Morgun-"fiskur"/morgunhani eða hæna

Aftur var ég snemma á fótum í gærmorgun. Klukkan var svo heldur ekki orðin hálfátta þegar ég var mætt í vinnuna. Sá sem er í afgreiðslunni og hleypir fólki inn tók svo öll kerfi af þannig að ég byrjaði á því að fara niður í kortadeild að kveikja á vélinni og þegar ég kom upp aftur opnaði ég seinni lásinn af öryggishurðinni inn í hvelfinguna uppi. Eftir að hafa fyllt á vatnsflöskuna og fengið mér smá kaffi fór ég niður á ítroðsluendann á kortavélinni. Fyrrum fyrirliði fór á móttökuendann og fyrirliðinn í bókhaldið. Sú fjórða er flogin með fyrsta hópnum af þremur í afmælisárshátíðarhelgarferð. Í morgunkaffinu var forstjóri RB mættur á svæðið og sat með okkur á miðvikudagsfundinum. Þar var boðið upp á heitan brauðterturétt, kalda brauðtertu og einnig venjulegt brauð. Meðan farið var yfir okkar ferð, þá þriðju af þremur, sem er á aðeins annan stað og styttri en hinar tvær svo ekki verði þjónusturof í Seðlaverinu og kortaframleiðslunni. Daglegri framleiðslu lauk um tólf. Tókum góða matarpásu og fyrirliðinn hjálpaði mér að ganga frá í eldhúsinu. Fórum niður aftur rétt fyrir hálftvö. Það var eftir að pakka smá en við settum líka endurnýjun af stað. Náðum aðeins að klára rúmlega helminginn af þessum 700 kortum sem voru eftir því um hálfþrjú leytið fór prentarinn að flækja og láta öllum illum látum. Hættum framleiðslu áður en klukkan varð hálffjögur og gengum frá. Ég var komin í Laugardalinn stuttu fyrir fjögur. Fór tvisvar sinnum 4 mínútur í kalda pottinn, synti 300 metra á milli og endaði svo á góðu gufubaði áður en ég fór upp úr og heim. Hringdi í Ellu vinkonu, horfði á einn þátt og fréttir og skrapp svo með Davíð Steini á rúntinn milli klukkan átta og níu. 

Hittingur fyrrum fimm kortadeildarsamstarfskvenna

Enn og aftur var ég vöknuð eldsnemma. Mætti í vinnu um hálfátta. Höfðum sömu verkaskiptingu nema við fyrirliðinn höfðum endaskipti á framleiðsluvélinni og var ég á móttökuendanum. Svo virðist sem slökknað hafi á vélinni daginn áður hvernig svo sem það gerðist. Engar nýjar skrár höfðu því komist yfir á vélina svo hafa þurfti samband við okkar helsta tæknimann. Í millitíðinni þurftum við að endurræsa vélina frá grunni en gátum svo framleitt smá skrá úr endurnýjun. Dagleg framleiðsla var komin í gang um hálfníu og þrátt fyrir að fyrsti skammtur væri yfir 190 stk og meira en 30 lotur var bæði framleiðslu og talningu lokið á innan við klukkutíma. Byrjuðum því aðeins á daglegri debetframleiðslu áður en við fórum í morgunkaffi. Debetframleiðslunni lauk  skömmu fyrir ellefu og þá var settur í gang einn partur af þremur í stærstu endurnýjunarskránni. Ég var leyst af rétt fyrir hálftólf. Maturinn kom um það leyti og ég fékk mér að borða áður en ég mætti til Nonna í Kristu Quest um tólf. Hafði fengið klippitímanum flýtt um þrjá daga og fjóra klukkutíma. Fyrir vikið bað ég hann einnig um að þvo mér um hárið. Hann tók ca 2 cm af hárinu en mestur tíminn fór í að þurrka þennan þykka hadd. Bókaði næsta tíma um miðjan september og fjárfesti í nýjum bursta sem er merktur stofunni. Var komin í vinnuna aftur um hálfeitt, beint í uppvaskið. Sú fjórða er með mér í þeirri vakt af því að við erum fyrstar í stafrófinu. Hún var byrjuð að tæma og skola. Ég hélt áfram að tæma ílátin og þurrkaði af öllum borðum. Fékk mér svo einn kaffi bolla áður en við fyrirliðinn fórum aftur í framleiðsluna, kláruðum stærri endurnýjunina (sem fer í póst í dag) og byrjuðum aðeins á endurnýjuninni sem kom 3. mars sl. Vorum búnar að ganga frá deildinni um þrjú. Ég var komin heim um hálffjögur. Hringdi í pabba og tók því rólega í um klukkustund. Þá klæddi ég mig upp í litríka lopapeysu undir nýju sumarkápuna og labbaði á nýju skónum yfir í Kringluna á Finnsson bístró þar sem ég hitti þær tvær sem sagt var upp í október sl. og einnig hinar tvær sem eru enn í teyminu og voru partur af fimm manna teymi síðast liðin nokkur ár. Rétt fyrir sjö fékk ég far heim með fyrrum fyrirliða, svo ég myndi ekki ofreyna mig á nýju skónum. Þarf að ganga þá til en má ekki fara of geyst í það ef þeir eiga að nýtast mér um næstu helgi. Þetta eru samt alveg einstaklega vandaðir, flottir og góðir skór.

Nýjir skór, "new feet"

Ég var vöknuð um fimm leytið í gærmorgun og þurfti að grípa í símann til að senda sjálfri mér póst með þremur nýjum limrum. Klukkutíma seinna var ég komin á fætur, þó á eftir N1 syninum, og setti þessar limrur bæði á ljóðvefinn minn og á vegginn. Var mætt í vinnu um hálfátta. Kerfin voru tekin af fljótlega og ég fór niður í kortadeild að kveikja á vélinni. Þegar ég kom upp aðstoðaði ég við að aflæsa hvelfingunni uppi með talnakóðanum mínum. Svo var kominn tími til að fylla á vatnsflöskuna, fá sér kaffi og prjóna nokkrar lykkjur í nýjustu tuskunni. Ég hafði fengið hugljómun varðandi verkaskiptingu og bar hana undir fyrrum fyrirliða, þá sem sér um að setja okkur inn í innlánin, þá fjórðu og svo fyrirliða kortadeildarinnar. Það var svo vel tekið í þessa hugmynd hjá mér að verkefnin skiptust alveg eins og ég sá fyrir mér. Ég og fyrirliðinn sáum um alla framleiðslu í gær, fyrrum fyrirliði fékk að leiðsögn og að prófa innlánin og sú fjórða sá um bókhaldið. Hún sat við mitt skrifborð og þær tvær uppi gátu svo aðstoðað hvor aðra. Daglegri framleiðslu lauk um tólf. Umslagavél og prentari í mun betra "skapi" heldur en á föstudaginn var. Ég og sú fjórða eigum kaffistofuvaktina þessa vikuna. Hún þurfti að leysa afgreiðslustarfsmanninn af en hann og fyrirliðinn hjálpuðu mér með frágang. Milli eitt og þrjú voru endurnýjuð hátt í átta hundruð kort. Klukkan hálffjögur var ég komin í Nauthólsvík og stakk mér smá stund í -0,8°C sjóinn. Um hálffimm var ég komin í verslunina Steinar Waage þar sem ég keypti mér nýja og mjög vandaða skó. Milli fimm og hálfsjö var ég í heimsókn hjá fyrrum samstarfskonu vestur í bæ. Á meðan ég var hjá henni hringdi danska frænka mín og nafna. Ég tók símann en þar sem ég var í heimsókn urðum við frænkur sammála um að ég skyldi hringja til baka um kvöldið. Þá spjölluðum við frænkur saman í um klukkustund.

Ný vinnuvika

Aftur var ég vöknuð og komin á fætur um hálfátta. Tæpum tveimur tímum seinna var ég komin í Laugardalslaugina. Byrjaði á kalda pottinum áður en ég synti 500 metra, allt á bringunni. Var í minni annarri ferð í þann kalda þegar kalda potts vinkona mín mætti á svæðið. Saman fórum við þrjár ferðir í viðbót og svo í gufuna. Vorum komnar í sjópottinn þegar ein systir hennar og nafna mín mætti á svæðið. Fór upp úr um hálftólf. Kom við í AO við Sprengisand. Ég gerði tilraunir á tveimur dælum en tókst ekki að dæla á bílinn. Kannski var ég bara of óþolinmóð. Brunaði alla leið í Kaplakrika og eftir smá meira vesen tókst loksins að fylla á tankinn. Kannski var of kalt þannig að erfiðlega gekk að lesa lykilinn, en hvað sem var að þá gekk þetta loksins. Kom heim um tólf leytið. Eftir hádegisfréttir hellti ég mér upp á sterkt kaffi og fékk mér eitthvað snarl með. Um tvö leytið skruppum við Davíð Steinn aðeins á rúntinn. Hann sækir í að keyra um í Hafnarfirði en leiðin lá núna upp hjá Vífilstöðum og utarlega í Heiðmörk. Komum heim eftir uþb klukkutíma rúnt. Oddur hafði verið að fylgjast með fyrri hálfleikjunum í þremur leikjum í enska boltanum og gaf mér skýrslu. Horfðum svo aðallega á Man. Utd. leikinn sem fór 0:0. Fljótlega eftir þann leik var seinni landsleikurinn við Tékka í handbolta karla, heimaleikur þar sem strákarnir svöruðu kallinu heldur betur eftir slaka leikinn ytra á miðvikudaginn var. Þá var reyndar vörn og markvarsla alveg ágæt en sóknin mjög léleg. Í gær gekk allt upp þrátt fyrir að dómarar héldu ekki alveg sömu línu báðum megin vallar í dómgæslunni. Fyrri leikurinn tapaðist með fimm mörkum en leikurinn í gær vannst með 9. Flest gekk upp og það var kátt í höllinni.

Sunnudagur

Ég var komin á fætur um hálfátta í gærmorgun. Eftir rúmlega klukkutíma vafr á netinu tók ég aðeins í prjónana. Er að prjóna tusku úr bókinni eftir mynstri úr bókinni sem ég fékk í jólagjöf sem nefnist tvöfaldur skái. Eftir nokkrar umferðir náði ég í bók af safninu sem ég kom heim með úr síðustu heimsókn. Þetta er ekki þykk bók, gefin út 1976 eftir íslenskan höfund og heitir; Skipstjórinn okkar er kona. Um hálfellefu var ég komin vestur í bæ til norsku esperanto vinkonu minnar. Ég var með esperanto dótið meðferðis en ekkert varð úr slíkum æfingum heldur vorum við að spjalla saman í rúman klukkutíma um allt og ekkert og lífsins gang. Ég kom heim aftur rétt fyrir tólf. Sótti þvott niður á snúrur en þar sem ég var ekki viss um hvort annar hvor sonurinn ætlaði að nýta þvottavélina og mér lá ekkert á setti ég í hana fyrr en seinna um daginn, eftir að bræður voru búnir í Sorpuferð og farnir í heimsókn til pabba síns og fjölskyldu hans. Ég horfði á leik í enska, Borumouth-Liverpool 1:0, og brot úr öðrum leikjum dagsins. Prjónaði meira, kláraði bókina, horfði á þætti úr sarpinum og sinnti einnig hluta af því sem ekki má skrifa um. Skreið upp í rúm um hálfellefu, stuttu áður en bræður komu heim. Byrjaði á annarri bók af safninu; Sannleiks verkið eftir Clare Pooley.

Sjórinn 0,9°C í gær

Annan morguninn í röð var ég komin á fætur um hálfsex. Tveimur tímum seinna var ég komin í vinnu. Fyrirliðinn var mætt og sagðist vera búin að taka kerfið af niðri. Hún var að taka saman fyrstu framleiðslutölur svo ég stökk niður til að kveikja á vélinni. Ljósið fyrir ofan hurðina inn í hvelfingu var slökkt svo ég tók líka segularminn af. Þegar ég opnaði inn í kortadeild heyrðist mér eins og vekjaraklukka færi í gang og var að spá í hvort það væri sími á svæðinu en þetta var þá niðurteljarinn á öryggiskerfinu. Kerfið hafði ekki farið af framleiðsluherberginu. Ef ég hefði vitað þetta hefði ég náð að koma mér út áður en allt fór í gang. En það var svo sem ekkert hættulegt. Sá sem er í afgreiðslunni uppi slökkti á þessu og hafði samband við securitas. Til klukkan tíu var ég að að opna innleggspoka frá fyrirtæki sem er staðsett út um allan bæ en ég var með pokana úr Árbænum. Vel gekk að skanna, slá inn tölur, opna pokana, telja og skrá seðla og klink. Reyndar tókst mér að klippa í einn seðil þrátt fyrir að reyna alltaf að fara mjög varlega. Sá seðill og annan sem var smá sjúskaður tók ég til hliðar. Ég lærði svo hvernig klinkið er meðhöndlað sem og svona seðlar sem teknir eru til hliðar. Eftir kaffi fór ég yfir nokkra bunka sem önnur hafði sett inn. Um hádegi frétti ég að kortavélin, aðallega prentari og umslagavél voru að haga sér mjög illa í þessum kulda. Ég fór því niður þegar ég var búin að borða, leysti þá fjórðu af í mat og svo fyrirliðann og var svo með þeim að klára daginn. Dagurinn var alls ekki stór en það sem venjulega er hægt að komast yfir á ca tveimur tímum tók þrisvar sinnum lengri tíma. Við komumst því ekkert í að endunýja og vorum alveg til klukkan hálffjögur að klára. Hitastigið í herberginu var orðið nokkuð þokkalegt um það leyti og vonandi verður það til þess að allt gangi betur fyrir sig í næstu viku. Eftir vinnu fór ég beinustu leið í Nauthólsvík. Svamlaði í sjónum í ca þrjár mínútur og var svo tæpar tíu mínútu í heita pottinum áður en ég fór upp úr. Kom við í búðinni Belladonna áður en ég fór heim og keypti mér eins konar sumarkápu, fyrir íslenskt sumar. Notaði jólagjafakortið frá pabba og bætti svo við af bleika kortinu það sem vantaði upp á. 

Snemma á fætur

Klukkan var rétt byrjuð að ganga sex í gærmorgun þegar ég glaðvaknaði. Gerði tilraun til að kúra mig niður en hugurinn var kominn á fullt og spenningurinn fyrir nýjum verkefnum í vinnunni varð til þess að það þýddi ekki neitt. Klæddi mig því fljótlega í rólegheitum, fann til sunddótið, burstaði tennur, fékk mér sopa af þorskalýsi og notaði svo afganginn af tímanum til að vafra um á netinu. N1 sonurinn kom fra um hálfsjö og kvaddi tíu mínútum seinna. Ég lagði ekki af stað fyrr en rúmu hálftíma á eftir honum. 

Ég og fyrirliðinn byrjuðum á vélinni. Hinar tvær þurftu að reka smá erindi í byrjun dags en fyrrum fyrirliði fór í bókhaldið þegar hún mætti og sú fjórða leysti mig af rúmlega níu. Þá var visaframleiðslu lokið sem og talningu á þeim tegundum sem voru framleiddar. Ég fór upp og hitti á fyrirliðann yfir seðlaverinu því meiningin var sú að ég fengi að kynnast innlánunum. Ég fékk samt að byrja á því að fara í kaffi. Eftir kaffi Var ég skilgreind inn í kerfið. Tölvan mín var næstum tilbúin en það vantaði smá upp á að ég gæti skráð mig inn í fyrstu tilraun. Það tók ekki langan tíma að kippa því í liðinni og ég komst inn í næstu tilraun. Svo fékk ég alls konar dót í kringum mig og skildi þá fyrst hvers vegna skrifborðið mitt er svona stórt. Ætla ekkert að fara nákvæmlega út í málin skref fyrir skref. Allt gekk þokkalega fyrir sig en ég gerði þó ein mistök sem ekki komu fram fyrr en eftir á en hægt var að laga áður en var sent út. Fyrirliði seðlavers sagði að það væri bara til að læra af þeim og ég fékk í leiðinni að sjá mig í mynd í aðgerð sem sýndi hvað gerðist. Mikið sem ég geifla mig svipað og pabbi fyrir framan skjáinn. Það er bara fyndið að sjá það. Eftir hádegi fékk ég að læra hvernig maður fer yfir bunka hjá öðrum. Um hálfþrjú skrapp ég niður í kortadeild svo fyrirliðinn væri ekki ein þar. Fyrrum fyrirliði þurfti að fara og sú fjórða var í starfsmannasamtali. Kortavélin hafði víst mótmælt harðlega að ég lét mig hverfa fyrr um morguninn. Þær náðu aðeins að framleiða þetta daglega. Fyrirliðinn var búin að slökkva á vélinni og var að pakka og það átti eftir að útbúa póstmiða með því sem fer í póst í dag. Einnig átti eftir að telja og tæta. Ég fór upp með pakkið og póstinn og náði að útbúa póstmiðana áður en komið var að mér í starfsannasamtalinu. Sú fjórða fór beinustu leið niður í kort að hjálpa til við að telja og ganga frá vögnum inn á lager og loka deildinni. Viðtalið átti að taka um hálftíma en tíminn leið svo hratt yfir góðu spjalli við framkvæmdastjórann að klukkuna vantaði tuttugu mínútur í fjögur þegar við settum punktinn yfir i-ið í spjallinu. 

Ég fór beinustu leið yfir í Laugardalslaug. Hringdi í pabba áður en ég fór inn í klefa. Kalda potts vinkona mín var mætt og búin að fara eina ferð í kalda. Saman fórum við 4x4-5 mínútur og enduðum á góðu gufubaði. 

Sund og sá kaldi á köldum dögum

Í gærmorgun vaknaði ég við vekjaraklukkuna sem gerist alveg stöku sinnum. Var í miðjum draumi sem var gott að vakna af því það sem mig rámar í var að það stefndi í eins konar þrátefli í draumalandinu. Og þá er nú best að vakna bara og fara að takast á við daglega lífið. Var mætt í vinnu um hálfátta. Ég og fyrrum fyrirliði tókum að okkur framleiðsluna og var ég á móttökuendanum. Fyrirliðinn og sú fjórða sáu um bókhaldið, talningar og rannsóknarvinnu. Sú fjórða sá líka um að pakka. Daglegri framleiðslu lauk rétt rúmlega tólf. Áður en við fórum aftur niður eftir hádegið fengum við einn af snillingunum í net- og uppsetningarmálum úr K2, sem var á svæðinu, til að undirbúa tölvurnar okkar undir nýtt kerfi. Þá fer loksins að koma að því að við fáum að fara að kynnast betur á eigin skinni í hverju sum að störfum seðlaversins felast. Vorum komnar niður um hálftvö. Kláruðum talningu á seinni kortavagninum áður en við dembdum okkur í endurnýjun. Framleiddum ca einn fimmta af stærri endurnýjuninni sem bíður á vélinni. Hættum rétt fyrir þrjú og gengum frá deildinni. Ég var komin á planið við Laugardalslaugina um hálffjögur. Þar hitti ég kalda potts vinkonu mína sem var reyndar ekki að fara í sund heldur var á göngu um hverfið. Hún er ekki að kenna á miðvikudögum og fer þá í pottana um hádegið. Ég var komin heim um fimm eftir að hafa synt 300m, farið 3x3-4 mín í kalda, eina ferð í heitasta og endaði á góðu gufubaði.

Í framleiðslugír

Ég var mætt í vinnu á svipuðum tíma og venjulega. Fór niður í kortadeild að kveikja á vélinni. Var að skoða fyrstu tölur þegar ég var spurð hvort ég gæti opnað ytri lásinn á hvelfingunni uppi. Fyrrum fyrirliði var mætt og tók við töluskoðuninni. Ég opnaði seinni talnalásinn (get líka byrjað), það þarf alltaf tvo til.  Svo fór ég inn í kaffi stofu með vatnsbrúsann og prjónana. Er byrjuð á tusku eftir munstri sem nefnist fjöllin. Fyllti á flöskuna og fékk mér smá kaffi. Vorum mættar allar fjórar stuttu fyrir átta. Ég lagði til að fyrirliði og fyrrum fyrirliði væru uppi og ég og sú fjórða í framleiðslunni. Það var samþykkt. Leyfði þeirri fjórðu að velja á hvorum endanum hún væri. Hún valdi móttökuendann. Allt gekk ágætlega en það komu þó ekki umslög sem okkur vantaði fyrr en um hádegi og það er enn hráefnisskortur í einni tegund en höfum fengið beiðni og leyfi til að framleiða á annað plast. Það komu 2x10 kassar (fyrir tvo banka) af umslögum á meðan við vorum í mat. Kláruðum daglega framleiðslu og allt pakk rétt rúmlega tvö. Kláruðum svo eina endurnýjun í debetinu, það voru reyndar bara tæp 200 kort eftir. Lögðum ekki í að byrja aðeins á kreditendurnýjun því þá hefðum við líklega klárað formin. Þau eru í pöntun og koma fljótlega en það þarf að eiga einhver fyrir daglega framleiðslu. Klukkan var að verða þrjú þegar við vorum búnar að ganga frá niðri og senda 6 póstkassa upp með annarri lyftunni. Í einum af þessum sex kössum var reyndar póstur í öryggisumslögum sem fara út í útibú í dag. Var komin í kalda pottinn um hálffjögur eftir að hafa hringt í pabba skömmu áður. Synti 300 metra og fór 2 aðrar ferðir í pottinn, eina í heitasta, eina í sjópottinn og endaði í gufunni. Ekkert stæði var í götunni þegar ég kom heim um fimm, kannski vegna þess að það var opið hús í kjallaranum. Lagði því bílnum í Blönduhlíð.

Kæling í sjónum er góð

Ég var mætt í vinnuna rétt upp úr klukkan hálf átta. Fyrst úr kortadeildinni. Byrjaði á því að fara niður og kveikja á kortavélinni. Fyrrum fyrirliði var mætt þegar ég kom upp aftur. Ég opnaði seinni læsinguna á ytri hurðinni á hvelfingunni uppi áður en ég fór svo inn á kaffistofu að fylla á vatnabrúsann, fá mér fyrsta kaffibollann og grípa aðeins í prjónana mína. Til stóð að ég myndi fara að læra inn á eitt af því sem fer fram í seðlaverinu, eitthvað sem er kallað innlán. En þar sem verið er að færa jcc kerfin alfarið yfir í rb og það ferli er á síðustu metrunum var ákveðið að fresta því námi fram í miðja viku. Fyrirliðinn bað mig því um að vera í bókhaldinu í staðinn. Hún sjálf fór í að taka saman tölur yfir ónýt kort og sinna ýmsu öðru. Sú fjórða og fyrrum fyrirliði tóku að sér framleiðsluna. Allt gekk ágætlega fyrir utan smá skort á hráefni í einu tilviki og umslögum í öðru. Hættum vinnu um þrjú. Ég fór beinustu leið í Nauthólsvíkina og dembdi mér í 3,6°C sjóinn í tæpar tíu mínútur og annað eins í heita pottinn.

Kuldakast í kortunum

Vaknaði við vekjaraklukkuna stuttu fyrir klukkan hálfátta í gærmorgun. Fyrsta sem ég hugsaði um leið og ég stillti á blund voru vangaveltur um hvers vegna ég hefði stillt á mig klukku á sunnudagsmorgni. Áður en vekjarinn hringdi aftur var ég búin að slökkva á honum og dreif mig á fætur. Fyrstu þrjú korterin vafraði ég aðeins um á netinu en ég var komin í sund um níu leytið. Var búin að fara tvær ferðir í þann kalda, synda 400 metra á bakinu og flatmagaði í sjópottinum þegar kalda potts vinkona mín mætti á svæðið. Saman fórum við fjórar ferðir í kalda, eina í gufu og svo hittum við á systur hennar í sjópottinum. Ég stoppaði stutt við þar. Fór upp úr um ellefu og þvoði mér um hárið. Einkabílstjórinn var kominn á fætur þegar ég kom heim um hálftólf. Ég hellti upp á könnuna og tók því rólega fram yfir eitt. Þá tók ég saman föt sem ég nýti ekki lengur eða eru orðin slitin. Það sem ég tók til komst í tvo gráa höldupoka. Gæti líklega vel fyllt einn til tvo svara ruslapoka í viðbót. Við Oddur skruppum svo vestur á Granda í Krónu og Sorpuferð með smá innkaupalista frá Davíð Steini sem er lasinn þessa dagana.  Vorum innan við klukkutíma í þessum erindagjörðum. Afgangurinn af deginum fór í fótboltaáhorf (Liverpool-Man. Utd. 7:0), prjónaskap og þáttaáhorf. 

Ekkert útstáelsi í gær

Ég var komin á fætur um sjö leytið í gærmorgun, skipti um á rúminu og tók til sunddótið. Það endaði svo með því að ég fór ekkert út í gær, aðeins þrjár ferðir í þvottahúsið. Ein þvottahúsferðanna var reyndar vegna tímsskynsleysi því þá voru enn rúmar tuttugu mínútur eftir af þvottaprógramminu. Þessi innivera kom að hluta til vegna mála sem ekki má skrifa um og kalla má tiltekt og þrif. En ég greip líka í bók og prjóna. Vafraði á netinu (óvenju lítið samt), hringdi í pabba og horfði á fótbolta og þætti. Bókin sem ég á enn eftir um 100 bls. af er sú eina sem ég skilaði ekki inn í ferðinni á safnið í liðinni viku; Elskhuginn eftir Helene Flood. 

Sjórinn 4,4°C í gær

N1 sonurinn hélt kyrru fyrir í gær. Hann var orðinn eitthvað slappur í fyrradag og ég vissi af því að hann ætlaði að taka amk einn heimadag af helgarvinnuvaktinni og var búinn að láta vita af því. Ég var mætt í mína vinnu upp úr klukkan hálfátta. Fyrirliðinn og ég tókum að okkur vélarvaktina, hún fór á móttökuendann og pakkið en ég á ítroðsluendann. Sú fjórða var í bókhaldinu og fyrrum fyrirliði í reikningagerðinni. Daglegri framleiðslu lauk um hádegi og eftir hádegi var ákveðið að klára frágang og talningar og hætta snemma. Ég var farin út úr húsi um tvö og fór beinustu leið í Nauthólsvík. Það var stillt veður, fjara en þó ekki eins langt út í dýpi og á mánudaginn. Svamlaði um í fimm mínútur og var korter í heita pottinum á eftir áður en ég fór upp úr og heim. Bankaði upp á hjá Davíð Steini til að athuga með heilsuna hans. Hann sagðist hafa, að ráði spjalls á heilsuveru, skroppið á heilsugæsluna til að láta taka sýni til að athuga hvort hann væri með streptokokka. Hann átti að fá niðurstöðu um kvöldið. Hann var með einhverjar kommur en á fótum og að spila í tölvunni. Niðurstaðan reyndist sem betur fer neikvæð en samt skynsamlegast að halda sig heima við svo það lítur út fyrir að það verði engin skutlvakt um helgina.

Skattframtalinu skilað inn

Ég var mætt í vinnu um hálfátta. Byrjaði á því að fara niður og kveikja á kortavélinni. Þegar ég kom upp aftur snéri ég mér að því að undirbúa fyrstu tölur. Opnaði einnig ytri dyrnar á hvelfingunni uppi. Það þarf tvo til og get ég bæði byrjað og verið númer tvö. Aftur á móti getur sú sem opnaði með mér bara byrjað, eitthvað hefur klikkað þegar hún var stillt inn. Síðan var kominn tími til að fylla á vatnsflöskuna, fá sér fyrsta kaffibollann og grípa aðeins í prjónana. Ég var semsagt í bókhaldinu fram að hádegi og fyrirliðinn og fyrrum fyrirliði á vélinni.  Daglegur verkefnum lauk um hádegið en næsti skammtur af endurnýjun var kominn og búið að hlaða inn á vélina. Ég skipti við fyrrum fyrirliða, hún fór í reikningagerðina og mánaðamóta uppgjör og ég niður að byrja á endurnýjun með fyrirliðanum. Hættum framleiðslu um þrjú og gengum frá deildinni og hvelfingunni niðri. Þá vorum við búnar með um 800 kort af rúmlega 4000 korta endurnýjun. Ég fór beint heim því ég var búin að lofa því að koma bílnum heim ef einkabílstjórinn færi í Sorpuferð. Hann ákvað hins vegar að nota  við húsið en var líka að ryksuga þvotthúsið og sameignina upp að stigapallinum hjá nágrannanum fyrir neðan. Ég settist inn í stofu með fartölvuna í fanginu. Klukkan var 16:43 þegar ég skilaði inn skattinum. Sem fyrr þurfti ég að lækka töluna í einum reit og færa mismuninn, sem var aðeins rúmlega sexþúsund krónur, í annan reit. Hefði getað fært inn heildarsummu þessa 11 lottovinninga sem ég fékk á árinu. Summan var rúmlega fimmtíuogsex þúsund því ég fékk einu sinni 4 rétta. En ég nennti ekki að hafa fyrir því að leita uppi kennitölu útgreiðenda. Þessir vinningar eru skattfrjálsir svo þeir ættu ekki að þurfa að fyllast inn. Geri ráð fyrir að ef um hærri vinningshæð væri að ræða þá kæmu þeir kannski sjálfkrafa inn, þ.e. ef útgreiðandi þarf að skila inn til skattsins. Það kom allavega í ljós í mínu tilviki að ég hef verið dugleg að styrkja hin og þessi málefnin og það gerir það að verkum að ég fæ smá skattaafslátt og á inni hjá skattinum. Fæ eitthvað til baka 1. júní n.k. en 1. júlí og 1. ágúst verða skuldfærðar á mig tæplega 7 þúsund í hvort skipti.

Aftur í sund

Ég var mætt í vinnu upp úr klukkan hálfátta á sama tíma og fyrrum fyrirliði mætti. Fyrirliðinn var kominn og bæði búin að "heilsa" upp á vélina og undirbúa tölur fyrir fyrstu framleiðslu.  Við fórum því inni í kaffistofu. Ég fyllti á vatnsflöskuna og fékk mér tvöfalda espressó áður en ég settist niður með prjónana og kaffibollann. Verkefnum dagsins var svo skipt þannig að ég var í bókhaldinu, fyrrum fyrirliði í reikningagerð og mánaðamótauppgjöri og fyrirliðinn og sú fjórða í framleiðslunni. Allt gekk svo vel að þegar við hættum vinnu milli þrjú og hálffjögur var allt daglegt búið og einnig búið að klára endurnýjunina. Ég fór beint í sund. Byrjaði á því að hringja í pabba en fór svo beinustu leið í kalda. Þær ferðir urðu alls þrjár, synti einnig 300 metra þar af um 40 metra skriðsund. Úr sundi skrapp ég á safnið og skilaði af mér fjórum bókum af fimm. Það kom í ljós að bókasafnsskírteinið var útrunnið og lykilorðið líka, var sex tölustafir en þeir vilja hafa fjóra. Þessu var bjargað fyrir mig, ég endurnýjaði skírteinið og tók sex bækur með mér heim. Þar fyrir utan heilsaði annar íbúinn í kjallaranum mér með gögn sem gjaldkeri húsfélagsins þarf að fylla út. Þau er semsagt að fara að setja á sölu og hafa augastað á aðeins stærri íbúð í nágrenninu. Var búin að fylla út skjalið um hálfsjö. Nágranninn kom og sótti það og fékk tusku í kaupbæti. Ég gaf þeim tusku í innflutningsgjöf og sú tuska hefur verið mikið notuð.

Marsmánuður hafinn

Mætti í vinnuna um hálfátta. Sömu tvær uppi, önnur í bókhaldi og hin í mánaðamótareikningargerð. Við sem vorum niðri höfðum endaskipti á vélinni þannig að ég byrjaði að hlaða inn öllum skrám sem voru komnar og hin tók til í fyrstu framleiðsluna, rúmlega tvöhundruð kort í yfir þrjátíu tegundum. Klukkutíma eftir að við byrjuðum komu hinar niður og töldu allar tegundir í visa, framleiddar og óframleiddar. Þá vorum við að framleiða síðustu fimm tegundirnar og byrjuðum svo aðeins á debetkorta framleiðslunni áður en við fórum allar upp í kaffi og skiluðum af okkur fyrstu tösku. Eftir kaffi hlóð ég inn nýjasta endurnýjunar skammtinum sem var að koma nýju leiðina í allra fyrsta sinn. Hafði verið sendur til okkar á mánudaginn en fer ekki sjálfvirkt alla leið á vél heldur verður kerfisfræðingur að senda skammtinn til okkar. Kannski verður þetta svo still sjálfvirkt í framtíðinni eins og allt hitt sem er að fara nýju leiðina. Daglegri framleiðslu lauk fljótlega eftir hádegi, líklega um eitt leytið. Sú fjórða lauk við að pakka og svo dembdum við okkur í að framleiða hluta af fyrrnefndri endurnýjun. Kláruðum allar minni skrár en skildum þrjár þær stærstu eftir. Gengum frá kortadeildinni um tvö. Þá fór hin upp að aðstoða í öðrum deildum en ég beið eftir þeirri í bókhaldinu til að telja með henni síðasta skammtinn áður en við fórum með seinni kortavagninn og endurnýjunina inn á lager og læstum. Hætti vinnu rétt fyrir þrjú og fór beinustu leið í Laugardalslaug. Byrjaði á að hringja í pabba áður en ég fór inn, synti 300 metra og var í minni fjórðu ferð í kalda pottinum þegar kalda potts vinkona mín mætti á svæðið. Fór tvær ferðir með henni áður en ég fór upp úr og heim.

Öldugangur

Vaknaði rétt upp úr klukkan sex í gærmorgun. Mætti í vinnuna um hálfátta. Var á móttökuendanum á vélinni og sú fjórða á ítroðsluendanum. Fyrrum fyrirliði vann í reikningagerðinni en tók svo við bókhaldinu af fyrirliðanum sem tók sér frí eftir hádegi. Allt daglegt og endurnýjun sem kom til okkar 17. sl. var búið um tvö fyrir utan eitt kort í einni daglegri skrá. Sá sem skoðar þau mál var á fundi í K2 til þrjú. Við vorum ekki vissar um að hægt væri að "bjarga" þessu korti öðruvísi en að biðja um að það yrði pantað aftur svo við ákváðum að geyma þetta mál til morguns. Ég var mætt í Nauthólsvíkina rétt fyrir fjögur. Fjara, brim og sjórinn 3,8°C, bara geggjað að leika sér smá stund í öldunum. Eftir sjósundsferðina skrapp ég í Krónuna við Fiskislóð og notaði nýja bleika kortið mitt í fyrsta skipti. Veifaði því svo aftur þegar ég renndi bílnum í gegnum þvottatöðina Löður þarna skammt frá. 

Sunnudags-hittingur/saumaklúbbur

Gekk eitthvað illa að sofna almennilega í fyrrinótt. Sem betur fer stillti ég ekki á mig vekjaraklukku en ég var vöknuð rétt fyrir níu og ákvað að drífa mig beint í sund. Byrjaði á kalda pottinum, synti svo 400 metra á bakinu. Fór 3 aðrar ferðir í kalda pottinn. Kalda potts vinkona mín var að syngja við messu en ég hitti helling af fólki, m.a. sjósunds vinkonu mína, tvær úr "óþæga kórnum", yngstu mágkonu mömmu og nokkra fleiri. Þvoði mér um hárið þegar ég fór upp úr og var komin heim áður en klukkan sló tólf. Strákarnir sváfu fram á dag og þegar sá sem er í æfninga akstrinum kom loksins fram ákvað hann sjálfur að sleppa því að fara á rúntinn. Þeir bræður áttu að hitta pabba sinn og hans fjölskyldu í Egilshöllinni um fjögur leytið og ég var búin að lána þeim bílinn í þá ferð. Hafði samband við tvíburahálfsystur mína og það varð úr að hún kom og sótti mig um þrjú. Ákváðum að athuga hvort saumaklúbbsvinkona okkar væri heima. Vorum ekki búnar að hittast neitt síðan í nóvember. Og viti menn það var stæði beint fyrir utan hjá vinkonunni, hún var heima og mjög hissa en glöð að sjá okkur. Úr varð skemmtilegur hittingum og fyrsti saumaklúbbur ársins haldinn. Var komin heim aftur um hálfsjö. Ég var nýkomin heim þegar Davíð Steinn hringdi til að segja mér að þeir bræður væru á leiðinni heim og til að athuga hvort þeir þyrftu að sækja mig eitthvert.

Æfingaakstur út á land

Í dag eru akkúrat tveir mánuðir síðan við mæðgin fórum aftur heim eftir nokkra daga og gott atlæti á Hellu. Í gær var komið að því að skreppa í fyrstu heimsóknina þangað á árinu. Davíð Steini langaði að sýna afa sínum bílinni og prófa í leiðinni að keyra út fyrir höfuðborgina. Oddur Smári var til í að koma með en honum fannst frekar skrýtið að sitja í farþegasætinu fram í við hliðina á bróður sínum. Við lögðum í hann rétt fyrir klukkan hálftvö, ég sat aftur í fyrir aftan bílstjórann sem var að æfa sig. Það var þoka á heiðinni en bílstjórinn lét það ekki slá sig út af laginu og við vorum komin á Hellu rétt fyrir þrjú. Hittum aðeins á Bríeti og Bjarka en þau voru á leiðinni á árshátíð SS á hótel Selfoss og fóru fljótlega. Pabbi var búinn að búa til stafla af pönnsum og hella upp á kaffi. Eftir kaffi settumst við inn í stofu. Um fimm leytið setti pabbi upp saltfisk, kartöflur og rófur. Þegar suðan var að koma upp spurði hann Davíð Stein hvort hann ætlaði ekki að sýna sér bílinn. Þeir skruppu út í dágóða stund á meðan ég passaði upp á soðninguna og lagði á borðið. Afinn sýndi svo dóttursyninum nýjustu græjuna sína en hann er búinn að fjárfesta í smá snjóblásara fyrir næsta snjóáhlaup. Saltfiskurinn, rófurnar og kartöflurnar smakkaðist mjög vel og pabbi bauð svo upp á ís í eftirrétt. Um það leyti sem söngvakeppnin var að byrja í sjónvarpinu kvöddum við og héldum heim á leið í sömu sætum og við vorum í á leiðinni austur. Vorum komin heim rúmlega hálftíu. 

Kæling í sjó

Ég var vöknuð á undan vekjaraklukkunni eins og oftast áður í gærmorgun. Mætti í vinnuna um hálfátta. Enn voru eftir tólfhundruð kort af stóraverkefninu og svo var komið sérverkefni upp á rúmlega fimmhundruð kort sem samið var um að yrði framleitt fyrir hádegi. Ég var á móttökuendanum og fyrirliðinn á ítroðsluendanum. Við byrjuðum á því að klára fyrstu daglegu skrárnar. Vélin er farin að vinna miklu betur heldur en fyrstu vikurnar og til stytta sögu gærdagsins þá kláruðum við allt daglegt og þau verkefni sem lá mest á um það bil sjö tímum. Vorum búnar að ganga frá kortadeildinni og loka niðri um þrjú. Sendum sex póstkassa upp með lyftunni en fyrr um daginn var búið að senda annað eins. Það sem fór á undan fór út úr húsi í gær hitt fer strax eftir helgi. Lagði á planinu við Nauthólsvík um hálffjögur. Það var enn meiri fjara heldur en þegar ég fór á mánudaginn. Fór ekki lengra út í en upp á mið læri en var þá samt komin út fyrir garðinn. Sjórinn 2,9°C og afar hressandi að kæla sig í uþb fimm mínútur. Var komin heim um fimm. Fór ekkert út aftur en lánaði bræðrunum bílinn um tíu til að skreppa í bíó saman. 

Lítið eftir af febrúar

Var mætt í vinnu um hálfátta. Var á ítroðsluendanum á vélinni til hálftvö. Daglegri framleiðslu lauk um tólf. Ég hætti vinnu rétt fyrir þrjú og fór beinustu leið í sund. Hafði látið kalda potts vinkonu mína vita að ég myndi mæta um hálffjögur. Hún mætti á sama tíma og ég. Fórum sex ferðir í kalda pottinn 3-4 mínútur í senn. Gufan var lokuð vegna viðhalds svo við enduðum á því að flatmaga góða stund í sjópottinum. Synti semsagt ekkert. Kom við í AO við Öskjuhlíð. Þrátt fyrir að vera með lykilafslátt þar er bensínlíterinn fjórtán krónum hærri heldur en þegar ég tanka á AO við Sprengisand eða Kaplakrika. Klukkan var rétt byrjuð að ganga sex þegar ég kom heim. Fékk uppáhalds stæðið mitt, á horninu næst Lönguhlíð.

Yfirvinna

Þar sem N1 sonurinn tók aukavakt á stöðinni í Mosó milli klukkan fjögur og tíu í fyrradag ákvað ég að skutla honum upp á Gagnveg í gærmorgun. Ég var samt komin í mína vinnu um hálfátta. Fyrirliðinn var mætt. Hinar tvær komu ekkert löngu síðar. Sú fjórða fékk að byrja í bókhaldinu. Ég sat með henni fram að kaffi. Hún var ekki komin með aðgang að sameiginlega póstinum svo ég áfram sendi henni póstana með öllum tölunum í. Eftir kaffi fór ég niður á móttökuendann á vélinni en fyrrum fyrirliði var upp til taks með þeirri fjórðu. Eftir hádegi fór ég á ítroðsluendann á vélinni og það má eiginlega segja að þar hafi ég svo verið með stuttum hléum alveg til klukkan átta. Daglegri framleiðslu og pökkun lauk um tvö leytið. Þá tók við endurnýjun debetplasts sem við hefðum viljað vera búnar að framleiða og senda frá okkur fyrir viku síðan. Um fjögurleytið hófst svo framleiðsla á endurnýjun sem kom til okkar í fyrradag og í gær. Sú endurnýjun hefði átt að koma til okkar fyrir amk þremur vikum síðan. Korthafar eru með kort sem gilda út mars en það er stefna hjá eigendum plastins að ný kort berist kúnna helst í byrjun þess mánaðar sem gömllu kortin renna úr gildi. Það varð því að samkomulagi að þessi framleiðsla yrði útseld tímavinna fyrir þrjá í kortadeild. Ein fékk því að fara heim eftir að allt daglegt var búið við hinar vorum til klukkan langt gengin í níu. Ég fékk reyndar að fara um hálfníu þegar búið var að loka og ganga frá niðri. 

Fimmtudagur

Var mætt í vinnuna um hálfátta, rétt á undan fyrrum fyrirliða. Vissum að báðar hinar væru í smá stússi og að önnur af þeim kæmi kannski ekkert. Ég útbjó aðeins allra fyrstu tölur og fór niður á móttökuendann. Sú fjórða kom og leysti mig af um níu leytið. Þá tók ég saman debet tölurnar, skráði lotur og setti inn í excel. Þarna var orðið ljóst að fyrirliðinn kæmist ekki. Við ákváðum því að skipta okkur í kaffi. Ég fór niður um tíu með tölur. Sú fjórða sagðist ætla að sleppa kaffi og ég bað hana um að leysa hina af og tók við móttökuendanum þar til sú var búin að fara í kaffi. Þegar hún kom niður aftur hjálpaði ég til við að pakka þar til klukkan var að verða ellefu. Það þurfti að vera búið að framleiða allt daglegt og pakka um tólf og okkur tókst það. Það var yfirferð á vélinni. Ég sat yfir "strákunum" á meðan hinar voru í mat. Og svo aftur frá klukkan rúmlega tvö til fjögur. Sú fjórða fékk að æfa sig í því sem eftir var af bókhaldsvinnunni, það var búið rúmlega tvö. Fór beint í sund en synti ekkert. Hitti á kalda potts vinkonu mína og fór fimm ferðir í kalda. Var komin heim um sex.

Tilsögn og æfingaakstur

Ég var mætt í vinnuna um hálfátta í gærmorgun. Ég byrjaði á því að opna hvelfinguna uppi með annarri samstarfskonu og skreppa einnig niður og kveikja á kortavélinni.  Þegar ég kom upp aftur var fyrrum fyrirliði mætt. Við ákváðum að græja allra fyrstu tölur, einungis framleiðsluna fyrir valitor og skreppa svo í kaffi. Sú fjórða var mætt nokkru fyrir átta og fyrirliðinn um átta en hún var á skutlvakt áður en hún kom. Ég tók að mér að setja þá fjórðu inn í bókhaldsstörfin en hinar tvær sáu um framleiðsluna. Sú fjórða gat opnað sinn aðgang að tölvunni við hliðina á minni en það kom strax í ljós að hún var ekki komin með aðgang að sameiginlega kortapostinum og síðar ekki heldur tveimur linkum sem við notum stundum. Við fundum samt leið til þess að hún gæti lært bæði með því að fá að gera sjálf, skrá niður punkta niður, spyrja mig og horfa á mig framkvæma sumt. Við vorum allavega komin niður í framleiðslu herbergið rúmlega níu með næstu framleiðslutölur og skjal til að telja fyrstu framleiðsluna eftir. Kennslan gekk þokkalega og sú sem er að læra að tileinka sér hlutina verður búin að ná tökum á þessu fljótlega og farin að kenna okkur hinum. Vinnu var lokið um hálfþrjú. Ég fór úr húsi um þrjú og beinustu leið í Nauthólsvík. Sjórinn 2°C og ég svamlaði um í rúmar þrjár mínútur. Var komin heim um fjögur. Rúmlega sex skruppum við Davíð Steinn á rúntinn í tæpa tvo tíma.

Og strax kominn mánudagur

Vaknaði mun fyrr en ég ætlaði mér. Vekjaraklukkan átti að hringja um hálfátta en um það leyti voru liðnir hátt í tveir tímar frá því ég slökkti á henni. Var klædd og komin fram um hálfjö. Rúmlega níu settum við Davíð Steinn skiltið á bílinn minn og hann fékk að skutla sér í vinnuna. Ég var komin í kalda pottinn í Laugardalslauginni fyrir tíu. Sat svo góða stund í sjópottinum áður en ég fór næstu ferð í þann kalda. Um hálfellefu fór ég loksins á braut átta og synti 500 metra bringusund á ca tuttuguogfimm mínútum. Fór tvær ferðir í viðbót í kalda og tíu mínútur í gufu í lokin. Hitti sjósunds vinkonu mína í klefanum þegar ég var að klæða mig aftur. Ég kom heim rétt fyrir tólf og fór ekkert út aftur. Dagurinn leið samt alveg ótrúlega hratt og var notaður mis skynsamlega. 

Sunnudagur

Var vöknuð mjög snemma og komin á fætur um sex leytið. Klukkutíma seinna fékk N1 sonurinn að keyra sig í vinnuna á mínum bíl. Vorum komin upp að N1 við Gagnveg klukkan hálfátta. Ég tók skiltið af bílnum og settist undir á meðan ég beið eftir fyrsta kaffibolla dagsins. Var komin á planið við Laugardalslaug rúmum tíu mínútum áður en opnaði og sat út í bíl fram yfir morgunfréttir. Fór í kalda pottinn í þrjár mínútur áður en ég synti sexhundruð metra á hálftíma, ýmist á baki eða bringu en fór eina ferð, 50m, á skriðsundi. Fór nokkrar ferðir í kalda pottinn og dreifði hinum ferðunum á 42°C, pottinn, sjópottinn og heitasta pottinn. Um hálftíu fór ég í gufu. Kalda potts vinkona mín var mætt á svæðið þegar ég kom úr gufunni. Fór með henni í mína síðustu kalda potts ferð áður en ég fór upp úr og þvoði mér um hárið. Eftir sundið fór ég beinustu leið vestur í bæ til esperanto vinkonu minnar. Hún var lasin og sagði pass við esperanto æfingum en hún bauð upp á graut og tvo bolla af kaffi. Stoppaði við hjá henni í uþb klukkustund áður en ég fór heim. Heima setti ég handklæði og þurrkustykki á forþvott og 60°, hlustaði á hádegisfréttir og fitjaði upp á og byrjaði á nýrri tusku á meðan, mynstur sem ég er búin að prjóna einu sinni áður, tígladans. Hringdi í tvíburahálfsystur mína, horfði á fótboltaleiki og hina og þessa þættina úr sarpinum.

Laugardagur

Svefninn var eitthvað slitróttur í fyrri nótt. Rumskaði um tvö leytið, alveg í spreng. Læddist á salernið í myrkrinu og til baka, eftir að hafa tæmt blöðruna, án þess að reka mig neins staðar í. Það tók mig einhverja stund að sofna aftur. Næst vaknaði ég um fimm leytið, alls ekki útsofin en mál að pissa. Gafst fljótlega upp á að reyna að kúra mig niður og var komin á fætur um sex. Davíð Steinn kom fram um hálfsjö og var farinn út tíu mínútum seinna. Ég var mætt í mína vinnu um hálfátta. Fram að kaffi vann ég við að gata og merkja ónýt kort frá því fyrr í mánuðinum. Yfirleitt gerum við þetta strax en þarna var um yfir hundraðogfjörutíu korta bunka að ræða. Þetta verk tók drjúga stund og ég sá eftir því að hafa ekki tekið með mér vatnsflöskuna niður því ég var niðri alveg þar til fyrstu framleiðslu var lokið og endaði á því að merkja við í föstudagstalningu á visa kortunum. Eftir kaffi fór ég á móttökuendann á vélinni því sú fjórða þurfti að fara í hraðbanka málin. Framleiðslu, pökkun, talningu og frágangi var lokið rétt fyrir klukkan hálfþrjú. Ég var mætt að planið við Laugardalslaugina um þrjú en byrjaði á því að hringja í pabba. Sat í kalda pottinum í minni fyrstu ferð þegar vinkona mín kom í sína aðra. Eftir næstu ferð hittum við á eina systur hennar og settumst smá stund með henni í 42°C pottinn. Eftir þriðju ferðina og gufubað hittum við systur hennar aftur í sjópottinum. Ég var komin upp úr og út í bíl um hálffimm. Hringdi þá í fyrrum samstarfskonu og jafnöldru. Hún var heima og meira en tilbúin að taka á móti mér. Stoppaði hjá henni í hátt í tvo tíma. Var komin heim fyrir sjö. Felldi draumaduluna af prjónunum síðar um kvöldið en á eftir að ganga frá endanum.

Óvissuferð

Einkabílstjórinn var kominn fram fyrir klukkan sjö í gærmorgun. Tæpum hálftíma seinna skutlaði hann mér í vinnuna. Ég var aðeins með húslykla, lykilkortið úr vinnunni og draumaduluna í vösunum á vetrarúlpunni minni. Ég var á ítrosluendanum fram að hádegi. Vegna tilfærslna á kerfum deginum áður gátum við ekki prentað út og sett saman lista yfir framleiðslutölur fyrsta klukkutímann. Ég hlóð inn fyrstu verkefnunum og handskráði tegundir og fjölda.  Sú fjórða var með mér fram að kaffi hún tók til í tegundirnar eftir listanum mínum og fékk einnig að nota hann til að merkja við þegar hún tók á móti kortunum. Sú sem var í bókhaldinu kom með útprentaða lista um hálftíu akkúrat þegar við vorum búnar með skammtinn sem fer úr húsi klukkan tíu. Eftir kaffi þurfti sú fjórða að fara á hina vinnustöðina sína. Sú sem var í bókhaldinu kom með mér niður og taldi í debet tegundirnar og tók á móti framleiðslunni. Við náðum líka að framleiða megnið af hádegisskammtinum. Fyrirliðinn brá sér tímabundið í bókhaldið og kom niður með tölurnar áður en hún þurfti að skreppa aðeins úr húsi. Eftir hádegi var ég "föst" með nettæknimann við tölvuna mína að finna út úr því hvernig hægt væri að nota verkfæri í smá verk í allra síðasta sinn. Tengingin hafði dottið út við tilfærslurnar og breytingarnar. Það fannst út úr þessu á endanum.

Klukkan hálffjögur rölti ég með fyrirliðanum og einum til yfir í hinn endann á húslengjunni í sal sem tilheyrir húsfélaginu. Þangað mættu svo meirihlutinn af vinnuvélögunum sem hafa starfsstöðvar í Sundaborg og tækninmanninum var boðið með. Þrír leigubílar, einn sem tók átta manns, sóttu okkur um fjögurleitið og keyrðu okkur niður í bæ. Aðeins fjórir fóru á einkabílum. Það var tekið á móti okkur í LÍ við Austurstræti, starfsmannainnganginum, um hálffimm og næstu rúmu tvo tímana fengum við leiðsögn og fyrirlestur um húsið og málverkin sem ekki verður hægt að flytja með þegar flutt verður í nýju höfuðstöðvarnar. Enduðum í hringborðs/koníaksstofunni sem búin var til 2007 en lítur út fyrir að vera enn eldri. Klukkan að verða sjö þökkuðum við fyrir okkur og trítluðum yfir á Jómfrúna. Sendi einkabílstjóranum sms og hann sótti mig þangað korter yfir átta. Við skutluðum þremur af samstarfsmönnum mínum í Sundaborg áður en við fórum heim.

Tilraun

Í fyrrinótt svaf ég frekar stutt, slitrótt og illa. Hluti af því var líklega bland af stressi og spenningi. Eftir smá vangaveltur og umhugsund síðast liðnar vikur ákvað ég að demba mér út í djúpu laugina og gera eitthvað sem gæti mjög hugsanlega haft eitthvað nýtt í för með sér. Um hálftíu á þriðjudagskvöldið sótti ég um reikning hjá nýjasta sparisjóðnum, valdi lit á korti og ég veit að í gærmorgun var framleitt á mig bleikt kort. Reikningurinn varð strax virkur og ég hefði líklega getað fundið út úr því að virkja kortið í símanum til að byrja að nota það strax. Og það voru strax sýnilegar kröfurnar um þá reikninga sem greiða á næst. Mér liggur ekkert á því að byrja að nota þennan reikning og greiðslumáta. Millifærði þó tvisvar sinnum hundrað þúsund krónur af Auka- og ferðasparireikningunum mínum í Landsbankanum. Hugsunin hjá mér er að minnka notkunina á kreditkortinu og einnig að sleppa við færslugjöld eins og reiknast í hvert sinn sem debetkorti úr banka er notað. Enda hef ég ekki notað debetkortið mitt í langan tíma nema þá örfáu sinnum sem ég þarf lausafé en ef maður nota hraðbanka sem merktir eru plastinu þarf maður ekki að borga færslugjöld.

Annars var ég mætt í vinnu upp úr klukkan hálfátta. Var í rannsóknar verkefnum til að byrja með en upp úr hádeginu tók ég við af þeirri sem var í bókhaldinu. Framleiðslan var ekki mjög mikil en það teygðist aðeins á henni. Lokuðum kortadeildinni og gengum frá niðri rétt fyrir þrjú. Ég vann hálftíma lengur að smá bókhaldsverkefnum. Í skottinu á bílnum mínum var ég bæði með sund og sjósundsdót. Ég byrjaði þó á því að renna við í AO við Sprengisand og fylla á tankinn. Það tó smá tíma að komast þangað en það var lítil sem engin röð og ég komst strax að á einni dælunni. Eftir áfyllinguna keyrði ég Bústaðaveginn, mikið að spá í hvort ég ætti að fara í sjóinn eða ekki. Það síðarnefnda varð ofan á og ég fór beint heim. Hringdi í pabba um fjögur leytið. Klukkutíma seinna skruppum við Davíð Steinn í smá æfingaakstur á hans bíl og komum aðeins við í Krónunni við Fiskislóð og Orkunni í Öskjuhlíð.

Rétt eða rangt

Í gær var afmælisdagur æskuvinkonu minnar. Það kom líka í ljós að mamma þeirrar fjórðu átti afmæli í gær og það afmælisbarn gærdagsins er aðeins ári yngri en við vinkonurnar. Var annars mætt í vinnu um hálfátta. Fyrirliðinn og sú fjórða fóru fyrst á vélarvaktina (hvað eru mörg eff í því?). Ég var í rannsóknarvirnnu og aðstoðaði einnig aðeins við bókhaldið. Eftir kaffi leysti ég fyrirliðann af á ítroðsluendanum á meðan hún skutlaði dóttur sinni í flug norður, námstengt. Fyrirliðinn var komin aftur rétt fyrir ellefu. Eftir hádegi leysti ég þá fjórðu af á móttökuendanum á meðan hún æfði sig í að pakka kortum sem fara í útibú. Fengum fjögurra daga uppsafnaðan framleiðsluskammt, nýju leiðina, frá einum bankanum um hálftvö. Það voru um þrjúhundruð kort. Framleiðslu og frágangi var lokið stuttu fyrir þrjú. Fór út af vinnustað skömmu síðar og beinustu leið í sund. Þegar ég var komin á planið við Laugardalslaugina byrjaði ég á því að hringja i æskuvinkonu mína og spjallaði við hana í rúmar tíu mínútur. Klukkan var því orðin hálffjögur þegar ég fór í fyrstu ferðina af fjórum í þann kalda. Þar hitti ég fyrir hóp af fólki sem hafði akkúrat verið að minnast á mig. Í þessum hópi var kalda potts vinkona mín í sinni fyrstu ferð í þann kalda. Eftir fjórðu ferðina elti hún mig í gufuna hún fór svo úr gufunni 1-2 ferðir í viðbót í heita og kalda. Ég fór hinsvegar upp úr og heim. Ég var að spá í að fylla á tankinn þótt hann sé en rúmlega hálfur en ég ákvað að bíða með það. Skv. N1 syninum var brjálað að gera og bara á hans stöð við Gagnveg, seldist 3x meira af bensín og dísel heldur en þá daga sem kallast "mikið að gera". Þetta er alger klikkun en vonandi leysist úr samningaflækjunni milli Eflingar og SA áður en allt verður fast og fer í bál og brand. 

Alveg nóg að gera

Ég mætti í vinnu upp úr klukkan hálfátta. Tók að mér bókhaldið. Lítil framleiðsla var gömlu leiðina en þó nokkur nýju leiðina, mest fyrir "ekki bankann" en það kom ekkert nýju leiðina fyrir einn af bönkunum og hefur ekki skilað sér þá leiðina í þrjá virka daga. Það er sennilega eitthvað bogið við það svo ég á alveg eins von á því að það verði stórar skrár sem koma þegar þetta mun skila sér. Framleiðslu á form og í umslög lauk um hálfeitt. Um eitt leysti ég af á vélinni með þeirri fjórðu. Leyfði henni að æfa sig í að pakka þeim kortum sem fara í öryggispokum í útibú. Hinar og tvær til fóru í það verkefni að farga ónýtum kortum sem hafa verið að safnast upp frá því áður en við fluttum úr Seðlabankanum ásamt tveimur sem komu úr K2. Förgunin tók styttri tíma en ég bjóst við en þó einn og hálfan tíma. Henni var lokið á undan framleiðslunni eftir hádegi og afleysingu minni á vélinni lauk milli hálfþrjú og þrjú. Allt var búið rétt fyrir fjögur. Ég stimplaði mig út skömmu síðar og fór beint í sund. Synti reyndar ekkert en fór tvisvar í kalda, eina ferð í gufu og endaði í sjópottinum í smá stund áður en ég fór upp úr og heim.

Ný vinnuvika

Þrátt fyrir að ég stillti ekki ekki á mig vekjaraklukku var ég vöknuð um hálfátta leytið í gærmorgun. En þá var ég líka búin að sofa tæpa átta tíma en ekki rúma fjóra eins og nóttina á undan. Ég fann að ég var útsofin og dreif mig á fætur. Var ekki með neina sérstaka áætlun í huga. Gufan var lokuð í Laugardalnum á laugardaginn og þótt ég hefði getað farið í aðrar laugar ákvað ég að fara hvergi. Skipti um á rúminu, vafraði á netinu, prjónaði og las til klukkan að verða tíu. Þá setti ég loks í þvottavél og kveikti svo á sjónvarpinu. Hellti upp á kaffi um ellefu, á mjög svipuðum tíma og ég hafði gert á laugardaginn. Strákarnir rumskuðu ekki fyrr en um tvö leytið. Þegar Davíð Steinn var búinn að elda sér nesti fyrir komandi vinnuvaktir og fá sér að borða fórum við í klukkutíma rúnt á bílnum hans með skiltið aftan á og mig í farþegasætinu. Komum til baka um hálffjögur. Hengdi upp þvottinn. Skömmu seinna lánaði ég bræðrunum bílinn minn. Þeir fóru ferð í Sorpu og svo í heimsókn til pabba síns og fjölskyldu hans.

Sunnudagur

Í gærmorgun var ég búin að kveikja á náttborðs lampanum milli fimm og hálfsex og farin að lesa. Fór á fætur um sex leytið og notaði tímann til klukkan að verða átta til vafra um á netinu og setja inn færslu dagsins. Var komin í sund og á braut sex tuttugu mínútum yfir átta. Synti 400 metra, þar af um 250 á bakinu. Það tók mig tæpar tuttugu mínútur. Fór í kalda pottinn í 3 mínútur. Gufan var lokuð svo ég fór beint í sjópottinn í nokkrar mínútur áður en ég fór aftur í kalda pottinn í aðrar þrjár mínútur. Eftir nokkrar mínútur í heitasta pottinum ætlaði ég aðeins að dýfa mér í kalda. Sú dýfa varð að tveimur mínútum. Settist svo á stól úti við í smá stund áður en ég fór inn í sturtu og að þvo mér um hárið. Þegar ég kom heim greip ég í prjónana mína í smá stund. Er langt komin með tuskuna kaðladans. Bætti einum kaðli við munstrið og hafði gatamunstrin á endunum í mismunandi skáa og röð. Fór eftir bókinni í fyrra tilviki og hafði skáa til hægri en í hinum endanum hafði ég skáa til vinstri og byrjaði fyrst á að slá band um prjóninn áður en ég tók eina óprjónaða sem ég steypti yfir næstu prjónuðu lykkju og prjónaði þrjár lykkjur sléttar. Eftir smá prjónastund var komið að lestrarstund. Er byrjuð á annarri bókinni af fimm af safninu; Dóttir Mýrarkóngsins eftir Karen Dionne. Ég er nú búin að lesa tæplega þriðjunginn af rúmlega 300 blaðsíðum. Ég horfði líka á þætti og fótbolta í sjónvarpinu. Um hálfsex leytið skrapp ég með Davíð Steini á rúntinn í rúma klukkustund. Hann fór m.a. á vinnustaðinn sinn og keypti sér sköfu og svo á fyrrum vinnustaðinn N1 í Kópavogi til að skoða breytingarnar á þeirri stöð. Á báðum tilvikum þekkti hann þá eða þau sem voru á vakt.

Lokaðar inni í smá stund

Ekkert verður af aukavinnunni nema ég er nokkuð viss um að n.k. mánuvinnudagur verði svolítið lengri í annan endann. En ég var mætt í vinnu um hálfátta í gærmorgun, fyrst af fjórum. Tvær af hinum komu fljótlega og sú fjórða var mætt fyrir klukkan átta. Verkefni dagsins röðuðust vel niður. Venjulegi framleiðsludagurinn var ekki svo stór en það var nokkuð mikið framleitt fyrir nýjasta sparisjóðinn. Samt ekki stærstu skrárnar sem við höfum séð frá þeim. Ég dembdi mér í að gera tilraun til að raða visa bókhaldinu upp eftir bönkum. Tilraunin tókst vel og var ákveðið að halda inni breytingunum. Búið var að framleiða og telja fyrsta skammtinn upp úr klukkan hálftíu og sá vagn settur inn í hvelfingu. Fljótlega eftir kaffi fór ég inn á kortalager með fyrirliðanum. Hún til að halda áfram merkingum en ég raðaði lagernum fyrir visa kortin eftir nýbreyttu bókhaldinu. Framleiðslunni lauk fyrir klukkan tvö. Fyrirliðinn var þá tekin við að klára að pakka. Fyrrum fyrirliðinn fór í að tæta en sú fjórða kom með mér inn á lagerinn með seinni vagninn. Líklega hefðum við átt að tilkynna hinum tveimur að við ætluðum að raða visakortunum á vagni eftir breyttu bókhaldinu. Við vorum hálfnaðar með verkefnið þegar við heyrðum smá dynk fyrir utan og skömmu síðar varð allt svart og kerfið fór í gang. Fyrirliðinn hélt að við værum farnar, hafði sett læsinguna á hurðina og svo kveikt á kerfinu áður en hún fór út úr húsi. Ég hringdi í hina og hún gat sagt þeim sem var í afgreiðslunni að við værum tvær læstar inni á kortalagernum. Hann tók kerfið af og hringdi í securitas en hún kom niður, tók læsinguna af og bankaði. Við hleyptum henni inn til okkar því við vorum ekki alveg búnar að raða kortunum sem dreifðust í báða vagnana. Engir kortakassar upp á visavagninum eða upp á hlið í hillunum inni í vögnunum. Visa vagninn er fullur en það er enn smá pláss í blandaða vagninum. Við þrjár pössuðum svo upp á að engin yrði eftir inni þegar við fórum út af lagernum og settum lásinn aftur á. Ég var komin út af vinnustaðnum rétt fyrir þrjú og fór beinustu leið heim þrátt fyrir að vera með sunddótið með mér í skottinu. Hringdi í pabba úr heimasímanum og spjallaði við hann í góðar tíu mínútur. Restin af deginum fór í alls konar dútl; netvafr, þáttaáhorf, prjón, lestur og ég fylgdist líka með gagni í leik KA og Vals í handbolta karla á mbl.is.

Líklega aukavinna framundan

Síðan heimalínan komst í lag hef ég aftur komist inn í facebook leik sem sennilega er einn af mestu tímaþjófunum mínum. Ætla ekki að hætta í leiknum en verð vonandi meðvitaðri um tímann, að ég fari ekki yfir ákveðin mörk. Annars var ég mætt í vinnu um hálfátta í gærmorgun. Ég og sú fjórða vorum á sömu vinnustöðvum á framleiðsluvélinni. Daglegri framleiðslu lauk um eitt og eftir talningu og pökkun settum við endurnýjun í gang sem við vorum byrjaðar á fyrr í vikunni. Kláruðum það sem var eftir og gengum frá deildinni þegar klukkan var byrjuð að ganga fjögur. Stimplaði mig út um hálffjögur og fór beinustu leið í Laugardalslaugina. Hitti strax á kalda potts vinkonu mína í kalda pottinum, hún í sinni annarri ferð. Við fórum tvær ferðir í þann kalda, eina í heitasta pottinn og svo elti hún mig í gufuna. Ég fór svo smá stund í sjópottinn en ég held að hún hafi farið tvær þrjár ferðir í viðbót í kalda pottinn. Hún sagðist vera búin að sakna mín mikið og var mjög glöð að hitta mig þótt ég væri bara stutt á svæðinu. Sleppti sundinu sjálfu og var komin heim um fimm leytið. Varðandi titil dagsins þá skrifa ég um það í færslu morgundagsins. 

Ein af safnbókunum á náttborðinu

Var mætt í vinnu um hálfátta í gærmorgun. Aftur fyrst af okkur fjórum. Sá um móttökuendann á vélinni og leiðbeindi þeirri fjórðu og hjálpaði ef hún spurði. Hún er búin að fá að æfa sig á að hlaða inn verkefnum og senda þau af stað á ítroðsluendanum síðan á föstudaginn var og fær að æfa sig út vikuna. Hún stendur sig gríðarlega vel og þrátt fyrir að eiga eftir að setja sig betur inn í bókhaldið og fá að taka svona æfingu þar þá fer líklega ein af okkur hinum þremur að fara á aðra vinnustöð innanhús og læra og æfa eitthvað alveg nýtt í heila viku fljótlega. Við ætlum allar þrjár að fá að setja okkur inn í eitthvað af þeim störfum sem fór fram í þessu húsi áður en kortadeildin bættist við. Það er talað um sjö hlutverk. Hvort við lærum inn á einn eða fleiri mun svo bara koma í ljós með tíð og tíma en það er gríðarlega mikilvægt upp á sveigjanleika og geta sett á sig fleiri en einn hatt til að geta leyst af í veikindum og fríum ef svo ber undir. Var í vinnu til klukkan að verða fjögur. Fór þá beinustu leið heim þrátt fyrir að vera með sjósundsdótið með mér. Ákvað að gera loksins eitthvað í því að fá són á heimalínuna og fékk góða aðstöð í gegnum síma úr þjónustuveri símans. Hringdi svo í pabba úr heimasímanum um fimm leytið. Annars lauk ég við tuskuna óróa og fitjaði upp á kaðladansi, horfði á Kiljuna, seinni hálfleikinn í bikarleik kvenna í handbolta milli Fram og Vals og einn þátt úr sarpinu af "mínum lista". Fór ekki inn í rúm fyrr en eftir ellefu fréttir og tók þá loksins bækurnar fimm upp úr bókasafnspokanum. Byrjaði á að lesa; Líkvaka eftir Guðmund S. Brynjarsson. Um tvöhundruð blaðsíðan bók og strax búin með yfir sextíu blaðsíður.

Mið vika

Rumskaði um þrjú leytið í fyrrinótt. Veit ekki afhverju en einhverra hluta vegna gekk frekar illa að sofna aftur. Um fjögur leytið skrapp ég fram á salerni. Þegar ég kom inn í rúm aftur ákvað ég að stilla vekjarann á tíma sem er rúmum tuttugu mínútum síðar en sá sem ég vel alla jafna alltaf kvöldin fyrir virku vinnudagana. Sofnaði loksins aftur en var vöknuð á tíma sem var mitt á milli umtalaðra tímastillinga. Þurfti að sópa af bílnum en veður og færð var alveg í lagi þrátt fyrir að appelsínugula viðvörunin væri enn í gildi. Mætti í vinnu um hálfátta. Var aftur í bókhaldinu. Þeirri vinnu lauk milli klukkan eitt og hálftvö. Leysti þá af á móttökuendanum á vélinni til klukkan langt gengin í þrjú. Gengum frá deildinni og rúlluðum læstum kortavögnunum inn í kortahvelfingu. Þá fréttist af því að kortasending væri á leiðinni frá Keflavík með securitas bíl og vörðum. Hinar þrjár þurftu allar að vera mættar annað fljótlega en sem betur fer var kerfisfræðingurinn okkar á svæðinu og ekkert að fara strax. Hann er eini fyrir utan okkur fjórar með aðgang að kortahvelfingunni og það þarf tvo til að komast þar inn. Ég var ekki með neitt planað eftir vinnu og tók að mér að bíða eftir kortunum. Sá vinnur í afgreiðslunni uppi og stjórnar umferðinni um móttökuskúrana var líka á svæðinu. Hann átti einnig von á sendingu í hvelfinguna uppi og hún má bara vera opin ef amk tveir eru á svæðinu. Svo þetta dæmi gekk alveg upp. Upp úr klukkan hálffjögur komu þrír bílar með sendingar. Aðeins einn bíll má vera inni í einum í hvorum skúr. Sem betur fer var einn bíllinn aðeins minni en hinir tveir og var honum hleypt inn í minni skúrinn. Kerfisfræðingurinn kom með mér niður að taka á móti nokkrum innsigluðum pokum af kortum sem höfðu verið settir á tvo hjólavagna. Við rúlluðum þessu alla leið inn í kortahvelfingu. Ekki mjög löng leið en innri skúrhurðin (inn í húsið) þurfti að lokast áður en hægt er að opna millihurð inn í ganginn milli kortadeildar og kortahvelfingar. Og sú hurð þarf að lokast áður en hægt er að opna hvelfinguna. Þetta gekk samt vel fyrir sig. Kerfisfræðingurinn var ekki að fara alveg strax svo þeir voru tveir á svæðinu, hann og afgreiðslustjórinn. Ég mátti hins vegar fara og fór beinustu leið heim. Eftir sjónvarpsfréttir skruppum við Davíð Steinn í um klukkustundar æfingar akstur.

Vetrar-veður

Svaf þar til vekjarinn hringdi í gærmorgunn og þá smellti ég einu sinni á blund takkann. Sofnaði ekki aftur en lá líklega í svona þrjár mínútur áður en ég slökkti alveg á vekjaranum og fór á fætur. Var mætt í vinnuna um hálfátta, fyrst af okkur fjórum úr kortadeild. Ég var í bókhaldinu. Smá mánudagur var í framleiðsluvélinni svo fyrsta framleiðsla tafðist um þrjú korter. Skiptum okkur í kaffi og mat og létum vélina ganga alveg til klukkan langt gengin í þrjú. Þá var búið að framleiða yfir ellefuhundruð dagleg kort og sennilega á fimmta hundrað kort endurnýjuð. Ég var komin í sund rétt rúmlega þrjú. Fór beinustu leið í kalda pottinn í rúmar tvær mínútur, tíu mínútur í gufu og korter í sjópottinn áður en ég fór upp úr. Synti semsagt ekki neitt. Næst lá leiðin á bókasafnið. Skilaði þremur bókum sem áttu aðeins einn dag eftir af 60 daga útláni. Lauk aldrei við eina af þessum bókum, var uþb hálfnuð þegar ég fór að lesa tvær aðrar bækur sem ég á sjálf og voru búnar að bíða mis lengi eftir athygli. Tók fimm bækur af safninu og fór svo heim. Var búin að vera heima í um hálftíma þegar Bríet frænka hringdi í Davíð Stein. Hún var alveg að koma í bæinn, þurfti að skreppa í Elko til að kaupa sér nýjan síma. Davíð Steinn er með afslátt í Elko og frænkuna langaði líka til að skreppa með honum á hans bíl svo ég fór með þeim út á Granda. Skrapp þá sjálf aðeins í Krónuna í leiðinni. Þegar við komum til baka elda Davíð Steinn fyrir frænku okkar og hjálpaði henni að setja upp nýja síman og færa allt yfir af þeim gamla sem var skringilega skaddaður. Skjárinn skiptist í miðju með rauðri lóðréttri línu og ekkert hægt að sjá á annan helminginn. Bríet kvaddi um átta leytið og fór beinustu leið austur aftur.

Á blund-takkanum

Svaf til klukkan að byrja að ganga níu í gærmorgun. Korter yfir níu lögðum við sonurinn af stað upp á Gagnveg, skiltið á bílnum ég í farþegasætinu fram í og Davíð Steinn í bílstjórasætinu. Úti var grátt og blautt og svolítil hraðferð á logninu. Ferðin gekk þó mjög vel fyrir sig. Ég ákvað að þyggja kaffi út í bíl áður en ég fór aftur beinustu leið heim. Hugsanlega hefði ég haft gott af því að skreppa aðeins í sund og gufu en ég ákvað að skrópa í gær. Fór ekkert aftur út en horfði á einn leið í enska, nokkra þætti af ýmsu efni, m.a. fyrsta þáttin af "Stormur" og svo númer tvö af átta þegar hann fór í loftið eftir fréttir og Landann. Prjónaði slatta af nýjustu tuskunna á prjónunum og hringdi líka í pabba. 

Sunnudagur

Var vöknuð og komin á fætur um hálfsjö í gærmorgun. Eftir morgunverkin á baðherberginu hafði ég ágætan tíma til að vafra aðeins um á netinu. Tíu mínútum yfir sjö lögðum við mæðgin af stað. Ég setti skiltið um æfingaakstur á skottlokið fyrir ofan númeraplötuna og settist í farþegasætið fram í á mínum bíl. Í Ártúntbrekkunni kom smá hríð og skyggnið varð aðeins verra en Davíð Steinn komst vel í gegnum þá prófraun. Rétt fyrir hálfátta vorum við komin upp á N1 við Gagnveg. Ég tók skiltið af bílnum, færði mig í bílstjórasætið og hinkraði eftir að sonurinn færði mér kaffibolla. Var komin á planið við Laugardalslaugina tæpu korteri áður en opnaði. Sat út í bíl, kláraði kaffið og hlustaði á morgunfréttir áður en ég fór í sund. Synti 400m, þar af 350 á bakinu. Fór eina ferð, þrjár og hálfa mínútur í kalda pottinn, tíu mínútur í gufu og aðrar tíu í sjópottinn áður en ég fór upp úr og þvoði mér um hárið. Kom heim um hálftíu. Klukkutíma seinna setti ég í eina þvottavél og skrapp svo í smá stund vestur í bæ til norsku esperanto vinkonu minnar. Við slepptum esperantóinu en ég þáði hjá henni graut og kaffi. Var komin heim aftur um hálftólf. Fór ekkert aftur út. Aðeins eina ferð í þvottahúsið til að hengja upp. Kláraði að prjóna eina tusku og fitjaði upp á annarri, óróa, úr bókinni sem ég fékk í jólagjöf. Horfði á fótboltaleiki og nokkra þætti. Las og kláraði bók sem ég gaf sjálfri mér; Gauksunginn eftir Camillu Lackberg. Byrjaði á þeirri bók fyrir meira en viku.

Grand, pass eða nóló

Vaknaði upp úr klukkan sex í gærmorgun. Mætti til vinnu um hálfátta. Ég og sú fjórða vorum á vélarvaktinni og að þessu sinni var hún allan daginn á ítroðsluendanum. Var henni innan handar á meðan hún var að hlaða inn fyrstu verkefnum dagsins. Svo ákvað hún sjálf að framleiða aðeins eina tegund í einu sem mér fannst mjög skynsamlegt. Hægt er að framleiða þær tegundir saman sem er hlaðið inn eins en þeim fer nú reyndar fækkandi í flestum verkefnum hjá okkur því breytingar og frávik frá plasti gera það að verkum að búa þarf til ný "load" fyrir margar af tegundunum. Klukkan var orðin tíu þegar við skruppum upp í kaffi. Þá vorum við búnar með fyrsta verkefnið og langt komnar með að telja. Urðum að loka og læsa öllu því það komu gestir úr einum bankanum í hús og alla leið niður á gang. Þótt þeir mættu ekki koma inn í framleiðslurýmið mátti heldur ekki vera neitt í gangi þar inni. Vorum langt komnar með debet daginn þegar við skruppum í mat um tólf. Framleiðslu lauk um tvö og búið var að telja, pakka og ganga frá deildinni rétt fyrir hálfþrjú. Þá átti sú sem var í bókhaldinu bara eftir að útbúa póstmiða með þeim kortum sem voru að fara í póst en ekki útibú. Ég stimplaði mig út korter fyrir þrjú. Var með sunddótið með mér en í stað þess að drífa mig í sund burraði ég alla leið inn í Hafnarfjörð á AO við Kaplakrika og fyllti á tankinn. Það var rigning og mikil bleyta og vatnselgur sums staðar á leiðinni og umferðin farin að þyngjast. Kom heim fyrir klukkan fjögur. 

Rúmlega sex

Það þurfti að sópa af bílnum í gærmorgun en það tók svo sem enga stund því snjórinn var ekki fastur á. Hins vegar var ég ekki skynsöm í skóvali þótt það hafi sloppið til í gærmorgun. Slabbið, krapið og rennandi vökvinn var þannig að það var betra að stíga varlega til jarðar og ekki hvar sem er. Var mætt í vinnu um hálfátta. Um átta fór ég niður með fjórðu manneskjunni. Höfðum sama háttinn á. Ég byrjaði á ítroðsluendanum og var þar fram að kaffi. Vorum í miðju kafi þegar öryggiskerfið fór allt í einu á. Þá var viðgerðarmaður búinn að "brjóstast" inn til okkar um neyðarhurðina. Þessi maður var að leita að myntherberginu og hafði ekki komið síðan kortadeildin bættist við. Eftir kaffi fór ég á móttökuendann. Þegar daglegri framleiðslu var lokið, sem var yfir ellefu hundruð kort, skiptum við aftur um enda. Áttum aðeins eftir um tvöhundruð kort af níuhundruð í endurnýjun þegar við urðum að pakka saman. Klukkan var orðin þrjú. Við höfðum ætlað að klára þessa endurnýjun en urðum að víkja fyrir manneskju sem kom til að setja upp rakamæla í herbergið. Ekki má vera með framleiðslu í gangi á meðan utanað komandi aðilar eru á kortagerðarsvæðinu. Ég var því að labba út af vinnustaðnum um hálffjögur. Fór beint heim. Um átta leytið um kvöldið skrapp ég svo með Davíð Steini sem farþegi í hans bíl í klukkutíma æfinga akstur.

Aðeins lengri vinnudagur

Var vöknuð um sex í gærmorgun og er því greinilega að komast í ákveðna rútínu aftur. Mætti í vinnuna um hálfátta. Ég byrjaði á ítroðsluendanum fram að kaffi. Fjórða manneskjan var með mér. Eftir kaffi fékk hún sinn eigin aðgang að framleiðsluvélinni og við skiptum um stað. Fyrirliðinn leysti mig af í mat rétt fyrir tólf en um það leyti fór vélin að vera með smá vesen. Um hálftvö leytið skiptum við yfir í nýjustu kortin fyrir  nýjustu sparisjóðina sem auglýsa mikið þessa dagana. Höfum verið að framleiða fyrir þá tvo daga í viku en nú vilja þeir fara að fá kortin sín daglega. Framleiddum síðast fyrir þá á mánudaginn og þá voru þetta innan við þrjátíu kort. Í gær var heildarfjöldinn hátt í tvöþúsundogsjöhundruð kort. Þessi kort fara ekki á nein form, þeim er pakkað annars staðar, en við vorum nú samt tæpa þrjá tíma að framleiða þennan helling. Klukkan var því um hálffim þegar ég fór heim úr vinnu. Umferðin var orðin þyngri og ég tæpu korteri lengur á leiðinni heim. Bræðurnir fengu lánaðan bílinn til að fara í eina sorpuferð og Davíð Steinn notaði tækifærið og verslaði inn fyrir sjálfan sig í leiðinni. Við mæðgin fórum ekki á rúntinn í æfingaakstur í gærkvöldi. Held að hvorugt okkar hafi nennt.

Febrúar mættur

Vaknaði um sex leytið í gærmorgun. Mætti í vinnu rétt rúmlega hálfátta. Ég var á ítroðsluendanum á vélinni og sú sem var í fríi á mánudaginn var á móttökuendanum. Sú þriðja í bókhaldinu og sú fjórða í mánaðamótaverkefnum á hinni vinnustöðinni sinni. Dagleg framleiðsla var eitthvað um níuhundruð kort, helmingi fleiri heldur en daginn áður. Samt var þeirri framleiðslu lokið rétt rúmlega tólf. Það var hins vegar verið að pakka alveg til klukkan eitt. Á meðan ég var í mat komu viðgerðarmennirnir í yfirferð á vélina. Þeir voru svo heppnir að borðin yfir vagnana undir lagerhlutina í vélina komu í hús eftir að þeir voru mættir á svæðið. Vélin var blásin hátt og lágt og svo send tvö kort í gegn til að kanna hvort hökt væri á framleiðslunni. En um tvö leytið snéru þeir sér að því að koma skikki á varahlutalagerinn. Ég fékk að fara um hálfþrjú. Fór beint með bílinn í smurningu, ár síðan síðast. Þeir á smurstöðinni skiptu einnig um peru í framljósinu bílstjóra meginn. Þetta tók ekki langa stund. Næst lá leiðin í Krónuna við Fiskislóð. Var komin í götuna rétt rúmlega fjögur. Fékk stæði milli 7 og 9 og hringdi í Odd og bað hann um að sækja þessa tvo poka úr búðinni og ganga frá vörunum.

Janúar á endasprettinum

Svaf alveg þar til vekjaraklukkan gaf til kynna að kominn væri tími á fótaferð í gærmorgun. Davíð Steinn var því á undan mér fram svo ég fór beinustu leið inn í stofu þegar ég var búin að klæða mig. Sinnti ekk morgunverkunum á baðherberginu fyrr en um hálftíma síðar. Var mætt í vinnu rétt upp úr klukkan hálfátta. Ein var í fríi í gær og við höfðum þá fjórðu fram að morgunkaffi. Ég byrjaði því á því að sinna bókhaldsvinnu. Eftir klukkan tíu fór ég niður á móttökuendann á vélinni. Klukkutíma seinna skrapp ég upp til að prenta út hádegisframeiðsluna og skuldfærslubeiðnir fyrir fjóra póstbunka. Komum upp með afganginn af daglegu framleiðslunni korter yfir tólf. Eftir mat unnum við að endurnýjun til klukkan rúmlega hálfþrjú. Ég hætti vinnu um þrjú og fór beinustu leið heim.

Á leið í vinnu aftur

Ég vaknaði um níu í gærmorgun. Rúmlega klukkutíma síðar var ég komin í Laugardalinn. Varð að leggja í stæði við völlinn. Þrátt fyrir full stæði á planinu við laugina var nóg af skápum og samt var helmingurinn af klefanum stúkaður af og merktur keppendum. Ég notaði skápinn undir fötin rétt á meðan ég skrapp í sturtu og hárþvott. Fór svo beinustu leið heim aftur án þessa að fara í sund, potta eða gufu. Við Davíð Steinn fórum ekki aftur á rúntinn í gær. Veit ekki hvort hann nennti að prófa að keyra í þessum smá snjó sem aftur var kominn eða hvort hann nennti ekki út. Ég nennti svo sem ekki aftur út og tók því bara rólega. Horfði á bronsleikinn. Sendi Odd á KFC. Horfði á gull leikinn á HM í handbolta karla. Danir heimsmeistarar í þriðja sinn í röð. Það hefur enginn gert áður. Voru með Frakka í vasanum allan tímann, amk alltaf skrefinu á undan.

Sunnudagur

Það var um eitt leytið að við mæðgin skruppum aðeins á rúntinn í gær á hans bíl. Skiltið um æfingaakstur á skottlokinu, ég í farþegasætinu og Davíð Steinn í bílstjórasætinu. Fyrst lá leiðin aðeins út á Gróttu. Ekkert stoppað þar. Sonurinn skrapp svo í Elko við Fiskislóð að kaupa eitthvað fyrir símann til að tengja í bílinn. Hann fékk ekki alveg allt sem hann vantaði þar svo hann fór næst í tölvubúðina í Skipholti og keypti restina af því sem hann vantaði. Svo lá leiðin inn í Hafnarfjörð og þar var mikið rúntað. Hann kom aðeins við  í N1 til að kaupa sér nýja lykt í bílinn. Þegar við komum heim aftur vorum við búin að vera á ferðinni í um tvo tíma. Nokkru síðar lánaði ég bræðrunum bílinn minn til að fara í heimsókn í Mosfellsbæinn. Ég fór ekkert aftur út en fitjaði upp á nýrri tusku og horfði á nokkra þætti. 

Allt í rétta átt

Ég líkist sjálfri mér meir og meir. Hitalaus í amk tvo daga, ekki þurft að taka verkjalyf síðan í fyrrakvöld og aðeins eftir að losna við smávegis úr brjóstholinu. Er að hósta því upp smátt og smátt. Ég er að bræða það með mér hvort ég komist upp með að skreppa á rúntinn með syninum sem þarf að æfa sig án þess að fara í sturtu í dag. Hann verður kannski að segja til um það hvort mamma hans lykti nokkuð illa. Ég var komin á fætur um níu leytið í gærmorgun eftir að hafa sofið ágætlega út. Minnst vafrað á netinu í gær. Mest horft á þætti og handbolta og eins og ein tuska kláruð. Ég vona svo sannarlega að ég hafi tæklað þessi veikindi það vel að ég leggist ekki aftur í bráð. 

Heil vika

Já, ég er búin að vera heima í viku. Var líklega að verða lasin á fimmtudagskvöldið í síðustu viku en stóð samt vaktina í vinnu á föstudag. Mældi mig fyrst á laugardagsmorgninum. Hitinn er að minnsta kosti farinn en ég er enn að hósta einhverju upp sem er ekki alveg á því að losna. Þetta er samt allt í rétta átt. Davíð Steinn var á sinni seinni vinnuvakt í þessari viku í gær og var farinn löngu áður en ég vaknaði. Ég var nú samt komin á fætur fyrir klukkan tíu. Oddur kom á fætur fljótlega en hann var á leið í blóðprufu og hormóna sprautu. Hann fékk lánaðan bílinn til að fara upp á Landsspítala í blóðprufuna en sprautuna fékk hann í Heilsugæslunni, mætti sjálfur með efnið eins og alltaf. Minn dagur var ósköp svipaður og undan farin vika. En á þriðja tímanum hellti ég mér loksins upp á kaffi. Hafði ekki drukkið svoleiðis síðan í hádeginu á föstudaginn var. Áður en vaktin var búin hjá Davíð Steini sendi ég honum skilaboð um að færa mér poka af hálsbrjóstsykri þegar hann kæmi heim. Ég tók engar verkjatöflur í gær, ekki heldur þegar ég fór að sofa. 

Hætt að mæla mig

Það var gott að geta slakað á og sofa nokkuð langan dúr. Ég var útsofin upp úr klukkan átta og klæddi mig í fyrsta skipti í nokkra daga. Dagurinn fór í svipað og undan farnir dagar. Hálsinn er enn aumur og augun lasleg svo skynsemin segir mér að halda mér heima eitthvað lengur. Semsagt frekar lítið að frétta.

Hitalaus en ekki 100%

Ég rumskaði um sjö leytið í gærmorgun. Mældi mig, skrapp svo á salernið áður en ég kúrði mig aftur undir sæng. Vaknaði aftur á ellefta tímanum. Hringdi í pabba og einnig fyrirliðann í kortadeildinni og grínaðist í báðum tilvikum með að ég þyrfti endilega að hætta að reykja. Röddin er svo rám enda er hálsinn frekar aumur. Um hádegisbilið ákvað ég að skella í mig tveimur parataps töflum og einu vatnsglasi. Var farin að finna eymsli í skrokknum þannig að erfitt var að finna góða stellingu til að sitja eða liggja. Kláraði eina tusku og fitjaði upp á annarri. Vafraði aðeins um á netinu en ekkert eftir klukkan tvö. Horfði á helling af þáttum en það var ekki fyrr en ég fór upp í rúm um tíu að ég las smávegis. Hitamælirinn sýnir 37°C en augun eru frekar mött ennþá og hálsinn aumur. Ég er samt búin að klæða mig í fyrsta sinn síðan á föstudaginn. Hef hina dagana verið á sloppnum og í ullarsokkum.

mínus fimm kommur, 36,5°C

Aðfaranótt gærdagsins var mér verulega erfið. Fann til, sama á hvaða hlið ég reyndi að leggjast. Ég reyndi fyrst að fara í rúmið um tíu en þetta endaði með því að ég var stöðutg að koma fram í lengri eða styttri ferðir. Mig minnir að ég hafi loks náð að sofna eitthvað á fimmta tímanum en svo var ég vökunuð aftur upp úr klukkan sjö. Þá mældi ég mig og var með fimm kommur. Dagurinn fór í merkilega lítið netvafr, ekkert lesið, smá prjónað en horft á þætti og handbolta. Mældi mig aftur um níu leytið um kvöldið og var þá með átta kommur. Hélt að ég væri orðin nógu þreytt til að lognast útaf en svo var ekki. Um tíu ákvað ég því að senda Odd fyrir mig út í lyfju að kaupa verkjalyf. Hann kom til baka með eina pakkningu af 500mg parataps og aðra pakkningu með 400mg íbúfen. Ég tók tvær parataps töflur og kláraði að horfa á þátt sem ég var langt komin með að horfa á. Þegar ég fór upp í rúm um ellefu fann ég ekkert til og hef líklega sofnað mjög fljótlega. Þrátt fyrir að hitinn sé að víkja er mjög líklegt að ég verði að fara mjög vel með mig í nokkra daga enn og finnst ólíklegt að ég sé á leiðinni í vinnu þessa vikuna. Ég er enn að hósta þótt ég hósti ekki oft, hef ekki verið að hósta mikið en það er samt eitthvað ofan í mér sem er smám saman að losna.

Fimm kommur

Rumskaði frekar snemma í gærmorgun og mældi mig, 38,5°C. Skrapp aðeins á baðherbergið en fór beint upp í rúm aftur og sofnaði. Svaf í rúma þrjá tíma í viðbót. Á tólfta tímanum hringdi ég í fyrirliða kortadeildar og tilkynnti henni stöðuna á mér. Tók því svo frekar rólega allan daginn. Prjónaði smá og horfði á boltaíþróttir og þætti. Eitt af því sem ég gerði ekki var að lesa og síðustu kvöld hef ég farið upp í rúm án þess að lesa staf. Á eftir að lesa eina bók af safninu en ég framlengdi skilafrestinum og þarf ekki að hafa áhyggjur næstu rúmu tvær vikurnar. Þegar Davíð Steinn kom heim úr vinnu í gærkvöldi fór hann næstum beint niður í þvottahús með nýja verkfærið. Þegar hann hafði dvalið þar um stund sendi ég Odd niður til hans. Það er ekki vandamál að skrúfa upp snúrurnar en þeir eru ekki búnir að því nema að hálfu leyti því snúrurnar eru eitthvað flæktar. Kannski finna þeir út úr þessu í dag. 

Nýtt verkfæri

Ég mældi mig snemma í gærmorgun og var þá með 38,5°C hita. Rétt fyrir sjö bankaði ég hjá Davíð Steini til að segja honum að hann yrði að bjarga sér sjálfur í vinnuna. Hann var svo sem búinn að undirbúa sig undir það því hann varð var við að ég var að hósta mikið kvöldið áður. Hann tók leigubíl upp á Gagnveg og fær hann vonandi endurgreiddan. Ég fór fljótlega aftur inn í rúm og svaf næstum fram að hádegi. Var þó komin fram aftur um hálftólf í slopp og sokkum. Tveimur tímum seinna bankaði ég hjá Oddi. Ég var búin að millifæra 50000 á hann og bað hann um að fara í Bauhaus til að kaupa borvél sem líka væri hægt að nota sem skrúfvél og þá bæði bor- og skrúfbitasett. Það er útsala um þessar mundir og Oddur fékk ágætist grip á eitthvað um 43000 krónur. Var sagt að gripurinn ætti að endast í 10 ár. Nú verður loksins hægt að skrúfa upp nýju snúrurnar. Þeir munu gera það í sameiningu, bræðurnir, þegar Davíð Steinn kemur heim úr vinnu í kvöld. 

Lasin

Vinnudagurinn í gær var frá rúmlega hálfátta til rúmlega þrjú. Ég var í bókhaldinu. Við fengum aukamanneskjuna með okkur. Hún er reyndar alls ekki auka því hún á að koma inn í þetta með okkur með tíð og tíma en hún þarf líka stundum að sinna verkefnum sem hún hefur verið að sinna fram að þessu, sérstaklega ef það eru frí. Fyrirliðinn fékk tækifæri til að taka saman pappíra um ónýt kort í nóvember og desember og ég hjálpaði til við að sortera, telja og stemma af. Ég fór beinustu leið heim eftir vinnu. Var komin með leiðinda kuldahroll. Fljótlega eftir að ég kom heim vafði ég teppi utan um mig. Ég fór ekki að sofa fyrr en á tólfta tímanum og nú brá svo við að ég las ekki einn staf í bókinni sem er á náttborðinu þessa dagana. 

Föstudagur

Fengum fjórðu manneskjuna með okkur í gærmorgun og hún var á mótökuendanum á vélinni með mér til hádegis. Framleiðsla gekk næstum eins og í sögu og vorum við búnar með allt daglegt um tólf. Fljótlega komu viðgerðarmennirnir til að yfir fara vélina. Ég fór fyrst í mat og sú sem var með mér um morguninn fór einnig í mat og svo önnur verkefni. Eftir hádegishléið tók ég prjónana með mér niður í korta deild og sat yfir. Strákarnir voru búnir að taka öll lok af vélinni og svo ryksuguðu þeir og blésu. Um þrjú komu tvö úr arion banka í heimsókn og fengu að fræðast um alla starfsemi seðlaversins. Þau komu í kortadeildina þegar viðgerðarmennirnir voru að setja saman vélina aftur og fengu að sjá eitt kort framleitt. Var ekki búin í vinnu fyrr en um hálffimm en þá fór ég beint heim fyrst sundlaugar og aðastaðan í Nauthólsvík voru lokuð vegna kulda og til að spara vatnið. 

Færsla no 3494

Í dag eru tuttugu ár síðan ég byrjaði á þessum vettvangi, að blogga. Færslurnar eru orðnar hátt í fjögur þúsund en sum bloggárin voru rýrari en önnur. Ef ég hefði sett inn eina færslu á dag væru þær orðnar rúmlega sjöþúsundogþrjúhundruð. Gærdagurinn var annars alveg ágætur. Var í bókhaldinu. Færði mig yfir í tímon úr tempo og er nú komin með vinnuskráningar app í gemsann þar sem ég get stimplað mig inn og út. Um tvö leytið leysti ég aðra af á vélinni sem þurfti að fara. Það var aðeins eftir að framleiða rúmlega þrjátíu kort, telja, pakka og ganga frá. Það var allt búið um þrjú leytið og um hálffjögur fór ég heim. Hringdi í Lilju vinkonu og pabba en um hálffimm var ég búin að kveikja á sjónvarpinu til að horfa á HM stofuna og landsleikinn. Seinna um kvöldið horði ég að parta úr leik Svía og Ungverja og Cristal Palace og Man. Utd.

Miðvikudagur

Það var vekjaraklukkan í gemsanum sem ýtti við mér í gær. Að vísu var ég búin að rumska en það var vel fyrir sex og ég sofnaði sem betur fer aftur. Hafði alveg tíma til að vafra um á netinu en var mætt í vinnuna tuttugu mínútum fyrir átta. Var á ítroðsluendanum á vélinni. Kláruðum fyrsta skammtinn, sem var yfir tvöhundruð kort, korter yfir níu. En þegar við ætluðum að fara að framleiða kort á form var prentarinn með mjög þreytandi vesen og það tók okkur eina og hálfa klukkustund að koma honum í gang. Kláruðum endurnýjun korta sem renna úr gildi um næstu mánaðamót. Um fimm hundruð kort. Byrjuðum á daglegri framleiðslu rúmlega tólf en þá tók prentarinn aftur kast. Þrátt fyrir að dagleg framleiðsla væru aðeins færri kort en þau sem við vorum að endurnýja vorum við ekki búnar fyrr en rúmlega fjögur og klukkan var orðin hálffimm þegar ég kvaddi vinnustaðinn minn. Fór beinustu leið í sund og náði aðeins í "skottið" á kalda potts vinkonum minni. Eftir sundið kom ég við á AO við Sprengisand og fyllti á tankinn. 

Mánuðurinn rúmlega hálfnaður

Var mætt í vinnuna rétt upp úr klukkan hálfátta. Sú sem var í bókhaldinu var komin en ekki búin að fara niður. Ég skrapp því niður til að kveikja á vélinni og rakatækinu. Áður en lengra var haldið fór ég upp aftur, fyllti á vatnsflöskuna, fékk mér kaffi og settist aðeins niður með prjónana mína í kaffistofunni. Ég var á móttökuendanum. Áttum bara eftir hádegis framleiðsluna þegar við fórum í mat upp úr klukkan tólf. Þegar daglegri framleiðslu og pökkun lauk héldum við áfram með endurnýjunina. Vélin var hundleiðinleg. Unnum til klukkan að verða fimm en náðum ekki að klára allt það sem við ætluðum okkur, eigum rúmlega fimmhundruð kort eftir af því. Hlustaði á lýsingu á landsleiknum á Rás tvö á leiðinni heim og var fyrri hálfleikur rúmlega hálfnaður þegar ég kom heim og kveikti á sjónvarpinu. 

Mánudagur

Ég var komin á fætur um átta leytið í gærmorgun. Tók því frekar rólega og vafraði um á netinu dágóða stund. Um hálfellefu skrapp ég út til að færa bílinn. Kom beint inn aftur og kveikti þá á sjónvarpinu og horfði á nokkra þætti. Um tvö leytið ætluðum við Davíð Steinn að skreppa aðeins á rúntinn á nýja bílnum hans. Bíllinn fór hins vegar ekki í gang. Var rafmagnslaus, sennilega vegna þess að hann hafði skilið ljósin inni í bílnum eftir á en kuldinn hefur heldur ekki hjálpað til. Vinnufélagi hans sendi pabba sinn á staðinn til að gefa start. Pabbinn kom um fjögur og skömmu síðar gátum við loksins lagt af stað. Sonurinn ók um borgina og nærliggjandi sveitafélög. "Fann" ansi mörg hringtorg og þurfti einnig að stoppa á mörgum ljósum. Bíltúrinn tók um klukkustund. Hann drap aldrei á bílnum og skiptingarnar og að taka af stað verður sífellt mýkra hjá honum. Honum fer fram og hann er vandvirkur og athugull fyrir. Kláraði eldhúshandklæði úr afgöngum. Á samt nóg af afgöngum í amk tvö handklæði eða nokkrar tuskur enn. Fitjaði þó upp á nýrri tusku úr nýju bókinni af nýrri garnhnotu úr Söstrene Grene.

Töp og sigrar

Ég svaf út í gærmorgun og klukkan var byrjuð að ganga tíu þegar ég dreif mig loksins á fætur. Eftir morgunverkin á baðherberginu vafraði ég um á netinu til klukkan að verða hálfellefu. Þá fór ég með esperanto dótið mitt yfir í vesturbæinn til esperanto vinkonu minnar. Komum okkur í ágætis esperanto gír. Var komin heim aftur skömmu fyrir klukkan eitt. Fór ekkert út aftur en setti í eina þvottavél, vafraði á neti, prjónaði og horfði á fótbolta, körfubolta, handbolta og þætti. Lánaði bræðrunum bílinn. Þegar þeir komu til baka fann Oddur ekkert annað stæði en bak við heilsugæsluna. 

Á rúntinum

Mætti í vinnu rétt upp úr klukkan hálfátta. Ég var aftur á ítroðsluendanum en hinar tvær skiptu um vinnustöð. Daglegri framleiðslu lauk á svipuðum tíma og daginn áður eða um hádegið. Eftir hádegi framleiddum við eitthvað í kringum fimmhundruð kort í endurnýjun. Hættum vinnum um hálfþrjú. Ég fór beinustu leið heim þrátt fyrir að vera með sjósundsdótið með mér í bílnum. Málið var að það var stutt í háfjöru og ég var ekki alveg í stuði til að vaða "hálfa leið" til Kópavogs. Hefði reyndar ekki þurft að gera það svo sem því það er vel hægt að svamla um í sjó sem nær upp að hné. Þegar klukkan var byrjuð að ganga sex fórum við Davíð Steinn saman að bílnum hans. Illa gekk að bakka út úr stæðinu og það virtist ekki nóg að ég ýtti en sem betur fer kom að ungur maður sem hjálpaði mér svo eftir tíu mínútna streð komst Davíð Steinn loksins út úr stæðinu. Leiðin lá fyrst að N1 í Kópavogi, gömlu vinnustöðinni hans. Þar fyllti hann á bílinn og bætti einnig á rúðuvökvann. Svo keyrði sonrinn í gegnum Breiðholtið og yfir í Grafarvog og stoppaði smá stund á N1 við Gagnveg. Þaðan ók hann í gegnum Grafarvoginn og svo aftur heim. Þessi ferð tók um eina og hálfa klukkustund. Ég finn það að hann verður góður ökumaður. Hann er varkár og ekur frekar mjúklega. Þarf að æfa sig í að taka af stað í brekku og passa að leita ekki of mikið til hægri út í kantinn. 

Sigur í fyrsta leik á HM í handbolta karla

Vaknaði upp úr klukkan sex og var komin fram fljótlega eftir það. Nógur tími til að vafra um á netinu og setja inn færslu á þessum vettvangi. Davíð Steinn kom fram fyrir klukkan hálfsjö og var farinn út úr húsi innan við korteri seinna. Ég mætti í vinnuna korter í átta. Var á ítroðsluendanum. Kláruðum daglega framleiðslu um hádegið. Eftir hádegi unnum við að endurnýjun. Þá var vélin byrjuð að vera með stæla og á þeim tíma sem við hefðum venjulega verið að framleiða hátt í þúsund kort framleiddum við rúmlega fjögurhundruð. Fór beint í sund eftir vinnu. Hringdi þó fyrst í pabba þegar ég var búin að leggja bílnum við Laugardalslaugina. Hitti kalda potts vinkonu mína í hennar þriðju ferð í kalda. Fórum saman í fjórar ferðir og svo í gufu. Ég fór í sturtu eftir gufuna og synti 200 metra áður en ég fór upp úr og þvoði mér um hárið. Var komin heim um hálfsex. Byrjaði á því að vafra um á netinu til klukkan að verða sjö en þá kveikti ég á sjónvarpinu til að horfa á HM stofuna og leikinn Ísland - Portúgal 30:26. Fyrstu mínúturnar leit þetta mjög vel út en leikurinn jafnaðist út eingöngu vegna of margra tapaðra bolta hjá okkar strákun. Portugalir komust samt aldrei yfir í leiknum. Þeir eru með mjög gott lið en þetta datt okkar meginn í gær, þökk sé góðri vörn og Bjöggi var frábær í markinu. Viktor Gísli varði eitt víti og leysti Bjögga af um stund þegar sá síðarnefdi var búinn að fá boltann í höfuðið í tvígang.

Fatakaup

Davíð Steinn svaf aðeins yfir sig í gærmorgun svo ég bauðst til þess að skutla honum í vinnuna. Á leiðinni út götuna ókum við framhjá bílnum sem hann fjárfesti í í fyrradag. Hvít volkswagen bjalla með númerið KMT96. Vinnufélagi hans vann í að leita að bíl með honum og sá er einnig skráður sem leiðbeinandi vegna æfingaakstur svo Davíð Steinn fékk rúmlega klukkutíma æfingu seinni partinn á þriðjudaginn. Ég var mætt í vinnu rétt upp úr klukkan hálfátta eftir að hafa skilað syninum af mér korteri fyrr. Ég var á móttökuendanum á vélinni. Kláruðum daglega framleiðslu og pökkun um hádegi og unnum að endurnýjun eftir hádegi. Fór beinustu leið í sund eftir vinnu. Hafði ætlað mér að synda smá baksund og þvo mér um hárið á leiðinni upp úr en ég hafði ekki tekið með mér höfuðhandklæði svo ég sleppti öllu sundi og hárþvotti. Fór 2x5 mínútur í kalda, einu sinni í heitasta, einu sinni í sjópottinn og einu sinni í gufuna. Áður en ég fór heim kom ég við í Belladonna og keypti mér 4 buxur.

Í jafnvægi

Ég var  aftur á bókhaldsvaktinni í gær. Leysti aðra af á vélinni milli eitt og hálfþrjú þar sem hún fór á fund og hina um hálffjögur en hún var á leið í sjúkraþjálfun. Bras var á vélinni og þegar við vorum loksins búnar að framleiða um 500 kort þurftum við að lesa saman mest alla framleiðsluna til að finna út hvaða eina kort hafði verið á lista. Listinn hafði óvart verið þurrkaður út. Þetta varð til þess að klukkan var að verða fimm þegar við gátum farið úr vinnu. Og þrátt fyrir að vera með sunddótið meðferðis fór ég beinustu leið heim.

Sjórinn góður

Ég var mætt fyrst í vinnu í gærmorgun. Fór niður og kveikti á vélinni, teljurum og rakatæki. Var að vinna í að prenta út fyrstu tölur þegar samstarfskonur mínar mættu. Ég var semsagt í bókhaldinu í gær. Við unnum til hálffjögur. Þá fór ég beint í Nauthólsvík. Var mætt rétt fyrir fjögur. Sjórinn -1,8°C og aðeins byrjað að flæða að aftur. Engin ísing var á sjónum enda aðeins meiri hreyfing á logninu. Ég var rúmar þrjár mínútur út í og var svo búin að vera tíu mínútur í pottinum þegar þrjár úr sjósundshópnum mættu. Þær fóru í lónið sem þær sögðu vera mun heitara en sjórinn. Var komin heim um fimm leytið. Í dag eru tuttuguogþrjú ár síðan ég byrjaði að vinna hjá RB.

Helgin liðin

Fór á fætur um átta. Rúmlega klukkutíma síðar settum við skiltið á bílinn og Davíð Steinn keyrði sig í vinnuna. Ég tók skiltið af þegar við vorum komin upp á Gagnveg, kvaddi soninn og dreif mig í sund. Synti 400 metra, fór 3x5 mínútur í kalda, einu sinni í sjó pottinn og einu sinni í gufuna. Heitasti potturinn var lokaður. Hitti tvær úr sjósundshópnum mínum örstutt. Var komin heim um hálftólf og byrjaði á því að hella upp á könnuna. Sýslaði við nokkurn veginn það sama annars þegar ég er heima við. Dagurinn var alltof fljótur að líða. 

Æfinga akstur

Var vöknuð upp úr klukkan sex í gærmorgun. Rétt fyrir sjö heyrði ég í vekjaraklukkunni hjá Davíð Steini. Tíu mínútum seinna hringdi ég í hann til að ýta við honum. Bauð honum að keyra sig sjálfan í vinnuna. Settum skiltið neðst á skottlokið og tókum ökubókina sem ökukennarinn er búinn að kvitta í fimm sinnum og sýslumaður stimpla leyfi til að æfa sig í akstri. Þetta var í fyrsta sinn sem Davíð Steinn keyrði sjálfskiptan bíl og þetta gekk bara nokkuð vel hjá honum. Aðeins einu sinni sem hann bremsaði svolítið harkalega. Þegar við komum upp á Gagnveg tókum við skiltið af og skiptum um sæti. Ég þáði kaffi bolla með mér til baka og kláraði að drekka hann á planinu við Laugardalslaugina. Fór tvær ferðir í kalda pottinn, eina í heitasta og eina í sjópottinn áður en ég synti 300 metra. Var komin heim um tíu. Klukkutíma síðar skrapp ég til norsku esperanto vinkonu minnar. Skilaði henni smákökudósinni. Var með esperanto dótið meðferðis en við vorum hvorugar í stuði í svoleiðis æfingar í gær og frestuðum þeim um viku. Fór með bílinn í gegnum löðurþvottastöðina við Fiskislóð og skrapp svo í Krónuna á eftir. Kom heim um hálftvö og var nýbúin að ganga frá vörunum þegar Oddur Smári kom fram. Horfði á æfingaleikinn milli Þýskalands og Íslands, fitjaði upp á nýrri tusku, vafraði svolítið á netinu og fleira. Um sex var ég mætt á staðinn Matur og Drykkur við Grandagarð 2. Móðursystir mín hafði boðið mér í mat með þeim mæðgum nöfnu minni og kærasta hennar. Þannig að við vorum fjögur. Mæli eindregið með þessum stað. Góður matur og mjög góð þjónusta. Var komin heim aftur um hálfníu. 

Nægjusemi

Var komin á fætur rétt rúmlega sex í gærmorgun. Eftir morgunverkin á baðherberginu settist ég inn í stofu með fartölvuna í fanginu næsta klukkutímann eða svo. Mætti í vinnu um hálfátta leytið. Var á móttökuendanum á vélinni og kláruðum allt daglegt um tólf. Eftir hádegi var klárað og telja og svo gengum við bara frá vélinni og deildinni og hættum vinnu um tvö samt ekkert svo löngu á undan öðrum vinnufélögum á staðnum. Ég fór beinustu leið í Nauthólsvík. Þurfti að vaða varlega út í -2,1°C sjóinn en tolldi samt rúmlega mínútu út í áður en ég fór aftur upp úr og í heita pottinn. Klukkan var ekki orðin hálffjögur þegar ég kom heim. 

Ýmislegt

Vinnudagurinn í gær var örlítið styttri en samt náðum við að framleiða yfir ellefuhundruð kort í endurnýnun fyrir utan daglega framleiðslu. Ég var á ítroðsluendanum en hinar tvær skiptu um stað. Sú sem er búin að vera í bókhaldinu undanfarna viku kom á móttökuendann. Vorum búnar að ganga frá deildinni um hálfþrjú. Ég fór beint í sund. Staldraði þó aðeins við í bílnum á planinu og hringdi í eina vinkonu mína sem var að missa pabba sinn í fyrradag. Hún var á rölti á Laugaveginum með einni af systrum sínum til að dreifa huganum aðeins. Synti 300 metra áður en ég fór í kalda pottinn þar var kalda potts vinkona mín að ljúka sinni annarri ferð þar en hún hafði líka mætt í fyrra fallinu. Saman fórum við 4 ferðir í kalda, þann heitasta á milli og í gufuna eftir síðustu ferðina í kalda. 

Tækifæri

Ég var mætt í vinnu tuttugu mínútum fyrir klukkan átta. Sú sem hefur verið í bókhaldinu síðustu daga var beðin um að vera í því enn einn daginn en við sem vorum niðri skiptum um enda. Ég var semsagt á ítroðsluendanum. Daglegri framleiðslu lauk um hádegið. Eftir hádegi ætluðum við að byrjað á einni endurnýjuninni sem bíður. Það gekk ekki þrautalaust fyrir sig. Hluti af því var að búið er að taka öll gömul load til hliðar. En þegar búið var að færa fjögur af þeim til baka, fjögur sem tilheyra sex óframleiddum skrám kom í ljós að það var eitthvað meira að því vélin vildi hvorki starta á skrám hvort sem kort áttu að fara á form eða ekki. Kerfisfræðingurinn hafði verið beðinn um að setja inn nýtt forrit inn í Smára (Smári er kerfi sem m.a. "talar" við örgjörvamódúlana í framleiðsluvélinni) af öryggisstjóra. Það var ekki fyrr en búið var að stöðva þetta forrit að kortavélin samþykkti að fara af stað. Framleiddum eina af sex skrám sem bíða. Ég var komin heim um hálffjögur og bað Odd um að skreppa eina ferð í Sorpu, sem hann gerði. Hann hefði helst vilja fara í dag en ég er búin að lofa mér í sund seinni partinn í dag.

Tilraun

Í gærmorgun vaknaði ég við vekjaraklukkuna. Ég hafði reyndar rumskað um fimm en sem betur fer steinsofnað aftur. Það var smá bras að bakka út úr stæðinu þegar ég var að leggja af stað í vinnuna um hálfátta en það tókst í fimmtu tilraun. Vorum á sömu vinnustöðvum, ég semsagt á móttökuendanum og að pakka. Hættum vinnu um þrjú og ég fór beint í sund. Byrjaði á kalda pottinum en sat svo í þeim heitasta þegar kalda potts vinkonan kom úr gufu. Hún var þá þegar búin með tvær ferðir í kalda en saman fórum við í fjórar og svo í gufu. Eftir gufubaðið fór ég í sturtu og synti 200 metra á bakinu áður en ég fór upp úr og þvoði mér um hárið. Kom aðeins við í Hagkaup í Skeifunni á leiðinni heim.

Án titils

Var vöknuð um sex og komin fram á undan Davíð Steini sem þó fer alltaf á undan út úr húsi. Hann kom fram um hálfsjö og var farinn tíu mínútum seinna. Útidyrnar stóðu ekki á sér að þessu sinni, hvorki þegar hann fór né þegar ég fór rúmum hálftíma seinna. Er helst á því að minnsta einingin í lásnum hafi frosið eða staðið á sér í fyrrakvöld. Bíllinn var í Blönduhlíð. Þurfti aðeins að sópa af honum en ekki mikið þó. Í vinnunni var ég á móttökuendanum og í pökkun. Vélin hagaði sér þokkalega og við gátum klárað eins og eitt stykki endurnýjun og vorum samt hættar um þrjú. Endurnýjunum er samt ekki lokið en það saxast á þær og vonandi verða þær búnar áður en þær næstu skella á okkur. Ég fór beinustu leið í Nauthólsvík eftir vinnu. Enn var mikill krapi þar sem ég er vön að fara út í. Sjórinn -1,6°C. Við vorum nokkur sem fórum út í á sama tíma. Fórum ekki langt. Ég var um mínútu út í þarna meginn en skrapp svo í lónið í 3 mínútur áður en ég fór í pottinn. Var komin heim um hálffimm. Kláraði tuskuna Blanda og fitjaði upp á nýrri sem heitir Ferningar. Horfði að mestu á leikinn í enska en mínir menn Liverpool töpuðu á úti velli fyrir Brentford sem er á góðri leið að gera heimavöllinn sinn óvinnandi vígi og þó voru þeir án síns besta manns. Aðeins Arsenal hafa unnið þá á þessum velli á þessari leiktíð.

Ryk

Rumskaði um sjö leytið í gærmorgun en steinsofnaði fljótlega aftur. Komst svo á fætur rétt áður en klukkan varð tíu. Ekki það að ég ætlaði mér neitt að vakna mjög snemma og ég var alls ekki með nein plön önnur en að taka því rólega heima við og sinna mínum hugðarefnum. Tók tvær bækur með mér inn í stofu en las svo ekkert í þeim fyrr en ég fór upp í rúm um kvöldið. Það var prjónið, netvafrið, fótboltinn og þáttaáhorf sem urðu ofan á fram eftir degi og fram á kvöld. Lánaði Oddi bílinn um miðjan dag. Ég var farin að sofa þegar Davíð Steinn hringdi um hálfellefu. Þá voru þeir bræður fyrir utan en útidyrnar vildu ekki opnast utan frá. Ég fór í slopp og niður en gat heldur ekki opnað innan frá svo ég hleypti sonunum inn um dyrnar í kjallaranum. Veit ekkert hvað er í gangi með þessa hurð en það verður skoðað. 

!

Enn eitt árið horfið í aldanna skaut og nýtt ár að hefja sína vegferð. Ég var komin á fætur um níu í gærmorgun. Þrátt fyrir ágætis veður ákvað ég að senda skilaboð til norsku esperanto vinkonu minnar að ég væri löt og ætlaði bara að halda mig heima við. Og það gerði ég, hélt mér heima við. Vafraði á netinu, kláraði eina tusku og byrjaði á annarri, horfði á þætti, fótbolta, fréttaannál og skaup og hafði það yfir höfuð mjög notalegt. Við Oddur voru tvö heima, Davíð Steinn var hjá vini sínum á Akranesi og kemur ekki heim fyrr en í kvöld. Ég var með ofnrétt úr kjúkling og grænmeti og hafði einnig bygggrjón með. Í stofunni var ég með tvær bækur á kantinum en ég las ekki í þeim fyrr en ég var komin upp í rúm um hálfeitt leytið.