31.12.20

Síðasti dagur þessa árs

Þrátt fyrir að það sé hlaupár og því einn aukadagur í þessu ári sem er að klárast er tilfinningin sú að það geti varla verið að árið sé búið. Vissulega hafa verið alls konar áskoranir á þessu ári og maður hefur þurft að aðlaga sig að aðstæðum hverju sinni, bæði í vinnu og samfélaginu. En kannski af því að meiri hluta ársins mátti ég ekki mæta til vinnu nema aðra hverja viku og af því að ekki er hægt að vinna framleiðsluna heiman að frá sér (nema þá eigin framleiðslu) þá held ég að ég hafi setti hluta af þessum "heima-vikum" á einhvers konar pásu eða bið. Það er ekki útlit fyrir að þessi vinnutilhögun breytist neitt fyrr en búið verður að bólusetja alla svo það er viðbúið að nýja árið byrji eins og það endaði. Að vísu endaði ég þetta ár á því að mega mæta til vinnu svo nýja árið byrjar á því að ég verð að halda mér fjarri vinnu. Janúar verður næstum því hálfnaður þegar ég mæti næst til vinnu.

Þriðjudag og miðvikudag fór ég gangandi í vinnuna og fékk svo far heim um hálffjögur. Og báða þessa daga mætti ég í sund um fimm. Í morgun fór ég á bílnum í vinnuna og hafði sunddótið með mér. "Vinnuskylda" var 3 tímar og við náðum að klára framleiðslu, talningar, skýrslugerð, frágang, þrif og sótthreinsun og smá kaffitíma á þessum þremur tímum. Ég fór svo beint úr vinnunni í sund og hitti kalda potts vinkonu mína í sinni annarri ferð í kalda pottinum. Fór með henni í fimm ferðir og endaði svo í gufu áður en ég fór heim.

N1 sonurinn er að vinna en Oddur Smári kláraði sína síðustu vakt hjá Kvikk í Öskjuhlíð í gærkvöldi. Hann er heima og hjálpaði mömmu sinni við smá tiltekt og þrif.

29.12.20

Á leið í sund eftir smá stund

Þar sem ég var enn á kisuvaktinni í gær fór ég á bílnum í vinnuna. Ég var í bókhaldinu en samstarfskonur mínar á framleiðsluvaktinni. Daglegu skrárnar voru mjög litlar en um hádegið var send til okkar endurnýjun og það tók rúma tvo tíma að klára þá framleiðslu. Þar að auki hafði komið nokkuð stór hráefnissending rétt fyrir jól með gulum miðum sem þarf að fjarlæga áður en hægt er að telja svo ég gat dundað mér við það þegar öllum daglegum bókhaldsverkefnum var lokið. Hættum vinnu rétt upp úr þrjú og þá fór ég beint til kisu. Hún var ekki undir sófa og kom ekki strax þaðan sem hún hélt sig. Ég skolaði upp vatnsskálina og fyllti á hana og matardallinn. Tók svo fram kisudót og labbaði aðeins um íbúðina. Og viti menn, allt í einu var kisa komin, en ég veit ekki enn hvar hún var. Hún vildi alveg leika við mig í smá stund. Svo settist ég upp í sófa og það endaði með því að kisa ákvað að koma til mín og leggja sig við hliðina á mér. Hún vildi alveg leyfa mér að klappa mér en mér leist ekkert á blikuna því að neistaði svo mikið á milli okkar. Samt ekki svo að við hrukkum við. Stoppaði í hátt í tvo klukkutíma áður en ég kvaddi. Kisa var ekkert að hafa fyrir því að fylgja mér til dyra eins og hún gerði daginn áður heldur kúrði sig áfram í sófanum. 

28.12.20

Á kisuvaktinni

Synir mínir gáfu mér báðir bækur í jólagjöf. Davíð Steinn gaf mér Dauði skógar og Oddur Smári gaf mér tvær bækur; Martröð í Mykinesi og Svo týnist hjartaslóð. Ég fékk líka bók frá tvíburahálfforeldrum mínum,barna-teppaprjónabók svo nú verður tusku- og sjalaprjónið lagt til hliðar fljótlega og farið að prófa að prjóna teppi. Pabbi gaf mér pening sem ég notaði til að fjárfesta í sjósundsskóm og hönskum. Frá vinnunni fékk ég hvíta húfu frá 66°Norður og 35.000 gjafakort í sömu verslun. Sjósundsvinkona mín gaf mér höfuðljós sem má fara ofan í vatn. Ætlað fyrir sjósundið þegar við erum á ferðinni seinni partinn.

Allir voru komnir á fætur fyrir klukkan tólf á jóladag. Pabbi fór á smá tölvu-skanna námskeið hjá Davíð Steini en fljótlega eftir hádegi setti hann upp sýningatjald og varpaði innskönnuðum myndum úr tölvunni á það. Þetta var hið besta skemmtun. Vorum með kaffihlaðborð um miðjan dag en á sjötta tímanum setti ég upp kartöflur og bakaði upp hvítan jafning og hangikjötsbitinn af "feita sauðnum" var nóg í matinn handa okkur öllum. Kvöddum pabba um átta. Oddur Smári keyrði í bæinn.

Á annan í jólum vorum við mæðgin öll komin á fætur á svipuðum tíma. Oddur Smári var fyrstur út úr húsi, rétt fyrir hálftíu en ég skutlaði Davíð Steini upp á Gagnveg þannig að hann var mættur um tíu. Svo var ég svo bjartsýn að ég fór beinustu leið í Laugardalinn. Þar var enn lokað, opnaði ekki fyrr en ellefu, svo ég fór aðeins heim og las smá í einni bók af safninu; Merkt eftir Emelie Schepp. Klukkan var að nálgast tólf þegar ég fór út aftur. Kom við hjá móðurbróður mínum að sækja lykla af íbúð nöfnu minnar áður en ég fór í sund. Laugin var hálfköld en ég synti engu að síður 400 metra. Hitti óvænt sjósundsvinkonu mín í potti tvö og hún kom svo eina ferð með mér í þann kalda áður en hún fór upp úr. Eftir sundið fór ég beinustu leið að heimsækja kisu. Skolaði upp vatnsskálina og fyllti hana svo af vatni, fyllti á matarskálina, hreinsaði upp úr kattasandkassanum og bætti sandi út í. Stoppaði í um klukkustund áður en ég fór heim.

Oddur Smári fór út klukkan hálfátta í gærmorgun. Ég skutlaði Davíð Steini í sína vinnu á sama tíma og á laugardaginn og nú komst ég beint í sund eftir skutlið því það opnaði klukkan átta í gærmorgun. Kom beint heim eftir sundið og hellti mér á könnuna. Fór ekki til kisu fyrr en um miðjan dag en ég stoppaði hjá henni í svipaðan tíma og daginn áður og lék mér aðeins við hana.

27.12.20

Sunnudagsmorgun

Á aðfangadagsmorgun var ég komin á fætur upp úr klukkan sjö. Pabbi var þá þegar á fótum og var að skrá niður sínar daglegu mælingatölur. Við fórum í kaplakeppni þar til klukkan var að nálgast átta. Þá var kominn tími til að hafa sig af stað í sund. Kannski ekki venjulegasti tími pabba, en þennan dag opnaði ekki fyrr og það er eiginlega langbest að taka jólabaðið í sundinu. Við feðginin höfðum laugina alveg útaf fyrir okkur. Ég byrjaði að synda aðeins á undan pabba því ég varð á undan út og í þann kalda. Svo synti ég og synti þar til ég sá pabba fara aftur í þann kalda eftir sína 300 metra uþb 25 mínútum síðar. Skiptumst á að fara í kalda pottinn, notuðum sitt hvorn heita pottinn og enduðum á smá stund í gufunni. Pabbi var á undan að klæða sig eftir sundið þrátt fyrir að ég væri ekki að þvo á mér hárið. Hann var að drekka kaffi og spjalla við Þórhall þegar ég kom fram.

Um hádegisbilið var dyrabjöllunni hringt og spurt eftir pabba. Þar var á ferðinni maður sem hafði lengi vel verið í sömu sundmætingarútínu og pabbi en hefur ekki komið sér aftur í þann gír eftir fyrstu lokun. Hann var að færa pabba "væna flís af feitum sauð" og kasta á hann hátíðarkveðju en stoppaði ekkert við.

Rétt um hálfþrjú leytið kom lögreglan, systursonur pabba, í smá innlit. Hann var á frívakt, byrjaði á því að spyrja hversu stór jólakúlan okkar væri, og sagðist svo hafa orðið að kíkja aðeins við og heilsa upp á frænda sinn. Hann þáði einn kaffibolla og smakk af sólberjapæinu sem Inger sendi mig með til pabba.

Lambahryggurinn fór inn í 120°C gráður heitan ofninn pakkaður smurður olíu og kryddi í álpappír í stóran ofnpott um miðjan dag. Þegar synir mínir komu austur rétt upp úr klukkan sjö vorum við pabbi búin að leggja á borðstofuborðið, blanda jólaöl, sjóða kúlukál og kartöflur, útbúa sósu og setja fram meira meðlæti. Maturinn þótti mjög góður. Höfðum ekki strax pláss fyrir ísinn sem var í eftir rétt, heldur gengum frá, settum uppþvottavélina af stað og fórum að huga að pökkum.

24.12.20

Morgunsund á Hellu í morgun

Heyrði pabba fara af stað í sund um hálfsjö í gærmorgun. Ég var vöknuð en að reyna að kúra áfram. Gafst upp á að reyna að sofna aftur og var komin á stjá um hálfátta. Pabbi kom heim úr sundi klukkutíma síðar. Það var mjög rólegt hjá okkur feðginum.Pabbi spurði hvort við ættum nokkuð að vera að setja upp jólatré og ég benti á að það væri alveg nóg að setja upp tvö keramikjólatré sem mamma heitin gerði, annað hvítt og hitt grænt. Ég var annars ýmist að prjóna, leggja kapal eða vafra á netinu

Um hálftólf bauð pabbi mér á Kanslarann í hádegismat. Þar fengum við aspassúpu og steiktan fisk í matinn. Vegna fjöldatakmarka hafði eigandinn ákveðið að sleppa því að vera með skötu þetta árið.

Komum við í búðinni á leiðinni heim. Vorum með smá lista af vörum sem vantaði upp á jólastússið. Þetta var ekki meira en svo að það komst fyrir í einum poka.

Dagurinn  leið frekar hratt. Aldrei þessu vant var sjónvarpið opið frá klukkan að verða hálfsjö til klukkan að ganga ellefu. Upptakan frá jólatónleikum Friðriks Ómars í Hofi 2019 hélt okkur límdum fyrir framan skjáinn.

23.12.20

Þorláksmessa

Í gærmorgun var ég komin á fætur upp úr klukkan sjö og búin að stinga handklæðum í þvottavél áður en klukkan varð hálfátta. Setti hreint á rúmið en það óhreina verður ekki þvegið fyrr en á milli jóla og nýjárs. Einkabílstrjórinn kom fram á ellefta tímanum. Þá var ég búin að hengja upp þvottinn og langt komin að með að pakka mér niður.

Fermdum bílinn um ellefu leytið og byrjuðum á því að fara með jólakort og pakka til norsku esperantóvinkonu minnar. Hún afhenti mér jólkort í staðinn og tvö sólberjapæ, annað til pabba og hitt til okkar mæðgina. Það pæ fékk samt að fara í ferðalag austur fyrir fjall. Komum við í Fossheiðinni með jólakort og pakka. Stoppaði ekkert en tók á móti korti og pökkum.

Oddur Smári stoppaði í tæpan klukkutíma hjá afa sínum. Hjálpaði honum með eitt forrit í tölvunni og þáði smá kaffihressingu áður en hann sneri heim á leið. Þurfti að koma við heima til að ná í vinnupeysuna sína og líklega hefur hann lagt bílnum þar í leiðinni.

Ég fitjaði upp á nýrri tusku, lagði kapla og spjallaði við pabba. Við fengum okkur síðdegishressinu um hálffjögur og snarl eftir kvöldfréttirnar í sjónvarpinu. Dagurinn leið frekar hratt þrátt fyrir rólegheit.

22.12.20

Að pakka niður fyrir þrjár nætur

Gærdagurinn leið frekar hratt. Var lengi að koma mér af stað í smá leiðangur. Fór ekki fyrr en um tvö og fyrir vikið tók leiðangurinn heldur lengri tíma vegna umferðar. Kom fyrst við á pósthúsinu. Það tók ekki langan tíÉma og frekar rólegt þar þótt umferðin væri nokkuð mikil þar í kring sem annars staðar. Næst lá leiðin í Hagkaup í Skeifunni. Þar var klikkað að gera en ég var samt ekkert svo lengi að sinna mínum erindagjörðum. Að lokum lá leiðin í Aquasport við Bæjarlind 1-3 í Kópavogi. Þar keypti ég mér jólagjöfina mína frá pabba, sjósundsskó og hanska. Hitti afgreiðslustúlkuna í Nauthólsvík fyrir nokkru síðan þar sem hún var að prófa sjósundfatnað. Hún sagðist nefnilega helst vilja vita hvað hún væri að selja og hvort hún mælti með því. Þetta var að ég held hennar fyrsta sjósundsferð en ekki sú síðasta. Fékk 15% afslátt af verðinu á því sem ég keypti bara af því ég mundi eftir henni frá því í Nauthólsvík einn laugardaginn um daginn.

Var komin heim um hálffjögur. Þegar Oddur Smári var farin í vinnuna nokkru síðar pakkaði ég inn síðustu jólagjöfunum og skrifaði á allra síðasta jólakortið. Rétt fyrir fimm var ég tilbúin og komin út þegar nöfnurnar sóttu mig í sjósundsferð. Hittum systurnar úr okkar hóp í klefanum. Að sjálfsögðu prófaði ég nýju skóna og hanskana. Það hafðist að renna upp lásnum á hægri skónum þrátt fyrir að fóturinn væri aðeins bólginn. Og auðvitað virkaði þetta eins og það átti að virka. Það var að fjara út og sjórinn var 2,2°C. Svömluðum um í uþb 5 mínútur og vorum svo amk 15 í pottinum.

Ég er með handklæði í þvottavélinni sem ég get hengt upp um tíu leytið. Er aðeins búin að fá mér lýsi en er á leiðinni að hella upp á könnuna og klára svo að pakka niður. Oddur Smári ætlar að skutla mér austur um hádegisbilið.

21.12.20

Hægagangur

Í gærmorgun var ég komin á fætur fyrir klukkan átta. Klukkutíma síðar hafði kalda potts vinkona mín samband og við sammæltumst um að hittast í Laugardalslauginni um tíu. Mættum nánast á sama tíma og við byrjuðum á að fara í pott númer tvö og svo sex ferðir sinnum þrjár mínútur í þann kalda og pott númer fjögur, þann heitasta á milli. Eftir síðustu ferðina í kalda pottinn skildu leiðir og ég endaði í gufunni. Synti semsagt ekki neitt. Þvoði á mér hárið og fór svo beint heim.

Er búin að skrifa á 27 jólakort af 28 sem ég bjó til. Listinn er tæmdur en hugsanlega skrifa ég á síðasta kortið til pabba. Á aðeins eftir að pakka inn gjöfinni til hans. Hef tíma til þess í dag. En um hádegið á morgun mun einkabílstjórinn skutla mér austur en þeir bræður koma saman á aðfangadagskvöld og verða yfir eina nótt.

20.12.20

Ýmislegt brallað

Ég var komin á fætur um átta í gærmorgun. Var löngu vöknuð, heyrði í Oddi þegar hann fór af stað í vinnu fyrir hálf. Um hálftíu útjó ég mér hafragraut. Og ég var tilbúin í sjósundsferð þegar sjósundsvinkona mín sótti mig rétt fyrir ellefu. Miklu fleiri voru mættir í Nauthólsvík heldur en fyrir viku. Þar sem ég var í sundbolnum innanundir og búin að klæða mig í sjósundssokka og strandskó var ég ekki lengi að taka af mér í klefanum og setja upp sundhettu. Sjórinn var 2,1° og við vorum fjórar úr sama hóp í uþb fjórar mínútur á svamli. Heiti potturinn var eiginlega of troðinn. Systurnar fóru beint inn í sturtu en við hinar rétt settumst niður í eitt hornið, kannski í hálfa mínútu til eina á meðan við vorum að klæða okkur úr sokkum, vettlingum og skóm.

Var komin heim rétt fyrir tólf. Ryksugaði sameignina frammi áður en ég hellti mér upp á kaffi og hlustaði á hádegisfréttir. Áður en fréttrinar voru búnar skipti ég yfir á Cristal Palace - Liverpool og reyndist sá leikur hin besta skemmtun fyrir Liverpool aðdáanda til margra ára 0:7. Fljótlega eftir að leikurinn var búinn skrapp ég í þriggja kortera gönguferð. Fór upp hjá Perlunni og kom niður hjá HR.

Rétt fyrir sjö klæddi ég mig upp í smá spari, kvaddi strákana og fór í jólakózýboð til Önnu frænku. Hún og kærastinn hennar buðu líka móðurbróður okkar og fjölskyldu (hann og mamma Önnu eru tvíburar) svo við vorum 6 manns saman og einn köttur. Þetta var mjög skemmtileg og notaleg kvöldstund með frændfólki. Mikið talað á ensku því kærasti frænku minnar er breskur og þótt hann hafi búið hér á landi í meira en áratug hefur hann ekki náð að tjá sig á íslensku að ráði. En ég er nokkuð viss um að hann skilur tungumálið, sérstaklega ef maður gerir sér far um að tala hægar. 

19.12.20

Laugardagur

Ég fékk far heim úr vinnunni í gær. Gönguloturnar í vinnuvikunni urðu því alls sjö. Í venjulegu árferði væri ég búin að fjárfesta í strætókorti en á meðan ég má aðeins mæta í vinnu aðra hverja viku sleppi ég því að nota strætó. Tíðin síðustu daga hefur verið óvanalega góð hér í höfuðborginni og ef ekki væri fyrir takmarkaða tíma dagsbirtunnar þá hefði maður helst haldið að það væri haust. En mikið finn ég til með Austfirðingum og hamfarirnar á Seyðisfirði eru skelfilegar. Elstu menn muna ekki annað eins. Las eða heyrði viðtal við e-n í fyrradag þar sem kom fram að til væru sagnir að svona gæti gerst á uþb 100 ára fresti. Þetta er þá svipað og með Suðurlandsskjálftana nema að því leiti að það var vitað um þá og fólk var undirbúið þótt það vissi ekki hvenær nákvæmlega þeir myndu ríða yfir. Hringdi í vinkonu mína á Egilstöðum seinni partinn í gær og þau hjónin urðu svo sannarlega vör við að eitthvað mikið væri í gangi, heyrðist í sírenum og mikið af þeim. Þau voru að sjálfsögðu með hugann hjá Seyðfirðingum, þekkja marga þar.

Annars gerði ég mest lítið eftir að ég kom heim úr vinnu í gær. Tók þó aðeins í prjónana mína og það er stutt í að enn ein tuskan "detti" af prjónunum. Horfði líka á stóran part af handboltaleiknum milli Danmerkur og Noregs, svakalega var hann spennandi.

18.12.20

Helgi og jólafrí framundan

Hef labbað alla daga til vinnu í vikunni. Í gær náðum við yfir 100.000 framleidd kort á nýju kortavélina sem tekin var í notkun seinni partinn í ágúst og tók alfarið við af gömlu vélinni í október. Höfðum alveg nóg að gera og stóðum í framleiðslu alveg til klukkan var byrjuð að ganga þrjú. Þá gengum við frá og ég "hljóp" heim til að ná í sunddótið mitt. Fyrsta ferðin í kalda pottinn í laugardalnum var klukkan korter yfir fjögur og var kalda potts vinkona mín akkúrat að byrja sína fyrstu ferð. Við fórum alls sex ferðir í kalda pottinn og ýmist í pott tvö, 42°C eða þann heitasta sem á að vera 44°C á milli. Kaldi potturinn var óvenjulega vinsæll og það kom fyrir að það myndaðist smá biðröð því ekki mega vera fleiri en sex í pottinum í einu. Ég ákvað annars að sleppa því alveg að synda. Var komin heim um sex og þar hélt ég áfram að slaka á þar til ég fór að sofa á ellefta tímanum. 

17.12.20

Labbað í og úr vinnu

Það er ótrúlegt en einnig mjög gott að geta gengið til og frá vinnu á strigaskóm þessa dagana. Legg yfirleitt af stað um eða rétt fyrir sjö á morgnana og það tekur mig rúmlega hálftíma að labba í vinnuna. Í gær var ég í bókhaldinu. Fengum tvö auka verkefni í gær, ekkert svo stór en annað þeirra entist alla vega til klukkan að verða hálftvö. Eftir það þá átti eftir að telja alla framleiðslu því ég lenti í vandræðum með eitt verkfærið og náði ekki út sumum talningablöðunum fyrr en ég var búin að fá aðstoð í gegnum TEAMS. Allt hafðist þetta þó og svo hjálpuðumst við vinnuhópurinn minn að við að telja, ein á talningavélunum og við vorum tvær í að staðfesta. Labbaði heim beint yfir Skólavörðuholtið.

Stoppaði ekki lengi heima og var mætt í sund rétt fyrir fjögur. Náði að synda 300metra áður ég fór að pottormast með kalda potts vinkonu minni. Fórum sex ferðir í pottinn og yfirleitt þann heitasta á milli en eftir síðustu ferðina endaði ég á því að fara í gufu.

Eftir að ég kom heim aftur skrifaði ég á fimm jólakort og horfði á seinni hálfleik milli Liverpool og Tottenham. Klukkan var rétt orðin tíu er ég fór upp í en ég las í amk hálftíma. Er að lesa hina bókina eftir Rögnu Sigurðardóttur, smásögusafn en bókin kom út í fyrra og ber titilinn Vetrargulrætur. Sögurnar eiga að gerast á misjöfnum tíma en það er visst sameiginlegt þema í þeim öllum. 

16.12.20

Saumaklúbbur

Fór af stað, gangandi til vinnu, um sjö í gærmorgun. Var mætt um hálfátta. Daglegu verkunum var lokið um klukkan eitt. Gerðum viðeigandi ráðstafanir um hvernig væri hægt að ná sambandi við okkur amk til hálffjögur en fórum að því búnu heim. Rétt fyrir fjögur var ég komin í sund. Synti 200metra en þá var kalda potts vinkona mín mætt og við fórum saman sex ferðir í kalda pottinn og þann heitasta á milli. Eftir síðustu ferðina í þann kalda skyldu leiðir og ég sat í gufunni í uþb tíu mínútur. Áður en ég fór heim eftir sundið gerði ég mér ferð í Hagkaup í Skeifunni.

Það var 100% mæting til mín í saumaklúbb um kvöldið. Önnur kom gangandi neðan úr bæ og var mætt hálfátta. Hin sendi skilaboð að hún yrði aðeins sein fyrir en hún var mætt um hálfníu. Tíminn leið extra hratt, nóg spjallað, mikið hlegið en við slóum samt ekki slöku við í föndrinu. Áður en við vissum af var klukkan langt gengin í ellefu. Sú sem mætti síðar á svæðið skutlaði þeirri sem kom gangandi þannig að þær kvöddu mig báðar í einu. 

15.12.20

Sundkortið virkar líka í Nauthólsvík

Ég var vöknuð tuttugu mínútum áður en vekjaraklukkan átti að hringja í gærmorgun. Dreif mig fljótlega á fætur og tók mig til fyrir daginn. Labbaði af stað í vinnu um sjö og þar sem heilsuforritið á símanum virtist ekki vera byrjað að telja skrefin mín prófaði ég að stilla forritið á göngutúr rétt áður en ég lagði af stað. Forritið lét mig vita  þegar ég var búin að ganga kílómeter og aftur þegar komnir voru tveir. Og skrefateljarinn var svo sannarlega að virka og hélt því áfram eftir að ég "sagðist" vera komin í mark og slökkti á gönguferðarforritinu. Vinnudagurinn var léttur, eingöngu dagleg verkefni fyrir utan smá gjafakortaframleiðslu í hádeginu. Hefðum verið búnar um hálftvö ef ekki hefði verið fyrir stíflu á einum stað og verkefni sem yfirleitt er lokið fyrir ellefu kom ekki til framleiðslu fyrr en langt á þriðja tímanum. En þetta var í góðu lagi því ég fann mér smá verkefni á meðan ég var að bíða. Fékk far heim úr vinnu með Garðabæjarsamstarfskonu minni og var komin heim upp úr klukkan þrjú. Tæpum tveimur tímum seinna var ég tilbúin þegar sjósundsvinkona mín og nafna hennar sóttu mig. Fékk grænt ljós þegar ég veifaði sundkortinu mínu á búnað sem nýlega er búið að festa á einn vegginn rétt hjá þar sem afgreiðslan er. Við mættum fimm úr hópnum, nóg pláss í kvennaaðstöðunni, fullt að plássi í 2,1°C sjónum þar sem við svömluðum um í uþb fimm mínútur og það var líka gott pláss í heita pottinum. Var komin heim aftur rétt upp úr sex. Gærkvöldið notaði ég svo meðal annars til að skrifa á 6 jólakort.

14.12.20

Sundferð og göngutúr í gær

Var eitthvað seinni á fætur heldur en ég ætlaði mér í gærmorgun og varð því frekar lítið úr verki fyrsta klukkutímann. Um hálftíu var N1 sonurinn ekki kominn fram og þar sem ég heyrði engin hljóð frá herberginu hans um að hann væri að vakna hringdi ég í hann. Hann hafði víst snúsað vekjaraklukkuna og svo slökkt á henni óvart og steinsofnað aftur. Hann var samt mættur á vakt fimm mínútum fyrir tíu. Áður en ég fór heim aftur dreif ég mig í sund. Byrjaði á einni ferð í kalda pottinn og synti 500 metra. Hitti yngstu mágkonu mömmu heitinnar en við syntum af stað á sama tíma.

Kom heim um tólf. Tæpum þremur tímum seinna fór ég aftur út í  4 km göngutúr á þremur korterum. Mætti einni frænku minni á hlaupum, hún er dóttir þeirrar sem ég hitti í sundinu. Annars var dagurinn nokkuð rólegur. Skrifaði á fjögur jólakort og er þá búin að skrifa á tæplega helminginn. 

13.12.20

Í sjóinn í gærmorgun

Þar sem ég var  komin á fætur á undan N1-syninum í gærmorgun bauðst ég til að skutla honum. Hann átti að mæta klukkan átta upp á Gagnveg og var komin tvær mínútur fyrir. Ég fór beint heim aftur og fékk sama stæði fyrir framan. Settist beint inn í stofu og kveikti á fartölvunni. Um hálftíu leytið bjó ég mér til hafragraut. Klukkutíma síðar fór ég að undirbúa mig undir sjósundsferð, fór í sundbolinn innan undir fötin og klæddi mig einnig í sjósundssokka og strandskó. Á meðan ég beið eftir sjósundsvinkonu minni fram í gangi kom fráfarandi nágranni í risinu fram og spjallaði við mig í nokkrar mínútur.

Við voru fjórar mættar í röðina í Nauthólsvík korter fyrir opnun. Á meðan það var lokað var sett upp nýtt kerfi. Nú er hægt að nota árskortið í sund sem aðgangskort inn í búningsaðstöðuna líka. Ég var bara með litla plastkortið sem ég fékk afhent þegar ég skilaði inn armbandinu frá í vor um miðjan ágúst. En það var nóg því á því voru upplýsingar til að setja inn í tölvukerfið og næst þegar ég fer í sjóinn á árskortið að virka. Vorum tæpar fimm mínútur í rúmlega tveggja gráðu heitum sjónum og svo var svo ljúft að geta flatmagað um stund í heita pottinum.

Þegar ég kom heim aftur byrjaði ég á því að hita mér kaffi. Um hálftvö hrærði ég í vöffludeig og klukkutíma síðar gafst ég upp á að bíða eftir að hinn sonurinn kæmi sér á fætur og bankaði á herbergisdyrnar hjá honum. Hellti mér aftur upp á kaffi til að drekka með vöfflunum.  Klukkan langt gengin í fjögur dreif ég mig loksins í hálftíma gönguferð um hverfið.

Annars náði ég að klára bréfið til frænku minnar á Fjóni. Skrifaði á tvö jólakort í viðbót og er þá búin að skrifa á alls sjö jólakort. Sennilega Uþb 20 óskrifuð enn, en ég er ekkert stressuð yfir því. Eina sem stressar mig er að ég veit ekkert hvað ég á að gefa strákunum mínum í jólagjöf. 

12.12.20

Fjögurhundruð metrar

Hefði haldið að ég ætti að sofa eins og engill í fyrrinótt eftir fyrstu sundferð í tvo mánuði. Ég synti reyndar ekki nema 200 metra en sennilega var ég spennt yfir að  komast í sund strax daginn eftir. Við kalda potts vinkona mín höfðum mælt okkur mót um tíu í gærmorgun. Við vorum báðar komnar uþb korteri fyrr og hittumst á leiðinni í sturtu. Fyrsta sem við gerðum er út var komið var að fara í pott númer tvö sem er 42°C. Rétt seinna kom í pottinn maður sem heilsaði og kynnti mig fyrir sér sem mann sjósundsvinkonu minnar. Þar með er ég búin að hitta alla hennar nær fjölskyldu. Við Hrafnhildur fórum sex ferðir í þann kalda og yfirleitt þann heitasta á milli. Eftir sjöttu og síðustu ferðina fór ég þó beint út í laug og synti helmingi meira en í fyrradag eða 400 metra á tæpu korteri.

Eftir sundferðina skrapp ég aðeins í Kringluna á tvo staði en reyndar í sömu búðina. Kom heim um það leyti sem hádegisfréttir voru að byrja og ég hlustaði á þær áður en ég fékk mér hádegishressingu og hellti mér upp á fyrsta kaffibolla dagsins, vel sterkan.

Byrjaði á jólabréfinu til frænku minnar á Fjóni en þrátt fyrir að það væri á móðurmálinu náði ég ekki að ljúka við það. Var ekki í nógu góðu skrifstuði í gær.

 um helgina er ég að fá nýjan nágranna í risið. Sú sem hefur verið þar undanfarin nokkur ár er búin að selja og kaupa sér nýja eign í vestur hluta Kópavogs. Hún er að flytja í dag og lét mig vita í gær. Hún upplýsti mig einnig um hver væri að kaupa af henni svo ég, sem gjaldkeri húsfélagsins, gæti gert viðeigandi ráðstafanir og breytingar. Ég sendi upplýsingarnar á þjónustufulltrúa minn í bankanum um hálftvöleitið í gær og innan við hálftíma síðar var þetta komið í gegn. Þjónustufulltrúinn bað mig í staðinn að fara inn í fyrirtækjabankann og svara áreiðanleikakönnun sem ég gerði strax.

Lauk loksins við að lesa fyrstu bókina af fimm af safninu í gærkvöldi. Er ekki byrjuð á annarri bók og heldur ekki búin að fitja upp á nýrri tusku en þetta stendur allt til bóta. 

11.12.20

Tvöhundruð metrar

 Hafði mig nokkuð hæga framan af degi í gær. Davíð Steinn kom fram um hálftíu. Þá var ég búin að ákveða að búa til hafragraut. Hann þáði boðið um á fá af grautnum. Lauk við danska jólabréfið og skrifaði á eitt jólakort að auki. Bræðurnir fóru í Sorpuferð um tvö leytið og ráku nokkur önnur einkaerindi í leiðinni. Ég skrapp í stutta gönguferð, uþb 2km, á meðan ég beið eftir að þeir kæmu með bílinn til baka. Rétt fyrir fjögur var ég svo mætt í Laugardalslaugina eftir tveggja mánaða hlé. Kalda potts vinkona mín hafði samband við mig um leið og fréttist af að ætti að opna aftur í gær og spurði hvort við ættum að hittast á þessum tíma í gær. Ég var semsagt alls ekki ein af þeim sem hékk á hurðarhúninum í gærmorgun þótt ég hefði getað. Það var engin biðröð í að komast inn, allir með grímur í anddyrinu og svo sá maður breiðu brosin á samferðafólkinu þegar út var komið. Við fórum alls sex ferðir í þann kalda sem er amk 6 gráðum hlýrri en sjórinn. Eftir pottaferðirnar synti ég 200m áður en ég fór upp úr. Á heimleiðinni kom ég örstutt við á tveimur stöðum, fyrir utan pósthúsið í Síðumúla til að setja tvö kort í póstkassann og til norsku vinkonu minnar að skila af mér tómu jólakökuboxi og fá annað fullt í staðinn. Hún hefur gefið mér sykurlausar smákökur nokkur undanfarin jól og hafði samband um daginn til að láta mig vita að það væri engin breyting á því þetta árið ef ég myndi bara skjótast og ná í þetta. Davíð Steinn sá um að elda kvöldmatinn á meðan gat ég horft á fréttirnar og fellt af enn einni afgangatuskunni. Hversu heppin manneskja er ég með samferðafólkið í kringum mig? Ég er endalaust þakklát.

10.12.20

Smá tilslakanir

Það gekk brösuglega að komast jólabréfaskrifstuð á dönsku í gær. Tók mig nánast allan daginn og fann mér ýmislegt annað til dundurs á meðan, ekkert endilega hjálplegt dundur. Skrifaði utaná umslagið og inn í jólakortið en það var ekki fyrr en um hálfellefu í gærkvöldi sem ég byrjaði almennilega á bréfinu. Þremur korterum seinna lagði ég frá mér pennann, aðeins hálfnuð með bréfið, ákveðin í að vera í meira skrifstuði í dag. Þrátt fyrir að klukkan væri farin að ganga tólf ákvað ég að lesa í smá stund þegar ég var komin upp í. Auðvitað gleymdi ég alveg að fylgjast með tímanum og las fram yfir miðnætti. Ákvað að prófa að stilla á mig vekjaraklukkuna á 7:40. Sofnaði fljótt og svaf í einum dúr til klukkan sjö. 

9.12.20

Svefnpurka

Undanfarna daga hef ég stillt vekjaraklukkuna á 7:20 en alltaf verið vöknuð á undan. Í gærkvöldi ákvað ég að sleppa því að stilla á mig klukkuna. Fór upp í um ellefu og las í einni bók af safninu til klukkan hálftólf. Var sofnuð fyrir miðnætti. Vissi næst aðeins af mér um miðja nótt. Þurfti ekki og fór ekki framúr. Var ekki mikið að bylta mér en hugurinn var eitthvað á sveimi í einhvern tíma. Síðasta sem ég man var að ég hugsaði að ég ætlaði ekki á fætur fyrr en klukkan væri orðin amk sjö. Er ekki viss hvenær þessi hugsun flaug í gegn, var ekkert að fylgjast með tímanum en næst vissi ég af mér klukkan níu svo ég hef steinsofnað á endanum.

Í gærmorgun var ég vöknuð fyrir hálfsjö og komin á stjá uþb klukkutíma síðar. Það tók mig smá tíma að komast í skrifgírinn en ég lauk við enska jólabréfið, jólakortið með því og skrifaði á annað jólakort. Hefði getað skroppið með þetta á pósthúsið fyrir hádegi en ég fór ekki fyrr en um þrjú. Biðröð af bílum og fólki var fyrir utan pósthúsið í Síðumúla svo ég lagði fyrir framan Verkfærasöluna og fór í biðröðina fyrir framan pósthúsið. Fjórir voru á undan mér í röðinni og tíu inni. Þetta gekk samt nokkuð hratt fyrir sig. Þegar afgreiðsluröðin kom að mér varð ég mér úti um 2 frímerki til evrópu og 20 innanlands til að taka með mér. Áður en ég fór heim aftur kom ég við í Krónunni við Nóatún.

Ég skrifaði ekki fleiri bréf né jólakort í gær og þar að auki hellti ég mér aðeins einu sinni upp á könnuna, um tíu í gærmorgun svo ég er að uppgötva að það eru meira en 24 tímar síðan ég drakk kaffi síðast. Þessu verð ég að bæta úr sem fyrst. En að lokum ætla ég aðeins að nefna bókina sem ég er að lesa og hef pottþétt fengið að láni og lesið áður; Hið fullkomna landslag eftir Rögnu Sigurðardóttur. Ein af hinum bókunum fjórum er líka eftir Rögnu. Meira um það síðar.

8.12.20

Á bókasafnið

Þegar ég var búin að vafra, blogga og leika mér nóg í gærmorgun opnaði ég á google translate og tók aftur til við að skrifa fyrsta jólabréf þessa árs. Ég var komin með eina handskrifaða blaðsíðu. Ætlunin var að klára bréfið og jólakortið sem fylgja á með og kaupa frímerki á amk 20 jólakort í viðbót þegar ég færi með það í póst. Og það átti helst að gerast í gær. Skrifaði tvær blaðsíður í viðbót og var hvergi nærri búin þegar ég ákvað að fresta þessu verkefni aðeins og skreppa á bókasafnið um stund rétt upp úr hádeginu.

Þar sem ég var með tíu bækur til að skila skipti ég þeim í tvo poka en ég var ekki með hugmyndaflug í að nota tækifærið og gera þetta að göngutúr í leiðinni. Setti á mig aðra af grímunum sem sjósundsvinkona mín gaf mér og brunaði svo á bílnum upp í Kringlu. Einhverjir voru komnir á safnið en þó ekki fleiri en tíu svo það var engin röð fyrir utan. Sprittaði á mér hendurnar og afgreiddi bækurnar inn á safnið. Gaf mér smá stund í að leita uppi nýjar bækur til að lesa og fann fimm sem ég tók með mér. Setti þær í bókasafnspokanum í skottið á bílnum og ákvað að taka einn hring í Kringlunni. Var með tvo staði í huga til að kíkja inn á en það var röð fyrir framan þá báða sem lengdist ef eitthvað var svo ég ákvað að hverfa frá að sinni, fara heim og hella mér upp á seinni tvo kaffibolla dagsins.

Rétt fyrir hálfsex sótti sjósundsvinkona mín mig. Hún var búin að sækja nöfnu sína og við hittum systurnar á stæðinu við Nauthólsvík. Það var fjara og mikið farið að dimma. Systurnar og nafnan ákváðu að klæða sig upp við húsið en við Helga Rún tókum af okkur á steinunum í fjörunni, nær ljósinu og þeim meginn sem við erum ekki vanar að setja frá okkur dótið. Sjórinn var um það bil ein gráða og við svömluðum um í ca 3-4 mínútur. Það var búið að skila mér heim aftur um sex. 

7.12.20

Löngu vöknuð

Í gær var ég komin á fætur um átta. Eftir morgunverkin á baðinu fór ég beint í stofuna og sat þar í sófanum með fartölvuna í fanginu í hátt í tvo tíma. Rétt fyrir tíu hellti ég mér upp á kaffi og fékk mér lýsi og harðsoðið egg. Um klukkustund síðar sótti sjósundsvinkona mín mig. Að þessu sinni lá leiðin á Jómfrúna þar sem við sóttum þrjá fyrirfram pantaða jólaplatta sem við tókum með okkur til nöfnu hennar. Þangað mættu einnig systurnar svo við vorum fimm sem deildum þessu saman. Vorum allar með grímur þar til sest var að borðum. Þessir þrír plattar dugðu fyrir okkur fimm og vel það því við gátum ekki klárað og hvað mig varðar var ég södd alveg fram á kvöld.

Kom heim á þriðja tímanum. Hafði ætlað að skreppa á bókasafnið og skila öllum tíu bókunum. Fékk áminningu rétt fyrir helgi um að skiladagur væri að nálgast. Lokafrestur er í dag svo ég er alveg róleg. Safnið opnar klukkan tólf og er opið til klukkan fimm. Fór ekkert út aftur í gær en náði loksins að byrja á fyrsta jólabréfinu. Er að skrifa til ensku vinkonu minnar og jafnöldru. Náði ekki að ljúka við bréfið en ég er að fara að vinda mér aftur í málin. Ætla bara að hella upp á smá kaffi fyrst.

6.12.20

Sunnudagur

Já, ég var vöknuð fyrir klukkan sex í gærmorgun. Gafst upp á að berja mig niður aftur nokkru áður en klukkan varð sjö og fór á fætur. Hitti aðeins á Odd Smára en hann labbaði af stað í vinnuna nokkrum mínútum áður en klukkan varð hálfátta. Ég var sest í stofusófann með fartölvuna sem Davíð Steinn lánaði mér fyrir nokkru síðan. Um hálftíu leytið bjó ég mér til hafragraut og hellti upp á kaffi. Rúmum klukkutíma seinna var ég búin að græja mig upp í sjósundsferð. Ég var sótt skömmu síðar og við hittumst þrjár úr hópnum á bílastæðinu við Nauthólsvík um ellefu. En það voru mikið fleiri heldur við á svæðinu, sennilega um tuttugu manns. Það var aðeins að byrja að fjara út og nóg í lóninu. Við skildum dótið okkar eftir á bekk við útisturtu svæðið og óðum út í lónið. Erfitt var að mæla hitastigið en þrátt fyrir flóð var lónið örugglega aðeins heitara heldur en sjórinn fyrir utan lón því það kom í ljós að það streymdi heitt vatn í heita pottinn og þar mældist hitastigið 28°C. Fórum ekkert út fyrir lónið, svömluðum þar í rúmar fjórar mínútur og vorum svo nokkrar mínútur í pottinum. Þrátt fyrir hóp af fólki var alveg verið að passa upp á fjarlægð, það gerðist einhvern veginn ósjálfrátt. Var komin heim um hálftólf og fór beint í sturtu og þvoði mér m.a. um hárið. Var búin að hella mér aftur upp á kaffi áður en ég kveikti og hlustaði á hádegisfréttir.

Fór ekkert út úr húsi aftur. Hringdi aftur í pabba að segja honum frá RB-gjöfinni og skilaboðunum. Prjónaði, horfði á brot úr fótboltaleikjum dagsins og seríuþætti úr premium. Fann til skrifblokk og penna en komst ekki í bréfaskrifastuð í gær. Hringdi í tvíburahálfsystur mína í gegnum facebook-spjallið og vorum við með myndavélina í símunum opnar til að sjá hvor aðra. Það var bæði gott að heyra í henni og sjá hana. 

5.12.20

Vaknaði heldur snemma

 Var ekki með broddana undir skónum þegar ég arkaði til vinnu í gærmorgun. Það var líka alveg óþarfi en ég hafði þá meðferðist til öryggis. Við samstarfskonurnar lögðum allt kapp á að ljúka framleiðslu, frágangi á deild þar með talið sótthreinsun á sameiginlegum snertiflötum og punktum fyrir þau sem taka við í næstu viku í fyrra fallinu. (Vá, þetta var frekar löng setning.) Gáfum okkur þó góðan tíma í kaffi og hádegispásum. Sú sem átti afmæli sl. mánudag bauð upp á súkkulaðiköku frá McCain í báðum pásunum. Ég freistaðist ekki til að smakka en féll fyrir after eight súkkulaðinu og fékk mér einn með kaffinu í pásunum. Klukkan var rétt byrjuð að ganga þrjú þegar við urðum allar þrjár samferða út af vinnustaðnum. Fékk far heim. Báðar hefðu þær viljað skutla mér en ég þáði farið með þeirri sem var á undan að spyrja. Hin var búin að kippa mér með hina þrjá dagana. Þessi vinnuvika leið mjög hratt. Fljótlega eftir að ég kom heim kom umslag merkt mér inn um lúguna. Í umslaginu var þriggja laga gríma með RB-logoinu (sem má þvo á 60°C) og hvetjandi skilaboð og þökkum fyrir að hafa staðið mig frábærlega í starfi síðustu mánuði. Já, takk kærlega!

4.12.20

Vinnudegi lokið í fyrra fallinu

Setti mannbroddana undir gönguskóna í gærmorgun og labbaði á þeim alla leið í vinnuna. Eiginlega var engin hálka eftir og þar sem voru smá svell var hægt að sveigja framhjá. Aftur á móti blés Kári sterklega á móti góðan part af leiðinni og var nokkuð sterkur á köflum þegar ég var að labba Skúlagötuna. Nýja úlpan mín er mjög góð í svona kuldabola og hraðferð á logni og ég komst í vinnu heilu og höldnu, 3 km á uþb 34 mínútum. Vinnudagurinn gekk vel fyrir sig og leið jafn hratt og undan farnir dagar og ég fékk enn og aftur far heim úr vinnunni upp úr klukkan fjögur. Heima tók ég því frekar rólega. Hringdi í pabba, vafraði um á netinu og setti inn tvöhundruðustuogfertugustu bloggfærslu ársins. Horfði á fréttir, Kiljuna og fleira í sjónvarpinu. Útbjó eggjaköku með afgöngum af soðnum fiski en það varð afgangur af þessum rétti þar sem hvorugur bræðranna fékk sér af honum. Það verða þá afgangar af afgöngum í matinn í kvöld. 

3.12.20

Líður á vikuna

Ég fann mannbroddana mína fljótlega eftir að ég kom heim úr vinnunni á mánudaginn var. Setti þá samviskusamlega í bakpokann og labbaði í vinnuna án þess að setja þá undir. Það voru mun færri hálkublettir heldur en á mánudaginn en þó einhverjir. Vinnudagurinn leið nokkuð hratt. Nóg af verkefnum en við tókum líka tvær góðar pásur, morgunkaffi um hálftíu og hádegishlé um hálfeitt fyrir utan að við byrjum oft vinnudaginn á því að setjast niður frammi í kaffi stofu rétt fyrir átta og leyfum stóra vísinum að fara aðeins framhjá 12. Sú sem var í bókhaldsvinnunni í gær er sú sem sér um mánaðamótareikningagerðina þegar mánaðamótin lenda á okkar hóp. Fyrir utan daglegur verkin sat hún iðin við að taka saman og finna til tölur og leita uppi svör við skrýtnum færslum. Við hin framleiddum til klukkan hálffjögur en þá tókum við saman og gengum frá. Ég fékk far heim úr vinnunni. Engin var heima því strákarnir voru báðir á vakt. Restin af deginum og kvöldið fór í alls konar, bæði netvafr, prjónaskap og sjónvarpsgláp. 

2.12.20

Á bíl í gær

Fór á bílnum í vinnuna í gærmorgun. Eins og kom fram í pistli gærdagsins var ég í bókhaldinu í gær. Það að vera í bókhaldinu fyrsta virka dag mánaðarins er aðeins meiri vinni heldur en aðra daga. Ég var því aðeins lengur að ljúka við verkefnin. En rétt um tvö var ég búin með mitt hlutverk og þá leysti ég þá samstarfsstúlku mína af sem sér um mánaðamótareikningagerðina ef mánaðamót lenda á okkar hóp. Var á framleiðsluvélinni með hinni samstarfskonunni til klukkan var orðin rúmlega hálffjögur. Framleiddum 900 kort á þessum tíma. Það tekur smá tíma að ganga frá eftir daginn og klukkan var orðin fjögur þegar ég settist aftur upp í bíl.

Heyrði lýsingu á síðustu mínútum landsleiks kvennaliðsins í knattspyrnu sem fór 1:0 fyrir Íslandi og það var svo staðfest eftir aðra leiki að stelpurnar væru komnar beint á EM sem eitt af þremur bestu liðunum sem lentu í öðru sæti. Vel gert.

Fór með bílinn í gegnum bílaþvottastöðina Löður við Granda og fór þaðan alla leið að Atlantsolíustöðinni við Sprengisand og Bústaðaveg til að fylla á tankinn. Var komin heim um fimm og fékk stæði fyrir framan. 

1.12.20

Fullveldisdagurinn

Í gærmorgun labbaði ég af stað í vinnuna um sjö. Var á gönguskónum. Veðrið var mjög gott en færðin sumstaðar varhugaverð á leiðinni. Ég hefði eiginlega átt að setja mannbroddana undir. Ég var ekki búin að finna þá en sem betur fer komst ég alla leið í vinnuna á rúmum hálftíma án þess að detta. Skrikaði aðeins fótur tvisvar sinnum en hélt jafnvægi og passaði mig bara að taka stutt og hæg skref á stöðum þar sem ekki var búið að sanda eða salta og ekki hægt að fara út fyrir. Dágóður partur af leiðinni var auður þar sem hiti er undir svo ég var ekki í hægagangi alla leiðina.

Við í okkar hóp erum löngu komnar í rútínu sem rúllar áfram og við vitum alveg hvernig verkefni dagana skiptast þrátt fyrir viku pásur á milli. Ég endaði í "ljósmóður"-störfum á vélinni síðast þegar við vorum að vinna, í gær var ég á hinum enda framleiðsluvélarinnar að hlaða inn verkefnum og troða í og í dag var ég í bókhaldinu. Vorum að framleiða til klukkan að verða fjögur í gær. Lentum í smá veseni fyrsta klukkutímann, vélin vildi alls ekki framleiða nokkrar ákveðnar tegundir og það var ekkert sem við gátum gert í því nema hringja í "vin". Sá kannaðist við að það hafi verið að breyta e-u sl. föstudag. Hann kom fljótlega og náði að laga málin þannig að hægt var að framleiða allar tegundir. Yfirleitt höfum við tímann til klukkan tíu til að ljúka fyrsta verkefni dagsins og við náðum akkúrat að klára klukkan tíu í gærmorgun. Sá sem sækir viðkomandi tösku hafði hins vegar mætt klukkan hálftíu, kom fýluferð því við vorum nokkuð vissar um að klára innan tímamarka og töldum okkur ekki þurfa að tilkynna um hugsanlega seinkun.

Tókum kaffipásu í seinna lagi eða upp úr klukkan tíu og var veisla borin á borð þar sem önnur samstarfkvenna minna átti afmæli. Það var svo framhaldsveisla í hádeginu, um hálfeitt. Fleiri pásur tókum við ekki en eins og fyrr segir hættum við ekki framleiðslu fyrr en rétt fyrir fjögur. Það er nóg af framleiðsluverkefnum í gangi.

Fékk far heim úr vinnunni og var komin heim um hálffimm. Þá var ég búin að ákveða að sleppa sjósundsferð en þrjár úr hópnum mínum hittust í Nauthólsvík um fimm og var sjórinn innan við gráðu heitur.

30.11.20

Síðasti dagurinn í næstsíðasta mánuði ársins

Ég var komin á fætur á undan N1 syninum í gærmorgun. Bjó til hafragraut fyrir tvo um níu leytið og borðaði annan skammtinn sjálf. Bauð vinnusyninum að borða hinn helminginn en hann gaf sér ekki tíma í það heldur fór í snögga sturtu áður en ég skutlaði honum á vakt upp á Gagnveg fyrir klukkan tíu. Fór beint heim aftur að undirbúa mig undir sjósundsferð. Var sótt rétt fyrir ellefu og vorum við fjórar úr hópnum okkar sem svömluðum saman í uþb sjö mínútur í Nauthólsvík í gærmorgun. Þegar ég kom heim fór ég beint í sturtu og þvoði á mér hárið. Setti svo sjósundsdótið á stutt 30°C prógram. Fór ekkert aftur út í gær og byrjaði heldur ekki að skrifa nein jólabréf. Horfði svolítið á fótbolta og einhverja þætti úr premium. Hafði lasanja í kvöldmatinn og var með forrétt og eftirrétt frá RB/SRB veislunni frá því á föstudaginn. Í forrétt var ofnbakaður gullostur með möndlumauki. Leyfði strákunum að eiga eftirréttinn sem var góður biti af súkkulaðiköku sem var hitaður uþb 10 mínútur í 180°C ofni. Ofan á þetta var sett einhverskonar eplasallatblanda og köld vanillusósa á eftir. 

29.11.20

Sjóbað á sunnudegi

Sjósundsvinkona mín var af fagna 85 ára afmæli föður síns með nánasta fólkinu í gær svo það varð úr að við færðum sjóbuslið til sunnudags. Eftir að hafa skutlað Davíð Steini í vinnuna var ég að velta því fyrir mér að taka fram penna og blað og byrja á fyrsta jólabréfinu af þremur. Það fór nú samt svo að ég hugsaði aðeins um þetta verkefni og notaði tímann í annað. Ég ætlaði líka að skreppa út í smá göngu en það varð ekkert heldur af því. Kláraði eina afgangatusku og byrjaði á annarri, horfði á fótbolta og einnig Castle-þætti. Er á nokkrum vikum búin að horfa á alla þættina sem ég horfði einnig á á sínum tíma. Hafði steikta þorskhnakka í kvöldmatinn með soðnu blómkáli og kúlukáli. Horfði svo, aldrei þessu vant, á allan #heimameðhelga þáttinn, styrkti mæðrastyrk í leiðinni og tístaði um það einu sinni. Tístið birtist á skjánum og var það verulega skondið. Var reyndar næstum því búin að missa af því þar sem ég var eitthvað að vafra um á netinu á símanum.

28.11.20

Laugardagur

Mér fannst fyrst í morgun sem það væri sunnudagur. Var vöknuð alltof snemma og komin á fætur rúmlega sjö. Skutlaði N1 syninum í vinnuna þannig að hann var mættur rétt fyrir átta en ekki tuttugu mínútur yfir eins og hann hefði gert ef hann hefði farið með fyrstu mögulegu strætóferð.

Um tíu leytið, eða korter yfir, í gærmorgun sópaði ég af bílnum og brunaði svo upp á Gagnveg til að sækja N1 soninn og skutla honum í tannlæknatíma. Beið með hann fyrir utan Valhöll þar til hringt var í hann og honum tilkynnt að hann mætti mæta inn. Þá fór ég heim. Davíð Steinn tók strætó aftur í vinnuna þegar hann var búinn með þennan fyrsta tíma hjá tannsa. Hann fékk næsta tíma strax á mánudaginn en þá verður hann í vaktafríi og getur reddað sér sjálfur.

Um eitt vakti ég hinn soninn og bað hann um að gerast einkabílstjórinn minn að sækja matarpakka í K2 vegna jólagleði RB og SRB. Oddur beið úti í bíl á meðan ég skrapp inn. Ég var með grímu og fylgdi leiðbeiningum alveg þar til ég var að fara út aftur með vörurnar. Fólk var nefnilega helst beðið um að fara ekki út á sama stað og það kom inn en ég svindlaði þar en þar sem ég mætti ekki neinum að koma rétt á meðan verða engar afleiðingar af þessu svindli.

Klukkan hálfsjö loggaði ég mig inn á workplace á fartölvunni og smellti á link sem opnaði fyrir opið streymi á viðburð SRB sem tekið var beint upp í Gullhömrum. Dagskráin stóð í einn og hálfan tíma. Hægt var að taka þátt í net-kvizzi en ég sleppti því. Fylgdist bara með fínnri skemmtidagskrá. upp úr klukkan sjö hitaði ég ofninn og þegar hann var orðinn 160°C heitur setti ég kalkúnbita og hnetusteik saman í fati og hafði inni í rúman hálftíma. Þegar ég tók þetta út setti ég inn sætkartöflumeðlætið inn og hellti sósu úr krukku í pott og hitaði. Maturinn var akkúrat tilbúinn þegar Davíð Steinn kom heim úr vinnunni. Ákvað að geyma forrréttinn og eftirréttinn þar til síðar, forréttinn, gullost bakaðan með dölublandi í vel heitum ofni í nokkrar mínútur, handa mér og eftirréttinn, súkkulaðikökubitar, handa bræðrunum.

27.11.20

Frænkunöfnuhittingur

Gærmorguninn fór að mestu í rólegheit og tölvuleiki. Upp úr hádeginu ýtti ég við einkabílstjóranum. Hann tók saman það sem átti að fara í sorpu á meðan ég gerði innkaupalista. Hann setti mig út við Krónuna við Granda um tvö. Þegar ég kom út með vörurnar var hann búinn að fara með ruslið. Komum við á tveimur öðrum stöðum áður en við fórum aftur heim. Fengum stæði fyrir framan. Oddur gekk frá vörunum. Davíð Steinn var búinn að ryksuga fram á palli, eldhús- og baðherbergisgólf. Oddur sá um að ryksuga holið og stofuna. Ég settist með prjónana mína fyrir framan skjáinn og horfði á körfuboltalandsleikinn, amk að hluta. Um hálffimm var ég búin að hella upp á fullan brúsa af kaffi og stuttu síðar kom nafna mín og systurdóttir mömmu í heimsókn beint úr vinnunni. Hún vinnur sem leikskólakennari í leikskóla í Mosfellsbæ. Tíminn flaug. Nafna mín kvaddi á áttunda tímanum eftir mjög gott spjall og staðfestingu á að næsti hittingur yrði hjá henni eftir rúmar tvær vikur. 

26.11.20

Komin heim

Vaknaði í gærmorgun þegar klukkan var að nálgast níu. Það var ennþá mjög dimmt úti en ég heyrði að pabbi var kominn á stjá og dreif mig á fætur eftir mjög góðan nætursvefn. Fékk mér eina mandarínu, lagði nokkra kapla og sat svo góða stund með prjónana mína inni í stofu. Pabbi bauð mér með sér á Kanslarann í hádeginu og við vorum mætt þar um það leyti sem er opnað um hálftólf. Fengum sveppasúpu, steiktan fisk með gufusoðnu grænmeti, kartöflum sallati og lauksmjöri og svo kaffi á eftir. Herramannsatur, alger veisla. Það komu tveir viðskiptavinir inn rétt eftir að við pabbi vorum byrjuð að borða. Mér fannst ég kannast við annan þeirra en var ekki viss þar sem það er grímuskylda þar til maður sest niður við borðin. Örstuttu síðar er kastað á mig kveðju og það reyndist vera þessi sem ég kannaðist við, bekkjarbróðir úr grunnskóla sem var sveitastrákur hjá föðurbróður mínum í nokkru ár frá því við vorum 10 ára.

Við pabbi vorum komin aftur í Hólavanginn rétt fyrir tólf. Tíminn flaug þrátt fyrir að ég væri ekki að gera neitt sérstakt. Jú, ég prjónaði meira, fór í kaplakeppni við pabba og var líka góða stund í einni tölvunni hans, bæði að leika mér og blogga. Strax eftir kaffitímann tók ég mig saman. Tók með mér fjögur þorskhnakkaflök og frosin krækiber. Var komin heim fyrir klukkan sex og fékk stæði fyrir framan.

Ég er mikið fegin að vera búin að búa til jólakortin þetta árið og veit að það væri skynsamlegast að fara að vinna í að skrifa á þau og einnig árlegu jólabréfin þrjú sem eru á íslensku, dönsku og ensku. Það er frívakt hjá báðum sonunum. Það þarf að fara í Sorpu- og verslunarferð í dag og seinni partinn á ég von á nöfnu minni í heimsókn.

25.11.20

Á Hellu

Það eru næstum því tveir mánuðir síðan ég skrapp í heimsókn til pabba síðast. Hef verið að fylgja fyrirmælum og einnig bíða eftir því að smitum fækki og að helst sem fæstir greindir utan sóttkví. Líklega hefði ég mátt bíða miklu lengur eftir "réttu" tölunum. Ég þurfti að koma hundabúri í geymlsu og var einnig viss um að jólakortaframleiðsluandinn kæmi betur yfir mig á Hellu svo ég notaði það sem kærkomna afsökun fyrir því að skreppa og vera yfir nótt. Vakti Odd Smára um hálftólf til þess að kveðja hann og lagði svo fljótlega í hann. Þá var orðið enn lengra síðan ég stoppaði síðast við í Fossheiðinni og ég ákvað að koma við þar og stoppa í ca einn kaffibolla eða tvo.

Var komin á Hellu upp úr klukkan tvö. Fram að kaffi vorum við pabbi í kaplakeppni en strax eftir kaffi tók ég fram jólakortaföndrið. Var búin að skera niður slatta af örkum í nokkrum litum en átti eftir að brjóta niðurskorninginn í kortastærð. Ég átt til nothæft lím frá í fyrra og hvítan pappír til að líma inn í lituðu arkirnar. Eitthvað átti ég líka af niðurklipptum myndum, gömlum jólakortum og helling af alls konar límmiðum. Það er skemmst frá því að segja að andinn kom svo sannarlega yfir mig. Pabbi ætlaði bara að fá sér snarl í kvöldmatinn og sagði að ég yrði að elda eitthvað handa mér. Ég gaf mér ekki tíma til að elda heldur fékk mér eitt harðsoðið egg og sneið af kaldri lifrarpylsu um hálfátta. Klukkan var að verða níu þegar ég tók föndrið saman og var ég þá komin með 28 kort sem er aðeins ríflega heldur en listinn segir til um.

Fitjaði upp á afgangatusku en fór svo aftur í smá kaplakeppni við pabba er þar til hann bauð góða nótt um tíu. Þá settist ég við tölvuna í einn og hálfan tíma áður en ég fór að sofa. 

24.11.20

Ennþá dimmt úti

Klukkan er rétt orðin níu. Rúmir tveir tímar síðan ég vaknaði. Fór þó ekki á fætur fyrr en upp úr klukkan hálfátta. N1 sonurinn var farinn fyrir sjö líkt og í gærmorgun. Hinn sonurinn á ekki vakt fyrr en klukkan fjögur síðdegis svo það eru margir klukkutímar þar til hann rís úr rekkju. Hann hefur tekið þá ákvörðun að vinna allan uppsagnarfrestinn en það er rúmur mánuður eftir.

Gærdagurinn leið jafn hratt og allir aðrir. Það er búið að setja upp ljósaseríu á eitt tréð í garðinum eins og undanfarin ár. Yfirleitt hefur verið stungið í samband í kjallaraíbúðinni en nýjir eigendur eru á fullu að standsetja íbúðina svo ég gaf nágrannanum á hæðinni fyrir neðan að þræða snúruna inn um gluggann á hornberginu (Davíðs Steins herbergi) og stinga í samband í fjöltengi.

Rétt fyrir fimm var ég sótt af nöfnunum. Ég var tilbúin og við hittum systurnar á planinu við Nauthólsvík. Engin ferð var á logninu en sjórinn mældist innan við 2 gráður. Það var meiriháttar að svamla aðeins um í svölum sjónum og þessar mínútur sem við gáfum okkur voru alltof fljótar að líða. Ég var komin heim aftur rétt upp úr hálfsex og fór beint í sturtu.

Steikti afganginn af slátrinu, bland af báðu, og sauð kartöflur. Strákarnir fengu sér báðir að borða þegar þeir komu heim úr sínum vinnum á níunda tímanum. Einn frændi minn kom með vörur sem ég var að kaupa af honum til styrktar útskriftarsjóðs úr menntaskóla. Ég hafði pantað wc-rúllur, útikerti og fjölnota bökunarpappír. 

23.11.20

Mánudagsmorgun

Það er svo sem ósköp lítið að frétta. Í gær var mikill rólegaheitadagur, þ.e. ég var mjög löt til allra verka. Fór rétt svo aðeins út til þess að færa bílinn úr stæði fyrir aftan heilsugæslustöðina og í stæði fyrir framan 19-21. Keyrði næstum heilan hring því það er einstefna í götunni. N1 sonurinn skrapp í heimsókn til félaga sem býr í Keflavík og tók hann strætó þangað. Veit ekki hvort hann fékk far heim eða tók strætó til baka því ég var komin upp í þegar hann kom heim um ellefu leytið. Heyrði í honum rétt fyrir sjö í morgun þegar hann lagði af stað til að ná í strætó upp í Grafarvog. Hann er semsagt á vinnuvakt í dag og á morgun milli 7:30-19:30. Oddur Smári var að vinna milli hálfátta og hálfþrjú í gær. Átti að vera búinn um tvö en sá sem átti að taka við af honum hafði misst af strætó og var seinn fyrir. Það datt annars ein tuska af prjónunum í gær, gekk frá endum. En líklega fór dagurinn að mestu leyti í fótboltagláp. Horfði reyndar bara á brot af sumum leikjunum en að sjálfsögðu horfði ég á allan Liverpool-leikinn. 

22.11.20

Sunnudagur

Gærdagurinn var nokkuð rólegur. Fór ekkert aftur út eftir að ég kom heim úr sjónum. Oddur Smári fékk bílinn lánaðan seinni partinn í gær til að sækja nýtt hundabúr í Hafnarfjörð handa Vargi fyrir Ingva og Helgu. Hann varð að setja aftursætin niður og svo verður búrið bara að fá að vera í bílnum í einhvern tíma og aðeins pláss fyrir einn farþega á meðan. Fljótlega eftir að Oddur kom heim úr þessari ferð fóru þeir bræður saman á bílnum, aðallega til að sjá til þess að setja nýjar rúðuþurrkur. Þeir voru ekkert lengi í þessu skreppi en þegar þeir komu til baka varð Oddur að leggja bílnum fyrir aftan heilsugæsluna. Hann fann ekkert stæði í næstu götum.

Ég var með soðið slátur í kvöldmatinn og það sló alveg í gegn. Nú á ég eftir einn ósoðinn kepp af hvoru tagi í frystihólfinu. Þetta er herramanns matur og ætti að vera á boðstólum einu sinni til tvisvar í mánuði, amk yfir vetrartímann. Vonandi munum við stöllur í saumaklúbbnum taka höndum saman næsta haust og taka smá slátur líkt og við gerðum fyrir alltof mörgum árum síðan. Við tvíburahálfsystir mín tókum slátur saman í nokkur ár í röð og Lilja var með okkur amk í eitt skiptið.

21.11.20

Sjórinn 2,7°C klukkan tíu í morgun

Fór í háttinn um ellefu leytið í gærkvöldi. Var nokkuð fljót að sofna og vissi næst af mér um sjö leytið í morgun er ég varð vör við að Kvikk sonurinn var að gera sig kláran í að mæta á vakt. Ég sofnaði strax aftur og var klukkan langt gengin í níu þegar ég fór framúr. Eftir morgunverkin á baðherberginu bjó ég til tvöfaldan skammt af hafragraut. Fljótlega eftir að ég var búin að borða annan skammtinn græjaði ég mig upp í sjósundsferð. Var sótt stuttu fyrir klukkan tíu. Vorum sjö sem hittumst í Nauthólsvík. Það var flóð en veður svo stillt að við athöfnuðum okkur á grjótgarðinum rétt við "landganginn" niður í sjó og fórum beint út í þar. Sjórinn náði alveg að grjótgarðinum. Vorum næstum því sjö mínútur útí, gleymdum okkur aðeins, en ég fann ekki fyrir kuldanum og varð ekkert loppin á fingrunum eins og stundum þegar ég er að klæða mig úr sjósundssokkum, þurrka mér og fara í sokka og skó. Fór beint í sturtu eftir að mér var skilað heim og notaði tækifærið og þvoði á mér hárið í leiðinni. Setti nokkur handklæði í þvottavélina og skolaði úr sjósunds-sokkum, strandskóm og vettlingum í leiðinni og hengdi á heita rörið mitt í þvottahúsinu. Þá var loksins kominn tími til að hella upp á fyrsta kaffiskammt dagsins.

20.11.20

Dularfulla gleraugnahvarfið

Nætursvefninn síðast liðna nótt var skringilega slitróttur. Það hvarflaði að mér að það að drekka einn strekan kaffibolla upp úr klukkan hálffjögur hafi sett strik í reikninginn en mér finnst það samt ótrúlegt. Vaknaði hálftíma áður en vekjaraklukkan átti að hringja og ég ákvað fljótlega að drífa mig á fætur, var annars smeik um að ég myndi sofna aftur og gleyma mér. Hafði nógan tíma í morgunrútínuna því ég var búin að gefa mér leyfi til að fara á bílnum í vinnuna svona einu sinni þessa vinnuviku.

Þegar framleiðsla átti að hefjast kom í ljós að vélin var eitthvað vanstillt. Við gátum ekki byrjað fyrr en tveir sem komu úr tæknideildinni komu og fundu út úr þessu. Fyrsti daglegi skammturinn var tilbúinn rétt upp úr tíu. Þá fórum við í kaffi.Tækninmennirnir tóku yfir vélina á meðan og gott betur en það. Í kaffitímanum varð ég vör við að ég var ekki lengur með gleraugun hangandi á mér og ég fann þau hvergi þrátt fyrir að hafa farið aftur á bak á þá staði innan húss sem ég var búin að fara á eftir að ég lagði af stað í kaffi eftir fyrstu framleiðslu dagsins. Ég velti því alvarlega fyrir mér hvort ég hefði óvart stungið gleraugunum í töskuna með kortunum sem fóru frá okkur á ellefta tímanum en það er mjög langsótt. En gleraugun eru týnd og ég veit ekkert hvort ég finn þau aftur eða kemst að því hvað varð um þau.

Ég var í vinnunni til klukkan að byrja að ganga sex því við ákváðum að klára ákveðið verkefni sem kom til okkar með hádegisskammtinum. Kom heim um hálfsex og vatt mér beint í að útbúa grjónagraut í kvöldmatinn.

19.11.20

Frost

Nýja úlpan varð fyrir valinu þegar ég var að undirbúa mig undir að labba til vinnu fjórða daginn í röö. Ákvað hins vegar að sleppa gönguskónum og fara í strigaskónum. Það var allt í lagi. Fann ekki fyrir kuldanum. Hef labbað sömu leið alla fjóra morgnana og mælist á bilinu 2,9-3km á sífellt styttri tíma. Var uþb 38 mínútur á mánudaginn en ekki nema um hálftíma í morgun. Ég var í bókhaldsvinnu í dag og kom hvergi nálægt framleiðslunni. Samstarfskonur mínar sáu um alla daglega framleiðslu, önnur að troða í og hin að taka á móti og að þeim verkefnum loknum var nóg af endurnýjun svo hægt var að láta vélina ganga alveg til klukkan þrjú. Tókum pásu í morgunkaffinu og í hádeginu.

Fjórða daginn í röð fékk ég far heim úr vinnu. Var komin heim um hálffjögur og ákvað að hella mér upp á sterkan kaffibolla. Var alveg búin að fá mér tvisvar sinnum góða blöndu af espresso úr kaffivélinni í vinnunni en mig langaði í kaffi þegar ég kom heim og lét það eftir mér. Hringdi og spjallaði við eina sem vann með mér bæði sumarið sem ég var hjá eurocard og einnig í kortadeildinni frá 2007-2016 eða þar um bil.

Það eru aðeins tveir vinnudagar eftir af þessum mánuði, morgundagurinn og mánudagurinn 30. Fyrirkomulagið verður óbreytt amk fram að mánaðamótum eða næstu afléttingu. Það er nú alveg að verða spurning hvort maður hinn helminginn af vinnugenginu nokkuð á þessu ári. 

18.11.20

Mið vika

Ég kveikti smá stund á sjónvarpinu í gærkvöldi eða rétt rúma klukkustund. Fór upp í rúm um hálfellefu med tvö sudoku blöð. Var farin að sofa áður en klukkan var byrjuð að ganga tólf. Vaknaði tæpum hálftíma áður en klukkan átti að hringja. Nennti samt ekki að búa mér til hafragraut í morgun. Hitti aðeins á N1 soninn en hann fór á undan mér líkt og í gær. Labbaði í vinnuna þriðja morguninn í röð. Svolítið svalt en mjög gott gönguveður. Vélin var mun þægari en í gær en hún var samt með pínu vesen í hátt í hálftíma eftir að sneplalímrúllan kláraðist og skipta þurfti um í miðri framleiðslu. Það tókst þó á endanum að koma vélinni af stað aftur og engin kort eyðilögust. Þurfti að fá þá sem var í bókhaldinu í dag að leysa mig af í korter um hálftvö leytið og klukkutíma seinna var hálftíma fundum með nýjum yfirmanni. Fundi lauk rúmlega þrjú og þá héldum við áfram framleiðslu til að klára ákveðið verkefni. Klukkan var því aðeins farin að ganga fimm þegar ég fékk far heim þriðja daginn í röð. Stoppaði stutt við heima en hringdi samt fyrst og spjallaði aðeins við pabba áður en ég skrapp í smá leiðangur í Fiskbúð Fúsa. 

17.11.20

Öðruvísi dagur

 Ég var sótt 12 mínútum fyrir fimm í gær af sjósundsvinkonu minni. Tvær aðrar bættust í hópinn við Nauthólsvík. Það var að nálgast háflóð og við ákváðum að skilja dótið eftir við húsvegginn og fara í lónið. Sjórinn mældist 3,7°C og við vorum tæpar sex mínútur út í. Þrátt fyrir að N1 sonurinn hafi sett í þvottavél og hengt upp var alveg pláss fyrir að þvo sjósundsdótið og hengja upp. Útbjó hakkkássu í kvöldmatinn og sat fyrir framan imbann til klukkan langt gengin í tíu.

Vaknaði ekki alveg eins snemma og í gærmorgun en á undan vekjaraklukkunni þó. Fékk mér hinn helminginn af hafragrautnum frá í gær og borðaði hann kaldan. Labbaði af stað í vinnuna um sjö og var mætt rétt upp úr hálfátta. Framan af var vinnudagurinn nokkuð eðlilegur. Ég þurfti að fá bókhaldsmanneskjuna til að leysa mig af á móttökuendanum á vélinni í um klukkustund vegna annars verkefnis. Vélin var aðeins búin að vera með vesen en þegar ég tók við mínu hlutverki aftur var hún alveg stopp og vildi bara alls ekki hlýða. Það tók smá tíma að finna út úr þessu vandamáli en það tókst að laga það á endanum og ljúka framleiðslunni. Ég fékk far heim úr vinnunni um hálfátta og kom ég mátulega heim í kvöldmat sem N1 sonurinn var búinn að elda.

16.11.20

Vinnuvika

Ég var vöknuð alltof snemma í morgun, eða um klukkan hálfsex. Sennilega hef ég verið eitthvað vinnuspennt. Dreif mig á fætur fljótlega og útbjó mér til hafragraut og tók mig til fyrir labbið í vinnuna. Fór í fyrsta skipti í gönguskóna og líklega hefði ég átt að vera enn skynsamari og setja á mig mannbroddana. Datt þó ekkert á leiðinni en það voru kafla þar sem ég þurfti að fara varlega. Var mætt í vinnu upp úr klukkan hálfátta. Bókhaldið átti að vera í minni umsjá í dag en það byrjaði ekki mjög vel. Þurfti að setja inn nýtt aðgangsorð í vinnutölvuna og klúðraði því þannig að ég varð að fá aðra af samstarfskonum mínum til að prenta út fyrstu framleiðslutölur. Hafði samband við manneskju sem m.a. getur séð um aðgangsmál. Sá nú ekki að hún svaraði mér en hún hlýtur að hafa fengið skilaboðin og gert eitthvað því ég fékk annað tækifæri til að setja inn nýtt aðgangsorð og var komin inn í vinnutölvuna um hálfníu. Ekkert annað af verkefnum mínum frestaðist. Um þrjú fékk ég far heim úr vinnunni og eftir tæpan hálftíma verð ég sótt af sjósundsvinkonu minni. Já, og svo fitjaði ég upp á nýrri tusku í gærkvöldi. Stóðst ekki mátið því það er voðalega gott að hafa eitthvað á milli handanna part af kaffi og matmálstímum í vinnunni, að ég tali nú ekki um fyrir framan sjónvarpsfréttirnar. 

15.11.20

Bakstur

Rétt fyrir tíu í gærmorgun sótti sjósundsvinkona mín mig. Um það leyti sem við vorum að leggja í stæði við Nauthólsvík kom ein önnur úr hópnum. Ekki mættu fleiri en við þrjár. Sjórinn var kominn niður fyrir 4°C en það var alveg logn, fjara og himneskt að svamla um í uþb 6 mínútur. Kom heim aftur um hálfellefu. Fór beint í sturtu og þvoði á mér hárið. Eftir að hafa gengið frá sjósundsdótinu hellti ég mér upp á tvo bolla af kaffi. Útbjó deig í kókoskúlur, kúlaði upp og setti inn í frysti. Fljótlega upp úr hádeginu hrærði ég í uppáhaldssort Odds Smára, lakkrístoppa. Baksturinn stóð yfir til klukkan að ganga sex. Það eina sem ekki gekk upp var að smákökurnar urðu ekki að toppum heldur flöttust út. Mér skilst á sysninum að kökurnar séu alveg jafn góðar og venjulega og ljósi punkturinn í þessu er líka að kökurnar rúmast betur fyrir í dósunum.

 N1 sonurinn er rétt ókominn á fætur. Ég var búin að lofa honum því að skutla honum á vakt þannig að hann verði mættur á réttum tíma klukkan tíu. Hugsanlega herði ég mig svo upp í að baka uppáhaldssortina hans. Framundan er heil vinnuvika og bý ég mig undir annríki hvað það varðar, bland af daglegum verkefnum, endurnýjun og aukaframleiðslu. Vonandi kemst ég samt í sjóinn með hópnum mínum seinni partinn á morgun og á miðvikudaginn.

Er búin að lesa allar bókasafnsbækurnar en það eru þó ólesnar bækur á náttborðinu mínu. Fór seint í háttinn í gær en þó fyrir miðnætti og braut heilan um stund yfir sudokuþraut. Ég gekk líka frá endanum á tuskunni sem datt af prjónunum í fyrradag. Það munaði sáralitlu að ég fitjaði upp á nýrri tusku en þar sem ég gat ekki ákveðið mig hvaða mynstur ég ætlaði að prjóna næst varð ekkert af því. Eins og ég hef fært í skrif nýlega þá þarf ég að fara að snúa mér að jólakortagerð ársins fyrir alvöru.

14.11.20

Verslunarferð

N1 sonurinn er á vakt þessa helgina, var farinn út fyrir klukkan sjö í gær og svo hefur hann líklega samið um að fá að mæta í seinna lagi í dag því strætó byrjar að ganga seinna um helgar. Laugardagsvaktin er frá klukkan átta til hálfátta. Það gæti líka verið að hann hafi fengið leyfi til að taka leigubíl á kostnað vinnuveitanda. Hann á að eiga rétt á því þá daga sem almenningssamgöngur eru þannig að þótt þú takir fyrstu strætóferðina ertu mættur of seint í vinnuna.

Við Oddur Smári skruppum í Sorpu, Elkó, Krónuna og Fiskbúð Fúsa í gær. Hann á fyrstu tvo staðina, ég á hina tvo en við fórum saman og hann var einkabílstjórinn minn. Keypti m.a. vörur í uppáhaldssortir bræðranna og í fiskbúðinni keypti ég nætursaltaða ýsu í soðið.

Það datt tuska af prjónunum í gær. Á aðeins eftir að ganga frá einum enda, upphafsendann prjónaði ég saman við í fyrstu umferðinni. Er ekki búin að fitja upp á nýrri tusku og ég veit ekki nema ég láti það aðeins bíða svo ég fari frekar að snúa mér betur að jólakortagerðinni. 

13.11.20

Píparamál

Einn daginn um daginn uppgötvaði ég það að allir ofnar í íbúðinni voru orðnir kaldir. Davíð Steinn var reyndar búinn að segja mér stuttu áður að ofninn inni í herbergi hjá honum væri búinn að vera kaldur lengi. Hann tók sig til um daginn og liðkaði til pinnanna á flestum ofnum. Rennslið við inntakið í þvottahúsinu sýndi að það var að koma inn heitt vatn þangað. Reyndar var þrýstilokinn eitthvað laskaður en nágranninn niðri sagði að það ætti ekki að skipta svo miklu máli. Það kom reyndar velgja á ofninn í mínu herbergi, sem er tveimur hæðum fyrir ofan þvottahúsið en mér fannst það mjög grunsamlegt að handklæðaofninn á baðinu, sem settur var upp fyrir sex árum var líka kaldur. Í fyrradag gúglaði ég því pípara og komst á síðu þar sem ég gat fyllt út form. Þetta voru nokkrar spurningar til að greina vandamálið og fleira svo hægt væri að mæla með fagmanni eða senda mér tilboð. Reyndar virkaði ekki lokahnappurinn að því leyti að ég átti að fá fjögurra stafa pin-númer í gemsann til að fylla inn í síðasta reitinn. Reyndir tvisvar sinnum en það virkaði ekki. Engu að síður fékk ég rafrænan póst skömmu síðar. Umsóknin hafði gengið í gegn og ég fékk þrjá valmöguleika til að smella á til að komast í samband. Ég smellti á rafrænt handaband og það leið ekki á löngu áður en var hringt og viðkomandi sagðist geta komið daginn eftir (í gær) eða á föstudagsmorguninn. Um hálftíu í gærmorgun hringdi maðurinn aftur og sagðist vera á leiðinni. Hann var kominn rétt fyrir tíu. Ég sýndi honum fyrst niður í þvottahús og hann sá það strax að það þyrfti að skipta um þennan þrýstiloka, hann væri líklega orðinn yfir 30 ára. Hann leit á tvo ofna í íbúðinni áður en hann skrapp frá til að útvega það sem til þurfti. Þegar hann kom aftur fékk hann leyfi til að leggja í innkeyrslunni og hann kom inn um kjallaradyrnar með allar græjur. Ekki tók langa stund að skipta um þennan loka, held að það hafi tekið lengri tíma fyrir kerfið að dreifa heitu vatni á allt ofnakerfið hjá mér en um tólfleytið sagðist píparinn vera viss um að allt væri að komast í lag. Ofninn í mínu herbergi var orðinn funheitur, enda var skrúfað upp í botn á öllum ofnum. Ég mátti skrúfa niður í mínum ofni en ofnarnir þeim megin í íbúðinni sem snýr út að götu voru hafðir á fullu amk hálftíma lengur áður en þeir voru svo settir á milli 2-3. Ég þurfti svo aðeins að senda g-mailið mitt og kennitölu í sms-i í gemsa píparans og nú bíð ég bara eftir reikningi til að gera upp við hann.

12.11.20

Fimmtudagur

Svaf í einum dúr frá klukkan að verða ellefu og til klukkan að verða sjö. Rámar þó í að hafa rumskað eitthvað aðeins um miðja nótt en það gæti líka vel hafa verið draumur. Framan af degi í gær var ég alltaf á leiðinni út í smá göngutúr en þegar klukkan var orðin þrjú og ég ekki var ekki enn búin að drífa mig af stað gaf ég þetta alveg frá mér og hellti í staðinn upp á 3 bolla af kaffi. Rétt fyrir fimm var ég hins vegar alveg tilbúin fyrir sjósund þegar ég var sótt. Mættum fimm og þar sem það var flóð ákváðum við að taka af okkur upp við húsvegginn og svamla um stund í lóninu sjálfu. Afar hressandi. Vorum mun fljótari að athafna okkur upp við húsvegginn þar sem einnig eru bekkir og tröppur og frá því við fórum úr bílunum upp á stæði um fimm og þar til við settumst aftur inn í bílana liðu rétt tæpar tuttuguogfimm mínútur. Af þessum tíma vorum við uþb 7 mínútur á svamli.

11.11.20

Næturbrölt

Það vantaði aðeins 200 metra upp á að göngutúr gærdagsins næði 5 kílómetrum. Klukkan var að verða hálftólf þegar ég dreif mig af stað. Fór hálfan hring, rangsælis, um Öskjuhlíð og þegar ég kom niður að hringtorginu þar sem m.a. Eskihlíðin og Langahlíðin enda beygði ég inn Eskihlíðina. Það var reyndar alveg óvart. Yfirleytt labba ég Lönguhlíðina að Drápuhlíð en þetta lengdi gönguferðina amk um fimm mínútur og 3-400 metra. Kom heim um það leyti sem hádegisfréttir í útvarpinu voru að byrja.

Fór ekki aftur út í gær, og aðeins eina ferð niður í þvottahús að sækja það sem ég hengdi upp í fyrrakvöld. Tuska datt af prjónunum og ég fitjaði upp á enn einni. Fyrir utan dokkuna sem ég er að prjóna úr á ég þrjár aðrar heilar eftir og svo afganga í líklega 3-4 tuskur.

N1 sonurinn fór í sína vinnu snemma í gærmorgun. Hans vaktir eru frá 7:30-19:30 á virkum dögum og hann þarf að ná strætó fyrir klukkan sjö. Hinn sonurinn kom fram milli eitt og tvö í gær og sat með mér inni í stofu þar til hann labbaði á sína vakt rétt fyrir fjögur. Þeir bræður komu svo heim á svipuðum tíma stuttu fyrir klukkan hálfníu í gærkvöldi.

Ég fór upp í rúm á ellefta tímanum og las til klukkan að verða ellefu. Sofnaði fljótlega eftir að ég lagði frá mér bókina og slökkti á lampanum. Rumskaði um eitt leytið og hugurinn var ekkert á þeim buxunum að fara í nein rólegheit strax aftur. Hvað það var sem var að velkjast um í kollinum á mér virtist samt ekki vera neitt merkilegt en að tók mig amk þrjár klukkustundir að gleyma mér alveg aftur. Þegar ég rumskaði aftur á áttunda tímanum í morgun átti ég í engum vandræðum með að snúa mér á hina hliðina og sofna. Klukkan var því að verða níu þegar ég dreif mig loksins á fætur.

10.11.20

Rólegheit

Labbitúr gærdagsins var 4,1 km á rétt rúmlega þremur korterum á þriðja tímanum í gær. Tveimur tímum eftir að ég var komun úr göngunni var ég búin að græja mig fyrir sjósund og mætt á eigin bíl í Nauthólsvík. Sú sem lánaði mér yfirtökuflíkina og hefur kippt mér með hingað til var með allt aðra farþega að þessu sinni. Ein vinkona hennar er gift Íra. Hann er vanur að fara í sjóinn á sínum heimaslóðum og saknaði þess að komast ekki í sund. Hann langaði að prófa að koma með okkur. Konan hans var einnig með í för en bara sem andlegur stuðningur, hún kom ekki út í sjóinn. Svo voru þrjár aðrar úr hópnum mættar líka. Sjórinn mældist yfir 5°C. Ég var með þeim fyrstu útí og svamlaði um í næstum átta mínútur. Dýrðlegt. Var svo örugglega hátt í tíu mínútur að þurrka mér og klæða mig úr sjósundssokkum og strandskóm og í sokka, skó og yfirtökuflík. Vafði handklæðinu utan um mig miðja, yfir sundbolinn og undir flíkinni. Síðan fór ég beint heim í sturtu.

Á aðeins eftir að fella tuskuna, sem ég byrjaði á í fyrradag, af prjónunum og ganga frá endum. Það gerist líklega bara rétt á eftir. Hitti aðeins á nágranna minn í risinu í gær. Hún er reyndar að ganga frá sölu á risíbúðinni sinni og pakka niður og þar sem hún er nýkomin frá Porúgal er hún í sóttkví fram á fimmtudag og fær að vera í risinu á meðan. Hún hafði aðeins skroppið út í smá gönguferð þegar ég hitti á hana. 

9.11.20

Grábleikur himinn

Það er að birta smátt og smátt en þessa dagana styttist dagurinn um sex mínútur á dag eða þar um bil. Ég er búin að vera á fótum í tvo klukkutíma en lítið gert af mér annað en að vafra aðeins um á netinu, svara og taka saman upplýsingar fyrir gjaldkera sameiginlegs húsfélags og leika mér í leik sem ég held að hverfi um áramótin amk í núverandi útliti. Er löngu búin að klæða mig og tanna en á eftir að fá mér lýsi, morgunmat og kaffi. Spurning hvort það verði ekki bara einhvers konar bröns í hádeginu.

Ég hafði mig af stað í labbitúr upp úr hádegi í gær og labbaði 3,5 km á tæpum fjörutíu mínútum. Labbaði rangsælis um hálfa Öskjuhlíð að HR en þar fór ég upp að Perlu og kom niður hjá ljósunum við Bústaðaveg þar sem hægt er að beygja niður í þær hlíðar, svæðið sem ég bý á.

Fitjaði upp á nýrri tusku í gær og prjónaði uþb einn þriðja af henni. Horfði einnig brot af leikjum gærdagsins í enska, allan Liverpool leikinn þó. Hafði soðið slátur í kvöldmatinn og það þótti herramanns matur. Oddur Smári var búinn að biðja mig um þetta og þegar ég sagði Davíð Steini frá því í síðustu viku að þetta stæði til bað hann mig um að hafa þetta á sunnudegi svo hann yrði örugglega heima. Hann var á frívakt frá því á sl. þrjá daga en búinn að ráðstafa sér fyrri tvo dagana og vissi ekki hvort hann myndi vera heima á matmálstíma þá.

Held að það sé að styttast í að reikningur á sameiginlega kennitölu 19-21 verði stofnaður og þá ættu mál í kringum húsið og tilvonandi framkvæmdir að fara að verða ljósari. Kannski erum við því miður að verða of sein í lagfæringar fyrir veturinn en aðal framkvæmdir ættu að komast í gang þegar veður leyfir með vorinu. Það er nú ekkert hlaupið að því að stofna svona reikning í þessu veiruástandi og flestar af þessum töfum eiga sér eðlilegar skýringar. 

8.11.20

Tíminn staldrar stutt við

Gærdagurinn var ósköp rólegur en kláraðist samt furðu fljótt. Fór ekkert út aftur eftir sjóferðina, aðeins tvær ferðir í þvottahúsið til að þvo og hengja upp sjósundsdótir. Tuskan sem ég byrjaði á í fyrrakvöld mun líklega detta af prjónunum í dag. Ég var með síðustu bókina af safninu nálægt mér en ég las ekki í henni fyrr en ég fór með hana með mér upp í rúm á ellefta tímanum í gærkvöldi. Oddur Smári er á helgarvakt á Kvikk í Öskjuhlíðinni. Hann ætlar sér að vinna uppsagnarfrestinn sem rennur út um áramótin. Davíð Steinn skrapp út að hitta vini um hádegisbilið í gær og fram eftir degi. Það voru strákarnir sem hann fór með í veiðiferðirnar í sumar. Hann var löngu kominn heim þegar ég græjaði bleikju í kvöldmatinn upp úr klukkan sex. Eins og mér finnst bleikja góð þá er ekki sama hægt að segja um annan soninn en hann var samt svo elskulegur að ganga frá eftir matinn.

7.11.20

Sjórinn 4°C kl. 9:30

Rumskaði upp úr sex en tókst að kúra mig niður aftur og gleyma mér aðeins. Var glaðvöknuð áður en klukkan varð hálfátta en ég var ekkert að drífa mig framúr fyrr en eftir að hafa hlustað á morgunfréttir klukkan átta og vafrað aðeins um á netmiðlum í símanum. Um hálfníu setti ég upp hafragraut. Gerði helmingnum góð skil en gekk frá hinum helmingnum í dall og inn í ísskáp. Tíu mínútum yfir níu var ég klár í sjósundsferð og var ég sótt uþb tíu mínútum síðar. Hittum tvær aðrar á bílastæðinu, aðra sem er búin að koma nokkrum sinnum með og nýkomin inn í hópinn og hún var með frænku sína með. Ef frænkan kemur inn í hópinn verða þrjár af níu sem heita Helga. Það var að flæða að og um það bil klukkutími í háflóð svo við tókum af okkur fyrir ofan brautina sem liggur niður í fjöru. Á háflóði þegar er stórstreymt nær sjórinn vel upp á miðja braut. Þarna var sjórinn aðeins byrjaður að "narta" í neðsta hluta brautarinnar. Svömluðum um í tæpar átta mínútur og ætluðum varla að tíma að fara upp úr. Var komin heim aftur rétt fyrir tíu. Fór beint í sturtu og líkt og síðustu tvo laugardagsmorgna þvoði ég mér um hárið og setti svo sjósundsdótið í þvottavélina þegar ég var búin að klæða mig. Hellti mér svo upp á tvo bolla af sterku kaffi.

6.11.20

Gæti verið sami titill og í gær

Ég var að horfa á Kveikþáttinn og að prjóna í gær þegar sjónvarpið fraus. Mér fannst of snemmt að draga mig í hlé og fannst þessi þáttur áhugaverður svo ég slökkti á öllu sem hægt var að slökkva á og tók allt úr sambandi í smá stund. Það leit samt út fyrir að þessi aðgerð myndi ekki virka því það tók hátt í fimm mínútur að ná inn sendingunni þegar ég var búin að setja allt í samband og kveikja á öllu. En það virkaði að lokum og fraus ekkert eftir það. Eftir kveikþáttinn horfði ég á þátt um bakgrunn Ágústu Evu og að lokum einn gamlan Castle þátt. Ný tuska datt svo af prjónunum og ég fitjaði upp á enn einni og prjónaði nokkrar umferðir.

Fór í háttinn um hálfellefu og byrjaði aðeins á síðustu ólesnu bókasafnsbókinni: Helköld sól eftir Lilju Sigurðardóttur. Svaf svo alveg þar til vekjarinn byrjaði að hamast rétt fyrir hálfsjö. Fékk að vísu smá martröð sem man bara slitrur úr en er svolítið fyndin. Svoleiðis er að ég á enn eina litla hvítvínsflösku af fjórum sem ég keypti í sumar rétt áður en ég fór í dagsferð í Viðey. Var eitthvað að minnast á þessa flösku við vinnufélaga í gær og svo dreymdi mig að ég fékk heimsókn. Man ekki hvort ég þekkti þann sem kom né af hvoru kyninu viðkomandi var. Það eina sem situr eftir var að viðkomandi fann flöskuna og kláraði en ég hugsað eða sagði við sjálfa mig: "Þér var nær að geyma hana svona lengi!" Frekar fyndin martröð.

Klæddi mig í flíspeysu innanundir regnkápuna og fór í venjulega götuskó (en ekki strigaskóna úr Eins og fætur toga) áður en ég labbaði í vinnuna í morgun. Það var komin mánaðarleg dk-endurnýjun sem ég hlóð inn á framleiðsluvélina. Hins vegar ákváðum við að framleiða aðeins daglega skammtinn og gefa okkur góðan tíma í að þrífa, sótthreinsa og setja saman smá skýrslu fyrir hópinn sem tekur við í næstu viku. Við ákváðum líka að vegna þess að það væri föstudagur væri kjörið að vera búinn snemma og hættum klukkan tvö. Ég fékk aftur far heim.

Synir mínir höfðu skroppið saman gangandi upp í Kringlu. N1 sonurinn var ekki búinn að fá nýtt símkort og fór að athuga málið. Ég fann hins vegar póst á hann frá NOVA með nýju símkorti í í póstkassanum innan á útidyrahurðinni. Pósturinn hefur líklega komið eftir að þeir bræður fóru að heiman. Nýji ráterinn er líka kominn og búið að tengja hann og virkar hann svona glimrandi vel.

5.11.20

Labbað í vinnu, þáði svo far heim

Það kom upp netvandamál í sambandi við sjónvarpið um níu í gærkvöldi. Prófaði að endurræsa sem og að taka allt úr sambandi í smá stund en þetta lagaðist ekkert. Það var engin truflun á netsambandi strákanna í tölvunum þeirra. Ég gafst upp á að reyna að kveikja á útsendingu sjónvarpsins aftur, á nú Kilju-þáttinn til góða. Fór fljótlega upp í rúm og kláraði næstsíðustu ólesnu bókasafnsbókina á rúmlega klukkustund.

Ég var í móttökustörfum í framleiðslunni í dag. Framleidd voru hátt í nítjánhundruð kort og lauk framleiðslu stuttu fyrir eitt í dag. Tókum smá talningapásu um níu og svo góða kaffipásu en fórum ekki í mat fyrr en klukkan eitt. Öllum verkefnum var lokið rétt upp úr tvö en við vorum aðeins lengur því það kom upp netvandamál vegna eins verkfæris á tölvunum okkar. Það var þó ekki búið að laga það heldur var það í skoðun og við ákváðum að fara heim um hálfþrjú. Önnur samstarfskona mín sagði að ég yrði að fá far hjá henni því það væri nokkur hraðferð á logninu, bálhvasst og missterkir vindstrengir. Ég þáði farið með þökkum. 

4.11.20

Fór á bílnum í morgun

Það var ekki byrjað að rigna neitt að ráði þegar ég vaknaði rétt upp úr klukkan sex í morgun og í smá stund gældi ég við það að fara labbandi í vinnuna. Dreif mig á fætur og setti upp hafragraut og þáði N1 sonurinn annan skammtinn áður en hann rauk út til að ná í strætó nokkru fyrir eitt en hann þurfti að vera mættur upp á Gagnveg klukkan 7:30. Um það leyti sem ég hefði átt að labba af stað í vinnuna kom hellidemba og ég ákvað að fresta för um hálftíma og fara þá á bílnum.

Ég var í bókhaldinu í dag. Það var eingöngu dagleg framleiðsla og tölur heldur lægri en í gær en ívið hærri en í fyrradag. Þegar vinnufélagar mínir voru búnir með fyrsta skammtinn og ég að setja inn tölur og prenta út bað ég þær um að telja á meðan ég sinnti tilfallandi verkefni sem getur komið hvenær sem er. Við gáfum okkur svo góðan tíma í kaffipásunni og ég bauð upp á tvenns konar osta, stollenbita og sultu. Það var til tekex fyrir þá sem vildu nota með ostinum. Framleiðslu lauk rétt upp úr hálftólf. Við fórum fljótlega í mat og sátum frammi í uþb klukkustund. Ein af okkur skrapp reyndar aðeins út og tók veðrið. Hún var samt ekki að reykja, reykir hvorki né drekkur, heldur skrapp hún í stuttan göngutúr. Eftir hádegishléið fór þessi síðast nefnda að leggja lokahönd á mánaðamótauppgjörið á meðan við hinar tvær töldum og stemmdum af síðustu framleiðslutölur dagsins. Ég fékk svo að fara yfir rg-ið áður en tölunum var skilað inn.

Öllum verkefnum var lokið um tvö. Ég var í einhverju brasi með að komast aftur inn í spjallforritið Teams en læt það bíða til morguns að láta fagmanneskju skoða það mál, þ.e. ef vandamálið verður enn til staðar. Fór beint heim eftir vinnu. Skrapp yfir í 19, heilsaði upp á 11 vikna hvolp, sem tók jafn vel á móti mér og hann gerði í gær, eftir að hafa skilað af mér ljósritum af göngun sem skila þarf inn til að stofna bankareikning á sameiginlegu kennitöluna.

Eftir klukkutíma verð ég sótt til að skreppa í smástund í sjóinn í Nauthólsvík.

3.11.20

Þrefalt meiri framleiðsla í dag heldur en í gær

Ég var sótt rétt fyrir klukkan fimm í gær og var sjósundsvinkona mín búin að ná í nöfnu sína líka. Vorum aðeins þrjár úr hópnum. Það var að flæða að og smá ferð á logninu svo við ákváðum að geyma dótið okkar við húsvegginn á byggingunni þar sem klefaaðstaðan er þegar er hægt að hafa opið. Skelltum okkur svo í sex mínútur í 4,8°C lónið. Ég var komin heim aftur um hálfsex. Fór í sturtu og á eftir fór ég með óhrein handklæði og sjósundsdótið niður í þvottahús. N1-sonurinn var með þvott í vélinni svo ég setti óhreina þvottinn inn í skáp við þvottavélina, hengdi yfirtökuflíkina á herðatré á eina snúruna og skolaði úr sjósundsdótinu og setti sokka skó og hanska á heitt rör en sundbolinn á herðatréð hjá yfirtökuflíkinni.

Í morgun var ég vöknuð nokkru áður en vekjaraklukkan átti að fara í gang. Kveikti á lampanum á náttborðinu, slökkti á vekjaranum og vafraði smá stund um á netinu áður en ég dreif mig á fætur um hálfsjö. Labbaði af stað í vinnuna um sjö. Ég sá um að hlaða inn á vélina og mata hana á hráefninu. Tókum framleiðslupásu á meðan var verið að gera upp fyrsta framleiðsluskammt dagsins og í kjölfarið skruppum við í kaffipásu. Daglegri framleiðslu, sem og framleiðslu smá aukaskammta, lauk rétt rúmlega tólf. Þá tókum við matarhlé. Öllum verkefnum var lokið rétt rúmlega tvö og þá ákváðum við að segja þetta gott í dag. Ég kom við hjá Lilju á heimleiðinni og þáði hjá henni einn og hálfan kaffibolla áður en ég hélt áfram för heim á leið. Heim var ég komin um hálffjögur. Setti í þvottavél og tók upp þvott N1-sonarins ásamt sjósunddótinu mínu.

Um klukkan fjögur setti ég upp grímu og skrapp í Fiskbúð Fúsa og keypti ýsu, 2 bleikjuflök og harðfisk. Síðan fór ég beinustu leið í Hagkaup í Skeifunni þar sem ég fann loksins ósoðið slátur af báðum tegundum, lifrarpylsu og blóðmör, þrír keppir í hvorum umbúðum. Þegar heim var komið setti ég slátrið og bleikjuna í frysti. Ætla að hafa ýsu í matinn í kvöld. Svo skrapp ég yfir á no 19 að ná í gögn sem þarf að ljósrita v/stofnunnar á sameiginlegum reikning fyrir sameiginlegu kennitölu 19-21. 

2.11.20

Afmælisdagur systur minnar

Sat fyrir framan imbann alveg til klukkan að verða hálftíu í gærkvöldi. Hefði kannski setið lengur ef annar sonurinn hefði ekki þurft að endurræsa ráterinn. Það var alveg í fínu lagi mín vegna en fyrir vikið fór ég heldur snemma að sofa. Náði að lesa til klukkan tíu en fljótlega eftir það var ég búin að slökkva á lampanum og stilla á mig vekjaraklukkuna til öryggis. Sofnaði fljótlega en einhverra hluta vegna rumskaði ég á öðrum tímanum í nótt og mér fannst sem ég væri heillengi að sofna aftur. Vaknaði svo tíu mínútum áður en klukkan átti að hringja, alls ekki útsofin en ákvað að drífa mig á fætur og undirbúa mig undir vinnudag.

Labbaði af stað rétt fyrir sjö og var hálftíma að labba leið sem smasungforritið í símanum sagði að hafi verið 2,7km. Vinnudagurinn gekk vel. Allri daglegri framleiðslu lauk um tólf og var engin aukaframleiðsla. Kannski eins gott því sú sem var í bókhaldinu þurfti líka að sinna mánaðamótauppgjöri og það er hellings vinna sem þar liggur sérstaklega fyrir þá sem eru ekki að sinna þessu nema endrum og sinnum. Ekki er svo sem hægt að klára þetta á einum degi því síðustu tölur sem þurfa að fara inn í dæmið skila sér ekki fyrr en á þriðja eða fjórða virka degi nýs mánaðar.

Ég þurfti að sinna aukaverkefni á "gamalt" verkfæri upp úr hádeginu en var búin upp úr klukkan tvö. Var búin að öllu sem ég gat gert um hálfþrjú og skráði mig þá út úr kerfum og labbaði heim. Hringdi í pabbi og eftir smá spjall við hann hellti ég upp á tvo bolla af sterku kaffi og fékk mér síðdegishressingu. Eftir ca hálftíma verð ég sótt svo ég þarf að fara að huga að því að gera mig tilbúna í sjósundsferð. 

1.11.20

Nóvembermánuður hafinn

Þátturinn sem ég var að horfa á í spilaranum fraus rétt fyrir hálftíu í gærkvöldi. Líklega er um að kenna lélegur ráter. Ég ákvað að slökkva á sjónvarpinu og færa mig inn í rúm og lesa Sólkross eftir Óttar M. Norðfjörð. Er að verða hálfnuð með þá bók. Ég var farin að sofa rétt upp úr klukkan tíu. Rumskaði fyrst rétt fyrir sjö en fór ekki á fætur fyrr en amk klukkutíma síðar. Var fyrst á fætur, búin að lofa N1 syninum að skutla honum á vakt fyrir klukkan tíu. Bjó til hafragraut og var búin að borða minn skammt og prjóna þrjár umferðir í nýjustu tuskunni áður en Davíð Steinn kom fram og fór í sturtu. Hann rétt svo hafði tíma til að gleypa í sig sinn grautarskammt áður en við lögðum af stað. Að vísu var hann mættur upp á Gagnveg ca. sjö mínútum áður en vaktin hans átti að byrja. Á leiðinni þangað sagðist hann vera búinn að fjárfesta í nýjum ráter sem hann sækir á morgun eða hinn. Sá gripur er dýrari heldur en það sem hann borgar heim á mánuði svo vonandi hættir þetta netvandamál. Í bakaleiðinni ákvað ég að koma við hjá Atlantsolíustöðinni við Sprengisand og fylla á tankinn sem var þó hálfur fyrir enda er bíllinn hreyfður mikið sjaldnar þessa dagana. Hellti mér svo upp á fyrstu kaffibolla dagsins þegar ég kom heim aftur.

Var búin að hengja upp úr tveimur þvottavélum og undirbúa gólfin í eldhúsi, stofu, holi og baðherbergi undir skúrun þegar Oddur Smári kom á fætur upp úr klukkan eitt í gær. Hann tók að sér að skúra en ég fór í klukkustundar göngu um Öskjuhlíð og nágrenni,  labbaði m.a. framhjá Nauthólsvík.

31.10.20

Bloggað alla daga þennan mánuðinn

Það var eitthvað vesen á netinu í gærkvöldi þannig að þegar sjónvarpið fraus í annað skipti um hálftíu ákvað ég að slökkva og hátta mig upp í rúm með bók. Las í einhverja stund en ég leit ekki á klukkuna þegar ég lagði frá mér bókina og slökkti á lampanum. Held samt að klukkan hafi alls ekki verið orðin ellefu enda var ég vöknuð rétt fyrir klukkan sjö í morgun. Fór fram á sloppnum um hálfátta og var á undan N1 syninum á baðherbergið en hann kom fram rétt á eftir mér og var farinn af stað í sína vinnu fljótlega. Ég bjó mér til hafragraut og borðaði í rólegheitunum. Um hálfníu fór ég að huga að því að undirbúa mig undir sjóferð. Var sótt uþb tuttugu mínútum síðar. Tvær aðrar voru mættar og biðu í bílunum sínum þar til sú síðasta sem hafði boðað komu sína mætti skömmu síðar. Sjórinn mældist 4,8°C og það var afar hressandi að taka nokkur sundtök bæði á bringu og baki. Vorum uþb sjö mínútur útí. Svo var mér skilað heim að innkeyrslu. Ég fór beint í sturtu og þvoði mér um hárið. Fór svo niður í þvottahús og setti sjósundsdótið 30° stutt prógramm í þvottavélinni. Á nú bara eftir að fara niður aftur til að hengja dótið upp.

Heyrði aðeins í Helgu systur í gærkvöldi. Hún hringdi til baka þar sem hún gat ekki svarað þegar ég hringdi um miðjan dag. Tilboðinu þeirra í jörðina var tekið en það veltur samt á því hvort seljendur fái greiðslumat hvort þetta verði að veruleika. Tilfinning mín er samt sú að norðanfólkið mitt sé að fara að flytja í sveitina á næstu misserum.

Síðasti dagurinn í þessum mánuði runninn upp og framundan er vinnuvika eftir helgi. Vegna hertra reglna til að freista þess að ná böndum um veiruna er útlit fyrir að vinnufyrirkomulag haldi áfram með sama hætti næstu vikurnar. Í næsta vinnustoppi ætla ég að huga að jólakortagerðinni í ár.

30.10.20

Lítil ferð á logninu

Næstsíðasti dagur októbermánaðar er hafinn. Ég kom mér á fætur áður en klukkan varð átta en er lítið búin að gera síðan eftir morgunverkin á baðherberginu. N1 sonurinn lagði af stað í sína vinnu stuttu fyrir sjö. Hinn sonurinn fer líklega ekki á fætur fyrr en upp úr hádeginu. Rólegheit hjá mér, nenni varla að spá í hvað ég ætla mér að aðhafast. Fór ekki í neinn göngutúr í gær en ég er búin að fara oftar út að ganga í þessari fríviku heldur en þegar var frívika síðast. Við Oddur urðum samferða út á Granda fljótlega eftir hádegið í gær. Hann hleypti mér út við Krónuna og skrapp í Sorpuferð á meðan ég verslaði. Innkaupalistinn var nokkuð langur enda hálfur mánuður síðan ég fór síðast í búð.

Heyrði í pabba mínum í gær. Hann er laus við þvaglegginn en honum var kennt hvernig hann á að losa um sjálfur og þarf að fara reglulega á salernið, ekki sjaldnar en á fjögurra tíma fresti. En í staðinn kemst hann líka í sund á meðan það er hægt og er hann nú, með deginum í dag, búinn að fara þrjá daga í röð. Hann sagðist vera sprækari, syndir aðeins hraðar, heldur en nokkru áður en hann fékk þvaglegginn og með minni verki í mjöðmunum. Ég fékk svo fréttir af systir minni og mági í gegnum hann. Tilboðinu í jörðina var tekið með fyrirvara um greiðslumat svo það stefnir allt í að þau séu að flytja enn norðar, í sveitina milli Akureyrar og Húsavíkur.

Hringdi líka í Ellu vinkonu. Það er búið að skilgreina hennar afbrigði af MS í miklum áhættuflokki. Hún lét skólastjóra grunnskólans á Egilstöðum vita sem spurði hana hvað hún vildi gera. Á meðan engin smit greinast fyrir austan vill Ella stunda sína kennslu með hefðbundum hætti, þ.e. mæta í skólann. En ef þessi staða breytist er skólastjórinn tilbúinn að setja hana í verkefni sem hægt er að vinna að heiman.

29.10.20

Stutt í næsta mánuð

Þrátt fyrir að hafa bæði farið í  fimmtíu mínútna göngu í gær morgun og svo tæpar sex mínútur í lónið í Nauthólsvík seinni partinn gekk svolítið illa að sofna í gærkvöldi. Ég skreið upp í rúmlega tíu en kláraði "Eddumál" á tæpum þremur korterum. Var búin að slökkva á lampanum fyrir klukkan ellefu. Held ég hafi gleymt mér í smá stund en ég hrökk upp fyrir miðnætti. Veit ekki nákvæmlega hversu lengi ég var að sofna en ég fór amk aldrei framúr og kveikti heldur ekki nein ljós eða fór að vafra um í netheimum á símanum. Einhvern tímann sofnaði ég og kannski var ekki svo langt liðið á nóttina. Svo svaf ég á mínu græna alveg til klukkan að byrja að ganga níu í morgun. Ég á eftir að fara út í göngutúr en kannski fer ég ekki fyrr en seinni partinn í dag. Einkabílstjórinn ætlar í sorpuferð og ég ætla nota ferðina og skreppa í búðina. Hálfur mánuður síðan ég verslaði síðast ef frá er talin ein ferð í Fiskbúð Fúsa í síðustu viku.

Það "datt" ein afgangatuska af prjónunum í gær. Á sennilega afganga í eina til en ég ákvað að nota eina af fjórum dokkum sem ég á eftir af þeim tíu sem ég keypti í Söstrene Grene um daginn. Seinni dokkan af þeim sem ég keypti í Hagkaup er hluti af afgöngum núna.

Ég á eftir að heyra í bæði pabba og systur minni og/eða mági í dag. Engar fréttir eru góðar fréttir en ég þarf samt að fá það staðfest. Og svo er spurning hvort tilboðinu í jörðina var tekið. 

Sennilega verða sundlaugar á höfuðborgarsvæðinu ekki opnaðara neitt alveg á næstunni en vonandi næst að ná böndum um veirufaraldurinn sem allra allra fyrst.