31.12.21

Gamlársdagur

Tók því rólega í gærmorgun. Var þó komin á fætur upp úr klukkan átta. Morguninn fór í netvafr og prjónaskap. Er byrjuð á enn einni tuskunni, að rifja upp mynstrið sikk-sakk. Um ellefu leytið hellti ég upp á könnuna og fékk mér eitthvað að borða. Rétt fyrir tvö skrapp ég í Nauthólsvík. Sjórinn var 0,4°C, það var flóð og fallegt veður. Svamlaði um í rúmlega korter og sat svo annað eins í heita pottinum. Ekki var mjög margt um manninn, það fátt að ekki var röð en við síðustu takmarkanir þurftu starfsmenn aðstöðunnar að fara að telja inn. Það þurfti ekki á þeim tíma sem ég mætti í gær. Gerði mér ferð að Atlantsolíustöðinni við Sprengisand en mér leist ekkert á raðirnar við stöðina og fór þá bara í smá bíltúr í staðinn. Bensínmælirinn segir að tankurinn á eftir einn fjórða eða ca 200 km. Fljótlega eftir að ég kom heim setti ég upp grjónagraut. Að suðu lokinni kældi ég hann niður og í gærkvöldi þeytti ég rjóma og blandaði saman við grautinn. Ég var búin að lofa strákunum þessu að fyrra bragði. N1 sonurinn kom heim af síðustu vakt ársins um hálfníu leytið í gærkvöldi. Hann er nú kominn í helgar og áramótafrí. 

30.12.21

Sá næstsíðasti

Ég var komin í sund um níu í gærmorgun. Byrjaði á að sitja fimm mínútur í kalda pottinum. Synti 400 metra bringusund á brautum 7 og 8. Fór svo beint aftur í kalda pottinn. Eftir þá ferð fór ég í sjópottinn. Sá var í heitara lagi. Sat þar samt í uþb tíu mínútur áður en ég fór í gufu. Að gufubaðinu loknu fór ég í kalda sturtu, fjórar mínútur í kalda pottinn og svo í kalda sturtu á leiðinni upp úr. Kom m.a. við í Fiskbúð Fúsa á heimliðinni og keypti saltfisk og harðfisk. Fljótlega eftir að ég kom heim hellti ég upp á könnuna og fékk mér eitthvað snarl. Dagurinn leið frekar hratt. N1 sonurinn var á sinni næstsíðustu vakt á árinu sá atvinnulausi kom ekki á fætur fyrr en á þriðja tímanum. Ég fékk hann til þess að ryksuga yfir gólfin. Hann var frekar lengi að koma sér að verki en þetta hafðist á endanum. Ég sá um afþurrkið. Hringdi í eina sem vinnur með mér og er líka að halda sig frá vinnustað. Við munum hittast í vinnunni á mánudagsmorguninn. Hún lét vel af sér. Okkur finnst þetta báðum skrýtin staða en þó sammála um að líklega sé hún nauðsynleg. Oddur var glaður að fá saltfisk í kvöldmatinn. Ég var nokkuð sátt við kjör íþróttamanns ársins. Hélt reyndar með fimleikastúlkunni og var ánægð með að hún var í liði ársins. Eins var ég ánægð með þjálfara ársins og að Einar Vilhjálms væri kominn í frægðarhöllina. 

29.12.21

Annar í ekki vinnu

Fór á fætur um hálfátta í gærmorgun eða á sama tíma og ég er vön að vera mætt til vinnu á virkum dögum. Eftir morgunverkin á baðherberginu settist ég inn í stofu með fartölvuna í fanginu og sat þar í rúman klukkutíma. Var mætt í Laugardalslaugina um níu. Byrjaði á því að fara í kalda pottinn í fimm mínútur. Fór svo á braut 7-8 og synti 400 metra, þar af 150 á bakinu. Eftir sundið sat ég aðrar fimm mínútur í kalda pottinum áður en ég e1 ndaði í gufubaðinu. Þvoði mér um hárið. Rétt upp úr klukkan hálfellefu var ég mætt til norsku esperanto vinkonu minnar. Hún bauð mér upp á hátíðar-hafragraut með kanel, bananabitum og rúsínum og kaffi og smákökur á eftir. Stoppaði í rétt rúman klukkutíma. Næst lá leiðin í Krónuna við Fiskislóð. Eftir að hafa verslað rúntaði ég út að Gróttu þar sem ég stoppaði bílinn um stund og horfði á ólgandi brimið. Davíð Steinn var kominn á fætur þegar ég kom heim og gekk hann frá vörunum. Ég setti handklæði í þvottavél og stillti á forþvott og 60° prógramm. Hringdi í númer einnar sem ég var að vinna með fyrir nokkrum árum. Hún svaraði ekki svo ég ákvað að hella mér upp á kaffi áður en ég gerði aðra hringitilraun. Hún hringdi til baka skömmu síðar og við spjölluðum um stund. Önnur af þeim sem stendur vinnuvaktina hringdi í rétt eftir að samtalinu við fyrrum samstarfskonu lauk. Hún var að spá í svolítið varðandi eina endurnýjunina. Ég hringdi líka í æskuvinkonu mína sem býr á Egilsstöðum. Þar var að snjóa svo mikið að hækka varð hitann í innkeyrslunni til að það kerfi hefði undan að bræða snjóinn. Davíð Steinn fór á aukavakt á N1 við Gagnveg milli fjögur og hálfátta. Ég hafði afgang af hryggnum frá því á aðfangadag í kvöldmatinn. Skar hann niður í sósuna með afgangskartöflunum í pott, bætti við rjómaslettu og gulum baunum og hitaði þetta allt saman.

28.12.21

Ekki í vinnu

Í gærmorgun svaf ég þar til vekjaraklukkan fór að hamast. Reyndar hafði ég rumskað aðeins um eitt leytið og ekki sofnað alveg strax aftur en ég veit ekki hvort það hafði einhver áhrif. Var mætt fyrst til vinnu og þá kom í ljós að prentarinn var í flækju og vildi láta slökkva á sér. Ekkert blað var fast í prentaranum en hann var ekki búinn að prenta út pökkunarlista dagsins. Eftir að hafa endurræst prentarann prófaði ég að prenta út fyrstu framleiðslutölur. Bæði listinn og þær töluru skiluðu sér. Vorum þrjár í vinnu. Fyrirliðinn sá um bókhaldshliðina, ég um móttökuendann á vélinni og sú þriðja hlóð inn og sendi verkefnin af stað. Eftir daglega framleiðslu var nóg af endurnýjun til að vinna við. Fyrirliðinn kom að máli við mig um miðjan morgun og sagði að hún og yfirmaður væru sammála um að skipta hópnum upp í ljósi nýjustu smittalna. Svo þrátt fyrir að við séum flestar með örvunarbólusetningarskammt og ein með tvær sprautur og Covid-veikindi að baki þá er ekki talið öruggt að við séum allar að mæta til vinnu. Fyrirliðinn og hin sem var að vinna í gær fengu sérstakt leyfi til að vera aðeins tvær á vinnustað restina af vikunni og þessu ári. Við hinar þrjár mætum næst til vinnu á mánudaginn, annan í nýja ári og ein af okkur vinnur sína 70% stöðu og hættir á hádegi á fimmtudeginum. Svo getur vel verið að sett verði upp svipað plan og tók við þegar við hættum að skiptast alveg upp en vorum bara þrjár í vinnu í einu. Þá vann maður sex virka daga í röð og var "heima" í fjóra virka daga. Ég var komin heim um hálffjögur í gær og ákvað að taka því bara rólega það sem eftir lifði dags og kvölds. Hringdi í pabba. Lánaði bræðrunum bílinn í gærkvöldi og talaði einnig við norsku vinkonu mína í síma. 

27.12.21

Vaknað við klukku

Fór á fætur um níu í gærmorgun. Pabbi var þegar kominn á stjá. Morguninn leið hratt við kapallagnir, spjall og netvafr. Um eitt var ég búin að pakka niður og kvaddi pabba. Fór beinustu leið í bæinn og fékk stæði fyrir framan 15. Gerði tilraun til að hringja í Odd og fá hann til að koma á móti mér og hjálpa mér við dótið. Hann svaraði, var vís á prívatinu. Ég komst samt með allt inn í einni ferð en það munar líka helling um að ferðataskan er á hjólum. Davíð Steinn var að vinna. Pabbi ætlaði að skreppa í kirkju. Það var auglýst messa á Keldum í dagskránni. En þegar hann mætti á staðinn kom hann að lokuðum dyrum svo úr þessu varð einungis hressandi bíltúr. Er búin að lesa þrjár safnsbækur af fjórum en ekki byrjuð á jólabókunum. 

26.12.21

Annar í jólum

Ég rétt hafði það af að komast á fætur áður en klukkan sló tíu í gærmorgun, þá búin að sofa í um átta tíma. Pabba var kominn á fætur og sat við eina tölvuna sína. Ég fékk mér lýsi og egg og fljótlega hellti ég upp á könnuna. Svo fór dagurinn í svipaða hluti og í fyrradag; lesa, prjóna, leggja kapla og vafra um á netinu. Ég setti upp kartöflur um hálfsex, bjó til jafning og lagði á borð. Pabbi skar niður hangiketssneiðar og sá svo um uppvaskið á eftir. Sátum fyrir framan sjónvarpið þar til myndin um æskuár Astridar Lindgren var búin. Lögðum svo nokkra fleiri kapla. Pabbi bauð góða nótt um ellefu en ég settist aðeins við tölvuna. Var þó búin að slökkva á henni fyrir miðnætti. 

25.12.21

Jóladagur

Var komin á fætur fyrir klukkan hálfníu í gærmorgun og á undan pabba. Hann var reyndar búinn að vakna en ekkert að drífa sig. Það var opið í sund í gær en ekki fyrr en frá átta og það finnst honum of seint svo hann sleppti sundferð. Dagurinn leið í rólegheitum, lestur, prjón, kapallagnir og almennt dunderí. Upp úr klukkan eitt kryddaði ég vænan hrygg, sem systir mín gaf pabba, í ofnpott inn í ofn á 120°.  Var ekki viss um þyngdina á hryggnum en um kaffi leytið hækkaði ég hitann upp í 150° og um hálfsex upp í 250° og tók lokið af pottinum. Setti upp kartöflur og bjó til sósu með þessu. Maturinn var tilbúinn á slaginu sex og var virkilega góður. En það er alveg slatti af afgangi eftir. Pabbi sá um uppvaskið. Ég færði honum rauðvínsflösku. Var búin að gerar nokkrar tilraunir til að athuga hvort krossgátubók ársins 2022 væri komin út því í mörg ár hef ég gefið pabba slíka bók í jólagjöf. Um sjö leytið opnaði ég bögglana mína. Fékk matreiðslubók og gjafakort frá RB, múmín kaffakrús frá Salt/Pay, gjafakort frá pabba, prjónabók með vettlingamynstri (og vettlinga) frá tvíburahálfforeldrum mínum, vatnsflösku frá kisunni Pixý, prjónabók og skáldssögu frá Oddi Smára og þrjár tegundir af kaffi og bók eftir Mikael Torfa (bréf til mömmu hans) frá Davíð Steini og svo nokkur jólakort að auki. Við feðgin vorum á fótum fram eftir kvöldi og fram á nótt.

24.12.21

Aðfangadagur

Klukkan var að verða níu þegar ég vaknaði í gærmorgun. Pabbi var nýlega kominn heim úr sundi þegar ég kom fram stuttu síðar. Um hálftólf bauð hann mér á Kanslarann. Þar var ekki skata heldur jólaskinka í matinn en þó nokkuð að gera við að svara símanum og segja "því miður, nei, það er ekki skata". Við feðgin vorum einu gestirnir. Það kom reyndar einn maður inn en hann var að spyrja um skötu og fór strax aftur eftir neikvætt svar. Komum við í búðinni á leiðinni til baka. Aldrei þessu vant þá gleymdi ég ferðasnyrtisettinu og tannburstanum heima. Keyptum malt, grænar baunir og Síríus-suðusúkkulaði í leiðinni. Annars leið dagurinn nokkuð fljótt við lestur, prjón og kaplalagnir. Hellti mér upp á sterkt kaffi um þrjú leytið í kaffitímanum. En í kvöldmat fékk ég mér eina mandarínu, mjög södd eftir hádegið og kaffitímann. Fékk mér svo tvö vínglös í gærkvöldi.

23.12.21

Jólafrí

Stillti ekki á mig neina klukku þegar ég fór að sofa í fyrrakvöld. Vaknaði við jarðskjálftann um hálffimm en sofnaði fljótlega aftur og svaf til klukkan átta. Sat í stofunni með fartölvuna í fanginu þegar næstu skjálftar yfir 4 riðu yfir. Fór í sund um tíu. Skrapp á tvo staði í Kringlunni eftir sundið og skutlaðist svo með síðasta jólakortið vestur í bæ til norsku esperantovinkonu minnar. Hún varaði mig við að hún væri með kvef en ég þáði samt hjá henni tvo bolla af kaffi. Kom heim upp úr klukkan hálfeitt. Pakkaði niður en fór svo aðeins í tölvuleik aftur. Kvaddi synina um þrjú og brunaði beint austur á Hellu til pabba. 

22.12.21

Jarðhræringar

Vaknaði rétt upp úr klukkan sex í gærmorgun, nokkuð á undan vekjaraklukkunni. Var mætt fyrst af fjórum til vinnu. Sú sem kom inn á móttökuendann á vélinni með mér bað um að fá að vera áfram á vélinni eftir kaffi. Skiptum okkur í kaffi og þær sem voru frammi fóru á undan og leystu okkur af um tíu. Daglegri framleiðslu lauk um tólf og einnig náðist að framleiða 1000 í viðbót af 4000 gjafakortum. Reyndar voru pöntuð 1000 gjafakort í hádeginu sem fóru aftast í röðina. Yfirferð var á vélinni frá hádegi. Ein af okkur var í fríi eftir hádegi og ég fékk að fara aðeins á undan hinum, um þrjú. Labbaði á Grettisgötuna til Lilju. Afhenti henni jólakortið sitt og þáði kaffi. Tók 13 frá Bíó Paradís rúmlega fjögur og fór ekkert út aftur eftir að ég kom heim. Var með rauðrófubuff og hrísgrjón í matinn. 

21.12.21

Heildarfærsla no 3100

Vaknaði góðri stund á undan vekjaraklukkunni. Dreif mig á fætur og heyrði í N1 syninum hamast á lyklaborðinu sínu. Hann kom fram skömmu síðar og var farinn af stað í sína vinnu á undan mér. Ég var mætt í mina vinnu fyrst af þremur, hinar tvær voru í fríi. Ég var skráð á móttökuendann en sú sem var skráð á ítroðsluendann og var þar á föstudaginn var bað mig um að skipta við sig. Dagleg framleiðsla gekk vel en hluti af endurnýjuninni var gallaður. Sem betur fer eyðilögðum við ekki mörg kort því kerfisfræðingur hafði beðið okkur um að fara varlega í gang með endurnýjunina, hafði sennilega grun um gallann. Í hádeginu voru pöntuö 4700 gjafakort. Gátum framleitt og sent 700 af þeim með hádegistöskunni. Milli hálfeitt og þrjú var verið að taka afrit af vélinni en síðasta klukkutímann framleiddum við fyrstu 1000 gjafakortin af 4000. Kom rúmlega fjögur. Anna frænka mín Önfjörð hafði samband við mig nokkru áður og hún kíkti í heimsókn rétt fyrir fimm með pakka til mín frá kisunni Pisý. Ég var búin að hella upp á könnuna og frænka mín, systurdóttir mömmu, stoppaði í um klukkustund. Ég fór ekkert út úr húsi aftur. 

20.12.21

Eftir helgina

Svaf til klukkan að byrja að ganga tíu í gærmorgun. Næstu tvo tíma eftir að ég fór á fætur var ég að leika mér og vafra um á netinu. Hellti mér upp á kaffi um hádegið og var þá búin að taka ákvörðun um að skrópa í sund. Dútlaði mér við ýmislegt hérna heima en tók þó ekki fram prjónana og ekki bók fyrr en ég fór í háttinn í gærkvöldi. Lánaði bræðrunum bílinn seinni partinn í jólabögglaútkeyrslu og stúss. Dagurinn leið frekar hratt þrátt fyrir allt, eiginlega alltof hratt. 

19.12.21

Ljósfjólublár himinn

Vaknaði rétt fyrir hálfátta í gærmorgun. Gaf mér tíma til að vafra um á netinu og setja í þvottavél áður en ég fór í sund. Ég var að velta því fyrir mér að geyma hárþvott í nokkra daga en ákvað svo að þvo mér um hárið eftir sundrútínuna. Næsti "hárþvottadagur" er jóladagur en ég mun flýta honum um tvo til þrjá daga. Sundrútínan gekk annars vel fyrir sig. Breytti henni aðeins. Þrjár ferðir í kalda, tvær í heitasta, 300m sund, þar af 250m á bakinu, gufa, köld sturta, sjópottur, loka ferðin í þann kalda og svo sat ég smá stund úti á stól áður en ég fór inn að þvo á mér hárið. Hengdi upp úr þvottavélinni þegar ég kom heim. Hellti upp á kaffi og fékk mér eitthvað snarl. Stuttu fyrir tvö dreif ég mig af stað aftur og gerði mér ferð á Selfoss. Byrjaði á að koma við í Fossheiðinni, skila af mér pakka og korti, taka móti pakka og korti í staðinn og þyggja kaffi og veitingar. Stoppaði í um klukkustund. Næst lá leiðin til Jónu og Reynis með tvö jólakort, annað til þeirra og hitt til Gerðar og fjölskyldu. Þau Reynir og jóna gista á hóteli í Keflavík aðfaranótt næsta þriðjudags og fljúga út morguninn eftir. Koma heim aftur rúmri viku síðar. Færði þeim líka eldhúshandklæði og borðtusku. Þau voru að byrja kaffitímann sinn þegar ég kom og þáði ég kaffi og meðlæti þar einnig. Stoppaði í um klukkustund og keyrði Þrengslin í bæinn aftur. Um hálfátta leytið bauð ég strákunum með mér á Pítuna. Oddur var bílstjóri svo ég ákvað að splæsa á mig einu hvítvínsglai með matnum.

18.12.21

Á leið í sund

Ég var mætt fyrst af þremur til vinnu í gærmorgun. Stuttu síðar  mætti sú næsta en sú þriðja hringdi og tilkynnti að hún yrði aðeins sein. Hún var þó mætt áður en við fórum að framleiða. Reyndar hefðum við aldrei byrjað án hennar því reglurnar segja að við verðum að vera þrjár. Ég var á móttökuendanum á vélinni. Lentum í smá basli með að framleiða tvær af tegundunum úr fyrsta verkefninu. Kerfisfræðingarnir tveir mættu á svæðið, fundu út úr villunni og við náðum að skila af okkur á réttum tíma. Þeir voru að vinna í að laga það sem var í ólagi í fyrradag og það gekk líka upp. Þegar vinnu lauk um hálffjögur vorum við með hreint borð hvað dagleg verkefni varðar. "Á kantinum" bíða svo tvær stórar endurnýjanir, alls um tíu þúsund kort. Ég var komin heim um fjögur. Klukkan var fimm þegar ég lagði á planið við Nauthólsvík. Sjórinn orðinn 3,6°C, flóð og ég svamlaði um í uþb tuttugu mínútur. Hitti eina úr sjósundshópnum í heita pottinum. Hún var búin að fara í sjóinn. Við spjölluðum í nokkra stund en ég var á undan upp úr. Gerði mér ferð á AO við Sprengisand á heimleiðinni og fyllti á tankinn.

17.12.21

Helgi framundan

Vaknaði við vekjaraklukkuna í gærmorgun, sem kemur fyrir en er frekar sjaldgæft. Kom við í bakaríinu við Skúlagötu á leiðinni í vinnuna. Það bakarí opnar klukkan hálfátta virka daga og ég kom að um það leyti sem verið var að opna. Vorum fjórar í vinnu og ég var í bókhaldinu. Fyrsti framleiðsluskammtur gekk vel. En kerfisfræðingur hafði samband við mig og sagði okkur að bíða með að hlaða inn næsta skammti og framleiða þar til hann kæmi á staðinn. Þegar það mátti svo fara í gang gekk ágætlega til að byrja með. Það átti aðeins eftir að framleiða einn skammt úr verkefni tvö þegar upp kom villa og framleiðslan stoppaði. Villan hafði líka áhrif á hádegisframleiðsluna. Tvær af okkur gerðu sér ferð yfir í K2 í hádeginu, fengu hangiket og meðlæti að borða og komu til baka með jólagafirnar okkar.

Ég  kom heim upp úr klukkan þrjú. Um hálffimm var ég komin á planið við Laugardalslaug eftir að hafa komið við í Fiskbúð Fúsa. Hringdi í pabba áður en ég fór lengra. Svo skellti ég mér beint í sund. Synti í korter, fór tvisvar í kalda, einu sinni í heitasta og endaði í gufubaði. Ætlaði að fylla á bílinn áður en ég fór heim en mér leist ekkert á röðina við AO við Sprengisand svo ég ákvað að geyma það verkefni aðeins. 

16.12.21

Langur vinnudagur

Ég var mætt fyrst í vinnu í gærmorgun í bleiku regnkápunni. Laumaði pakka undir tréð við kaffistofuna og setti ostaþrennuna í ísskápinn. Vorum allar mættar og kerfisfræðingarni komu um svipað leyti. Verið var að breyta sendingaleið fyrstu tveggja verkefnanna yfir á framleiðsluvélina. Það var pínu vesen en fyrsta verkefnið kláraðist þó rétt um tíu. Alveg á tíma nema sendillinn hafði gert tilraun til að nálgast töskuna og kortin hálftíma fyrr svo hann þurfti að koma aftur. Ég var að flokka kennispjöld fram að kaffi en á móttökuendanum fram að hádegi. Erfiðlega gekk að koma verkefni tvö yfir en við gátum afgreitt gjafakortapöntun og svo hádegis framleiðsluna. Um tvö var ekki enn farið að framleiða debetið en við eftirlétum kerfisfræðingunum að vinna í og finna út úr málunum í rúma klukkustund og héldum "litlu jólin" frammi í kaffistofu. Tveir af fjórum öðrum höfðu missreiknað daginn og þar sem þeir voru ekki með böggla undir tréð vildu þeir ekki taka þátt í kaffisamsætinu. Ég var reyndar sú eina sem drakk kaffi með smákökunum, ostatertunni, ostunum, mandarínunum og vínberjunum því boðið var upp á kók, malt og appelsín með. Þá drykki drekk ég hins vegar ekki. Aðeins byrjaði að þokast í framleiðslunni þegar við komum inn aftur. Tvær þurftu að fara fljótlega og sú sem var í bókhaldinu fór um hálffimm. Þá var framleiðslan loksins að komast á fullt. Kom heim um hálfsjö og fór ekkert út aftur. 

15.12.21

Miðvikudagur

Vaknaði rétt rúmlega sex í gærmorgun. Fór aftur í bleiku regnkápunni í vinnuna. Mættum fjórar, ein var enn í fríi. Ég var að hlaða inn verkefnum og senda þau af stað á framleiðsluvélinni fram að kaffi. Eftir kaffi fór ég á móttökuendann. Engin gjafakort í framleiðslu og heldur ekki alveg komið að endurnýjun. Daglegri framleiðslu lauk um tólf. Eftir hádegi flokkaði ég kennispjöld í hálftíma og taldi svo úr seinni tveimur vögnunum með þeirri sem var í bókhaldinu. Korter yfir tvö mætti yfirmaður okkar á svæðið. Við fórum með henni fram í kaffistofu og héldum fund og settum upp næsta skipulagsverkefni. Vinnu lauk upp úr hálffjögur. Ég kom heim um fjögur og fór ekkert út aftur. Skrifaði níu jólakort en lét hvítvínið vera. Á nú aðeins eftir að skrifa þrjú síðustu jólakortin en það eru kort sem ég sendi ekki með póstinum heldur afhendi sjálf. Á samt eftir þrjú frímerki en ætla að bjóða deildinni að nota þau til að senda jólakort frá okkur.

14.12.21

Þriðjudagur

Fór í bleiku regnkápunni í vinnuna í gærmorgun. Við vorum þrjár að vinna og tvær í fríi. Ég var skráð í bókhald en ég er líka skráð í bókhald á fimmtudaginn og önnur af þeim sem var í gær var ekkert skráð í bókhald í þessarri viku svo ég bauð henni að vera í bókhaldinu í gær. Hinni bauð ég að velja á hvorum endanum hún væri á vélinni, hún var nefnilega ekki skráð á vélina fyrr en eftir kaffi heldur önnur þeirrar sem er í fríi og sú sem ég bauð að taka að sér bókhaldið. Úr varð að hún valdi móttökuendann. Allri framleiðslu var lokið upp úr klukkan tólf og rúmlega tvö var öllum verkum lokið. Hefðum að vísu getað flokkað kennispjöld en við ákváðum að hætta vinnu. Ég var komin heim upp úr klukkan hálfþrjú. Strákarnir voru báðir heima, annar að fá sér að borða og hinn var nýlega vaknaður. Fljótlega tók ég til sjósundsdótið, bókasafnspokann og þrjú af fimm jólakortum sem ég var búin að skrifa. Byrjaði á því að skreppa í pósthúsið. Rétt áður en kom að mér kom séra Pétur að. Hann bað mig um að leysa út sendingu fyrir sig og kirkjuna og það gat ég og mátti, póstlagði bréfin og keypti 20 frímerki. Næst lá leiðin í bókasafnið. Skilaði bókunum tveimur og fékk mér fjórar í staðinn. Eftir sjósundsferð, tuttugu mínútur í 2,2°C sjónum og 15 í pottinum skrapp ég aftur í Kringluna á tvo staði. Eftir kvöldmat skrifaði ég svo átta jólakort og þá er aðeins eftir að skrifa 12 í viðbót. 

13.12.21

Mánudagur

Heyrði í N1 syninum fara upp úr klukkan níu í gærmorgun. Ég kúrði aðeins lengur. Eftir að ég fór á fætur settist ég niður í stofu með fartölvuna í fanginu og tíminn flaug. Fór ekkert út í gær en ég er búin að skrifa öll jólabréfin þrjú, utan á öll 25 umslögin og fimm af tuttuguogfimm jólakortum. Fékk mér ekkert hvítvín í þessum aðgerðum í gær en drakk litlu flöskuna, ca eitt glas, í fyrrakvöld þegar ég var að skrifa síðasta jólabréfið. Kláraði þau skrif í gær. Lauk líka við að lesa síðustu bókina af safninu, Svört perla eftir Lizu Marklund. Þær eru reyndar aðeins tvær bækurnar af safninu í fórum mínum og skilafresturinn rennur út á morgun en má framlengja um 30 daga. N1 sonurinn hringdi þegar rúm klukkustund var eftir af vinnunni hjá honum. Hann ætlaði að ljúka vaktinni en var að spyrja hvort hægt væri að sækja hann um átta. Oddur Smári fékk sér bíltúr þegar nálgaðist "hættutíma" hjá Davíð Steini. Fékk samt sama stæðið fyrir utan þegar þeir komu til baka.

12.12.21

Rólegheit

N1 sonurinn fékk leigubílakort til að komast í vinnuna um helgina. Ég heyrði hann fara upp úr sjö í gærmorgun en fór ekki sjálf á fætur fyrr en klukkan var byrjuð að ganga níu. Var komin í sund um níu. Synti ekki mikið en samt smá á bakinu. Fór tvisvar í kalda, einu sinni í heitasta og endaði í gufu. Var að þvo á mér hárið upp úr klukkan tíu og mætt hjá norsku esperanto vinkonu minni um hálfellefu. Hún var með smákökur handa mér og kryddbrauð til strákanna. Hún bauð upp á graut, kaffi og smákökur og ég stoppaði hjá henni í rúma klukkustund. Kom við á tveimur öðrum stöðum áður en ég fór heim. Seinni staðurinn var Krónan, hálfur mánuður síðan ég verslaði síðast. Fékk stæði fyrir utan hér heima og komst inn með allt í einni ferð. Fljótlega hellti ég mér upp á könnuna. Skrifaði eitt jólabréf á ensku og byrjaði á þriðja og síðasta jólabréfinu sem er á dönsku. Skrifaði utan á eitt umslag en lengra komst ég ekki í jólakortaskrifum í gær. Semsagt ekki búin að skrifa á eitt einasta kort. En það stendur til bóta í dag. Horfði á einn leik í enska og glefsur úr tveimur öðrum og svo festist ég í myndinn Love actually sem sýnd var á Sjónvarpi símans. Hef þó horft á þessa mynd nokkrum sinnum.

11.12.21

Ekki á skutlvakt

Ég var vöknuð upp úr klukkan fimm í gærmorgun, eiginlega útsofin. Reyndi að kúra lengur en þegar ég heyrði Odd Smára banka á stofuhurðina til að "ýta" við Bríet ákvað ég að fara á fætur. Bríet var á leið í flug, átti að vera mætt á Reykjavíkurflugvöll fyrir klukkan hálfsjö. Hún sagðist hins vegar alltaf þurfa að gefa sér góðan tíma til að vakna. Við sátum í stofunni öll þrjú í nokkra stund og spjölluðum. Svo fór frænka mín að klæða sig í hvert fatalagið á fætur öðru. Þetta gerði hún m.a. til þess að lágmarka það sem hún tók með sér sem farangur. Hún var með einn stóran bakpoka. Þar sem hún má samt ekki halda á neinu sá Oddur um burðinn og á vellinum var samið um að bakpokinn færi í farangursrými flugvélarinnar ásamt töskum hinna farþeganna.

Var mætt í vinnu um hálfátta. Oddur var ekki kominn heim þegar ég lagði af stað enda ákvað hann að bíða með frænku sinni þar til hún fór um borð í vélina til Akureyrar. Vorum þrjár í vinnu og minn vinnustaður var á ítroðsluenda vélarinnar. Það kom í ljós í byrjun að slökkt hafði verið alveg á vélinni daginn áður, ekki við sem vinnum við hana, heldur þeir sem eru að uppfæra kerfin og voru að testa. Það þurfti að endurræsa allan hugbúnaðirnn áður en allt komst í gang en það hafðist eftir smá stund og við vorum búnar með fyrsta framleiðslu skammt rétt upp úr klukkan niu. Hádegisframleiðslan tók sinn tíma því þá var komið að því að prófa nýja sendingaleið að það sem framleiða átti. Það tók fjórar eða fimm tilraunir til að fá það til að virka og afhendingunni seinkaði um tæpan hálftíma. Létum vita af seinkuninni í tíma og þeir sem áttu að fá þessa framleiðslu voru mjög glaðir þegar í ljós kom að seinkunin var ekkert svo mikil. Reyndar var hún innan "gömlu" afhendingarmarkanna.

Kom heim aftur um þrjú. Seinni partinn skrapp ég í sjóinn, 0,9°C og samt ætlaði ég ekki að tíma því að fara upp úr aftur. Svamlaði um í uþb korter og var styttri tíma í heita pottinum. Kom við í vínbúðinni á heimleiðinni og verslaði tvær hvítvínsflöskur, eina af minnstu gerð og aðra um 500ml. 

10.12.21

Vaknað snemma

Ég var mætt fyrst til vinnu í gærmorgun. Fram að kaffi undirbjó ég pökkun, flokkaði kennispjöld og taldi með þeirri sem var í bókhaldinu þegar fyrstu tölur voru tilbúnar. Eftir kaffi fór ég á ítroðsluendann á vélinni. Allri framleiðslu var lokið um tólf, bæði daglegri sem og gjafakort. Fljótlega eftir hádegi var ég farin að flokka kennispjöld aftur. Um tvö fór ég með 14 kassa af flokkuðum kennispjöldum inn í geymslu og sótti 15 óflokkaða kassa í staðinn. Hættum vinnu upp úr klukkan hálfþrjú. Var komin heim um hálfþrjú. Synir mínir voru að erindast á bílnum. Þegar þeir komu um fjögur leytið kom yngri systurdóttir mín með þeim. Pabbi hafði skutlað henni í bæinn og þau hringdu í annan hvorn strákinn og biðu fyrir utan eftir þeim. Vissu líklega ekki að ég var komin heim. Pabbi fór beint austur aftur eftir að strákarnir komu og héldu á dótinu hennar Bríetar inn. Hún reif eitthvað upp í skurðinum í vikunni og er aftur komin í veikindaleyfi. Má ekki lyfta neinu í eina til tvær vikur, ekki einu sinni reyna að standa upp ef hún dettur á gólfið. 

9.12.21

Fimmtudagur

Rumskaði einhvern tíman um tvö leytið í fyrrinótt. Var ekki mjög fljót að sofna aftur en það var samt ekkert óþol í mér og ég fór hvorki fram né kveikti ljós til að lesa. Ég sofnaði örugglega aftur og svaf alveg þar til vekjaraklukkan gaf til kynna að kominn væri fótaferðatími fyrir þá sem væru á leið í vinnu. Ég var fyrst á vinnustað í gærmorgun en sú sem oftast kemur á undan mér var og er í fríi næstu daga. Var á móttökuendanum á vélinni fram að kaffi og í pökkun og talningum fram að hádegi. Eftir hádegi átti aðeins eftir að framleiða tæplega níuhundruð gafakort. Framleiddum þau þó ekki öll, skildum eftir ríflega hundrað. Hættum vinnu um hálfþrjú. Stoppaði heima til klukkan að verða hálffimm en þá tók ég til sunddótið mitt, sópaði af bílnum og fór í Laugardalslaugina. Byrjaði á því að synda. Ekkert bólaði á kalda potts vinkonu minni á meðan ég var í kalda potts rútínu það var ekki fyrr en ég var að koma úr gufunni og á leiðinni upp úr um sex að hún mætti á svæðið. Venjulega er hún að koma beint úr leikfimi um hálfsex en í gær var hún að koma af fundi vegna ferðar sem hún er að fara í um komandi helgi. Þegar ég kom heim var Davíð Steinn búinn að elda og þeir bræður sestir að snæðingi. Notalegt að koma heim og maturinn er tilbúinn. 

8.12.21

Vikan uþb hálfnuð

Það sem tíminn æðir áfram og ekkert hægt að gera í því nema hamast við að njóta augnablikanna á mismunandi skynsaman máta. Í gær vann ég í bókhaldinu í vinnunni. Það kom strax í ljós að fyrstu tölur höfðu ekki skilað sér einhverra hluta vegna, skráin var á núlli. Það er ekki eðlilegt ástand svo ég fór beint í að senda skilaboð á alla hluteigandi. Þar fór allt í gang fljótlega til að skoða og laga og um ellefu kom þessi skrá loksins yfir á framleiðsluvél. Í staðinn ætluðu þær sem voru á vélinni fram að kaffi að vinna að verkefni tvö en þá vildi ekki betur til en einn módúllinn var ósamvinnuþýður. Úr varð að setja af stað gjafakortaframleiðslu því viðkomandi módúll tengist þeirri framleiðslu ekkert. Rétt fyrir níu mættu kerfisfræðingar á svæðið og voru þeir fljótir að kippa módúlamálunum í lag. Málin þróuðust þannig að öll dagleg framleiðsla var kláruð og talningarnar gerðar fljótlega eftir hádegi á öllum framleiddum tegundum. Svo náðist að klára endurnýjun. Ég fór í að flokka kennispjöld síðasta klukkutímann í vinnunni. Hætti vinnu um hálffjögur. 

7.12.21

Þriðjudagsmorgun

Vaknaði rétt upp úr klukkan sex, að minnsta kosti korteri áður en vekjarinn átti að hringja. Slökkti í vekjaranum, klæddi mig og bjó um. Ég var búin að sitja inni í stofu með fartölvuna á hnjánum í amk tíu mínútur áður en N1 sonurinn kom fram. Hann var svo farinn á undan mér. Ég var mætt fyrst í mína vinnu um hálfátta. Vorum allar fimm í gær og ég var á ítroðsluendanum á vélinni milli tíu og rúmlega tólf. Reyndar gátum við ekki byrjað fyrr en klukkan var langt gengin í ellefu því kerfisfræðingarnir yfirtóku vélina þegar við fórum í kaffi og þurftu þennan tíma til að gera tilraunir. Þannig að í stað þess að ljúka við dk framleiðslu dagsins fórum við næstum beint í hádegisframleiðsluna. Framleiddum reyndar tvær síðustu skrárnar fyrir einn bankann en þá voru tvær skrár úr einum banka eftir. Þær sem voru á vélinni fram að kaffi fóru aftur á hana eftir hádegi. Hættum vinnu rétt fyrir hálffjögur. Ég stoppaði heima í tæpa klukkustund áður en ég dreif mig í Nauthólsvík og 2,1°C sjóinn. Var næstum því tuttugu mínútur að svamla í sjónum og kannski eitthvað svipað sem ég sat í pottinum. Held samt að ég hafi verið styttra í pottinum en sjónum.

6.12.21

Tíminn þýtur

Vaknaði rétt fyrir klukkan níu í gærmorgun. Fór á fætur og eftir morgunverkin á baðinu kveikti ég á einni tölvunni hans pabba. Sat svo við hana í um klukkustund. Pabbi kom fram um tíu leytið og byrjaði á því að skrá niður sínar mælingartölur um hitastig og fleira. Við fengum okkur harðsoðin egg og hann setti fleiri upp. Ég fór í kaplakeppni við sjálfa mig. Um hálftólf hellti ég mér upp á kaffi. Pappírinn sem ég keypti til að setja inn í dökku jólakortin mætti alveg nota sem jólakort ein og sér. Hann er 220 gr. Ákvað samt að nota hluta af honum inn í tilvonandi jólakort þessa árs. Lauk við að brjóta og líma 20 stk. inn í grænu, bláu, rauðu og svörtu jólakortin. Um hálftvö kvaddi ég pabba minn og frænku mína og lagði af stað heim. Kom við hjá Jónu Mæju og Reyni. Þeim hálfbrá þegar ég hringdi dyrabjöllunni þeirra því það kemur svo sjaldan nokkur til þeirra þessa dagana. En þau tóku fagnandi á móti mér og ég stoppaði hjá þeim í kaffi í um klukkutíma. Þau fara til Danmerkur um jólin svo ef ég er skynsöm þá klára ég jólabréf og kort til Gerðar og bið þau fyrir það áður en þau fara út. Jóna Mæja sýndi mér svolítið þegar ég kom. Þegar hún varð sextug fyrir átta árum gaf ég henni útsaumað stjörnumerkið sitt með nafninu sínu undir. Það átti bara eftir að finna ramma utan um útsaumið. Afmælið var haldið í Reykjavík á sínum tíma hjá aldraðri móður hennar. En svo tíndi hún þessari gjöf og var búin að leita öðru hvoru. Þetta fannst loksins um daginn þegar hún tók fram gjafapoka til að endurnýta. Ég kom heim um fimm leytið. Tæpum tveimur tímum seinna tók Davíð Steinn að sér að elda úr "jólaglaðningum" frá RB. T-bone steik með alls konar meðlæti og ofnbakaður gullostur í forrétt. 

5.12.21

Á Hellu

Svaf til klukkan langt gengin í átta í gærmorgun. Dreif mig beint í sund og rútínan þar tók rúma tvo tíma með hárþvottinum í lokin. Það var ekki fyrr en ég kom heim úr sundi og búin að hella mér upp á kaffi og finna mér eitthvað snarl að ég settist niður í stofu með fartölvuna í fanginu og kaffibollann á kantinum. Eftir smá leiki, netvafr og blogginnfærslu sótti ég þvottinn minn í þvottahúsið. Pakkaði niður í tösku, gat aðeins vakið annan strákinn til að kveðja. Lagði svo af stað austur upp úr klukkan hálfeitt. Kom við í Fossheiðinni á Selfossi. Stoppaði þar í um klukkustund áður en ég hélt för áfram á áfangastað. Byrjaði á því að fara í smá kaplakeppni við pabba en eftir kaffitímann horfðu við á seinni hálfleik í leik þar sem Liverpool var að keppa á útivelli. Staðan var markalaus þar til á síðustu mínútu uppbótartíma að Liverpool náði inn marki og tók öll stigin þrjú. Chelsea hafði tapað óvænt í hádegisleiknum svo "mitt" lið var á toppnum þar til eftir Man. City var búinn að vinna sinn leik og er fyrir vikið á toppnum stigi ofar en Liverpool. Eldaði grjónagraut í matinn. Fékk mér hvítvín eftir fréttir og við pabbi horfðum saman á Emil í Kattholti. 

4.12.21

Hádegi

 sem er vön að vera mætt fyrst á vinnustað þegar hún er ekki í fríi eða lasin mætti síðust í gærmorgun. Ein af okkur hinum þremur sem erum í 100% stöðu reyndi að hringja um átta en síminn hjá þeirri sem ekki var mætt hringdi út. Þá  hringdi hún í dóttur viðkomandi og það kom í ljós að mamman hafði sofið yfir sig. Hún átti að vera á móttökuendanum á framleiðsluvélinni en ég skipti við hana og í staðinn fór hún inn á vél eftir kaffi og á móttökuendann eftir hádegi. Þar sem fella þurfti jólahlaðborð vinnustaðarins niður vegna veiru og hertra reglna fengum við jólaglaðning, gott að borða, velútilátið fyrir tvo og þríréttað. Það mátti sækja þetta seinni partinn á fimmtudaginn en við fengum okkar sent í K1 í gær. Vegna aukafarangursins þáði ég boð um far heim eftir vinnu frá þeirri sem býr í Garðabæ. Um hálffimm fór ég í Nauthólsvík. Það var stillt veður, flóð og sjávarhiti 2,2°C. Ég var að svamla um í sjónum í uþb korter og sat svo annað eins í heita pottinum áður en ég fór upp úr og heim. Lánaði bræðrunum bílinn um sjö og fram eftir kvöldi. Þeir voru boðnir í 25 ára afmæli einnar skólasystur þeirra úr Hlíðarskóla. Vorum beðnir um að vera búnir að taka hraðpróf og ekki mæta nema þeir væru neikvæðir. Ég hafði það notalegt fyrir framan imbann til klukkan að verða ellefu. Þá fór ég í háttinn, kláraði að lesa bókina Bláleiftur eftir Ann Cleves og byrjaði á Svörtu perla eftir Lizu Marklund.

3.12.21

Morgunstund

Við vorum fjórar í vinnu til hádegis og þrjár eftir hádegi. Ég vann á vélinni allan daginn en skipti reglulega um enda. Gátum lokið við stóra gjafakortapöntun og sent frá okkur upp úr hádeginu. Vinnudagurinn leið hratt þótt hann stæði yfir til klukkan langt gengin í fjögur. Kom við í Eymundsson í Austurstræti og keypti mér hvítan pappír til að setja inn í dökku jólakortin. Fjárfesti einnig m.a. í pennum. Klukkan var orðin hálffimm þegar ég kom heim og enn og aftur skrópaði ég í sund. Fór ekkert út aftur. Hafði til kvöldmat um sjö. Annar sonurinn reyndar að vinna og hinn hafði pantað sér pizzu en gekk þó frá í eldhúsinu. Horfði á megnið af Man. Utd - Arsenal leiknum en fór inn í rúm að lesa korteri áður en leiknum lauk. 

2.12.21

Fimmtudagsmorgunn

Vaknaði nokkrum mínútum áður en vekjarinn átti að fara af stað í gærmorgun. Fór á fætur og gaf mér tíma til að vafra um á netinu. Var mætt fyrst í vinnuna af þremur um hálfátta. Hinar tvær voru í fríi. Ein vann í bókhaldi, "frystingum", mánaðamóti og álíka stússi á meðan við hinar tvær skiptum með okkur verkum á framleiðsluvélinni. Ég var í móttökunni fram að hádegi og hefði verið allan daginn ef hin hefði ekki beðið mig um að skipta við sig. Eftir hádegi vorum við aðallega að framleiða gjafakort en þar sem var lítið að gera hjá mér nema að telja hráefnið áður en ég setti það af stað í gegnum vélina þá tók ég að mér að hjálpa bókaranum að telja alla framleiðslu dagsins. Hættum framleiðslu rétt rúmlega þrjú, "háttuðum" vélina og gengum frá. Ég tók strætó klukkan hálffjögur og var komin heim tæpu korteri síðar. Klukkan var nokkuð langt gengin í fimm þegar ég dreif mig í sund. Synti smávegis og var svo í minni annarri ferð í 7,3°C kalda pottinum þegar kalda potts vinkona mín mætti. Beið eftir henni á meðan hún skrapp aðeins í heitasta pottinn og sat svo áfram allan tímann í hennar fyrstu ferð í kalda. Fórum fjórar aðrar ferðir og enduðum svo í löngu gufubaði. Ég kom heim um hálfsjö. Stór hluti af kvöldinu fór í fótboltagláp. Everton - Liverpool 1:4. 

1.12.21

Mánuður eftir af árinu

Vaknaði fimm mínútum áður en vekjarinn átti að hringja í gærmorgun. Fór strax á fætur og hafði tíma til að vafra um á netinu áður en ég fór í vinnuna. Ég var í bókhaldinu í gær, ein í fríi og hinar þrjár skiptust á að vera á framleiðsluvélinni, tvær og tvær í senn, pakka eða telja með mér. Klukkuna vantaði korter í fjögur þegar við hættum vinnu en þá var líka önnur endurnýjun af þremur búin. Hálftíma síðar var ég komin heim og að þessu sinni skrópaði ég í sundið því ég vildi fylgjast með kvennalandsleiknum í knattspyrnu sem byrjaði klukkan fimm. 

30.11.21

Desember hinum megin við miðnætti

Var vöknuð og komin á fætur upp úr klukkan sex í gærmorgun. Var að vafra um á netinu þegar N1 sonurinn kom fram. Hann var farinn út á undan mér á aukavakt. Ég mætti fyrst í vinnuna en hvorki ég né sú næsta sem mætti komumst inn í herbergið þar sem framleiðsluvélin var. Fyrirliðinn varð að hringja á einn vinnufélaga okkar á svæðinu. Sá gat hjálpað henni í gegnum símann. En eftirleiðis verðum við allar að nota lykilkortin okkar inn og út af þessu svæði sama hvort við erum að fara tvær, þrjár eða fleiri inn á það. Ég var á móttöku endanum á vélinni fram að kaffi. Eftir kaffi var ég í pökkun, talningu og flokkun kennispjalda. Eftir hádegi fór ég á ítroðsluendann þangað til yfirmaður mætti á svæðið þá gerðum við framleiðslupásu í þrjú korter á meðan við fórum á fund. Var komin heim korter fyrir fjögur. Ákvað að skrópa í sjóinn og fara ekkert út aftur. Um fimm var ég með stillt á RÚV2 og fylgdist með karlalandsliðinu í körfubolta keppa við Rússa. 

29.11.21

Ný vinnuvika

Var komin á fætur um átta. Skutlaði Davíð Steini upp á Gagnveg fyrir hálftíu og fór beint í sund eftir skutlið. Var í minni fyrstu ferð í kalda pottinum þegar kalda potts vinkona mín kom í sína aðra ferð. Fórum fimm ferðir í viðbót og svo í gufu. Var komin heim um hálftólf.

Ein leiðin til að passa upp á að sækja ekki of margar bækur á safnið er að senda einkabílstjórann að skila þeim fjórum sem voru að komast eða komnar á skiladag. Oddur Smári tók þetta verkefni að sér glaður og sagðist hafa skilað tveimur bókum aukalega. Það kom nefnilega einhver grímulaus og skilaði tveimur bókum og fór án þess að renna þeim í gegnum skilavélina. Oddur renndi þeim í gegn.

Annars er frekar lítið að frétta. Helgin leið mjög hratt. Horfði á tvo fótboltaleiki í gær og horfði Oddur með mér á Chelsea - Man. Utd. leikinn. Horfði líka á næstsíðasta þáttinn af Ófærð. Betra að horfa á línulega dagskrá til þess að geta haft síðu 888 í textavarpinu virka.

28.11.21

Lítið eftir af nóvember

Ég var komin á fætur upp úr klukkan hálfsjö í gærmorgun og hafði góðan tíma til að vafra aðeins um á netinu áður en N1 sonurinn kom fram. Skutlaði honum í vinnuna og var hann mættur upp á Gagnveg um hálfátta. Ég fékk kaffibolla til að taka með mér í staðinn. Var komin á bílaplanið við Laugardalslaug tólf mínútum fyrir opnun. Hlustaði á átta fréttir áður en ég fór í sundið. Fór þrjár ferðir þann kalda og tvær í heitasta áður en ég fór á braut 2 og synti í 15 mínútur. Eftir fjórðu ferðina í kalda sat ég góða stund í gufunni, svo kalda sturtu og tíu mínútur í sjópottinum áður en ég fór upp úr og þvoði mér um hárið. Næst lá leiðin í Krónuna við Fiskislóð (Granda). Kom heim um ellefu og fékk stæði fyrir utan. Að öðru leyti fór gærdagurinn að mestu í lestur, prjón, fótbolta- og þáttaáhorf. 

27.11.21

Á skutlvaktinni

Vorum þrjár í vinnu í gær. Ég sá um bókhaldið og pökkun hinar um framleiðslu og önnur þeirra taldi með mér allar tegundir í öllum vögnum eftir daglega framleiðslu. Hættum vinnu upp úr klukkan hálfþrjú svo ég var komin heim um þrjú. Stoppaði heima í rúmlega klukkutíma og skrapp síðan í Nauthólsvík. Tolldi alveg 15 mínútur í 2,7°C sjónum. Veðrið svalt en stillt. Steikti slátur og kartöflur í kvöldmatinn handa okkur Oddi, N1 sonurinn var að vinna og kom ekki heim fyrr en um hálfníu. 

26.11.21

í endann á vikunni

Vorum allar fimm mættar til vinnu í gærmorgun, amk til hádegis en þá fór ein í helgarfrí. Framleiðsluvélin var ósamvinnuþýð langt fram eftir morgni. Fyrsta skammti var ekki skilað af sér fyrr en um ellefu leytið. Ég var á ítroðsluendanum á vélinni eftir kaffi og það var um hálfellefu sem allt komst í gang. Eftir hádegi tók ég bókhaldsvinnuna að mér. Daglegum verkum lauk á þriðja tímanum. Það var ekki mikið auka framleitt, 200 gjafakort og örfá kort í kreditendurnýjun því um klukkan þrjú hófst sviðsfundur sem var hægt að vera á á Teams. Fylgdist með megninu af fundinum en yfirgaf tölvuheima og vinnustað rétt fyrir fjögur. Fór beint heim með strætó og ekkert út aftur. Davíð Steinn sá um kvöldmatinn alveg óumbeðið. Það var frekar notalegt.

25.11.21

Fimmtudagur

Í gær vorum við aðeins þrjár á vinnustað. Sú sem fór heim lasin í fyrradag og sú sem fékk örvunarskammtinn á mánudag voru enn lasnar. Við hinar þrjár vorum þá allar á sömur vinnustöðvum. Ég var að hlaða inn verkefnum og senda þau af stað. Vorum búnar að framleiða og telja fyrsta verkefnið fyrir klukkan níu. Næsta verkefni kláraðist stuttu eftir kaffi og fram að hádegi framleiddum við 1500 gjafakort og svo önnur 600 með hádegisverkefninu. Fórum í mat um eitt. Eftir hádegi kláruðum við dk-endurnýjun. Og héldum áfram með kreditendurnýjun. Senda þurfti hana aftur því undirrituð hafði ekki vanda sig við tiltekt á vélinni og hent henni út. Sem betur fer var hægt að keyra hana aftur. Þrátt fyrir að ég sæi til þess að þær fjórar skrár af 29 færu ekki í gegn aftur tók það um einn og hálfan tíma að koma yfir á vélina en hún kom akkúrat þegar við vorum að vinna í debetendurnýjuninni. Framleiddum átta skrár af 25. Hættum og gengum frá um þrjú. Ég kom heim korter í fjögur. Var komin í sund um fimm. Byrjaði á því að synda og var í minni fyrstu ferð í kalda pottinum þegar kalda potts vinkona mín kom í sína fyrstu. Ég var því örugglega sjö mínútur í fyrstu ferðinni og svo fórum við fjórar aðrar 3 mínútna ferðir í 8°C pottinum. Enduðum á löngu gufubaði. 

24.11.21

Þriðji skammtur - kokteill

Eftir átta tíma svefn, smá rumsk um fimm leytið, vaknaði ég við að vekjaraklukkuna í gærmorgun. Hafði samt góðan tíma til að vafra aðeins um á netinu. Fór á bílnum í vinnuna og lagði af stað á svipuðum tíma og þegar ég tek strætó. Var mætt rúmum fimm mínútum fyrr en venjulega en samt ekki fyrst á svæðið. Sú sem fékk sína þriðju sprautu í fyrradag hringdi sig inn veika. Við vorum því aftur fjórar á svæðinu því sú sem var lasin á mánudaginn kom í gær. Ég var á móttökuendanum á framleiðsluvélinni fram að kaffi. Fljótlega eftir kaffi skrapp ég í Laugardalshöllina. SMS-ið frá því daginn áður sagði tímann 11:10 en ég var mætt um hálfellefu. Allt gekk hratt og vel fyrir sig. Er nú komin með eina Pfizer ofan í tvær moderna. Eina vandamálið var að stæðið við vinnuna beið mín ekki og ég varð að leggja á gjaldstæði. Borgaði 500 kr. fyrir að leggja til klukkan 15:17. Eftir hádegi fór ég á ítroðsluendann á vélinni að klára dk framleiðsluna sem var í stærra lagi í gær. Gátum líka gert hluta af síðustu skránni í dk-endurnýjun. Fékk að hætta vinnu korter yfir þrjú. Þá átti bara eftir að ganga frá og telja. Það voru tvær eftir til að sjá um það en sú fjórða fór heim lasin um hálftvö leytið. Ég fór beinustu leið heim og hélt mig þar það sem eftir lifði dags. 

23.11.21

Sofið þar til klukkan hringdi

Vorum þrjár í vinnu í gær. Ein í fríi og önnur lasin. Ég var á móttökuendanum á framleiðsluvélinni fram að hádegi. Um hádegið skrapp sú sem var á hinum vélarendanum í Laugardalshöll af fá örvunarskammtinn. Sú þriðja var í bókhaldinu og eftir hádegi töldum við óhætt að setja af stað gjafakortaframleiðslu á meðan við töldum tvo seinni skápa dagsins. Sú sem fór í bólusetninguna kom rétt eftir að við vorum búnar að telja og þá var búið að skoða fyrstu 100 gjafakortin og örugglega um tvöhundruð óskoðuð. Hún tók að sér að vera á þeim endanum og framleiddum við alls 1500 kort til klukkan að verða þrjú. Hefðum líklega náð 500 í viðbót ef vélin hefði ekki farið að eyðileggja slatta af kortum. Ákváðum frekar að hætta og ganga frá, nóg var af borðunum til að tæta eftir framleiðslu dagsins. Var komin heim um hálffjögur og um klukkustund síðar skellti ég mér í sjóinn 4,4°C sjóinn í korter.  

22.11.21

American style

Rumskaði rétt um átta og dreif mig fljótlega á fætur. Klukkan var langt gengin tíu þegar ég lagði af stað í sundið. Rútínan var svipuð og morguninn áður nema ég synti ekki á bakinu og eftir síðustu ferðina í kalda pottinn fór ég í kalda sturtu áður en ég fór upp úr. Kom við á Atlantsolíustöðinni við Sprengisand og fyllti á tankinn áður en ég fór heim. Heima leið dagurinn áfram, hratt við alls kona dútl. Um hálfsjö bauð ég strákunum út að borða. Þeir voru eitthvað að spá í að velja Pítuna eina ferðina enn. Ég var alveg sátt við það en endirinn varð svo sá að við fórum á American style.

21.11.21

Jómfrúin

Þegar ég var að keyra að heiman í sund í gærmorgun voru morgunfréttir klukkan átta að byrja í útvarpinu. Var komin ofan í kalda pottinn tuttugu mínútum yfir átta. Sat í rúmar fimm og fór þá í þann heitasta í nokkrar mínútur og svo aftur í kalda. Um tuttugu mínútum fyrir níu synti ég af stað á braut sex, 250 metra á bakinu og 150 á bringunni. Fór svo beinustu leið aftur í þann kalda. Á eftir sat ég góða stund í gufunni. Fór í kalda sturtu eftir það "bað" og beint í sjópottinn. Endaði svo á kalda pottinum í um þrjár mínútur áður en ég fór upp úr og þvoði mér um hárið. Þegar ég kom heim byrjaði ég á að setja handklæði í þvottavél og tók upp þvottinn fyrir annan soninn í leiðinni. Settist inn í stofu en um tólf hellti ég mér upp á kaffi og fann mér til hressingu. Hlustaði á hádegisfréttir en stillti svo yfir á hádegisleikinn í enska boltanum. Lauk við að lesa bókina Hælið eftir Johan Theorin. Þá á ég aðeins eftir að lesa nokkrar smásögur í skammtímalánsbókinni og bókina Nornaveiðar eftir Max Seeck. Ég gæti reyndar framlengt skilafrestinum á þeirri bók, sem er þann 28. n.k., um 30 daga. Bókin er yfir fjögurhundruðogþrjátíu blaðsíður og ég er rétt byrjuð á henni. En ef hún er spennandi fer ég örugglega létt með að klára hana fyrir næsta sunnudag. Svo er ég með tvær bækur með skilafrestinum 14. des; Svört perla eftir Lizu Marklund og Bláleiftur eftir Ann Cleeves. Það er líka hægt að framlengja skilafrestinum á þeim bókum um 30 daga ef ég verð ekki búin að lesa þær fyrir 14. desember. Horfði einnig á Manjú leikinn. En um það leyti sem aðalleikurinn var að byrja og mínir menn í Liverpool að taka á móti Arsenal þá var ég búin að klæða mig upp á og á leiðinni út. Þorði ekki annað en að slökkva á sjónvarpinu áður en leikurinn byrjaði. Tuttugu mínútum fyrir sex sótti sjósundsvinkona mín. Nafna hennar hafði pantað borð fyrir okkur fimm úr sjósundshópnum. Við hittum hana og systurnar þar. Áttum tímann milli sex og átta. Ég pantaði mér kalkúnabringu, hvítvínsglas og elpatertusneið í eftirrétt. Var að hitta systurnar og nöfnu sjósunds vinkonunnar í fyrsta skipti í nokkrar vikur. Einhvern veginn höfum við verið að fara á mis í sjósundinu. Þær fara t.d. oft á laugardögum sem ég er hætt að gera. En það var glatt á hjalla og tíminn fljótur að líða. Svo var búið að skila mér aftur heim um hálfníu. 

20.11.21

Vika í aðventu

Vorum þrjár í vinnu í gær. Ég sá um móttökuendann á vélinni. Þegar fyrsta verkefni var lokið og smá hluti af verkefni tvö lagði ég til að við færum í gjafakortaframleiðslu. Tók á móti 500 og skoðaði á meðan hinar tvær töldu fyrstu tvo vagnana. Eftir kaffi héldum við gjafakortaframleiðslunni áfram og framleiddum 2000 stk til viðbótar. Þau kort og 1000 önnur fóru frá okkur með hádegisframleiðslunni um eitt. Eftir hádegi kláruðum við verkefni tvö og héldum svo áfram með endurnýjun til klukkan þrjú. Kom heim um hálffjögur. Stoppaði rétt rúman hálftíma heima áður en ég fór í Nauthólsvík og hitti þar fyrir sjósundsvinkonu mína. Vorum 12 mínútur út í 3,3°C sjónum og svo rúmlega það í heita pottinum á eftir.

19.11.21

Föstudagur

Enn á ný er að koma helgi. Í gærmorgun var eitt af þeim skiptum sem ég svaf alveg þar til vekjarinn fór að hamast við að vekja mig. Ég slökkti á vekjaranum og fór strax á fætur. Gaf mér tíma í að vafra aðeins um á netinu og fékk mér lýsi og 3 glös af vatni áður en ég tók strætó frá Krambúðinni að Þjóðleikhúsinu. Við mættum allar fimm til vinnu í gær og vorum fimm fram að hádegi en þá hættir sú sem vinnur 70%. Ég var á ítroðsluendanum á vélinni en það kom fljótlega í ljós að fyrstu tvö verkefnin höfðu ekki skilað sér yfir og þurftum við að hringja á vin. Það leið nokkur stund áður en við mundum eftir því að við gætum verið að framleiða endurnýjun á meðan. Flokkuðum kennispjöld í rúmar tíu mínútur áður en við fórum aftur inn í framleiðsluherbergi. Framleiddum til klukkan hálftíu og þá var annað verkefni dagsins komið inn á verkefnalistann. Það verkefni sem við byrjum alltaf á var ekki tilbúið fyrr en eftir kaffi, um tíu. Ég fór inn með 17 flokkaða kassa af kennispjöldum og kom til baka með 15 óflokkaða. Flokkaði kennispjöld til hádegis. Eftir hádegi fór ég á móttökuendann á vélinni. Lukum við debet framleiðslu dagsins og héldum áfram framleiðslu á debet-endurnýjun. Smá vesen var á vélinni um þrjú leytið ég fékk samt að fara rétt fyrir hálffjögur. Tók ásinn á Hlemm og labbaði þaðan í blóðbankann við Snorrabraut. Átti bókaðan tíma kl 15:50 en ég fékk bæði mail og sms, í fyrradag, með beiðni um að panta tíma hjá þeim. Var búin að vera extra dugleg að drekka vatn yfir daginn og fékk mér eitt djúsglas áður en ég fór inn. Allar mælingar voru góðar og ég lét þá sem meðhöndlaði mig þreyfa á báðum handleggjum og velja í hvorn hún myndi stinga. Sú hægri varð fyrir valinu en þrátt fyrir að gefa sér góðan tíma þá "færðist" æðin eitthvað undan svo nálin hitti ekki. Önnur var fengin til að þreyfa á vinstri en hún treysti sér ekki til að finna og hitta á æðina þar. Svo þessi heimsókn í besta bankann var ónýt. Ég má panta tíma aftur eftir viku. Veit samt ekki hvort ég læt líða aðeins lengri tíma en það. Labbaði heim og lét frænku mína vita þegar ég var komin þangað. Hún mætti skömmu síðar og færði mér gjafir, malað kaffi í fallegri dós, smákökur í spiladós og súkkulaðihnetur, allt fyrir passið á Pixý.

18.11.21

Furðulegir draumar

Bankaði á herbergisdyr N1 sonarins ca tuttugu mínútum fyrir sjö í gærmorgun. Hafði ekki heyrt í vekjaraklukkunni hans og hélt kannski að hann væri að sofa yfir sig. Heyrðist samt á röddinni að hann væri búinn að rumska en væri ekkert að flýta sér á fætur. Miðað við það að hann fær sér ekki morgunmat áður en hann fer hafði hann víst alveg nógan tíma. Hann kom fram skömmu síðar og var farinn á undan mér að venju. Ég var mætt fyrst í vinnuna og var ein fyrstu tíu mínúturnar. Var í bókhaldinu, undirbjó pökkun því ég var ein frammi til að byrja með og flokkaði kennispjöld inn á milli hefðbundinna verkefna. Eftir að allri talningu var lokið eftir hádegi voru tvær að framleiða endurnýjun og við hinar tvær að taka nýtt plast upp úr kössum og telja. Hættum vinnu rétt rúmlega þrjú og var ég komin heim um hálffjögur. Átti von á nöfnu minni og frænku í heimsókn upp úr klukkan fjögur svo ég hellti fljótlega upp á kaffi. Hún hringdi hins vegar rétt fyrir fimm og sagðist hafa gleymt sér. Ég ætlaði að drífa mig í sund í staðinn en var á svo spennandi stað í bók sem ég var að lesa að ég gleymdi mér í lestri og kaffidrykkju. 

17.11.21

Smá rafmagnsleysi

Var mætt fyrst til vinnu en samt bara rétt á undan næstu manneskju. Vann á vélinni allan daginn því sú sem var með mér á móttökuendanum fram að kaffi þurfti að fara um hádegið. Ég fór því aftur á ítroðsluendann eftir hádegið og við framleiddum 2500 gjafakort til klukkan að ganga fjögur. Kom heim rétt fyrir fjögur. Hringdi í pabba og svo náði nafna mín og frænka, sem á hluta af kisunni sem ég var að passa um daginn, í mig í símann strax á eftir samtalið við pabba. Var komin í sund um fimm. Synti ekkert en fór þrjár ferðir í kalda og hitti svo konu í sjópottinum og sat þar á spjalli í um hálftíma. Rétt þegar ég var að skríða upp í rúm um tíu sló út hjá okkur. Við mæðginin hjálpuðums að við að slá rafmagninu inn aftur. Ég var búin að lesa í svona korter þegar rafmagnið fór alveg af hverfinu og kom ekki á aftur fyrr en einhvern tímann á tólfta tímanum.

16.11.21

Dagarnir styttast

Vaknaði nokkru áður en vekjaraklukkan átti að hringja. Slökkti á henni og var komin á fætur um hálfsjö. Notaði hluta af næsta hálftímanum í netvafr og að setja inn færslu dagsins. Var mætt fyrst í vinnuna en bara rétt á undan fyrirliðanum. Við tókum út vagnana og kveiktum á vélinni og kortateljurunum. Eftirlétum bókaranum að prenta út framleiðslublöðin. Fram að kaffi var ég að undirbúa pökkun debetkorta og flokka kennispjöld. Þegar fyrstu tölur dagsins voru tilbúnar taldi ég framleiddar tegundir með þeirri sem var í bókhaldinu. Eftir kaffi fór ég á ítroðsluendann á vélinni. Klárðuðum debetframleiðsluna fyrir ellefu og þurftum að bíða í uþb hálftíma eftir hádegisverkefninu. Flokkaði kennispjöld á meðan. Eftir hádegi fór ég í talningar aftur. Á meðan var verið að farga ónýtu plasti frá því í september og október. Um hálftvö var stuttur fundur með yfirmanni. Svo fórum við tvær inn á vél, ég og fyrirliðinn, og framleiddum 1000 gjafakort á 50 mínútum. Fengum pöntun upp á 5000 slík kort og erum því búnar með 1/5 af skammtinum. Kom heim um hálffjögur og stoppaði við í rúman hálftíma. Var komin í Nauthólsvík um hálffimm og var rétt búin að koma mér í sundbol, sundhettu, skó og vettlinga þegar sjósundsvinkona mín mætti. Beið eftir henni og við vorum svo um átta mínútur í sjónum en örugglega tæplega hálftíma í heita pottinum. Það var svo langt síðan við hittumst síðast og við höfðum um margt að spjalla. Kom heim rétt fyrir sex. 

15.11.21

Mánudagur

Þegar ég vaknaði upp úr klukkan sjö í gærmorgun kveikti ég á náttborðslampanum, tók bók og las í uþb klukkustund. Fór á fætur um hálfníu. Klukkutíma síðar skilaði ég Davíð Steini á N1 stöðina við Gagnveg. Fór svo beinustu leið í sund. Fyrst í kalda pottinn og synti svo uþb 100 metra en þá sá ég að kalda potts vinkona mín var að fara sína fyrstu ferð í kalda pottinn. Eftir fjórðu ferðina í kalda hittum við eina systur hennar sem kom með okkur í heitast pottinn og hitti okkur svo í sjópottinum eftir næstu ferð í kalda. Ég var komin heim um hálftólf. Þá kláraði ég að lesa bókina og hellti mér síðan upp á kaffi. Um eitt leytið skrapp ég í bókasafnið í Kringlunni. Skilaði 4 bókum og tók þrjár með mér heim og er þá með 6 bækur í láni. 

14.11.21

Sunnudagur

Ég var komin á fætur upp úr klukkan hálfsjö í gærmorgun, á skutlvaktinni. Hafði tíma til að vafra um á netinu og setja inn færslu dagsins. Tíu mínútum yfir sjö bankaði ég á herbergisdyrnar hjá N1 syninum og spurði hvort hann ætlaði sér ekki að vera mættur í vinnum um hálfátta. Hann kom fram skömmu síðar. Ég tók með mér sunddótið mitt og rétt rúmlega hálfátta þáði ég fyrsta kaffibolla dagsins inn í bíl til mín. Lenti í smá vandræðum með málið en það bjargaðist að mestu. Lokið smokraðist af og það sullaðist aðeins á gallabuxurnar mínar en ekki allt. Lauk við að drekka kaffið þegar ég var komin á planið við Laugardalslaugina tólf mínútum fyrir átta. Það opnar klukkan átta um helgar svo ég beið alveg róleg og hlustaði meira að segja á morgunfréttir áður en ég fór inn. Byrjaði á því að fara rúmar fimm mínútur í kalda pottinn. Synti svo 500 metra á brautum sjö og átta, aðallega á braut sjö. 250 metra á bakinu. Fór svo beint í kalda pottinn aftur. Hafði ætlað að skreppa aðeins í sjópottinn en hann var tómur og lokaður. Fór eina ferð í heitasta pottinn, þriðju ferðina í þann kalda og endaði svo í gufunni áður en ég fór og þvoði á mér hárið. Næst lá leiðin í Krónuna við Fiskislóð vestur á Granda. Vörurnar fóru í þrjá fjölnota poka og kostuðu um þrjátíu þúsund. Hluta af þessum vörum hefði ég svo sem alveg getað sleppt að kaupa en einhverra hluta vegna fer ég frekar eins sjaldan í búð og ég kemst upp með og leyfi mér að grípa smá óþarfa með þegar ég loksins fer. Spyr strákana reglulega hvort það sé eitthvað sérstak sem vantar og þeir muna aldrei eftir neinu svo ég er farin að segja við þá að ef þá vantar eitthvað sem ekki kemur úr búðinni með mér verði þeir að útvega sér það sjálfir. Kom heim upp úr ellefu og komst með vörurnar, sunddótið og handtöskuna inn í einni ferð. Gekk frá vörunum og hellti mér upp á kaffi. Fór ekkert aftur út og eyddi restina af deginum í alls konar dútl, þarft og óþarft. 

13.11.21

Mánuðurinn að verða hálfnaður

Enn og aftur var ég mætt fyrst til vinnu. Fyrirliðinn þurfti að koma við í búð. Vorum annars bara þrjár því ein er í fríi og önnur vinnur aldrei á föstudögum nema í sérstökum tilvikum, svosem sumarafleysingum. Ég var í bókhaldinu, hinar tvær að framleiða. Þegar klukkan var langt gengin í níu kom í ljós að hringja þurfti í vin vegna þess að vélin neitaði að framleiða tvær kortategundir úr fyrsta verkefni dagsins. Tæknimaðurinn kom fljótlega og það var búið að afgreiða þetta mál áður en taskan var sótt. Í kaffinu bauð fyrirliðinn upp á osta, vínber, mandarínur og smákex en hún átti afmæli í gær. Um tólf leysti ég hina samstarfskonu mína af á móttökuendanum. Hún var að fara í jarðaför. Vorum að framleiða smá slatta af gjafakortum og þeirri framleiðslu lauk rúmlega eitt. Þá skruppum við aðeins í mat en tókum okkur svo til og töldum allar tegundir í öllum vögnum eins og gert er á föstudögum. Kom heim upp úr klukkan þrjú. Var svo komin í Nauthólsvík um fjögur. Sjórinn 2,7°C en sem fyrr ætlaði ég varla að tíma að fara upp úr. Svamlaði um í korter og stoppaði svo tíu mínútur í heita pottinum. Kom við í Fiskbúð Fúsa á heimleiðinni. Hefði betur keypt saltfisk eða nætursaltaða ýsu en uppá haldið mitt er soðin ýsa og ég keypti svoleiðis. Annar sonurinn var að vinna og hinn gekk frá eftir matinn en fékk sér eitthvað allt annað að borða.

12.11.21

Föstudagur

Í gærmorgun vaknaði ég sjö mínútum áður en vekjaraklukkan átti að ýta við mér. Var að dreyma eitthvað sem ég man nú ekki hvað var nema hluti af því var vandræði með að halda lesgleraugunum heilum. Var í vandræðum með að herða skrúfu. Lausa-skrúfu vandamálið er reyndar nokkuð sem er byrjað að bera á einmitt á þeim lesgleraugum sem ég nota mest. Enn sem komið er hef ég ekki tínt skrúfunni, þótt hún hafi dottið tvisvar úr. Annars keypti ég þessi gleraugu í Tiger í sumar og þar finnast fleiri á góðu verði svo ef skrúfan tínist þá fjárfesti ég bara í öðrum gleraugum.

Enn á ný var ég mætt fyrst á vinnustað í minni deild. Það var vegna þess að fyrirliðinn kom við í bakaríi til að útvega kruðerí með "föstudagskaffinu" sem er alltaf á fimmtudagsmorgnum. Hún var semsagt í bókhaldinu í gær. Tvær voru í fríi og við hinar tvær skiptum með okkur umsjón með vélinni. Fljótlega eftir að framleiðsla hófst varð ljóst að kalla þurfti til sérfræðinga vegna ákveðinna kortategunda. Gáutm framleitt eitthvað en ekki allt. Eftir að sérfræðingarnir komu og fóru að vinna að lausnum ætluðum við að byrja á næsta verkefni, þ.e. þegar við vorum búnar að framleiða allt sem hægt var í fyrsta verkefninu. Þá var umslagavélini með vesen. Það tók um korter að koma vélinni af stað en eftir það stoppaði hún aldrei ekki einu sinni í "collet pocket jam" eins og gerist reglulega. Sú sem er í 70% og á að vera búin klukkan tólf á fimmtudögum komst ekki heim fyrr en um eitt. Á þriðja tímanum var svo loksins búið að framleiða þau kort sem ekki var hægt að framleiða um morguninn.

Kom heim um hálffjögur og stoppaði í uþb hálftíma áður en ég fór í sund. Synti reyndar ekkert því við kalda potts vinkona mín vorum mættar á svipuðum tíma. Fórum sex ferðir í kalda og ég fimm ferðir í þann heitasta, hún byrjar í honum á meðan ég byrja í kalda, enduðum svo á góðu gufubaði. Kom heim rétt fyrir sex. Davíð Steinn tók að sér að græja kvöldmatinn.

11.11.21

Fimmtudagur

Var aftur mætt fyrst til vinnu í gærmorgun. Vorum þrjár í vinnu og þar með unnum við á föstum stöðum. Bókarinn er alltaf í bókhaldinu en við sem vorum á framleiðsluvélinni "pössuðum" hvorn sinn endann á meðan á framleiðslu stóð. Ég var í móttökunni. Framleiðslu lauk rétt um tólf en þá kom líka maðurinn sem "heimsækir" vélina mánaðarlega og yfirfer. Stundum koma þeir reyndar tveir saman en í gær kom hann einn. Um eitt leyfði ég stelpunum að fara. Þegar einn er í yfirferð tekur það fjóra tíma. En um þrjú kom einn vinnufélagi minn sem kemur ef vesen er á FÍFU og SMÁRA eða þarf að uppfæra kerfin eða eitthvað. Þar með mátti ég stinga af. Var komin heim um þrjú og stoppaði þar í tæpa tvo tíma því kalda-potts vinkona mín ætlaði að hitta mig í kalda pottinum um hálfsex. Ég rétt náði að synda 200 metra en þá mætti vinkonan amk tíu mínútum (og 200 metrum) á undan áætlun. Fórum fimm ferðir í kalda, fjórar í heita og enduðum í gufubaði. Kom heim aftur stuttu fyrir sjö og græjaði kvöldmat. 

10.11.21

Miðjan á vikunni

Var mætt fyrst til vinnu í gærmorgun. Fljótlega fékk ég símhringingu frá fyrirliðanum. Án þess að fara nánar út í nein smáatriði né neitt þá var smá ástand hjá sumum vinnufélögum sem ekki komust til vinnu. Það mál var leyst. Við sem stóðum vaktina vorum að framleiða og sinna daglegum verkefnum til klukkan rúmlega eitt en fórum þó í morgunkaffi í millitíðinni. Eftir hádegishlé kláruðum við talningu og frá gangi á deildinni. Um hálfþrjú kom beiðnapóstur sem venjulega kemur um tvö. Afgreiddum hann og náðum því áður en pósturinn sótti póst dagsins. Hættum vinnu um þrjú. Ég var komin heim um hálffjögur og datt fljótlega í lestrargír svo það varð ekkert úr því að ég færi út aftur. Skrópaði því í sundi.

9.11.21

Tíminn þýtur áfram

Var vöknuð rétt upp úr klukkan sex í gærmorgun. Hafði tíma til að vafra um á netinu. Var mætt fyrst í vinnuna og eins og á föstudaginn var ég skráð í bókhaldið. Vorum þrjár á svæðinu til að byrja með en sú fjórða mætti um hálftíu. Sú fimmta er komin í frí næstu eina og hálfa vikuna. Hættum vinnu upp úr klukkan þrjú. Ég var komin í sjóinn stuttu fyrir fimm og svamlaði um í uþb korter. Kom heim aftur um rétt fyrir sex. Um hálfsjö var ég mætt í smá sjötugsafmælisboð til einnar frænku minnar sem býr í Noregi en er á landinu um þessar mundir. Það var maðurinn hennar sem átti afmæli. Málið var að hún og hann og systir hennar heimsóttu pabba á laugardaginn fyrir rúmri viku og þar gleymdi hún bláum trefli. Ég tók þennan trefil með í bæinn og var að skila honum til hennar í gærkvöldi. Færði afmælisbarninu heimaprjónað eldhúshandklæði, grænt með munstrinu snúningar. Í boðinu voru einnig systir hennar og fjölskylda, bróðir hennar og sonur og ein frænka eða vinkona. Mikið var gaman að hitta þetta frændfólk sitt. Ég stoppaði í um þrjá tíma og var alls ekki sú fyrsta til að kveðja né sú síðasta að fara.

8.11.21

Ný vinnuvika

Vaknaði rétt fyrir klukkan níu í gærmorgun. Fór á fætur og fékk mér lýsi og eitt harðsoðið egg. Lagði nokkra kapla. Pabbi kom fram stuttu seinna. Um hálfellefu hellti ég upp á kaffi. Lauk við að lesa eina bók sem var 619 blaðsíður. Það er önnur af bókunum sem ég framlengdi skilafrestinum á. Fitjaði upp á nýrri tusku. Kvaddi pabba um hálftvö og var komin heim um þrjú. Horfði á fótbolta, nokkra þætti og fjórða þáttinn af Ófærð III. 

7.11.21

Jólakortaframleiðsla á Hellu

Klukkan var byrjuð að ganga átta þegar ég vaknaði í gærmorgun. Gaf mér tíma til að vafra um á netinu áður en ég fór í sund. Var mætt í Laugardalinn upp úr hálfníu, dreif mig út úr húsi án þess að fá mér lýsi eða morgunmat. Hreinlega gleymdi því. Byrjaði á því að synda 400 metra, helminginn á bakinu. Fór tvisvar sinnum 6 mínútur í kalda pottinn sem var 7,7°C, eina ferð í heitasta pottinn og endaði á góðu gufubaði áður en ég fór uppúr og þvoði mér um hárið. Úr sundi fór ég í síðustu heimsóknina til kisu í bili. Hún var búin að ná kisunammipokanum af eldhúsborðinu og var hann fyrir innan dyrnar, enn harðlokaður þó þegar ég kom. Stoppaði hjá kisu í tæpan klukkutíma. Kom heim upp úr hálftólf. Lauk við að pakka niður. Davíð Steinn kom fram um þetta leyti og fór í sturtu. Hann spurði mig hvort ég gæti skutlað sér upp á N1 við Gagnveg. Ég gat það og þurfti að bíða í smá stund eftir honum því hann varð fyrst að skreppa niður í þvottahús og ná í þvottinn sinn og skella sér í buxur beint af snúrunni. Ég vakti Odd til þess að kveðja hann. Kom við hjá móðurbróður mínum í Álftamýrinni og lét hann hafa húslyklana af kisuheimilinu. Skyldi Davíð Stein eftir við Gagnveg, hann ætlaði sér að koma sér sjálfur þaðan og í barnaafmælisveislu í Kópavogi. Kom við í Fossheiðinni og stoppaði þar í tæpa klukkustund. Þegar ég kom á Hellu var klukkan að byrja að ganga fjögur. Ég varð að nota húslykil og hleypa sjálfri mér inn. Pabbi kom stuttu síðar úr jarðaför Skúla Lýðssonar heitins á frá Keldum. Við pabbi fengum okkur kaffi og svo tók ég út þorskhnakka flak úr frysti. Það var ekki fyrr en eftir kvöldmat og sjónvarpsfréttir sem ég  breiddi úr mér við eldhúsborðið, náði mér í hvítvín í vínglas og hófst handa við að búa til jólakort ársins. Tveimur og hálfum tíma og tveimur vínglösum síðar var kvótinn kominn, 25 kort. Aðeins á eftir að setja hvítan pappír inn í lituðu kortin svo jólakveðjurnar verði læsilegar. Fékk mér hálft vínglas í viðbót eftir að hafa gengið frá eftir mig og vafraði um á pabba neti í tæpa klukkustund áður en ég fór í rúmið að lesa. 

6.11.21

Laugardagur

Þá er ég búin að nota nýtt strætókort í eina og hálfa viku eða átta virka daga. Var mætt númer tvö af fjórum til vinnu í gærmorgun. Sú sem kom á undan mér var ekki búin að prenta út og þar sem ég var að sinna bókhaldsverkefnum í gær tók ég það að mér. Þegar ég var búin að undirbúa fyrstu talningu fór ég með 13 sorteraða kennispjaldakassa og sótti 15 aðra ósorteraða í staðinn. Erum komnar að árinu 2003. Sú sem var frammi með mér fram að kaffi kom og hjálpaði mér þegar ég var búin að tæma vagninn og langt komin með að fylla á hann aftur. Öll dagleg verkefni voru búin um hálftvö og við ákváðum að yfirgefa vinnustað tæpri klukkustund síðar og fara inn í helgina. Ég skrapp heim og gleymdi mér næstum því í tölvuvafrinu. Upp úr fjögur fór ég í sjóinn og var komin á kisuvaktina um fimm. Stoppaði hjá Pixí í tæpa klukkustund. Hún tók vel á móti mér en ég er ekki frá því að hún hefði viljað hafa mig lengur.

5.11.21

"Litla" veislan

Var mætt fyrst til vinnu um hálfátta í gærmorgun. Ekki leið þó á löngu áður en tvær bættust í hópinn og sögðust hafa hitt þá þriðju sem var að koma úr bakarínu og varð að fara þangað aftur að ná í hluta af kaffimeðlætinu sem hafði orðið eftir. Sú fimmta í hópnum var því mætt á undan henni en við vorum allar mættar áður en klukkan sló átta. Ég var á móttökuendanum á vélinni fram að kaffi og byrjaði á því að taka til og telja í þær tegundir sem voru til framleiðslu í fyrstu tveimur verkefnum dagsins. Eftir kaffi flokkaði ég kennispjöld. Vesen var á einu verkefni dagsins og það fór svo að við ákváðum að fara heim um hálffjögur þrátt fyrir að verkefnið væri ekki komið til okkar. Ég stoppaði stutt heima. Fór í kisuheimsókn um hálffimm og um sex var ég mætt til einnar samstarfskonu minnar sem býr í Kópavogi en hún var búin að bjóða kortadeildinni til sín í mat. Ég var síðust af okkur fimm. Fékk kristal í glas og ferskt jarðaber út í. og svo var boðið upp á osta, vínber, bláber, kex, sultu, jarðaber og melónu á meðan kvöldmaturinn var að græjast í ofninum. Færðum okkur úr eldhúsinu og yfir í borðstofuna um hálfsjö leytið. Boðið var upp á ofnbakað lambalæri með öllu tilheyrandi. Okkur fannst bara vera komin jólin, gular og grænar baunir, rauðkál og þær sem vildu fengu sér malt og appelsín. Ég hélt mér við kristalinn. Eftir að hafa gert matnum góð skil hjálpuðumst við að taka af borðinu og færðum okkur svo inn í stofu. Þar var boðið upp á nammerí og kaffi fljótlega. Um átta leytið færðum við okkur aftur inn í borðstofu og þar var boðið upp á rommkúlutertu og ostaköku. Fyrrum samstarfskona okkar sem vann við þrif þar til fyrir þremur árum að hún var að verða 67 hringdi í eina okkar sem setti símtalið á "speaker". Það sem við vorum glaðar að heyra í þessari manneskju og hún í okkur. Klukkan var langt gengin í níu þegar við kvöddum. Vorum samt að gantast með það að gista. Kom við hjá AO-við Sprengisand og fyllti á tankinn. Horfði svo á einn og hálfan þátt áður en ég fór upp í rúm tæpum klukkutíma seinna en ég er vön á virkum dögum. Las samt til klukkan að verða ellefu.

4.11.21

Fimmtudagsmorgun

Var búin að slökkva á vekjaranum og komin á fætur amk korteri áður en hann átti að hringja og vekja mig. Fyrsti hálftími dagsins fór í netvafr og blogg. Var komin í vinnuna um hálfátta. Sorteraði kennispjöld og aðstoðaði við fyrstu talningu fyrir kaffi. Var á móttökuendanum eftir kaffi. Daglegri framleiðslu lauk um klukkan hálfeitt. Var ekki í sorteringastuði eftir mat en dútlaði við ýmislegt annað. Hættum vinnu um þrjú. Ég stoppaði heima áður en ég fór á kisuvaktina og í sund. Kom heim aftur um hálfsjö og bjó til plokkfisk úr afgangnum frá því kvöldið áður. 

3.11.21

Stytting

Ég var mætt til vinnu um hálfátta í gærmorgun. Fyrirliði deildarinnar var þegar mætt og ég lét hana vita að ég ætlaði mér að hætta vinnu um hádegi, taka út 1/2 dag þennan mánuðinn sem styttingu vinnuvikunnar einu sinni í mánuði. Hún var sátt við það. Fram að kaffi undirbjó ég pökkun, flokkaði kennispjöld og aðstoðaði við talningu þegar fyrstu tölur voru tilbúnar. Eftir kaffi var ég númer eitt á vélinni. Daglegri framleiðslu lauk korter yfir tólf, heldur seinna en ég reiknaði með en ég var ekkert tímabundin og það koma dagar þar sem við erum að hætta og fara í fyrra fallinu svo það skiptir engu þótt ég hafi verið rúmu korteri lengur en ég ætlaði mér í vinnu í gær.

Kom heim um eitt og stoppaði þar í um klukkustund. Þá lá leiðin í Dýrabæ í Kringlunni þar sem ég keypti nýja "kattasandsveiðiskóflu" og kisunammi. Næst fór ég í Fiskbúð Fúsa og keypti m.a. ýsu í soðið. Eftir það fór ég í sund. Byrjaði á að synda 300 metra og var svo 2x5-6 mínútur í kalda pottinum, einu sinni í heitasta og endaði í gufunni. Eftir sundið fór ég í 66° Norður í Faxafeni og notaði loksins gjafakortið sem ég fékk í jólagjöf frá vinnunni í fyrra. Verslaði fyrir rétt rúmlega 31000, gjafa kortið dekkaði það allt og enn eru eftir tæp 4000 á því. Svo fór ég til kisu. Opnaði út á svalir og leyfði henni að fara út í smá stund. Íbúðin er á fimmtu hæð og ólíklegt að kötturinn taki upp á því að stökkva niður af svölunum. Hreinsaði vatnsdallinn og fyllti á hann og þurrmattardallinn. Hreinsaði kattasandinn, var með poka með mér. Gaf kisu nokkra mola af kisunammi. Hún vildi svo koma í fangið á mér þegar ég settist í sófann. Breiddi sem betur fer teppi yfir lærin á mér svo klærnar væru ekki að stingast í gegnum buxurnar.

Klukkan rúmlega sex var ég komin heim aftur. Setti upp kartöflur og snöggsauð ýsuna. Hvorugur bræðranna borðaði með mér af þessu svo það er til afgangur til að nota í plokkfisk. 

2.11.21

Afmælisdagur systur minnar

Var vöknuð rétt upp úr klukkan sex í gærmorgun. Fór strax á fætur og notaði svo hluta af tímanum til að vafra um á netinu. Notaði að sjálfsögðu strætókortið til að koma mér til vinnu með leið 13 milli Krambúðar og Þjóleikhúss. Ég var á ítroðsluendanum á vélinni fram að kaffi og að flokka kennispjöld eftir kaffi. Eftir hádegi kom yfirmaður á hálfsmánaðar reglulegan stöðufund milli háftvö og hálfþrjú. Ég fékk að fara um þrjú og hinar fóru örugglega ekki mikið seinna. Stoppaði heima í rúman hálftíma áður en ég dreif mig í með sjósundsdótið í Nauthólsvík og skellti mér í sjóinn í uþb tíu mínútur. Næst lá leiðin í heimsókn til kisu. Hleypti henni aðeins út á svalir. Þetta er inni köttur en íbúðin sem frænka mín býr í núna er á fimmtu hæð svo það er engin hætta á að kötturinn fari neitt langt. Kom heim um hálfsjö og þá var Davíð Steinn búinn að elda. 

1.11.21

Á kisuvaktinni

Svaf til klukkan að verða átta í gærmorgun. Settist svo inn í stofu með fartölvuna í fanginu og vafraði um á netinu næstu tvo tíma. Var lengi að íhuga það að skreppa í sund. Eftir "tölvutímann" færði ég mig í stofustólinn og kveikti á sjónvarpinu. Horfði á tvo þætti af "Once up on a time..." og tók það mun styttri tíma heldur en tíminn sem fór í tölvuna. Um hálftvö fór ég með sunddótið mitt út í bíl og skrapp í heimsókn til móðurbróður mín og konu hans. Sameiginleg frænka okkar, systurdóttir hans og mömmu og nafna mín, hringdi í mig á fimmtudaginn var frá Bretlandi. Mamma sambýlismanns hennar hafði veikst alvarlega og þau fóru út seinni part laugardags um síðustu helgi. Frændi minn og kona hans voru búin að vera á kisuvaktinni í viku og ég bauðst til þess að taka við og var að sækja húslykla til þeirra. Stoppaði hjá þeim í rúman klukkutíma. Frá þeim fór ég beint í heimsókn til kisu, sem þekkti mig, og tók mér mjög vel. Elti mig um alla íbúð og þegar ég settist í stofusófann kom hún sjálfviljug aftur og aftur í fangið á mér. Ég varð samt að færa hana af mér því hún vildi endilega vera að "teygja" úr klónum og lærin á mér þoldu það ekki. Hjá kisu stoppaði ég í um klukkustund. Svo fór ég aftur heim án þess að nota sunddótið, tók það bara inn úr bílnum aftur.

31.10.21

Síðasti októberdagurinn

Þetta er færsla númer þrjúhundruðogeitt á þessu ári. Sextíu og einn dagur eftir þar til nýtt ár rennur upp og þetta ár sem er tiltölulega ný byrjað að manni finnst. Í gærmorgun var ég komin á fætur fyrir klukkan hálfsjö. Á meðan ég beið eftir að N1 sonurinn vaknaði vafraði ég um á netinu. Davíð Steinn var mættur í vinnu um hálfátta og færði mér kaffibolla út í bíl í staðinn fyrir skutlið. Ég var komin á bílaplanið við Laugardalslaugina tíu mínútum fyrir átta. Kláraði að drekka kaffið mitt og hlustaði líka á átta fréttir áður en ég dreif mig í sundið. Sundrútínan tók mig um tvo tíma og svo þvoði ég mér um hárið á leiðinni upp úr. Skrapp að versla á leiðinni heim og keyrði bílinn einnig í gegnum bílaþvottastöð og bað um að felgurnar yrðu þvegnar sérstaklega. Kom heim um ellefu leytið. Gærdagurinn fór svo að öðru leyti í ýmislegt dútl. 

30.10.21

Á skutl vaktinni

Við vorum aðeins þrjár í vinnu í gær, ein í frii og önnur aldrei að vinna á föstudögum nema í "sumarfrísafleysingum".  Þrjár kláruðum við daginn og það sem eftir var af endurnýjun en okkur vannst ekki tími til að byrja að telja lagerinn vegna mánaðamóta. Það var í lagi því við verðum fimm eftir helgi og tvær af okkur getum farið beint í talningu. Þessa talningu þarf að gera áður en mánaðamótin eru "fryst". Ein af okkur þremur þurfti að fara um hálfþrjú í gær. Við hinar vorum að spá í að fara fljótlega en þá kom beiðni um að nettengja tölvuna inni í hvelfingu svo hægt væri að uppfæra hana. Það þarf tvær til að komast inn í hvelfinguna en þó það þurfi aðeins eina til að komast út fannst okkur betra að vera tvær þar til uppfærslan var búin og hægt var að taka netsnúruna úr sambandi. Ég var komin heim rétt fyrir fjögur. Upp úr klukkan hálffimm tók ég til sjósundsdótið og bókasafnspokann. Fór fyrst á safnið og skilaði þremur bókum af átta og tók tvær í staðinn. Tuttugu mínútum yfir fimm var ég komin út í 4,9°C sjóinn. Svalaði um og synti í hringi í um tuttugu mínútur. Skrapp svo aðeins í gufuna áður en ég fór upp úr og heim aftur. Var með steikt slátur í kvöldmatinn.

29.10.21

Stutt í næsta mánuð

 þegar ég er komin með strætókort gengur verr að safna skrefum. Rétt náði 6000 skrefum í fyrradag og komst ekki einu sinni alveg upp í 5000 skref í gær. Labba frá Þjóðleikhúsinu og tek svo vagninn fyrir utan MR heim. Var í bókhaldinu í gær. Rétt fyrir tólf komu forstjóri, framkvæmdastjóri míns sviðs og yfirmaður í heimsókn til okkar. Vorum bara þrjár því ein var í fríi og önnur nýfarin í helgarfrí. Gestirnir fengu m.a. að fylgjast með hádegisframleiðslunni. Kom heim um þrjú í gær og var komin í sundum hálffimm. Fór beint út í laug á brautir 7-8 (enginn kaðall á milli þeirra brauta). Við vorum þrjú á brautinni en þegar ég var að klára fyrstu ferðina bættust fjórir aðrir í hópinn svo ég eiginlega hrökklaðist upp úr. Fór þá í kalda pottinn sem var jafn "heitur" og í fyrradag eða um ellefu gráður. Átti von á því að kalda potts vinkona mín færi að koma en eitthvað hefur komið upp á hjá henni. Hún var ekki komin þegar ég fór upp úr rétt fyrir sex. 

28.10.21

Útskrifuð

Ég þarf að byrja á að leiðrétta smá "sögufölsun" vegna þriðjudagsins. Skrapp nefnilega aðeins aftur út eftir að ég kom heim og skilaði af mér bakpokanum. Setti handtöskuna í skottið svo ég væri með ökuskírteinið, brunaði út í Kringlu og fjárfesti í þriggja mánaða strætókorti sem gilti frá 27. sl. og til 26. janúar n.k. Það eru um 21 mánuður síðan ég fjárfesti síðast í slíku korti.

Notaði semsagt strætó í og úr vinnu í gær. Ég var skráð á vélina no 1. en sú sem var með mér á fyrstu vaktinni var í fríi á mánudaginn og skráð eitt þá og síðustu tvær vikur og næstu viku vorum við og erum skráðar ég 1 og hún 2. Svo ég skipti um enda við hana. Þegar kom að hádegis framleiðslunni vorum við þrjár inni og til að flýta fyrir voru öll kort aðeins sett á form og þau sem áttu að fara í umslög voru handsett í umslögin. Svoleiðis vorum við fljótari og gátum framleitt fleiri kort í einu.

Klukkan tólf vorum við komnar í Þjóleikhúskjallarann. Fengum sætkartöflusúpu og korter yfir byrjaði leiksýningin "Út að borða með Esther" með Sigga Sigurjóns og Guðrúnu Gísladóttur. Þetta var mjög skemmtilegt. Leikritið var í hálftíma og við vorum komnar aftur á vinnustað um eitt. Þar beið okkar seinni endurnýjun og neyðarframleiðsla á einu korti.

Mætti í sund um hálffimm. Synti 300 metra og var í minni þriðju ferð í tæplega 12° kalda pottinum (helmingi of heitur) þegar kalda potts vinkona mín mætti. Fór aðrar þrjár ferðir með henni og svo í gufuna áður en ég fór heim aftur.

27.10.21

Góður bati

Labbaði í vinnuna um Eiríksgötu og Skólavörðustíg í gærmorgun. Ég var frammi í skrifstofurými fram að kaffi, undirbjó dk pökkun, flokkaði kennispjöld og taldi svo með bókaranum þegar fyrstu tölur voru tilbúnar upp úr níu. Ein af okkur fimm átti tíma hjá lækni í gærmorgun. Hún mætti til vinnu upp úr hálfellefu. Þá var önnur af þeim sem voru á vélinni  fyrir kaffi inni með mér að leysa hana af. Hún kom inn um ellefu. Vorum í vinnu til rúmlega tvö. Þá fórum við þrjár af fimm á kaffihúsið Garðurinn við Klapparstíg að hitta þá fjórðu sem vann einu sinni með okkur. Það var ekki búinn að vera hittingur í heila sjö mánuði og löngu kominn tími til. Stuttu fyrir fjögur labbaði ég áleiðis heim. Kom við hjá Bríeti. Stoppaði frekar stutt. Hjúkrunarfræðingur benti mér á að heimsóknartími byrjaði ekki fyrr en hálffimm þegar ég spurðist fyrir á hvaða stofu frænka mín hafði verið flutt. Ég sagðist vera að koma labbandi beint úr vinnunni og ekki ætla að stoppa lengi. Bríet var eini sjúklingurinn á stofunni og ein inni þegar ég kom. Hún var laus við næringuna úr æð og sagðist hafa labbað án þess að nota göngugrind og komist í sturtu. Bataferlið gengi svo vel að hún yrði líklega útskrifuð fyrir vikulok. Frænka mín var þreytt og sagðist fljótlega þurfa að fá sér smá blund svo ég kvaddi eftir að hafa stoppaði hjá henni í ca tíu mínútur. Var komin heim upp úr fimm. Fór ekkert út aftur, aðeins að vafra um í netheimum, horfði á fréttir klukkan sex og svo kvennalandsleikinn Ísland - Kýpur 5:0.

26.10.21

Vetrardekkin undir

Ætlaði að labba í vinnuna í gærmorgun en hætti við vegna regns. Í staðinn tók ég bæði sund- og sjósundsdót með mér í bílinn og geymdi í skottinu. Ein var í fríi í gær og var hún skráð á ítroðsluendann ég ákvað sjálf að "leysa" hana af og var því á vélinni no. 1 fram að kaffi og no. 2 (móttökuendanum) eftir kaffi. Daglegri framleiðslu lauk fyrir tólf en svo kom smá endurnýjuð sem var kláruð á innan við klukkustund eftir hádegi. Ég flokkaði kennispjöld til rúmlega tvö. Fékk að hætta upp úr klukkan hálfþrjú og fór beinustu leið í sjóinn. Var að vaða út í 5,6°C rétt rúmlega þrjú og svamlaði um í uþb tíu mínútur. Rétt fyrir fjögur var ég komin með bílinn á dekkjaverkstæði N1 við Fellsmúla. Átti pantaðan tíma og komst strax að. Með afslætti N1-sonarins kostaði breytingin og geymslan á sumardekkjunum til næsta vors innan við fjórtán þúsund. Var komin heim um hálffimm. 

25.10.21

Rúst

Svaf til klukkan að verða níu í gærmorgun. Tveimur tímum seinna fengum við Davíð Steinn okkur göngutúr upp á barnaspítala og heimsóttum Bríeti. Davíð Steinn færði henni tvo eplasafa og sódavatn. Hún mátti aðeins drekka aðra fernuna, hægt, í gær. Helga systir fékk að nota tækifærið og fara og fá sér eitthvað að borða. Tengdamamma hennar hafði lánað henni bílinn sinn. Davíð Steinn stoppaði í klukkutíma en ég beið alveg þar til Helga kom aftur, um tvö. Kom heim aftur upp úr klukkan hálfþrjú. Setti upp slátur, einn kepp af hvoru. Rétt rúmlega hálffjögur settumst við Oddur fyrir framan fótboltaskjáinn. Liðin okkar voru að keppa, sex mínútur liðnar af leiknum og mitt lið strax búið að skora. "Mínir menn" áttu eftir að bæta við fjórum mörkum áður en leiknum lauk. Mark sem Ronaldo skoraði var dæmt af vegna rangstöðu og varamaðurinn Pogba fékk rauða spjaldið fimmtán mínútum eftir að hann kom inn á. 

24.10.21

Bríet nagli

Síminn hringdi í fyrrakvöld þegar ég var á kafi að uppfæra lifrarmauk í keppi og vinkonur mínar að sauma fyrir. Eftir að hafa lokið þessu verkefni og skolað af mér athugaði ég frá hverjum ég var að missa af símtali. Það hafði verið systir mín. Hún svaraði ekki þegar ég hringdi til baka svo ég sendi henni sms-skilaboð um að ég væri í sláturgerð. Helga náði svo í mig þegar ég var að koma heim úr sundi á tófta tímanum í gærmorgun. Ástæða hringinganna var sú að hún vildi láta mig vita að Bríet hafði lent í vinnuslysi á sínum síðasta degi í sláturtíðinni á Selfossi. Hnífur hafði hrokkið til í hendi hennar og stungist inn í magann. Því miður var hún ekki í öryggissvuntu. Það blæddi hins vegar ekkert mikið og hún gerði lítið úr þessu við vinnufélaganna. Hins vegar fékk hún krampa og kvíðakast þegar hún var komin út í bíl. Sem betur fer ákvað hún að láta kíkja á sig. Keyrði sig sjálf á Sjúkrahús Selfoss og gerði vart við sig strax. Henni var strax sinnt og innan hálftíma var hún á leið í sjúkrabíl í bæinn í myndatöku. Þar kom í ljós að hnífurinn hafði farið ca cm í lifrina en ekki garnirnar sem betur fer, nógu slæmt var þetta samt. Hún þurfti að fara í aðgerð og var kviðarholið opnað. Hún var svo á gjörgæslu til klukkan tvö í gær en á var hún flutt yfir á Barnaspítala Hringsins og þar þarf hún líklega að vera í amk eina og hálfa viku. Systurdóttir mín hafði líka haft hugsun á því að hringja í konu frænda okkar á Selfossi (þar hafði hún fengið að gista næstum alla vikuna svo hún þyrfti ekki að keyra á milli). Bað hana um að koma til sín með hluta af dótinu sínu. Hvort hún bað hana líka um að hafa samband við kæró eða gerði það sjálf svo hann væri ekki að taka rútuna á Selfoss. Það var svo kona frænda okkar sem hringdi í mömmuna, Helgu systur. Ingvi mágur fékk símtal frá lækni eða hjúkrunarfræðingi í gærmorgun þar sem var kvartað yfir því að enginn aðstandandi væri kominn og seinna um daginn flaug systir mín suður eftir fréttir um að annars gæti þetta orðið að barnaverndarmáli.

Við Davíð Steinn skruppum austur á Hellu eftir hádegi í gær. Oddur komst ekki með því hann er að glíma við slæmt kvef. Vorum komin um þrjú og þá var pabbi að koma gangandi alla leið úr búðinni. Stoppuðum hjá honum framyfir kvöldmat og fréttir. Vorum komin aftur í bæinn um níu. 

23.10.21

Sláturgerð

Labbaði í vinnuna yfir Skólavörðuholtið. Vorum fjórar í vinnu, bókarinn kom aðeins seinna því hún þurfti að koma við á einum stað fyrst. Við tvær sem byrjuðum á vélinni, ég no 1 og hin no 2, kláruðum fyrstu tvö verkefni dagsins á einum og hálfum tíma. Samt þurftum við að hafa samband við "vin" þar sem tvær tegundir skiluðu sér ekki yfir. Eftir morgunkaffi fór ég á móttökuendann á vélinni að taka á móti kreditendurnýjun þar til hádegisskammturinn kom. Eftir hádegi kláruðu þær tvær sem voru á vélarvaktinni endurnýjunina. Hætti vinnu um þrjú og labbaði sömu leið heim og ég labbaði í vinnu. Það var smá raki í loftinu og þegar heim kom ákvað ég að taka því aðeins rólega, sleppa sjóferð í þetta sinnið.

Um hálfsex sótti ég Lilju vinkonu og við vorum komnar til Sonju rúmu korteri seinna. Hún byrjaði á bjóða okkur að borða mér sér og kaffi á eftir. En um sjö settum við allt á fullt og byrjuðum í sláturgerðinni. Tókum sex slátur saman og vorum um þrjár klukkustundir að undirbúa, (skera mör, hakka lifur og hræra í) og afraksturinn varð 17 keppir af lifrarpylsu og 13 keppir af blóðmör. 30 keppir sem við skiptum á milli okkar. Lilja tók fimm af lifrarpylsu og fjóra af blóðmör. Ég tók sex af lifrarpylsu og fjóra af blóðmör og Sonja tók sex af lifrarpylsu og fimm af blóðmör. Skilaði Lilju heim um hálfellefu. Þegar ég kom sjálf heim setti ég minn hlut í frysti og háttaði mig svo upp í rúm og fór að lesa til miðnættis.

22.10.21

Bleikur tannbursti

Í gærmorgun fór ég á bílnum í vinnuna. Það var ekkert að gönguveðrinu en ég átti tíma í tanneftirlit fljótlega eftir hádegi. Var skráð á vélarvakt eftir kaffi en önnur þeirra sem átti vaktina fram að kaffi svaf yfir sig. Sú sem átti vaktina með henni bauð mér og hinni sem var skráð með mér að skipta. Við tvær sem vorum skráðar saman í gær erum einhverra hluta vegna sjaldan skráðar saman inn á vél og vildum þess vegna halda hópinn. Þáðum því þetta boð. Framleiðslan gekk ágætlega. Ég var í móttökunni þótt ég væri eiginlega skráð á hinn endan en þar sem ég var skráð á þann enda síðast þegar við unnum saman bauð ég samstarfskonu minni að skipta því næst þegar við erum skráðar saman á vélina erum við enn einu sinni skráðar þannig að ég er á ítroðsluendanum og hún í móttökunni. Í kaffinu fengum við brauð og bakkelsi úr bakaríi sem sú sem var í bókhaldinu sá um að kaupa og koma með. Við höfum "föstudagskaffið" á fimmtudögum því ein af okkur er ekki að vinna á föstudögum. Eftir kaffi flokkaði ég kennispjöld. Þær sem fóru á vélina eftir kaffi voru alveg til klukkan eitt því þær ákváðu að klára eina endurnýjun upp á rúmlega fimmhundruð kort svo þær byrjuðu ekki á hádegisframleiðslunni fyrr en rúmlega tólf. Þær fóru svo aftur inn á vél eftir hádegi því ég þurfti að fara um tvö.

Er komin með nýjan tannlækni. Átti tíma í tanneftirlit þann 19. sl. en í síðustu viku var hringt í mig og mér tjáð að sú sem ég hef verið hjá undanfarin ár væri komin í leyfi og flutt erlendis. Mér var boðið að fá tíma hjá öðrum á stofunni sem ég þáði. Sá tími var í gær. Tannlæknirinn tók tvær myndir, hreinsaði og skoðaði. Ekkert fannst frekar en oftast áður. Aðeins einn staður sem gæti verið að byrja að skemmast og á skoðast betur þegar ég kem næst, eftir ár.

Fór beint í sund eftir tannnlæknatímann og synti 300 metra. Fór 2 x fimm mínútur í kalda og tíu mínútur í sjópottinn. Eftir að ég var komin upp úr aftur kom ég við á AO-við Sprengisand og fyllti á bílinn og einnig í Hagkaup í Skefunni áður en ég fór heim. 

21.10.21

Svei mér þá

Labbaði sömu leið í vinnuna í gærmorgun og morgnana tvo á undan. Fyrsta vakt var á móttökuenda framleiðsluvélarinnar. Þar með var ég líka að telja og taka til tegundirnar á meðan sú sem var á ítroðsluendanum var að hlaða inn fyrstu tveimur verkefnum dagsins. Eftir kaffi flokkaði ég kennispjöld og eftir hádegi fór ég aftur á vélina að vinna í endurnýjun og þá skiptum við um enda. Fékk far heim úr vinnunni um þrjú leytið. Klukkan var byrjuð að ganga sex þegar ég dreif mig í sundið en ástæðan var aðallega sú að ég hafði hitt kalda potts vinkonu mína í mýflugumynd á þriðjudaginn og hún sagðist myndu vera í sundi um hálfsex. Það stóðst líka hún kom í kalda pottinn í sína fyrstu ferð þegar ég var búin að sitja þar í um tvær mínútur. Fórum fjórar aðrar ferðir og enduðum í gufubaði. Þar sat ég amk fimm mínútum lengur en hún og sat hún þó ekki stutt. Það fór svo þannig að ég synti ekkert í gær, til þess hefði ég líklega þurft að mæta korteri fyrr því þótt ég syndi stundum í restina þá er það frekar sjaldgæft.

Er loksins búin að lesa bókina Feilspor og byrjuð á bókinni; Meistari Jakob. Sú bók er um þrjúhundruðognítíu blaðsíður og er ég búin að lesa um einn sjötta af henni. Lofar góðu.

20.10.21

Vikan hálfnuð

Vaknaði um sex í gærmorgun. Slökkti á vekjaranum svo hann færi ekki að væla um hálfsjö, klæddi mig og gaf mér góðan tíma til að vafra um á netinu áður en ég fékk mér lýsi og labbaði af stað í vinnuna. Fór sömu leið og morguninn áður. Forritið í símanum skráði á mig 2,9km göngu. Fram að kaffi var ég að sortera kennispjöld og eftir kaffi á móttökuendanum á vélinni. Þær sem byrjuðu daginn á vélinni fóru aftur inn á vél eftir hádegi, skiptu bara um enda. Ég sorteraði fleiri kennispjöld. Labbaði af stað heim upp úr klukkan þrjú, líka sömu leið og eftir vinnu á mánudaginn. Klukkan var svo að verða fimm þegar ég dreif mig loksins af stað í sundið. Hitti aðeins á kalda potts vinkonu mína en hún var að klára. Hitti líka á eina bekkjarsystur mína úr grunnskóla sem og einn frænda minn. Kom heim rétt fyrir hálfsjö og fór beint í að búa til eitthvað úr foleldagúllasinu sem ég tók út úr frysti um morguninn. 

19.10.21

Labbað báðar leiðir

Labbaði Lönguhlíð, Klambratún, Flókagötu, Gunnarsbraut, Njálsgötu, Snorrabraut og Skúlagötu í vinnuna í gærmorgun. Ég var komin fyrst og fór beinustu leið í að sinna mínum bókhaldsverkefnum, þ.e. prenta út fyrstu framleiðslutölur. Fyrirliðinn mætti rétt á eftir mér og við hjálpuðumst að við að sækja vagna og töskur inn í hvelfingu. Næst lá leiðin inn á kaffistofu til að fylla á vatnsflöskuna, fá sér smá kaffi og prjóna nokkrar lykkjur. Daglegri framleiðslu lauk rétt fyrir eitt. Þá átti bara eftir að stemma af hádegisframleiðsluna. Við fórum í mat og um hálftvö kom yfirmaður okkar á fyrsta skipulagða reglulegan fund sem eftirleiðis verður hálfsmánðarlega. Fundurinn var rétt rúman klukkutíma. Eftir hann var klárað að telja og ganga frá. Ég labbaði heim yfir Skólavörðuholtið. Meðan ég var að kasta mæðinni eftir gönguna settist ég inn í stofu með fartölvuna og vafraði svolítið um á netinu. Um fimm var ég mætt í Nauthólsvík. Sjórinn 6,5°C, flóð og ég svamlaði um í uþb korter. Gaf mér fimm mínútur í heita pottinum áður en ég fór upp úr og heim aftur. Svo bauð ég strákunum með mér á pítuna. Einkabílstjórinn fékk að keyra og ég fékk mér hvítvínsglas með minni pöntun, fiski í orlydeigi.
Annars gaf ég upp ranga blaðsíðutölu á bókinni sem ég er að lesa, hún er 474 síður og ég á eftir uþb hundar blaðsíður.

18.10.21

Pabbi 87 ára í dag

Var vöknuð fyrir klukkan sjö í gærmorgun. Var með fartölvuna í herberginu og "skrapp" á netið til að byrja með. Unga parið var í stofunni. Um tíu var ég komin í Laugardalinn. Var langmest í kalda pottinum en ég synti 200 metra og fór einu sinni í heitasta pottinn, einu sinni í gufuna og einu sinni í sjópottinn. Eftir sundferðina fór ég í Krónuna, alveg búin að steingleyma því að ég hafði ætlað að hringja í Odd og spyrja hann hvort hann vildi koma með. Ég kom heim upp úr klukkan tólf og var búin að ganga frá vörunum áður en Oddur kom á fætur. Fékk að fara inn í stofu upp úr klukkan eitt. Unga parið var samt áfram hjá mér fram eftir degi en seinni partinn þurfti Mundi að fara að vinna og Bríet skutlaði honum þangað og ætlaði svo í eina heimsókn áður en hún drifi sig austur.

Ég er ekki byrjuð að lesa skammtímalánsbækurnar; Meistari Jakob og Níu líf eftir Emelie Schepp. Ætla fyrst að klára Feilspor, mjög spennandi bók upp á rúmlega þrjúhundruðogfjörutíu síður. Á aðeins eftir tæpar sjötíu bls. Skilafresturinn á skammtímalánsbókunum rennur út eftir annan föstudag og ef ég les þær næst, sem er ætlunin, ætti ég að vera búin með þær fyrir þann tíma. Gæti jafnvel klárað amk eina af hinum fimm bókunum sem ég er líka með í láni fyrir utan þessar þrjár.

17.10.21

Sunnudagur

Ég var vöknuð fyrir klukkan sex í gærmorgun. Korter yfir sjö varð ég svo að banka á dyrnar hjá N1 syni mínum sem hafði sofnað aftur en átti að vera mættur í vinnu upp úr klukkan hálfátta. Hann var fljótur á fætur og uþb tuttugu mínútum síðar setti ég hann út við N1 við Gagnveg í Grafarvogi. Hann færði mér bolla af kaffi út í bíl og svo fór ég beinustu leið í Laugardalinn. Þurfti að bíða smá stund á bílaplaninu og ákvað því að hlusta á morgunfréttir áður en ég færi í sundið. Fór beinustu leið í kalda pottinn, svo sjó pottinn, aftur í kalda, synti 400, þar af 250 á bakinu, aftur í kalda, gufubað, kalda sturtu og smástund aftur í sjópottinn. Þvoði mér um hárið og var komin heim aftur um tíu. Restin af deginum fór að mestu í lestur, fótboltagláp og þáttaáhorf. 

16.10.21

Frænkuheimsókn

Í gærmorgun fór ég á bílnum í vinnuna. Var með sjósundsdótið, bókasafnspoka með þremur bókum og dall með mér í skottinu. Inn í vinnu tók ég prjónadótið og súpubréf með mér. Vorum þrjár í vinnu sem virkar þá þannig að hver og ein er bara á einni starfsstöð yfir daginn, ekki bara bókarinn. Ég var á ítroðsluendanum á vélinni. Þessa dagana er aðeins um daglega framleiðslu að ræða en það styttist í að endurnýjanir fyrir kort sem renna út eftir næsta mánuð skili sér til okkar. Það ferli byrjar strax eftir helgi. Vélin var með smá leiðindi og vesen og í einu slíku veseniskasti þurftum við að hringja á viðgerðarmann. Hann gat liðsinnt okkur í gegnum símann og við gátum klárað alla framleiðslu fyrir klukkan tólf. Eftir hádegi sorteraði ég kennispjöld. Hættum vinnu fyrir klukkan þrjú. Ég fór beint á safnið að skila bókunum. Þrátt fyrir að það væru enn þrjár bækur heima stóðst ég ekki mátið og valdi fimm aðrar til að taka með mér heim. Tvær af þeim eru skammtímalánsbækur með fjórtán daga skilafresti. Næst lá leiðin í Nauthólsvík. Sjórinn 6°C og flóð. Ég svamlaði um í korter og var svo annað eins í heita pottinum. Áður en ég fór heim kom ég við í Fiskbúð Fúsa og keypti mér nætursaltaða ýsu og harðfisk, óbarða ýsu. Um níu komu Bríet og Mundi en Bríet var búin að hringja í mig fyrr um daginn til að spyrja hvort hún mætti gista í stofunni minni um helgina.