Sjósund á eftir

Svaf í einum dúr í fyrri nótt frá klukkan tíu til klukkan að ganga sjö í gærmorgun. Var komin í sund rétt upp úr klukkan átta. Fór beint á braut 7 og synti 500m þar af helminginn skriðsund. Þegar ég var komin í sjópottinn eftir að hafa farið í þann kalda og gufuna kom ein af Sigrúnunum og hrósaði mér fyrir skriðsundið. Sagði að það hefði verið mjög gaman að fylgjast með mér synda rólega og "þokkafullt" yfir laugina. Vá hvað ég var glöð með þetta hrós. Í seinni ferðinni í þann kalda hitti ég á kalda potts vinkonu mína. Þetta var um hálftíu leytið og hún var að mæta á svæðið og ég að fara. Náðum þó þessari ferð saman og sammæltumst um að hittast í Nauthólsvík um tíu á eftir (miðvikudag). Kom heim upp úr klukkan tíu og sýslaði við eitt og annað fram yfir hádegi. Rétt fyrir þrjú sendi nafna mín og frænka, sem hefur verið að hjálpa mér, skilaboð um hvort ég vildi borða með þeim hjónum um kvöldið. Ég þáði það boð en spurði jafnframt hvort hún ætlaði ekki að hitta mig á opnu húsi í Kópavoginum um fimm. Ég var mætt ca 12 mínútum fyrir og frænka mín kom fimm mínútum síðar. Skoðuðum sæta tveggja herbergja íbúð á mjög góðum stað. Íbúð sem getur verið laus strax. Það var þó tvennt sem ég var svolítið hugsi með. Geymslan sem fylgir íbúðinni er sameiginleg þvotta húsinu og innan íbúðar. Semsagt engin auka geymsla utan í sameign. Þótt ég sé búin að vera dugleg að grisja dótið mitt er ég ekki alveg viss um að geta komið því dóti fyrir sem þarfnast frekari yfirferðar og skoðunnar. Svo er bæði baðkar og sturta á baðherberginu. Baðkarið var fyrir en sturtan var sett upp frekar nýlega. Skápaplássið er samt töluvert, eldhúsinnrétting og gólfefni nýlegt og helstu tæki fylgja. Eftir að hafa skoða og gengið um íbúðina og svalirnar tók ég upplýsingapappíra með og við frænkur þökkuðum fyrir okkur. Ég elti svo frænku mín yfir í hæðahverfið í Garðabæ og stoppaði þar til klukkan að verða átta í gærkvöldi. 

Þriðjudagur

Það voru nokkur verkefni á dagskránni í gær. Mætti í sund rétt rúmlega sjö. Fór beint í kalda pottinn og þaðan í sjópottinn þar sem ég hitti þá Sigrúnu sem ég kynntist fyrst af þessum fimm sem ég hitti mis reglulega í sundi. Við spjölluðum í dágóða stund og urðum svo samferða í gufuna. Stoppuðum þar í um fimm mínútur og settumst svo smástund á stól til að sóla okkur og halda spjallinu áfram. Rétt fyrir hálfníu var ég mætt í osteostrong. Komst strax að. Bætti mig á einu tæki. Eftir tímann fékk ég að geyma bílinn þar sem ég lagði þegar ég mætti á meðan ég skrapp labbandi í hsm við Borgartún 21 til að sækja skjöl til undirritunar og þinglýsingar. Um var að ræða pappíra varðandi lánið sem var tekið þegar Drápuhlið 21, efri hæð var keypt fyrir rétt rúmu tuttuguogeinu ári síðan. Við skilnaðinn varð það útundan að lánið væri alfarið fært yfir á mig þótt íbúðareignin sjálf sé þinglýst á mig og að reikningarnir fyrir láninu hafi verið skráðir á mig sl 11-12 ár. Var komin heim upp úr klukkan hálftíu. Fékk mér hressingu skoðaði pappírana og prófaði kaffikönnuna sem ég fékk að láni hjá pabba. Hún virkaði fínt en ég veit ekkert hvernig kaffið bragðaðist því ég hellti því öllu niður, ca 6 bollum, síðar um morguninn þegar komið var að næsta verkefni. Um tíu hringdi ég í Davíð. Hann svaraði ekki svo ég sendi honum sms. Hann hringdi til baka rúmum hálftíma síðar. Ég sagði honum að við þyrftum að hittast til að ganga frá þessum lána málum. Hann var staddur á skrifstofunni í Ármúla og sagði að hentugast væri að ég kæmi þangað eða hann kæmi til mín. Ég var hins vegar búin að ákveða að fara upp á Gagnveg þar sem N1 sonurinn var á vakt og fá hann og samstarfsmanninn til að votta undirskriftir okkar. Og þar hittumst við um hálftólf leytið. Ég fór svo beinustu leið í Hlíðarsmára 1 til að láta þinglýsa skjölunum. Má sækja þau eftir viku og þá þarf ég að skila þeim aftur til hsm. Var komin heim fyrir klukkan hálfeitt. Restin af deginum fór í aðeins minna sýsl heldur en undanfarið ein eitthvað þó. Hellti m.a. aftur upp á og leyfði kaffinu að standa í hátt í tvo tíma áður en ég hellti því öllu niður. Hringdi bæði í Odd og pabba og reyndar Davíð Stein líka. Talaði við bræðurnar fyrir hádegi, N1 soninn um níu til að kanna hvenær gæti verið rólegast á stöðinni og um hálftíu við Odd sem svaraði líka í fyrsta og lét ágætlega af sér. Í pabba hringdi ég um miðjan dag og lét hann m.a. vita að kaffigræjan sem hann lánaði mér virkar.

Tvöhundraðtuttugastiogþriðji dagur ársin

Vaknaði um hálfsjö í gærmorgun eftir rúmlega átta tíma svefn. Skrapp fram á pisseríið og gerði tilraun til að kúra mig lengur niður. Lá svo sem slök í einhvern tíma en sofnaði ekki aftur. Klæddi mig um hálfátta leytið og kveikti á tölvunni hans pabba. Pabbi kom fram rúmum klukkutíma síðar en hann var reyndar búinn að kom fram fyrir klukkan sex, skrá niður helstu tölur og fá sér eitthvað. Ég varð ekkert vör við það. Við ákváðum að hafa folaldakjöt í hádeginu. Fasteignasalinn sendi mér yfirlit til samþykktar og auglýsti opið hús og íbúðina mína til sölu. Ég stoppaði hjá pabba fram á miðjan dag. Sátum góða stund út á palli í bongó blíðu. Var komin í bæinn rétt fyrir sex. Kom aðeins við í Krónunni í Skeifunni. Mætti til tvíburahálfsystur minnar upp úr klukkan hálfátta og var boðin í veislumat. Hún skannaði yfirlýsingar fyrir mig sem ég sendi á fasteignasalann. Margt var spjallað og tíminn flaug, ég var ekki komin heim aftur fyrr en klukkan var langt gengin í ellefu. 

Á Hellu í augnablikinu

Vaknaði um hálfsjö í gærmorgun. Var mætt í sund fljótlega eftir að opnaði um átta. Fór beint á braut 7 og synti 500m, þar af 200m skriðsund. Klukkan hálftíu var ég mætt á Sólvallagötuna í esperanto hitting. Klukkutíma síðar kom Inger með mér yfir í Drápuhlíðina til að fá að skoða umbreytinguna. Eftir að hún var farin sýslaði ég við eitt og annað. M.a. kom ég öllu "óviðkomandi" dóti úr augsýn. Þegar fasteignasalinn kom um eitt leytið var ekki svo mikið sem hægt var að setja út á og raunar var íbúðin tilbúin undir myndatöku svo hún ákvað að taka myndirnar sjálf. Veðrið var mjög gott í gær og glugginn og veggurinn úr herberginu sem Oddur var í leit út eins og málverk. Líklega fer þá auglýsing út á vefinn á veraldarvefinn mjög fljótlega. Seinni part dags ákvað ég svo að skreppa austur til pabba með kassa merktum Helgu systur. Var komin á Hellu um sex og ætla að stoppa eitthvað fram á daginn.

Færsla no 4390

Ég svaf aðeins lengur en marga undanfarna daga en ég var þó komin á fætur á níunda tímanum í gærmorgun. Oddur kom fram ekkert löngu síðar, hafði sofið vel sína þriðju nótt í stofunni og líklega þá síðustu í Drápuhlíðinni. Ég bjó til hafragraut um níu leytið. Um tíu skrapp ég í Nauthólsvík. Það var stafalogn, að fjara út og sjórinn 12°C. Synti út að kaðli. Hefði líklega getað vaðið allan þann spöl. Fór beint í gufu í 10 mínútur og svo aftur út í sjó í nokkrar mínútur. Svo fór ég beint upp úr og skolaði aðeins á mér tærnar og sundbolinn. Þegar ég kom heim var Davíð Steinn mættur á svæðið og var að taka til afganginn af dótinu sínu. Hann setti í síðustu þvottavélina svo það er ekki alveg allt farið. Bræðurnir hjálpuðu mér að yfirfara ýmislegt og fóru í síðustu sorpuferðina í bili um þrjú leytið. Til stóð að pabbi þeirra kæmi á flutningabíl fyrir Odd og mest af dótinu hans um fimm leytið. Strákarnir voru búnir að fá nágrannann á neðri að færa annan bílinn sinn og bera allt dótið út í innkeyrslu um fimm. Pabbi þeirra tafðist um rúman klukkutíma þar sem hann læsti bíllykilinn inn í flutningabílnum með tilheyrandi veseni. Þegar hann kom einhvern tímann á sjöunda tímanum, á mjög stórum flutningabíl, tók það ekki svo langan tíma að ferma bílinn. Mesta vesenið var að bakka bílnum í innkeyrsluna og fékk tré úr garði nágrannanna á no 23 að finna fyrir því. Tré sem breiðir úr sér yfir í innkeyrsluna á 21. Er að öllu jöfnu ekkert fyrir þannig séð. En flutningabíllinn var stór eins og fyrr er skrifað. Davíð Steinn fór austur á sínum bíl með tölvuskjá, spariföt og úlpu. Ég kvaddi Odd með knúsi. Hann er meira að segja búinn að skila af sér húslyklunum en er alveg reiðubúinn að hjálpa ef á þarf að halda. Pabbi þeirra hafði á orði að ég hefði átt að vera löngu búin að "henda" strákunum út. Sjálf vil ég meina að allt hefur sinn tíma en líklega hefði ég ekki farið alveg strax út í þessar breytingar ef ég hefði ekki misst vinnuna í vor. Núna virðist vera hárréttur tími til að snúa lífinu á enn meira hvolf, minnka við sig og horfa fram á veginn en ekki of mikið í baksýnisspegilinn.

Sjö ár síðan mamma dó

Gærdagurinn hófst mjög snemma. Var komin í sund rétt rúmlega sjö, fór beint á braut 7 og synti 600m, flesta á bakinu en smá skriðsund inn á milli. Ég var komin heim aftur fyrir níu og fór strax að sýsla við eitt og annað. Oddur kom fram skömmu síðar og ég bjó til hafragraut handa okkur. Var nýbúin að borða minn skammt þegar fyrrum samstarfskona hringdi. Eftir gott spjall hélt ég sýslinu áfram. Oddur fór eina ferð í sorpu upp úr klukkan eitt. Þá var að verða ljóst að hann flytur út seinni partinn í dag en þarf ekki að fá bílinn minn lánaðan. Frænka mín og nafna kom um miðjan dag með smá punt í þrjá glugga. Ég var þá langt komin með að þrífa tvo af þessum gluggum. Hún sá alveg greinilegan árangur á sýslinu mínu frá því daginn áður. Oddur var líka búinn að leggja mjög gott lið svo það er að sjá fyrir endann á þessum fasa í breytingunum framundan. Ýmislegt eftir en ég hef daginn í dag og fyrramálið því það er búið að fresta úttektinni til klukkan eitt á morgun. Við Oddur fórum saman í sorpuferð um fimm leytið. Það þurfti samt ekki að hafa aftursætin niðri og nota bene ég var bara í bílnum og lét hann sjá um að fara á milli gáma. Sýslið stoppaði aðeins eftir þetta en ég tók stutta törn um níu leytið áður en ég fór að sofa. 

Tíminn æðir áfram

Í gær var þriðji miðvikudagurinn á árinu sem ég sleppti sjósundinu. Var mætt í Laugardalslaug upp úr klukkan sjö. Fór beint á braut 7 og synti 500m þar af 150m skrið. Eftir fjórar mínútur í kalda pottinum og 12 mínútur í gufunni skellti ég mér í kalda sturtu áður en ég fór í sjópottinn. Á leiðinni heim úr sundi kom ég við í Stakkahlíð og sótti sófaborð var gefins. Oddur var kominn á fætur þegar ég kom heim um hálftíu, sagðist hafa sofið vel í stofunni. Ég bjó til hafragraut handa okkur og svo var sýslað við ýmislegt líkt og marga undanfarna daga. Klukkan hálftólf hringdi ég í flutningamanninn sem kom við annan mann á þriðjudaginn. Hann var tilbúinn að koma strax en gaf mér þó klukkutíma og kom við annan mann um hálfeitt. Líkt og í fyrradag var ýmislegt látið fljúga fram af svölunum. Þriggja sæta parturinn af stofusófanum var þó borinn niður. Verkið kláraðist á vel innan við klukkutíma. Oddur fór svo aukaferð í sorpu skömmu síðar. Ein frænka mín og nafna mætti til mín um miðjan dag og lagði mér lið í uþb tvær klukkustundir. N1 sonurinn var að vinna í gær en kom svo beint eftir vinnu til að taka dót. Hann gat ekki tekið alveg allt svo við Oddur skruppum saman eina ferð með eitt og annað í snjallgeymsluna. Enn sem komið er ég ekki búin að ákveða hvað af mínum geymsluhlutum fer þangað. Þarf aðeins að sortera sumt betur. Það eru mörg verkefni framundan næstu dagana en mér finnst ég þó vera langt kominn með vissan áfanga. Allt hefur sinn tíma, sumt er að gerast nokkuð hratt og annað tekur aðeins lengri tíma eins og gengur. 

Flutningabíll í gær og aftur í dag

Líkt og oft áður var ég vöknuð fyrir klukkan sex í gærmorgun. Sinnti morgunrútínunni og dreif mig svo í sund áður en klukkan varð sjö. Þar fór ég beint á braut átta og synti 500m á rétt rúmum 20 mínútum. Hitti aðeins á sjósundsvinkonu mína, fyrst þegar ég var nýbúin að synda og svo aftur þegar ég var að fara upp úr klukkan átta. Dagurinn fór svo í alls konar sýsl. Synirnir komu fram á tíunda tímanum og um ellefu var annar sonurinn farinn í fyrstu ferð með dót frá sér yfir á nýja staðinn. Fljótlega eftir að hann fór setti ég mig í samband við FL flutninga og þeir gátu sent mér bíl og aukamann upp úr klukkan eitt. N1 sonurinn þurfti því að koma mun fyrr yfir aftur heldur en hann reiknaði með. En hann kom um hálfeitt og var búinn að skrúfa sundur tölvuskápinn þegar strákarnir á flutningabílnum komu. Báðir synirnir tóku þátt í að ferma bílinn af dóti sem mátti fara. M.a. fengu hlutir að fljúga fram af svölunum. Ekki komst allt með í þessari ferð en það dót fer í dag. Rúmið hans Odds var skrúfað í sundur og dót sem fara á með ferðinni í dag var sett inn í herbergið sem hann hefur haft afnot af sl 15 ár. Hefði getað búið um hann í herberginu sem bróðir hans var að losa í gær en hann vildi frekar hreiðra um sig í stofunni. Eins gott að sófinn komst ekki með í ruslferðinni í gær. Oddur er búinn að pakka að mestu en hann mun líklega ekki flytja alveg út fyrr en í vikulokin. Í millitíðinni mun hann þá geta hjálpað mér með hluta af þeim undirbúningi sem eftir er. Frænka mín og nafna kíkti aðeins við seinni partinn og mun vera í sambandi og á svæðinu til að hjálpa fram að helgi.

Breytingar

Í gær ákvað ég að drífa mig í sjósund. Á sumartíma opnar aðstaðan í Nauthólsvík klukkan tíu alla morgna og það er sumartími fram til 19. ágúst. Ég var því mætt um tíu enda löngu vöknuð. Sjórinn 12,5°C og ég synti út að kaðli. Nokkrar hressar konur í tveimur hópum syntu alveg yfir í Kópavog. Var komin heim aftur um hálftólf, hress og endurnærð. Dagurinn fór svo í alls konar sýsl líkt og undanfarna daga. Ég er ekki tilbúin að skrifa meira um það sem stendur nema það gengur ágætlega en mér finnst ég samt vera aðeins á eftir áætlnum en þó ekki. 

Frídagur verslunarmanna

Það varð ekkert úr sjó- eða sundferð í gær þótt ég væri vöknuð eldsnemma. Einmitt af því að ég vaknaði of snemma þá ákvað ég að skríða aftur upp í og halda áfram lesa seinni bókina sem ég sótti síðast á safnið. Las í tæpa tvo tíma og þá var klukkan hálfátta. Gerði tilraun til að sofna aðeins aftur. Sú tilraun stóð yfir í ca hálftíma áður en ég ákvað að klára bókina. Var komin á fætur upp úr klukkan níu. Um hálfellefu bjó ég til næstum fullan pott af hafragraut. Þegar ég var búin að fá mér að borða af honum ákvað ég að ræsa synina og bjóða þeim að fá sér. Hafði orðið vör við að vekjara þeirra fór í gang um tíu. Þeir komu fljótlega fram og fyrri parturinn af deginum fór í alls konar undirbúning og sýsl bæði hjá þeim og mér. Um fjögur fóru þeir til pabba síns og komu við í sorpu í leiðinni. Ég skrapp í stuttan göngutúr um fimm leytið, tæpa 2km. 

Verslunarmannahelgi

Ég var komin í sund rétt upp úr klukkan átta. Hitti aðeins á sjósundsvinkonu mína en hún var að fara beint í pott en ég fór á braut 8 og synti 500m, þar af uþb 150m skriðsund. Úr sundi fór ég beinustu leið vestur í bæ í esperanto hitting. Fékk svo að skilja esperantodótið mitt eftir hjá Inger. Þegar ég kom heim stuttu fyrir klukkan tólf voru báðir bræðurnir komnir á fætur. Sýslaði við eitt og annað fram eftir degi. Strákarnir skruppu í eina sorpuferð seinni part dags. Ég fór með gler í gáminn við Öskjuhlíð um svipað leyti og í stuttan göngutúr í kjölfarið. Það hægði á vinnugleðinni eftir því sem leið á daginn og á sjöunda tímanum kveikti ég á imbanum og gerðist sófakartafla þar til kominn var tími til að fara í háttinn. Bræðurnir fóru saman í bíó á tíunda tímanum og ég var löngu sofnuð áður en þeir komu heim aftur. 

Skrepp

Gærdagurinn byrjaði fyrir klukkan sex hjá mér. Var samt ekki mætt í sund fyrr en rúmlega sjö. Fór beint á braut 7 og synti 500m á tuttugu og tveimur mínútum. Kláraði afganginn af sundferðinni á rúmum hálftíma og var komin heim upp úr klukkan hálfníu. Afgangurinn af morgninum fór svo í alls konar sýsl, m.a. að undirbúa komu meindýraeyðirs. Bræðurnir komu tiltölulega snemma fram og lögðu sitt af mörkum. Meidýraeyðirinn kom um hálfeitt. Aðgengi var inn í allar íbúðir, geymslur og sameign frá kjallara upp í ris og allir íbúar "flúðu" út og héldu sér í burtu í amk þrjá tíma. Við mæðginin fórum á bíl N1 sonarins og gerðum okkur ferð austur á Hellu til að kíkja á pabba/afa. Vorum komin þangað upp úr klukkan hálfþrjú og stoppuðum í hátt í fjóra tíma. Pabbi leit vel út og lét vel af sér. Hann var í fyrstu að hugsa um að skella í pönnsur en svo var ákveðið að grilla í staðinn. Vorum komin heim aftur um níu leytið.

Nýr mánuður

Ég var mætt í sund og á braut 2 um sjö í gærmorgun. Synti flestar ferðir á bakinu því ég þvoði mér um hárið þegar ég var búin með prógrammið. Var komin heim upp úr klukkan níu. Gærdagurinn, líkt og undanfarnir dagar, fór í alls konar sýsl. Farnar voru tvær ferðir í sorpu þar sem slatti fór í nytjagám. Davíð Steinn fékk bílinn sinn úr viðgerð og losnaði í kjölfarið við endurskoðunar miðann.  

Síðasti júlídagurinn í ár framundan

Ég var komin á fætur um sex í gærmorgun. Nýtti morguninn óvenju vel miðað við oftast áður. Dreif mig svo í Nauthólsvík um tíu. Það var háflóð og sjórinn 12,5°C. Dásamlegt að skella sér út í og svamla um í uþb korter. Fór eina ferð í gufuna, smá stund í lónið og nokkrar mínútur í pottinn. Á heimleiðinni kom ég við á planið hjá ÓB í Öskjuhlíðinni til að athuga með og jafna loftþrýstinginn á dekkjunum. Hann var í lagi á þremur dekkjum af fjórum. Dagurinn var nýttur alveg þokkalega vel og ég sé alveg að það saxast á verkefnin. Ég fékk mér þrjá stutta göngutúra að málm og glergámunum við Eskihlíð og bræðurnir fóru tvær ferðir í sorpu. Þeir eru langt komnir með að fara yfir og flokka dótið sitt. Ég er eiginlega búin að tæma geymsluna af dóti sem má fara og er farið. Á bara eftir að taka ákvörðun um nokkra hluti. Það er auðvitað alveg nóg af verkefnum eftir en ég er bjartsýn á að þeir fari langt með að kláras um og upp úr helginni. 

Mið vika

Ég var komin á fætur skömmu fyrir klukkan sex í gærmorgun. N1 sonurinn kom fram um sjö leytið og upp úr klukkan hálfátta, eða rúmlega það, keyrði hann bílinn sinn á verkstæði í Breiðholtinu. Ég fór fljótlega á eftir honum og sótti hann. Gærdagurinn var annars nýttur þokkalega hjá okkur öllum þremur. Bræðurnir eru komnir vel á veg með að "moka" í gegnum og yfirfara dótið sitt. Um tvö fóru þeir saman eina ferð á sorpu á bílnum mínum. Ferðina notuðu þeir líka til að sækja 20 pappakassa og lok en ein frænka mín þekkir fólk sem rekur verslun sem er að gefa þessa kassa. Frænka mín var milliliður í að fá samþykki til að nálgast þessa kassa. Um sex leytið bauðst ég til að bjóða strákunum með mér á Prepp barinn en þar er alltaf tilboð á þriðjudögum. Oddur var upptekinn og sagði pass. En Davíð Steinn þáði þetta boð þar sem í bili var ekki hægt að matreiða sér neitt í eldhúsinu. Hann fékk að keyra. Svo notuðum við tækifærið og skruppum til tvíburahálfsystur minnar. Davíð Steinn skutlaði mér til hennar og skrapp í smá pokaleiðangur. Vorum komin heim á níunda tímanum. 

Þriðjudagur

Var vöknuð alltof snemma í gærmorgun. Mætti í sund um sjö. Synti 400m, fór tvær ferðir í þann kalda og eina í sjópottinn. Var svo komin í osteostrong tíma rétt fyrir hálfníu og heim hálftíma síðar. Dagurinn fór í alls konar sýsl. Oddur fór tvær ferðir í sorpu. Í fyrri ferðinni fór hann á þrjá staði til þess að geta losað sig við dót í nytjagám. Ég fór með honum í seinni ferðina í Ánanaust og notaði tækifærið og fór í Krónuna í leiðinni. Um hálfátta var ég mætt til tvíburahálfsystur minnar. Stoppaði hjá henni í rúma tvo tíma. Hún prentaði út fyrir mig skjal sem ég þarf að fylla út. Það er nóg framundan og það koma andartök þar sem mér finnst ég ekki ná alveg utan um allt en tilfinningin er samt aðallega sú að þetta séu rétt og nauðsynleg skref.

Dagurinn byrjar snemma í dag

Í fyrrakvöld var klukkan orðin ellefu áður en ég fór að sofa. Ég vaknaði svo útsofin um hálfsjö í gærmorgun. Var mætt í sund rétt eftir opnun, fór beint á braut 7 og synti 700m. Gaf mér góðan tíma í alla rútínu þannig að klukkan var að verða hálfellefu þegar ég kom heim aftur. Fljótlega skrapp ég út með fullan höldupoka af gleri í glergáminn við Eskihlíð 1 og hélt svo göngunni áfram. Síminn skráði rúma tvo km á tæpum hálftíma. Klukkan var að verða tólf þegar ég kom heim og skömmu síðar kom Oddur fram. Ég bauð honum upp á fiskibollur og rósakál sem hann þáði. Svo fór afgangurinn af deginum í alls konar sýsl líkt og undanfarna daga. Er með það í huga að vera dugleg að henda eða gefa frá mér en ég fann samt fjársjóði sem halda verður upp á. Ekki var farin nein sorpu ferð en það er líklega búið að safna upp í amk 2 ferðir. Á áttunda tímanum í gærkvöldi skrapp ég á bílnum með tvo svarta poka af textíl í textílgám sem er staðsettur í Suðurhlíðunum rétt við Fossvogskirkjugarð austan megin. 

Rífandi gangur með góðri hjálp

Ég var mætt í sund rétt upp úr klukkan átta í gærmorgun, stuttu eftir að opnaði. Fór beint á braut 7 og synti 500m. Um hálftíu var ég komin vestur í bæ til norsku esperanto vinkonu minnar. Við lásum rétt rúmlega blaðsíðu af Kon-Tiki. Áður en ég fór heim aftur kom ég aðeins við í BYKO. Fljótlega eftir að ég kom heim komst hreyfing á synina. Ferðalangurinn kom þó fram nokkru á undan. Tvíburahálfsystir mín hafði samband upp úr klukkan eitt og mætti svo í eigin persónu fljótlega eftir það. Margar hendur vinna létt verk. Davíð Steinn hjálpaði Oddi að ferma bílinn minn af dóti sem fara átti í sorpu. Sá fyrrnefndi lagði svo af stað í tjaldferðalagið sem ég sagði frá í gær. Oddur fór tvær ferðir í sorpu og við tvíburahálfsystir mín hjálpuðum honum að ferma bílinni fyrir seinni ferðina. Ég er þakklát fyrir hjálpina. Það þurfti engan göngutúr til að koma skrefum gærdagsins yfir 4500, fóru reyndar yfir 5500. 

Laugardagur

Gærdagurinn var alls konar. Hófst frekar snemma og fór allur í alls konar sýsl. Fór ekkert út úr húsi en tvær ferðir í geymsluna. Verkefnin eru fjölmörg og virðast fjölga frekar en hitt. Það er sem sagt allt að komast á fullt og framundan eru miklar breytingar og ný ævintýri. Davíð Steinn kom heim úr viku ferðalagi en er svo að fara strax aftur í 1-2 daga útilegu. Oddur er byrjaður að taka til hendinni í "sínu" herbergi. Skrúfaði m.a. niður rafmagns-trommusettið sem hefur ekki verið í notkun mörg undanfarin ár.

Verkefni

Ég var komin á braut 7 rúmlegakorter í átta í gærmorgun. Synti 700m, flesta bak-skrið, á rétt rúmum hálftíma. Var komin heim aftur á tíunda tímanum. Sinnti hinum ýmsu verkefnum til klukkan að verða hálftólf. Um tólf var ég mætt í heimsókn til einnar fyrrum samstarfskonu vestur í bæ og önnur fyrrum samstarfskona kom skömmu síðar. Var komin heim aftur stuttu fyrir tvö. Hálftíma eftir að ég kom heim mætti ein vinkona mín sem er fasteignasali og rétt á eftir henni nafna mín og frænka sem var að hjálpa mér á miðvikudaginn. Eftir að vinkona mín var farin fórum við frænkurnar í sorpu á Dalveginum. Megnið af því sem við vorum að losa fór í nytjagám. Næst lá leiðin í rúmfatalagerinn í Kópavogi. Þar fjárfesti ég í kössum. Ég fór líka í Bónus sem er þarna skammtfrá, eingöngu til að fjárfesta í nokkrum rúllum af hvítum/glærum stórum pokum. Klukkan var orðin hálffimm þegar frænka mín skilaði mér heim aftur. Sýslaði við eitt og annað alveg þar til ég kveikti á sjónvarpinu um hálfsjö. Fór óvenju snemma í rúmið en ég las líka í rúman hálftíma. Var sofnuð áður en klukkan varð tíu. 

Hreyfingar

Var komin á fætur og búin að gera lóðaæfingar fyrir klukkan sex í gærmorgun. Miðvikudagar eru sjósundsdagar og í gær var ég búin að mæla mér mót við kaldapotts vinkonu mína þegar opnaði í Nauthólsvík kl. tíu. Sjórinn var 14°C og við fórum þrisvar út í hann, tvisvar í gufuna en ég fór aðeins einu sinni í pottinn. Á leiðinni heim kom ég við hjá ÓB í Öskjuhlíð til að jafna þrýstinginn í dekkjunum. Þegar heim kom, stuttu fyrir tólf, var Oddur kominn á fætur en hann átti fund hjá Vinnumálastofnun um eitt. Ég var búin að fá skilaboð frá einni frænku minni og nöfnu sem og vinkonu minni sem er fasteignasali. Sú síðarnefnda var að athuga hvort hún mætti kíkja á mig og íbúðina og skoða aðstæður í dag, fimmtudag. Ég lét hana vita að hún væri velkomin, væri búin að undirbúa slatta en íbúðin yrði ekki tilbúin fyrir myndatöku fyrr en um mánaðamótin. Svaraði einnig frænku minni sem hringdi skömmu síðar. Hún var komin til mín um hálfþrjú leytið og á næstu tveimur tímum gerðist alveg helling. M.a. gátum við sent Odd í eina sorpuferð með eitt og annað úr geymslunni. Ég verð sífellt tilbúnari fyrir frekari breytingar og hef mjög góða tilfinningu fyrir þessu öllu saman. Auðvitað er hugurinn oft líka að spá í hvað sé réttast og best og svarar stundum með mismunandi svörum en yfirleitt kemst ég alltaf að sömu niðurstöðu; Skrefin sem ég er að stíga eru nauðsynleg og rétt.

Synirnir 29 ára í dag

Í gærmorgun var ég mætt í sund rétt rúmlega sjö, þá búin að vera á fótum í hátt í tvo tíma. Fór beint á braut 7 og synti 600m á 27 mínútum. Í heildina tók rútínan tæpar 2 klst. Var komin heim fyrir klukkan hálftíu. Á næsta klukkutímanum eftir það fór ég nokkrum sinnum upp og niður tröppurnar milli íbúðar og geymslu. Það sem kom með mér upp úr geymslunni voru kassar og dót sem ég var handviss um að ekki þyrfti að geyma lengur. Þegar Oddur kom á fætur upp úr hádeginu hjálpuðumst við að við að flokka og fara með út í bíl. Setja þurfti aftursætin niður og sumt var einnig sett farþegamegin fram í bíl. Oddur sá svo um að ferja þetta yfir í sorpu og setja í réttu gámana og tók það merkilega stuttan tíma. Ég fór hins vegar í samskonar göngutúr og á mánudaginn milli þrjú og hálffjögur. Seinna um daginn leyfði ég mér að grípa aðeins í saumana. Þar eru allir heilir krossar búnir en slatti eftir af hálfu spori og allar útlínur. Horfði líka á leikinn milli Englands og Ítalíu í fyrri undanúrslitaleik á EM kvenna.

Án athugasemda

Gærdagurinn byrjaði í fyrra fallinu. Ég hefði alveg geta mætt í sund strax við opnun en úti var mikil mengun og ég var alvarlega að spá í að sleppa sundinu. Þegar til kom var ég mætt í Laugardalinn um sjö og fór beinustu leið í þann kalda. Eftir kælinguna sá ég þá Sigrúnu, sem ég kynntist fyrst í Laugardalnum fyrir um tíu árum síðan, þar sem hún var á leiðinni í sjópottinn. Ákvað að elta hana þangað og svo þaðan eftir 15 mínútur og gott spjall smá stund í gufuna. Leiðir skildu þegar ég fór seinni ferðina í þann kalda. Synti 200m áður en ég fór upp úr og beint í osteostrong. Var mætt þangað á slaginu hálfníu og komst strax að. Þrátt fyrir linkuna daginn áður stóð ég mig vel í tækjunum. Sló þó engin met að þessu sinni. Sjö mínútum fyrir níu kvaddi ég og labbaði út af staðnum. Ákvað að renna við hjá Frumherja við Grensásveg. Komst strax að og fékk fulla skoðun án athugasemda og gulan 26 miða á númeraplöturnar. Kom heim stuttu fyrir klukkan hálftíu. Stoppaði heima í um hálftíma og skrapp svo á Kringlusafnið og skilaði öllum bókum nema Kon-Tiki, framlengdi skilafrestinum á henni um 30 daga. Kom svo aðeins með tvær bækur með mér heim. Áður en ég fór inn úr bílnum hringdi ég tvö símtöl. Klukkan var að verða ellefu þegar ég kom heim/inn. Lungan úr deginum notaði ég svo í alls konar sýsl. Um hálftvö skrapp ég með málm í gáminn við upphafsenda Eskihlíðar. Úr þeirri ferð gerði ég tuttugu mínútna göngutúr. Um hálfníu leytið í gærkvöldi hringdi ein nafna mín og frænka í mig. Hún var á leið vestur í bæ að vökva blóm og þar sem ég var heima sammæltumst við um að hún myndi kíkja við í bakaleiðinni. Hún var komin til mín um níu og stoppaði við í rúman hálftíma. Ég var komin upp í rúm um tíu, las í stutta stund en var örugglega sofnuð um hálfellefu.

Mánudagur

Ég var komin á stjá fyrir klukkan sex í gærmorgun eftir ágætis nætursvefn. Um það leyti sem ég vaknaði fór ég þó að finna fyrir leiðinda ólgu í maganum. Fann þó ekki fyrir neinni annars konar linku. Ákvað að sleppa því að fara nokkuð út og fasta fram að hádegi. Var bara í vatninu. Um hálfeitt borðaði ég afgang af hafragraut frá því á föstudaginn. Maginn var ekkert að kvarta yfir því amk ekki strax.  Eða hvort það var eitthvað sem ég fékk mér um miðjan dag sem fékk magann til að ólga aftur seinni part dagsins. Hvað sem þetta var þá tel ég það vera liðið hjá. Dagurinn leið frekar hratt þrátt fyrir að vera innipúki en ég var farin að sofa um tíu í gærkvöldi.

Mengun

Ég var mætt í Laugardalslaug rétt rúmlega átta í gærmorgun eða nokkrum mínútum eftir að opnaði. Eftir 500m sund, eina ferð í þann kalda og korter í gufunni hitti ég á sjósunds vinkonu mína í nuddpottinum. Við urðum svo samferða yfir í sjópottinn. Sá pottur var í heitara lagi en þá brá ég (og fleiri) á það ráð að setjast á kantinn og hafa aðeins fæturnar upp að hné ofan í. Fór aðra ferð í þann kalda áður en ég fór upp úr. Var mætt til norsku esperanto vinkonu minnar rétt rúmlega tíu. Við lásum tvær bls. í Kon-Tiki. Var svo komin heim skömmu fyrir klukkan tólf. Afgangurinn af deginum var nýttur í alls kyns sýsl. 

Laugardagur

Gærdagurinn byrjaði í fyrra fallinu. Var komin á ról fyrir klukkan sex, gerði nokkrar æfingar með 2kg lóðunum, fékk mér sítrónu vatn, burstaði tennur og settist svo niður í stofu með fartölvuna í fanginu. Var búin að slökka aftur á henni um átta leytið. Á tíunda tímanum bjó ég mér til hafragraut og svo var ég mætt í Nauthólsvík um tíu. Strandskórnir gleymdust heima en ég tiplaði berfætt út í 13,9°C sjóinn og svamlaði út að kaðli í samfloti við aðra sem líka var berfætt. Hún skildi þó sína skó viljandi eftir heima. Ekkert mál var að fóta sig upp hjá kaðlinum. Ég dýfði mér aðeins ofan í lónið áður en ég fór í gufu. Fór ekki aftur út í sjó en aðeins í pottinn. Var komin heim aftur upp úr klukkan ellefu. Fljótlega eftir að Oddur kom á fætur upp úr hádeginu fórum við með nokkra poka fulla af ýmsu dóti út í bíl. Hann hleypti mér út við Krónuna við Fiskislóð og þegar ég var búin að versla var hann búinn að fara í Sorpu. Fór líka í Byko og keypti tvo hluti og einnig í Elkó þar sem ég fjárfesti í hleðslubanka fyrir gsm símann. Áður en við fórum heim aftur keypti ég þvott á bílinni hjá Löðri þarna skammt frá. 

Færsla no fjögurþúsundþrjúhundruðsextíuogátta

Í gærmorgun ákvað ég að snúa aðeins á rútínuna. Vaknaði ekki fyrr en korter fyrir sjö. Sennilega vegna þess að einhverra hluta vegna rumskaði ég upp úr miðnætti eftir uþb tveggja tíma svefn og þótt ég þyrfti ekki á salernið og gerði mitt besta til að kúra mig niður aftur þá "slökknaði" ekki almennilega á mér fyrr en milli klukkan tvö og þrjú. Sjálfsagt voru það einhverjar hugsanir sem hringsnérust í kollinum á mér og töfðu fyrir að í dytti almennilega inn í draumalandið. Rámar samt í það að mig hafi dreymt frekar furðulegan draum seinna um nóttina. Ég fékk mér sítrónuvatn og sinnti morgunverkunum á baðherberginu en var svo komin í sund milli sjö og hálfátta. Kom heim aftur um hálftíu. N1 sonurinn, sem er í sumarfríi þessa dagana, kom fram skömmu síðar. Hann kvaddi á ellefta tímanum og lagði af stað norður í land. Hann og Hulda frænka ætla að ferðast saman um norð-austanvert landið næstu dagana. Annars fór dagurinn í alls konar sýsl, var samt eiginlega ekki nógu dugleg að halda mig að verki. Því meira sem ég geri finnst mér stundum líkt og enn meira eigi eftir að gera. Um fimm leytið skrapp ég loks út að viðra mig. Rölti upp á veðurstofuhæð, 0,7km á 11 mínútum og settist á bekk þar. Hélt för aðeins áfram tæpum hálftíma eftir að ég settist á bekkinn. Labbaði þá 1,1km á tæpum 14 mínútum og settist aftur á bekk rétt við Stakkahlíð og Barmahlíð. Sat þar líklega í tæpar tíu mínútur áður en ég fór heim.

Byrjaði þennan dag á sundferð

Ég var búin að vera á fótum í rúman klukkutíma þegar ég "frétti" fyrst að það væri enn og aftur byrjað að gjósa á Reykjanesinu. Ég var fljót að kveikja á sjónvarpinu eftir að ég sá tilkynninguna á vedur.is. Að öðru leyti var miðvikudags rútínan svipuð. Útbjó mér hafragraut á tíunda tímanum og var komin í Nauthólsvík um það leyti sem aðstaðan var að opna um tíu. Á svipuðum tíma mættu þrjár úr gamla sjósundshópnum og þar að auki sonur einnar þeirrar. Við urðum öll samferða út í sjó, svömluðum þar um í rúmar tuttugu mínútur og sátum svo rúman hálftíma í pottinum. Ég var fyrst af okkur til að kveðja og fara upp úr. Kom heim stuttu fyrir klukkan tólf og horfði auðvitað á aukafréttatímann í hádeginu. Fram eftir degi var ég svo að sýsla við ýmislegt. Um hálffjögur skrapp ég svo loksins út aftur í það sem átti að verða stutt ganga og varð að tveimur stuttum göngutúrum þar sem ég sá ein frænda minn úti við þar sem hann býr í Norðurmýrinni og við spjölluðum saman í rúmar tuttugu mínútur. Kom heim aftur stuttu fyrir klukkan fimm.

Tólfta eldgosið á Reykjanesi hafið

Mig rámar í að hafa rumskað einhvern tímann á fjórða tímanum í fyrrinótt. Það var greinilega mjög stutt rumsk, þurfti ekki á salernið og man ekki meira eftir mér fyrr en ég vaknaði um hálfsex. Viðeyjardagurinn hefur greinilega gert mér mjög gott. Var heldur ekki með neina strengi eftir allt röltið. Klukkan var langt gengin í átta þegar ég var mætt á braut 8 í Laugardalslaug. Sundrútínan tók tæpa tvo tíma með öllu og svo fór ég beint heim aftur og fékk mér smá hressingu. Dagurinn, framan af, var svo notaður í alls konar dútl. Um eitt leytið rölti ég af stað með nokkra poka sem ég þurfti að losa í gámana í Eskihlíð. Var með tvo fatapoka, einn poka af glerkrukkum og smávegis í poka af málmi. Losaði mig við glerið og málminn en leist ekkert á textílgáminn og rölti yfir að gámunum við Kjarvalsstaði og losaði mig við fatapokana þar. Hélt svo göngunni aðeins áfram svo þegar ég kom heim aftur var ég búin að ganga tæpa tvo tíma á tæpum hálftíma. Hringdi í pabba. Hann lét bara mjög vel af sér, sat út á palli og fylgdist með þremur piltum á vegum hreppsins slá hólinn fyrir aftan hús hjá honum.

3/4 úr Viðeyjargenginu í Viðey í gær

Líkt og nokkra undanfarna morgna var ég vöknuð eldsnemma í gærmorgun. Ákvað samt að sleppa því að mæta í sund og var að bræða það með mér hvort ég ætti að labba í og úr osteostrong tíma. Ákvað samt að sleppa því líka, þ.e. er labbinu ekki tímanum. Var mætt tuttugu mínútur yfir átta og komst strax að. Var nálægt mínu besta á þremur tækjum og sló met á einu. Var komin heim aftur um níu. Fljótlega útbjó ég mér hafragraut. Um hálfellefu rölti ég af stað með harðfisk, vatnsflösku, lopapeysu og smávegis fleira í bakpoka. Hafði nægan tíma. Stoppaði aðeins hjá sölubásnum hennar Lilju og síminn skráði þar á mig hálftíma göngu. Rétt fyrir hálftólf var ég svo komin niður á gömlu höfnina og keypti mér ferð út í Viðey. Var á undan Inger og Helgu en báturinn fór heldur ekki fyrr en tíu mínútur fyrir tólf. Við þrjár príluðum upp á stýrishús, settumst þar á bekk sem snéri að stefninu. Báturinn kom við á Skarfabakka og sótti fólk þar og svo vorum við komin út í Viðey tuttugu mínútur yfir tólf. Stöldruðum stuttlega við í Viðeyjarstofu þar sem tvær af okkur nýttu salernisaðstöðuna. Svo löbbuðum við austur eftir eynni, með nokkrum smá stoppum t.d. í og við skólahúsið, og alveg að húsi Viðeyjarfélagsins þar sem við settumst niður á bekk og fengum okkur smá nesti. Þegar við komum til baka í Viðeyjarstofu vorum við ákveðnar að skilja eitthvað eftir okkur í eynni. Hinar tvær fengu sér súkkulaði-kókoskúlu og önnur kaffi með. Ég er enn í pásu frá kaffinu og það breyttist ekkert í gær. Aftur á móti leyfði ég mér eitt hvítvínsglas, en vín hef ég ekki drukkið síðan seinni partinn í maí í fyrra. Kaffi hef ég reyndar ekki drukkið síðan 14. október í hittifyrra. Það snarsveif auðvitað á mig af víninu og ég varð ennþá málglaðari en oftast. Við röltum svo vestur eftir eynni, upp á einn hól, niður aftur og að tveimur af 18 súlum sem eru þar. Ákváðum að í næstu ferð skyldum við byrja á að fara þessa leið og fara allan hringinn og skoða allar súlur. Hér áður fyrr var mikið um kríur á þessu svæði en þær hafa varla sést í eynni sl. ár. Við komum svo í Viðeyjarstofu aftur rétt fyrir fimm, nýttum okkur salernisaðstöðuna og ég keypti mér bláan kristal. Tókum svo næstsíðasta bátinn til baka um hálfsex en það er ein af þremur ferðum yfir daginn sem fer alla leið að gömlu höfninni. Flestu ferðirnar á sumartímanum eru frá Skarfabakka á klukkutíma fresti frá kl. 10:15 og síðasta ferðin úr eynni klukkan hálfsjö. Vorum komnar í land skömmu fyrir klukkan sex og ég labbaði heim líka. Settist í smá stund á bekk á Klambratúninu og þá var ég búin að ganga tæpa 3km á 38mínútum. Heildarskrefafjöldi gærdagsins fór líka yfir tuttuguogtvöþúsund skref. Það skal tekið fram að ég þurfti aldrei á lopapeysunni að halda. Var mestan tíman á stuttermabolnum.

Ný vika

Ég var komin á braut 7 í Laugardalslauginni tuttugu mínútur yfir átta. Synti 600m á tæpum hálftíma. Var komin heim aftur á ellefta tímanum. Dagurinn var semi vel nýttur í alls konar sýsl. Á sjötta tímanum ákvað ég að bjóða strákunum út að borða. Það styttist í afmælið þeirra og það er ekki víst að þeir verði báðir á sama stað um það leyti. Fórum á bílnum hans Davíðs Steins. Vorum ekki alveg búin á ákveða hvert þegar við lögðum af stað en enduðum svo á Saffran í Faxafeni. 

Samverustundir með systurdóttur

Gærdagurinn var byrjaður fyrir klukkan fimm í gærmorgun. Tíminn fram að sundferð var nýttur í alls konar, bæði morgunrútinu og fleira. Var mætt í Laugardalinn um það leyti sem verið var að opna um átta. Fór beint á braut 7 og synti í uþb hálftíma eða 600m. Fór beint úr sundi í esperantohitting og var komin þangað um 10. Ég var svo komin heim aftur um hálftólf. Fljótlega fór ég aftur að sýsla við eitt og annað en þegar ég stóð mig að því að vera að fara úr einu í annað settist ég aðeins niður og hringdi í tvíburahálfsystur mína. Eftir gott spjall í hátt í klukkutíma hélt ég sýslinu áfram. Hulda frænka kom um þrjú leytið. Hún kom í bæinn í fyrradag en heldur til hjá vinkonu. Strákarnir voru að undirbúa sig undir heimsókn í Mosfellsbæinn og kvöddu á fimmta tímanum. Milli fimm og hálfsjö gerðum við frænkur okkur ferðir í Sports Direct og Ali Baba. Á fyrri staðnum keypti ég mér tvo nýja sundboli en frænka mín fjárfesti í skóm. Á seinni staðnum bauð ég frænku minni upp á uppáhalds réttinn hennar en fékk mér sjálf fiskrétt. Eftir að við komum heim aftur sat Hulda í smá stund úti á tröppum að njóta veðurblíðunnar. Vinkona hennar sótti hana stuttu fyrir tíu og þá skreið ég upp í rúm og las í smá stund. Bókin Vatnið brennur kemur á óvart. Var ekki alveg að tengja fyrst þegar ég byrjaði að lesa hana en núna verð ég helst að vita hvernig allt tengist og hvernig þetta endar allt saman. Bókin flakkar um þrjú tímabil, nútímann, 1972 og 6000 f. Kr. Hún er óhugnanleg á köflum en einhvern veginn eru sögurnar búnar að "ná mér".

Helgi

Var komin á stjá fyrir klukkan sex í gærmorgun. Í gær var sjósundsdagur og ég var mætt í Nauthólsvík rétt upp úr klukkan tíu. Sjórinn mældist 13°C, það var að fjara út og ég svamlaði og skokkaði út að kaðli á rúmum tíu mínútum. Ég fór aftur í sjóinn eftir 10 mínútur í gufunni og sat svo smá stund í pottinum áður en ég fór upp úr. Þá var klukkan rétt að verða ellefu. Fór beint heim og ekki aftur út fyrr en um þrjú. En þá skrapp ég út í göngu, réttsælis í kringum Öskjuhlíðina með tveimur stoppum. Eftir seinna stoppið sem var þegar ég settist á bekk í Eskihlíðinni. Þaðan var svo stutt heim að það skráðist ekki nein ganga. En það skráðust niður 2,2km og 3,2km. 

Hittingur

Ég var komin á fætur fyrir klukkan sex í gærmorgun en mætti samt ekki í Laugardalslaug fyrr en upp úr klukkan hálfátta. Synti 700m á braut 7, langflesta á bakinu. Þegar ég syndi á bakinu þýðir það að ég þvæ mér um hárið. Þetta gerist svona ca einu sinni í viku. Úr sundi brunaði ég upp á N1 við Gagnveg. Jafnaði þrýstinginn á dekkjunum og var svo að spjalla við N1 soninn og vinnufélaga hans sem átti 25 ára afmæli í gær. Mér skilst að Davíð Steinn hafi bæði sungið fyrir hann og fært honum afmælisköku. Það teygðist aðeins úr spjallinu og klukkan var byrjuð að ganga tólf þegar ég kvaddi og hélt heim á leið. Heima var ég að dunda mér við ýmislegt þar til fyrrum samstarfskona hafði samband og bað mig um að bruna til sín í fjögurra konu hitting. Við fjórar vorum þær sem komu að kortagerðarvinnu þar til henni var hætt í desember á sl. ári. Það var virkilega gott og gaman að hittast. Spjallað um alla heima og geyma og tíminn flaug hratt hjá. Þegar ég kom heim aftur hélt ég sýslinu áfram þar til leikurinn Ísland - Noregur 3:4 á EM kvenna hófst. Ég kláraði líka þriðju bókina af fjórum sem ég sótti síðast á safnið. Aðal skúrkurinn náðist ekki en gat komið því þannig fyrir að annar var handtekinn í hans stað. Það hlýtur að þýða að það eru fleiri bækur um þessar sögur persónur. 

Tíundi júlí

Gærmorguninn var einn af þeim dögum sem byrjaði óþægilega snemma en ég virtist alveg vera útsofin áður en klukkan var einu sinni orðin fimm. Þegar ég gafst upp á að reyna að kúra lengur greip ég í bók af náttborðinu og setti lesgleraugu á nefið og las þar til klukkan var að verða sex. Þá fór ég á fætur og sinnti hefðbundinni morgunrútínu. Vafraði helst til lengi í netheimum en ég var þó búin að leggja frá mér fartölvuna um átta. Um níu leytið útbjó ég mér hafragraut og svo var ég mætt á planið við Nauthólsvík rétt fyrir klukkan tíu. Kalda potts vinkona mín var þá þegar mætt. Sjórinn var rúmlega tólf gráður og það var að fjara meir og meir út. Við fórum þrisvar í sjóinn og tvisvar í gufu og klukkan var um hálftólf þegar við fórum upp úr og kvöddumst. Ég kom við í Fisbúð Fúsa áður en ég fór heim. Keypti m.a. ýsu í soðið og fljótlega eftir að ég kom heim skellti ég hluta af henni í pott og hluta í frysti. Afgangurinn af deginum var alls konar. Ýmislegt gert og hugsað, spekúlerað og spáð. M.a. átti ég mjög langt símtal við eina vinkonu mína sem er fasteignasali. Það skal skrifast og viðurkennast að ég er búin að vera að velta því fyrir mér í ákveðinn tíma að gera breytingar. Stöku sinnum í gegnum sl amk fimm ár hef ég verið að velta fyrir mér ýmsum hlutum og oftar en ekki ýtt þeim svo frá mér og ákveðið að sjá til. En það er pottþétt ekki hægt að "sjá til" alveg endalaust og á einhverjum tímapunkti verður maður að taka ákvörðun um að hrökkva eða stökkva. Ég sem er meira en lítið fanaföst en engu að síður með ágæta aðlögunarhæfileika, syndi bæði með og á móti straumnum og er búin að vera í millibils ástandi sl. mánuði þarf að fara að standa enn betur með sjálfri mér og gera enn frekari breytingar. Veit innst inni að þetta verður allt í góðu lagi, hvernig svo sem hlutirnir þróast. 

Sjósundsdagur framundan

Ég vaknaði útsofin um hálfsex í gærmorgun. Var samt ekki mætt í sund fyrr en um hálfátta. Fór beint á braut 7 og synti 700m áður en ég fór fyrstu ferðina í þann kalda. Ferðirnar í hann urðu þó aðeins þrjár talsins, 2 fimm mínútna ferðir og ein svona rúmlega dýfuferð eitthvað á aðra mínútu. Ég fór líka í gufu, nudd- og sjópott og gerði nokkrar æfingar í rimlum. Sundferðin tók alls tæpa tvo tíma með öllu. Þ.e. er frá því ég stilli símann áður en ég fer inn í klefa þar til ég slekk á stillingunni þegar ég kem út úr klefanum aftur. Forritið í Samung health veit ekki betur en ég sé að synda allan þennan tíma en ég skrái niður glósur um helstu hreyfiverkefni tímans þegar ég slekk á forritinu. Annars var gærdagurinn frekar fljótur að líða við alls konar og ekki neitt. Það er eiginlega alveg ljóst að ekkert fær stöðvað þennan tíma og það er bara spurning um hvernig og hversu vel hann er nýttur. Sjálfsagt gæti ég nýtt hann miklu miklu betur en ætla svo sem ekki að hafa áhyggjur af því. Fann bók í fórum mínum sem ekki er búið að taka plastið utan af en ég ætti kannski að gera og lesa; Lifum lífinu hægar eftir Carl Honoré. En annars er ég byrjuð á seinni tveimur bókum sem ég sótti í síðustu ferð á safnið um daginn; Opið hús eftir Sofie Sarenbrant og Vatnið brennur eftir Gunnar Theodór Eggertsson. Sú fyrrnefnda alveg sérlega spennandi og hin svolítið öðruvísi. Báðar bækurnar í kringum 400 bls. og ég er búin að lesa yfir 60 bls.

Þriðjudagur

Ég var komin í sund um korter fyrir sjö í gærmorgun. Synti í uþb tuttugu mínútur, fór þrisvar sinnum fjórar mínútur í þann kalda, rúmar tíu mínútur í gufu og svipaðan tíma í sjópottinn en þar hitti ég fyrir eina konu sem ég hitti nokkuð oft á árunum 2015-2020 en kemur nú aðeins tvisvar í viku. Alltaf um leið og opnar. Var mætt í osteostrong um hálfníu. Var við mitt besta á flestum tækjunum. Eftir tímann fór ég í Krónuna á Fiskislóð og var komin þangað rétt eftir að opnaði. Var komin heim fyrir tíu. Þar með átti ég að hafa tíma til að gera alls konar og jafnvel koma meiru af "skylduverkunum" í gegn.  Dagurinn leið amk frekar hratt en hversu mikið ég komst yfir að gera skal óskrifað bæði vegna þess að það má ekki skrifa um það og einnig vegna þess að miðað við tímann sem ég hafði fór aðeins brotabrot af honum í þessi verk. Það sat í mér bókin sem ég var síðast að lesa, hámaði í mig á rúmum sólarhring. Þannig að ég var einnig illa sofin. Lagði mig samt ekkert yfir daginn en var komin upp í rúm um níu í gærkvöldi og sennilega sofnuð um hálftíu því ég las bara í smá stund.

Osteostrong

Fannst eins og klukkan væri örugglega að ganga átta þegar ég dreif mig á fætur í gærmorgun. Þá var hún rétt að verða hálfsjö. Pabbi kom fljótlega á fætur líka. Veðrið var mjög gott. Ég fór samt ekki í neinn göngutúr en sat dágóða stund úti á palli eftir hádegið. Pabbi fór út á undan og var aðeins lengur. Ég "flúði" inn þegar mér var orðið alltof heitt. Annars fátt að frétta nema ég las heila bók, sögulega skáldsögu af safninu; Rokið í stofunni eftir Guðrúnu Jónínu Magnúsdóttur. Yfir þrjúhundruð blaðsíður en svo grípandi og átakanleg á köflum, sérstaklega þar sem sagan er byggð á raunverulegum atburðum sem gerðust á stríðsárunum, hvernig brotið var á ungum stúlkum bæði af réttarkerfi og sumu samferðafólki, og fylgir einni persónunni út lífið. Kleppjárnsreykir koma við sögu þegar sögupersónan er á fjórtánda ári. 

Sunnudagur

Ég var komin á fætur einhvern tímann á áttunda tímanum í gærmorgun. Pabbi kom fram ekkert svo löngu síðar. Gærdagurinn var annars bara rólegheita dagur. Um tvö leytið skrapp ég aðeins út og labbaði 3,5km hring á þremur korterum. Kláraði að lesa eina af bókunum sem ég sótti á safnið á miðvikudaginn; Sjúk eftir Þóru Sveinsdóttur. Þessi bók kom út í fyrra, fer fram og aftur í tíma og er nokkuð spennandi. Höfðum urriða í matinn um sex leytið og ég skreið upp í rúm um hálfellefu sem er mun seinna en vanalega.

Er enn að ná utan um það að Diogo Jota og bróðir hans André Silva hafi farist í skelfilegu slysi fyrir þremur dögum. Jota var fæddur sama ár og tvíburarnir mínir og var að gera góða hluti innan vallar sem utan, búinn að vera í fimm á hjá Liverpool. Bróðir hann var fjórum árum yngri. Þetta er svo skelfilega sorglegt. Hugur minn og bænir eru hjá fjölskyldum þeirra, ættingjum og vinum.

Fimmti fjórði

Gærmorguninn byrjaði upp úr klukkan fimm. Greip í bók og las þar til klukkan var að verða hálfsjö. Þá fór ég á fætur og náði að hitta aðeins á N1 soninn sem lagði af stað á helgarvinnuvakt áður en klukkan varð sjö. Ég sinnti morgunrútínunni og hélt svo áfram að lesa. Kláraði aðra af þeim bókum sem ég skildi eftir heima þegar ég fór á safnið í vikunni. Á tíunda tímanum fékk ég mér hinn helminginn af hafragrautnum sem ég útbjó á miðvikudagsmorguninn. Var svo mætt í Nauthólsvík rétt rúmlega tíu. Sjórinn 13°C og ég svamlaði út að kaðli fyrri ferðina sem ég fór út í. Fór upp úr um ellefu leytið og kom við í Fiskbúð Fúsa á leiðinni heim. Verslaði aðeins harðfisk að þessu sinni. Heima fékk ég mér hádegishressingu og pakkaði niður fyrir helgina. Lagði af stað úr bænum rúmlega tólf. Kom aðeins við á N1 við Gagnveg. Ætlaði að athuga þrýstinginn á dekkjunum en það var yfirgefin tezla og svo stór flutningabíll með gaskútum fyrir svo ég komst ekki að loftinu. Heilsaði aðeins upp á soninn. Keyrði austur um Þrengsli eins og ég geri orðið í langflestum tilvikum. Kom við hjá frændfólki á Selfossi og stoppaði við í tæpa klukkustund. Var komin á Hellu til pabba um þrjú. Afgangurinn af deginum fór í útsaum, kapallagnir og fótbolta- og imbagláp og leið mjög hratt. Líklega hefði verið skynsamlegra að safna aðeins fleiri skrefum en stundum þá er maður ekkert endilega mjög skynsamur. 

Föstudagur

Um þetta leyti í gærmorgun, 7:39, var ég að mæta í Laugardalslaugina. Gærdagurinn hófst samt miklu fyrr en ég byrjaði á því að grípa í bók um fimm leytið. Á laugarsvæðinu byrjaði ég á kalda pottinum áður en ég fór á braut 7. Laugin var í heitara lagi en kannski fann ég minna fyrir því þar sem ég synti flestar ferðirnar á bakinu. Synti 1km á rúmum þremur korterum. Fór tvær aðrar ferðir í þann kalda og gerði nokkrar æfingar í rimlum eftir gufu ferð. Þvoði mér um hárið og var komin heim um hálfellefu. Um hálftvö leytið skrapp ég út í göngutúr upp í Öskjuhlíð. Settist niður eftir hálftíma göngu og hringdi í tvíburahálfsystur mína. Við spjölluðum í þónokkra stund og ákváðum svo að hún myndi kíkja við hjá mér eftir vinnu. Hún var komin um fimm og augnabliki síðar var klukkan allt í einu langt gengin í sjö. Fór óvanalega seint í háttinn þar sem ég vildi horfa á Steinsnar frá þjóðvegi í línulegri dagskrá. Endaði svo daginn eins og ég byrjaði með því að lesa um stund. Fór ekki að sofa fyrr en um hálftólf. Gærdagurinn var semsagt langur í báða enda.

Fyrsti leikur gekk ekki alveg nógu vel

Í gær var sjósundsdagur svo ég fór ekki út úr húsi fyrr en rétt fyrir tíu. Þá var ég búin að vera á fótum í tæpa fjóra tíma og vakandi í rúmlega fimm tíma. Bjó mér til hafragraut upp úr klukkan níu. Hitti kalda potts vinkonu mína á planinu við Nauthólsvík um það leyti sem verið var að opna. Sjórinn var 12,4°C og það var að flæða að. Fórum þrjár ferðir í sjóinn, eina í gufu og tvær í pottinn. Fórum upp úr um hálftólf. Ég kom við í bókasafninu í Kringlunni áður en ég fór heim. Skilaði 7 bókum af 9 og tók fjórar bækur í staðinn, allar með 30 daga skilafresti og frekar þykkar. Í hádeginu sauð ég ýsubita í einum potti og sæta kartöflu, brokkolí og gulrætur í öðrum potti. Fljótlega eftir hádegið skrapp ég út í smá göngu. Forritið í símanum skráði á mig 1,2km á korteri en þótt gangan hafi ekki verið mjög löng var hún í heildina eitthvað lengri því skrefin fóru yfir 4000. Sennilega spilar inn í að það var hringt í mig í miðri göngu og ég stoppaði í smá stund og rölti svo miklu hægar og stoppaði jafnvel öðru hvoru á meðan ég var að tala í símann. Á línunni var ein frænka mín og nafna, fimm árum eldri en ég. Eftir að ég kom heim aftur hringdi ég í pabba. Hann var bara nokkuð hress. Hafði lent í meira brasi með sláttuvélina en náði að gera við hana og klára að slá. Kveikti á sjónvarpinu stuttu fyrir fjögur og fylgdist með fyrsta leiknum á EM kvenna; Ísland - Finnland 0:1. Stelpurnar okkar voru ekki líkar sjálfum sér, amk ekki alveg eins ákveðnar og í æfingaleiknum fyrir nokkrum dögum. Fengu þó sín færi sem þær nýttu ekki. Kannski sló magakveisa fyrirliðans þær eitthvað út af laginu og ég veit að þær ætluðu sér að gera betur. Vonandi nýta þær færin sín betur í þeim leikjum sem eftir eru í riðlinum og ná hagstæðari úrslitum. 

EM að byrja í dag

Þetta er einn af þeim dögum sem byrja eldsnemma. Það snemma að mér fannst ekki tímabært að fara á fætur og byrjaði því daginn eins og ég endaði gærdaginn. Eftir að hafa skroppið fram á baðherbergi um fimm fór ég aftur upp í rúm og greip í bók. Er búin með tvo þriðju af bókinni; Í skugga trjánna eftir Guðrúnu Evu Mínervudóttur og er alveg heilluð. Gærdagurinn byrjaði ekkert svo seint heldur en þó ekki eins snemma, einhvers staðar á milli sex og hálfsjö. Samt var klukkan orðin átta þegar ég var loksins mætt í sundið. Var í heila tvo tíma og synti m.a. 700m. Ég fór líka í göngutúr í gær en bara stuttan, 1,5km á 20 mínútum. Notaði ferðina til að fara með gler og málm í gámana við upphafsenda Eskihlíðar. Annars var nú veðrið í gær upplagt fyrir mikla útiveru en ég var að sýsla við eitt og annað hér heima og gleymdi mér í mis gáfulegum og mis nauðsynlegum verkefnum.

Verkstæðismál

Korter fyrir sjö í gærmorgun var ég komin á braut 7. Synti 700m á rúmum hálftíma. Hafði ágætis tíma til að fara í gufuna, sjópottinn og þrjár ferðir í þann kalda. Gat einnig gefið mér tíma í spjall við konu sem ég er nýfarin að hitta aftur í sundi og kemur nú aðeins tvisvar í viku um leið og opnar. Var mætt í Hátúnið í osteostrong um hálfníu og komst strax að. Bætti mig á einu tæki og var við mitt besta á tveimur öðrum. Kom klukkan að byrja að ganga tíu. Rúmum klukkutíma síðar hringdi ég á N1 verkstæðið við Ægisíðu og spurði hvort þeir gætu athugað bremsurnar og skipt um klossa ef þyrfti. Ég var beðin um að koma með bílinn til þeirra sem allra fyrst og dreif mig strax í það verkefni. Í ljós kom að það þurfti að skipta um diska og klossa að framan. Þeir sögðust geta afgreitt það samdægurs svo ég skildi bílinn eftir, nafn mitt og símanúmer og labbaði heim. Fór ekki alveg beinustu leið en það urðu rúmir 4km á tæpum 55 mínútum. Klukkan hálftvö var hringt í mig frá verkstæðinu til að láta vita að bíllinn væri tilbúinn. Var rúmar 40mínútur að labba 3,55km. Mátti gefa upp kennutölu N1 sonarins og fékk ágætis afslátt út á hana. Borgaði tæp 47þúsund en sú upphæð hefði farið yfir 60þúsund. Var komin heim fyrir klukkan hálfþrjú og lánaði Oddi bílinn til að reka einhver erindi. Skrefafjöldi dagsins var þarna kominn yfir 12þúsund. Kláraði annars að lesa enn eina bókina af safninu.

Síðasti júnídagurinn framundan

Þegar maður er sofnaður fyrir klukkan hálfellefu er kannski ekkert svo skrýtið að vera vaknaður fyrir klukkan hálfsex. Ég er klædd og komin á ról og mun gera líkt í sl. mánudag; mæta snemma í sund og fara svo beint í osteostrong tíma um hálfníu. Í gærmorgun var ég mætt í sund rétt rúmlega átta. Synti 500m á braut átta og fór 3x5 mínútur í þann kalda. Ég var komin heim aftur á ellefta tímanum. Var að sýsla við ýmislegt mis gáfulegt fram eftir degi. Ein nafna mín og frænka hringdi í mig um þrjú og við spjölluðum í hátt í klukkustund. Svo hringdi ég í pabba. Hann var hress en ekki alveg eins hress með sláttuvélina sína. Hún gafst upp áður en hann var búinn að slá. Sennilega vantar nýtt kerti í hana. Rétt rúmlega fjögur lagði ég af stað í göngutúr, nokkuð stóran hring í kringum Öskjuhlíðina. Settist niður í 10 mínútur eftir rúma 4 km og uþb 50 mínútna göngu. Var tæpan hálftíma að labba 2,2 km heim eftir að ég hélt för áfram. Veðrið var dásamlegt, milt og gott og ég var næstum alla gönguna á stuttermabol með peysuna bundna um mittið á mér. 

Sunnudagur

Var komin á fætur rétt fyrir klukkan sex í gærmorgun. Mætti í Laugardalslaugina um átta, rétt eftir að að var opnað. Fór beint á braut 7 og synti 600m. Fór 3 ferðir í þann kalda, eina í gufu, eina í sjópott, eina í heitasta og eina í nuddpottinn. Var svo mætt vestur í bær til norsku esperanto vinkonu minnar rétt rúmlega tíu. Við lásum 2 bls. í Kon-Tiki. Svo var ég komin heim um hálftólf leytið. Var að dútla við ýmislegt, m.a. það sem ekki má skrifa um. Klukkan var því að verða fjögur þegar ég skrapp loksins út í smá göngutúr. Labbaði tæpa 4km á þremur korterum og settist svo aðeins niður á bekk á Klambratúninu. Kom heim um hálfsex leytið. Kvöldið leið hratt. Þriðju vikuna í röð vann ég á áskriftamiðann minn í lottó. Var með 3 rétta. Í síðustu viku var ég með tvo rétta og bónus og vikuna þar á undan 4 rétta. Þegar ég ætlaði að slökkva á sjónvarpinu stuttu fyrir klukkan tíu "festist" ég yfir sannsögulegri mynd sem verið var að sína á RÚV. Fór því óvanalega seint í háttinn í gær. Las samt nokkrar bls. í tveimur af bókasafnsbókunum áður en ég fór að sofa.

Sól

Gærdagurinn var einn af þeim dögum sem byrjaði mjög snemma. Föstudagar eru líka orðnir sjósundsdagar og þar sem ekki opnar í Nauthólsvík fyrr en klukkan tíu var mjög rúmur tími til að gera ýmislegt, bæði sinna hefðbundinni morgunrútínu og fleiru. Um hálftíu fékk ég mér chia-graut sem ég átti tilbúinn í ísskápnum og svo var ég mætt í Nauthólsvík um það bil sem verið var að opna. Sjórinn 12°C og ég synti, eða réttara skrifað svamlaði, út að kaðli fyrri ferðina sem ég fór í sjóinn. Það tók ekki nema uþb korter. Fór beint í gufu í um tíu mínútur og svo aftur í sjóinn í um tíu mínútur. Endaði svo í pottinum í smá stund áður en ég fór upp úr og heim aftur. Stuttu fyrir tvö skrapp ég aftur út í smá göngu. Rölti upp á "veðurstofuhæð" og settist á bekk í smá stund. Þetta er það stutt frá að síminn skráði þetta ekki sem göngu. Hringdi í pabba og svo Ellu vinkonu. Pabbi var á leiðinni frá Hvolsvelli eftir að hafa skilað inn gögnum og sótt um að endurnýja ökuleyfið sitt. Ella vinkona var í sólbaði og sagði að það væri í fyrsta skipti síðan ég var hjá henni í maí sem það væri sólbaðsveður. Sagði henni frá að ég hefði verið að finna heimatilbúið 37 ára afmæliskort með fallegri kveðju vegna tvítugs afmælis í. Eftir símtölin hélt ég göngunni áfram og labbaði um 2km á uþb 25 mínútum. Afgangurinn af gærdeginum leið frekar hratt við alls konar dútl.

Föstudagur

Ég var komin á fætur um sex leytið í gærmorgun. Gerði lóðaæfingar með þyngstu lóðunum og synti einnig hefðbundinni morgunrútínu. Var kannski heldur lengi að vafra í netheimum því klukkan var orðin meira en hálfátta þegar ég mætti í Laugardalslaugina. Þar fór ég beint á braut 6 og synti 700m, flestar ferðir á bakinu. Fór fjórar ferðir í þann kalda og þvoði mér um hárið. Klukkan var byrjuð að ganga ellefu þegar ég lagði af stað heim. Upp úr klukkan tólf skrapp ég með einn poka af textíl í fatagáminn í Eskihlíð og kláraði lítinn gönguhring í leiðinni á uþb tuttugu mínútum. Mikið meira er svo sem ekki að frétta af gærdeginum sem leið þó ógnar hratt við alls konar dútl. M.a. kláraði ég að lesa bókina Fuglinn í fjörunni.

Endurnýjað árskort í Nauthólsvík

Í fyrrakvöld var ég sofnuð rétt upp úr klukkan tíu. Rumskaði svo á þriðja tímanum. Skrapp fram á baðherbergi til að tæma blöðruna. Tókst ekki að sofna þegar ég skreið aftur upp í rúm svo ég greip í bókina sem ég er að lesa sem heitir á frummálinu; The Long Call. Þetta er ríflega fjögurhundruð blaðsíðna bók og þegar ég byrjaði á henni fannst mér ég kannast við efnið. Hafði þó ekki lesið hana áður en það er búið að gera þætti um þessa bók sem finna má í sarpinum hjá sjónvarpi símans. Það er samt það langt síðan ég horfði á þá þætti að ég er man ekki hver ódæðismaðurinn er. Ég las líklega í svona hálftíma og sofnaði sem betur fer fljótlega eftir það. Klukkan var að verða hálfátta þegar ég vaknaði í gærmorgun. Á tíunda tímanum bjó ég mér til hafragraut og svo var ég mætt á planið við Nauthólsvík rétt fyrir tíu. Kaldapotts vinkona mín var þegar mætt. Ég byrjaði á því að endurnýja árskortið. Það var fjara, sjórinn 11°C og yfir tuttugu bátar á voginum. Við Hrafnhildur fórum þrisvar sinnum í sjóinn og tvisvar í gufuna. Vorum að njóta alveg til klukkan rúmlega hálftólf. Þegar ég kom í bílinn aftur tók ég mynd af kvittuninni fyrir árskortinu og sendi á RB því á eftir að nýta hluta af íþróttastyrknum og hann má nýta á meðan maður er á starflokum hjá fyrirtækinu. Sá líka að ég hafði fengið skilaboð eða réttara sagt fyrirspurn frá formanni starfsmannafélagsins en hún var að spyrja hvernig ég hefði það. Svaraði þeim skilaboðum. Hringdi svo í eina fyrrum samstarfskonu sem líka er á starfslokasamningi og spjallaði við hana á meðan ég keyrði vestur í bæ til að versla í Krónunni við Fiskislóð. Kom heim um eitt leytið. Eftir það fór dagurinn í alls konar dútl. M.a. hringdi ég í pabba minn. Ekkert varð úr því að ég færi neitt út aftur svo skrefafjöldi gærdagsins náði rétt yfir tvöþúsundþrjúhundruðogþrjátíu en þá eru reyndar ótalin þau skref sem ég tók á meðan ég var að vappa um í Nauthólsvík um morguninn, í og úr sjónum, gufunni og pottinum. 

Klukkan alveg að verða átta

Það er rétt rúmur klukkutími síðan ég fór á fætur. Fyrir klukkan sjö og því alls ekki eins snemma og í gærmorgun en þá var klukkan ekki orðin hálfsex þegar ég var klædd, búin að búa um og gera nokkrar lóða æfingar. Ég var komin í Laugardalslaug rétt upp úr klukkan sjö. Hitti konu sem ég var ekki búin að hitta lengi en hitti nokkuð reglulega áður fyrr. Hún var reyndar á leiðinni upp úr en við spjölluðum samt saman í nokkrar mínútur. Þessi kona er föðursystir Hreims í Landi og sonum. Svo fór ég beint á braut 7 og synti í hálftíma, 600m. Fór 3x6mínútur í þann kalda og að sjálfsögðu bæði í sjópott og gufu. Var alveg um tvo tíma í sundi. Kom heim um hálftíu. Um hálftvö lagði ég af stað í göngutúr með hálftóman, gamlan sundpoka á bakinu því markmiðið var að labba m.a. í Fiskbúð Fúsa. Fór ekki alveg stystu leið en var þó aðeins tæpar tuttugu mínútur á leiðinni. Verslaði mér harðfisk, ýsu í soðið, nokkrar fiskibollur, gulrætur, tómata og tvær sítrónum. Labbaði svo aðra leið heim. Stoppaði í smá stund á Klambratúninu þar sem ég hitti unga konu með 4 ára son sinn, Odd. Og það kom í ljós að bróðir konunnar hafði verið í sama árgangi og tvíburarnir mínir í Hlíðaskóla og millinafnið hans er Oddur. Ég kom heim fyrir klukkan þrjú og fór ekki aftur út. Dagurinn leið engu að síður hratt við ýmiskonar dútl. 

Nýr mánuður eftir viku...

...og þessi sem var að byrja? Hvernig í ósköpunum getur tíminn spanað svona hratt áfram? Líklega á maður alls ekki að skilja það, heldur bara njóta hvers dags eins og hann mætir manni. Í gærmorgun var ég mætt í sund upp úr klukkan hálfsjö. Fór beint á braut 7 og synti 500m. Eftir fyrri ferðina í þann kalda fór ég beint í sjópottinn. Þar hitti ég fyrir konu sem heitir Sigrún og er hún númer eitt af amk 5 með þessu nafni sem ég hef kynnst í sundi. Við spjölluðum um ýmislegt í ca korter en þá fór ég seinni ferðina í þann kalda og svo smástund í gufu. Var mætt í osteostrong tíma á slaginu klukkan hálfníu. Einn var á undan mér í röðinni en tíminn sem ég þurfti að bíða var ekki mjög langur. Sló met á tveimur tækjum af fjórum, m.a. á það tæki sem ég sló ekki met á í síðustu viku. Var komin heim korter yfir níu. Lánaði Oddi bílinn stuttu fyrir tíu. Hann hafði verið boðaður í atvinnuviðtal vestur í bæ. Þegar hann kom til baka var hann ekki hress með það viðtal, sagðist aðeins hafa verið spurður einnar spurningar og svo sendur í burtu. Án þess að fara út í þá sálma nánar þá fann ég alveg til með honum en benti honum samt á fleiri sjónarhorn heldur en hans. Honum fannst semsagt viðbrögðin við svari sínu á spurningunni út í hött. Fljótlega eftir hádegið fór ég með gler og málm í gáma sem standa við upphafsenda Eskihlíðar og notaði svo tækifærið og fór í smá göngutúr yfir brúna við Landsspítalann, upp á Barónsstíg, niður Eiríksgötu, undir brúna Snorrabrautsmeginn á gatnamótum og inn á Klambratún. Þar settist ég aðeins niður, reif upp símann og söng afmælissönginn fyrir Bríeti frænku þegar hún svaraði símanum. Síminn skráði á mig tvær lotur af göngu, önnur rúmir 2km hin tæpur 1km. Var komin heim aftur á þriðja tímanum. Restin af deginum fór í alls konar dútl. Var komin í háttinn um hálftíu og kláraði enn eina bókina; Flot. Þetta er fyrsta skáldsaga höfundar og hún er mjög áhugaverð.

Í rauða bítið

Já, ég er komin á fætur og meira að segja búin að gera lóðaæfingar og sinna morgunverkunum á baðherberginu. Klukkan rétt nýlega orðin hálfsex. Ég var ekki alveg svona snemma á fótum í gærmorgun en skrapp þó fram að tæma blöðruna um sex. Fór ekki á fætur fyrr en rúmri klukkustund eftir það. Pabbi var búinn að koma fram til að taka niður helstu tölur og fá sér eitthvað. Hann kom svo aftur fram um níu leytið. Þá var ég búin að vera að vafra á netinu. Skömmu síðar lagði ég fyrsta kapal dagsins og hann gekk upp. Kláraði afganginn af fiskréttinum í hádeginu. Seinni partinn, eða á fimmta tímanum afhýdd ég, skar niður sæta kartöflu og sauð á meðan pabbi grillaði. Kvaddi hann svo um sex leytið og brunaði í bæinn. Var komin heim skömmu áður en N1 sonurinn kom af vinnuvakt.

Hjá pabba

Jæja, nú brá svo við að ég svaf þar til klukkan var langt gengin í sjö í gærmorgun. Stytti morgun rútínuna þannig að ég var örugglega mætt í Laugardalslaugina rétt eftir opnun um átta. fór beint á braut 7 og synti í hálftíma áður en ég fór fyrri sex mínútna ferðina í þann kalda. Ætlaði reyndar ekki að vera alveg svo lengi í þeim potti en lenti á spjalli og gleymdi tímanum aðeins. Fór að sjálfsögðu í gufu og sjópott líka. Var mætt til norsku esperanto vinkonu minnar um tíu. Var með íslensku útgáfuna af Kon Tiki með mér. Lásum meira í þeirri bók en þó eina bls. í esperanto útgáfunni. Kvaddi um ellefu leytið og kom við á AO við Öskjuhlíð til að fylla á tankinn sem reyndar var bara hálfur og hefði alveg dugað í það ferðalag sem ég var á leið í austur yfir fjall (og svo til baka í kvöld). Lagði af stað austur upp úr klukkan tólf og kom við í Fossheiðinni. Þar stoppaði ég í um klukkustund áður en ég hélt för áfram. Þegar ég kom á Hellu til pabba var hann að horfa á þátt í sjónvarpinu um Hákon heitinn Aðalsteinsson. Ég horfði með honum en þegar þátturinn var búinn lagði ég nokkra kapla, vafraði aðeins á netinu og greip líka í saumana mína. Um hálfsex eldaði ég handa okkur fiskrétt. Vorum búin að borða og ganga frá eftir okkur um hálfsjö.

Sumarsólstöður

Mér fannst ég vakna heldur snemma í gærmorgun. Klukkan var varla orðin fimm þegar ég rumskaði. Skrapp aðeins á salernið og reyndi svo að kúra mig niður aftur. Varð fljótlega ljóst að ég væri ekkert að fara að sofna aftur svo ég greip í bók og las þar til klukkan var að verða sex. Þá fór ég á fætur og sinnti rútínunni. Föstudagar eru líka orðnir sjósundsdagar svo ég var ekki að fara út úr húsi fyrr en stuttu fyrir tíu en tíminn fram að því leið mjög hratt. Fékk mér gríska jógúrt með chia fræjum, granatepli, bláberjum og kasew-hnetum og eina sneið af kaldri lifrarpylsu um hálftíu. Var komin út í sjó í Nauthólsvík rétt rúmlega tíu og synti að þessu sinni alveg út að kaðli fyrri ferðina sem ég fór í sjóinn. Kom heim aftur upp úr klukkan hálftólf. Það stóð alveg til að skreppa aftur út í smá göngu en einhvern veginn æxlaðist það þannig að ég fór ekkert út aftur. Dagurinn leið samt alveg óhugnanlega hratt við alls konar dútl.

Aftur á safnið

Dagarnir byrja yfirleitt snemma hjá mér. Þegar ég glaðvakna áður en klukkan er orðin sex veit ég að það er best að drífa sig á fætur, sinna morgunrútínunni og takast á við daginn. Klukkan var aðeins byrjuð að ganga átta í gærmorgun þegar ég lagði af stað í sundið. Hún var orðin hálfátta þegar ég labbaði úr sturtuaðstöðunni og út á sundlaugarsvæðið. Skannaði yfir brautirnar og sá svo konu sem ég kynntist fljótlega eftir að ég byrjaði að stunda Laugardalslaugina reglulega fyrir meira ein tíu árum síðan. Þessa konu hafði ég ekki hitt síðan Covid byrjaði en ég hringdi reyndar í hana um daginn. Hún var að klára sína sundrútínu en við spjölluðum í smástund áður en hún kvaddi og ég dýfði mér fyrstu ferðina í þann kalda. Korter í átta fór ég á braut 7 og synti í hálftíma, 600m, flestar ferðir á bakinu. Kalda potts vinkona mín var mætt þegar ég var búin að synda og við gáfum okkur góðan tíma í alla potta- og gufu rútínu. Klukkan var orðin tíu þegar ég labbaði út úr klefanum, klædd og með nýþvegið hár. Þá var ég búin að vera amk tvo og hálfan tíma í sundi. Ég var með bókasafnspokann með mér í bílnum og í honum 7 af 9 bókum. Fór beint á Kringlusafnið að skila þessum bókum og ætlaði að fá íslensku útgáfuna af Kon-Tiki aftur að láni. Fann hana á sínum stað og sex aðrar bækur þar af eina sem var með 14 daga skilafresti; Seint og um síðir eftir Klaire Keegan. Hún hefur að geyma þrjár smásögur um samskipti kynjana og kláraði ég að lesa þær allar í gær. Hinar fimm bækurnar eru; Ljósbrot eftir Ingileif Friðriksdóttur, Flot eftir Rebekku Sif Stefánsdóttur, Morðin í Aare eftir Viveca Sten, Í skugga tránna eftir Guðrúnu Evu Mínervudóttur og Kona eftir Annie Ernaux. Sú síðast nefnda er þýdd úr frönsku af Þórhildi Ólafsdóttur. Kom út á frummálinu 1987 en á íslensku 2023. Höfundur er Nóbelsverðlaunaskáld og skrifaði þarna um samskipti sín við móður sína. Ég er líka búin að lesa þessa bók og mæli alveg með henni. Rétt áður en ég kom heim af safninu hringdi ég í pabba. Hann hafði skroppið í bæinn á miðvikudagsmorguninn því hann átti tíma hjá augnlækni. Læknirinn vilda meina að svo virtist sem augun í pabba væru mun yngri en kennitalan hans sagði til um. Pabbi sagði mér líka að það var bakkað á bílinn hans en það sá reyndar minna á hans bíl heldur hinum bílnum. Klukkan var byrjuð að ganga þrjú þegar ég skrapp út í göngutúr. Labbaði tæpa 4km á rúmum þremur korterum.

Útitekin

Dagurinn í gær byrjaði stuttu fyrir klukkan sex. Þegar ég var komin á fætur byrjaði ég á því að gera nokkrar æfingar með léttustu lóðunum. Næst lá leiðin inn í eldhús þar sem ég fékk mér sítrónuvatn. Eftir morgunverkin á baðherberginu settist ég, að venju, inn í stofu með fartölvuna í fanginu. Slökkti svo á henni rúmlega sjö og færði mig yfir í sjónvarpsstólinn, greip í saumana mína og fylgdist með Bítinu á Bylgjunni í beinni á rás 8. Oddur kom fram upp úr klukkan hálfátta og klukkutíma síðar fór hann af stað í strætó til að vera kominn á Grensásveg um níu. Á tíunda tímanum útbjó ég mér hafragraut og svo var ég mætt í Nauthólsvík á slaginu tíu. Sjórinn var rétt rúmlega 12°C. Það var flóð og ég fór tvisvar sinnum tíu mínútur út í. Hélt mig nálægt landi og garðinu því það var mikið um bátaferðir á voginum. Eftir sjósundsferðina kom ég við í Fiskbúð Fúsa og keypti harðfisk og ýsu í soðið. Oddur hafði samband skömmu síðar, var búinn á námskeiði dagsins og ég sótti hann. Um leið og við komum heim setti ég upp kartöflur og fiskinn í pott. Bauð Oddi að borða með mér en hann afþakkaði. Um tvö leytið skrapp ég í hálftíma göngutúr, smá hring í hverfinu. Næstsíðasta bókin af safninu, Skuggadrengur, er það spennandi að ég er að nálgast það að verða hálfnuð með hana. Það er frekar erfitt að leggja hana frá mér en ég greip samt oft í saumana mína í gær og dútlaði við ýmislegt annað en lestur. 

Sjósundsdagur framundan

Nú brá svo við að ég svaf svolítið frameftir í gærmorgun miðað við flesta daga. Var þó komin á fætur upp úr klukkan átta. N1 sonurinn kom fram um níu og lagði af stað á vinnuvakt rúmum hálftíma síðar. Ég komst að því að ég þekki ekki tærnar mínar í sundur því það var víst miðju-táin sem var með stóra blöðru. ég stakk á blöðruna, þurrkaði upp það sem vætlaði úr henni og setti plástur á tána. Það hafði annars verið í skoðun hjá Viðeyjargenginu að skreppa út í Viðey á þjóðhátíðardaginn. Sú hugmynd var blásin af þegar í ljós kom að veðrið var ekki hagstætt slíku ævintýri. Það fór því þannig í gær að ég hélt mér heima við, fór ekki einu sinni út í göngu. Dagurinn leið engu að síður frekar hratt við allskonar og samt var ég alls ekki að vafra mikið á netinu, hvorki í símanum né tölvunni. Fylgdist með sjónvarps útsendingu frá Austurvelli milli ellefu og tólf, hlustaði á rás 2, horfði á þætti og greip nokkrum sinnum í saumana mína. Greip líka aðeins í bók en þó ekki af neinni alvöru fyrr en ég fór upp í rúm um hálftíu leytið. Á nú aðeins tvær ólesnar bækur eftir af safninu en þær eru samtals eitthvað á áttundahundrað blaðsíður. Báðar spennubækur.

Hæ hó jibbí jey

Var ekki komin í sund í gærmorgun fyrr en um hálfátta og samt var ég vöknuð um sex. Ég hafði samt nægan tíma til að synda 400m, skella mér í þann kalda í 4 mínútur og flatmaga í sjópottinum í 10 mínútur. Tók svo eina stutta dýfu í þann kalda á leiðinni upp úr og var mætt í osteostrong tíma upp úr klukkan hálfníu. Sló met á tveimur tækjum og var við mitt besta á því þriðja af fjórum og leiðbeinandinn hafði á orði að það hefði bara gert mér mjög gott að "hvíla" í eina viku. Ákváðum svo í sameiningu að flytja fasta tímann yfir á morgnana en fasti tíminn hefur verið á mánudögum kl 16:20 þetta uþb ár sem ég hef stundað osteostrong. Var komin heim á tíunda tímanum. N1 sonurinn var á vinnuvakt á Gagnveginum og Oddur var á námskeiði á vegum vinnumálastofnunar. Sá síðarnefndi hringdi í mig um hálftólf. Þá var ég að útbúa innkaupalista og við ákváðum að hittast í Krónunni í Skeifunni. Hann var búinn að versla sínar vörur þegar ég kom og ég afhenti honum bíllykilinn áður en ég fór inn í búð. Oddur fór með pokann sinn í bílinn og kom svo aftur að aðstoða mig. Verslaði svo sem ekki mikið en þó fyrir rúmlega ellefuþúsund kr. Oddur fékk að keyra og ég bað hann um að koma við í Kringlunni. Hann beið út í bíl á meðan ég skrapp í heilsuhúsið. Var aðallega að leita að kókosvatni sem ég hafði ekki fundið í Krónunni. Komum heim um hálfeitt. Klukkutíma síðar lagði ég af stað í göngutúr sem átti að vera rangsælis í kringum Öskjuhlíðina en hringurinn varð svolítið stærri en það því ég fór yfir brúna yfir Kringlumýrarbraut og kom svo upp skammt frá "borgarspítalanum" í Fossvogi. Settist tvisvar niður á þessari leið en í seinna skipti var ég það stutt frá heimahögum að það skráðist ekki á mig ganga síðasta spölinn. En heildar skrefafjöldi dagsins fór yfir 14.320 skref og þá eru ótalin skrefin sem ég tók á meðan síminn var í búningsklefanum á meðan ég var í sundi og bílnum á meðan ég var í osteostrong. Þegar ég háttaði mig um hálftíuleytið um kvöldið fann ég blöðru á mjög skrýtnum stað á næstminnstu tánni á hægri fæti. Blaðran nær aðeins upp á nöglina hægra megin. 

Júní hálfnaður og eiginlega rétt rúmlega það

Var vöknuð og komin á fætur fyrir klukkan sex í gærmorgun. Þegar ég mætti svo á planið við Laugardalslaugina rétt um átta voru ekki margir bílar og í smá stund hélt ég að það væri lokað. Svo var þó ekki en það var verulega rólegt fyrri klukkutímann sem ég var í sundi. Fór beint á braut 7 og synti 600m og 3x6 mínútur í þann kalda. Aðeins 10 mínútur í gufu en tuttugu mínútur í sjópottinum og svo gaf ég mér smá tíma í "sólbað" í restina. Var komin heim aftur um hálfellefu. Rétt fyrir tvö fór ég aftur út og að þessu sinni labbaði ég rangsælis í kringum flugvöllinn. Gerði smá hlé á göngunni eftir 4,3km og rúmar 50 mínútur, þá var ég rúmlega hálfnuð. Kom heim aftur um fjögur og ákvað að matreiða bleikjuflak sem ég hafði átt í frysti og tekið út um morguninn. Bauð Oddi að borða með mér, sem hann þáði þrátt fyrir að ég hafi ákveðið að sjóða bleikjuna frekar en steikja. Hringdi í pabba í gær, aðallega til að athuga hvort netmálin hjá honum væru komin í lag. Þau voru það en ekki heimasíminn.

Heildarfærsla no fjögurþúsundþrjúhundruðþrjátíuogfimm

Vaknaði snemma eins og oftast. Fyrsti klukkutími dagsins fór í hefðbundna morgunrútínu og smá netvafr. Svo færði ég mig aðeins yfir í stofustólinn og kveikti á sjónvarpinu til að hlusta aðeins á tónlist í útvarpinu. Var mætt í Laugardalslaugina rétt eftir að opnaði um átta. Byrjaði á að tékka aðeins á kalda pottinum áður en ég fór á braut 2 og synti í hálftíma, 600m. Fór tvær aðrar ferðir í þann kalda, eina í sjópottinn og góða gufuferð. Um tíu var ég svo mætt til norsku esperanto vinkonu minnar. Ekkert varð úr lestri þar sem hún var frekar tímabundin vegna matarboðshalds en við áttum gott spjall. Stoppaði við í rúman hálftíma. Var komin heim um ellefu. Um tvö leytið fór ég út aftur, spjallaði stuttlega við nágranna minn á neðri hæðinni sem var að sýsla úti við en lagði svo af stað í það sem átti að verða göngutúr í kringum Öskjuhlíðin. Fór upp á Bústaðaveg og gekk austur eftir honum en í stað þess að beygja til hægri við Kringlumýrarbraut ákvað ég að halda aðeins áfram. Beygði svo til vinstri við Efstaleiti, gekk um Hvassaleyti og fór yfir göngubrúna yfir Miklubraut við Safamýri. Þarna var ég búin að ákveða að athuga hvort móðurbróðir minn og fjölskylda væru heimavið en þau búa í Álftamýrinni. Hringdi á bjöllunni hjá þeim um þrjú. Frændi minn og konan hans voru heimavið að bíða eftir að heyra frá manneskju sem ætlaði að leigja af þeim pláss í nokkra daga. Ég stoppaði í hátt í tvo tíma. Allan þann tíma heyrðist ekkert frá manneskjunni en yfirleitt er verið að bóka svona skammtímaleigu um þrjú leytið. Göngutúrinn til frændfólksins tók mig um fjörutíu mínútur en frá þeim var ég svo um tuttugu mínútur að labba heim. 

Veðrið mjög gott

Var komin á fætur stuttu fyrir klukkan sex. Sinnti hefðbundinni morgunrútínu fyrsta klukkutímann en kveikti svo á sjónvarpinu, stillti á Bítið á Bylgjunni og greip í saumana mína. Upp úr klukkan níu bjó ég mér til hafragraut og svo var ég mætt í Nauthólsvík tíu mínútum fyrir opnun en samt á eftir kalda potts vinkonu minni. Sjórinn var 11°C og við fórum þrisvar sinnum út í, tvisvar í pottinn og einu sinni í gufuna. Var komin heim um hádegisbilið. Um hálftvö leytið setti ég nokkra hluti í léttan bakpoka og labbaði af stað í átt að miðbænum. Þegar ég var komin að Hallgrímskirkju ákvað ég að hringja í eina vinkonu sem ég kynntist í gegnum bréfaskriftir þegar við vorum líklega 11-12 ára. Hún er árinu yngri en ég, hafði fundið nafnið í barnablaðinu á sínum tíma þar sem ég óskaði eftir pennavinum. Sumarið sem við vorum 14 og 15 ára vorum við báðar í Kaupmannahöfn og hittumst amk tvisvar sinnum. Ég og systir mín vorum hjá móðursystur okkar inn í borginni en hún hjá frændfólki í einu af úthverfunum. Þessi vinkona mín er m.a. fasteignasali í dag og ég hringdi í hana til að leita ráða hjá henni. Úr varð næstum því klukkutíma samtal bæði um erindið og annað. Á einum tímapunkti hélt á göngunni áfram og þegar við kvöddumst var ég komin niður á Lækjargötu. Stoppaði við hjá vinkonunni sem er með einn sölubás þar skammt frá. Eftir mjög gott stopp hélt ég göngunni áfram og ákvað að ganga framhjá Hörpu og eitthvað meðfram sjónum að Höfða. Þar beygði ég upp og lokaði hringnum um Katrínatún, Nóatún og Lönguhlíð. Kom heim um hálffimm. Síminn skráði á mig þrjár göngulotur, alls tæpa sex kílómetra.  

Föstudagsmorgunn

Þótt ég væri komin á stjá upp úr klukkan sex í gærmorgun var ég ekki mætti í sundið fyrr en stuttu fyrir klukkan átta. Þar byrjaði ég á ferð í kalda pottinn áður en ég fór á braut 7 og synti 700m, flesta á bakinu. Fór tvær aðrar ferðir í þann kalda, var góða stund í gufunni og uþb 10 mínútur í sjópottinum. Settist smá stund á stól áður en ég fór upp úr og þvoði mér um hárið. Kom heim rúmlega tíu. Rétt rúmum klukkutíma síðar skrapp ég út í göngutúr sem ég skipti upp í tvær lotur því ég tók smá pásu þegar ég var uþb hálfnuð. Annars er ósköp fátt að frétta af gærdeginum. Hringdí í pabba. Heimasíminn hans virkar ekki og hefur ekki gert síðan í rafmagnsleysinu sl. þriðjudag. Það er sennilega tæknimál sem einhver í þjónustuveri símans getur lagfært. Pabbi var annars hress og var rétt ófarinn á haugana með garðúrgarginn eftir sláttinn.

Hundraðsextugastiogþriðji dagur ársins

Var komin á fætur upp úr klukkan sex í gærorgun. Fyrsta klukkutímann notaði ég í hefðbundna rútínu. Síðan fylgdist ég aðeins með "Bítinu" á Bylgjunni á rás átta á sjónvarpinu og greip í saumana mína í leiðinni. Um níu leytið bjó ég til hafragraut og um tíu var ég mætt í Nauthólsvík. Afar fáir voru mættir svona rétt eftir opnun en ég var þó ekki ein. Fór tvisvar í rúmlega níu gráðu heitan sjóinn, einu sinni í gufu og einu sinni í pottinn. Var komin heim aftur um hálftólf. Fór ekkert út aftur en lánaði Oddi bílinn um miðjan dag. Dagurinn leið frekar hratt. Hringdi stuttlega í æskuvinkonu mín sem ég heimsótti í sl. mánuði, greip af og til í sauma, horfði á þætti, hlustaði á þætti og gerði smávegis af því sem ekki má skrifa um. 

Rafmagnsleysi í rúma þrjá tíma

Rumskaði aðeins um fimm leytið í gærmorgun og aftur um sex. Kúrði aðeins lengur undir sæng en var komin á fætur fyrir klukkan sjö. Þá var pabbi löngu farinn í sitt sund. Hann kom til baka upp úr klukkan átta og setti ryksugu-rúmbuna af stað. Um níu kom stúlkan sem skúrar hjá honum hálfsmánaðarlega. Hress stúlka sem vann vel og var ekki lengi að hlutunum. Pabbi færði til dót og settist svo í ruggustólinn sem hann hafði fært yfir á teppið í stofunni. Ég passaði mig líka að vera ekki fyrir. Þegar stúlkan var að skúra í kringum pabba hafði hún á orði að hann væri bara glaðvakandi. Það var víst oft í vetur sem pabbi sofnaði um leið og hann settist niður. Pabbi svaraði því til að hann væri alveg glaðvakandi og með allra hressasta móti. Stuttu eftir að stúlkan var búin og farin fór rafmagnið. Klukkan var ekki orðin tíu og klukkan var byrjuð að ganga tvö þegar rafmagnið kom loksins á aftur. Þetta var vegna bilunar, slitinnar bugtar, í Hvolsvallarlínu 1. Engin hringtengin var vegna viðhalds og viðgerða í tengivirki við Hellu. Rafmagn fór af á mjög stóru svæði og það var ekki hægt að keyra upp varaafl nema á stöku stað. Pabbi fór því ekkert í Kanslarann í hádeginu í gær. Þegar rafmagnið kom á aftur var þónokkuð vesen að koma nettengingunni á sjónvarpið en það tókst þó á endanum án þess að fá tæknilega aðstoð. Ég pakkaði niður og kvaddi pabba um hálffimm leytið. Ekkert stæði var laust í minni götu svo ég lagði bílnum við Blönduhlíð og fékk Odd til að koma á móti mér og taka stóru töskuna.

Sláttur

Var komin á fætur rétt fyrir klukkan sjö í gærmorgun. Gærdagurinn var rólegheita dagur að mestu. Eftir hádegi fékk ég þó að hjálpa pabba við að slá garðblettinn fyrir aftan hús. Áður en hægt var að byrja, þ.e. halda áfram frá því þar sem pabbi hætti í fyrradag, þurfti að hreinsa vélina og hún var frekar lengi að komast í gang. En þegar búið var að hreinsa, bæta á olíu og skipta um kerti gekk allt vel. Tæma þurfti sláttuvélar-grassöfnunarboxið eftir hvern hring og þegar pabbi var búinn að fara tvo hringi fékk ég að prófa. Prófaði alveg þar til búið var að slá blettinn og svæðið undir snúrunum bak við skúr. Pabbi vildi þó fá að hjálpa til við að tæma boxið og setja vélina aftur í gang inn á milli. Vorum búin um þrjú og settumst þá sunnan undir hús þar til ský dró fyrir sólu. Um fimm leytið setti ég upp saltfisk og sauð kartöflur, rófubita og bita af hálfri sætri kartöflu með í sama pottinum. Annars fór dagurinn í að leggja kapla, vafra á netinu, sauma út og lesa. Helga systir hringdi í pabba. Þar gránaði yfir í fyrrinótt. Þau eru annars búin að fjárfesta í dráttarvél.

Annar í hvítasunnu

Rumskaði stuttlega þegar ég heyrði stofuklukkuna slá fimm högg í gærmorgun. Ekkert svo löngu síðar, að mér fannst, heyrði ég stofuklukkuna slá sjö högg. Eftir það gat ég ekki sofnað aftur og dreif mig því á fætur. Er með 1,5kg lóðin með mér og gerði æfingar með þeim fyrst áður en ég fór fram, kveikti á tölvunni hans pabba. Meðan tölvan var að ræsa sig sinnti ég hefðbundum morgunverkum. Annars var gærdagurinn í heildina með rólegra móti. Skrapp þó í smá göngutúr meðfram ánni og lítinn hring um hálftvö leytið. Seinni partinn tók pabbi fram grillið og ég skrældi, skar niður og sauð hálfa sæta kartöflu. Vorum búin að borða fyrir klukkan sex. Horfðum bæði á annan þáttinn af "Systraslagur" og "Ferðabók Gísla Einarssonar". Fór óvenju seint í háttinn og klukkan var örugglega búin að slá tólf högg áður en ég sofnaði. 

Iss

Gærdagurinn hófst um sex í gærmorgun. Steingleymdi að gera lóðaæfingar en önnur morgunrútína var hefðbundin. Var mætt í sund rétt eftir opnun og fór beint á braut 8. Skömmu síðar fylltust þrjá brautir, 5-7, af ungu sundfólki sem var mætt á útiæfingu þar sem eitthvað var um að vera í innilauginni. Einn af þeim sem var fyrir á braut 7 þegar æfingin byrjaði var alls ekki ánægður og það kom til orðaskipta milli hans og eins ungs þjálfara. Ég hélt mínu striki ásamt nokkrum öðrum á braut 8. Synti í hálftíma, 600m, og veit ekki hvort þessi sem þurfti að hrökklast af braut 7 kláraði sitt morgunsund á einnhverri annarri braut. Þjálfarinn hafði sagt að þessar brautir væru fráteknar en þá hafði láðst að stilla upp skiltinu sem yfirleitt er notað ef sundæfingar fara fram á einhverjum brautum í útilauginni. Var mætt til nosrku esperanto vinkonu minnar rétt rúmlega tíu. Stoppaði hjá henni í rúmlega klukkustund og við lásum þrjár bls. í Kon-Tiki. Þegar ég kom heim um hálftólf kláraði ég að pakka niður í stærri töskuna. Kvaddi Odd um tólf leytið, fermdi bílinn og kom við hjá N1 syninum við Gagnveg áður en ég brunaði austur. Notaði tækifærið til að athuga með þrýstinginn á dekkjunum. Var komin til pabba um tvö leytið. Hann var ekki inni en þó ekki langt undan. Hann hafði skroppið í Bauhaus í Reykjavík í vikunni og keypt sér nýtt sláttuorf sem hann var að nota í fyrsta skipti. Tók sér nokkrar pásur við verkið en kláraði þó og reif þá fram sláttuvélina. Sláttuvélin gafst hinsvegar upp áður en pabbi náði að klára að slá blettinn á bak við hús. Var með soðin þorsk og sætar kartöflur í kvöldmatinn. 

Nefnilega

Það sem þessi tími þeytist áfram við leiki og störf, aðallega leiki. Næstum því sex vikur síðan mér var sagt upp og mér finnst ég enn vera í fríi og eiga eftir að gera svo margt í því fríi. Flesta daga er ég glaðvöknuð frekar snemma og gærdagurinn var einn af þeim flestu dögum. Morgunrútínan var samt ekki 100% hefðbundin. Sleppti lóðaæfingum viljandi, kallaði það eins konar hvíldardag. Ég fór heldur ekki í sund því við kaldapotts vinkona mín vorum búnar að mæla okkur mót í Nauthólsvík þegar opnaði þar. Á sjósundsdögum þarf ég að passa að vera búin að fá mér að borða áður en ég fer að heiman. Í gær fékk ég mér gríska jógúrt með chia fræum, kasjúhnetum, smá granateplum, bláberjum og fleiru sem mér finnst gott að blanda við og hefur góð áhrif á mallakútinn. Var komin í Nauthólsvík rétt fyrir opnun og þar beið kaldapotts vinkona mín. Það var mun rólegra á svæðinu þótt við værum ekki alveg einar. Sjórinn innan við tíu gráður og við fórum þrisvar sinnum í hann, einu sinni í lónið, tvisvar í gufuna og tvisvar í pottinn. Gáfum okkur extra góðan tíma líkt og á miðvikudaginn í síðustu viku og vorum tæpa tvo tíma. Á heimleiðinni kom ég við á tveimur stöðum. Seinni staðurinn var Fiskbúð Fúsa þar sem ég keypti m.a. harðfisk. Kom heim upp úr klukkan hálfeitt. Fór ekki aftur út fyrr en rétt fyrir fjögur en þá fór ég í göngutúr, stóran hring í kringum Öskjuhlíðina. Þegar ég var rúmlega hálfnuð settist ég smá stund á bekk við HR þannig að símtækið skráði á mig tvo mislanga göngutúra; 3,78km og 1,88km samtals á uþb 5 korterum. Klukkan var næstum því hálfsex þegar ég kom heim aftur. Horfði á vináttulandsleikinn í fótbolta karla við Skota en var líka að lesa. Þegar seinni hálfleikur var nýlega byrjaður hringdi fyrrum samstarfskona og jafnaldra úr kortadeild í mig og við spjölluðum saman í þrjú korter. Það var annars svo merkilegt að mér hafði verið hugsað til hennar tveimur tímum fyrr en endað þá hugsun á að hún myndi örugglega hringja fljótlega í mig.

Nokkrir

Þar sem ég var glaðvöknuð um fimm í gærmorgun en ekki alveg tilbúin að fara á fætur byrjaði ég daginn á því að lesa. Svo sinnti ég hefbundinni morgun rútínu áður en ég fór í sund um hálfátta. Það var búið að setja kaðal á milli brauta 7 og 8 sem er mjög sjaldgæft. Ég synti 300m á braut 8 áður en ég færði mig yfir á braut 7 og synti 400m í viðbót. Fór tvisvar í þann kalda, um 20 mín í gufu og korter í sjópottinn áður en ég fór upp úr og þvoði mér um hárið. Var komin heim á ellefta tímanum. N1 sonurinn var í vaktafríi en þegar hann fór á stjá dreif hann sig með bílinn sinn í skoðun og verslaði svo á heimleiðinni. Ég og bróðir hans skruppum á þvottastöðina Löður við Fiskislóð um miðjan dag og svo í Krónuna.

En nú ætla ég að telja upp þá fimm titla af bókasafnsbókunum sem ég er eða á eftir að lesa; Frosin sönnunargögn eftir Ninu von Staffeldt. Kom út fyrst á dönsku 2016 en á íslensku árið 2021. Skuggadrengur eftir Carl-Johan Vallgren,  Fuglinn í fjörunni eftir Ann Cleeves, Miðnæturbókasafnið eftir Matt Haig og Þegar sannleikurinn sefur eftir Nönnu Rögnvaldardóttur. Ég er byrjuð á síðast nefndu bókinni. Búin með tvær smásögur af 7 og alveg með hinar bækurnar af þessum sem ég minntis á í færslu gærdagsins.

Iða ekki í skinninu

Þótt ég hafi lagt mig í klukkutíma um miðjan dag á mánudag og verið sofnuð fyrir klukkan hálfellefu um kvöldið svaf ég alveg til klukkan sjö í gærmorgun. Var frekar hissa þegar ég vaknaði því yfirleitt er ég vöknuð áður en klukkan er orðin sex. Að sjálfsögðu sinnti ég minni hefðbundnu morgunrútínu nema ég fór ekki í sund. Borðaði afgang af hafragraut um hálftíu og var mætt í Nauthólsvík á slaginu tíu. Þar var þá þegar kominn hópur af krökkum á ýmsum aldri og umsjónafólk þeirra. Ég var komin út í sjó tíu mínútum yfir tíu og svamlaði um í rétt rúmlega 9°C sjónum í uþb tíu mínútur. Var hálftíma í gufunni en það var eiginlega eingöngu vegna þess að krakkarnir voru svolítið á rápinu út og inn og ekki alltaf að hugsa um að loka á eftir sér svo það kólnaði í rýminu inn á milli. Fór aftur í sjóinn í 7 mínútur og var svo í tæpan hálftíma í pottinum áður en ég sá að það var lag á að athafna sig í klefanum. Næst lá leiðin á bókasafnið þrátt fyrir að vera ekki búin að lesa síðustu bókina og hafa enn til þess viku. Skilaði 5 bókum af sex og kom með 8 bækur með mér heim. Ein af þeim bókum var reyndar bók með ferskeytlum og örfáum limrum sem ég renndi yfir og kláraði strax í gær. Ég kláraði reyndar líka bókina sem ekki var með skilabókunum. Nú er spennandi að vita hvað ég næ að lesa margar af bókunum á vikunni sem ég hef. Í gærkvöldi byrjaði ég á bók sem heitir; með minnið á heilanum FRÁSAGNIR ÚR FJARLÆGUM BERNSKUHEIMI eftir Þórhildi Ólafsdóttur. Þessi bók er nýkomin út og sú sem hana skrifar og er að skrifa um minningar og minningabrot frá því hún var innan við 10 ára. Áður en ég fór á fætur í morgun byrjaði ég á annarri bók; Herbergi í öðrum heimi eftir Maríu Elísbet Bragadóttur. Þetta er smásögusafn sem kom út 2020. Báðar þessar bækur eru þannig að ég mun líklega ekki vera lengi að gleypa þær í mig. Annars hitti ég einn fyrrum vinnufélaga minn á bókasafninu en hann er búinn að vinna þar í rúm þrjú ár. Var reyndar á bókabíl fyrsta árið. Kom heim um tólf. Fór aftur út um þrjú í klukkustundar göngutúr um Öskjuhlið sem skiptist í tvennt þar sem ég settist aðeins niður við svæðið þar sem flest trén voru felld í vor. 

Svefninn er skrýtið fyrirbæri

Þrátt fyrir mjög kaflaskiptan og eiginlega of lítinn svefn í fyrrinótt var ég vöknuð um sex í gærmorgun. Hefðbundin morgunrútína gekk vel fyrir sig en ég var mun lengur að koma mér af stað í sundið en oft áður. Var komin örfáum mínútum á undan kalda potts vinkonu minni og fór því beinustu leið í sjópottinn í staðinn fyrir að byrja á að synda. Það er líka í góðu lagi að snúa rútínu og venjum við. Fyrst í stað var ég samt ekkert viss um að ég myndi endilega synda neitt en hélt þeim möguleika opnum með því að vera með sundgleraugun vafin um vinstri úlnliðinn. Fljótlega eftir að vinkonan mætti fórum við fyrstu ferðina í þann kalda. Náðum alls fjórum ferðum, tveimur í þann heitasta og góðri gufuferð áður en hún þurfti að fara. Þá fyrst tók ég ákvörðun um að skella mér smá stund á brautir 7 og 8. Það var frekar hvasst og nokkur öldugangur í lauginni. Synti 400m. Hafði ekki haft sinnu á því að "festa" sundskóna og þeir gerðu tilraun í millitíðinni til að stinga af. Sundlaugavörður bjargaði þeim í fyrra skipti en annar skórinn fauk aftur og þá út í laug. Handsamaði hann og fann hinn fljótlega eftir að ég var búin að synda. Kom heim um hálftíu. Gærdagurinn leið svo við ýmiskonar dútl. Fann smá villu í útsaumsverkefninu og setti það aðeins til hliðar. Var að spá í að láta það vera í nokkra daga. Um tvö fór ég að finna fyrir því að ég hafði ekki sofið vel um nóttina. Lagði mig aðeins í stofusófann og svaf í uþb klukkustund. Var mun sprækari eftir að ég vaknaði aftur. Hringdí í pabba sem var að vinna að verkefni út í skúr og einnig í konu eins frænda míns sem búsett eru á Selfossi. Eftir það var ég alveg til í að laga villuna í saumaverkefninu. Horfði á landsleikinn í knattspyrnu kvenna, Ísland - Noregur 0:2.

Í löngu eða stuttu máli

Var vöknuð, komin á fætur og búin að gera æfingar með 2kg lóðum um sex. Klukkan var samt farin að nálgast hálfátta þegar ég dreif mig loksins af stað í sund. Synti aðeins 400m, fór tvisvar í þann kalda og 10 mínútur í sjópottinn. Í heildina tók þessi sundferð rétt rúma klukkustund og ég var mætt í osteostrong korter fyrir níu. Áður en æfingarnar þar byrjuðu var ég spurð hvort ég vildi færa tímann í næstu viku því það er annar í hvítasunnu nk mánudag og því lokað. Ég ákvað að vera ekkert að finna annan tíma þá vikuna heldur mæta aftur eftir hálfan mánuð. Kom heim um hálftíu. Hringdi fljótlega í þá þriðju sem var sagt upp í seðlaveri RB fyrir rétt rúmum mánuði. Spjölluðum í tæpan hálftíma. Hún er ekki heldur búin að tala við félagið og hefur svipaða upplifun á tímanum og ég, að hann sé að líða alltof hratt þrátt fyrir að vera ekki að vinna. Á tólfta tímanum bjó ég mér til hafragraut og um hálfeitt var ég komin í Nauthólsvík. Sjórinn rétt rúma tólf gráður og ég fór tvisvar sinnum tíu mínútur í hann, tíu mínútur í gufuna á milli ferða og var svo í næstum hálftíma í pottinum áður en ég fór upp úr og heim. Áður en ég fór úr bílnum og inn gerði ég tilraun til að hringja í tvíburahálfsystur mína. Hún svaraði ekki en ég var rétt komin inn og búin að ganga frá sjósundsdótinu þegar hún hringdi til baka. Við töluðum saman í rúma klukkustund. Einhvern veginn leið svo dagurinn án þess að ég færi út aftur en það hefði auðvitað verið alveg upplagt að skreppa í stuttan göngutúr og safna fleiri skrefum. 

Líflegheit

Mér leist ekkert á blikuna þegar ég rumskaði alltof snemma á fimmta tímanum í gærmorgun. Skrapp á salernið og skreið svo aftur upp í rúm. Sem betur fer steinsofnaði ég aftur og vissi næst af mér rétt fyrir klukkan átta. Þá dreif ég mig á fætur. Sá vísbendingar um að pabbi væri búinn að koma fram, fá sér eitthvað og taka niður daglegu tölurnar. Um helgar fer hann svo aftur upp í og það er misjafnt hvenær hann kemur á fætur. Hann er þó oftast ekki steinsofandi heldur er að hlusta á útvarpið, dottar kannski inn á milli. Ég fékk mér sítrónuvatn og kveikti á tölvunni hans pabba. Var svo að vafra um á netinu næsta einn og hálfan tímann. Þá fékk ég mér mandarínu, harðsoðið egg og vatnsglas. Lagði nokkra kapla og fór svo aftur í tölvuna. Pabbi kom fram upp úr klukkan tíu. Eftir það færði ég mig inn í stofu. Gekk frá enda á nýjasta eldhúshandklæðinu og tók svo fram saumana. Við fengum okkur skyr í hádeginu. Um hálftvö skrapp ég út í smá göngutúr, rétt rúmlega 2,5km hring á uþb hálftíma. Ekkert löngu eftir að ég kom til baka kom Bríet frænka í heimsókn en hún og kærastinn hennar eru eiginlega flutt í sveitina hans því þau eru að hjálpa foreldrum hans við búskapinn. Systurdóttir mín var mjög hress og gaf sér góðan tíma í spjall. Lætur hátt rómur og segir svo skemmtilega frá. Hún stoppaði hátt í tvo tíma og tók eitthvað af dóti með sér þegar hún fór. Um fimm leytið setti ég upp kartöflur og steikti keilu sem ég var búin að bita niður upp úr eggi og smá hveiti sem ég var búin að krydda með best á lambið (þótt þetta væri fiskur), svörtum pipar og cayanne. Vorum búin að borða fyrir klukkan sex en ég kvaddi þó ekki fyrr en um hálfátta og var komin heim rétt fyrir níu. 

Óskaplega afslöppuð og vel út sofin

Í gærmorgun var ég komin á fætur og búin að gera lóðaæfingar fyrir klukkan sex. Næstu tæpu tveir tímar liðu frekar hratt. Var komin á bílaplanið við Laugardalslaug um leið og klukkan var að slá átta. Fór beint á braut 8 og synti 700m á 35 mínútum. Hitti "hlaupastrákana" mína í fyrstu ferðinni í kalda og var svo búin að vera nokkrar mínútur í sjópottinum þegar kalda potts vinkona mín mætti. Við náðum þremur ferðum í þann kalda og góðri gufuferð áður en ég kvaddi og fór í esperanto hitting. Var komin til Inger um tíu. Hún bauð upp á hafragraut áður en við fórum með tebollana yfir í forstofuherbergið og lásum þrjár blaðsíður í Kon-Tiki. Hittingurinn varði aðeins í rúman klukkutíma en við nýttum þann klukkutíma mjög vel. Kom við á AO við Flugvallarveg/Öskjuhlíð og fyllti á tankinn. Gekk frá sund- og esperantodótinu heim, kláraði að pakka og um tólf kvaddi ég þann soninn sem var kominn á fætur og skilaði kveðju til hins. Keyrði austur um Þrengslin. Kom við í Fossheiðinni og stoppaði þar í um klukkustund. Ég var svo komin til pabba upp úr klukkan hálfþrjú. Dagurinn leið mjög hratt og þar sem veðrið var með ágætasta móti ákvað pabbi að grilla á sjötta tímanum. Ég sá um að setja upp kartöflurnar og leggja á borð. Annars fór tíminn í spjall, kaplakeppni og ég greip í prjónana mína.