Svipuð staða á heilsu

Ég skrönglaðist á fætur um átta leytið í gærmorgun. Útbjó mér fljótlega engiferdrykk og sat með hann og bók í hönd í stofunni. Ég virðist ekkert eiga erfitt með að lesa þannig að hitinn er ekki svo mikill og meðan ég get andað með nefinu og haft munninn sem mest lokaðan fækka ég hóstaköstunum til muna. Tók samt all nokkur hósta og hnerraköst í gær. Um ellefu leytið hellti ég upp á sterkt kaffi og ristaði brauð. Kaffibollarnir urðu tveir en svo ekki fleiri yfir daginn. Voru þá einum færri heldur en kaffibollar fimmtudagsins. Eftir hádegisfréttir fór ég að horfa á þætti úr seríunni Station 19. Hef verið að horfa á þessa seríu en undanfarið hafa þættirnir safnast upp, líklega helst vegna þess að ég er að fylgjast með nokkuð mörgum seríum en hef takamarkaðan tíma í annríki daganna til að horfa of mikið. Vil líka heldur eiga einhverjar stundir til að lesa sem og stunda sund, kalda pottinn og sjóinn. En þessa dagana held ég mig heimavið og vona að hálsbólgan gangi sem hraðast yfir og ég komist í vinnu og út fyrir dyr strax eftir helgina. Var komin upp í rúm rétt fyrir níu í gærkvöldi. Las til klukkan að verða hálftíu. Rumskaði fyrst um hálfsex í morgun, eftir átta tíma svefn. Gat sem betur fer sofnað aðeins aftur, þó ekki lengur en tæpa tvo tíma. 

Lasin

Þrátt fyrir að fara extra vel  með mig, drekka heita engiferdrykki og halda mig innan dyra ágerðust hálssærindin og í gærkvöldi var ég komin með nokkrar kommur og farin að hósta að auki. Hálsverkurinn leiðir stundum út í eyru en nefið er alveg laust við hor og get ég andað vel með því sem betur fer því ef ég þyrfti að anda með munninum mundi hálsinn þurrkast upp og ég hósta meira. Fór á fætur um hálfníu leytið í gærmorgun. Slenið hafði engin áhrif á lestur, netvafr og þáttaáhorf og ég hafði líka matarlyst. Las í rúma klukkustund í gærmorgun og dreypti á heitum engifervökva sem ég útbjó sjálf. Á tólfta tímanum hellti ég upp á sterkt kaffi og ristaði mér speltbrauðsneiðar sem ég smurði með hummus, osti og þunnt skornum flúðasveppum. Bjó til samloku úr þessu. Um tvö leytið útbjó ég mér aftur engifervatn. Tíminn var ekkert að láta bíða neitt eftir sér og dagurinn leið frekar hratt. Var komin upp í rúm rétt rúmlega níu. Las um stund en var líklega sofnuð um hálfellefu. Vaknaði upp í hóstakasti um tvöleytið og aftur um fjögur leytið. Ákvað þá að það væri ekkert við í því að skreiðast til vinnu. Rumskaði um sjö í morgun til að senda eftirfarandi skilaboð í vinnuna: 

Með hálsbólgu og hitavelling

hósta líka mikið.

Ekki fær um heilan helling

heima fyrir vikið.

Smá hálsbólga

Ég var mætt í vinnu um hálfátta. Í þetta sinn var ég í bókhaldinu, sú fjórða no. eitt að hlaða inn á vél og troða í, sumarstelpan á móttökuendanum og fyrirliðinn niðri til aðstoðar til klukkan hálftólf. Milli klukkan hálftíu og tíu var kaffi, fundur og þar af leiðandi boðið upp á eitthvað að maula með kaffinu. Að auki átti einn vinnufélagi okkar afmæli í gær og hann kom með tertu af því tilefni. Fyrirliðinn fékk að fara um hálftólf til að sækja yngsta bróður sinn. Þau voru að fara til að vera við útför móðurbróður þeirra. Líkt og í fyrradag þurfti að gefa sér extra tíma í umferðinni. Daglegri framleiðslu lauk rétt fyrir tólf. Eftir hádegi kláraði sumarstúlkan að pakka því sem er að fara í útibú í fyrramálið, við hinar tvær settum af stað þá endurnýjun sem byrjað var að framleiða í fyrradag. Sumarstelpan tók svo aftur við á móttökuendanum þegar hún var búin að pakka. Þá var líka búið að telja allt og rétt fyrir hádegi hafði ég undirbúið allar póstsendingar. Ég tók þá ákvörðun að þar sem það væri eins konar föstudagur skildum við hætta og ganga frá um tvö. Þá var búið að framleiða 750 kort og aðeins rétt rúmlega helmingur af stærstu og síðustu skránni eftir. Hluti af þessari hættu-ákvörðun var reyndar sú að ég þurfti að fara heim með bílinn svo Oddur gæti skutlað systurdóttur minni í banka og svo til Keflavíkur. Var ekki viss hversu lengi ég yrði á leiðinni heim og hversu lengi þau myndu vera. Þetta gekk reyndar allt voða vel og voru þau akkúrat að koma til Keflavíkur þegar Bríet var á leið út úr flugstöðinni að koma heim úr æfingabúðum frá Sviss. Þau gátu sótt hana og hún leiðbeint þeim heim til vinkonu sinnar í Keflavík. Þar fengu þær að vera fram eftir kvöldi og var svo skutlað út á flugvöll af vinkonunni eða mömmu hennar en litla systirin bauð nefnilega stóru systur með sér í brúðkaupsveislu til Póllands. Áður en Oddur lagði af stað til baka frá Keflavík þurfti hann að jafna loftþrýstinginn á dekkjunum en það hefur ekki þurft að gera það síðan sumardekkin voru sett undir og það er nú alveg mánuður síðan það var gert og búið að keyra helling um á þeim tíma.

Aðeins öðruvísi dagur í gær

Ekkert varð  úr yfirsetu í gær, kannski sem betur fer. Framleiðsludagurinn var í stærra lagi, um þúsund kort í heildina og vélin tók smá kast um tíu leytið. Hefðum líklega aldrei getað afhent vélina alveg á réttum tíma. Í staðinn fengum við tækifæri til að byrja á hinum hlutanum á endurnýjuninni sem kom til framleiðslu þann 3. sl. Ég var í sama hlutverki og að auki var ég þeirri fjórðu innan handar um þá hluti í bókhaldinu sem hún hefur ekki þurft að sinna áður. T.d. að undirbúa endurnýjun undir að verða send í póst. Þau rúmlega áttahundruð kort sem voru endurnýjuð í fyrradag fóru út úr húsi í gærmorgun. Hættum framleiðslu og gengum frá niðri um tvö leytið. Sumarstúlkan og sú fjórða fóru að hjálpa til á seðlavélunum uppi en það var rólegt yfir innleggjunum svo við fyrirliðinn máttum stinga af um hálfþrjú. Ég fór í sund en komst ekki alveg beinustu leið vegna lokana. Þurfti samt ekki að fara langan krók og lenti ekki í neinni biðröð. Hringdi í pabba áður en ég fór inn í sundlaugabygginguna. Hafði hugsað mér að synda smávegis áður en kalda potts vinkona mín mætti á svæðið en það var sundkennsla og leikur í útilauginni sem dreifðist á nær allar brautir. Ég notaði þetta sem afsökun til að bíða bara í sjópottinum eftir fyrstu ferðina í þann kalda.

Davíð Steinn sótti Huldu frænku á Reykjavíkurflugvöll um tvö leytið í gær. Það var yndislegt að fá þessa frænku sína í heimsókn. Hún gisti í stofunni í nótt en seint í kvöld fara þær systur saman til Póllands í brúðkaupsveislu til pólskra vina og vinnufélaga Bríetar.

Yfirseta í dag milli tólf og fjögur

Ég var mætt í vinnu um hálfátta í gærmorgun. Þar sem fyrirliðinn sá um bókhaldið í síðustu viku og fyrrum fyrirliði er farin í sumarfrí ákvað ég amk að taka til fyrstu tölur. Þrír af sex sumarstarfsmönnum sem ráðnir verða í sumar eru komnir og ákveðið var að ein af þeim kæmi í kortadeildina. Sú fjórða var einnig með okkur í gær. Við fyrirliðinn höfðum séð það fyrir okkur að hún myndi leiðbeina sumarstúlkunni en rétt áður en allt fór í gang var ákveðið að sú fjórða færi í bókhaldið, fyrirliðinn á ítroðsluendann og ég að leiðbeina á móttökuendanum. Vélin var með mánudagsmótþróa, það þurfti að taka hana niður og framleiðslan hófst ekki fyrr en upp úr klukkan hálfníu og rúmlega það. Engu að síður vorum við búnar að framleiða fyrsta skammtinn og telja um hálftíu. Þá skruppum við í kaffi. Restin af daglegri framleiðslu, einnig það sem kom um ellefu leytið, var klárað um tólf. Eftir hádegi dembdum við okkur í endurnýun og framleiddum rúmlega áttahundruð kort á innan við tveimur tímum. Allan tímann var ég að aðstoða og leiðbeina á móttöku endanum. Ég fékk að stinga af korter yfir tvö og var komin yfir í K2, Katrínartún skömmu síðar. Þar fór fram kveðjuathöfn fyrir sex af vinnufélögum mínum til margra ára. Sá sem var búinn að vinna lengst hjá RB byrjaði 1980 og "unglingurinn" í þessum hættu hóp byrjaði árið sem tvíburarnir mínir fæddust. Þetta voru tvær konur og fjórir menn. Forstjórinn og einn framkvæmdastjórinn voru með yfirlit yfir ýmislegt sem gerðist árin sem þetta fólk hóf störf sem og starfsferilinn hjá RB. Starfsmannafélagið sem og RB vinnustaðurinn leysti fólkið út með blómum, konfekti og gjafakortum. Boðið var upp á kampavín og stærðar rjóma-marsípan tertur. Ég lét mér nægja að fá mér kaffi með minni tertusneið. Fékk að faðma vinnufélagana sem var að kveðja. Einn af þeim vann öll sín 35 ár á K1, Kalkofnsvegi. Úr kveðjuhófinu fór ég beinustu leið í Nauthólsvík. Vorpassinn var runninn út og nú er loksins búið að ákveða að hér eftir verður ekki lengur fríkeypis í sjóinn og aðstöðuna á sumrin. Ég ákvað strax að fjárfesta í árskorti sem kostar 19.200 kr. og mun ég fá það að mestu endurgreitt í gegnum íþróttastyrkinn í vinnunni. Með vorpassanum og árskortinu í sund er ég komin aðeins yfir 65 þúsund kr. þakið. Það var flóð og sjórinn yfir átta gráðum svo ég ákvað að prófa að nota strandskóna. Það virkaði bara nokkuð vel og sjórinn fór ekki að "bíta" fyrr en ég var búin að svamla um í tíu mínútur.

Fjórir vinnudagar í þessari viku

Ég var komin á fætur upp úr klukkan sjö í gærmorgun og í sund áður en klukkan var orðin hálfníu. Það urðu 4 ferðir í kalda, 460m bringusund, 40m skriðsund, ein ferð í sjópottinn, 15mín í gufu og smá "sólbað" áður en ég fór upp úr. Skrapp næst í Krónuna út á Granda. Keypti álfinn í anddyrinu. Vörurnar úr búðinni komust rúmlega hálfa körfu af minni gerðinni. Var komin heim stuttu fyrir ellefu. Gekk frá vörunum, sótti þvott á snúrur, setti í vél í leiðinni og hellti mér svo upp á fyrstu kaffibolla dagsins. Var búin að drekka 3 bolla um eitt og svo ekkert meir þann daginn. Um hálfþrjú leytið skrapp ég í stuttan, tæplega hálftíma göngutúr sem forritið í símanum mældi sem 2,2km. Annars var ég að gera svipaða hluti og á laugardaginn.

Morgunstund fyrir sund

Var komin á fætur tuttugu mínútum yfir sjö í gærmorgun. Korteri áður hafði ég heyrt í N1 syninum fara út úr húsi á leið upp á Gagnveg á helgarvakt. Ég gaf mér tíma til að vafra aðeins um á netinu. Um átta setti ég í þvottavél og fór svo í sund. Fimm ferðir í kalda, 500 metra stund flestar ferðir á bakinu, einu sinni heitasti potturinn, sjópotturinn, 15 mínútur í gufu og smá "sólbað" áður en ég fór upp úr og þvoði mér um hárið. Hitti mikið af fólki, m.a. sjósundsvinkonu mína sem var að koma þegar ég var að fara. Var mætt hjá esperanto vinkonu minni um hálfellefu. Ekkert varð úr esperanto því mestur tíminn fór í heilabrot yfir smá kafla í nýjustu krossgátu bændablaðsins. Kom heim um hálfeitt. Hengdi fljótlega upp úr vélinni. Hellti mér upp á sterkt kaffi og svo leið dagurinn við alls konar. Reyndar greip ég ekkert í prjónanana og það var ekki fyrr en ég kom upp í rúm um ellefu sem ég greip í bók, las þá í um klukkustund. En ég hringdi í Pabba, æskuvinkonu mína, eldri systur dóttur mína og eina fyrrum samstarfskonu mína úr kortadeildinni. Horfði á fótbolta, þætti, mynd og stigagjöfina í söngvakeppninni. Og svo fór einhver tími í það sem sjaldan er skrifað um.

Helgarfrí

Þegar klukkan var tólf mínútur gengin í átta í gærmorgun og N1 sonurinn ekki kominn fram hringdi ég í hann þótt ég sæti inn í stofu. Í ljós kom að hann hafði gleymt að stilla vekjaraklukkuna og fékk smá áfall. Ég var á undan honum út úr húsi og í mína vinnu. Hann sendi mér sms skömmu fyrir klukkan átta til að þakka mér fyrir að ýta við sér. Hann hafði mætt í sína vinna tvær mínútur yfir hálfátta, sem var innan skekkjumarka. Vinnufélaginn var að hugsa um að fara að hringja í hann. Sonurinn fór semsagt í fyrsta skipti í vinnuna á sínum eigin bíl. Þegar hann var að nota strætó þurfti hann að fara út tuttugu mínútum fyrir sjö. Ég var annars á móttöku endanum á vélinni. Taskan með fyrstu framleiðslu var afhent á réttum tíma og þegar við fórum í mat vorum við búnar að vinna upp alla daga til 11. maí. Debetið og hádegisskammtur gærdagsins var svo framleitt milli eitt og rúmlega tvö. Þegar ég fékk að fara rétt fyrir hálfþrjú var aðeins eftir að telja og ganga frá vögnunum.  Ég fór heim, skipti um bol og peysu, fór í nýju kápuna mína og fékk Odd til þess að skutla mér í K2. Þar var viðburðurinn "Kona býður konu". Reyndar bauð ég ekki neinni með mér en þessi viðburður var mjög áhugaverður og ég hitti líka all nokkrar sem ég þekkti. Labbaði heim um fimm leytið og skráði gemsinn á mig 1,5km göngu.

Törn

Við fyrrum fyrirliði vorum komnar niður í framleiðsluherbergi korter fyrir átta. Á tveimur og hálfum tíma náðum við að sópa upp allri morgunkredit framleiðslunni frá því sem út af stóð á mánudaginn, það sem kom á þriðjudag, miðvikudag og það sem var til framleiðslu í gær. Sá sem sækir var til í að bíða þetta korter til að fá allt afhent. Eftir þessa törn skruppum við upp í kaffi og til að fylla á vatnsflöskurnar okkar. Til klukkan tólf vorum við að framleiða debet og hádegiskreditið frá áttunda maí og hluta frá níunda. Eftir hádegi framleiddum við níunda og hluta af tíunda maí. Um tvö byrjuðum við að pakka þessu og framleiddum þá á meðan kort sem ekki fara alla leið á form og í umslög. Hættum og gengum frá upp úr klukkan þrjú og þá stóð út af hluti af tíunda og ellefta sem verður vonandi kláraður með því sem er til framleiðslu í dag. Var komin í sund rétt fyrir fjögur. Hringdi í pabba þegar ég var komin á planið við Laugardalslaug. Davíð Steinn var fyrir austan. Hafði farið með frænku sína á rúntinn og þvoði og bónaði bílinn sinn. Fékk m.a. að nota skúrinn hjá afa sínum. Hann kom svo heim um níu leytið og fer væntanlega á bílnum á vinnuvaktina á dag og um helgina. 

Hinn sonurinn líka kominn með bílpróf

Var vöknuð stuttu fyrir klukkan sex. Morgunrútínan svipuð og flesta virka daga. Mætti í vinnuna um hálfátta. Ég byrjaði á því að fara inn á kaffistofu með prjónana mína, fylla á vatnsbrúsann og fá mér fyrsta kaffibolla dagsins. Skömmu síðar opnaði ég seinni lásinn á hvelfingunni uppi. Um átta var fyrirliðinn búin að taka saman kredit tölur dagsins svo ég fór niður að hlaða þeim inn og öllu öðru sem var komið á vélina. Tilkynnti Indó og Emmu tölur á teams hópinn í kortagerð. Fyrirliðinn og fyrrum fyrirliði fóru innleggin. Þegar ég kom upp aftur var ég aðeins að skoða og garfa í reikningagerðamálunum, aðeins að undirbúa mig undir næstu mánaðamót því sú sem oftast sér um þetta er að fara í mánaðar sumarfrí eftir þessa viku. Eftir kaffi fór ég niður með skiptiblaðið og framleiðslutölur fyrir debetið, fyllti út það fyrrnefnda, klemmdi blöðin saman og setti aftast í debet bunkann. Skömmu seinna kom annar viðgerðarmaðurinn til að reyna að ná þannig sambandi við framleiðsluvélina þannig að við gætum gert eitthvað af kortum. Hinn viðgerðarmaðurinn bættist í hópinn skömmu fyrir hádegi. Til að gera langa sögu stutta þá kom varahluturinn í hús á öðrum tímanum. Eftir tvær auka endurræsingar hrökk vélin í gang og hætti að vera með nokkuð vesen, líka á límmiða módúlnum og umslagavélinni. Allt virkaði. Þá var þó búið að ákveða að vinna ekki yfirvinnu. Staðan verður tekin um hádegið í dag. Við gátum þó klárað það sem við vorum með í gangi á mánudagsmorguninn og smá hluta af debetinu. Fyrirliðinn og fyrrum fyrirliði þurftu að fara um þrjú leytið en kerfisfræðingurinn var með mér síðasta klukkutímann. Hann er með aðgang að hvelfingunni og getur þar að auki sett kerfin á . Klukkan var aðeins byrjuð að ganga fimm þegar við vorum búin að ganga frá niðri. Rétt áður hringdi Davíð Steinn í mig að segja mér að hann hefði náð verklega bílprófinu. Ég var komin í sund um hálffimm. Synti reyndar ekkert að þessu sinni en fór þrjár ferðir í kalda, tvær í heitasta og eina í gufuna. Klukkan var byrjuð að ganga sjö þegar ég kom heim.

Auka færsla um eitt atvik gærdagsins

Klukkutíma eftir að ég kom heim í gær hringdi heimasíminn. Það var Davíð Steinn. Hann var í vinnunni og spurði mig hvort Bríet frænka væri fyrir utan. Ég trítlaði fram á gang og alla leið niður til að útidyrum til að hleypa frænku minni inn. Hún hafði hringt í Davíð Stein og spurt hann hvort hann væri heima. Stormaði framhjá mér, upp stigann og beinustu leið að salernið alveg í spreng. Þegar hún kom fram aftur knúsaði hún mig bæði hæ og bæ því hún var að drífa sig austur á Hellu. 

Uþb einn þriðji búinn af maí

Vaknaði um sex leytið og sat inni í stofu með fartölvuna í fanginu þegar N1 sonurinn kom fram rúmlega hálfsjö. Köstuðum morgunkveðju á hvort annað, mæðginin, eins og við gerum alltaf þessa morgna sem hann er að fara á vinnuvakt, mánudag, þriðjudag og föstudag aðra vikuna og miðvikudag og fimmtudag hina vikuna. Hann er semsagt á frívakt í dag og á morgun og eftir hádegið fer hann í bílprófið. Ég var mætt í vinnu um hálfátta. Þetta var svona allt öðruvísi vinnudagur og ætla ég ekkert að fara nánar út í það í þetta sinn. Var komin í sund um þrjú og búin með eina ferð í kalda og 400 metra sund þegar kalda potts vinkona mín mætti á svæðið. Aldrei þessu vant dýfði hún sér fyrst í kalda pottinn. Fljótlega eftir þetta var lokað inn í gufu vegna framkvæmda og átti ekki að opna þar aftur fyrr en um sex leytið. Við fórum því í sjópottinn eftir mína sjöttu ferð í þann kalda. Ég tók svo eina mínútu í kalda áður en ég fór upp úr og í kalda sturtu áður en ég fór heim. Horfði að hluta af fyrri riðli í söngvakeppninni. Sá m.a. atriðin tvö sem voru eftir að öll 15 voru búin að koma fram með sín framlög. Svakalega flott. Og varð líka vitni að því þegar norðurlöndin þrjú sem voru í þessum riðli komust áfram. 

Beðið eftir varahlutum

Var glaðvöknuð tæpum hálftíma áður en vekjaraklukkan átti að ýta við mér. Slökkti á vekjaranum og dreif mig á fætur. Næsti klukkutími var mjög fljótur að líða og fór að mestu í bloggskrif og netvafr. Mætti í vinnuna um hálfátta. Fyrirliðinn átti tíma í saumatöku um níu og við hinar tvær vissum að hún kæmi ekki fyrr en eftir það. Ég fór niður og kveikti á vélinni á meðan fyrrum fyrirliði tók saman fyrst tölur. Fylltum svo á vatnsflöskurnar og ég fékk mér fyrsta kaffibolla dagsins. Fljótlega eftir að við komum niður kom í ljós að vélin vildi ekki lengur láta plata sig varðandi bráðabirgðaviðgerð á skynjara við annan prentmódúlinn. Gátum framleitt um tuttugu kort af hundraðogsjötíu sem afhenda hefði átt um tíu. Kerfisfræðingurinn kom að hjálpa okkur um níu og svo hringdum við í viðgerðarmann. Þegar ljóst var að hann gat ekki hjálpað í gegnum símann ákvað hann að senda þann sem kemur stundum í yfirferðir til okkar. Sá komst þó ekki alveg á stundinni. Í millitíðinni, létum við vita af seinkun, fórum í kaffipásu og framleiddum þau debetkort sem ekki er prentað aftan á. Eitthvað á annað hundrað kort, öll fyrir sama banka og aðeins ein tegundin af fjórum varð útundan þar sem eitthvað er prentað á bakhliðina á þeim kortum. Viðgerðarmaðurinn kom um ellefu leytið, fékk að skreppa aðeins frá í hádeginu en um hálfþrjú var ákveðið að ekkert væri hægt að gera nema bíða eftir varahlutnum sem hafði verið pantaður með hraði fyrir helgi.

Í gær voru akkúrat sex ár frá því að ég prófaði sjóinn við Nauthólsvík í fyrsta skipti. Það var því upplagt að bjóða fyrrum fyrirliða með mér en hún fór í kælinganámskeið fyrir nokkrum misserum og var búin að eignast sjósundsskó og vettlinga. Í námskeiðinu sjálfu ("Hættu að væla og komdu að kæla") var ekki notast við svoleiðis græjur og námskeiðið fór fram á nokkrum stöðum. Sjórinn var 7,3°C, fjara og við byrjuðum á að vaða aðeinst í áttina að Kópavogi. Eftir eina og hálfa til tvær mínútur fórum við upp úr og löbbuðum landleiðina yfir í víkina. Þar var sjórinn aðeins hlýrri og eftir smá stund bauð samstarfskona mín mér að fara aftur út í þar sem við byrjuðum og ég fer oftast. Ég lét ekki segja mér það nema tvisvar og tíu mínútum seinna hitti ég svo Sillu í heita pottinum. Hún var hæst ánægð með þessa sjóferð. Ég var komin heim um fimm leytið.

Hundraðtuttuguastiogáttundi dagur ársins hafinn

Rumskaði frekar snemma eða um sex leytið í gærmorgun en sofnaði sem betur fer fljótlega aftur. Var komin á fætur skömmu fyrir klukkan níu. Pabbi var kominn fram og var að taka upp úr uppþvottavélinni. Eftir morgunverkin á baðherberginu, sopa af lýsi og glas af vatni með vítamíntöflunum settist ég við tölvuskjáinn í um klukkustund. Um tíu leytið fékk ég mér klementínu og settist svo inn í stofu með bækur og prjóna. Byrjaði á bókinni; Leyniviðauki 4 eftir Óskar Magnússon. Hún er ein af fimm bókum með skilafrest þann 22. maí n.k. sem hægt er að framlengja um 30 daga. Þær þrjár bækur sem ég tók síðast með heim eru með skilafrest til 1. júní og þá líka hægt að framlengja þeim fresti um 30 daga. Fyrir utan þessar átta bækur er ég með nokkrar aðrar, m.a. tvær sem ég tók með mér frá Egilsstöðum, báðar eftir Marian Keyes. Byrjaði að lesa aðra bókina fyrir austan; Vatnsmelóna, svona um það bil að verða hálfnuð með hana. Um ellefu leytið hellti ég upp á kaffi og fékk mér eitt harðsoðið egg. Í hádeginu fékk ég mér skyr með krækiberjum og rúgbrauð með síld. Ég get alls ekki borðað hálfan lítra af skyr í einu eins og pabbi gerir. Efast um að ég hafi tekið nema um einn fimmta úr dósinni sem ég opnaði. Um tvö leytið fékk ég mér örstuttan göngutúr út í Bogatún þangað sem Valur, pabbi Ellu vinkonu, býr núna. Það eru nokkur misseri síðan hann minnkaði við sig og flutti úr Heiðvanginum. Þetta var mín fyrsta heimsókn í Bogatúnið. Valur og Ingibjörg komu að Norðan á húsbílnum um síðustu helgi en þau eru til skiptis á Hellu og Blönduósi þar sem hún á sína íbúð. Hver veit nema ég eigi eftir að heimsækja þau þangað. Þegar ég kom til baka fékk ég mér pönnuköku með rjóma og horfði á það sem eftir var af leik Newcastle og Arsenal. Hafði samt þegið kaffi og sneið af gulrótarköku í Bogatúninu. Um hálfsex kvaddi ég og dreif mig í bæinn. Þoka var á heiðinni en ég var komin heim skömmu fyrir klukkan sjö. Horfði á fréttir og Landann en líka smá part af leik West Ham og Man Utd. og svo á þátt tvö úr fyrstu seríunni af Happy Valley. Var komin upp í rúm um hálftíu og las þá um stund í; Rauður maður/svartur maður eftir Kim Leine.

Þrúþúsundsexhundraðastaogfyrsta færslan

Var vöknuð eldsnemma miðað við að hvorki var virkur dagur né ég á skutlvaktinni. Fór á fætur stuttu fyrir klukkan sjö. Um það leyti sem morgunfréttirnar klukkan átta fóru í loftið var ég að leggja af stað í sund. Fyrsta ferðin af þremur í kalda var tuttugu mínútum síðar. Synti 500m á 25 mínútum, flestar ferðir á bakinu en 100m á bringunni og ca 70m skriðsund. Eftir næstu ferð í kalda fór ég í sjópottinn og hitta þar fyrir yngstu mágkonu mömmu heitinnar. Við spjölluðum saman í dágóða stund. Vorum svo samferða til baka þegar hún fór að synda og ég í mína loka ferð í kalda pottinn áður en ég fór í gufu. Hún fann mig svo aftur í gufunni korteri seinna. Þvoði mér um hárið þegar ég fór upp úr og fór svo beint vestur á Sólvallagötu að hitta esperanto vinkonu mína. Var komin þangað á slaginu hálfellefu. Tæpum tveimur tímum, skál af hafragraut, fjórum kaffibollum og grúsk í nýja símann hennar og bækur, síðar, kvaddi ég og fór heim. Bankaði upp á hjá Oddi og sagði að hann hefði aðeins einnoghálfan til tvo tíma aflögu ef hann vildi fá lánaðan bílinn áður en ég færi austur. Honum tókst greinilega ekki að vakna svo ég sendi sms í Fossheiðina um hálftvö leytið og lauk við að pakka niður. Lagði af stað úr bænum hálftíma síðar. Ákvað að fara Þrengslin til að sleppa við mestu umferðina yfir fjallið. Þar var verið að undirbúa vegaframkvæmdir á stórum kafla og hraðinn tekinn niður í 30km.  Ég komst þetta nú samt og hlýddi öllum skiltum. Tveir bílar tóku framúr um leið og það mátti. Það voru líka greinilega einhvers konar framkvæmdir við og kringum hús tvíburahálfforeldranna. Lagði ekki í að leggja fyrir aftan kerruna í innkeyrslunni þar sem þar að auki lá leiðsla eða slanga úr skúrnum og eitthvert út á gangstétt fyrir framan. En það var pláss við hliðina á gangstéttinni. Fékk svo að vita að nágrannahjón voru að hjálpa til við vorverkin í garðinum og hitti "vinnufólkið" svo þegar því var boðið inn í kaffipásu hálftíma eftir að ég kom. Ásdís lánaði mér eina sokkaprjónsbók og gaf mér aðra. Ég var komin á Hellu um fimm. Bríet og Bjarki voru á svæðinu og það var ákveðið að hafa bleikju í kvöldmatinn um hálfátta leytið (eftir fréttir veður og íþróttir). Gufusauð kartöflur, lauk og rófubita sem meðlæti en steikti bleikjuna upp úr miklu smjöri og setti smá rjóma út í. Unga fólkið sá svo um að vaska upp á eftir en ég settist niður fyrir framan imbann með hvítvínsglas og horfði á síðasta þáttinn af Alla leið, tvo þætti úr sarpinum og byrjun á einni mynd af skjáeinum. Unga fólkið skrapp eitthvað út á lífið. Pabbi fór inn í rúm um hálfellefu leytið, ég var smástund í tölvunni en búin að slökkva á henni og komin inn í rúm um hálftólf.

Maí á hröðu skriði

Mættum tvær í kortadeild til að byrja með. Vélin var svo ósamvinnuþýð að kalla þurfti út viðgerðarmann. Skipta þurfti út skynjara við annan prentmódúlinn. Sá skynjari sem var settur í var ekki alveg rétta tegundin og virkaði ekki fyrr en kerfisfræðingur var búinn að breyta þannig að sama hvort við vorum að nota svartan, hvítan, silfraðan eða gylltan borða taldi vélin/skynjarinn að við værum bara með svartan. Framleiðsla fór í fullan gang um hálftólf svo það varð smá seinkun á afhendingu. Þau einu kort sem eru afgreidd innan dagsins fara venjulega frá okkur um tíu en ég gær var klukkan rúmlega hálfeitt þegar við gátum afhent frá okkur þessi tæpu tvöhundruð kort. Þau rúmlega sjöhundruð önnur nýpöntuð kort voru framleidd og pökkuð á innan við þremur tímum. Búið var að telja, ganga frá og útbúa alla póstmiða um hálffjögur. Föstudagur í lengra lagi og ekki byrjað á endurnýjuninni enn. Fór beinustu leið í Nauthólsvík eftir vinnu. Það var háflóð, sjórinn yfir sjö gráður, smá ferð á logninu og ég svamlaði um í rúmt korter. Um það leyti sem ég var að fara upp úr heita pottinum mættu þrjár úr sjósundshópnum. Gott að hitta aðeins á þær. Ég var komin heim um hálfsex.

Sextugastaogþriðja heimsóknin gekk upp

Vaknaði stuttu fyrir klukkan sex í gærmorgun eftir alveg átta tíma svefn. Var mætt í vinnuna um hálfátta en þá þegar var fyrirliðinn mætt. Hún fór niður að kveikja á vélinni og hlaða inn þeim tölum sem ekki kemur póstur út af. Þegar fyrrum fyrirliði mætti var ákveðið að ég tæki að mér bókhaldið. Ég var búin að fylla á vatnsflöskuna mína og drekka einn kaffibolla og var svo sest við skjáinn tíu mínútum fyrir klukkan átta. Opnaði líka seinni lásinn á hvelfingunni uppi. Fyrstu tölur voru í hærra lagi en þó ekki yfir tvöhundruð, hvað þá þrjúhundruð eins og í fyrradag. Bókhaldið gekk vel og framleiðslan alveg fram að hádegi. Síðastu skránni af daglegum verkefnum var ranglega hlaðið inn og vélin vildi ekki framleiða kortin, kannski sem betur fer því þau fara öll í umslag og við hefðum ekki getað séð að á þau hefði prentast logo sem ekki átti að vera. En þegar skránni var hlaðið rétt inn var eins og vélin tæki mótþróaröskunarkast því þrátt fyrir alls konar tilraunir og dekstur við vélina þá framleiddi hún ekki meira þann daginn og útaf stóðu 6 óframleidd kort og nokkur ónýt. Hvort þetta er einhver alvarleg bilun eða lagast í dag kemur í ljós á eftir. Við gengum frá deildinni um hálffjögur og hættum vinnu.

Ég var mætt í besta bankann um fjögur, hálftíma fyrir skráðan tíma en sagðist ætla að fá mér smá af kaffistofunni þar sem ég var ekki búin að borða síðan um hálftólf. Eftir tvö djúsglös, kaffibolla og rúgbrauð með kæfu, gúrku og osti var ég tilbúin. Sú sem sótti mig tók eftir að síðasta heimsókn hefði ekki gengið upp og ég sagði henni frá að í seinni tíð hefði verið ákveðin kúnst að hitta á æðarnar í mér. Þegar hún var búin að fá að þreyfa á olnbogabótum beggja handa ákvað hún að sækja eina reyndari. Þá konu hef ég samt ekki hitt áður í blóðbankanum. Hún var fegin að fá að standa smástund upp frá verkefnum á bak við tjöldin og það sem meira var að hún treysti sér alveg til að stinga í báða handleggi. Hún valdi samt þann hægri og allt gekk eins og í sögu þannig að ég fékk að leggja inn í þennan banka í gær. Fékk mér annan kaffibolla, hafraklatta, lítinn poka af snakki og annan af salthnetum (tók þann poka með mér heim) og gluggaði aðeins í moggann.

Um hálfsjö labbaði ég upp í Háteigskirkju í nýju sumarkápunni og á nýju skónum og keypti mér inn á 30 ára afmælistónleika Valskórsins sem byrjuðu klukkan átta. Gestur og einsöngvari í nokkrum lögum var Kristjana Stefánsdóttir og einnig komu fram erlendir gestir sem spiluðu nokkur lög á orgel og fiðlu og einn kórmeðlimur með þeim í amk einu lagi á flautu. Dagskránni var stillt þannig upp að kórinn fékk að setjast niður tvisvar sinnum. Í heildina, með uppklappslagi voru tuttugu atriði. Ég skemmti mér vel og tíminn týndist gersamlega. Labbaði heim aftur rétt fyrir tíu og fór ekki í háttinn fyrr en hálftíma síðar. Gaf mér samt tíma til að lesa í hálftíma áður en ég fór að sofa.

Fimmtudags- snemma um morgun

Þó ekki alveg eins snemma og í gærmorgun. Þá var ég vöknuð fyrir klukkan fimm eftir ca sex tíma svefn. Samt var ekkert sérstakt að leita á mig. Var mætt í vinnuna um hálfátta. Fyrirliðinn var í fríi og sú fjórða veik. Sá sem var í afgreiðslunni tók öll kerfin af. Ég byrjaði á því að taka saman fyrstu tölur og prenta út fór svo niður til að kveikja á kortavélinni og "ná í" þær tölur sem við fáum ekki póst um. Eftir að hafa hlaðið þeim inn og skráð á teams-kortahópinn fór ég aftur upp. Opnaði seinni lásinn á hvelfingunni uppi, fyllti svo á vatnsflöskuna mína og fór aftur niður til að hlaða fleiri skrám. Fyrrum fyrirliði kom fljótlega niður með fleiri daglegar tölur og talningablöð. Í millitíðinni kom framkvæmdastjórinn niður með fyrstu tvo sumarstarfskraftana. Hann var að kynna þeim húsakynni, starfsemi og starfsfólk og kynnti þau í leiðinni. Þegar þau fóru að yfir í myntdeildina sóttum við Silla vagnana og lykilinn inn í kortahvelfingu. Hún fór að taka til í fyrsta skammtinn sem var óvenjulega stór eða yfir þrjúhundruð kort. Þegar ég ætlaði svo að setja fyrsta skammtinn af stað, neitaði vélin. Tók vélina alveg niður í smá stund og þegar hún kom upp aftur rauk hún í gang. Vorum að byrja framleiðslu korter yfir átta. Þremur korterum síðar gerðum við hlé til að skreppa á morgunfund sem var settur hálftíma fyrr þar sem framkvæmdastjórinn þurfti á annan fund um hálftíu leytið. Áttum eftir að framleiða um fjörutíu kort en taskan á ekki að vera sótt fyrr en klukkan tíu svo þetta slapp. Á miðviku(funda)dögum er alltaf eitthvað með kaffinu og í gær voru extra veitingar, snittur og tvær tertur, þar sem markmiðum apríl mánaðar hafði verið náð. Það náðist líka að ljúka fyrstu framleiðslu, telja og fara upp með innsiglaða töskuna fimm mínútum fyrir tíu. Debet dagurinn var einnig extra stór eða yfir sjöhundruð kort. Áttum eftir um áttatíu kort af þeim þegar við fórum í mat um hálftólf. Þá var hádegisskráin komin með rúmlega hundrað kortum í en hún var extra stór í fyrradag, þó ekki yfir tvöhundruð. Fyrrum fyrirliði þurfti aðeins að skreppa úr húsi í hádeginu en var komin aftur um eitt. Daglegri framleiðslu, pökkun, talningu og frágangi deildar var lokið um tvö. Við fengum reyndar bæði debet og kredit endurnýjun fyrir einn bankann, hátt í þrjúþúsund kort í heildina. Ég hlóð skránum inn og fyrrum fyrirliði las yfir en þar sem við vorum bara tvær og það átti eftir að klára mánaðamótuppgjörið "lokuðum" við kortadeildinni snemma. Ég fór að fara yfir innlegg og þegar kortauppgjörið fyrir apríl var tilbúið las ég yfir það. Klukkan var aftur farin að ganga fimm þegar ég hætti vinnu. Hringdi í pabba og talaði við hann á meðan ég var á leiðinni yfir í Laugardalslaugina en umferðin á Dalbraut og Sundlaugarvegi er mikil og hæg á þessum tíma. Var svo komin heim um sex leytið.

Morgunhani

Vekaraklukkan þurfti ekki að ýta við mér frekar en oftast áður. Var búin að slökkva á henni amk tuttugu mínútum áður en hún átti að vekja mig. Mætti í vinnuna klukkan hálfátta. Var á móttökuendanum á vélinni. Hlé var gert á daglegri framleiðslu milli klukkan ellefu og hálftvö en þá vorum við þó búnar að framleiða rúmlega átta hundruð kort. Fyrirliðinn og fyrrum fyrirliði fóru ásamt tveimur úr öryggisdeild að farga ónýtum sem og úreltum kortum. Ég kláraði að pakka, "sótti" hádegistölurnar (sem voru næstum 170) og fór svo í mat. Förgunin tók lengri tíma en venjulega þar sem verið var að farga slatta af úreltu plasti. Milli hálftvö og þrjú var dagleg framleiðsla og afgangurinn af nýjustu endurnýjuninni kláruð. Búið var að ganga frá kortarýminu fljótlega eftir það. Þá tók ég að mér að fara yfir innlegg og áður en ég vissi af var klukkan byrjuð að ganga fimm. Fór beinustu leið í sund. Kalda potts vinkona mín var þegar búin að fara þrjár ferðir í þann kalda og tók aðrar þrjár með mér áður en við fórum í gufu. Ég tók svo mína fjórðu ferð í kalda áður en ég fór upp úr. Um sex skilaði ég fjórum bókum á Kringlusafnið. Þrátt fyrir að vera með fimm bækur af safninu og nokkrar aðrar heima tók ég þrjár með mér heim. Hringdi í Davíð Stein áður en ég ók af stað frá Kringlunni og úr varð að ég kippti honum með í Krónuna við Fiskislóð. Ég var aðallega að kaupa inn brauð og álegg en hann var að versla sér í sinn mat. Þegar við komum til baka úr leiðangrinum fékk ég stæði fyrir framan númer 9. Sonurinn tók fyrst sína poka inn en kom svo aftur og hjálpaði mér með mína poka þar sem ég var þar að auki með bakpoka, sundpoka og bókasafnspoka.

Fjórir virkir dagar framundan

Þrátt fyrir að ég væri komin á fætur um sjö leytið og að það opnaði í sund í Laugardalslaug klukkan átta var klukkan að verða níu þegar ég mætti þangað. Í anddyrinu mætti ég fyrrum vinnufélaga, hann að koma úr sundi ég að mæta. Var búin að spjalla við hann í hátt í tíu mínútur þegar sr. Pétur kom úr sundi. Yfirleitt fer hann nú í Vesturbæjarlaugina en sú laug og fleiri voru lokaðar í gær þannig að það var dágóður slatti af sundgestum í Laugardalnum sem mætir reglulega í aðrar laugar. Byrjaði á kalda pottinum sem enn er dásamlega kaldur eða undir 7°C. Næst lá leiðin í sjópottinn í dágóða stund. Eftir aðra ferðina í þann kalda var ég að spá í að velja mér braut til að synda á. Það var alveg pláss í lauginni en mér fannst samt heldur margir fyrir minn smekk, akkúrat á þeim tímapunkti svo ég fór í heitasta pottinn. Eftir næstu ferð í kalda fór ég í gufuna. Svo kalda sturtu og aftur í kalda. Svo settist ég einfaldlega á stól og fór í smá sólbað. Það endaði semsagt með því að ég "skrópaði" í sjálft sundið. Var komin heim upp úr klukkan hálfellefu. Hellti upp á sterkt kaffi. Einhvern veginn flaug svo dagurinn við alls konar og ekki neitt. 

Frídagur verkalýðsins

Einn þriðji liðinn af árinu sem byrjaði fyrir svo stuttu síðan. Ég var komin á fætur um sjö í gærmorgun. Hafði góðan tíma til að vafra um á netinu því N1 sonurinn átti ekki að vera mættur fyrr en um hálftíu. Korter yfir níu kom sonurinn fram og skömmu síðar fór ég sennilega í mína síðustu skutlvakt og æfingaakstur með honum. Ökukennarinn er með bókina svo það er ekki á það hættandi að fara mikið á rúntinn þegar hún er ekki meðferðis. Ég fór beinustu leið í Laugardalslaugina og hitti strax á kalda potts vinkonu mína. Við fórum fimm ferðir í kalda og ég fjórar í þann heitasta áður en við fórum í gufu. Sjósundsvinkona mín fann mig í gufunni. Hún kom þangað bara til að hitta aðeins á mig. Eftir gufuferðina fór ég í kalda sturtu og svo hittum við eina systur kalda potts vinkonu minnar í sjópottinum. Sjósundsvinkona mín og maðurinn hennar komu þangað skömmu síðar og eina af þeim Sigrúnum sem ég hitti reglulega í sundi, þær eru amk fjórar sem ég hitta þar mis reglulega. Fór sjöttu og síðustu ferðina í þann kalda, sem var 6,5°C, og settist svo smá stund á stól og bakaði mig í sólinni. Var komin heim um hálftólf. Hellti upp á kaffi og fékk mér hressingu. Kveikti á útvarpinu í gegnum sjónvarpið. Hlustaði á hádegisfréttir en um eitt skipti ég yfir á eina sportrás sjónvarps símans. Ætlaði að skreppa í smá göngutúr um miðjan dag en fór ekkert út aftur því það var annar fótboltaleikur seinni partinn og landsleikur í handbolta á sama tíma. Annars var ég líka að prjóna og lesa. Er búin með þær bækur sem þarf að skila 2. og 5. maí og byrjuð á einni af þeim sem eru með skilafrest til tuttugugastaogannan maí og hægt er að framlengja um 30 daga eftir það; Fíkn eftir Rannveigu Borg Sigurðardóttur. Er líka með bókina Tálsýn eftir sama höfund og þrjár aðrar, eina mjög þykka.

Síðasti dagurinn í apríl

Hafði stillt vekjarann á hálfátta sem getur samt ekki gengið upp þegar ég er á skutlvaktinni því N1 sonurinn á að vera mættur upp á Gagnveg um það leyti til að undirbúa opnun. Ég vaknaði hins vegar rétt rúmum klukkutíma fyrr eða tuttugu mínútum yfir sjö. Var smá stund að átta mig en komst fljótlega í rétta gírinn. Slökkti á vekjaranum og fór á fætur. Hafði tíma til að setja inn færslu á þessum vettvangi og vafra aðeins um á netinu. N1 sonurinn kom fram úr sínu herbergi í þann mund sem ég sendi honum sms þar sem ég bauð honum góða daginn og ætlaði í framhaldi að spyrja hvenær hann ætti að vera mættur. Þá var klukkan korter yfir sjö. Tíu mínútum seinna lögðum við af stað á mínum bíl, hann undir stýri og æfingaaksturs skiltið á skottlokinu. Rúmum tuttugu mínútum síðar þáði ég kaffibolla út í bíl. Var komin á planið við sundlaugina í Laugardalnum átta mínútum fyrir opnun. Sat út í bíl til rúmlega átta. Kláraði kaffið og hlustaði á morgunfréttir. Fór beinustu leið í kalda pottinn sem var að þessu sinni tæpar 6°C. Sat þar í um þrjár mínútur áður en ég fór á brautir sjö og átta og synti 500 metra. Flesta á bakinu líka um 120m skriðsund og 50m bringusund. Fór tvisvar í viðbót í þann kalda, einu sinni í sjópottinn, tíu mínútur í gufuna og sat svo smá stund á stól áður en ég fór inn að þvo á mér hárið. Kom heim um hálfellefu og hellti mér upp á 3 bolla af sterku kaffi. Var búin að drekka þá alla um tólf. Hellti ekki aftur upp á. Var m.a. að prjóna og lesa; Þessu lýkur hér eftir Colleen Hoover. Um þrjú skrapp ég aðeins út í göngu. Labbaði út á Klambratún og fékk mér sæti á bekk innan garðsins skammt frá þar sem beygt er af Miklubrautinni inn á Rauðarárstíg. Gangan þangað tók mig ellefu mínútur og var rétt innan við kílómetri. Tók ekki tímann hversu lengi ég sat en þegar ég hélt áfram fór ég undir brúna við Snorrabraut, yfir brúna yfir Miklubraut, framhjá Valsheimilinu, undir brúna á Bústaðavegi, meðfram Flugvallavegi yfir Skógarhlíð, göngustíg að Eskihlíð og þar settist ég á bekk eftir tuttugu mínútna göngu og 1,6km. Leiðin heim af bekknum var það stutt að sá spölur skráðist ekki en ég kom heim skömmu fyrir klukkan hálffimm.

KK og karlakór

Slökkti á vekjaranum amk hálftíma áður en hann átti að ýta við mér. Var þá búin að sofa í tæpa sex tíma. Mætti í vinnuna um hálfátta. Ég var á ítroðsluendanum á vélinni og fyrirliðinn á móttökuendanum. Vorum langt komnar með daglega framleiðslu þegar við fórum í kaffi um hálftíu. Fyrrum fyrirliði var í bókhaldinu en hún kom með mér niður í framleiðsluna milli tíu og ellefu á meðan fyrirliðinn fór á fund. Framleiddum m.a. tvær skrár af þremur sem eftir er af endurnýjuninni, um tvö hundruð kort. Hádegisskammturinn var innan við áttatíu kort. Framleiddum ekkert eftir hádegi heldur sinntum ýmsu tengdu mánaðamótunum og hættum svo vinnu snemma. Ég var komin í sjóinn um hálffjögur. Kom heim um hálffimm og hálftíma seinna hringdi fyrirliðinn í mig og bauð mér að koma með sér, parti af fjölskyldu hennar og fyrrum fyrirliða á tónleika í Salnum. Hún og sú síðast nefnda sóttu mig um hálfátta og þá hafði losnað einn miði til. Ákveðið var að hringja í þá sem við fyrrum fyrirliði vorum heima hjá á fimmtudagskvöldið. Sú var til en fyrirvarinn var það stuttur að hún missti aðeins af byrjuninni. Yngsti bróðir fyrirliðans syngur með karlakór, Þrestir úr Hafnarfirði (þau systkynin eru samt frá Stóru-Mörk) sem stjórnað er af Árna Heiðari Karlssyni og þeir fengu KK í lið með sér. Foreldrar og hluti af systkynahópnum kom á tónleikana en við þrjár auka fengum miða fjölskyldumeðlima sem forfölluðust. Það var þvílík heppni því þessir tónleikar voru mjög skemmtilegir. Ég var komin heim aftur um hálfellefu.

Fimm Dimmalimm og Inga

Það var amk tíu sentimetra snjór sem huldi bílinn minn í gærmorgun og það þurfti bæði að sópa og skafa. Ökufærið í vinnuna var samt í góðu lagi þrátt fyrir að ég væri komin á sumardekkin. Var mætt rétt rúmlega hálfátta. Vel var tekið á móti mér en ég spurð í gríni hvort það væri ég sem hefði komið með þennan snjó frá Egilsstöðum. Þar snjóaði vissulega aðeins á þriðjudaginn var en alls ekki svona mikið. Ég var á móttökuendanum á vélinni. Framleiðsla og pökkun gengu vel og allt daglegt var búið korter fyrir tólf. Um hádegisbilið var síðasta endurnýjun mánaðarins send til okkar, innan við ellefuhundruð kort. Framleiddum hátt í þriðjunginn af henni en hættum samt og gengum frá um tvö. Ég fór fljótlega í sund, synti 400 metra (þar af 50 á skriðsundi) fór 2x4 mínútur í kalda, smá stund í sjópottinn og rúmar tíu mínútur í gufu. Heitasti potturinn var lokaður. Á leiðinni heim kom ég við í Hagkaup í Skeifunni, sem ég geri örsjaldan.

Sá sem á risíbúðina hefur verið að reyna að selja hana og hann vantaði nýja yfirlýsingu frá húsfélaginu. Ég var búin að kíkja inn á fyrirtækjabankann og skrifa niður hjá mér hver staðan væri. Prentaði út tómt skjal frá fasteignasölunni í vinnunni í gærmorgun. Lauk við að fylla út og fékk fyrrum fyrirliða til að lesa yfir í hádeginu áður en ég skannaði skjalið inn og sendi á eigandann. Honum fannst hlutur risíbúðarinnar í yfirstandandi framkvæmdum. Þegar ég fór að skoða málin betur fékk ég hálfgert áfall. Ég hef ekki breytt neinum hlutföllum síðan ég neyddist til að taka við gjaldkerakeflinu og taldi að það væri aðeins munurinn á milli minnar íbúðar og nágrannanna fyrir neðan síðan ég seldi þeim skúrinn sem ég hef ekki enn breytt. Veit að sama hvernig hlutföllin eru þá á mín íbúð þann pening í sjóðnum sem ég hef borgað hvort sem ég greiði 30% hlutfall eða minna. Þegar ég lagðist yfir eignaskiptasamninginn frá því 2014 uppgötvaði ég að risíbúar hafa alla tíð verið að greiða of lágt en kjallaraíbúar of hátt, að það hafi víxlast hlutföllin hjá þeim. Hlutfallið af heildinni hef ég samt alltaf reiknað rétt, hvernig sem á því stendur. En þessi víxlun verður örugglega til þess að ég lagfæri málin. Ætla að leyfa mér að gera ráð fyrir að tilvonandi kjallaraíbúar verði bara ánægðir með að eiga meira en minna og að hússjóður lækki. Núverandi risíbúi var meira hissa á þessu og alls ekki pirraður og ég slapp við að skrifa skjalið aftur þar sem upplýsingarnar um eign í hússjóð og hlutfall í heildinni eru réttar.

Klukkan rúmlega sjö sótti fyrrum samstarfskona mín mig og við vorum mættar hjá annarri sem var að vinna með mér þar til í október sl. Fyrrum fyrirliði mætti rétt á eftir okkur og svo bættust við ein sem byrjaði í kortadeildinni seint árið 2005 og sú sem réð okkur allar á sínum tíma. Vorum sex í heildina með húsráðanda og tíminn hreinlega flaug. Þegar mér datt í hug að kíkja á hvað tímanum liði "hálftíma" eftir að við mættum var klukkan byrjuð að ganga tólf. Það var erfitt að kveðja en við fimm sem erum í hópnum vonumst til þess að fá Ingu inn í hann líka eða amk að hún hitti okkur aftur í einhverjum að næstu hittingum sem hingað til hafa verið frekar óreglulegir en verða kannski á einhverra mánuða fresti í framtíðinni. Kom heim upp úr klukkan hálftólf en las þrátt fyrir það í rúman hálftíma í bókinni; Arnaldur Indriðason deyr eftir Braga Pál Sigurðarson.

Það snjóar

Var komin á fætur upp úr klukkan sjö í gærmorgun. Um átta leytið lét ég sjósunds vinkonu mína vita að ég ætlaði í sjóinn klukkan ellefu og kalda potts vinkonu mína að ég kæmi ekki í sund þennan daginn. Ég fer sjaldan í sjóinn á miðvikudögum en þar sem ég komst ekki á mánudaginn og ég var þar að auki búin að fletta því upp að það væri flóð um hádegisbilið þá togaði sjórinn meira í mig heldur en sundið. Hringdi í Lilju vinkonu um níu leytið. Hún er aðeins byrjuð að "stelast" niður á torg, amk þrjá daga, fór reyndar ekki í gær, en hún er búin að greiða fyrir aðstöðuna frá 1. maí n.k. og í fimm mánuði. Einhver ein var búin að greiða fyrir apríl mánuð líka og byrjaði þrátt fyrir að aðstaðan kæmi ekki upp fyrr en eftir miðjan mánuðinn. Á þessum fáu dögum seldi Lilja fyrir um hundrað þúsund krónur. Davíð Steinn kom á fætur um níu leytið og var tilbúinn þegar hann var sóttur í ökumat af manni sem er að leysa ökukennarann hans af, um tíu. Ég hellti mér upp á kaffi og fékk mér eitthvað að borða því enginn skal fara í sjóinn á fastandi maga. Bílastæðin við Nauthólsvík voru næstum því full en það voru ekki margir í þeim bílum að fara í sjóinn heldur voru bílstjórarnir í HR og það þótt það séu nóg af stæðum sem eru merkt stofnuninni á meðan þessi eru merkt Nauthólsvík. Ég fann eitt sem betur fer eitt stæði og sjósundsvinkona mín annað þegar hún kom. Var mætt aðeins fyrir ellefu og þá var þar þegar kominn þrír árgangar úr skóla í Breiðholti, 5.-7. bekkur ásamt nokkrum kennurum og stuðningskennurum. Þegar aðstaðan var opnuð og við vinkonurnar búnar að klæða okkur í sjósundsfatnaðinn og skilja hin fötin okkar eftir í körfu upp í hillu og skóna undir öðrum bekknum fórum við beinustu leið út í 6°C sjóinn. Vorum þar í um korter og svo næstum þrjú korter í heita pottinum á eftir. Höfum alltaf svo mikið að spjalla um að við gleymum okkur alveg. Kom heim um hálfþrjú og bankaði upp á hjá Davíð Steini því hann var líka kominn heim. Hann sagðist hafa verið metinn tilbúinn í verklega prófið en það er ekki tími í það fyrr en 10. maí. Sá sem sótti hann í gær mun fylgja honum eftir og þeir ætla að hittast einu sinni eða tvisvar fyrir þann tíma. Ökutímarnir sem sonurinn er búinn að taka eru alls ekki margir en þó eitthvað rúmlega tíu. Ná þó ekki einhverjum viðmiðum en það verður fiffað til að mér skilst. Afgangurinn af deginum fór í alls konar en leið þó án þess að ég skryppi aftur út.

Komin heim, síðasti frídagurinn framundan

Vaknaði um hálfsjö. Gerði tilraun til að kúra mig niður aftur en ákvað svo fljótlega að fara á fætur. Þannig náði ég ágætri morgunstund með Ellu og Aðalsteini áður en þau þurftu að fara í vinnu. Þegar þau voru bæði farin sótti ég fartölvuna og setti hana upp við endann á eldhúsborðinu. Klukkan var rétt rúmlega níu. Líkt og daginn áður fór drjúgur tími í blogg og netvafr. Held þó að ég hafi verið aðeins styttra en það getur varla hafa verið margara mínútur. Mesta lagi korter styttri tími. Hjónin komu heim í hádegismat um hálftólf. Aðalsteinn stoppaði í klukkustund en Ella þurfti ekki að fara neitt aftur því það féll niður tími í sjúkraþjálfun hjá henni. Í staðinn gerði hún æfingar heima þegar hún var búin að slaka vel á fram yfir hádegi. Dagurinn leið alltof hratt þrátt fyrir að við værum mjög slakar. Um miðjan dag spurði Ella hvernig mér litist á að skreppa út að borða ca klukkutíma áður en ég þurfti að vera mætt út á flugvöll. Mér leist vel á það. Um fimm leytið var ég búin að pakka niður farangrinum mínum í ferða tösku og bakpoka. Pabbi hennar Ellu hringdi í hana um það leyti. Hann er búinn að vera á Blönduósi undanfarið en um næstu helgi er hann að fara í sextíu ára útskriftarafmæli frá Hvanneyri um næstu helgi. Ella lét svo Aðalstein vita að við værum að fara út að borða um hálfsex. Hann var að vinna til sex og svo á leið á blakæfingu inn á Reyðarfjörð fljótlega eftir kvöldmat. Við vinkonurnar vorum komnar á Salt rúmlega hálfsex. Hún pantaði sér kjúklingasallat en ég brauðlausan hamborgarar með sætkartöflum, sallati og bernessósu og eitt vínglas með. Rétturinn minn heitir "Sá beri". Við vorum alveg slakar en þegar ég var búin með skammtinn minn og hún var orðin södd af sínum skammti var klukkan að verða hálfsjö. Hún keyrði mig út á flugvöll og kvaddi mig fyrir utan um tíu mínútum síðar. Fór með ferðatöskuna í innritun, settist svo niður og las í smá stund. Kalla átti út í vél korter yfir sjö en það tafðist um nokkrar mínútur. Var komin til Reykjavíkur rúmlega hálfníu. Oddur hafði lagt bílnum í stæðin svolítið frá flugvellinum en kom svo akandi að í þann mund sem ég kom út úr flugstöðinni með töskuna í eftirdragi og bakpokann á annarri öxlinni. Davíð Steinn var kominn heim úr sinni vinnu en var kominn í einhvern tölvuleik lokaður inn í sínu herbergi. Oddur hafði verið í pásu í sínum leik en hvarf strax inn í herbergið sitt þegar við komum heim. Ég gekk frá farangrinum mínum og settist svo inn í stofu. Fyrst horfði ég smástund á brot úr þætti svo tók ég fram fartölvuna. Var komin upp í rúm að lesa um hálfellefu leytið.

Gott að vera í smá fríi

Þegar ég kom á fætur upp úr klukkan sjö í gærmorgun sat vinkona mín í stólnum sínum inn í stofu en maðurinn hennar var í ræktinni. Hann var þó kominn heim áður en Ella þurfti að fara í sína vinnu rétt fyrir átta. Hún fór á bílnum með göngugrindina með sér. Sýndi mér það í fyrradag að eitt fatlaða stæðið sem er alveg við innganginn inn í skólann er líka við leiksvæði krakkanna og alveg við hjólagrindurnar sem þau leggja hjólunum sínum þannig að hún vill helst ekki leggja bílnum þar svo það er aðeins lengri spölur sem hún þarf að labba áður en hún kemst inn í anddyri í hjólastólinn sinn. Þegar veðrið og færið verður betra getur hún farið á rafskútunni sinni. Þá fer hún inn á öðrum stað þar sem t.d. eru hjólagrindur fyrir kennarana sem eru á hjólum. Aðalsteinn fer í sína vinnu um níu. Ég fékk mér kaffibolla um hálfátta og settist svo með prjóna og bækur í stólinn við stofugluggann. Um níu leytið náði ég í fartölvuna og kom mér fyrir við endann á eldhúsborðinu til að setja inn færslu og vafra aðeins um á netinu. Ætlaði aðeins að vera að í um klukkustund en það teygðist aðeins meira úr tímanum. Einn tími varð næstum að tveimur. Ég var þó búin að ganga frá fartölvunni aftur áður en hjónin komu heim í mat um hálftólf. Ella var búin að segja mér að það væri svo kennarafundur milli hálfþrjú og fjögur. Ég var ákveðin í að skreppa í sund á þessum tíma og hún spurði mig hvort ég vildi fá far aðra hvora leiðina. Ég ákvað að labba amk í sundið og sjá svo til. Ég var 15 mínútur að ganga þennan spöl, 1,2 km. Fór meira að segja aðeins styttri leið heldur en í göngutúrnum með vinkonu minni í fyrradag. Synti í tuttugu mínútur, líklega um 500 metrar og 100 af þeim á skrisundi. Fór tvisvar í kalda pottinn, einu sinni í heitari pottinn, einu sinni í gufu og einu sinni í kaldari pottinn. Ekkert í vaðlaugina eða rennibrautina en sat smá stund á bekk og í stól. Klukkuna vantaði tuttugu mínútur í fjögur þegar ég var komin upp úr. Kennarafundurinn var búinn og Ella farin heim en hún hafði sent mér skilaboð um að hún gæti sótt mig ef ég vildi. Ég ákvað að fara aðeins aðra leið til baka sem reyndist 1,5 km og var ég 22 mínútur að ganga hana. Ella benti mér á að ég gæti hengt handklæðið og sundbolinn út á snúru í smá stund sem ég gerði. Um fimm leytið færði ég það svo inn á handklæðaofn í sturtunni. Fljótlega eftir það hjálpuðumst við vinkonurnar við að útbúa kvöldmatinn. Ég skar niður afganginn af lærinu, hún setti upp hrísgrjón og afganginn af sósunni í annan pott ásamt rjóma. Þar í setti ég svo kjötið þegar ég var búin að bita það niður. Kvöldmaturinn var tilbúinn þegar maðurinn hennar kom heim úr vinnunni rétt upp úr klukkan sex. Hann skrapp svo á blakæfingu um sjö en hann er að fara að taka þátt í öldungamóti á Akureyri um næstu helgi. Við Ella horfðum á fréttir þar til körfuboltaleikurinn Þór Þorlákshöfn-Valur byrjaði. Hörku leikur og þrátt fyrir að væri jafnt eftir fyrsta leikhluta var Valur alltaf að elta fyrir utan að þeir skoruðu fyrstu körfuna. Niðurstaðan tíu stiga tap fyrir mína menn og þeir eru 0:2 undir í baráttunni um að komast í úrslita leikinn. Það þarf að vinna þrjá leiki til að komast þangað svo þetta er orðið strembið verkefni. Ég fylgdist einnig með gangi mála í 3. umferð bestu deildar karla, seinni þrír leikirnir af sex spilaðir í gærkvöldi. Ég fór í háttinn um hálfellefu og las í smá stund áður en ég fór að sofa.

Dagur 2 af fjórum virkum sumarfrís dögum

Ég var vöknuð um sjö í gærmorgun og komin á fætur hálftíma síðar. Aðalsteinn kom fram skömmu síðar og setti upp hafragraut fyrir rúmlega þrjá og Ella kom fram um átta. Hafragrauturinn kláraðist og það var að hluta til mér að þakka því ég fékk mér tvisvar í skálina og í seinna skiptið kláraði ég úr pottinum. Svo var kominn tími til að fá sér fyrsta kaffibolla dagsins. Aðalsteinn ætlaði að skreppa í smá sexhjólaleiðangur inn á einhverja heiðina með einum til um tíu leytið. Hér má keyra sexhjólin út úr bænum. Hann fór um níu leytið að fylla á tankinn á sexhjólinu og kaupa sér nesti í ferðina. Hann kom svo aftur heim þar til kunninginn hafði samband. Við Ella sátum í stofunni að spjalla, drekka kaffi og fylgjast með einhverju í sjónvarpinu inn á milli. Ég er búin að fitja upp á nýrri tusku og ég var líka með bækur á kantinum, skammtímalánsbókina Hungur og Saknaðarilmur eftir Elísabetu Jökulsdóttur, bók sem ég gaf norsku vinkonu minni í jólagjöf og er með í láni frá henni. Um tíu kvaddi Aðalsteinn. Hann kom reyndar aftur um ellefu. Sexhjól kunningjans hafði bilað áður en þeir gátu lagt af stað. Einn nágranni þeirra hjóna sem ekki er vanur svona ferðum en á sexhjól hafði hitt á Aðalstein og þeir ákváðu að skreppa í styttri ferð á hjólunum upp úr hádeginu. Í hádeginu fengum við okkur afgang af hakkrétt frá kvöldinu áður ásamt spældum gæsa eða andaeggjum (man ekki hvort) sem Aðalsteinn pantar og kaupir reglulega af einum vinnufélaga sínum. Mjög gott. Fljótlega eftir hádegi dró ég fram fartölvuna hans Davíðs Steins sem ég er með í láni og tók með í ferðalagið. Stillti mig inn á heimanetið bæði á fartölvunni og einnig á gemsanum mínum. Ella fór að gera styrktaræfingar á stofugólfinu ég setti inn færslu dagsins um laugardaginn. Um tvö var ég búin að ganga frá tölvunni aftur eftir að hafa einnig vafrað aðeins um á netinu. Horfðum á fyrri hálfleikinn í leik Tottenham og Newcastle. Staðan var fimm núll síðarnefnda liðinu vil í hálfleik. Þá ákváðum við vinkonur að taka stuttan göngutúr, ég á mínum tveimur jafnfljótum og hún á rafskútunni sinni. Hún sýndi mér eina gönguleiðina að sundlaug Egilsstaða og við gengum í eins konar hring því við fórum alls ekki sömu leið til baka. Þessi hringur var um 2,2 km. Þegar við komum til baka var staðan í leiknum 6:1 Newcastle í vil og leikurinn endaði þannig að það var jafntefli í seinni hálfleik. Ég hjálpaði Ellu að krydda lamabalæri, setja í ofnpott, lokið á og inn í ofn. Aðalsteinn kom heim stuttu síðar, eftir rúmlega tveggja tíma ferð aðeins inn á heiði. Hann var svo upptekinn við að leiðbeina nágrannanum og keyra mjög ábyrgt að hann missti af að sjá hreindýrahjörð ofar í heiðinni sem nágranninn tók eftir. Um hálfsex skar Aðalsteinn kartöflur niður í báta, setti í eldfast form með olíu í botninn, kryddaði og setti inn í ofn. Svo útbjó hann sósu. Nokkru áður hafði hann skroppið í búðina til að kaupa rauðkál og grænar baunir. Borðuðum  upp úr klukkan sex, mjög gómsætt læri og meðlæti. Kvöldið fór í spjall, þátta og íþróttakeppnis áhorf. Ég fór inn í rúm rétt á eftir Ellu skömmu fyrir ellefu og las um stund áður en ég fór að sofa. Er búin með bókina hennar Elísabetar og langt komin með hina, klára þá bók líklega í dag.

Á Egilstöðum, dagur einn af þremur

Samkvæmt venju mun færsla dagsins vera um gærdaginn. Þrátt fyrir að það væri laugardagur var ég vöknuð um eða fyrir klukkan sjö. Hafði stillt vekjaraklukkuna á rúmlega hálfátta því ég var ákveðin í að fara í sund fljótlega eftir að laugin væri opnuð. Um hálfátta leytið var ég sest með fartölvuna í fanginu í stofusófanum og það fór nú svo að ég var að vafra um á netinu í rúma klukkustund. Klukkan var byrjuð að ganga tíu þegar ég fór fyrstu ferðina í kalda pottinn. Synti svo 400 metra, þar af heila 50 skriðsund í lokin. Eftir aðra ferðina í þann kalda var ég á leið í gufu þegar ég rakst á sjósundsvinkonu mína og manninn hennar í nuddpottinum. Kastaði aðeins kveðju á þau og hitti þau svo í sjópottinum eftir 15 mínútur í gufunni og kalda sturtu. Við Helga Rún fórum svo saman í þriðju og síðustu ferðina mína í kalda pottinn. Það urðu fimm mínútur og svo settist ég aðeins í "sólbað" áður en ég fór upp úr og heim. Kom heim um ellefu leytið og hellti mér upp á kaffi. Fékk mér svo eitthvað snarl um tólf leytið. Fljótlega eftir það kom Davíð Steinn fram og við fórum á rúntinn. Á klukkutíma æfði hann sig m.a. í hraðabreytinum og að taka af stað í brekku. Þegar við komum til baka rétt fyrir tvö fór ég að pakka niður af alvöru. Notaði töskuna sem Lilja vinkona gaf mér þegar ég var á leiðinni frá henni á Kanaríeyjum fyrir rúmum fjórum árum og svo bakpokann sem Davíð Steinn lánaði mér í ferðina til Kaupmannahafnar í síðasta mánuði. Var búin að tékka mig inn kvöldið áður og þurfti bara að afhenda töskuna til innritunar. Horfði á fyrri hálfleikinn í leik Liverpool og Nottingham Forrest og aðeins byrjunina á þeim seinni. Oddur Smári skutlaði mér út á flugvöll um hálffjögur. Það hefði alveg verið nóg fyrir mig að vera mætt þangað tíu mínútum eða korter fyrir fjögur en ég var orðin ferðaspennt og var alveg sama þótt ég þyrfti að bíða smá áður en var tékkað inn í flugvélina. Fórum í loftið korter yfir fjögur og lentum á Egilsstöðum rétt rúmum klukkutíma síðar. Ella og Aðalsteinn tóku á móti mér og hann sótti töskuna mína á færibandið og svo eru þau hjónin komin með smá stuðningsdæmi fyrir Ellu. Hún var aðeins með stafinn sinn, bíllinn á stæði fyrir fatlaða svo það voru ekki mörg skref þangað en samt nógu mörg fyrir hana. Studdi því sig við manninn sinn með vinstri og stafinn með hægri. Þetta er mín fyrsta heimsókn til þeirra síðan fyrir Covid og í millitíðinni eru þau búin að selja húsið við Hamrahlíð og flutt í parhús við Litluskóga. Það eru tæp þrjú ár síðan þau fluttu. Fljótlega eftir að við komum á nýja staðinn var mér boðið kaffi eða hvítvínsglas. Auðvitað þáði ég hvítvínsglasið. Áttum notalega og mjög skemmtilega kvöldstund sem var alltof fljót að líða. Ég fór inn að sofa um miðnætti. Gerði þó heiðarlega tilraun til að lesa nýjustu bókina hans Stefáns Mána um Hörð sem er skammtímaláns bókin af safninu.

Flugferðalag austur framundan

Miðað við að vera í fríi vaknaði ég í fyrra fallinu svona á föstudags virkum morgni. Gaf mér tíma til að vafra um á netinu en var komin í sund um átta leytið. Eftir tvær ferðir í kalda og nokkra stund í sjópottinum synti ég 400 metra, flesta á bakinu, á braut átta áður en ég fór í þriðju og síðustu ferðina í þann kalda. Gufan var lokuð svo ég settist um stund í sólbað og spjallaði við eina af Sigrúnunum sem ég hitti reglulega í Laugardalnum. Þvoði mér um hárið þegar ég var á leiðinni upp úr og var næstum búin að tína sundhettunni því ég hafði gleymt henni hjá handlaugunum við salernisaðstöðuna. Það voru tvær athugular konur sem sáu einmana sundhettu og fóru að kanna málið. Þá var ég að þurrka mér og ekki búin að uppgötva að sundhettan var ekki með sundbolnum og sjampóbrúsanum. Á föstudagsmorgnum er kaffibrúsinn settur fram og ekki þarf að greiða fyrir bollann. Ég sá tvær konur sem ég þekkti að drekka kaffi við eitt borð. Oftast eru þær fjórar vinkonurnar á sama tíma í sundi en núna voru það bara ein sem söng með mér í KÓSÍ kórnum og ein af Sigrúnunum sem ég þekki. Fékk mér kaffi, settist hjá þeim og spjallaði um stund. Var komin heim um ellefu. Davíð Steinn kom á fætur klukkustund síðar en hann var á leiðinni út að borða um tólf. Þegar hann kom til baka úr þeirri ferð fórum við í tveggja tíma æfingaakstur. Fórum beinustu leið í Kringluna. Hann beið út í bílnum sínum á meðan ég fór í bókasafnið, skilaði sex bókum af níu og fékk mér sex aðrar. Fjárfesti í tvenns konar bókasafnspokum í leiðinni. Þetta tók innan við korter. Næst lá leiðin í Krónuna við Fiskislóð. Verslaði smá inn. Svo keyrðum við út að Gróttu, um Seltjarnarnesið, vestubæinn meðfram ströndinni að flugvellinum. Fórum að Nauthól og á stæðunum við HR æfði hann sig í að bakka í stæði. Komum heim um fjögur leitið. Hann sá svo um að útbúa kvöldmatinn síðar um kvöldið. Ein af þeim þremur bókum sem ekki var skilað á safnið í gær er: í trúnaði eftir Héléne Grémillon. Kom út á íslensku árið 2013. Lætur lítið yfir sér en er þó yfir tvöhundruðogfjörutíu blaðsíður. Skáldsaga sem fjallar mest um tímann rétt fyrir og í seinni heimsstyrjöld í Frakkalandi. Hörku spennandi bók.

Smá sumarfrí

Þar sem kalda potts vinkona mín hafði látið mig vita að hún kæmist ekki í sund í gær samþykkti ég að skreppa í sjóinn með sjósunds vinkonu minni. Var á skutlvaktinni og N1 sonurinn átti að mæta klukkan hálftíu. Það er ennþá vetraropnun í Nauthólsvík og opnar ekki fyrr en klukkan ellefu. ég var komin á fætur um átta og fimm korterum seinna settum við mæðgin æfingaakstursskiltið á bílinn minn og ég settist í farþegasætið en Davíð Steinn í bílstjórasætið. Þegar við komum upp á Gagnveg tók ég skiltið af bílnum og settist undir stýri. Ég fór þó ekki fyrr en sonurinn var búinn að færa mér kaffi út í bíl. Fór beinustu leið heim aftur og fékk mér eitthvað að borða með kaffinu því ekki fer maður í sjóinn á fastandi maga. Hafði tíma til að dútla við alls konar en ég var komin á stæði við Nauthólsvík tólf mínútum fyrir ellefu. Byrjaði á að hringja í pabba og óska honum gleðilegs sumars. Hitti sjósundsvinkonu mína í röðinni við aðstöðuna stuttu áður en það var opnað. Það var að fjara út, sjórinn 6,2°C og við vinkonurnar óðum hálfa leið til Kópavogs. Vorum um korter á svamlinu og rúman hálftíma í heita pottinum. Var komin heim aftur um hálfeitt. Tveimur tímum seinna skrapp ég í stuttan göngutúr en annars gerði ég ekkert merkilegt af mér. Hringdi þó í eldri systurdóttur mína til að óska henni gleðilegs sumars og spjalla smá. Ein tuska "datt" af prjónunum og dagurinn leið ógnar hratt.

Sumardagurinn fyrsti

Vaknaði um sex leytið. Fljótlega eftir að ég mætti í vinnuna var ákveðið að ég myndi sjá um bókhaldið. Það höfðu klippst út tvær línur í fyrstu tölum sem ég sendi niður. Fór þó ekki niður með ný blöð fyrr en hálftíma síðar þegar ég var búin að taka saman fleiri daglegar tölur, tvær smáar endurnýjanir og undirbúa rúmlega fimmtánhundruð endurnýjuð kort í 6 póstbökkum í póst. Rúmlega níu fór ég svo niður með talningablöð fyrir fyrsta skammtinn og debetkorta skammtinn. Líkt og í fyrradag var ekki hægt að framleiða hluta af embossuðu kortunum. Þau voru þó bara aðeins á annan tuginn en ekki tæp þrjátu. Framleiðslu og talningu á fyrsta skammti var lokið fyrir klukkan hálftíu. Í kaffinu var farið yfir ánægjukönnunina, sérstaklega þann hluta sem snéri að okkar deild, SKM en það var líka borið saman við RB í heild og okkar deild skoraði hærra í fleiri tilvikum, sumt var álíka en í örfáum tilvikum vorum við aðeins undir. Framkvæmdastjórinn var mjög ánægður með þá einkunn sem hann skoraði. Hann var nýlega byrjaður þegar kortadeildin flutti á svæðið en hann hefur verið mjög duglegur að setja sig inn í öll mál, vill fá ábendingar, hlustar á þær og bregst fljótt við ef það á við og er hægt. Þegar ég fór niður með hádegisframleiðslutölurnar tók ég að mér að pakka kortum í útibú fyrir þann banka sem var í endurnýjun. Hátt í þrjúhundruð kort úr endurnýjuninni voru með ógild heimilisföng, amk sexfalt fleiri kort en þau daglegu sem voru að fara í útibú. Fórum í mat upp úr klukkan tólf. Þá átti aðeins eftir að pakka smá og telja. Ég fór upp með bakkann með kortunum sem fara í póst á morgun. Ákveðið var að geyma þessar litlu endurnýjanir aðeins en í öllum tilvikum er um kort að ræða sem eiga að taka við kortum sem renna út mánaðamótin maí júní líkt og þau kort sem verið var að senda í póst í gær. Ég kvaddi vinnufélagana tíu mínútum fyrir tvö og hitti þau ekki aftur fyrr en á fimmtudaginn eftir viku. Fór beint í laugardalslaugina. 2x5 mínútur í kalda, 300 metra sund, þar af rúmlega 40m skriðsund. Var mætt til esperanto vinkonu minnar um þrjú. Hún var að passa 3 ára dótturdóttur sína þar sem var starfsdagur í leikskólanum. Sú stutta var feimin í ca fimm til tíu mínútur. Skemmtilegt og mjög skýrt stelpuskott þarna á ferðinni. Mamman kom að sækja upp úr klukkan fjögur og stoppaði við í nokkra stund. Ég var með esperantodótið meðferðis en þegar þær mæðgur kvöddu ákváðum við Inger að fara frekar í smá göngutúr meðfram sjónum og í áttina að Seltjarnanesi og Gróttu. Fórum þó ekki út fyrir borgarmörkin en þetta voru samt 2 km. í heildina. Var komin heim um sex leytið.

Síðasti vetrardagur

Í gærmorgun vaknaði ég aðeins örfáum mínútum áður en vekjaraklukkan átti að hringja. Eftir morgunverkin á baðherberginu og lýsisinntökuna í eldhúsinu settist ég inn í stofusófa með fartölvuna í fanginu. Sat við í rúman hálftíma en svo var kominn tími til að leggja af stað í vinnuna. Þangað var ég mætt um hálfátta. Fyrirliðinn var komin á undan og búin að skreppa niður og kveikja á vélinni. Sú fjórða var ekki komin um átta en staðan á öðrum deildum var þannig að hún þurfti hvort sem er að dekka hraðbankadeildina og aðstoða í við ýmislegt annað uppi. Þegar fyrrum fyrirliði var mætt ákváðum við að fyrirliðinn yrði aftur í bókhaldinu en við hinar tvær færum í framleiðsluna en hefðum endaskipti á vélinni þannig að ég var á ítroðsluendanum. Ég var á undan niður en þegar fyrrum fyrirliði komst í gegn var eins og slússan bilaði. Ég prófaði reyndar ekki sjálf að athuga hvort ég kæmist í gegn en sá sem var niðri í mynthvelfingunni komst ekki út og fyrirliðinn ekki inn nema með fjarstýringu sem er notuð þegar koma gestir sem ekki fá aðgangskort eða hafa ekki aðgang að slússunni. Lentum svo í smá brasi í framleiðslunni, gátum ekki framleitt hluta af embossuðum kortum þar sem ekki voru hástafi skilgreindir fyrir upphleyptu stafina. Af 228 kortum gátum við ekki framleitt 29 stk. Þegar við vorum búnar með það sem hægt var og stemma af afganginn var klukkan orðin hálftíu, má að fara í kaffi. Fyrrum fyrirliði komst ekki í gegnum slússuna en fyrirliðinn var hinum megin með fjarstýringuna og hleypti henni í gegn. Ég prófaði kortið mitt og komst í gegn, fór meira að segja aukaferð til að sannfærast um að kortið virkaði alveg í báðar áttir. Eftir þetta virtist slússan vera komin í lag en það komu samt menn að kíkja á hana síðar um daginn. Daglegri framleiðslu og pökkun lauk um hálftvö en við höfðum líka gefið okkur smá tíma til að taka upp kortasendingu, tvær tegundir um áttaþúsundogþrjúhundruð kort í heildina. Ekki þurfti að "klæða" kassana úr og í því annar teljarinn taldi í gegnum plastið. Þurftum því aðeins að opna tvo kassa til að skrá niður upplýsingar af bakhlið. Um hálftvö helltum við okkur út í endurnýjun og vorum hátt í klukkutíma að klára þessi rúmlega sjöhundruð sem eftir voru. Gaman þegar gengur svona vel. Það var smá vesen á prentaranum en ekkert sem tafði okkur. Hins vegar var hitastigið í herberginu í hærra lagi eða um þrjátíugráður. Vorum með litlu gluggana galopna allan daginn en það dugði alls ekki til. Vorum búnar að ganga frá niðri og komnar upp fyrir klukkan þrjú. Nefndi það við aðra samstarfskonu mína um það leyti að N1 sonurinn væri að taka bóklega prófið í ökuskóla 3. Nokkrum mínútum seinna hringdi Davíð Steinn í mig, þá að labba út af prófstaðnum í Mjódd. Hann hafði náð með glans. Engin villa í A hlutanum en 3 í B hlutanum. Hann sagði samt að hann hefði fengið eitt af erfiðari prófunum, merkt Z en því aftarlegra í stafrófinu því erfiðara. Ég hringdi í pabba þegar ég var á leiðinni í sund skömmu síðar til að monta mig af stráknum. Synti ekkert en var búin að fara 4 ferðir í kalda pottinn þegar kalda potts vinkona mín fann mig í gufunni. Fór tvær aukaferðir með henni. Kom heim um sex leytið og fljótlega eftir það horfðum við Oddur á nýjasta þáttinn í CSI Las Vegas.

Sumardekkin komin undir

Klukkan  var varla orðin sex þegar ég var komin á fætur í gærmorgun. Hafði því extra góðan tíma í netvafrinu og var samt mætt í vinnu um hálfátta. Fyrirliðinn sá um bókhaldið, fyrrum fyrirliði var á ítroðsluendanum, ég á móttökuendanum og sú fjórða var á hraðbankavinnustöðinni. Daglegri framleiðslu, pökkun og mest af talningunni var lokið um tólf. Samt voru þetta um áttahundruð kort í heildina. Frá korter í eitt til hálfþrjú endurnýjuðum við um ellefuhundruð kort og erum þá búnar með meirihlutann af þeirri endurnýjun. Vorum búnar að ganga frá í kortadeildinni tíu mínútum fyrir þrjú og hálftíma seinna hitti ég sjósundsvinkonu mína í Nauthólsvík. Vorum tíu mínútur út í sjónum og rúman hálftíma í heita pottinum. Var svo mætt á N1 í Fellsmúla stuttu fyrir fimm til að fá sumardekkin undir og setja vetradekkin á dekkjahótelið í staðinn. Það tók ekki langa stund, ca tuttugu mínútur eða svo. Hitti einn framkvæmdastjórann úr K2 sem var þarna í sömu erindagjörðu eða amk að skipta um dekk. Spurði hann ekki hvort hann nýtti sér dekkjahótelið en við spjölluðum um árshátíðarferðirnar og fleira tengt RB. Þegar ég kom heim upp úr klukkan hálfsex var Davíð Steinn nýkominn heim úr ökuskóla 3 þar sem hann prófaði að keyra í aðstæðum sem líktust hálku, fór í veltubílinn og fleira. Hann er að fara í skriflega prófið í dag.

Stutt vinnuvika framundan

Var komin á fætur frekar snemma miðað við að það var sunnudagur í gær. Vafraði um á netinu í um klukkustund, sótti þvottinn á snúrunar og var búin að lesa í um hálftíma þegar N1 sonurinn kom á fætur rúmlega níu. Hann skutlaði sér í vinnuna á mínum bíl, svo tók ég niður skiltið og brunaði beinustu leið í Laugardalslaugina. Þar var ég byrjuð að synda um tíu. Synti 500 metra, mest á bringunni en þó um 40 metra skriðsund í loka umferðinni. Fór þrisvar sinnum fimm mínútur í kalda pottinn, tvisvar í þann heitasta, fimmtán mínútur í gufu og svo smá "sólbað" áður en ég fór upp úr. Næst lá leiðin í Löður við Fiskislóð og svo Krónuna áður en ég fór heim aftur. Fékk stæði fyrir framan númer 15 um hálfeitt. Hringdi í Odd og bað hann um að koma og sækja vörurnar. Hann gekk frá þeim líka. Fór ekkert út aftur. Horfði bara á fótboltaleiki, þætti, las og prjónaði og dagurinn leið frekar hratt. Kláraði m.a. eina bók af safninu; Myrkrið milli stjarnanna eftir Hildi Knústdóttur. 

Sunnudagur

Það sést ekki í blátt á himninum en það er þó orðið bjart þrátt fyrir grátt veður. Ég var vöknuð upp úr klukkan sex í gærmorgun. Klukkustund síðar skelltum við skiltinu á bílinn minn og N1 sonurinn fékk að keyra sig í vinnuna. Ég fékk kaffibolla út í bíl í staðinn og var komin á planið við Laugardalslaug ca tólf mínútum fyrir opnun. Samt var byrjað að safnast fólk á hurðarhúninum, bæði fastagestir og eins mun yngri gestir því það var greinilega að fara fram ein hvers konar sundmót í innilauginni. Ég hlustaði á morgunfréttir áður en ég fór inn. Fyrsta ferðin í kalda pottinn var korter yfir átta. Fór strax í heitasta pottinn á eftir en að lokinni annarri ferð í þann kalda fann ég smá pláss á brautum 7 og 8 til að synda. Ekki alveg eins margar ferðir á bakinu og ég vildi en þó tvær af sex eða 100 metra af 300. Eftir þriðju ferðina í þann kalda fór ég í gufu, svo í kalda sturtu, fjórðu ferðina í kalda pottinn og smá sólbað áður en ég fór upp úr og þvoði mér um hárið. Var komin heim um tíu leytið. Náði í þvott og stakk í aðra þvottavél. Vafraði aðeins um á netinu, las og lauk m.a. við eina bók um Stellu Blómkvist; Morðið við Huldukletta. Um hálftvö skrapp í smá göngutúr og labbaði rúma tvo kílómetra á tæplega hálftíma. Annars leið dagurinn frekar hratt við alls konar hér heimavið. Hringdi m.a. í pabba og Helgu systur og hugsaði til fleira fólks. Fitjaði upp á nýrri tusku, Strik úr bókinni sem ég fékk í jólagjöf, horfði aðeins á part úr leikju í enska, horfði á þætti, las meira og vafraði einnig meira á netinu. Var komin upp í um tíu leytið og farin að sofa um hálfellefu enda rumskaði ég fyrst upp úr klukkan sex í morgun.

Vorið er komið

Fyrirliðinn mætti í vinnuna rétt á eftir mér í gærmorgun. Sú fjórða þurfti að sjá um hraðbankamálin og fyrrum fyrirliði mætti svo um níu en við vissum alveg af því, hún tók að sér bókhaldsmálin þegar hún mætti. Ég sá um að taka saman fyrstu tölur og var á ítroðsluendanum á vélinni. Fyrirliðinn var komin með sýkingu í annað augað sem bara versnaði eftir því sem leið á morguninn. Daglegri framleiðslu, pökkun og talningu var lokið stuttu fyrir klukkun tólf. Eftir hádegi vorum við tvær eftir ég og fyrrum fyrirliði. Kláruðum endurnýjun á kreditkortum um tvö, eitthvað um sjöhundruð kort. "Háttuðum" kortavélina og gengum frá. Ég hætti vinnu fljótlega eftir það og fór beinustu leið í Nauthólsvík. Var búin að setja tilkynningu um það á sjósundshópinn og sjósundsvinkona mín svaraði kallinu og mætti á svipuðum tíma. Við vorum samferða út í 5,8°C sjóinn. Þar svömluðum við um og gleymdum okkur á spjallinu í rúmt korter áður en við færðum okkur yfir í heita pottinum þar sem spjallið hélt áfram í sjálfsagt um þrjú korter. Ég var svo komin heim um fjögur leytið.

Föstudagur enn á ný

Setti inn færslu á þessum vettvangi í gærmorgun áður en ég fór í vinnuna, eins og ég geri oftast. Það er samt öruggt að á einhverjum tímapunktum í ár kemst ég ekki í þessi daglegu skrif mín og munu því koma mislangar skrifpásur inn á milli. Líkt og gerðist afmælishelgina mína í síðasta mánuði þegar ég var í Kaupmannahöfn. Var mætt í vinnu um hálfátta. Opnaði seinni lásinn á hvelfingunni uppi, fór niður í kortadeild að kveikja á vélinni og opna glugga og undirbjó svo fyrstu tölur dagsins áður en ég fór inn í kaffistofu fyllti á vatnsbrúsann og fékk mér fyrsta kaffibolla dagsins. Fyrsti skammtur var mun minni en í fyrradag en samt um hundraðogáttatíu kort. Daglegri framleiðslu, pökkun og talningu var lokið klukkan tólf. Eftir mat fengum við tvær sem vorum á vélinni leyfi til að taka pásu milli klukkan eitt og tvö og fylgjast með útför í streymi við tölvurnar okkar. Mjög falleg útför. Við vitum að sú sem var heima lasin fylgdist líka með. Milli tvö og þrjú endurnýjuðum við um fjögurhundruð kort. Þegar við komum upp aftur voru flestir farnir. Ég var komin heim fyrir klukkan hálffjögur. Lánaði bræðrunum bílinn í Sorpu og verslunarferð og þeir skiluðu lyklunum á Vesturgötuna í leiðinni. Fljótlega eftir að þeir komu til baka fórum við Davíð Steinn á rúntinn á hans bíl, alveg í einn og hálfan tíma. Hann kom m.a. við á vinnustaðnum sínum til að skipta um rúðuþurrkur og varð að fá aðstoð við það frá útimanninum. Komum heim aftur rétt fyrir sjö. Horfði á fréttir, prjónaði og horfði svo á þætti úr sarpinum, m.a. síðasta þáttinn úr færeysku seríunni Trom.

Útfarardagur Péturs heitins

Sem oftast fyrr var ég vöknuð nokkru áður en vekjaraklukkan átti að ýta við mér. Hafði því ágætis tíma í netvafr og blogg en var engu að síður mætt í vinnu klukkan hálfátta. Við í kortadeildinni voru eiginlega bara rétt rúmlega tvær í gær því sú fjórða varð að sinna hraðbankamálunum að mestu leyti þar sem sú sem vinnur við þá líka er orðin veik og ein af okkur hinum þremur er enn veik. Sú fjórða sá þó um að taka saman, raða upp og prenta út fyrstu tölur, yfir þrjúhundruðogtuttugu kort sem þurfti að framleiða fyrir klukkan tíu. Við náðum því að framleiða þann skammt á uþb klukkutíma. Þá var sú fjórða búin að koma með talningablað vegna þeirrar framleiðslu niður til okkar. Við höfðum byrjað framleiðslu ca korter yfir átta og vorum komnar upp í kaffi um hálftíu þá búnar að stemma af framleiðsluna líka. Ég tók svo saman debettölur eftir kaffi sem í heildina voru rétt um sexhundruð kort. Kreditskammturinn sem er svo sendur í um ellefu leytið var yfir hundraðogtuttugu þannig að dagleg framleiðsla fór yfir eittþúsundogfjörutíu. Lentum í vandræðum með framleiðslu á multoskortum en lukum allri visa (debogkred) framleiðslu og pökkun á þeim kortum fyrir klukkan tólf. Kerfisfræðingurinn kom multosframleiðslunni í lag strax eftir hádegi og rétt fyrir tvö vorum við búnar, áttum þá bara eftir að pakka og telja. Meðan sú sem var í móttökunni kláraði að pakka setti ég smá endurnýjun í gang. Endurnýjuðum ekki nema hundraðogfjörutíuogfjögur kort og vorum búnar að telja og ganga frá deildinni um hálffþrjú. Þá átti eftir að útbúa póstmiða með póstbunkunum og "laga" bókhaldið eftir talningar. Síðasta klukkutímann, milli þrjú og fjögur, vorum við að yfirfara innlegg. Ég var komin á planið við Laugardalslaug rétt rúmlega fjögur. Byrjaði á því að heyra aðeins í pabba mínum. Fór þrisvar sinnum fimm mínútur í kalda pottinn, 15 mínútur í gufu og kalda sturtu á eftir. Var komin heim um hálfsex. Frænka mín og nafna kom um sex leytið og færði mér smá gjöf sem þakklætisvott fyrir kisupassið. Hún stoppaði í rúma klukkustund en ég gleymdi alveg að láta hana hafa húslyklana sína.

Pétur Árni Óskarsson verður jarðsungin og borinn til grafar í dag. Þessi flinki, hægláti, ræðni en mjög prívat rafeindavirkjameistari sem glímt hefur við parkison í amk eitthvað á annan áratuginn varð aðeins rétt rúmlega sjötugur. Þegar umslagavélin lét sem verst eftir flutningana var annar af núverandi viðgerðarmönnum eiginlega búinn að gefast upp og fá leyfi til að kalla Pétur inn til aðstoðar. Það varð þó ekkert úr því. Það er samt alls ekki svo langt síðan Pétur kom síðast í yfirferð en þó amk eitt og hálft ár og þá á Kalkofnsveg. Þangað kom hann með reglulegu millibili í vel yfir tuttugu ár til að yfirfara og gera við umslaga og kortavélar. Síðustu árin var greinlegt að veikindin hömluðu honum en aldrei vildi hann tjá sig um þau mál, fór bara að tala um eitthvað annað ef maður spurði hann beint og óbeint út. Ég kemst ekki til að fylgja honum síðasta spölinn en hugga mig við það að útförinni er streymt. Minnist þessa manns með hlýju.

Birtir fyrr og fyrr

Vaknaði amk hálftíma áður en vekjaraklukkan átti að ýta við mér. Korteri síðar var ég komin á fætur, búin að sinna morgunverkunum á baðherberginu og sest inn í stofu með fartölvuna í fanginu. Mætti í vinnu um hálfátta. Ein var veik og önnur meira í öðrum verkefnum. Sú sá þó um bókhaldið einnig. Ég var á móttökuendanum. Daglegri framleiðslu, pökkun og hluta af talningu var lokið um tólf. Eftir mat kláruðum við að telja og ég fór í að útbúa afgreiðsluseðla með bunkunum sem fara í póst í dag. Sú sem var á ítroðsluendanum þurfti að fara um hálftvö. Um tvö kom annar viðgerðarmaðurinn til að skipta um annan prenthausinn. Sá sem var ég var farinn að skila verri vinnu sem lagaðist ekkert þótt hann væri pússaður upp eða þrifinn. Mjög gott að skipta um áður en farið væri að kvarta. Það ætlaði ekki alveg að ganga að senda testkort í gegnum vélina til að vera viss um að allt hafi virkað svo við kölluðum kerfisfræðinginn til. Vélin fór í gang um leið og kerfisfræðingurinn birtist. Hann notaði tækifærið og fékk viðgerðarmanninn til að aðstoða sig við yfir að skipta yfir á nýtt kerfi, kerfi sem "talar við" örgjörvamódúlana. Það var búið að uppfæra það í no 2 fyrir nokkru síðar en er nú komið í no 3 og það er strax farið að vinna að kerfi no 4. Fullvissuðum okkur um að vélin samþykkti að vinna á þessu kerfi áður en við slökktum á henni aftur stuttu fyrir fjögur. Fór beinustu leið í sund og þegar ég var á leiðinni út úr klefa mætti ég kalda potts vinkonu minni sem var eiginlega að athuga hvort ég væri að koma. Hún var búin með 3 ferðir í kalda og fór í heitasta á meðan ég fór í mína fyrstu ferð. Saman fórum við svo þrjár aðrar ferðir áður en við enduðum í gufunni. Ég var komin heim um hálfsex.

Undirbúningur undir vinnudag

Klukkan var  rétt rúmlega átta þegar ég var komin á fætur í gærmorgun og búin að kveikja á tölvunni hans pabba. Vafraði um á netinu í um einn og hálfan tíma. Svo lá leiðin inn í stofu þar sem ég greip í bækur og prjóna. Kláraði eina afgangatusku í gær, á bara eftir að ganga frá síðasta endanum og klippa hann og alla hina. Fitjaði upp á nýrri tusku, enn eitt mynstur úr nýju bókinni sem ég var ekki búin að prófa áður. Í hádeginu hitaði ég mér afganginn af bleikjunni frá því kvöldið áður. Um hálftvö leytið var ég búin að pakka saman. Pabbi var búinn að ákveða að skutla mér alla leið í bæinn og þangað var ég komin um þrjú. Bað pabba svo um að smessa á mig þegar hann væri kominn aftur heim. Tveimur tímum seinna smessaði ég á pabba minn. Hann var kominn heim en fór beint í að finna til sumardekkin og steingleymdi alveg að smessa á mig. Hann sendi "já" til baka og hringdi svo örstutt símtal úr gemsanum sínum í heimasímann minn. N1 sonurinn var að vinna. Einkabílstjórinn hafði skutlað honum um morguninn þannig að hann var mættur hálftíu eins og á sunnudagsvöktum.

Annar í páskum

Mér tókst að sofa langt fram á morguninn í gærmorgun. Hafði rumskað um fimm leytið til að skreppa á salernið og rámar í það hafa pissað óvenju mikið og lengi. Næst vissi ég af mér um níu leytið. Pabbi var þá kominn á stjá. Ég fór á fætur um hálftíu. Eftir morgunverkin á baðherberginu settist ég inn í stofu, bæði með bækur og prjóna. Um tíu leytið settist ég við tölvuna í um klukkustund til að blogga og vafra um á netinu. Tvisvar sinnum enn yfir daginn settist ég við tölvuna en þessa daga sem ég hef verið hér á Hellu hef ég ekkert vafrað um á netinu á kvöldin og sagt nei þegar pabbi spurði hvort hann ætti að hafa kveikt á tölvunni. Fékk mér AB-mjólk með musli og rúsínum og lifrapylsusneið í hádeginu og hellti mér upp á smá kaffi. Pabbi fékk sér skyr. Hellti aftur upp á kaffi um þrjú leytið og smurði mér brauð. Pabbi bauð líka upp á pönnsur. Tók út þrjú bleikjuflök úr frysti. Horfði á leik Liverpool og Arsenal þar sem mínir menn lentu 0:2 undir og Salah klúðraði vítaspyrnu. Leikurinn fór 2:2. Um sex setti ég upp hýðisgrjón og sauð kjúklingatening með.  Smurði bleiku hliðina af bleikjunni með kryddosti og kryddaði einnig með cayanne pipar og steikar kryddi. Þetta var afbragðsgóður matur og vorum við feðgin mjög ánægð með hann og okkur. Eftir sjónvarpsfréttir og Landann horfði ég á 3 þætti af Paradís. Nú búin með 6 þætti af átta. Fór í háttinn upp úr hálfellefu, nokkru á eftir pabba, og las í um klukkustund.

Páskadagur

Ég var vöknuð og komin á fætur fyrir klukkan átta í gærmorgun. Kveikti fljótlega á tölvunni hans pabba en komst þó ekki lengra en það því það var búið að uppfæra hana og skipta um aðgangsorð. Pabbi var ekki kominn á fætur og ég vildi alls ekki raska ró hans. Í staðinn settist ég inn í stofu með bókina Ríki hinna blindu sem og prjónadótið mitt. Bókin er alls ekki eins margar blaðsíður og ég gaf upp þegar ég skrifaði fyrst um hana en hún er samt aðeins yfir fimmhundruð blaðsíður og nú á ég eitthvað um hundrað blaðsíður eftir. Er með fleiri bækur með mér og þar að auki bættist ein við til láns áður en ég kvaddi fólkið mitt í Fossheiðinni sl. föstudag. Pabbi kom á fætur um níu leytið og sagði mér aðgangsorðið inn á tölvuna. Ég leyfði honum fyrst að fara sinn vefrúnt og var ekkert að reka á eftir honum. En fljótlega eftir að hann stóð upp frá tölvunni settist ég við hana. Það tók mig tæpa klukkustund að setja upp svæði fyrir mig, blogga og vafra aðeins á netinu. Svo settist ég aftur inn í stofu og greip í prjónana. Er að nota afganga og prjóna eftir mynstrinu Blíðar bárur úr fyrstu tuskubókinni minni.

Eftir hádegisfréttir skruppum við pabbi aðeins í búðina. Hann vildi endilega að ég setti í körfuna hjá honum það sem ég myndi fá mér í hressingu en var ekki til, mátti ekki heyra á það minnst að ég gæti alveg verslaði inn sjálf, sérstaklega ef um vörur sem enda svo líklega heima hjá mér var að ræða. Hvorugu okkar datt í hug að kaupa inn einhvers konar páskalamb en bæði fyrir og eftir búðarferð var ég búin að segja pabba að mér væri nákvæmlega sama hvort við værum með kjöt eða fisk.

Pabbi setti upp saltfisk, kartöflur og rófur í kvöldmatinn. Mjög gott. Ég sá um uppvaskið í staðinn. Bríet kom aðeins við en stoppaði ekki lengi og var ekkert að hugsa neitt um kvöldmat. Hún, kæró og vinur hans voru að fara eitthvað á djammið, frænka mín líklega og örugglega til að vera bílstjóri. Hún er harðákveðin í að sleppa alveg að smakka það er svo handviss um að genin hennar muni ellegar taka af henni ráðin. Við pabbi hins vegar fengum okkur smá vín í gærkvöldi, hann rauðvín og ég hvítvín. Hann var að mestu að vafra um á netinu en ég horfði á einn finnsk/spænskan framhaldsþátt, Paradís og Alla leið.

Komin austur á Hellu

Var glaðvöknuð einhvern tímann á sjöunda tímanum og var fljótlega ljóst að ekkert myndi þýða að reyna að kúra sig niður aftur. Dreif mig því á fætur og hafði dágóðan tíma til að vafra um á netinu og undirbúa pökkun fyrir langa helgarferð. Laugardalslaugin var opnuð klukkan tíu og ég var komin þangað um það leyti. Sá fljótlega að ekkert þýddi að hugsa um að synda eitthvað á bakinu. Hefði léttilega getað synt eitthvað á bringunni og kannski smá skriðsund en endirinn varð sá að ég fór fjórum sinnum í kalda pottinn, einu sinni í heitasta pottinn, amk korter í sjópottinn og svipaðan tíma í gufunni. Þvoði mér nú samt um hárið þrátt fyrir allt. Heim sótti kisu milli 11:45 og 12:40. Var komin heim rétt fyrir eitt. Davíð Steinn var kominn á fætur og ég sagðist verða tilbúin að smá rúnt eftir hálftíma. Hellti mér upp á sterkt kaffi, fékk mér smá hressingu með og hringdi einnig eitt símtal. Við mæðgin fórum svo í klukkutíma rúnt, m.a. um Hafnarfjörð og Grafarvog. Hann fékk sama stæði þegar við komum til baka um hálfþrjú. Þá var Oddur kominn á fætur og tilbúinn til að skutlast með mig austur. Davíð Steini bauðst að koma með en hann sagðist vera upptekinn við að plana einhverja ferð með vinum fljótlega. Það var rok og rigning og fór allt upp í 23metra á sekúndu á Hellisheiðinni en ferðalagið gekk þó vel fyrir sig. Komum við í Fossheiðinni. Þar var vel tekið á móti okkur eins og alltaf. Stoppuðum í uþb klukkustund. Vorum amk komin á Hellu klukkan fimm. Um sex leytið tók ég til við eldamennskuna. Skar niður kartöflu og lauk og gufusauð. Kryddaði þrjú bleikjuflök og steikti. Oddur stoppaði fram á kvöldið en var kominn í bæinn aftur um ellefu leytið. 

Föstudagurinn langi

Svaf lengur fram á morgunin en ég hélt ég myndi gera en var þó vöknuð og búin að slökkva á vekjaraklukkunni nokkru áður en hún átti að hringja. Ég var á skutlvaktinni, í gær var rauður dagur og N1 sonurinn átti ekki að mæta fyrr en um hálftíu. Tíu mínútum yfir níu var ég búin að vafra á netinu og setja inn færslu en ekkert bólaði á Davíð Steini. Ég hringdi því í soninn og það kom í ljós að hann var ekki farinn að rumska neitt en vaknaði auðvitað við hringinguna. Ég tók til skiltið á bílinn, bókina sem fylgir ökunáminu og sunddótið og var búin að undirbúa bílinn minn og sest í farþegasætið fram í þegar Davíð Steinn kom. Hann hafði klætt sig á methraða og þurfti bara að muna eftir að taka með sér nestið sitt sem hann útbjó kvöldið áður. Þrátt fyrir smá umferð vorum við komin upp að N1 við Gagnveg rétt rúmlega hálftíu. Ég þáði ekki kaffi í þetta sinn heldur fór beinustu leið í Laugardalslaugina. Þar var sundleikfimi heldri borgara á brautum 7 og 8 og þónokkur umferð á öllum hinum brautunum. Endirinn varð sá að ég fór 4 sinnum í kalda pottinn, einu sinni í heitasta, einu sinni í sjópottinn, korter í gufuna og smá sólbað áður en ég fór upp úr og í heimsókn til kisu. Stoppaði í um klukkustund þar áður en ég fór heim um hálfeitt. Heima greip ég nokkrar bækur og prjónana mína og fór með inn í stofu. Sólin skein svo glatt inn um stofugluggann að mér datt ekki einu sinni í hug að reyna að kveikja á sjónvarpinu, ekki heldur til þess að stilla á einhverja útvarpsstöð.

Þær tvær bækur sem ég framlengdi eru; Brotin eftir Jón Atla Jónsson og Ríki hinna blindu eftir Louise Penny. Fyrri bókin eitthvað á fjórða hundrað blaðsíður, mjög spennandi en ég lauk ekki við að lesa hana fyrr en í fyrradag. Hin bókin mun lengri eða um sjöhundruð blaðsíður en líka mjög spennandi. Byrjaði á henni nýlega og er búin að lesa hátt í tvöhundruð blaðsíður. Ég er svo búin að lesa eina af þeim sjö bókum sem ég kom með heim af safninu síðast; Hetjusögur eftir Kristínu Svövu Tómasdóttur. Þetta er ljóðræn bók byggð á sögum af hundrað ljósmæðrum sem voru upp þegar samgöngurnar voru mun frumstæðari.

Upp úr klukkan fimm skutlaði einkabílstjórinn mér yfir í Vesturbæinn til norsku esperanto vinkonu minnar og mannsins hennar. Þau voru líka búin að bjóða þremur tveimur öðrum konum og við fjórar vinkonurnar köllum okkur Viðeyjargengið. Ég er yngst í þessum hópi sú elsta er fædd 1946 og hinar tvær 1956 og 1961. Esperanto vinkona mín er semsagt næst yngst en þess má geta að maðurinn hennar er fæddur 1966. Við fjórar höfum gert meira saman heldur en að skreppa reglulega út í Viðey. Við höfum td farið í qi gong, labbað um Elliðaárdalinn og farið á jazztónleiki í bakgarðinum við Jómfrúna. Inger bauð upp á matarmikið sallat og hvítvín eða rósavín með. Í eftirrétt var hún með franska súkkulaðiköku með rjóma og bláberjum en hún vissi að ég myndi ekki geta borðað súkkulaðikökuna og bauð mer upp á frosna brómberja marengs köku, sem var alls ekki of sæt, í staðinn. Um átta leytið kvaddi sú elsta og labbaði yfir til sín en hún býr í 60 plús blokk við Grandaveg. Um níu hringdi ég í einkabílstjórann og bað hann um að sækja mig fljótlega. Nefndi það í leiðinni að hann fengi aukabíltúr upp í efra Breiðholt því ég var búin að bjóða hinum gestinum sem eftir var það. Hún hafði komið á bíl og lagt honum við Ásvallagötu og þótt það sæist ekki á henni vínið eða bjórinn sem hún var búin að smakka var réttast að skilja bílinn eftir. Strætósamgöngur eftir klukkan níu og á rauðum dögum þar að auki eru mun strjálli. Oddi fannst þetta skutl alveg sjálfsagt. Spurði mig bara hvort ég vildi fara heim fyrst. Ég sagðist vilja taka rúntinn með þeim og í baka leiðinni komum við við á AO við Sprengisand og fylltum á tankinn.

Skírdagur

Gærdagurinn var langur en mjög fljótur að líða. Var komin á fætur um sex, mætt í vinnu um hálfátta. Var á ítroðsluendanum. Dagleg framleiðsla var í heildina um 200 kortum færri heldur en daginn áður og var búin fyrir klukkan tólf, bæði framleiðsla og pökkun. Þá voru mættir til okkar rafvirkjar til að færa súlu utan um leiðslur. Þessi súla hefur eiginlega verið fyrir okkur þegar við erum að telja kort, þannig að það má líta á það að fram að þessu höfum við verið í hálfgerðum súludans við talningarnar því hún var fyrir framan borðið með teljurunum á, mitt á milli þeirra. Núna er hún staðsett hinum megin við borðið og því verður miklu minna um súludans hér eftir enda grínaðist kerfisfræðingurinn okkar með að hann væri hættur að heimsækja okkur eða myndi koma sjaldnar. Eftir hádegi framleiddum við smá endurnýjun og kláruðum talningar. Gengum frá deildinni um tvö og fórum allar í að hjálpa til við að fara yfir innlegg. Hætti vinnu um hálffjögur og fór beint í sund. Synti 300m, fór 3x í kalda pottinn, 1x í heitasta pottinn og endaði á góðu gufubaði áður en ég fór upp úr og í heimsókn til kisu. Pixý var kát að sjá mig og þegar hún hafði grun um að ég væri að fara gerði hún tilraun til að stoppa mig með því að leggjast á mottuna fyrir framan dyrnar út úr íbúðinni. Ég kom við í Krónunni við Fiskislóð og var svo komin heim rétt fyrir klukkan sjö. Oddur tók á móti vörunum og gekk samviskusamlega frá þeim. 

Síðasti vinnudagurinn í þessari viku

Var komin á fætur fyrir klukkan hálfsjö í gærmorgun og mætt í vinnuna um hálfátta. Ég var á móttökuendanum. Í heildina voru á níunda hundrað kort í daglegri framleiðslu og svo komu tvær endurnýjanir, debet og kredit, fyrir einn bankann. Sinntum daglegur framleiðslunni, endurnýjun var hlaðið inn og lesið yfir. Um hálftvö var slökkt á vélinni og hún ryksuguð. Milli tvö og hálffimm var ég að fara yfir innlegg. Var komin í sund um fimm. Synti aðeins 100 metra því það var svo mikið af krökkum, bæði íslenskum og erlendum. Kaldi potturinn var 10°C og ég fór í hann þrisvar sinnum áður en ég fór upp úr og í heimsókn til kisu. Pixý tók vel á móti mér og ég stoppaði hjá henni í þrjú korter. Var komin heim á slaginu sjö. Vantaði aðeins rúmt korter upp á að ég væri búin að vera að heiman í tólf tíma. 

Bíóferð

Ég var mjög hissa þegar vekjaraklukkan "ýtti" við mér rétt fyrir klukkan hálfsjö í gærmorgun. Hefði sennilega alveg getað sofið lengur og var ég þó búin að sofa í tæpa átta tíma. Dreif mig samt á fætur svo ég hefði smá tíma til að vafra um á netinu og setja inn færslu á bloggið mitt. Var mætt í vinnu um hálfátta. Aðstoðaði við að opna ytri hurðina á hvelfingunni uppi og fór svo niður að kveikja á kortavélinni áður en ég fór inn á kaffistofu að fylla á vatnsbrúsann minn og fá mér smá kaffi. Svo raðaðist þetta þannig að fyrirliðinn og sú fjórða fóru niður, fyrrum fyrirliði var í bókhaldi og reikningagerð og ég var að æfa mig í innleggjum. Sleppti kaffitímanum klukkan hálftíu en fór í mat klukkan tólf þá var ég hálfnuð með seinni innleggspokasúpuna. Þegar ég var svo rétt að klára var ákveðið að ég myndi fara niður og leysa þá fjórðu af svo hún gæti hjálpað þeirri sem var að sinna hraðbankamálunum. Það var nefnilega mjög mikið að gera í þeim málum. Það var aðeins eftir að framleiða fjórar tegundir, telja annan kortavagninn og ganga frá deildinni niðri. Það tók innan við klukkutíma. Þegar ég kom upp aftur fór ég í að fara yfir innlegg hjá öðrum. Þrisvar sinnum stökk ég til að aðstoða tvo kerfisfræðinga. Í tveimur tilvikum þurfti ég að skrá mig inn á svæði sem ég hef ekki gert lengi, ekki síðan kortadeildin var í Seðlabankanum. Mér fannst ég alveg galtóm varðandi lykilorðið en viti menn, mér tókst að skrá mig inn í fyrstu tilraun og svo kom reyndar í ljós að ég var með þetta skrifað niður til öryggis.

Hætti vinnu um fjögur og fór beinustu leið í Nauthólsvík. Flóð, öldugangur og sjórinn 3°C. Bara dásamlegt. Úr Nauthólsvíkinni lá leiðin á Vesturgötuna í heimsókn til Pixý. Stoppaði hjá henni í þrjú korter. Var komin heim rúmlega sex en stoppaði svo sem ekki lengi við þar því ég var búin að ákveða að sjá Napóleonsskjölin í bíó og var mætt í Kringlubíó rétt fyrir klukkan sjö. Myndin var hröð, spennandi og fyndin á köflum og endirinn gaf til kynna að líklega verður framhald síðar.

Smá ferðalag

Í gærmorgun var ég komin á fætur fyrir klukkan átta. Rúmlega níu hringdi ég í N1 soninn og spurði hvenær hann ætti að mæta í vinnu. Í ljós kom var að hann var vaknaður bara ekki alvega að nenna fram úr. Hann keyrði sig á mínum bíl í vinnuna og var mættur upp á Gagnveg á slaginu hálftíu. Ég tók niður æfingaakstursskiltið og beið eftir kaffi áður en ég fór á Vesturgötuna að kíkja á kisu. Varð að leggja í Ránargötu. Pixí tók vel á móti mér en annars var allt í standi hjá henni. Skipti um vatn í skálunum og hreinsaði sandinn. Sat svo í sófanum smá stund. Kisa kom til mín í stutta stund, snéri sér svo aðeins að matarskálunum áður en hún hvarf upp í gluggakistu á öðru herbergi. Um hálfellefu leytið hringdi ég í Lilju vinkonu og hún var tilbúin þegar ég renndi við á Grettisgötunni. Við keyrðum beinustu leið á Breiðabólstað í Fljótshlíðinni aðeins að kíkja á leiðið hjá pabba hennar. Næst stoppuðum við í nýja kirkjugarðinum við Hvolsvöll og kíktum á leiðið hjá mömmu hennar. Vorum komnar til pabba um hálftvö og þar stoppuðum við í tvo og hálfan tíma. Þáðum pönnsur og kaffi og settumst svo inn í stofu á eftir og spjölluðum. Ég var með prjónana mína með og greip aðeins í þá. Bríet og Bjarki voru einhvers staðar á ferðinni, aðeins bíllinn hennar frænku minnar var fyrir utan. Áður en við kvöddum pabba sýndi hann okkur snjómoksturgræjuna sína. Í baka leiðinni ákváváðum við að keyra Suðurstrandaveginn og í gegnum Grindavík. Þannig sluppum við við heilmikla umferð og ég gat verið með stillt á krús kontról mest allan tímann sem við ókum með suðurströndinni. Skilaði Lilju heim til sín um sex og fékk svo stæði á besta stað við heimili mitt. Kannski ekki uppáhaldsstaðinn sem er hornstæðið en fjórða stæðið frá beygjunni inn í götuna og öðrum megin við innkeyrsluna. Í stæðinu hinum megin við innkeyrsluna er bíllinn hans Davíðs Steins.

Horft á mússíktilraunir á RÚV2 milli fimm og hálfellefu

Var vöknuð rúmlega sex. Var búin að blogga og vafra á netinu þegar N1 sonurinn kom fram um sjö. Hann fékk að keyra sig í vinnuna á mínum bíl og ég fékk kaffibolla með mér sem ég kláraði að drekka úr þegar ég var komin á planið við Laugardalslaug tíu mínútum áður en opnaði. Hlustaði á morgunfréttir í útvarpinu áður en ég fór inn. Greinilega sundmót í gangi þessa helgina en krakkarnir voru að mestu í innilauginni. Ég fór beint í kalda pottinn sem reyndist í heitara lagi, 17°C. Sat í honum í rúmar tíu mínútur. Fór svo á braut 7 og 8 og synti 500 metra, meirihlutann á bakinu. Heiti kaldi potturinn var kominn upp í 18°C þegar ég settist aftur í hann eftir sundið. Sat svo góða stund í sjópottinum áður en ég fór inn í kalda sturtu og þvoði mér um hárið í leiðinni. Kom heim rétt fyrir tíu. Um ellefu hafði esperanto vinkona mín samband á facebook spjallinu. Ég var reyndar að tala við  Lilju vinkonu en hringdi til baka strax eftir það samtal. Þá var hún að tala við ömmustelpuna sína en við ákváðum að ég kíkti yfir eftir hádegi. Fór til hennar rétt fyrir eitt. Var með esperanto dótið með mér. Hún bauð mér upp á kaffi og spjall og svo fórum við í stuttan göngutúr áleiðis út að Seltjarnarnesi. Hún sá þá fyrst pokann sem ég var með. Hann setti ég aftur út í bíl áður en við löbbuðum af stað. Kom aftur heim um hálfþrjú og fór ekkert eftir það. Útsending frá úrslitum mússíktilrauna hófst á RÚV2 um fimm. Ég hef aldrei farið eða hlustað áður nema þau brot sem Óli Palli hefur stundum spilað í útvarpsþætti sínum. Þótt þetta væri langt, því þetta voru tólf atriði, einstaklingar eða hljómsveitir, og hvert atriði var með 3 lög. Sá sem kom númer 2 á svið og varð í öðru sæti var í drengjakórnum á sínum tíma, örfáum árum yngri en Davíð Steinn. Hann var með flott söng- og dansatriði og magnað hvað hann er liðugur og góður dansari.