Á morgun er mars-búinn :-)

Skrýtið hversu hratt tíminn þýtur áfram, jafnvel þótt ekki sé verið að gera neitt sérstakt.  Í gær tók ég því afar rólega að mestu leyti.  Stutta einfalda útgáfan er sú að ég las, drakk kaffi, vafraði um á netinu, saumaði út og horfði á sjónvarpið. Var lengi vel ein í rólegheitum þótt ég færi nú ekki tiltakanlega snemma á fætur en mun fyrr en strákarnir enda fóru þeir örugglega seinna að sofa heldur en ég.

Lauk við bókina eftir Sólveigu Pálsdóttur sem ég minntist á í pistli gærdagsins og var hún spennandi allt til enda.  Er með margar bækur á náttborðinu og að lesa í þeim fjórum amk. Tvær með smásögusöfnum, ein með gamansögum af hrossum og hrossafólki og svo byrjaði ég í gærkvöldi á tvímála útgáfu bókarinnar Skólaus á öðrum fæti eftir Ana María Matute þýdd af Kristni R Ólafssyni.  Les aðeins íslenska hlutann en glugga stundum mér til gamans í spænska hlutann hægra meginn á opnunum eingöngu til að skoða ritmálið.

Hringdi í pabba og spjallaði aðeins og seinna hringdi svo mamma í mig og spjallaði lengur.  Ágætis hljóð í þeim báðum.

Fyrsti virki frídagurinn úr launavinnunni

Fyrst ætla ég að segja aðeins frá nokkru sem ég skrifaði ekki um í færslu gærdagsins um laugardaginn. Það var nefnilega svo að þegar ég kom heim úr heimsókninni frá Vífilsstöðum var Davíð Steinn að enda við að hella upp á kaffi og var þar að auki með heitt brauð í ofni, ætlað sér og mér.  Oddur Smári var í æfingarakstri og kom ekki fyrr en um það bil sem ég dreif mig í kjötsúpugírinn.

Gærdagurinn var afar rólegur hvað mig varðar.  Gerði heiðarlega tilraun til að sofa út en mig minnir að ég hafi verið byrjuð að lesa fyrir klukkan níu og farin að ramba aðeins um á netinu um tíuleytið. Gerði meðvitað sem allra minnst en hugsaði reyndar um það að skynsamlegast væri að bregða sér í örstutta göngu.  Ekkert varð samt úr því, fór ekki út fyrir dyr. Náði að klára Afturgönguna eftir Jo Nesbø. Spennan í þeirri bók er á köflum svo óbærileg að ég varð stundum að leggja hana frá mér og fara að gera eitthvað allt annað.  Um þrjú hellti ég loksins upp á kaffi og bjó til vöfflur úr hálfri uppskrift.  Davíð Steinn var akkúrat að skreppa út um það leiti sem ég var að byrja á vöfflugerðinni en ég lofaði honum því að það yrði afgangur þegar hann kæmi aftur.

Hafði afgang af kjötsúpu í kvöldmatinn og horfði svo á eitt og annað í sjónvarpinu fram eftir kvöldi með lokaða saumatöskuna við hliðina á mér.  Er annars strax byrjuð á nýrri bók, eina af þeim sem ég fékk lánaða af safninu fyrir nokkrum dögum, Hinir réttlátu eftir Sólveigu Pálsdóttur.  Fyrir nokkrum misserum las ég fyrstu skáldsögu sama höfundar, Leikarinn og nú er komin út ný skáldsaga, Flekklaus sem ég mun væntanlega einnig sækja í að lesa.  Höfundurinn nær mér alveg með góðum stíl, spennu og kímni í bland og þannig gerð að það er vel hægt að lesa og lesa á meðan blaðsíðurnar endast.  Gerði það reyndar með vilja að gera hlé á lestrinum í bili margra hluta vegna en mun sennilega ekki geta haldið mig lengi frá bókinni.  Fyrsta og önnur bókin eru um sama lögregluhópinn og um sakamál sem leysa þarf og það er líka farið út í einkalíf lögreglufólksins sem er misjafnt og gerir persónurnar í sögunum trúverðugri.

Pálmasunnudagur

Ég var komin á fætur upp úr átta í gærmorgun og vöknuð nokkuð löngu áður miðað við að það var laugardagur.  Reyndar var ég örugglega búin að sofa í rúma sjö tíma því ég var sofnuð vel fyrir miðnætti.  Ég var eitthvað að spá í hvort ég næði því að komast aðeins í sund áður en þetta "þriggja mánaða, handstýrða" færi af stað en það tókst ekki.  Kveikti á tölvunni í staðinn og dundaði mér einnig við ýmislegt hér heima áður en kominn var tími til að skreppa yfir til norsku esperanto vinkonu minnar. Þar sem vikan kom ekki í lúguna fyrr en eftir að ég var farin í vinnuna á föstudagsmorguninn ákvað ég að grípa blaðið með mér í heimsóknina.  Það varð til þess að mestur tíminn fór í að leysa aðalkrossgátu blaðsins og tókst okkur að klára að fylla í alla reiti og finna lausnarorðið.  Á eftir skelltum við okkur í rúmlega hálftíma göngu meðfram sjónum, í áttina að Gróttu og til baka.

Skrapp í Krónuna og keypti inn eftir lista.  Oddur Smári gekk frá vörunum fyrir mig og ég hringdi í Böddu til að láta hana vita að ég ætlaði að heimsækja hana á "nýja" staðinn og spurði í leiðinni hvort ég ætti ekki að taka með mér eitthvað lesefni.  Dreif mig strax af stað en varð reyndar að koma við hjá Atlantsolíu þar sem bensínljósið á lánsbílnum logaði.  Badda sat á kaffistofunni og beið eftir mér.  Ég þáði einn kaffibolla áður en við fórum inn í herbergið hennar, þar sem eru þrjú önnur rúm.  Hjálpaði henni úr inniskónum og breiddi yfir hana.  Las fyrir hana tvær smásögur eftir Guðmund L Friðfinnsson og eitt viðtal í helgarfréttablaðinu.  Við spjölluðum að sjálfsögðu líka um allt og ekkert.

Kom heim upp úr klukkan fjögur og horfði á seinni hálfleikinn í landsleiknum áður en ég bjó til kjötsúpu í stærsta pottinum handa okkur mæðginum.  Súpan ætti að duga í nokkra daga.  :-)

Smá páskaleyfi og styttra sundfrí

Ég var mætt á lánsbílnum í vinnuna nokkrum mínútum fyrir sjö.  Morgunverkin voru aðeins úr takti við það sem venjulegt er en okkur hinni morgunvaktinni tókst að leysa úr því ásamt þeirri sem var á næturvakt á konsúl.  Framleiðsluvélin var miklu seinni í flestum aðgerðum svo það varð ekki umflúið að láta kíkja á vélina. Biðum þó með alla ákörðun þar til fyrirliðinn og fleiri voru mættir enda kom það á daginn að það er að verða til nýr þjónustusamningur.  Sem betur fer var hægt að halda áfram og í næsta verkefni í röðinni gekk reyndar mun betur.  Vélin var svo stillt síðar um morguninn og hagaði sér eitthvað betur eftir það.  Ég var búin að fá það staðfest að ég gæti farið í frí næstu þrjá virka daga og náði, að ég held, að skilja eftir svotil hreint skrifborð.  Klukkan var líka alveg að slá í hálfþrjú þegar ég stimplaði mig út.

Strax og ég var sest inn í bíl hringdi ég eitt símtal.  Reyndar var ekki svarað hinum meginn svo ég brá á það ráð að keyra lánsbílinn í gegnum snerilausu þvottastöðina við Skúlagötu og hringdi í pabba á meðan ég beið eftir að hreinsun lyki.  Ég var rétt að leggja af stað út í umferðina aftur þegar sá sem ég reyndi fyrst að hringja í, hringdi til baka til að segja mér að hann gæti skotist heim til að afhenda mér ákveðnar vörur sem ég er áskrifandi að.  Það kom sér vel því þessar vörur koma mánaðarlega en ég hef sótt tvær sendingar í einu, annan hvern mánuð, amk síðustu 3-4 skiptin.

Eftir að hafa sótt kassana tvo fór ég heim, hellti upp á kaffi og bjó til vöfflur úr hálfri uppskrift.  Oddur skaust fyrir mig út í Sunnubúð eftir rjóma.  Ég bað hann um að kaupa 1/4 en þar sem hann vissi að ég ætlaði að hafa rabbarbaragraut í kvöldmatinn ákvað hann að kaupa frekar 1/2 líter.  Sniðugur, og þetta reyndist vera hin besta ákvörðun hjá honum.

Að loknum kvöldmat og fréttum skruppum við Oddur Smári í sund í Laugardalinn.  Ég fyllti á 20 skipta sundkortið hans en svo hittumst við ekki aftur fyrr en við vorum á leið upp úr lauginni.  Ég sá aðeins til hans en hann fór aldrei i laugina og í aðra potta heldur en ég.  Davíð Steinn hafði farið í sund með vini sínum kvöldið áður og var með aðrar áætlanir á prjónunum í gærkvöldi heldur en að skreppa aftur í sund.

Færsla no. 1944 fyrir mömmu og sjálfstæða Íslendinga :-)

Strætó tók mig upp í við Sunnubúðina ca korteri fyrir sjö í gærmorgun og hleypti mér út á sjöundu stoppitöðinni, við Hörpu um það bil tíu mínútum síðar.  Tíminn til tvö var nokkuð fljótur að líða. Þegar vinnu lauk labbaði ég við í Sundhöllinni og gerði klukkutíma stopp þar. Synti fleiri ferðir en oft áður en það er styttra á milli bakkanna heldur en í Laugardalnum svo líklega synti ég ekki mikið meira en 300m. Fór tvisvar í gufu og "sólaði" mig á milli og eftir áður en ég fór upp úr.  Aldrei þessu vant steig ég á vigtina og ég er ekki frá því að síðast liðna tæpu fimm mánuði hafi ég synt af mér hátt í tuttugu kíló. Það er nú bara all nokkuð miðað við að ég hef ekki verið að gera neitt annað og meðvitað varðandi þyngdarmálin.  Er bara glöð með að þyngdin sé aftur komin niður í tveggja stafa tölu og ætla að vara mig á að segja eina ferðina enn "Aldrei aftur yfir 100" og sjá aðeins til hvort það virki betur til að ég haldi mig fyrir innan 100 og komist jafnvel niður fyrir næsta tug eða tvo. Þarf reyndar ekki að losa mig við nema 4 kíló í viðbót til að komast að fyrra takmarkinu og það mun takast ef ég einbeiti mér en einblíni samt ekki of mikið á verkefnið.

Þegar ég kom heim í gær um fjögur færði ég lánsbílinn úr innkeyrslustæðinu um tvö stæði til vinstri. Það var það eina sem ég hreyfði bílinn í gær.  Oddur fór með pabba sínum í æfingaakstur og heimsókn til hans.  Davíð Steinn sá um kvöldmatinn en fór svo í sund með einum vini sínum. Ég horfði aðeins á sjónvarp, las og saumaði út og passaði mig á að vera komin upp í rúm fyrir hálfellefu. Las aðeins meira en ekki svo lengi. Er annars að lesa nýjustu bókina um Harrý Hole sem ég keypti á tilboðsverði fyrir bókaklúbbsfélaga í Forlaginu fyrir nokkru.

Vor í lofti, dag og dag

Hafði nokkrar áætlanir á prjónunum eftir vinnu í gær sem kröfðust þess að ég væri á lánsbílnum. Var mætt rétt fyrir sjö og stimplaði mig út aftur ca tuttugu mínútum yfir tvö.  Ein af áætlum mínum gekk ekki upp að þessu sinni svo ég lagði leið mína beint í Laugardalinn.  Var búin að synda þrjár x 50 ferðir þegar einn vinnufélagi minn ávarpaði mig.  Við skiptumst á nokkrum orðum en svo fór hann í sjópottinn sem ku vera kominn í samt lag og ég hélt áfram að synda um stund.  Eftir nokkrar ferðir í viðbót elti ég vinnufélagann upp og sannreyndi um leið að sjópotturinn var kominn í lag.  Spjallaði í nokkrar mínútur en skrapp því næst aðeins í gufu áður en ég fór upp úr og heim í bili.

Mætti á kóræfingu um hálfsex og þar var m.a. farið í páskadagskrána.  Þetta er aðeins öðruvísi en venjulega þar sem ég æfi alfarið orðið með sópraninum.  Tveggja tíma æfing var ekki lengi að líða. Fór heim með nóturnar.  Spilakvöld var hjá strákunum og opið hús í risinu vegna sölu þeirrar íbúðar.  Ég hringdi í einn frænda minn til að athuga hvernig stæði á og skrapp í heimsókn í kjölfarið. Vel var tekið á móti mér og voru hjónin bæði heimavið.  Heilmikið var spjallað en ég stoppaði í tæpa tvo tíma því ég vildi ekki fara of seint að sofa vegna morgunvaktarinnar.

Sjópotturinn kominn í lag

Ég bauð strákunum far í skólann á lánsbílnum í gærmorgun þar sem það var eina átta til fjögur vaktin mín í vikunni.  Vinnudagurinn leið mjög hratt og ég var búin á réttum tíma.  Þá dreif ég mig í fiskbúðina við Sundlaugarveg og keypti hrogn, ýsu og bleikju.  Næst lá leiðin í sundlaugina í Laugardalnum.  Fyrir utan hitti ég konu sem ég hef ekki hitt lengi og ég gaf mér tíma til að knúsa hana.  Hún var að bíða eftir e-m og í miðju spjalli fékk hún þau skilaboð að sú sem hún átti að hitta þarna væri komin inn.  Synti um 400 og fór því næst í gufu.  Gaf mér ekki svo langan tíma en þetta var samt virkilega gott og notalegt.

Svo skrapp ég heim, gekk frá sunddótinu og tók með mér bókasafnspokann aftur út í bíl.  Skilaði fjórum bókum af fimm og þegar ég kom aftur heim með fimm bækur í viðbót framlengdi ég skilafrestinum á þeirri sem ég hafði skilið eftir heima.  Hafði hrogn og ýsu í matinn.  Um það leyti sem Castle var að byrja tók ég aðeins á móti eiganda risíbúðarinnar rétt til þess að fylla út nauðsynlegt um stöðu hússjóðsins þar sem íbúðin er í söluferli.  Náði svo að horfa á megnið af Castle-þættinum.

Átta til fjögur í dag.

Þessa vikuna er ég að vinna flesta daga milli klukkan sjö og tvö fyrir utan daginn í dag. Í gærmorgun fór ég með strætó í vinnuna.  Vagninn var mínútu fyrr á ferðinni en það gerði ekkert til fyrir mig þar sem ég var komin tímanlega út í skýli við Sunnubúð.  Aftur á móti var ég svo utan við mig að ég fór út einni stoppistöð of snemma eða rétt við Sólfarið í stað þess að fara alla leið að Hörpu.  Það gerði heldur ekki til því ég var ekki lengi að arka þennan spöl og stimplaði ég mig inn á slaginu klukka sjö.  Öllu verra var að ég hélt áfram að vera utan við mig fram eftir morgni. Það hafði sem betur fer ekki alvarlegar afleiðingar en setti óneitanlega skrýtna vinkla á annars niðurnjörvað morgunstarfið í kortadeildinni.  Stimplaði mig út korter yfir tvö.

Hafði hugsað mér að labba heim en koma samt við í Sundhöllinni. Þar sem ég arkaði eftir Skúlagötunni fékk ég þá hugmynd að athuga hvort fyrrum kórsystir mín, sem býr við Lindagötu, væri heimavið. Svona ákvarðanir geta fallið um sjálfar sig ef ekki hefur verið hringt á undan sér eins og um var að ræða í mínu tilviki.  Ég var hins vegar svo heppin að altliljan mín var heima.  Hún bauð mér að koma með sér niður og fá mér kaffi með sér, sem ég þáði.  Við höfðum um nóg að spjalla og klukkutíminn leið hratt.  Hún var á leið í heimsókn til dóttur sinnar og ég hélt för minni áfram að Sundhöllinni.

Man ekkert hvenær ég skilaði mér heim eftir vinnu, heimsókn og sund en það var sennilega á sjötta tímanum.  Hafði til kvöldmatinn, horfði á fréttir og skrapp svo aðeins til hennar Böddu minnar.

Sólmyrkvinn sem og gærdagurinn

Á föstudagsmorguninn var skutlaði ég bræðrunum í skólann um átta og síðan lá leiðin beint í Laugardalinn.  Ætlaði svo sem ekki að stoppa neitt lengi en þegar til kom var ég mun lengur en vanalega.  Synti kannski ekki svo mikið eða einungis 300metra en þegar ég kom út úr gufunni á eftir bauð einn sundlaugarstarfsmaður mér að kíkja á sólmyrkvann í gegnum rafsuðuhjálm.  Það varð til þess að ég fór aftur inn í gufu í von um að fá að kíkja betur á sólmyrkvann um það leyti sem hann væri að ná hámarki.  Klukkan var ekki nema korter, tuttugu mínútur yfir níu þegar ég kom aftur úr gufunni og þá var farið að dreifa álþynnum (gylltum öðrum meginn og silfruðum á hinni hliðinni) fyrir þá sundlaugagesti sem vildu.  Ég þáði eina svona þynnu, braut gylltu hliðina inn og skoðaði svo myrkvann allt þar til hámarkinu var náð.  Þá snöggkólnaði mér svo að ég sá mitt óvænna og dreif mig inn í sturtu.  Ákvað svo að kaupa mér kaffi og banana áður en ég færi heim.  Kaffið var reyndar frítt þennan morguninn.  Ég settist með málið og bananann hjá fólki sem sest greinilega niður saman eftir smá sundferðir, potta og gufu.  Ég var boðin velkomin í hópinn og var líka svo heppin að fá að skoða myndir sem ein konan hafði tekið af sólmyrkvanum.

Upp úr tólf fékk ég þá hugmynd að fá mér göngutúr í vinnuna og var ég ekkert að velja allra stystu og beinustu leiðina en svo sem ekki þá lengstu heldur.  Gönguferðin tók mig rétt tæp þrjú korter og var ég sem betur fer með auka bol í bakpokanum því það var "Önnufoss" á bakinu á mér.

Í gærmorgun var ég komin á fætur fyrir tíu þrátt fyrir að hafa ekki farið að sofa fyrr en um hálfþrjú um nóttina.  Las nefnilega um stund eftir að ég kom heim af árshátíðinni.  Fann aðeins fyrir því að hafa dansað svona mikið og ákvað að skella mér í Laugardalinn, aðallega til að athuga hvort gufan myndi ekki mýkja mig aðeins upp.  Synti samt eitthvað smávegis.  Fljótlega eftir að ég kom heim úr sundinu var kominn tími til að dubba sig upp og drífa sig í upphitun fyrir fermingarmessu.  Fermdar voru fimm stúlkur.  Um leið og messunni lauk fór ég heim, skipti um föt og var klár í að drífa mig austur. Strákarnir höfðu báðir ætlað að fara með mér en þegar til kom varð Oddur að segja pass því hann var að vinna að verkefni sem varð að skilast fyrir miðnætti.  Davíð Steinn kom hins vegar með.  Við komum austur um hálffimm og stoppuðum í tæpa fjóra tíma.

Árshátíð - seinni partur

Rúta, til að koma okkur á Grand Hólel þar sem árshátíðin sjálf var haldin, sótti okkar hóp og annan fyrirpartýshóp til.  Mörg úr okkar fyrir partýi voru reyndar á einkabílum, ekki að drekka og komu sér sjálf yfir á Grand.  Þar beið okkar fordrykkur og smá einsöngur.  Ég var nokkuð dugleg að ganga aðeins á milli og heilsa upp á vinnufélaga sem ég hitti ekki oft þar sem flestir í fyrirtækinu eru með vinnustöðvar við í turninum við Katrínartún en ég vinn í deildinni sem varð eftir á Kalkofnsvegi.  Um átta var hleypt inn í aðalsalinn.  Þegar allir voru búinir að finna og setjast við borðin sín kynnti formaður SRB veislustjóra kvöldsins sem tók þegar við keflinu.  Á milli rétta kynnti hann skemmtiatriði kvöldsins, fór sjálfur með gamanmál, stjórnaði happdrætti og söng.  Maturinn var góður, borðfélagarnir frábærir en eftir borðhald kynnti veislustjórinn hljómsveit kvöldsins, Á móti sól, sem byrjaði á því að spila undir söng veislustjórans og var svo að stanslaust til klukkan rúmlega eitt.  Stuðið var mikið.  Ég var reyndar ekki alveg allan tímann á dansgólfinu en megnið af þessum tíma.  Það rann af mér lýsið, ég var örugglega heit og rauð í framan og dansaði mig gersamlega upp að hnjám, þakklát fyrir að vera ekki á háhæluðum skóm.  Ég var svo heppin að mér bauðst far heim með einni sem vinnur á minni deild.  Hún skutlaði fyrst heim tveimur öðrum á tvo staði vestur í bæ og það var mikið fjör í bílnum hjá okkur á meðan.  Gærdagurinn var semsagt í tveimur orðum skrifað, MJÖG SKEMMTILEGUR.

Nú ætla ég aðeins að víkja að seinni part nýliðinnar vinnuviku, svona rétt áður en ný vinnuvika hefst. Það féllu niður tímar hjá Oddi Smára á fimmtudaginn svo var heima.  Ég skutlaði Davíð Steini í skólann um átta og dreif mig svo í sund í Laugardalinn.  Þegar ég kom upp úr var klukkan níu. Hringdi í soninn sem var heima til að athuga hvort hann væri vaknaður, klæddur og tilbúinn að taka á móti viðgerðarmanninum.  Það reyndist vera og ákvað ég sjálf að skreppa á skattstofu Reykjavíkur til að sækja um endurgreiðslu á virðistauka af vinnu við endurnýjun baðherbergisins.  Var búin að reyna að gera þetta rafrænt en fann ekki réttu útfyllingarskjölin.  Ég fékk frumrit til útfyllingar og náði að fylla það út ca 90%.  Fékk aðstoð með að ljúka útfyllingu og var svo beðin um stimplaða reikninga sem sönnuðu að ég hefði borgað fyrir vinnuna.  Ég spurði hvort ég mætti senda þetta rafrænt og það var í góðu lagi.

Þegar ég kom heim var búið að skipta um ljósleiðarabox og allt komið í lag sem hafði verið í ólagi í tæpa viku.  Vann skjal úr einkabankanum varðandi greiðslur fyrir baðherbergisframkvæmdirnar og sendi rafrænt til rsk.is  Horfði svo á síðasa Castleþátt með Oddi áður en ég fékk mér eitthvað að borða og dreif mig með strætó í vinnuna.  Var mætt um eitt og leið vinnutíminn afar hratt.  Síðasta klukkutímann lentum við sem vorum á seinni partsvaktinni í óþarfa veseni en náðum að klára og ganga frá öllu fyrir klukka sjö.  Þá átti ég þó eftir að skrifa smá skilaboð til morgunfólksins og það tók mig um tuttugu mínútur.  Ég rétt missti því af leið 13 og tók næsta vagn og skiptimiða upp á Hlemm.  Á meðan ég beið annað hvort eftir 11 eða 13 hringdi Oddur Smári og spurði hvort ég væri ekki að koma heim því maturinn væri alveg að verða tilbúinn.  :-)

"Á móti sól"

Gærdagurinn var langur og skemmtilegur.  Ég hafði stillt vekjarann á að vekja mig klukkan hálfátta til að vera mætt í sund strax um átta leytið.  Ég vaknaði sjálf klukkan hálfsjö.  Hafði litla eirð í mér til að kúra svo ég dreif mig bara á fætur og ákvað að setja inn blogg-pistil eftir rúmlega viku hlé.  Ég var aðeins lengur að skrifa heldur en ég ætlaði mér þannig að klukkan var orðin átta áður en ég lagði af stað í Laugardalinn.  Var tæpan klukkutíma að synda, gufast, þvo mér og bera á mig.  Rétt kom heim upp úr hálftíu til að hengja upp sunddótið og setja í eina þvottavél.

Á slaginu tíu var ég mætt til norsku esperanto vinkonu minnar en hún hafði verið í sambandi við mig kvöldið áður til að biðja mig um að koma klukkutíma fyrr.  Það hentaði mér alveg ágætlega. Við vorum nokkuð duglegar í því sem við erum að bralla saman.  Rétt fyrir tólf var ég stödd við Sorpu í röð bíla og beið eftir að staðurinn opnaði svo ég gæti "tekið til" í bílnum.  Var að henda smá dóti sem var búið að vera í bílnum í nokkra daga.  Síðan skrapp ég aðeins í Krónuna og keypti inn það nauðsynlegasta. Oddur Smári gekk frá vörunum þegar ég kom heim á meðan ég gekk frá í þvottahúsinu.

Um tvö hafði ég hugsað mér að skila inn bókum á Kringlusafnið en hætti snarlega við þegar ég mundi eftir því að það er Kringlukast þessa dagana og því meiri umferð en vanalega.  Kíkti aðeins á Böddu mína og var ekki búin að stoppa lengi þegar yngsta dóttir hennar, nafna mín og frænka, leit við. Alltaf gaman að hitta þær mæðgur en hundleiðinlegt fyrir gömlu konuna að þurfa að vera á sjúkrahúsi og vita ekki hversu lengi hún þarf að vera þarna.

Klukkan að verða hálfsex var ég búin að klæða mig upp í sparifötin og rjóða smá lit á varirnar. Var sótt nokkru seinna af mæðgum.  Mamman vinnur með mér en dóttir hennar er nýkomin með bílpróf og hún tók við bíllyklunum eftir að við vorum komnar að staðnum þar sem fyrirpartýið fyrir árshátíðina var haldið.  Þar var skemmtilegt fólk og þónokkuð fjör.  Því miður verð ég að láta staðar numið hér að sinni þar sem ég á að vera mætt í upphitun fyrir fermingarmessu klukkan eitt.  En enda bara á því að segja að fjörið var rétt að byrja.  :-)

Afmælisparturinn og kannski meira til

Eftir vinnu og kvöldmat á mánudagskvöldið var skrapp ég aðeins til gömlu konunnar á öldrunardeildinni í Fossvoginum.  Stoppaði ekkert svo lengi en mig minnir að klukkan hafi verið langt gengi í tíu þegar ég kom heim aftur.  Þá dreif ég mig í smá afmælisbakstur.  Bakaði tvo ein hvers konar kakóbotna úr einni uppskrift áður en ég fór að sofa.

Klukkan sjö á afmælisdag okkar tvíburahálsystranna var ég búin að búa mér til kaffi sem ég notaði að hluta til út í kakó-flórsykurskrem sem ég setti á milli kökubotnanna og einnig yfir kökuna.  "Gafflaði" töluna 47 ofan á.  Skutlaði bræðrunum í skólann og skrapp í sund í Laugardalnum.  Veðrið var yndislegt og gaf ég mér góðan tíma til að njóta þess.  Var samt komin heim aftur um tíu. Hringdi í pabba og systur mína og í hádeginu hringdi mamma í mig og óskaði mér til hamingju með 37 árin. Og ég sem var 45 ára bæði í fyrra og hittifyrra.  Þessi tími er hvort sem er alltaf að æða frá manni og maður bara er og það virðist sem gær, í dag og á morgun blandist saman í núinu.  Ég fór á lánsbílnum í vinnuna.  Reyndi að senda hugarskilaboð um laust stæði á neðra planinu en sá ekkert þegar ég keyrði framhjá.  Lagði í gjaldsvæði örskammt frá og þegar ég trítlaði yfir í vinnuna með dótið mitt,afmæliskökuna og fleira sá ég eitt laust stæði innarlega á planinu.  Hefði sennilega séð það ef ég hefði komið að Skúlagötumeginn en ekki ekið Ingólfsstrætið.  Á vinnustaðnum var búið að skreyta básinn minn með blöðrum og fiðrildaútklippum.  Virkilega flott og skemmtilegt.  Vinnudagurinn leið afar hratt en ég kom ekki að framleiðslunni fyrr en eftir afmæliskaffið.  Kom heim um hálfátta og þá var Davíð Steinn að byrja að elda lasanja í afmælismatinn.  Oddur Smári lét mig og vita að það væri til kaffi.  Þessir synir mínir eru einstakir og þeir hjálpuðu mér alveg helling við undirbúning matarboðsins helgina áður.  Matur var borðaður um níu og um tíu fengum við okkur smá bita af ostaköku.  Ég slapp eiginlega við alla fyrirhöfn og var virkilega sátt við afmælisdaginn.  Enn var net, sími og sjónvarp ekki komið í lag en fyrir mig gerði það minnst til.

Á miðvikudagsmorguninn fengu tvíburarnir aftur far í skólann og að þessu sinni mætti ég í vinnuna klukkan átta. Þar sem ég er á kóræfingum klukkan hálfsex get ég ekki unnið milli 13 og 19 þá daga. Klukkan var um hálffimm þegar ég stimplaði mig aftur út og lagði þá leið mína beint í Sundhöll Reykjavíkur.  Synti örfáar ferðir og skrapp aðeins í gufuna.  Allt í allt var ég líklega rétt rúmlega hálftíma að þessu.  Hringdi í strákana og fékk þær fréttir að þeir væru á leið á spilakvöld í Tækniskólanum.  Einnig sagði Davíð Steinn að það hefði hringt í hann viðgerðarmaður fyrr um daginn og hann ætlað að koma við þá.  Þar sem enginn var við heima var nýr tími ákveðinn morguninn eftir. Ég fór því beint á kóræfingu úr sundinu, hringdi örstutt í pabba áður en ég fór inn.  Tveir tímar voru ekki lengi að líða en þar sem ég vissi að það væri engin kominn heim dreif ég mig í Fossvoginn og stoppaði til hálftíu.

12.-21.

Loksins, loksins er ég "komin aftur".  Ég fór reyndar aldrei neitt langt en ljósleiðaraboxið hætti alveg að virka hjá mér fyrir rétt rúmri viku síðan.  Heimasíminn, sjónvarpið og netið lá því niðri í nokkra daga.  Þetta var á föstudaginn fyrir rúmri viku.  Þá stóð til hjá mér að skreppa á fyrirlestur í lífsspekifélaginu með norsku esperanto vinkonu minni.  Hún hringdi í gemsann upp úr klukkan hálfsjö og tjáði mér að ein önnur vinkona hennar hefði verið að vinna fjóra miða á síðustu Tom Jones tónleikana í Austurbæ og spurði hvort ég vildi koma með þeim þangað.  Ég var alveg til í að taka U-beyju og sé svo sannarlega ekki eftir því þótt fyrirvarinn væri í styttra lagi.  Ég sótti Inger um hálfátta og við fengum stæði á fínum stað í Norðurmýrinni.  Næstu þrír tímar liðu ógnarhratt og ég skemmti mér konunglega.

Morguninn eftir gekk þetta fræga óveður yfir landann.  Ég skutlaði Oddi Smára yfir í HR rétt fyrir níu og þar var hann langt fram á dag að taka þátt í forritunarkeppni.  Veðrið var orðið miklu skaplegra um fimm þegar hann var loksins búinn og hann labbaði heim.  Ég var í ýmsum útréttingum eftir hádegið.  Lét skreyta afmælisgjöf frá kórnum til einnar nöfnu minnar í KÓSÍ sem var búin að bjóða okkur söngfélögunum ásamt fullt af öðru samferðafólki hennar að halda með henni upp á árin 70 um kvöldið. Afmælisdagurinn var reyndar þann 16. en það var mánudagur.  Sótti vörur til tvíburahálfsystur minnar og fékk í leiðinni að fylla á símana hjá sonum mínum.  Eftir að hafa þegið kaffi og með því og spjallað um stund sótti ég afmælisgjöfina úr skreytingu. Skrapp í heimsókn til hennar Böddu minnar og þegar ég kom þaðan voru strákarnir að fara með pabba sínum. Ég mætti í afmælisveisluna rétt upp úr klukkan átta og skemmti mér alveg jafn vel og kvöldið áður.  Kom heim rétt um miðnætti.

Sunnudagurinn var alveg jafn skemmtilegur og hinir tveir dagarnir á undan.  Fyrri parturinn fór í undirbúning undir kvöldið að mestu því ég var búin að bjóða norsku esperantovinkonu minni og manninum hennar í matarboð, nokkurs konar innflutnings partý vegna nýuppgerðs baðherbergis. Davíð Steinn hringdi fyrir mig í Vodafone og það var ákveðið að prófa að skipa um spennubreyti. Það virkaði ekki neitt og áfram var engin tengin við ljósleiðaraboxið og umheiminn. En matarboðið tókst vel og kvöldið var mjög skemmtilegt.  Hafði bleikt og grænt þema í matargerðinni, ofnbakaða bleikju með spínati, sæta kartöflumús, lauk í heitu smjöri og fulla skál af fersku sallati, fetaost og svartar ólífur til hliðar.  Þetta sló í gegn. Eftir borðhaldið bjó ég til kaffi og allir færðu sig yfir í stofuna, synir mínir líka, og þeir virtust hafa virkilega gaman af þessari heimsókn.

Á mánudagsmorguninn skutlaði ég Oddi Smára í skólann og fór sjálf í Sundhöllina.  Nýliðna vinnuviku vann ég flesta daga frá 13-19 fyrir utan miðvikudaginn.  Hringdi fljótlega í pabba er ég kom heim úr sundi og beið svo eftir því að klukkan yrði örugglega tíu áður en ég vakti Davíð Stein en hann átti ekki að fara í skólann fyrr en seinni partinn og hafði tekið að sér að hringja aftur í þjónustuver Vodafone.  Þá varð það alveg ljóst að bilunin væri það alvarleg og mjög líklegt að boxið væri hreinlega ónýtt svo erindið var sent áfram upp í bilanadeild og sagt að haft yrði samband þegar einhver kæmist á staðinn til okkar að kíkja á málin berum augum.  Ég mætti eins og fyrr segir í vinnu klukkan eitt og fór fljótlega að sinna framleiðslunni ásamt þeim sem var með mér á vaktinni.  Það gekk alveg ótrúlega vel hjá okkur og við náðum að framleiða 2500 kort á tæpum sex tímum, reyndar með tveimur góðum pásum.  En hér set punkt í bili. Er á leið í sund, sjötta daginn í röð.

Rúmlega einn þriðji liðinn af nýbyrjuðum mánuðinum

Fór á fætur rétt upp úr klukkan sex í morgun og gaf mér góðan tíma til að sinna hefðbundnum morgunverkum.  Var mætt út í skýli við Sunnubúðina korter fyrir sjö. Vagninn var örlítið seinn en bilaði þó ekki.  Stimplaði mig inn rétt rúmlega.  Vinnudagurinn leið jafn hratt og flestir aðrir vinnudagar. Náði líka að sinna verkefnum sem sjaldan hefur verið hægt að komast í undanfarið. Stimplaði mig út klukkan 14:14 og labbaði beinustu leið heim. Færði lánsbílinn, sem var á stæði fyrir framan hús nr 9, á stæði rétt við nr. 21.  Ég var komin heim á undan strákunum. Hringdi austur fljótlega en aldrei þessu vant kom enginn á línuna.  Á fimmta tímanum fékk ég skilaboð frá frænku minni og nöfnu að mamma hennar væri komin aftur á sjúkrahús. Ég ákvað þegar í stað að skreppa í heimsókn.  Hitti nöfnu mína í stutta stund og sat svo og spjallaði við gömlu konuna í rúma klukkustund þar sem hún sat fram á rúmstokkinn á ganginum á öldrunardeildinni.  Mér fannst gamla konan reyndar örlítið hressari heldur en þegar ég hitti hana síðast en hún er aftur komin með sýkingu og það þarf að líta betur til með henni heldur en hægt er að gera þegar hún er heima hjá sér.

Heildarfærsla númer 1934, ártalið hans pabba míns.

Ég ákvað að fara á lánsbílnum til vinnu í morgun.  Gaf mér góðan tíma því ég vissi ekki hversu lengi væri verið að sópa og skafa af bílnum áður en hægt yrði að leggja í hann.  Það tók hins vegar mun styttri tíma en ég áætlaði og var ég að stimpla mig inn ca sjö mínútur í sjö.  Vinnudagurinn náði svo aðeins fram yfir tvö en ekkert mjög margar mínútur þó.  Dreif mig í bankann að sinna tveimur málum þar fyrir aðra gjaldkerastöðuna sem ég hef tekið að mér.  Síðan lá leiðin í Laugardalslaugina. Synti 500m, fór beint í gufu á eftir í uþb tíu mínútur og sat svo úti um stund.  Fór með sunddótið heim og gekk frá því, fékk mér smá snarl og tók mig til fyrir kóræfingu og heimsókn í Hafnarfjörðinn á eftir.

Tveggja tíma kóræfing var ekki lengi að líða. Staldraði aðeins við og "fundaði" með ferðanefndinni áður en ég dreif mig yfir til tvíburahálfsystur minnar. Hún kíkti aðeins á skattframtalið mitt með mér og það tók drjúga stund.  Virðist vera í góðum málum þar en við fundum ekki út hvernig hægt væri að sækja um endurgreiðslu á virðisauka af vinnu við endurnýjun baðerbergis og skila með rafrænt. Endirinn verður líklega sá að ég fer með öll gögnin á skattstofuna og sæki beint um þetta þar.  Þá get ég skilað inn umsókn vegna málningarvinnu í leiðinni ég fékk ekki þann reikning fyrr en í janúar, dagsettan í janúar.  Ég var líka með saumana mína með en við gáfum okkur ekki tíma í svoleiðis.  Kvaddi um tíu og var komin alla leið heim aftur og búin að leggja bílnum innarlega í götunni þegar ég mundi hvað ég hafði ætlað að taka með mér heim, styrktarvörur sem tvíburahálfsystir mín gleymdi að koma með til mín í fyrrakvöld. Hringdi auðvitað í vinkonu mína sem kveikti strax á perunni um leið og hún sá hver var að hringja og saman hlógum við að þessari gleymsku okkar enda lítið hægt að gera annað í stöðunni í bili.  :-)

Tveir vagnar í vinnuna í morgun

Í gærkvöldi var saumaklúbbur hjá mér og var 100% mæting, þ.e. við vorum þrjár.  Ég náði loksins að klára útlínur og merkingu á gamaldags símanum.  Það var mikið spjallað og hlegið og auðvitað hvarf tíminn alltof hratt frá okkur.  Næsti "fullsetni" saumaklúbbur verður ekki alveg á næstunni því ein af okkur er að fara í heilmikla og langa ævintýraferð.  Við hinar munum samt halda merkinu á lofti á meðan og taka svo fagnandi á móti ferðalanginum þegar hann snýr aftur.

Fyrsta ferð leið 13 niður í bæ á morgnana stoppar ca klukkan 06:47 fyrir framan Sunnubúð. Það á að vera alveg nægur tími fyrir mig til að komast alla leið að Hörpu og stimpla mig inn í vinnu (hinum megin við götuna) áður en klukkan verður mikið meira en sjö.  Í morgun stoppaði hins vegar vagninn á Hlemmi og vagnstjórinn tilkynnti um bilun.  Ég bað um skiptimiða og  örfáum mínútum seinna náði ég leið 11 sem var á leið niður í bæ.  Ég varð aðeins um fimm mínútum of sein í vinnuna.

Var búin rúmlega tvö og ákvað að taka strætó heim að þessu sinni þannig að ég var komin heim nokkuð snemma.  Hringdi í pabba og lagði mig svo í um klukkustund.  Er annars aðeins byrjuð að kíkja á skattframtalið sem verður örlítið viðfangsmeira heldur en stundum áður.  :-)

Ný vinnuvika

Horfði á Landann, fréttir og leitina að Billy á RÚV og Law and Order á SjáEinum í gærkvöldi í þessari tilteknu röð.  Var komin upp í rúm fyrir hálfellefu og sofnuð um ellefu.  Vaknaði á undan klukkunni í morgun.  Þ.e. ég hélt ég hefði still gsm-vekjarann á að vekja mig  ca tíu mínútur fyrir sex. Klukkan var nýorðin fimm þegar ég rumskaði.  Kúrði áfram til hálfsex og ákvað þá að slökkva á vekjaranum og fara á fætur. Þá kom í ljós að ég hafði aldrei stillt á mig neina klukku áður en ég fór að sofa.

Tók strætó í vinnuna og var að stimpla mig inn rétt fyrir sjö.  Mótvaktin mín var þegar mættur. Ég ákvað að hann skyldi sjá um sendingar og móttöku til klukkan átta og sinna svo bókhaldinu og talningum eftir það.  Ég hlóð inn fyrstu daglegu verkefnunum og tróð í vélina.  Þegar átta-fjögur vaktin mætti leysti önnur bókarann af en ég ákvað að vera á vélinni áfram til klukkan tíu. Vinnudagurinn minn leið annars frekar hratt.  Stimplaði mig út  ca korter yfir tvö og labbaði þá upp Ingólfsstræti og Skólavörðustíg.

Kom við í Sundhöll Reykjavíkur og var komin ofan í laugina stuttu fyrir þrjú. Tíndi tölunni á ferðunum en ég er nokkuð viss um að þær voru amk 11x25m. Hafði aldrei þessu vant nóg pláss í lauginni og enginn að "flækjast fyrir mér".  Skrapp örstutt út í heitari pottinn og svo í gufu. Lét aðeins gufa af mér útivið áður en ég fór upp úr og labbaði alla leið heim í smá snjókomu. Var eiginlega eins og snjókerling þegar ég kom heim þótt þetta væri ekkert sérlega langur spölur.  Mokaði aðeins af útitröppunum áður en ég fór inn, þannig að klukkan var byrjuð að ganga fimm þegar ég kom heim.  :-)

Galdramessa

Það gekk ekki alveg nógu vel að snúa á klukkuna og svefninn.  Horfði á "Augst Rush" á RÚV í gærkvöldi, varfraði svo heldur lengi um á netinu þannig að klukkan var sennilega um eitt eftir miðnætti þegar ég skreið upp í. Las ekki neitt og var enga stund að sofna.  Vaknaði hins vegar nokkru áður en klukkan sló átta. Gerði tilraun til að kúra lengur og hefði sennilega átt að grípa aðeins í bók.  Var komin á fætur um hálfníu.  Ákvað fljótlega að taka niður "gardýnurnar" í stofunni og eldhúsinu og skella þeim á viðkvæmt prógramm í þvottavélina.  Vafraði svo um í netheimum og var meira að segja farin að kíkja á skattframtalið. Gleymdi næstum því að fá mér eitthvað í svanginn. Þegar þvottavélin var búin tók ég innihaldið með mér beint upp í íbúð.  Lagði eldhúsgardýnurnar á handklæði inn á rúm en hengdi hinar aftur upp í stofunni.  Klippti neðsta partinn af þeim, sem var orðinn frekar slitinn, þannig að nú ná þær aðeins niður að opnanlega faginu á stofuglugganum.  Kemur hreint ekkert illa út.

Um tólf skrapp ég út og sópaði og skóf af lánsbílnum. Þá loksins fékk ég mér eitthvað í svanginn áður en ég skipti um föt og lagði tímanlega af stað til að koma við í hraðbanka áður en ég mætti í krikjuna rétt um eitt. Rétti formanni kvenfélagsins mitt framlag á hlaðborðið áður en ég tók af mér og skipti um skó.  Judith Þorbergsson leysti Árna Heiðar organista af  og spilaði allan tímann á orgelið. Við sungum yfir alla fjóra sálmana, öll erindin, til að hita kórinn upp og æfa afleysingaorganistann. Messan tókst annars prýðisvel.  Jón Víðis töframaður lék listir sínar með aðstoð séra Péturs og tveimur af fjölmörgum börnum sem voru mætt. Það var annars nokkuð þétt setinn bekkurinn en við kórfélagarnir, 10 sem vorum mætt fengum þó alveg sæti. Lagt var á borð í efra og neðra og eitt inni í kirkjuskipi eftir messu. Ég kom ekki heim aftur fyrr en um fjögur og þrátt fyrir að veitingum hefðu verið gerð góð skil fékk ég smá afgang með mér heim.  Bræðurnir voru bara hressir með það.

Laugardagur

Vaknaði einhvern tímann á áttunda tímanum í morgun. Kúrði áfram um stund en ekkert svo lengi þó því það var smá dagskrá hjá mér framan af morgni.  Fékk mér morgunmat og vítamín og tók bæði til sunddótið og esperantodótið.  Þurfti aðeins að sópa og skafa af lánsbílnum.  Var komin ofan í Laugardalslaugina rétt um níu. "Fann" mér góðan stað og var að hugsa um að synda eins og tíu ferðir eða 500 m.  Þegar ég var að klára áttundu ferðina mætti ég öðrum sundgarpi og ég varð að víkja aðeins af leið til að forða árekstri.  Ég ákvað að þetta væri gott í bili og fór í gufuna í staðinn áður en ég fór aftur inn í klefa.

Mætti örlítið of seint í klippingu en það voru held ég ekki nema tvær mínútur sem skeikaði.  Líkt og fyrir sex vikum var ég eini kúnninn í klippingu á þessum tíma.  Við Nonni vorum þó síður en svo að spjalla á eins alvarlegum nótum og hluta af síðasta tíma. Það er reyndar alltaf gott að spjalla við  klipparann minn og tíminn líður alveg extra hratt.  Áður en ég kvaddi og þakkaði fyrir mig eftir að hafa greitt fyrir klippinguna þá komumst við að því að þetta var síðasti skipulagði tíminn. Það voru skipulagði þrettán næstu tíma í snarhasti á hefðbundnum sex vikna fresti.

Skrapp heim með sunddótið mitt en fór svo beint vestur í bæ til norsku esperanto vinkonu minna.  Og þrátt fyrir að þurfa mikið að spjalla þá glugguðum við líka í bækurnar allavega fjórða partinn af tímanum sem ég stoppaði hjá henni.

Næst lá leiðin í Krónuna og svo skrapp ég með lánsbílinn á snertilausa þvottastöð áður en ég fór heim. Oddur Smári kom út og sótti hluta af pokunum og gekk frá vörunum.  Ég hingdi og spjallaði aðeins við pabba áður en ég hellti mér upp á kaffi. Davíð Steinn vaknaði ekki fyrr en seinni partinn en hann hjálpaði mér að útbúa kjötsúpu í matinn og núna er seinni galdramessukakan fyrir morgundaginn að bakast í ofninum.

"Röddin"

Ekki mín, ekki bókin heldur þátturinn "The Voice".  Ný þáttaröð hófst um síðustu helgi.  Þá spáði ég reyndar lítið sem ekkert í að horfa, var að hugsa um allt annað.  En í kvöld ætlaði ég rétt að kíkja á annan þáttinn og gat svo ekki hætt að horfa fyrr en komið var að næsta dagskrálið. Hugsanlega hefði verið skynsamlegra að horfa á þetta á tímarásinni til að geta spólað hratt yfir auglýsingarnar. Og líklega hefði ég geta nýtt tímann betur, t.d. með því að grípa í saumana mína.  En svona fór um sjóferð þá og ég er ekkert að afsaka mig eða sjá eftir einu né neinu.

Aðeins um gærdaginn. Annar strákurinn fékk far með mér í skólann í gærmorgun en það féll niður fyrsti tími hjá hinum syninum svo hann gat leyft sér að kúra aðeins lengur. Vinnudagurinn leið mjög hratt og hann var brotinn aðeins upp þar sem ég þurfti að skreppa frá á fund annars staðar í borginni milli klukkan tíu og ellfefu.  Fjarveran allt í allt var sennilega einn og hálfur tími eða svo.

Fór beinustu leið heim eftir vinnu og þá var orðið ljóst að ekkert yrði úr að strákarnir færu til pabba síns í mat. Sem betur fer fékk ég hugmynd að kvöldmat sem ég átti allt hráefni í og tók ekki mjög langan tíma í eldamennsku.  Davíð Steinn samdi við mig um útgáfuna af pastaréttinum, bað um að fá að taka sér af pönnunni áður en ég bætti lauk, gulrót og sætri kartöflu út í skrúfupasta með túnfiski með bræddum osti með svörtum pipar.  Hvað eru mörg með í því.  ;-) Rétturinn heppnaðist fullkomlega.

Umhleypingar

Strákarnir þáðu far með mér í skólann í gærmorgun.  Það teygðist aðeins úr vinnudeginum og var klukkan að verða hálffimm þegar ég var laus.  Oddur Smári hafði sent mér sms um þrjú og spurt hvort ég gæti sótt hann í skólann eftir vinnu.  Ég varð ekkert hissa á þeirri spurningu þegar ég kom út úr vinnustaðnum.  Það tók mig dágóða stund að komast upp í Tækniskóla en kannski var það vegna þess að ég valdi ekki rétta leið, og þó. Við mæðgin komum heim um fimm og hittum Davíð Stein þar fyrir en hann hafði fengið far heim úr skólanum.  Ég hringdi í pabba og spjallaði örstutt við hann. Var mætt á kóræfingu á slaginu hálfsex.  Kórstjórinn er enn lasinn en hann hafði fengið raddþjálfarann til liðs við sig og þrátt fyrir að það vantaði mismikið í næstum allar raddir fengum við hin sem vorum mætt heilmikið út úr þessari þjálfum.  Held meira að segja að ég hafi komist upp á háa c-ið og bassinn komst alla leið niður á "lága c-ið".  Með smá kaffipásu vorum við að í rúma tvo tíma. Strax á eftir skrapp ég í Laugardalslaugina, synti 500 metra og sat svo góða stund í gufunni á eftir. Hérna heima var spilasession og voru þeir alls fjórir að sonum mínum meðtöldum.

Raddþjálfun

Í gærmorgun tók ég strætó upp úr klukkan hálfátta frá Sunnubúðinni þannig að ég var mætt í vinnuna ca 12 mínútum fyrir átta.  Vinnudagurinn leið jafn hratt og oftast áður.  Vann á vélinni fyrir hádegi og sinnti reikningagerðinni, sýndi og kenndi, eftir hádegi.  Stimplaði mig út tíu mínútur yfir fjögur, tók vinstri beygju og labbaði Lækjargötuna og hægra meginn við Skólavörðuhæðina alla leið heim.  Uþb 3 km.  Heima hringdi ég í foreldra mína eftir að hafa lokið af smá heimilisverkefni.  Hafði til kvöldmatinn rétt fyrir sjö, horfði aðeins á Castle í sjónvarpinu og var komin upp í rúm með bók um hálfellefu.  Las ekkert svo lengi og var líklega sofnuð upp úr ellefu.

Gekk og "synti" heim úr vinnu í gær

Rétt áður en strætó kom að skýlinu við Sunnubúð þar sem ég beið um hálfátta í gærmorgun uppgötvaði ég að ég var ekki með nauðsynlegar "vinnugræjur" meðferðis.  Ég hringdi í Odd og bað hann um að taka til lykilkortið mitt á meðan ég labbaði til baka.  Gat þá í leiðinni kastað aftur kveðju á systur mína og yngri systurdóttur.  Mágur minn var farinn í göngutúr með Cöru og eldri systurdóttir mín var sofandi.

Náði svo strætó klukkan 7:47, hitti fyrrum bekkjarbróður bræðranna í skýlinu og var mætt í vinnu á slaginu átta.  Vinnudagurinn leið afar hratt og var klukkan byrjuð að ganga fimm þegar ég stimplaði mig út og labbaði af stað heimleiðis með ca klukkutíma stoppi í Sundhöllinni.  Syndi 9x25m ferðir, fór örstutt í heitari pottinn, góða stund í gufuna og sat svo úti við á stól þar til ég var orðin þurr. Kom heim um sex.  Hringdi í pabba áður en ég steikti þorsk, sauð kartöflur og hitaði lauk í bræddu smjöri í matinn. Hafði svo samband við Böddu mína rétt til að láta hana vita að ég ætlaði aðeins að kíkja á hana um kvöldið.

Tómlegt í "kotinu"

Systir mín og yngri dóttir hennar fóru út úr húsi stuttu fyrir klukkan átta í gærmorgun til að Helga gæti tekið myndir af skautakeppni A-skautara í Egilshöll fram að hádegi og Bríet fylgst með og horft á vinkonu sína keppa.  Vinkonan var á staðnum og horfði á Bríeti á laugardagsmorguninn. Ingvi mágur skrapp út með Cöru í stutta stund en hann átti svo von á að þau yrðu sótt e-n tímann á tíunda tímanum. Ég sá því ástæðu til að hella upp á kaffi og við mágur minn áttum gott morgunspjall yfir kaffibollunum. Samt vorum við með Merrild en ekki Gevalia.  ;-)

Ég skrapp til esperanto vinkonu minnar um hálftólf, aðeins á öðrum tíma og degi, en við vorum búnar að sammælast um þetta á laugardaginn var.  Nú var hún búin að finna esperanto-bækurnar en ég var aftur á móti ekki með neitt slíkt með mér.  Kláruðum nokkrar krossgátur saman og fórum svo í göngutúr meðfram sjónum í áttina að Seltjarnarnesi og snérum við nokkurn veginn á svæða-skilunum. Svo skrapp ég í Krónuna eftir meiri mjólk og brauði og smávegis í viðbót sem vantaði upp á til að geta haft "síðustu kvöldmáltíðina" handa "Akureyringunum".

Fljótlega eftir að ég kom heim bjó ég til vöfflur úr heilli uppskrift og í miðjum vöffluklíðum komu tveir vinir strákanna í heimsókn og þeim var að sjálfsögðu boðið með.  Systir mín og fjölskylda komu úr kaffiboði frá mágkonu hennar. þar sem einnig hittust eitthvað af bræðrum mágs míns og pabbi hans, upp úr sex.  Þau voru það södd að ákveðið var að kvöldmatur yrði ekki fyrr en um átta.  Oddur hjálpaði mér við kvöldmatargerðina og eftir mat skrapp hann í hálftíma göngu með Cöru.

Flestir fóru í háttinn um ellefu og nú svaf eldri systurdóttir mín með mér í stofunni.

Sund, skautar og fleira

"Akureyringarnir" vöknuðu fyrst í gærmorgun, fyrir klukkan átta.  Ég fór fljótlega á fætur líka og var farin út á undan þeim því ég hafði ákveðið að byrja á því að skella mér í sund. Náði 3 ferðum (6 ef báðar leiðir fram og til baka eru taldar) í Laugardalslauginni og er viss um að það voru rúmlega 300m þar sem mér fannst ég sjaldnast vera að synda beint á milli vegna nokkurrar umferðar. Fór örstutt í sjópottinn og aðeins lengur í gufu.

Skrapp heim með sunddótið og sótti Odd í leiðinni.  Davíð Steinn varð þá einn eftir heima að passa Cöru.  Komum í Egilshöllina um tíu góðum tíma áður en Bríet átti að keppa. Þær eru 16 í hennar flokk og í þremur hópum.  Fyrsti hópurinn var byrjaður en Bríet var í þeim síðasta.  Foreldrar mínir voru mætt rétt á undan og sáu allar stelpurnar keppa.  Þrátt fyrir lasleika og hælsæri náði Bríet þriðja sætinu og við sáum miklar framfarir hjá henni.

Eftir þessa keppni skruppum við mæðginin heim enda voru rúmir þrír tímar þar til Hulda átti að keppa.  Davíð Steinn var búinn að fara tvisvar út með Cöru, fyrst í tuttugu mínútur og svo í rúma klukkustund.  Hann fór svo með hana í stutta pissuferð út í gar áður en hún var sótt af vinkonu systur minnar sem líka á svona hund, bara aðeins eldri.  Cara er ekki nema sex mánaða en Aska er nokkurra ára en þær eru ágætis vinkonur og hafa gaman að því að leika sér saman.

Við Oddur vorum komin aftur upp í Egilshöll um hálfþrjú og náðum þá að sjá kennara Bríetar keppa en hún er dóttir þeirrar sem kennir Huldu.  Hittum aðeins á Huldu áður en hún fór að hita upp en hún kvaðst vera slæm í mjöðminni eftir slæma byltu fyrr í vikunni.  Okkur fannst hún samt standa sig vel í upphituninni.  Þegar kom að sjálfri keppninni byrjaði allt ágætlega en svo datt hún og fékk e-n ólýsanlegan verk sem hún gat ekki harkað af sér þótt hún gerði tilraun til svo hún varð að hætta keppni.  Pabbi hennar fór með hana á slysó, foreldrar okkar systra fóru fljótlega í Drápuhlíðina þar sem Davíð Steinn tók á móti þeim með nýuppáhellt kaffi en við Oddur Smári biðum eftir Helgu sem var búin að lofa að taka myndir af verðlaunaafhendingunni og Bríeti sem var búin að vera þarna allan tímann að leika við vinkonu úr skautafélaginu Birninum.  Við sóttum Cöru á leiðinni heim.

Pabbi var búinn að festa fyrir mig þröskuldinn inn á baðherbergi sem hann hafði farið með austur í lagfæringu.  Hann setti líka upp fyrir mig klósettrúlluhaldara og þar að auki handklæða slá fyrir handlaugarhandklæðið.  Slánna bað ég hann um að festa framan á efri skúffuna fyrir neðan vaskinn og kemur þetta allt svo ljómandi vel út.  Fljóglega eftir að mæðginin komu af slysó var Huldu skutlað til vinkonu.  Systir mín og afgangurinn af hennar fjölskyldu var boðið í kvöldmat heim til vinkonunnar sem á Ösku og ég bauð pabba og mömmu í mat áður en þau brunuðu austur aftur.

"Akureyringar" í helgar heimsókn :-)

Í gær notaði ég lánsbílinn til að komast í vinnuna.  Var mætt nokkrum mínútum fyrir sjö, örlítið á undan hinni sjö vaktinni.  Fyrir utan kaffi og matartíma var ég að allan tímann milli sjö og rúmlega tvö.  Mest af því var bókhald, mánaðamótatalningar og undirbúningur undir samantekt vegna febrúarmánaðara.

Eftir vinnu skrapp ég að versla í Krónuna við Fiskislóð/Granda.  Aðeins öðruvísi verslunartími heldur en ég er vön en ég hitti samt Bjössa, fyrrum söngfugl úr DKR, aðeins og svo einn bekkjarbróður minn úr Kennó.  Þegar ég kom heim með vörurnar fékk ég báða strákana mína til að koma út og taka fyrir mig pokana inn.

Ætlaði mér að vera búin að ljúka aðeins meiri gestamóttöku-undirbúningi áður en systir mín og fjölskylda kæmu en bæði festist ég í að fylgjast með Val og FH keppa í undanúrslitum bikarsins og svo komu þau fyrr en ég reiknaði með.  En þetta var allt í góðu lagi og gott og gaman að fá þau í heimsókn. Kvöldið leið alltof hratt.  Yngri systurdóttir mín vildi helst sofa á bedda inni hjá pabba sínum og mömmu en þegar ég bauðst til að lesa fyrir hana áður en við færum að sofa samþykkti hún að sofa í stofunni með mér.

Helgarfrí

Enn og aftur fór ég með strætó til vinnu rétt fyrir sjö í gærmorgun.  Þessi vagn var örlítið seinni heldur en mánudags- og miðvikudagsvagninn en ég náði þó að stimpla mig inn nokkrar sekúndur í sjö. Vinnudagurinn til rétt rúmlega tvö leið afar hratt en ég slapp út ca tíu mínútur yfir heila tímann og fékk meðbyr á göngunni heim beint yfir Skólavörðuhæðina.  Var svo skynsöm að setjast ekki niður fyrsta kastið eftir að ég kom heim heldur fór á fullt í gestamóttöku-undirbúning.  Í miðjum klíðum kom annar tvíburinn glorsoltinn heim úr skólanum.  Hinn tvíburinn hafði komið heim rétt á eftir mér. Ég ákvað í snarhasti að "henda" í hálfa uppskrift að heilhveitivöfflum.  Það tókst nú ekki betur en svo að eftir tvær vöfflur og þrjár aðrar misheppnaðar, henti ég deiginu og byrjaði upp á nýtt og seinni uppskriftin virkaði miklu betur.  Strákarnir fóru svo til pabba síns á sjöunda tímanum en ég sinnti ýmsu dútli til klukkan tíu en þá skreið ég upp í, las í smá stund og var sofnuð löngu fyrir miðnætti.

Fimmtudagspistill um miðvikudaginn (gærdaginn)

Ég fór með strætó til vinnu í gærmorgun á sama tíma og á mánudagsmorguninn var og stimplaði mig inn tvær mínútur í sjö.  Einhvern tímann fyrir hádegi kom svo sviðsfundarboð með afar stuttum fyrirvara og var fólk hvatt til að mæta um þrjú.  Reyndar máttu þeir sem voru búnir klukkan tvö ráða því hvort það mætti.  Ég var ein af þeim sem var búin um tvö.  Veðrið var þannig að ég var hvort sem er ekki að fara labbandi áleiðis heim með viðkomu í sundlauginni.  Þar að auki fékk ég far yfir í K2. Fundurinn stóð reyndar frekar stutt yfir.  Ég fékk aftur far og nú alla leið heim.  Hringdi í pabba og ákvað svo að drífa mig í Laugardalslaugina og þaðan ætlaði ég beint á kóræfingu. Synti 300m og sat svo um stund í gufunni áður en ég dreif mig aftur upp úr.  Var mætt fyrir utan kirkjuna á slaginu hálfsex en það var enginn mættur og allt læst.  Stuttu seinna komu tvær kórsystur mínar, önnur akandi og hin á hjóli.  Þá var ég búin að fá þær fréttir að æfing félli niður vegna veikinda kórstjóra. Fór því aftur heim, gekk frá sunddótinu og kórdótinu og hringdi svo eitt símtal. Síðan ákvað ég að drífa mig í heimsókn á Minni-Grund til hennar Böddu minnar.  Þegar ég kom að anddyrinu hitti ég yngri tengdason hennar sem sagði mér að gamla konan væri útskrifast og á leið heim. Frænka mín og frændi voru að hjálpa mömmu sinni að taka sig saman og þegar þau komu niður spurðu þau hvort ég elti þau ekki bara.  Það fannst mér góð hugmynd.  Stoppaði þar í um rúman klukkutíma ánægð með að hitta allt þetta fólk.  Skyldi samt vel að Badda væri leið og óörugg því það stóð til að hún fengi aukaviku í hvíldarinnlögninni.

Aðalréttur og eftirréttur í gær!

Engin kóræfing í kvöld

Í gær var ég á átta til fjögur vakt í vinnunni, venjulegur átta tíma vinnudagur, og ég ákvað að fara á lánsbílnum og bjóða tvíburunum far í skólann.  Átta tímar liðu afar hratt en ég komst frá rétt upp úr fjögur.  Þótt það væri aðalfundur í starfsmannafélaginu skrapp ég frekar í Forlagið við Fiskislóð þar sem ég hafði ákveðið að láta það eftir mér að fjárfesta í nýjustu Jo Nesbö bókinni á sérstöku bókaklúbbstilboði. Kom einnig við í Sorpu áður en ég fór heim.

Heima stoppaði ég svo aðeins í tæpa tvo tíma áður en ég tók strætó alla leið á Lækjargötu, einni stoppustöð lengra en þegar ég fer með strætó í vinnu og hoppa út við Hörpuna.  Tilgangur ferðar gærkvöldsins var að hitta fimm fyrrum og núverandi samstarfskonum og borða saman á Grillmarkaðnum.  Ég var mætt fyrst á staðinn og ákvað að fá mér eitt hvítvínsglas. Smá stund leið áður en sú næsta mætti og á meðan tók ég nokkrar skrautlegar "selfí" af mér. Þegar allar boðaðar voru mættar á svæðið settumst við við pantað borðið. Ég fékk mér þrenns konar fisk (þorsk, lax og karfa) í aðalrétt og pantaði auka grænt sallat með.  Þetta var mjög flott og gott.  Hélt að ég hefði ekki pláss fyrir meira en freistaðist svo í að fá mér kaffi og þrennskonar osta í eftirrétt.  Það var mikið spjallað og mikið gaman og við vildum helst ekki að kvöldið endaði.  Klukkan var um ellefu þegar við stóðum loks upp.  Ég fékk far heim og fannst ég þvílíkt heppin.  Var ekki nógu skynsöm að fara alveg beint í háttinn en það er ekkert hægt að gera við því héðan af.

Fæðingardagur Hlíbbu

Ég komst að því að fyrsta morgunferð leiðar númer 13 frá Sléttuvegi er alveg nógu snemma til að ég geti notað og mætt til vinnu klukkan sjö.  Ég fór snemma með strætó í vinnuna í gærmorgun.  Við vorum tvær sem mættum klukkan sjö og komum framleiðsluferlinu í gang.  Í staðinn gat ég hætt vinnu rétt upp úr klukkan tvö.  Ekki alveg á slaginu kannski en klukkan var ekki nema tíu mínútur yfir heila tímann þegar ég stimplaði mig út.

Labbaði af stað heim og kom við í Sundhöllinni.  Var komin ofan í laugina korter fyrir þrjú og synti ég í uþb fimmtán mínútur áður en ég fór í gufubað.  Kom heim rétt um fjögur og var víst bara rétt á eftir öðrum syninum sem var að koma heim úr skóla.  Hann bjór til kaffi handa okkur mæðginum.

Hafði lifur og ofnbakaðar kartöflur og gulrætur í kvöldmatinn og mæltist það mjög vel fyrir.  Þótt vel væri etið var þó afgangur fyrir mig til að taka með í vinnuna.  Eftir kvöldmat fór ég í saumaklúbb til Lilju. Mæting á meðlimum klúbbsins var 100%.  Ég náði næstum því að klára útlínurnar í saumaverkefninu "gamall sími", á einungis eftir að sauma tvo hringi til að afmarka hringiskífuna. Það var mikið spjallað að venju og auðvitað flaug tíminn alltof hratt.  Kom heim aftur um ellefu og var svo heppin að fá stæði beint fyrir utan.

"Strætó-göngu-sund-ganga"

Kuldinn og hreyfingin á logninu í gærmorgun fékk mig til að ákveða að skreppa frekar í Sundhöllina heldur en Laugardalslaugina.  Aðeins þurfti að sópa smávegis af bílnum en snjórinn hafði annars fokið saman í hina skrýtnustu skafla.  Smá stund tók að koma lánsbílnum í gang en í gang fór hann á endanum.  Var komin ofan í laug rétt fyrir ellefu.  Synti einungis örfáar ferðir og fór svo beint í gufuna á eftir.  Síðan sat ég stund útivið á meðan ég þornaði eftir gufuna.

Hafði rúman hálftíma til að klæða mig upp og taka mig til fyrir afmælis-"messusyngi" með KÓSÍ-kórnum í kirkju óháða safnaðarins en ég var mætt á réttum tíma fyrir upphitun eða fimm korterum áður en sjálf messan byrjaði.  Kirkjan var mjög vel sótt en kórmeðlimir fengu samt sæti í kirkjunni eftir að seinni ritningalestri lauk.  Þá söng Gissur Páll eina aríu og eftir guðspjallið söng hann þekkt Eyjalag.  Herra Karl Sigurbjörnsson, fyrrverandi biskup, sá um predikunina og mér þótti ræðan hans afar góð.  Öllu verra var að þurfa svo að syngja í röddum strax á eftir því hléið var nokkuð langt þarna á milli og raddböndin svolítið þurr.  Sópraninn komst þó skammlaust frá sínu og ég held að þetta hafi sloppið svona la, la, í heildina.  Eftir messu var boðið upp á snittur, smápizzur, kaffi, vatn, gos og fleira.  Efri salurinn var bara helst til lítill fyrir alla kirkjugestina.

Áður en ég fór heim skrapp ég að versla og fór þar að auki á bókasafnið og skilaði þessari einu bók sem ég var með.  Tók fimm bækur heim í staðinn.  Davíð Steinn sá um kvöldmatinn og Oddur Smári hellti upp á kaffi.  Ég horfði svo á Landann og þáttinn um Holuhraun áður en ég fór að huga að því að koma mér í háttinn.

Afmælismessa

Það var ekki fyrr en um fimm sem ég kveikti á tölvu í dag og þá var nettengingin eitthvað að stríða mér.  Sá jafnvel fram á að komast alls ekkert á netið.  En það rættist úr þessu og af því tilefni ætla ég að setja inn nokkur orð um gærdaginn.

Þegar ég kom heim af árshátíðarskrallinu um miðnætti á föstudagskvöld var hvorugur bræðranna heima en mín biðu skilaboð á ísskápnum um að norska esperantovinkona mín yrði vant við látin um helgina.  Ég notaði því tækifærið og svaf aðeins fram á laugardagsmorguninn.  Ekkert svo lengi samt því ég held að ég hafi verið byrjuð að lesa eitthvað um níu.  Til stóð að skreppa eina til tvær ferðir í Sorpu og versla jafnvel í leiðinni en þar sem ég var ekki alveg búin að negla það niður hvað átti að fara á haugana eða í söfnunargáma og að það leit út fyrir að það væri frekar kalt úti þá notaði ég daginn í annað.  Sumt af því er eitthvað sem í raun er rútína, þótt ég eigi frekar erfitt með að vera í niðurnjörvaðri heimilisverkarútínu, og maður skrifar sjaldan eða aldrei um.  Ég ætla þó að geta þess að það er minn mánuður í sameignarþrifum og ég fór niður með ryksuguna og ryksugaði neðan frá þvottahúsi og alveg upp á pallinn fyrir framan íbúðina mína.

Strákarnir rumskuðu ekki fyrr en nokkru upp úr hádeginu og fljótlega fékk ég þá hugmynd að það væri sniðugt að hella upp á og búa til vöfflur þrátt fyrir rjómaleysi.  Bjó til vöfflur úr hálfri uppskrift af heilhveitivöfflum og það voru alveg 12 stykki.  Synirnir voru frekar sáttir með þetta og söknuðu ekkert rjómans.  Ég var líka dugleg að lesa og vafraði einnig svolítið um á netinu. Hringdi austur og talaði bæði við pabba og mömmu, hvort á eftir öðru og fannst vera mjög gott í þeim hljóðið.

Baunasúpan frá því á þriðjudag var kláruð um kvöldmatarleytið og stuttu seinna dreif ég mig loksins út og skrapp yfir á Minni-Grund til að heimsækja hana Böddu mína.  Mér brá svolítið þegar ég sá að búið var að fjarlægja nafnið hennar af herbergi númer 406, hljóp niður á fyrstu hæð aftur og fyrsti starfsmaður sem ég mætti gat frætt mig á því að gamla konan væri flutt upp á fimmtu hæð.  Ég hljóp því aftur upp og einni hæð betur og fékk hlýjar móttökur.  Stoppaði í góðan klukkutíma sem leið afar hratt.  Þegar ég kom heim aftur var byrjuð óvænt spilasession.  Tveir nýjir spilafélagar, einn vinur bræðranna en aðeins annar strákurinn minn því hinn var á leiðinni út með öðrum vinum.  Ég kastaði kveðju á strákana en hélt mig svo til hlés.

Vil ekki vera löt

Gærdagurinn hófst heldur snemma hjá mér svipað og dagurinn þar á undan.  Kúrði þó áfram í einhvern tíma en ákvað svo að nota einhverjar mínútur í að bera saman biblíutexta á íslensku og esperanto, þ.e.a.s. ég las nokkrar ritningar úr Markúsarguðspjalli, fyrst á móðurmálinu og svo þær sömu á esperanto.  Þetta er reyndar ótrúlega gaman og þarna virðist ég vera búin að finna enn eitt áhugamálið sem skemmtilegt er að grúska í.

Fór með strætó í vinnuna alveg ákveðin í að gefa mér og fá leyfi til að hætta vinnu í fyrra fallinu, helst upp úr klukkan tvö.  Einhvern tímann fyrir hádegi var komið með smá sendingu í tilefni konudagsins sem er framundan.  Við stelpurnar fengum allar eina rauða rós.  Reyndar tókum við eftir því þegar við fórum fram á kaffistofu nokkru seinna að það var engin rós hjá konunni sem vinnur við þrif og kemur ekki í vinnu fyrr en um miðjan dag. Þar sem ég hafði hugsað mér að labba heim og koma við í Sundhöllinni ákvað ég að skynsamlegast væri að leggja mína rós fram í kaffistofukrók sem ég og gerði. Ákvað samt líka að senda þeim sem kom með rósirnar skilaboð um að gleymst hefði að skilja eftir rós handa 7. konunni.  Til að stytta söguna urðu skilaboðin til þess að mér var færð önnur rós rétt áður en ég hætti vinnu og ég fékk þar að auki far upp í Sundhöll.

Kom heim rétt fyrir fjögur og rósinni virtist ekkert hafa orðið meint af þótt ég hefði labbað með hana þessa leið frá Sundhöllinni enda var veðrið alveg þokkalegt.  Strákarnir voru báðir heima en skruppu svo út rétt seinna með vini sínum.  Ég hringdi í pabba og spjallaði stutta stund við hann.  Fékk mér smá hressingu, kveikti á tölvunni en ákvað svo að stilla á mig klukku og leggja mig um stund.  Ég steinsofnaði og var frekar hissa þegar vekjarinn hringdi að því er virtist frekar stuttu síðar.

Fljótlega fór ég að taka mig til fyrir kvöldið.  Strákarnir voru komnir heim en Oddur Smári fór með strætó til Hafnarfjarðar á spilakvöld nokkru áður en ég þurfti að fara.  Ég var mætt í Kornhlöðuna við Lækjarbrekku á árshátíð og 65 ára afmæli óháða safnaðarins um hálfáttaleytið.  Það var góð mæting og stemmingin frábær.  Maturinn góður, borðfélagarnir skemmtilegir og skemmtiatriðin frábær. Einn kórfélagi minn var með sinn árlega pistil þar sem hann fór á kostum eins og venjulega. Ari Eldjárn tók svo við boltanum og áfram var hlegið. Ara þótti salurinn svo góður að ég er helst á því að hann hafi lengt prógrammið sitt örlítið.  Að lokum kom svo Sigtryggur Baldursson beint úr Hörpunni og spilaði og söng nokkur lög ásamt Árna Heiðari kórstjóra og veislustjóra kvöldsins.  Þeir fengu m.a. KÓSÍ-kórfélaga til að koma upp og syngja með þeim viðlög í tveimur af þessum lögum.

Rauðar rósir

Hvernig sem á því stóð var ég vöknuð upp úr fímm í gærmorgun.  Reyndar kúrði ég áfram alveg í tæpa tvo tíma en hugurinn var kominn á fullt og var ekki á því að láta róa sig niður. Þrátt fyrir úðarigningu ákvða ég að strákarnir gætu alveg klætt veðrið af sér og notaði ég leið 13 til að koma mér til vinnu.  Sem fyrr leið vinnudagurinn afar hratt við margvísleg verkefni en að þessu sinni náði ég að stimpla mig út aðeins örfáar mínútur yfir fjögur.  Þegar ég kom út á neðra planinu við vinnustaðinn minn sá ég á eftir vagninum, leið 13, þeim sem stoppar einnig skammt frá  heimili mínu.  Ég var fljót að ákveða að vera ekkert að bíða eftir næsta vagni, hvað þá taka e-n vagn sem stoppar aðeins lengra frá, heldur ganga bara stystu leið heim yfir Skólavörðuholtið.  Það er fínn göngutúr, tæplega 2,8 km og ég tæpan hálftíma að labba þetta.  Var rennblaut á bakinu undan bakpokanum þegar ég kom heim svo ég varð að fara úr blauta bolnum, þurrka mér og fara í annan þurran.  Peysan sjálf slapp við að vökna innan frá.

Hringdi í pabba og spjallaði um stund en svo skruppum við Oddur Smári í skóleiðangur í Kringluna. Fundum á hann fína ecco-skó sem voru á 20% afslætti.  Þegar við komum aftur heim sótti strákurinn fyrir mig þvottinn á snúruna en ég hitaði upp hluta af baunasúpunni og hafði að þessu sinni afganginn af saltkjötinu í bitum út í.  Við mæðginin kláruðum öll skammtinn með bestu lyst. Sat við sjónvarpið, með saumana mína, frá því fyrir átta og til klukkan að ganga ellefu.  Saumana lagði ég reyndar frá mér þegar ég fór að horfa á Fortitute en útlínur saumaverkefnisins (gamaldags sími) eru óðum að skýrast og ég klára það líklega á næstu dögum.  Hafði ekki orku í að bíða eftir og horfa á þáttinn Glæpahneygð.  Vildi heldur koma mér í rúmið og lesa örstutta stund.

Vöknuð alltof snemma

Þriðja daginn í röð fór ég á lánsbílnum í vinnuna í gærmorgun en strákarnir gátu báðir nýtt sér farið líkt og á þriðjudagsmorguninn svo ég var ekki að svindla neitt varðandi samgöngusamninginn.  Var laus úr vinnu um hálffimm og hafði þá klukkustund þar til ég átti að vera mætt á kóræfingu.  Það er reyndar alveg magnað hvað hægt er að komast yfir að gera á svo stuttum tíma.  Ég skrapp aðeins heim, hitaði mér smá af baunasúpunni, spjallaði við pabba um stund og tók til bæði nótnablöð og sunddót.  Tveggja tíma kóræfing leið afar hratt.  Við erum að æfa fyrir árshátíð sem og hátíðarmessu og þrátt fyrir smá erfiðleika á sumum stöðum held ég að kórstjórinn hafi verið sáttur með kórinn sinn þegar æfingu lauk.

Það er annars orðin rúm vika síðan ég fór síðast í sund en í gærkvöldi rigndi svo mikið að ég ákvað að fresta sundferð aðeins lengur og dreif mig frekar í heimsókn á Minni-Grund til hennar Böddu minnar. Það sem hún var ánægð að fá mig, svo ánægð að ég sá alls ekki eftir að hafa frestað sundferðinni. Stoppaði hjá gömlu konunni í rúman klukkutíma og við spjölluðum og göntuðumst eins og okkur tveimur er einum lagðið.

Kom heim um hálftíu.  Strákarnir voru hjá pabba sínum en ég setti inn pistil og vafraði aðeins um á netinu áður en ég horfði á Kiljuna á tímarásinni.  Var komin upp í rúm um ellefu en líkt og kvöldið áður hafði ég bara orku í að lesa í stutta stund áður en ég varð að láta undan og fara að sofa.  Annars er heilsan alveg að lagast.

"Eyjólfur" að hressast

Það var markmiðið að hætta vinnu rúmlega tólf í gær.  Reyndin varð sú að ég stimplaði mig út rétt fyrir hálfþrjú.  Þá brunaði ég beint í bankann til að sækja um að breyta séreignasparnaðnum aftur úr 2% í 4% eins og hann var fyrir hrun.  Síðan lá leiðin á Hlemm til að fjárfesta í nokkrum strætómiðakortum þar sem verðið hækkar all mikið um næstu mánaðamót.  Á Hlemmi urðu á vegi mínum mæðgur sem ég kannast við frá fyrri tíð og tengjast/tengdust öðrum fyrrverandi mági mínum. Spjölluðum örstutta stund en mamman var á leið í næsta strætó og ég var með lánsbílinn á staur í nokkrar mínútur.

Oddur Smári var langt kominn með að þrífa baðherbergið þegar ég kom heim og ég bauð honum að byrja á að sjóða upp á baununum.  Hann þáði það með þökkum og þeir sem eru á FB og sáu það sem ég setti þar inn um kvöldmatarleytið vita hvernig fór með sjóferð þá.  En baunasúpan heppnaðist alveg með ágætum.  Við mæðgin horfðum öll á Castle og ég náði að halda mér vakandi yfir "White chappel" en fyrsta þætti af nýrri seríu lauk rétt upp úr klukkan ellefu.  Svo náði ég að lesa í uþb tíu mínútur áður en ég bara varð að láta undan og fara að sofa í hausinn á mér.

Mánuður í afmælið mitt

Þar sem ég var kommulaus í gær og bíllinn þar að auki enn fyrir aftan heilsugæslustöðina síðan á föstudagskvöldið ákvað ég að ég væri búin að hvíla mig nóg og dreif mig í vinnuna í gærmorgun.  Aðeins annars strákurinn gat nýtt sér farið.  Ég var með einhver áform um að hætta vinnu í fyrra fallinu til að rétta aðeins af unna vinnutíma í mánuðinum.  Hlutirnir æxluðust samt þannig í gær að í stað þess að hætta klukka tvö var klukkan að verða fimm þegar ég gat loksins slitið mig frá afar margvíslegum verkefnum.  Þá dreif ég mig beint í Krónuna við Granda og verslaði inn það sem ekki var keypt í Sunnubúð fyrir mig um helgina.  Á listanum voru m.a. saltkjöt og baunir en Oddur Smári ætlaði að sjá um að elda þetta í kvöld sprengidagskvöld því hann langaði svo mikið í svona mat. Davíð Steinn tók að sér að elda kvöldmatinn í gærkvöldi og hafði litlar bollur í tómatmauki með spaghettí. Ég kveikti annars ekkert á sjónvarpinu í gær, vafraði frekar um á netinu og kom mér svo í rúmið fyrir klukkan hálfellefu og byrjaði að lesa fjórðu og síðustu bókina sem ég fékk í jólagjöf; Ljónatemjarinn eftir Camillu Läckberg.

Ný vinnuvika, enn á ný hraðferð á tímanum

Ég var alveg kommulaus þegar ég vaknaði í gærmorgun.  Hélt samt áfram að taka því rólega og fór ekki út fyrir dyr.  Millifærði smá aur á Odd Smára og sendi hann í Sunnubúðina fljótlega eftir hádegi og bað hann m.a. um að athuga hvort seldar væru tilbúinar vatnsdeigsbollur.  Drengurinn kom með allt af listanum til baka og með þær fréttir að það væru seldar bollur en það væru ekki til sérstakir bakkar undir þær.  Ég sendi strákinn auðvitað rakleiðis aftur í búðina með Tuppevare-kökudisk og bað hann um að kaupa eina bollu á mann fyrir okkur mæðginin.  Þegar hann kom aftur til baka með þessar þrjár sagði hann að afgreiðslumaðurinn hefði bent honum á að það væri nú pláss fyrir fleiri bollur á disknum.  Ég fékk svo Davíð Stein til að ná í þvottinn sem var búinn að hanga á snúrunum  í þvottahúsinu frá því á föstudagskvöldið var.  Hann fór fljótlega í þetta verkefni og var góða stund niðri í kjallara enda kom það í ljós þegar hann kom upp aftur að hann var búinn að brjóta saman allan þvottinn.  Annars las ég bara og las þar til ég náði að klára nýjustu Yrsu-bókina.

Kommulaus

Mér fannst heldur snemmt að vakna fyrst um fimm leytið í gærmorgun þrátt fyrir óslitinn svefn frá því um hálfellefu.  Mér tókst að sofna aftur og sofa í næstum þrjá tíma í viðbót.  Þar sem ég hafði ekki farið í sund síðan á þriðjudag, og ekki heldur í sturtu, var ég farin að hafa það á tilfinningunni að ég lyktaði eins og sítrónu engifer í bland við aðra líkamslykt.  Ég ákvað því að skella mér í smá sturtu.  Ég varð ekkert vör við það að mér yrði kalt svo það kom mér á óvart að ég skyldi mælast með nokkrar kommur.  Kannski voru þetta þreytukommur?  Ég ákvað snarlega að taka því rólega og fresta öllum "gerum".

Lauk við að lesa bókina Hugsýki eftir Chelsea Cain, alveg óhugnanlega spennandi bók með góðri fléttu.  Ég gat ekki merkt það að þetta væri fyrsta bók höfundar eins og tekið er fram aftan á kápunni. Beið svo alveg til klukkan að verða hálfellefu með að setja mig í samband við norsku esperanto vinkonu mína til að boða forföll en við hittumst oftast um ellefu á laugardögum nema eitthvað annað standi til hjá annarri hvorri okkar.

Annars leið dagurinn í rólegheitum.  Ég reyndi að gera sem minnst en var auðvitað aðeins of mikið að vafra um í netheimum.  Byrjaði loksins á DNA eftir Yrsu Sigurðardóttur, bókinni sem systir mín og hennar fjölskylda gáfu mér í jólabók.  Hún lofar mjög góðu og ég er eiginlega hissa á að ég geti slitið mig frá lestrinum inn á milli.

Strákarnir vöknuðu einhvern tímann upp úr hádeginu.  Þeir héldu sig heimavið en voru mest að spila netleik/i við vin/i sín/a.  Oddur Smári sá um að hafa til kvöldmatinn og Davíð Steinn bjó til kaffi. Aldrei þessu vant horfði ég á tvær bíómyndir í röð á Skjá Einum og það var komið fram yfir miðnætti þegar ég dreif mig aftur í rúmið.  "Stalst" þá til að lesa aðeins.

Febrúar um það bil hálfnaður

Þriðja daginn í röð fór ég á lánsbílnum í vinnuna í gærmorgun.  Bræður voru ekkert óhressir með farið, síður en svo.  Annríkið í vinnunni sá til þess að dagurinn leið afar hratt.  Náði reyndar ekki að komast yfir allt það sem var á listanum hjá mér en ég náði hins vegar að laga til á skrifborðinu og slíta mig frá vinnu rétt rúmlega fjögur.

Ég fór beinustu leið heim, ákveðin í að slaka aðeins á.  Fannst þó ég verða að setja í eina þvottavél. Hafði bleikju í kvöldmat um hálfsjö og rétt fyrir átta báðu strákarnir mig um að skutla sér í Laugardalslaugina.  Það skutl tók nú ekki langan tíma, en nógu langan til þess að þegar ég kom heim aftur varð ég að leggja lánsbílnum fyrir aftan heilsugæsluna.  Það á þó að vera í lagi að geyma bílinn þar yfir helgina.

Var komin upp í rúm upp úr klukkan tíu.  Gerði tilraun til að lesa smá en ég varð að gefast upp fljótlega og var örugglega sofnuð fyrir hálfellefu.  Strákarnir voru ekki komnir heim en ég rumskaði ekki heldur við það þegar þeir skiluðu sér e-n tímann fyrir miðnætti.

Heilsan á grensunni, þó aðeins fyrir ofan

Ég bauð tvíburunum mínum aftur far í skólann á lánsbílnum í gærmorgun.  Vinnudagurinn teygðist aðeins í suður því klukkan var að nálgast fimm þegar ég lagði af stað heim.  Úti var þónokkuð kalt og það var næstum því meira en rafgeymir bílsins þoldi.  Kom bílnum samt í gang með smá lagni og dreif mig í Lyfjaver m.a. til að kaupa C-vítamín handa okkur mæðginunum.  Svo datt mér í hug að það væri sniðugt að fylla á tankinn þótt það væri enn ca einn fjórði eftir á honum.  Dældi á tankinn á sama stað og oftast áður eða á Atlantsolíustöðinni við Flugvallarveg.  Ég var að renna af stað þaðan þegar síminn hringdi og um vinnutengt mál var að ræða.  Lagði bílnum upp við Rúbín á meðan ég afgreiddi málið sem tók mig heilar tuttugu mínútur þar sem ég var eiginlega búin að aftengja allt vinnutengt þann daginn.

Klukkan var að verða sex þegar ég kom loksins heim.  Hér beið mín heitt kaffi á brúsa og notalegheit.  Ég sá um kvöldmatinn og eyddi svo kvöldinu, milli átta og tíu, fyrir framan skjáinn ásamt saumunum mínum.  Dreif mig í háttinn fljótlega eftir það.  Hafði ekki orku í að lesa nema örstutta stund og var svo steinsofnuð upp úr klukkan ellefu.  Því miður fékk annar sonurinn heimsókn uþb þremur korterum síðar sem varð til þess að ég hrökk upp og náði ekki að festa aftur svefn fyrr en góðum tveimur tímum seinna.  En þetta er sem betur fer bara undantekning.  Sonurinn hafði ekki vit á að biðja gestinn eða gestina að setja á mute og eftir að klukkan er farin að nálgast miðnætti þegar er virkur dagur daginn eftir og ákveðin ró farin að færast yfir allt þá er frekar hljóðbært.

Fart á tímanum

Bauð strákunum far í skólann í gærmorgun.  Það var smá ævintýri að komast inn í bílinn því bílstjórahurðin var pikkfrosin föst og haggaðist ekki.  Ég tróð mér því inn farþegameginn og bað Odd um að sópa af bílnum á meðan ég kæmi bílnum í gang og hitaði hann upp.  Þetta hafðist allt saman og ég náði að stimpla mig inn í vinnu nokkrum sekúndum fyrir klukkan átta í gærmorgun.

Sleit mig frá vinnu nokkrum mínútum yfir fjögur, þreytt eftir daginn og aum í hálsinum.  Fór beint heim og sendi kórstjóranum skilaboð um að ég ætlaði að taka því rólega hálssins vegna.  Spilakvöld var hjá strákunum en þáðu engu að síður steikt slátur og að þessu sinni skar ég niður kartöflur í skífur og steikti líka.  Eftir kvöldmat sat ég inni í stofu og horfði á sjónvarpið og las alveg þar til Kiljan var búin.

Svo náði ég að koma mér í háttinn tiltölulega snemma eða um hálfellefu. Hafði ekki orku í að lesa nema örfáar blaðsíður og var örugglega sofnuð fyrir klukkan ellefu, áður en spilakvöldinu í holinum hinum megin við svefnherbergisdyrnar.

Hörmungar hálsbólga

Ég fór með strætó í vinnuna í gærmorgun.  Vinnudagurinn leið undra hratt en ég náði að slíta mig frá verkefnunum þegar klukkan var rétt orðin fjögur.  Labbaði áleiðis heim í hríðinni en kom við í Sundhöllinni, fékk mér smá innisprett, fór örstutt út í heitan pott og slakaði svo vel á í gufunni áður en ég fór aftur upp úr.  Var komin heim rétt fyrir sex.  Oddur Smári sá um að útbúa kvöldmatinn, niðurskornar kartöflur og gulrætur bakaðar í ofni og bauð einnig upp á eitt soðið egg á mann með þessu.  Þetta var bara þrælgott hjá honum.  Davíð Steinn hellti upp á kaffi eftir matinn.  Einn vinur tvíburanna kom upp úr átta og þeir Davíð Steinn fóru saman í sund og fleira á meðan Oddur Smári ákvað að horfa á Castle með mér.

Saumaklúbbur í gær

Stóri guli bíllinn, þ.e.a.s. strætó, var nýttur í ferðina til vinnu í gærmorgun.  Líkt og undanfarið leið vinnudagurinn ótrúlega hratt við margvísleg verkefni enda í mörg horn að líta.  Að þessu sinni náði ég að hætta áður en klukkan varð mikið meira en fjögur og labbaði ég stystu leið heim, upp og niður Skólavörðuholtið.

Ekkert löngu eftir að ég kom heim útbjó ég kartöflumús úr sætri kartöflu sem ég hafði með afgangnum af súrmatnum handa okkur Oddi Smára.  Davíð Steinn fékk hins vegar afganginn af lasanjanu sem hann eldaði sjálfur á sunnudagskvöldið var.   Oddur Smári fór á spilakvöld í Breiðholtið strax eftir mat. Ég beið aðeins með að ljúka við fráganginn í eldhúsinu því ég ætlaði mér að búa fyrst til kaffi og undirbúa saumaklúbbshitting.  Byrjaði samt á því að setjast aðeins við tölvuna. 

Allt í einu heyrði ég uppþvottavélin var sett í gang og svo var hrasuðukatlinum stungið í samband í tengil í holinu.  Davíð Steinn var þarna að verki og bjó hann til kaffið sem ég bauð upp á í saumaklúbbnum um kvöldið.

Það var 100% mæting í klúbbinn.  Ég náði að vinna aðeins í línum í myndinni af gamaldags símanum og mér sýnist að þetta fari nú alveg að hafast.  Þá mun vinna við myndina af týnda sauðnum verða tekin upp að nýju því ég er búin að einsetja mér að ljúka við þessi tvö verkefni áður en ég sný mér að öðru.  Mikið var skrafað og hlegið eins og alltaf en tíminn lét því miður ekki bíða eftir sér og flaug frá okkur á hraða ljóssins.  En áður en kvöldinu lauk var ákveðið hvenær halda á næsta saumaklúbb.

Ný vinnuvika

Ég dreif mig í sund ca tveimur tímum áður en mæta átti í upphitun fyrir fyrri messu mánaðarins. Synti sex sinnum 50 metra og fór beint í gufuna á eftir.  Allt í allt með ferðum fram og til baka tók þetta mig rétt rúmlega fimm korter.  Hitti fyrrum vinnufélaga þegar ég var í að þurrka mér.  Við spjölluðum smá og svo fór hún að sínum skáp að klæða sig eftir sundið.  Það kom svo í ljós stuttu seinna að hún var með skáp rétt hjá þeim skáp þar sem ég geymdi mín föt svo við gátum aðeins haldið áfram að spjalla.

Hafði smá tíma til að skipta um föt og taka mig til fyrir messuna.  Upphitun gekk vel og það var ákveðið að kórinn dreifði sér um kirkjuna og sjórnaði söngnum þaðan.  Þetta gekk alveg ágætlega þar sem enginn sálmur var sunginn í röddum.  Guðni Einarsson stjórnarmaður í Biblíufélaginu sá um predikunina og fórst það vel úr hendi.  Hann talaði að vísu örlítið of lengi en fyrir mitt leyti fyrirgaf ég honum það því hann hélt amk minni athygli hér um bil allan tímann.  Á eftir var svartbaunaseyði og bráðabrauð í neðra.

Oddur Smári sá um að klára þvottahúsmál, eða hengja upp úr vélinni seinni partinn, og Davíð Steinn stóð sig með ágætum í að sjá um að kvöldmaturinn væri klár upp úr klukkan hálfátta.  Ég horfði á fréttir á meðan ég beið eftir matnum og horfði á Landann eftir að við mæðgin vorum búin að borða.  Strákarnir fengu vin í heimsókn eftir kvöldmat og þeir fóru þrír saman í sund.

Messudagur

Ég vaknaði óþarflega snemma í gærmorgun en var líklega búin að sofa í rúmlega sjö tíma rétt fyrir sjö. Gerði heiðarlega tilraun til að kúra aðeins lengur en það enti með því að ég kveikti á náttborðslampanum (rétt fyrir átta) og beindi athyglinni óskiptri að nýjustu íslensku bókinni eftir Mary Higgins Clark, Pabbi er farinn á veiðar, sem ég byrjaði á um og upp úr síðustu helgi.  Spennan magnaðist og langt var liðið á bókina þegar ég uppgötvaði að það var komin tími til að drífa sig á fætur til að komast yfir til norsku esperanto vinkonu minnar á "réttum" tíma.  Þá átti ég bara örfáa kafla eftir og það var frekar erfitt að slíta sig frá lestrinum, en tókst þó.

Rétt rúmlega ellefu hringdi ég á bjölluna hjá Inger.  Hún heilsaði í dyrasímann og hleypti mér inn en í fyrsta skipti síðan þau fjölskyldan fluttu á þenna stað þá gleymdi hún að aflæsa lyftunni svo ég kæmist alla leið upp í forstofuna til hennar.  Ég dó samt ekki ráðalaus heldur fór eins langt og ég komst, á næstu hæð fyrir neðan, og labbaði svo upp stigaganginn síðustu hæðina og bankaði upp á.  Okkur vinkonunum fannst þetta frekar fyndið og næstu tveir tímar liðu ógnarhratt.  Ekkert esperanto að vísu en krossgátur, létt spjall, mikill hlátur og fleira sem gefur lífinu sterkan og góðan lit.

Næst lá leiðin í Krónuna við Granda í minn nokkurn veginn vikulega verslunarleiðangur og áður en ég fór heim kom ég við á Minni-Grund í fyrstu heimsóknina til Böddu minnar síðan hún fór þangað í hvíldarinnlögn beint af sjúkrahúsinu fyrir einni og hálfri viku síðan.  Ég byrjaði reyndar á að villast og fór á Litlu-Grund en þegar ég var orðin viss um þessa villu mína hringdi ég í gömlu konuna og hún leiðbeindi mér þannig að ég komst til hennar á endanum.  Það var annars mál til komið að drífa sig í þessa heimsókn og nú þegar ég veit hvar þetta er get ég drifið mig oftar og reglulegar.

Laugardagur

Fór á negldum skóm með strætó rúmlega hálfátta til vinnu í gærmorgun.  Klukkan var langt gengin í fimm þegar ég hafði að slíta mig frá vinnu og labba af stað heimleiðis inn í helgina.  Labbaði eftir Hverfisgötunni að Hárhorninu og hafði ágætis meðbyr.  Rétt náði að koma af mér nokkrum vikublöðum til tengdapabba systur minnar.  Hann var nýbúinn að læsa hjá sér, ekki farinn, sá mig og opnaði til að taka á móti sendingunni.  Kári var svo meira í hliðina afganginn af leiðinni heim en ekki svo sterkur að ég lét mig hafa það að labba alla leið.  Byrjaði á því að hringja í pabba og heyra aðeins í honum. Seinna steikti afganginn af hrognunum og kartöflunum frá kvöldinu áður og var það bara ágætis matur.  Kveikti ekki einu sinni á sjónvarpinu í gærkvöldi en fór þó ekki í háttinn fyrr en upp úr ellefu.  Las um stund í "Pabbi er farinn á veiðar" en ekki lengi því ég var víst orðin rangeygð af þreytu.  ...en ég er nú einu sinni Rangæingur.  ;-)

Fyrsta vinnuvika febrúar liðin

Ég fór aftur á lánsbílnum til vinnu í gærmorgun og gátu tvíburarnir nýtt sér farið.  Enn og aftur var mikill erill í vinnunni en það náðist samt að loka ákveðnum mánaðamótamálum sem er vel. Hafði eina með mér í þessari vinnu sl. daga sem ég er nokkuð vön að lesa yfir fyrir mig og nú fylgdist hún nokkurn veginn með öllu ferlinu.  Klukkan var langt gengin í fimm þegar ég gat loksins slitið mig frá vinnu.  Þá lá leiðin í Laugardalinn með viðkomu í fiskbúðinni við Sundlaugarveg.  Um það leyti sem ég var að leggja við fiskbúðina hringdi gemsinn og var það vinnutengt símtal sem reyndar var fljótafgreitt. Í búðinni var ég ákveðin í að kaupa smá ýsu og klausturbleikju og á meðan verið var að afgreiða þessa pöntun fyrir mig ákvað ég að fá líka eins og einar "hrogna-buxur".  Spaugaði aðeins við afgreiðslumanninn um hvort þetta væru stuttbuxur? Hann sagðist halda að þetta væru frekar snjó- eða regnbuxur en þá hvíslaði afgreiðslumaðurinn við hliðina að þeim sem var að afgreiða mig að þetta væri örugglega G-strengur. Ó, mig auma þetta var frekar fyndið en að sama skapi neyðarlegt því ég varð allt í einu afar feimin.  Náði þó að halda andlitinu og þakka hressilega fyrir mig þegar hafði greitt fyrir og tekið við því sem ég bað um.  Synti svo nokkrar ferðir í Laugardalslauginni og sat í gufunni í um tíu mínútur áður en ég fór heim.

Hrogn og ýsa

Í gærmorgun fór ég á lánsbílnum í vinnuna og bauð bræðrunum far í Tækniskólann í leiðinni. Erill var í vinnunni og það teygðist úr vinnudeginum líkt og undanfarið.  Ég hafði þó smá stund aflögu heima áður en ég fór á kóræfingu m.a. til að hringja í foreldra mína, úr varð eins konar tuttugu mínútna "þriggja manna símafundur" en það er afar sjaldgæft að pabbi og mamma tali við mig bæði í einu í símann.  Oddur Smári hafði skellt sér í ökuskóla 2 námskeið en Davíð Steinn var steinsofandi og vissi örugglega aldrei af því að ég hafði komið heim í smá stund.

Tveir tímar á kóræfingu liðu sem hálftími, alltof hratt, og ég var varla tilbúin að fara heim þegar æfingu lauk um hálfátta.  Oddur var enn á námskeiðinu en það var kominn vinur í heimsók til Davíðs Steins og voru þeir að spila í playstaition tölvunni þegar ég kom heim.  Um hálfníu drifu þeir sig svo í sund.  Ég var fegin því þá sá ég fram á að ég þyrfti ekki að "reka" þá úr stofunni þegar Kiljan byrjaði.  Í millitíðinni hringdi ég í "tvíburahálfmömmu" mína og þar fauk klukkutíma í afar þarft spjall. Ég horfði því á Kiljuna á tímarásinni en ekki á rauntíma en það var þó ekki orðið svo framorðið þegar því áhorfi lauk.  Hafði smá tíma í m.a. netvafr og bókalestur fyrir svefninn.

Laglínan sungin af innlifun

Eins og ég sagði frá í pistli gærdagsins þá fór ég með strætó í vinnuna í gærmorgun.  Hafði sunddótið tiltækt með í bakpokanum með það í huga að koma við í Sundhöllinni á heimleiðinni seinni partinn. Þrátt fyrir að aðeins hafi teygst úr vinnudeginum þá stóð ég við þessa ætlun mína.  Labbaði af stað frá vinnustaðnum klukkan langt gengin í fimm og var komin ofan í innilauginna aðeins rúmlega.  Synti þó bara sex ferðir x 25 metrar því mér fannst ég þurfa heldur meira pláss en ég fékk.  Kannski var það afsökun fyrir að skella sér sem fyrst út í heitari pottinn og gufuna á eftir.  Þegar ég kom upp úr kvennaklefanum hitti ég einn frænda minn og annan son hans örstutt.  Og þegar ég var nýlögð af stað heimleiðis flautaði á eftir mér bíll en þar reyndust mæðgur vera á ferð, "föðursystir" mín og dóttir hennar.  Ég spjallaði smá stund við þær áður en ég hélt áfram heim.  Klukkan var að verða hálfsjö þegar ég kom heim og þá fór ég beint í að útbúa kvöldmatinn.

Gengið heim á negldum

Síðustu fjóra virka daga, að þessum þriðjudegi meðtöldum, hef ég farið með strætó í vinnuna en labbað heim seinni partinn og í tvö skipti af þessum fjórum hef ég komið við í Sundhöllinni og fengið mér stuttan innisprett og skroppið í heitan pott og gufu á eftir.

Í gær labbaði ég stystu og beinustu leið heim eftir vinnu.  Ekkert útstáelsi var á mér en kvöldið leið engu að síður afar hratt þótt ég næði ekki að komast í að gera allt sem mig langaði til.  Rimpaði m.a. saman "tásugat" á sokkabuxum og tók fram útsaumsdótið í leiðinni alveg viss um að nú myndi ég stinga niður nál og vinna í að klára þá vinnu sem er næstum búin svo ég geti farið að snúa mér að nýjum saumaverkefnum.  Í staðinn gleymdi ég mér meðal annars í netvafri, vinkonuspjalli (og það er ekkert að því síðarnefnda) og fleiru.

Er annars að lesa nýjustu þýddu bókina eftir Mary Higgins Clark Pabbi er farinn á veiðar sem ég fékk í jólagjöf frá pabba og mömmu.  Hún er spennandi og með það stuttum köflum að það er alveg hægt að gleyma tímanum og hugsa of oft "...bara einn kafla enn..." og láta það eftir sér.  Náði samt að slökkva á lampanum á slaginu ellefu, bað bænirnar, sendi strauma í margar áttir og sofnaði örugglega áður en klukkan náði að verða hálftólf.

Ný vinnuvika

Í fyrsta skipti í nokkrar vikur stillti ég ekki á mig neina vekjaraklukku í gær.  Ég var samt vöknuð upp úr átta og byrjaði á því að ljúka við bókina um Götumálarann.  Þegar ég fór að huga að því að fá mér eitthvað að borða ákvað ég að blanda mér í búst en það hef ég heldur ekki gert lengi.  Dvöl mín í eldhúsínu varð þó lengri heldur en þann tíma sem tók að blanda bústið og drekka því áður en ég vissi af var ég farin að láta hendur standa fram úr ermum við verk sem ég byrjaði á um daginn og er hvergi nærri lokið.

Um fjögur dreif ég mig á safnið og skilaði af mér fimm bókum af sex.  Að þessu sinni passaði ég mig á að líta ekki í kringum mig eftir nýju lesefni heldur dreif mig beint í sund.  Áður en ég fór heim eftir sundið skrapp ég í Sunnubúðina eftir brauðosti sem ég hafði gleymt að kaupa í mínum vikulega verslunarleiðangri.  Ég kom heim með ostinn og smávegis fleira, m.a. fötu af súrmat.  Var reyndar búin að ákveða að hafa steikt slátur og þar sem ég vissi að annar strákurinn er ekki hrifinn af súrmat hélt ég mig við mataráætlunina en útbjó jafnframt kartöflumús úr sætri kartöflu sem ég hafði með súrmatnum. Mér að óvörum þá fékk hinn strákurinn sér af súrmatnum og "sætu" músinni.

Nýr mánuður

Vaknaði nokkuð snemma í gærmorgun miðað við að það var laugardagur.  Ég ákvað því að drífa mig í sund og var mætt í Laugardalinn um það leyti sem opnaði, eða á slaginu átta.  Tapaði tölunni á ferðunum en miðað við tímann sem ég synti voru þetta sennilega 600 metrar sem er bara nokkuð gott. Ég kom heim upp úr níu rétt til þess að ganga frá sunddótinu, skipta um föt og drífa mig þangað sem starfsdagur RB var haldinn.  Með því að vera mætt aðeins fyrir tíu hafði ég tíma til að fá mér léttan morgunverð, kaffi og heilsa eitthvað af öllu fólkinu áður en dagskráin hófst.  Raðað var niður í sæti og til að byrja með var ég á borði 5 af ég veit ekki hvað mörgum borðum.  Mér skilst að það hafi verið met mæting miðað við að hún var valkvæð (ekki skylda) eða í kringum 130 manns.  Eftir hádegi var hópnum skipt upp í sín svið og ég færðist á borð 7 þar sem við vorum mætt 6 af átta úr kortadeildinni manns úr kortadeildinni. Tíminn flaug hratt, allir voru að vinna að svipuðu verkefni, hver fyrir sína deild eða hóp og það voru nokkrir sem litu til með þessu, m.a. forstjóri RB sjálfur, boðinn og búinn til að aðstoða.

Kom heim aftur um hálfþrjú, skipti aftur um föt og skrapp í vikulegan verslunarleiðangur með það í huga að kíkja kannski á hana Böddu mína í heimleiðinni.  Ekkert varð úr þeirri heimsókn í því þegar ég var að keyra heim kom yfir mig mikil og skrýtin þreyta svo ég taldi best að drífa mig bara heim og taka því rólega.  Oddur gekk frá vörunum og ég gaf mér tíma til að slaka aðeins á, kíkja á netið, horfa á seinni hálfleikinn um fimmta sætið, lesa og svo framvegis.

Var  að klára mjög skemmtilega bók eftir Þórarinn Leifsson sem heitir Götumálarinn og byggir á atburðum sem hann upplifði þegar hann var nítján ára.  Skemmtilega skrifuð, mannleg, brosleg og spennandi.