Veðurblíða dag eftir dag

Var vöknuð og komin á fætur upp úr klukkan sjö í gærmorgun. Um níu kom Davíð Steinn fram og skömmu síðar skutlaði ég honum upp á Gagnveg. Hann hafði á orði að honum sýndist vanta smá loft í hægra framdekkið. Það var ekki byrjað að kvarta í mælaborðinu en þegar ég athugaði þrýstinginn á dekkjunum sem eru stillt á 32" vantað ca 1" á hin þrjú en 4" á hægra framdekkið. Eftir að hafa jafnað þrýstinginn fór ég í Grafarvogslaug. Þar fór ég fjórum sinnum í kalda, synti 350m, fór einu sinni í gufu, einu sinni í heitasta pottinn og tvisvar settist ég á bekk. Var komin heim aftur um hálftólf. Dagurinn fór í prjónaskap, fótboltaáhorf og netvafr. Engir strengir voru eftir berjatínsluna en ég var löt að nýta mér góða veðrið ekki betur. 

Ævintýri laugardagsins

Vaknaði um sex leytið. Fór fljótlega á fætur og eftir morgunverkin á baðherberginu settist ég í stofusófann með fartölvuna í fanginu þar til N1 sonurinn var tilbúinn sem var ca klukkutíma síðast. Skutlaði honum upp á Gagnveg rétt fyrir hálfátta og þáði kaffi til að taka með mér í staðinn. Kom við í AO við Sprengisand og ákvað svo að fara í Laugardalslaugina. Þótt ekki væru mjög margir fannst mér samt lítið pláss á brautunum til að byrja með. Fór tvisvar í kalda og tvisvar í heitasta áður en ég settist um stund á einn bekkinn. Svo losnaði braut númer tvö og ég var búin að synda 100 metra á bakinu þegar ég fékk félagsskap. Synti 200 í viðbót áður en ég fór aftur í kalda, þaðan í gufu, svo kalda sturtu, smá stund fjórðu ferðina í kalda og settist svo á stól í nokkrar mínútur áður en ég fór inn í klefa og þvoði mér um hárið. Rétt hafði tíma til að fara heim með sunddótið, ganga frá því og skipta um skó. Fór í strigaskóna mína. Var komin á Sólvallagötuna um hálfellefu. Þar beið mín hafragrautur og kaffi. Klukkan var ekki orðin ellefu þegar við vinkonurnar fórum með nesti og tómar fötur út í bíl og lögðum af stað út úr bænum. Keyrðum í gegnum Mosfellsbæ og beygðum og keyrðum í átt að Þingvöllum alveg þar til kom að skiltinu sem vísaði inn í Hvalfjörð. Stoppuðum út í kanti rúmlega kílómeter frá afleggjaranum og fundum strax ber. Aðallega væn krækiber en eitt og eitt bláber líka. Vorum ekki með berjatínur en mér var sama um það. Tíndum líklega í þrjú korter áður en við fengum okkur af nestinu, smurðar flatkökur og ég fékk kaffi með því. Svo ákváðum við að halda ferð áfram. Fórum inn í Hvalfjörð, alla leið inn í Brynjudal. Þar var eitthvað af fólki í berjamó en nóg af krækiberjum fyrir alla sem vildu. Það endaði með því að ég fleygði mér flatri við eina lyngbreiðuna og þar fannst mér sem væri endalaust af berjum. Þarna vorum við líklega hátt í tvo tíma áður en við kölluðum þetta gott þrátt fyrir að fylla ekki föturnar alveg. Keyrðum áfram fyrir Hvalfjörðinn og alla leið á Akranes. Rúntuðum aðeins um bæinn en stoppuðum svo stutt frá fótboltavellinum, Guðlaugu og ströndinni og afganginn af nestinu. Drukkum vatn með. Síðan löbbuðum við aðeins um. Næst gerðum við stopp á N1 þar sem við fengum að fara á salerni. Ég keypti mér svo bolla af kaffi og Inger bauð upp á ís í brauðformi. Þessu gerðum við skil á bekk fyrir utan. Það sem veðrið lék við okkur. Komum í bæinn um hálfsex og Inger bauð mér upp á að borða með sér af grænmetissúpu sem hún átti. Klukkan var því langt gengin í sjö þegar ég kom heima aftur eftir þessi ævintýri dagsins. 

Á skutlvaktinni

Þrátt fyrir ágætis veður (reyndar svolítið hraðferð á logninu) og aðeins einn vinnugöngutúr í vinnuna fór ég enn og aftur á bílnum. Að þessu sinni var ég með sjósundsdótið meðferðis í skottinu. Ég var á ítroðsluendanum á vélinni og þar sem við vorum aðeins þrjár stóð ég vaktina þar, þar til framleiðslu var lokið. Viðgerðarmaðurinn komst ekki á svæðið í fyrradag en þær gátu klárað framleiðslu og í gær hagaði vélin sér einstaklega vel. Aðeins tvisvar þurfti að dextra örlítið við hana. Sú sem var á móttökuendanum tók til og taldi í framleiðslutegundirnar. Ég taldi aftur áður en ég setti af stað en láðist að skoða kortin. Yfirleitt kemur það ekki að sök en í gær varð það til þess að það eyðilögðust 107, ein tegund framleiddist fyrst á rangt plast. Sem betur fer uppgötvaðist málið við talningu og það var endurframleitt á rétt plast þannig að þetta fór ekki frá okkur vitlaust. Daglegri framleiðslu var lokið um tólf. Eftir hádegi hjálpaði annar kerfisfræðingurinn mér að taka tappann úr tveimur síðustu tegundunum sem eru búnar að vera í haldi frá því í fyrstu viku síðasta mánaðar. Það er komið plast. Á vélinni bíður líka endurnýjun plasta sem runnu úr gildi um síðustu mánaðamót. Og svo á eftir að keyra til okkar þau kort sem hefðu átt að koma til endurnýjunar um miðjan síðasta mánuð og renna úr gildi um næstu mánaðamót. Tappinn kom í veg fyrir að skrárnar kæmu í gegn sem er alveg eins og það á að vera því við viljum helst ekki geyma svona lengi á vélinni og þurfa að "klippa" frá þeim kortum sem mega endurnýjast. Hætti vinnu um hálfþrjú og fór beinustu leið í Nauthólsvík. Þar var að fjara út, sjórinn 10,4°C og dásamlegt að svamla um. Var út í í uþb hálftíma. Kom heim upp úr klukkan fjögur og beið spennt eftir landsleiknum sem var hin mesta skemmtun. Oddur sótti bróður sinn í vinnuna um hálfátta og þeir komu við hjá KFC á heimleiðinni.

Örstutt skýrsla yfir gærdaginn

Fór enn og aftur á bílnum í vinnuna því ég ætlaði að fá að hætta snemma og skreppa í bankann. Ég var í bókhaldinu og mánaðamótafrystingum. Debetdagsframleiðslan var í stærra lagi vegna þess að tekist hafði að taka tappann úr þremur tegundum af fimm fyrir einn bankann. Tappinn var búinn að vera í síðan fyrri partinn í ágúst og safnast höfðu upp um 700 kort. Vélin fór að vera með mikil leiðindi í framleiðslunni rétt fyrir hádegi. Þegar ég fékk að fara um hálfþrjú var verið að bíða eftir viðgerðarmanni og það átti eftir að framleiða fyrir einn bankann. Bankamálin gengu fljótt og vel fyrir stig. Kom því snemma heim og bræðurnir gátu skroppið saman í Sorpu og verslunarferð. 

Glænýr mánuður

Var vöknuð og komin á fætur korter-tuttugu mínútum yfir sex í gærmorgun. Eftir morgunverkin á baðherberginu settist ég niður í stofu með fartölvuna í fanginu og vafraði um á netinu þar til kominn var tími til að bruna í vinnuna. Mætti fyrst á svæðið og komst að því að ekki hefði tekist að taka tappa úr þremur tegundum. Ég var frammi í skrifstofurými að undirbúa pökkun og fleira fram að kaffi. Sá sem fjarstýrði mér í fyrradag hafði samband og hjálpaði mér við að laga tappamálið. Höfðum uppfært ranga skrá í fyrradag. Ég fór inn á vél eftir kaffi og fram að hádegi klárðuðum við allt daglegt og einnig endurnýjun. Eftir hádegi fórum við í að raða flokkuðum kennispjöldum fyrir einn aðila á bretti. Tæplega hundraðogsextíu kassar á fimm bretti og plasti vafið utan um þá til að halda þeim saman. Þegar við fórum yfir geymsluna til að kanna hvort við værum með alla kassa fundum við einn óflokkaðan kassa á gólfi inn í horni undir nokkrum af kössum sem eru frá því að við byrjuðum að flokka kennispjöldin eftir stimplum 2016. Þessi tiltekni kassi var frá 2007. Við drifum í að flokka úr þessum kassa svo við gætum komið þeim spjöldum sem tilheyrðu kössunum á brettunum með. Hætti vinnu upp úr klukkan hálffjögur. Byrjaði á því að fara í bókasafnið og skila þremur bókum. Fékk mér tvær í staðinn, hvorug þeirra alveg ný. Næst lá leiðin í fiskbúðina áður en ég skellti mér í Laugardalslaugina. Synti reyndar ekkert en fór 3 í kalda, 2 í heitasta og rúmar 10 mínútur í gufu áður en ég fór upp úr og heim.

Á bílnum

Svaf alveg þar til vekjaraklukkan hringdi í gærmorgun. Fór á bílnum í vinnuna. Einhvern veginn atvikaðist það þannig að ég var allan daginn á móttökuendanum á vélinni. Átti reyndar þátt í þeirri ákvörðun sjálf. Sú sem átti að fara inn á vél eftir kaffi bað mig um að leysa sig af vegna annarra verkefna sem hún var í og þrátt fyrir að hún ætti að fara á ítroðsluendann bauð ég þeirri sem var með mér á vélinni fram að kaffi að halda sömu stöðum. Svo fór ég aftur inn eftir hádegi með þeirri sem var skráð á ítroðsluendann eftir kaffi. Hún fór sjálfkrafa á þann enda. Við vorum að vinna að endurnýjun. Allt gekk vel framan af en  eftir klukkutíma keyrslu fór umslagaparturinn á vélinni að haga sér verulega illa. Áttum von á viðgerðarmanni til að laga annað mál. Hann kom um hálfþrjú og sinnti þessu verkefni líka. Um hálffjögur fór ég í að taka tappann úr þremur tegundum með aðstoð beggja kerfisfræðinganna. Annar þeirra var á staðnum en hinn fjarstýrði mér og okkur í gegnum fjarfundabúnað. Erum komin með smá plast af þeirri tegund sem vantar og þegar sá sem fjarstýrði okkur var búin að kanna stöðuna á því sem hefur safnast upp síðustu vikur sáum við að hægt yrði að taka tappann úr þessum þremur, náms og klassakortum. Og vonandi fáum við svo heildarbirgðirnar á næstu dögum. Fór úr vinnu um hálffimm og þrátt fyrir að vera með sunddótið með mér í skottinu fór ég beinustu leið heim.

Mánuðurinn að klárast

Labbaði í vinnuna þvert yfir Klambratún, Gunnarsbraut, Snorrabraut, Laugaveg og nokkrar litlar götur í kringum Þjóðleikhúsið. Var mætt fyrst af fjórum. Skráð í bókhaldið svo ég byrjaði á því að prenta út fyrstu framleiðsluskrár dagsins. Daglegri framleiðslu lauk rétt upp úr tólf. Smá vesen á vélinni svo kalla þurfti út viðgerðarmann. Það átti þó að reyna að byrja á endurnýjun eftir hádegi en það gekk ekki upp svo hornið í sófanum í skrifstofurýminu breyttist í hálfgerðan prjónaklúbb. Að vísu vorum við bara tvær að prjóna af fjórum. Fékk að hætta vinnu um þrjú leytið. Úti var smá úði og dumbungur svo ég ákvað að hringja í einkabílstjórann og biðja hann um að sækja mig við Sólfarið. Rölti svo þangað og þurfti aðeins að bíða þar í nokkrar mínútur. Heima fengum við það gott stæði að ég nota það sem afsökun til að fara ekkert aftur út. 

Ný vinnuvika að hefjast

Vaknaði um níu í gærmorgun og var komin á fætur hálftíma síðar. Eftir morgunverkin á baðherberginu settist ég inn í stofu í smá stund, bæði með bók og prjóna. Nokkru síðar fór ég inn í eldhús. Fékk mér lýsissopa og harðsoðið egg og hellti upp á smá kaffi. Dagurinn leið hratt við prjón, lestur og kapallagnir. Pabbi bauð okkur Bríet upp á grillaðar lambasneiðar um fimm leytið, með soðnum kartöflum, hrásallati, spínati og lambhagasallati. Þetta var mjög gott. Eiginlega strax eftir mat pakkaði ég saman og kvaddi. Var komin heim upp úr klukkan sjö. 

Í föðurhúsum

Þrátt fyrir að vera komin á fætur fyrir átta í gærmorgun var klukkan farin að nálgast ellefu þegar ég mætti í Sundhöllina. Byrjaði á að skella mér í kalda pottinn. Synti svo í tæpan hálftíma á braut 4 í útilauginni, flestar ferðirnar á bakinu en þó 2x25m skriðsund. Fór beint aftur í kalda pottinn í nokkrar mínútur og sat svo í 3-4 mínútur á bekk úti áður en ég fór inn að þvo á mér hárið. Þegar ég kom heim og ætlaði að ganga frá sunddótinu kom í ljós að ég hafði gleymt sundbolnum mínum hangandi á snaga í rýminu þar sem maður þurrkar sér. Fékk mér að borða áður en ég pakkaði niður og kvaddi. Byrjaði á því að koma við í Sundhöllinni og fékk að fara sjálf niður. Fann sundbolinn þar sem ég hafði skilið hann eftir. Kom næst við í AO við Sprengisand og fyllti á tankinn. Var komin á Hellu um þrjú. Pabbi var á leið út í garð að slá. Ég skrapp út í vínbúð að kaupa kassa af hvítvíni. Hitti skólasystur mína úr grunnskóla þegar ég kom úr vínbúðinni en hún var á leið í matvörubúðina. Spjölluðum saman í nokkrar mínútur. Horfði á bikarúrslitaleik kvenna í knattspyrnu og var glöð yfir að mínar stelpur í Val höfðu sigur þrátt fyrir að lenda undir; Breiðablik 1 Valur 2. Og Liverpool vann loksins sinn fyrsta leik á tímabilinu í fjórðu umferð deildarinnar. Sigruðu Bournmouth með níu mörkum gegn engu. 

Síðasta helgin í ágúst

Fór aftur á bílnum í vinnuna í gær. Nú með sjósundsdótið með mér í skottinu. Ég var á móttökuendanum. Allri framleiðslu og talningu var lokið fyrir klukkan tólf. Eftir hádegi tók ég óvissukennispjalda bunkann og fletti öllum kennitölum upp. Þannig fann ég hvar amk 30 spjöld áttu "heima".  Hættum vinnu um hálftvö. Ég byrjaði á því að skreppa aðeins heim. Oddur hafði á orði að skinkan væri búin og hann væri búinn að taka síðasta brauðkubbinn úr frysti. Ég var komin í sjóinn um hálffjögur og svamlaði um í rúmar tuttugu mínútur. Sat svo annað eins eða jafnvel aðeins lengur í heita pottinum. Síðan skrapp ég í Krónuna við Fiskislóð og verslaði í tvo fjölnota innkaupapoka. Hringdi í Odd þegar ég var komin fyrir utan og bað hann um að sækja vörurnar. Hann gerði það og gekk frá þeim líka.

Föstudagur

Í gærmorgun vaknaði ég þremur mínútum áður en vekjaraklukkan átti að hringja. Ég hélt ég hefði slökkt á henni en þegar ég var að klæða mig stuttu síðar byrjaði síminn að hamast. Fór á bílnum í vinnuna og tók sunddótið með og geymdi í skottinu. Ég byrjaði frammi að undirbúa pökkun og aðstoða þá sem var í bókhaldinu að telja þegar fyrstu tölur voru tilbúnar. Eftir kaffi fór ég á ítroðsluendann á vélinni. Fengum smá "glugga" til að halda aðeins áfram með endurnýjun. Eftir hádegi tók aðeins hálftíma á klára þá endurnýjun. Ég var á móttökuendanum þá. Svo enduðum við á því að ryksuga vélina. Ákváðum að hætta vinnu upp úr klukkan hálftvö með það á bak við eyrað að fljótlega gætum við þurft að vera lengur en átta tíma í vinnunni. Meira um það þegar þar að kemur. Ég ákvað að skreppa í sund í Laugardalinn en þar hef ég ekki synt eða farið síðan í mars. Fór beinustu leið í kalda pottinn. Synti svo 300 metra og var á minni annari ferð í þeim kalda þegar kalda potts vinkona mín og systir hennar mættu á svæðið. Það urðu fagnaðarfundir og við fórum 5 eða sex ferðir á milli kalda og heita áður en við kvöddumst og ég endaði á góðu gufubaði. Hún hafði "stungið" af úr skólanum sem er nýbyrjaður og var á leið þangað aftur. 

Fimmtudagur

Var mjög hissa þegar vekjaraklukkan ýtti við mér í gærmorgun. Slökkti á henni og fór á fætur. Beið með morgunverkin að baðherberginu því Davíð Steinn var þar. Hann var svo farinn í sína vinnu á undan mér. Ég labbaði í vinnuna yfir Skólavörðuholtið. Var á ítroðsluendanum á vélinni fram að kaffi og á móttökuendanum til hádegis. Eftir hádegi var ég að pakka endurnýjun og fletta í gegnum nokkra kassa af umslögum til að finna og taka út tvö kort sem beiðni var um að færu frekar í útibú. Kom við á Lækjartorgi hjá Lilju og labbaði svo heim í gegnum Hljómskálagarðinn og meðfram flugvellinum og Valsvellinum. Ákvað að þetta væri nóg hreyfing yfir daginn og fór ekkert út aftur. 

Miðvikudagur

Var vöknuð upp úr klukkan sex. Labbaði af stað í vinnuna um sjö, yfir Klambratúnið og þá leiðina. Ég var í bókhaldinu í gær. Við tvær sem vorum frammi saman fyrst einhentum okkur fljótlega í að opna sendingu af plasti sem kom í fyrradag. Tveir stórir kassar og þrír minni og litlir kassar inni í þeim öllum. 1-3 litlir í minni kössunum en 5-6 í þeim stóru. Höfðum ekki að klára og þessu verkefni var ekki haldið áfram fyrr en eftir hádegi. Sú sem var með mér frammi þá kláraði með mér. Þetta voru í heildina um 40.000 kort og þurfti að taka alla kassa úr plasti til að telja, setja svo aftur í plastið og loka vel. Áttum bara eftir að merkja (setja límmiða) á hluta af sendingunni þegar við hættum vinnu um hálffjögur. Labbaði heim yfir Skólavörðuholtið. Stoppaði heima í rúman klukkutíma áður en ég fór í fiskbúð og svo sund. Synti ekki neitt en fór 3 sinnum í kalda pottinn, einu sinni í heitan og einu sinni í gufu. Kom heim um hálfátta og ákvað að geyma fiskinn til morguns.

Jafntefli og tap

Labbaði í vinnuna í gærmorgun og var mætt fyrst til vinnu tuttugu mínútum fyrir átta. Hinar þrjár sem ekki eru í fríi skiluðu sér á svipuðum tíma ca tíu mínútum síðar. Ég byrjaði á ítroðsluendanum á vélinni, hlóð inn verkefnum og sendi frá mér skrárnar úr fyrsta skammtinum og megnið af þeim næsta fram að kaffi. Eftir kaffi fór ég á móttökuendann. Kláruðum skammt númer tvö og héldum svo áfram með gjafakortaframleiðslu þar til hádegisskammturinn skilaði sér. Lentum í smá veseni með hádegisframleiðsluna því þegar átti að framleiða sex skrár í einu sem allar eru hlaðnar inn á sama hátt merktist bara við fimm af þeim, sú fyrsta varð útundan. Öll kortin voru hins vegar í þeirri röð sem átti að framleiða þau og þetta varð til þess að það varð slatti ónýtur og tíma tók að greiða úr þessari flækju. Eftir hádegi var ég að mestu frammi við. Leysti þó þær sem voru á vélinni af um tvö, eina í einu, í smá stund. Um þrjú vorum við allar mættar upp í K2 í fundarherbergið Hamar. Þangað mætti einnig kerfisfræðingurinn sem er með vinnuaðstöðu hjá okkur í K1. Yfirmaður okkar hafði boðað okkur á fund og vildi fá okkur upp í Katrínartún svo hún hefði möguleika á að nota skjá. Fundurinn stóð yfir í rúman klukkutíma. Ég labbaði heim og var komin þangað upp úr klukkan hálffimm. Ákvað að "skrópa" í sjósundsferð. Var eiginlega hvort sem er búin að missa af þeim sem ætluðu að mæta úr hópnum mínum. Horfði á Man. Utd - Liverpool 2:1 og fylgdist með Breiðablik - Valur 2:2 á netmogganum. Fyrsti leikur sem Liverpool tapar í marga, marga mánuði. 

Líður á mánuðinn

Í gærmorgun var ég komin á fætur um hálfátta. Skutlaði syninum í vinnuna rétt fyrir hálftíu og ákvað að kíkja í Grafarvogslaug. Byrjaði á að pottormast milli kalda og heita og fór í gufu áður en ég synti smávegis. Kom við í Hagkaup í Skeifunni á leiðinni heim. Oddur Smári gaf mér fjórar dokkur af sérstöku garni fyrir nokkrum vikum. Það garn hentar ekki í tuskugerð. Hefði líklega getað prjónað teppi en í staðinn fitjaði ég upp á enn einu sjalinu. Er byrjuð á dokku tvö af bleika litnum. Hinar tvær dokkurnar eru bláar og ætla ég að nota þær á síðasta helmingi sjalsins. Fann eina dokku af bleika garninu í Hagkaup í gær og fjárfesti í henni.

Annars gleymdi ég að geta þess að ég fór á bókasafnið á laugardaginn. Skilaði fjórum bókum, ein með skilafrest 22. ágúst og hinar 24. ágúst. Þrjár bækur voru eftir heima og ég tók þrjár með mér heim af safninu. Ein af þeim er ný með 14 daga skilafresti. Ég á reyndar eftir að athuga einhvern tímann hvort hægt sé að fá auka hálfan mánuð. Held að það eigi að vera hægt nema bókin sé pöntuð í millitíðinni. En ég er yfirleitt búin að lesa bækurnar áður en kemur að skilafresti.

Og af því að ég er að rifja upp og skrásetja viðburði þá er rétt að hafa það skjalfest að tæpum fjórum mánuðum eftir að gert var við framtönnina og jaxlinn er rótarfyllingin farin úr jaxlinum. Framtönnin er heil en líklega var það ópal sem ég fékk mér af í vinnunni í boði vinnufélaga á miðvikudaginn var sem losaði um og skemmti fyllinguna. Hef ekki enn haft samband við tannlækni og pantað mér tíma en ég læt það líklega ekki bíða fram að næsta tanneftirlitsdegi sem er eftir tvo mánuði. 

Heildarfærsla no 3343

Var komin á fætur um hálfsjö. Klukkutíma síðar hleypti ég Davíð Steini út við N1 stöðina við Gagnveg og þáði kaffi til að taka með  í staðinn. Komst alla leið að Sundhöllinni og fékk stæði fyrir framan þótt búið væri að loka einhverjum götum. Hitti ritara safnaðarstjórnar óháða safnaðarins í búningsklefanum og svo aftur aðeins í kalda pottinum í minni annarri ferð af þremur. Fékk að synda óáreitt á braut fjögur í útilauginni í uþb tuttugu mínútur, flestar ferðirnar á bakinu. Var ekki alveg búin með 500 metra þegar ég fékk félagsskap og ákvað að kalla þetta gott. Finnst óþægilegt að synda á bakinu þegar fleiri eru í sömu braut. Í gær var hárþvottadagur og ég vildi synda sem flestar ferðir á bakinu. Synti þó 2x25m skriðsundsferðir. Var komin heim upp úr klukkan hálftíu. Hellti mér ekki upp á kaffi fyrr en um hádegisbilið. Svo fór afgangurinn af deginum í prjón, boltaáhorf og smá þvott.

Menningarnótt í dag

Þriðja daginn í röð fór ég á bílnum í vinnuna. Þar sem sú sem var skráð í bókhaldið var búin að láta vita að hún kæmi ekki fyrr en upp úr níu prentaði ég út tölur fyrir fyrstu tvær daglegu framleiðslur. Hin sem var með mér á vélinni kom mátulega til að taka vagna og töskur með mér út af lager rétt áður en fyrsta bankataskan var sótt. Ég var skráð á ítroðsluendann en fyrr í vikunni svissuðust stöðurnar milli okkar sömu tveggja þar sem hún kom ekki í vinnu fyrr en upp úr klukkan átta. Ég sá því um móttökuendann á vélinni allan daginn þar sem við vorum aðeins þrjár í vinnu. Með hádegisskammtinum kom pöntun upp á 5000 gjafakort. Framleiddum helminginn af þeim á uþb tveimur og hálfum tíma eftir hádegi þannig að ekkert var unnið við endurnýjun í gær. Sú sem var í bókhaldinu þurfti að fara rétt fyrir þrjú en við sem vorum á vélinni vorum til hálffjögur. Ég fór beint í Nauthólsvík. Sjórinn 11,2 og það var að koma fjara. Svamlaði um í tæpar tuttugu mínútur. Á þeim tíma fór að hellirigna og regndroparnir voru svo stórir og margir að það var eins og þeir dönsuðu á sjávarfletinum. Eftir sjóbuslið sat ég svo annað eins í heita pottinum ef ekki ívíð lengur. Klukkan var byrjuð að ganga sex þegar ég kom heim. 

Aftur á bílnum

Ég var skráð í bókhaldið í gær og þegar maður á bókhaldið á fimmtudögum kemur maður við í bakaríi á leiðinni í vinnuna. Ég var ekki í stuði til að labba við þótt það sé þannig séð í leiðinni. Hefði svo sem líka alveg getað skroppið frá eftir að vinna hófst. En ég fór semsagt á bílnum og kom við í Bakaríinu við Skúlagötu, keypti gróft súrdeigsbrauð, tvær tegundir af sallati og vínarbrauðslengju. Þrátt fyrir þetta stopp var ég langfyrst í vinnuna. Sú sem kemur oftast fyrst eða um svipað leyti og ég komst ekki strax. Var með barnabarnið sitt og það átti ekki að mæta í leikskólann sinn fyrr en klukkan níu. Einhvern veginn gat hún þó samið um að hann mætti koma í fyrra fallinu og var sjálf mætt í vinnu upp úr klukkan hálfníu. Framleiðsla og endurnýjun gengu vel og allar talningar gengu 100 prósent upp. Hættum vinnu rétt um þrjú. Þá þurfti amman að fara að sækja barnabarnið. Ég kom við í Sundhöllinni. Synti þó ekkert en nýtti mér potta og gufu. Kom heim um hálffimm. 

Á bílnum

Það var svolítið hraðferð á logninu og aðeins byrjað að rigna um sjö í gærmorgun. Ég notaði það sem afsökun til að fara á bílnum í vinnuna. Sú sem átti að vera nr. 1 með mér á vélinni kom ekki fyrr en korter yfir átta. Ég ákvað því að svissa um enda við hana. Við eigum vélina aftur á föstudagsmorguninn. Þá er ég skráð no. 1 og skipti þá við hana og fer yfir á móttökuendann. Nóg var að gera á ítroðsluendanum að hlaða inn deginum sem og nokkrum endurnýjunum. Eftir kaffi fór ég á móttökuendann. Kláruðum að framleiða daglegu debetkortin um hálfellefu og framleiddum þá smá endurnýjun næsta rúma hálftímann. Vorum svo búnar að framleiða hádegisskammtinn rétt rúmlega hálftólf. Eftir hádegi voru aðrar tvær saman inn á vél að vinna að endurnýjun. Ég leysti aðra þeirra af um tíma þar sem hún varð að svara mikilvægum fyrirspurnum. Hættum vinnu rúmlega þrjú. Úti var hellidemba og þrátt fyrir að sunddótið væri meðferðis fór ég bara beinustu leið heim. 

Sjósundsferð

Labbaði í vinnuna um sjö. Var í "frammiverkefnum" fram að kaffi. Undibjór pökkun og taldi svo með þeirri sem var í bókhaldinu þegar fyrsti skammturinn hafði verið afgreiddur. Eftir kaffi fór ég á ítroðsluendann. Við vorum búnar með næsta skammt hálftíma áður en hádegisskammturinn komi yfir á vél og sá skammtur var búinn rúmlega hálftólf. Fengum að fara úr vinnu um hálftvö. Ég kom aðeins við í bókabúð að kíkja á nýja tuskuprjónabók. Ákvað samt að freistast ekki til að kaupa þá bók. Stoppaði heima í um tvo tíma áður en ég tók til sjósundsdótið og fór í Nauthólsvík. Hausttímabilið er hafið og ég fyllti á kortið mitt til áramóta. Hitti sjósundsvinkonu mína og við vorum búnar að vera rúmar tíu mínútur á svamli í sjónum þegar systurnar úr hópnum okkar komu. Fórum í heita pottinn tuttugu mínútum síðar. Það var frekar margt um manninn miðað við að ekki er lengur ókeypis í aðstöðuna. Áður en ég fór heim kom ég við í fiskbúðinni og keypti ýsu í soðið. Ekki var til harðfiskur úr óbarinni ýsu en ég prófaði keilu og þorsk í staðinn. 

Labbað í vinnu og aftur heim

Vaknaði rétt rúmlega sex. Sá til þess að vekjarinn myndi ekki hringja, fór á fætur og eftir morgunverkin á baðherberginu settist ég inn í stofu með fartölvuna í fanginu í tæpan hálftíma. N1 sonurinn kom fram rétt fyrir hálfsjö og fór út á undan mér. Ég labbaði í vinnuna um sjö og var fyrst á svæðið af fjórum. Já, nú er aðeins ein í fríi og við fjórar á svæðinu. Var á móttökuendanum á framleiðsluvélinni fram að hádegi og í pökkun, talningu og sorteringu til hádegis. Var að flokka ónýt kort frá apríl og út júlí sem þarf að farga fljótlega. Átti aðeins júlíkortin eftir þegar við skruppum í mat. Yfirgáfum vinnustaðinn fyrir klukkan þrjú og ég labbaði heim yfir Skólavörðuholtið.

Ný vinnuvika

Vaknaði rúmlega níu. Var samt komin á fætur og fram aðeins á undan pabba. Lagði kapla, las og prjónaði. Hellti mér upp á kaffi um hálfellefu. Um hálftvö kom maður einnar frænku okkar pabba og færði honum smávegis af krækiberjum. Ég hellti aftur upp á. Maðurinn stoppaði þó ekki lengi en gaf sér tíma til að drekka einn bolla af kaffi. Upp úr hálffjögur bauð pabbi upp á grilluð rif með hrísgrjónum og sallati. Bríet og Bjarki borðuðu með okkur og tóku svo að sér að vaska upp. Rúmlega fimm tók ég mig saman og kvaddi pabba. Bjarki var farinn og Bríet líklega farin að sofa því hún átti að byrja vinnu eldsnemma eða um fjögur í morgun. Greiðfært var í bæinn eða alveg fram að þar sem framkvæmdirnar eru þar var samfelld bílalest á ca 30 km hraða inn að fyrsta hringtorgi. 

Sunnudagur

Klukkan var orðin hálfníu þegar ég vaknaði í gærmorgun. Eftir morgunverkin á baðherberginu gaf ég mér tíma í netvafr og það urðu tveir tíma. Klukkan var því um ellefu þegar ég mætti í Sundhöllina. Braut 4 í útilauginni var laus og ég byrjaði á því að synda í tuttugu mínútur, flestar ferðirnar á bakinu en þó tvær skriðsundsferðir. Eftir sundið var það kaldi í fimm mínútur, gufa, sturta og aftur kaldi áður en ég fór upp úr og þvoði mér um hárið. Skrapp aðeins í Krónuna við Fiskislóð því það var farið að vanta ost, skinku og brauð. Verslaði aðeins í einn poka. Gekk frá vörunum er ég kom heim og fékk mér einhverja hressingu. Kveikti aðeins á sjónvarpinu og horfði á síðustu mínútur í hádegisleiknum í enska boltanum. Svo pakkaði ég niður og dreif mig austur. Fór Þrengslin og kom aðeins við hjá Jónu og Reyni en þau eru enn í sumarleyfi, nýkomin úr tveggja vikna ferð til dóttur sinnar og fjölskyldu í Danmörku. Þáði kaffi hjá þeim en stoppaði aðeins í tæpan klukkutíma. Klukkan var samt orðin hálffimm þegar ég kom til pabba. 

Nýr skoðunarmiði

Í gærmorgun vaknaði ég aðeins þremur mínútum áður en klukkan átti að hringja. Hafði reyndar rumskað um klukkutíma fyrr en mér fannst það heldur snemmt og sem betur fer steinsofnaði ég aftur og dreymdi einhverja vitleysu. Fór á bílnum í vinnuna. Við vorum tvær, ég var í bókhaldi og á móttökuendanum. Daglegri framleiðslu lauk fyrir klukkan tólf og við kláruðum að telja og ganga frá áður en við fórum í mat. Ég fékk að fara um tvö. Fór með bílinn í Frumherja til að láta skoða hann. Tveir aðrir voru á undan og aðeins einn í vinnu en biðin varð samt ekkert löng og ég fékk bláan 2023 miða á bílinn og enga athugasemd. Kom við hjá AO við Sprengisand og fyllti á tankinn. Þrátt fyrir að vera með sunddótið í bílnum ákvað ég að fara heim án þess að fara í sund. Oddur fékk lánaðan bílinn og þeir bræður fóru báðir saman eitthvað að erindast. Komu heim með tilboð og fötu frá KFC í boði Davíðs Steins. Um kvöldið horfði ég á bikarleik kvenna, undanúrslit, í fótboltanum. Stjarnan - Valur 1:3. Leikur var sýndur beint á RÚV2.

Labbað báðar leiðir í gær

Ég var vöknuð og komin á fætur upp úr klukkan sex. Hafði því ágætis tíma til að vafra aðeins um á netinu áður en ég labbaði í vinnuna. Ég var á móttökuendanum aftur í gær því ég bauð þeirri sem var í bókhaldinu í fyrradag sem var aðeins að vinna til hádegis í gær að velja á hvorum endanum hún vildi vera. Framleiðsla var ekki mikil og gekk vel. Geymdum okkur part af verkefni tvö fram yfir kaffi. Sú sem var í bókhaldinu hafði skroppið í Bernhöftsbakarí og fyrrum vinnufélagi okkar kom í heimsókn í "föstudagskaffið". Þegar daglegri framleiðslu lauk fengum við nokkra mínútna auka verkefni sem bráðlega mun bætast við inn í framleiðsluflóruna. Daglegri framleiðslu, fyrir utan þrjú kort úr tegund sem bráðum fer að hætta, var lokið upp úr klukkan hálftólf. Stuttu síðar fór sú sem vinnur bara til hádegis á fimmtudögum inn í sína helgi.  Eftir hádegi var loksins hægt að framleiða kortin þrjú. Ég fékk að hætta og fara um hálftvö. Það var hvort sem er allt búið. Kom við í Austurstræti og heilsaði aðeins upp á Lilju. Labbaði svo lengri leiðina heim, Lækjargötu, gegnum Hljómskálagarðinn, meðfram flugvellinum og framhjá Valsheimilinu. Oddur var í Sorpuferð en kom heim nokkru á eftir mér. Davíð Steinn var á vinnuvakt. Hann kom ekki heim fyrr en um hálfníu.

Flokkun lokið

Labbaði yfir Skólavörðuholtið í vinnuna í gærmorgun með ýmislegt með mér í bakpokanum. Vorum þrjár, ein farin í frí og önnur komin úr stuttu fríi. Tekist hafði að koma í veg fyrir lekann svo það kom ekkert plast til framleiðslu sem ekki eru til birgðir af. Ég var á móttöku endanum og við sem vorum á vélinni kláruðum fyrstu tvö verkefnin áður en við fórum í kaffi. Tókum okkur gott kaffihlé en svo fór fyrirliðinn á fjarfund í tölvunni sinni. Sá fundi var lokið áður en hádegisverkefnið skilaði sér til okkar. Allri framleiðslu var lokið korter í tólf, allt talið og frágengið um tólf. Hinar tvær fóru svo heim en ég tók á móti tveimur viðgerðarmönnum í yfirferð. Kerfisfræðingurinn sem er með aðstöðuna hjá okkur var líka á svæðinu. Yfirferðin fólst að þessu sinni í að fara yfir og sortera varahluti og setja í nýjar geymsluhirslur. Ég flokkaði kennispjöld á meðan. Flokkaði síðustu kennispjöldin frá því í ágúst 2016 um þrjú leytið. Var með bók í bakpokanum og einnig komin inn með prjónana mína en ég eyddi síðustu þremur korterunum í að vafra á netinu á vinnutölvunni minni. Oddur sótti mig í vinnuna og ég fór ekkert aftur út. Lauk við eldhúshandklæðið í páskagula litnum, gekk frá endum og fitjaði upp á nýrri tusku úr grænni dokku. 

Yfirseta í dag

Það var úrhellisdemba í gærmorgun svo ég fór á bílnum í vinnuna. Varð blaut við að labba út í bíl en hann var í stæði fyrir framan númer 9 svo þetta var smá spölur. Eitthvað gerðist þegar verið var að laga uppsetningu kortanna í kerfinu í fyrradag og þrátt fyrir að sumar tegundir væru merktar þannig að ekki mætti framleiða þær komu allar tegundir til framleiðslu. Sem betur fer fengum við leyfi til að nota annað plastútlit svo hægt var að framleiða kortin. Kerfisfræðingarnir fóru í það að "handlaga" málin og nú er það svo að þegar birgðir berast verðum við að kalla þá til til að opna aftur fyrir framleiðslu. Ég var á ítroðsluendanum. Við vorum þrjár í vinnu og sá fjórði á staðnum, annar kerfisfræðingurinn, því hann er með sína aðstöðu hjá okkur og mun flytja með kortadeildinni þegar þar að kemur. Framleiðslu lauk rétt fyrir tólf. Þá vorum við búnar að framleiða yfir níuhundruð kort. Ég fór upp í mat með þeirri sem er skráð í mat. Eftir hádegi töldum við afganginn af vögnunum, vorum búnar að telja tvo af fjórum rétt fyrir morgunkaffi. Ég mátti svo hætta vinnu rétt fyrir tvö. Ég ákvað að fara í sund í Vesturbæjarlaugina. Vafði sjampóbrúsa og höfuðhandklæðinu inn í handklæðið. Þegar til kom synti ég ekkert og fór ekki heldur í kalda pottinn. Það eru aðeins fjórar brautir og þar sem ekki voru þegar fyrir einn eða tveir að synda voru börn að leik og þar sem ég var að spá í að þvo á mér hárið vildi ég helst synda nokkrar ferðir á bakinu. Ég var samt rúman klukkutíma á svæðinu. Fór í sána, heita potta, vaðlaug og sat góða stund á einum af bekkjunum. En þar sem ég synti ekki neitt þvoði ég mér heldur ekki um hárið. Ekki að það sé mikið skítugt en það er vika síðan ég þvoði það síðast. 

Bókasafnsferð

Vaknaði rétt fyrir sex og fór strax á fætur. Klukkutíma síðar labbaði ég af stað í vinnuna og komst alla leið áður en fór að rigna. Það var rétt að byrja að dropa síðustu metrana. Við vorum tvær í vinnu, ég í bókhaldi og á móttökuendanum á vélinni. Um níu kom kerfisfræðingurinn sem er með aðstöðu hjá okkur úr fríi svo þá vorum við orðin lögleg á deildinni. Þótt dagleg framleiðsla væri ekki mjög mikil var klukka orðin hálfeitt þegar henni lauk. Silla bauð mér með sér upp að borða. Strax eftir mat og einn kaffibolla fór hún í að pakka og ég að vinna í bókhaldinu. Höfðum talið fyrstu framleiðslu fyrir morgunkaffi en áttum eftir að telja hinar tvær, seinni tvo vagnana. Vorum í vinnu til hálffjögur. Fékk far heim úr vinnunni. Settist smá stund inn í stofu með fartölvuna í fanginu en rétt fyrir fimm skrapp ég á bókasafnið í Kringlunni og skilaði þremur bókum. Ein af þeim var skammtímalánsbókin og var akkúrat kominn tími til að skila henni. Þrátt fyrir að vera með þrjár bækur enn heima tók ég fjórar bækur og ein af þeim er ný með 14 daga skilafresti. Fór beint heim aftur og kláraði að lesa eina af þeim þremur sem voru heima frá síðustu ferð og byrjaði svo strax á annarri af hinum; Hægt og hljótt til helvítis eftir Magnús Guðmundsson. 

Enn einn kippurinn

Í dag eru 4 ár síðan mamma dó og rúm þrjú ár eru liðin síðan duftkerið var sett niður í gröf "Litlu Önnu" systur minnar sem aðeins fékk að vera til um sjö mánuði. Það er ekki búið að setja viðbótarmerki á leiðið en það verður ekki gert strax. Annars var ég komin á fætur rúmlega sjö í gærmorgun. tæpum tveimur tímum síðar fékk ég mér lýsi og musli með mjólk út á. Skutlaði Davíð Steini í vinnu þannig að hann var mættur á stöðina klukkan hálftíu. Þáði kaffi út í bíl sem ég drakk þegar ég var komin á stæði við Nauthólsvík. Hlustaði á útvarpsfréttir klukkan tíu og snérist svo hugur. Hætti við að skella mér í sjóinn og fór bara heim. Heima dútlaði ég við ýmislegt, las, prjónaði, vafraði á netinu, horfði á leiki í enska sem og þætti. Setti handklæði af strákunum í þvottavél sem ég fékk svo Odd til að hengja upp. Er búin að ræða við strákana um að þeir geti alveg farið að skiptast á að þvo handklæðin sín. Þeir eru löngu farnir að þvo af sér leppana og nú er það orðið þannig að maður spyr hvort þeir þurfi að setja í vél áður en maður fer í þvottahúsið því ef þeir segjast þurfa að þvo fer ég að sjálfsögðu ekki í þvottahúsið þann daginn.

Jafntefli

Vaknaði um sexleytið og dreif mig á fætur. Hafði því ágætan tíma til að vafra aðeins um á netinu áður en ég skutlaði N1 syninum upp á Gagnveg. Hleypti piltinum út við vinnustaðinn um hálfátta og beið fyrir utan þar til hann var búinn að færa mér kaffi. Drakk kaffið á bílastæði við Austurbæjarskóla. Hlustaði á morgunfréttir klukkan átta áður en ég dreif mig í sund. Sá bíl sr. Péturs fyrir framan Sundhöllina en hitti samt ekki á hann í sundinu. Fór 4 ferðir í kalda pottinn, synti í tuttugu mínútur á braut 4 í innilauginni (allt á bringunni), eina ferð í heitasta pottinn, eina ferð í gufu og eina ferð í langpottinn á útisvæðinu. Áður en ég fór heim kom ég við í Bakarameistaranum í Suðurveri og fékk mér kaffi, smurt rúnstykki og sérbakað vínarbrauð sem ég borðaði og drakk á staðnum. Kom heim um hálfellefuleytið. Fór ekkert út aftur en setti í þvottavél, prjónaði, vafraði á netinu, horfði á leiki í enska og þætti. Um kvöldið steikti ég þorskhnakka. 

Á skutlvaktinni

Í gærmorgun  fór ég á bílnum í vinnuna. Við vorum tvær hin í bókhaldi og á móttökuendanum og ég á ítroðsluendanum. Fyrsta framleiðsla gekk alveg ágætlega. Svo lentum við í brasi með eina tegund úr næstu framleiðslu. Svo miklu brasi að við urðum að sleppa því að framleiða þá tegund, þar var eitthvað ekki alveg rétt og vélin virtist ekki ráða við málið. Þetta bras kostaði það að við áttum eftir að framleiða fyrir einn bankann þegar við fórum í mat. Eftir mat byrjuðum við á því að snúa við ferlinu og framleiddum fyrst allt sem fara átti í póst fyrir síðasta bankann. Gengum svo frá öllum póstsendingum áður en við kláruðum að framleiða. Pósturinn hefur nefnilega verið sóttur frekar snemma undanfarið, klukkan er varla orðin hálftvö og ef það er ekki allt tilbúið fyrir þann tíma fer það ekki fyrr en í næstu ferð. Þegar framleiðslu lauk fór sú sem var í bókhaldinu og útbúa talningablöð en kom svo og kláraði að pakka með mér því sem átti að fara í útibú. Síðan töldum við báða seinni vagnana, fyrri tvo töldum við eftir fyrstu framleiðsluna. Hættum vinnu um hálfþrjú og ég fór í Nauthólsvík því ég var með sjósundsdótið með mér í skottinu. Svamlaði um í uþb korter í tæplega 12 gráðu heitum sjónum. Var komin heim um hálffimm. Um kvöldið kíkti ég aðeins á opnunarleik í enska boltanu; Crystal Palace - Arsenal 0:2. Horfði ekki á allan leikinn en sá fyrra markið.

Enski boltinn að rúlla af stað

Vaknaði rúmlega sex. Labbaði af stað í vinnuna tæpum klukkutíma síðar. Ég var á móttökuendanum á vélinni. Framleiðsla gekk vel fyrir sig. Sú sem var í bókhaldinu náði að klára sín verk áður en hún fór heim inn í sína helgi. Hin bauð mér upp í mat með sér. Vorum í vinnu til rúmlega tvö. Flokkaði m.a. kennispjöld úr hálfum kassa. Aðeins er eftir að flokka úr rúmum þremur kössum svo þetta er alveg að verða búið. Fékk far heim úr vinnunni. Bræðurnir voru í nýlega farnir í Sorpuferð þegar ég kom heim um hálfþrjú. Ég fór ekkert út aftur. Vafraði um á netinu, horfði á fréttir og þætti, prjónaði og endaði á því að horfa smá stund á gosið á RÚV2 áður en ég fór upp í rúm að lesa um hálftíu. 

Nýtt gos á Reykjanesi hafið

Rumskaði um hálfsex við skjálfta en sofnaði strax aftur. Vaknaði tæpum klukkutíma síðar, rétt áður en vekjaraklukkan átti að hringja. Slökkti á henni og dreif mig á fætur. Eftir morgunverkin á baðherberginu vafraði ég um á netinu þar til kominn var tími til að labba í vinnuna. Ég var í bókhaldinu í gær. Dagleg framleiðsla var nokkuð stór, debetið yfir sexhundruð og þrjátíu kort og visa yfir tvöhundruð og fjörutíu. Hádegisskammturinn var temmilegur. Þrátt fyrir þennan fjölda lauk framleiðslu um tólf. Þá afhentum við vélina aftur til yfirferðar. Að vísu byrjuðum við á því að senda viðgerðarmanninn fram í mat á meðan við fórum upp að borða. Öllum talningum lauk upp úr klukkan eitt og þá var líka opnaður síðasti kassinn af nýjustu kortasendingunni. Það voru rúm þrjúþúsund kort sem ekki heldur var hægt að telja í gegnum plastið utanum um kassann og kortin. Hinar tvær sem voru að vinna með mér fóru heim upp úr klukkan tvö. Ég sat yfir viðgerðarmanninum og flokkaði kennispjöld á meðan. Hafði samband við einkabílstjórann um þrjú og hann var kominn til að sækja mig klukkutíma síðar. Svo lánaði ég honum bílinn skömmu síðar til að hitta bróður sinn hjá pabba þeirra. N1 sonurinn hafði farið og leyst af í N1 í Mosfellsbæ um hádegisbilið. 

Á bílnum í gær

Rumskaði um hálftólf og hrökk aftur upp um hálfþrjú í fyrrinótt þegar yfir riðu allsterkir skjálftar. Gekk aðeins verr að sofna aftur þarna um miðja nótt en tókst þó og svaf þá til rúmlega sex. Fór á bílnum í vinnuna. Var á ítroðsluendanum. Daglegri framleiðslu lauk upp úr klukkan hálftólf. Um hádegisbilið afhentum við vélina til yfirferðar en tvær af okkur þremur fórum að opna og telja kortasendingu. Ekki var hægt að telja kortin í gegnum plastið svo við urðum að klæða kassana úr, telja, klæða aftur í og líma fyrir. Þetta tók okkur drjúga stund því við vorum að fá yfir fjörutíuþúsund kort í einni tegund. Áttum eftir einn minniháttar kassa með kortum af annarri tegund þegar við hættum og gengum frá. Hinar tvær fóru um þrjú en ég sat yfir viðgerðarmanninum þar til hann hætti um fjögur. Þá fór ég beint í Sundhöllina. Synti baksund á braut 4 í útilauginni í ca korter, fór tvisvar í kalda pottinn og endaði í smá gufubaði. Þvoðið mér um hárið á leiðinni upp úr. Kom svo við í Krónunni á leiðinni heim. 

Hrokkið upp af værum svefni

Fór á fætur á svipuðum tíma og á sunnudagsmorguninn. Að þessu sinni var ég samt á undan pabba mínum. Morguninn fór í netvafr, prjón og kapallagnir. Steiktum okkur hamborgara í hádeginu og þá fyrst hellti ég upp á kaffi. Settumst fljótlega eftir það út á pall og sátum þar úti í um tvo tíma. Ég rétt skrapp inn einu sinni til að fara á klósettið sem og að ná mér í aðeins meira kaffi. Tók mig saman og kvaddi pabba á fimmta tímnum. Sagði honum að ég ætlaði að keyra aðra leið heim og myndi ekki vera að flýta mér. Stoppaði aðeins á bensínstöð í Þorlákshöfn til að tékka á þrýstingnum í hjólbörðunum en ég hafði stuttu áður orðið vör við að mælaborðið var komið með athugasemd þar um. Síðan keyrði ég Suðurstrandaveginn alla leið til Grindavíkur. Hugmyndin var að stoppa þar um stund í grenndinni en þegar til kom varð ekkert af því. Var því komin heim um sjö. 

Öflugir jarðskjálftar

Fór á fætur um níu í gærmorgun. Pabbi var kominn á fætur og sat frammi í eldhúsi. Um tíu leytið hellti ég mér upp á kaffi og tók út eitt þorshnakkaflak. Langaði að leyfa að pabba að smakka á því sem hann geymir fyrir mig í frystikistunni sinni. Um ellefu skrapp pabbi í búðina eftir hrásallati. Á meðan hann var þar renndi einn bróðir hennar mömmu og konan hans í hlað. Þau höfðu gist á Hótel Rangá og ákváðu að koma við áður en þau fóru aftur í bæinn. Hellti upp á nýtt kaffi fyrir þau. Þau vildu hins vegar ekki borða með okkur, voru nýlega búin að borða vel útilátinn morgunverð. Þau kvöddu um eitt og þá settumst við pabbi að snæðingi. Mér tókst að toppa sjálfa mig í eldamennskunni, maður minn hvað þetta var góður matur. Við feðginin vorum bæði spennt fyrir úrslitaleik EM kvenna milli Englands og Þýskalands. Á Heiði var verið að halda hálfgildings ættarmót en pabba langaði ekki þangað svo ég ákvað að vera bara með honum. Leikurinn var spennandi en það hefði verið gaman að vita hvort hann hefði verið öðruvísi ef fyrirliði Þjóðverja, Alexandra Popp, hefði getað verið með. Hún meiddist í upphituninni og gat ekki einu sinni gefið kost á sér sem varamaður. Hún var þó á svæðinu. Held að úrslitin 2:1 fyrir England eftir framlengdan leik séu mjög sanngjörn. Bæði lið áttu sín færi og þetta eru þau lið sem fengu á sig fæst mörk í allri keppninni. Fengu til dæmis ekki á sig mark í riðlakeppninni. Stuttu fyrir klukkan sex reið yfir sterkur jarðskjálfti á Reykjanesinu þar sem stendur yfir mjög öflug hrina. Skjálftinn fannst vel hér á Hellu.

Síðasti júlídagur ársins

Vaknaði einhvern tímann á áttunda tímanum í gærmorgun. Fór fljótlega á fætur. Gaf mér góðan tíma í netvafr svo það var ekki fyrr en á ellefta tímanum sem ég fór í sund. Synti í rúmar tíu mínútur á braut 1 í innilauginni. Þrjár ferðir í kalda, tvo heita potta og gufu. Á leiðinni upp úr hitti ég aðeins á eina sem var með mér í foreldrafélagi drengjakórsins á sínum tíma. Hún og hennar maður voru í sundi með fyrsta ömmubarninu sínu. Þegar ég kom heim hellti ég upp á kaffi og bjó mér til hafragraut. Pakkaði niður um hálftvö, kvaddi strákana og brunaði austur með viðkomu á AO vi ð Sprengisand.

Verslunarmannahelgi

Sem fyrr vaknaði ég á undan vejaraklukkunni og var komin á fætur upp úr klukkan sex. Fór á bílnum í vinnuna. Vorum aðeins tvær því tvær af hinum eru í fríi og sú þriðja er ekki í 100% stöðu og vinnur bara til hádegis á fimmtudögum. Fram í miðjan ágúst eru tveir föstudagar, einn mánudagur og tveir fimmtudagar frá hádegi þar sem aðeins verða tvær í vinnunni. Önnur þeirra er ég en tvær skipta hinum dögunum á milli sín. Eftir 15. ágúst er aðeins ein í fríi og þá verðum við oftast fjórar í vinnu og þrjár frá hádegi á fimmtudögum og fram að helgi. Ég var annars í bókhaldinu og á móttökuendanum á framleiðsluvélinni. Daglegri framleiðslu lauk rúmlega tólf. Þá gátum við slökkt á vélinni. Fórum fram í smá matarpásu en aðeins í uþb tuttugu mínútur. Kláruðum að pakka, telja og ganga frá deildinni upp úr klukkan hálftvö. Um tvö kom eitt smá verkefni sem kemur stundum en þar sem pósturinn var búinn að koma að sækja póstinn gerði ég bara helminginn af verefninu. Hættum vinnu um hálfþrjú og hin fór þar með í tveggja vikna frí. Ég fór beinustu leið í Sundhöllina. Innilaugin var opin en það var stökkbrettið líka svo ég sleppti því alveg að synda. Fór 3 ferðir í kalda pottinn, í tvo heita potta og gufu áður en ég fór upp úr og heim. Hellti mér upp á kaffi þegar ég kom heim og drakk fyrstu tvo og einu kaffibolla dagsins um fjögur leytið.

Síðasti virki dagurinn í júlí

Vaknaði á undan vekjaraklukkunni eins og oftast áður. Slökkti á henni og fór á fætur. Eftir morgunverkin á baðherberginu hafði ég tíma til að setjast niður í stofu með fartölvuna í fanginu og vafra aðeins um á netinu. Um sjö labbaði ég af stað í vinnuna. Síminn skráði 3,13 km göngu sjálfkrafa. Ég var á móttökuendanum á vélinni. Kláruðum fyrsta skammtinn og stóran hluta af næsta skammti fyrir kaffi. Kaffivélin var biluð þegar við komum fram og engin varavél á svæðinu. Sem betur fer hafði ég fengið mér tvöfaldan espressó rétt fyrir átta. Kláruðum allt daglegt og fyrirliggjandi endurnýjun rétt rúmlega tólf. Þá fór sú sem var með mér á vélinni heim en ég upp að borða með þeirri sem var í bókhaldinu. Eftir hádegi töldum við og gengum frá. Ryksuguðum vélina og töldum lagerinn. Vorum að ganga frá deildinni þegar stór kortasending á tveimur vögnum kom. Komum þessu fyrir inn á lager og hættum vinnu um þrjú. Fékk far heim úr vinnunni og fór ekkert út eftir það. Vafraði um á netinu, las, prjónaði og horfði á tvo þætti, hvorn úr sinni þáttaseríunni. 

Fimmtudagur

Þegar ég vaknaði um sex í gærmorgun sá ég skilaboð frá Davíð Steini sem voru send á fb-spjallinu um hálftólf kvöldið áður. Hann var semsagt nýlentur þá. Átti far með flugrútu og þegar hann kom á BSÍ hafði hann samband við bróður sinn til að sækja sig. Mikil rigning og svo átti hann að mæta í vinnu strax í gær. Ég hitti þennan N1 son minn í nokkrar mínútur áður en hann fór af stað í sína vinnu. Hann hafði átt góða daga úti í Frakklandi en sagðist þó vera sama þótt hann sæi aldrei lest aftur. Ég fór á bílnum í mína vinnu og hafði sunddótið með mér í skottinu. Ég var komin nokkru á undan samstarfskonum mínum. Vissi að ég ætti að vera á ítroðsluendanum á vélinni og þyrfti að byrja á því að skipta um aðgangsorð. Ákvað því að gera það og byrja aðeins að hlaða inn verkefnum dagsins í rólegheitunum. Framleiðsludagurinn í gær var mun minni heldur en á þriðjudaginn og það var einnig miklu minna vesen á vélinni. Daglegum verkefnum lauk fyrir klukkan tólf og eftir hádegi kláruðum við það sem hægt var af einni endurnýjun og byrjuðum á einni sem kom til okkar um hádegisbil. Hættum vinnu og gengum frá aðeins í fyrra fallinu. Klukkan var ekki alveg orðin þrjú þegar ég yfirgaf vinnustaðinn. Fór beinustu leið í Sundhöllina. Innilaugin var reyndar lokuð og nokkuð margir að nota útilaugina, m.a. strákahópur sem var mest megnis að leika sér. Ég ákvað því að sleppa sundinu en fór tvisvar í kalda, einu sinni í heita pottinn og einu sinni í gufu. Var komin heim um hálffimm. 

Frakklandsfarinn kom heim í nótt

Vaknaði um sex í gærmorgun, næstum því hálftíma á undan vekjaraklukkunni. Slökkti á henni og fór strax á fætur. Eftir morgunverkin á baðherberginu hafði ég þá ágætistíma í smá netvafr. Um sjö labbaði ég af stað í vinnuna í smá úða sem stóð reyndar ekki lengi yfir. Var mætt fyrst af okkur þremur sem vorum að vinna. Aðra þeirra vann ég með í útkallinu en hina hafði ég ekki séð frá því síðast í maí. Þrátt fyrir að ég hafi verið fjarverandi í þrjár vikur var bókhaldsbakkinn á mínu borði. Það var alveg í góðu lagi mín vegna því þá gat ég notað aukatímann í að flokka kennispjöld. Framleiðsludagurinn var í stærra lagi og vélin með einhverja stæla þannig að allt í allt náði ég að flokka úr næstum fjórum kössum af kennispjöldum. Þá eru einungis sjö óflokkaðir kassar eftir. Pósturinn var það snemma á ferðinni að hann fékk eingöngu það sem ekki náðist með á mánudeginum, sem var ekki svo mikið en eitthvað samt. Þetta var um hálftvö en fljótlega kom fyrsti skammturinn fram til að pakka. Klukkan var langt gengin í fjögur þegar við vorum búnar með öll daglegu verkin og ganga frá. Ekki var neinn aukatími fyrir endurnýjun en það er bara lítill hluti eftir af henni sem klárast bara seinna í vikunni. Labbaði aftur heim sömu leið til baka frá því um morguninn, yfir Skólavörðuholtið og niður Egilsgötu. Seinni partinn af gönguleiðinni fór að rigna smá, aðeins meira í úði en alls ekki hellirigning. Kom heim upp úr klukkan hálffimm og ákvað að fara ekkert út aftur. Fékk meira að segja Odd til að sækja fyrir mig þvott niður í þvottahús.

Hárþvottur og bókasafnsferð

Byrjaði gærdaginn á því að skipta um á rúminu mínu á áttunda tímanum. Setti óhreinu rúmfötin þó ekki í þvottavélina fyrr en um tíu rétt áður en ég dreif mig loksins í sund. Eftir fyrstu ferðina í klalda pottinn synti ég 500 metra á braut 4 í innilauginni. Allar ferðir á bakinu og fjórðu hverja ferð bakskrið. Fór tvær aðrar ferðir í kalda pottinn, eina ferð í heitasta pottinn og eina ferð í langpottinn á útisvæðinu. Sleppti gufunni að þessu sinni. Var búin að þvo á mér hárið um tólf. Ætlaði að drífa í því að láta skoða bílinn en Frumherji er með lokað í hádeginu til klukkan hálfeitt svo ég fer líklega ekki fyrr en í næsta mánuði. Bílnúmerið endar á átta svo ég hef alveg tíma, jafnvel fram í október. Ég fór því bara heim og kláraði að lesa síðustu bókina af safninu. Oddur fór í Sorpuferð um miðjan dag og þegar hann kom aftur skrapp ég á bókasafnið í Kringlunni. Skilaði þeim þremur bókum sem ég var með og tók sex aðrar í staðinn. Ein af þeim er ný með 14 daga skilafresti. Samt byrjaði ég ekki að lesa neina af bókunum í gær eða gærkvöldi.

Síðasti sumarfrísdagurinn í bili

Ég var ákveðin í að sofa út í gærmorgun og klukkan var rétt byrjuð að ganga ellefu þegar ég fór loksins á fætur. Eftir morgunverkin á baðherberginu settist ég um stund inn í stofusófa með fartölvuna í fanginu. Um hádegisbilið færði ég mig yfir í stólinn og kveikti á sjónvarpinu til að hlusta á hádegisfréttir. Prjónaði á meðan. Klukkan var orðin eitt þegar ég hellti mér upp á kaffi og fékk mér eitthvað að borða. Dagurinn leið svo undur hratt eins og alltaf. Fannst hann í styttra lagi en það er örugglega vegna þess að ég svaf frameftir. Var komin upp í rúm, með bók, fyrir klukkuna tíu. Er að lesa síðustu bókasafnsbókina; Roðabein eftir Ann Cleeves. 

Sofið út á sunnudegi

Afmælisdagur tvíburanna var nokkuð rólegur. Ég var komin á fætur um átta og var svo bara eitthvað að dúlla mér fram eftir degi. Sá sonurinn sem er heimavið kom fram um hálfellefu en fór aftur inn til sín eftir að hafa farið á salernið. Klukkan var byrjuð að ganga fjögur áður en hann kom aftur fram. Ég sagðist ætla að bjóða honum út að borða í tilefni dagsins. Hann mætti velja staðinn. Eina skilyrðið var að við yrðum komin heim fyrir leik um sjö. Oddur valdi að fara á Nings og við vorum þar um hálfsex. Skammturinn er í stærra lagi og ég gat ekki klárað minn alveg. Þegar við komum heim aftur skrapp Oddur út í Krambúð. Hann kom til baka og færði mér einn poka af stjörnupoppi án þess að ég hafði beðið um það. Geymdi mér pokann langt fram á kvöld. Leikurinn var framlengdur en svo fór ég að horfa á sannsögulegan þátt um óhugnanleg morð á DR1. Var næstum farin að horfa á þátt með Banks strax á eftir en klukkan var byruð að ganga eitt og ég fór frekar inn í rúm að lesa smá. Og eitt að lokum ég fékk aftur póst frá gjaldkera getspár, var með tvo rétt og bónus í lottóútdrætti gærkvöldsins.

Tvíburarnir 26 ára í dag

Var komin á fætur um klukkan sex í gærmorgun. Eftir morgunverkin á baðherberginu hafði ég nægan tíma til að vafra aðeins um á netinu. Davíð Steinn kom fram um sjö og fór í sturtu. Hann var búinn að pakka niður. Hafði skroppið í Kringluna í fyrradag að kaupa sér tösku þar sem töskurnar sem hann pantaði í gegnum capacent og fjölmiðlamælinn voru ekki komnar. Þær töskur komu svo í fyrrakvöld. Um hálfátta skutlaði ég syninum til Keflavíkur. Hann átti flug til Parísar rétt fyrir ellefu. "Henti" stráknum út við flugstöðina og brunaði beint í bæinn aftur, beinustu leið í Sundhöllina. Fór þrjár ferðir í kalda pottinn, eina ferð í heitasta pottinn, smástund í gufu og synti tvo spretti, tuttugu mínútur í innilauginni og tíu mínútur í útilauginni. Kom heim um ellefu og hellti mér upp á kaffi. Davíð Steinn sendi skilaboð rúmlega tvö að hann væri lentur í París. Held að franskur spilafélagi hans hafi tekið á móti honum og sá bauð honum að gista heima hjá sér. Annars var þetta rólegheita dagur. Las, prjónaði (kláraði tusku og byrjaði á nýrri), horfði á þætti og svo 3. leikinn af 4 í undanúrslitum EM kvenna í fótbolta. Svíar rétt sluppu við að fara í framlengingu og náðu að pota in einu marki hjá Belgíu í uppbótartíma.

61. heimsóknin í besta bankann

Frá því að ég fór á fætur um átta í gærmorgun og alveg fram yfir hádegið var ég mjög meðvituð um að drekka oft og vel. Á alltaf orðið flösku í frysti með smá klaka í og þá flösku fyllti ég þrisvar. Flaskan er reyndar ekki stór en þar að auki drakk ég eina flösku af jarðaberja kombuchadrykk, tvær litlar af blönduðum ávaxtasafa og tvo bolla af kaffi. Þetta virkaði amk þannig að um eitt var ég búin að fara þrjár ferðir á klósettið að pissa. Stuttu fyrir klukkan tvö fór ég á bílnum og lagði honum á Berþórugötuna við hliðina á Sundhöllinni. Þaðan labbaði ég spölinn yfir í Blóðbankann. Þurfti að bíða smá, var kölluð þriðja inn og var það ungur maður að þessu sinni. Ég sagði honum allt um erfiðu æðarnar og þegar hann var búinn að þreyfa vel á báðum handleggjum ákvað hann að kalla til aðstoð. Sú sem hann sótti hefur hitt mig áður. "Já, ert þetta þú!", sagði hún brosandi og tók við verkefninu. Hún valdi þann handlegginn sem oftast er stunginn, þann vinstri, og var nokkuð fljót að stinga. Hitti vel á æðina en varð þó aðeins að halda við nálina. Allt gekk ljómandi vel og streymið var þokkalega gott. Á eftir fékk ég mér kaffi, rúsínur og hafraköku áður en ég fór aftur heim. Tók því rólega það sem eftir var dags, bæði í vatnsdrykkju og dútli. Hafði klárað tusku um morguninn og var búin að fitja upp á nýrri og prjónaði ég næstum því helminginn af þeirri tusku. Horfði svo á annan leikinn af fjórum í átta liða úrslitum EM kvenna sem fór 2:0 fyrir Þýsku stelpunum sem enn hafa ekki fengið á sig mark. 

Dagsferð í Viðey

Var komin á fætur um sjö leytið í gærmorgun. Um klukkustund síðar var ég mætt í Sundhöllina. Þrjár ferðir í kalda pottinn, 300 metrar syntir á braut 4 í útilauginni, ein ferð í heita pottinn og svo setið um stund á bekk útivið. Áður en ég fór heim kom ég við í Hagkaup í Skeifunni. Til að verða mér úti um nasl og nesti. Kom heim rúmlega tíu. Fékk mér að borða og útbjó nesti. Setti vatn í flösku en tók líka með litla flösku af kristal. Setti nestið, vökvann, peysu, húfu og vettlinga í bakpoka. Stuttu fyrir klukkan tólf tók ég þetta með mér og fór á bílnum og lagði rétt hjá Skarfabakka. Ferjan út í Viðey fer þaðan á klukkutíma fresti milli 10:15 og 17:15. Það eiga líka að vera tvær ferðir á dag frá Gömlu höfninni. Í gær þótt hins vegar of hvasst til að sigla þaðan svo þeir sem keyptu sér farmiða þar voru keyrðir í smárútu að Skarfabakka. Inger og Helga voru því mættar á Skarfa bakka rétt fyrir tólf í gær. Sigurrós kom með strætó úr Breiðholtinu og var líka mætt á undan mér. Siglingin út í eyju tekur ekki nema uþb 7 mínútur. Við fjórar löbbuðum fyrst aðeins upp að Viðeyjarstofu en héldum fljótlega áfram upp á næsta hól og svo eftir stíg nokkurn veginn með fram strandlengjunni sem snýr að borginni. Ein kona af öðrum farþegum fylgdi í humátt á eftir okkur alla leið að vatnstankinum nyrst í eyjunni. Þar settumst við fjórar niður í rúman klukkutíma, borðuðum nesti og lásum ljóð úr bók sem Helga hafði gefið Inger. En konan hélt sinni för áfram. Eftir pásuna löbbuðum við eftir vegarslóðanum til baka og svo alla leið að friðarsúlunni. Ég fór svo upp að Viðeyjarstofu og fékk mér kaffi og vöfflu á meðan hinar héldu för sinni aðeins áfram. Þær komu þó fljótlega til baka, hættu við að fara mikið lengra þar sem hluti af stígnum sem þær löbbuðu eftir var erfiður yfirferðar. Tókum næst síðastu ferðina og kvöddum eyjuna um hálfsex. Smárútan beið eftir Helgu og Inger en ég skutlaði Sigurrós heim. Lánaði bræðrunum bílinn um átta. Þeir voru að fara út að borða og í bíó með pabba sínum. Ég horfði á fyrsta leikinn í átta liða úrslitum EM kvenna í fótbolta. Þar kom að því að Englendingar fengu á sig mark. Lentu 0:1 undir gegn Spáni en náðu að jafna stuttu fyrir lok venjulegs leiktíma. Það þurfti því að framlengja og skoruðum þær ensku sigurmarkið í framlengingunni.

Heima

Stofuklukkan var búin að slá níu högg áður en ég fór á fætur í gærmorgun. Systurdóttir mín var löngu farin í vinnuna og pabbi var kominn heim úr sundi. Eftir morgunverkin á baðherberginu settist ég aðeins inn í stofu og prjónaði í smástund enn eina tuskuna sem ég fitjaði upp á kvöldið áður. Rétt fyrir tíu fékk ég mér lýsi og harðsoðið egg. Settist aðeins við tölvuna í ganginu en eftir stutt netvafr og færslu á þessum vettvangi fór ég aftur inn í stofu að lesa. Pabbi bauð mér á Kanslarann í hádeginu og fengum við kjötfarsbollur, kartöflur og soðið hvítkál. Hægt var að fá sér bráðið smjör út á. Einnig fengum við okkur dýrindis aspassúpu. Eftir að við komum í Hólavanginn aftur skipti ég tímanum fram að kaffi á milli lesturs, kapallagna, prjóns og netvafrs. Pabbi fór út í garð eftir kaffi að raka saman. Hann er að vinna í því að slá brekkuna með sláttuorfi. Bríet kom heim um sex. Hafði skroppið til vinkonu eftir vinnu. Ég var búin að taka mig saman og kvaddi frænku mína og pabba. Seinna um kvöldið var von á Helgu systur og tveimur vinkonum hennar. Þær voru að koma austan frá Höfn. Ég var komin í bæinn klukkan að verða hálfátta.

Á Hellu

Dreif mig á fætur um klukkan hálfátta í gærmorgun. Var þó ekki komin í Sundhöllina fyrr en um tíu. Þrjár ferðir í kalda pottinn, 400 m á bakinu á braut 4 í innilauginni, annar gamli heiti potturinn, stóri heiti potturinn og smá bekkjarsetja úti. Þvoði mér um hárið á leiðinni upp úr. Kom heim um hálftólf. Hitti annan soninn sem var að koma á fætur. Tók mig saman, kvaddi og hélt af stað austur. Kom við í AO við Sprengisand. Hefði alveg komist fram og til baka og gott betur en það er eitthvað við það að keyra út úr bænum á fullum tanki. Kom við í Fossheiðinni og þáði kaffi og veitingar hjá afmælisbarni gærdagsins. Var komin á Hellu um tvö. Pabbi var úti í garði að slá. Systurdóttir mín kom fljótlega heim úr vinnu en hún hafði mætt mjög snemma og fór beinustu leið inn í herbergi að leggja sig. Pabbi fór aftur út í garð eftir kaffi. Ég var með bleikju og gróf hrísgrjón í kvöldmatinn. Um kvöldið kynnti Bríet unga manninn sem hún er nýbyrjuð í sambandi við. Hann er tveimur mánuðum eldri en hún og úr Landeyjunum. Annars vil ég taka það fram að ég er svo stolt af "stelpunum okkar". Þær börðust eins og ljón allan leikinn og uppskáru enn eitt 1:1 jafnteflið. Þær voru klárlega litla liðið því Frakkland er mun ofar á styrkleikalistanum og var búið að vinna báða hina leiki sína 5:1 á móti Ítalíu og 2:1 á móti Belgíu. Lengi vel var jafntefli í hinum leiknum. Ítalir gerðu árangurslausar orrahríð að marki Belgíu en Belgía aftur á móti skoraði úr sínu eina færi í þeim leik og komst þar með áfram. Það verður fróðlegt að sjá þær mæta Svíu í átta liða úrslitum.

Síðasta heila frívikan framundan

Lottóvinningur helgarinnar var greiddur út strax í gær og heldur því kreditkortið mitt áfram að vera í plús um sinn. Þegar ég geri upp visareikninginn mánaðarlega legg ég alltaf eitthvað aukalega inn þannig að ég byrja hvern mánuð með vísa í plús. Var að nálgast núllið þegar við bættust rúmlega fjörutíuogsjöþúsund krónur. Annars svaf ég út í gærmorgun og fór ekki á fætur fyrr en um tíu. Um hádegið hellti ég mér upp á kaffi. Var að vafra á netinu, prjóna og dúlla mér. Á þriðja tímanum skrapp ég út í klukkustundar göngutúr um nágrennið. Labbaði Hamrahlíðina að Kringlumýrarbraut, beygði til hægri og var að spá í hvort ég ætti að fara heilan Öskjuhlíðarhring. Beygði þó útaf á stíg mun fyrr. Þetta urðu samt rúmlega þrír kílómetrar sem ég labbaði í tveimur hollum. Fann nefnilega bekk á leiðinni og ákvað að setjast og njóta augnabliksins um stund. Það kom köttur og heilsaði upp á mig á meðan ég sat þarna. Gærdagurinn var jafn fljótur að líða og allir aðrir dagar. 

Álitlegur lottóvinningur

Fékk það staðfest með tölvupósti frá gjaldkera íslenskrar getspár að ég fékk fjóra rétta á eina af áskriftarröðunum mínum í útdrætti gærkvöldsins. Tæplega fjörutíuogáttaþúsund krónur sem lagðar verða beint inn á kreditkortið á næstu dögum. Þá eru heildarvinningar ársins komnir í 51.460 kr. á árinu því ég er nokkrum sinnum búin að fá tvo rétta og bónus eða þrjá rétta, nokkra hundrað kalla og einn vinning rétt yfir 1000 kr. Kannski er að styttast í þann stóra? Hann kemur örugglega einhvern tímann. Ætla að halda áskriftinni og ekki breyta neinu þótt bæst hafi í tölurnar á dögunum. Annars var gærdagurinn mjög góður. Skrapp í sundhöllina upp úr hádeginu og synti á braut fjögur í útilauginni í rúmt korter, 400 metra og fjórðu hverju ferð skriðsund. Fór þrisvar í kalda pottinn, smá stund í gufu og heita pottinn úti en annars sat ég góða stund á stól og slakaði vel á. Oddur Smári fékk eitthvað í magann í gær. Ég vona að hann haldi ekki að hann hafi fengið matareitrun eftir eldamennsku sína kvöldið áður því þá er hætt við að langur tími líði áður en hann eldar sér aftur í matinn. 

Loksins

Ég var eitthvað svekkt og pirruð um daginn. Hafði útbúið plokkfisk úr afgangi af soðinni ýsu. Hvorugur sonanna fékk sér af matnum. Davíð Steinn er að mestu farinn að elda ofan í sig sjálfan. Er á sér mataræði og launin þau að hann hefur losað sig við hátt í þrjátíu kíló. Þannig að ég var ekkert að svekkja mig á að hann skyldi ekki fá sér af plokkfisknum. En hinn sonurinn, ég las aðeins yfir honum. Sagði að nú væri ég búin að fá nóg og færi meira og minna að elda bara þegar mér sýndist og þá hugsa eingöngu um mig þannig. Það væri líka kominn tími til að hann færi að gera meira í eldhúsinu heldur en að vaska upp og ganga frá stöku sinnum. Og í gær eldaði þessi sonur minn sinn eigin mat í fyrsta sinn í nokkur ár. Held að hann hafi meira segja verslað hráefnið sjálfur. Stundum verður maður bara að taka af skarið og segja sínar meiningar. 

Annað jafntefli

Já, stelpurnar okkar gerðu 1:1 jafntefli við Ítali í öðrum leik af þremur í sínum D-riðli í gær. Þær stóðu sig heilt yfir mjög vel, skoruðu snemma og fengu nokkur færi til að gera út um leikinn bæði áður en ítölsku stelpurnar jöfnuðu og líka eftir jöfnunarmarkið. Svo fannst mér belgísku stelpurnar standa sig súper vel á móti þeim frönsku. Leikurinn við Frakka verður örugglega erfiður en ég er viss um að allt verður gefið í þann leik. Ég var semsagt mest að fylgjast með EM í knattspyrnu kvenna í gær en líka að prjóna, lesa og ýmislegt fleira. 

Júlí næstum hálfnaður

Vaknaði rétt upp úr klukkan sjö í gærmorgun og dreif mig á fætur fljótlega. Um tíu var ég komin í Sundhöllina. Fór þrisvar sinnum í kalda pottinn og synti í tuttugu mínútur á braut eitt í innilauginni. Fjórðu hverju ferð synti ég skriðsund en annars bringusund. Syndi aldrei baksund nema þá daga sem ég þvæ á mér hárið. Eftir sundferðina skrapp ég í bakaríið í Suðurveri og keypti mér kaffi með ábót, smurt rúnstykki og sérbakað vínarbrauð. Gerði þessu skil á staðnum. Kom heim um tólf. Kláraði afgangatuskuna í gær en alls ekki alla afganga. Fitjaði upp á nýrri tusku, snúningar. Bæti við umferðum og lykkjum til að hafa kant í kring. Davíð Steinn var að vinna í gær. Lánaði svo bræðrunum bílinn til að fara í bíó í gærkvöldi. Nú er N1 sonurinn kominn í tveggja vikna sumarfrí. 

Sólin skín

Þar sem gærdagurinn var nokkuð svipaður og undanfarnir dagar er mest lítið um hann að segja. Fór reyndar hvorki í sund né sjóinn og svo leið allur dagurinn án þess að ég hellti mér upp á kaffi. Var að spá í að láta loksins verða af því um átta leytið í gærkvöldi þar sem þrýstingur í höfði hálf krafðist þess að fá eitthvað koffín. En það fór nú samt svo að ekkert kaffi var drukkið í gær og bara einn sterkur bolli í fyrradag. Ég er alls ekki að hætta í kaffinu þó. Svo var hringt í mig frá blóðbankanum og ég spurð hvort ég væri ekki til í að koma þangað fljótlega. Ég er nýbyrjuð á járnkúr en samþykkti að bóka tíma á fimmtudaginn í næstu viku. 

Færsla no 3303

Klukkan var farin að ganga tvö þegar ég dreif mig loksins í sund í gær. Samt var ég komin á fætur um sjö leytið. Fór í Sundhöllina. Byrjaði að venju á að fara í kalda pottinn. Fór svo á braut 4 í innilauginni og synti í um fimmtán mínútur, allar ferðir á bakinu. Fór tvær aðrar ferðir í kalda pottinn, einu sinni í gufu og einu sinni í heita pottinn. Sat líka á bekk í góða stund. Svo kom ég við í Fiskbúð Fúsa á leiðinni heim og keypti ýsu í soðið, kartöflur og harðfisk. Annars er svo sem lítið að frétta. Nýt þess að vera í fríi og leyfi mér að vera löt. 

Jafntefli

Var vöknuð upp úr klukkan sjö í gærmorgun. Skutlaði Davíð Steini upp á Gagnveg á tíunda tímanum og þáði kaffibolla út í bíl í staðinn. Hann drakk ég á stæði við Nauthólsvík á meðan ég beið eftir því að aðstaðan opnaði. Það var fjara og sjórinn 12°C. Synti út að kaðli í rólegheitum. Hefði getað vaðið alla leið. Var í sjónum í uþb tuttugu mínútur og annað eins í heita pottinum á eftir. Skrapp í Krónuna við Fiskislóð eftir sjósundsferðina. Kom heim um hádegisbilið. Gekk frá vörunum en það liðu svo næstum þrír tímar áður en ég hellti mér upp á kaffi, munaði líklega um þennan bolla sem ég þáði hjá syninum. Þegar leikurinn; Ísland - Belgía á EM kvenna hófst ákvað ég að prjóna á meðan ég fylgdist með leiknum. Stelpurnar okkar stóðu sig mjög vel að mínu mati þrátt fyrir að misnota vítaspyrnu og ná aðeins einu stigi úr leiknum. Það var meira skorað í seinni leik dagsins; Frakkland - Ítalía en í hálfleik var staðan 5:0 fyrir Frakka. Ítalir unnu þó seinni hálfleikinn en þeir skoruðu eina markið og töpuðu því leiknum með fjögurra marka mun.  

Leikdagur

Var komin á fætur upp úr klukkan sex í gærmorgun. Hafði því um klukkustund til að vafra um á netinu áður en ég skutlaði Davíð Steini upp á Gagnveg. Hleypti honum út þar á slaginu hálfátta og þáði kaffibolla út í bíl fyrir vikið. Lagði á stæði við Austurbæjarskóla rétt rúmu korteri síðar. Sat úti í bíl framyfir morgunfréttir og drakk mestan hluta af kaffinu. Þegar ég kom í sundhöllina var tilkynning um að innilaugin væri lokuð. Ákvað samt að fara inn, sleppa bara baksundi og hárþvotti. Það fór reyndar svo að ég fór þrisvar sinnum í kalda pottinn, tvisvar sinnum í stærsta heita pottinn úti, einu sinni í gufu og svo nokkrar mínútur sitjandi á bekk. Sleppti sundinu algerlega en yfirferðin tók samt um klukkustund. Fátt annað gerðist svo sem annars í gær. Horfði á báða leikina í C-riðli EM kvenna, prjónaði, las, vafraði á netinu og horfði á leikna þætti úr sarpinum. 

Hundraðognítugasti dagur ársins

Svaf til klukkan átta í gærmorgun. Dagurinn var annars ósköp svipaður undanförnum dögum. Ein tuska "datt" af prjónunum og að þessu sinni notaði ég afganginn af dokkunni til að fitja upp á afgangatusku. Er líklega komin með nóg af afgöngum í amk tvær tuskur. Hugsanlega hefði ég átt að fitja upp á afgangahandklæði en þar sem ég prjóna eftir mynstrinu "blíðar bárur" þá held ég að ég hefði ekki nennt að hafa stykkið of stórt. Ég bætti reyndar við níu lykkjum við það sem er gefið upp. Í fimmtu hverju umferð bætast við 18 aukalykkjur og í sjöundu hverju umferð þarf að prjóna 36 lykkjur tvær og tvær saman. Nú er EM kvenna í knattspyrnu hafið. Fyrsti leikur okkar stelpna er ekki fyrr en á morgun en það er ein umferð búin í A og B riðli og fyrsta umferðin í C riðli fer fram í dag. 

Veðurviðvaranir

Vaknaði um sjö í gærmorgun. Snéri mér ekki á hina hliðina og fór fljótlega á fætur. Morguninn var tekinn nokkuð rólega. Upp úr hádeginu lét ég tvíburahálfsystur mína vita að ég væri á leiðinni, þyrfti bara að koma við á einum stað. Skilaði þremur bókum á safnið. Þurfti að fara með tvær að afgreiðsluborðinu vegna þess að skilaferlið mistókst. Eina af þessum bókum hafði ég ekki tengt við og ákveðið að skila ólesinni. Hafði lesið hinar tvær og önnur af þeim var skammtímalánsbókin sem komst óvart með mér heim í síðustu safnferð. Ákvað að líta ekkert í kringum mig og fór með tóman poka út. Er jú með þrjár nokkuð þykkar ólesnar hér heima og þar að auki tvær þrjár ólesnar úr eigin eigu. Var komin til Sonju rúmlega eitt. Hún bauð mér upp á kaffi og snarl en svo hjálpaði hún mér að prenta út skjal til útfyllingar vegna sölu á íbúð. Þegar ég var búin að fylla það út skannaði hún það inn og ég gat sent útfyllt skjalið til baka til núverandi eiganda risíbúðarinnar. Fljótlega eftir að þetta var afgreitt færðum við okkur yfir í sófann og tókum upp prjónana. Klukkan var um fimm þegar ég kvaddi en þessir fjórir tímar virkuðu eins og nokkrar mínútur. 

Fimmtudagur

Var komin á fætur um níu í gærmorgun. Hélt mig að mestu heimavið. Skrapp þó í stuttan göngutúr um miðjan dag og kom við í Krambúðinni í bakaleiðinni og keypti m.a. hrásallat og kartöflusallat í bernese. Bjó til kjötbollur í kvöldmatinn. Langt síðan ég hef gert svoleiðis. Annars ósköp lítið að gerast nema nú er líklega loksins að komast einhver hreyfing á framkvæmdir við húsið og það heildarframkvæmdir en ekki plástrar. Ég ætti því að geta "troðið" glugga og svalahurðardæmi inn í dæmið. Það eina sem við þurfum að gera er að halda smá fund og klára að stofna framkvæmdarreikning. Sá sem tók saman skýrsluna um húskassann á sínum tíma er svo til í að liðsinna okkur. Eigandi risíbúðarinnar fyrir ofan mig er að fara setja hana á sölu. Hann er með vinnu og annað heimili norður í landi og íbúðin hér í bænum hefur verið mikið notuð sem skammtímaleigupláss. Ég þarf að taka saman upplýsingar um hússjóð, sameiginlegt húsfélag og framkvæmdirnar framundan.

Hittingur

Í gærmorgun var ég komin á fætur upp úr klukkan sjö. Var eitthvað að spá í að skreppa í sjóinn um tíu en ekkert varð þó úr því. Um tvö hafði norska esperanto vinkona mín samband og bauð mér að koma yfir til sín um fimm. Oddur Smári skutlaði mér þangað þegar tíminn var kominn. Einni annarri konu var boðið. Sú er líka í Lífsspekifélaginu. Við Þrjár höfum stundum brallað eitthvað saman. Seinni parturinn og kvöldið var fljótt að líða. Sonur hinnar vinkonunnar sótti mömmu sína um hálftíu leytið. Við Inger skruppum í smá göngutúr og löbbuðum meðfram sjónum alla leið út að bílastæðinu við Gróttu. Þangað sótti Oddur okkur. Klukkan var farin að ganga tólf þegar ég kom heim. Í stað þess að fara beinustu leið í rúmið settist ég inn í stofu með fartölvuna í fanginu. Þegar ég fór loksins í rúmið einhvern tímann eftir miðnætti las ég um stund í einni bók af safninu. 

Annar af sextán virkum

Klukkan var að verða hálftíu þegar ég vaknaði og fór á fætur í gærmorgun. Hafði reyndar rumskað um hálfsjö um það leyti sem N1 sonurinn var að hafa sig til og leggja af stað í vinnu en snéri mér á hina hliðina og grjótsofnaði aftur. Það stefndi í enn einn letidaginn en um hádegisbilið sá ég skilaboð frá norsku esperanto vinkonu minni. Dóttir hennar varð þrítug í gær og þau höfðu veislu fyrir hana um nýliðna helgi. Nú vildi hún bjóða mér yfir til sín í súpu og hvítvín. Þegar ég svaraði skilaboðum hennar um hvenær ég ætti að mæta sagðist hún aðeins þurfa að hugsa málið. Ég dreif mig hins vegar í Sundhöllina. Fór tvisvar í kalda pottinn, synti í tuttugu mínútur, langmest á bakinu en 1x25 m skriðsund. Fór í gufu eftir seinni kalda potts ferðina og sat svo stund úti á bekk áður en ég fór inn í sturtu og að þvo á mér hárið. Um það leyti sem ég kom heim fékk ég skilaboð frá vinkonunni um að það þyrfti að fresta hittingnum aðeins. Það sem eftir lifði dags og kvölds notaði ég í ýmislegt mis gagnlegt dútl. Slapp við eldamennsku því ég átti afgang af steiktum þorskhnakka. Oddur vildi reyndar ekki fá sér með mér svo ég benti honum á að afgangurinn væri amk fyrir tvo og ef hann ekki vildi borða þýddi það að ég ætti auka afgang fyrir sjálfa mig og væri því ekkert að fara að elda alveg á næstunni. 

Sofið út

Fór á fætur upp úr klukkan níu í gærmorgun. Að öðru leyti var dagurinn mjög svipaður og laugardeginum. Um miðjan dag lánaði ég bræðrunum bílinn. Þeir komu heim aftur um níu í gærkvöld. Ég var komin upp í rúm fyrir klukkan tíu en þrátt fyrir að lesa í einn og hálfan tíma kláraði ég ekki skammtímalánsbókina. Hún er upp á 529 bls. og það eru rúmar 30 blaðsíður eftir. Þarf svo sem ekki að skila henni fyrr en eftir viku en svo á ég fimm aðrar bækur ólesnar. Hef 23 plús 30 daga til að lesa þær. 

Letikast

Þrátt fyrir að vera komin á fætur upp úr klukkan sjö í gærmorgun þá fór það nú svo að dagurinn var eingöngu notaður hér heima. Drjúgur tími fór í netvafr og netleiki, lestur, sjónvarpsgláp og prjónaskap. Strákarnir tóku að sér að fara saman í eina sorpuferð og ég steikti þorskhnakka í matinn og sauð smælki til að hafa með. Rólegheitadagur og alveg jafn fljótur að líða og allir aðrir dagar. 

Árið hálfnað

Það var vekjaraklukkan sem ýtti við mér rétt fyrir klukkan hálfsjö í gærmorgun. Fór á fætur, bjó um, sinnti morgunverkunum á baðherberginu og settist svo smá stund inn í stofu með fartölvuna í fanginu. Fór á bílnum í vinnuna. Ég var í bókhaldinu og mánaðamótafrystingum. Var búin að klára af frystingarnar þegar samstarfskona mín mætti. Við sóttum alla vagna og töskur og rétt skruppum fram til að fylla á vatnsbrúsana okkar áður en við byrjuðum á fyrstu framleiðslu dagsins. Vorum langt komnar með þá framleiðslu þegar við tókum stutta pásu til að fara á zoom-fund. Þar var verið að tilkynna að ákveðið hafi verið að Reiknistofan myndi flytja úr Katrínartúni og yfir í Kópavog að ári. Einnig var sagt að búið væri að festa kaup á amk hluta af húsnæðinu sem Seðlaverið er í við Sundaborg, þangað sem kortadeildin flytur eftir nokkra mánuði. Kláruðum mest allt daglegt um tólf. Áttum bara eftir að framleiða dagleg debetkort fyrir einn banka þegar við fórum upp í mat. Vorum búnar að framleiða þann banka og ganga frá því sem fara átti í póst þegar hann var sóttur fyrir klukkan hálftvö. Pökkuðum og töldum og kláruðum svo það sem eftir var af dk-endurnýjun af þriðja banka af fjórum. Ætluðum svo að klára næstminnstu skrána úr síðasta bankanum, 37 kort, þegar vélin fór að vera leiðinleg. 8 kort í lagi en 29 ónýt og við hættum og gengum frá án þess að endurgera þessi ónýtu. Var með sjósundsdótið í skottinu en þegar ég kom að planinu við Nauthólsvík fannst mér of margir bílar á stæðinu. Veðrið var líka það gott að það væru allar líkur á að það væri fjöldi fólks að spóka sig í sjónum, lóninu og heita pottinum. Snéri því við og fór bara heim.

Föstudagur

Klukkan var rétt um sex í gærmorgun þegar ég vaknaði og fór á fætur. Um klukkustund síðar labbaði ég í vinnuna. Komst inn á framleiðsluvélina án þess að þurfa að skipta um lykilorð og í stað þess að logga mig út þegar við fórum í matar, kaffi og talningapásur þá slökkti ég á skjánum. Urðum að afhenda vélina eftir hádegi vegna tilraunaframleiðslu á nýjum kortum fyrir nýjan banka svo við komumst ekkert í endurnýjun í gær. Nóg annað var samt að sýsla og við höfðum t.d. engan tíma til að flokka kennispjöld. Fékk far heim úr vinnunni og var í engu stuði til að fara eitthvað út aftur. Bíllinn var líka í svo góðu stæði fyrir framan húsið. Er annars búin að lesa tæplega helminginn af skammtímalánsbókinni af safninu. 

Tveir vinnudagar í viðbót

Þrátt fyrir að veðrið væri tilvalið til göngu í gærmorgun ákvað ég að fara á bílnum í vinnuna og tók sunddótið með mér. Ég var á ítroðsluendanum en það var smá basl að koma framleiðsluvélinni í gang. Þurfti að taka hana niður og endurræsa þrisvar sinnum áður en hægt var að hefja framleiðslu. Fyrsti daglegi skammtur var þó tilbúinn rétt rúmlega níu. Byrjuðum á einni tegund í næstu framleiðslu áður en sú sem var í bókhaldinu útbjó fyrstu tölur og talningu. Töldum áður en við fórum í kaffi. Næstu framleiðslu lauk um það bil sem þriðja og síðasta framleiðslan, hádegisskammturinn, skilaði sér til okkar. Daglegri framleiðslu lauk korter yfir tólf. Eftir hádegi kláruðum við að pakka og telja áður en við snérum okkur að endurnýjun. Endurnýjuðum 1000 kort. Hættum framleiðslu rétt fyrir hálffjögur og vorum búnar að taka saman og ganga frá rúmu korteri síðar. Ég átti svo að fá að halda áfram í fríi. Hafði samt eitthvað á tilfinningunni að ég væri ekki alveg laus. Dreif mig í sundhöllina og í klefanum þar vatt sér að mér 3-4 ára stúlkubarn sem sagði að ég væri voða flott kona. Fór beinustu leið í kalda pottinn og ætlaði svo upp í innilaug. Þar var mikið fjör á stóra stökkbrettinu svo ég fór í heitasta pottinn, annan af elstu pottunum, í nokkrar mínútur. Allt var orðið rólegt í innilauginni eftir pottferðina svo ég fór á braut 1 og synti í korter áður en ég fór aftur í kalda pottinn. Var komin heim um hálfsex. Þá biðu mín skilaboð frá yfirmanni að sú sem var í fríi síðustu vikuna væri komin með covid-19 og var ég spurð hvort ég gæti unnið fram að helgi. Ég samþykkti það og ætti svo að fá að halda áfram með fríið til og með 25. júlí.

Síðasti útkallsdagur

Vaknaði um sex. Sá til þess að vekjarinn myndi ekki hringja á sínum tíma og fór á fætur. Eftir morgunverkin á baðherberginu settist ég niður í stofu með fartölvuna í fanginu og vafraði um á netinu þar til kominn var tími til að labba af stað í vinnuna. Vorum bara tvær í vinnu í gær. Það fyrsta sem ég tók eftir þegar ég mætti til að prenta út fyrstu framleiðslutölur var að ein skráin var á núlli. Sendi póst til að kanna málið og þegar leið á morguninn kom í ljós að um bilun hafði verið að ræða. Skráin kom til okkar um tíu. Á meðan unnum við í hinni daglegu skránni. Ég var á móttökuendanum og í bókhaldinu. Það sem venjulega er tilbúið til afhendingar kláraðist um hálftólf. Vorum til klukkan hálfeitt að klára allt daglegt. Eftir hádegi urðum við að afhenda framleiðsluvélina. Við töldum, pökkuðum og gengum frá og ákváðum svo að stinga af um þrjú. Ég fékk far heim úr vinnunni og fór ekkert út aftur. Aðeins niður í þvottahús að sækja þvott af snúrunum. Er byrjuð að lesa skammtímalánsbókina sem er yfir fimmhundruðogtuttugu blaðsíður. Er búin með fyrstu 140 blaðsíðurnar. 

Þriðjudagur

Sem oftast áður vaknaði ég nokkru áður en vekjaraklukkan átti að ýta við mér. Slökkti á henni og fór á fætur. Eftir morgunverkin á baðherberginu vafraði ég um á netinu þar til kominn var tími til að labba í vinnuna. Ég var á ítroðsluendanum með lánsmanneskjuna með mér á móttökuendanum. Daglegri framleiðslu lauk um hálfeitt. Eftir hádegi héldum við áfram endurnýjun til klukkan að verða hálffjögur. Sú sem var í bókhaldinu hélt áfram að flokka kennispjöld þegar bókhalds og pökkunarvinnu var lokið. Hún bauð mér far heim eftir vinnu sem ég þáði. Stoppaði heima í tæpa klukkustund en þá tók ég bókasafnspokann og sunddótið með mér. Fór fyrst á safnið og skilaði fjórum bókum. Fann sex aðrar, sem samtals eru yfir tvöþúsundogfjögurhundruð blaðsíður. Hélt að þær væru allar á 30 daga skilafresti því ég fór ekkert í rekkann með nýjustu bókunum. Samt var eina af þessum sex ný og með 14 daga skilafresti. Bók sem er yfir 500 blaðsíður. Af safninu fór ég í Sundhöllina. Settist fyrst í kalda pottinn rétt fyrir hálfsex. Fór svo á braut 1 í innilauginni og synti 300 metra áður en ég fór beint í þann kalda aftur. Svo smá stund í gufu og uþb tvær mínútur á bekk úti áður en ég fór upp úr og heim aftur. 

Mánudagur

Ég var komin á fætur um hálfátta í gærmorgun. Vafraði um á netinu í rúman klukkutíma. Rétt áður en ég skutlaðist með Davíð Stein upp á N1 við Gagnveg setti ég uppþvottavélina í gang. Eftir skutlið ákvað ég að fara í sund í Grafarvogslaug. Synti í um 15 mínútur, fór þrisvar sinnum í kalda pottinn, einu sinni í heitan pott og einu sinni í gufu. Var komin heim aftur um ellefu leytið. Uppþvottavélin var búin. Tók til nokkrar óhreinar flíkur og fór með niður í þvottahús. Rúmum tveimur tímum síðar fór ég aftur niður og hengdi upp úr vélinni. Annars er mest lítið að frétta. Er búin að lesa allar bækur sem ég er með af safninu en bókasafnið er lokað á sunnudögum í sumar. Þá kemur sér vel að eiga ólesnar "jóla/afmælisgjafa" bækur. 

Síðasti sunnudagur júnímánaðar

Vaknaði rétt fyrir klukkan hálfsjö í gærmorgun. Dreif mig á fætur og gaf mér tíma til að vafra um á netinu og setja inn færslu á þessum vettvangi. Davíð Steinn kom fram rúmlega sjö. Ég skutlaði honum upp á Gagnveg og þáði kaffibolla í staðinn. Kom við hjá AO við Sprengisand og fyllti á tankinn. Ég er skráð með ferðavikur núna en það er meiri afsláttur á ódýrustu stöðunum heldur en á öllum hinum þrátt fyrir afslátt á hinum en ekki á þeim ódýrustu. Næst lá leiðin í Sundhöllina. Lagði á stæði við Austurbæjarskóla líkt og ég geri oftast. Var komin í kalda pottinn rúmlega átta tuttugu og rétt fyrir hálfníu fór ég á braut eitt í innilauginni. 48 mínútum síðar var ég búin að synda 1000 metra, 40x25 og langflestar ferðirnar á bakinu. Synti 6x25 skriðsund og 4x25 bakskriðsund og allar hinar baksund. Semsagt engin bringusundsferð. Settist svo aðeins út í heitasta pottinn áður en ég fór aftur í þann kalda og svo gufuna. Eftir gufuferðina fór ég í útisturtuna og eina enn ferð í þann kalda. Settist svo smá stund á bekk áður en ég fór inn að þvo á mér hárið. Eftir sundið fór ég á þvottastöðina við Fiskislóð og keypti eina ferð fyrir bílinn. Að lokum kom ég við í Krónunni þar skammt frá og verslaði smávegis inn. Kom heim aftur upp úr klukkan ellefu. Gekk frá vörunum og fitjaði svo upp á nýrri tusku með drekamynstri. 

Á skutlvaktinni

Notaði bílinn til að komast í vinnuna í gærmorgun og hafði sjósundsdótið með mér í skottinu. Ég var í bókhaldinu en um hálftíu þurfti lánsmanneskjan að skreppa aðeins frá svo eftir morgunkaffi og fram að hádegi fór ég á móttökuendann á vélinni. Þegar allt daglegt var búið sáum við til þess að allur póstur væri tilbúinn til afgreiðslu úr húsi áður en við fórum í mat. Lánsmanneskjan var komin aftur þegar við fórum inn eftir mat. Hún og hin fóru því inn á vél að vinna í endurnýjun en ég pakkaði dk-daglegu kortunum í útibú og undirbjó talningu fyrir seinni tvo skápana, hinir tveir voru taldir eftir fyrstu framleiðslu dagsins. Þegar daglegum verkum bókarans var lokið, talningu og frágangi, fór ég að flokka kennispjöld. Hafði aðeins komist í það um morguninn og allt í allt flokkaði ég úr tveimur kössum, rúmlega þúsund spjöld og þá eru aðeins 14 kassar af óflokkuðum kössum eftir. Hættum vinnu og vorum búnar að ganga frá rétt fyrir klukkan hálffjögur. Þá fór ég beinustu leið í Nauthólsvík. Það var flóð ég synti og svamlaði út að kaðli og var í 11°C sjónum í uþb tuttugu mínútur.  Kom heim stuttu fyrir fimm. 

Vaknað á undan vekjaraklukkunni

Ég var komin á fætur korter yfir sex í gærmorgun. Eftir morgunverkin á baðherberginu settist ég niður í stofusófa með fartölvuna í fanginu og vafraði um á netinu. Um sjö labbaði ég af stað í vinnuna og fór yfir Skólavörðuholtið. Ég vann á ítroðsluendanum á vélinni og með lánsmanneskjuna með mér á hinum endanum. Kláruðum allt daglegt rétt rúmlega tólf og eftir hádegi framleiddum við yfir tólfhundruð kort í endurnýjuninni sem byrjað var á í gær. Fékk far heim úr vinnunni en fór ekkert út aftur. 

Fimmtudagur

Ég var vöknuð áður en vekjarinn átti að hringja og slökkti bara á honum. Hafði ágætan tíma til að vafra aðeins um á netinu áður en ég fór á bílnum í vinnuna. Var mætt fyrst á vinnusvæðið mitt og sú sem átti líka að mæta hafði samband rétt fyrir átta, föst í smá morgunumferðarsultu. Yfirmaður okkar mætti svo líka á svæðið og var inni á vél með hinni til rúmlega tíu en þá fengum við lánaða manneskju úr seðlaverinu sem ætlar að vera með okkur næstu vikuna. Ég var í bókhaldinu og fékk að leysa þar úr ýmsum flækjum. Yfirmaðurinn fór um hádegi. Hinar tvær kláruðu daglega framleiðslu fyrir tvö og unnu svo að endurnýjun til klukkan að verða hálffjögur. Ég sá um að pakka eða ganga frá daglegu debetkortunum í póst. Eftir vinnu fór ég beinustu leið í Sundhöllina. Fór tvisvar í kalda pottinn og synti 300 metra. Kom heim upp úr klukkan fimm. 

Frestun á fríi

Þegar ég kom á fætur rétt upp úr klukkan átta í gærmorgun voru allir heimilisfastir farnir nema hundarnir Vargur og Cara sem voru niðri í kjallara. Ingvi og Aron farnir í vinnuna og Helga og Hulda inn á Akureyri að sinna nauðsynlegum erindum. Ég hellti mér upp á kaffi, vafraði um á netinu, las og prjónaði. Mæðgurnar komu heim um ellefu. Rétt rúmum klukkutíma síðar kvöddum við Oddur eftir að hafa fermt bílinn. Oddur sá um aksturinn. Mágur minn hafði skráð bílnúmerið hjá sér þannig að við gátum keyrt í gegnum Vaðlaheiðargöngin án þess að spá nokkuð í það. Stoppuðum við AO við Baldursnes og fylltum á tankinn. Svo héldum við áfram suður á bóginn. Þegar við nálguðumst Blöndós vorum við búin að ákveða að það væri fínt að halda áfram og stoppa í Staðarskála. Þangað vorum við komin korter fyrir fjögur. Notuðum salernin fyrst en fengum okkur svo rétt dagsins. Vorum ekki lengi að borða og stoppið var uþb hálftími. Við vorum samt ekki komin mjög langt áfram áleiðis heim þegar við þurftum að stoppa í bílaröð og bíða í einn og hálfan tíma þar sem hafði orðið óhapp og hjólhýsi þveraði veginn. Sjúkrabíll kom fyrstu á svæðið, svo tækjabíll frá slökkviliðinu og að lokum lögreglu bíll. Einhverjir í röðinni okkar meginn snéru við en flestir biðu rólegir. Klukkan var langt gengin sex þegar við gátum haldið för áfram og vorum komin heim um átta. Fengum stæði fyrir framan hús og komumst inn með flest allt úr bílnum í einni ferð. Oddur skildi tjaldið sitt eftir og ég sunddótið.

En ástæðan fyrir því að yfirmaður minn hafði samband við mig í fyrradag er sú að ein þeirra sem á ekki að fara í frí fyrr en ég er komin úr fríi þurfti að fara í bráðaaugnaðgerð og má ekki mæta í vinnu næstu tvær vikurnar. Og tvær af hinum þremur eru með skipulagt frí næstu daga svo þá var aðeins orðin ein eftir á vaktinni. Ég er hvort sem er ekki með allt fast planað svo ég sagðist geta frestað fríinu mínu í bili.

Sundferð á Laugar

Rumskaði rétt fyrir sjö þegar mágur minn og systir mín voru að gefa hundunum og fá sér ketókaffi skammtinn. Ég sofnaði aftur en svaf bara í rúma klukkustund. Þá var Ingvi farinn í vinnuna, hundarnir aftur niður og systir mín búin að leggja sig aftur. Fljótlega komst þó hreyfing á hluta af mannskapnum. Vinkonan sem á hundana Ösku og Þrumu kom fram um hálfníu, hellti upp á, nettengdi sig og fjarvann í rúma klukkustund. Önnur vinkona og maður hennar sem voru í hjólhýsi komu inn að fá sér smá kaffi. Vinkonurnar þrjár (systir mín í hópnum) skruppu svo aðeins inn á Akureyri. "Norska" fjölskyldan var þá byrjuð að pakka og fékk sér einnig hressingu. Þau kvöddu um hálftólf, klukkutíma áður en vinkonurnar skiluðu sér frá Akureyri. Um hálftvö voru allir gestir farnir nema við Oddur Smári. Við ákváðum að skreppa í sund inn á Laugar en það eru rétt tæpir 24km þangað frá Árlandi. Ekki fékkst nógu stór skýla á Odd en hann fór í sturtu og beið svo bara rólegur eftir mér. Tveir voru í öðrum heita pottinum þegar ég kom og skellti mér beinustu leið í 4°C kalda pottinn. Hinir fóru upp úr fljótlega en ég synti í 20 mínútur, fór tvær aðrar ferðir í kalda pottinn og eina í heitasta áður en ég fór inn og þvoði á mér hárið. Bauð Oddi upp á snarl í Dalakofanum og svo skruppum við örstutt til Húsavíkur í bakaleiðinni. Vorum þá búin að taka nokkurs konar hring þegar við komum aftur á Árland. Á áttunda tímanum fékk ég facebook skilaboð frá fyrirliðanum úr vinnunni um að næsti yfirmaður okkar væri búin að vera að reyna að ná í mig. Ég hafði ekkert orðið vör við símhringingarnar en hringdi til baka um leið og ég fékk skilaboðin. Meira um það mál á morgun.

Enn í norðlensku sveitinni

Fór á fætur um átta. Aðeins einn átta ára gutti var kominn fram. Ég hellti samt upp á fulla könnu af kaffi ef ske kynni að einhver kaffiþyrstur kæmi fram eða inn fljótlega. Setti kaffið á brúsa og settist inn í stofu með einn bolla. Drakk einn sopa og lagði bollann frá mér í gluggakistuna. Ræsti tölvuna, vafraði aðeins um á netinu og ætlaði svo að taka annan sopa af kaffinu. Þá var drukknuð fluga fljótandi í því. Setti inn eina færslu áður en ég fór inn í eldhús og hellti niður kaffinu, skolaði bollann og fékk mér nýtt. Engin hreyfing var á fólki langt fram eftir morgni. Varð þó vör við að hluti af þeim sem voru í tjaldvögnum eða fellihýsum kæmi aðeins út á blett, sumir til að fá sér "ferskt" loft en hurfu svo aftur inn í sínar vistarverur. Um ellefu var samt allt komið á fullt inni við að undirbúa morgunhádegisverð, egg, beikon og lummuklattar. Rétt upp úr hádeginu kvöddu pabbi, Davíð Steinn, Bríet og Arnar vinur hennar og lögðu af stað suður. Þau lentu í smá ævintýrum á leiðinni og þurftu m.a. að keyra Hvalfjörðinn vegna umferðaróhapps við eða í göngunum. Fleira fólk týndist af svæðinu en það voru ekki allir að fara, sumir skruppu í sund inn á Laugar eða á Akureyri en hluti af því fólki kom aftur. Ég ákvað að vera hundahirðir og taka því rólega. Var að lesa og prjóna megnið af tímanum. 

Leikir og fjör

Dagurinn byrjaði mjög snemma hjá mér. Sex svangir hundar í kjallaranum, fjórir þeirra fylgdu tveimur af gestunum, létu vita að þeir væru svangir og vildu komast út að pissa eitthvað á sjöunda tímanum. Þar að auki var átta ára drengur, nýkominn frá Noregi vaknaður, kominn upp í eldhús og byrjaður að horfa á eitthvað í IPadinum sínum án þess að vera með eitthvað á eyrunum. Kannski var það líka það sem gerði hundana frekar ákveðna um að hætta ekki að væla fyrr en einhver sinnti þeim. Mágur minn tók að sér að sinna hundunum fljótlega, fyrir klukkan sjö held ég örugglega. Ég þurfti hvort sem er að sinna morgun verkunum á baðherberginu og fór á fætur um hálfátta. Annars var fólk að koma á fætur á mismunandi tímum alveg fram að hádegi. Það var svolítið rok en hætt að ringa og þegar leið á daginn reif hann af sér og sólin braust fram. Um þrjú söfnuðust flestir saman á flötinni við húsið. Sú sem bjó til viðburðinn; Árlandsleikar 2022 tók að sér að skipta í fjögur lið og stýra leikjunum. Það náðist í fjögur 4-5 manna lið og keppt var í fimm greinum. Það var mikið fjör og mikið gaman og allir stóðu sig vel. Sú sem stjórnaði sagðist svo þurfa nokkra tíma til að reikna út stig til að finna út hvaða lið hefði unnið. Svo var grafin hola og grilluð nokkur læri sem höfðu verið í marineringu í álpappír frá því kvöldið áður. Með þessu var boðið upp á kartöflulallat, sallat, pikknikk kartöflur og kalda bernessósu. Svo var stuð langt fram á nótt, úti og inni. Ég fór að sofa um eitt en ég veit ekkert hve lengi partýið stóð.

Hundastóð

Það var komin rigning þegar ég fór á fætur um hálfníu í gærmorgun. Eldsnemma voru heimalingar, ungur strákur og hundarnir fjórir að heimta athygli. Einhverjir af tjaldbúunum höfðu flúið inn. Aðrir sváfu á sínu græna þrátt fyrir bleytu. Tjöld sona minna stóðust þó öll próf og þeir sváfu fram eftir morgni. Ég var búin að kveikja á tölvunni um níu og viðmótið mundi eftir innskráningunni á heimanetið í sveitinni frá því í fyrra. Mágur minn færði mér kaffibolla inn í stofu og ég vafraði um á netinu í tæpa klukkustund. Átti svo eftir að logga mig inn aftur í um hálftíma seinni part dags. Synir mínir og eldri systurdóttir skruppu á mínum bíl inn á Akureyri, Davíð Steinn til að hitta vinnufélaga og kíkja á bíladaga. Vinnufélaginn skutlaði honum í sveitina aftur um miðjan dag. Yngri systurdóttir mín og vinur hennar fengu lánaðan sér bíl og fóru líka inn á Akureyri. Um miðjan dag fóru sjö gestanna á tveimur bílum í Skógarböðin við Akureyri og létu vel af þegar þau komu til baka. Ein úr hópnum sagðist þó ekki þurfa að fara þangað aftur. Og svo bættist við og ræktendur Vargs og vinafólk systir minnar og mágs komu með fellihýsi og fjóra hunda, m.a. hundamömmuna. Þegar allir sem skruppu frá voru komnir aftur til baka voru grillaðar risapylsur sem Bríet hafði búið til í SS frá grunni og komið með. Pylsurnar voru svo skornar niður í pylsubrauðastærð og var meira en nóg til handa öllum sem vildu. Ég opnaði hvítvínsbeljuna mína og varð svo að koma henni fyrir í ísskápnum niðri. Hluti af tjaldbúunum fengu að búa um sig inni í húsi, uppi í risi eða niðri í kjallara og ró komst á allt upp úr miðnætti. 

Árlandsleikar

Sundáformin í gærmorgun runnu út í sandinn en um hádegisbilið ákvað ég að skreppa í Eins og fætur toga og kaupa mér nýja strigaskó. Greip í tómt í Kópavoginum en síðan ég var þarna síðast á ferðinni er fyrirtækið alfarið flutt upp á Höfða. Ég fór því þangað en keyrði í leiðinni alls konar krókaleiðir um Kópavog. Fékk skóna, aðeins aðra tegund þó. Átti að fá að velja mér lit en þegar til kom var fjólublár ekki til í minni stærð. Sætti mig við svarta í staðinn og keypti einnig fjögur pör af sokkum. Á leiðinni heim aftur kom ég við í vínbúð og keypti mér einn kassa af hvítvínsbelju. Uppþvottavélin var á fullu þegar ég kom heim og á meðan ég beið eftir því að hún lyki sínu starfi pakkaði ég niður því helsta, m.a. fartölvunni. Upp úr klukkan hálfþrjú vorum við mæðginin búin að ferma bílinn. Davíð Steinn fékk okkur til að koma við í Rúmfatalagernum þar sem hann keypti tvær dýnur. Oddur Smári keypti eitthvað að drekka í Hagkaup handa þeim bræðrum. Næsta stopp var á AO stöðinni við Borgarnes þar sem ég fyllti á tankinn. Ferðavikurnar mínar eru byrjaðar að tikka inn. Ekki þurfti að setja nema 22 lítra á og við hefðum örugglega komist til Akureyrar á því sem fyrir var á tanknum. Hefði líklega verið ódýrarar að nota frekar stöðina í Baldursnesi. Oddur var búinn að fá sér orkudrykk og var eiginlega mál að skila honum. Við keyrðum samt alla leið að Staðarskála áður en við stoppuðum aftur. Þar notaði Davíð Steinn N1 afsláttinn sinn og bauð okkur að borða um hálfsjö. Og þar drakk ég fyrsta og eina kaffibolla dagsins. Stoppuðum ekkert aftur fyrr en við komum í sveitina til systur minnar og mágs. Fórum skarðið en ekki göngin því við vissum ekki að Ingvi væri búinn að skrá bílnúmerið mitt inn í kerfið hjá sér. Klukkan var alveg að verða tíu þegar við mættum á svæðið. Tvö tjöld voru þegar risin upp, strákarnir settu upp sín á milli þeirra og það áttu eftir að rísa þrjú tjöld í viðbót. Pabbi og Bríet komu rétt fyrir miðnætti. Bríet fékk lánaðan annan bílinn hjá foreldrum sínum til að sækja vin sinn inn á Akureyrir. Hann kom þangað með strætó út bænum. Sá er ekki með síma svo þau höfðu enga leið til að ná í hann og bjóða honum að sitja í með sér. Ég velti því fyrir mér hvort það væri öruggt að vinurinn væri að koma, en þau komu tvö til baka og hann var með tjald sem þurfti ekki mörg handtök við að tjalda. Hef hitt þennan strák áður, skemmtilegur fýr. Það var sett upp rúm með sæng og allt fyrir mig í stofunni, stærsta herberginu og pabbi fékk herbergið hennar Bríetar/Brynju (vinkonu systur minnar og mágs).