Frídagur verslunarmanna

Seinni partinn í fyrradag var tjaldað í garðinum og systurdætur mínar voru ákveðnar að sofa þar.  Það er að segja sú yngri átti hugmyndina og sú eldri var ekkert mótfallin henni.  Pabbi þeirra fór með þeim út í tjald um miðnætti og tók það fram að útidyrahurðinni yrði ekki læst yfir nóttina ef þær þyrftu að komast á klósett eða eitthvað.  Ég held að það hafi verið um fjögur í gærmorgun að dyrabjöllunni var hringt.  Þar var víst Bríet á ferð, svo vön því að dyrnar væru læstar að hún hafði ekki meðtekið upplýsingar pabba síns.  Þeirri stuttu var kalt og fékk hún að skríða upp í til foreldra sinna.  Eldri systirin svaf alveg til níu en hún kvartaði líka um kulda þegar hún kom inn í gærmorgun.

Ekkert löngu eftir hádegi í gær ákvað ég að drífa mig í heimsókn í bústaðinn Sælukot við Heiði.  Enginn hafði tíma til að koma með því enn var verið að taka til í skúrnum og sortera dót og mamma ætlaði að baka. Fjölskylda, Böggu heitnnar systir pabba, á þennan bústað og er alltaf þar um verslunarmannahelgar.  Þar að auki er systurdóttir pabba, búsett er í USA, stödd hér á landi ásamt manni sínum.  Ég hafði áhuga á því að hitta "fólkið mitt" og vissi að þar fengi ég helling af knúsum.  Þegar ég mætti þá voru flestir af elstu kynslóðinni í gólfi við Strönd en ég hitti marga af yngri kynslóðunum.  Hluti af þeim hópi fór svo í sund en ekki allir og ég var alveg róleg.  Enda kom fólkið úr gólfi á endanum.  Það hafði reyndar skroppið í kirkjugarðinn á Keldum í bakaleiðinni.  Það var afar gott og gaman að hitta frændfólkið.  Ég hef aldrei áður "droppað" svona við í bústaðinn á þessum tíma en veit þó að það hefði alveg verið tekið á móti manni.

Kvöldmatur (á Hellu) var borðaður um níu og rúmum klukkutíma síðar fóru systir mín og hennar fjölskylda í bæinn.  Hingað koma þau svo líklega ekki aftur fyrr en upp úr miðjum næsta mánuði.

Á Hellu

Fór að sofa upp úr klukkan eitt í fyrrinótt eftir að hafa lesið um stund.  Var ekki með neinar áætlanir um hvenær ég ætlaði mér svo að vakna eða fara á fætur.  Um níuleitið í gærmorgun fór ég í sturtu og skreið svo aftur upp í á meðan hinn hefðbundi áburður var að þorna.  Greip aftur í bók, Svik, og ætlaði bara ekki að geta lagt hana frá mér aftur.  Dreif mig þó á fætur áður en klukkan varð ellefu og kveikti á tölvunni.  Þegar Oddur Smári vaknaði nokkru seinna var alveg ljóst að hann ætlaði sér ekki að koma með mér.  Lagði samt ekki í hann fyrr en klukkan var byrjuð að ganga þrjú.  Davíð Steinn var ekki enn vaknaður.  Systir mín og fjölskylda voru komin austur þegar ég mætti um hálffjögur.  Helga og mamma voru að steikja pönnsur og þegar "fjallið" var tilbúið var ég beðin um að hella upp á.  Eftir kaffi bað Helga mig um að taka af rúmunum í stóra herberginu og hennar gamla herbergi og setja í þvottavélar.  Mamma bætti smá við þvottinn og þetta passaði akkúrat í báðar þvottavélarnar.  Það var líka verið að taka til í skúrnum hjá foreldrum mínum, skoða í gamla kassa merkta okkur systur.  Mest af mínu "dóti" dæmdi ég á haugana, eiginlega allt nema stytturnar. En þetta "allt" var helst gamalt skóladót.  Í kvöldmatnum hringdi Davíð Steinn í mig og sagðist vera búin að fá far norður í dag en hann vissi ekki hversu lengi hann yrði þar.  Ég bað hann bara um að hringja í mig þegar hann væri kominn og einnig að vera í sambandi.

Löng helgi :-)

Í gærmorgun fór ég á lánsbílnum í vinnuna.  Hafði samt engin sérstök erindi að reka eftir vinnu því ég var m.a. búin að ákveða að bíða með að skila bókum á safnið fram í næstu viku.  Þá er nefnilega öruggt að ég get skilað fleirum af mér.  Ég hef áður sagt frá þeirri ákvörðun minni að neita að eyða tíma í bækur sem ekki ná til mín.  Það kemur fyrir að ég kem með bækur heim af safninu sem ég næ svo ekki að festa mig við þegar ég byrja að lesa þær.  Hvað um það þótt einhverjar umsagnir segi að bókin sé snildar vel skrifuð.  Ef hún höfðar ekki til mín þá hætti ég við að lesa hana.  Önnur af bókunum sem safnið framlengdi fyrir mig um mánuð á föstudaginn í síðustu viku komst næstum því í þennan flokk.  En það var eitthvað við söguna sem þó hélt forvitni minni.  Stærsti gallinn voru alltof langir kaflar.  Ég vil helst taka pásur á kaflaskilum og ef ég er að skríða upp í rúm um hálftólf  á virkum degi og kaflinn í bókinni sem ég ætla að lesa er yfir 40 blaðsíður þá er vitað mál að klukkan verður örugglega orðin meira en miðnætti þegar ég lokið lesturinn á kaflanum.  Í gærkvöldi kláraði ég þessa bók loksins, Hörkutól stíga ekki dans eftir Norman Mailer þýdd af Árna Ibsen.  Rithöfundur nokkur segir söguna.  Konan hans fór frá honum fyrir tæpum mánuði.  Hann telur dagana og drekkur daglega frá sér ráð og rænu.  Einn morgun uppgötvar hann að hann hefur látið tattóvera sig og framsætið í bílnum hans er alblóðugt.  Á staðnum þar sem hann felur kannabisræktun sína finnur hann konuhöfuð...  Sagan leiðir mann vítt og breytt og það komu kaflar þar sem ég gafst næstum því upp en samt varð ég að fá að vita meira.  Í millitíðinni las ég líka bókina Gaddavír eftir Sigurjón Magnússon.  Þá bók hef ég örugglega lesið áður en það kom ekki að sök, hún var jafn ágæt og mig minnti og sumt hafði farið framhjá mér og öðru var ég búin að gleyma frá því ég las hana fyrir nokkrum árum.  Núna er ég byrjuð að lesa bókina Svik eftir Karin Alvtegen.  Hörkubók og mjög spennandi.  Annars langar mig rétt að minnast á í lokin að ég er búin að borga lánið, sem ég tók í nóvember sl. til að borga Davíð út úr íbúðinni í einu lagi, niður um 2,1 millijón.  Eftirstöðvar eru níuhundruðþúsund og það stefnir allt í að ég greiði þær upp á næstu 2-3 mánuðum.  Duglega ég!  :-)

Nýr mánuður

Þar sem ég er ein í kaffipásu nota ég tækifærið til að setja inn nokkrar línur.  Þriðja daginn í röð fór ég á hjóli í vinnuna í gærmorgun.  Nú brá svo við að ég fór alveg "nýja" leið.  Hjólaði Lönguhlíðina, þvert yfir Klambratún, Flókagötu að Gunnarsbraut, Njálsgötu, Snorrabraut, Laugaveg, Barónsstíg og Hverfisgötu. Hefði getað hjólað alla Hverfisgötuna að Ingólfsstræti en þess í stað beygði ég af leið áður en ég kom að Þjóðleikhúsinu og sikksakkaði næstu götur.  Tók ekki tímann en var örugglega bara svipað lengi eins og ef ég hefði valið leiðina sem ég fer oftast.  Vinnudagurinn leið afar hratt.  Ég sá um bókhaldið og aðeins um afleysingar á vél.  Nóg var að gera í því fyrrnefna því nú standa yfir mánaðamótauppgjör.  Fór beint heim eftir vinnu.  Helga systir leit við upp úr hálfsex til að skila námsbókum til Davíðs Steins.  Ég hafði kjúklingabringur í ofni í matinn, með soðnum hýðisgrjónum og gulum baunum.  Upp úr sjö skutlaði ég strákunum í Egilshöllina. Kom aðeins við í Hagkaup í Skeifunni og renndi einnig við hjá Atlantsolíustöðinni við Flugvallarveg og dældi á lánsbílinn þar sem það var 12 kr. afsláttur af lítranum.

Síðasti dagurinn í júlí

Hjólið var aftur notað í ferðir milli heimilis og vinnu í gær.  Fram að hádegi vann ég á framleiðsluvélinni ýmist við móttöku og skoðun korta eða við að "moka í".  Eftir hádegi hjálpaði ég til við að telja alla kassa sem framleitt hafði verið úr og síðan skannaði ég inn nýjar myndir.  Var langt komin með bunkann þegar hringt var úr einu útibúi úti á landi.  Án þess að fara mikið nánar út í það samtal þá var ég beðin um að skanna inn spjald með hraði ef það kæmist í hús fyrir klukkan hálffjögur.  Lauk við fyrirliggjandi bunka upp úr þrjú og þá fórum við allar í kaffipásu.  Kennispjaldið sem minnst var á rétt áðan skilaði sér í hús rétt fyrir hálffjögur svo mynd og undirskrift komust í kerfið.  Yfirmaður minn þurfti að fara aðeins fyrr en rétt áður komu kerfisfræðingur og sérfræðingur frá Borgun til að gera smá test.  Ég dokaði aðeins við, sem var eins gott því þörf var á minni aðstoð við nokkur atriði.  Ég komst þó í burt áður en þeir voru búnir en þá var klukkan alveg að verða fimm.  Fljótlega eftir að ég kom heim aðstoðaði ég Davíð Stein við að útbúa Lasanja í kvöldmatinn og eftir mat fékk ég Odd Smára til að ganga frá.

Blíðviðri

Það tók mig fimmtán mínútur frá því ég lokaði íbúðinni á eftir mér og þar til ég var búin að hengja hjálminn á hjólið og læsa því við hjólagrind í bílastæðakjallara seðlabankans.  Ég leit á klukkuna í gemsanum rétt áður en ég lagði í hann og hún sýndi 7:28.  Þetta var nú heldur snemmt en ég var komin í skó og úlpu og búin að setja á mig hjálminn.  Aflæsti hjólinu og teymdi það út á götu.  Hjólaði svo í átt að miðbænun, Drápuhlíð, Reykjahlíð, Miklabraut, Gamla Hringbraut, Barónstíg, Skálholtsstíg að og eftir Grundarstíg og krossaði svo yfir Spítalastíg yfir á Ingólfsstræti sem ég hjólaði svo endilagt alveg að neðra planinu við seðlabankann.  Í vinnuni sá ég að mestu um bókhaldið fyrri partinn.  Var aðeins í afleysingjum á vél í kringum morgunkaffið og eftir hádegi í kortatalningu ásamt annarri.  Stimplaði mig út rétt fyrir fjögur og hjólaði beint heim.  Um fimm, þegar mesti roðinn var farinn úr kinnum, setti ég mig í samband við systur ASEA-mannsins.  Við mæltum okkur mót í neðra Breiðholti og þangað var ég mætt rétt fyrir hálfsex.  Þegar ég var búin að fá sendinguna í hendurnar hringdi ég í Böddu mína úr því ég var stödd í nágrenninu.  Þessi 92 ára mágkona móðurömmu minnar var heimavið og tók á móti mér og góðu knúsi.. Stoppaði ekki nema uþb klukkustund.  Strákarnir höfðu farið með pabba sínum um fimm svo ég slapp við eldamennsku og fékk mér bara smá snarl er ég kom heim.

Tvíburahálfsysturheimsókn

Slökkti á útvarpsvekjaranum næstum tuttugu mínútum áður en hann átti að hringja.  Dreif mig í sturtu, bar á mig gel er ég hafði þurrkað mig og skreið svo aftur upp í rúm á meðan það þornaði.  Kúrði svo þar til vekjarinn í gemsanum fór í gang um sjö.  Snúsaði einu sinni en dreif mig svo á fætur tíu mínútum síðar og tók rúmfötin af dýnu, sæng og koddum áður en ég bjó um.  Þurfti að sinna nokkrum erindum strax eftir vinnu svo ég fór á lánsbílnum í vinnuna.  Vann á framleiðsluvélinni til hálfþrjú fyrir utan morgunkaffi- og hádegispásu og síðasta klukkutímann skannaði ég inn nýjar myndir.

Strax eftir vinnu fór í Krónuna við Granda til að versla inn fyrir vikuna.  Næst lá leiðin í "Sundfisk" fiskbúðina við Sundlaugarveg þar sem ég keypti bæði ýsu og bleikju og reyndar smávegis fleira.  Asea-maðurinn svaraði ekki gemsanum svo hann er líklega á sjónum svo ég fór heim með vörurnar.  Hitti nýju nágrannana í kjallaranum, eigandann og vin hans sem ætlar að leigja hjá honum.  Þeir eru að mála og gera allt klárt og flytja líklega inn um mánaðamótin.  Bað Odd Smára um að koma út með einn poka því það hafði slitnað haldið af einum Krónupokanum.  Strákurinn sá svo um að ganga frá vörunum eins og vanalega.  Kveikti á tölvunni og athugað hvort ég kæmist í samband við asea-manninn í gegnum FB.  Það gekk upp næstum strax og sendi hann mér nafn og símanúmer hjá systur sinni sem afgreiðir fyrir hann á meðan hann er á sjónum.  Þegar ég náði sambandi við hana sagðist hún aðeins þurfa að athuga málin og myndi svo hringja aftur í mig.  Endirinn verður samt líklega sá að ég hringi aftur í hana eftir vinnu í dag.  Ég veit að frísendingin mín er komin og mánaðarlega sendingin á líka að vera búin að skila sér það sem 24. dagur mánaðarins er liðinn.

Hafði soðna ýsu í matinn.  Strákarnir borðuðu smá af henni en voru eiginlega búnir að ákveða að panta pizzu með tveimur vinum sínum.  Um hálfátta hringdi ég í tvíburahálfsystur mína til að athuga hvort hún væri heima. Svarið var jákvætt svo ég dreif mig í heimsókn og fékk grænt á öll umferðaljós á leiðinni.  Tíminn leið afar hratt var með saumana mína með og sýndi henni einnig tvö saumaverkefni sem mamma hafði keypt á útsölu hjá "Ömmu mús" um daginn og gefið mér.  Klukkan var að slá hálftólf er ég skilaði mér heim aftur.

Ný vinnuvika hafin

Rumskaði fyrst um átta í gærmorgun og bar á mig gel.  Lá á bakinu í rúminu, ekki undir sæng, á meðan ég var að þorna.  Dormaði.  Þegar ég varð vör við að óhætt væri að breiða yfir sig aftur var ég ekki sein á mér að snúa mér á aðra hliðina og sofa áfram.  Komst á fætur um tíu, þá búin að sofa í ca átta tíma.  Dagurinn var annars tekinn afar rólega.  Nennti hvorki að lesa né sauma en settist aðeins út á pall með pabba og vafraði alveg helling um á netinu.  Eftir kvöldmat fylgdist ég með uppfærslum af "íslenska boltanum í beinni" og þá aðallega með leik Keflavíkur og Vals sem endaði 1-2 fyrir Val.  Þegar úrslitin voru ljós kvaddi ég foreldra mína og frænku og dreif mig heim á leið.  Þangað kom ég um hálfellefu.  Aðeins annar tvíburinn var heima en hinn var í bíó með pabba sínum.  Ég spurði þann sem var heima hvers vegna hann væri ekki í bíó líka og þá kom upp úr dúrnum að það var alfarið hans ákvörðun.  Bróðir hans var eitthvað að pirra hann og þá ákvað hann að halda sér frekar til hlés.

Í Foreldrahúsum

Stakk gemsanum í hleðslu rétt fyrir tíu í gærmorgun.  Um það leiti var annað partýljónið að koma á fætur, sá sem kom fyrr heim eða um hálfþrjú.  Hitt partýljónið vaknaði um hálftólf, alltof snemma að eigin sögn, en hann kom ekki heim fyrr en um hálfsex.  Stuttu eftir þetta tók ég mig saman, kvaddi strákana og lagði í hann austur á Hellu.  Ég var komin langleiðina þegar ég uppgötvaði að gemsinn var víst enn í hleðslu og áminningin um að taka með skál, sem ég fékk með heim fulla af kartöflusallati um daginn, var örugglega að "tikka" í gemsanum.  Þannig að það fyrsta sem ég gerði eftir að ég kom í Hólavanginn og var búin að heilsa foreldrum mínum og systurdóttur var að fá að hringja heim og fá annan tvíburann til að taka gemsann úr hleðslu og slökkva á áminningunni.

Ég er annars búin að lesa skammtímalánsbókina, Of mörg orð eftir Sigríði Láru Sigurjónsdóttur.  Bókin er byggð á bloggskrifum höfundar á árunum 2003-2008.  Smellin og skemmtileg bók og ég skellti nokkrum sinnum upp úr við lesturinn.

Rétt fyrir fjögur í gær skruppum við pabbi á mömmubíl (lánsbílnum - ég keyrði) út í búð.  Það kom í ljós að ekki var búið að loka vínbúðinni svo við byrjuðum á því að fara þangað inn.  Pabbi keypti sér bjórkippu en ég litla flösku af hvítvíni (eitt og hálft glas eða svo).  Eftir að hafa lokið erindum í búðinni færði ég bílinn að bensínstöðinni þar sem loftið er.  Þar setti pabbi loft í öll bíldekkin og það er víst minnsta málið því það er hægt að stilla það fyrir fram hversu mikill þrýstingur á að vera á dekkjunum.

Eftir kvöldmat í gærkvöldi skruppum við Bríet í smá göngutúr.  Ég á tveimur jafnfljótum og hún á hlaupahjóli. Fékk mér kaffibolla erum við komum heim. En svo opnaði ég hvítvínið mitt, J. P. Chenet.  Sem betur fer var þetta bara lítil flaska því vínið var of sætt fyrir minn smekk.  En ég kláraði úr flöskunni og var svo heppinn að fá að opna flösku frá mömmu af miklu betra hvítvíni hússins síðan 24.04.2013.

Fimm virkum vinnudögum lokið í bili

Það hellirigndi um það leiti sem ég var að leggja af stað til vinnu í gærmorgun.  Hætti snarlega við að fara á hjólinu enda mundi ég eftir því að ég var með nokkra fatapoka, í skottinu á lánsbílnum, sem ég ætlaði að fara með í Rauða Kross gám í Sorpu.  Seinni hlutann af hádegispásunni var ég ein frammi og notaði þá tækifærið til að skoða einkapóstinn.  Þar kom fram að skilafrestur á síðustu tveimur bókasafnsbókunum í fórum mínum var að renna út.  Gat ekki framlengt skilafrestinum þar sem bókasafnskortið var útrunnið.  Vinnudagurinn leið annars afar hratt og ég þurfti aðeins að "bíða" eftir klukkunni síðasta hálftímann því þá var öllum verkefnum lokið.  Strax eftir vinnu fór ég í Sorpu með dótið úr skottinu.  Næst stoppaði ég við hraðbanka til að taka út smá skotsilfur til að eiga í veskinu mínu og svo lá leiðin á Kringlusafnið.  Konan sem afgreiddi mig bauðst til þess að framlengja fyrir mig skilafrestinum ef ég vildi bíða með að endurnýja bókasafnskortið.  Ég þáði framlenginguna en bað líka um endurnýjun og að greiða aukalega fyrir einn stóran bókasafnspoka.  Það fór líka eins og mig grunaði; ég fann sex bækur sem mig langaði til að lesa þegar ég tók "einn hring" um safnið. Ein bókin er með tveggja vikna útlán.  Var með hakk og spakk í kvöldmatinn og svo komu nokkrir vinir til strákanna áður en þeir fóru allir saman í partý.  Ég vafraði um á netinu, horfði á Spy Game á DR1 og byrjaði að lesa bókina með stysta útlánstímann þegar ég skreið svo upp í löngu eftir miðnætti.

Síðasti föstudagurinn í mánuðinum

Vinnudagurinn í gær leið afar hratt.  Allri framleiðslu var lokið um tólf, talningum lauk um tvö og svo fór afgangurinn af tímanum í að skanna inn ný útlit á nokkrum kortategundum.  Strax eftir vinnu skrapp ég í heimsókn á Sólvallagötuna til norsku esperanto vinkonu minnar.  Við vorum þó ekki að glugga neitt í tilbúna tungumálið.  Stoppaði í rúma klukkustund.  Er ég kom heim var mitt fyrsta verk að kveikja á tölvunni. Matarmálin voru frekar einföld því það var til svo mikill afgangur af laxi og soðnum kartöflum að það eina sem ég þurfti að gera var að skipta þessu upp á diska og setja í örbylgjuofn.  En ég bræddi líka smá smjörklípu og setti úr lítilli dós af gulum baunum saman við.  Og svo var meira að segja afgangur til að hafa með mér í vinnuna í dag.

Færsla númer 1701 frá upphafi bloggs

Fór á lánsbílnum i vinnuna í gærmorgun.  Við vorum þrjár mættar fyrsta klukkutímann en nú er sumarsaðstoðarstúlkan komín í sumarfrí.  Ég sá um bókhald og afleysingar á móttöku korta á framleiðsluvélinni.  Upp úr níu mætti aukamaðurinn og hann var með okkur til klukkan að verða tvö. Rétt fyrir hádegi kom hraðsending til okkar, aðeins 1000stk kort, af kortategund sem okkur vantaði til að ljúka endurnýjun.  Það kom maður úr turninum til að aðtoða við opnun sendingarinnar og votta fyrir rétta fjölda.  Meiri hlutinn af plastinu var svo strax notaður til að klára endurnýjun.  Náðum að pakka endurnýjuninni, skanna kennispjöld, telja og ganga frá áður en klukkan varð fjögur.  Fór beint heim eftir vinnu.  Helga systir hringdi í mig rétt áður en ég kom heim, til að óska mér til hamingju með strákana. Þegar hún heyrði af því að við ætluðum að borða á Saffran sagðist hún ætla að athuga hvort þau Ingvi og jafnvel Hulda myndu ekki hitta okkur þar.  Þrír vinir úr árgangi ´96 í Hlíðaskóla voru hjá strákunum og höfðu meira að segja fært þeim afmælisgjöf.  Um sex hittum við mæðginin Helgu og Ingva í Saffran í Glæsibæ.  Hulda var í "vinkonustandi" og Bríet er enn á Hellu.  Þetta var hin skemmtilegasta stund.  Kvöddum þau svo upp úr klukkan sjö því strákarnir áttu von á spilafélögum í "session".  Reyndar mættu bara tveir en annar þeirra færði afmælisbörnunum köku sem strákarnir fjórir skiptu á milli sín.  Ég var komin í háttinn rétt fyrir ellefu og aldrei þess vant leit ég ekki í bók.

Tvíburarnir átján ára í dag

Fór aftur á hjóli í vinnuna í gærmorgun.  Nýji lásinn virkaði og læsti ég hjólið við hjólagrindarstæði niðri í bílastæðahúsi í Seðlabankakjallaranum.  Það var alveg jafnmikið að gera í vinnunni en ég komst þó í morgunkaffi, mat og svo tíu mínútna síðdegiskaffi.  Hjólaði "beint" heim opnaði lásinn sem ég hafði læst utan um stýrið á meðan ég hjólaði á milli en svo gat ég engan veginn læst lásnum aftur.  Nágranninn kom að mér og leit á lásinn en hann gat ekki hjálpað mér, dæmdi hann bara ónýtan.  Í millitíðinni hafði exið komið við til að hitta Davíð Stein að máli.  Hann kastaði á mig kveðju er hann gekk framhjá mér þar sem ég var að bisa við lásinn ég "hæaði" á móti en hann heyrði það víst ekki því hann heilsaði aftur nokkru hærra.  Ég fattaði því miður ekki að spyrja hann hvort hann væri orðinn svo gamall að hann væri að missa heyrn.  En þegar útséð var um að hægt væri að nota nýkeyptan lásinn neitt meira fékk ég Odd Smára til að koma út og vakta hjólið á meðan ég skrapp í GÁP og keypti nýjan lás, svipaðan þeim sem ég var með áður.  Er við mæðginin komum svo inn rétt upp úr fimm bauð Davíð Steinn okkur upp á ananas- banana- og jarðaberjabúst í eplasafa og heitt brauð með barbeque sósu og osti.  Hann fékk svo hjólið lánað upp úr sex til að hitta vini.  Oddur fór eftir kvöldmat, lax í ofni, sem ég var ekki fyrr en upp úr átta.

Smá hjólalásavandræði

Það var alveg kjörið að nota hjólið milli heimilis og vinnu í gær.  Lásinn var svolítið stífur þegar ég opnaði hann upp úr klukkan hálfátta í gærmorgun en ég var samt ekki lengi að bisa við hann.  Verra var það aftur á móti þegar ég ætlaði að opna hann aftur til að læsa hjólið við eitt stæðið í hjólagrind í Seðlabankakjallaranum.  Það vildi ekki betur til en lykill brotnaði.  Líklega var það eins gott að svona fór áður en ég hafði náð að læsa hjólinu.  Ég ákvað að treysta því að hjólið fengi að vera í friði þarna á meðan ég væri í vinnunni.  Vinnudagurinn var annasamur og við vorum ekki búnar fyrr en klukkan var korter yfir fjögur.  Þá hjólaði ég beint upp á Hverfisgötu á stað þar sem hægt er að fá leigð hjól og einnig gert við hjól og spurði hvort hægt væri að klippa lásinn af og hvort þeir væru með hjólalása til sölu.  Það var hægt og borgaði ég 2600 kr. fyrir nýjan frekar stuttan lás og hjálpina við að klippa gamla lásinn af hjólinu.  Áður en ég fékk lásinn smelltan á stýrið og afhenta tvo lykla af honum spreyjaði maðurinn með lásaspreyi í lásinn.  Ég hjólaði Hverfisgötuna, Rauðarárstíginn, Klamratúnið og Lönguhlíðina heim og var svo ekki í neinum vandræðum með að læsa hjólinu við grindverkið þrátt fyrir að lásinn væri miklu styttri en sá sem ég var með áður.

Aftur á völlinn

Það var engin vekjaraklukka í gangi í gærmorgun enda sunnudagsmorgun.  Samt var ég ekki eins löt á fætur og á laugardaginn.  Um hádegisbil hellti ég fyrst á könnuna en þá var ég búin að vera á fótum hátt í þrjár klukkustundir.  Davíð Steinn lauk við fráganginn í eldhúsinu frá því kvöldið áður en svo fóru þeir bræður til pabba síns þar sem þeir voru fram á kvöld.  Ég var svo mætt á Valsvöllinn rétt fyrir fjögur að fylgjast með Valsstelpunum taka á móti Þór/KA í pepsídeild kvenna.  Gestirnir voru meira með boltann.  Í kringum tuttugustu mínútu taldi dómarinn að markvörður Vals hefði handleikið boltann ólöglega og dæmdi aukaspyrnu.  Í aukaspyrnunni hrasar ein norðanstúlkan á aðra markstöngina og dómarinn vildi meina að Valsstúlka hefði farið í hana með olnbogann.  Hann rak þá "brotlegu" útaf og dæmdi vítaspyrnu.  Markmaður Vals varði þessa spyrnu og það fór svo að ekkert mark var skorað í fyrri hálfleik.  Þrátt fyrir að norðanstelpur væru meira með boltan skorðuðu "mínar stelpur" á undan.  Gestirnir náðu svo jöfnunarmarki áður en uppbótatíminn var liðinn svo leikurinn fór 1-1 og hvort lið fékk eitt stig.

Letihelgi

Ég var alveg ótrúlega lengi að koma mér á fætur í gærmorgun.  Fór reyndar fyrst framúr um hálfátta en skreið upp í aftur innan við korteri seinna.  Þegar gelið var þornað kúrði ég mig undir sæng og var þar næstu klukkutímana.  Komst þó framúr á endanum en ég man ekki hvorum megin við tólf á hádegi það var.  Oddur Smári kom með mér í verslunarleiðangur upp úr tvö.  Er við vorum á leiðinni heim aftur hringdi ég í Davíð Stein og bað hann um að hella upp á kaffi, þannig að fljótlega eftir að ég kom heim úr búðinni fékk ég fyrsta kaffibolla gærdagsins.  Náði að drekka tvo bolla áður en ég trítlaði svo út á Hlíðarenda þar sem ég sá mína menn tapa 1-4 fyrir KR  :-(.  Spilið var alveg ágætt á köflum en það vantaði smá upp á endahnútinn og inn á milli var varnarleikurinn heldur slakur.  Kom heim aftur um sex og hafði steikt slátur og soðnar kartöflur í matinn.

Tvöhundraðasti dagur ársins

Það var fínt að komast í helgarfrí eftir klukkan fjögur í gær.  Ég vann á framleiðsluvélinni megnið af deginum og það gekk alveg þokkalega.  Dagurinn var líka enn fljótari að líða.  Samt var ég farin að bíða eftir klukkunni um hálffjögur.  Annars var dagurinn tíðindalaus.  Ég var með kvöldmatinn aðeins seinna en oft áður, hakk, pasta, gulrætur, sætar kartöflur, kasewhnetur, graskersfræ, afgangur af bygggrjónum frá fimmtudeginum og smá tómatmauk saman við.  Nennti engu en horfði á "Banks" með Oddi um kvöldið og las í bókinni "Bláa minnisbókin" eftir James A levine áður en ég fór að sofa.

Stuttu vinnuvika eftir frí búin

Ég fór á lánsbílnum í vinnuna í gærmorgun þar sem ég ætlaði að reka smá erindi strax eftir vinnu. Ein er enn í fríi en ég hitti hinar þrjár, sumarstelpuna og ungan mann í hjólastól sem vinnur hjá okkur um fjóra tíma á dag alla vega út næstu viku eða svo.  Mín vann í bókhaldinu og leysti svo af í matar og kaffitímum á skoðunarenda framleiðsluvélarinnar.  Dagurinn var ekkert svo lengi að líða og klukkan varð fjögur áður en ég vissi af.  Dreif mig þá á bókasafnið í Kringlunni og skilaði einum sex bókum. Hitti ekki á neinn í afgreiðslunni til að endurnýja bókasafnsskírteinið og eftir að hafa gengið einn hring en ekki fundið neina bók ákvað ég að fresta endurnýjuninni og fara heim með tóman poka. Er enn með tvær bækur af safninu, á aðra jólagjöfina mína ólesna og ég er nokkuð viss um að það fer að koma bók og krimmaklúbbnum inn um lúguna.  Svo ég er bara vel sett.  Var með matinn upp úr sex því strákarnir voru á leið í fjallgöngu með pabba sínum upp úr hálfsjö eða svo.  Þeir komu ekki heim fyrr en rétt fyrir tíu, næstum búnir á því, eða þannig.

Fimmtudagur

Ég rétt missti af hringingu frá mömmu um níu í gærmorgun.  Hafði verið í sturtu og var þar að auki aðeins seinni á fætur þennan síðasta frídag í bili.  Náði í mömmu í annarri tilraun og þá kom á daginn að það átti að útskrifa hana af bráðadeildinni og hún mátti fara heim.  Hún spurði hvort ég gæti skutlast með sig og það gekk alveg upp.  Var mætt í Fossvoginn um tíu og korteri seinna vorum við á leiðinni á Lyfjaver að m.a. til að leysa út sýklalyf þegar hún bað mig um að koma aðeins við í sjúkrahótelinu til að kveðja.  Í Lyfjaveri þurfti mamma að bíða eftir lyfjunum í næstum tvo tíma.  Ég sat úti í bíl og kláraði bókaklúbbsbókina, "Piparkökuhúsið" og hlustaði á útvarpið.  Við vorum svo komnar langleiðina austur þegar hringt var ú Lyfjaveri því það hafði gleymst að láta mömmu hafa sýklalyfin sem voru henni afar nauðsynleg.  Sem betur fer var hægt að "millifæra" pöntunina og taka þetta út í Lyf og heilsu á Hellu.  Ég stoppaði á Hellu fram yfir kvöldmat og kom svo við í Fossheiðinni á Selfossi á leiðinni í bæinn.  Það var spilakvöld hjá strákunum svo ég var ekkert að flýta mér heim.  Var þó komin í bæinn um tíu og skreið upp í rúm fyrir ellefu.

Síðasti dagurinn í sumarfríi runninn upp

Á morgun mun ég mæta aftur til vinnu eftir fimm vikna sumarfrí, tuttuguogfjóra virka daga.  Þá á ég eftir sjö virka daga þar sem ég náði ekki á klára einn dag síðan í fyrra.  Ég fór á fætur um hálfníu í gærmorgun. Mamma var enn inni á bráðamóttöku og það átti jafnvel að senda hana á Selfoss í dag.  Það varð úr að við pabbi og Bríet lögðum af stað í bæinn um eitt.  Fórum fyrst til mömmu og þar varð sú stutta eftir á meðan við pabbi fórum og hreinsuðum út úr herbergi 312 á sjúkrahótelinu og gerðum upp fyrir mömmu.  Komum aftur upp á bráðamóttöku stuttu fyrir fjögur.  Biðum eftir að Helga kæmi úr vinnu.  Hún mætti með súkkulaðimuffins og hjónabandssælusneið og söng á vörum til handa afmælisbarninu.  Stuttu seinna fór ég á lánsbílnum heim.  Upp úr hálfsex bauð ég strákunum mínum út að borða á Saffran en þangað höfum við ekki farið saman í tvö ár og ég bara tvisvar ein í millitíðinni.  Hafði svo smá stund heima áður en ég trítlaði á Valsvöllinn til þess að verða vitni á því að heimaliðið tapa 1-3 fyrir Selfossstúlkum.  Öll mörk voru skoruð í fyrrihálfleik líkt og í tapleiknum hjá strákunum á móti Breiðabliki kvöldið áður (1-2) en á þann leik komst ég ekki þar sem ég var fyrir austan á leið á kynningartónleika.

Mamma sjötug í dag

Ég heyrði óljóst í pabba og Bríeti fyrir klukkan sjö í gærmorgun.  Bríet vaknaði og fékk sér eitthvað en þegar til kom nennti hún ekki í sund með afa sínum.  Ég fór á fætur á slaginu níu.  Áður en ég fór að sofa kvöldið áður byrjaði ég á "nýrri" bók úr bókaklúbbnum, Piparkökuhúsið eftir Carin Gerhardsen.  Þessi bók kom fyrir tæpum tveimur mánuðum og á ég von á sendingu aftur fljótlega svo það er best að fara að gera þessari bók skil.  Þetta er höruspennandi krimmi sem fær mann til að hugsa og pæla um orsök og afleiðingu. Mamma hringdi í pabba í hádeginu en þá var búið að kyrrsetja hana á sjúkrahúsinu.  Sýklalyfjagjöf einu sinni á dag vegna heimakomu var víst ekki nóg og átti hún að fá inngjöf þrisvar sinnum næsta sólarhringinn.  Annars leið dagurinn ágætlega hratt.  Úti komu hellidembur en inn á milli sást í sólina.  Pabbi sá um kaffitímann en bað mig svo um að taka til kvöldmatinn.  Vorum með ofnbakaðan lax og með honum hrísgrjón og gular baunir í heitu, bræddu smjöri.  Um hálfníu lánaði pabbi mér jeppann sinn, sem ég hef líklega aldrei tekið í áður, og ég brunaði austur í Hvolsvöll á tónleika í Sögusetrinu.  Dóttir hjónanna, Sigríðar og Friðriks Guðna sem bæði eru dáin, er búin að semja helling af flottum og góðum lögum sem hún stefnir að því að gefa út.  Á tæpri klukkustund fengum við smá nasasjón af músíkinni hennar.  Í flestum lögum söng æskuvinkona hennar bakrödd með henni.  Hún sjálf spilaði í fyrstu undir á flygil og svo fékk hún 16 ára son sinn til að spila undir bæði með henni og svo sér í mörgum af lögunum og í einu laginu spilaði dóttir annarar vinkonu með henni undir á fiðlu.  Þetta voru yndislegir tónleikar og ég var með gæsahúð allan tímann svo ég get eiginlega ekki beðið eftir að diskurinn komi út.

Hundraðogfimmtíu ára í ár

Ég var vöknuð rétt fyrir sjö í gærmorgun og fór fljótlega á stjá, fyrst í sturtu og önnur hefbundin morgunverk svo klukkan var sennilega um átta þegar ég klæddi mig og bjó um. Ekki það að ég sé neitt lengi í sturtu heldur er það gelið sem tekur nokkra stund að þorna. Kveikti á tölvunni, sótti þvott af snúrunum í þvottahúsinu, straujaði spariskyrtur strákanna og tók eitt og annað til í tösku.  Vafraði um á netinu til klukkan að verða hálfttíu en þá slökkti ég aftur á tölvunni.  Settist með "Ómarsbókina" í "nýja" sófann og las þar til mamma hringdi.  Ég var tilbúin fyrir utan þegar hún renndi við upp úr hálfellefu.  Hún keyrði svo að Atlantsolíustöðinni við Flugvallarveg þar sem ég dældi á bílinn og skipti svo um sæti við mömmu.  Við vorum komnar á Hellu um tólf.  Þar hittum við fyrir pabba og systurdætur mínar.  Við fórum fljótlega að undirbúa smá veisluhöld.  Eldri frænka mín sá um að pakka inn smá hlutum sem mamma hafði útvegað og átti að nota í pakkaleik en við pabbi lögðum á tvö borð.  Um hálfþrjú komu systir mín og mágur með tvíburana með sér en þau höfðu komið við á Bakkanum til að sækja þá.  Rétt seinna byrjuðu veislugestir að koma, alls 10 manns, fern hjón og tvær konur af elstu kynslóðinni (fæddar ´22 og ´28).  Helga hafði komið með tilbúið kartöflusallat og kaldar sósur og keypt kjöt á grillið, Ingvi sá um að grilla.  Á eftir var boðið upp á kaffi og hjónabandssælu.  Og til efnið;  mamma verður sjötug á morgun og pabbi áttræður í október, saman verða þau þá 150 ára.  Flestir gestir kvöddu um hálfsex til að vera komnir í bæinn fyrir úrslitaleik hm.  Eftir urðu fjölskyldan ein hjón og svo systir hans pabba sem hann keyrði reyndar fljótlega heim til sín.  Síðustu gestirnir fengu ekki að fara fyrr en að loknum pakkaleik.  Ég var sú eina af viðstöddum sem ekki tók þátt því ég vildi heldur horfa á hm og sjá liðið sem ég hélt með verða heimsmeistara.  Já, ég hélt með Þjóðverjum en líka smá með Messí.  Mágur minn, mamma, Hulda og Davíð Steinn kvöddu eitthvað á níunda tímanum en Helga og Oddur Smári fóru  á mömmu bíl rúmlega tíu eftir að búið var að lesa fyrir Bríeti.  Ég varð eftir en mun skrifa um ástæðuna í næsta pistli.

"Nýr" stofusófi

Um síðustu helgi fengu systir mín og mágur lánaðan jeppann og kerruna hjá pabba.  Í gær kom Ingvi við annan mann nokkru upp úr hádegi og í fyrstu ferðinni komu þeir inn með nokkra púða sem þeir lögðu á rúmið mitt.  Síðan tóku þeir hornsófann í sundur og fóru út með einn part af þremur.  Í næstu ferð komu þeir inn með fleiri púða og sessur.  Þegar hornsófinn var allur komin út í innkeyrslu komu þeir inn með sófa sem Helga og Ingvi eru búin að eiga í einhver ár en ætla ekki að flytja með sér. Mágur minn og aðstoðarmaðurinn settu nýja sófann saman, sem er líka í þremur pörtum en öðru vísi í laginu og nokkru stærri, og kvöddu svo með þeim orðum að best væri að drífa sig með inn á haugana.  Ég varð auðvitað að prófa þennan nýja sófa og horfði á nokkra  "Ray Donovan" þætti af skjá frelsi.  Sófinn virkar vel og ég notaði hann áfram þegar ég horfði á bronsleikinn á hm.  Aftur spáði ég rétt fyrir um hvort liðið næði þriðja sætinu en markatalan var ekki rétt þó.  Þá er bara spennandi að vita hvort ég hafi rétt fyrir mér varðandi úrslitaleikinn en það er samt ekki víst að ég geti horft á hann í beinni.  Meira um það næst.

194. færsla ársins

Það er dagur númer 193 á þessu ári þótt færslan sé sú 194.  Þetta veit ég því einn daginn seinni partinn í vetur setti ég bæði inn mynd og texta en hvort í sínu lagi þó.  Ég er nú komin með yfir 10 fleiri færslur en "allt" árið í fyrra.  Reyndar byrjaði ég ekki skrifin þá fyrr en í maí og fyrst í stað aðeins á virkum dögum.  Nú virðist vera sama hvort það er virkur dagur, helgi eða hátíðistdagur alltaf sé ég ástæðu til að skrifa a.m.k. eitthvað smávegis.  Hvort ég hafi svo alltaf eitthvað að segja er allt annað mál en svo sem engin sérstök ástæða til að velta því of mikið fyrir sér.  Það rigndi einhver ósköp í gær og ég fann ekki neina þörf hjá mér fyrir að fara út fyrir dyr.  Var komin á fætur fyrir níu og eyddi deginum í tölvuna, þáttagláp af skjá frelsi og svo smá lestur inn á milli.  Skreið aftur upp í rúm um tvö eftir miðnætti og las aðeins meira.

Rólegheit

Gærdagurinn var heldur styttri í annan endann.  Ég vaknaði að vísu fyrst upp úr átta, hringdi í pabba og Helgu systur og sagði þeim frá biðinni með mömmu og hvað hefði verið gert og ákveðið.  Síðan fór ég í sturtu, smurði á mig gelið og skreið svo aftur upp í.  Þegar ég varð vör við að gelið væri þornað breiddi ég sængina yfir mig, lagðist á magann og svaf til hádegis.  Ætlaði varla að nenna að hafa mig á fætur en það tókst einhvern tímann á milli tólf og eitt.  Restin af deginum fór í þáttagláp og tölvuvafr. Var svo háttuð og skriðin upp í fyrir miðnætti.

Ég spáði réttum liðum áfram

Eftir hádegi í gær skruppum við Ella vinkona yfir á Seyðisfjörð.  Lögðum bílnum á bílastæðinu við Samkaup og fengum okkur svo smá gönguferð um bæinn.  Síðan fórum við á kaffihús og fengum okkur kaffi og skyrtertusneiðar.  Ég splæsti á mig einu hvítvínsglasi og meðan við nutum veitinganna sátum við fyrir utan í bongóblíðu.  Tókum svo annan göngutúr að "bláu kirkjunni" og þar um kring áður en við kvöddum staðinn og fórum aftur yfir á Egilsstaði.  Dagurinn leið afar fljótt.  Ella skrapp á strandblakæfingu seinni partinn og bauð mér svo upp á dýrindis fiskrétt úr kjöt og fiskbúðinni.  Upp úr hálfátta skutlaði hún mér svo á flugvöllinn.  Mamma sótti mig nokkru eftir að ég lenti í Reykjavík.  Ég var búin að ákveða að hún ætti að hafa bílinn sinn á meðan hún væri í bænum svo hún skutlaði mér heim og kvaddi.  Horfði á seinni undanúrslitaleikinn á tímarásinni og hraðspólaði á köflum.  Rétt þegar fyrri hálfleikur framlengingar var að klárast hætti tímarásin að virka en þá setti ég bara á plúsinn og kom inn þar sem seinni hálfleikur framlengingar var um það bil að hefjast. Stuttu áður hafði Helga systir hringt til að segja mér að hún væri að fara með mömmu upp á bráðamóttöku því hún væri komin með heimakomu í báða fætur. Ég náði að klára leikinn á plúsnum, vítakeppnina og allt, áður en Helga sótti mig og keyrði mig að bílnum hennar mömmu rétt við sjúkrahótelið í Ármúlanum.  Ég brunaði svo á bráðamóttökuna þar sem mamma beið enn eftir að röðin kæmi að sér.  Upp úr miðnætti var hún kölluð upp og fór ég með henni inn þar sem metið var hvar hún yrði sett í röðina.  Síðan fórum við aftur fram og biðum í klukkustund.  Þá var hún kölluð inn og látin leggjast á bekk inn í litlu skoðunarherbergi.  Hjúkrunarfræðingurinn reyndi að flýta fyrir og taka blóðprufu en það gekk ekki í fyrstu tilraun.  Svo tók við meiri bið og meiri bið og ég var farin að halda að mamma hefði bara gleymst þarna.  Um hálfþrjú fór eitthvað að gerast því þá kom inn læknakandídat.  Henni tókst reyndar ekki að taka mömmu blóð.  Þegar hjúkrunarfræðingurinn kom svo aftur upp úr þrjú þá loksins hafðist það og hún setti þá inn svona kera eða hvað þetta heitir.  Upp úr hálffjögur fékk mamma sýklalyf í gegnum kerann og áður en hún fór um fjögur fékk hún tíma í dag til að fá annan svoleiðis skammt. Henni var ekki bannað að keyra svo ég keyrði mig heim og hún fór sjálf aftur á sjúkrahótelið.

Rúst

Á meðan vinkona mín skrapp til tannlæknis fékk ég leyfi til að fara í tölvu.  Að sjálfsögðu nota ég tækifærið og set inn nokkrar línur.  Ég var komin á fætur um níu í gærmorgun, nokkru á undan vinkonu minni.  Þegar hún kom fram ekkert svo löngu seinna var ég að setja upp kaffið.  Dagurinn leið hratt við ýmis dundur. Horfðum á einn þátt af Intelligence, spjölluðum og hlóum.  Ella skrapp aðeins um eitt en var ekki lengi í burtu. Þegar hún kom aftur um hálftvö fórum við tvær í göngutúr um næsta nágrenni.  Hún sýndi mér m.a. vinnustaðinn sinn að utan, strandblakvellina og nokkra garða með frábærum listaverkum.  Áður en við komum heim komum við í Nettó og keyptum m.a. "morgunroða" (kaffitegund) og ástarpunga.  Þegar leið á daginn varð ég alltaf spenntari og spennari fyrir fyrri undanúrslitaleiknum, Braselía - Þýskaland.  Klukkan átta hófst sá leikur og fyrir utan fyrstu mínúturnar var þetta eiginlega bara einstefna.  Seinni hálfleikur var aðeins skárri hjá Braselíu en Neuer varði vel í marki Þjóðverja.  Oscar náði þó að setja hann rétt í lokin en það var of lítið og alltof seint því þeir voru búnir að fá á sig 7 mörk.  Ég spáði leiknum 2-0 fyrir Þýskaland svo ég get bara verið þokkalega sátt.

Í heimsókn hjá æskuvinkonu

Þar sem ég komst aðeins í nettengda tölvu gat ég ekki látið það vera að setja inn smá pistil.  Vaknaði afar spennt um sjö í gærmorgun.  Byrjaði á því að fara í sturtu og þurfti svo að skríða í smá stund upp í rúm á meðan daglega gelið var að þorna.  Las í bókinni hans Ómars um Möngu með svarta vanga á meðan.  Var svo klædd og komin á ról fyrir klukkan átta.  Kveikti á tölvunni og vafraði aðeins um.  Fékk mér eitthvað í svanginn og yfirfór íbúðina aðeins.  Kvöldið áður var ég búin að taka til ýmislegt í tösku.  Upp úr hálftíu skellti ég hurðinni inn í íbúð í lás á eftir mér og skutlaðist á Hótel Íslands.  Mamma svaraði ekki í gemsann svo ég varð að leggja lánsbílnum og sækja hana inn.  Það virtist sem hún hefði alveg gleymt að hún ætlaði að fá bílinn.  En hún var klædd, nýkomin úr morgunmat, og ég þurfti bara að hjálpa henni í peysu og minna hana á herbergislykilinn.  Næst lá leiðin út á Reykjavíkurflugvöll.  Kvaddi mömmu eftir að hafa skrifað niður fyrir hana hvenær ég kæmi til baka.  Farangur minn var svo léttur að ég gat tekið allt sem handfarangur og komst þar með í miklu styttri röð við innbókun í flug til Egilsstaða.  Eftir innritun hitti ég vinkonu systur minnar og fjölskyldu en hjónin voru að senda dætur sínar tvær með sömu vél og ég var á leið í til að hitta afa sinn og ömmu og fara með þeim í sumarbústað.  Ella vinkona tók á móti mér á Egilstöðum rétt rúmlega hálftólf.  Við lögðum leiðina fyrst í Nettó áður en við fórum heim til hennar.  Það rigndi mikið allan daginn svo við héldum okkur inni framan af, drukkum kaffi, spjölluðum og horfðum líka á nokkra þætti af Intelligence.  Um hálfátta skruppum við út í ca. 40 mínútna göngutúr.  Er við komum til baka voru maðurinn hennar og sonur komnir heim úr strandblaki.  Það teygðist úr kvöldinu hjá okkur vinkonunum alveg til klukkan að verða eitt.

"Manga með svarta vanga - sagan öll"

Titillinn í dag segir að sjálfsögðu frá hvaða bók ég er að lesa í augnablikinu, vel skrifuð og skemmtileg aflestrar.  Fær mann líka til að hugsa um pælingar höfundarins um ýmislegt sem fram kemur. Annars var gærdagurinn fínn þótt ég væri ein heima.  Framan af dunaði ég mér ýmist vil lestur, netvafr eða horfði á þætti "inntelligence" sem komnir eru á Skjá frelsi.  Rétt fyrir hálffimm lá svo leiðin niður í bæ. Var heppin að finna bílastæði en fann það svo þar sem ég hafði aldrei lagt áður en var þó ekki langt frá áfangastaðnum.  Á Kaffi París hitti ég jafnöldru mína og tvíburamömmuvinkonu sem er alin upp í Rangárvallarsýslu eins og ég.  Hún var búin að panta sér kaffi og vatnsglas sem henni var fært rétt eftir að ég mætti.  Ég pantaði það sama.  Við tóku frábærir klukkutímar af spjalli, hlátri, galsa og einstakri skemmtun.  Pöntuðum okkur hvor sína tegundina af sallati rétt fyrir sex.  Ég fékk mér Gylfasallat en hún Sesarsallat.  Nokkru eftir að við lukum við að borða það pöntuðum við meira kaffi og bættum við eplakökusneið sem rjóma.  Þarna vorum við í fjóra tíma en um hálfníu röltum við út og aðeins upp Laugaveg.  Klukkan var svo langt gengin í tíu er við kvöddumst báðar jafn ánægðar og endurnærðar eftir gott spall og mikinn hlátur.  Annars vil ég svo geta þess að það er líklegt að nú komi smá skrifpása á þessum vettvangi, kannski einn til þrír dagar, í ég hef þá örugglega frá mörgu að segja næst þegar ég set inn pistil.

Sunnudagur

Mamma hringdi í mig á föstudaginn var og spurði hvort ég gæti skutlast aðeins með hana um eitt daginn eftir (í gær).  Það var alveg sjálfsagt mál.  Tvíburarnir voru að fara til föðurforeldra sinna og það átti að sækja þá um eitt.  Ég kvaddi þá því með knúsi er ég fór út úr húsi um tólf.  Fór beinustu leið með lánsbílinn og "keyrði í gegnum" snertilausu þvottastöðina við Skúlagötu.  Síðan kom ég við í hraðbanka áður en ég lagði til hliðar við Hótel Ísland aðeins í fyrra fallinu.  Hringdi í gemsann hennar mömmu og það var systir mín sem svaraði.  Hún hafði semsagt líka fengið systur mína í sama erindi.  Reyndar voru þær eitthvað búnar að snúast fyrr um morguninn en mamma var alveg búin að gleyma að hún hafði beðið mig um að skutlast með sig þangað sem hún var að fara um eitt.  Þetta gerði nú minnst til því ég tók einfaldlega við af Helgu.  Mamma var að ljúka við að borða og svo sótti hún öll lyfin sín áður en ég skutlaði henni upp á geðdeild.  Mamma hafði verið boðuð þangað daginn áður og svo aftur í gær.  Hún fór í viðtöl og lyfin skoðuð.  Held að það hafi verið að breyta einhverju.  Ég þurfti ekki að bíða eftir mömmu því hún vissi ekki hvað þetta myndi taka langan tíma.  Ég bý lika svo stutt frá.  Fór því beint heim og náði að hitta strákana mína aðeins aftur og knúsa þá betur áður en þeir voru sóttir.  Það kom á daginn að mamma var lungan úr deginum í þessu erindi sínu.  Hún var ekki búinn fyrr en um fjögur og hringdi þá í mig. Rétt áður hafði Helga systir hringt til að leita frétta, sem þá voru engar. Ég slökkti snarlega á sjónvarpinu en næstsíðasti leikurinn í átta liða úrslitum hm var að hefjast, Argentína - Belgía.  Skutlaði mömmu aftur á sjúkrahótelið og á leiðinni þangað hringdi gemsinn minn.  Hélt að það væri systir mín aftur og bað mömmu um að svara en þar sem hún þekkti ekki nafnið sleppti hún því.  Þetta var "tvíburamömmuvinkona mín" og ég hringdi bara aftur í hana eftir að ég kom heim. Skrapp fyrst aðeins í Hagkaup í Skeifunni.  Ég missti af eina marki leiksins í beinni en það var nú sýnt aftur og aftur.  Sá seinni hálfleikinn og svo allan seinni leikinn síðar um kvöldið.

Meira um bækur og lestur

Hef lokið við að lesa enn eina bókina, "Þrettánda sagan", og nú eru fjórar bækur komnar ofan í bókasafnspokann.  Ein af þeim bókum, "Bókaþjófurinn" var með skilafrest til 7. júlí en hinum þremur þarf ekki að skila fyrr en 21. júlí.  Ég var ekki svo viss um að ég kæmist á safnið næstu dagana svo framlengdi skilafrestinum á bókaþjófnum.  Þá eru fimm bækur ólesnar af safninu með skilafrest í endaðan mánaðarins.  Ég mun klárlega leggja leið mína á bókasafnið fyrir 21. n.k. og þá skila fleirum en fjórum bókum.  Þá þarf ég líka að endurnýja bókasafnskortið mitt en það rennur út á morgun. Lestur er svo sannarlega bestur.

Oddur Smári var vaknaður og kominn á fætur upp úr sjö í gærmorgun.  Hann fór að sofa aðeins á undan mér en á eftir bróður sínum.  Ég fór fyrst fram úr rétt fyrir átta og svo á fætur áður en klukkan varð níu.  Bókin sem ég lauk við í gær togaði í mig og dagurinn fór í lestur, tölvustúss og hm-gláp.

Badda mín 92 ára í dag

Ég er rúmlega hálfnuð með bókina sem ég sagði aðeins frá í gær, "Þrettánda sagan".  Hún heldur mér alveg við efnið og er spennandi.  Samt las ég lítið um miðbik gærdagsins því ég er viss um að ef ég hefði sökkt mér niður í bókina þá hefði ég lokið við hana í gær.  En ég er svo sem ekki í neinum kapplestri og það er alveg ágætt að leggja bókina til hliðar um stund og hugsa um það sem fram er komið.  Mamma kom annars í bæinn í gær og verður í nokkra daga á sjúkrahótelinu við Ármúla.  Ég hitti hana ekkert en hún hringdi í mig og spurði hvort hún fengi bílinn sinn í einhverja daga, samt ekki strax í gær.  Það var alveg í góðu lagi mín vegna enda á hún bílinn.  Ég er búin að vera með hann í láni í eitt og hálft ár með smá hléi í fyrrasumar.  Asea-maðurinn hringdi líka í mig að fyrra bragði í gærkvöldi.  Sá að ég hafði verið að reyna að ná á hann.  Hann hafði verið á sjónum og þar sem hann er að fara aftur út í dag dreif ég mig til hans eftir kassanum mínum.  Í leiðinni gekk hann frá fríkassanum fyrir mig svo næst fæ ég tvo kassa, átta flöskur.

"Þrettánda sagan"

Já, ég las Flekkuð upp til agna í gær og er að sjálfsögðu byrjuð á nýrri bók sem er yfir 420 blaðsíður og eftir Diane Setterfield.  Þrettánda sagan segir frá frægum rithöfundi sem fær lítt þekktan ævisagnaritara til að skrifa ævisögu sína.  Í gegnum árin höfðu margir reynt að fá rithöfundinn til að segja frá ævihlaupi sínu en hún sagði alltaf nýjar og nýjar sögur.  Ég er eiginlega bara rétt að byrja á bókinni en hún lofar góðu.

Mér barst bréf frá sýslumannsembættinu í Reykjavík í gær og nú er lögskilnaðurinn í gegn.  Ég sá því ástæðu til að opna hvítvínsflöskuna með kvöldmatnum í gærkvöldi, ofnbakaðri bleikju með kartöflum og gulum baunum í heitu smjöri.  :-)

Mikið lesið

Ég lauk við Yrsubókina í gær og byrjaði strax á annarri, Flekkuð, eftir höfund sem heitir Cecilia Samartin.  Bókin er um stúlku frá Mexíkó sem fæðist með stærðar valbrá á bakinu.  Þegar mamma hennar deyr laumast hún yfir landamærin og finnur móðursystur sína í Los Angeles.  Hún fær svo vinnu, út á fölsuð skilríki, við að sjá um einn erfiðan sjúkling á geðveikrahæli, sérvitring sem segir henni sögu sína sem hún heillast af.  Bókin er um 340 bls. og er ég nokkurn vegin hálfnuð með hana enda ein af þessum bókum sem togar sterkt í mann að lesa meira og meira til að fylgjast með framgangi mála.

Eftir hádegi skruppum við Davíð Steinn í Veiðibúðina við Síðumúla þar sem ég gaf honum nýtt veiðihjól í afmælisgjöf.  Þeir bræður eru líklega að fara á Bakkann um næstu helgi og taka stangirnar með sér.  Þeir voru búnir að leita nokkrum sinnum í geymslunni og fundu allar græjurnar fyrir utan veiðihjólið hans Davíð Steins.  Ég ákvað því að gefa honum afmælisgjöfina í fyrra lagi svo hann gæti nú notað stöngina.  Ég keyrði hann líka í Vesturröst þar sem hann keypti sér nokkrar 60gr sökkur.

Ég lét ekki síðustu tvo leikina í 16 liða úrslitum á hm í Brasilíu fram hjá mér fara.  Ég spáði rétt fyrir um úrslit leikjana og meira að segja markatalan í seinni leiknum var rétt hjá mér.  Það náðist að hafa spilakvöld hjá strákunum.  Einn spilafélaginn gat þó ekki verið lengi en þeir létu það ekki stoppa sig í þetta sinnið.  Þar með þurfti ég ekkert að hafa fyrir því að hugsa um neinn kvöldmat.

Árið að verða hálfnað

Nú á ég aðeins sex kafla eftir af Yrsu-bókinn enda las ég helling í gær. Bókin er það spennandi að ég er mest hissa á því að vera hreinlega ekki búin að lesa hana upp til agna.  Byrjaði gærmorguninn á því að lesa um stund eftir að ég kom úr sturtu.  Tók einnig nokkrar les-tarnir yfir daginn og endaði daginn á því að lesa nokkra kafla.  Klukkan var líka að nálgast eitt eftir miðnætti er ég ákvað að beita mig hörðu, leggja frá mér bókina, slökkva á lampanum, biðja bænirnar mína og svífa inn í draumalandi.  Eyddi samt deginum í aðeins meira en lestur og tölvumál.  Við Oddur Smári skruppum í Krónuna og örsnöggt í Hagkaup í Skeifunni. Versluðum alls ekki yfir okkur en nú er nóg til fyrir vikuna.  Einnig horfði ég á báða hm-leiki gærdagsins.  Slapp nokkuð létt frá matseldinni, setti upp kartöflur og steikti nokkrar blóðmörs- og lifrarpylsusneiðar.

Síðasti júnídagurinn

Ég er búin með Bókaþjófinn og byrjuð á annarri bók, ekkert mikið styttri.  Sú bók er eftir Yrsu Sigruðardóttur og heitir Horfðu á mig.  Hún kom út árið 2010 en einhvern veginn barst hún ekki upp í hendurnar á mér fyrr.  Ég fékk hana á safninu þann 21. þ.m. ásamt tveimur öðrum bókum og þarf ekki að skila fyrr en 21. júlí.  Ég er nú þegar búin að lesa um 180 bls. af 478 í heildina og verð líklega ekki lengi að klára því þetta er ein af þeim bókum sem maður leggur ekki svo glatt frá sér.

Í gær skrapp ég í heimsókn til nöfnu minnar og frænku í Garðabænum og bað strákana um að ryksuga yfir gólfin á meðan.  Þeir von á vini til að horfa með þeim á fyrri hm-leikinn og svo stóð jafnvel til að það yrði spilakvöld eða "session" eins og þeir kalla það.  Ég var komin heim rétt fyrir fjögur og tók strax eftir að strákarnir höfðu staðið við sitt.  Þeir skruppu í Sunnubúð og er þeir komu til baka var vinurinn með þeim.  Hins vegar varð ekkert af því að hópurinn hittist síðar um daginn þar sem einn af þeim var staddur fyrir norðan.

Milli leikja bauð ég upp á hakk og spakk.  Vinurinn fór reyndar strax eftir fyrri leikinn sem var alveg ótrúlegur þar sem Hollendingar virtust vera að tapa 0-1 fyrir Mexíkó en skoruðu tvö mörk á síðustu mínútunum. Þá var seinni leikurinn ekkert síðri, fór í framlengingu og vítaspyrnukeppni.  Vinningsliðið, Kosta Ríka spilaði manni færri í tæpa klukkustund og voru eiginlega búnir á því en markvörður þeirra sá svo um að verja vitaspyrnu eins Grikkjans á meðan sigurvegararnir skoruðu úr öllum sínum spyrnum.  Grikkir tóku bara fjórar spyrnur þar sem úrslitin lágu fyrir fyrir síðustu spyrnu þeirra.

Sunnudagur

Það stenst enn að ég taki hvern dag nokkuð snemma.  Í gærmorgun las ég um stund á meðan ég beið eftir því að gelið þornaði.  Ég var samt komin á fætur um hálfníu.  Skipti tímanum á milli tölvunnar og bókarinnar á meðan ég beið eftir því að bræðurnir vöknuðu.  Klukkan var byrjuð að ganga eitt áður en þeir voru báðir búnir/hættir að sofa.  Þá spurði ég þá hvort þeir vildu koma með mér að afhenda afmælispakka.  Hringdi heim til systur minnar til að kanna hvort einhver væri heima.  Mágur minn sagðist alveg skyldu gefa mér kaffi.  Aðeins Davíð Steinn var til í að koma með.  Ingvi var einn heima er við mættum en systir mín kom nokkru síðar með blóm og þrjú kort.  Hún var frekar ánægð með að ég hefði rekið inn nefið því þá gat hún beðið mig um að skrifa á kortin, tvö á ensku og eitt á íslensku. Rétt seinna fór hún og sótti eldri dótturina og svo þá yngri nokkru síðar.  Sú yngri var ánægð með gjöfina sína.  Um þrjú fóru mæðgur af stað með blóm og kort til að kveðja skautaþjálfara stelpnanna. Þær urðu samt fyrst að snúa við eftir köku sem þær ætluðu að hafa með sér.  Á þessum eina og hálfa tíma pressaði Ingvi kaffi handa okkur tvisvar sinnum.  Við Davíð Steinn kvöddum svo stuttu eftir að mæðgurnar voru farnar.  Ég skutlaði stráknum á Njálsgötuna og kom svo við hjá Atlantsolíu við Flugvallarveg til að fylla á tank lánsbílsins úr því að það var 16 kr. afsláttur í gær.  Restin af deginum fór í að fylgjast með mögnuðum hm-leikjum. Þar sem fyrri leikur dagsins, sá fyrsti í 16 liða úrslitum, fór í framlengingu og vítaspyrnukepnni.  Það var rétt svo tími til að finna til kvöldmat á milli leikja. Tippaði á rétt úrslit í báðum leikjum en markatalan var ekki rétt nema í einu tilviki.  Ég endaði svo daginn nokkurn veginn eins og ég byrjaði hann, á því að lesa um stund.

Á ferðinni

Í dag eru sex vikur síðan ég fékk mér stuttu sumarklippinguna mína.  Nonni, klipparinn minn, er í fríi á laugardögum í sumar svo ég átti tíma hjá honum í gær.  Var mætt til hans fimm mínútur i tíu í gærmorgun og bað um samskonar meðhöndlun og síðast.  Skildi eftir helling af hári og kvaddi hársnyrtimeistarann minn tæpum hálftíma síðar.  Frá Kristu Quest lá leiðin í Hagkaup í Skeifunni. Þar keypti ég m.a. bleika strigaskó svo nú get ég aðeins sparað næstnýjasta skóparið, svörtu ecco sparilegu skóna mína.  Hitti fyrrum framkvæmdastjóra hjá RB á meðan ég beið eftir að komast að á kassanum. Davíð Steinn var kominn á fætur er ég kom heim um ellefu og tæpum klukkutíma síðar bað hann mig um að skutla sér upp í Grafarvog, í Vættarborgir, til vinar síns.  Hann var með honum fram á kvöld, fór m.a. í bíó.

Þegar ég var komin heim á ný settist ég með bókasafnsbók inn í stofu og las og las.  Þetta er ein þykkasta bókina sem ég er með u.þ.b. 600 bls.  Starfsfólk bókaverslana veiit þessar bók bókmenntaverðlaun árið 2008.  Ég er að tala um bókina Bókaþjófurinn eftir Markus Zusak. Frábær lesning.  Ég er búin með aðeins yfir 360 bls. og næ örugglega að ljúka við bókina fyrir 7. júlí n.k. og slepp þá við að framlengja láninu.  Rétt upp úr þrjú skilaði ég tveimur bókum í Kringlusafnið sem voru með sama skiladag og Bókaþjófurinn.  Nældi mér í fimm bækur í staðinn og er því með níu bækur af safninu því ég fékk þrjár lánaðar fyrir viku.  Fór með bækurnar inn í bíl og rölti svo aftur inn í Kringlu. Fékk mér kaffi á Te&Kaffi við Stjörnutorgið og var að rölta með kaffimálið að næsta lausa borði þegar exið birtist, ótrúlega stundvís, um hálffjögur.  Hann var að koma með lokapappíra til undirritunar vegna lögskilnaðar svo þetta er alveg að hafast.  Mér tókst að skrifa nafnið mitt á vitlausan stað í fyrstu og skrifaði því bæði á undan og eftir honum.  Samskiptin voru áreynslulaus og ég í því að spauga einhverja vitleysu.  En mér tókst líka að óska honum til hamingju með dótturina sem ku vera búið að nefna Elísabet Unu.  Hann má víst samt ekki vera skráður pabbi hennar fyrr en barnsmóðirn fær pappíra úr sínu heimlandi um að hún sé ekki í sambúð þar.  Þegar ég var búin úr kaffimálinu kvaddi ég. Lagði leið mína í vínbúðina og nældi mér í eina hvítvínsflösku.  Ég opnaði hana samt ekki í gærkvöldi einhverra hluta vegna.  Sennilegast þó vegna þess að mig langaði til að horfa á Wallander um "Órólega manninn" en ég er nýlega búin að lesa þá bók.

Heima á ný í bili a.m.k.

Klukkan að verða níu í gærmorgun voru allir komnir á fætur í húsinu við Hólavang 24.  Pabbi var auðvitað löngu komin á fætur en það er ekki oft sem mamma er vöknuð á þessum tíma.  Nú þurftu foreldrar mínir að vera komnir í bæinn stuttu fyrir hádegi.  Þau kvöddu mig um tíu og létu mig vita hvar aukalykillinn að húsinu væri.  Ég settist reyndar strax við tölvuna sem pabbi var búinn að kveikja á.  Rétt eftir að þau fóru hringdi síminn.  Það var kona sem er búin að taka að sér að þjala neglurnar á mömmu, kona sem ég þekki mjög vel því ég var mikið hjá henni á unglingsárunum og kíki enn nokkuð reglulega til hennar.  Hún bauð mér yfir til sín þar sem hún náði ekki í mömmu og ég skrapp í smá kaffi og spjall.  Eftir hádegi var ég að hugsa um að trítla upp að Helluvaði og heimsækja föðursystur mín.  Áður en ég var farin að hugsa mér til hreyfings hringdi dyrabjallan.  Og viti menn, fyrir utan stóð Árný föðursystir mín.  Hún var að koma frá því að sinna nokkrum erindum úr þorpinu.  Hún stoppaði nokkra stund og fékk kaffi og kanelsnúða og við áttum gott spjall í eldhúsinu.  Um það leyti sem hún var að fara var aftur hringt á dyrabjöllunni.  Það var nágrannakonan að koma með einn poka af nýsteiktum kleinum sem þakklæti til foreldra minna fyrir lán á garðsláttuvél.  Klukkan var um þrjú er ég var aftur orðin ein.  Þá fór ég aftur í tölvu þar til hm-leikurinn sem sýndur var beint á RÚV byrjaði. Var svo að horfa á seinni beinu útsendinguna þegar pabbi og mamma skiluðu sér heim.  Horfði á allan þann leik áður en ég kvaddi og brunaði í bæinn.

Smá skrepp

Að sjálfsögðu var ég komin á fætur upp úr klukkan átta í gærmorgun.  Sinnti ýmsu smálegu og beið svo eftir þvottavél, uppþvottavél og að bræður vöknuðu.  Davíð Steinn vaknaði miklu fyrr enda er hann búin að setja sér skýr markmið varðandi svefn, fótaferð og hreyfingu.  Þegar þvottamálin voru komin á hreint var klukkan langt gengin í eitt.  Þá bankaði ég upp á hjá Oddi.  Hann var enn ákveðinn í að koma ekki með sem svo leiddi til þess að hinn nennti ekki heldur.  Ég var ekkert að þrýsta á þá, skyldi bara eftir pening fyrir brauði og smá nauðsynjum, kvaddi og lagði í hann.  Fyrst fór ég á atlantsolíustöðina við Flugvallarveg og fyllti á lánsbílinn.  Síðan brunaði ég áleiðis austur.  Rétt austan við Selfoss tók ég tvo puttaferðalanga upp í, tvær þýskar stúlkur sem spurðu hvort þær kæmust með mér austur á Hellu.  Önnur er búin að vera hér í tæpt ár. Það kom svo í ljós þegar ég sleppti þeim út við olísstöðina að þær ætluðu að fara að Seljalandsfossi og eitthvað lengra austur.  Var komin til foreldra minna rétt fyrir hálfþrjú.  Eftir kaffi, um fjögur, fékk ég leyfi til að horfa á hm ef ég stillti það lágt.  Mamma horfði á fyrri hálfleikinn með mér og sagðist þá vera búin að horfa á hm.  Ég horfði líka á seinni leikinn sem sýndur var beint um átta.  Í millitíðinni komu þrjár frænkur okkar pabba og var ein að þeim með systradætur sínar að skila upphlutnum mínum sem hún var í við háskólaútskrift sína um síðustu helgi.

Bitvargur

Eins og fram kom í skrifum gærdagsins var ég komin á fætur fyrir klukkan átta.  Þá var ég samt búin að lesa í góða stund.  Ætlunin var að skipta um á rúminu og setja strax í þvottavél en ég frestaði því um einn dag eða svo þegar til kom.  Kveikti á tölvunni og "gleymdi" mér aðeins þar.  Þegar synirnir voru báðir vaknaðir bað ég þá um að koma með mér í Kringluna, ætlaði aðeins að "buxa" þá upp. Oddur Smári kláraði einar buxur úti í körfubolta fyrr í vikunni, hugsaði ekki út í að fara í íþróttabuxur í svoleiðis.  Hann átti svo einar heilar og  tvennar eða þrennar sem búið er að staga í.  Buxur Davíðs Steins eru ekki götóttar en ég ákvað engu að síður að kaupa einar nýjar á hann.  Við fórum í Dressmann og dæmið snérist aðeins við.  Aðeins voru til einar buxur í Odds stærð í þeim lit sem hann vildi en hinn fékk á sig tvennar gallabuxur því það var afsláttur af seinni buxunum.  Hann gat líka fengið buxur í sitt hvorum litnum.  Eftir þessi viðskipti fórum við og keyptum afmælisgjöf handa frænku okkar sem varð tíu ára á mánudaginn var.  Síðan fórum við í Lyf og heilsu og keyptum plástra og nefsprey til að losna við stíflu úr nefi.  Að lokum bauð ég þeim upp á kaffi og súkkulaðikrossant á staðnum fyrir framan Hagkaup niðri.  Davíð Steinn fékk sér cappucino, Oddur Smári swiss-mokka og ég einn venjulegan.

Um fjögur var ég sest fyrir framan sjónvarpið til að fylgjast með leik Ítala og Úrugvæa.  Ég hélt með þeim fyrrnefndu en hafði víst tippað á hitt liðið.  En ég var ekki par hrifin þegar ég sá atvikið með Suarez.  Sá maður ætti að vera settu í æfilangt knattspyrnubann.  Ég fékk strákana til að skipta þrifum á ganginum með sér og þeir gerðu það bara nokkuð vel.  Rölti á Valsvöllinn um sjö og sá mínar stelpur tapa 0-2 fyrir Fylki þrátt fyrir að vera mun meira með boltann.  En maður vinnur víst ekki nema að koma tuðrunni oftar í net andstæðinganna.

Kaffi

Í þessum skrifuðum orðum er ég líka að hella mér upp á kaffi.  Búin að vera á fótum í hátt í þrjá tíma og fyrst núna að huga að kaffinu.  Ég er skrýtin skrúfa en mér finnst það í góðu lagi.  Gærdagurinn leið ógnar hratt eins og flestir dagar.  Skrapp í bankann upp úr tíu og fékk aðstoð hjá fyrirtækjaþjónustunni við að fella út íbúa sem er fluttur út og setja þann sem keypti plássið í staðinn. Hef enn ekki rekist á "nýbúann" því hann er sennilega ekki fluttur inn.  Þetta gekk fljótt og vel fyrir sig. Þá skrapp í fiskbúðina við Sundlaugarveg og keypti mér ýsu í soðið, bleikjuflök í frystinn, rúgbrauð og reyktan silung.  Fljótlega eftir hádegið hringdi ég í Böddu mína til að athuga hvort hún væri heima. Svo reyndist vera.  Hún sagðist vera frekar léleg en tæki alveg á móti gestum.  Þegar ég kom í blokkina hennar virkaði ekki dyrasíminn sem skyldi. Var svo heppin að það var að koma gömul kona sem hleypti mér inn.  Sú kona var reyndar á leiðinni á sömu hæð og ég því hún er víst nágranni Böddu.  Stoppaði í uþb eina og hálfa klukkustund og lofaði svo að kíkja fljótt aftur.  Og nú er kaffið tilbúið sterkt og gott.

Brosi hringinn, bara af því bara :-D

Í gærmorgun var ég mætt í kirkju óháða safnaðarins stuttu fyrir klukkan tíu, rúmri klukkustund fyrir síðustu messuna í sumar.  Þá var ég búin að vera á fótum í tvo og hálfan tíma.  Presturinn og organistinn voru mættir á staðinn og það kom einn tenór um leið og ég.  Í kórhópinn bættust svo við einn sópran, einn bassi og þrjár í altröddinni á næstu fimmtán mínútum eða svo.  Við áttum ekki að syngja í röddum, aðeins þrjá sálma og auðvitað messusvörin.  Það var líka ákveðið að við skildum sitja úti í kirkju í messunni og "stjórna" sálmasöng og svörum þaðan.  Ljósvakinn, Leifur Eiríksson, opnaði messuna en Geir Ólafs mætti einnig og tók tvö lög (í sálmastað), góða sveiflu og svo "Ó, sole mio" og fórst það vel úr hendi.  Vel rættist úr mætingunni og við vorum nokkur sem borðuðum gúllassúpuna eftir messu "í efra", þar á meðal fyrsti kórstjórinn minn í kirkjukórnum, Peter Maté.  Áður en ég kvaddi svo kórfélaga mína hitti ég á söngvarann og gerði eins og ég hef vanið mig á við alla sem koma og "framkvæma" eitthvað í messunni, þakkaði honum fyrir sönginn.  Í staðinn uppskar ég hlýlegt handtak og knús.  Kom heim rétt fyrir eitt.  Davíð Steinn var í göngu með pabba sínum en hinn bróðirinn svaf á sínu græna langt fram á dag.  Skildi þó ekki vera að hann hafi vakað og tölvast fram eftir öllu...

Bókum skilað

Sex af tíu bókasafnsbókum í fórum mínum voru að nálgast skiladag, samkvæmt e-mail skilaboðum frá Borgarbókasafninu.  Lokafresturinn var strax eftir helgi en ég hefði líka getað framlengt láninu um þrjátíu daga í gegnum gegnir.is.  Ég var búin að lesa fimm af þessum bókum og byrjuð á þeirri sjöttu. Sú bók var ekki að höfða til mín og ég ákvað að vera ekki að eyða meiri tíma í hana.  Um tvö í gær fór ég með þessar sex bækur og eina sem ég var búin að lesa af hinum fjórum og skilaði þeim í Kringlusafnið.  Tók þrjár bækur í staðinn og er því með sex bækur af safninu hjá mér.  Þrjár af þeim á að skila þann 7. n.m. þ.e. ef ég framlengi þá ekki frestinum.  Hef þó fulla trú á því að ég verði búin að lesa bækurnar fyrir tilskilinn tíma.  Áður en ég fór aftur heim kom ég við í hraðbanka til að ná mér í smá skotsilfur til að eiga í seðlaveskinu.

Örstutt um gærdaginn

Var komin á fætur fyrir klukkan hálfníu.  Ekkert sérstakt var á planinu en ég lauk við að lesa "Eða deyja ella" eftir Lee Child og kveikti auðvitað líka á tölvunni.  Um eitt setti ég á mig hjálminn, fór í úlpu án þess að renna lásnum og tók lykilinn af hjólalásnum með mér út.  Brösuglega gekk að opna lásinn því hann er orðinn svo stífur en það tókst þó á endanum.  Beygði til vinstri á Lönguhlíð og þegar ég fór stuttu seinna yfir á hinn hjólaslóðann hitt ég norsku esperanto vinkonu mína örstutt.  Hún var á leiðinni í strætóskýlið við Sunnubúð.  Við skiptumst á nokkrum orðum en svo hélt ég áfram.  Beygði til hægri á Miklubraut.  Hjólaði auðvitað eftir gangstéttinni þar.  Beygði svo aftur til hægri er ég kom að Kringlumýrarbraut.  Vegna e-s konar framkvæmda beygði ég svo enn og aftur til hægri nokkru áður en ég kom að stígnum sem liggur aftan við Öskjuhlíðina.  Komst þó fljótlega á þann stíg.  Mér var síður en svo kalt en smá vindur angraði annað eyrað.  Svo ég stoppaði við bekki fyrir neðan Fossvogskirkjugarð, slakaði á í nokkrar mínútur og naut sólarinnar áður en ég setti á mig eyrnaband undir hjálminn og kláraði hringinn.  Allt í allt tók þetta ferðalag uþb 50 mín.

Innipúki

Ég var sennilega svo glöð að "græða" einn dag í gær að ég notaði hann í alls konar dundur innivið.  Ég er langt komin með Lee Child bókina úr bókaklúbbnum og ég gleymdi mér í uppáhalds demantaleiknum svo dagurinn leið hjá heldur hratt.  Þar fyrir utan kláraði ég að horfa á þriðju seríuna af Scandal og horfði á tvo hm-leiki.  Það var  spilasession hjá strákunum.  Þeir ákváðu allir að panta sér pizzu svo ég slapp við að elda.  Ég greip meira að segja í saumana mína og vann aðeins að símamyndinni.  En ég hugsaði ekkert út í að fara út og viðra mig.  Það verður bætt úr því í dag.

Fimmti virki frídagurinn

Mér fannst sem snöggast eins og það væri kominn föstudagur.  Það getur bara ekki verið, hugsaði ég og hafði þar með rétt fyrir mér.  Það getur ekki komið föstudagur á eftir miðvikudegi, eða hvað? Annars er tryggingafélagið búið að borga hjólastuldinn.  Ég varð bara nokkuð sátt þegar ég kíkti í einkabankann á þriðjudagskvöldið.  Þetta var mun meira en ég þorði að vona og ég samdi við strákana um að þar sem ég sæi um að borga af tryggingunum fengi ég að halda smá hluta eftir.  Þeir fengu samt milli 70 og 80 þúsund hvor um sig.  Davíð Steinn örlítið meira þar sem hans hjól var dýrara á sínum tíma.  Bræðurnir báðu mig svo um að koma með sér í Elkó og ég valdi að fara í Kópavoginn.  Oddur Smári keypti sér fjarstýringu fyrir playstation tölvuna en Davíð Steinn fékk sér nýjan LG síma og kom ég aðeins inn í það dæmi því hann kostaði meira en heimildin hans.  Að þessum viðskiptum fórum við Oddur í Krónuna við hliðina en Steinn beið í bílnum.

Gönguferð í Heiðmörk

Ég held mig við það að vera komin á fætur í síðasta lagi um níu.  Þá er ég reyndar búin að fara framúr einu sinni, m.a. til að smyrja á mig hormónagelinu.  Eitt af því fyrsta sem ég gerði eftir að ég var klædd og komin á ról var auðvitað að kveikja á tölvunni.  Sat þó ekki of lengi við hana eftir að ég var búin að vafra smá, setja inn pistil dagsins og spila örfáar umferðir í demantaleiknum.  Tók svo til við að lesa í bókinni sem ég skrifaði um í gær.  Rétt upp úr hádegi uppgötvaði ég að ég var orðin frekar kaffiþyrst. Hellti því upp á og settist með fyrsta bollan fyrir framan tölvuna.  Þá sá ég að Lilja vinkona var viðlátin og ákvað að kasta á hana kveðju.  Hvorug okkar var með neitt sérstakt á prjónunum svo við ákváðum að hittast og gera þetta "ekkert" saman.  Sótti þessa vinkonu mína og við byrjuðum á því að koma hingað og fá okkur smá kaffi.  Svo kviknaði sú hugmynd að skreppa í Heiðmörk og fá sér smá göngu.

Fór Rauðhólameginn inn í Heiðmörk og þegar við komum að þar sem voru bílastæði báðum meginn við veginn beygðum við og lögðum í stæði hægra meginn.  Ég fór í gönguskó og úlpu og svo lögðum við af stað gamlan vegslóða.  Löbbuðum hvorki hægt né hratt og spjölluðum og spjölluðum.  Við gengum líklega í þrjú korter áður en við snérum við og í bakaleiðinni tókum við eftir skilti sem á stóð "Rangæingafélagið" sem okkur fannst heldur betur við hæfi, báðar Rangæingar.  Það rigndi á okkur allan tímann en það var enginn vindur svo við fundum varla fyrir þessu.  U.þ.b. einum og hálfum tíma eftir að við löbbuðum af stað komum aftur að bílnum.  Beygðum útaf stæðinu til hægri og komum svo "út" Vífilstaðameginn.  Þaðan lá leiðin til Lilju sem bauð mér upp á gott kaffi, hafrakökur og enn meira spjall.  Kvaddi hana upp úr hálfsex og hitti fólk í anddyrinu sem ég kynntist á Veghúsatímabilinu.

Þjóðhátíðardagur Íslands

"Eða deyja ella", þar kom að því að ég gæti ekki hamið mig lengur og tæki mér þessa bókaklúbbsbók, eftir spennusagnahöfundinn Lee Child um Jack Reacher, í hönd.  Ég byrjaði reyndar á henni seint á sunnudagskvöldið og það var með herkjum að ég gæti lagt hana frá mér aftur.  Það tókst þó einhvern veginn og af því að ég var búin að uppgötva þriðju þáttaröðina um Oliviu Pope (Scandal) á skjá frelsi og var líka að horfa á HM sem og að vafra á netinu, þá las ég lítið meir fyrr en ég skreið upp í á tólfta tímanum í gærkvöldi.  Ég er búin að lesa um 100 blaðsíður og á tæplega 400 eftir.  Vafra minna og lesa meira verður mottóið í dag.

Komin heim í bili

Klukkan var eitthvað um hálfátta þegar ég rumskaði fyrst í gærmorgun.  Hefði eiginlega þurft að fara fram og tæma blöðruna en í staðinn smurði ég á mig gelinu og þegar það var þornað tókst mér að finna stellingu og sofna aðeins aftur.  Fór á fætur um hálftíu.  Fann eldri systurdóttur mína inni á baðherberginu og bauð henni að nota herbergið "mitt".  Hina systurdóttur mína fann ég svo í eldhúsinu að leika sér með leikfangagrasker en hún var líka með heyrnartól að hlusta á mússík.  Davíð Steinn kom fram skömmu síðar.  Honum leist ekkert að rigninguna en ég held að hann hafi skroppið í smá göngu á endanum.  Þeim bræðrum bauðst svo að fara með mági mínum upp úr hádegi að prófa að skjóta á dósir með riffli.  Oddur Smári var ekki nógu vel fyrir kallaður og sagði nei takk en Davíð Steinn sló til og kom afar glaður til baka.  Hann hafði hitt í um 80% tilfella sem er bara nokkuð gott miðað við að hann var að prófa í fyrsta skipti.

Eftir kaffi tókum við mæðgin okkur saman, kvöddum og héldum heim á leið.  Kveikti strax á sjónvarpinu er ég kom heim og var fyrri hálfleikur í leik Íslands og Bosníu-Hersegóvínu í handbolta karla hálfnaður.  Mér tókst samt ekki að horfa alveg á allan leikinn, gat það bara ekki.  Þess í stað labbaði ég bara af stað á Valsvöllinn í fyrra fallinu.  Þar tóku Valsstrákarnir á móti strákunum í Víkingi og tókst að klúðra því.  Voru á undan að skora en fengu á sig jöfnunarmark strax í næstu sókn gestanna og svo skoruðu gestirnir eina markið sem kom í seinni hálfleik og unnu 1-2.  Það var bara eins og "strákarnir" mínir hefðu ekki alveg nógu góða trú á verkefninu.  Vonandi gera þeir betur næst en það eru tveir útileikir framundan við sterk lið.

Sunnudagur

Í gærmorgun var ég komin fram úr og klædd fyrir hálfníu og þá búin að bera á mig gelið og bíða eftir að það þornaði nokkru áður. Pabbi og Davíð Steinn komu fram stuttu seinna en ég hef nú grun um að sá fyrrnefndi hafi verið löngu vaknaður.  Við fengum okkur morgunmat.  Ég var búin að kveikja á tölvunni og dreif mig í að skrifa svarbréf, til danskra hjóna sem voru hér fyrir nokkrum misserum, fyrir pabba og mömmu.  Danska konan er systir manns sem var undir ráðsmennsku pabba á Geldingalæk á sjöunda áratug síðustu aldar.  Bréfið frá dönsku hjónunum var eins konar boðsbréf til Danmerkur í tilefni afmælis mömmu í næsta mánuði.  Þau fylgjast greinilega vel með.  Verst að mamma hefur enga heilsu í að ferðast.

Rétt fyrir klukkan eitt fóru pabbi og Davíð Steinn upp að Þingskálum að ræða um örnefni á staðnum við ábúandann.  Oddur var nývaknaður en hann tók það að sér að vera hjá ömmu sinni.  Ég skrapp nefnilega austur í Hvolsvöll að hitta mömmu hennar Lilju vinkonu aðeins.  Ég fann Selmu úti í garði að reita arfa.  Við settumst inn í gróðurhús og hún bauð upp á kaffi og pönnsur og gott spjall.  Áður en ég fór gaf hún mér slatta af frosnum rabbarbara og rifsberjum.  Kom til baka um þrjú og setti kaffið af stað.  Oddur sagði að amma sín hefði bara verið mjög þæg.

Seinna um daginn kom systir mín og dætur hennar ofan úr Gunnarsholti þar sem þær höfðu skilið mág minn eftir en hann fór á tófu með frænda okkar.  Pabbi og Davíð Steinn komu rétt á eftir mæðgunum.

Og svo heldur HM-veislan áfram.  Úrslitin eru svo sannarlega ekki alltaf eftir bókinni.

Laugardagur í sveitinni

Ég er enn staðráðin í að nýta sumarfríið mitt sem best og lengst og var því komin á fætur fyrir níu eftir að hafa farið í sturtu um átta og smurt á mig gelinu í gærmorgun.  Rétt fyrir hálftíu bankaði ég á dyrnar hjá tvíburanum sem er að vinna í góðum markmiðum.  Í ljós kom að hann var rétt ókominn á fætur.  Eftir morgunmat fékk hann lánað hjólið mitt og hjólaði flugvallarhringinn á því með smá pásu einhvers staðar á leiðinni á tæpri klukkustund.  Ég kveikti aftur á móti á tölvunni.  Hinn tvíburinn kom fram á svipuðum tíma og "morguninn" áður.

Um hálftvö vorum við mæðgin búin að taka okkur til og sest út í lánsbílinn.  Fyrst lá leiðin að Atlantsolíustöðinni við Flugvallarveg og tankurinn fylltur þótt rúmlega hálfur væri.  Næst fórum við með næstum útfylltar tilkynningar um hjólastuldinn á lögreglustöðina við Grensásveg.  Við vorum hvött til að skreppa í GÁP, þar sem hjólin voru keypt fyrir fjórum árum til að fá þá til að fletta upp stellnúmerunum.  Sá sem afgreiddi okkur þar var ekki frá því að hann hafi selt drengjunum hjólin á sínum tíma.  Við fengum útprentað það sem til var um sölu hvors hjóls og fórum með það aftur á Grensásveginn.  Þar skrifaði ég stellnúmerið á tilkynningarnar, fékk ljósrit af þeim og fékk að halda blöðunum frá GÁP.  Með þetta fórum við í VÍS í Ármúlanum þar sem ég lagði þetta inn í tjónadeild.  Þá var klukkan langt gengin í þrjú.

Vorum mætt á Hellu rétt um fjögur og komum beint í kaffi til pabba og mömmu.  Ég fékk svo leyfi til að kveikja á sjónvarpinu og horfa á HM með lágt stillt á.  Leikirnir í gær voru ótrúlegir og ég var alls ekki sannspá um úrslitin nema í þeim leik sem var um tíu og sýndur í læstri dagskrá á Stöð 2 Sport 2.  Hollendingar sýndu frábær tilþrif í seinni hálfleik við Spánverja og þeir síðast nefndu vissu varla hvaðan "á þá stóð veðrið..."  Gaman að því þótt ég fyrirfram hafi ég verið viss um spánskan sigur eins og margir aðrir.

Dagurinn tekinn tiltölulega snemma

Fyrsta virka frídaginn minn, í gær, var ég komin á fætur um átta.  Kveikti auðvitað á tölvunni og var m.a. af vafra á netinu þar til annar strákurinn kom fram um níu.  Þá fékk ég mér loks morgunmat.  Um leið og pilturinn var búinn að borða fór hann út í göngu til að prófa nýju skóna.  Hann kom aftur um klukkustund síðar afar ánægður.  Þá var ég að ljúka við að búa til smá kaffi.  Hinn strákurinn kom ekki á fætur fyrr en á tólfta tímanum en hann hafði líka farið frekar seint að sofa skilst mér.

Um eitt dreif ég mig í að sinna nokkrum nauðsynlegum erindum.  Lagði lánsbílnum við Njálsgötu rétt við Rauðarárstíg og labbaði þaðan á lögreglustöðina við Hlemm.  Þar fékk ég tvö eyðublöð til útfyllingar vegna hjólahvarfsins.  Tók blöðin með mér.  Næst lá leiðin í Brimborg.  Fór næstum beint til manns frænku minnar sem vinnur þarna og sagðist vera að sækja pakka fyrir pabba og spurði hvort hægt væri að nota ferðina til að setja peru í hægra bremsuljósið.  Við fundum pakkann og svo sagði hann mér að koma á lánsbílnum inn um fyrstu stóru dyrnar hægra meginn þegar maður er á útleið.  Hann lét mig stoppa rétt fyrir innan og stíga á bremsuna til að vera viss um um hvort ljósið væri að ræða.  Svo setti hann pakkann í skottið og fékk mann til að skipta um peru.  Þetta tók um tíu til fimmtán mínútur og svo sagði hann að "sá gamli" (pabbi) væri örugglega búinn að borga þessa viðgerð og ég fékk að keyra í gegnum húsnæðið og út að aftan.  Á leiðinni heim ætlaði ég að kíkja heim til hennar Böddu minnar en hún virtist ekki vera inni við.

Annars leið þessi fyrsti frídagur alltof hratt en ég varð spenntari og spenntari eftir því sem nær dró kvöldinu.  HM-opnunarleikurinn bauð upp á margt og það eina sem ég var ósátt við var hversu vafasamur vítadómurinn var og hve sá brasilíski féll með miklum tilþrifum.  Ég spáði 2-1 sigri heimamanna á minni síðu á leikir.betra.is og fæ fyrir það 4 stig af fimm, 3 stig fyrir rétt úrslit og 1 fyrir að hafa aðra markatöluna rétta.

Fyrsti virki dagur í fríi í dag

Framundan eru fimm vikur í sumarfrí, 35 dagar og 24 virkir þar af.  Það gæti alveg farið svo að einhverja af þessum dögum verði ég hvergi nálægt tölvu og því er hætt við að ekki komin inn pistill alveg daglega.  Það gæti líka hent sig að þótt ég væri í námunda við tölvu og net kæmi ég því samt ekki í verk að setja inn einhverja færslu.  Sjáum bara til með það allt saman.  Kannski verður einhver regla á þessu og kannski verður þetta bara óskipulagt kaos.

Ég hjólaði sömu leið til vinnu í gærmorgun og á þriðjudaginn var, raulandi einhvern lagstúf að sjálfsögðu.  Nóg var að gera í vinnunni og dagurinn leið afar hratt.  Er búin að flytja allt af gamla staðnum og úr gamla skrifborðinu, mundi eftir að stilla á sjálfvirkan svarpóst áður en ég slökkti á vinnutölvunni minni og kvaddi stelpurnar vel og vandlega.  Hjólaði svipaðaða leið heim og í vinnuna nema ég fór meðfram flugvellinum austan meginn og hjólaði framhjá Valsvellinum.

Þegar heim kom byrjaði ég á því að hringja og spjalla aðeins við pabba.  Kveikti svo á tölvunni.  Rétt rúmlega fimm skruppum við strákarnir á skór.is í Kringlunni þar sem ég keypti á þá létta "götustrigaskó" fyrir sumarið.  Verð svo að fara aðra ferð seinna til að finna skó á mig svo ég geti sparað "spariskóna" mína.  Hafði steikt slátur og steikta lifrarpylsu með soðnum kartöflum í matinn.  Oddur gekk frá á eftir og setti uppþvottavélina í gang.  Kvöldið fór svo aðallega í tölvuna.

Opnunarleikurinn á HM í knattspyrnu karla fer fram í Braselíu í kvöld, milli gestgjafanna og Króatíu.  Það er bara veisla næsta mánuðinn.  Að sjálfsögðu mun ég eitthvað fylgjast með þessu móti en ætla samt að passa mig á því að það komi ekki niður á neinu öðru spennandi sumarfrísverkefnum.

Fimm vikna sumarfrí frá og með morgundeginum

Að sjálsögðu notaði ég hjólið milli heimilis og vinnu í gær.  Fór aðeins aðra leið í vinnuna.  Hjólaði út Eskihlíðina og undir brýrnar undir Bústaðaveginn.  Hjólaði svo gangstéttina fram að brú númer tvö þar sem maður kemur að Hljómskálagarðinum.  Hjólaði í gegnum hann, meðfram tjörninni og Lækjargötuna að Kalkofnsvegi.  Lagði hjólinu í bílakjallarann undir seðlabankanum.  Þetta var afar hressandi og það er segin saga að þegar ég er komin á ferðina stend ég sjálfa mig að því að vera allt í einu farin að syngja hástöfum.  Vinnudagurinn leið annars nokkuð fljótt.  Það var hellidemba úti um fjögur leytið en ég lét það ekki á mig fá.  Hjólaði stystu leið án þess að þurfa að hjóla miklar brekkur.  Hengdi svo úlpuna upp yfir baðkarinu og fór í þurrar buxur.  Hafði hakk og spakk í matinn.  Við Oddur horfðum á Castle og ég svo á seinni hluta af sakamálaþætti eftir tíu fréttir.

Demba

Var komin á fætur á svipuðum tíma í gærmorgun og á hvítasunnudagsmorgunn.  "Fann"  pabba í eldhúsinu að leggja kapalinn 10,20,30.  Fékk mér asea og spjallaði svo um stund við pabba og fylgdist með kaplinum hjá honum.  Eftir rúmar tíu mínútur fór ég og tannburstaði mig og þá gat ég loksins fengið mér morgunmat, ab-mjólk með "mömmumuslí" (tvenns konar blanda sem ég kann ekki að segja frá).  Fljótlega eftir tíufréttir fór pabbi að leggja sig aftur svo ég fór í tölvuna hans.  Seinna tók ég aðeins fram saumana mína og ég lauk einnig við að lesa eina bókasafnsbók.  Um eitt hringdi frændi okkar mömmu að boða sig og konuna í heimsókn.  Þau birtust um fjögur leytið.  Þegar þau fór tveim tímum seinna var mamma alveg búin á því og bað mig um að sjá um kvöldmatinn svo pabbi gæti horft á allar kvöldfréttirnar.  Það var auðsótt mál.  Hafði hluta af kjötbollunum sem ég bjó til með henni um daginn og sauð kartöflur með.  Fékk mér einn kaffibolla eftir mat og kvaddi svo á níunda tímanum.  Strákarnir voru komnir heim nokkru á undan mér.  Við Oddur Smári horfðum saman á Leverage og CSI.

"Í sveitinni"

Var komin á fætur um níu leytið í gærmorgun.  Hitti nágrannann minn af neðri hæðinni þegar ég var að kom upp frá því að ná í þvottinn.  Hann sagðist hafa tilkynnt lögreglunni um horfnu hjólin og fullyrti að þau hefðu verið læst.  Þá ætti heimilistryggingin mín að ná yfir þetta.  Morguninn fór annars í lestur og tölvu.  Upp úr tólf tók ég mig til, klæddi mig í betri flíkur, varalitaði mig og fór með flugfreyjutösku, hliðartösku, handavinnutösku og sálmabók út í bíl.  Mætti fyrst í kirkjuna um eitt til að hita upp með kórstjóranum og sjö af kórsystkynum mínum fyrir hvítasunnumessuna.  Það leit út fyrir lélega mætingu þannig að ákveðið var að kórinn sæti í kirkjunni.  Það rættist nú aðeins úr mætingunni, held að með kórnum og meðhjálpara hafi setið um 17 úti í kirkju.  Eftir notalega stund fékk ég mér smá kaffisopa áður en ég lagði í hann beint austur.  Var komin á Hellu rétt fyrir hálffimm og opnaði mamma fyrir mér, fannst ég sennilega lengi að koma mér úr bílnum.  Knúsaði báða foreldra mína og fékk mér svo kaffi úr vélinni eftir smá spjall.  Hélt auðvitað áfram að spjalla.  Afgangurinn af deginum leið jafn hratt og fyrri helmingurinn en ég var komin í rúmið um hálfellefu og las í uþb klst.

Hvítasunnudagur

Ég var ósköp löt á fætur í gærmorgun.  Rumskaði fyrst um átta og svo um níu og um hálftíuleytið greip ég í bók og fór frekar að lesa heldur en að klæða mig strax.  Tíminn flaug afar hratt og þegar dyrabjallan glumdi um hálftólf var ég enn óklædd og að lesa.  Þá dreif ég mig á fætur en þó ekki nógu fljótt til að opna fyrir þeim sem hringdi bjöllunni.  Það gæti reyndar verið að um nágranna minn af neðri hæðinni hafi verið að ræða því Hann hringdi svo aftur um tvöleytið til að láta mig vita af undarlegu en afar leiðinlegu máli.  Þegar ég afhenti honum skúrinn í vetur setti hann öll hjólin okkar mæðgina í geymsluna sína undir útitröppunum.  Mitt hjól var komið út og í reglulega notkun á milli þess sem það er læst við grindverkið í heimreiðinni.  Hjól strákanna voru smávegis biluð og við strákarnir vorum búin að tala um að fara með þau í viðgerð fljótlega.  Oddur Smári var samt alvarlega að spá í að selja sitt hjól þar sem hann notaði það afar lítið.  Nágranninn tók út hjólin í gær og gerði heiðarlega tilraun til að pumpa í lin dekkin en ég veit að annað dekkið á hjólin hans Davíðs Steins var sprungið.  Hjólunum var still upp við húsið rétt við þar sem maður kemst inn í kjallarann.  Þau voru ekki læst en nágranninn var á vappi og heima við.  Engu að síður voru hjólin allt í einu horfin.  Það er búið að stela hjólum strákanna sem þeir keyptu sér fyrir hluta af fermingarpeningum sínum fyrir fjórum árum.  Enginn varð var við neitt en það hefur varla verið hægt að hjóla á þeim í burtu og líklega um að ræða fleiri en einn þjóf.  Það er ósennilegt að þau komi í leitirnar og þar sem þau voru ekki læst fást þau varla tryggð.  Einhvern veginn verð ég samt að bæta strákunum mínum upp þetta tap.

Eftir að hafa kannað þá ólíklegu atburðarrás að strákarnir hefðu sjálfir náð í hjólin og þá látið þá vita hvers kyns var þá settist ég upp í lánsbílinn og keyrði heim til systur minnar án þess að hringja á undan mér.  Mágur minn var úti að þvo bílinn og sagði að systir mín og yngri dóttirin væru ekki heima.  Hann hringdi í Helgu en hún var ekki alveg á leiðinni heim svo hann geymdi sér það að bóna bílinn og bauð mér inn í smá kaffi.  Þar hitti ég eldri dóttur þeirra í smá stund.  Stoppaði í á aðra klukkustund og kom svo við í Krónunni á Höfða og Hagkaup í Skeifunni.  Á síðarnefnda staðnum hitti ég einn frænda minn sem er nýbakaður faðir.  Það var ánægjulegt að fá tækifæri til að knúsa hann og spjalla smá og hver veit nema ég kíki á nýbökuðu foreldrana og litlu frænku mína við tækifæri.

Rólegheit

Fór hjólandi í vinnuna í gærmorgun.  Var á stuttermabol innan undir úlpunni og með peysu til öryggis í bakpokanum.  Ætla mér ekkert frekar að rekja vinnudaginn en hann gekk svo sem ekki alveg snuðrulaust fyrir sig.  Það var þó allt daglegt búið fyrir klukkan fjögur svo ég komst af stað heim á réttum tíma.  Slakaði örstutt á er heim kom og spjallaði við mömmu á meðan.  Síðan dreif ég mig á bókasafnið í Kringlunni að skila bókinn sem komin var á lokadag.  Skilaði annarri í leiðinni og að þessu sinni fór ég ekki tómhent heim þótt heima væru enn ólesnar bæði bækur af safninu sem og úr klúbbnum og önnur jólagjöfin.  Það komu fjórar bækur með með mér heim.  Var aðeins of sein að hafa til kvöldmatinn sem kom svo sem ekki að sök nema það að ég nennti ekki að bruna á bikarleik í Mosfellsbæ milli Aftureldingar og Valskvenna fyrir vikið.  Sá leikur fór 2-4 fyrir mínum stelpum en þær úr Aftureldingu komust tvisvar yfir.  Strákarnir fóru til pabba síns upp úr tíu í gærkvöldi og verða þar fram á mánudag.  Ég var komin í rúmið fyrir miðnætti og las og las.  Kláraði eina bók og byrjaði á annarri.  Fór samt ekkert svo seint að sofa.

Löng helgi framundan

Ég mætti hjólandi til vinnu rétt fyrir átta í gærmorgun of hjólaði svo ekki af stað heim fyrr en klukkan var byrjuð að ganga sjö um kvöldið.  Í millitíðinni gerðist margt en stór hluti af tímanum fór í bið eftir að ljúka við venjulegan dag.  Bið eftir að vélinni yrði komið í lag en hún bilaði nokkuð alvarlega upp úr miðjum morgni.  Þetta tókst svo allt á endanum en við vorum tvær sem tókium vaktina eftir fjögur og fórum ekki heim fyrr en búið að ganga frá öllum lausum endum.  Hér heima átti að vera spilakvöld og var það undirbúið.  Oddur sá um að hita vorrúllur og fékk ég tvær af þeim, slapp semsagt við að elda. Ekkert varð úr spilakvöldinu en það voru þó tveir vinir mættir. Upp úr hálfníu hringdi ég í fyrrum vinnufélaga og vinkonu og þar sem hún var heima dreif í mig til hennar, í og með, til að sækja "Skálholtsdiskinn" minn sem fór óvart með í jólapakkann til hennar.  Örstutt stopp varð að einum og hálfum tíma og ég fékk alveg helling út úr þessum hitting.

Styttist í sumarfrí

Ég var ákveðin í að heimsækja hana Böddu mína á Landakot eftir vinnu í gær svo ég fór á lánsbílnum í vinnuna.  Í vinnunni gekk allt á afturfótunum en sem betur fer náðist að ljúka öllu fyrir klukkan fjögur og þar að auki sendum við maítölurnar frá okkur.  Var komin á Landakot rétt rúmlega fjögur.  Greip í tómt í fyrstu en ég var viss um að gamla konan væri ekki langt undan þótt ég fyndi hana hvergi í fyrstu.  Þar sem ég dokaði við fyrir framan herbergisnúmerið hennar sá ég hana svo koma út af snyrtingunni.  Við settumst niður í hvorn sinn stólinn á ganginum og röbbuðum saman um eitt og annað.  Svo birtist sonur hennar en hann átti að vera á frívakt en hljóp í skarðið fyrir einn vörðinn.  Frændi minn stoppaði um stund hjá okkur en svo þurfti hann að fara að sinna skyldum sínum.  Ég kvaddi ekki Böddu fyrr en um hálfsex þegar kallað var í kvöldmat. Sjálf byrjaði ég strax að sinna kvöldmatargerð þegar ég kom heim.  Setti upp kartöflur og grænmeti, kryddaði fjóra laxabita með gott á fiskinn og setti í ofninn.  Þetta þótti bara mjög gott og svo var afgangur sem ég get nýtt mér til að taka með mér í vinnuna.

Ég er annars búin að fá skilaboð frá bókasafninu um að skiladagur á skammtímalánsbókinni nálgast.  Þarf að skila bókinni í síðasta lagi á morgun en það á alveg að ganga upp því ég á bara örfáa kafla eftir ólesna.  Ég er líka búin að fá nýja bókaklúbbsbók senda heim og ég sem er ekki byrjuð á þeirri sem kom í mars, hef reyndar verið að spara hana.  Veit að hún er góð og ætla mér að lesa hana í sumarfríinu sem ég byrja í eftir viku eða svo.

Aftur á völlinn

Hjólið var notað milli heimilis og vinnu í gær.  Vinnudagurinn verður ekki rakinn hér, hann leið fljótt við ýmis störf og svo var klukkan allt í einu orðin fjögur.  Fór aðeins lengri leið heim heldur en í vinnuna og var að koma heim um fimm.  Kastaði mæðinni um stund.  Hringdi í pabba og kveikti svo á tölvunni. Upp úr sex var ég búin að sjóða kartöflur og steikja slátur og lifrapylsusneiðar.  Um sjö trítlaði ég á Valsvöllinn.  Þar hitti ég eina sem er í stjórn óháða safnaðarins og ég gerði nokkuð sem ég geri yfirleitt aldrei, ég settist hjá henni og vinkonu hennar, gestameginn í stúkunni.  Þær styðja nefnilega Breiðablik og átti vinkonan dóttur í liðinu.  Það að sitja "öfugu" meginn kom ekki að sök hvað úrslitin varðar, Valsstelpurnar unnu leikinn 3-1.  Í hálfleik fengur stelpur í 4. og 5. flokki verðlaunapeninga og bikar fyrir að sigra í sínum flokkum á Reykjavíkurmótinu.  Gaman að því.  Þegar ég kom heim af leiknum horfðum við Oddur á Castle á tímarásinni.

Aðeins ein upprisa en það var nóg

Ég var vöknuð rétt upp úr sex í gærmorgun.  Skrapp fram að ná í fjölmiðlamælinn, fá mér asea, pissa og endaði svo að fara í sturtu áður en ég skreið aðeins upp í aftur.  Ætlaði að reyna að kúra fram yfir sjö en þar sem ég sofnaði ekki aftur las ég um stund í bókinni sem þarf að skila á föstudaginn.  Hlustað eftir Jón Óttar Ólafsson, fyrsta bók höfundar og fjallar um rannsókn á dauða fyrrum fíkils. Rannsakandinn rekst á marga veggi og ég er að verða spennt að fá að vita hvort maður fær að vita hver sé sekur.

Um sjö leytið dreif ég mig á fætur, fékk mér morgunmat, gríska jógúrt með krækiberjum og musli og drakk svo eitt glas af rauðrófusafa.  Fór á lánsbílnum í vinnuna.  Fram að kaffi sá ég um að tvær að samstarfskonum mínum fengju æfingu og leiðsögn í mánaðamótauppgjöri bókhaldsins.  Einnig kenndi ég þeim hvernig maður færir óframleiddar endurnýjunarskrár yfir mánaðamót ef ekki tekst að ljúka allri endurnýjun áður en þarf að loka uppgjörinu.  Eftir kaffi fór ég á vélina að "troða í" og eftir hádegi var ég að taka á móti og skoða kortin.

Strax eftir vinnu heimsótti ég Böddu mína á Landakot og stoppaði hjá henni til klukkan að verða hálfsex.  Svo kom ég við í Krónunni áður en ég fór heim til að kaupa meira af rauðrófusafa.  Stoppaði heima í svona klukkustund.  Strákarnir borðuðu afgang af kvöldmatnum frá því kvöldið áður.  Um sjö rölti ég út á Valsvöll og sá valsstrákana vinna Fylki 1-0.  Mínir menn áttu þó mun fleiri skot á rammann, held að markvörður Fylkis hafi varið fjóra bolta.  Á vellinum hitti ég fyrrum samstarfskonu mína.  Hún mætti í seinni hálfleik en sonur hennar var á öllum leiknum og ég hafði séð hann og sest hjá honum áður en leikurinn hófst.

Heil vinnuvika framundan

Þetta var gott hjá mér.  Póstaði titlinum áður en ég var búin að skrifa pistil dagsins.  Gærdagurinn var annars rólegheita dagur.  Fór hvorki seint né snemma á fætur.  Var vöknuð fyrir níu og byrjaði daginn eins og ég endaði laugardagskvöldið á því að lesa um stund.  Var komin á fætur löngu fyrir ellefu.  Kveikti auðvitað á tölvunni og vafraði og lék mér án þess að spá nokkuð í tímann.  Strákarnir voru sofandi.  Annar þeirra vaknaði svo um eitt.  Nokkru eftir það hellti ég loksins upp á kaffi og á meðan brúsinn var að fyllast smátt og smátt bjó ég til vöffludeig og vonaði að kaffi- og vöffluilmurinn myndi vekja hinn tvíburann.  Sá kom reyndar ekki fram fyrr en ég var uþb að taka síðustu vöffluna úr járninu.  Ég hringdi bæði í pabba og systur mína en svo fór dagurinn að mestu í lestur og netvafr- og leiki.  Hafði lasanja í kvöldmatinn og notaði afgang af grjónum og gulum baunum út í.  Sú tilraun heppnaðist bara vel.

Splunkunýr mánuður hafinn

Þótt ég rumskaði fyrst um sjö og færi fram til að létta á blöðrunni og fá mér asea þá skreið ég upp í aftur og komst ekki á fætur fyrr en klukkan var farin að ganga tíu.  Þá byrjaði ég auðvitað á því að kveikja á tölvunni, vafra svolítið á netinu og spila uppáhalds netleikina mína.  En rétt fyrir klukkan ellefu dreif ég mig yfir til norsku esperanto vinkonu minnar.  Hún bauð mér upp á hægeldaðan hafragraut, kaffi og bláberjamúffu.  Í stað þess að grúska svo í tungumálinu tilbúna grúfðum við okkur yfir krossgátu úr Birtublaðinu frá síðustu helgi.

Þegar ég fór frá Inger, stuttu fyrir hálfeitt, lá leiðin í Krónuna við Granda.  Þar hitti ég eina úr deildinni minni.  Ég var frekar hissa því hún býr í Breiðholtinu.  Hún og mamma hennar höfðu verið að leita að einhverjum stað í miðbænum og ákveðið að skella sér svo að versla.  Gaman að því.  Þegar ég lagði í stæði fyrir utan númer nítján ákvað ég að hringja í Odd og biðja hann um að sækja pokana þrjá.  Vakti víst strákinn en hann kom með glöðu geði, tók pokana og gekk frá vörunum á meðan ég rölti út í Hlíðaskóla til að nota atkvæðið mitt.  Að því loknu kom ég við í Sunnubúðinni og keypti smávegis sem ég hafði gleymt að kaupa í Krónunni.

Annars fór dagurinn í lestur og netvafr.  Davíð Steinn sá um að taka til kvöldmatin og Oddur Smári gekk frá eftir matinn.  Gott að eiga svona góða og duglega syni.