28.11.22

Aðventutími

Fór á fætur rétt fyrir klukkan átta í gærmorgun. Rúmlega klukkutíma seinna skutlaði ég Davíð Steini upp á Gagnveg, þáði kaffi út í bíl og fór svo beinustu leið heim. Gærdagurinn fór meira og minna í fótboltagláp, smá körfugláp, prjón og netvafr. Lánaði Oddi bílinn seinni partinn en hann var kominn heim aftur um átta, rétt á undan bróður sínum. Davíð Steinn var víst kominn í strætó þegar Oddur hringdi og athugaði með hann. 

27.11.22

Á skutlvaktinni

Ég var vöknuð upp úr klukkan sex í gærmorgun og var búin að vera á fótum í uþb klukkutíma þegar Davíð Steinn kom fram. Skutlaði honum upp á Gagnveg og þáði kaffi í staðinn. Kom við hjá AO við Sprengisand og fyllti tankinn á bílnum. Var mætt við Sundhöllina fyrir klukkan átta. Sat út í bíl fram yfir morgunfréttir. Eftir ferð í kalda pottinn fór ég beinustu leið í innilaugina og synti 750 metra, flesta á bakinu, á braut þrjú. Það tók mig rétt rúmlega hálftíma. Settist aðeins út í heitari pottinn á svölunum áður en ég fór aðra ferð í kalda pottinn. Endaði í gufunni áður en ég fór inn og þvoði mér um hárið. Var komin heim rúmlega tíu. 

26.11.22

Aftur tvær

Það er stefnan á núverandi vinnustað að taka styttingu vinnuviku á föstudögum og vera hættur um þrjú. Það kom sér ágætlega fyrir mig þar sem ég þurfti að mæta aftur til tanna klukkan þrjú til að láta skanna jaxlinn sem var pússaður niður á þriðjudaginn og bráðabirgða hulsa sett yfir þar til króna hefur verið útbúin. Við tvær sem vorum mættar í kortadeildinni urðum samt að halda vel á spöðunum til að komast yfir að klára daginn og kannski smá meira. Gerðum 1500 gjafakort en komumst ekki í endurnýjun enda er umslagavélin verulega leiðinleg svo við ætlum að láta líta á hana eftir helgi. Það eina sem við urðum að skilja eftir var talning á öðrum kortaskápnum. Vorum búnar að telja visa vagninn en vagninn með debet- og saltpay kortunum verður að bíða til mánudagsmorguns. Var mætt til tanna á slaginu þrjú og labbaði þaðan út aftur hálftíma síðar. Fór beinustu leið heim. 

25.11.22

Föstudagur

Ég var mætt fyrst af kortadeildargenginu. Reyndar vorum við bara tvær af þremur því ein var lasin. Tækluðum verkefnin tvær með mestu ágætum. Framleiddum slatta en þegar við gengum frá deildinni um hálfþrjú áttum við eftir að telja skápana. Urðum að geyma það því hin átti tíma í sjúkraþjálfun klukkan þrjú. Ég var í vinnunni til klukkan hálffjögur. Fór á sviðsfund í gegnum TEAMS klukkan þrjú en stakk af fundi og fór beint í sund. Kaldapotts vinkona mín hafði sent mér kveðju. Kemst ekki þessa dagana vegna Covid. Ég fór þrisvar í kalda, tvivar í heitasta og endaði í gufunni. Fannst of margir á brautunum að ég sleppti því alveg að synda. Kom heim upp úr klukkan fimm og fékk hornstæðið. 

24.11.22

Líður á viku og mánuð

Ég var mætt í vinnu upp úr klukkan hálfátta. Var aftur í bókhaldinu og byrjaði á því að prenta út tölur, fylla út skiptiblað og prenta það út líka. Forstjórinn kom í heimsókn og kíkti niður í kortadeild í smá stund. Um hálftíu var vikulegur fundur í kaffistofunni og boðið upp á brauð og bakkelsi. Framleiðsluvélin, aðallega umslagavélin var með smá leiðindi en daglegri framleiðslu lauk upp úr hádegi. Þá var látið ganga fyrir að ljúka framleiðslu á gjafakortum. Reyndar bættust við 2000 í viðbót með hádegisskammtinum og verða þau framleidd meðfram endurnýjunum sem verður lögð aðal áhersla á næstu dagana. Góða við gjafakortin er að það er hægt að skilja vélina eftir við framleiðslu þeirra. Var komin heim um hálffjögur og fljótlega fóru bræðurnir saman í Sorpuferð. Hvorugur þeirra var að nota þvottavélina svo ég setti í eina vél.

23.11.22

Miðvikudagur

Ég var mætt í vinnuna um hálfátta. Var í bókhaldinu svo ég byrjaði á því að prenta út framleiðslutölur og skiptiblað áður en ég fór á kaffistofuna. Fyllti á vatnsbrúsann, fékk mér kaffi og settist á borðið með prjónana mína þar sem Ella sat með prjónana sína. Allt gekk ágætlega fyrir sig nema vélin var eitthvað að stríða stelpunum. Stuttu fyrir tvö varð ég að fara. Þá var smá eftir af hádegisframleiðslunni. Ákváðum samt að ég þyrfti ekki að koma aftur. Ég var komin til tannlæknisins klukkan tvö. Hann slípaði niður rótarfyllta jaxlinn og setti bráðabirgða hulsu yfir. Þarf að mæta aftur á föstudaginn í skanna og svo fæ ég krónu yfir jaxlinn eftir ca tvær vikur eða svo. Skrapp aðeins heim eftir þetta en var komin í sund um fjögur. Synti samt ekkert og þar sem kalda potts vinkona mín var ekki á staðnum fór ég aðeins 3x5 mínútur í kalda, tvisvar í heitasta pottinn og svo góða gufu á eftir. Gerði svo nokkuð sem ég hef aldrei gert áður, kom við í pylsuvagninum og fékk mér eina með öllu áður en ég fór heim. 

22.11.22

Tíminn flýgur

Ég var mætt í vinnuna um hálfátta í gærmorgun. Fyrirliðinn var komin og búin að fara niður til að kveikja á vélinni. Hitastigið í herberginu var um 14°C en fór hæst í rúmlega 18. Ég var á ítorðsluendanum. Daglegur verkefnum lauk um hádegið og eftir hádegi og til klukkan þrjú framleiddum við 1500 gjafakort og eitthvað af endurnýjun. Ég var komin í Nauthólsvík rétt fyrir fjögur. Sjórinn 4,7°C og flóð sem náði alveg upp á brúna niður í fjöru. Svamlaði um í uþb korter og var svo í rúman hálftíma í heita pottinum áður en ég fór upp úr og heim. 

21.11.22

Morgunstund

Var fyrst á fætur um níu. Kveikti strax á tölvunni í ganginum en sinnti þó morgunverkunum á baðherberginu áður en ég fór að vafra á netinu. Um tíu fékk ég mér lýsi og harðsoðið egg. Pabbi kom á fætur skömmu síðar og fljótlega bjó ég mér til kaffi. Í hádeginu fengum við okkur skyr. Ég var ýmist að lesa, prjóna eða vafra á netinu. Bjó mér aftur til kaffi um þrjú leytið og tæpum klukkutíma seinna tók ég mig saman, kvaddi og brunaði í bæinn. Fékk stæði beint fyrir utan hús. 

20.11.22

Jólakortagerð

Ég var vöknuð og komin á fætur fyrir klukkan sjö. Rétt rúmlega átta lagði ég við Austurbæjarskóla og trítlaði þaðan í Sundhöllina. Byrjaði á ferð í kalda pottinn en fór svo á braut 3 í innilauginni og synti 600 metra, flesta á bakinu. 1x25m skriðsund og 1x25m bringusund. Settist stund í heitari pottinn uppi úti áður en ég fór aftur í þann kalda. Endaði svo í gufunni. Þvoði mér um hárið og var komin heim um tíu. Tæpum klukkutíma seinna var ég búin að pakka niður, hlaða bílinn og á leiðinni til norsku vinkonu minnar. Við tókum smá esperantóhitting áður en ég fór úr borginni. Kom við í Fossheiðinni en var komin á Hellu rúmlega hálfþrjú. Pabbi var að horfa á fótboltalandsleikinn um Eystrasalts-bikarinn. Horfðum til enda áður en við fengum okkur kaffi. Um sex var pabbi með saltfisk í matinn. Ég horfði á kvöldfréttir og prjónaði smá. Um hálfátta tók ég fram jólkortagerðar dótið og tæpum þremur tímum seinna var ég búin að búa til 26 jólakort. Að sjálfsögðu var ég með hvítt á kantinum en það urðu þó bara tvö glös og svo hálft í viðbót eftir að ég var búin að ganga frá dótinu.

19.11.22

Helgarfrí

Var mætt til vinnu á svipuðum tíma og áður, upp úr klukkan hálfátta. Nú var ég komin á ítroðsluendann. Hlóð inn þeim verkefnum sem fyrir lágu. Ein skráin, debet, nýja leiðin, var eitthvað biluð. Kerfisfræðingurinn okkar gat bjargað þeim málum. Vorum búnar með fyrstu framleiðslu og komnar upp með töskuna um hálftíu. Debetið var búið um hádegið sem og 200 spargjafakort. Eftir hádegi og þrjú framleiddum við það sem er sent til okkar á tólfta tímanum sem og 2000 gjafakort úr 5000 korta skrá. Vorum þegar búnar með 1500 af henni svo eftir eru 1500 í viðbót. Með hádegisskammtinum var send 3000 korta gjafakortaskrá til okkar. Ég fór úr vinnunni fyrir hálffjögur og beinustu leið í Nauthólsvík. Byrjaði á því að hringja aðeins í pabba áður en ég fór í 4,9°C sjóinn. Það var rétt að byrja að fjara út eftir háflóð, fáninn á flaggstönginni var ekki á mikilli hreyfingu og þrátt fyrir að það séu líklega þrjár vikur síðan ég fór í sjóinn síðast tolldi ég út í í rúmar tíu mínútur. Sat svo hálftíma í heita pottinum áður en ég fór upp úr og heim.

18.11.22

Flest gengur ágætlega

Ég var mætt í Sundaborg rétt upp úr klukkan hálfátta. Silla kom skömmu síðar en Ella skrapp fyrst niður á K1. Hún var hvort eð er í bókhaldinu og við Silla prentuðum út fyrstu tölur. Urðum reyndar að skreppa niður að sækja tóner í prentarann en við vorum byrjaðar að framleiða korter yfir átta. Lukum fyrsta skammti um níu og byrjuðum aðeins á debetinu áður en við fórum upp með töskuna og í kaffi. Eftir hádegi söxuðum við aðeins betur á gjafakortaframleiðsluna en það eru að hrúgast inn endurnýjanir í staðinn. Silla varð að fara stuttu fyrir þrjú og ég um hálffjögur. Ég fór beinustu leið í besta bankann. Átti pantaðan tíma klukkan fjögur og var því komin í fyrra fallinu. Skemmst er frá því að segja að æðin gafst upp áður en náðist nóg í gjafapokann. Þannig þessi gjöf var ónýt en heimsóknin telur þó og er númer 62. Á þá bara 13 eftir til að ná 75. 

17.11.22

Eðlilegri vinnudagur

Ég var mætt í vinnuna upp úr klukkan hálfátta. Fór niður að sækja framleiðsluna frá því á þriðjudaginn til að afgreiðslan gæti komið henni út úr húsi. Svo fyllti ég á vatnsbrúsann og fékk mér kaffi. Við Silla áttum vélarvakt dagsins. Hún á ítroðsluendanum og ég í móttökunni og að taka til í framleiðsluna. Kláruðum fyrstu framleiðslu á rúmum klukkutíma og vorum komnar upp með töskuna um hálftíu. Debetið kláruðum við um hádegisbilið og daglegri framleiðslu lauk fyrir klukkan tvö. Það var smá flækjuvesen á vélinni en ekki nærri eins mikið og fyrstu tvo dagana. Framleiddum 2500 gjafakort til hálffjögur. Viðgerðarmaður kom að kíkja á prentarann og umslagavélina. Ég mátti fara og fór beint heim og sótti Odd. Skipti við hann um sæti. Hann byrjaði á að skreppa í Lyfjaver en þar var lyfið hans ekki til þótt hann ætti ávísun í gáttinni. Þá fór hann í Lyfju í Lágmúla og var afgreiddur þar. Skruppum svo í Krónuna í Skeifunni áður en við fórum heim aftur.

16.11.22

Mánuðurinn hálfnaður

Var vöknuð upp úr klukkan sex. Eftir morgunverkin á baðherberginu vafraði ég um á netinu þar til kominn var tími til að keyra af stað í vinnuna. Við stöllurnar í kortadeildinni ákváðum að halda sömu vinnustöðvum og á mánudaginn. Og vélin ákvað að vera áfram með flækju-leiðindi. Það er kalt í kortadeildinni og gustar aðeins um akkúrat þar sem prentarin er að skila af sér blöðum og formin límast á þau. Það var prófað að leggja teppi yfir þennan stað og svei mér þá ef það var ekki aðeins betra. En það er samt búið að boða viðgerðarmenn til okkar í dag. Fleiri kort voru í framleiðslu heldur en daginn áður. Einhvern veginn náðum við að koma framleiðslunni í gegn en þegar var búið að framleiða, pakka og ganga frá ákváðum við að bíða með talningar til morguns. Labbaði út af vinnustaðnum rétt rúmlega sex. Var ekki í neinu sundstuði og ákvað að fara bara beint heim.

15.11.22

Þriðjudagur

Þrátt fyrir kaflaskiptan svefn í fyrrinótt var ég vöknuð og komin á fætur upp úr sex. Eftir morgunverkin á baðherberginu gaf ég mér góðan tíma í netvafr. Klukkan var tuttuguogeitthvað mínútur yfir sjö þegar ég lagði af stað á bílnum í vinnuna á nýja staðinn. Vinnufélagarnir eru nú orðnir rúmlega tuttugu sem eru að vinna á sama stað. Fyrirliði kortadeildar var þegar mætt og búin að kveikja á kortavélinni. Nokkrir aðrir voru einnig mættir og allir byrjuðu á að bjóða mig velkomna. Ég skrapp niður á kortalager til að sækja þau kort sem þurftu að komast út úr húsi með því sem var að fara. Svo fór ég í smá kaffi eins og flestir gera í upphafi vinnudags. Ég sá um bókhaldið í gær. Fyrsti framleiðsluskammtur kom upp í innsiglaðri tösku rétt fyrir tíu og til að byrja með fær taskan að fara út úr húsi samdægurs eins og hún hefur gert síðustu áratugina fyrir utan þau skipti sem upp hafa komað vélabilanir og tafir. Framleiðsla korta á form var frekar brösug því inn á milli var vélin að flækja burðarblöðin. Þetta tafði aðeins fyrir og framleiðslu lauk ekki fyrr en um fjögur og þá átti eftir að telja, ganga frá og setjast aðeins niður með þeim tveim sem munu halda utan um okkur kortadeildina á þessum stað. Það  varð því ekkert úr því að ég færi í sjóinn í gær en þó var ég ekki komin heim fyrr en skömmu fyrir klukkan sex. 

14.11.22

Ný vinnuvika á nýjum stað

Var vöknuð upp úr klukkan hálfátta og komin á fætur fljótlega eftir það. Eftir morgunverkin á baðherberginu settist ég niður í stofu með fartölvuna í fanginu og vafraði um á netinu til klukkan níu. Skutlaði Davíð Steini upp á Gagnveg og þáði kaffibolla út í bíl því ég vissi að ég þyrfti að bíða smá stund eftir að komast í sund. Árshátíð sundlaugastarfsfólks var haldin á laugardagskvöldið og ekki opnað í sund fyrr en klukkan tíu í gærmorgun. Þetta hentaði mér ágætlega. Ég fór tvisvar í kalda og einu sinni í heita áður en ég fór á braut átta og synti 200 metra með fjórum aðferðum; baksund, skriðsund, bakskriðsund og bringusund. Fór svo þriðju ferðina í kalda pottinn og góða stund í gufu áður en ég fór upp úr. Þvoði mér um hárið í leiðinni. Afganginn af deginum notaði ég í netvafr, prjón, lestur, íþrótta og þáttaáhorf. 

13.11.22

Sunnudagur

Var komin á fætur um klukkan sex í gærmorgun. Rúmum klukkutíma síðar skutlaði ég Davíð Steini upp á Gagnveg og þáði kaffibolla út í bíl í staðinn. Fyllti á tankinn hjá AO við Sprengisand en var samt komin á planið við Laugardalslaug tíu mínútum fyrir átta. Fór inn um leið og var opnað. Tvær ferðir í kalda, eina í heitasta og synti 200 metra áður en ég fór upp úr. Síðan lá leiðin á nýja staðinn. Lagði fyrir ofan, nær Sæbraut. Einn af vinnufélögunum var akkúrat að koma inn að neðan og hleypti mér inn. Þegar ég var komin alla leið inn fékk ég nýtt aðgangskort. Byrjað var á að safnast saman á kaffistofunni. Fengum okkur kaffi og með því og einnig var afmæliskaka á boðstólnum sem flutningsstjórinn sá um að útvega. Fyrirliðinn úr kortadeild átti afmæli. Um hálftíu var farið niður. Þrír frá Ottó B Arnar fór að setja saman vélina. Við úr kortadeildinni fórum inn á lager að taka upp úr pokum og kössum og raða upp í hillur með góðri aðstoð. Um hádegið voru debetkortin og hluti af kreditkortunum komin á sínar nýju hillur. Fengum mat frá Hamborgara fabrikkunni sem flutningsstjórinn hafði pantað eftir okkar óskum og hún sótti og kom með til okkar. Síðan var haldið áfram að taka upp og koma fyrir. Lagerinn var kominn í sitt nýja form á fimmta tímanum. Búið var að kveikja á vélinni og framleiða kort, bæði áprentuð og upphleypt. Þegar framleiðsla á form var prufuð kom upp vandamál með formin. Vélin beyglaði þau eða braut ekki rétt saman. Veit ekki hversu langan tíma tók að laga þetta því ég mátti fara heim um hálfsex en þá var enn verið að finna út úr þessu vandamáli. 

12.11.22

Auka vinnudagur á nýjum stað

Ég var vöknuð rétt fyrir klukkan sex í gærmorgun. Hafði því extra góðan tíma til að hafa mig til og vafra smá á netinu því ég fór á bílnum í vinnuna. Var mætt fyrst. Ég var á ítroðsluendanum á vélinni og sú sem var í bókhaldinu var meira og minna á móttökuendanum því fyrirliðinn var að hjálpa við frágang og að innsigla kortaumbúðir. Daglegri framleiðslu lauk rétt fyrir tólf en svo bættist aðeins við og varð smá vesen en það var þó búið að slökka á kortavélinni í síðasta sinn á Kalkofnsvegi um eitt. Um leið og við töldum öll kort á vögnum plöstuðum við þau inn og gátum fækkað komið öllum kortum fyrir í tveimur vögnum. Höfum verið að nota fjóra vagna undan farin ár. Vagnarnir voru síðan læsti og setti inn í hvelfingu hjá öllum hinum kortaumbúðunum. Ein úr öryggisdeildinni fékk mig til að koma með sér inn á lagerinn þar sem hún gerði talningu á því sem verið var að flytja. Hún sá svo um að telja þetta inn í flutningabílinn og svo sá öryggisstjórinn um að telja þetta út úr bílnum á staðnum sem þetta var flutt á. Þrír frá Otto B Arnar komu um eitt og skrúfuðu niður vélina sem var svo flutt í einingum í tveimur ferðum á nýja staðinn. Þessum flutningum fylgdu einnig tveir menn frá securitas. Tveir sem eru á Reiknistofubílnum sáu um að flytja önnur gögn dót og þeir þurftu að fara nokkrar ferðir. Sérstakur flutningsstjóri sá um ýmislegt í kringum þetta og var búin að setja upp skipulag fyrir nokkru. Hún var á Kalkofnsvegi frá því um hádegi í gær. Um sex leytið voru pantaðar pizzur í allan mannskapinn sem vann að þessu. Síðasta ferð frá Kalkofnsvegi var farin um átta. Flutningsstjórinn þurfti svo að taka smávegis í bílinn hjá sér. Ég var að vinna til hálfníu í gærkvöldi en það var mjög skrýtið að labba út af staðnum í síðasta skiptið. Er búin að mæta í vinnu á Kalkofnsveg í tæp 23 ár.

11.11.22

Síðasti vinnudagurinn í Seðlabankarýminu

Í gær labbaði ég í síðasta sinn niður á Kalkofnsveg. Fór Drápuhlíðina, Reykjahlíð, Miklubraut, Snorrabraut, Eiríksgötu, Skólavörðustíg og Ingólfsstræti. Var mætt fyrst af okkur þremur ein hinar komu fljótlega. Hinar tvær svissuðu um vinnustað en ég ákvað að taka að mér móttökuendann þriðja daginn í röð. Um hálftíu var heljarinnar morgunkaffi og mættu þær tvær úr deildinni sem fengu starfslokasamning um daginn og eins einn sem er nýlega hættur að vinna vegna aldurs. Tókum okkur góða stund í kaffi og það var glatt á hjalla og borðið svignaði undan krásunum. Mikið var að gera hjá fyrirliðanum í símsvörum og að svara póstum en daglegri framleiðslu lauk einhvern tímann eftir hádegi. Þá stillti kerfisfræðingurinn af útlitið á nýja gjafakortaplastinu. Hálftíma síðar komu skilaboð um að það mætti framleiða eins og vindurinn. En við vorum líka að pakka niður kortalagernum í poka og kassa sem hægt er a innsigla eða loka örugglega. Vorum að þessu fram á kvöld. Eins gott að það sé til nóg hráefni á vögnunum í framleiðslu dagsins. Fékk far heim úr vinnunni rétt fyrir tíu, í síðasta sinn. Frá og með næstu viku nota ég óvistvænan ferðamáta í vinnuna og fer á bílnum. Sé fyrir mér að ég verði jafnvel duglegri við að skella mér í sund eða sjóinn beint eftir vinnu. Og í næstu viku byrja ég einnig í mataráskrift svo það verður sjaldnar sem ég elda eitthvað á kvöldin. Mun þó örugglega kaupa í soðið öðru hvoru. 

10.11.22

Síðasti vinnulabbidagur í bili

Labbaði með höfuðljósið í vinnuna þvert yfir Klambratúnið, Flókagötu, Gunnarsbraut, Njálsgötu, Snorrabraut, Laugaveg og Ingólfsstræti. Vorum allar mættar fyrir átta og ákváðum að halda sömu vinnustöðvum og daginn áður. Ég var því á móttökuendanum. Daglegri framleiðslu lauk rétt fyrir tólf. Ekki var búið að stilla fyrir okkur breytingar vegna gjafakorta en við höfðum í nógu að sýsla við frágang og undirbúning flutninga. Fékk far heim úr vinnunni upp úr klukkan hálffjögur. Um sex bauð ég bræðrunum með mér á Pítuna. Oddur sá um að koma okkur á milli staða. 

9.11.22

Heimsókn á nýja staðinn

Ég fór aftur á bílnum í vinnuna í gærmorgun. Þó ekki eins snemma og tvo virku morgnana á undan. Ég var á móttökuendanum á vélinni. Kepptumst við að ljúka allri daglegri framleiðslu sem fyrst svo við gætum skilað af okkur framleiðsluvélinni um hádegið. Það var síðasta yfirferðin á vélinni á þessum stað. Eftir hádegi kláruðum við allar talningar og frágang á deildinni. Um tvö mættum við í heimsókn í Seðlaverið til að skoða aðstöðuna sem við flytjum í um helgina og hitta á næstu yfirmenn okkar. Sú heimsókn tók um klukkutíma. Ég var komin á planið við Laugardalslaugina rétt rúmlega þrjú. Byrjaði á því að hringja í pabba áður en ég fór inn. Um hálffjögur var ég byrjuð að synda og synti ég í tæpar tuttugu mínútur. Ég var svo búin með eina ferð í kalda pottinn og eina í þann heitasta þegar kalda potts vinkona mín mætti á svæðið. Saman fórum við fimm ferðir í hvorn pott og enduðum svo í gufunni. Ég kom heim skömmu fyrir sex. 

8.11.22

Á bílnum

Var vöknuð rétt fyrir klukkan sex í gærmorgun. Hafði því alveg tíma til að vafra smá stund á netinu þrátt fyrir að mæta til vinnu klukkan sjö. Enda fór ég á bílnum. Við mættum tvær um sjö og byrjuðum daginn á því að framleiða 1000 gjafakort til að geta afhent þau frá okkur ásamt 4000 öðrum um átta. Næst skiptum við yfir í það sem er yfirleitt framleitt fyrst á morgnana. Þeirri framleiðslu lauk um níu. Þá ákváðum við að klára síðustu endurnýjun frá því í síðasta mánuði. Framleiðsla á kortum sem eiga að taka við af plasti sem rennur út um næstu mánaðamót. Eftir morgunkaffi skiptum við yfir í daglega debetframleiðslu. Henni lauk rúmlega ellefu og þá tók við framleiðsla á hádegisskammtinum. Kreditkort sem send eru til okkar um það leyti. Áttum tæp 5000 gjafakort óframleidd og fengum pöntun upp á önnur 5000. Nóg er til af hráefninu en þegar eldri birgðir kláruðust kom í ljós að það var breyting á plastinu. Við höfðum ekki fengið neina beiðni um að breyta áprentuninni og byrjuðum að nota plastið, hugsuðum eiginlega mest út í að reyna að vinda ofan af framleiðslunni. Enda er kominn þessi tími og þrátt fyrir að við fáum stundum þau skilaboð að ekkert liggi á er spurt næstum daglega eftir gjafakortunum, sérstaklega ef pöntuð hafa verið mörg á saman útibú. Það tekur lengri tíma að framleiða 5000 kort heldur en 500 kort og allt daglegt og jafnvel endurnýjun er látið ganga fyrir. Eftir nokkra framleiðslu á nýja plastútlitinu var samt ákveðið að stoppa og senda fyrirspurn á eigendur. Þrátt fyrir þetta stopp var ég að vinna til klukkan hálffjögur. Var með sjósundsdótið í skottinu en ákvað hins vegar að fara bara beint heim. Hluti af þeirri ákvörðun var tekin vegna þess að ég fékk stæði á góðum stað við húsið. 

7.11.22

Mæti snemma í vinnu

Stillti enga klukku á mig en var vöknuð og komin á fætur um átta leytið. Setti í þvottavél og tók upp þvottinn sem var á snúrunni. Mætti í Laugardalslaugina um tíu en kalda potts vinkona mín hefur sennilega ákveðið að mæta og syngja með kirkjukórnum í Laugarneskirkju í messu. Ég fór þrjár langar ferðir í kalda pottinn, tvær í heitasta pottinn og endaði á góðu gufubaði. Var ekki í stuði til að synda neitt og sleppti því þess vegna. Fór beint heim aftur að undirbúa mig undir fyrsta leikinn í enska. Hengdi upp úr vélinni, hellti upp á kaffi og sótti prjónana mína. Lánaði bræðrunum bílinn seinni partinn en þeir skruppu í heimsókn til pabba síns og fjölskyldu hans. Dagurinn leið frekar hratt.

6.11.22

Sunnudagur

Rumskaði fyrst alltof snemma, fyrir klukkan sex. Sofnaði aftur í smá stund en um sjö ákvað ég að fara á salernið og tæma blöðruna. Eftir það sofnaði ég aftur, fyrst til klukkan að verða níu en svo lengur og reyndar var klukkan næstum orðin ellefu þegar ég dreif mig loksins á fætur. Ég eyddi svo deginum í að taka því rólega. Vafra á netinu, prjóna, horfa á boltaíþróttir og þætti og hringja í pabba og vinkonu. 

5.11.22

Sofið út

Vaknaði rétt fyrir sex í gærmorgun. Fór á bílnum í vinnunna tæpum klukkutíma síðar. Við ætluðum að reyna að klára það sem stóð útaf þegar við urðum að hætta deginum áður og koma því með í töskuna sem var sótt um átta. Framleiðsluvélin, þ.e.a.s. umslaga parturinn á henni, var að haga sér mjög illa. Aðeins örfá kort voru tilbúin en ekki hægt að senda þau með þegar taskan var sótt. Við gátum hins vegar framleitt öll kort sem ekki voru að fara á form en það voru aðeins um 180 kort svo það var afgreitt á innan við klukkutíma. En á meðan við biðum eftir viðgerðarmanni gátum við þó framleitt slatta af gjafakortum. Vélin komst ekki í lag fyrr en um tvö og við vorum til hálffimm að framleiða allt daglegt á form og það sem vantaði upp á frá því í fyrradag. Ég fékk að fara korter í fimm. Fór beint heim. Tók inn bakpokann, handtöskuna og sjósundsdótið. Fór í aðra blússu og svo brunuðum við mæðginin austur á Selfoss til Jónu og Reynis þar sem við hittum líka Helgu systur og pabba. Helga var búin að vera hjá frændfólkinu í vikunni á meðan hún var starfsmaður í þjálfun í Krónunni á Selfossi. Þetta var frábær hittingur og klukkan var langt gengin í tólf þegar við mæðgin kvöddum og fórum aftur í bæinn. Oddur Smári keyrði báðar leiðir. 

4.11.22

Morgunstund

Ég fór á bílnum í vinnuna í gærmorgun. Vorum á sömu vinnustöðvum og á miðvikudaginn svo ég var í bókhaldinu. Stelpurnar byrjuðu á því að framleiða fyrir nýjasta bankann en þegar þær ætluðu að byrja á daglegum verkum stoppaði allt. Það var reynt að endurræsa, slökkva og alls konar en fljótlega varð ljóst að hringja þurfti út viðgerðarmann. Hann kom um tíu og það tók tvo tíma að koma vélinni í gagnið aftur. Um þrjú áttum við að vera í heimsókn á nýja staðnum og skoða aðstöðuna sem við fáum þar en við urðum að afboða okkur. Þurftum samt að afhenda vélina um þrjú svo hægt væri að uppfæra hin ýmsu kerfi á henni. Eitt daglegt verkefni stóð þá útaf. Kláruðum að telja, pakka og ganga frá. Ég var komin fyrir utan Laugardalslaug um fjögur. Hringdi í pabba í gemsann og á meðan við vorum að tala saman hringdi systir mín í hann í heimasímann. Hún var að bjóða okkur í mat í kvöld hjá frændfólki okkar á Selfossi í tilefni þess að hún og kona frænda okkar áttu afmæli 2. og 3. nóvember. Kalda potts vinkona mín mætti á svæðið um hálffimm. Þá var ég búin að fara tvær ferðir í kalda. Fór fjórar í viðbót með henni. Synti 200 metra á bakinu og þvoði mér um hárið á leiðinni upp úr. Kom við í Fiskbúð Fúsa á heimleiðinni. Systir mín hringdi svo aftur í mig í gærkvöldi til að athuga hvort synir mínir myndu nenna með á Selfoss og einkabílstjórinn að keyra mig svo ég gæti fengið mér í tána, eða allar tærnar þess vegna. 

3.11.22

Fimmtudagur

Labbaði í vinnuna sömu leið og á mánudagsmorguninn. Ég var í bókhaldinu og það var nóg að gera fram yfir hádegi. Eftir hádegi var verið að vinna að endurnýjun til hálffjögur. Ég settist hins vegar með prjónana mína í sófann dágóða stund en hjálpaði svo til við að ganga frá og loka deildinni. Klukkan var að verða hálffimm þegar við yfirgáfum staðinn því við ákváðum að klára að pakka allri endurnýjun. Fékk far heim úr vinnunni en fór svo ekkert út aftur.

2.11.22

Afmælisdagur systur minnar

Vaknaði um sex. Þveraði Klambratúnið þegar ég labbaði í vinnuna. Setti höfuðljósi í hleðslu á vinnutölvunni minni eftir gönguna. Ákváðum að vera á sömu vinnustöðvum og á mánudaginn. Ég var semsagt á móttökuendanum. Rétt fyrir hádegi tók framleiðsluvélin kast. Við ákváðum að slökkva á henni á meðan við færum í mat. Fyrsta einn og hálfa tímann eftir mat hegðaði vélin sér betur en svo var hún að byrja aftur um tvö. Skiptum því úr endurnýjun yfir í gjafakortaframleiðslu og framleiddum 1000 svoleiðis áður en við sögðum þetta gott um þrjú. Sú sem oftast býður mér far heim úr vinnu var að fara beint í sjúkraþjálfun svo ég labbaði heim yfir Skólavörðuholtið. Það kom maður um hálffimm að rakamæla flestar íbúðir í húsinu. Tengist tilvonandi framkvæmdum og uppsetningu þeirra. Ég skrapp svo á bókasafnið og í Krónuna en skrópaði í sund. 

1.11.22

Glænýr mánuður

Vaknaði rétt fyrir sex í gærmorgun. Dreif mig fljótlega á fætur. Eftir morgunverkin á baðherberginu settist ég í stofuna með fartölvuna í fanginu þar til kominn var tími til að labba af stað í vinnuna. Labbaði upp Eiríksgötu og niður Skólavörðustíg og Ingólfsstræti. Ég var á móttökuendanum á vélinni. Öll dagleg framleiðsla var búin um hádegið svo við gátum einbeitt okkur að endurnýjun eftir hádegi. Allt gekk mjög vel framan af en um þrjú fékk vélin kast og það endaði með því að klukkan var orðin hálffimm áður en við gátum yfirgefið vinnustaðinn. Fékk far heim úr vinnunni og við vorum lengur en venjulega vegna umferðar á þessum tíma. Ég ákvað svo að fara ekkert út aftur. Kláraði eina tusku og fitjaði upp á nýrri og horfði á tvo þætti úr hluta af þeim seríum sem ég er að fylgjast með. 

31.10.22

Síðasti október dagurinn

Ég var komin á fætur um átta í gærmorgun. Tæpum klukkutíma síðar heyrði ég í vekjaranum hjá Davíð Steini en svo bólaði ekkert á honum. Oftast hringi ég í hann en í þetta sinn bankaði ég á dyrnar til að ýta við honum. Skutlaði honum upp á N1 við Gagnveg og fór svo beinustu leið í Laugardalslaugina. Var búin með mína fyrstu ferð í kalda pottinn og sat í þeim heitasta þegar vinkona mín mætti á svæðið. Við vorum búnar að fara fjórar ferðir þegar systir hennar mætti á svæðið. Við settumst hjá henni í sjópottinum (sem reyndar er ekki með sjó í þessa dagana) í góða stund áður en við fórum í síðustu ferðina í kalda og svo gufuna. Kom heim rétt fyrir tólf og hellti mér upp á kaffi. Fór ekkert aftur en dagurinn fór í netvafr, prjón, bolta og þáttagláp. 

30.10.22

Sunnudagur

Vaknaði við vekjaraklukkuna tuttugu mínútum fyrir sjö í gærmorgun. Davíð Steinn kom fram um sjö og þá var ég búin að vafra aðeins um á netinu. Skutlaði honum í vinnuna og þáði kaffi út í bíl í staðinn. Lagði á planinu við Laugardalslaug tólf mínútum fyrir átta en fór ekki inn fyrr en eftir morgunfréttir. Synti aðeins 200 metra en fór nokkrum sinnum í kalda, tvisvar sinnum í heitasta og einu sinni í gufu. Fór beint heim eftir sundið og fékk hornstæðið fyrir bílinn. Davíð Steinn kom heim úr vinnu í fyrra fallinu, um hálf átta. Lánaði þeim bræðrum bílinn til að fara í hrekkjavökupartý.

29.10.22

Á skutl vaktinni

Fór á bílnum í vinnuna í gær. Var á ítroðsluendanum. Um hálftíu komu tilvonandi yfirmaður og tveir fyrirliðar úr seðlaverinu í heimsókn. Kynntu sig og kynntu sér starfsemi kortadeildarinnar næstu rúmu tvo tíma. Núverandi yfirmaður var líka á staðnum. Hún kom fyrr um morguninn og fór svo um hádegisbilið. Daglegri framleiðslu lauk um tólf. Eftir hádegi vorum við búnar að endurnýja um 500 kort þegar umslagaparturninn af vélinni fór í stanslausar villumerkingar. Ákváðum að hætta og ganga frá þegar við vorum búnar að taka um 50 kort á formum úr vélinni og handsetja í umslög. Þá var klukkan um þrjú. Ég fór með bílinn á Löður við Fiskislóð og fékk þá til að þvo felgurnar líka. Lagði bílnum á stæði við Kringluna, bókasafnsmegin, korter í fjögur. Hringdi í eldri af þeim sem fengu starfslokasamning um daginn og spjallaði dágóða stund við hana. Ætlaði svo að skila inn fjórum bókum og fá mér nýjar í staðinn rúmlega fjögur en þá var búið að loka vegna starfsmannafundar. Hringdi í pabba en var svo komin með bílinn á N1 dekkjaverkstæðið við Fellsmúla tuttugu mínútur yfir fjögur. Komst að fimm mínútum síðar, fimm mínútum fyrir pantaðan tíma og vetrardekkin voru sett undir.

28.10.22

Vikan að klárast

Setti plástur á blöðrutána og labbaði í vinnuna í gærmorgun. Fór næstum sömu leið og á þriðjudaginn og var með höfuðljósið. Ég var á móttökuendanum á vélinni. Daglegri framleiðslu lauk rétt rúmlega tólf. Fékk að fara upp í mat með þeirri sem var mér mér á vélarvaktinni. Eftir hádegi unnum við að endurnýjun til klukkan að byrja að ganga fjögur. Fékk far heim úr vinnunni. Bræðurnir voru þá að koma heim úr ferð í Sorpu og verslunarferð. Ég var komin í Laugardalslaugina korter yfir fjögur og hitti þar fyrir kaldapotts vinkonu mína í sinni annarri ferð í kalda pottinn. Saman náðum við fimm ferðum áður en við enduðum í gufunni. Kom heim aftur rétt fyrir sex. Felldi gullt eldhúshandklæði af prjónunum og gekk frá endum. Fitjaði upp á nýrri tusku, laxableikri. Milli átta og níu horfði ég á bikarleik í handbolta á RÚV2. 

27.10.22

Frænku- og systrahittingur

Var orðin svolítið aum í einni tánni sem hafði fengið "göngublöðru" og sú blaðra sprakk. Ég ákvað því að fara á bílnum í vinnuna í gærmorgun. Ég var í bókhaldinu og nóg að gera. Daglegri framleiðslu lauk fyrr en langt gengin í tvö eftir hádegi en það var aðallega vegna þess að það þurfti að vinna upp uppsafnaða daga vegna hráefnisskorts. Hráefni kom til okkar seinni partinn á þriðjudaginn. Ég var alveg til klukkan rúmlega hálffjögur að pakka. Vinnudegi lauk rétt fyrir fjögur. Þá fór ég beinustu leið í Garðabæinn að heimsækja frænku mína og nöfnu. Pabbi hennar og móðuramma mín voru systkyni. Stóra systir nöfnu minnar og systir mín og mágur voru mætt á undan mér en það tók mig um tuttugu mínútur að komast frá Seðlabankanum og í Garðabæinn, það sem á ekki að taka nema um tíu mínútur. En það var nú svo sem ekkert stress á einum eða neinum. Hittingurinn stóð yfir í rúmlega tvo tíma. Þá skutlaði ég Ástu frænku yfir í Kópavoginn þar sem hún á íbúð en þessi frænka mín er gift Norðmanni og hefur búið í Noregi í yfir 40 ár. Hún og maðurinn hennar fjárfestu í íbúð í Smárahverfinu fyrir nokkrum árum og hafa verið dugleg að koma í lengri og skemmri ferðir. Systir mín og mágur eltu okkur frænkurnar til að fá að kíkja á íbúðina hennar. Ég fór hins vegar ekki með inn og var komin heim um sjö. 

26.10.22

Mið vika

Labbaði þvert yfir Klambratúnið, Flókagötu, Gunnarsbraut, Snorrabraut, Laugaveg og Ingólfsstræti í vinnuna í gærmorgun og var að sjálfsögðu með höfuðljósið. Ég var á ítroðsluendanum á vélinni. Enn vantaði hráefni til að ljúka við framleiðslu fyrir einn bankann. Það kom svo í hús um þrjú. Það var talið og látið vita að það væri komið og að uppsöfnuð dagleg framleiðsla yrði framleidd daginn eftir (í dag semsagt). Fékk far heim úr vinnunni. Stoppaði heima í rúman hálftíma áður en ég fór í sund. Kom við í fiskbúðinni á leiðinni í Laugardalinn. Synti svo ekkert, fór bara tvisvar í kalda pottinn, tvisvar í þann heitasta, einu sinni í 42°C pottinn og sat svo góða stund úti á bekk áður en ég fór inn og þvoði mér um hárið. Það er búið að hækka hitann á kalda pottinum úr 6-8 í 10-12. Það finnst mér frekar dapurt en sjálfsagt eru aðrir sem fagna því. 

25.10.22

Vika eftir af október

Vaknaði um sex leytið, amk tuttugu mínútum áður en vekjaraklukkan átti að hringja.  Eftir morgunverkin á baðherberginu settist ég inn í stofu með fartölvuna í fanginu. Davíð Steinn kom fram um hálfsjö og var farin tíu mínútum síðar. Ég labbaði af stað í vinnuna um sjö. Var með höfuðljósið og fór upp Eiríksgötu og niður Skólavörðustíg. Ég var á móttökuendanum á vélinni. Kláruðum daglega framleiðslu um hálfeitt og vorum að sinna endurnýjun eftir hádegi. Fékk far heim úr vinnunni stuttu fyrir fjögur og einhvern veginn æxlaðist það þannig að ég fór ekkert út aftur.

24.10.22

Mánudagsmorgun

Svaf út í gærmorgun, alveg til klukkan að verða níu. Í stað þess að drífa mig í sund setti ég í þvottavél og svo að vafra á netinu. Strákarnir komu fram um hádegisbilið og um eitt lögðum við af stað austur. Stoppuðum hjá N1 á Selfossi. Davíð Steinn fjárfesti í og skipti um rúðuþurrkur að framan og færði mér kaffi út í bíl. Komum á Hellu um hálfþrjú. Pabbi og Helga systir tóku vel á móti okkur. Ingvi og Bríet voru úti að viðra hundana en komu hálftíma síðar. Pabbi hellti upp á könnuna. Hann spurði mig svo hvort ég gæti séð um að elda bleikju í kvöldmatinn. Davíð Steinn skrapp með afa sínum út í búð til að kaupa sallat, blómkál og ís. Ég fór að huga að matnum um fimm. Reif niður blómkál í gufupott, skar niður lauk og kartöflur og bætti út í. Beið með að handera bleikjuna þar til stutt var þar til grænmetið var tilbúið. Allir voru mjög hrifnir af kvöldmatnum. Það var boðið upp á ísinn í eftirrétt. Klukkan var langt gengin í sjö þegar við mæðgin kvöddum en strákarnir voru búnir að lofa sér í spilamennsku um kvöldið og ég vildi ekki leggja of seint af stað í bæinn hvort sem er og var alveg tilbúin að kveðja. 

23.10.22

Sunnudagur

Ég var komin á fætur rétt upp úr klukkan sjö í gærmorgun. Setti hársundsteygjuna á hægri ungliðinn en var mjög óákveðin um hvort ég ætti að fara í Sundhöllina eða Laugardalslaugina. Það endaði með því að ég tók enga ákvörðun, fór semsagt ekkert, nema í þvottahúsið. Um hálftólf byrjaði fyrsti leikur dagsins í enska boltanum. Liverpool að heimsækja liðið sem var í neðsta sæti. Sá leikur fór 1:0 fyrir heimaliðinu. Lýsandinn var búinn að segja að þau fimm skipti sem Liverpool hefði komið á þennan völl hefði það aldrei náð að sigra og það breyttist ekkert í gær. Klukkan tvö voru tveir spennandi leikir og síðasti leikur dagsins hófst hálffimm. Svo tók Valur á móti Breiðablik klukkan átta. Sá leikur fór mjög illa fyrir mína menn. En ég var annars mjög dugleg að prjóna í gær og slaka almennt á. Var kannski örlítið æst yfir boltanum en ekkert mikið. 

22.10.22

Laugardagur

Rumskaði rétt fyrir sex en svaf svo alveg til klukkan að ganga níu. Var mætt í Nauthólsvík rétt eftir að opnaði um ellefu. Var frekar hissa á hversu margir voru á svæðinu en hluti af því skýrist kannski vegna þess að það er vetrarfrí í skólum. Svo eru aðrir sem hafa tök á að skreppa í hádegishléinu og enn aðrir sem ekki eru að vinna og komast hvenær sem þeim hentar. Ég hitti eina frá Hellu sem var einmitt að nýta sér hádegishléið í vinnunni. Ég var í sjónum í um tuttugu mínútur og eitthvað svipað í heita pottinum á eftir. Var komin heim aftur um tólf. Hringdi í pabba og tvær vinkonur. Um tvö var ég svo komin á 4. hæð í Valhöll í árlegan tanneftirlitstíma. Varaði tannlækninn við að rótarfyllingin væri farin úr jaxlinum. Við urðum ásátt um að undibúa jaxlinn undir að fá krónu yfir. Teknar voru þrjár myndir. Tannlæknirinn reiknaði líka út hvað þetta myndi kosta í heildina og setti bráðabirgðafyllingu. Gat svo tekið einn smá lið út, þ.e. hann taldi ekki þurfa að setja neinn pinna undir undirstöðuna. Samt mun þessi kostnaður líklega fara langleiðina upp í þrjúhundruð þúsund. Eins gott að ég er búin að vera dugleg að safna fyrir framkvæmdum og óvæntum útgjöldum. Borgaði rúmar fimmtíuþúsund í gær og fékk tíma aftur eftir mánuð. 

21.10.22

Frídagur

Vaknaði rétt áður en vekjaraklukkan hringdi í gærmorgun. Svo rétt á undan að hún byrjaði að hamast þegar ég var að opna símann til að slökkva á henni. Ég fór á bílnum í vinnuna og við sem erum þrjár eftir settumst aðeins aukalega niður til að taka stöðuna á okkur og fleiru. Ég var svo í bókhaldinu. Þeirri vinnu lauk um hálftvö. Þá leysti ég aðra af á móttökuendanum á vélinni til klukkan að verða hálfþrjú. Átti að mæta í Hamar í K2 klukkan þrjú og taldi best að gefa mér góðan tíma til að finna stæði. Lokað var að stæðunum við Höfða en þegar til kom fékk ég eitt stæði beint fyrir framan Katrínartún 2. Borgaði í stöðumæli og fékk mér svo grænt búst áður en ég fór upp á fimmtu. Var komin aðeins of snemma þannig að ég beið í móttökunni og drakk af bústinu. Starfsmanna samtalið gekk vel. Spjölluðum vítt og breytt en auðvitað voru breytingarnar efst á baugi. Sú sem ég hafði leyst af á vélinni átti tíma strax á eftir mér. Hún var að spjalla við starfsmannastjórann þegar ég kom fram og við skiptum eiginlega um sæti. Starfsmannastjórinn vildi nefnilega líka heyra í mér hljóðið og tók það skýrt fram að hann væri til staðar ef það væri eitthvað. Það kom reyndar í ljós að pabbi hans var heimilislæknirinn minn í mörg ár. Sá er hættur störfum enda komin yfir sjötugt. Eftir þetta spjall fór ég beinustu leið í Laugardalslaugina. Fór í kalda í tæpar fimm mínútur, synti 300 metra, aftur í kalda í rúmar sex mínútur, gufuna í korter, kalda sturtu og hitti svo yngstu mágkonu mömmu í sjópottinum. Það var reyndar engin sjór í pottinum. Var komin heim um sex. 

20.10.22

Furðulegir tímar

Notaði höfuðljósið á göngunni til vinnu í gærmorgun. Það var enn slökkt á ljósunum í undirgöngunum undir Miklubraut við Lönguhlíð og mun þægilegra að labba í gegnu með ljósið. Eins var slökkt á sumum staurunum við göngustíginn sem þverar Klambratún. Slökkti á og tók niður ljósið einhvers staðar á Laugaveginum. En það hefði nú verið ágætt að hafa það eða setja upp aftur vestan megin við Þjóðleikhúsið. Ég var í skrifstofurýmingu fram að kaffi, undibrjó pökkun og taldi framleiðsluna úr fyrstu tveimur vögnunum með þeirri sem var í bókhaldinu þegar fyrstu framleiðslu var lokið og tölur tilbúnar. Eftir kaffi fór ég á móttökuendann og var þar þar til við vorum leystar af í mat tuttugu mínútum fyrir eitt. Eftir hádegi var ég í pökkun. Hættum vinnu um hálffjögur og fékk ég far heim úr vinnunni. Oddur Smári sat út í bíl framan við hús, nýlega kominn heim úr Sorpuferð. Ég ákvað að sleppa sundferð eins og ég geri stundum orðið í miðri viku. Bíllinn var líka í svo góðu stæði. Við Oddur horfðum á leiki í enska boltanum. Fyrri hálfleikinn í leik Liverpool og Wolves en í leik hléi skiptum við yfir í Man. Utd og Tottenham. Báðir þessir leikir enduðu vel fyrir liðin sem voru á heimavelli, 1:0 og 2:0. Um hálfátta hringdi heimasíminn. Það var yfirmaður minn. Hún hafði verið að reyna að ná í mig í gemsann og einnig sent skilaboð á facebook-spjallinu um að hringja í sig. Ég var ekki á netinu og ég hafði ekkert heyrt í gemsanum. Þar voru engin ósvöruð símtöl. Ég er reyndar að fara í starfsmannasamtal seinni partinn í dag en yfirmaðurinn vildi láta mig vita að búið væri að gera starfslokasamning við tvær samstarfskonur mínar úr kortadeildinni.

19.10.22

Saumaklúbbur

Var vöknuð og komin á fætur á svipuðum tíma og á mánudagsmorguninn. Rétt fyrir sjö labbaði ég af stað í vinnuna. Labbaði Lönguhlíðina að gatnamótunum við Miklubraut. Þar eru göng undir. Labba gegnum þau oftast þegar ég fer þessa leið. Fór þau líka í gær en það lá við að ég hætti við það því það var myrkur, annað hvort sprungið eða slökkt á ljósunum. Þetta fékk mig til að íhuga að sennilega væri best að grafa upp höfuðljósið og nota á göngunni eftirleiðis. Var ekki með það í bakpokanum í gær heldur var það heima í handtöskunni. Það var slökkt á þremur af ljósastaurunum sem eru á Klambratúninu en eftir það var þetta í lagi. Við vorum þrjár í vinnu. Ég var skráð á ítorðsluendann og hélt mig við þann enda allan daginn. Lukum daglegri framleiðslu um tólf. Var búin að hlaða inn debetendurnýjun en við létum það ganga fyrir að halda gjafakortaframleiðslu áfram. Hættum vinnu um þrjú og ég fékk far heim úr vinnunni. Stoppaði ekkert þar heldur tók til sunddótið mitt og fór beinustu leið í Laugardalslaugina. Var búin með ein ferð í kalda pottinn þegar vinkona mín mætti á svæðið. Fór fimm ferðir með henni en var svo á undan að stinga mér í gufuna. Hún tók sína sjöttu ferð áður en hún kom í gufu. Um átta um kvöldið sótti tvíburasystir mín mig og kippti mér með í saumklúbb til Lilju. Tveir og hálfur tími voru fljótir að líða enda extra langt síðan síðasti klúbbur var haldinn. Var komin heim um ellefu og þrátt fyrir að vera venjulega farin að sofa á þeim tíma, sérstaklega þegar er vinnudagur framundan, þá las ég nú í nokkrar mínútur. 

18.10.22

Afmælisdagurinn hans pabba

Var vöknuð og komin á fætur upp úr klukkan sex í gærmorgun. Lagði ekki af stað í vinnuna fyrr en klukkutíma síðar og fór þá á bílnum. Var að vinna til hádegis, á ítroðsluendanum fram að kaffi og á móttökuendanum eftir kaffi. Um tólf kvaddi ég vinnufélagana og fór beint í Nauthólsvík. Sjórinn 4,5°C svo ég fór í sjósundsskóna svo ég myndi tolla lengur út í. Var samt ekki nema um korter að svamla, hefði getar verið lengur því mér var ekkert kalt á tánum. Sat í heita pottinum í svipaðan tíma og ég svamlaði í sjónum. Kom við heima í ca hálftíma. Gekk frá sjósundsdótinu og vafraði aðeins um á netinu. Rétt rúmlega tvö var ég komin til norsku esperanto vinkonu minnar vestur í bæ. Við erum ekki komnar í esperanto gírinn ennþá. Hún bauð upp á kaffi, berjapæ og fleira og svo fengum við okkur stutta göngu. Stoppaði hjá henni í um tvo tíma áður en ég fór heim aftur. 

17.10.22

Hálfur vinnudagur í dag

Var komin á fætur skömmu fyrir klukkan átta í gærmorgun. Rúmum klukkutíma seinna hringdi ég í gsm síma Davíðs Steins sem hafði víst slökkt á vekjaraklukkunni sinni og steinsofnað aftur. Hann dreif sig á fætur og ég var skutlaði honum upp á Gagnveg. Í leiðinni athugaði ég þrýstinginn á framhjólinu farþegameginn, þar þurfti aðeins að bæta á. Kerfið í bílnum var ekki byrjað að kvarta og ég tékkaði ekkert á hinum dekkjunum. Fór beinustu leið í Laugardalslaugina. Eftir tvær ferðir í kalda pottinn varð mér ljóst að kalda potts vinkonan væri ekki á sama tíma og ég svo ég ákvað að synda tvær ferðir. Skórnir mínir ákváðu að elta mig. Fór þó ekki langt en voru komnir út í laug og "svömluðu" við sundlaugarbakkann þaðan sem ég syndi frá. Ég sat í gufunni þegar vinkonan mætti á svæðið. Hún hafði hitt aðra og frétt af mér og ákvað að byrja sína rútínu á að setjast stund með mér í gufunni. Eftir sundið skrapp ég í Krónuna við Fiskislóð. Var ekki með lista með mér frekar en venjulega. Mundi þó eftir langflestu en gleymdi þó því sem mest er notað, ostinum. Kom heim um tólf. Fór ekkert út aftur heldur horfði á fótbolta fram eftir degi. 

16.10.22

Október hálfnaður

Var komin á fætur um hálfsjö. N1 sonurinn kom fram hálftíma síðar. Stuttu fyrir hálfátta færði hann mér kaffi út í bíl eftir að ég var búin að skutla honum á vinnustaðinn. Frá Gagnvegi fór ég að AO-stöðinni við Sprengisand og fyllti á tankinn. Næsta stopp var á bílaplani við Austurbæjarskóla. Þar þurfti ég að bíða í um tíu mínútur og sat svo aðeins lengur og hlustaði á morgunfréttir í útvarpinu áður en ég fór í Sundhöllina. Eftir tæpar fimm mínútur í kalda pottinum fór ég á braut 1 í innilauginni og synti 40x25 metra á 50 mínútum. 5x25m skriðsund en allar hinar ferðirnar á bakinu. Fimm af þeim reyndar bakskrið en ég fór fjórðu hverju ferð á skriðinu, aðallega til að telja ferðirnar. Eftir sundið fór ég heitasta og annan elsta pottinn í tíu mínútur og svo annað eins í kalda pottinn áður en ég endaði í gufunni. Þvoði mér um hárið. Næst lá leiðin í bakaríið í Suðurveri. Keypti mér kaffi, samloku og gríska jógúrt. Það síðast nefnda tók ég með mér heim en hinu gerði ég skil á staðnum. Fór ekkert út aftur eftir að ég kom heim. Um fjögur lánaði ég Oddi bílinn. Davíð Steinn fékk að hætta fyrr í vinnunni og saman fóru þeir að fagna 80 afmæli föðurafa síns með keilu og út að borða ferð með föðurfjölskyldunni. 

15.10.22

Á skutlvaktinni

Fór aftur á bílnum í vinnuna í gærmorgun. Það var nóg að setja miðstöðin á fullt og bíða í smá stund. Setja svo rúðupissið af stað og það fór allt af bæði fram- og afturrúðu. Ekkert var á hliðarrúðum svo ég slapp við skafið í gær. Vorum þrjár í vinnu í gær, ein nýkomin heim frá Búdapest. Hún var í bókhaldinu, ég á ítroðsluendanum og fyrirliðinn á móttökuendanum. Framleiðsla gekk ágætlega fyrir sig. Hún var ekki mikil en smá hluti af henni kom í gegnum nýja leið og það tók tíma. Kerfisfræðingurinn var með okkur í því. Gallinn við þessa leið að við höfum ekkert í höndunum nema skrárnar sem hlaðast inn á vélina. Við erum vanar að fá blöð með tegundum og fjölda og einnig koma listar til að pakka eftir svo við séum vissar um að réttur fjöldi séu að fara í réttu útibúin eða í póst. Fyrirliðinn fór um hálfþrjú en við hin vorum alveg til fjögur. Þá fór ég beinustu leið í Nauthólsvík. Sjórinn 5,8°C. Ég var með sjósundsskóna en ákvað að prófa að nota strandskóna. Tolldi í sjónum í um tíu mínútur. Dásamlegt veður og mjög gott að fara í sjóbað. Kom við í Fiskbúð Fúsa, vínbúðinni og Krambúðinni áður en ég fór heim. Setti handklæði í þvottavél og þegar upp var staðið hafði forritið í símanum mælt tæplega 7000 skref og þá eru ekki talin með skrefin sem ég fór án síma. 

14.10.22

Föstudagur

Þurfti að skafa bílrúðurnar áður en ég lagði af stað til vinnu í gærmorgun. Slapp reyndar við að skafa framrúðuna því ég var með miðstöðina á fullu og á meðan ég skóf allar hinar rúðurnar bráðnaði af framrúðunni. Varð að fara extra varlega í umferðinni því það var nokkuð hálft. Ég lenti ekki í neinum vandræðum samt á leiðinni. Ekki eins og leigubílstjórinn sem missti stjórn á bílnum og framendinn hafnaði í Reykjavíkurtjörn. Við mættum tvær af þremur fyrsta klukkutímann. Ég fór á móttökuendann og hin sá um að hlaða inn verkefnum og senda skrárnar og kortin af stað. Dagleg framleiðsla var með minna móti og þegar við fórum í kaffi um það leyti sem sú sem var í bókhaldi mætti með "föstudagskaffibakkelsið" rétt fyrir hálftíu áttum við aðeins eftir að framleiða 80 kort. Vorum löngu búnar með það áður en við fengum hádegisskammtinn sem var innan við 80 kort. Vorum því búnar að framleiða allt, telja og ganga frá fyrir tólf. Afhentum vélina til yfirferðar rúmlega tólf. Ég sat yfir þeim tveimur sem komu til að yfirfara til klukkan fjögur. Las og prjónaði hluta af tímanum. Fór svo beinustu leið í Laugardalslaugina þar sem kalda potts beið eftir mér. Hún var búin að fara 3 ferðir í kalda. Ég byrjaði á að fara í kalda pottinn í fimm mínútur og svo fórum við þrjár ferðir saman, tvær ferðir í heitasta og enduðum í gufunni. Þar sat ég í tæpan hálftíma áður en ég fór upp úr og heim.

13.10.22

Yfirseta í dag

Labbaði yfir Skólavörðuholtið í vinnuna í gærmorgun. Ég var í bókhaldinu og þurfti að byrja á því að prenta út alla lista. Framleiðsla gekk ágætlega. Ég leysti skólastelpuna af rétt fyrir hálftólf og kláraði hádegisframleiðsluna með hinni. Vorum búnar að framleiða allt, telja og ganga frá um tólf. Fyrirliðinn ákvað að sú sem fór í skólann þyrfti ekki að mæta aftur við hinar tvær gætum farið heim um hálftvö. Aðstoðuðum kerfisfræðinginn í smá framleiðslutilraunum. Ég labbaði svo sömu leið heim og fór ekkert aftur út. Horfði á landsleik í handbolta karla á RÚV2 um kvöldið. Góður leikur það.

12.10.22

Mið vika

Fór á bílnum í vinnuna í gærmorgun. Tók bæði sund- og sjósundsdót með mér. Þar sem við vorum aðeins þrjár í vinnu vorum við á þeim vinnustöðvum sem við byrjuðum á allan tímann. Sú sem var í bókhaldinu þurfti þó að leysa þá sem var á móttökuendanum af stuttu fyrir hálftólf því hún skrapp frá í skólann. Við bókarinn kláruðum framleiðslu dagsins, "háttuðum" og slökktum á vélinni og kláruðum að telja og ganga frá. Tókum svo lykilinn af kennispjaldageymslunni með okkur fram í mat. Kennispjaldageymslan er hinum megin við kaffistofuna. Vorum búnar að hlaða á eitt bretti, plasta og fara með inn í skrifstofurýmið og langt komnar með að hlaða á bretti númer tvö þegar sú þriðja kom úr skólanum. Allt í allt fóru 133 kassar á fimm bretti. En inni í einu horninu í hillu sem við héldum að væri eingöngu með kassa fyrir þann banka sem við vorum að vinna með fundum við tvo kassa frá öðrum banka sem við töldum okkur búnar að vera senda allt frá okkur. Höfðum marglesið yfir þegar við vorum að hlaða á bretti fyrir þann vagna en ekki svo gott að lesa inn í horni og höfum líklega gefið okkur að þar sem við sáum fjóra kassa af sama bankanaum í hilluröð sem tekur sex kassa að það hlytu að vera kassar fyrir viðkomandi banka sem væru innst í horninu. Vorum búnar að hlaða á, plasta og fara með fimm bretti inn í skrifstofurými upp úr klukkan tvö. Hættum vinnu hálftíma síðar. Úti var ausandi rigning og ég ákvað að fara í Laugardalinn. Hringdi aðeins í pabba áður en ég fór inn í sundið. Var komin í fyrstu ferðina í kalda pottinn um þrjú. Fór tvær aðrar ferðir, synti 300 metra en sleppti alveg gufuferð. Var hálftíma á leiðinni heim vegna umferðar og kom heim rétt eftir að landsleikurinn Portúgal - Ísland 4:1 byrjaði. Svekkjandi tap en miðað við hvernig leikurinn þróaðist þá er lítið við þessum úrslitum að segja. Stelpurnar okkar börðust allan tímann en voru orðnar þreyttar og búnar að vera einum færri í þrjú korter þegar þurfti að framlengja þar sem staðan var 1:1 eftir venjulegan leiktíma. 

11.10.22

Tvær í fríi

Vaknaði tveimur mínútum áður en vekjaraklukkan átti að ýta við mér. Klæddi mig og bjó um en byrjaði svo á því að setjast inn í stofu með fartölvuna. Davíð Steinn var nefnilega að sinna sínum morgunverkum á baðherberginu eða nýbúinn að því. Hann kvaddi um tuttugu mínútum fyrir sjö og tíu mínútum síðar sinnti ég mínum morgunverkum. Labbaði í vinnuna um sjö. Var fyrst á staðinn en ekki leið á löngu áður en fleiri mættu. Vorum fjórar í gær, ein komin í nokkra daga frí. Ég byrjaði frammi í skrifstofurými að undirbúa pökkun en fór svo á ítroðsluendann á vélinni eftir kaffi. Allri framleiðslu var lokið um tólf. Eftir hádegi vorum við í smá tiltekt. Fara yfir dót og henda því sem óþarfi verður að flytja með sér af staðnum þegar þar að kemur. Hættum vinnu rétt fyrir tvö. Ein af hinum þremur var þá komin í frí fram í næstu viku. Ég fékk far heim úr vinnunni. Stoppaði heima til klukkan langt gengin í fjögur. Skrapp þá í Laugardalinn í einn og hálfan tíma. Hitti ekki á kalda potts vinkonu mína, hvort sem hún var búin að koma eða komst ekki. Hún átti heldur örugglega ekki von á því að hitta mig þar sem ég fer oftast í sjóinn á mánudögum. 

10.10.22

Upphaf vinnuviku

Ég var komin á fætur rétt rúmlega átta í gærmorgun. Dagurinn fór að langmestu í það sama og laugardagurinn. Enn meira boltaáhorf þó. Lánaði Oddi bílinn. Davíð Steinn var á Akranesi síðan um miðjan dag á föstudag. Hann kom sér þaðan yfir í Mosfellsbæ og gat því verið samferða bróður sínum heim. Þeir komu þó ekki fyrr en ég var farin að sofa. Kláraði að lesa eina af fjórum bókum af safninu en byrjaði ekki á annarri bók fyrr en ég var skriðin upp í rúm rétt fyrir hálftíu í gærkvöldi. 

9.10.22

Haustveður

Þrátt fyrir að hafa farið að sofa um tíu í fyrrakvöld svaf ég til klukkan að ganga tíu í gærmorgun. Ég rumskaði reyndar um sex en fannst alltof snemmt að rífa mig á fætur. Veðrið var ágætt en ég mjög löt. Notaði gærdaginn í prjónaskap, netvafr og fótboltaáhorf. Hringdi líka í pabba. Dagurinn leið samt frekar hratt. Fór ekki inn í rúm fyrr en um hálfellefu og las í hálftíma áður en ég fór að sofa. Og það gekk bara mjög vel að sofna. 

8.10.22

Laugardagur

Fór á bílnum í vinnuna í gærmorgun. Ég var í bókhaldinu. Það gekk vel fyrir sig. Ekki var alveg eins mikil framleiðsla og suma aðra daga í vikunni þó var fyrsti skammturinn yfir meðallagi. Allri framleiðslu var lokið fyrir tólf og búið að telja allt og ganga frá upp úr klukkan eitt. Fimm bretti af kennispjöldum voru sótt til okkar rétt fyrir hádegi. Þá á bara eftir að hlaða á fimm bretti í viðbót og láta sækja það. Svo eru örfáir kennispjaldakassar sem ekki þarf bretti undir. Nóg að líma lokin föst og afhenda á vagni. Ég var komin heim upp úr klukkan hálftvö. Tveimur tímum seinna fór ég í Nauthólsvík. Þá var að nálgast háflóð, stutt út í og sjórinn 8,1°C. Ég svamlaði um í hálftíma og var svo næstum því annað eins í heita pottinum. Kom við í Fiskbúð Fúsa og keypti ýsu í soðið, kartöflur, einn lauk og tvo pakka af harðfisk. Ég var svo heppina að eiga smá hvítvín með kvöldmatnum. 

7.10.22

Föstudagur

Í gærmorgun var ég tilbúin að leggja af stað til vinnu tíu mínútum fyrir sjö. Ég ákvað því að labba aðeins lengri leið í vinnuna. Fór framhjá Valsheimilinu, meðfram flugvellinum, þveraði Hljómskálagarðinn og labbaði svo Lækjargötuna að Kalkofnsvegi. Ég var í skrifstofurýminu fram að kaffi. Undirbjó pökkun og ýmislegt annað. Eftir kaffi fór ég á ítroðsluendann. Eftir fyrstu framleiðslu morgunsins hafði prentarinn gert uppreisn. Slökkt var á vélinni og við fórum í kaffi. Ég kveikti á vélinni, sem tók nokkra stund en þegar hún var komin upp fór allt í gang. Við lukum við debetframleiðsluna rétt áður en hádegisskammturinn kom inn á vél og allri framleiðslu var lokið stuttu fyrir klukkan tólf. Um hálftvö fékk ég far heim úr vinnunni. Oddur Smári var að búa sig undir Sorpuferð en hann var kominn til baka fyrir þrjú. Ég var komin í Laugardalinn um hálffjögur. Synti ekki nema 200 metra og fór aðeins þrisvar sinnum í kalda pottinn því kalda potts vinkona mín var ekki á svæðinu. Rútínan tók engu að síður einn og hálfan tíma því ég gaf mér góðan tíma í sjópottinum og gufunni. 

6.10.22

Fimmtudagur

Vikulok nálgast enn á ný, samt svo stutt síðan vikan byrjaði. Ég labbaði í vinnuna í gærmorgun. Það rigndi á mig hluta af leiðinni en ég varð samt ekkert holdvot. Vorum fjórar í vinnu, ein var að fara í próf og tók frí um morguninn. Hún þurfti svo ekki að koma eftir hádegi þar sem við hættum í fyrra fallinu eða upp úr klukkan tvö. Fékk far heim úr vinnunni. Var eitthvað að spá í að fara aukaferð í sjóinn því það var háflæði um þetta leyti en það endaði með því að ég fór ekkert út aftur. 

5.10.22

Á bílnum í gær

Það var fínt að fara á bílnum í vinnuna í gærmorgun því það var rigning. Var á móttökuendanum og það var alvöru framleiðsla í gangi. Allt í allt voru framleidd hátt í ellefu hundruð kort í gær og að þótt engin væri endurnýjunin. Eftir hádegi stöfluðum við 190 kennispjaldakössum á fimm bretti, plöstuðum og færðum yfir í skrifstofurýmið. Fyrirliðinn sá um að senda viðkomandi banka tilkynningu og vonandi verður þetta sótt til okkar í vikunni. Þá eru bara rúmlega 200 kennispjaldakassar eftir í geymslunni. Þessir kassar eiga að afhendast þremur aðilum. Vorum búnar um hálfþrjú og máttum þá fara. Ég var með sunddótið með mér í skottinu og fór beinustu leið í Laugardalslaugina. Byrjaði þó á að hringja aðeins í pabba áður en ég fór inn. Settist í kalda pottinn í um fjórar mínútur um þrjú. Synti svo hálftíma á brautum 7 og 8, aðallega á bakinu. Brautir 1-5 voru uppteknar í sundkennslu til klukkan að verða hálffjögur. Eftir sundið fór ég í sjópottinn og beið þar eftir að kalda potts vinkona mín mætti á svæðið. Hún kom um fjögur og saman fórum við fimm ferðir í kalda, fjórar í heitasta og enduðum svo í gufunni. Þvoði mér um hárið á leiðinni upp úr. Kom aðeins við í Hagkaup í Skeifunni áður en ég fór heim. 

4.10.22

Sjórinn að kólna

Labbaði í vinnuna í gærmorgun. Sú sem átti að vera á ítroðsluendanum var í ömmureddingum og komst ekki til vinnu fyrr en um níu. Ég tók að mér að leysa hana af. Eftir kaffi pakkaði ég síðasta partinum af debetendurnýjuninni. Hin sem hafði verið með mér á vélinni sá um að pakka megninu af daglegu framleiðslunni. Þær sem fóru á vélina eftir kaffi náðu bæði að klára allt daglegt sem og síðustu endurnýjunina fyrir klukkan hálfeitt þannig að við gátum skilað henni allri af okkur. Fórum frekar snemma úr vinnu eða upp úr hálftvö og fékk ég far heim úr vinnunni. Meiningin var þá að drífa sig fljótlega í sjóinn áður en fjaraði of mikið út. Klukkan var hins vegar að verða hálffjögur þegar ég hafði mig loksins af stað og þá byrjaði ég á því að koma við í bókasafninu í Kringlunni, skila af mér öllum fjórum bókunum og taka fjórar aðrar í staðinn. sjórinn mældis 7,6°C. Ég fór samt út í á strandskónum mínum og svamlaði um í tuttugu mínútur. Sat svo annað eins í heita pottinum áður en ég fór upp úr. Kom við á ÓB í Öskjuhlíð eingöngu til að jafna loftþrýstinginn í dekkjunum. Fór ekkert inn á stöðina sem var opnuð aftur nýlega eftir einhverjar breytingar.

3.10.22

Upphafið á vinnuviku

Var byrjuð að rumska upp úr klukkan sex og um sjö leytið dreif ég mig bara á fætur. Hafði því nægan tíma til að vafra um á netinu því ég þurfti ekki að skutla Davíð Steini fyrr en stuttu fyrir klukkan hálftíu. Ég var komin í Laugardalslaugina rétt fyrir tíu. Kalda potts vinkona mín var ekki á svæðinu en ég fór 4 sinnum í kalda, einu sinni í heitasta, einu sinni í sjópottinn, synti 300 metra, þar af 50m skriðskund og var svo rúmt korter í gufunni. Var komin heim rétt fyrir tólf. Eftir hádegisfréttir hellti ég mér upp á 2 bolla af kaffi. Restin af deginum fór í fótboltaáhorf, prjón, netvafr og einnig þáttaáhorf. 

2.10.22

Bleikur mánuður

Vaknaði stuttu fyrir hálfsjö í gærmorgun. Eftir morgunverkin á baðherberginu hafði ég tíma til að vafra aðeins um á netinu áður en kominn var tími til að skutla Davíð Steini upp á Gagnveg. Hann færði mér kaffi út í bíl fyrir skutlið. Ég var kom á planið við Laugardalslaug tíu mínútum fyrir opnun. Hlustaði svo á morgunfréttir áður en ég fór í sundið. Fór tvær ferðir í kalda, eina í heitasta og eina í sjópottinn áður en ég synti 300 metra. Fór svo í þriðju ferðina í kalda og endaði í gufu áður en ég fór upp úr og heim. Stoppaði heima í um klukkustund en skrapp svo yfir á Sólvallagötuna í um klukkustund milli ellefu og tólf. Kom við í Krónunni áður en ég fór heim aftur. Var mest að versla brauð og álegg en ég steingleymdi að kaupa mér nýja lýsisflösku. Kaupi alltaf stóra flösku af þorskalýsi. Það eru bara nokkrir dagar þar til klárast úr þeirri sem ég á hér heima.

1.10.22

Nýr mánuður

Þriðja skiptið í vinnuvikunni notaði ég einkabílinn til að koma mér á milli staða. Við vorum þrjár mættar rétt fyrir átta en sú fjórða kom rétt rúmlega níu. Ég var á móttökuendanum fram að kaffi en í pökkun og talningum til hádegis. Eftir hádegi fór ég á ítroðsluendann. Við klárðuðum endurnýjun númer tvö og byrjuðum á þriðju og síðustu endurnýjuninni. Vélin var í þokkalegum gangi en stríddi okkur öðru hvoru. Hættum framleiðslu upp úr klukkan hálfþrjú. Ég fór beinustu leið í Nauthólsvík eftir vinnu. Það var að fjara út og smá langt að labba út á eitthvert dýpi. En sjórinn var rúmlega níu gráður og ég svamlaði um í honum í tæpan hálftíma. Sat svo annað eins í heita pottinum.

30.9.22

Teboð í Apótekinu

Fór á bílnum í vinnuna í gærmorgun þar sem það var grenjandi rigning. Fram að kaffi var ég frammi í skrifstofurýminu m.a. að undirbúa pökkun. Eftir kaffi fór ég á móttökuendann á vélinni. Allri daglegri framleiðslu var lokið rétt rúmlega tólf. Eftir hádegi fóru þær tvær sem byrjuðu á vélinni um morguninn aftur á vélina að vinna að endurnýjun. Voru að til klukkan langt gengin í fjögur. Þær eru báðar með TEAMS í símanum og gátu fylgst með sviðsfundi frá klukkan þrjú þrátt fyrir að vera að vinna að framleiðslu. Við hinar sátum við skjáina okkar. Um fjögur löbbuðum við yfir á Apótekið þar sem við hittum næstráðandi yfirmann okkar. Vorum að halda upp á að búið er að flokka öll kennispjöld og þau verða brátt öll farin frá okkur. Kom heim upp úr klukkan sex. Strákarnir komu mun seinna en þeir höfðu boðið einum frænda sínum og hans fjölskyldu með sér út að borða á einhverjum stað í Kringlunni.

29.9.22

Fimmtudagur

Labbaði í vinnuna upp Eiríksgötu og yfir Skólavörðuholtið í gærmorgun. Var á ítroðsluendanum fram að kaffi og þurfti að byrja á því að skipta um aðgangsorð á vélinni. Það gekk upp í fyrsta. Eftir kaffi fór ég á móttökuendann. Framleiðslan gekk vél og vélin með sama og ekkert vesen. Kerfisfræðingarnir þurftu stundum að yfirtaka vélina en það var oftast bara tölvuparturinn og þá máttum við halda áfram með okkar verkefni á meðan. Eftir hádegi pakkaði ég því síðasta sem ópakkað var en svo var ég annað hvort að lesa eða prjóna þar til tími var kominn til að hætta vinnu. Fékk far heim úr vinnunni. Strákarnir voru í Sorpuferð og ég ákvað bara að halda mig heimavið.

28.9.22

Sundferð

Það sem himininn var fallegur í gærmorgun þegar ég var á leiðinni akandi í vinnuna. Velflestir vinnufélagarnir höfðu orð á þessu. Ég var í skrifstofurýminu ásamt tveimur öðrum fram að kaffi. Lítið var fyrir mig að gera svo sem betur fer var ég með bók og prjóna með mér. Eftir kaffi fór ég á ítroðsluendann á vélinni. Vélin var þokkaleg til að byrja með en vildi fljótlega fara að láta sinna sér. Í flestu tilfellum þýddi það að taka varð kortin úr henni framan við svæðið þar sem þau koma venjulega. Þetta reynir svolítið á þolinmæðina en þeir sem koma að gera við eða fara yfir vélina eru búnir að sjá þetta og segjast vera búnir að gera allt sem þeim dettur í hug svo þeir koma ekki að kíkja aftur fyrr en allt stoppar alveg. En þetta tefur okkur í framleiðslunni og það er ekki gott þegar maður er með endurnýjanir sem þarf að klára og koma frá okkur. Eftir hádegi var ég í sömu stöðu og um morguninn. Öllum verkefnum lokið nema framleiðslu sem aðrar tvær sáu um. Þær hættu um þrjú vegna leiðinda í vélinni. Ég fór beinustu leið í Laugardalslaugina eftir vinnu. Synti 400 metra, 350 á bakinu og 50 skriðsund. Var nýbúin með mína fyrstu ferð í kalda pottinum og sat í þeim heitasta þegar kalda potts vinkonan mætti. Saman fórum við fimm ferðir í kalda pottinn og enduðum svo í gufunni. Að þessu sinni fór ég upp úr á undan og þvoði mér um hárið í leiðinni. 

27.9.22

Sjóbað

Vaknaði við hamaganginn í vekjaraklukkunni stuttu fyrir klukkan hálfsjö í gærmorgun. Davíð Steinn var að sinna sínum morgunverkum á baðherberginu þannig að ég fór beint á netið þegar ég kom á fætur og fram. Tuttugu mínútum síðar sinni ég mínum morgun verkum og labbaði svo fljótlega af stað í vinnuna. Ég var í bókhaldinu í gær. Það starf gekk vel en mín verkefni voru búin rétt upp úr hádeginu. Sem betur fer var ég bæði með bók og prjóna. Felldi enn eina tuskuna af prjónunum og fitjaði að sjálfsögðu upp á nýrri. Rúmlega tvö varð ég samferða einni af hinum upp í K2 þar sem við kortagerðarteymið áttum markmiðsfund með yfirmanni. Fundurinn var skráður frá 14:30-16 en stóð aðeins yfir í klukkutíma því okkur gekk svona ljómandi vel á fundinum. Ég fékk far með annarri heim. Staldraði stutt við þar, var komin í Nauthólsvík upp úr klukkan fjögur. Sjórinn 8,8°C og að flæða að, engin fleiri úr sjósundshópnum mínum en ég svamlaði um í sjónum í tæpar tuttugu mínútur og sat svo í heita pottinum í rúman hálftíma. Kom við í Fiskbúð Fúsa og Krambúðinni áður en ég fór heim. 

26.9.22

Líður á mánuðinn

Var komin á fætur um níu í gærmorgun, lokað inn til strákanna svo þeir höfðu skilað sér heim. Gærdagurinn var mjög svipaður laugardeginum, fór ekkert en las, prjónaði, vafraði um á netinu og horfði á hina og þessa þættina. Hafði ofnsteiktar kjúklingabringur í matinn og gátu báðir bræðurnir nýtt sér það. Var búin að slökkva á sjónvarpinu um níu og komin upp í rúm ca 40 mínútum seinna. Las til klukkan hálfellefu og var svo fljót að sofna. 

25.9.22

Hraðferð á logninu í nótt

Ég var ekkert að drífa mig á fætur í gærmorgun. Rumskaði nokkrum sinnum en snéri mér svo jafnharðan á hina hliðina. Var þó komin á fætur áður en klukkan varð tíu. Þá var ég búin að ákveða að halda mig heimavið. Er með smá kvef, alls ekkert slöpp en löt. Nennti þó að lesa og prjóna. Kláraði seinni bókina af þeim tveimur sem ég á að skila næst; Uppgjör eftir Lee Child. Er svo byrjuð á fyrri bókinni af þeim tveim sem ég tók í síðustu ferð á safnið; Mávurinn eftir Ann Cleeves. Lánaði bræðrunum bílinn um miðjan dag og þeir voru ekki komnir þegar ég fór að sofa á ellefta tímanum. Ég sofnaði alveg róleg fyrir því. 

24.9.22

Sofið út

Föstudagar eru að verða fastir "fara á bílnum í vinnuna" dagar og það var engin undantekning á því í gærmorgun. Ég var á móttökuendanum fram að kaffi. Í skrifstofurýminu og pökkun fram að hádegi og á ítroðsluendanum eftir hádegi. Unnum til klukkan rúmlega hálfþrjú en hættum áður en vélin hætti að vera of samvinnuþýð. Reyndar var slökkt á henni í rúman hálftíma í hádeginu og vel gekk fyrsta klukkutímann eftir hádegi. Endurnýjun gengur hvort eð er alveg ágætlega, ein farin frá okkur og hátt í þriðjungur búinn af þeirri sem er í vinnslu núna. Var með sjósundsdótið með mér í skottinu en þar sem ég var búin að lofa að hitta sjósundsvinkonu mína um hálffimm byrjaði ég á því að skreppa aðeins heim og fá mér eitthvað smávegis. Bræðurnir voru farnir í gæslu á Víkingsvellinum þar sem landsleikur U-21 karla í knattspyrnu hófst um fjögur. Ég var mætt í Nauthólsvík aðeins á undan vinkonu minni en beið eftir henni. Var kannski komin tveimur mínútum á undan út í 8,8°C sjóinn. Það var að falla að og stutt að vaða út í. Svömluðum um í ca tíu mínútur, ég þá í tólf og vorum svo annað eins í heita pottinum. Létum okkur hverfa áður en húlumhæið "strandsúmba" hófst.

23.9.22

99 dagar eftir af árinu

Í gærmorgun labbaði ég yfir Klambratún, Gunnarsbraut, Laugaveg og nokkrar aðrar götur í vinnuna. Ég var í skrifstofurýminu fram að kaffi. Undribjó pökkun og aðstoðaði svo þá sem var í bókhaldinu að telja þegar fyrstu framleiðslu var lokið og tölur tilbúnar. Eftir kaffi fór ég á ítroðsluendann. Kláruðum næstu framleiðslu og byrjuðum svo á debetendurnýjun á meðan við biðum eftir hádegistölunum. Eftir hádegi var ég aftur í skrifstofurýminu en tilbúin til að leysa af inni á vél ef þurftu. Það þurfti samt ekki nema einu sinni í kannski tíu mínútur. Fékk far heim úr vinnunni um hálffjögur. Oddur Smári var þá búinn að taka saman í Sorpuferð. Ég var hvort sem er ekki í stuði til að fara aftur út og var búin að upplýsa kaldapotts vinkonu mína um að líklega kæmi ég ekkert í sund þennan daginn. 

22.9.22

"Lengsta leiðin löbbuð í gær"

Tíu mínútum fyrir sjö var ég tilbúin að leggja af stað í vinnuna í gærmorgun svo ég ákvað að labba út Eskihlíð, meðfram flugvellinum, Hljómskálagarðinn og Lækjargötuna að Kalkofnsvegi. Þetta tók mig þrjú korter og voru 3,8km og yfir 5000 skref. Við vorum allar mættar til vinnu og gátum því loksins opnað og gætt okkur á innihaldi ostakörfu sem okkur var gefin rétt fyrir síðustu helgi. Eftir kaffi fór ég á ítroðsluendann á vélinni. Milli tveggja daglegra verkefna kláruðum við smá hluta af annarri endurnýjuninni sem er í gangi. Eftir hádegi var ég í skrifstofurýminu tilbúin að leysa af á vélinni. Var einu sinni beðin um afleysingu rétt á meðan sú samstarfskona mín skrapp á prívatið. Á þeim tímapunkti var vélin með svolítið vesen þannig að ég tók eiginlega ekki á móti mörgum kortum en þurfti að handsetja nokkur í umslög og loka. Fékk far heim úr vinnunni en fór ekkert aftur út svo bíllinn er enn þar sem ég lagði honum í Blönduhlíð hinum megin við Lönguhlíð þegar ég kom heim úr vinnu og sundi á þriðjudaginn var. 

21.9.22

Á bílnum

Notaði bílinn til að flytja mig til vinnu í gærmorgun. Var í bókhaldinu. Vorum fjórar í vinnu. Bókhalds og talningastörfunum lauk fljótlega eftir hádegi en unnið var á vélinni til klukkan hálffjögur. Ég var bæði með bók og prjóna með mér og las alveg slatta. Eftir vinnu fór ég beinustu leið í sund. Mér fannst of margir í kalda pottinum þannig að aldrei þessu vant fór ég beint í heitasta pottinn og þar hitti ég kalda potts vinkonu mína. Hún var búin að fara eina ferð í kalda og saman fórum við fimm ferðir í hann. Kom aðeins við í Hagkaup í Skeifunni áður en ég fór heim eftir sundið. 

20.9.22

Bókasafnsferð

Vaknaði upp úr klukkan sex. Um sjö labbaði ég af stað í vinnuna. Vorum fjórar, ein í fríi. Ég var því á ítroðsluendanum fram að kaffi og á móttökuendanum eftir kaffi. Eftir hádegi höfðum við vélina aðeins til klukkan tvö því kerfisfræðingurinn og viðgerðarmaðurinn voru búnir að panta hana í afritunarmál. Ég fékk far heim úr vinnunni og var komin þangað milli hálfþrjú og þrjú. Klukkutíma seinna skrapp ég á bókasafnið í Kringlunni, skilaði þremur bókum og tók tvær aðrar í staðinn. Síðan lá leiðin í Nauthólsvík. Var komin út í sjó korter yfir fjögur korteri á undan tveimur af sjósundsvinkonum mínum. Ég svamlaði um í rétt rúman hálftíma í 9,9°C sjónum. Varð ekki vör við neina mengun. Kom heim aftur um hálfsex og setti strax nokkur handklæði í þvottavélina sem ég svo hengdi upp rúmum tveimur tímum seinna. 

19.9.22

Aðeins eitt skutl í gær

Ég var komin á fætur stuttu fyrir klukkan átta. Rúmum klukkutíma síðar skutlaði ég Davíð Steini upp á Gagnveg og fór svo beinustu leið í Laugardalslaugina. Var akkúrat að koma upp úr fyrstu ferðinni í kalda pottinn þegar vinkona mín mætti á svæðið. Fórum í heitasta pottinn og svo sex ferðir í kalda. Alltaf þann heitasta á milli en eftir síðustu ferðina í kalda fórum við í gufu. Sátum þar góða stund og ég aðeins lengur. Ég fór svo í kalda sturtu og aðeins í sjópottinn áður en ég fór áttundu ferðina í þann kalda. Sat smá stund úti á stól áður en ég dembdi mér í laugina og synti 300 metra þar af 1x50 skriðsund, allt hitt á bringunni. En já, ég náði alla leið yfir að þessu sinni. Var komin heim rétt rúmlega tólf. Afganginn af deginum notaði ég í lestur, prjón, fótbolta- og körfuboltaáhorf og einnig smá vafr á netinu. 

18.9.22

Tvö skutl í gær

Vaknaði um hálfsjö í gærmorgun. Þremur korterum seinna skutlaði ég Davíð Steini upp á Gagnveg. Það var þónokkur þoka í efri byggðum og við mæðgin grínuðumst með það hvort við myndum nú finna stöðina hans og ég svo rata til baka. Við fundum þetta nú auðveldlega og fékk ég kaffi í máli með loki út í bíl. Kom við hjá AO við Sprengisand og fyllti á tankinn. Þar er 95 oktana bensínið komið undir 300 kr. líterinn. Síðan lá leiðin í Sundhöllina. Það voru 4 ferðir í kalda pottinn, 200 metra bringusund, ein ferð í heitasta pottinn, ein í langpottinn á útisvæðinu og ein ferð í gufuna. Þessi rútína tók mig næstum einn og hálfan tíma.

Um hálfeitt skutlaði ég Oddi Smára upp á Víkinsgvöll. Hann var búinn að taka að sér gæslustörf á leik Víkinga og KR í einum leik síðasta umferðar bestu deildar karla í knattspyrnu. Skildi hann eftir ca tuttugu mínútum fyrir eitt og fór sjálf vestur í bæ í heimsókn til norsku esperanto vinkonu minnar. Við sátum út á svölum hjá henni í blíðviðrinu í á annan tíma. Var komin heim aftur upp úr klukkan þrjú.

17.9.22

Á skutlvaktinni

Var komin á fætur um hálfsjö í gærmorgun. Fór aftur á bíl í vinnuna. Vann á móttökuendanum fram að kaffi. Eftir kaffi var ég í pökkun. Ég tók styttingu vinnuvikunnar og fór heim á hádegi. Um þrjú var ég komin í sund í Laugardalslauginni. Synti 300 metra á bakinu og í seinni ferðinni í kalda pottinn hitti ég á kaldapotts vinkonu mína. Ég fór svo beint upp úr að þvo á mér hárið og var komin á stofuna til klippara míns rétt fyrir fjögur. Hann klippti sentemeter neðan af hárinu, þurrkaði og dedúaði við það. Keypti af honum sjampó og festi næsta tíma eftir hálft ár áður en ég fór heim aftur að horfa á undanúrslit EM karla í körfu.

16.9.22

Á bakaraíisbókaravaktinni í gær

það var vekjarinn sem ýtti við mér í gærmorgun. Hafði samt góðan tíma til að vafra aðeins um á netinu því ég fór svo á bílnum í vinnuna. Kom við í Bernhöfstbakaríi við Skúlagötu til að útvega brauð og fínerí með "föstudagskaffinu" síðar um morguninn. Framleiðsla var ekki mikil og bara þessi daglega.  Henni lauk upp úr hálftólf og það var búið að telja alla vagna og loka inni í lagerhvelfingu um tólf. Fjórar af okkur fimm vorum í vinnu til klukkan eitthvað gengin í tvö en sú fimmta fór fyrr heim í "styttinig" (stytting vinnuvikunnar, hálfur dagur einu sinni í mánuði). Ég var með sunddótið með mér í bílnum en þar sem ég var búin að mæla mér mót við kaldapotts vinkonu mína um fjögur skrapp ég heim fyrst í rúman einn og hálfan tíma. Var komin í Laugardalinn rétt fyrir fjögur og búin í minni fyrstu ferð í kalda þegar vinkona mín mætti. Saman fórum við sex sinnum í þann kalda og okkar annarri ferð bættist dóttir hennar í hópinn. Eftir sjöundu ferðina mína í kalda fórum við allar í gufu í rúmt korter. Mægðurnar fóru svo aðeins í saltpottinn en ég settist á bekk um stund eftir kalda sturtu. Settist svo aðeins í 42°C pottinn áður en ég fór upp úr. Kom við í KFC á leiðinni heim og einnig í vínbúðinni í Skeifunni. Á seinni staðnum keypti ég tvær 500 ml hvítvínsflöskur. Notaði þær þó ekki í gær því meiningin er að nota þær næstu skipti sem ég hef fisk í matinn.

15.9.22

Körfuboltaáhorf

Var komin á fætur upp úr sex og labbaði af stað í vinnuna um sjö, yfir Klambratúnið og þá leiðina. Ég var í skrifstofurýminu fram að kaffi og þar sem sú sem var í bókhaldinu var að fara á fund tók ég að mér að "kalla" eftir því að endurnýjunin í gluggaumslögunum yrði sótt til okkar í póst. Það gekk vel. Eftir kaffi fór ég á móttökuenda vélarinnar. Korter yfir ellefu var sú sem var með mér á ítroðsluendanum leyst af svo hún kæmist í skólann. Smá vesen var á vélinni á þessum tíma en daglegri framleiðslu lauk samt rúmlega tólf. Öll endurnýjun er búin í bili svo hægt var að slökkva á vélinni og ganga frá. Eftir hádegi héldum við smá fund um fundinn sem bókarinn og fyrirliðinn var á um morguninn. Fundurinn var um tilvonandi flutninga. Fékk far heim úr vinnunni um hálfþrjú. Bræðurnir voru í sorpu og verslunarferð en komu fljótlega heim. Þá var ég hins vegar dottin í að fylgjast með þriðja leik af fjórum í átta liða úrslitum EM í körfubolta og beið svo spennt eftir síðasta leiknum. Ég veit eiginlega ekki hvað er komið yfir mig varðandi þetta körfuboltagláp því sú var tíðin að mér fannst þetta sport leiðinlegt að horfa á. Hringdi bæði í pabba og Ellu vinkonu. Eftir seinni körfuboltaleikinn fór ég smá stund í tölvuna en horfði svo á einn þátt úr sarpi sjónvarps símans. Klukkan var orðin tíu þegar ég fór upp í en ég gaf mér samt tíma til að lesa í rúmlega hálftíma. 

14.9.22

Vikan hálfnuð

Rumskaði stuttu fyrir sex og fór fljótlega á fætur. Hafði því góðan tíma til að vafra aðeins um á netinu eftir morgunverkin á baðherberginu. Labbaði af stað í vinnuna um sjö, upp Eiríksgötu og niður Skólavörðustíg. Vorum fjórar mættar. Ein tók styttingu vinnuvikunnar fyrir hádegi og önnur tók styttingu eftir hádegi. Ég var á ítroðsluendanum fram að kaffi og á móttökuendanum til hádegis. Þær tvær sem voru á vélinni eftir hádegi ákváðu að klára að framleiða þessi 900 kort sem eftir voru í endurnýjuninni. Vélin var eitthvað með stæla og þegar ég fékk að fara heim rétt fyrir fjögur voru amk 100 kort eftir í framleiðslu. Ég var ekki í stuði til að labba heim og hringdi í einkabílstjórann sem sótti mig við Sólfarið. Klukkan var orðin hálffimm þegar við komum heim. Ég kveikti á sjónvarpinu og horfði á restina á fyrsta leikinn í átta liða úrslitum í EM í körfu karla. Um hálfsjö hófst svo seinni leikur dagsins. Hinir tveir leikirnir eru á sömu tímum í dag. 

13.9.22

Þriðjudagur

Vaknaði upp úr klukkan sex. Labbaði af stað í vinnuna rétt fyrir sjö. Við vorum allar fimm mættar. Ég var ein af þeim sem var frammi fram að kaffi en fór á móttökuendann eftir kaffi fram að hádegi. Ein tók styttingu vinnuvikunnar frá klukkan tólf. Ég fór því aftur á vélina eftir hádegi. Þá vorum við að vinna að endurnýjun. Það gekk vel til að byrja með en milli tvö og þrjú var bras að vinna við þetta. Ákváðum að hætta um þrjú og ganga frá vélinni og deildinni. Ég fékk far heim úr vinnu. Í stað þess að taka til sjósundsdótið og skreppa í Nauthólsvík skruppum við Oddur í Krónuna við Fiskislóða að versla. Hann sá um akstur og frágang. 

12.9.22

Mánudagur

Ég var vöknuð upp úr klukkan átta í gærmorgun og komin á fætur skömmu síðar. Pabbi kom fram á svipuðum tíma. Dagurinn fór í körfuboltaáhorf, prjónaskap, lestur, kapallagnir, netvafr og fleira. Veðrið yndislegt en tíminn leið helst til hratt. Hellti mér upp á kaffi um tíu en við pabbi slepptum svo síðdegiskaffinu og vorum með grill í matinn um fimm. Klukkutíma eftir það kvaddi ég og brunaði í bæinn. Fékk stæði fyrir framan hús.

11.9.22

Sunnudagur

Fór á fætur rétt fyrir klukkan níu í gærmorgun. Tók utan af sæng og kodda og setti hreint á í staðinn og að sjálfsögðu hreint lak líka. Var mætt í Sundhöllina um tíu. Eftir fyrri ferðina í kalda pottinn hefði ég getað valið um þrjár brautir af fjórum í útilauginni en ég ákvað að fara í innilaugina og fékk að synda óáreitt á braut eitt í tuttuguogfimm mínútur, flestar ferðirnar á bakinu en þó 3x25 m skriðsund. Kom aðeins við í heitasta pottinum áður en ég fór í seinni ferðina í kalda pottinn. Settist svo í smástund á bekk áður en ég fór inn að þvo á mér hárið. Var komin heim aftur um hálftólf. Gekk frá sunddótinu, fékk mér smá hressingu áður en ég kláraði að pakka niður fyrir helgina. Vakti Odd til þess að kveðja hann og lagði svo af stað austur rétt áður en hádegisfréttirnar byrjuðu í útvarpinu. Að þessu sinni ákvað ég að athuga hvort ég rataði örugglega ekki ennþá upp í Guttormshaga. Þangað var ég komin um hálftvö og hitti fleira fólk en heimilisfólkið. Sem betur fer var ég ekki fyrr á ferðinni því þá hefði ég hitt um fimmtíu ættingja Óla og fjölskyldu. En ég hitti á alla syni hans, tengdadætur og börn. Yngsti sonurinn býr reyndar á staðnum í eigin húsi og hann og mamma hans reka búið í félagi. Stoppaði í um tvær klukkustundi áður en ég hélt för áfram á Hellu. Pabbi var heima en Bríet hjá og með kæró. 

10.9.22

Húsfélagsbankamál

Aftur fór ég á bíl í vinnuna. Byrjaði á ítroðsluendanum og færði mig svo yfir á móttökuendann eftir morgunkaffi. Eftir hádegi var ég í talningum með þeirri sem var í bókhaldinu og svo vorum við að merkja nýjustu kortasendingarnar og raða þeim upp í hillur inn á lager. Hættum vinnu um hálfþrjú. Ég fór beinustu leið í bankann og það kom í ljós að það var það réttasta í stöðunni. Það sem er líklegast er að síðan það var skipt um kerfi hef ég einfaldlega ekki þurft að borga út af hússjóðsreikningnum og það er samt svo langt síðan að leyfið var útrunnið og þurfti endurnýjunnar við. RSA virkaði í skýinu í símanum mínum en í fyrirtækjabankanum var lykillinn ótengdur. Það tók enga stund að tengja þetta og sú sem hjálpaði mér benti mér á að það væri í lagi að pinnið væri það sama og leyninúmerið út af reikningnum. Síðan lá leiðin í Nauthólsvík í rigningu en samt fínu veðri og ekki var verra að það var að flæða að. Tuttugu mínútum yfir þrjú voru fjögur skref frá enda "brúarinnar" og út í sjó. Þegar ég fór upp úr tuttugu mínútum síðar voru engin skref því sjórinn náði að brúnni. Kannski er þetta ekki beint brú en þetta liggur frá brún yfir stórurðina og niður í sandinn neðst við grjótið. Kom heim upp úr klukkan hálffimm. Klukkutíma síðar eða svo endurgreiddi mér það sem ég lánaði húsfélaginu mínu um daginn, helminginn af slætti sumarsins. Það gekk í fyrsta og var lítið mál. Ég varð svo glöð yfir þessu að ég ákvað að bjóða einkabílstjóranum með mér á Pítuna. N1 sonurinn var skroppinn út úr bænum svo hann missti af þessu boði. Á pítunni fékk ég mér svo hvítvínsglas með matnum þar sem ég var með bílstjóra.

9.9.22

Vinnuvikulok í dag

Ég fór á bílnum í vinnuna í gær. Vorum allar fimm á svæðinu og fram að kaffi vann ég í skrifstofurýminu. Eftir kaffi fór á á ítroðsluendann á vélinni. Um hádegið þurfti ein af okkur að fara heim vegna magaverkja. Sú átti að vera á vélinni en ég leysti hana af í staðinn. Var í vinnu til fjögur en fór þá beinustu leið í Laugardalslaugina og hitti kaldapotts vinkonu mína í sinni annarri ferð í kalda pottinum. Fórum fjórar aðrar ferðir og svo endaði ég á góðu gufubaði áður en ég fór upp úr og heim. Ekkert stæði var í götunni minni en ég fann svo stæði á horninu á Blönduhlíð hinum megin við Lönguhlíð.

8.9.22

Viðeyjarferð með vinnufélögum

Labbaði sömu leið í vinnu í gærmorgun og í fyrradag. Ég var í bókhaldinu. Tvær voru að koma úr fríi og önnur tók sér frí fram að hádegi. Þannig að eftir hádegi vorum við allar fimm mættar í vinnu. Framleiðsla gekk ágætlega og það náðist að klára allt auka líka sem og að telja kortasendinguna. Um hálffjögur fékk ég far með einni upp í K2. Þaðan löbbuðum við yfir í Arion banka þar sem við hlýddum á þrjár kynningar og eitt uppistand frá Sögu Garðars. Um fimm fékk ég far með annarri úr kortadeildinni niður á Skarfabakka. Þrjár af okkur fimm tókum fyrri ferðina yfir í Viðey ásamt slatta af vinnufélögum úr K2. Hinar tvær úr okkar deild voru búnar að lofa sér annað. Þegar allir voru komnir út í eyju tók sagnfræðingurinn Stefán Pálson okkur í smá leiðsögn um staðinn. Byrjuðum fyrir framan kirkjuna en við löbbuðum einnig yfir þar sem gamla þorpið stóð. Stoppuðum 3 á leiðinni og svo einu sinni í bakaleiðinni áður en við fórum niður í Samkomusalinn þar sem við fengum að borða. Það sem veðrið var gott. Stefán sagðist aldrei hafa komið í eyjuna í svona góðu veðri. Fyrri ferðin til baka var klukkan níu og við vinnufélagarnir úr kortadeildinni tókum hana. Önnur þeirra skutlaði mér svo heim. Allt í allt labbaði ég rúmlega 15.000 skref í gær.

7.9.22

Svo grátlega nálægt

Í gærmorgun labbaði ég í vinnuna upp Eiríksgötu og niður Skólavörðustíg. Var á móttökuendanum á vélinni fram að kaffi. Leysti svo þann enda aftur af skömmu fyrir klukkan hálftólf. Eftir hádegi fór ég á ítroðslulendann. Hinar tvær sem ekki voru á vélinni komu fljótlega inn með tvo fulla vagna af innsigluðum pokum með kortasendingum í og opnuðu og töldu þar til klukkan var orðin rúmlega hálffjögur. Ákváðum að hætta vinnu þá. Ca 200 kort eftir af því sem verið var að vinna að á vélinni og eftir að opna einn eða tvo poka af sendingunni. Ég fékk far heim úr vinnunni og fór svo beinustu leið í Laugardalinn. Hitti kaldapotts vinkonu mína eftir fyrstu ferðina í þann kalda. Hún var mætt og búin að fara eina ferð í kalda en hafði svo verið í sólbaði á meðan hún beið eftir mér. Saman fórum við fimm ferðir í kalda og annað eins í heita. Ég endaði svo á því að sitja í gufunni í tæpt korter áður en ég fór upp úr og heim að horfa á landsleikinn. Sá var spennandi en sennilega voru úrslitin sanngjörn þrátt fyrir að sigurmark Hollendinga kæmi ekki fyrr en í uppbótartíma í blálokin. Sandra varði mjög vel í markinu og stelpurnar börðust eins og ljón um allan völl en áttu þó ekki nema 2 færi á meðan þær hollensku áttu yfir 20 færi. 

6.9.22

Vinnudagur í lengri kantinum

Vaknaði upp úr klukkan sex. Tæpum klukkutíma síðar labbaði ég í vinnuna þvert yfir Klambratúnið og þá leiðina. Vorum þrjár í vinnu, tvær í fríi. Það hafði greinilega tekist að taka tappann úr framleiðslunni því það voru yfir 2440 debetrkort til framleiðslu og þar af um 2200 bara fyrir einn banka. Kredit framleiðslan var hátt í 200 í öðru tilvikinu og rúmlega hundrað í hinu svo í gær voru framleidd í kringum 2800 kort. Framan af gekk ágætlega en eftir hádegi var mikið hjakk stundum þegar kortin stoppuðu á formunum rétt áður en þau áttu að koma út og þurfti að handsækja þau. Ég er viss um að ef ekki um neitt svoleiðis stopp hefði verið að ræða hefðum við klárað klukkutíma fyrr. Þar að auki var loksins komið að því að farga ónýtu plasti frá apríl til og með júlí. Tvær komu á staðinn og hinar tvær sem voru að vinna með mér þurftu líka að sjá um það. Ég fékk leyfi til að tjónka ein við vélina á meðan en það var haft opið á milli herbergja á meðan. Klukkan var að verða hálfsex þegar allt var loksins búið, förgunin stóð yfir í hálftíma, framleiðslu lauk rétt fyrir fimm. Þá átti eftir að ljúka við að pakka og telja síðasta vagninn. Ég fékk far heim úr vinnunni og skrópaði svo í sjóinn þriðja mánudaginn í röð. 

5.9.22

Veðurblíða dag eftir dag

Var vöknuð og komin á fætur upp úr klukkan sjö í gærmorgun. Um níu kom Davíð Steinn fram og skömmu síðar skutlaði ég honum upp á Gagnveg. Hann hafði á orði að honum sýndist vanta smá loft í hægra framdekkið. Það var ekki byrjað að kvarta í mælaborðinu en þegar ég athugaði þrýstinginn á dekkjunum sem eru stillt á 32" vantað ca 1" á hin þrjú en 4" á hægra framdekkið. Eftir að hafa jafnað þrýstinginn fór ég í Grafarvogslaug. Þar fór ég fjórum sinnum í kalda, synti 350m, fór einu sinni í gufu, einu sinni í heitasta pottinn og tvisvar settist ég á bekk. Var komin heim aftur um hálftólf. Dagurinn fór í prjónaskap, fótboltaáhorf og netvafr. Engir strengir voru eftir berjatínsluna en ég var löt að nýta mér góða veðrið ekki betur. 

4.9.22

Ævintýri laugardagsins

Vaknaði um sex leytið. Fór fljótlega á fætur og eftir morgunverkin á baðherberginu settist ég í stofusófann með fartölvuna í fanginu þar til N1 sonurinn var tilbúinn sem var ca klukkutíma síðast. Skutlaði honum upp á Gagnveg rétt fyrir hálfátta og þáði kaffi til að taka með mér í staðinn. Kom við í AO við Sprengisand og ákvað svo að fara í Laugardalslaugina. Þótt ekki væru mjög margir fannst mér samt lítið pláss á brautunum til að byrja með. Fór tvisvar í kalda og tvisvar í heitasta áður en ég settist um stund á einn bekkinn. Svo losnaði braut númer tvö og ég var búin að synda 100 metra á bakinu þegar ég fékk félagsskap. Synti 200 í viðbót áður en ég fór aftur í kalda, þaðan í gufu, svo kalda sturtu, smá stund fjórðu ferðina í kalda og settist svo á stól í nokkrar mínútur áður en ég fór inn í klefa og þvoði mér um hárið. Rétt hafði tíma til að fara heim með sunddótið, ganga frá því og skipta um skó. Fór í strigaskóna mína. Var komin á Sólvallagötuna um hálfellefu. Þar beið mín hafragrautur og kaffi. Klukkan var ekki orðin ellefu þegar við vinkonurnar fórum með nesti og tómar fötur út í bíl og lögðum af stað út úr bænum. Keyrðum í gegnum Mosfellsbæ og beygðum og keyrðum í átt að Þingvöllum alveg þar til kom að skiltinu sem vísaði inn í Hvalfjörð. Stoppuðum út í kanti rúmlega kílómeter frá afleggjaranum og fundum strax ber. Aðallega væn krækiber en eitt og eitt bláber líka. Vorum ekki með berjatínur en mér var sama um það. Tíndum líklega í þrjú korter áður en við fengum okkur af nestinu, smurðar flatkökur og ég fékk kaffi með því. Svo ákváðum við að halda ferð áfram. Fórum inn í Hvalfjörð, alla leið inn í Brynjudal. Þar var eitthvað af fólki í berjamó en nóg af krækiberjum fyrir alla sem vildu. Það endaði með því að ég fleygði mér flatri við eina lyngbreiðuna og þar fannst mér sem væri endalaust af berjum. Þarna vorum við líklega hátt í tvo tíma áður en við kölluðum þetta gott þrátt fyrir að fylla ekki föturnar alveg. Keyrðum áfram fyrir Hvalfjörðinn og alla leið á Akranes. Rúntuðum aðeins um bæinn en stoppuðum svo stutt frá fótboltavellinum, Guðlaugu og ströndinni og afganginn af nestinu. Drukkum vatn með. Síðan löbbuðum við aðeins um. Næst gerðum við stopp á N1 þar sem við fengum að fara á salerni. Ég keypti mér svo bolla af kaffi og Inger bauð upp á ís í brauðformi. Þessu gerðum við skil á bekk fyrir utan. Það sem veðrið lék við okkur. Komum í bæinn um hálfsex og Inger bauð mér upp á að borða með sér af grænmetissúpu sem hún átti. Klukkan var því langt gengin í sjö þegar ég kom heima aftur eftir þessi ævintýri dagsins. 

3.9.22

Á skutlvaktinni

Þrátt fyrir ágætis veður (reyndar svolítið hraðferð á logninu) og aðeins einn vinnugöngutúr í vinnuna fór ég enn og aftur á bílnum. Að þessu sinni var ég með sjósundsdótið meðferðis í skottinu. Ég var á ítroðsluendanum á vélinni og þar sem við vorum aðeins þrjár stóð ég vaktina þar, þar til framleiðslu var lokið. Viðgerðarmaðurinn komst ekki á svæðið í fyrradag en þær gátu klárað framleiðslu og í gær hagaði vélin sér einstaklega vel. Aðeins tvisvar þurfti að dextra örlítið við hana. Sú sem var á móttökuendanum tók til og taldi í framleiðslutegundirnar. Ég taldi aftur áður en ég setti af stað en láðist að skoða kortin. Yfirleitt kemur það ekki að sök en í gær varð það til þess að það eyðilögðust 107, ein tegund framleiddist fyrst á rangt plast. Sem betur fer uppgötvaðist málið við talningu og það var endurframleitt á rétt plast þannig að þetta fór ekki frá okkur vitlaust. Daglegri framleiðslu var lokið um tólf. Eftir hádegi hjálpaði annar kerfisfræðingurinn mér að taka tappann úr tveimur síðustu tegundunum sem eru búnar að vera í haldi frá því í fyrstu viku síðasta mánaðar. Það er komið plast. Á vélinni bíður líka endurnýjun plasta sem runnu úr gildi um síðustu mánaðamót. Og svo á eftir að keyra til okkar þau kort sem hefðu átt að koma til endurnýjunar um miðjan síðasta mánuð og renna úr gildi um næstu mánaðamót. Tappinn kom í veg fyrir að skrárnar kæmu í gegn sem er alveg eins og það á að vera því við viljum helst ekki geyma svona lengi á vélinni og þurfa að "klippa" frá þeim kortum sem mega endurnýjast. Hætti vinnu um hálfþrjú og fór beinustu leið í Nauthólsvík. Þar var að fjara út, sjórinn 10,4°C og dásamlegt að svamla um. Var út í í uþb hálftíma. Kom heim upp úr klukkan fjögur og beið spennt eftir landsleiknum sem var hin mesta skemmtun. Oddur sótti bróður sinn í vinnuna um hálfátta og þeir komu við hjá KFC á heimleiðinni.

2.9.22

Örstutt skýrsla yfir gærdaginn

Fór enn og aftur á bílnum í vinnuna því ég ætlaði að fá að hætta snemma og skreppa í bankann. Ég var í bókhaldinu og mánaðamótafrystingum. Debetdagsframleiðslan var í stærra lagi vegna þess að tekist hafði að taka tappann úr þremur tegundum af fimm fyrir einn bankann. Tappinn var búinn að vera í síðan fyrri partinn í ágúst og safnast höfðu upp um 700 kort. Vélin fór að vera með mikil leiðindi í framleiðslunni rétt fyrir hádegi. Þegar ég fékk að fara um hálfþrjú var verið að bíða eftir viðgerðarmanni og það átti eftir að framleiða fyrir einn bankann. Bankamálin gengu fljótt og vel fyrir stig. Kom því snemma heim og bræðurnir gátu skroppið saman í Sorpu og verslunarferð. 

1.9.22

Glænýr mánuður

Var vöknuð og komin á fætur korter-tuttugu mínútum yfir sex í gærmorgun. Eftir morgunverkin á baðherberginu settist ég niður í stofu með fartölvuna í fanginu og vafraði um á netinu þar til kominn var tími til að bruna í vinnuna. Mætti fyrst á svæðið og komst að því að ekki hefði tekist að taka tappa úr þremur tegundum. Ég var frammi í skrifstofurými að undirbúa pökkun og fleira fram að kaffi. Sá sem fjarstýrði mér í fyrradag hafði samband og hjálpaði mér við að laga tappamálið. Höfðum uppfært ranga skrá í fyrradag. Ég fór inn á vél eftir kaffi og fram að hádegi klárðuðum við allt daglegt og einnig endurnýjun. Eftir hádegi fórum við í að raða flokkuðum kennispjöldum fyrir einn aðila á bretti. Tæplega hundraðogsextíu kassar á fimm bretti og plasti vafið utan um þá til að halda þeim saman. Þegar við fórum yfir geymsluna til að kanna hvort við værum með alla kassa fundum við einn óflokkaðan kassa á gólfi inn í horni undir nokkrum af kössum sem eru frá því að við byrjuðum að flokka kennispjöldin eftir stimplum 2016. Þessi tiltekni kassi var frá 2007. Við drifum í að flokka úr þessum kassa svo við gætum komið þeim spjöldum sem tilheyrðu kössunum á brettunum með. Hætti vinnu upp úr klukkan hálffjögur. Byrjaði á því að fara í bókasafnið og skila þremur bókum. Fékk mér tvær í staðinn, hvorug þeirra alveg ný. Næst lá leiðin í fiskbúðina áður en ég skellti mér í Laugardalslaugina. Synti reyndar ekkert en fór 3 í kalda, 2 í heitasta og rúmar 10 mínútur í gufu áður en ég fór upp úr og heim.

31.8.22

Á bílnum

Svaf alveg þar til vekjaraklukkan hringdi í gærmorgun. Fór á bílnum í vinnuna. Einhvern veginn atvikaðist það þannig að ég var allan daginn á móttökuendanum á vélinni. Átti reyndar þátt í þeirri ákvörðun sjálf. Sú sem átti að fara inn á vél eftir kaffi bað mig um að leysa sig af vegna annarra verkefna sem hún var í og þrátt fyrir að hún ætti að fara á ítroðsluendann bauð ég þeirri sem var með mér á vélinni fram að kaffi að halda sömu stöðum. Svo fór ég aftur inn eftir hádegi með þeirri sem var skráð á ítroðsluendann eftir kaffi. Hún fór sjálfkrafa á þann enda. Við vorum að vinna að endurnýjun. Allt gekk vel framan af en  eftir klukkutíma keyrslu fór umslagaparturinn á vélinni að haga sér verulega illa. Áttum von á viðgerðarmanni til að laga annað mál. Hann kom um hálfþrjú og sinnti þessu verkefni líka. Um hálffjögur fór ég í að taka tappann úr þremur tegundum með aðstoð beggja kerfisfræðinganna. Annar þeirra var á staðnum en hinn fjarstýrði mér og okkur í gegnum fjarfundabúnað. Erum komin með smá plast af þeirri tegund sem vantar og þegar sá sem fjarstýrði okkur var búin að kanna stöðuna á því sem hefur safnast upp síðustu vikur sáum við að hægt yrði að taka tappann úr þessum þremur, náms og klassakortum. Og vonandi fáum við svo heildarbirgðirnar á næstu dögum. Fór úr vinnu um hálffimm og þrátt fyrir að vera með sunddótið með mér í skottinu fór ég beinustu leið heim.

30.8.22

Mánuðurinn að klárast

Labbaði í vinnuna þvert yfir Klambratún, Gunnarsbraut, Snorrabraut, Laugaveg og nokkrar litlar götur í kringum Þjóðleikhúsið. Var mætt fyrst af fjórum. Skráð í bókhaldið svo ég byrjaði á því að prenta út fyrstu framleiðsluskrár dagsins. Daglegri framleiðslu lauk rétt upp úr tólf. Smá vesen á vélinni svo kalla þurfti út viðgerðarmann. Það átti þó að reyna að byrja á endurnýjun eftir hádegi en það gekk ekki upp svo hornið í sófanum í skrifstofurýminu breyttist í hálfgerðan prjónaklúbb. Að vísu vorum við bara tvær að prjóna af fjórum. Fékk að hætta vinnu um þrjú leytið. Úti var smá úði og dumbungur svo ég ákvað að hringja í einkabílstjórann og biðja hann um að sækja mig við Sólfarið. Rölti svo þangað og þurfti aðeins að bíða þar í nokkrar mínútur. Heima fengum við það gott stæði að ég nota það sem afsökun til að fara ekkert aftur út. 

29.8.22

Ný vinnuvika að hefjast

Vaknaði um níu í gærmorgun og var komin á fætur hálftíma síðar. Eftir morgunverkin á baðherberginu settist ég inn í stofu í smá stund, bæði með bók og prjóna. Nokkru síðar fór ég inn í eldhús. Fékk mér lýsissopa og harðsoðið egg og hellti upp á smá kaffi. Dagurinn leið hratt við prjón, lestur og kapallagnir. Pabbi bauð okkur Bríet upp á grillaðar lambasneiðar um fimm leytið, með soðnum kartöflum, hrásallati, spínati og lambhagasallati. Þetta var mjög gott. Eiginlega strax eftir mat pakkaði ég saman og kvaddi. Var komin heim upp úr klukkan sjö.