Anna 44 - 44 annA

Á 77. degi ársins, þann 17. mars sl. fagnaði ég 44 ára afmælinu mínu. Davíð færði mér morgun mat í rúmið og stjanaði við mig út í eitt allan daginn. Við skruppum m.a. í Húsdýragarðinn, bara við tvö, heilsuðum upp á mörg dýranna og fengum okkur kaffi og vöfflu í kaffihúsinu þar. Síðan skruppum við í Byggt og búið í Kringlunni og keyptum okkur blandara á mjög góðu verði. Tvíburarnir fóru upp í skóla um fimm, tveimur og hálfri klst. fyrir frumsýningu á söngleiknum "Hver er ég?" Við hjónin röltum upp í skóla um sjö og hittum tengdó og Tedda þar. Áður en leikritið hófst urðu "leikhúsgestir" vitni að því þegar Björn Thors leikari afhenti "gamla" listakennaranum sínum, Önnu Flosadóttur, grímuna sem hann fékk 2009 og tileinkaði henni á sínum tíma. Söngleikurinn sjálfur var virkilega flottur og skemmtilegur og upplifði ég allan skalann í tilfinningum á meðan á honum stóð. Yfir 100 krakkar úr leiklistavali í 8.-10. bekk taka þátt og eiga þau öll mikið hrós skilið. Kennararnir sem aðstoðuðu þau við þessa uppsetningu eiga líka mikið lof fyrir. Ég er eiginlega búin að ákveða að fara á aðra sýningu, þá næstsíðustu en er mjög ánægð að vita að það á að taka þetta upp svo hægt verður að kaupa sér eitt (og vonandi fleiri) eintak/tök. Þegar við Davíð komum heim horfðum við á eina af "Police akademia" myndunum. Þannig að ég notaði afmælisdaginn minn mjög vel. :-)

- Einn sjötti liðinn af árinu -

Í gær fór ég í síðustu foreldraviðtölin vegna grunnskólaveru tvíburanna. Þeir eru að pluma sig frábærlega í flestu eins og alltaf áður. Já, strákarnir munu útskrifast úr grunnskóla í vor. Þessir ungu menn verða 16 ára í sumar og byrja væntanlega í framhaldsskóla næsta haust. Í tilefni af foreldradeginum efndi 10. bekkur til kökubazars í fjáröflunarskyni fyrir væntanlegt "útskriftarferðalag" í vor. Hver nemandi í árganginum átti að koma með amk eitthvað tvennt til að selja og voru tveir sölubásar settir upp í skólanum og skiptu krakkarnir með sér deginum og seldist vel. Kvöldinu áður, á þriðjudagskvöldið, kom einn vinur strákanna í árganginum og bakaði með okkur. Það tókst bærilega vel og í gærmorgun fórum við með tvær brúntertur með súkkulaðikremi, tvö lítil haframjölsbrauð, eina hjónabandssælu, 5x4 muffins og 5x6 kornfleksklatta á söluborðin. Verslaði auðvitað við krakkana á báðum stöðunum. - Annars tók ég mér smá vetrarfrí frá og með hádegi sl. fimmtudag og allan mánudaginn með að auki. Fórum út úr bænum rétt upp úr tvö á föstudag og komum við á Bakkanum á leiðinni upp í Brekkubæ, nýjasta sumarbústað RB á Efri-Reykjum. Við Davíð fórum í heita pottinn seint um kvöldið. Það var spilað, lesið, saumað (frúin taldi út), horft á imbann og slakað á. Urðum að vera komin aftur í bæinn fyrir hálfeitt á sunnudag því ég varð að vera mætt í upphitun v/jazzmessu. Feðgarnir "hentu" mér út við kirkjuna uþb 12:40 og svo labbaði ég heim um þrjú. Það var mjög gott að eiga svo mánudaginn. Fór á fætur með manninum og skutlaði honum í vinnuna svo ég gæti haft bílinn. Rak tvö erindi í Mjóddinni og heimsótti svo Böddu. Seinna um daginn heimsótti ég fyrrum nágranna okkar af Hrefnugötunni í fyrsta sinn eftir að þau fluttu á Sléttuveginn.

- Alltaf nóg að sýsla -

Nú er aðeins rétt rúm vika eftir af febrúar, ýmislegt búið að bralla og margt og mikið framundan. Í gærkvöldi var saumaklúbbur hjá "tvíburahálfsystur" minni og vorum við allar mættar áður en klukkan sló hálfníu í gærkvöldi. Ég vann í hvítvínssmámyndinni en tók líka eldhúsmyndina sem ég er byrjuð á með til að monta mig aðeins. Eins og venjulega var glatt á hjalla, mikið spjallað og hlegið en inn á milli datt allt í dúnalogn þegar við vorum allar að einbeita okkur að handavinnunni. Ég náði að koma heim rétt áður en klukkan varð ellefu og klukkutíminn fram að miðnætti (reyndar alveg til 00:10) fór í þvottahús-, tölvumál og lestur. Tíminn er alltof alltof fljótur að líða. Á konudaginn fór ég á fætur upp úr sjö og bjó til hafragraut, aðallega handa karatestráknum mínum en við Davíð fengum líka. Ég fór svo með Oddi Smára í Smárann og var með honum þar milli hálfníu og rúmlega ellefu. Hans flokkur hóf keppni á undan áætlun, upp úr hálfellefu og þetta tók frekar fljótt af. Á heimleiðinni kom ég við í Lyfju og keypti hnéhlíf og hirudoid fyrir manninn minn. Stoppaði mjög stutt heima því við norska esperanto vinkona mín ætluðum að hittast, höfðum bara fært hittinginn aðeins til vegna karatemótsins. Ég var mætt til hennar upp úr tólf og byrjaði hún á að bjóða mér kaffi og bollur áður en við snérum okkur að efninu. Verslaði svo inn áður en ég fór aftur heim. Um miðjan dag setti ég upp slátur. Einnig ákvað ég að standa við loforð sem ég gaf öðrum tvíburanum mínum helgina á undan og skellti í eina eplaköku. Laugardagurinn fór í afslappelsi að mestu. Svaf frameftir og tók því frekar rólega. Reyndar bakaði ég nokkrar vatnsdeigsbollur. Davíð kom draghaltur heim af karateæfingu (og er þá komin skýringing á Lyfju-ferðinni). Á föstudaginn skutlaði Davíð mér á Hvíta riddarann. Ég var mætt þar alveg á slaginu sjö mjög spennt að hitta "Krakkana þeirra Friðriks Guðna og Siggu" Þau heiðurshjón (sem létust langt fyrir aldur fram) stofnuðu tónlistarskóla Rangæinga. Einkadóttir þeirra var stödd á landinu og hún og tvær vinkonur ákváðu hvort ekki væri hægt að hóa saman hóp af krökkum sem stunduðu nám í tónlistarskólanum. Jú, jú, það var ágætist mæting og m.a. mættu nokkrir kennarar líka. Sumir voru ekki búnir að hittast mjög lengi en þetta varð hinn skemmtilegasti hittingur sem vonandi verður endurtekinn næst þegar Þöll verður á landinu. - Á fimmtudagskvöldið var ég orðin ein eftir heima rétt fyrir átta. Horfði á 3. þátt Hallarinnar á leigunni og dreif mig svo á fyrstu keiluæfinguna í marga, marga mánuði. Það er ljóst að þótt ég hafi sýnt gamla takta á köflum að þá er ég alls ekki í góðri æfingu. En þetta var alveg jafn gaman og mig minnti.

- Nokkrir dagar aftur í tímann -

Sennilega er best að byrja á að rekja sig afturábak. Það er gaman að segja frá því að á leiðinni í sund eftir vinnu í gær hitti ég Birnu frænku. Sá konu koma út úr búð við Skólavörðustíginn. Varð litið á hana, þekkti samstundis þessa frænku mína og fleygði mér um hálsinn á henni. Aðstæður til sunds voru svolítið erfiðar akkúrat á því tímabili sem ég var í lauginni, synti því bara 11 25m ferðir áður en ég skrapp í pott og gufu. - Á mánudaginn hitti ég nöfnu mína og frænku, systurdóttir mömmu, eftir vinnu. Ég trítlaði yfir á Vesturgötuna til hennar og hún keyrði mig heim. Löbbuðum samt hálfan hring í Öskjuhlíðinni áður en við fórum inn að hita okkur kaffi. Um svipað leyti og við nöfnurnar lögðum af stað í gönguna var Oddur Smári mættur í Faxafenið með pabba sínum en strákurinn var valinn í tafllið skólans og milli fimm og rúml. átta var haldið Reykjavíkurmót grunnskólanna í skák. Það áttu að vera fjórir í liði en það mættu bara þrír úr Hlíðaskóla svo þeir töpuðu alltaf einni skák í hverri umferð. Oddur tefldi á borði eitt og vann fjórar skákir af sjö. Eina vann hann þar sem hann átti að tefla við e-n sem ekki var á svæðinu svo það voru greinilega fleiri skólar sem ekki voru með fullmönnuð lið. Þessir þrír kappar úr Hlíðó náðu í 12 og hálfan vinning. - Mætti í messuupphitun klukkan eitt á sunnudaginn. Kórstjórinn ákvað að við skildum svo sitja dreifð úti í kirkju. Sungum þrjá sálma og svörin en fyrir og eftir predikun söng Hulda Garðars sópransöngkona fjögur lög (2 og 2) við undirleik Árna. Magnaðir örtónleikar það. Gaf mér ekki tíma til að fá mér kaffi eftir messuna heldur dreif mig heim og sá til þess að við vorum öll fjögur lögð af stað austur á Hellu til pabba og mömmu áður en klukkan varð mikið meira en fjögur. Tók saumana með mér austur en um hálfsexleytið fórum við pabbi að undirbúa þorraveislu sem mamma var aðeins byrjuð að undirbúa. Pabbi skar niður súrmat og setti á tvö föt á meðan kartöflur og rófur suðu í pottunum. Við feðgin lögðum á borð og ég steikti svo slátur handa öðrum unglingnum sem ekki borðar súrt. - Á laugardagsmorguninn skrapp ég til esperantovinkonu minnar. Hún bauð mér upp á lífrænan hafragraut og lífrænt kaffi á eftir áður en við byrjuðum að kíkja á áhugamálið okkar. Þegar ég kom heim var orðið ljóst að ekkert yrði af tófuferð svilanna svo Davíð missti ekki af karateæfingu. Tvíburarnir sáu um að ryksuga yfir gólfin en þeir áttu von á nokkrum unglingum á spilakvöld seinna um daginn. Ég bakaði eplaköku fyrir það tilefni. Fyrstu krakkarnir mættu um fimm og þegar flestir voru komnir röðuðu þau sér í kringum borðið í holinu og þau byrjuðu á að spila fimbulfamb. Glatt var á hjalla lengi frameftir kvöldi og þeir sem voru með mesta úthaldið voru til miðnættis. - Að loku ætla ég að geta þess að ég heimsótti blóðbankann í 30. sinn eftir vinnu og sundsprett sl. fimmtudag. Æðin í "betri" hendinni var með stæla en þá var bara tekið úr þeirri hægri í staðinn.

- Alls konar -

Janúar er liðinn og einnig nokkrir dagar af febrúar mánuði. Ég mætti á kóræfingu sl. miðvikudag. Röddin virkaði en hún var ekki 100% og þegar fór að líða á æfinguna fannst mér ég verða svo þurr í hálsinum. Þetta var ekkert svo erfið æfing en það var greinilega eitthvað ennþá ofan í mér sem fór að trufla mig eftir því sem leið á æfinguna. Daginn áður var "Önnuhittingur". Davíð hafði skilið bílinn eftir rétt fyrir utan vinnuna mína svo ég sótti nöfnu mína og frænku og byrjuðum við á að stoppa í Sundhöllinni og fá okkur smá sundsprett. Syntum 225 metra og vorum svo í nuddpottinum í dágóða stund. Anna kom með mér heim. Davíð sá um kvöldmatinn og fór svo á karateæfingu. Ég sýndi nöfnu minni m.a. kínverska táknið sem ég hef lokið við að sauma og á bara eftir að útbúa púða úr myndinni. Svo spjölluðum við um alla heima og geyma þar til Davíð kom heim af æfingu en þá skutlaði ég henni heim til sín. - Um nýliðna helgi fórum við m.a. tvisvar í Egilshöllina. Á sjöunda tímanum á laugardaginn var Hulda að keppa. Við mættum akkúrat um leið og hún var kynnt inn á svellið og sáum hennar æfingar og stúlkunnar sem var á eftir henni í röðinni áður en við drifum okkur yfir í Grafarholtið í smá þorrablót með vinafólki okkar til margrar ára. Strákarnir höfðu fengið að velja hvort þeir kæmu með eða ekki og þeir ákváðu að koma ekki. Kvöldið varð engu að síður mjög skemmtilegt og kvöddum við ekki fyrr en klukkan var farin að ganga eitt. - Um hálfsex í gær vorum við mætt aftur í Egilshöllina til að fylgjast með Bríeti keppa. Þurftum að bíða smá eftir að röðin kæmi að henni og þar sem ekkert lá annað fyrir biðum við þar til verðlaunaafhendingin fyrir hennar flokk var afstaðin. Sú stutta varð í 3. sæti af átta en var ekki par sátt með það því hún ætlaði sér víst að vinna. - Um helgina skrapp ég einnig í esperantohitting til norsku vinkonu minnar og heimsótti einnig mömmu frænku minnar. Einnig fór tíminn í smá tiltekt, þrif, lestur, saumaskap og sjónvarpsgláp. :-)

- Saumi, saumi og smá lestur með -

Í fyrrakvöld ákvað ég að leyfa mér að byrja á "nýju" saumaverkefni þrátt fyrir að vera með alveg nokkur verkefni í takinu sem eru á mismunandi stigum. Ég skrifa nýju innan gæsalappa því myndin sem ég ákvað að byrja á er búin að vera til hjá mér síðan snemma árs 2007 (að mig minnir, ætti að geta flett því upp á blogginu mínu) en ég pantaði hana um leið og bláa engilinn m.a. Þetta er eldhúsmynd en það situr líka köttur á hillunni innan um sultukrukkur og eldhúsáhöld. Ég handsaumaði hringinn í kringum jafann, tók miðjuna og saumaði nokkur spor. Myndin er í grófari jafa en ég sauma oftast í svo notaðir eru þrír þræðir af sex í krosssauminn. Í gærkvöldi hefði ég átt að vera á kóræfingu en hálsinn leyfði það ekki svo ég ákvað að byrja á nýrri saumamynd, smámynd af hvítvínsflösku, vínglasi og smá vínviði. Líkt og kvöldið áður byrjaði ég á að handsauma í kringum jafann, tók miðjuna og saumaði svo af stað. Þetta er miklu minni mynd í fínlegri jafa, nota tvo þræði af sex. Þegar ég lagði þetta verkefni frá mér tók ég aðeins upp flöskusvuntuna sem ég byrjaði á sl. mánudagskvöld. - Davíð gaf mér eina bók í jólagjöf, Jójó eftir Steinunni Sigurðardóttur. Sjálfur fékk hann nýjustu bókina hans Arnaldar. Ég gaf mér ágætan tíma að lesa mína bók. Þessi þunna bók var mun þykkari aflestrar og hygg ég að ég ætti að lesa hana aftur mjög fljótlega til að athuga hvort nokkuð hafi farið framhjá mér. Ég var þó löngu búin með bókina áður en Davíð lauk við sína svo ég þurfti að bíða í næstum þrjár vikur eftir að geta byrjað á Einvíginu. Spurning um að fara að endurnýja bókasafnskortið...

- Hálsbólga -

og sitthvað fleira

Í nokkra daga hefur hálsinn verið mjög sár, söngröddin ónothæf og talröddin léleg. Fann fyrir þessu um miðja síðustu viku. Eins og ég var ánægð með að ég var komin í góðan sundgýr, fór í Sundhöllina eftir vinnu þrjá daga í sl. viku, synti 500m og gaf mér svo góðan tíma í gufunni líka. Hélt mig alveg heima við um helgina og hef ekki þorað að fara í sund í þessari viku. Úða bara í mig sterkum brjóstsykri og heima hef ég drukkið kalt (en soðið) engifervatn með sítrónusafa út í. Passaði mig á að blanda ekki sítrónusafanum út í fyrr en engifervatnið hefur kólnað. Kitlar oft í hálsinn og fæ þá jafnan hóstakast en það er svo undarlegt að ég hef ekki fengið kitl eða kast á nóttunni. Hef heldur ekki fengið neinn hita svo ég hef alveg verið vinnufær. Mamma fékk slæmt kvef upp úr áramótunum sem endaði með því að hún fékk lungnabólgu og öll orkan sem hún náði sér í á Kanaríeyjum í nóvember er horfin. Lyfin eru varla farin að virka á hana og hún þarf að fara mjög, mjög vel með sig næstu vikurnar. - Annars var ég með saumaklúbb hjá mér á mánudagskvöldið var, no. 2 á árinu en ég missti af þeim fyrsta vegna óvæntrar magapestar sem ég fékk að morgni 11. jan. sl. Það mættu þrjár hannyrðakonur til mín og ein af þeim var að ganga í klúbbinn til okkar. Hún smellpassar inn í hópinn sem á það m.a. sameiginlegt að hafa stundað nám í FSu amk 2-3 annir eða lengur (t.d. allt stúdentsnámið). Ég dreif í að klára útlínusaum í rósamynd á flöskusvuntu og byrjaði svo á nýrri. Er með nokkur verkefni í gangi en er einnig nýbúin að klára þrjú verkefni, þar af eitt frekar stórt sem er kínverskt tákn fyrir hamingju. Þ.e. útsaumnum er lokið en svo á eftir að búa til púða úr myndinni. - Í gærmorgun var varla göngufært í vinnuna og líklega valdi ég mér alveg kolranga leið. Það var hvergi búið að moka neinagangstíga á þeirri leið. Ef stutt var út á götuna var þeim mun dýpri snjórinn þar sem ég gekk um enda var ég blaut upp að hnjám er ég mætti í vinnuna og ég hafði ekki verið svo forsjál að taka með mér aukabuxur svo ég varð að biðja Davíð um að skutla til mín þurrum buxum og sokkum. Hann fór á fætur með mér í morgun og skutlaði mér í vinnuna en ég tók eftir því að það var búið að moka e-a göngustíga í morgun. En enn snjóar og snjóar...

- Áfram Ísland -

Já, strákarnir okkar handboltalandsliðinu eru mættir á enn eitt stórmótið, EM í Slóveníu. Ég hafði alveg ágæta tilfinningu fyrir leiknum (Ísland - Króatía, í gærkvöldi) en leist ekki á blikuna þegar fór að líða á leikinn og ekki tókst að slíta sig frá andstæðingunum, og svo fór sem fór. En ég held að fall sé fararheill. Skrýtið annars að sjá liðið án Óla Stefáns og Snorra Steins en það kemur yfirleitt maður í manns stað. Því miður næ ég ekki að horfa á næsta leik í beinni því annað kvöld er fyrsta kóræfing ársins. - Annars missti ég af fyrsta saumaklúbbi ársins, þrátt fyrir að hafa skipulagt hann sjálf. Fannst það alveg upplagt að nota sl. miðvikudag þar sem það var ekki kóræfing. Á ellefta tímanum þann morgun snérist maginn minn á hvolf og ég varð að biðja Davíð um að sækja mig í vinnuna. Rétt náði heim áður en ég þurfti að kasta upp aftur og svo háttaði ég mig, fór beint í rúmið og svaf fram á dag. Fannst ég vera orðin hressari um kvöldið en hélt mig heima við og á fimmtudagsmorguninn kom á daginn að ég var ekki alveg orðin 100%. Var heima þann daginn. - Upp úr hádegi sl. laugardag heimsótti mig ein vinkona mín úr saumaklúbbnum og hafði hún saumana sína með sér svo við settum upp svona "mínísaumaklúbb". Held að við höfum setið og saumað og spjallað í rúma tvo tíma. - Á sunnudaginn skruppum við Davíð að versla eftir hádegið og notuðum tækifærið og fórum með fullt bílskott af ýmsu drasli í Sorpu. Við áttum von á tengdó í heimsókn og ákváðum að bjóða þeim í mat með okkur. Davíð sá um alla eldamennskuna og eldaði dýrindis læri og hafði með sætar kartöflur, sallat, baunir, rauðkál og bernessósu. Mjög ljúffengt allt saman. Með kaffinu eftir matinn buðum við svo upp á karamelluostaköku sem við höfðum kippt með okkur heim úr verslunarferðinni. Góður matur með góðu fólki og stemmingin var mjög notaleg.

- Dagarnir þeytast áfram -

Einn þriðji er liðinn af þessum fyrsta mánuði nýs árs og þótt maður sé ekki kominn í 100 % rútínu þá veit ég varla hvað verður af þessum dögum, og þó... Fór aðeins einu sinni í sund í síðustu viku. Taldi það ekki ráðlegt að fara aftur því ég nældi mér einhvers staðar í slæmt kvef og rétt slapp við að leggjast í rúmið vegna þess. Á laugardagsmorguninn var dreif ég mig í fyrstu esperanto-heimsókn ársins. Við stöllur komumst aðeins í gang og ákváðum að hittast ca hálfsmánaðarlega til að byrja með. Um kvöldið fórum við öll fjölskyldan í veislu sem endaði með balli sem stóð til klukkan að ganga þrjú. Tilefnið var að árgangur 1952 verður sextugur á árinu og var það móðursystir mín (og guðmóðir) sem skipulagði þennan fögnuð. Það voru smá ræðuhöld og upplestur en mest þó söngur úr ýmsum áttum og svo hafði hún beðið bróðurson sinn einn að safna saman strákum til að spila og syngja undir dansi. Davíð bauð tvíburunum að skutla þeim heim um miðnætti en það var bara annar sem þáði það. Hinn tvíburinn skemmti sér of vel til að vilja fara heim enda var jafnaldri hans og frændi okkar sem hefur sams konar áhugamál líka áfram. Þessi sami tvíburi kom svo með mér í messu í óháða klukkan tvö á sunnudaginn þar sem ég mætti sem "óbreyttur kirkjugestur" því kórstjórinn er úti og Raddbandafélag Reykjavíkur sá um að leiða messusönginn. Möguleikhúsið mætti líka á svæðið og sýndi leikrit í staðinn fyrir predikunina. Í gær hélt ég upp á 12 ára starfsafmælið í vinnunni, mætti með brauðtertu, eplaköku og ostaköku. Eftir vinnu dreif ég mig í sund og þangað náði Davíð í mig um hálfsex. Tók loksins fram handavinnuna mína í gærkvöldi, rétt til þess að athuga hvort ég yrði ekki tilbúin í fyrsta saumaklúbb ársins í kvöld...

- Gleðilegt nýtt ár -

Desember var ekki lengi að klárast og allt í einu er árið 2012 mætt á svæðið og bara 355 dagar til næstu jóla. Nýliðin jól voru frekar snubbótt fyrir þá sem þurftu að vinna flesta virka daga, hreinræktuð atvinnuekendajól eða hvað það kallast. Ég fékk kost á því að taka út einn aukafrídag gefins (ekki af orlofinu mínu) í boði vinnunnar og 27. desember varð fyrir valinu. Ég varð líka að taka smá frí frá kirkjusöng, söng bara með við aftanmessur á aðfanga- og gamlársdag en var komin austur á Hellu þegar messað var á jóladag. Mamma og pabbi voru með jóla"brunch"boð fyrir 19 manns (að þeim meðtöldum sem og okkur systrum og okkar fjölskyldum) milli eitt og fjögur. "Litla fjölskyldan" í Danmörku var á landinu, Gerður, Frank og tæplega sjö mánaða sonur þeirra, Elías Frey, voru á landinu 18-27 des og þau komu ma í þetta boð. Yndislega gaman að hitta þau. Foreldra hennar, ömmu, eina frænku mína hennar mann og móður hennar hittum við líka og þetta var hinn allra skemmtilegasti dagur. Helga, Ingvi og dætur eru alltaf fyrir austan á jólunum og oft um áramót. Við Davíð höfum aftur á móti alltaf haldið aðfangadaginn heima hjá okkur sjálfum, alveg frá því við byrjuðum að búa 1990, og það breyttist ekkert eftir að strákarnir fæddust. Okkur var bæði boðið í jólaboðið og hangiket með fjölskyldunni um kvöldið svo við vorum fyrir austan langt fram á kvöld. Tókum því mjög rólega heima næstu tvo daga en skutluðum bræðrunum í heimsókn til föðurforeldrana á þriðjudagskvöldinu milli jóla og nýjárs þar sem þeir voru fram á gamlársdag. Davíð var í fríi frá og með 23. des og alla virku dagana sem eftir voru 2011 og þar að auki "slæddist" 1. virki dagur á nýja árinu með inn í þetta frí. Hann hafði verulega gott af þessu fríi en hann er búin að hafa þetta ca svona nokkuð mörg undanfarin ár því fyrir ekkert svo löngu síðan gat hann ekki tekið lengra sumarfrí að sumri til heldur en uþb tvær vikur. Það er hugsanlega að breytast en ég trúi því samt mátulega fyrr en ég sé það gerast. Fimmtudaginn fyrir áramót hafði snjóað mikið um nóttina og það var eiginlega ófært á köflum. Ég var tíu mínútum lengur að arka í vinnuna enda mátti ég klofa snjóinn sums staðar upp í hné. Ég var samt mætt í vinnuna áður en klukkan sló átta. Eftir vinnu dreif ég mig í Sundhöllina og synti 400m. Var að skila mér heim um hálfsex. Jæja, fyrsti pistill ársins að verða að veruleika, allur í belg og biðu samt. Margt borið á góma en óvíst hvað af því ratar á bloggið. Sjáum bara til með það. Megi árið 2012 fara vel í ykkur og með ykkur. Knús!

- Dagarnir fljúga áfram -

Ég get ekki sagt að ég sé mjög dugleg í jólaundirbúningnum. Einhvern veginn finnst mér tíminn hafa verið alveg nógur hingað til. Bakaði tvær sortir af smákökum seinni partinn í nóvember og aðra þeirra aftur í gærkvöldi. Er eitthvað byrjuð að hugsa um og viða að mér hugmyndum og raunverulegum jólagjöfum en ég er ekki enn byrjuð að skrifa jólakortin. Samt hefur verið í nógu að snúast í félagslífinu hjá mér. Á fimmtudaginn var, var okkur hjónum boðið í dýrindis kjötsúpuveislu vestur í bæ ásamt öðrum hjónum. "Strákarnir" þrír hafa þekkst síðan þeir voru pollar. Húsmóðirin bauð svo upp á alls kyns góðgæti með kaffinu og hafði baka tvær kökur sérstaklega handa mér, þar sem hún veit að ég má ekki borða hvítan sykur og hvítt hveiti. Þetta var mjög skemmtileg kvöldstund með góðum vinum. Á föstudaginn var tók ég mér orlof eftir hádegi til að gefa mér góðan tíma til að undirbúa það sem var framundan. Davíð kom ekki heim fyrr en um þrjú en við vorum lögð af stað úr bænum rúmlega fjögur. Helga systir sótti strákana fyrir kvöldmat og voru þeir hjá henni fram að hádegi á laugardag. Vorum komin á Hótel Rangá rétt fyrir sex og fengum mega-herbergi (að mér fannst) í nýjustu álmunni. Slökuðum vel á til að byrja með áður en kominn var tími til að skvera sig upp fyrir hlaðborðið. Habilis var með borð á efri hæðinni (ásamt öðrum 10 manna hóp) sem þýddi það að það þurfti að trítla upp og niður stigann til að sækja sér á hlaðborðið. En það var alveg í góðu lagi. Maturinn var mjög góður og erfitt að velja úr hvað maður átti helst að smakka því það var ekki sjens að smakka á öllum sortum. Á einum tímapunkti hvarf Davíð og missti því af skemmtilegum jólasveinasveini sem birtist með stærðar poka af gjöfum handa öllum við langborðið okkar. Sveinki var það skemmtilegur að fólk lá í hláturskasti mest allan tímann sem hann var í heimsókn. Úthaldið var mismunandi, sumir létu gott heita um miðnætti og þeir sem höfðu mesta úthaldið voru að langt fram á nótt. Ég var í hópnum þarna mitt á milli. Mættum í morgunverðarhlaðborðið rétt upp úr tíu á laugardagsmorgninum. Þar var hægt að fá alls kyns morgunverðarkræsingar. Á leiðinni í bæinn aftur stoppuðum við bæði hjá pabba sem og hjá tengdaforeldrum mínum þannig að klukkan var að verða fimm þegar við komum heim. Þ.e. ég komst alla leið heim, Davíð þurfti að fara aftur í smá björgunarleiðangur sem tók meira ein fjóra tíma. Fór að aðstoða vin sinn og samstarfsfélaga sem hafði fest sig og festi sig sjálfur. Fleiri voru kallaðir til og þetta var víst mikið bras sem endaði þó vel.

- Desembermánuður byrjaður -

Tæpar þrjár vikur til jóla og tíminn flýgur ógnarhratt áfram. Ætlaði að segja frá því í síðustu viku að síðasta mánudagskvöldið í nóvember tók ég upp saumana mína en þeir höfðu legið ósnertir í ca mánuð eða svo. Ákvað að sauma annað "Jólaþorp" (ætla að reyna að muna eftir því að taka myndir af saumuðu jólakortunum). Myndin er ekki stór en það fer drjúgur tími í að sauma hana. Er búin að taka upp sauman amk þrisvar sinnum síðan þetta kvöld og ég á enn ca klst vinnu eftir, megnið af hvíta litnum og svo útlínur. Á laugardagsmorguninn var, reyndar bara stuttu fyrir hádegi, kíkti ég aðeins á norsku esperanto vinkonu mína. Við tókum reyndar ekki fram bækurnar heldur skruppum í smá göngutúr meðfram sjónum við Grandana í átt að Seltjarnarnesi. Var ekki nægilega vel klædd fyrir langan spöl og entist bara í uþb hálftíma. Mér fannst ég hins vegar þeim mun duglegri heima miðað við marga aðra laugardaga. Eftir hádegi á sunnudaginn var drifum við hjónin okkur saman út í göngu. Að þessu sinni var ég nógu vel klædd. Aftur á móti var úthaldið ekki meira en fyrir rúmlega klst göngu svo gönguleiðir okkar hjóna skildu þegar ég var ca hálfnuð. En þetta var virkilega hressandi. Skutlaði Davíð í pílu og sótti norsku vinkonu mína um hálfátta í gærkvöldi. Við tvær fórum saman á kyrrðarstund í Bústaðakirkju, notaleg stund sem er haldin fyrsta mánudagskvöld í hverjum mánuði með Þór Gunnlaugssyni lögreglumanni á eftirlaunum og oftast er séra Pálmi einnig. Sá síðarnefndi var hins vegar ekki með í gærkvöldi og ekki heldur fyrir mánuði síðan.

- Eitt og annað -

Nú er nóvember senn á enda og þá bara einn mánuður eftir af árinu. Undanfarnir dagar hafa verið fljótir að líða og margt hefur verið brallað. Á föstudaginn bauð ég Davíð með mér á jólhlaðborð með vinnufélögum mínum og þeirra fylgifiskum á Grand Hótel. Við stoppuðum aðeins í rúma tvo tíma því svo lá leiðin heim til eins kórfélaga míns í jólaglögg, söng og fleira. Við rétt misstum reyndar af hápunktinum, pistlinum sem sannKristinn flytur alltaf við svona tækifæri. En við skemmtum okkur engu að síður svo vel að áður en við vissum af var klukkan komin nokkuð fram yfir miðnætti. Maðurinn minn og svili stefndu á rjúpuferðir á laugardag og sunnudag og þar að auki hefði Davíð helst þurft að klára smá verkefni sem hann var að vinna að. Þeir félagar fóru ekki af stað fyrr en komið var vel fram á morguninn því yngri systurdóttir mín var að keppa á skautum og pabbi hennar að taka upp dansinn hennar. Sú stutta nældi sér í annað sætið. Ég var heimavið allan laugardaginn og náði að taka til í og þrífa efri skápana í eldhúsinu og framfylgja fleiri heimilisstörfum.

Svilarnir fóru fyrr af stað á sunnudagsmorguninn en samt ekki fyrr en á níunda tímanum. Ég var afar löt og kom mér ekki á fætur fyrr en um ellefu. Var mætt í kirkjuna um eitt og söng með sex öðrum kórfélögum mínum við messuna klukkan tvö. Rétt fyrir þrjú vorum við sest niður og ég komin með kaffi í bollann. Þá verð ég vör við það að gemsinn minn er að hringja. Á línunni var maðurinn minn með hjálparbeiðni. Hann bað mig að sækja aukalykla af bíl svila síns og skutlast með þá til þeirra. Áður en ég fór af stað lánaði sannKristinn mér pistilinn frá föstudeginum. Skrapp heim, skipti um skó og lét strákana vita hvað ég væri að fara að gera. Setti bensín á bílinn á leiðinni heim til systur minnar. Eftir að hafa sótt bíllyklana lagði ég í hann út úr bænum og var ég uþb klst að keyra til þeirra félaga. Þeir höfðu sem betur fer hitt á hóp manna sem var að vinna í skógrækt (saga og pakka jólatrjám) ca tuttugumínútna gangleið frá þar sem þeir festu sig og læstu sig úti úr bílnum. Vel gekk að kippa þeim lausum (ég og okkar bíll sluppum sem betur fer alveg við það). Vorum komin í bæinn stuttu fyrir sex. Bjó til kaffi handa manninum áður en ég skrapp að versla inn það nauðsynlegasta og skutlaði ég gleraugum mágs míns til hans í leiðinni. Ákváðum að hafa mat frá Saffran í kvöldmatinn.

- Tónleikar -

forskot á aðventuna

Um leið vinnu lauk í gær arkaði ég yfir Skólavörðuholtið og kom fyrst við í Sundhöllinni. Var komin ofan í laugina upp úr klukkan hálffimm og synti í ca tuttugu mínútur. Tapaði tölunni á ferðunum eftir þá 12. (300 metra) og veit ekki hvort ég synti 6 eða átta ferðir eftir það. Synti bara til klukkan að verða fimm og skrapp þá í heita pottinn áður en ég dreif mig upp úr og hélt áfram ferðinni heim.

ÉG var rétt að komast heim þegar Davíð hringdi í mig og spurði hvort ég væri með eitthvað skipulagt um kvöldið. Það var ekki svo hann sagðist ætla að bjóða mér á tónleika í Fríkirkjunni. Tveir kórar og Gissur Páll Gissurarson sáu um sönginn. Vox academica reið á vaðið með þremur lögum og áður en þriðja lagið kláraðist gengu þau aftast í kirkjuna og Raddbandafélag Reykjavíkur tók við. Báðir þessir kórar sungu án undirleiks. Ég verð aðeins að skjóta því að að þrátt fyrir fínan söng í upphafslögunum leist mér ekki á blikuna til að byrja með en þegar Raddbandafélagið byrjaði breikkaði brosið á minni og ég hélt áfram að brosa út að eyrum þegar Gissur steig fram og söng tvö lög. Á eftir Gissuri steig Vox hópurinn aftur upp á sviðið með mun skemmtilegri lög heldur en í byrjun. Svo söng Gissur eitt lag áður en Raddbandafélagið tók aftur við með þrjú lög. Að endingu sungu báðir kórarnir þrjú lög saman og Gissur sá um einsöng í tveimur laganna. Auðvitað var svo eitt aukalag í lokin. Erfið byrjun skemmti ekki fyrir mér kvöldið og ég var alsæl með kvöldið.

- Smá(köku)bakstur -

Um síðustu helgi stóð til að taka eldhúsið í gegn hjá mér. Það gekk ekki alveg eftir en ég þreif amk ísskápinn og tók til í honum áður en ég verslaði inn til vikunnar. Í gærkvöldi ákvað ég að demba mér í smákökubakstur og súkkulaðikúlugerð. Hnoðaði fyrst í kúludeigið (smjör, haframjöl, kakó, flórsykur og smá mjólk hnoðað saman og kúlað upp úr kókosmjöli) og fékk bræðurnar til að kúla það upp. Næst þeytti ég þrjár eggjahvítur sem er grunnurinn í lakkrístoppakökum (annað innihald er púðursykur, rjómasúkkulaði og lakkrískurl). Þetta urðu eitthvað rúmlega 60 kökur og þegar síðasta platan beið eftir að komast í ofninn bjó ég til "deig" í kornflekskökur (eggjahvítur, sykur, kornfleks, kókosmjöl og suðusúkkulaði). Tók síðust plötuna út úr ofninum á tólfta tímanum, stolt yfir því að hafa ekki látið freistast að sleikja skálar að innan eða smakka á afrakstrinum.

Sundgleði

Fljótlega eftir sumarfrí í haust ákvað ég að fara amk tvisvar í viku í Sundhöllina beint eftir vinnu. Átti gamalt tíu miða gatakort með sex götum á í fórum mínum. Eftir að hafa nýtt kortið ákvað ég að kaupa mér 10 "miða" kort í laugarnar. Var langt komin með að nota það kort þegar Davíð minntist á það að laugarnar opnuðu klukkan hálfsjö. Hann sagði ekki meira og ég var heilan sólarhring að átta mig á að maðurinn var að biðja mig um að koma í sund á morgnana. Við ákváðum að prófa þetta og komumst að því að þetta var að virka mjög vel. Þegar ég var búin að klára rafræna sundkortið tvisvar ákvað ég því að kaupa ársmiða í laugarnar. Í Sundhöllinni synti ég oftast 200m og aldrei meir en 300m en í Laugardalnum syndi ég oftast hálfan km og í morgun fór ég 700m. Það er virkilega gott að byrja daginn á að fá sér sundsprett.

Löng og góð bústaðarhelgi

Fyrsta föstudaginn í mánuðinum, 4. nóv. sl, tók ég mér frí úr vinnu frá hádegi. Davíð kom heim rétt fyrir þrjú og klukkan var orðin fjögur þegar öll fjölskyldan var búin að taka sig saman og lögðum af stað að heiman. Komum við í Krónunni upp á Höfða og svo tókum við bensín áður en við keyrðum alveg út úr borginni. Vorum ekki komin að afleggjaranum upp í land Efri-Reykja fyrr en um kvöldmatarleytið. Þar biðu eftir okkur mágur minn og yngri systurdóttir. Kvöldmatur var ekki borðaður fyrr en um níu, gúllassúpa a la Davíð. Eldsnemma morguninn eftir fóru svilarnir af stað í rjúpuleiðangur. Bríet vaknaði um það leyti sem þeir fóru og til að leyfa nú unglingunum mínum að sofa aðeins lengur dreif ég mig upp til að sinna frænku minni. Oddur Smári kom niður um níu og á ellefta tímanum skruppum við þrjú í pottinn. Pabbi kom upp úr hádeginu og systir mín og eldri dóttir hennar seinni partinn (Hulda hafði verið að keppa á skautum um morguninn) á svipuðum tíma og veiðimennirnir komu tómhentir heim. Þá vorum við öll mætt fyrir utan mömmu sem er að spóka sig á Kanaríeyjum þessa dagana og skemmtir sér konunglega þar í góðum hita fyrir kroppinn hennar. Borðað var hreindýr í kvöldmatinn með dýrindis meðlæti a la Helga og Ingvi og pabbi bauð okkur fullorðna fólkinu upp á rautt eða hvítt með.´

Spáin fyrir sunnudaginn var ekki spennandi en svilarnir ákváðu engu að síður að drífa sig upp snemma og taka stöðuna þá. Það varð úr að þeir drifu sig aftur á veiðar. Við hin fórum á tveimur bílum upp að Geysi þar sem voru teknar myndir af krökkunum við Strokk. Helga fór svo með eldri krakkana upp að Gullfossi og tók myndir af þeim þar á meðan við pabbi fórum með Bríeti í lengri bíltúr og keyptum handa henni ís. Veiðimennirnir komu heim með fjórar rjúpur en í kvöldmatinn var læri a la pabbi. Allir gestir voru farnir um átta og þá settumst við fjögur niður og spiluðum partý-alías. Nafnarnir rústuðu okkur Oddi en þetta var meiriháttar skemmtilegt.

Við vorum öll fjögur í fríi á mánudeginum og tókum því rólega til að byrja með. Við Davíð ákváðum samt að vekja strákana þegar klukkan var orðin tólf. Eftir að hafa fengið okkur eitthvað að borða fórum við að huga að tiltekt og frágangi. Lokuðum bústaðnum á eftir okkur rétt fyrir fimm.

- Mánuðurinn er hálfnaður -

Síðastliðin helgi var allsherjar pabbahelgi. Við systur kvöddum börn og menn og brunuðum saman austur á Hellu eftir kvöldmat á föstudaginn. Horfðum með honum á "Útsvarið" og skemmtum okkur vel. Hann leyfði okkur líka að hlusta á segulbandsspólu sem var tekin upp þegar mamma fór að hitta Þórhall miðil í síðastliðnum mánuði. Ég horfði svo á Wallander áður en ég fór í háttinn. Klukkan var rétt orðin tíu á laugardaginn þegar við brettum öll upp ermar og byrjuðum á skápaþrifum í eldhúsinu. Pabbi og Helga hjálpuðust að við að taka til og þrífa í búrinu á meðan ég setti minna notað leirtau í uppþvottavél og byrjaði á eldhússkápunum. Við unnum mjög vel allan daginn og fram að kvöldmat. Pabbi lenti í smá veseni því það var byrjað að leka undir eldhúsvaskinum, en auðvitað náði hann að laga það :-). Á sunnudaginn þreif Helga ísskápinn og ég þurrkaði af köppum og kösturum í stofunni. Síðan skellti ég mér í göngutúr upp að Helluvaði og heimsótti Árný, föðursystur mína. Áður en við systur lögðum af stað í bæinn kynnti pabbi okkur fyrir grænmetisréttinum sínum, gufusoðið niðurskorið grænmeti og epli.

En fyrsta helgin í mánuðinum var ekki síðri en sú nýliðna. Punkta aðeins niður um þá helgi næst. ...á annars ekki að skrifa í "öfugri tímaröð

- Ógnarferð á þessum tíma -

Hvernig væri nú að fara að skrifa reglulega á þessum vettvangi aftur? Er reyndar sannfærð um að ef ég næ að koma e-s konar skipulagi á þessi skrif þá verður þetta lítið mál. Ákveðin rútína er mjög holl.

- Langt liðið á þriðja mánuð ársins -

Það er alltaf nóg að gerast í kringum mig, gef mér bara því miður ekki mikinn tíma til að setjast niður og festa á skjáinn það eftirminnilegasta. Síðan ég skrifaði síðast er ég bæði búin að eiga 43 ára afmæli og fagna 15 ára brúðkaupsafmæli, kristalsbrúðkaupsafmæli, með manninum mínum.

Merkilegir áfangar það :-). Ég lauk líka við að sauma engilinn, þvo hann, pressa, festi allar nál. 100 perlurnar (bláar og hvítar) í hann og straujaði yfir aftur. Davíð tók mynd af listaverkinu mínu bæði sér og með mér og þegar ég verð búin að láta ramma engilinn inn og hengja hann upp á góðum stað mun ég biðja hann um að mynda hann aftur. Þá tók ég mig til og tók fram mest af því sem ég er ekki byrjuð á og var að spá í að byrja á næstu stóru mynd (hef um tvær að velja). Ákvað svo að fresta því smá. Er þó með fullt í takinu og byrjaði á tveimur smámyndum og undirbjó jafa fyrir þrjár aðrar. Sat t.d. í allt gærkvöldi í húsbóndastólnum og fór langt með eina páskamynd sem ég byrjaði á fyrr í vikunni.

Tvíburarnir voru annars á árshátíð Hlíðaskóla í gærkvöldi, fóru fínir að heiman við þriðja dreng rétt fyrir hálfsjö og komu heim rúmum fjórum tímum seinna afar ánægðir með kvöldið. Karatestrákurinn sýndi víst nokkrar kötur og svo var hann valinn HÁR HLÍÐÓ 2011 enda er hann duglegur að breyta um og óhræddur við að prófa eitthvað nýtt.

- "Tíminn líður hratt" -

Fyrsta vikan af mars er liðin og það stefnir hraðbyri í tvö afmæli hjá mér. Seinna afmælið á ég sameiginlegt með manninum mínum en eftir tvær vikur verða liðin 15 ár síðan við mæltum okkur mót við fulltrúa sýslumanns og létum pússa okkur saman. Margt er annars búið að gerast sl. "skráfría" daga, eiginlega alltof margt til að vera að skrifa um á einu bretti. Get ekki valið úr og veit varla hvar á að byrja. En ég veit þó að ég ætla að nota þetta sem hvatningu til að skrifa oftar :-). Sjáum til hvort ég kemst ekki bráðum í "skrifgang"!

- Aftur kominn föstudagur -

Það er ekkert fyndið hversu hratt tíminn æðir áfram. Ég hamast við að njóta augnabliksins og reyni að stressa mig sem minnst. Oft er maður samt kominn út í hringiðuna áður en maður veit af. Labbaði tvisvar sinnum yfir í Hlíðarnar úr vinnunni í gær. Fyrst um hádegið til að fara í foreldraviðtal með strákunum (sem og Davíð og kennaranum). Það gekk svona glimrandi vel að við Davíð buðum okkur út að borða á "Fish and Chips" á eftir :-). Maturinn þar er mjög góður. Kláraði svo vinnudaginn áður en ég arkaði af stað heim á leið. Stoppaði góða stund á einum stað þegar ég var ca hálfnuð. Bjó til plokkfisk úr afgangnum frá því á miðvikudaginn. Annar tvíburinn var lítið hrifinn en sagði samt eftir matinn að þetta hefði nú ekki verið versti plokkfiskur sem hann hefði smakkað. Þegar Davíð kom heim kláraði hann afganginn enda held ég að plokkfiskur sé einn af uppáhaldsréttunum hans.

- Fjörug kóræfing -

Kom við í Heilsuhúsinu og Yggdrasil á leiðinni heim úr vinnu í gær. Þegar ég kom út úr síðarnefnda staðnum var kallað: "Mamma" og hinum meginn götunnar stóð fyrrum söngfugl, við hliðina á kunnuglegum bíl, og baðaði út öllum öngum og við hraðbankann stóð enginn annar en maðurinn minn. Ég fór yfir götuna og inni í bílnum var hinn tvíburinn. Davíð var að skutla þeim bræðrum að hitta bekkinn sinn á Eldsmiðjunni og hafði stoppað þarna til að taka út pening og láta þá hafa. Ég óskaði strákunum góðrar skemmtunar og hélt svo göngu minni áfram heim á leið. Sauð mér ýsu og bræddi smjör með möndlum og furuhnetum í og fékk mér ásamt mauki sem ég keypti í Yggdrasil. Um sjöleytið skundaði ég af stað á kóræfingu. Það vantaði einn-tvo í hverja rödd fyrir utan tenór, þau mættu öll þrjú. Eftir upphitun byrjuðum við á fara yfir Moon River svo sungum við yfir lagið sem við sungum eftir predikun sl. sunnudag og svo æfðum við Aldasöng áður en við fórum í kaffi. Eftir kaffi fengum við nokkra blaðsíðna lag í hendurnar sem ætlunin er að flytja seinna í mánuðinum. Ein úr altinum hefur sungið þetta áður. Þetta er þekkt lag en mér gekk hálfbrösuglega til að byrja með. Það var samt farið að lagast. Allt í einu var klukkan orðin tíu og kórstjórinn sagðist ekki ætla að halda okkur til miðnættis. Tveir og hálfur tími er alveg ágætis tími en hann var svakalega fljótur að líða. Fékk góðar fréttir eftir æfinguna.

- Útlínur og úttalning -

Sat með saumana mína fyrir framan sjónvarpsskjáinn part úr gærkvöldinu. Taldi fyrst út í "vínmyndinni". Er að sauma laufblöð og byrja bráðum á berjaklösum. En ég tók engilinn líka fram og saumaði amk tvær útlínur. Þetta er alveg að hafast en samt virðist alltaf vera eitthvað smá eftir. Annars er hugurinn stöðugt hjá tengdamömmu og verður hjá henni í allan dag, eða þar til ég/við heyrum frá henni eða tengdapabba.

- Dirty Dancing -

Ég skellti mér í Háskólabíó í gærkvöldi með fimm öðrum stelpum að sjá Patrick Swayze heitinn í myndinni Dirty Dancing. Það var fullur salur og rétt fyrir myndina var komu fram fjögur danspör og hituðu og byggðu upp stemminguna. Þetta var sko ekki leiðinlegt og það eina sem mér fannst að var tuttugu mínútna hlé í miðri myndinni. Davíð var í pílu og karatestrákurinn á æfingu svo fyrrverandi söngfuglinn var einn heima part úr gærkvöldinu.

- Enn ein helgin þotin hjá -

Sat með saumana mína fyrir framan imbann fram eftir föstudagskvöldi. Davíð sá alveg um matinn og stóð sig vel í þeim málum :-). Laugardagurinn var nokkuð slakur en um miðjan dag skruppum við í heimsókn til einnar frænku minnar, þ.e. við fórum bara tvö við Davíð. Strax eftir heimsóknina ákváðum við að prófa að verla í Kosti. Það var svolítið skrýtið að ganga um þetta vöruhús og skoða úrvalið en ég var annars nokkuð ánægð með þennan prufuleiðangur. Hver veit nema maður fari að kíkja reglulega í Kost, þ.e. a.m.k. betra ef mann vantar eitthvað í miklu magni. Saumaði fyrir framan skjáinn aftur þá um kvöldið alveg þar til Mission impossible III byrjaði. Vann bæði að englinum sem og "vín-smá-myndinni". Engillinn er nú langt kominn, aðeins örfáar útlínur í ermarnar á kjólnum eftir og svo auðvitað allar perlurnar. Rétt fyrir hádegi í gær fór ég tvær ferðir með fernur og blöð í gáminn sem er í Eskihlíðinni. Davíð skutlaði mér svo í kirkjuna um eitt. Það var skírð stúlka í messunni og maður sem hefur verið kristinboði í Eþíópíu fór í ræðustólinn. Ræðan hans var virkilega góð og vel fram sett. Eftir smá kaffisopa eftir messuna labbaði ég heim. Feðgarnir voru á leið í keilu með tengdó, einum mági mínum og syni hans, en þeir voru ekki farnir þegar ég kom heim. Ég náði að horfa á framlenginguna í undanúrslitum bikar karla í handboltanum og var búin að stinga læri í ofninn nokkru áður en feðgarnir komu aftur heim. Davíð kom með mér að versla ávexti fyrir vinnuna og svo horfðum við fjölskyldan á "The karate kid" með Jackie Chan.

- Vikan að klárast -

Það er kominn föstudagur enn á ný. Vikan að klárast og eftir helgina verður þessi stysti mánuður ársins hálfnaður. :-) Þar sem ég tek þátt í "Lífshlaupinu" á vinnustaðnum mínum hef ég gengið bæði í og úr vinnu og á miðvikudaginn trítlaði (hálfskautaði ég reyndar) ég líka á kóræfingu og á heimleiðinni var smá hríðarkóf að bíta í andlitið á mér. En í morgun treysti ég mér ekki til að rennblotna og kannski fjúka um koll svo ég bað manninn um að skutla mér í vinnuna. Ein frænka mín sem býr í Danmörku er á Íslandi þessa dagana. Ég frétti af henni í fyrradag. Dvölin stendur bara yfir í viku og er hún að fljúga heim til sín á morgun. Hringdi í foreldra hennar í gær bara svona rétt til þess að heyra í henni. Það var mjög gott og gaman. Á eftir hringdi ég svo í mömmu. Hún er þreytt og finnst þessi barátta við heilsuna frekar erfið. Vonandi fer hún að finna meira fyrir batanum fljótlega. Hugurinn er líka stöðugt hjá tengdamömmu.

- Dagarnir æða áfram -

Vikan er hálfnuð og fimm dagar síðan ég settist síðast við skjáinn í þeim tilgangi að punkta niður það sem hefur verið á döfinni. Á laugardaginn skundaði ég yfir í Norðurmýrina til esperanto vinkonu minnar. Við erum að vinna í að koma okkur aftur í gang. Nú styttist reyndar í að það verði mun lengra að labba yfir til hennar en þau eru að flytja vestur í bæ einhvern tímann með vorinu. Að öðru leyti tók ég því rólega þannig að á sunnudeginum átti auðvitað eftir að sinna hefðbundum heimilisstörfum sem eiga að vinnast reglulega. Slapp feðgunum að mestu við þau mál. Notaði skurðinn í lófanum sem afsökun fyrir að vera ekki mikið að "busla" í vatni og vinda klúta. Á mánudagskvöldið tók ég á móti hinum fiskunum í saumaklúbb. Yndislegt kvöld í alla staði. Mikið spjallað, hlegið og saumað. Vorum allar að telja út. Ég sýndi þeim engilinn en ákvað að sauma smámyndina sem ég byrjaði á um daginn. Kom við í fiskbúðinni á heimleiðinni í gær og keypti bæði bleikju og ýsu. Ýsan fór í frysti en ég ákvað að prófa að baka bleikjuna með afgangi af rófum sem voru skornar niður í snakk fyrir saumaklúbbinn kvöldinu áður. Sauð kartöflur og bræddi smá smjör og setti möndlur út í. Mér fannst þetta hið mesta sælgæti en feðgarnir voru svona semí-ánægðir.

- Það kom babb í bátinn -

Á heimleiðinni í gær leit ég aðeins inn til fyrrum nágranna í risinu í norðurmýrinni. Alltaf gott og gaman að kíkja smá til gömlu hjónanna. Ætlaði mér að sitja eitthvað við saumana í gærkvöldi og hefði reyndar geta farið í keilu líka en ég varð fyrir smá óhappi, þegar ég var að ganga frá í eldhúsinu eftir matinn, sem setti strik í reikninginn. Hægri lófinn lenti í smá árekstri við hnífsodd og Davíð varð að hjálpa mér við að setja eitthvað yfir ca cm skurð á óþægilegum stað. Í stað þess að sauma neitt, hvað þá keila, þá kláraði ég að lesa "Morgunengil" eftir Árna Þórarinsson.

- Engin kóræfing í gærkvöldi -

Var að hamast við að hengja upp þvott um sjö í gærkvöldi þegar ég fékk sms um að kóræfing félli niður vegna veikinda. Ég þurfti því ekkert að flýta mér að hengja upp til að verða ekki of sein á æfingu. En mér datt reyndar í hug að kannski hefðu þessi skilaboð ekki borist einni sem er nýbyrjuð aftur í altinum. Ég lauk við það sem ég var að gera, dreif mig upp í íbúð og fann símanúmerið hjá kórsystur minni. Ég rétt náði henni áður en hún fór að að heiman því hún var auðvitað að leggja af stað á æfingu. Í staðinn notaði kvöldið í englasaum og fylgdist einnig með Kiljunni. Náði að klára alveg annan vænginn og það er ekki mikið eftir af hinum vængnum, hugsanlega samt svona ein kvöldstund. Kannski get ég klárað þann væng í kvöld og þá eru bara eitthvað af dökkum útlínum í kjólnum eftir og svo auðvitað perlurnar. Jei, þetta klárast líklega bara á næstu dögum, þ.e. ef ég held mig að verki.

- Vikan er hálfnuð -

Í dag byrjar "Lífshlaupið" og stendur það yfir í tæpar þrjár vikur. Að sjálfsögðu skráði ég mig til leiks og arkaði keik í vinnuna í morgun með vindinn í bakið. Varð að passa mig vel á Eiríksgötunni við sjúkrahúsið því þar var búið að moka gangstéttina og lúmsk hálka. Var næstum því dottin einu sinni en bjargaði mér meistaralega með nettum handleggjasveiflum. Það er ekki svo langt síðan ég flaug á hausinn á miðri hraðahindrun yfir Barónsstíginn. Þá lenti ég á öðru hnénu og ætlaði ekki að geta staðið á fætur. Það tókst þó í þriðju tilraun en ég er enn með kúlu og mar á hnénu til minningar um þetta fall. Karatestrákurinn var þreyttur í gærkvöldi og sleppti kumiteæfingu. Ég var með soðinn fisk í matinn um hálfsjö og pilturinn ákvað svo sjálfur að fara í háttinn klukkan níu. Mér fannst það gott hjá honum. Hann vaknaði alveg jafnþreyttur í morgun, fannst honum. Hinn tvíburinn tók út svona daga í síðustu viku og ég veit ekki hvort um er að ræða vetrarslen, vaxtarkippi eða sambland af báðu. Vann aðeins að bláa englinum í gær og er langt komin með að klára útlínur í öðrum vængnum. Enn get ég þó ekki áætlað hversu mikið er eftir en það eru nokkur verkefni sem bíða eftir mér og halda mér við efnið því ég er ákveðin í að byrja ekki á neinu "stóru" fyrr en ég hef alveg lokið við engilinn. Aftur á móti er ég einnig að vinna að tveimur litlum myndum sem ég gríp í stöku sinnum.

- Nýr mánuður -

Það er kominn febrúar og miðað við hvað janúar var fljótur að líða reikna ég með að það verði örstutt þar þessi mánuður verður liðinn.

Helgin fór vel fram. Gerði reyndar mest lítið á laugardaginn. Svaf framundir hádegi og restin af deginum fór í innkaup, saumaskap og smá lestur. Á sunnudaginn skyldum við fyrrverandi söngfugl eftir heima og brunuðum til Akranes með karatestrákinn til að fylgjast með honum keppa í kata og kumite. Það fór rúmlega hálfur dagurinn í þetta ævintýri en þegar heim var komið var ákveðið að leigja mynd sem við gátum horft á öll fjögur. Aldrei þessu vant voru allir sammála um myndavalið strax. Ævintýramynd með Nicolas Cage varð fyrir valinu.

Hulda, systurdóttir mín, keppti á skautum á laugardaginn og náði silfrinu í þetta sinn. Vel gert hjá frænku minni.

Í gærkvöldi skrapp ég til tvíburahálfsystur minnar. Ekki í saumaklúbb, heldur á Tuppervare-kynningu. Það er ár og dagur síðan ég fór síðast á svona kynningu. Hitta margar skemmtilegar konur og svo endaði það með því að ég smellti mér á nokkrar vörur úr bæklingnum. Á "svolítið" af svona fyrir og sumt af þessu nota ég mjög mikið.

- Janúar alveg að verða búinn -

Það er föstudagur, helgi framundan og strax á þriðjudaginn hefst nýr mánuður. Og mér sem finnst áramótin hafi verið fyrir ca hálfum mánuði. Ætli það verði ekki kominn mars eftir eina og hálfa viku?

Annars settist ég niður með saumana mína í gærkvöldi. Er að "hamast" við að reyna að klára engilinn svo ég geti nú farið að byrja á nýju stóru verkefni. Stóðst ekki mátið um daginn og byrjaði að sauma litla mynd af rauðvínsflösku og glasi ásamt vínberjum og laufblöðum. Svo hef ég líka alltaf "merkjamyndirnar" að grípa í. En ég var semsagt að vinna í englinum í gærkvöldi. Nánar tiltekið að útlínum í öðrum vængnum. Ef ég sest niður með saumana mína eitthvað, nánast á hverjum degi, ætti ég að ná að klára þetta verkefni á örfáum vikum.

- Ein að reyna að koma sér í gang -

Jæja, er ekki besta leiðin til að vekja "skrifandann" að setjast niður fyrir framan skjáinn og "hamra" svolítið á lyklaborðið? Jafnvel þótt maður hafi ekkert að segja? Reyndar er kollurinn fullur af alls konar efni það er bara spurning hvort og hvernig ég kem einhverju af því frá mér. Ætla að sjá til næstu daga hvort eitthvað festist á skjáinn...

- Nýtt ár og fyrsti mánuðurinn langt kominn -

Ég er orðin alltof löt við skriftirnar og líkar það frekar illa. Það er nefnilega alveg ágætt að eiga einhverja punkta til að lesa yfir. Ég ætla nú samt ekki að lofa því að ég verði neitt duglegri og að þessu sinni verður þetta bara stutt og snubbótt. Sjáum svo til hvað gerist á næstu dögum og vikum.

- 23.08.1890 -

Ættarmót í Heiðarættinni

Í dag eru 120 ár síðan föðuramma mín heitin, Vilborg Helga Þorsteinsdóttir frá Berustöðum, fæddist. Pabbi minn er "örverpið" hennar og Odds Oddssonar, frá Heiði á Rangárvöllum. Hann, pabbi minn alltsvo, hefur alltaf verið duglegur að taka myndir af ýmsu og ýmsum og á orðið þónokkuð safn sem hann hefur haldið vel utan um í gegnum tíðina. Systkynabörn hans hafa lengi þrýst á um að haldin yrði myndasýning. Pabbi taldi að myndasýningin ein og sér myndi nú ekki taka neitt svo langan tíma og vildi gera meira úr þessu. Það var samþykkt fyrir nokkru, ákveðið að blása m.a. til ættarmóts í kringum 120 ára fæðingarafmæli ömmu minnar og nefnd sett á laggirnar. Pabbi sá um að taka saman allskyns fróðleik um það hvernig "Heiðarættin" er tilkomin enda á hann til ómetanlegan fróðleik í sínum fórum (gömul skjöl og sendibréf) og ákvað að tileinka hann ömmu sinni, Guðbjörgu Filippusdóttur (1855-1918), enda má alveg segja að hún sé upphafið af tilurð okkar sem kennum okkur við Heiði.

Stóri dagurinn rann upp á laugardaginn var. Um eitt leytið var hist á Keldum og blessað yfir leiði ættingjanna. Næst var haldið að Gunnarsholti þar sem fenginn hafði verið fundarsalur fóðurkögglaverksmiðjunnar. Sveinn Runólfsson landgræðslu-stjóri, bauð fólk velkomið þegar klukkan var nýbyrjuð að ganga þrjú. Og svo tók pabbi við með fróðlegan fyrirlestur um upphafið. Eldri tengdasonur hans sá um sýningarvélina og las einnig minningarorð og ljóðabálka um langömmu mína, undirrituð las upp nokkur gömul bréf (það elsta frá árinu 1903) og fyrsta tengdabarnabarn ömmu og afa sagði m.a. frá sinni fyrstu reynslu af kynnum sínum af Heiðarættinni. Myndasýningin kom svo í kjölfarið. Að lokum var hist á Helluvaði (þar sem amma heitin átti sín síðustu ár hjá yngstu dóttur sinni). Helluvaðsfjölskyldan hafði skipulagt skemmtilega þrauta- og ratleiki sem farið var í á meðan aðrir í sömu fjölskyldu sáu um að elda ofan í mannskapinn. Það var sungið, leikið og spjallað fram eftir kvöldi. Þótt auðvitað hafi ekki öll ættin komist í þennan gleðskap trúi ég því að ástvinir okkar sem kvatt hafa þennan heim hafi verið með okkur í anda þennan skemmtilega laugardag.

- Gleðilegt sumar! -

Sóttum Helgu systur um hálftvö í gær. Mágur minn og stelpurnar þeirra voru á "sumargleði" í Húsaskóla en Helga tók hluta af myndavélagræjunum sínum og við fórum í Þingvelli. Nánar tiltekið að Öxarárfossi þar sem systir mín tók myndir af þeim bræðrum og eitthvað af okkur fjölskyldunni. Er við komum í bæinn aftur klæddu strákarnir sig í jakkafötin og tilheyrandi og Helga tók af þeim myndir bæði saman og sitt í hvoru lagi. Alls tók hún 108 myndir og sumar koma mjög vel út.

- Síðasti vetrardagur -

Seinni partinn í gær kom ég við hjá fyrrum nágrönnum mínum í Norðurmýrinni. Á það til að droppan þangað inn öðru hverju, enda alveg í leiðinni heim. Og í gær var eitthvað sem togaði mig þangað. Stoppa aldrei mjög lengi en fæ mér þó kaffisopa og gott spjall. Davíð var heima þegar ég kom svo heim. Hann var eitthvað slappur svo ég tók að mér að skutla og sækja á æfingar. Karatestrákurinn labbaði nú á sína æfingu en ekki heim og Judóstrákurinn æfir í Þróttaraheimilinu og það er heldur langt fyrir hann að labba á milli. Kannski mun hann hjóla þetta þegar hann hefur fengið sér hjól. Uppgötvaði það svo í gærkvöldi að ég hef ekki sest niður með saumana mína sl. 4-5 daga. Verð að bæta úr því.

- Bráðum kemur sumar -

Það eru góðar fréttir, ef rétt er, að vetur og sumar eigi að frjósa saman. Samt er hæpið að ástandið fyrir austan verði neitt eðlilegt næstu misserin. Það er hræðilegt að sjá mynd af stöðunum sem hafa orðið verst úti vegna öskufalls úr Eyjafjallajökli. Ég hef mikla samúð með fólkinu sem býr þarna og vona að það "lifi" þessar hörmungar af, þ.e. að byggð leggist ekki alveg í eyði. Kíki alltaf reglulega í gegnum vefmyndavélarnar á milu.is og stari heilluð en þó með ákveðnum hryllingi ef útsýnið er gott á gufu- og öskustrókana.

- Mánuðurinn rúmlega hálfnaður -

Eins og svo oft áður þá æðir tíminn áfram eins og hann sé á akkorði. Hafði það mjög rólegt um helgina. Fékk aukaklukkutíma með Ellu vinkonu en það var ekki flogið austur á Egilsstaði fyrr en á laugardagsmorguninn. Síðustu nóttina gat hún sofið í rúmi því söngfuglinn fór í kóræfingabúðir seinni partinn á föstudaginn og kom ekki heim fyrr en í hádeginu í gær. Nokkru eftir að ég skutlaði Ellu á flugvöllinn fór ég til norsku esperanto vinkonu minnar. Hún átti afmæli og ég færði henni útsaumað hrútsmerki með nafninu hennar undir. Þegar ég kom heim voru feðgarnir, Davíð og karatestrákurinn, farnir á karatemót sem haldið var í Mosfellsbæ. Þeir komu ekki heim fyrr en milli fimm og sex. Davíð sá um að sækja söngfuglinn í hádeginu í gær og hann sá einnig um kvöldmatinn í gærkvöldi.

- Sögulegir tímar -

Já, við erum heldur betur að upplifa sögulega tíma. Fyrst fengum við flott ferðamannagos á Fimmvörðuhálsi. Núna gýs í Eyjafjallajökli, sem hefur ekki gosið í um 200 ár og ég er mjög hrædd um að áður en langt um líður taki Katla við. Það er rétt eins og verið sé að þjálfa björgunarsveitirnar sem og fólkið sem býr á svæðinu fyrir það sem koma skal. Rýmingaráætlunin sem framkvæma þurftir aðfaranótt miðvikudags gekk mjög vel. Menn halda vöku sinni, gera ráð fyrir hinu versta en vona að besta. Og nú er litla Ísland nafli alheimsins þar sem gosið takmarkar flugsamgöngur vegna öskunnar (sem ku vera stórhættuleg hreyflum flugvélanna). Pabba var búið að dreyma fyrir þessum gosum og fyrst hluti af draumnum/unum er komið fram getur maður alveg búist við að hinn hlutinn rætist; Miklu, miklu, stærra gos líklega í Kötlu eða á því svæði.

Annars eru tvíburarnir fermdir og tókust bæði athöfn og veisla með eindæmum vel. Fékk reyndar ekki að fara tvisvar til altaris en það var í góðu lagi. Bræðurnir tóku sig vel út bæði í kyrtlunum sem og nýju jakkafötunum sínum. Veislan var í sal Lionsklúbbsins Lundar í Auðbrekku í Kópavogi og mættu tæplega 70 gestir, ættingjar og vinir. Strákarnir voru ljúfir og kurteisir og fyndnir en þegar fór að líða á veisluna voru þeir með uppistand og reittu af sér brandarana við góðar undirtektir. Það var gott að eiga frí eftir þetta. Strákarnir fengu frí í skólanum á mánudaginn var og ég mætti ekki til vinnu fyrr en í gærmorgun, en nú er ég líka búin með sumarfríið mitt síðan í fyrra.

- Stutt í tvöfalda fermingu -

Eftir vinnudaginn í dag tek ég mér fimm (virka) daga frí. Mestur hlutinn af þessu fríi er afgangurinn af sumarfríinu síðan í fyrra. Á sunnudaginn kemur munu tvíburarnir fermast í kirkju óháða safnaðarins. Allt er að verða klárt. Feðgarnir búnir að fá á sig spariföt, kerti og servíettur verða tilbúnar á föstudaginn og á morgun næ ég í "fermingadrengina" úr innrömmun. Við eigum von á ríflega 70 manns (+/- 10 eða svo) til að fagna þessum áfanga drengjanna með þeim og okkur. Það verður örugglega gott að eiga nokkra daga heima eftir veisluhöldin.

Hef lítið saumað sl. daga, samt aðeins í bláa englinum og svo er ég byrjuð að sauma hrútsmerkið. Ætla mér að klára hann fyrir 17. apríl n.k. og gefa norsku esperantovinkonu minni í 49 ára afmælisgjöf þann sama dag (170410).

Fór og hitti húðlækni í gær. Fékk í raun engin svör við útaf hverju ég er með þessi útbrot en læknirinn skrifaði upp á 100 gr af sterakremi og hálfsmánaðar skammt af "kláða-"töflum. Á að bera á mig og taka inn eina töflu á kvöldin ca. klst. áður en ég fer að sofa.

Páskarnir gengu vel fyrir sig. Séra Pétur hafði samband við mig á skírdag og spurði mig hvort ég gæti ekki fengið tvíburana með í athöfnina á föstudaginn langa. Þeir áttu að fara í fermingarkyrtla og annar þeirra að halda á kertastjaka með sjö logandi kertum og hinn að slökkva á einu og einu kerti eftir því sem presturinn las upp síðustu orð Jésú. Þetta var auðsótt mál. Eftir upplestur, sálmasöng og altarisgöngu komu bræðurnir inn. Oddur hélt á stjakanum og Davíð Steinn sá um að slökkva á kertunum með e-s konar kertakveiksklípu. Á fjórða kertinu kleip hann ekki alveg nógu fast svo það slökknaði ekki á kertinu í fyrstu tilraun. Þá hvíslaði Oddur (en samt þannig að það heyrðist um alla kirkju): "Þú hittir ekki!"

Á laugardagsmorguninn var auka kóræfing milli klukkan tíu og tólf. Mættum svo rétt fyrir sjö á páskadagsmorgunn. Leyfði tvíburunum að sofa út en strangt til tekið áttu öll fermingabörnin að ganga inn með altarismunina. Tvö fermingabörn mættu af fimmtán, 4 dansarar og nokkrir kórfélagar sáu um að bera inn á altarið og kveikja á tveimur kertum. Já, ég nefndi dansara en rétt á undan predikuninni var sýndur ballettdans sem átti að túlka sköpunina. Mögnuð túlkun og flottur dans.

- Þrjár myndir fara í innrömmun í dag -

Fleygði mér í smá stund eftir að ég kom heim í gær. Hafði lasanja í matinn og settist svo með saumana mína fyrir framan imbann upp úr sjö. Vann í "Bláa englinum" og komst svolítið áfram með hann. Það er hellingur búið en heilmikið eftir svo ég verð að sitja við og ekki leiða hugann að neinu nýju verkefni, þ.e. ekki stórum myndum (á tvær svoleiðis). Tel það vera í lagi að grípa í merkjamyndirnar og/eða jólakortamyndir inn á milli. Eftir tíu-fréttir í sjónvarpinu skolaði ég úr fermingardrengjunum og kossinum, pressaði og lagði til á handklæði í stofunni. Rúllaði þeim upp á hólk undan eldhúsbréfi í morgun og eftir vinnu í dag ætla ég að fara með þessar myndir í innrömmun. Held það geti verið mjög sniðugt að vera með bæði fermingar- og fæðingar-myndirnar uppivið í veislunni aðra helgi.

- Saumaklúbbur og útbrot -

Nei, nei ég er ekki með ofnæmi fyrir saumaklúbbnum mínum, síður en svo. En ég er öll útsteypt í rauðum upphleyptum bólum og blettum. Fyrir þremur vikum lét ég trúnaðarlækni fyrirtækissins kíkja á einn blett sem var á sköflungnum á hægra fæti og fór sá blettur stækkandi. Læknirinn skrifaði upp á eitthvað krem sem ég átti að bera á daglega til að byrja með. Ég er nýlega farin að taka inn hörfræolíu aftur. Hún hefur aldrei farið illa í mig en núna veit ég ekki hvort útbrotin eru af völdum kremsins, olíunnar eða e-u öðru. Ég er amk hætt að taka inn olíuna og bera á mig kremið. Að auki hætti ég að taka inn vítamínin mín og hef pantað mér tíma hjá húðsjúkdómalækni. Fékk tíma á þriðjudaginn kemur og vona að ég verði ekki dáin úr kláða áður.

En í gærkvöldi var saumaklúbbur upp í Árbæ. Skutlaði manninum í pílu um hálfátta og fannst ekki taka því að fara heim aftur svo ég var mætt fyrir átta. Fékk álit klúbbhaldarans um hvernig ég ætti að sauma fermingardag drengjanna á myndirnar og hún gaf mér einn fjólubláan enda og rúðustrikað blað. Setti dæmið upp á blaðið og saumaði eftir því: 11. apríl 2010 undir nafnið. Setti svo skammstöfun mína og 10 (með úrfellingarmerki fyrir framan) undir ermina með einum þræði af ljósfjólubláum. Þegar þetta var búið tók ég til við að sauma bláa engilinn. Korter fyrir ellefu sagði ég "jæja" og þá hrindi gemsinn. Davíð Steinn og Dagur höfðu farið í sundlaug Kópavogs og vantaði far heim. Ég sótti þá og fékk sá síðarnefndi að gista hjá okkur.

- Eldgos, kirkjuferðir og fleira -

Á laugardagsmorguninn kíkti ég í smá esperantotíma til norsku vinkonu minnar. Vorum báðar búnar að vera duglegar að lesa en samt fór klukkutíminn að mestu leyti í allt annað spjall, og það á íslensku. Um miðjan dag fékk ég loksins Davíð til að fara í bíltúr austur fyrir fjall. Byrjuðum á því að stoppa hjá pabba og mömmu á Hellu en um það leyti sem úrslitaþátturinn í spurningakeppni framhaldsskólanna var að byrja í sjónvarpinu fórum við þrjú, ég, Davíð og nafni hans í bíltúr inn í Fljótshlíð. Það var virkilega gaman að berja eldgosið augum í hæfilegri fjarlægð en mér fannst jafn tilkomumikið að sjá afturljósin á bílalestinni bæði inn Fljótshlíðina og svo aftur á leiðinni í bæinn. Þetta var á tímabili, bíll við bíl og minnti á mjóa hrauná. Oddur beið á Hellu á meðan við vorum í gosbíltúrnum. Hann langaði ekkert til að upplifa gos í beinni.

Í gær vorum við söngfuglinn mætt í Hallgrímskirkju rétt fyrir tíu. Fljótlega var farið niður Skólavörðustíg og stillt sér upp áður en skrúðgangan hélt af stað upp að kirkju aftur þar sem nýju kirkjuhurðarnar voru helgaðar. Í messunni var skírður lítill drengur og altarisganga í restina að venju. Svo mikið fólk var í kirkjunni að athöfnin var ekki búin fyrr en korter yfir tólf en þá tók við stutt opnunarræða dóms- og kirkjumálaráðherra þar sem hún setti kirkjulistahátíð 2010. Ég hafði svo tíu mínútur til að fá mér eitthvað smá og sækja sálmabókina mína áður en ég átti að vera mætt í "mína" kirkju rétt fyrir eitt. Þar fór fram skírnar og fermingarmessa og margt fólk í kirkjunni. Að auki var hópur frá Stöð 2, Jón Ársæll með myndatökumenn. Séra Pétur verður víst í þættinum hans Jóns n.k. sunnudagskvöld. Við í kórnum vorum svolítið mikið myndum en hvað veit maður svo hvað verður notað af því ;-). Alla vega sáumst við söngfuglinn í mynd í fréttatímum sjónvarpsstöðvanna í gærkvöldi svo maður er orðinn pínu frægur, eða þannig....

- Út að borða -

Um hálfsjö í gær fóru strákarnir á árshátíð í skólanum. Fögnuðurinn stóð til klukkan ellefu. Þar sem við Davíð náðum ekki að halda upp á brúðkaupsafmælið okkar sl. mánudag bauð hann mér út að borða á Pottinn og pönnuna í gær. Áttum saman notalega stund á staðnum og ég fékk mér eitt hvítvínsglas með matnum. Það rauk auðvitað beint upp í höfuð þótt ég væri nú ekki beint að þamba vínið. Pöntuðum okkur bæði lambakjötsrétti og fengum okkur súpu, sallat og brauð á undan. Það varð því ekkert úr því að ég settist niður með saumana mína í gær því fljótlega eftir að við komum heim horfðum við saman á hina myndina, "Star Trek" sem maðurinn gaf mér í afmælisgjöf. En þótt klukkan væri orðin tólf þegar við fórum í rúmið las ég einn kafla í bókinni sem ég er með á skammtímaláni af safninu.

- Æft fyrir páska- og fermingamessur -

Á kóræfingu í gær æfðum við fyrir páskana og fermingamessurnar. Reyndar æfðum við minnst fyrir fermingarnar því mér skilst að það verði bara sungið einraddað og verði frekar einfalt. Einnig fékk ég úr því skorið að ég þarf og á ekki að syngja með kórnum þegar bræðurnir verða fermdir enda kannski eins gott. Hafði hugsað mér að sauma aðeins eftir að ég kom heim af kóræfingu en það fór þannig að ég fór upp í rúm fyrir klukkan ellefu og las til hálftólf. Í staðinn verð ég bara að vera dugleg við saumana mína í kvöld.

- Vikan hálfnuð -

Þrátt fyrir að sitja við saumana mína hátt í tvo tíma í gærkvöldi þá náði ég ekki að klára að sauma blómaskreytinguna. Kláraði ermina á jakkanum og saumaði þrjú rauð blóm og nokkur laufblöð. Það er ekki mjög mikið eftir en þar sem ég er að fara á kóræfingu í kvöld efast ég um að ég nái að klára þetta þótt ég setjist við um stund upp úr klukkan tíu. Þar að auki á ég eftir að sauma nöfnin og fermingardaginn. Ég er samt ekkert farin að örvænta og hugsa að þetta sleppi allt saman til. Líkt og í fyrrakvöld las ég svo síðasta hálftímann áður en ég fór að sofa í kringum miðnættið.

- Saumað af kappi -

Rétt áður en ég kom heim í gær kom æskuvinkona mín, sem nú býr á Egilsstöðum. Hún var byrjuð að undirbúa uppáhellingu þegar ég kom. Karatestrákurinn var eitthvað þreyttur í gær og ákvað að sleppa því að mæta á æfingu. Maturinn var því til hjá mér um sjö (í stað hálfátta-átta). Hefði örugglega samt haft matinn á þessum tíma því Davíð átti að vera mættur í pílu um hálfátta. Var með lasanja sem mæltist vel fyrir af öllum. Söngfuglinn minn ákvað að fyrst hann var að syngja á tónleikum seinni partinn á sunnudaginn væri örugglega frí á æfingu. Hann fór því heim með vini og þegar ég ætlaði að athuga með hann náði ég ekki í hann í síma. Fyrst hann var ekki heima hélt ég að hann hefði farið í fyrra fallinu á æfinguna. Þegar hann var ekki kominn heim klukkan sjö fór mig að gruna að ekki væri allt alveg með felldu. Loksins náði ég símasambandi við hann og frétti þá að hann hefði farið heim með vini. Eftir að ég var búin að ganga frá í eldhúsinu með matinn settist ég inn í stofu með saumana mína og sat við í drjúga stund með smá hléum. Er alls ekki búin og þarf að sitja við í kvöld og næstu kvöld þar til þetta klárast.

- Brúðkaupsafmæli -

Í dag eru 14 ár síðan við Davíð skruppum til sýslumanns og létum pússa okkur saman. Áttum tíma klukkan þrjú og fulltrúi sýslumanns og önnur til tóku á móti okkur tveimur. Allt gekk vel fyrir sig en reyndar var fundið að því við manninn minn að hann ætlaði að setja giftingarhringinn á baugfingur vinstri handar eftir að hafa rennt mínum upp á baugfingur hægri handar minnar. Hann breytti þessu og var með hringinn á hægri hendi fyrstu árin. Núna er hann búinn að færa hringinn yfir á vinstri hendina. Fljótlega eftir athöfnina ókum við austur yfir fjall og áttum nóttina á Hótel Örk í Hveragerði. Skruppum á Bakkann daginn eftir og svo áfram á Hellu til pabba, þar sem við gistum eina nótt.

Skrópaði ekki í hannyrðunum mínum á föstudaginn. En laugardagurinn fór allur í annað heldur en saumaskap. T.d. fékk ég sms frá bókasafninu um að ég gæti sótt bókina sem ég hafði pantað innan þriggja daga. þetta er hátt í 700 bls. bók og mér leist ekkert á að bíða neitt með að sækja hana svo ég vatt mér strax í málið. Kom við í verslun á heimleiðinni og keypti nammi fyrir bræðurnar og pylsur sem þeir hituðu upp sjálfir þegar við foreldrarnir vorum farin á árshátíð um kvöldið.

Í gær vorum við boðin í 1 árs afmæli. Skruppum öll fjögur í smá stund en stoppuðum örugglega ekki lengur en í klukkutíma því söngfuglinn minn átti að vera mættur í fullum skrúða í Langholtskirkju rétt fyrir fimm. Drengjakórinn söng nokkur lög á tónleikum eldri félaga karlakórs Reykjavíkur. Davíð fór með honum og þeir feðgar björguðu svo kvöldmatnum. Settist svo niður með saumana mína í gærkvöldi og komst þónokkuð áfram þótt ég vildi reyndar helst vera búinn að þessu. Á eftir u.þ.b. helminginn af blómaskrautinu á öðrum fermingardrengnum og svo að merkja nafn og fermingardaga á báðar myndirnar. Þetta er samt allt að koma.

- Lagði inn pöntun -

Eftir vinnu í gær lagði ég leið mína í Aðalsafnið í Grófinni og skilaði inn "Ástandsbarninu". Hafði séð það á gegni.is að það ættu að vera til tvö eintök af : "Loftkastalinn sem hrundi" en þegar til kom hafði þeim bókum verið skilað í öðrum söfnum svo ég brá á það ráð að leggja inn pöntun. Hugaði reyndar um að þetta væri bara ágætt því ég þarf að leggja aðaláherslu á saumana mína næstu daga. Var svo heppin að Davíð tók að sér að sjá um kvöldmatinn, annan daginn í röð. Ég fór því í fyrsta skipti og sótti júdókappann af æfingu. Karatestrákurinn sá um sig sjálfur, labbaði á æfingu og aftur heim eftir æfinguna. Það tók samt sinn tíma. Held að hann hafi farið í smá gufubað eftir karateæfingu. Klukkan var orðin níu þegar ég settist loksins niður með saumana mína en ég hafði það af að klára blómamunstrið á fermingadreng no II. Þar er því bara eftir að sauma nafn og fermingardag. Ætla að byrja á blómamunstrinu á fermingadreng no I í kvöld. Það er þokkalega mikið að gerast um helgina en ég hlýt að fá tíma inn á milli til að sauma. Stefni að því að fara með þrjár útsaumsmyndir í innrömmun í næstu viku.

- Tveggja daga sauma-"verkfall" -

Hef ekki tekið upp saumadótið mitt síðan á mánudagskvöldið. Vona samt að það komi ekki að sök. Davíð fór í tölvubjörgunarleiðangur til eins vinar síns eftir mat á þriðjudagskvöldið og kom ekki heim fyrr en eitthvað eftir miðnætti. Ég festist óvart fyrir framan sjónvarpið og horfði á "Læknamiðstöðina" áður en ég setti í eina brauðtertu. Yfirleitt get ég nú saumað um leið og ég fylgist með e-u í sjónvarpinu, nema um spennuþætti/myndir og gamanmyndir sé að ræða en í fyrrakvöld gleymdi ég bara að taka upp saumana. Þegar bræðurnir voru farnir í rúmið upp úr tíu settist ég við tölvuna. Í gær ákvað ég að prófa hvort ég gæti svarað fyrir allar afmælisóskirnar á FB-veggnum mínum, hverja og eina einustu (urðu uþb 200 allt í allt). Það tókst eiginlega, nema ég svaraði þeim kveðjum sem bárust síðustu tæpu tvær klukkustundirnar fyrir miðnætti í morgun. Við Davíð ákváðum nefnilega að horfa á aðra myndina sem hann gaf mér í afmælisgjöf: "Yes man!" með Jim Carrey. Davíð sá til þess að ég fengi tvíréttaða máltíð í gærkvöldi áður en ég fór á kóræfingu. Hann var með sjávarréttasúpu í forrétt og snitsel og kartöflukratín í aðalrétt. Nýja græjan kom sér mjög vel við að skera niður grænmetið. Þetta var mjög gott hjá honum. Ég þurfti ekki að koma nálægt eldhússtörfunum í gær. Stakk í eina þvottavél og braut saman og tók upp þvottinn sem var á snúrunum, en maðurinn fór svo niður og hengdi upp úr vélinni þegar hún var búin. En í kvöld verð ég að taka upp saumana og sauma í amk í klst. ef ég á að geta farið með fermingadrengina í innrömmun í næstu viku.

- Stelputryppið 42 ára í dag! -

Fór og hitti trúnaðarlækni vinnu minnar með þrjú erindi í gær. Sýndi honum fingurnar og sagði frá "slysinu" sem ég varð fyrir á jóladag. Hann sagði að þetta væri bara mjög slæm tognun og ekkert undarlegt þótt fingurnir væru ekki enn búnir að jafna sig. Ég er líka komin með mjög skrýtin útbrot á sköflunginn á hægra fæti og skrifaði læknirinn upp á krem sem ég á að bera á svæðið daglega og annan til þriðja hvern dag þegar útbrotin fara að mýkjast. Kom því við í apótekinu á leiðinni heim í gær. Einnig "heimsótti" ég fiskbúðina við Freyjugötu 1 og fékk mér ýsu í soðið. Strákarnir fóru báðir á æfingar svo við vorum ekki að borða fyrr en á níunda tímanum. Söngfuglinn og júdókappinn minn hann Davíð Steinn var ekki par hrifinn er hann kom heim sársvangur en hann fékkst þó til að fá sér eitthvað smá. Það varð afgangur sem ég tók til í skál handa mér, gleymdi bara að taka það með mér í vinnuna svo ég borða þetta bara í kvöld eða tek með mér á morgun. Setti í eina brauðtertu sem ég hafði með mér fyrir vinnufélagana í dag.

- Saumaklúbbur -

Eftir nokkuð margra daga gönguhlé til vinnu þá trítlaði ég í vinnunna á nýju skónum mínum í gærmorgun. Arkaði aftur heim, seinni partinn, með viðkomu í bakaríinu þar sem ég verslaði grunn í brauðtertu sem ég ætla að skella í í kvöld og hafa með mér á morgun. Á mánudögum er tölvulaus dagur hjá bræðrunum og þeir voru heima í stofu með tveimur vinum að horfa á sjónvarpið þegar ég kom upp úr hálffimm. Var ekkert að spá neitt meira í þessu en klukkan fimm sagði karatestrákurinn allt í einu við söngfuglinn: "Átt þú ekki að vera mættur á kóræfingu?" Sá síðarnefndi var ekkert að gera mál úr hlutunum en dreif sig samt af stað. Rétt fyrir hálfátta skutlaði ég manninum í pílu, sótti karatestrákinn af æfingu og bauð strákunum að vera í tölvunni um kvöldið þar sem hvorugt okkar foreldranna yrði heima. Ég var komin til "tvíburahálfsystur" minnar upp úr klukkan átta. Vorum bara tvær í saumaklúbbnum en ég nýtti tímann mjög vel og er alveg að verða búin með blómaskreytinguna á fermingardreng no II. Ég er nú orðin sannfærð um að myndirnar muni fara í innrömmun eftir næstu helgi.

- "Önnusöm" helgi liðin -

Var mætt í Kristu til Nonna rétt fyrir tíu á laugardaginn. Lét þvo á mér hárið áður en Nonni tók við og klippti það og þynnti eftir öllum kúnstarinnar reglum. Hann var ekki ánægður þegar ég sagði honum að ég laumaðist stundum til að taka hvít hár úr e-m skallablett bara til að skoða þessi fíngerðu hár. "Þú mátt ekki taka hárin sem eru að koma." Eftir smá umhugsun bætti hann við "Veldu þá amk bara einn blett til að fikta í." Eftir klippinguna fór ég í skóbúðina Steinar Waage og keypti mér nýja skó, alveg eins og þá sem ég hef gengið í sl. 10 mánuði. Gömlu skóna skildi ég eftir því þeir voru eiginlega alveg búnir. Skutluðum tvíburunum í síðasta fermingafræðslutímann í Salahverfi í Kópavogi. Um kvöldið útbjó ég eina brauðtertu og Davíð keypti fyrir mig tvær skyrtertur. Þetta fór ég með alltsaman í kirkjuna um eitt í gær (þ.e. maðurinn skutlaðist með mig). Feðgarnir mættu svo í messubyrjun. Það var galdramessa og Bjargarkaffi eftir messu. Það var full kirkja. Allir sálmar voru sungnir einradda en við stóðum samt saman í röddunum okkar við kórfélagarnir. Við vorum aðeins 3 í altinum tvær Önnur og svo "tvíburahálfsystir" mín og hún stóð á milli okkar nafnanna svo hún var mjög önnum kafin. Skyldumæting hjá fermingabörnunum en fyrri fermingarmessan verður eftir hálfan mánuð. Strax eftir messu var smá fundur með prestinum, fermingarbörnunum og foreldrum. Lagt var á borð í "efra" og "neðra" og einnig á fimm borð í kirkjunni og það var hlaðborð af alls kyns góðgæti á báðum hæðum. Það fór svo þannig að ég tók ekkert upp saumana mína í gærkvöldi en ég saumaði bæði á föstudags- og laugardagskvöldið og ég er komin það langt að ég veit að myndirnar fara í innrömmun í næstu viku. Það er líka saumaklúbbur í kvöld...

- Pottakynning -

Tók mér orlof um klukkan eitt í gær. Á enn eftir nokkra daga af sumarfríinu síðan í fyrra. Byrjaði á því að rölta með skjal yfir á Vesturgötu 1. Þegar ég kom heim setti ég í þvottavél. Tók upp úr uppþvottavélinni. Hóf tiltekt í elhúsinu, ryksugaði og skúraði. Davíð kom heim um fjögur og fór strax að hjálpa mér. Pabbi kom um svipað leyti (og ein vinkona mín sem fékk gistingu hjá mér í tvo daga) en hann fór svo seinna að sækja mömmu. Konan með kynninguna (var að kynna potta frá Salatmaster) kom upp úr klukka sex og upp úr hálfsjö komu síðustu kynningargestirnir. Þá var búið að dúka borð í holinu og setja ný kerti í tvo stjaka á borðið. Kynningin fór samt fram í eldhúsinu og þar varð fólk að standa upp á endann í næstum einn og hálfan tíma. Allt fór vel fram og ég held að allir hafi skemmt sér stór vel. Allir fengu rófu- og gulrótasnakk á meðan kynningunni stóð en þegar maturinn var tilbúinn settust menn við borðið í holinu. Fengum kjúkling, fjórar tegundir af grænmeti og kartöflugratín og í eftir rétt var súkkulaði-grænmetiskaka með rjóma. Allt var yfirstaðið um tíuleytið og klukkutíma síðar fengu maðurinn minn og vinkona þá flugu í höfuðið að leigja mynd "The Hart locker". Ég held að klukkan hafi verið orðin hálftvö áður en ég skreið upp í rúm í nótt. Og framundan er annasöm helgi...

- Kóræfing, útsaumur og lestur -

Já, ég náði að sinna öllum áhugamálunum mínum í gær þrátt fyrir að þurfa á fund strax eftir vinnu og hafa aðeins hálftíma frá fundinum fram að kóræfingu og æfingin stóð yfir frá hálfátta til tíu. Að vísu var smá kaffihlé í millitíðinni en ég var ekki komin heim fyrr en upp úr klukkan tíu. Mamma hafði skutlað mér á æfinguna (en hún stoppaði stund heima áður en hún og söngfuglinn fóru á tónleika í Salnum) og ég fékk far heim með "tvíburahálfsystur" minni. Bað Davíð nefnilega um að sækja eina elstu vinkonu mína út á flugvöll upp úr hálfníu. Þau voru á rökræðum þegar ég kom heim af æfingu. Fljótlega settist ég niður með saumana mína og horfði í leiðinni á hluta af heimildamynd um fjölskyldu sem tók sig alveg upp og ferðaðist um heiminn mánuðum saman. Þegar ég skreið svo upp í rúm skuggalega nálægt miðnætti freistaðist ég til að byrja aðeins á bókinni sem ég fékk af safninu í fyrradag.

- Góð ferð á safnið -

Strax eftir vinnu í gær rölti ég yfir í aðal-borgarbókasafnið í Grófinni. Samkvæmt Gegni.is áttu að vera 2 eintök inni í hillu af bókinni "Ástandsbarnið" eftir Camillu Läckberg. Fann hana ekki í hillunni hjá nýjum og nýlegum bókum svo ég ákvað að spyrja um hana við afgreiðsluborðið. Þegar ég nefndi bókina við þá sem ég spurði snéri hún sér í hálfhring að hillu fyrir innan afgreiðsluborðið, tók bók og rétti mér. Mikið varð ég glöð. Hef 14 daga til að lesa hana og tímdi ekki að byrja strax í gær. Eftir þessa góðu ferð skrapp ég yfir í Eymundsson og keypti tvær svartar sálmabækur. Þá var ég að byrja að blotna á tánum svo ég ákvað að labba ekki mikið meira og settist á næstu biðstöð og beið eftir leið 13. Var eiginlega nýbúin að missa af vagninum og þurfti að bíða í uþb hálftíma eftir næsta en það var í góðu lagi.

Strákarnir fóru báðir á æfingar seinni partinn í gær, annar í karate og labbaði báðar leiðir, og hinn á Júdóæfingu en Davíð skutlaði honum og sótti aftur. Eftir að hafa aðeins setið við tölvuna bjó ég til kjötvars úr hakki, lauk, eggjum, haframjöli, heilhveiti, byggmjöli og kryddað með salti, cayanne og kjötkrafti leystum upp í vatni. Kúlaði þetta upp í ríflega 30 bollur, setti í ofnskúffuna og inn í ofn. Mmmmm, góðar voru þær. Frysti hluta af bollunum en gat líka smá til að hafa með mér í vinnuna í dag.

- Saumað og saumað -

Að vísu settist ég ekki niður með saumana mína fyrr en um tíu í gærkvöldi og sat þá við í rúman klukkutíma. Nú er ég komin af stað með blómaskreytinguna á seinni myndinni og líklega klára ég hana áður en ég held áfram með blómaskreytinguna á fyrri myndinni. Svo eru það bara nöfnin, fermingardagurinn, skammstöfunin mín og ártalið áður en ég mun pressa þetta og fara með í innrömmun. Í leiðinni ætla ég að láta ramma inn myndina "Kossinn" sem ég saumaði 2007. Ég var svo óforsjál að panta ekki rammann með um leið og ég pantaði útsauminn og svo hefur myndin bara legið samanbrotin í saumatöskunni minni. Á svo reyndar nokkar aðra myndir sem ég þarf að fara að vinna í að ramma inn (eða láta ramma inn) fyrir utan nokkur saumaverkefni sem ég á eftir að byrja á. Eftir að ég hef lokið við að sauma fermingadrenginga mun ég ráðast í að klára bláa engilinn og kannski sauma nokkur stjörnumerki. Saumi, saumi, saumi, saumi...... - það er svo gaman! :-)

- N E I ! -

Tvíburarnir skruppu í heimsókn til föðurforeldranna um helgina. Davíð skutlaðist með þá eftir kvöldmat á föstudaginn. Ég var enn hálftuskuleg eftir magapínuna á fimmtudaginn og settist frekar niður með saumana mína og horfði á útsvar í leiðinni. Settist líka niður með saumana mína bæði á laugardag og sunnudag, enda er ég búinn með fermingastrák no II og er þá komin á svipaðar slóðir og með fermingardreng I þ.e. á bara eftir að sauma blómaskreytinguna, nafnið(nöfnin) og fermingardaginn. Ef ég sest niður með saumana í einhverja stund á hverjum degi ætti ég að geta sett báða drengina í innrömmun eftir ca hálfan mánuð.

Útvarpsklukkan fór í gang klukkan sjö á laugardagsmorguninn eins og það væri virkur dagur. Ég rumskaði upp úr því en í stað þess að slökkva á útvarpinu settist ég við tölvuna í ca eina og hálfa klukkustund áður en ég skreið upp í aftur. Það var samt ekki að virka að skríða upp í aftur þótt slökknað hefði á útvarpinu svo ég fór fljótlega á fætur. Það var samt Davíð sem hellti upp á könnuna og útbjó "brunch" handa okkur um tólf. Röltum út í skóla og kusum um tvö leytið og um fimm fórum við að versla.

Gærdagurinn var jafn rólegur og laugardagurinn, ef ekki rólegri. Davíð sá um kvöldmatarmál og tengdapabbi átti leið í bæinn svo hann skutlaði strákunum heim í leiðinni.

- Raddþjálfun og magapest -

Við kórfélagarnir í "óþæga" kórnum rákum upp stór augu er við mættum á æfingu sl. miðvikudagskvöld. Árni var búinn að breytast í konu. Hann fékk kórstjóra Veiranna til að hlaupa í skarðið fyrir sig og taka okkur í raddþjálfun. Og það var sko þjálfun í lagi. Hún lét okkur m.a. galopna munninn áður en við byrjuðum að gefa frá okkur hljóð, leggjast á bakið og anda þannig að mjóhryggurinn snerti gólfið og taka um höfuðið áður en við hófum raddæfingar. Einnig áttum við að stinga tánum undir ofn og gera magaæfingar um leið og raddæfingar, þ.e. við áttum að reisa okkur upp til hálfs og sitja í þeirri stellingu eins lengi og við treystum okkur til á meðan við gerðum raddæfingar. Held að við höfum fengið amk tíu tíma námskeið á tveimur tímum. Hún á svo eftir að koma og tuska okkur til einu sinni enn.

Þegar ég fór á fætur í gærmorgun var ég eitthvað undarleg í maganum. Hélt fyrst að ég væri bara svona svöng og þetta mánaðarlega væri einnig að plaga mig. Ekki lagaðist verkurinn þótt ég fengi mér að borða, hann varð bara verri ef eitthvað var. Settist á klóið og skilaði af mér en samt lagaðist verkurinn ekki heldur varð ennþá verri og ég var að verða smeik um að það væri gos í uppsiglingu. Tilkynnti mig veika, háttaði mig skjálfandi upp í rúm og tókst sem betur fer að sofna fljótlega. Vissi ekki af mér fyrr en um hádegisbil. Þá var verkurinn farinn og mér leið miklu skár. Náði svo að vera sofnuð vel fyrir miðnætti í gærkvöld og vona að ég hafi sofið þessa pest úr mér.

Ákvað að mæta til vinnu í morgun þrátt fyrir að horfa framan í grá-hvíta konu í speglinum í morgun. Það hefur bara gengið vel.

- Tíminn æðir áfram -

Hef ekki enn mætt á keiluæfingar á árinu (sem eru á þriðjudagskvöldum). Eftir "vinnuslysið" í kirkjunni á jóladag eru vísifingur og langatöng hægri handar enn bólgnir og stundum aumir eða dofnir. Get samt saumað út án þess að finna fyrir aukaverkunum en veit að líklega verð ég að passa mig á að sitja ekki of lengi við. Settist niður í gærkvöldi í tæpan klukkutíma. Nú fer ég bráðum að verða búin að ná jafnlangt með fermingardreng no II og ég var komin með fermingardreng no I (bráðum bara eftir blómin, nafn og fermingardagur). Annars erum við búin að senda út næstum því öll boðskortin og undirbúningurinn fer nú að fara á fullt. Sumum finnst ég kannski heldur róleg í tíðinni en það er örugglega svipað með þetta og jólin... þessi stund mun renna upp...

- Mars er lagður af stað -

Helgin leið ótrúlega fljótt við skyldur og leiki í bland. Var mætt á aukakóræfingu í kirkjuna klukkan tíu á laugardagsmorguninn. Hafði passað að fara á fætur amk tveimur tímum fyrir æfingu til að vekja röddina. Svo var bara enginn annar vaknaður svo ég hafði enga ástæðu til að nota röddina fyrr en karatestrákurinn kom á fætur upp úr klukkan níu. Tveir og hálfur tími (meira að segja aðeins lengur en það) liðu undrafljótt enda var mjög gaman á æfingunni. Beið eftir að karatestrákurinn var búinn á sinni æfingu og hafði hann með mér heim. Vorum ekki mjög lengi heima því strákarnir áttu að mæta í fermingafræðslu á Kjalarnesi. Fórum öll saman og við Davíð versluðum inn á heimleiðinni. Sendi hann svo einann að sækja strákana því ég var komin með saumana mína í fangið og dottin í að fylgjast með bikarúrslitaleik karla í handbolta.

Á sunnudaginn skutlaði Davíð mér í kirkjuna rétt fyrir hálfeitt. Kórinn æfði með undirleikurunum (trommuleikara, saxafónleikara, kontrabassaleikara og kórstjórinn spilaði á píanóið). Feðgarnir mættu svo í kirkjuna um tvö. Það var heljarsveifla í messunni og hrikalega gaman.

Strax eftir vinnu í gær fór ég á pósthúsið og keypti mér slatta af frímerkjum. Frímerkti 17 umslög og setti strax í póst en restin af boðskortunum fer í póst í dag. Síðan rölti ég yfir á bókasafnið og skilaði einni bók. Aðra bókasafnsheimsóknina í röð labbaði ég tómhent út (þriðja heimsóknin á stuttum tíma) og nú er ég aðeins með 3 esperantobækur í láni af safninu. En ég er líka byrjuð að lesa jólabækurnar.

Strákarnir björguðu sér báðir á æfingar og heim aftur svo ég ákvað að mæta í saumaklúbbinn eftir að hafa skutlað manninum í pílu. Var því mætt í fyrrafallinu eða rétt fyrir átta og var tæpum klukkutíma á undan "tvíburahálfsystur" minni. Það var mikið saumað, hlegið og þambað kaffi. Stundum vorum við stöllurnar í hláturskasti og stundum svo niðursokknar í verkefnin okkar að það hljóðnaði allt í kringum okkur. Kom heim um hálftólf, á undan manninum, og hafði þá saumað heilt kerti og einnig bætt við fermingarjakkann á fermingardreng II. Hef uþb þrjár vikur enn til að klára og ætla mér helst að setjast eitthvað niður með saumana mína á hverju kvöldi/ hverjum degi.