Sofið út á sunnudegi

Fann aðra bók eftir Guðrúnu Evu Mínervudóttur, YOSOY í fórum mínum í gær og er að sjálfsögðu byrjuð að glugga í hana. Markmiðið er að geta skráð lágmark 30 mínútur lestur á dag á svæðið mitt hjá allirlesa.is. Reyndar les ég sjaldnast styttra en þrjú korter eða klukkutíma í einu þegar ég tek mig til og gríp bók í hönd en svo skrái ég líka tíma sem ég er að glugga í blöðin og ég er fljótari að afgreiða þau.

Hringdi í Ellu vinkonu upp úr hádegi í gær. Hún heyrði ekki í símanum akkúrat þá en hringdi til baka seinni partinn og við spjölluðum í dágóða stund. Spurði hana m.a. út í soninn sem er í verkfræðinámi úti í Hollandi. Sonur sjósundsvinkonu minnar er í sama námi, ári á undan Einari Bjarna. Sá ungi maður og kærasta hans komu heim rétt fyrir miðjan mars og stunda fjarnám héðan. Unga manninum úti líður ágætlega. Þau eru örfá á vistinni, skólinn sjálfur er lokaður. Hann hafði hugsað sér að vera úti í sumar, skrapp heim um jólin, á eftir allan næsta vetur til að ljúka þessu námi. Nú er verkfræðistofan, sem hann hefur unnið hjá sl. sumur og allt árið þar til hann hóf þetta nám, búin að hafa samband við hann nokkrum sinnum og athugað hvort hann vilji ekki koma í vinnu hjá þeim í sumar.

Morgunbusl í sjónum

Í gærmorgun notaði ég bílinn til að koma mér í vinnuna og hafði í leiðinni með mér tómt box svo ég gæti komið við í Fiskbúð Fúsa á leiðinni heim. Hætti vinnu upp úr tvö og kom með rúmt kíló af ýsu og einn poka af harðfisk, óbarinni ýsu með mér heim. Vatt mér beint í að hella upp á könnuna og hrærði í vöffludeig í leiðinni. N1 sonurinn var að vinna svo ég bjó aðeins til 5 vöfflur og geymi svo afganginn af vöfflusoppunni til helgarinnar.

Var vöknuð klukkan sex í morgun. Gerði heiðarlega tilraun til að sofna aftur en það endaði með því að ég dreif mig á fætur, þó tveimur tímum seinna. Útbjó mér hafragraut um níu og þremur korterum síðar gerði ég mig klára fyrir sjósund. Var sótt á slaginu 10. Það var fjara og smá öldugangur í Nauthólsvík og við ætluðum aðeins að vera útí í 3-5 mínútur. Það var hins vegar svo gott og skemmtilegt buslið í sjónum að við gleymdum næstum því að fylgjast með tímanum. Vorum aðeins lengur en til stóð en ekkert svo mörgum mínútum lengur. Rétt áður en við fórum upp úr komu tveir hlauparar á svæðið, vippuðu sér úr hlaupafötunum, gerður nokkrar armbeygjur í fjörunni og skelltu sér smá stund út í sjó.

Er búin að lesa Síðasti hlekkurinn en er ekki búin að velja mér næstu bók. Hlýt að finna mér einhverja í dag. Sjáum til með það. Næsta mál á dagskrá er að hella mér upp á kaffi og fá mér fyrsta bolla dagsins.

Einn vinnudagur eftir í þessari viku

Labbaði af stað í vinnu kl. 6:57 í morgun og fór aðra leið heldur en í gær eða fyrradag. Eitthvað virðist ég hafa hikað á leiðinni því síminn skráði sjálfvirkt á mig tvo göngutúra. Þann fyrri frá kl. 18 mínútur og 1,36km en þann seinni frá klukkan 7:16 í 20 mínútur og 1,6km. Man ekki til að hafa stoppað neitt en ég labbaði Lönguhlíð að Miklubraut, undir göngin við ljósin, í gegnum Klambratúnið, Flókagötu að Gunnarsbraut þar sem ég beygði til hægri og labbaði að Njálsgötu. Labbaði stuttan spöl af Snorrabraut, hluta af Laugaveginum, smá hluta af Hverfisgötu og síðasta spölinn að Kalkofnsvegi labbaði ég Skúlagötu. Sá sjávarútvegsráðherra mæta í vinnu rétt upp úr klukkan hálfátta. Annars var ég í bókhaldinu í dag og fyrir utan að skrá niður framleiðslutölur og ónýt kort kom m.a. beiðni um að útbúa A-Hraðbankalykil og 2 PUK-bréf. Lagði af stað heim kl. 14:30 og var 37 mínútur að labba 2,87 km, beint yfir Skólavörðuholtið, undir tvær brýr og kom upp við byrjun Eskihlíðar. Skipti um bol, þvoði mér um hendur og hellti upp á kaffi og drakk einn bolla áður en ég bjallaði í pabba.

Frú Vigdís Finnbogadóttir níræð í dag

Fékk hláturskast þegar ég renndi yfir texta gærdagsins og sá meinlega villu sem ég er búin að laga núna. Í gærkvöldi var ég komin upp í rúm upp úr klukkan hálftíu og ca þremur korterum seinna lagði ég frá mér bókina sem ég er að lesa, slökkti ljósið, bað bænirnar mínar og svo steinsofnaði ég.

Vaknaði í morgun örstuttu áður en vekjarinn átti að fara af stað eða fyrir klukkan hálfsjö. Lagði gangandi af stað í vinnuna kl. 6:54 og 43 mínútum og 3,4 km síðar var ég komin á leiðarenda. Já, ég fór aðeins lengri leið heldur en í gær. Ætlaði eiginlega að rekja mig eftir leiðinni sem ég kom seinni partinn í gær en endaði á því að labba meðfram "nýju Hringbraut" alveg að brúnni neðan við Háskólann. Fór yfir þá brú og labbaði í gegnum Hljómskálagarðinn, meðfram tjörninni, Lækjargötu og að Kalkofnsvegi. Daglegri framleiðslu lauk fyrir klukkan tólf. Eftir hádegi ryksuguðum við framleiðsluvélina, sinntum bókhaldi og talningu, tókum á móti smá plastbirgðum og merktum 2 tegundir. Nýja vélin kom í mörgum pörtum og misstórum kössum upp úr klukkan eitt. Sumir kassarnir voru það stórir að kalla þurfti manninn sem sinnir viðhaldi á vegum OBA til að hjálpa til við að taka utan af stærstu kössunum til að koma öllum hlutum inn. Vélin verður ekki sett saman alveg í bráð því það þarf líka að vera með sérfræðingur utan úr heimi þaðan sem vélin er framleidd.

Klukkan korter yfir tvö ákvað ég að ég væri búin að skila mínu vinnuframlagi í dag. Hafði hugsað mér að labba aðra leið heim, búa til nokkurs konar hring, en áður en ég vissi af var ég farin að þræða svipaða leið til baka og ég kom úr í morgun. Á leiðinni mætti ég konu sem ég hitti stundum í sundi. Síminn skráði 3,52 km á 45 mínútum. Það fyrsta sem ég gerði eftir að ég var komin heim og búin að fara í þurran bol var að hella mér upp á kaffi. Svo hringdi ég í pabba sem er að byrja að vinna í því að ganga betur frá stóru skúrhurðinni sem hann setti í sl. haust.

Gengið í vinnuna

3 mánaða strætókortið, sem ég fjárfesti í í upphafi árs, rann úr gildi 5. apríl sl. og það stóð alltaf til að eftir þann tíma færi ég að labba í vinnuna. Eins og vinnutilhögun í minni deild er háttað væri heldur ekkert skynsamlegt að fjárfesta í nýju korti sem eiginlega nýtist aðeins aðra hverja viku. Klukkan 07:07 labbaði ég af stað í vinnuna í morgun. 37mínútum og 2,77km síðar var ég mætt og hafði sem betur fer hugsað fyrir því að hafa með mér þurran bol. B-hópurinn sem vann í dymbilvikunni kláraði það sem stóð útaf kreditendurnýjuninni og sendi af stað í póst og þær framleiddu líka mánaðarlega debetendurnýjun uþb 4000 kort á tveimur dögum. Sú af okkur í A-hópnum sem var í bókhaldinu keyrði lokakeyrsluna og sá til þess að senda megnið af þessum kort af stað í póst. Við hinar tvær sinntum því eingöngu daglegri framleiðslu og henni lauk rétt upp úr klukkan tólf. Eftir hádegi var lokið við að gera upp framleiðslu dagsins og telja þær tegundir á vagni sem voru notaðar í dag. Ég sá til þess að tæta niður uppsafnaða borða, svarta, gráa, rauða, hvíta og einn innfylliborða. Vinnudegi lauk í fyrrafallinu. Labbaði af stað heim kl. 14:34 og 41 mínútum og 2,93km síðar var ég komin heim. Þvoði mér um hendurnar, skipti um bol og hellti mér upp á 3 bolla af kaffi.

"Ekki leikur veröldin eins við alla"

Um það leiti sem Davíð Steinn var að byrja að undirbúa kvöldmatinn í gær, upp úr klukkan þrjú, dreif ég mig út í gönguferð. Skv. forriti í símanum mínum hóf ég gönguna kl. 15:24 og 68 mín og 5,38km síðar var ég búin að ganga réttsælis í kringum Öskjuhlíðina og komin heim aftur kl. 16:32. Þetta var 0.04km lengra en fimm mínútum hraðar heldur en þegar ég labbaði rangsælis í kringum Öskjuhlíðina sl miðvikudag. Vel gert og klapp á bakið mitt. Kvöldmaturinn var tilbúinn um hálfsex, ofnsteikt purusteik, með steiktum kartöflum, piparsósu, sallati og grænum baunum. Virkilega gott. Ég tók að mér að ganga frá á eftir og var búin að því áður en kvöldfréttir á Stöð2 hófust.

Í morgun var ég vöknuð fyrir klukkan átta og mín biðu skilaboð frá sjósundsvinkonu minni sem ég svaraði. Bjó mér til hafragraut á tíunda tímanum og stuttu fyrir ellefu var ég tilbúin, íklædd sundbol innanundir joggingfötum af mömmu, fjólubláu úlpunni, hárið í teygju undir sundhettu og ullarhúfu og í sjósundssokkum og strandskónum sem ég keypti á Spáni 2016. Var með sokka, gönguskó, sjósundsvettlinga og handklæði með mér í poka. Vinkona mín pikkaði mig upp um ellefu og við fórum beint í Nauthólsvík. Hún lánaði mér stærðar "yfirtökuflík", var sjálf í einni utan yfir sinn sjósundsklæðnað. Ég klæddi mig úr úlpu og joggingfötunum og í yfirtökuflíkina áður en við yfirgáfum bílinn og röltum með handklæðin og vettlingana í poka niður að staðnum þar sem við förum yfirleitt út í sjó við Nauthólsvík. Þar fyrir hittum við eina konu sem var að koma upp úr. Sú skrapp út í aftur í eina mínútu. Við hinar tvær svömluðum um og spjölluðum í um 9 mínútur. Vá, hvað þetta var gott. Ég verð að viðurkenna að ég var pínu smeik um að vera dottin úr einhverri æfingu þar sem það er mánuður síðan ég fór síðast í sjóinn. En heldur betur ekki. Vinkona mín skutlaði mér svo beint heim aftur og við sammæltumst um að vera í bandi n.k. laugardagsmorgun og fæ ég að hafa yfirtökuflíkina lánaða amk þar til opnað verður aftur fyrir aðstöðuna eftir samkomubann, hvenær sem það verður. Þegar heim kom dreif ég mig í sturtu og skolaði svo vel úr sjósundsbúnaðinum.

Bókin sem ég er að lesa núna er Síðasti hlekkurinn eftir Fredrik T Olsson. Var byrjuð á þessari bók fyrir einhverju síðan og ákvað að byrjað aftur frá byrjun. Er búin með fyrsta hlutann af fjórum og er mest hissa á að ég hafi ekki verið búin að ljúka við að lesa þessa bók fyrir löngu síðan, hún er það spennandi.

Páskadagur

Það eru dæmalaust skrýtnir tímar í gangi og hafa verið í nokkrar vikur. Allur heimurinn er undir og enginn veit nákvæmlega hvernig málin þróast. Ástandið bitnar á öllum en eitt af því sem getur og mun hjálpa er að skilja að við erum öll í þessu saman og það borgar sig að róa í sömu áttina amk í því landi sem við búum. Faraldurinn sem geisar mun kannski ekki ná okkur öllum og þá geta þeir sem ekki veikjast eða þekkja engan í þeim hópi eða framlínunni átt bágt með að taka þátt í þessum hamlandi verkefnum lon og don. Vonandi skilja þó flestir, helst allir, alvarleika þess að hlýða ekki Víði. Mikið sem ég er ánægð með þrenninguna, hversu samstíga þau eru, þolinmóð og óþreytandi við að upplýsa okkur hin. Það er mikið öryggi í því. Ég hef alveg sloppið við að rekast á veiruna. Það munaði líklega ekki miklu að þessi vágestur næði á vinnustöðvar strákanna minna en þeir hafa amk ekki veikst og eru duglegir að virða fjarlægðarmörk og benda kúnnum á að gera slíkt hið sama. Helgina fyrir afmælið mitt, um miðjan mars, var vinnuhópnum mínum skipt upp í A og B og síðan höfum við ekki hist nema þá í netheimum. A hópurinn, minn hópur, tók fyrstu törnina vikuna 16.-20. mars. Þá viku vorum við aðeins tvær. Vikuna 30/3-3/4 vorum við orðnar þrjár eins og B hópurinn og við verðum á vaktinni 3 í næstu viku. Ekki er vitað hversu lengi þetta fyrirkomulag verður en þó reiknum við með að þetta breytist ekki fyrr en í fyrsta lagi eftir 4. maí. Þannig að ég er búin að reikna það út að A hópur vinnur 11 virka daga í apríl en B hópur 9. Eitt af því sem er mjög erfitt í þessu ástandi er að geta ekki hitt fólkið sitt. Veðurtíðin fram að samkomu- og fjarlægðartakmörkunum hjálpaði samt líklega til við að venja mig við þetta ástand. Apríl er alveg að verða hálfnaður og ég er aðeins búin að hitta pabba minn tvisvar sinnum á árinu. Heyri í honum daglega. Hann er rólegur, æðrulaus og mikill dundari, finnur sér alltaf eitthvað til að gera. En ég veit að blöðruhálskirtillinn er að plaga hann og tíminn sem hann átti í ómskoðun 18. mars sl. var frestað til 13. maí.

Oddur Smári er að vinna frá 7:30-14 þessa helgina. Hann kom heim rétt fyrir þrjú í gær. Það er ekki nema fimm mínútna gangur í vinnuna hans og hann stimplaði sig út klukkan 14 en dvaldist eitthvað á staðnum og tók nokkrar afgreiðslur aukalega. Ég var búin að skrifa innkaupamiða og fékk hann til að keyra mig í Krónuna við Granda. Hann beið úti í bíl á meðan. Margt var um manninn á staðnum en þó ekki svo að það þyrfti að bíða í röð úti. Verslunarferðin tók ekki svo langan tíma.  Davíð Steinn ætlar svo að sjá um að elda hátíðarmatinn í dag/kvöld.

Fuglasöngur eldsnemma

Ég skrapp í örlítið lengri gönguferð um miðjan dag í gær heldur en seinni partinn í fyrradag. Það var smá rigning og ég fór í bleiku regnkápuna. Labbaði Lönguhlíð að Stakkahlíð, þar beygði ég til hægri og  labbaði að Hamrahlíð. Beygði til vinstri og labbaði næstum því út að Kringlumýrarbraut áður en ég beygði til hægri og labbaði upp að göngustíg sem liggur rétt við Bústaðaveg. Þetta endaði amk með því að ég labbaði einhvers konar hring og ég kom inn í Drápuhlíð þar sem hún byrjar. Labbaði rúmlega 2km á ca hálftíma. Annað varðandi gærdaginn er eiginlega ekki í frásögur færandi nema ég bjó til kjötbollur úr 2x500gr hakkrúllum í kvöldmatinn. Fór ekki eftir neinni sérstakri uppskrift frekar en venjulega en var mjög ánægð með útkomuna. Synir mínir voru sammála um gæðin. Fór eiginlega alltof seint að sofa en var þó búin að slökkva á náttborðslampanum fyrir miðnætti. Vaknaði við fuglasöng um klukkan fimm og náði ekki að sofna aftur.

Sturta og hárþvottur

Rumskaði fyrst eitthvað um sex í morgun og fannst það heldur snemmt. Náði að sofna aftur og sofa í næstum því tvo tíma. Gaf mér góðan tíma til að átta mig á að það væri að hefjast nýr dagur. Hugsaði um allt og ekkert. Það er alveg ágætt að gera einhverjar áætlanir en það er líka allt í lagi að láta þetta bara ráðast. Rétt fyrir níu steig ég inn í sturtuklefann og var með sjampó og sápu með í för. Það er rétt rúm vika síðan ég þvoði hárið á mér síðast. Ég hefði reyndar alveg geta slegið þessum hárþvotti á frest í 2-3 daga í viðbót án þess að nokkru skaði hefði hlotist af en ég var í stuði til að sinna þessu svo ég vatt mér í málið.

Gönguferðin í fyrradag var þess valdandi að ég var örlítið stirð í gær en líklega hefði ég átt að hundskast til að teygja mig vel eftir að ég kom heim, sem ég gerði ekki. Ég fór samt aftur út í gær en mun styttri hring, innan við 1,5 km. Í gær hrærði ég líka í vöfflur sem Oddur Smári tók að sér að verka og Davíð Steinn sá um kvöldmatinn og útjó dýrindis máltíð úr þorskhnökkum sem ég tók út úr frysti í gærmorgun. Las annars alveg helling í gær enda er ég búin að skrá mig á "Tími til að lesa" til að hjálpa til við heimsmet í lestri.

Sjósundsvinkona mín hafði samband við mig á FB-spjallinu í gær. Hún hafði drifið sig í sjóinn við Nauthólsvík um ellefu í gærmorgun. Fór tvisvar ofan í því þegar hún kom upp úr eftir um 8 mínútur kom myndatökumaður frá Stöð2 og bað hana um leyfi til að taka mynd af henni að svamla í sjónum. Hún var útí í ca 3 mínútur og svo kom smá myndbrot á fréttunum á Stöð2 í gærkvöldi. Hún setti sjálf myndir á vegginn sinn sem maðurinn hennar tók en hann ók henni á milli. Hún sagðist búa svo vel að ég síðar útitökuúlpu sem hún klæddi sig í yfir sjósundsgallann bæði fyrir og eftir sund. Hún fór úr sjósundsskónum eftir svamlið, þurrkaði sér og klæddi sig í ullarsokka og gönguskó og svo fór hún í sturtu þegar hún kom heim til sín. Naglinn sem hún er. Hún byrjaði að stunda sjóinn í fyrrasumar og fann að þetta var að hjálpa henni með hnjá og liðerfiðleika í fótum, þ.e. hún fann mikinn mun til batnaðar. Nú er hún búin að finna leið til þess að skreppa í sjóinn þótt aðstaðan við Nauthólsvík sé lokuð vegna Covid-19.

Gönguferð

Einhvern veginn æxlaðist það þannig að ég fór ekkert út úr húsi frá því að ég kom heim úr vinnu og skreppitúr í tvær búðir á föstudagskvöldið og alveg þar til ég skrapp í rúmlega klukkutíma gönguferð rangsælis í kringum Öskjuhlíðina seinni partinn í dag, 5,3km. Ég er hins vegar búin að ljúka við að lesa allar bókasafns- og jólabækur. Þögn eftir Yrsu Sigurðardóttir, sem ég fékk frá systir minni og fjölskyldu, las ég næstum alla á mánudaginn nema síðustu 60 bls. kláraði ég í gærmorgun. Sem betur fer er ég með nokkrar aðrar ólesnar bækur í fórum mínum m.a; Skaparinn eftir Guðrúnu Evu Minervudóttur. En ég hef líka verið frekar dugleg að munda prjónana síðustu daga og þar að auki leyft mér að gleyma mér alveg við hámhorf á hinum ýmsu þáttum í boði Sjónvarps Símans Premium. Synir mínir skruppu í Sorpuferð í dag, fóru báðir, því þeir voru báðir eitthvað að uppfæratölvurnar sínar rétt fyrir helgi og því fylgdi slatti af umbúðum sem var ágætt að losna við.

Snjór

Ég ferðaðist innanhús í gær. Davíð Steinn var sá eini af okkur sem fór út á milli hálfellefu og hálfsex en hann stóð vaktina á plani N1 við Stórahjalla frá klukkan ellefu til fimm. Oddur Smári hafði horft á marga þætti af Criminal Minds langt frameftir aðfaranótt gærdagsins. Hann rumskaði einhvern tímann eftir hádegi en var svo sem ekkert mikið á ferðinni. Ég var glaðvöknuð mjög snemma í gærmorgun og var klædd og komin á ról stundu síðar áður en klukkan náði að verða hálfátta. Eftir að hafa tannburstað mig og fengið mér matskeið af lýsi settist ég með prjónana mína inn í stofu. Er byrjuð á enn einu afgangasjalinu sem verður úr svörtu og grænum litum.  Lagði frá mér prjónana eftir uþb tíu mínútur, en ég greip til þeirra af og til í allan gærdag í 15-30 mínútur í hvert skipti. Las í síðustu ólesnu bókinni af safninu til klukkan að verða hálfníu en þá ákvað ég að gera mér ferð í þvottahúsið og stinga í eins og eina þvottavél. Þegar ég kom upp aftur skömmu síðar tók ég fram fartölvuna og sat með hana til klukkan að byrja að ganga ellefu. Ekkert löngu síðar skrapp ég aftur niður til að hengja upp þvottinn. Klukkan var byrjuð að ganga tólf þegar ég hellti loksins upp á könnuna og fékk mér hressingu. Kveikti á sjónvarpinu og stillti á útvarpsrás til að byrja með, amk framyfir hádegisfréttir. Hringdi í pabba, tvíburahálfsystur mína og Helgu systur. Sú síðastnefnda gat reyndar ekki tekið símann þegar ég hringdi en hún hringdi til baka um leið og hún var komin heim úr búðinni. Var með ofnbakaða bleikju með kartöfluskífum og rauðkáli í kvöldmatinn. Horfði á fréttir og fleira en slökkti á sjónvarpinu um hálftíu og háttaði upp í rúm með bók. Las í rúman hálftíma en svei mér þá ef ég var ekki sofnuð löngu áður en klukkan varð hálfellefu. Ég rumskaði upp úr klukkan sex í morgun en náði að steinsofna aftur og það var ekki fyrr en klukkan var langt gengin í níu að ég náði að vakna almennilega. Var að dreyma eitthvað í millitíðinni en það eina sem ég man frá því að ég var með einhverri persónu á veitingastað að reyna að lesa matseðilinn og ákveða mig.

Strætókortið alveg að renna úr gildi

Ég var mætt í vinnu rétt upp úr klukkan hálfátta í gærmorgun. Þegar við vorum mættar allar þrjár fékk ég þá sem er með stystan starfsaldur af okkur þremur til að keyra ákveðið forrit til að kanna hvort það virkaði hjá henni. Það virkaði vel. Það skilaði sér ákveðin skrá á aðra tölvu sem ég náði í á usb-lykil áður en ég eyddi henni út af þeirri tölvu. Færði þessa skrá af usb-lyklinum á ákveðið drif og stað á minni tölvu. Þar með vorum við búnar að gera klárt fyrir sérfræðinginn sem bjó til þessa leið til þess að finna úr henni leið til að prenta formin með daglegu debetkortunum á prentarann í skrifstofurýminu. Við höfðum framleiðsluvélina til klukkan tólf en þá komu tveir viðgerðarmenn að gera loka tilraun til þess að fá prentarann við vélina til að vinna rétt. Á meðan þeir voru að vinna sína vinnu höfðum við nóg að gera við að para saman kort og form úr debetdeginum og hluta af mánaðarlegri kreditendurnýjun. Til að gera langa sögu stutta var prentarinn farinn að virka og starfa eðlilega upp úr klukkan þrjú. Það var hægt að testa með því að framleiða hluta af kreditendurnýjuninni sem var enn óframleidd. Mikið sem við urðum glaðar. Við vorum til klukkan fimm að ganga frá og spritta helstu snertifleti. Ein af okkur var reyndar til klukkan að verða sex en hún var að ljúka við mánaðamótauppgjörið. Ég var komin heim um hálfsex. Fór fljótlega út aftur til að ná í fiskbúð fyrir lokun. Keypti ýsu, bleikjuflök og harðfisk hjá Fúsa. Skrapp svo aðeins í Krónuna við Nóatún og verslaði aðeins inn. Hef ekki verslað í hátt í þrjár vikur. Var ekki að kaup mjög mikið, ætla að gera stærri innkaup í Krónunni við Granda einhvern tímann í næstu viku. Ég er ekki að fara í vinnu aftur fyrr en eftir páska.

Slapp heim úr vinnu á réttum tíma í dag

Á þriðjudagsmorguninn breyttust aðeins tímaáætlanir strætó. Hef verið að taka strætó klukkan ca 7:15 fyrir utan Krambúðina. Núna kemur hann 5-6 mínútum seinna. Ég er samt mætt í vinnu rétt upp úr klukkan hálfátta, aðeins á undan samstarfsstúlkum mínum sem mæta uþb 7:45. Þessa fjóra daga, sem liðnir eru af vinnuvikunni, höfum við byrjað í sömu stöðum ("Groundhoug day"). Sú úlnliðnsbrotna í bókhaldinu, sú sem vann með mér fyrstu vikuna eftir að deildinni var skipt upp nr. 1 á vélinni fram að kaffipásu og ég númer 2 og svo nr. eftir kaffipásu og líka eftir hádegi þegar það var hægt. Þegar við vorum búnar með fyrsta framleiðsluskammtinn á þriðjudaginn kom viðgerðarmaðurinn í hús og hann fór beint í að nota varahlutasendingu sem kom í hús deginum áður og reyna að laga prentarann. Fljótlega eftir kaffipásu fengum við að byrjað að prófa, fyrst voru aðeins sett fá form í einu og svo fórum við að prófa að framleiða kort og form. Þetta gekk ágætlega til að byrja með en ekki lengi. Þegar við settum yfir 20 kortafæl af stað og vorum rétt hálfnaðar að taka á móti kortunum fór allt í flækju aftur. Prentarinn hélt áfram að stríða okkur fram eftir degi og viðgerðarmaðurinn fór heim stuttu fyrir fimm. Við hinar vorum að vinna til klukkan sjö en skildum samt eftir smá hala. Í gærmorgun kom besti kortatæknimaðurinn og fann leið B fyrir okkur, þ.e. hvernig hægt væri að prenta formin fyrir kortin út á annan prentara. Viðgerðarmaðurinn kom um tíu og vann í prentaramálunum til klukkan fjögur. Prentarinn lét ekki að stjórn þannig að eftir fjögur unnum við eftir leið B og náðum að klára daginn og halann frá því á þriðjudaginn um sex. Viðgerðarmaðurinn komst ekki til okkar í dag, það var hans dagur að vera heima með börnunum sínum. Við unnum því eftir leið B og gátum einnig unnið að endurnýjun. Vorum eitthvað að grínast með það að við þyrftum að vera til klukkan fimm í dag en satt best að segja var ég alveg búin að fá nóg klukkan hálffjögur. Hinar voru sem betur fer sammála mér. Ég var því komin heim klukkan fjögur í dag.

Vinnuvika framundan

Stuttu fyrir klukkan þrjú í gær dreif ég mig út í göngutúr. Sá göngutúr varði í rétt tæpan klukkutíma og síminn skráði sjálfvirkt á mig 4,19km. Labbaði upp að Perlunni og hélt beint áfram og niður hinum meginn við Öskjuhlíð. Kom niður hjá HR og beygði fyrst til vinstri en svo fljótlega til hægri og gekk ég að Nauthólsvík áður en ég beygði til hægri, í áttina að HR aftur og þaðan stíginn við Öskjuhlíð til vinstri að Flugvallaveg, framhjá Valsheimilinu, göngin undir Bústaðaveg að Reykjahlíð þar strax til hægri inn Drápuhlíð þar sem hún byrjar.

Fyrr um daginn hafði ég lokið við að lesa seinni lánsbókina frá tvíburahálfsystur minni, prjónað svolítið og byrjað á síðustu bókasafnsbókinni; Mótíf X eftir Stefan Ahnheim um lögreglumanninn Fabian Risk. Horfði á fréttatímana, Landann, Fjöllin rumska og Ísalög. Háttaði upp úr klukkan tíu og las í rúman hálftíma. Sofnaði um ellefu leytið og rumskaði svo alltof alltof snemma, sennilega eitthvað vinnuspennt.

Tók strætó við Krambúðina korter yfir sjö í morgun og var mætt í vinnu um hálfátta fyrst af okkur þremur sem stöndum vinnuvaktina í þessari viku. Síðasta vika var mjög erfið fyrir þær sem stóðu vaktina þá því m.a. bilaði prentarinn og það var ekki hægt að gera við hann heldur varð að panta varahluti. Þeir varahlutir komu í hús í dag og mun viðgerðarmaðurinn koma í fyrramálið og vonandi verður prentarinn betri en nýr á eftir. Við þræluðum daglegum debetkortum í gegn, 169 stk á mjög löngum tíma. Kortin var auðvelt að framleiða alveg sér en prentarinn skilaði aðeins 7 burðarblöðum undir þau í einu og það tók amk 5 mínútur. Lukum við daglega framleiðslu, frágang og talningu um tvö og byrjuðum svo á framleiðslu kredit-endurnýjunar fyrir það kreditkortafyrirtæki sem fær kortin sín beint til sín og náðum að framleiða um 300 af rúmlega 2000 áður en við sögðum þetta gott rétt upp úr klukkan þrjú. Var komin heim um hálffjögur. Hitti Odd Smára fyrir utan heima en hann var að koma úr Sorpu og smá búðarskreppu til að fylla aðeins á brauð og ost birgðirnar. Hann fór svo á vinnuvakt rétt fyrir fimm. Davíð Steinn er líka að vinna í dag og hann var farinn úr húsi á undan mér í morgun og kemur líklega heim á næsta klukkutímanum.

Birtir fyrr og fyrr

Ég heyrði í Oddi fara á stjá um sjö í morgun. Hann er á helgarvaktinni þessa helgina og mætir upp í Kvikk við Öskjuhlíð um 7:30 til að undirbúa opnun klukkan átta. Nýlega voru vaktirnar hans styttar um nokkra klukkutíma. Mánudags-miðvikudags vaktirnar voru áður frá 15-20 en frá og með síðasta mánudegi eru þær frá 17-20 og helgarvaktir styttust um 1,5 klst hvor dagur. Oddur var því kominn heim fyrir klukkan þrjú í gær. Ég hafði náð að senda honum skilaboð og leggja inn á hann áður en hann var búinn að vinna svo hann kom heim með rjóma út á vöfflur. Davíð Steinn er í vaktafríi þessa helgina. Hann kom ekki framúr fyrr en um tvö í gær og tók þá að sér að skúra það sem ég átti eftir að skúra og ljúka við vöfflubaksturinn.

Annars gerði ég varla handtak fyrr en ég var búin að ljúka við að lesa bókina um kastaníumanninn, bókin var yfir 530 bls. og tók alls konar beygjur en hélt spennu mest allan lesturinn. Það tók samt nokkra daga að lesa bókina en ég kláraði síðustu 150 bls. í gærmorgun. Í gærkvöldi byrjaði ég á hinni bókinni sem tvíburahálfsystir mín lánaði mér; HORFIÐ EKKI Í LJÓSIРeftir Þórdísi Gísladóttur. Ég las fyrstu 9 kaflana og átti erfitt með að hætta og leggja hana frá mér. Bókin er innan við 160 bls og 26 kaflar svo það má alveg reikna með að ég ljúki lestri hennar í dag. Og þá á ég eftir síðustu bókasafnsbókina sem og síðustu jólabókina.

Er byrjuð að búa mig undir vinnuvikuna framundan. Ég heyrði í einni af þeim sem vann í síðustu viku og skv. henni bíður löng skýrsla um vinnuævintýri síðustu viku. Það lítur allt út fyrir að það teygist á aðgerðum vegna Covid-19 sem í mínu tilviki gæti þýtt að ég vinni ekki nema 11 daga í apríl mánuði. Hvort vinnutilhögunin, önnur hver vika, nái lengra fram á vorið verður að koma í ljós. Líklega langbest að hugsa ekki framúr sér. Auðvitað er óvissa erfið en þessar aðgerðir sem standa yfir eru lífsnauðsynlegar. Á meðan ástandið er svona á maður eiginlega að nota tækifærið og æfa sig betur í að lifa í núinu, taka því sem að höndum ber og HLÝÐA VÍÐI!

Alls konar dundur

Í gærmorgun var ég klædd og komin á ról um klukkan hálfátta. Ég ákvað að skipta um á rúminu mínu og setja í þvottavél. Annars notaði ég fyrstu tvo tímana í smá eldhússnurfus en aðallega lestur.. Er komin vel áleiðis með næstsíðustu bókasafnsbókina; Kastaníumaðurinn sem er eftir höfund sjónvarspþáttanna Forbrydelsen. Á ellefta tímanum hellti ég mér upp á kaffi og fékk mér aðeins meiri hressingu heldur en eina matskeið af lýsi sem ég hafði tekið inn fljótlega eftir að ég kom á fætur. Svo greip ég í prjónana mína alveg fram yfir hádegisfréttir. Rétt fyrir klukkan eitt skrapp ég út í göngutúr. Var með símann á mér og eftir að ég kom heim lét hann mig vita að skráð var á mig hálftíma 2,2 km göngutúr, sjálfvirkt. Seinni hluti dagsins fór í prjón, lestur og þáttahámhorf. Slökkti á sjónvarpinu áður en klukkan varð tíu. Háttaði upp í rúm og las í rúman hálftíma áður en ég fór að sofa.

Vaknaði fyrir klukkan sjö. Nennti samt ekki strax á fætur og af því að fljótlega greip ég símann og fór "online" þá var klukkan langt gengin í níu áður en ég klæddi mig og bjó um. Dagurinn hefur liðið frekar hratt og hef ég næstum eingöngu verið að sinna áhugamálum mínum. Oddur Smári er í vaktafríi í dag og á morgun. Davíð Steinn var að vinna frá 7:30-18 í gær og í dag en á vaktafrí næstu þrjá daga. Ég hafði fiskibollur úr Fiskbúð Fúsa í kvöldmatinn. Og nú er ég að sötra smá hvítvín á meðan ég er að skrá niður það helsta.

En mikið svakalega langar mig í sund.  :-/

Innidagur enn sem komið er

Ég var vöknuð það snemma að ég heyrði morgunfréttirnar klukkan sjö í útvarpinu. Sofnaði ekki aftur en það tók mig þrjú korter að koma mér á fætur. Eftir að hafa burstað tennurnar, fengið mér eina matskeið af lýsi og tekið út 500gr. af hakki úr frysti settist ég með eina af bókasafnsbókunum, Olnbogavík, inn í stofu og las þar til klukkan var langt gengin í tíu. Þá ákvað ég að hita mér kaffi og fá mér einhverja morgunhressingu. Um hálfellefu hringdi ég í Lilju vinkonu og spjallaði stuttlega við hana. Svo hélt ég áfram að lesa fram að hádegisfréttum. Hafði til heitan mat um eitt leytið handa okkur mæðginunum. Það var ekki ætlunin að hanga inni í allan dag en það er ekkert sérstakt sem togar mig út. Hef verið að prjóna og horfa á allskonar þætti úr sjónvarpi símans Premium. Um þrjúleytið slökkti ég þó aftur á sjónvarpinu og lauk við að lesa bókina. Það var rétt hjá mér að ég hef lesið þá bók áður. Hafði engu að síður gaman að bókinni.

Síðasta sundferðin í amk 3 vikur

Ég fór ekki á fætur fyrr en um hálfníu í gærmorgun. Um níu var ég búin að búa til hafragraut. Ýtti fljótlega við N1 syninum og bauðst til að skutla honum á vinnuvakt fyrir klukkan tíu. Hann þáði boðið og fékk sér smá grautarslettu í morgunmat. Setti hann út við N1 við Stórahjalla rétt fyrir tíu. Við sammæltumst um að ég kæmi við hjá honum í baka leiðinni úr sundi því önnur rúðuþurrkan sem hann setti í fyrir mig um daginn virtist vera eitthvað gölluð. Það var mjög rólegt í sundi. Hafði braut 6 alveg útaf fyrir mig, synti mínar tuttugu mínútur, 500m þar af rúma 150 á bakinu, ca 40m skriðsund og 300m bringusund. Fór nokkrar ferðir í þann kalda og skipti milliferðunum á milli sjópotts, heitasta potts og 42°C potts. Þvoði mér um hárið og var mætt fyrir utan Stórahjalla um hálftólf. Fékk kaffi í boði Davíðs Steins á meðan hann skipti fyrir mig um aðra framrúðuþurrkuna á kostnað fyrirtækisins. Það er svo stutt síðan ég keypti þessar þurrkur að önnur þeirra hlýtur að hafa verið gölluð. Ég kom heim um tólf og fór ekkert meira út.

Stillti ekki á mig neina klukku þegar ég fór að sofa upp úr ellefu í gærkvöldi. Ég á að halda mig fjarri vinnu þessa vikuna og þá skiptir ekki öllu máli hvort maður vaknar klukkan sex, sjö eða átta. Var smá stund að ákveða mig í morgun hvenær dagsins ég ætti að skella mér í sund. Fannst þó best að fara fljótlega eftir að ég kom á fætur. Klukkan níu var ég komin út í þann kalda. Eftir þriggja mínútna stopp þar fór ég á braut 5 og synti í tæpar 25 mínútur, 600 metrar, þar af 150 metrar á bakinu en allt hitt á bringunni. Fór þrjár aðrar ferðir í þann kalda. Mjög fáir voru í sundi og aldrei biðröð í þá potta sem ekki mega fara nema 2 ofan í í einu. Oddur Smári var vaknaður og kominn fram þegar ég kom heim rétt fyrir ellefu. Rúmum klukkutíma seinna vöktum við bróður hans og þeir fóru eina ferð saman í Sorpu. Eftir að hafa skutlað bróður sínum heim aftur fór Oddur í Dressmann XL og fataði sig upp, keypti þrennar buxur og tvær hettupeysur. Hann kom líka við í matvörubúð og keypti brauð og lítinn pela af rjóma en ég var einmitt að taka síðustu vöffluna úr járninu þegar hann kom heim.

Innipúki í dag

Aðeins einn á þessu heimili fór út í dag og er hann reyndar enn að vinna, N1 sonurinn. Ég var vöknuð fyrir klukkan átta en nennti ómögulega á fætur. Heyrði í syninum fara á stjá og svo út úr húsi upp úr klukkan hálftíu. Ég reif mig ekki upp úr rúminu fyrr en klukkan var byrjuð að ganga ellefu.

Lauk við að lesa bókina Bókasafn föður míns eftir Ragnar Helga Ólafsson sem ég er með í láni frá tvíburahálfsystur minni. Er ekki byrjuð á síðustu jólabókinni en ég er aðeins byrjuð á einni af þremur ólesnum bókasafnsbókum Olnbogavík eftir Hermann Jóhannesson. Þessi bók kom út árið 2013 og mig rámar í að hafa lesið hana áður. Ætla samt að halda lestri áfram. Annars hef ég líka verið að prjóna í dag og horfa á þætti úr sjónvarpi símans premium.

Vorjafndægur

Ég var komin upp í rúm um hálftíu í gærkvöldi. Las tvær síðustu smásögurnar í Átta sár á samviskunni eftir Karl Ágúst Úlfson. Slökkti ljósið klukkan tíu og var sofnuð stuttu síðar. Svaf í einum dúr til klukkan sex. Vaknaði rúmum hálftíma á undan klukkunni. Var mætt í vinnu um hálfátta og var mjög fegin að hafa tíma til að undirbúa sum af verkefnum dagsins. Þegar samstarfskona mín mætti suttu síðar tókum við fram framleiðsluvagnana, kveiktum á framleiðsluvélinni, fórum fram með bankatöskur og settumst svo stund frammi í kaffistofu eftir að hafa þvegið okkur og sprittað. Eftir að daglegum verkefnum lauk var klukkan byrjuð að ganga þrjú. Þá settumst við niður og skrifuðum smá "skýrslu" sem við sendum með rafrænum pósti á samtarfskonurnar okkar þrjár. Tvær af þeim grípa boltann eftir helgina ásamt sumarstelpunni frá í fyrra og sú þriðja kemur vonandi á vakt með okkur tveimur annan mánudag n.k. Kom heim um hálffjögur. Ákvað að sleppa sundferð í dag en um fimm skrapp ég í Fiskbúð Fúsa og keypti ýsu í soðið, nokkrar fiskibollur og harðfisk.

Stutt í laaaaanga "helgi"

Svefninn sl. nótt var svolítið órólegur. Var sofnuð fyrir klukkan ellefu og mig rámar í að mig hafi dreymt svolítið furðulegan draum. Rumskaði á öðrum tímanum í nótt og skrapp á salernið. Eftir það fannst mér ég vita af mér fram eftir nóttu. Man eftir að klukkan var byrjuð að ganga sex en svo hef ég líklega sofnað fastar því næst vissi ég af mér korter fyrir sjö þegar vekjaraklukkan fór í gang.

Var mætt í vinnu klukkan hálfátta í morgun eins og alla aðra virka morgna í vikunni. Notaði fyrsta korterið, þar til samstarfsmanneskja mín mætti, til að undirbúa m.a. bókhald og fleira til að flýta fyrir. Daglegri framleiðslu lauk rétt fyrir klukkan tólf. Keyrði mánaðarlega kreditendurnýjun og eitt af því síðasta sem við gerðum var að framleiða þau kort sem fara beint í kortafyrirtækið, rétt rúmlega 60 kort. Hins vegar byrjuðum við ekki á endurnýjun plasta sem send verða í pósti heim til kúnnanna, um tólfhundruð kort. Kannski byrjum við á þeirri framleiðslu á morgun en þau kort þurfa ekki að fara í póst fyrr en um mánaðamótin í síðasta lagi svo stelpurnar sem standa munu framleiðsluvaktina í næstu viku fara örugglega létt með að vinna þetta verkefni.

Kom heim um hálffjögur. Fór beint í að hella upp á uþb tvo bolla af kaffi. Fékk mér hressingu og hringdi svo í pabba. Var komin í sund um hálffimm. Þegar ég var að klára 400m bringusund sá ég kaldapotts vinkonu mína vera að fara í þann kalda svo ég dreif mig upp úr lauginni og náði 3 ferðum með henni. Hún hafði mætt fyrr en venjulega og var byrjuð á að pottast stuttu áður en ég byrjaði að synda.

Vikan hálfnuð

Betur gekk að sofna í gærkvöldi heldur en í fyrrakvöld. Var sofnuð fyrir klukkan ellefu og vaknaði upp úr klukkan sex, áður en vekjaraklukkan átti að vekja mig. Mætti til vinnu klukkan hálfátta og notaði fyrsta korterið til að skoða, prenta út og undirbúa ákveðna A-lyklasmíð. Það voru komnar 16 slíkar beiðnir. Það vill til að kortaframleiðslutölur hafa lækkað. Upp úr klukkan átta hófum við fyrstu framleiðslu dagsins við tvær sem stöndum vaktina þessa vikuna, ég að troða í og hún að taka á móti. Fyrsta framleiðsluskammtinum lauk rétt fyrir níu. Þá fór hún að vinna að bókhaldinu en ég að búa til fyrstu 6 lyklana. Eftir talningu skruppum við í kaffi og hófum svo næstu framleiðslu á ellefta tímanum. Þriðji framleiðsluskammtur kom rétt fyrir hálftólf, ekki mörg kort og framleiðslu var eiginlega lokið fyrir tólf fyrir utan tvö kort sem við þurftum smá aðstoð við að koma í gegnum vélina. Sú aðstoð var veitt eftir hádegi. Ég bjó til 5 lykla í viðbót eftir hádegi og okkur tókst að ljúka öllum frágangi rétt fyrir klukkan þrjú.

Ég var komin heim klukkan hálffjögur. Hellti upp á þrjá bolla af kaffi og fékk mér smá hressingu. Hringdi í Ellu vinkonu, pabba og esperanto vinkonu mína sem hafði reynt að ná í mig í gær. Pabbi hafði átt að fara í segulómskoðun vegna blöðruhálskirtils hér í bænum rétt fyrir hádegi en það var haft samband við hann og honum gefinn annar tími, 13. maí n.k.

Mætti í Laugardalslaugina um fimm. Engin biðröð var inn í dag amk ekki á þeim tíma sem ég mætti. Einn starfsmaður upplýsti mig um að miðað væri við að 100 manns mættu vera inni í einu og inni í þeirri tölu er starfsfólkið á svæðinu. Byrjaði á einni ferð í þann kalda áður en ég synti 500m. Fór tvær aðrar ferðir í kalda pottinn áður en ég fór upp úr og heim aftur.

Afmælisdagur

Það gekk ekki alveg eins vel að sofna í gærkvöldi og undanfarin kvöld, sennilega var ég eitthvað afmælisspennt. Veit ekki alveg hvenær ég sofnaði loksins en ég var amk vöknuð fyrir klukkan hálfsjö og komin á fætur stuttu síðar. Tók strætó kl. 7:15 eins og í gær og meðferðis hafði ég m.a. pralín súkkulaðiköku, 3 osta, tvær tegundir af smákexi og bland af bróm- og bláberjasultu til að bjóða samstarfsfólki mínu upp á í kaffitímanum. Á vinnustöðinni minni biðu mín falleg afmælisskilaboð frá þeirri sem vinnur með mér á kortadeildinni í þessari viku. Við svissuðum verkefnum frá í gær. Öll framleiðsla var búin um tólf en við vorum til klukkan þrjú að ganga frá og þar að auki varð ég að útbúa beiðni um aðstoð vegna eins verkfærisins sem við notum daglega og er ekki að virka eins og skyldi.

Í hádeginu hringdi kaldapotts vinkona mín til að óska mér til hamingju með daginn og spyrja hvænær ég myndi komast í sund í dag, hún ætlaði að mæta á þriðja tímanum. Ég var ekki komin heim fyrr en fjögur en ég tók strax til sunddótið mitt og brunaði af stað í sund. Í laugardal var verið að hleypa fólki inn í hollum og ég var nr. 10 í biðröðinni. Það var samt ekki nema tæplega 15 mínútna bið. Og viti menn kalda potts vinkona mín var enn á svæðinu og við náðum amk 3 ferðum samn í kalda pottinn og tveimur í þann heita áður en hún kallaði þetta gott í dag. Ég synti 300m áður en ég fór heim.

Heima beið mín terta ársins, ilmkerti og 3l pottur frá Davíð Steini og Oddur Smári tók svo að sér að panta og sækja á Saffran. Af bókalestri er það að frétta að nú á ég aðeins eftir að byrja á og lesa síðustu jólabókina. Er að lesa smásögurnar hans Karls Ágúst Úlfssonar sem komu út rétt fyrir síðustu jól og í Gærkvöldi byrjaði ég á annarri bókinni sem ég er með í láni frá tvíburahálfsystur minni, Bókasafn föður míns eftir Ragnar Helga Ólafsson.

Inn að aftan

Vaknaði nokkru áður en vekjaraklukkan átti að hringja. Var komin á fætur stuttu fyrir sjö og ákvað að taka strætó í vinnuna korteri fyrr en venjulega eða um 7:15. N1 sonurinn sagði mér frá skilaboðum strætó um helgina að eftir að samkomubann hefði tekið gildi yrði farþegum hleypt inn í vangnana að aftan og þeir sem væru með strætókort eða app þyrftu bara að veifa þessu í áttina að bílstjóranum. Ég fór inn á heimasíðu strætó áður en ég lagði af stað í morgun og fékk þetta alveg staðfest svo ég var vel undirbúin. Var mætt í vinnu um hálfátta ca korteri á undan samstarfsstúlku minni. Við verðum að standa vaktina tvær í þessari viku, höldum okkur frá vinnu í næstu viku og þá mæta hinar tvær og sumarstúlkan frá í fyrra og svo verður sú fimmta vonandi komin í starfshæft ástand vikuna 30. mars - 3. apríl þannig að hún komi sem þriðja manneskja inn með okkur tveimur. Annars gekk þetta ágætlega upp í dag. Engin aukaframleiðlsa var á döfinni í dag og framleiðsludagurinn náði ekki 500 kortum í heildina svo við vorum búnar með alla framleiðslu rétt fyrir tólf þrátt fyrir að taka tvær talningapásur og eina kaffipásu. Þegar búið var að ganga frá öllu vegna framleiðslunnar eftir hádegið tókum við upp kortasendingu sem kom í hús sl. fimmtudag og vorum einn og hálfan tíma að taka upp, skoða, telja og kvitta fyrir tvær tegundir, hátt í tíuþúsund kort. Vorum svona lengi að telja því ekki var hægt að telja kortin í gegnum plastið og það tók frekar langan tíma að "klæða" kassana aftur í. Þegar við vorum rúmlega hálfnaðar með þetta verkefni ákváðum við að nota frekar tóma kassa sem eru með loki og þá fór þetta að ganga aðeins hraðar. Var komin heim um hálffjögur, rétt á undan N1 syninum sem varð að taka enn eina auka vaktina í dag sem teygðist aðeins úr. Sá skilaboð frá sjósundsvinkonu minni sem og tilkynningu frá ylströndinni við Nauthólsvíka að í dag væri lokað í sjóinn á meðan verið væri að finna út úr því hvernig eða hvort hægt væri að hafa þjónustuna opna á meðan að samkomubann og 2m bil á milli manna væri í gildi. Vonandi verður hægt að finna leið en þetta er aðeins annar mánudagurinn á árinu sem ég fer ekki í sjóinn.

Rólegheit og vöfflur

Ég man að ég rumskaði upp úr klukkan sex, heldur of snemmt að vakna þá. Var ekki með verkjaraklukku stillta á mig, tókst að snúa mér á hina hliðina og steinsofna aftur. Glaðvaknaði svo á níunda tímanum. Var komin í sund fyrir klukkan hálftíu. Gaf mér góðan tíma í rútínuna. Eftir sundið fór ég í Krónuna út á Granda og verslaði inn. Næsta stopp var í Kvikk í Öskjuhlíð þar sem ég drakk einn kaffibolla í boði Odds. Síðan gerði ég mér ferð á Atlantsolíustöðina við Sprengisand. Eftir að hafa fyllt á tankinn lá leiðin að Kringlunni. Var komin tíu mínútum of snemma en ég beið í nokkrar mínútur úti í bíl þar til klukkan var alveg að slá eitt. Skrapp þá inn á Kringlubókasafnið eingöngu til að skila tveimur bókum. Eftr það fór ég heim. Er búin að prjóna, lesa, horfa á ýmislegt í sjónvarpinu og búa til vöfflur úr hálfri uppskrif (3dl heilhveiti). Vöfflurnar voru tilbúnar um það leiti sem strákarnir komu heim úr vinnu.

Ljómandi laugardagur

Ég var sofnuð um ellefu í gærkvöldi og rumskaði fyrst rétt fyrir hálfsjö. Fór ekki á fætur fyrr en rúmum klukkutíma síðar og var að skafa framrúðuna á bílnum á meðan morgunfréttir klukkan átta voru í loftinu. Var byrjuð að synda tæpum hálftíma síðar, fékk alveg heila braut fyrir mig (nr. 6), og synti 600m. Þar af uþb 200 á bakinu. Fór þrjár ferðir í þann kalda. Gaf mér góðan tíma í alla rútínu og þvoði á mér hárið að auki. Skrapp í heimsókn í vinnuna til Odds um hálfellefu og viðraði það við hann hvort hann yrði nokkuð sár þótt við Davíð Steinn færum í stutta heimsókn á Hellu, þ.e. ef sá síðarnefndi væri til í það. Oddur taldi að bróðir sinn yrði alveg til því það væri stutt síðan hann nefndi það að hann langaði að fara og kíkja á móðurafa sinn.

Þegar ég kom heim, um ellefu, útbjó ég mér staðgóðan hafragraut. Rétt fyrir tólf bankaði ég á herbergisdyrnar hjá Davíð Steini og vakti hann. Þá var hann búinn að sofa samfleytt í uþb 15 tíma en hann kom úrvinda heim úr vinnu á níunda tímanum í gærkvöldi eftir 7 daga vinnutörn. Hann var alveg til í að koma með mér austur og við ákváðum að leggja í hann fljótlega eftir hádegisfréttir. Hringdi í pabba og "varaði" hann við. Vorum komin til hans upp úr klukkan tvö og stoppuðum í rúma tvo tíma. Ég skellti í pönnsur með kaffinu og Davíð Steinn gerði tilraun til að laga flakkara afa síns. Flakkarinn er sennilega eitthvað laskaður því það tókst ekki að fá hann til að varpa myndum á sjónvarpið með neinu móti. Tók með mér afganginn af þorskhnökkum sem pabbi er búinn að geyma í kistunni hjá sér í síðan í fyrra, fékk hjá honum poka af frosnum krækiberjum og svo spurði hann hvort ég vildi ekki taka smá af oststykkinu. Hann er nýbúinn að kaupa lengju af 16% brauðosti. Annars vorum við mæðgininn að skila okkur heim fyrir tæpum hálftíma síðan. Hinn sonurinn var kominn heim af vinnuvaktinni sinni en hann á vakt aftur milli 7:30 og 16 á morgun og 15 og 20 mánudag til og með miðvikudag.

Fallegur föstudagur

Við mættum þrjár til vinnu um korter fyrir átta í morgun. Tvær af okkur sáum um vélina og framleiðslu en sú þriðja um bókhald og pökkun. Sú skrapp í Brauð & Co með einum samstarfsmanni um níu og keypti brauð með föstudagskaffinu þar sem slíkar vikulegar sendingar úr mötuneytinu á K2 liggur niðri ótímabundið. Eftir kaffipásu, upp úr klukkan tíu, var ákveðið að vinna þar til daglegri framleiðslu og frágangi væri lokið og svo ákveðið að fara heim.

Ég var komin heim korter fyrir klukkan eitt. Var eitthvað að spá í að drífa mig strax í sund en áður en ég vissi var klukkan orðin tvö og ég fór að fylgjast með upplýsingafundingum á RÚV. Áður en þeirri útsendingu var lokið hringdi fyrirliði kortadeildar í mig til að upplýsa mig um að framkvæmdastjórinn væri nýbúinn að tala við hana og ákveða að skipta yrði upp deildinni, vinna tvær og tvær í viku í senn og halda sig fjarri vinnustaðnum hina vikuna. Sú fimmta í deildinni verður líklega amk tvær vikur í viðbót að jafna sig eftir aðgerð á úlnlið sl. föstudag en hún kemur svo inn í annað hvort teymið þegar þar að kemur.

Eftir þessar fréttir hringdi ég í pabba en dreif mig svo loksins í sund með viðkomu í Fiskbúð Fúsa þar sem ég keypti allsbera ýsu í soðið.

Fyndinn fimmtudagur

Líkt og í fyrrakvöld var ég sofnuð fyrir klukkan ellefu í gærkvöldi. Rumskaði aðeins á sjötta tímanum en náði að sofna aftur. Glaðvaknaði klukkutíma síðar og fór á fætur á svipuðum tíma og í gærmorgun. Var mætt í vinnuna á sama tíma og venjulega, korter fyrir átta. Við vorum aðeins þrjár en við rúlluðum upp verkefnunum. Við vorum tvær á vélinni og ein í bókhaldi og frágangi. Framleiðslu lauk upp úr klukkan hálftólf. Þá skruppum við í mat. Önnur af hinum tveimur hættir yfirleitt á hádegi á fimmtudögum en hún var búin að samþykkja að vera eins lengi og þurfti í dag. Eftir hádegishlé, var klárað að telja og ganga frá og vélin ryksuguð og þegar klukkan var alveg að verða hálftvö sendi ég hinar tvær heim. Ég ákvað að vera lengur ef það kæmi vinnupóstur klukkan tvö, sem reyndin varð. Vann líka aðeins í öðru svo áður en ég vissi af var klukkan að verða hálfþrjú.

Upp úr klukkan hálftíu í morgun hringdi einkabílstjórinn í mig þá kominn upp að Brimborg en fann ekki innganginn til að byrja með. Hann átti að mæta með bílinn á verkstæði Ford í þessu fyrirtæki til að fá nýjan hliðarspegill farþegameginn. Ég sagði syninum að finna stæði framan við fyrirtækið og hann myndi örugglega finna innganginn ef hann labbaði meðfram byggingunni. Stuttu seinna sendi hann mér sms um að viðgerð tæki amk tvo tíma og hálfspurði mig í leiðinni hvað hann ætti að gera við sig á meðan. Úr varð að hann fékk sér göngu upp í Krónu og apótek við Stórhöfða og þaðan fór hann svo að N1 í Ártúnsbrekku og beið eftir að fá sms með tilkynningu um að bíllinn væri klár. Það sms kom um hálfeitt. Hann fékk FÍB afslátt af viðgerðinni en þurfti að borga rúmlega 90þúsund. Svo fór pilturinn með bílinn í röð hjá bílaþvottastöð rétt hjá og fékk hann þrifinn eftir smá bið.

Ég var komin heim um þrjú. Hellti mér upp á kaffi og hringdi í pabba. N1 sonurinn átti að mæta á vakt upp í Stórahjalla klukkan fjögur og ég ákvað að skutla honum þangað og skreppa í Sports Direct og kaupa mér 2 sundboli áður en ég færi svo beinustu leið í sund í Laugardalslaugina. Var byrjuð að synda korter fyrir fimm. Synti í tuttugu mínútur, 500m. Fór fjórar ferðir í þann kalda, einni færri ferð en kalda potts vinkona mín. Endaði í gufunni og var kominn heim fyrir klukkan hálfsjö.

Annars er ég ennþá að lesa bókina hans Ármanns Jakobssonar, er rúmlega hálfnuð með þá bók og líkar lesturinn vel.

Mikilvægur miðvikudagur

Í gærkvöldi var ég komin upp í rúm rétt upp úr klukkan tíu, las í rúman hálftíma og var örugglega sofnuð fyrir klukkan ellefu. Rumskaði klukkan fimm í morgun og náði ekki að sofna aftur. Fór þó ekki á fætur fyrr en upp úr klukkan hálfsjö. Oddur Smári kom fram stuttu á eftir mér og var hann á leiðinni í vinnuna, hafði skipt um vakt til að leysa einn af og ætlaði að vera mættur í Kvikk í Öskjuhlíð um hálfátta til að undirbúa opnun á slaginu átta. Ég var þó á undan synininum út úr húsi og var að bíða eftir strætó þegar ég sá hann rölta af stað í sína vinnu 7:25.

Í minni vinnu var búið að uppfæra vinnuplanið með tilliti til þess að við værum aðeins fjórar af fimm. Ég var skráð í bókhaldsvinnu svo ég þurfti ekki að koma nálægt framleiðslunni. Ég var búin að fá það samþykkt að ég tæki út styttingu vinnuvikunnar, 1/2 dag í mars í dag. Átti þá að vera búin um hálftólf en ég vildi ekki skilja við ákveðið verkefni ólokið og var ca hálftíma lengur.

Um leið og ég labbaði frá vinnu hringdi ég eina í fyrrum samstarfskonu mína og athugaði hvernig ég sækti að henni. Hún var heima og ég ákvað að stökkva upp í næsta strætó vestur í bæ, leið 13. Sá keyrir aðeins á hálftíma fresti milli klukkan ellefu og tvö og var tiltölulega nýlega farin frá Lækjartorgi. Ég rölti alla leið að Ráðhúsi Reykjavíkur og beið þar eftir næsta vagni. Mætti í heimsóknina upp úr klukkan hálfeitt og stoppaði í rúma tvo tíma.

Kom heim um milli þrjú og hálffjögur. Stoppaði heima í uþb hálftíma og hringdi í pabba áður en ég dreif mig í sund með viðkomu í Fiskbúð Fúsa þar sem ég keypti nætursaltaðan þorsk í soðið sem og einn pakka af harðfisk.

Þrautseigur þriðjudagur

Það er vel hægt að finna fyrir að dagsbirtan eykst dag frá degi, aðeins 10 dagar þar til dagur og nótt verða jafnlöng. Við fjórar, af fimm, sem stöndum vaktina í kortadeildinni vorum byrjaðar að framleiða sem og undirbúa pökkun rétt upp úr klukkan átta. Ég var á framleiðsluvélinni að hlaða inn og troða í fram að morgunkaffi en að taka á móti og skoða eftir kaffið og til tólf. Þá var daglegri framleiðslu lokið en eftir hádegi sáu tvær um að klára framleiðslu á endurnýjun debetkorta marsmánaðar. Sú framleiðsla hófst á föstudaginn og allt í allt voru þetta uþb 4000 kort sem kláraðist að framleiða upp úr klukkan þrjú í dag.

Ég var komin heim korter fyrir fjögur og mitt allra fyrsta verk var að hella mér upp á tvo bolla af kaffi og fá mér smá hressingu með. Rétt rúmlega fjögur sló ég á þráðinn til pabba. Hann svaraði ekki fyrr en í níundu hringingu svo ég var farin að halda að hann hefði skroppið af bæ. Í reynd hitti ég akkúrat á að hringja þegar hann var á pisseríinu. Við feðgin spjölluðum í rúmar tíu mínútur en svo dreif ég mig af stað í Laugardalinn. Var búin að synda og fara eina ferð í þann kalda og hefði verið í þeim heitasta þegar kalda potts vinkona mín mætti á svæðið ef ég hefði ekki hitt á eina af öllum þeim sund-Sigrúnum og farið að spjalla. Fór fimm ferðir í þann kalda allt í allt og endaði svo í gufunni í ca 15 mínútur. Ég er eiginlega nýkomin heim, strákarnir báðir að vinna svo ég þarf ekki að elda frekar en ég vil. Fæ mér líklega gríska jógúrt í kvöldmatinn.

Magnaður mánudagur

Mikið varð ég fegin í morgun þegar ljóst var að BSRB var búið að semja og því ekki lengur hætta á að loka þyrfti sundlaugum og aðstöðunni í Nauthólsvík. N1 strákurinn minn var farinn af stað í vinnu rétt áður en ég kom fram stuttu fyrir klukkan sjö í morgun. Ég tók leið 13 frá Krambúðinni um hálfátta, fór út við Þjóleikhúsið og var mætt í vinnu korter fyrir átta. Vinnudagurinn leið hratt og örugglega. Var nokkuð erilssamur en við gátum leyft okkur að hætta um þrjú. Ég var því komin heim um hálffjögur og eitt af því fyrsta sem ég gerði var að hella upp á. Hringdi í pabba og spjallaði við hann það lengi að hann missti af fjögur fréttunum. Ég var mætt í Nauthólsvík um hálffimm og var að setja á mig hanskana þegar sjósundsvinkona mín mætti á svæðið. Ég hinkraði  eftir henni og skelltum við okkur saman út í 0,2°C kaldan sjóinn. Það var flóð svo við þurftum ekki að labba "hálfa leið" til Kópavogs til að komast á smá dýpi. Svömluðum um í tæpar átta mínútur og vorum svo í heita pottinum í amk þrjú korter, höfðum um það margt að spjalla. Þegar við vorum búnar að flatmaga í heita pottinum í einhverja stund bættist bekkjarsystir mín úr grunnskóla í hópinn.

Sól á sunnudegi

Vaknaði rétt fyrir klukkan sjö í morgun. Gerði tilraun til að kúra aðeins lengur en gafst upp á því eftir hálftíma. Ákvað að skipta um á rúminu mínu og gerði mig svo klára í sundferð. Klukkan var byrjuð að ganga níu áður en ég rölti yfir í Blönduhlíð, þar sem bíllinn var staðsettur, og keyrði þaðan beinustu leið í Laugardalinn. Synti 500m bringusund á tuttugu mínútum, fór þrisvar í þann kalda á eftir og sjópottinn, 42°C pottinn og gufuna á milli og á eftir áður en ég kallaði þetta gott að sinni. Var komin heim rétt fyrir klukkan hálfellefu. Eftir að hafa fengið mér hafragraut settist ég með skammtímalánsbókina inn í stofu og las í góða stund. N1 sonurinn kom fljótlega fram, vinnuklæddur, og var á leiðinni á auka vinnuvakt í Kópavogi. Fljótlega eftir að hann var farinn settist ég við tölvuna hans í smá stund.

Sr. Pétur hringdi í mig í vikunni og spurði hvort ég gæti komið og hjálpað til fyrir og eftir galdramessu í dag. Ég gaf honum þau svör að ef ég yrði í bænum myndi ég mæta um hálfeitt. Ég verð að viðurkenna að ég var eiginlega ekki að nenna að fara en loforð er loforð og ég var mætt við kirkjuna um hálfeitt. Skömmu síðar mætti ein fyrrum kórsystir mín sem og fyrrum safnaðarstjórnarsystir og sjálfur sérann sem fræddi okkur á því að seint í gær hefði verið ákveðið að það yrði aðeins boðið upp á kaffi og kleinur svo þeir sem ekki voru uppteknir eða í heimasóttkví úr stjórninni myndu alveg geta ráðið við að hella upp á og ganga frá. Semsagt ekkert Bjargarkaffi eftir messu í dag. Ég fór því beint heim aftur og var eitthvað að spá í hvort ég ætti að drífa mig í messu um tvö. Ekkert varð úr því. Lauk við skammtímalánsbókina og byrjaði á bókinni eftir Ármann Jakobson. Horfði á blaðamannafundinn á RÚV2 klukkan tvö og stillti svo á enska boltann. Er byrjuð að fella af afgangasjalinu í appelsínugulu og rauðu litunum með svörtu röndinni síðustu sex umferðirnar.

Laugardagur

Hafði áform um að taka upp ferðatölvuna seinni partinn í gær og punkta niður það helsta. Ekkert varð úr því vegna þess að leiðin að tölvu N1 sonarins varð greið og ég laumaði mér í hana um stund og notaði þann tíma í allt annað en að blogga. Núna var ég að koma heim úr sundi og esperantoæfingu og þrátt fyrir að veðurútlið sé skárra en reiknað var með hef ég ákveðið að vera í bænum um helgina.

Synti 500m í morgun og þar af 150m á bakinu því eftir sundið, tvær ferðir í kalda, eina í sjópottinn og eina gufuferð þvoði ég á mér hárið. Syndi semsagt aldrei á bakinu nema það standi til að þvo hárið og það geri ég ca vikulega. Hina sund og sjódagana kemst ég upp með að setja hárið í tagl og troða því undir hettu og þótt ég syndi alls ekki með höfuðið upp úr og byrji kalda potts ferðirnar á því að fara á bólakaf þá blotnar hárið ekki neitt að ráði, kannski bara rétt í hnakkanum.

Í gær kom ég heim úr vinnu upp úr klukkan hálffjögur. Vorum aðeins þrjár í vinnu. Ein af okkur fimm vinnur 70% stöðu og er búin á hádegi á fimmtudögum og hin sem ekki var mætt í gær var löglega afsökuð. Hún úlnliðsbrotnaði fyrir sex vikum síðan en þegar taka átti gipsið á miðvikudaginn var kom í ljós að brotið var ekki gróið og var ákveðið að hún færi í aðgerð þar sem tekið væri flís úr annarri mjöðminni á henni til að nota í úlnliðinn. Aðgerðin var í gær og hún verður frá vinnu í það minnsta tvær vikur. Ég fór ekkert út aftur eftir að ég kom heim en notaði tímann m.a. til að horfa á þáttinn um Ragga Bjarna sem var sýndur á RÚV kvöldið áður, á fimmtudagskvöldið.

Á fimmtudaginn kom ég heim úr vinnu fyrir klukkan þrjú. Hellti mér upp á kaffi og fékk mér hressingu áður en ég tók til sunddótið og allar bækurnar af safninu og lagði af stað í leiðangur. Byrjaði á safninu. Skilaði öllum fjórum bókunum, eina var ég rétt byrjuð að glugga í en ákvað að eyða ekki lengri tíma í þá bók í þetta sinn amk. Tók 6 bækur í staðinn og ein af þeim er á skammtímaláni Svanafólkið eftir Kristínu Ómarsdóttur. Er byrjuð að lesa þá bók, öðru vísi saga og stíll en ég er vön en ég hef gaman að henni. Hinar bækurnar eru: Kastaníumaðurinn eftir Sören Sveinstrup, Mótíf X eftir Stefan Ahnhem, Olndbogavík eftir Hermann Jóhannesson, Átta sár á samviskunni eftir Karl Ágúst Úlfsson og Útlagamorðin: saga um glæp eftir Ármann Jakobsson. Næst lá leiðin í laugardalslaugina þars sem ég byrjaði á því að synda í tuttugu mínútur áður en ég hitti á kalda potts vinkonu mína og fór 4 ferðir í þann kalda og þrjár í þann heitasta með henni. Eftir sundið kom ég við í Krónunni við Nóatún og verslaði inn. Áður en ég fór heim fór ég í Hagkaup í Skefunni til að ná mér í smá kambgarn til að nota í "afgangasjöl". Eftir kvöldmat heimsótti ég tvíburahálfsystur mína. Höfðum ákveðið þennan hitting daginn áður og hluti af heimsókninni átti að nota í að fá hana til að hjálpa mér við að ljúka við skattframtalið. Ég fann út úr því sjálf þegar til kom og var búin að skila því svo hittingurinn breyttist í saumaklúbb. Vorum reyndar báðar með eitthvað á prjónunum. Lánaði henni eina af jólabókunum mínum og fékk tvær bækur í láni frá henni í staðinn og þar að auki gaf hún mér tvær af borðtuskunum sem hún hefur verið að prjóna undanfarið eftir uppskriftum úr tuskubók sem hún hafði útvegað sér (ég er alltaf að græða).

Vikan hálfnuð

Í gær var ég komin heim úr vinnu um þrjú. Einum og hálfum tíma síðar var ég mætt í sund í Laugardalslaugina. Byrjaði á því að synda og var búin með eina ferð í kalda pottinn þegar kalda potts vinkona mín mætti á svæðið. Fór fimm aðrar ferðir með henni í þann kalda og oftast í 44°C heita pottinn inn á milli. Í einni kalda potts ferðinni ávarpaði ungur maður mig með þeim orðum að ég hafi verið kennari hans í 6 ára bekk í Árbærjarskóla fyrir allmörgum árum. Kom heim aftur um hálfsjö og fór beint í matarstúss. Bjó til bollur úr kalkúnahakki sem heppnuðust bara nokkuð vel.

Í dag var ég í vinnunni til klukkan fjögur, alveg nóg að gera allan tímann. Klukkan var að verða hálffimm þegar ég kom heim og það fór svo að ég fór ekkert út aftur. Lauk m.a. við að lesa næstsíðustu bókina af safninu. Það komu skilaboð frá bókasafninu í morgun um að skiladagur nálgast á skammtímalánsbókinni.

Sjósundsdagur

Ég var komin í Nauthólsvík um hálffimm og fór fyrri ferðina í sjóinn um 16:40 í ca tvær mínútur. Þegar ég var á leiðinni upp úr var sjósundsvinkona mín að mæta á svæðið. Ég skrapp í heita pottinn á meðan hún gallaði sig upp og fór svo aftur í sjóinn með henni í fimm mínútur. Á eftir sátum við á spjalli í heita pottinum í uþb 50 mínútur. Við erum ekki búnar að hittast í þrjár vikur og höfðum um margt að spjalla.

Var annars í bænum þessa helgina svo enn er bið á annarri heimsókn til Hellu á árinu. Í gærmorgun skutlaði ég N1 syninum á vinnuvakt í N1 við Stóragerði rétt fyrir tíu. Fór inn á stöðina rétt upp úr tíu, strax eftir opnun, og fékk soninn til að selja mér nýjar rúðuþurrkur og skipta út þeim gömlu. Gömlu vinnukonurnar voru 75 og 65 cm en settar voru tvær 70 cm í staðinn. Fékk kaffisopa áður en ég dreif mig heim aftur.

Á laugardagsmorguninn fór ég út rétt upp úr klukkan hálfátta, sópaði vandlega af bílnum og var komin í Laugardalinn rétt áður en opnaði. Synti mína 500m, fór þrisvar í þann kalda, heitan pott, sjópottinn og gufuna áður en ég dreif mig upp úr og þvoði á mér hárið. Var mætt á Kristu Quest, til klipparans míns, rétt fyrir tíu. Hann var tæpan hálftíma að klippa endana og þurrka á mér hárið, hafði mjög gaman að því að dedúa við það. Þegar ég gerði upp við hann keypti ég auka sjampóbrúsa og festi næsta klippitíma fyrsta laugardaginn í september n.k. Áður en ég fór heim kom ég við hjá Atlantsolíu við Sprengisand en enginn esparantóhittingur var á döfinni þar sem vinkona mín var lasin. Um hálfþrjú tók ég 3 niður í bæ og var mætt í Lífspekifélagið stuttu fyrir þrjú til að hlusta á Önnu Valdimarsdóttur og hugleiðingar um hamingjuna m.a. Kalda potts vinkona mín mætti í félagið í fyrsta skipti og mjög sátt.  Kvöldinu áður mætti ég á erindi Gunnlaugs Guðmundssonar stjörnuspekings. Það var vel mætt og áhugaverður fyrirlestur um hvert við stefnum.

Næst síðasta bókasafnsbókin Dag einn í desember eftir Josie Silver er hálfnuð í lestri hjá mér. Skemmtilega sett upp og mjög áhugaverð.

Sundskróp

Ég var komin heim úr vinnu um fjögur og byrjaði á því að hella mér upp á kaffi, fyrstu tveir kaffibollarnir síðan á þriðjudaginn. Eftir að hafa fengið mér hressingu, hringt í pabba og spjallað einnig við strákana mína var rassinn á mér orðinn það þungur að mér hugnaðist ekki að fara út aftur og eiga eftir að sópa af bílnum. Fór frekar í þvottahúsið að setja í eina vél og ná í af snúrunum síðan í gær og hringdi svo 3 önnur símtöl. Lét samt kaldapotts vinkonu mína vita að ég ætlaði að skrópa í dag.

Við, kaldapottsvinkona mín, hittumst í sundi upp úr hálfsex í gær. Hún var komin aðeins á undan og var í sinni fjórðu ferð í þann kalda þegar ég mætti. Ég hafði ílengst í vinnunni til hálffimm og átti þá eftir að fara heim með strætó, bjalla í pabba og ná í sunddótið mitt. Þar sem ég var ekki komin heim fyrr en um fimm sleppti ég því að hella upp á.

Á þriðjudaginn var losnaði ég úr vinnunni um hálffjögur og fór beint út í landsbankaútibú í Austurstræti og sótti um rafræn skilríki í símann minn. Semsagt loksins búin að taka það skref til nútímans. Þetta gekk svo fljótt og vel fyrir sig að ég náði strætó, leið 13, frá Stjórnarráðinu ca 13 mínútum fyrir klukkan fjögur. Í gær notaði ég rafrænu skilríkin mín til að undirrita nýjan uppfærðan ráðningasamning við RB og gekk það eins og í sögu.

Enski boltinn, Liverpool að spila í kvöld

Gærdagurinn, konudagur, var innidagur hjá mér. Fór á fætur upp úr klukkan átta. Morguninn notaði ég m.a. í bloggskrif, prjónaskap og lestur. Hafði eitthvað verið að hugsa um að skreppa gangandi og mæta í tónlistarmessu kl.14 í óháðu kirkjunni en  rétt fyrir eitt byrjuðu sunnudagssögur og fyrri gestur dagsins var Þorbjörg Hafsteinsdóttir Ingveldardóttir og það var fróðlegt klukkutíma viðtal. Hlustaði á það og hélt áfram að prjóna. Rétt fyrir tvö fraus sjónvarpsrásin sem ég var að nota til að hlusta. Ákvað að slökkva og sökkva mér í bókina; Hefndarenglar eftir Eirík P. Jörundsson. Spennandi skáldsaga sem gerist m.a. á Súðavík og Ísafirði. Náði að klára þessa bók í gær.

Skellti mér í vöfflugerð fljótlega sem við mæðginin gæddum okkur á um fjögur. Í kvöldmatinn bjó ég til kjötbollur. Bræður voru nokkuð sáttir með það en annar þeirra benti mér þó á að það væri ekki bolludagur.

Var frekar hissa þegar vekjaraklukkan fór í gang kl. 6:42 í morgun, þá búin að sofa í einum dúr í uþb 7 tíma. Var mætt í vinnu klukkustund síðar. Öllum verkum dagsins var lokið stuttu fyrir þrjú og þá máttum við fara heim. Er heim kom byrjaði ég á því að hella mér upp á kaffi og fá mér smá hressingu áður en ég hringdi í pabba. Var komin í Nauthólsvík upp úr klukkan hálffimm og fór tvisvar í sjóinn. Hitti ekki sjósundsvinkonu mína en þegar ég var í seinni ferðinni í sjónum mætti skólasystir mín úr grunnskóla. Ég fór upp úr sjónum á undan henni en við sátum svo góða stund og spjölluðum í heita pottinum á eftir.

Síðasti sunnudagur febrúar hafinn

Ég skrapp í Lífsspekifélagið á erindi milli átta og níu á föstudagskvöldið. Tók þristinn frá Miklubraut við Klambratúnið um hálfátta. Stuttu áður en strætó kom vatt sér að mér spænsk kona sem byrjaði á því að spyrja hvort ég talaði ensku og hvort hún myndi komast að Hörpu ef hún tæki næsta strætó frá þessu skýli. Einnig spurði hún mig hvort hægt væri að borga fargjaldið með kreditkorti. Ég játaði fyrri tveimur spurningunum en neitaði þeirri þriðju. Fékk hana til að þiggja af mér 500kr. sem var rétt rúmlega fyrir fargjaldinu og svo urðum við samferða í þristinum alveg að MR þar sem ég fór út. Erindið í félaginu var um Martínus og var nokkuð áhugavert. Hátt í 40 manns mættu. Ég gaf mér ekki tíma til að fara upp í kaffi og spjall á eftir heldur dreif mig heim til að horfa á dr. Martin. Davíð Steinn var að vinna langt fram á kvöld og Oddur var í starfsmannateiti sem byrjaði á RoadHouse við Snorrabraut og færðist svo í heimahús í Breiðholti. Ég lánaði honum bílinn.

Þegar ég kom fram stuttu fyrir klukkan átta í gærmorgun beið mín miði á borðinu frá Oddi um að bíllinn væri í næstu götu, að hann væri smá tjónaður og Oddur væri miður sín. Hliðarspegillinn farþegameginn var horfinn, aðeins smá tætlur og svo hangandi pera stefnuljóssins sem virkaði reyndar ennþá. Mér fannst pínu kjánalegt að keyra bílinn svona en fór samt á honum í sund og esperantó og lánaði bræðrunum hann seinni partinn til að þeir kæmust á smá þorrablót til föðurforeldra sinna. Ég setti Oddi fyrir það verkefni að komast að því hvort til væri spegill á bílinn í umboðinu, hvort hægt væri að fá hann settann á sem fyrst og hvað það kostaði. Slys gerast, það eina sem ég var ekki alveg nógu hress með varðandi atvikið á bílnum að ungi maðurinn stoppaði ekki þegar hann varð var við dynk eða skell þegar hann var að sækja einn félaga sinn í þröngri einstefnugötu vestur í bæ svo við vitum ekki hvort hann og þá hversu mikið hann tjónaði aðra eign. Ég tók þristinn aftur um hálfþrjú og hitti tvær vinkonur mínar á öðru erindi um kenningar Martiníusar í félaginu í gærdag. Var komin heim aftur stuttu áður en bræðurnir lögðu af stað austur.

Hefði getað verið á árshátíð RB á Hótel Örk í Hveragerði frá klukkan fjögur í gær en það var nákvæmlega ekki neitt sem togaði í mig þangað. Skráði mig ekki á viðburðinn og er nokkuð viss um að ég muni ekkert sjá eftir því.

Hulda systurdóttir mín varð tvítug í gær 22.02.2020.

Helgarfríið byrjað

Á miðvikudaginn kom ég heim úr vinnu um hálffjögur. Byrjaði á því að hella mér upp á kaffi og var að velta því fyrir mér hvort ég ætti að skreppa í sund eða sjóinn. Pabbi átti svar við þessum vangaveltum og spurði mig, þegar ég hringdi í hann og velti þessu upp, hvort þetta væri sjósundsdagurinn minn? Hann veit sem er að ég fer aðeins einu sinni í viku í sjóinn og þá alltaf á mánudögum. Það var líka alveg kominn tími á sund, ekki farið í sund síðan sl. sunnudag. Var mætt í Laugardalinn um hálffimm. Byrjaði á kalda pottinum og fór svo á braut 2. Hugsaði um það að prófa skriðsund síðustu 50metrana af 500 metrum. Geri þetta stundum en hef aðeins einu sinni náð alla leið yfir, ekki mjög dugleg við að æfa mig og satt best að segja svindlaði ég á mér þarna með því að synda aðeins 400 metra.

Í gær var klukkan að slá fjögur þegar ég kom heim. Hitaði mér kaffi, spjallaði við þann soninn sem var heima og hringdi í pabba áður en ég fór að huga að sundferð. Kom við á bókasafninu og skilaði þremur af sex bókum. Freistaðist í að taka eina bók í staðinn. Klukkan var orðin fimm þegar ég mætti til leiks og kalda pottsvinkona mín var í annarri ferðinni í þeim kalda. Ég fór með henni næstu fjögur skipti í kalt og heitt og ákvað svo að sleppa sundinu og enda í gufunni. Ég er semsagt oft að svindla á sjálfri mér.

Um tíu í morgun mætti framkvæmdastjóri rekstrarlausna RB í K1 "höfuðstöðvarnar" með köku ársins og Ragnhildur forstjóri kom skömmu síðar með omnom-súkkulaði handa okkur stelpunum, sérmerkt hverri og einni, í tilefni konudagsins n.k. sunnudag.

Austurferðin var yndisleg

Ég fór á bílnum út á flugvöll, lagði á góðum stað og sendi Oddi snapp um það. Ég var mætt í flugstöðina ca tíu mínútutum áður en byrjað var að bóka inn í vél eða tæpri klukkustund áður en hún fór í loftið. Tíminn leið hratt og flugið gekk vel, var þó heldur lengra en áætlað var eða klukkustund og sex mínútur, í stað 55 mínútna. Ella og Aðalsteinn biðu eftir mér og við þurftum ekki að bíða lengi eftir töskunni minni því hún var fyrst á færibandið. Aðalsteinn hafði skroppið í ríkið fyrr um daginn og keypti m.a. heila hvítvínsbelju sem mér var tjáð að ég mætti ganga í að vild. Hann sótti í fyrstu glösin handa okkur vinkonum en fékk sér sjálfur bjór. Í kvöldmat buðu þér mér upp á dýrindis afgang af hreindýrasteik með grænmeti og sveppasósu. Seint um kvöldið kíktu kunningjahjón þeirra frá Höfn í smá heimsókn. Voru á einhverju skralli og komu með leigubíl á svæðið en þurftu svo að labba til baka á hótelið í frekar erfiðu göngufæri.

Meðferðis í ferðalagið tók ég tvær bækur af safninu og eina af jólabókunum. Ég fékk svo einnig lánað smásögusafnið Tími til að tengja eftir Bjarna Hafþór Helgason sem kom út fyrir síðustu jól. Náði að ljúka við að lesa allar sögurnar á mánudaginn. Lauk einnig við Hvítadauða eftir Ragnar Jónasson og skildi þá bók eftir fyrir austan. Svo er ég langt komin með aðra af bókasafnsbókunum sem ég tók með mér Konan í klefa 10 eftir Ruth Ware. Ég tók líka með mér afganga af kambgarni og hringprjón og byrjaði á enn einu sjalinu, afgangasjali.

Á sunnudaginn fórum við þrjú í sund um hádegisbil í afskaplega fallegu veðri. Veðrið var svo gott að við sátum góða stund í sólbaði í vaðlauginni eftir hvert sína sund- og pottaiðkun. Ella var sú eina sem ekki fór í neinn pott, synti sína 300 m og fór svo beint í vaðlaugina. Ég byrjaði á kalda pottinum, synti í 15 mínútur, fór aftur í þann kalda og endaði svo í vaðlauginni. Aðalsteinn byrjaði í heita pottinum, synti í nokkrar mínútur, sat góða stund í vaðlauginni en þegar hann fór sína aðra ferð í heita pottinn og það var merki um að við stöllur ættum að "drífa" okkur upp úr. Valdís kom í stutt innlit á sjötta tímanum, með Hermann son sinn.  Einnig var hún með þríltan kettling sem hún var að fara að senda með flugi til nýrra eiganda. Mæðginin og kisan stoppuðu ekki nema stutta stund. Eftir kvöldfréttir á Stöð2 bauð ég vinum mínum út að borða á Salt. Aðalsteinn var bílstjórinn en við Ella fengum okkur hvítvínsglas með matnum.

Starfsdagur var í grunnskólanum á mánudaginn og Ella kom heim um tólf, þurfti aðeins að skila af sér sínum 50%. Við spiluðum 2 umferðir af scrabble, aðra um miðjan dag og hina eftir kvöldmat og vann ég báða leikina, þann fyrri með miklum mun. Kennsludagur var í gær. Ella var svo komin heim um hálfeitt eftir að hafa borðað hádegismat í skólanum. Um tvö skrapp hún í ræktina í ca hálftíma og þegar hún var búin að fara í sturtu og jafna sig skruppum við í búðina. Fljótlega eftir búðarferðina spiluðum við eina umferð í scrabble og að þessu sinni vann Ella. Mér var svo skutlað á flugvöllinn rétt fyrir klukkan sjö í gærkvöldi og kvödd með virktum. Vélin fór í loftið 19:25 og lenti í Reykjavík 20:15. Þangað sótti Oddur mig.

Köld sturta

Allar sturtur í innibúningsklefum laugardalslaugarinnar voru kaldar í morgun. Ég var mætt í sund rétt upp úr klukkan átta. Fannst ekkert að því að fara í kalda sturtu áður en ég fór út í rútínuna; kaldur, 500m, kaldur, sjópottur, kaldur og gufubað. Sótti svo sjampóið mitt og stalst til að þvo á mér hárið í annarri sturtunni við gufuklefann áður en ég fór inn og skrapp í kalda sturtu. Hefði reyndar getað farið í sturtu í útiklefa kvenna en ég var ekki tilbúin til að þurfa að fara aftur í sundbolinn til að labba meðfram útilauginni og inn þar sem handklæðin mín, sem og "fata-dóta-skápurinn" var.

Úr sundi fór ég beint vestur í bæ í smá esperantohitting. Annars á ég bókað flug til Egilsstaða klukkan fjögur í dag. Ég var búin að bóka þessa ferð í janúar og hafði ætlað mér að ferðast létt þrátt fyrir að ætla að vera alveg fram á þriðjudagskvöld. Guggnaði á því og bætti við tösku í bókunina í gær, bæði héðan og þaðan. Til stóð að tvíburarnir færu í þorraboð til föðurfjölskyldunnar í kvöld en því var frestað vegna veðurs. Oddur er samt tilbúinn að hætta aðeins fyrr í vinnu í dag til að skutla mér í flugið. En hann er líka tilbúinn að sækja bílinn út á flugvöll seinni partinn eða í kvöld. Hann tók með sér aukabíllykla í vinnuna og ég þarf þá að muna að skilja eftir strætókortið hérna heima. Er ekki búin að ákveða hvora leiðina ég vel.

Er búin að lesa tvær bækur af sex af safninu og í gærkvöldi byrjaði ég á þriðju jólabókinni, Mannshvörf á Íslandi. Sú bók kom út fyrir jólin en það voru eiginlega mistök hjá mér að byrja að lesa hana því ég ætlaði aldrei að geta lagt hana frá mér, var búin að lesa 100 blaðsíður og klukkan langt gengin í eitt áður en ég gat með herkjum slitið mig frá lestrinum. Ætla að geyma bókina heima en taka með mér 4. jólabókina og tvær af safninu með mér austur.

Var heima allan daginn í gær skv. ákvörðun framkvæmdastjóra, en við úr kortadeildinni hættum ekki vinnu fyrr en klukkan hálfellefu á fimmtudagskvöldið var og vorum þá búnar að vinna upp megnið af föstudagsframleiðslunni. Ein af okkur vinnur bara til hádegis á fimmtudögum, er ráðin í 70% stöðu. Hún ákvað hins vegar að koma aftur um sjö og kom með tilboð fyrir fjóra frá Nings í leiðinni sem var alveg vel útilátið fyrir okkur allar fimm. Ég mætti í vinnu klukkan hálftólf þennan dag. Önnur af hinum fjórum skrapp í klippingu upp úr fjögur en kom aftur á sjöunda tímanum en þær voru tvær, fyrirliðinn og fyrrum fyrirliði sem voru í vinnunni frá því um hálfátta um morguninn til hálfellefu um kvöldið.

Færsla númer 2501

Var að koma heim úr morgunsundi. Mætti í Laugardalslaugina rétt rúmlega hálfsjö. Byrjaði þar á kalda pottinum í tvær og hálfa mínútu, synti 500 metra á 20 mínútum, fór aftur í þann kalda (gleymdi að taka tímann en ég var eitthvað lengur en í fyrri ferðinni), sat í gufunni í uþb 10 mínútur og fór í örstutt "sólbað" áður en ég dreif mig upp úr og heim.

Í gær var klukkan að verða sex þegar ég fór í sund. Hafði komið heim úr vinnunni um fjögur og var eitthvað að drolla. En ég dreif mig á endanum aðallega vegna þess að ég vildi ekki skrópa tvo daga í röð. Já ég skrópaði í sundið á þriðjudaginn var. Kom ekki heim fyrr en um sex og nennti engan veginn út aftur eftir kvöldmat. Ástæðan fyrir því að ég kom þetta seint heim var að um hálffjögur fórum við þrjár af fimm úr deildinni minni á Café Aleppó að hitta fyrrum samstarfskonu okkar. Hún og ein af okkur þremur voru ekki búnar að hittast í nokkur ár. Áður en við vissum af var klukkan farin að ganga sex. Hluti af leti minni varðandi sundskrópið var líka sú að ég var svo spennt fyrir þessum hittingi að ég svaf ekki nóg um nóttina.

Ég er búin að lesa jólabók númer tvö sem og skammtímalánsbókina. Og ég er byrjuð á safnbók númer tvö, Söru eftir Árelíu Eydísi Guðmundsdóttur. Þetta er hennar önnur skáldsaga en ég man að ég var mjög hrifin af fyrstu skáldsögunni hennar Tapað fundið.

Er annars að taka út styttingu vinnuvikunnar, hálfan dag í þessum mánuði. Mæti til vinnu um hálftólf á eftir og er búin að lofa mér að vinna þar til aukaverkefni dagsins sem og dk endurnýjun mánaðarins verður lokið svo kannski kem ég ekki heim fyrr en um og upp úr sjö plús/mínus klukkutími. En þangað til ég þarf að mæta ætla ég að nota tímann í lestur og afslöppun.

Óskar

Afmælismessan í óháðu kirkjunni í gær var mjög skemmtileg. Margt var um manninn eða amk 100 kirkjugestir. Ég var komin tíu mínútum fyrir klukkan tvö og fékk sæti hjá 4 fyrrum kórfélögum mínu og tvö önnur mættu og fékk annað þeirra sæti fyrir framan okkur en hitt fór upp á svalir. Guðni forsetti heiðraði söfnuðinn með nærveru sinni (fékk reyndar á slá lokatóninn í messuna um klukkan þrjú. Sr. Baldur Kristjánsson. sem var prestur yfir söfnuðinum í tvö ár á níunda áratugnum var með stólræðuna. Talaði blaðlaust og var hnittinn og skemmtilegur. Sr. Pétur, óháðikórinn og Kristján organisti skiluðu sínum hlutverkum með sóma. Og á eftir var boðið í veislu á báðum hæðum.

Klukkan var langt gengin í fjögur þegar ég lagði leið mína á bókasafnið í Kringlunni til að skila 4 bókum. Ekki tókst mér að passa upp á að taka ekki fleiri bækur heim heldur en ég skilaði og er ein af bókunum þar að auki með14 daga skilafrest. En tölvupóstur um útlán frá safninu, sendur kl. 16:07 í gær gefur upp 6 stk í útlán:Dag einn í desember eftir Josie Silver, Ritgerð mín um sársaukann efitr Eirík Guðmundsson, Sara eftir Árelíu Eydísi Guðmundsdóttur, Hefndarenglar eftir Eirík P. Jörundsson, Konan í klefa 10 eftir Ruth Ware og skammtímalánsbókin Fjötrar eftir Sólveigu Pálsdóttur. Eftir að ég kom heim byrjaði ég að lesa síðastnefndu bókina. Náði að slíta mig frá lestrinum eftir 50 bls. en það var ekki létt. Ég ákvað hins vegar að klára jólabók 2 áður en ég myndi halda áfram þessum spennulestri. Blómamánamorðin er ekkert síður spennandi bók og náði ég að ljúka við að lesa hana eftir að ég kom heim úr vinnu og sjóferð í dag.

Splæsti saffranbökum á okkur mæðgin í gærkvöldi. Oddur Smári pantaði og sótti heim og ég sendi hann með 3000 kr. og fékk 30 kr. til baka þegar hann kom með fenginn heim um sjö í gærkvöldi.

Sunnudagur

Ég var að sópa og skafa af bílnum klukkan átta í morgun, svo ég var mætt nokkuð snemma í Laugardalinn en var þó ekki alveg á hurðarhúninum. Byrjaði í kalda pottinum áður en ég synti í rúmar 15 mínútur. Þá fór ég aftur í þann kalda og dagaði svo næstum því uppi í sjópottinum, sat þar líklega lengur heldur en sundtímann. Dýfði mér svo þriðju ferðina í ca 3 mínútur í þann kalda, 10 mínútur í gufu og svo ca 1 mínútu í "sólbað" áður en ég fór upp úr. Kom heim aftur rétt fyrir klukkan tíu og var svo heppin að fá sama bílastæðið en það er ekki sjálfgefið nú til dags. Það kemur oftar fyrir að ég þurfi að leggja í öðrum götum í nágrenninu. Það er reyndar alveg í lagi því ég er oftast að safna skrefum.

Setti upp hafragraut og egg og hellti upp á kaffi og er nýbúin að ljúka við að drekka úr þriðja kaffibollanum. Stefnan er að skreppa í afmælismessu í Óháðu kirkjunni eftir hádegi og ef ég "nenni" ekki að fá mér göngutúr í kirkjuna gæti vel verið að ég notaði tækifærið og skilaði bókum á safnið. Er enn að lesa "Blómamánamorðin", aðeins hálfnuð með uþb 300bls. bókina og á enn eftir að lesa 3 jólabækur (tvær af þeim fékk ég óvænt í millijólaognýjársgjöf frá sjálfri mér). Þannig að ef ég skrepp á safnið í dag væri best ef ég væri skynsöm og tæki ekki fleiri bækur heldur en ég skila. Sjáum til með það.

Laugardagur

Þegar ég mætti í vinnuna í gærmorgun tjáði fyrirliði deildarinnar að það yrði mánaðarleg yfirferð á vél eftir hádegi og við yrðum aðeins þrjár í vinnu til tólf því hún hefði beðið þá fjórðu um að koma seinna til að sitja yfir til klukkan fimm. Sú úlnliðsbrotna var beðin um að sinna bókhaldsvinnu en fyrirliðinn og ég skiptum með okkur verkum á framleiðsluvélinni. Ég  hlóð inn fyrstu verkefnum dagsins og mataði vélina fram að kaffi, en í móttöku og skoðun framleiðslu eftir kaffi og til hádegis. Lukum daglegri framleiðslu rétt fyrir klukkan tólf. Eftir hádegi og að hefbundnum frágangi loknum bauðst ég til að vera aðeins áfram til að ljúka við að fjarlægja gula miða og telja inn nýjar kortabirgðir ásamt þeirri sem var í yfirsetunni. Við vorum búnar að því fyrir klukkan þrjú og þá dreif ég mig heim.

Í gærkvöldi skrapp ég í Lífsspekifélagið til að hlýða á erindi um Pýþagoras. Var komin heim aftur rétt áður en þátturinn um lækninn dr. Martin byrjaði.

Var mætt í sund um átta í morgun.Fór tvisvar í þann kalda, synti 400m og endaði í gufunni. Hitti tvær sem heita Sigrún og þá eldri var ég ekki búin að hitta síðan í nóvember svo það urðu fagnaðarfundir í gufunni. Dreif mig upp úr up úr klukkan níu og sendi Davíð Steini sms rétt áður en ég lagði af stað úr Laugardalnum því ég hafði lofað honum að keyra hann á N1 við Stórahjalla og að hann yrði mættur þar um hálftíu. Á heimleiðinni kom ég við á Atlantsolíustöðinni við Sprengisand og fyllti á bílinn sem reyndar var rétt rúmlega hálffullur af bensíni. Sendi líka spurningu til esperantovinkonu minnar. Þegar ég var búin að ganga frá sunddótinu heima sá ég að hún hafði svarað með þumli upp svo ég dreif mig vestur í bæ í smá esperantohitting. Stoppaði hjá henni í tæpa tvo tíma. Áður en ég fór heim aftur keyrði ég bílinn í gegnum þvottastöð og kom svo við í Krónunni við Granda.

Í stað þess að skreppa aftur í lífsspekifélagið í dag bjó ég m.a. til vöfflur.

Líður á vikuna

Úlnliðsbrotna samstarfskonan mætti til vinnu í morgun, með gipsi á vinstri sem hún þarf að hafa á í 3-4 vikur í viðbót við þessar tæpu tvær sem það er búið að vera á. Hún var skráð í og sinnti bókhaldsstörfum í dag. Framleiðslu lauk um hádegið en seinni hluti vinnudagsins fór í að telja inn nýtt plast sem og taka út gula miða.

Var komin heim rétt fyrir fjögur. Hellti mér upp á tvo bolla af kaffi, fékk mér smá hressingu og hringdi í pabba. Um hálffimm lagði ég af stað í sund. Kom við í Fiskbúð Fúsa og keypti, hrogn, roðlaust og beinlaust ýsuflak og óbarinn harðfisk. Hitti kaldapotts vinkonu mína í sturtu svo ég ákvað að byrja á kaldapotts ferðunum. Fór fimm ferðir í þann kalda, fjórar í þann heitasta, eina í sjópottinn, synti 400m og þvoði mér svo um hárið á eftir.

Í gær lauk ég við að lesa síðustu bókasafnsbókina, Níunda gröfin, bók upp á vel yfir 500 bls.Bókunum 4 af safninu þarf ekki að skila fyrr en 19. febrúar n.k. Ætla að reyna að halda aftur af mér í nokkra daga og ráðast betur á jólabækurnar. Samt er ég viss um að ég verði búin gera mér ferð á safnið, skila bókunum og fá nýjar lánaðar áður en næsta vika verður liðin.

Sjósundshettan mín ónýt

Vorum fjórar af fimm í vinnunni að sinna daglegum og mánaðarlegur verkefnum til klukkan að verða hálffjögur í dag. Tókum okkur auðvitað tuttugu mínútur í kaffipásu í morgun og 40 mínútur í hádegismat, en það voru einu pásurnar. Ég var komin heim fyrir fjögur og byrjaði strax á því að hella mér upp á ca 2 bolla af kaffi og fékk mér góða síðdegishressingu. Hringdi í pabba og tvö önnur stutt símtöl.

Var mætt í Nauthólsvíkina korter fyrir fimm. Sjósundshettan mín rifnaði í tætlur þegar ég var að laga hana til svo ég henti henni. Sú hetta var reyndar orðin nokkuð gömul, notaði hana áður í sundið. Var sem betur fer með ullarhúfu sem ég hef sett yfir hettuna. Veðrið var stillt og gott, og sjórinn 1° og frekar tær. Ég fór tvisvar í sjóinn en veit ekki alveg hversu lengi í hvort skipti, sennilega 3-5 mínútur. Sjósundsvinkona mín og tímavörðurinn var ekki á svæðinu í þetta sinn.

02022020

Dagsetninguna í dag má lesa bæði afturábak og áfram sé hún skrifuð í tölum. Áhugavert. Annars ætlaði ég rétt aðeins að tjá mig um kvöldmat gærdagsins. Pabbi átti stórt silungsflak í frysti sem ég tók út eftir kaffitímann í gær. Upp úr klukkan sex setti ég upp bygggrjón og bætti hálfum teningi af kjúklinga krafti út í. Skar niður einn lauk og grænt epli. Sauð upp á lauknum, bætti svo eplinu (afhýddu og í bitum) útí og slökkti undir. Bitaði silungsflakið í þrennt og kryddaði með karrý og steikarkryddi. Setti bitana með kryddhliðina niður í augnablik áður en ég sneri þeim við (á roðhliðina) tveim mínútum síðar tæmdi ég vatnið úr laukeplapottinum og hellti lauknum og eplunum yfir silunginn. Setti lok yfir pönnuna og slökkti undir. Þetta var algert sælgæti og verðlaunaði ég mig með því að fá mér hvítvínsglas með matnum. Pabbi var sammála um gæði matarins en fékk sér frekar rauðvínsglas. Það má!

Loksins helgarskrepp á Hellu

Í dag eru 37 dagar síðan annar í jólum var. Rétt upp úr hádegi þann dag kvaddi ég pabba og var ég komin heim til mín fyrir klukkan þrjú. Einhvern veginn hefur svo hist þannig á að það hefur ekki verið neitt spennandi ferðaveður og jafnvel lokað á köflum flestar helgar ársins. Janúar leið þrátt fyrir það frekar hratt og í rauninni mjög skrýtið að það sé strax kominn febrúar.

Skrapp í Lífsspekifélagið í gærkvöldi að hlusta á fyrirlestur á ensku um heilnæm áhrif á svokölluðum ZOUK-dansi. Fyrirlesarinn var áhugasöm rússnesk stúlka sem er búin að prófa þetta og stefnir að því að stofna svona danshóp hér á landi. Fyrirlesturinn hófst aðeins á eftir áætlun eða kl. 20:15 en honum lauk ekki fyrr en tuttugu mínútum fyrir tíu. Þá ákvað ég að láta gott heita, sleppti því að kíkja upp í kaffi og spjall og tók strikið eftir Ingólfsstrætinu og þurfti aðeins að bíða uþb eina mínútu eftir leið 13 heim við Þjóðleikhúsið.

Var mætt í Laugardalslaugina um klukkan níu. Byrjaði á því að kæla mig í 2 mínútur, synti svo 300 áður en ég fór aftur í þann kalda í tæpar tvær. Þá fór ég í 42°C pottinn og svo aftur í þann kalda í 3 mínútur. Þá ákvað ég að synda 200m áður en ég fór fjórðu og síðustu ferðina í þann kalda. Endaði svo í gufunni í rúmar 10 mínútur áður en ég fór í kalda sturtu og upp úr. Skrapp í Krónuna við Nóatún og gerði smá innkaup og kom einnig við í Kvikk við Öskjuhlíð og sníkti kaffi hjá Oddi áður en ég fór heim með vörurnar og sunddótið.

Um tólf lagði ég af stað austur. Gerði gott stopp í Fossheiðinni, enda ekki búin að koma þangað síðan um miðjan desember. Var komin til pabba upp úr klukkan hálfþrjú og hér verð ég næsta sólarhringinn eða svo.