Á Hellu

Ég var mætt í sund rétt upp úr klukkan átta í gærmorgun. Hitti fullt af fólki og það voru nokkrar kjaftatarnirnar hjá mér. Synti þó 400 metra, fór 4x 5 mínútur í kalda, 15 mínútur í gufu og sennilega annað eins í sjópottinn og endaði á smá sólbaði. Klukkan var að verða tíu þegar ég lagði af stað frá planinu við Laugardalslaug. Leiðin lá vestur í bæ í esperanto hitting. Stoppaði þar í einn og hálfan tíma. Fór heim með sunddótið, sótti þvott af snúrunni, pakkaði niður fyrir helgarferð út á land og rétt áður en ég var tilbúin að fara kom annar sonurinn fram. Setti honum fyrir smá verkefni sem hann átti að skipta milli sín og bróður síns. Ég var komin á Hellum um tvö og pabbi var alveg steinhissa á að ég kæmi aðra helgina í röð. Ruglaði aðeins reglunni hjá honum með því að taka út 2 flök af þorskhnökkum sem ég eldaði um kvöldið. Hann er annars allur að koma til. Aðeins farinn að geta setið við tölvuna stund og stund og notast aðeins við eina hækju á göngunni um húsið. Gleymir reyndar hækjunni alveg inn á milli. Frétti það líka í gær að pabbi besta vinar míns féll frá þann 7. sl. Svo er rétt að geta þess að hugsanlega verður einhver breyting á færslutímum á þessum vettvangi næstu vikuna, þ.e. ég mun ekki leggja eins ríka áherslu á að byrja dagana á því að blogga. Hvað ég mun gera í staðinn kemur í ljós eftir því sem dögunum og vikunni vindur fram. 

Laugardagur

Í fyrrakvöld var ég svo spennt yfir einni bók, Litla blóm eftir Margréti Hjálmtýsdóttur, að klukkan var að verða hálftólf þegar ég loksins slökkti á lampanum. Ég kláraði þó ekki bókina alveg en svaf í einum dúr til klukkan rúmlega sex. Var að vinna til klukkan að ganga þrjú og fór þá beint í Nauthólsvík og hoppaði í öldunum þar í um tuttugu mínútur. Næst lá leiðin í bókamarkaðinn við Fiskislóð og svo í Krónuna í Skeifunni en framkvæmdir við Krónubúðina sem ég fer oftast í. Klukkan var langt gengin í sex þegar ég kom heim. 

Föstudagur

Ég var mætt í vinnu um hálfátta. Fyrirliðinn var komin, búin að taka kerfin af og byrjuð að undirbúa bókhaldið. Ég dreif mig niður til að hlaða inn þeim tölum sem ekki kemur póstur um. Gleymdi gleraugunum og læsti mig þar að auki úti. Skipti um aðgangsorð í fyrradag. Var með það skráð en líklega skráði ég það ekki alveg rétt og svo gæti áslátturinn líka hafa klikkað. Alla vega ég fékk bara þrjár tilraunir áður en allt læstist. Fékk að fara inn á aðgangi fyrirliðans þar til kerfisfræðingurinn mætti í hús. Hann kom rétt fyrir níu og beint niður til okkar. Við vorum samt ekki búnar að hafa samband við hann heldur var að hugsa um allt aðra hluti á kortavélinni. Hann hefði getað opnað aðganginn minn aftur en þar sem ég var ekki viss um að hafa aðgangsorðið alveg rétt sá hann svo um að ég valdi mér nýtt aðgangsorð og komst á því. Fyrri framleiðslu lauk upp úr klukkan hálftíu. Engin endurnýjun svo við vorum uppi til klukkan að ganga tólf. Fyrirliðinn fór í innlegg en ég fór aðeins að sinna gjaldkeramálum fyrir húsfélagið mitt. Gengum frá kortadeildinni um tólf eftir að hafa framleitt hádegisskammtinn. Ég fékk svo að hreinsa gullið. Það voru 106 mis stórir bunkar og við vorum tvær við þetta verk. Ég stimplaði mig út stuttu fyrir þrjú og fór beint í sund. Hringdi í pabba á leiðinni yfir í Laugardalinn. Hann lét vel af sér en er alltaf mjög verkjaður fyrst á morgnana. Í sundi synti ég 500 metra, flesta á bakinu, fór 4x6 mínútur í kalda, eina ferð í magnesíum pottinn, eina í gufuna og eina í sjópottinn. Þvoði mér svo um hárið áður en ég fór heim. 

Styttist í helgi

Nú brá svo við að ég svaf til klukkan að ganga sjö í gærmorgun. Vaknaði þó fimmtán mínútum áður en vekjaraklukkan átti að ýta við mér. Var mætt í vinnuna um hálfátta, rétt á undan fyrirliðanum. Ég byrjaði á því að taka kerfin af hvelfingu og kortadeild og fór svo niður til að hlaða inn þeim framleiðslutölum sem við fáum ekki póst um. Þurfti að byrja á því að skipta um aðgangsorð á vélinni. Ég var nefnilega á ítroðsluendanum í gær. Framleiðslan gekk ágætlega og við kláruðum endurýjunina milli tíu og ellefu. Allri framleiðslu var lokið rétt fyrir tólf svo við gengum frá kortadeildinni og vorum í innleggjunum eftir hádegi. Ég fékk líka að "hreinsa gullið". Verkefnum mínum í vinnunni lauk um þrjú. Þá fór ég beinustu leið í Nauthólsvík, hringdi í pabba á leiðinni þangað. Sjórinn enn í tveggja stafa tölu en kominn niður fyrir 12. Fjara, smá ferð á logninu, öldugangur og gaman að hoppa í þeim. Var um korter í sjónum og eitthvað svipað í heita pottinum á eftir.

Aftur tvær í kortadeild í bili

Var komin á stjá stuttu fyrir klukkan sex í gærmorgun. Morgunrútínan var svipuð og oftast á virkum vinnudögum. Mætti í vinnu um hálfátta. Tók saman fyrstu framleiðslutölur þar sem fyrrum fyrirliði átti að mæta á einum öðrum stað áður en  hún mætti til vinnu. Fór svo niður með tölurnar og hitti fyriliðann en hana vantaði aðstoð við að komast inn í hvelfingu svo hún gæti sent frá sér nokkur testkort strax um morguninn. Þegar fyrrum fyrirliði mætti á svæðið og með allar aðrar tölur og talningablöð vorum við nýbúnar að framleiða allt visa. Eftir kaffi héldum við áfram með endurnýjun og áttum aðeins eftir um 420 óframleidd kort þegar hádegisskammturinn kom yfir á vélina. Ákváðum að ganga frá þegar allt daglegt var búið og vorum í innleggjum eftir hádegi. Var búin í vinnu fyrir klukkan hálffjögur og fór beinustu leið í sund. Kláraði að synda 400m og átti aðeins eftir 100 metra þegar kaldapotts vinkonan mætti á svæðið. Hinni hana í þeim kalda í hennar annari ferð. Saman fórum við fimm ferðir í þann kalda. Var komin heim um hálfsex. Hellti mér þá upp á einn bolla af kaffi.

Eitt og annað og aðeins meira af pabba

Mér fannst sem ég hefði alveg átt að geta sofið aðeins lengur í gærmorgun en ég var vöknuð milli klukkan fimm og hálfsex. Vissi samt að ég myndi ekki sofna aftur svo ég dreif mig bara á fætur. Það kom svo í ljós að ég þurfti alveg á öllum þessum tíma að halda, m.a. til að setja inn bloggfærsluna. Strax og ég lagði svo af stað í vinnuna hringdi ég í pabba til að heyra í honum hljóðið. Hann var smá verkjaður en þó þokkalegur og samkvæmt honum ætlaði hann að ná í Jónu Mæju og leyfa henni að koma með sér í bæjar-rannsóknarstússið seinna um morguninn. Hann var líka viss um að hann yrði örugglega ekki með neinar heilsufarsfréttir samdægurs. Ég hugsaði eitthvað á þá leið að líklega væri best að leyfa honum að ráða þessu alveg.

Nóg var að gera í vinnunni á öllum vígstöðvum og vorum við fengnar til að loka kortadeildinni eftir hádegi og hjálpa til við innleggin uppi. Það komu tvær kortaendurnýjanir í gær en þær voru ekki mjög stórar og þar að auki eigum við að hafa hátt í þrjár vikur til þess að vinna þær. Önnur endurnýjunin var þó kláruð fyrir hádegi, rúmlega fimmhundruð kort, ásamt daglegri framleiðslu sem var í heildina um og yfir fjögurhundruð. Klukkan var byrjuð að ganga fimm þegar ég stimplaði mig út og fór í sund. Synti aðeins 200 metra og var búin að fara 2 x 5 mínútur í kalda, eina ferð í gufu og eina ferð í þann heitasta þegar kalda potts vinkona mín mætti á svæðið. Saman fórum við þrisvar sinnum þrjár í kalda, tvær í heitasta og eina í gufuna. Ég var komin heim upp úr klukkan sex.

Stuttu fyrir klukkan níu hringdi ég í Jónu Mæju til að heyra allt um það hvernig bæjarferðin með pabba hafði gengið. Hann hafði keyrt sig á Selfoss til hennar og vildi helst að hún keyrði hann á hans bíl. Hún gat þó sannfært hann um að best væri að hún færi á bíl sem hún væri vön að keyra. Hún hleypti honum út við Domus Medica en meðan hún var að leggja bílnum fór pabbi inn og sagðist vera að koma í blóðskimun. Honum var sagt að slíkt færi ekki fram þarna og hann fékk ekki einu sinni að gefa upp kennitöluna sína heldur var sagt að hann ætti að fara að stað í Ármúlanum. Jóna Mæja keyrði hann þangað. En þar kom í ljós að auðvitað átti pabbi að mæta í Dómus í ómskoðun. Það kom alla vega í ljós í ómskoðuninni að það fannst enginn blóðtappi og það var léttir. Þegar þau voru komin aftur á Selfoss kvaddi pabbi Jónu Mæju og þakkaði henni fyrir snúningana með sig. Hann keyrði sig hins vegar sjálfur á bráðamóttöku HSU til að láta vita að ekkert hefði komið út úr ómskoðuninni. Ákveðið var að setja hann í myndatöku en tækið var bilað og hann þurfti að bíða í rúma tvo tíma. Í stað þess að fara aftur Jónu Mæju og fá að leggja sig þar, lagði hann sig í bílnum sínum. Þetta vissi hún því hún hafði hringt í hann eftir að hann var komin heim til sín eftir þessa ævintýralegu bæjarferð.

Annars er mjög gaman út í Gdansk hjá Bríeti systurdóttur minni. Hún er að fara að keppa þar í kjötiðn á morgun. Hún er í herbergi með háriðnaðarnema sem er búin að lita og dedúa við hárið á henni og þær eru duglegar að snappa um allt mögulegt sem tengist staðnum, þeim og tilvonandi keppni.

Pabbi og hægri fóturinn hans

 Hann pabbi minn er svo mikill nagli og einnig æðrulaus. Hans mottó er í hnotskurn að það séu engin vandamál, bara lausnir og svo lætur hann hverjum degi nægja sína þjáningu. Á föstudaginn tóku sig upp verkir í hægri fætinum hans sem hann taldi vera vegna þess að um daginn bögglaðist fóturinn undir honum þegar hann fór í rennibrautina í sundlauginni. Í fyrstu fann hann ekki fyrir neinu en það átti eftir að breytast þannig að hann tók sér nokkurra daga frí úr sundi og setti teygjuhólka utan um hnén. Já, bæði hnén þótt hann væri verri í því hægra þá fann hann klárlega mun á sér að vera með svona stuðning á báðum hnjám. Á fimmtudaginn skrapp hann í langan bíltúr alla leið austur á Kirkjubæjarklaustur. Hann fann ekki fyrir neinu og var mjög ánægður með sig. Dreif sig því í sund á föstudagsmorgninum en sleppti því að fara í rennibrautina. Þegar fór að líða á daginn versnuðu verkirnir í hægra fætinum. Honum leið best í rúminu og einnig stólnum hans í stofunni ef hann hafði sæmilega hátt undir fótunum. Þegar ég kom með dótið mitt um hálftólf á laugardaginn þurfti ég að nota lykil til að komast inn og hann var rétt kominn í dyrnar á sínu herbergi þegar ég var búin að setja töskuna inn í "mitt" herbergi og komin á ganginn til hans. Hann vildi samt sjá til yfir helgina og það var ekkert sem ég gat gert fyrir hann. Svo ég fór í gleðskapinn með árganginum mínum og skemmti mér vel næstu tíu tímana. Pabbi var að enda við að hlusta á fréttirnar klukkan tíu þegar ég kom heim. Það var ljós hjá honum svo ég kíkti á hann. Hann sagðist vera slæmur en ætlaði að sjá til fram yfir helgi og ég mátti ekki einu sinni færa honum vatnsglas. En hann hafði gaman af viðburðasögu dagsins. Ég fór inn í rúm að lesa og að sofa um miðnætti aðfaranótt sunnudags. Rumskaði um þrjú og þurfti á salernið. Gat ekki sofnað strax aftur en svo var klukkan farin að ganga tíu á sunnudagsmorguninn þegar ég fór á fætur. Pabbi sagðist vera skárri en enn var ekkert sem ég gat eða mátti gera fyrir hann nema hugsa fyrir mat og ég mátti ráða hvenær það yrði. Hann klæddi sig og staulaðist á tveimur hækjum inn í stofustólinn sinn. Hann fékk mig til að fara með ryksuguróbótinn inn á eldhúsborð en kom þangað sjálfur fljótlega til að hreinsa hann og setja hann af stað. Held að fljótlega eftir það hafi verkirnir í fætinum farið að versna. Ég sagði við pabba að ég vildi ekki taka af honum ráðin en spurði hvort það væri nokkuð skynsamlegt að bíða fram yfir helgi með að láta líta á þetta. Ég setti upp saltfisk, kartöflur og rófubita um hálftólf, allt í sama pottinn. Um tólf hringdi pabbi sjálfur á læknavaktina og þegar hann var búin að lýsa verkjum og líðan var ákveðið að senda til hans sjúkrabíl. Við vorum búin að borða og ég að vaska upp þegar bíllinn og tveir sjúkraliðar kom um eitt. Þau afsökuðu sig hversu lengi þau voru á leiðinni. Pabbi var skoðaður vel og spurður út í eitt og annað. Sú sem var í forsvari ákvað að hringja í lækni og í framhaldinu var ákveðið að pabbi yrði fluttur á bráðamóttökuna á Selfoss. Hann fór á inniskónum, með gemsann og hækjurnar. Þetta var um hálftvö í gær. Róbótinn var ekki búinn að ryksuga og ég vildi heldur ekki fara fyrr en ég fengi fréttir af pabba. Hann hringdi um hálffimm. Vissi ekkert enn þá en bað mig um að koma til sín þvagleggjum. Lét hann vita áð ég var þá búin að láta systur mína og mág vita, svara hringingu frá nágrannanum og hringja í Jónu Mæju, konu Reynis frænda. Hún var strax boðin og búin til að koma til aðstoðar. Vildi helst stökkva strax af stað til að leita pabba uppi eða að minnsta kosti athuga hvort hún mætti fá að hitta hann. Ég hafði sagt að það væri betra að bíða frétta. Hringdi aftur þegar ég var búin að ganga frá, slökkva á öllu og pakka mínu dóti. Spurði hvort ég mætti koma á hana þvagleggjunum. Sagði henni að pabbi væri samþykkur því að þau Reynir kæmu til hans og ef hann fengi að fara heim að þau myndu skutla honum. Þegar ég kom í Löngumýrina þáði ég smá kaffi, knús og spjall áður en ég kvaddi aftur. Skrapp svo aðeins í Fossheiðina þar sem ég hitti tvíburahálfsystur mína hjá foreldrum sínum og þau nýbúin að borða dýrindis kjötsúpu. Ég stóðst ekki mátið og þáði smá súpu og spjall. Stuttu seinna hringdi Jóna Mæja. Pabbi hafði hringt og mátti fara heim í nótt en var með beiðni um að mæta í Domus Medica í dag. Held að hann hafi helst vilja fá að keyra sig þangað sjálfur en þegar Jóna og Reynir voru búin að skutlast með hann heim og þyggja kaffi og pönnsur voru þau búin að tala hann inn á að Jóna mætti sækja hann og snúast með hann.

Hittingur í útskriftarárgangi 1984 úr Helluskóla

Hafði stillt vekjaraklukkuna á hálfsjö en var auðvitað vöknuð klukkan sex. Dreif mig á fætur og var búin að blogga, vafra aðeins á netinu og byrjuð að pakka þegar N1 sonurinn kom fram rétt fyrir klukkan sjö. Hann skutlaði mér vestur í bæ áður en hann fór á vakt upp á Gagnveg. Ég var rétt lögð af stað á mínum bíl, í áttina heim, þegar kom merki í mælaborðið um að athuga með þrýstinginn á dekkjunum. Ég kom því við á planinu við ÓB í Öskjuhlíðinni og notaði loftið þar til að stilla öll dekk á "32. Eitt dekkið var komið niður í "21 hin voru milli "27-"30. Næst lá leiðin á AO við Sprengisand þar sem ég fyllti á tankinn. Svo fór ég heim og kláraði að pakka áður en ég dreif mig í sund. Synti 400 metra, þar af rétt um 100 metra skriðsund. Fór 3x5 mínútur í kalda, eina ferð í sjópottinn og eina ferð í gufuna áður en ég fór í kalda sturtu, upp úr og heim. Hellti upp á sterkt kaffi og fékk mér smá hressingu áður en ég dreif mig austur á Hellu. Var komin þangað um hálftólf og byrjaði á því að fara með hluta af dótinu á Hólavanginn og taka með mér hvítvínsbeljuna mína ef ég skyldi ákveða að fá mér í litlu tána síðar um daginn. Var komin á planið við Hellana við Ægisíðu um tólf. Þar söfnuðumst við saman 17 af 19 (2 af 19 komu seinna um daginn og 2 af 21 höfðu boðað afföll). Hópur af erlendum ferðamönnum voru að fara í Hellaskoðun með öðrum leiðsögumanni. Sá hópur byrjaði í Hellunum við þjóðveginn en Baldur bekkjarbróðir leiðsagði okkur og fór með okkur fyrst í einn hellinn hinum megin við túnið og bæinn þar sem hann ólst upp. Tvær úr hópnum höfðu aldrei komið þarna áður. Baldur var með mjög góða leiðsögn og kunni fullt af sögum og þarna er að eiga sér mjög merkileg uppbygging og kannski fáum við einhvern tímann að vita nákvæmari aldursgreiningu á þessum hellum. Eftir Hellaferðina sameinuðumst við í 4-5 bíla og fyrst ætluðum við að heimsækja grunnskólann. Þar eru miklar framkvæmdir í gangi og þegar við vorum nýkomin út á planið og búin að skoða innganginn sem við notuðum í 7-11 ára bekk kom hellidema og ákveðið var að drífa sig bara aftur í bílana og fara í bakaríið. Þar áttum við að hitta einn úr bæjarstjórninni um tvö. Vorum komin amk tuttugu mínútum of snemma en mörg okkar notuðu tækifærið og fengu sér kaffi. Þarna hitti ég eina úr KÓSÍ-kórnum, þá sem var formaður amk síðustu tíu árinn sem hann var starfræktur. Hún var á leið í heimsókn til frænda síns um tvö. Eftir að við höfðum fengið kynningu um uppbyggingu og ýmisleg sveitastjórnarmál skruppum við að svokölluðum kúlum sem tengdasonur Baldurs er að byggja upp og á að vera fyrir ferðamenn sem m.a. vilja upplifa og sjá Norðurljós. Svo fórum við aftur í afgreiðsluna við Hellana og þar bauðst okkur að smakka bjór úr héraðinu og saltkringlur með. Ég þáði bita af kringlu og bláan kristal í dós. Þarna bættist líka átjánda manneskjan í hópinn og ég hringdi myndsímtal til Ellu og gekk á röðina svo mannskapurinn og hún gætu heilsast eða amk séð hvort annað. Næst lá leiðin að Heiðarbóli sem er í landi Heiðarbrúnar fyrir vestan á. Þar er ein bekkjarsystirin og maðurinn hennar búin að byggja sér sumarhús á góðum stað með frábært útsýni. Settar voru upp nýteknar kartöflur úr Þykkvabænum og þegar þær voru að verða tilbúnar voru valdir tveir grillmeistarar úr hópnum, held að það hafi samt farið amk fimm út. Sá 19. bættist í hópinn um það leyti sem verið var að bjóða fólki að gjöra svo vel að fá sér. Einn úr hópnum tók að sér að stjórna því hverjir byrjuðu en þetta gekk fljótt og vel fyrir sig og var maturinn og meðlætið mjög gott. Þarna var ég búin að ákveða að láta vínið alveg vera. Það voru fleiri árgangar að hittast og við áttum frátekið borð á Stracta frá klukkan níu en þangað fóru fæstir. Veit þó að amk þrír af strákunum áttu pantað gistinu svo kannski hittu þeir einhverja úr hinum árgöngunum. Ég kvaddi stuttu fyrir tíu og þá voru húsráðendur og átta manns eftir. Þetta var semsagt mjög skemmtilegur hittingur og strax farið að tala um hitting á næsta ári aftur en þá verða 40 ár síðan við útskrifuðumst úr grunnskóla.

Úfinn sjór í gær

Var mætt í vinnuna um hálfátta. Var aftur á ítroðsluendanum. Fyrirliggjandi framleiðslu lauk um hálftíu. Síðasti skammturinn skilaði sér á vélina á tólfta tímanum og þá fyrst fórum við niður aftur. Vorum búnar að ganga frá deildinni um tólf og það sem var að fara í útibú og póst komst vel fyrir í einum póstkassa. Eftir hádegi var ég að hjálpa til uppi með því að fara yfir sum innleggin. Það hef ég ekki gert síðan fyrir sumarfrí en gekk ágætlega. Hætti vinnu rétt fyrir þrjú en þá var allt að verða búið. Fór beinustu leið í Nauthólsvík. Það var fjara, sjórinn rúmar tólf gráður, öldugangur og smá hraðferð á logninu. Ég lét mér nægja að leika mér í öldunum í um það bil korter, synti sama og ekkert en hoppaði um smá svæði og sveiflaði handleggjunum. Var komin heim um hálffimm og stoppaði þar aðeins í rúman klukkutíma áður en ég fór vestur í bæ í hitting með Viðeyjargenginu. Fór á bílnum því ég ætlaði mér ekki að fá mér í litlu tána. En ég breytti þeim áætlunum þegar ég var mætt á svæðið og hafði fengið jákvætt svar frá N1 syninum um að sækja mig og skutla mér svo eftir bílnum áður en hann færi á laugardagsvaktina. Sú elsta í hópnum bauð upp á kjúklingasúpu, sallat og ostaköku í eftirrétt. Með þessu drukkum við vatn og hvítt eða rautt. Ég hafði verið seinust á svæðið en var sótt fyrst en klukkan var þá um átta og ég búin að eiga gott spjall við vinkonurnar í um tvo tíma. Horfði á einn og hálfan þátt áður en ég fór inn í rúm að lesa. 

September hefur göngu sína

Vaknaði helst til snemma í gærmorgun en þegar ég gafst upp á að reyna að kúra mig niður aftur  var klukkan rétt byrjuð að ganga sex. Fór á fætur, sinnti morgunverkunum á baðherberginu og settist svo inn í stofu með fartölvuna í fanginu. Tveir tímar voru ekki lengi að líða. Mætti í vinnu um hálfátta. Ég var á ítroðsluendanum og fyrrum fyrirliði í bókhaldinu og á móttökuendanum. Rétt fyrir níu kom framkvæmdastjórinn niður til að ná í okkur. Hann var rétt áður búinn að tilkynna á TEAMS að kaffið yrði í fyrra fallinu en við vorum að ljúka við að telja fyrri vagninn eftir visa framleiðslu dagsins svo við vorum ekki búnar að sjá skilaboðin. Tilefni þessa kaffitíma var að kveðja einn starfsmann SKM sem var að vinna sinn síðasta vinnudag, byrjaði í Landsbankanum í Grindavík fyrir um 40 árum síðan. Það var boðið upp á þrjár brauðtertur, gos og gotterí. Annars var vinnudagurinn frekar rólegur. Daglegri kortaframleiðslu lauk rétt fyrir tólf. Eftir hádegi fór ég í verkefni sem kallast að "hreinsa gullið". Það voru 156 bunkar sem þurfti að hreinsa ég var búin með meiri helminginn þegar ég fékk aðstoð en ég hreinsaði amk rúmlega hundrað bunka á rúmum klukkutíma. Allt var búið fyrir klukkan þrjú. Var komin í Laugardalslaugina rétt rúmlega þrjú. Byrjaði á því að sitja sex mínútur í kalda pottinum áður en ég fór á braut átta. Var á ferð númer tvö þegar ég sá kalda potts vinkonu mína mæta svo ég synti ekki fleiri ferðir en fór fimm ferðir með vinkonunni í kalda, tvær í heitasta, tvær í magnesíum pottinn, eina í gufu og eina í sjópottinn. Kom heim á sjötta tímanum. 

Stutt í nýjan mánuð og helgina

Var komin á fætur um sex leytið í gærmorgun. Eftir morgunverkin á baðherberginu settist ég inn í stofu með fartölvuna í fanginu og byrjaði á því að setja inn færslu dagsins. Var mætt í vinnu um hálfátta. Sá um bókhaldið og móttökuendann annan daginn í röð. Vorum búnar með daglega framleiðslu og lagertalningu um tólf. Engin ný endurnýjun lá fyrir svo við gengum frá deildinni áður en við fórum upp í mat. Hætti vinnu um þrjú og fór í sund, beint á brautir 7 og 8 í Laugardalslaug og synti í uþb tuttugu mínútur. Flestar ferðirnar á bakinu. Fór 2x6 mínútur í kalda, 10 mínútur í sjópottin og korter í gufu áður en ég fór upp úr. Þvoði mér um hárið. Labbaði einn hring um bygginguna áður en ég settist upp í bíl og fór heim. 

Ágúst á endasprettinum

Vaknaði um sex leytið í gærmorgun. N1 sonurinn kom fram tæpum klukkutíma síðar en var farinn út úr húsi á sína vakt tíu mínútum á undan mér. Ég var mætt í mína vinnu rétt fyrir hálfátta. Tók kerfin af kortaherberginu og hvelfingunni niðri en vatt mér svo beint í að taka saman þær framleiðslutölur sem við fáum póst um. Fyrrum fyrirliði mætti stuttu á eftir mér og hún fór beint niður til að kveikja á kortavélinni og senda, í gegnum TEAMS, þær tölur sem ekki koma með pósti. Svo fylltum við á vatnsflöskurnar og fengum okkur kaffi. Fórum niður að framleiða rétt rúmlega átta. Ég var á móttökuendanum og tók til plastið sem nota átti. Kláruðum visa og debet um hálftíu. Eftir kaffi fórum við beinustu leið niður aftur og unnum að endurnýjun sem barst okkur í fyrradag, tæp áttahundruð kort. Kláruðum helminginn sem og hádegisframleiðsluna rétt fyrir tólf og hinn helminginn  milli eitt og tvö. Þegar við vorum búnar að ganga frá niðri fórum við upp og í verkefni sem kallast að hreinsa gullið. Stimplaði mig út rétt fyrir klukkan hálffjögur. Komst ekki stystu leið í sundið en var komin ofan í kalda pottinn rétt fyrir fjögur og var í sjópottinum þegar kaldapotts vinkona mín mætti á svæðið. Saman fórum við fjórar ferðir í kalda, þrjár í heitasta og eina í gufuna. Ég fór upp úr um fimm og kom við á bókasafninu og Heilsuhúsinu á leiðinni heim. Skilaði þremur bókum en tók fjórar í staðinn svo nú er ég með átta bækur af safninu hér heima.

Sennilega síðasta mánudagssjósundið á þessu ári

Vaknaði amk hálftíma áður en klukkan átti að ýta við mér. Dreif mig á fætur og hafði góða klukkustund í netvafr eftir morgunverkin á baðherberginu. Mætti í vinnuna um hálfátta. Byrjaði á því að taka kerfin af á neðri hæðinni og fór svo niður til að kveikja á vélinni og hlaða inn fyrstu skrám til að fá þær tölur sem við fáum aldrei póst um. Svo fór ég í kaffistofuna, fyllti á vatnsbrúsann, fékk mér kaffi, spjallaði við vinnufélagana og prjónaði eina til tvær umferðir af nýjasta eldhúshandklæðinu. Einn vinnufélaginn átti afmæli í gær, varð 66. Hann mætir alltaf á hjóli og það var engin undantekning á því í gær. Samt kom hann við í bakaríi til að kaupa með afmæliskaffinu. Var í vinnu til klukkan rúmlega hálffjögur. Þá dreif ég mig í Nauthólsvíkina og var um 40 mínútur að synda/svamla út að kaðli og til baka. Kom heim um hálfsex. 

Ný vinnuvika framundan

Klukkan var langt gengin í níu þegar ég fór á fætur í gærmorgun og byrjuð að ganga tíu þegar ég var komin í sund. Fór beinustu leið á brautir 7 og 8 og synti 400m, þar af ca 80m skriðsund. Fór fjórum sinnum í kalda, tvisvar í gufu, einu sinni í þann heitasta og í ca tuttugu mínútur í sjópottinn. Sat svo um stund í sólbaði. Kom aðeins við í Krónunni í Skeifunni en var komin heim um tólf. Hellti mér upp á kaffi og fékk mér hressingu. Davíð Steinn færði mér líka smakk af búst-drykknum sem hann bjó til handa sér. Upp úr klukkan hálftvö labbaði ég út á Valsvöll. Klukkan tvö hófst leikur í Bestudeild kvenna milli Vals og Keflavíkur. Þetta var síðasta umferðin áður en skipt verður í efri og neðri. Það var ekki alveg að sjá í fyrri hálf leik að Valsstelpurnar eru á toppnum og þær úr Keflavík á botninum. Staðan var 1:1 í hálfleik. Seinni hálfleikurinn vannst svo 3:0 þannig að úrslitin urðu 4:1. Labbaði örlítið lengri leið heim en síminn skráði á mig göngu upp á 17 mínútur. Horfði á seinni hálfleikinn í leik Newcastle og Liverpool. Staðan þar var 1:0 í hálfleik og púllarar einum manni færri frá 28 mínútu. Darwin Nunies kom inn á sem varamaður á 75. mínútu og skoraði 2 mörk fyrir Liverpool svo "mínir menn" unnu leikinn.

Sunnudagur

Heyrði í N1 syninum fara af stað á aukavakt um sjö í gærmorgun. Sjálf fór ég á fætur klukkutíma síðar og beint í sund. Synti 300m og fór nokkrar ferðir í kalda pottinn. Var komin upp úr rétt fyrir klukkan tíu og korteri síðar var ég komin til norsku esperanto vinkonu minnar. Var með esperanto dótið með mér en einhvern veginn fór allur tíminn í spjall og meira spjall. Stoppaði hjá henni til klukkan að verða tólf. Þá fór ég beinustu leið heim og ekkert meira út þann daginn.

Laugardagur

Ég var mætt til vinnu um hálfátta í gærmorgun. Undirbjó fyrstu tölur og mig undir að vera í bókhaldi. Þegar fyrirliði og fyrrum fyrirliði sendu mér fleiri tölur útbjó ég næstu tölur og einnig talningablöð. Fór með þessar tölur niður um hálfníu. Þá var hægt að byrja á föstudagstalningu á fyrri skápnum. Debetið var framleitt, pakkað og talið um það leyti sem var kominn tími á morgunkaffi. Næstu tölur komu ekki fyrr en um ellefu. Engin gjafakort og búið var að framleiða, pakka, telja og ganga frá deildinni fyrir klukkan tólf. Ég sá um að útbúa póstmiða eftir hádegi en var annars bara eitthvað að dúlla mér þar til klukkan var byrjuð að ganga þrjú. Um það leyti var allt að verða búið upp líka og flestir að fara eða farnir í helgarfrí. Fyrirliðinn ætlar að taka næstu viku sem sumarfrí. Ég var mætt í Nauthólsvík rétt fyrir þrjú. Sjórinn meira en fjórtán gráður. Synti út að kaðli og til baka og sat svo dágóða stund í heita pottinum. Nokkuð margt var um manninn enda gott veður en það var þó enginn troðningur samt.

Enginn titill

Ég svaf frekar lítið og skringilega í fyrri nótt og var komin á fætur áður en klukkan varð sex í gærmorgun. Mætti í vinnuna um hálfátta en stimplaði mig ekki inn fyrr en um ellefu. Setti athugasemd við innstimplunina um hvenær ég mætti til vinnu. Annars var ég á móttökuendanum. Við fyrirliðinn vorum búnar að afgreiða það sem lá fyrir í framleiðslunni um það leyti sem kominn var tími til að fara í kaffi um hálftíu. Næsti skammtur kom ekki fyrr en á tólfta tímanum svo við vorum uppi í öðrum verkefnum fram að því. Reyndar var næsta verkefni tvíþætt og annar hlutinn skilaði sér ekki fyrr en um tólf leytið svo við geymdum þann part fram yfir mat. Engu að síður vorum við búnar að ganga frá kortadeildinni fyrir klukkan hálftvö. Ég stimplaði mig út stuttu fyrir klukkan þrjú og fór beint í sund. Það var búið að loka brautum 7 og 8 þar sem verið var að stilla upp risa skjá á bakkanum við þær brautir. Ég sleppti því sundinu en fór nokkrar ferðir í kalda með kalda potts vinkonu minni. Var komin heim um fimm leytið.

Sumarleyfi lokið - á þó enn inni um sex daga

Heyrði í N1 syninum taka sig til og fara í vinnu um sjö leytið. Ég fór á fætur fljótlega eftir það. Gleymdi mér aðeins í netvafrinu en var komin í Laugardalslaugina um níu leytið. Það tók mig um hálftíma að hafa mig í að synda. Þá var ég samt bara búin með eina ferð í kalda pottinn en ég sat í sjópottinum í rúmar tuttugu mínútur. Þá skildi ég skóna eftir við þann kalda og fór á braut 2. Synti 500 metra, flesta á bakinu, á tæpum tuttuguogfimm mínútum. Eftir sundsprettinn fór ég tvær ferðir í þann kalda og gufubað. Þvoði mér um hárið og var komin heim um hálftólf. Hellti mér upp á kaffi og fékk mér hressingu. Stakk líka handklæðum í þvott. Dundaði mér við eitt og annað fram á miðjan dag en korter fyrir fjögur lagði ég af stað gangandi vestur í bæ til norsku esperanto vinkonu minnar. Meiningin var að skipta göngunni í tvo hluta en ég labbaði þessa fjóra kílómetra á fimmtíu mínútum. Ég var mætt í fyrra fallinu en Inger var búin að bjóða okkur Viðeyjargenginu í smá hitting og veislu. Hinar tvær mættu fljótlega. Það hafði staðið til að njóta þessara veitinga úti á svölum en þar sem sólin var ekki alveg eins glaðbeitt og undanfarið og þar að auki verið að vinna við bygginguna hinum megin við götuna hurfum við frá þeirri hugmynd. Hittingurinn tókst samt mjög vel. Það er stór spurning hvenær við fjórar hittumst saman næst því sú næst elsta í hópnum er nýlega hætt að vinna og er búin að festa sér leigu á íbúð á Spáni og mun leigja út sína íbúð hér heima í staðinn. Hún er að fara út um miðjan næsta mánuð. Esperanto vinkonu mína hitti ég þó strax aftur n.k. laugardagsmorgun. N1 sonurinn kom um átta, beint af vakt, og sótti mig svo ég slapp við að labba heim eða punga út fyrir leigubíl.

Veðurblíða

Man ekki alveg hvenær ég vaknaði í gærmorgun en ég var kannski ekkert svo mikið að spá í klukkunni í gær. Var amk búin að vafra um á netinu í einhvern tíma og setja inn færslu á þessum vettvangi áður en kominn var tími til að fá sér eitthvað að borða. Fékk mér sviðasultu stuttu fyrir klukkan ellefu og dreif mig svo í Nauthólsvík. Það var flóð en fínasta veður. Synti aðeins lengra heldur en út að kaðli og til baka. Sjórinn var rúmar þrettán gráður og ég var ofan í honum í næstum þrjú korter. Stoppaði ekkert svo lengi í heita pottinum á eftir, líklega bara tæpt korter. Þegar ég kom heim aftur var Davíð Steinn kominn á stjá. Ég fékk að taka af súpunni hans og hita mér. Virkilega góð súpa hjá syninum. Veðrið varð bara betra og betra og ég ákvað að skella mér í sund einhvern tímann upp úr klukkan tvö. Synti ekki neitt þar en fór all mörgum sinnum í kalda pottinn, þar af amk fimm ferðir með kalda potts vinkonu minni sem mætti þegar ég var í minni annarri ferð. Hún gaf sér góðan tíma en var samt farin upp úr á undan mér. Ég var í rúma þrjá tíma í sundi. Áður en ég fór heim lagði ég bílnum fyrst við Perluna og fór í hálftíma göngutúr. Var svo að glápa á nokkra þætti í gærkvöldi áður en ég fór upp í rúm um tíu. Las í um klukkutíma.

Næst síðasti sumarfrísdagurinn

Dreif mig á fætur um sjö leytið í gærmorgun þrátt fyrir gloppóttan svefn um nóttina. Pabbi var farinn í sund. Ég kveikti á tölvunni hans og var búin með netrúntinn og bloggið þegar hann kom úr sundi stuttu fyrir klukkan hálfníu. Hann var reyndar óvenju snemma á ferðinni því hann átti von á þeirri sem kemur og þrífur hjá honum hálfsmánaðarlega og hann vildi vera tilbúinn með kaffið. Þegar til kom mætti skúran ekki svo við pabbi áttum nóg kaffi fyrir okkur. Ég drakk amk þrjá bolla. Um hálftólf bauð hann mér með sér í Kanslarann. Hittum hluta af sundfélögum hans þar. Þegar við komum heim aftur settist ég inn í stofu með bók eftir Jill Mansell sem ég byrjaði að lesa kvöldið áður. Kláraði hana á tveimur tímum. Um þrjú leytið fékk ég mér kaffi með pabba en tók svo dótið mitt saman, kvaddi og lagði af stað heim á leið. Kom við í Löngumýrinni á Selfossi og hitti konu frænda míns þar fyrir. Áttum gott spjall yfir góðu kaffi. Fór heim um Þrengsli og fékk stæði fyrir utan hérna heima rétt fyrir klukkan sjö. Náði að koma mér og dótinu inn áður en kvöldfréttir hófust í sjónvarpinu. Strákarnir voru báðir heima en að spila á fullu lokaðir inni í herbergjunum sínum svo ég veit ekkert hvort þeir urðu varir við mig.

Heitt á Hellu

Þegar ég kom fram um níu í gærmorgun var pabbi þegar kominn á fætur fyrir einhverju síðan. Hann sat inn í stofu í stólnum sínum. Hann kveikti á sjónvarpinu stuttu síðar og við vorum eitthvað að fylgjast með útsendingu frá HM í frjálsum alveg þar til klukkan varð tíu en þá skiptum við yfir á úrslitaleikinn á HM kvenna í fótbolta. Sá leikur var mjög góður, endaði 1:0 fyrir Spáni á móti Englendingum. Um hádegið kláruðum við pabbi það sem eftir var af þorskhnökkunum sem ég steikti á laugardaginn. Um tvö leytið lét ég loksins verða af því að skreppa út á elliheimili til að heimsækja föðursystur mína. Hún er búin að vera þarna í um tvö ár en þetta var fyrsta heimsóknin. Stoppaði eitthvað í korter til tuttugu mínútur. Hefði stoppað lengur ef frænka mín hefði verið vakandi en ég kunni ekki við að vekja hana. Tók þess í stað stuttan göngutúr og settist svo út á pall hjá pabba. Systurdóttir mín og kærasti hennar kvöddu um fimm leytið. Þau fóru í bæinn, skólarnir byrjaðir, eru búin að fá lánað húsnæði í nokkrar vikur eða þar til þau fá inni á stúdentagörðum. Bjarki er að fara í iðnskóla að halda áfram með rafvirkjann og Bríet í MK. Til 3. september n.k. verður hún að æfa sig undir iðnaðarkeppnina í Póllandi en þegar þeirri ferð verður lokið hellir hún sér út í bóklegu greinarnar. Hún mun einnig vera að vinna í kjötiðninni með náminu svo hún verður eitthvað með annan fótinn hérna hjá afa sínum. Davíð Steinn á að fara í ristilspeglun en það á að skoða ristilinn betur innan frá. Hann var greindur með ristilpokabólgu og verður að passa upp á mataræðið. Hann var búinn að elda sér fullan pott af dýrindis grænmetissúpu þegar ég heyrði í honum.

Bíltúr með pabba

Ég var vöknuð fyrir klukkan sjö í gærmorgun og dreif mig fljótlega á fætur. Var því alveg tilbúin þegar bronsleikurinn milli Svía og Ástrala á HM kvenna í knattspyrnu hófst. Pabbi var líka kominn fram og horfði með mér. Sjónvarpið eða sambandi fraus stuttu áður en fyrra markið kom og við misstum af því en sáum síðustu tíu mínútur fyrri hálfleiks og allan seinni. Tvö núll fyrir Svíana. Svo skipti ég yfir á HM í frjálsum. Milli eitt og tvö setti ég upp nokkrar kartöflur og steikti þorskhnakka. Bauð unga parinu að borða með okkur pabba en þau þáðu frekar að mega fá sér af þessum rétti um kvöldið. Fljótlega eftir matinn settist ég út á pall með prjóna, krossgátublað og bók. Heyrði harmonikkutóna berast frá aðal töðugjalda skemmtisvæðinu. Um fjögur kom pabbi út og spurði hvort ég vildi koma í bíltúr á nýja bílnum hans. Ég þáði það. Létum Bríet og Bjarka vita að við værum að skreppa, ég sótti veskið og peysur og setti í aftursætið. Leiðin lá eitthvað austur á bóginn. Fórum alla leið að Gamla Fjósinu. Ég bauð pabba upp á kaffi og köku dagsins. Þar sem kaka dagsins var súkkulaðikaka valdi ég frekar döðluköku. Skammtarnir voru stórir og ég gat ekki klárað minn skammt. Austar var mikið mistur svo við ákváðum að snúa við en keyra samt á sveitavegunum. Komum til baka um hálfsjö. Pabbi bauð upp á ís eftir kvöldfréttir og svo fékk ég mér úr hvítvínskassanum. Seint um kvöldið ákvað ég að fara aðeins á netið í símanum og sá þá snapp skilaboð frá Davíð Steini um að hann væri í skoðun á bráðamóttökunni vegna slæmra kviðverkja. Hringdi í hann og bað hann um að láta mig vita hvað kæmi út úr skoðun. Hann sendi sms um hálffimm í morgun. Þá var hann kominn heim. Botnlanginn leit vel út en það sáustu bólgur á ristilsvæðinu. Hann á að vera á fljótandi fæði og bíður eftir að það hafi samband við hann læknir. 

Sveitin í Holtunum

Ég heyrði þegar pabbi var að spjalla við blaðberann um sex í gærmorgun. Hann fór í sund rétt fyrir hálfsjö og stuttu síðar í Bríeti fara af stað í vinnuna. Fór sjálf á fætur um sjö leytið og skammaði mig smá fyrir að hafa ekki rifið mig á fætur um sex og farið í sund með pabba. Ég var að leggja kapal um átta leytið þegar Bjarki kom á fætur. Hann var fúll út í sjálfan sig því hann hafði sofnað aftur og sofið yfir sig. Hann var samt ekkert fúll við mig enda engin ástæða til þess. Þegar hann var farinn fór ég í tölvuna. Pabbi kom heim rétt fyrir níu. Morguninn leið hratt. Pabbi bauð mér með sér á Kanslarann um hálftólf. Fengum okkur plokkfisk og aspassúpu og ég fékk mér einnig smá smakk af hinum aðalréttinum, svínagúllasréttur, kannski tvo þrjá kjötbita og sósu. Vorum komin aftur í Hólavanginn um tólf. Um tvö leytið var ég komin í heimsókn í Guttormshaga, sveitina sem ég var í fermingarsumarið mitt. Óli og Helga tóku vel á móti mér. Hún fór fljótlega að vekja yngsta barnabarnið, Söru Björk sem verður tveggja ára í október. Stóri bróðir, Þorsteinn var með pabba sínum úti við. Þeir feðgar komu inn um þrjú. Ég stoppaði í um tvo tíma en þetta er fyrsta heimsóknin í þessa sveit á þessu ári.

Sjósund og Suðurstrandavegur

Ég var komin á fætur fyrir klukkan sjö í gærmorgun. Rétt fyrir hálftíu hellti ég mér upp á kaffi og fékk mér hressingu. Var komin í Nauthólsvík um tíu leytið, rétt eftir að opnaði. Þetta er síðasta sumaropnunar vikan. N.k. sunnudagur er sá síðasti sem verður opið á þessu ári og opnunar tíminn verður frá 11-19 virka daga, eitthvað styttra á laugardögum út mánuðinn en eftir mánaðamót verður líka lokað á mánudögum. Í hitti fyrra var alltaf lokað á föstudögum og sunnudögum. Í fyrravetur var aðeins lokað á sunnudögum. Mánudagar og föstudagar hafa löngum verið uppáhalds sjósundsdagarnir mínir en nú þarf ég líklegast að velja mér annan dag í stað mánudaga. Annars var sjórinn 14°C, smá öldugangur og undiralda. Ég synti samt út að kaðli og til baka. Var lengur á bakaleiðinni því þá voru öldurnar á móti mér. En þetta hafðist á uþb fjörutíu mínútum og var virkilega hressandi þótt ég hefði gleypt smá sjó tvisvar til þrisvar sinnum þegar öldurnar skvettust framan í mig og upp í mig. Þegar ég var að koma upp úr fjörunni gekk ég beint í flasið á hóp af ferðamönnum og var einn þeirra, eldri kona, að taka upp á símann sinn. Þau þurftu að spjalla smá, á ensku, og sum að fá að koma við mig sérstaklega þar sem ég sagði þeim að mér finndist sjórinn of heitur. Þegar ég hélt förinni áfram í heita pottinn heyrði ég einhvern segja takk á íslensku, líklega fararstjóra hópsins.

Kom heim aftur stuttu fyrir tólf og stoppaði heima í rúman klukkutíma. Sendi fyrirspurnarskilaboð í sveitina sem ég var í sumarið sem ég fermdist, pakkaði niður dóti og lét nágrannana fyrir neðan vita að ég væri að fara út úr bænum í nokkra daga. Ekki var komið svar við fyrirspurninni svo ég ákvað að prófa að hringja í vinafólk mitt í Grindavík. Þau voru þá stödd á skólasetningu yngri dótturinnar í MR. Sú eldri var í Háskólanum. En þau sögðust myndu vera komin heim milli klukkan hálfþrjú og þrjú og ég sagðist ætla að taka smá rúnt um eitthvað af Suðurnesjunum og kanna svo hvort þau væru komin heim áður en ég brunaði austum um Suðurstrandaveg. Ég rúntaði um Voga og Vatnsleysuströnd og var svo komin til Grindavíkur stuttu fyrir þrjú. Það var einn bíll á planinu en þegar ég bankaði gerðist ekkert. Beið líklega ekki nógu lengi því ég var rétt að bakka út þegar besti vinur minn kom út til að láta vita að þau hjónin væru alveg nýkomin heim. Ég lagði því bílnum aftur, færði þeim eina borðtusku, þáði hjá þeim kaffibolla og stoppaði í um klukkustund áður en ég hélt för áfram.

Bætti á tankinn hjá AO við Selfoss og var komin austur til pabba upp úr klukkan hálfsex.

Sund, bókasafn og gluggamál

Var komin á fætur um sjö leytið í gærmorgun. Um klukkustund síðar var ég að byrjuð að setja inn færslu á þessum vettvangi þegar gemsinn hringdi. Þekkti ekki númerið en svaraði samt. Ekkert heyrðist á hinum enda línunnar svo ég skellti á. Stuttu seinna var hringt aftur og í þetta sinn heyrðist í þeim sem var á hinum endanum. Það reyndist vera einn af smiðunum sem hafa verið að vinna bráðabirgðaviðgerð á þakinu á no 19. Hann var að boða komu sína yfir til að mæla gluggana hjá mér þurfti bara að gera smávegis áður. Ég hafði því tíma til að láta strákana vita. Tuttugu mínútum fyrir níu hringdi smiðurinn aftur. Hann byrjaði á að skoða sameignargluggann svo eldhús, stofu, bað og gluggann í herberginu mínu. Hann fékk hjá mér blað og penna til að teikna upp málin. Davíð Steinn kom fram hálftíma síðar, svolítið myglaður, en settist inn í stofu. Oddur Smári bærði hins vegar ekki á sér en smiðurinn þurfti að komast út á svalir svo ég opnaði herbergið og hleypti honum inn. Hann mældi stofugluggann en sagðist geta mælt herbergis/fyrrverandi borðstofugluggan utan frá. Mælingarnar kláruðust stuttu um hálftíu tíu og ég hafði tíma til að klára færsluna áður en seinni undanúrslitaleikurinn á HM kvenna hófst. Davíð Steinn var sofnaður í sófanum en ég fylgdist spennt með leiknum. Gat þó prjónað í leiðinni.

Um eitt leytið tók ég sunddótið og bókasafnspokann með mér út í bíl. Byrjaði á því að skreppa út í Kringlu og skila fimm bókum af sex. Skilafresturinn á þeim var til 17. ágúst og ég hefði getað framlengt honum um 30 daga á meðan ég væri að lesa síðustu bókina sem er með skilafrest til 1. september. En í staðinn tók ég sex bækur í viðbót og ein af þeim er ný svo skilafresturinn á henni er tvær vikur. Fékk það samt staðfest að það er hægt að framlengja um aðrar tvær ef bókin verður ekki pöntuð í millitíðinni.

Næst lá leiðin í Laugardalslaugina. Var komin í kalda pottinn fimm mínútum fyrir tvö. Síðan fór ég beint á braut 7 og synti 500 metra á 23 mínútum, þar af 150 metra skriðsund. Í bakaleiðinni á fyrstu 100 metrunum skipti ég úr bringusundi yfir í skriðsund og komst alla leið yfir. Ögraði því sjálfri mér og prófaði að skipta yfir í skriðsund í bakaleiðinni á 200 og 300 metrum. Komst alltaf yfir og er bæði hissa og glöð á þessu afreki mínu. Fór svo amk fjórum sinnum í viðbót í kalda pottinn, tvær ferðir í gufu, eina í sjópottinn og eina í þann heitasta. Fór upp úr um fjögur leytið. Skrapp aðeins í Krónuna í Skeifunni og þaðan út á Gróttu þar sem ég fór í smá göngutúr.

Sjórinn og slagsmál við ís í ísskáp

Vaknaði alltof snemma í gærmorgun eða einhvern tímann milli fimm og sex. Mér varð fljótlega ljóst að ég væri glaðvöknuð og það þýddi ekkert að hanga í rúminu. Eftir morgunverkin á baðherberginu lauk ég af netvafrinu og bloggfærslunni á rúmum klukkutíma. Þegar ég slökkti á tölvunni og lagði hana frá mér var ennþá hálftími þar til fyrri undanúrslitaleikurinn á HM kvenna byrjaði. Þá greip ég í bók, síðustu bókina sem ég tók af safninu; Varnarlaus eftir Jónínu Leósdóttur. Undanúrslitaleikurinn var spennandi og réðist á síðustu tíu mínútum. Spánverjar voru á undan að skora, Svíar jöfnuðum um hæl en spænsku stelpurnar voru ekki á því að setja þennan leik í framlengingu og sigurmarkið var hreint stórkostlegt. Strax að leik loknum tók ég sjósundsdótið og dreif mig í Nauthólsvík. Sjórinn var 14,5°C, fjara og ég ætlaði ekki að tíma að fara upp úr. Synti út að kaðli og til baka og svamlaði lengur um. Var í sjónum í næstum þrjú korter og svo um tuttugu mínútur í heita pottinum á eftir. Áður en ég fór heim fór ég með bílinn í gegnum þvottastöðina Löður við Fiskislóð. Lét þvo felgurnar í leiðinni. Kom heim um tólf. Eftir hádegisfréttir ákvað ég að kominn væri tími til að taka á ísskápsmálunum. Hélt að það myndi kannski taka eina til tvær klukkustundir en það tók mun lengri tíma heldur en það, aðallega vegna þess að inn í ísskápnum sjálfum hafði myndast ísfjall í einu horninu milli tveggja grinda, þykkt og mikið. Það tók töluverðan tíma að láta það þiðna það mikið að að væri hægt að taka það út. Var löngu, löngu búin að affrysta frystihólfið en klukkan var að verða ellefu í gærkvöldi þegar ég náði loksins að taka restina af klakafjallinu út. Hugsanlega hefði ég getað notað áhrifaríkari aðferðir en ég gerði í gær en ég vildi ekki hætta á að fá flóð á eldhúsgólfið. Þannig að síðustu klukkutímana var ég að tékka á skápnum á hálftíma fresti og þurrka upp bleytu úr botninum en á milli var ég að horfa á fjórðu þáttaröðina; Grafin leyndarmál.

Sund og göngutúr

Klukkan var ekki nema sjö þegar ég fór á fætur í gærmorgun. Eftir morgunverkin á baðherberginu settist ég inn í stofu með bókina sem ég byrjaði á kvöldið áður. Það tók mig þrjá tíma að klára að lesa en þeir tímar flugu hjá mjög hratt. Um ellefu leytið hellti ég upp á könnuna og fékk mér loksins einhverja hressingu. Var komin í sund upp úr klukkan eitt. Hringdi í pabba áður en ég fór úr bílnum. Synti 500 metra, rúmlega helminginn á bakinu. Náði líka að synda bakka á milli á skriðsundi. Sundið tók mig tæpar 25 mínútur. Næsta einn og hálfa tímann var ég á vappi milli potta og gufu og einnig á spjalli við fólk. Sumt af því fólki hitti ég oft í sundi en í gær hitti ég líka fyrrum samstarfsmann sem einnig er frægur fyrir að ganga strandveginn í kringum Ísland og hjóla þvert yfir Bandaríkin. Hann var og er að skipuleggja hjólaferð hringinn í kringum hnöttinn en er að glíma við kviðslit og fer ekki í stóru aðgerðina fyrr en næsta vor. Í millitíðinni er hann að vinna að einhverskonar gerfigreind. Þvoði mér um hárið á leiðinni upp úr um fjögur og skrapp svo aðeins í "heimsókn" á vinnustaðinn til N1 sonarins. Hann bauð mér upp á kaffi og pylsu og kannaði einnig loftþrýstinginn á dekkjunum fyrir mig. Það var ekki byrjað að kvarta í mælaborðinu en það var örugglega mjög stutt í þá kvörtun. Áður en ég fór heim lagði ég bílnum við Perluna og fór í tæplega hálftíma göngu niður í kirkjugarð, að leiðinu hjá ömmu, afa og Hilmari og til baka. 

Sjór og sund sama daginn

Svaf út í gærmorgun og var klukkan um hálfníu þegar ég dreif mig loksins á fætur. Klukkutíma síðar hellti ég upp á sterkt kaffi og fékk mér hressingu. Var komin í Nauthólsvík um tíu. Það var fjara. Svamlaði um út í sjónum í um það bil hálftíma. Kom heim aftur um hálftólf. Tveimur tímum síðar var ég komin í Laugardalslaugina. Sleppti sundinu en var samt rúma tvo tíma á staðnum. Hitti slatta af fólki en ég var mest í því að stunda kalda pottinn. Mér bauðst nokkrum sinnum að leggjast á bekk en ég var ekki til í það en settist stundum á brúnu bekkina. Þegar ég kom heim aftur upp úr klukkan fjögur var ég búin að fá nóg af útiveru og fylgdist með leik Chelsea og Liverpool 1:1 í enska boltanum. Þegar ég fór upp í rúm um hálftíu byrjaði ég á næstsíðustu bókinni af safninu; Þetta gæti breytt öllu eftir Jill Mansell. Las til klukkan að ganga tólf og var þá búin með einn þriðja af bókinni.

Sunnudagur

Var komin á fætur stuttu áður en fyrri leikur dagsins hófst. Sá leikur var á milli Frakklands og Ástralíu og staðan var 0:0 eftir venjulegan leiktíma og framlengingu. Við tók hin ótrúlegasta vítaspyrnukeppni og það þurfti 11 umferðir til að fá úrslit og var það á endanum Ástralía sem vann 7:6. Stuttu eftir að leiknum lauk hófst upphitun fyrir seinni leikinn og þann síðasta í átta liða úrslitum. Horfði ekki á upphitunina en fór heldur ekki í suttan göngutúr eins og ég hafði ætlað mér. Seinni leikurinn fór 2:1 fyrir Englandi á móti Kólumbíu. Hörkuleikur líka og mjög spennandi. Nákvæmlega klukkan 13:25 var ég byrjuð að synda á braut átta í Laugardalslauginni. Synti 500 metra á uþb 24 mínútum. Svo fór ég nokkrar langar ferðir í kalda pottinn, tvær ferðir í sjópottinn, tvær í gufuna, eina í heitasta pottinn og sat inn á milli á bekk eða stól og sólaði mig. Fór upp úr stuttu fyrir fjögur, var ekki alveg að hætta á það að fá sólsting. 

Spennuleikir og löng sundferð

Ég var ekkert að reyna að vakna fyrir fyrsta leikinn í átta liða úrslitum HM kvenna og svaf hann af mér. Var hins vegar vöknuð og tilbúin þegar leikur tvö af fjórum hófst. Það var hörku leikur sem endaði með 2:1 sigri Svía gegn einu af skemmtilegasta liði mótsins Japan. Svíar unnu vel fyrir þessum sigri, þær japönsku voru of lengi að byrja. Var komin í sund um hálftvö og þrátt fyrir að skrópa í sundlaugina sjálfa var ég tvo tíma á svæðinu að kæla mig vel og slaka á í sjópottinum eða gufunni inn á milli. Hringdi í pabba rétt fyrir sundið og Ellu vinkonu eftir sundið. Bjó mér til ommilettu úr afgang af saltfiski síðan um daginn og horfði á bikarúrslita leik kvenna milli topp liða í tveimur efstu deildunum þar sem Víkingur vann 3:1. Hefði viljað sjá eitthvað dæmt á miður falleg brot fyrirliða Breiðabliks en kannski var það nóg refsing að tapa leiknum. Mér finnst það samt skammarlegt að leikmaðurinn komst upp með að sparka í liggjandi andstæðing og einnig í markvörð andstæðingsins. Þetta er landsliðskona með töluverða reynslu og á ekki að láta skapið hlaupa með sig í göngur. Það að hún komist upp með þetta eru ekki góð skilaboð.

Átta liða úrslit hafin

Var aðeins seinna á fótum í gærmorgun heldur en á miðvikudagsmorguninn en þó var klukkan varla farin að ganga átta. Eftir morgunverkin og netvafr kláraði ég að lesa Verubókina. Hellti upp á kaffi um tíu leytið og fékk mér hressingu. Greip aðeins í prjónana áður en ég byrjaði á næstu bók; Upplausn eftir Söru Blædel og Mads Peder Nordbo. Það er einnig virkilega spennandi bók sem kom út á íslensku í fyrra en var gefin út í Danmörku 2021. Er hálfnuð með lesturinn og klára hana líklega um helgina. Klukkan var orðin hálftvö þegar ég var loksins komin í sund. Fór beinustu leið á braut átta og synti 400m á tæpum tuttugu mínútum. Allt í allt var ég um tvo tíma í sundi því það voru nokkrar ferðirnar í kalda pottinn og magnesíum pottinn, Tvær ferðir í sjópottinn og gufuna að auki. Hellti aftur upp á kaffi þegar ég kom heim. Um fimm leytið ákvað ég að fara í smá göngu sem endaði sem heimsókn á Grettisgötuna til Lilju vinkonu. Stoppaði hjá henni í tvo tíma og drollaði svo í göngunni á leiðinni heim þannig að klukkan var að verða níu þegar ég mætti þangað aftur.

Himingrámi

Í gærmorgun var ég komin á fætur um klukkan hálfsjö. Eftir morgunverkin á baðherberginu og rúmlega klukkutíma netvafr, blogg og fleira ákvað ég að skella mér út í stutta göngu. Labbaði 3,5 km um nágrennið á ca þremur korterum. Fljótlega eftir að ég kom heim aftur hellti ég upp á kaffi og ristaði brauð. Klukkan tíu var ég svo komin í Nauthólsvík. Sjórinn var 14°C, spegilsléttur og nánast engin ferð á logninu. Synti að þessu sinni út að kaðli og aftur til baka. Hluta af leiðinni svamlaði ég bara eins og ég geri oftast og þegar ég kom upp úr aftur hafði ég verið í sjónum í amk fjörutíu mínútur. Sat um korter í heita pottinum áður en ég fór upp úr og heim. Það stóð alltaf til að fara aftur út en einhvern veginn festist ég í inniáhugamálum mínum. Taldi mér einnig trú um að ég yrði að passa upp á að fá ekki sólsting í of mikilli útiveru. Þegar fór að líða á daginn dró þó fyrir sóluna en þá var ég orðin alltof löt í að hreyfa mig meira. Er langt komin með "Veru-bókina" og nú togar hún í mig. Verð að komast að því hvernig liggur í málunum, klára þessa spennubók.

Himinblámi

Horfði á síðustu tvo leikina í sextán liða úrslitum í gærmorgun. Það var meiri spenna í fyrri leiknum milli Kólumbíu og Jamaíku sem fór eitt núll fyrir þær fyrrnefndu. Það var eina markið sem Jamaíkustelpur fengu á sig í keppninni en í útsláttarkeppni fer það lið sem tapar heim. Frakkar áttu ekki í neinum vandræðum með Marokkó, gerðu út um leikinn með þremur mörkum á átta mínútna kafla snemma í fyrri hálfleik. Leikurinn endaði 4:0 fyrir þær frönsku. Fljótlega eftir að seinni leiknum lauk tók ég til sunddótið mitt og dreif mig af stað. Ákvað þó að koma fyrst við hjá Frumherja í Skeifunni og fá skoðun á bílinn. Borgaði fyrirfram og ef ég væri ekki með FÍB afslátt hefði sá kostnaður farið yfir sextánþúsund og eitthundrað krónur. Bíllinn fékk fulla skoðun. Skoðunarmaðurinn nefndi það þó við mig að bremsuklossarnir að framan væru farnir að láta aðeins á sjá. Hringdi í pabba þegar ég kom á planið við Laugardalslaug og spjallaði við hann um stund. Varð að segja honum strax að bíllinn væri kominn í gegnum skoðun og einnig minntumst við á að það voru fimm ár í gær síðan mamma dó. Ég var búin að fara eina ferð í þann kalda, eina í heitasta, tíu mínútur í sjópottinn og var að synda á braut 2 þegar kalda potts vinkona mín mætti á svæðið. Ég synti í tuttugu mínútur, flestar ferðir á bakinu. Fór fimm ferðir í kalda með vinkonunni. Eftir seinustu ferðina endaði ég á góðu gufubaði, var lengur þar inni heldur en Hrafnhildur. Hitta hana svo aðeins í sjópottinum áður en ég fór upp úr og þvoði mér um hárið.

Áttundi áttundi tuttuguogþrjú

Var komin á fætur milli klukkan sjö og hálfátta í gærmorgun. Klukkan hálfátta hófst leikur Nígeríu og Englands. Eftir venjulegan leiktíma, rautt spjald á eina úr enska liðinu og framlengingu var staðan enn markalaus. Bæði lið klúðruðu fyrsta vítinu en það þurfti aðeins níu spyrnur til að fá úrslit og England vann 4:2. Nokkrum mínútum eftir að þessi maraþon leikur var búinn hófst seinni leikurinn sem var milli Ástralíu og Danmerkur. Sá fór 2:0 fyrir heimakonum. Klukkan eitt var ég mætt í Laugardalslaugina. Hafði hugsað mér að þvo á mér hárið en þar sem ég vildi helst ná að synda aðeins á bakinu fyrst en fann ekki pláss fyrir þannig sund í laugini frestaði ég hárþvotti. Fór þrjár langar ferðir í þann kalda sem var tæpar 10°C, 2 ferðir í gufuna, tvær í heitasta pottinn og eina í sjópottinn. Hitti á systur kalda potts vinkonu minnar og við spjölluðum heilmikið saman. Var komin heim aftur milli klukkan þrjú og fjögur. Um sex leytið bjó ég til kjötbollur og fengu báðir strákarnir sér af kvöldmatnum. 

Innipúki

Gerði  tilraun til að vakna rétt fyrir klukkan tvö í fyrrinótt til að horfa á þriðja leikinn í sextánliða úrslitum HM kvenna í knattspyrnu með því að stilla á mig vekjaraklukku. Þegar klukkan hringdi ákvað ég hins vegar að slökkva á henni og snúa mér á hina hliðina svo ég "missti" af leik Hollands og Suður-Afríku sem fór 2:0 fyrir þeim fyrrnefndu. Vaknaði svo útsofin um sjö leytið. Fjórði leikurinn; Svíþjóð - Bandaríkin var samt ekki fyrr en klukkan níu svo ég hafði góðan tíma til að vafra um á netinu. Kveikti svo á sjónvarpinu rétt fyrir klukkan níu og horfði á hreint magnaðan leik. Þær bandarísku náðu ekki að nýta nein af ótal færum sínum, þökk sé sænska markverðinum og bandaríski markvörðurinn greip einnig vel inn í þau fáu skipti sem Svíþjóð fékk tækifæri. Eftir 90 mínútur og framlengdan leik var staðan enn 0:0 og grípa þurfti til vítaspyrnukeppni. Þar þurfti sjö umferðir og leikar fóru þannig að Svíþjóð sló tvöfalda heimsmeistara út með 5 mörkum gegn 4.

Annars eyddi ég öllum deginum í prjónaskap, lestur, þáttaáhorf, hlustun á Rás 2 og sjónvarpsgláp. Hellti tvisvar upp á könnuna og fór ekki að sofa fyrr en klukkan var langt gengin í miðnætti.

Verslunarmannahelgi

Í gærmorgun var ég vöknuð rétt fyrir klukkan fimm án þess að það hringdi nokkur vekjaraklukkan. Fór á fætur og kveikti á sjónvarpinu til að fylgjast með fyrsta leiknum í sextán liða úrslitum á HM kvenna í fótbolta í Ástralíu og á Nýja Sjálandi. Annað liðið, Sviss, var ekki búið að fá á sig mark í riðlakeppninni en hitt liðið, Spánn, hafði tapað síðasta leik á móti Japan og fengið á sig fjögur mörk í þeim leik. Þessi leikur fór 5:1 fyrir Spán sem skoruðu öll sex mörkin. Klukkutíma eftir að þessum leik lauk eða um átta var leikur tvö af átta þar vann Japan Noreg 3:1. Noregur skoraði 2 af mörkunum því fyrsta markið var sjálfsmark. Annars fór dagurinn í lestur, prjóna og þáttaáhorf. Um hálftvö leytið hringdi nýji nágranninn úr risinu. Hann var þá læstur úti og enginn í hinum íbúðunum heima. Við vorum öll heima hérna en strákarnir voru ekki vaknaðir. Um sjö leytið skaust Davíð Steinn út og sótti handa okkur kvöldmat frá kínverska staðnum Fönix. Ég hafði lagt inn á hann og hann sá um að panta og sækja.

Kláraði að lesa bókina Dalurinn eftir Margréti Sigrúnu Höskuldsdóttur og byrjaði á bók um rannsóknalögreglukonuna Veru Stanhope; Lengsta nóttin eftir Ann Cleeves í gær.

Í sjóinn í gær

Vaknaði nokkuð snemma í gærmorgun, mun fyrr en ég hefði vaknað ef ég væri að mæta til vinnu. Fór þó ekki á fætur fyrr en upp úr klukkan hálfsjö. Hitti aðeins á N1 soninn áður en hann fór í vinnuna sína. Annars tók ég því mjög rólega til klukkan að verða hálftíu. Var að vafra á netinu, lesa og prjóna. Um hálftíu leytið fékk ég mér chia-graut með musli og rúsínum og var svo mætt í Nauthólsvík um það leyti sem var opnað um tíu. Sjórinn meira en 13°C, flóð og ég synti út að kaðli og skrapp einnig í lónið áður en ég fór í gufu og svo heita pottinn. Næst lá leiðin í fiskbúðina til Fúsa. Keypti af honum harðfisk, saltfiskbita og kartöflur. Áður en ég fór heim kom ég við á tveimur stöðum í Kringlunni, Tiger og Söstrene Grene. Verslaði mér lesgleraugu og bómullargarn. Þegar ég kom heim hellti ég upp á kaffi og fékk mér smá snarl með. Seinni partinn hringdi ég aðeins í pabba hann var smá upptekinn við að klára að gera pönnsur en hringdi svo í mig nokkrum mínútum seinna. Annars lítið títt, nema ég er að lesa nokkrar mjög spennandi bækur. Kannski meira um þær seinna.

Fössari í dag

Í fyrrinótt svaf ég alveg ágætlega og vaknaði útsofin á sjöunda tímanum í gærmorgun. Hitti aðeins á N1 soninn áður en hann dreif sig í vinnuna rétt fyrir sjö. Einhvern veginn æxlaðist það þannig að gærdagurinn varð innidagur þrátt fyrir gott veður. Kom samt heilmiklu í verk bæði af því sem ekki má skrifa um og svo sinnti ég mörgum af áhugamálunum líka. Þegar N1 sonurinn kom heim um fjögur leytið skruppu þeir bræður í Sorpuferð. 

Gæða frí

Það var ekki mikill svefn hjá mér aðfaranótt gærdagsins. Var vissulega komin í rúmið fyrir tíu. Las til klukkan að verða hálfellefu. Þá lagði ég frá mér bók sem ég átti amk 150 bls eftir af rúmlega fimmhundruð; Bragð af ást eftir Dorothy Koomzon. Slökkti á lampanum, bað bænirnar mínar og var sofnuð fljótlega. Hins vegar vaknaði ég upp aftur um tvö leytið. Þurfti ekki á salernið en þegar ég var búin að bylta mér nokkrum sinnum kveikti ég á lampanum og tók fram bókina á ný. Gerði máttlausa tilraun til að sofna aftur klukkutíma síðar en það endaði með því að ég kláraði bókina. Hún var ein af þeim sem var með skilafrest til dagsins í dag, þriðja ágúst. Fljótlega eftir að ég heyrði að N1 sonurinn var farinn af stað í vinnuna fyrir klukkan sjö, vaktaplanið breyttist hjá honum og verður með breyttu sniði amk næstu eina og hálfa vikuna á meðan margir eru að klára fríin sín, dreif ég mig bara á fætur. Eftir morgunverkin á baðherberginu kveikti ég á sjónvarpinu til að fylgjast með leikjum á HM kvenna en ég settist líka í sófann með fartölvuna í fanginu. Morguninn leið hratt og það endaði með því að ég horfði á hluta af leikjunum sem voru klukkan tíu líka. Hellti mér upp á kaffi rétt fyrir tólf og það var ekki fyrr en klukkan var farin að ganga tvö að ég dreif mig út. Skilaði fimm bókum á safnið og tók eina í staðinn áður en ég fór í sund. Kom heim aftur um fjögur, rétt á undan N1 syninum. 

Gluggamál

Dreif mig á fætur upp úr klukkan átta. Gleymdi mér aðeins í tölvunni þannig að ég hafði ekki tíma til að hella mér upp á kaffi. Fékk mér samloku og vatnsglas upp úr klukkan hálftíu og skrapp svo í Nauthólsvík. Þar kom ég að um leið og verið var að opna og hitti fyrir kalda potts vinkonu mína. Það var fjara en ég svamlaði út að kaðli þótt ég hefði getað vaðið þangað. Hitti kalda potts vinkonu mína í heita pottinum þar sem hún þekkti fleira fólk. Eftir korter í pottinum skruppum við aðeins út í lónið og smá stund í gufu á eftir. Vinkonan fór svo aftur í pottinn en ég upp úr og heim. Þá fyrst hellti ég upp á könnuna. Um tvö fékk ég skilaboð frá fyrrum nágranna úr risinu þar sem hann tilkynnti mér nafn og kennitölu mannsins sem keypti af honum. Ég sendi rafrænan póst á þjónustufulltrúa í 0111 og korteri síðar svaraði hún og var búin að breyta upplýsingunum í fyrirtækjabanka hússjóðs Drápuhlíðar no 21. Og rétt skömmu síðar fékk ég póst frá gluggamanninum. Hann sagði að það yrði komið einhvern daginn í næstu viku og skoðað og mælt út hjá mér gluggar og svalahurð.  Stuttu áður en öll þessi skilaboð bárust eða voru send hringdi ég í pabba. Hann hafði skroppið í bæinn annan daginn í röð og er nú kominn á nýlegan, svartan Ford Edge sem er fjórhljóladrifinn og gengur fyrir dísel. Milli þrjú og fjögur skrapp ég í göngutúr um Klambratún og nágrenni. Er annars búin að fitja upp á nýju jóla-eldhúshandklæði fyrir systur mína í grænum lit en er tilbúin með rauðan á kantinum ef hún vill heldur svoleiðis. Sá líka í gærmorgun hvernig ég gæti notað svona eldhúshandklæði sem eitthvað til að standa á og þurrka blautar iljar þegar ég er að klæða mig eftir sjósund. Er líka búin að klára að lesa allar þær bækur sem eru með skilafrestinn til 3. ágúst en á eftir að byrja á þeim fimm sem komu með mér heim af safninu síðast.

Glænýr mánuður

Var komin fætur fyrir klukkan átta í gærmorgun. Það tók mig samt næstum sex klukkustundir á koma mér út úr húsi og í sund. Hellti mér upp á kaffi stuttu fyrir tólf en þá var ég loksins búin að skrá niður ferðasöguna á bloggið. Var komin í Laugardalinn rétt fyrir hálftvö. Fór eina ferð í kalda og smástund í gufu og kalda sturtu áður en ég fór á braut 7 og synti 400 metra, þar af amk helminginn á bakinu. Eftir sundið og aðra ferð í kalda pottinn fór ég örstutt í heitasta pottinn og svo í sjópottinn. Þar var ég þegar kalda potts vinkona mín mætti á svæðið. Saman fórum við fimm ferðir í kalda, 4 í heitasta og eina ferð í gufu áður en hún lagðist á bekk í sólbað. Ég fór fljótlega og þvoði mér um hárið í leiðinni. Áður en ég fór heim aftur kom ég við í Krónunni við Fiskislóð og Elkó. Í elkó keypti ég ný batterí í heimasímann, tæki til að hlaða batterí, nokkur hleðslubatterí, ryksugupoka og litla flösku af kristal með sítrónubragði.

Strembið að komast í skrifgírinn aftur

Tvíburahálfsystir mín skilaði mér heim að dyrum á laugardagskvöldið var eftir viku útilegu þar sem gist var í tjaldi í fimm nætur af sjö. Gærdagurinn fór í slökun, lestur, prjón og smá imbagláp. Lánaði Oddi bílinn um miðjan dag og var hann kominn heim aftur um hálftíu leytið. Sjálf fór ég ekki út úr húsi, ekki einu sinni í stutta göngu. Hellti upp á kaffi og fékk mér hressingu um tólf leytið og fékk mér snarl um kvöldmatar leytið. Sonja skráði ferðasöguna ásamt nokkrum mögnuðum myndum og merkti mig inn á facebook. Ferðalagið var ákveðið með stuttum fyrirvara enda átti það aðeins að vera prufutúr í eina til þrjá nætur. Þegar við hins vegar vorum komnar af stað leiddi eitt af öðru og til að gera langa sögu mjög stutta þá endaðuðum við á því að fara hringinn með viðkomu á mörgum fjörðum og stöðum á austur og norðurlandi.

Eftir sundferð, hárþvott og esperantohitting laugardaginn 22. júlí sl. lauk ég við að pakka niður um hádegisbil og þóttist tilbúin. Sonja sótti mig um eitt leytið. Foreldrar hennar voru ekki heimavið svo við keyrðum í gegnum Selfoss og beinustu leið á Hellu í heimsókn til pabba míns. Þar fengum við kaffi og pönnsur og stoppuðum í rúmlega klukkustund eða svo áður en við héldum för áfram austur á bóginn. Þegar við vorum komnar vel austur fyrir Hvolsvöll sló því niður í kollinn á mér að svefnpokinn minn hafði ekki komið með í þetta ferðalag. Ég vildi hins vegar ekki snúa við og fá lánaðan poka hjá pabba svo við ákváðum að stoppa í Vík. Þar var keyptur svefnpoki sem fer ótrúlega lítið fyrir. Héldum svo för áfram að Kirkjubæjarklaustri. Ákváðum að kaupa eina gistinótt þar og sjá svo til. Sonja sá um kvöldmatinn og bauð upp á fínasta pastarétt með pepperóní og sósu og þar að auki var hún með bæði rautt og hvítt með. Þurftum að ákveða framhaldið fyrir klukkan tólf á sunnudeginum eða taka okkur upp fyrir klukkan eitt.

Þrátt fyrir mikla veðurblíðu á Klaustri ákváðum við að taka upp tjaldið og halda ferð áfram austur á bóginn, eftir að hafa fyrst fengið okkur kaffi og morgunhressingu. Vorum komnar á Höfn um miðjan dag. Fengum okkur að borða í N1 áður en við héldum áfram. Vorum ekki með neinn ákveðin gististað í huga en stuttu fyrir sjö vorum við komnar í Fossárdal við Djúpavog, rétt að skoða okkur um. Okkur leist vel á staðinn og mótökurnar voru meiri hátta svo við ákváðum að setja tjaldið niður þar. Fengum lánað millistykki og þegar kom í ljós að undirrituð hafði gleymt að taka gaurinn sem tengis við rafmagnssnúruna úr rafmagnsboxinu á Klausti fengum við lánað svoleiðis millistykki. Skáluðum og kláruðum úr vínflöskunum sem við höfðum opnað kvöldið áður, tókum upp handavinnu og sátum og spjölluðum í fortjaldinu fram eftir kvöldi.

Þegar við vorum búnar að fá okkur kaffi og morgunhressingu á mánudeginum tókum við upp rakt tjaldið og skiluðum lánshlutunum í kassa sem var merktur "staff only" rétt fyrir eitt. Héldum svo för áfram austur á bóginn með viðkomu og mislöngum stoppum í fjörðunum. Á Fáskrúðsfirði var verslað í matvöruversluninni. Á N1 í Reyðarfirði fundum við millistykki til að tengjast rafmagnsboxi og við komum einnig við í vínbúðinni þar og endurnýjuðum vínbirgðirnar. Keyrðum um Eskifjörð og nýju gönginn inn á Neskaupsstað áður en við snerum við og keyrðum inn á Egilsstaði. Þar fengum við okkur að borða mjög góðar speltpizzur á staðnum Askur Pizzeria áður en við keyrðum áfram og fundum okkur tjaldstæði í Höfðavík í Hallormsstaðaskógi.

Eftir kaffimorgunhressingu á þriðjudagsmorgninum keyrðum við inn á Egilsstaði. Stoppuðum við í Húsasmiðjunni þar sem keypt var fjöltengi áður en við fórum í sundlaugina. Klukkan var farin að ganga tvö þegar við bönkuðum upp á hjá Ellu vinkonu. Þar hittum við líka aðeins á Einar Bjarna son hennar. Fengum kaffi, gott spjall í hátt á aðra klukkustund áður en við héldum för áfram inn á Seyðisfjörð. Þar skoðuðum við Tæknimynjasafnið og löbbuðum einnig aðeins um bæinn. Vorum sammála um að Borgarfjörður Eystri yrði að bíða aðeins lengur eftir heimsókn frá okkur. Vorum komnar aftur á Egilsstaði klukkan að ganga sjö. Fengum okkur að borða á Salt áður en við fórum aftur "heim" í tjald.

Á miðvikudeginum tókum við upp tjaldið um hádegisbil eftir að hafa fengið okkur kaffi og hressingu. Síðan lá leiðin á Skriðuklaustur. Smári og Nina, sem búa á Ísafirði, voru búin að vera með listamannaíbúðina í tæpar þrjár vikur. Nína var með sýningu í einu herbergi á neðri hæð hússins og Smári hafði verið að vinna að efni í næstu hjólabók. Þau voru hins vegar bæði á staðnum þegar við tvíburarhálfsysturnar mættum og buðu okkur inn til sín í kaffi og spjall eftir að við vorum búnar að skoða safnið. Þegar við kvöddum og héldum áfram ókum við meðfram Lagarfljótinu vestan meginn og fórum stystu leið heim til systur minnar og mágs. Stoppuðum ekkert á þeirri leið nema að einum stað skammt frá Mývatni þar sem verið var að laga veginn og bíða þurfti eftir að leiðsögubíll kæmi og keyrði á undan röðinni aðeins aðra áttina í einu. Vorum komnar á Árland um hálfátta og hittum þar fyrir pabba minn. Helga systir bauð upp á dýrindis kjötsúpu.

Fimmtudagsferðalagið varð ansi langt en líklega má þakka smá þokusúld á víð og dreif um svæðið. Byrjuðum þó á því að heilsa upp á hænurnar og pabba og Ingva inni í fjárhúsum og hlöðu áður en við lögðum af stað. Keyrðum aðeins innar í Kinnarnar áður en við snerum við og ókum í gegnum Húsavík og alla leið inn að Ásbyrgi. Þar gengum við inn að Botnstjörn. Í baka leiðinni úr Ásbyrgi skoðuðum við handverksverslunina Heimöx. Þar verslaði ég rúgbrauð, pönnsur og hnetublöndu allt merkt og gert af heimafólki af svæðinu. Sonja keypti sér m.a. "görn". Fengum okkur síðan að borða í verslun örskammt frá. Héldum för áfram um hálftvö. Kíktum næst á Kópasker. Stoppuðum stutt en tókum myndir af hluta af þeim flottu fígúrum sem eru rétt fyrir utan þorpið og í kringum eina tjörn. Héldum för ótrauðar áfram og heimsóttum flesta þéttbýliskjarna en stoppuðum stutt við, tókum þó ýmist myndir eða snöpp af svæðunum. Þegar við vorum uþb hálfnaðar með ákveðin hring varð ljóst að hvort sem við héldum áfram eða snerum við yrðum við ekki komnar til systur minnar fyrr en einhvern tímann eftir klukkan átta. Ákváðum að klára hringinn og vorum mun nær Egilsstöðum heldur en Akureyri þegar við beygðum inn á þjóðveg eitt af vegi númer 85. Þess ber að geta að sveitabær systur minnar og mágs er í nokkurra mínútna akstur við hinn endann á vegi 85. Þrátt fyrir að vera nokkuð seint á ferð eða klukkan langt gengin í níu voru húsráðendur og gestir, Davíð Steinn var búinn að bætast í hópinn, nýlega sestir að borðum. Okkur var boðið upp á Hangiket af kind með nafni sem ég man ekki hvað var og meðlæti.

Ég var komin fram um átta á föstudagsmorguninn. Systir mín var löngu farin í vinnuna. Mágur minn hafði vaknað með henni en lagt sig aftur. Fljótlega hellti ég upp á könnuna og mágur minn og pabbi bættust í hópinn stuttu fyrir níu áður en þeir fóru út að hlöðu þar sem verið var að vinna í að setja upp rafmagnsbílsskúrshurð. Sonja kom fram stuttu eftir að þeir voru farnir út. Við fengum okkur kaffi og hressingu. Davíð Steinn bættist í hópinn skömmu síðar og fékk sér að borða með okkur. Áður en við tíndum dótið saman hittum við aðeins á Aron og Huldu. Báðum þau um að skila kveðjum en Hulda og Davíð Steinn ætluðu að skreppa í veiðitúr á Ljósavatn með smá krók inn á Akureyri til að kaupa sér nesti. Við Sonja keyrðum inn að Grenivík og þaðan á Akureyri. Fórum fyrst í jólahúsið en þegar við snerum við komum við fórum við í sund, skruppum svo í rúmfatalagerinn og Bónus áður en við héldum för áfram. Vorum eitthvað að spá í að setja niður tjaldið í Hauganesi en okkur fannst heldur dýr nóttin, 2000 kr. fyrir persónuna og sama fyrir rafmagn. Semsagt 6000 krónur fyrir okkur. Hættum við en fengum okkur að borða á góðum stað við höfnina. Ég fékk mér fiskisúpu, skammt af frönskum og hvítvínsglas. Góð þjónusta og mjög góður matur. Síðan héldum við för um Tröllaskaga áfram. Keyrðum í gegnum Dalvík og Siglufjörð. Það var búið að bjóða okkur að setja niður tjaldið fríkeypis við bæinn Haganes í fljótunum en þrátt fyrir gott veður leist mér ekkert á að tjalda þar m.a. vegna þess að þessa helgina var heilt ættarmót í gangi á svæðinu. Á Hofsósi var ekki hægt að komast í rafmagn. Kíktum á aðstæður á tjaldstæðinu við Hóla í Hjaltadal en þar var ekki rafmagn í boði og þar að auki fullt af fólki. Fundum blett á tjaldstæðinu við Sauðárkrók en ákváðum að kíkja einnig inn í Varmahlíð. Á síðarnefnda staðnum var ekkert laust svo við snérum við. Klukkan var um ellefu þegar við komum aftur á Krókinn. Verið var að tjalda á blettinum sem við höfðum í huga en það var nóg pláss á flötinni og snúran hennar Sonju er það löng að það var létt að tengjast rafmagninu. Ég var orðin ansi lúin, stirð og ferðaþreytt svo það tók mig nokkrar mínútur að staulast úr bílnum og hjálpa til við að tjalda. Eftir að hafa skroppið á salerni skreið ég beint ofan í pokann.

Klukkan var farin að ganga ellefu þegar ég skreyddist út úr tjaldinu á laugardeginum. Meðan ég fór að pissa og tanna hellti Sonja upp á en hún var aldrei þessu vant mun fyrr á fótum heldur en ég, hafði samt farið miklu seinna inn í tjald. Við vorum sammála um að þrátt fyrir mikla leti í mér að taka okkur upp og halda heim á leið. Keyrðum af stað um tólf leytið, inn fallegan dal sem lá m.a. til Blöndóss. Ókum malbikaða kaflann og þegar við komum að gatnamótum beygðum við fyrst til hægri og gerðum stuttan túr inn á Skagaströnd. Kíktum aðeins inn í spákonusetrið og var okkur leyft að skoða okkur smá stund um án þess að borga aðgang. En það er hægt að fá fjörutíu mínútna leiðsögn og einnig kaupa sér alls konar spá; lófalestur, tarrot, lestur í bolla og örugglega eina eða fleiri í viðbót. Það verður kannski gert síðar. Næsta stopp var ekki fyrr en um hálffimm í sumarbústað við Selborgir stutt frá Borgarnesi. Þar var okkur boðið í kaffi og með því og einnig grillað lambalæri með tilheyrandi bökunarkartöflum, fersku sallati og bernessósu. Stoppið stóð því rúma tvo tíma en það var mjög gott að fá svona móttökur og láta ferðaþreytuna aðeins líða úr sér áður en síðasta spölurinn í bæinn var ekinn.

Fyrsta sumarfríshelgin af fimm

Jæja, þá eru fyrstu fimm virku dagarnir af tuttuguogsjö liðnir af sumarfríinu. Í gærmorgun heyrði ég ekkert þegar Oddur fór á fætur og í vinnuna enda svaf ég til klukkan langt gengin í átta. Nóttin áður var svolítið kaflaskipt því ég þurfti að skreppa á salernið um tvö leytið. Gat ekki sofnað alveg strax aftur svo það endaði með því að ég kveikti á lampanum og las um stund. Var svo sofnuð aftur um fjögur leytið og þegar ég vaknaði hafði ég sofið samtals í hátt í átta tíma, tæpa fjóra fyrri hlutann og þrjá og hálfan seinni hlutann. Um níu leytið hellti ég mér upp á kaffi og ristaði brauð. Hitti aðeins á nýja nágrannann skömmu fyrir tíu þegar ég var að leggja af stað í sjóferð. Það var mikið um að vera í Sigluvík og eins gott að passa sig þegar maður var að synda/svamla út að kaðli því bátarnir voru alls konar og margir sem krakkarnir voru að róa á og voru þau nokkur sem sigldu hluta af þeirri leið sem við sjósundsfólkið höldum okkur á. Einn drengurinn var meira að segja næstum því búinn að sigla inn í víkina. Það var ekki viljandi og hann og nokkrir krakkar hjálpuðu honum út fyrir aftur áður en hann fór yfir innri kaðalinn. En þetta var fimmta ferðin mín í sjóinn frá því á föstudaginn fyrir viku. Var komin heim aftur um hálftólf leytið. Hitaði mér helminginn af fiskafgangnum frá því daginn áður. Fór ekkert út aftur, en kláraði eina af þeim bókum sem á að skila næst, prjónaði aðeins og horfði á einhverja þætti m.a. Annars er ég líklega að fara í nokkurra daga útilegu eftir hádegi í dag svo það kemur stopp á daglegar færslur í bili.

Sofið út til klukkan hálf átta

Aftur var ég komin fram á undan Oddi. Svaf einstaklega vel í fyrrinótt og vaknaði um sex leytið eftir átta tíma svefn. Var ekki alveg búin að teikna upp daginn en þegar til kom varð hann nokkuð líkur þriðjudeginum. Hellti mér upp á kaffi um níu leytið og fékk mér samloku með. Var komin í Nauthólsvík rétt eftir að aðstaðan opnaði um tíu. Svamlaði og synti út að kaðli. Sjórinn 13°C og það var frekar freistandi að svamla aftur til baka. Hefði svo sem alveg getað gert það en í staðinn kom ég við í lóninu í nokkrar mínútur. Fór aðeins í gufuna áður en ég fór í langpottinn sem var mun volgari en venjulega eða um 33°C. Það var verið að vinna í að laga það og ég sat í pottinum í tæpan hálftíma. Hitta bekkjarsystur mína úr A bekknum í Kennó. Kom heim stuttu fyrir tólf. Setti í þvottavél og setti upp smá skammt af hýðisgrónum. Hafði tekið út eitt flak af þorskhnökkum fyrr um morguninn og steikti það upp úr eggjum og blöndu af byggflögum og byggmjöli. Þetta var alveg skammtur fyrir þrjá. Seinna þegar Davíð Steinn kom fram bauð ég honum að borða af afgangnum en hann var búinn að ákveða að elda sér eitthvað allt annað. Ég hellti aftur upp á um hálftvö leytið. Hægt var að hengja upp úr þvottavélinni rúmum hálftíma seinna og svo ákvað ég að skella mér í sund. Synti reyndar ekki neitt að þessu sinni en fór all nokkrar ferðir í þann kalda og magnesíum pottinn. Kalda potts vinkona mín mætti á svæðið þegar ég var búin með fyrstu ferðina í kalda. Saman fórum við amk sex ferðir og ég tvær ferðir í viðbót eftir að hún var farin. Áður en ég fór heim kom ég við í Sports og keypti mér þrjá nýja sundboli. Fann sniðið og stærðina en fátt var um liti svo allir voru bolirnir svartir. Annars lauk ég við að lesa; Systumegin eftir Steinunni Sigurðardóttur í gær.

Viðey

Var komin fram á undan Oddi en hann fór svo út úr húsi á undan mér. Lagði af stað fyrir klukkan hálfátta að sækja frænda sinn. Ég skellti mér í sund um átta. Synti m.a. 300 metra, fór nokkrar ferðir í kalda pottinn og í einni þeirra hitti ég á sjósundsvinkonu mína. Hún var búin að synda og var á leiðinni upp úr því hún átti von á heimsókn um níu leytið. Ég fór ekki upp úr fyrr en rúmlega hálftíu. Var komin á planið við vínbúðina rétt áður en opnaði. Keypti eina hvítvínsflösku af minnstu gerð og aðra af næst minnstugerð. Síðan fór ég heim og hellti upp á sterkt kaffi og ristaði mér brauð. Upp úr klukkan ellefu pakkaði ég niður í bakpoka, smá nesti, litlu vínflöskunni, tveimur bókum, prjónadótinu, ennisbandi, flíspeysu og vettlingum. Klæddi mig í lopapeysuna fínu og góðu og brunaði niður á Skarfabakka. Þaðan er ferja yfir í Viðey á klukkutíma fresti frá klukkan 10:15-17:15. Hádegisferjan  er sú fyrri af tveimur sem kemur frá gömlu höfninni í miðbænum. Með þeirri ferju komu tvær af fjórum úr hóp sem fer amk eina ferð á ári út í Viðey. Og við vorum tvær sem bættumst í hópinn á Skarfabakka. Þegar við komum út í eyju ákváðum við að byrja á því að nota aðstöðuna rétt aftan við Viðeyjarstofu, fá okkur smá nesti, skála fyrir okkur og skreppa svo á salerni áður en við gengum af stað vestur eftir einni. Gangan var með þeim hætti að forritið í símanum skráðin enga göngutúra en ég safnaði samt yfir tólfþúsund skrefum í heildina í gær. Komum til baka að Viðeyrjarstofu um hálffjögur. Ætluðum að fá okkur kaffi en það var enginn til að sinna þeirri þjónustu í gær, eitthvað hlýtur að hafa komið upp á því yfirleitt er hægt að fá sér kaffi og með því og jafnvel vínglas ef svo ber undir en í gær hljóta að hafa verið óvænt forföll. Hægt var að nota salernisaðstöðuna inni alveg til fimm en staðarhaldarinn dró niður fánann um það leyti og lokaði og læsti húsinu. Kirkjan var líka harðlæst og lokuð. Hinar þrjár tóku annan smá göngutúr en ég vaktaði dótið þeirra og greip í bók á meðan. Tókum næst síðasta bátinn úr eynni, 17:30, en sá bátur fer einmitt alla leið niður á gömlu höfn. Ég var komin heim um sex mjög ánægð með ævintýralega skemmtilegan dag í góðum hópi.

Sjórinn, bókasafn og sundið

Ég var komin á fætur á undan Oddi í gærmorgun. Hann gefur sér góðan tíma til að vakna, fara í sturtu og fá sér eitthvað. Virtist vera nokkuð tilbúinn um hálfátta, þá búinn að vera á fótum í um klukkustund. Taldi að hann hefði rúman hálftíma þar til að hann yrði sóttur. Frændinn hringdi hins vegar í hann tíu mínútum fyrir átta og var þá kominn að sækja hann. Þá átti Oddur aðeins eftir að koma sér í sokka og skó en hann hafði ætlað sér að vera kominn út áður en frændinn mætti. Það tókst semsagt ekki. Ég hellti mér upp á kaffi um níu leytið og fékk mér hressingu. Var svo mætt í Nauthólsvík um leið og verið var að opna aðstöðuna klukkan tíu. Það var ekki eins mikil fjara og á sunnudaginn en það var samt ekki hæg að vaða út að kaðli. Var að spá í að synda til baka aftur en ákvað svo að það gæti ég alveg gert seinna. Eftir tuttugu mínútur í sjónum, skrapp ég smá stund í gufuna áður en ég fór í heita pottinn. Fór upp úr stuttu fyrir ellefu og þá var fólk farið að streyma að enda veðrið gott og örugglega margir í sumarfríi. Næst lá leiðin í AO við Sprengisand þar sem ég fyllti tankinn og á leiðinni heim kom ég við í bókasafninu til að skila fjórum bókum af níu. Þrjár af þessum fjórum voru skammtímalánsbækur. Stóðst ekki freistinguna að skoða mig um sem varð til þess að það komu fimm bækur með mér heim. Þannig að nú er ég með tíu bækur af safninu. Engin þeirra skammtíma láns en eina er ég þegar búin að framlengja skilafrestinum á en ég hef til 8. ágúst. Hinar fjórar sem eftir voru heima eru með skilafrest til 3. ágúst með möguleikann á að framlengja um 30 daga. Hugsanlega get ég skilað eitthvað af þessum bókum fyrir næstu mánaðamót. Ég er amk langt komin með framlengdu bókina; Leyndir gallar eftir Elsebeth Egholm. 

Eftir stopp heima í hádeginu og til klukkan að ganga tvö fór ég í sund. Sá kaldapotts vinkonu mína og eina systir hennar í sólbaði en byrjaði á tveimur ferðum í kalda pottinn og 200 m sundi áður en ég heilsaði upp á þær þegar ég var á leiðinni í gufuna. Kalda potts vinkona mín kom svo með mér nokkrar ferðir í kalda og eina ferð í gufuna áður en hún lagðist aftur í sólbað og ég skrapp í sjópottinn. Ég var komin heim um hálffimm rétt á undan Oddi.

Bíllinn í dekur í gærmorgun

Ég var komin á fætur um sex leytið í gærmorgun. Rétt fyrir klukkan átta var ég komin fyrir utan Stórhöfða 16 en ég átti pantaðan tíma í alþrif á bílinn klukkan átta. Maðurinn sem tók á móti bílnum sagði að þetta gætu orðið tvær til tvær og hálf klukkustund. Ég var með vatnsflösku, prjónadótt, lopapeysu og tvær bækur í bakpoka. Labbaði í áttina að Grafarvogi og beygði út af á stíg rétt við brúna. Fljótlega fann ég bekk sem ég settist á. Þá var ég búin að labba rúmlega níuhundruð metra á tæpum ellefu mínútum. skipti út flíspeysunni fyrir lopapeysu, aðallega til að búa til rýmra pláss í bakpokanum. Las í tuttugu mínútur áður en ég hélt göngunni áfram. Labbaði næstu rúmu níuhundruð metra á fjórtán mínútum. Var aðeins lengur og hægari þar sem ég ákvað að taka nokkur snöpp. Fann smá skúr með  bekkjum í, útsýni yfir voginn og myndir og texta af helstu fuglum og fleiru. Las aftur í tuttugu mínútur. Þriðji spölurinn af fjórum var 1,5 km á tuttugu mínútum og sá fjórði 1,2 á rúmu korteri. Þá var klukkan að byrja að ganga ellefu. Hélt að ég gæti fengið að bíða síðustu mínúturnar á staðnum en þar var allt læst og maðurinn hlaut að hafa skroppið frá. Um ellefu reyndi ég að hringja en það var ekki svarað. Tíu mínútum síðar var hringt til baka. Þá átti eftir að bóna bílinn og sagt að hann yrði tilbúinn um hálftólf. Ég var skammt frá og tók eftir að búið var að opna aðra skúrhurðina aftur. Ég komst því inn í "biðstofu" á svæðinu á meðan verið var að ljúka við að dekra við bílinn. Alþrifin kostuðu innan við sautjánþúsund. Ég var komin heim rétt rúmlega tólf. Hellti upp á kaffi og fékk mér snarl með. Um tvö var ég mætt í Laugardalslaugina og þar var ég í rúma tvo tíma, aðallega að kæla mig í kalda pottinum.

Fyrsti virki frídagurinn af tuttuguogsjö

Ég var komin á fætur um hálfátta leytið í gærmorgun. Fljótlega ákvað ég að stefna á Nauthólsvík svo ég sat róleg í stofusófanum með fartölvuna í fanginu í rúmlega einn og hálfan tíma. Þá hellti ég mér upp á sterkt kaffi og ristaði brauð. Mætti í Nauthólsvík á slaginu tíu akkúrat þegar verið var að opna. Það var rólegt en samt kominn smá hópur út í sjó sem hafði komið áður en aðstaðan opnaði. Sjórinn var 11°C og það var fjara. Hægt var að vaða út að kaðli en ég synti mest alla leiðina þangað, sem var mun styttri heldur en á föstudaginn var. Það flögraði að mér að synda til baka en ákvað svo að gera það ekki. Var líklega á svamli í sjónum í tæpar tuttugu mínútur. Kom ekkert við í lóninu en settist í smástund inn í gufu áður en ég skellti mér í sturtu og fór svo í heita pottinn í tæpan hálftíma. Þegar ég kom heim var Oddur kominn á fætur. Hann var að æfa sig fyrir þriggja vikna vinnutörn framundan. Hann byrjar samt ekki fyrr en á morgun, þriðjudag. Dagurinn fór svo aftur í alls konar m.a. það sem ekki má skrifa um. 

Sunnudagur

Auðvitað hafðist að sofna aftur um fjögur leytið í fyrrinótt. Var svo vöknuð aftur um sjö leytið og komin í sund rétt rúmlega átta. Synti 400m á braut 2, meiri helminginn á bakinu. Fjórar ferðir í kalda pottinn, eina í heitasta, eina í gufu, og eina í sjópottinn. Þvoði mér um hárið á leiðinni upp úr og fór svo beint vestur í bæ í hitting til norsku esperanto vinkonu minnar. Stoppaði þar í einn og hálfan tíma og fór amk helmingur af þeim tíma í esperanto grúsk. En líka spjall og smá krossgátulausn. Kom heim um tólf leytið. Fór ekkert út aftur en dagurinn fór í alls konar engu að síður og margt af því sem ekki má skrifa um. 

Dagurinn tekinn snemma eða smá pása á nóttinni

Klukkan var ekki orðin fimm þegar ég vaknaði í gærmorgun. Var komin á fætur fyrir klukkan hálfsex. Mætti í vinnuna tveimur tímum síðar. Þar sem þetta var síðasti vinnudagurinn með sumarstúlkunni leyfði ég henni að ráða á hvorum endanum á vélinni hún vildi vinna. Hún valdi þann enda sem hún er oftast á, móttökuendann. Sá það fyrir sér að þar væri meira að gera. Allri framleiðslu var lokið fyrir klukkan tólf, líka síðasta partinum af endurnýjuninni sem var hlaðið inn fyrir tæpum tveimur vikum. Hætti vinnu um tvö. Kom við í Fiskbúð Fúsa og keypti harðfisk og ýsuflök. Síðan lá leiðin beinustu leið í Nauthólsvík. Synti út að kaðli og kom við í lóninu á leiðinni í heita pottinn. Var komin heim um fjögur. Hellti mér upp á sterkt kaffi og fékk mér smá snarl. Um sex leytið setti ég upp örfáar kartöflur og um hálfsjö skellti ég ýsuflökunum í kryddað sjóðandi vatn í pott. Bauð Oddi að borða með mér, N1 sonurinn var á aukavakt. Oddur þáði reyndar ekki boðið en ég setti smjör út á matinn minn og opnaði 275ml flösku af hvítvíni sem ég er búin að eiga síðan stuttu fyrir jól.

Hraðferð á loginu

Eftir nokkurra daga veðurblíðu hefur sólin dregið sig í hlé um stund og gular veðurviðvaranir í kortunum vestan megin á landi til morguns. Það fær að hafa sinn gang mín vegna enda ekkert sem ég get gert betur í því heldur en að halda mínu striki. Ég var mætt í vinnu í gærmorgun um hálfátta. Var aftur á ítroðsluendanum og sumarstúlkan á móttökuendanum. Hún var enn þrælkvefuð en þrátt fyrir það hörku dugleg. Við kláruðum daglega framleiðslu fyrir klukkan tólf, eitthvað um fimmhundruð kort og fórum langt með eina endurnýjun, skildum aðeins 275 kort eftir af sautjánhundruð og vorum samt búnar að ganga frá deildinni og komnar upp um þrjú. Flestir í hinum deildunum voru farnir. Ég og fyrrum fyrirliði fórum krókaleiðir í Laugardalslaugin þar sem verið var að malbika Sundlaugarveg. Hittum fyrrum vinnufélaga þegar við skruppum í sjópottinn. Þegar ég var að verða tilbúin í að synda fylltist laugin af alls konar fólki sem bæði var að synda og leika. Ég tók þetta sem svo að ég færi bara fleiri ferðir í kalda pottinn og magnesíum pottinn. Fór einnig eina ferð í gufu og heitasta pottinn. Klukkan að ganga fimm skrapp ég í Krónuna við Granda. Þegar ég kom heim með vörurnar hringdi ég í Odd til að sækja pokana tvo. Hringdi í pabba áður en ég fór sjálf með mitt dót úr bílnum. Danska frændfólkið hafði kíkt á hann í gær, þ.e. Gerður og börnin hennar. Það er að styttast tíminn þeirra hérna og kannski fer það svo að ég nái ekki að hitta aðeins á þau í þetta sinn.

Sópað upp

Í gærmorgun, sem hófst mjög snemma, var ég vöknuð um fimm leytið og komin á fætur skömmu síðar. Tíminn fram að brottfarartíma leið samt ógnar hratt. Þegar ég var lögð af stað í vinnuna kviknaði ljós í mælaborðinu sem sýndi að það væri kominn tími til að athuga með þrýstinginn á dekkjunum. Fór því aðeins aðra leið í vinnu og kom við á N1 í Borgartúni. Þar keyrði ég einn hring án þess að finna það sem samt er þarna, loft til að bæta á dekkin. Ég keyrði því einnig framhjá Olísstöðinni sem er rétt hjá vinnunni og var mætt í vinnuna á svipuðum tíma og venjulega, eða um hálfátta. Um átta var sumarstúlkan ekki mætt en það kom í ljós hálftíma síðar að hún hafði hringt sig inn veika en sá sem tók á móti símtalinu taldi að um annan starfsmann væri að ræða. Fyrrum fyrirliði var í bókhaldinu og á móttökuendanum. Ég var í ítroðslunni og pökkuninni. Tímann milli átta fimmtán og þrjú eftir hádegi, með morgunkaffi, fundarpásu og hádegishléi, framleiddum við og pökkuðum tólfhundruð kortum og lukum þar með að vinna upp eftir stoppið. Sendum fjóra bakka upp með lyftunni um þrjú en höfðum komið upp með einn bakka um hádegið. Þrír af þessum pökkum fara í póst í dag í hinum tveimur voru kortið sem fara í útibú í dag og þau eru færð yfir í aðra bakka. Fór því með tvo tóma bakka og allar skuldfærslubeiðnirnar niður rétt fyrir hálffjögur. Hætti vinnu tuttugu mínútum síðar. Var með sunddótið með mér en ákvað að fara fyrst í bíltúr upp í N1 við Gagnveg. Þar veit ég nákvæmlega hvar loftið er og gat heimsótt N1 soninn í leiðinni. Eftir stoppið þar keyrði ég í Gegnum Grafarvog og endaði svo heima um fimm leytið. Skrópaði semsagt í sundið.

Mið vika

Var vöknuð á undan klukkunni eins og oftast. Eftir morgunverkin á baðherberginu og vítamín inntöku settist ég í stofusófann með fartölvuna í fanginu. Að sjálfsögðu var gluggað í fréttir og myndbrot af gosinu. Mætti í vinnu um hálfátta. Var í bókhaldinu en þegar ég ætlaði að útbúa fyrstu tölur var enginn póstur í sameiginlega pósthólfinu. Fyllti á vatnsflöskuna og settist inn í kaffistofu með kaffibolla og prjónana mína. Um átta leytið fórum við allar þrjár niður. Fyrrum fyrirliði var á ítroðsluendanum og þar var allt með eðlilegum hætti, þ.e. allar framleiðsluskrár höfðu skilað sér. Ég hringdi í kerfisfræðinginn og hann sagði að þá hefði málið eitthvað með póstsendingar að gera. Fyrrum fyrirliði skrapp upp til að athuga hvort sameiginlega innboxið væri líka tómt hjá henni, sem það var. Á meðan hún hafði samband við einhvern sem sér um að þjónusta þetta kerfi RB megin og einnig senda skilaboð til þeirra sem senda okkur listana, tók ég við að hlaða inn skránum og handskrá niður á blað. Sumarstúlkan fékk svo blaðið til að taka til í tegundirnar. Þegar fyrrum fyrirliði kom niður aftur tók hún að sér að fara upp með blaðið og ljósrita það áður en hún kom og leysti mig af. Listarnir skiluðu sér um hálftíu og það náðist að setja eitt útprentað blað með í töskuna áður en hún var sótt, ljósritaða handskrifaða blaðið fór einnig með töskunni. Svo tók við smá bið eftir að viðgerðarmaður kæmi til að setja varahlutinn í prentarann. Höfðum samt alveg nóg að sýsla við á meðan. Ég fékk fyrrum fyrirliða til að hleypa mér inn í kortahvelfingu (það þarf tvo til að opna) og þangað fór ég vopnuð töng og dúkahníf til að opna og skoða í kassana sem komu í hús á mánudaginn. Góðu fréttirnar eru þær að það eru ekki gulir miðar á milli kortanna en þegar við förum að telja kassana inn mun þurfa að "hátta" þá úr plastinu og "klæða" aftur í, því teljararnir ráða ekki við að telja þessi kort í gegnum plastið. Og þetta eru yfir 70 kassar. Það verður eitthvað. Viðgerðarmaðurinn mætti rétt fyrir ellefu og varahluturinn var kominn í rúmu korteri síðar og vélin og framleiðslan á form komin af stað. Framleiddir voru tveir af þremur dögum og var framleiðsla gærdagsins látin bíða til dagsins í dag. Hættum vinnu um hálffjögur og fór ég beint í sund. Synti meira að segja 300 metra eftir fyrstu ferðina af fjórum í kalda pottinn. Eftir síðustu ferðina í þann kalda sat ég á stól í hátt í hálftíma áður en ég fór upp úr og heim. 

Þriðja gosið á rúmum tveimur árum

Það hlaut að enda með gosi. Jörðin við Litla Hrút á Reykjanesi gaf loksins eftir upp úr klukkan hálffimm. Þá var ég líklega að tala við pabba minn rétt áður en ég fór í sund því ég heyrði fyrst af þessu um sex leytið. Var í vinnu milli hálfátta og fimm. Varahluturinn kom loks í hús um það leyti en þar sem hann kom svona seint var ákveðið að bóka viðgerðarmanninn ekki fyrr en um tíu í dag. Það var samt nóg að gera í vinnunni því það komu kortasendingar í hús á föstudag og í gær og það er meira en að segja það að taka upp og telja þúsundir korta, sérstaklega þegar þarf að plokka gula miða sem eru á milli allra korta. Hægt er að telja kortin þótt miðarnir séu í en það verður að plokka þá úr áður en kortin eru notuð í framleiðslu svo að er eins gott að gera þetta bara strax. Vorum þrjár að þessu og plokkuðum úr rúmlega 60 300 korta kössum í gær á ca fjórum og hálfum tíma. Það er þriðjungurinn af sendingunni svo þetta verkefni mun taka meiri tíma og ná yfir fleiri daga, því við munum ekki geta setið eins við þegar vélin verður komin í gang. Þetta verður ekki búið áður en ég fer í frí. En við botnum ekkert í þessar vitleysu að setja gula miða á milli plastanna, þetta er langt frá því að vera umhverfisvænt... 

Veðurblíða

Ég var risin úr rekkju stuttu áður en fyrsti skjálftinn yfir fjórum reið yfir stuttu fyrir klukkan hálfátta í gærmorgun. Fann ekki hristinginn sjálfan þar sem ég var á vappi en varð samt vör við hann. Hins vegar fann ég vel fyrir þeim næsta rétt rúmri klukkustund síðar en þá sat ég í stofusófanum með fartölvuna í fanginu alveg hissa á mér að vera ekki farin í sund. Var mætt í laugina um níu. Hitti á sjósundsvinkonu mína. Ég byrjaði á því að fara í kalda pottinn, synti svo tvöhundruð metra áður en ég fór aftur í kalda pottinn. Fór alls sjö ferðir í þann kalda en aðeins einu sinni í flesta af hinum pottunum, laugina og gufuna. Sleppti þó 42°C pottinum en fór aldrei þessu vant smá stund í nuddpottinn því sjósundsvinkona mín var þar. Eftir síðustu ferðina í kalda settist ég á stól og sólaði mig í næstum hálftíma. Kom heim rétt fyrir tólf. Hellti mér upp á sterkt kaffi og fékk mér eitthvað að borða með. Hlustaði á hádegisfréttir, prjónaði smá og horfði á einn Hawaii 5-O þátt áður en ég fór út í göngutúr. Sá túr átti bara að vera stuttur en endaði á því að verða rúmir fjórir kílómetrar í heildina með smá niðursetningi í milli tíðinni. Labbaði upp að Perlu og þaðan yfir í kirkjugarðinn. Staldraði um stund við leiði móðurforeldra minna og móðurbróður. Rölti svo áfram og út úr garðinum hinum megin við Öskjuhlíð. Þar fann ég fljótlega mjög freistandi bekk á góðum stað og settist niður um stund. Gangan heim var svo meðfram Öskjuhlíðinni framhjá HR og einnig Valssvæðinu. Sá spölur var lengri eða hátt í 2,5. Gangan úr kirkjugarðinum að bekknum var það stutt að hún var ekki skráð sem ganga en leiðin að heiman og að leiðinu var tæpir 2 km. Klukkan var byrjuð að ganga fjögur þegar ég kom heim aftur. Þá lauk ég við að lesa eina af skammtímalánsbókunum af safninu; Dauðaleit eftir Emil Hjörvar Petersen. Mjög svo spennandi bók þar sem aðal söguhetjan skreppur á Hellu og stelst/brýst inn í einn hellinn við Ægisíðu m.a. Ég var svo komin upp í rúm og að lesa þegar stærsti skjálfti gærdagsins og sá stærsti síðan þessar hræringar hófust fyrir tæpri viku, 5,2. Mjög snarpur og langur.

Bongó í borginni

Var snemma á fótum í gærmorgun þótt um helgi væri að ræða, um sex leytiö. N1-sonurinn ekki heima, í bústað í Helludal með systurdóttur minni, kærasta hennar og nokkrum vinum. Hinn sonurinn steinsvaf. Ég var mætt í sund rétt eftir að opnaði. Þar er verið að lagfæra ýmislegt og sumum hefðbundum gönguleiðum að pottum og laug lokað svo fara þurfti krókaleiðir. Það var og er í góðu lagi. Fyndið samt hvað er skrýtið að fara aðrar leiðir. Fór fjórar ferðir í kalda, synti 300 metra, 1 ferð í heitasta, 1 ferð í sjópottinn og svo sat ég smástund í sólbaði áður en ég fór og þvoði mér um hárið á leiðinni upp úr. Var komin til esperanto vinkonu minnar upp úr klukkan tíu. Stoppaði hjá henni í rúman klukkutíma. Kom heim rétt fyrir tólf. Um hálftvöleytið fór ég í stuttan göngutúr. Hitti nágrannana á neðrihæðinni í sólbaði í garðinum, bæði þegar ég fór og þegar ég kom aftur. Hitti líka einn af hópnum "Ljótu hálfvitarnir" á göngunni en sá er pabbi eins ungs manns úr árgangi tvíburanna. Hringdi í pabba sem var að brasa við að koma sólstólunum út á pall. Annars er svo sem lítið að frétta. Ætlunin er að njóta tímans alla daga við alls konar og ekki neitt og allt þar á milli.

Sumarblíða

Vaknaði snemma löngu á undan vekjaraklukkunni. Sat inni í stofu með fartölvuna í fanginu þegar atvinnulausi sonurinn kom fram til að fara á salernið áður en hann færi að sofa um hálf sjöleytið. Hálftíma á eftir honum kom N1 sonurinn fram. Hann var á aukavöktum á miðvikudag og fimmtudag í Borgartúni og upp í Mosfellsbæ. Í gær fór hann á sína vakt á Gagnveg en sagðist svo vera búinn að skipta út helginni. Ég var mætt í mína vinnu rétt rúmlega hálfátta. Var aftur í bókhaldinu. Lítið var hægt að gera í framleiðslunni þar prentarinn er bilaður og beðið er eftir varahlut. Einungis var hægt að framleiða þau kort sem ekki fara á form og í umslag. Tel mig mega skrifa um þetta þar sem bankarnir hafa verið upplýstir. Framleiðslu og talningu var lokið fyrir klukkan tíu. En við gátum hjálpað til í öðrum deildum. Flestum verkefnum var svo lokið um tvö leytið og held að allir hafi verið komnir út í góða veðrið áður en klukkan sló þrjú. Ég var með sunddótið með mér en endaði einhvern veginn heima. Slakaði á í tæpa tvo tíma en heimsótti dönsku nöfnu mína og frænku og kisuna Pixý. Sambýlismaður frænku minnar var að vinna að verkefni en hann kom aðeins og heilsaði upp á mig þegar ég kom. Við frænkur settumst fyrst út á svalir í dágóða stund. Kisu var heitt og hún lá inni í innréttaðri tösku og var vifta á gólfinu fyrir utan til að kæla aðeins loftið í kring. Þegar við frænkur komum aftur inn hafði kisa fært sig í stofu sófann. Hún vildi alveg spjalla smá stund við mig. Ég var komin heim aftur um sjö leytið.