Kommunum fer fækkandi

Varð svolítið svekkt þegar ég mældi mig í gærkvöldi, fjórar kommur eru alltaf fjórar kommur ef maður er að slást við pestirnar. Ég er þó ekki frá því að það sé farið að losa um "kekkina" í brjóstholinu. Hefði helst viljað vera laus við kommurnar svo ég gæti verið þokkalega viss um að mér slái ekki niður fari ég af stað út í morgundaginn. Ætla að halda mig heima við í dag. Oddur kom í gærkvöldi og er með gistingu hér til morguns og ég fæ þá bræður vonandi til að vera með mér í gjöf, og sjá um allt í kringum hana, til að taka með á opið hús á morgun. Það er eiginlega annars hálf galið að þurfa að halda sig inni við. Annars greiddi ég hálfa millijón inn á húsnæðislánið í morgun eftir að hafa fyrst greitt fasta greiðsluseðilinn. Lánið er því komið niður í 7,1 úr tæpum tólf sem það var í fyrir ári og greiðslubirgðin líklega að komast niður í um fimmtíuþúsund í stað áttatíuogtveggja. Þarf svo aðeins að ákveða næstu skref. Held að það væri skynsamlegt að koma láninu aðeins neðar til að lækka greiðslubirgðina enn frekar og svo halda áfram að borga inn á lánið með séreignarsparnaðinum þegar ég má fara að taka hann út eftir uþb tvö ár. Gallinn við sumt í þessu lífi er að stundum er það sem er svo rétt í dag alveg kolrangt á morgun og öfugt.

Með 8 kommur á kvöldin

Síðan á mánudags kvöldið hef ég verið að "vinna" í því að ná heilsu á ný. Var frekar spæld yfir því að mér tókst ekki að forðast pestina því dagana áður en ég játaði mig sigraða reyndi ég eins og ég gat að fara extra vel með mig. Það er enn nokkuð fast ofan í hálsi eða neðar. Er ekki stífluð en inn á milli þarf ég þó að snýta mér og horinn stundum grænn. Það er alls ekki gaman að vera kippt svona út úr rútínunni en það að ég hafi þurft að "hanga" heima sl daga hefur þó komið sér vel. T.d. eins og í gær þá gat ég fylgst með allri útsendingunni á RÚV vegan sólmyrkvans og í dag fylgdi ég Gunnari heitnum Þórðarsyni með góðri aðstoð útsendinu á sjónavarp símans preminum.

Oddur Smári byrjaði að vinna á mánudaginn var, sinnir yngstaskólastiginu í frístund í einum skólanum á Selfossi. Á meðan ekki er búið að setja skólann er þetta 100% starf en fer svo niður í hlutastarf um leið og skólinn byrjar.

"Hönnunar"-barnateppið stækkar daglega og mig er farið að gruna að ég þurfi að útvega aðeins fleiri dokkur í sumum litunum. Stundum veit ég ekki hvernig næsti bútur í teppinu verður fyrr en rétt áður en komið er að honum. Og þegar ég verð búin að prjóna og ganga frá endum mun ég amk eiga eftir að sauma kindamyndir á alla vega þrjá fleti og jafnvel ákveða hvort flott verði að hekla kant í kringum teppið. 

Pestargemlingur - kann það varla

Eftir að hafa farið frekar vel með mig um nýliðna helgi vaknaði ég nokkuð hress snemma í gærmorgun. Vissulega fann ég enn fyrir særindum í hálsinum en ég taldi mig vera hitalausa og nokkuð viss um að ég væri að komast yfir "versta" hjallann. Mætti í vinnu um hálfátta og var búin að hella upp á, snurfursa salernisrýmið, opna afgreiðslukerfin og gera upp kassann þegar stöðvarstjórinn mætti. Nýi maðurinn var á námskeiði mestallan daginn í gær, að vinna í að fá réttindi til að skoða og skila skoðununum sjálfur. Mér skilst að hugsanlega klárist það mál í vikulokin eða strax í næstu viku. Hann kom til okkar tæpum klukkutíma fyrir lokun og hjálpaði til við að skoða síðustu fimm bílana af 34 í heildina. Þó nokkur erill var í gær og ein skoðunin hafði meira að segja verið bókuð inn á noona sem við vorum að taka í notkun fyrir Skeifuna sl. föstudag. Þegar fór að líða á vinnudaginn var ég orðin nokkuð viss um að ég væri komin með hita. Tókst að mestu að forðast að fá hóstaköst en fann að hálsbólgan lá djúpt. Nebbinn stíflaðist ekki en það kom fyrir að ég þurfti að bregða mér frá og snýta mér eða þurrka nebbann, alls ekki oft. Ég sagði stöðvarstjóranum, í vinnudagslok, að ég ætlaði að mæla mig þegar ég kæmi heim og myndi senda honum sms ef ég væri komin með hita. Fór aðeins inn í Lyfju við Smáratorg. Ætlaði að kaupa annað glas af ólífulaufi og hitamæli en hætti við þar sem greiðslukortið mitt var út í bíl. Kom við í Krónunni í Lindum, hafði ekki farið að versla síðan fyrir síðustu mánaðamót. Kom heim um hálfsex. Gekk frá vörunum og fann svo loksins hitamælinn sem ég vissi að ég ætti í fórum mínum. Mældist með rétt tæplega 38,5°C hita. Ég hef ekki orðið svona lasin í meira en þrjú ár. Sendi sms-ið og tók því svo rólega. Um níu fékk ég mér panodíl-hot drykk, háttaði upp í rúm og fór að sofa án þess að lesa stafkrók. Rumskaði upp úr miðnætti en sofnaði strax aftur eftir að hafa farið á salerni pissað og snýtt mér. Rumskaði aftur um fimm leytið og þá var sama upp á teningnum. Vissi aðeins af mér um sjö en svo ekki fyrr en klukkan var að verða tíu. Er ekki búin að mæla mig aftur, geri það ekki fyrr en í kvöld eða á morgun. Hósta stöku sinnum og það er frekar sárt. Ég þarf líka að þurrka nebbann eða snýta mér öðru hvoru. Er samt ekki stífluð.

Seinni partinn í dag kemur einhver til að þrífa loftstokkinn í þvottaherberginu. Hæðir 5-8 voru teknar í gær og restina á að klára í dag. Nágrannakonan við hliðina bankaði upp á rétt áðan og afhenti mér lykla af sinni íbúð þar sem hún verður að vinna til klukkan hálfsjö.

Svæsin hálsbólga

Ég stóð mína pligt í vinnunni á fimmtudag og föstudag en er ekki búin að fara í sund síðan á Hellu á laugardaginn var og aðeins eina ferð í sjóinn um miðjan dag á miðvikudaginn. Eftir vinnu á fimmtudaginn kom ég við í Lyfju á Smáratorgi, sem ég skrifaði um í síðustu færslu, og keypti mér m.a. ólífulauf- og hvítlaukshylki. Hefði eiginlega líka átt að kaupa eitthvað sterkt og mýkjandi í hálsinn. Átti smá engifer bút sem ég nýtti mjög vel en kláraðist um helgina. 

Bríet hafði samband við mig á föstudaginn og spurði hvort hún mætti gista hjá mér aðfaranótt laugardags. Það var auðsótt mál. Hún kom um sjö leytið og fékk lánaða húslykla en staldraði stutt við. Ég sá hana svo ekki aftur fyrr en rétt fyrir klukkan ellefu í gærmorgun þegar hún kom og skilaði lyklunum og sagði orðrétt: "Svefn er greinilega fyrir aumingja!" Var svo rokin út fljótlega aftur á leið í smá lokunar veislu Hárhornsins en Lilja föðursystir hennar hefur rekið þá stofu síðan Torfi dó. Nú er hún búin að finna annað húsnæði á betri stað skilst mér. Ég reyndi að fara vel með mig um helgina og hélt mig heima við. Það varð þó amk til þess að ég er loksins farin að munda prjónana aftur eftir rúmlega árs hlé. Er byrjuð á einhverju sem á helst að verða bleikt ungbarnateppi með kindum á. Bríeti leist vel á það sem hún sá af því en svo verður það að ráðast hvernig heildarútkoman verður og hvort Hulda verði jafn hrifin. Í morgun fór ég annars í þriðja skipti í sturtu hér heima á þessum rétt tæpu tíu mánuðum sem ég hef búið hér en það kemur ekki til af góðu. Það er þó örugglega ágætt að nota sturtuna öðru hvoru og nýta tækifærið og skrúbba sturtubotninn í leiðinni. Hann var þó ekkert sérlega skítugur, samt smá sandur úr Nauthólsvík og einhver hár í niðurfallinu. 

Fyrsti vinnudagur eftir frí

Gærdagurinn var síðasti frídagurinn í bili. Kalda potts vinkona mín hafði haft samband kvöldið áður að spyrja hvort við gætum hist í Nauthólsvík um þrjú. Ég taldi það frekar líklegt en sló smá varnagla þó því ég fann aðeins fyrir eymslum í hálsinum og var smeik um að vera að leggjast í pestina sem synir mínir eru rétt að verða góðir af. Skrifaði til baka að ef hún heyrði ekkert frá mér í gær mætti hún reikna með að hitta mig. Fór frekar snemma á fætur og loksins lét ég verða af því að grípa í prjónana aftur eftir árs hlé. Einhverskonar barnateppi er komið í vinnslu og verður frekar fróðlegt að sjá útkomuna þegar þar að kemur. Um hádegið tók ég bleikju og smá ýsu úr frysti, skar niður sæta kartöflu sem ég sauð með spergilkáli. Frosna fiskinn setti ég saman í annan pott í vatn krydduðu með best á lambið. Úr varð hin ágætasta máltíð og nægur afgangur í tvo skammta. Ég var mætt í Nauthólsvíkina rétt fyrir þrjú. Við Hrafnhildur fórum þrisvar í sjóinn, einu sinni í gufuna og tvisvar í heita pottinn á einum og hálfum tíma. Var mætt í Hátúnið stuttu fyrir fimm. Eftir tímann fékk ég gefins sólmyrkvagleraugu og þau skilaboð að stöðinni yrði lokað klukkan fjögur n.k. miðvikudag svo ég fæ eina viku í frí. Á heimleiðinni kom ég við í Lyfju við Smáratorg og verslaði mér C-vítamín, hvítlaukshylki, ólífulauf og extra-tyggjó. Hitti bekkjarsystur úr 2. bekk í Helluskóla fyrir utan.

Þegar ég fór í háttinn í gærkvöldið stillti ég tvær "vekjaraklukkur", annars vegar klukkan hálfsex og hins vegar klukkan hálfsjö. Rumskaði um eitt leytið til að fara á pisseríið og ákvað í leiðinni að slökkva á fyrri vekjaranum og sleppa morgunsundi. Var mætt í vinnu um hálfátta. Hellti upp á, gerði uppgjör og fleira. Stöðvarstjórinn er búinn að útvega tveggja sæta sófa og aukaborði í afgreiðslurýmið og hann hafði þar að auki skroppið í Bónus í gær og passað upp á að kaupa hreint skyr og rjóma. Ég fór því aftur heim með chiagrautinn sem ég tók með í vinnuna í morgun og hafði sem millimál um fimm leytið eftir að ég kom heim. 

Næst síðasti frídagurinn langt kominn

Ég mætti fyrst af sjö (tíu ef ég tel hundana með) næturgestum til pabba á laugardaginn var. Helga og Ingvi og hundarnir þrír voru síðust, komu milli fjögur og hálffimm. Þá voru Hulda, Óli og tvíburarnir mætt á tveimur bílum. Við pabbi, Helga og Hulda skruppum þá fljótlega í búðina. Þegar við komum til baka var þremur krydduðum lambalærum pakkað inn í álpappír og stungið í ofn. Þá var líka að komast á hreint hvernig raðað yrði í svefnplássin. Óli, Hulda og Bríet sváfu í stærsta herberginu því þar inni voru tvö rúm, annað tvíbreitt. Ég var ein í mínu herbergi, bræðurnir sváfu saman í tvíbreiðu rúmi í herberginu við hliðina, pabbi og sú spænski í stofunni. Hann í sínu rúmi við minni gluggann og hún á dýnu á gólfinu við stærri gluggann. Helga, Ingvi og hundarnir lögðu undir sig pabba herbergi og "spariforstofuna"! Sú spænska var annars að vinna til klukkan tíu um kvöldið. Kom ekki heim fyrr en við vorum búin að borða og ganga frá. Hún vinnur í eldhúsinu á Stracta hótelinu og er á tólf tíma vöktum. Átti líka vinnu vakt á sunnudeginum. Bræðurnir og Bríet skutluðu henni í vinnuna daginn eftir og gerðu sér ferð á Hvolsvöll eftir hálftöflum og fleiru. Ég rölti í sund og var mætt rétt áður en opnaði um tíu. Kom til baka um tólf leytið. Um hálfþrjú leytið lögðum við af stað á tveimur bílum en Ingvi átti pantað borð fyrir 18 manns á Friðheimum því vinafólk þeirra var á svæðinu. Oddur fékk að keyra okkur Helgu og Ingva og tvo af hundunum á Helgu bíl. Davíð Steinn keyrði bíl afa síns, með óléttu frænku sína í framsætinu og afa sinn, Bríeti og Óla aftur í. Hann lagði heldur lengra frá en hann þurfti en færði svo bílinn nær eftir að pabbi hafði rölt með eina hækju af bílastæðinu og svo smá stuðning þegar hann þurft niður nokkur þrep. Borðið var tilbúið um fjögur leytið og þá voru níu manns á aldrinum 3 til rúmlega 50 búin að bætast við. Stór hlutu af þeim hópi var á fyrstu (og einu hingað til) Árlandsleikunum sem voru haldnir sumarið eftir að Helga og Ingvi fluttu í sveitina fyrir norðan. Systir mín og mágur buðu tvíburunum að borða og drekka, var "sextugs"-afmælisgjöfin þeirra. Ég átti í vandræðum með að velja á milli súpu og sallats en það síðarnefnda, með önd, varð ofan á. Pantaði mér einnig eitt hvítvínsglas með matnum. Nokkru eftir að allir voru búnir að borða og sú ólétta, systir hennar og afinn orðinn þreytt að sitja lengur var ákveðið að Bríet tæki að sér að keyra afa bíl með okkur fjögur og báða hundana með til baka á Hellu. Bræðurnir og systir mín og mágur og hluti af vinahópnum varð aðeins lengur.

Í gær átti sú spænska frídag og hún vildi endilega elda fyrir okkur spænskan rétt. Svo gott hjá henni. Vorum að borða milli tvö og þrjú. Eftir matinn kvöddu Hulda og Óli og fóru til Keflavíkur og ekkert svo löngu á eftir þeim kvöddu bræðurnir. Þeir voru búnir að glíma við smá hálsbólgu alla helgina og mér skilst á Oddi að hann hafi verið kominn með hita seinni partinn í gær. Davíð Steinn átti að byrja að vinna aftur í dag eftir rétt rúmlega viku frí en hann varð að tilkynna sig inn veikan. Ég stoppaði fram yfir kvöldmat og eftirrétt en ákvað svo að drífa mig í bæinn. Bíllinn var í 56% en ég komst á honum alla leið heim og það var laust fyrir hann á hleðslustaurnum þegar ég bakkaði að honum um tíu þá komin niður í 22%. Var rúma sjö klukkutíma að hlaða hann upp í 100%, rumskaði upp úr klukkan fimm til að stoppa hleðsluna en fór ekki út til að taka hann úr sambandi og færa fyrr en um níu.

Í hlutlausum

Ekkert merkilegt gerðist á fimmtudaginn var, nema þá helst að ég kláraði að lesa eina bóka af safninu. Í gærmorgun borðaði ég hinn helminginn af hafragrautnum sem ég bjó til á miðvikudaginn og hitti svo kalda potts vinkonu mína og eina til í Nauthólsvík um tíu. Var komin heim aftur um tólf. Klukkan var orðin hálffjögur þegar ég fór loksins út aftur. Stillti heilsuforritið í símanum á útiveru en byrjaði á því að rölta í Jysk á Smáratorgi að kíkja á og versla garn sem kannski verður að barnateppi við rétta meðhöndlun. Svo hélt ég útiverunni og gönguferðinni áfram. Staldraði aðeins við Himnastigann en ákvað að labba aðra leið og einhverskonar hring. Nú er ég um það bil að fara að leggja í hann austur á Hellu. Helga systir og Ingvi mágur eru á leiðinni suður með hundana sína þrjá. Hulda og Óli komu í bæinn í gær, gistu hjá mömmu hans og fá að geyma hundinn hans þar á meðan þau verða fyrir austan. Pabbi er búinn að undirbúa komu okkar. Færa rúmið sitt í stofuna og smíða annað tvíbreytt í herbergið hans. Spænsk-suðurameríska stúlkan ætlar að hreiðra um sig í stofunni og það lýtur allt út fyrir að hægt verði að hola tíu manns niður inni, amk yfir eina nótt. Pabbi er með allra hressasta móti því blaðran er alls ekki að angra hann þessa dagana. Ég veit annars ekki hvort ég verð eina, tvær eða þrjár nætur fyrir austan. Ætla að láta það ráðast. 

Ekkert kaffi í dag

Rumskaði fyrst um fimm leytið. Er ekki svo viss um að ég hafi steinsofnað alveg aftur en ég kúrði eitthvað. Um hálfsjö leytið greip ég í bók og rúmum klukkutíma eftir það fór ég loksins á fætur. Bjó mér til hafragraut um níu leytið. Á svipuðum tíma komu skilaboð frá ensku vinkonu minni. Hún og maðurinn hennar eru búin að bóka ferð til Íslands í 10 daga  í júní á næsta ári og festa sér íbúð í sjö mínútna göngufæri frá mér. Þetta verður eitthvað skemmtilegt. Annars mætti ég í Nauthólsvík um það leyti sem verið var að opna og var ég á undan kaldapotts vinkonu minni. Fórum þrjár ferðir í sjóinn og í annarri ferðinni var ég lengur út í og svamlaði út að kaðli. Í þriðju og síðustu ferðinni tók ég sundhettuna af höfðinu og sjóbleytti hárið. Ég kom við í Krónunni í Lindum áður en ég fór heim. Fór ekki aftur út fyrr en upp úr klukkan hálffimm en þá brunaði ég í Hátúnið í osteostrong tíma. 

Þrjátíu ár síðan synirnir voru skírðir

Rúmur klukkutími síðan ég kom heim eftir yndislega daga hjá æskuvinkonu á Egilsstöðum. Var svo heppinn að Davíð Steinn var í bænum og nennti að sækja mig á flugvöllinn. Hann skutlaði mér líka þangað um eitt leytið á föstudaginn var. Flugið austur tók um 45 mínútur og var ég að lenda rétt fyrir hálffjögur. Þurfti aðeins að bíða eftir að vera sótt á flugvöllinn, en það var í fínu lagi. Aðalsteinn, maðurinn hennar Ellu, var í sumarfríi á föstudaginn. Það var mikið gott að hitta Ellu og höfðum við um margt að spjalla. Um fimm leytið fengum við okkur hvítvínsglas í fordrykk en Aðalsteinn fór að undirbúa kvöldmatinn, folaldakjöt steikt í ofni í ofnpotti á rótargrænmeti. Mjög góður og vellukkaður matur. Á laugardagsmorguninn fór hann eldsnemma að leiðsegja mönnum frá Vestmannaeyjum í hreindýraveiði. Aðeins annar maðurinn var með leyfi fyrir tarfi en hinn fékk að fljóta með. Það fór allur dagurinn í þetta og endaði með því að þeir urðu frá að hverfa og fara aftur á sunnudaginn. Dagurinn hjá okkur Ellu byrjaði milli sjö og átta, reyndar hafði hún aðeins rumskað og farið fram um leið og bóndinn. Hún er með nokkuð fastmótaða rútínu dags daglega og heimsóknin mín truflaði alls ekki þá rútinu. Inn á milli vorum við að spjalla, leysa lykilgátur, sem hún er sérfræðingur í, horfa á þætti og alls konar. Um tólf ákvað ég að gera hlé á tæplega þriggja ára kaffibindindi og fékk mér einn bolla úr kaffivélinni hennar Ellu ásamt grillaðri samloku. Kaffið var himneskt en ég tók samt þá ákvörðun að "detta" ekki of mikið í það, hélt mig alla fjóra dagana við tvo bolla á dag, seinni bolla alls ekki seinna en klukkan þrjú. Hreindýratúrinn hjá Aðalsteini á sunnudaginn varði frá klukkan átta um morguninn til klukkan hálftvö aðfaranótt mánudagsins. Ella bauð mér út að borða á veitingastaðnum sem tilheyrir "Lake" gistihúsinum. Fórum þangað á rauða bílnum þeirra hjóna, ég bílstjórinn, og vorum settum hjólastólið í skottið á milli staða. Fengum okkur báðar rirsarækjur á grænmetis og ávaxtabeði. Seinna á sunnudaginn fórum við aðeins út á "röltið" þ.e. ég labbaði og Ella notaði rafskútuna sína. Löbbuðum niður á Vilhjálmsvöll, einn hring á ystu brautinni með smá stoppi og svo til baka. Borðuðum afgang af folaldasteikinni um kvöldið. Rétt fyrir hádegið í gær fékk ég rauða bílinn lánaðann og skrapp í heimsókn í Frumherja í Fellabæ. Var mætt rétt fyrir tólf og stoppaði aðeins inn í matartímann þeirra. Skoðunarmanninn þekkti ég aðeins en hann er fastamaður á Hádegismóum en tók að sér að leysa af fyrir austan næstu tvær vikurnar. Milli klukkan átta og tólf skoðaði hann 22 bíla, bæði bókaða bíla og fleiri sem komust að inn á milli ef þeir vildu bíða. Gætu hafa verið allt að fjórir auka bílar bara fyrir hádegi. Eftir heimsókina kom ég við í sundlauginni á Egilsstöðum. Fór beint á braut 2 og synti í um tuttugu mínútur, aðallega skriðsund en líklega um 125m bakskriðsund. Aðalsteinn grillaði ofan í okkur um kvöldið. Upp úr klukkan tíu í morgun skutlaði ég Ellu í sjúkraþjálfun, lagði svo bílnum og fékk mér um það bil hálftíma göngutúr á meðan. Eftir hádegi fórum við stöllur aðeins út á pall bak við húsið þar sem hún blés nokkrar sápukúlur, æfngar sem talmeinafræðingurinn hennar mælti með. Við vorum líka að leysa lykilgátur, horfa á þætti og spjalla. Aðalsteinn bauð upp á þorskhnakka með kartöflum og smjöri í kvöldmat áður en hann skutlaðist með mig á flugvöllinn.

Tvíburarnir þrítugir í dag

Ég gerði það með vilja að taka ekki fram tölvuna í gærkvöldi. Eftir vinnu í gær fór ég í osteostrong tíma, sló met á einu tækinu. Var komin í Nauthólsvík um hálfsex. Þar var margt um manninn því sjósundsfélag Reykjavíkur stóð fyrir einhvers konar sjósundskeppni. Ég er ekki í sjósundsfélaginu, var bara þarna að hitta kalda potts vinkonu mína. Við fórum tvisvar sinnum í sjóinn og í seinna skiptið svamlaði ég út að kaðli og fór smástund í lónið á leiðinni í pottin.

Rumskaði um fimm í morgun sem mér fannst mjög snemmt þar sem ég er byrjuð í tveggja vikna sumarfríi. Hafði ekki stillt á mig klukkuna og gat sem betur fer kúrt mig aðeins niður aftur, ekki mjög lengi samt. Held að ég hafi verið byrjuð að lesa einhvern tímann á sjöunda tímanum. Fór á fætur um átta, hélt áfram að lesa og kláraði næstsíðustu bókina af safninu. Um níu bjó ég mér til hafragraut og um tíu var ég mætt í Nauthólsvík þar sem verið var að opna. Svamlaði út að kaðli og fór í gufuna í tíu mínútur á eftir áður en ég fór aðra ferð í rúmlega 12°C kaldan sjóinn og svo í heita pottinn í ca tuttugu mínútur. Um hálftólf var ég komin á bókasafnið. Skilaði af mér öllum bókum nema einni, líka prjónablaðinu sem ég tók síðast. Í pokann fóru fimm bækur; Í leyndri gröf eftir Vivecu Sten, Hættulegur hæfileiki eftir Camillu Sten, Illska eftir Eirík Örn Norðdahl (gæti verið búin að lesa hana áður), Blómadalur eftir Niviaq Korneliussen og Oddaflug eftir Guðrúnu Helgadóttur.

Þegar ég kom aftur í bílinn af safninu átti klukkan stutt eftir í tólf. Ég hringdi í Odd Smára og talaði við hann á meðan ég keyrði yfir í N1 við Borgartún. Þar hitti ég á hinn soninn. Sá var með kórónu og svolítið skreyttur, m.a. með hálsmen með 30 á. Rétt eftir að ég hitti á Davíð Stein kom einn samstarfsfélaginn og byrjaði að syngja afmælissönginn. Ég tók undir, hástöfum, og afmælisbarnið hálf snéri sér undan. Ég var komin heim um hálfeitt. Ákvað að stinga bílnum í samband og hlaða þrátt fyrir að hann væri í 60%. Fljótlega eftir að ég kom inn fór ég að sinna því sem ekki má skrifa um. Hringdi líka í pabba og Ellu vinkonu. Þegar ég fór út að taka bílinn úr sambandi og færa hann í annað stæði seinni partinn, notaði ég tækifærið og fór í smá göngutúr. Stefnan var tekin á Himnastigann. Neðarlega var grafa við vinnu svo ég tók smá krók, sleppti þar af leiðandi einhverjum tröppum, fór þó alla leið upp og settist á bekkinn um stund. Labbaði svo aðeins aðra leið heim,

Á morgun á ég flug austur á Egilstaði. Davíð Steinn verður kominn í frí og ætlar að gefa sér tíma til að skutla mér á völlinn. Ég mun ferðast frekar létt. Tek ekki tölvuna með mér, enga handavinnu og kannski ekki einu sinni eina bók. Bara föt til fjögurra daga, snyrtibudduna, vítamín og sunddót. Færslur næstu tvær vikur verða örugglega mjög stopular.

Afturelding fer í bikarúrslitaleikinn í knattspyrnu karla 11. sept n.k.

Rumskaði aðeins of snemma en náði að kúra mig niður um stund. Slökkti á vekjaranum fimm mínútum áður en hann átti að ýta við mér. Eftir morgunverkin, morgunmatinn og lóðaæfingar hér heima var ég mætt í sund um það leyti sem opnaði í Laugardalslaug. Fór á braut 1 og synti 500m á rétt rúmum tuttugu mínútum. Stimplaði mig inn í vinnu rétt rúmlega hálfátta. Stöðvarstjórinn mætti fimm mínútum síðar og nýji skoðunarmaðurinn var mættur nokkru fyrir átta. Hann var aðeins að fylgjast með í afgreiðslunni og punkta hjá sér framan af morgni en eftir hádegi þegar meira varð að gera í skoðunum fór hann að hjálpa til þar. Eins og dagurinn byrjaði mjög rólega þá voru á endanum skoðaðir þrjátíuogþrír bílar í dag. Lokuðum á slaginu hálffimm og ég fór beinustu leið heim. Lítið annað að frétta nema ég byrjaði að lesa eina bókina úr síðustu ferð á safnið í gærkvöldi; Gröf minninganna eftir Bjarka Bjarnason. Mæli alveg með þeirri bók. 

Tveir vinnudagar eftir fram að tveggja vikna orlof

Ég fór ekki að sofa fyrr en um miðnætti í gær. Var komin upp í rúm um tíu leytið og gleymdi mér alveg í lestrinum. Vaknaði við vekjarann um hálfsex. Mætti í sund um leið og opnaði. Synti 500m. Stimplaði mig inn í vinnu tuttugu mínútum fyrir átta. Stöðvarstjórinn var ný mættur og tíu mínútum á eftir okkur mætti nýr skoðunarmaður. Hafði verið í þjálfun hjá Frumherja í Hafnarfirði en á eftir að klára námskeið eða próf til að fá skoðunarnúmer. Þeir voru því að vinna tveir saman við skoðanir í dag, annar meira uppi og hinn niðri en það var stöðvarstjórinn sem skilaði öllum skoðunum. Á tíma var erill í símsvörun og smá að gerast í númeraplötuviðskiptum. Vinnudagurinn leið fljótt, lokuðum á slaginu hálffimm og ég var komin heim fyrir klukkan fimm. 

Helgin og HM að klárast

Þessi helgi hefur verið fljót að líða eins og flestar aðrar helgar. Ég leyfði mér að sofa út í gærmorgun og skrópa í sundið. Vaknaði um hálfníu og frétti um hálftíma síðar að lítil frænka hefði fæðst í Danmörku nokkrum klukkustundum fyrr. Yngsti bróðir mömmu heitinnar og konan hans, 10 og 9 árum eldri en ég, voru að verða afi og amma. Dótturdóttirin hefur verið nefnd Alma. Klukkan tíu var ég mætt til norsku esperanto vinkonu minnar og stoppaði hjá henni í rúma klukkustund. Áður en ég fór heim keypti ég þvott á bílinn hjá Löðri við Fiskislóð. Um þrjú leytið skrapp ég út í göngu, fór 4,4km, með einni pásu, á klukkustund og tuttugu mínútum. Oddur Smári kom um hálftíu í gærkvöldi, rétt áður en Englendingar skoruðu þriðja markið í fyrri hálfleiknum um þriðja sætið á HM. Leikurinn endaði 6:4 fyrir England á mótið Frökkum. Frakkar voru ekki sjálfum sér líkir í fyrri hálfleiknum. En það lítur allt út fyrir að Mbappe verði markakónur, hann skoraði tvö í seinni hálfleik í gær og komst upp í 10 mörk skoruð á þessu móti.

Var komin á fætur um hálfníu í morgun. Bjó mér til hafragraut og tók mig til fyrir sjósundsferð. Hafði smá tíma til að gera æfingar með lóð og lesa. Var mætt  í Nauthólsvík rétt fyrir tíu. Hitti kalda potts vinkonu mín sem og sjósundsvinkona mína og aðra til. Kalda potts vinkonan og ég fórum þrisvar í sjóinn, einu sinni í gufu, einu sinni í lónið og tvisvar í pottinn. Ég var komin heim um tólf og hafði glútenlausar fiskibollur úr Fiskbúð Fúsa og sætar kartöflur í matinn. Um þrjú skutlaði ég Oddi í Mjóddina þar sem hann tók næsta strætó á Selfoss, tuttugu mínútur yfir, til að verða kominn á Bakkann áður en úrslitaleikurinn í HM byrjaði. 

Viðburðarríkur föstudagur í vinnunni

Synti 500m á brautum 3-5 í morgun, 300m skriðsund og 200m bakskriðsund. Þvoði mér um hárið áður og stimplaði mig inn í vinnu upp úr klukkan hálfátta. Um leið og við opnuðum kom eldri maður, sem bæði hefur hringt og komið áður, til að láta okkur vita að hann hafði valið þessa stöð til að skrá og skoða heimasmíðaðan rafbíl. Hann sagðist vera með alla pappíra frá samgöngustofu og að það kæmu tveir eftirlitsmenn um níu til að fylgjast með. Hann átti eftir að ljúka við að fylla út eitt form og var aðeins á vappinu á svæðinu en fór svo út og skrapp frá þar til klukkan var níu og eftirlitsmennirnir komu. Í millitíðinni höfðu verið skoðaðir tveir bílar. Tæpan klukkutíma tók að taka út þetta nýstárlega furðulega farartæki en niðurstaðan varð bílasmiðnum ekki í vil því alltof mörgu var ábótavant. Fljótlega eftir að þessu ævintýri lauk kom útlendingu hvers farartæki lögreglan hafði boðað í aukaskoðun út af brotnum afturljósum. Hann kom reyndar í gær líka en var ekki með nægan pening þá því það voru ógreidd opinber gjöld á eindaga af bílnum. Viðkomandi bifreið á að koma í skoðun síðar á árinu og við buðum honum að fara í aðalskoðun en hann vildi frekar fara í lögregluskoðun og hélt að þá væri bara skoðað að ljósin væru í lagi. Það endaði með að stöðvarstjórinn hafnaði því að gera skoðun, sagði manninum að fara annað. Ég sá það í ökutækjaskrá seinna í dag að það hafði hann gert, borgað fyrir L1, sem þýðir að ef bíllinn hefði staðist skoðun hefði hann fengið 26 miða og þurft að koma aftur í A1 síðar á árinu. En bifreiðin stóðs ekki skoðun og fékk akstursbann. Stöðvarstjórinn skrapp heim til sín í hádeginu. Ég fór í tuttugu mínútna göngu. Í heildina voru skoðuð 30 farartæki í dag. Lokuðum á slaginu fjögur og ég fór í klippingu áður en ég fór heim og stakk bílnum í hleðslu, var kominn í 30%. Eftir tæpa fjóra tíma er hann kominn í 70%.

Júlí hálfnaður

Ég las einn og hálfan kafla áður en ég fór að sofa í gærkvöldi. Líklega hefur klukkan verið um það bil ellefu þegar ég slökkti ljósið. Rumskaði um þrjú, alveg í spreng, en sofnaði strax aftur eftir að hafa farið á pisseríið. Vissi næst af mér þegar vekjarinn fór að hamast upp úr klukkan hálfsex. Rúmlega klukkustund síðar var ég komin á braut 7 í Laugardalslauginni. Synti 100m áður en ég færði mig á braut 6 og synti 400m í viðbót. Stimplaði mig inn í vinnu tuttugu mínútum fyrir átta. Einn var á húninum á slaginu átta en svo var nokkuð rólegt til að byrja með. Lokuðum í rúmlega hálftíma í hádeginu, þá var búið að skoða 18 farartæki. Stöðvarstjórinn skrapp heim til sín, ég fór í tuttugu mínútna göngu um nágrennið. Meiri erill var eftir hádegi, bæði í síma og annarri afgreiðslu. Heildarfjöldi skoðaðrar farartækja fór upp í 41. Lokuðum á slaginu hálffimm. Ég byrjaði á því að skreppa á bókasafnið. Skilaði fjórum bókum af fimm. Fletti í gegnum prjónablöð og tók eitt að láni ásamt þremur bókum. Kom við í Krónunni í Lindum áður en ég fór heim. Ein vinkona, jafnaldri og fyrrum starfsfélagi hringdi fljótlega eftir að ég kom heim. Við áttum langt og gott spjall.

Nokkuð viðburðarríkur dagur sem byrjaði svolítið snemma

Vaknaði helst til snemma þar sem ég ætlaði mér ekki að mæta í sund fyrir vinnu. Klukkan var ekki orðin sex en ég var útsofin og ég notaði tækifærið m.a. til að gera nokkrar æfingar með 2kg lóðum, borga föstu afborgunina inn á húsnæðislánið, taka mig til fyrir sjósund eftir vinnu og njóta þess að borða chia-morgun grautinn í rólegheitum. Um sjö birtist annar greiðsluseðill vegna húsnæðislánsins í bankaappinu, 2 af þremur í samningi sem ég gerði við sjálfa mig á síðum hsm. Er nú búin að greiða lánið niður um rúmar 4 millijónir síðan ég flutti það yfir á nýja heimilið.  Greiðslubirgðin minnkar jafnt og þétt sem er gott. Stimplaði mig inn í vinnu um hálfátta og hafði í nógu að snúast fram að opnun. Morguninn byrjaði rólega en engu að síður var búið að skoða átján bíla fyrir klukkan tólf. Skrapp út í tæplega hálftíma göngu í hádeginu. Opnað var fyrir skoðanir aftur rétt rúmlega hálfeitt og þegar við stimpluðum okkur út tæpum fjórum tímum síðar var heildarfjöldinn kominn upp í 42. Eftir vinnu fór ég beint í osteostrong tíma. Þurfti að bíða smástund eftir að komast að. Bætti mig á tveimur tækjum. Var komin í Nauthólsvík rétt fyrir klukkan hálfsex þar sem ég hitti kalda potts vinkonum mína. Það var háflóð og mjög stutt út í hressandi 11,6°C sjóinn. Vorum extra lengi þar sem við höfðum ekki hist í tæpar tvær vikur en við vorum þó komnar upp úr nokkru áður en lokaði um sjö. Hringdi í tvíburahálfsystur mína þegar ég var að leggja af stað frá Nauthólsvík og var komin til hennar skömmu síðar. Hún bauð mér í kvöldmat sem var súpergóður, lax, sveppir, sætar kartöflur og hollanderssósa. Á níunda tímanum kveikti hún á sjónvarpinu, RÚV og útsendingu frá seinni undanúrslita leiknum. England var nýlega búið að komast 1-0 yfir gegn Argentínu og reyndu svo að verja markið. Argentínumenn gáfust ekki upp og unnu leikinn 2:1. Held að úrslitaleikurinn á sunnudaginn, Spánn - Argentína verði mjög skemmtilegur. Var annars líka að fletta prjónablöðum sem endaði með því að ég tók nokkur með mér heim, eiginlega allan bunkann sem ég var búin að velja og taka frá á sunnudaginn var. En nú er löngu kominn tími fyrir "morgunsunddrottninguna" að koma sér í bælið. Freistast samt örugglega til að lesa smá.

Útsofin í morgun

Ég var pottþétt sofnuð um tíu í gærkvöld og svaf alveg þar til vekjarinn fór að hamast um hálfsex leytið. Var mætt á planið við Laugardalslaugina rétt áður en klukkan varð hálfsjö. Það var hópur á sundæfingu á brautum 6 og 7 svo ég fór á braut 1 og synti 500m áður en ég settist smá stund í steinapottinn. Stimplaði mig inn í vinnu örlítið fyrr en í gærmorgun. Skrapp í tuttugu mínútna göngutúr í hádeginu. Í heildina voru skoðaðir 35 bílar í dag. Ég kom heim um fimm. Þremur korterum seinna fór ég í lopapeysu, strigaskó, setti á mig ennisband og stillti heilsuforritið í símanum á útivist. Labbaði að Himnastiganum og upp langflestar tröppurnar. Sleppti örfáum tröppum neðarlega á leiðinni þar sem að var ungur maður á smágröfu að vinnu. Settist á bekkinn sem er efst uppi í nokkrar mínútur áður en ég fór niður og aftur upp og niður. Grafan var tóm og stopp svo ég fór allar tröppurnar. Labbaði svo stystu leið heim sem er um 950m og var komin áður en fyrri undanúrslitaleikurinn á HM hófst. Núna er hálfleikur og staðan er 1:0 fyrir Spán sem fékk vítaspyrnu stuttu fyrir vatnspásuna.

Mánudagur

Ég var alls ekki útsofin þegar ég fór á fætur stuttu fyrir sex í morgun en ég var ákveðin í að byrja daginn á því að mæta í sund. Það hressti mig til muna. Synti 500m á braut 7 í Laugardalslaug, skriðsund aðra leiðina og bakskrið til baka. Sat svo á spjalli í steinapottinum þar til kominn var tími til að fara upp úr. Stimplaði mig inn í vinnu nítján mínútum fyrir átta og var búin að hella upp á kaffi, snurfursa biðrýmið, opna afgreiðslukerfin og gera upp fimm mínútum fyrir átta. Rólegt var til að byrja með en skoðaðir voru fjórtán bílar fyrir hádegi. Í hádeginu skrapp stöðvarstjórinn aðeins heim og kom svo við í Bónus á leiðinni til baka. Ég skrapp í tuttugu mínútna göngutúr og var byrjuð að taka símann aftur rétt fyrir klukkan hálfeitt. Í heildina voru skoðaðir þrjátíuogfjórir bílar í dag. Hulda frænka fór í tuttugu vikna sónar og fékk að vita að það er von á stelpu seint í nóvember n.k. 

Samantekt helgarinnar

Í gærmorgun var ég ákveðin í að sleppa sundinu og ætlaði ég mér að sofa út. Ég varð því mjög hissa þegar "vekjaraklukkan" fór að hamast eldsnemma, um sex að mér sýndist og með nýju hljóði. Í raun var síminn að hringja rétt rúmlega fimm og var það systir mín sem vasahringdi óvart í mig. Ég snéri mér á hina hliðina, nennti ekki fram á pisseríið, og tókst að sofna aftur. Fór á fætur stuttu fyrir níu og bjó mér til hafragraut úr grófum grjónum. Rétt rúmlega ellefu var ég mætt til norsku esperanto vinkonu minnar og á sama tíma kom þar að ein úr Viðeyjargegningu, röltandi frá Aflagrandanum. Innan korters vorum við þrjár lagðar af stað austur fyrir fjall. Keyrðum úr ágætis veðri í bænum inn í þokusúld í Þrengslunum. Það var blautt á Selfossi og líka frekar rigningarlegt á Hellu. Komum til pabba stuttu fyrir klukkan eitt og fengum að pissa. Stoppuðum í ca þrjú korter en vorum mættar nokkru fyrir klukkan tvö í skúrinn við Hellana á Ægisíðu þar sem við keyptum okkur skoðunarferð með íslenskri leiðsögn. Héldum að færði um hellana tæki um klukkustund en þegar búið var að fara inn í þrjá hella og kíkja inn í aðra þrjá og fá mjög góða leiðsögn um þá alla og góðan tíma til að skoða og mynda ef vildi þá var klukkan langt gengin í fjögur. Við fórum aftur til pabba sem bauð upp á pönnsur og Inger upp á smurðar flatkökur, eplapæ og formköku. Pabbi fékk sér kranavatn með, ein fékk kaffi en við vorum tvær í teinu. Hjálpuðumst að við að ganga frá eftir að hafa kýlt vambirnar og spjallað um ýmislegt. Kvöddum pabba rétt fyrir klukkan hálfsex. Stoppuðum næst við Olís vestan við Ölfusá. Lenti í smá veseni með að hlaða bílinn. Appið var dottið út en þegar ég kom því inn aftur tókst að tengja bílinn við hraðhleðsluna. Skilaði stelpunum af mér fyrir utan heima hjá esperanto vinkonu minni um hálfátta leytið og ég fór beinustu leið til að undirbúa mig undir að horfa á þriðja leikinn af fjórum í átta liða úrslitunum. Ég var löngu farin að sofa þegar Oddur kom og bjó um sig í stofunni.

Í morgun ætlaði ég aldrei að nenna á fætur. Dreif mig þó fram áður en klukkan varð mikið meira en tíu. Oddur var vaknaður en ekki búinn að klæða sig eða búa um en fór þó að vinna að því fljótlega. Vorum að spjalla og ákváðum m.a. að sleppa því að fá okkur morgunmat. Ég bauð upp á saltfist og sæta kartöflu í hádeginu og um hálftvö skruppum við mæðgin í tæplega klukkutíma göngu. Sýndi honum Himnastigann og við löbbuðum upp allar 207 tröppurnar en þar sem verið var að mála hann og merkja ákvaðum við að vera ekki að trufla fólkið sem vann að því og löbbuðum í smá hring um hluta af hverfinu. Rúmum hálftíma eftir göngu túrinn skutlaði ég syninum í Mjóddina til að hann næði strætó austur á Selfoss. Sjálf hringdi ég í tvíburahálfsystir mína til að kann hvort hún væri heima og tæki á móti mér. Gerði mjög gott stopp hjá henni.

Vinnuvikan liðin

Var mætt í sund um hálfsjö. Fór á braut 4 og synti í tuttugu mínútur. Sat svo í korter í steinapottinum á spjalli við leikkonuna Kötlu Margréti Þorgeirsdóttur. Stimplaði mig inn í vinnu korter fyrir átta og var búin að hella upp á, snurfusa biðrýmið og setja upp afgreiðslukerfin áður en klukkan varð átta. Þar sem ekki var greitt með reiðufé í gær hafði ég gert upp í lok vinnudagsins í gær. Skoðaðir voru átján bílar fyrir hádegi, samt var mjög rólegt fyrsta klukkutímann. Í hádeginu skrapp ég aftur út í tuttugu mínútuna göngu. Eftir hádegi voru skoðuð 22 farartæki, þar af eitt mótorhjól. Stimpluðum okkur út á slaginu fjögur. Ég kom aðeins við í N1 í Borgartúni. Lét Davíð Stein taka húslykla til að láta bróður sinn hafa. Oddur fær gistingu aðfaranótt sunnudags en þeir bræður eru boðnir í þrítugsafmæli bekkjarsystur úr Hlíðaskóla á laugardagskvöldið. Stakk bílnum í hleðslu þegar ég kom heim upp úr klukkan hálffimm. Hann er kominn upp í 98% núna og segist geta verið að hlaða til klukkan tíu eða í hálftíma í viðbót. Ég skrepp bráðum út, stoppa hleðsluna og færi bílinn á annað stæði. 

Fimmtudagur

Ég fór heldur seinna að sofa í gærkvöldi en flest virk kvöld. Klukkan var að verða tíu þegar ég fór í háttinn og þá átti ég eftir að lesa í rúman hálftíma eða þangað til augun fóru að ranghvolfast ég hætt að meðtaka þar sem ég var að reyna að lesa. Rumskaði einhvern tímann um miðja nótt til að fara á pisseríið, sofnaði ekki alveg strax aftur en svaf svo alveg þar til vekjarinn ýtti við mér. Mætti í Laugardalslaugina þegar hún opnaði um hálfsjö, sund, smá spjall í steinapottinum og köld sturta áður en ég fór upp úr og í vinnu. Vinnudagurinn byrjaði mjög rólega, aðeins einn bíll skoðaður milli klukkan átta og rúmlega hálftíu en svo voru 16 bílar skoðaði eftir það til klukkan tólf. Ég skrapp aðeins út í smá göngu, tæpar tuttugu mínútur, í hádeginu. Aðeins meira var að gera eftir hádegi en verkefnin komu í skorpum. Í heildina voru gerðar 29 skoðanir í dag. Kom við í Fiskbúð Fúsa áður en ég fór heim. Verslaði harðfisk, ýsu, saltfisk og smá þorskhnakka sem ég fékk skorinn í þrjá bita. 

Hálfurmánuður í sumarfríið

Vaknaði helst til snemma í morgun þar sem planið var að sofa þar til klukkan væri byrjuð að ganga sjö. Var aðeins á "skrollinu" fyrsta hálftímann áður en ég fór á fætur. Tók með mér sjósundsdótið út í bíl á áttunda tímanum og var mætt í vinnu um hálfátta. Veitti ekkert af þessum tíma til að undirbúa daginn og græja eitt og annað áður en opnaði. Dagurinn byrjaði annars rólega en þó voru 16 faratæki skoðuð fyrir hádegi. Í hádeginu skrapp stöðvarstjórinn heim til sín. Ég labbaði tuttugu mínútna hring um svæðið eftir að ég var búin að fá mér að borða og ganga frá. Stimplaði mig úr vinnu á slaginu hálffimm og fór beint í osteostrong. Bætti mig á tveimur tækjum, tvö met. Eftir tímann fór ég beinustu leið í Nauthólsvík. Þar hafði ég mælt mér mót við frænku kaldapotts vinkonu minnar. Sú var nýkomin í klefann þegar ég mætti. Það er langt síðan hún fór í sjóinn síðast. Þótt sjórinn sé 12°C og hún nokkuð vön köldum pottum þá var þetta pínu sjokk fyrir líkama hennar. Vorum líklega útí í um eina og hálfa mínútu. Eftir nokkra stund í heita pottinum fórum við aftur í sjóinn. Hún fór upp úr eftir rúmar tvær mínútur og beið eftir mér í heita pottinum þegar ég kom nokkrum mínútum seinna. Fórum aðeins í gufuna, smá í lónið, sem var volgara en sjórinn þar sem var fjara og vorum svo korter í heita pottinum áður en við fórum upp úr. Ég var komin heim rétt fyrir klukkan sjö.

Sjöundi sjöundi tuttuguogsex

Var farin að losa svefninn í þann mund sem vekjarinn ýtti við mér. Snúsaði einu sinni eiginlega aðallega til að teygja mig og slaka á án þess að hafa áhyggjur af því að ég myndi gleyma tímanum. Fór út í daginn korter yfir sex og var mætt í Laugardalslaug um hálfsjö. Mun færri voru í sundi í morgun en samt einhvern veginn smá kraðak á brautunum til að byrja mér. Æfði mig í að synda hægt í stað þess að reyna að synda framúr. Var mætt í vinnu örlítið fyrr en í gær. Sömu verkefni og bætti við tæmingu á helstu ruslafötum. Þegar við lokuðum í hádeginu um tólf var búið að skoða fimmtán farartæki. Stuttu eftir hádegi komu feðgarnir, sem sjá um tæknimálin í fyrirtækinu, til að skipta um tölvu hjá mér og uppfæra. Ég var nýbúin að bóka inn tvo bíla en svo bókaði ég ekki aftur fyrr en um tvö. Í heildina voru samt skoðaðir tuttuguogátta bílar. Kom við í Krónunni í Skeifunni áður en ég fór heim. Kveikti fljótlega á sjónvarpinu og horfði á síðasta hálftímann í leik Argentínu og Egyptalands. Síðasta rúma hálftímann hef ég hlustað á lýsingu á leik Sviss og Kólumbíu á meðan ég hef verið að vafra á netinu í fartölvunni við eldhúsborðið.

Ný vinnuvika farin af stað

Vaknaði klukkan að verða hálfsex. Um klukkustund síðar var ég mætt á planið við Laugardalslaug. Fór beint á braut 7 og synti 500m. Flestar ferðirnar skriðsund og bakskriðsund til baka en lokaferðina til baka synti ég bringusund í fyrsta skipti í rúma viku. Fór í steinapottinn, sem hefur verið settur upp í amk 40°, þar sem hann er eiginlega eini "heiti" potturinn í notkun þessa dagana. Stimplaði mig inn í vinnu nítján mínútum fyrir átta. Hellti upp á, snurfusaði biðrýmið í afgreiðslunni, startaði tölvukerfunum og gerði upp kassann frá því á föstudaginn. Stöðvarstjórinn mætti nokkrum mínútum fyrir átta. Þótt það væru einhverjir á húninum var tiltölulega rólegt framan af morgni. Þó voru skoðaðir tuttugu bílar fyrir klukkan tólf. Farið var í Bónus í hádeginu og lokunartíminn lengdur um ca korter, opnað aftur korter fyrir eitt. Í heildina fóru skoðanirnar upp í 41 yfir allan daginn og sú sem kom með síðasta bílinn sem var skráður inn var ein bekkjarsystir mín úr A-bekknum í Kennó. Hún var búin að kveikja á mér, mundi bara ekki nafnið, ég þekkti hana ekki fyrr en ég skráði bílinn hennar inn og sá nafnið hennar. Áttum mjög gott spjall þar til ég þurfti að ganga frá afgreiðslunni, stimpla mig út og fara. Þá var bíllinn hennar langt komin í skoðuninni. Ég kom við í N1 í Borgartúni og skilaði syninum hattinum, sem hann hafði reyndar fengið frá móðurafa sínum fyrir þónokkru síðan. Pabbi hafði keypt þennan hatt í annarri af tveimur Tene ferðum með mömmu heitinni á sínum tíma. Annars var ég komin heim stuttu fyrir klukkan hálfsex og ég hugsa að það endi með því að ég horfi loksins á heilan leik á HM í knattspyrnu, 16 liða úrslit milli Spánar og Portúgals. 

Uppgjör helgarinnar

Ég er á Hellu í augnablikinu, að ákveða mig hvenær ég legg af stað í bæinn. Var vöknuð upp úr klukkan sjö í gærmorgun en ekki komin á fætur þegar Villa vinkona hringdi í mig stuttu fyrir klukkan átta. Við vorum báðar á leið í sama hitting og höfðum talað um að hún pikkaði mig upp á Hellu upp úr hádeginu. Gestgjafarnir höfðu sent á hana skilaboð um hvort hún gæti komið fyrr. Ég lagði af stað úr bænum tuttugu mínútum fyrir tíu og fór Þrengslin. Ég var rétt komin í gegnum Selfoss og þegar Villa hringdi aftur. Hún hafði lagt af stað tíu mínútum á eftir mér, komið við á einum stað, farið Hellisheiðina og var að keyra framhjá Landsbankahúsinu á Selfossi. Við sammæltumst um að ef hún næði mér ekki áður en ég væri komin á Hellu skyldi ég bíða eftir henni við Olís. Ég stoppaði bílinn reyndar við Arionbanka-bygginguna. Villa kom um þremur mínútum seinna og elti mig til pabba. Vorum þar um ellefu. Ég fór á pisseríið, setti inn dót í herbergið mitt, heilsaði upp á pabba og ítölsku stúlkuna sem fær afnot af einu herberginu þessa dagana. Villa kom líka aðeins inn en við stoppuðum varla í tíu mínútum. Komum við í ÁTVR á Hellu þar sem ég keypti tvær mis-litlar hvítvínsflöskur. Umferðin austur fyrir Hellu og fram að Odda afleggjara var hæg vegna umferðaróhapps. Stoppuðum aðeins í N1 á Hvolsvelli áður en við héldum för áfram inn í Fljótshlíðina að sumarbústað sem er í landi Nátthaga. Þar var vel tekið á móti okkur af þeim tveimur sem eiga bústaðinn og einum gesti sem mætti á föstudeginum. Fljótlega fórum við að hjálpast að við undirbúningi á kvöldmatnum og það var allt búið á ótrúlega skömmum tíma og löngu áður en næstu gestir komu. Alls mættu átta manns í viðbót. Tvennt á húsbíl, tvennt með 6m hjólhýsi í togi, tvennt með 8m hjólhýsi í togi og tvær systur saman á bíl sem ég fékk svo far með á Hellu seint í gærkvöldi. Veðrið var með besta móti, eiginlega of gott og á ákveðnum tímapunkti fór ég í lopapeysu til að handleggir héldu ekki áfram að brenna. Önnur systirin bar líka framan í mig. Þótt ég væri rauð fann ég ekki fyrir þessu. Glatt var á hjalla langt fram á kvöld. Borðuðum úti um átta leytið og seinna um kvöldið var dreginn upp gítar og sönghefti. Ég var komin á Hellu aftur tuttugu mínútum eftir miðnætti og þá áttu systurnar eftir að keyra alla leið í bæinn. Þær sendu skilaboð klukkutíma og korteri síðar um að þær væru komnar heim. Sá þau skilaboð eftir að ég fór á stjá í morgun, en Villa var amk búin að svara þeim.

Stofuklukkan stoppaði um hálftvö í nótt svo ég gat ekki athuga með tímann með því að hlusta á slög þegar ég vaknaði á áttunda tímanum í morgun. Fór á fætur milli átta og hálfníu og einum og hálfum tíma síðar dreif ég mig út í göngu, ákveðin í að labba niður með ánni austan megin alla leið að Ægisíðufossi. Var tæpan klukkutíma á leiðinni. Staldraði við á svæðinu í um korter. Labbaði vegslóða til baka og kom að Hellu við Stracta Hótel. Þá labbaði ég aftur að ánni til þess að fara undir brúna. Þegar ég kom að Hólavanginum hjá pabba aftur voru systurdóttir mín og sú ítalska að hreinsa á milli hellanna á bílaplaninu og pabbi að "saga" niður ónýta sólberjarunna í garðinum. Ég dreif í að elda og matur var borðaður um hálftvö, þótti mjög góður. Fljótlega eftir mat fóru Bríet og vinkonan í smá verslunarferð í bæinn og pabbi aftur út að dútla í garðinum. 

Ferð á bókasafnið eftir vinnu

Þrátt fyrir þær fréttir að búið væri að loka fyrir uppáhaldspottana mína, gufuna og fleiri potta í Laugardalslauginni var ég mætt í sund um hálfsjö. Fór beinustu leið á braut 7 og synti 600m á innan við hálftíma. Ekkert bringusund bara skrið og bakskriðssund. Kom aðeins við í steinapottinum áður en ég fór í sturtu og þvoði mér um hárið. Geir Ólafs var með söngatriði í afgreiðslurýminu, staldraði aðeins við en var mætt á planið við vinnuna tuttugu mínútum fyrir átta. Afleysingaskoðunarmaðurinn var þegar mættur á planið. Stöðvarsjórinn mætti rétt fyrir átta. Um hálfníu þurfti afleysingamaðurinn að fara upp í Hádegismóa en hann kom aftur í Skeifuna um hálftvö því fljótlega eftir það þurfti stöðvarstjórinn að fara. Í nógu var að snúast í dag. Sendillinn kom með nýjan kaffibrúsa og skrapp svo fyrir mig í bankann eftir skiptimynt. Hættum á slaginu fjögur og ég var á leiðinni á bókasafnið þegar var hringt í mig. Eftir tuttuguogfimmmínútna spjall skilaði ég fjórum bókum á safnið, framlengdi einni og tók fjórar bækur með mér heim. Setti bílinn í hleðslu um fimm og er bara nýbúin að taka hann úr sambandi og færa á annað stæði. 

Líður á vinnuvikuna

Rumskaði stuttu fyrir fimm, alveg í spreng. Sofnaði aftur eftir að hafa farið á pisseríið og vaknaði við vekjarann rúmlega hálfsex. Aldrei þessu vant snúsaði ég tvisvar sinnum og fór ekki á fætur fyrr en rúmum tíu mínútum seinna, aftur alveg í spreng. Var samt ekki að þamba neitt í gærkvöldi. Mætti í sund klukkan hálfsjö. Fór þrisvar í kalda pottinn, synti 300m, fór nokkrar mínútur í gufu og sjópottinn. Nú síðdegis voru annars að berast þær fréttir að loka þurfi gufunni og öllum pottum sem eru stúku megin. Það er spurning hvort ég verði að endurhugsa eða færa morgunsundið í aðra laug. Stimplaði mig inn í vinnu tæpum tuttugu mínútum fyrir átta og var búin að gera upp og starta afgreiðslukerfum í tölvunni í afgreiðslurýminu þegar stöðvarstjórinn mætti. Morguninn var með rólegra móti, þó voru nokkrir á húninum. Það var mun meira að gera eftir hádegi en alls ekkert stress. Í heildina voru skoðuð 33 farartæki. Stimpluðum okkur út og lokuðum á slaginu hálffimm. Ég kom við í N1 í Borgartúni, bæði til að kasta kveðju á N1 soninn og fá lánaðan kúrekahatt til að vera með í hittingnum á laugardaginn. 

Árið hálfnað

Vaknaði mun fyrr en ég þurfti þar sem ég ætlaði beint í vinnu en ekki fyrst í sund. Fékk mér chiagraut, kláraði morgunverkin, fyllti á vatnsflöskuna, tók til sjósundsdótið og las svo þar til kominn tími var til að fara. Stimplaði mig inn í vinnu um hálfátta. Það var ein á húninum þegar við opnuðum klukkan átta en svo var rólegt í rúman hálftíma eftir að skoðun lauk. Í heildina komu samt 36 bílar í skoðun í dag. Einnig var smá erill í símsvörun og öðrum afgreiðslum. Stimplaði mig út á slaginu hálffimm og var mætt í osteostrong tíma korteri síðar. Komst strax að. Bætti mig á þremur tækjum af fjórum. Tuttugu mínútum yfir fimm var ég komin í Nauthólsvík, þar sem kalda potts vinkonan beið eftir mér í heita pottinum. Ég byrjaði á því að endurnýja árskortið og fékk blátt armband með mér inn í búningsklefa. Klukkan var rúmlega hálfsex þegar við fórum fyrri ferðina í sjóinn. Það var að flæða að, stutt út í og sjórinn 12,5°C. Ég var komin heim rétt fyrir sjö. Setti upp frosið rósakál og sauð upp á ýsunni sem ég keypti hjá Fúsa í gær. Var að borða kvöldmatinn upp úr klukkan hálfátta.

Júní alveg að klárast

Mætti í sund um leið og opnaði. Eftir fyrstu ferðina af fjórum í kalda pottinn fór ég á braut 2 og synti 400m, skrið- og bakskriðsund. Stimplaði mig inn rúmu korteri fyrir átta. Kaffibrúsinn bilaði í vinnudagslok í gær, ekki hægt að pumpa kaffi úr brúsanum, þannig að ég sleppti því að búa til kaffi. Stöðvarstjórinn mætti fimm mínútum fyrir átta og opnaði á slaginu. Skemmst er frá því að segja að það var aldrei dauð stund í skoðunum í dag nema rétt þann tíma sem var lokað í hádeginu. Í heildina voru skoðaðir 43 bílar en örugglega meira en 10 vísað frá vegna þess að það voru komnir of margir í röðina og/eða það var stutt í lokun. Héldum jafnvel að skoðunarmaðurinn þyrfti að vera aðeins framyfir hálffimm en hann gat lokað á slaginu. Ég kom við í Fiskbúð Fúsa áður en ég fór heim. Keypti harðfisk, ýsu, bleikjuflak og fiskibollur. Ýsuna ætla ég að hafa í kvöldmatinn á morgun. Bollurnar og bleikjuflakið setti ég í frytsti. 

Síðasti mánudagurinn í júní

Vaknaði korter yfir fimm við hljóð í stórum bíl. Nennti ekki framúr strax til þess að kanna hvað væri í gangi en ég var útsofin og fór á fætur upp úr klukkan hálfsex. Fékk mér chiagraut með bláberjum í morgunmat og var mætt í sund um það leyti sem var verið að opna í Laugardalslauginni. Byrjaði á kalda pottinum synti 400m skrið- og baksund á braut 7. Fór aftur í kalda áður en ég fór sjópottinn þar sem ég hitti eina af eldri sundvinkonum mínum. Spjallaði við hana í rúmar tíu mínútur áður en ég fór síðustu ferðina í þann kalda, upp úr og í vinnu. Stöðvarstjórinn var mættur rétt á undan mér en hann var að koma beint frá því að skutla konunni sinni út á flugvöll. Það mættu fjórir í skoðun um leið og opnaði. Um níu leytið var smá pása í tæpan hálftíma, akkúrat þegar eftirlitsmaður frá SGS mætti á svæðið. En upp úr klukkan hálftíu fór að streyma aftur að. Skoðuð voru 18 farartæki fyrir hádegi og 19 eftir hádegi. Annars skrapp ég einn stuttan gönguhring, 1,5km á 20 mínútum í hádeginu. Kannski varð það til þess að ég hafði mig ekki út aftur eftir að ég kom heim úr vinnu. 

Uppgjör helgarinnar þótt en sé hún ekki alveg liðin

Gærmorguninn byrjaði eiginlega alltof snemma eða um fimm leytið. Fór þó ekki alveg strax á fætur, rétt skrapp á pisseríið og reyndi svo að kúra mig aftur niður. Það gekk ekki neitt, ég var eiginlega glaðvöknuð. Var því búin að gera ýmislegt mis-sniðugt þar til kominn var tími til að leggja af stað í sund. Tíminn líður pottþétt extra hraðar þegar með er að skrolla samfélagsmiðana og "leika" sér í netheimum. Var mætt í sund rétt rúmlega átta. Byrjaði á kalda pottinum en fór svo á braut 7 og synti í rúmar tuttuguogfimmmínútur, 600m, ekkert bringusund aðeins skrið- og bakskriðsund. Eftir aðra ferðina í þann kalda settist ég smástund í gufuna áður en ég fór í kalda sturtu og sjópottinn. Þar fann sjósundsvinkona mín mig og við spjölluðum í dágóða stund. Fór upp úr rétt fyrir klukkan tíu og þvoði mér um hárið. Var komin heim um hálfellefu. Næsti klukkutími fór í að sinna því sem ekki má skrifa um. Afgangurinn af deginum fór í þáttaáhorf, lestur og fleira innidútl. Hafði samt ætlað mér út en einhvernveginn varð ekkert af því.

Í morgun svaf ég til klukkan hálfsex og kúrði áfram til klukkan hálfsjö þótt ég sofnaði ekki aftur. Stuttu fyrir klukkan hálfníu bjó ég til hafragraut úr grófum grjónum sem voru búin að liggja í bleyti í potti inn í ísskáp síðan í gærkvöld. Helmingurinn fór í skál og inn í ísskáp. Var komin á braut sjö korter eftir níu og synti ég 700m á hálftíma, sömu sundaðferðir og í gær. Fór örstutt í kalda pottinn og þaðan í sjópottinn og beið þar eftir kaldapotts vinkonu minni sem kom á slaginu tíu. Við fórum fjórar ferðir í þann kalda og góða gufuferð. Ég kvaddi um ellefu og var komin heim um hálftólf. Klukkan korter yfir tvö fór ég út aftur, stillti heilduforritið í símanum á útiveru. Var úti í einnoghálfan tíma, labbaði 4,5km. Settist þrisvar niður á leiðinni m.a. eftir að hafa "trítlað" upp Himnastigann. Fór hann bara upp einu sinni og ekki niður aftur heldur í áttina að Digranesbraut og þar niður.

Aftur kominn föstudagur

Klukkan var varla orðin fimm þegar ég vaknaði í morgun, alveg í spreng. Samt var ég ekki að drekka mikið vatn í gærkvöldi. Skrapp á pisseríið og gerði svo misheppnaða tilraun til að halda áfram að sofa. Fór á fætur um hálfsex leytið og hafði næga tíma í hefðbundna rútínu, lestur og lóðaæfingar að auki. Var mætt á planið við Laugardalslaug fimm mínútum áður en opnaði. Fór þrisvar í kalda pottinn, synti 400m á braut 7 og var 10 mínútur í sjópottinum. Stimplaði mig inn í vinnu korter fyrir átta. Stöðvarstjórinn mætti rétt fyrir klukkan átta og þá voru fjórir á húninum. Skoðaðir voru 37 farartæki í dag, þar af eitt fjórhjól. Við lokuðum á slaginu fjögur og ég fór beinustu leið heim. Spjallaði við pabba í síma meiri hlutann af leiðinni. Setti bílinn í hleðslu þótt hann væri enn í 47%. Hann er kominn upp í 94% núna og það styttist í að ég fari út, taki hann úr sambandi og færi á annað stæði. Fljótlega eftir að ég kom inn reyndi ég að hringja í einn aðila. Það var ekki svarað svo ég hringdi í Huldu systurdóttur mína og spjallaði við hana í tæpar tíu mínútur. Um það leyti sem við vorum að kveðjast var hringt til baka. Það spjall varði í rúmar tíu mínútur. Ég var ný byrjuð að horfa á þátt þegar ein sundvinkona, sem ég hef þekkt í um ellefu ár. Hitti hana ekki í sundi í vikunni því hún mætti snemma þá tvo daga sem ég fór í sjóinn og sund eftir vinnu. Spjallið okkar varði í næstum þrjú korter. Annars er ég að vinna í að reyna að halda mér vakandi amk til klukkan tíu svo ég vakni ekki alltof snemma í fyrramálið.

Fimmtudagskvöld

Vekjarinn vakti mig í morgun, korter fyrir sex, og ég var frekar hissa á því. Var mætt á planið við Laugardagslaug rétt fyrir hálfsjö. Byrjaði á kalda pottinum fór svo á braut 7 og synti 400 m, þar af 200m skriðsund og ekkert bringusund. Stimplaði mig inn í vinnu rúmu korteri fyrir átta og var búin að gera upp, hella upp á kaffi og opna helstu afgreiðslukerfin þegar stöðvarstjórinn mætti. Þrjátíuogþrír bílar voru skoðaðir í dag. Lokuðum á slaginu hálffimm. Ég var eitthvað að spá í að koma við í Fiskbúð Fúsa en hætti við, keyrði ekki beinustu leiðina heim en var komin heim um fimm leytið. 

Osteostrong og sund eftir vinnu

Fór á fætur rétt fyrir klukkan hálfsjö. Sauð hafragraut úr grófum grjónum sem ég var búin að láta liggja í bleyti í pottinum yfir nótt. Grautnum gat ég skipt í þrennt og á því eftir tvo skammta. Var mætt í vinnu rétt fyrir klukkan hálfátta. Alls voru 33 bílar skoðaðir í dag. Lokuðum á slaginu hálffimm. Ég hringdi og spjallaði aðeins við pabba á meðan ég var að keyra yfir í Hátúnið. Komst strax að í osteostrong. Allar tölur voru mun betri heldur en fyrir hálfum mánuði. Mætti í Laugardalslaug um hálfsex leytið. Fór þrisvar í kalda pottinn, tvisvar í heitasta pottinn, einu sinni 12 mínútur í gufuna og synti svo 200m áður en ég fór upp úr. Kom við í Krónunni í Lindum áður en ég fór heim. Fór ekkert út aftur eftir að hafa fengið mér hressingu heldur horfði á tvo þætti úr mismunandi þáttaröðum og smá brot af fótbolta. 

Bríet 22 í dag

Vissi af mér og var að rumska líklega svona fimm mínútum áður en vekjarinn átti að ýta við mér. Gerði það með vilja að kúra alveg þar til vekjarinn fór að hamast. Var mætt á planið við Laugardalslaug stuttu fyrir hálfsjö. Hins vegar var ekki opnað fyrr en um 6:40 þar sem það vantaði mannskap. Ég fór beint út á braut 8 eftir að búið var að opna og ég búin að afklæðast, læsa fötin í skáp, fara í sturtu og svo sundbol. Sleppti því að fara í "sundskóna" og sá næstum eftir því. Synti 100m á braut átta og aðra 200 á braut 7. Helminginn af þessari vegalengd syndi skriðsun, 100m bakskrið og aðeins 50m bringusund. Fór þrisvar í þann kalda, ekkert í gufuna en smástund í sjópott og 42°C pottinn. Stimplaði mig inn í vinnu rúmlega korter fyrir átta. Einn kom í skoðun á fyrsta klukkutímanum en samt urðu skoðaðir bílar 38 í heildina eins og í gær. Stöðvarstjórinn var að ljúka við að skoða síðasta bílinn þegar ég stimplaði mig út, þakkaði fyrir daginn og kvaddi. Fór beint heim. Til stóð að skreppa jafnvel út aftur en ég festist í öðru og leyfði mér að vera löt. 

Ný vinnuvika hafin

Ég vaknaði það löngu á undan vekjaranum að ég hefði alveg haft tíma til að skella mér í morgunsund. Ég lét það þó vera því planið var að fara í sjóinn eftir vinnu. Gerði þess í stað nokkrar æfingar með 2 kg lóðum og kveikti einnig á fartölvunni til að vafra smá, aldrei þessu vant. Stimplaði mig inn í vinnu rétt fyrir klukkan hálfátta og var búinn að undirbúa, græja og gera þegar stöðvarstjórinn mætti rétt fyrir opnun. 23 bílar voru skoðaðir fram að hádegi en í heildina urðu þeir 38. Það kom örstutt stund rétt fyrir fjögur þar sem skoðunarmaðurinn gat sest niður á stól í afgreiðslu rýminu. Strax eftir vinnu fór ég ég Nauthólsvík og hitti kaldapotts vinkonu mína. Fórum tvær ferðir í tæplega 14°C heitan sjóinn og eina í lónið. Það var að fjara út og lónið því volgara en sjórinn. Kom heim upp úr klukkan hálfsjö og rúmri klukkustund síðar skrapp ég út í klukkutíma útivist. Fór í rólega göngu, smá hring upp á 3,6km og settist tvisvar niður á leiðinni til að njóta veðurs, kyrrðar og fuglasöngs.

Helgar uppgjör

Þrátt fyrir að enn séu rúmir átta klukkutíma til miðnættis ætla ég aðeins að taka helgina saman. Ég fór á fætur um sjö leytið og var komin í sund rétt eftir að opnaði um átta. Fór þrjár ferðir í kalda pottinn, synti 600m á braut átta, mest skriðsund, var nokkrar mínútur í gufunni, sleppti sjópottinum en settist í smá "sólbað" áður en ég fór upp úr og í esperanto hitting. Á Sólavalla götunni setti ég bílinn í samband þrátt fyrir að vera enn með amk 67% hleðslu. Á þeim rúma klukkutíma sem ég stoppaði hjá norsku esperanto vinkonu minni fór batteríið upp í 85%. Keypti þvott á bílinni og renndi honum í gegnum færibandið hjá Löðri við fiskislóð. Var komin heim stuttu fyrir klukkan tólf. Gaf mér tæpan hálftíma til að klára að pakka niður í tösku áður en ég lagði í hann austur á bóginn. Hringdi í pabba þegar ég var nýlega komin niður úr Þrengslunum og sagðist vera á leiðinni en ekki búin að ákveða hvort ég gerði stopp. Þegar ég kom á Selfoss fór ég í heimsókn til frændfólksins í Löngumýrinni og stoppaði í um klukkustund. Var komin til pabba einhvern tímann á fjórða tímanum. Bríet frænka var á fullu að koma sér fyrir. Pabbi grillaði rétt fyrir hálfsjö, ég sá um að það yrðu tilbúnar kartöflur á sama tíma og eftir matinn gekk frænka mín frá. Var aðeins að fylgjast með útsendingunni frá Þingvöllum en einnig smá fótbolta, einn þátt og eina bíómynd. Ég fór í háttinn um tíu en pabbi horfði sjónvarp símans til miðnættis og svo byrjun á einum fótboltaleik.

Þegar ég kom á fætur um átta í morgun var pabbi þegar kominn á stjá. Búinn að taka úr uppþvottavélinni og var að hlusta á rás tvö. Ég fór út um hálftíu í tæplega tveggja klukkutíma rólega göngu niður með ánni. Átti örugglega alls ekki svo langt eftir að Ægisíðufossi þegar ég ákvað að snúa við. Var komin til baka um hálftólf. Bríet kom fram skömmu síðar en hún var þá búin að ákveða að fara til vinkonu, vildi ekki borða með okkur. Pabbi hafði tekið út eitt þorskflak sem honum áskotnaðist og ég græjaði matinn á rúmum hálftíma. Bríet kvaddi um það leyti sem við vorum að setjast að snæðingi. Klukkan er rétt orðin fjögur og ég er enn að ákveða hvenær ég eigi að hafa mig af stað í bæinn.

Vinnuvikan liðin

Þrátt fyrir að ég vaknaði áður en vekjarinn átti að ýta við mér gaf ég mér ekki tíma í æfingar með lóðum í morgun. Fékk mér afgang af hafragraut frá því á miðvikudaginn og var mætt nokkrum mínútum fyrir opnun á planið við Laugardalslaug. Stimplaði mig inn í vinnu nítján mínútum fyrir átta. Rétt á eftir mér mætti afleysingaskoðunarmaður. Hann var reyndar kominn á undan en sat úti í frumherjabílnum þar til ég var búin að taka úr lás, kerfið af og kveikja ljósin. Rúmlega átta mætti aðstoðar pilturinn sem var með okkur sl. föstudag. Það var alveg í nógu að snúast og skoðunarmaðurinn fékk fáar pásur fyrir utan hádegishléið. Þrjátíu og átta farartæki skoðuð og klukkan var byrjuð að ganga fimm þegar við vorum búin að ganga frá og stimpla okkur út. Ég fór beinustu leið heim. Restin af deginum leið alveg jafn hratt og vinnudagurinn og mér sýnist það ætla að enda með því að ég fari frekar snemma í rúmið í stað þess að skreppa í smá spássitúr. 

Annar afleysinga-skoðunarmaður

Var svolítið hissa þegar vekjarinn ýtti við mér klukkan korter fyrirsex í morgun.Var reyndar eitthvað lengur að sofna í gærkvöldi svo það er líklega ekkert skrýtið. Dreif mig strax á fætur og gaf mér meira að segja tíma til að gera nokkrar lóða æfingar með 2kg lóðunum. Var mætt á planið við Laugardalslaug rétt fyrir klukkan hálfsjö. Rútínan eins og í gær og svo hitti ég óvænt "mánudags"-morgunsundsvinkonu mína í sjópottinum. Stimplaði mig inn í vinnu nítján mínútum fyrir átta. Einn af skoðunar-flökkurunum mætti tíu mínútum síðar. Það var ákveðin ró yfir deginum en þó voru um fjörutíu farartæki skoðuð í heildina. Við lokuðum á slaginu hálffimm og þá var ég búin að ná að gera upp kassann. Kom við í Fiskbúð Fúsa og keypti harðfisk og ýsu í soðið. Um leið og ég var komin heim snéri ég mér að verkum sem ekki má skrifa um. Um hálfsjö leytið setti ég upp ýsuna. Átti afgang af kartöflum og rósakáli frá því á sunnudaginn. Um hálfátta stillti ég heilsuforritið á útivist og skrapp út í göngutúr. Fór fram hjá Smáralind og langleiðina á Breiðabliksvöllinn. Labbaði svo stíg í dalnum í áttina heim og kom að Himnastiganum. Labbaði upp 207 þrepin. Það fór fram úr mér ungur maður á hlaupum. Hann kom ekki niður aftur, hljóp einhvern hring og kom aftur hlaupandi upp stigann og framhjá mér þar sem ég sat á bekk efst uppi. Ég mætti honum svo á niðurleiðinni. Útivistin spannaði eina klukkustund og fimmtíu mínútur og ég labbaði 5,75km, með hléum í heildina. Ég verð mjög hissa ef ég mun eiga erfitt með að sofna í kvöld. 

Þjóðhátíðardagurinn

Í smá stund fannst mér eins og ég hefði sofið yfir mig þegar ég vaknaði rétt fyrir klukkan níu í morgun. En ég var útsofin og hafði nægan tíma. Gerði meira að segja æfingar með 2kg lóðum. Bjó mér til hafragraut rétt fyrir tíu og var hann svo vel útilátinn að ég skipti honum niður og á eftir  tvo skammta. Með grautnum fékk ég mér sneið af köldum blóðmör og eitt harðsoðið egg af fjórum sem ég sauð. Ég var mætt í Nauthólsvík um leið og opnaði um ellefu. Fjara og sjórinn tæpar 14°C. Fyrri ferðina synti ég og svamlaði út að kaðli (hefði getað vaðið alla leiðina). Eftir ferð í gufuna fór ég beint aftur út í sjó og svamlaði um eða lét mig fljóta á bakinu. Var komin heim aftur upp úr klukkan hálfeitt. Hringdi í pabba um tvö leytið og frétti að hann hefði verið í bæjarferð í gær, var í tíma hjá augnlækni í Mjóddinni. Rétt fyrir fjögur fékk ég mér ristað brauð og te. Svo stillti ég heilsuforritið á útivist, fór í sömu flíkur og ég skrifaði um fyrir útivist gærdagsins og lagði leið mína að Himnastiganum. Settist á bekk í smá stund eftir að ég kom upp en trítlaði svo niður aftur og labbaði smá hring með tveimur hæfilegum pásum. Útivistin varði í tæpan einn og hálfan tíma og yfirferðin var tæpir 4,5km. 

Færsla númer fjögurþúsundogsjöhundruð

Rumskaði alltof snemma, einhvern tímann á fimmta tímanum. Fór á pisseríið og svo fram í ísskáp og saup á lýsisflöskunni áður en ég fór aftur upp í rúm. Hlýt að hafa gleymt mér í einhverja stund. Vaknaði korteri áður en vekjarinn átti að ýta við mér. Dreif mig fljótlega á fætur en samt gaf ég mér ekki tíma í neinar lóða æfingar. Var mætt á planið við Laugardalslaug fimm mínútum áður en opnaði. Synti 400m á braut 7 og byrjaði á að synda skriðsund yfir og bakskriðsund til baka fyrstu þrjá hringina. Fjórða og síðasta hring fór á bringusundi yfir og skrið- og bakskrið til baka. Var mætt í vinnu tuttugu mínútum fyrir átta. Sami afleysinga-skoðunarmaður mætti nokkrum mínútum fyrir átta, sjáfur yfirmaður BSK-sviðs, nafni minn og frændi. Dagurinn gekk vel hjá okkur en varð aðeins lengri í hinn endann. Akkúrat 40 faratæki skoðuð og við vorum að ganga frá og loka tíu/fimmtán mínútum fyrir fimm. Ég fór beint heim en þó aðra leið en oftast. Fékk mér smá hressingu og greip svo í bók, slakaði á í næstum þrjá tíma. Þá var ég reyndar búin að kveikja á sjónvarpinu en áður en ég festist alveg yfir boltanum stillti ég heilsuforritið í símanum á útiveru, fór í strigaskó, lopapeysu og ennisband og rölti 4,6km hring með þremur pásum á einum og hálfum tíma. 

Mánuðurinn hálfnaður

Vekjarinn "ýtti" við mér korter fyrir sex í morgun. Var mætt á planið við Laugardalslaug tæpum þremur korterum síðar. Fór þrjár ferðir í kalda pottinn, synti 400 metra og var um tíu mínútur í sjópottinum að spjalla við eina sundvinkonu mína. Stimplaði mig inn í vinnu seytján mínútum fyrir átta og var búin að hella upp á, starta kerfum og gera upp þegar Siggi frændi mætti á svæðið á slaginu átta. Skoðaðir voru 37 bílar í dag. Fór beinustu leið heim eftir vinnu og lagði bílnum á neðra planinu. Fékk mér hressingu, kveikti á sjónvarpinu en slökkti aftur á því korteri síðar og fór að lesa. Rúmlega sjö klæddi ég mig í lopapeysu, setti á mig eyrnaband og reimaði á mig strigaskóna. Stillti símaforritið á útivist. Labbaði uþb 3km hring með einni ca korters pásu á tæpum klukkutíma. Annars greiddi ég húsnæðislánið niður um hálfa millijón í dag, eftir að hafa greitt mánaðalegu afborgunina af því. Þá skulda ég bara rúmlega átta millijónir.

Helgin gerð upp

Það var með vilja að ég sleppti því að setja inn færslu fyrir gærdaginn. Ákvað að taka ekki fram tölvuna í gær. Svaf út, fór á fætur um hálfníu. Bjó til hafragraut fljótlega og vakti eiginlega Odd til þess að borða hann með mér. Um eitt leytið var ég með hádegismat. Fann bleikjubita og smá ýsu í frysti sem ég sauð. Setti líka upp kartöflur og rósakál og skar niður einn lauk sem ég mýkti aðeins upp á suðu. Var einnig með súrkál og sallat með þessu. Var eitthvað að spyrja soninn hvort hann vildi koma í göngutúr en við vorum amk ekki farin að fara út þegar hinn sonurinn hringdi í bróður sinn um þrjú og spurði hvort hann vildi koma í bíltúr. Mér var líka boðið að koma með en fannst eigilega of langt liðið á daginn því stefnan var tekin á Arnarstapa. Þeir bræður lögðu í hann stuttu fyrir fjögur og meiningin hjá mér var að skreppa út í stuttan göngutúr. Þau plön urðu ekki að veruleika og það endaði með því að ég var innipúki í gær, festist í að horfa á breska þætti á RÚV um Kjarnakvendið Emmu Hart byggða á samnefndri skáldsögu eftir Barböru Taylor Bradford. Klukkan var langt gengin í tólf þegar ég fór í háttinn. Samt las ég í smá stund.

Vaknaði fyrst upp úr klukkan sex í morgun en náði að kúra mig niður í um klukkustund. Ég var mætt í sund rétt eftir að opnaði um átta. Fór fjórum sinnum í kalda pottinn, synti 500m, var nokkrar mínútur í gufu og sjópottinum en sat líka í dágóða stund á stól á spjalli við yngstu mágkonu mömmu. Klukkan var að verða tíu þegar ég fór upp úr og heim. Um tvö leitið skrapp ég aftur út. Markmiðið var að labba að og upp himnastigann, rúmlega 200 þrep. Ekki er langt á staðinn og allt gekk vel. Ég var samt frekar andstutt þegar ég kom upp. Staldraði aðeins við og tók mynd áður en ég hélt göngunni áfram sem varð á endanum næstum því 6km hringur. Settist niður á einum öðrum stað. Þrátt fyrir að bíllinn væri með meira en 55% hleðslu ákvað ég að nýta mér að staurinn var laus. Ætla að hlaða upp í amk 95%. Þambaði vatn og fékk mér svo te og brauðsneið og bók í hönd. Tók ekki tölvuna fram fyrr en um sex leytið.

Veðurblíða

Vaknaði rétt fyrir klukkan hálfsex. Hálft í hvoru langaði mig eiginlega til að snúa mér á hina hliðina og kúra aðeins lengur. Ég fór samt fljótlega á fætur og notaði auka tímann í að gera nokkrar lóðaæfingar með 1,5kg lóðum og lesa. Var komin í kalda pottinn í Laugardalslauginni tuttugum mínútum fyrir sjö. Fór því næst á braut 7 og synti 400m á ca 17 mínútum. Fór tvær ferðir í viðbót í þann kalda, nokkrar mínútur í sjópottinn og gerði einnig stutta "hanga í rim"-æfingu áður en ég fór upp úr og í vinnu. Rétt rúmlega átta mætti til okkar sumarpilturinn sem var með okkur um daginn og á tíunda tímanum kom auka skoðunarmaður til okkar. Það var þó frekar rólegt í skoðunum, aðeins 12 faratæki fyrir hádegi og 13 eftir hádegi. En þá var bæði hægt að nota tímann til að sitja úti í sólinni (reyndar var ég inni að vakta símann og önnur samskipti) og strákarnir þrifu líka stöðina mjög vel. Stöðvarstjórinn skrapp aðeins rétt fyrir hádegi til að kaupa handa okkur súpu að borða. Fór beint heim eftir vinnu. Setti handklæði og tuskur í þvottavélina, fékk mér hressingu og horfði á tvo nýja þætti. Um kvöldmatar leytið bjó ég mér til plokkfisk. Gleymdi því alveg að ég ætlaði að skera niður lauk, mýkja og bæta við. Plokkarinn var samt mjög góður. Klukkan var byrjuð að ganga tíu þegar ég dreif mig aftur út í smá göngu/útiveru í tæpa klukkustund. Von er á Oddi í gistingu síðar í kvöld.

Húsfundur

Vaknaði einhvern tímann snemma á sjötta tímanum í morgun. Það var því ágætis tími fyrir morgunrútínu og að bæta smá lóðaæfingum og lestri við áður en ég dreif mig í sund. Svo var ég mætt í vinnu um tuttugu mínútum fyrir átta. Tuttugu bílar voru skoðaðir fyrir hádegi. Stöðvarstjórinn skrapp heim í hádeginu. Ég hellti upp á nýtt kaffi, fékk mér að borða og skrapp einnig í um tíu mínútna göngutúr, smá hring. Var komin aftur fyrir klukkan hálfeitt, á undan stöðvarstjóranum. Ég var komin heim um fimm. Las í tæpa klukkustund en um sex var ég mætt niður í bílageymslu á húsfund þar sem greidd voru atkvæði um nokkrar framkvæmdir sem eru framundan. Það var frekar léleg mæting á fundinum en til hans var boðað með löglegum fyrirvara og þar sem flestir eða allir mætti voru samþykkir því sem verið er að fara að gera þá munu þær framkvæmdir fara í frekari ferli fljótlega. 

Sjósunds hittingur

Á miðvikudögum fer ég aðeins seinna af stað út úr húsi og þá beint í vinnuna. Var mætt um hálfátta og vá þá búin að vera á fótum í um einn og hálfan tíma. Gaf mér m.a. tíma til að gera nokkrar lóðaæfingar með 1,5kg lóðunum. Þegar stöðvarstjórinn mætti rétt fyrir átta voru komnir tveir á húninn. Fram að hádegi skoðaði hann 20 farartæki. Stöðin var lokuð í um fimm korter í hádeginu en byrjað var að skoða aftur korter fyrir eitt. Heildin fór upp í 38, einhverjum varð að vísa frá í dag og sumir ákváðu sjálfir að annað hvort fara annað eða koma aftur annan dag. Eftir vinnu fór ég beint í osteostrong tíma og þaðan í Nauthólsvíkina. Kaldapotts vinkona mín var mætt og beið í heita pottinum þegar ég mætti á svæðið um hálfsex. Það var eiginlega háfjara og sjórinn 11,7° C. Vorum ca klukkutíma að sinna rútínunni okkar og spjalla. Fórum upp úr um hálfsjö. Ég kom við í Krónunni í Skeifunni og var ekki komin heim fyrr en korter yfir sjö, tólf tímum eftir að ég fór að heiman í morgun.

Soðin ýsa alltaf sælgæti

Ég var vöknuð áður en klukkan varð hálfsex, amk tuttugu mínútum áður en vekjarinn átti að hnippa í mig. Var útsofin og dreif mig fljótlega á fætur. Hafði því bæði tíma til að gera smá lóðaæfingar og lesa smávegis áður en ég dreif mig í morgunsundið. Rútína dagsins var svipuð og í gær nema ég fór fjórar ferðir í kalda pottinn, smá stund í heitasta og hékk og gerði smá æfingar í rimlunum. Stimplaði mig inn í vinnu átján mínútum fyrir átta tæpu korteri áður en stöðvastjórinn mætti. Ég var búin að hella upp á og var að klára að gera upp. Skoðuð voru rétt yfir farartæki í dag, þar af voru þrjú mótorhjól og eitthvað af endurskoðunum. Eftir vinnu kom ég aftur við á N1 í Borgartúni, að kíka á N1-soninn, en fór svo Sæbrautina heim. Um fimm leytið var þar mikil umferð en ég notaði tímann og spjallaði við pabba meiri hlutann af leiðinni. Fljótlega eftir að ég kom heim setti ég upp kartöflu og sauð upp á ýsunni sem ég fékk í fiskbúðinni í gær. Var eitthvað aðeins að horfa á landsdleikinn í kvennaboltanum en ákvað svo að skreppa aðeins út. Notaði tækifærið og fór með lífræna ruslið. Stillti heilsuforrit símans á útiveru og labbaði hring sem mældist tæpir 3km. Áður en ég fór inn aftur kom ég við í sjoppunni hinum megin við götuna og keypti mér tvo poka af prótein poppi. Hitti fyrrum vinnufélaga í sjoppunni.

Á bókasafnið

Ég var vöknuð rúmu korteri áður en vekjarinn átti að ýta við mér, ekki alveg útsofin en þó tilbúin í daginn. Gerði meira að segja nokkrar lóðaæfingar. Var mætt á planið við Laugardalslaug fimm mínútum fyrir opnun. Byrjaði sundrútínuna á að skella mér nokkrar mínútur í þann kalda, synti svo 400m á braut 7 áður en ég fór aftur í kalda pottinn. Hitti nokkrar sundvinkonur á öllum aldri í sjópottinum. Stimplaði mig inn í vinnu átján mínútur í átta og var búin að hella upp á kaffi, undirbúa afgreiðslurýmið, setja upp afgreiðslukerfin, gera upp og kveikja á pressunni áður en stöðvarstjórinn mætti á slaginu átta. Þá biðu tveir á húninum. Það var ákveðin ró yfir deginum en þó nokkur ös engu að síður. Ingi frændi kom við að athuga með númeraplötu, hún var ekki komin en skráð þannig í kerfinu að hún væri á leiðinni. Skelltum í lás í hádeginu og stöðvarstjórinn sótti handa okkur mat á Hanann, keyptan fyrir flöskusjóðinn. Í heildina voru skoðaðir 43 bílar þar af 20 fyrir hádegi. Númeraplatan kom ekki með sendingu dagsins og ég sendi nokkrar fyrirspurnir. Strax eftir vinnu hringdi ég í Davíð Stein og kom aðeins við hjá honum á N1, stoppaði ekki lengi. Næst lá leiðin í röðina í Fiskbúð Fúsa. Þar verslaði ég harðfisk og ýsu sem ég geri ráð fyrir að hafa í matinn annað kvöld (óþarfi að borða tvær heitar máltíðir á dag). Úr fiskbúðinni fór ég í bókasafnið í Kringlunni og skilaði þremur bókum af fjórum. Er búin með 68 bls. af 480 af fjórðu bókinni; Ráðuneyti æðstu hamingju eftir Arundhati Roy. Var frekar lengi að komast inn í þá bók en ákvað að gefa henni séns. Af safninu "eltu" mig fjórar bækur heim. Engin af þeim skammtímaláns. Sleggjudómur eftir Ragnheiði Jónsdóttur, Sumarrollur eftir Quentin Bates, Það sem við komumst ekki yfir eftir Lucy Score og Minninga skrínið eftir Kathryn Hughes. Ég hef það sterklega á tilfinningunni að ég eigi eftir að framlengja einhverjum skilafrestum. Áður en ég fór heim kom ég við í Útilíf í Kringlunni og kláraði tvö gjafa kort og bætti við tæplega 1100 kr. þegar ég fjárfesti í 3mm "sokkum" sem ég ætla að nota seinna í sjóbuslið. Kom heim rétt fyrir klukkan sex. Það stóð til að skreppa aðeins út og safna skrefum en líklega verður endirnn sá að ég fer í fyrra fallinu í háttinn.

Sjórinn

Eitthvað svar ég furðulega í nótt en í staðinn náði ég að kúra til klukkan langt gengin í níu. Þá fór ég loksins á fætur og bjó mér til hafragraut. Var mætt í Nauthólsvík tíu mínútum áður en aðstaðan opnaði. Kaldapotts vinkona mín var þá þegar mætt á svæðið. Við fórum þrjár ferðir í sjóinn og í annarri ferðinni minni synti ég út að kaðli. Var komin heim aftur stuttu fyrir klukkan tólf. Til stóð að gera eitthvað meira úr deginum en það sem ég var að dunda mér við er eiginlega ekki í frásögur færandi. Skrifa bara það að tíminn leið frekar hratt. 

Laugardagur

Það var heldur snemmt að fara á fætur þegar ég  rumskaði fyrst rétt fyrir klukkan hálfsex. Mér tókst að sofna aftur og var mun tilbúnari í daginn þegar ég vaknaði um sjö. Var mætt í sund rétt rúmlega átta. Byrjaði í kalda pottinum en synti svo 500m, aðallega á braut átta. Var búin með rúmlega 100m á braut 7 þegar sú braut fylltist af krökkum á sundæfingu. Eftir aðra ferðina í þann kalda fór ég í gufu, þá kalda sturtu og sjópottinn. Var búin að vera þar í nokkrar mínútur þegar yngsta mágkona mömmu mætti á svæðið. Eftir lokaferðina í kalda pottinn fór ég upp úr og lagði leið mína vestur í bæ til norsku esperanto vinkonu minnar. Stakk bílnum í hleðslu áður en ég fór inn. Við lásum tvær útgáfur af því hvernig álfar urðu til á esperanto í þýðinu Þórbergs Þórðarsonar. Eftir hittinginn, spjallið, samlesturinn og fleira keypti ég þvott fyrir bílinn og renndi honum á færibandið hjá Löðri við Fiskislóð. Síðan fór ég beinustu leið heim. Staurinn var laus, bílinn í 54% en ég ákvað að stinga honum í samband og hlóð alveg upp í 98%. Á meðan bíllinn var að hlaða sig dundaði ég mér við ýmislegt sem helst ekki má skrifa um. Um hálfþrjú fór ég út, stoppaði hleðsluna, færði bílinn að annað stæði og fór svo í göngutúr. Kom heim aftur um fimm leytið. Skrefafjöldi dagsins er næstum 9000 skref.

Aftur komin helgi

Ég var mætt í sund þegar opnaði og hafði ég rútínuna eins og í gær. Þvoði mér um hárið og var mætt í vinnu tuttugu mínútum fyrir átta. Stöðvarstjórinn mætti á slaginu og þá voru þegar mættir þrír á húninn. Um hálftíu mætti annar skoðunarmaður á stöðina til að leysa af. Þá var þegar búið að skoða níu bíla. Stöðvarstjórinn skrapp frá í rúma klukkustund. Fljótlega eftir að hann kom aftur fór afleysingaskoðunarmaðurinn til baka á stærri skoðunarstöð þar sem helst þurfa að vera þrír skoðunarmenn. Í heildina voru skoðaðir rétt innan við 40 bílar í dag milli klukkan átta og fjögur og samt var lokað í rúmlega hálftíma í hádeginu. Seinni partinn komu tveir tæknimenn á svæðið og nú er búið að setja upp myndavélakerfi. Ég fór beint í klippingu eftir vinnu. Átti tíma klukkan hálffimm en var mætt korter yfir fjögur og þurfti því að bíða smástund. Það var í góðu lagi. Ég var klipp enn styttra í hnakkann og næsti tími var festur eftir sex vikur. Hringdi í pabba og tvíburahálfsystur mína og spjallaði við þau á meðan ég var að keyra heim. Svo var hringt í mig fljótlega eftir að ég kom heim. 

Vikan senn á enda

Vekjarinn var stilltur á korter fyrir sex en ég vaknaði hálftíma áður. Fór ekki alveg strax á fætur en þó nógu snemma til að gefa mér tíma í smá lóðalyftingar. Var mætt á planið við Laugardalslaug fimm mínútum fyrir opnun og byrjaði á því að pikka inn limrum sem varð til á leiðinni. Snéri svo sundrútínunni aðeins við. Fór tvisvar í þann kalda og í heitasta á milli þeirra ferða. Synti 400m á braut 7 og endaði svo á einni kaldapotts ferð áður en ég fór upp úr og í vinnu. Vorum aftur bara tvö en morguninn var rólegri en oft áður þrátt fyrir að það byrjaði með smá látum því það voru tveir á húninum þegar var opnað og tveir aðrir bættust við skömmu síðar. Fyrir hádegi voru skoðaðir 18 bílar. Í hádeginu skrapp stöðvarstjórinn í bankann eftir klinki og í Bónus eftir kaffi. Fljótlega eftir hádegi komu tvær fyrrum samstarfskonur mínar í smá innlit, önnur á hjóli en hin á bíl. Stoppuðu ekki mjög lengi því það var smá erill í afgreiðslunni akkúrat þarna um tvö leytið. Frá rétt fyrir eitt og til klukkan að verða hálffimm voru skoðaðir tuttuguogeinn bíll. Hringdi í Odd og spjallaði við hann hluta af heimleiðinni. Næst hringdi ég í pabba en þar sem hann var með gest varð það örstutt því ég vildi ekki trufla, get alltaf hringt síðar. Þá hringdi ég í Þórnýju fyrrum samstarfskonu en það hef ég ekki gert frá því hún var í leyfi í hittifyrra vegna mjaðmaskipta. Hún fagnaði þessari óvæntu hringingu og við spjölluðum á meðan ég keyrði síðasta spölinn heim og aðeins rúmlega það. Ég var að koma heim rétt rúmlega fimm og skömmu eftir að ég kom heim hringdi ég enn eitt símtalið og spjallaði í rúmar tuttugu mínútur. Um sex leytið fékk ég mér kvöldskatt, afgang af fiskibollum og kartöflum. Horfði á einn nýjan þátt í annarri seríu af; "After the flood", frétti og næstnýjasta þáttinn hans Sigga Gunnars. Klukkan var farin að ganga níu þegar ég hafði mig loksins út í stuttan göngutúr, rétt rúmlega 2km á um tuttuguogfimm mínútum. 

Tvö á vaktinni í dag

Þótt vekjarinn væri stilltur á hálfsjö var ég vöknuð fyrir klukkan sex. Fór þó ekki á fætur fyrr en rétt áður en klukkan varð hálfsjö. Fékk mér chiagraut eftir morgunverkin á baðherberginu, tók til sjósundsdótið og hafði samt smá tíma til að glugga í smá lesefni. Var mætt í vinnu um hálfátta. Náði að hella upp á, gera upp og verka tvo gólffleti áður en klukkan varð átta og stöðvarstjórinn mætti. Hann var einn í dag og geymdi því bílinn sinn á hinni brautinni. Rétt fyrir hádegi kom einn samstarfsmaður okkar sem sér m.a. um breytingar og viðhald á stöðvum. Hann var að fjarlægja smá af köntunum sem voru meðfram skoðunargryfjunum. Alls voru skoðaðir 40 bílar í dag, 20 bílar fyrir hádegi og tuttugu bílar eftir hádegi. Samt fannst okkur morguninn mun rólegri heldur en seinni parturinn af deginum. Stöðvarstjórinn fór rétt fyrir hálffimm og ég sá um að setja kerfið á og læsa. Var komin í Hátún 12, í osteostrongtíma, korter fyrir fimm og komst næstum því strax að. Var með betri árangur á öllum tækjum heldur en í síðustu viku, sló þó engin met. Um hálfsex var ég komin í Nauthólsvík og fékk grænt armaband að þessu sinni. Sjórinn er komin í rúmlega 11°C og ég synti út að kaðli í fyrri ferðinni en svamlaði aðeins um í um fimm mínútur í þeirri seinni. Kom heim áður en klukkan varð sjö. 

Smá rölt fljótlega eftir vinnu

Ég hætti ekki að lesa í gærkvöldi fyrr en ég kláraði skammtímalánsbókina. Ennþá um vika þar til ég þarf að skila henni. Varð frekar hissa þegar vekjarinn ýtti við mér korter fyrir sex. Í augnablik íhugaði ég að endurstilla vekjarann og snúa mér á hina hliðina. En sundið togaði sterkar í mig og var ég mætt á planið rétt fyrir klukkan hálfsjö. Tuttugu mínútum fyrir átta stimplaði ég mig inn og tæpum tíu mínútum síðar kom afleysingaskoðunarmaður. Sá hefur komið áður, t.d. í fyrstu heilu vikunni í janúar. Hann var með okkur í allan dag, skrapp frá í um klukkustund rétt upp úr hádeginu. Í hádeginu kom líka sumardrengurinn sem var á föstudaginn var. Hann var að koma úr lokaprófi vorsins í Versló. Við vorum því fjögur að vinna saman á stöðinni milli tvö og hálffimm. Ég fór beint heim eftir vinnu, spjallaði við pabba megnið af leiðinni. Um sex leytið skrapp ég niður í ruslageymsluna að henda plasti og pappír og notaði svo tækið færið og skrapp í rúmlega 2 km göngutúr á rétt innan við hálftíma. 

Nýr mánuður

Veit ekki alveg hvað klukkan var þegar ég fór að sofa í gærkvöldi, ekkert svo seint en örugglega upp úr klukkan hálfellefu. Samt var ég vöknuð upp úr klukkan hálfsex. Var mætt í sund um leið og opnaði. Fór beint á braut 8 og synti 300m. Eftir eina kalda potts ferð fór ég smástund í gufuna og svo hitti ég rúmlega áttræða konu í sjópottinum. Kynntist henni fyrir um tíu árum en hún er alveg hætt að mæta í sund á veturnar en mætir einu sinni til tvisvar í viku yfir sumarmánuðina. Stimplaði mig inn í vinnu tuttugu mínútum fyrir átta. Afleysinga-skoðunarmaðurinn var með okkur til hádegis en þá var hann sendur í Hádegismóa til að leysa af. Fimmtíuogþrír bílar voru skoðaðir í dag, þar af tuttuguog fimm fyrir hádegi. Fór annars beint heim eftir vinnu og lítið meira um þennan fyrsta dag júní mánaðar að segja. 

Tveir og hálfur tími eftir af maí

Rumskaði um sjö leytið í morgun. Kúrði smástund áfram en var komin á fætur upp úr klukkan hálfátta. Þá var pabbi þegar klæddur og kominn á ról. Um tíu skrapp ég út í göngutúr. Labbaði upp í hæð og yfir hana. Þar mætti ég einni frænku minni á göngu með hund og þrjá syni. Synirnir héldu göngunni fljótlega áfram, voru á leið í Heiðvanginn til afa síns. Við frænkurnar spjölluðum í amk korter áður en við kvöddumst. Ég  hélt áfram göngunni. Fór m.a. yfir þjóðveginn skammt frá brúnni yfir Ytri-Rangá til að labba undir hana og upp með ánni þar til ég kom til móts við elliheimilið Lund. Sá þrjá menn á veiðum og það beit á hjá einum. Stoppaði stutta stund í Bogatúninu hjá Val, pabba Ellu vinkonu, og Ingibjörgu og spjallaði einnig örstutt við nágranna pabba á no. 26. Pabbi var búinn að setja upp kartöflur og leggja á borð og var um það bil að fara að grilla þegar ég kom rétt fyrir tólf. Eftir hádegi var ég aðallega að lesa en lagði nokkra kapla sem gengu upp á endanum og spjallaði við pabba. Um fimm pakkaði ég saman og kvaddi. Eins og síðustu helgi hlóð ég bílinn á hraðhleðslustöð við Olís vestan við Ölfusá. Var komin í bæinn um hálfsjö. 

Á Hellu

Svaf til klukkan að verða sjö í morgun. Mætti í Laugardalslaugina rétt rúmlega átta og snéri rútínunni nokkurn veginn við, endaði á því að synda eftir að hafa farið þrisvar í kalda, einu sinni í heitasta-, nudd- og sjópottinn. Hitti mágkonu mömmu í tveimur síðustu pottunum. Var mætt vestur í bæ til norsku esperanto vinkonum minnar. Við lásum þjóðsöguna um djáknann á Myrká á esperanto. Fór svo með bílinn á færibandið hjá Löðri við Fiskislóð, hefði líklega betur geymt það aðeins en ég vissi ekki þá að ég myndi taka skyndiákvörðun um tveimur tímum síðar. Fór heim og gekk frá sunddótinu og kláraði að pakka niður í tösku. Rétt rúmlega tólf lagði ég af stað austur. Hringdi í pabba og "varaði" hann við. Fljótlega eftir að ég kom í Rangárvallarsýsluna beygði ég til vinstri. Allt gekk vel en þegar ég kom að gatnamótum rétt eftir að ég ók framhjá Gíslholti þurfti ég að hægja enn frekar á ferðinni á löngum kafla þar sem eru vegaframkvæmdir og vegurinn mjög grófur á kafla. Svo þegar ég var búin að keyra rúmlega kílómeter af afleggjaranum að Guttormshaga varð ég að stoppa í dágóða stund þar sem verið var að smala nokkrum hrossum í rétt og setja sum af þeim á kerrur. Ég beið alveg róleg og lenti á smá spjalli við tvo bráðum átta ára frændur. Ég var komin í Gutt um hálfþrjú og stoppaði í rúma klukkustund. Þegar ég kvaddi beygði ég til hægri frá afleggjaranum, vegurinn á þeirri leið var mun skárri en ég keyrði nú ekki hratt þar sem það var maður á dráttarvél á undan mér, lá svo sem ekkert á. Pabbi lét mig ráða hvað við hefðum í kvöldskattinn. Ég fann rauðsprettuflök í frysti sem ég sauð, setti einnig upp kartöflur og skar niður einn lauk og sauð. Þetta var bara nokkuð gott með smjöri og hrásallati. 

Tveir ON-lyklar í hús

Ég rumskaði einhvern tímann um miðja nótt, skrapp á pisseríið og var svolítið lengi að sofna aftur. Svo vaknaði ég rétt áður en vekjarinn var að fara að ýta við mér. Fékk mér chiagraut í morgunmat og var mætt í sund um leið og opnaði klukkan hálfsjö. Sundrútínan var næstum eins og í gær nema í morgun synti ég 400m á tæpum 18 mínútum. Mætti í vinnu á sama tíma og í gær og afleysingaskoðunarmaðurinn var þá þegar mættur fyrir utan. Ég opnaði, kerfið af og hellti upp á. Um átta kom ungur piltur, ekki orðinn seytján ára, og var okkur til aðstoðar í allan dag. Hann var að vinna hjá Frumherja í fyrrasumar líka og er alveg liðtækur í afgreiðslu og að aðstoða skoðunarmanninn. Ég gat því skroppið í Bónus um tíu leytið. Dagurinn byrjaði rólega en bara fyrsta korterið svo var nóg að gera fram að hádegi og þegar opnað var eftir hádegi voru þrír komnir á húninn. Í heildina voru skoðaðir 43 bílar, síðasti bíll fór út á slaginu fjögur. Það tók okkur örfáar mínútur að ganga frá, setja kerfið á og læsa á eftir okkur. Ég fór beinustu leið heim, spjallaði við Ellu vinkonu alla leiðina. Umferðin var nokkuð þung og var klukkan orðin hálffimm þegar ég kom heim. Bíllinn var enn í uþb 45% en þar sem var laust á staurnum ákvað ég að stinga í samband. Pöntuð sending frá ON var í póstkassanum, tveir ON-lyklar. Virkjaði þá báða og gat prófað annan strax því hleðslusambandið hafði rofnað eftir tíu mínútur. Hingað til hef ég verið að skanna kóða á staurnum og það kemur einmitt stöku sinnum fyrir að samband rofnar. Það virkaði vel að skanna lykilinn og nú er bíllinn búinn að vera í hleðslu í fjóra og hálfan tíma og kominn upp í 99%. Ég fer því fljótlega í það mál að stoppa hleðslu, taka úr sambandi og færa bílinn á annað stæði. 

Einn virkur vinnudagur eftir af mánuðinum

Vekjarinn ýtti við mér korter fyrir sex í morgun og ég var mætt í sund um hálfsjö. Byrjaði í kalda pottinum og fór alls þrjár ferðir í hann, synti 300m, fór eina sjö mínútna ferð í gufuna og örstutt í heitasta pottinn. Var mætt í vinnu tuttugu mínútum fyrir átta. Afleysinga-skoðunarmaðurinn var mættur fyrir utan og varð samferða mér inn. Stöðvarstjórinn mætti rétt fyrir átta og var fram að hádegi. Í heildina voru skoðaðir 42 bílar í dag. Klukkan var rúmlega hálffimm þegar við settum kerfið á og læstum eftir að hafa gengið frá og stimplað okkur út. Ég fór beinustu leið í Fiskbúð Fúsa og spjallaði við pabba á leiðinni þangað. Keypti mér fiskibollur og og harðfisk, óbarða ýsu. Ætlaði aðeins að kíkja á fyrrum nágranna, sá að bíllinn var í innkeyrslunni en þau voru ekki heima. Tvíburahálfsystir mín hafði samband í vikunni og spurði hvort ég gæti sótt og nýtt sendingu sem hún fengi í dag fimmtudag. Hún er stödd erlendis. Ég þáði það og hún sendi mér kóða í dag og áður en ég fór heim kom ég við í smá skúr á planinu þar sem Orkan við Hæðarsmára er, notaði kóðann til að opna og fann boxið sem var merkt við kóðann. Þar beið kassi af nokkrum tegundum af fersku grænmeti. Hringdi eitt símtal eftir að ég kom heim en að því loknu setti ég upp kartöflur, hitaði fiskibollur og bjó mér til sallat. 

Miðvikudagur

Vekjarinn var stilltur á 06:35 en ég var vöknuð stuttu fyrir klukkan sex. Slökkti á vekjaranum fór ekki á fætur fyrr en stuttu fyrir klukkan hálfsjö. Hafði nægan tíma í morgunverkin, sjósundsundirbúning og meira að segja smá lestur í fræðunum. Var mætt í vinnu um hálfátta. Þegar stöðvarstjórinn mætti rétt fyrir klukkan átta voru þrír að bíða á húninum. Já, við erum farin að hafa það þannig að ég læsi innri hurðinni á eftir mér og hún er ekki tekin úr lás fyrr en stöðvarstjóinn mætir eða á slaginu klukkan átta. Tuttuguogfjórir bílar voru skoðaðir fyrir hádegi og tuttugu eftir hádegi. Ég mætti í osteostrong korteri fyrir tíman minn klukkan fimm og komst eiginlega strax að. Var svo mætt í Nauthólsvík rétt fyrir klukkan hálfsex. Þá var kaldapotts vinkona mín þegar komin í pottinn. Fórum þrisvar í sjóinn þar af eina ferð í lónið og að venju eina ferð í gufuna á milli ferða og tvær í pottinn. Fórum upp úr um hálfsjö og ég var komin heim rétt áður en klukkan varð sjö. 

Hundraðogsex ár frá því móðuramma fæddist

Vekjarinn lét vita korter fyrir sex að kominn væri tími fyrir fótaferð ef ég ætlaði að fara í sund áður en ég mætti til vinnu. Leyfði mér að "snúsa" einu sinni en ég var komin á fætur um sex. Sinnti morgunverkunum á baðherberginu, fékk mér chiagraut og vitamin og var komin á planið við Laugardalslaug um það leyti sem verið var að opna um hálfsjö. Ég var með nýjan sundbol sem ég keypti í Sports Direct í gær. Byrjaði á því að fara í kalda, synti 300m á braut 7 áður en ég fór aftur í kalda. Sat í sjópottinum í uþb tíu mínútur og endaði í kalda pottinum og kaldri sturtu áður en ég fór uppúr og í vinnu. Var búin að hella upp á og gera upp kassann þegar stöðvarstjórinn mætti rétt fyrir átta. Dagurin byrjaði frekar rólega en í heildina voru samt skoðaðir 43 bílar milli klukkan hálfníu og hálffimm, þrátt fyrir hálftíma lokun í hádeginu. Eftir vinnu fór ég beint á bókasafnið í Kringlunni og skilaði fjórum bókum. Tók fjórar bækur í staðinn, þar af eina skammtímalánsbók; Girnd eftir Þóru Sveinsdóttir. Áður hefur komið út bókin Sjúk eftir sama höfund og eru helstu persónur að hluta til þær sömu. Hinar þrjár bækurnar sem komu heim með mér af safninu eru; Ráðuneyti æðstu hamingju eftir Arundahati Roy, Gestir eftir Hildi Knútsdóttur og Útreiðartúrinn eftir Rögnu Sigurðardóttur. Var komin heim um hálfsex. Tveimur tímum síðar mætti ég á húsfund í bílakjallaranum, um sama mál og fundurinn fyrir viku. Þá náðist ekki tiltekinn meirihluti en núna var nóg að fá meirihluta til að koma málinu í ferli. Áminna á íbúa einnar íbúðarinnar og ef íbúar fara að fyrirmælum og ekkert kemur upp á 30 dögum eftir að áminningarbréf berst fellur málið niður. Fundurinn var mun styttri heldur en í síðustu viku, meirihluti fékkst og málið fer í ferli. Þegar ég kom upp aftur hringdi ég tvö símtöl. Annað símtalið varði í 21 mínútu og hitt í hálftíma. 

Annar í hvítasunnu

Ég vaknaði helst til snemma í morgun en hélt mig þó uppi í rúmi til klukkan langt gengin í átta. Þá fór ég á fætur, sinnti morgunverkunum á baðherberginu, fékk mér sítrónuvatn og settist svo niður í stofustólinn og kláraði síðustu bókina af fjórum af safninu. Um hálftíu bjó ég til tvöfaldan hafragraut úr grófum hafragrjónum sem ég var búin að láta liggja í bleyti í skaftpotti inni í ísskáp frá því stuttu áður en ég fór austur á laugardaginn. Ég var mætt á planið við Nauthólsvík korter fyrir ellefu, tveimur mínútum á undan kalda potts vinkonu minni. Sátum í bílunum þar til fjórum mínútum fyrir opnun. Við hittum þrjár úr gamla sjósundshópnum mínum, tvær systur og sjósundsvinkonu mína sem bjó til hópinn á sínum tíma. Við Hrafnhildur fórum tvisvar í sjóinn, einu sinni í lónið, einu sinni í gufuna og tvisvar í pottinn. Og nú er annars farið að merkja fólk sem er með árskort eða borgar sig inn. Renndi annars framhjá Drápuhlíð eftir sjósundsferðina en sá að fyrrum nágrannar mínir voru ekki heima. Bókasafnið í Kringlunni var ekki opið í dag nema fyrir þá sem kunna að nota "utan opnunartíma" en ég fór í Krónuna í Skeifunni og verslaði inn. Þegar ég var að fara með pokana út í bíl sá ég Davíð Stein koma og ég heilsaði aðeins upp á hann þegar ég var búin að læsa pokana inn í mínum bíl og hann að leggja sínum bíl. Kom heim rétt fyrir tvö og það stóð alltaf til að fara út aftur og safna skrefum en einhvern veginn leið dagurinn án þess að af því yrði. 

Sunnudags síðdegi

Vissi af mér um fjögur leytið en gafst ekki upp á því að reyna að sofna aftur og hafði það á endanum. Vaknaði svo stuttu fyrir hálfátta og fór fljótlega á fætur. Pabbi var þegar klæddur og kominn á ról. Um tíu skrapp ég út í rúmlega hálftíma göngu og náði þar með að safna yfir 3500 skrefum. Fljótlega eftir að ég kom til baka fór pabbi að undirbúa smá grillveislu. Það eina sem ég fékk að gera var að passa upp á sætu kartöfluna sem gufusauð í sigtipotti, leggja á borðið og ganga svo frá eftir matinn. Á þriðja tímanum dreif pabbi sig í að skipta um eldhúsgardýnur og ekkert löngu eftir það fór hann út að hirða smá laufhrúgu í einu horninu í garðinum austan við hús. Ég fékk að keyra hjólbörurnar með hrúgunni að kerrunni. Annars er ég um það bil að fara að leggja af stað heim til mín, ætla í Nauthólsvík um ellefu í fyrramálið.

Hvítasunnuhelgi

Ég held að ég hafi verið sofnuð um tíu í gærkvöldi og ég rumskaði ekki fyrr en rétt fyrir sex, sem mér fannst reyndar heldur snemmt. Kúrði eitthvað áfram en greip svo símann um hálfsjöleytið. Rúmum klukkutíma síðar fór ég loksins á fætur, fékk mér sítrónuvatn og sinnti morgunverkunum á baðherberginu. Klukkan var nýlega orðin átta þegar ég mætti á planið við Laugardalslaug. Tíu mínútum síðar var ég mætt á braut átta. Eftir fyrstu hundrað metrana hitti ég á sjósundsvinkonu mína, hún og maðurinn hennar voru búin að synda og á leiðinni upp úr en við tvær spjölluðum örugglega saman í um tuttugu mínútur áður en hún fór í heita pottinn og ég hélt áfram að synda. Var komin heim aftur um hálfellefu. Fékk mér harðsoðið egg, vítamín og vatnsglas. Horfði á einn þátt áður en ég snéri mér loksins að þeim verkefnum sem ekki má skrifa um. Að þeim verkefnum loknum ristaði ég mér brauð og smurði með smjöri (aldrei þessu vant) og setti á verkaða bleikju frá Svartárkoti. Stuttu fyrir eitt var ég komin út í bíl með farangur fyrir eina nótt og lagði af stað austur. Hringdi í frændfólk mitt á Selfossi. Þau voru á leið í bústaðinn og Jóna Mæja spurði hvort ég myndi ekki geta dobblað pabba í að heimsækja þau þangað. Ég var meira en til í að láta þá hugmynd verða að veruleika og hringdi í pabba þegar ég var að nálgast Kambabrún og spurði hann hvort hann væri til í þetta ævintýri. Hann var mjög jákvæður. Ég stoppaði því hvergi á leiðinni en á einum tímapunkti lét ég verða af því að hringja í manninn sem hringdi í mig í vinnuna í sl mánuði, aðallega til að fá skoðunarfrest á bíl en líka til að reyna við mig. Hann svaraði símanum og það var bara nokkuð þægilegt að spjalla við hann, sagði honum sagt að ég væri eiginlega enn að hugsa málið. Helga systir vasa-hringdi í mig þegar ég átti eftir um 10km á Hellu. Hún heyrði að ég var komin í samband og við töluðumst stuttlega við en hún var á kafi í einhverjum undirbúningi. Þegar ég kom á Hellu fór ég inn með farangurinn og skrapp aðeins á salernið. Pabbi gerði sig kláran og við lögðum af stað á hans bíl mjög fljótlega. Vel var tekið á móti okkur í bústaðnum. Ég var að koma þangað í fyrsta skipti. Sáum líka nýja bílinn þeirra en fyrir um mánuði uppfærðu þau skódann í 100% rafmagnsbíl. Stoppuðum í á annan tíma. Pabbi hafði svo siginn fisk með kartöflum og smjöri í kvöldmatinn.