16.11.26

Tannlæknir, gömul viðgerð löguð

Gærdagurinn fór mikið til í rólegtheit og dundur. Rumskaði um hálfátta en fór aftur upp í eftir að hafa farið á pisseríið. Systir mín "vasa"-hringdi í mig og vakti mig um tíu en vissi ekkert af því sjálf. Ég fór á fætur skömmu síðar. Bjó mér til hafragraut sem ég skipti niður í þrennt. Á þá tvo hluta eftir. Ég kláraði að lesa næst síðustu bókina af safninu og byrjaði á þeirri síðustu. Kláraði líka bókina eftir frænku mína, horfði á einhverja þætti, prjónaði, vann að verkefninu sem ég minntist aðeins á í pistli gærdagsins. Hringdi í pabba og einnig Jónu Mæju.

Í morgun var ég vöknuð fyrir klukkan hálfsex. Borðaði chiagraut með bláberjum í morgunmat, hitaði bílinn áður en ég lagði af stað út í daginn. Mætti á planið við Laugardalslaug nokkrum mínútum eftir að opnaði. Synti aðeins 200m og sat aðeins skamma stund í pottinum áður en ég fór upp úr. Stimplaði mig inn í vinnu tuttugu mínútum fyrir átta. Stöðvarstjórinn þurfti að byrja daginn á því að reka erindi en þegar hann mætti stuttu fyrir níu var ekki enn búinn að koma bíll til skoðunar. Ég skrapp frá í rúman klukkutíma frá því stuttu fyrir tíu og til rúmlega ellefu. Átti tíma hjá tannlækni sem hafði fengið mig til að bóka hann eftir síðasta tanneftirlit. Hann vildi fjarlægja gamla silfurviðgerð í jaxli hægra megin í neðri góm. Sú aðgerð tók uþb hálftíma og kostaði rétt tæp fjörutíuogfjögur þúsund.

Heildarfjöldi skoðaðra bíla fór upp í nítján, þar af var ein bilanaskoðun sem dettur út úr talningunni eftir miðnætti því slík skoðun fer aldrei alla leið í ökutækjaskrá. Fór annars beinustu leið heim eftir vinnu og stakk bílnum í samband. Er að hugsa um að hlaða bílinn til klukkan átta en skreppa þá yfir til tvíburahálfsystur minnar og skila henni regnkápunni sem hún lánaði mér til að taka með mér út og nota.

15.11.26

Sunnudagur

Verð að játa að ég hef enga löngun haft til að taka fram fartölvuna í nokkra daga, ég sem þyrfti helst að fara að hespa af smá skylduverkefni sem þarf að skila fljótlega. Þegar ég kom heim eftir vinnu sl fimmtudag heyrði ég í einni vinkonu minni sem er í sama félagsskap og ég er nýgengin inn í. Þar eru haldnir fundir reglulega yfir veturinn og einn slíkur var á dagskrá þetta kvöld. Vinkonan heyrði á rödd minni að ég væri alls ekki fullfrísk og jafnvel smitandi. Ég spurði hana hvort ég gæti eða mætti vera með grímu en hún sagði mér að skynsamlegra væri að boða forföll og halda mig heima. Innst inni vissi ég þetta alveg og ég fór eftir þessu ráði. Notaði því fimmtudagskvöldið í að horfa á síðasta þáttinn af Elmu og einhverja tvo aðra áður en ég fór í háttinn.

Mætti í vinnu rétt rúmlega hálfátta á föstudagsmorguninn. Þegar við opnuðum klukkan átta var einn kúnni á húninum, sú heilsaði mér með fullu nafni. Það kom í ljós að þetta var skóla- og útskriftarsystir mín úr Kennó. Seinna um daginn kom konan sem keypti af mér Dráðuhlíðina með bílinn í skoðun. Heildarskoðanir dagsins fóru upp í 20 sem er bara nokkuð gott miðað við árstíma.

Í gær fór ég á fætur upp úr klukkan átta. Hélt mig heimavið langt fram eftir degi. Kláraði trefil fyrir frænku mína, trefil sem líklega er heldur stuttur en frænku minni finnst hann flottur. Ákvað að fitja upp á bleikri tusku, þarf að eiga fleiri svoleiðis. Einn frændi minn kom við um hálftvö leytið með vörur sem ég keypti af honum til styrktar handboltaflokknum sem sonur hans æfir með. Rétt fyrir klukkan sex var ég komin upp í Keiluhöll í Egilshöllinni. Þar hitti ég slatta af fólkinu sem er í sama félagsskap og ég gat um hér ofar. Áttum tvær brautir pantaðar klukkan sjö svo við byrjuðum á því að fá okkur hressingu. Ég fékk mér sætar/franskar kartöflur, það var alveg nóg. Spilamennskan í keilunni gekk ekki mjög vel hjá mér en ég skemmti mér mjög vel. Var komin heim aftur rétt fyrir níu.

11.11.26

Ekki í sund og ekki í osteostrong

En ég mætti í vinnuna um hálfátta og nýtti fyrsta tæpa hálftímann nokkuð vel. Svo var reyndar frekar rólegt að gera. Held að heildarfjöldi skoðaðra bíla hafi farið upp í tuttugu. Þrír af þeim áttu bókaða tíma en hinir sem komu inn af götunni þurftu sjaldnast að bíða lengi. Eiginlega bara í kringum hádegið þegar stöðvarstjórinn skrapp í mat. Hálsinn er enn með leiðindi en ég þraukaði gegnum daginn. Stimplaði mig út á slaginu klukkan hálffimm og þá var ég búin að ákveða að afbóka mig í osteostrongtíma. Fór þess í stað beinustu leið á bókasafnið í Kringlunni og skilaði af mér fjórum bókum af sjö, þar af báðum skammtímalánsbókunum og önnur hinna var sú sem var ólesin heima í síðustu ferð. Þau undur og stórmerki gerðust að ég freistaðist ekki til að taka neina bók með mér heim. Er með fjórar á náttborðinu og fjórða bókin er hálflesinn; Traustabrestir eftir frænku mína. Ég þarf líka að fara að huga að jólakortagerð, minnir að ég eigi einhvern bunka tilbúinn síðan í fyrra og þarf líklega ekki að komast í nema eitt gott jólakorta-kvöldstuð til að vinna upp fyrir listann sem er alls ekki langur. Það er bara spurning hvort ég set upp kortagerðina hér heima (og laumi mér í það sem átti að verða Viðeyjar-hvítvínið mitt) eða hvort ég fer austur með dótið eins og sl þónokkur ár. Annars setti ég bílinn á staur þegar ég kom heim og hlóð hann upp í 96%, úr rúmlega 40% á fjórum tímum. Var svo séð að leggja við hliðina á merktu hleðslustæði þannig að þegar ég fór og tók úr sambandi þurfti ég ekki að færa bílinn. En nú er skynsamlegast að fara í háttinn og stilla klukkuna á korter í sjö, jebb sleppa sundinu í fyrramálið.

10.11.26

Heilsa ekki alveg upp á 100%

Seinni partinn á sunnudaginn var fór ég að finna aðeins fyrir hálskitli. Það varð til þess að ég keypti mér tvenns konar hálsbrjóstsykur í fríhöfninni og nokkuð stóra engiferrót og sítrónur í Krónunni eftir vinnu og dekkjaskipti í gær. Ég var ákveðin í að sleppa sundi í gærmorgun en fannst ég ekki nógu óhress til að hringja mig inn lasna. Mætti í vinnu korter fyrir átta og var með annan brjóstsykurspokann meðferðis, gat samt notað hann frekar sparlega. Kom heim í gær um hálfsjö og gaf mér tíma til að horfa á nýjasta þáttinn um Elmu sem er byggð á sögunni "Marrið í stiganum" eftir Evu Björgu Ægisdóttur. Horfði líka á viðtalsþáttinn hennar Vikoríu Hermannsdóttur sem að þessu sinni var við biskup Íslands, Guðrúnu Karls Helgudóttur. Klukkan var orðin óvanalega margt þegar ég fór í rúmið í gær. Las samt aðeins í bókinn Aldrei, aldrei.

Ég var vöknuð tíu mínútum áður en vekjarinn átti að ýta við mér og ég tók þá ákvörðun að sleppa því að taka sjósundsdótið með, þarf að vera í betra ástandi til að skella mér út í. Það var annars nokkuð rólegt í vinnunni í dag en skoðaðir voru eitthvað um tuttugu bílar, þar af fjórir sem áttu bókaða tima og einn bíll var bæði að koma í aðalskoðun og breytingaskoðun. Stimplaði mig út á slaginu hálffimm og það tók mig næstum klukkutíma að komast heim, svo mikil var umferðasultan alveg úr Skeifunni og næstum því að Kópavogi. Fljótlega eftir að ég kom heim skar ég niður 3 gulrætur, eina sæta kartöflu og fimm venjulegar og skellti í pott. Eftir að suðan var komin upp fann ég nokkrar fiskibollur í frysti, það margar að ég á afgang í tvær aðrar máltíðir. Núna er ég að drekka blöndu af engiferbitum og safa úr hálfri sítrónu í soðnu vatni krydduðu með kanil og cayenne pipar. Það rífur vel í hálsinn. Skyldi ég komast í sund í fyrramálið og í sjóinn eftir vinnu á föstudaginn? Það verður bara að koma í ljós.

9.11.26

Skemmtileg ferð að baki

Í dag var fyrsti vinnudagur eftir tvo virka daga í frí og þrjár nætur í Lissabon með 67 manna hóp sem tengdust Frumherja, vinnunni minni, á einn eða annan hátt. Ég er alls ekki viss um hvernig best er að segja frá. Vil samt byrja á því að segja frá að ég vaknaði eldsnemma sl fimmtudagsmorgun og var tilbúin ca korter yfir fimm þegar Davíð Steinn kom og sótti mig. Ég var með vegabréfið klárt og hafði pakkað niður í flugfreyjutösku og bakpoka. Það var byrjað að bóka inn þegar ég mætti. Veifaði einungis vegabréfinu og sagðist ekki vera með neinn farangur á færibandið. Næst lá leiðin í öryggisleitina. Þar gekk allt nokkuð vel. Ég var reyndar tekin aðeins útfyrir röðina í random tékk eftir að hafa farið í gegnum öryggishliðið. Ekki var þó gramsað í dótinu í bökkunum. Flugið út tók rúma fjóra tíma og svo tók einhvern tíma að bíða eftir þeim töskum sem tékkaðar voru inn áður en okkur var safnað saman í tvær rútur og keyrt að hótel Mundial niðri í bæ. Þar þurftum við að afhenda vegabréfin okkar, öll í einu, áður en lesið var upp og lyklar afhentir. Ég og sú sem kenndi mér á afgreiðslukerfið í Hádegismóum í fyrra höfðum beðið um tvíbura herbergi. Fengum herbergi númer 547. Þegar við fundum það loksins, beygðum fyrst í ranga átt, og opnuðum var rúmunum stillt upp saman. Við gátum dregið þau í sundur og ákváðum að gera bara gott úr hlutunum. Þessi herbergismál voru mjög skrýtin í nokkrum tilvikum. Þegar við vorum búin að koma okkur aðeins fyrir fórum við niður. Það var enn það mikið eftir af deginum að við fórum nokkur hópur, fundum aðal- göngugötuna og löbbuðum alveg niður að flóa. Þegar við komum til baka fórum við sum upp á áttundu og fundum einhverja úr hópnum þar. Á níunda tímanum fór tólf manna hópur á einn stað í göngugötunni og borðuðum. Vorum að koma aftur á hótelið stuttu fyrir klukkan tíu. Það var slatti af ferðafélögunum niðri á barnum og mjög glatt á hjalla. Ég ákvað samt að fara  upp á herbergi, búin að ganga næstum 11.500 skref sem var næstum fimm sinnum meira en það sem ég næ dags daglega, þ.e. ef ég fer ekki í smá göngutúr. Næsta dag gekk ég yfir 17 þúsund skref, labbaði m.a upp að kastalarústunum með "tvíburanum" mínum og við borguðum okkur inn til að skoða. Um fjögur vorum við sjö sem vorum sótt á hótelið og fórum í göngu og smakk upplifanir með leiðsögn. Fórum á sex staði og þetta tók um þrjá tíma. Komum við á einhverjum bar í baka leiðinni og fengum "happy hour" tilboð. Rétt að geta þess að morgunganga þessa dags byrjaði með því að kaupa sér regnhlíf, en það var stytt upp fyrir hádegi. Á laugardagsmorguninn vorum við sex í hóp sem tókum sporvagn númer 28. Héldum að við gætum tekið heilan hring en þegar við vorum rekin út ákváðum við aðeins að rölta. Komum við á dönsku kaffihúsi og fengum okkur kaffi og kruðerí áður en við fundum ákjósanlegan stað til að láta uber af stærri gerðinn sækja okkur og keyra okkur á markað sem var í göngufæri við hótelið. Eftir að hafa rölt þar um og fengið okkur að borða yfirgáfu tvö hópinn til að fara í jarðskjálftasafn. Við hin fórum á hótelið og um hálffimm voru fjórir búnir að bætast í hópinn og fórum við á tveimur uberum í stærsta aquarium í evrópu að mér skilst. Magnaður staður. Þegar við komum til baka bættust tveir í hópinn sem fór með okkur að borða á Ítölskum stað í nágrenninu. Í gærmorgun skruppum við herbergisfélagarnir í röltgöngu niður að flóa eftir morgunmatinn. Komum til baka fyrir klukkan ellefu og skömmu síðar byrjaði að rigna. Tæmdum herbergið rétt fyrir tólf og rúturnar komu og sóttu okkur um eitt leytið. Vorum aðeins of snemma á ferðinni á flugvöllinn því þegar við mættum var um klukkutími þar til átti að byrja að bóka inn. Flugið heim tók styttri tíma, þrjá tíma og rétt rúmlega þrjú korter.

4.11.26

Fjögurra daga ferðalag framundan

Ég rumskaði upp úr klukkan fjögur. Eftir ferð á pisseríið gat ég kúrt eitthvað áfram en stuttu fyrir hálfsex kveikti ég ljós og kláraði að lesa seinni skammtímalánsbókina áður en ég fór á fætur. Það hafðist á tæpum hálftíma og ég var svo mætt í sund um hálfsjö. Vinnudagurinn var nokkuð rólegur en þó voru skoðaðir hátt í þrjátíu bílar. Mætti í osteostrong rétt fyrir klukkan fimm og var komin heim um hálfsex leytið. Bjó mér til hafragraut sem ég hafði í kvöldmatinn ásamt kaldri lifrarpylsusneið. Þess má geta að í hádeginu hitaði ég blóðmörssneið, af kepp sem ég tók með í vinnu í gær, í örbylgjuofninum. Fékk mér svo hreint skyr með rjóma í eftirmat. Held því líka til haga að ég setti bílinn í hleðslu í rúma tvo tíma, er nú í 83%, og setti hann svo á annað stæði þar sem hann verður alveg til mánudagsmorguns. Líklega verður næsta vika aðeins byrjuð áður en ég set inn færslu næst enda flýg ég til Lissabon snemma í fyrramálið og kem ekki heim aftur fyrr en á sunnudagskvöldið. 

3.11.26

Þriðjudagskvöld

Ég var komin á fætur korter fyrir sjö en var vöknuð mun fyrr. Stimplaði mig inn í vinnu um hálfátta og náði að græja, undibúa og gera helling á fyrsta hálftímanum. Það var lítið að gerast í skoðunum fyrsta klukkutímann en það átti eftir að rætast úr og þegar upp var staðið voru skoðaðir nokkuð yfir þrjátíu bílar í dag. Aðeins einn af þeim var með bókaðan tíma. Skráður eigandi þess bíls er bekkjarbróðir systur minnar úr grunnskóla og frændi Ellu vinkonu. Það var hins vegar sonurinn sem bókaði skoðunina og kom með farartækið. Sá er reyndar sláandi líkur pabba sínum. Stimplaði mig út á slaginu hálffimm og fór og hitti kaldapotts vinkonu mína í Nauthólsvík. Við fórum tvisvar í 6,8°C sjóinn, einu sinni í lónið, tvisvar í gufuna og sátum einnig dágóða stund í heita pottinum. Ég verð illa svikin ef ég sef ekki extra vel í nótt. 

2.11.26

Helga systir 57 ára í dag

Svefninn síðast liðna nótt var eitthvað köflóttur og ákvað ég því að sleppa morgunsundi í morgun. Mætti í vinnu upp úr klukkan hálfátta. Rólegt var til að byrja með en í heildina voru samt skoðaðir hátt í fjörutíu bílar í dag. Fór í esperanto hitting beint eftir vinnu og hafði bílinn í hleðslu þennan klukkutíma sem ég stoppaði. Kom heim stuttu fyrir klukkan hálfsjö og ákvað að hlaða bílinn aðeins meira. Allt virtist í lagi til að byrja með en þegar ég var búin að vera inni í tæpan hálftíma tilkynnti forritið í símanum um villu. Ég fór út og það endaði með því að ég ákvað að taka úr sambandi og færa bílinn á annað stæði. Bíllinn er í 70% og það nægir næstu dagana. 

1.11.26

Skrepp á Hellu með Oddi í dag

Það eru bæði kostir og gallar við að skrásetja ekki endilega niður dagana daglega. Hluti af göllunum getur verið að eitthvað gleymist sem mætti alveg minnast á. Kostir eru þá m.a. að ég hef kannski frá meiru að segja, amk stundum. Þessa stundina er ég á Hellu. Við Oddur komum hérna fyrir klukkan tvö, þá var pabbi í miðri pönnukökugerð. Þeir tveir eru núna að spjalla saman inni í stofu og ég ákvað að nota tækifærið og skrásetja hluta af því sem ég er búin að vera að bralla síðan á föstudaginn. Það er nefnilega ekkert víst að ég nenni að taka fram fartölvuna þegar ég kem heim. Ég var annars vöknuð um átta í morgun og morguninn sem og gærmorguninn fóru að hluta til í það sem ekki má skrifa um. Um hálftólf lagði ég af stað austur. Þegar ég hringdi Odd upp um tvö leytið í gær var hann opinn fyrir því að koma með mér í smá skrepp á Hellu í dag. Hann svaraði þó ekki símanum þegar ég hringdi um það leyti sem ég lagði í hann en hringdi til baka þegar ég var að keyra framhjá Bláfjallaafleggjara.

Um tvöleytið í gær setti ég mig í samband við frænku mína og jafnöldru sem býr í Seljahverfinu. Hún var heima og sagði að ég væri velkomin. Ég var rétt lögð af stað, gangandi, til hennar þegar kom haglél og svo einnig hellidemba. Þrátt fyrir að vera í strigaskóm hélt ég för áfram. Var tæpan hálftíma á leiðinni. Rétt áður en ég kom til hennar sá ég tvöfalda heila regnboga, sá innri mjög litsterkur og flottur. Stoppaði hjá frænku minni í næstum tvo tíma, og svo rúmlega það því þegar ég var tilbúin að fara, komin í og búin að kveðja kom hellidemba. Þá dembu beið ég af mér, ca tíu mínútur, og komst svo heim án þess að rigndi. Þurfti þó að fara úr blautum sokkum þegar ég kom heim.

Föstudagurinn var síðasti virki dagur októbermánaðar. Ég byrjaði daginn á sundferð um hálfsjö. Það var nóg að gera í vinnunni milli klukkan átta og rúmlega fjögur, yfir sextíu bílar. Stimplaði mig út sjö mínútum yfir fjögur. Kom aðeins við hjá N1 syninum í Borgartúni og svo hjá frændfólki sem býr í sundunum. Kom heim um sex og var með bílinn í hleðslu næstum til miðnættis.

29.10.26

Fimmtudagskvöld

Þegar ég kom heim eftir vinnu, osteostrong og bókasafnsferð í gær stakk ég bílnum í samband í tæpa tvo tíma, eða þar til tvíburahálfsystir mín lét mig vita að hún væri komin heim. Þá tók ég prjónadótið með og fór á bílnum yfir til hennar. Heimsóknartilefnið var líka að fá lánaða regnkápu til að taka með í ferðina til Lissabon fyrstu helgina í næsta mánuði. Sömu regnkápu fékk ég lánaða þegar ég fór með RB í helgarferð til Kaupmannahafnar í mars fyrir rúmum þremur árum. Stoppaði við í um einn og hálfan tíma og prjónaði smávegis en var meira að spjall við mæðgurnar, tvíburahálfsystur mína og dóttluna hennar.

Í morgun var ég mætt á braut 6 tuttugu mínútum fyrir sjö og synti 500 m á rétt tæpum tuttugu mínútum. Stimplaði mig inn í vinnu tuttugu mínútum fyrir átta. Í heildina voru bókaðar inn þrjátíuogfjórar skoðanir en þrír af bílunum voru bókaðir í aðalskoðun og breytingaskoðun, ýmist að breytast í eða úr leigubíl. Stimplaði mig út á slaginu hálffimm og fór beinustu leið heim. Upp úr klukkan hálfsex klæddi ég mig upp og var mætt á fund um sex leytið, tæpum klukkutíma áður en fundur hófst. Kom heim korter fyrir tíu og er að vinna í því að fara í háttinn.

28.10.26

Sundsprettur fyrir vinnu, osteostrong og bókasafn eftir vinnu

Var alveg tilbúin að vakna þegar vekjarinn ýtti við mér tíu mínútum fyrir klukkan sex. Fimmtíu mínútum síðar var ég komin á braut 7 og færði mig svo á braut 6 þegar ég var uþb hálfnuð með fimmhundruð metrana. Stimplaði mig inn í vinnu tuttugu mínútum fyrir átta. Ásgeir, skoðunarmaður mætti fimm mínútum síðar og stöðvarstjórinn mætti um átta leytið. Inn á milli var rólegt en það komu skorpur af alls kyns verkefnum og í heildina voru bókaðir inn yfir fjörutíu bílar í skoðun í dag. Sumir með bókaða tíma í noona en flestir komu inn af götunni. Stimplaði mig út á slaginu hálffimm og fór beinustu leið í Hátúnið. Þurfti ekki að bíða nema í fimm mínútur eftir að komast að. Eftir tímann lá leiðin í bókasafnið í Kringlunni. Í gærkvöldi kláraði ég næstsíðustu bókina sem ég var með í láni og byrjaði á þeirri síðustu og einhvern veginn fannst mér það góð hugmynd að skila inn fimm bókum af sex. Freistaðist svo auðvitað til að taka sex bækur með mér heim og tvær af þeim bókum eru nýjar og með tveggja vikna skilafrest; Birkilundur ÍBÚÐIR FYRIR 60+ eftir Margréti Sigríði Sölvadóttur og Hefnd Þórdísar eftir Öddu Sigurjóns. Hinar fjórar bækurnar eru Einfaldlega Emma og Birta, ljós og skuggar eftir Unni Lilju Aradóttur, Eyja eftir Ragnhildi Þrastardóttur og ALDREI ALDREI eftir Collen Hoover og Tarryn Fisher. Þetta verður smá áskorun og kostar eitthvað skipulag. Vonandi verður þetta til þess að ég dragi aðeins niður í imba/þátta glápinu því ég þarf að sinna fleiru en þessu og vinnunni. Kemur í ljós.

27.10.26

Sjóbusl eftir vinnu

Vekjarinn var stilltur á tuttugu mínútur fyrir sjö. Vaknaði einu sinni um miðja nótt til þess að fara á pisseríið. Sofnaði ekki alveg strax aftur en svaf svo alveg þar til vekjarinn ýtti við mér. Var mætt í vinnu um hálfátta og náði að gera eitt og annað í snurfusi og undirbúningi opnunnar á tæpum hálftíma. Fyrsta hálftímann eftir opnun var nokkur erill og svo róaðist allt og okkur fannst allt stefna í að þetta yrði lélegasti skoðunardagurinn í mánuðinum. En það rættist úr og skoðaðir voru amk fimm fleiri bílar en þann 12 okt sl þegar skoðaðir voru tuttuguogþrír bílar yfir daginn. Kalda pott vinkona mín mætti til mín tíu mínútum fyrir lokun og hún fékk far með mér í sjóinn og eftir ágætis busl tíma skutlaði ég henni heim til sín. Ákvað að gera eins og sl þriðjudag og kom við á Preppbarnum á leiðinni heim og fékk mér litla öskju af sinnepskjúkling á þriðjudagstilboði, 1990 kr. Kom heim um hálfsjö leytið. 

26.10.26

Síðustu dagarnir í október

Næst komandi sunnudag byrjar nýr mánuður, sá næstsíðasti á þessu ári. Tíminn er svo sannarlega ekki að láta bíða eftir sér. Í morgun vaknaði ég einni mínútu áður en vekjarinn átti að ýta við mér. Var mætt á braut 6 í Laugardalslaug tuttugu og tveimur mínútum fyrir sjö og var búin að synda 500 þremur mínútum fyrir sjö. Sat í steinapottinum, að spjall við tvo fastakúnna, í um tuttugu mínútur. Klukkuna vantaði korter í átta þegar ég mætti í vinnu og var Ásgeir alveg ný mættur. Það var ekki alveg eins mikill erill í skoðunum og á föstudaginn var en þó fóru skoðanirnar yfir þrjátíu í heildina. Stimplaði mig út á slaginu hálffimm og var komin vestur í bæ til norsku esperanto vinkonu minnar áður en klukkan varð fimm. Stoppaði hjá henni í uþb klukkustund og við lásum m.a. 4 sögur af sr. Eiríki á Vogsósum, bæði á esperanto og á íslensku. Kom heim fyrir klukkan hálfsjö. Hafði soðna ýsu í matinn. Sauð einnig niðurskorna gulrót og eina sæta kartöflu skorna í bita. Það er nægur afgangur til að búa til plokkfisk í vikunni og þá mun ég líklega skera niður lauk og mýkja áður en ég bæti honum saman við. 

25.10.26

Sunnudagskvöld

Föstudagurinn var óvanalega erilsamur í vinnunni. Ég mætti beint úr sundi, aðeins seinna en oftasta, á sama tíma og annar skoðunarmaðurinn. Stöðvarstjórinn mætti á slaginu átta og það voru þá þegar komnir að tveir kúnnar og svo átti einn bókaðan tíma klukkan átta sem kom tíu mínútum yfir. Milli átta og fjögur voru skoðaðir næstum því fimmtíu bílar. En við gátum hætt og lokað á slaginu fjögur. Ég kom við í Krónunni í Lindum á leiðinni heim, lagði bílnum á efraplanið og labbaði stigaganginn tvær hæðir með sunddótið og þrjá poka. Það var eiginlega af því að lyftan var nýfarin upp og ég nennti ekki að bíða eftir henni. Oddur var á leiðinni í bæinn en ætlaði að gera eitt og annað með bróður sínum áður en hann kæmi í næturgistingu til mín. Hann var ekki kominn um tíu um kvöldið þegar ég fór í háttinn, svo ég læsti ekki dyrunum inn í íbúð. Vissi að Davíð Steinn gæti opnað fyrir hann niðri.

Kom á fætur um hálfníu á laugardeginum og Oddur vakanði skömmu síðar. Ég varð ekkert vör við það þegar hann kom öðru hvor meginn við miðnætti. Fresta þurfti hittingi í spilahóp sem þeir bræður eru í. Í staðinn fékk ég Odd til að koma með mér í smá bíltúr. Leyfði honum að keyra og markmiðið var eiginlega bara að fara og renna bílnum í gegnum þvottastöð. Keyrðum svo smá krókaleiðir til baka aftur. Var með saltfisk og kartöflur í kvöldmatinn.

Í morgun fór ég á fætur rúmlega níu. Þá var Oddur þegar vaknaður. Morguninn fór í prjón, spjall, og ýmislegt fleira. Um tvö sóttum við Davíð Stein og keyrðum hann upp í Engjahverfi í Grafarvogi til að sækja bílinn sinn. Hann var á einhverju staffaskralli í gær og fékk far heim eftir þá skrall. Oddur keyrði Púmuna og fékk svo að skutla sér í Mosó í heimsókn til pabba síns og fjölskyldu hans. Ég var að spá í að heimsækja fólk sem passaði mig og systur mína sumarið sem ég var sex ára. Það fólk býr í Mosfellsbænum. Það svaraði ekki hjá þeim heimasíminn en nokkru eftir að ég kom heim var hringt til baka. Þau voru heima en bæði lögst í slæma pest.

22.10.26

Alveg að koma aftur helgi

Vaknði um hálfsex. Klukkutíma síðar var ég komin á planið við Laugardalslaug. Synti 500m ár braut 5 og staldraði svo við í steinapottinum tæpt korter. Bíllinn var kominn niður í 27% hleðslu og farinn að láta vita að það gæti verið sniðugt að hlaða hann. Ég ákvað samt að lifa "hættulega" og mætti í vinnu rétt rúmlega hálfátta. Okkar stöð átti vinninginn í skoðuðum bílum í dag, þrjátíu og sjö alls. Eftir vinnu lagði ég leið mína í Fiskbúð Fúsa. Hringdi í pabba og spjallaði við hann á meðan ég var á leiðinni þangað. Ákvað að hringja í tvíburahálfsystur mína eftir að ég væri búin að reka erindi mitt í fiskbúðinni. Reyndar hringdi hún, tvíburahálfsystir mín, í mig þegar var í kúnnaröðinni. Ég svaraði en við stöllur sammæltumst um að í myndi hringja í hana þegar ég væri búin að versla mér harðfisk og alls konar í soðið. Ó, já, ég hamstraði aðeins í búðinni, keypti ýsu, saltfisk, fiskibollur, kartöflur og tvær tegundir af harðfisk, óbarða ýsu og lúðu. Hringdi svo til baka í Sonju. Hún átti við mig erindi sem ég tók vel í og varð hún því á undan mér að Núpalindinni. Ég fékk stæði á hleðslustaur, bíllinn var ekki kominn niður fyrir 20%. Um leið og ég hef lokið pistlinum og gengið frá fartölvunni ætla ég út, stoppa hleðsluna, taka úr sambandi og færa bílinn á annað stæði. Hann verður þá komin í eitthvað á milli 84-90%. Sonja færði mér annars baststól sem passar ágætlega á svalirnar hjá mér. Svo fengum við okkur te og þarafrækex með sykurlausri bláberjasultu og spjölluðum um eitt og annað. Hún kvaddi upp úr klukkan sex.

21.10.26

Bleiki dagurinn í dag

Vekjarinn ýtti við mér tíu mínútum fyrir klukkan sex. Var smá stund að átta mig á hvað væri eiginlega að gerast því mig var að dreyma eitthvað. Kveikti á hitanum í bílnum fimm mínútum áður en ég fór út. Varð samt að skafa af ljósum. Mætti í sundið uþb fimm mínútum eftir opnun. Synti 400m á korteri á braut 8 og sat svo annað korter í steina pottinum að spjalla við nokkra fastagesti. Stimplaði mig inn í vinnu korter fyrir átta. Þótt það sé að róast í skoðunum voru skoðaði þrjátíuogeinn bíll í dag. Stimplaði mig út á slaginu hálffimm og fór beinustu leið í Hátúnið í Osteostron. Þar var óvanalega margt um manninn og góð mæting og þótt þeir væru tveir að leiðbeina þurfti ég að bíða í hálftíma. Það var í góðu lagi, mætti korteri fyrir "fasta" tímann minn og hann var aðeins korteri seinna, þ.e. korter yfir fimm. Stóð mig þokkalega í öllum æfingum og slakaði svo vel á á eftir að ég var næstum sofnuð. Var komin heim rétt fyrir klukkan sex. 

20.10.26

Sjórinn 5,5°C

Í gærmorgun dreif ég mig í sund fyrir vinnu þrátt fyrir að svefnin hafi verið svolítið köflóttur. Synti 500m og staldraði svo aðeins við í steina pottinum áður en ég fór upp úr og í vinnuna. Vorum tvö en það var nokkuð rólegt, aðeins tuttuguogsex bílar skoðaðir í heildina. Fór beint heim eftir vinnu og var frekar ánægð með sjálfa mig að halda mér vakandi til klukkan að ganga tíu. Ég var alveg örugglega sofnuð upp úr klukkan hálftíu og svaf nánast í einum dúr þar til vekjaraklukkan ýtti við mér korter fyrir sjö í morgun. Mætti í vinnu upp úr klukkan hálfátta. Vorum þrjú í dag, aðeins fleiri bílar skoðaðir heldur en í gær en mjög rólegt inn á milli. Hitti kalda potts vinkonu mína á planinu við Nauthólsvík um fimm. Fórum tvær ferðir í sjóinn, eina í lónið, tvær ferðir í gufuna og eina í pottinn. Á heimleiðinni kom ég við á Prepp-Barnum við Suðurlandsbraut 10 og tók litla öskju af sinneps-kjúklingablöndu með mér heim. 

18.10.26

Pabbi 92 ára í dag

Suma daga hef ég frá frekar litlu að segja og aðra daga ákveð ég að sleppa því að taka fram tölvuna eða þá að það er svo mikill erill í kringum mig að ég finn ekki hentungan tíma til að setjast niður og punkta eða skrá niður það sem er að gerast. Á fimmtudaginn var mætti ég í sund um leið og opnaði og í vinnu upp úr klukkan hálfátta. Það er heldur farið að róast í skoðunum en þó koma skorpur inn á milli. Í dagslok vék ég frá þeirri reglu minni að bíða eftir klukkunni og stimplaði mig út þremur mínútum áður en klukkan varð hálffimm. Fór beinustu leið heim, skipti um föt, tók til það sem var mitt framlag í kaffinu eftir fund og fór svo beint upp á Kirkjustétt til að undirbúa. Það eru alltaf tveir sem eru í þessu hlutverki og það er skipst á. Það má samt alltaf bjóða fram aðstoð og við þáðum þá aðstoð sem okkur bauðst bæði í undirbúningnum og í fráganginum á eftir.

Á föstudagsmorguninn var ég mætt í sund um leið og opnaði og í vinnu á svipuðum tíma og morguninn áður. Skömmu á eftir mér mætti nýrri skoðunarmaðurinn. Við tvö sáum alfarið um stöðina því stöðvarstjórinn tók sér langa helgi. Hann kíkti þó við einhvern tímann eftir hádegið en það var aðallega til að "skoða" bíl sem hann var kannski að spá í að kaupa. Vorum að ganga frá stuttu fyrir fjögur þegar kom að kona austan undan fjöllunum með bíl í skoðun ca þremur mínútum fyrir fjögur. Við ákváðum að opna kerfin aftur, skrá bílinn inn og hann að skoða. Samt var ég mætt í klippingu tíu mínútum áður en tíminn var. Nema sá sem átti tímann á undan mér var seinn fyrir og mætti rétt á eftir mér svo ég settist ekki í stólinn fyrr en korter fyrir fimm. En það var í góðu lagi því ég ákvað að þyggja kaffi og taka því aðeins rólegra. Þegar ég kom heim ákvað ég að nýta laust pláss á hleðslustaurnum. Hlóð bílinn upp í 100% á tæpum fimm tímum.

Í gærmorgun var ég komin á fætur upp úr klukkan átta. Notaði morguninn í alls konar meðal annars verkefni sem ekki skal skrifa um. Um hádegisbilið lagði ég af stað austur. Hringdi í strákana mína og spjallaði við þá hluta af leiðinni, fyrst Davíð Stein sem svaraði ekki en þá Odd og um það leyti sem við vorum að hætta að tala saman hringdi Davíð Steinn til baka. 23 m á sek mældust kviðurnar í Þrengslunum, rok og rigning. Hringdi í Huldu þegar ég var komin yfir fjallið og fékk það staðfest að teppið er búið að skila sér. Rétt austan við Selfoss tók í puttaferðaling upp, íslenskan tæplega 15 ára pilt sem var með gítar meðferðis. Hann reyndist vera á leiðinni á Hellu þar sem hann hefur búið með fjölskyldu sinni sl. 4 ár. Hann er alíslenskur en fæddist og ólst upp í Austurríki fyrstu tæpu tíu ár ævi sinnar. Það var mjög gaman að spjalla við þennan pilt, kurteis, opinn og áhugasamur. Skutlaði honum heim að dyrum upp í hæð og komst svo að því seinna um daginn að föðuramma hans og ég erum þremenningar. Ég var komin í Hólavanginn um hálftvö. Pabbi, Bríet og Itsell voru öll heima. Hálftíma eftir að ég mætti komu Jóna Mæja og Reynir. Þau voru að koma úr bústaðnum og ákváðu að kíkja við á pabba, daginn fyrir afmælið. Hann skellti í vöfflur og það vildi svo til að ég var með mér ostaköku, osta, frækex og vínber. Bríet spurði reyndar hvort hún mætti ekki bjóða fram vínber sem hún átti til, sem var í góðu lagi. Átttum mjög góða stund, öll sex, við kaffiborðið. Jóna og Bríet voru duglegar að þýða bæði fyrir Itsell og pabba. Itsell skilur orðið helling í íslensku en það er kannski erfiðara þegar talað er of hratt.

Bríet fann upphlutinn minn í gær og mátaði hann, skildi ekkert í sér afhverju hún vildi ekki að mamma hennar klæddist honum í fermingaveislunni á sínum tíma og langar helst að fá að klæðast honum þegar bumbulína verður skírð. Ég eldaði fisk í kvöldmatinn og Bríet gerði mjög gott sallat með.

14.10.26

Miðvika og mánuðurinn að verða hálfnaður

Svefninn var það köflóttur í nótt að ég ákvað að sleppa morgunsundinu og kúra frekar lengur. Var þó mætt í vinnu um hálfátta. Morguinn var frekar rólegur á köflum en það var meira að gera eftir hádegi og í heildina voru skoðaðir þrjátíuogsjöbílar. Ég fór í osteostrong beint eftir vinnu og svo beinustu leið heim. Annars frekar lítið að frétta en eru ekki engar fréttir yfirleitt góðar fréttir?

13.10.26

Sjósundsdagur

Vekjarinn var stilltur á 6:45 en ég var vöknuð fyrir klukkan hálfsex. Var komin í vinnu um hálfátta, mistókst samt að stimpla mig inn, kláraði ekki seinna skrefið fyrr en rétt fyrir átta. Þá var ég búin að hella upp á, snurfusa afgreiðslurýmið og opna helstu afgreiðslukerfi. Vorum annars öll þrjú mætt í dag. Aðeins voru bókaði tveir bílar í skoðun en í heildina voru skoðaðir þrjátíuogsjö bílar og vorum við í þriðja sæti af frumherjastöðvunum. Eftir vinnu fór ég beinustu leið í Nauthólsvík. Hitti kaldapotts vinkonu mína á planinu. Við fórum tvivar í 7,2°C sjóinn, tvivar í gufu, einu sinni í lónið og einu sinni saman í pottinn en hún fór tvær. Þegar ég var komin upp úr og var að labba að bílnum sá ég að ég hafði misst af tveimur símtölum og þau voru bæði frá vinkonum sem hringja afar sjaldan í mig. Ég hringdi til baka í báðar, spjallaði við aðra á leiðinni úr Nauthólsvík að Hagkaup í Skeifunni og hina þegar ég var á leiðinni heim. Spjallaði í góða stund eftir að ég var búin að leggja á neðra planinu. Þegar samtalið var búið var farið að rigna og ég ákvað að færa bílinn upp á efra plan enda með tvo auka poka, ekki þunga þó, meðferðis. Steingleymdi alveg að ég ætlaði að horfa á seinni hálfleikinn í landsleiknum í knattspyrnu kvenna. Hann fór fimm núll fyrir stelpunum okkar, samtals 9-0 ef fyrri leikurinn er talinn með.

12.10.26

Ný vinnuvika hafin

Rumskaði um fimm leytið í morgun, aðeins of snemma. Ekki virkaði að kúra sig niður aftur svo ég var komin á fætur um hálfsex og í sund klukkutíma eftir það. Stimplaði mig inn í vinnu tuttugu mínútum fyrir átta. Hellti upp á og undirbjó nokkurra daga uppgjör í að vera lagt inn í bankann. Stöðvarstjórinn mætti rétt fyrir átta og lagði bílnum sínum á hina brautina þar sem hinn skoðunarmaðurinn var forfallaður. Stöðvarstjórinn merkti hádegis-lokun í noona kerfinu, milli tólf og hálfeitt. Hann fór í Bónus í hádeginu en ég skrapp og póstlagði barnateppið til Huldu. Í heildina voru annars skoðaðir tuttuguogþrír bílar en það var svolítið um annars konar eril inn á milli. Stimplaði mig út á slaginu hálffimm og fór beinustu leið vestur í bæ til norsku esperanto vinkonu minnar. Lásum nokkrar sögur af sr. Eiríki í Vogsósum, bæði á esperanto og á íslensku úr fyrsta bindi af Þjóðsögum Jóns Árnasonar. Stoppið hjá Inger varði í um klukkustund. Á heimleiðinni kom ég við í Krónunni í Lindum.

11.10.26

Sunnudagskvöld

Föstudagurinn var nokkuð hefðbundinn. Fór í sund um hálfsjö og var mætt í vinnu rúmum klukkutíma síðar. Fyrsti bíll var bókaður strax klukkan átta. Morgun var þó frekar rólegur og þar sem enginn bíll var bókaður í hádeginu ákváðum við að loka. Meira var að gera milli hálfeitt og fjögur. Skoðaðir bílar fóru eitthvað yfir þrjátíu. Eftir vinnu fór ég beint heim og stakk bílnum í samband og hlóð hann upp í 100%.

Í gærmorgun var ég komin á fætur milli klukkan átta og níu, vöknuð aðeins fyrr þó. Morguninn fór í alls konar dútl. Um hádegið lagði ég af stað austur og var komin á Hellu til pabba stuttu fyrir klukkan tvö. Hann var einn heima. Bríet var í bænum, á landbúnaðarsýningunni, þar sem hún fékk fyrstu verðlaun í sælkeraflokki fyrir grafin hjörtu. Frétti þetta í gegnum Davíð Stein. Pabbi ákvað að skella í vöfflur og ég ákvað að með þeim yrði ég að fá kaffi og hellti upp á 2-3 bolla. Mæli með vöfflum með rabbabarasultu ala pabbi og hreinu skyri. Kvaddi pabba upp úr klukkan fimm og var komin heim um hálfsjö. Setti bílinn aftur í samband og hlóð hann upp í næstum 99%. Var að taka hann úr hleðslu upp úr klukkan ellefu.

Í morgun svaf ég til klukkan verða níu. Fór lítið út nema í klukkutíma göngu milli tvö og þrjú. Annars var ég m.a. að prjóna eitthvað sem ég fitjaði upp á í gær og á að verða að trefli.

8.10.26

Árlegt tanneftirlit í dag

Í gærmorgun vaknaði ég fyrir allar aldir, löngu á undan vekjaranum. Held að klukkan hafi ekki verið orðin fimm. Sofnaði ekki aftur en kláraði að lesa eina bók sem ég var langt komin með. Var komin á planið við Laugardalslaug rétt um það leyti sem opnaði og á braut 5 tíu mínútum síðar. Vinnudagurinn byrjaði nokkuð rólega en eins og stundum áður var meiri erill eftir hádegi og í heildina voru skoðaðir hátt í fjörutíu bílar. Stimplaði mig út rétt rúmlega hálffimm og fór beint í osteostrong tíma. Var komin heim korter fyrir sex en fór reyndar ekki beint inn þar sem ég var að spjalla við eina fyrrum samstarfskonu mína. Eftir að ég kom inn fór ég ekki út aftur. Fór snemma í háttinn eða upp úr klukkan níu, las samt í nokkrar mínútur en ég er viss um að ég var sofnuð löngu fyrir klukkan tíu.

Ég svaf í einum dúr til klukkan að verða hálfsex. Rúmri klukkustund síðar var ég komin á braut 7. Gleymdi mér svo næstum því í steinapottinum því ég var að spjalla við þrjá aðra fastagesti. Stimplaði mig inn tuttugu mínútum fyrir átta og var bara örfáum mínútum á undan nýrri skoðunarmanninum. Núna er hægt að bóka tíma í skoðun, 3 bíla á klst. milli klukkan átta og hálffimm en þar sem enginn var bókaður akkúrat í hádeginu og stöðvarstjórinn skrapp heim til sín í mat sagði hann að við mættum læsa milli tólf og hálfeitt ef við vildum. Ég fékk svo að skreppa frá í tæpa klukkustund til að fara í árlegt tanneftirlit. Borgaði rúmlega þrjátíuþúsund fyrir tvær myndir, tannsteinshreinsun, skoðun og tuttugu mínútur í stólnum. Var mætt í vinnu aftur tuttugu mínútum fyrir fjögur. Í heildina voru skoðaðir þrjátíuogfjórir bílar í dag. Stimplaði mig út á slaginu hálffimm og fór beinustu leið heim. 

6.10.26

Tvíburahálfsysturhittingur í kvöld

Vekjarinn var stilltur á korter í sjö í morgun. Ég rumskaði aðeins um hálfsex en sofnaði strax aftur og svaf í klukkustund í viðbót. Setti hitakerfi bílsins í gang fimm mínútum áður en ég fór út en þurfti samt að skafa aðeins af fram- og afturljósum og einnig móðu af hliðarrúðum. Mætti í vinnu rétt rúmlega hálfátta. Tveir komu í skoðun upp úr klukkan átta en svo virtist dagurinn ætla að verða nokkuð rólegur. Man ekki hvað innan við tuttugu bílar voru skoðaðir fyrir hádegi. Erillinn jókst eftir hádegi og í heildina voru skoðaðir þrjátíuogsjö bílar í dag. Stimplaði mig út á slaginu hálffimm og lagði af stað beinustu leið í Nauthólsvík. Var um tuttugu mínútur á leiðinni. Maulaði kalda lifrapyslusneið og smá harðfisk á leiðinni en hringdi líka og spjallaði við pabba. Kaldapotts vinkona mín var mætt rétt á undan mér og gat þó aðeins setið um stund í heita pottinum áður en ég kom út, tilbúin að fara beinustu leið í sjóinn. Vorum frekar stutt út í fyrri ferðina í 7,4°C sjónum. En eftir rúmar tíu mínútur í gufunni fórum við aftur beint í sjóinn, hún í nokkrar mínútur en ég synti út að kaðli og kom einnig við í lóninu áður en ég hitti hana aftur í heitapottinum. Kom heim um hálfsjö. Stoppaði við í rúmlega einn og hálfan tíma en fór svo yfir til tvíburahálfsystur minnar. Ég var hjá henni seinni partinn á sunnudaginn var og þá tók hún að sér að þvo, teygja og leggja til barnateppið og í kvöld var ég að sækja það til hennar. Vá, hvað teppið er orðið enn fallegra. Og nú á ég bara eftir að senda það norður til systurdóttur minnar. Stoppaði hjá Sonju til klukkan langt gengin í tíu. Alltaf höfum við um nóg að spjalla og ef líkamsklukkan mín væri ekki orðin svona innstillt á að "komasérírúmið um og helst fyrir tíu" á virkum dögum þá hefði ég líklega stoppað mun lengur.

5.10.26

Tíminn æðir áfram

Fyrri parturinn af laugardeginum fór í alls konar "dúllerí", bæði þarft og óþarft. Stuttu fyrir klukkan þrjú var ég búin að pakka niður í tösku. Fyrst lá leiðin á einn stað í Hafnarfirði. Þar býr einn fyrrum kórfélagi minn, flutti þangað fyrr á árinu, og hann var búinn að bjóða okkur "gamla genginu" í heimsókn. Mættum fimm til hans. Ég stoppaði í tæpan einn og hálfan tíma áður en ég hélt för minni áfram. Leiðin lá út úr bænum, yfir Þrengslin og á "Hótel Svörtu Sanda", nýr staður rétt við Hafið Bláa og Óseyrarbrú. Var komin upp úr klukkan fimm, bókaði mig inn, skipti um föt á hótelherberginu og fór svo aftur fram í lobbý þar sem vinnufélagar og maka voru að safnast saman. Um hálfsjö var farið yfir á Hafið Bláa. Þangað kom svo bíll frá Grillvagninum sem sá um matinn fyrir árshátíðina. Um hálftólf var farið aftur yfir á hótelið. Hópurinn var aðeins farinn að þynnast. Ég ákvað að draga mig í hlé en ég veit að einhverjir héldu lengur út, eitthvað fram í nóttina.

Á sunnudagsmorgninum fór ég í sturtu upp úr klukkan átta og var mætt í morgunmat um níu. Bókaði mig út af hótelinu um tíu leytið. Um klukkutíma síðar var ég búin að hlaða bílinn upp í 90% á olísstöðinni vestan við Ölfusá á Selfossi. Frændfólk mitt í Löngumýrinni átti von á mér í heimsókn og ég stoppaði hjá þeim í næstum tvo tíma áður en ég dreif mig í bæinn. Renndi bílnum í gegnum þvottastöðina Löður uppi á Hálsum áður en ég fór heim.

Í morgun var ég vöknuð korteri áður en vekjarinn átti að ýta við mér. Bjó mér til hafragraut og var mætt í sund um það leyti sem opnaði. Stimplaði mig inn í vinnu upp úr klukkan hálfátta. Stöðvarstjórinn mætti rétt fyrir átta. Erillinn byrjaði strax klukkan átta. Hinn skoðunarmaðurinn þurfti að sinna tveimur erindinum áður en hann mætti í vinnuna um níu leytið. Í heildina voru skoðaðir fjörutíu og þrír bílar í dag og vorum við fyrst af Frumherja stöðunum að fara yfir fjörutíu skoðaða bíla. Held samt að Akureyri hafi náð að jafna okkur. Stimplaði mig út á slaginu hálffimm og fór beinustu leið vestur í bæ í esperanto hitting til norsku vinkonu minnar. Klukkan var orðin hálfsjö þegar ég kom heim. Var því að heiman í rúma tólf tíma. 

2.10.26

Október er hafinn

Gærdagurinn var í lengri kantinum. Var vöknuð áður en vekjarinn átti að ýta við mér og mætt í sund klukkan hálfsjö. Þar hitti ég kaldapotts vinkonu mína, í steinapottinum, þegar ég var búin að synda. Aðeins rólegra var í vinnunni en þó skoðaðir hátt í fjörutíu bílar og einhvað um önnur afgreiðsluverkefni. Stimplaði mig út á slaginu hálffimm og fór beint heim. Stoppaði þó ekki heimavið nema í uþb klukkustund. Var mætt upp á Kirkjuteig upp úr klukkan sex og ekki komin heim aftur fyrr en um hálfellefu. Þá háttaði ég mig beint upp í rúm en að sjálfsögðu þurfti ég að grípa aðeins í bók. Er ekki viss hvað ég las lengi en ég var nú örugglega alveg sofnuð fyrir miðnætti.

Það kom mér verulega á óvart að ég vaknaði amk tíu mínútum áður en vekjarinn átti að hringja. Dreif mig á fætur og var mætt á planið við Laugardalslaug áður en klukkan var orðin hálfsjö. Vinnudagurinn var svipaður og í gær, nema hálftíma styttri því við hættum alltaf klukkan fjögur á föstudögum. Ég fór á bókasafnið í Kringlunni eftir vinnu og skilaði nokkrum bókum, þrjár bækur voru eftir heima og ég tók með mér þrjár bækur; Sara og Dagný og ég eftir Ísak Regal, Snjór í paradís eftir Ólaf Jóhann Ólafsson og Irpa eftir Hildi Knútsdóttur. Allt bækur með 30 daga skilafresti. Á leiðinni á safnið tók ég aðeins stöðuna á pabba en það helltist í hann kvef fyrr í vikunni. Hann fór ekki í sund í gær og í dag en segist vera að jafna sig og stefnir á að mæta í sund eftir helgi. Af safninu lá leiðin í N1 í Borgartúni og meðan ég var á leiðinni þangað hringdi ég í Odd og spjallaði við hann. Davíð Steinn var fáanlegur til að vinna fyrir mig smá viðvik. Hann skutlaði bílnum sínum heim til sín eftir vinnu, sótti verkfæratöskuna sína og varð samferða mér heim til mín til að merkja fyrir mig póstkassann minn. Ég var búin að skrifa nafnið mitt í wordskjal í vinnunni minn fyrir nokkrum dögum, prenta út og klippa niður  passlega stóran miða. Það þurfti lítið stjörnuskrúfjárn til að losa og fjarlægja hinn miðann undan smá plast eða glerplötu, setja miðann minn í staðinn og festa aftur. Handskrifaði miðinn sem var límdur á boxið í nóvember var fjarlægður. Eftir þetta viðvik skutlaði ég syninum í Krónuna í Lindum. Þegar hann var búinn að versla bauð ég honum að borða með mér á Saffran áður en ég skutlaði honum heim. Ég var komin heim stuttu fyrir klukkan átta. Tengdi þá bílinn við hleðslustaur og er að hugsa um að hafa hann þar til klukkan ellefu. Verð því að halda mér vakandi aðeins lengur í kvöld. 

 

30.9.26

September alveg að klárast og sjónvarpið 60 ára í dag

Ég var vöknuð upp úr klukkan fimm og fór á fætur um hálfsex. Hafði því tíma til að lesa smávegis líkt og í gærmorgun. Var mætt á braut 6 í Laugardalslauginni tuttugu mínútum fyrir sjö og stimplaði mig inn í vinnu rétt rúmlega hálfátta. Stöðvarstjórinn var ekki mættur þegar ég þurfti að skreppa frá rétt rúmlega átta, átti tíma hjá augnlækni. Varð að skilja þann nýja eftir í djúpu lauginni við bæði að afgreiða og skoða. Átti samt ekki von á öðru en að hann yrði ekki lengi einn. Ég labbaði yfir í Sjónlag og var mætt þremur mínútum fyrir tímann. Var þó ekki kölluð alveg strax inn en þegar kallið kom þá var það ekki augnlæknirinn sjálfur heldur önnur kona sem gerði ýmsar mælinga, spurði mig út úr, "blés" í augun og setti í þau dropa. Síðan sagði hún mér að setjast aftur á biðstofuna. Tíu mínútum seinna var ég sótt í myndatöku. Það var ekki fyrr en smástund eftir að myndatöku lauk að augnlæknirinn kallaði mig inn til sín. Hún gerði sínar skoðanir og sagði mér líka að fæðingabletturinn hefði ekkert breyst. Í raun þyrfti ég ekki að koma aftur í skoðun fyrr en eftir þrjú ár nema ég fyndi einhverjar breytingar. Hún bókar reyndar ekki þrjú ár fram í tímann. Ég benti henni á að ég væri mikið að vinna fyrir framan skjá og það væri bara fínt að fá augntékk aftur eftir tvö ár. Hún samþykkti það og bókaði mig 18. okt. 2028. Ég mætti aftur í vinnu um níu. Þá var stöðvarstjórinn nýlega mættur og nóg að gera. Alls voru skoðaðir sjötíuogfimm bílar í dag, vorum næsthæst af Frumherjastöðvunum á eftir Akureyri. Strákarnir voru að skoða síðustu tvo bílana þegar ég stimplaði mig út á slaginu hálffimm, kvaddi og fór beint í osteostrongtíma. Eftir tímann kom ég við í hraðbanka og svo stoppaði ég í Krónunni í Lindum áður en ég fór heim. Lagði þar af leiðandi á efra planinu. 

29.9.26

Slagveður á köflum

Vaknaði upp úr klukkan sex, rúmum hálftíma áður en vekjarinn átti að ýta við mér. Það gaf mér smá stund til að lesa áður en ég lagði af stað í vinnuna, þ.e. eftir að ég hafði sinnt morgunverkunum. Tók sjósundsdótið með mér. Stimplaði mig inn í vinnu á slaginu hálfátta. Stöðvarstjórinn var búinn að láta okkur vita að hann kæmi ekki í vinnu fyrstu tímana, kom reyndar aðeins við á tíunda tímanum og fékk þá m.a. innkaupalista. Hann mætti svo klyfjaður um hálftólf. Þá var hinn skoðunarmaðurinn búinn að skoða um sautján bíla og það var smá röð. Rétt rúmlega tuttugu bílar voru skoðaðir fyrir hádegi en eftir hádegispásu hélt "veislan" áfram og í heildina voru skoðaðir fimmtíuogfimm bílar í dag, mjög margir með 7 sem endastaf í númeri. Ég stimplaði mig út á slaginu hálffimm. Hringdi og spjallaði við pabba á meðan ég keyrði áleiðs í Nauthólsvík. Umferðin mikil og frekar hæg en ég fór fyrri ferðina í 9°C sjóinn rúmlega fimm. Kom heim um hálfsjö leytið. Borðaði helminginn af afgangum frá kvöldmatnum í gær, horfði á kafla úr landsleiknum í knattspyrnu karla en var aðallega að horfa á tvo þætti um lögreglumanninn Alex Ridley, sem er eiginlega sestur í helgan stein en er beðinn um að sinna ráðgjafahlutverki í málum sem koma upp. Hvert mál spannar tvo þætti en svo er rauður þráður í gegnum alla seríuna. Á aðeins eftir að horfa á síðustu tvo þættina af átta. 

28.9.26

Ný vinnuvika hafin

Vekjarinn ýtti við mér tíu mínútum fyrir klukkan sex í morgun. Um hálfsjö var ég mætt á planið við Laugardalslaug og um sjö var ég búin að synda 500m á um það bil tuttugu mínútum. Stimplaði mig inn í vinnu tuttuguogfjórum mínútum fyrir átta. Morguninn var þokkalega rólegur en þó voru skoðaðir átján bílar. Stöðvarstjórinn skrapp frá um tólf leytið til að leysa af á annarri stöð. Hann var sem betur fer kominn aftur um tvö því það var mikil traffík eftir hádegi, amk fyrir einn mann. Í heildina voru skráðir inn fjörutíuogátta bílar í dag en tvo af þeim verður að handskrá inn og skoða á morgun. Það var alveg í lagi að geyma þá því þeir voru skildir eftir með þeim skilaboðum að þeir yrðu sóttir milli níu og tíu í fyrramálið. Eftir vinnu fór ég beinustu leið vestur í bæ til norsku esperanto vinkonu minnar. Stoppaði hjá henni í rúman klukkutíma. Við lásum hluta af þjóðsögu á esperanto í þýðingu Þórbergs heitins Þórðarsonar. Var komin heim upp úr klukkan hálfsjö. Setti upp fiskibollur í einn pott og sæta kartöflu í bitum í annan pott. Eldaði það mikið að ég á afgang í tvö skipti sem er þægilegt. 

27.9.26

Aðeins um föstudaginn og helgina

Fór að heiman korter yfir sex á föstudagsmorguninn og var byrjuð að synda á braut 7 í Laugardalslauginni tuttugu mínútum fyrir sjö. Að þessu sinni synti ég aðeins 400m og var því komin í steinapottinn áður en klukkan var orðin sjö. Stimplaði mig inn í vinnu rúmum þrjátíuogfimm mínútum síðar. Alls voru skoðaðir fjörutíu bílar milli klukkan átta og fjögur. Inn á milli var samt rólegt og við lokuðum að venju í hálftíma í hádeginu.

Var ekki alveg búin að "teikna" upp laugardaginn þegar ég fór á fætur um hálfátta. Vissi að ég þyrfti aðeins að sinna því sem ekki má skrifa um og um níu leytið ákvað ég að fara út og setja bílinn í hleðslu þrátt fyrir að vera í rúmlega 60%. Um eitt fór ég aftur út, tók bílinn úr sambandi og færði hann á annað stæði. Ákvað svo að fá mér göngutúr upp í Seljahverfi og athuga hvort ég fyndi eina frænku mína og jafnöldru heima. Svo reyndist ekki vera en ég hitti aðeins á manninn hennar sem var að sinna bílaþvotti úti á plani. Ég skilaði kveðju til frænku minnar og labbaði nokkurn veginn sömu leið til baka heim. Veðrið var mjög þokkalegt og ef ég hefði ekki verið farinn að finna til óþæginda í einni tánni á vinstra fæti hefði ég líklega tekið lengri göngu. Svo virðist sem það hafi verið smá sandkort eða aðskotahlutu í sokknum sem lenti á milli tveggja táa og nuddaði og meiddi.

Í morgun fór ég á fætur upp úr klukkan átta. Nuddið var enn að trufla og meiða og það endaði með því að ég setti plástur á þá tá sem ég fann mest fyrir, en þó ekki fyrr en um hádegisbilið. Þá var ég búin að fá skilaboð frá frænku minni um að hún hefði fengið kveðjuna frá mér í gær og að hún væri heima í dag. Upp úr klukkan eitt dreif ég mig því aftur í göngutúr yfir til Reykjavíkur og var um tuttuguogfimm mínútur á leiðinni til frænku minnar. Veðrið var yndislegt. Heimsóknin stóð yfir í hátt í tvo tíma og svo labbaði ég aðeins aðra leið heim.

Annars er ég búin að lesa báðar bækurnar sem urðu eftir heima í síðustu bókasafnsferð, aðra skammtímalánsbókina og ljóðabókina. Ég var líka að grufla og ráða í vísbendingakrossgátur með Ellu vinkonu. Hún mun flinkari við að finna réttu svörin en ég næ svona einu og einu inn á milli og finnst stundum ég vera að verða betri í þessu.

24.9.26

Síðasti fimmtudagurinn í september

Ég var líklega sofnuð um tíu leytið í gærkvöldi og svaf alveg til klukkan að verða hálfsex í morgun. Var semsagt vöknuð tæplega hálftíma áður en vekjarinn átti að ýta við mér. Var komin á planið við Laugardalslaug fimm mínútum áður en opnaði. Korteri síðar var ég byrjuð að synda á braut 7. Synti í uþb tuttugu mínútur, 500m, og hitti svo kalda potts vinkonu mína í steina pottinum. Stimplaði mig inn í vinnu rúmlega hálfátta. Það var rólegt framan af og inn á milli, samt voru skoðaðir þrjátíuogfimm bílar í heildina í dag. Eftir vinnu kom ég við í Fiskbúð Fúsa og keypti mér fisk í soðið og harðfisk. Ákvað að kíkja við í Drápuhlíðinni. Einn fyrrum nágranni minn var lasinn en ég hitti á manninn sem keypti af mér 50% af gömlu íbúðinni þegar ég var um það bil að labba í burtu. Ég spurði hann hvort ég mætti kíkja við í smá stund og skoða mig um og það var auðsótt mál. Konan hans, og reyndar stelpurnar og ein vinkona voru heima. Hjónin sýndu mér hvað væri búið að gera og það er ekkert smá kósý hjá þeim. Það er m.a. búið að hækka svalirnar, færa rafmagnstöfluna úr holinu yfir í það sem var búr en er nú líka einhvers konar bókaskápur og fleira og fleira. Stoppaði aðeins í tíu mínútur en þakkaði mikið vel fyrir að fá að skoða mig aðeins um. Gleymdi alveg að taka myndir.

23.9.26

Osteostrong

Yfirleitt sef ég extra vel eftir að hafa skroppið og kælt mig í sjónum. Er ekki viss klukkan hvað ég lagði frá mér bókina í gærkvöldi og fór að sofa. Líklega þó fyrir klukkan hálfellefu. Var fljót að sofna en svo rumskaði ég um eitt leytið og þurfti á pisseríð. Gat ekki með nokkru móti sofnað strax aftur og tel ég það vera vegna þess að ég var forvitin að vita hvernig sagan um Galdra-Imbu endaði. Ég lét það eftir mér að klára að lesa bókina áður en ég gat svo farið að sofa aftur. Þegar vekjarinn hringdi tíu mínútum fyrir klukkan sex fann ég að ég var alls ekki tilbúin að fara á fætur svo ég endurstillti vekjarann og steinsofnaði aftur. Var mætt í vinnu rétt rúmlega hálfátta. Morguninn var í rólegri kantinum, mesta ösin var frá því strax eftir hádegi og til klukkan rúmlega þrjú. Í heildina voru skoðaðir þrjátíuogsex bílar í dag. Ég var með sunddótið meðferðis og var að spá í að skreppa í Árbæjarlaugina eftir vinnu. Held þó að ég hefði endað heima ef ég hefði ekki munað eftir því að ég átti tíma í osteostrong klukkan fimm. Var komin í Hátúnið tíu mínútum fyrir tímann þótt ég færi "lengri" leiðina þangað. Komst strax að. Sló met á einu tæki. Eftir tímann var ég orðin alveg frábitin því að skella mér í sund og fór því beinustu leið heim. 

22.9.26

Nauthólsvík eftir vinnu

Klukkan var varla orðin níu þegar ég háttaði upp í rúm í gærkvöldi. Held samt að ég hafi náð að lesa í uþb hálftíma áður en ég lagði frá mér tvær bækur, slökkti ljósin og sofnaði mjög hratt. Vekjarinn var stilltur á sex-fjörutíuogfimm en ég var vöknuð amk hálftíma fyrr. Gaf mér mjög góðan tíma í morgunverkin og las líka í um tíu mínútur áður en ég fór beint í vinnuna. Stimplaði mig inn um hálfátta. Erill var í skoðunum fyrsta klukkutímann, milli átta og níu en í heildina voru skoðaðir þrjátíuogfjórir bílar í dag. Strax eftir vinnu fór ég í Nauthólsvík. Sjórinn sagður 9,6°C, háflóð en var að byrja að fjara út og ég fór tvisvar sinnum fimm mínútur út í, korter í gufuna á milli ferða og annað korter í heita pottinum eftir seinni ferðina áður en ég fór upp úr og heim. Nú er búið að setja upp nafna skiltin í anddyrinu og einnig búið að setja upp skilti með mínu nafni hægra meginn við dyrnar inn í íbúðina mína. Þá þarf ég endilega að fara að drífa í því að laga merkinguna á póstkassanum mínum. 

21.9.26

Esperanto hittingur eftir vinnu í dag

Ég ætla að byrja á því að leiðrétta það sem ég skrifaði um fjölda skoðaðra bíla á föstudaginn. Það voru skoðaðir akkúrat þrjátíu bílar þannig að fjöldinn var meiri en "innan við þrjátíu". Annars vaknaði ég heldur snemma í morgun, fyrir klukkan fimm. Fór á pisseríið og fékk mér svo sopa af lýsi en ég náði ekki að kúra mig niður aftur svo ég greip í bók og las þar til rétt áður en vekjarinn átti að ýta við mér. Fékk mér chiagraut með bláberjum í morgunmat og sneið af lifrarpylsu með. Mætti í Laugardalslaugina um leið og opnaði og synti 500m á braut 7. Slakaði á í steinapottinum í rúmar tíu mínútur og spjallaði við nokkra fastagesti. Stimplaði mig inn í vinnu rétt rúmlega hálfátta. Sex áttu bókaða tíma á tímabilinu frá átta fjörutíu og ellefu og tveir eftir hádegi. Einn sem átti bókaðan tíma um níu tuttugu skrópaði, "villtist" yfir í Aðalskoðun eða eitthvað. Í heildina voru skoðaðir þrjátíuogtveir bílar, þar af þrír sem fóru í gegnum skráningaskoðun og einn einungis í breytingaskoðun. Stimplaði mig út á slaginu hálffimm. Var hálftíma úr Skeifunni yfir á Sólvallagötuna. Þar ákvað ég að leggja bílnum við annan hleðslustaurinn og stinga bílnum í samband þótt hann væri í 78%. Á tæpum einum og hálfumtíma fór bíllinn upp í 94%. Var komin heim skömmu fyrir klukkan sjö. 

20.9.26

Fartölvan ekki verið tekin fram síðan á fimmtudagskvöldið

Var mætt í sund um hálfsjö á föstudagsmorguninn og í vinnu upp úr klukkan hálfátta. Skoðaðir bílar yfir daginn náðu ekki þrjátíu en þeir voru heldur ekki tveir allan tímann því annar skoðunarmaðurinn hætti um hálfþrjú leytið. Vinnudagurinn leið alveg þokkalega hratt, rólegt, en inn á milli alls konar verkefni. Klukkan var byrjuð að ganga fimm þegar ég stimplaði mig út. Hringdi í eina fyrrum samstarfskonu mína þegar ég var sest upp í bíl og úr varð að ég fór beinustu leið í heimsókn til hennar vestur í bæ. Stoppaði hjá henni í næstum tvo tíma enda höfðum við um margt að spjalla. Laust var á staur þegar ég kom heim svo ég stakk bílnum í samband og hlóð hann upp í 85% á uþb fjórum tímum.

Ekkert varð úr esperanto-hitting á laugardagsmorguninn. En ég var komin snemma á fætur og dútlaði mér við alls konar fram yfir hádegi. Um tvö fékk ég mér göngutúr yfir í Belladonna þar sem ég mátaði nokkrar buxur og keypti mér tvennar fyrir rúmlega fjörutíuþúsund. Labbaði beinustu leið heim aftur. Var í og með að fylgjast með bakgarðshlaupinu, lesa, sauma bleikar kindur í barnateppið og fleira. Tíminn leið alla vega frekar hratt.

Rumskaði alltof snemma eða upp úr klukkan fimm í morgun. Fór á pisseríið og svo fékk ég mér sopa af þorskalýsi og þrjá vatnssopa áður en ég reyndi að kúra mig niður aftur. Það virtist ekki ætla að virka framan af en þó steinsofnaði ég að lokum og ætlaði varla að trúa því að klukkan væri byrjuð að ganga tólf þegar ég vaknaði aftur. Upp úr klukkan tvö tók ég saman bækur af safninu, fjórar af sex, og dreif mig í bókasafnið í Kringlunni. Meiningin var að skila bókunum og helst ekki taka neina eða ekki fleiri en tvær í staðinn. En ég stóðst ekki freistinguna og tók sex bækur, þar af tvær skammtímalánsbækur; Þegar heimurinn fórst eftir Stefán Mána, Galdra-Imba eftir Söndru Bergljótu Calusen, Þagnafár ljóð eftir Garibaldi, Bókafárið mikla eftir Tom Sharpe, Ísbirnirnir eftir Sólveigu Pálsdóttur og Arsenik turninn eftir Anne B. Ragde. Var næstum búin að hætta við þá síðustu því mér tóks ekki að nota sjálfsafgreiðsluna og fór með hana að afgreiðsluborðinu og ætlaði að skilja hana eftir þar. En sá sem tók við bókinni vann einu sinni með mér í RB og hann sá til þess að hún bættist í pokann hjá mér. Áður en ég fór heim aftur kom ég við í Krónunni í Lindum. Lagði bílnum á planinu við anddyrið inn í blokk og fór inn með vörur og bækur. Fékk mér hressingu og kveikti smá stund á sjónvarpinu, bakgarðshlaupinu á rás 8. Um hálfsex fór ég út og færði bílinn á stæði á neðra planinu og fór svo í tæplega hálftíma göngutúr áður en ég fór inn aftur. 

17.9.26

Styttist í helgina

Ég var byrjuð að losa svefninn og rumska nokkrum mínútum áður en vekjarinn fór að hamast rétt rúmlega hálfsex í morgun. Í gærkvöldi hafði ég skellt tröllahöfrum, smá haframjöli, chiafræum og salti í skaftpott og bætti 6dl af vatni í til að láta liggja í bleyti inni í ísskáp yfir nóttina. Var enga stund að búa til hafragraut úr þessu eftir að ég kom á fætur. Oddur Smári kom sér á fætur þegar grauturinn var tilbúinn og með þessu fengum við okkur kalda lifrapylsusneið. Ég knúsaði soninn og kvaddi korter yfir sex og var mætt í Laugardalslaugina um það leyti sem var verið að opna. Synti 500m og gleymdi mér svo næstum því á spjalli í steinapottinum. Stimplaði mig inn í vinnu tuttuguogeitthvað mínútum fyrir átta. Rólegt var til að byrja með, einn og einn kúnni og um hálftíu ákvað stöðvarstjórinn að nota tækifærið og fara að láta smíða lykla handa nýjasta skoðunarmanninum. Eftir að hann fór varð renneríið meira og sá nýji stoppaði ekki í einn og hálfan tíma. Í heildina voru skoðaðir þrjátíuogátta bílar í dag. Fór beint heim eftir vinnu. Hringdi í pabba og spjallaði við hann hluta af leiðinni. Stoppaði heima í uþb klukkustund og þegar ég fór út aftur var ég búin að dressa mig upp og tilbúin á fund. 

16.9.26

Miðvikudagur kominn að kveldi og stutt í háttatíma

Rumskaði eldsnemma, amk tveimur og hálfum tíma áður en ég ætlaði að vakan og fara á fætur. Fór á pisseríið og svo leið góð stund, eftir að ég skreið aftur upp í rúm, áður en ég sofnaði aftur. Það gerðist þó á endanum og næst vissi ég af mér tuttugu mínútum fyrir sjö þegar vekjarinn ýtti við mér. Stimplaði mig inn í vinnu um hálfátta. Þrjátíu bílar voru skoðaðir í heildina, rólegt inn á milli eins og í gær en stundum í alls konar horn að líta. Það varð annars smá óhapp í morgun er einn kúnninn ætlaði að koma inn um aðra stóru hurðina sem eru opnaðar þegar verið er að fara inn og út með bíla í skoðun eða skoðað, að hann áttaði sig ekki á því að hún var að lokast. Skoðunarmaðurinn sem var að loka var líka byrjaðu að skoða bíl og sá ekki neitt fyrr en óhappið varð. Kúnninn fékk hurðina í sig og smá skurð á nefið. Hann kom samt inn, bókaði inn bílinn í skoðun en var ósáttur með þetta atvik. Ég skildi samt ekki afhverju hann var að kvarta í mér en spurði kurteislega afhverju hann hefði ekki frekar notað innganginn fyrir mannfólkið. Bríet frænka hafði samband um tíu leytið og fékk að senda mér skjal til útprentunnar með með rafrænum pósti. Stimplaði mig út á slaginu hálffimm og var komin í Hátún 12 tæpu korteri síðar og komst beint að í osteostrong tíma. Var því komin á planið við Nauthólsvík tuttugu mínútum yfir fimm. Kalda potts vinkona mín var þegar mætt og komin í pottinn. Fórum tvær ferðir í sjóinn, eina í gufu og svo var ég tæpt korter í heita pottinum áður en ég fór upp úr. Oddur Smári var kominn í bæinn og ég pikkaði hann upp í Mjóddinni. Hann fær gistingu hér í nótt og svo ætlar bróðir hans að skutla honum á Keflavíkurflugvöll í fyrramálið. Aðeins meira um það kannski síðar. Bríet kom við rétt áðan, ásamt vinkonu, stoppaði mjög stutt en hún fékk skjalið, gaf mér gott knús og bað um að fá að sýna vinkonu sinni teppið sem ég er enn með í vinnslu. 

15.9.26

Ýmislegt var gert í dag

Dagurinn byrjaði helst til snemma, eða rétt fyrir fimm. Um hálfsex var ég komin á fætur og  var þá m.a. búin að greiða mánaðarlega reikninginn af húsnæðisláninu. Rétt rúmlega klukkutíma síðar var ég komin á braut átta í Laugardalslaug þar sem ég synti í tuttugu mínútur. Sat nokkrar mínútur í steinapottinum áður en ég fór upp úr og í vinnuna. Stuttu eftir að við vorum búin að opna kom aðal-kerfisfræðingurinn. Hann var hjá okkur í tæpa þrjá tíma, var að uppfæra og skipta um myndavéla-eftirlitskerfi/ð. Rólegt var í skoðunum til að byrja með og inn á milli og heildarfjöldinn náði ekki alveg 30 bílum. En það var smávegis að gera í annarri afgreiðslu, panta ný númer, afhenda ný númer, afhenda númer úr geymslu og skrá faratæki í umferð, gera millifærslu skv. tölvupóstbeiðnum, svara síma og fleira. Stimplaði mig út á slaginu hálffimm og fór beinustu leið að Vesturbrún 30 en klukkan fimm hófst útgáfuteiti í Áskirkju í tilefni útgáfu bókar sem ein frænka mín skrifaði; Traustabrestir eftir Sigurrós Jónu Oddsdóttur. Einskonar sannsöguleg saga með skáldaleyfi. Hitti fyrir þónokkuð af ættingjum og samferðafólki. Í seinni hópnum var m.a. Jón Ingi Sigurmundsson sem var kórstjóri kórs FSu í fjölmörg ár. Ég var í þeim kór árin ´85-´88. Kom heim um hálfsjö. Klukkutíma síðar hringdi ég í tvíburahálfsystur mína til að kanna hvort hún væri upptekinn, sem hún var ekki svo ég dreif mig yfir og tók barnateppið sem ég er með í "smíðum" með mér. Tíminn æddi frá okkur en við náðum þó góðu spjalli og það bættist ein kind við á teppið, meira að segja frekar kindarleg kind en ekki eins og úlfur í sauðargæru.

14.9.26

Mánuðurinn að verða hálfnaður

Ég kvaddi pabba um og upp úr klukkan hálffjögur í gær. Fór beinustu leið heim og byrjaði á því að setja bílinn í hleðslu. Hlóð hann úr rúmlega 30% í tæp 90% á uþb fjórum tímum. Í morgun var ég vöknuð löngu á undan vekjaranum sem átti að ýta við mér stuttu fyrir klukkan sex. Var mætt í sund um hálfsjö og synti 500m á tuttugu mínútum, aðallega á braut 7. Sat í tæpar tíu mínútur í steinapottinum áður en ég fór upp úr og þvoði mér um hárið. Stimplaði mig inn í vinnu upp úr klukkan hálfátta. Í heildina voru skoðaðir 36 bílar í dag og það var svolítið um annars konar afgreiðslur en að bóka inn bíla. Vinnudagurinn leið þokkalega hratt. Stimplaði mig út á slaginu hálffimm og fór beint heim. Hringdi í Odd Smára er ég var nýlögð af stað frá vinnu og hann svaraði frekar hissa því hann ætlaði einmitt að fara að hringja í mig. Þegar ég kom í anddyrið  á blokkinni tók ég eftir að það er greinilega verið að vinna í að uppfæra nafnatöfluna. Eins var búið að fjarlægja nafnaskiltið fyrir utan innganginn á íbúðinni minni. Bráðum verður nafnið mitt komið á þessa tvo staði og þá er rétt að fara að huga að því að laga merkinguna á póstkassanum líka, fjarlægja handskrifaða miðann og setja mitt nafn prentað í staðinn fyrir fyrri eiganda. Hringdi í hálfdönsku frænku mína og nöfnu ca klukkutíma eftir að ég kom heim. Milli hálfsjö og sjö skrapp ég út í stutta göngu, smá hring. Rétt fyrir átta sló ég líka á þráðinn til Lilju vinkonu. Hef ekki heyrt í henni síðan einhvern tímann í vor.

13.9.26

Sunnudagur

Það er yfirleitt ágætt að hafa eins konar rútínu á hlutunum, en þó ekki um og of. Hvað færslurnar varðar finnst mér ég stundum hafa það lítið að skrifa og mjög oft að skrifa um það sama. Það er samt mjög gott að geta flett upp í skrifunum, þ.e. ef ég hef þá skrifað um hlutina. Ef líða of margir dagar vill það henda að ég annað hvort gleymi að skrifa um eitthvað sem væri vel þess virði að minnast á og halda upp á eða ég þarf að reka á eftir mér að skrifa áður en enn einn skriflausi dagurinn líður hjá.

Ég fór í morgunsund í Laugardalslaug fyrir vinnu á föstudaginn. Stimplaði mig inn í vinnu á svipuðum tíma og oftast. Báðir skoðunarmennirnir voru mættir fyrir átta. Það var rólegt framan af. Um hálfellefu fór stöðvarstjórinn í próf og fleira, fékk restina af deginum til að nýta í alls kyns útréttingar. Þá var þegar byrjað að færast fjör í skoðunarmálin og hinn skoðunarmaðurinn settist ekki niður fram að lokum nema þennan hálftíma sem við vorum í mat. Skoðaði eitthvað yfir tuttugu bíla. Á heimleiðinni kom ég aðeins við í N1 við Borgartún til að heilsa upp á N1 soninn.

Í gærmorgun var ég komin á fætur um hálfátta, vöknuð miklu fyrr. Sleppti sundinu annan laugardaginn í röð en sinnti því sem ekki má skrifa um í staðinn. Lenti í smá tímahraki því eldhúsklukkan sem ég ætlaði ekki að flytja með mér en setti upp tímabundið datt niður eftir að ég rak skaftir á skúringagræjunni í hana. Sópaði upp stærstu brotunum og varð að taka ryksuguna fram aftur. Um tíu var ég mætt vestur í bæ til norsku esperanto vinkonu minnar og var komin heim aftur fyrir klukkan tólf. Klukkutíma eftir það lagði ég af stað austur og gerði gott stopp í Fossheiðinni. Nokkru á eftir mér mætti tvíburahálfsystir mín. Ég var komin á Hellu um fjögur. Bríet var á kafi í alls konar "geru" og eftir kvöldmatinn fékk hún mig til að aðstoða sig við að þræða tilrauna kjötbitaniðurskurð á tannstöngla eftir að hafa marinerast í þrenns konar legi; sætu, venjlegu og sterkur. Semsagt þrjár tegundir. Þetta lét hún svo bakast í 70°C ofninum í á fimmta tíma. Fékk að smakka árangurinn í dag og var hrifnust af því sem marineraðist í sterkasta kryddleginum. Þetta fer svo frænka mín með sér í vinnuna sína, SS, á morgun sem smakk.

10.9.26

Stutt í helgina

Fór í seinna lagi að sofa í gær, í háttinn upp úr tíu og las svo í dágóða stund. Stillti vekjarann á tíu mínútur fyrir sex. Svaf virkilega vel til klukkan að verða fimm. Þá þurfti ég á pisseríið, augun frekar límd aftur en ég beið sennilega aðeins of lengi með að sinna kalli náttúrunnar því ég náði ekki að sofna aftur þegar ég skreið upp í rúm aftur. Kúrði þó til klukkan rúmlega hálfsex. Var mætt á planið við Laugardalslaug fimm mínútum fyrir opnun. Synti 600m, flestar ferðir á braut 7 en þó 50m á braut átta. Var mætt í vinnu um hálfátta leytið. Skoðunarmennirnir komu stuttu fyrir átta. Skoðaðir voru 32 bílar í dag, frekar rólegt inn á milli en það komu líka smá tarnir. Stimplaði mig út á slaginu hálffimm og fór beinustu leið heim. Stakk bílnum í samband þar sem staurinn var laus og bíllinn kominn niður í 32%. Ég var svo forsjál að taka út ýsuflök úr frysti áður en ég fór að heiman í morgun. Átti líka sæta kartöflu, blómkál og brokkolí í ísskápnum. Úr varð hinn ágætasti kvöldmatur sem dugir í tvo skammta í viðbót.

9.9.26

Háflóð í Nauthólsvík kl 17:20 í dag

Vekjarinn var stilltur á korter í sjö í morgun en ég var vöknuð amk hálftíma fyrr. Mætti í vinnu um hálfátta og var Íris, rétt á eftir mér. Við stimpluðum okkur inn, undirbjuggum kaffið og svo sýndi ég henni hvernig ég geri upp. Annars sá hún eiginlega alfarið um afgreiðsluna í dag. Dagurinn var kannski of rólegur á köflum en alls voru gerðar 32 skoðanir og m.a. kom inn nýskráning og einnig tvær aðalskoðanir með breytingaskoðun þar sem í öðru tilfellinu var verið að skrá krók og í hinu að breyta notkunarflokki bifreiðar. Nýja afgreiðslustúlkan afgreiddi málin nokkuð léttilega, þurfti að spyrja smá, aðallega til að laga og bæta við glósurnar sínar sem virkuðu að öðru leyti mjög vel. Framkvæmdastjórinn kom í heimsókn um tvö leytið, bæði til að taka stöðuna og einnig tilkynna þessari nýju að hún ætti að mæta á framtíðarstöðina sína, Klettagarða, í fyrramálið. Íris stimplaði mig út á slaginu hálffimm og ég fór beinustu leið í Hátúnið þar sem ég komst strax að í osteostrongtíma. Var mætt á planið við Nauthólsvík rétt um það leyti sem háflóðið var. Kalda potts vinkona mín var þegar mætt. Við fórum tvisvar í sjóinn og einu sinni í lónið.  Hún fór aðra ferð í gufuna og pottinn en ég kvaddi og fór upp úr korter yfir sex. Var komin heim fyrir klukkan sjö. Greip aðeins í nál í kvöld. Það er að verða nokkuð ljóst að fyrsta saumaða kindin í barnateppinu verður hálfgerð ókind.

8.9.26

Inn í vinnuvikuna

Vekjarinn ýtti við mér tíu mínútum fyrir klukkan sex í gærmorgun. Fjörutíu mínútum síðar var ég mætt á Laugardalslaugar-sund-húninn. Synti 500m og fór svo smá stund í steinapottinn. Stimplaði mig inn í vinnu rétt rúmlega hálfátta. Báðir skoðunarmennirnir mættu 10-15 mínútum síðar og stöðvarstjórinn með þær fréttir að til okkar væri að koma afgreiðslustúlka í þjálfun. Hún var mætt skömmu síðar og fékk þau fyrirmæli að fylgjast með mér, spyrja og punkta niður. Hún ákvað reyndar sjálf að taka niður glósur. Vinnudagurinn gekk vel fyrir sig. Var annars frekar dugleg að þamba vatn því eftir vinnudaginn lá leiðin í Blóðbankann í Kringlunni, sjötugustuogaðra heimsóknina. Þar gekk allt mjög vel fyrir sig en sá sem tók úr mér blóðið vildi að ég hvíldi mig í stutta sund lengur á bekknum eftir gjöfina því honum fannst hendurnar á mér svo kaldar. Lét meira að segja mæla aftur blóðþrýstinginn sem hefur eiginlega aldrei verið betri.

Í morgun var ég vöknuð upp úr klukkan fimm og fór á fætur korter fyrir sex. Mætti í sund um hálfsjö og synti mína 500m. Stoppaði frekar stutt í pottinum og var mætt í vinnu rétt fyrir klukkan hálfátta. Við vorum öll mætt tíu mínútum fyrir átta og sú sem er í þjálfun og á svo að fara í afgreiðsluna í Klettagörðum skráði sig inn í afgreiðslutölvuna og sá um langflestar afgreiðslur í dag sem og að setja upp hin og þessi verkfærin, sem eru notuð, með og án aðstoðar. Dagurinn var fremur rólegur skoðanalega sér. Ég fékk að skrá mig inn, inn á milli til að grípa m.a. millifærslu- og plötupöntunarbeiðnir. Sú nýja stóð sig mjög vel og ég spaugaði með að hún yrði farin að kenna mér áður en langt um liði.

Strax eftir vinnu brunaði ég út úr bænum um Þrengslin austur fyrir fjall og til frændfólks á Selfossi en dóttir þeirra, frænka mín og eins konar litla systir, er í viku heimsókn á landinu. Hún er búin að búa úti í Danmörku í þrjátíu ár af sinni 50 ára ævi. Ég stoppaði hjá þeim í þrjá tíma, og var mikið spjallað. Var boðin í kvöldmat með þeim, svokallaða kofaböku. Hafði líka rænu á því að óska eftir og fá myndatöku bæði af þeim þremur og svo mér og frænku/litlusystur minni áður en ég þakkaði fyrir mig og fór. Var komin heim rétt fyrir tíu.

6.9.26

Nokkra daga "heimatölvufrí"

Það er bæði óvart og smá viljandi að ég tók mér pásu frá skrifum. Fimmtudagurinn var langur í báða enda. Mætti í sund um hálfsjö. Nóg að gera í vinnunni milli 7:37 og 16:35. Stoppaði heima í tæpa klukkustund og klæddi mig í buxnadragtina áður en ég fór að heiman aftur og á fyrsta samfrímúrarafund haustsins. Klukkan var byrjuð að ganga ellefu þegar ég kom heim aftur. Samt gaf ég mér tíma í smá lestur áður en ég fór að sofa. Föstudagurinn byrjaði einnig á sundi áður en ég mætti í vinnu. Það var eiginlega ennþá meiri erill í vinnunni þann daginn og mjög gott að það er skoðað á báðum brautunum. Stimplaði mig út rétt rúmlega fjögur og fór beinustu leið í klippingu. Hringdi reyndar í sundvinkonu sem stundar Laugardagslaugina aðeins á sumrin í seinni tíð, og spjallaði við hana þar til rétt áður en ég átti að klippitímann. Sjö vikur síðan ég var klipp síðast og mér fannst mjög gott að láta stytta og þynna vel. Var komin heim um hálfsex leytið. Fór frekar seint að sofa en þó ekki eftir miðnætti. Var bæði að horfa á þætti og einnig lesa. Kláraði m.a. að lesa ljóðasafnið hans Njarðar en á örugglega eftir að glugga meira í það áður en ég skila inn bókinni.

Vaknaði um hálfsjö á laugardagsmorgninum. Ákvað að fara ekkert í sund. Las í fræðunum og tveimur bókum af safninum fyrsta einn og hálfa tímann. Sinnti því svo sem ekki má skrifa um en var mætt til norsku esperanto vinkonu minnar um tíu. Stakk bílnum í samband á meðan ég var í hittingnum, ca 1 og hálfan tíma. Kom við í Krónunni við Fiskislóð áður en ég fór heim. Heima lagði ég við hleðslustaurinn á planinu og stakk bílnum í samband. Klukkan var líklega eitthvað um hálfeitt og ég var með bílinn í hleðslu til klukkan fjögur. Þá fór ég út, gekk frá hleðslukaplinum, lagði bílnum í annað stæði og skrapp svo í klukkutíma göngutúr.

Í morgun var ég líka vöknuð frekar snemma eða um hálfátta. Fór fljótlega á fætur og var að lesa fyrstu tvo tímana. Rétt fyrir tíu ákváðum við tvíburahálfsystir mín hitting upp úr hádeginu hjá henni. Ég skrapp út í klukkutíma göngutúr. Horfði á einn þátt í þriðju seríunni: "House of the Dragon", fékk mér að borða um tólf leytið og stuttu fyrir eitt tók ég til handavinnudótið mitt og fór akandi yfir í Ljósakur í Garðabæ. Veðrið var svo frábært að við ákváðum að setjast með handavinnuna út á svalir. Ég bað um kaffi og drakk tvo bolla af því. Seinna um daginn skiptum við yfir í te. Sonja kom mér af stað í að sauma í sléttu fletina á barnateppinu. Saumaði reyndar útlínur utan um þrjú hjörtu en er hálfnuð með fyrstu kindina af nokkrum. Finnst ég vera búin að ná tökum á tækninni að sauma eins og kindin sé prjónuð í en samt gæti alveg verið að þessi fyrsta kind muni líta að einhverju leyti út eins og úlfur í sauðagæru. Að vísu verður þessi "kind/úlfur" með horn. Klukkan var að verða að byrja að ganga sjö þegar ég kom heim og bíllinn er enn með 100% hleðslu eða yfir 300km.

2.9.26

Á bókasafnið seinni partinn í dag

Vaknaði næstum hálftíma áður en vekjarinn átti að ýta við mér tíu mínútum fyrir sex. Korter yfir sex lagði ég af stað í sund og fór Kringlumýrarbrautina að þessu sinni. Var komin á planið við Laugardalslaug fimm mínútum áður en opnaði. Synti 500m (250m skrið- og 250m bakskriðsund) á braut sex. Sat svo næstum korter í steinapottinum og spjallaði m.a. við fyrrum vinnufélaga úr RB. Stimplaði mig inn í vinnu upp úr klukkan hálfátta. Aðeins rólegra var í skoðunum í dag heldur en undan farna daga en þær fóru þó nokkkuð yfir þrjátíu. Eftir hádegi kom til okkar kona sem er að ráða sig í afgreiðslustörf hjá frumherja. Vann fyrir nokkrum misserum í afgreiðslu hjá Aðalskoðun þannig að hún kann nú ýmislegt fyrir sér. Tveimur tímum eftir að hún kom settist hún í "afgreiðslu-stólinn" og stóð sig mjög vel og fagmannlega. Á morgun á hún að mæta hjá frumherja í Hafnarfirði. Þar eru tvær tölvur í afgreiðslunni svo hún getur skráð sig inn á aðra og haldið þjálfun áfram en það stendur til að hún fari svo í afgreiðsluna í Hádegismóum síðar á árinu.

Eftir vinnu fór ég beinustu leið í Hátún 12 í osteostrong tíma. Var mætt þar korter fyrir fimm. Þurfti að hinkra í rúmar fimm mínútur og var svo búin með ferlið korter yfir fimm. Þá lá leiðin í bókasafnið í Kringlunni. Skilaði þremur bókum af fjórum. Skilda ljóðasafnið hans Njarðar P. Njarðvík eftir heima þar sem ég er rétt rúmlega hálfnuð að lesa það. Á líka tæpar þrjár vikur eftir af útláninu á þeirri bók. Með mér heim tók ég sex bækur þar af eina með 14 daga skilafresti; Vesen eftir Láru Óskarsdóttur. Hinar bækurnar eru; Fimmta barnið eftir Doris Lessing, FYRIR DAGA farsímans (sögur) eftir Böðvar Guðmundsson, Hefnd Diddu Morthens eftir Sigríði Pétursóttur, Sumarblóm og heimsins grjót eftir Sigrúnu Ölbu Sigurðardóttur og Syndafall eftir Yrsu Sigurðardóttur. Veisla framundan hjá mér en ég tel nú líklegt að ég muni þurfa að framlengja einhverjum skilafrestum því það er meira sem ég þarf að gera eftir vinnu heldur en að lesa.


1.9.26

Glænýr mánuður

Vaknaði á undan vekjaranum, einhvern tímann upp úr klukkan sex. Var mætt í vinnu um hálfátta. Í heildina voru skoðaðir 54 bílar í dag, 10 færri en í gær. Nýji skoðunarmaðurinn var að standa sig ágætlega með góðum stuðningi hjá unga stöðvarstjóranum. Um þrjú leytið kom yfirmaður BSK sviðs (Siggi frændi) við til að funda stuttlega með stöðvarstjóranum. Strax eftir vinnu fór ég í Nauthólsvík. Spjallaði við pabba í símann langleiðina á leiðinni þangað. Var komin út í 11,7°C sjóinn rúmlega fimm. Það var fjara. Fór tvisvar út í, í gufuna á milli ferða og endaði svo í heita pottinum í uþb korter. Var komin heim fyrir klukkan hálfsjö. 

31.8.26

Síðasti ágústdagurinn þetta árið

Ég var komin austur á Hellu um hálftvö leytið á laugardaginn. Eyddi 30% af hleðslunni. Sú spænsk-suðurameríska var á vakt í eldhúsinu á Stracta hótelinu til tíu um kvöldið og Bríet frænka var eitthvað á vegum SS á kjötsúpuhátíð á Hvolsvelli en það voru samt "næturgestir" í herberginu sem hún hefur afnot af og pabbi hélt sig í stofunni og stundum eldhúsinu. Hann var annars ágætlega hress. Ég skrapp í stuttan, tæplega hálftíma göngutúr um fjögur leytið og milli fimm og sex bauð pabbi mér upp á grill. Bríet var komin heim en hún og gestir hennar voru í öðrum hugleiðingum varðandi mat og björguðu sér sjálf.

Þegar ég kom fram á níunda tímanum voru pabbi og sú spænska þau einu sem voru komin á fætur. Hún var með í þvottavélinni en vélin var búin fljótlega og ég ákvað að nota tækifærið og þvo utan af rúminu mínu og hengja svo út á snúru. Pabbi tók út þrjú mismunandi fiskflök úr frysti og ég matreiddi handa okkur þremur í hádeginu. Þegar Bríet kom á fætur um eitt afþakkaði hún að fá sér af því sem var afgangs svo ég fékk að taka afganginn með mér í bæinn. Kvaddi pabba um þrjú leytið og var komin í bæinn á fimmta tímanum. Kom við í Löðri við Vesturlandsveg áður en ég fór heim. Hleðslan var rétt komin niður í 39% þegar ég kom heim og af því að það var laust á staur setti ég bílinn í samband og hlóð hann upp í 89%. Tók hann úr sambandi og færði í annað stæð um tíu í gærkvöldi.

Vaknaði um hálfsex í morgun og var mætt í Laugardalslaug þegar opnaði klukkutíma síðar. Synti 500m á braut 6 og hitti svo fyrrum vinnufélaga smá stund í steinapottinum. Stimplaði mig inn í vinnu ca tuttugu mínútum fyrir átta. Stöðvarstjórinn var búinn að fjarlægja bíl sem var á "auka"brautinni því nú er nýji skoðunarmaðurinn kominn með skoðunarnúmer svo þá er um að gera að nýta báðar brautirnar. Það var þokkalega sturlað að gera, slatti bíla bókaðir (bæði fyrir og eftir hádegi) og svo komu mjög margir inn af götunni. Heildar skoðanir fór upp í 64. Þeir voru að klára síðustu skoðanirnar þegar ég stimplaði mig út rétt eftir klukkan hálffimm.

Fór beinustu leið heim. Í síðasta sjónvarpsfréttatíma Sýnar í kvöld kom Davíð Steinn smá stund í mynd vegna fréttar um að á miðnætti mun vsk af eldsneyti hækka aftur upp í 24% úr 11%. Horfði svo á fréttir á Rúv sem sagði m.a. frá síðasta fréttatíma Sýnar (áður stöð 2, í bili eða hvað sem verður).

Sem betur fer tékkaði ég aðeins á almanakinu í símanum því annars hefði ég gleymt að mæta á boðaðan framhaldsfund í húsfélaginu vegna ónæðis íbúa í einni íbúð af 33 í blokkinni. Þar kom fram að ástandið hefur kannski skánað smá en ekki lagast nógu vel og ákveðið var að veita íbúum frest í 30 daga í viðbót. Þó með þeim fyrirvörum að ef ónæðið byrjar aftur eftir þennan tíma þá verði málið tekið lengra.

29.8.26

Inn í helgina

Það var gott og hressandi að byrja gærdaginn á 500m sundi í Laugardalslauginni. Stimplaði mig inn í vinnu um hálfátta. Nóg var að sýsla við undirbúning á opnun en ég sleppti því að gera upp því þá hefði ég verið tæp á skiptimynt. Þá brá auðvitað svo við að enginn af hátt í 50 viðskiptavinum sem voru annað hvort að láta skoða, leggja inn númer eða borga opinbergjöld greiddu með reiðufé. Það gerist alveg. Það voru annars skoðaðir yfir fjörutíu bílar í gær og rétt rúmum hálftíma fyrir lokun kom yfirmaður bifreiðasviðs með skoðunarnúmer og síma fyrir nýja skoðunarmanninn þannig að í næstu viku verður loksins hægt að nýta báðar brautirnar. Eftir vinnu fór ég vestur í bæ til norsku esperanto vinkonu minnar. Var komin til hennar rétt fyrir hálffimm og nýtti ég tækifærið og setti bílinn í hleðslu á meðan. Við settumst út á svalir fyrri klukkutímann og spjölluðum um alls konar. Inger bauð upp á te og sykurlaust eplakökupæ, mjög gott! Seinni klukkutíminn fór í ljóðaglugg og smá esperanto. Ég var með mér nýútgefið ljóðasafn Njarðar P Njarðvík sem ég tók af safninu um síðustu viku. Útgáfan er í tilefni þess að Njörður varð níræður í lok júní sl. Mjög mörg mögnuð ljóð. Ég er annars aðeins búin með ca einn þriðja af bókinni. Bíllinn var kominn yfir áttatíu prósent þegar ég tók hann úr hleðslu. Ákvað samt að skella honum aftur í samband á staurnum á planinu heima og hlaða alveg upp í hundrað. 

27.8.26

Sjósund og kosning eftir vinnu

Vaknaði korter fyrir sex, tæpri klukkustund áður en vekjarinn átti að ýta við mér. Skrapp fram á pisseríið og gerði svo tilraun til að kúra mig niður og sofna aftur. Virkaði ekki en ég fór þó ekki á fætur fyrr en um það leyti sem hafði stillt vekjarann á. Mætti í vinnu rétt fyrir hálfátta. Vinnudagurinn var kaflaskiptur, stundum mikill erill en inn á milli rólegra. Fyrrum samstarfskona til hátt í tuttugu ára í kortadeildinni kom með bílinn sinn í skoðun. Gátum spjallað smá því það var smá röð á undan (einn eða tveir bílar). Eftir vinnu fékk ég mér smá göngu að heimilisfangi á Suðurlandsbraut skammt frá gatnamótunum við Grensásveg. Erindið var vinnutengt. Manneskjan sem ég var að reyna að ná sambandi við var ekki heima en ég gat stungið umslagi með smá bréfkorni í í póstkassann hennar. Labbaði beinustu leið til baka í bílinn og dreif mig í Nauthólsvík. Fór fyrri ferðina í sjóinn korter yfir fimm. Stutt var út í og sjórinn 12,2°C. Tók ekki tímann sem ég var út í en fór í gufu, aftur í sjóinn og svo smástund í pottinn áður en ég fór upp úr upp úr klukkan sex. Kom við í Hlíðarsmára og kaus utan kjörfundar. Það var nóg að gera þar en ferlið gekk ótrúlega vel fyrir sig. Ég var komin heim fyrir klukkan sjö.

26.8.26

Eitt og annað

Þar sem ég skrópaði í sund eftir vinnu í gær var ég ákveðin í að mæta á húninn í Laugardalslaug í morgun og stillti vekjarann á að ýta við mér tíu mínútum fyrir sex. Fór í háttinn um tíu og las í hálftíma. Rumskaði um hálffimm og þurfti á pisseríið. Ég sofnaði eiginlega ekki aftur. En ég var mætt á húninn við opnun. Synti 500m á braut sjö á tuttugu mínútum og sat svo nokkrar mínútur í steinapottinum að spjalla við einn fyrrum samstarfsmann. Vinnudagurinn var annars alls konar, rólegur til að byrja með en mun meiri erill eftir hádegið. Í heildina voru skoðaðir 36 bílar. Í stað þess að fara í osteostrong eftir vinnu lá leiðin í ákveðið hús mjög austarlega í borginni. Þar var fyrir slatti af fólki sem var að taka til hendinni og ég lagði mitt af mörkum í því verkefni. Klukkan var langt gengin í sjö þegar ég kom heim. 

25.8.26

Án titils

Ég var frekar óákveðin og óviss með plön eftir vinnu í dag. Tók með mér sund- og sjósundsdót en einnig var ég undirbúin undir esperantó hitting. Stimplaði mig inn í vinnu um hálfátta. Hafði í nægu að snúast fram að opnun. Svo var rólegt fyrsta rúma hálftímann áður en fyrsti bíll kom til skoðunar. Stöðvarstjórinn fékk afleysingu milli hálfellefu og hálfeitt. Fyrir hádegi voru skoðaðir 17 bílar og alveg jafn margir eftir hádegi því heildin fór upp í 34. Strax eftir vinnu fór ég í Fiskbúð Fúsa. Ekki var til óbarin ýsa en ég keypti lúðu, glútenlausar fiskibollur og eitt þorskhnakkaflak. Hugað verður að esperanto hittingi seinni part seinna í vikunni og ég ákvað stefna á sund í Árbæjarlauginni í stað sjósunds í Nauthólsvík. Hringdi í pabba á meðan ég var á leiðinni upp í Árbæ. Hann var að gera sultu úr kílói af niðurskornum rabbabara sem hann átti i frysti síðan í fyrra. Var komin að Árbæjarlaug korter yfir fimm. Fann ekki stæði svo ég hætti við sundferð og fór beint heim. 

24.8.26

Eftir helgina og vinnuvikuupphaf

Helgin varð aðeins öðruvísi en ég átti von á en ég var svo sem ekki með nein plön. Laugardagsmorguninn fór í stúss sem ekki má og er alveg óþarfi að skrifa um. Fékk áminningu frá bókasafninu og ég hefði alveg eins getað farið og skilað bókunum á safninu í Úlfarsárdal því það var opnað um leið og sundlaugin. Kringlusafnið var opið milli eitt og fimm. Það fór svo að ég fór þangað um miðjan dag. Hafði fests í að horfa á "Sama viðtalið" með Baldvini Þór Bergsveinssyni og Patreki Jaime í sarpi RÚV. Skilaði öllum bókunum sem ég var með í láni og fékk mér fjórar í staðinn. Þar af tvær sem voru nýjar og með 14 daga skilafresti. Á heimleiðinni gerði ég stopp í Krónunni í Lindum. Stór partur af því sem eftir lifði helgarinnar fór í að klára að lesa báðar skammtímalánsbækurnar; 17 ástæður til að drepa og 18 rauðar rósir eftir Unni Lilju Aradóttur.

Í morgun var ég búin að stimpla mig inn í vinnu um hálfátta leytið. Rólegt var fyrir hádegi en í heildina voru skoðaðir 32 bílar, sá fyrsti átti bókaðan tíma og mætti um níu. Sá síðasti var skoðaður korter yfir fjögur. Stimplaði mig út á slaginu hálffimm og kom við í Árbæjarlauginni áður en ég fór heim.

21.8.26

Er að hlaða bílinn

Rumskaði frekar snemma og hefði í sjálfu sér getað byrjað daginn á því að fara í sund en ákvað að kúra aðeins lengur og nota svo tímann í smá dútl hér heima áður en ég fór af stað í vinnu tuttugu mínútum yfir sjö í morgun. Var þó með sunddótið meðferðis. Fyrsta hálftímann í vinnunni notaði ég m.a. til að hella upp á, strjúka yfir nokkra fleti og gera upp kassann. Annars var morguninn rólegur og aðeins ellefu bílar skoðaðir fyrir hádegi. Það var meira líf í tuskunum eftir hádegi en þó smá pásur inn á milli. Heildarfjöldi skoðaðra bíla fór upp í þrjátíuogtvo en við stimpluðum okkur út á slaginu fjögur. Kom aðeins við í N1 við Borgartún og heilsaði upp á Davíð Stein. Keypti mér ný plús 1,5 lesgleraugu. Um fimm leytið var ég komin í Árbæjarlaugina. Synti í tæpar tuttugu mínútur, fór í gufu, eina ferð í kalda pottinn, kalda sturtu og infra rauða klefann. Kom heim stuttu fyrir klukkan hálfsjö. Bíllinn var enn í eitthvað yfir fjörutíu prósent en það var pláss á staurnum og ég ákvað að nýta mér það. Hann er kominn upp í 93% núna og ég gæti alveg farið að kalla þetta gott að sinni og færa hann á almennt stæði. Talandi um stæði þá gleymdi ég að geta þess að í gær voru öll útibílastæði sem tengjast blokkinni máluð.

20.8.26

Nauthólsvík eftir vinnu í dag

Mætti í vinnu um hálfátta. Strákarnir voru mættir tuttugu mínútum. Mjög rólegt var fyrstu tvo tímana og notaði nýji maðurinn tímann til að vinna í síðasta bóklega prófinu til að geta sótt um að fá skoðunarréttindi. Ellefu bílar voru skoðaðir fyrir hádegi. Í hádeginu þurfti stöðvarstjórinn að skreppa frá í rúma tvo tíma. Ein "flakkari" var sendur til okkar. Hann kom rétt fyrir hálfeitt og þá voru þegar komnir tveir á húninn. Flakkarinn gerði 19 skoðanir á rétt rúmum tveimur tímum. Stöðvarstjórinn skilaði sér til baka um hálfþrjú og flakkarinn kvaddi rétt fyrir þrjú. Eftir það og fram að lokun voru gerðar fimm eða sex skoðanir. Ég stimplaði mig út á slaginu hálffimm og fór beinustu leið í Nauthólsvík. Umferðin var þannig að ég var rúmlega tuttugu og fimm mínútur á leiðinni þangað. Var rétt á eftir kaldapotts vinkonu minni. Við fórum tvisvar í sjóinn, tvisvar í gufu, einu sinni í lónið og ég fór aðeins einu sinni í heita pottinn því ég fór upp úr eftir ferðina í lónið. Var komin heim rétt um klukkan sjö. 

19.8.26

Osteostrong eftir vinnu í dag

Ég vaknaði fimm mínútum áður en vekjarinn átti að ýta við mér í morgun, eða um hálfsjö. Rétt rúmum klukkutíma síðar var ég mætt í vinnuna. Vorum bara tvö í allan dag. Nokkuð rólegt framan af og stundum inn á milli en í heildina voru þó skoðaðir tuttuguogsex bílar sem er alveg ágætt fyrir einn mann. Sex af þessum skoðunum voru bókaðar í gegnum noona-appið og voru þá á ákveðnum tímum. Með þessari þjónustu þarf þá einnig að vera vakandi fyrir því að tilkynna þeim, sem mæta til að athuga hvort sé hægt að fá skoðun, að bókaðir tímar gangi fyrir. Sum verkefnin mín fóru fram í gegnum síma, með tölvupóstsamskiptum og líka netfyrirspurnarsamskipti af heimasíðu fyrirtækisins. Eftir vinnu fór ég beinustu leið í Hátúnið og komst strax að í osteostrong þótt klukkan væri ekki orðin fimm þegar ég mætti. Átti ekki von á neinum sérstökum árangri þar sem ég er búin að vera lasin en árangurinn var bara mjög þokkalegur. Lét svo vita að ég komist ekki í tíma aftur fyrr en eftir hálfan mánuð. Var komin heim um hálfsex leytið. Í kvöldmatinn kláraði ég afganginn af bleikjuréttinum sem ég útbjó sl. sunnudag. Mikið var annars gaman að horfa á fyrsta þáttinn í sextándu þáttaröðinni af "Með okkar augum" í kvöld.

18.8.26

Smástund í sund eftir vinnu

Ég mætti í vinnu um hálfátta í morgun. Samstarfsmenn mínir mættu stuttu fyrir klukkan átta. Reyndar var sá nýji mættur aðeins fyrr en hann er ekki með lykla og ég vissi ekki af því og hafði læst innri dyrunum eftir að ég var komin inn og búin að taka kerfið af. Það var frekar rólegt í morgun, aðeins tólf bílar skoðaðir fyrir hádegið. Sá nýji fór á skoðunarnámskeið um hádegisbilið og við vorum bara tvö eftir hádegi. Það var meira að gera milli hálfeitt og rúmlega fjögur en þó náði heildarfjöldi skoðaðra bifreiða yfir daginn ekki þrjátíu. Vantaði svo sem ekki mikið upp á. Stimpluðum okkur út á slaginu hálffimm og ég dreif mig í Árbæinn og fór í sund þar. Synti ekki nema um 100m, fór tvisvar í kalda pottinn, eina ferð í gufuna og endaði á að fara í innfrarauða klefann í kvennaklefanum í 15 mínútur áður en ég fór heim. Sundferðin tók innan við klukkustund og ég var komin heim um sex leytið. 

17.8.26

Fékk sms og mail frá besta bankanum í morgun

Þar til flensan náði að leggja mig var takmarkið að fara í blóðbankann eftir vinnu í dag. Var með áminningu í dagatalinu um að bóka tíma akkúrat í dag 17. ágúst. Færði þessa áminningu aðeins aftar í dagatalið og eyddi henni svo. Ekki það að ég sé hætt við heldur er ég ekki viss um hversu lengi ég þarf að fresta þessari heimsókn. Ég myndi halda svona 2-4 vikur. En ég mætti þó í vinnuna í dag og lifði vinnudaginn af. Vorum bara tvö framan af og þegar hinn tilvonandi skoðunarmaðurinn mætti einhvern tímann upp úr hádeginu fór hann að vinna í verkefnum sem tengdust því sem hann er að vinna að þessa dagana, þ.e. að klára skoðunarmannanámskeiðið og taka fleiri en eitt próf til að fá skoðunarskírteinið. Þrjátíuogfjórir bílar og ein kerra voru skoðuð í dag, allt af stöðvarstjóranum. Ég hafði annars tekið sunddótið með í bílinn en eftir vinnu ákvað ég heldur að fara beint heim í sturtu og svo rólegtheit. Greip ekki einu sinni í prjónana mína og líklegast er að ég fari beint í háttinn eftir þessa færslu og lesi lítið sem ekki neitt.

16.8.26

Sunnudagur sextándi

Ég hélt mig heima við í gær eins og fjóra daga þar á undan. Davíð Steinn sótti Odd um tvö leytið og þeir fóru saman í gjafa-leiðangur fyrir "baby-shower" og fengu sér að borða í leiðinni. Oddur var kominn til baka einhvern tímann fyrir fimm. Um sex leytið setti ég upp hýðisgrjón og náði í nokkra bleikjubita úr frosti og setti í annan pott. Greip þetta með mér þegar ég fór í Krónuna síðast. Oddur þáði reyndar ekki að borða með mér (meiri afgangur fyrir mig í staðinn) því hann var enn saddur. Rétt fyrir hálfátta fór hann labbandi í Smárann til að fara í bíó. Ég fór í háttinn upp úr hálftíu og byrjaði á því að mæla mig, ennþá örfáar kommur því miður en ég er eiginlega ekki að nenna þessu lengur. Kommurnar eru kannski eðlilegar að kvöldi til, amk á meðan enn "sýður" aðeins í brjóstholinu. Auðvitað langar mig ekki að láta mér slá niður og ég vil helst ekki fara á læknavaktina til að fá sýklalyf til að vinna þetta hraðar niður. Það síðara er kannski samt það sem ég þarf að gera. Skoða þetta betur í vikunni. 

15.8.26

Kommunum fer fækkandi

Varð svolítið svekkt þegar ég mældi mig í gærkvöldi, fjórar kommur eru alltaf fjórar kommur ef maður er að slást við pestirnar. Ég er þó ekki frá því að það sé farið að losa um "kekkina" í brjóstholinu. Hefði helst viljað vera laus við kommurnar svo ég gæti verið þokkalega viss um að mér slái ekki niður fari ég af stað út í morgundaginn. Ætla að halda mig heima við í dag. Oddur kom í gærkvöldi og er með gistingu hér til morguns og ég fæ þá bræður vonandi til að vera með mér í gjöf, og sjá um allt í kringum hana, til að taka með á opið hús á morgun. Það er eiginlega annars hálf galið að þurfa að halda sig inni við. Annars greiddi ég hálfa millijón inn á húsnæðislánið í morgun eftir að hafa fyrst greitt fasta greiðsluseðilinn. Lánið er því komið niður í 7,1 úr tæpum tólf sem það var í fyrir ári og greiðslubirgðin líklega að komast niður í um fimmtíuþúsund í stað áttatíuogtveggja. Þarf svo aðeins að ákveða næstu skref. Held að það væri skynsamlegt að koma láninu aðeins neðar til að lækka greiðslubirgðina enn frekar og svo halda áfram að borga inn á lánið með séreignarsparnaðinum þegar ég má fara að taka hann út eftir uþb tvö ár. Gallinn við sumt í þessu lífi er að stundum er það sem er svo rétt í dag alveg kolrangt á morgun og öfugt.

13.8.26

Með 8 kommur á kvöldin

Síðan á mánudags kvöldið hef ég verið að "vinna" í því að ná heilsu á ný. Var frekar spæld yfir því að mér tókst ekki að forðast pestina því dagana áður en ég játaði mig sigraða reyndi ég eins og ég gat að fara extra vel með mig. Það er enn nokkuð fast ofan í hálsi eða neðar. Er ekki stífluð en inn á milli þarf ég þó að snýta mér og horinn stundum grænn. Það er alls ekki gaman að vera kippt svona út úr rútínunni en það að ég hafi þurft að "hanga" heima sl daga hefur þó komið sér vel. T.d. eins og í gær þá gat ég fylgst með allri útsendingunni á RÚV vegan sólmyrkvans og í dag fylgdi ég Gunnari heitnum Þórðarsyni með góðri aðstoð útsendinu á sjónavarp símans preminum.

Oddur Smári byrjaði að vinna á mánudaginn var, sinnir yngstaskólastiginu í frístund í einum skólanum á Selfossi. Á meðan ekki er búið að setja skólann er þetta 100% starf en fer svo niður í hlutastarf um leið og skólinn byrjar.

"Hönnunar"-barnateppið stækkar daglega og mig er farið að gruna að ég þurfi að útvega aðeins fleiri dokkur í sumum litunum. Stundum veit ég ekki hvernig næsti bútur í teppinu verður fyrr en rétt áður en komið er að honum. Og þegar ég verð búin að prjóna og ganga frá endum mun ég amk eiga eftir að sauma kindamyndir á alla vega þrjá fleti og jafnvel ákveða hvort flott verði að hekla kant í kringum teppið.