31.12.15

Takk fyrir 2015 - gott ár í heildina litið



Sjálfsmynd undir gömlu tré í Hallormsstað 23. ágúst 2015

Síðasta sundferðin á árinu farin í morgun milli tíu fimmtán og hálftólf

Fróðlegt væri að vita hversu marga daga á árinu ég fór í sund. Framan af ári fór ég sennilega 3-4 sinnum í viku. Tók rétt rúmlega viku hlé í þrjú af fjórum blæðingatímabilum. Ég er að minnsta kosti viss um að ég nýtti árskortið mitt í sundlaugar Reykjavíkur mjög vel og þennan hálfa mánuð sem ég var í hringferðalaginu fór ég alla vega fimm ef ekki sex sinnum í sund, þrisvar á Akureyri, einu sinni á Egilsstöðum og einu sinni eða tvisvar á Hellu. Vel gert finnst mér.

Í gærmorgun "stalst" ég til að fara snemma af stað á lánsbílnum og var mætt í Laugardalslaugina rétt upp úr klukkan hálfsjö. Var búin að synda í ca korter þegar ég varð vör við að Lena var komin. Við stilltum okkur af og komumst tvær ferðir í kalda pottinn, eina í 42 gráðu pottinn og eina í sjópottinn. Við enduðum í síðasta nefnda pottinum og ég var næstum því búin að gleyma mér. Sleppti gufu- og sólbaði og náði að vera mætt í vinnu áður en klukkan varð átta.

Vinnudagurinn til fjögur leið afar hratt enda nóg að gera. Ég komst þó alveg frá á réttum tíma og rétt áður en ég ók af stað heim hringdi ég í annan soninn. Þegar ég var komin fyrir utan hringdi ég í hinn soninn og þeir komu báðir út á endanum, annar mun fyrr en hinn ætlaði varla að nenna en kom samt. Leiðin lá í Rúmfatalagerinn við Korputorg með tvær sængur og kassakvittun. Ekkert mál var að breyta sængunum í kodda, sængurver og sokka og við fengum meira að segja inneignarnótu upp á rúmar fjögur þúsund að auki.

Eftir þetta ævintýri ákvað ég að bjóða sonunum á Pítuna áður en ég skilaði öðrum þeirra heim. Hinn ungi maðurinn kom með mér í smá innkaupaleiðangur áður en við skiluðum okkur heim. Þar beið okkar nýlagað jólakaffi. Frábærir ungir menn þessir synir mínir.

30.12.15

Rétt rúmlega sólarhringur eftir af 2015

Ég var vakna rétt fyrir hálfsjö í gærmorgun. Gaf mér þokkalega góðan tíma í morgunrútínuna og var svo rétt ófarin út að taka hálfátta vagninn við Sunnubúðina þegar bræðrunum var skilað heim eftir ævintýranæturspil. Ég fékk tíma fram að morgunkaffi til að halda áfram að telja varahlutalagerinn, en við erum tvær sem höfum hjálpast að við það. Eftir kaffi fór ég í móttöku hráefnis á framleiðsluvélinni og þar var ég þar til ég var leyst af í mat upp úr klukkan tólf. Þá fórum við tvær sem erum ekki skráðar í mötuneytismat og fengum okkur súpu- og grænmetishlaðborð á Kryddlegnum Hjörtum. Vorum báðar alsælar með allt í tengslum við staðinn og matinn og komum saddar og sælar aftur í vinnuna um eitt. Vinnudagurinn var liðinn fyrr en varði. Ég hringdi í einkabílsstjórann til að athuga hvort hann gæti og vildi sækja mig. Það kom í ljós að pilturinn átti eftir að fara í sturtu svo ég ákvað að labba heim í snjókomunni. Var hálftíma á leiðinni og leit út eins og snjókerling þegar ég kom heim en nýja úlpan sannaði gildi sitt. Þurfti að skipta um buxur en nokkru eftir að ég kom heim ákvað ég að skutla sölumanninum í vinnuna upp á Malarhöfða. Fór beint heim aftur og byrjaði á því að setja upp mjólk og grjón í "ris a la mandle graut". Sú eldamennska gekk ekki alveg eins vel og þegar ég framkvæmdi hana rétt fyrir jól en ég held að þetta hafi og muni sleppa til. Það kemur reyndar ekki í ljós fyrr en nokkru eftir kirkjuferð annaðkvöld.

29.12.15

Algert fyrirsagnarandleysi

Desember hefur verið frekar "götóttur" hvað bloggskrif varðar. Það er nú líka örugglega bara betra að vera ekkert endilega að streða við að setja inn færslu daglega, nema þá að það liggi þannig á manni, tíminn leyfi og skrifandinn svífi yfir, eða hvað? Við mæðgin gistum annars tvær nætur á Hellu og höfðum það frekar notalegt hjá foreldrum mínum. Ég hafði útbúið mig þannig til fararinnar að það var eins og ég ætlaði að vera viku. Tók með mér saumana, fjórar bækur, krossgátu-/sudokublöð, gönguskó, sundföt og eitthvað af öðrum flíkum svo eitthvað sé upptalið. Þótt ég passaði vel upp á að vera foreldrum mínum innan handar með alls konar stúss (bæði beðin og óumbeðið) þá var mjög góður tími inn á milli til að sinna hugðarefnum sínum. Fór reyndar ekki í neinn göngutúr, krossgátublöðin voru aldrei tekin upp og ekki heldur nálin en ég las tvær bækur, spilaði vist við hina, vafraði um á netinu, spjallaði og slakaði vel á.

Á sunnudaginn var lagt á morgunverðarhádegishlaðborð um eitt leytið. Ungu mennirnir drifu sig svo í sturtu hvor á eftir öðrum og um hálffjögur vorum við búin að taka okkur saman, þakka fyrir okkur og kveðja. Fyrst lá leiðin í Fossheiðina á Selfossi til "tvíburahálfforeldra" minna. Þar stoppuðum við í á annan tíma. Síðan skutlaði ég bræðrunum á Bakkann rétt fyrir sex og fór því Þrengslin í bæinn. Fékk bílastæði rétt fyrir utan hér heima og ég fór fjórar ferðir út í bíl eftir öllu dótinu. Hringdi í pabba rétt fyrir sjö til að láta hann vita að ég væri búin að skila mér heim. Kvöldið fór svo í sjónvarpsgláp og kósíheit. Ég var ekki farin að sofa þegar ungu mennirnir komu heim á ellefta tímanum.

Ég dreif mig á fætur rétt fyrir sex í gærmorgun til að byrja á því að skreppa í sund áður en ég mætti í vinnuna. Fór þar af leiðandi á milli þessara staða á lánsbílnum. Rétt áður en ég fór heim eftir vinnu frétti ég að til stæði að tvíburarnir færu á "spilakvöld alla nóttina" og yrðu sóttir um sjö. Ég hafði því matinn til um sex. Kvöldið fór í ýmislegt dundur, m.a. sjónvarpsgláp og lestur en ég var skriðin upp í um hálfellefu og sofnuð stuttu síðar.

27.12.15

Þriðji í jólum

Eru þá ekki 363 dagar til næstu jóla?  ;-) Þegar ég kom fram um hálfátta á aðfangadag var Davíð Steinn nýkominn fram. Ég hélt fyrst að hann ætlaði aðeins á prívatið og svo aftur inn í herbergi en hann var ákveðinn í að fara á fætur. Ég var á leiðinni í sund og bauð honum að koma með. Hann vildi heldur vera heima og vera búinn að laga kaffi þegar ég kæmi aftur. Ég skilaði mér heim, endurnærð úr sundinu, upp úr klukkan hálftíu og byrjaði auðvitað á því að drekka nýtt kaffi með syninum. Við mæðgin vorum alveg slök. Hinn sonurinn var reyndar svo slakur að ég neyddist til að vekja hann um eitt til að nálgast kókið út á svalir. Ég kaupi afar sjaldan gos en auðvitað keypti ég jólaöl handa bræðrunum og hluta af kókinu ætlaði ég að prófa að nota til að sjóða hamborgarahrygginn í. Undirbúningur fyrir kvöldið var á réttu róli en upp úr fjögur var ég búin að halda smá kjóla-tískusýningu fyrir synina áður en ég ákvað að fara í ljósri dragt í kirkjuna.

Í kirkjunni var byrjað að hita upp stuttu fyrir fimm og það kom í ljós að sóprönnur voru mun fleiri en ölturnar svo ég ákvað að syngja með altinum. Kann hann enn mun betur en sópraninn. Korter fyrir sex byrjuðu tvær konur að leika á hörpu og raddbönd. Aftansöngurinn byrjaði á slaginu sex þegar séra Pétur bað nöfnu sína og meðhjálpara að kveikja á öllum fimm kertunum í aðventukransinum og alla í kirkjunni að rísa á fætur og faðma næsta mann og óska gleðilegra jóla. Stundin var afar hátíðleg, nokkuð margt í kirkju og allt gekk eins og í sögu.

Var komin heim rétt rúmlega sjö. Davíð Steinn var þá búinn að setja upp kartöflur. Ég setti upp svuntu hitaði ofninn, smurði sinnepshúð á hrygginn og bjó til sósu. Oddur Smári lagði á borð. Maturinn heppnaðist vel, líka ris a la mandle grauturinn. Við hjálpuðumst öll að við að ganga frá og svo var sest inn í stofu og kíkt í pakkana og jólakortin lesin.

Allar sundlaugar eru lokaðar á jóladag. Ég var mætt í kirkju rétt fyrir eitt. Það hafði fækkað í sópran en fjölgað í alt svo ég söng með sópran nema á einum stað í "Bjarnatóninu". Einn kórfélagi minn fór í predikunarstólinn og flutti pistil sem nú er búið að setja inn í greinasafnið á heimasíðu safnaðarins. Það tók mig rúman hálftíma að taka mig til fyrir austurferð, synirnir voru tilbúnir á undan. Lögðum af stað rétt fyrir fjögur og þegar við komum austur á sjötta tímanum var tekið á móti okkur með fleiri jólabögglum og "síðdegiskaffi" en hangiketið var svo snætt um níu. Eftir að búið var að borða var sest að spilum og spiluð vist. Oddur Smári leysti afa sinn af þegar komið var að því að taka úr uppþvottavélinni.

24.12.15

Aðfangadagur

Byrjaði fjóra síðustu morgna, þessi meðtalinn, á því að fara í sund. Mánudag til og með miðvikudag var ég mætt upp úr hálfsjö, alltaf byrjuð að synda áður en klukkan var orðin sjö. Á mánudagsmorguninn þóttist ég vera frekar tímalega í því en ég þurfti að byrja á því að leita að bílnum þar sem bræðurnir höfðu ekki skilað sér heim af spilakvöldinu fyrr en einhvern tímann um nóttina. Fann bílinn í Blönduhlíðinni. Hafði ekki eins rúman tíma í sundið og oft áður þar sem ég átti að vera mætt í vinnu um átta. Synti þó í uþb tuttugu mínútur og ákvað sem betur fer að kíkja aðeins í einn heita pottinn. Þar fann ég Lenu og ég náði að fara með henni eina ferð í kalda pottinn. Vinnudagurinn leið mjög hratt. Ég ákvað að skreppa á Kringlusafnið strax eftir vinnu og skila tveimur af fjórum bókum, framlengja hinum tveimur og tók fjórar með mér heim. Ein af þeim bókum er með 14 daga skilafrest. Ákvað svo að skutla Oddi í vinnuna sína áður en ég fór heim. Var eitthvað að spá í að drífa síðustu innkaupin af um kvöldið og þá jafnvel sækja Odd aftur en í staðinn var ég farin að sofa upp úr klukkan tíu.

Á þriðjudagsmorguninn þurfti ég að byrja á því að skafa lánsbílinn og það bauð upp á nokkuð góða líkamsrækt því það var frekar þykkt og fast á sumum rúðum. Var með bílinn í gangi á meðan svo þetta lagaðist þegar leið á. Var byrjuð að synda tíu mínútum fyrir sjö og þegar ég var að klára mínar ferðir varð ég vör við Lenu. Hún fór aðeins eina ferð en var nýkomin úr Laugum, ræktinni. Við náðum tveimur ferðum í kalda pottinn saman og einni í sjópottinn áður en ég þurfti að rjúka í vinnuna. Síðasti hluti vinnudagsins var notaður í jólapakka stemmingu kortadeildarinnar en fyrir ca sex vikum síðan voru nöfnin okkar sett í hatt og við drógum einn miða hvert. Ekki þurfti að draga nema einu sinni. Þegar allir voru komnir, biðu veglegar veitingar sem tvær úr deildinni höfðu séð um að taka saman og keyra inn á vagni. En fyrst voru pakkarnir opnaðir, einn í einu og svo giskað eða reynt að giska á hver væri sá sem hafði gefið manni. Mér tókst að giska rétt í fyrsta, fékk mjög flott, rautt höfuð handklæði sem mun nýtast mér í sundferðunum mínum framvegis. Strax eftir vinnu skrapp ég í Hagkaup í Skeifunni.

Í gær átti ég frí. Hafði ætlað mér að skreppa austur og fara í skötu með pabba. Ég komst í sundið rétt eftir að opnaði, hitti Lenu og gaf mér góðan tíma í rútínuna. En við það að slaka aðeins á þá helltist yfir mig einhver þreyta sem varð til þess að ég ákvað að taka því frekar rólega. Pabbi tók þeim fréttum bara vel sagði að þau hefðu keypt sér saltfisk ef við mæðgin myndum ekki koma. Á fjórða tímanum tók ég strætó til norsku esperanto vinkonu minnar. Sigurrós var þegar komin en við vorum bara þrjár í þessum notalega hittingi. Ég þáði meira að segja hálft rauðvínsglas, og ég sem drekk aldrei rauðvín. Við skiptumst líka á að finna lög með hinum og þessum flytjendum á YouTube og spila. Stoppaði aðeins lengur en ég ætlaði mér en var þó komin heim fyrir sjö.

21.12.15

369 dagar til jóla 2016

Ég var ákveðin í að taka gærdaginn nokkuð rólega, sérstaklega morguninn. Sleppti sundinu en var þó vöknuð fyrir átta. Tók það til bragðs að reyna að kúra aðeins lengur. Þegar það virkaði ekki nógu vel ákvað ég að grípa bók í hönd og það virkaði miklu betur. Guggnaði á því að fara gangandi í Norræna húsið. Ýtti aðeins við einkabílsstjóranum rétt til að segja honum að ég færi á lánsbílnum en þeir bræður gætu fengið afnot af honum eftir klukkan þrjú. Í Norræna húsinu hitti ég Inger og Sigurrós. Við fylgdumst með þegar gluggi númer 20 var opnaður og fylgdumst svo með viðburðinum, ungri stúlku sem lék á rafgítar og söng. Því miður tók ég ekki eftir nafninu á stúlkunni en mér fannst gjörningurinn ágætur að mestu leyti, varð amk sultuslök við að hlusta á mússík og texta.

Næst lá leiðin í Fríkirkjuna við Reykjavíkurtjörn. Sigurrós geymdi bílinn sinn við Norræna húsið og þær stöllur fengu far með mér. Við vorum mættar það snemma á næsta viðburð að það tóku nýbökuð brúðhjón á móti okkur á kirkjutröppunum um hálftvö, nema að um einhvers konar gjörning hafi verið að ræða. Klukkan tvö hófst heilunarmessa sem var í samstarfi við prest og starfsfólk kirkjunnar annars vegar og sálarrannsóknarfélagði og kærleikssetrið hins vegar. Ku þetta hafa verið tólfta árið í röð sem svona messa er haldin í Fríkirkjunni en ég var að mæta í fyrsta skipti. Þarna slakaði ég enn betur á. Um þrjú kvaddi ég Inger og Sigurrós og fór beint heim. Tvíburarnir fengu bílinn til að fara á "spilakvöld" og voru farnir upp úr hálffjögur.

Ég horfði á norsku stelpurnar vinna enn einn titilinn undir sjórn Íslendingsins (Selfyssingsins) Þóris Hergeirssonar, las og dundaði mér við ýmislegt annað en heimilisskyldurnar. Stuttu fyrir átta sótti tvíburahálfsystir mín mig til að fara með sér á tónleika með þessum í þessari kirkju. Sérlega vel heppnaðir og skemmtilegir tónleikar það.

20.12.15

Fimm dögum síðar

Ritletin og smá tölvuvesen tóku af mér völdin síðustu daga og það eru klárlega bæði kostir og gallar við það.  Alla virku dagana í síðustu viku var ég mætt til vinnu rétt fyrir klukkan sex á morgnana. Þar af leiðandi notaði ég lánsbílinn til að ferja mig á milli þar sem strætó er ekki byrjaður að ganga svona snemma. Eftir vinnu á þriðjudaginn gerði ég aðra tilraun til að fara í pósthúsið við Síðumúla en leist ekkert betur á aðstæður fremur en daginn áður. Ákvað því að fara í Kringluna og hefði líklega átt að fara þangað strax því þar er komið upp árlegt jólapósthús þar sem bæði er hægt að kaupa frímerki og senda af stað kort og pakka ef e-r eru.

Þriggja daga strætókortið gilti frá og með þessum þriðjudegi en ég eftirlét Oddi Smára að nýta það til að komast í og úr sinni vinnu. Hann lagði af stað upp úr klukkan fimm. Rétt fyrir sex ákvað ég að fara labbandi á matstaðinn Kryddlegin Hjörtu þar sem ég átti stefnumót við tvær vinkonur mínar, "föðursystur"  og "tvíburahálfsystur". Sú fyrrnefnda hringdi rétt áður en ég lagði af stað og bauðst til þess að kippa mér með. Ég bað frekar um að fá far heim eftir hittinginn. Það var reyndar örlítið erfitt að labba fyrsta hlutann af leiðinni þar sem ég ákvað að skilja negldu skóna eftir heima. Að vísu var ekki hálkt, búið að sand og/eða saltbera helstu gangstéttir og stíga sem ekki voru. Ég komst heil alla leið og var fyrst á staðinn. Var að prófa þennan stað í fyrsta skipti og varð alveg heilluð. Notalegt andrúmsloft, góður matur, góð þjónusta og alls ekkert svo dýrt. Kvöldið var auðvitað alltof fljótt að líða.

Fór sund strax eftir vinnu á miðvikudaginn og líka á fimmtudaginn. Mætti á síðustu kóræfinguna fyrir jól á miðvikudeginum. Kláraði öll jólakortaskrif á fimmtudagskvöldið. Á föstudaginn fékk ég að hætta stuttu fyrir klukkan eitt og fór fyrst með gjöf frá KÓSÍ til einnar úr kórnum sem er nýlega bökuð móðir og gifti sig í sumar. Gat ekki stoppað neitt (ætlaði þó ekki að stoppa lengi) því um það leyti sem ég kom til hennar var hringt frá tannlækninum og ég spurð hvort ég gæti komið hálftíma fyrr, þ.e. um hálftvö í stað tvö. Gaf mér smá tíma til að fá að lyfta mánaðargömlum ungum dreng og spjalla stuttlega við mömmuna áður en ég kvaddi og rauk í burtu. Í tannlæknastólnum var ég í fimm korter þar sem verið var að rótfylla tönnina sem var athuguð betur fyrir ca tveimur vikum. Það sást nefnilega ekki alveg á myndum sem teknar voru í eftirliti hjá tanna í síðasta mánuði að skemmdin var mun dýpri svo það borgaði sig að rótfylla.

Í gærmorgun var ég mætt fyrir utan Laugardalslaugina rétt í þann mund sem opnaði klukkan átta. Tvær-þrjár brautir af átta voru fráteknar og í notkun vegna sundæfinga. Ég synti uþb tuttugu mínútur, áður en ég fór í sjópottinn og gufu. Svo virtist sem sá kaldi væri lokaður en þar sem ég sá til einhverra nota hann engu að síður ákvað ég að fara í sturtu eftir gufuna og dýfa mér smástund í þann kalda á leiðinni upp úr. Var komin í Kristu Quest um hálftíu. Afhenti klipparanum mínum jólakort til hans, starfsfólksins og fjölskyldna þeirra og fékk svo jólaklippinguna, fimm vikum eftir að ég var síðast í stólnum. Áður en ég fór heim kom ég við á annarri hárgreiðslustofu og afhenti eigandanum jólakort um leið og ég óskaði honum til hamingju með daginn. Skrapp að lokum í Krónuna við Nóatún og þegar ég kom heim hellti ég upp á könnuna og ákvað að vekja syni mína til að drekka kaffi mér til samlætis og setjast niður í smá mæðginaspjall. Þeir tóku þessu uppátæki mínu bara vel.

15.12.15

Morgunhani

Vekjaraklukkan lét mig vita þegar hún var tíu mínútur gengin í sex í gærmorgun. Ég var frekar fljót að átta mig og fyrr en varði var ég klædd og komin á ról til að sinna morgunrútinunni. Þar sem strætó er ekki byrjaður að ganga svona árla morguns fór ég í vinnuna á lánsbílnum. Öryggisvörðinn, sem veifaði mér úr "búrinu", þekkti ég en hann var einu sinni í kirkjukórnum. Klukkan eitt var haldinn örfundur á deildinni sem var reyndar aðeins lengri en til stóð. Ég og sú sem mætti um leið og ég máttum svo fara strax eftir fundinn.

Keyrði framhjá pósthúsinu við Síðumúla en ákvað að sleppa því að leita að stæði og fara í röðina. Þess í stað fór ég alla leið upp í Mjódd. Keypti reikningabók í Eymundsson fyrir soninn sem er í verktakasímasöluvinnunni, keypti níu miða strætókort til að skipta milli brætranna og einnig þriggja daga kort sem gildir frá og með deginum í dag og til og með fimmtudagsins handa sama syni og fékk reikningabókina en ég lagði ekki í að fara í biðröðina á pósthúsinu í Mjóddinni.

Kom heim um hálfþrjú. Pabbi og mamma voru fyrir utan tæpum tveimur tímum seinna en mamma treysti sér ekki í tröppurnar upp í íbúð til mín svo við mæðgin skruppum öll út til að faðma þau. Þetta var afar stuttur hittingur en hefði líklega ekki orðið nema vegna þess að foreldrar mínir þurftu að koma á okkur pökkum.

Ákvað að keyra Odd Smára í vinnuna og dreif mig í sund á heimleiðinni. Fór að venju í Laugardalslaugina. Synti í þrjú korter, fór aðeins einu sinni í kalda pottinn í tæpar þrjár mínútur, nokkrar mínútur í sjópottinn og einhverjar mínútur í gufuna áður en ég fór aftur heim. Skrifaði nokkur jólakort og eitt auka bréf með smá sendingu til ungrar konu hverrar mömmu ég þekkti.

14.12.15

"Milkiwhale" í Norræna húsinu í gær

Þar sem ég fór afar seint að sofa aðfaranótt gærdagsins, eitthvað langt gengin í þrjú ákvað ég að taka mér frí frá morgunsundinu á sunnudagsmorgni. Það fór nú svo að ég fór ekkert í sund í gær. Var mætt til norsku esperanto vinkonu minnar um ellefu og hún minntist strax á að sig langaði til að plata mig með sér á jóladagatalið í Norræna húsinu kl. 12:34. Ég var alveg til í þetta og rétt fyrir tólf löbbuðum við af stað heiman frá henni og vorum tæpan hálftíma á leiðinni. Fyrirfram vissum við ekkert á hvaða viðburð við vorum að fara. Það kom ekki í ljós fyrr en gluggi númer 13 var opnaður og þar stóð Milkywhale. Um var að ræða íslenska tveggja manna hljómsveit, plötsnúð og dansandi söngkonu sem söng alveg ný og eldri lög á ensku næstu tuttugu mínúturnar eða svo. Þetta var bara gaman. Við stöllur löbbuðum sömu leið til baka, þ.e. meðfram Hringbrautinni, og þegar við komum aftur á Sólvallagötuna kvaddi ég og dreif mig í Krónuleiðangur út á Granda. Þegar ég kom heim lét ég Odd Smára vita og hann kom út og hjálpaði mér inn með vörurnar og gekk frá þeim. Seinna um daginn nýtti hann síðasta gildisdag rauða kortsins og fór til pabba síns en Davíð Steinn var búinn að ráðstafa sér í annað verkefni. Ég lauk við danska og íslenska jólabréfið sem bæði fara til Danmerkur. Með íslenska jólabréfinu laumaði ég auka jólakorti. Horfði á Landann og Downton Abby en vann svo í því að koma mér í bælið því framundan var morgunvaktarvika og þá vakna ég alltaf um fimm.

13.12.15

Hvorki forvitin né feimin

Viðkvæmir sem "slysast" inn á þessa síðu eru varaðir við að textinn sem á eftir fer gæti innihaldið "óviðeigandi" orð sem eru ekki notuð á hverjum degi. Held þó sjálf að flestir ættu að þola og þora að lesa pistil minn um gærdaginn.

Ég var mjög lengi á báðum áttum hvort ég ætti að skella mér í sund í gærmorgun. Framkallaðar blæðingar voru um það bil að hefjast og ég man ekki til þess að ég hafi farið í sund í svoleiðis ástandi. Var vöknuð á áttunda tímanum en klæddi mig ekki nærri strax. Slakaði vel á inn í morguninn en þegar ég var komin á fætur kveikti ég á tölvunni og leitaði að upplýsingum um sund og blæðingar. Vissi reyndar að það á alveg að vera hægt að stunda sundið ef notaður er þar til gerður tappi. Ég á til svoleiðis og þegar var komið undir hádegi ákvað ég að taka til sunddótið og drífa mig af stað.

Lánsbíllinn var hrímaður allan hringinn en það tók ekki langa stund að skafa allar rúður og ljós. Mikið var um bíla í Laugardalnum en ég var svo heppin að fá stæði og það á frekar góðum stað. Einn sjúkrabíll var fyrir framan aðalinnganginn og annar var að renna að um það leyti sem ég var að ganga inn. Ein af konunum sem vinna þarna og ég er nýbúin að fá að vita að er nafna mín (Önnu-nafna mín) tók á móti sjúkraflutningamönnunum sem voru að koma og sagði að þeir ættu að fara inn með börurnar. Ég sá þessar börur á ganginum fyrir framan búningsklefana en spáði hvorki í frekari staðsetningu né velti því fyrir mér hvað væri í gangi. Ég var bara ákveðin í að vera ekki fyrir og hugsaði um það eitt að finna mér skáp, afklæðast og skreppa afsíðist til að koma tappanum fyrir. Þegar ég kom fram aftur, haldandi á handklæði vöfðu utanum um sjampóbrúsa, tvískiptu sundfötunum og sundgleraugunum áttaði ég mig á að börurnar voru á gólfinu fyrir framan sturturnar og það voru fjórir sjúkraflutningamenn að sinna þessu tilfelli. Og ég nakin (og reyndar fleiri konur og stúlkur) á leið í sturtu. Ég setti handklæðið ofarlega í geymslurekkann og fór í sturturnar sem eru strax til vinstri og eru aðeins við einn vegg. Þaðan var ekki hægt að vera að glápa á hvað var að gerast við börurnar. Ég tek það fram að ég gleymdi alveg að vera feimin þessa stuttu stund sem ég valsaði inn að sturtunum. Synti stanslaust í um 50 mín, skrapp í sjópottinn (sá kaldi var lokaður vegna loftkulda), aðeins í gufuna og settist svo um stund á bekk í "sólbað" áður en ég fór upp úr og heim.

Um miðjan dag lánaði ég sonunum bílinn til að þeir kæmust báðir á "spilakvöld" í Kópavogi. Hugsaði að það væri smá tími síðan "einkabílstjórinn" hefði fengið að taka í stýrið. Ég dundaði við ýmislegt heimavið. M.a. skrifaði ég fyrsta jólabréfið af þremur (enska bréfið), jólakort með því, horfði á beina útsendingu frá því þegar dregið var í riðlanana á EM-2016 og horfði reyndar á imbann, 3 myndir, allt kvöldið og fram á nótt. Strákarnir komu heim um tíu en hurfu fljótlega inn í sín herbergi.

12.12.15

Engin sundferð í gær

Nýliðnir fimm virku dagar urðu aðeins öðruvísi en til stóð. Vaktin mín var fyrirfram ákveðin frá 13-19 með smá undantekningum. Var búin að segja frá því að á mánudaginn var vinnudagurinn frekar stuttur vegna veðurs. Á þriðjudaginn vann ég "rétta" vakt en þá var jafnframt tekin ákvörðun um að framlengja vinnu til klukkan 21:00 út vikuna, frá og með miðvikudeginum. Fjóra virka morgna af fimm fór ég í sund þar sem ég gaf mér góðan tíma í sundið (ca. 50 mín plús mínus 5), potta og gufuferðir. Frá miðvikudeginum fór ég þar að auki gangandi í vinnuna og gerði ég mér það til gamans að stilla "rekjara" á mig í nýja símanum.

Þegar ég var að ljúka vinnu um níu á miðvikudagskvöldið hringdi ein nafna mín og frænka í mig, þá stödd fyrir utan heima hjá mér (og þar var enginn heima). Hún og maðurinn hennar voru að sækja til mín pönnuna sem var notuð í að steikja laufabrauðið um daginn. Pannan var komin út í lánsbílinn en ég var nýbúin að segja við þá sem var með mér á vaktinni að ég yrði líklega að fara að drífa í að skrifa jólakortin og samnýta ferðina með jólakortið til frænku minnar til að skila pönnunni í leiðinni. Frænka mín sótti mig í vinnuna þetta kvöld og ég gat því skilað henni pönnunni í leiðinni.

Síðustu tveir vinnudagarnir voru langir og öðruvísi, fimmtudagurinn ívið lengri en minna hægt að gera. Ég komst heim til mín stuttu fyrir miðnætti en það hefði líklega ekki náðst nema vegna þess að næsti yfirmaður skutlaði mér heim. Í gær komst ég ekkert í sund því ég fann að það var ekkert skynsamlegt við það að rífa sig of snemma á fætur. Ég var samt komin á ról um níu. Skrapp aðeins út í Sunnubúð um ellefu og labbaði af stað í vinnuna hálftíma síðar. Var mætt þangað klukkan tólf og vinnubrögðin við hluta af daglegu verkefnunum voru allt öðru vísi en venjulega en hafa þó verið "notuð" áður, bara afar, afar sjaldan. Eftir allt daglegt og fljótlega eftir að hinar vaktirnar voru farnar vorum við tvær (sem báðar mættum um tólf) áfram til klukkan níu og létum vélina ganga allan tímann fyrir utan hálftíma þegar við fengum okkur kvöldmat. Sú sem var með mér á vaktinni býr í Garðabænum og hún bauðst til að skutla mér heim sem ég þáði með þökkum.

Heima hitti ég fyrir annan unga manninn, soninn sem er tilvonandi rafeindavirki. Sá ungi maður var farinn til vinar síns þegar hinn ungi maðurinn kom heim úr vinnunni um ellefu.

9.12.15

Kaldur pottur og sjópottur í gærmorgun

Var hálftíma seinna á ferðinni í laugina í gærmorgun heldur en á mánudagsmorguninn. Það kom til af því að tilvonandi rafeindavirki hafði fengið misvísandi skilaboð um prófatíma. Ein tilkynningin var sú að prófið ætti að frestast um hálftíma og byrja klukkan níu en hið rétta var að prófið frestaðist ekki neitt. Skutlaði honum upp í Tækniskóla við Hallgrímskirkju og var hann líklega tuttugu mínútum of seinn en fékk þó að taka prófið.  Ég var byrjuð að synda fimm mínútum yfir níu og það hlakkaði heldur betur í mér því ég hafði tekið eftir því að kaldi potturinn var fullur af vatni og opinn. Synti því aðeins í um þrjú korter fór tvisvar í þann kalda einu sinni í heitan pott og sá svo að það var líka búið að opna sjópottinn svo ég nýtti mér það. Endaði svo á smá gufu og útisetu áður en ég skrapp heim. Hinn sonurinn "lánaði" mér rauða kortið í hádeginu og sótti það til mín í vinnuna eftir að hann var búinn í prófi um miðjan dag. Hann var svo farinn í sína vinnu er ég skilaði mér aftur heim eftir mína vinnu.

8.12.15

Stuttur vinnudagur í gær vegna veðurs

Var pínu löt af stað í gærmorgun en það kom öðrum syninum til góða. Í stað þess að mæta í Laugardalslaugina strax klukkan hálfsjö mætti ég tæpum tveimur tímum síðar eftir að hafa skutlað Davíð Steini upp í Tækniskóla við Hallgrímskirkju þar sem hann átti að mæta í próf klukkan hálfníu. Ég var byrjuð að synda þegar klukkan var 08:35 og hætti ekki fyrr en 55 mínútum síðar. Þá fór ég í smástund í gufu og sat svo aðeins úti áður en ég dreif mig aftur upp úr og heim. Um ellefu leytið vakti ég hinn soninn til að athuga hvort hann væri skráður í vinnu. Þá hafði hann nýlega haft spurnir af því að kvöldvaktin yrði felld niður vegna slæmrara veðurspár. Ég fékk því rauða kortið og var mætt í mína vinnu um hálfeitt. Fyrsta sem ég frétti er ég mætti á staðinn var að það voru fyrirmæli um að hætta framleiðslu um þrjú og koma sér heim. Eftir stuttan fund fór ég og sú sem var á síðdegisvakt með mér inn í framleiðslurýmið og þar vorum við til klukkan langt gengin í þrjú. Vorum búnar að ganga frá deildinni um þrjú og þau okkar sem voru ekki þegar farin heim af deildinni yfirgáfu svæðið skömmu síðar. Ég rétt missti af leið 13 þar sem ég fann svipað lykilkort og við notum í vinnunni minni rétt við strætóskýlið og ákvað að afhenda þeim sem sér um hýsingar og móttökuna fyrir RB á K1 þetta spjald til að finna út úr því hver ætti það. Kom heim fyrir klukkan fjögur og notaði tímann fyrst til að horfa á Landann og Downton Abbey frá því kvöldið áður. Útbjó kvöldmat á sjöunda tímanum, horfði á fréttir en var löt að öðru leyti, nennti ekki einu sinni að lesa og skreið upp í rúm löngu fyrir miðnætti.

7.12.15

Magnað aðventukvöld í kirkju óháða safnaðarins í gærkvöldi

Það hurfu nokkrir dagar eitthvað út í buskann án þess að ég fengi rönd við reist enda afar ósennilegt að nokkur mannelgur máttur hafi vald á að stoppa tímann í að æða svona hratt áfram. Á fimmtudaginn átti ég ekki að mæta í vinnu fyrr en um hálfeitt svo ég skellti mér í sund strax upp úr klukkan hálfsjö. Þar sem ég hafði ekki farið í sund síðan á mánudagsmorgun ætlaði ég eiginlega ekki að geta hætt að synda. Tapaði tölunum á ferðunum en ég synti stanslaust í tæpar sextíu mínútur. Eftir sundið skrapp ég heim með sunddótið, hellti upp á smá kaffi en staldraði svo sem ekki lengi við því ég hafði hug á því að kíkja aðeins í Kringluna áður en ég átti að mæta til vinnu og lét ég verða af því. Oddur Smári var með rauða kortið og ég ákvað að vera á lánsbílnum. Fékk ekkert stæði á neðra plani Seðlabankans en það var líka viðbúið. Hafði gott af því að ganga smá spöl frá planinu rétt við bensínstöðina. Sex og hálfum tíma seinna þurfti ég að sópa aðeins af lánsbílnum en komst klakklaust heim og fékk ágætis stæði í götunni. Oddur var farinn í vinnuna en hinn ungi maðurinn var búin að hafa til kvöldmatinn og beið með að borða þar til ég skilaði mér heim um hálfátta.

Föstudagurinn var eilítið stermbinn, vinnulega séð (kannski vegna þess að þetta var síðasti vinnudagur afar viðburðarríkrar vinnuviku), en ég kláraði vinnutímann milli 7:45 og 15:55. Fékk leyfi til að rjúka út rétt fyrir fjögur til að komast heim sem fyrst og afhenda Oddi strætókortið. Á laugardagsmorguninn var ég mætt í Laugardalinn um hálfníu og synti jafnlengi og tveim morgnum fyrr. Skrapp aftur í Kringluna á leiðinni heim. Um eitt leytið skutlaði ég bræðrunum í afmælisveislu í Kópavoginn og sá til þess að sá þeirra sem ekki var með rauða kortið væri með fyrir strætófargjaldi heim. Um þrjú var ég mætt í kirkju óháða safnaðarins þar sem ég hitti fyrir eina sem er líka í stjórninni og sú er reyndar formaður KÓSÍ-kórsins. Það tók okkur tæpa klukkustund að setja upp og skreyta jólatréð í kirkjunni og raða upp borðum og stólum í neðri safnaðarsalnum. Skrapp í Krónuna við Nóatún og verslaði inn áður en ég fór aftur heim.

Ég var mætt á svipuðum tíma í laugina í gærmorgun og á laugardagsmorguninn. Synti einnig jafn lengi. Skrapp svo heim í sutta stund m.a. til að ganga frá sunddótinu og ná í esperanto-bækurnar. Var komin til esperanto vinkonu minnar um ellefu og við áttu notadrjúga esperantostund saman. Fór beint heim á eftir og slakaði á fyrir kvöldið. Stuttu fyrir fimm klæddi ég mig í sparileg föt, greip með mér nótur og aðra skó og var svo mætt í kirkjuna mína ca korter yfir. Þangað voru að tínast til fullt af öðru kórfólki bæði úr KÓSÍ (mínum kór), Kyrjunum og Stefni og ræðumaður og einsöngvari kvöldsins, Bergþór Pálsson, mætti ca klukkustund síðar til að æfa sitt prógramm. Aðventustundin sjálf byrjaði klukkan átta, full kirkja og þegar allir taldir saman náðum við tölunni 252. Stundin heppnaðist afar vel og ræðumaður kvöldsins fór á kostum. Hann hélt minni athygli allan tímann og ég er nokkuð viss um að hann talaði í uþb tuttugu mínútur (var ekki með neina tímavél á mér þó). Á eftir bauð safnaðarstjórnin, sem var öll mætt, upp á kaffi, öl og smákökusmakk á báðum hæðum. Klukkan var byrjuð að ganga ellefu þegar ég skilaði mér svo heim, afar sátt með alla helgina.

3.12.15

Smávegis um gærdaginn

Ég vaknaði af sjálfsdáðum fyrir klukkan hálfsex í gærmorgun amk hálftíma áður en ég hafði stillt klukkuna. Hugurinn stefndi í Laugardalinn og ég klæddi mig, fékk mér að borða og tók til sunddótið, vinnudótið og kórdótið, greip bíllyklana og dreif mig út. Ég var ekki lengi að ákveða að það borgaði sig ekkert að reyna að "finna" lánsbílinn, leyfa honum að kúra áfram undir þykku snjóteppi í stæðinu fyrir framan innkeyrsluna og fara aftur inn og kúra aðeins lengur sjálf.

Fór svo með hálfátta strætisvagninum í vinnuna. Þrátt fyrir krefjandi verkefni og eril í vinnunni fékk ég leyfi til að fara aðeins fyrr svo ég náði vagninum heim rétt fyrir fjögur. Ungi sölumaðurinn fékk hjá mér strætókortið og rétti mér kúst í staðinn. Vel gekk að sópa af bílnum og að því loknu keyrði ég einn hring og lagði í annað stæði. Hafði ágætis tíma til að slaka á heima um stund áður en ég bílaðist á kóræfingu þar sem æft var fyrir komandi aðventukvöld sem og jólamessurnar. Fékk svo gott stæði stutt frá nr. 21 þegar ég kom heim aftur.

2.12.15

Vikan hálfnuð

Ég tók strætó, leið 13, fyrir utan Sunnubúðina um hálfátta í gærmorgun. Vinnudagurinn var erilsamur og fullt af "auka"-verkefnum sem þurfti að leysa. Dagurinn leið líka frekar hratt. Um hálffimm tók ég leið 11 frá Hörpu og fór í skýlinu á horninu á Háteigsvegi við Stakkahlíð. Var því mætt á réttum tíma á reglubundinn safnaðarstjórnarfund. Þrátt fyrir fannfergi var ekki mikið um forföll á fundinn, aðeins organistinn og varaformaðurinn komust ekki. Eftir góðan fund fékk ég far heim með formanni stjórnarinnar sem líka skutlaði ritaranum heim enda var þetta nokkurn veginn á hans leið heim til sín. Davíð Steinn var að sinna verkefnavinnu upp í skóla en við Oddur Smári fengum okkur afganginn af kvöldmatnum frá því á mánudagskvöldið, ofnbakaðar kjúklingabringur á grænmeti. Seinna horfðum við á Castle en ég var komin í háttinn um hálfellefu.

1.12.15

Fullveldisdagurinn

Þá er síðasti mánuður ársins hafinn og mér segir svo hugur um að hann verði horfinn í aldanna skaut með þessu herrans ári eftir ótrúlega stuttan tíma. En aðeins um síðustu tvo daga.

Þrátt fyrir að fara nokkuð seint að sofa aðfaranótt sunnudagsins var ég komin á fætur um sjö. Eldri systurdóttir mín hafði fengið að gista hjá vinkonu sinni. Systir mín, mágur og yngri systurdóttir voru komin á fætur og þau fóru fljótlega í Skautahöll Reykjavíkur. Ég fékk mér morgunhressingu, tók til sunddótið mitt og var að sópa af lánsbílnum ca tuttugu mínútum fyrir átta. Fyrsti viðkomustaður var áðurnefnd skautahöll. Mætti þangað um það bil sem fyrri hópurinn úr keppnishóp 12-B byrjaði að hita upp. Systurdóttir mín var númer tvö í keppnisröðinni í þeim hóp. Ég horfði á allara 12 stúlkurnar, báða hópana, og skráði niður stigaskorið hjá hverri og einni. Bríet sem er ein af yngstu keppendunum í hópnum skoraði 22,15 þrátt fyrir að detta en hún varð í 4. sæti.

Var mætt í Laugardalslaugina um hálftíu. Nú var búið að loka kalda pottinum en ég synti þá bara þeim mun lengur. Ekki var heldur hægt að fara í sjópottinn sem er í viðgerð. Afgangurinn af sunnudeginum fór í ýmis konar dútl. Norðan fjölskyldan fór í heimsókn austur á Hellu og gisti þar. Til stóð að þau yrðu svo aftur eina nótt í viðbót hér hjá mér en þar sem spáin var slæm flýttu þau plönunum og voru víst komin aftur norður um miðnættið í gærkvöldi.

Ég náði því ekkert að hitta þau aftur. Fór í morgunsund strax upp úr klukkan hálfsjö í gærmorgun. Hafði nægan tíma. Lena mætti líka en þar sem kaldi potturinn var lokaður vorum við næstum því farnar að velta okkur upp úr snjónum. Hafði tíma til að skutla sunddótinu heim áður en ég mætti í tíma til tannlæknis sem skoðaði skemmd á einum stað. Nánari skoðun á skemmdinni sem sást í myndatöku í síðasta eftirliti leiddi í ljós að hún var það dúp að það borgar sig að rótarfylla tönnina. Skrýtið að ég skuli ekki hafa verið farin að finna fyrir neinni tannpínu. En ég fékk bráðabirgðafyllingu og tíma aftur eftir uþb tvær vikur. Skrapp heim, fékk mér að borða og hringdi austur. Hafði lánað öðrum syninum rauða kortið í strætó svo ég fór á bílnum í vinnuna og var mætt þangað um hálfeitt og kom heim aftur um átta um kvöldið. Þá var sá sem fékk strætókortið farin í vinnuna sína en hinn ungi maðurinn var steinsofnaður og svaf hann víst til klukkan sjö í morgun.

29.11.15

Fimm dögum síðar

Ekkert varð úr bakstri fyrr en tveimur kvöldum eftir síðustu færslu, á fimmtudagskvöldið var. Ég skutlaði Oddi Smára upp á Malarhöfða rétt fyrir sex það síðdegi. Fékk hinn unga manninn til að pakka inn jólagjöfunum til fjölskyldunnar sem býr á Akureyri og bakaði svo um það bil níutíu lakkrístoppa. Sótti Odd aftur um tíu.

Á föstudagsmorguninn sópaði ég af bílnum og var mætt í Laugardalinn rétt áður en laugin opnaði um hálfsjö. Byrjaði á því að synda og var búin að fara nokkrar ferðir þegar ég sá að Lena var mætt. Við náðum þremur ferðum saman í kalda pottinn en ég fór beint upp úr eftir þriðju ferðina og það var svolítið sérstakt að koma ísköld inn og fara í sturtu. Var annars á lánsbílnum þennan morgun þar sem ég átti tíma hjá tannlækni um þrjú. Sá tími féll reyndar niður og var færður til mánudags en ég vissi ekki af því fyrr en fór að líða á morguninn.

Helga systir og fjölskylda mínus tíkin Cara komu til mín um tíu þetta kvöld. Þá var ég búin að baka uppáhalds smákökusortina hans Davíðs Steins, eggjahvítukökur með kornfleks, suðusúkkulaði og kókosmjöli. Það urðu ekki nema 48 kökur, næstum því helmingi færri en lakkrístopparnir. Smá skandall það en ég verð þá bara að hræra í aðra lotu af þessari tegund þegar hún klárast.

Það hafði kyngt niður miklum snjó aðfaranótt laugardagsins, 32 cm jafnfallin og hefur ekki snjóað svona mikið síðan árið 1979. Mágur minn skutlaði systur minni í Skautahöll Reykjavíkur fyrir klukkan átta. Ég fór út rétt á eftir og sópaði af lánsbílnum og dreif mig í sund. Fékk ekkert stæði rétt við innganginn að laugardalslauginni en það voru næg stæði þeim megin sem líkamsræktarstöðin er. Fékk þá bara smá göngutúr og skrefamælingu út úr því. Synti í uþb þrjú korter og fór þrisvar í kalda pottinn og þrisvar í pottinn sem er 42 gráður. Sjópotturinn er búinn að vera lokaður vegna viðgerða í nokkra daga svo sundrútínan hefur aðeins breyst.

Eftir sundið fór ég aftur heim. Fljótlega eftir hádegi skrapp ég á bókasafnið Kringlunni til að skila tveimur bókum og notaði tækifærið og verslaði aðeins inn í Bónus, aldrei þessu vant. Systir mín og fjölskylda voru að erindast og snattast í bænum fram á kvöld. Ég steikti slátur og bjó til sæta kartöflumús með handa okkur mæðginum. Um hálfníu sótti Brynja vinkona mín mig og við fórum saman í hið árlega tilhleypingateiti til séra Péturs þar sem kirkjuáramótin voru skotin upp um miðnætti.

24.11.15

Á eftir að ákveða mig

Ég er að bræða það með mér að vinda mér loksins í smákökubakstur. Á meðan ég reyni að ákveða mig nota ég tækifærið og punkta aðeins niður gærdaginn.

Var vöknuð aðeins á undan vekjaraklukkunni sem átti að vekja mig rétt fyrir sjö. Morgunrútínan gekk vel og ég náði að kveikja aðeins á tölvunni áður en ég þurfti að mæta á stoppistöðina ca 17 mínútum fyrir átta. Í vinnunni var nóg að gera enda leið dagurinn afar hratt eftir því. Kom heim aftur um hálffimm. Hafði kvöldmatinn tilbúinn rétt fyrir sex og fór svo í sund 17. daginn í röð. Veit ekkert hversu mikið ég synti nema ég synti stanslaust í tæpar fjörutíu mínútur áður en ég skellti mér í kalda pottinn. Fór aðeins tvær ferðir í hann og tvær í 42 gráðu pottinn. Sjópotturinn var lokaður og ég sleppti gufubaðinu í þetta sinn. Kom heim alveg endurnærð og ánægð eftir því. Ætla ekkert að vera að láta vigtina stjórna mér og hef ekki stigið á hana síðan ég endurnýjaði árskortið en ég finn það á fötunum mínum að það eru að fara af mér sentimetrar. Vona að þetta gerist ekki of hratt svo "nýju" flíkurnar verði ekki strax of stórar á mig. Sennilega engin hætta á því þó.

Meira ætla ég ekki að skrifa í þetta sinn nema ég er ekki enn búin að ákveða hvað ég geri úr kvöldinu.

23.11.15

"Þannig týnist tíminn"

Ég var komin í Laugardalinn og byrjuð að synda korter yfir átta í gærmorgun. Synti stanslaust í hér um bil þrjú korter. Ég var svo á leiðinni yfir í sjópottinn þegar ég uppgötvaði að það var einhver að nota kalda pottinn. Að sjálfsögðu dreif ég mig ofan í og fór ég allt í allt fjórar ferðir í minnst tvær mínútur í senn. Eftir fjórðu ferðina fór ég í sjópottinn, svo smá gufu og að lokum örstutt "sólbað" áður en ég fór aftur heim.

Heima hafði ég uþb tvo og hálfan tíma áður en ég skipti um föt, tók með mér sálmabókina og mætti kirkjuna um eitt í upphitun fyrir messu. Kórsystir mín, Guðlaug Pétursdóttir, söng einsöng fyrir og eftir predikun og gerði það mjög vel eins og hennar er von og vísa. Kórinn söng þrjá sálma og svo eitt lag úr brúnu bókinni undir altarisgöngunni. Á eftir messu var boðið upp á bráðabrauð með svartbaunaseyðinu.

Áður en ég fór heim úr kirkjunni kom ég við á bókasafninu í Kringlunni og skilaði níu af þeim ellefu bókum sem ég var með frá þeim í fórum mínum. Tók fimm bækur með mér heim og eina af þeim er með tveggja vikna skilafrest. Ég þarf líka að klára þessar tvær sem skildi eftir heima fyrir 29. nóvember. Reyndar gæti ég framlengt skilafrestinum um mánuð en ég er byrjuð á báðum þessum bókum og ætla amk að sjá til hvort ég næ ekki að klára að lesa þær í vikunni.

22.11.15

Alltaf nóg um að vera

Ég sló skrefamet, mælirinn í símanum taldi uþb 11.000 skref, á föstudaginn var og það þrátt fyrir að ekki væri hægt að telja skrefin þann tíma sem ég var í sundi. Var á ferðinni frá því um fimm um morguninn. Fór beint í sund eftir vinnu klukkan eitt. Synti stanslaust í næstum því þrjú korter, kannski til að bæta mér upp að kaldi potturinn var tómur vegna ísinga og kulda. Var búin að mæla mér mót við Odd Smára í Kringlunni, þ.e. hann hafði stungið upp á því sjálfur að hittast þar. Vorum nokkuð fljót að afgreiða málin á verkefnalistanum en þó tók það smá tíma að finna óskorið og ósteikt laufabrauð. Ungi maðurinn fór svo til pabba síns seinna um daginn. Ég vissi ekki af því fyrr en um miðjan dag og hafði tekið út kjúkling úr frysti. Ég ákvað að elda úr hráefninu og skar niður fullt af grænmeti til að setja með í ofninn. Það kom líka á daginn að hinn ungi maðurinn var ekki að fara til pabba síns og kom hann heim akkúrat þegar maturinn var tilbúinn. Ég var komin í rúmið fyrir miðnætti.

Gærdaginn byrjaði ég á því að fara í sund fljótlega eftir að laugin opnaði um átta. Kaldi potturinn var enn tómur svo ég synti bara og synti og gaf mér svo góðan tíma í sjópottinum og gufunni á eftir. Fljótlega eftir að ég kom heim slökkti ég alveg á tölvunni, tók hana úr sambandi og lokaði hana inni í tölvuskáp. Ræsti Odd upp stuttu fyrir hádegi til að fara eina ferð með pappír, plast og fleira í gáma svo ég hefði sjálf betri tíma til að undirbúa komu frændfólks í laufabrauðagerð. Bræðurnir voru á leið á "spilakvöld" um tvö og fengu þeir leyfi hjá mér til að fara á lánsbílnum. Þeir voru nýfarnir þegar frændi minn og konan hans komu. Þau voru tæpum hálftíma á undan systurunum sem villtust fyrst yfir í mávahlíðina. Allir komu með eitthvað með kaffinu með sér en fyrst var byrjað að skera út í laufabrauðin. Það var reyndar boðið upp á kaffisopa fyrir þá sem vildu. Maður annarrar frænku minnar kom eftir að leikur liðsins hans í enska var búinn. Hann skar út nokkrar kökur en svo fóru svilarnir í að steikja kökurnar á meðan við stelpurnar héldum áfram að skera út. Upp úr klukkan fjögur var tekin smá kaffipása. Þá var búið að steikja tuttugu kökur af áttatíu, en það var heldur ekki búið að skera út alveg allar. Klukkan var samt ekki nema sex þegar allt var yfirstaðið og frændfólkið kvaddi fljótlega eftir það.

19.11.15

Tíu dagar frá því ég endurnýjaði árskortið í sund

Ég er búin að fara í sund á hverjum degi í tæpar tvær vikur og þessa vikuna hef ég synt mun lengur en ég gerði áður. Það hjálpar mikið að ég tek þátt í nýjustu vinnustaðaáskoruninni og nota til þess nýtt app sem heitir "Sidekick". Þetta er appið og áskorunin sem varð þess valdandi að ég uppfærði símann minn á kostnað vinnunnar minnar í síðustu viku. Kaldi potturinn var annars tómur og lokaður í gær og í dag og saknaði ég þess sárlega að geta ekki dýft mér í kalt í smástund.

Kom heim úr sundi upp úr klukkan þrjú í gærdag og hafði þá ágætan tíma í smá skylduverk hér heima áður en ég mætti á kóræfingu. Fékk Odd til þess að búa til kaffi og ég hafði, merkilegt nokk (eða ekki), smá tíma til að lesa. Á kóræfingunni söng ég aðallega sem og með sópran en brá mér stundum yfir í altinn þegar sópran átti ekki að syngja.

17.11.15

Synt og synt og synt og synt...

Vekjarinn í gamla nokia samlokusímanum mínum vakti mig klukkan fimm mínútur yfir fimm í gærmorgun. Morgunverkin gengu greiðlega fyrir sig og þar sem ég var ekki alveg viss hvort ég þyrfti að skafa af lánsbílnum lagði ég tímanlega í hann. Var með nesti og sunddótið með mér. Þurfti ekkert að skafa og var þess vegna mætt í vinnu um tíu mínútum fyrir sex. Sú sem er með mér á sex-vaktinni þessa vikuna mætti á slaginu. Verkefnin gengu áægtlega fyrir sig og fyrr en varði varð klukkan átta og þá vorum við leystar af. Þær tvær sem voru á síðdegisvaktinni voru mættar klukkan níu.

Ég fór næstum beint í sund eftir vinnu, reyndar með viðkomu á einum stað. Naut þess að synda og synda og skellti mér svo í kalda pottinn á eftir. Kom heim um kaffileytið. Annar sonurinn var heima og ég ákvað að hella upp á smá kaffi. Dútlaði mér við ýmislegt það sem eftir lifði dags, safnaði m.a. fullt af skrefum. Svo var ég það skynsöm að koma mér í háttinn rétt fyrir hálfellefu. Las í smá stund en ég er handviss um að ég var steinsofnuð áður en klukkan varð ellefu.

16.11.15

Eftir helgina

Níunda morguninn í röð byrjaði ég daginn á því að fara í sund. Reyndar opnar ekki fyrr en klukkan átta um helgar en ég var mætt á svipuðum tíma og á laugardagsmorguninn, eða fyrir klukkan hálfníu, í gærmorgun. Tók sundrútínuna föstum tökum og var svo glöð að það væri búið að opna sjópottinn atftur að ég var extra langan tíma í honum eftir sundið og pottadýfingarnar. Endaði svo á gufu og "sólbaði".

Um ellefu var ég mætt til norsku esperanto vinkonu minnar og á þeim tíma sem ég stoppaði lásum við smá landnáms-sögu frá því fyrir árið 900, úr gamalli kennslubók á esperanto. Það var gaman og þarna fléttast saga Norðmanna og Íslendinga mjög mikið saman.

Kom heim um hálfeitt og þá var einkabílstjórinn vaknaður og næstum tilbúinn í að keyra austur fyrir fjall í heimsókn á Hellu. Við vorum komin þangað um tvö og stoppuðum til klukkan að verða níu. Mundi eftir að taka með mér nokkra poka af krækiberjum og lét einkabílstjórann alveg um að keyra heim líka. Skiluðum okkur heim um tíu í gærkvöldi og urðum að leggja bílnum aftan við heilsugæsluna.

15.11.15

Sunnudagur

Var mætt í Laugardalslaugina og byrjuð að synda rétt fyrir klukkan hálfníu í gærmorgun. Sjópotturinn var lokaður þannig að þegar ég var búin að synda og fara þrjár ferðir í kalda pottinn og tvær í 42 gráðu heita pottinn fór ég i gufu beint eftir síðustu ferðina í þann kalda. Það var mjög sérstakt. Eftir sundið kom ég við í Krónunni við Nóatún og var ég að koma heim með vörurnar rétt fyrir hádegi. Synirnir voru enn sofandi og fljótlega eftir að þeir fóru loks á stjá báðu þeir um að fá að fara á lánsbílnum á "spilakvöld" (byrjaði upp úr klukkan þrjú). Ég leyfði þeim það þar sem ég var búin að sinna mínum útréttingum. Dundaði við ýmislegt hérna heima en skrapp líka í hálftíma göngutúr. "Sidekick"-appið og keppnisskapið heldur manni við efnið. Þrátt fyrir að vera ein heima ákvað ég að útbúa mér ofnbakaðan bleikjurétt í kvöldmatinn. Missti kannski heldur mikið af karrý út á bleikjuna en mér fannst þetta samt gott.

14.11.15

Bleikjuflök og grænmeti í ofninum

Hugurinn er í París, alls konar tilfinningar á kreiki en mér finnst einhvern veginn erfitt að orða hugsanir mínar um þessar hræðilegu árásir. Veröldin verður sífellt firrtari að mínu mati en þó held ég að það sé aðeins lítið brot af mannkyninu sem er að valda þessum usla og ala á hræðlsu þannig að það fyrsta sem ráðamönnum dettur í hug er að auka viðvörunarstigið, vígbúast og vera við öllu búnir. Jafnvel fara að elta uppi þá sem lýsa sig ábyrga. Ég veit að það væri farsælast að launa illt með góðu og reyna að taka á hlutunum eins og Norðmenn gerðu eftir Úteyjar-hryllinginn. Æ, hvað veit maður svo sem? Ég er amk ekki tilbúin í stríð af neins konar tagi og ætla frekar að kveikja á kertum, biðja fyrir betri heimi og senda frá mér hlýjar, jákvæðar og góðar hugsanir.

Vinnuvikan leið hratt og helgin er að verða hálfnuð, sem og mánuðurinn. Er búin að fara daglega í sund átta daga í röð og hitti ég Lenu þrjá fjóra virka morgna af fimm svo við gátum pottormast saman. Það var mikið spjallað og ég gat leyft mér að vera amk fimm korter í sundi þar sem vinnudagurinn alla vikuna var frá klukkan níu til fimm. Fór heim með bílinn fjóra af þessum dögum og náði strætó sem skilaði mér fyrir utan vinnustaðinn rétt fyrir klukkan níu.

Nýji síminn er farinn að virka, líka sem sími, en ég kann ósköp lítið á þetta tæki ennþá. En ég kann þó að færa inn í keppnis-appið sem meiri hlutinn af vinnufélögunum er að taka þátt í. Fyrirtækinu var skipt upp í amk 13 lið og þetta app varð semsagt til þess að ég uppfærði símann loksins. Er samt ekki búin að skila samlokusímanum á "Þjóðmynjasafnið" en hann virkar ekki lengur sem sími því ég lét færa númerið á nýja símann.

12.11.15

Lífið er skemmtilegt

Ég fór á lánsbílnum beint í sund rétt fyrir klukkan hálfsjö í gærmorgun þannig að ég var að mæta rétt eftir að opnaði. Synti í uþb tuttugu mínútur og byrjaði svo á því að fara með Lenu í heitan pott þar sem hún var að ljúka fyrstu ferðinni í kalda pottinn. Fór svo tvær ferðir með henni í kalda, eina ferð í sjópottinn og eina ferð í þann heitasta. Svo kvaddi hún en ég fór í gufubað og svo smá sólbað. Annar sonurinn var með strætókortið og mér fannst ekki taka því að fara heim með sunddótið. Hafði verið það útsjónarsöm að taka til fyrir vinnuna sem og nótur fyrir kóræfingu. Fékk mér kaffibolla og banana áður en ég fór í vinnuna. Var mjög tímanlega og hugsaði alla leiðina hvort ég fengi stæði á neðra planinu. Og viti menn ég fékk enda stæðið.

Nýji síminn var notaður eins og spjaldtölva en ég ákvað að ég hefði tíma til að koma við í vodafone í Kringlunni til að virkja nýja símann og afvirkja hinn. Þurfti að bíða um stund eftir afgreiðslu en þetta hafðist allt saman og ég varð heldur ekkert svo sein á kóræfingu, það munaði sennilega bara eitthvað um þremur mínútum. Æfði aðeins með sópran en færði mig svo yfir í altinn því þær voru bara tvær en hinar voru þrjár (án mín). Það var miklu jafnara dæmi eftir að ég ákvað að syngja með altinum.

11.11.15

Samsung galaxy S5 neo

Það þurfti heila vinnustaðakeppni á nýju appformi til, til að ég uppfærði gsm-inn minn, nokia samloku-síma yfir í flatan síma með snertiskjá. Um fimm leytið í gær fór ég heim með útprentaða síðu af síma sem ég lét einn vinnufélaga minn sannfæra mig um að væri eitthvað sem gæti gengið upp fyrir mig. Báðum sonum mínum leist vel á að ég væri að spá í þetta og samþykktu þessa tegund en vildu samt ekki koma með mér. Ég dreif mig þá ein í ELKO í Skeifunni og keypti eitt stk. síma. Davíð Steinn var svo að "fikta" í honum á annan klukkutíma og gat sett flest upp nema símkortið úr gamlanum var of stórt. Hann ráðlagði mér að fara til VODAFONE við tækifæri og fá þá til að klippa gamla kortið í þá stærð sem hentaði nýja símanum. Það var ekki tími til þess í gær.

Annars fór ég í morgunsund fjórða daginn í röð í gærmorgun. Var byrjuð að synda aðeins fyrr heldur en morguninn áður. Þótt ég slakaði afar vel á og tæki lífinu í laugunum með nokkurri ró passaði ég vel upp á tímann. Fór beint heim með sunddótið mitt upp úr klukkan átta og hafði smá stund aflögu áður en ég náði strætó í vinnunna, leið 13 ca fimmtán mínútum fyrir níu fyrir utan Sunnubúðina.

10.11.15

Nokkrir dagar

Það hefur annað hvort ekki gefist tími í skrif eða þá að ég var ekki alveg upplögð þegar stundirnar gáfust þessa rúmu hálfu viku síðan ég skrifaði nokkuð síðast.  Það er svo sem alveg búið að vera í nógu að snúast, sérstaklega í félagslífinu. Endurnýjaði árskortið mitt í sund í gærmorgun. Hitti tvær vinkonur á Gló um sex í gær og höfðum við um margt að spjalla þannig að við sátum þó nokkra stund eftir að við vorum búnar að borða.

r í sund upp úr klukkan átta á sunnudagsmorguninn. Átti svo tæpa tvo tíma heima áður en ég fór aftur af stað. Kom við í blómaversluninni Hlíðarblóm, valdi og keypti tvo fallega smávendi áður en ég mætti í kirkjuna nokkuð í fyrra fallinu þar sem ég var bæði að aðstoða við kaffiundirbúninginn og hita upp með kórnum. Met var slegið í mætingu og við sem sáum um kaffið á eftir vorum að ljúka fráganginum um hálffimm. Þetta voru góðir fjórir klukkutímar sem ég var í krikjunni.

Laugardagurinn leið líka svona hratt og byrjaði einnig á sundferð. Á föstudaginn mætti ég í vinnu klukkan átta, hitti vinkonu á kaffihúsinu Babalú fljótlega eftir vinnu og bauð henni svo með mér á Edduna í Austubæ upp úr klukkan átta um kvöldið. Semsagt alltaf nóg að gera hjá mér. Hef þó alveg fundið mér tíma til að lesa en nálin hefur verið í óvanalega langri pásu.

5.11.15

Jóla-nótulaus á kóræfingu

Ég var mætt í Laugardalinn um það bil sem opnaði í sundlaugarafgreiðslunni í gærmorgun. Synti í rúmt korter, fór aðeins tvisvar sinnum í kalda pottinn en það var til að geta bleytt betur og aðeins lengur í mér í sjópottinum. Var mætt í vinnuna rétt fyrir átta. Vinnudagurinn leið hratt og örugglega en það teygðist aðeins úr honum í hinn endann.

Kom heim rétt fyrir fimm, hringdi og talaði stuttlega við pabba sem verður grasekkjumaður næstu vikuna eða svo. Svo taldi ég mig sortera rétt í kórnótupokann minn og var mætt í kirkjuna rétt fyrir hálfsex. Það kom í ljós fljótlega eftir að æfingin byrjaði að mig vantaði allar nótur sem við höfum verið að æfa í haust sem og jólanóturnar. Var með páskanóturnar og eiginlega allar aðrar nótur, brúnu bókina og sálma bókina. Þetta bjargaðist fyrir horn í þetta sinnið en um leið og ég kom heim fór ég yfir það sem ég hafði tekið úr pokanum og skilið eftir heima. "Týndu" nóturnar reyndust ekki vera í þeim bunka ..."svo hvað skyldi ég nú hafa gert af þeim?", hugsaði ég með mér.

Annar sonurinn var tilbúinn með kvöldmatinn og hinn sá um uppvaskið á eftir. Það var ekki fyrr en ég var sest inn í stofu eftir mat að ég mundi skyndilega að ég hafði tekið þessar umræddu nótur með mér austur í rauða bakpokanum mínum og þar voru þær enn ásamt hluta af esperanto dótinum mínu, þ.e. í bakpokanum (ekki fyrir austan).  :-)

4.11.15

Skemmtilega langur dagur

Tók leið 13, vagninn klukkan korter fyrir átta í gærmorgun. Þekkti vagnstjórann en hún er frá Selfossi. Vinnudagurinn til fjögur leið ótrúlega hratt en ég fékk að "hlaupa" út rétt fyrir fjögur til að hafa smá stund heima sem ég notaði til að hringja í pabba og skipta um föt. Var mætt á mánaðarlegan safnaðarstjórnarfund klukkan hálfsex. Eftir fundinn voru teknar af okkur einstaklingsmyndir og svo var hópnum stillt upp við altarið og teknar myndir af stjórninni með og án prests og organista. Það verður fróðlegt að vita hvernig til tókst en eitthvað af þessum myndum eiga að fara inn á heimahöfn safnaðarins.

Þegar ég kom heim aftur fékk ég að vita að bræðurnir væru á leið á spilakvöld til spilafélagans sem býr í Kópavogi. Ég lánaði þeim bílinn og hafði það kósí fyrir framan imbann alveg til klukkan tíu. Var farin að sofa áður en ungu mennirnir komu heim aftur en ég veit þó að þeir komu heim fyrir miðnætti.

3.11.15

Eitt og annað

Í gær leysti ég einn vinnufélaga minn af þannig að hún mætti á mínum tíma milli átta og fjögur en ég á hennar tíma milli 13 og 19. Þar af leiðandi gat ég notað morguninn til að skottast í sund, reka smá erindi og lesa svolítið. Var mætt í sundið rétt upp úr opnun eða rúmlega hálfsjö. Hitti Lenu í heita pottinum eftir að ég var búin að synda og fór með henni þrjár ferðir í kalda pottinn, eina í sjópottinn og eina ferð í heitasta pottinn. Gaf mér góðan tíma og kom ekki heim aftur fyrr en tveimur tímum eftir að ég fór. Skrapp svo fljótlega aftur til að sækja jólagjöfina til hennar systur minnar úr innrömmun.

Eina af níu bókunum sem ég náði í af safninu um daginn hef ég lesið áður, 90 sýni úr minni mínu eftir Halldóru Kristínu Thoroddsen. Þessi bók er alveg þess virði að vera lesin oft. Ég las hana upp til agna í gær. Hún er að vísu ekki nema rúmlega 100 blaðsíður en minningarbrotin eru mörg og sum hver alveg óborganleg. Mæli hiklaust með þessari bók.

Rétt missti af leið 13 upp úr hádeginu svo ég trítlaði á stoppistöðina við Klambratún og tók Ásinn þaðan. Hafði þó það góðan tíma að ég fór úr við MR einni stoppistöð fyrr en vagninn stoppar líka við Hörpuna. Vinnudagurinn leið þokkalega hratt. Við sem vorum á kvöldvaktinni gátum leyft okkur að fara heim nokkrum mínútum fyrir sjö þannig að ég var komin heim fyrir hálfátta.

2.11.15

Nýkomin úr morgunsundi

Enn ein helgin liðin og skiptu helgidagarnir sér niður á hvorn sinn mánuðinn. Það voru semsagt mánaðmót um helgina og næstsíðasti mánuður ársins er hafinn. Afmælisbarn dagsins í dag er systir mín sem er rétt rúmlega einu og hálfu ári yngri en ég. En ég ætlaði aðeins að gera upp helgina á þessum vettvangi.

Mikið sem veðrið var fallegt og gott á laugardaginn. En ég varð að skafa smá af lánsbílnum og vanda mig og keyra varlega í morgunsundið. Klukkan var að nálgast hálfníu þegar ég lagði af stað í sundið. Gaf mér góðan tíma í Laugardalnum og endaði á því að bera rakakrem á kroppinn þegar ég kom upp úr en það geri ég bara sirka vikulega. Þar sem norska esperanto vinkona mín var ekki búin að hringja um hálftíu reiknaði ég með að hún hefði farið í sína rækt og ég ætti að koma til hennar um tólf. Ég fór því heim, gekk frá sunddótinu, náði í þvottinn á snúruna og settist svo í stofusófann með mjög áhugaverða bók úr svo kallaðri tunglseríu: "Líf mitt til dæmis", (dagbækur 1998-2002) eftir Margréti Bjarnadóttur f.1981. Bókin er ekki nema 72 bls. en hún er mjög góð að mínu mati. Ég var búin að lesa uþb einn þriðja af bókinni þegar Inger hringdi. Hún hafði ekki farið eitt né neitt og var tilbúin að taka esperantostund með mér. Ég dreif mig því yfir til hennar. Stoppaði í rúma klukkustund, verslaði í bakaleiðinni og um hálftvö athugaði ég hvort tilvonandi rafeindavirki væri nokkuð búinn að hætta við að skreppa austur með mér. Svo reyndist ekki vera og hálftíma síðar vorum við lögð af stað. Hinn sonurinn var búinn að ákveða að vinna að erfiðu skólaverkefni og halda sig heima við.

Við Davíð Steinn komu austur um kaffi leytið. Eftir kaffið fékk pabbi dóttursoninn til að fara í vinnugalla og fara með sér út í skúr og skipta um dekk á báðum bílunum. Það tók drjúga stund en þeir voru þó búnir fyrir kvöldfréttir í sjónvarpinu. Ég sá um að elda kvöldmatinn fyrir okkur fjögur en við vorum ekki að borða fyrr en upp úr klukkan átta. Bauð upp á hvítvín með matnum úr "belju" sem ég hafði keypt helgina áður og var ekki búin að opna. Sonurinn fékk hálft vínglas en rétt smakkaði á því og gaf mér svo restina. Hann fór fyrstur í háttinn milli tíu og ellefu. Mamma fór inn í rúm að hlusta á sögu en við pabbi biðum eftir að uppþvottavélin kláraði til að geta gengið frá. Ég var svo síðust í bælið því ég settist aðeins við tölvuna.

Fór á fætur rétt um níu í gærmorgun. Náði því að borða morgunmat með pabba mínum. Á ellefta tímanum fékk ég lánaða regnkápuna hennar mömmu og arkaði upp að Helluvaði í heimsókn til föðursystur minnar. Stoppaði hjá henni í dágóða stund enda höfðum við um margt að spjalla. Ég var samt komin til baka um tólf. Dagurinn leið nokkuð hratt. Við mæðginin vorum ákveðin í að drífa okkur í bæinn strax eftir kaffi. Það gekk ekki alveg eftir en við vorum þó að skila okkur í bæinn upp úr klukkan sex.

31.10.15

Helgi og mánaðamót

Ég náði leið 13 fyrir utan vinnustaðinn minn klukkan rétt rúmlega fjögur í gær og fór beinustu leið heim. Annar sonurinn hafði aðeins þurft að skreppa í einn tíma í skólann um morguninn líkt og aðra föstudaga þetta misserið en hinn var ekki kominn heim og ekki von á honum nærri strax. Sá þeirra sem var heima hafði framkvæmt beiðni mína um að ryksuga sameignina alveg frá þvottahúsinu og upp á okkar pall. Þegar ég skrapp niður til að setja í eina vél sá ég að mér var óhætt að ákveða að við værum búin að skila af okkur þvottahúsumsjón þennan mánuðinn, en við eigum að taka sameignina fjórða hvern mánuð. Slapp semsagt alveg við að skúra yfir þvottahúsið og gat einbeitt mér að skylduverkunum í eigin íbúð.

Rétt fyrir hálfsex ákvað ég að drífa mig með nokkra poka af flöskum í endurvinnsluna við Knarrarvog. Fékk góða aðstoð við að tæma pokana í teljarann og skanna kvittunina sem ég fékk á eftir. Rúmlega 70 flöskur og dósir gáfu rúmar ellefuhundruð krónur beint inn á debetreikninginn minn svo mér fannst þessi ferð borga sig. Að vísu finnst mér líka gott að geta styrkt skátana, yngri flokkana í íþróttafélaginu og aðra sem stundum koma og spyrja um flöskur.

Úr endurvinnslunni fór ég í bókasafnið í Kringlunni og skilaði tveimur af fjórum bókum sem ég var enn með. Skilafresturinn nálgaðist á þessum sem ég fór með en ég var búin að framlengja um mánuð á hinum tveimur bókunum sem telja samtals 932 bls. Er byrjuð á þeim báðum og vildi fá lengri tíma til að ljúka við þær. Þrátt fyrir að eiga eftir þessar bækur, eina úr bókaklúbbnum sem ég er líka byrjuð á og enn eina ólesna tók ég mér níu bækur með heim af safninu. Heildar blaðsíðufjöldi þeirra bóka er þó ekki nema 1.482. Er ég bókaormur eða hvað? Ég held að það sé engin spurning og löngu sannað.

Hafið það sem allra best um helgina og njótið þess að vera til alltaf!


30.10.15

Bókasafnsferð

Eftir vinnu í gær fór ég beint heim. Hringdi í pabba og einnig tvær vinkonur mínar. Eftir að hafa matreitt lifur í kvöldmatinn og borðað dreif ég mig í sund. Kom heim rétt fyrir níu og þá voru ævintýraspilafélagar bræðranna mættir og þeir voru búnir að leggja holið undir sig þessir hressu fimm kappar. Ég gaf mér tíma til að skrásetja miðvikudaginn í örfáum línum áður en ég fór inn í stofu með bók. Reyndar notaði ég svo megnið að næstu tveimur tímum til að glápa á imbann. Fór í háttinn áður en strákarnir voru búnir að spila og vissi ekkert hvenær spilinu lauk því ég var steinsofnuð.

29.10.15

Hví er svona mikil hraðferð á tímanum?

Annar sonurinn notar rauða strætókortið á miðvikudögum. Þá nota ég tækifærið og fer á bílnum, fyrst í sund upp úr klukkan sjö og eftir reglubundna rútínu fer ég beint úr Laugardalnum í vinnuna. Í gærmorgun hitti ég Lenu og til að geta farið oftar með henni í pottadýfingar kleip ég aðeins af gufustundinni áður en ég fór upp úr.

Eftir annasaman vinnudag dreif ég mig beint heim strax um fjögur. Póstaði tilkynningu um samveru aldraðra í kirkjunni n.k. sunnudag á vegg og heimahöfn safnaðarins. Hringdi í pabba og svo hringdi mamma. Átti gott spjall við þau bæði en varð svo að drífa mig á kóræfingu. Ég fékk að æfa með bæði alt og sópran og nú erum við byrjuð að fara yfir aðventu og jólalögin.

Þegar æfingu var lokið, fyllti ég á tankinn á lánsbílnum og fór svo beinustu leið til tvíburahálfsystur minnar. Hún fékk leyfi til að æfa verkefni á mér. Ég hafði tekið föndrið með mér en það endaði með því að kvöldið leið án þess að ég gerði nokkuð nema aðeins að sýna jólakortin sem ég er búin að búa til. Það var mikið spjallað og ég gat ekki slitið mig í burtu fyrr en klukkan var langt gengin í ellefu. Gærdagurinn var því afar langur en viðburðarríkur hjá mér.

28.10.15

Morgunsund

Um gærdaginn er alveg hægt að skrifa í örfáum línum. Mætti í vinnu rétt fyrir átta í gærmorgun. Fór beint heim seinni partinn og hélt mig heima eftir það. Hringdi í tvíburahálfsystur mína. Hafði kjöt í karrý í matinn. Strákarnir voru með spilakvöld í holinu en ég föndraði og horfði á sjónvarpið til klukkan að ganga ellefu. Og nú er kominn tími til að rjúka á vikulega kóræfingu. Hvort skyldi ég nú æfa sem alt eða sópran í þetta skiptið? Segi kannski frá því á morgun.

27.10.15

Kjöt í karrý í kvöldmatinn

Ég hafði hugsað mér að kíkja í sund í Sundhöllina eftir vinnu í gær. Fór með sunddótið með mér í strætó í vinnuna í gærmorgun (hvað eru mörg í í því?). Það fór nú samt svoleiðis að ég fór beint aftur heim eftir vinnu, horfði á landsleikinn, hafði til kvöldmatinn, borðaði og fór svo á lánsbílnum í sund í Laugardalslaugina. Var byrjuð að synda upp úr hálfátta, fór tvisvar sinnum rúmlega tvær mínútur í kalda pottinn, nokkrar mínútur í sjópottinn, smá stund í gufuna og var komin heim aftur fyrir klukkan níu, áður en Broen byrjaði.

Samanburður


Myndin að ofan er tekin á Saffran á afmæli tvíburanna í fyrra. Mynd númer tvö er tekin heima hjá einni vinkonu minni fyrir rétt rúmum mánuði. Og myndin hér að neðan var tekin 8. okt. sl. Myndin sem ég setti á FB-vegginn af nýju úlpunni um daginn er þó enn betri.  "Ég, um mig frá mér til mín"


26.10.15

Nýkomin úr sundi

Það tókst ekki að mæta í sund strax eftir opnun í gærmorgun. Í staðinn hitti ég synina þegar þeir komu heim á níunda tímanum eftir að hafa spilað "ævintýraspilið" heima hjá einum spilafélaganum frá því um átta kvöldið áður. Náði líka að hella upp á kaffi handa Lilju vinkonu áður en ég dreif mig loks í Laugardalinn. Var á svipuðum tíma og á laugardagsmorguninn  en ég gaf mér ekki eins góðan tíma þótt ég næði alveg að sinna sundpottagufurútínunni svona nokkurn veginn. Ég vildi heldur eiga góða stund aftur heima áður en ég mætti í upphitun fyrir jazzmessu í kirkjuna. Náði þarna góðum tveimur tímum á milli, fékk mér kaffi með Lilju og kvaddi hana svo með góðu faðmlagi þar sem ég þóttist viss um að hún yrði farin þegar ég kæmi heim seinni partinn. Það reyndist vera rétt hjá mér.

Jazzmessan tókst alveg ágætlega. Það mætti ein úr sópran sem hefur ekki getað verið með í haust þar sem hún hefur verið að vinna á æfingatímum og á ferð og flugi messuhelgarnar. Þessi stúlka er líka að komast á níunda meðgöngumánuð svo það er viðbúið að hún verði stopult með í vetur. En mikið var gott og gaman að fá hana í hópinn í gær, hitta hana og sjá hvað hún blómstrar.  Aðeins tveir af tíu sálmum voru sungnir einradda. Kórstjórinn spilaði undir á Hammondorgelið og hafði fengið Scott Mclemore á trommur og Ásgeir Ásgeirsson á gítar með sér. Það var fín blanda. Rödduðu sálmana söng ég með altinum og gerði engar stórar gloríur þar. Villtist að vísu einu sinni yfir í sópran en það kom ekki að sök.

25.10.15

Púff hvað helgin leið fljótt.

Í gærmorgun var ég ákveðin í að vera ekkert að rjúka af stað í sund um leið og opnaði. Fór á fætur rétt upp úr átta og bjó til kaffi handa okkur Lilju. Klukkutíma síðar skutlaði ég vinkonu minni í Kolaportið þar sem hún var með sölubás ásamt annarri konu. Eftir skutlið fór ég í Laugardalinn og var byrjuð að synda um 9:40. Synti í tuttugu mínútur án þess að stoppa neitt á milli. Er ekki viss um hversu margir metrar það voru en ég ætla að giska á 600. Fór fjórar ferðir í kalda pottinn, þrjár ferðir í þann sem er 42 gráður en eftir fjórðu ferðina í þann kalda fór ég í sjópottinn. Þar var ég í dágóða stund því ég hitti svo skemmtilegt fólk, m.a. hjón um áttrætt sem voru svo lífleg og skemmtileg. Það kom í ljós að konan hafði verið í sveit á Móeiðahvoli í kringum fermingu hjá barnlausum hjónum og var húsmóðirin ættuð frá Keldum. Úr sjó pottinum skrapp ég aðeins í gufuna áður en ég fór upp úr.

Á heimleiðinni kom ég við á tveimur stöðum, Krónunni við Nóatún og i vínbúðina í Faxafeni. Heima dundaði ég mér við ýmislegt annað en "skyldustörfin" og flaug tíminn hratt við það dundur. Sótti Lilju í Kolaportið um fimm og var svo tilbúin um sex þegar ein úr minni deild í vinnunni kippti mér með mér í heimboð til annarrar úr sömu deild. Mættum öll nema ein af átta en fengum samt áttunda gestinn með en það er sá sem vann með okkur sl. vetur. Að auki fékk kjölturakkinn Birta að vera með. Við vorum semsagt í matarboði. Ég hafði tekið með mér litlar hvítvínsflöskur úr hvítvínsbúðinni en þær fór ég allar með óáteknar heim aftur því það var boðið upp á vín. Gerði mitt besta til að passa að fara ekki yfir víndrykkjustrikið til að vera messufær í dag. Held að það hafi alveg sloppið til.

24.10.15

Snemma á fótum - snemma í rúmið

Ég fór á fætur upp úr klukkan fimm í gærmorgun og var mætt í vinnuna klukkan sex eins og tvo dagana þar á undan. Um hálftíu fékk ég að skjótast frá. Sótti tilvonandi rafvirkja í Tækniskólann til að koma honum í fyrirfram pantaðan tíma til augnlæknis. Þar kom í ljós að sjónin hafði eitthvað versnað síðan í fyrravor. Engu að síður spurði augnlæknirinn son minn að því hvort hann vildi fá gleraugu. Hann er enn á mörkunum og myndi alveg fá bílpróf þótt hann væri ekki með gleraugu. Hins vegar er hann með smá sjónskekkju og finnur þar að auki fyrir þreytu í tímum og verður að passa sig að lenda ekki aftarlega í stofunni ef hann á að sjá á töfluna. Svo það var ákveðið að fjárfesta í gleraugum. Fórum með miðann frá lækninum í optikbúðina á fyrstu hæðinni í Hamrahlíðinni. Það tók smá tíma að velja sér réttar umgjarðir. Ég var fegin að það var ekki ég sem þurfti að velja en strákurinn fann þetta út alveg sjálfur og þegar búið var að velja, stilla og borga fengum við að vita að hægt yrði að sækja gleraugun seinna um daginn.

Einkabílstjórinn var kominn heim úr skólanum þarna langt gengin í ellefu og þar sem ég var alls ekki viss um að fá stæði aftur fyrir utan vinnustaðinn minn kipptum við honum með, skutluðum hinum bróðurnum aftur í skólann og mér í vinnuna. Ég bað strákinn um að fara með uppsöfnuð blöð og fleira í gámana og sækja mig aftur um eitt leytið.

Eftir vinnu fór ég beint heim. Við einkabílstjórinn sátum nokkra stund í bílnum fyrir utan því við vorum að rabba saman um eitt og annað. Að vísu var svo sem enginn heima hjá okkur þá stundina en það er bara eitthvað við það að spjalla saman í bílnum.

Seinna um daginn skrapp ég með vinkonu minni á tvo staði með hjólið hennar og fleira í geymslu og annað í notkun. Stoppuðum aðeins á báðum stöðum, ívið lengur á fyrri staðnum þar sem við skildum hjólið eftir. Þegar við komum til baka úr þessu leiðangri hjálpuðumst við að við að útbúa kvöldmatinn.

"Kaffi og rán" eftir Catharina Ingelman-Sundberg er bráðskemmtilegur sænskur kósí-krimmi. Hef verið að lesa þessa bók undanfarna daga og mæli hiklaust með henni. Vona að ég verði svona hresst og uppátækjasamt gamalmenni þegar þar að kemur.  :-)

Ég og pabbi minn


Myndin af okkur er tekina á Hellu þann 3. ágúst sl.

23.10.15

Jazzmessuhelgi framundan

Ég mætti aftur klukkan sex í vinnu í gærmorgun ásamt sama vinnufélaganum. Klukkan eitt fór ég beint í sund þar sem ég gaf mér góðan tíma í rútínuna. Hitti fyrrum vinnufélaga í sjópottinum og staldraði fyrir vikið aðeins lengur þar en oft áður. Að sundinu loknu fór ég með jólagjöfina hennar systur minnar í innrömmun í Rammagerð Kópavogs. Má sækja þetta strax upp úr mánaðamótum. Var komin heim á fjórða tímanum. Annar tvíburinn var farinn til pabba síns en hinn var að vinna að verkefni til sex og fékk svo strætóklink hjá mér því bróðirinn hafði verið með rauð kortið til að komast m.a. til Garðabæjar fyrr um daginn,eitthvað sem var skyldumæting á vegum skólans. Við vinkona mín skruppum í Sunnubúð eftir nauðsynjum og nammi, fengum okkur afganginn af laxaréttinum frá því kvöldið áður og horfðum svo á imbann fram eftir kvöldi. Ég var reyndar frekar skynsöm og fór í háttinn á ellefta tímanum vitandi það að ég þyrfti að vakna upp úr fimm aftur.

22.10.15

Morgunhani

Í stað þess að byrja gærdaginn á því að mæta í sund um hálfsjö var ég mætt í vinnuna klukkan sex ásamt einni annarri úr deildinni. Vinnuskyldu okkar lauk svo klukkan eitt og þá fór ég beint í Laugardalslaugina. Gaf mér góðan tíma í rútínuna mína og var þarna á annan tíma. Kom við í Fiskbúð Hafliða í Skipholti og ætlaði að kaupa bleikju að vestan til að hafa í kvöldmatinn. Samkvæmt manninum sem afgreiddi mig var bleikjan týnd, hafði ekki skilað sér í fiskbúðina, svo ég ákvað að kaupa laxaflak í staðinn

Var komin heim upp úr þrjú og hafði því góða tvo tíma í smá hvíld áður en ég mætti á kóræfingu. Kórstjórinn bað mig um að æfa altröddina því í byrjun leit út fyrir að annars væri engin alt. Það rættist þó úr því. Nafna mín altinum mætti nefnilega rétt eftir að æfingin hófst. Við konurnar voru einni færri en karlarnir eða fimm en þrjár af okkur heitum Anna svo það má segja að kórstjórinn hafi verið Önnum kafinn. Tveir af þremur bössum heita reyndar Kristinn. Æft var fyrir Jazzmessuna sem verður n.k. sunnudag og einnig farið yfir lögin sem við höfum verið að æfa sl. mánuð. Þess má geta að í einu laginu var ég að syngja alt-röddina í fyrsta skipti.

Þegar ég kom heim eftir kóræfingu var vinkona mín búin að gera mat úr laxinum og þau strákarnir að fá sér að borða. Ég byrjaði á því að smíða messutilkynningu í moggann og uppfæra vegginn og heimahöfnina með svipuðum upplýsingum áður en ég fékk mér smakk af laxi sem var bakaður í ofni ásamt rauðkáli, gulrótum og hvítkáli. Horfði á imbann til klukkan að verða tíu en þá fór ég að undirbúa mig undir háttinn til að vera tilbúin í næstu morgunvakt.

20.10.15

Þriðjudagskvöld

En ég ætla aðeins að skrá niður smávegis um gærdaginn. Fór með strætó í vinnuna og hafði sunddótið með því ég var að spá í að fara í sund beint eftir vinnu. Sú ákvörðun breyttist þó margra hluta vegna. Vinnudagurinn var annasamur og mjög öðruvísi, á margan hátt mjög athyglisverður en ég ætla samt ekki að að skrifa neitt meira um það. Ég sinnti vinnuskyldum mínum og fór beint heim á eftir. Heima stoppaði ég ca. einn og hálfan tíma áður en ég dreif mig loks í sund. Viðhélt rútínunni þrátt fyrir að vera á "óvenjulegri" tíma.

Eftir sundið ákvað ég að fara beint í heimboð í heimahús á stórreykjavíkursvæðinu til að fá tækifæri til að kveðja einn vinnufélaga minn. Ég hitti á réttu götuna í rétta bæjarfélagi en eitthvað hafði húsnúmerið skolast til í minninu hjá mér og ég bankaði upp á hjá bláókunnugu fólki. Sem betur fer átta annar vinnufélagi minn leið framhjá, gangandi og í sömu erindagjörðum og ég. Sú var með húsnúmerið á hreinu. Ég geymdi lánsbílinn þar sem ég hafði lagt honum og varð samferða töluvert austar í götuna. Nokkrir aðrir vinnufélagar höfðu svarað kallinu og voru þegar mætt í kveðjuhófið. Frábært að fá tækifæri til að kveðja góða manneskju en við vorum vissar um að leiðir okkar myndu eitthvað liggja saman síðar.

19.10.15

Annasöm og skemmtileg helgi!

Ég fór í sund strax upp úr klukkan átta á laugardagsmorguninn. Gaf mér góðan tíma, synti 500 metra fór fjórum sinnum 2,5 mínútur í kalda pottinn þrisvar í einn heita pottinn, tíu mínútur í sjópottinn og annað eins í gufuna. Upp úr hálftíu var ég á leiðinni heim þegar norska esperanto-vinkona mín hringdi og mér heyrðist á henni að hún vildi fá mig yfir til sín. Ég ákvað að hlýða kallinu. Fór heim með sunddótið, tók mig til fyrir austurferð og hafði esperantodótið með mér. Á leiðinni heyrði ég um að eitthvað væri um að vera á Eiðistorgi um hálfellefu í þættinum Bergson og Blöndal. Spáði svo sem ekkert meir í það en ég var rétt sest inn hjá vinkonum minni þegar hún sagðist hafa fengið "geggjaða" hugmynd og það leiddi til þess að við skruppum út á Eiðistorg og fengum okkur smá morgunverð og kaffi. Stoppuðum kannski í svona tuttugu mínútur eða hálftíma og nutum kaffis, hljómlistar og fl. áður en við snérum heim og lásum smá esperanto.

Frá Inger fór ég um tólf og fór þá beint austur á Hellu. Aðstoðaði mömmu við að gera eplajukk uppskrift úr helgarmogganum og hræra í pönnukökudeig og bjó einnig til þrjú jólakort. Ég var líka með bækur og saumadótið en það vannst ekki tími til að sinna því vegna þess að það var búið að bjóða okkur í smá veislu í Brekkugerði. Tókum pönnsurnar, sem mamma steikti á tveimur pönnum, eplajukkið og rjómasprautu með okkur þangað. Kvöldið leið alltof hratt. Pabbi og mamma fengu í glas og ég rétt dreypti á hálfu hvítvínsglasi með matnum. Keyrði þau heim stuttu fyrir tíu, tók saman dótið mitt, fékk krækiber og tók dót sem ég átti að afhenda Helgu systur og brunaði svo í bæinn. Kom heim fyrir miðnætti.

Í gærmorgun var ég mætt í Egilshöllina upp úr átta og sá yngri systurdóttur mína keppa á skautum. Henni gekk alveg ágætlega. Ég sá amk miklar framfarir en hún lenti í fjórða sæti af sextán keppendum og það þótt henni fipaðist einu sinni. Hún gerði svo afar vel í því að klára sinn dans þótt mússíkin stoppaði amk hálfri mínútu of snemma. Þegar keppni í þessum flokki var lokið lét ég Helgu fá dótið úr bílnum, kvaddi mæðgurnar og fór svo beint í sund. Synti svipað og daginn áður og gaf mér góðan tíma til að pottormast á eftir. Verslaði á heimleiðinni og var að koma heim um hálfeitt.

16.10.15

Bleikur dagur

Já, það var bleikur dagur í dag. En ég ætla reyndar að segja örstutt frá gærdeginum. Hann var kannski ekki alveg eins viðburðarríkur og margir undanfarnir dagar, nánast hægt að lýsa honum í þremur orðum: Vinna, borða, sofa! Og þó, ég náði að lesa smá inn á milli, skila fjórum bókum á safnið án þess að taka neinar í staðinn, elda kjúklingabringur í ofni með sætri kartöflu, hnúðkáli og rauðkáli (sauð bygggrjón með þessu) og horfði svo á imbann til klukkan tíu. Þá varð ég að fara að huga að því að koma mér í háttinn, einhvern veginn alveg búin á því þótt ég viti ekki alveg eftir hvað. Kannski eitthvað uppsafnað?

Njótið allra daga alltaf!

15.10.15

Allt ágætt bara

Gærdagurinn kláraðist alveg án þess að ég gæfi mér tíma til að setja inn pistil fyrir þriðjudaginn. Ég fór á fætur um sex í gærmorgun og þótt ég héldi vel á morgunrútínsspöðunum þá vantaði klukkuna ca 13 mínútur í sjö þegar ég synti loks af stað í Laugardalslauginni. Varð vör við að Lena var á svæðinu svo ég synti aðeins 200 metra til að hitta hana sem fyrst í pottinum. Hún fór reyndar fyrst í 42°C pottinn en þótt ég væri á undan ofan í þann kalda sat ég hennar tvær mínútur í viðbót þegar hún kom. Við náðum svo þremur öðrum kaldapottsferðum en ég sleppti gufu- og "sól"-baðinu því ég var ákveðin í að mæta aðeins fyrir átta í vinnuna.

Strax eftir vinnu skrapp ég upp í Brimborg til að sækja pakka fyrir pabba. Hann hafði verið að versla sér varahlut í bílinn sinn og þar sem hann vissi að ég yrði á ferðinni fljótlega bað hann mig um að sækja hann fyrir sig. Hafði örfáar mínútur heima til að ganga frá sunddótinu og fá mér smá snarl áður en tími var kominn til að mæta á kóræfingu. Bassinn var sá eini sem var fullskipaður en engu að síður var æfingafært.  Við sóprÖnnur og Helga sungum með Ingu Dóru í altinum þegar sópran átti ekki að syngja. Litum aðeins á "Bjarnatónið"- til að rifja upp fyrir jólin eftir kaffihlé. Einn úr bassanum átti sjötugs afmæli fyrr í vikunni og nafna mín í sópran átti afmæli í gær. Það var sungið fyrir þau bæði í restina af kóræfingunni.

lokum verð ég að segja örstutt frá þriðjudagskvöldinu því það var blásið í sauma-jólakortagerðar-prjónaklúbb hjá tvíburahálfsystur minni og ég náði að framleiða 10 stk jólakort. Kvöldið leið alltof hratt og klukkan var allt í einu farin að ganga tólf áður en við gátum slitið okkur frá föndrinu. Líklega er alltof langt síðan síðasti klúbbur var haldinn því við höfðum um margt að spjalla og að sjálfsögðu fengum við nokkur hlátursköstin.

13.10.15

Endalaust hraðferð á tímanum

Þar sem ég þurfti að skila posanum og leggja inn seðlana eftir kaffihlaðborðið í kirkjunni á sunnudaginn fór ég á lánsbílnum í vinnuna í gærmorgun. Ég byrjaði að sjálfsögðu á því að mæta í sund í Laugardalinn rétt eftir opnun. Veðrið var dásamlegt og frábært að byrja morguninn svona. Eftir 300 metra á bringunni fór ég beint í kalda pottinn. Hafði þóst sjá Lenu í lauginni að synda baksund og það kom á daginn að hún var þarna, hafði fyrst brugðið sér í einn heita pottinn áður en hún kom til mín í kalda pottinn. Það endaði með því að ég fór fjórar ferðir í þann kalda með henni. Í síðustu ferðinni hitti ég einn frænda minn, afi hans var föðubróðir minn. Hann var að prófa þessar dýfingar í þann kalda. Náði að vera um mínútu og svo fór hann smá stund upp úr áður en hann dýfði sér aftur. Við Lena bentum honum á að það þætti ekki verra að fara í heitan pott á milli. Endaði í sjópott og gufu og náði samt alveg á réttum tíma í vinnuna.

Fékk að stinga af úr vinnu rétt fyrir hálftvö. Fór fyrst í bankann áður en ég renndi Hafnarfjörðinn til að skila posanum til VALITOR. Kvöldið var notalegt. Las, horfði á fréttir, dansk-sænska sakamálaþáttinn Brúna og CSI-Cyber.

12.10.15

Eftir helgina

Nýliðin helgi var að mestu helguð kirkju óháða safnaðarins.  Ég fór þó í sund báða morgnana strax upp úr klukkan átta, þ.e. rétt eftir opnun. Eftir laugardagssundið og pottadýfingar skutlaði ég vinkonu minni í Kolaportið þar sem hún var með sölubás allan þann daginn. Síðan lá leiðin í Bónus í Kringlunni þar sem ég verslaði inn nauðsynjar fyrir kaffihlaðborð KÓSÍ-kórsins. Mætti með þetta kirkjuna og minn skerf á hlaðborðið, flatkökurnar sem ég smurði kvöldið áður, um hádegisbilið. Ég renndi blint í sjóinn hvað varðaði hjálparhendur fyrir undirbúning, vissi aðeins fyrir víst um fjórar hendur. En allt í allt mættum við átta (16 hendur) og komumst nokkuð langt með það sem hægt var að undirbúa daginn fyrir hlaðborð á tæpum þremur tímum. Ég var amk komin heim góðum klukkutíma áður en fótboltalandsleikurinn hófst. Þá voru mættir þrír félagar bræðranna og þeir vinirnir byrjaðir að spila. Sótti vinkonu mína í hálfleik. Nokkru eftir leikinn ákváðum við tvær að skreppa á Gló við Laugaveg og fá okkur að borða þar. Fórum á lánsbílnum en lögðum honum við Hallgrímskirkju og löbbuðum þaðan. Þetta var mjög góð hugmynd hjá okkur og komum við pakksaddar til baka.

Eftir sundið í gærmorgun hafði ég ágætistíma heima en ég hafði ákveðið að mæta í krikjuna um tólf og stóð við það. Var ekki búin að vera lengi á staðnum en byrjuð að undirbúa þegar fleiri mættu. Rétt upp úr eitt hituðum við upp fyrir messuna og að þessu sinni voru helmingi fleiri kórfélagar mættir heldur en í sl. tveimur messum, eða 10. Reyndar var aðeins ein mætt í altinum svo ég svissaði yfir í altinn í eina sálminum sem sunginn var í röddum. Einkabílstjórinn kom gangandi í kirkjuna um hálftvö og ég bað hann um að passa posann og "peningakassann" með skiptimynntinni í. Hann sá svo að mestu um að taka við greiðslu v/kaffihlaðborðsins eftir afar skemmtilega galdramessuna. Vel var mætt í kirkjuna og í nógu að snúast að fylgjast með að ekki vantaði neitt. Það tók líka drjúgan tíma að ganga frá. Oddur fékk að skila posanum af sér um fjögur og ég lánaði honum rauða kortið til að hann gæti skroppið í heimsókn til pabba síns.

10.10.15

Undirbúningur í fullum gangi

Þar sem ég var búin að fá leyfi til að fara fyrr úr vinnu til að reka ýmis erindi fór ég á lánsbílnum í gærmorgun. Byrjaði að sjálfsögðu á því að mæta í Laugardalinn klukkan hálfsjö. Synti 400 og náði tveimur góðum ferðum í kalda pottinn, einni í heitan pott, einni ferð í sjópottinn og smástund í gufuna og "sólbað" á eftir.

Klukkan hálfþrjú kvaddi ég vinnufélagana og dreif mig í að reka fyrrnefnd erindi. M.a. skrapp ég í banka eftir skiptimynnt (seðlum), sótti einn posa til Valitor og keypti nokkra pakka af flatkökum, smjör og hangikjöt. Eftir kvöldmat sat ég svo í stofunni með vinkonu minni, hún að prjóna og ég að smyrja flatkökur. Höfðum kveikt á sjónvarpinu á meðan og fylgdumst aðeins með útsvari.

9.10.15

Vinnuvikan liðin í bili

Ég fór með vagninum sem fer frá Sunnubúð korteri fyrir heila tímann í vinnuna í gærmorgun og var mætt á vinnustaðinn rétt fimm mínútum fyrir átta og svo beint heim aftur átta tímum seinna. Fékk annan soninn í lið með mér í skylduverkin svo þau gengu nokkuð hratt og vel fyrir sig. Hafði steiktan fisk með hvítkáli, rauðkáli og hýðisgrjónum í kvöldmatinn og tók svo fram jólakortaföndrið. Bjó til níu kort í viðbót og er þá nánast komin með tvo þriðju af kortunum sem mig vantar í ár. Vel gert!


8.10.15

Morgunstund

Var vöknuð nokkuð á undan vekjaraklukkunni og þó var hún stillt á tíma sem ekki náði 06:00. Hafði því ágætis tíma til að sinna morgunverkunum og taka mig til fyrir daginn. Var mætt við Laugardalslaugina um það leiti sem opnaði og að sjálfsögðu vígði ég nýja sundbolinn með því að synda 300m, dýfa mér 3x í kalda pottinn, 2x í einn heitan, einu sinni í sjópottinn og sitja svo nokkrar mínútur í gufunni.  Sundbolurinn virkaði vel.

Var mætt í vinnuna stuttu fyrir átta. Hafði alveg nóg að sýsla frameftir degi en fékk svo að fara klukkutíma fyrr. Hafði þá tæpa tvo tíma heima áður en ég mætti í fyrra fallinu á kóræfingu í krikjuna til að taka til kaffið fyrir pásuna. Þrátt fyrir að við mættum aðeins fimm fyrir utan kórstjórann blésum við í æfingu og æfðum nokkur lög, gömul og nýtti í röddum. Æfingin var góð en höfð í styttra lagi og við enduðum á því að taka smá kaffi áður en við gengum frá og fórum heim. Kórstjórinn varð reyndar eftir því hann er líka að stjórna karlakórnum Stefni og þeirra æfing er á eftir æfingu KÓSÍ-kórsins.

7.10.15

Mið vika

Þar sem ég var vöknuð nokkuð löngu á undan vekjaraklukkunni í gærmorgun freistaðist ég til að kveikja á tölvunni og náði ég að setja inn bloggfærslu áður en tími var kominn til að skottast út í strætó. Annars lá mér svo á að nota nýju úlpuna í fyrsta sinn að ég gleymdi að taka með mér húslykla. Þegar mér gafst kostur á að hætta aðeins fyrr í vinnunni var ég ekki viss um að ég myndi finna einhvern heima svo ég samdi um að ég mætti frekar hætta fyrr seinna í vikunni. Fékk mér svo göngutúr hálfa leið heim áður en ég náði vagninum sem stoppaði fyrir utan um hálffimm. Það voru allir heima svo ég komst inn. Ég stoppaði þó ekki lengi við því fyrsta þriðjudag í mánuði eru haldnir stjórnarfundir í óháða söfnuðinum og ég átti að vera mætt upp í kirkju klukkan fimm. Það hafðist. Fundurinn var nokkuð góður og setti ég m.a. beiðni fyrir hönd KÓSÍ-kórsins (með smá aðstoð) um að hækka framlagið í sjóðinn. Formaðurinn lagði til að tillagan yrði samþykkt á þá vegu að kórinn fengi helminginn af hækkuninni núna en frá og með áramótum myndi framlagið tvöfaldast miðað við núverandi framlag.

Kom heim upp úr hálfsjö. Hitaði smá hluta af kjötsúpunni, frá því á mánudagskvöldið án þess að hafa kjötið með, handa okkur Lilju en strákarnir höfðu sagt pass því það var spilakvöld hér hjá þeim frá klukkan hálfníu til hálftólf. Ég gerði lítið annað en að lesa, spjalla við Lilju og glápa á imbann. Ætlaði að horfa á þáttinn eftir tíu fréttir á RÚV en þá var ég hins vegar farin að geyspa svo mikið að ég taldi ráðlegast að koma mér í háttinn.

6.10.15

Brun á tímanum

Það mætti segja mér að það nýtt ár verði gengið í garð áður en langt um líður og þessir þrír mánuðið sem eftir lifa af þessu ári líði svo hratt, svo hratt að þegar ég lít til baka um áramótin muni mér finnast eins og þetta hafi í raun verið mun styttri tími. Það er eins gott að nýta og njóta augnablikanna.

Fljótlega eftir vinnu í gær fékk ég vinkonu mína sem er hjá mér í nokkra næstu daga til að koma með mér í Sport Direct og hjálpa mér að finna á mig úlpu og sundfatnað. Við gerðum góða ferð. Ég fékk á mig samskonar úlpu og ég keypti handa einkabílstjóranum um daginn, þrjár í einni fjólubláa að lit, og tvennskonar sundföt, tegundir sem ég hef ekki prófað áður, á innan við tuttuguogeittþúsund krónur. Sundbolurinn er opinn í bakið en ekki aðskorinn og hin sundfötin eru í tvennu lagi, brók og bolur (ekki bikiní). Ég hlakka til að prófa þá.

Eftir að við komum heim aftur hjálpuðumst við að við að útbúa dýrindis kjötsúpu í stærsta pottinum mínum. Um það leyti sem súpan varð til hringdi ég til að athuga með soninn sem enn var í skólanum. Þá var hann einmitt að hætta í verkefninu sem hann hafði verið að vinna að, úti var hellidemba og ég ákvað að senda einkabílstjórann, hinn soninn, eftir honum.

5.10.15

Eftir helgina

Tók þátt í haustfagnaði með vinnufélögum seinni partinn á föstudaginn og aðeins fram á kvöldið. Hafði ekki úthald lengur en til hálfníu en það var að hluta til vegna þess að ég var ákveðin í að nýta báða helgidagana mjög vel.

Var komin ofan í Laugardalslaug og byrjuð að synda fyrir klukkan hálfníu á laugardagsmorguninn. Úr sundinu mætti ég beint í klippingu. Þótt ég væri mætt  áður en klukkan varð alveg  tíu opnaði Nonni fyrir mér og bauð mér að byrja á því að fá mér smá kaffi sem ég þáði. Kom heim um hálfellefu. Tíminn til tvö leið frekar hratt við ýmis konar dundur og skylduverk. Var mætt á Vodafone-völlinn um tvö. Komið gervigras á völlinn en leiktíðið endaði eins og hún hófst með heimaleik sem tapaðist. Patrick Pedersen náði ekki að skora í leiknum en fékk engu að síður gullskóinn fyrir flest skoruð mörk í sumar.

Eftir leikinn trítlaði ég aftur heim til þess að ná í lánsbílinn og sækja eina vinkonu mína, og dótið hennar, en hún var með bás í Kolaportinu. Hitti aðeins á þrjár vinkonur sem eru Rangæingar að upplagi og líka í vinahóp Þallar (Fridu Fridriks).

Það var spilakvöld hér hjá bræðrunum en við vinkona mín lögðum stofuna undir okkur og ég bjó til níu jólakort þrátt fyrir að vera líka að fylgjast með sjónvarpinu. Hætti ekki kortaframleiðslunni fyrr en klukkan var langt gengin í tólf.

Var mætt í laugina í gærmorgun á svipuðum tíma og morguninn áður. Skrapp heim með sunddótið og náði í esperantodótið. Mundi loksins eftir að taka með mér tvær síðustu vikukrossgáturnar, þ.e. úr þeim vikublöðum sem ég fékk síðast í ágúst áður en ég sagði upp áskriftinni. Við einbeittum okkur að esperantoinu í þetta sinn. Stoppaði aðeins rúma klukkustund, skaust heim með esperantodótið og dreif mig svo í heimsókn til foreldra minna. Þar stoppaði ég aðeins fram á kvöld en var þó komin heim aftur um tíu.