Tími til að skella sér í sund

Ég vaknaði mjög snemma í gærmorgun, um hálf fimm leytið. Var útsofin en í stað þess að fara á fætur greip ég í bókina um Star og las næstu þrjá tímana. Fór á fætur um átta og þá átti ég bara eftir um sextíu blaðsíður af bókinni. Ég ætlaði mér svo sannarlega að skreppa út og í sund. Setti í þvottavél, sinnti morgunverkunum og "tíndi" mér svo í netvafri í meira en klukkustund. Náði svo í bókina inn í herbergi og kláraði hana. Að lestri loknum var letin orðin svo mikil að ég ákvað að skrópa í sundið. Fór að horfa á áströlsku þættina tvo sem voru sýndir á rúv í vikunni. Dagurinn leið hratt við alls konar, aðallega rólegheit. Mæli alveg með svona dögum stöku sinnum. Klukkan var farin að ganga tólf þegar ég fór í háttinn og ég las um stund í einni bók af safninu. Ætla að spara aðeins bækurnar sem ég fékk í jólagjöf en ekki of lengi samt. 

Að halda sig við efnið.... eða ekki

Í fyrrinótt rumskaði ég um hálftvö. Var líklega of lengi að ákveða hvort ég ætti að fara og tæma blöðruna eða reyna að sofna aftur því eftir að ég ákvað loks hið fyrra var hugurinn farinn að snúast um söguna og forsöguna um Star. Stóðst ekki mátið og ákvað að grípa aðeins í bókina. Las þó ekki nema í um tuttugu mínútur áður en ég gerði aðra tilraun til að bæla mig niður. Ég hef greinilega sofnað því ég rumskaði ekki fyrr en ca fimm mínútum áður en vekjaraklukkan átti að hringja. Var mætt í vinnu um hálfátta. Rétt rúmum hálftíma seinna vorum við fyrrum fyrirliði kortadeildar komnar á fullt í daglega framleiðslu. Áður en við fórum í kaffi töldum við hluta af kortalagernum. Eftir kaffi dembdum við okkur í endurnýjunina. Kláruðum stærri fælinn sem eftir var, rúmlega fimmtánhundruð kort, rétt fyrir tólf. Eftir mat kláruðum við síðasta fælinn, tæp níuhundruð kort, áður en við framleiddum daglega skammtinn sem barst okkur á tólfta tímanum. Lukum svo við að telja kortalagerinn og ganga frá deildinni áður en við báðum um lyftu fyrir alla póstbakkana sem voru alls tuttuguogtveir. Þeir fóru upp í tvennu lagi og taskan með kortunum sem ekki voru gild heimilsföng á fór í seinni ferðinni. Ég fór sjálf upp með seinasta daglega skammtinn og gekk frá bókhaldinu. Stimplaði mig út korter fyrir fjögur. Kom við í Fiskbúð Fúsa og keypti bæði ýsu, lax, síld og tværtegundri af harðfiski áður en ég fór í Nauthólsvík og skellti mér tvisvar sinnum í -0,3°C sjóinn. Fyrri ferðin var um þrjá mínútur, fór svo beint í gufu í rúmar tíu mínútur, rúma mínútu aftur í sjóinn og var svo næstum hálftíma í heita pottinum áður en ég fór upp úr og heim. 

Rólegheit eftir vinnutörn

Ég var mætt í vinnu um hálfátta í gærmorgun. Var áfram í bókhaldi og á móttökuendanum. Þegar tveir af þremur daglegum framleiðsluskömmtum var lokið byrjuðum við á endurnýjuninni sem var send til okkar eftir hádegi sl miðvikudag. Eftir kaffi héldum við þeirri framleiðslu áfram til hádegis. Eftir hádegi framleiddum við hádegisskammtinn en héldum svo endurnýjun áfram. Framkvæmdastjórinn gaf leyfi á að vinna aðeins fram á daginn til að gera atlögu að því að klára þessa endurnýjun fyrir áramót svo hún færi inn í reikningagerð desember mánaðar. Framleiðsla gekk alveg þokkalega. Tókum pissu og vatnspásu um tvö og aftur um fjögur. Í seinni pásunni spurði framkvæmdastjórinn hvað við ætluðum að vera lengi. Við vorum alveg á því að vera þar til allt væri búið. Honum leist nú ekkert á það. Sagði að kerfið færi á húsið sjálfvirkt klukkan sjö og lagði til að við yrðum ekki lengur en til hálfsjö. Um sex leytið var vélin aðeins farin að stríða okkur svo við ákváðum að hætta og ganga frá, þá búnar að framleiða rúmlega fjögurþúsund kort af þessum sexþúsundogþrjúhundruð. Ég stimplaði mig út tuttugu mínútur yfir sex og fór beinustu leið heim þrátt fyrir að vera með sund dótið meðferðis.

Hækkandi sól

Vaknaði um klukkan sex í gærmorgun á þriðja síðasta vinnudegi ársins. Hafði nógan tíma í morgunverkin og netvafrið en fór samt út úr húsi á sama tíma og N1 sonurinn þar sem ég vissi að sópa þyrfti af bílnum. Davíð Steinn hafði tekið upp vinnukonunarnar á framrúðunni fyrir mig daginn áður og hitastigið var um núllið svo það tók ekkert svo langan tíma að losa sig við snjóinn og það þurfti heldur ekki að skafa. Var mætt í vinnu rétt fyrir klukkan hálfátta. Þessa vikuna er ég í bókhaldinu og á móttökuendanum á vélinni. Byrjaði þó á því að fara inn á kaffistofu, fylla á vatnsflöskuna og fá mér smá heitt vatn áður en ég fór að safna saman tölum. Í heildina var dagleg framleiðsla rétt um 200 kort. Vorum í innlögnum milli klukkan tíu og ellefu og svo aftur eftir hádegi. Um eitt leytið kom póstur um síðustu endurnýjun ársins og sú endurnýjun er mun stærri en marga undanfarna mánuði eða yfir sexþúsundogþrjúhundruð kort. Við höfðum þó verið sammála um það fyrrum fyrirliði og ég að halda okkur uppi í innleggjunum, þar var nóg að gera og hjálparhendur mjög vel þegnar. Stimplaði mig út úr vinnu um hálffimm og fór í sund. Synti í tæpar tuttugu mínútur, fór tvisvar í kalda pottinn, einu sinni í gufu og einu sinni í þann heitasta. Sleppti ferð í sjópottinn þar sem þar voru frekar margir á þeim tíma sem ég var í sundi. Var komin heim um klukkan sex. 

Afslöppun

Í gærmorgun vaknaði ég ekki fyrr en um hálftíu. Mér varð fljótlega ljóst að ég myndi alls ekki nenna að drattast af stað í sund. Skrapp fram á salernið og svo beinustu leið undir sæng aftur, ekki til að sofa heldur las ég til klukkan að ganga tólf. Þá fyrst klæddi ég mig, bjó um og fór á fætur til þess eins að hafa það notalegt áfram í stofunni. Smá netvafr, meiri lestur, þátta og fótboltaáhorf fram á kvöld.  Háttaði mig upp í rúm um tíu, áður en síðasti fótboltaleikur dagsins var búinn og las til klukkan hálfellefu. Er nú búin með einn þriðja af bókinni um Star.

Notalegheit

Ég skal alveg játa það að það tekur svolítið á að neita sér um ýmislegt sem er í banni eða pásu þessa dagana. Allra helst er það blessað kaffið sem ég hef ekki drukkið síðan 14. október. Mér er þó alveg sama þótt ég sleppi bæði súkkulaði og öðrum sætindum því oftast er það skammvinn sæla að neyta þeirra en óþægindin yfirleitt þannig að það er langbest að sleppa því að smakka eða fá sér. Ég er sem betur fer það þrjósk að ég hef nokkurn veginn staðist allar helstu freistingar, fyrir utan íssmakkið á aðfangadagskvöld. Það að ég hafi getað staðist það að fá mér kaffi er samt ofar mínum skilningi. Sennilegast er það þó vonin um að ég geti á einhverjum tímapunkti tekið það í einhverri mynd inn í daglega rútínu aftur.

Annars svaf ég alveg til klukkan að verða níu í gærmorgun þótt ég væri sofnuð fyrir miðnætti kvöldið áður. Ég var komin á fætur nokkru síðar. Pabbi kom klæddur fram á tólfta tímanum en hann hafði komið fram um sex fyrst líkt og flesta aðra daga til að fá sér eitthvað og taka niður helstu hitatölur úti og inni. Ég var eitthvað að vafra smá á netinu og leggja kapla en ég setti samt aðal kraftinn í að klára bókina um Ally og það tókst.

Synir mínir komu um hálffimm leytið. Pabbi var búinn að búa til grjónagraut sem var þó geymdur sem eftir réttur. Í sameiningu settum við upp tvær gerðir af heimalöguðum bjúgum sem sundfélagi pabba gaf honum nokkru fyrir jól. Hann gaf pabba reyndar þrjár tegundir, úr hrossi, kind og nauti. Kartöflur voru settar út í pottinn eftir tuttugu mínútna suðu. Handa mér útbjó ég sams konar rétt og kvöldið áður og svo lagaði ég uppstúf sem aðeins pabbi og Davíð Steinn gerðu góð skil með bjúgunum og kláruðu. Borðað var um sex leytið en þá var Davíð Steinn búinn að hjálpa afa sínum að ná sambandi við skannan í gegnum tölvuna. Einhver tenging hafði dottið út. Svo pabbi gat loksins skannað inn og prentað út nýtt skjal til að safna daglegum tölum á nýja árinu sem nálgast óðum. Mikið sem mig annars langaði til að smakka bjúgun sem strákarnir og pabbi sögðu að væru mjög góð. Ég varð samt þokkalega södd af mínum mat og þrátt fyrir að langa líka til að smakka grjónagrautinn þá hefði ég ekki haft pláss fyrir hann hvort sem er. Þegar við horfðum á fréttir og veður sáum við að spáin fyrir morgundaginn væri frekar leiðinleg. Bræðurnir ætluðu svo sem hvort sem er ekki að stoppa yfir nótt en þetta varð til þess að ég tók þá ákvörðun að taka mig upp í gærkvöldi og fara heim. Lögðum þó ekki í hann fyrr en klukkan var farin að ganga ellefu. Vorum í samfloti, ég oftast á undan bræðrunum, og vorum komin heim um hálftólf. Ég gekk frá farangrinum en fór svo beinustu leið í rúmið, ekki til að fara að sofa strax heldur til að lesa aðeins í bókinni um Star. Held að klukkan hafi verið að verða eitt þegar ég fór loksins að sofa.

Ofboðslega notalegur tími

Rumskaði um hálfsex í gærmorgun og þurfti að skreppa aðeins á salernið. Reyndi að kúra mig niður aftur en um klukkutíma síðar tók ég upp fartölvuna sem ég hafði meðferðis og "rúntaði" smá í vefheimum og setti inn færslu. Loggaði mig út um þremurkorterum seinna og tók þá fram eina bók. Las til klukkan að verða níu en þá drattaðist ég loksins á fætur. Pabbi kom ekki fram fyrr en um ellefu leytið en hann hafði fengið sér morgunmat og tekið niður hitatölur um sex leytið. Við lögðum ofur áherslu á að gera sem minnst en þó var kveikt á sjónvarpinu og einnig vafrað aðeins á netinu, kaplar lagðir og ég las líka amk 200 blaðsíður. Um fimm leytið brytjaði ég hálfa sæta kartöflu, 3 venjulegar kartöflur, 5 gulrætur og hálfan lauk og setti allt í sama gufusoðninga-pottinn. Ofan á grænmetið lagði ég smá grænkál. Eftir að suðan kom upp lækkaði ég undir og leyfði þessu að malla í tíu mínutur áður en ég setti laxaflak kryddað með hvítlaukspipar, cayennepipar og smá karrý með roðið niður á grænkálið. Þurfti ekki að hækka undir og tíu mínútum seinna var maturinn tilbúinn. Með þessu hafði ég súrkál, grænar steinlausar ólífur og fersk spínat. Pabbi fékk sér hrásallat. Vorum bæði sammála um að þetta hefði verið mjög gómsætt. Pabbi gekk frá eftir matinn og við horfðum og hlustuðum á aftansöng í sjónvarpinu áður en við tókum upp pakkana. Pabbi fékk eggjasuðutæki og konfektkassa frá Davíð Steini og Bríeti, viskíflösku frá Oddi og Inniskó, jólasokka og nýjustu útkallsbókina frá mér. Ég fékk bækur frá Bríeti og Davíð Steini (þau keyptu gjafirnar saman og hann pakkaði þeim saman inn og kvittaði fyrir þau bæði). Bækurnar eru eftir Arnald Indriðason og Jónínu Leósdóttur. Oddur gaf mér bókina Ból eftir Steinunni Sigurðardóttur, pabbi hafði lagt smá aur inn á mig skömmu fyrir jól og fjórðu bókina fékk ég frá tvíburahálfforeldrum mínum, allar þrjár bækurnar; Af bestu lyst í einni bók. Fljótlega eftir að pakkarnir höfðu verið opnaðir lásum við jólakortin okkar. Ég las þau kort sem fylgdu gjöfunum aftur. Stalst svo til þess að smakka aðeins á vanilluís. Fékk mér ekki stóran skammt. Neikvæðu áhrifin komu ekki alveg strax fram en þau komu en voru ekki eins sterk eins og ef ég hefði dottið í súkkulaðiát.

Veislur

Sjálfsagt er smá jólaspenningur að gera vart við sig því það gekk pínu illa að sofna í fyrrakvöld. Það getur líka verið að því að ég ætlaði ekki að geta lagt frá mér bókina sem ég var að lesa, Systirin í storminum, og var klukkan næstum orðin ellefu þegar ég lagði bókina loksins frá mér þá komin á blaðsíðu sjötíuogeitthvað. Ég sem passa yfirleitt upp á það að vera búin að slökkva á leslampanum um tíu og stundum fyrr. En það var svo sem ekki vinnudagur framundan í gær. Ég rumskaði svo um hálfeitt til að skreppa á salernið en sem betur fer sofnaði ég fljótlega aftur. Ég var svo vöknuð fyrir klukkan sjö og hitti aðeins á N1 soninn áður en hann fór á sína vinnuvakt. Lagði af stað í sund um átta. Synti 500 metra, flesta á bakinu en næstum því 100m skriðsund og smá bringusund. Fór þrisvar sinnum í kalda pottinn, einu sinni í þann heitasta, einu sinni í gufu og einu sinni í sjópottinn áður en ég fór upp úr og þvoði mér um hárið. Kom heim rétt fyrir tíu. Sendi sms til tvíburahálfmömmu minnar um að ég ætti bara eftir að pakka niður áður en ég legði í hann austur á bóginn og hvort ég gæti komið við hjá þeim á Selfossi. Þau voru heima og hress og ég velkomin. Ég er alltaf velkomin þangað en það var bara orðið svo langt síðan ég kom við að mér fannst betra að spyrja og gera vart við mig. Það tók mig næstum þrjú korter að pakka niður og ferma bílinn. Pakkaði líklega niður fyrir meira en viku í staðinn fyrir þrjár nætur. Klukkan var því að verða tólf þegar ég "lenti" í Fossheiðinni. Fimm mínútum á eftir mér kom tvíburahálfsystir mín. Það var lagt á borð fyrir fjóra og boðið upp á skötu og saltfisk. Þvílíka veislan. Skatan var mjög góð, fékk mér tvisvar á diskinn og hafði svo ekkert pláss eftir til að smakka á saltfiskinum. Hélt ferðinni austur áfram um eitt leytið og var komin til pabba um tvö. Hann var að gera innkaupalista og spurðim mig hvort það væri eitthvað sem ég sæi að vantaði. Bað hann um að kaupa sæta kartöflu og spurði hvort ég ætti að fara með honum í búðina. Hann sagði að ég þyrfti þess ekki en mætti ef ég vildi. Ég ákvað að vera eftir og taka upp úr töskunum. Um hálfsex leytið bauð pabbi mér svo með sér á Kanslarann í skötu og þáði ég það með þökkum. Þar fékk ég mér aðeins einu sinni á diskinn þó, einhvern veginn ekki pláss fyrir meira og samt hafði ég ekkert fengið mér frá því ég borðaði í hádeginu. Helga systir hringdi í pabba stuttu eftir að við komum til baka. Bríet og Bjarki lentu í smá hrakningum á Hellisheiðinni, bíllinn hans ekki ökufær eftir og Bríet þurfti smá skoðun á sjúkrahúsinu á Selfossi vegna magaverkja. Vonandi verða þau fljót að jafna sig.

Sjórinn -0,3°C í gær

Ég var mætt í vinnu um hálfátta. Það komu skilaboð frá fyrirliðanum að hún yrði aðeins seinni. Ég "sótti" tölur og hlóð inn fyrstu verkefnunum. Fór svo aftur upp, fyllti á vatnsflöskuna og settist niður í kaffistofu með heitt vatn í bolla. Kláruðum fyrstu verkefni dagsins áður en klukkan varð hálftíu. Eftir kaffipásu (ég fékk mér aftur heitt vatn í bolla) lukum við sennilega við að framleiða síðustu gjafakortin fyrir einn bankann. Hráefnið er búið og líklega munum við ekki fá nýjar birgðir í ljósi þess að það er líklegt að íslenskri banka og gjafakortaframleiðslu verði hætt innan árs. Vorum búnar að framleiða hádegisskammtinn upp úr klukkan hálftólf. Gengum frá deildinni, sendum framleiðsluna upp með annarri lyftunni og fórum í mat. Hjálpuðum til í innleggjum og hreinsuðum gullið eftir mat. Ég stimplaði mig út tuttugu mínútum fyrir klukkan þrjú. Það kom athugasemd í mælaborð bílsins um að kominn væri tími á að athuga loftþrýstinginn í dekkjunum. Ég fór þó samt beinustu leið í Nauthólsvík og skellti mér smá stund í sjóinn, gufubaðið, lónið og heita pottinn. Var komin í bílinn aftur um fjögur og ákvað að gera mér ferð upp á Gagnveg í vinnuna til N1 sonarins. Fékk hann til að jafna þrýstinginn á dekkjunum og spjallaði smá við hann og vinnufélaga hans áður en ég fór heim. 

Indó

Við fyrirliðinn hættum gjafakortaframleiðslu rétt fyrir hálfþrjú og gengum frá kortadeildinni. Þá vorum við búnar með allt daglegt og 3000 gjafakort. 500 af þeim framleiddum við fyrir kaffi, 1500 kláruðum við upp úr hálftólf og fórum þá í mat. Í gær var jólamatur í boði fyrir alla hvort sem þeir eru í mataráskrift eður ei. Maturinn kom frá Múlakaffi og sú sem sér um kaffistofuna á D30 alla daga (sem og kaffistofuna á S15 á fundardögum) kom og setti upp matinn. Það kom í ljós að það var ýmislegt í boði sem ég mátti alveg fá mér af og þar að auki var afgangur sem ég mátti taka frá til að borða í hádeginu í dag. Smakkaði samt ekkert af kalkúninum, eplasallatinu eða eftirréttinum. Freistaðist til að fá mér smá rauðkál sem var líklega búið til í Múlakaffi. Mjög gott en líklega var samt eitthvað í því sem maginn minn þoldi ekki. Fann samt ekki fyrir neinu fyrstu klukkutímana eftir mat. Stimplaði mig út korter í þrjú og fór beint í sund. Synti 400 metra, fór 4 ferðir í kalda pottinn, eina í gufu, tvisvar í sjópottinn og eina ferð í heitastapottinn. Var komin heim um hálffimm leytið. Bræðurnir voru hvorugir heima, höfðu skroppið í pakkaheimsóknarferð á Bakkann. Ég byrjaði á því að fleygja mér í sófann með tvær af safnbókunum og las í rúman hálftíma. Þeim tíma var ekki skipt jafnt á milli bóka. Bækurnar sem ég er með af safninu eru:

Læknir verður til eftir Henrik Geir Garcia, Systirin í storminum eftir Lucindu Riley, Systirin í skugganum eftir sama höfund, Hús harmleikja eftir Guðrúnu Guðlaugsdóttur og Gísl eftir Clare Mackintosh. 

Mögnuð stund í sjónum seinni partinn í gær

Vaknaði stuttu fyrir klukkan sex í gærmorgun. Var mætt í vinnuna um hálfátta og fór eiginlega beinustu leið niður í kortadeild að sækja tölur og athuga hvort vélin kæmist í framleiðslugýrinn eftir að ég hafði kveikt á henni. Svo reyndist ekki vera. Um níu var ákveðið að kalla út viðgerðarmann. Hann kom á svæðið upp úr klukkan hálfellefu. Hann sagði okkur eiginlega strax að honum sýndist þetta ekki vera beint vélarbilun heldur samskiptaleysi í örgjörvamódúlnum við ákveðið kerfi. Fyrirliðinn hafði því samband við kerfisfræðinginn okkar og bað hann um að endurræsa þetta ákveðna kerfi. Það reyndist nóg til að koma vélinni í vinnugýrinn. Milli klukkan ellefu og hálfeitt framleiddum við daglegu kortin og 600 gjafakort. Frá korter yfir eitt til klukkan hálfþrjú lukum við svo við að framleiða endurnýjunina sem við vorum að vinna í þegar vélin hætti að vinna í fyrradag. Stimplaði mig úr vinnu klukkan hálffjögur. Kom við í Fiskbúð Fúsa til að kaupa harðfisk. Næst lá leiðin á bókasafnið að skila þremur bókum af fjórum. Fjórðu bókina var ég ekki byrjuð á en hún er hátt í 600 blaðsíður. Engu að síður tók ég fjórar bækur með mér af safninu og er ein þeirra einnig um 600 blaðsíður. Engin af bókunum er skammtímaláns en mig grunar að ég muni þurfa að framlengja skilafrestinum á þeim öllum. Meira um þessar bækur síðar. Af safninu fór ég beinustu leið í Nauthólsvík og skellti mér aðeins í 1,6°C sjóinn í þessu svartasta skammdegi. Sjórinn var spegilsléttur og sama og engin ferð á logninu. Var út í í rúmar sjö mínútur og svo ca korter í heita pottinum áður en ég fór upp úr og heim. 

Í sjóinn eftir vinnu og nokkur erindi

Bílarnir okkar N1 sonarins voru hlið við hlið í stæði í gærmorgun. Þetta vissi ég því sonurinn var að ljúka við að skafa og sópa af sínum bíl og leggja af stað í vinnuna þegar ég kom út ca tíu mínútur yfir sjö. Ég var nokkuð snögg að skafa og sópa af mínum bíl og var mætt í mína vinnu um hálfátta. Það var komin meiri endurnýjun, ekki jafn stór og sú sem við lukum við á mánudaginn. Framan af morgni stóð það til að fyrirliðinn þyrfti að skreppa úr vinnu og sinna brýnu erindi. Það erindi datt þó upp fyrir og í staðinn fórum við að vinna að endurnýjuninni. Einnig voru send á vélina gjafakort fyrir einn sparisjóðinn sem við lofuðum að yrðu unnin sem fyrst. Tuttugu mínútum fyrir þrjú hætti vélin allt í einu að vinna í miðju kafi. Vorum í um fimm korter að reyna að tjónka við hana en við komum henni ekki af stað sama hvað. Við ákváðum að kannski myndi hún haga sér betur eftir góða næturhvíld. Gengum frá kortadeildinni og ég stimplaði mig út rúmlega fjögur. Hringdi aftur í pabba á leiðinni yfir í Laugardalinn. Þurfti að segja honum að ég hefði sofið af mér byrjunina á nýjastu Reykjaneseldunum. Frétti fyrst af gosinu á samfélagsmiðlunum í gærmorgun.  Eftir eina ferð í kalda pottinn og 500 metra sund hitti ég kaldapotts vinkonu mína. Fórum saman þrjár ferðir í kalda, tvær ferðir í heitasta, eina í gufuna og eina í sjópottinn. Þá var mér orðið mikið mál að komast á klósettið, kvaddi og fór upp úr. Held að vinkona mín hafi tekið eina til tvær ferðir í viðbót í þann kalda. Ég var komin heim um sex leytið.

Töluvert gos í gangi

Vaknaði um sex í gærmorgun. Var ekkert að flýta mér að neinu. Þurfti að skafa aðeins og sópa af bílnum áður en ég lagði af stað í vinnuna á áttunda tímanum. Eftir að hafa stimplað mig inn í vinnunni og opnað seinni lásinn á ytri hurðinni á hvelfingunni uppi fór ég niður að ná í tölur. Það voru alvöru tölur á ferð. Daglegu tölurnar voru reyndar ekkert svo háar en það var komin endurnýjun upp á meira en tvöþúsund og tvöhundruð kort. Fyrirliðinn var í bókhaldinu og á móttökuendanum og okkur tókst að framleiða allan fyrirliggjandi skammt bæði af daglegum kortum, smá gjafakortum og þessa endurnýjun á nokkrum klukkutímum. Vorum búnar að ganga frá kortadeildinni um hálfþrjú. Seinasta klukkutímann fór ég yfir skjöl. Stimplaði mig út úr vinnu um hálffjögur. Hringdi í pabba og talaði við hann á meðan ég var á leiðinni yfir í Laugardalslaug. Hitti kaldapotts vinkonu mína í hennar þriðju ferð í kalda pottinum. Fórum fjórar ferðir saman, tvær í heitasta, eina í gufu og eina í sjópottinn. Svo fór hún upp úr en ég synti fyrst 400metra. Var komin heim um hálfsex. 

Inniskór

Var komin á fætur upp úr klukka sjö í gærmorgun en fór ekki í sund fyrr en um níu leytið. Fór fyrst tvær ferðir í þann kalda með viðkomu í heitasta pottinum á milli ferða. Synti svo 500 metra áður en ég fór aftur í þann kalda. Var í minni fjórðu ferð í kalda pottinn þegar kalda potts vinkona mín mætti á svæðið. Fór tvær ferðir með henni, eina í gufuna og svo sátum við góða stund í sjópottinum. Ég var komin heim um hálftólf. Fór ekkert út aftur en fjórum sinnum niður í þvottahús. Bríet frænka kíkti við og gat ég afhent henni jólakortið til hennar og Bjarka. Þá á ég bara eftir að afhenda síðasta jólakortið. Það verður gert á leiðinni austur á Þorláksmessu. Þegar fór að rökkva aftur kveikti ég á nokkrum sprittkertum og setti út í stofuglugga í mismunandi kertastjökum/ílátum. Fyrir seinni tvær ferðirnar í þvottahúsið klæddi ég mig í kósí föt. Var svo að lesa, horfa á fótbolta, þætti og hafa það huggulegt sem mest ég gat. 

Syndari

Rumskaði um fjögur leytið í gærmorgun og fannst það heldur snemmt. Skrapp fram á salernið og gerði svo tilraun til að sofna aftur. Það tókst eftir smá tíma og það vel að ég hafði mig ekki á fætur fyrr en klukkan var um hálfníu í gærmorgun. Ég sleppti þess vegna morgun netvafrinu og fór beint í sund. Byrjaði á þremur mínútum í kalda pottinum. Hitti yngstu mágkonu mömmu í sjópottinum og spjallaði við hana í góða stund áður en við fórum að synda. Ég skellti mér í hálfa mínútu í þann kalda og fór svo á braut 2 og synti 500 metra, flesta á bakinu. Hún fór beint á brautir 7 og 8. Ég var svo að koma úr þriðju ferðinni úr þeim kalda þegar við hittumst aftur á leiðinni upp úr. Þvoði mér um hárið og var mætt til norsku esperanto vinkonu minnar korter fyrir ellefu. Stoppaði hjá henni í rúm fimm korter. Við lásum m.a. tvær blaðsíður af esperanto smásögu. Kom svo við í Krónunni áður en ég fór heim. Eftir að hafa gengið frá sunddóti og búðarvörum settist ég niður með fartölvuna í fanginu í um klukkustund. Ég var nýbúin að slökkva á henni og leggja tölvuna frá mér þegar Ella vinkona hringdi í mig. Hún var búin að fá sendinguna og opna hana. Leit á innihaldið sem jólagjöf og sagðist hafa lokað pakkanum aftur og ekki sýna manninum fyrr en á jólunum. Innihaldið í brúna umslaginu var jólakort í umslagi merkt jól, borðtuska og bók sem ég pakkaði ekkert sérstaklega inn því þetta var bara smá hugdetta að koma á óvart og ég var þar að auki búin að lesa bókina, sem kom út í fyrra, sjálf. Annars sagði Ella mér af hraðsláttar vandamálum sem fór að bera á fyrir tveimur mánuðum. Fyrir viku síðan kom upp þriðja tilfellið og þá loksins fór hún að láta líta á sig. Það eru til þrjár aðferðir til að reyna að ná niður púlsinum (fyrir utan lyf), engin þeirra aðferða virkaði á Ellu svo hún var sett á lyf. Svo sagði hún að mátturinn í fótunum færi minnkandi og það liði senn að því að hún verði að leggja göngugrindinni og treysta alfarið á hjólastólinn. En eins erfitt og þetta dæmi er þá er vinkona mín ekkert að barma sér og tekur þessu af miklu æðruleysi. Segir að það þýði ekkert að velta sér upp úr því sem lítið er hægt að gera við. En hún sagði mér líka að elsta barnið hennar og það yngsta verði hjá henni um jólin og miðjubarnið komi til hennar milli jóla og nýárs. Bræðurnir skruppu saman í Kringluna og svo til hinnar fjölkyldunnar. Ég hringdi í pabba, horfði á þætti og smá bolta. Annars er aðal boltaleikurinn seinni partinn í dag. 

Sjórinn eftir vinnu í gær

Vinnudagurinn í gær leið hratt og gekk ágætlega fyrir sig. Stimplaði mig út tuttugu mínútum fyrir þrjú og var komin í Nauthólsvík um þrjú. Leist satt að segja ekkert á blikuna á leiðinni á milli staða því það kom dimmt él og rok-kviðurnar tóku í. Ég ákvað þó að halda sjósundsferð til streitu. Sjórinn var 1,1°C og svolítill öldugangur en það er einmitt svo gaman að hoppa í öldunum. Var út í í svona þrjár mínútur og fór beinustu leið í gufuna. Sat í gufunni í uþb tíu mínútur og trítlaði svo aðeins í lónið. Fékk á mig hagl á leiðinni en eftir rúmar þrjár mínútur í lóninu fékk ég mikinn meðbyr og nánas hljóp yfir heita pottinum. Sat óvenju stutt í pottinum en þó amk tíu mínútur. Var komin heim um hálffimm leytið. Það voru ekki margir í Nauthólsvík á meðan ég var þar. Við vorum eitthvað um tíu en það voru að koma fleiri um það leyti sem ég var að fara. 

Enn og aftur komin helgi

Vaknaði um sex leytið í gærmorgun. Mætti í vinnu stuttu fyrir klukkan hálfátta og var byrjuð í innleggs vinnunni rétt fyrir átta. Rafmagnið blikkaði tvisvar sinnum á stuttum tíma um tíu leytið, blikkaði þannig að það slökknaði á tölvunum. Sem betur fer var ég ekki með innlegg í vinnslu akkúrat á þeim blikk augnablikum svo það sem ég var búin að vinna hélst inni. Vorum búin fyrir klukkan hálfþrjú. Ég fór beint yfir í Laugardalinn og hringdi í pabba á meðan ég var á leiðinni þangað. Var byrjuð að synda tíu mínútum fyrir þrjú og synti 500 metra á rúmum tuttugu mínútum. Þá fyrst fór ég í þann kalda. Sat svo góða stund í sjópottinum áður en ég fór aftur í kalda. Var í þriðju kalda potts ferðinni þegar vinkona mín mætti á svæðið. Saman fórum við tvær ferðir í kalda og eina í gufu. Eftir gufubaðið fór ég upp úr og heim enda klukkan orðin hálffimm.

Þarabað

Rumskaði um hálfsex í gærmorgun en vaknaði svo tuttugu mínútur yfir sex, innan við tíu mínútum áður en vekjaraklukkan átti að hringja. Dreif mig á fætur, sinnti morgunverkunum á baðherberginu, fékk mér vatnglas og vítamín. Vafraði um á netinu í um hálftíma. Þá fékk ég mér kókosvatn og hinn helminginn af vítamínunum. Mætti í vinnu áður en klukkan var orðin hálfátta. Ég var samt alls ekki fyrst á svæðið, sennilega sú fjórða. Innleggin gengu vel fyrir sig og við kláruðum í fyrra fallinu eða fyrir klukkan hálfþrjú. Eftir að hafa stimplað mig út fór ég beinustu leið í Nauthólsvík. Dýfði mér aðeins í ca eina mínútu í sjóinn áður en ég fór yfir að Siglunesi þar sem búið var að safna þara og setja í stórt kar ásamt rúmlega 34°C heitu vatni. Ég hef aldrei prófað svona áður en fannst þetta alveg himneskt og ætlaði varla að tíma að fara upp úr. Held að ég hafi verið uþb fjörutíu mínútur ofan í þarasúpunni. Skrapp svo í heita pottinn og var þar í korter áður en ég fór upp úr. Fann smá þara fyrir innan sundbolinn þegar ég fór í sturtu. Var komin heim um fimm.

Rok og rigning

Vaknaði um sex í gærmorgun. Í vinnunni var ég alfarið uppi í innleggjum. Davíð Steinn hringdi í mig um tíu leytið. Hann hafði skilið bílinn sinn eftir á verkstæði við Tangarhöfða og átti von um að geta sótt hann seinni part dags og vildi athuga hvort ég væri til í að skutla honum. Ég lofaði að hringja í hann þegar ég væri búin að vinna til að kanna stöðuna. Hann hringdi aftur um tvö leytið. Heyrði reyndar ekki í símanum þá því ég var komin á kaf í að hreinsa gullið. Þegar ég hringdi til baka sagðist hann líka hafa sent mér sms um að bíllinn væri klár en það væri samt ekkert stress því það væri opið til klukkan sex. Ég var búin að vinna um hálffjögur og sendi honum þá sms um að ég væri að stimpla mig út og á leiðinni að sækja hann. Vorum komin upp á Tangarhöfða rúmlega fjögur. Skildi hann eftir þar og fór svo bara heim þrátt fyrir að vera með sunddótið með mér. Þannig að ég skrópaði í sundið í gær.

Upplagt að nýta tímann

Vaknaði stuttu fyrir klukkan sex í gærmorgun. Fimm korterum síðar lagði ég af stað í vinnuna og tók smá krók til að setja tvö síðustu jólakortin sem fara í póst í póstkassann á pósthúsinu í Síðumúla. Var mætt í vinnuna rúmlega hálfátta og fór beint niður í kortadeild til að kveikja á vélinni, "ná í" tölur og hlaða inn fyrstu verkefnum dagsins. Bæði verkefnin voru í kringum níutíu kort en við vorum búnar að framleiða þau og komnar í kaffi um hálftíu. Milli tíu og ellefu var ég í innleggjum. Hádegis skammturinn var framleiddur á tólfta tímanum, tæp áttatíu kort og vorum við búnar að ganga frá deildinni tuttugu mínútum fyrir tólf. Eftir hádegi var yfirferð á vélinni. Fyrrum fyrirliði sá um að sitja yfir viðgerðarmönnunum en ég var uppi í innleggjunum. Klukkan var orðin fjögur þegar ég stimplaði mig út. Fór beinustu leið í sund og hitti kaldapotts vinkonu mína þegar ég var í fyrstu ferðinni í kalda og hún kom í sína aðra ferð. Fórum tvær ferðir í viðbót áður en við fórum í gufu. Úr gufunni fórum við í sjópottinn. Þegar hún fór í sína fimmtu ferð í kalda pottinn var klukkan orðin hálfsex og ég ákvað að drífa mig upp úr til að koma við á einum stað áður en lokaði klukkan sex. Var komin í Faxafen 5 tólf mínútum fyrir sex og svo í Fiskbúð Fúsa rétt rúmlega sex. Á seinni staðnum keypti ég harðfisk og ýsu í soðið sem ég eldaði handa mér um leið og ég kom heim. Með ýsunni hafði ég súrkál og afganga af gufusoðnu grænmeti sem ég tók með að austan. 

Ð

Svaf alveg ótrúlega vel í fyrrinótt. Rumskaði aðeins um sex og hefði þurft að fara fram á salernið en ég steinsofnaði strax aftur og svaf í tvo tíma í viðbót. Var komin á ról um hálfníu leytið og pabbi kom fram skömmu síðar. Verkefni dagsins var að skrifa á sem flest af jólakortunum og helst klára enska jólabréfið. Gleymdi að taka með mér bréfið sem ég fékk frá Janis sl sumar svo ég ákvað að ég gæti byrjað aðeins á bréfinu en ekki klárað það fyrir austan. Dagurinn leið alveg ótrúlega hratt. Lagði kapla inn á milli. Var með mat um eitt leytið. Vafraði aðeins á netinu og las í skammtímalánsbókinni. Þegar ég tók mig saman um hálffimm leytið átti ég aðeins eftir að klára enska bréfið og skrifa á fjögur jólakort. Þrjú af þeim fjórum jólakortum mun ég bera sjálf út. Kom við í Síðumúlanum rétt um sex í gær og setti 17 umslög í póstkassann. Fljótlega eftir að ég kom heim kláraði ég enska bréfið og að skrifa á síðustu jólakortin. Svo var ég næstum búin að festast í að horfa á upptöku á leik Noregs og Frakklands en ég ákvað að vera skynsöm og drífa mig í rúmið. Las nú samt til klukkan langt gengin í ellefu.

Í föðurhúsum

Í gærmorgun var ég komin á fætur fyrir klukkan sjö. Rúmum klukkutíma seinna fór ég í sund. Byrjaði rútínuna á því að fara í kalda, heitasta, kalda, gufu og sjópottinn áður en ég fór á braut sex og synti 400 metra á bakinu. Fór svo í kalda, heitasta og stutta dýfu í þann kalda áður en ég fór upp úr og þvoði mér um hárið. Var mætt til esperanto vinkonu minnar stuttu fyrir klukkan hálfellefu. Stoppaði hjá henni í fimm korter. Þegar ég kom heim, skömmu fyrir tólf, fór ég beint í að taka mig saman fyrir helgarskrepp út úr bænum. Kom við í Heilsuhúsinu í Kringlunni og stoppaði einnig stutta stund hjá frændfólki á Selfossi. Var að færa þeim tuskur. Þáði ekkert nema vatnsglas og gott spjall. Klukkan var að byrja að ganga þrjú þegar ég kom austur til pabba. Hann var að þrífa ísskápinn og búinn að setja upp jólagardýnur í eldhúsið og jólaljós í eldhúsglugga og stóra stofugluggann. Einnig voru óróarnir frá Georg Jensen komnir upp í stofugluggana. Ég hafði tekið með mér nokkur tebréf sem ég veit að ég má drekka og hitaði vatn út á eitt slíkt, kamillute. Settist stund við eldhúsborðið og lagði nokkra kapla. Svo færðum við feðgin okkur inn í stofu að horfa á boltaútsendingar og ég raðaði jólakortadótinu og skriffærum í kringum mig. Fann þrjú óskrifuð en tilbúin kort frá því í fyrra svo bunkinn var kominn upp í 28 stk. en ég er búin að skera niður á listanum svo það verða líklega 6-8 tilbúin en óskrifuð kort eftir fyrir vertíðina næsta ár. 6 stk. því ég er að spá í að skrifa á sér kort til yngri systurdóttur minnar og einnig senda eitt kort til Ísafjarðar. Held ég hafi samt ofáætlað frímerkin á kortin sem fara munu í póst en það gerir ekkert til. Afraksturinn á kortaskrifunum í gær var samt bara þrjú kort en ég skrifaði líka annað jólabréfið svo ég er bara þokkalega sátt. Eftir kvöldfréttir borðuðum við pabbi bleikju með gufu soðnu grænmeti (rauðkáli, hvítkáli, lauk og sætri kartöflu). Hann fékk sér stjörnuhrásallat að auki en ég súrkál. Horfðum svo á úrslitin í jólastjörnunni og upptöku frá jólagestum Björgvins frá því fyrir nokkrum árum. Ég fór ekki upp í rúm fyrr en klukkan var orðin hálfellefu og þá las ég í smá stund í skammtímalánsbókinni. Held ég hafi verið sofnuð áður en klukkan var orðin hálftólf.

Laugardagur

Klukkan var byrjuð að ganga sjö þegar ég  vaknaði í gærmorgun, þó var enn korter í að vekjarinn færi í gang. Slökkti á honum og fór á fætur. Var mætt í vinnu um hálfátta. Heildar kortaframleiðsla náði ekki þrjúhundruð kortum en það var nóg að gera uppi og var klukkan að verða þrjú þegar ég stimplaði mig út. Bauðst til að skutla einni sem vinnur með mér heim. Hún býr í efra Breiðholti. Hún ætlaði að reka erindi í Mjóddinni og sagðist alveg vilja fá far þangað. Eftir skutlið fór í pósthúsið við Síðumúla. Þangað var ég komin ca korter fyrir lokun. Nóg var að gera en ég þurfti samt ekki að bíða nema í rúmar tíu mínútur. Var að versla frímerki á nokkur (enn óskrifuð) jólakort innanlands, tvö frímerki á (óskrifuð) jólabréf til Danmerkur og Englands og svo áætlaði ég þyngd á tveimur A4 umslögum sem sendingu til Egilsstaða og sveitina fyrir Norðan. Það er því nokkuð ljóst hvaða verkefni bíður helgarinnar. 

Undarlegt að það sé komin helgi enn á ný

Vinnudagurinn í gær var rólegur í kortunum en annasamtur í innleggjunum. Var að vinna til klukkan rétt tæplega fjögur. Fór svo beint í sund. Hitti kalda potts vinkonu mína í kalda pottinum. Hún var að fara í sína aðra ferð. Tókum fjórar ferðir í þann kalda, tvær í heitasta pottinn, eina ferð í gufuna og eina ferð í sjópottinn. Ég endaði í kalda pottinum áður en ég fór upp úr og heim um fimm leytið en vinkona mín ætlaði að vera eitthvað lengur að pottormast. 

Jamm

Það er nokkuð um veikindi á vinnustaðnum þessa dagana. Engu að síður gengur ágætlega að vinna upp innleggin og annað sem þarf að gera án þess að vera alveg fram á kvöld. Ég var búin í vinnunni í gær um þrjú leytið. Þó það væri freistandi að skreppa aðeins í 0,9°C sjóinn ákvað ég að vera skynsöm. Ég er enn með smá kvef og vildi ekki hætta á að slá niður. Kom við í Bókasafninu og skilaði þremur bókum, ein af þeim var skammtímalánsbók með skilafrest til 7. des. Tók tvær bækur í staðinn, aðra sem er á sjötta hundrað blaðsíður og hina sem er ný, yfir tvöhundruð blaðsíður og með fjórtán daga skilafresti. Bræðurnir voru ekki heim þegar ég kom heim en það var vitað. Þeir skruppu saman í heimsókn til föðurömmu sinnar. Stuttu fyrir klukkan hálfátta fór ég á bílnum og lagði honum á stæði við Domus Medica. Þaðan labbaði ég upp í Hallgrímskirkju. Esperanto vinkona mín var búin að bjóða mér á Aðventutónleika fjögurra kvenna/stúlknakóra. Inger var með miðana en hún og ein úr Viðeyjargenginu komu svona fimm mínútum á eftir mér. Það var uppselt á viðburðinn. Mér var boðið að koma inn í anddyrið á meðan ég beið en ég rétt kíkti þangað inn bara til að fullvissa mig um að þar var enginn að bíða eftir mér. Kórarnir fjórir voru; Aurora, Cantabile, Stúlknakór Reykjavíkur og Vox feminae. Dagskráin hófst á tónleikaatriði, fiðluleik við orgel undirspil. Á dagskrá voru 18 atriði. Fjórar konur sungu einsöng með eða án kóranna. Diddú var ein af þessum konum. Ekkert hlé var á tónleikunum en tíminn leið mjög hratt enda skemmti ég mér vel. Var komin heim aftur upp úr klukkan hálftíu. Fór þá beint í rúmið en las óvenju lengi, eða til klukkan hálfellefu. 

Rökkrið er mjög dökkt þessa dagana

Vaknaði útsofin um hálfsex leytið í gærmorgun. Tæpum tveimur tímum síðar var ég mætt í vinnu. Ekkert auka er í framleiðslu þessa dagana og við kláruðum fyrstu tvo skammtana áður en klukkan varð hálftíu. Vorum í innleggjum það til hádegisskammturinn skilaði sér. Vorum búnar að ganga frá og loka kortadeildinni stuttu fyrir klukkan tólf. Eftir hádegi héldum við áfram í innleggjunum. Það var nóg að gera. Ég var búin um þrjú leytið og farin úr vinnu upp úr klukkan hálffjögur. Hringdi aftur í pabba til að segja honum músasöguna. Hann var þá staddur á Selfossi hjá Jónu Mæju. Hafði skroppið í bæinn til að láta þvo bílinn og stoppaði á Selfossi í baka leiðinni. Ég var byrjuð að synda um fjögur. Synti 500 metra á uþb 25 mínútum. Hitti ekki á kalda potts vinkonu mína en hún hafði sent skilaboð um að komast ekki í sund fyrr en um fimm leytið. Kom við á einum stað áður en ég fór heim eftir sundið. Horfði á hluta af landsleik kvenna í fótbolta við Dani. Missti þó af því þegar Ísland skoraði sigurmarkið. Ánægð með stelpurnar okkar og mikið svakalega stóð markvörðurinn sig vel. Þar er heilmikið efni á ferð. 

Eitthvað út í loftið

Klukkan var ekki nema hálfsex þegar ég rumskaði í gær við það að ég þurfti á salernið. Eiginlega of snemmt til að fara á fætur svo ég gerði tilraun til að kúra mig niður aftur eftir að hafa skroppið á snyrtinguna. Sú tilraun gekk ekki upp svo ég ákvað að klæða mig. Hafði ekki sett símann í hleðslu í fyrrakvöld. Það var sennilega alveg nóg á honum uþb 65% en ég ákvað samt að hlaða hann á meðan ég væri heima. Sinnti morgunverkunum og settist síðan inn í stofu með fartölvuna í fanginu. Um hálfsjö fór vekjaraklukka af stað. Hélt að N1 sonurinn ætlaði bara að fara á fætur í fyrra fallinu. Vekjarinn hélt áfram að hringja og ca 3-4 mínútum seinna ákvað ég að fara og banka á dyrnar hjá syninum. Hann var alveg saklaus, vekjarinn hans átti ekki að hringja fyrr en korter fyrir sjö. Ég hafði þá sjálf gleymt að slökkva á mínum eigin vekjara þegar ég fór á fætur og var þarna kannski búin að vekja eitthvað af nágrönnunum.

Mætti í vinnu stuttu fyrir klukkan hálfátta. Þar hafði ýmislegt gengið á á kaffistofunni skömmu áður en ég mætti. Einhvern veginn hafði mús komist inn og inn á kaffistofu. Músin forðaði sér inn í aðra uppþvottavélina og í stað þess að reyna að veiða hana þar var ákveðið að setja vélina bara í gang. Annars var ég á móttökuendanum á framleiðsluvélinni. Aðeins lágu fyrir dagleg verkefni. Lukum fyrri skömmtunum af rétt fyrir hálftíu. Fórum svo niður aftur um ellefu leytið og vorum búnar fyrir klukkan tólf. Eftir hádegi var fyrrum fyrirliði í reikningagerðinni en ég var að hjálpa til í sumum uppi verkefnunum alveg til klukkan að verða fjögur. Þá fór ég í sund. Hringdi í pabba á leiðinni yfir í Laugardalinn en gleymdi að segja honum frá músinni, enda sá ég hana aldrei sjálf. Henni var hent í poka og út í gám. Kalda potts vinkona mín var í sinni annarri ferð í kalda pottinum þegar ég mætti. Saman fórum við þrjár ferðir, eina í gufuna og eina í sjópottinn. Innilaugin var ekki í notkun svo það var mikið um að vera á flestum brautunum í útilauginni. Ég synti því ekkert en þvoði mér samt um hárið á leiðinni upp úr. Var komin heim skömmu fyrir klukkan sex. 

Værukær

Svaf til  klukkan að byrja að ganga átta í gærmorgun. Var eitthvað að spá í að skreppa aðeins í sund en fljótlega ákvað ég að halda mig inni og heima. Líkt og á laugardaginn fór ég tvisvar í þvottahúsið, til að sækja þvott, setja í vél og hengja upp. Rétt fyrir tvö eða um það leyti sem leikur Liverpool og Fulham í ensku deildinni var að byrja datt mér í hug að athuga hvort ég gæti ekki nýtt tímann til að föndra á meðan ég fylgdist líka með leiknum. Þetta gekk svona glimrandi vel. Byrjaði á því að skera þykkar litaðar og hvítar arkir í tvennt og brjóta helmingana upp í kort. Held að ég hafi búið til helmingi fleiri kortagrunna en ég þarf. Svo klippti ég út nokkrar jólamyndir úr blöðum sem ég er búin að eiga í nokkur ár og klippa áður úr. Áður en fótboltaleikurinn var búinn var ég byrjuð að líma, skreyta og föndra. Hélt þessu föndri áfram og fylgdist einnig með lokaleik dagsins sem var milli Manchester City og Tottenham. Um það leyti sem kvöldfréttirnar voru að klárast var ég búin að búa til 25 kort, kvótinn kominn og sennilega rétt rúmlega það. Nú á ég bara eftir að setja hvítar arkir inn í lituðu kortin og svo væri snilld að byrja að skrifa kortin sem fyrst.

Hana nú!

Það er þrálátt kvefið. Ekki með hita, nef og ennisholur ekki stíflaðar, smá eymsli í hálsinum gera það að verkum að ég er latari en dags daglega. Var þó komin á fætur um sjö í gærmorgun og eitthvað að spá í að skreppa í sund. Endirinn varð samt sá að ég hélt mig inni við og heima við allan daginn. Einu skiptin sem ég fór út úr íbúðinni voru þau tvö skipti sem ég skrapp niður í þvottahús til að setja í eina vél og hengja upp. Hringdi í pabba um hálftvö leytið og vakti hann víst upp af hádegisblundinum eftir hádegisfréttirnar. Hann hafði verið svo fast sofandi að í fyrstu hélt hann að vekjaraklukkan væri að hamast þegar það var síminn og önnur dóttlan að trufla draumana. Annars sonurinn skrapp til pabba síns en hinn eldaði sér stórsteik og fór svo á nokkra klukkutíma aukavakt á N1 við Borgartún. Ég sýslaði ýmislegt en gerði lítið af því sem ekki má skrifa um, meira af því sem ég skrifa oft um. Dagurinn leið ótrúlega hratt og klukkan var orðin tíu þegar ég skreið upp í rúm. 

Fyndið eða fúlt?

Sennilega er ég ekki að fara alveg nógu vel með mig því það situr í mér þrálátt kvef með tilheyrandi leiðindum. Að vísu hefur ekki stíflast neitt, hef varla fundið fyrir hálsbólgu og alveg haft næga orku í daglegt stúss og vinnumál. Svaf eitthvað stopult í fyrrinótt en var vöknuð á mínum tíma og mætt í vinnu um hálfátta. Framleiðslu vikunnar var lokið stuttu fyrir tólf. Framkvæmdastjórinn og næstráðandi hans voru á fundi til klukkan langt gengin í eitt og við biðum bara rólegar eftir að þau kæmu í mat. Vorum að ganga frá eftir matinn til klukkan rúmlega hálftvö og skiluðum svo af okkur eldhúsvaktarböngsunum til þeirra sem eiga vaktina í næstu viku. Það teygðist úr vinnudeginum hjá sumum. Ég stimplaði mig út klukkan hálffjögur. Var með sjósundsdótið meðferðis en taldi það skynsamlegra að sleppa ferð í sjóinn. Kom við á tveimur stöðum áður en ég fór bara heim. Ég var komin í rúmið um hálftíu og sofnuð upp úr klukkan tíu. 

Afmælisheimboð

Þegar ég kom heim í gær og fór á netið biðu skilaboð eftir mér frá einni fyrrum samstarfskonu minni. Hún setti á kortagrúppuna sem var að vinna saman í K1 til október í fyrra. Hún bauð okkur heim til sín um fjögur leytið í gær í tilefni af 55 ára afmæli. Ég var búin að vinna fyrir klukkan þrjú. Fyllti tankinn hjá AO við Öskjuhlíð og skrapp svo heim í hálftíma. Við fjórar gestirnir komum allar á svipuðum tíma tvær af okkur voru með afmælisgjöfina; nýjasti jólaóróinn og tíminn minn 2024. Gestgjafinn og afmælisbarnið var steinhissa því hún var ekki að ætlast til þess að fá neina gjöf heldur langaði hana að hitta okkur. Hún bauð upp á alls konar kruðerí en ég þáði ekkert nema kalt vatn. Löngunin í sumt af kruðeríinu var alls ekki svo sterk. Ég var búin að vara við í grúppunni. Skrifaði að ég myndi koma í heimsókn er segði pass á veitingarnar. Stoppuðum í hátt í tvo tíma sem liðu ógnar hratt. Kom heim um upp úr klukkan sex. 

Inn

Svaf til klukkan hálfsex í gærmorgun. Var mætt í vinnu um hálfátta. Hættum framleiðslu stuttu fyrir þrjú. Ég var komin í sjóinn tuttugu mínútum fyrir fjögur. Það var fjara, sjórinn 2,1°C og ég var út í í tæpar tíu mínútur. Fór ekkert í lónið en sat góða stund á spjalli í heita pottinum. Úr Nauthólsvík lá leiðin í Forlagðið við Fiskislóð, Löður og Krónuna. Bræðurnir voru nýlega komnir heim þegar ég kom heim um sex leytið. Föðurafi þeirra var jarðsunginn í kyrrþey í Eyrarbakkakirkju í gær. Þeir voru kistuberar ásamt pabba sínum bræðrnum hans og fóstursyni yngsta föðurbróðurins. Báru kistuna úr líkbílnum inn í kirkju fyrir athöfn og út úr kirkjunni eftir athöfn. Þá var hún sett á stall svo þeir sem ekki ætluðu í garðinn gætu signað yfir hana. Kistuberarnir þurftu líka að bera kistuna úr líkbílnum í garðinn og láta hana síga ofan í gröfina. Davíð Steinn sagði að þetta hafi gengið mun betur en hann átti von á. Oddur Smári hefur ekkert tjáð sig um þetta. Horfði á einn þátt og Kiljuna en var komin upp í rúm fyrir klukkan hálftíu.

Krukka með blöndu af fræjum, hnetum og möndlum

Rumskaði um fjögur leytið í gærmorgun. Fór á salernið og beint aftur upp í rúm. Gat samt ekki sofnað neitt að ráði aftur og var komin á fætur fyrir klukkan sex. Var alveg hress og kát í vinnuni. Frágangurinn í kaffistofunni eftir hádegismatinn gekk vel og í framleiðslunni framleiddum við um fimmtán hundruð gjafakort og svo tvo þriðju að rúmlega níuhundruð korta endurnýjun. Hættum rétt fyrir þrjú. Um það leyti fann ég að ég var að verða hálf syfjuð og þreytt. Það freistaði mín í smá stund að fara beint heim eftir vinnu en ég lét það ekki eftir mér. Spjallaði við pabba á meðan ég var á leiðinni yfir í Laugardalslaug. Rútínan í sundinu tók mig einn og hálfan tíma. Synti m.a. 500 metra. Kom heim um hálfsex leytið og var það endurnærð eftir sundið að ég hékk uppi alveg til klukkan að byrja að ganga tíu. Þá fór ég upp í rúm og las í ca hálftíma áður en ég fór að sofa. 

Kvartanir... nenni þeim alls ekki

Sem oftast fyrr á virkum morgnum var ég vöknuð rétt fyrir klukkan sex í gærmorgun. Fimm korterum síðar lagði ég af stað í vinnuna. Fram í miðja viku mun ég vera á ítroðsluendanum á kortaframleiðsluvélinni og eftir að hafa stimplað mig inn í vinnu og opnað seinni lásinn á ytri hurðinni á hvelfingunni uppi fór ég niður að "ná í" tölur og hlaða inn fyrirliggjandi verkefnum. Fór svo upp aftur til að fylla á vatnsbrúsann minn og fá mér heitt vatn. Fyrirliðinn var í bókhaldinu og á móttökuendanum og fyrrum fyrirliði í innlögnum. Við tvær sem erum á kortavélinni þessa vikuna erum líka skráðar á kaffistofu vaktina þessa vikuna. Sú sem var með mér áður á von á frumburði sínum á næstu dögum og er komin í leyfi. Umslagavélin var með smá uppsteit í debetframleiðslunni en við lukum við þann skammt ásamt visa og 200 gjafakortum um hálftíu. Milli tíu og hálftólf framleiddum við 1000 gjafakort og kláruðum hádegisskammtinn um tólf. Vel gekk að ganga frá í eldhúsinu eftir matinn en líklega hefði verið betra að ég hefði tekið það að mér ein á meðan fyrirliðinn sinnti bókhaldsvinnunni því svo þurfti ég að bíða aðeins eftir henni áður en við framleiddum 1000 gjafakort í viðbót. Sú bið getur verið mismunandi og eiginlega ekki hægt að demba sér í önnur verkefni á meðan og ekki má vera einn á framleiðsluvélinni. Stimplaði mig út um þrjú og fór beinustu leið yfir í Laugardalslaug. Kalda potts vinkona mín kom á sama tíma og ég ákvað að elta hana á milli potta og gufu en skrópa í sundinu. Kom heim um fimm leytið. Bræðurnir voru búnir að fara saman í verslunarleiðangur. Annar þurfti að kaupa sér skyrtu og bindi en hinn nýja spariskó og báðir fóru þeir í klippingu og skeggsnyrtingu en þeir verða kistuberar á morgun. 

Ennþá er að dimma meir og meir

Var komin á fætur um hálfátta í gærmorgun. Var eitthvað að spá í hvort ég ætti að gera mér ferð í laugina í Grafarvogi og prófa infrarauðu gufuna en klukkan hálftíu var ég ekki enn farin af stað. Tók þá ákvörðun að setja sundlaugar og sjósundshandklæðin mín í þvottavélina og skrópa alfarið í sund. Hætti netvafri um þetta leyti og tók fram skammtímalánsbókina: Blóðmeri eftir Steindór Ívarsson. Stuttu fyrir klukkan hálftólf lagði ég frá mér bókina og fékk mér hálftíma göngutúr. Hélt lestrinum áfram eftir hádegi og kláraði bókina. Hef svo tíma til 7. desember  til að klára bókina sem ég skilaði ekki af mér í síðustu ferð. Það er bók sem er hátt í sexhundruð blaðsíður: Sjö systur eftir Lucindu Riley. Er rúmlega hálfnuð en á eitthvað um tvöhundruð blaðsíður eftir enn. Ég var líka aðeins að horfa á enska boltann, horfði á fyrri hálfleikinn í æfingalandsleika kvenna í handbolta og tvo síðustu pólsku þættina Kennari 2. Gufusauð mér grænmeti og hafði með fiskbita sem ég átti frá því um daginn og þegar ég fór upp í rúm að lesa meira áður en ég fór að sofa sleppti ég því að fá mér tyggjó.

Labbitúr í morgun en ekki sund

Vaknaði stuttu fyrir klukkan sjö í gærmorgun og fór fljótlega á fætur. Var komin í Laugardalslaugina rétt upp úr klukkan átta. Þar var að hefjast tveggja daga sundmót í innilauginni en ég kom nægjanlega snemma til að fá stæði á planinu. Engar brautir á útilauginni voru fráteknar en þar sem ég ætlaði að þvo á mér hárið skipti mig miklu máli á fá braut sem ég gæti synt á bakinu án þess að hafa áhyggjur af því að reka hausinn í einhvern. Byrjaði því rútínuna á því að fara í kalda, heitasta, kalda, sjópottinn, kalda, gufu og svo fór ég á braut sjö og synti 400 metra, flesta á bakinu og fékk að halda mig alveg út við kaðalinn sem skilur að brautir 6 og 7. Eftir sundið fór ég eina ferð í kalda og svo smá "sólbað" áður en ég fór inn og þvoði mér um hárið. Var mætt vestur í bæ til norsku esperanto vinkonu minnar rétt fyrir klukkan hálfellefu og stoppaði í rétt rúman klukkutíma. Við byrjuðum á alltof fræðilegum kafla um úrverk en lásum bara um hálfa blaðsíðu áður en við ákváðum að skippa yfir kaflann og færa okkur yfir í þann næsta. Það gekk miklu betur. Var komin heim um tólf. Upp úr klukkan sex rúllaði ég yfir í Garðabæinn til tvíburahálfsystur minnar sem einnig var að taka á móti útskriftarbróður okkar úr FSu sem nú er m.a. að gefa út sína sjöundu hjólabók. Tilefnið var m.a. að afhenda okkur okkar eintak og fékk ég allar sjö bækurnar í einu og sú nýjasta var árituð. Sonja bauð okkur í mat og tíminn leið alveg svakalega hratt því allt í einu var klukkan orðin hálftíu. Lagði bílnum við Blönduhlíð rétt fyrir tíu. Fór beinustu leið upp í rúm og las til klukkan ellefu. Steinsofnaði fljótlega eftir það en rumskaði um hálfeittleitið en þá var hlandblaðran að heimta tæmingu og þóttist vera jafn full og eins og ég hefði sofið alla nóttina. Skrapp á salernið en var fljót að sofna aftur. 

Á sjó... ég meina í sjó

Það var eilítið skrýtinn dagur í vinnunni í gær. Ein af þeim sem getur "opnað" fyrir að hægt sé að byrja innlegg dagsins var í fríi, önnur lasin og hinar tvær sem hafa leyfi og getu til að gera þetta mættu rétt áður en klukkan varð átta. Þær lentu í smá veseni sem tók um korter að leysa úr. Eftir það var hægt að byrja. Yfirleitt erum við búin frekar snemma á föstudögum eða upp úr klukkan tvö en í gær vorum við til klukkan rétt rúmlega þrjú að klára allt. Ég var komin i Nauthólsvík tuttugu mínútum fyrir fjögur og í 2,1°C sjóinn tíu mínútum seinna. Svamlaði og hoppaði um í smá öldugangi í ca sjö mínútur. Fór svo í gufu í uþb fimm mínútur, þaðan í lónið og var þar í nokkrar mínútur áður en ég fór loksins í heita pottinn. Var komin heim um fimm leytið.

Magnað í 2,1°C sjónum áðan

Rumskaði aðeins um fimm í gærmorgun, sofnaði strax aftur og svaf í um klukkustund. Hafði ágætis tíma til að vafra um á netinu áður en ég fór í vinnuna. Var byrjuð í innleggja vinnu áður en klukkan varð átta.  Allt var búið um þrjú leytið. Hringdi og talaði við pabba á meðan ég var á leiðinni yfir í Laugardalslaugina. Byrjaði á að fara í kalda pottinn en fór svo á braut átta og synti 400m Nú var sama og engin ferð á logninu þannig að skórnir mínir stukku ekki út í laug á eftir mér. Fór amk tvær aðrar ferðir í þann kalda og gufuna og sjópottinn að auki. Þessi rútína tók mig rúma klukkustund. Eftir sundið skrapp ég á Kringlusafnið og skilaði þremur bókum af fjórum og tók fjórar aðrar í staðinn, eina nýja á skammtímaláni. Næst lá leiðin í Krónuna í Skeifunni. Var komin heim um sex leytið. 

Titill

Það var nokkuð mikil hraðferð á logninu í gær en engin ófærð. Mætti í vinnu um hálfátta og var byrjuð í innleggjunum fyrir klukkan átta. Þrátt fyrir að það vantaði einhverjar hendur á dekk og sumar hendur væru aðeins til hádegis vorum við búin snemma í gær eða fyrir klukkan hálfþrjú. Þær í kortunum voru aðeins lengur til að klára að framleiða gjafakortaskammt. Ég var búin að stimpla mig út og farin úr húsi á undan þeim. Ég var með sjósundsdótið með mér en ég þurfti samt að skreppa heim áður og það varð til þess að ég fór ekkert út aftur. Það hefði nú verið gaman að hoppa smávegis í öldunum. Ég var nú samt fegin að vera komin inn þegar komu hagléls hryðjur og hraðferðin á logininu jókst verulega inn á milli.

Gæðastundir

Vaknaði um sex í gærmorgun og var frekar hissa á því að nóttin væri liðin. Hefði alveg getað hugsað mér að kúra aðeins lengur. Lét það þó ekki eftir mér og var komin á fætur skömmu síðar. Mætti í vinnu um hálfátta og var byrjuð í innleggjum fyrir klukkan átta. Það að fá að vera í innleggjunum í heila viku hjálpar til við að komast hraðar inn í málin. Sumt af því sem ég var mjög óörugg með í byrjun er orðið mun auðveldara. Fæ þó enn ábendingar um hvað má betur fara og eins geri í villur sem sem betur fer eru ekki of alvarlegar en læri mikið af þeim. Vorum búin klukkan að verða hálffjögur. Kalda potts vinkona mín var búin að láta mig vita að hún kæmist ekki í sund en ég dreif mig í Laugardalslaugina beint eftir vinnu. Fór  fyrst í kalda pottinn og synti svo 400m bringusund. Strax eftir fyrstu 100 metrana fann ég annan skóinn á svamli í lauginni en hinn var týndur. Eftir aðra ferð í þann kalda hitti ég á eina sem ég er farin að kannast vel við. Urðum samferða í heitasta pottinn og sagði ég henni af skóveseninu. Á leiðinni úr heitasta pottinum í sjópottinn sá hún eitthvað á svamli á braut sex. Og það reyndist við nánari skoðun vera hinn skórinn. Ég var að synda á brautum 7 og 8. Þar á milli er enginn kaðall en það er kaðall á milli brauta 6 og 7. Úr sjópottinum fór ég aftur í kalda og endaði svo á góðu gufubaði áður en ég fór upp úr og heim. Þessi rútína tók um fimm korter með tímanum í sturtu og skiptiklefanum.

Ekki er betra veðrið í dag

Vaknaði útsofin stuttu fyrir klukkan sex í gærmorgun. Var mætt í vinnu rétt fyrir hálfátta. Þessa vikuna er ég í innleggjum og var ég byrjuð á fyrsta skammtinum áður en klukkan varð átta. Stimpilklukkan telur frá því ég stimpla mig inn sem ég geri um leið og ég er komin að skrifborðinu mínu eftir að ég mæti. Það var þokkalega mikið að gera en það náðist að klára allt um þrjú leytið. Þá stimplaði ég mig út og fór beit í sund. Synti 400m á bakinu og hitti svo kalda potts vinkonu mína í kalda pottinum í hennar annarri ferð. Eftir mína aðra ferð í kalda fórum við í gufu og svo aðeins í sjópottinn. Þá var kominn klukkutími frá því ég mætti og þar sem ég ætlaði að þvo á mér hárið kallaði ég þetta gott svo hárið myndi nú ná að þorna. Fannst voða skrýtið að handklæðin mín voru mjög blaut þegar ég var búin að þvo mér. Það kom í ljós að sturtan sem ég notaði var biluð og sprautaði vatni yfir vegginn og á handklæðin sem voru efst í rekkanum. Kom við í Fiskbúð Fúsa á heimleiðinni til að kaupa mér harðfisk. Var komin heim fyrir klukkan hálfsex. 

Leiðinda veður

Svaf sennilega í um níu tíma í fyrrinótt. Fór nefnilega tiltölulega snemma í háttinn og vaknaði svo um hálfátta leytið. Var bara þokkalega hress en alveg einstaklega löt. Nennti ekki út fyrir hússins dyr en var að dútla við alls konar hérna inni við. Er samt ekki enn farin að taka fram jólakorta föndurdótið. Stefni þó að því að taka það með mér austur um næstu helgi ef veður og færð leyfir. Ég dreifði aðeins úr tuskum og handklæðum sem ég hef verið að prjóna undafarin misseri, þ.e. þeim stykkjum sem ekki hafa verið gefin eða tekin í notkun ennþá. Það væri sennilega hægt að búa til amk tvö rúmteppi úr þeim öllum. Svo var ég að horfa á hina ýmsu þætti. Kíkti líka aðeins á landsleikinn; Portúgal - Ísland í knattspyrnu karla þar sem hann var sýndur í opinni dagskrá á Stöð2 Sport. Dagurinn leið ógnar hratt og var ég komin upp í rúm um hálftíu í gærkvöldi og las í hálftíma áður en ég fór að sofa. 

Rúm

Rumskaði um eitt leytið í fyrrinótt til að fara og létta á blöðrunni. Sofnaði strax aftur og svaf til klukkan að verða sjö. Þurfti þá aftur að tæma. Var ekki tilbúin að fara strax á fætur en fann það fljótlega að ég var útsofin og vel hvíld svo það var ekki lengi sem ég lá í bælinu. Ákvað að taka utan af sængurfötunum, lakið og einnig stykkið sem er undir dýnunni og nær næstum niður í gólf á þremur hliðum af fjórum (pífa til að "fela" gólfið undir rúminu). Lyfti svo dýnunni upp á rönd og lagði upp að fataskápnum. Skyldi við herbergið mitt svona og settist inn í stofu með fartölvuna í fanginu þar til klukkan var byrjuð að ganga tíu. Þá fyrst fór ég með sængurfötin og "pífuna" í þvottahúsið. Um þetta leyti var ég búin að ákveða að taka því rólega heimavið allan daginn. Fann engin eymsli í hálsinum og frekar lítið fór fyrir maga/ristil skruðningum svo það er vonandi að hverfa alveg á næstunni. Ég horfði á nokkra þætti, körfuboltaleiki, prjónaði, gerði smá af því sem ekki skal skrifa um og dagurinn leið mjög hratt. Davíð Steinn fór til pabba síns og fjölskyldu hans. Oddur mátti ekki vera að því en hann hjálpaði mér svo að snúa dýnunni við í gærkvöldi þegar pífan var þornuð og komin aftur á. Var komin upp í rúm um hálftíu og las í um hálftíma áður en ég fór að sofa.

Aftur komin helgi

Í gær framleiddum við 3000 gjafakort í heildina ásamt daglegu framleiðslunni. Það er nokkuð vel af sér vikið því á föstudögum hættum við frekar snemma og vorum við búnar að ganga frá kortadeildinni um tvö leytið. Þegar við komum upp sneri ég mér að því að fara yfir skjöl í smá stund. Stimplaði mig út fyrir klukkan þrjú og ákvað að fara beinustu leið heim. Skruðningarnir á maga og ristilsvæðinu sem og hálssærindin voru að einhverju leyti enn til staðar og ekki á það hættandi að skella sér í sjóinn. Annars hefur mér liði alveg þokkalega alla vikuna og held að þessi óþægindi séu á undanhaldi. Það flögraði að mér að þetta tengdist breyttu mataræði en ég er samt viss um að svo er ekki, þá hefði þetta ástand átt að poppa upp fyrir tæpum mánuði. Held svo reyndar að ég sé búin að "pissa" amk 5 kílóum af bjúgsöfnun sem segir mér að ég sé á réttri leið. En það hvort þetta breytta mataræði sé komið til með að vera alveg 100% þori ég ekki að fullyrða neitt um. Vona helst að þegar ég hef náð tökum á blessaðri vökvasöfnuninni í líkamanum að ég geti að einhverju leyti snúið mér að flest sé best í hófi stíl. Það verður að koma í ljós. Kaffibindindið heldur áfram amk enn um sinn. Og ég mun einnig halda áfram að forðast sykurinn og glútenið. 

Vissa

Það er helling að gera í framleiðslu gjafakorta þessa dagana. Skammtarnir eru misstórir en þegar vel gengur erum við að framleiða um þúsund kort á uþb fimmtíu mínútum. Í gær var allt að verða búið uppi um hálfþrjú leytið svo við ákváðum að ganga frá niðri um svipað leyti. Sendum eina tösku upp í lyftunni í skúr eitt með 2500 gjafakortum fyrir eitt útibú. Þar sem ég var í bókhaldinu þessa vikuna fór ég beint í að ganga frá tölum og skjölum. En klukkan var rétt að verða þrjú þegar ég yfirgaf vinnustaðinn eftir ágætis dagsverk. Var með sunddótið með mér í bílnum en byrjaði á því að fara í heilsuhúsið til að kaupa mér C vítamín og fleira. Ákvað m.a. að prófa safa úr djúsvélinni. Það var búinn til fyrir mig úr hveitigrasi, engifer, epli og gúrku. Það átti að vera paprika í þessu líka en ég bað um að henni yrði sleppt. Þessi drykkur reif vel í hálsinn og var alveg ágætur en ég náði þó ekki að klára skammtinn. Tók hann með mér úr í bíl og keyrði í Laugardalinn. Á planinu við sundlaugina ákvað ég hins vegar að það væri ekki sniðugt að fara í sund verandi aum í hálsinum svo ég dreif mig bara heim. Kláraði þá bók sem ég tók síðast af safninu; Gættu þinna handa eftir Yrsu Sigurðardóttur, fitjaði upp á nýju smá-handklæði, vafraði á netinu, horfði á þætti en fór inn í rúm fyrir hálftíu og var sofnuð um tíu leytið eftir að hafa lesið smá stund.

Laukrétt

Þrátt fyrir að þurfa að afhenda framleiðsluvélina til yfirferðar um tólf í gær gátum við framleitt 1000 gjafakort ásamt daglegur framleiðslunni. Pöntunin fyrir útibúið hljóðaði upp á 1500 en við höfðum framleitt fyrstu fimmhundruð á þriðjudaginn svo hægt var að senda þetta frá okkur. Ég sendi fyrrum fyrirliða upp í mat um tólf en beið sjálf niðri eftir yfirferðarmönnunum. Klukkan var að verða hálfeitt þegar sá fyrri mætti og skömmu síðar var ég leyst af í mat. Eftir mat lauk ég við bókhaldsvinnuna og þurfti svo að vera til taks fyrir tæknimanninn okkar. Hann þurfti að setja inn nokkrar nýjar skrár í kerfi sem tveir þurfa að skrá sig inn fyrst. Rétt fyrir hálfþrjú komst ég svo niður til að leysa fyrrum fyrirliða af í yfirsetunni. Þá voru báðir viðgerðarmennirnir á svæðinu. Þeir vildu fljótlega fara upp í kaffi. Uppi var allt að verða búið og fáir eftir í vinnu, í raun bara tveir. Annar var að skúra á neðri hæðinni. Sá sem vinnur í afgreiðslunni kenndi mér á hvernig ég gæti hleypt yfirferðarviðgerðarmönnunum út ef til þess kæmi áður en hann fór. Klukkan var að verða hálffimm þegar allt var búið niðri. Sá sem er í skúringunum var að skúra uppi og tæknimaðurinn tók að sér að hleypa út. Ég fór beinustu leið heim eftir vinnu, hringdi í pabba og spjallaði við hann á leiðinni. Ég var semsagt ekki í neinu líkamlega formi til að skreppa aðeins í sjóinn. Enn með særindi í hálsinum en hvorki verri né betri heldur en daginn áður. Held að það hafi verið skynsamlegt af mér að fara bara heim og dunda mér þar. 

Akkúrat

Í vinnunni í gær framleiddum við yfir 3000 gjafakort. Hættum framleiðslu um hálfþrjú en svo notaði ég síðasta hálftímann til að ljúka við bókhaldsverkefni. Var með sunddótið með mér í bílnum en ég var einhvern veginn ekki stemmd og farin að finna fyrir hálsbólgu svo ég fór beint heim. Ég hvorki versnaði né lagaðist í hálsinum. Dundaði mér við ýmislegt að var komin upp í rúm um níu og lagði frá mér bókina áður en klukkan varð hálftíu. Var fljót að sofna en því miður rumskaði ég aftur stuttu eftir miðnætti og þurfti að pissa. Ekkert gekk að sofna aftur svo ég ákvað að lesa aðeins meira. Held að klukkan hafi verið að nálgast þrjú þegar ég hætti lestri og kúrði mig niður. Sofnaði sem betur fer en var svo vöknuð nokkru áður en vekjaraklukkan átti að hringja í morgun. 

Ð

Svaf í einum dúr frá ca tíu til klukkan að verða sex í gærmorgun. Var mjög hissa að kominn væri morgun og hefði líklega alveg getað sofið lengur. Ég dreif mig nú samt á fætur og hafði rúman tíma til að vafra aðeins um á netinu áður en ég fór í vinnuna. Var í bókhaldi og á móttökuendanum á vélinni. Til stóð að viðgerðarmenn kæmu um tólf í hefðbundna yfirferð á vél en það frestaðist um tvo daga. Í staðinn var tími til að ljúka við framleiðslu á gjafakortapöntun frá því í síðustu viku. Hætti vinnu um þrjú og fór beint í sund. Var búin að synda 400m og í minni þriðju ferð í kalda pottinum þegar kalda potts vinkona mín mætti. Og ein systir hennar var líka mætt á svæðið. Sú fer aldrei í kalda en við sátum góða stund í sjópottinum. Var komin heim um hálfsex leytið. Strákarnir voru ekki heima. Þeir voru með pabba sínum á sjúkrahúsi Selfoss að kveðja föðurafa sinn.

Uss

Svefninn, aðfaranótt sunnudagsins var frekar skrykkjóttur. Ég fór á fætur á níunda tímanum og hafði þá í heildina sofið í um fimm klukkustundir í mis-stutt/löngum bútum. Var komin í sund upp úr klukkan hálftíu. Hitti á sjósundsvinkonu mína sem var að mæta um svipað leyti. Hún fór beint á braut átta en ég í kalda pottinn og svo á braut átta. Synti 400 metra áður en ég fór aftur í kalda og þaðan í gufu. Þegar ég var að koma úr gufunni var sjósundsvinkonan á leiðinni í þann kalda og varð ég samferða henni. Hún fór svo upp úr og heim en ég í sjópottinn. Þar var ég óvenju lengi því upp úr klukkan ellefu komu mágkona mömmu heitinnar og kalda potts vinkona mín skömmu síðar. Náði einni ferð í kalda pottinn með þeirri síðar nefndu áður en ég fór upp úr og heim. Restinni af deginum eyddi í ég alls konar dundur.

Kærleiksknús á alla í óvissuástandi

Var sofnuð fyrir klukkan ellefu á föstudagskvöldið. Svaf nokkuð vel, með einu pissuhléi, til klukkan að verða sjö. N1 sonurinn var því farinn í vinnuna þegar ég kom á fætur. Var mætt í sund um hálfníu. Eftir fyrstu ferðina í þann kalda fór ég á braut og synti yfir á bakinu. Færði mig svo yfir á braut tvö og í heildina synti ég 500m þar af ca 40 m. skriðsund en annars á bakinu. Fór svo beint aftur í kalda, þaðan í gufu, kalda sturtu, sjópottinn og smá dýfu í kalda áður en ég fór inn að þvo á mér hárið. Var mætt til esperanto vinkonu minnar upp úr klukkan hálfellefu. Stoppaði hjá henni í um klukkustund. Á þeim tíma náðum við m.a. að lesa eina blaðsíðu og glósa nokkur orð. Var komin heim aftur stuttu áður en aukafréttatíminn vegna hræringanna á Reykjanesinu og í kringum Grindavík hófst. Grindavíkurbær hafði verið rýmdur um nóttina þegar í ljós kom að sprungan og kvikugangurinn náði undir bæinn og út í sjó og kvikan sennilega komin á innan við eins kílómetra dýpi á hættulegum stað hvað bæinn varðar. Úff, þetta er svo nöturlegt og það er líklegra en ekki að það komu upp gos mjög nálægt bænum. Sprungan ku vera um 15 km löng og 3km á breidd þar sem hún er breiðust. Eftir aukafréttatímann hringdi ég í pabba og sagðist ætla að taka því rólega þessa helgina, horfa á enska boltann, lesa, prjóna, horfa á þætti og skoða mataræðið betur. Ég á aðeins eftir að taka út kjötið af þeim matvörum sem eru á "taka út" listanum. Um fimm leytið gufusauð ég blómkál, belgbaunir, rósakál og fjóra bita af þorskhnökkum. Borðaði svo einn fjórða af skammtinum með sallati, súrkáli og ólífum. Mér gengur alltaf betur og betur að forðast að detta í að fá mér eitthvað nasl fram eftir kvöldi. Jafnvel þó það nasl sé tiltölulega hollt. Er að tala um möndlu, hnetur (ekki jarðhnetur) og fræ. Hef ekki farið út í að leggja þetta í bleyti yfir nótt og þurrka upp aftur en það á víst að vera ennþá betra fyrir meltinguna og ristilinn.

Kannski

Nú er hugurinn með Grindvíkingum. Það er ekki sjón að sjá skjálftaveðurkortið, allt morandi í grænum stjörnum. Ég fann fyrir nokkrum öflugum skjálftum eftir að ég kom heim úr vinnu og sjósundi síðdegis í gær.

Ég var annars mætt í vinnu á svipuðum tíma og venjulega í gærmorgun. Framleiddum rúmlega þrjúþúsund gjafakort en hættum framleiðslu frekar snemma eða um tvö. Margir voru farnir þegar við komum upp enda reynum við yfirleitt að taka út styttingu vinnuvikunnar á föstudögum. Ég tók við bókhaldinu og mun sjá um það og móttökuendann á framleiðsluvélinni í næstu viku. Stimplaði mig út um klukkan þrjú.

Var komin í Nauthólsvík um klukkan hálffjögur og tíu mínútum fyrir fjögur óð ég út í 2,7°C sjóinn og svamlaði um í tæpar tuttugu mínútur. Hitti enga seli. Sat í heita pottinum lengur en ég var út í sjónum en var komin heim um fimm leytið.

Og aftur komin helgi

Vorum að framleiða til klukkan þrjú í gær, með kaffi og matarpásu að sjálfsögðu. Það er komin gjafakortaframleiðsluvertíð og pantanir þannig að þær klárast ekki innan dagsins svo við förum beinustu leið niður eftir morgunkaffi, framleiðum til klukkan að ganga eitt. Förum svo aftur niður um eitt leytið og höldum áfram. Eftir vinnu fór ég beint yfir í Laugardalinn og fór fyrstu ferðina í þann kalda um hálffjögur. Synti svo 400 metra áður en ég fór aftur í kalda. Var í sundi til klukkan fimm. Hitti ekki á kalda potts vinkonu mína því hún komst ekki fyrr en korter yfir fimm. Ég var komin heim um hálfsex og kvöldið fór í alls konar. Dreif mig í háttinn um hálftíu og las í uþb hálftíma áður en ég fór að sofa. 

Næstum því synt með selum

Svaf mjög vel og lengi í fyrri nótt eins og ég gat um í færslunni í gær. Var mætt í vinnu um hálfátta og var að vinna til klukkan þrjú. Á leiðinni í Nauthólsvík hringdi ég í Huldu frænku og spjallaði við hana. Hún var hjá móðurafa sínum í síðustu viku að þjálfa hvolpinn Uglu sem vann til verðlauna á hunda/hvolpa sýningu sl. helgi. Ég var komin í 3,9°C sjóinn tíu mínútum fyrir fjögur og var að svamla um í rúmar tíu mínútur. Ég var búin að vera tæpar tíu mínútur í heita pottinum þegar einhver tók eftir að nokkrir selir væru að forvitnast skammt frá þar sem ég fer alltaf út í sjó. Trítlaði út á bryggju þar sem fólk var að safnast saman og sá tvo mjög nálægt og þann þriðja lengra frá. Fór inn í sturtu og klæddi mig og þegar ég kom út aftur fékk ég alveg góðan tíma til að mynda þessa gesti og fylgast með þeim. Kom aðeins við í Heilsuhúsinu áður en ég fór heim. Var að útvega mér kókosvatn m.a. Slíkt vatn fæst reyndar í sumum stórmörkuðum.

Rjómablíða, eða næstum því

Aðfaranótt gærdagsins var frekar erfið upp á svefn að gera. Held að samtals hafi ég sofið í kannski fjóra tíma. Engu að síður var ég komin á fætur um sex og mætt í vinnu klukkan hálfátta. Var búin í vinnu um hálffjögur og fór þá yfir í Laugardalinn. Spjallaði við pabba á leiðinni. Eftir fyrstu ferðina í kalda pottinn synti ég 300 metra og þá passaði akkúrat að kalda potts vinkonan var komin og tilbúin í sína fyrstu ferð í kalda en hún byrjar oftast og endar á því að fara í heitasta pottinn. Fórum í gufu eftir mína fjórðu ferð í kalda og svo þaðan í sjópottinn. Eftir korter þar varð ég að segja þetta gott því ég var komin í spreng. Kom heim um sex og fékk mér hluta af afgangnum sem ég eldaði mér sl. sunnudag. Um hálfátta kom nafna mín til að sækja húslyklana sem hún hafði látið Davíð Stein fá þegar hann var í kisupassinu stuttu fyrir síðust mánaðamót. Frænka mín stoppaði hjá mér í rúma klukkustund og við áttum gott spjall. Fljótlega eftir að hún fór ákvað ég að þótt klukkann væri ekki alveg orðin níu væri ágætt að fara bara í háttinn. Las til klukkan korter yfir níu en ég held að ég hafi verið sofnuð um hálftíu. Rumskaði um fjögur í morgun til að fara á salerni en svaf svo í tvo tíma í viðbót. Vaknaði á undan vekjaraklukkunni og mér reiknast til að heildarsvefninn sl. nótt hafi verið rúmir átta tímar.

Ekkert kaffi í þrjár vikur

Vegferðin mín til að "heila görnina" heldur áfram og gengur bara þokkalega. Er þó ekki búin að taka út alveg allt sem var á úttöku-listanum en líklega er það bara kjötið sem er eftir og ég er að vinna í þessu. Það að ég finn góðan mun á mér hjálpar til við þetta verkefni en alltaf langar mig samt í kaffi og stundum popp á kvöldin. Læt það ekki eftir mér ennþá, staðráðin í að halda þetta út. Hversu lengi veit ég ekki en líklega þrjá mánuði til hálft ár og þá get ég vonandi farið að taka stöðuna um hvað ég prófa að taka inn aftur.

Var á íttoðsluendanum á vélinni í gær. Fór því beint niður að "sækja" tölur og hlaða inn þegar ég mætti í vinnu. Emmurnar voru á sínum stað en í hinni möppunni voru bara debetkortaskrár en engar skrár fyrir kreditkort. Framleiddum allt debet og kláruðum afgang af gjafakortapöntun. Kerfisfræðingurinn kom um níu leytið til að skoða, sagðist hafa sér allar skrár hjá sér. Hann gat sent okkur þær og við fórum ekki upp í kaffi fyrr en að framleiðslu lokinni. Þá var klukkan að ganga tíu svo það var engin veruleg seinkun á afhedingu. Fórum ekki niður aftur fyrr en hádegisskammturinn skilaði sér á vélina. Gengum frá kortadeildinni um tólf. Ég hjálpaði til við frágang í eldhúsverkunum og fór svo í innleggin. Klukkan var fjögur þegar ég stimplaði mig út.

Hringdi í afmælisbarn gærdagsins, besta vin minn, og spjallaði við hann á meðan ég ók yfir í Laugardalinn. Kaldapotts vinkona mín var í sinni annarri ferð í kalda pottinum þegar ég mætti í sundið. Við fórum fjórar ferðir saman í kalda, tvær í heitasta, eina í gufuna og eina í sjópottinn. En ég skrópaði í sjálft sundið. Kom við í Krónunni í Borgartúni á leiðinni heim. Fékk ekki alveg allt þar sem mig vanhagaði um en fór þó ekki í aðra búð til að útvega það sem ávantaði. Lá ekkert svo á þessu. 

Almannavarnafundur

Ég var vöknuð og komin á fætur fyrir klukkan sjö í gærmorgun. Klukkan var ný orðin níu þegar ég var komin á braut sjö í Laugardagslauginni, þá búin að fara eina ferð í kalda pottinn. Synti 400m og fór aftur í kalda. Sjósundsvinkona mín var þá mætt á svæðið. Það eru níu vikur síðan hún fékk nýja hnjáliði. Hún er að vinna í að styrkja sig og þarf að passa sig að gera ekki of mikið en hún synti 200 metra skriðsund, fór svo í nuttpottinn og hitti mig í gufunni. Úr gufunni fórum við í sjópottinn og þar sátum við á spjalli í amk hálftíma. Skelltum okkur svo í kalda pottinn í þrjár mínútur áður en við fórum upp úr. Ég var komin heim rétt fyrir tólf. Um þrjú leytið skellti ég mér í smá göngu upp að Perlu, niður að HR og svo til hægri meðfram Öskjuhlíðinni og framhjá Valsheimilinu. Forritið í símanum byrjaði líklega ekki að skrá gönguna fyrr en ég var komin yfir Bústaðahlíð á ljósunum. Þetta voru rétt rúmir þrír kílómetrar á 37 mínútum og ég kom heim mátulega áður en Liverpool leikurinn hófst. Það munaði engu að mínir menn töpuðu. Á áttugustu mínútu skorðuðu Luton fyrsta mark leiksins en það var í uppbótatíma sem Luis Diaz jafnaði metin.

Trall

Titill færslunnar í dag er út í loftið. Hefði allt eins getað notað upphafsorðið í þessari færslu sem titil þar sem markmiðið var að orðið hæfist á T. Vaknaði um hálfsjö í gærmorgun og notaði fyrsta rúma klukkutímann til að vafra um á netinu og setja inn færslu. Lagði af stað í sund um það leyti sem morgunfréttir klukkan átta voru að hefjast. Í sundi byrjaði ég á að fara eina ferð í þann kalda og úr þeim potti í þann heitasta. Þar hitti ég fyrir frænda minn og nafna hans pabba. Sá er kominn í fæðingarorlof en yngri sonur hans er um eins árs. Við spjölluðum í nokkra stund eða þar til ég fann að kominn var tími á að kæla sig aftur. Eftir næstu ferð í kalda pottinn fór ég á braut 6 og synti 500m, flesta á bakinu en kannski 40 metra skriðsund í síðustu ferðinni. Eftir þriðju ferðina í kalda pottinn fór ég í gufu, þaðan í sjópottinn og svo endaði ég á kalda og smá "sólbaði" áður en ég fór upp úr og þvoði mér um hárið. Þá var klukkan að byrja að ganga ellefu. Svo lagði ég leið mína í AO við Sprengisand áður en ég fór vestur í bæ til esperanto vinkonu minnar. Kom heim um hálfeitt leytið. Einhvern veginn fór það svo að ég fór ekkert út aftur. Bræðurnir fóru til pabba síns og fjölskyldu hans um tvö leytið. Davíð Steinn hringdi í mig upp úr klukkan sjö til að athuga hvort ég væri í bænum og ef svo væri hvort hann mætti fá lánaðan minn bíl til að sækja frænku sína austur í Hvolsvöll. Hann kom um níu leytið að sækja bíllykilinn. Bíllinn hennar Bríetar hlýtur að vera eitthvað bilaður og kærastinn vant við látinn. En þetta gaf frændsystkynunum tæki færi til að hittast. 

Tíminn

Það er tilgangslaust að reyna að eltast við eða stoppa tímann en það er vel hægt að staldra við í núinu og gleyma stund og stað, fortíð og framtíð. Það eru til nokkrar aðferðir og er sjósund ein af þeim. Föstudagar eru sjósundsdagar hjá mér, svona oftast nær. Engin undantekning í gær og þegar vinnu lauk um þrjú leytið fór ég beinustu leið í Nauthólsvík. C.a. tuttugu mínútum fyrir fjögur óð ég út í 4,5°C heitan sjóinn í fjöru og stillu. Var svo sem ekki mikið að synda en svamlaði um í rúmar tíu mínútur. Ætlaði varla að tíma að fara upp úr. Sat svo korter í heita pottinum áður en ég fór upp úr og heim. Þar lauk ég við að hlusta á síðasta innleggið í fjögra vikna netnámskeiðinu um heilun á görninni. Mataræðið skiptir miklu máli en það gerir andlega hliðin líka. Það er hægt að borða hollt og gott en vera út á túni andlega og það er líka hægt að vera andlega sterkur en borða svo óhollt og mikið að líkaminn mótmælir. Ég hef svo sem vitað þetta í þó nokkurn tíma en þótt meltingakerfið hjá mér hafi verið viðkvæmt alveg frá fæðingu þá hef ég samt ekki haldist á réttri braut hvað varðar að passa alltaf hvað ég læt ofan í mig. Að vísu hef ég ekki drukkið litað gos í meira ein þrjá áratugi og drekk heldur ekki bjór. Hvernig mér mun ganga að vera staðföst næstu vikurnar hvað varðar t.d. kaffi, hvítvín, popp, kjöt og fleira sem ég þarf að útiloka (sumt vonandi bara um tíma) verður að koma í ljós. Er ekki frá því að ég sé að finna smá mun á mér en á meðan ég er ekki alveg laus við bjúginn held ég þetta vonandi út. Það er örugglega þess virði að reyna og sleppa því bara að hugsa um það sem ekki má heldur einblína á það sem má alveg örugglega.

Enginn magnesíum pottur

Nú brá svo við að ég svaf í einum dúr frá ca tíu í fyrrakvöld til klukkan að verða sex í gærmorgun. Vinnudagurinn stóð yfir milli klukkan hálfátta og rúmlega þrjú. Var komin í sund upp úr klukkan hálffjögur. Hringdi í pabba á meðan ég var á leiðinni úr vinnunni í sundið og komst þá að því að eldri systurdóttir mín er búin að vera hjá honum síðan seint á sunnudagskvöldið var, með hvolpinn Uglu með sér. Ugla er að fara að taka þátt í hundasýningu um helgina. Synti 300 metra og það passaði akkúrat að þá var kaldapotts vinkonan mætt og tilbúin í fyrstu ferðina í þann kalda. Fórum fjórar ferðir í í þann heitasta á milli. Eftir fjórðu ferðina settumst við inn í gufu í góða stund. Í uþb tvo mánuði fyrir lokun var verið að setja magnesíum flögur út í einn pottinn á þriggja eða fjögurra tíma fresti einu sinni í viku, á fimmtudögum. Í gær var fyrsti fimmtudagurinn síðan opnaði aftur en búið var að fjarlægja skiltið. Sumir sögðu að ekki hefði verið fyllt á flögurnar en aðrir sögðu að þetta hefði alltaf átta að vera tímabundin kynning. Það er verið að selja poka af magnesíuflögum í afgreiðslunni. En eftir gufuferðina fórum við í sjópottinn. Ég dýfði mér svo smástund aftur í þann kalda áður en ég fór upp úr og heim. Þá var klukkan byrjuð að ganga sex. Vinkonan ætlaði að vera svolítið lengur því mögulega var dóttir hennar að fara að mæta í sund um hálfsex leytið. 

Þessi tími sem hleypur svo hratt

Í "gærmorgun" var klukkan rétt orðin hálffjögur þegar hlandblaðran stuggaði við mér. Ég skreið svo aftur upp í rúm. Sofnaði ekki alveg strax aftur en held að ég hafi svo fengið klukkutíma lengri svefn því mig var að dreyma eitthvað spennandi og skrýtið þegar ég vaknaði rétt fyrir sex. Mætti í vinnu á sama tíma og venjulega og var byrjuð í innleggjunum áður en klukkan sló átta. Það var aðeins rólegra í þeirri vinnu og ég var búin með minn skammt stuttu fyrir kaffi. Á miðvikudögum er brauð og kruðerí með morgunkaffinu og oft fundir. Það var ekki fundur í gær en sú sem kemur með kruðeríið er að vinna hálfa stöðu í fyrirtækinu og sér um kaffistofuna í D30 og kemur einu sinni í viku til okkar. Ég ákvað að snúa bakinu í glæsilegt morgunverðarborðið, drekka mitt heita vatn, prjóna og spjalla við vinnufélagana. Freistaðist ekki neitt. Hélt svo áfram í innleggjunum eftir kaffi og kláraði þann skammt rétt fyrir tólf. Eftir hádegi gekk vel framan af og ég sá fyrir mér að klára um tvö en þá kom babb í bátinn og ég þurfti smá aðstoð og var síðust að klára. Var samt búin um þrjú. Fór í Nauthólsvík beint eftir vinnu. Var rétt búin að klæða mig úr skóm og sokkum þegar ég uppgötvaði að ég hafði gleymt handklæði. Trítlaði fram í afgreiðslu og leigði mér eitt handklæði á 750 krónur. Var komin út í 4,7°C sjóinn tíu mínútum fyrir fjögur og svamlaði um í tæpar tíu mínútur. Þá settist ég smá stund inn í gufuna. Úr gufunni óð ég út í lónið sem var amk einni til tveimur gráðum heitara ef ekki meira því það var fjara. Var samt bara stutta stund út í.  

Nagladekkin komin undir og sumardekkin á dekkjahótelið

Aftur rumskaði ég um fimm til að skreppa á salernið. Var komin á fætur rétt fyrir klukkan sex og í vinnuna um hálfátta. Var byrjuð í innleggjavinnunni áður en klukkan var orðin átta. Klukkan að byrja að ganga fjögur fékk ég að hætta vinnu því ég átti tíma með bílinn hjá N1 í Fellsmúla klukkan hálffjögur. Bíllinn komst strax að á réttum tíma og það tók aðeins korter að svissa yfir á vetrardekkin. Ég prjónaði smávegis á meðan og horfði löngunaraugum á kaffivélina og bakkelsið sem var í boði. Mig langaði í kaffi og kleinu en þó eiginlega samt ekki. Ég er á ákveðinni vegferð og fer vonandi ekki að skemma hana alveg strax. Er aðeins farin að finna mun á mér til hins betra en reikna þó með að tilraunin þurfi að standa yfir í amk þrjá til sex mánuði og ef bjúgurinn mun hverfa þá er allt eins líklegt að ég hugsi mig tvisvar um hvort það borgi sig bara ekki að halda sig við það sem gerir manni gott og sleppi tökum á því sem er að skemma fyrir. Sjáum hvað setur.

Var mætt í sund rétt rúmlega fjögur og hitti kalda potts vinkonu mína þegar hún var á leið í sína fyrstu ferð í kalda. Fórum fjórar ferðir alls í þann pott, tvær ferðir í heitasta pottinn, eina í gufu og eina í sjópottinn. Ég synti ekki neitt en þessi rútína tók alls um einn og hálfan tíma. Kom við í Hagkaup í Skeifunni áður en ég fór heim.

Innlagnarvika

Rumskaði um fimm í gærmorgun. Blaðran var full svo ég skrapp á salernið en skreið svo upp í rúm aftur. Sofnaði þó ekki en ég kúrði í tæpan klukkutíma áður en ég fór á fætur. Var mætt í vinnu fyrir klukkan hálfátta. Þessa vikuna hefur verið ákveðið að ein af okkur í kortunum verði alfarið uppi í innlögnum en hinar tvær sinni kortamálunum. Fyrirliðinn ákvað fyrir helgi að ég skyldi byrja í innlögnunum og ég var sátt við það. Það var nóg að gera og smá aukaálag því það vantaði tvær. Við vorum því að vinna til klukkan hálffimm. Ég gerði aðeins ein mistök sem ekkert mál var að laga. Læri af þeim. Annars finnst mér þetta alveg að vera að koma hjá mér. Veit þó að ég er alls ekki útlærð. En þetta er gaman og tíminn gersamlega flýgur áfram. Var komin í sund um fimm og hitti kalda potts vinkonu mína í sinni fimmtu ferð í kalda pottinum. Saman náðum við 3 ferðum og eina í gufu. Ég synti ekkert en fór aðeins í sjópottinn og fjórðu ferðina í þann kalda áður en ég fór upp úr og heim. 

Ný vinnuvika

Svaf alveg ágætlega í fyrrinótt þrátt fyrir að þurfa að skreppa á salernið tvisvar sinnum. Seinna skreppið var reyndar um sex. Ég fór á fætur um átta. Vafraði um á netinu í uþb klukkustund. Þá var pabbi komin á fætur og ég settist við eldhúsborðið og lagði kapla í hálftíma. Einhvern tímann fljótlega eftir það skrapp ég í tæplega hálftíma göngu aðeins upp og aftur niður með Rangánni. Veðrið var fallegt en svalt. Ég var í lopapeysu og með ennisband og það var alveg nóg þar sem ég var á hreyfingu. Var rjóð í framan lengi eftir að ég kom inn úr göngunni. Fitjaði upp á nýrri tusku og greip líka í bók. Hafði mat handa okkur feðginum tilbúinn um það leyti sem hádegisfréttir voru að klárast. Horfði á Liverpool leikinn en fljótlega eftir hann fór ég að taka mig saman. Mundi eftir að taka með mér þorskhnakkana úr kistunni hans pabba. Var komin heim um hálfsex. 

Á Hellu

Ég var vöknuð um sex í gærmorgun. Fór í sund um átta. Hárþvottadagur svo ég synti á bakinu. Fór fjórar ferðir í kalda, eina í gufu, eina í þann heitasta og slakaði einnig vel á um stund í sjópottinum. Var komin heim aftur um hálfellefu. Enginn esperantohittingur þessa helgina þar sem verið var að undirbúa 4 ára afmæli. Um hádegisbil pakkaði ég niður, m.a. fartölvunni N1 sonarins sem ég er búin að hafa aðgang að síðustu misserin. Kom við í Heilsuhúsinu í Kringlunni til að versla vítamín og kókosvatn. Var komin til pabba um tvö. Það hafðist að senda skjal með pósti úr fartölvunni, opna í tölvunni hans pabba og prenta út. Þetta er yfirlit úr netnámskeiðinu yfir vítamín sem eiga að hjálpa til við að heila mína blessuðu görn. Dagurinn leið ógnarhratt. Var með bleikju í matinn og gufusoðið blómkál og lauk með í kvöldmatinn. Fann einnig steinlausar ólífur inn í ísskáp. Næstu tvær vikurnar mun ég fara vel yfir leiðbeiningarnar um það sem taka á úr mataræðinu, alfarið eða um tíma og mun ég gefa mig alla að þessu verkefni næstu misserin í góðri von um að mér muni takast að vinna bug á bjúgnum sem ég hef verið með meira og minna í yfir þrjátíu ár.

 

Morgunstund

Vaknaði hálftíma áður en vekjaraklukkan átti að fara í gang. Slökkti á henni, dreif mig á fætur að sinna morgunverkefnunum. Mætti í vinnu um hálfátta. Ég var í sömu stöðu í gær, á ítorðsluendanum, svo ég fór beinustu leið niður í kortadeild að kveikja á vélinni og "ná í" tölur áður en ég fór og fyllti á vatnsbrúsann. Visa og debet framleiðslu lauk tuttugu mínútum yfir níu. Þá fór ég upp á undan til að skreppa á salernið áður en fór í starfsmannasamtal við framkvæmdastjórann klukkan hálftíu, það seinna á árinu. Við spjölluðum í rúmar tuttugu mínútur og leið mér mjög vel í þessu samtali. Verkefnastaðan var þannig að það þurfti ekki aukahendur uppi. Ég sat því góða stund inn á kaffistofnni eftir samtalið, prjónaði og spjallaði og drakk vatn. Um ellefu kom pöntun upp á 5000 gjafakort ásamt hádegisframleiðslunni.  Við fórum því aftur niður eftir hádegi til að hlaða inn og byrja framleiðslu á þessum gjafakortum. Framleiddum einn fimmta af pöntuninni en ákváðum á láta gott heita um tvö leytið og ganga frá deildinni. Hjálpaði til með eitt verkefni uppi áður en ég stimplaði mig út stuttu fyrir þrjú og fór svo beinustu leið í Nauthólsvík. Dásamlegt að skella sér aðeins í sjóinn í vinnuvikulok. Kom heim á fimmta tímanum. 

Taylor Swift bíótónleikar

Vinnudagurinn í gær náði til klukkan hálffjögur. Ég var á ítroðsluendanum. Vorum búnar með fyrstu tvo framleiðsluskammtana um það leyti sem var að bresta á kaffipása. Eftir kaffi og til ellefu tók ég nokkur innlegg. Ákvað sjálf verkefnið og leysti það án þess að þurfa neina tilsögn eða aðstoð. Hádegisskammturinn var ekki stór en það var líka tilkynnt og send inn beiðni um framleiðslu á 2000 gjafakortum. Það var hægt að hlaða gjafakortaverkefninu inn klukkan eitt og við gátum klárað framleiðslu. Þegar við vorum búnar að ganga frá niðri var klukkan að byrjuð að ganga fjögur. Flest var að klárast uppi líka. Ekki tók því samt að fara eitt eða neitt því ég var búin að skrá mig á viðburð með með framkvæmdastjóranum, nokkrum vinnufélögum og fylgifiskum. Byrjuðum á því að fara yfir í salinn í hinum endanum á húslengjunni. Þar vorum við í góðu yfirlæti til klukkan hálfsex. Fengum léttar veitingar og ég ákvað að taka svindldag. Fékk mér reyndar ekkert að drekka hvorki áfengt né óáfengt. Ég fékk svo far yfir, ákvað að geyma bílinn minn áfram í því stæði þar sem ég lagði honum um morguninn. Í Laugarásbíó fengum við afhentan miða sem gilti fyrir popp og gosi. Ég ákvað að sleppa gosinu og fékk í staðinn að uppfæra popppokann í stærri poka. Popp er eitt af því sem ég á að taka út og ég á í jafnmiklu veseni með það og kaffið. Reyndar er nú liðin ein og hálf vika síðan ég drakk kaffi síðast, en mig langar alltaf í svarta, sterka drykkinn. Klukkan sex vorum við komin inn í aðalsalinn. Það voru reyndar auglýsingar fyrsta korterið eða svo en svo hófust stórkostlegir tónleikar og flott dansatrið með Taylor Swift þar sem hún fór yfir ferilinn og tók lög af öllum plötunum sínum. Þetta var ekki búið fyrr en klukkan langt gengin í níu. Þá var ég að verða svolítið þreytt í rófubeininu þrátt fyrir að hægt væri að halla sér í sætunum. En ég var uppveðruð þegar ég svindlaði mér sem fyrst yfir Sæbrautina, næstum stystu leið að bílnum mínum og fór heim, beinustu leið í rúmið en las þó aðeins áður en ég fór að sofa.

Fimmtudagur og stutt í mánaðamót

Auðvitað var tvöfaldur skammtur af kortapöntunum í gær en misstórir skammtar þó. Framleiðsla stóð yfir milli klukkan átta og hálfeitt með kaffipásu á milli. Ég var í bókhaldi og innlögnum og fór bara einu sinni niður í kortadeild. Það var einnig nóg að gera í innlögnunum og eftir hádegi komu fyrirliði og fyrrum fyrirliði með inn í þau verkefni. Ég var búin í vinnu rétt fyrir fjögur og fór þá beinustu leið í Nauthólsvík. Það var flóð, lítil ferð á logninu, sjórinn 7,1°C og spegilsléttur. Ætlaði varla að tíma að fara upp úr. Skrapp svo og skilaði skammtímalánsbókunum á Kringlusafnið. Tók aðeins eina bók í staðinn sem er nýleg eða frá því í fyrra og með 30 daga skilafresti. Ég er þá með fjórar bækur en ekki fimm hér heima og eftir hálfan mánuð mun ég líklega framlengja skilafresti á þremur af bókunum.

Lagði niður störf í gær

Þrátt fyrir að ég stillti ekki á mig neina klukku og hefði farið að sofa aðeins með seinni skipunum á mánudagskvöldið var ég glaðvöknuð um hálfsex. Var komin á fætur fljótlega. Hitti því aðeins á N1 soninn sem lagði af stað í vinnu um sjö. Ég vafraði ekkert svo lengi á netinu en kynnti mér m.a. viðburðina sem tengdust deginum. Það varð úr að ég ákvað að fara einungis á hápunktinn, samstöðufundinn á Arnarhóli. Notaði tækifærið og lauk við að lesa hina skammtímalánsbókina af safninu, hugaði að næstu skrefum í tiltektinni í mataræðinu til að heila mína blessuðu görn og prjónaði líka smávegis. Kveikti ekkert á sjónvarpinu og var lítið á glugga í samfélagsmiðla. Korter yfir eitt lagði ég labbandi af stað og rifjaði upp leiðina sem ég fór oftast þegar vinnustaðurinn var á Kalkofnsvegi. Það var greinilegt að allar leiðir lágu á torgið og margir fóru labbandi úr Hlíðum og nágrenni. Upp á Skólavörðuholtinu var magnað að sjá "fossana" sem streymdu úr að manni fannst öllum áttum. Var komin á Arnarhólinn korter fyrir tvö og stóð nánast á sama blettinum í einn og hálfan tíma. Veðrið sýndi svo sannarlega á sér sínar bestu hliðar og stundin var magnþrungin. Ég sem yfirleitt forðast að fara í mikla mannþröng sýndi samstöðu og fann bara fyrir töfrum allt í kring. Labbaði svo aðeins aðra leið heim og var komin þangað fyrir klukkan fjögur. Í gærkvöldi kíkti danska frænka mín og nafna til mín en hún var að afhenda Davíð Steini húslykla þar sem þau Mikel eru að skreppa til Danmerkur í dag og verða til sunnudags og hann var búinn að taka að sér að heimsækja kisu á meðan. Hann var einmitt nýkominn af vakt þegar hún mætti á svæðið. Pabbi hennar á afmæli á laugardaginn, verður 76 ára og þau ætla að gera sér glaða daga með honum.

Bíó Paradís

Vinnudagurinn minn í gær varð rétt rúmir átta tímar. Fór beinustu leið í Laugardalslaug eftir vinnu. Kalda potts vinkona mín var þegar búin að fara tvær ferðir í þann kalda þegar ég mætti. Saman fórum við þrjár ferðir í hann, tvær í heitasta pottinn og eina ferð í gufuna. Ég dýfði mér svo smá stund í kalda pottinn áður en ég fór upp úr og heim. Ég mátti semsagt ekki vera að því að synda neitt. Kom heim um hálfsex. Fékk mér kókosvatn og avaocado. Þremur korterum síðar labbaði ég af stað niður í bæ. Var komin rétt á undan esperanto vinkonu minni að Bíó Paradís. Vorum við báðar örlítið snemma í því. Kyrrðarbænasamtökin á Íslandi buðu upp á að sækja sýningu á verðlaunamynd um Thomas Keating: A RISING TIDE OF SILENCE. Sýningin stóð yfir í klukkustund og korter og byggðist á viðtölum við þennan merka mann og ævi hans. Hann var fæddur 1923 og hefði því orðið hundrað ára í ár. Myndin kom út fyrir tíu árum, sama ár og kyrrðarbænasamtökin voru stofnuð. Var komin heim aftur um hálfníu og skrefafjöldi gærdagsins fór yfir tíuþúsundskref.

Fæðingardagur föðurbróður míns

Eins og kom fram í tiltlinum á færslunni í gær átti ég erfiða nótt í fyrrinótt. Fór upp í tiltölulega snemma og las í smá stund. Það voru þannig skilaboð í líkamanum að mér fannst ég hvorki geta legið né setið og var þetta næstum því eins slæmt og þegar ég fékk flensuna í maí í vor. Einhvern veginn fann ég stellingu og sofnaði um stund. Rumskaði um eitt leytið. Skrapp á salernið. Óþægindin voru enn að angra mig en ég sofnaði samt aftur en ekki lengi. Vissi næst af mér um þrjú leytið og fór þá aftur á salernið. Báðar ferðirnar á salernið voru til að pissa. Um fimm leytið var ég að spá í að kannski væri bara best að koma sér á fætur en næst vissi ég af mér upp úr klukkan átta. Þetta varð til þess að ég fór ekki í sund fyrr en um hálfellefu því ég þurfti að vafra aðeins um á netinu og einnig búa til innkaupalista í samræmi við mataræðið þessa dagana. Áttaði mig strax á því í sturtuklefanum að það var bara ágætt að ég væri í sundi á þessum tíma. Hitti nefnilega tvær konur sem ég hef ekki hitt lengi, önnur þeirra er sjósundsvinkona mín og hin kona eins frænda míns. Hitti hann út í laug og hálftíma síðar mætti kalda potts vinkona mín. Því miður fyrir okkur var kaldi potturinn lokaður í gær. Klukkan var byrjuð að ganga eitt þegar ég fór upp úr. Kom við í Krónunni í Skeifunni og líka Heilsuhúsinu í Kringlunni. Hringdi í pabba. Var eitthvað að spá í að skreppa austur og sækja þorskhnakka í kistuna til hans en það varð ekkert úr því. Davíð Steinn hjálpaði mér með vörurnar inn úr bílnum. Þetta voru samt bara tveir pokar, annar léttur, og tveir hlutir í þriðja pokanum fyrir utan sundtöskuna og veskið mitt. Það fór svo þannig að ég skrapp í tuttugu mínútna göngutúr stuttu fyrir fjögur en ekkert í lengra ferðalag á bílnum. Eldaði mér bleikju í kvöldmatinn og hafði slatta af grænu grænmeti með og dass af rauðu súrkáli. 

Erfið nótt

Það er nokkuð víst að líkaminn er að vinna í að afeitra sig. Svaf þokkalega í fyrrinótt en var vöknuð fyrir allar aldir í gærmorgun, fyrir klukkan sex á laugardegi. Lagði af stað í sund í fyrra fallinu og kom við hjá ÓB í Öskjuhlíðinni til að jafna þrýstinginn á dekkjunum. Hitti fleira af "sundfólkinu mínu" í sundi, bros á vörum en sumir voru samt að spá í hvort ekki hefði verið hægt að þrífa sumt betur. Eftir fyrstu ferðina í kalda pottinn fór ég á braut 1 og synti 500 metra, flesta á bakinu en smá bringu- og skriðsund líka. Eftir aðra ferðina í kalda pottinn fór ég í sjópottinn og var það í korter áður en ég fór aftur í kalda, síðan í gufu, stutta dýfu í kalda, smá "sólbað" og svo upp úr að þvo á mér hárið um tíu leytið. Var mætt til esperanto vinkonu minnar um hálfellefu. Ég var búin að ákveða að taka ekki út hafra úr fæðunni fyrr en eftir þessa helgi svo hún bauð mér upp á hafragraut með chia fræjum og kanil og svo jurtate á eftir. Var komin heim rétt fyrir tólf. Kveikti strax á sjónvarpinu og stillti á rás tólf því hádegisleikurinn í gær var milli Liverpool og Everton. Leikurinn fór 2:0 fyrir heima liðið en gestirnir voru einum færri frá því fyrir þrítugustu mínútu í fyrri hálfleik. Eftir leikinn lauk ég við fyrirlestrana og ítarefnið fyrir viku tvö í netnámskeiðinu. Tók einnig saman lista yfir það sem ég þarf að verða mér út um. Var frekar svekkt síðar um daginn þegar ég uppgötvaði að möndlumjólkin sem ég keypti um daginn inniheldur sykur. Keypti hana áður en námskeiðið hófst en ég er samt yfirleitt vön að athuga með innihaldslýsingar. Það hef ég greinilega ekki gert um daginn. Blandaði hluta af mjólkinni við chiafræ en líklega helli ég restinni af fernunni. Ekkert varð úr að ég færi út í búð í gær. Bræðurnir fóru að heimsækja hina fjölskylduna sína. Ég horfði á bart úr nokkrum leikjum í enska, tvo þætti, prjónaði smá en það var ekki fyrr en ég fór upp í rúm á tíunda tímanum að ég las eitthvað.

Næst síðasta helgin í október

Þar sem ég var farin að sofa um tíu í fyrrakvöld kom mér það lítið á óvart að vera farin að losa svefn um fimm leytið í gærmorgun. Þegar ljóst var að ég myndi ekki sofna aftur þrátt fyrir að tæma blöðruna ákvað ég að kveikja á náttborðs lampanum og klára að lesa aðra af skammtímalánsbókunum af safninu. Það voru aðeins eitthvað um 40-50 bls eftir og að þeim lestri loknum var klukkan að verða sex. Þá klæddi ég mig, bjó um, tannburstaði mig og fékk mér glas af sítrónuvatni áður en ég settist inn í stofu með fartölvuna í fanginu. Klukkutíma síðar fékk ég mér sopa af þorskalýsi og drakk annað glas af vatni með vítamíntöflunum mínum. Var mætt í vinnu um hálfátta. Þar sem ég var hvorki í bókhaldi né á ítroðsluendanum fór ég beinustu leið inn á kaffistofu til að fylla á vatnsflöskuna. Hafði prjónana mína með og settist niður um stund. Við sem vorum mætt vorum flest í bleiku í tilefni dagsins. Aldrei þessu vant stóð vinnudagurinn yfir alveg til klukkan að verða hálffjögur. Kortaframleiðslu var lokið um hádegið en ég var í innlögnum eftir hádegi og svo að fara yfir skjöl. Eftir vinnu fór ég beinustu leið yfir í Laugardalinn því um eitt í gær var Laugardalslaugin opnuð almenningi aftur eftir að hafa verið lokuð í þrjár vikur og þrjá daga. Ég hafði lesið um þetta á fimmtudaginn og ákvað í gærmorgun að taka frekar sunddótið með mér þrátt fyrir að föstudagar séu sjósundsdagar.