- Klúbbur eða keðjubréf -

Strákarnir tóku við bréfum um að ganga í límmiðaklúbb. Með bréfinu fylgdi límmiði en svo eiga þeir að senda límmiða til þess sem gekk í klúbbinn á undan þeim sem bauð þeim í klúbbinn. Næst breyta þeir klúbbbréfinu. Setja nafnið á þeim sem þeir fengu bréfið frá í 1. sæti og sitt í sæti nr. 2. Því næst fimm falda þeir bréfið, setja það í umslag ásamt límmiðum og reyna svo að veiða klúbbfélaga. Ég var að hjálpa þeim við þetta í gærkvöldi og ætluðu þeir að bjóða skólafélögum sínum að ganga í klúbbinn. Hvernig skyldi það svo ganga?

Mágur minn fær alltaf verri og verri fréttir af ástandinu af sér eftir slysið um síðustu helgi. Barkakýlið er víst brotið og hann verður að hreyfa sig og tala sem minnst næstu tvær vikurnar eða svo.

Gott er að skrifa hugsanir sínar
skoða þær fram og til baka.
Þær eru margar flugurnar mínar
af mörgu er að taka.

Þokkalegir þankar mínir
þeir eru út og suður.

(vill einhver botna ;) )???

- Góður leikur -

Við fórum öll á völlinn í gærkvöldi þegar Valur tók á móti ÍA í Landsbankadeild karla. "Okkar strákar" voru mun beittari í sínum aðgerðum og uppskáru eftir því. Leikurinn endaði: 2-0 sem er bara glæsilegt! 3. flokkur Vals spilaði úrslitaleik við Fylki, lentu 1-0 undir en sigruðu svo 3-1. Það er líka frábært.

Aðeins að öðrum málum. Mikið finnst mér skrýtið hvað ég er lengi að ganga nýju skóna mína til (bæði pörin). Þeir ætla bara ekki að samlagast mér og er ég því með blöðrur og skósæri þessa dagana, ekki gefst ég samt upp á arkinu! Kannski þarf ég að kaupa mér eitt par enn?

- Eitt og annað -

Ó, já. Helgin er liðin og aftur kominn mánudagur. Frá því hádegi á laugardag var ég á Grettisgötunni. Hulda var með Davíð og Oddi, Davíð Steinn var í skemmtiferð með drengjakórnum, Ingvi var inn og út af sjúkrahúsinu og Helga systir var að vinna til fjögur. Davíð var með Huldu alveg til fjögur og sótti svo Helgu. Oddur Smári var kominn í afmæli til bekkjarbróður síns. Við systur fórum saman í Bónus í Holtagarða ákveðnar í að grilla saman um kvöldið og hafa smá söngvakeppnisteiti. Davíð fór heim með okkar vörur og sótti svo strákana um sex og hálfsjö. Eiginlega má Ingvi ekki borða nema fljótandi, það blæddi inn á barkann og hann á helst að spara röddina næstu vikuna. Hann grillaði nú samt fyrir okkur og fékk sér smá smakk.

Í gær var ég í engu stuði, eins og sést kannski á línunum hér fyrir neðan. Davíð skutlaðist með nafna sinn í kirkjuna fyrir tíu og svo sendi ég þá feðga, Oddu og Davíð eina í messu um ellefu. Ég bara varð að fá tíma ein með sjálfri mér í ró og næði. (Að ég skyldi ekki hafa nýtt síðustu helgi betur fyrir það þegar Davíð var í Danmörku og strákarnir á Hellu...)

Út í bláinn

ég held að höfuðið
sé tengt við líkamann
ég heyri í hugsununum
en skil ekkert í þeim

ég held að hendur mínar
séu á réttum stað á búknum
ég sé fingurnar hreyfast
en skil ekki hvað þeir eru að gera

ég held af fæturnar
tengist rétt við búkinn
ég sé þær ekki hreyfast
og skil ekki afhverju

þetta er allt út í bláinn
engin tengsl
og lítið samhengi
þetta bara er
svona

- Breytingar á áætlunum -

Hér sit ég við tölvu systur minnar og mágs. Er að passa Bríet sem er sofandi úti í vagni, Ingvi er að láta taka mynd af barkakýlinu og kjálkanum (er með sex spor í hökunni eftir óhapp í óvissuferð með vinnunni sinni). Hulda er með Davíð og Oddi Smára á vorhátíð Ísaksskóla, Davíð Steinn er í dagsferð með drengjakórnum og Helga systir er á námskeiði.
Ég sé fram á það að komast ekki á völlinn en Valsstelpurnar eru að taka á móti Stjörnunni núna klukkan tvö. Það kemur heimaleikur eftir þennan leik!

- Eitt tekur við af öðru -

Noh, það er bara kominn föstudagur, enn á ný!!!

Og tónleikarnir eru búnir. Þeir tókust með ágætum þrátt fyrir vöntun í nær allar raddir. Það var bara bassinn sem var full skipaður enda bara tveir svo það hefðu verið mikil afföl ef annar hvor þeirra hefði forfallast. Það vantaði eina af sjö í sópran, eina af fjórum í alt og einn af fjórum í tenór. Fyrst sungum við fimm lög; Tíminn líður, Maríukvæði, Nú hverfur sól, Nótt og Á Sprengisandi. Þá söng Sólveig Samúelsdóttir messósópran þrjú lög. Þá söng kórinn önnur fimm lög; Tanzen und springen, Við brunninn, Þú hljóða nótt, Þú fagra blómið og sofðu rótt. Sólveig tók við og söng önnur þrjú lög. Næst síðasta lagið, Senn kemur vor, var í útsetningu fyrir kvennakór (og kórstjórinn þóttist ekkert skilja afhverju strákarnir komu upp líka. Hann var reyndar búin að biðja þá um að koma upp með okkur). Síðast söng kórninn Kvöldljóð. Sum lögin sungum við án hljóðfæraleiks, t.d. það fyrsta og Á Sprengisandi. Undir önnur lög spilaði kórstjórinn ýmist á orgel eða flygil, þó oftar á síðarnefnda hljóðfærið. Einsöngsstúlkunni og kórstjóranum voru færð blóm í lokin og svo söng kórinn eitt aukalag, Smávinir fagrir og Sólveig tók líka eitt aukalag og það var eina lagið sem hún hafði nótur fyrir framan sig. Á eftir var tónleikagestum boðið upp á kaffi og konfekt. Oddur Smári hélt smá sér tónleika (líkt og þeir bræður gerðu í fyrra nema nú söng hann einn allan tímann). Kvöldið var í alla staði vel heppnað og skemmtilegt. Næst stefnir kórinn og stjórinn á að hafa jólatónleika og ég hlakka til!!!!

Nú eiga bræður aðeins eftir eina og hálf viku eftir af skólaveru sinni í Ísaksskóla. Á morgun er vorhátíð skólans en Davíð Steinn er að fara í dagsferð með drengjakórnum. Og hann verður allan daginn í þessari ferð frá því fyrir níu og amk til hálfsjö. Það er ég viss um að verður skemmtilegt. Í skólanum á að snyrta skólalóðina milli tíu og tólf en eftir það og til tvö verður ýmislegt til gamans gert. M.a. grillaðar pylsur, farið í leiki og fleira og fleira.

- Lokaæfing -

Það var auka kóræfing í gærkvöldi og gekk hún mun betur heldur en æfingin á miðvikudaginn var. Raddþjálfarinn, Ingibjörg Ýr, var bara ánægð með okkur og Pétur kórstjóri líka. Við renndum í gegnum lögin, sum þurfti að syngja oftar yfir, og um tíu fengum við okkur kaffisopa áður en við fórum heim. Við fengum þær leiðinlegu fréttir að einn tenórinn var lagður inn á sjúkrahús í fyrradag með aðkenningu að kransæðastíflu. Vonandi fer allt vel. Þetta þýðir að þá vantar þrjú í kórinn á tónleikana í kvöld, eina úr sópran, eina úr alt og einn úr tenór. Sem betur fer eru báðir bassarnir sprækir og tilbúnir í slaginn. Og er það svo bara ekki toj, toj að lokum?!?!

- Þokkaleg helgi -

Um hálfsex sl. föstudagsmorgun kvaddi Davíð mig og fór yfir á 11 þaðan sem hann fékk að fljóta með út á Keflavíkurflugvöll. Habilismenn og sumir makar voru á leið til Kaupmannahafnar. Við mæðginin fórum á fætur um sjö. Ég rabbaði við strákana um hvað við gætum gert saman eftir skóla og um helgina. Þeim leist bara vel á allar áætlanir. Ég kvaddi þá korter fyrir átta og sagðist hringja í þá um átta til að ýta við þeim af stað í skólann, sem ég og gerði. Þetta gekk bara vel fyrir sig. Nokkrum tímum seinna lá fyrir að það þyrfti að vinna yfir helgina. Mamma var alveg til í að taka strákana austur með sér og þeir voru meira en til í að fara með henni (allar áætlanir gleymdar, he, he).

Ég fór austur strax eftir messu um hádegi á sunnudag. Helga, Ingvi og dætur höfðu farið austur á laugardag. Strákarnir voru búnir að vera duglegir að leika sér við Huldu. Það sauð samt næstum upp úr á laugardagskvöldið. Þau ætluðu í einhvern ofurhetjuleik og Oddur Smári sagði ákveðið: -"Það verða sko engar dúkkur með í þessum leik! Punktur!!!" (Þarna kemur skýrt fram hvernig við leggjum áherslu á hlutina á okkar heimili) Hulda var ekki par ánægð með þetta og kvartaði í mömmu sína. Helga fékk Odd til að samþykkja að ofurdúkkur gætu alveg verið með í leiknum.

Við mæðgin komum svo í bæinn rétt fyrir fimm í gær og mættum beint á völlinn. Valur - Grindavík 3:1. Fyrri hálfleikur var mjög skemmtilegur og vel leikinn af hálfu Valsara. Það er vonandi að þeir sýni svona góðan leik allar 90 mínúturnar þegar þeir taka á móti ÍA mánudagskvöldið 23. maí. n.k.!!!

Davíð skilaði sér svo heim upp úr tíu í gærkvöldi.

- B-12 -

Aðeins hefur borið á því að annar tvíburanum líði illa og ráði jafnvel illa við skap sitt. Pabbi ráðlagði mér að prófa B-12 kúr. Svo ég keypti eitt glas í gær og ákvað að setja báða strákana á kúr. Davíð Steinn var á kóræfingu til sjö þannig að Oddur Smári fékk fyrst. Útskýrði fyrir honum að þessa töflur ætti að gleypa, alls ekki sjúga eða tyggja og þær væru góðar til að hjálpa manni að halda góða skapinu. Rétt eftir að Oddur Smári gleypti töfluna sagði hann stríðnislega: -"Ég held að ég sé kominn í fýlu mamma!"

Í morgun vöknuðu tvíburarnir rétt á undan mér og voru að finna sér til morgunmat þegar ég kom fram í eldhús. Ég tíndi til handa þeim vítamínið og kom svo á eftir þeim með minn morgunmat. Þá gall við í Oddi: -"Mamma, ert þú líka að taka svona geðsjúklingspillur?" Davíð Steinn tók undir og sagði hreinskilinn: -"Já, það er örugglega líka gott fyrir þig því þú ert stundum svo pirruð!"

Annars var kóræfing í gærkvöldi. Við byrjuðum á því að renna yfir hvítasunnumessuna en svo stilltum við upp og æfðum "í tónleikastellingum". Ein úr altinum er á ferðalagi og getur ekki verið með og önnur var lasin í gær svo við vorum bara tvær í gærkvöldi. Það tóks samt nokkuð vel. Þó gekk kórnum fremur illa fyrri partinn af æfingunni en einhverra hluta vegna þá var allt annað upp á teningnum eftir kaffihlé. Áður en við fórum heim tókum við með okkur auglýsingaplögg til að hengja upp hér og þar og auglýsa tónleikana: Þeir verða haldnir í kirkju óháða safnaðarins þann 18. maí n.k. klukkan 20:00. Aðgangseyrir er kr. 1.500 og það er mjög líklegt að boðið verði upp á kaffi og konfekt eftir tónleikana. Sólveig Samúelsdóttir sópran, syngur einsöng inn á milli til að hvíla kórinn. Hún söng hjá okkur í fyrra líka, er með alveg frábæra rödd og mikla og góða túlkun.

- Bekkjarkvöld 8 ára Æ -

Ég hafði smá stund aflögu er ég kom heim seinni partinn í gær áður en arkaði af stað aftur áleiðis í Ísaksskóla. Davíð sótti strákana á æfingu rétt áður en henni lauk og voru feðgarnir komnir í skólann rétt á undan mér. Bekkurinn setti á svið leikritið Selshamurinn byggt á þjóðsögunni. Oddur Smári var annar sögumaðurinn og las á íslensku en hinn sögumaðurinn las söguna á ensku. Davíð Steinn lék eitt af selabörnunum. Þetta var virkilega flott hjá krökkunum og sögðu kennararnir að þau ættu allan heiðurinn skilið því þau hefðu lagt mikla vinnu í þetta og bjargað sér sjálf með marga hluti. Ástæðan fyrir því að sagan er líka sögð á ensku er sú að n.k. föstudag fær skólinn heimsókn frá Spáni og það á að sýna þeim hóp leikritið líka.

Þegar heim kom drifu strákarnir sig í að lesa og fengu svo að horfa á restina af leiknum Man. Utd. - Chelsea. Eiður var flottur.

- Vangaveltur -
...og fleira...

Jæja, nú styttist í að knattspyrnan fari að rúlla. Landsbankadeildin hefst n.k. mánudag, þann 16. maí með fjórum leikjum í karladeildinni og einum í kvenna. Valsstrákarnir taka á móti Grindavík í fyrstu umferðinni (þann 16.). Ég hlakka til og er að vona að sem netstjóri hjá
Val fái maðurinn minn amk eitt árskort á alla heimaleiki (eða tvö á afslætti...). Ég er harðákveðin í því að vera duglega að sækja sem flesta heimaleiki, bæði hjá stelpum og strákum. Verið var að spá um úrslitin eftir sumarið (svona áður en tímabilið hefst en liðin hafa reyndar verið að spila innanhúsknattspyrnu undanfarið) og lentu strákarnir í 3. (sem er nokkuð gott miðað við að vera að koma upp úr 1. deildinni) og stelpunum er spá titlinum aftur. Ég er handviss um að stelpurnar eiga eftir að standa sig vel í sumar en mér finnst að strákarnir eigi að fókusa á einn leik í einu og hafa að aðalmarkmiði að halda sér í deildinni. En það er bara mín skoðun.

Davíð tók að sér að aðstoða frænku mína við að fara yfir stærðfræði 103 fyrir próf. Ég var búin að ákveða að heimsæka tvíburahálfsystur mína og stóð við það. Tíminn þar var fljótur að líða, klukkan var allt í einu farin að ganga tólf. Frænka mín og Davíð voru í vinnustuði, alveg á kafi í stærðfræðinni. Mér skilst að klukkan hafi verið orðin eitt þegar þau hættu. Hún gat þess líka að hún hefði lært meira á þessu eina kvöldi heldur en allan veturinn. Já, hann Davíð er góður kennari!

Ég er búin að setja mér það markmið að vera búin að leggja 20 sinnum inn í blóðbankann um fertugt. En þá þarf ég líka að vinna svolítið í að gera blóð mitt það gott að ég megi gefa 3 sinnum á ári. Ég er mjög hraust og mér líður alltaf mjög vel eftir gjöf, blóðþrýstingurinn er líka alltaf í lagi en hitt sem er mælt í blóðinu er ekki alltaf nógu gott. Um daginn tók ég mig til og fór að drekka járn nokkuð reglulega og er ég búin með ein 1/2 lítra flösku. Er svona að hugsa mig um hvort ég eigi að næla mér í aðra. Ég gaf síðast um miðjan febrúar (það var 13. gjöfin mín) og var ráðlagt að koma ekki aftur fyrr en eftir 5-6 mánuði... ...og ég sem verð fertug eftir 3 ár. Hvað maður getur verið "skrýtinn" á köflum, he he!!!

- Gömlu skórnir -

Gamlir, slitnir, snjáðir
þreyttir og þjáðir
gömlu skórnir

götóttir og lekir
úr sér gengnir
gömlu skórnir

þeir þjónuðu mér
og pössuðu vel
gömlu skórnir

nú þarf ég að viðurkenna
fyrir sjálfri mér
að þeirra tími
er liðinn
minna gömlu skóa

tími bara ekki að fleygja þeim
veit þó að ekki er hægt að
lappa upp á þá
mína gömlu skó

blessuð sé minning
minna gömlu skóa.

- Helgin næstum liðin -

Sunnudagskvöld, strákarnir á leið í háttinn og fjölbreytt helgi næstum búin. Í gærmorgun var fjölskyldan öll snemma á fótum. Um hálftíu voru við komin vestur í bæ, á KR-svæðið. Þar voru þrjú lið, A,B og C að keppa við ÍBV og KR fram að hádegi. Oddur Smári gat ekki verið með. Ég skutlaðist með hann í Þórshamar rétt fyrir tíu þaðan sem lagt var upp í spennandi ósvissuferð. Síðan fór ég aftur vestur í bæ. Leikirnir gengu ekki alveg nógu vel. Davíð Steinn var í C-liðinu og spiluðu þeir fyrst við stráka úr Eyjum. Þeir strákar voru allir stærri en guttarnir okkar. Leikurinn fór amk 9-1 fyrir Eyjapeyjunum. KR strákarnir sem spiluðu við þá seinni leikinn voru jafnari okkar liði í hæð en mun flinkari með boltann. Davíð Steinn var í marki og bjargaði oft ansi vel en samt tapaðist leikurinn með alltof mörgum mörkum. En þetta er nú bara æfingaleikur og nú veit þjálfarinn á hverju á að taka fyrir Eyjaferðina síðast í júní.

Strax eftir keppnina skruppum við aðeins heim svo Davíð Steinn gæti skipt um föt og náð í sunddótið sitt. Við komum við á einum stað til að kaupa afmælisgjöf handa bekkjarbróður þeirra og var gjöfin höfð frá Oddi líka þótt hann kæmist ekki í boðið.

Á slaginu þrjú hringdi Oddur Smári og var þá kominn aftur í Þórshamarsheimilið. Ég sótti hann með það sama og var stráksi mjög ánægður með daginn. Kannski segir hann eitthvað frá óvissuferðinni á síðunni sinni en m.a. var farið í fjallgöngu á Helgafell, og í sund í Grafarvogslaug.

Það var messa í dag og kom Strætókórinn og söng með okkur. Sá kór verður svo með tónleika í kirkjunni okkar þann 19. maí n.k. klukkan 20:00 kvöldið eftir tónleikana okkar (sem verða á sama stað og sama tíma- það er bara alveg að koma að þessu...).

- Hálf- hundrað ára -

Þann 5. maí á því herrans ári 1955 fæddist hann Pétur Þorsteinsson sem nú er prestur yfir Óháða söfnuðinum. Hann hélt upp á afmælið sitt í gær, þann 05.05.05 og var örugglega vel yfir 200 manns í veislunni. Boðið var upp á uppáhaldsrétt afmælisbarnsins, plokkfisk með rúgbrauði og smjöri, virkilega gott og seinna var sett fram stærðarinnar afmælisterta með kaffinu. Sóknarprestur Grensáskirkju var veislustjóri og skemmtiatriðin sem voru mörg og góð entust alveg til klukkan að verða átta. Við í kórnum sungum tvö lög, "Tíminn líður" og "Á Sprengisandi". Ræður voru stranglega bannaðar en það mátti vera með framsækinn fíflaskap. Einn kórfélagi minn var sagðist ekki vera með ræðu heldur hugleiðingar. En m.a. var boðið upp á magadans-sýningu, "alvöru töfrabrögð", gjörninga, einsöng og fleira. Pétur sjálfur stjórnaði smá ferðalagi þar sem við konurnar misstum hægri skóinn en fengum í staðinn vinsti skó dansfélagans. Við fengum að bretta upp á buxnaskálmar og þeir fengu bæði að taka okkur á bakið og í fangið. Þetta var hin fjörugasta veilsa og skemmti ég mér afskaplega vel. Já, hann er hress hann séra Pétur og á marga hressa vini!!!

- Út og suður -

Það er fyndið hvað ég er fljót á milli staða á morgun- og síðdegisarkinu þegar hugsanir mínar snúast um hitamál. Í gær var ég hálf foj er ég hugsaði um það hversu margir eru að hjóla hjálmlausir, aðallega fullorðnir en líka eitthvað af yngri kynslóðinni. Þetta er ekkert annað en vítavert kæruleysi, og hananú!

Nafnarnir voru saman heima í gær líka. Davíð Steinn var nú á því að hann væri orðinn nógu hress, hann langaði víst til að prófa nýju fótboltaskóna á æfingu í gær. En hann var með smá hita seinni partinn á mánudag svo ég taldi best að hann yrði heima í gær.

Sótti Odd Smára í næstsíðasta karatetíma tímabilsins í gær. Eftir að hafa skilað honum heim dreif ég mig á bókasafn og skilaði þremur fullum pokum af bókum. Ég mundi nefnilega eftir því að skiladagur nálgaðist er ég skrifaði um sumar bækurnar síðast. Auðvitað kom ég með nokkrar bækur til baka þótt ég væri að framlengja 7 bókum, en það voru samt ekki fullir pokar þótt eitthvað færi í þá alla þrjá.

Hann var spennandi leikurinn milli ÍBV og Hauka í gærkvöldi og bauð upp á mikla skemmtun. Birkir Ívar fór ekki alveg strax í gang en hann komst í stuð á mikilvægu augnabliki. Róland Valur varði ágætlega en þegar Haukarnir komast í gang á annað borð þá er fátt sem stöðvar þá.

Eftir leikinn tók ég aðeins í nál og handlék nýjasta verkefnið. Það er afskaplega róandi að sauma út (þurfti aðeins að ná mér niður eftir spennuna).

Og Liverpool komst áfram í gær, jei!

- Bókamál og fleira -

Ég hef ekki slegið slöku við lesturinn þótt ég sé að vasast í mörgu öðru. Um daginn las ég bókina um Hrafn Gunnlaugsson. Hún kom á óvart og hafði ég gaman af að lesa hana. En ég hafði samt ennþá meira gaman af bókinni um Rannveigu E. Löve. Virkilega vel skrifuð og sú manneskja (Rannveig) hefur greinilega lent í mörgu. Ég átti bágt með að slíta mig frá lestrinum og var því ekki lengi að klára hana upp til agna. Í bókinni segir hún líka heilmikið frá foreldrum sínum og tíðarandi hvers tíma kemur vel fram. Sl. föstudagskvöld fór ég í háttinn um tíu og byrjaði á skáldsögu (man ekki eftir hvern en þýdd af Aldísi Baldvinsdóttur) sem heitir Pýrenurnar. Þetta var fremur þykk bók en svo spennandi að ég gat ekki lagt hana frá mér fyrr en ég var búin með hana og þá var klukkan byrjuð að ganga eitt. Núna er ég langt komin með Öxin og jörðin eftir Ólaf Gunnarsson. Hún er búin að vera á óskalistanum síðan hún kom út og náði ég henni þegar leið mín lá síðast á safnið.

Þegar feðgarnir fóru í skómálin um helgina byrjaði Davíð á að fá aðstoð handa nafna sínum og hjálpa til sjálfur. Oddi fannst þetta taka alltof langan tíma og ákvað að bjarga sér sjálfur, fann of stóra skó og leitaði uppi annan afgreiðslumann og bað hann um að hjálpa sér að finna passlega skó í sama stíl og lit (gráir Wayne Rooney-skór). Mottóið hjá Oddi er því: Ég bjarga mér bara sjálfur!

- 1. Maí -

Það er líf og fjör í kringum mig alla daga. Í gær skildi ég feðgana eftir heima og fór í svokallaða vinnuferð. Davíð skutlaði mér að rútunni um átta og við fórum 5 saman af stað, tókum tvo uppí á leiðinni út úr bænum og hittum 3 til er við komum á staðinn. Það var nóg að gera en vinnuferðir snúast um að gera klára sumarbústaðina fyrir sumarið, viðra, þrífa, bera á, smíða og fleira ef tími vinnst til. Verkin gengu vel enda vanur mannskapur á ferð, aðeins einn sem ekki hafði komið áður. Í lok dags var borðað saman; dýrindis grillmáltíð með öllu tilheyrandi.

Ég kom heim um hálfníu. Feðgarnir höfðu m.a. farið í skókaup fyrir tvíburana, bæði fótbolta- og strigaskór voru keyptir og var þetta að hluta sumargjöf frá afa og ömmu á Bakkanum. Gott að þessi mál eru frá. Davíð Steinn var eitthvað slappur um kvöldið enda var hann sjóðheitur viðkomu. Hann þrjóskaðist samt við að horfa á Spaugstofuna kúrandi undir sæng í stofusófanum. Pabbi hans hjálpaði honum svo að hátta sig. Stuttu fyrir miðnætti kallaði strákur. Hann var þá búinn að æla á gólfið og smá á sæng bróður síns.

Stráksi er hressari í dag en ég held honum heima við og fór Oddur Smári einn á fótboltaæfingu í morgun. Davíð Steinn missti áttundu tönnina sína í morgun og skolaði henni svo óvart niður í vaskinn inn á baði svo ég er ekki viss um að tannálfurinn finni hana, hvað þá borgi eitthvað fyrir hana...

- Apríl á endaspretti -

Maí er handan við hornið og enn stend ég mig að þvi að spá í hvers vegna tíminn æði svona áfram. Mér finnst svo stutt síðan árið byrjaði og nú er þriðjungur þess að verða liðinn.

Kom við í Fiskbúð Einars á heimleiðinni í gær. Fiskibollur, ýsuflök og svo freistaðist ég í harðfisk, steinbít, hann er alltaf góður.

Annars er bara frekar tíðindalaust. Saumaði nokkur spor í nýja verkefninu og er farin að koma smá mynd á jafann núna, spennandi.

- Nýstárleg sósuþykking -

Davíð tók að sér að sjá um kvöldmatinn í gærkvöldi. Ég var að vísu búin að sjá til þess að höfð yrðu bygggrjón með. Hráefnið var m.a. svínagúllas, paprika, laukur og sveppir. Ég notaði tækifærið og tölvaðist á meðan maðurinn var að dunda í eldhúsinu. Þegar fór að líða að mat heyrði ég Davíð allt í einu reka upp hláturroku. Auðvitað rauk ég fram í eldhús til að kanna hvað væri svona fyndið. Hann hafði ætlað að þykkja sósuna á pönnunni, fann hveiti í skál uppi í skáp og setti saman við vatn í sósuhristaranum. Þegar hann var búinn að hrista blönduna saman tók hann lokið af og fann þá furðulega lykt, jarðaberjalykt. Það sem hann taldi vera hveiti var þá Núpó létt duft. Maturinn smakkaðist mjög vel hjá honum en hann hætti við að þykkja gumsið.

Raddþjálfinn okkar mætti á kóræfingu í gærkvöldi. Við erum búin að læra heilmikið. Það er alltaf gaman á æfingum en þegar raddþjálfinn, Ingibjörg Ýr, mætir er banastuð. Hún ætlar að koma tvisvar enn fyrir tónleikana okkar sem verða miðvikudagskvöldið 18. maí n.k.

Í ágústlok 2003 keypti ég á mig ecco-skó í skóverslun Steinars Waage í Kringlunni. Skórnir pössuðu mér frábærlega og ég þurfti ekkert að ganga þá til, fékk aldrei hælsæri eða fann til þreytu. En ég er búin að labba fleiri, fleiri kílómetra á þessum skóm og ég verð víst að viðurkenna það að þeir eru einfaldlega orðnir gatslitnir og ónýtir. Í fyrrahaust fann ég svipaða skó í Ecco við Laugaveg. En þeir henta mér ekki vel göngulega séð. Nota þá því mest í messum, veislum og styttri ferðum. Á leiðinni í Þórshamar á þriðjudaginn var kom ég við í Ecco aftur. Þar fann ég á mig annars konar skó. Þeir passa mér ágætlega og það er ágætt að ganga í þeim, (fæ ekki hælsæri amk). En það er smá galli samt. Í skónum eru límd hálf innlegg og tábergið finnur aðeins fyrir því. Kannski lagast þetta þegar ég er búin að ganga skóna til...

- Gula beltið í höfn -

Oddur Smári var í gráðun í gær og tók seinni hlutann af gula beltinu. Strákurinn stóð sig mjög vel og þurfti aldrei að gera athugasemd við stöðuna hjá honum. Við Davíð erum auðvitað að rifna úr stolti, kannski við séum sprungin...

En mér varð heldur betur á í messunni sl. mánudag. Drengjakórinn var með æfingu og smá tónleika í Fella- og Hólakirkju. Ég var svo viss um að Davíð Steinn átti bara að fara með kórpeysuna og spariskóna með sér (svona er að lesa ekki aftur yfir "fylgiskjöl"). En þá áttu þeir að mæta í hvítri skyrtu og svörtum buxum líka. Pilturinn fyrirgaf mér þessi mistök en ég samdi við hann um að lesa líka sjálfur yfir öll "fylgiskjöl" svo hann geti haft hönd í bagga og yfirsýn sjálfur.

sumarkoma

ég sá sumarið
koma á móti mér
ég gekk inn í
útbreiddan faðm
og við knúsuðumst

þegar ég leit til baka
sá ég vorið
veifa glaðlega
eins og það vildi segja
"ég kem aftur seinna"

- Æfingin skapar meistarann -

Loksins náði ég tökum á þessum frönsku ("fræhnútum") hnútum og þá var ég auðvitað alveg óstöðvandi og hætti ekki fyrr en ég var búin með myndina. Á myndinni eru eitthvað á fimmta tug hnúta og ég varð bara betri og betri í þessu.

Sl. föstudagskvöld hitti ég félaga mína úr Landsbankakórnum og marga af eldri félögum. Ég hef greinilega fallið vel inn í hópinn þann stutta tíma sem ég var í kórnum (bara fimm mánuði) því þær voru nokkrar sem þökkuðu mér fyrir öll árin. Gaman að því! Kvöldið heppnaðist mjög vel og var fljótt að líða.

Í gær var þjóðlagamessa í Óháðu kirkjunni. Og kom Borgarkórinn undir stjórn Sigvalda Kaldalóns og söng fjögur lög í messunni. Kórinn var svo með tónleika seinni partinn í gær.

- Margt er hugsað á arkinu -

Hugurinn skreið út í skotið
skamma stund dvaldi þar.
Þótti ekki þægilegt potið
og þáði með mér far.
(á næsta bar)

Hugurinn flaug yfir fjallið
fús ég elti hann.
Viss um að þaðan kom kallið
kannski ég heimsæki mann.
(og annan)
-----------------

Ekki tókst Valsmönnum að knýja fram oddaleik. Þetta leit samt ágætlega út í leikhléi, 15-12. Og eftir hlé juku þeir muninn upp í fimm mörk. En svo fór Birkir að verja betur og Haukarnir komust aftur inn í leikinn, náðu forystunni og héldu henni. ÍR-ingar sigruðu hins vegar ÍBV og oddaleikurinn fer fram í Eyjum á sunnudag. En leikurinn í Valsheimilinu var síðasti leikurinn í þessu húsi. Það verður rifið fljótlega og þegar breytingarnar verða afstaðnar verður aðstaðan við Valssvæðið til fyrirmyndar. Þá verða vonandir allar æfingar í öllum greinum og flokkum á svæðinu sjálfu.

Þolinmæði þrautir vinnur allar. Ég var í miklu saumastuði í gær og er langt komin með myndina hennar Bríet. Ég prófaði meira að segja að byrja á fræhnútunum og það virðist ætla að takast. Þá þarf ég ekki að blikka mömmu með það. Nú klæjar mig í fingurnar að drífa þetta verkefni alveg af og byrja á því nýjasta.

Hafið það gott um helgina!

- Gleðilegt sumar -

Ekki hef ég trú á því að sumar og vetur hafi frosið saman að þessu sinni en ég ætla samt að vera bjartsýn á að framundan sé yndislegt sumar. Á meðan ég man, önnur kaffitegundin frá Andra frænda, (sú sem ég er farin að nota) heitir Sólarglóð. Ég er búin að hella upp á nú í morgun og færði manninum bolla í rúmið núna rétt fyrir tíu.

Milli fimm og sjö í gær var ég stödd á Nordica Hotel (sama stað og árshátíðin var haldin í sl. mánuði). Tilefnið var Mastercard dagurinn. Þetta er árviss viðburður hjá MasterCard kreditkort hf. og er þetta í þriðja sinn sem mér er boðið. Hitti fullt af fólki og þarna var boðið upp á léttar veitingar, bæði í vökva og föstu formi. Smá kynning var á fyrirtækinu og því sem er framundan og einnig var dregið í happdrætti (nokkrum flokkum, hinum ýmsu klúbbum og fleira).

Davíð sótti mig um sjö. Helga systir kíkti aðeins seinna um kvöldið m.a. til að lána mér myndina sem ég saumaði handa Huldu svo ég hefði hana til samanburðar við myndina handa Bríet. Kannski ég klári myndina um helgina.

Farið vel með ykkur og eigið góðan dag og gott sumar framundan. Áfram betra liðið í handboltarimmunum í kvöld!!!

- Síðasti vetrardagur -

Hitinn fór upp í tveggja stafa tölu í gær svo mér var nokkuð heitt á arkinu heim, þótt ég væri með kápuna opna. Tvíburarnir voru á æfingu og Davíð sá um að millifæra Odd Smára úr Safamýrinni yfir í Þórshamar. Þegar ég kom heim fann ég kaffapakka sem ég var að kaupa af frænda mínum, Guatemala-kaffi og Sólar-kaffi. Hellti upp á það síðarnefnda og það eina sem ég get sagt er mmmmmmm... (Takk Andri)

Helga systir hringdi og bað um smá aðstoð og tók Davíð það líka að sér. Hann kom heim mátulega í mat, ofnbakaðan lax borinn fram með bygggrjónum og gufusoðnu grænmeti, alveg ótrúlega gott!!!

Davíð Steinn spurði hvort hann mætti fara út þegar klukkan var að verða hálfátta. Ég sagði að hann mætti vera úti til hálfníu og bað hann um að fylgjast vel með klukkunni. Davíð fór á fund um átta. Oddur Smári fór ekki út og var hann búinn að gera sig klárann í svefninn um hálfníu. Ekkert bólaði á Davíð Steini. Klukkan var orðin níu og Oddur Smári sofnaður þegar drengurinn skilaði sér.
Ég: "Veistu hvað klukkan er, Davíð Steinn"?
Hann: "Ég gleymdi mér"

Ég byrjaði á nýja saumverkefninu mínu í gærkvöldi. Saumaði í kringum jafann, tók miðju, merkti litina og tók fyrstu sporin. Markmiðið er samt að klára myndina fyrir Bríet áður en ég sný mér alveg að þessu nýja. Helga ætlaði að senda mér Huldumynd til samanburðar, en það fórst fyrir. Fæ þá mynd í kvöld og klára þá þann saumaskap um helgina.

Rimman, undanúrslit karla í handbolta, er hafin. Í gær tók ÍBV á móti ÍR og Valsmenn sóttu Hauka heim. Ég er viss um að báðar rimmurnar fara í oddaleik en ekki alveg hvernig fer. Á pappírunum eru Haukar og ÍBV sterkastir - en spyrjum að leikslokum.

Þankar

Þankarnir snúast hring eftir hring
hingað og þangað skjótast.
Mennirnir rífast þing eftir þing
því í öllu er verið að rótast.

Mikið er annars um heilabrot
og ekki svo létt að "laga".
Afgreiðum sumar út í skot
slíkt mun engan plaga.

Á arkinu hugsa ég mikið og margt
magnað hvað kemst að.
Aldrei verður frá öllu sagt
of mikið yrði það.

Suma hluti skal hugsa um
halda sér við efnið.
Aðra verður að ræða um
og frá vandræðum stefnið.

- Helgin liðin -

Það er meira hvað helgarnar fljúga hratt frá manni. Ég kom samt ýmsu í verk (þó ekki öllu), m.a. las ég, saumaði og undirbjó tiltekt og þrif. Svo var ég svo heppin að fá heimsókn frá æskuvinkonu minni seinni partinn á laugardaginn þannig að ég gat frestað frekari þrifum og átti góða stund með Ellu.

Í gærmorgun tölti Oddur Smári einn af stað á knattspyrnuæfingu upp úr hálfníu. Klukkutíma seinna skutlaði ég Davíð Steini í kirkjuna á upphitun fyrir messu. Var komin aftur í kirkjuna nokkuð fyrir ellefu og tók á móti Bríeti og Huldu. Sú fyrrnefnda var mjög meðfærileg og margir trúðu því að ég ætti hana svo lík þykir hún mér.

Seinni partinn kíkti Anna frænka til mín og var löngu kominn tími á hitting og gott kaffispjall. Þetta var notaleg stund.

Á arkinu heim, rúmlega fjögur í dag, setti ég í heldur hærri göngugír en ég er vön og tók þá ákvörðun að drífa í að þrífa. Ég var svo smeik um að svíkja sjálfa mig að ég settist ekki niður fyrr en tæpum tveimur tímum eftir að ég kom heim. Þá var ég líka búin að koma ýmsu í verk (þó ekki öllu) og er ég bara ánægð með dugnaðinn og dagsverkið. Kannski held ég áfram á morgun. Ef ekki þá verð ég að byrja á þeim verkum sem ekki komust að í dag og um helgina, næst þegar ég helli mér í tiltekt og þrif.

Þessa stundina er ég að hlusta á Davíð Stein lesa um Benedikt búálf. Oddur Smári er að lesa fyrir Davíð. Það er skylda að lesa "aukalestur" upphátt í amk tuttugu mínútur á dag. Það er gert til þess að þeir æfist í framburði og t.d. að stoppa við kommur og punkta. Þeim fer fram það er ekki nokkur spurning!

- Órólegt veður -

Svona veður á að nota til þess að koma húshaldinu í betri skorður. Það byrjaði amk. vel hjá mér í morgun. Fór á fætur klukkan níu. Tvíburarnir voru vaknaðir og voru að horfa á morgunsjónvarpið. Fann til morgunverð og færði þeim, bjó til kaffi og færði Davíð í rúmið. Stefnan var að koma sér í gang og byrja um tíu. Veit að Davíð ætlar sér að vinna eitthvað um helgina. Svo rétt fyrir tíu lét ég hann vita að ég ætlaði að kveikja á tölvunni og aðeins að "hita" upp. Hmm, allt í einu er klukkan orðin ellefu. Ef ég á að eiga það skilið að horfa á Liverpool og Tottenham á eftir verð ég að bretta upp ermarnar.

- Úr öllum áttum -

Það gengur ekkert að reyna að halda í dagana, þeir æða samt áfram, og hraðar ef eitthvað er. Skrifaði niður sömu dagsetningu tvo daga í röð um daginn og það eina sem ég hafði upp úr því að það var allt í einu kominn 13. og ég tapaði af þeim 12.

Á þriðjudagskvöldið passaði ég Bríeti Á meðan Helga og Ingvi fóru að sjá ballettsýninguna hjá Huldu. Passið gekk ágætlega. Var mætt um sjö, setti dömuna í rúmið um hálfátta og sú stutta var fljót að sofna. Svo notaði ég tímann og saumaði.

Í gær mætti ég á foreldrafund drengjakórsins. Ýmislegt var á dagskrá og var mjög þægilegt að grípa í saumana á meðan verið var að fara yfir málin.

Svo var kóræfing í gærkvöldi. Við erum m.a. að æfa ungverskt lag og í miðkaflanum er hluti af textanum eftirfarandi: "Rida, rida, bom, bom, bom". Kórstjórinn bað okkur um að syngja þetta frekar með L-i (Lida, lida....). Rétt í lok æfingar sungum við "Á Sprengisandi." Þá fór kórstjórinn allt í einu að spá hvort við yrðum ekki að breyta þar líka og syngja: "Líðum, líðum, lekum yfir sandinn..."?!?!?!

- Komin í saumagírinn -

Já, mér tókst að byrja á saumaverkefninu handa Bríeti og þegar ég er komin af stað þá verð ég ekki lengi að rumpa þessu af. Saumaði töluvert í gærkvöldi. Mikið sem það er afslappandi að grípa í nálina! Nú get ég farið að hlakka til að byrja á allra nýjasta verkefninu.

- Sunnudagskvöld -

Helgin er næstum liðin, bæði annasöm og skemmtileg. Ég var í Valsheimilinu ásamt kórnum mínum og þremur öðrum kórum á föstudagskvöldið. Þar hitti ég m.a. Loft frænda en konan hans syngur með kvennakór Kópavogs. Mæting var áætluð um hálfníu. Allsherjar upphitun á kórunum var rúmlega níu undir stjórn kórstjóra Samkórs Reykjavíkur. Síðan söng hver kór þrjú lög. (Við sungum; "Tíminn líður", "Sofðu rótt" og "Á Sprengisandi"). Eftir sönginn var fólki boðið að gjöra svo vel og fá sér að borða af köldu hlaðborði (grænmetis- og pastaréttir, ostar, vínber og fleira góðgæti). Mörgum fannst samt margt ganga frekar seint fyrir sig. Vitað var að kórarnir væru með skemmtiatriði en klukkan var langt gengin í ellefu áður en þau voru kynnt og alltaf einhver hlé á milli. Klukkan var orðin tólf þegar kom að okkur. Kristinn (annar bassinn okkar) var með nokkra smellna fimmaurabrandara og kórhugleiðingar og sló hann í gegn. Hann ætlaði svo að kynna mig til sögunnar en ég hafði hlaupið í skarðið fyrir einn sem varð að fara áður en kom að okkur. Kristinn gleymdi alveg að kynna mig en ég bjargaði því snarlega, stökk á hljóðnemann og kynnti mig sjálf (þ.e. kynnti seinna atriðið okkar). Ég var með smá sögu úr villta vestrinu og fékk nokkra kórfélaga upp á svið til mín mér til aðstoðar. Alla hina í salnum bað ég um að baula ef þeir heyrðu orðið hjörð í upplestri mínum. Þetta tókst ágætlega. Pétur kórstjóri lék lögreglustjórann og hafði nágranni hans lánað honum merktan lögreglujakka og húfu í stíl. Einn tenórinn lék fyrir mig kúrekann og hinir tveir sem mættir voru léku skúrkana. Síðast en ekki síst fékk ég eina úr sópran til að leika hina yndisfögru Lafði Rós. Klukkan var orðin hálfeitt þegar loks var hægt að slá upp balli (og við sem höfðum ekki salinn nema til tvö...).

Seinni partinn á laugardag fórum við mæðginin á leik Vals og HK í Valsheimilinu. Valsara fóru með átta marka forskot inn í hálfleik og munaði um það að Björgvin Gústavsson, í marki HK-inga var ekki kominn í gang og Hlynur varði mjög vel í marki Valsara. Seinni hálfleikur var mun meira spennandi og ég verð að viðurkenna að ég var orðin smeik í lokin um að annaðhvort yrði framlengt eða jafnvel Kópavogsliðið myndi vinna. 31:30 fyrir Val var lokastaðan og þar sem ÍBV marði sigur á Frömmurum mæta Valsara Haukum í undanúrslitum (annars hefðu það verið ÍR-ingar).

Upp úr eitt í dag mætti ég svo í kirju og söng með flestum kórfélögum mínum við fermingamessu. Fjórar stúlkur fermdust og átti"Lafði Rós" eina af þeim.

En ég er líka búin að slaka á, lesa og sinna húsverum um helgina. Það eina sem ég komst ekki í var að byrja á saumaskapnum. En koma dagar og koma ráð!

- Ýmislegt -

Það er ljóst að það verður hörku leikur í Valsheimilinu á morgun, oddaleikur. Líklega er það rétt hjá Ólafi Víði Ólafssyni, að það lið sem langar mest til að vinna, vinnur leikinn! Það má bóka það að ég verð á staðnum á morgun. En ég verð þar í kvöld líka. Ekki til þess að taka frá pláss fyrir leikinn á morgun. Nei, það er svokallað kórakvöld í kvöl. Kirkjukór Óháða safnaðarins er einn af fjórum kórum (Karlakór Kópavogs, Kvennakór Kópavogs og Samkór Reykjavíkur) sem ætla að hittast og syngja hverjir fyrir aðra. Ég hlakka til! Hver kór syngur 3 lög og verður með e-r skemmtiatriði og boðið verður upp á léttar veitingar. Og ef þetta er eins og í fyrra þá verður barinn opinn. Svo verður ball til klukkan tvö.

Annars sit ég þessa stundina og dáist að nýja giftingahringnum mínum. Fór með hann í gær til gullsmiðsins sem smíðaði hann fyrir rúmum níu árum og bað hann um að hreinsa hann og stækka. Í ljós kom að það þurfti aðeins að stækka hann um eitt númer. "Eitt, núll fyrir þig!" sagði gullsmiðurinn við mig í gær (en var áður búinn að spyrja hvort hann hefði hlaupið). Og ég mátti vitja hans eftir fjögur í dag. Hann er svo skínandi fagur að mér finnst ég vera nýgift, he he.

Ég gerði fleira í gær. Ég útvegaði mér það sem til þarf til að sauma fæðingarmynd handa Bríeti, alveg eins og þá mynd sem ég saumaði handa Huldu á sínum tíma (og svipað og ég saumaði í handa Oddi Smára og Davíð Steini). Ég var nefnilega búin að heita mér því að byrja ekki á nýju saumaverkefni fyrr en ég væri búin að afgreiða þetta handa Bríeti. Ég verð ekki lengi að skvera þessu af eftir að ég byrja!

- Minning -

Í dag er fæðingardagur eins frænda míns, Odds Þorsteinssonar, sem lést langt um aldur fram fyrir tæpum þremur árum síðan. Ég naut þeirra forréttinda að alast upp með honum. Þótt hann væri átta árum eldri en ég var hann (og eldri bróðir hans) mjög duglegur að leika við okkur systur. Hugurinn er hjá fjölkyldunni í dag!

Annars fórum við mæðginin á leikinn, Valur - HK í gærkvöldi. Þvílíkur spennuleikur. Mér segir svo hugur að þetta fari í þrjá leiki og það er engan veginn ljóst hvort liðið vinnur tvo. Pálmar stóð sig ágætlega í markinu framan af. Hann skipti svo við Hlyn eftir að seinni hálfleikur var byrjaður. Hlynur kom svo í veg fyrir það að leikurinn færi í framlengingu með því að verja síðasta aukakastið frá HK.

Herra Atli

Ég ætlaði mér að drífa af
öll hús- og skylduverk.
Gleymdi nú samt að þurrka af
en var bara í andanum sterk.

Bækurnar mikinn tíma taka
tæla mig oft til sín.
Sumum finnst ég ætti að baka
en er það ekki ákvörðun mín?

Betri er bók en kaka!

- Góður RAUÐUR dagur -

Liverpool vann sinn leik gegn Bolton 1:0 og Valsstelpurnar slógu FH-stúlkur út rétt áðan með 25 mörkum gegn 19. Berglind varði mjög vel í markinu og sigurinn var aldrei í hættu. Við mæðginin fórum á leikinn og skemmtum okkur vel. Ég var samt aðeins að reyna að spara röddina því ég er með einhvern kverkaskít og hálsinn tæpur. Verð að ná mér góðri fyrir næstu helgi en það er kórakvöld í Valsheimilinu n.k. föstudagskvöld og fermingarmess n.k. sunnudag. Annars kórónaði Eiður Smári daginn með því að skora tvö mörk í 1:3 sigri Chelsea á Southamton.

orðaleikurinn

þau skjótast um í kollinum
vilja að hugsað sé um þau
biða um að þau séu rituð niður
orðin
mörg skemmtilega glettin

þau gera sér að leik
að setja allt á annan endann
og hlægja svo að öllu saman
orðin
sum einfaldlega stríðin

þau geta hrúgast saman
stundum dreifist úr þeim
og ekki er hægt að henda reiður á þeim
orðin
algerlega nauðsynleg

- Skattskil og heimsókn -

Mér tókst að skila inn skattaskýrslunni (í rafrænu formi) í gærkvöldi. Hafði fengið mér frest sem var veittur til 29. mars svo það voru síðustu forvöð í gær. Það var mikill létti að ljúka þessu af. Þetta var heldur flóknara vegna íbúðar- sölu og kaupa en þetta hafðist. Það var eiginlega ágætt að fá þennan frest. Í fyrsta lagi ætlaði ég aldrei að hafa mig í að byrja að fylla þetta út. Loks þegar ég ætlaði að sækja skýrsluna fann ég ekki veflykilinn (fann hann eftir að ég var búin að fá nýjan) og síðast en ekki síst þá var gott að fylla þetta inn og fara yfir málin í skorpum. Skv. villuprófun á netinu fannst engin villa en það er gott að hugsa til þess að hægt er að sækja skýrsluna og leiðrétta og bæta við ef svo ólíklega vildi til að þess þyrfti.

Um níu voru strákarnir að koma sér í ró og ég dreif mig í heimsókn til tvíburahálfsystur minnar. Tók með mér pakkann sem ég sótti í Margaretha um daginn og opnaði hann loksins þar. Mig klæjar í fingurnar að byrja á nýju verkefni en hef heitið mér því að gera það ekki fyrr en ég er búin að ljúka nokkrum verkefnum öðrum áður.

En núna er best að drífa sig á kóræfingu.

- Ekkert páskahret -

Tókuð þið eftir því hvað veðrið var gott amk. hér sunnanlands um páskana? Hreint út sagt yndislegt veður!!!

Nú er bara að koma sér í gírinn aftur, klára þennan mars mánuð og taka vel á móti sumrinu. Ó, já, þá er það að ákveða og skipuleggja sumarfríið sitt. Þarf aðeins að spá í þau mál.

- Annar í páskum -

Tíminn lætur ekki bíða eftir sér. En þetta eru búnir að vera ljúfir frídagars. Á skírdag gerði ég nákvæmlega ekki neitt nema að slaka á. Á föstudaginn langa gerði ég heldur meira en ekki neitt en það var allt húsverkatengt og lítið spennandi að segja frá því. Nema jú, ég var mætt til að syngja í krikjunni minni upp úr átta.

Á laugardaginn sótti Lilja vinkona mig fyrir hádegi. Hún þáði hjá mér kaffibolla en leið okkar lá svo í Laugardalshöllina þar sem við fylgdumst með þremur handboltaleikjum: Holland - Austurríki U-21, Úkraína - Ísland U-21 og vináttulandsleik milli Íslands og Póllands. Dagurinn var sérdeilis fljótur að líða. Um kvöldið litu tengdó við og færðu mér afmælisgjöf í leiðinni, blómvönd, baðsápu í flottri flösku, smá heilsugotterí og síðast en ekki síst flotta platta "Past times".

Í gærmorgun páskadag var ég komin á fætur fyrir hálfsjö og mætt í kirkjuna á slaginu sjö. Kórstjórinn talaði um að það væri svolítið erfitt að hita raddir okkar upp og vekja þær. Ég fann samt ekki fyrir því. Klukkan átta var messað. Við syngjum upp úr sérstakri hátíðarmessuskrá eða bók og sungum þar að auki fjóra sálma, tvo í röddum og tvö einraddað. Messan tókst vel. Ein úr kórnum treysti sér ekki til að syngja og sat bara og hlustaði á okkur. Hún sagði að það væri góður hljómur í kórnum. Eftir messu var boðið upp á heitt kakó með rjóma og brauðbollur með smjöri og osti.

Upp úr hádegi lögðum við í hann austur á Hellu og vorum þar fram eftir degi.

Grunurinn læddist framhjá
straukst við mig
en stoppaði ekki

hvert er hann að fara?

Ég elti með hálfum huga
óljósan skugga
næstum ósýnilegan

hvert var hann að fara?

Allt í einu var hann horfinn
hafði leysts upp
og orðið gegnsær

hvert fór hann?

Eiginlega langaði mig
ekki að vita það
samt var ég forvitin

- Ásetnir dagar -

Í dag eru níu ár síðan við Davíð skruppum til borgardómara og létum pússa okkur saman. Já, tíminn líður, hann hreinlega flýgur stundum á ljóshraða finnst mér.

Það er búið að vera í nógu að snúast eins og fyrri daginn. Ég gaf sjálfri mér það í afmælisgjöf að sækja pantaðar vörur í Margaretha sl. fimmtudag. Hef samt ekki enn opnað pakkann (og ekki heldur nýjustu bókina hennar Birgittu Halldórsdóttur sem ég keypti mér fyrir nokkur). Ég ætla fyrst að ljúka af fæðingarmynd handa Bríeti frænku.

Á laugardagskvöldið fengum við Kolfinnu til að vera hjá strákunum og bauð ég Davíð með mér á árshátíð sem haldin var á Nordica Hotel. Þetta var mjög vel heppnuð árshátíð í alla staði, góður matur, frábær skemmtiatriði (sérstaklega þessi heimatilbúnu) og fínn veislustjóri, Óskar Jónasson betur þekktur sem Skari skrípó. Hann stóð undir nafni svo ekki sé meira sagt en mér fannst hann aldrei fara yfir strikið.

Á sunnudaginn vorum við öll boðin í fermingarveislu. Ég skrifaði á kortið rétt áður en við fórum og var svo upptekin af að finna rétta heilræðavísu og rita inn í kortið að ég gleymdi að skrifa undir. Setti dagsetningu, ávarpaði fermingarbarnið, merkti umslagið, skrifaði vísuna stakk inn smá aur, setti kortið í umslagið og lokaði. Um kvöldið hringdi frænka mín og spurði hvort það gæti verið að ég/við hefðum gleymt að skrifa undir kveðjuna. Úps, já það gat vel verið.

Stákarnir eru komnir í páskafrí og mamma líka. Helga systir bjargar málunum þessa dagana og ég hjálpa henni á móti seinni partinn.

- Bekkjarkvöld -

Í gærmorgun vöknuðu fjölskyldumeðlimir í öfugri röð miðað við flesta aðra daga. Davíð fór á fætur góðri stundu áður en klukkan mín hringdi. Nafni hans kom fram um hálfsjö (þá var ég búin að stilla á blund tvisvar sinnum) og Oddur Smári kom fram rétt á undan mér sirka korteri á eftir bróður sínum.

En ég ætlaði að segja frá bekkjarkvöldinu. Mæting var um hálfsex (og kom m.a. mamma) og stuttu seinna sýndu Davíð Steinn og Friðrik Örn leikritið um ljónið og músina. Síðan lásu nokkur börn úr bekknum frumsamdar sögur um unga og páska. (Öll höfðu þau samið sögur en það var valið af handahófi hverjir lásu, annað var ekki hægt vegna tímans). Allur bekkurinn spilaði svo og söng "Krummi svaf í klettagjá" og að lokum sungu þau þrjú lög við undirleik tónmenntakennara síns (Á sprengisandi, Hver á sér fegra og Við krossins helga tré). Tónmenntakennarinn gat þess að hún hefði aldrei haft kraftmeiri hóp í tímum hjá sér. Það var líka virkilega gaman að hlusta á krakkana. Strákarnir eru í meiri hluta, 14 á móti fimm stelpum. Eftir að hafa fengið sér af góðgætinu sem allir komu með var sest niður og föndrað.

Við vorum komin heim um átta og þá hafði ég nokkrar mínútur í slökun áður en ég mætti á kóræfingu. Við vorum að æfa fyrir fermingamessu og páskana. Það gekk vel og við vorum svo heppin að hafa raddþjálfarann með okkur sem gat gefið okkur góð ráð. Virkilega gott og skemmtilegt kvöld semsagt!

- Hitt og þetta -

Helgin er bara búin og var hún ekki lengi að skjótast framhjá. Við Davíð Steinn vorum í Valsheimilinu frá hálfþrú til sex á laugardaginn. Fyrst tókur stelpurnar á móti FH og töpuðu naumlega, 22:23, í æsispennandi leiki. Svo tóku strákarnir á móti HK og unnu 30:32, einnig í mjög spennandi leik.

Í gær var svokallað Bjargarkaffi eftir messu í kirkjunni minni. Ég söng við messuna eins og margir úr kórnum en svo stakk ég af, má ekki við því að falla of mikið fyrir freistingunum. Þess í stað fór ég beint að versla. Það var lokað í Bónus svo ég fór í Hagkaup og notaði tækifærið og verslaði sitt hvað úr heilsuhillunum, s.s. bygggrjón sem eru í uppáhaldi á þessu heimili. Fór með vörurnar heim, bað Davíð um að ganga frá þeim fyrir mig/okkur og var svo rokin út aftur.

Skrapp á lokadag bókamarkaðarins í Perlunni. Þótt undarlegt megi virðast þá féll ég ekki fyrir neinum freistinum. Sá samt nokkrar bækur sem mig langar til að lesa. Til þess eru nú bókasöfnin!

Ég hélt Oddi Smára inni alla helgina og bað svo um að hann þyrfti ekki að vera mikið úti í þessum kulda. Strákurinn er með mjög ljótan hósta og lungun eru frekar viðkvæm. Held samt að hann sleppi við að pústa sig að þessu sinni. En ef honum slær niður, þá þarf ég að útvega nýtt astma-púst handa honum. Vona frekar að hann vinni á þessu sjálfur.

- Veikindi -

Oddur Smári náði sér í svæsna kvefpest með hita og tilheyrandi. Í gær svaf hann lungan úr deginum en hann er öllu hressari í dag þótt hann sé ekki alveg hitalaus. Ég var einmitt að ræða við Davið Stein um hversu hraustur hann sjálfur væri búinn að vera í allan vetur, er við röltum heim eftir kóræfingu sl. miðvikudag. Ég hafði beðið um frí fyrir hann næsta miðvikudag og Friðrik sagði að það væri ekkert nema sjálfsagt, strákurinn væri búinn að mæta á allar boðaðar æfingar í vetur, ekki misst úr eina einustu! Davíð Steinn er samt aðeins búinn að vera hósta undanfarið en ekkert meira en það. Þegar kvefið nær tökum á Oddi Smára þá eru lungun hans það viðkvæm að yfirleitt verður hann veikur. Ég get samt ekki kvartað neitt því drengirnir mínir eru mjög hraustir þó Davíð Steinn, hrausti strákurinn minn, sé kannsi heldur hraustari.

Ég er auðvitað búin að nota tækifærið og glugga í bækurnar sem ég er með af safninu. Í gær lauk ég við að lesa: Þegar barn fæðist. Endurminningar Helgu M Níelsdóttur ljósmóður, skráð af Gylfa Gröndal. Ég var ekki lengi að gleypa þá bók í mig og er nú að lesa: Benjamín H. J. Eiríksson Í stormum seinna tíða. Sú bók er skráð af Hannesi H. Gissurasyni. Læsilegar bækur báðar tvær og oft erfitt að slíta sér frá þeim þegar skyldan kallar. Um daginn las ég fyrri bókina um ævi Chaplins. Fann ekki seinni helminginn þegar ég fór í safnið síðast en ég á örugglega eftir að finna hann og lesa seinna.

Stökur

Vinnuvikan hálfnuð er
var þó rétt að byrja.
Allir vita hvernig fer
óþarfi að spyrja

Ótrúlegt hvað tíminn tifar
tilgangslaust að elta.
Það veit sú er þetta skrifar
samt að reyna að melta.

Stundum er betra að bíða
biðja ekki um neitt.
Einhvern tíma láta líða
loksins komast í feitt.

Lengist dagur dálítið
dugar fyrir vorið.
Ekki er það skrýtið
að fá úr því skorið.

Aftur er ég byrjuð að bulla
barnalegt en gaman.
Ættum frekar samt að sulla
syngjandi og saman...

- Bókasafnsferð -

Sl. sunnudag var síðasti skiladagur á þeim bókum sem voru í fórum okkar mæðgina. Upp úr hádeginu tók ég saman allar þær bækur sem við vorum búin að afgreiða og dreif mig á safnið. Þar bað ég um lengri skilafrest á þeim bókum sem eftir voru heima en fór engu að síður með körfu og "lét greipar sópa" um hillurnar. Ofan í körfuna fóru nokkrar barnabækur og slatti af alls konar bókum sem ég hef hugsað mér að sökkvar mér í á næstunni. Í afgreiðslunni fékk ég svo í hendurnar langan strimil með nöfnum þeirra bóka og höfunda sem ég (og strákarnir) verðum með næsta mánuðinn eða svo. Það kemur fram á strimlinum hvenær á að skila (eða biðja um lengri skilafrest). Þetta er langur strimill og hann skiptist alveg í tvennt, 13 bækur hugsaðar fyrir mig og 13 fyrir strákana.

Áður en ég fór heim skrapp ég í búð og verslaði smá nauðsynjar til heimilisins. Eftir það gaf ég sjálfri mér góðan tíma. Strákarnir voru úti að leika sér og Davíð í tölvunni. Mamma hafði séð til þess að allir hópstjórar fengu afganga með sér heim svo ég þurfti ekkert að hugsa fyrir mat.

Í gærkvöldi fór ég svo á fatakynningu. Aðal-markmiðið var að panta buxur og boxer á Davíð. Ég stóðst samt ekki mátið og keypti mér skyrtu og buxur.

- Æfingabúðir -

Davíð safnaði okkur mæðginum seinni partinn á föstudaginn. Heima lukum við Davíð Steinn við að finna okkur til fyrir helgina (drengurinn stóð sig vel í að láta niður sitt dót, þurfti bara að spyrja stöku sinnum til að vera viss um að allt væri með og góða skapið var líka tekið með). Um fimm leytið var Oddi skutlað á karateæfingu en okkur Davíð Steini upp að kirkju þar sem rútan beið og fleiri drengir og eitthvað af foreldrum var að safnast saman.

Leiðin lá í Hlíðardalsskóla, alveg mátulega langt/stutt frá höfuðstaðnum. Mamma var með í för og sá um eldhúsmálin. Hún var með kvöldmat um hálfátta og klukkutíma síðar var kóræfing. Upp úr hálftíu var kvöldhressing. Það spurðist fljótt út að ég ætlaði að vera með sögustund fyrir hópinn minn og náðust við mig samningar um að lesa inni í setustofunni fyrir þá sem vildu. Flestir strákanna 15, nokkrir af hópstjórunum og kórstjórinn komu og hlustuðu á mig lesa fyrstu kaflana í Ævintýraeyjunni eftir Enid Blyton. Sá síðastnefndi steinsofnaði reyndar. Ég las í tæpan hálftíma en um ellefu var allt komið í ró.

Allir voru komnir á fætur um hálfníu á laugardagsmorguninn og var morgunmatur um níu. Fyrsta kóræfingin byrjaði hálftíma síðar og það voru æfingar alveg til fimm með viðeigandi djús-, og matarhléum. Kórstjórinn var mjög ánægður með strákana (16. drengurinn bættist í hópinn þennan dag, hafði ekki komist kvöldið áður). Friðrik kórstjóri hrósaði líka sérstaklega einum drengnum sem var alveg nýbyrjaður í kórnum, sá var aðeins búinn að koma á síðustu æfinguna fyrir æfingabúðirnar og ákvað samt að skella sér með.

Á meðan drengirnir æfðu, sundur og saman, hjálpuðum við hópstjórarnir við frágang og undirbúining í eldhúsinu en ég var líka með handavinnu og bækur með mér (nema hvað). Um fimm stefndum við drengjunum í íþróttahúsið þar sem búið var að setja upp þrautahring. Strákunum var skipað niður í tvö lið og svo var blásið til keppni. Eftir spennandi keppni fengu strákarnir svo að fara í sund sem einnig var á staðnum. Að sundinu loknum var farið að undirbúa kvöldvöku sem var haldin eftir kvöldmat og frágang í eldhúsinu. Kvöldvakan tókst alveg með ágætum. Það voru sagðar gátur og brandarar, leiknir látbragðsleikir og spurðar spurningar (úr trivial). Það var líka tilkynnt um snyrtilegasta herbergið. Að lokum var strákunum tilkynnt um að vegna þess hversu vel þeir höfðu staðið sig í æfingabúðunum ætlaði matráðskonan að verðalauna þá með heitri, nýbakaðri súkkulaðiköku.

Klukkan hálfellefu kom ég mínum hóp í ró. Þeir voru fljótir að sofna og voru langfyrstir inn í draumalandið. Eldri strákarnir reyndu að suða um sögustund en mér fannst orðið of framorðið og líka ósanngjarnt gagnvart þeim sem voru komnir í ró.

Ég vakti hópinn minn um átta. Drengirnir drifu sig í kórfötin og gengu frá dótinu sínu. Fljótlega eftir morgunmat var brunað í bæinn þar sem undirleikarinn átti að spila í messu í Fella- og Hólakirkju og drengirnir að syngja við æskulýðsmessu í Hallgrímskirkju. Á leiðinni í bæinn var tilkynnt um hvaða hópur hefði unnið háttvísiverðlaunin og þótt langflestir strákanna hefðu verið mjög duglegir og þægir þá skar minn hópur sig aðeins úr. Þeir mundu alltaf eftir að þakka fyrir matinn, voru fyrstir að sofna og hlýddu mér í einu og öllu.

Þetta var mjög vel heppnuð helgi og skemmtileg í alla staði.

litagleði

í draumnum var það eðlilegt
að brún sólin risi
úr suðri upp á
fjólubláan himininn

fólkið gekk út á hlið
og allir heilsuðust
brosandi

appelsínugult hafið
lék sér við bleika ströndina
grasið var dimmblátt

þegar kvöldaði
settist sólin
í austri
fólk gekk afturábak
inn í húsin sín
og kallaði
"góða nótt!"

- Hamagangur í eldhúsinu -

Á arkinu seinni partinn í gær var ég ákeðin í að láta hendur standa fram úr ermum. Fljótlega eftir að ég kom heim var ég komin í eldhúsið og byrjuð undirbúa kjötbollugerð. Fyrst þurfti ég reyndar að "finna" elhúsið en þegar ég var komin í ham var það ekki lengi gert. Ég blandaði saman svína- og nautahakki til helminga, leysti upp grænmetistening í könnu af sjóðandi vatni og tók fram matvinnsluvélina mína. Fyrir utan laukinn og eggin setti ég hveiti, byggmjöl og smá kartöflumjöl út í farsið og kryddaði svo allt með pipar (hvítum, svörtum og cayanne). Úr 1200 gr. fékk ég 45 bollur.

Um kvöldið var kóræfing og kom raddþjálfari fyrsta hálftímann (hún verður lengur í næstu viku og ætlar þá að taka altinn í gegn). Hún kom til okkar tvisvar sinnum í haust og þetta eru mjög gagnlegir tímar. Eftir að hún var farin æfðum við páskasálma og einnig lög sem við verðum með á vortónleikunum.

Þar sem strákarnir voru á knattspyrnuæfingu til hálfsex arkaði ég lengri leiðina heim. Fékk skyndilega mikla löngun í að fá fisk í matinn og kom við í Fiskbúð Hafliða og keypti mér ýsu.
Kom heim hálftíma seinna en venjulega og dreif mig í húsverkin. Áður en feðgarnir komu heim var ég búin að ryksuga og byrjuð að undirbúa plokkara.

En það er best að hjálpa strákunum að klára að læra. Oddur Smári er eiginlega búinn á því, skilur hvorki upp né niður í stærðfræðinni, líklega orðinn þreyttur!

- Valur - KA -

Já, við tvíburarnir fórum á leikinn í gærkvöldi. Og þvílíkur leikur! "Okkar strákar" voru undir allan fyrri hálfleikinn, samt var Pálmar að verja ágætlega í markinu. Í hléinu lét ég strákana fá 500 kr. og sagði að þeir mættu kaupa sér eitthvað að drekka fyrir þá. Þeir fengu sér báðir Topp og skiluðu mér sínum hundrað kallinum hvor. ) Davíð Steinn var mikið að spá í að kaupa sér bland í poka og Oddur Smári hefur líklega vitað af því og marg sagði bróður sínum að kaupa ekki). Hlynur kom í markið í seinni hálfleik og átti mjög góðan leik. Vörnin fór líka að virka betur og á tuttugu mínútum breyttu Valsara stöðunni úr fimm mörkum undir í fimm mörk yfir. KA-menn náðu samt að minnka munin og þegar 1 sekúnda og aðeins aukakast var eftir af leiknum var staðan jöfn 27:27. Einn KA-maðurinn fékk tvær mínútur en þeir náðu samt að stilla upp mjög háum vegg. En Sigurður Eggertsson náði samt að skora sigurmarkið á alveg ótrúlegan hátt. Hann fann glufu á veggnum og markmaðurinn átti enga möguleika.

- Það helsta frá sunnudeginum -

Vekjarinn á gemsanum mínum hringdi rétt fyrir átta. Ég stillti á blund og dormaði áfram. Rétt áður en vekjarinn hringdi aftur læddist Oddur Smári inn og spurði í lágum hljóðum:
-"Mamma, ertu nokkuð búin að gleyma fótboltanum?" Nei, ég var ekki búin að gleyma honum. Davíð Steinn vaknaði um leið og ég fór fram. Ég bað strákana um að klæða sig á meðan ég finndi til vítamín og setti morgunmatinn á borðið.

Bræðurnir trítluðu svo af stað á æfingu upp úr hálfníu. Ég notaði tækifærið og lagði mig aftur. Var svo komin á fætur þegar strákarnir komu heim aftur rúmum tveimur tímum seinna. Með þeim kom einn fótboltafélaginn. Hann stoppaði stutt, var sóttur um hálftíma síðar en við vorum líka að fara í afmæli til Huldu frænku.

-"Afhverju komið þið svona snemma?" spurði mágur minn. Helga og Hulda voru í kirkju og ekki var von á þeim alveg strax. Pabbi og mamma komu stuttu á eftir okkur mæðginunum. Pabbi var búinn að smíða stærðar dúkkuhús handa dótturdóttur sinni og mamma hafði séð um að kaupa eitthvað í það. Farið var með húsið upp á efri hæðina og teppi breytt yfir það. Hulda var ekkert smá ánægð með gripinn. Þegar hún var svo spurð að því hvað væri í pökkunum sem fylgdu með (eftir að hafa opnað þá) svaraði hún strax: -"Húsverk"

Ég fékk að skilja tvíburana eftir í afmælinu frá eitt til þrjú og skrapp og söng við messu. Við mættum næstum öll, kórfélagarnir, og sungum við messuna. Það vantaði eiginlega bara einn (kannski tvo en ein tenórinn hefur ekki mætt á æfingar eða í messur frá áramótum svo hann er líklega hættur að syngja með okkur).

- Annasöm helgi -

Það hefði verið ágætt að geta verið á nokkrum stöðum í einum nú um helgina. Stundum tókst það svona hér um bil. Davíð og strákarnir pikkuðu mig upp við 10-11 við Skúlagötu um hálffimm sl. föstudag. Við fórum heim en stoppuðum ekki lengi við þar. Davíð tók pc-tölvuna og setti í skottið. Skyldum Davíð Stein eftir heima í Play-staion, skutluðum Oddi á karateæfinu og svo skutlaði ég manninum í Kópavoginn, Digraness, en þar fór fram Skjálfti nú um helgina. Níu, tíu manna, lið tóku þátt.

Hafði nokkrar mínútur heima áður en ég sótti Odd og skyldi Davíð Stein aftur eftir. Oddur var að labba út úr búningsklefanum þegar ég kom. Ég skutlaði honum heim en fór svo yfir Lækinn að sækja Guðjón, barnapíuna mína. Hann fékk þau fyrirmæli að strákarnir mættu vaka til tíu, ég kvaddi synina og svo var ég rokin. Það var matarboð í kirkjunni. Kvöldið var frábært í alla staði og sé ég ekki eftir að hafa skellt mér. Maturinn var fjölbreyttur og góður, Ómar Ragnarsson fór að venju með gamanmál og kórfélagi okkar Kristinn Þorsteinsson fór með kór annál og Sikileyjarhugleiðingar. Virkilega skemmtilegt allt saman. Ég var komin heim aftur upp úr ellefu og að þessu sinni var Guðjón sóttur til mín.

Bræðurnir voru komnir á stjá um átta morguninn eftir. Davíð hafði fengið skutl heim e-n tímann um nóttina. Ég fór framúr um níu og fann til morgunmat og vítamín handa okkur strákunum. Renndi svo í könnuna og vakti Davíð um tíu. Það kom í ljós að hann ætlaði sér einmitt að vakna um þetta leyti og hafa smá tíma með okkur áður en hann færi aftur til keppni um hádegi. Ég skutlaðist með hann til að hafa bílinn.

Um tvö vorum við mæðgin kominn í Hafnarfjörð til tvíburahálfsystur minnar en þau hjónin höfðu boðið okkur og fleirum til skírnarveilsu. Séra Pálmi Matthíasson skírði dömuna þeirra til. Þá veit maður loks hvað litla frænka heitir þeim fallegu nöfnum; Elísa Ásdís. Það var notaleg stund sem við áttum með fjölskydunni og vinum. Strákarnir voru eiginlega ekkert á því að koma heim.

Frá sunnudeginum segi ég síðar.

- Andríki -

Núna kom andinn yfir mig
og það ætla ég að nýta.
Ætli það muni borga sig
sýnum draumum að flýta?

Föstudagur enn á ný
og tíminn flýtir sér
Á himni eru engin ský
ég er að dunda mér.

Hvað skyldi vera tveir og tveir
tuttuguogtveir eða fjórir?
Hugsa ég alltaf meir og meir
mínir þankar eru stórir.

Núna er ég farin að bulla og bulla
ballið er rétt að byrja.
Kannski er betra að sulla og sulla
hvern á ég að spyrja?

Á arkinu hugurinn vinnur mikið
ég rífst oft við sjálfa mig.
Hvernig væri fyrir vikið
virkilega að hlusta á sig?

Ja hérna hugsa ég núna
halelúja eða hvað.
Tel mig vera alveg búna
og mun færast úr stað.

- Á léttu nótunum -

Það var kóræfing í gærkvöldi. Í síðustu viku var ákveðið að það væri alltaf einhver sem sæi um að koma með brandara til að lesa eða segja í kaffipásunni. Það var líka ákveðið að byrja fremst í stafrófinu þannig og var ég tilbúin með nokkra góða í gærkvöldi. Þar á meðal þennan sem ég þýddi og staðfærði:

Heiða var komin á steypirinn og ein heima ásamt þriggja ára dóttur sinni, Kötu. Það er leiðinda veður þegar hún fær hríðir. Hún hringir í 112 og fljótlega kom sjúkraliði, einn einhverra hluta vegna. Rafmagnið var farið og Heiða var byrjuð að rembast á fullu. Sjúkraliðinn varð að biðja Kötu litlu að lýsa sér með ljóskastara sem hann var með. Þetta tók einhvern tíma en að lokum fæddist drengur. Sjúkraliðinn klippti á naflastrenginn, tók piltinn upp og danglaði í bossann á honum. Þá gall við í Kötu litlu: -"Já, gott hjá þér! Rassskelltu hann aftur því hann átti ekkert að vera að skríða þarna inn..."

- Handavinnuverkefni -

Ég afrekaði það í gær að taka upp kassann með handavinnudótinu mínu. Fljótlega þarf ég að fara að byrja á fæðingarmynd fyrir Bríet. Ég á munstrið til og slatta af garni en mig vantar jafann. Svo á ég nokkur verkefni sem ég gæti farið að dunda mér við að sauma. Annars lét ég það eftir mér að panta mér úr nýjasta Margarethabæklingnum í síðustu viku og bíð ég spennt eftir þeim pakka. Þess vegna er um að gera að drífa sig í að sauma eitthvað óklárað svo það liggi ekki óklárað lengur þegar nýju verkefnin koma í hús.

- Þoka -

Það var hálf draugalegt á arkinu í morgun og stundum erfitt að átta sig á fjarlægðum. Að öðru leyti var samt gott að ganga. Færið með besta móti og enginn vindur og engin úrkoma.


Hulda frænka er fimm ára í dag. Mikið flýgur tíminn ógnarhratt. Vinkonurnar eru boðnar í afmæli seinni partinn í dag en svo verður fjölskylduafmæli n.k. sunnudag.

Í gærkvöldi komu til mín vörurnar sem ég pantaði hjá New Skin, einn kassi af vítamínum og annar af snyrtivörum. Ég keypti krem fyrir Helgu systur og "rollon" handa Davíð en handa mér heilt tannburstasett. Í töskunni eru tvær tegundir af tannkremi, tannþráður, munnskol, munnsprey og þrír tannburstar.

- Konudagur -

Allar konur til hamingju með daginn! Ég ætla aðeins að "gera upp" gærdaginn. Það voru spenntir bræður sem vöknuðu fyrir hálfátta í gærmorgun þrátt fyrir að hafa fengið að horfa á Disney-myndina kvöldið áður. Spenningurinn hjá Davíð Steini var tvöfaldur því eftir hádegi var hann á leið í óvissuferð. Ég fékk strákana til að kúra sig aðeins niður aftur en bara til átta þá tipluðu þeir fram í stofu og kveiktu á sjónvarpinu. Stuttu seinna komu þeir og spurðu hvort þeir mættu fara í play-station. Ég fór fljótlega á fætur og bjó til kaffi og hafragraut.

Stuttu fyrir ellefu vorum við mætt á Leiknissvæðið þar sem Valsarar spiluðu æfingaleik við Leiknisstráka. A-liðið hafði verið að spila milli 10 og 11 en ég veit ekkert hvernig gekk hjá þeim. Það rétt náðist í tvö (B og C ) lið, það var svo tæpt að það var enginn drengur afgangs til að skipta inn á og hvíla. Davíð Steinn stóð í markinu fyrir sitt til og Ármann bekkjarbróðir tvíburanna (sem er nýkomin úr Fram yfir í Val) stóð í markinu fyrir hitt liðið. Ármann fékk víst aðeins 4 skot á sig, var með öfluga vörn fyrir framan sig, og varði tvö af skotunum. Davíð Steinn fékk amk 15 skot á sig (þótt vörnin væri oftast að standa sig) og varði hann mörg skot alveg stórglæsilega. Leikurinn hjá honum og hans liði endaði 7-2 fyrir Leikni en það var alveg öfugt hjá hinu liðinu. Við Davíð og fleiri foreldrar vorum á hliðarlínunni og var Davíð duglegur að hrópa hvatningarorðum og leiðbeiningum til strákanna. Eitt sinn var einn drengurinn búinn að ná boltanum af andstæðingnum þá hrópaði Davíð: "Hlauptu aðeins framar með boltann þú þarft ekki að skjóta standandi.....uh kyrr!" Ég sprakk úr hlátri og sagði að þetta yrði munað

Klukkan tvö var ég mætt með Davíð Stein við Hallgrímskirkju og skildi ég hann þar eftir í umsjón hjóna sem ætluðu með hann og fjóra aðra út í óvissuna. Ferðin tók alveg fjóra tíma. M.a. var farið í Víðidal á hestbak. Davíð Steinn datt víst aðeins af baki en hann þurfti bara að jafna sig smá og svo fór hann óhræddur á bak aftur. Ferðin endaði svo á Hróa Hetti þar sem þeir fengu sér að borða.

Davíð sótti Guðjón Örn barnapíuna okkar á sjöunda tímanum. Síðan fórum við hjónakornin heim til "föðursystur minnar" þar sem okkur og tvíburahálfsystur minni og hennar fjölskyldu var boðið í mat. Við áttum saman frábæra kvöldstund yfir þriggja rétta máltíð og góðu spjalli á meðan og á eftir. Það var boðið upp á rautt og hvítt með matnum og var ég sú eina sem var í þessu hvíta. Ég var skemmtilega létt á mér þegar við kvöddum um miðnætti.

Rétt áðan var ég að senda Odd af stað á fótboltaæfingu. Davíð Steinn á svo að vera mættur upp í kirkju um hálftíu en drengjakórinn á að syngja við messu klukkan ellefu. Það er best að fara að finna til sparifötin á drenginn.

- Músin og ljónið -

Davíð Steinn spurði mig um sjö í m0rgun hvort ég kæmi ekki í skólann til að sjá sig og Friðrik bekkjarbróðir hans leika "Ljónið og músin. Sem betur fer gat ég fengið leyfi með svona stuttum fyrirvara. Við fórum því öll fjögur saman í skólann rétt fyrir hálfníu. Ég fór inn í stofu með Davíð Steini og hjálpaði honum í músarbúninginn. Kennarinn hans var mjög fegin að sjá okkur og sagði að strákurinn stæði sig virkilega vel, hún væri viss um að hann væri efni í leikara. Þegar ég var svo að hjálpa strákunum kom annar kennari að og hún sagði næstum því það sama svo ég var orðin mjög spennt að sjá leikritið. Þegar drengirnir voru tilbúnir fórum við fram og gáfum kennaranum bendingu. Allir bekkir byrja fyrsta tímann á föstudögum frammi í sal og syngja saman og stundum sýna þau líka leikrit. Það var alveg rétt hjá kennaranum leikritið heppnaðist mjög vel og mér fannst báðir strákarnir standa sig með sóma. Við Davíð dokuðum svo við eftir leikritið og hlustuðum að barnahópinn syngja nokkur lög af ýmsum toga.
Það var ein að springa úr stolti þegar hún mætti til vinnu rétt rúmlega klukkutíma of "seint".

- Haustið er búið -

Loksins er ég búin að sauma allar árstíðamyndirnar mínar. Nú er bara eftir að ramma þær inn og koma þeim upp á vegg. Tók síðustu sporin í haustmyndina í gær. Á núna bara eftir að setja inn skammstafina mína og ártalið. Er einhver sem getur bent mér á sniðugan innrömmunarstað? Hinar myndirnar, sumarið, veturinn og vorið kláraði ég 2002 og 2003. Núna þarf ég bara að finna mér nýtt saumverkefni. Þótt ég hafi verið nokkuð lengi að klára þetta síðasta verkefni veit ég að ég verð ekki lengi svona handavinnu-verkefnalaus. Það er svo róandi að telja út og sitja með saumana sína.

- Leigubílafílingur -

Í gær fékk ég smá innsýn í það hvernig dagarnir eru hjá mömmu. Bíllinn hennar var rafmagnslaus. Davíð tók reyndar að sér að skutla tvíburunum og Víði "öðrum tvíburanum hennar mömmu" á knattspyrnuæfingu, svo strákarnir yrðu ekki seinir. Síðan tók ég við bílnum og skutlaði manninum aftur í vinnuna. Á heimleiðinni hringdi mamma og þegar ég sá mér fært að hringja aftur í hana bað hún mig um að sækja Kolfinnu í fimleikana. Fór heim með töskur strákana og þá var kominn tími til að millifæra Odd Smára úr boltanum yfir í karate. Kvaddi drenginn fyrir utan Þórshamar og fór beint að fimleikahúsi Ármanns. Davíð Steinn ætlaði heim með bekkjarbróður sínum að æfa sig fyrir leikrit sem þeir eiga að sýna í skólanum á föstudagsmorguninn. En ég varð auðvitað að sækja Víði, hann og tvíburabróðir hans voru á leið á skátafund stuttu seinna en ég þurfti ekki að skutla þeim.

Fór strax að huga að matnum er heim kom heim. Það var samt stutt stopp heima áður en kominn var tími til að sækja Odd af æfingu og Davíð í vinnuna. Davíð Steinn hringdi um sjö og spurði hvort hann mætti borða hjá skólabróður sínum. Hann kom svo heim rétt fyrir átta.

En smá að öðru. Ég er að lesa Sá er úlfinn óttast eftir Karin Fossum. Þetta er spennandi sakamálasaga sem er mjög ljóðræn á köflum. Mér finnst gaman að henni og er engan veginn búin að leysa ráðgátuna...

- Drengjakórsmál og blóðbankinn -

Það var eitthvað sem dró mig að blóðbankanum seinni partinn í gær. Ég átti klukkutíma aflögu og ákvað að athuga hvort það væri nokkuð mikið að gera. Ég komst strax að. Að þessu sinni lét ég stinga í hægri handlegginn til að vita hvort það væri jafn erfitt og það var fyrir einhverjum árum síðan. Þetta gekk bara mjög vel og það passaði fínt eftir gjöfin og smá kaffisopa að tölta upp í Hallgrímskirkju á foreldrafund drengjakórsins.

Fundurinn var ekki nógu vel sóttur, kannski vegna tímans, en það kom einn faðir rétt eftir að fundi var slitið um hálfsjö og sagðist alltaf vera á stjórnarfundi á þessum tíma. N.k. laugardag eiga þrír söluhæstu drengirnir að fara í óvissuferð og á sunnudaginn syngur kórinn við messu. Framundan eru líka æfingabúðir í byrjun mars og svo var verið að tala um og segja frá því sem er framundan alveg fram að jólum.

Mamma vissi ekki að ég var ekki á bíl og þegar kóræfingin hjá strákunum var búin hurfu hún og Bjössi áður en ég náði að biðja um far fyrir okkur Davíð Stein. En ég var með símann og hringdi bara heim í Davíð.

Strákarnir báðu aðra parnapíuna um að lesa fyrir sig sl. laugardagskvöld og ég ákvað að koma lestrarsiðnum aftur í fastar skorður. Bað Davíð um að lesa fyrir strákana á sunnudagskvöldið og þeir báðu pabba sinn aftur í gær. Og getið þið nú hvaða bók er verið að lesa. Harrý Potter, bókin sem ég ætlaði að skila í síðustu safnferð...

- Eftir helgina -

Hvernig fer tíminn að því að æða svona hratt frá manni? Eftir daginn í dag þessi mánuður hálfnaður og þá verða búnir 45 dagar af árinu. Sko, það verða komin jól aftur áður en maður veit af.

Í hádeginu sl. föstudag fór Davíð aftur með strákana til tanna. Verið var að loka nýjustu jöxlunum og flúorbursta drengina. Það gekk allt saman mjög vel. Síðan fóru strákarnir til Helgu systur og Davíð kom með bílinn til mín. Er ég sótti strákana dokaði ég við um stund svo Helga gæti skroppið í búðina. Bríet æfði lungun og raddböndin svolítið vel á meðan.

Klukkan var orðin fimm er við kvöddum. Fór með Odd í karatetíma. Davíð Steinn vildi ekki koma inn og horfa svo við skruppum í fiskbúðina og svo heim. Var búin að finna til matinn áður en ég sótti feðgana, af æfingu og úr vinnu.

Um kvöldið fór ég til vinkonu minnar á New-Skin kynningu. Mjög áhugaverð kynning. Pantaði mér nú engar snyrtivörur en ákvað að prófa Life-Pak vitamínið.

Davíð er loksins að verða sæmilega góður í öxlinni og hann tók að sér að versla á laugardaginn. Ég var öll í boltanum en það fór þó einhver tími í tiltekt. Á áttunda tímanum sótti Davíð barnapíuna okkar, yfir lækinn. Stráksi kom með systur sína með sér (hún var reyndar barnapían okkar áður og tók þá stundum bróður sinn með sér). Síðan fórum við hjónin yfir til vinafólks okkar sem var búið að bjóða okkur í tölvudinner. Davíð er búinn að vera að hjálpa vini sínum að kaupa sér tölvu sl. 12-18 mánuði og það er loksins komin niðurstaða og talvan komin í hús.

Í gær söng ég í messu. Til stóð að það kæmi kristniboði í stólinn en sá sem átti að koma hafði misskilið dagsetninguna og var kominn norður í land. Séra Pétur sagðist aldrei hafa fengið jafn stuttan tíma til að undirbúa sig (frétti þetta með kristniboðann tvær mínútur fyrir messu). Engu að síður sagðist hann amk hafa eitt mál til að tala yfir hausamótunum á okkur og fórst honum það bara vel úr hendi, svona blaðlaus og óundirbúinn.

- Afmæli -

Í dag ætla ég að hugsa til Helgu frænku minnar, hún er árinu eldri.

Strákarnir voru mjög ánægðir með öskudaginn. Það komu tilmæli frá skólanum að vopn væru óæskileg svo Oddur Smári tók þá ákvörðun að skilja sverðið og skjöldinn eftir heima. Skynsamur piltur! Davíð Steinn gerði það gott í keilunni með kórfélögum sínum og skemmti sér mjög vel.

- Öskudagur -

Strákarnir eru búnir að bíða spenntir eftir þessum degi og loksins er hann runninn upp. Þegar þessi orð eru skrifuð er fjörið byrjað í skólanum. Davíð Steinn er klæddur í Harrý Potter-búning, Oddur Smári er kóngur og maðurinn minn er draugur. Þar sem Davíð er í foreldraráði er hann einn af þeim sem sér um skemmtunina. Hann ætlar að vera í fríi eftir hádegi þannig að þeir feðgar verða komnir heim um hálfþrjú.

Drengjakórinn ætlar að hittast í keiluhöllinni í Öskjuhlíð á æfingatímanum í dag, taka eina eða tvær umferðir í keilu og fá sér pizzu og gos á eftir. Davíð Steinn fær að fara í búningnum sínum og ég á von á því að fleiri strákar geri það líka.

Núna er ég byrjuð að lesa Í leiftri daganna eftir Agnar Þórðarson. Þetta er framhald af endurminningum hans. Eitt af því besta við þessar bækur eru allar þær bækur sem hann segir frá og hefur lesið. Maðurinn segir líka mjög skemmtilega frá bæði frá því sem hann lendir sjálfur í og það sem hann hefur eftir öðrum.

- Eftir helgina -

Mig rak í rogastans í hádeginu sl. föstudag. Davíð hafði séð um að fara með strákana til tannlæknis og var búinn að koma þeim svo til Helgu systur. Þarna var hann að eftirláta mér bílinn því það var fyrsti föstudagur í mánuði og því eitthvað um að vera eftir vinnu á skrifstofunni. Hann sat þarna undir stýri íklæddur jakkafötunum sínum. -"Vá, en fínn! Hvað er í gangi?" spurði ég. -"Það er fyrsti föstudagur í mánuði og þemað er glæpaforingjar. Í dag er ég don Davíð" sagði maðurinn minn hásri, ógnandi röddu.

Ég sótti strákana upp úr fjögur og gaf mér tíma fyrir einn tebolla. Oddur átti karatetíma rétt fyrir hálfsex. Það var ekki viðlit að fá Davíð Stein til að koma með, hvorki í Þórshamar né á bókasafnið. Ég ákvað samt að fara á bókasafnið (ætlaði m.a. loksins að skila Harrý Potter og Fönixreglunni). Davíð Steinn fékk leyfi til að vera heima og leika sér í tölvunni. Hleypti Oddi út fyrir framan karateheimilið og dreif mig á safnið. Þar kom í ljós að Harrý Potter var ekki með í skilabókabunkanum. Korter í sex var ég búin að safna að mér tveimur pokum af bókum, framlengja þeim bókum sem voru heima og komin út í bíl. Hringdi heim og spurði litla tölvukarlinn hvort það væri ekki í lagi að ég færi og horfði á restina af karateæfingunni. Það var auðsótt mál. Raunar fannst honum við hafa verið frekar stutt í burtu þegar við komum heim eftir næstum tveggja tíma fjarveru.

Á laugardaginn hafði ég orð á því við strákana að það væri frekar erfitt að ryksuga eða skúra hjá þeim gólfið þegar það sæist varla í það fyrir dóti. Það var Davíð Steinn sem ýtti svo í bróður sinn og spurði hvort hann vildi ekki hjálpa sér að taka saman dótið. Þeir byrjuðu strax og luku verkinu í gær, ryksuguðu meira að segja alveg sjálfir. Sjálf komst í nokkra tilekt og þrif þrátt fyrir að horfa á bæði handbolta og fótboltaleiki báða helgidagana.

Davíð fór með strákunum í búningaleit á laugardaginn. Það tók smá tíma en feðgarnir komu allir glaðir heim úr þeim útréttingum. Segi betur frá því á öskudaginn.

Þessa dagana er ég að lesa Höfundur Íslands eftir Hallgrím Helgason og Í vagni tímans fyrri minningabók Agnars Þórðarsonar. Svo bíða á náttborðinu margar spennandi bækur sem ég hlakka til að lesa.

orðaréttin

mig dreymdi
að ég mætti fullt af orðum
þau voru þarna í flokkum

ég ákvað
að reka þau í almenninginn
og flokka þau

þetta voru alls konar orð
af öllum stærðum
og gerðum

það mátti skipta þeim niður
á marga staði
fyrir orð sem aldrei á að nota
fyrir orð sem bara skal hugsa
fyrir orð til að halda upp á

sum orð þyrfti að
flétta upp í orðabók
önnur ættu helst
að vera þurrkuð út
að eilífu

þetta var stórt
og viðamikið
verkefni

og þá
vaknaði ég