Yfirvinna

Þar sem N1 sonurinn tók aukavakt á stöðinni í Mosó milli klukkan fjögur og tíu í fyrradag ákvað ég að skutla honum upp á Gagnveg í gærmorgun. Ég var samt komin í mína vinnu um hálfátta. Fyrirliðinn var mætt. Hinar tvær komu ekkert löngu síðar. Sú fjórða fékk að byrja í bókhaldinu. Ég sat með henni fram að kaffi. Hún var ekki komin með aðgang að sameiginlega póstinum svo ég áfram sendi henni póstana með öllum tölunum í. Eftir kaffi fór ég niður á móttökuendann á vélinni en fyrrum fyrirliði var upp til taks með þeirri fjórðu. Eftir hádegi fór ég á ítroðsluendann á vélinni og það má eiginlega segja að þar hafi ég svo verið með stuttum hléum alveg til klukkan átta. Daglegri framleiðslu og pökkun lauk um tvö leytið. Þá tók við endurnýjun debetplasts sem við hefðum viljað vera búnar að framleiða og senda frá okkur fyrir viku síðan. Um fjögurleytið hófst svo framleiðsla á endurnýjun sem kom til okkar í fyrradag og í gær. Sú endurnýjun hefði átt að koma til okkar fyrir amk þremur vikum síðan. Korthafar eru með kort sem gilda út mars en það er stefna hjá eigendum plastins að ný kort berist kúnna helst í byrjun þess mánaðar sem gömllu kortin renna úr gildi. Það varð því að samkomulagi að þessi framleiðsla yrði útseld tímavinna fyrir þrjá í kortadeild. Ein fékk því að fara heim eftir að allt daglegt var búið við hinar vorum til klukkan langt gengin í níu. Ég fékk reyndar að fara um hálfníu þegar búið var að loka og ganga frá niðri. 

Fimmtudagur

Var mætt í vinnuna um hálfátta, rétt á undan fyrrum fyrirliða. Vissum að báðar hinar væru í smá stússi og að önnur af þeim kæmi kannski ekkert. Ég útbjó aðeins allra fyrstu tölur og fór niður á móttökuendann. Sú fjórða kom og leysti mig af um níu leytið. Þá tók ég saman debet tölurnar, skráði lotur og setti inn í excel. Þarna var orðið ljóst að fyrirliðinn kæmist ekki. Við ákváðum því að skipta okkur í kaffi. Ég fór niður um tíu með tölur. Sú fjórða sagðist ætla að sleppa kaffi og ég bað hana um að leysa hina af og tók við móttökuendanum þar til sú var búin að fara í kaffi. Þegar hún kom niður aftur hjálpaði ég til við að pakka þar til klukkan var að verða ellefu. Það þurfti að vera búið að framleiða allt daglegt og pakka um tólf og okkur tókst það. Það var yfirferð á vélinni. Ég sat yfir "strákunum" á meðan hinar voru í mat. Og svo aftur frá klukkan rúmlega tvö til fjögur. Sú fjórða fékk að æfa sig í því sem eftir var af bókhaldsvinnunni, það var búið rúmlega tvö. Fór beint í sund en synti ekkert. Hitti á kalda potts vinkonu mína og fór fimm ferðir í kalda. Var komin heim um sex.

Tilsögn og æfingaakstur

Ég var mætt í vinnuna um hálfátta í gærmorgun. Ég byrjaði á því að opna hvelfinguna uppi með annarri samstarfskonu og skreppa einnig niður og kveikja á kortavélinni.  Þegar ég kom upp aftur var fyrrum fyrirliði mætt. Við ákváðum að græja allra fyrstu tölur, einungis framleiðsluna fyrir valitor og skreppa svo í kaffi. Sú fjórða var mætt nokkru fyrir átta og fyrirliðinn um átta en hún var á skutlvakt áður en hún kom. Ég tók að mér að setja þá fjórðu inn í bókhaldsstörfin en hinar tvær sáu um framleiðsluna. Sú fjórða gat opnað sinn aðgang að tölvunni við hliðina á minni en það kom strax í ljós að hún var ekki komin með aðgang að sameiginlega kortapostinum og síðar ekki heldur tveimur linkum sem við notum stundum. Við fundum samt leið til þess að hún gæti lært bæði með því að fá að gera sjálf, skrá niður punkta niður, spyrja mig og horfa á mig framkvæma sumt. Við vorum allavega komin niður í framleiðslu herbergið rúmlega níu með næstu framleiðslutölur og skjal til að telja fyrstu framleiðsluna eftir. Kennslan gekk þokkalega og sú sem er að læra að tileinka sér hlutina verður búin að ná tökum á þessu fljótlega og farin að kenna okkur hinum. Vinnu var lokið um hálfþrjú. Ég fór úr húsi um þrjú og beinustu leið í Nauthólsvík. Sjórinn 2°C og ég svamlaði um í rúmar þrjár mínútur. Var komin heim um fjögur. Rúmlega sex skruppum við Davíð Steinn á rúntinn í tæpa tvo tíma.

Og strax kominn mánudagur

Vaknaði mun fyrr en ég ætlaði mér. Vekjaraklukkan átti að hringja um hálfátta en um það leyti voru liðnir hátt í tveir tímar frá því ég slökkti á henni. Var klædd og komin fram um hálfjö. Rúmlega níu settum við Davíð Steinn skiltið á bílinn minn og hann fékk að skutla sér í vinnuna. Ég var komin í kalda pottinn í Laugardalslauginni fyrir tíu. Sat svo góða stund í sjópottinum áður en ég fór næstu ferð í þann kalda. Um hálfellefu fór ég loksins á braut átta og synti 500 metra bringusund á ca tuttuguogfimm mínútum. Fór tvær ferðir í viðbót í kalda og tíu mínútur í gufu í lokin. Hitti sjósunds vinkonu mína í klefanum þegar ég var að klæða mig aftur. Ég kom heim rétt fyrir tólf og fór ekkert út aftur. Dagurinn leið samt alveg ótrúlega hratt og var notaður mis skynsamlega. 

Sunnudagur

Var vöknuð mjög snemma og komin á fætur um sex leytið. Klukkutíma seinna fékk N1 sonurinn að keyra sig í vinnuna á mínum bíl. Vorum komin upp að N1 við Gagnveg klukkan hálfátta. Ég tók skiltið af bílnum og settist undir á meðan ég beið eftir fyrsta kaffibolla dagsins. Var komin á planið við Laugardalslaug rúmum tíu mínútum áður en opnaði og sat út í bíl fram yfir morgunfréttir. Fór í kalda pottinn í þrjár mínútur áður en ég synti sexhundruð metra á hálftíma, ýmist á baki eða bringu en fór eina ferð, 50m, á skriðsundi. Fór nokkrar ferðir í kalda pottinn og dreifði hinum ferðunum á 42°C, pottinn, sjópottinn og heitasta pottinn. Um hálftíu fór ég í gufu. Kalda potts vinkona mín var mætt á svæðið þegar ég kom úr gufunni. Fór með henni í mína síðustu kalda potts ferð áður en ég fór upp úr og þvoði mér um hárið. Eftir sundið fór ég beinustu leið vestur í bæ til esperanto vinkonu minnar. Hún var lasin og sagði pass við esperanto æfingum en hún bauð upp á graut og tvo bolla af kaffi. Stoppaði við hjá henni í uþb klukkustund áður en ég fór heim. Heima setti ég handklæði og þurrkustykki á forþvott og 60°, hlustaði á hádegisfréttir og fitjaði upp á og byrjaði á nýrri tusku á meðan, mynstur sem ég er búin að prjóna einu sinni áður, tígladans. Hringdi í tvíburahálfsystur mína, horfði á fótboltaleiki og hina og þessa þættina úr sarpinum.

Laugardagur

Svefninn var eitthvað slitróttur í fyrri nótt. Rumskaði um tvö leytið, alveg í spreng. Læddist á salernið í myrkrinu og til baka, eftir að hafa tæmt blöðruna, án þess að reka mig neins staðar í. Það tók mig einhverja stund að sofna aftur. Næst vaknaði ég um fimm leytið, alls ekki útsofin en mál að pissa. Gafst fljótlega upp á að reyna að kúra mig niður og var komin á fætur um sex. Davíð Steinn kom fram um hálfsjö og var farinn út tíu mínútum seinna. Ég var mætt í mína vinnu um hálfátta. Fram að kaffi vann ég við að gata og merkja ónýt kort frá því fyrr í mánuðinum. Yfirleitt gerum við þetta strax en þarna var um yfir hundraðogfjörutíu korta bunka að ræða. Þetta verk tók drjúga stund og ég sá eftir því að hafa ekki tekið með mér vatnsflöskuna niður því ég var niðri alveg þar til fyrstu framleiðslu var lokið og endaði á því að merkja við í föstudagstalningu á visa kortunum. Eftir kaffi fór ég á móttökuendann á vélinni því sú fjórða þurfti að fara í hraðbanka málin. Framleiðslu, pökkun, talningu og frágangi var lokið rétt fyrir klukkan hálfþrjú. Ég var mætt að planið við Laugardalslaugina um þrjú en byrjaði á því að hringja í pabba. Sat í kalda pottinum í minni fyrstu ferð þegar vinkona mín kom í sína aðra. Eftir næstu ferð hittum við á eina systur hennar og settumst smá stund með henni í 42°C pottinn. Eftir þriðju ferðina og gufubað hittum við systur hennar aftur í sjópottinum. Ég var komin upp úr og út í bíl um hálffimm. Hringdi þá í fyrrum samstarfskonu og jafnöldru. Hún var heima og meira en tilbúin að taka á móti mér. Stoppaði hjá henni í hátt í tvo tíma. Var komin heim fyrir sjö. Felldi draumaduluna af prjónunum síðar um kvöldið en á eftir að ganga frá endanum.

Óvissuferð

Einkabílstjórinn var kominn fram fyrir klukkan sjö í gærmorgun. Tæpum hálftíma seinna skutlaði hann mér í vinnuna. Ég var aðeins með húslykla, lykilkortið úr vinnunni og draumaduluna í vösunum á vetrarúlpunni minni. Ég var á ítrosluendanum fram að hádegi. Vegna tilfærslna á kerfum deginum áður gátum við ekki prentað út og sett saman lista yfir framleiðslutölur fyrsta klukkutímann. Ég hlóð inn fyrstu verkefnunum og handskráði tegundir og fjölda.  Sú fjórða var með mér fram að kaffi hún tók til í tegundirnar eftir listanum mínum og fékk einnig að nota hann til að merkja við þegar hún tók á móti kortunum. Sú sem var í bókhaldinu kom með útprentaða lista um hálftíu akkúrat þegar við vorum búnar með skammtinn sem fer úr húsi klukkan tíu. Eftir kaffi þurfti sú fjórða að fara á hina vinnustöðina sína. Sú sem var í bókhaldinu kom með mér niður og taldi í debet tegundirnar og tók á móti framleiðslunni. Við náðum líka að framleiða megnið af hádegisskammtinum. Fyrirliðinn brá sér tímabundið í bókhaldið og kom niður með tölurnar áður en hún þurfti að skreppa aðeins úr húsi. Eftir hádegi var ég "föst" með nettæknimann við tölvuna mína að finna út úr því hvernig hægt væri að nota verkfæri í smá verk í allra síðasta sinn. Tengingin hafði dottið út við tilfærslurnar og breytingarnar. Það fannst út úr þessu á endanum.

Klukkan hálffjögur rölti ég með fyrirliðanum og einum til yfir í hinn endann á húslengjunni í sal sem tilheyrir húsfélaginu. Þangað mættu svo meirihlutinn af vinnuvélögunum sem hafa starfsstöðvar í Sundaborg og tækninmanninum var boðið með. Þrír leigubílar, einn sem tók átta manns, sóttu okkur um fjögurleitið og keyrðu okkur niður í bæ. Aðeins fjórir fóru á einkabílum. Það var tekið á móti okkur í LÍ við Austurstræti, starfsmannainnganginum, um hálffimm og næstu rúmu tvo tímana fengum við leiðsögn og fyrirlestur um húsið og málverkin sem ekki verður hægt að flytja með þegar flutt verður í nýju höfuðstöðvarnar. Enduðum í hringborðs/koníaksstofunni sem búin var til 2007 en lítur út fyrir að vera enn eldri. Klukkan að verða sjö þökkuðum við fyrir okkur og trítluðum yfir á Jómfrúna. Sendi einkabílstjóranum sms og hann sótti mig þangað korter yfir átta. Við skutluðum þremur af samstarfsmönnum mínum í Sundaborg áður en við fórum heim.

Tilraun

Í fyrrinótt svaf ég frekar stutt, slitrótt og illa. Hluti af því var líklega bland af stressi og spenningi. Eftir smá vangaveltur og umhugsund síðast liðnar vikur ákvað ég að demba mér út í djúpu laugina og gera eitthvað sem gæti mjög hugsanlega haft eitthvað nýtt í för með sér. Um hálftíu á þriðjudagskvöldið sótti ég um reikning hjá nýjasta sparisjóðnum, valdi lit á korti og ég veit að í gærmorgun var framleitt á mig bleikt kort. Reikningurinn varð strax virkur og ég hefði líklega getað fundið út úr því að virkja kortið í símanum til að byrja að nota það strax. Og það voru strax sýnilegar kröfurnar um þá reikninga sem greiða á næst. Mér liggur ekkert á því að byrja að nota þennan reikning og greiðslumáta. Millifærði þó tvisvar sinnum hundrað þúsund krónur af Auka- og ferðasparireikningunum mínum í Landsbankanum. Hugsunin hjá mér er að minnka notkunina á kreditkortinu og einnig að sleppa við færslugjöld eins og reiknast í hvert sinn sem debetkorti úr banka er notað. Enda hef ég ekki notað debetkortið mitt í langan tíma nema þá örfáu sinnum sem ég þarf lausafé en ef maður nota hraðbanka sem merktir eru plastinu þarf maður ekki að borga færslugjöld.

Annars var ég mætt í vinnu upp úr klukkan hálfátta. Var í rannsóknar verkefnum til að byrja með en upp úr hádeginu tók ég við af þeirri sem var í bókhaldinu. Framleiðslan var ekki mjög mikil en það teygðist aðeins á henni. Lokuðum kortadeildinni og gengum frá niðri rétt fyrir þrjú. Ég vann hálftíma lengur að smá bókhaldsverkefnum. Í skottinu á bílnum mínum var ég bæði með sund og sjósundsdót. Ég byrjaði þó á því að renna við í AO við Sprengisand og fylla á tankinn. Það tó smá tíma að komast þangað en það var lítil sem engin röð og ég komst strax að á einni dælunni. Eftir áfyllinguna keyrði ég Bústaðaveginn, mikið að spá í hvort ég ætti að fara í sjóinn eða ekki. Það síðarnefnda varð ofan á og ég fór beint heim. Hringdi í pabba um fjögur leytið. Klukkutíma seinna skruppum við Davíð Steinn í smá æfingaakstur á hans bíl og komum aðeins við í Krónunni við Fiskislóð og Orkunni í Öskjuhlíð.

Rétt eða rangt

Í gær var afmælisdagur æskuvinkonu minnar. Það kom líka í ljós að mamma þeirrar fjórðu átti afmæli í gær og það afmælisbarn gærdagsins er aðeins ári yngri en við vinkonurnar. Var annars mætt í vinnu um hálfátta. Fyrirliðinn og sú fjórða fóru fyrst á vélarvaktina (hvað eru mörg eff í því?). Ég var í rannsóknarvirnnu og aðstoðaði einnig aðeins við bókhaldið. Eftir kaffi leysti ég fyrirliðann af á ítroðsluendanum á meðan hún skutlaði dóttur sinni í flug norður, námstengt. Fyrirliðinn var komin aftur rétt fyrir ellefu. Eftir hádegi leysti ég þá fjórðu af á móttökuendanum á meðan hún æfði sig í að pakka kortum sem fara í útibú. Fengum fjögurra daga uppsafnaðan framleiðsluskammt, nýju leiðina, frá einum bankanum um hálftvö. Það voru um þrjúhundruð kort. Framleiðslu og frágangi var lokið stuttu fyrir þrjú. Fór út af vinnustað skömmu síðar og beinustu leið í sund. Þegar ég var komin á planið við Laugardalslaugina byrjaði ég á því að hringja i æskuvinkonu mína og spjallaði við hana í rúmar tíu mínútur. Klukkan var því orðin hálffjögur þegar ég fór í fyrstu ferðina af fjórum í þann kalda. Þar hitti ég fyrir hóp af fólki sem hafði akkúrat verið að minnast á mig. Í þessum hópi var kalda potts vinkona mín í sinni fyrstu ferð í þann kalda. Eftir fjórðu ferðina elti hún mig í gufuna hún fór svo úr gufunni 1-2 ferðir í viðbót í heita og kalda. Ég fór hinsvegar upp úr og heim. Ég var að spá í að fylla á tankinn þótt hann sé en rúmlega hálfur en ég ákvað að bíða með það. Skv. N1 syninum var brjálað að gera og bara á hans stöð við Gagnveg, seldist 3x meira af bensín og dísel heldur en þá daga sem kallast "mikið að gera". Þetta er alger klikkun en vonandi leysist úr samningaflækjunni milli Eflingar og SA áður en allt verður fast og fer í bál og brand. 

Alveg nóg að gera

Ég mætti í vinnu upp úr klukkan hálfátta. Tók að mér bókhaldið. Lítil framleiðsla var gömlu leiðina en þó nokkur nýju leiðina, mest fyrir "ekki bankann" en það kom ekkert nýju leiðina fyrir einn af bönkunum og hefur ekki skilað sér þá leiðina í þrjá virka daga. Það er sennilega eitthvað bogið við það svo ég á alveg eins von á því að það verði stórar skrár sem koma þegar þetta mun skila sér. Framleiðslu á form og í umslög lauk um hálfeitt. Um eitt leysti ég af á vélinni með þeirri fjórðu. Leyfði henni að æfa sig í að pakka þeim kortum sem fara í öryggispokum í útibú. Hinar og tvær til fóru í það verkefni að farga ónýtum kortum sem hafa verið að safnast upp frá því áður en við fluttum úr Seðlabankanum ásamt tveimur sem komu úr K2. Förgunin tók styttri tíma en ég bjóst við en þó einn og hálfan tíma. Henni var lokið á undan framleiðslunni eftir hádegi og afleysingu minni á vélinni lauk milli hálfþrjú og þrjú. Allt var búið rétt fyrir fjögur. Ég stimplaði mig út skömmu síðar og fór beint í sund. Synti reyndar ekkert en fór tvisvar í kalda, eina ferð í gufu og endaði í sjópottinum í smá stund áður en ég fór upp úr og heim.

Ný vinnuvika

Þrátt fyrir að ég stillti ekki ekki á mig vekjaraklukku var ég vöknuð um hálfátta leytið í gærmorgun. En þá var ég líka búin að sofa tæpa átta tíma en ekki rúma fjóra eins og nóttina á undan. Ég fann að ég var útsofin og dreif mig á fætur. Var ekki með neina sérstaka áætlun í huga. Gufan var lokuð í Laugardalnum á laugardaginn og þótt ég hefði getað farið í aðrar laugar ákvað ég að fara hvergi. Skipti um á rúminu, vafraði á netinu, prjónaði og las til klukkan að verða tíu. Þá setti ég loks í þvottavél og kveikti svo á sjónvarpinu. Hellti upp á kaffi um ellefu, á mjög svipuðum tíma og ég hafði gert á laugardaginn. Strákarnir rumskuðu ekki fyrr en um tvö leytið. Þegar Davíð Steinn var búinn að elda sér nesti fyrir komandi vinnuvaktir og fá sér að borða fórum við í klukkutíma rúnt á bílnum hans með skiltið aftan á og mig í farþegasætinu. Komum til baka um hálffjögur. Hengdi upp þvottinn. Skömmu seinna lánaði ég bræðrunum bílinn minn. Þeir fóru ferð í Sorpu og svo í heimsókn til pabba síns og fjölskyldu hans.

Sunnudagur

Í gærmorgun var ég búin að kveikja á náttborðs lampanum milli fimm og hálfsex og farin að lesa. Fór á fætur um sex leytið og notaði tímann til klukkan að verða átta til vafra um á netinu og setja inn færslu dagsins. Var komin í sund og á braut sex tuttugu mínútum yfir átta. Synti 400 metra, þar af um 250 á bakinu. Það tók mig tæpar tuttugu mínútur. Fór í kalda pottinn í 3 mínútur. Gufan var lokuð svo ég fór beint í sjópottinn í nokkrar mínútur áður en ég fór aftur í kalda pottinn í aðrar þrjár mínútur. Eftir nokkrar mínútur í heitasta pottinum ætlaði ég aðeins að dýfa mér í kalda. Sú dýfa varð að tveimur mínútum. Settist svo á stól úti við í smá stund áður en ég fór inn í sturtu og að þvo mér um hárið. Þegar ég kom heim greip ég í prjónana mína í smá stund. Er langt komin með tuskuna kaðladans. Bætti einum kaðli við munstrið og hafði gatamunstrin á endunum í mismunandi skáa og röð. Fór eftir bókinni í fyrra tilviki og hafði skáa til hægri en í hinum endanum hafði ég skáa til vinstri og byrjaði fyrst á að slá band um prjóninn áður en ég tók eina óprjónaða sem ég steypti yfir næstu prjónuðu lykkju og prjónaði þrjár lykkjur sléttar. Eftir smá prjónastund var komið að lestrarstund. Er byrjuð á annarri bókinni af fimm af safninu; Dóttir Mýrarkóngsins eftir Karen Dionne. Ég er nú búin að lesa tæplega þriðjunginn af rúmlega 300 blaðsíðum. Ég horfði líka á þætti og fótbolta í sjónvarpinu. Um hálfsex leytið skrapp ég með Davíð Steini á rúntinn í rúma klukkustund. Hann fór m.a. á vinnustaðinn sinn og keypti sér sköfu og svo á fyrrum vinnustaðinn N1 í Kópavogi til að skoða breytingarnar á þeirri stöð. Á báðum tilvikum þekkti hann þá eða þau sem voru á vakt.

Lokaðar inni í smá stund

Ekkert verður af aukavinnunni nema ég er nokkuð viss um að n.k. mánuvinnudagur verði svolítið lengri í annan endann. En ég var mætt í vinnu um hálfátta í gærmorgun, fyrst af fjórum. Tvær af hinum komu fljótlega og sú fjórða var mætt fyrir klukkan átta. Verkefni dagsins röðuðust vel niður. Venjulegi framleiðsludagurinn var ekki svo stór en það var nokkuð mikið framleitt fyrir nýjasta sparisjóðinn. Samt ekki stærstu skrárnar sem við höfum séð frá þeim. Ég dembdi mér í að gera tilraun til að raða visa bókhaldinu upp eftir bönkum. Tilraunin tókst vel og var ákveðið að halda inni breytingunum. Búið var að framleiða og telja fyrsta skammtinn upp úr klukkan hálftíu og sá vagn settur inn í hvelfingu. Fljótlega eftir kaffi fór ég inn á kortalager með fyrirliðanum. Hún til að halda áfram merkingum en ég raðaði lagernum fyrir visa kortin eftir nýbreyttu bókhaldinu. Framleiðslunni lauk fyrir klukkan tvö. Fyrirliðinn var þá tekin við að klára að pakka. Fyrrum fyrirliðinn fór í að tæta en sú fjórða kom með mér inn á lagerinn með seinni vagninn. Líklega hefðum við átt að tilkynna hinum tveimur að við ætluðum að raða visakortunum á vagni eftir breyttu bókhaldinu. Við vorum hálfnaðar með verkefnið þegar við heyrðum smá dynk fyrir utan og skömmu síðar varð allt svart og kerfið fór í gang. Fyrirliðinn hélt að við værum farnar, hafði sett læsinguna á hurðina og svo kveikt á kerfinu áður en hún fór út úr húsi. Ég hringdi í hina og hún gat sagt þeim sem var í afgreiðslunni að við værum tvær læstar inni á kortalagernum. Hann tók kerfið af og hringdi í securitas en hún kom niður, tók læsinguna af og bankaði. Við hleyptum henni inn til okkar því við vorum ekki alveg búnar að raða kortunum sem dreifðust í báða vagnana. Engir kortakassar upp á visavagninum eða upp á hlið í hillunum inni í vögnunum. Visa vagninn er fullur en það er enn smá pláss í blandaða vagninum. Við þrjár pössuðum svo upp á að engin yrði eftir inni þegar við fórum út af lagernum og settum lásinn aftur á. Ég var komin út af vinnustaðnum rétt fyrir þrjú og fór beinustu leið heim þrátt fyrir að vera með sunddótið með mér í skottinu. Hringdi í pabba úr heimasímanum og spjallaði við hann í góðar tíu mínútur. Restin af deginum fór í alls konar dútl; netvafr, þáttaáhorf, prjón, lestur og ég fylgdist líka með gagni í leik KA og Vals í handbolta karla á mbl.is.

Líklega aukavinna framundan

Síðan heimalínan komst í lag hef ég aftur komist inn í facebook leik sem sennilega er einn af mestu tímaþjófunum mínum. Ætla ekki að hætta í leiknum en verð vonandi meðvitaðri um tímann, að ég fari ekki yfir ákveðin mörk. Annars var ég mætt í vinnu um hálfátta í gærmorgun. Ég og sú fjórða vorum á sömu vinnustöðvum á framleiðsluvélinni. Daglegri framleiðslu lauk um eitt og eftir talningu og pökkun settum við endurnýjun í gang sem við vorum byrjaðar á fyrr í vikunni. Kláruðum það sem var eftir og gengum frá deildinni þegar klukkan var byrjuð að ganga fjögur. Stimplaði mig út um hálffjögur og fór beinustu leið í Laugardalslaugina. Hitti strax á kalda potts vinkonu mína í kalda pottinum, hún í sinni annarri ferð. Við fórum tvær ferðir í þann kalda, eina í heitasta pottinn og svo elti hún mig í gufuna. Ég fór svo smá stund í sjópottinn en ég held að hún hafi farið tvær þrjár ferðir í viðbót í kalda pottinn. Hún sagðist vera búin að sakna mín mikið og var mjög glöð að hitta mig þótt ég væri bara stutt á svæðinu. Sleppti sundinu sjálfu og var komin heim um fimm leytið. Varðandi titil dagsins þá skrifa ég um það í færslu morgundagsins. 

Ein af safnbókunum á náttborðinu

Var mætt í vinnu um hálfátta í gærmorgun. Aftur fyrst af okkur fjórum. Sá um móttökuendann á vélinni og leiðbeindi þeirri fjórðu og hjálpaði ef hún spurði. Hún er búin að fá að æfa sig á að hlaða inn verkefnum og senda þau af stað á ítroðsluendanum síðan á föstudaginn var og fær að æfa sig út vikuna. Hún stendur sig gríðarlega vel og þrátt fyrir að eiga eftir að setja sig betur inn í bókhaldið og fá að taka svona æfingu þar þá fer líklega ein af okkur hinum þremur að fara á aðra vinnustöð innanhús og læra og æfa eitthvað alveg nýtt í heila viku fljótlega. Við ætlum allar þrjár að fá að setja okkur inn í eitthvað af þeim störfum sem fór fram í þessu húsi áður en kortadeildin bættist við. Það er talað um sjö hlutverk. Hvort við lærum inn á einn eða fleiri mun svo bara koma í ljós með tíð og tíma en það er gríðarlega mikilvægt upp á sveigjanleika og geta sett á sig fleiri en einn hatt til að geta leyst af í veikindum og fríum ef svo ber undir. Var í vinnu til klukkan að verða fjögur. Fór þá beinustu leið heim þrátt fyrir að vera með sjósundsdótið með mér. Ákvað að gera loksins eitthvað í því að fá són á heimalínuna og fékk góða aðstöð í gegnum síma úr þjónustuveri símans. Hringdi svo í pabba úr heimasímanum um fimm leytið. Annars lauk ég við tuskuna óróa og fitjaði upp á kaðladansi, horfði á Kiljuna, seinni hálfleikinn í bikarleik kvenna í handbolta milli Fram og Vals og einn þátt úr sarpinu af "mínum lista". Fór ekki inn í rúm fyrr en eftir ellefu fréttir og tók þá loksins bækurnar fimm upp úr bókasafnspokanum. Byrjaði á að lesa; Líkvaka eftir Guðmund S. Brynjarsson. Um tvöhundruð blaðsíðan bók og strax búin með yfir sextíu blaðsíður.

Mið vika

Rumskaði um þrjú leytið í fyrrinótt. Veit ekki afhverju en einhverra hluta vegna gekk frekar illa að sofna aftur. Um fjögur leytið skrapp ég fram á salerni. Þegar ég kom inn í rúm aftur ákvað ég að stilla vekjarann á tíma sem er rúmum tuttugu mínútum síðar en sá sem ég vel alla jafna alltaf kvöldin fyrir virku vinnudagana. Sofnaði loksins aftur en var vöknuð á tíma sem var mitt á milli umtalaðra tímastillinga. Þurfti að sópa af bílnum en veður og færð var alveg í lagi þrátt fyrir að appelsínugula viðvörunin væri enn í gildi. Mætti í vinnu um hálfátta. Var aftur í bókhaldinu. Þeirri vinnu lauk milli klukkan eitt og hálftvö. Leysti þá af á móttökuendanum á vélinni til klukkan langt gengin í þrjú. Gengum frá deildinni og rúlluðum læstum kortavögnunum inn í kortahvelfingu. Þá fréttist af því að kortasending væri á leiðinni frá Keflavík með securitas bíl og vörðum. Hinar þrjár þurftu allar að vera mættar annað fljótlega en sem betur fer var kerfisfræðingurinn okkar á svæðinu og ekkert að fara strax. Hann er eini fyrir utan okkur fjórar með aðgang að kortahvelfingunni og það þarf tvo til að komast þar inn. Ég var ekki með neitt planað eftir vinnu og tók að mér að bíða eftir kortunum. Sá vinnur í afgreiðslunni uppi og stjórnar umferðinni um móttökuskúrana var líka á svæðinu. Hann átti einnig von á sendingu í hvelfinguna uppi og hún má bara vera opin ef amk tveir eru á svæðinu. Svo þetta dæmi gekk alveg upp. Upp úr klukkan hálffjögur komu þrír bílar með sendingar. Aðeins einn bíll má vera inni í einum í hvorum skúr. Sem betur fer var einn bíllinn aðeins minni en hinir tveir og var honum hleypt inn í minni skúrinn. Kerfisfræðingurinn kom með mér niður að taka á móti nokkrum innsigluðum pokum af kortum sem höfðu verið settir á tvo hjólavagna. Við rúlluðum þessu alla leið inn í kortahvelfingu. Ekki mjög löng leið en innri skúrhurðin (inn í húsið) þurfti að lokast áður en hægt er að opna millihurð inn í ganginn milli kortadeildar og kortahvelfingar. Og sú hurð þarf að lokast áður en hægt er að opna hvelfinguna. Þetta gekk samt vel fyrir sig. Kerfisfræðingurinn var ekki að fara alveg strax svo þeir voru tveir á svæðinu, hann og afgreiðslustjórinn. Ég mátti hins vegar fara og fór beinustu leið heim. Eftir sjónvarpsfréttir skruppum við Davíð Steinn í um klukkustundar æfingar akstur.

Vetrar-veður

Svaf þar til vekjarinn hringdi í gærmorgunn og þá smellti ég einu sinni á blund takkann. Sofnaði ekki aftur en lá líklega í svona þrjár mínútur áður en ég slökkti alveg á vekjaranum og fór á fætur. Var mætt í vinnuna um hálfátta, fyrst af okkur fjórum úr kortadeild. Ég var í bókhaldinu. Smá mánudagur var í framleiðsluvélinni svo fyrsta framleiðsla tafðist um þrjú korter. Skiptum okkur í kaffi og mat og létum vélina ganga alveg til klukkan langt gengin í þrjú. Þá var búið að framleiða yfir ellefuhundruð dagleg kort og sennilega á fimmta hundrað kort endurnýjuð. Ég var komin í sund rétt rúmlega þrjú. Fór beinustu leið í kalda pottinn í rúmar tvær mínútur, tíu mínútur í gufu og korter í sjópottinn áður en ég fór upp úr. Synti semsagt ekki neitt. Næst lá leiðin á bókasafnið. Skilaði þremur bókum sem áttu aðeins einn dag eftir af 60 daga útláni. Lauk aldrei við eina af þessum bókum, var uþb hálfnuð þegar ég fór að lesa tvær aðrar bækur sem ég á sjálf og voru búnar að bíða mis lengi eftir athygli. Tók fimm bækur af safninu og fór svo heim. Var búin að vera heima í um hálftíma þegar Bríet frænka hringdi í Davíð Stein. Hún var alveg að koma í bæinn, þurfti að skreppa í Elko til að kaupa sér nýjan síma. Davíð Steinn er með afslátt í Elko og frænkuna langaði líka til að skreppa með honum á hans bíl svo ég fór með þeim út á Granda. Skrapp þá sjálf aðeins í Krónuna í leiðinni. Þegar við komum til baka elda Davíð Steinn fyrir frænku okkar og hjálpaði henni að setja upp nýja síman og færa allt yfir af þeim gamla sem var skringilega skaddaður. Skjárinn skiptist í miðju með rauðri lóðréttri línu og ekkert hægt að sjá á annan helminginn. Bríet kvaddi um átta leytið og fór beinustu leið austur aftur.

Á blund-takkanum

Svaf til klukkan að byrja að ganga níu í gærmorgun. Korter yfir níu lögðum við sonurinn af stað upp á Gagnveg, skiltið á bílnum ég í farþegasætinu fram í og Davíð Steinn í bílstjórasætinu. Úti var grátt og blautt og svolítil hraðferð á logninu. Ferðin gekk þó mjög vel fyrir sig. Ég ákvað að þyggja kaffi út í bíl áður en ég fór aftur beinustu leið heim. Hugsanlega hefði ég haft gott af því að skreppa aðeins í sund og gufu en ég ákvað að skrópa í gær. Fór ekkert aftur út en horfði á einn leið í enska, nokkra þætti af ýmsu efni, m.a. fyrsta þáttin af "Stormur" og svo númer tvö af átta þegar hann fór í loftið eftir fréttir og Landann. Prjónaði slatta af nýjustu tuskunna á prjónunum og hringdi líka í pabba. 

Sunnudagur

Var vöknuð og komin á fætur um hálfsjö í gærmorgun. Eftir morgunverkin á baðherberginu hafði ég ágætan tíma til að vafra aðeins um á netinu. Tíu mínútum yfir sjö lögðum við mæðgin af stað. Ég setti skiltið um æfingaakstur á skottlokið fyrir ofan númeraplötuna og settist í farþegasætið fram í á mínum bíl. Í Ártúntbrekkunni kom smá hríð og skyggnið varð aðeins verra en Davíð Steinn komst vel í gegnum þá prófraun. Rétt fyrir hálfátta vorum við komin upp á N1 við Gagnveg. Ég tók skiltið af bílnum, færði mig í bílstjórasætið og hinkraði eftir að sonurinn færði mér kaffibolla. Var komin á planið við Laugardalslaugina tæpu korteri áður en opnaði. Sat út í bíl, kláraði kaffið og hlustaði á morgunfréttir áður en ég fór í sund. Synti 400m, þar af 350 á bakinu. Fór eina ferð, þrjár og hálfa mínútur í kalda pottinn, tíu mínútur í gufu og aðrar tíu í sjópottinn áður en ég fór upp úr og þvoði mér um hárið. Kom heim um hálftíu. Klukkutíma seinna setti ég í eina þvottavél og skrapp svo í smá stund vestur í bæ til norsku esperanto vinkonu minnar. Við slepptum esperantóinu en ég þáði hjá henni graut og kaffi. Var komin heim aftur um hálftólf. Fór ekkert aftur út. Aðeins eina ferð í þvottahúsið til að hengja upp. Kláraði að prjóna eina tusku og fitjaði upp á annarri, óróa, úr bókinni sem ég fékk í jólagjöf. Horfði á fótboltaleiki og nokkra þætti. Las og kláraði bók sem ég gaf sjálfri mér; Gauksunginn eftir Camillu Lackberg. Byrjaði á þeirri bók fyrir meira en viku.

Grand, pass eða nóló

Vaknaði upp úr klukkan sex í gærmorgun. Mætti til vinnu um hálfátta. Ég og sú fjórða vorum á vélarvaktinni og að þessu sinni var hún allan daginn á ítroðsluendanum. Var henni innan handar á meðan hún var að hlaða inn fyrstu verkefnum dagsins. Svo ákvað hún sjálf að framleiða aðeins eina tegund í einu sem mér fannst mjög skynsamlegt. Hægt er að framleiða þær tegundir saman sem er hlaðið inn eins en þeim fer nú reyndar fækkandi í flestum verkefnum hjá okkur því breytingar og frávik frá plasti gera það að verkum að búa þarf til ný "load" fyrir margar af tegundunum. Klukkan var orðin tíu þegar við skruppum upp í kaffi. Þá vorum við búnar með fyrsta verkefnið og langt komnar með að telja. Urðum að loka og læsa öllu því það komu gestir úr einum bankanum í hús og alla leið niður á gang. Þótt þeir mættu ekki koma inn í framleiðslurýmið mátti heldur ekki vera neitt í gangi þar inni. Vorum langt komnar með debet daginn þegar við skruppum í mat um tólf. Framleiðslu lauk um tvö og búið var að telja, pakka og ganga frá deildinni rétt fyrir hálfþrjú. Þá átti sú sem var í bókhaldinu bara eftir að útbúa póstmiða með þeim kortum sem voru að fara í póst en ekki útibú. Ég stimplaði mig út korter fyrir þrjú. Var með sunddótið með mér en í stað þess að drífa mig í sund burraði ég alla leið inn í Hafnarfjörð á AO við Kaplakrika og fyllti á tankinn. Það var rigning og mikil bleyta og vatnselgur sums staðar á leiðinni og umferðin farin að þyngjast. Kom heim fyrir klukkan fjögur. 

Rúmlega sex

Það þurfti að sópa af bílnum í gærmorgun en það tók svo sem enga stund því snjórinn var ekki fastur á. Hins vegar var ég ekki skynsöm í skóvali þótt það hafi sloppið til í gærmorgun. Slabbið, krapið og rennandi vökvinn var þannig að það var betra að stíga varlega til jarðar og ekki hvar sem er. Var mætt í vinnu um hálfátta. Um átta fór ég niður með fjórðu manneskjunni. Höfðum sama háttinn á. Ég byrjaði á ítroðsluendanum og var þar fram að kaffi. Vorum í miðju kafi þegar öryggiskerfið fór allt í einu á. Þá var viðgerðarmaður búinn að "brjóstast" inn til okkar um neyðarhurðina. Þessi maður var að leita að myntherberginu og hafði ekki komið síðan kortadeildin bættist við. Eftir kaffi fór ég á móttökuendann. Þegar daglegri framleiðslu var lokið, sem var yfir ellefu hundruð kort, skiptum við aftur um enda. Áttum aðeins eftir um tvöhundruð kort af níuhundruð í endurnýjun þegar við urðum að pakka saman. Klukkan var orðin þrjú. Við höfðum ætlað að klára þessa endurnýjun en urðum að víkja fyrir manneskju sem kom til að setja upp rakamæla í herbergið. Ekki má vera með framleiðslu í gangi á meðan utanað komandi aðilar eru á kortagerðarsvæðinu. Ég var því að labba út af vinnustaðnum um hálffjögur. Fór beint heim. Um átta leytið um kvöldið skrapp ég svo með Davíð Steini sem farþegi í hans bíl í klukkutíma æfinga akstur.

Aðeins lengri vinnudagur

Var vöknuð um sex í gærmorgun og er því greinilega að komast í ákveðna rútínu aftur. Mætti í vinnuna um hálfátta. Ég byrjaði á ítroðsluendanum fram að kaffi. Fjórða manneskjan var með mér. Eftir kaffi fékk hún sinn eigin aðgang að framleiðsluvélinni og við skiptum um stað. Fyrirliðinn leysti mig af í mat rétt fyrir tólf en um það leyti fór vélin að vera með smá vesen. Um hálftvö leytið skiptum við yfir í nýjustu kortin fyrir  nýjustu sparisjóðina sem auglýsa mikið þessa dagana. Höfum verið að framleiða fyrir þá tvo daga í viku en nú vilja þeir fara að fá kortin sín daglega. Framleiddum síðast fyrir þá á mánudaginn og þá voru þetta innan við þrjátíu kort. Í gær var heildarfjöldinn hátt í tvöþúsundogsjöhundruð kort. Þessi kort fara ekki á nein form, þeim er pakkað annars staðar, en við vorum nú samt tæpa þrjá tíma að framleiða þennan helling. Klukkan var því um hálffim þegar ég fór heim úr vinnu. Umferðin var orðin þyngri og ég tæpu korteri lengur á leiðinni heim. Bræðurnir fengu lánaðan bílinn til að fara í eina sorpuferð og Davíð Steinn notaði tækifærið og verslaði inn fyrir sjálfan sig í leiðinni. Við mæðgin fórum ekki á rúntinn í æfingaakstur í gærkvöldi. Held að hvorugt okkar hafi nennt.

Febrúar mættur

Vaknaði um sex leytið í gærmorgun. Mætti í vinnu rétt rúmlega hálfátta. Ég var á ítroðsluendanum á vélinni og sú sem var í fríi á mánudaginn var á móttökuendanum. Sú þriðja í bókhaldinu og sú fjórða í mánaðamótaverkefnum á hinni vinnustöðinni sinni. Dagleg framleiðsla var eitthvað um níuhundruð kort, helmingi fleiri heldur en daginn áður. Samt var þeirri framleiðslu lokið rétt rúmlega tólf. Það var hins vegar verið að pakka alveg til klukkan eitt. Á meðan ég var í mat komu viðgerðarmennirnir í yfirferð á vélina. Þeir voru svo heppnir að borðin yfir vagnana undir lagerhlutina í vélina komu í hús eftir að þeir voru mættir á svæðið. Vélin var blásin hátt og lágt og svo send tvö kort í gegn til að kanna hvort hökt væri á framleiðslunni. En um tvö leytið snéru þeir sér að því að koma skikki á varahlutalagerinn. Ég fékk að fara um hálfþrjú. Fór beint með bílinn í smurningu, ár síðan síðast. Þeir á smurstöðinni skiptu einnig um peru í framljósinu bílstjóra meginn. Þetta tók ekki langa stund. Næst lá leiðin í Krónuna við Fiskislóð. Var komin í götuna rétt rúmlega fjögur. Fékk stæði milli 7 og 9 og hringdi í Odd og bað hann um að sækja þessa tvo poka úr búðinni og ganga frá vörunum.

Janúar á endasprettinum

Svaf alveg þar til vekjaraklukkan gaf til kynna að kominn væri tími á fótaferð í gærmorgun. Davíð Steinn var því á undan mér fram svo ég fór beinustu leið inn í stofu þegar ég var búin að klæða mig. Sinnti ekk morgunverkunum á baðherberginu fyrr en um hálftíma síðar. Var mætt í vinnu rétt upp úr klukkan hálfátta. Ein var í fríi í gær og við höfðum þá fjórðu fram að morgunkaffi. Ég byrjaði því á því að sinna bókhaldsvinnu. Eftir klukkan tíu fór ég niður á móttökuendann á vélinni. Klukkutíma seinna skrapp ég upp til að prenta út hádegisframeiðsluna og skuldfærslubeiðnir fyrir fjóra póstbunka. Komum upp með afganginn af daglegu framleiðslunni korter yfir tólf. Eftir mat unnum við að endurnýjun til klukkan rúmlega hálfþrjú. Ég hætti vinnu um þrjú og fór beinustu leið heim.

Á leið í vinnu aftur

Ég vaknaði um níu í gærmorgun. Rúmlega klukkutíma síðar var ég komin í Laugardalinn. Varð að leggja í stæði við völlinn. Þrátt fyrir full stæði á planinu við laugina var nóg af skápum og samt var helmingurinn af klefanum stúkaður af og merktur keppendum. Ég notaði skápinn undir fötin rétt á meðan ég skrapp í sturtu og hárþvott. Fór svo beinustu leið heim aftur án þessa að fara í sund, potta eða gufu. Við Davíð Steinn fórum ekki aftur á rúntinn í gær. Veit ekki hvort hann nennti að prófa að keyra í þessum smá snjó sem aftur var kominn eða hvort hann nennti ekki út. Ég nennti svo sem ekki aftur út og tók því bara rólega. Horfði á bronsleikinn. Sendi Odd á KFC. Horfði á gull leikinn á HM í handbolta karla. Danir heimsmeistarar í þriðja sinn í röð. Það hefur enginn gert áður. Voru með Frakka í vasanum allan tímann, amk alltaf skrefinu á undan.

Sunnudagur

Það var um eitt leytið að við mæðgin skruppum aðeins á rúntinn í gær á hans bíl. Skiltið um æfingaakstur á skottlokinu, ég í farþegasætinu og Davíð Steinn í bílstjórasætinu. Fyrst lá leiðin aðeins út á Gróttu. Ekkert stoppað þar. Sonurinn skrapp svo í Elko við Fiskislóð að kaupa eitthvað fyrir símann til að tengja í bílinn. Hann fékk ekki alveg allt sem hann vantaði þar svo hann fór næst í tölvubúðina í Skipholti og keypti restina af því sem hann vantaði. Svo lá leiðin inn í Hafnarfjörð og þar var mikið rúntað. Hann kom aðeins við  í N1 til að kaupa sér nýja lykt í bílinn. Þegar við komum heim aftur vorum við búin að vera á ferðinni í um tvo tíma. Nokkru síðar lánaði ég bræðrunum bílinn minn til að fara í heimsókn í Mosfellsbæinn. Ég fór ekkert aftur út en fitjaði upp á nýrri tusku og horfði á nokkra þætti. 

Allt í rétta átt

Ég líkist sjálfri mér meir og meir. Hitalaus í amk tvo daga, ekki þurft að taka verkjalyf síðan í fyrrakvöld og aðeins eftir að losna við smávegis úr brjóstholinu. Er að hósta því upp smátt og smátt. Ég er að bræða það með mér hvort ég komist upp með að skreppa á rúntinn með syninum sem þarf að æfa sig án þess að fara í sturtu í dag. Hann verður kannski að segja til um það hvort mamma hans lykti nokkuð illa. Ég var komin á fætur um níu leytið í gærmorgun eftir að hafa sofið ágætlega út. Minnst vafrað á netinu í gær. Mest horft á þætti og handbolta og eins og ein tuska kláruð. Ég vona svo sannarlega að ég hafi tæklað þessi veikindi það vel að ég leggist ekki aftur í bráð. 

Heil vika

Já, ég er búin að vera heima í viku. Var líklega að verða lasin á fimmtudagskvöldið í síðustu viku en stóð samt vaktina í vinnu á föstudag. Mældi mig fyrst á laugardagsmorgninum. Hitinn er að minnsta kosti farinn en ég er enn að hósta einhverju upp sem er ekki alveg á því að losna. Þetta er samt allt í rétta átt. Davíð Steinn var á sinni seinni vinnuvakt í þessari viku í gær og var farinn löngu áður en ég vaknaði. Ég var nú samt komin á fætur fyrir klukkan tíu. Oddur kom á fætur fljótlega en hann var á leið í blóðprufu og hormóna sprautu. Hann fékk lánaðan bílinn til að fara upp á Landsspítala í blóðprufuna en sprautuna fékk hann í Heilsugæslunni, mætti sjálfur með efnið eins og alltaf. Minn dagur var ósköp svipaður og undan farin vika. En á þriðja tímanum hellti ég mér loksins upp á kaffi. Hafði ekki drukkið svoleiðis síðan í hádeginu á föstudaginn var. Áður en vaktin var búin hjá Davíð Steini sendi ég honum skilaboð um að færa mér poka af hálsbrjóstsykri þegar hann kæmi heim. Ég tók engar verkjatöflur í gær, ekki heldur þegar ég fór að sofa. 

Hætt að mæla mig

Það var gott að geta slakað á og sofa nokkuð langan dúr. Ég var útsofin upp úr klukkan átta og klæddi mig í fyrsta skipti í nokkra daga. Dagurinn fór í svipað og undan farnir dagar. Hálsinn er enn aumur og augun lasleg svo skynsemin segir mér að halda mér heima eitthvað lengur. Semsagt frekar lítið að frétta.

Hitalaus en ekki 100%

Ég rumskaði um sjö leytið í gærmorgun. Mældi mig, skrapp svo á salernið áður en ég kúrði mig aftur undir sæng. Vaknaði aftur á ellefta tímanum. Hringdi í pabba og einnig fyrirliðann í kortadeildinni og grínaðist í báðum tilvikum með að ég þyrfti endilega að hætta að reykja. Röddin er svo rám enda er hálsinn frekar aumur. Um hádegisbilið ákvað ég að skella í mig tveimur parataps töflum og einu vatnsglasi. Var farin að finna eymsli í skrokknum þannig að erfitt var að finna góða stellingu til að sitja eða liggja. Kláraði eina tusku og fitjaði upp á annarri. Vafraði aðeins um á netinu en ekkert eftir klukkan tvö. Horfði á helling af þáttum en það var ekki fyrr en ég fór upp í rúm um tíu að ég las smávegis. Hitamælirinn sýnir 37°C en augun eru frekar mött ennþá og hálsinn aumur. Ég er samt búin að klæða mig í fyrsta sinn síðan á föstudaginn. Hef hina dagana verið á sloppnum og í ullarsokkum.

mínus fimm kommur, 36,5°C

Aðfaranótt gærdagsins var mér verulega erfið. Fann til, sama á hvaða hlið ég reyndi að leggjast. Ég reyndi fyrst að fara í rúmið um tíu en þetta endaði með því að ég var stöðutg að koma fram í lengri eða styttri ferðir. Mig minnir að ég hafi loks náð að sofna eitthvað á fimmta tímanum en svo var ég vökunuð aftur upp úr klukkan sjö. Þá mældi ég mig og var með fimm kommur. Dagurinn fór í merkilega lítið netvafr, ekkert lesið, smá prjónað en horft á þætti og handbolta. Mældi mig aftur um níu leytið um kvöldið og var þá með átta kommur. Hélt að ég væri orðin nógu þreytt til að lognast útaf en svo var ekki. Um tíu ákvað ég því að senda Odd fyrir mig út í lyfju að kaupa verkjalyf. Hann kom til baka með eina pakkningu af 500mg parataps og aðra pakkningu með 400mg íbúfen. Ég tók tvær parataps töflur og kláraði að horfa á þátt sem ég var langt komin með að horfa á. Þegar ég fór upp í rúm um ellefu fann ég ekkert til og hef líklega sofnað mjög fljótlega. Þrátt fyrir að hitinn sé að víkja er mjög líklegt að ég verði að fara mjög vel með mig í nokkra daga enn og finnst ólíklegt að ég sé á leiðinni í vinnu þessa vikuna. Ég er enn að hósta þótt ég hósti ekki oft, hef ekki verið að hósta mikið en það er samt eitthvað ofan í mér sem er smám saman að losna.

Fimm kommur

Rumskaði frekar snemma í gærmorgun og mældi mig, 38,5°C. Skrapp aðeins á baðherbergið en fór beint upp í rúm aftur og sofnaði. Svaf í rúma þrjá tíma í viðbót. Á tólfta tímanum hringdi ég í fyrirliða kortadeildar og tilkynnti henni stöðuna á mér. Tók því svo frekar rólega allan daginn. Prjónaði smá og horfði á boltaíþróttir og þætti. Eitt af því sem ég gerði ekki var að lesa og síðustu kvöld hef ég farið upp í rúm án þess að lesa staf. Á eftir að lesa eina bók af safninu en ég framlengdi skilafrestinum og þarf ekki að hafa áhyggjur næstu rúmu tvær vikurnar. Þegar Davíð Steinn kom heim úr vinnu í gærkvöldi fór hann næstum beint niður í þvottahús með nýja verkfærið. Þegar hann hafði dvalið þar um stund sendi ég Odd niður til hans. Það er ekki vandamál að skrúfa upp snúrurnar en þeir eru ekki búnir að því nema að hálfu leyti því snúrurnar eru eitthvað flæktar. Kannski finna þeir út úr þessu í dag. 

Nýtt verkfæri

Ég mældi mig snemma í gærmorgun og var þá með 38,5°C hita. Rétt fyrir sjö bankaði ég hjá Davíð Steini til að segja honum að hann yrði að bjarga sér sjálfur í vinnuna. Hann var svo sem búinn að undirbúa sig undir það því hann varð var við að ég var að hósta mikið kvöldið áður. Hann tók leigubíl upp á Gagnveg og fær hann vonandi endurgreiddan. Ég fór fljótlega aftur inn í rúm og svaf næstum fram að hádegi. Var þó komin fram aftur um hálftólf í slopp og sokkum. Tveimur tímum seinna bankaði ég hjá Oddi. Ég var búin að millifæra 50000 á hann og bað hann um að fara í Bauhaus til að kaupa borvél sem líka væri hægt að nota sem skrúfvél og þá bæði bor- og skrúfbitasett. Það er útsala um þessar mundir og Oddur fékk ágætist grip á eitthvað um 43000 krónur. Var sagt að gripurinn ætti að endast í 10 ár. Nú verður loksins hægt að skrúfa upp nýju snúrurnar. Þeir munu gera það í sameiningu, bræðurnir, þegar Davíð Steinn kemur heim úr vinnu í kvöld. 

Lasin

Vinnudagurinn í gær var frá rúmlega hálfátta til rúmlega þrjú. Ég var í bókhaldinu. Við fengum aukamanneskjuna með okkur. Hún er reyndar alls ekki auka því hún á að koma inn í þetta með okkur með tíð og tíma en hún þarf líka stundum að sinna verkefnum sem hún hefur verið að sinna fram að þessu, sérstaklega ef það eru frí. Fyrirliðinn fékk tækifæri til að taka saman pappíra um ónýt kort í nóvember og desember og ég hjálpaði til við að sortera, telja og stemma af. Ég fór beinustu leið heim eftir vinnu. Var komin með leiðinda kuldahroll. Fljótlega eftir að ég kom heim vafði ég teppi utan um mig. Ég fór ekki að sofa fyrr en á tólfta tímanum og nú brá svo við að ég las ekki einn staf í bókinni sem er á náttborðinu þessa dagana. 

Föstudagur

Fengum fjórðu manneskjuna með okkur í gærmorgun og hún var á mótökuendanum á vélinni með mér til hádegis. Framleiðsla gekk næstum eins og í sögu og vorum við búnar með allt daglegt um tólf. Fljótlega komu viðgerðarmennirnir til að yfir fara vélina. Ég fór fyrst í mat og sú sem var með mér um morguninn fór einnig í mat og svo önnur verkefni. Eftir hádegishléið tók ég prjónana með mér niður í korta deild og sat yfir. Strákarnir voru búnir að taka öll lok af vélinni og svo ryksuguðu þeir og blésu. Um þrjú komu tvö úr arion banka í heimsókn og fengu að fræðast um alla starfsemi seðlaversins. Þau komu í kortadeildina þegar viðgerðarmennirnir voru að setja saman vélina aftur og fengu að sjá eitt kort framleitt. Var ekki búin í vinnu fyrr en um hálffimm en þá fór ég beint heim fyrst sundlaugar og aðastaðan í Nauthólsvík voru lokuð vegna kulda og til að spara vatnið. 

Færsla no 3494

Í dag eru tuttugu ár síðan ég byrjaði á þessum vettvangi, að blogga. Færslurnar eru orðnar hátt í fjögur þúsund en sum bloggárin voru rýrari en önnur. Ef ég hefði sett inn eina færslu á dag væru þær orðnar rúmlega sjöþúsundogþrjúhundruð. Gærdagurinn var annars alveg ágætur. Var í bókhaldinu. Færði mig yfir í tímon úr tempo og er nú komin með vinnuskráningar app í gemsann þar sem ég get stimplað mig inn og út. Um tvö leytið leysti ég aðra af á vélinni sem þurfti að fara. Það var aðeins eftir að framleiða rúmlega þrjátíu kort, telja, pakka og ganga frá. Það var allt búið um þrjú leytið og um hálffjögur fór ég heim. Hringdi í Lilju vinkonu og pabba en um hálffimm var ég búin að kveikja á sjónvarpinu til að horfa á HM stofuna og landsleikinn. Seinna um kvöldið horði ég að parta úr leik Svía og Ungverja og Cristal Palace og Man. Utd.

Miðvikudagur

Það var vekjaraklukkan í gemsanum sem ýtti við mér í gær. Að vísu var ég búin að rumska en það var vel fyrir sex og ég sofnaði sem betur fer aftur. Hafði alveg tíma til að vafra um á netinu en var mætt í vinnuna tuttugu mínútum fyrir átta. Var á ítroðsluendanum á vélinni. Kláruðum fyrsta skammtinn, sem var yfir tvöhundruð kort, korter yfir níu. En þegar við ætluðum að fara að framleiða kort á form var prentarinn með mjög þreytandi vesen og það tók okkur eina og hálfa klukkustund að koma honum í gang. Kláruðum endurnýjun korta sem renna úr gildi um næstu mánaðamót. Um fimm hundruð kort. Byrjuðum á daglegri framleiðslu rúmlega tólf en þá tók prentarinn aftur kast. Þrátt fyrir að dagleg framleiðsla væru aðeins færri kort en þau sem við vorum að endurnýja vorum við ekki búnar fyrr en rúmlega fjögur og klukkan var orðin hálffimm þegar ég kvaddi vinnustaðinn minn. Fór beinustu leið í sund og náði aðeins í "skottið" á kalda potts vinkonum minni. Eftir sundið kom ég við á AO við Sprengisand og fyllti á tankinn. 

Mánuðurinn rúmlega hálfnaður

Var mætt í vinnuna rétt upp úr klukkan hálfátta. Sú sem var í bókhaldinu var komin en ekki búin að fara niður. Ég skrapp því niður til að kveikja á vélinni og rakatækinu. Áður en lengra var haldið fór ég upp aftur, fyllti á vatnsflöskuna, fékk mér kaffi og settist aðeins niður með prjónana mína í kaffistofunni. Ég var á móttökuendanum. Áttum bara eftir hádegis framleiðsluna þegar við fórum í mat upp úr klukkan tólf. Þegar daglegri framleiðslu og pökkun lauk héldum við áfram með endurnýjunina. Vélin var hundleiðinleg. Unnum til klukkan að verða fimm en náðum ekki að klára allt það sem við ætluðum okkur, eigum rúmlega fimmhundruð kort eftir af því. Hlustaði á lýsingu á landsleiknum á Rás tvö á leiðinni heim og var fyrri hálfleikur rúmlega hálfnaður þegar ég kom heim og kveikti á sjónvarpinu. 

Mánudagur

Ég var komin á fætur um átta leytið í gærmorgun. Tók því frekar rólega og vafraði um á netinu dágóða stund. Um hálfellefu skrapp ég út til að færa bílinn. Kom beint inn aftur og kveikti þá á sjónvarpinu og horfði á nokkra þætti. Um tvö leytið ætluðum við Davíð Steinn að skreppa aðeins á rúntinn á nýja bílnum hans. Bíllinn fór hins vegar ekki í gang. Var rafmagnslaus, sennilega vegna þess að hann hafði skilið ljósin inni í bílnum eftir á en kuldinn hefur heldur ekki hjálpað til. Vinnufélagi hans sendi pabba sinn á staðinn til að gefa start. Pabbinn kom um fjögur og skömmu síðar gátum við loksins lagt af stað. Sonurinn ók um borgina og nærliggjandi sveitafélög. "Fann" ansi mörg hringtorg og þurfti einnig að stoppa á mörgum ljósum. Bíltúrinn tók um klukkustund. Hann drap aldrei á bílnum og skiptingarnar og að taka af stað verður sífellt mýkra hjá honum. Honum fer fram og hann er vandvirkur og athugull fyrir. Kláraði eldhúshandklæði úr afgöngum. Á samt nóg af afgöngum í amk tvö handklæði eða nokkrar tuskur enn. Fitjaði þó upp á nýrri tusku úr nýju bókinni af nýrri garnhnotu úr Söstrene Grene.

Töp og sigrar

Ég svaf út í gærmorgun og klukkan var byrjuð að ganga tíu þegar ég dreif mig loksins á fætur. Eftir morgunverkin á baðherberginu vafraði ég um á netinu til klukkan að verða hálfellefu. Þá fór ég með esperanto dótið mitt yfir í vesturbæinn til esperanto vinkonu minnar. Komum okkur í ágætis esperanto gír. Var komin heim aftur skömmu fyrir klukkan eitt. Fór ekkert út aftur en setti í eina þvottavél, vafraði á neti, prjónaði og horfði á fótbolta, körfubolta, handbolta og þætti. Lánaði bræðrunum bílinn. Þegar þeir komu til baka fann Oddur ekkert annað stæði en bak við heilsugæsluna. 

Á rúntinum

Mætti í vinnu rétt upp úr klukkan hálfátta. Ég var aftur á ítroðsluendanum en hinar tvær skiptu um vinnustöð. Daglegri framleiðslu lauk á svipuðum tíma og daginn áður eða um hádegið. Eftir hádegi framleiddum við eitthvað í kringum fimmhundruð kort í endurnýjun. Hættum vinnum um hálfþrjú. Ég fór beinustu leið heim þrátt fyrir að vera með sjósundsdótið með mér í bílnum. Málið var að það var stutt í háfjöru og ég var ekki alveg í stuði til að vaða "hálfa leið" til Kópavogs. Hefði reyndar ekki þurft að gera það svo sem því það er vel hægt að svamla um í sjó sem nær upp að hné. Þegar klukkan var byrjuð að ganga sex fórum við Davíð Steinn saman að bílnum hans. Illa gekk að bakka út úr stæðinu og það virtist ekki nóg að ég ýtti en sem betur fer kom að ungur maður sem hjálpaði mér svo eftir tíu mínútna streð komst Davíð Steinn loksins út úr stæðinu. Leiðin lá fyrst að N1 í Kópavogi, gömlu vinnustöðinni hans. Þar fyllti hann á bílinn og bætti einnig á rúðuvökvann. Svo keyrði sonrinn í gegnum Breiðholtið og yfir í Grafarvog og stoppaði smá stund á N1 við Gagnveg. Þaðan ók hann í gegnum Grafarvoginn og svo aftur heim. Þessi ferð tók um eina og hálfa klukkustund. Ég finn það að hann verður góður ökumaður. Hann er varkár og ekur frekar mjúklega. Þarf að æfa sig í að taka af stað í brekku og passa að leita ekki of mikið til hægri út í kantinn. 

Sigur í fyrsta leik á HM í handbolta karla

Vaknaði upp úr klukkan sex og var komin fram fljótlega eftir það. Nógur tími til að vafra um á netinu og setja inn færslu á þessum vettvangi. Davíð Steinn kom fram fyrir klukkan hálfsjö og var farinn út úr húsi innan við korteri seinna. Ég mætti í vinnuna korter í átta. Var á ítroðsluendanum. Kláruðum daglega framleiðslu um hádegið. Eftir hádegi unnum við að endurnýjun. Þá var vélin byrjuð að vera með stæla og á þeim tíma sem við hefðum venjulega verið að framleiða hátt í þúsund kort framleiddum við rúmlega fjögurhundruð. Fór beint í sund eftir vinnu. Hringdi þó fyrst í pabba þegar ég var búin að leggja bílnum við Laugardalslaugina. Hitti kalda potts vinkonu mína í hennar þriðju ferð í kalda. Fórum saman í fjórar ferðir og svo í gufu. Ég fór í sturtu eftir gufuna og synti 200 metra áður en ég fór upp úr og þvoði mér um hárið. Var komin heim um hálfsex. Byrjaði á því að vafra um á netinu til klukkan að verða sjö en þá kveikti ég á sjónvarpinu til að horfa á HM stofuna og leikinn Ísland - Portúgal 30:26. Fyrstu mínúturnar leit þetta mjög vel út en leikurinn jafnaðist út eingöngu vegna of margra tapaðra bolta hjá okkar strákun. Portugalir komust samt aldrei yfir í leiknum. Þeir eru með mjög gott lið en þetta datt okkar meginn í gær, þökk sé góðri vörn og Bjöggi var frábær í markinu. Viktor Gísli varði eitt víti og leysti Bjögga af um stund þegar sá síðarnefdi var búinn að fá boltann í höfuðið í tvígang.

Fatakaup

Davíð Steinn svaf aðeins yfir sig í gærmorgun svo ég bauðst til þess að skutla honum í vinnuna. Á leiðinni út götuna ókum við framhjá bílnum sem hann fjárfesti í í fyrradag. Hvít volkswagen bjalla með númerið KMT96. Vinnufélagi hans vann í að leita að bíl með honum og sá er einnig skráður sem leiðbeinandi vegna æfingaakstur svo Davíð Steinn fékk rúmlega klukkutíma æfingu seinni partinn á þriðjudaginn. Ég var mætt í vinnu rétt upp úr klukkan hálfátta eftir að hafa skilað syninum af mér korteri fyrr. Ég var á móttökuendanum á vélinni. Kláruðum daglega framleiðslu og pökkun um hádegi og unnum að endurnýjun eftir hádegi. Fór beinustu leið í sund eftir vinnu. Hafði ætlað mér að synda smá baksund og þvo mér um hárið á leiðinni upp úr en ég hafði ekki tekið með mér höfuðhandklæði svo ég sleppti öllu sundi og hárþvotti. Fór 2x5 mínútur í kalda, einu sinni í heitasta, einu sinni í sjópottinn og einu sinni í gufuna. Áður en ég fór heim kom ég við í Belladonna og keypti mér 4 buxur.

Í jafnvægi

Ég var  aftur á bókhaldsvaktinni í gær. Leysti aðra af á vélinni milli eitt og hálfþrjú þar sem hún fór á fund og hina um hálffjögur en hún var á leið í sjúkraþjálfun. Bras var á vélinni og þegar við vorum loksins búnar að framleiða um 500 kort þurftum við að lesa saman mest alla framleiðsluna til að finna út hvaða eina kort hafði verið á lista. Listinn hafði óvart verið þurrkaður út. Þetta varð til þess að klukkan var að verða fimm þegar við gátum farið úr vinnu. Og þrátt fyrir að vera með sunddótið meðferðis fór ég beinustu leið heim.

Sjórinn góður

Ég var mætt fyrst í vinnu í gærmorgun. Fór niður og kveikti á vélinni, teljurum og rakatæki. Var að vinna í að prenta út fyrstu tölur þegar samstarfskonur mínar mættu. Ég var semsagt í bókhaldinu í gær. Við unnum til hálffjögur. Þá fór ég beint í Nauthólsvík. Var mætt rétt fyrir fjögur. Sjórinn -1,8°C og aðeins byrjað að flæða að aftur. Engin ísing var á sjónum enda aðeins meiri hreyfing á logninu. Ég var rúmar þrjár mínútur út í og var svo búin að vera tíu mínútur í pottinum þegar þrjár úr sjósundshópnum mættu. Þær fóru í lónið sem þær sögðu vera mun heitara en sjórinn. Var komin heim um fimm leytið. Í dag eru tuttuguogþrjú ár síðan ég byrjaði að vinna hjá RB.

Helgin liðin

Fór á fætur um átta. Rúmlega klukkutíma síðar settum við skiltið á bílinn og Davíð Steinn keyrði sig í vinnuna. Ég tók skiltið af þegar við vorum komin upp á Gagnveg, kvaddi soninn og dreif mig í sund. Synti 400 metra, fór 3x5 mínútur í kalda, einu sinni í sjó pottinn og einu sinni í gufuna. Heitasti potturinn var lokaður. Hitti tvær úr sjósundshópnum mínum örstutt. Var komin heim um hálftólf og byrjaði á því að hella upp á könnuna. Sýslaði við nokkurn veginn það sama annars þegar ég er heima við. Dagurinn var alltof fljótur að líða. 

Æfinga akstur

Var vöknuð upp úr klukkan sex í gærmorgun. Rétt fyrir sjö heyrði ég í vekjaraklukkunni hjá Davíð Steini. Tíu mínútum seinna hringdi ég í hann til að ýta við honum. Bauð honum að keyra sig sjálfan í vinnuna. Settum skiltið neðst á skottlokið og tókum ökubókina sem ökukennarinn er búinn að kvitta í fimm sinnum og sýslumaður stimpla leyfi til að æfa sig í akstri. Þetta var í fyrsta sinn sem Davíð Steinn keyrði sjálfskiptan bíl og þetta gekk bara nokkuð vel hjá honum. Aðeins einu sinni sem hann bremsaði svolítið harkalega. Þegar við komum upp á Gagnveg tókum við skiltið af og skiptum um sæti. Ég þáði kaffi bolla með mér til baka og kláraði að drekka hann á planinu við Laugardalslaugina. Fór tvær ferðir í kalda pottinn, eina í heitasta og eina í sjópottinn áður en ég synti 300 metra. Var komin heim um tíu. Klukkutíma síðar skrapp ég til norsku esperanto vinkonu minnar. Skilaði henni smákökudósinni. Var með esperanto dótið meðferðis en við vorum hvorugar í stuði í svoleiðis æfingar í gær og frestuðum þeim um viku. Fór með bílinn í gegnum löðurþvottastöðina við Fiskislóð og skrapp svo í Krónuna á eftir. Kom heim um hálftvö og var nýbúin að ganga frá vörunum þegar Oddur Smári kom fram. Horfði á æfingaleikinn milli Þýskalands og Íslands, fitjaði upp á nýrri tusku, vafraði svolítið á netinu og fleira. Um sex var ég mætt á staðinn Matur og Drykkur við Grandagarð 2. Móðursystir mín hafði boðið mér í mat með þeim mæðgum nöfnu minni og kærasta hennar. Þannig að við vorum fjögur. Mæli eindregið með þessum stað. Góður matur og mjög góð þjónusta. Var komin heim aftur um hálfníu. 

Nægjusemi

Var komin á fætur rétt rúmlega sex í gærmorgun. Eftir morgunverkin á baðherberginu settist ég inn í stofu með fartölvuna í fanginu næsta klukkutímann eða svo. Mætti í vinnu um hálfátta leytið. Var á móttökuendanum á vélinni og kláruðum allt daglegt um tólf. Eftir hádegi var klárað og telja og svo gengum við bara frá vélinni og deildinni og hættum vinnu um tvö samt ekkert svo löngu á undan öðrum vinnufélögum á staðnum. Ég fór beinustu leið í Nauthólsvík. Þurfti að vaða varlega út í -2,1°C sjóinn en tolldi samt rúmlega mínútu út í áður en ég fór aftur upp úr og í heita pottinn. Klukkan var ekki orðin hálffjögur þegar ég kom heim. 

Ýmislegt

Vinnudagurinn í gær var örlítið styttri en samt náðum við að framleiða yfir ellefuhundruð kort í endurnýnun fyrir utan daglega framleiðslu. Ég var á ítroðsluendanum en hinar tvær skiptu um stað. Sú sem er búin að vera í bókhaldinu undanfarna viku kom á móttökuendann. Vorum búnar að ganga frá deildinni um hálfþrjú. Ég fór beint í sund. Staldraði þó aðeins við í bílnum á planinu og hringdi í eina vinkonu mína sem var að missa pabba sinn í fyrradag. Hún var á rölti á Laugaveginum með einni af systrum sínum til að dreifa huganum aðeins. Synti 300 metra áður en ég fór í kalda pottinn þar var kalda potts vinkona mín að ljúka sinni annarri ferð þar en hún hafði líka mætt í fyrra fallinu. Saman fórum við 4 ferðir í kalda, þann heitasta á milli og í gufuna eftir síðustu ferðina í kalda. 

Tækifæri

Ég var mætt í vinnu tuttugu mínútum fyrir klukkan átta. Sú sem hefur verið í bókhaldinu síðustu daga var beðin um að vera í því enn einn daginn en við sem vorum niðri skiptum um enda. Ég var semsagt á ítroðsluendanum. Daglegri framleiðslu lauk um hádegið. Eftir hádegi ætluðum við að byrjað á einni endurnýjuninni sem bíður. Það gekk ekki þrautalaust fyrir sig. Hluti af því var að búið er að taka öll gömul load til hliðar. En þegar búið var að færa fjögur af þeim til baka, fjögur sem tilheyra sex óframleiddum skrám kom í ljós að það var eitthvað meira að því vélin vildi hvorki starta á skrám hvort sem kort áttu að fara á form eða ekki. Kerfisfræðingurinn hafði verið beðinn um að setja inn nýtt forrit inn í Smára (Smári er kerfi sem m.a. "talar" við örgjörvamódúlana í framleiðsluvélinni) af öryggisstjóra. Það var ekki fyrr en búið var að stöðva þetta forrit að kortavélin samþykkti að fara af stað. Framleiddum eina af sex skrám sem bíða. Ég var komin heim um hálffjögur og bað Odd um að skreppa eina ferð í Sorpu, sem hann gerði. Hann hefði helst vilja fara í dag en ég er búin að lofa mér í sund seinni partinn í dag.

Tilraun

Í gærmorgun vaknaði ég við vekjaraklukkuna. Ég hafði reyndar rumskað um fimm en sem betur fer steinsofnað aftur. Það var smá bras að bakka út úr stæðinu þegar ég var að leggja af stað í vinnuna um hálfátta en það tókst í fimmtu tilraun. Vorum á sömu vinnustöðvum, ég semsagt á móttökuendanum og að pakka. Hættum vinnu um þrjú og ég fór beint í sund. Byrjaði á kalda pottinum en sat svo í þeim heitasta þegar kalda potts vinkonan kom úr gufu. Hún var þá þegar búin með tvær ferðir í kalda en saman fórum við í fjórar og svo í gufu. Eftir gufubaðið fór ég í sturtu og synti 200 metra á bakinu áður en ég fór upp úr og þvoði mér um hárið. Kom aðeins við í Hagkaup í Skeifunni á leiðinni heim.

Án titils

Var vöknuð um sex og komin fram á undan Davíð Steini sem þó fer alltaf á undan út úr húsi. Hann kom fram um hálfsjö og var farinn tíu mínútum seinna. Útidyrnar stóðu ekki á sér að þessu sinni, hvorki þegar hann fór né þegar ég fór rúmum hálftíma seinna. Er helst á því að minnsta einingin í lásnum hafi frosið eða staðið á sér í fyrrakvöld. Bíllinn var í Blönduhlíð. Þurfti aðeins að sópa af honum en ekki mikið þó. Í vinnunni var ég á móttökuendanum og í pökkun. Vélin hagaði sér þokkalega og við gátum klárað eins og eitt stykki endurnýjun og vorum samt hættar um þrjú. Endurnýjunum er samt ekki lokið en það saxast á þær og vonandi verða þær búnar áður en þær næstu skella á okkur. Ég fór beinustu leið í Nauthólsvík eftir vinnu. Enn var mikill krapi þar sem ég er vön að fara út í. Sjórinn -1,6°C. Við vorum nokkur sem fórum út í á sama tíma. Fórum ekki langt. Ég var um mínútu út í þarna meginn en skrapp svo í lónið í 3 mínútur áður en ég fór í pottinn. Var komin heim um hálffimm. Kláraði tuskuna Blanda og fitjaði upp á nýrri sem heitir Ferningar. Horfði að mestu á leikinn í enska en mínir menn Liverpool töpuðu á úti velli fyrir Brentford sem er á góðri leið að gera heimavöllinn sinn óvinnandi vígi og þó voru þeir án síns besta manns. Aðeins Arsenal hafa unnið þá á þessum velli á þessari leiktíð.

Ryk

Rumskaði um sjö leytið í gærmorgun en steinsofnaði fljótlega aftur. Komst svo á fætur rétt áður en klukkan varð tíu. Ekki það að ég ætlaði mér neitt að vakna mjög snemma og ég var alls ekki með nein plön önnur en að taka því rólega heima við og sinna mínum hugðarefnum. Tók tvær bækur með mér inn í stofu en las svo ekkert í þeim fyrr en ég fór upp í rúm um kvöldið. Það var prjónið, netvafrið, fótboltinn og þáttaáhorf sem urðu ofan á fram eftir degi og fram á kvöld. Lánaði Oddi bílinn um miðjan dag. Ég var farin að sofa þegar Davíð Steinn hringdi um hálfellefu. Þá voru þeir bræður fyrir utan en útidyrnar vildu ekki opnast utan frá. Ég fór í slopp og niður en gat heldur ekki opnað innan frá svo ég hleypti sonunum inn um dyrnar í kjallaranum. Veit ekkert hvað er í gangi með þessa hurð en það verður skoðað. 

!

Enn eitt árið horfið í aldanna skaut og nýtt ár að hefja sína vegferð. Ég var komin á fætur um níu í gærmorgun. Þrátt fyrir ágætis veður ákvað ég að senda skilaboð til norsku esperanto vinkonu minnar að ég væri löt og ætlaði bara að halda mig heima við. Og það gerði ég, hélt mér heima við. Vafraði á netinu, kláraði eina tusku og byrjaði á annarri, horfði á þætti, fótbolta, fréttaannál og skaup og hafði það yfir höfuð mjög notalegt. Við Oddur voru tvö heima, Davíð Steinn var hjá vini sínum á Akranesi og kemur ekki heim fyrr en í kvöld. Ég var með ofnrétt úr kjúkling og grænmeti og hafði einnig bygggrjón með. Í stofunni var ég með tvær bækur á kantinum en ég las ekki í þeim fyrr en ég var komin upp í rúm um hálfeitt leytið. 

Gamla árið kveður brátt

Var mætt í vinnu korter fyrir átta. Höfum sömu verkaskipan á. Umslagavélin er alls ekki 100% en það er hægt að koma meiru í gegn en undanfarið. Slökktum á vélinni þegar við fórum í kaffi en kveiktum á tölvunni aftur. Þegar við komum niður aftur um tíu kveiktum við á vélarpartinum og fyrirliggjandi daglegur skammtur var kláraður á hálftíma. Á meðan við biðum eftir hádegis skammtinum framleiddum við nokkrar skrár af endurnýjun. Hádegis framleiðslan var langt innan við 100 kort og við vorum búnar að slökkva og ganga frá vélinni fyrir klukkan tólf. Sú sem var á móttökuendanum þurfti að skreppa frá í hádeginu. Við hinar tvær tókum að okkur frá ganginn í kaffistofunni eftir matinn og klárðuðum svo að telja og ganga alveg frá kortadeildinni. Ég var farin út af vinnustaðnum um tvö. Ætlaði að koma við í AO við Sprengisand en þar var mikið að gera svo ég mjakaði mér eftir umferðinni á Reykjanesbraut sem var extra hæg vegna óhapps og fyllti á tankinn við Kaplakrika. Þetta tók mig í það heila um klukkustund. Var komin í Nauthólsvík rúmlega þrjú. Það var 15 stiga frost, hægur vindur og sjórinn við ströndina ísi lagður sums staðar en einnig mjög krapa kenndur. Samkvæmt mælingum var hitastigið á sjónum -2,2°C. Ég ákvað að láta vaða á þetta en varlega þó. Hafði áður farið í hann -1,8°C. Fór ekki langt út í en upp að rúmlega hné og settist þá niður í hálfa mínútu eða svo. Rölti svo yfir að lóninu sem er einhverjum örfáum gráðum heitara og buslaði þar í ca tvær mínútur áður en ég fór í heita pottinn um stund. Var komin heim um hálffimm. Um átta var sýnt beint frá Liverpool - Leicester 1:2. Gestirnir skoruðu öll mörkin.

Síðasti virki dagurinn

Var mætt í vinnu tuttugu mínútum fyrir átta. Ákváðum að hafa sömu vinnustaði. Á ellefta tímanum kom annar viðgerðarmaðurinn til að fylgjast með umslagavélinni í ham og hinn viðgerðarmaðurinn bættist við rúmum klukkutíma síðar. Sá fyrri fór um eitt en hinn var alveg þar til við hættum vinnu um hálffjögur. Eftir hádegið, þegar allt daglegt var búið, framleiddum við slatta af endurnýjun en þó ekki eins mikið og ef umslagavélin væri í 100% lagi. Vonandi finnst út úr þessum bilinum fljótlega. Mætti í sund beint eftir vinnu og þá var kalda potts vinkona mín búin að fara 4 ferðir í kalda og eitthvað í gufuna. Hún fór þrjár ferðir í kalda með mér en ég var búin að fara eina áður því hún var í gufunni þegar ég mætti á svæðið. Kom heim um fimm leytið og fljótlega kom nafna mín og frænka, sú hálf danska, í heimsókn og færði mér gjöf fyrir passið á kisunni. Þau sögðu að auðvitað hefði kisan verið fúl yfir því hversu lengi þau skildu hana eftir eina en þau fundu samt að hún var í góðu jafnvægi. Frænka mín kvaddi rétt fyrir sjö. Ég horfði á fréttir og íþróttamann ársins. Kláraði tuskuna Línudans og gekk frá endum. Fitjaði svo upp á tuskunni Tíglatjútt. 

Mjög lítið eftir af þessu ári

Var vöknuð rétt fyrir klukkan sex í gærmorgun og komin á fætur skömmu síðar. Eftir morgunverkin á baðherberginu hafði ég því tæpa klukkustund í að vafra á netinu. Mætti í vinnu rétt rúmlega hálfátta.  Það kom í ljós að vélin er ekki alveg upp á sitt best ennþá þótt hún sé miklu, miklu skárri. Ég var á ítroðsluendanum. Þegar við fórum í hádegismat áttum við aðeins eftir að framleiða það sem keyrt er til okkur um ellefu leytið. Slökktum alveg á vélinni á meðan við tókum matartímann. Sú sem var á móttökuendanum á eldhúsvaktina þessa vikuna. Hin sem er skráð með henni er á sjúkrahúsi en það var nóg um hjálparhendur í staðinn. Vorum komnar niður í kortadeild aftur um eitt. Vélin vann ágætlega fyrsta korterið en svo fór allt í sama farið hvað varðar þann part þar sem kortin eiga að koma út á formi og í umslögum. Framleiddum þó 86 kort aukalega og erum þar með formlega byrjaðar að endurnýja þau kort sem gilda frá mánaðamótum janúar febrúar. Hættum framleiðslu um tvö leytið og gengum frá. Ég var komin út af vinnustaðnum um hálfþrjú. Skrapp fyrst upp í Kringlu. Skilaði þremur bókum á safnið og skipti svo bókinni sem Bríet frænka gaf mér í jólagjöf í Eymundsson. Var búin að lesa þá bók; Tíbrá eftir Ármann Jakobsson. Skipti í eina af jólabókum þessa árs. Næst lá leiðin í Laugardalinn. Synti 200 metra, fór tvisvar í kalda, einu sinni í heitasta, einu sinni í sjópott og endaði á 15 mínútna gufubað áður en ég fór heim.

Dásemdar dagar

Þrátt fyrir að vera í fríi var ég komin á fætur upp úr klukkan sjö í gærmorgun. Komst fljótlega að því að ég nennti alls ekki í sund en hafði nóg að sýsla hérna heima við. Vafraði á netinu, las, fitjaði upp á nýrri tusku með glænýju mynstri, horfði á þætti og slakaði vel á. Hellti mér á könnuna um ellefu leytið. Um tvö hjálpaði Davíð Steinn mér að sópa af bílnum. Við skruppum fyrst yfir í Kópavog til sýslumann þar sem hann lagði inn göng til samþykktar um að hann geti byrjað á æfinga akstri. Svo kom hann með mér í síðustu kisu heimsóknina í bili. Lítið þurfti að gera þar annað en að bæta á þurrmatinn og klappa og spjalla smá við kisu. Komum heim aftur skömmu fyrir klukkan hálffjögur.  Rúmum klukkutíma seinna setti ég upp kjötið sem mér var sent að norðan rétt fyrir jól. Bætti svo katröflum út í pottinn eftir þriggja kortera suðu. Bitarnir voru 6 og vel vænir. En svona kjöt er líka gott kalt.

Notalegheit

Var komin á fætur áður en klukkan sló tíu í gærmorgun. Vafraði um á netinu í smá tíma. Hellti upp á könnuna fljótlega og lagði kapla við eldhúsborðið um stund. Um tólf leytið hreinsaði ég af hryggnum í pott, bætti niðurskornum soðnum kartöflum við sem og afgangnum af gulrótunum og grænu baununum. Hitaði þetta í smá rjómaslettu. Bauð bræðrunum að skipta þessu á milli sín. Pabbi var búinn að fara tvisvar út að moka braut frá skúrnum átti aðeins haftið eftir út á götu. Davíð Steinn fór út að moka frá bílnum mínum og kláraði haftið út á götu frá skúrnum. Oddur mundaði einnig skófluna. Um hálfþrjú kvöddum við pabba og brunuðum í bæinn. Hleypti strákunum út heima en fór svo beinustu leið að heilsa aðeins upp á kisu. Hreinsaði sandinn hennar. Skolaði allar vatnsskálar og setti nýtt vatn. Kögglarnir voru búnir úr öðrum matardallinum. Hreinsaði hann áður en ég setti meiri kattarmatsköggla. Hreinsaði einnig dallinn þar sem blautmaturinn er settur og setti eitt bréf af blautmat í hann. Stoppaði hjá kisu í ca þrjú korter en var komin tímanlega heim áður en leikur Aston Villa og Liverpool byrjaði 1:3. 

Uppstúfur

Svaf heldur lengur fram á morguninn í gær heldur en í fyrradag. Var samt komin á fætur um tíu, langt á undan bræðrunum. Dagurinn leið í notalegheitum við prjóna, lestur, kapallagnir, netvafr og svo gripum við í spil og spiluðum vist. Setti upp kartöflur skömmu fyrir sex og bjó til smá jafning. Pabbi skar niður í sneiðar kalt hangigjöt sem hann keypti og sauð í síðustu viku. Þetta var mjög gott. Eftir fréttir horfðum við á heimildamyndina um Árna og svo jólagesti Björgvins frá því í fyrra á tímaflakkinu. 

Takk

Vaknaði um átta í gærmorgun eftir átta tíma svefn. Fór á fætur hálftíma síðar. Pabbi var komin á fætur, búinn að kveikja aftur á tölvunni en sat inn í stofu. Þannig að þegar ég var búin að bjóða góðan dag og sinna morgunverkunum á baðherberginu settist ég aðeins við tölvuna og vafraði um á netinu áður en ég settist með prjónana mína inn í stofu til pabba. Eftir birgðakönnun var ákveðið að pabbi færi í búðina að kaupa sósubréf, rósakál og laufabrauð. Það síðast nefnda var ekki til. Hann kom aftur um tíu leytið með vörurnar og datt í mjúkan snjóinn fyrir utan. Hann var því eins og snjókarl þegar hann bað mig um að ganga frá því hann ætlaði að skreppa út í sundlaug í kalda pottinn, gufu og jólabaðið/sturtuna. Hann var ekki kominn til baka þegar frændi okkar, systursonur hans, lögga kom í innlit með jólakort. Frændi stoppaði í hálftíma og þáði hjá mér kaffi. Hann mætti svo pabba þegar hann var lagður af stað á næsta áfangastað. Um tvö kryddaði ég lambahrygginn frá Árlandi setti í álpappír í ofnpott og inn í ofn á 130° hita. Um sama leyti var Oddur á kisuvaktinni í vestur bænum. Hann sótti svo bróður sinn í vinnuna. Þeir komu aðeins við heima í Hlíðunum en voru komnir austur rétt fyrir sex. Þá var ég að hræra í sósunni og pabbi að leggja á borð. Maturinn smakkaðist mjög vel en ég er sammála pabba um að best hefði verið að hafa hrygginn á háum hita fyrstu tíu mínúturnar en ekki á saman hitanum allan tímann. Davíð Steinn gekk frá í eldhúsinu með afa sínum og svo settumst við öll inn í stofu. Strákarnir fengu slatta af gjöfum frá ættingjum og vinum. Ég fékk gjöf frá pabba (gjafakort), Bríeti, Fossheiðinni og Davíð Steini, gjafakort frá vinnunni og gjöfin frá Oddi er heima, nýjar snúrur í þvottahúsið þar sem 4 af sex snúrum eru slitnar niður. Um níu fengum við okkur ís. Helga systir hringdi í mig um það leyti til að kanna hvernig maturinn hafi verið.

Skötuveisla

Var komin á fætur korter yfir sex í gærmorgun. Eftir morgunverkin á baðherberginu vafraði ég um á netinu  í tæpa klukkustund. Bauð Davíð Steini far í vinnuna og við þurftum að labba upp að leikskólanum við Stakkahlíð en þar var bíllinn í stæði eftir pakkaskutl bræðranna kvöldið áður. Kom við í AO við Sprengisand og fyllti á tankinn þegar ég var búin að skila syninum af mér. Svo lá leiðin í Laugardalslaugina. Fór 3 í kalda, synti 300 metra, einu sinni í heitasta, einu sinni í sjópottinn og endaði í gufunni. Eftir sundið fékk ég mér kaffi sem er í boði á staðnum á föstudögum. Svo fór ég vestur í bæ og heimsótti kisu. Hreinsaði sandinn, skipti um vatn í öllum vatnsskálum og bætti kögglum í kögglaskálina. Síðan hreinsaði ég upp hina matarskálina og setti eitt bréf að einhvers konar blautmat í þá skál. Stoppaði hjá kisu í uþb þrjú korter. Skrapp aðeins í Eymundsson í Kringlunni og keypti allra síðustu jólagjöfina áður en ég fór heim. Næstu klukkutímana var ég að lesa, prjóna, vafra um á netinu, pakka inn gjöfum, pakka niður í tösku og horfa á þætti. Pabbi skutlaði Bríeti í bæinn því bíllinn hennar var bilaður. Þau voru fyrir utan um hálffjögur. Frænka mín átti flug tveimur tímum seinna og Oddur ætlaði að skutla henni á völlinn. Ég tók mig saman og varð samferða pabba austur. Hann byrjaði á því að koma við hjá AO við Sprengisand. Á Selfossi kíktum við við í Löngumýrinni hjá Jónu Mæju og Reyni og þáðum kaffi. Afhenti þeim jólakortið í leiðinni. Komum svo rétt við í Fossheiðinni þar sem ég hafði pakka og korta skipti og lofaði að koma í heimsókn mjög fljótlega. Vorum komin á Hellu um sjö. Horfðum á fréttir, íþróttir og veður en svo bauð pabbi mér á Kanslarann í skötu þrátt fyrir að hafa fengið skötu í hádeginu. Þetta var svo skata af bestu gerð og mátti helst ekki opna munninn á meðan maður var að tyggja. Horfði á Kappsmál þegar við komum til baka.

Á kisuvaktinni

Fékk sms rétt fyrir klukkan hálfsjö í gærmorgun um að ég ætti sendingu hjá Icelandair cargo og að opið væri frá sjö til nítján. Ég vissi af þessu því Helga systir hafði samband við mig í fyrradag. Var mætt í vinnuna rétt upp úr klukkan hálfátta. Ég var beðin um að fara á ítroðsluendann á vélinni þar sem ég væri mest inn í málum sem þurfti að afgreiða þar. T.d. urðum við að kippa tveimur umslögum úr póstkassanum og endurgera tvö kort frá því á miðvikudaginn. Framleiðsla gekk vel til að byrja með og við náuðum að telja fyrri vagninn eftir fyrstu framleiðslu dagsins áður en við fórum upp með töskuna og í kaffi. Sem betur fer var debet dagurinn ekki stór. Sumt gekk sæmilega en þegar varahlutirnir voru komnir í hús og stuttu síðar viðgerðarmaðurinn um tvö var enn smávegis eftir af framleiðsludeginum sem hefði á venjulegum degi verið búið um hádegi. Viðgerðin tók smá tíma og við vorum að fara út úr húsi rétt fyrir hálffimm bjartsýn á að nú væri vélin komin í betra skap. Það tók mig um hálftíma að komast út á flugvöll til að sækja pakkann frá Helgu og Ingva, hangikjöt. Þegar ég var að labba með pakkann út í bíl hringdi pabbi. Bíllinn hjá Bríet er bilaður svo pabbi mun skutla henni í flug í dag, Þorláksmessu. Hann mun því taka mig með austur í staðinn. Ætla að fá hann til að koma aðeins við á tveimur stöðum á Selfossi á leiðinni austur. Af flugvellinum fór ég á Vesturgötuna og heimsótti kisu í fyrsta skipti í marga mánuði. Hún mundi eftir mér og heilsaði vel upp á mig. Lánaði bræðrunum bílinn um kvöldið í pakkaskutl.

Þreytandi bilun

Sú fjórða var með okkur í kortadeildinni megnið af gærdeginum eða frá klukkan níu. Vorum reyndar bara þrjár því ein var að taka út gjafa frídag. Ég var í bókhaldinu. Dagurinn var ekkert stór en vesenið á vélinni er alls ekki búið. Þegar við tókum saman rétt fyrir fimm átti eftir að pakka smávegis. Ég fór svo beinustu leið í Laugardalslaug. Synti 300 metra á bakinu, sat tæpar fimm mínútur í kalda pottinum, eitthvað svipað í þeim heitasta og svo næstum hálftíma í sjópottinum áður en ég fór upp úr og þvoði mér um hárið. Í sjónvarpsfréttum um kvöldið sá ég viðtal við kalda potts vinkonu mína og systur hennar. Þær voru örugglega ekki í kalda pottinum því systirin fer mjög sjaldan í hann.

Nóttin löng, en samt stutt

Mætti í vinnuna í fyrra fallinu í gærorgun eða uþb korter yfir sjö. Gat svo ekki notað nýjan aðgang að ytri dyrum hvelfingarinnar upp þegar til kom. Hringja varð í þá sem er á sjúkrahúsi og hennar aðgangur virkaði enn svo ekki hefur tekist að setja minn aðgang í staðinn fyrir hennar. Öryggisstjórinn kom aftur í hádeginu og stofnaði á mig nýjan aðgang á nýjum stað, þ.e. sem númer 6 en ekki fjögur og aðgang númer 5 á aðra sem hefur haft aðgang áður. Þessi aðgangur er settur inn tvisvar þannig að hann virki bæði ef maður er á undan að opna eða á eftir en það þarf alltaf tvo. Þetta var prufað og eftir smá vesen með annan aðganginn minn fór þetta að virka rétt bæði fyrri og seinni aðgangur. Ég var annars aftur í bókhaldinu en fór niður um eitt að leysa Ellu af sem þurfti að fara um eitt. Vorum búnar upp úr klukkan hálffjögur, að framleiða, pakka, telja og ganga frá deildinni. Fór beint heim. Nafna mín og hálfdanska frænka mín hringdi í mig um hálffimm til að spyrja hvort ég gæti tekið að mér kattarpössun í nokkra daga. Það mun ganga upp ef ég fæ Odd til að kíkja á kisu á aðfangadag og verðum komin aftur í bæinn á annan í jólum. Þá verður kisa bara ein í einn heilan dag, tvær nætur. Um átta skrapp ég með kort og nokkrar tuskur til annarrar frænku minnar og nöfnu. Stoppaði þar í um klukkustund. Þegar ég var komin heim aftur kom Anna danska með húslykla handa mér. Hún og kærastinn verða hjá pabba hennar um jólin. 

Aðeins fyrr

Ágætlega gekk að koma sér til vinnu í gærmorgun. Að þessu sinni lagði ég fyrir neðan hús. Var fyrst úr kortadeildinni en önnur kom mjög fljótlega og það komu skilaboð frá þeirri þriðju að hún yrði aðeins sein fyrir. Ég var í bókhaldinu og nú er einnig komið að því að standa eldhúsvaktina. Sú sem er skráð með mér var í fríi í gær en ég fékk góða aðstoð. Það bættist við endurnýjunina en henni var bara hlaðið inn og áhersla lögð á að klára allt daglegt. Sú sem var á ítroðsluendanum fékk að hætta um eitt. Ég fór því niður með hinni til að klára. Þegar daglegu kortin á form voru afgreidd var sett af stað 220 korta skrá þar sem aðeins eru framleidd kort. Ég fór upp að prenta út vegna talninga. Yfirmaður minn kom til mín og spurði hvort ég væri til í að vera ein af þeim sem getur opnað ytri hurðina á hvelfingunni uppi. Ég var til í það og þurfti þar með að bíða eftir að öryggisstjóri kæmi í hús og sæi um að veita mér aðgang. Ég fór því ekki niður aftur fyrr en eftir hálftíma. Þá var hin rétt að klára að pakka. Við töldum allt og gengum frá og klukkan var ekki orðin þrjú þegar ég fór. Var næstum búin að gleyma því að bíllinn væri fyrir neðan. Skrapp með kort til móðurbróður míns og fjölskyldu en stoppaði ekkert. Sótti Odd og skipti við hann um sæti. Við skruppum í Krónuna út á Fiskislóð að versla inn.

Messi og Argentína

Í gærmorgun svaf ég út og var klukkan orðin níu þegar ég vaknaði. Vafraði um á netinu, réði krossgátur og las, allt inni í herberginu mínu. Fór ekki fram fyrr en klukkan var langt gengin í eitt. Skömmu síðar kom frænka mín fram úr stofunni. Hún gaf sér góðan tíma til að taka sig saman en kvaddi um tvö. Ekki var búið að opna heiðina en hún fór Þrengslin og hefur líklega gengið ágætlega því ég heyrði ekki frá henni aftur. Að sjálfsögðu horfði ég á úrslitaleikinn milli Argentínu og Frakklands, 3:3 eftir venjulegan leiktíma og framlengingu þar sem Argentína komst í 2:0, voru á undan að skora. Í víta spyrnukeppninni fóru Frakkar fyrst á punktinn. Skoruðu úr fyrsta og fjórða en annað vítið var varið og það þriðja fór ekki á ramman. Argentínumenn skoruðu úr öllum fjórum vítunum og unnu þar með leikinn. Stór stund fyrir Lionel Messi sem aðeins átti eftir að vinna þennan titil á ferlinum. 

Ævintýri í umferðinni

Ég var vöknuð fyrir klukkan átta en fór ekki á fætur fyrr en klukkutíma síðar. Eftir morgunverkin á baðherberginu bankaði ég á stofudyrnar. Frænka mín reyndist vöknuð. Hún fór svo til föðurömmu sinnar um tíu leytið. Hafði á orði að hún myndi hringja í mig ef hún kæmist ekki út úr stæðinu. Síminn var þögull en esperanto vinkona mín hafði samband í gegnum facebook og spurði hvort ég væri föst heima. Ég taldi svo ekki vera og sagðist vera á leiðinni fljótlega. Þurfti að sópa af bílnum en þrátt fyrir slatta af snjó komst bíllinn úr stæðinu og út götuna. Það var ekki fyrr en ég var komin vestur í bæ að ég lenti í vandræðum. Var reyndar næstum komin alla leið að bílastæðunum aftan við Sólvallagötuna en þar var verið að losa bíl og ég stoppaði og ætlaði að snúa við en var þá búin að festa mig. Eftir nokkrar tilraunir hringdi ég í Inger. Hún kom út með skóflur og ég notaði einnig mottu úr bílnum. Það tók örugglega hálftíma að losa sig og bakka niður "ranann" aftur út á Sólvallagötuna. Þar festi ég mig aftur en með aðstoð þriggja sem voru á göngu sem og mottunnar komst ég af stað aftur eftir korter tuttugu mínútur. Þá var reyndar bakkgýrinn hættur að virka. Þakkaði fyrir aðstoðina og ákvað að keyra alla leið í Kringluna. Ætlaði að athuga hvort ég gæti lagt í stæði sem hægt væri að keyra út úr. Áður en ég fann stæði komst ég að því að bakkgýrinn var farinn að virka aftur. Rölti um í Kringlunni og keypti líklega síðustu jólagjafirnar. Hafði samt ekki hugsun á því að kaupa mér kaffi. Kom heim klukkan að ganga tvö og hellti mér fljótlega upp á kaffi. Bríet hafði komið í millitíðinni og sótt Davíð. Þau skiluðu sér til baka um fjögur leytið. Davíð Steinn bjó til kjötbollur handa okku í kvöldmatinn.

Helgi

Vaknaði um sex. Var mætt í vinnu upp úr klukkan hálfátta. Sú sem var í bókhaldinu í gær lét vita að hún yrði sein fyrir. Við tvær sem vorum á vélarvaktinni fórum niður, kveiktum á vélinni, náðum í vagna og sendum síðasta endurnýjunarskammtinn í bili upp með lyftunni. Ég útbjó fylgimiða með endurnýjuninni en hin sá um póstmiðana með daglega póstinum frá því daginn áður og prentaði einnig út framleiðslutölur dagsins. Ég fékk að vera á ítroðsluendanum fjórða daginn í röð. Vorum ný byrjaðar að framleiða þegar við vorum sóttar upp til að fá afhentar jólagjafirnar, jólakort undirritað af forstjóra og gjafakort sem við höfðum sjálfar búið til. Í boði voru einnig kaffi, lagkökur og terta. Þrátt fyrir þetta millispil vorum við búnar með fyrstu framleiðslu dagsins um hálftíu. Settum af stað gjafakortaframleiðslu og fórum með töskuna upp og aftur í kaffi. Framleiðsludagurinn var ekki mjög stór en það voru þrjár skrár yfir 30 kort og ein af þeim yfir 100. Þær skrár framleiddum við kort og form sér og handlímdum og settum sjálfar í umslög og lokuðum. Á síðustu litlu fælum dagsins fór vélina að hiksta en við kláruðum allt rétt fyrir hálfþrjú og ég var komin á pósthúsið um þrjú. Sendi 16 jólakort í póst, tvö af þeim til Danmerkur og Englands, og keypti tvö auka frímerki. Næst lá leiðin í Nauthólsvíkina. Hringdi aðeins í pabba áður en ég skellti mér í -0,6°C sjóinn. Það var að fjara út og smá spölur að vaða út í en ég var að svamla um í tæpar fimm mínútur. Afar hressandi. Sat svo í heita pottinum í tæpan hálftíma áður en ég fór upp úr og heim. Skrifaði á síðustu jólakortin í ár og pakkaði inn fyrsta pakkanum. Pakkarnir verða nú ekkert mjög margir og jólakortin urðu 23 stkykki í heildina þannig að ég á 3 óskrifuð tilbúin fyrir næsta ár. Bríet frænka var komin í bæinn og þau Davíð Steinn voru í bæjarferð. Komu heim um átta leytið. 

Morgunstund

Annan daginn í röð byrjuðum við á því að senda nokkra póstbakka fulla af kortum með lyftunni upp í afgreiðslu. Sú sem var í bókhaldinu sá um að útbúa fylgiskjöl. Reyndar eru svo útbúin fylgiskjöl af þeim sem eru afgreiðslunni fyrir öryggismennina á bílunum með farminu sem hver og einn bíll tekur með sér. Við vorum á sömu vinnustöðum og tvo dagana á undan. Vorum þrjár til klukkan að ganga fjögur en þá bættist ein við. Klukkan var næstum orðin sex þegar búið var að framleiða allan daginn sem og það sem eftir var af endurnýjun þeirra korta sem eiga að taka við um áramótin. Það þurfti að búa til kort og form á stærstu skránum þannig að handtökin við þá vinnu voru mun fleiri heldur en þegar vélin gerir þetta sjálf alla leið. Eftir vinnu skrapp ég aðeins í sund. Synti 200 metra, settist í kalda í tæpar 4 mínútur, 5 mínútur í þann heitasta og svo tíu mínútur í sjópottinn áður en ég fór upp úr og heim.

Langir vinnudagar

Var komin á fætur upp úr klukkan sex í gærmorgun. Sem fyrr hafði ég því góðan tíma til að vafra smá um á netinu eftir morgunverkin á baðherberginu. Var mætt í vinnuna tuttugu mínútur í átta og byrjaði á því að fara niður með einni úr teyminu til að kveikja á vélinni, opna geymsluna og senda nokkra kassa upp með lyftunni. Lyftan þurfti reyndar að fara tvær ferðir. Var aftur á ítroðsluendanum. Fram að kaffi framleiddum við þau kort sem ekki fara á form og fá að fara samdægurs út úr húsi. Í kaffitímanum létum við vélina framleiða gjafakort. Hún hefði átt að framleiða hátt í fimmhundruð, eða fylla sleðann sem tekur á móti. En framleiddi aðeins tæp hundrað því þótt þessi kort séu ekki að fara á form þóttist hún vera að flækja í umslaga partinum og þá þarf að opna þar og loka áður en maður smellir á "resume" til að vélin haldi áfram. Geymdum því aðeins gjafakortaframleiðsluna og fórum að framleiða form fyrir 500 kort sem við framleiddum kvöldið áður. Fengum aftur mannskap í að hjálpa okkur við að líma hátt í 2000 kort á form, setja í umslög og loka. Vorum þrjú eftir um fjögur en vorum búin heldur fyrr en á þriðjudagskvöldið eða um hálfsjö. Þá vorum m.a. búið að framleiða 400 kort sem eiga eftir að límast á form. Svo mikið var að gera við AO við Sprengisand að ég ákvað að koma við á stöðinni við Kaplakrika til að fylla á tankinn. Var samt komin heim rétt áður en seinni undanúrslitaleikurinn hófst; Frakkland - Marokkó 2:0.

Mánuðurinn næstum hálfnaður

Ég var komin í vinnuna rétt upp úr klukkan hálfátta, um svipað leyti og hinar tvær. Byrjuðum á því að sækja "dót" niður áður en við settumst um stund inn í kaffistofu, fengum okkur fyrsta kaffibolla dagsins og gripum aðeins í prjónið eða heklið. Ég var á ítroðsluendanum. Það var samt búið að hlaða inn verkefnum að hluta vegna smá misskilnings um vinnustöður. Tveir strákar niðri í myntinni tóku að sér að líma 500 kort á form og setja í umslög. Þeir tóku við fleiri svoleiðis verkefnum. Verklagið var líka svona hluta af daglegu framleiðslunni og þegar upp var staðið held ég að handlímd hafi verið yfir 2000 kort. Stór partur af þessu er endurnýjun. Umslaga parturinn er semsagt ennþá með vesen en nú er engin elsku mamma því það eru nokkur þúsund korthafar sem eru með kort sem renna út um áramótin. Sú sem á að koma til okkar í kortadeildina var einnig með okkur í gær. Sjálfsagt ekki gaman að kynnast starfsseminni þegar hún er svona löskuð. Við vorum fjögur sem unnum til klukkan hálfátta, svo lengi að kerfið var komið á og það þurfti að hleypa okkur kortakonunum út um slússuna niðri með fjarstýringu og einni slússuna út. Kom heim þegar fyrri hálfleik fyrri undanúrslitaleiksins í HM í Katar var að klárast. Horfði á allan seinni hálfleikinn og HM stofuna. Skrifaði líka á 7 jólakort í viðbót. 

Nýr jaxl

Aldrei þessu vant svaf ég alveg þar til vekjaraklukkan fór að hamast. Hafði samt nægan tíma til að vafra aðeins um á netinu. Mætti í vinnuna rétt upp úr klukkan hálfátta. Blessuð umslagavélin er enn að haga sér frekar leiðinlega. Ég var á móttökuendanum. Byrjuðum á dk framleiðslunni upp úr klukkan níu og til að byrja með gekk allt sæmilega. Eftir því sem leið á daginn gekk verr og verr. Lukum ekki daglegri framleiðslu fyrr en um hálftvö. Þá dembdum við okkur í endurnýjun. Ég skrapp til tannlæknis um þrjú og fékk krónu yfir jaxlinn sem var slípaður niður um daginn, jaxlinn sem undan farin ár hefur verið rótarfylltur. Þessi aðgerð tók ekki nema tæpan hálftíma. Hringdi í vinnunna og þær vildu fá mig aftur. Ég var að spá í að koma fyrst við á pósthúsinu en ákvað að sleppa því að þessu sinni. Þegar ég mætti á staðinn var búið að ákveða af framleiða kort og form sér, handlíma kortin í formin, setja í umslög og loka. Framleiddum og límdum nokkur hundruð kort. Þegar við hættum rétt fyrir hálfsjö áttum við framleidd 480 kort og form sem eftir er að líma og setja í umslög. Óframleidd kort í heildina eru þrátt fyrir það á þriðja þúsund. Fór beinustu leið heim eftir vinnu. Hafði verið með sjósunds dótið í skottinu en það lokar í Nauthólsvík klukkan sjö og ég nennti ekki út aftur til að skreppa í sund. Fitjaði upp á nýrri tusku og skrifaði á fimm jólakort.

Jólabréfin afgreidd

Var komin á fætur fyrir klukkan átta. Skutlaði Davíð Steini í vinnuna rétt fyrir hálftíu og fór svo beinustu leið í Laugardalslaug. Þar byrjaði ég á því að synda 500 metra á braut 6. Hitti svo kalda potts vinkonu mína í kalda pottinum í sinni annarri ferð. Frekar lítið vatn var í heitasta pottinum en það var hægt að fleygja sér flötum í hann. Held samt að það hafi staðið til að loka honum. Eftir mína fimmtu ferð í kalda fórum við í sjópottinn. Þar hitti ég sjósundsvinkonu mína fyrir en hún kemur stundum í sund á sunnudagsmorgnum. Eftir sundið fór ég upp í Kringlu. Þurfti að bíða það í uþb korter eftir að opnaði (kl. 12). Byrjaði á því að skreppa í Eymundsson en svo skilaði ég fjórum bókum á safnið og tók fjórar í staðinn. Fljótlega eftir að ég kom heim tók ég fram skrifblokk, penna, merktu umslögin og jólakortin. Skrifaði aðeins tvö bréf og þau voru svona í styttri kantinum. Byrjaði á bréfi til ensku vinkonu minnar og skrifaði á jólakortið líka og lokaði saman í umslaginu áður en ég skrifaði bréf og jólakort til dönsku gömlu hjónanna á Jótlandi. Að auki skrifaði ég eitt jólakort á íslensku. Þá á ég eftir að skrifa á 18-19 kort í viðbót. Íslenska jólabréfið og jólakveðjan verður rafræn í ár.

Sunnudagsmorgun

Var komin á fætur stuttu fyrir klukkan sjö í gærmorgun. Hafði alveg tíma til að setja inn færslu og vafra smá á netinu áður en kominn var tími til að skutla Davíð Steini upp á Gagnveg. Hleypti honum út  við vinnustaðinn sinn um hálfátta en þáði ekki kaffi að þessu sinni heldur fór beint heim aftur. Þar var ég að prjóna og lesa til skiptis þar til klukkan var langt gengin í ellefu en þá fór ég vestur í bæ í esperanto hitting. Hjá Inger byrjaði ég á því að þyggja grautarskál. Eftir að hafa gert grautnum skil settumst við í græna sófann í forstofuherberginu. Ég var með fyrsta kaffibolla dagsins meðferðis. Áður en yfir lauk var búið að hella þrisvar í hann aftur. Lásum stuttan kafla um himininn og þrumur og eldingar. Þurftu ekki að leita uppi mörg orð, en nokkur þó. Þegar við hættum bað Inger mig um að hinkra svo ég gæti hitt á dóttur hennar og barnabarn sem komu fljótlega. Mira Björk varð 3 ára í endaðan október en hún var ekkert feimin við mig bara hissa til að byrja með. En hún vildi alveg tala við mig. Áður en ég fór heim gerði ég tilraun til að skreppa á bókasafnið í Kringlunni en þar sem ég fann ekki bílastæði baka til, hvorki uppi né niðri ákvað ég að bíða með að skila bókunum. Skammtímaláns fresturinn rennur ekki út fyrr en eftir n.k. miðvikudag. Restin af deginum fór í meiri lestur, prjón og einnig horfði ég á tvo fótboltaleiki og tvo þætti. 

Jólahlaðborð

Mætti í vinnuna um hálfátta. Ég fór á móttökuendann á vélinni. Eftir fyrstu framleiðslu dagsins kom fljótlega í ljós að það væri eiginlega ekki hægt að vinna á hana eins og hún lét í umslagapartinum. Höfðum það þó af að ljúka við það sem stóð útaf frá því á fimmtudaginn og þótt það væru aðeins rúmlega sextíu kort tók það meira en eina og hálfa klukkustund. Von er á viðgerðarteymi um helgina og það var ákveðið að vera ekki að hjakka svona á vélinni lengur. Ein okkar fékk að fara um eitt en við vorum tvær sem biðum til þrjú eftir nýrri kortasendingu. Ég var komin í Laugardalslaugina korter yfir þrjú. Fór beinustu leið á braut  7 og synti 400 metra á bakinu. Næst lá leiðin í 9°C kalda pottinn og þar sat ég í fjórar mínútur. Endaði svo í góðu gufubaði áður en ég fór inn að þvo á mér hárið. Kom heim skömmu áður en seinni hálfleikur í fyrsta leik í átta liða úrslitum á HM var búinn milli Braselíu og Króatíu. 0:0 stóð eftir venjulegan leiktíma og 1:1 eftir framlengingu. Króatar unnu þetta í vítaspyrnukeppni. Um sjö skutlaði Oddur mér upp í Gullhamra þar sem ég hitta marga af vinnufélögum mínum á meiri háttar jólahlaðborði. Seðlaverið var á tveimur hringborðum. Við mættum tvær úr kortadeildinni og deildum með okkur einni hvítvínsflösku. Rétt upp úr níu hringdi ég í Odd sem kom og sótti mig um hálftíu. Við skutluðum samstarfskonu minni heim í leiðinni. Heima náði ég síðustu mínútum af framlengdum leik Argentínu og Hollands sem endaði 2:2. Argentínumenn unnu í vító.

Föstudagur

Ég komst að því í gær að ég get skráð mig inn á bloggerinn minn í vinnunni. Ekki það að ég ætli að nýta mér það eitthvað að ráði en ég gerði það þó í gær og bætti við textann og sagði frá umslagaskrifum mínum í fyrradag. Annars er vélin enn með vesen. Varahluturinn er kominn og voru hinar tvær í vinnu til klukkan að verða ellefu í fyrrakvöld. Ég var beðin um að vera í bókhaldinu og til að byrja með gekk allt ágætlega í framleiðslunni. Það hafði reyndar komið í ljós að það var einn vír í límarminum sem var brotinn og það var hægt að gera við hann til bráðabirgða en það þurfti að panta annan arm. Bráðabirgðaviðgerðin hélt ekki lengur en til hádegis í gær. Ég fékk að fara heim úr vinnu um fimm en ég veit ekki hversu lengi viðgerðarmaður, sem kom um tvö, eða hinar tvær voru. Ég sótti Davíð Stein heim til að skutla honum í Krónuna í Skeifunni að versla inn fyrir sig. Keyptum rúðuvökva í leiðinni og fylltum á bílinn en boxið var alveg galtómt. Vorum komin heim um hálfsjö. 

Líður á vikuna

Sendi skilaboð í vinnuna, rétt fyrir átta, um að ég ætlaði að halda mig heima við. Svaf svo áfram til klukkan að ganga ellefu. Þá fyrst fór ég á fætur. Skömmu síðar kom Davíð Steinn fram en hann fór í sinn fyrsta ökutíma í gær og gekk víst nokkuð vel. Ég var með prjónið, bók og fartölvuna inni í stofu. Seinna um daginn náði ég í jólakortin, umslög og penna. Það kom í ljós að jólalistinn var aðeins styttri en ég hélt. Númerin sem náðu upp í 24 voru ekki alveg rétt, vantaði 3 tölur inn í rununa svo listinn er ekki nema 21. Vissi að ég ætti amk 2 auka kort en þau eru þá 5. Nota þó sennilega ekki nema eitt eða tvö af þeim og á þá þrjú til fjögur kort tilbúin fyrir næsta ár. Skrifaði framan á 22 umslög en engin jólakort þó í bili. Dagurinn leið frekar hratt. Hringdi í pabba, Ellu vinkonu og Lilju vinkonu. Einmitt í þessari röð. Saknaði þess ekkert að það væri engin fótbolti á HM en horfði á þætti og Kiljuna í gær og gærkvöld. Var komin upp í rúm fyrir klukkan tíu og las í tæpan hálftíma.