- Af systurdóttur minni -

Þegar ég kom að sækja Huldu í gær var hún að koma niður í fataklefa til að fara út. Ein starfsstúlkan var í bleikri peysu og Hulda settist við hlið hennar og fór að dást að peysunni. Við fórum að spjalla um ást barnsins á bleiku og þá sagði önnur frá því að það hefði verið svona græn súpa (grænmetis eða bauna...) í hádeginu og Hulda hafði sagt: "- Get ég fengið bleika súpu?"

Helga systir skutlaði strákunum í boltann um fimm og við frænkurnar borðuðum rauðsprettu saman um hálfsex. Eftir matinn bauð ég systir minni upp á kaffi og suðusúkkulaði-bita með. Hulda vildi endilega fá að sjá upp í munninn á mömmu sinni og sagði svo: "- Ertu með skít á tungunni?"
Feðgarnir borðuðu svo saman um hálfsjö.

- Sitt af hverju tagi -

Upp úr klukkan átta í gærkvöldi var ég komin upp í Mosfellsbæ þar sem ég rændi Sonju vinkonu með mér á Friendtex fataúsölu. Við gerðum góð kaup, sérstaklega hún, og vorum svo komnar heim til hennar aftur um hálftíu. Stoppaði hjá henni til ellefu og héldum við tveggja manna óformlega saumaklúbb.

Í morgun bjó ég til graut úr byggmjöli og hirsi með kókoshnetumjólkurdufti og kanelstöng. Þetta var aðallega handa strákunum en ég fékk smá í skál líka. Þessi grautur stendur vel og lengi með manni. Ég fékk ekki svo stóran skammt en ég bý enn að honum núna þremur tímum seinna.

- Í minningu móðurömmu minnar -

Þennan dag fyrir 83 árum fæddist móðuramma mín, Anna Jónsdóttir. Fyrir nákvæmlega þremur árum var hún á Spáni að halda upp á 80 árin, hálfnuð með tveggja vikna ferð. Þegar hún kom heim var hún í skýjunum yfir því að alla seinni vikuna höfðu ferðafélagarnir verið að halda upp á afmælið hennar. Við sem tókum á mótin henni heima vissum að hún var orðin veik, veikari en hún gerði sér grein fyrir því hálfum mánuði eftir heimkomuna var hún öll. Hún var reyndar alveg sátt við öll sín áttatíu ár og kvaðst alveg vera tilbúin að svara kallinu. Mér verður oft hugsað til hennar og sé hana fyrir mér að skoða þá staði sem hún hafði ekki komist á þótt reisurnar væru margar síðustu þrjá áratugi hennar. Ég leit mjög upp til hennar og var hún að mörgu leyti mín helsta fyrirmynd. Blessuð sé minning hennar!

- Laugardagur -
(...fyrst aðeins aftur-á-bak (eins og venjulega)...

Davíð komst að því um þrjú í gær að hann ætti að mæta á Selfoss um fjögur í 15 ára útskriftarafmæli úr FSu. Okkur fannst alltaf að þetta myndi vera í dag. Hann lét mig vita og fór svo austur á bílnum. Ég fékk far í Ísaksskóla um fjögur og þaðan löbbuðum við strákarnir heim. Eitthvað var um að vera á Miklatúni, hoppu-kastali, grill og fleira. Hittum Billa frænda en stoppuðum ekki lengi. Gaf strákunum hressingu og svo voru þeir úti þar til kominn var tími til að rölta út á Hlíðarenda á fótboltaæfingu. Um kvöldið horfðum við mæðginin á Stikkilsberja-Finn og lifðu þeir sig inn í myndina, sérstaklega Oddur.

Davíð kom heim um þrjú í nótt án þess að ég yrði þess vör, allt í einu var plássið í rúminu orðið minna. Hann hafði ákveðið að vera ekkert að drekka svo hann þyrfti ekki að skilja bílinn eftir. Upp úr hádeginu fórum við í verslunina Smáskó. Oddur var nánast kominn í gegnum strigaskóna sína svo eitthvað varð að gera í málinu. Hann er ákveðinn ungur maður og var fljótur að finna út hvernig skó hann vildi fá. Einnig keyptum við spariskó á þá báða og gerðum góð kaup.

VALUR - ÍBV 4:1

Já, við fjölskyldan drifum okkur á leikinn og sjáum alls ekki eftir því. Þetta var mjög skemmtilegur leikur sem frábært var að fylgjast með. Eyjamenn virðast ekki vera komnir almennilega í gang en þeir áttu sína spretti. Valsmenn áttu leikinn. Þeir komust yfir á 33 mínútu er þeir fengu vítaspyrnu. Rétt seinna varði markvörður Vals, Ólafur, vítaspyrnu sem ÍBV fékk. Staðan í hálfleik var eitt-núll. Á sjöttu mínútu síðari hálfleiks komst Valur í 2:0 en aðeins mínútu seinna minnkuðu Eyjamenn muninn. Það er nokkuð ljóst að við eigum eftir að gera þetta aftur í sumar. Til að halda upp á sigurinn fórum við í Perluna, strákarnir og ég fengum ís og Davíð var eingöngu í kaffinu. Áfram Valur!!!

...og svo er það áfram Birgitta í kvöld, er það ekki (spá henni ekki neðar en í 10. sæti). Ég er á leið í Eurovision-partý og segi líklega meira frá því eftir helgi...

- Föstudagur -

Þegar við Hulda röltum af stað heim til hennar úr leikskólanum í gær heyrðum við ámátlegt mjálm fyrir aftan okkur. Við snérum okkur við og til okkar kom hvítur og svart flekkóttur, stálpaður kettlingur.
Eins og hann var fallegur var hann alveg grútskítugur, það var varla að maður gætir hugsað sér að gæla við hann. En hann virtist kelinn og elti okkur smá spöl og flæktist fyrir fótum okkar.

Helga systir var aftur með veislumat. Að þessu sinni grillaðar kjúklingabringur og leggi. Mamma var einnig snemma á ferðinni sem og Davíð svo við borðuðum öll á sama tíma. Við fjölskyldan vorum komin heim fyrir sjö. Strákarnir luku við að læra og háttuðu sig. Rétt fyrir átta sagðist Oddur vera að fara að sofa en vildi fyrst fá kvöldhressingu. Strákarnir voru sofnaðir vel fyrir hálfníu.

- Fimmtudagur -

Við frænkurnar, Hulda og ég, fórum saman í fiskbúðina á leiðinni heim til mín í gær. Þar keyptum við "dásamlega bleikan fisk (lax). Þegar ég kom heim setti ég upp bygggrjón og tók svo af sængunum og fór með þær út í viðrun. Að venju notaði ég örbylgjuofninn til að elda fiskinn. Hulda var með smá kúnstir áður en hún fékkst til að smakka matinn en um leið og hún var komin á bragðið hvarf allt af disknum ofan í hana. Strákarnir voru í boltanum en Davíð kom með þá heim rétt fyrir sex, stuttu áður en mæðgurnar kvöddu og fóru. Eftir að hafa borðað drifu strákarnir sig í að læra (lesa, skrifa og vinna í vinnubók). Það er svolítið kapp í þeim. Davíð Steinn var byrjaður á vinnubókinni á undan og Oddur hafði hug á því að reyna að ná honum.... ....ég ætlaði varla að fá þá til að hætta að vinna. Oddur vann einar þrjár til fjórar síður en Davíð Steinn örugglega fimm eða sex...

You're Elizabeth Bennett of Pride and Prejudice by
Jane Austen!


Which Classic Female Literary Character Are you?
brought to you by Quizilla

- Ég er ekki svo viss um að ég finni mig í þessari persónu....

- Miðvikudagur -

Helga systir var með matinn í gær, grillaða helgarsteik. Strákarnir voru úti til fimm en komu svo inn lásu, reiknuðu og gerðu verkefni þar til maturinn var til. Mamma kom "heim" í fyrra fallinu og borðaði með okkur. Það er orðið frekar langt síðan maður hefur hitt á hana. Að vísu var hún fyrir austan þegar við Anna frænka skruppum þann 10. maí sl. og svo var hún í afmælinu hans Daða á sunnudaginn var. Hún var þá með Huldu með sér. (Sú stutta var að eigin sögn í dásamlega bleikum kjól)

Davíð kom ekki fyrr en á sjöunda tímanum og strákarnir horfðu á barnaefnið áður en við fórum heim. Þeir luku við að læra, háttuðu sig, fengu hressingu, tönnuðu sig og máttu svo leika sér nokkra stund áður en kominn var tími til að fara í rúmið. Leyfi þeim nú orðið að vaka til hálfníu á virkum dögum í stað átta (svo fá þeir að vaka lengur á föstudögum og laugardögum). Ég setti tvisvar sinnum í þvottavélina og sópaði eldhúsgólfið, meira varð ekki úr húsverkunum að þessu sinni.

Davíð fór á fætur fyrir allar aldir í morgun og þegar ég kom úr sturtu um sjö var hann búinn að hella upp á og var að steikja egg og beikon handa okkur báðum. Við þurftum að vekja strákana hálfátta og ég freistaðist til að þyggja það að fá skutl í stað þess að labba.

- Þriðjudagur -

Þegar ég sótti Huldu í gær tók ég eftir því að hún var á stígvélunum úti. Ég fór í hólfið hennar og athugaði hvort ég sæi skóna og jafnvel blaut föt í poka. Skórnir lágu á gólfinu en ég fann ekkert nema útiföt í hólfinu. Kallaði þá á frænku mína til að skipta um skófatnað. Hún neitaði hins vegar að fara í þá, sagði að þeir væru blautir svo ég dreif hana með mér að sækja kerruna hennar heim til hennar og rölti með hana heim til mín. Það fyrsta sem mamma hennar sagði er hún sá barnið: "Hulda, pissaðir þú í þig í leikskólanum?" Hvar voru þá blautu fötin hennar, í næsta hólfi eða hvað...???

"Strætó" Sonja sótti mig heim við aðra konu um hálfníu í gærkvöldi. Við þrjár hittum svo þá fjórðu á Kaffi París. Þar sátum við í góðu yfirlæti fram eftir kvöldi og áður en við vissum af var klukkan langt gengin í tólf. Notalegt, skemmtilegt og fjörugt kvöld.

Er ég kom svo heim freistaðist ég til að horfa á upptöku af loka þættinum af "Survivor Amazon" svo ég fór ekki í rúmið fyrr en klukkan var farin að halla í tvö. Það kemur á óvart að ég skuli ekki vera myglaðri en ég er....

- Mánudagur -

Helgin leið á met-hraða. Seinni partinn á föstudaginn fór ég með strákana á fótboltaæfingu. Skyldi þá bara eftir því ég varð að nota tímann til að sækja barnapíurnar mínar (tvo 12 ára stráka sem eiga heima í Hafnarfirði (ég fer sko yfir lækinn...)) og pizzu handa öllum strákunum að borða. Sótti strákana og sá síðustu mínúturnar af æfingunni. Er ég kom heim skipti ég um föt og svo vorum við Davíð "farin" á Old West þar sem kórfélagar mínir ætluðu að hittast. Í ljós kom að ég var sú eina sem bauð maka með og samt vorum við bara sjö með honum. Engin kom úr sópran eða tenór og það vantaði í hinar raddirnar. Kórstjórinn lét sig ekki vanta og þegar allir voru komnir ákváðum við að fara frekar á Ruby Tuesday og borða þar. Þar fengum við fljótlega borð og sátum við til hálftólf. Þá kvöddum við Davíð því ég var búin að lofa mér annað snemma morguninn eftir. Davíð keyrði barnapíurnar heim og fór svo að vinna fram eftir nóttu.

Ég fór á fætur á laugardeginum eins og það væri virkur dagur. Ég var búin að bjóða mig fram í sjálboðaliðaferð út á land og fór ég þetta með góðum hópi af frábæru fólki. En þetta rakst saman við vorhátíð Ísaksskóla. Ég var bara búin að skrá mig í þetta áður en ég vissi að slík hátíð stæði til. Þegar ég kom heim á laugardagskvöldið átti ég einn Harry Potter. Hinn sonur minn hafði verið málaður sem hvolpur en hann var búinn að þvo sér. Helga systir var hjá strákunum því Davíð var farin í grillpartý.

Upp úr klukkan tíu í gær-morgun fékk ég Helgu til að skjóta mér upp í Grafarvog og ná í bílinn. Horfði svo á spennandi formúlu áður en við fórum í afmæli til eins frænda míns sem varð 12 ára daginn sem forsetinn varð sextugur.

Semsagt mjög annasöm en skemmtileg helgi.

-Föstudagur -

Vikan flogin, mánuðurinn hálfnaður og fullt að gera í félagslífinu. Maður hefur a.m.k. engan tíma til að láta sér leiðast, veit varla hvað það er lengur. Ég varð samferða feðgunum í skólann í morgun og hjálpaði krökkunum í 6-d að klæða sig í búninga. Einn leikarinn mætti ekki á svæðið og önnur tók að sér að leika músina í kvæðinum um litlu Gunnu og litla Jón. Oddur Smári lék litla Jón og það er óhætt að segja að hann gæti átt leikara-framtíð fyrir sér. Davíð Steinn lék hænu og var þar að auki forsöngvari. Ég var að springa úr monti er kennarinn hrósaði drengjunum, sagði að hún vissi ekki hvernig þetta hefði farið ef Davíð Steinn væri ekki svona lagviss og leiddi sönginn svona vel og hvað Oddur væri frábær í gerfinu. Ég er a.m.k. mjög ánægð með að hafa fengið tækifæri til að sjá leikritið.

Í kvöld fer ég svo út að borða með Landsbanka-kórnum og býð Davíð með mér. Það kemur líklega ekki í ljós fyrr en með haustinu hvort kórinn er búinn að syngja sitt síðasta...

- Að tónleikum loknum -

Mikið skemmti ég mér vel í gærkvöldi, enda ekki hægt annað í svona góðum hópi. Systir mín var alveg hissa á mér að taka það að mér að hafa mat á svona degi í gær. Ég sagðist þurfa sjáf að fá mér eitthvað og biðja hana svo um að skutla mér út á Nes. Hafði líka frekar fljótlegan mat, fiskibollur, og þótt strákarnir væru að fara á bekkjarkvöld þar sem átti að koma með eitthvað með sér vildu þeir endilega fá sér eins og eina bollu. Eftir að gleypt í mig, pússaði ég skóna og skipti svo um föt. Feðgarnir kvöddu rétt fyrir hálfsex og við systur fórum rétt seinna.

Ég var komin lang fyrst í kirkjuna en það var bara ágætt. Fyrr en varði voru allir komnir og við hituðum upp og fórum í nokkur lög (sungum svona létt yfir lögin), byrjanir og annað. Svala mætti á svæðið upp úr hálfátta. Settist stund niður með henni en fljótlega voru kórfélagar beðnir um að fara niður í kjallara. Þar komum við okkur þægilega fyrir, mis-stressuð. Við gengum upp og inn í kirkju um átta, stilltum okkur upp og sungum fyrsta lagið áður en kórstjórinn tók til máls og bauð gesti velkomna. Það var slatti af fólki í kirkjunni. Tónleikarnir voru teknir upp og verða gefnir út á disk í örfáum eintökum. Í sumum lögunum var ég ekki alveg með á "nótunum" og ég veit að stundum horfðum við kórinn ekki nógu mikið á stjórnandann en tónleikagestir skemmtu sér mjög vel og hefðu helst viljað að við syngjum fleiri aukalög (sumir sögðu meira að segja að við hefðum sungið eins og englar). Við tókum ekkert hlé og með aukalaginu vorum við svona þrjú korter. Síðan buðum við gestum upp á kaffi og með því í hliðarsalnum. Þegar flestir voru farnir voru kórfélagar beðnir um að stilla sér upp og teknar voru nokkrar myndir. Svala var svo væn að bíða eftir mér og skutla mér heim á eftir. Var komin heim fyrir tíu!

- TÓNLEIKAR Í KVÖLD -

Þá er stóri dagurinn runninn upp. Klukkan átta í kvöld heldur Landsbankakórinn tónleika í Seltjarnarneskirkju og hefst dagskráin klukkan átta. Aðgangseyrir er enginn og boðið verður upp á kökur og kaffi eftir að söngskráin hefur verið tæmd.

En það er gott að eiga hjálpsama systur! Ég sótti Huldu í gær og fór með hana á Grettisgötuna. Helga kom með strákana stuttu seinna. Ég dreif í að hjálpa þeim við heimalesturinn og reikninginn en þegar klukkan var byrjuð að ganga sex lánaði systir mín mér bílinn sinn og ég fór á lokaæfingu fyrir tónleikana, sem var haldin úti á nesi. Helga sagði að ég mætti hafa bílinn til morguns.

Davíð var á fundi og sótti strákana í seinna lagi til Helgu en gaf sér samt tíma til að spila "hrað-lúdó" við þá áður en þeir fóru í háttinn.

Æfingin var búin á níunda tímanum. Ég kom við í búð á heimleiðinni og bakaði eina smáköku-sort til að hafa með mér, og bjóða upp á, með kaffinu eftir tónleikana í kvöld.

Í morgun skilaði ég svo bílnum (og bíllyklunum) vel fyrir átta. Það var enginn kominn á fætur hjá systur minni svo ég laumaði lyklunum inn fyrir og hvarf svo jafn hljóðlega út...

- Árekstrar -
(...en fyrst allt annað...)

Þegar við systurdóttir mín vorum búnar að sækja kerruna hennar í gær og vorum að leggja í hann í fiskbúðina á leiðinni heim, varð ég óljóst vör við að fugl var að drita alveg við okkur. Sá smá dellu á gangstéttinni og hugsaði að þarna hefðum við verið heppnar (seinna í blogginu kemur í ljós að svo var ekki...). Við frænkur fórum í fiskbúð Hafliða og keyptum bleikan fisk. Það fannst Huldu æði. Hún var með bleikt naglalakk og í bleikri úlpu, hún (eins og vel-flestar yngri stúlkur) elskar bleikt. Helga systir var búin að koma strákunum í að læra og ég snéri mér strax að eldamennskunni er ég kom heim. Setti upp kartöflur og grænmeti, kryddaði bleikjuna, steikti og stráði möndlum yfir í restina. Þetta smakkaðist allt mjög vel og höfðu krakkarnir góða lyst á þessu.

Fljótlega eftir að Davíð kom heim dreif ég mig á bókasafnið að skila bókum og ná mér í fleiri (er eitthvað svo "lesþyrst" þessa dagana) bæði handa mér og strákunum. Verslaði smávegis á heimleiðinni og endaði á því að skila videóspólu (mynd með Jean Claude Van-Damme) sem við Davíð tókum á sunnudagskvöldið. Þessi erindi tókum mig líklega um einn og hálfan tíma en ég náði því þó að fara inn með tvíburunum og lesa bænir með þeim og kyssa þá góða nótt. Náði svo að setja í tvær þvottavélar í gærkvöldi og var búin að hengja upp úr þeirri seinni áður en klukkan sló hálftólf.

Í morgun kom svo í ljós að fuglinn sem ég nefndi hér í upphafi hafði hitt á kápuermina mína, á henni var stærri della en ég sá á gangstéttinni.

Það er ýmislegt að rekast á hjá mér þessa dagana. Ég þyrfti helst að geta verið á tveimur stöðum annað kvöld og á laugardaginn. En svona er þetta. Líklega fæ ég systur mína í lið með mér með morgundaginn. Það er lokaæfing á "Litlu Gunnu og litla Jóni" hjá 6-d í Ísaksskóla. Það á að hafa þetta eins og þegar bekkjarskemmtunin var í janúar; mæta í skólann um hálfsex með eitthvað til að narta í og bjóða með sér, leikritið sýnt mjög fljótlega, borðað og svo spilað til hálfátta. Málið er að Landsbankakórinn er með tónleika í Seltjarnarneskirkju annað kvöld og ég er í kórnum (eins og áður hefur fram komið). Helga fæst kannski til að fara á bekkjarskemmtunina og taka hana upp fyrir mig. Þetta með áreksturinn á laugardaginn, ég segi kannski frá því seinna...

- Mánudagur -

Annasöm helgi er að baki og framundan er brjáluð vika. Þegar ég kom heim á föstudaginn byrjaði ég á því að skutla manninum á skrifstofuna. Um sex fór ég með strákana á fótboltaæfingu. Þar fengu þeir að vita hvenær þeir ættu að mæta á fótboltakeppnina um helgina. Það var næstum því orðinn misskilningur. Þjálfarinn hélt að allir leikir færu fram á sunnudeginum en það kom í ljós að yngri strákarnir áttu að mæta og keppa á laugardeginum.

Ég og strákarnir vorum semsagt mætt upp í Egilshöll í Grafarvogi klukkan níu á laugardagsmorguninn. Strákarnir spiluðu fimm leiki við fimm lið. Þeir töpuðu fjórum leikjum en gerðu jafntefli í einum. (Ég er eiginlega viss um að strákarnir í sumum liðunum eru fæddir 1995 en ekki 1996). Samt sá maður hvað "litlu guttunum (1996)" hefur farið mikið fram í vetur og þeir áttu flestir mjög góða takta í leikjunum. Þetta var bara gaman. Allir fengu að spila með og svo var þetta búið áður en maður vissi af, samt stóð þetta yfir til klukkan eitt (með mislöngum hléum). Eftir þetta drifum við okkur heim, fengum okkur hressingu og hringdum í Önnu frænku. Davíð var búinn að puða í garðinum allan morguninn við að bæta mold á beðin með íbúunum af efri hæðinni. Davíð Steinn ákvað að vera heima og "passa" pabba sinn en við nöfnurnar og Oddur brunuðum úr glaðasólskini í bæinn í krapa-úrhellis-rigningu á Hellu. Þannig að við stoppuðum aðeins hjá pabba og mömmu í tvo og hálfan tíma og vorum ekkert að eiga við það að skreppa aðeins út að ganga.

Þegar við komum í bæinn dreif ég mig í að kjósa. Davíð var á fullu að elda matinn er við komum heim og buðum við Önnu upp á pasta, sem er uppáhalds maturinn hennar, og hvítvín með. Davíð Steinn hafði farið að kjósa með pabba sínum fyrr um daginn. Báðir strákarnir þrýstu á okkur foreldrana um hvað við ættum að kjósa. Bekkurinn þeirrahafði haftkosningar í skólanum á föstudeginum og meirihlutinn kaus x-D.
Við Davíð áttum semsagt að gera eins:
x-D af því að strákarnir eru í 6-d
x-D af því að pabbi þeirra heitir Davíð Oddsson og
x-D af því að forsætisráðherrann er í Sjálfstæðisflokknum og heitir Davíð Oddsson.

Fúff, ég ætla nú ekki að segja hvert atkvæðið mitt fór, en strákarnir eru enn að spyrja mig...

Í gær fór feðgar saman í sund eftir hádegi. Ég var heima að þvo þvott og fylgjast með gull-leik Svía og Kanadamanna í íshokkí og svo Haukum og ÍR í handbolta. Eftir kvöldmat fór ég á auka kóræfingu en nú styttist í tónleika!!!

- Spekingurinn minn -

- "Mamma, ef þú værir ég vissir þú hvernig væri að vera ég!"
- "Já, það er alveg satt, Oddur minn."
- "Lífið er stundum leitt..."
- "Leiðist þér lífið?"
- "Já, stundum þegar enginn er að leika við mig."

Nokkru seinna yfir morgunverðarborðinu spurði Oddur mig hvaða dagur væri í dag.

- "Það er kominn föstudagur."
- "VÁ! Hvert fóru allir dagarnir?"

Strákarnir voru báðir vaknaðir fyrir sjö og Davíð Steinn var meira að segja búinn að klæða sig á undan mér. Við áttum því saman notalega stund yfir morgunmatnum. Pabbi þeirra kúrði áfram en ég setti upp egg rétt áður en ég þurfti að fara og varaði Davíð við því að þau yrðu tilbúinn fyrr en varði.

- Fimmtudagur -

Vikan á fullu skriði og kosningar ekki á morgun heldur hinn. Ég á alveg eftir að gera upp hug minn að þessu sinni en samkvæmt þessari könnun sem ég fann er ég var að "kíkja" á Loryu um daginn þá á ég að kjósa Frjálslynda flokkinn (yfir 60%) og ef mér líst ekkert á það þá komu Vinstri grænir í öðru sæti (rúmlega 42%). Framsóknarflokkurinn, Samfylkingin og Sjálfstæðisflokkurinn áttu ekki upp á pallborðið hjá mér, fengu hvert um sig 23%. Kunningi okkar Davíðs leit inn í gærkvöldi. Hann er leigubílsstjóri og skrapp til okkar milli túra. Það gaf mér ástæðu til að hella upp á gott "after dinner" kaffi. Davíð þurfti að svara símanum svo við leigubílstjórinn fórum að spjalla saman um pólitíkina. Við vorum að minnsta kosti sammála um það að Samfylkingin og Ingibjörg Sólrún fengju ekki okkar atkvæði. Það er á hreinu að hún laug í borgarstjórakosningunum er hún sagðist ætla að sitja sem borgarstjóri út kjörtímabilið, kæmist hún aftur að. Hún vissi það að ef hún gæfi ekki þessa sterku yfirlýsingu myndi R-listinn tapa. Ég er samt viss um það að hún ætlaði sér út í þennan slag allan tímann og fyrir vikið missti ég allt álit á henni. Sá sem Davíð var að tala við í símann heyrði samræður okkar leigubílstjórans og leist mjög vel á hvað við töluðum illa um Samfylkinguna og Ingibjörgu. Af þessu ræð ég að Ingibjörg muni ekki verða það tromp sem Samfylkingin ætlaði sér... En um ellefu var pípað á kunningjann og hann fór á túr!

Einn bekkjarfélagi strákanna minna átti afmæli í gær og bauð öllum strákunum. Þeir voru sóttir á þremur bílum strax eftir skóla og Davíð sótti svo strákana um sex. Þeir voru mjög ánægðir með þetta afmæli og ég vona að afmælisbarnið hafi verið það líka. Sennilega hafa tvíburarnir verið alveg uppgefnir í gærkvöldi því þeir voru ekki vaknaðir er ég fór í morgun, reyndar varla pabbi þeirra heldur...

- Formúlan á Spáni -

Ég er heppin að mágur minn er mikið út á sjó þessa dagana. Systir mín tók upp bæði tímatökuna og keppnina um síðustu helgi og lánaði mér spóluna á mánudaginn og ég skilaði henni í gær. Kosturinn við að horfa á þetta eftir á er að maður getur hraðspólað yfir auglýsingar og langdregið efni. Tímatökurnar í ár eru ekkert sérstaklega spennandi. Maður er þó oft að bíða eftir hvort ökumaðurinn í brautinni geri betur en þeir sem á undan eru komnir eða hvort hann fer útaf, eins og kom fyrir Raikkionen. Hann þurfti því að ræsa aftastur og afþví að ræsibúnaðurinn klikkaði hjá Pizzonia klessti Kimi á hann og komst ekki nema nokkra metra... Það hefði verið meira spennandi að sjá hvert Finninn hefði komist í keppninni, hann missti eiginlega stiga-forskotið sitt. Það verður gaman að fylgjast með Alonso í framtíðinni. Og þótt Schumacher hafi verið að dásama 2003 bílinn er ljóst að hann er ekki svo "góður" að hin liðin eigi enga möguleika...

Ég var að spjalla við vinkonu mína á msn núna áðan og...
Sonja Freydís says:
en til hamingju með silfuverðlaunin fyrir stuttmyndina þína sem þú fékkst í nótt - verst að ég náði ekki að sjá myndina áður en ég vaknaði.....Hana var greinilega að dreyma mig í nótt. Verst að hún vissi ekki um hvað myndin átti að hafa verið en ég stóð mig vel, ekki satt!

- Vikan komin á skrið -

Oddur var vaknaður um hálfsjö í morgun. Ég bauð honum í miðjuna og sagði honum svo að kúra áfram þegar ég dreif mig framúr í sturtu skömmu síðar. Hann kom nú samt inn á bað er ég var að þurrka mér, settist á klósettið og fylgdist með mér. Allt í einu sagði hann:
- "Mamma, konur eru ekki fitubollur ef þær eru með barn í maganum!" -
- "Já, en Oddur mamma er ekki með barn í maganum, svo hún er bolla!" -
- "Ég var að segja að þú ert ekki fitubolla með barn í maganum." -
- "Ég er ekki með barn í maganum. Það er heldur ekkert pláss fyrir lítið barn hjá okkur." -
- "Við getum kannski beðið afa um að smíða rúm handa því...." -
Sennilega hefur sá stutti átt við föðurafa sinn þótt báðir afarnir séu mjög laghentir við smíðar. Ég hélt áfram að benda honum á að þótt við hefðum rúm fyrir barn væri hvergi pláss fyrir rúmið. Þá mátaði hann mig með því að segja að við gætum bara flutt. Þessi sonur minn virðist eiga svar við öllu...

- Kóræfingabúðir í Selvík 2.-4. maí -

Við lögðum af stað úr bænum rúmlega hálfátta á föstudagskvöldið. Fórum Þrengslin því heiðin var lokuð vegan skelfilegs slyss. "Lentum" í Selvík upp úr klukkan hálfníu. Tveir kórmeðlimir voru þegar mættir á eigin bílum og sá þriðji kom stuttu síðar. Komum okkur fyrir á herbergjunum, fengum smá hressingu og svo var æfing frá hálftíu til ellefu.

Eftir æfingu slakaði fólk á inni í setustofu, sumir með bjór eða hvítvín en sumir voru í kaffinu. Við í skemmtinefndinni lögðum fram fyrri-parta um alla í kórnum (sem Baldur Pálsson sá um að semja) og óskuðum eftir botnum. Einnig lögðum við fram átta vísna-gátur og óskuðum eftir lausnum á þeim. "Botna-lausna"kassinn var látinn standa í setustofunni.

Ég lét símann vekja mig um átta, dreif mig á fætur og komst svo í þvílíkt stuð að botna fyrripartana og ráða gáturnar. Skilaði öllu í kassann rétt fyrir níu. Klukkan níu var morgunmatur og svo hófst æfing klukkan tíu. Tókum stutt kaffihlé um hálftólf og svo klukkutíma matarhlé um hálfeitt. Við æfðum meira og minna allan daginn með stuttum kaffipásum og svo hálftíma kaffihléi og vorum að alveg til klukkan að verða hálfsjö. Ég held að við megum vera þokkalega sátt það eru þrjár æfingar eftir fram að tónleikum sem verða í Seltjarnarneskirkju miðvikudagskvöldið 14. maí næst komandi.

Eftir æfingatörnina lögðum við í skemmtinefnd á borð. Undir servíetturnar settum við (á hvolf) stjörnuspá fyrir hvern afmælisdag kórmeðlima. Svo var upprúllaður málháttur við hvert sæti og einnig upprúllaður "hring-söng-texti". Höfðum smá stund til að hvíla okkur og skvera okkur upp. Ég hafði ekki hugsað út í að taka með mér spariföt en ákvað að setja það ekki fyrir mig. "Strákarnir" komu í matinn í jakkafötum, bassarnir með bindi en ekki hinir. "Stelpurnar" voru sumar í stórglæsilegum kjólum og fyrir vikið var líkt og við værum í veislu. Þetta var veisla! Sest var að borðum klukkan átta. Þegar allir voru búnir að fá sér af dýrindis-pottréttinum (sem sendur var með okkur frá Kidda-kokki (e-r sem hefur hingað til komið með í þessar ferðir en sá sér ekki fært að koma núna)), sló ég í glasið og stóð upp. Bað fólk um að taka fram miðana og sagði að allir ættu að lesa upp, svo ætti að reyna að finna út hver gæti átt viðkomandi afmælis-spá. Samt varaði ég fólk við að það væri alls ekki víst að stjörnuspáin passaði, þetta væri bara til gamans gert. Eftir að lestur var hafinn breyttum við fljótlega um taktík. Textinn var lesinn, óskað eftir tillögum en ekki gefinn langur tími heldur kvað ég upp úr hvaða afmælisdagur þetta var og hver ætti hann. Svo var textinn lesinn aftur. Úr þessu varð hin mesta skemmtun. Aðeins ein lenti í því að lesa um sjálfa sig. Næst voru málshættirnir lesnir og um það leyti vorum við búin að borða svo hring-textinn var tekinn fram og sunginn hring eftir hring....og sögðum: TAKK FYRIR MATINN!

Allir hjálpuðust að við að taka af borðinu og svo færðum við okkur inn í setustofu. Allir þeir sem skiluðu inn botnum voru beðnir um að lesa sínar tillögur og ætla ég að láta mínar tillögur fylgja hér:

Björn er okkar besta vörn
gegn brennivíni og sukki.
Nú í búðum tökum törn
taktfst, hreint með bukki.

Hulda er mesta happafljóð
og heimsins mesta skvísa.
Hana vildum setja í sjóð
söfnun dúkku-lísa.

Alla hefur allt ég tel
altinn þó ei syngur,
Stundum hana líka vel
að telja mína fingur.

Anna Sigga eins og sól
í sumarblíðu ljómar.
Brosir blítt ef fær hún hól
betur þá hún hljómar.

Dísella er dásamleg
dísæt eins og sykur.
Dísella er yndisleg
og ekki vatna-nykur.

Baldur er í bassarödd
með bumbu í sínu fangi.
Værum öll í vanda stödd
vildi hann lifa á þangi.

Í bassanum hann Bjarni sat
en breyttist svo í gelding,
Finnbjörn reyndi allt hvað gat
en hvarf svo eins og elding.

Bryndís fór í berjamó
og baslaði við að tína.
Syngur hæ og segir hó
situr við hlið mína.

Hilmar á hinn hreina tón,
háan mjög og bjartan.
Ólöf og hann eru hjón
hanga þau á hjartan-
u

Hlíf er ung og Hlíf er rjóð
Hlíf er svoldið dreymin.
Hlíf er sæt og Hlíf er góð,
Hlíf er ekki gleymin!

Jóhanna er jákvæð mær
Jóhanna er kroppur.
Andlit sitt hún aðeins þvær
og undir rúmi koppur.

Kristinn marga kjóla á,
og klæðist þeim í leynum.
Líkjast honum líka má
líklega við reynum.

Ólöf er sko yndið mitt
einstök vændiskona.
Ágætt bara heldur en hitt
Hún er bara svona.

Sigurbjörg er sæt og fín
syngur eins og díva.
Vildi hún kæmi heim til mín
húsið mitt að þrífa.

Sveinn er bæði sýnist mér
svipfagur og ljúfur.
Er hann eitthvað skyldur þér,
einmitt líkt og stúfur?

Villa mín er vænsta sprund
vildi ég hana kyssa.
Röltum út um græna grund,
grasið bítur hryssa.

Þeir sprækustu voru að til klukkan fimm. Mig minnir að ég hafi farið í háttinn rétt fyrir þrjú. Lét símann vekja mig um tíu í gær, fór í sturtu, bjó um og tók ruslið og sængurfötin með mér fram. Hafði enga lyst á að fá mér eitthvað. Rútan fór frá Selvík um hálftólf og ég var komin heim til mín fyrir eitt. Gerði heiðarlega tilraun til að fylgjast með Formúlunni en gafst upp og svaf meira og minna í allan gærdag!!! Samt gekk mér vel að sofna í gærkvöldi...

- Og þá er kominn maí! -

Á miðvikudagskvöldið þurftum við hjónin bæði á fund á sama tíma. Kolfinna, ein af systkynunum sem mamma tekur á móti úr skóla, hafði verið í heimsókn hjá Helgu systur til að leika við Huldu og fá smá kjúkling. Við vorum að skutla henni heim þegar Davíð fékk þá hugmynd að "ræna" henni. Mamma gaf leyfi á það svo Kolfinna passaði fyrir okkur í tæpan klukkutíma eða þar til Davíð kom af sínum fundi. Þegar ég var búin á fundinum sem ég var á "rændi" Helga mér með sér í púl. Vorum frá tíu til miðnættis og skemmtum okkur mjög vel. Ég fékk mér hvítvínsglas og á meðan það virkaði gekk mér vel að skjóta niður kúlurnar...

Í gær fór ég á fætur með strákunum og notaði morguninn í að undirbúa mig undir helgina, segi frá því öllu síðar. Eftir hádegi fórum við fjölskyldan í heimsókn til annars bróður hans Davíðs og kærustunnar hans en þau búa frekar stutt frá okkur. Strákarnir komust í tölvu og skemmtilega tölvuleiki þar og það var ekki hægt að fá þá til að koma með sér er við ætluðum að fara. Fengum að skilja þá eftir á meðan við sóttum fisk (sem ég pantaði í gegnum vinnufélaga). Þar með fengu drengirnir klukkutíma lengur í tölvunni.

Annars var hugurinn hjá föðurbróður mínum í gær því 1. maí í fyrra dó yngsti sonur hans, Oddur (var fæddur 1960) úr krabbameini. Það er örugglega mjög sárt að missa barn úr veikindum eða af slysförum. Ég get rétt ímyndað mér það...

- Miðviku/föstudagur -

Af átján virkum dögum í þessum apríl mánuði eru sex af heim eiginlegir og hálfgerðir föstudagar. T.d. í dag, af því að það er frí á morgun þá finnst manni að það sé föstudagur. Svo segir maður örugglega á föstudaginn: "Um helgina!" þegar maður er að tala um frídaginn...

Eldavélin og þvottavélin eru farnar að virka aftur. Öryggið er komið á sinn stað. Helga systir býður samt í mat í dag!

- Þriðjudagur -

Þar sem ég bý er mjög gamalt kerfi. Gamaldags rafmagnstafla. Upphaflega var gert ráð fyrir að í húsinu væru tvær íbúðir en kjallarinn sameiginlegur (þvottahús og geymslur). Stór hluti af kjallaranum var samt einhvern tímann seldur þriðja aðila sem standsetti íbúð þar og leigir hana svo út. Rafmagnstaflan er að sjálfsögðu í kjallaranum akkúrat í þeim hluta þar sem íbúðin er. Þegar ég kom heim til mín, með Huldu með mér, byrjaði ég á því að setja í þvottavél. Því næst setti ég upp kartöflur og gerði grænmetispottinn tilbúinn. Þá datt mér í hug að það væri sniðugt að búa til kaffi og setti upp hraðsuðukönnuna. Tók fram pönnu, setti smá olíu og svo svínagúllas, kryddaði og kveikti undir. Lækkaði undir kartöflupottinum. Rétt seinna datt suðan niður, hraðsuðukannan virtist ekki ætla að fara af stað og ekkert hitnaði undir pönnunni. Ég áttaði mig fljótlega á að það hlyti að hafa sprungið öryggi.

Leigjendurnir í kjallaranum voru ekki komnir heim, millihurðin inn í þvottahúsið læst og lykillinn í skránni að innan. Ég fór upp og spurði hvort þau hefðu lykil að kjallaranum. Veit að þau eru með geymslu í ganginum. Þau eru bara með lykil að útidyrahurðinni en ekki hurðinni inn í íbúðina. Þau buðu mér að nota eldavélina hjá þeim og fékk ég að gufusjóða grænmetið uppi. Ákvað að sleppa því að steikja lauk, sveppi og papriku og elda gúllasið bara í örbylgjuofninum. Kartöflurnar voru næstum soðnar, ég skrældi þær og setti þær á fullan hita í örbylgjuofninn í um tvær mínútur (eftir að kjötið var tilbúið). Svo þetta slapp til. Kjötið var að vísu aðeins seigara en ef ég hefði steikt það á pönnu en það sögðu allir namm, namm við matnum og fengu sér tvisvar á diskana. Eftir matinn ætlaði ég að hengja upp úr þvottavélinni. Hún var þá stopp líka svo ljóst var að farið hafði öryggi fyrir eldavél og þvottahús.

Þegar íbúarnir í kjallaranum voru komnir heim bankaði ég upp á hjá þeim þvottahúsmegin. Öryggið var svo sprungið og ónýtt að hitinn frá því hafði eyðilagt skrúftappann eða hylkið utan um öryggið. Þar fyrir utan átti ég ekki 25W öryggi í staðinn fyrir það ónýta. Úlala... Maðurinn uppi ætlar að redda þessu í dag. Sem betur fer er matur hjá Helgu systur og strákarnir sluppu við að fá hafragraut í morgunmat!

Ég hringdi í Önnu frænku í gærkvöldi. Hún var til í að skreppa yfir, aðeins að dreifa huganum fyrir próf sem hún átti að mæta í í morgun, næst síðasta prófið. Það var gaman að fá hana eins og endranær, eiginlega orðið of langt síðan síðast og hún flýgur til Noregs þann 19. maí svo það þarf að nýta næstu vikur mjög vel. Hún verður þó líka hér á landi næsta vetur...

- Mánudagur -

Og helgin er flogin. Hún var nýtt alveg ágætlega í þrif og tiltekt. Strákarnir fóru í afmæli til bekkjarfélaga síns eftir hádegi á laugardag. Davíð fór í sorpu og tæmdi úr skottinu það sem hefur verið að safnast fyrir þar og dreif sig svo í að láta umfelga hjá sér. Hann hafði á orði að hann hefði nú eiginlega ekkert þurft að vera með vetrardekkin undir í vetur, kannski í þrjá til fjóra daga. Ég viðraði sængurföt strákana og setti nýtt á. Þurrkaði af í hjónaherberginu og helminginn af stofunni og setti í tvær þvottavélar. Þetta var svo sem ekki slæmt miðað við að ég var hálf-þunn eftir óbeinu-reykingarnar í billiardsalnum á föstudagskvöldið.... Í gær fór ég yfir gólfin,lauk við afþurrkunina og þvoði svolítið meira.

Fórum í lúdó við strákana í gærkvöldi áður en þeir fóru í háttinn og horfðum svo á James Bond "Die another day"!


Find your inner Smurf!

- Laugardagur -

Jæja, enn ein helgin að hefjast og hún verður sko flogin áður en maður veit af. Var í einhverju óstuði í gærkvöldi og þegar ég fór að spjalla við Helgu systur á msn-inu datt henni í hug að við gætum farið aftur í pool! Það fannst mér vera fín hugmynd. Strákarnir voru að fara að sofa (um hálftíu) og ég vissi að Davíð mundi alveg þyggja það að fá að vera í tölvunni í ótakmarkaðan tíma. Ég kyssti drengina góða nótt, kvaddi manninn og sótti systur mína. Mér gekk ekki eins vel og síðast en við spiluðum lengur. Um miðnætti var bjöllu hringt og við vorum að spá í hvort við ættum að fara að hætta eða hvort verið væri að loka barnum. Nei, nei, ekkert svoleiðis, heldur var þetta óþolinmóður kúnni sem var að bíða eftir afgreiðslu og að komast að á billiard- eða poolborð. Reyndar má vera eins lengi og maður nennir um helgar og það er víst algengt að það sé verið að spila til þrjú (eins og á sveitaböllunum...) Svo við systur spiluðum áfram í um klukkutíma í viðbót.

- Hmmm, ég held ekki að þetta sé ég.... -


Harley Cooper: Thu ert uppreisnarseggur og
villingur! Skyrd eftir Harley Davidson
motorhjli, fylgir engum reglum og gerir thad
sem thu villt. Thin veika hlid eru karlmenn,
thu hefur gifst nokkrum sinnum vegna astar, en
thad hefur aldrei gengid upp. Thu ert hins
vegar mjog skotin i nuverandi kaerasta thinum,
hann er logga alveg eins og thu. Vonandi bara
ad hann fai aftur tilfinningu i lappirnar eftir
sprenginguna...


Hvada Leidarljos karakter ertu?
brought to you by Quizilla

- Mánu-föstudagur -

Gærdagurinn var afskaplega rólegur. Strákarnir voru mikið úti að leika sér eftir hádegi. Ég las, stakk í þvottavél og hengdi svo upp þegar hún var búin, við Davíð hjálpuðumst að við að taka til í eldhúsinu en ég fann enga löngun í mér til að ráðast á rykið í íbúðinni og var ekkert að pína mig í það. Á fjórða tímanum setti ég upp læri og var að sýsla við að finna til og setja upp meðlætið og búa til sósu þegar systir mín og dóttir hennar komu. Við vorum semsagt búin að bjóða þeim í mat. Lærið heppnaðist mjög vel og sósan var hreint afbragð (þótt ég segi sjálf frá... he, he). Það var allavega vel borðað.

Strákarnir voru komnir í rúmið um hálfníu og um níu leit Bidda inn. Hún stoppaði til ellefu og þá festist ég yfir mynd kvöldsins, The boys from Brazil. Hef reyndar séð þessa mynd áður en hún er alltaf sígild.

Warning: I taste like Gasoline. I may not taste good, but I'm handy to have around if you want to breathe fire. I'm expensive, and sometimes cause disputes. I'm inflammatory, you see. Ha ha. What Flavour Are You?

- G L E Ð I L E G T S U M A R ! -

Jæja, þá er sumarið að ganga í garð samkvæmt dagatalinu og svei mér þá ef veðrið ætlar bara ekki að vera þokkalegt.

Helga systir bauð í mat í gær og var búin að ákveða að panta pizzur svo við höfðum ágætan tíma. Strákarnir voru í fótbolta og Hulda fór út. Sú stutta var alltaf að hlaupa of hratt og detta og í eitt skipti sem Helga fór að hugga hana hitti hún nágrannakonu sína sem var að ferma hjá sér um síðustu helgi. Ég þekki einnig þessa konu síðan á opnu húsi í kirkjunni í fyrravetur og nú bauð hún okkur systrum yfir í kaffi og kökur. Við létum ekki bjóða okkur tvisvar, tókum lásinn af og drifum okkur yfir í kaffið. Þegar Davíð kom með strákana úr boltanum hringdi ég í hann og sagði honum að það væri opið, við kæmum rétt strax.

Þótt það sé frí í dag ákvað ég að strákarnir skyldu vera farnir í rúmið vel fyrir níu í gærkvöldi. Var að byrja að lesa fyrir þá rétt fyrir hálf og las ég í fimmtán mínútur. Svo tók það strákana örugglega aðrar fimmtán mínútur að sofna þannig að klukkan var að byrja að ganga tíu þegar allt datt í dúnalogn. Davíð var að keppa í stríðsleiknum og var nokkuð æstur á tímabili, hrópaði skipanir sem ég var viss um að heyrðust yfir í næstu götu...

- Síðasti vetrardagur -

Jæja, þá er þessum milda vetri að ljúka og vonandi verður sumarið hlýtt og þurrt!

Það var ekki messufært í kórnum í gær og ákváðum við því bara að skreppa á kaffihús í staðinn. Fórum sjö af þeim níu sem mættu á æfingu (erum ekki orðin nema 16 eftir). Fengum ekkert borð fyrir utan Kaffi París svo við fórum á Thorvaldsens-bar. Þar var ekkert mál að fá pláss úti. Að vísu náði sólin ekki til okkar en það var svo hlýtt að ég fór úr kápunni og var bara á ermalausum bol (ekki í sandölum samt). Þegar ein afgreiðslustúlka kom til að kanna hvort hún gæti aðstoðað okkur spurði kórstjórinn eftir ákveðinni bjórtegund. "- Nei, því miður, við seljum ekki vín hér!" Það hreinlega datt andlitið af manninum. Auðvitað var stúlkan bara að stríða og hann gat fengið bjór. Ég lét það eftir mér að fá mér hvítvínsglas.

Davíð var að sækja strákana á Bakkann. Hann hringdi heim um hálfníu og bað mig um að hafa tilbúið bað handa þeim. Þeir komu heim um níu. Strákarnir fóru beint í froðu-bað og svo í rúmið. Þeir voru ekki lengi að sofna. Annars verð ég að segja frá hvað þeir eru skynsamir. Þeir voru búnir að lofa afa sínum að hjálpa honum í garðinum í gær. Svo bauð afi þeirra þeim að byrja á því að skreppa í fjöruna. En strákarnir sögðu nei við því. "Afi, við skulum byrja í garðinum. Það er ekki víst að við nennum að hjálpa þér ef við förum fyrst í fjöruna..." Ég er ekkert smá stolt af drengjunum mínum...

-Það styttist í næsta mánuð...-
Enginn sníður vítt og sítt úr engu!

...og þessi mánuður er bara rétt nýbyrjaður. Höfðum það rólegt framan af degi í gær. Ég fékk að sofa út en fór þó tímanlega á fætur til að setja upp matinn. Við vorum með eplamarineraða svínasteik í hádeginu (ætluðum reyndar að hafa hana í matinn á páskadagskvöld en við fórum í smá heimsókn sem drógst aðeins á langinn svo við höfðum bara afganga er við komum heim...). Um þrjú leytið tók ég til náttföt, og aukaföt fyrir strákana og svo drifum við okkur á Bakkann til tengdó. Tengdapabbi er í fríi þessa vikuna og hann var alveg til í að bjarga okkur með strákana í dag. Við stoppuðum fram á kvöldið og komum ekki heim fyrr en klukkan var farin að ganga tólf. Hittum bræður Davíðs og aðra kærustuna (hin var að lesa undir próf). Þetta var semsagt bara ágætlega notalegt.

-Formúlan-
Fylgdist með tímatökunum á laugardag. Þær eru alls ekki eins spennandi og í fyrra svo ég tók mig til og skráði niður alla millitíma á köppunum svona til að bera svo saman hvar hver var fljótastur og svoleiðis.

Keppnin sjálf var spennandi alveg frá starti og til loka. Það lá samt í loftinu að minn maður myndi loksins hala inn sigur á árinu og ég verð bara að segja það að mér fannst bræðurnir standa sig mjög vel miðað við sorgar-atburðinn í fjölskyldu þeirra. Ég tók líka eftir því að það náðu óvenju margir ökumenn að klára keppnina. Þeir fáu sem ekki luku við keppni gátu kennt bílunum um. Ég er nú ekkert svo viss um að Schumacher landi heimsmeistaratitlinum í ár. Keppnin verður a.m.k. spennandi og það á líka að vera svoleiðis...

Jón Bjarnason. Þú ert gríðarlegur duglegur og missir aldrei úr færi á að
kynnast kjósendum. Byggðamál eru þitt líf og yndi.



Taktu "Hvaða frambjóðandi Vinstri - grænna ert þú" prófið

<-Skírdagur-
Þetta heyrði ég í útvarpinu í morgun: Útvarp Reykjavík, góðan dag! Klukkan er átta. Í dag er skírdagur 17. mars... ...átti ég þá aftur afmæli eða hvað??? He he...

En æ, æ, hvað ég get verið utan við mig. Á mánudaginn marg bað ég Davíð um að muna eftir að setja jakkafötin sín í hreinsun. Í gærmorgun spurði ég hann hvort hann hefði ekki fengið miða hjá hreinsuninni. Jú, jú. En ég bara fékk aldrei þennan miða og ég mundi ekki eftir því fyrr en búið var að loka hreinsuninni að ég hafði ætlað að ná í jakkafötin. (Og tvær fermigarveislur á döfinni...). En fyrst:

-saumaklúbburinn-
Við Bidda vorum mættar til Svölu fyrir níu í gærkvöldi og þá var Sonja nýkomin. 100 prósent mæting. Við þrjár, gestirnir, byrjuðum nær strax að sauma. Svala var ekki í stuði en hún sá okkur fyrir kaffi og meðlæti. Mikið var spaugað og hlegið og ég er viss um að við höfum lengt æfina um nokkur ár er það er satt að hláturinn lengir lífið! Klukkan var langt gengin í eitt er við kvöddum...

- Tvær fermingarveislur -
Við lögðum af stað úr bænum um hádegisbil. Stoppuðum aðeins á Hellu hjá pabba og vorum svo í samfloti með þeim mömmu austur í Hvolsvöll. Einn frændi minn var fermdur í morgun og vorum við boðin þangað. Fermingarbarnið tók á móti okkur með aðra hendina í gipsi og ég get svo svarið að hann var einnig með hönd í gipsi í fyrra þegar systir hans var fermd. Veðrið var með allra besta móti og það var gaman að hitta ættingjana (og auðvitað hinn legginn). Við Davíð og strákarnir stoppuðum í tvo tíma en þá var mál að leggja af stað í næstu veislu.

Ein bekkjarsystir frænda míns er dóttir bestu vinkonu minnar síðan úr grunnskóla og fengum við boðskort í hennar veislu líka. Sú veisla var haldin á Hellu hjá móðurforeldrunum. Þótt ég hafi stöku sinnum komið í heimsókn þarna síðan vinkona mín flutti að heiman og fór sjálf að búa hefur það samt verið alltof sjaldan. Í dag rifjuðust upp fyrir mér allar skemmtilegu minningarnar frá því við vinkonur vorum unglingar og aðeins yngri... Yngri bræður fermingabarnsins, bróðurbörn vinkonu minnar og tvíburarnir náðu ágætlega saman og þegar fjörið var orðið helst til mikið inni var krökkunum sópað út. Þar undu þau sér svo vel að við Davíð vorum bara ekkert að flýta okkur og kvöddum ekki fyrr en rétt fyrir sjö...

Góður dagur og hér (hjá pabba) verður gist í nótt.

- Frídagur -

Útvarpið fór í gang klukkan hálfátta í morgun og ég gaf mér góðan tíma. Oddur Smári kom ekki fram fyrr en rétt fyrir átta og ég sagði honum að ég ætlaði að hlusta á fréttir áður en ég skreiddist á fætur. Steinn vaknaði um hálfníu. Hann var með hita í gærkvöldi en það hefur líklega verið svona þreytu-hiti því hann var stálsleginn í morgun. Keyrðum Davíð í vinnuna um níu og svo fór ég með strákana á Hárhornið við Hlemm til Torfa og fékk þá klippta. Varð að prútta við Odd um klippingu því helst hefði hann viljað allt hárið af eða mjög litla brodda en Davíð Steinn bað bara um venjulega páskaklippingu. Um leið búið var að skera hár strákanna fór ég upp í Hallgrímskirkju á opið hús til Dagbjartar og Magneu. Það var rekið upp heróp þegar við birtumst og fengum við hlýjar og góðar móttökur. Áður en við fórum vorum við svo leyst út með páskaeggjum. (Reyndar fengu öll börn (eða mömmur þeirra) páskaegg;-)

Eftir hádegi dreif ég mig í að ryksuga og skúra eldhúsgólfið og setja í eina þvottavél. Svo skruppum við mæðginin á bókasafnið. Þegar við komum heim aftur gaf ég þeim að drekka og fékk þá svo til að lesa fyrir mig.

Og í kvöld er saumaklúbbur í Grafarvoginum og nú er það öruggt að það verður 100% mæting! Ég hlakka til!!!

- Framtíðarsýn drengjanna -
(skrifað eins og þeir rituðu það í ritvinnslunni í skólanum)

Framtíð
  Fótboltamaður
davið 6-d

framtíð ég ætla að verða

finndinn
og ætla
að eiga eins mikið
af börn og
konan mín gétur fæt. Ég ætla ekki að
segja: fæddu annað barn!
svo hún fari ekki að gráta
oddur 6-d

- Rusla-drengirnir mínir -

Í gær hefði ég svo gjarnan vilja hafa video-upptökuvél við hendina. Tvíburarnir tóku upp á því að hreiðra um sig í ný-tæmdum ruslatunnunum og þóttust búa þar. Það var frekar skondið að sjá lokin lyftast og höfuðin á drengjunum birtast. Hulda frænka var samt alls ekki ánægð með þetta:
- "Mamma, komdu og taktu þá. Þeir eru að henda sér í ruslið!!!" Henni leist alls ekki á þetta og hefur líklega verið hrædd um að ruslabíllinn kæmi þá og þegar og tæki frændur hennar með sér... Þeir bræður voru svo settir í bað um kvöldið!

- Mánudagur -

Enn ein helgin liðin og apríl-mánuður alveg að verða hálfnaður. Oddur Smári ákvað að hætta við að hætta í handboltanum og fór á æfingu á föstudag. Sagðist hafa verið með í öllu en reyndar var ekki settur upp þrautahringurinn sem honum finnst svo erfiður.

Á laugardagsmorguninn fékk ég Davíð til að skutla mér upp í Áskirkju rétt fyrir tíu þar sem var plönuð löng kóræfing til klukkan þrjú. Æfingin gekk þokkalega og maðurinn sem opnaði fyrir okkur var svo elskulegur að hella upp á kaffi fyrir okkur. Kórstjórinn reyndist svo tímabundinn (var að fara að ferma hjá sér daginn eftir) og vildi þar að auki ekki halda okkur inni í svona góðu veðri þannig að æfingin var stytt um klukkutíma. Ég fékk sms frá Davíð um leið og ég kveikti á gemsanum. Þeir feðgar voru í sundi til þrjú. Ég labbaði því til móðurbróður míns, en hann býr við Austurbrún, og hitti konuna hans eina heima. Stoppaði samt hjá henni í rúman hálftíma áður en ég hélt för minni áfram að Laugardals-lauginni. Fann bílinn fljótt og var búin að bíða í sirka fimm mínútur þegar þeir feðgar komu. Strákarnir ráku náttúrulega upp stór augu og spurðu mig hvernig ég hefði komist þangað. Ég þóttist vera göldrótt!

Gærdagurinn var nokkuð rólegur. Strákarnir voru duglegir að leika sér úti og ég gaf mér smá tíma í að taka til hendinni heima. Ekki nærri nóg samt og verð bara að halda áfram nú í vikunni. Setti upp matinn á fjórða tímanum en um hálfsjö var ég búin að fá nóg. Sagði við Davíð, sem sat við tölvuna, að allt væri til búið til að fara að borða og svo dreif ég mig út í langan, langan göngutúr. Endaði hjá Helgu systur og um níu leytið bauð hún mér að fara með sér í pool. Ég var alveg til í það og við skemmtum okkur þrælvel. Þetta er eitthvað sem við verðum að gera saman aftur...

- Morgunhaninn -

Oddur kom fram upp úr klukkan hálfsjö í morgun. Útvarpsklukkan var búin að fara tvisvar í gang. Ég bað stráksa um að tala aðeins lægra og sagðist ætla að kúra smá stund lengur áður en ég færi í sturtu og á fætur.
-"Ég ætla að vaka hér yfir ykkur eins og ég sé GUÐ!", sagði hann þá
-"Ha, sagði ég syfjuð, ertu Guð?"
-"Nei, eins og....

Annars halda strákarnir þessa dagana að bekkjarsystkynin sem eru að verða sjö ára fari beint í sjö ára bekkinn á undan þeim. Oddur var eitthvað að tala um að það væru síðustu forvöð að hjálpa bekkjarsystur sinni því hún ætti afmæli núna bráðum.

- Kjúklingur og vöntun á lyktarskyni -

Eftir að hafa borið Huldu frænku á háhesti næstum því alla leiðina á Hrefnugötu frá Njálsborg fór ég að fást við matinn. Ég tók út kjúkling á þriðjudagskvöldið. Þegar ég tók hann úr umbúðunum brá mér svolítið því mér fannst hann heldur skrýtinn á litinn. Ég finn enga lykt og var mikið að spá í hvernig ég ætti að finna út hvort kjúklingurinn væri í lagi eða ekki. Helga systir leysti vandamálið þegar hún kom. Hún rak nefið upp að kjúklingnum og sagði svo: "Anna, þetta er reyktur kjúklingur!"

Já það getur bæði komið sér vel og illa að hafa ekkert lyktarskyn. Sennilega hef ég aldrei haft neitt lyktarskyn, er örugglega fædd með þennan galla (stundum kostur). Þegar ég var krakki var nefið á mér alltaf stíflað, annað hvort vegna kvefs eða ofnæmis. Ég var komin á unglingsárin þegar "stíflurnar" hurfu (a.m.k. til lengri eða skemmri tíma). Ég man eftir því að ef ég var beðin um að segja álit mitt á ilmvatni eða einhverju sem lyktaði vel þá þóttist ég nasa, yppti svo öxlum og sagði að þetta væri ágætt. Þar sem ég gat ekki skýrt þetta út fyrir sjálfri mér kom ég mér hjá því að skýra það út fyrir öðrum að ég hreinlega vissi ekki (og veit ekki enn í dag) hvað lykt er!!!

- Mið vika -

Vikuleg kóræfing var í gærkvöldi og fengum við nýtt lag. Það er úr West Side Story og svolítið langt svo ég grínaðist með að þetta væri auðvitað aukalagið okkar. Það gekk bara nokkuð vel að æfa þá parta sem teknir voru fyrir í gær. N.k. laugardag er svo löng kóræfing. Þá verður æft meira og minna frá klukkan tíu til þrjú. Það verður örugglega mjög gaman, allavega hlakka ég til.

- Þriðjudagur -
Sótti Huldu frænku rúmlega fjögur, í gær, og fór með hana heim til sín. Við vorum á undan mömmu hennar og tvíburunum en það kom til af því að Helga þurfti bæði að leita strákana uppi er hún sótti þá og koma svo við í fiskbúð á heimleiðinni. Oddur fékkst ekki til að koma inn úr bílnum og ég held að hann hafi verið þar úti í rúmlega klukkutíma. Bræður höfðu verið að slást og m.a. að bíta hvorn annan. Þetta eru nú meiri gaurarnir.

Lauk við að fylla út hina árlegu skattaskýrslu í gærkvöldi og sendi hana inn. Það er nú meiri munurinn að geta gert þetta svona rafrænt. Nú vonar maður bara að innan skamms verði forskráðar það margar upplýsingar fyrirfram að það þurfi bara að gera grein fyrir eignabreytingum og fara yfir allar tölur...

- FORMÚLAN í Braselíu -

Formúlan heldur áfram að vera spennandi. Hún var ræst af stað, sirka korter yfir fimm að íslenskum tíma, fyrir aftan öryggisbíl sem ók fyrir framan bílalestina fyrstu hringina. Brautin var rennblaut eftir miklar úrkomu og ekkert af keppnisliðunum voru með rétta gerð af dekkjum sem hentaði við þessar aðstæður. Keppendur höfðu skrifað undir plagg um að þeir vildu helst fresta keppninni. En keppnin var ekki blásin af og þegar öryggisbíllinn dró sig í hlé hófst mikill darraða-dans. Enginn bílar heltust samt úr lestinni til að byrja með. Heimamaðurinn Barrichello hafði verið á ráspól en missti svo nokkra fram úr sér strax eftir að öryggisbíllinn fór af brautinni. Eitthvað virtist vera að bílnum hans. Ein beyjan á brautinni var sérlega blaut og varasöm og þar fóru margir útaf og skemmdu bílana, m.a. heimsmeistarinn sjálfur sem á nú að vera einn sá besti við þessar aðstæður. Öryggisbíllinn kom nokkrum sinnum út. Sorglegast fannst mér að vélin í bílnum hans Barrichello skyldi gefa sig þegar hann var orðinn fyrstur aftur. Hann á bara ekki að fá að ljúka keppni á heimavelli. Í hring 55 urðu tvö alvarleg óhöpp með stuttu millibili og þar með var keppnin blásin af. Aðeins átta bílar voru eftir þá, og varla það, því rétt eftir að keppnin var stöðvuð kviknaði í einum bílnum. En formúlan virðist ætla að verða æsi spennandi þetta árið og ég ætla að reyna að sjá til þess að ég missi ekki af einni einustu keppni...

- Sunnudagur -

Það er eitthvað svo rólegt í kringum mig þótt klukkan sé langt gengin í eitt...

Verð fyrst að segja frá því sem Hulda frænka sagði við mig á föstudagskvöldið var. Hún hafði sofnað um fimm í tuttugu mínútur þannig að hún gat ekki sofnað strax um kvöldið (að öllu jöfnu þá er hún sofnuð fyrir sjö á kvöldin). Ég leyfði henni að horfa á Disney-myndina með mér og hafði hún mjög gaman af. Í miðri mynd leit hún á mig og sagði: "- Anna frænka, ég á mömmu!" Stelpan sofnaði upp úr tíu og mamma hennar kom heim rúmlega hálfellefu.

- KÓRAFMÆLIÐ tónleikar og fl. -
Þann 21. febrúar 1983 var stofnaður kór við Fjölbrautaskóla Suðurlands á Selfossi. Í gær hélt þessi kór upp á tuttugu ára afmælið. Davíð og strákarnir skutluðu okkur Biddu á Selfoss, skyldu okkur eftir við fjölbrautaskólann stuttu fyrir fjögur og fóru svo á Bakkann. Tónleikarnir hófust klukkan fjögur á hefðbundinn hátt. Kórfélagar gegnu inn og stilltu sér upp syngjandi Cum decore en það hefur verið inngöngulag kórsins frá upphafi. Kórinn söng sálmalög, ættjarðalög, dægurlög og fleira. Það var unun að hlusta á krakkana. Kórinn er mjög góður og þetta var hin besta skemmtun. Fyrir framan okkur Biddu sat "gamli" íslenskukennari minn úr FSu., Ásmundur Sverrir Pálsson með konu sinni og þriggja ára barnabarni. Litla stúlka hlustaði á kórinn allan tímann, klappaði þegar við átti og virtist njóta þess að vera þarna. Ég er reyndar ekkert svo hissa en samt er þetta óvenjulegt hjá svona ungu barni. Þegar aðeins tvö lög voru eftir var heiðursgesti tónleikanna og kórstjóra kórsins til margra ára (þar til fyrir örfáum árum) boðið að taka við og stjórna núverandi og fyrrverandi kórfélögum (sem þarna voru) syngja: "Sofðu unga ástin mín" og "Maístjarnan". Það er ótrúlegt hvað maður man bæði textann og röddina sína (alt) eftir öll þessi ár. Ég byrjaði í kórnum haustið ´85 á þriðju önn minni í skólanum og reyndi að vera með eitthvað eftir útskrift jólin ´87 en var ekki nema fram á vorið 1988.

Eftir tónleikana fór ég með Biddu þangað sem hún ólst upp og fengum við okkur kaffi og kanelsnúða. Rétt fyrir átt náði ein úr saumaklúbbnum, Svala, og einnig fyrrverandi kórfélagi í okkur og saman fórum við að Þingborg þar sem afmælisveisla kórsins var haldin. Þarna hittum við nokkra sem voru samtíða okkur úr kórnum en það vantaði samt stóran kjarna því ´67 árgangurinn frá Selfossi var að halda upp á tuttugu ára útskrift úr grunnskóla þennan sama dag og aðeins ein úr þeim hópi kom í kórafmælið. Vonandi rekast þessi afmæli ekki á eftir fimm ár! En á Þingborg spilaði léttsveit, undir stjórn Stefáns Þorleifssonar (en hann var samtíða mér í kórnum, útskrifaðist úr FSu á sama tíma og einnig úr KHÍ) nokkur lög. Boðið var upp á gómsætan pottrétt og nokkrir tóku til máls. Einnig var sunginn fjöldasöngur, kórlög sem allir þekktu. Um ellefu-leytið var orðið ljóst að enginn úr ´67 árganginum myndi kíkja við og fólk var byrjað að tínast í burtu. Við stöllurnar þrjár ákváðum þá að láta gott heita og kvöddum. Bidda gisti á Selfossi en ég fékk far með Svölu. Við sóttum manninn hennar og dóttur sem beðið höfðu á Selfossi og "drifum" okkur í bæinn. Það var ekki hægt að keyra hraðar en á 40-50 yfir heiðina því það var svara þoka og sást ekki á milli stika stundum...

Ég kom heim um hálfeitt og fann manninn minn að leika sér í tölvunni en hvar voru strákarnir??? Jú, þeir höfðu fengið að gista hjá afa og ömmu á Eyrarbakka. Davíð hafði hugsað sér gott til glóðarinnar að fá að vera einn í sínum tölvuheimi. Ég reyndar leyfði honum það bara og nú er hann enn sofandi og ég hérna ein að festa síðustu upplifanir á skjáinn...

- Enn einn föstudagurinn -

Hulda frænka var lasin og með hita í gær og þar sem Davíð féllst á að hætta vinnu um fjögur og sækja strákana sagði ég Helgu að við myndum ekki koma á Grettisgötuna (svo hún slapp mjög vel með eldamennsku fyrir okkur Hrefnugötuliðið í vikunni...). Tóti, gælubangsi, kom heim með Oddi úr skólanum og fær að fylgjast með fjölskyldunni og taka þátt í flestu fram á mánudagsmorgun.

Ég lofaði að sækja Huldu úr leikskólanum í dag og vera með hana og hjá henni eitthvað fram eftir kvöldi. Elda því á Grettisgötunni og sendi svo feðgana eina heim.

Framundan er spennandi helgi. Kórafmæli á morgun og formúlu-keppni á sunnudaginn...

- Skammarstrik Odds Smára -

Strákarnir komu heim með tvö stærðfræðiblöð í gær. Á meðan Davíð Steinn lauk við að borða byrjaði Oddur á að reikna annað blaðið og las svo heimalesturinn fyrir mig. Á meðan Oddur var að lesa byrjaði Davíð Steinn að reikna. Strákur var í stuði og lauk við báðar blaðsíðurnar. Oddur fór svo að hátta eftir að hafa lokið skyldunni og Davíð Steinn kom og las fyrir mig. Rétt áður en hann var búinn heyri ég að Oddur segir við pabba sinn: "Ég er búin að stroka út bls. 16 hjá Davíð Steini. Það á bara að reikna eina blaðsíðu í dag og hina á morgun!"

Rétt fyrir hálfátta í morgun bað ég Davíð Stein um að athuga hvernig pabba hans gengi að koma sér á fætur. Hann kom til baka skömmu síðar og sagði: "Hann er risinn upp frá dauðum..."

- Miðvikudagur -

Helga systir hélt að ég væri að láta hana hlaupa apríl í gær þegar ég sagði henni að hún mætti bara skutla strákunum heim eftir skólann og koma svo sjálf heim til sín. Sem sagt sleppa því að elda fyrir allt liðið. Davíð fór lasinn heim vel fyrir hádegi (í gær) (með einhverja magapest sem strákarnir voru líka búnir að fá (ég vona bara að þetta sé bundið við stráka;-)). Davíð treysti sér samt alveg til að taka á móti strákunum. Um leið og Helga kom heim til sín dreif ég mig heim og setti strákana í bað (var búin að lofa þeim því og gat ekki lagt það á Davíð). Fljótlega kvaddi ég þó og fór á kóræfingu. Það var til afgangur af rækjupizzu, uppáhald strákanna og svo lét Davíð þá sleppa með að lesa aðeins skylduna og einn aukalestur...

- Nýr mánuður -

Hann beit svolítið í kinnarnar í morgun og þegar ég leit í spegil eftir labbið og sá rjóðu kinnarnar mínar varð mér hugsað til frænku minnar sem ég var í teiti hjá á föstudagskvöldið var. Ég hef alltaf verið þannig að ef ég hreyfi mig þá verða kinnarnar mína eldrjóðar. Þegar ég var krakki voru þær þar að auki mjög bollulegar og þessi frænka mín kallaði þær epla-kinnar og freistaðist oft til þess að bíta í þær. Mér var meinilla við þetta en sl. föstudagskvöld gat ég þó sagt frá þessu í afmælis-veislunni!

Það er gabb-dagurinn mikli í dag. Eini dagurinn á árinu sem maður má plata fólk!!! Fyrir tveimur eða þremur árum náðum við mæðginin að láta húsbóndann hlaupa apríl. Þannig var að hann var að vinna alla nóttina fyrir þann 1. og var ekki kominn heim þegar við mæðginin fórum á fætur. Bíllinn var einhverra hluta vegna heima svo ég fékk þá hugmynd að láta annan strákinn hringja í pabba sinn og segja honum að við værum komin að sækja hann og biðum eftir honum fyrir utan. Davíð stóð upp frá tölvunni, fór út á svalir og kíkti út. Enginn bíll....

- Mars á síðasta snúning -

Tíminn flýgur svo hratt áfram að mér líður eins og ég sé ýmist í rússíbana eða standi utan við hann og fylgist með honum þjóta áfram hring eftir hring. Það er betra að standa fyrir utan því þá er maður svolítið á sínum eigin hraða en sé maður innanborðs er eins og maður sé alltaf að flýta sér og drífa sig að öllu...

Ekki náðu knattspyrnustrákarnir okkar að sigra Skotana enda varla hægt að ætlast til þess á útivelli eftir tap fyrir þeim hér heima. En leikurinn var gífurlega spennandi, sérstaklega seinni hálfleikurinn. Og nú er orðið ljóst að Haukar eru deildarmeistarar í Essó-deild karla en Valsmenn, sem voru lengi vel á toppnum, enduðu í öðru sæti. Eyjastúlkur unnu essódeild kvenna með glæsibrag, unnu 24 leiki af 27.

Anna frænka kom til mín í gær og bjó til tvær pizzur með mér. Ég hringdi í hana upp úr klukkan hálfþrjú, þá voru feðgarnir úti í göngutúr en ég að sýsla eitthvað hérna heima. Anna kom að vörmu spori. Við bjuggum til tvær pizzur og eins og venjulega var önnur með rækjum, túnfiski, lauk, papriku og sveppum. Hinni pizzunni skiptum við í tvennt; öðru megin var hakk, bygggrjón, gulrætur, blómkál, spergilkál, gular baunir, laukur og sveppur en á hinn helminginn vantaði hakkið (gert spes fyrir frænku mína sem hefur valið að borða ekki kjöt). Mjög gott eins og venjulega.

Helgin var annars í alla staði mjög notaleg. Kannski svolítið fljót að líða en virku dagarnir eru svo sem ekkert lengur að líða og áður en ég veit af verður aftur kominn föstudagur...

- Laugardagur -

Ég ætla að nota tækifærið á meðan ég er ein inni og blogga smá pínu pons... Davíð fór á fund og strákarnir eru úti með þoturnar (í annað sinn þennan veturinn).

Frænka mín hélt upp á fertugs-afmælið sitt í gærkvöldi. Þetta var glæsileg veisla og mjög skemmtileg. Þegar við mæðgur mættum á svæðið tók eiginmaður afmælisbarnsins af okkur yfirhafnirnar, yngri sonurinn tók á móti gjöfinni og afmælisbarnið nældi hvítu hjarta í barm okkar. Þegar flestir gestir voru komnir sló frænka mín í glas og bað einn gestinn um að taka hjartað af sér, lesa nafnið sem þar stóð og næla á viðkomandi. Persónan sem í var nælt átti að kynna sig, gera grein fyrir hvernig hún tengdist og eða þekkti afmælisbarnið og lesa svo á hjartað sem fyrst var nælt í hana. Þetta var bráðsniðugt. Eftir kynningarnar var sunginn afmælissöngur og svo boðið að gjöra svo vel og fá sér að borða. Við vorum ekki fyrr búin að klára af diskunum þegar "stóra" systir afmælisbarnsins bað um hljóð og sagði nokkar sögur af "litlu" systur við góðar undirtektir. Mjög eftirminnilegt kvöld. Ég fór að vísu heim áður en frænka mín fór að taka upp gjafirnar en ég á bara eftir að heimsækja hana fljótlega...

- Vikan á endasprettinum -

Ég kom við í fiskbúð og keypti rauðsprettu í soðið á leiðinni heim í gær. Mágur minn ætlaði að sækja dóttur sína í leikskólann og Helga systir skutlaði strákunum heim. Þeir voru komnir heim korteri á undan mér og að sjálfsögðu komnir í tölvuna. Þegar ég fór að sýsla við matargerðina var ég auðvitað spurð að því hvað væri í matinn. Ég átti von á húrra-hrópum því þeim hefur alltaf fundist rauðsprettan góð. En það var öðru nær.
"Oooh, afhverju rauðspretta, sagði Davíð Steinn, mér finnst rauðspretta vond!"
Ég ákvað að anda rólega og sjá til... Enda kom það á daginn að þegar hann smakkaði fiskinn fannst honum hann ekkert vondur. Ég sagði líka við hann að það væri betra að smakka matinn fyrst áður en maður héldi því fram að hann væri vondur.

Stuttu eftir að strákarnir voru komnir upp í rúm þá skrapp ég út úr húsi, annað kvöldið í röð. Davíð var að vísu ekki að spila en hann þurfti að vinna og kunningjakona mín var búin að bjóða mér á snyrtivörukynningu, svo ég dreif mig bara.

-Eitt og annað..._

Við komum heim upp úr klukkan hálfsjö í gærkvöldi. Strákarnir lærðu á met-tíma og voru komnir í bað korter yfir sjö. Gaf þeim kleinur og mjólkurglas í hressingu stuttu fyrir átta og þeir komust í rúmið á slaginu og voru ekki lengi að komast í draumalandið.

Rétt eftir að strákarnir voru sofnaðir kom dóttir vinkonu minnar. Reyndar er stúlkan sjálf orðin mjög góð vinkona mín og ég er frekar upp með mér yfir því að hún sækir í að koma til mín (endrum og sinnum). Ekkert kynslóðabil virðist vera á milli okkar og þá er ég ánægð. Davíð var byrjaður í stríðsleiknum sínum svo við Esther drifum okkur bara út úr húsi og fórum á Ara í Ögri. Þar áttum við notalega stund og spjölluðum heilmikið. Kaffið hjá "Ara" er mjög, mjög gott og mér er sagt að kakóið sé það líka.

Ég var komin heim rétt fyrir tíu. Esther átti eftir að læra en hún er að taka stúdentspróf í vor. Davíð var enn í tölvunni og reyndar þá var klukkan byrjuð að ganga tvö er hann hætti þar. Þvílík elja...

...og dagarnir fljúga áfram...

Undanfarið hef ég hugsað stíft upp í Hallgrímskirkju, sérstaklega á miðvikudögum. Þetta er fyrsti veturinn síðan haustið ´96 að ég fer ekki á opið hús. En viti menn í gærkvöldi hringdi hún Dagbjört (sú sem tekur á móti á opnu húsi) í mig og talaði einmitt um að hún hefði verið að hugsa svo mikið til okkar mæðginanna. Það var virkilega gott að heyra í henni og ég veit að við höldum áfram að vera í sambandi á meðan við erum báðar til.

Þegar Oddur Smári var að lesa í gærkvöldi fór hann allt í einu að slá með flötum lófa á hálsinn á sér. Þegar hann var spurður hvað hann væri að gera sagðist hann vera að gera röddina fallegri. Pabbi hans sagði að röddin yrði ekkert fallegri þótt hann gerði þetta svo sá stutti breytti upplýsingunum í ...svo röddin yrði sterkari!!!

Ég mun leika lausum hala í kvöld....

- Þriðjudagur -

Ég bauð nöfnu minni og frænku í heimsókn og mat í gær. Það er svo gaman að fá hana. Henni gengur mjög vel að læra íslenskuna og hún sagði mér frá því að hún hefði fengið 8,6 á málfræðiprófi. Frábær námshestur! Helga systir hafði boðið Kolfinnu, níu ára stúlku sem mamma tekur á móti heim úr skóla, heim til mín og lék hún við Huldu og hjálpaði strákunum með stærðfræðina. Ég var með þorsk í matinn og heppnaðist hann vel að vanda. Það er tvennt sem ég er óhress með þessa dagana. Annars vegar bjúgurinn, sem sest mest á hægri fótinn og belgir út og hins vegar að þá er röddin að hverfa (hálsinn hálf svona ryðgaður) svo ég kemst ekki á kóræfingu í kvöld...

-Árshátíðin -

Klukkan korter fyrir sex á laugardaginn vorum við Davíð komin í Perluna. Þar var okkur boðinn drykkur og við hittum vinnufélaga mína og maka þeirra sem smám saman tíndust á staðinn. Mjög fljótlega var okkur boðið að skoða sögusýninguna undir leiðsögn. Ég varð stór hrifin. Þetta var magnað. Stytturnar af fólkinu voru svo vel gerðar að ég stóð mig að því að stara á þær og bíða eftir að einhver myndi blikka augunum eða hreyfast. Reyndar hreyfðist ein styttan, hún andaði. Rétt fyrir sjö fór fólk að tínast út í rútur nema þeir sem ekki fengu sér áfengan drykk og voru á einkabílum. Við Davíð skildum bílinn bara eftir við Perluna. Leiðin lá vestur á Seltjarnarnes, nánar tiltekið í félagsheimið þar. Allar konur fengu eina rauða rós við komuna. Þegar allir voru komnir og um það bil sestir stigu tvö úr skemmtinefndinni í pontu, buðu fólk velkomið og kynntu veislustjóra kvöldsins sem var Helga Braga Jónsdóttir. Til að gera langa sögu stutta þá stóð Helga Braga sig frábærlega vel, kenndi okkur konunum m.a. undirstöðu atriðin í magadans... Forrétturinn var borinn fram rétt fyrir klukkan átta; Heitreyktur bleikjutígull með stökku sallati, Teryaki (sumir fengu frosin forrétt...) og hvítvín að drekka með. Forstjórinn var með annálinn og vöktu gömlu myndirnar sem hann sýndi almenna kátínu (sumir voru ungir einu sinni). Síðan var Jóhannes eftirherma með nokkra brandara. Hann hefur reyndar verið áður og var hann að hluta til með sömu brandarana og síðast. Aðalrétturinn var borinn fram um níu; Gljáð kjúklingabringa með villisveppum, Rösti-kartöflum og rauðvín að drekka með. Ég fékk þó að halda mig við hvítvínið. Stuttu fyrir tíu voru dregnir út fimm veglegir happdrættisvinningar og svo var eftirrétturinn, volgur "súkkulaðidraumur" með ganacefyllingu og vanillurjóma, borinn fram. Með þessu fengum við freyðivín. Selma og Hansa komu og sungu nokkur lög og um ellefu tók hljómsveitin Land og Synir við. Það var mikið stuð allan tímann og ég held að allir hafi skemmt sér hið besta. Við Davíð fengum far heim að dyrum. Okkur stóð til boða að kíkja í partý og heitan pott en þegar við vorum komin heim var úr okkur allur vindur svo við slepptum því.

- formúlan -

Þótt ég færi seint að sofa var eitthvað sem dreif mig á fætur rétt fyrir klukkan sjö í gærmorgun til að fylgjast með formúlunni. Líkt og síðast var þetta mjög spennandi keppni þótt línurnar um efstu sætin lægju fyrir er keppnin var rúmlega hálfnuð. Schumacher er greinilega orðinn óvanur að ræsa með einhvern fyrir framan sig því hann gerði afdrifarík ökumannsmistök er hann ók á Trulli í annarri beyjunni eftir startið. Þetta kostaði það að heimsmeistarinn þurfti að koma inn og láta skipta um framvæng hjá sér auk þess sem hann fékk víti og þurfti að aka í gegnum þjónustusvæðið. Alls fór hann því fjórum sinnum inn. Raikkoinen vann sinn fyrsta kappakstur og þrátt fyrir flensu náði Alonso þriðja sætinu. Og nú er fullt af köppum með átta stig...

...helgin

var semsagt þrælfín. Ég lagði mig aftur eftir formúluna og klukkan var byrjuð að ganga tvö áður en við fórum á fætur. Fengum okkur afgang af sallati sem Davíð útbjó á föstudagskvöldið. Svo fórum við í göngutúr upp í Perlu. Þar fengum við okkur ís og kakó (Davíð) og ég skyrtertusneið og kaffibolla áður en við sóttum bílinn. Það voru greinilega fleiri sem höfðu geymt bílinn sinn við Perluna frá því kvöldinu áður því er við vorum sest niður með kaffið og það var kastað á okkur kveðju... Fórum í smá bíltúr áður en við fórum heim aftur en til stóð að Davíð og tölvufélagar hans tækju leik. Það varð ekkert úr því þannig að við spiluðum Yatsý með sex teningum. Um sex fórum við á American Style. Er við komum þaðan bjó ég til kaffi. Davíð lagði af stað austur upp úr klukkan hálfátta að sækja strákana en ég fór í videóleiguna og leigði The Bourne Identity...

- Laugardagur -

Það er margt í gangi í dag;

Davíð var að leggja af stað með strákana austur til Tomma með viðkomu í Grafarvoginum til að kippa vinkonu bróður síns með. Við erum semsagt að leysa út afganginn af jólagjöfinni frá honum. Hann gaf okkur m.a. þetta fína gjafabréf þar sem hann bauðst til að hafa strákana frá rúmlega hádegi á laugardegi fram yfir kvöldmat á sunnudegi. Og það kemur sér aldeilis vel að geta leyst þetta út einmitt þessa helgi. Ég var að vísu á báðum áttum því Davíð Steinn er búinn að vera slappur, en hann er hitalaus og vonandi slær honum ekki niður.

Dreif mig á lappir klukkan sex í morgun til að fylgjast með seinni tímatökunni fyrir formúlukeppnina á morgun. Það var virkilega spennandi að fylgjast með framvindu mála en engan veginn hægt að spá í keppnisáætlun liðanna. Nú er bara spurningin hvort ég hafi heilsu í að horfa á beina útsendingu í fyrramálið eða endursýninguna upp úr hádegi. Sem betur fer ætlar systir mín taka upp keppnina fyrir manninn sinn.

Klukkan korter fyrir sex eigum við Davíð að vera mætt upp í Perlu ásamt flestum vinnufélögum mínum og mökum þeirra. Þar er sögusýning í gangi og auk þess verður boðið upp á fordrykk og jafnvel ræðu. Rútur munu svo flytja mannskapinn vestur á Seltjarnanes þar sem aðalhátíðin mun fara fram í félagsheimilinu. Skrifa meira um þetta eftir helgi, þegar ég er búin að upplifa þetta allt saman.

Við Davíð getum líka haldið upp á sjö ára brúðkaupsafmæli í dag!!!

Vinnuvikan að klárast...

...og hún verður í styttra lagi hjá mér. Davíð Steinn vaknaði skælandi um fimm í morgun með sáran verk í öðru eyranu. Ég fékk Davíð til að taka fyrriparts-vaktina því ég er ein í kortadeildinni á morgnana og þar fyrir utan átti ég von á kortaflóði í morgun. Flóðið reyndist í minna lagi og alveg viðráðanlegt.

...en HÚN á afmæli í dag. Til hamingju með daginn Bidda mín!!!

- Dimmur fimmtudagur -

...og þá eru ósköpin hafin og hver veit hvar þetta mun enda...

Hann var svalur um hálfátta er ég labbaði í vinnuna. Var frekar sein að öllu þannig að ég náði ekki að fá mér neitt að borða áður en ég dreif mig af stað. Hluti af því var örugglega það að ég var ekki dugleg að koma mér á fætur. Ég lék nefnilega lausum hala í gærkvöldi. Davíð var að æfa sig fyrir keppnina í kvöld svo ég dreif mig í Hafnarfjörðinn í heimsókn til samstarfs- og vinkonu minnar. Ég kom heim alltof seint eða um hálftólf og þá tók það mig um klukkutíma að fá manninn til að hætta í tölvunni...

Vaknaði upp í nótt um korter yfir þrjú við það að annar strákurinn var að kalla á mig (Var ekki Bush með ávarp til bandarískuþjóðarinnar um það leyti...?). Það var Davíð Steinn sem sagði að sér liði hræðilega illa. Hann var brennheitur. Ég tók hann upp í til okkar og þar var hann í rúman hálftíma en þá vildi hann fara í sitt rúm aftur. Útvarpið fór í gang um tuttugu mínútur yfir sex samkvæmt venju á virkum degi en ég var alls ekki tilbúin að fara á fætur. Það tók mig góða stund að rífa mig upp og fara í sturtu...

Davíð Steinn mældist ekki með neinn hita svo við sendum hann í skólann. Vonandi helst hann frískur pilturinn en líklega má ég eiga von á því að hann sé að fá flensuna...!!!

...og vikan hálfnuð...

Það er stutt í næstu helgi en mér sem finnst síðasta helgi vera nýliðin. Það er nóg að gera hjá mér hér í vinnunni og einhverra hluta vegna er eitthvað um að vera hjá mér næstu helgar svo langt sem ég sé... Ætli það sé ekki bara ágætt!

Annars er ég búin að komast að því hvar nýja vinnan hennar er. Eftir kóræfingu í gærkvöldi skrapp ég inn í Eymundsson í Austurstræti og þar var hún að afgreiða með bros á vör...

- Sandkassaleikur -

Það er nokkuð ljóst að Bush ætlar sér að ráðast inn í Írak. Hann setur fram skilyrði sem hann er viss um að Hussein muni ekki fara eftir og þó svo ólíklega vildi til að farið yrði að fyrirmælunum þá finnur Bush bara einhverja aðra ástæðu. Stór bilað ástand!!!

- Afmælisdagur -

Þar skall á mig ár í viðbót og er það vel! Hálf-fertug, en mér finnst skemmtilegar að líta svo á að ég og Sonja vinkona mín séum sjötugar saman í dag. TIL HAMINGJU MEÐ DAGINN, SONJA MÍN!!! Við kynntumst í Fjölbraut á Selfossi og það tók okkur næstum því allt fyrsta skólaárið (84-85 (svo feimnar vorum við);-). En kannski er vinátta okkar betri fyrir vikið og ekki skemmir að vera fæddar sama dag sama ár...

- Sunnudagur -

Helgin byrjaði ansi skrautlega en Oddur ældi út alla sængina sína og koddann aðfaranótt laugardags. Davíð var tillölulega nýkominn heim úr vinnupartýi og ekki sofnaður svo við hjálpuðumst að við að verka strákinn, skipta um lak, færa Davíð Stein upp í eftri koju og skola rúmfötin. Settum handklæði undir höfðalagið á stráknum, fötu við rúmstokkinn og breiddum bara teppi yfir hann. Við urðum ekki vör við frekari uppköst en Oddur sagði mér um í gær-morgun að hann hefði kyngt öllu því sem ætlaði upp úr honum, oj, oj....

Bauð Önnu frænku yfir í gær og við bjuggum til tvær pizzur saman. Mjög ljúffengar og matarmiklar. Var búin að bjóða Esther (dóttur Lilju vinkonu í London) en hún var að flytja nú um helgina svo ég hef ákveðið að hafa aftur pizzudag annan sunnudag. Sonur kunningja okkar, 13 ára gutti, fékk að vera hjá okkur milli hálfátta og ellefu á meðan foreldrarnir skruppu í leikhús. Við urðum nú lítið vör við strákinn því hann fékk að vera í tölvunni mest allan tímann og var hann ekkert óhress með það.

Annars hef ég verið iðin við að fylgjast með heimsmeistara-mótinu í frjálsum íþróttum sem var haldið í Birmingham nú um helgina. Þetta var sannkölluð veisla. Spenna í sjöþrautinni, heimsmet í stangarstökki kvenna (því miður komst Þórey Edda ekki í úrslitakeppnina en það munaði bara fimm sentimetrum og ég hef grun um að hún eigi mun meira inni...), skemmtilegar hástökkskeppnir, hlaupagreinar spennandi og fleira og fleira...

Setti á eina rjómatertu í dag og var með lambahrygg í kvöldmatinn, svona forskot á morgundaginn...

Green You are a very calm and contemplative person. Others are drawn to your peaceful, nurturing nature. Find out your color at Stvlive.com!

Ég er Kristín Kötterheinrich!
Þú ert Kristín Kötterheinrich. Þér er ekki
sama hvað aðrir kennarar segja um bekkinn og ert mikill aðdáandi þýsks aga.
Ágætis manneskja.


Taktu "Hvaða kennari 4.B ert þú?" prófið

- Föstudagur á ný -

Helga systir var forsjál, að koma við í Nóatúni á leiðinni heim í gær, og taka með sér tilbúinn kjúkling í matinn. Hulda var orðin lasin og um leið og mamma hennar kom heim vildi hún alla hennar athygli. Maturinn var því borðaður óvenjulega snemma eða rétt fyrir fimm. Strákarnir fóru svo að heimsækja ein vin sinn. Davíð kom um hálfsjö og komu strákarnir inn með honum og festust fyrir framan sjónvarpið. ...(Fyndið annars þetta snjókross) Klukkan var sjö er við kvöddum mæðgurnar. Davíð Steinn fékk allt í einu þá hugmynd að labba heim, sagðist verða að hreyfa á sér fæturnar. Davíð labbaði með honum en við Oddur keyrðum heim og var hann byrjaður að læra þegar nafnarnir komu. Næsti klukkutími fór í að hjálpa drengjunum við heimalesturinn, fá þá til að klára skriftina og hátta sig, gefa þeim hressingu, biðja þá að tanna sig og fylgja þeim í rúmið...

- Um sprautumálin -
Þegar ég hitti Odd í gær spurði ég hann hvernig hefði gengið í sprautunni. Hann sagði að það hefði gengið vel. "Varstu að plata mig?", sagðist hann hafa sagt við þann sem sprautaði því sá (eða sú) hafði sagt að þetta væri pínu vont... Svo kom reyndar í ljós að Oddur hafði ekki verið svo samvinnuþýður í byrjun. Neitað að láta sprauta sig og skælt mikið...

Ég fæ að hætta fyrr í dag og fara að jarðarförinni!

Sitt lítið af einu og öðru.

Oddur Smári hafði orð á því í gærkvöldi að hann vildi ekki fara í skólann í dag. Ég vissi vel afhverju. Í dag á að sprauta krakkana við menigokokkum-c (heilahimnubólgu-tegund). Strákarnir komu heim með tilkynningu þar sem hægt var að afþakka slíka sprautu með því að skrifa niður nafn barnsins og kvitta undir. Oddur var búinn að skrifa niður nafnið sitt og bróður síns á blaðið sem hann fékk. Ég ræddi aðeins um þessi sprautumál við hann og held að mér hafi tekist að róa hann og undirbúa undir sprautuna.

Davíð Steinn kom heim með tvær skriftarbækur og líklega er sessunautur hans og bekkjarsystir svekkt yfir að hafa ekki getað skrifað neitt í gær. Krakkarnir fá skriftarbókina heim með sér á miðvikudögum og eiga þá að skrifa fyrri þrjár línurnar af sex. Hinar þrjár línurnar skrifa þau á fimmtudögum og skila svo bókunum til kennara á föstudögum.

Ég var tilbúin með áætlun þegar Davíð kom heim með strákana úr fótboltanum í gær. Það yrði ekkert kveikt á tölvunni, ekki horft á sjónvarpið en það væri möguleiki að leigja spólu ef við værum búin að fara aðeins yfir gólfin fyrst. Davíð leist auðvitað ekkert á þetta (skiljanlega). Þó varð endirinn sá að hann ryksugaði á meðan ég skrapp út í leigu (voru það ekki alveg jöfn skipti?). Reyndar sá ég um matinn og frágang í eldhúsinu, setti í eina þvottavél og skúraði svo inni á baði og eldhúsgólfið er ég kom úr leigunni...

...Leigði annars K-19 The widowmaker. Hún er alveg ágæt.

- Miðvikudagur -

Vikan er komin á skrið og áður en maður veit af verður komin helgi. Það er víst ekki hægt að stöðva tímann og það borgar sig alls ekki að reyna að elta hann uppi. Best er bara að reyna að njóta augnabliksins...

Ég mun sennilega ekki leika lausum hala í kvöld. Allavega ekki undir sömu formerkjum og tvö síðustu miðvikudagskvöld. Davíð snéri laglega á mig núna. Æfði og eða spilaði sunnudags-, mánudags- og þriðjudagskvöld en svo verður engin keppni í kvöld. En það er að fæðast hjá mér frábær hugmynd (vonandi) (Svona nokkurs konar krókur á móti bragði, eða þannig). Ef þetta heppnast hjá mér mun ég örugglega skrifa um það á morgun og kannski hvort sem er...

- Eftirfarandi samræður milli systur minnar og Odds Smára áttu sér stað í gærkvöldi:

- Oddur, afhverju ertu strákur?
- Af því ég fæddist strákur.
- En afhverju er Hulda stelpa?
- Nú af því að hún fæddist stelpa.
- Hvernig veistu að þú ert strákur en ekki stelpa?
- Það er munur á strákum og stelpum.
- Hver er munurinn?
- Strákar geta ekki farið í kjóla!!!
(Hmmm, hugsaði ég með mér. Hvernig fékk hann þetta út og hvað með grímubúninga, leikbúninga og dragdrottningar?)

- Formúlan -

Ef að komandi tímabil verður eitthvað í líkingu við fyrstu keppnina þá vil ég helst ekki missa af neinni keppni í ár. Keppnin um helgina var einhver sú mest spennandi í þrjú fjögur ár!!! Fyrir keppnina rigndi og veðjuðu sum liðin á regndekk, þar á meðal Ferrari. Þetta reyndist kolröng ákvörðun því brautin var fljót að þorna og þá tættust regndekkin upp. Barrichello var fyrstur til að falla úr keppni og þurfti að kalla út öryggisbíl. Þeir sem voru á regndekkjum notuðu tækifærið og komu inn í þjónustuhlé. Schumacher, Montoya, Räkkionen og reyndar fleiri voru allir líklegir til að vinna og var keppnin milli Þjóðverjans og Finnans mjög spennandi. Aftur þurfti að kalla út öryggisbíl og eins og alltaf áður græddu margir á því en sumir ekki. Það fór í raun lítið fyrir Coulthard mestan hlutann af keppninni en hann nýtti sér mistök margra og kom sá og sigraði! Nú get ég varla beðið eftir næstu keppni...

-Grímuball - 75 (40+35) ára afmæli og fleira

   Seinni partinn í gær fór ég á fullt að hanna grímubúninga á okkur Davíð. Tók fram gamalt sængurverasett, klippti fyrir hálsmáli og armgötum og svo vel neðan af verunum. Fékk Davíð til að rétta fyrir mig úr tveimur vírherðatrjám sem ég saumaði fast eftst í verin. Á koddaverin klipptum við smá göt fyrir augu og nef en gáfum okkur ekki tíma til að setja víra á þau.
   Davíð sótti barnapíurnar okkar um átta leytið og um hálfníu skelltum við búningunum aftur í bílinn. Klæddum okkur í múnderinguna fyrir utan þar sem veislan fór fram og birtumst svo með stæl. Vel var tekið á móti okkur. Sumir föttuðu strax að við vorum "hjónasængur" en aðrir vildu meina að við værum konur frá Afganistan og einn hélt því fram að við værum Osama bin Laden. Í afmælisveislunni voru allskonar verur á sveimi t.d. Karíus og Baktus, Eiríkur Fjalar, einn strumpur, Pokahontas, norn, prinsessa og fleiri og fleiri.
   Reyndar var þetta brúðkaupsveisla í leiðinni því yngra afmælisbarnið tilkynnti það að hún og kærastinn hefðu verið gefin saman deginum áður (mér fannst þau líka vera í frekar flottum grímubúningum, búin sem brúðarpar, og svo var þetta ekta...) Öllum gafst kostur á að taka þátt í karaoke og konan sem stjórnaði því var iðin við að taka myndir sem má finna á þessari síðu Karaoke. Þetta var mjög skemmtileg veisla og áður en maður vissi af var klukkan orðin eitt og söngdótinu var pakkað saman. Við Davíð fórum upp úr því.
   Ég keyrði barnapíurnar heim og svo setti ég mig í formúlustellingar en um það skrifa ég á morgun eða mjög fljótlega því það var hreint mögnuð keppni sem ég verð að tjá mig um óþreytt og í betra stuði.

- Formúla 1 tímatökur -

Ó, já, þetta er allt að komast í gang. Ég stillti útvarpsklukkuna á 02:30 og fór að sofa um hálfellefu (bara rétt á eftir strákunum sem fengu að horfa á Disney-mynd kvöldsins). Davíð notaði tækifærið og var að leika sér allan þennan tíma (milli 22:30 og 03:15 þvílíkt úthald enda endist hann ekki alveg út tímatökurnar;-). "Fjörið" byrjaði um 03:00 að íslenskum tíma. Tímatökur daginn áður ráða því í hvaða röð ökumenn fara út. Heimsmeistarinn Schumacher var reyndar óhress með að þurfa að byrja tímatökurnar á föstudag en mér fannst hann bara setja nokkuð góðan tíma. Barrichello, Räkkionen og Villenauve náðu samt betri tíma og sá fyrstnefndi alveg ótrúlega góðum tíma. Minardi-maður, Wilson (einn af nýju köppunum) var með lakasta tímann og því fyrstur út í gær. Ég hélt að hann væri að gera mistök þegar hann kláraði ekki tímatökuhringinn en þegar liðsmaður hans, Verstappen gerði slíkt hið sama var ljóst að Minardi ætlaði ekki að setja neina tíma og þar af leiðandi ekki að taka þátt í aðalkeppninni... Tímatökurnar runnu nokkuð vel áfram. Gott var að geta einbeitt sér í að fylgjast bara með einum í einu. Titilhafinn var semsagt fjórði síðastur í röðinni og náði besta tímanum. Ég tók samt eftir því að það var bara svipaður tími og daginn áður. Villenauve náði ekki að bæta þennan tíma og Finninn ungi hafði verið svo óheppinn að eyðileggja aðal-bílinn á æfingum fyrir seinni tímatökur og var á varabílnum. Eitthvað var að hjá honum því hann flæktist fyrir Barrichello. Barrichello náði öðrum besta tímanum en ég er viss um að hann hefði náð ráspól ef hann hefði ekki verið truflaður.... Það er samt spennandi keppni framundan og nú veit enginn hvenær hver þarf að fara inn í þjónustuhlé!

Annars þarf ég að fara að snúa mér að því að útbúa grímubúninga á okkur Davíð fyrir kvöldið... (Meira um það á morgun eða eftir helgi)

-Bara smá hífuð...!!! -

Ég var að koma heim... Davíð sótti mig í vinnuna um fjögur og svo var ég svo ljónheppin að mamma bauðst til að skutla mér á Hótel Sögu þegar hún kom heim með strákana úr handboltanum. Já, ég var á hótel Sögu. Fékk boðskort frá Euro, sem nú heitir Masercard kreditkort hf. Það var boðið upp á léttar veitingar, ég tók þátt í happdrætti og svo var líka kynning á starfsemi sl. árs og því sem er framundan. Þetta var auglýst frá 17:00-19:00 og er ég kom út um sjö biðu feðgarnir eftir mér. Þeir höfðu hætt við að fara í fótboltann því þeir höfðu gleymt að taka með sér íþróttaskó og treystu sér ekki til að æfa skólausir...

- Föstudagur - (sá 10. á nýja árinu)

Ég var nýlögð af stað heim þegar Davíð hringdi og spurði hvort hann ætti að sækja mig. Hann var kominn heim og búinn að sækja strákana í skólann. Ég sagðist ætla að labba og koma við í fiskbúðinni. Strákarnir voru nefnilega að tala um það að það væri orðið langt síðan þeir hefðu fengið "kóngafisk" svo ég var ákveðin í að bæta úr því. Systir mín og hennar litla fjölskylda var búin að afboða sig því þau voru boðin annað. Ég lét því alveg duga að kaupa eitt flak. Þetta hitti í beint í mark og var borðað vel af þessu. Laxinn eldaði ég í örbylgjuofninum. Svo sauð ég hýðishrísgrjón, gufusauð grænmeti og steikti lauk, hvítkál, sveppi og papriku... (ég fæ bara vatn í munninn. Ég var svo heppin að það var afgangur fyrir mig til að taka með í vinnuna).

Það gerðust undur og stórmerki í gærkvöldi!!! Davíð tók sér frí frá tölvunni. Ég var eiginlega nokkra stund að fatta þetta og melta en þegar málið lá ljóst fyrir var sko slökkt á sjónvarpinu. Ég vildi njóta þess að hafa manninn bara fyrir mig, spjalla, fá sér smá kaffi og hafa það kósí saman.

Í morgun vöknuðu allir á svipuðum tíma þannig að við gátum borðað morgunmatinn saman. Davíð ákvað að keyra mig í vinnuna svo ég gat tekið því rólega. Þetta er í lagi stöku sinnum. Ég hef samt mjög gott af því að ganga...


... mig setur hljóða. Ég var að fá þær fréttir að einn vinnufélagi minn hafi misst konuna sína í nótt. Sl. vikur hefur verið vitað hvert stefndi en ferlið hefur samt gegnið alltof hratt fyrir sig því þau vissu það bara um síðustu áramót að hún væri veik...

- Venjulegur fimmtudagur -

Það voru ánægðir strákar sem komu heim úr skólanum í gær. Hátíðin hafði heppnast mjög vel og svo komu þeir heim með nokkra öskupoka með sér og voru að "lauma" á okkur fullorðna fólkið. Grey Ingvi mágur var stunginn í bakið...

Og ég lék lausum hala í gærkvöldi. Ég var komin til vinkonu minnar vel fyrir klukkan hálfníu og við spjölluðum, saumuðum og göntuðumst. Smástund síðar að mér fannst spurði ég hvað tímanum liði og þá var klukkan orðin hálfellefu. Svo tók það góðan hálftíma að koma sér af stað heim.

Í heimleiðinni renndi ég við í 10-11 í Lágmúlanum (þar sem er opið allan sólarhringinn). Það kom mér á óvart hversu mikið var að gera þarna á þessum tíma; hátt á annan tuginn var þarna í svipuðum erindagjörðum og ég...

Það er komið að mér að elda í kvöld. Og svo þegar strákarnir eru komnir í rúmið ætla ég að leika lausum hala. Davíð verður í tölvunni í allt kvöld, að keppa. Hann var reyndar í allt gærkvöld að æfa sig svo það er spurning hvort ég eigi þá ekki að leika lausum hala á þriðjudagkvöldum líka. Það er áhugaverður möguleiki...

- ÖSKUDAGUR -

Davíð stoppaði mig af áður en ég labbaði af stað í vinnuna. Hann bauðst til að keyra mig svo ég gæti séð hvernig strákarnir fóru búnir í skólann. Það var vel þess virði. Ég var búin að sjá búningana en það var enn betra að sjá þá í þeim. Oddur eins og geimkarl og Davíð Steinn sem Ninja. Þeir voru líka ánægðir strákarnir. Samkvæmt skilaboðum frá skólanum áttu krakkarnir að mæta í búningum en þó verður hefðbundið skólastarf fram að hádegi. Hátíðin heftst upp úr hádeginu. Ég hlakka til að hitta drengina eftir vinnu og skóla og heyra um hvernig allt var...

SPRENGIDAGUR

...saltket og baunir.... TÚKALL! ...ég ætla upp í mat í hádeginu, það er öruggt!!!

Það var yndislegt að labba í vinnuna í morgun (og reyndar í gær líka). Alveg logn og þótt jörðin sé grá er vor í lofti. Magnað! Það er samt nokkuð víst að við megum eiga von á páskahreti... ...en því að hafa nokkrar áhyggjur af því fyrr en þar að kemur?!?!?!!!

- BOLLUDAGUR -

Við Davíð vorum ekki vakin með flengingum í morgun (eins og "lög" gera ráð fyrir). Við vorum bæði komin fram úr og ég var að leggja af stað í vinnuna er Oddur kom fram. Það er vetrarfrí í skólanum í dag og á morgun og ætlar mamma að redda okkur eins og oft áður.

Ég verð að geta þess að handklæðið sem Oddur gleymdi annan daginn í sundinu hefur skilað sér heim.

Heyrði í Oddi um hálfátta er hann fór á klósettið. Um átta vaknaði Hulda og Davíð Steinn ekkert svo löngu síðar. Plantaði börnunum fyrir framan teiknimyndarásina og leyfði mér að kúra til klukkan að verða níu. Þá bjó ég til graut handa stelpunni og fann til brauð handa strákunum. Rúmlega tíu leyfði ég Davíð Steini að hringja í Ragnar Pál (sonur bekkjarbróður míns úr grunnskólanum á áttunda ári. Þeir eru búnir að þekkjast guttarnir í rúm þrjú ár...) til að spyrja hvort þeir bræður mættu heimsækja hann upp úr hádeginu. Það var víst auðsótt mál. Ragnar Páll átti heima í Ártúninu (bara rétt hinum megin við hólinn) en í nóvember sl. flutti fjölskyldan upp í hæð. Strákarnir héldu áfram að horfa á sjónvarpið en við Hulda röltum yfir til Steina föðurbróður míns (Steina afa eins og krakkarnir kalla hann). Eftir stutt stopp héldum við frænkur gönguferðinni áfram og fórum á Lund, elliheimilið á Hellu, þar sem við kíktum til Ólu (eftirlifandi konunnar hans Steina í Gutt. sem ég minntist á um daginn).

Um leið og strákarnir voru búnir að borða hádegismatinn löbbuðu þeir af stað upp í hæð. Mikið á ég annars orðið stóra stráka... Ég hringdi í vinkonu mína á Hvolsvelli og þegar ég var búin að ganga frá fórum við Hulda austur eftir og stoppuðum við í góðan einn og hálfan tíma.

Ég hrökk upp um hálffjögur í nótt (eða eldsnemma í morgun...;-) við það að ég heyrði í barni. Það var ekki um að villast, Hulda var að kalla. "Hvað nú?", hugsaði ég með mér "ætli hún sé búin að missa eða týna dulunni?" Þegar ég opna inn sagði hún strax: "Anna frænka, hvar er litla barnið mitt?" (Lítil dúkka sem hún hafði komið með austur). Sem betur fer vissi ég nokkurn vegin hvar dúkkan var, fann hana fljótt og rétti Huldu, bauð aftur góða nótt og skreið inn í rúm. Hulda var glað-vöknuð og næstu tvo tímana heyrði ég hana spjalla við litla barnið, syngja og klappa saman lófum. Einu sinni kallaði hún aftur á mig og var það vegna þess að hún gat ekki klætt dúkkuna...

Mamma kom með Huldu til mín um ellefu-leytið á laugardaginn. Við strákarnir vorum tilbúin svo ég hringdi á Selfoss, fermdi bílinn, kvaddi manninn og ók af stað. Var komin í Fossheiðina rétt rúmlega tólf og var ekkert að flýta mér enda alltof langt síðan ég var þar síðast. Rétt fyrir þrjú héldum við samt ferðinni áfram á Hellu og var ég hálfhissa að sjá að pabbi var kominn á undan þótt ég vissi að von væri á honum heim eftir þriggja daga legu, þræðingu og fleira. Krakkarnir fóru öll út að hjóla og leika sér en við pabbi fórum í gegnum það hvort okkur vantaði eitthvað úr búðinni. Það reyndist ekki vera.

Dagurinn flaug áfram. Við vorum með matinn um sex og ég setti Huldu í rúmið um hálfátta. Hún sofnaði eiginlega á stundinni. Eins og venjulega leyfði ég strákunum að horfa á Spaugstofuna áður en þeir fóru í rúmið. Þeir voru líka fljótir að sofna. Þá laumaði ég mér út úr húsi og inn í annað (til eldri konu sem ég er búin að þekkja lengi) neðar í götunni. Stoppaði góða stund en var komin tímanlega "heim" áður en Taggart byrjaði.

(Birta er semsagt jafnaldra strákanna og voru þau saman á leikskóla en nú er hún í Háteigsskóla (þar sem þeir eiga reyndar skólasókn líka ef þeir væru ekki í Ísaksskóla)).

Það er kominn mars, mánudagur handan við hornið og skemmtileg helgi rétt að verða liðin. Fyrst verð ég að segja frá hvað ég heyrði strákana mína og Birtu vinkonu og jafnöldru vera að tala saman um seinni partinn á föstudag. (Verst bara að ég veit ekki hvort og þá hver aðdragandinn var) Ég var að leika mér í tölvunni, krakkarnir eru nýkomin inn og ég heyri allt í einu að Birta segir: "Það var gott, Oddur, að þú drukknaðir ekki í fyrra!" Ég legg eyrun við og Oddur svara sallarólegur: "Já, þá hefði þurft að jarða mig." "Og þú gætir ekki farið núna og hitt Ragnar Pál", bætir bróðir hans við, "þú værir ekki til lengur." Lengri urðu þessar pælingar ekki. Skömmu seinna var Birta sótt og strákarnir Davíð kom og fór með strákana á fótboltaæfingu.