Fartur á tímanum

Vaknaði um sjö. Um hálfníu var ég komin í Sundhöllina. Eftir fyrstu ferðina af þremur í þann kalda sá ég að braut tvö var mannlaus náði samt ekki ofan í laug áður en einhver annar var byrjaður að synda á henni. Var komin út í á braut eitt og synti 300m en á síðustu 75 metrunum bættist þriðja manneskjan við og ég rétt hafði geð í mér að klára upp í 300m því þessar brautir eru eiginlega bara ein og hálfbreidd eða svo. Fór aftur í kalda í fimm mínútur og fékk svo braut 1 í innilauginni alveg fyrir mig og synti aðra 300m þar. Fyllti á bensíntankinn á leiðinni heim um tíu leytið. Stoppaði heima í rúma tvo tíma. Rétt fyrir eitt sótti ég esperanto vinkonu mína. Vorum báðar klæddar til útivistar. Valið hafði staðið á milli þess að skreppa í Viðey eða leita að berjum og við ákváðum að fara í bíltúr aðeins út fyrir bæinn. Fórum fyrst upp að Hafravatni á stað sem Inger hafði farið áður. Þar voru engin ber en fullt af lyngi. Næst lá leiðin í Heiðmörk en við vorum heldur ekki lengi þar. Að endingu fórum við alla leið að Gljúfrasteini. Lögðum þar og röltum aðeins aftur fyrir húsið og stutt áleiðis að Helgufossi sem er tæpa 3km frá. Ef við hefðum verið fyrr á ferðinni, ákveðið að fara beint þangað, hefðum við sennilega labbað aðeins lengra. En við fundum samt smávegis af bæði blá- og krækiberjum. Þau voru ekki stór en í lagi með flest af þeim. Tíndum ekki mikið en eitthvað. Fengum okkur svo te og harðfisk sem Inger hafði útbúið og komið með sér. Í baka leiðinni komum við við hjá N1 við Gangveg og heilsuðum upp á Davíð Stein og Óla. N1-sonur minn tékkaði á þrýstingnum á dekkjunum. 3 af fjórum voru í lagi, en eins og mig grunaði var það fjórða frekar vanstillt. Skilaði svo Inger heim og var sjálf komin heim um hálfsex. Veðrið hafði leikið við okkur allan daginn þótt sums staðar væri smá ferð á logninu. Ekki náði ég þó að safna skrefum alveg upp í 4500 en fór heldur ekki út aftur til að gera það. Hefði ekki þurft langa göngu til að ná markmiðinu en hugsaði með mér að ef öll skref dagsins hefðu verið talin (skrefin milli potta og lauga í sundinu) væri ég í ágætis málum. 

Tap hjá Liverpool

Var komin á fætur um sjö leytið í gærmorgun. Klukkan var svo orðin hálfníu þegar ég mætti í sundhöllina. Að þessu sinni gat ég farið beinustu leið í kalda pottinn. Sá yngstu mágkonu mömmu í heita pottinum og heilsaði upp á hana eftir fyrstu kælinguna. Hún var búin að synda og þegar hún fór að hugsa sér til hreyfings upp úr lauginni fór ég aftur í kalda áður en ég fór á braut 4 í innilauginni og synti 600m á hálftíma, flestar ferðir á bakinu en fjórðu hverju ferð ýmist skrið- eða bringusund. Fór smástund í heitasta pottinn, 42°C, annan af elstu pottunum, áður en ég fór síðustu ferðina í þann kalda, gufu og þvoði mér svo um hárið á leiðinni upp úr. Var komin til espernato vinkonu minnar rétt rúmlega hálfellefu og stoppaði hjá henni til tólf. Lásum eina og hálfa bls. í Kon-Tiki og höfðum nú íslensku útgáfuna til samanburðar. Planlögðum svo næsta hitting sem verður á öðrum nótum og strax í dag. Áður en ég fór heim keypti ég þvott og felguþrif á bílinn hjá Löðri við Fiskislóð og kom svo aðeins við í Krónunni. Restin af deginum fór að mestu í fótboltaáhorf, lestur og prjónaskap. 

September að verða hálnaður

Vinnudagurinn í gær var léttur og í styttra lagi. Kortaframleiðslu og frágangi á kortadeild lauk fyrir hálftíu. Restina af vinnudeginum var ég í innlögnum. Fréttum reyndar af plastsendingu í hádeginu en sem betur fer ákváðum við að bíða ekki eftir henni því um tvö leytið komu þau skilaboð að pakkanum yrði komið til okkar eftir helgi. Var komin í Nauthólsvík upp úr klukkan þrjú Hringdi í pabba þegar ég var á leiðinni. Pabbi var sjálfur á ferðinni, á leiðinni í búðina. Mágur minn er staddur hjá honum þessa dagana. Fór annars tvisvar í sjóinn, fyrst í tuttugu mínútur og eftir uþb tuttugu mínútna gufu fór ég aftur í rúmar fimm mínútur. Sat svo dágóða stund í heita pottinum áður en ég fór upp úr og heim. 

Míni golfgarðurinn með vinnufélögum

Í gær skildi ég bæði prjóna og sunddót eftir heima þegar ég fór í vinnuna. Öllum verkefnum í vinnunni var lokið í fyrra lagi en við dokuðum flest við til klukkan langt gengin í fjögur. Ástæðan var sú að ekki tók því að fara heim því við vorum skráð sem hópur í Mínígólf og staðurinn, sem er frekar stutt frá vinnustaðnum, opnar klukkan fjögur. Vorum 22 í hópnum og af þeim tveir af sumarliðunum og ein sem er í barneignarfríi. Okkur hafði verið skipt í tvö lið og þeir tveir sem skipulögðu þennan hitting voru "bændurnir" í þessari bændaglímu. Svo var okkur skipt niður í fjóra fjögurra manna hópa og einn sex manna, tveir (þrír í sex manna hópnum) úr hvoru liði. Ég var í fyrsta hollinu sem var ræst út klukkan hálffimm. Spilaðar voru allar átján holurnar. Í mínu holli, ekki í mínu liði samt, var sá sem fór holurnar á fæstum höggum. Ég fór fyrstu holuna á tveimur höggum en svo gekk svona upp og niður. Skv. skorblaðinu átti ekki að skrá fleiri högg en sex á hverri holu. En við höfðum ekki lesið það og vissum því ekki af því fyrr en einhver úr öðru liði sagði okkur frá því. Ég fór nefnilega eina holuna á tólf höggum og aðra á 10. Eftir reiknireglunni "ekki fleiri en 6 högg" fór ég fyrri níu á 36 og seinni níu á sömu svo í heildina fór ég á 72 og var líklega í neðsta sæti á flestum höggum. En það var svo gaman og á eftir var hlaðborð og framkvæmdastjórinn tilkynnti hver fór flestar holur í höggi, hvort liði fór á færri höggum í heildina og hver fór á fæstum höggum.

Sjórinn og lengri göngutúr

Það var framleiðsludagur í vinnunni í gær. Allt gekk ágætlega en við áttum eftir að framleiða tvær tegundir þegar klukkan var að verða hálftíu. Geymdum þá framleiðslu því það var fundur í kaffitímanum og forstjórinn var með okkur á þeim fundi. Framleiðslu og frágangi í kortadeild lauk svo milli hálfellefu og ellefu. Sneri mér beint að innleggjum eftir það. Vinnudegi lauk fyrir klukkan þrjú. Var mætt í Nauthólsvík korter yfir þrjú og óð út í um hálffjögur. Hitastigið undir níu gráðum en ég var í strandskónum og berhent. Ætlaði ekki að tíma að fara upp úr en tuttugu mínútum síðar fór ég í gufuna. Eftir gufu, kalda sturtu og tuttugu mínútur í pottinum skrapp ég aftur í sjóinn í örfáar mínútur áður en ég fór að huga að heimferð. Ákvað að fara ekki í sturtu bara þurrka mér en skolaði strandskóna og úr sundbolnum. Kom heim klukkan að ganga sex. Ætlaði varla að nenna út aftur en stuttu fyrir átta fór ég út og það sem átti að vera göngutúr í styttra lagði varð 3,1km hringur á tæpum fjörutíu mínútum. Eftir að ég kom heim aftur náði ég sambandi við Jónu Mæju hans Reynis frænda. Hún náði ekki að svara heima símanum sínum en hringdi til baka úr gemsanum og við spjölluðum saman í heila klukkustund. Það var eiginlega komið fram yfir þann tíma sem ég fer oftast upp í, ekki svo langt fram yfir en framyfir samt. Engu að síður réði ég eina sudoku og las í þremur bókum eftir að ég var háttuð og komin í rúmið enda var klukkan orðin hálfellefu og rúmlega það þegar ég fór loksins að sofa. 

Sundhöllin og stuttur göngurtúr

Hrökk upp ca tíu mínútum áður en vekjarinn átti að ýta við mér. Var að dreyma eitthvað furðulegt stuttu áður sem ég man ekki lengur hvað var. Aftur á móti man ég brot úr draumi frá nýliðinni nótt sem var enn furðulegri. "Fann s.s. útsaums/handavinnu-töskuna mína í uppþvottavélinni ásamt smávegis af óhreinu leirtaui. Ekki var búið að setja vélina af stað þegar ég bjargaði töskunni". Annars var ég að vinna til klukkan að verða fjögur í gær. Var með sunddótið meðferðis en ekki alveg ákveðin í hvaða laug ég ætti að stefna á fyrr en ég lagði af stað frá vinnu. Fann stæði við Austurbæjarskóla sem er örstutt frá Sundhöllinni. Því miður var kaldi potturinn lokaður. Ég byrjaði á einni gufuferð, útisturtu og í langpottinn úti. Þar var ég búin að sitja í uþb tíu mínútur þegar kaldapotts vinkona mín og ein systir hennar birtust. Spjallaði við þær í smá stund en svo sá ég að braut 4 í útilauginni var laus, skellti mér í hana og synti í uþb tuttugu mínútur áður en ég fór upp úr og heim. Ætlaði varla að nenna neinu meiru nema kannski glápi en dreif mig út um átta leytið og labbaði smá hring um hverfið. Hélt ekki að ég hefði stoppað neins staða en engu að síður skráði heilsuforritið í símanum á mig tvo stutta göngu túra samtals upp á 2,1km á tæpum tuttuguogfimm mínútum. Greip svo aðeins í prjónana áður en ég kveikti aftur á sjónvarpinu. Fór upp í rúm um hálftíu og las í 3x7-10 mínútur. Já, ég las í þremur bókum, tveimur af safninu og einni sem mér var gefið í vor.

Osteostrong og bókasafn í gær

Var komin á stjá um sex í gærmorgun. Morgunrútínan svipuð og greip ég aðeins í tveggja kílóa lóðin stuttu áður en ég lagði af stað í vinnu. Nóg var að gera í vinnunni, þurfti ekki að bíða eftir verkefnum, en allt var búið um þrjú. Fannst of snemmt að athuga hvort ég kæmist að í osteostrong tíma svo ég byrjaði á því að skreppa í bókasafnið í Kringlunni. Skilaði bókunum fjórum úr Sólheimasafni í hillu merkta "Frátekið". Fann mér svo fimm aðrar bækur, m.a. Kon-Tiki á íslensku en við Inger ætlum að bera saman þann texta við esperanto útgáfuna. Erum reyndar líka að spá í hvort við finnum eintak á norsku, það væri mjög gaman. Hitti Siggu, mágkonu mömmu, á safninu. Var komin í Hátún 12 rétt fyrir fjögur og í Laugardalslaug rétt rúmum hálftíma síðar. Kalda potts vinkona mín mætti um fimm. Þá var ég í minni annarri ferð af fjórum í kalda pottinum. Næsta hálfa mánuðinn verður laugin lokuð almenningi vegna viðhalds svo það verður spennandi að sjá hvaða laugar toga í staðinn eða hvort fleiri ferðir verða farnar í sjóinn. 

Ný vinnuvika framundan

Heyrði stofuklukkuna slá hálfsjö í gærmorgun. Svo fannst mér aðeins líða nokkrar mínútur þegar ég heyrði hana slá aftur og taldi sjö slög. Hef greinilega sofnað aðeins aftur og ég veit að ég steinsofnaði aftur milli sjö og átta. Klukkan var svo rétt byrjuð að ganga níu þegar ég var alveg glaðvöknuð og fór á fætur. Pabbi var nýlega kominn á fætur og var að taka niður daglegar tölur til að skrá niður. Dagurinn var frekar rólegur hjá okkur feðginum. Skiptumst á að vafra á netinu í tölvunni hans, fórum í kapla keppnir og horfðum á sjónvarpsútsendingar. Að auki var ég að prjóna. Um hádegisbil matreiddi ég tvö bleikjuflök handa okkur. Pabba fannst þau svo lítil að hann talaði um að hann gæti alveg fengið sér skyr. Ég bað hann amk um að fá sér smá af réttinum því það voru kartöflur og sallat með. Ef hann væri svangur eftir skammtinn mætti hann alveg fá sér skyr í eftirrétt. Um kaffi leytið fengum við okkur flatkökur með reyktum silungi. Það er örugglega uþb ár síðan ég borðaði flatkökur síðast og ég ákvað að fara varlega í smakkið. Borðaði þó tvo fjórðungsparta úr köku. Klukkan var að verða hálfsex þegar ég tók mig loksins saman, kvaddi pabba og brunaði í bæinn. 

Laugardagur - skráð á sunnudegi

Vaknaði um sjö í gærmorgun. Var komin í sund um hálfníu. Eftir fimm mínútur í kalda pottinum fór ég á braut 6 og synti 500 metra áður en ég fór aftur í kalda pottinn. Eftir þá ferði lá leiðin í gufuna í ca 15 mínútur, köld sturta og sjópottur í 10 mínútur. Fór svo þriðju ferðina í þann kalda áður en ég fór upp úr og þvoði mér um hárið. Var mætt til esperanto vinkonu minnar um hálfellefu. Stoppaði hjá henni í næstum einn og hálfan tíma og lásum við m.a. tvær og hálfa blaðsíður í Kon-Tiki. Var komin heim milli tólf og hálfeitt. Komst af stað austur rétt rúmum klukkutíma síðar og var komin til pabba rétt upp úr klukkan þrjú. Þegar ég var að leggja af stað úr bænum "vasahringdi" systir mín í mig en hún heyrði mig svara og spjallaði smá. Hafði verið að spjalla við manninn sinn sem þurfti að rjúka af stað með Huldu úr smalamennsku á sjúkrahús vegna ofnæmisviðbragða. Frétti ekki meira um það mál svo það hlýtur að hafa farið vel. Við pabbi ákváðum að grilla kindakjöt, sem var til í ísskápnum hjá honum, um hálfsex leytið. Ég setti upp kartöflur og lagði á borð en hann sá um grillið. Horfðum svo á útsendinguna frá Ljósanótt í Reykjanesbæ milli átta og ellefu.

Strax komin helgi aftur

Bankaði á herbergisdyrnar hjá Oddi stuttu áður en ég fór í vinnu í gær. Hann var vakandi og byrjaður að undirbúa sig undir verkefni dagsins, smá skyldufund hjá vinnumálastofnun og að taka á móti iðnaðarmönnum. Iðnaðarmennirnir höfðu ekki samband fyrr en hann var mættur á fundinn. Oddur sendi þeim skilaboð um að hringja í Davíð Stein þar sem hann væri smá upptekinn. Skilaboðin frá þeim sem voru að koma með nýju svalahurðina voru þau að þeir kæmu ekki fyrr en milli hálfellefu og ellefu. Oddur var löngu kominn heim aftur þá því bróðir hans sótti hann eftir fundinn. Davíð Steinn "stakk" hins vegar af, fór að sinna öðrum verkefnum s.s. fara í klippingu og fleira, og kom ekki aftur fyrr en nýja svalahurðin var komin upp og iðnaðarmennirnir farnir en þeir voru rétt rúma tvo tíma að græja þetta. Ég var búin að vinna stuttu fyrir þrjú. Hringdi í pabba þriðja daginn í röð þegar ég var á leiðinni í Nauthólsvík. Hann var reyndar í heimsókn hjá frændfólki á Selfossi en við spjölluðum engu að síður stuttlega saman. Sjórinn var dásamlegur og hressandi en heldur mikil fjara. Hringdi svo loksins í frænku mína og nöfnu sem á danskan pabba. Hún býr og vinnur hér á Íslandi en við vorum ekki búnar að heyrast síðan í sumar. Hvorug okkar var reyndar að velta sér upp úr því. Mamma hennar, móðursystir mín, er hætt að vinna og alveg flutt til Danmerkur aftur frá Noregi þar sem hún var með lögheimili sl. þrjátíu ár eða svo. Hún á reyndar fasteignir í nokkrum löndum, m.a. hér í Reykjavík.   

Ný svalahurð verður sett upp í dag

Gærdagurinn var í léttari kantinum vinnulega séð. Var komin í sund upp úr klukkan hálfþrjú. Synti 400m og var að klára fyrstu ferðina í þann kalda þegar kalda potts vinkona mín mætti. Saman fórum við þrjár ferðir, vorum næstum hálftíma í gufu og uþb 15 mínútur í sjópottinum. Sundferðin mín stóð yfir í næstum tvo tíma. Kom við í Fiskbúð Fúsa á heimleiðinni og keypti mér harðfisk og ýsu í soðið. Pikkaði svo Odd upp og skruppum við saman í Krónuna við Fiskislóð. Á leiðinni þangað hafði smiðurinn, sem kom og mældi út hjá mér svaladyrnar, samband og sagðist ætla koma í dag, föstudag. Hann og einhver með honum koma sennilega fljótlega eftir að ég er farin í vinnu. Oddur mun taka á móti honum og svo tekur Davíð Steinn við um miðjan morgun ef á þarf að halda því Oddur hefur verið boðaður á fund hjá vinnumálastofnun. Vonandi fer eitthvað að gerast í atvinnumálunum hjá honum. Held að hann þurfi að vera mun opnari fyrir tækifærunum en hann heldur amk þannig á spilunum að hann fær smá bætur mánaðarlega. 

Sjórinn hressir alltaf

Í gær var framleiðsludagur. Ég var í bókhaldi og á móttökuendanum. Vélin byrjaði á smá mótþróaþrjóskuröskun þegar við ætluðum að hefja framleiðslu. Þurfti að taka hana alveg niður og þegar parturinn fyrir vélina var ræstur gerðist nokkuð sem við höfum ekki lent í áður, þ.e. ekkert gerðist. Takkinn var í réttri stöðu en ekkert heyrðist í vélinni. Eftir nokkrar sekúndur af smá sjokki bað ég þá sem var á ítroðslu endanum að prófa að snúa takkanum til baka, doka stutta stund, og reyna aftur. Hvað við urðum fegnar að þá fór allt í gang og það sem meira var að framleiðsla gekk nánast eins og í sögu. Kláruðum allt daglegt fyrir kaffipásu og afganginn af endurnýjuninni milli tíu og tólf. Kláraði bókhaldsmálin eftir hádegi og var komin í innlegg upp úr hálftvö. Allt var búið um þrjú. Var með sjósundsdótið meðferðis en ákvað að kíkja fyrst í Aqua Sport, gömlu strandskórnir eru löngu orðnir ónýtir. Hringdi í pabba og spjallaði við hann hluta af leiðinni. Sokkarnir sem ég ætlaði að kaupa voru ekki til í minni stærð, kannski sem betur fer því þarna fæst alls konar og m.a. svipaðir skór og strandskórnir. Þykkari botnar aðeins öðru vísi efni og litir en miklu betra en sokkar. Og voru líka til í mínu númeri. Fjárfesti í þeim. Næst kom ég við í sokkabúðinni Copra við Garðatorg og fjárfesti í fjórum pörum af orkusokkum og á þá núna sex pör. Ætlaði að kíka í nýju verslunina Prís en "villtist" inn í Smáralind í Söstrene Grene og keypti mér nokkrar dokkur af 10% bómullargarnir í ýmsum litum. Ákvað að geyma "heimsóknina" í Prís til betri tíma því klukkan var farin að ganga fimm og mál að drífa sig í sjóinn og prófa nýju skóna. Hringdi þó fyrst í Ellu vinkonu eftir að ég var komin á stæði við Nauthólsvík og átti gott spjall við hana. Klukkan var akkúrat fimm þegar ég dembdi mér í sjóinn. Skórnir reyndust ljómandi vel. Var 15 mínútur í sjónum sem er rúmar 10°C þessa dagana, 10 mínútur í gufu, köld sturta og svo 15 mínútur í heita pottinum. Var komin heim fyrir klukkan hálfsjö. Um átta skrapp ég í 1,7km göngu sem tók mig 22 mínútur. Nú hef ég náð skrefamarkmiðunum fimm daga í röð. 

Yfir fjögurþúsundogfimmtíu blogg færslur

Gærdagurinn var mjög annasamur í vinnunni en allt kláraðist þó innan níu tíma. Var komin í sund um hálffimm leytið. Byrjaði á því að synda 300m en fór svo á kalda potts rölt með kalda potts vinkonu minni. Gáfum okkur extra góðan tíma í gufunni og sjópottinum. Ferðirnar í þann kalda urðu fjórar 3-5 mínútur í senn. Ég var komin heim rétt fyrir hálfsjö. Rétt rúmum klukkutíma síðar skrapp ég út í smá göngu. Labbaði 1,5km á uþb 19 mínútum og náði skrefa markmiðinu þriðja daginn í röð. Heildarskrefin voru samt mun færri heldur en þá daga sem ég labbaði í og jafnvel úr vinnu en sjöþúsund skref eru þó betri en innan við tvöþúsund skref, eða hvað? :-) 

Mun bjartara en í gærmorgun

Vaknaði rétt rúmlega sex í gærmorgun. Þurfti að kveikja ljós á meðan ég var að klæða mig og einnig athafna mig á baðherberginu. Annars var morgun rútínan mjög svipuð. Mætti í vinnu um hálfátta og fyrsti hálftíminn fór í bókhalds og reikningagerða vinnu fyrir kortadeildina. Upp úr klukkan átta svissaði ég yfir í innlagnir. Sú vinna stóð yfir til klukkan langt gengin í þrjú. Þá sneri ég mér aftur að reikningagerðinni. Fékk Petru til að lesa yfir loka tölur og skilaði svo af mér. Gott að þetta er frá. Er langt komin með allar excel tengingar til að safna tölum fyrir næstu mánaðamót. Var komin í Hátún 12 í osteostrong tíma rétt fyrir fjögur og sem fyrr komst ég strax að þótt "fasti" tíminn væri ekki fyrr en 16:20. Eftir tímann fór ég beint í sund. Var búin að láta kalda potts vinkonu mína vita að ég myndi líklega vera mætt í sund ca korter í fimm. Hún var mætt en ég sá hana ekki strax þar sem hún hafði skroppið í gufu. Ég var því búin að fara eina ferð í þann kalda og smá stund í sjópottinn áður en við hittumst. Fórum fjórar ferðir saman í þann kalda og í hina ýmsu potta eða gufu inn á milli. Var komin heim upp úr klukkan sex. Um átta leytið skrapp ég aftur út í stutta göngu, 1,1 km á tæpu korteri en þar með hafði ég náð að safna skrefamarkmiðum dagsins og gott betur svo forritið í símanum þarf ekki að "skamma" mig en hrósar mér í staðinn. Annars er ég svo sem að safna óskráðum skrefum þegar ég er að vappa á milli potta í sundinu. Það væri fróðlegt að vita hversu mörg skref það eru þegar farnar eru 4-6 ferðir í þann kalda og rölt á milli potta og gufu. 

Dimmt yfir

Vaknaði eiginlega alltof snemma í gærmorgun, svona miðað við að það var sunnudagur. Helgast kannski af því að ég fór tiltölulega snemma að sofa á laugardagskvöldið. Hvað um það ég var komin á fætur fyrir klukkan hálfsjö. Ætlaði að fylgjast með sundinu hjá Má á ólympíuleikunum áður en ég færi í sund. Í átta fréttum var sagt að það yrði um hálfníu svo ég taldi óhætt að horfa á brot úr þætti í sarpinum. Stillti aftur á rúv2 tuttugu mínútum yfir átta en þá var Már nýbúinn að synda sig inn í úrslit og hinn riðillinn í hans flokki að gera sig kláran í sundið. Var byrjuð að synda korter fyrir níu og þegar ég var akkúrat að klára 500 metrana kom kalda potts vinkona mín. Fórum 4 ferðir í kalda, eina í heitasta, eina í 42°C, eina í gufuna og eina í sjópottinn. Þar sem við hittum eina systur hennar. Kom heim um hálftólf. Dagurinn fór í alls konar en samt aðallega fótboltaáhorf og prjónaskap. Skrapp þó í stuttan göngutúr fljótlega eftir kvöldmat og náði þar af leiðandi skrefa markmiðinu mínu, sem er orðið frekar sjaldgæft. Nenni ekki alltaf út í göngu eftir vinnu og sund eða sjóferð.

Nýr mánuður

Ég rumskaði fyrst rétt fyrir fimm í gærmorgun. Skrapp á salernið að tæma blöðruna og fór beinustu leið aftur í bælið. Sofnaði aftur og klukkan var byrjuð að ganga átta þegar ég fór á fætur. Gleymdi mér aðeins í netvafrinu og um átta var ruslabíll á ferðinni í götunni. Ég var þó komin í sund um hálfníu. Synti 500m, flesta á bakinu. Fór tvær fjögurra mínútna ferðir í þann kalda, gerði æfingar í gufunni og slakaði vel á í sjópottinum. Þvoði mér um hárið og fór svo beint vestur í bæ til norsku esperanto vinkonu minnar. Tókum tvöfaldan tíma og kláruðum fyrsta kaflann í Kon-Tiki, sem við höfum reyndar lesið amk tvisvar sinnum áður. Varð að víkja fyrir bifreið þegar ég var á leiðinni í burtu og bíllinn straukst aðeins við smá steinkant við það. Hugsaði sem svo að það væri skárra heldur en að rispa bílinn sem ég var að víkja fyrir. Ætti að geta lappað upp á þessa skrámu næst þegar ég fer til pabba. Annarst ekkert nýtt né títt. 

Á leið í sund og esperanto

Allt í einu er komin helgi aftur og þessi helgi lendir akkúrat á mánaðamótum. Vel gekk í kortaframleiðslunni í gær en við gengum frá henni um hádegisbilið og skildum eftir síðustu og stærstu endurnýjunarskrána, rúmlega þúsund kort. Erum samt rúmlega hálfnaðar og munum að öllum líkindum klára um miðja næstu viku. Sinnti reikningagerð kortadeildar, mánaðamótauppgjöri, til klukkan hálftvö en tók þá smá innlegg. Er ekki búin með uppgjörið en það klárast fljótlega eftir helgi. Á föstudögum er vinnuskilda til klukkan 15:15 en eins og alla aðra daga megum við fara þegar allt er búið sama hvað klukkan er. Í gær vorum við búin milli hálfþrjú og þrjú. Þurfti samt ekki að logga neinn bónustíma því ég stimplaði mig inn og var byrjuð að vinna um hálfátta leytið þannig að ég skilaði 7klst og 15 mínútum í gær. Var með sjósundsdótið með mér en einhvern veginn var ég ekki í stuði fyrir svoleiðis, hvorki sund né sjó. Fór bara heim og setti í þvottavél. Hringdi í Huldu frænku sem sagði mér frá því að hún, foreldrar hennar og tveir af hundunum væru að fara í útilegu yfir eina nótt á einhvern stað ekki langt frá Húsavík. Frænka mín var mjög spennt yfir þessu og hún hlakkaði til. Það er langt síðan ég heyrði svona spenning í röddinni hennar. Hringdi líka í pabba og esperanto vinkonu mína. Pabbi hafði fengið góða heimsókn í gær og við Inger ákváðum hitting og munum því spjalla betur á eftir. Núna er hins vegar löngu komin tími til að drífa sig í sund því það opnaði klukkan átta. 

Blóðgjöf og út að borða

Í gær fór ég hvorki í sund né sjóinn. Vinnudagurinn var í styttra lagi og var ég komin heim frekar snemma eða fyrir klukkan þrjú. Rúmum klukkutíma síðar rölti ég í blóðbankann, rúmur kílómetri. Sú sem mældi þrýsting og tók viðtalið við mig ákvað að fá "æðahvíslara" til að taka við verkefninu eftir að ég var lögst á bekk. Leyfði þeirri sem tók við að velja og eftir þreyfingar á báðum ákvað hún að velja þá hægri. Það gekk ekki betur en svo að æðin "hljóp" undan nálinni. Sem betur fer má prófa aftur, þ.e. stinga í hina olnbogabótina og það gekk miklu betur. Fann ekkert fyrir stungunni og rennslið var mjög gott. Var komin heim aftur um hálfsex.

Ég og fyrrum fyrirliði vorum búnar að ákveða að nota sumargjöfina frá RB, út að borða fyrir tvo á veitingastaðinn sumac (tvípunktur yfir u-inu), og bjóða nýjasta sumarliðanum og manni hennar með okkur. Þau þáðu boðið. Ég hafði ætlað að mæta á staðinn um sjö en fyrrum fyrirliði bað mig um að hringja og athuga hvort það væri pláss. Í ljós kom að það var betra að mæta upp úr klukkan hálfátta. Fyrrum fyrirliði var samt komin niður í bæ um sex leytið. Ég bauð henni að koma til mín og bíða. Þau sem við buðum með okkur sóttu okkur rétt fyrir hálfátta. Lögðum bílnum við Austurbæjarskóla og röltum þaðan. Fengum pláss í innra herbergi á veitingastaðnum. Þar fyrir var reyndar hópur af Ameríkönum en það fór vel um okkur. Þjónustan var extra góð og maturinn meiriháttar. Þurftum ekki að velja því gjafabréfið hljóðaði upp á eitthvað sem er kallað meze og er sjörétta matseðill. Þessi matarupplyfun tók okkur rúma tvo tíma, sem liðu reyndar frekar hratt. Þegar við vorum að fara hittum við vinnufélaga sem hafði líka verið að leysa út gjafabréfið. Mæli annars 100% með þessum stað. Var komin heim um hálfellefu og fór ekki að sofa fyrr en rúmum klukkutíma síðar því ég þurfti auðvitað að lesa smá. 

Fallegur dagur

Vinnudagurinn í gær fór eingöngu í kortamálin því það var komin endurnýjun til framleiðslu. Ég var á ítroðslu endanum. Prentarinn var með smá vesen framan af þannig að við vorum til hádegis að klára allt daglegt. Höfðum veður af því að uppi yrði allt búið frekar snemma. Kláruðum níu skrár af tólf í endurnýjuninni eftir hádegi, það voru eitthvað á sjötta hundrað kort og næstum einn fjórði af heildarendurnýjuninni. Vorum búnar að ganga frá kortadeildinni milli tvö og hálfþrjú. Flestum verkefnum á efri hæðinni var lokið þannig að við stimpluðum okkur fljótlega út og ég fór beinustu leið í Nauthólsvík. Hringdi í eitt afmælisbarn, fyrrum samstarfskonu, og spjallaði við hana á leiðinni á milli. Var korter í sjónum, annað korter í gufu. Fór aftur í sjóinn í tæpar fimm og var svo korter í heita pottinum áður en ég fór upp úr. Aftur lenti ég í bílaröð frá hringtorginu við HR en var samt alls ekki eins lengi á leiðinni heim og sl. miðvikudag því röðin virtist mjakast aðeins hraðar en þá. 

Ósköp fátt en samt eitthvað

Klukkan var byrjuð að ganga sjö þegar ég vaknaði í gærmorgun, örfáum mínútum áður en vekjarinn átti að fara af stað. Engu að síður hafði ég ágætis tíma fyrir morgunrútínuna. Liðkaði reyndar ekki hendina með prjónaskap en ég gerði æfingar með tveimur tveggja kílóa lóðum. Var eiginlega aðalega að spá í gripið með þeirri hægri og hafa vinstri með til hliðsjónar. Mætti í vinnu um hálfátta. Fór fljótlega niður að hlaða inn nýjustu skrám og fylla út skiptiblöð. Stór dagur var í innlögnum í gær en það voru margar hendur á dekki svo við vorum búin um þrjú. Öllum verkefnum mínum var lokið rúmlega hálffjögur. Var komin í sund um fjögur. Kalda potts vinkona mín var mætt en hún vissi að ég ætlaði að byrja á því að synda svo hún beið eftir mér í sjópottinum. Synti 300m og svo var trítlið á milli potta og gufubaðs mjög svipað og á mánudaginn. Eftir sund kom ég aðeins við í heilsuhúsinu í Kringlunni, en ég var komin heim fyrir hálfsjö. 

Sól og blíða í gær

Vaknaði rétt fyrir sex. Gaf mér góðan tíma í alla morgunrútínu en var samt mætt í vinnu um hálfátta. Eftir að hafa stimplað mig inn, fyllt á vatnsflöskun, fengið mér heitt vatn og spjallað smá við vinnufélaga sem voru mætt fór ég niður að hlaða inn nýjustu skránum og útbúa skiptiblöð. Það tók aðeins um tuttugu mínútur svo ég var komin upp og byrjuð í innleggjunum rétt fyrir átta. Vinnudagurinn var búinn rétt fyrir fjögur. Þá fór ég beinustu leið í Hátúnið í vikulegan osteostrong tíma. Þar bætti ég mig á þremur tækjum af fjórum. Fékk aftur að setja þá hægri á hristipallinn og vafning utan um hana í slökuninni. Eftir tímann og slökunina fór ég beinustu leið í sund. Þar beið kalda potts vinkona mín eftir mér. Fórum fjórar ferðir í þann kalda sem var í heitara lagi fyrir okkur örugglega meira en 12°C. Á leiðinni í þriðju ferðina hittum við eina systur hennar og mæltum okkur "betra" mót við hana í sjópottinum eftir þann galda og smá gufu. Eftir fjórðu ferðina í þann kalda fór ég upp úr og kom við í Krónunni í Skeifunni á leiðinni heim enda var klukkan að verða sjö þegar ég skilaði mér loksins í heimahús. 

Síðasta vika ágústmánaðar hafin

Rumskaði fyrst upp úr klukkan sex en sofnaði strax aftur. Þegar ég vaknaði aftur heyrði ég stofuklukkuna slá átta högg. Fór á fætur. Pabbi var þegar klæddur og kominn á ról. Búinn að ganga frá úr uppþvottavélinni og sat við eldhúsborðið og lagði kapla. Ég settist á móti honum þegar ég var búin að sinna morgunverkunum á baðherberginu. Eftir nokkra kapla sem gengu frekar illa settist ég fram í gang við tölvuna hans pabba í smá stund. Vafraði á netinu og setti inn færslu. Færði mig svo inn í stofu. Pabbi var kominn þangað og búinn að kveikja á sjónvarpinu. Ég greip í prjónana. Það stóð alltaf til að fara aðeins út og safna skrefum en einhvern veginn leið dagurinn án þess að ég tosaði mig af stað. Borðuðum afganginn af folaldakjötinu í hádeginu. Las, prjónaði, lagði kapla og vafraði á netinu. Seinni partinn horfði ég á leik Liverpool og Brentford 2:0. Fljótlega eftir leikinn tók ég dótið mitt saman, kvaddi pabba og brunaði í bæinn.

Í heimsókn yfir nótt á Hellu hjá pabba

Vaknaði á sjöunda tímanum í gærmorgun. Rétt fyrir átta lagði ég af stað í sund. Það byrjaði ég á því að fara í kalda pottinn í 4 mínútur. Þegar ég var að ljúka tímanum kom sjósundsvinkona mín, þ.e. hún var að koma af brautum 7-8 og á leiðinni í nuddpottinn. Ég ákvað að fylgja henni þangað. Fórum saman í mína næstu ferð í þann kalda. Eftir fjórar mínútur þar fór hún upp úr en ég á brautir 7-8 og synti 600m áður en ég fór þriðju ferðina af fimm í þann kalda. Fór einnig í gufu í 10 mínútur og gerði æfingar og í 10 mín í sjópottinn. Þvoði mér svo um hárið áður en ég fór heim. Klukkan var að verða ellefu þegar ég kom heim. Pakkaði niður en fékk mér svo AB-mjólk með hnetum, fræjum og rúsínum. Rétt fyrir tólf sendi ég sms í Fossheiðina og dreif mig svo af stað. Þegar ég kom á Selfoss hafði ég ekki orðið vör við svarskilaboð (sá þau löngu síðar, kannski var ég bara svona blind) svo ég hringdi og fékk að vita að tvíburahálfforeldrarnir væru heima og heilsan góð (eins og stóð í skilaboðunum). Það var liðinn amk mánuður síðan ég var síðast á ferðinni og kominn tími til að renna við. Mátti þó ekki vera að því að bíða eftir tvíburahálfsystur minni sem var á leiðinni í berja og rabbabaravinnu. Stoppaði aðeins í uþb klst. Var komin á Hellu um þrjú. Pabbi var búinn að taka lásinn af og sat við eldhúsborðið að leggja kapla. Ég byrjaði því heimsóknina á að fara í smá kaplakeppni við hann. Ekkert löngu síðar færðum við okkur inn í stofu. Þar "datt" eitt stk. eldhús- eða fótþurrkuhandklæði af prjónunum og skömmu síðar fitjaði ég upp á enn einni tuskunni. Pabbi kveikti á sjónvarpinu. Man ekkert hvað hann var að horfa á en þegar sá þáttur var búinn var síðasti leikurinn í enska boltanum að hefjast. Aston Villa - Arsenal 0:2. Pabbi settist um stund við tölvuna en hann setti upp folaldakjöt um hálfsex og skrældi og skar niður eina væna sæta kartöflu sem hann sauð í sér potti stuttu áður en folaldakjötið var tilbúið. Skammturinn var svo stór að við borðum líklega afganginn í hádeginu í dag. Eftir mat hjálpuðumst við feðgin að mér frágang. Kvöldfréttir í sjónvarpinu voru búnar en við skiptumst á að horfa á útsendingar frá Arnarhóli og Hljómskálagarðinum. Ágætis tónleikar á báðum stöðum. Ég las bara stutt þegar ég fór í háttinn á tólfta tímanum, var örugglega steinsofnuð fyrir miðnætti.

Næst síðasta helgin í ágústmánuði

Vaknaði mjög snemma í gærmorgun, útsofin en ekki tilbúin til að fara strax á fætur. Klukkan var eitthvað aðeins byrjuð að ganga sex og ég byrjaði daginn á því að lesa smávegis. Mætti í vinnu um hálfátta og var fljótlega byrjuð á innleggjunum. Vinnan gekk ágætlega en það teygðist engu að síður úr deginum. Á föstudögum er markmiðið að vera búinn og farinn úr vinnu í síðasta lagi korter yfir þrjú. Getum ekki farið fyrr en allt er búið og ég var að stimpla mig út milli hálffjögur og fjögur í gær. Var með bæði sund- og sjósundsdót meðferðis. Nauthólsvíkin varð ofan á. Prófaði að nota ullarsokkana sem ég keypti á ullarsetrinu á Hvammstanga á leiðinni norður í vor. Hefði kannski líka átt að fara í ræfilslegu strandsskóna en þetta slapp til. Ekki þó viss um að ég geri þetta aftur. Annað hvort útvega ég mér betri sokka eða fer að nota sjósundsskóna aftur aðeins fyrr en ég ætlaði mér. Sjórinn var 9,8°C og skónotkunarviðmiðið hjá mér er ca 6-7. Var berhent eins og ég er búin að vera í allt sumar og svamlaði í sjónum í tæpt korter. Sat svo annað eins í gufunni og notaði tækifærið og gerði æfingar. Var komin heim um hálfsex. 

Enn eitt gosið við Grindavík

Rumskaði stuttlega um miðja nótt í fyrri nótt en vaknaði svo við vekjarann í gærmorgun. Rútínan varð eitthvað styttri fyrir vikið og bitnaði mest á morgunæfingunum. Mætti í vinnu um hálfátta og fljótlega var ég byrjuð að vinna innlegg. Verkefnum mínum var ekki lokið fyrr en korter fyrir fjögur og var ég með þeim síðustu út úr húsi, með í því að setja kerfið á áður ég og önnur hlupum út. Fór beint í sund og eftir fimm mínútur í kalda pottinum fór ég á braut 7 og synti 200 metra. Þá var komin svo mikil umferð í laugina að ég ákvað að kalla þetta gott sund í bili, betra en ekki neitt samt. Fór aftur í kalda pottinn. Svo gufu, kalda sturtu, sjópott og kalda sturtu á leiðinni upp úr. Var komin heim um sex. 

Beinþéttnimæling í gær

Fyrir tæpum tveimur vikum síðan fékk ég bréf frá Landsspítalanum þar sem ég var boðuð í beinþéttnimælingu og gefinn tíminn þann 21. þessa mánaðar kl. 9:10 í þá mælingu. Ég byrjaði því gærdaginn ekki alveg eins snemma og flesta virka daga en samt um hálfsjö leytið. Synti morgunrútínunni, gaf mér extra góðan tíma í æfingar og náði meira að segja að lesa aðeins áður en ég fór að huga að brottför í mælinguna. Hugmyndin var að fara á bílnum en leggja aðeins lengra frá og labba síðasta spölinn að Eiríksgötu 5. Hins vegar fann ég ekki stæði á þeim stað sem ég ætlaði að leggja bílnum svo ég fór alla leið, fékk stæði rétt við annan innganginn og þar sem ég var aðeins í fyrra fallinu borgaði ég fyrir rúman klukkutíma ef ég skyldi þurfa að bíða eitthvað. Skráði mig inn á fyrstu hæð og borgaði í þar til gerðan posa. Ég var mætt rúmum tíu mínútum fyrir boðaðan tíma en ég þurfti samt ekki að bíða lengi eftir að vera kölluð inn. Ég var búin að fylla út ákveðið skjal nema hæðina sem ég var ekki með á hreinu. Var síðast í mælingu fyrir fimm árum og síðan þá hef ég dregist saman um 2mm, mældist 169,3 í gær. Þyngdin 79kg. Ég þarf svo að panta tíma hjá lækni á heilsugæslunni til að fá niðurstöður en sú sem setti mig í tækið sagði að mælingar væru flestar mjög svipaðar og síðast þegar ég var mæld og það voru alls ekki slæmar mælingar. Mætti í vinnu um hálftíu og eftir smá fund fór ég í innlegg. Vinnudegi lauk um hálffjögur leytið og þá fór ég beinustu leið í Nauthólsvík. Svamlaði um í 11,1°C sjónum í uþb korter en því miður var gufan lokuð. Sat í heita pottinum í annað korter. Hefði líklega átt að fara aftur í sjóinn og gefa mér enn betri tíma því ég var án gríns næstum þrjú korter á leiðinni heim því umferðin frá HR var bíll við bíl, stopp og bið inn á milli og það var byrjað þegar ég var á leiðinni í Nauthólsvík.

Veðurblíða í gær og margt um manninn í sundi seinni partinn

Var komin á fætur rúmlega sex í gærmorgun. Morgunrútínan svipuð og flesta virka daga. Mætti í vinnu um hálfátta og fljótlega var ég byrjuð í innleggjunum sem voru mörg í gær. Verkefnum var ekki lokið fyrr en um hálffimm. Þá fór ég beint í sund. Lagði bílnum á stæði við Laugardalsvöllinn og rölti þaðan í laugina. Margar af brautunum voru fráteknar vegna æfinga og þær sem ekki voru fráteknar voru undirlagðar í leik eða slatta af syndandi fólki. Ég notaði þetta kraðak sem afsökun fyrir því að skrópa í sjálft sundið en fór tvisvar í frekar volgan kalda pottinn, tuttugu mínútur í gufu og tíu mínútur í sjópottinn áður en ég fór upp úr og heim. 

Hraðferð á logninu í gær

Glaðvaknaði korter fyrir sex í gærmorgun. Morgunrútínan var svipuð og oftast áður. Gaf mér góðan tíma í fyrstu æfingalotu dagsins en var líka að vafra á netinu. Mætti í vinnu um hálfátta. Fyrirliðinn og sumarliðinn sem hefur fengið framlengingu til áramóta sáu um það sem þurfti að gera varðandi kortamálin, bókhald og hlaða inn skrám. Ég var aðeins í innleggjum í gær. Það gekk vel og flestum verkefnum var lokið um þrjú. Mér fannst of snemmt að mæta strax þá í vikulegan osteostrong tímann minn en það tók því heldur ekki að fara heim. Hringdi í pabba sem var á ferðinni. Hafði skroppið í bæinn með bílinn í eftirlit hjá Brimborg en var staddur í Flóanum á leiðinni heim eftir bæjarferðina. Ég lagði mínum bíl fyrst við Hátún 10 og eftir að hafa talað við pabba hringdi ég í vinkonu mína sem er með bás á torginu öll sumur. Hún var heimavið í gær og við spjölluðum í dágóða stund. Rétt fyrir fjögur færði ég bílinn að Hátúni tólf og þótt ég væri mætt rúmum tuttugu mínútum áður en tíminn minn átti að hefjast komst ég strax að. Bætti mig á tveimur tækjum af fjórum og var við minn besta árangur á hinum tveim. Eftir jafnvægisæfingarnar bað ég um að fá að setja hægri hendina á hristipallinn í smá stund og í hvíldinni fékk ég auka vafning utan um hana. Eftir tímann fór ég beint í sund. Synti reyndar ekkert en fór tvisvar í þann kalda, gerði fingra og úlnliðsæfingar í gufunni og fór smá stund í sjópottinn líka. Var komin heim um sex. 

Ný vinnuvika

Man ekki nákvæmlega hvenær ég rumskaði í gærmorgun en ég kúrði amk uppí alveg til klukkan hálfátta. Þá fór ég á fætur og dundaði mér við ýmislegt þar til klukkan var langt gengin í ellefu. Um ellefu var ég komin vestur í bæ til norsku esperanto vinkonu minnar. Stoppaði hjá henni í einn og hálfan tíma. Við lásum m.a. uþb eina og hálfa bls. í Kon Tiki. Keyrði aðeins út að Gróttu á leiðinni heim en stoppaði ekkert. Meiningin var svo að skreppa í göngutúr seinna um daginn en ég festist yfir fótbolta leikjum og þáttaáhorfi og ákvað að þetta yrði bara svona hreinasti letidagur þar sem ég fór heldur ekki í neitt sund. Í gær var síðasti dagur sumartímabilsins í Nauthólsvík. Frá og með deginum í dag verður aðstaðan lokuð á sunnudögum og mánudögum en hina dagana opið frá 10-19. Opnunartíminn breytist kannski þegar líður á haustið. Sl. vetur hefur verið opnað klukkan ellefu og á laugardögum lokað klukkan fjögur. 

Í bænum þessa helgin

Svaf í einum dúr frá hálfellefu til hálfsex í fyrrinótt og þar sem ég var útsofin fór ég á fætur. Tók af rúminu og setti hreint á í staðinn. Setti þetta samt ekki í þvottavélina fyrr en um átta, rétt áður en ég dreif mig í sund. Var tvo tíma í sundi. Synti 500m og fór 3x5mín í þann kalda. Fór líka í gufu og sjópottinn og sat svo á stól í smá stund. Þvoði mér um hárið og var komin heim um hálfellefu leytið. Horfði á einn þátt og akkúrat þegar hann var búinn var fyrsti leikur dagsins í enska að byrja. Liverpool sótti nýliðana Ipswich heim. Heimaliði byrjaði af krafti, varðist vel og gerði "mínum" mönnum erfitt fyrir í fyrri hálfleik. Ekkert mark var skorað í fyrri hálfleik. Leikurinn endaði 0:2 fyrir gestunum en ég missti af báðum mörkunum, sá þau bara í endursýningu, því ég skrapp í smá stund frá (til að hengja upp úr þvottavélinni). Eftir leikinn skrapp ég út í rúmlega klukkutíma göngutúr. Fór svo ekkert meira út eftir það. 

Ágústmánuður rúmlega hálfnaður

Nú brá svo við að ég svaf alveg þar til vekjarinn vakti mig með látum í gærmorgun. Að vísu rumskaði ég aðeins um þrjú leytið og hefði eiginlega þurft að fara á pisseríið en í stað þess sneri ég mér á hina hliðina og vissi næst af mér þegar vekjarinn fór að ólmast. Morgun rútínan var því aðeins í styttra lagi en það kom ekkert að sök. Var mætt í vinnu um hálfátta. Vissi ekki strax að fyrirliði kortadeildar var mætt og farin niður að hlaða inn skrám en þegar ég opnaði tölvuna korter fyrir átta var hún að setja inn að skiptiblöð væru tilbúin. Ég græjaði framleiðslublöð og talningablöð, prentaði út öll gögn og var komin niður um átta. Kláruðum allt daglegt og rúmlega helming af endurnýjun sem var að bíða eftir plastsendingu. Hefðum klárað alla endurnýjunina ef umslögin hefðu ekki verið á þrotum. Einhvern veginn fór það framhjá okkur að þau væru að klárast en nóg er til af formum. Við gengum frá kortadeildinni korter fyrir tíu og ég sendi beiðni á viðkomandi aðila um að útvega okkur umslög eins fljótt og kostur væri. Eftir kaffi kláraði ég bókhaldsmál áður en ég stimplaði mig úr kortunum og setti upp tímateljara fyrir næsta verkefni. Flestum verkefnum var lokið upp úr klukkan tvö. Þrír sumarliðar kvöddu okkur en hugsanlega kom tveir þeirra í smá afleysingu stöku sinnum næstu vikurnar. Fimmti sumarliðinn mun kveðja eftir næsta þriðjudag, sá sjötti um mánaðamótin en sá sumarliði sem kom síðastur inn hefur fengið framlengingu til áramóta. Fór í sund eftir vinnu og beint á braut 6 þar sem ég synti 400m. Fór 3x5 mínútur í þann kalda sem reyndar var í volgara lagi, 10 mínútur í gufu og sjópott og 5 mínútur í 42°C pottinn. Kom við í fiskbúð Fúsa sem opnaði aftur í vikunni eftir sumarfrí. Keypti harðfisk og einnig ýsu í soðið. Var komin heim einhvern tímann á fimmta tímanum. 

Sól og blár himinn

Vaknaði upp úr klukkan hálfsex í gærmorgun. Tíminn fram að því að ég lagði af stað í vinnuna var fljótur að líða. Rútínan var svipuð og oftast. Var svo mætt í vinnu rétt um hálfátta. Vann aðallega í innleggjum en ég tók bæði að mér að útbúa framleiðslublöð og hlaða inn kortaskrám þótt tvær aðrar kortakonur væru á svæðinu. Þurfti nefnilega hvort sem er að fara niður til að mappa ákveðin skjöl frá því í fyrra dag. Auðvitað hefði það mátt bíða en fyrsti innleggja skammturinn minn var búinn um níu leytið en hinar tvær voru enn með verkefni og það var ekki alveg kominn tími á kaffipásu. Skrifandi um kaffi þá eru núna liðnir tíu mánuðir síðan ég drakk síðast kaffi. Fljótlega eftir kaffi var ísbíllinn á ferðinni, pantaður af framkvæmdastjóra til að gera vel við sumarliðana okkar en í gær var síðasti vinnudagur eins af þeim. Ég ákvað að skreppa út og spyrja hvort til væri sykurlaus ís og viti menn ég fékk einn í hendurnar sem stóð á "Utan tilsadt sucker". Og það sem meira var, eftir að hafa borðað hann var maginn alveg til friðs og löngun í gotterí eða meira að borða hafði ekki æsts upp. Vinnudegi mínum lauk um þrjú. Hringdi í pabba og spjallaði við hann á meðan ég var á leiðinni yfir í Laugardalslaugina. Hann hafði farið í myndatöku á Selfoss á miðvikudaginn og skroppið í Krónuna í leiðinni. Þar fann hann uppáhalds hráefnið sitt í pönnukökugerð og var að undirbúa slíka framkvæmd þegar ég hringdi í hann. Ég fór beint á brautir 7 og 8 og byrjaði á því að synda 300m. Gufan var lokuð en ég fór 2x5mínútur í kalda, 15 mín í sjópottinn og 10 mínútur í nudd/magnesíum pottinn. Kalda potts vinkona mín var að koma þegar ég var að labba út úr byggingunni um hálffimm leytið. Lánaði Oddi bílinn eftir að ég kom heim og í staðinn skrapp hann í Sorpuferð á leiðinni í Krónuna. Horfðum svo á þrjá NCIS þætti eftir fréttir í gærkvöldi. 

Í sjóinn í gær

Þar sem ég var ekki alveg ákveðin í hvort ég færi í sund eða sjóinn eftir vinnu í gær hafði ég báða pokana með mér. Vinnudagurinn hófst á kortaverkefnum. Innan við þrjúhundruð kort voru í framleiðslu og ekki hægt að framleiða nokkur vegna hráefnisskorts. Vélin og prentarinn tóku smá "kast" en við vorum búnar að framleiða og ganga frá niðri korter fyrir tíu. Eftir kaffi kláraði ég bókhald og fylgiskjöl með pósti áður en ég stimplaði mig út úr kortunum, setti upp nýjan tímamæli og fór í innleggin. Öllum verkefnum mínum lauk milli klukkan tvö og hálfþrjú og þá mátti ég fara. Tók stefnuna í Nauthólsvík. Svamlaði í sjónum í uþb korter, var annað eins í gufunni og gerði æfingar þar, fór í kalda sturtu á eftir og sat í heita pottinum í rúmt korter áður en ég fór upp úr og heim. Davíð Steinn er allur að hressast og þótt hann ætli að halda sig inni við til morguns þegar hann á næstu vakt þá var hann hann að þvo af sér. Hann var því líka búinn að taka af snúrunum eftir mig og koma með upp, saman brotið, og setja á rúmið mitt. Hvorki ég né Oddur kennum okkur meins svo það er spurning hvort við séum sloppin í þetta sinnið. Krosslegg fingur og tær og vona það allra besta. 

Full skoðun á bílinn

Vaknaði nokkru á undan klukkunni eins og oftast áður, samt ekki mjög löngu á undan. Morgunrútínan var svipuð og oftast og ég var mætt í vinnu um hálfátta. Eftir að hafa stimplað mig inn, fyllt á vatnsflöskuna og fengið mér bolla af sjóðandi vatni byrjaði ég á því að græja tölu og bókhald fyrir kortadeild áður en ég sneri mér alfarið að innleggjum. Vinnudagurinn varði til klukkan að verða fjögur. Þá byrjaði ég á því að skreppa með bílinn að Klettagörðum 11 þar sem ég komst strax að með bílinn í skoðun hjá Frumherja. Það tók ekki mjög langan tíma, fékk enga athugasemd og nýjan miða á númeraplöturnar. Síðan lá leiðin í Laugardalslaug. Hringdi í pabba áður en ég fór inn. Hann er búinn að taka niður Reynitré sem var komið á tíma og aldur og hefði getað oltið um koll í næsta roki og þá jafnvel skemmt eitthvað í leiðinni. Það eru greinilega sundæfingar að byrja um hálffimm og aftur skrópaði ég í sundið sjálft en kaldi potturinn, gufan og sjópottinn héldu mér aðeins við efnið. 

Osteostrongtími í gær

Var mætt í vinnu um hálfátta. Græjaði bókhald og framleiðslutölur fyrir kortadeildina eftir að fyrirliðinn hafði ákveðið að við sumarliðinn ættum að fá að vinna saman og sumarliðinn ákveðið að hún vildi hlaða inn skrám fyrstu dagana en taka við bókhaldskeflinu aftur síðar í vikunni. Annars var ég í innleggjum. Fyrirliggjandi innlegg kláruðust um hálftíu leytið og næstu verkefni skiluðu sér ekki fyrr en um og upp úr hálfellefu. Allt var svo alveg búið milli þrjú og fjögur. Ég stimplaði mig út rétt fyrir hálffjögur. Osteostrong tími minn er ekki fyrr en kl. 16:20 en ég var mætt rúmum hálftíma fyrr en það og þurfti samt ekki að bíða. Bætti mig á þremur tækjum af fjórum og var við besta árangurinn á fjórða tækinu. Var komin í sund fyrir klukkan hálffimm. Synti reyndar ekkert því mér fannst of mikið kraðak á brautunum. Innisundlaugin er lokuð og því allar sundæfingar í útilauginni. Ég er svo sem ekkert viss um að ég hefði synt mikið hvort sem er en fór í þann kalda sem var um 10°C, gufuna og sjópottinn. Kom við í sokkabúðinni Copra við Garðatorg og keypti mér tvö pör af orkusokkum. Ætla að prufa hvort þeir hafi betri áhrif á bólgurnar í fótunum. Kom heim um hálfsjö. Davíð Steinn er allur að hressast en þarf að fara varlega næstu daga. Fer amk ekki í vinnu í dag og á svo frívakt næstu tvo daga og kemst svo kannski á helgarvaktina sína. Ég náði loksins að klára fyrstu bókina af fjórum af Sólheimasafninu, um 550bls. en ég var heldur ekki að fara að sofa fyrr en um hálftólf þótt ég færi upp í rétt fyrir tíu. 

Tólfti ágúst

Ingvi mágur og hundarnir Vargur og Ugla voru fyrst á fætur um sjö leytið í gærmorgun. Að vísu var pabbi örugglega búinn að koma aðeins fram fyrr um morguninn til að taka niður helstu tölur og fá sér eitthvað. Ég klæddi mig um það leyti sem hundunum var hleypt út að pissa og bjó til kaffi. Er enn ekki farin að drekka kaffi aftur. Það eru uþb tíu mánuðir síðan ég drakk þann drykk síðast. Enn í pásu en ekki tilbúin að segja að ég sé hætt. Sé það nefnilega fyrir mér að leyfa mér einn til tvo bolla á dag einhvern tímann. Núna er markmiðið að vera kaffilaus amk í ár. Fljótlega fóru systir mín og mágur að hugsa sér til hreyfings enda löng keyrsla norður framundan. Þurftu að skila af sér kerru á N1 við Gagnveg og þar opnar ekki fyrr en tíu á sunnudögum. Kerran var notuð til að koma dýnu úr íbúðinni sem Bríet og Bjarki hafa leigt sl ár og aftur á Hellu. Unga parið hefur reyndar verið meira í sveitinni hjá foreldrum hans, bæði að hjálpa til og flýja flugnabit. Um hálftíu kvöddu norðanfólkið og hundarnir. Ég var áfram á Hellu fram eftir degi. Horfði á beinar útsendingar, prjónaði, lagði kapla, vafraði á netinu og las. Klukkan var farin að ganga fimm þegar ég kvaddi pabba. Þrátt fyrir umferð gekk ferðin í bæinn ágætlega, amk framan af. Það var mikil umferðasulta alveg frá Sandskeiði og að Rauðavatni. Kom heim um hálfsjö. Davíð Steinn greindist í fyrsta skipti með covid um helgina. Hann tók tvö test og bæði voru jákvæð. Hann er því ekki að fara að vinna í dag eða á morgun enda ekki orðinn hitalaus eða var það ekki í gærkvöldi. 

Alls konar og ekki neitt

Rumskaði um sjö leytið í gærmorgun við það þegar hundar mágs míns og systur ráku á eftir honum að hleypa sér út að pissa. Mágur minn fór með hundana í stutta göngu. Pabbi var kominn á fætur og var að horfa á beina útsendingu frá ólympíuleikunum. Helga systir var eitthvað illa fyrirkölluð og var í rauninni sárlasin og það voru alls ekki bara timburmenn ef það voru þá timburmenn. Um hálftólf leytið ákvað Ingvi að fara í aðeins lengri göngu með hundana og ég fékk að fara með. Löbbuðum að Rangánni og upp með henni, vegslóða, alveg að þar sem greinilega eru framkvæmdir í gangi. Á baka leiðinni fórum við annan veg sem Ingvi vildi sjá hvert leiddi. Sá vegur var aðeins meiri en slóði. Á tímabili vorum við stutt frá fjósinu á Helluvaði, aðeins tún á milli. Komum svo að öðrum stað þar sem einnig hefur verið framkvæmt og byggt. Göngutúrinn varði alls tæpa tvo tíma og forritið í simanum skráði á mig þrjár mislangar göngur innan þess tíma. Í fyrsta skipti í nokkurn tíma sem skref dagsins fara yfir níuþúsund. Horfði á úrslitaleik kvenna í handbolta þar sem þær norsku unnu þær frönsku. Svo tók ég mig til og matreiddi löngu sem Helga hafði valið þegar þau pabbi skruppu saman í fiskbúðina stuttu fyrir helgi. Steikti lönguna upp úr krydduðu rjómablönduðu hrærðu eggi og smá hveiti á salatmæsterpönnunni hans pabba. Áður var ég búin að skræla og bita niður lauk og sæta kartöflu sem ég gufusauð. Með þessu bjó ég einnig til sallat. Helga hafði litla sem enga matarlyst en settist þau niður með okkur pabba og Ingva í smá stund og smakkaði á fiskinum. Matargerðin heppnaðist vel hjá mér og ef Helga hefði haft betri lyst hefði fiskurinn klárast. Pabbi sá um uppvaskið eftir matinn og það sem eftir lifði dags og kvölds var ég ýmist að prjóna, lesa, klappa hundum og/eða fylgjast með beinum útsendingum.

Komin aftur á Hellu

Svefninn í fyrrinótt var eitthvað furðulegur. Á tímabili kveikti ég á lampanum og setti upp lesgleraugu. Það var um miðja nótt. Engu að síður vaknaði ég löngu áður en vekjarinn átti að ýta við mér og var komin á fætur fyrir sex og mætt í vinnu um hálfátta. Ég fór niður að kveikja á kortavélinni, hlaða inn nýjustu skrám og fylla út skiptiblöð. Sumarliðinn sá um að útbúa framleiðslu og talningablöð og prentaði svo allt út áður en hún kom niður. Framleiðslu lauk á rúmum klukkutíma og frágangurinn tók ca hálftíma í viðbót. Eftir það skráðum við tímana á kortavinnslu, settum upp nýtt "tímatrakk" og snerum okkur að öðrum verkefnum. Nóg var að gera í innlögnunum, það kláraðist ekki fyrr en um hálffjögur og var klukkan orðin fjögur áður en ég stimplaði mig út. Fór beint yfir í Laugardalslaug og á braut tvö. Var bara búin að synda uþb 100m þegar sú braut fylltist að krökkum sem greinilega voru að fara að æfa svo ég færði mig snarlega yfir á braut 1, eftir það gat ég bara synt á bakinu aðra hverja ferð en ég synti 400m í það heila. Sat svo í tíu mínútur í 12°C (of heitum) kalda pottinum og ca 15 mínútur í sjópottinum áður en ég fór upp úr. Þvoði mér um hárið og skrapp svo aldrei þessu vant í Hagkaup í Skeifunni. Kom heim um hálfsjö leytið og fékk mér hressingu áður en ég pakkaði niður og lagði af stað austur. Var komin á Hellu um níu. Helga systir hringdi úr Hvolsvelli um klst síðar. Þá var ég farin að horfa á þátt og sagðist sækja þau um ellefu. Pabbi lánaði mér bílinn í það verkefni því þau voru með hundana með sér í matarboði hjá fólkinu sem seldi þeim Varg og lánaði þeim Uglu til uppeldis. 

Í sjóinn í gær

Vaknaði nokkrum mínútum áður en vekjarinn átti að ýta við mér í gærmorgun. Mætti til vinnu um hálfátta. Eftir að hafa fyllt á vatnsbrúsann og fengið mér bolla af heitu vatni fór ég niður í kortadeild, hlóð inn nýjustu skránum og útbjó skiptiblöð. Lengstan tíma tók að bíða eftir að fartölvan opnaði aðganginn minn og var ég niðri í tæpan hálftíma. Restina af vinnudeginum var ég í innleggjum og í yfirlestri í blálokin. Vinnudagurinn minn varði í akkúrat átta tíma. Var með sjósundsdótið meðferðis en ætlaði að vera skynsöm og láta skoða bílinn fyrst. Kom við í Frumherja við Grenásveg 7 því þangað hef ég farið undanfarin ár. Nær hefði líklega verið að fara á stöðina við Klettagarða. Klukkan var um fjögur og hálftími í lokun en því miður þá voru veikindi svo þótt ég kæmist inn á stöðin við Grensás og hitti einn mann að máli, þá var eiginlega búið að loka. Lét skoða bílinn síðast þann 8. ágúst í fyrra. Bílnúmerið endar á átta svo þetta er skoðunarmánuðurinn. Hef hann og tvo til svo það er nægur tími. Samt væri gott að ljúka þessu af. Hringdi og spjallaði við Ellu vinkonu þegar ég var á leiðinni í Nauthólsvík. Var komin ofan í sjóinn rúmlega hálffimm og svamlaði um í tæpar tuttugu mínútur. Eftir 10 mín í gufu, kalda sturtu og næstum tuttugu mínútur í pottinum fór ég upp úr. Sá á símanum að Helga systir hafði verið að reyna að ná í mig og hringdi til baka. Þau Ingvi verða á Hellu um helgina en eru boðin í mat í Hvolsvöll í kvöld. Pabbi er búinn að kaupa löngu sem ég á að matreiða á morgun. Fer líklega samt austur strax í kvöld. Frá Nauthólsvík lá leiðin í Krónuna við Fiskislóð svo ég var ekki komin heim fyrr en um hálfsjö leytið. 

Draugalegt þokuloft í gærmorgun

Það var svolítið sérstakt að keyra til vinnu í gærmorgun því það var þokkalega þétt þoka og umhverfið hálf draugalegt þannig. Annars var framleiðsludagur. Kortasumarliðinn fór niður að hlaða inn skrám og fylla út skiptiblöð og ég útbjó framleiðslublöðu, fyllti út talningablöð og prentaði öll gögn út áður en ég fór niður. Framleiðsluvélin var með smá mótþróaþrjóskuröskun í upphafi og þurfti að taka hana einu sinni niður áður en hún komst af stað. Eftir það gekk allt eins og í sögu. Vorum næstum búnar með dagskammtinn þegar boð komu um að það væri fundur í morgunkaffinu um 9:40. Á fundinum var verið að fara yfir alls konar tölur varðandi vinnuna okkar allra. Framkvæmdastjórinn var mjög ánægður með hvað gengi vel á öllum sviðum. Hann langar þó að fá að sjá hversu mikil tími fer í kortaframleiðsluna þessa fáu mánuði sem eftir eru af henni svo hann bað um að við myndum skrá tímana okkar á það sama og við skráðum þá á þegar kortadeildin var staðsett í seðlabankanum, alltsvo þegar við værum að vinna í kortunum. Eftir fundinn fórum við niður aftur, kláruðum daginn og afganginn af endurnýjuninni sem kom stuttu fyrir sl mánaðamót. Sendum upp tólf fulla póstbakka um tólf leytið, ellefu af þeim tengdir endurnýjuninni. Vorum búnar að ganga frá kortadeildinni niðri en eftir mat kláruðum við frágang og fylgiskjöl, skráðum tímana og settum upp nýtt "tímatrakk" áður en við fórum í næsta verkefni. Mínum verkefnum var ekki lokið fyrr en um hálffimm leytið. Þá var komin sól og blíða úti. Var bæði með sund og sjósundsdót meðferðis. Ákvað að skella mér í sundið þar sem ég var viss um að það væri krökkt af fólki í Nauthólsvíkinni. Hringdi í pabba og spjallaði við hann á meðan ég var á leiðinni yfir. Hann var nýlega kominn heim úr smá ferðalagi um Rangárvelli með Bjarna Böðvarssyni frá Þinghól sem sótti hann og fékk hann til að fara með sér um þessar slóðir. Það var líka kraðak í sundlauginni sjálfri og kaldi potturinn ívið of heitur eða meira en 14°C. Sleppti því að synda en lét mig hafa það að sitja 2x10 mínútur í "kalda" pottinum, 10 mínútur í gufu og 10 mínútur í sjópottinum. Var komin heim um hálfsjö leytið.

Vikan uþb hálfnuð

Eitthvað var svefninn ekki alveg hundrað prósent í fyrrinótt, fannst ég ekki útsofin þegar ég fór á fætur upp úr klukkan sex. Ég var engu að síður tilbúin í daginn. Morgunrútínan var svipuð. Var mætt í vinnu um hálfátta. Nóg var af verkefnum og ég var að alveg til klukkan korter í fjögur. Fór þó auðvitað í kaffi og matarpásur. Tvær úr kortunum voru í fríi og sumarliðinn sem þekkir inn á það dæmi er enn lasin eftir slæma covid-pest. Ég fór því bæði niður að hlaða inn skrám og gera skiptablöð sem og útbúa framleiðslublöð og gera bókhaldið. Fékk að fara úr vinnu áður en allt var alveg búið því þar sem það var frídagur á mánudaginn hafði ég fært osteostrong tímann til um einn dag. Átti tíma tíu mínútur yfir fjögur í gær. Var mætt aðeins fyrr en það og átti von á því að þurfa kannski að bíða. En ég komst strax að, bætti mig á tveimur tækjum af þremur og jafnaði árangur á einu. Var ekki svo langt undir því besta á fjórða tækinu. Eftir jafnvægisæfingar á eftir og slökun fékk ég mér vatnsglas áður en ég kvaddi og fór beint í sund. Synti reyndar ekkert, fannst of margt á öllum brautum en ég fór tvisvar fimm mínútur í þann kalda og 15 mínútur í gufu og einnig sjópott. 

Vinnuvika í styttra lagi framundan

Fór á fætur um hálfátta í gærmorgun. Pabbi var löngu kominn á fætur og hafði lokað dyrunum inn á þvottahúsgang og inn í stofu. Hann hafði kveikt á sjónvarpinu um sex leytið og fylgst með beinum útsendingum. Ég settist inn í stofu með bók og prjóna. Fljótlega rétti pabbi mér fjarstýringuna og fór að sýsla ýmislegt annað. Um hádegið bauð hann upp á saltfisk með kartöflum og smjöri. Ég lagði fyrsta kapal dagsins eftir mat, 10, 20, 30, og hann gekk strax upp. Um hálf fimm leytið tók ég mig saman og kvaddi pabba. Umferðin var þónokkur í báðar áttir en gekk vel. Ákvað samt að beygja upp Villingaholtsafleggjarann og keyra þá leiðina í gegnum Stokkseyri og fara Þrengslin. Var komin heim upp úr sex. Fékk Odd til að koma út til að hjálpa mér inn með ferðatöskuna. Báðir bræður voru heima.  

Góður bíltúr með pabba í gær

Klukkan var að verða hálfátta þegar ég fór á fætur í gærmorgun. Pabbi var þá þegar kominn á fætur. Morguninn var þokkalega rólegur; beinar útsendingar, prjón, lestur, æfingar og netvafr. Um hádegisbilið spurði pabbi hvenær ég hefði hugsað mér að fara. Ég var ekki alveg búin að hugsa það og spurði á móti, í gríni, hvort hann væri orðinn þreyttur á mér. Ekki var það nú meinið heldur var hann að spá í hvort ég kæmi með honum í smá bíltúr eftir hádegið. Auðvitað var ég til í bíltúr. Lögðum af stað rétt fyrir tvö. Ókum næstum upp að Keldum en beygðum upp til vinstri rétt áður, veg sem merktur er Syðri Fjallabaksleið. Ókum alla leið upp að leyfum af eyðibýlinu Rauðnefsstöðum sem fór í eyði eftir Heklugosið 1947. Í bakaleiðinni komum við niður hjá Tumastöðum í Fljótshlíðinni. Þessi bíltúr og smá stopp við Rauðnefsstaði tók rétt rúma tvo tíma.

Rólegheit

Vaknaði fyrir klukkan sex. Þurfti og fór á pisseríið en fannst of snemmt að fara strax á fætur. Las í smá stund en vissi svo næst af mér um níu leytið. Pabbi var auðvitað löngu kominn á fætur þegar ég kom fram um hálftíu. Hann var að horfa á beina útsendingu frá Frakklandi. Fórum svo í smá kaplakepnni og vöfruðum á netinu. Eftir hádegisfréttir skruppum við í búðina. Þegar við komum til baka kveikti pabbi á grillinu en ég setti upp sæta kartöflu og útbjó smá sallat. Vorum að borða um tvö leytið.

Ein af bókunum af safninu er meðferðis hún er númer tvö í röðinni eftir Camillu Lackberg og Henrik Fexeus um samstarf lögreglu og sjáanda; Gátan. Vel yfir fimmhundruð blaðsíður og ég er bara komin á blaðsíðu tvöhundruðogeitthvað. Hinar þrjár bækurnar eru svipað þykkar svo ég spyr mig; Hvenær ætla ég að læra að sníða mér stakk eftir vexti? Ég þarf að hafa mig alla við að klára þessar fjórar á 30-60 dögum því ég er með fleira lesefni á kantinum fyrir utan annað dútl.

 

Verslunarmannahelgi

Eftir vinnu á fimmtudaginn ákvað ég að skreppa aðeins í sund enda með sunddótið meðferðis. Það var búið að rigna mikið um daginn og um hádegisbilið kom þvílíkt úrhelli í þónokkurn tíma að það dimmdi yfir. En þegar ég kom í laugina rúmlega þrjú fór að sjást í bláan himin og sólina. Synti því í uþb hálftíma, flestar ferðir á bakinu, fór tvisvar sinnum fimm mínútur í kalda, 15 mínútur í gufu og næstum annað eins í magnesíum pottinn. Var komin ofan í þann pott rétt fyrir fjögur og á slaginu fjögur var sturtað úr heilli fötu af magnesíumflögum yfir okkur. Þvoði mér um hárið á leiðinni upp úr þar sem ég var að fara út úr bænum í nokkra daga. Hringdi í pabba þegar ég var á leiðinni heim og sagðist eiga eftir að pakka og fá mér eitthvað áður en ég drifi mig af stað. Hann var í miðju kafi að steikja pönnukökur. Ég var komin austur um átta leytið og frétti þá að Helga systir væri á leiðinni. Þau hjónin höfðu lagt af stað að norða um fimm leytið svo ég var farin að sofa þegar þau mættu á svæðið. Rumskaði aðeins þegar þau komu með tvo hunda af þremur um eitt leytið. Hefði þurft að fara og tæma blöðruna en ég sofnaði aftur og vaknaði ekki fyrr en um sjö leytið. Þá var pabbi farinn í sund og enginn annar kominn á fætur. Korter yfir tíu lögðum við mæðgin af stað í jarðaförina, Ingvi varð eftir til að passa upp á hundana. Vorum komin að Keldum tæpum hálftíma fyrir athöfn. Sátum út í bíl og fylgdumst með á fm 107,1. Athöfnin var mjög falleg og minningarorðin alveg í anda frænku minnar. Öðlingarnir og Gísli Stefánsson sáu um kór og einsöng, frændi minn Guðjón Halldór Óskarsson var organisti og frændi minn sr. Kristján Arason var sálusorgarinn. Margt var um manninn og eftir athöfn í kirkju og úti í garði var öllum boðið í íþróttahúsið á Hellu. Hitti ótal marga en hafði ekki tök á því að knúsa alla. Vorum komin í Hólavanginn upp úr klukkan tvö. Bríet frænka var komin og hún bað um að fá far með foreldrum sínum á Selfoss en þau voru að fara í bústað með vinkonu og verða þar næstu daga. Systir mín í fríi fram yfir næstu helgi og mágur minn að vinna í bænum í næstu viku. Við pabbi höfðum það bara gott. Fylgdumst eitthvað með beinum útsendingum, vöfruðum á netinu, lögðum kapla og ég var líka að lesa. Hafði bleikju og sætar kartöflur í kvöldmatinn, horfði á eina mynd í gærkvöldi og fór óvenju seint (á eftir pabba) í háttinn eða stuttu fyrir miðnætti. 

Árný Oddbjörg Oddsdóttir, f 6. jan 1928 d 13. júlí 2024

Í dag fylgi ég föðursystur minni síðasta spölinn og þakka fyrir samfylgdina. Það eru ótal skrefin upp að Helluvaði í gegnum tíðina og margar, margar minningarnar bæði gamlar og nýrri, allar góðar. Erfitt að gera upp á milli hverjar á að toga fram og festa á blað og verður líklega ekki gert. Þessi rólega, hlýja og blátt áfram frænka mín sem nú hefur fengið hvíldina. Lúmst stríðin og gott að spjalla við hana. Ekkert svo mörg ár síðan hún lagði prjónana á hilluna. Ræktaði garðinn sinn í öllum skilningi og var mjög stolt af fólkinu sínu. Mátti líka alveg vera það, sá fjársjóður er aldrei ofmetinn. Takk fyrir allt og allt! 

Bóksafn og hopp í sjónum

Í gærmorgun var ég mætt í vinnu rétt fyrir klukkan hálfátta. Það var framleiðsludagur og ég var komin niður og búin að kveikja á vélinni korter fyrir átta. Að hlaða inn skrám og útbúa skiptiblöð gekk vandræðalaust fyrir sig. Sjálf vélin var með smá mótþróaþrjóskuröskun í byrjun en þegar hún komst af stað gekk allt ljómandi vel. Vorum búnar með daglega framleiðslu um kaffi leytið. Eftir kaffi byrjuðum við á nýjustu endurnýjuninni. Framleiddum alls níu skrár af ellefu en skildum tvær stærstu skrárnar eftir. Slökktum á framleiðsluvélinni um tvö en vorum hálftíma lengur niðri að plokka gula miða úr nýlegri plastsendingu. Var að vinna til klukkan rúmlega hálffjögur. Ætlaði að skila fjórum bókum á Kringlusafnið áður en ég færi í Nauthólsvík. Sumarlokun var og er á safninu til 19. ágúst n.k. Ég gerði mér því ferð á Sólheimasafnið. Tók fjórar bækur að láni. Það var pínu freistandi að fara svo bara heim en ég var með sjósunddótið meðferðis og ákvað að drífa mig í Nauthólsvík. Sé svo sannarlega ekki eftir því. Fór reyndar aðeins einu sinni út í sjóinn í uþb tíu mínútur og var aðallega að hoppa um í öldunum. Var næstu tíu mínútur í gufunni og sat svo í heita pottinum í tuttugu mínútur áður en ég fór upp úr og heim. 

Smá yfirvinna og sund á eftir

Þessa dagana er N1 sonurinn að leysa af 07-15 vakt alla virka daga. Það er örugglega smá munur á því og að vinna tólf tíma vaktir þrjá virka daga í viku og aðra hverja helgi. Sjálf var ég vöknuð og komin á fætur um hálfsex í gærmorgun, klukkutíma á undan Davíð Steini. Hann lagði af stað í sína vinnu hálftíma á undan mér. Ég stimplaði mig inn um hálfátta. Fór fljótlega niður til að hlaða inn skrám. Lenti í vandræðum með fartölvuna, það kom síðar í ljós að hún var "dottin" af nettengingunni. Gat fundið út úr því með aðstoð tæknimanns í gegnum TEAMS. Annars var stór dagur í innlögnum eins og er oftast á þriðjudögum. Klukkan var byrjuð að ganga fimm þegar ég var búin með mín verkefni. Dreif mig beint í Laugardalslaugina. Fór fyrst í kalda, gufu og sjópott áður en ég fór á braut 2 og synti 400m. Kom heim um hálfsjö. 

Osteostrong í gær

Gærdagurinn byrjaði nokkuð snemma eða um fimm leytið. Þá "heimtaði" blaðran að hún yrði tæmd og ég komst fljótlega að því að ég var útsofin eftir um sjö tíma ágætis svefn. Tíminn fram að vinnu var samt fljótur að líða við netvafr og æfingar. Vinnudagurinn minn teygði sig aðeins yfir átta tímana en ég fékk að fara um fjögur því ég átti tíma í osteostrong kl. 16:20. Vildi alls ekki missa þann tíma því það var hálfur mánuður frá síðasta tíma. Umferðin var ekki svo þung og ég var byrjuð í æfingunum tíu mínútur yfir fjögur og búin með þær og hvíldina eftir ca tuttuguogfimm mínútur. Fór beint í sund. Synti aðeins 200m og fór bara 2x4 mínútur í þann kalda en var 15 mínútur í gufunni og rúmar tíu í sjópottinum. Kom heim um hálfsjö. 

Sjósund og stutt ganga

Vaknaði útsofin um sexleytið í gærmorgun. Eftir morgunverkin á baðherberginu, netvafr og æfingar kveikti ég á sjónvarpinu. Nóg um að vera þar, beinar útsendingar frá ólympíuleikunum. Um hálftíu fékk ég mér chia-graut. Var komin í Nauthólsvík á saginu tíu og út í 12°C sjóinn tíu mínútum síðar. Það var flóð og enn að flæða að. Synti/svamlaði út að kaðli á ca korteri. Gerði æfingar í gufunni, fór í kalda sturtu og smá stund í heita pottinn. Fór aftur í sjóinn í tæpar fjórar mínútur áður en ég fór upp úr og heim. Eldaði mér ýsu og sætar kartöflur í hádeginu. Planið var að fara fljótlega út í göngu en ég festist fyrir framan sjónvarpið fram eftir degi þannig að klukkan var byrjuð að ganga sex þegar ég loksins dreif mig aðeins út aftur. Það var rigning en samkvæmt heilsuforritinu í símanum labbaði ég samt rúma 1,8km á tæpum átján mínútum.

Sund, hárþvottur og esperanto og í gær

Var glaðvöknuð um sex leytið í gærmorgun og alveg útsofin. Fyrstu tveir tímarnir fóru í netvafr og æfingar. Dreif mig í sund strax upp úr klukkan átta. Byrjaði á kalda pottinum í nokkrar mínútur. Fór svo í gufu í uþb 15 mínútur og gerði úlnliðs og fingraæfingar þar. Síðan var það köld sturta áður en ég fór á braut 8. Eftir 50m á þeirri braut færði ég mig á braut 7. Eftir aðra 50m færði ég mig á braut 6 og synti 400m í viðbót, flesta á bakinu. Svo var það kaldur pottur, sjópottur, nuddpottur og að endingu sá kaldi áður en ég fór upp úr og þvoði mér um hárið. Þessi rútína tók alveg tvo tíma með klefatímanum. Fór beint vestur í bæ að hitta norsku esperanto vinkonu mína. Stoppaði hjá henni í einn og hálfan tíma og við lásum m.a. tvær bls í KonTiki. Restin af deginu fór í alls konar dútl. 

Þokuloft

Dagarnir bruna áfram, oftast eins og þeir séu í ein hvers konar akkorði. Ég var mætt í vinnu um hálfátta, stimplaði mig inn og hóf vinnudaginn á því að taka saman helstu tölur áður en ég fór og fyllti á vatnsflöskuna mína. Fyrrum fyrirliði fór niður í kortadeild að hlaða inn skrám og útbúa skiptiblöð. Að því loknu "hnippti" hún í mig í gegnum TEAMS svo ég gæti prentað út skjölin áður en ég skottaðist niður. Framleiðslu var lokið upp úr klukkan níu og ég kláraði bókhaldsfráganginn áður en ég fór í kaffi. Þótt það væri frekar rólegt uppi var alveg not fyrir auka hendur. Vinnudegi lauk um hálfþrjú. Þrátt fyrir að vera með sjósundsdótið meðferðis ákvað ég að skrópa. Hluta til vegna þess að ég vissi að það væri fjara og svo var líka of gott veður og sjórinn tæpar 13°C. Fór því heim og skömmu síðar fór Davíð Steinn á bílnum mínum til að þvo hann. Hugmyndin hjá mér var að skreppa frekar út í göngu en það varð ekkert úr þeirri hugmynd. Hringdi í pabba, setti í og hengdi upp úr tveimur þvottavélum en tók því að öðru leyti mjög rólega. Fór þó óvenju seint í háttinn eða klukkan að ganga ellefu. 

Síðasti föstudagurinn í júlí

Vaknaði á slaginu sex í gærmorgun, tuttugu mínútum áður en vekjarinn átti að hnippa í mig. Var útsofin eftir átta tíma svefn. Rámar aðeins í að ég hafi rumskað um miðja nótt, en svo stutt að ég er ekki viss nema það hafi verið draumur. Þegar ég kom fram tók ég eftir því að ferðalangurinn var búinn að skila sér heim. Gleymdi að minnast á að eftir sjósundið á miðvikudaginn stalst ég til að leggja bílnum í smá stund við Austubæjarskóla. Skrapp í jurtaapótekið að verða mér úti um brenninetlu til að prófa og labbaði smá hring í leiðinni. Annars var gærdagurinn alveg jafn fljótur að líða og flestir aðrir dagar. Var komin í vinnu um hálfátta. Fyrrum fyrirliði fór niður að hlaða inn nýjustu kortaskránum og ég tók saman bókhaldið en annars vorum við í innleggjum. Það var ekki stór dagur og það margar hendur á dekki að stundum þurfti að bíða eftir verkefnum. Var komin í sund upp úr klukkan þrjú. Synti 400m og fór 3x4mínútur í þann kalda. Samkvæmt plani átti að sturta magnesíumflögum í nuddpottinn klukkan fjögur. Planið gekk samt ekki upp í gær því okkur var sagt að það hefði riðlast til um daginn (þennan eina dag vikunnar sem þetta er gert) og yrði ekki fyrr en klukkan fimm. Á spjaldinu við pottinn stendur: Kl 7:00, 12:00, 16:00 og 20:00. Ég nennti ekki að bíða til klukkan fimm, náði mér bara í smá magnesíum í sjópottinum í staðinn. 

Í sjóinn í gær

Aftur var ég frekar snemma á fótum, útsofin á sjötta tímanum í gærmorgun. Morguninn fram að vinnu tíma er samt alltaf frekar fljótur að líða hvort sem ég hef hálftíma eða tvo tíma. Reyndar eru flestir dagar afar fljótir að líða í heildina og gærdagurinn var engin undantekning. Það var framleiðsludagur og ég var í bókhaldinu og á móttöku endanum. Afgreiddum framleiðsluna á rúmum klukkutíma. Milli tíu og tvö vorum við fyrrum fyrirliði að taka saman, flokka og telja ónýt kort alveg frá því í nóvember. Þegar það allt var komið heim og saman og alveg búið að ganga frá kortadeild og hvelfingu tókum við nokkur innlegg til að flýta fyrir vinnunni uppi. Allt var búið um þrjú. Hringdi og talaði við pabba á meðan ég var á leiðinni í Nauthólsvík. Davíð Steinn var enn hjá honum að gæða sér á nýsteiktum pönnsum. Sonurinn var samt farinn að huga að brottför. Óð "hálfa" leið til Kópavogs í sjónum því það var mikil fjara. Fór reyndar langleiðina út að kaðli og aftur til baka. Hefði getað vaðið þetta og gerði það á köflum en annars svamlaði ég á bakinu. Tók þó einstaka sinnum skrið og bringusundstök. Var hálftíma í 11,4°C sjónum, fimm mínútur í gufu og korter í heita pottinum eftir kalda sturtu. Fór ekki aftur út í sjó svo að þessu sinni þvoði ég mér um leið og ég skolaði úr sundbol og strandskóm. Á snap-kortinu sá ég að Davíð Steinn var kominn í heimsókn til ömmu sinnar um fimm leytið.

Vika eftir af júlímánuði

Dagurinn í gær byrjaði nokkuð snemma. Rumskaði semsagt upp úr klukkan fimm og fann fljótlega að ég var eiginlega útsofin þótt ég hafi ekki alveg náð sjö tíma svefni. Tíminn fram að vinnutíma leið mjög hratt við netvafr, blogg og æfingar. Mætti í vinnu um hálfátta. Þriðjudagar eru stórir dagar og gærdagurinn var enginn undantekning. Höfðum það samt af að klára yfir sextánhundruð innlegg fyrir klukkan hálffjögur. Ég fór beint í sund eftir vinnu og hitti strax á kalda potts vinkonu mína. Hún var þá þegar búin að fara eina ferð í kalda. Fórum fjórum sinnum saman í kalda. Eftir síðustu ferðina synti ég aðeins 100m áður en ég fór upp úr og heim. - Annars ætlaði ég að segja frá því að í kringum áttunda júli fékk ég áminningu frá bókasafninu um að skiladagur væri að nálgast. Ég var búin að lesa þrjár af þeim fjórum bókum sem ég var með að láni. Ákvað að framlengja skilafrestinum á öllum bókunum og gefa mér tíma til að lesa; Ættarfylgjan eftir Ninu Waha.  Það eiga reyndar að vera tveir punktar yfir báðum ö-unum en lyklaborðið er ekki að vinna með mér í að finna út leið til að skrá þá. Engu að síður er bókin góð en ég á þó enn eftir að lesa síðustu 100 bls af tæplega 500 bls bókinni.

Smá vinna, útför og kistulagning í gær

Vaknaði um fimm leytið í gærmorgun. Var komin á fætur um hálfsex. Vafraði um á netinu eftir morgunverkin á baðherberginu en stuttu fyrir sjö greip ég aðeins í prjónana mína áður en ég gerði fyrstu æfingalotu dagsins. Stimplaði mig inn í vinnu upp úr klukkan hálfátta. Fyrirliðinn var komin úr fríi og þegar fyrrum fyrirliði kom úr sjúkraþjálfun vorum við fjórar kortadömur á svæðinu. Sumarliðinn okkar fór niður að hlaða inn skrám en tókst ekki að kveikja á fartölvunni til að fylla út skiptiblöð. Kom með fartölvuna upp og skiptinguna handskrifaða. Ég var í innleggjum fram að kaffi en var líka í kortabókhaldinu. Mér tókst ekki að "vekja" fartölvuna svo ég leitaði ráða hjá tæknimanni í gegnum teams. Hann sagði mér að halda inni starthnappnum í 30 sekúndur, sem ég gerði. Svo kom fyrirliðinn og tók tölvuna, ætlaði að setja hana í samband við aðra hleðslustöð. Á leiðinni yfir að sínu svæði smellti hún á starthnappinn og tölvan vaknaði til lífsins. Stimplaði mig út úr vinnu eftir fjóra tíma. Samstarfsmaður til margra ára, var oft mikið í kortamálunum, var að missa konuna sína um daginn. Útförin fór fram í Háteigskirkju klukkan eitt og ég var búin að fá leyfi til að fara. Það var nánast full kirkja. Stundin var mjög falleg en smá erfið á köflum. Yngsta dóttir þeirra var í árgangi með tvíburunum í Hlíðaskóla og sú elsta leigði risíbúðina fyrir ofan mig í eitt ár fyrir nokkrum árum. Boðið var upp á veitingar í safnaðarheimilinu eftir kirkjuathöfnina. Ég fór eingöngu þangað til að votta vinnufélaganum og börnum hans samúð mína en svo dreif ég mig beint austur. Var komin til pabba fyrir klukkan fjögur. Við urðum svo samferða á hans bíl yfir á elliheimilið stuttu fyrir fimm. Einn systur-sonar-sonur pabba er prestur og hann tók að sér að stýra kistulagningu ömmu sinnar. Mjög falleg athöfn og gott að fá að taka þátt í henni, kveðja aldraða föðursystur og knúsa margt af fólkinu hennar. Eftir athöfnina var öllum boðið í súpu og spjall á Maríuvöllum. Við pabbi komum aftur í Hólavanginn um sjö leytið. Ég staldraði við í tvo tíma, fór í smá kaplakeppni við pabba (hann hafði betur), því ég vissi að von væri á Davíð Steini sem er að verða búinn að fara hringinn. Hafði tjaldað á Höfn kvöldið áður. Gat því gefið syninum fyrirfram afmælisknús áður en ég fór heim. 

Strembinn dagur framundan

Þrátt fyrir að vera komin á fætur um sjö leytið í gærmorgun fór ég ekki í sund fyrr en stuttu fyrir tíu. Hitti þá beint á kalda potts vinkonu mína og við fórum beinustu leið í þann kalda. Yfirleitt vill hún byrja á heitasta pottinum og enda á honum líka. Fórum fimm ferðir í þann kalda og ég fór í alla hringpotta, gufu og sjópott á milli. Eftir fimmtu ferðina fór ég á braut 7 og synti 300m en vinkona mín í steinapottinn ásamt einni systur sinni. Vorum búnar að kveðjast en eftir sundið ákvað ég að fara sjöttu ferðina í þann kalda og þá var hún líka að fara sína sjöttu ferð. Hún fór svo í þann heitasta en ég settist smá stund á stól áður en ég fór upp úr og heim. Gerði annars alls konar í gær en hluti af því skrifa ég sjaldnast um. Skrapp í stutta göngu, með bók og sólgleraugu meðferðist. Settist á bekk rétt hjá Veðurstofu Íslands og las nokkrar blaðsíður. Ferðin á logninu var þó heldur of hröð svo ég hélt för áfram fljótlega og kláraði smá hring um hverfið. 

Hálfgerð letihelgi

Var vöknuð upp úr klukkan sex í gær. Tók tvo tíma í netvafr og æfingar áður en ég dreif mig í sund snemma á níunda tímanum. Sturturnar voru margar kaldar og eitthvað ólag á þeim en ég hafði það samt af að þrífa mig áður en ég fór fyrstu ferð í þann kalda af fjórum. Eftir ferð í sjópott og aðra í kalda fór ég á braut 2 og synti af stað á bakinu. eftir eina og hálfa ferð færði ég mig á braut 1 og synti tvær og hálfa ferð í viðbót. Eftir þriðju ferðina í þann kalda fór ég í gufu, svo kalda sturtu og nuddpott og eftir fjórðu og síðustu ferðina í kalda sat ég smá stund á stól áður en ég fór inn að þvo mér um hárið. Fór beinustu leið til esperanto vinkonu minnar og stoppaði þar í rúman klukkutíma. Lásum tvær bls. í Kon Tiki. Fór svo með bílinn á færibandið hjá Löðri við Fiskislóð áður en ég fór heim. Var með ýmsar hugmyndir um hvernig framhaldið af deginu átti að vera en framkvæmdi fæstar af þeim. 

Aftur í sjóinn

Það er komin helgi enn á ný. Gærdagurinn var nokkuð léttur og fljótur að líða. Framleiðslu lauk um hálftíu og eftir kaffi tók við smá bið eftir innleggs verkefnum. Þegar þau komu vorum við nokkuð snögg að afgreiða þau enda margar hendur á dekki. Vinnutíminn á föstudögum í seðlaverinu er skráður 7klst og korter. Ég stimplaði mig inn í gær um hálfátta og út sjö tímum síðar. Leiðin lá beint í Nauthólsvík. Það var flóð, sjórinn rúmlega 12 gráður og ég fór tvisvar út í. Fyrst í rúmt korter. Beint í gufu í fimm mínútur, kalda sturtu og í pottinn í tæpt korter. Að lokum í sjóinn í uþb fimm mínútur áður en ég fór upp úr og heim. Hringdi í systur mína sem var á leiðinni suður en einn bróðir mágs míns, sammæðra honum, er að gifta sig um helgina. Esperanto vinkona mín hafði svo samband í gærkvöldi. Nú á að fara að koma esperanto hittingi í rútínu aftur. Annars var ég aðeins að fylgjast með Davíð Steini á snappinu. Hann er búinn að tjalda í Fellabæ, verður með bækistöðvar þar amk til morguns. Fór m.a. á Borgarfjörð eystri í gær. 

Færsla no. 4004

Vaknaði rétt rúmlega sex í gærmorgun, einhverjum mínútum áður en vekjarinn átti að ýta við mér. Aldrei þessu vant gaf ég mér ekki tíma til að "trekkja" þá hægri í gang áður en ég fór í vinnu en það var eiginlega það fyrsta sem ég gerði svo eftir að ég var búin að stimpla mig inn. Um átta fór ég niður í kortadeild að hlaða inn nýjustu skránum og útbúa skiptiblöð. Þegar ég kom upp aftur voru öll verkefni komin í vinnslu. Fékk þá að taka af því sem sessunautur minn og fyrrum fyrirliði var að vinna í. Það var allt búið fyrir klukkan hálftíu og ekkert komið inn svo ég fór í góða kaffipásu. Heildarinnlegg gærdagsins náðu ekki 700 og allt gekk það vel að öllum verkefnum var lokið upp úr klukkan tvö. Þá máttum við fara og fór ég beint í sund. Synti 300m og hitti svo kaldapotts vinkonu mína í kalda pottinum. Fórum þrjár ferðir í kalda áður en við fórum í gufu. Eftir gufu vorum við næstum hálftíma í sjópottinum, eiginlega að bíða eftir að klukkan yrði fjögur en þá stóð til að sturta magnesíumflögum út í nuddpottinn. Flögurnar voru settar út í nokkrum mínútum yfir fjögur og tíu mínútum síðar fórum við fjórðu og síðustu ferðina í þann kalda. Kom við í Fiskbúð Fúsa á leiðinni heim. Hann er að fara í þriggja vikna frí eftir þessa viku. Ég ætlaði að hamstra harðfisk en hann átti hvorki óbarna ýsu né lúðu. Keypti því keilu, eitt flak af bleikju og 500gr af ýsu. Var með hluta af ýsunni í matinn handa mér í gærkvöldi ásamt kúlukáli (rósakál), spínati og súrkáli. 

Í sjóinn í gær

Var mætt í vinnu rétt fyrir klukkan hálfátta. Hugurinn var svo mikill því til stóð að vera búin að framleiða fyrsta kortið, testkort, sem átti að fara úr húsi með fyrstu ferð. Kortið var framleitt rétt fyrir átta en einhver misskilningur varð og það uppgötvaðist um hádegisbil að það var ekki einu sinni farið út úr húsi. En það fór frá okkur um hálfeitt og tæpum tveimur tímum síðar fengum við grænt ljós á að nota nýtt load á plast með engu logoi (svo það fengi logo) og framleiða sem tegund sem kláraðist fyrir helgi. Öll verkefni voru svo búin um þrjú. Ákvað að byrja á því að skreppa í Aquasport því ég hafði frétt að þar væri hægt að fá sundsokka sem gætu tekið við af strandskónum mínum. Því miður voru ekki til sokkar í minni stærð, koma kannski eftir tvær til þrjár vikur. Þá lagði ég leið mína í Sportsdirect og keypti mér þrjá nýja sundboli. Hitti þar einn frænda minn og fjölskyldu hans. Amma hans var ein af systrum pabba. Svo lá leiðin loksins í Nauthólsvíkina. Notaði einn af nýju sundbolunum. Fór eina tíu mínútna ferð í sjóinn og svo beint upp úr aftur. Á leiðinni úr úr klefanum hitti ég annan tvíburann sem ég kynntist á Klamratúninu fyrir tuttuguogsex árum síðan. Hún og bróðir hennar verða 28 í nóvember og við mæðurnar smullum saman og áttum nokkuð mikil samskipti næstu árin, amk á meðan fjölskyldan bjó í Hlíðunum. Ásta Bergrún mundi alveg eftir mér og ég fékk gott knús og smá spjall. En hún var á leiðinni í sjóinn en ég að fara heim. 

Framleiðsludagur í dag

Um hálfþrjú leytið í fyrrinótt vakna ég upp við það að ég var í spreng. Sinnti kallinu en fór að sjálfsögðu beinustu leið í rúmið aftur. Var svolítið lengi að sofna en gleymdi mér örugglega eitthvað. Um fjögur vaknaði ég aftur við blöðruna. Kannski er eitthvað af bjúgnum að renna af mér, veit ekki, en eftir seinni ferðina á pisseríið steinsofnaði ég og vaknaði ekki fyrr en vekjaraklukkan fór af stað. Þá var ég í miðju draumalandinu og svolítið rugluð á hvaða læti væru eiginlega í gangi. Þrátt fyrir að vera hálftíma seinna á fótum en oftast áður þá náði ég að setja inn færslu og smá netvafri áður en ég fór í vinnuna. Þriðjudagar eru klárlega stærstu dagarnir í vikunni af innleggjum en það voru nógu margar hendur á dekki og flest gekk snuðrulaust fyrir sig þannig að allt var búið áður en við vorum búin að vera átta tíma á svæðinu. Ég var komin í sund um hálffjögur. Kalda potts vinkona mín kom stuttu síðar og við náðum þremur ferðum í þann kalda saman. Ég var samt komin heim fyrir fimm áður en landsleikur íslenska kvennaliðsins í knattspyrnu við Pólverja hófst. Sá leikur vannst með einu marki gegn engu. 

Vaknað við vekjarann

Í gærmorgun var ég komin á fætur fyrir klukkan sex. Netvafrið tók ívið lengri tíma en ég hafði ætlað mér en ég hafði þó smá tíma í úlnliðs- og fingraæfingar áður en ég fór í vinnuna. Stimplaði mig inn í vinnu um hálfátta og fékk strax það hlutverk að opna hvelfinguna uppi á móti annarri. Síðan fyllti ég á vatnsflöskuna og sauð mér vatn. Þegar fyrrum fyrirliði og sumarliðinn voru komnar var sú ákvörðun tekin að sumarliðinn yrði í reiðufénu, ég færi niður að hlaða inn skrám og fyrrum fyrirliði yrði í bókhaldinu þessa vikuna. Mesti tíminn niðri fór í að bíða eftir að ég loggaðist inn á fartölvuna sem notuð er til að útbúa skiptiblöð. Var byrjuð í innleggjum um hálfníu. Kláraði minn skammt á einum og hálfum tíma og fór þá inn á kaffistofu. Þurftum að bíða aðeins eftir fleiri verkefnum og það sem kom var það lítið að ég fór í mat um hálftólf. Aðeins meira var að gera eftir hádegi en það var samt allt búið um þrjú leytið. Var mætt í Osteostrong tíma fyrir klukkan fjögur og komst strax að þótt fasti tíminn minn væri ekki fyrr en 16:20. Var því komin í sund um hálffimm. Þar sem úti var hálfgert bongó voru margir í sundi, bæði í lauginni, pottunum og á bekkjum og stólum. Ég fór þrjár ferðir í kalda, eina í gufu, eina í 42°C pottinn og sat svo smá stund í skugganum áður en ég fór upp úr og heim. Skrópaði því í sundið. Það er samt allt í lagi því ég var búin að taka vel á því í osteostrongtímanum. 

Mamma hefði orðið áttatíu ára í dag

Rumskaði stuttu fyrir klukkan sex í gærmorgun. Var í spreng svo ég sinnti kallinu en fór svo upp í aftur. Heyrði klukkuna slá hálfsjö en svo steinsofnaði ég greinilega því næst heyrði ég klukkuna slá níu. Þá dreif ég mig á fætur. Pabbi var kominn á ról, sat inni í eldhúsi að leggja kapal. Hann var sestur inn í stofustól og búinn að kveikja á sjónvarpinu þegar ég var búin að sinna morgunverkefnunum á baðherberginu. Greip í prjónana í smá stund en kveikti svo á tölvunni hans, setti inn færslu og vafraði smá stund á netinu áður en ég settist aftur inn í stofu. Um hádegisbilið borðuðum við afganginn af bjúganu frá því á laugardagskvöldið. Eftir mat lagði ég einn kapal sem gengur afar sjaldan upp en í þetta sinn gekk hann upp í fyrsta. Veðrið var þannig að hvorugt okkar pabba nennti í bíltúr. Hugmyndin hafði verið að skreppa aðeins upp að Keldum og krossa yfir nokkur leiði en það bíður bara betri tíma. Kvaddi pabba um hálffjögur. Ákvað svo að beygja niður hjá Urriðafossi og keyra Flóann, gegnum Stokksteyri og fara Þrengslin í bæinn. Var komin heim rétt rúmlega fimm. Oddur var einn heim því Davíð Steinn er kominn í sumarfrí og lagði af stað úr bænum milli átta og níu í gærmorgun. Annars er ég sammála sparksérfræðingum að fótboltinn og betra liðið vann í gær, Spánn 2 - England 1. 

Öðruvísi

Fór á fætur um sjö leytið í gærmorgun og gaf mér tíma í netvafr áður en ég fór í sund enda var klukkan langt gengin í níu þegar ég var loksins byrjuð að synda. Synti 500m, flestar ferðir á bakinu. Fór þrjár ferðir í þann kalda, eina í gufu og eina í sjópottinn áður en ég fór upp úr og þvoði mér um hárið. Mætti Davíð Steini, frekar syfjulegum, þegar ég kom heim. Hann var á leiðinni að redda frænku sinni Bríeti, sækja hana í vinnuna til að ná í lykil heima hjá henni og skutla henni svo aftur í vinnuna. Ég fékk mér hressingu og pakkaði niður. Var samt ekki farinn þegar Davíð Steinn kom aftur og hann var farinn aftur út á undan mér. Bankaði aðeins upp á hjá Oddi áður en ég fór um tólf. Keyrði Nesjavalla leiðina austur á Selfoss. Hef ekki farið þessa leið lengi. Lenti auðvitað í smá sultu við Ölfusárbrúna en var svo sem ekki alveg stopp, amk ekki lengi í einu, heldur mjakaðist í gegnum þennan kafla á mjög hægum hraða. Það var allt læst hjá pabba en bílinn hans fyrir utan. Hringdi bjöllunni og kafaði svo í veskið eftir húslykli og var á undan að opna. Pabbi var þó næstum kominn að útidyrunum, hafði setið inni í stofu. Ég var ekki búin að vera nema rúmlega tvo tíma á svæðinu þegar bankað var á "spari-dyrnar". Þær eru mun nær stofunni en ég var á undan pabba að opna. Þar var einn systursonur pabba á ferð. Sagðist hafa marg reynt að hringja dyrabjöllunni en við feðgin heyrðum aldrei í henni. Kannski var við hæfi að frændi kæmi þessa leið inn en hann var að koma beint af elliheimilinu. Mamma hans, föðursystir mín, fékk hvíldina í gær 96 og hálfu ári betur. Svo nú er pabbi einn eftir af systkyninum fimm. Frændi stoppaði í hálftíma og þáði pönnsur hjá pabba. Eftir að Oddur var farinn hringdi pabbi í Helgu systur. Fór svo fljótlega að prófa dyrabjölluna sem virkaði alveg fínt. Annars höfðum við feðgin það frekar rólegt.

Aftur komin helgi

Það fór svo að daglegri framleiðslu sem og endurnýjun var lokið um hádegisbil í gær og það þótt við tækjum kaffipásu og vélin væri aðeins að stríða okkur í lokin. Það verða því væntanlega léttari og styttri næstu fjórir framleiðsludagar en þá verður komin ný endurnýjun. Það gekk líka vel í öðrum deildum og ég því alveg búin með mín verkefni um tvö leytið. Fór beinustu leið í Nauthólsvík. Fjara, sjórinn 12°C, smá ferð á logninu og mjög hressandi að hoppa í öldunum. Fór tvisvar út í, fyrst í tæpt korter og eftir fimm mínútur í gufu rúmar fimm mínútur áður en ég fór upp úr. Skolaði á mér tærnar, strandskóna og sundbolinn en þurrkaði mér svo að öðru leyti. Verð svo dásamlega mjúk í húðinni ef ég sleppi því að fara alveg í sturtu og sápa mig eftir hoppið í sjónum.

Framleiðsludagur framundan

Þegar ég kíkti á vinnupóstinn minn eftir að ég var búin að stimpla mig inn í vinnu í gærmorgun biðu þau fyrirmæli um að senda í póst það sem tilbúið var af endurnýjuninni. Fór því niður með fyrrum fyrirliða til að sækja 12 fulla og hálfan póstkassa í viðbót af samtals yfir þrjúþúsundogþrjúhundruð kortum. Fyrrum fyrirliði sá um að koma þessu í lyftu 1 í tveimur hollum og snéri sér svo að því að hlaða inn daglegum skrám. Ég fór upp aftur og útbjó fylgiskjal með póstinum og sendi svar við fyrirmælunum. Annars vorum við í innleggjum í gær sem voru nokkuð innan við þúsund í gær. Margar hendur á dekki og allt gekk vel fyrir sig, svo vel að flestir voru búnir með sín verkefni um hálfþrjú. Ég sendi skilaboð á kaldapotts vinkonu mína, stimplaði mig út og hringdi og talaði við pabba á meðan ég var á leiðinni yfir í Laugardalslaug. Hann var byrjaður að sulta og hafði sett allt í gang um fimm leytið í gærmorgun. Ég var búin að synda 300m þegar vinkona mín sótti mig. Fórum þrjár ferðir í kalda, eina í heitasta, eina í 42°C, eina í gufu, eina í magnesíumpottinn (um það leyti sem sturtað var úr heilum magnesíumpoka út í pottinn) og smá stund í sjópottinn. Fór upp úr korter yfir fjögur. Sótti Odd og skipti við hann um sæti. Fórum í Krónuna við Fiskislóð. Hann var á undan að versla sitt og fara með í bílinn. Kom svo inn aftur að hjálpa mér að raða í poka og halda á þyngri pokanum út í bíl og svo aftur inn þegar við komum heim. Annars skrapp ég smá stund yfir í Eskihlíðina þar sem litli bróðir mömmu og konan hans búa. Var að skila henni fatla sem hún lánaði mér í vor. Stoppaði hjá þeim í uþb hálftíma og átti gott spjall við þau. Kristínu hitti ég reglulega í sundi en við vorum samt ekki búnar að hittast síðan skömmu áður en ég var búin með sumarfríið. En það var enn lengra síðan ég hitti Billa frænda, man ekki einu sinni hvenær það var.

Framleiðsludagur í gær

Í gærmorgun var ég komin á fætur um sex. Morgunrútínan var svipuð og flesta virka morgna. Mætti í vinnu um hálfátta. Nú vorum við þrjár á svæðinu sem gátum farið í kortaframleiðslumálin. Það var reyndar nóg að gera í reiðufénu þannig að það varð úr að fyrrum fyrirliði fór niður að hlaða inn skrám og búa til skiptiblað á meðan ég var í bókhaldinu uppi og prentaði út framleiðslu-, skipti- og talningablöð. Daglegri framleiðslu lauk um hálftíu og frágangnum vegna framleiðslunnar tæpum hálftíma síðar. Þá fór ég í "kaffi" en fyrrum fyrirliði til tæknimanns, sem er á svæðinu einu sinni í viku, til að fá hann til að setja upp fyrir sig nýja síma. Hún var að breyta úr samsung í iphone og þetta tók þó nokkurn tíma. Um ellefu sagðist tæknimaðurinn að það væru eftir uþb tíu mínútur svo ég fór niður til að ganga frá daglegum pappírum og undirbúa endurnýjun. Ekkert bólaði á fyrrum fyrirliða en sem betur fer var búið að sækja hluta af hráefninu í endurnýjunina og þegar ég opnaði fyrsta kassann af fjórum (þurftum 7 kassa) til að telja hann kom í ljós að það voru gulir miðar á milli hvers einasta plasts (300 kort í kassanum). Þegar ég var búin að plokka alla gulu miðana úr kössunum fjórum var klukkan að verða hálftólf. Ég ákvað því að skreppa í mat. Rúmlega hálftíma síðar, eftir að við báðar vorum búnar í mat, fórum við niður, sóttum 3 kassa til viðbótar, umslög, form og vagn undir þetta. Framleiddum tólfhundruð kort á tveimur tímum. Vissum að um það leyti væri mest allt búið uppi og flestir að fara eða farnir svo við ákváðum að ganga frá deildinni og geyma síðustu áttahundruð kortin úr endurnýjuninni til föstudags. Ég stimplaði mig út um hálfþrjú, lét "föðurnöfnu" mína vita og hitti hana í Nauthólsvík um þrjú. Ég skrapp í sjóinn í rúmar fimm mínútur en svo sátum við í heita pottinum í rúma klukkustund og spjölluðum. Ég sat reyndar ekki allan tímann í pottinum sjálfum því þá hefði ég líklega breyst í rúsínu. Var komin heim stuttu fyrir fimm.

Mið vika

Varð mjög hissa þegar vekjarinn fór í gang í gærmorgun, tuttugu mínútum yfir sex. En var líka ánægð með að hafa sofnað svona vel aftur eftir að hafa rumskað alltof snemma um hálffimm leytið. Gaf mér tíma í netvafr og færslu og það var einnig smá tími fyrir nokkrar úlnliðs og fingraæfingar. Mætti í vinnu um hálfátta. Tók saman framleiðslutölur sem voru frekar fáar. Fengum skilaboð frá einum stað af fjórum að engar skrár hefðu verið sendar en yrðu þá bara aðeins stærri í dag. Annars var ég byrjuð á að vinna innlegg um hálfníu og þar var nóg að gera og tveir sumarliðar lasnir. Það kom reyndar ein mjög vön úr sumarfríi og þau tvö sem eru í hraðbönkunum tóku einhver innlegg inn á milli hraðbanka verkefna. Boðað var til sérstaks fundar tuttugu mínútum fyrir tíu og mætti "nýr" framkvæmdastjóri úr fríi með tertur og tilkynningu. SKM er ekki lengur undirdeild undir öðru sviði heldur orðið sér svið. Hæstráðandi í seðlaverinu var semsagt að hækka í tign og vildi þakka okkur fólkinu á gólfinu fyrir okkar þátt í því. Við samglöddumst honum en ég lét þó terturnar og rúnstykkin alveg eiga sig. Annars urðu innlegginn rétt tæp sextánhundruð í heildina en engu að síður vorum við búin að vinna þau fyrir þrjú og allt búið milli þrjú og hálffjögur nema hjá þeim sem eru í sjóðunum. Enginn af okkur átti von á þessum rífandi gangi. Ég stimplaði mig út 40 mínútum áður en átta tímarnir voru liðnir og fór beinustu leið í sund. Hringdi í pabba á leiðinni í sundið. Hann var nokkuð lengi að svara því hann var að dunda við garðverkinn og í aukabuxum. Rútinan í sundinu var aðeins öðru vísi. Synti fyrst 200m, fór svo í kalda pottinn í 4 mínútur, sjópottinn í 15 mínútur, aftur í kalda í 4 mínútur, synti aðra 200m, fór í gufu í tíu mínútur og kalda sturtu í lokin.  

Rumskað heldur snemma en vaknað svo við klukku í morgun

Var komin á fætur um hálfsex í gærmorgun. Hafði því góðan tíma í netvafr sem og æfingar. Mætti í vinnuna tuttugu mínútum fyrir átta. Byrjaði á að taka saman tölur fyrir kortadeild. Fyrrum fyrirliði mætti en við sendum sumarliðann okkar niður til að hlaða inn og undirbúa skiptiblöð áður en hún fór svo í reiðuféð. Annars var ég í innlögnum og nóg að gera þar. Um hálffjögur fór þó að sjá fyrir endann á verkefnunum og ég fékk að fara fljótlega þótt ekki væri alveg allt búið. Mætti í osteostrong tímann rétt rúmlega fjögur. Sú sem hefur fylgt mér fyrstu tvo tímana var upptekin en ég komst samt strax að því það var önnur á svæðinu. Bætti allar tölur á tækjunum fjórum og finn einnig að jafnvægið á öðrum fæti á hristipallinum hefur lagast alveg heilmikið. Er þó með betra jafnvægi á vinstri en þeim hægri en það er víst eðlilegt ef maður er hægri hentur. Eftir hvíldina fékk ég mér vatnsglas að venju og fór svo beinustu leið í sund. "Föðursystir" mín (eða öllu heldur föðurnafna, Hjaltadóttir) hafði haft samband á fb fyrr um daginn. Hringdi í hana og spjallaði aðeins á meðan ég var á leiðinni yfir í Laugardalslaug. Var komin í sund rétt fyrir fimm. Synti ekki nema 200m og það í restina eftir að hafa farið 2x4 mínútur í þann kalda, 10 mínútur og úlnliðs- og fingraæfingar í gufu og tíu mínútur í sjópottinn. Klukkan var farin að ganga sjö þegar ég kom heim.

Ný vinnuvika og osteostrongtími í dag

Var vöknuð frekar snemma eða um hálfsex í gærmorgun. Fór þó ekki á fætur fyrr en um hálfátta. Pabbi var þá þegar klæddur og kominn á ról og byrjaði á því að spyrja hvað við ættum að hafa í matinn síðar um daginn. Það var fljótákveðið því ég vissi að hann ætti til bleikju í frysti. Upp úr klukkan tíu bauð hann mér með sér í bíltúr. Við fórum sem leið lá á æskuslóðir og keyrðum framhjá Heiði. Rétt við Kaldbak keyrði hann inn á slóða og að hliði sem þurfti að opna. Skilti við hliðið bannaði skotvopn og mótorhjól. Skammt innan hliðs/girðingar skiptist slóðinn í tvennt. Pabbi hafði farið þann hægri áður og ákvað að beygja til vinstri. Sá slóði er sennilega mun minna notaður og eftir að hafa keyrt nokkra kílómetra eftir honum og m.a. kannað aðstæður gangandi sums staðar ákvað pabbi að snúa við og fara frekar hinn slóðann. Sá slóði var mun betri yfirferðar og reyndar um fleiri leiðir að ræða en bara þann slóða. Þetta voru mjög fallegar leiðir og komum við niður skammt frá Selsundi. Keyrðum svo aftur framhjá Heiði í baka leiðinni. Komum við í búðinni og keyptum sallat og sæta kartöflu. Þá var klukkan farin að ganga eitt. Ég fór næstum beint í að elda þegar við komum aftur í Hólavanginn. Setti upp hýðishrísgrjón, skrældi kartöfluna, bitaði niður og setti í annan pott. Hitaði svo sallatmaster pönnuna upp í 150°C og skellti tveimur frosnum flökum af bleikju á í uþb korter. Maturinn var tilbúinn fyrir klukkan hálftvö og var mjög góður. Lagði kapla, las, prjónaði og/eða horfði á þætti til klukkan að ganga sex en þá tók ég mig saman, kvaddi pabba og brunaði í bæinn. Nokkuð greiðfært var að Selfossi. Við hringtorgið austan við Selfoss sýndist mér vera smá röð svo ég ákvað að fara sömu leið og ég hafði komið deginum áður og fara Þrengslin í bæinn. Skammt frá Eyrarbakka var verið að reka hestastóð smá spöl en það tók ekki svo langan tíma. Fáir voru á ferðinni í Þrengslunum en þegar ég var komin að afleggjaranum að Bláfjöllum hægðist verulega á og stoppaði og svo var hægt að mjaka sér áfram einhverja metra á tíu kílómetra hraða. Það greiddist ekki úr þessari sultu fyrr en á seinna hringtorginu við Rauðavatn. Var komin heim milli hálfátta og átta, rétt á undan N1 syninum sem var að vinna á Gagnvegi til hálfátta.