- Lítið um pásur -

Um miðjan dag í gær tók ég við bílnum. Skutlaði Davíð á skrifstofuna, lauk minni skyldu og sótti því næst tvíburana til mömmu. Fyrst fórum við heim með skólatöskurnar og til að skipta um föt því um fimm áttu þeir að vera mætti í Veröldina Okkar í afmælisveislu til vinar þeirra, bekkjarbróður og fótboltafélaga. Þjálfarinn var einmitt nýbúinn að færa æfingatímann til klukkan fimm þannig að það var bara "skrópað" á æfingu þar sem ekki var hægt að vera á tveimur stöðum í einu.

Á meðan þeir voru í afmælinu fór ég heim að sinna eitthvað af heimilisstörfunum sem fyrir láu. En ég stal mér líka smá tíma til að lesa. Fyrir sex vikum náði ég mér í fyrstu þrjár Harrý Potter bækurnar og í síðustu viku í nr. 4 og 5. Ég er semsagt hálfnuð með Fönixregluna. Magnaðar bækur og ég er ákveðin í að lesa þær e-n tímann á móðurmálinu sínu, ensku.

Sótti tvíburana rétt fyrir sjö. Þeir voru ekki tilbúnir til að koma. En við vorum búin að lofa Helgu Vilborgu, sem stjórnaði barnakórnum í fyrravetur, að hitta hana og flesta þá sem hún hafði unnið með og sungið með í KFUMogK húsinu við Holtaveg. Strákarnir misstu af upphituninni en það gerði ekkert til. Um átta byrjuðu svo tónleikar þar sem kenndi ýmissa grasa, m.a. sálmavinafélagið, gospelkór Reykjavíkur, barna og unglingakórar Hallgrimskirkju og fleiri og fleiri. Það var ekki að heyra á barnakórnum að þau væru búin að vera í sumarfríi síðan í maí og þegar gospelkórinn setti allt í fullan gír hríslaðist um mann góð tilfinning. Helga Vilborg var potturinn og pannan í þessu prógrammi enda hugsaði hún þetta sem kveðjutónleika áður en hún, maðurinn hennar og tvö börn fara til Norgegs í trúboðsundirbúning.

Það voru þreyttir bræður sem skriðu upp í kojur rétt rúmlega tíu.

- Skroppið út úr bænum -

Ég fékk skyndihugdettu í gærmorgun og hringdi í pabba fyrir klukkan tíu. Eftir að hafa talað við hann varð ég ákveðnari í að skella mér austur. Skutlaði Davíð og
bróður hans í Kópavoginn og svo brunuðum við mæðginin beinustu leið austur. Pabbi heilsaði tvíburunum kumpánlega og sagði: "-...langt síðan við höfum sést!" Oddur Smári svaraði um hæl: "-Æ, láttu ekki svona afi!".

Þeir bræður fóru beint inn í og hlömmuðu sér fyrir framan sjónvarpið. Ég lét þá eiga sig til að byrja með en eftir að hafa fundið til handa þeim hádegishressingu sagði ég þeim að fara út og nota góða veðrið. Það tók smá stund en þeir voru farnir fyrir hálftvö, til vinar síns upp í hæð og komu ekki aftur fyrr en um hálfátta, léku sér víst úti allan þennan tíma - enda var veðrið til þess. Við vorum boðin í mat og drifum okkur strax í bæinn eftir snæðinginn. Samt var klukkan að slá tíu er þeir komust í rúmið og það sem er svo mikið að gera í dag og fram á kvöld....

- Burtflognir dagar -

Tíminn er ekkert að láta bíða eftir sér þessa dagana frekar en endranær. Skólinn fór hægt af stað og var ekkert heimanám í vikunni. Mamma bauð strákunum að koma í Skaftahlíðina eftir skóla og skutlaði þeim á æfingar fyrstu tvo dagana og sendi þá heim á góðum tíma á föstudag. Við mæðginin hittumst fyrir utan hliðið og sýndi Davíð Steinn mér hróðugur sjöttu barnatönnina sem hann hafði rifið úr sér fyrr um daginn.

Það var ljúft að hitta aftur velflesta kórfélagana sína sl. miðvikudagskvöl og tvö (alt, og tenór) mættu til prufu (og verða mjög líklega með í vetur). Á fimmtudagskvöld-ið var mikilvæg keppni í tímafrekaleiknum svo ég notaði tækifærið og skrapp í heimsókn í annað bæjarfélag.

Fljótlega eftir að við mæðgin komum heim á föstudaginn kom vinkona mín frá London. Eftir að hafa fengið okkur hressingu og spjallað drifum við okkur á Valur - Breiðablik 6:1, strákarnir hjólandi og við tvær gangandi. Það var allt annað að sjá til Vals í þessum leik nema kannski að einn af nýliðunum, Garðar Gunnlaugsson var óheppin að nýta ekki færin sem hann fékk í leiknum. Held að piltinn vanti bara smá sjálfstraust. En sæti í efstu deild að ári er svo gott sem tryggt og eins og staðan er eftir 16 umferðir af 18 lítur út fyrir að Þróttarar fylgi þeim aftur upp en HK á góða möguleika og jafnvel önnur þrjú önnur lið þótt það sé mun fjarlægara hjá þeim. Allt getur gerst!

Er við komum aftur heim var Davíð búinn að sækja tölvuna og farinn á Skjálftamót nr. 2 á og þriðju helgarkeppnina á árinu. Vinkona mín stoppaði aðeins lengur. Strákarnir fengu að horfa á fyrri bíómynd kvöldsins, Rauðu skóna, og fóru því heldur seint að sofa.

Um tíu í gærmorgun ýtti Davíð við mér því ég hafði eitthvað minnst á það að ég vildi hafa bílinn. Oddur Smári vaknaði um svipað leiti en fór bara inn í stofu að lesa Harry Potter og eldbikarinn á meðan ég skutlaði elsta unglingnum upp í Digranes. Davíð Steinn var að rumska er ég kom til baka. Á leiknum kvöldið áður höfðu heyrst raddir um að hafa hátíð á Valssvæðinu frá hádegi. Ég sendi strákana gallaða og hjólandi þangað og tók svo fram ryksuguna. Ég var rétt búin að ryksuga inni í hjónaherbergi þegar þeir bræður komu til baka. Ég bað því Odd um að ryksuga inn í þeirra herbergi og þá spurði Davíð Steinn hvað hann ætti að ryksuga. Það varð úr að þeir skiptu á milli sín þeim gólfsvæðum sem eftir voru í íbúðinni, nema stofunni og frammi á gangi.

Um hálftvö tókum við okkur til og fórum á bílnum áleiðis á Valssvæðið. Afsökunin var sú að strax eftir Valur - Breiðablik 3:0 ætluðum við að verlsa inn. Það var frábært að sjá hversu margir komu á leikinn og fylgdust með stelpunum tryggja sér Deildar-titilinn. Þær spiluðu líka oft á tíðum eins og sannir meistarar þótt þær hafi kannski ekki nýtt öll sín þrjátíuogeitthvað færi í leiknum.

- Grunnskólinn og kirkjukórinn -

Tvíburarnir hófu sinn síðasta vetur í skólanum í morgun. Þeir áttu að mæta í nýja stofu og bekkurinn þeirra heitir 8 ára Þ. Þeir voru orðnir nokkuð spenntir, með nýjar skólatöskur og kveðjur til kennarans frá mér. Ég er ekki í nokkrum vafa að framundan er skemmtilegur og spennandi vetur.

Og í kvöld byrja aftur kóræfingar.

- Sameiginlegur afmælisfagnaður -

Mamma lagði mikið upp úr því að við værum komin austur í síðasta lagi um hádegi í gær. Það tókst svona hérumbil. Gerðum stutt stopp á Selfossi. Sótti rabbarbara til mömmu tvíburahálfsystur og þáðum kaffi og með því í leiðinni.

Það var Hulda frænka sem tók fyrst á móti okkur á Hellu. Hún hljóp beint upp í fangið á mér og gaf mér gott frænkuknús svo hjálpaði hún okkur að afferma og ferma (strákadót) bílinn.

Rétt fyrir tvö var Helga nýbúin að sleppa orðunum: -"Það koma engir gestir fyrr en eftir þrjú!", þegar fyrstu gestirnir renndu í hlað. Ég stakk af í smá stund og kíkti yfir til föðurbróður míns sem var að gera upp gamalt skrifborð í skúrnum hjá sér. En síðan dembdi ég mér í að búa til kaffi. Ég var í sömu fötunum og ég mætti í í skírnarveislu Bríetar og út í bíl var ég með "kaffilituðu fötin" með mér til öryggis. Sem betur fer þurfti ekkert á þeim að halda. Helga systir sá um að tína fram allt sem mamma var búin að baka síðustu daga og það var ekki smá. Næstu gestir komu ekki fyrr en tveimur tímum seinna. Alls komu 20 gestir en tilefnið var 60 ár mömmu (15. júlí sl.) og það að pabbi fyllir 70 árin í október. Það var búinn til pottréttur í súrsætri sósu, grillað naut, skorið niður í sallat, búin til piparsósa og fyrirfram var mamma búin að búa til tvenns konar kartöflusallöt. Yngstu krakkarnir fengu líka grillaðar pylsur ef þau vildu það frekar. Þetta var hin fínasta veisla og gaman að hitta allt þetta fólk, fjölskyldu og vini. Veðrið var líka alveg ágætt og hægt að vera úti að verönd. Þegar kvöldaði og kulaði var gashitarinn settur í gang.

Um ellefu þökkuðu strákarnir afa, ömmu, Helgu, Ingva, Huldu og Bríeti fyrir vikuna og komu með okkur heim. Þeir eru svo sannarlega búnir að hafa það gott undanfarnar tvær vikur.

- Aftur í bíó -

Fékk Davíð til að sækja mig seinni partinn í gær þar sem ég var með fangið fullt af ómótstæðilegum kössum. Jú, jú, ég er flutt og að pakka upp í rólegheitunum en þessir kassar henta svo vel undir strákadót eða föndurdót. Þegar ég opnaði farangursrýmið á bílnum uppgötvaði ég að þar var enn dót sem var á leiðinni í Sorpu fyrir meira en viku. Skruppum þangað en svo varð Davíð að fara aftur í vinnuna. Ég tók bílinn traustataki og sinnti nokkrum erindum.

Fyrst lá leiðin í Rúmfatalagerinn til að kaupa dúkaklemmur fyrir mömmu. Á meðan ég var að svipast um eftir þeim fann ég ýmislegt annað; litla krúttlega saumavél, blandaða tvinna og sokka á tvíburana og Huldu. Næst fór ég heim að sækja bækur til að skila á bókasafnið. Endurnýjaði bókasafnsskírteinið og fann mér svo fulla körfu af bókum (sumar af þeim reyndar hugsaðar fyrir strákana). Skilaði dvd-myndinni frá kvöldinu áður og fór loks heim. Gat staðist mátið að byrja að lesa en festist við tölvuna þar til kominn var tími til að sækja Davíð.

Við prentuðum út afmæliskort (handa mömmu) áður en við fórum af skrifstofunni. Freistuðumst til að fá okkur kjúklingasallat á American Style og fórum svo að sjá réttu myndina, The village í bíó og að þessu sinni var hún sýnd í Kringlubíó. Mynd sem kom á óvart en þarf ekki endilega að sjá á stóru tjaldi.

Menningarnóttin er í allan dag og fram á nótt. Ég upplifði hana í fyrsta skipti í fyrra (því hún hittist alltaf á sömu helgina og Töðugjöldin á Hellu) og ætlaði mér svo sannarlega að vera með núna. En fyrr í sumar varð ljóst að ég yrði bara að hlakka til næsta árs...

Þangað til næst: FARIÐ VEL MEÐ YKKUR ÖLL!

- Hvert ruku dagarnir? -

Það er kominn föstudagur enn á ný. Þegar ég arkaði af stað seinni partinn í gær var ég með áætlanir um að sækja nokkra kassa úr skúrnum, setja í þvottavél og fleira og fleira. En svo gerði ég lykkju á leið mína og stoppaði í klukkutíma í bankanum en þangað hef ég ekki komið í tvö ár. Þetta var 12. innlögnin mín á 16 árum.

Eftir blóðgjöf er betra að reyna ekki um of á handlegginn næstu tímana svo þar fór áætlunin um kassana út um gluggann í bili. Settist bara við tölvuna og fór að spjalla á msn-inu.

Davíð kom heim á sjöundatímanum. Vorum búin að ákveða að fara ekki á Þróttur - Valur 2:1 og hann ákvað líka að sleppa æfingu í tímafreka leiknum. Í staðinn fórum við bæði í bíó (á "vitlausa mynd", ætluðum að sjá "The village" en hún var bara ekki sýnd í Kringlubíó eins og ég þóttist hafa lesið á kvikmyndavefnum) og leigðum okkur svo dvd-disk strax á eftir. Myndin sem við sáum var The Chronicles of Riddick en hin The whole ten yards. Báðar ágætar en ég hafði samt ekki úthald í að horfa á alla seinni myndina.

Í morgun sá ég svo megnið af tapleik Íslendinganna gegn Kóreumönnum. Ég hafði það svo á tilfinningunni mestan partinn af leiknum að þetta væri alveg að smella og ekki þyrfti að hafa neinar áhyggjur. En það fór sem fór. Nú er bara að vona að strákarnir okkar láti þetta ekki of mikið á sig fá og leggi Rússana á sunnudaginn.

- Uppselt -
- ÍSLAND - ÍTALÍA 2:0 -

Við vinkona mín, sú sem er nýkomin frá London, urðum frá að hverfa hálftíma fyrir leik. Mig grunaði þetta reyndar og var ekkert svo svekkt þar sem ég var alltof lengi að taka ákvörðun. Í staðinn fórum við heim til mín og vorum í ágætu stúkusæti fyrir framan skjáinn. Davíð sá um matinn, kjúkling frá Kentucky, og horfði svo á leikinn með okkur. Hann var sestur fyrir framan skjáinn áður en mörkin komu. Þvílíkur leikur. Það var unun að fylgjast með strákunum okkar, sérstaklega í fyrri hálfleiknum. Reykjavík fékk góða afmæligjöf og Ítalirnir vissu aldrei hvaðan á þá stóð veðrið. Mér fannst strákarnir detta alltof aftarlega í seinni hálfleik en þetta bjargaðist allt. Líklega fór eiginlega allt púðrið í fyrri hálfleik. Og mér fannst ekki leiðinlegt að lesa það sem Buffon lét hafa eftir sér að jafnvel í sínu allra besta formi hefðu þeir átt í erfiðleikum með Íslendingana!

- Kassavinna -

Seinni partinn í gær kom ég við hjá norsku vinkonu minni. Stoppaði góða stund hjá henni en svo kom hún með mér yfir til mín og hjálpaði mér í smá kassa málum. Við fluttum nokkra kassa úr bílskúrnum yfir í geymsluna, aðallega jóladót, og fórum svo upp í íbúð með bókakassa, geisladiskakassa og spólukassa og tæmdum þá á hugsanlega framtíðarstaði. Þetta gekk alveg ágætlega og eftir tæplega klukkutíma törn sögðum við þetta gott. Það er svolítið þreytandi að fara margar ferðir með þunga kassa alla þessa stiga. Engu að síður fannst mér við hafa verið mjög duglegar. Það er gott að eiga góða að. Ég er búin að fá góða aðstoð við ýmislegt úr ýmsum áttum og er ég mjög þakklát fyrir.

- Skrautleg og skemmtileg helgi -

Ég var ákveðin í að fara á fætur í fyrra fallinu en leyfa Davíð að sofa út sl. laugardagsmorgun. Framundan var innflutningspartý. Endirinn varrð samt sá að við sváfum bæði til klukkan að ganga ellefu og fljótlega eftir að ég fór á fætur kveikti ég á SkjáEinum til að fylgjast með upphitun fyrir fyrsta leikinn í ensku deildinni (Everton - Liverpool 1:1).

Eftir hádegi fór Davíð í verslunarleiðangur en ég í tiltektina (hann hjálpaði svo til er hann kom til baka). Fyrstu gestir komu um miðjan dag, vinkona mín og maðurinn hennar. Um sama leyti kom norska vinkona mín en ég hafði þáð tilboði hennar um aðstoð við þrif og tiltekt. Hún sagði mér bara að sinna gestunum róleg og var svo eins og stormsveipur um alla íbúð næstu tvo tímana. Þá kvaddi hún í bili. Hinir gestirnir stoppuðu eitthvað lengur en þau ætluðu að fara á kvöldvökuna á Töðugjöldunum á Hellu og voru farin vel áður en fyrstu gestir mættu.

Vinkona mín sem er nýkomin frá London kom langfyrst en hún var líka búin að bjóða fram aðstoð við veisluundirbúning og skar niður grænmeti með mér í snakk og pastarétt (buðum líka upp á pizzur, bjór, gos og snakk). Fyrstu gestir komu á áttunda tímanum og það voru að tínast inn og út gestir allt kvöldið. Sumir voru að koma úr öðru boði, aðrir að fara í annað boð og einstaka gestur kom og fór og kom aftur. (Margir voru líka búnir að borða þannig að það var heilmikill afgangur af öllu). Þegar sem flestir voru komnir skiptist samkoman eiginlega upp í tvö partý, svalapartý þar sem var geðveikt "hávaða" stuð og stofupartý þar sem var heldur rólegra, meira talað og mússíkinni stillt í hóf. Davíð gerði reyndar nokkrar heiðarlegar tilraunir til að fá upp stuðið í stofunni, hækkaði í græjunum og tók jafnvel sporið fyrir okkur við mikinn fögnuð sumra. Samt var alltaf lækkaði í mússíkinni þegar hann fór aftur yfir í svalapartýið. Síðustu gestir fóru um hálfþrjú nema næturgesturinn
mágur minn.

Í gær vorum við komin á ról fyrir hádegi. Týndum saman það mesta og ég renndi yfir gólfin með rakri tusku. Seinni partinn sóttum við tvíburana Bakkann og fórum með þá á Hellu þar sem þeir verða fram að næstu helgi. Skringilega tómlegt en tíminn nýttur vel.

Á arkinu seinni partinn hringdi ég í vinkonu mína (sem er nýkomin frá London) og spurði hvort ég mætti sækja hana og bjóða með mér á Valur - Fjölnir (6:0) í kvöld. Það var auðsótt mál. Davíð var kominn heim þegar ég kom um hálffimm. Hann var á leiðinni á fund um sex svo ég sótti vinkonu mína strax. Við löbbuðum á völlinn vel fyrir sjö og skemmtum okkur stórvel á leiknum. Nú eru bara tvær umferðir eftir í Landsbankadeild kvenna. Í næstu viku taka Valsstelpurnar á móti Breiðablik og ef þær vinna þann leik er alveg sama hvernig úrslitin verða í lokaumferðinni þegar þær fara til Eyja. En í millitíðinni (eftir næsta deildarleik en fyrir lokaleikinn í deildinni) spila þær líka undanúrslitaleik í Bikarkeppninni og taka á móti KR.

- Ég fór á ról í dag -

Arkaði af stað rétt fyrir hálfátta í morgun. Veðrið yndislegt, leiðin skemmtileg, en mikið hugsað og pælt á leiðinni. Alveg frá átta til fjögur var enginn tími til að hugleiða og spá. Er ég var lögð af stað heimleiðis seinni partinn datt mér í hug að kíkja á Súfistann þar sem tvær frænkur mínar vinna. Þær voru nýbúnar að opna staðinn aftur eftir nokkra tíma "siestu". Kom líka við í apótekinu til að fá mér eitthvað mýkjandi í hálsinn, hann er enn aumur og þarf ég að fara extra vel með hann. Eins gott að það eru ekki byrjaðar kóræfingar. Nú þarf ég að láta hendur standa fram úr ermum. Það hefur safnast upp þvottur og ég hef lítið gert í að koma hlutunum fyrir síðustu daga. En mig langar svo á leikinn FH - DUNFERMILINE, ætti ég að fara.....?

- Hugleiðingar um mistök og fyrirgefningu -

Stundum verður okkur á í mannlegum samskiptum eða daglegu amstri. Er ekki sagt að "mistökin séu til að læra af þeim?". Við erum öll mannleg geri ég ráð fyrir og það er mannlegt að gera mistök. Stundum er verið að tala tæpitungulaust og þá falla kannski óheppileg og vanhugsuð orð. Sem betur fer sér fólk að sér fyrr eða síðar og þá er langbest að ræða út um hlutina og biðjast fyrirgefningar. Gott mál það. Yfirleitt sættast aðilar á eitt, málið er afgreitt og lagt til hliðar - aldrei þarf að tala neikvætt um málin og rifja þau upp eftir sættir. Eða það finnst mér. Mér líður amk eins og ég fái spark í magann sé velt upp gömlum málum sem ég hef gert hreint fyrir mínum dyrum en skammast mín samt fyrir. Líður eins og ég hafi ekki fengið fyrirgefningu og þurfi því að upplifa leiðindin aftur og aftur. Og þá spyr maður tilhvers að biðjast fyrirgefningar og fyrirgefa ef maður getur ekki sleppt taki á hlutunum og hætt að velta þeim upp?

- Veikindi og innivera í veðurblíðu -

Ég er að hjarna við eftir að hafa farið beint að sofa er ég kom heim seinni partinn á mánudaginn og sofið af mér allan gærdaginn. Hálsinn er enn nokkuð aumur en höfuðverkurinn horfinn. Ég er að vona að ég komist á beinu brautina á morgun. Davíð sótti mig í vinnuna og við renndum við í Píluna og pöntuðum okkur myrkratjöld fyrir gluggana í hjónaherberginu. Við getum líklega sótt þau á föstudaginn.

En þessi veikindi höfðu þó eitt gott með sér. Ég gat passað Bríeti í um klukkustund á meðan Helga systir sinnti brýnum erindum í bænum. Ingvi og Hulda biðu fyrir austan. Hulda hringdi þó í mig og spurði hvort hún mætti koma líka en svo ákvað hún að passa frekar pabba sinn svo honum leiddist ekki aleinum þar sem afi og amma eru á smá ferðalagi. Passið gekk þokkalega og hún gerði allt hjá mér, svaf, spjallaði, orgaði og prumpaði. Við eigum eftir að ná enn betur saman í framtíðinni. Það er ég viss um!

- Skírnarveisla, lestur, söngur og fleira -

Strákarnir fóru á kvennaleikinn Valur - Stjarnan 7:0 í gær. Við Davíð vorum heima að tína upp úr kössum og koma dótinu fyrir. Sóttum samt enga kassa inn úr skúrnum. Það er alltaf að koma meiri og meiri mynd á heimilið og það fer loks að líða að því að við mátum myndir á veggina. Allt tekur þó sinn tíma.

Í dag vorum við svo boðin í skírnar veislu í Drápuhlíð 11. Stúlkan fékk nafnið Guðbjörg Lísa Guðmundsdóttir Johnsen og var svo eftir sig eftir skírnina að hún svaf næstum alla veisluna sína af sér.

Mitt í öllum flutningunum og látunum sem þeim fylgdi og fylgir hef ég alltaf gefið mér tíma til að lesa öðru hvoru. Ég hef nýlokið við bók sem Sigfús Daðason setti saman: MAÐURINN OG SKÁLDIÐ STEINN STEINARR. Þessi bók var gefin út 1987 en þá voru tæp þrjátíu ár frá því Aðalsteinn Kristmundsson lést. Ég mæli með þessari bók hún er vel saman sett og í henni er líka að finna margar perlur eftir Stein Steinarr.

Feðgarnir skutluðu mér í kirkjuna rétt fyrir átta í kvöld en brunuðu svo austur á Bakka þar sem þeir bræður verða næstu vikuna. Ég tók hins vega þátt í fyrstu messu eftir sumarfrí og var mjög gaman að hitta þá kórfélaga sem mættu. N.k fimmtudagskvöld verða píanótónleikar í kirkjunni og svo verður einn kórfélagi minn, Ari og bræðrabandið með tónleika á laugardaginn klukkan þrjú.

- Morgunstund -

Ég hef nýlokið við að skrifa enskri vinkonu minni, Janis, emil en hún sendi mér tilkynningu um breytt netfang og ég skrifaði henni um hæl.

Tvíburarnir vöknuðu löngu fyrir níu en þar sem ég fór að sofa fyrir miðnætti þá var ég eiginlega útsofin. Ákvað að leyfa Davíð að sofa aðeins lengur (ekki mikið lengur samt...), útbjó hafragraut handa strákunum og þegar ég uppgötvaði að kveikt var á tölvunni ákvað ég að setjast stund við hana.

Sá einhver "Út að grilla með Kára og Villa" sl. fimmtudagskvöld? Þeir fengu Ólaf Ragnar og Davíð Oddsson í þáttinn til sín, boðuðu þá upp að Perlu. Þátturinn var tekinn upp daginn sem Bríet var skírð (25. júlí). Þetta voru semsagt kokkurinn Ólafur Ragnar og tölvunarfræðingurinn og maðurinn minn Davíð Oddsson. Sá smá brot úr þættinum og fannst frekar fyndið að þeir bræður tóku á móti kumpánum í jakkafötum með bindi á meðan gestirnir mættu frjálslega klæddir. Davíð hafði reyndar spurt hvort klæðnaður skipti máli og hafði fengið neikvætt svar.

En stundin sem ég ætlaði mér í tölvuna er nokkurnvegin liðinn. Mín bíða ótal verk en sennilega byrja á að renna í könnuna. Það er ekkert eins gott og að skipuleggja verkefnin yfir fyrsta kaffibolla dagsins.

- Fjölgun og fleira -

Í gær frétti ég að dótturdóttir ömmusystur minnar væri búin að eignast eineggja tvíburasyni. Þeir voru teknir með keisara í gær og vógu 9 merkur og voru 46 og 47 cm langir. Það verður gaman að fylgjast með þeim vaxa og dafna. Ég veit núna hvað ég á að gera við sum ungbarnafötin sem ég "fann" í flutningunum.

Hulda frænka svaraði í símann er ég hringdi austur í dag.
Ég: -"Halló Hulda frænka! Hvað segirðu gott?"
Hún: -"Gott og vel. En Anna frænka ég get ekki komið til þín afþví ég er í sveitinni. Pabbi minn er að fara í afmæli og ég er að fara að gráta. Vilt þú koma til mín?"
Ég sagðist vera í vinnunni en sú stutta sagði að ég gæti komið strax eftir vinnu. Stuttu seinna heyrði ég í Helgu systur. Hulda ku vera búin að suða stanslaust um að fara og heimsækja Önnu Siggu (hún er nýbyjuð að kalla mig þetta, oftast er ég Anna frænka). Annars er sú stutta búin að hitta flest afasystkyni sín og spáir mikið í ellina. Hún fann það út að ein systir hans pabba væri gömul afþví hún var með krumpaðar hendur. Aftur á móti var maður hennar ekki með krumpaðar hendur og gat því ekki verið gamall. Þegar hann sagðist samt vera gamall spurði hún: -"Og, hvar er þá stafurinn þinn?"

- Gleymska -

Í gær gleymdu feðgarnir fótboltaæfingu og rúmlega tíu í morgun hringdi tannlæknir tvíburanna í mig og spurði hvar Davíð Steinn væri. Ég hringdi heim og kannaði málið. Í ljós kom að þeir voru allir steinsofandi...

- Meira labb og fleira -

Veðrið var svo gott í gærkvöldi að ég dró alla strákana mína með mér í smá göngutúr upp í Öskjuhlíð. Leiðin lá að vísu nokkuð beint upp í Perlu þar sem sumir fengu ís (mér bauðst nú líka en afþakkaði).

Í morgun tók ég blaðapokann með mér og kom við hjá nýuppgötvuðum blaðagám á arkinu. Ég var ekkert lengur á leiðinni samt. Seinni partinn tók ég svo á mig smá krók og kom við í tveimur fiskbúðum. Keypti lax í Fiskbúð Hafliða við Hlemm og fiskibollur í Fiskbúð Einars.

Davíð var búinn að hella upp á er ég kom heim. Ákváðum að hafa bollurnar í matinn og drifum okkur svo á bikarleik.

HK - Valur 1:0 - jamm, Valsararnir eru dottnir út úr bikarnum (það eru KR-ingarnir nú líka eftir tap gegn FH JIBBÍ fyrir FH) og lítið við því að gera svo sem. Vona bara að þeir haldi haus og haldi 1. sætinu fyrstu í deildinni svo þeir spili í Landsbankadeildinni að ári. Það eru sex umferðir eftir og HK, Fjölnir og fleiri lið eiga möguleika á að vinna og eða ná 2. sætinu.

- Í mörg horn að líta - (...og bæði aftur og fram á við...)

Arkaði af stað tuttugu mínútum yfir sjö í morgun þar eð ég vissi ekki hvað ég yrði lengi á milli staða héðan. Ég var ekkert svo lengi, tæpan hálftíma (og annan hálftíma á leiðinni heim seinni partinn) en nógu lengi samt til þess að hugsanir mínar komust nokkra hringi. Það er bara ágætt.

Davíð og strákarnir voru heima í dag, hann að reyna að ljúka e-u verkefni til að komast í nokkurra daga frí og þeir að lesa Harry Potter (II, leyniklefinn og III, fanginn frá Azkaban). Þegar ég kom heim vakti ég athygli þeirra á því að það væri fínasta veður úti. Þeir létu ekki segja sér það tvisvar (að vísu var pabbi þeirra búinn að spyrja þá í dag hvort þeir vildu ekki fara út...)

Þann 25. júlí sl. var systurdóttir mín skírð. Presturinn sem gaf systur mína og mág saman fyrir sex árum síðan, séra Pálmi Matthíasson, kom á Grettisgötuna rúmlega eitt þennan sunnudag. Allir boðsgestir voru komnir. Ég tók að mér að vera meðhjálpari og dreifði litlum ritum svo allir gætu tekið þátt í athöfninni. Fyrst var sunginn skírnarsálmurinn, Ó blíði Jésú... eftir ritningalestur, ræðu, trúarjátningu og faðir vorið var stúlkan ausin og þá fengum við loksins að vita nafnið Bríet. Hulda skammaði prestinn fyrir að koma við litlu systur sína svona blautur um hendurnar. Að lokum sungum við mæðgin tvö fyrstu erindin af Snert hörpu mína... Þetta var látlaus og falleg athöfn. Ég tók að mér að sjá um kaffimálin. Það varð hálf slysalegt. Systir mín á hvorki kaffikönnu né hraðsuðukönnu. Ég hafði komið með trekt, kaffipoka og nokkra brúsa með mér en gleymdi hraðsuðukönnunni minni svo ég setti upp vatn í stóran pott. Undirbjó trektina og ákvað að flýta fyrir með því að nota pressukönnu systur minnar. Þegar vatnið sauð hellti ég í trektina og svo pressukönnuna fulla. Var rétt byrjuð að pressa þegar kannan sprakk og þótt ég væri með svuntu sluppu ljósu fötin, sem ég var í, ekki. Að öðru leyti slapp ég mjög vel, brenndist aðeins undir annarri hendinni en það er til aloavera planta á Grettisgötunni og mamma braut strax af henni og bar á mig. Ég varð semsagt að fara heim og skipta um föt og hafði orð á því þegar ég kom aftur í brúnu gallapilsi og brúnni skyrtu að ég hefði auðvitað átt að hafa vit á því að mæta til veislunnar í kaffilituðu fötunum.

Eins og fyrr segir er Davíð ekki alveg kominn í frí. Hann vann samt ekkert um helgina eins og hann hafði hugsað sér heldur notuðum við part úr laugardeginum til að halda áfram að koma okkur fyrir. Á sunnudaginn skruppum við á Bakkann og í gær lá leiðin á Hellu. Það eru annars margir að spyrja hvernig okkur gangi að koma okkur fyrir og sumir sjálfsagt hneykslaðir á því hversu hægt það gengur. En okkur finnst betra að rasa ekki um ráð fram, gefa okkur góðan tíma en passa samt að gera eitthvað á hverjum degi (amk ekki láta líða of marga daga á milli svo ástandið venjist ekki og verði viðvarandi). Eitt af því sem við eigum eftir að gera er að panta okkur gluggatjöld fyrir hjónaherbergisgluggann, svalahurðina og baðherbergisgluggann. Á baðinu límdi Davíð láréttar og lóðréttar rendur með málningateypi en í herberginu okkar límdi hann jólagjafapappír og smá maskínupappír. Er það nokkuð furða þótt við vöknum "alltaf" í jólaskapi?

- Smá lífsmark -

Tölvan var tengd í fyrrakvöld. Hef hvort sem er ekki verið í neinu skrifstuði, þarf að koma mér betur fyrir fyrst áður en núverandi ástand íbúðar festir sig í sessi. Flutningarnir gengur mjög vel. Fengum nokkra fílhrausta drengi í lið með okkur og veðrið var það gott að hægt var að bera alla stóru hlutina út áður en bíllinn kom og svo var hann affermdur í heimkeyrsluna hérna. Tvíburahálfsystir mín kom og sá um kaffi og vöfflur, en einnig fengu flutningsdrengirnir pizzu og bjór. Ekki veitti af öllum þessum kræsingum því það tók á að flytja þessa hluti. Á sunnudeginum kom
tvíburahálfsystir mín aftur og hjálpaði mér að finna eldhúsið. Það gekk mjög vel hjá okkur!

Tvíburarnir komu heim á mánudagsmorguninn og þegar fór að líða á vikuna spurði Davíð Steinn afhverju allt dótið væri inni í þeirra herbergi. Ég dreif loks í að mála geymsluna. Ein góð vinkona mín kom til landsins aðfaranótt fimmtudags (22. júlí) og hún og önnur komu þann dag og hjálpuðu mér helling.

Föstudaginn 23. júlí sl. urðu synirnir átta ára. Þann dag ákvað ég að gera ekkert hér í íbúðinni heldur setja upp ævintýralegan dag fyrir bræðurnar. Veðrið var svolítið blautt en við létum það ekkert á okkur fá. Þar sem Davíð þurfti að vinna bauð ég nýheimkominni vinkonu minni að vera með okkur mæðginunum. Við fórum í húsdýragarðinn þar sem strákarnir fengu fimm miða hvor í lest, hringekju og fleira. Bauð þeim svo upp á kakó og vöfflur áður en við fórum í sund. Eftir sundið sóttum við Davíð og fórum öll á nýjustu Pottermyndina. Oddur Smári ætlaði ekki að þora inn í salinn (það tengist lífsreynslu sem hann lenti í fyrir fjórum árum er við fórum á fjölskyldusýningu á Shrek 1 og sýnt var úr Júragarðinum 3 með tilheyrandi hávaða á undan myndinni). Ein starfsstúlkan í bíóinu tók málin að sér, bauð drengnum um að hjálpa honum að finna sæti í salnum og fara svo og biðja sýningastjórann um að lækka í myndinni. Þetta virkaði og er ég mjög þakklát þessari stúlku fyrir. Eftir myndina skiluðum við vinkonu minni og strákarnir völdu að fara út að borða á Nings. Áður en þeir sofnuðu um kvöldið sögðu þeir að þetta hefði verið skemmtilegasti dagur ævi sinnar...

- Tækifærið gripið -
 
Þessi dagur er að líða frá mér.  Ég nýtti hann reyndar mjög vel.  Pabbi kom í morgun og var í Drápuhlíðinni í allan dag og fram eftir kvöldi.  Skutlaði Davíð í vinnuna um hálftíu.  Tvíburarnir fóru út að leika sér og ég fór eina ferð með fullan bíl yfir fyrir hádegi.  Fór ferð nr. 2 stuttu eftir hádegi (þær urðu alls 6 ferðirnar...) og strákarnir komu röltandi á eftir (skyldu ekkert í því afhverju það var ekkert pláss fyrir þá í bílnum). Þeir bræður voru svo í Drápuhlíðinni fram eftir degi, bæði inni og úti.  Þetta var langur dagur fyrir þá því ég var á ferðinni á milli og þeir að bíða eftir því að vera sóttir (svo ég pakkaði þeim ekki niður í næsta kassa eða poka).  Tengdapabbi sótti þá á sjöunda tímanum og þá ráku þeir upp heróp.
 
Þetta er síðasta nóttin sem við sofum hér á Hrefnugötunni.  Undarleg tilhugsun.  Það eru alveg að verða níu ár síðan við fluttum hingað og hér hefur okkur liðið mjög vel.  En ég efast ekki um að okkur á eftir að líða vel í Drápuhlíðinni líka.  Ég hlakka til að vera þar.  Þetta var semsagt síðasta tækifærið mitt að skrifa eitthvað héðan og svo verður að koma í ljós hvenær tengin kemst á hinum megin og hvenær ég gef mér tíma til að skrifa næst.
 
Á meðan: Farið vel með ykkur öll!

- Stórt afmæli -

Mamma er sextug í dag. Undanfarnar vikur hefur hún verið stödd fyrir norðan hjá Mæju móðursystur sinni (þeirri sömu og við fjölsk. og Anna frænka heimsóttum sl. haust). Það fer vel á því að mamma haldi upp á eiginlega daginn hjá og með þessari frænku sinni en ég veit þó að til stendur að halda smá fagnað í ágúst og slá þá líklega saman í 130 ára afmæli. Meira um það seinna. Hugurinn verður hjá mömmu í dag en vonandi nýti ég samt daginn vel í flutningsundirbúning.

Eins og þeir vita sem kíkja á síðuna mína reglulega hef ég ekkert bloggað í nokkra daga. Allur tíminn fer í þúsund aðra hluti og stundum finnst mér vera svo mikið að gera að ég hreinlega sest niður, loka augunum og reyni að henda reiður á öllu.

Sl. sunnudagsmorgun var ég komin upp á Akranes um hálftíu. Fylgdist með tvíburunum og þeirra liði spila síðasta leikinn og var með öllum hópnum þar til yfir lauk. Valsstrákarnir unnu eftirsóttasta bikarinn sem prúðasta liðið (innan vallar sem utan) og voru allir mjög glaðir með það. Það var svolítið skondið að þegar tilkynningin kom voru fararstjórarnir að aga drengina og fá þá til að vera í beinni röð. Enginn heyrði að verið var að kalla þá upp og einn af mótshöldurunum varð að sækja liðið til að hægt væri að afhenda þeim verðlaunin.

Strákarnir hafa verið mjög duglegir að hjálpa mér hér og í Drápuhlíðinni en inn á milli leyfi ég þeim líka að tölvast inni og leika lausum hala úti...

Veit ekkert hvenær ég skrifa næst og hvar ég verð þá. Líklega þýðir ekkert að kíkja neitt á mig næstu dagana...

- Rífandi gangur - en ég vildi vera á tveimur stöðum...

Það er að hafast að mála og lakka íbúðina. Í gær vorum við Davíð vöknuð fyrir sex. Strákarnir vöknuðu sjálfir á sjöunda tímanum og það tókst að næra sig og taka sig saman og koma sér að Hlíðarenda á tilsettum tíma. Rútan lagði af stað upp á Skaga fyrir klukkan níu.

Ég fór mjög fljótlega og skar fyrir seinni umferð á stofuna. Renndi við í slippinn að kaupa aðeins meira lakk. Bidda var búin að bjóða fram aðstoð og ég stefndi henni til mín í Drápuhlíðina um eitt. Byrjuðum á því að sækja Ingva mág og kíktum á litlu frænku í leiðinni. Það var reyndar hálf klikkað að vera inni í þessu góða veðri enda tókum við pásurnar úti á svölum.

Þegar við Bidda hættum um tíu (Ingvi kvaddi um hálfsjö) var ég búin að lakka fyrri umferð á bað- eldhús- og stofugluggann og hún að mála inn í herbergisskápana og sópa yfir gólfin.

Davíð hringdi. Það gekk bara þokkalega í gær. Strákarnir spiluðu þrjá leiki, sigur, jaftefli og tap (mjög jafnt skipt). Þeir eru svo líklega byrjaðir að spila núna og ég er með hugann hjá þeim:
Strákarnir eru á Skaganum
skemmta sér með knött.
Hnúturinn í maganum
hann er út í hött...?
Ég fer á Skagann strax í fyrramálið og næ að sjá síðasta leikinn.

Ingvi og pabbi eru komnir upp í íbúð og tengdapabbi á leiðinni. Það á að parketleggja um helgina. Ég er að ganga frá smá málum (að vísu venjuleg hússtörf s.s. þvottur og þrif en það þarf líka). Kannski flyt ég nokkra kassa yfir í dag svo hægt sé að fylla fleiri...

- Ágiskarnir mínar og stig -

Ég endaði í ca. 54.-61. sæti með 74 stig.

Allur tími þessa dagana fer í undirbúning. Með Ingva mági ganga hlutirnir mjög vel fyrir sig því ég er viss um að væri ég ein snérist ég í tóma hringi. Er að fara að drífa mig yfir til að skera loftið og grunna hillurnar sem smíðaðar voru í gatið milli stofanna. Hvíta lakkmálningin sem ég keypti til að setja inn í eldhús og fataskápa kláraðist í gær og til að vera alveg viss um að fá nóg á restina ætla ég að kaupa tvo lítra í viðbót. Ingvi lakkaði svalahurðina að innan og þrjá glugga í gær. Tilvonandi vinnuherbergi og holið eru tilbúin (á samt eftir að skúra gólfin), stærsta herbergið, hjónaherbergið og eldhúsið eru langt komin og það er búin ein umferð í loftinu á stofunni. Eftir hádegi næ ég svo í gólfefnið sem var valið og pantað hjá Ofnasmiðjunni.

Í fyrramálið leggja 39 strákar auk þjálfara og nokkurra farastjóra af stað upp á Skaga til að taka þátt í Skagamótinu. Ég komst ekki með í fyrra en ég er amk. búin að sjá til þess að ég komist á sunnudaginn því ég sendi alla strákana mína uppeftir með rútunni (það er bara rútuferð aðra leiðina ;))

- Vinnusemi -

Morgunhaninn minn var vaknaður vel fyrir sjö bæði í morgun og gærmorgun. Hann hreyfði sig hljóðlega um og ég steinsofnaði aftur. Þegar ég fór loks á fætur á níunda tímanum var Davíð Steinn líka vaknaður.

Var komin upp í Drápuhlíð rétt rúmlega tíu og á tveimur tímum náði ég að skera tilvonandi hjónaherbergi og inni á baði. Formúlan var byrjuð þegar ég kom heim. Feðgarnir sátu fyrir framan skjáinn og borðuðu skyr. Ég náði mér í dós og settist hjá þeim.

Eftir formúlu og níunda sigur Schumachers náði ég í mág minn. Hann málaði þar sem ég var búin að skera og ég byrjaði að skera inni í eldhúsi. Málningin á eldhúsið kláraðist áður en búið var að mála alveg aðra umferð (einn veggur eftir). Í staðinn skárum við og máluðum veggina í vinnuherberginu en það er með öðrum lit en hin herbergin, með smá bláum tón. Við lukum við þetta verkefni á innan við þremur tímum.

Ég náði að hafa til mat og klára að borða áður en úrslitaleikurinn á EM byrjaði Portúgal - Grikkland 0:1. Fyrirfram hélt ég að í þetta sinn myndu Portúgalir sigra. Grikkir voru eina liðið sem heimamenn töpuðu fyrir í keppninni og það verður að segjast eins og er á þótt Grikkir töpuðu fyrir Rússum í riðlakeppninni þá fannst mér þeir alveg eiga skilið að vinna evrópumeistaratitilinn.

- Allt í góðum gír -

Í gær fékk ég mág minn í lið með mér í Drápuhlíðina og það munar ekkert smá um hann enda er hann vanur svona vinnu. Ég sótti hann upp úr hádegi. Hann varð eiginlega hálfspældur yfir þvi hversu stutt ég var komin því hann hélt að ég væri byrjuð að skera. Hann dembdi sér í að verkstýra mér og meðan ég skar loftið í stærsta herberginu tók hann allar skápahurðirnar af hjörum. Á tveimur tímum skárum við og máluðum loftin í holinu, litla herberginu og stærsta herberginu (þar var Davíð búinn með eina umferð í vikunni). Skilaði Ingva um þrjú og kom við í Fiskbúð Einars á heimleiðinni. Hafði smá tíma fyrir sjálfa mig áður en kominn var tími til að sækja strákana úr sumarbúðunum. Var með matinn snemma og sótti svo mág minn aftur um sjö. Kláruðum aðra umferð á fyrrnefnd loft sem það þurftu og byrjuðum á veggjunum í stærsta herberginu. Vorum að til klukkan langt gengin í ellefu.

Í morgun var ég komin upp í íbúð fyrir hálfellefu. Á tveimur tímum skar ég aðra umferð í stærsta herberginu og byrjaði að skera í holinu. Maginn lét mig vita að komið væri hádegi. Um tvö leytið sótti ég mág minn. Við vorum að til hálffjögur og var ég byrjuð að skera loft og horn í eldhúsi þegar við gerðum smá pásu og skruppum á Pítuna m.a. til að fá okkur kaffi. Héldum svo áfram vinnu í rúma þrjá tíma. Kláruðum eina umferð á veggi í hjónaherberginu, eldhúsinu og á baðinu og seinni umferðina á holinu. Ég er amk sátt við dagsverkið!

- Árið hálfnað -

Nú er mín byrjuð í sumarfríi. Fyrsti dagurinn var í gær og hann fór að mestu í loft og veggjastrokur. Ég var svo heppin að föðursystir mín hafði samband eftir hádegið, skrapp í heimsókn til mín í Drápuhlíðina og þessa stund sem hún stoppaði strauk hún úr öllum eldhússkápum. Eflaust finnst mörgum við stutt á veg komin með allt saman, bráðum þrjár vikur síðan við fengum afhent en tími og tími er ekki alveg það sama, eða hvað? Margt er þó komið vel á veg. Það munar um að vera búinn að pakka niður helling og það munar líka um að það skuli vera búið að tæma bílskúrinn hér. Við höfum ákveðið að mæta ekki á ættarmót í móðurfjölskyldu Davíðs sem haldið verður í Árnessýslu um helgina því næsta helgi fer öll í Skagamótið og helgina þar á eftir verðum við að flytja.

Strákarnir eru að klára námskeið númer tvö í sumarbúðum í borg í dag. Þeir eru hættir að biðja um að fara á námskeið númer 3 og 4 en samt hafa þeir nú verið að skemmta sér mjög vel.

Framundan eru mjög spennandi dagar, "hálfbrjálað" að gera í flutningum og boltanum. Talandi um boltann. Hálfskondið að leikurinn um evrópumeistaratitilinn skuli vera milli þeirra liða sem opnuðu keppnina 12. júní sl. Skyldu Grikkir vinna aftur?

- Stiklað á stóru -

Dagarnir fljúga og það er óhætt að segja það að hjá mér sé alveg meira en nóg að gera, eins og venjulega

Ég fór næstum beint að skoða litlu frænku mína seinni partinn sl. miðvikudag. - "Láttu litla barnið mitt vera og réttu mömmu minni það!", sagði Hulda frænka. Stóra systirin kom með ömmu sinni í bæinn til að skoða en þær fóru aftur austur um kvöldið. Helga og Ingvi voru komin heim með litlu dömuna fyrir hádegi á fimmtudag og ég kom við hjá þeim á heimleiðinni seinni partinn þann dag.

Hulda og pabbi komu svo saman í bæinn á laugardaginn. Davíð var að aðstoða við flutninga svo við mæðginin skruppum á Grettisgötuna, þeir á hjólum og ég á tveimur jafnfljótum. Svo heppilega vildi til að systurdóttir Ingva var í heimsókn líka. Hún hefur búið í Danmörku í nokkur ár en áður en hún flutti út var hún á sama leikskóla og tvíburarnir. Pabbi gat slegið tvær flugur í þessari borgarferð, séð nýjasta barnabarnið og einnig skoðað íbúðina okkar.

Á sunnudagsmorguninn hitti ég frænku mína (sem er líka að flytja) er ég var að fara i upphitun fyrir síðustu messu sumarsins. Við mættum tíu í kórnum og vorum álíka mörg og kirkjugestir, fámennt en góðmennt. Dreif mig heim að messu lokinni. Við fórum svo öll upp í íbúð eftir að hafa fengið okkur hressingu. Tvíburarnir voru mjög hjálpsamir og duglegir og það var eiginlega betra að finna verkefni handa þeim (þeir hjálpuðu pabba sínum m.a. að mála loftið í tilvonandi herbergi þeirra og svo voru þeir mjög öflugir sópara) því annars fengu þeir fremur slæmar fikthugmyndir. Tengdó kíktu við til að skoða.

Á leiðinni heim seinni partinn í gær hringdi Bidda og bauð fram aðstoð sína. Hún hitti okkur í íbúðinni um hálfsjö. Þar voru tvíburarnir að mála fyrir mig búrið. Davíð var skilinn eftir og við hin fórum heim, strákarnir í bað og við Bidda hjálpuðumst að við kvöldmatargerð. Seinna um kvöldið var sett niður í tvo kassa en það er orðið lítið um pláss núna fyrir alla þessa fullu kassa...

- Hulda frænka orðin stóra systir -

Klukkan hálfsjö í morgun fæddist 52 cm og 15 marka stúlka (3775gr), með mikið hár. Allt gekk vel. Ég frétti þetta á arkinu í morgun og hugsaði svo mikið um að ég yrði að labba við seinni partinn og heilsa upp á mæðgurnar, að ég byrjaði á því að reyna að stimla mig út.

- Sumarsólstöður -

Veðrið er magnað hér í Reykjavík á þessum lengsta degi ársins. Í dag er Anna frænka 22 ára og í dag eru liðin fjögur ár síðan móðuramma okkar Önnu og nafna (Anna Jónsdóttir) dó.

Gleymdi að geta þess í gærkvöld að þegar við mæðginin komum heim lá Gula Kisa á miðju hjónarúminu, ég hafði skilið eftir gluggann á strákaherberginu galopinn og þessi köttur virðist hafa smá flugkraft því glugginn snýr út að hallandi innkeyslunni að bílskúrnum.

- Helgin gerð upp -

Það er hálf ótrúlegt að helgin sé að klárast. Það er samt búið að gera alveg fullt. Svilarnir fóru saman upp í íbúð upp úr hádegi í gær. Ég var heima að reyna að láta hendur standa fram úr ermum og gerði ýmislegt annað heldur en það sem var efst á dagskránni; dótið í herbergi tvíburanna.. Maginn eða þarmarnir voru eitthvað að trufla mig og hafa verið að gera það undan farna daga. Rétt fyrir tvö ákvað ég að best væri að fá sér frískt loft og rölti yfir að Hlíðarenda þar sem Valsara tóku á móti Þrótti (2:1). Davíð tókst að draga Ingva með á leikinn þótt sá síðar nefndi hefði frekar vilja halda áfram að vinna í íbúðinni. Leikurinn var ágætur en mér fannst mínir menn virka hálfþungir á köflum. Aftur á móti var leikur Hollendinga og Tékka 2:3 hreint út sagt frábær!

Í morgun var ég komin á fætur um níu, klukkutíma á undan Davíð. Hafði "brunch" um ellefu, plokkfisk, og var Davíð glaður með það. Svo var hann rokinn að sækja svila sinn. Þeir voru með kerru og bíl í láni og fóru amk fjórar ferðir með ónýtt dótt úr skúrnum. Ég hélt áfram dútli mínu hérna heima en hafði hugsað mér að renna austur eftir strákunum fljótlega upp úr hádegi. Rétt fyrir eitt hringdi norska vinkona mín og bauð fram aðstoð sína, sem ég þáði og á tveimur tímum gerðum við meira saman heldur en ég hafði gert allan laugardaginn. Þokkalega duglegar ha! M.a. tókum við myndir niður af veggjum, punt úr stofuhillum og gluggakistum og fylltum stóran kassa af dóti úr herbergi strákanna. Ekki er samt allt búið enn hvað pökkun varðar en það eru amk þrjár vikur þar til við flytjum svo flutningsundirbúningurinn gengur bara þokkalega vel!

Um þrjú skrapp ég á bókasafnið og skilaði af mér nokkrum bókum sem ég hef verið með undanfarinn mánuð (þó eru fjórar bækur sem ég hélt eftir í bili). Að því loknu brunaði ég austur. Svilarnir voru að mestu búnir með skúrinn og fóru því næst í íbúðina að smíða vegg og hillur fyrir "gatið" milli stofanna.

Fyrir austan tóku Oddur Smári og Hulda vel á móti mér. Davíð Steinn var niðursokkinn í "húsasmíði" úr legó. Systurdóttir mín hafði einhvern grun um að ég væri bara komin til að sækja strákana, hún yrði eftir. Hún og Oddur Smári komu með mér í smá innilit en sú stutta fór til baka á undan okkur og hvarf, eða þannig. Hún lokaði sig inn í bílnum mínum. Ég var ekkert að fara alveg strax en systurnar úr næsta húsi björguðu málunum þegar að brottför kom...

- Frændsystkynin saman á Hellu -

Tvíburarnir fengu að velja hvort þeir vildu fara austur með ömmu sinni og Huldu frænku og vera fram á sunnudag eða vera hér í bænum. Það var víst mjög létt val. En fyrst var smá grillfundur á Miklatúni, með foreldrum og piltum í 7. flokki, eftir æfingu á miðvikudag. Sá fundur tókst vel enda lék veðrið við okkur.

Um átta vorum við búin að taka strákana til og skutluðum þeim á Grettisgötuna þar sem mamma og Hulda biðu eftir að komast af stað austur. Seinna um kvöldið fóru svilarnir saman upp í íbúð og rifu teppið af stofunum. Davíð gleymdi símanum sínum þar en ákvað að láta slag standa og koma við í myndbandaleigunni. Ég gerði heiðarlega tilraun til að horfa á myndina með honum en gafst upp, gat bara ekki haldið augunum opnum lengur, og klukkan var rétt að byrja að ganga eitt.

Á 60 ára afmæli lýðveldissins tolldi ég í rúminu til klukkan að ganga ellefu og ákvað þá að leyfa Davíð að sofa lengur (hann er svona kvöldtýpa). Dagurinn fór eiginlega í dútl. Setti þó niður í fimm kassa af minni gerðinni, aðallega þungar bækur. Var að reyna að manna mig upp í að taka dót strákanna í gegn en komst ekki svo langt, ætla mér að klára það um helgina! Svilarnir fóru aftur saman upp í íbúð þar sem þeir naglhreinsuðu alla veggi og spörsluðu í göt og sprungur. (Við vorum svo ljómandi heppin að Ingvi átti til sparsl).

Þessa stundina eru svilarnir að viða að sér málningu. Við erum líka að spá í hvort ekki sé rétt að láta draga nýtt í rafmagnið. Ingvi er ánægður með að fá að hjálpa okkur. Ekkert bólar enn á nýja barninu en það kemur væntanlega á næstu dögum. Það skyldi þó aldrei vera að Helga næði að geyma þetta fram á jónsmessu og eiga barnið í krabbamerkinu?!?!

- Boltinn og kvöldgöngutúr -

Fékk aftur far seinni seinni partinn í gær og kippti með mér nokkrum tómum kössum. Davíð hafði sagst sjá um að sækja strákana, en þyrfti á fund með hinum í foreldraráði 7. flokks. Ég horfði því róleg á leik Lettlands og Tékklands 1:2 og skrapp í fiskbúðina í leikhléinu. Lettar eru með markvörð á heimsmælikvarða og ég held að Tékkar hafi verið að verða svolítið pirraðir að koma ekki í tuðrunni í netið. Lettar voru á undan að skora og í lokin var ég einlega farin að vona að þeir myndu ná að halda jafnteflinu (þá hefði ég líka fengið 5 stig fyrir rétta ágiskun í stað eins fyrir aðra markatöluna rétta). En það er allavega ljóst að það má alls ekki vanmeta Lettana.

Milli leikja setti ég upp kartöflur, sauð upp á ýsuflökum og bræddi hamsa. Fljótlegt, einfalt og mjög, mjög gott. Feðgarnir komu ekki heim fyrr en rétt fyrir sjö. Þá var ég búin að fá mér að borða, búa til kaffi og sest aftur fyrir framan skjáinn. (Það er hálfgerð fötlun að hafa þennan brennandi áhuga, sérstaklega þegar í nógu er að snúast aukalega!)

Holland - Þýskaland 1:1. Ég var svo að vona að Þjóðverjar næðu að sigra 1:0 en Hollendingar áttu þetta jafntefli skilið því þeir voru búnir að vinna mjög vel. Er farin að hallast að því að Tékkar og Hollendingar eigi mestu möguleikana á að komast í átta liða úrslitin en það má ekki afskrifa hin liðin. Lettar eiga eftir að stríða Þjóðverjum og Hollendingum og Þjóðverjar búa yfir mikilli seiglu.

Strax að leik loknum sá ég til þess að tvíburarnir fengju kvöldhressingu áður en ég kvaddi feðgana og rölti yfir til norsku vinkonu minnar. Saman fórum við í kvöldgöngu með viðkomu á "nýja" staðnum. Henni leist mjög vel á íbúðina og alla aðstöðu. Í bakaleiðinni hitti ég einn frænda minn sem býr norðurmýrinni og spjallaði góða stund við hann. Eftir göngutúrinn stoppaði ég hjá vinkonunni yfir tesopa og spjalli.

- Gott bland -

Í dag er Sigrún Bjarnadóttir árinu eldri og fagnar stórafmæli! Sigrún þessi kenndi mér handavinnu í grunnskóla. Dóttir hennar var bekkjarsystir mín og mikil vinkona (og við útskrifuðumst saman úr F.Su. og byrjuðum samtímis í KHÍ. Ég mun hugsa mikið austur í dag!

En í dag er líka dagurinn sem við áttum á fá afhenta íbúðina sem við vorum að festa kaup á. Það breyttist aðeins því það var haft samband við Davíð í gær stuttu fyrir hádegi. Hann hringdi strax í mig og bað mig um að fá frí í klukkutíma upp úr hádeginu, sagðist ætla að sýna mér svolítið. Mig grunaði nú hvað var í gangi en var þó ekki viss fyrr en Davíð stoppaði fyrir utan "nýja staðinn"! Framundan er því mjög skemmtilegur tími (sem var nú viðbúið), sem nota þarf til að undirbúa komu okkar á nýja staðinn, áframhaldandi pökkun og öllu tilheyrandi.

Seinni partinn í gær var ég svo heppin að fá far heim þannig að ég náði leik Dana og Ítala 0:0 frá byrjun. Ég hafði spáð jafntefli í þeim leik en hélt þó að það yrðu skoruð einhver mörk. Markverðir beggja liða stóðu sig með sóma og mér fannst Danir standa sig mjög vel í leiknum, þeir lögðu sig greinilega 100% fram ef ekki meir.

Davíð sótti strákana og sýndi þeim nýju íbúðina á heimleiðinni. Mér skilst að Oddur hafi komið með þá tillögu að skipta stofunum í sitthvort herbergið handa þeim bræðrum. Þeir feðgar komu heim rétt eftir leikinn og milli leikja fór ég með Helgu systur og Ingva mági og sýndi þeim herlegheitin. Þeim leist mjög vel á.

Svíðþjóð - Búlagaría 5:0. Frábær leikur. Ég spáði rétt fyrir um úrslitin og aðra markatöluna (og er komin með 12 stig í spáleiknum) en átti ekki alveg vona á svona miklu markaregni. Það verður spennandi að fylgjast með næstu tveimur umferðum í C riðlinum...

- Afmæli -

Í dag er Árný Lára frænka mín að fagna fæðingardegi sínum og mun ég hugsa til hennar í allan dag. Vonandi fær hún góða strauma frá mér!

-Boltinn rúllar -

Helgin er að klárast, var ekki lengi að líða. Sl. föstudag arkaði ég beint heim seinni partinn því Davíð hafði lofað að sækja strákana í sumarbúðirnar. Þeir feðgar komu hálfsex. Þá skutlaði ég manninum í vinnupartí til þess að hafa bílinn heimavið. Við strákarnir borðuðum snemma en þeir fóru svo út að leika við Birtu þangað til Disney-mynd kvöldsins Lási lögga byrjaði. (Davíð Steinn hjálpaði mér við að pakka niður myndbandsspólunum þeirra bræðra, einn fullur kassi þar.)

Á laugardagsmorguninn fór ég á fætur um hálfátta og tæpum klukkutíma síðar var ég mætt í kirkjuna. Hituðum upp fyrir göngumessu. Upphituninn gekk vel og megnið af messunni en strax eftir predikun sungum við "Smávinir fagrir" og ég eiginlega ekki hvað gerðist hjá mér. Það hafði allt gengið svo vel þegar við sungum lagið yfir rétt fyrir messu en mér varð svei mér þá á í messunni og söng einhversstaðar neðan úr maga, samt kann ég textann og alt-laglínuna. Æ, ég er að hugsa um að velta mér ekkert meir upp úr þessu...

Fór beint heim meðan margir aðrir voru á leið í göngutúr einhvers staðar stutt frá Borgarnesi. Tvíburarnir voru vaknaðir og búnir að koma sér fyrir fyrir framan sjónvarpið. Lokaði inn til Davíðs, sá um að strákarnir fengju morgunhressingu og lét svo hendur standa fram úr ermum við að undirbúa meira pakk.
Stuttu seinna komu Bollagötu-bræðurnir og spurðu eftir strákunum. Þeir fengu að koma inn á meðan mínir klæddu sig en svo sendi ég þá alla út, sagði þeim að Davíð ætti að fá að sofa til hádegis og þar að auki væri eiginlega lítið leikpláss inni núna.

Hafði heitan mat í hádeginu. Strákarnir fóru beint út aftur. Birta kom en þeir bræður sögðust vera búnir að lofast til að leika við Bollagötubræðurna og þeir voru með þeim, bæði úti og inni, til klukkan sex. Á meðan lét ég hendur standa fram úr ermum með góðri aðstoð frá noskri vinkonu minni. Við fórum m.a. í gegnum öll föt strákanna og eitthvað af fullorðinsfötunum. Fylltum einn svartan poka af fötum til að gefa og hálfan að auki til að senda Tedda frænda. Rétt fyrir fjögur sagði ég stopp, hitaði handa okkur te og kveikti á sjónvarpinu til að fylgjast með fyrsta leiknum á EM Portúgal - Grikkland 0:2. Grikkir komu verulega á óvart. Held að enginn hafi reiknað með þessum sigri nema þá kannski Grikkir sjálfir. Mér fannst þeir duglegir að vera fyrir í vörninni og verð eiginlega að segja það að þetta var verðskuldaður sigur. Portugalir voru helst til stressaðir enda mikil pressa á þeim.

Milli leikja hitaði ég linsusúpu úr heilsuhúsinu sem mældist vel fyrir hjá flestum úr fjölskyldunni. Seinni leikurinn Spánn - Rússland 1:0 var mjög skemmtilegur en ég held að Rússarnir hafi verið heppnir að tapa ekki stærra.

Í dag kom norska vinkona mín yfir aftur og á tveimur tímum pökkuðum við í sex kassa og fórum í gegnum ýmislegt dót. Feðgarnir og Birta fóru á Valsleikinn í Landsbankadeild kvenna: Valur - Þór/KA/KS 4:0. Hefði vilja vera þar líka en það er víst ekki hægt að gera allt í einu.

Um hálffimm byrjaði formúlan og endaði hún líkt og flestar fyrri keppnirnar á árinu, með sigri Michaels Schumachers.

Við hjónin hjálpuðumst að við að finna til fljótlegan kvöldmat svo við gætum öll fylgst með leik Frakka og Englendinga 2:1. Fyrr í dag (þegar stund var milli stríða) fann ég spásíðu sem unnusti frænku minnar hafði linkað á og ákvað ég að vera með þótt búnir væru tveir leikir. Skaut langt yfir markið er ég spáði um úrslit í leik Króata og Svisslendinga, en bætti það upp með því að spá hárrétt fyrir um úrslitin í seinni leik dagsins. En mikið held ég að Englendingar séu svekktir, létu verja frá sér vítaspyrnu og fengu þessi tvö mörk á sig alveg undir lok leiksins...

- Föstudagur -

Í gær byrjuðu tvíburarnir í Sumarbúðum í borg (á Hlíðarendasvæðinu, hægt er að fylgjast með hvað er að gerast daglega, skoða myndir og fleira ef maður smellir á flipann neðst vinstra meginn á forsíðunni (valur.is/sumarbúðir í borg)). Þeir voru spenntir að byrja og vöknuðu snemma en síðan skóla lauk hafa þeir sofið til hálfníu (farið að sofa í seinna lagi á kvöldin reyndar) og ég því ekki hitt þá á morgnana, fyrr en í gær. Í morgun rétt náðu þeir að hitta mig áður en ég arkaði af stað.

Skrifandinn er ekki beint yfir mér þessa dagana, hugsa þeim mun meira og nú um helgina ætla ég að láta hendur standa fram úr ermum svo ég geti horft á EM- og formúluna með góðri samvisku!!!

- Lítill tími til skrifta -

Þeir strunsa áfram dagarnir, eins og venjuleg. Þarf að hafa mig alla við til að njóta þeirra. Það er nóg um að vera og miklu meira en nóg að gera. Smá yfirlit:

-Föstudagskvöld sl. Ég sótti strákana á fótboltaæfingu og við löbbuðum heim á sjötta tímanum. Davíð kom heim um svipað leyti, skellti sér í sturtu og fór með tölvuna sína með sér í HK-húsið á Skjálfta 2. Við strákarnir löbbuðum aftur yfir á Valssvæðið upp úr átta. Valur - Njarðvík 1:0. Ég hef aldrei séð jafn stuttan markvörð og stóð í marki gestanna en hann stóð fyrir sínu.

-Á Laugardaginn tóku strákarnir þátt í vinamóti Breiðabliks. Davíð tók sér frí frá Skjálfta til að vera með okkur. Tvíburarnir spiluðu með C-liði Vals, við Keflavík, Fjölni og Stjörnuna. Þetta var erfitt hjá þeim, allir leikir töpuðust en misstórt þó. Þeir voru bara sjö mættir (hafa stundum verið 10-12) svo þjálfarinn tók það til bragðs að fá einn dreng sem spilaði með D liðinu svo hægt væri að skipta einum og einum út inn á milli. Eftir keppnina skutluðum við Davíð á sitt tölvumót og litum aðeins við hjá frænku okkar í Garðabæ.

-Á hádegi á sunnudag skutluðum við mæðginin Davíð á Skjálfta tvö og brunuðum svo sem leið lá til tvíburahálfsystur minnar. Áttum góðan dag með hennar fjölskyldu. Tölvumótið átti að vera búið um fjögur en það drógst aðeins. Davíð var hættur að spila um fimm leytið. Þá tók hann við strákunum og skutlaði mér heim til Péturs kórstjóra þar sem við kórsystkynin og sumir makar komum með góðgæti á grillið til hans. Semsagt skemmtilegur dagur í alla staði!

- Veðurblíða -

Það er örugglega komið sumar. Hitinn kominn í tveggja stafa tölu og sólin skælbrosandi þarna úti. Arkaði léttklædd í morgun, þó ekki á stuttbuxum og bol eins og ein sem ég mætti. Uppgötvaði svo rúmum klukkutíma seinna að með mér kom laumufarþegi, og ég sem passaði mig svo á því að ganga ekki undir trjágreinarnar sem marga slúta yfir gangstéttirnar víðast hvar!

Á miðvikudagskvöldið var, var öðruvísi kóræfing. Ein úr hópnum fór í ferð til Kenýa fyrr í vetur og þar sem ekki er messa fyrr en annan laugardagsmorgun (13. júní) ákváðum við að nota kvöldið til sjá myndir og muni frá ferðinni. Alveg mögnuð sýning og skemmtilega kynnt því hún sagði nokkur orð áður en byrjað var að sýna myndirnar og svo þurfti líka oft að segja frá og skýra út myndefnið.

Pakkið gengur eitthvað illa þessa dagana. Það er í svo mörgu að snúast eitthvað. Ég ákvað svo seinni partinn í gær að viðra sængurnar okkar Davíðs og að það væri kominn tími til að þrífa hjónaherbergið rækilega. Að þessu loknu hafði ég hugsað mér að taka saman allt handavinnudótið mitt, saumað og ósaumað (nema það sem ég er með í svartholinu mínu) og pakka því niður. Það vannst nú ekki tími í það en þetta blessast nú allt saman er ég viss um.

Ég hef alla vega gefið mér tíma til að lesa og hef nýlokið við að lesa Eins og ég er klædd um Guðrúnu Á. Símonar. Skemmti-lesning! Ein síðustu jólin sem við áttum á Heiði (fyrir 1980) kom út plata með Guðrúnu. Við systur gáfum enn gjafir með foreldrum okkar. Það var svolítið pínlegt þessi jól að bæði völdu þau plötuna hennar Guðrúnar til að gefa hvort öðru og eina leiðin sem við systur sáum út úr þessu var að passa upp á að þau opnuðu gjafirnar frá hvort öðru og okkur á sama tíma.

- Orð -

Ég loka augunum
og sé orðin svífa
allt í kring

sum eins og svartar klessur
orð sem aldrei hefðu átt
að vera sögð

önnur björt og skínandi
hrós, fallegar kveðjur
og ástarorð

enn önnur grá og óljós
sem kannski verða
svarta klessur
eða skínandi björt
í framtíðinni

- Dagarnir þjóta -

Fyrsti dagur júnímánaðar að kveldi komin og Hvítasunnuhelgin rétt nýliðin. Dreif mig snemma á fætur (með strákunum) á laugardagsmorguninn var. Sinnti ýmsum inniverkum en meiningin var að sækja Önnu frænku um ellefu og bruna austur fyrir fjall, alla leið á Hellu. Um tíu fékk ég sms-spurningu hvort ég gæti sótt nöfnu mín klukkutíma síðar. Það kom sér einkar vel fyrir mig því inniverkin tóku lengri tíma en ég áætlaði.

Um hálftólf kvöddum við mæðgin heimilisföðurinn (sem þurfti að nota daginn til vinnu). Fyrst lá leiðin á Grettisgötuna að sækja nokkuð sem átti að fara austur. Lentum í miðri skrúðgöngu á leiðinni, en Austurbæjarskóli var með e-s konar karnival hátíð. Gaman að því! Við nöfnur og strákar komum austur um tvö. Fengum kaffi og með því (ekki koníak samt, he he) og svo bauð pabbi okkur í bíltúr upp að Heiði. Hann notaði tækifærið og gróðursetti nokkrar hríslur á öðrum jarðarblettinum sem hann á. Við buðum okkur líka fram í smá smalamennsku, þar sem núverandi eigendur voru að reyna að losna við nokkrar rolluskjátur af landareigninni. Skjáturnar sáu samt við okkur og ég get svarið það að þær stoppuðu og gáfu sér tíma til að glotta að okkur þegar ljóst var að við vorum búnar að missa þær frá okkur. Klettasvæðið þar sem við systur lékum okkur er bara orðið svipur hjá sjón. Bæði er ég orðin stærri og svo sást greinilega að það hefur hrunið mikið úr því í skjálftunum sumarið fyrir fjórum árum. Komum til baka úr þessari ævintýraför um sex. Þá var mamma tilbúin með dýrindis sjávarréttasúpu og sallat. Við mæðgin komum heim rétt rúmlega tíu um kvöldið eftir að hafa skutlað nöfnu minni á stefnumót við vini sína.

Mætti í upphitun fyrir hvítasunnumessu rúmlega tíu á sunnudagsmorguninn. Í messunni söng m.a. barnakór frá Svalbarða og setti það skemmtilega svip á messuhaldið. Að öðru leyti var dagurinn bara rólegur. Náði meira að segja að horfa á næstum alla formúluna.

Gærdagurinn byrjaði rólega en við skruppum á Bakkann eftir hádegið og okkur dvaldist þar vel fram á kvöldið.

Og laust upp úr hádeginu var skólanum svo slitið. Og var sýnt frá því í lok fréttatímans í kvöld á rúv í kvöld.

Næstu daga mun mamma bjarga mér með strákana en hún byrjaði strax í dag svo ég kæmist að versla og í klippingu...

- Tónleikum lokið - (óvæntir aukatónleikar í restina)

Aldrei þessu vant var ég á undan strákunum heim seinni partinn í gær. Þeir voru líklega eitthvað að drolla á leiðinni en skiluðu sér rétt um fimm. Ákvað að leggja mig til hálfsex og kúrðu báðir strákarnir hjá mér. Annar var reyndar að spila á gameboy-tölvuna sína en hinn sofnaði og svaf í klukkutíma.

Hafði matinn til upp úr sex. Tvíburunum leist vel á að fá að koma á tónleika svo ég arkaði upp í kirkju rúmlega sjö í upphitunina svo þeir feðgar gætu komið á bílnum á tónleikana. (Davíð þótti ég sniðug að bjóða strákunum því þá varð hann auðvitað að fara líka).

Fólk fór að drífa að strax upp úr klukkan átta og þegar tónleikarnir hófust var kirkjan rúmlega hálffull (á að giska 50-60 gestir). Tvíburarnir sátu tveir einir á fremsta bekk. "Föðursystir" mín, tvíburahálfsystir og nokkrir fleiri tengdir mér voru þarna. Flutningur laganna, sem voru af ýmsu tagi, gekk þokkalega. Prógrammið var "keyrt" í gegn en við fengum söngpásur inn á milli því Pétur kórstjóri hafði fengið einsöngvara (Sólveigu Samúelsdóttur nemanda í Listaháskóla Íslands). Stúlka með frábæra söngrödd og mikla túlkun. Eitt lag sungu karlarnir einir og við konurnar sungum tvö lög einar. Lenka kona Péturs spilaði undir sum lögin á orgel og önnur á píanó en sum sungum við án undirleiks.

Eftir tónleika var boðið upp á kaffi og konfekt í efri safnaðarsalnum. Nokkru seinna var mér tjáð að annar sonurinn væri með einsöngstónleika. Svo fór ég að taka eftir því að fólkið færðist smám saman inn í kirkju aftur. Ég ákvað að kíkja líka og þá var Davíð Steinn búinn að stilla sér upp við hliðina á bróður sínum og söng með. Oddur kynnti lögin og fór á kostum í þeim efnum: -"Mamma þú mátt setjast þarna fremst og pabbi þú mátt setjast þarna hjá mömmu. Næst ætlum við Davíð Steinn að syngja.... kórinn söng það eiginlega hérna áðan, Maístjarnar. Ah, það gæti verið svolítið erfitt, við erum bara tveir. Þið megið alveg syngja með á bekkjunum..." (Þess skal getið að Oddur söng með okkur úr sætinu þegar við sungum Maístjörnuna. Drengirnir voru marg klappaðir upp og (Oddur söng sig hásan) sungu bæði skólalög og lög sem þeir sungu með kirkjukórnum.

- Danssýning og lokaæfing -

Fékk að skreppa í Ísaksskóla í gærmorgun. Davíð sótti mig. Um var að ræða síðasta danstíma 7 ára B í vetur og voru foreldrar boðnir velkomnir að koma og sjá. Snjólaug kennari þurfti að fá lánaðar nokkrar stúlkur úr öðrum átta ára bekknum því strákarnir eru 15 í bekknum en stúlkurnar aðeins 8. Krakkarnir sýndu okkur allt sem þau voru búin að læra og það var frábært að fylgjast með þeim. Davíð Steinn dansaði við eina bekkjarsystur sína en Oddur Smári var með eina átta ára upp á arminn. Verst hvað ég var utan við mig að gleyma að láta mömmu og Helgu systur vita af þessu, er eiginlega bara að fatta það núna, allt, allt, alltof seint...

Seinni partinn arkaði ég svo út á Hlíðarendasvæðið til að sækja strákana af æfingu. Vissi ekki betur en að Davíð ætlaði sér að vinna til amk sex. En þegar ég var rétt komin á svæðið kom Davíð brunandi. Göngutúrinn var samt fínn!

Í gærkvöldi var svo loka æfing fyrir tónleikana í kvöld.

- Sundferð -

Arkaði nokkuð hratt heimleiðis seinni partinn í gær. Samt voru peyjarnir komnir á undan mér. Annar þeirra lá á neðstu tröppunni úti, hinn var kominn inn og farinn að leika sér í "game-boy" tölvunni sinni. Getið þið bara hvor var hvar! Oddur Smári fór svo fljótlega að læra eftir að ég var komin. Þetta er víst síðasta vikan í skólanum og hún er notuð til að klára hin og þessi verkefnin. Davíð Steinn er búinn að klára öll sín svo hann þarf ekkert að læra þessa dagana.

Rúmlega fimm var ég búin að taka sunddót okkar allra til og Davíð kom um svipað leyti. Það var löngu kominn tími til að skreppa í fjölskyldu-sundferð í Laugardalslaugina. Við vorum komin ofan í laug um hálfsex. Feðgarnir fóru ótal ferðir í stóru rennibrautina en ég tók því mun rólegar, fékk mér ekki einu sinni sundsprett. En mikið ósköp var þetta nú hressandi.

Seinna um kvöldið ákváðum við hjónin að leigja spólu. Davíð fór út í leigu og ævintýramyndin "Pirods of the Carabian" varð fyrir valinu. Stórskemmtileg mynd. Það var ekkert kveikt á tölvunni í gær og það gerist afar sjaldan!

- Hvar fær maður aukatíma í sólarhringinn? -

Um helgina náði ég að gera heilmikið, en kannski var ég með of margt á listanum hjá mér því hann tæmdist engan veginn:
-Valur - HK 5:1
Við vorum þar öll (þrátt fyrir þreytu gat ég ekki hugsað mér að missa af fjörinu). Stórskemmtilegur leikur en mjög blautur.
-Eftir leikinn sóttum við fullt af hakki, til Helgu systur, sem átti að fara í kjötbollugerð.
-Ég náði líka að grynnka á þvottinum um helgina en komst ekki á körfubotninn.
-Skilaði bókum á safnið á laugardaginn. Var komin degi framyfir en slapp við sekt. Skyldi eina bók eftir heima og hafði hugsað mér að taka bara tvær til þrjár með mér heim aftur. En ég gat ekki staðið við það, ó nei. Oddur kom með mér og fékk að velja bækur fyrir þá bræður og þegar við vorum búin að ljúka okkur af var ég með tvo fulla poka. Fjórar barnabækur og 12 stykki fyrir mig...
-Oddur kom líka með mér í Bónus og keyrði körfuna fyrir mig eins og herforingi, mjög hjálpsamlegur.
-Eftir að hafa gengið frá vörunum skruppum við öll fjögur yfir í næst-næstu götu til vinahjóna okkar. Við strákarnir stoppuðum á annan klukkutíma en Davíð varð eftir, þurfti lengri tíma til að sinna tölvumálum fyrir þau.
-Klukkan var orðin sex á laugardaginn þegar ég byrjaði loksins á kjötbollugerðinni. Deigið fyllt hnoðskálina mína en þegar upp var staðið urðu bollurnar aðeins rúmlega 80. (sá fyrir mér yfir hundrað bollur áður en ég byrjaði að steikja). Kvöldmaturinn það kvöldið var borðaður óvanalega seint, eða um níu og það voru auðvitað kjötbollur í matinn.
-Í gærmorgun mætti ég í kirkjuna á upphitun fyrir gúllasmessu. Messan var samnorræn, finnsk kona las fyrri ritningalestur á sínu móðurmáli, norskur piltur las þann seinni og finnskur prestur predikaði á sænsku með aðstoð séra Péturs. Eftir mikið gúllasát var kóræfing og ég get svarið það að gúllasið gerði það að verkum að sum lögin voru hreinlega eins og óæfð.
-Valur - KR 3:0. Við fórum öll þangað líka. Það var greinilegt að þetta var fyrsti leikur Valsstúlkna í sumar því það tók þær nokkrar mínútur að finna sig í leiknum en eftir fyrstu fimmtán mínúturnar tók þær eiginlega öll völdin. Í seinni hálfleik fór 85% af leiknum fram á vallarhelmingi KR-stúlkna.

Það sem ég náði ekki að gera var að halda undirbúningi undir flutning áfram og ég náði heldur ekki að taka neitt til að ráði eða þrífa heima hjá mér. Aukaklukkutímar í sólarhringinn óskast!!!

- Tónleikar á döfinni -

N.k. fimmtudagskvöld, 27. maí klukkan 20:30 mun

kirkjukór óháða safnaðarins halda tónleika í kirkjunni "sinni" Stjórnandi er Peter Máté, undirleik annast Lenka Mátéová (konan hans) og svo mun Sólveig Samúelsdóttir syngja einsöng. Aðgöngueyrir er kr. 1000 Efnisskráin verður "keyrð" í gegn en eftir tónleika verður boðið upp á kaffi og konfekt! Ég vil hvetja allt söngelskt fólk til að mæta og eiga með okkur góða kvöldstund.

- Fleiri fréttir og önnur mál -

Ég er komin af stað aftur, kannski ekki 100% hress en fyrst ég gat "hamast" í tiltekt og þrifum og pönnukökugerð heima hjá mér í gær þá var mér örugglega óhætt að fara á arkið í morgun, sem ég og gerði.

Hulda systurdóttir er heima þessa dagana öll útsteypt í hlaupabólu. Þær mæðgur hafa því tekið því mjög rólega sl. daga. Ingvi mágur kom í land á miðvikudaginn og hefur samið um það að þurfa ekki að fara út á sjó aftur þar sem bumbubúinn gæti komið hvenær sem er þótt Helga sé skráð þann 24. júní n.k. Ég er búin að segja henni að hún fái tvíbura....

Eftir að hafa sofið af mér mest allan þriðjudaginn, lá ég fyrir og las og las meiri partinn af miðvikudeginum. M.a. las ég Mynd örlaganna eftir Isabelle Alliende. Stórgóð bók sem mér skilst að sé sjálfstæður milli kafli á öðrum tveimur bókum; Dóttir gæfunnar og Hús örlaganna. Á eftir að lesa þær og geri það líklega þegar fer að hausta aftur. Bókin sem ég er að lesa núna heitir Aðeins eitt barn og er hún sönn saga kínveskrar hjúkrunarkonu sem vann að því að fylgja eftir stefnunni um aðeins eitt barn og lenti svo sjálf í því að verða barnshafandi öðru sinni. En það er margt fleira í þessari bók því hún upplifði marga skelfinguna í stjórnartíð Maós og dróst hún inn í alls konar "vitleysu". Ég mæli með þessari sögu.

Valsara spila sinn annan leik í 1. deildinni á heimavelli í kvöld og taka á móti HK. Mig dauðlangar á leikinn en hef ákveðið að fara vel með mig að sinni. Held samt að feðgarnir fari allir.

- Nokkrar stuttar "fréttir" -

Frá mér hurfu nokkrir dagar. Ég var búin að þrjóskast við og næstum vinna bug á hálsbólgu þegar ég fór að finna fyrir magakveisu sl. mánudag. Ég stóð vinnudaginn af mér og var svo heppin að fá skutl heim. Strákarnir komu rétt seinna labbandi heim úr skólanum og komu með mér í fiskbúðina. Ég veit ekki enn hvernig ég fór að því að malla plokkara uppáhaldið hans Davíðs en þegar hann kom heim var ég komin undir sæng skjálfandi úr innri hrolli og hafði alls enga matarlyst. Oddur kom inn til mín eftir matinn, lagði úlnliðinn á ennið á mér og sagði: -"Þú ert sjóðheit mamma. Þú verður að vera heima á morgun og við Davíð Steinn komum labbandi heim úr skólanum og sjáum um þig..."

Svaf mest allan þriðjudaginn og hafði litla lyst. Davíð Steinn kom aleinn heim úr skólanum, vildi ekki fara með feðgunum en Oddur átti tíma í göngugreiningu um hálfþrjú. Þegar þeir voru báðir komnir heim gaf ég þeim hressingu og sendi þá svo út að hjóla eða leika. Fann til kvöldmatinn og kom strákunum í rúmið upp úr átta og var sjálf sofnuð á tíunda tímanum.

Ég var öllu hressari í gær en hálf máttlaus og ákvað því að vera heima og fara vel með mig. Varð vitni að sennu milli feðganna (Davíðs og Odds) rétt áður en halda átti í skólann, þar sem Oddur hafði betur. Það er vor í lofti en samt hefur Oddur klætt sig í þykka húfu, flíspeysu og vind- og regnheldan jakka. Pabbi hans tók af honum húfuna og sagði honum að velja annað hvort peysuna eða jakkann til að fara í. En stráksi sagðist ekki fara í skólann nema hann fengi að fara í þetta allt. Svaf ekki eins mikið en las þeim mun meira. Davíð Steinn kom einn heim úr skólanum um hálfþrjú. Hann hélt að Oddur hefði farið á undan sér en sá síðar nefndi skilaði sér ekki fyrr en rétt áður en Davíð kom og skutlaði þeim á fótboltaæfingu. Oddur hélt að Davíð Steinn væri á eftir sér og hinkraði eftir honum. Einnig sagðist hann hafa hitt eina konu og sungið tvö lög fyrir hana. Þetta er drengurinn sem er búinn að tilkynna það að hann ætli ekki að vera í kór næsta vetur.

Meðan ég man: Kórtónleikar Óháða kórsins verða haldnir fimmtudaginn 28. maí kl 20:30 í kirkju óháða safnaðarins. Ég komst reyndar ekki á æfingu í gær en frétti þetta þegar ég tilkynnti forföllin. N.k. sunnudag er messa klukkan ellefu og boðið upp á gúllas eftir messu.

- Valur - Þór 1:1 -

Við fjölskyldan mættum á leikinn í gær, fyrsta leikinn í fyrstu umferð fyrstu deildar. Davíð fékk afhent árskortið sitt og þar að auki tvær Valspeysur svo nú getur hann aldeilis mætt á alla heimaleiki sem hann vill. Kannski ég fái að nota kortið á heimaleikina í Landsbankadeild kvenna?!?!

En það sem ég vildi sagt hafa um leikinn. Mér fannst Valsararnir eiga mun meira í leiknum og þeir voru hreinlega óheppnir að setja ekki amk annað mark undir lok leiksins. En í staðinn jafnaði Þór eftir klaufaleg varnarmistök Valsmanna. En ég tók líka eftir því að sumir Þórsararnir þurftu ekki annað en að detta og kútveltast (án þess að um nokkurt návígi væri að ræða) og þá fengu þeir aukaspyrnu. Umferð 1. deildar lýkur svo í kvöld með þremur leikjum (það voru spilaðir tveir leikir í gær). Þetta á eftir að verða verulega spennandi sumar.

Þá tilkynnist hér með að það var einn kassi til fylltur í gær. Í þann kassa setti ég flestar myndbandskassetturnar okkar Davíðs...

- Margt og mikið -

Þá er enn ein helgin liðin og þessi mánuður rúmlega hálfnaður. Það var mikið að gera eins og svo oft áður. Seinni partinn á föstudaginn fórum við með nýju skóna hans Davíð Steins og létum líma þá betur. Í leiðinni pantaði ég tíma í göngugreiningu fyrir Odd.

Á laugardaginn mættum við upp í skóla á ellefta tímanum. Þá þegar var komið nokkuð af fjölskyldum og margir búnir að finna sér verkefni. Fyrstu tíu mínúturnar var ég ekki viss um hvað ég átti af mér að gera. Þá tók Edda skólastjóri til sinna ráða, benti mér á verkefnalista, rétti mér trjáklippur og sagði að ég mætti gera það sem ég vildi. Ég sá strax eitt atriði á listanum sem ég færi mjög létt með; brosa!!!. Ég tók líka við klippunum og fann stað sem enginn var búinn að finna, rósabeðið fyrir framan skóla. Nokkru seinna barst liðsauki sem var betur garðgræjuvopnaður heldur en ég, mamma eins bekkjarbróður tvíburanna. Upp úr tólf hófst svo eiginleg vorhátíð. Þá var búið að blása upp þrjá hoppukastala, verið var að grilla pylsur (foreldrafélagið sá um það), þeir krakkar sem vildu fengu andlitsmálun (tvíburarnir nýttu sér það, tvisvar!) og svo kom hópur frá götuleikhúsinu.

Þessa helgi var víst sett Reykjavíkurmót í knattspyrnu yngri flokka í Egilshöll. Benni þjálfari vissi ekki af þessu fyrr en á miðvikudaginn og hafði ekki náð að tala við strákana. Hann kom á vorhátíðina og talaði m.a. við Odd Smára og Davíð Stein en þeir voru í þeim hópi sem vildu ekki taka þátt og þeirri ákvörðun þeirra varð ekki haggað.

Horfði á leikinn Ísland - Danmörk 31:34 eftir að við komum heim á laugardaginn. Mér fannst íslensku stúlkurnar standa sig mjög vel, það var eiginlega grátlegt að sjá þær dönsku jafna og síga aðeins framúr á síðustu mínútunum. Strákarnir voru úti og Davíð að vinna í tölvunni. Eftir leikinn ákvað ég að setja eitthvað meira ofan í kassa og fyllti þrjá kassa af bókum (og samt eru enn bækur uppivið).

Strákarnir komu inn rétt fyrir sjö til þess að horfa á Eurovision. Davíð sá um að færa okkur matinn. Jónsi stóð sig vel en það var greinilegt að meiri hlutinn af þeim sem kusu vildu frekar hress lög. Ég var og er reyndar mjög hrifin af úkrainska laginu í flutningi Ruslönu og var hún vel að sigrinum kominn, með ágætis lag og frábæra sýningu...

- Hárvöxtur -

Það er löngu kominn tími til að láta sníða hárlubbann til. Var á leiðinni til þess í kringum páskana en varð að afpanta tímann vegna anna. Hef ekki farið í klippingu síðan fyrir jól og þótt ég hafi verið sköllótt fram á þriðja ár þá er ég með frekar þykkt hár í dag. Samt er ljóst að ég kemst ekki alveg á næstunni, (en það hlýtur að styttast í það, annars fer ég bara að safna!)

Framundan er annasöm helgi aldrei þessu vant, við fjölskyldan gætum verið á þremur stöðum og ég á enn einum. Valið er þó þokkalega auðvelt, Vorhátíð í Ísaksskóla! En það er líka vorferð hjá barnakórnum og Reykjavíkurmót í Egilshöll. Var svolítið hissa á strákunum að vilja sleppa boltanum, en ég komst ekki á vorhátíðina í fyrra svo kannski verður mér ljóst eftir helgina hvers vegna hún varð fyrir valinu (fyrir utan það að Davíð er í foreldrafélagi skólans og einn af þeim sem sjá um að skipuleggja daginn...)

Í gær söng barnakórinn söngleikinn um Símon Pétur á Droplaugarstöðum. Það var lokaverkefni krakkanna. Helga systir tók svo á móti tvíburunum (sem voru reyndar úti allan tímann með Huldu og fleiri krökkum) því við vorum á fasteignasölunni að skrifa undir kaupsamning og borga fyrstu greiðslu í nýju íbúðinni sem við munum svo fá afhenta eftir mánuð. Helga bauð okkur í mat þegar við komum að sækja strákana.

Strákana langaði ekkert á leikinn, Davíð var þar að auki búinn að skrá sig til keppni með liðinu sínu í tímafreka leiknum og ég er enn að passa upp á röddina. Við Oddur horfðum á leikinn í sjónvarpinu og nafnarnir bættust í hópinn í seinni hálfleik þegar Davíð og félagar voru búnir að vinna keppnina.

Skyldi ég ná að pakka niður í fleiri kassa um helgina...?

- Afmæli -

Daði, bróðursonur mömmu er 13 ára í dag. Það er auðvitað þess vegna sem er flaggað á helstu stöðum og strætó!?!?! (Kosturinn við það að eiga afmæli sama dag og forsetinn...)

- Söngforföll og sitthvað fleira -

Um miðjan dag í gær ákvað ég að hringja í kórstjórann minn og boða forföll á æfingu um kvöldið. Hann var sammála ákvörðun minni þegar hann heyrði í mér, það er betra að slaka á og ná röddinni góðri fyrir tónleika. Seinna um kvöldið stóð ég mig nú að því að hugsa upp í kirkju til kórfélaga minna, óskandi þess að ég hefði geta verið með. Þetta var fyrsta æfingin sem ég missi úr síðan ég byrjaði í kórnum í nóvember sl.

Þriðja miðvikudaginn í röð arkaði ég yfir á Hlíðarendasvæðið á fimmta tímanum. Æfingin var búin hjá strákunum og Oddur var í smá "bananastuði" með bróður sinn á hornum sér. Náði að sjatla þessi mál með þeim á heimleiðinni.

Eftir að hafa gefið þeim smá ávaxta-hressingu gáfum við okkur tíma til að spila svolítið saman. Davíð Steinn valdi veiðimann og reyndist fisknastur. Oddur Smári fékk okkur svo til að spila ræningja, spil eftir hann sjálfan sem er byggt á þjófi. Þetta var hinn skemmtilegasti hálftími. Stuttu fyrir sex lét ég renna í bað fyrir strákana og leyfði þeim að leika sér amk í hálftíma. Fann til í matinn. Steikti svínagúllas og hitaði afþýddar soðnar kjúklingabaunir og setti út í sallat, með sveppum, rauðlauk, lúku af salthnetum og fleiru sem ég fann í ískápnum. Þessi blanda virkaði mjög vel. Allir nema Davíð Steinn fengu sér tvisvar á diskinn og samt var smá afgangur sem ég tók með mér í morgun.

Tvíburarnir fengu svo að horfa á forkeppni söngvakeppni evrópskra sjónvarpsstöðva til klukkan átta en þeir voru líka fljótir að sofna....

- Aðeins af Oddi -

Það sem ungir menn eru að verða stórir. Ég komst ekki til þess að segja frá því að á mánudaginn labbaði Oddur Smári einn heim beint úr skólanum. Hann kom um hálfþrjú og var "...fjórar fréttir!" Sú fyrsta var að hann mætti einni sem vann í Sumarbúðum í borg í fyrra og bað hún að heilsa Davíð Steini. Önnur fréttin var sú að hann sá heiðlóu. Þriðja fréttin var um heiðlóuflokk á Miklatúninu og sú fjórða var að hann tók með sér verkefni úr skólanum handa bróður sínum. Þessa dagana er Oddur líka að þjálfa kraftana sína, lyftir 10 kílóa lóðum þrisvar til fjórum sinnum alveg upp yfir höfuð (semsagt réttir alveg úr handleggjunum). Svo biður hann pabba sinn að finna kraftana/vöðvana á sér.

Síðasta námskeiðskvöldið var í gærkvöldi. Allt í einu eru þessi fimm kvöld liðin. Var með hugann svolítið við leikinn samt. Það verður á brattann að sækja fyrir mína menn. Vonandi ná þeir samt að stríða Haukum eitthvað í þriðja leiknum...

- Með ísskápshurð í höndunum - (í nokkra daga)

Sl. föstudagsmorgun var ég að sýsla í eldhúsinu, búa til kaffi (helli alltaf upp á á "gamla mátann") og undirbúa morgunverð og nesti. Ísskápurinn var galopinn á meðan ég týndi úr honum það sem ég ætlaði að nota. Þegar ég svo lokaði hurðinni heyrðist brestur, eitthvað skoppaði eftir gólfinu og allt í einu stóð ég með ísskápshurðina í höndunum. Ég sendi neyðarkall til Davíðs sem kom fram gleraugnalaus og hálfsofandi og sá ekkert athugavert til að byrja með. Hann áttaði sig þó fljótlega og tók málin í sínar hendur. Eftir að búið var að tæma dótið sem var í hurðinni var hægt að tylla henni á skápinn. Ekki vannst tími til að gera eitthvað í þessum málum um helgina (við vorum alveg viss um að það þyrfti að kaupa varahluti, amk þetta stykki sem brotnaði...). Í gær gaf Davíð sér tíma til að líta á málin og fann það út að hann gæti lagað þetta sjálfur og var ekki lengi að því (hálf broslegt að láta þetta bíða svona, en svona er það ef maður er ákveðinn í að það þurfi eitthvað meira til að laga þetta en bara að skrúfa hurðina í aftur, he, he, hemm!). Þetta stykki sem brotnaði af var víst ekki svo nauðsynlegt...

- Virkur dagur -

Davíð Steinn er orðinn hress aftur. Hann var frekar ánægður með að verða loksins veikur og fá að vera einn dag heima og ekki var það verra að hafa mömmu sína hjá sér.

- "Hrausti strákurinn lasinn..." -

Það var erfið nóttin hjá okkur Davíð Steini. Hann kom inn í herbergi um tvö og kvartaði í maganum, gat samt ekki gubbað. Ég hélt helst að hann væri svangur og gaf honum banana og leyfði honum svo að kúra hjá okkur Davíð á annan klukkutíma. Skipti á rúmunum hjá drengjunum í gær og við það færðist Davíð Steinn upp í efri koju. Setti handklæði undir höfðalagið hjá honum og rétti honum poka til að hafa hjá sér þegar hann fór aftur í sitt rúm. Klukkan var langt gengin í fimm þegar ósköpin byrjuðu hjá drengnum, handklæðið og pokinn björguðu miklu. Þessa stundina er hann sofandi í hjónarúminu. Sjálf er ég þræl kvefuð og hálf "foj" yfir því, bara hálfur mánuður í vortónleika Óháða kórsins fyrir utan það hvað ástandið dregur úr vinnukraftinum. Ég verð líklega að sætta mig við ástandið, slaka á og vona að þetta líði fljótt hjá. Og ég sem ætlaði á leikinn í kvöld, VALUR-íbv en það hefði aldrei verið hollt fyrir röddina hvort sem hún væri 100% eða ekki...

- "Rökræður" -

Ef ég bara gæti nú sagt orðrétt frá rökræðunum milli Odds Smára og Davíðs á sjötta tímanum í gær, þá myndu margir brosa út í bæði. Oddur Smári fór eiginlega hringinn. Hann bað pabba sinn um að spila við sig Pokemonspil en þar sem það var ekki tími til þess bað hann þá pabba sinn um að lesa spilareglurnar. Oddur var alls ekki sáttur við það sem kom út úr þeim lestri, sagði að einn bekkjarbróðir sinn kynni líka að lesa "útlensku" og hann hefði lesi þetta allt öðruvísi. Eftir smá þref ákvað Davíð að gefa eftir og sagði Oddi þá bara að trú bekkjarbróður sínum. Oddur velti sér áfram upp úr málunum og fann skýringu á hlutunum og klingdi út með því að segja: -"Ég ætla frekar að treysta þér, pabbi!" Það var ansi erfitt að halda andlitinu og vera alvarlegur á meðan á þrefinu stóð.

Þeir feðgar skutluðu mér á námskeiðið, fengu sér að borða (á Pítunni) og fóru svo á leikinn Valur-ÍBV. Davíð sendi mér úrslitin í gegnum sms. Þetta var greinilega hörku leikur og staðan er 1-1 í rimmunni um titilinn. Áfram Valur!

- Stórafmæli -

Í dag á nafna mín og fyrrum orgelkennari minn, Anna Magnúsdóttir, afmæli. Ég var tíu ára þegar ég byrjaði í orgeltímum hjá henni og kenndi hún mér a.m.k. í fjóra vetur eða þar til ég var búin að taka þrjú sig.

Annars er fátt eitt að frétta. Seinni partinn í gær arkaði ég yfir á Hlíðarenda-svæðið og sótti strákana. Davíð hafði skutlað þeim á æfingu og var víst með töskurnar í bílnum svo ég samdi við þá um að taka smá til í herberginu sínu og þá mættu þeir leika sér í Play Station 2 þar til pabbi þeirra kæmi heim með töskurnar. Ég ætlaði að setja í eins og eina þvottavél. Gerði það reyndar en setti hana ekki í gang þar eð allar snúrur voru fullar og önnur vél í gangi. Þvotturinn verður því að bíða betri tíma. Gaf mér smá tíma til að lesa og slaka á áður en ég fór að stússa í eldhúsverkunum. Davíð kom heim á sama tíma og maturinn var tilbúinn (rauðlaukur, sveppir, avokado, paprika, kál, graskersfræ, tómatur og steikt svínagúllas borið fram með hýðisgrjónum, pítusósu og sinnepi fyrir þá sem vildu).

Kvaddi feðgana stuttu fyrir hálfníu og dreif mig á extra langa kóræfingu. Hún var ekki búin fyrr en klukkan að ganga miðnætti. En það var gaman þrátt fyrir að við værum bara tvær mættar í minni rödd, enda iljaði það okkur þegar strákarnir sögðu við okkur eftir æfingu að þeir hefðu sjaldan heyrt í betri alt-dúett. Á æfingunni var því slegið föstu að halda vortónleikana mánudagskvöldið 24. maí n.k. Ég hlakka til en það eru nokkrir textar og lög sem ég þarf að festa betur í minninu...

- Vikan hálfnuð -

Ég las það einhvers staðar á blaði að það væru tveir dagar sem við ættum aldrei að hugsa of mikið um né hafa of miklar áhyggjur af; dagurinn í gær, sem er liðinn og kemur aldrei aftur og morgundagurinn sem er alveg óskrifað blað. Góð speki! Samt stend ég sjálfa mig að því á arkinu á morgnana (og jafnvel seinni partinn) að rífast HÁSTÖFUM (í hljóði þó) og velta mér upp úr hlutunum bæði þeim sem liðnir eru og því sem á eftir að gerast eða gæti gerst. Það er hægara sagt en gert að lifa eftir þessari speki, en ég reyni og ef ég æfi mig og æfi ætti það að takast á endanum.

En nóg um það. Strákarnir voru boðnir í afmæli til bekkjarbróður síns strax eftir skóla í gær. Það var til fimm og bauðst strákunum m.a. að fara í heitan pott og fleira. Svo ég arkaði beint heim vitandi það að Davíð mundi sjá um að sækja strákana. Gaf mér tíma til að nota það sem ég fann í ísskápnum og búa til einhvers konar grænmetispottrétt (með beikonbitum og kjúklingabaunum að auki). Feðgarnir komu mátulega heim þegar ég þurfti að fara. Kyssti þá bless og brunaði svo á nær tómum bíl á photoshop námskeiðið. Fjórir tímar þar flugu mjög hratt og skemmti ég mér mjög vel. Setti bensín á bílinn á heimleiðinni, dældi sjálf og allt, he he.

Í kvöld er svo kóræfing. Það styttist í tónleika og ég þarf að leggja harðar að mér við að læra textana utan að.

- Helgin liðin -

Það var ekki við öðru að búast. Þetta var hin þokkalegasta helgi þótt ég hefði auðvitað mátt nýta hana miklu betur. Ég er samt að hugsa um að vera sátt við árangurinn.

Veðrið var yndislegt á laugardaginn. Tvíburarnir léku sér úti allan daginn og fram á kvöld með félögum sínum. Ég var eitthvað að skrifa um það um daginn að það væri enginn tími til að lesa en í sökkti mér samt niður í eina bók á laugardeginum; Lífsjátning Guðmundu Elíasdóttur, skrifuð af Ingólfi Margeirssyni. Ætlaði aðeins að taka pásu milli verka en tíminn hvarf mér alveg, bókin er svo skemmtileg og vel skrifuð. Davíð var eitthvað að bralla í tölvunni og þegar ég rankaði við mér um fjögur leitið sá ég að ég væri í engu gerustuði og sagði við sjálfa mig að ég ætti frekar að nýta þetta góða veður og ákvað að skella mér í smá göngutúr. Ég kom heim næstum einum og hálfum tíma síðar, eftir að hafa labbað upp í Öskjuhlíð og áfram inn í Fossvogskirkjugarð. Tók stóran hring og heyrði m.a. í lóu og hrossagauk. Þetta þyrfti ég að gera oftar.

Gærdagurinn var annasamur en góður! Strákarnir vöknuðu upp úr hálfátta og ég dreif mig á fætur með þeim. Eftir morgunverð bauð ég þeim að horfa á Lion King til að nota textalestur sem hluta af lestrarkeppninni. Þeir voru ekki búnir að horfa lengi þegar Birta vinkona þeirra kom yfir og hún var rétt komin þegar fótboltafélagi þeirra hringdi upp á líka. Þeir náðu samt að lesa í þrjú korter og voru svo á leiðinni út þegar enn einn vinurinn birtist.

Um ellefu mættum við öll upp í kirkju til að fylgjast með Huldu frænku bera ljósið fram í barnastarf (ásamt Úllu vinkonu sinni) undir síðasta sálmi fyrir prédikun. Sú stutta var í glænýjum kjól sem mamma hennar hengdi upp eftir að Hulda var sofnuð á laugardagskvöldið. Um nóttina rumskaði Helga við það að dóttir hennar er eitthvað að brölta um í herberginu sínu. Þegar hún aðgætti málið var stelpan búin að klæða sig í nýja kjólinn og hélt því fram að þetta væri náttkjóll.

Strax að kirkjuferð lokinn fór Davíð á fund. Hann kom mátulega heim til að fara með strákana á fótboltaæfingu. Ég lét hendur standa fram úr ermum og byrjaði að undirbúa flutningana. Náði í Helgu systur úr barnaafmæli um hálffjögur. Hún var búin að lofa að verkstýra mér. Mennirnir okkar fóru með börnin á Dýrin í Hálsaskógi, síðustu sýninguna að ég held. Ég náði að setja ofan í tvo kassa og henda a.m.k. tveimur höldupokum áður en kominn var tími til að undirbúa matinn. Á meðan ég skar í sallatið hlustaði í á útsendingu frá mögnuðum spennuleik milli Vals og ÍR. Ég væri sennilega ekki búin að ná mér niður ef ég hefði verið á leiknum. Ég missti reyndar af leiknum sjálfum en hlustaði á framlengingarnar og bráðabanann. Þvílík spenna, þessi leikur hefði getað farið hvernig sem var...

- Baráttudagur -

Apríl er liðinn og þar með þriðjungurinn af árinu. 1. maí í dag og mér verður hugsað til móðurömmu minnar heitinnar. Hún var ein af þeim sem fór í Keflavíkurgöngurnar og hún hefði ekki farið að bakka með þær eins og Spaugstofumenn voru að grínast með í einum þættinum sínum fyrir nokkru síðan.

Skórnir hans Davíðs Steins voru tilbúnir hjá Stoðtækni í gær. Davíð safnaði okkur mæðginum saman á fimmta tímanum. Strákarnir gefa sér alltaf góðan tíma til að taka sig saman. Davíð Steinn var aðeins á undan en uppgötvaði að hann hafði gleymt lestrarspjaldinu sínu í skólastofunni. Ég bað hann um að flýta sér að ná í það því svo værum við að fara og sækja skóna hans. - "Ég skal hlaupa eins og fætur toga, mamma!" og hann stóð við það. Oddur Smári vildi ekki koma með inn og sækja skóna. - "Hverju skiptir þetta mig máli, þetta er ekkert merkilegt fyrir mig!" og hann beið úti í bíl.

Áður en við fórum heim komum við við á einum öðrum stað. Í vikunni fékk ég sms frá 1900 með hamingjuóskum og tilkynningu um að ég hefði unnið poppgaffal. Ég minntist þess ekki að hafa verið að taka þátt í neins konar leik en Davíð sagðist hafa sent einhver sms úr mínum síma. Ég var auðvitað forvitin að vita hvernig poppgaffall lítur út svo við renndum eftir vinningnum og ég prufaði hann seinna um kvöldið. Skondið tæki.