Ekkert kaffi í þrjár vikur

Vegferðin mín til að "heila görnina" heldur áfram og gengur bara þokkalega. Er þó ekki búin að taka út alveg allt sem var á úttöku-listanum en líklega er það bara kjötið sem er eftir og ég er að vinna í þessu. Það að ég finn góðan mun á mér hjálpar til við þetta verkefni en alltaf langar mig samt í kaffi og stundum popp á kvöldin. Læt það ekki eftir mér ennþá, staðráðin í að halda þetta út. Hversu lengi veit ég ekki en líklega þrjá mánuði til hálft ár og þá get ég vonandi farið að taka stöðuna um hvað ég prófa að taka inn aftur.

Var á íttoðsluendanum á vélinni í gær. Fór því beint niður að "sækja" tölur og hlaða inn þegar ég mætti í vinnu. Emmurnar voru á sínum stað en í hinni möppunni voru bara debetkortaskrár en engar skrár fyrir kreditkort. Framleiddum allt debet og kláruðum afgang af gjafakortapöntun. Kerfisfræðingurinn kom um níu leytið til að skoða, sagðist hafa sér allar skrár hjá sér. Hann gat sent okkur þær og við fórum ekki upp í kaffi fyrr en að framleiðslu lokinni. Þá var klukkan að ganga tíu svo það var engin veruleg seinkun á afhedingu. Fórum ekki niður aftur fyrr en hádegisskammturinn skilaði sér á vélina. Gengum frá kortadeildinni um tólf. Ég hjálpaði til við frágang í eldhúsverkunum og fór svo í innleggin. Klukkan var fjögur þegar ég stimplaði mig út.

Hringdi í afmælisbarn gærdagsins, besta vin minn, og spjallaði við hann á meðan ég ók yfir í Laugardalinn. Kaldapotts vinkona mín var í sinni annarri ferð í kalda pottinum þegar ég mætti í sundið. Við fórum fjórar ferðir saman í kalda, tvær í heitasta, eina í gufuna og eina í sjópottinn. En ég skrópaði í sjálft sundið. Kom við í Krónunni í Borgartúni á leiðinni heim. Fékk ekki alveg allt þar sem mig vanhagaði um en fór þó ekki í aðra búð til að útvega það sem ávantaði. Lá ekkert svo á þessu. 

Almannavarnafundur

Ég var vöknuð og komin á fætur fyrir klukkan sjö í gærmorgun. Klukkan var ný orðin níu þegar ég var komin á braut sjö í Laugardagslauginni, þá búin að fara eina ferð í kalda pottinn. Synti 400m og fór aftur í kalda. Sjósundsvinkona mín var þá mætt á svæðið. Það eru níu vikur síðan hún fékk nýja hnjáliði. Hún er að vinna í að styrkja sig og þarf að passa sig að gera ekki of mikið en hún synti 200 metra skriðsund, fór svo í nuttpottinn og hitti mig í gufunni. Úr gufunni fórum við í sjópottinn og þar sátum við á spjalli í amk hálftíma. Skelltum okkur svo í kalda pottinn í þrjár mínútur áður en við fórum upp úr. Ég var komin heim rétt fyrir tólf. Um þrjú leytið skellti ég mér í smá göngu upp að Perlu, niður að HR og svo til hægri meðfram Öskjuhlíðinni og framhjá Valsheimilinu. Forritið í símanum byrjaði líklega ekki að skrá gönguna fyrr en ég var komin yfir Bústaðahlíð á ljósunum. Þetta voru rétt rúmir þrír kílómetrar á 37 mínútum og ég kom heim mátulega áður en Liverpool leikurinn hófst. Það munaði engu að mínir menn töpuðu. Á áttugustu mínútu skorðuðu Luton fyrsta mark leiksins en það var í uppbótatíma sem Luis Diaz jafnaði metin.

Trall

Titill færslunnar í dag er út í loftið. Hefði allt eins getað notað upphafsorðið í þessari færslu sem titil þar sem markmiðið var að orðið hæfist á T. Vaknaði um hálfsjö í gærmorgun og notaði fyrsta rúma klukkutímann til að vafra um á netinu og setja inn færslu. Lagði af stað í sund um það leyti sem morgunfréttir klukkan átta voru að hefjast. Í sundi byrjaði ég á að fara eina ferð í þann kalda og úr þeim potti í þann heitasta. Þar hitti ég fyrir frænda minn og nafna hans pabba. Sá er kominn í fæðingarorlof en yngri sonur hans er um eins árs. Við spjölluðum í nokkra stund eða þar til ég fann að kominn var tími á að kæla sig aftur. Eftir næstu ferð í kalda pottinn fór ég á braut 6 og synti 500m, flesta á bakinu en kannski 40 metra skriðsund í síðustu ferðinni. Eftir þriðju ferðina í kalda pottinn fór ég í gufu, þaðan í sjópottinn og svo endaði ég á kalda og smá "sólbaði" áður en ég fór upp úr og þvoði mér um hárið. Þá var klukkan að byrja að ganga ellefu. Svo lagði ég leið mína í AO við Sprengisand áður en ég fór vestur í bæ til esperanto vinkonu minnar. Kom heim um hálfeitt leytið. Einhvern veginn fór það svo að ég fór ekkert út aftur. Bræðurnir fóru til pabba síns og fjölskyldu hans um tvö leytið. Davíð Steinn hringdi í mig upp úr klukkan sjö til að athuga hvort ég væri í bænum og ef svo væri hvort hann mætti fá lánaðan minn bíl til að sækja frænku sína austur í Hvolsvöll. Hann kom um níu leytið að sækja bíllykilinn. Bíllinn hennar Bríetar hlýtur að vera eitthvað bilaður og kærastinn vant við látinn. En þetta gaf frændsystkynunum tæki færi til að hittast. 

Tíminn

Það er tilgangslaust að reyna að eltast við eða stoppa tímann en það er vel hægt að staldra við í núinu og gleyma stund og stað, fortíð og framtíð. Það eru til nokkrar aðferðir og er sjósund ein af þeim. Föstudagar eru sjósundsdagar hjá mér, svona oftast nær. Engin undantekning í gær og þegar vinnu lauk um þrjú leytið fór ég beinustu leið í Nauthólsvík. C.a. tuttugu mínútum fyrir fjögur óð ég út í 4,5°C heitan sjóinn í fjöru og stillu. Var svo sem ekki mikið að synda en svamlaði um í rúmar tíu mínútur. Ætlaði varla að tíma að fara upp úr. Sat svo korter í heita pottinum áður en ég fór upp úr og heim. Þar lauk ég við að hlusta á síðasta innleggið í fjögra vikna netnámskeiðinu um heilun á görninni. Mataræðið skiptir miklu máli en það gerir andlega hliðin líka. Það er hægt að borða hollt og gott en vera út á túni andlega og það er líka hægt að vera andlega sterkur en borða svo óhollt og mikið að líkaminn mótmælir. Ég hef svo sem vitað þetta í þó nokkurn tíma en þótt meltingakerfið hjá mér hafi verið viðkvæmt alveg frá fæðingu þá hef ég samt ekki haldist á réttri braut hvað varðar að passa alltaf hvað ég læt ofan í mig. Að vísu hef ég ekki drukkið litað gos í meira ein þrjá áratugi og drekk heldur ekki bjór. Hvernig mér mun ganga að vera staðföst næstu vikurnar hvað varðar t.d. kaffi, hvítvín, popp, kjöt og fleira sem ég þarf að útiloka (sumt vonandi bara um tíma) verður að koma í ljós. Er ekki frá því að ég sé að finna smá mun á mér en á meðan ég er ekki alveg laus við bjúginn held ég þetta vonandi út. Það er örugglega þess virði að reyna og sleppa því bara að hugsa um það sem ekki má heldur einblína á það sem má alveg örugglega.

Enginn magnesíum pottur

Nú brá svo við að ég svaf í einum dúr frá ca tíu í fyrrakvöld til klukkan að verða sex í gærmorgun. Vinnudagurinn stóð yfir milli klukkan hálfátta og rúmlega þrjú. Var komin í sund upp úr klukkan hálffjögur. Hringdi í pabba á meðan ég var á leiðinni úr vinnunni í sundið og komst þá að því að eldri systurdóttir mín er búin að vera hjá honum síðan seint á sunnudagskvöldið var, með hvolpinn Uglu með sér. Ugla er að fara að taka þátt í hundasýningu um helgina. Synti 300 metra og það passaði akkúrat að þá var kaldapotts vinkonan mætt og tilbúin í fyrstu ferðina í þann kalda. Fórum fjórar ferðir í í þann heitasta á milli. Eftir fjórðu ferðina settumst við inn í gufu í góða stund. Í uþb tvo mánuði fyrir lokun var verið að setja magnesíum flögur út í einn pottinn á þriggja eða fjögurra tíma fresti einu sinni í viku, á fimmtudögum. Í gær var fyrsti fimmtudagurinn síðan opnaði aftur en búið var að fjarlægja skiltið. Sumir sögðu að ekki hefði verið fyllt á flögurnar en aðrir sögðu að þetta hefði alltaf átta að vera tímabundin kynning. Það er verið að selja poka af magnesíuflögum í afgreiðslunni. En eftir gufuferðina fórum við í sjópottinn. Ég dýfði mér svo smástund aftur í þann kalda áður en ég fór upp úr og heim. Þá var klukkan byrjuð að ganga sex. Vinkonan ætlaði að vera svolítið lengur því mögulega var dóttir hennar að fara að mæta í sund um hálfsex leytið. 

Þessi tími sem hleypur svo hratt

Í "gærmorgun" var klukkan rétt orðin hálffjögur þegar hlandblaðran stuggaði við mér. Ég skreið svo aftur upp í rúm. Sofnaði ekki alveg strax aftur en held að ég hafi svo fengið klukkutíma lengri svefn því mig var að dreyma eitthvað spennandi og skrýtið þegar ég vaknaði rétt fyrir sex. Mætti í vinnu á sama tíma og venjulega og var byrjuð í innleggjunum áður en klukkan sló átta. Það var aðeins rólegra í þeirri vinnu og ég var búin með minn skammt stuttu fyrir kaffi. Á miðvikudögum er brauð og kruðerí með morgunkaffinu og oft fundir. Það var ekki fundur í gær en sú sem kemur með kruðeríið er að vinna hálfa stöðu í fyrirtækinu og sér um kaffistofuna í D30 og kemur einu sinni í viku til okkar. Ég ákvað að snúa bakinu í glæsilegt morgunverðarborðið, drekka mitt heita vatn, prjóna og spjalla við vinnufélagana. Freistaðist ekki neitt. Hélt svo áfram í innleggjunum eftir kaffi og kláraði þann skammt rétt fyrir tólf. Eftir hádegi gekk vel framan af og ég sá fyrir mér að klára um tvö en þá kom babb í bátinn og ég þurfti smá aðstoð og var síðust að klára. Var samt búin um þrjú. Fór í Nauthólsvík beint eftir vinnu. Var rétt búin að klæða mig úr skóm og sokkum þegar ég uppgötvaði að ég hafði gleymt handklæði. Trítlaði fram í afgreiðslu og leigði mér eitt handklæði á 750 krónur. Var komin út í 4,7°C sjóinn tíu mínútum fyrir fjögur og svamlaði um í tæpar tíu mínútur. Þá settist ég smá stund inn í gufuna. Úr gufunni óð ég út í lónið sem var amk einni til tveimur gráðum heitara ef ekki meira því það var fjara. Var samt bara stutta stund út í.  

Nagladekkin komin undir og sumardekkin á dekkjahótelið

Aftur rumskaði ég um fimm til að skreppa á salernið. Var komin á fætur rétt fyrir klukkan sex og í vinnuna um hálfátta. Var byrjuð í innleggjavinnunni áður en klukkan var orðin átta. Klukkan að byrja að ganga fjögur fékk ég að hætta vinnu því ég átti tíma með bílinn hjá N1 í Fellsmúla klukkan hálffjögur. Bíllinn komst strax að á réttum tíma og það tók aðeins korter að svissa yfir á vetrardekkin. Ég prjónaði smávegis á meðan og horfði löngunaraugum á kaffivélina og bakkelsið sem var í boði. Mig langaði í kaffi og kleinu en þó eiginlega samt ekki. Ég er á ákveðinni vegferð og fer vonandi ekki að skemma hana alveg strax. Er aðeins farin að finna mun á mér til hins betra en reikna þó með að tilraunin þurfi að standa yfir í amk þrjá til sex mánuði og ef bjúgurinn mun hverfa þá er allt eins líklegt að ég hugsi mig tvisvar um hvort það borgi sig bara ekki að halda sig við það sem gerir manni gott og sleppi tökum á því sem er að skemma fyrir. Sjáum hvað setur.

Var mætt í sund rétt rúmlega fjögur og hitti kalda potts vinkonu mína þegar hún var á leið í sína fyrstu ferð í kalda. Fórum fjórar ferðir alls í þann pott, tvær ferðir í heitasta pottinn, eina í gufu og eina í sjópottinn. Ég synti ekki neitt en þessi rútína tók alls um einn og hálfan tíma. Kom við í Hagkaup í Skeifunni áður en ég fór heim.

Innlagnarvika

Rumskaði um fimm í gærmorgun. Blaðran var full svo ég skrapp á salernið en skreið svo upp í rúm aftur. Sofnaði þó ekki en ég kúrði í tæpan klukkutíma áður en ég fór á fætur. Var mætt í vinnu fyrir klukkan hálfátta. Þessa vikuna hefur verið ákveðið að ein af okkur í kortunum verði alfarið uppi í innlögnum en hinar tvær sinni kortamálunum. Fyrirliðinn ákvað fyrir helgi að ég skyldi byrja í innlögnunum og ég var sátt við það. Það var nóg að gera og smá aukaálag því það vantaði tvær. Við vorum því að vinna til klukkan hálffimm. Ég gerði aðeins ein mistök sem ekkert mál var að laga. Læri af þeim. Annars finnst mér þetta alveg að vera að koma hjá mér. Veit þó að ég er alls ekki útlærð. En þetta er gaman og tíminn gersamlega flýgur áfram. Var komin í sund um fimm og hitti kalda potts vinkonu mína í sinni fimmtu ferð í kalda pottinum. Saman náðum við 3 ferðum og eina í gufu. Ég synti ekkert en fór aðeins í sjópottinn og fjórðu ferðina í þann kalda áður en ég fór upp úr og heim. 

Ný vinnuvika

Svaf alveg ágætlega í fyrrinótt þrátt fyrir að þurfa að skreppa á salernið tvisvar sinnum. Seinna skreppið var reyndar um sex. Ég fór á fætur um átta. Vafraði um á netinu í uþb klukkustund. Þá var pabbi komin á fætur og ég settist við eldhúsborðið og lagði kapla í hálftíma. Einhvern tímann fljótlega eftir það skrapp ég í tæplega hálftíma göngu aðeins upp og aftur niður með Rangánni. Veðrið var fallegt en svalt. Ég var í lopapeysu og með ennisband og það var alveg nóg þar sem ég var á hreyfingu. Var rjóð í framan lengi eftir að ég kom inn úr göngunni. Fitjaði upp á nýrri tusku og greip líka í bók. Hafði mat handa okkur feðginum tilbúinn um það leyti sem hádegisfréttir voru að klárast. Horfði á Liverpool leikinn en fljótlega eftir hann fór ég að taka mig saman. Mundi eftir að taka með mér þorskhnakkana úr kistunni hans pabba. Var komin heim um hálfsex. 

Á Hellu

Ég var vöknuð um sex í gærmorgun. Fór í sund um átta. Hárþvottadagur svo ég synti á bakinu. Fór fjórar ferðir í kalda, eina í gufu, eina í þann heitasta og slakaði einnig vel á um stund í sjópottinum. Var komin heim aftur um hálfellefu. Enginn esperantohittingur þessa helgina þar sem verið var að undirbúa 4 ára afmæli. Um hádegisbil pakkaði ég niður, m.a. fartölvunni N1 sonarins sem ég er búin að hafa aðgang að síðustu misserin. Kom við í Heilsuhúsinu í Kringlunni til að versla vítamín og kókosvatn. Var komin til pabba um tvö. Það hafðist að senda skjal með pósti úr fartölvunni, opna í tölvunni hans pabba og prenta út. Þetta er yfirlit úr netnámskeiðinu yfir vítamín sem eiga að hjálpa til við að heila mína blessuðu görn. Dagurinn leið ógnarhratt. Var með bleikju í matinn og gufusoðið blómkál og lauk með í kvöldmatinn. Fann einnig steinlausar ólífur inn í ísskáp. Næstu tvær vikurnar mun ég fara vel yfir leiðbeiningarnar um það sem taka á úr mataræðinu, alfarið eða um tíma og mun ég gefa mig alla að þessu verkefni næstu misserin í góðri von um að mér muni takast að vinna bug á bjúgnum sem ég hef verið með meira og minna í yfir þrjátíu ár.

 

Morgunstund

Vaknaði hálftíma áður en vekjaraklukkan átti að fara í gang. Slökkti á henni, dreif mig á fætur að sinna morgunverkefnunum. Mætti í vinnu um hálfátta. Ég var í sömu stöðu í gær, á ítorðsluendanum, svo ég fór beinustu leið niður í kortadeild að kveikja á vélinni og "ná í" tölur áður en ég fór og fyllti á vatnsbrúsann. Visa og debet framleiðslu lauk tuttugu mínútum yfir níu. Þá fór ég upp á undan til að skreppa á salernið áður en fór í starfsmannasamtal við framkvæmdastjórann klukkan hálftíu, það seinna á árinu. Við spjölluðum í rúmar tuttugu mínútur og leið mér mjög vel í þessu samtali. Verkefnastaðan var þannig að það þurfti ekki aukahendur uppi. Ég sat því góða stund inn á kaffistofnni eftir samtalið, prjónaði og spjallaði og drakk vatn. Um ellefu kom pöntun upp á 5000 gjafakort ásamt hádegisframleiðslunni.  Við fórum því aftur niður eftir hádegi til að hlaða inn og byrja framleiðslu á þessum gjafakortum. Framleiddum einn fimmta af pöntuninni en ákváðum á láta gott heita um tvö leytið og ganga frá deildinni. Hjálpaði til með eitt verkefni uppi áður en ég stimplaði mig út stuttu fyrir þrjú og fór svo beinustu leið í Nauthólsvík. Dásamlegt að skella sér aðeins í sjóinn í vinnuvikulok. Kom heim á fimmta tímanum. 

Taylor Swift bíótónleikar

Vinnudagurinn í gær náði til klukkan hálffjögur. Ég var á ítroðsluendanum. Vorum búnar með fyrstu tvo framleiðsluskammtana um það leyti sem var að bresta á kaffipása. Eftir kaffi og til ellefu tók ég nokkur innlegg. Ákvað sjálf verkefnið og leysti það án þess að þurfa neina tilsögn eða aðstoð. Hádegisskammturinn var ekki stór en það var líka tilkynnt og send inn beiðni um framleiðslu á 2000 gjafakortum. Það var hægt að hlaða gjafakortaverkefninu inn klukkan eitt og við gátum klárað framleiðslu. Þegar við vorum búnar að ganga frá niðri var klukkan að byrjuð að ganga fjögur. Flest var að klárast uppi líka. Ekki tók því samt að fara eitt eða neitt því ég var búin að skrá mig á viðburð með með framkvæmdastjóranum, nokkrum vinnufélögum og fylgifiskum. Byrjuðum á því að fara yfir í salinn í hinum endanum á húslengjunni. Þar vorum við í góðu yfirlæti til klukkan hálfsex. Fengum léttar veitingar og ég ákvað að taka svindldag. Fékk mér reyndar ekkert að drekka hvorki áfengt né óáfengt. Ég fékk svo far yfir, ákvað að geyma bílinn minn áfram í því stæði þar sem ég lagði honum um morguninn. Í Laugarásbíó fengum við afhentan miða sem gilti fyrir popp og gosi. Ég ákvað að sleppa gosinu og fékk í staðinn að uppfæra popppokann í stærri poka. Popp er eitt af því sem ég á að taka út og ég á í jafnmiklu veseni með það og kaffið. Reyndar er nú liðin ein og hálf vika síðan ég drakk kaffi síðast, en mig langar alltaf í svarta, sterka drykkinn. Klukkan sex vorum við komin inn í aðalsalinn. Það voru reyndar auglýsingar fyrsta korterið eða svo en svo hófust stórkostlegir tónleikar og flott dansatrið með Taylor Swift þar sem hún fór yfir ferilinn og tók lög af öllum plötunum sínum. Þetta var ekki búið fyrr en klukkan langt gengin í níu. Þá var ég að verða svolítið þreytt í rófubeininu þrátt fyrir að hægt væri að halla sér í sætunum. En ég var uppveðruð þegar ég svindlaði mér sem fyrst yfir Sæbrautina, næstum stystu leið að bílnum mínum og fór heim, beinustu leið í rúmið en las þó aðeins áður en ég fór að sofa.

Fimmtudagur og stutt í mánaðamót

Auðvitað var tvöfaldur skammtur af kortapöntunum í gær en misstórir skammtar þó. Framleiðsla stóð yfir milli klukkan átta og hálfeitt með kaffipásu á milli. Ég var í bókhaldi og innlögnum og fór bara einu sinni niður í kortadeild. Það var einnig nóg að gera í innlögnunum og eftir hádegi komu fyrirliði og fyrrum fyrirliði með inn í þau verkefni. Ég var búin í vinnu rétt fyrir fjögur og fór þá beinustu leið í Nauthólsvík. Það var flóð, lítil ferð á logninu, sjórinn 7,1°C og spegilsléttur. Ætlaði varla að tíma að fara upp úr. Skrapp svo og skilaði skammtímalánsbókunum á Kringlusafnið. Tók aðeins eina bók í staðinn sem er nýleg eða frá því í fyrra og með 30 daga skilafresti. Ég er þá með fjórar bækur en ekki fimm hér heima og eftir hálfan mánuð mun ég líklega framlengja skilafresti á þremur af bókunum.

Lagði niður störf í gær

Þrátt fyrir að ég stillti ekki á mig neina klukku og hefði farið að sofa aðeins með seinni skipunum á mánudagskvöldið var ég glaðvöknuð um hálfsex. Var komin á fætur fljótlega. Hitti því aðeins á N1 soninn sem lagði af stað í vinnu um sjö. Ég vafraði ekkert svo lengi á netinu en kynnti mér m.a. viðburðina sem tengdust deginum. Það varð úr að ég ákvað að fara einungis á hápunktinn, samstöðufundinn á Arnarhóli. Notaði tækifærið og lauk við að lesa hina skammtímalánsbókina af safninu, hugaði að næstu skrefum í tiltektinni í mataræðinu til að heila mína blessuðu görn og prjónaði líka smávegis. Kveikti ekkert á sjónvarpinu og var lítið á glugga í samfélagsmiðla. Korter yfir eitt lagði ég labbandi af stað og rifjaði upp leiðina sem ég fór oftast þegar vinnustaðurinn var á Kalkofnsvegi. Það var greinilegt að allar leiðir lágu á torgið og margir fóru labbandi úr Hlíðum og nágrenni. Upp á Skólavörðuholtinu var magnað að sjá "fossana" sem streymdu úr að manni fannst öllum áttum. Var komin á Arnarhólinn korter fyrir tvö og stóð nánast á sama blettinum í einn og hálfan tíma. Veðrið sýndi svo sannarlega á sér sínar bestu hliðar og stundin var magnþrungin. Ég sem yfirleitt forðast að fara í mikla mannþröng sýndi samstöðu og fann bara fyrir töfrum allt í kring. Labbaði svo aðeins aðra leið heim og var komin þangað fyrir klukkan fjögur. Í gærkvöldi kíkti danska frænka mín og nafna til mín en hún var að afhenda Davíð Steini húslykla þar sem þau Mikel eru að skreppa til Danmerkur í dag og verða til sunnudags og hann var búinn að taka að sér að heimsækja kisu á meðan. Hann var einmitt nýkominn af vakt þegar hún mætti á svæðið. Pabbi hennar á afmæli á laugardaginn, verður 76 ára og þau ætla að gera sér glaða daga með honum.

Bíó Paradís

Vinnudagurinn minn í gær varð rétt rúmir átta tímar. Fór beinustu leið í Laugardalslaug eftir vinnu. Kalda potts vinkona mín var þegar búin að fara tvær ferðir í þann kalda þegar ég mætti. Saman fórum við þrjár ferðir í hann, tvær í heitasta pottinn og eina ferð í gufuna. Ég dýfði mér svo smá stund í kalda pottinn áður en ég fór upp úr og heim. Ég mátti semsagt ekki vera að því að synda neitt. Kom heim um hálfsex. Fékk mér kókosvatn og avaocado. Þremur korterum síðar labbaði ég af stað niður í bæ. Var komin rétt á undan esperanto vinkonu minni að Bíó Paradís. Vorum við báðar örlítið snemma í því. Kyrrðarbænasamtökin á Íslandi buðu upp á að sækja sýningu á verðlaunamynd um Thomas Keating: A RISING TIDE OF SILENCE. Sýningin stóð yfir í klukkustund og korter og byggðist á viðtölum við þennan merka mann og ævi hans. Hann var fæddur 1923 og hefði því orðið hundrað ára í ár. Myndin kom út fyrir tíu árum, sama ár og kyrrðarbænasamtökin voru stofnuð. Var komin heim aftur um hálfníu og skrefafjöldi gærdagsins fór yfir tíuþúsundskref.

Fæðingardagur föðurbróður míns

Eins og kom fram í tiltlinum á færslunni í gær átti ég erfiða nótt í fyrrinótt. Fór upp í tiltölulega snemma og las í smá stund. Það voru þannig skilaboð í líkamanum að mér fannst ég hvorki geta legið né setið og var þetta næstum því eins slæmt og þegar ég fékk flensuna í maí í vor. Einhvern veginn fann ég stellingu og sofnaði um stund. Rumskaði um eitt leytið. Skrapp á salernið. Óþægindin voru enn að angra mig en ég sofnaði samt aftur en ekki lengi. Vissi næst af mér um þrjú leytið og fór þá aftur á salernið. Báðar ferðirnar á salernið voru til að pissa. Um fimm leytið var ég að spá í að kannski væri bara best að koma sér á fætur en næst vissi ég af mér upp úr klukkan átta. Þetta varð til þess að ég fór ekki í sund fyrr en um hálfellefu því ég þurfti að vafra aðeins um á netinu og einnig búa til innkaupalista í samræmi við mataræðið þessa dagana. Áttaði mig strax á því í sturtuklefanum að það var bara ágætt að ég væri í sundi á þessum tíma. Hitti nefnilega tvær konur sem ég hef ekki hitt lengi, önnur þeirra er sjósundsvinkona mín og hin kona eins frænda míns. Hitti hann út í laug og hálftíma síðar mætti kalda potts vinkona mín. Því miður fyrir okkur var kaldi potturinn lokaður í gær. Klukkan var byrjuð að ganga eitt þegar ég fór upp úr. Kom við í Krónunni í Skeifunni og líka Heilsuhúsinu í Kringlunni. Hringdi í pabba. Var eitthvað að spá í að skreppa austur og sækja þorskhnakka í kistuna til hans en það varð ekkert úr því. Davíð Steinn hjálpaði mér með vörurnar inn úr bílnum. Þetta voru samt bara tveir pokar, annar léttur, og tveir hlutir í þriðja pokanum fyrir utan sundtöskuna og veskið mitt. Það fór svo þannig að ég skrapp í tuttugu mínútna göngutúr stuttu fyrir fjögur en ekkert í lengra ferðalag á bílnum. Eldaði mér bleikju í kvöldmatinn og hafði slatta af grænu grænmeti með og dass af rauðu súrkáli. 

Erfið nótt

Það er nokkuð víst að líkaminn er að vinna í að afeitra sig. Svaf þokkalega í fyrrinótt en var vöknuð fyrir allar aldir í gærmorgun, fyrir klukkan sex á laugardegi. Lagði af stað í sund í fyrra fallinu og kom við hjá ÓB í Öskjuhlíðinni til að jafna þrýstinginn á dekkjunum. Hitti fleira af "sundfólkinu mínu" í sundi, bros á vörum en sumir voru samt að spá í hvort ekki hefði verið hægt að þrífa sumt betur. Eftir fyrstu ferðina í kalda pottinn fór ég á braut 1 og synti 500 metra, flesta á bakinu en smá bringu- og skriðsund líka. Eftir aðra ferðina í kalda pottinn fór ég í sjópottinn og var það í korter áður en ég fór aftur í kalda, síðan í gufu, stutta dýfu í kalda, smá "sólbað" og svo upp úr að þvo á mér hárið um tíu leytið. Var mætt til esperanto vinkonu minnar um hálfellefu. Ég var búin að ákveða að taka ekki út hafra úr fæðunni fyrr en eftir þessa helgi svo hún bauð mér upp á hafragraut með chia fræjum og kanil og svo jurtate á eftir. Var komin heim rétt fyrir tólf. Kveikti strax á sjónvarpinu og stillti á rás tólf því hádegisleikurinn í gær var milli Liverpool og Everton. Leikurinn fór 2:0 fyrir heima liðið en gestirnir voru einum færri frá því fyrir þrítugustu mínútu í fyrri hálfleik. Eftir leikinn lauk ég við fyrirlestrana og ítarefnið fyrir viku tvö í netnámskeiðinu. Tók einnig saman lista yfir það sem ég þarf að verða mér út um. Var frekar svekkt síðar um daginn þegar ég uppgötvaði að möndlumjólkin sem ég keypti um daginn inniheldur sykur. Keypti hana áður en námskeiðið hófst en ég er samt yfirleitt vön að athuga með innihaldslýsingar. Það hef ég greinilega ekki gert um daginn. Blandaði hluta af mjólkinni við chiafræ en líklega helli ég restinni af fernunni. Ekkert varð úr að ég færi út í búð í gær. Bræðurnir fóru að heimsækja hina fjölskylduna sína. Ég horfði á bart úr nokkrum leikjum í enska, tvo þætti, prjónaði smá en það var ekki fyrr en ég fór upp í rúm á tíunda tímanum að ég las eitthvað.

Næst síðasta helgin í október

Þar sem ég var farin að sofa um tíu í fyrrakvöld kom mér það lítið á óvart að vera farin að losa svefn um fimm leytið í gærmorgun. Þegar ljóst var að ég myndi ekki sofna aftur þrátt fyrir að tæma blöðruna ákvað ég að kveikja á náttborðs lampanum og klára að lesa aðra af skammtímalánsbókunum af safninu. Það voru aðeins eitthvað um 40-50 bls eftir og að þeim lestri loknum var klukkan að verða sex. Þá klæddi ég mig, bjó um, tannburstaði mig og fékk mér glas af sítrónuvatni áður en ég settist inn í stofu með fartölvuna í fanginu. Klukkutíma síðar fékk ég mér sopa af þorskalýsi og drakk annað glas af vatni með vítamíntöflunum mínum. Var mætt í vinnu um hálfátta. Þar sem ég var hvorki í bókhaldi né á ítroðsluendanum fór ég beinustu leið inn á kaffistofu til að fylla á vatnsflöskuna. Hafði prjónana mína með og settist niður um stund. Við sem vorum mætt vorum flest í bleiku í tilefni dagsins. Aldrei þessu vant stóð vinnudagurinn yfir alveg til klukkan að verða hálffjögur. Kortaframleiðslu var lokið um hádegið en ég var í innlögnum eftir hádegi og svo að fara yfir skjöl. Eftir vinnu fór ég beinustu leið yfir í Laugardalinn því um eitt í gær var Laugardalslaugin opnuð almenningi aftur eftir að hafa verið lokuð í þrjár vikur og þrjá daga. Ég hafði lesið um þetta á fimmtudaginn og ákvað í gærmorgun að taka frekar sunddótið með mér þrátt fyrir að föstudagar séu sjósundsdagar. 

Föstudagur

Vaknaði um sex í gærmorgun eftir ágætan nætursvefn. Var í vinnu milli klukkan hálfátta og klukkan að ganga fjögur. Á móttökuendanum í framleiðslunni til hádegis og að hreinsa gull og fara yfir skjöl eftir hádegi. Þrátt fyrir að vera með sunddótið meðferðis fór ég beint heim eftir vinnu. Ég veit að það borgar sig ekki að skrópa of oft en þar sem ég er að vinna í breytingum þessa dagana þá fannst mér liggja meira á að koma heim til að kíkja á netnámskeiðið. En kannski er ég bara að skrökva að sjálfri mér eða alltof góð við mig. Ég notaði amk fyrstu þrjú korterin eftir að ég kom heim til að spjalla við konu eins frænda míns og ég eyddi aðeins minni tíma í námskeiðið. Þetta er svokallað 4 vikna sjálfsnámskeið og einn af kostunum við það er að maður ræður hvenær maður hlustar á fyrirlestrana og skoðar ítarefnið. Rétt fyrir sex fékk ég mér AB mjólk með rúsínum, chiafræjum og smá seríósi. Seríósið er reyndar eitt af því sem á að taka út og í næstu viku eiga allar mjólkurvörur að fara út amk í einhvern tíma. Líklega er best að líta á þessa vegferð sem spennandi ferðalag. En maður má líklega líka halda í vonina um að sumt af því sem tekið er út í þessu ferli muni vera hægt að taka inn aftur. Sjáum hvað setur. Ég er amk ekki búin að drekka kaffi síðan á þriðjudagsmorguninn. 

Fart á tímanum

Þegar ég mætti í vinnuna um hálfátta í gærmorgun var mér hleypt inn í stigaganginn. Þar voru þegar mættir hátt í tíu vinnufélagar og það bættist í hópinn á næstu mínútum. Aðgangskortin virkuðu ekki en sá sem er í móttökunni var að tala við einhvern í símanum. Eftir dágóða stund komst hann inn og amk fimm mínútum seinna opnaði hann fyrir okkur hinum, hleypti okkur öllum inn í einu í gegnum slússuna þar sem á yfirleitt einn að fara í einu hvort sem fólk er að koma eða fara. Hann varð líka að hleypa okkur inn í skrifstofurýmið því aðgangskortin voru ekki orðin virk. Það var verið að vinna í því. Ég gat aðstoðað við að opna ytri hurðina á hvelfingunni uppi. Fyrrum fyrirliði var mætt og fyrirliðinn setti hana í bókhalds- og uppivinnu. Þegar aðgangskortin voru loksins orðin virk kom í ljós að það var samt ekki hægt að nota þau til að opna hvelfinguna niðri. Ég gat hlaðið inn verkefnunum en það var að sjálfsögðu ekki hægt að framleiða neitt fyrr en hægt var að sækja kortavagnana inn í hvelfingu. Sá sem lagaði það kom rétt fyrir níu. Skammturinn sem átti að fara út um tíu var tilbúinn hálftíma fyrr. Við fórum upp með töskuna og í kaffi. Nema nú er ég á þeirri vegferð að sleppa kaffidrykkju og brauðáti í ákveðinn tíma. Það var sem betur fer boðið upp á vínber, jarðaber, osta og sykurlausar sultur en frá og með næstu viku mun ég taka út alla mjólkurvöru í ákveðinn tíma. Ég er að gera þetta til að athuga hvort ég losni við bjúginn ef ég breyti mataræðinu. Var búin í vinnu rétt fyrir tvö. Fór beint í Nauthólsvík og naut þess að hoppa um í öldunum í 6,5°C sjónum í tæpt korter. Fór svo aðeins í gufu og tíu mínútur í heita pottinn áður en ég fór upp úr og heim. 

Pabbi áttatíuogníu ára í dag

Ég varð  svolítið hissa þegar ég vaknaði í gærmorgun og sá að klukkan var orðin sex. Enn voru samt um tuttugu mínútur þar til vekjarinn hefði átt að ýta við mér. Slökkti á honum og fór á fætur. Var mætt í vinnu um hálfátta og var ekki búin fyrr en klukkan að verða fjögur. Þrátt fyrir að vera með sunddótið með mér fór ég beint heim úr vinnu og skrópaði í sundið.

Beint heim eftir vinnu í dag

Var nokkuð snemma á fótum í gærmorgun. Mætti í vinnu á sama tíma og oftast. Ég var í bókhaldinu og á móttökuendanum á vélinni. Kláruðum daglega fyrirliggjandi framleiðslu fyrir klukkan hálftíu. Stuttu fyrir tíu mætti fyrrum fyrirliði og hitti okkur fyrir utan hús. Við fengum far í D30 með vinnufélaga. Öll vorum við að fara til að vera viðstödd minningarstund um samstarfskonu sem tapaði baráttunni við ristilkrabbamein fyrr í mánuðinum. Athöfnin var falleg, erfið og stóð yfir í tæpan hálftíma. Vinnufélaginn sem við fengum far með á staðinn var ekki að fara til baka svo við þrjár tókum leigubíl. Fyrrum fyrirliði kom ekki inn með okkur en hún kemur til vinnu á morgun eftir sex vikna veikindaorlof vegna aðgerðar sem hún þurfti að fara í. Ég var búin í vinnu rétt fyrir klukkan þrjú. Kom við á AO við Sprengisand til að fylla á tankinn áður en ég fór í Sund í sundhöllinni. Synti ekki neitt en var þeim mun duglegri við að pottormast. 

Netnámskeið í að heila görn

Rumskaði alltof snemma en sofnaði þó aftur á endanum. Klukkan var svo um níu þegar ég fór á fætur og tók ég fljótlega þá ákvörðun að halda kyrru fyrir heima. Eina sem ég fór úr íbúðinni voru tvær ferðir í þvottahúsið. Vafraði á netinu milli klukkan hálftíu og tólf. Helmingurinn af þeim tíma fór í að klára fyrstu vikuna af fjórum á netnámskeiði sem ég skráði mig á rétt eftir síðustu mánaðamót. Yfir hádegisfréttunum fór ég langt með að ljúka við enn eina tuskuna, kláraði hana alveg og gekk frá endum í gærkvöldi. Rétt fyrir tvö var ég búin að setja upp vatn í hraðsuðukönnuna og til stóð að hella upp á fyrsta kaffibolla dagsins og fara að fylgjast með landsleik í handknattleik kvenna. Þá hringdi síminn. Á línunni var ein af fyrrum samstarfskonum úr kortadeildinni. Úr varð þriggja kortera símtal. Klukkan var því þrjú þegar ég drakk fyrri kaffibollann af tveimur. Seinni partinn af deginum notaði ég í þáttaáhorf. Var með bækur með mér í stofunni en ég tók þær aftur með mér inn í herbergi þegar ég fór í háttinn um hálftíu og las þá í tæpan klukkutíma. 

Hvíldardagur

Þegar ég leit út í gærmorgun sá ég snjóföl yfir öllu. Hins vegar þurfti ég ekki að skafa af bílnum þegar ég lagði af stað í sund um átta. Snjórinn var laus á og ekki á hliðarrúðunum og rúðuþurrkurnar unnu strax á þessu bæði á fram og afturrúðu. Lagði bílnum á stæði við Austurbæjarskóla og labbaði þaðan spölinn í Sundhöll Reykjavíkur. Eftir fyrstu ferðina í kalda pottinn fór ég beint í innilaugina. Þar var einn á hverri braut en ég fann mér pláss á braut 2 og synti í uþb hálftíma, flestar ferðirnar á bakinu. Yfirleitt er ég frekar "feimin" við að synda á bakinu ef einn eða fleiri eru á sömu braut en í gærmorgun var þetta ekkert mál. Sá sem var fyrir á brautinni syndir með hljóðum svo ég vissi yfirleitt hvenær við vorum að mætast á brautinni. Næst fór ég smá stund í heitasta pottinn sem er á svölunum og annar af elstu pottunum. Átti svo eftir að fara þrjár ferðir í kalda, eina ferð í gufuna og eina í nuddpottinn áður en ég fór upp úr og þvoði mér um hárið. Klukkan var rétt byrjuð að ganga ellefu þegar ég rölti að bílnum aftur. Í þetta sinn þurfti ég að sópa af honum. Var búin að mæla mér mót við esperanto vinkonu mína en þó ekki fyrr en um hálfellefu. Mér fannst samt ekki taka því að skutlast fyrst heim með sunddótið heldur fékk ég mér smá bíltúr út á Gróttu. Var komin á Sólvallagötuna rétt rúmlega hálfellefu og stoppaði þar til klukkan tólf. Lásum saman eina blaðsíðu og það voru nokkur orðin sem við glósuðum hjá okkur. Fór ekkert út aftur eftir að ég kom heim en tvær ferðir í þvottahúsið með fimm tíma millibili, aðra til að setja í vél og ná í þvottinn af snúrunum og hina til að hengja upp. Annars fór dagurinn í lestur, netvafr, netnámskeið, þáttaáhorf, og prjón. 

Smá snjór

Hafi ég vaknað heldur snemma í fyrradag þá sló ég það met í gærmorgun. Rumskaði um hálffimm og rúmum hálftíma síðar varð mér ljóst að ég var glaðvöknuð. Það eru aldrei vandræði með að eyða tímanum fram að vinnutíma en get alveg þurft að passa mig að gleyma mér ekki í grúskinu, vafrinu á netinu eða lestrinum þegar ég gríp í bók að morgni til. Var mætt í vinnu rétt fyrir klukkan hálfátta. Ég var í bókhaldsvinnunni og tók saman tölur. Færri en fimmtíu kort voru til framleiðslu í fyrsta skammtinum en sá skammtur fer úr húsi um tíu á morgnana. Debet dagurinn náði heldur ekki tvöhundruð kortum. Vorum búnar niðri í bili um hálftíu. Fór aðeins í innlagnir eftir kaffi og gekk vel. Þurfti bara að fá ráð um eitt atriði en allt annað gekk vel. Hádegisskammturinn var innan við sextíu kort. Fyrirliðinn var upp tekin alveg til klukkan rúmlega hálftólf en þá fórum við niður og það tók okkur ekki nema hálftíma að framleiða, telja, pakka og ganga alveg frá kortadeildinni. Eftir mat fór ég aftur í innlagnir. Vorum búin um tvö leytið og ég var komin í Nauthólsvík fljótlega eftir það. Hitastigið á sjónum hafði lækkað um heila gráðu frá því á miðvikudaginn en ég fór í fyrsta sinn í sjósunds skóna mína síðan ég lagði þeim í vor eftir að sjórinn var orðinn átta til níu gráður. Svamlaði um í uþb tuttugu mínútur og ætlaði varla að tíma að fara upp úr. Fékk svo gott kikk í líkamann þegar ég fór í heita pottinn. Var komin heim rétt fyrir klukkan fjögur.

Sjórinn 5,8°C

Vaknaði heldur snemma í gærmorgun. Var komin á stjá um hálfsex leytið. Mætti í vinnu rétt fyrir hálfátta. Var aftur á ítroðsluendanum. Þegar daglegri kreditkortaframleiðslu var lokið snerum við okkur beint að því að framleiða auka kreditendurnýjunina. Þegar rétt rúmlega hundraðogsjötíu kort voru óframleidd af sexhundruðogsextíu urðum við að hætta því formin voru alveg á þrotum. Eftir kaffi framleiddum við debetkortapöntun dagsins og svo hádegis kreditskammtinn í kjölfarið. Stuttu eftir mat bárust fleiri form svo við gátum farið niður aftur og klárað það sem stóð útaf. Var búin í vinnu um hálfþrjú. Fannst of snemmt að leggja bílnum við Austurbæjarskóla til að fara í sund í Sundhöllina svo ég skrapp heim og náði í bókasafnspokann með öllum átta bókunum af safninu. Tók aðeins fimm bækur í staðinn en tvær af þeim eru á skammtímaláni svo ég hef líklega aðeins tvær vikur til að lesa þær. Það ætti nú að takast en hugsanlega verður hægt að framlengja um aðrar tvær ef enginn pantar þær í millitíðinni. Var komin í sund um hálffjögur og hitti konuna sem ég kynntist þegar ég var í heimsókn hjá Lilju vinkonu á Kanaríeyjum mánaðamótin janúar/febrúar 2019. Ég fór 4 ferðir í kalda, synti í uþb tuttugu mínútur, fór eina ferð í heitasta pottinn og eina í gufuna áður en ég fór upp úr og heim. 

Bókasafnið

Gærdagurinn var annasamur en skemmtilegur. Var mætt í vinnu rétt fyrir klukkan hálfátta. Fór niður í kortadeild að kveikja á vélinni, undirbúa daginn og hlaða inn skránum. Fann óvenju fáar skrá í möppunum og hélt fyrst að framleiðslan yrði fljót afgreidd. Hins vegar frétti ég það þegar ég kom upp aftur til að fylla á vatnsbrúsann og fá mér smá kaffi að það hefðu verið sendar nokkuð stórar endurnýjunarskrá og stór hluti af daglegri framleiðslu seinni partinn í fyrradag og þær skrá sem voru svo sendar á venjulegum tíma ýttu þessum skrám í skráar súpuna. Það þurftir því að hlaða inn fleiri skrám og það tók aðeins lengri tíma að "leita" þær uppi á almenna svæðinu. Fyrir utan daglega vinnslu kláruðum við debet hlutann af auka endurnýjuninni. Lokuðum og gengum frá kortadeildinni um hálffjögur og ég var komin í sjóinn tíu mínútur yfir fjögur. Notaði strandskóna, þurfti ekki að vaða hálfaleið til Kópavogs og ég svamlaði um í tæpar tíu mínútur í 6,8°C. Þá var mér farið að verða kalt á tánum svo ég fór í heita pottinn í smá stund áður en ég fór upp úr og heim. Um hálfsjö lagði ég af stað í Kópavog. Átti að hitta núverandi og tvær fyrrverandi kortadömur á Brasserie Kársnes klukkan sjö. Ég taldi mig hafa nægan tíma en lenti í smá villum og mætti síðust af okkur fimm þegar klukkan var tíu mínútur gengin í átta. Þær spurðu mig hvort ég hefði synt yfir og tafist á leiðinni. Fljótlega eftir að ég mætti voru teknar niður pantanir. Hinar fjórar pöntuðu allar hamborgara en ég valdi fisk dagsins sem reyndist vera mjög gómsæt bleikja með smælki og sallati. Hittingurinn stóð yfir í tæpa tvo tíma. Ég var komin heim rúmlega níu. Kveikti ekkert á sjónvarpinu og fór í háttinn um hálftíu. Var búin að lesa allar bækurnar af safninu en þegar ég fór á bókamarkaðinn við Fiskislóð um daginn keypti ég m.a. nýjustu bókina eftir Lilju Sigurðardóttur og ég byrjaði á henni í gærkvöldi. Ætlaði varla að geta lagt hana frá mér en eftir rúmlega hálftíma lestur var ég samt orðin það syfjuð að ég ákvað að vera skynsöm og fara að sofa.

Sjósund

Svaf nokkuð ágætlega í fyrrinótt. Vaknaði á undan vekjaraklukkunni og var mætt í vinnu um hálfátta. Upp úr klukkan hálfþrjú fékk ég að fara því ég átti tíma í árlegt tanneftirlit. Tannlæknastofan er flutt á milli hæða í Valhöll. Var alltaf, þann tíma sem ég hef sótt hana, á fjórðu hæð en í mars sl. flutti hún niður á þriðjuhæð. Ég vissi ekki af þessu fyrr en ég kom úr lyftunni í gær og sá tilkynningu um flutningana við gamla innganginn inn a stofuna. Labbaði niður á þriðju. Þegar kom að mínum tíma vildi tannlæknirinn byrja á því að nota nýjustu græjuna og taka panorama mynd af tönnum og tanngarði. Hann vildi m.a. fá að sjá hvernig barnajaxlinn hefur það. Hann sagðist vilja senda inn umsókn um niðurgreiðslu vegna brúar sem þarf að gera fyrr eða síðar. Þar sem þetta er "fæðingargalli" er mjög líklegt að umsókninni verði svarað játandi og þá hef ég ár til að ákveða hvort ég dembi mér í þessi mál næstu misserin eða hvort ég fái tannlækninn til að sækja um aftur að ári þegar ég á næsta eftirlitstíma. Reyndar sagði hann að það lægi meira á að setja krónu í stað rótarfyllts jaxls niðri hægra megin. Ég ákvað að festa tíma fyrir það í febrúar n.k. en get alltaf afbókað þann tíma ef ég vil fresta þessu eitthvað lengur.

Mætti í Sundhöllina um hálffjögur leytið. Hitti eina sem ég hitti yfirleitt í Laugardalslauginni en þar sem sú laug er enn lokuð vegna framkvæmda dreifast sundlaugargestir í aðrar laugar á höfuðborgarsvæðinu á meðan. Fór 3 sinnum í kalda, synti í tæpar tuttugu mínútur og fór einu sinni í langa nuddpottinn á útisvæðinu áður en ég fór upp úr. Skrapp svo í Krónuna við Fiskislóð áður en ég fór heim.

Árlegt tanneftirlit

Í fyrrinótt svaf ég eitthvað skringilega og alls ekki nóg. Var komin á fætur um sex og mætt í vinnuna um hálfátta. Klukkutíma síðar vorum við fyrirliðinn að framleiða kort á fullu þegar mér datt í hug að kíkja aðeins á facebook. Þá var maður samstarfskonu okkar og fyrrum yfirmanns nýbúinn að setja inn mjög dapurlega færslu því konan hans hafði tapað fyrir ristilkrabba kvöldið áður. Við höfðum fengið þær fréttir fyrir örfáum vikum að það liti alls ekki vel út og meinið væri ólæknandi. Ég gerði mér samt ekki ljóst að það væri svona stutt eftir. Við fyrirliðinn fengum báðar nett áfall og sem betur fer var smá endurnýjun ólokið því við vorum alls ekki tilbúnar að fara strax upp. Fórum ekki upp fyrr en um tíu. Var í vinnu til klukkan að verða hálffjögur. Þá var ég það lúin að þrátt fyrir að ég væri með sunddótið meðferðis fór ég beinustu leið heim. Var komin upp í rúm fyrir klukkan hálftíu og sofnuð rúmlega tiu. 

Erfiðar fréttir

Rumskaði um sex leytið í gærmorgun við það að vera í spreng. Fannst samt eins og ég væri bara nýsofnuð og hellingur eftir af nóttinni. Eftir að hafa skroppið á salernið fór ég beinustu leið í rúmið aftur. Vissi næst af mér um níu. Það leið samt tæpur hálftími þar til ég fór á fætur. Um hálfellefu leytið hellti ég upp á kaffi. Rúmum klukkutíma eftir það setti ég upp saltfisk, kartöflur og niðurkorna og skrælda rófu saman í pott. Beið eftir suðunni og sauð svo þar til kartöflurnar voru tilbúnar. Við pabbi vorum að borða stuttu fyrir klukkan eitt. Um eitt settist ég fyrir framan imbann og horfði á leik í enska; Brighton - Liverpool 2:2. Fljótlega eftir að leiknum lauk hellti ég aftur upp á kaffi og við pabbi fengum okkur pönnsur. Rétt fyrir fjögur tók ég mig saman, kvaddi og brunaði í bæinn. Hlustaði á Rokkland með Óla Palla á rás tvö þar sem hann fór yfir feril Sinead O´Connor.

Um hálfníu leytið í morgun bárust þær erfiðu fréttir að samstarfskona til sl tíu ára væri fallin frá eftir baráttu við ristil krabbamein. Kona sem var ekki orðin 53, greindist í nóvember í fyrra. Meðferð virtist vera að skila jákvæðum árangri í vor en fyrir stuttu síðan fengum við þær fréttir að meinið væri búið að dreifa sér og það væri stutt eftir. Okkur grunaði ekki hversu stuttur tími þetta var. Hugurinn er núna hjá fjölskyldu og vinum hennar og verður þar líklega áfram næstu daga og vikur.

Heima hjá mér

Hafði ekki stillt á mig vekjaraklukku en vaknaði engu að síður einhvern tímann á sjöunda tímanum í gærmorgun. Tíminn leið fljótt við netvafr en svo var ég komin í Sundhölluna um átta leytið stuttu eftir að opnaði. Eftir fyrstu ferðina í þann kalda ætlaði ég að demba mér beinustu leið í innilaugina en þá var lokað fyrir aðgengi að henni vegna skorts á starfsfólki. Eftir smá stund í heitasta pottinnum, aðra ferð í þann kalda, korter í gufunni og þriðju ferðina í kalda pottinn var búið að opna á notkun innilaugarinnar. Ég fór á braut 1 og synti í tæpt korter, flestar ferðirnar á bakinu. Tók svo eina ferð í kalda, nokkra stund í heita/nudd pottinn úti, fimmtu ferðina í kalda og smá stund í sólbað áður en ég fór inn í sturtu og þvoði mér um hárið. Var mætt til esperanto vinkonu minnar rétt fyrir hálfellefu. Hún tók vel á móti mér en þó með þeim orðum að við yrðum að fresta esperanto lestri þar til síðar. Stoppaði hjá henni í um klukkustund áður en ég fór heim. Þá var ég ekki alveg búin að ákveða næstu skref. Það varð þó úr að um eitt leytið setti ég niður í tösku og brunaði austur á bóginn eftir að hafa hringt í pabba og sagst líklega vera á leiðinni. Var komin um hálfþrjú. Skömmu síðar hellti pabbi upp á könnuna. Eftir kaffi ákvað hann að skella sér í að búa til pönnuköku stafla. Eftir kvöldfréttir hafði ég steikta bleikju með soðnum kartöflum og hrásallati í matinn. Aldrei þessu vant fékk ég mér ekkert hvítvín, hvorki með matnum né seinna um kvöldið. Ég á samt ennþá hvítvínsbelju í öðrum ísskápnum hjá pabba.Kassa sem ég keypti einhvern tímann í vor eða sumar. 

Komin austur á Hellu

Fram að hádegi framleiddum við fyrirliðinn dagleg kort og rúmlega sjöhundruð að auki í endurnýjun. Kaffipása á milli hálftíu og tíu. Eftir hádegi hjálpuðum við til uppi. Vinnudegi lauk upp úr klukkan hálfþrjú eða rétt rúmlega það. Ég fór beinustu leið í Nauthólsvík. Á leiðinni þangað spjallaði ég við Lilju vinkonu en torgarvertíðinni er lokið hjá henni, lauk sl. mánaðamót. Svamlaði um í uþb tuttugu mínútur í sjónum og sat svo korter í heita pottinum áður en ég fór upp úr og heim. Setti í eina handklæðaþvottavél og stillti á prógram sem er 4,5 klst langt. Vafraði á netinu til klukkan að ganga sjö en sat svo fyrir framan imbann alveg til klukkan langt gengin í ellefu. Þá "skreið" ég loksins inn í rúm og las í smá stund áður en ég fór að sofa.

Sjósundsdagur

Vinnudagurinn var passlega langur. Vissi ekki fyrirfram hversu langur svo ég tók ekki sunddótið með mér og fór því beint heim eftir vinnu. Um hálffimm skutlaði Oddur Smári mér yfir í Kópavoginn, nánar til tekið á Dalveg 30 þangað sem RB-ingar sem voru áður staðsettir í Katrínartúni 2 voru að flytja stuttu fyrir síðusu mánaðamót. Í gær var innflutnings partý og okkur sem erum með vinnuaðstöðu annars staðar á höfuðborgarsvæðinu var boðið að koma, taka þátt í partýinu og skoða nýja húsnæðið. Aðgangskortið sem ég notaði í K1 og nota núna til að ná í gögn sem ég sendi á prentarann í vinnunni, gildir líka á aðgangsstýringar á D30. Ég hafði verið að spá í að taka það kort með mér heim úr vinnunni í gær en stakk því í staðinn niður í skúffu. Mér var nú samt hleypt inn. Fyrrum fyrirliði mætti á svæðið upp úr klukkan hálfsex. Hún var með sitt kort. Hún bauð mér far heim um sjö leytið þrátt fyrir að það væri ekki beint í leiðinni heim til hennar. Hún er annars enn í veikinda leyfi en það styttist í að hún megi mæta aftur til vinnu. Afgangurinn af kvöldinu fór í mest lítið en ég var komin upp í rúm um níu leytið og farin að sofa um hálftíu. 

Innflutningspartý í D30 á eftir

Vinnudagurinn  hjá mér í gær kláraðist um fjögur leytið. Það fór ég í Nauthólsvík. Sjórinn var 8,4°C, það var fjara en ég var að svamla í honum í uþb tuttugu mínútur. Sat svo annað eins í heita pottinum. Þegar ég hafði lagt bílnum fyrir utan heima fór ég í stuttan göngutúr.  Labbaði 1,5km á 19 mínútum sléttum. Eftir að hafa gengið frá sjósundsdótinu settist ég niður í stofu með fartölvuna í fanginu og vafraði á netinu og setti m.a. inn færslu á þessum vettvangi. Var búin að slökkva á tölvunni áður en klukkan sló sjö. Fékk mér AB mjólk með chia fræum, rúsínum og musli og seinna fékk ég mér harðfiskbita. Horfði á fréttir og þætti og svo fyrstu Kilju vetrarins nokkru seinna heldur en í línulegri dagskrá enda var klukkan að byrja að ganga ellefu þegar ég fór loksins í rúmið.

Aftur sund og göngutúr eftir vinnu

Vaknaði óþarflega snemma í gærmorgun. Fór þó ekki á fætur fyrr en stuttu fyrir klukkan sex. Mætti í vinnuna á svipuðum tíma og venjulega. Fór beint í að taka saman framleiðslutölur dagsins. Það var einnig komin smá endurnýjun á bæði debet og kredit kort fyrir einn bankann. Öllum skrám var hlaðið inn á framleiðsluvélina en endurnýjunar skrárnar voru látnar bíða. Daglegri framleiðslu lauk upp úr klukkan hálftólf. Fyrirliðinn kvaddi um leið og búið var að ganga frá í kortadeildinni, var í fríi eftir hádegi. Ég fékk mér að borða, kláraði bókhaldsvinnuna en um eitt leytið fór ég í að hjálpa til við að vinna í innlögnunum og fleiru. Var búin í vinnunni korter yfir þrjú. Fór beinustu leið í Sundhöllina. Fór fjórar ferðir í kalda, synti í ca tuttugu mínútur, eina ferð í heitasta pottinn og eina í gufu. Eftir að ég lagði bílnum í götunni heima fór ég í aðeins lengri göngutúr en í fyrradag. Labbaði 2,16 km á 27 mínútum sléttum.

Sund og göngutúr eftir vinnu í gær

Vaknaði á undan klukkunni í gærmorgun. Mætti í vinnu um hálfátta. Fyrirliðinn tilkynnti smá seinkun en ég tók saman þær tölur sem við fáum póst um og prentaði út alla pappíra. Þær tölur sem við fáum ekki póst um handskrifuðum við inn á framleiðslublöðin þegar við fórum niður. Milli tíu og rúmlega ellefu vann ég að því að klára mánaðamótavinnuna í reikningagerðinni og undirbúa og tengja fyrir næstu mánaðamót. Kláruðum daglega framleiðslu um tólf. Var að vinna til klukkan langt gengin í fjögur. Fór svo beinustu leið í Sundhöllina. Lagði bílnum við Austurbæjarskóla. Synti ekki nema rúmar tíu mínútur en fór fjórum sinnum í kalda pottinn. Þegar ég kom heim fékk ég stæði fyrir framan hús. Fór í stuttan göngutúr, 1,6 km á 19 mínútum, áður en ég fór inn.

Fyrsti mánudagur mánaðarins

Vaknaði um klukkan sjö í gærmorgun. Korter fyrir níu tók ég sunddótið með mér út í bíl og ók upp í Úlfarsárdal til að prófa sundlaugina þar. Þarna opnar klukkan níu um helgar og aðstaðan er til fyrirmyndar. Útilaugin skiptist í 6 tuttuguogfimm metra brautir. Það er líka innilaug og gufa. Kaldi potturinn og heitasti potturinn eru hlið við hlið og svo eru fleiri mismunandi heitir pottar. Ég byrjaði á því að prófa kalda pottinn. Hann var skráðu 8-10°C en mæling gærdagsins sýndi hann yfir 13°C enda hefði ég næstum getað setið endalaust í honum. Sat í 10 mínútur fyrstu ferðina af fjórum. Synti 500 metra á braut eitt en á milli hinna ferðanna í þann kalda prófaði ég heitasta pottinn og gufuna. Ég átti svo í smá erfiðleikum með að taka ekki bók með mér heim af bókasafninu sem er staðsett á sama stað. Sá þarna amk tvær sem mig langaði að lesa en báðar þeirra voru með 14 daga skilafrest og þar að auki er ég búin að lofa mér að sækja ekki fleiri bækur fyrr en ég er búin að lesa síðustu bókina af Kringlusafninu. Skrapp í "heimsókn" til N1 sonarins sem var á vakt á N1 stöðinni við Gagnveg. Þegar ég var búin að jafna þrýstinginn á dekkjunum sníkti ég smá kaffi. Kvaddi á tólfta tímanum og var komin í stæði fyrir framan hús um hálftólf. Fór í stuttan göngutúr um hverfið áður en ég fór inn. 

Ný laug prófuð í morgun

En ég skrifa aðeins um gærdaginn. Var vöknuð um sjö og rúmum klukkutíma seinna var ég komin í Sundhöllina. Byrjaði á því að setjast í kalda pottinn í rúmar fimm mínútur. Þá fór ég á braut 1 í innilauginni og synti 500metra á rétt rúmum tuttugu mínútur, flestar ferðir á bakinu en 2x25 m á skriðsundi og 3x25 m bringusund. Skellti mér svo í heitasta pottinn og hitti fyrir ritarann í stjórn óháðasafnaðarins og manninn hennar. Tíu mínútum seinna fór ég niður, út og aftur í kalda pottinn. Var ný sest í hann þegar ég tók eftir kunnuglegri konu í heitapottinum hinum megin við útilaugina. Veifaði til hennar og fékk veif til baka. Fimm mínútum síðar var ég svo komin í pottinn til hennar. Áttum gott hálftíma spjall eða rúmlega það áður en hún skellti sér út í laugina en ég dýfði mér smástund í kalda pottinn áður en ég fór inn í sturtu og þvoði mér um hárið. Var komin til esperanto vinkonu minnar um hálfellefu. Við spjölluðum líka mikið saman en lásum líka rúmlega hálfa plaðsíðu í kennslubók á og um esperanto. Kom heim um tólf leytið og fór ekkert út aftur. Horfði á leiki í enska boltanum og sinnti einnig húsverkum sem ekki má skrifa um. 

Helgi og mánaðamót

Þriðja morguninn í sömu vikunni var ég vakin af vekjaraklukkunni eftir aðra svefnskrykkjótta nótt. Var samt mætt í vinnu um hálfátta. Vinnudagurinn stóð til klukkan að ganga þrjú og nýttist í framleiðslu og mánaðamótabókhalduppgjör. Var með sjósundsdótið í skottinu en ég fann að dagsformið var heldur bágt sennilega vegna of lítis svefns og svo mikillar einbeitingar í mánaðamótauppgjöri. Þannig að ég endaði heima og var komin þangað óvenju snemma eða upp úr klukkan hálfþrjú. Sá fyrir mér að líklega yrði ég að fara snemma í háttinn um kvöldið. En þegar til kom fór ég ekkert svo snemma í háttinn en heldur ekkert svo seint.

Mánaðamót

Vaknaði tuttugu mínútum áður en vekjarinn átti að hringja. Mætti í vinnu um hálfátta. Við fyrirliðinn vorum í kortaframleiðslu til hádegis en að hjálpa til uppi eftir hádegi. Verkefnum var ekki lokið fyrr en klukkan var korter í fjögur. Fór aftur í Sundhöllina. Synti ekki nema 200 metra en var heldur ekki nema uþb klukkutíma á svæðinu. Fór þrjár ferðir í kalda pottinn, eina í gufu og eina í heitasta pottinn. Fékk stæði við hliðina á innkeyrslunni. Tók stuttan göngutúr áður en ég fór inn. 

Sundhöllin

Annan morguninn í röð vaknaði ég við vekjaraklukkuna en að þessu sinni var svefninn miklu miklu betri. Svaf örugglega í átta tíma og var að dreyma eitthvað fallegt þegar ég var vakin í gærmorgun. Mætti í vinnu um hálfátta. Ætlaði að taka kerfin niðri af en varð það á að setja af stað kerfið uppi. Eða eins og sá í afgreiðslunni sagði þegar hann hringdi í securitas; "Svolítið breiðir þumalfingur"! Mér tókst að taka kerfin skammlaust af í annarri tilraun og snéri mér svo að því að taka saman framleiðslutölur. Fyrirliðinn fór niður að hlaða inn og "sækja" þær tölur sem kom án tilkynninga. Í kaffinu kom sú sem á að sjá um kaffistofuna á miðvikudögum þegar boðið er upp á brauð og kruðerí og oft haldnir fundir um það sem er á döfinni. Fór í smá innlagnir. Tók þó ekki mikið og var búin að skila af mér um það leyti sem tölur um hádegisframleiðsluna skiluðu sér. Vorum búnar niðri um tólf. Eftir mat tók ég að mér að sjá um frágang í eldhúsinu þar sem það var mjög mikið að gera hjá þeim sem eiga kaffistofuvaktina þessa vikuna.  Svo hreinsaði ég gullið áður en ég fór aftur í innlagnir. Klukkan var langt gengin í fjögur þegar mínum verkefnum var lokið. Þar sem Laugardalslaugin er lokuð þessa dagana ákvað ég að skreppa í Sundhöllina. Lagði bílnum á stæði við Austurbæjarskólann. Það kom mér á óvart að það var ekkert svo margt um manninn, fékk meira að segja pláss til að synda á einni af fjórum brautum í útilauginni og synti alveg í tuttugu mínútur. Fór þrisvar í kalda pottinn, einu sinni í heitasta sem er 42°C og einu sinni í gufu. Var komin heim um hálfsex. Ákvað að framlengja skilafrestinum á þeim bókum sem ég sótti á safnið fyrir mánuði síðan. Á aðeins eftir að lesa eina bók en ég get þá skilað öllum bókunum átta þegar ég hef lesið hana.

Framlenging á bókaskilum; seinni fjórar

Svaf frekar lítið í fyrrinótt. Rumskaði eftir rúmlega tveggja tíma svefn og var allt í einu glaðvöknuð. Kveikti á lampanum og greip í bókina sem ég er að lesa; Mín sök sem ég hef minnst á hér áður. Spennan var svo mikil að ég steingleymdi tímanum og las í rúma tvo klukkutíma. Gerði svo tilraun til að sofna aftur. Um fimm leytið var ég að spá í hvort ég ætti bara að fara á fætur en svo vissi ég næst af mér um hálfsjö þegar vekjaraklukkan truflaði hjá mér ágætis draum. Var mætt í vinnuna um hálfátta. Á milli framleiðsluskammta og eftir hádegi vorum við fyrirliðinn að hjálpa til í innleggjunum. Fannst ég vera pínu utan við mig og þurfti óvenju mikla aðstoð á köflum en samt var sagt að það munaði um þessa hjálp. Mínum vinnudegi lauk um hálffjögur. Þá fór ég beinustu leið heim. Horfði á landsleikinn Þýskaland - Ísland með öðru auganu en þegar staðan var orðin 4:0 fyrir þýsku fótboltastelpurnar skipti ég yfir í þáttaáhorf. Var komin í rúmið fyrir hálftíu og farin að sofa um tíu.

Innlagnir og yfirferð

Var vöknuð og búin að slökkva á vekjaraklukkunni tæpum hálftíma áður en hún átti að hringja. Mætti í vinnu um hálfátta. Vélin var með mánudagsstæla eða mótþróaþrjóskuröskun en við komum henni af stað upp úr klukkan hálfníu. Eftir kaffi tók ég innlegg úr nokkrum vínbúðum á höfðuborgarsvæðinu. Handtaldi úr pokunum því ég mundi ekki eftir því að það var hægt að setja seðlana á spjöld. Klukkan var korter í tólf þegar ég fór loksins niður til að hlaða inn, gera skiptiblað og framleiða hádegisskammtinn. Fyrirliðinn var farin amk tuttugu mínútum á undan mér að taka til í framleiðsluna og svo beið hún bara róleg eftir mér. Hún sat svo yfir viðgerðarmönnunum þegar þeir komu rúmlega tólf á meðan ég skrapp í mat. Yfirferðinni lauk korter fyrir fjögur og ég fór beinustu leið í Nauthólsvík. Engin ferð á logninu, flóð og 9°C. Svamlaði út að kaðli og kom svo við í lóninu á leiðinni í heita pottinn. Eftir sjósundsferðina skrapp ég í Krónuna vestur á Fiskislóð sem opnaði nýlega aftur eftir miklar breytingar.

Síðasti mánudagur septembermánaðar

Rumskaði um hálffimm leytið í gærmorgun og þurfti á salernið. Gerði heiðarlega tilraun til að kúra mig niður aftur en í staðinn helltist andinn yfir mig og ég varð að ná í símann til að skrá niður tvær nýjar limrur. Fór ekki á fætur fyrr en um átta en hafði ekki sofnað aftur. Hellti upp á kaffi um níu leytið, lagði kapla, vafraði á netinu, prjónaði og las. Hafði bleikju í matinn eftir hádegisfréttir og horfði svo á Liverpool leikinn. Hellti aftur á könnuna um þrjú leytið. Um fjögur tók ég mig saman, kvaddi pabba og brunaði beinustu leið heim.

Rok og rigning úti, sól í sinni inni

Dreif mig á fætur um sjö leytið í gærmorgun. Vafraði aðeins um á netinu eftir morgunverkin á baðherberginu en var komin í Laugardalslaugin rúmlega átta. Þar var að byrja sundmót í innilauginni, Stæðin á planinu fyrir framan að fyllast og nóg að gera í búningsklefunum. Ég byrjaði á því að skella mér í kalda pottinn í uþb fimm mínútur. Synti svo 400 metra, helminginn á bakinu hinn helminginn á skriðsundi og bringusundi. Eftir næstu ferð í kalda fór ég beint í gufuna. Svo kalda sturtu og í sjópottinn. Þar lenti ég á kjaftatörn en ég hafði þó tíma til að dýfa mér í þann kalda í nokkrar sekúndur áður en ég fór inn og þvoði mér um hárið. Var í vandræðum með að bakka út úr stæðinu vegna bíls sem var vinstra megin við minn bíl. Sem betur fer kom þarna kona að sem var að sverma fyrir stæðinu. Hún gat leiðbeint mér þessa fáu metra sem ég var óviss um eftir að ég hafði þó dregið hliðarspegilinn bílstjórameginn inn. Var mætt til espernato vinkonu minnar tuttugu mínútum seinna. Stoppaði hjá henni í eina og hálfa klukkustund og stór hluti af þeim tíma var helgaður lestri á esperanto. Fór svo beint heim með sund- og espreantodótið, setti niður í tösku og dreif mig austur til pabba til "rugla" aðeins í helgarrútínunni hans, eða þannig. 

Á Hellu þessa helgina

Ég var mætt í vinnu rétt fyrir klukkan hálfátta í gærmorgun. Stimplaði mig inn á slaginu hálf og fór niður í kortadeild að kveikja á vélinni og "sækja" þær tölur sem ekki kemur póstur um. Svo fór ég upp, fyllti á vatnsflöskuna, fékk mér einn kaffibolla og prjónaði eina umferð í tuskunni sem er á prjónunum núna. Við fyrirliðinn fórum niður rétt rúmlega átta og kláruðum framleiðslu og pökkun á þeim skömmtum sem lágu fyrir og föstudagstalningu að  auki áður en klukkan varð hálftíu. Eftir tíu þurfti fyrirliðinn að skreppa aðeins úr húsi en næsti framleiðsluskammtur var hvort eð er ekki að koma fyrr en upp úr ellefu. Ég fór því í "innleggs-vinnu" uppi í um klukkutíma. Tók einnig saman hádegistölurnar, skipti- og talningablað og fór niður að hlaða inn og fylla út skiptiblaðið. Svo komu fyrirmæli frá framkvæmdastjóra um að koma upp í mat en hann kom með eldbakaðar pizzur í hús upp úr klukkan hálftólf. Hann hafði annars kíkt á okkur um átta leytið um morguninn með mjög erfiðar fréttir af fyrrum yfirmanni. Fer kannski út í þá sálma seinna. Vinnudegi var lokið um tvöleytið og ég fór beinustu leið í Nauthólsvík. Hringdi í tvíburahálfsystur mína á leiðinni þangað til að leita frétta af tvíburahálfmömmu minni. Þar er staðan öllu betri, hægur bati þó en svo sagði Sonja mér af því að það hafði verið viðtal við systurdóttur mína í tíu fréttunum á fimmtudagskvöldið. Ég var rúmar tuttugu mínútur í sjónum og ca helminginn af þeim tíma í heita pottinum. Hringdi í pabba þegar ég var á leiðinni heim. Bríet var þá stödd hjá honum og talaði líka við mig en hann sagðist einmitt líka hafa séð viðtalið við hana kvöldið áður og horft á það tvisvar. Þegar ég kom heim var ég fljót að kveikja á sjónvarpinu og velja að horfa á tíu fréttirnar frá því 21. september. Það sem ég er endalaust stolt af þessari systurdóttur minni sem ég á smá þátt í að hún varð til, allt vegna þess að mamma hennar vildi fá mitt álit og skoðun á því sem hún var að velta fyrir sér síðla árs 2003. Fyrst vildi ég ekkert segja um málið en systir mín sótti fast eftir mínu áliti og af tveimur valkostum sem hún velti upp var svarið hjá mér; Þú getur alveg gert bæði (...stundað nám og eignast annað barn)!

Sjórinn 8,6°C

Var búin að klæða mig, búa um og slökkva á vekjaranum amk tuttugu mínútum áður en hann átti að hringja í gærmorgun. Mætti í vinnu um hálfátta. Vinnudagurinn fór allur fram í kringum kortin en honum var lokið fyrir klukkan tvö. Fyrir utan daglega framleiðslu kláruðum við endurnýjun og svo var förgun á ónýtu plasti frá júní, júlí og ágúst. Gjafakortið sem fannst í vélinni í upphafi vikuknnar eftir að hafa verið "týnt" síðan í október í fyrra var líka tætt niður. Var komin í Laugardalslaugina rétt rúmlega tvö. Fór beinustu leið á braut átta og synti 500 metra. Var búin að fara eina ferð í kalda pottinn, eina ferð í magnesíum pottinn og hafði setið um 15 mínútur í sjópottinum þegar kalda potts vinkona mín mætti á svæðið. Fórum nokkrar ferðir í þann kalda, og annað hvort í heitasta, magnesíupottinn eða gufuna inn á milli. Settumst líka 2x30 mínútur í smá sólbað. Vorum í minni síðustu ferð í magnesíum pottinum þegar tveimur pokum af magnesíum flögum var sturtað út í. Ég var komin heim um hálfsex eftir þrjá tíma á sundlaugarsvæðinu. Átti von á sendingu um sex leytið en sú sending skilaði sér um hálfníu leytið. Var að styrkja dóttur einnar sem vann með mér á Grandaborg veturinn 1991-92. Keypti af þeim tvær pakkningar af klósettrúllum. 

Sólbaðsveður við sundlaugina

Vaknaði um sex leytið í gærmorgun. Mætti í vinnuna um hálfátta. Kláruðum daglega framleiðslu rétt fyrir tólf. Eftir hádegi "hreinsaði" ég gullið og fékk svo að æfa mig og fylgjast með verkefnum í kringum seðavélarnar og hraðbankana. Korter yfir þrjú var allt búið. Ég fór beint í sund. Hringdi aftur í pabba og frétti að hann hefði skellt sér aftur í rennibrautina eftir morgunsundið. Hann var hinn hressasti. Ég hins vegar var löt varðandi sundið. Þegar ég var búin að fara fjórar ferðir í kalda, 10 mínútur í gufu, eina ferð í heitasta og 20 mínútur í sjópottinn mætti ég kalda potts vinkonu minni. Það varð til þess að ég tók aukaferðir í kalda og gufu og svo sátum við amk hálftíma í sólbaði. Þegar ég kvaddi um hálfsex var enn um 13°C hiti í forsælu. 

Pabbi og rennibrautirnar í sundlauginni á Hellu

Var komin á stjá einhvern tíman rétt upp úr klukkan sex í gærmorgun. Eftir morgunverkin á baðherberginu vafraði ég um á netinu til klukkan að byrja að ganga átta. Mætti í vinnu um hálfátta og fékk fljótlega skilaboð frá fyrirliðanum að hún yrði sein fyrir, ég mætti alveg taka saman allar tölur þegar ég væri búin að "sækja" Emmurnar. Sá að það var komin smá endurnýjun, ekki stór en bæði debet og kredit fyrir fleiri en einn aðila. Hlóð öllum skrám inn en tók svo aðeins saman daglegar framleiðslutölur. Þeirri framleiðslu lauk um hálftíu. Eftir kaffi fór ég yfir skjöl en fyrirliðinn vann í kortabókhaldinu og tók saman endurnýjunartölurnar. Ákváðum að geyma þá framleiðslu aðeins. Lokuðum og gengum frá kortadeildinni um tólf eftir að hafa framleitt hádegisskammtinn. Eftir fór ég í verkefni uppi sem tók einn og hálfan tíma og það þrátt fyrir að fá smá aðstoð í restina. Mínum verkefnum lauk um þrjú leytið og mátti ég fara þá. Hringdi í pabba á meðan ég var á leiðinni yfir í Laugardalslaugina. Var að kanna hvort hann væri með strengi eftir leikfimina. Svo var ekki og hann sagðist meira að segja hafa skellt sér eina salibunu í rennibraut eftir sundið um morguninn. Hann sagði líka að hann væri búinn að fá gott krem til að bera á fæturnar og þetta krem mildaði eða tæki alla verki svo honum fannst hann vera léttari á sér. Ég bað hann samt um að passa sig á að fara ekki á undan sjálfum sér, flýta sér hægt. En ég er mjög glöð að pabbi er allur að braggast eftir þessa slæmu tognun.

Kaldapotts vinkona mín mætti ekki á svæðið. Ég synti 500 metra þar af næstum 100 metra skriðsund, fór fimm sinnum í kalda pottinn, tvisvar í heitasta, einu sinni í gufu og einu sinni í sjópottinn. Þegar ég fór loksins upp úr og heim var klukkan byrjuð að ganga sex.

Hitt og þetta

Í gærmorgun vaknaði ég uþb korteri áður en vekjaraklukkan átti að hringja. Hafði samt nægan tíma til að vafra aðeins á netinu áður en ég fór í vinnuna. Vinnudagurinn stóð til klukkan rétt að byrja að ganga fjögur. Hringdi í pabba og talaði við hann á meðan ég var á leiðinni í Nauthólsvík. Mér fannst hann eitthvað móður og spurði hvort hann hefði verið á hlaupum. Þá kom í ljós að hann hafði verið í sínum fyrsta eldri borgara leikfimitíma. Sjórinn var 10,5°C, fjara, lítil ferð á loginu og ég synti, svamlaði og "skokkaði" út að kaðli og til baka. Var í sjónum í um hálftíma og eiginlega jafn lengi eða jafnvel lengur í heita pottinum því ég lenti á smá kjaftatörn. Var komin heim um hálfsex. 

Ný vinnuvika

Nokkrar línur um gærdaginn. Var vöknuð snemma en þó ekki eins snemma og oft áður. Hafði ekki stillt á mig klukku en fór á fætur um sjö leytið. Vafraði aðeins um á netinu eftir morgunverkin á baðherberginu en um átta tók ég sunddótið með mér út í bíl og brunaði í Laugardalslaugina. Fór tvær ferðir í þann kalda og eina í heitasta áður en ég synti 500 metra á braut 2. Gufan var lokuð svo ég fór í sjópottinn eftir þriðju kaldapotts ferðina. Var að spá í að dýfa mér fjórðu ferðina í þann kalda áður en ég færi upp úr en þá mætti ég yngstu mágkonu mömmu og fór því aftur í sjópottinn eftir 4 mínútur í kalda pottinum. Við Kristín spjölluðum örugglega saman í hálftíma áður en við urðum samferða meðfram laugarbakkanum, hún til að fara að synda á brautum 7-8 en ég til að dýfa mér smástund í kalda pottinn áður en ég færi upp úr. Fór í kalda sturtu. Í stað þess að fara beint heim skrapp ég í heimsókn á N1 vinnustöðina hans Davíðs Steins. Hann var á vakt. Ég byrjaði á því að jafna loftþrýstinginn í dekkjunum. Í raun hefði verið nóg að pumpa í hægra framdekkið því mælaborðið var ekki að biðja mig um að jafna þrýstinginn en það dekk var þó komið í "26 en ég vil hafa dekkin "32. Hin þrjú dekkin voru öll á bilinu "30-31. Sonurinn ætlaði ekki að þekkja mömmu sína þegar hún kom inn á stöðina, eftir að hafa lagt bílnum, og óskaði eftir að fá kaffi. Hann er ekki vanur að sjá mig í kápunni sem ég keypti í vor. Drakk tvo bolla af kaffi og spjallaði við soninn í tæpan hálftíma. Það var rólegt hjá þeim tveimur sem voru á vakt en hann þurfti þó að afgreiða einu sinni eða tvisvar þegar komu fleiri en einn kúnnar inn í einu.

Kom heim rétt fyrir tólf og útbjó mér plokkfisk úr afganginum af fisknum sem ég verslaði hjá Fúsa á föstudaginn var. Meiningin var að skreppa aðeins út í göngu einhvern tíma dagsins en dagurinn leið og fór í allt annað; tuskuprjón, lestur, íþrótta og þáttaáhorf.

Á helgar nótunum

Hafði stillt vekjaraklukkuna á sjö eitthvað en var vöknuð fyrir klukkan sex og búin að slökkva á vekjaranum. Vafraði aðeins um á netinu, hitti N1 sonin áður en hann fór af stað í vinnuna um sjö leytið og var sjálf komin í sund rétt eftir að opnaði um átta. Synti ekki nema 300 metra, allt á bringunni, en fór amk fjórum sinnum 5 mínútur í kalda pottinn og eftir tvö skipti í heitasta pottinn, eina góða ferð í gufu og aðra í sjópottinn dýfði ég mér örstutt í kalda áður en ég fór upp úr. Var mætt vestur í bæ klukkan að byrja að ganga ellefu. Esperanto vinkona mín sagðist vera aum í hálsinum og hélt hún væri að fá kvef svo við ákváðum að fresta esperanto grúskinu en fengum okkur kaffi/vatn og hrökk brauð og spjölluðum um allt annað en esperanto og alls ekki á esperanto. Stoppaði í tæpan klukkutíma. Var komin heim um það leyti sem hádegisleikurinn í enska boltanum byrjaði en í þeim leik tóku úlfarnir á móti Liverpool og voru eitt núll yfir í hálfleik en gestirnir og mitt lið skoruðu þrjú mörk í seinni hálfleik, það þriðja var reyndar skráð sem sjálfsmark heimamanna. Það var mikil íþróttaveisla í sjónvarpinu mínu í gær, enski boltinn, bikarúrslitaleikur í knattspyrnu karla og nokkrir handboltaleikir að auki. En ég var líka að lesa og án þess að vita almennilega afhverju er ég byrjuð á öllum þremur bókunum sem ólesnar eru af safninu. Fimm lesnar komnar ofan í bókasafnspokann. En þær sem ég er að lesa eru;  Kuldagustur eftir Quentin Bates, Mín sök eftir Clare Mackintosh og Liðin tíð eftir Lee Child. Er komin lengst inn í þá fyrst nefndu, búin að lesa 100 blaðsíður af 340 en komin styst með síðast nefndu bókina.

Sund og klipping

Var mætt í vinnu um hálfátta í gærmorgun. Tók saman fyrstu framleiðslutölur dagsins á meðan fyrirliðinn fór inn og "náði" í þær tölur sem við fáum ekki póst um. Vorum búnar að framleiða og pakka fyrirliggjandi verkefnum áður en klukkan varð hálftíu. Það var líka rólegt uppi svo ég fór aðeins að kíkja á mánaðamóta tengingar þótt enn sé hálfur mánuður þar til allar þær tölur verða tilbúnar. Það kom reyndar í ljós að sumar tengingar voru ekki réttar og lagaði ég þær snarlega. Hádegistölurnar skiluðu sér í pósti um ellefu og á framleiðsluvélina tuttugu mínútum síðar. Vorum búnar að að framleiða og pakka nokkru fyrir tólf. Ég fór beint í að klára bókhaldsvinnuna áður en ég fór að fá mér að borða. Eftir mat vorum við fyrirliðinn og einn til kölluð á fund með framkvæmdastjóra og næstráðandi. Ég gat ekki einu sinni hjálpað til við að ganga frá í eldhúsinu eftir matinn. Reyndar var aðeins minna verk að ganga frá en oft áður því það var súpa í stórri fötu, sallat á fati og núðluréttur á öðru fati og ekkert fleira. Fljótlega upp úr klukkan eitt var ljóst að verkefni dagsins voru ekki til skiptanna og við fyrirliðinn máttum fara heim. Ég fór beinustu leið í sund. Synti 500 metra, flesta á bakinu og fór 3x5 mínútur í kalda, tíu mínútur í gufu og korter í sjópottinn. Þvoði mér svo um hárið áður en ég mætti til Nonna í Kristu Quest. Var mætt þar tíu mínútum áður en klukkan varð fjögur en komst næstum strax í stólinn. Nonni tók um þrjá til fjóra sentimetra af hárinu, snyrti endana, blés, greiddi og setti hárolíu í restina. Næsti tími er svo ekki fyrr en eftir hálft ár eða svo. Kom við í Fiskbúð Fúsa, keypti 500gr af roð- og beinlausri ýsu og tvo poka af óbarinn ýsu.

Í þrumu stuði

Var búin snemma í vinnunni í gær, eða um hálfþrjú leytið. Ef ég hefði verið með sund- eða sjósundsdótið í skottinu hefði ég örugglega skroppið annað hvort í sund eða sjóinn. Þess í stað fór ég beint heim og hafði það nokkuð notalegt og rólegt til klukkan að rétt rúmlega fimm. Þá skipti ég um föt og rölti í rólegheitum á Hereford.  Þar hittumst við langflest sem vinnum í SKM deildinni í RB, framkvæmdastjórinn okkar, tvö af sumarliðunum og sú sem hætti störfum um síðustu mánaðamót. Tilefnið var einmitt að kveðja þessa "hættulegu" en hún var búin að leggja sitt af mörkum í bankageiranum í fjörutíuogþrjú ár. Hún varð sextíuogtveggja í sumar svo hún hefur verið átján ára þegar hún hóf störf fyrst í Landsbankaútibúinu í Grindavík. Okkur bauðst að fá okkur fordrykk, áfengan eða óáfengan á meðan við vorum að safnast saman en alls vorum við tuttuguogsex, vantaði bara tvo úr starfsliðinu en fjögur af sumarliðunum. Ég lét freistast og fékk mér eitt hvítvínsglas í fordrykk. Þegar sest var að borðum var einnig í boði að fá sér rautt eða hvítt með matnum. Fengum mjög góða súpu í forrétt, góða steik með bakaðri kartöflu og tveimur sósu tegundum í aðalrétt og heita súkkulaðikökusneið með ís og rjóma í eftirrétt. Glatt var á hjalla, góður andi í hópnum og tíminn flaug ógnar hratt. Um hálfníu tók einn þjónninn mynd af hópnum í tröppunum úti.

Annars var ég mjög skynsöm og framlengdi skilafresti á fjórum bókum af átta þótt ég væri búin að lesa þrjár af þeim. Hinar fjórar eru með skilafrest um næstu mánaðamót og vonandi verð ég búin að lesa flestar af þeim þá.

Sól og 14°C

Var búin í vinnunni um hálfþrjú í gær og fór beinustu leið í Nauthólsvík. Hringdi í pabba á meðan ég var á leiðinni á milli staða. Hann lét vel af sér. Var komin í sjóinn korter yfir þrjú og var uþb 20 mínútur í 10,5°C sjónum. Sat svo annað eins í heita pottinum þannig að klukkan var um fjögur þegar ég settist aftur út í bíl. Þá voru allir og amma þeirra í umferðinni og heimferðin tók mig klukkutíma. Notaði tækifærið og hringdi þrjú símtöl. Reyndi líka að hringja í tvíburahálfsystur mína, hún hringdi svo til baka í gærkvöldi. 

Miðjan á vikunni

Vinnudegi  gærdagsins lauk upp úr klukkan þrjú í gær. Sinnti alls konar verkefnum. Þessa vikuna erum ég og sú fjórða ábyrgar fyrir uppvaski og kaffistofu umsjón. Byrjum uppvaskið fljótlega eftir að allir hafa borðað sem er upp úr klukkan hálfeitt. Mis mikill matur er eftir á fötunum og í skálunum og það er einnig mjög misjafnt hvort einhver og þá hversu margir vilja taka afganga með sér. En oftast erum við búnar að skola upp ílátin og þurrka af öllum borðum um eitt. Eftir eldhúshádegisfrágang gærdagsins fór ég í að hreinsa gullið með annarri sem var þegar byrjuð. Bunkarnir voru alls yfir hundraðogfjörutíu og misstórir. Milli tvö og þrjú fór ég yfir innlagnir. En um þrjú var allt búið. Dreif mig fljótlega í sund. Sleppti því alveg að synda þó. Var búin með eina ferð í kalda pottinn og var búin að sitja um tíu mínútur í sjópottinum þegar kalda potts vinkona mín mætti á svæðið. Saman fórum við fimm ferðir í þann kalda, fjórar í heitasta pottinn og eina í gufuna. Þá fór ég í smá sólbað áður en ég fór upp úr og heim en hún fór eina aukaferð í heitt og kalt.

Ýmislegt

Útsofin og slök byrjaði ég gærdaginn á að vafra aðeins um á netinu eftir morgunverkin á baðherberginu. Mætti í vinnu um hálfátta. Þessa vikuna verð ég í bókhaldi og á móttökuendanum svo ég byrjaði á því að taka saman fyrstu tölur. Fyrirliðinn hlóð inn verkefnunum og þær tölur sem við fáum aldrei póst um voru í stærra lagi því það fylgdi smá endurnýjun með. Vorum því að framleiða og pakka fram að hádegi með smá kaffipásu á milli. Eftir hádegi fórum við í innlegg. Þrátt fyrir að það vanti smá mannskap og mikið að gera á mánudegi var allt langt komið þegar ég þurfti að fara um hálffjögur. Lagði bílnum rétt við Sundhöllina og rölti þaðan yfir í blóðbankann. Þrátt fyrir að ég hafi fengið rafræna staðfestingu á því að ég ætti pantaðan tíma á þessum stað og degi klukkan fjögur, fannst ekki bókun. En ég var þó ekki rekin í burtu heldur bókuð. Ég fékk mér smá hressingu fyrir gjöf. Hremmingarnar virtust ætla að halda áfram því sá sem ætlaði að sinna mér treysti sér ekki til að stinga mig og náði í hjúkrunarfræðing með reynslu. Sú fékk einnig að þreyfa á báðum olnbogabótum og valdi að stinga í þá vinstri. Ég fann ekkert fyrir stungunni en hún hitti heldur ekki í æðina. Ég ýtti mjög á um að tilraun yrði gerð við að reyna að hitta æðina í hægri olnbogabótinni og mér varð að ósk minni. Það gekk eins og í sögu svo ég gat gefið í sextugasta og fyrsta sinn af sextíuogfjórum heimsóknum. Mikið varð ég bæði glöð og fegin. Hringdi í pabba þegar ég var á leiðinni heim. Hann lét vel af sér og virðist vera kominn á beinu brautina. Hann segist þó enn finna fyrir verkjum í hægra fæti en þeir há honum ekkert.

Sextugastaogfjórða heimsóknin í besta bankann

Það var ætlun mín að byrja daginn á því að fara í stutt sund áður en ég myndi mæta í vinnuna. Er yfirleitt að vakna áður en klukkan er orðin sex og á virkum dögum opnar laugin klukkna 6:30. Færði samt stillinguna á vekjaraklukkunni úr 6:27 í 6:12. Þrátt fyrir að vera búin að slökkva á lampanum áður en klukkan sló tíu í gærkvöldi og sofnaði mjög fljótlega þá vaknaði ég ekki fyrr en vekjaraklukkan hringdi í morgun. Og þar sem ég hafði bara korter til stefnu breytti ég áætluninni.

Annars aðeins af gærdeginum. Pabbi hafði farið á undan mér í háttinn á laugardagskvöldið en hann var klæddur og kominn á ról á undan mér í gærmorgun. Sestur fyrir framan imbann, búinn að kveikja á honum og beið spenntur eftir að bronsleikurinn í HM karla í körfu hæfist þegar ég kom fram korter yfir átta. Ég horfði með honum á leikinn sem var mjög spennandi en þar unnu Kanadamenn B-lið Bandaríkjamanna. Gull leikurinn hófst um hálfeitt og sá leikur var ekki síður spennandi á milli Slóveníu og Þýskalands. Þeir síðar nefndu voru ekki búnir að tapa neinum leik í keppninni og þrátt fyrir að vera að elta fyrstu tvo leikhlutana þá snéru þeir taflinu sér í vil í þriðja leikhluta. Þeir komust yfir og unnu leikinn.

Kvaddi pabba seinni part dags og ók heim um Þrengslin. Fitjaði upp á nýrri tusku í gær eftir munstri úr nýrri tuskubókinni minni. Munstrið heitir strik. Byrjaði líka á að lesa síðustu bókina af þeim bókum sem eru með skilafrest um miðjan mánuðinn; Laufskálafuglinn eftir Margréti Lóu Jónsdóttur.

Á Hellu

Ég var mætt í sund rétt upp úr klukkan átta í gærmorgun. Hitti fullt af fólki og það voru nokkrar kjaftatarnirnar hjá mér. Synti þó 400 metra, fór 4x 5 mínútur í kalda, 15 mínútur í gufu og sennilega annað eins í sjópottinn og endaði á smá sólbaði. Klukkan var að verða tíu þegar ég lagði af stað frá planinu við Laugardalslaug. Leiðin lá vestur í bæ í esperanto hitting. Stoppaði þar í einn og hálfan tíma. Fór heim með sunddótið, sótti þvott af snúrunni, pakkaði niður fyrir helgarferð út á land og rétt áður en ég var tilbúin að fara kom annar sonurinn fram. Setti honum fyrir smá verkefni sem hann átti að skipta milli sín og bróður síns. Ég var komin á Hellum um tvö og pabbi var alveg steinhissa á að ég kæmi aðra helgina í röð. Ruglaði aðeins reglunni hjá honum með því að taka út 2 flök af þorskhnökkum sem ég eldaði um kvöldið. Hann er annars allur að koma til. Aðeins farinn að geta setið við tölvuna stund og stund og notast aðeins við eina hækju á göngunni um húsið. Gleymir reyndar hækjunni alveg inn á milli. Frétti það líka í gær að pabbi besta vinar míns féll frá þann 7. sl. Svo er rétt að geta þess að hugsanlega verður einhver breyting á færslutímum á þessum vettvangi næstu vikuna, þ.e. ég mun ekki leggja eins ríka áherslu á að byrja dagana á því að blogga. Hvað ég mun gera í staðinn kemur í ljós eftir því sem dögunum og vikunni vindur fram. 

Laugardagur

Í fyrrakvöld var ég svo spennt yfir einni bók, Litla blóm eftir Margréti Hjálmtýsdóttur, að klukkan var að verða hálftólf þegar ég loksins slökkti á lampanum. Ég kláraði þó ekki bókina alveg en svaf í einum dúr til klukkan rúmlega sex. Var að vinna til klukkan að ganga þrjú og fór þá beint í Nauthólsvík og hoppaði í öldunum þar í um tuttugu mínútur. Næst lá leiðin í bókamarkaðinn við Fiskislóð og svo í Krónuna í Skeifunni en framkvæmdir við Krónubúðina sem ég fer oftast í. Klukkan var langt gengin í sex þegar ég kom heim. 

Föstudagur

Ég var mætt í vinnu um hálfátta. Fyrirliðinn var komin, búin að taka kerfin af og byrjuð að undirbúa bókhaldið. Ég dreif mig niður til að hlaða inn þeim tölum sem ekki kemur póstur um. Gleymdi gleraugunum og læsti mig þar að auki úti. Skipti um aðgangsorð í fyrradag. Var með það skráð en líklega skráði ég það ekki alveg rétt og svo gæti áslátturinn líka hafa klikkað. Alla vega ég fékk bara þrjár tilraunir áður en allt læstist. Fékk að fara inn á aðgangi fyrirliðans þar til kerfisfræðingurinn mætti í hús. Hann kom rétt fyrir níu og beint niður til okkar. Við vorum samt ekki búnar að hafa samband við hann heldur var að hugsa um allt aðra hluti á kortavélinni. Hann hefði getað opnað aðganginn minn aftur en þar sem ég var ekki viss um að hafa aðgangsorðið alveg rétt sá hann svo um að ég valdi mér nýtt aðgangsorð og komst á því. Fyrri framleiðslu lauk upp úr klukkan hálftíu. Engin endurnýjun svo við vorum uppi til klukkan að ganga tólf. Fyrirliðinn fór í innlegg en ég fór aðeins að sinna gjaldkeramálum fyrir húsfélagið mitt. Gengum frá kortadeildinni um tólf eftir að hafa framleitt hádegisskammtinn. Ég fékk svo að hreinsa gullið. Það voru 106 mis stórir bunkar og við vorum tvær við þetta verk. Ég stimplaði mig út stuttu fyrir þrjú og fór beint í sund. Hringdi í pabba á leiðinni yfir í Laugardalinn. Hann lét vel af sér en er alltaf mjög verkjaður fyrst á morgnana. Í sundi synti ég 500 metra, flesta á bakinu, fór 4x6 mínútur í kalda, eina ferð í magnesíum pottinn, eina í gufuna og eina í sjópottinn. Þvoði mér svo um hárið áður en ég fór heim. 

Styttist í helgi

Nú brá svo við að ég svaf til klukkan að ganga sjö í gærmorgun. Vaknaði þó fimmtán mínútum áður en vekjaraklukkan átti að ýta við mér. Var mætt í vinnuna um hálfátta, rétt á undan fyrirliðanum. Ég byrjaði á því að taka kerfin af hvelfingu og kortadeild og fór svo niður til að hlaða inn þeim framleiðslutölum sem við fáum ekki póst um. Þurfti að byrja á því að skipta um aðgangsorð á vélinni. Ég var nefnilega á ítroðsluendanum í gær. Framleiðslan gekk ágætlega og við kláruðum endurýjunina milli tíu og ellefu. Allri framleiðslu var lokið rétt fyrir tólf svo við gengum frá kortadeildinni og vorum í innleggjunum eftir hádegi. Ég fékk líka að "hreinsa gullið". Verkefnum mínum í vinnunni lauk um þrjú. Þá fór ég beinustu leið í Nauthólsvík, hringdi í pabba á leiðinni þangað. Sjórinn enn í tveggja stafa tölu en kominn niður fyrir 12. Fjara, smá ferð á logninu, öldugangur og gaman að hoppa í þeim. Var um korter í sjónum og eitthvað svipað í heita pottinum á eftir.

Aftur tvær í kortadeild í bili

Var komin á stjá stuttu fyrir klukkan sex í gærmorgun. Morgunrútínan var svipuð og oftast á virkum vinnudögum. Mætti í vinnu um hálfátta. Tók saman fyrstu framleiðslutölur þar sem fyrrum fyrirliði átti að mæta á einum öðrum stað áður en  hún mætti til vinnu. Fór svo niður með tölurnar og hitti fyriliðann en hana vantaði aðstoð við að komast inn í hvelfingu svo hún gæti sent frá sér nokkur testkort strax um morguninn. Þegar fyrrum fyrirliði mætti á svæðið og með allar aðrar tölur og talningablöð vorum við nýbúnar að framleiða allt visa. Eftir kaffi héldum við áfram með endurnýjun og áttum aðeins eftir um 420 óframleidd kort þegar hádegisskammturinn kom yfir á vélina. Ákváðum að ganga frá þegar allt daglegt var búið og vorum í innleggjum eftir hádegi. Var búin í vinnu fyrir klukkan hálffjögur og fór beinustu leið í sund. Kláraði að synda 400m og átti aðeins eftir 100 metra þegar kaldapotts vinkonan mætti á svæðið. Hinni hana í þeim kalda í hennar annari ferð. Saman fórum við fimm ferðir í þann kalda. Var komin heim um hálfsex. Hellti mér þá upp á einn bolla af kaffi.

Eitt og annað og aðeins meira af pabba

Mér fannst sem ég hefði alveg átt að geta sofið aðeins lengur í gærmorgun en ég var vöknuð milli klukkan fimm og hálfsex. Vissi samt að ég myndi ekki sofna aftur svo ég dreif mig bara á fætur. Það kom svo í ljós að ég þurfti alveg á öllum þessum tíma að halda, m.a. til að setja inn bloggfærsluna. Strax og ég lagði svo af stað í vinnuna hringdi ég í pabba til að heyra í honum hljóðið. Hann var smá verkjaður en þó þokkalegur og samkvæmt honum ætlaði hann að ná í Jónu Mæju og leyfa henni að koma með sér í bæjar-rannsóknarstússið seinna um morguninn. Hann var líka viss um að hann yrði örugglega ekki með neinar heilsufarsfréttir samdægurs. Ég hugsaði eitthvað á þá leið að líklega væri best að leyfa honum að ráða þessu alveg.

Nóg var að gera í vinnunni á öllum vígstöðvum og vorum við fengnar til að loka kortadeildinni eftir hádegi og hjálpa til við innleggin uppi. Það komu tvær kortaendurnýjanir í gær en þær voru ekki mjög stórar og þar að auki eigum við að hafa hátt í þrjár vikur til þess að vinna þær. Önnur endurnýjunin var þó kláruð fyrir hádegi, rúmlega fimmhundruð kort, ásamt daglegri framleiðslu sem var í heildina um og yfir fjögurhundruð. Klukkan var byrjuð að ganga fimm þegar ég stimplaði mig út og fór í sund. Synti aðeins 200 metra og var búin að fara 2 x 5 mínútur í kalda, eina ferð í gufu og eina ferð í þann heitasta þegar kalda potts vinkona mín mætti á svæðið. Saman fórum við þrisvar sinnum þrjár í kalda, tvær í heitasta og eina í gufuna. Ég var komin heim upp úr klukkan sex.

Stuttu fyrir klukkan níu hringdi ég í Jónu Mæju til að heyra allt um það hvernig bæjarferðin með pabba hafði gengið. Hann hafði keyrt sig á Selfoss til hennar og vildi helst að hún keyrði hann á hans bíl. Hún gat þó sannfært hann um að best væri að hún færi á bíl sem hún væri vön að keyra. Hún hleypti honum út við Domus Medica en meðan hún var að leggja bílnum fór pabbi inn og sagðist vera að koma í blóðskimun. Honum var sagt að slíkt færi ekki fram þarna og hann fékk ekki einu sinni að gefa upp kennitöluna sína heldur var sagt að hann ætti að fara að stað í Ármúlanum. Jóna Mæja keyrði hann þangað. En þar kom í ljós að auðvitað átti pabbi að mæta í Dómus í ómskoðun. Það kom alla vega í ljós í ómskoðuninni að það fannst enginn blóðtappi og það var léttir. Þegar þau voru komin aftur á Selfoss kvaddi pabbi Jónu Mæju og þakkaði henni fyrir snúningana með sig. Hann keyrði sig hins vegar sjálfur á bráðamóttöku HSU til að láta vita að ekkert hefði komið út úr ómskoðuninni. Ákveðið var að setja hann í myndatöku en tækið var bilað og hann þurfti að bíða í rúma tvo tíma. Í stað þess að fara aftur Jónu Mæju og fá að leggja sig þar, lagði hann sig í bílnum sínum. Þetta vissi hún því hún hafði hringt í hann eftir að hann var komin heim til sín eftir þessa ævintýralegu bæjarferð.

Annars er mjög gaman út í Gdansk hjá Bríeti systurdóttur minni. Hún er að fara að keppa þar í kjötiðn á morgun. Hún er í herbergi með háriðnaðarnema sem er búin að lita og dedúa við hárið á henni og þær eru duglegar að snappa um allt mögulegt sem tengist staðnum, þeim og tilvonandi keppni.

Pabbi og hægri fóturinn hans

 Hann pabbi minn er svo mikill nagli og einnig æðrulaus. Hans mottó er í hnotskurn að það séu engin vandamál, bara lausnir og svo lætur hann hverjum degi nægja sína þjáningu. Á föstudaginn tóku sig upp verkir í hægri fætinum hans sem hann taldi vera vegna þess að um daginn bögglaðist fóturinn undir honum þegar hann fór í rennibrautina í sundlauginni. Í fyrstu fann hann ekki fyrir neinu en það átti eftir að breytast þannig að hann tók sér nokkurra daga frí úr sundi og setti teygjuhólka utan um hnén. Já, bæði hnén þótt hann væri verri í því hægra þá fann hann klárlega mun á sér að vera með svona stuðning á báðum hnjám. Á fimmtudaginn skrapp hann í langan bíltúr alla leið austur á Kirkjubæjarklaustur. Hann fann ekki fyrir neinu og var mjög ánægður með sig. Dreif sig því í sund á föstudagsmorgninum en sleppti því að fara í rennibrautina. Þegar fór að líða á daginn versnuðu verkirnir í hægra fætinum. Honum leið best í rúminu og einnig stólnum hans í stofunni ef hann hafði sæmilega hátt undir fótunum. Þegar ég kom með dótið mitt um hálftólf á laugardaginn þurfti ég að nota lykil til að komast inn og hann var rétt kominn í dyrnar á sínu herbergi þegar ég var búin að setja töskuna inn í "mitt" herbergi og komin á ganginn til hans. Hann vildi samt sjá til yfir helgina og það var ekkert sem ég gat gert fyrir hann. Svo ég fór í gleðskapinn með árganginum mínum og skemmti mér vel næstu tíu tímana. Pabbi var að enda við að hlusta á fréttirnar klukkan tíu þegar ég kom heim. Það var ljós hjá honum svo ég kíkti á hann. Hann sagðist vera slæmur en ætlaði að sjá til fram yfir helgi og ég mátti ekki einu sinni færa honum vatnsglas. En hann hafði gaman af viðburðasögu dagsins. Ég fór inn í rúm að lesa og að sofa um miðnætti aðfaranótt sunnudags. Rumskaði um þrjú og þurfti á salernið. Gat ekki sofnað strax aftur en svo var klukkan farin að ganga tíu á sunnudagsmorguninn þegar ég fór á fætur. Pabbi sagðist vera skárri en enn var ekkert sem ég gat eða mátti gera fyrir hann nema hugsa fyrir mat og ég mátti ráða hvenær það yrði. Hann klæddi sig og staulaðist á tveimur hækjum inn í stofustólinn sinn. Hann fékk mig til að fara með ryksuguróbótinn inn á eldhúsborð en kom þangað sjálfur fljótlega til að hreinsa hann og setja hann af stað. Held að fljótlega eftir það hafi verkirnir í fætinum farið að versna. Ég sagði við pabba að ég vildi ekki taka af honum ráðin en spurði hvort það væri nokkuð skynsamlegt að bíða fram yfir helgi með að láta líta á þetta. Ég setti upp saltfisk, kartöflur og rófubita um hálftólf, allt í sama pottinn. Um tólf hringdi pabbi sjálfur á læknavaktina og þegar hann var búin að lýsa verkjum og líðan var ákveðið að senda til hans sjúkrabíl. Við vorum búin að borða og ég að vaska upp þegar bíllinn og tveir sjúkraliðar kom um eitt. Þau afsökuðu sig hversu lengi þau voru á leiðinni. Pabbi var skoðaður vel og spurður út í eitt og annað. Sú sem var í forsvari ákvað að hringja í lækni og í framhaldinu var ákveðið að pabbi yrði fluttur á bráðamóttökuna á Selfoss. Hann fór á inniskónum, með gemsann og hækjurnar. Þetta var um hálftvö í gær. Róbótinn var ekki búinn að ryksuga og ég vildi heldur ekki fara fyrr en ég fengi fréttir af pabba. Hann hringdi um hálffimm. Vissi ekkert enn þá en bað mig um að koma til sín þvagleggjum. Lét hann vita áð ég var þá búin að láta systur mína og mág vita, svara hringingu frá nágrannanum og hringja í Jónu Mæju, konu Reynis frænda. Hún var strax boðin og búin til að koma til aðstoðar. Vildi helst stökkva strax af stað til að leita pabba uppi eða að minnsta kosti athuga hvort hún mætti fá að hitta hann. Ég hafði sagt að það væri betra að bíða frétta. Hringdi aftur þegar ég var búin að ganga frá, slökkva á öllu og pakka mínu dóti. Spurði hvort ég mætti koma á hana þvagleggjunum. Sagði henni að pabbi væri samþykkur því að þau Reynir kæmu til hans og ef hann fengi að fara heim að þau myndu skutla honum. Þegar ég kom í Löngumýrina þáði ég smá kaffi, knús og spjall áður en ég kvaddi aftur. Skrapp svo aðeins í Fossheiðina þar sem ég hitti tvíburahálfsystur mína hjá foreldrum sínum og þau nýbúin að borða dýrindis kjötsúpu. Ég stóðst ekki mátið og þáði smá súpu og spjall. Stuttu seinna hringdi Jóna Mæja. Pabbi hafði hringt og mátti fara heim í nótt en var með beiðni um að mæta í Domus Medica í dag. Held að hann hafi helst vilja fá að keyra sig þangað sjálfur en þegar Jóna og Reynir voru búin að skutlast með hann heim og þyggja kaffi og pönnsur voru þau búin að tala hann inn á að Jóna mætti sækja hann og snúast með hann.

Hittingur í útskriftarárgangi 1984 úr Helluskóla

Hafði stillt vekjaraklukkuna á hálfsjö en var auðvitað vöknuð klukkan sex. Dreif mig á fætur og var búin að blogga, vafra aðeins á netinu og byrjuð að pakka þegar N1 sonurinn kom fram rétt fyrir klukkan sjö. Hann skutlaði mér vestur í bæ áður en hann fór á vakt upp á Gagnveg. Ég var rétt lögð af stað á mínum bíl, í áttina heim, þegar kom merki í mælaborðið um að athuga með þrýstinginn á dekkjunum. Ég kom því við á planinu við ÓB í Öskjuhlíðinni og notaði loftið þar til að stilla öll dekk á "32. Eitt dekkið var komið niður í "21 hin voru milli "27-"30. Næst lá leiðin á AO við Sprengisand þar sem ég fyllti á tankinn. Svo fór ég heim og kláraði að pakka áður en ég dreif mig í sund. Synti 400 metra, þar af rétt um 100 metra skriðsund. Fór 3x5 mínútur í kalda, eina ferð í sjópottinn og eina ferð í gufuna áður en ég fór í kalda sturtu, upp úr og heim. Hellti upp á sterkt kaffi og fékk mér smá hressingu áður en ég dreif mig austur á Hellu. Var komin þangað um hálftólf og byrjaði á því að fara með hluta af dótinu á Hólavanginn og taka með mér hvítvínsbeljuna mína ef ég skyldi ákveða að fá mér í litlu tána síðar um daginn. Var komin á planið við Hellana við Ægisíðu um tólf. Þar söfnuðumst við saman 17 af 19 (2 af 19 komu seinna um daginn og 2 af 21 höfðu boðað afföll). Hópur af erlendum ferðamönnum voru að fara í Hellaskoðun með öðrum leiðsögumanni. Sá hópur byrjaði í Hellunum við þjóðveginn en Baldur bekkjarbróðir leiðsagði okkur og fór með okkur fyrst í einn hellinn hinum megin við túnið og bæinn þar sem hann ólst upp. Tvær úr hópnum höfðu aldrei komið þarna áður. Baldur var með mjög góða leiðsögn og kunni fullt af sögum og þarna er að eiga sér mjög merkileg uppbygging og kannski fáum við einhvern tímann að vita nákvæmari aldursgreiningu á þessum hellum. Eftir Hellaferðina sameinuðumst við í 4-5 bíla og fyrst ætluðum við að heimsækja grunnskólann. Þar eru miklar framkvæmdir í gangi og þegar við vorum nýkomin út á planið og búin að skoða innganginn sem við notuðum í 7-11 ára bekk kom hellidema og ákveðið var að drífa sig bara aftur í bílana og fara í bakaríið. Þar áttum við að hitta einn úr bæjarstjórninni um tvö. Vorum komin amk tuttugu mínútum of snemma en mörg okkar notuðu tækifærið og fengu sér kaffi. Þarna hitti ég eina úr KÓSÍ-kórnum, þá sem var formaður amk síðustu tíu árinn sem hann var starfræktur. Hún var á leið í heimsókn til frænda síns um tvö. Eftir að við höfðum fengið kynningu um uppbyggingu og ýmisleg sveitastjórnarmál skruppum við að svokölluðum kúlum sem tengdasonur Baldurs er að byggja upp og á að vera fyrir ferðamenn sem m.a. vilja upplifa og sjá Norðurljós. Svo fórum við aftur í afgreiðsluna við Hellana og þar bauðst okkur að smakka bjór úr héraðinu og saltkringlur með. Ég þáði bita af kringlu og bláan kristal í dós. Þarna bættist líka átjánda manneskjan í hópinn og ég hringdi myndsímtal til Ellu og gekk á röðina svo mannskapurinn og hún gætu heilsast eða amk séð hvort annað. Næst lá leiðin að Heiðarbóli sem er í landi Heiðarbrúnar fyrir vestan á. Þar er ein bekkjarsystirin og maðurinn hennar búin að byggja sér sumarhús á góðum stað með frábært útsýni. Settar voru upp nýteknar kartöflur úr Þykkvabænum og þegar þær voru að verða tilbúnar voru valdir tveir grillmeistarar úr hópnum, held að það hafi samt farið amk fimm út. Sá 19. bættist í hópinn um það leyti sem verið var að bjóða fólki að gjöra svo vel að fá sér. Einn úr hópnum tók að sér að stjórna því hverjir byrjuðu en þetta gekk fljótt og vel fyrir sig og var maturinn og meðlætið mjög gott. Þarna var ég búin að ákveða að láta vínið alveg vera. Það voru fleiri árgangar að hittast og við áttum frátekið borð á Stracta frá klukkan níu en þangað fóru fæstir. Veit þó að amk þrír af strákunum áttu pantað gistinu svo kannski hittu þeir einhverja úr hinum árgöngunum. Ég kvaddi stuttu fyrir tíu og þá voru húsráðendur og átta manns eftir. Þetta var semsagt mjög skemmtilegur hittingur og strax farið að tala um hitting á næsta ári aftur en þá verða 40 ár síðan við útskrifuðumst úr grunnskóla.

Úfinn sjór í gær

Var mætt í vinnuna um hálfátta. Var aftur á ítroðsluendanum. Fyrirliggjandi framleiðslu lauk um hálftíu. Síðasti skammturinn skilaði sér á vélina á tólfta tímanum og þá fyrst fórum við niður aftur. Vorum búnar að ganga frá deildinni um tólf og það sem var að fara í útibú og póst komst vel fyrir í einum póstkassa. Eftir hádegi var ég að hjálpa til uppi með því að fara yfir sum innleggin. Það hef ég ekki gert síðan fyrir sumarfrí en gekk ágætlega. Hætti vinnu rétt fyrir þrjú en þá var allt að verða búið. Fór beinustu leið í Nauthólsvík. Það var fjara, sjórinn rúmar tólf gráður, öldugangur og smá hraðferð á logninu. Ég lét mér nægja að leika mér í öldunum í um það bil korter, synti sama og ekkert en hoppaði um smá svæði og sveiflaði handleggjunum. Var komin heim um hálffimm og stoppaði þar aðeins í rúman klukkutíma áður en ég fór vestur í bæ í hitting með Viðeyjargenginu. Fór á bílnum því ég ætlaði mér ekki að fá mér í litlu tána. En ég breytti þeim áætlunum þegar ég var mætt á svæðið og hafði fengið jákvætt svar frá N1 syninum um að sækja mig og skutla mér svo eftir bílnum áður en hann færi á laugardagsvaktina. Sú elsta í hópnum bauð upp á kjúklingasúpu, sallat og ostaköku í eftirrétt. Með þessu drukkum við vatn og hvítt eða rautt. Ég hafði verið seinust á svæðið en var sótt fyrst en klukkan var þá um átta og ég búin að eiga gott spjall við vinkonurnar í um tvo tíma. Horfði á einn og hálfan þátt áður en ég fór inn í rúm að lesa. 

September hefur göngu sína

Vaknaði helst til snemma í gærmorgun en þegar ég gafst upp á að reyna að kúra mig niður aftur  var klukkan rétt byrjuð að ganga sex. Fór á fætur, sinnti morgunverkunum á baðherberginu og settist svo inn í stofu með fartölvuna í fanginu. Tveir tímar voru ekki lengi að líða. Mætti í vinnu um hálfátta. Ég var á ítroðsluendanum og fyrrum fyrirliði í bókhaldinu og á móttökuendanum. Rétt fyrir níu kom framkvæmdastjórinn niður til að ná í okkur. Hann var rétt áður búinn að tilkynna á TEAMS að kaffið yrði í fyrra fallinu en við vorum að ljúka við að telja fyrri vagninn eftir visa framleiðslu dagsins svo við vorum ekki búnar að sjá skilaboðin. Tilefni þessa kaffitíma var að kveðja einn starfsmann SKM sem var að vinna sinn síðasta vinnudag, byrjaði í Landsbankanum í Grindavík fyrir um 40 árum síðan. Það var boðið upp á þrjár brauðtertur, gos og gotterí. Annars var vinnudagurinn frekar rólegur. Daglegri kortaframleiðslu lauk rétt fyrir tólf. Eftir hádegi fór ég í verkefni sem kallast að "hreinsa gullið". Það voru 156 bunkar sem þurfti að hreinsa ég var búin með meiri helminginn þegar ég fékk aðstoð en ég hreinsaði amk rúmlega hundrað bunka á rúmum klukkutíma. Allt var búið fyrir klukkan þrjú. Var komin í Laugardalslaugina rétt rúmlega þrjú. Byrjaði á því að sitja sex mínútur í kalda pottinum áður en ég fór á braut átta. Var á ferð númer tvö þegar ég sá kalda potts vinkonu mína mæta svo ég synti ekki fleiri ferðir en fór fimm ferðir með vinkonunni í kalda, tvær í heitasta, tvær í magnesíum pottinn, eina í gufu og eina í sjópottinn. Kom heim á sjötta tímanum.