31.12.13

Síðasti dagurinn á þessu ári

Ég verð að játa það að ég er eiginlega fegin að þetta ár er að kveðja en jafnframt er ég afar hissa á hversu hratt það leið þrátt fyrir allt og allt.  Ég stökk upp í strætó rétt upp úr hálfátta í gærmorgun og byrjaði á því að senda mér sms.  Vinnudagurinn leið hratt en það teygðist örlítið á honum.  Hringdi í annan tvíburann upp úr þrjú til að kanna hvort þeir bræður yrðu í mat.  Þá voru þeir eiginlega rétt ófarnir til pabba síns svo ég hitti þá ekkert.  Ég kom heim rétt fyrir fimm og byrjaði á því að kveikja á tölvunni.  Slapp við alla eldamennsku því ég átti afgang af túnfiskpastarétti frá því á sunnudaginn.  Horfði á fréttir og Dicte en fór svo í rúmið í fyrra fallinu.  Las um stund en var búin að slökkva á náttlampanum um ellefu.

30.12.13

Fyrsta limran mín

Ég vildi´ ég gæti limru samið
og andann yfir orðum tamið.
Það væri ei leitt,
ég kæmist í feitt.
Ég gæti mig alls ekki hamið.

Þessi  varð til þegar ég beið eftir strætó í morgun.  Um leið og ég var sest upp í vagninn pikkaði ég hana upp og sendi mér sms-skilaboð til að gleyma henni ekki.  Annars ætlaði ég nú bara að skrifa nokkur orð um gærdaginn.  Svaf ekki eins lengi frameftir og á laugardaginn en byrjaði daginn þó eins, á því að lesa.  Strákarnir lögðu stofuna og playtation tölvuna undir sig fram eftir degi.  Ég dundaði við ýmislegt annað, mest var ég þó í tölvuleikjum sjálf.  Var með matinn upp úr fimm og yfirtók svo sjónvarpið um sjö.  Sat fyrir framan skjáinn alveg til klukkan að ganga tólf. Ekki hafði ég rænu á að taka upp saumana mína þótt það hefði vel verið hægt amk yfir fréttum og "Orðbragði".

29.12.13

Síðasti sunnudagur ársins

Það sem ég gat sofið í gær og þegar ég vaknaði loksins byrjaði ég á því að taka mér bók í hönd, lá áfram upp í rúmi og las og las.  Ég held að klukkan hafi verið orðin tólf áður en ég skreið framúr, klæddi mig og bjó um.  Fljótlega var svo kveikt á tölvunni.  Um tvöleytið skutlaði ég Oddi í Hallarmúla tvö og beið eftir honum á meðan hann fór að sinna erindum í Tölvutek ehf.  Það var greinilega nóg að gera því það liðu þrjú korter áður en strákurinn kom aftur.  Dagurinn leið afar hratt.  Kannski ekkert skrýtið þegar hann byrjar svona seint hjá manni.  Tvíburarnir voru búnir að bjóða nokkrum vinum sínum með sér í bíó um kvöldið og lögðu frekar snemma í hann með þeim.  Ætlunin var að sjá þríviddarútgáfu af Hobbitanum í Egilshöllinni um tíu en þar var uppselt.  Þeir enduðu í Laugarásbíó á sýningu sem ekki var í þrívídd.  Ég horfði á fréttir og útsendingu frá kjöri íþróttamanni ársins 2013 og var mjög ósátt við úrslitin því mér fannst sú sem lenti í öðru sæti hafa skarað algerlega framúr og verið með bestan árangurinn.  Var hún of ung til að hljóta tiltilinn?  Var hún ekki af réttu kyni?  Var hún ekki í réttu íþróttagreininni?  Var það svo ekki Alfreð sem setti markamet í efstu deild? Og hvað með heimsmeistarann í spjótkasti?  Allir sem talað var við fyrir útnefninguna minntust á Anítu og hennar árangur.  Nei ég er ósátt við þessi úrslit og ekki svo viss um að ég muni fylgjast aftur með þessari seremoníu.  Ég er handviss um að ef það færi fram þjóðaratkvæðagreiðsla þá myndi þessi bráefnilega hlaupakona vinna, og hana nú.

28.12.13

Komin heim í bili

Bræðurnir voru búnir að biðja mig um að fara degi fyrr en ég hafði áætlað.  Þeir eru á leiðinni í bíó með nokkrum vinum sínum í kvöld og vildu hafa rýmri tíma til að skipuleggja það út í æsar.  Annar tvíburinn var líklega samt búin að sætta sig við að við færum heim í dag, laugardag.  Það var samt sá strákurinn sem vaknaði á undan.  Ég vakti hinn um eitt í gær og sagðist vildu fara fljótlega í bæinn þ.e. ef við ættum að fara fyrr á annað borð.  Endirinn varð sá að við kvöddum foreldra mína um hálfþrjú og vorum komin í bæinn um fjögur.  Strákarnir voru ekki fyrr komnir heim er þeir stormuðu út í Kringlu og svo þaðan til eins vinar síns.  Ég sá þá ekki aftur fyrr en seint í gærkvöldi.  Ég skrapp í Sunnubúð og keypti mjólk og brauð.  Ekki tók ég upp saumana mína og ég kveikti heldur ekki á tölvunni en dagurinn leið engu að síður við annars konar dundur, mestmegnis fyrir framan sjónvarpsskjáinn.

27.12.13

Frídagur

Borðuðum öll saman fyrir klukkan eitt í gær.  Sumir voru búnir að borða fyrr um morguninn en aðrir voru nývaknaðir.  Eftir fráganginn kenndi pabbi okkur bingó með spilum en eftir nokkrar umferðir fóru systir mín og fjölskylda í eina jólaheimsókn.  Við mæðgin héldum eitthvað áfram og pabbi bingóstjóri sem fyrr.  Dagurinn leið annars afar hratt.  Ég er með saumana mína með mér en hef ekkert snert á þeim, aðeins lesið, vafrað um á neti, spilað netleiki, drukkið kaffi og spjallað.

26.12.13

Annar í jólum

Birtan undurfalleg er
ég dáleidd horfi á.
Tímanum ég viljug ver
við lestur svei mér þá.
 
Eins gott að pabbi var búinn að taka það fram að ég mætti kveikja á tölvunni þegar ég vildi.  Andinn kom nefnilega yfir mig og ég er með slökkt á gemsanum svo ekki get ég sent mér sms með andagiftinni.  Gærdagurinn leið afar hratt.  Vorum með brunch um hálftvö.  Mamma setti upp hangiket um þrjú þar sem hún ætlaði bæði að vera með heitt og kalt.  Ég sá um kartöflurnar og uppstúfinn og Helga um að leggja á borð með krökkunum.  Gestirnir komu um hálffimm og það var borðað um sex.  Eftir matinn voru sýndir nokkrir skautadansar með frænkum mínum og fleirum þar sem þær tóku þátt í hópsýningum.  Svo var boðið upp á möndluís og var það Hulda sem fékk möndluna.  Á einum tímapunkti voru sú elsta og yngsta að ræða mikið saman og það var yndislegt að fylgjast með þeim samskiptum.

25.12.13

Gleðilega hátíð!

Auðvitað stóðst ég ekki mátið að setja inn nokkrar línur í dag en fyrst og fremst ætla ég að deila eldhúsmyndinni sem ég saumaði handa mömmu í vor.  Gærdagurinn var annars afar notalegur og skemmtilegur í alla staði.  Það var svolítið erfitt fyrir þá allra yngstu að bíða eftir að hægt væri að opna pakkana, svo erfitt að hún hafði ekki mikla matarlyst.  En mágur minn var búinn að standa vaktina í eldhúsinu í marga klukkutíma (rjúpur, tveir hryggir og tvenns konar sósur og fl.) og við systur útbjugum epla og perusallatið svo við eldri kynslóðin vildum njóta þess að borða.  Systurnar fengu að opna einn pakka hvor frá öðrum tvíburanum en svo fékkst sú stutta til að fara inn í herbergi og horfa á eitthvað með pabba sínum á meðan við feðgin gengum frá eftir matinn.  Pakkarnir voru á annað hundrað og fékk sú stutta mest eða 25 pakka.  Það tók næstum þrjá tíma að lesa á, útdeila og opna pakkana enda opnaði oftast bara einn í einu, stundum tveir eða tvær ef viðkomandi voru að fá mjög svipað.  Á eftir var hellt upp á kaffi og jólakortin lesin.

24.12.13

Gleðileg jól

Var ekki viss hversu mikið verk yrði að sópa og skafa af lánsbílnum í gærmorgun svo ég fór út úr húsi áður en klukkan sló hálfátta.  Ég var nú ekki lengi að hreinsa bílinn og því komin langfyrst í vinnuna eða tuttugu mínútum fyrir átta.  Hlóð inn fyrstu framleiðslu dagsins en svo kom sú sem var með það hlutverk að troða í.  Ég var í móttökunni fram að kaffi.  Í hádeginu fór ég upp í mötuneyti seðlabankans og fékk mér skötubita.  Tók svo við að troða í vélina til klukkan hálftvö en þá var ég búin að fá frí.  Kom við og fyllti á bílinn á AO-stöðinni við Flugvallarveg.  Strákarnir voru tilbúnir svo við hlóðum bílinn og lögðum af stað.  Komum við á einum stað í Grafarvogi að taka pakka sem við skiluðum af okkur í Fossheiðinni á Selfossi.  Svo stoppuðum við um klst. á öðrum stað í Fossheiðinni og afhentum kort og smápakka.  Vorum komin á Hellu um fimm.  Tveimur tímum seinna fórum við öll mæðginin með pabba og Ingva mági og fengum okkur skötu í Kanslaranum.
 
Ég sendi mínar allra bestu jólakveðjur til minna tryggu lesenda.  Á þessari stundu er ekki vitað hvort um einhverra daga blogghlé verður að ræða eða hvort ég setji inn pistil strax á morgun.  Farið vel með ykkur.  Knús!

23.12.13

Þorláksmessa

Og svo bara nokkrir punktar um gærdaginn.  Var aftur snemma á fótum.  Náði að afkasta heilmiklu og líka að slaka vel á.  Skrapp aðeins í Hagkaup í Skeifunni því mig vantaði nokkra hluti og svo var pabbi búinn að biðja mig um að kaupa stærri gerðina af danskri lifrarkæfu.  Dagurinn leið afar hratt en ég náði samt í rúmið fyrir miðnætti.  Aftur á móti las ég aðeins lengur en til tólf.

22.12.13

Nú fer daginn að lengja aftur

Ég var tiltölulega snemma á fótum í gærmorgun, komin framúr fyrir níu en vöknuð löngu fyrr.  Lauk við að ganga frá og skrifa í síðustu tvö saumuðu jólakortin og skrifaði kveðju á esperanto inn í það þriðja og allra síðasta.  Allt í allt skrifaði ég 39 jólakort.  Pakkaði einnig inn þremur smápökkum sem fylgja eiga jólakortunum.  Um hálfellefu renndi ég við með eitt jólakort til Nonna og starfsfólks hans í Kristu Quest.  Þaðan fór ég svo beint til esperanto vinkonu minnar.  Hún hafði hringt í mig kvöldið áður og beðið um að ég kæmi ekki með bækurnar, gætum frekar notað þær sem eru hjá henni.  Þegar til kom kíktum við ekkert í bækur.  Uppeldisfaðir mannsins hennar var í heimsókn.  Fengum okkur graut og kaffi og spjölluðum.  Ég stoppaði í tæpan klukkutíma.  Þá fór ég aftur heim, óþarfi að versla inn þar sem strákarnir voru að fara til pabba síns og við mæðginin förum austur eftir hádegi á mánudaginn.  Bræðurnir voru ekki farnir heldur léku sér í tölvunni inn í stofu.  Ég fór aftur um hálftvö til að skila af mér þremur kortum og tveimur smágjöfum.  Fór fyrst til nöfnu minnar og frænku í Garðabænum.  Hún var að undirbúa sörubakstur.  Stoppaði samt stund hjá henni og fékk kaffi og smakk af nokkrum smákökusortum.  Ég stoppaði líka smá stund á næsta viðkomustað en á þeim þriðja og síðasta var enginn heima svo kortið fór bara í lúguna og ég heim.  Þá var klukkan að byrja að ganga fimm og strákarnir ekki farnir.  Þeir voru samt að gera sig klára og voru sóttir rétt strax.  Ég fór fljótlega í það að pakka inn öllum jólagjöfum, utan eina en ég fann bara helminginn af henni, var víst ekki búin að kaupa hinn helminginn.  Seinna um kvöldið horfði ég á Barnaby á DR1 og var svo skynsöm að koma mér í rúmið fyrir ellefu.  Las að vísu smá en ég var örugglega sofnuð fyrir miðnætti.

21.12.13

Tek því nokkuð rólega

Var á bílnum í vinnunni í gær eins og flesta föstudaga.  Skrapp í K2 rétt upp úr hádegi í smá viðtal.  Stæðin á neðra planinu voru auðvitað öll full er ég kom til bara svo ég lagði í gjaldstæði.  Fyrir 200 kr. mátti bíllinn vera þar alveg til klukkan langt gengin í sex.  Ég fór þó strax upp úr fjögur enda vinnudagurinn búinn þá.  Hirti Odd Smára upp heima fyrir hálffimm og hann kom út með bókasafnspokann.  Hafði aðeins tvær bækur til að skila en skilafresturinn á annarri var að renna út og í stað þess að endurnýja útlánið um mánuð kom ég við í Kringlusafninu fyrst það var tími til þess.  Skilaði Oddi af mér í Mjóddinni og notaði tímann á meðan hann var að spila með skólalúðrahljómsveit Árbæjar og Breiðholts til að renna upp í efri byggðir með kort til einnar vinkonum minnar sem líka er í saumaklúbbnum.  Stoppaði hjá henni í rúman hálftíma.  Sótti Odd aftur um sex og kom einn vinur strákanna með okkur þar sem þeir ætluðu þrír að panta sér pizzur saman og hafa gaman hér heima um kvöldið.  Strákarnir lögðu stofuna undir sig svo ég vafraði bara um á netinu og spilaði ýmsa netleiki.

20.12.13

Alltaf eitthvað

Strætóbílstjórinn í gærmorgun var mjög röskur.  Hann var aðeins á undan áætlun svo ég þurfti ekki að bíða mjög lengi á stoppistöðinni fyrir utnan Sunnubúð.  Bílstjórinn beið í mínútu við Kjarvalsstaði og aðra á Hlemmi en samt var ég að stimpla mig amk þremur mínúturm fyrr inn en oftast þegar ég tek strætó til vinnu.  Vinnudagurinn leið hratt og örugglega.  Vikan leið eiginlega svo hratt að mér fannst endilega að það væri kominn föstudagur á tímabili í gær. Ein sem vinnur með mér hafði komið með þá hugmynd að hafa einhvers konar morgun "brunch" og við hinar komum flestar með eitthvað í púkkið.  Amerískar pönnukökur steiktar á staðnum, beikon, sveppi, egg, sýróp og nýkreystur appelsínusafi.  Vélin ákvað að ganga í lið með okkur og var eitthvað ósamvinnuþýð þegar byrja átti debetframleiðslu dagsins um hálftíu.  Á meðan hópstýran okkar reyndi að tjónka við vélina gátum við hinar fimm borðað morgunmatinn saman.

Stökk upp í næsta strætó og bað um skiptimiða þegar vinnu lauk.  Fór úr á Hlemmi og skrapp yfir í Hárhornið með nokkrar vikur, eitt jólakort og síðast en ekki síst afmælisknús á tengdapabba systur minnar, Torfa.  Þurfti svo bara að bíða í um hálfa mínútu eftir 13 til að komast heim.

Þegar heim kom lagði ég frá mér bakpokann og setti seðlaveskið mitt í handtöskuna mína.  Tilkynnti strákunum að ég ætlaði að heimsækja Blóðbankann.  Ég fékk semsagt annað sms-ið á viku og hugsaði sem svo að þá hlyti ég að mega gefa.  Ætlunin var reyndar að mæta fljótlega á nýju ári en úr því verið var að "kalla" á mig ákvað ég að svara því kalli.  Blóðbankinn er sextugur í ár og í kaffistofunni var þessi líka fína afmælisterta.  Ég fékk mér reyndar bara djús, kleinu og rúsínur, var mjög södd þrátt fyrir að hafa ekki borðað síðan um eitt.  Hjúkrunarfræðingurinn sem tók hjá mér blóðið sagði að ég mætti enn bara gefa á fimm mánaða fresti en ég er viss um að það breytist eftir 2-3 gjafir enn.  Á leiðinni heim eftir blóðgjöfina kom ég í við hjá Atlantsolíu við Flugvallarveg því það var 12 kr. afláttur.  Á einni viku var ég samt ekki búin að nota nema rúmlega 8 lítra síðan ég fyllti síðast á lánsbílinn.

19.12.13

Það styttist til jóla

Ég er alveg róleg þótt tíminn sé eitthvað að "hlaupa" hraðar.  Ég er nefnilega næstum búin að skrifa á öll jólakort og senda í póst þau sem ég kem ekki sjálf út.  Kíkti á Hlíbbu mína í gærkvöldi með jólakortið til hennar og dóttur hennar og mannsins hennar.  Gaf mér góðan tíma með gömlu konunni og stoppaði alveg í tvo tíma.  Höfðum um margt að spjalla og horfðum svo saman á Kiljuna.  Áður en ég fór heim kom ég við í Hagkaup í Skeifunni að kaupa meiri jólapappír og öráa hluti sem mig vantaði.  Held ég hafi meira að segja verið að kaupa síðustu jólagjafirnar.  En í Hakaup hitti ég konu sem ég kynntist í gegnum DKR starfið.  Hef ekki hitt hana í meira en ár en hún var búin að frétta um breytingarnar í mínu lífi og hún gaf mér svo gott knús en sagði jafnframt að ég liti bara vel út.  Hún eins og svo margir aðrir höfðu á orði hversu vel ég tæki á hlutunum.  Það var gott að fá þetta knús og hrós, það hjálpar alveg helling.

18.12.13

Hundraðsextugastaogníunda færslan á árinu

Orðin nota til að tjá mig
táknað margt þau geta.
Að æfing geti borgað sig
aðrir verða´ að meta.


ÉG gleymdi alveg að segja frá því í gær að ég skrifaði utan á öll umslög fyrir þau kort sem ég ætlaði og átti eftir að skrifa í fyrrakvöld.  Það er svo mikið frá þegar búið er að merkja umslög með nöfnum, heimilisföngum og póstnúmeri.  En eftir nokkuð annasaman vinnudag í gær lá leiðin á pósthúsið í Síðumúla því ég var á bíl eins og flesta þriðjudaga.  Keypti þrjú frímerki til evrópu og svo slatta af frímerkjum á jólapóst innanlands, eiginlega aðeins of mörg því ég set ekki öll kort í póst og er þar að auki búin að grisja listann.  Þegar ég kom heim beið Helga systir fyrir utan.  Ég vissi að hún væri á leiðinni en strákarnir voru ekki heima og hún kom rétt á undan mér.  Hún gaf sér tíma til að drekka með mér smá kaffi.  Þegar hún fór setti ég upp bygggrjón, hrærði í hina uppáhaldssmákökuuppskriftina en byrjaði á því að setja kjúklingabringur í ofninn.  Einn vinur strákanna kom í heimsókn þegar smákökuplata tvö af þremur var í ofninum og hann hafði á orði að það væri góð lykt í eldhúsinu.  "Já, það var kjúklingur í matinn", sagði annar tvíburinn.  "Nei, það er svona bökunarlykt sem ég finn", sagði þá vinurinn.

Um áttaleytið skrapp ég í Kringluna og kláraði smá innkaup, eða fór mjög langt með þau.  Kom heim upp úr hálftíu og hugsaði mér að ég ætti að geta skrifað slatta af kortum á rúmum klukkutíma.  Sá klukkutími fór þó út um gluggann því ég byrjaði ekki að skrifa fyrr en um ellefu.  Náði að skrifa hátt í tíu kort á þremur korterum.  Setti líka frímerki á öll umslögin sem fara í póst.  Enn og aftur var klukkan orðin meira en tólf þegar ég skreið upp úr rúm og auðvitað las ég í smástund áður en ég bað bænirnar mínar og fór að sofa.

17.12.13

Reyni að komast í smá jólakortaskrifgír

Nóg var að gera í vinnunni næstum alveg til fjögur í gær.  Notaði strætó báðar leiðir, upp úr hálfátta um morguninn og rétt rúmlega fjögur heim seinni partinn.  Byrjaði á því að hella upp á könnuna því ég átti von á móðursystur minni.  Hún kom reyndar ekki fyrr en stuttu fyrir sjö um það leyti sem spilafélagar tvíburanna voru að mæta á ca vikulegt spilakvöld hingað.  Þeir lögðu undir sig holið en við Gunný sátum yfir kaffibollum og spjalli í stofunni auk þess sem við fylgdumst með fréttum, Kastljósi og Nigellu.  Þegar frænka mín fór horfði ég á Dicte, settist aðeins við tölvuna og las svo í smá stund eftir að ég skreið í koju þótt klukkan væri um miðnætti.

16.12.13

Hádegispásan notuð vel

Ég held að klukkan hafi verið byrjuð að ganga ellefu þegar ég drattaðist loksins framúr í gærmorgun. Reyndar var ég þá búin að fara í sturtu og smyrja á mig gel.  En svo gaf ég í.  Lauk við þriðja og síðasta jólabréfið, á bara eftir að skrifa kortin með þeim og utan á umslög, skrifaði fimm jólakort og bakaði eina smákökusort, lakkrístoppa.  Upp úr hálffjögur vorum við mæðginin mætt til móðursystur minnar sem býr í vesturbænum þegar hún er á Íslandi.  Við vorum fyrst á staðinn og ég bauð fram aðstoð og fékk að smyrja nokkrar flatkökur.  Tveir bræður mömmu, börn þeirra, önnur mágkonan og tveir bróðursynir mömmu, annar með mömmu sinni (jafngamall tvíburunum) og hinn með alla þrjá syni sína mættu líka.  Þarna afhenti ég öll fimm jólakortin sem ég var búin að skrifa.  Glatt var á hjalla og tíminn var ekkert að láta bíða eftir sér.  Við strákarnir komum heim rétt fyrir sjö.  Oddur Smári og ég gerðumst tímaflakkarar á DR1-stöðinni og horfðum á "Inspector Morse".  Svo horfði ég á Downtown Abbey áður en Oddur kom aftur og horfði með mér á Law and order, special victims unit.  Að þessu loknu settist ég of lengi við tölvuna en þótt klukkan væri um hálfeitt þegar ég skreið upp í rúm þá las ég örugglega í einar fimmtán mínútur í bók sem heitir "Skipafréttir".  Áhugaverð skáldsaga af safninu.

15.12.13

Gaman, gaman!

Var komin á fætur upp úr níu í gærmorgun.  Lauk við fyrsta jólabréfið og byrjaði á öðru.  Skrapp til esperanto vinkonu minnar um ellefu og stoppaði þar í á annan tíma.  Vorum duglegar að lesa.  Fórum yfir þá kafla sem við lásum síðast og lásum tvo í biðbót.  Seinni kafli dagsins var reyndar tveggja erinda ljóð um hvíta máva sem fljúga hátt yfir sjónum.  Áður en ég fór aftur heim kom ég við í Krónunni úti á Granda og verslaði inn.  Var með bakstur í huga en engan sérstakan lista.  Davíð Steinn hellti upp á kaffi fljótlega eftir að ég kom heim og færði mér í bolla merktum: "Til bestu mömmu í heimi!"  Kaffið var sterkt og gott og hugulsemin iljaði mér.

Um átta var ég mætt í hús eitt í Fossvoginum þar sem ég hitti marga af kórfélögum mínum.  Smakkaði aðeins á jólaglögginni en þar sem ég var á bíl drakk ég bara uþb hálfan bolla og hélt mig svo við vatnið það sem eftir lifði kvölds.  Ekki var lagið tekið þótt við værum þarna í öllum röddum en það klikkaði ekki að Kristinn var með pistilinn sinn góða sem alltaf byrjar á nokkrum fimmaurabröndurum áður en hann fer yfir það helsta sem búið er að gerast á árinu með kórnum á æfingum og í messum.  Tíminn flaug og um miðnætti kvaddi ég og mér sýndist þá koma hreyfing á flesta aðra gesti.  Einkar notaleg og skemmtileg kvöldstund með frábæru fólki.

14.12.13

Jólasnjórinn kominn?

Á tímabili í gær leit út fyrir að ég yrði að sinna deildinni minni ein milli tvö og fjögur í gær.  En sem betur fer þá ákvað hópstjórinn minn að koma aftur eftir nokkur erindi.  Hún hafði verið að spá í að koma ekkert aftur en þar sem það er nóg af verkefnum þessa dagana, og vélin gengur allan daginn þá verða eiginlega að vera tvær að vinna.  Tvær af hinum hætta klukkan tvö á föstudögum og önnur hinna var lasin og hin varð að sinna félagsstörfum í K2.  En strax eftir vinnu fór ég með lánsbílinn og lét smyrja hann á olíssmurstöðinni við Klöpp.  Bað þá um að yfirfara allt, einnig nota tækifærið og setja á hann rúðupiss og athuga með viftureimina.  Svo skrapp ég inn í verslunina og fékk mér kaffi.  Ég hafði rétt náð að drekka svona fimm sopa þegar mér var tjáð að bíllinn væri tilbúinn.  Var látin vita að viftureimin væri að komast á tíma eins og mig og pabba hafði grunað.  Næst lá leiðin að Atlantsolíustöðinni við Flugvallarveg.  Hafði fengið sms-tilkynningu um að það væri 13 kr. afsláttur af lítranum.  Það komust ekki nema 15 lítrar á bílinn.  Þá var tankurinn fullur en allt telur þetta.  Síðan fór ég heim.  Byrjaði að skrifa fyrsta jólabréfið, það bréfið sem er á ensku.  Ákvað að handskrifa það.  Komst á nokkuð flug en kláraði þó ekki.  Þrátt fyrir að hafa séð "Legally blond" og "Die hard" áður þá festist ég yfir þessum tveimur myndum í gærkvöldi.

13.12.13

Kaffihlé

Lista´ upp það sem gera þarf
þetta verður æði.
Á kortin skrifa, mikið starf
sinna mun í næði.

Enn gríp ég tækifærið, ein í kaffipásu í vinnunni.  Þegar ég var á leiðinni heim úr vinnu í gær hringdi ein vinkona mín (föðursystir) í migm sem ég var búin að lofa að passa fyrir og sagði að það væri leiðinleg færð í efri byggðunum.  Hún sagðist því ætla að láta sækja mig og skutla mér svo aftur heim eftir passið.  Ég þáði það auðvitað með þökkum.  Hafði tæpa tvo tíma heima sem ég notaði mest megnis í tölvuleiki.  Davíð Steinn hafði skroppið á KFC með vinum sínum en ég sauð kartöflur og steikti slátur handa okkur Oddi um hálfsex. Ég var sótt rúmum hálftíma seinna og fékk trommarinn far með að Hilton Hóteli þar sem hann átti að spila með skólalúðrasveit Árbæjar og Breiðholts.

Börnin tóku fagnandi á móti mér.  Nú eru þau bæði steinhætt að vera feimin við mig.  Strákurinn sem verður fimm ára á gamlársdag er mikill pælari og þarf orðið mikið að segja mér sem er bara yndislegt.  Svo þarf ég ekki annað en að segja þeim að nú sé tími til að tanna og fara í rúmið og þau hlýða því á stundinni. Strákurinn bað mig um að lesa stafakarlana áður en hann fór að sofa en ég þurfti bara að breiða yfir systur hans.  Var með bók með mér en fór líka á netið.  Tíminn leið afar hratt.  Mér var skutlað heim aftur rétt fyrir hálfellefu.

12.12.13

Fljúga dagar

Ég var að alveg til klukkan fjögur í vinnunni í gær, með kaffi og matarpásum þó.  Stökk svo beint upp í strætó númer 13 sem stoppar hér á horninu milli Máva- og Drápuhlíðar.  Strákarnir voru að fara að fagna próf og annarlokum með pabba sínum svo ég slapp við alla eldamennsku.  Fór út að sópa af bílnum upp úr sjö og var mætt á kóræfingu upp í kirkju áður en klukkan varð hálfátta.  Við æfðum "Bjarnatónið", Messu á aðvangadagskvöld og messu á jóladag.  Einnig sungum við tvo sálma í röddum, "Í dag er glatt" og "Heims um ból".  Á æfinguna mætti ein sem tók sér pásu eftir sextán ára veru í kórnum sl. vor.  Hún ákvað að taka þátt í jólamessunum með kórnum en ætlar sér samt ekki að byrja aftur.  Kom heim upp úr hálftíu, rétt á eftir strákunum.  Einhverju seinna horfði ég á Kiljuna á tímarásinni.  Klukkan var orðin meira en tólf er ég skreið upp í rúm.  Las samt nokkra kafla í bókasafnsbók áður en ég sveif inn í draumalandið.

11.12.13

Ellefu, tólf, þrettán

Já, í dag er ellefti dagur tólfta mánaðar árið tvöþúsundogþrettán.  Var fólk örugglega ekki að fylgjast með þegar klukkan var fjórtán fimmtán?  Eftir vinnu í gær kom ég við á aðalborgarbókasafninu í Grófinni.  Skilaði fjórum bókum og tók örugglega sex bækur í staðinn.  Annars frestaði ég jólabakstrinum til næstu viku.  Davíð Steinn var að læra undir síðasta prófið í gær og gærkvöldi svo ég sat með saumana mína fyrir framan íþróttarásina.  Fylgdist með bikarleik karla milli efstu deildar liðsins Fram og fyrstu deildar liðsins Aftureldingar og lauk við að sauma sjötta jólakortið.  Á reyndar eftir að strauja myndirnar og festa inn í kortin.  Þau verða reyndar sennilega bara fimm því ég gaf mömmu eitt.  En það er ekki útséð með að ég saumi líka áttunda kortið, þriðja jólaálfinn því ég er ekkert svo lengi með eina svona krúttlega mynd.  Annars fóru handboltaleikar þannig að Afturelding hafði sigur á fram.  Aldrei þessu vant var ég svo komin í rúmið rétt upp úr ellefu og var hætt að lesa nokkru fyrir miðnætti.

10.12.13

Nógur tími

Annar sonur minn tók síðasta prófið á önninni í gær en hann þurfti heldur ekki að taka nema tvö núna í desember.  Hinn fer í fimmta og síðasta prófið sitt á morgun.  Það kom sér vel að hafa gripið tækifærið í kaffipásunni seinni partinn í gær.  Ég var beðin um að vera lengur og vann til klukkan að verða átta.  Þá tók ég strætó heim.  Vafraði aðeins um á netinu áður en ég settist fyrir framan imbann um níu með popp sem Oddur hafði poppað fyrir mig.  Um tíu hætti ég sjónvarpsglápi og hellti mér upp á smá kaffi.  Drakk amk þrjá bolla og vafraði um á netinu til miðnættist.  Þá skreið ég upp í og las nokkra kafla í seinustu ólesnu bókinni af safninu.

9.12.13

Í nógu að snúast

Aftur nota ég tækifærið og set inn daglega færslu í kaffipásu á vinnutíma.  Mikið var að gera í gær.  Var komin á fætur milli níu og tíu og dútlaði ýmislegt framundir hádegi.  Rétt fyrir eitt setti ég pakka af óskornu og ósteiktu laufabrauði, tvo hnífa, ostaköku, bretti og svuntu í poka og hélt af stað í Garðabæinn til einnar frænku minnar og nöfnu.  Ég var rétt ókomin til hennar er hún náði sambandi við mig og bað mig um að koma við í verslun og kaupa feiti.  Þrátt fyrir þennan smákrók var ég fyrst á staðinn og við frænkur vorum byrjaðar að skera áður en bróðir hennar, mágkona og móðir mættu.  Ég var ekki lengi að skera í 20 kökur.  Fékk reyndar smá hjálp frá elsta meðlimnum, konu sem komin er á nítugasta og annað árið.  Þegar ég var búin með mínar kökur skar ég í nokkrar fyrir frænku mína.  Minn stafli og einn til voru svo steiktir fyrstir áður en sest var niður og fengið sér kaffi og með því.

Ég kom heim upp úr hálffimm, tæpum klukkutíma áður en ég átti að vera mætt í kirkjuna.  Setti nóturnar, sem ég var búin að raða inn í rétta röð, í svarta möppu, skipti um föt og tók með mér spariskóna.  Kyrjurnar voru að hita upp og æfa þegar ég mætti í kirkju óháða safnaðarins rétt fyrir hálfsex.  Kórstjóri Kyrjanna hitaði okkur svo upp áður en við renndum yfir lög kvöldsins.  Klukkan sjö var pása og um klukkustund síðar byrjaði aðventukvöldið.  Árni Heiðar var að vísu búin að spila nokkur lög á nýjan flygil í uþb korter áður en dagskrá hófst.  Kirkjan var alveg full og það þurfti að bæta við stólum.  Kyrjurnar byrjuðu og sungu þrjú lög.  Þegar við hin bættumst í hópinn var kveikt á tveimur kertum á aðventukransinum og sungin viðeigandi erindi með.  Eftir þrjú lög dró allur kórinn sig í hlé og Gissur Páll söng.  Þá var komið að Andra Snæ Magnasyni að vera með smá hugvekju.  Síðan söng kórinn Ave María (Kaldalóns) með Gissuri Páli og Vögguljóð Maríu (án tenórsins) við undirleik Árna og undir stjórn stjórnanda Kyrjanna.  Gissur Páll söng svo eitt lag áður en fermingabörnin söfnðuðust fyrir framan gráturnar í smá bæn þar sem þau fengu svo ljós á kertin sín, gengu út í kirkju og gáfu kirkjugestum og okkur kórfélögum ljós áður en risið var á fætur og endað með því að syngja "Heims um ból".  Afar notaleg kvöldstund og svo var hægt að fá sér kaffi eða öl og smákökur í báðum sölunum á eftir.

8.12.13

Daglega færslan

Ég var komin tiltölululega snemma á fætur í gærmorgun.  Bloggaði og vafraði svo um á netinu þar til klukkan var um hálfellefu.  Þá tók ég til esperantobækurnar mínar og lagði í hann til norsku esperanto-vinkonu minnar.  Nú brá svo við að hún var ekki komin heim.  Dóttir hennar vaknaði við dyrasímann og hleypti mér inn.  Það leið nokkur stund áður en Inger kom heim en Hinni hafði þurft að reka smá erindi eftir morgunleikfimina áður en hann keyrði konu sína heim.  Ég beið bara róleg eftir henni og dóttir hennar hélt mér selskap á meðan.  Þegar Inger kom svo byrjaði hún á því að setja upp graut og hella á könnuna.  Við vorum svo nokkuð duglegar í esperantogrúskinu.  Fórum yfir það sem við lásum síðast.  Lásum tvo kafla og renndum einnig yfir orðin sem tilheyra kaflanum sem við lesum næst.

Fór og verslaði í Krónunni eftir esperantolesturinn.  Oddur Smári gekk frá vörunum.  Svo fór dagurinn í ýmislegt annað heldur en ég var búin að hugsa mér.  Hafði ætlað mér að skrifa nokkur jólakort og jafnvel eitt til tvö af þremum árlegum jólabréfum.  En ég fékk mig ekki til að setjast niður við þessi verk.  Það er heldur ekkert hundrað í hættunni þótt ég byrji ekki á þessu alveg strax.  Endaði daginn á því að horfa á Barnaby á DR1 og lesa svo nokkra kafla í Reisubók Guðríðar.

7.12.13

Á jólatónleikum í Salnum

Lánsbíllinn fór í gang í annarri tilraun í gærmorgun.  Vinnudagurinn leið afar hratt enda var ég að alveg frá klukkan rétt fyrir átta og þar til klukkan fjögur fyrir utan matar og kaffipásur.  Fór beint heim eftir vinnu.  Strákarnir voru að undirbúa vikulegt spilakvöld svo ég þurfti ekki að hugsa fyrir mat.  Um hálfátta klæddi ég mig í sparilegri föt og dreif mig svo yfir í Salinn í Kópavogi.  Þar voru Gissur Páll Gissurarson og Árni Heiðar Karlson með jólatónleika og gestur þeirra Valgerður Guðnadóttir var gestur þeirra og söng nokkur lög með Gissuri og nokkur lög ein.  Gissur og Árni Heiðar byrjuðu mjög formlega en eftir fyrsta lagið var Gissur með mjög líflegar kynningar á milli laga og Vala kynnti sín lög einnig mjög skemmtilega.  Það er skemmst frá því að segja að tíminn flaug.  Ég var heilluð af söngnum og fannst mér lagavalið mjög skemmtilegt og á milli laga hló ég stundum svo mikið að ég fékk verk í magann.  Og þrátt fyrir að vera á móti fjöldasöng þá bauð Gissur öllum gestum sem gátu að standa upp eftir uppklappið og syngja með þeim "Nóttin var sú ágæt ein".  Þeir félagar hafa unnið saman síðan 2008 og þetta eru ekki fyrstu jólatónleikarnir þeirra.  Og þeir sögðust hlakka til að hitta okkur árlega næstu tæplega áttatíu árin.

6.12.13

33:25

Allar stundir einset mér
að horfa fram á veginn.
Eins ég botna stökur hér
og andinn verður feginn.

Enn ein vinnuvikan liðin og framundan annasöm helgi, amk sunnudagurinn.  Var svo heppin í gær að fá far heim eftir vinnu.  Hafði hakk og spakk í kvöldmatinn en það er nokkuð langt síðan ég hafði svoleiðis síðast.
Um sjöleytið labbaði ég af stað á heimaleik í olísdeild karla í handbolta.  Lánsbíllinn var fyrir utan hús númer 1 í götunni og ég ákvað að fara á honum og reyna að fá stæði nær eftir leikinn.  Bíllinn fór hins vegar ekki í gang svo ég labbaði á leikinn.  Framan af leik leist mér ekkert á blikuna en það munaði þó ekki nema einu marki gestaliðinu ÍR í lið þegar flautað var til hálfleiks.  Seinni hálfleikur var mun betur spilaður af Valsstrákunum og þeir náðu fljótlega undirtökunum. jöfnuðu og sigu framúr.  Átta marka sigur var staðreynd þegar lokaflautan gall.  Reyndi aftur að ræsa lánsbílinn á leið heim frá leiknum og það tókst í fjórðu eða fimmtu tilraun.  Ekkert stæði var nálægt húsinu mínu svo ég stalst til að leggja fyrir aftan heilsugæsluna vitandi það að ég yrði búin að fjarlægja bílinn þaðan fyrir átta í morgun. 

5.12.13

Æft með Gissuri Páli

Vinnudagurinn í gær leið afar hratt.  Mest var að gera í gærmorgun og aðeins framyfir hádegi.  Var komin heim fyrir hálffimm og fór beint í að vafra aðeins um á netinu.  Strákarnir fóru til pabba síns svo ég slapp við að elda.  Fékk mér bara sjóðandi vatn út á haframjöl með rúsínum, musli, kasjuhnetum og kanil útá.  Lagði af stað á kóræfingu í fyrrafallinu.  Þurfti að sópa smá snjó af hluta af lánsbílnum og skafa framrúðuna að utan og innan.  Svo var svo kalt að það tók nokkrar tilraunir að fá bílinn í gang og til að ganga.  Kyrjurnar voru mættar og byrjaðar að æfa sín lög.  Stjórnandi þeirra hitaði okkur hin upp áður en við byrjuðum svo að æfa rétt upp úr hálfátta.  Eftir eina og hálfa klukkustund fórum við í smá kaffipásu.  Við vorum nýbyrjuð aftur þegar Gissur Páll mætti og fór tvisvar yfir lagið sem við ætlum að syngja með honum,  Ave María í útletningu Sigvalda Kaldalóns.  Kom heim aftur upp úr tíu og fékk ekkert stæði nema í hinum endanum á götunni við hús númer 1.  Lagði bílnum þar.  Fljótlega eftir að ég kom inn horfði ég á Kiljuna á tímarásinni, gleymdi mér svo aðeins á netinu og var því að lesa til klukkan hálfeitt eftir að ég fór upp í rúm um miðnætti.

4.12.13

Greip tækifærið

Er ein í mat, búin að borða, með kaffi í bolla og uþb tuttugu mínútur þar til matartíminn minn er búinn. Auðvitað greip ég tækifærið fyrst það er komin tölva í kaffistofuna með aðeins meiri aðgang að ýmsum hlutum heldur en tölvan á skrifborðinu mínu, og nýti mér tímann og einveruna til að punkta niður smávegis um gærdaginn.

Notaði lánsbílinn í ferðirnar milli heimilis og vinnu í gær.  Ætla mér að halda mig við þriðjudaga og föstudaga sem bíladaga út árið nema eitthvað komi uppá.  Hvorugur strákurinn var í prófi í gær og þeir voru ekki komnir fram er ég fór á stjá í gærmorgun.  Vinnudagurinn leið hratt og örugglega.  Erum að bíða eftir ákveðnu verefni sem við ættum að vera að vinna að alla seinni parta á þessu tímapunkti.  Verkefnið kom ekki í gær en við notuðum tímann til að jólaskreyta hjá okkur.  Um hálfþrjú vorum við aðeins orðnar tvær eftir en það kom ekki neitt að sök.

Það var glaður drengur sem sveif út úr herberginu sínu í gærkvöldi og tilkynnti að hann væri með 10 í áfanga sem skammstafaður er TNT.  Hann fékk víst 9,5 á prófinu og hefur verið að gera góða hluti alla önnina svo hann var námundaður upp í 10.

En ég fékk líka leiðinlegar fréttir í gegnum mömmu í gær.  Ungur frændi okkar fyrir norðan, aðeins 6 ára, var að greinast með bráðahvítblæði.  Það er því barátta framundan hjá honum og hans fjölkyldu og ég ætla mér að muna eftir þeim í bænum mínum á kvöldin.

Kláraði fimmta jólakortið í gær og byrjaði á því sjötta.  Þ.e. ég er búin að sauma 5 myndir í kort (og gefa 1) en á reyndar eftir að klára að útbúa sjálf kortin.  Þarf að útvega mér nýtt og gott lím áður en ég dembi mér í þetta.

3.12.13

Morgunblogg um gærdaginn

Líkt og flesta mánudaga undanfarnar nokkrar vikur notaði ég strætó á milli heimilis og vinnu.  Vinnudagurinn var ekki lengi að líða, verkefnin sáu til þess.  Þung hurð rakst aðeins í annan fótinn minn, mest á tána við hliðina á stóru tánni svo ég ákvað að vera ekkert að haltra heim.  Þetta er svo sem ekkert alvarlegt en nöglin er blá og táin aum.  Hafði lifur í rjómalagaðri tómatpúrresósu, með steiktum lauk og soðnum kartöflum í kvöldmatinn.  Mjög, mjög gott og það er meira að segja afgangur til að taka með mér í vinnuna.  Annars fór kvöldið í netvafr og imbagláp.

Er að lesa Reisubók Guðríðar eftir Steinunni Jóhannesdóttur, ekki komin mjög langt en afar hrifin og spennt.  Verð að beita mig hörðu við að leggja frá mér bókina áður en klukkan verður alltof margt.

2.12.13

Helgin leið hratt

Mætti til norsku esperanto vinkonu minnar um hálfellefu í gæmorgun, degi seinna en venjulega vegna anna á laugardeginum.  Við byrjuðum á því að fá okkur hafragraut með kanel og agavesýrópi og tókum svo kaffibollana með okkur yfir í sófann þar sem við grúskum í esperantofræðunum.  Fórum yfir orðin og leskaflann sem við lásum í síðustu viku. Síðan fórum við yfir orðin í næsta kafla og lásum þann kafla og þýddum og enduðum á því að skoða orðin sem tilheyra kaflanum sem við lesum um næstu helgi.

Eftir esperantogrúskið lá leið mín í Krónuna við Granda þar sem ég verslaði inn fyrir vikuna.  Hugsaði reyndar alls ekki út í það að strákarnir verða mikið meira heimavið þar sem prófin eru byrjuð en ég held að ég hafi samt verslað mjög skynsamlega inn.  Þegar ég var búin að ganga frá vörunum heima og vafra aðeins á netinu dreif ég í að setja upp jólaklukkustrenginn.  Pakkaði 48 súkkulaðibitum inn í álpappír og festi á alla hringinga (48, 2 hringir við hvert númer).

Um þrjú hringdi ég í gamla konu til að athuga hvernig ég sækti að.  Tengdadóttirin svaraði og sagði að sú gamla væri lasin en ég mætti alveg kíkja stutta stund.  Hún og maðurinn hennar voru að setja upp jólin fyrir gömlu konuna.  Ég dreif mig í heimsókn og hitti þau öll.  Stoppaði í rúman klukkutíma og ég get svo svarið það að xið hafði komið og tekið næstum allt sitt hafurtask þessa stuttu stund sem ég brá mér frá.  Það er bara frábært nema hann ætlar mér líklega að sjá um að ganga frá og/eða henda afgangnum af dótinu.

1.12.13

Aðventa og nýtt kirkjuár

Ég var mætt á kóræfingu í kirkjuna mína rétt fyrir tíu í gærmorgun.  Þrír tímar liðu undrahratt og nú er aðeins ein æfing eftir fyrir aðventukvöldið.  Að vísu eigum við víst að mæta frekar snemma eða rúmum þremur tímum áður en stundin hefst n.k. sunnudagskvöld.  Æfingin í gær gekk vel fyrir sig og ég held að kórstjórinn hafi bara verið nokkuð ánægður með okkur.  Að minnsta kosti sagði hann að við værum farin að hljóma eins og kór.

Samkvæmt skipulagi átti ég víst tíma í klippingu klukkan tíu í gærmorgun en ég var svo heppin, þegar ég hringdi til að breyta tímanum vegna árekstrar við æfinguna, að fá tíma klukkan hálftvö í staðinn.  Svolítið skrýtið að mæta á þessum tíma en afar gott að losna við lubbann.

Fljótlega eftir að ég kom heim, upp úr tvö, varð ég vör við að að xið væri að vinna í að tæma skúrinn.  Hann gerði ekki vart við sig svo ég var ekkert að fara út og "heilsa" upp á hann.  Var bara fegin að hann væri loksins að gera eitthvað í þessu með dótið sitt.  Sá reyndar aldrei neinn flutningabíl eða kerru þannig að mig grunar að hann hafi bara tekið kassa og poka í gær en að stóru mublurnar séu eftir.

Um hálfníu í gærkvöldi bankaði ég upp á íbúð við Hagamel 50.  Séra Pétur var búinn að bjóða mér á svona "tilhleypinga" kvöld þar sem einungis makalausir eru gjaldgengir fyrir utan eina (2) undantekningu.  Það mæta til hans hjón úr kirkjustarfinu sem sjá um að hita kaffi og vaska upp.  Þetta var hin skemmtilegasta samkoma og ég kvaddi ekki fyrr en upp úr miðnætti þegar búið var að skjóta upp gamla kirkjuárinu, með míni-rakettum.

30.11.13

Nóvembermánuður næstum liðinn

Sennilega skutlaði ég tvíburunum í síðasta sinn í skólann á þessari önn í gærmorgun.  Nú eru bara prófin eftir hjá þeim.  Síðan lá leiðin á fjórðu hæð í turninum við Katrínartún.  Enginn var staddur þar sem ég átti að gefa mig fram en ég fann eitthvað af fókinu í matsalnum og þar var mér uppálagt að byrja á því að fá mér kaffi og með því.  Þessi heimsókn mín var nokkurs konar starfskynning og var ég á fundum eða sat hjá nokkrum af þeim sem vinna á þjónustuborðinu og fylgdist með allan morguninn.  Á einum tímapunkti hittust flestir í matsalnum til að kveðja einn vinnufélagann sem var að hætta eftir 35 ára starf.  Í hádeginu fékk ég að borða og fljótlega eftir það fór ég í starfsmanna viðtal við næstráðandi yfirmann minn og kvaddi svo upp úr hálftvö.

Áður en ég mætti í deildina mína lagði ég leið mína í bankann þar sem ég fékk aðstoð þjónustufulltrúa til að millifæra fyrir mig tæplega 3,6 millijónir inn á reiknings xins til að borga hann út úr íbúðinni samkvæmt samningi.  Hann er ekki enn búinn að taka dótið sitt en ég varð að borga í síðasta lagi 1. desember og þar sem ég hef ekki heimild til að millifæra svo háa eingreiðslu og sá fyrsti ber upp á sunnudag dreif ég í þessu í gær.  Er ég kom í kortadeildina var mitt fyrsta verk að senda lögfræðingnum mínum skilaboð og kvittun þess efnis að ég væri búin að standa við mitt.  Hún svaraði fljótlega að hún myndi framsenda þetta á lögfræðing xins svo gengið yrði frá eignaskiptum.

Strákarnir voru með spilakvöld hér heima annað föstudagskvöldið í röð.  Annar þeirra fór fyrst í smá matarboð til fyrrum bekkjarsystur en hinir lögðu í púkk og pöntuðu sér eitthvað.  Ég lokaði að mér inn í stofu og horfði á imbann og fór langt með að klára 5. útsaumaða jólakortið.  Xið sótti svo strákana stuttu fyrir miðnætti.

29.11.13

Föstudagur sá síðasti í þessum mánuði

Viljug mæti vinnu til
vandvirk störfum sinni.
Þetta´ er svona um það bil
eftir mínu minni.

Enn einn föstudagurinn runninn upp.  Dagarnir eru ákaflega fljótir að líða og maður hefur vart undan að njóta þeirra.  Í gær var ég í vinnu þar til klukkan var langt gengin í fimm en ég var komin heim áður en klukkan sló hálfsex.  Notaði strætó báðar leiðir í gær en byrjaði svo á því að "leita" uppi lánsbílinn og færa hann nær heimilinu.  Þegar ég kom heim af kóræfingu á miðvikudagskvöldið var næsta lausa stæði við hús nr. 11.

Um það bil sem Oddur Smári fór á trommuæfingu fór ég að huga að matargerð.  Steikti sæta kartöflu og kjúklingafille og bætti graskersfræjum, kasjúhnetum og afgangi af bygggrjónum út á pönnuna.  Kryddaði þetta svo með "Best á kjúklinginn".  Annars var gærkvöldið rólegt.  Var aðallega að sauma út fimmta útsaumaða jólakortið en fylgdist líka aðeins með íþróttarásinni og með gangi mála á hinum handboltaleikjum kvöldsins.  Mínir menn voru víst með undirtökin nær allan leikinn í Safamýrinni en töpuðu svo með einu marki.  Frekar fúlt það. 

28.11.13

Fjölmenn kóræfing

Gærdagurinn leið afar hratt og örugglega.  Notaði strætó báðar leiðir til og frá vinnu.  Rétt hitti annan tvíburann en þeir bræður fóru til pabba síns í gærkvöldi.  Um sexleytið kom Lilja vinkona mín og hellti ég upp á smá kaffi handa okkur.  Ég skildi hana svo eina eftir rúmlega klukkutíma seinna.  Fór á extra langa kóræfingu, frá hálfátta til tíu, með extra mörgu söngfólki.  Sönghópurinn Kyrjurnar, sem er kvennakór, ætlar að syngja á aðventukvöldinu með okkur.  Einnig bættist við einn aukatenór en ég held að það bætist við fleiri aukakarlaraddir á næstu tvær æfingar.  Kom heim upp úr tíu og við Lilja horfðum saman á Kiljuna á tímarásinni.  Hún fékk svo afnot af sófanum í nótt og vorum við báðar farnar í háttinn áður en strákarnir komu heim.

27.11.13

Föndurstund

Aðeins annar tvíburinn var samferða mér í gærmorgun.  Hinn þurfti ekki að mæta í skólann í gær.  Rétt fyrir tvö skrapp ég á leitarstöðina í reglulega skoðun sem nú er framkvæmd á fjögurra ára fresti en var áður annað hvert ár.  Allt gekk vel og ég var ekki klukkutíma í burtu.  Á heimleiðinni kom ég við í fiskbúð og hamstraði, keypti bleikju, ýsu og saltfiskflök.  Það síðast nefnda hafði ég í kvöldmatinn en hitt frysti ég.  Um hálfátta var ég mætt á fjórðu hæðina í Katrínartúni.  Þar var mættur hópur af vinnufélögum.  Flestir skreyttu kerti, örfáir voru í fluguhnýtingum og ég var með saumana mína með mér.  Kláraði jólakortið sem ég byrjaði á sl. laugardag og byrjaði á öðru.  Var komin heim um tíu.

26.11.13

Saumaklúbbur

Mamma og pabbi sendu mig með skópar til Davíðs Steins og auglýsingu um 20% afslátt af svipuðu skópari í versluninni Músík og sport við Reykjavíkurveg.  Afslátturinn gilti frá fimmtudegi til mánudags.  Lokað er á sunnudögum svo við Oddur Smári drifum okkur eftir vinnu og skóla í gær.  Því miður voru skórnir ekki til í hans númeri.  Góður fréttirnar eru þó þær að það er von á nýrri sendingu innan tveggja vikna.  Við munum "sitja" fyrir henni þótt afslátturinn gildi ekki þá.  Davíð Steinn smellpassaði í skóna sem hann fékk og fannst þeir svo góðir að hann sagðist ekki ætla úr þeim aftur.

Eftir kvöldmat tók ég handavinnuna mína með mér yfir til tvíburahálfsystur minnar.  Síðasti skipulagði saumaklúbbur ársins var hjá henni í gær.  Reyndar vorum við bara tvær sökum anna hjá þeirri þriðju.  En tíminn flaug afar hratt frá okkur.  Ég kláraði að sauma útlínur á seinni gulu flöskurósinni og hélt svo áfram með jólamyndina sem ég byrjaði á fyrir austan um síðustu helgi.  Fór langt með þá mynd.  Kom heim rétt upp úr ellefu og freistaðist í að horfa strax á næstsíðasta þáttinn um Sögu og Martin í seríu númer tvö um brúna.  Og þrátt fyrir að klukkan var farin að ganga eitt eftir miðnætti þegar ég fór í rúmið las í smá í bókinni  Land þagnarinnar eftir Ara Trausta Guðmundsson.  Ég á ekki mikið eftir af þeirri sögu en það er mesta furða að ég hafi náð að slíta mig frá henni áður en klukkan varð mikið meira en hálfeitt í nótt.

25.11.13

Sungið í messu

Oddur Smári og ég fórum í smá bíltúr stuttu fyrir hádegi í gær, bíltúr sem ekkert kom út úr og verður að endurtakast.  Meira um það á morgun.  Var mætt í kirkjuna korter fyrir eitt í gær, næst á eftir prestinum.  Stuttu seinna mætti afleysingaorganistinn.  Við þekkjum hann nokkuð vel því hann var organisti hjá okkur í tvö ár fyrir nokkrum árum.  Við hituðum upp níu úr kórnum en sú tíunda mætti tímanlega áður en sjálf messan hófst.  Eftir upphitun var okkur boðið upp á smá sérrístaup, kaffi og tertusneið.  Kári spilaði á orgelið í messunni og stundin var öll hin notalegasta.  Fékk mér smá kaffi eftir messu en sótti svo Odd sem kom með mér að versla inn fyrir vikuna.  Í gærkvöldi tók ég mig til og byrjaði að sauma útlínur á seinni gulu rósina sem ég saumaði á flöskusvuntu um daginn.

24.11.13

Skrapp austur

Var mætt til esperanto vinkonu minnar upp úr hálfellefu.  Hafði bara rétt rúman klukkutíma að þessu sinni en við náðum að fara yfir síðasta kafla, lesa næsta kafla þar á eftir og skoða orðin sem tilheyra kaflanum sem við förum í næst.  Aðeins annar tvíbbinn var vaknaður er ég kom heim um tólf.  Það var sá sem ég hafði lofað að skutla upp í Fella- og Hólakirkju fyrir hálfeitt þar sem hann átti að spila með skólalúðrasveit Árbæjar og Breiðholts á tónleikum um klukkustund síðar.  Ég tók mig til og svo lögðum við í hann.  Ég skildi stráksa eftir fyrir utan kirkjuna en ég hélt áfram för minni austur á Hellu.  Hinn tvíburinn hafði alveg hugsað sér að kom með en ég leyfði honum að sofa.  Hringdi í hann þegar ég var komin yfir heiðina og var þá að vekja hann.  Stoppaði hjá pabba og mömmu fram á kvöld og hjá þeim byrjaði ég m.a. að sauma "nýja" jólamynd sem fer í jólakort.  Kvaddi foreldra mína þegar klukkan var byrjuð að ganga tíu.  Bensínljós bílsins kviknaði er ég var komin að Hveradölum en ég komst alla leið að bensínstöðinni í Ártúnsbrekku.  Veit ekki hversu langt ég hefði farið á dropunum sem eftir voru því ég ákvað að fylla ekki á tankinn.  Yfirleitt nota ég nefnilega Atlantsolíulykilinn þegar ég fylli á.

23.11.13

Jólahlaðborð

Eins og flesta föstudaga þá fór ég á bílnum í vinnuna í gærmorgun.  Tvíburarnir voru samferða mér upp að Tækniskóla.  Strax eftir vinnu lá leiðin á aðalborgarbókasafnið í Grófinni.  Þar skilaði ég fjórum bókum af fimm og tók aðrar fjórar bækur með mér heim.  Strákarnir áttu von á nokkrum félögum til að spila eitthvað spil sem þeir spila vikulega.  Þeir hafa verið að hittast einhvers staðar niður í bæ undanfarin föstudagskvöld.  Þeir undirbjuggu hittinginn með því að stækka borðið í holinu og skella nokkrum vorrúllum í ofninn.  Ég tók því rólega þar til klukkan var langt gengin í sjö.  Vafraði um á netinu og byrjaði einnig á bókinni sem ég átti ólesna frá síðustu bókasafnsheimsókn.  En rétt fyrir sjö fór ég að hafa mig til.  Klæddi mig í spariföt og setti á mig varalit. Var ákveðin í að smakka ekki vín um kvöldið svo ég fór á bílnum á Hilton Hótel við Suðurlandsbraut.  Þar hitti ég marga vinnuvélaga mína.  Tilefnið var jólahlaðborð.  Borðhaldið hófst upp úr klukkan átta.  Ég fór eina ferð í forréttina, aðra í aðalréttina og tvær í eftirréttina.  Passaði mig á að hlaða ekki um of á diskana og reyndi að velja margt af því sem maður fær sér sjaldan eða aldrei.  Þrátt fyrir að kunna mér hófs í þessar veislu varð ég pakksödd.  Maturinn var góður og ég borðaði hægt og naut hans.  Undir borðum komu söngkona og píanóleikari fram nokkrum sinnum með hléum.  Eyþór Ingi, sá sem vann íslensku söngvakeppnina í ár, bættist í hópinn á ellefta tímanum og um ellefu mættu trommari og bassaleikari einnig á sviðið.  Ég staldraði nú ekki lengi við eftir það en þó eitthvað.

22.11.13

Breyttir skriftímar

Hafa vil ei hátt um það
hve úti er að vetra.
Andann nærði', heitt ég bað
og lífið það varð betra.

Framvegis mun ég annaðhvort skrifa inn daglegu færsluna um sjö virka daga eða eftir klukkan hálffimm.  Ég hef ekki lengur aðgang til að skrá mig inn í vinnunni.  Hugsanlega verður ein tölva með þessum aðgangi en ég mun helst ekki nýta mér það og sennilega bara alls ekki.  

Þegar ég labbaði heim úr vinnunni á miðvikudaginn var fékk ég slæmt hælsæri á annan hælinn.  Ég notaði því strætó báðar leiðir milli heimilis og vinnu í gær.  Og fór á bílnum út að Valsheimili á heimaleik í Olísdeild karla í gærkvöldi.  Þar tóku Valsmenn á móti FH og töpuðu með 23 mörkum geng 25.  Samt var okkar markvörður að verja betur.

21.11.13

Ferðalangarnir komnir heim

Síðustu þrjár vikur voru foreldrar mínir á Tenerife.  Þetta var fyrsta skiptið hans pabba en annað skiptið hjá mömmu.  Hún fór fyrir tveimur árum síðan.  Á þeirri ferð kynnstist hún fólki sem rak verslun þarna úti.  Það fólk tók hana upp á sína arma, fór með hana í skoðunarferðir og fleira.  Hún leitaði þetta fólk uppi þegar þau pabbi voru komin út og það urðu fagnaðarfundir.  Hún færði fólkinu meðal annars prjónaðar peysur á börnin.  En mamma hringdi semsagt í mig upp úr níu í gærkvöldi og þá voru þau nýlent á Keflavíkurflugvelli og ætluðu beint austur.  Þau hringdu reglulega í mig og systur mína á meðan þau voru úti og létu vel af sér.  Mamma hefði auðvitað alveg verið til í að vera að minnsta kosti í þrjár vikur enn en ég held að pabbi hafi alveg verið tilbúinn að koma aftur heim.  Ég var annars á miðri kóræfingu þegar mamma hringdi í gærkvöldi.  Þar vorum við að æfa fyrir aðventukvöldið og einnig fórum við yfir hátíðasöngvana (sr. Bjarna/Bjarnatónið (messa á aðfangadag og messa á jóladag)).

20.11.13

Þeir eru samt "STRÁKARNIR OKKAR"

Ekki vannst sæti á hm í Braselíu næsta sumar.  Ég er samt stolt af íslenska karlalandsliðinu í fótbolta og alveg viss um að þeir eiga eftir að gera betri hluti og komast lengra í náinni framtíð.  Þeir eru þegar búnir að ná lengra en íslenskt A-karlalandslið í knattspyrnu hefur náð áður.  Auðvitað eru þeir svekktir núna, ekki síst Eiður Smári sem sagðist líklega hafa verið að spila sinn síðasta landsleik í gær enda orðinn 35 ára.  Ég er nú samt viss um að hann gæti alveg átt tvö til þrjú ár enn ef hann heldur sér í formi en kannski er það líka rétt hjá honum að leggja landsliðsskóna á hilluna.  Hann er nú alveg búinn að skila sínu og jafnvel gott betur á þessum 17 árum.  Hugsa sér, hann er eiginlega búinn að vera í landsliðinu helminginn af ævi sinni.  Ég átti annars svolítið erfitt með að horfa á leikinn á köflum svo ég greip til þess ráðs að taka upp saumana mína.  Náði að sauma allar útlínur á annarri gulu flösku-rósinni, og það á þeirri sem er flóknari, í gærkvöldi.

19.11.13

Áfram flýgur tíminn

Ég tók mér far með strætó báðar leiðir milli heimilis og vinnu í gær.  Var komin heim nokkru fyrir hálffimm og fór nær beint í að vafra aðeins um á netinu.  Hafði matinn um hálfsjö, lasanja.  Ég held að báðir bræðurnir hafi fengið sér tvisvar á diskinn.  Það var samt til einn skammtur fyrir mig til að taka með mér í vinnuna í dag.  Færði mig inn í stofu um sjö.  Horfði á fréttir, kastljós, söguna um Heiðu Dís og næstsíðasta þáttinn í annarri seríunni um brúnna.  Notaði tímann líka til að ljúka við að sauma útlínur á þriðja útsaumaða jólakortið og merkja þessi þrjú með skammstöfun og ártali.  Ætla mér svo að taka mynd af þessum jólamyndum fljótlega.

18.11.13

Notalegheit

Ég get ekki að því gert en stundum óska ég þess að um suma hluti væri nóg að hugsa um hvernig maður hagaði þeim til og þá, væri eins og við manninn mælt, verkefninu lokið.  Ég var semsagt að hugsa um að ryksuga yfir íbúðina í gær en notaði daginn aðallega í lestur og netvafr.  Hitt gerist víst ekki að sjálfu sér en það fer heldur ekki neitt.
 
Seinni partinn hafði ég samband við tvíburahálfsystur mína sem og föðursystur mína og við ákváðum að ég myndi ná í þær, aðra í Hafnarfjörðinn en hina við Olísstöðina í Norðlingaholti.  Saman fórum við yfir heiðina til að mæta á kóræfingu fyrrum FSu-kórfélaga.  Jón Ingi sá um æfinguna sem hófst upp úr klukkan hálfníu. "Sofðu unga..., Heyr himnasmiður, Smávinir fagrir, Hallingsvisa..."  og nokkur önnur lög voru rifjuð upp og sungin.  Mér tókst að sannfæra Sonju um að syngja í altinum með mér, annars hefði ég verið ein.  Vorum mætt um tuttugu en vonumst eftir betri mætingu næst.  Ákveðið var að hittast einu sinni í mánuði en þó ekki fyrr en í janúar næst.
 
Ekki tæmdi x-ið skúrinn um helgina svo það stefnir allt í það að ég verði að ýta við honum og fá hann til að tæma í síðasta lagi um það leyti sem ég verð að borga hann út skv. samningi.

17.11.13

Mánuðurinn meira en hálfnaður

Þrátt fyrir kvefið dreif ég mig til esperanto vinkonu minnar  upp úr hálfellefu í gærmorgun.  Var heldur seinni en venjulega því ég hafði ekki litið út um glugga áður en ég fór út og vissi ekki að það þyrfti að sópa og skafa.  Esperantogruflið gekk bara vel.  Næst lá leiðin í Krónuna við Granda þar sem ég versla oftast inn fyrir vikuna.  Inn á milli skrepp ég í Sunnubúðina og stöku sinnum í Hagkaup.  Mér finnst ekkert að því að styrkja kaupmanninn á horninu. Það er afar hentugt að geta hlaupið út eftir ýmsu smálegu ef eitthvað vantar.

Ég var að ganga frá vörunum þegar systir mín hringdi til að athuga hvort ég væri heimavið.  Ég hellti því upp á könnuna fyrir okkur tvær og tók vel á móti henni þegar hún kom.  Sátum afslappaðar í stofunni í hátt á annan tíma.  Við höfðum um margt að spjalla.

Fljótlega eftir að Helga fór hringdi ég svo í nöfnu mína og frænku í Garðabænum og heimsótti hana í kjölfarið.  Það er orðið langt síðan ég leit þar inn síðast.  Hugsanlega gæti ég alveg verið duglegri við að kíkja við til ættingja og vina en ég tel mig þó vera að gera mitt besta í þeim efnum.

Kvöldinu eyddi ég í rólegheitum fyrir framan skjáinn.  Horfði á Merlín á RÚV og Barnaby á SkjáEinum.  Fór tiltölulega snemma í rúmið en las hátt í klukkutíma áður en ég fór að sofa.  Fullkominn dagur!

16.11.13

Allt getur gerst

Það að ekkert mark var skorað í fyrri umspilsleiknum í gær, úrslit 0:0, þýðir að enn er möguleiki á úrslitum okkar strákum í hag.  Króatar verða alltaf að vinna og ef þeir fá á sig eitt mark verða þeir amk að skora 2 til að vinna því útivallarmark telur mikið.  Ef leikurinn úti fer1:1 þá færu okkar strákar á hm í Brasilíu.

Kom við í Hagkaup í Skeifunni að kaupa mér engifer, sítrónur og hálsbrjóstsykur og svo smá snakk með leiknum.  Átti notalega kvöldstund fyrir framan skjáinn.  Þoldi reyndar ekki að horfa alveg á köflum en horfði þó á mest allan leikinn.  Eftir leikinn horfði ég svo á "The voice" á plúsnum á Skjá einum.  Var búin að slökkva á sjónvarpinu fyrir miðnætti og las helling í rúminu áður en ég fór að sofa.

15.11.13

Spenningur

Við Króata um sæti keppum
kannski´ á hm förum.
Vinnist leikir, okkur sleppum,
og þá á allra vörum.

Síðasta klukkutímann í vinnu í gær mætti ég á sviðsfund í Katrínartúni.  Þaðan labbaði ég heim.  Þetta er nú ekkert svo langur spölur, sennilega uþb einn og hálfur kílómetri eða svo.  Sem betur fer var ekki rok en rigningin, maður minn.  Þegar ég kom í Drápuhlíðina fór ég úr úlpunni, settist inn í mömmubíl og skrapp á næstu bensínstöð Atlantsolíu.  14 krónur afsláttur af lítranum svo það borgaði sig að fylla á tankinn.  Fór svo beint heim aftur og skipti um föt.  Hafði matinn um hálfsjö og rétt fyrir átta skutlaði ég bræðrunum og einum vini í fyrirpartý fyrir skólaballið sem var seinna um kvöldið á Rúbín við Keiluhöllina.  Heima fylgdist ég með leiknum Valur - Haukar og var svekkt yfir að valsararnir glutruðu  sex marka forystu niður í jafntefli.  Sem betur fer fengu þeir þó annað stigið.  Þetta hefði líklega geta endað verr.

14.11.13

Nefrennsli og aumur háls

Andinn góður enn um sinn
ég nýta mér það kann.
Á færibandi stökur finn
flink ég er með sann.

Særindi í hálsi komu í veg fyrir að ég færi á kóræfingu í gærkvöldi.  Leiðinlegt að missa af æfingu því við erum byrjuð að æfa fyrir aðventukvöldið en ég vissi það vel að ég átti ekkert erindi.  Ég hefði freistast til að taka þátt og það er öruggt að hálsinn og raddböndin hefðu ekki þolað það og jafnvel verið lengur að komast í lag.  Er ekki með neinn hita með þessu kvefi en samt ekki alveg 100% ég.
 
Steikti slátur handa okkur strákunum og notaði svo kvöldið fyrir framan skjáinn í útsaum.  Er byrjuð á útlínunum í þriðja saumaða jólakortinu.  Af þessum þremur kortum fær mamma að velja sér eitt til að nota.  Það er vel hugsanlegt að ég nái að sauma eitt til tvö jólakort í viðbót en ég ætla samt að láta útlínur á gulu flösku-rósirnar ganga fyrir.  Fór í háttinn um ellefu og las smá stund.  Náði að slíta mig frá bókinni áður en klukkan sló hálftólf og var fljót að sofna.

13.11.13

Þrettán - ellefu - þrettán

Veðrið rysjótt, tíðin rök,
rok og blautir dagar.
Ekki kemur neitt að sök
innivera lagar.


Ég var aðeins að fara yfir skrifin í mánuðinum og komst að því að ég var að bulla feitt á sunnudaginn. Var alveg búin að gleyma sögunni af næstum því týnda bíllyklinum sem ég skráði inn 3. nóvember. Þannig að það leið ekkert langur tími á milli sunnudagsbloggskrifa.
 
Strákarnir urðu samferða mér í gærmorgun.  Vinnudagurinn leið afar fljótt og ég fór beint heim eftir vinnu.  Vafraði aðeins um á netinu og byrjaði á nýrri bók.  Komst upp með að hafa afganga í matinn og svo notaði ég kvöldið í útsaum.  Er langt komin með jólamyndina sem ég byrjaði á í saumaklúbbnum á mánudagskvöldið.  Ekki svo margir krossar eftir og svo bara útlínur.  Svo var mín bara skynsöm og fór tiltölulega snemma í háttinn.  Las um stund í þykkustu bókinni af safninu en var örugglega sofnuð um ellefu.

12.11.13

Kátt á hjalla í saumaklúbb

Krossa marga kát og hress
í klúbbnum sauma bjó.
Á okkur stöllum ekkert stress
stakk af tíminn þó.

Eins og fram kemur í stökunni var saumaklúbbur í gær.  Ég var mætt til Lilju, sem býr rétt við Úlfarsfell, um átta og Sonja bættist svo í hópinn áður en klukkan sló hálfníu.  Ég var ekki með jólakortaföndrið meðferðis heldur lauk ég við útlínur á jólamynd og byrjaði á annarri sem báðar verða notaðar í jólakort.  Það var mikið spjallað og mikið hlegið en alls ekki slegið slöku við handavinnuna.  Þrír tímar voru alltof fljótir að líða.  En þótt klukkan væri að verða hálftólf er ég skilaði mér heim horfði ég á "Sögu og Martin" úr Brúnni á tímarásinni.  Ekki nóg með það þá las ég nokkra kafla í bókinni hans Pálma áður en ég fór að sofa, sem var frekar seint.  Vonandi kemur það ekki niður á mér þótt ég svæfi innan við sex tíma í nótt.

11.11.13

Ný vinnuvika

Vænt mér þykir orðin um
og nota mörg ég vil.
Ónothæf þó eru sum
örfá varla til.
 
Í gær var kristniboðsdagurinn og þar sem aðeins er messað tvisvar í mánuði alla jafna í kirkju óháða safnaðarins var líka látinna minnst.  Maður frá Gideon-félaginu predikaði eða sagði frá félaginu og reynslusögur og það komu tveir karl-einsöngvarar og sungu fyrir og eftir predikun.  Kórinn söng aðeins þrjá sálma, einraddaða, fyrir utan messusvörin.  Það mættu nokkuð margir og var þetta hin notalegasta stund.
 
Hafði ætlað mér að taka bókasafnspokann með að kirkjunni og geyma í skottinu.  Mundi ekki eftir pokanum fyrr en of seint.  Það gerði þó ekkert til því það er opið á söfnunum til klukkan fimm og ég hafði alveg tíma til að fá mér smá kaffi eftir messu áður en ég fór heim og sótti pokann.  Ákvað að fara á aðalsafnið, í Grófinni, þar sem ég setti allar þrjár bækurnar úr Kringlusafninu á vagninn sem merktur er "FRÁTEKIÐ".  Fann mér fimm bækur til að taka með heim og sú þykkasta er með 14 daga skilafrest.  Samt byrjaði ég ekki strax að lesa skammtímalánsbókina né neina af hinum af safninu.  Er með bókina hans Pálma Gunnarssonar  Gengið með fiskum í láni frá vinnufélaga.  Byrjaði á henni er ég var komin upp í rúm frekar seint og áður en ég vissi af var ég búin að lesa einn fjórða af bókinni, eða eitthvað um 50 síður.

10.11.13

Sunnudagshugvekja

Góða daginn, góða fólk,
geymi ykkur englar.
Í kaffi aldrei nota mjólk
æ, hún bragðið brenglar.

Ó, já, þetta er fyrsti sunnudagurinn í langan tíma sem ég sest niður og rita eitthvað um mitt daglega líf inn á bloggið mitt.  Hluti af því er vegna þessa að ég skoraði á mig að semja eina vísu á dag í sjö daga í röð og svo er svo mikið um að vera hjá mér að það er best að létta á skriftunum með því að skrifa oftar.

Mætti til norsku esperanto vinkonu minnar um hálfellefu.  Var mínútu á undan þeim hjónum en þau voru að koma úr morgunleikfimi.  Hún hellti upp á og bjó til hafragraut en svo dembdum við okkur í æfingarnar.  Við erum að mana okkur upp í að fara að tala meira saman á esperanto, því æfingin skapar meistarann.  Frá Inger fór ég í Krónuna á Granda og verslaði inn fyrir vikuna.  Oddur Smári gekk frá vörunum.  Ég stoppaði ekki mjög lengi heima við því það voru tveir heimaleikir í Olísdeildunum hjá Val í gær.  Nú brá svo við að ég fór á bílnum út að Hlíðarenda.  Strákarnir tóku á móti ÍBV.  Fyrstu mínúturnar gekk ekki nógu vel og gestirnir náðu smá forskoti en "mínir strákar" gáfust ekki upp og þrátt fyrir að tveir Valsarar fengju rauða spjaldið þá lönduðu þeir góðum sigri.  Rúmum hálftíma eftir að karlaleiknum lauk var komið að kvennaleiknum.  Stelpurnar tóku á móti efsta liðinu, Stjörnunni og mér sýndust þær alveg ákveðnar í að ná báðum stigunum.  Allt gekk upp fyrstu mínúturnar en svo söxuðu gestirnir á forskotið og þær voru yfir í hálfleik. Leikurinn endaði með jafntefli.

En ástæðan fyrir því að ég fór á bílnum á leikina var sú að ég var búin að ákveða að fara á tónleika klukkan fimm.  Það þýddi að ég varð að sleppa því að fylgjast með seinni hálfleiknum í seinni leiknum.  Dómkórinn var með tónleika í Dómkirkjunni og ásamt nokkrum íslenskum lögum frumfluttu þau verkið Magnificat eftir Hildigunni Rúnarsdóttur.  Og þótt það væri erfitt að fara af miðjum leik þá sé ég ekki eftir því vegna þess að tónleikarnir voru stórkostlegir, bara gæsahúð og allt.  Ég fékk svo tækifæri til að knúsa tónskáldið takk fyrir.

 

9.11.13

Andagift

Í eina viku ein á dag,
efna kannski get.
Staka kemur skapi´ í lag
set ég vísu met.

Renndi bílnum í gegnum snertilausa þvottastöð á leiðinni heim úr vinnu í gær.  Valdi gullþvottakerfið.  Nú þyrfti ég bara aðeins að snurfusa bílinn að innan.  Hvorugur strákanna var heima þegar ég kom heim en Davíð Steinn kom fljótlega.  Oddur Smári var á hljómsveitaræfingu og svo ætlaði hann að hitta nokkra vini og spila með þeim.  Davíð Steinn fór eftir mat að hitta "spilavinina" svo ég hafði plássið allt fyrir mig.  Kveikti á "saumalampanum" og kom mér fyrir í stofunni.  Það endaði reyndar með því að ég saumaði ekki spor.  Horfði eitthvað á imbann og var svo að vafra á netinu.  Fór tiltölulega snemma í háttinn og lauk við síðustu bókasafnsbókina sem ég er með.

8.11.13

Hraðferð á tímanum

Tíminn eins og stormur stríður
staldrar aldrei lengi við.
Hugurinn er vakur, víður
vafrar gegnum ókunn hlið.

Þessi hér að ofan varð til á staðnum í núinu.  Andinn er greinilega að færast yfir mig aftur og virðist ég geta kallað orðin til mín og raðað þeim upp nær fyrirhafnarlaust.
 
Fékk far áleiðis heim úr vinnu í gær með Sillu og "Frímerkinu" eins og hún kallar bílinn sinn.  Annars var ágætis gönguveður en ég labbaði líklega ekki nema tæpan hálfan kílómetra síðasta spölinn heim.  Ég var komin heim á undan strákunum.  Kveikti fljótlega á tölvu og vafraði aðeins um netheima.
 
Eftir kvöldmat settist ég með saumana inn í stofu og fylgdist aðeins með íþróttarásinni.  Um tíu skipti ég svo yfir á DR1 og horfði á Taggart.  Hélt samt áfram að sauma til að byrja með enda er seinni gula rósin óðum að taka á sig fulla mynd, fyrir utan útlínur sem ég byrja ekki á fyrr en allir krossar hafa verið saumaðir.

7.11.13

Jólalög æfð

Það var mjög freistandi að taka strætó heim úr vinnu seinni partinn í gær.  Stutt er út á stoppistöðina við vinnuna og eiginlega jafnstutt heim frá stoppistöðinni á Lönguhlíðinni milli Mávahlíðar og Drápuhlíðar.  Ég lét samt skynsemina ráða og labbaði heim.  Strákarnir fóru til pabba síns svo ég komst upp með að sleppa því að elda nokkuð.  Setti bara sjóðandi vatn út á haframjöl og smá rúsínur og musli með og hafði það í kvöldmatinn handa mér, mjög saðsamt og gott.
 
Aðeins vantaði eina manneskju á kóræfinguna.  Rifjuðum upp nokkur kunnuleg jólalög og einni tvö ný (ég hef amk ekki sungið þau áður).  Annað lagið var reyndar ekki jólalag en mjög flott og útsetningin svo falleg.  Mér er hins vegar fyrirmunað að muna nöfnin á þessum lögum og er ég ekki með nóturnar við hendina til að athuga málið.
 
Kom heim upp úr hálftíu.  Vafraði um á netheimum þar til Kiljan byrjaði á plúsnum.  Þá settist ég inn í stofu og tók fram saumana mína.  Gul rós er óðum að birtast á flöskusvuntu og ef ég held mig að verki klára ég þetta í síðasta lagi í næstu viku, útlínur og allt.

6.11.13

Dagarnir þjóta áfram

Það er eins gott að reyna að njóta hverrar mínútu svo maður missi ekki af augnablikinu.  Mikið skelfing líður tíminn eitthvað hratt.  Föðursystir mín hafði samband við mig í hádeginu í gær og spurði hvort ég gæti setið hjá börnunum hennar um kvöldið.  Ég taldi mig alveg geta það og sá fyrir mér að ég gæti alveg eins saumað þar eins og heima.  Hafði steiktan fisk í matinn í gærkvöldi og mætti svo með farangur til vinkonu minnar rétt fyrir hálfátta.  Var með saumana í saumatöskunni og bók í bakpokanum.  Eldra barnið kom heim úr afmæli stuttu eftir að foreldrarnir voru farnir og hún ákvað strax að hátta en sat um stund í öðrum stofustólnum.  Hún var farin inn í rúm og sofnuð fyrir hálfníu.  Hins vegar gekk bróður hennar mun verr að sofna og ég held að klukkan hafi verið næstum tíu þegar hann sofnaði í stofustólnum en ekki sófanum.  Ég saumaði svolítið en var svo líka aðeins að vafra á netinu.  Foreldrarnir komu heim fyrir ellefu.  Lilja var komin þegar ég skilaði mér heim og við sátum um stund og spjölluðum í stofunni áður en við fórum í háttinn.

5.11.13

Tvær strætóferðir

Lognið ferðast furðu hratt
fjúka lauf um götur.
Hef það fyrir hreina satt
hirða má í fötur.
 
Ég verð að byrja á því að játa leti mína seinni partinn í gær.  Var búin að taka nokkur skref upp Ingólfstrætið um fjögur leytið þegar ég ákvað að taka mér far með stóra gula bílnum.  Kári var eitthvað að stríða mér og það var alls ekki gott að láta hann næða um andlitið á sér.  Líklega hefði ég getað valið að ganga aðra leið heim en strætó varð semsagt fyrir valinu.  Fyrr um daginn hafði ég smessað á frænku mína í Hryggjarselinu til að athuga hvort hún yrði heima um kvöldið.  Fékk jákvætt svar við því svo ég tilkynnti komu mína um kvöldið og að ég myndi taka saumana mína með.  Var með lifur í kvöldmatinn og bauð strákunum upp á soðnar kartöflur og grænar baunir með.  Síðast þegar ég heimsótti frænku mína villtist ég smá af leið þótt ég rambaði svo á réttan stað á endanum.  Í gærkvöldi var ekkert hik á mér né heldur villtist ég.  Ákvað að byrja á hinni gulu rósinni, þótt ég sé ekki búin að sauma útlínur á þessari sem ég saumaði í síðustu viku, og varð vel ágengt þrátt fyrir að við værum einnig að fylgjast með Brúnni hluta af heimsóknartímanum.

4.11.13

Ný vinnuvika hafin

Seint á laugardagskvöldið barst mér sms frá norsku esperanto vinkonu minni þar sem hún sagðist vera með slæmt kvef og ég mætti ráða hvort ég kæmi til hennar á sunnudeginum.  Ég sendi sms til hennar upp úr níu í gærmorgun þar sem ég sagði að ég kæmi alveg óhrædd.  Var mætt hjá henni upp úr hálfellefu.  Hún sagðist vera skárri til heilsunnar heldur en á laugardeginum og við stóðum okkur ágætlega í esperantogrúskinu.  Frá Inger fór ég í aðra bókabúðina í Kringlunni og keypti afmæliskort, penna, lítinn gjafapoka, sudokublað og tvær jólagjafir.  Skrifaði á kortið úti í bíl og setti það ásamt pennanum og útsaumuðu stjörnumerki af sporðdrekanum merktu afmælisbarninu ofan í gjafapokann.  Síðan lá leiðin í Hátúnið þar sem afmælisbarnið ætlaði að fagna með nánustu vinum heima hjá móður sinni.  Ég afrekaði það að mæta fyrst á staðinn og fékk í staðinn að hjálpa til við að undirbúa frekari gestakomur.  Gestir og gestgafar voru alls 12 og var mjög notalegur andi yfir gleðskapnum.  Ein af gestunum hafði unnið á reiknistofunni á árum áður en hún var hætt nokkru áður en ég byrjaði en ég er ekki frá því að ég hafi heyrt minnst á hana í vinnunni minni.  Ég afrekaði það líka að vera síðust af gestunum til að kveðja.  Kom heim á sjöunda tímanum og uppgötvaði að xið hafði ekki staðið við orð sín um að taka dótið sitt.  Það stefnir því allt í það að ég fái að vera "millijónamæringur" í einhverja daga eða vikur því bankalánið fer að detta inn hjá mér og ég greiði ekki xinu út nema hann taki dótið sitt eða þá í síðasta lagi 1. des. skv. samningnum.

3.11.13

Ástæðulaus panik

Ég gleymdi að segja frá smá fáránlegu stresskasti í gær.  Ég setti á mig kínverska "sjaltrefilinn" frá Önnu frænku, fór í flíspeysu og greip úlpuna með mér út í bíl í gær.  Þótt veðrið væri mjög fallegt í gær var kalt og ég ákvað að fara í úlpuna þegar ég fór úr bílnum við Oddakirkju.  Smeygði mér í úlpuna er ég kom út og renndi henni upp á meðan ég labbaði nær kirkjunni.  Þar sem ég staðnæmdist við kirkjuhornið skammt frá kirkjudyrunum ákvað ég að athuga með bíllykilinn.  Í öðrum úlpuvasanum var græni þykki hálskraginn sem mamma prjónaði og gaf mér, húslyklar og vinnulykilinn.  Í hinum úlpuvasanum var varaliturinn minn og poki af extratyggjói.  En hvernig sem ég þreyfaði og þreyfaði fann ég ekki lykilinn.  Hafði ég ekki tekið hann úr svissinum?  Hafði ég kannski gleymt honum í skránni?  Eða hafði ég misst hann á planið er ég smeygði mér í úlpuna?  Mér datt í hug að labba til baka en lét ekki verða af því.  Skyndilega mundi ég svo að ég hafði auðvitað stungið bíllyklinum í vasann á flíspeysunni sem ég var í innanundir úlpunni.

2.11.13

Afmælisdagur systir minnar í dag

Ég fór á bílnum í vinnuna í gærmorgun eins og flesta föstudaga.  Líkt og á þriðjudaginn var átti ég svo líka erindi að reka.  Var mætt á sýsluskrifstofuna um hálftólf til að skrifa undir skjal svo hægt væri að staðfesta skilnað að borði og sæng.  Hafði víst átt að mæta á mánudaginn en ég hélt að það væri nóg að senda xið með undirskrifað samþykki um skiptasamning og stafina mína á bls eitt og tvö (undirskriftirnar voru á síðu 3).  En þetta bjargaðist alltsaman.

Stuttu fyrir sjö í gærkvöldi hringdi  fððursystir mín, Svala vinkona, í mig og bauð mér með sér á tónleika með kvartet Kristjönu Stefánsdóttur í Dómkirkjunni um hálfníu.  Þrátt fyrir stuttan fyrirvara var ég alveg til og sé alls ekki eftir því.  Klukkustundin var ekki lengi að líða og var hún töfrum þrungin.

Í morgun lagði ég tímanlega af stað austur til að fylgja henni Obbu, Þorbjörgu Hansdóttur móður eins bekkjarbróður míns úr grunnskóla.  Var reyndar aðeins of tímanlega og brá á það ráð að stoppa um stund á leiðinni og lesa nokkra kafla í Paganinisamningum eftir Lars Kepler.  Þykk og mikil bók og afar spennandi.  Var mætt við Oddakirkju fyrir klukkan hálftvö og ákvað að það hlyti að vera full kirkja og einnig safnaðarheimilið, það voru komnir svo margir bílar.  Las því meira þar til klukkan sló tvö.  Þá kveikti ég á FM103,5 og hlustaði á útförina og söng á köflum með.  Einssöngvari var Kristjana Stefánsdóttir en að öðru leyti sá kirkjukór Þykkvabæjar-og Oddakirkju um sönginn.  Um það leyti sem athöfninni var að ljúka streymdi fólk úr mörgum bílanna (þ.e. þeir sem ekki fór eða komust fyrir í kirkju eða safnaðaraheimili) til að krossa yfir kistu þessarar heiðurskonu.  Á eftir var erfidrykkja í íþróttahúsinu á Hellu.

Var á Selfossi um fimmleytið og ákvað að kíkja við í Fossheiðinni þótt ég hefði ekki verið búin að hringja á undan mér.  Húsráðendur voru heima og dvaldi ég hjá þeim í góðu yfirlæti fram yfir fréttatíma.  Kom heim á níunda tímanum og var nokkuð forvitin að vita hvort xið væri búinn að sækja dótið sitt í skúrinn.  Það reyndist ekki vera.

1.11.13

Upphaf og endir

Andinn er greinilega kominn í smá frí en það verður bara að hafa það.  Í dag er fyrsti dagur nýs mánaðar en síðasti dagur vinnuvikunnar.  Kláraði loksins að taka saman síðasta dótið frá exinu og annar tvíbbinn fór fyrir mig tvær ferðir út í skúr með kassa og poka.  Bráðum get ég farið að einbeita mér að því að taka betur til í kringum mig, endurraða hlutum og skipuleggja eitt og annað.  Vonandi verður svo skúrinn tæmdur um helgina eins og lofað var.  Að öðru leyti fór gærkvöldið í að sauma gulu flöskurósina.  Nú á ég bara eftir að sauma allar útlínur svo ég er bjartsýn á að geta bætt við tveimur til þremur enn.  Það væri ekki amalegt að geta gefið mömmu tvær gular í jólagjöf í stíl við þær tvær rauðu sem hún fékk á flöskusvuntum í jólagjöf í fyrra.

31.10.13

Aðeins tveir mánuðir eftir af árinu 2013

Við Lilja urðum samferða út úr húsi í gærmorgun, ég til að taka strætó en hún fékk meðbyr upp í háskóla.  Vinnudagurinn leið hratt og örugglega.  Daglegum verkefnum var lokið upp úr eitt en þá var farið að huga að mánaðamótunum, telja lagera og svoleiðis.  Stimplaði mig út á laginu fjögur, amk samkvæmt stimpilklukkunni.  Hugsaði um það í augnablik að taka mér far með strætó heim en ákvað sem betur fer að labba frekar eins og sex síðustu skipti þá daga sem ég hef farið með strætó í vinnuna.  Pabbi hafði á orði við mig um daginn að hann væri feginn að ég væri ekki lengur að labba í myrkrinu snemma á morgnana.  Hann viðurkenndi að hann hefði oft haft smá áhyggjur af mér á þeim tíma sem ég labbaði daglega til og frá vinnu, sérstaklega á morgnana í svartasta skammdeginu.  Um sjö komu sms-skilaboð frá kórstjóranum að því miður yrði hann að fella niður æfingu kvöldsins sökum lasleika.  Ég notaði því kvöldið í að halda áfram að sauma gula rós á flöskusvuntu.  Saumaskapurinn gekk vel og ég er örugglega rúmlega hálfnuð sem gefur mér von um að hafa tíma til að sauma fleiri rósir á fleiri flöskusvuntur.  Varð svo vör við það að það er búið að skuldfæra fyrir þinglýsingargjöldum af láni sem ég er að taka til að borga Davíð út.  Kannski "dettur" lánið svo inn öðru hvoru megin við helgina og ef X-ið stendur við sitt og sækir dótið sitt í skúrinn um helgina get ég afgreitt þetta mál í næstu viku þannig að það er stutt í að ég verði ein skráð fyrir eigninni og eigi hana þá með íbúðalánasjóði og bankanum.  Ekki slæm tilhugsun það.

30.10.13

Vikan hálfnuð

Lenti í basli með útvarpsvekjarann í gærmorgun.  Þegar ég ætlaði að "snúsa" ýtti ég sennilega á takka merktan "sleep" og þá fór útvarpið í gang í fáti mínu kunni ég engin önnur ráð en að taka tækið úr sambandi.  Þannig að ég varð svo að endurstilla útvarpsklukkuna og vekjarann.  Lét hann ekki hringja aftur. Ég var á bíl í gær, eins og flesta þriðjudaga, sem kom sér afar vel því ég þurfti að reka smá erindi og var á tímabili smá "ping-pong" milli vinnu og banka.  Þegar ég hélt svo að allt væri loksins orðið klárt var hringt úr bankanum, smá vesen, en reyndar þurfti ég ekki að fara þriðju og fjórðu ferðina þangað.  Fór beint heim eftir vinnu og hellti upp á fullan kaffibrúsa.  Kaffið var alveg nýtt þegar foreldrar mínir ráku inn nefið í stutta stund.  Gáfu sér tíma fyrir einn bolla og tvö knús (hæ og bæ). Þau rétt misstu af Oddi Smára en hann hafði orðið samferða einum skólabróður sínum og kom seinna heim en oftast.  Hafði ofnbakaðar kjúklingabringur með gulum baunum og gufusoðnu blönduðu grænmeti í kvöldmatinn.  Eftir matinn settist ég með flöskusvuntusaumana mína fyrir framan sjónvarpsskjáinn.  Náði að sauma alveg helling.  Lilja vinkona kom á tíunda tímanum en hún fær afnot af sófanum flest þriðjudagskvöld.  Ég hélt áfram að sauma í smá stund, spjallaði við vinkonu mína og við horfðum á seinni fréttir áður en ég fór inn í rúm.

29.10.13

Saumaklúbbur

Notaði strætó í vinnuna í gærmorgun og labbaði svo heim seinni partinn.  Ákvað að hafa eitthvað fljótlegt í kvöldmatinn. Hafði keypt einn soðinn blóðmörskepp á laugardaginn var og ég steikti hann og sauð kartöflur með.  Strákarnir voru ekki síður hrifnir af þessu eins og kjötsúpunni kvöldið áður.  Þeir hjálpuðu mér að stækka borðstofuborðið og gera það tilbúið fyrir saumaklúbb.  Lilja kom í fyrrafallinu um hálfsjö og ég bauð henni að borða með okkur.  Við vorum svo byrjaðar að föndra um átta.  Ég klippti út nokkrar jólamyndir og var búin að búa til 3 jólakort þegar tvíburahálfsystir mín mætti um hálfníu.  Rúmum klukkutíma seinna var jólakortaafraksturinn orðin 11 stk.  Þá tók ég mig til og undirbjó flöskusvuntu útsaum.  Ætla að sauma amk eina gula rós á eina flöskusvuntu en vonandi næ ég þó að sauma tvær til fjórar, þrjár gular og kannski eina rauða.
 
Gemsinn minn er í einhverju lamasessi og það lítur út fyrir að ég þurfi að útvega mér nýjan.  Það heyrist bara eitt aumingjalegt píp í símanum hvort sem verið er að hringja, senda sms eða ég að láta vekjaraklukkuna hringja.  Davíð Steinn var svo almennilegur að lána mér útvarpsvekjarann sinn um óákveðinn tíma en áður en ég fór að sofa eftir saumaklúbbinn stóðst ég ekki mátið að horfa á 6. þáttinn um Sögu og Martin á tímarásinni.

28.10.13

Allt að ganga upp

Var mætt upp í kirkju rétt fyrir hálfeitt í gær.  Trommarinn og bassaleikarinn voru að æfa með organistanum.  Þeir tveir fyrrnefndu fengu svo smá kaffipásu á meðan kórinn hitaði upp.  Svo var æft fyrir jazzmessuna.  Hálftíma fyrir messu vorum við klár og fengum okkur kaffi og klæddum okkur í grænu "kórkjólana".  Messan gekk mjög vel fyrir sig en ég hefði viljað sjá fleiri kirkjugesti.  Kom heim um hálffjögur.  Hálftíma síðar límdist ég fyrir framan skjáinn og horfði á landsleik í kvennahandboltanum sem endaði því miður með tapi með minnsta mun.  Hafði kjötsúpu í kvöldmatinn og voru synirnir mjög ánægðir með það.
 
er búið að skrifa undir samþykki um veð í íbúðinni til að ég fái afgreitt lánið og ég er meira að segja búin að fá afhenta húslyklana af útihurð og íbúð.  Mér skildist á X-inu að hann myndi taka dótið sitt um næstu helgi og um leið það er búið og búið er að afgreiða lánsupphæðina til mín mun ég borga hann út.  Þannig að það er líklegt að í næsta mánuði eða síðasta lagi í desember muni ég eiga íbúðina ein ásamt íbúðalánasjóði og bankanum.  Ekki slæmt það!

26.10.13

Hve tíminn flýgur hratt

Fékk að hætta vinnu um tvö í gær.  Fór beint í bankaútibúið mitt til að skrifa undir gögn til að fá lán sem er búið að samþykkja.  Í ljós kom að Davíð þarf að samþykkja að ég fái lán út á veð í íbúðinni.  Náði ekki í hann í gær svo hugmyndir mínar um að fagna þessum áfanga runnu út í sandinn.  Skrapp í Kringlusafnið og skilaði þremur bókum.  Nú brá svo við að ég tók enga bók heim með mér í staðinn en ég er með þrjár frekar þykkar bækur sem ég þarf að skila eftir tæpar þrjár vikur.  Þurfti ekki að hafa fyrir því að hugsa um kvöldmat.  Strákarnir fóru nefnilega á spilakvöld og ég borðaði bara afganga.

Var mætt til norsku esperantovinkonu minnar upp úr klukkan hálfellefu í morgun.  Eftir að hún hafði boðið mér upp á að borða flauelsmjúkan hafragraut með kanel út á tókum við kaffið með okkur í stofuna og grúfðum okkur yfir nokkra esperanto leskafla.  Stoppaði samt ekki lengi að þessu sinni.  Var komin í Krónuna einum og hálfum tíma síðar.  Oddur Smári gekk frá vörunum úr þessum tveimur pokum sem ég kom með heim úr búðinni.  Um eitt hringdi ég í Böddu, 91 árs gamla mágkonu móðurömmu minnar og spurði hvort hún væri heima.  "Nú ég er að tala við þig úr heimasímanum mínum!", var svarið.  Ég var líka eiginlega að meina hvort hún væri frísk og hvort hún væri nokkuð að fara.  Líklega hefði verið best að spyrja hvernig ég sækti að henni.  Ég skutlaði trommaranum upp í efra Breiðholt og fór svo í heimsókn til Böddu minnar því hún var ekkert að fara og alveg til í að fá mig í heimsókn.  Hún hafði meira að segja á orða hve langt væri síðan síðast þegar ég knúsaði hana hæ.

25.10.13

Enn á ferðinni

Þessi föstudagspistill hefst ekki á ferskeytlu.  Ákvað frekar að ljúka við að ryðja úr mér fyrir klukkan átta.  Labbaði áleiðis heim eftir Skúlagötunni seinni partinn í gær.  Kom við í Hárhorninu hjá tengdapabba systur minnar og lét hann hafa nokkrar vikur af vikunni.  Keypti mér svo tvö strætókort á Hlemmi áður en ég labbaði Rauðarárstíginn, þvert yfir Klambratún og Lönguhlíðina heim.  Hafði ofnbakaða bleikju í matinn um hálfsjö og var svo komin upp í Grafarholt rúmlega sjö til að passa tvö systkyni á meðan að foreldrarnir voru á fundi.  Passið gekk alveg glimrandi vel og voru bæði börnin sofnuð um níu.  Horfði á íþróttarás sjónvarpsins þótt ekki væri verið að sýna frá leik Valsmanna.  Foreldrarnir skiluðu sér heim upp úr tíu og ég var komin heim til mín um hálfellefu.  Í dag stendur til að skrifa undir bankalánið og þá styttist mjög í það að ég geti greitt fyrrverandi manninn mínn út úr íbúðinni.  Ég þarf ekki að borga fyrr en í síðasta lagi 1. des. en ætla að bjóða honum að borga fyrr ef hann losar skúrinn um eða fyrir næstu mánaðamót.  Ég er sko aldeilis komin á beinu brautina og veit að ég á eftir að standa mig.   Góða helgi!

24.10.13

Æft fyrir næstu messu

Fékk mér far með stóra gula bílnum í vinnuna í gærmorgun.  Vinnudagurinn leið mjög hratt.  Lét ekki smá úrkomu aftra mér frá því að labba heim.  Annar tvíburinn sendi mér skilaboð um að hann færi til pabba síns eftir skóla.  Ég ákvað að hætta ekki á það að þvottavélin myndi stríða mér svo ég yrði aftur sein á kóræfingu.  Kórstjórinn sendi póst um miðjan dag þar sem hann tók fram að æfingin yrði bara til níu og lét fylgja með upplýsingar um það sem syngja á í jazzmessunni n.k. sunnudag.  Sumir kórfélagar misskildu víst póstinn og héldu að æfingin byrjaði ekki fyrr en klukkan níu.  Þeir kórfélagar sem mættu um níu misstu af æfingunni en settust með okkur í kaffi.

23.10.13

Útstáelsi

Bíllinn var notaður milli heimilis og vinnu í gær og þáðu tvíburarnir farið í skólann þrátt fyrir að vera þá mættir heldur snemma eða amk tuttugu mínútum fyrir fyrsta tímann.  Fór beint heim eftir vinnu og fljótlega eftir að ég kom heim kíktu mamma og pabbi, sem voru að koma úr jarðaför, við í stutta stund.  Aðalerindi þeirra var að sækja kápuna hennar mömmu sem ég hafði farið með í Saumnálina og sótt þangað þegar búið var að setja nýjan rennilás í (svartan með semelíusteinum).  Mömmu fannst þetta ekki nógu vel gert og sagðist ætla að fara og kvarta við tækifæri.  Hitt erindið var að sjá breytingarnar á íbúðinni eftir að nánast er búið að moka út kallinum.
 
Um átta skrapp ég í heimsókn til konu sem ég var að vinna með á árunum 2000-2005.  Við höfum haldið sambandi og vináttunni þótt mislangt líði á milli heimsókna og símtala.  Hún var reyndar ekki komin úr súmbatíma þegar ég mætti (misskildi eitthvað tímasetninguna) en synir hennar hleyptu mér inn og kötturinn á heimilinu tók vel á móti mér.  Það leið ekkert löng stund þar til vinkonan kom heim og áttum við notalega kvöldstund saman.  Ræddum um alla heima og geima.  Sótti mikinn styrk og ró til hennar og ég vona að ég hafi ekki stolið neinni orku frá henni.  Kvaddi upp úr tíu með loforði um að láta ekki líða of langt þar til næst.
 
En ég áttaði mig á því í gærkvöldi að ég hef ekki snert á handavinnunni minni í nokkra daga einhverra hluta vegna.  Var aðeins búin að hugsa um að taka pásu frá "Lost nomore" og sauma nokkrar flöskusvuntur en eins og fyrr segir hef ekki snert á nál óvanalega lengi...

22.10.13

Gengið heim úr vinnu

Tók mér far með strætó í vinnuna í gærmorgun.  Það er afskaplega þægilegt hversu nálægt vinnustaðnum stóri guli bíllinn stoppar.  Þarf aðeins að fara yfir götuna (Kalkofnsveg) og þá er ég nánast komin.  Vinnudagurinn leið hratt og rétt rúmlega fjögur var ég komin út.  Veðrið hjálpaði til við að ýta á eftir mér að ganga heim yfir skólavörðuhæðina.  Þetta er svona hálftíma hressandi göngutúr.  Kveikti á tölvunni er ég kom heim en fór svo fljótlega að sinna þvottamálum.  Karfan fylltist alveg um helgina svo ég þarf líklega að þvo þvotta á hverjum degi næstu daga til að vinna á óhreinatausfjallinu, en það er nú alveg í lagi.  Hafði lasanja í kvöldmatinn og hringdi svo í föðursystur mína.  Hún var reyndar ekki heima en hringdi til baka stuttu seinna.  Það varð úr að ég skrapp í heimsókn til hennar.