Tveir og hálfur tími eftir af maí

Rumskaði um sjö leytið í morgun. Kúrði smástund áfram en var komin á fætur upp úr klukkan hálfátta. Þá var pabbi þegar klæddur og kominn á ról. Um tíu skrapp ég út í göngutúr. Labbaði upp í hæð og yfir hana. Þar mætti ég einni frænku minni á göngu með hund og þrjá syni. Synirnir héldu göngunni fljótlega áfram, voru á leið í Heiðvanginn til afa síns. Við frænkurnar spjölluðum í amk korter áður en við kvöddumst. Ég  hélt áfram göngunni. Fór m.a. yfir þjóðveginn skammt frá brúnni yfir Ytri-Rangá til að labba undir hana og upp með ánni þar til ég kom til móts við elliheimilið Lund. Sá þrjá menn á veiðum og það beit á hjá einum. Stoppaði stutta stund í Bogatúninu hjá Val, pabba Ellu vinkonu, og Ingibjörgu og spjallaði einnig örstutt við nágranna pabba á no. 26. Pabbi var búinn að setja upp kartöflur og leggja á borð og var um það bil að fara að grilla þegar ég kom rétt fyrir tólf. Eftir hádegi var ég aðallega að lesa en lagði nokkra kapla sem gengu upp á endanum og spjallaði við pabba. Um fimm pakkaði ég saman og kvaddi. Eins og síðustu helgi hlóð ég bílinn á hraðhleðslustöð við Olís vestan við Ölfusá. Var komin í bæinn um hálfsjö. 

Á Hellu

Svaf til klukkan að verða sjö í morgun. Mætti í Laugardalslaugina rétt rúmlega átta og snéri rútínunni nokkurn veginn við, endaði á því að synda eftir að hafa farið þrisvar í kalda, einu sinni í heitasta-, nudd- og sjópottinn. Hitti mágkonu mömmu í tveimur síðustu pottunum. Var mætt vestur í bæ til norsku esperanto vinkonum minnar. Við lásum þjóðsöguna um djáknann á Myrká á esperanto. Fór svo með bílinn á færibandið hjá Löðri við Fiskislóð, hefði líklega betur geymt það aðeins en ég vissi ekki þá að ég myndi taka skyndiákvörðun um tveimur tímum síðar. Fór heim og gekk frá sunddótinu og kláraði að pakka niður í tösku. Rétt rúmlega tólf lagði ég af stað austur. Hringdi í pabba og "varaði" hann við. Fljótlega eftir að ég kom í Rangárvallarsýsluna beygði ég til vinstri. Allt gekk vel en þegar ég kom að gatnamótum rétt eftir að ég ók framhjá Gíslholti þurfti ég að hægja enn frekar á ferðinni á löngum kafla þar sem eru vegaframkvæmdir og vegurinn mjög grófur á kafla. Svo þegar ég var búin að keyra rúmlega kílómeter af afleggjaranum að Guttormshaga varð ég að stoppa í dágóða stund þar sem verið var að smala nokkrum hrossum í rétt og setja sum af þeim á kerrur. Ég beið alveg róleg og lenti á smá spjalli við tvo bráðum átta ára frændur. Ég var komin í Gutt um hálfþrjú og stoppaði í rúma klukkustund. Þegar ég kvaddi beygði ég til hægri frá afleggjaranum, vegurinn á þeirri leið var mun skárri en ég keyrði nú ekki hratt þar sem það var maður á dráttarvél á undan mér, lá svo sem ekkert á. Pabbi lét mig ráða hvað við hefðum í kvöldskattinn. Ég fann rauðsprettuflök í frysti sem ég sauð, setti einnig upp kartöflur og skar niður einn lauk og sauð. Þetta var bara nokkuð gott með smjöri og hrásallati. 

Tveir ON-lyklar í hús

Ég rumskaði einhvern tímann um miðja nótt, skrapp á pisseríið og var svolítið lengi að sofna aftur. Svo vaknaði ég rétt áður en vekjarinn var að fara að ýta við mér. Fékk mér chiagraut í morgunmat og var mætt í sund um leið og opnaði klukkan hálfsjö. Sundrútínan var næstum eins og í gær nema í morgun synti ég 400m á tæpum 18 mínútum. Mætti í vinnu á sama tíma og í gær og afleysingaskoðunarmaðurinn var þá þegar mættur fyrir utan. Ég opnaði, kerfið af og hellti upp á. Um átta kom ungur piltur, ekki orðinn seytján ára, og var okkur til aðstoðar í allan dag. Hann var að vinna hjá Frumherja í fyrrasumar líka og er alveg liðtækur í afgreiðslu og að aðstoða skoðunarmanninn. Ég gat því skroppið í Bónus um tíu leytið. Dagurinn byrjaði rólega en bara fyrsta korterið svo var nóg að gera fram að hádegi og þegar opnað var eftir hádegi voru þrír komnir á húninn. Í heildina voru skoðaðir 43 bílar, síðasti bíll fór út á slaginu fjögur. Það tók okkur örfáar mínútur að ganga frá, setja kerfið á og læsa á eftir okkur. Ég fór beinustu leið heim, spjallaði við Ellu vinkonu alla leiðina. Umferðin var nokkuð þung og var klukkan orðin hálffimm þegar ég kom heim. Bíllinn var enn í uþb 45% en þar sem var laust á staurnum ákvað ég að stinga í samband. Pöntuð sending frá ON var í póstkassanum, tveir ON-lyklar. Virkjaði þá báða og gat prófað annan strax því hleðslusambandið hafði rofnað eftir tíu mínútur. Hingað til hef ég verið að skanna kóða á staurnum og það kemur einmitt stöku sinnum fyrir að samband rofnar. Það virkaði vel að skanna lykilinn og nú er bíllinn búinn að vera í hleðslu í fjóra og hálfan tíma og kominn upp í 99%. Ég fer því fljótlega í það mál að stoppa hleðslu, taka úr sambandi og færa bílinn á annað stæði. 

Einn virkur vinnudagur eftir af mánuðinum

Vekjarinn ýtti við mér korter fyrir sex í morgun og ég var mætt í sund um hálfsjö. Byrjaði í kalda pottinum og fór alls þrjár ferðir í hann, synti 300m, fór eina sjö mínútna ferð í gufuna og örstutt í heitasta pottinn. Var mætt í vinnu tuttugu mínútum fyrir átta. Afleysinga-skoðunarmaðurinn var mættur fyrir utan og varð samferða mér inn. Stöðvarstjórinn mætti rétt fyrir átta og var fram að hádegi. Í heildina voru skoðaðir 42 bílar í dag. Klukkan var rúmlega hálffimm þegar við settum kerfið á og læstum eftir að hafa gengið frá og stimplað okkur út. Ég fór beinustu leið í Fiskbúð Fúsa og spjallaði við pabba á leiðinni þangað. Keypti mér fiskibollur og og harðfisk, óbarða ýsu. Ætlaði aðeins að kíkja á fyrrum nágranna, sá að bíllinn var í innkeyrslunni en þau voru ekki heima. Tvíburahálfsystir mín hafði samband í vikunni og spurði hvort ég gæti sótt og nýtt sendingu sem hún fengi í dag fimmtudag. Hún er stödd erlendis. Ég þáði það og hún sendi mér kóða í dag og áður en ég fór heim kom ég við í smá skúr á planinu þar sem Orkan við Hæðarsmára er, notaði kóðann til að opna og fann boxið sem var merkt við kóðann. Þar beið kassi af nokkrum tegundum af fersku grænmeti. Hringdi eitt símtal eftir að ég kom heim en að því loknu setti ég upp kartöflur, hitaði fiskibollur og bjó mér til sallat. 

Miðvikudagur

Vekjarinn var stilltur á 06:35 en ég var vöknuð stuttu fyrir klukkan sex. Slökkti á vekjaranum fór ekki á fætur fyrr en stuttu fyrir klukkan hálfsjö. Hafði nægan tíma í morgunverkin, sjósundsundirbúning og meira að segja smá lestur í fræðunum. Var mætt í vinnu um hálfátta. Þegar stöðvarstjórinn mætti rétt fyrir klukkan átta voru þrír að bíða á húninum. Já, við erum farin að hafa það þannig að ég læsi innri hurðinni á eftir mér og hún er ekki tekin úr lás fyrr en stöðvarstjóinn mætir eða á slaginu klukkan átta. Tuttuguogfjórir bílar voru skoðaðir fyrir hádegi og tuttugu eftir hádegi. Ég mætti í osteostrong korteri fyrir tíman minn klukkan fimm og komst eiginlega strax að. Var svo mætt í Nauthólsvík rétt fyrir klukkan hálfsex. Þá var kaldapotts vinkona mín þegar komin í pottinn. Fórum þrisvar í sjóinn þar af eina ferð í lónið og að venju eina ferð í gufuna á milli ferða og tvær í pottinn. Fórum upp úr um hálfsjö og ég var komin heim rétt áður en klukkan varð sjö. 

Hundraðogsex ár frá því móðuramma fæddist

Vekjarinn lét vita korter fyrir sex að kominn væri tími fyrir fótaferð ef ég ætlaði að fara í sund áður en ég mætti til vinnu. Leyfði mér að "snúsa" einu sinni en ég var komin á fætur um sex. Sinnti morgunverkunum á baðherberginu, fékk mér chiagraut og vitamin og var komin á planið við Laugardalslaug um það leyti sem verið var að opna um hálfsjö. Ég var með nýjan sundbol sem ég keypti í Sports Direct í gær. Byrjaði á því að fara í kalda, synti 300m á braut 7 áður en ég fór aftur í kalda. Sat í sjópottinum í uþb tíu mínútur og endaði í kalda pottinum og kaldri sturtu áður en ég fór uppúr og í vinnu. Var búin að hella upp á og gera upp kassann þegar stöðvarstjórinn mætti rétt fyrir átta. Dagurin byrjaði frekar rólega en í heildina voru samt skoðaðir 43 bílar milli klukkan hálfníu og hálffimm, þrátt fyrir hálftíma lokun í hádeginu. Eftir vinnu fór ég beint á bókasafnið í Kringlunni og skilaði fjórum bókum. Tók fjórar bækur í staðinn, þar af eina skammtímalánsbók; Girnd eftir Þóru Sveinsdóttir. Áður hefur komið út bókin Sjúk eftir sama höfund og eru helstu persónur að hluta til þær sömu. Hinar þrjár bækurnar sem komu heim með mér af safninu eru; Ráðuneyti æðstu hamingju eftir Arundahati Roy, Gestir eftir Hildi Knútsdóttur og Útreiðartúrinn eftir Rögnu Sigurðardóttur. Var komin heim um hálfsex. Tveimur tímum síðar mætti ég á húsfund í bílakjallaranum, um sama mál og fundurinn fyrir viku. Þá náðist ekki tiltekinn meirihluti en núna var nóg að fá meirihluta til að koma málinu í ferli. Áminna á íbúa einnar íbúðarinnar og ef íbúar fara að fyrirmælum og ekkert kemur upp á 30 dögum eftir að áminningarbréf berst fellur málið niður. Fundurinn var mun styttri heldur en í síðustu viku, meirihluti fékkst og málið fer í ferli. Þegar ég kom upp aftur hringdi ég tvö símtöl. Annað símtalið varði í 21 mínútu og hitt í hálftíma. 

Annar í hvítasunnu

Ég vaknaði helst til snemma í morgun en hélt mig þó uppi í rúmi til klukkan langt gengin í átta. Þá fór ég á fætur, sinnti morgunverkunum á baðherberginu, fékk mér sítrónuvatn og settist svo niður í stofustólinn og kláraði síðustu bókina af fjórum af safninu. Um hálftíu bjó ég til tvöfaldan hafragraut úr grófum hafragrjónum sem ég var búin að láta liggja í bleyti í skaftpotti inni í ísskáp frá því stuttu áður en ég fór austur á laugardaginn. Ég var mætt á planið við Nauthólsvík korter fyrir ellefu, tveimur mínútum á undan kalda potts vinkonu minni. Sátum í bílunum þar til fjórum mínútum fyrir opnun. Við hittum þrjár úr gamla sjósundshópnum mínum, tvær systur og sjósundsvinkonu mína sem bjó til hópinn á sínum tíma. Við Hrafnhildur fórum tvisvar í sjóinn, einu sinni í lónið, einu sinni í gufuna og tvisvar í pottinn. Og nú er annars farið að merkja fólk sem er með árskort eða borgar sig inn. Renndi annars framhjá Drápuhlíð eftir sjósundsferðina en sá að fyrrum nágrannar mínir voru ekki heima. Bókasafnið í Kringlunni var ekki opið í dag nema fyrir þá sem kunna að nota "utan opnunartíma" en ég fór í Krónuna í Skeifunni og verslaði inn. Þegar ég var að fara með pokana út í bíl sá ég Davíð Stein koma og ég heilsaði aðeins upp á hann þegar ég var búin að læsa pokana inn í mínum bíl og hann að leggja sínum bíl. Kom heim rétt fyrir tvö og það stóð alltaf til að fara út aftur og safna skrefum en einhvern veginn leið dagurinn án þess að af því yrði. 

Sunnudags síðdegi

Vissi af mér um fjögur leytið en gafst ekki upp á því að reyna að sofna aftur og hafði það á endanum. Vaknaði svo stuttu fyrir hálfátta og fór fljótlega á fætur. Pabbi var þegar klæddur og kominn á ról. Um tíu skrapp ég út í rúmlega hálftíma göngu og náði þar með að safna yfir 3500 skrefum. Fljótlega eftir að ég kom til baka fór pabbi að undirbúa smá grillveislu. Það eina sem ég fékk að gera var að passa upp á sætu kartöfluna sem gufusauð í sigtipotti, leggja á borðið og ganga svo frá eftir matinn. Á þriðja tímanum dreif pabbi sig í að skipta um eldhúsgardýnur og ekkert löngu eftir það fór hann út að hirða smá laufhrúgu í einu horninu í garðinum austan við hús. Ég fékk að keyra hjólbörurnar með hrúgunni að kerrunni. Annars er ég um það bil að fara að leggja af stað heim til mín, ætla í Nauthólsvík um ellefu í fyrramálið.

Hvítasunnuhelgi

Ég held að ég hafi verið sofnuð um tíu í gærkvöldi og ég rumskaði ekki fyrr en rétt fyrir sex, sem mér fannst reyndar heldur snemmt. Kúrði eitthvað áfram en greip svo símann um hálfsjöleytið. Rúmum klukkutíma síðar fór ég loksins á fætur, fékk mér sítrónuvatn og sinnti morgunverkunum á baðherberginu. Klukkan var nýlega orðin átta þegar ég mætti á planið við Laugardalslaug. Tíu mínútum síðar var ég mætt á braut átta. Eftir fyrstu hundrað metrana hitti ég á sjósundsvinkonu mína, hún og maðurinn hennar voru búin að synda og á leiðinni upp úr en við tvær spjölluðum örugglega saman í um tuttugu mínútur áður en hún fór í heita pottinn og ég hélt áfram að synda. Var komin heim aftur um hálfellefu. Fékk mér harðsoðið egg, vítamín og vatnsglas. Horfði á einn þátt áður en ég snéri mér loksins að þeim verkefnum sem ekki má skrifa um. Að þeim verkefnum loknum ristaði ég mér brauð og smurði með smjöri (aldrei þessu vant) og setti á verkaða bleikju frá Svartárkoti. Stuttu fyrir eitt var ég komin út í bíl með farangur fyrir eina nótt og lagði af stað austur. Hringdi í frændfólk mitt á Selfossi. Þau voru á leið í bústaðinn og Jóna Mæja spurði hvort ég myndi ekki geta dobblað pabba í að heimsækja þau þangað. Ég var meira en til í að láta þá hugmynd verða að veruleika og hringdi í pabba þegar ég var að nálgast Kambabrún og spurði hann hvort hann væri til í þetta ævintýri. Hann var mjög jákvæður. Ég stoppaði því hvergi á leiðinni en á einum tímapunkti lét ég verða af því að hringja í manninn sem hringdi í mig í vinnuna í sl mánuði, aðallega til að fá skoðunarfrest á bíl en líka til að reyna við mig. Hann svaraði símanum og það var bara nokkuð þægilegt að spjalla við hann, sagði honum sagt að ég væri eiginlega enn að hugsa málið. Helga systir vasa-hringdi í mig þegar ég átti eftir um 10km á Hellu. Hún heyrði að ég var komin í samband og við töluðumst stuttlega við en hún var á kafi í einhverjum undirbúningi. Þegar ég kom á Hellu fór ég inn með farangurinn og skrapp aðeins á salernið. Pabbi gerði sig kláran og við lögðum af stað á hans bíl mjög fljótlega. Vel var tekið á móti okkur í bústaðnum. Ég var að koma þangað í fyrsta skipti. Sáum líka nýja bílinn þeirra en fyrir um mánuði uppfærðu þau skódann í 100% rafmagnsbíl. Stoppuðum í á annan tíma. Pabbi hafði svo siginn fisk með kartöflum og smjöri í kvöldmatinn. 

Fössari

Ég var komin á stjá stuttu fyrir sex. Helga systir var vöknuð en þó ekki komin á fætur. Hún fékk sér harðsoðið egg og tvær döðlur í morgunmat á meðan ég fékk mér chiagraut og eina döðlu. Ég gleymdi að fylla á og taka með mér vatnsflöskunar þegar við fórum út úr húsi en við vorum komnar á Reykjavíkurflugvöll upp úr klukkan hálfsjö. Ég beið með Helgu þar til kallað var út í vél. Þá var klukkan að verða sjö, of seint til að skreppa í sund eða heim og of snemmt til að mæta í vinnu. Ákvað að stinga bílnum í samband í rúmar tíu mínútur við hraðhleðslustöð Olís við Álfheima. Mætti í vinnu um hálfátta, gerði upp og opnaði kerfin. Stöðvarstjórinn mætti um átta og við vorum bara tvö til hádegis, nóg að gera en engar hasar uppákomur. Eftir hádegi kom afleysingaskoðunarmaður til okkar. Vinnudagurinn leið hratt og við vorum búin að ganga frá og loka á slaginu fjögur. Ég hringdi í pabba og spjallaði við hann á meðan ég keyrði í Fiskbúð Fúsa. Þar keypti ég ýsu í soðið og harðfisk, lúðu, hann átti ekki óbarna ýsu. Ætlaði næst að líta inn til fyrrum nágranna í Drápuhlíðinni en þau voru ekki heima svo ég tók hús á frændfólki mínu í Álftamýrinni og stoppaði þar í hátt á aðra klukkustund. Kom heim stuttu fyrir sjö, setti í vél til að þvo m.a. vinnupeysuna og útbjó mér soðna ýsu í kvöldmatinn. 

Bríet meistari

Mikið varð ég hissa þegar vekjarinn í símanum byrjaði að hamast klukkan 6:35 í morgun. Var smá stund að átta mig og slökkva á honum og það tók mig næstum korter að hafa mig á fætur. Samt var ég nú mætt fyrir utan Laugardalslaug rétt fyrir hálfsjö. Byrjaði í kalda pottinum, synti 300m þar af ca helminginn á bakinu, fór aftur í kalda, smá stund í sjópottinn og endaði í kalda áður en ég fór upp úr og þvoði mér um hárið. Stimplaði mig inn í vinnu tuttugu mínútum fyrir átta. Stöðvarstjórinn mætti á slaginu og við vorum bara tvö í dag. Reyndar kom aðal kerfisfræðingur fyrirtækisins fljótlega og var í á þriðja tima að undirbúa að setja upp myndavélakerfi. Nóg var að gera í skoðunum og í heildina fór þær yfir fjörutíu. Ég stimplaði mig út um hálffimm og þegar ég var rétt komin að bílnum mínum hringdi Davíð Steinn í mig og sagði að þau Helga systir, Bríet dóttir hennar og Bjarki kærastinn væru í mathöllinni í Smáralind. Ég stefndi því beinustu leið þangað. Tvö þau síðarnefndu voru samt nýfarin þegar ég mætti. Tilefnið var að Bíet útskrifaðist með meistaragráðu í kjötiðn frá MK í dag. Davíð Steinn var með okkur systrum eitthvað áfram en kvaddi stuttu fyrir sjö. Klukkan var byrjuð að ganga níu þegar við Helga fórum heim. Hér fær hún að gista og ég mun svo skutla henni í flug í fyrramálið.

Mannmargt í Nauthólsvík seinni partinn

Vaknaði fyrst um fjögur leytið, alltof, alltof snemma. Tókst að kúra til klukkan að verða sex en þá fór ég á fætur þótt ég ætlaði ekki að byrja daginn á sundferð. Notaði heldur ekki tækifærið að gera lóða-æfingar. Borðaði afganginn af hafragrautnum frá því á mánudaginn, tók til sjósundsdótið og hafði svo amk tuttugu mínútur til að lesa í seinustu bókinni af safninu. Mætti í vinnu um hálfátta. Skráði mig inn, setti af stað kaffið og skúraði gólfið í klósett-rýminu. Sjö mínútum fyrir átta mætti Siggi yfirmaður og rétt fyrir átta var stöðvarstjórinn mættur þrátt fyrir atið sem hann/við lentum í um miðjan dag í gær. Um hálfníu kom starfsmannastjórinn og hún spjallaði við okkur maður á mann, Siggi skoðaði bíla á meðan stöðvarstjórinn var að spjalla og sá síðarnefndi leysti mig af í afgreiðslu á meðan ég var í spjall-viðtali. Annars voru þeir tveir að skoða stóran part af vinnudeginum. Kalda potts vinkona mín mætti með sinn bíl í skoðun í morgun, við vorum svo búnar að mæla okkur mót í Nauthólsvík eftir osteostrong og vinnu. Hún og dóttir hennar voru komnar í pottinn þegar ég mætti um hálfsex. Fórum tvisvar í sjóinn, einu sinni í gufu og enduðum svo í pottinum. Ég var komin heim milli klukkan hálfsjö og sjö. Helga hringdi um átta leytið til að biðja um gistingu annað kvöld en hún er að koma með flugi í bæinn á morgun til að fylgjast með Bríeti útskrifast með meistaragráðu í kjötiðn.

Fjárfesti í árskorti

Þar sem ég var vöknuð fyrir allar aldir í morgun og komin á stjá fyrir klukkan sex ákvað ég að fá mér einungis sítrónuvatn, sinna morgunverkunum á baðherberginu, taka til sunddót, taka með mér skyrdós og vítamín og drífa mig fyrst í Laugardalslaugina. Kom þangað rétt fyrir hálfsjö. Það var opnað á slaginu og ég tók strikið að afgreiðsluborðinu bæði til að endurnýja sundkortið og fá mér armband fyrir skápinn. Sú sem afgreiddi mig sagði að kortið væri ennþá virkt til 24. júní n.k. Var kannski ekki alveg vöknuð því ég prófaði hliðin, sem neituðu, áður en ég fattaði að árskortið í Nauthólsvík er virkt. Bæði sett á sama kortið. Það kom svo ánægjulega á óvart að í stað þess að borga 48000 fyrir 12 mánuði þurfti ég aðeins að borga 34000. Það var gott að komast í laugina. Byrjaði á þeim kalda og var búin að fara 4 ferðir í hann, en synti aðeins 200m, áður en ég fór upp úr og í vinnu. Ágætlega gekk að taka nýja þjófarvarnarkerfið úr sambandi, það tókst í annarri tilraun. Hellti upp á kaffi. Skannaði inn kvittunina fyrir árskortinu en sendi með e-mail til aðalbókarans. Hann var búinn að leggja inn á mig íþróttastyrkinn, 20000 kr tveimur tímum síðar. Annars byrjaði dagurinn nokkuð rólega. Vorum bara tvö, ég og stöðvarstjórinn. Hann var þó búinn að skoða um 19 bíla fyrir hádegi. Í hádeginu skrapp hann með lista og bónuskort út í Bónus. Var í vinnu til rúmlega hálffimm og fór þá beint heim. Tengdi bílinn á staur, var kominn niður í 34%. Um hálfátta var "skrautlegur" húsfundur í bílakjallaranum. Fundurinn snérist um íbúa í einni íbúð sem virðist eiginlega ekki geta búið í fjölbýli. Eigandi og einn íbúi í viðkomandi íbúð mætti á sinn allra fyrsta fund þrátt fyrir að hafa búið í blokkinni í meira en tólf ár. Lögmaður var á svæðinu og allir sem vildu fengu að tjá sig áður en greidd voru atkvæði um hvort veita skyldi formlega ákvörðun sem fælist m.a. í sér að viðkomandi íbúi fengi 30 daga til að bæta hegðun sína og sýna nágrönnum tillitsemi og kurteisi.

Í mörg horn að líta í vinnunni

Var vöknuð nokkru áður en vekjarinn átti að ýta við mér. Eftir morgunverkin á baðherberginu náði ég í skaftpott með grófum hafragrjónum, chiafræjum, salti, smá finum hafragrjónum og vatni sem ég blandaði í pottinn í gærkvöldi. Hitaði upp blandið og lét það malla í smá stund og úr varð ágætis hafragrautur sem ég gat skipt í tvennt. Borðaði annan helminginn með hnetum, fræjum, rúsínum og kanil strax. Blandaði samskonar út í hinn helminginn, hræði saman við og setti í skál og plast inn í ísskáp. Var mætt í vinnu tuttugu mínútum fyrir átta. Sá að það var búið að setja upp nýtt kerfi en það var ekki á. Komst ekki inn í afgreiðslutölvuna fyrr en stöðvarstjórinn mætti á svæðið svo ég stimplaði mig ekki inn í vinnu fyrr en tvær mínútur í átta. Var þá búin að búa til kaffi, stjúka af borðflötum í biðstofu afgreiðslurýmisins og fleira dútl. Það liðu ekki margar mínútur frá því að opnað var fyrir skoðun og fyrstu kúnnar mættu á svæðið. Vorum bara tvö, þ.e. stöðvarstjórinn og ég. Hann að skoða og ég að afgreiða. Skoðaðir voru yfir 45 bílar í dag. Ekki var búið að gera upp kassann síðan ég gerði upp síðast en mér tókst að gera hann upp rétt fyrir lokun svo ég byrja með hreint borð í fyrramálið. Fór beint í Nauthólsvík eftir vinnu og var svo komin heim rétt fyrir klukkan hálfsjö. 

Sunnudagur

Svaf út í morgun og fór ekki á fætur fyrr en klukkan var langt gengin í níu. Pabbi var víst löngu kominn á fætur, hafði lokað inn í stofu og eldhús til að raska ekki ró minni. Held að ég hefði nú ekki endilega vaknað við "læti" í honum. Vissi fyrst af mér um sjö því ég heyrði stofuklukkuna slá sjö högg. Sofnaði strax aftur þrátt fyrir að ég hefði eiginlega þurft að fara á klósettið. Fékk mér harðsoðið egg í morgunmat, lagði nokkra kapla, sýslaði í tölvunni hans pabba, skrapp í stuttan göngutúr, las í smá stund og spjallaði líka við pabba. Um ellefu dreif ég mig í matargerð. Hafði tekið út fiskflök um hálftíu. Skar niður lauk og sauð hann í smá stund. Skrældi sæta kartöflu og skar niður ásamt nokkrum kartölfum og gufusauð. Bitaði fiskinn niður og velt upp úr krydduðu, þeyttu, hráu eggi og blöndu af hveiti og haframjöli og smjörsteikti á pönnu. Virkilega gott allt saman. Við feðgin vorum búin að borða og ganga frá fyrir klukkan tólf. Um hálfþrjú pakkaði ég dótinu mínu niður og setti út í bíl eftir að hafa tekið hann úr skúrnum. Kvaddi pabba. Eyddi 31% rafmagni á að keyra heim og á 50% eftir á bílnum svo ég þarf líklega ekki að hlaða hann fyrr en um miðja vikuna. Annars var ég komin heim um fjögur og setti strax í þvottavél, síðan fór afgangurinn af deginum í smá uppsafnað þáttagláp.

Komin á Hellu

Það má segja að ég hafi sofið út í morgun því klukkan var byrjuð að ganga átta þegar ég ákvað loks að opna augun og athuga hvað klukkan væri orðin. Hlandblaðran var líka farin að minna verulega á sig. Helga var búin að fara eina ferð í fjárhúsin. Fullt af skilaboðum frá unga bóndanum, Aroni, voru á sauðburðarspjallinu sem flest voru sett inn um hálffimm. Yngri bróðirinn, Anton, mátti vera slakur til amk átta. Ingvi og Helga fengu sér ketókaffi um hálfátta og við pabbi morgunmat. Rétt fyrir níu fór ég upp að pakka og kom með dótið niður í tveimur ferðum. Helga var farin aftur út í hús, tveir gemlingar að bera og annar lengra kominn en þurfti smá aðstoð. Sá bar tveimur lömbum og gaf sig alveg strax að þeim, með mikið gott móðureðli. Anton kom fljótlega þannig að Helga gat aðeins komið út til að kveðja okkur pabba. Óli, unnusti Huldu, var búinn að ferma bílinn og ég búin að knúsa þau og Ingva bless. Rúmlega hálftíu lögðum við pabbi í hann, hann undir stýri. Það var ekki stoppað fyrr en í Staðarskála. Þar byrjaði ég á því að nýta salernisaðstöðuna og svo fengum við okkur aftur kjötsúpu. Stoppið var ekki langt og ég tók við stýrinu. Næsta stopp var ekki fyrr en í Núpalind 6 um hálffjögur. Pabbi var að koma í heimsókn í fyrsta skipti og leist mjög vel á. Ég skildi eftir óhreina þvottinn, endurpakkaði dóti í minni tösku, fékk mér vítamínin mín og tók til eins dags skammt en skammtarnir sem ég tók með norður kláruðust í gær. Vissi svo sem alveg af því að ég var "tæp" á dögum en það átti ekki að gera neitt til. Síðan fór ég smá krókaleiðir í Smárann til að kjósa áður en við drifum okkur á Hellu. Klukkan var rétt að verða sex þegar við komum hingað. Bíllinn minn fær að vera auka nótt í skúrnum.

Föstudagur

Síðasta nóttin í Árlandi framundan, sauðburðarfrívikan mín liðin. Var komin á stjá um sex og fór fljótlega út í hús. Þar var yngri bróðirinn fyrir, um það bil að taka á móti lambi úr gemsa. Annars var þessi dagur rólegur þannig séð því það báru ekki nema þrjár fyrri partinn. Það var samt nóg að gera í að vatna fénu. Í dag var besti dagurinn veðurlega séð og það er búið að opna út í réttina fyrir kindur og lömb sem eru alveg að verða tilbúin í að fara út í frelsið. Mamma bræðranna kom í heimsókn um tvö leytið. Hún stoppaði alveg til klukkan að verða sjö en varð ekki að ósk sinni að sjá eina kind bera. Um það bil sem hún var að fara var einn gemsi rétt farinn að sýna merki, hann bar ekki fyrr en um níu leytið. Ég kvaddi annars fjárhúsin og hana Siggu mína og lömbin hennar, Sigga og Stínu ekkert löngur fyrir kvöldmat. Fór inn og í sturtu, búin að ákveða að vera ekkert að fara í fjárhúsin í fyrramálið. Mun þó örugglega kíkja aðeins í myndavélarnar. 

Uppstigningadagur

Vaknaði rétt rúmlega sex og var ekkert að drolla uppí rúmi. Eftir morgunverkin á baðherberginu kíkti ég aðeins á tölvuskjáinn í tölvunni inni í eldhúsi. Þessa dagana er bein útsending frá nokkrum myndavélum í fjárhúsinu. Það virtist allt vera með kyrrum kjörum, var þó ekki alveg viss í einu tilvikinu og ákvað að kíkja aðeins út. Það báru ein kind og tveir gemsar fyrir hádegi. Gemsarnir þurftu báðir aðstoð. Stuttu fyrir eitt fóru Helga systir og pabbi í heimsókn í Svartárkot, pabbi átti heimboð þangað. Þau komu aftur til baka um hálfsex leytið. Þá var ég að byrja að matreiða kjöt í karrí. Maturinn var tilbúinn um hálfátta og þótti góður. Ungi bóndinn hafði þurft að skreppa yfir í Hlíð og var boðinn í mat þar. 

Nóg að gera í fjárhúsunum í dag

Ég var komin á fætur um sex. Ungi bóndinn var nýlega farinn af vaktinn og yngri bróðir hans tekinn við. Allt var með kyrrum kjörum svo ég gat gefið mér tíma til að fá mér morgunmat og sest aðeins niður með systir minni og mági á meðan þau voru að klára ketókaffið sitt og taka sig saman. Þau kvöddu um hálfsjö. Annað þeirra var eiginlega í fyrra fallinu á leið í vinnu á meðan hitt ætlaði að fá inni hjá vinkonu til að undirbúa sig undir upptökupróf. Ég fór út í hús rétt eftir að þau voru farin. Þar var ein kindin byrjuð að bera. Anton kom fljótlega út, hafði verið að fylgjast með í tölvu inni. Það voru nefnilega settar upp nokkrar myndavélar í vor. Milli klukkan sjö og hádegis báru sex kindur og þurfti að hjálpa þeim öllum. Ýmist voru þær of þröngar, lömbin eitthvað skökk eða komu öfugt út. Ég fór einu sinni inn á þessu tímabili. Óli og Hulda komu niður á tíunda tímanum og lögðu svo af stað inn á Akureyri um hálftíu. Rétt eftir að þau fóru kom pabbi loksins fram, hafði eiginlega verið að bíða eftir að flest heimilisfólkið væri farið af svæðinu og notaði tækifærið til að skreppa í sturtu. Eftir hádegi báru tveir gemsar og þrjár kindur í viðbót. Fyrri gemsinn var með tvö lömb og sýndi strax mikla móðurumhyggju. Helga og Hulda komu heim um fimm leytið og skömmu síðar kom vikulega sending úr Krónunni. Ingvi mágur varð eftir inni á Akureyri, var að fara í einhvern hitting í wiský-hóp sem hann er í. Óli kom úr vinnu á sjöunda tímanum. Þá var Hulda búin að gefa nokkrum lömbum aukalega. Unga parið fór svo saman í Skógarböðin við Akureyri, ætlaði að kippa Ingva með heim í bakaleiðinni.

Skrepp til Akureyrar í morgun

Ég vaknaði upp úr klukkan hálfsex og fór fljótlega á fætur, sinnti morgunverkunum á baðherberginu og fór svo beint út í fjárhús. Þar var reyndar allt með kyrrum kjörum en ég gat þó nýtt tímann í að brynna. Lagði reyndar ekki í að klofast yfir allar grindurnar í norðan megin í hlöðunni. Kom inn stuttu fyrir sjö og dreif mig þá í snögga sturtu. Upp úr klukkan átta fengum við Hulda bílínn hans pabba lánaðan. Hún átti að vera mætt í blóðprufu hjá mæðravernd um níu. Hún átti reyndar líka að skila inn þvagprufu en prufan varð eftir í ísskápnum í Árlandi. Eftir blóðprufuna skruppum við aðeins í sund, Hulda flatmagaði í  35-37°C en ég byrjaði á því að synda í tæpt korter áður en ég fór til hennar. Ég skrapp svo aðeins eina ferð í þann kalda áður en við fórum upp úr. Notaði tækifærið og þvoði mér um hárið. Komum aðeins við í Krónunni áður en við brunuðum aftur í sveitina. Helga systir var komin út í fjárhús þar sem tvær voru að byrja að bera. Ég fékk mér smá hressingu áður en ég skipti um föt og fór út í hús til að leysa hana af. Yngri bróðirinn var farinn af vaktinni og ungi bóndinn var nýkomin eftir að hafa tekið sér pásu um kvöldmatarleytið í gær eftir eins og hálfssólarhrings törn. Það var nóg fyrir hann að græja og gera. Marka lömb, færa til í króm og fleira. Ég var aðeins að brynna en fylgdist svo með einni sem var byrjuð að bera og átti mjög erfitt með það. Grey kindin var svo þröng. Ungi bóndinn kom stöku sinnum og reyndi að hjálpa til við að víkka út opið. Á endanum varð hann svo að toga lambið út. Það var frekar lítið og svolítið eftir sig eftir átökin. Hresstist þó furðu fljótt. Talnin höfðu verið tvö í kindinni í fósturtaldningunni fyrir nokkrum vikum en það var ekkert annað lamb í henni. Það var því vaninn undir handa minnsti þrílembingurinn sem kom í heiminn daginn sem við pabbi komum norður. 

Færri borið í dag

Ég var vöknuð stuttu fyrir klukkan sex. Þá voru skilaboð frá unga bóndanum í sauðburðargrúppunni um að ekkert lægi á að kíkja í fjárhúsin. Allt væri með kyrrum kjörum. Ég gaf mér því tíma til að fá mér morgunmat og setjast niður með systir minni og mági, áður en ég fór út í fjárhús. Ég bætti á vatnbúskapinn hjá kindunum þar sem það þurfti. Ungi bóndinn var kominn aftur úr einhverri skreppu og ákvað að gefa. Ég spurði hann hvert hann hefði fært hana Siggu mína og lömbin hennar og í ljós kom að ég hafði einmitt verið nýbúin að fylla á vatnfötuna hennar, hafði bara ekkert verið að spá í hvaða kind þetta var. En hún er alveg að sinna báðum lömbunum sínum og að verja þau. Ég var komin inn um hálfníu leytið. Fór aftur út um tíu og þá með hænumat með mér. Tékkaði á vatnbússkapnum hjá kindunum sem og hvort einhver væri líkleg. Allt var með kyrrum kjörum svo ég fór aftur inn fljótlega. Um tólf leytið var yngri bróðir unga bóndans mættur og þeir bræður fóru að græja og gera í hinum fjárhúsunum. Skilaboð komu frá þeim, á grúppuna, um að gemsi væri að bera og allt rétt. Ég fór strax út til að vakta gemsann. Rúmum tveimur tímum seinna sendi ég mynd á grúppuna sem varð til þess að bræðurnir komu. Draga þurfti lambið út og það þurfti tvo til. Held að ekki hafi miklu munað að illa færi fyrir lambinu en þetta slapp sem betur fer. Þegar búið var að koma lífi í lambið og færa það og mömmuna í sér kró var farið að gefa aftur. Ein einlemba var þá byrjuð og eftir að hafa staðfest að allt snéri rétt skruppu bræðurnir á einhvern bæ í nágrenninu að sækja lamb sem þeir höfðu fengið vilyrði fyrir að fá til að venja undir. Ekkert löngu áður en þeir komu til baka var ég búin að hjálpa lambinu í heiminn þar sem það virkaði eins og að annar framfóturinn væri að sogast meira inn. Höfuðið og hinn framfóturinn voru komin og tungan á lambinu var komin út um munninn. Mér tókst að ná taki á hinum framfótnum og draga hann út og svo skömmu síðar allt lambið, stærðar hrútur. Ég fór svo inn fljótlega. Er ekki búin að fara út aftur en hugsanlega kíki ég aðeins eftir kvöldmat, það er ein þrílemba að byrja.

Smá stöðu-uppfærsla

Það er eins og mig grunaði, frekar knappur tími til að setja inn færslu á hverjum degi. Í gærmorgun var ég komin á fætur rétt fyrir klukkan hálfátta. Pabbi var löngu kominn á stjá og búinn að pakka niður. Við fengum okkur harðsoðið egg og skyr í morgunmat. Síðan tók pabbi sinn bíl út úr bílskúrnum og ég setti minn þar inn í staðinn. Á slaginu hálfníu lögðum við að stað frá Hellu. Pabbi keyrði fyrsta spölinn, alla leið í gegnum Hvalfjarðagöngin. Hann stoppaði á stóru bílaplani rétt hjá til að teygja úr sér og skipta við mig um sæti. Næsta stopp var Staðarskáli. Þar fór ég á salernið og svo fengum við okkur kjötsúpu. Ég ákvað svo að halda áfram að stýra bílnum og gerði það alveg inn að AO við Glerártorg á Akureyri. Pabbi vildi fylla á tankinn þótt hægt væri að keyra tæpa fimm hundruð km á uþb hálfum tankinum. Svo keyrði hann síðasta spölinn. Fórum skarðið en ekki göngin en vorum komin í Árland klukkan hálffjögur. Ég var svo komin út í fjárhús einhvern tímann á fimmta tímanum og var þar fram að kvöldmat og svo aftur í ca klukkutíma eða jafnvel tvo eftir kvöldmat. Það bar slatti af kindum í gær frá miðnætti til miðnættis, eitthvað rúmlega tuttugu stykki. Fór í háttinn rétt fyrir miðnætti, fékk gestaherbergið í risinu. Ég var svo vöknuð stuttu fyrir klukkan sex og fór næstum því beint út í fjárhús. Slatti borinn í dag, þó ekki alveg eins margar og í gær. Hún Sigga mín, "lambið" sem ég bjargaði í fyrra bar tveimur litlum lömbum. Hrút og gimbur, minna lambið var svört gimbur, ótrúlega spræk miðað við smæð en mamman óreynd í þessu hlutverki var ekki að sinna því nógu vel til að byrja með. Það á samt að sjá aðeins til. Stuttu fyrir kvöldmat fór ungi bóndinn með hóp af kindum og amk þriggja daga gömlum lömbum yfir í hin fjárhúsin og kom með allt óborið þaðan í staðinn. Reyndar var ein að bera og fékk að vera áfram í hinum fjárhúsunum. 

Komin á Hellu

Vaknaði upp úr klukkan sex en fór ekki á fætur fyrr en stuttu fyrir sjö. Þá var ég búin að ákveða að vera ekkert að stressa mig á að klára að pakka niður því það væri ekkert vit í að dröslast með allt út í bíl svona snemma morguns. Fékk mér gríska jógúrt og bláber í morgunmat. Mætti í vinnu tuttugu mínútum fyrir átta. Á slaginu átta mætti stöðvarstjórinn, kannski ekki alveg orðinn 100% en hann stóð vaktina einn og skoðaði hátt í fjörutíu bíla í dag. Það var líka þokkalega mikið að gera í annarri afgreiðslu heldur en að bóka inn bíla, m.a. var nóg að gera í símsvörun. Stimplaði mig út á slaginu fjögur og skráði mig út úr tölvunni en yfir leitt vel ég að loka forritunum ekki og velja "skipta um notanda". Hringdi í Odd og spjallaði við hann á leiðinni heim. Gaf mér tíma til að fá mér hressingu og horfa á einn nýjan þátt af "Law&order special victims unit" áður en ég kláraði að pakka niður. Lagði af stað austur upp úr klukkan hálfsex. Talaði við tvíburahálfsystur mína frá upphafi ferðar og alveg að Hveradölum. Var komin á Hellu stuttu fyrir sjö. Bíllinn var kominn niður í 55% og ég ákvað að koma við á hraðhleðslustöðinni og hlaða hann upp í 80%. Það tók ekki nema korter. 

Aftur í sjóinn eftir vinnu

Bríet kom stuttu fyrir átta í gærkvöldi. Við skruppum aðeins í Hagkaup í Garðabæ fljótlega eftir að hún kom því hún komst að því að hún hafði gleymt að pakka niður nauðsynlegum kremum. Davíð Steinn sótti frænku sína um miðja nótt og skutlaði henni á flugvöllinn á Keflavík en hún var á leið í 4 daga heimsókn til vinafólks í Póllandi. Ég hins vegar var mætt í vinnu um hálfátta. Korteri síðar var barið hraustlega á innri hurðin. Þar var kominn afleysinga-skoðunarmaður. Hann var einn til klukkan að ganga tíu en þá mætti Siggi frændi. Þeir voru tveir að skoða til klukkan að verða tvö en eftir tvö og til rúmlega hálffimm stóð Siggi vaktina einn. Allt gekk ágætlega fyrir sig. Það var í mismörg horn að líta hjá mér en það var stundum rólegt í smástund. Ég var mætt í Nauthólsvík um fimm. Kalda potts vinkona mín var þá þegar mætt. Fórum tvisvar í sjóinn og einu sinni í lónið. Ég kom heim upp úr klukkan hálfsjö og þóttist heppin að sjá að önnur innstungan á hleðslustaurnum var laus. Hins vegar tókst mér ekki að koma bílnum í hleðslu þar. Ákvað að kíka á hraðhleðslustöðina við KFC. Þar virtist annar tengillinn vera laus en þegar ég ætlaði að hefja aðgerðir voru skilaboðin þau að viðkomandi tengill væri ekki á lausu. Það endaði með því á ég fann hraðhleðslustöð við Smáralind og kom ég bílnum upp í 90%, úr 33% á uþb hálftíma. Nú er ég aðeins byrjuð að pakka og hugsanlega klára ég í fyrramálið þannig að ég geti farið beint austur eftir vinnu. Kemur í ljós síðar. Mun taka fartölvuna með mér en ætla ekki að lofa neinu hvað færslufjölda varðar. Það verður líka bara að koma í ljós. 

Berhent í sjóinn

Ég vildi að ég gæti munað drauminn sem mig var að dreyma þegar ég rumskaði upp úr klukkan sex. Ég var komin á fætur hálftíma síðar. Gerði nokkrar æfingar með 1,5kg lóðum, fékk mér gríska jógúrt með chia fræjum og bláberjum og tók öll vítamínin með. Mætti í vinnu rétt fyrir klukkan hálfátta. Í þetta sinn og jafnfram fyrsta sinn læsti ég á eftir mér innri hurðinni en losaði lokurnar á stóru hurðunum. Þá er alveg öruggt að enginn rambi inn áður en klukkan er orðin átta. Stöðvarstjórinn kom fimm mínútum fyrir átta og hann sá um að taka úr lás á slaginu. Skoðaðir voru 35 bílar í dag. Ég stimplaði mig út á slaginu hálffimm og fór beint í Hátúnið. Komst strax að í osteostrong og var svo komin í Nauthólsvík rétt fyrir klukkan hálfsex. Sjórinn sagður 6,5°C og ég ákvað að prófa að fara í þynnri skónum og sleppa því að setja upp hanska. Fór 2x4 mínútur í sjóinn, 15 mínútur í gufu á milli og sat svo í rúmt korter í pottinum áður en ég fór upp úr. Var komin heim korter fyrir sjö. Á von á yngri systurdóttur minni fljótlega en hún er að fara í flug (veit ekki hvort það er innan- eða utanlands) og ætlar að fá að gista hjá mér í nótt.

Hittingur

Rumskaði snemma í morgun, á sama tíma og í gærmorgun. Fór þó heldur fyrr á fætur og dreif mig í sturtu sem ég geri alls ekki oft heima hjá mér. En þar sem ég er ekki búin að endurnýja sundkortið og ekki heldur búin að fara í sjóinn síðan fyrir helgi þá ákvað ég að skola af mér nokkura daga "skít". Mætti í vinnu rétt fyrir hálf. Morguninn byrjaði rólega en þegar við læstum í hádeginu var búið að skoða um tuttugu bíla. Stöðvarstjórinn skrapp með lista í Bónus og ég notaði tækifærið og strauk innan úr ísskápnum sem var orðinn frekar tómlegur. Það var eiginlega alveg jafn mikið að gera eftir hádegi, biðraðir eftir skoðunum og við urðum að vísa þó nokkrum frá. Í heildina vantaði aðeins einn bíl upp í 40 bíla yfir daginn. Kom við í Hagkaup í Skeifunni eftir vinnu og fór síðan beinustu leið heim. Hefði líklega alveg getað tekið sjósundsdótið með og skroppið aðeins í sjóinn en ég vildi eiginlega frekar hafa smá tíma heima áður en ég færi aftur af stað. Var alveg að spá í að labba þennan einn og hálfa kílómeter yfir í Stjórahjalla en hvarf frá því þar sem ég þóttist viss um að þá yrði ég að taka með mér auka bol. Hópurinn "Sex svanir", sem vann lengst saman í kortadeild RB hittust hjá einni og það var 100% mæting. Það var svo gaman hjá okkur að við ætluðum ekki að tíma því að fara heim. Margt var skrafað, rifjað upp og mikið hlegið. Klukkan var alveg að verða ellefu þegar ég kom heim aftur. 

Mikill erill í vinnunni

Rumskaði um hálfsex í morgun. Fór á fætur tæpum klukkutíma síðar. Var mætt í vinnu rétt fyrir klukkan hálfátta og ákvað að blautmoppa/skúra aðeins yfir gólfin í kaffistofu og á salerninu. Klukkuna vantaði fimm mínútur í átta þegar fyrstu kúnnar komu inn, tveimur mínútum á undan stöðvarstjóranum. Ég var að hamast við að undirbúa opnum en bauð þó góðan daginn og sagði að við opnuðum klukkan átta. Það var ákveðin ró yfir en eiginlega engin "dauð" stund hjá skoðunarmanninum. Um hálftíu sendi hann mig í Klettagarðana til að fá eitthvað af endurskoðunarmiðum með sex á. Átti að hringja fyrst en enginn svaraði símanum. Þegar ég mætti á svæðið var aðeins einn skoðunarmaður á svæðinu. Hinn hafði skutlaði afgreiðslukonunni upp í Hádegismóa til að leysa þar af og notaði tímann til að sækja símann sinn í leiðinni, hafði gleymt honum heima. Viðkomandi skoðunarmaður er búsettur á Kjalarnesinu. Ég fékk bunka af endurskoðunarmiðum og var komin til baka í Skeifuna fyrir klukkan tíu. Þá var stöðvarstjórinn búinn að bóka inn þrjá bíla í millitíðinni, var að skoða einn og hafði notað endurskoðunarmiða 9 á hvolfi á einn bíl (ég hafði stungið þessu að honum í djóki rétt áður en ég skrapp eftir miðum). Lokuðum í hálftíma í hádeginu og það var komin röð fyrir utan þegar við opnuðum aftur. 46 bílar voru skoðaðir í heildina í dag en ég þurfti að vísa frá amk 10 ef ekki fleirum svo við gætum lokað á réttum tíma. Ég fór beint heim eftir vinnu. Var eitthvað að spá í að skreppa aðeins út í göngu en það varð ekkert úr því. Í staðinn setti ég upp fiskibollur, sæta kartöflu í bitum og blómkál í bitum, horfði á tvo þætti og svo FH - Val í handboltaúrslitaleik sem var tvíframlengdur. Spila verður oddaleik nk fimmtudag því eftir fjóra leiki er staðan jöfn 2:2.

Sunnudagur

Dagurinn hófst frekar snemma hjá mér miðað við að það er sunnudagur. Vaknaði um hálfsjö en fór þó ekki á fætur fyrr en um átta leytið. Um níu leytið útbjó ég mér tvo skammta af hafragraut og setti helminginn inn í ísskáp. Annars er ekki frá mjög miklu að segja. Fylgdist öðru hvoru með "lambaspjallinu" en ég var líka að lesa, ráða sudoku og glápa á eitt og annað. Og dagurinn leið frekar hratt þótt ég hafi ekki verið að gera neitt sérstakt.

Letidagur

Fór á fætur um átta. Var þá búin að fá skilaboð frá hálfdönsku frænku minni og nöfnu að hún væri ekki nógu vel fyrir kölluð en planið hafði verið að ég sækti hana um hádegisbilið. Um níu leytið fékk ég mér harðsoðið egg, vítamínin og vatnsglas. Um klukkustund síðar var ég mætt á Sólvallagötuna til norsku esperanto vinkonu minnar. Ég var með eina bók með nokkrum þjóðsögum þýddum á esperanto af Þórbergi Þórðarsyni. Fyrsta sagan í röðinni var um Dalakútinn. Eftir espó-hittinginn renndi ég bílnum í gegnum Löður við Fiskislóð og verslaði síðan í Krónunni þar rétt hjá áður en ég fór heim. Einhvern veginn leið svo dagurinn, og það frekar hratt, við misgáfulegt dundur. 

Fyrsti maí

Ég var vöknuð fyrir klukkan sjö. Fór þó ekki á fætur fyrr en klukkutíma síðar. Tók lesefni, sudoku-blað og blýant með mér fram í stofu. Milli klukkan níu og tíu fékk ég mér gríska jógúrt með chiafræum og bláberjum. Helga systir bætti mér við í sauðburðarspjallhóp Árlands. Sauðburður er hafinn og það er m.a. búið að setja inn myndir af nýbornum lömbum. Rétt rúmlega ellefu var ég komin á stæði við Nauthólsvík. Það var  fjara og ég ákvað að synda/svamla/vaða út að kaðli. Svolítið fyndið að synda skiðsund og eiginlega "berja" botninn á köflum. Tók ekki tímann hversu lengi ég var út í en fór beint í gufu í ca korter, aftur í sjóinn í uþb tvær mínútur, korter í heita pottinn og svo upp úr og beint heim aftur. Það stóð til að fara aftur út seinna í dag en dagurinn leið við alls konar og ekki neitt. Tíminn virðist líða alveg jafn hratt hvort sem maður er að lesa, sinna skyldum, horfa á þætti, hugsa um allt og ekkert eða spjalla í síma. Og ég veit að þótt klukkan sé byrjuð að ganga tólf þá mun ég lesa aðeins meira áður en ég fer að sofa.