Einn þriðji búinn af apríl

Vekjaraklukkan var stillt á uþb hálfátta. Ég vaknaði hins vegar rétt upp úr sjö, slökkti á klukkunni, klæddi mig og bjó um. Vafraði um á netinu í klukkustund en slökkti svo á fartölvunni og bjó mér til hafragraut. Rétt fyrir tíu sóttu nöfnurnar mig og við hittum systurnar á bílastæðinu við Nauthólsvík. Sjórinn mældist 2,5°C og það var langt komið að fjara út þannig að maður var hálfnaður út í Kópavog loksins þegar maður komst á smá dýpi. Vorum að svamla um og spjalla í rúmar fimm mínútur. Ég var komin heim aftur upp úr hálfellefu. Þvoði mér um hárið. Eftir sturtuna hellti ég mér upp á kaffi.

Horfði á Liverpool-leikinn en svo skruppum við einkabílstjórinn í Krónuna við Granda. Bræðurnir sáu um heimilisþrifin en ég var að lesa og prjóna. Greip ekki í nálina annan daginn í röð. Hafði kindabjúgu í matinn. Reyndar vorum við aðeins tvö í mat því Davíð Steinn fór eitthvað út um sex. Var búin að slökkva á imbanum um níu og fór fljótlega upp í rúm og las til klukkan tíu. 

Tíminn líður

Í gær labbaði ég báðar leiðir milli heimilis og vinnu. Lagði af stað um sjö. Verkefnin fram að hádegi voru bókhaldstengd og eftir hádegi flokkaði ég kennispjöld til klukkan hálfþrjú. Í fyrradag tók ég mig til og taldi öll kennispjöldin úr einum heilum kassa sem ég flokkaði og voru þau 1115 stykki. Maður er líka næstum einn og hálfan tíma að flokka úr einum kassa, aðeins lengur ef maður rekst á myndir af fólki sem maður þekkir. Við erum búnar að flokka úr rúmlega 30 kössum og eigum að minnsta kosti efitr 600 kassa. Labbaði heim yfir Skólavörðuholtið og var komin um hálffjögur. Greip ekkert í nál en aðeins í prjóna og bækur. Bjó svo vel að eiga til afganga svo ég var ekkert að hafa neitt fyrir kvöldmatnum. 

Löng helgi framundan

Aftur var ég vöknuð á undan vekjaraklukkunni. Gærmorguninn var ósköp svipaður og aðrir vinnumorgnar. Gaf mér smá tíma í tölvunni eftir að ég var komin á fætur og búin að ljúka morgunverkunum. Labbaði af stað í vinnu um sjö. Fyrirliðinn var mætt til vinnu og hún fékk mig til að skipta við sig um stöðu, þ.e. bað um að fá að taka bókhaldið í gær þar sem hún þurfti að mæta á fjarfund um níu. Ég samþykkti það og fór á móttökuendann á framleiðsluvélinni. Daglegri framleiðslu lauk um hádegið og eftir hádegið flokkuðum við gömul kennispjöld til klukkan að verða þrjú. Fékk far heim úr vinnunni. Sjósundsvinkona mín var búin að spyrja hver vildi koma með í sjóinn um fimm en þegar til kom komst hún ekki sjálf og engin af hinum heldur svo ég var ekkert að æða ein af stað. Saumaði út, las, vafraði á netinu og glápti á imbann. Um níu fór ég í snögga sturtu og svo upp í rúm. Las til klukkan tíu og er nú langt komin með bókina Urðarköttur. 

Gluggaveður

Ég vaknaði aftur smá stundu áður en vekjarinn átti að hringja í gærmorgun og var búin að slökkva á honum og koma mér á fætur fyrir klukkan hálfsjö. Labbaði í vinnuna yfir Skólavörðuholtið. Ég var í framleiðslu að troða í vélina fram að hádegi. Eftir hádegi kláruðum við að plokka frá gulu miðana og töldum allt plastið, skráðum niður upplýsingar og létum kortaeigendur vita fjöldann og tegundirnar. Yfirgáfum vinnustað rétt fyrir hálffjögur. Ég fékk far heim. Nennti ekki út aftur. Hellti mér upp á smá kaffi og kveikti svo á fartölvunni. Millifærði smá summu á Odd og fékk hann til að skreppa út í Krambúð. Hringdi í pabba og einnig jafnöldru hans, konu sem var í Óháða kórnum. Tók aðeins fram útsauminn. Horfði á imbann og FBI þátt. Var háttuð upp í rúm um hálftíu og las í rúman hálftíma. Var frekar fljót að sofna. 

Vinnuvikan hálfnuð

Ég vaknaði rétt upp úr klukkan sex í gærmorgun, amk fimmtán mínútum áður en vekjarinn átti að hringja. Dreif mig á fætur, bjó um mig, sinnti morgunverkunum á baðherberginu, fékk mér lýsi og notaði svo tímann sem eftir var til að vafra aðeins um á netinu. Labbaði af stað í vinnuna um klukkan sjö. Fram að hádegi vann ég við framleiðsluna, taldi í kortategundirnar og tók á móti þeim og skoðaði. Framleiðslu lauk um hádegið en eftir hádegi voru við tvær af þremur að plokka út gula miða á milli plasta úr nýrri sendingu sem kom til okkar fyrir fáeinum dögum. Sú þriðja var að vinna í reikningagerðinni en hún plokkaði smá stund með okkur, eða úr einum 300 korta kassa af þeim 25 sem voru saman í öðrum stóra kassanum úr sendingunni.

Fékk far heim úr vinnunni. Tímann til hálfátta notaði ég í tölvumál, útsaum og sjónvarpsgláp. En um hálfátta tók ég til handavinnuna mína og labbaði í Grettisgötuna í saumaklúbb. Tvíburahálfsystir mín mætti um hálfníu. Notaleg og skemmtileg kvöldstundin til klukkan ellefu leið alltof hratt. Fékk far heim með Sonju en við tókum smá rúnt á Gróttu og Ægisíðu til að virða fyrir okkur gosbjarmann af Reykjanesinu. Var komin heim fyrir miðnætti en það munaði ekki miklu. Fór beint í rúmið en gaf mér tíma til að lesa aðeins áður en ég fór að sofa þannig að klukkan var byrjuð að ganga eitt þegar ég slökkti ljósið. 

Fyrsti virki dagurinn í apríl

Ég var pínu löt að fara fram úr fletinu í gærmorgun. Var þó klædd og komin á ról um hálfníu. Það lá svo sem ekkert sérstakt fyrir framan af morgni. Eyddi rúmri klukkustund í fartölvunni en um tíu bjó ég mér til hafragraut. Stuttu fyrir ellefu sótti sjósundsvinkona mín mig og var nafna hennar með í för. Þrjár saman skelltum við okkur í sjóinn við Nauthólsvík. Frost var í lofti en sjórinn mældist 3°C. Áður en við vissum af vorum við búnar að svamla um í sjö mínútur. Tíminn leið extra hratt því við vorum að spjalla svo mikið. Ég kom heim aftur rétt fyrir tólf og var búin að fara í sturtu búa mér til kaffi áður en hádegisfréttirnar á Rás 2 fóru í loftið.

Hélt mig heima við það sem eftir var af deginu. Skrapp aðeins tvær ferðir í þvottahúsið en annars var ég að prjóna, lesa, vafra um á netinu og glápa á imbann. Ekkert varð úr útsaum í gær en það stendur til bóta í dag.

 

Meiri eldar

Ég fór á fætur um hálfníu í gærmorgun. Eftir morgunverkin fór ég beint í eina tölvuna hans pabba og sat þar í uþb klukkustund. Síðan fékk ég mér AB-mjólk og lagði nokkra kapla. Hellti upp á kaffi um tíu um það leyti sem pabbi kom fram. Hann fékk sér þó ekki af kaffinu. Tók út eitt laxaflak sem ég matreiddi í hádeginu og gufusauð ég afganginn af blómkálinu, paprikunni og einn niðurskorin lauk en gleymdi að bæta epli út í. Fram að kaffi var ég að lesa, prjóna, sauma og leggja kapla. Fljótlega eftir kaffitímann tók ég mig saman, kvaddi pabbi, fermdi bílinn og brunaði í bæinn. Kom við á Sprengisandi og fyllti tankinn áður en ég fór heim. Fékk stæði beint fyrir utan og komst með dótið mitt inn í einni ferð. Afgangurinn af deginum fór í sjónvarpsgláp. 

Laxasteik í páskamatinn

Dreif mig á fætur upp úr klukkan átta í gærmorgun. Fyrsti klukkutíminn fór í leiki og netvafr í einni tölvunni hans pabba. Pabbi kom fram um það leyti sem ég hellti mér upp á fyrstu kaffibolla dagsins um tíu. Dagurinn fór svo í lestur, prjón, útsaum og tölvuleiki. Pabbi hafði keypt nokkur laxastykki og matreiddi ég tvö væn stykki í hádeginu og hafði með þeim gufusoðið blómkál, papriku, lauk og epli. Á meðan ég var að græja þetta skrapp pabbi í "mjólkurbúðina" til að kaupa einn kassa af hvítvíni. Opnaði hann ekki fyrr en á áttunda tímanum í gærkvöldi. Um tvö leytið bjó pabbi til pönnukökustafla úr pönnusumixi frá Kötlu. Út í soppuna bætti hann við eggi.

Er búin með bókina um þöglu stúlkuna og er byrjuð á bókinni; Urðarköttur eftir Ármann Jakobsson. 

Páskahelgin á Hellu

Ég var komin á fætur um hálfátta í gærmorgun.  Beið aðeins með að fá mér lýsi og morgunverð eða til níu. Þá borðaði ég afganginn af hafragrautnum frá því á miðvikudagsmorguninn, kaldan með smá rjóma útá. Sjósundsvinkona mín sótti mig rétt fyrir tíu. Þá var ég tilbúin og búin að bíða úti í uþb tíu mínútur. Hún var þá að koma frá því að bíða fyrir utan hjá nöfnu sinni sem hafði ætlað með okkur. Hún var greinilega steinsofandi því það náðist ekki í hana. Við vorum því bara tvær úr kjarnanum sem skelltum okkur nokkrar mínútur í sjóinn við Nauthólsvík. Hittum þó tvennt annað.

Var komin heim rétt upp úr hálfellefu. Skellti mér í sturtu og hellti svo upp á kaffi. Synir mínir komu fram úr herbergjum sínum á tólfta tímanum en ég kvaddi þá um tólf. Kom við hjá Atlantsolíu við Sprengisand en þar var röð af bílum svo ég ákvað að rúmlega hálfur tankur væri alveg nóg næstu daga.

Á leiðinni austur kom ég aðeins við í Fossheiðinni. Stoppaði þar í tæpa klukkustund. Var komin austur á Hellu fyrir klukkan þrjú og hér ætla ég að vera amk til morguns.

Við pabbi vorum með reykt folaldakjöt með rófustöppu í matinn og eftir kvöldréttir setti pabbi upp tjaldið og var með myndasýningu í rúma klukkustund.

Föstudagurinn langi

Í gærmorgun var klukkan byrjuð að ganga níu áður en ég fór fram úr fletinu og á fætur. Eftir morgunverkin á baðinu fór ég beint inn í stofu. Þar voru bæði bækur og prjónadót en líka fartölvan og ég settist niður með hana í dágóða stund. Annars var gærdagurinn nokkuð rólegur. Nennti ekki út í smá labbitúr og það eina sem ég fór út úr íbúðinni voru tvær ferðir í þvottahúsið. Drakk aðeins tvo bolla af kaffi en er ekkert að finna fyrir því núna, þ.e. höfuðið er ekki byrjað að kalla á kaffi. Er langt komin með bókina um þöglu stúlkuna og á aðeins tíu umferðir eftir af barnateppi no tvö áður en ég felli af og geng frá endum. Reyndar verða ekki svo margir endar til að ganga frá því ég prjónaði endana inn í teppið þegar ég var að klára og byrja á nýjum dokkum. Fyrir nokkrum dögum datt mér í hug að kíkja á þætti sem heita "Sáttasemjarinn", var búin að horfa á 3 þætti í gær og horfði á þrjá í einu seinni partinn og í gærkvöldi. 

Mars búinn

Var komin á fætur fyrir klukkan átta í gærmorgun. Fyrsta klukkutímanum eyddi ég í fartölvunni. Rétt fyrir níu skrapp ég í þvottahúsið og fór síðan beint í að búa mér til hafragraut. Sjósundsvinkona mín sótti mig rétt fyrir tíu og við hittum systurnar á bílastæðinu við Nauthólsvík. Ég var langfyrst út í sjó og fór upp úr um leið og hinar. Þær voru eitthvað um fimm mínútur og ég sennilega rúmum tveimur mínútum lengur. Kom heim um hálfellefu og nú notaði ég tækifærið og þvoði mér um hárið. Fljótlega eftir surtuferðina hellti ég upp á fyrsta kaffibolla dagsins. Þeir urðu reyndar tveir og um miðjan dag hellti ég upp á og drakk aðra tvo. Hengdi upp í þvottahúsinu og ákvað að skella yfirtökuflíkinni og hluta af sjósundsdótinu á stutt 39°C prógramm. Annars fór gærdagurinn í lestur, prjón, sjónvarpsgláp og netvafr. 

Í sjóinn í morgun

Ekki tókst mér að sofa lengur en til klukkan að verða sjö í gærmorgun. Gerði tilraun til að kúra svolítið lengur en var komin á fætur áður en klukkan varð hálfátta þrátt fyrir að eiga ekki að mæta til vinnu. Vann einum virkum degi lengur í mars heldur en samanlagt fyrir janúar og febrúar. Það er komið vaktaáætlun alveg til  16. apríl n.k. og skv. þeirri áætlun vinn ég alla fjóra virku dagana eftir páska og svo 15. og 16. apríl.

Tók því frekar rólega fram að hádegi í gær, setti þó handklæði í þvottavélina og var búin að hengja þau upp eftir þvottinn áður en Oddur Smári kom fram. N1 strákurinn var á vinnuvakt og hafði lagt af stað nokkru fyrir klukkan sjö.

Komst að því að það eru tveir höfundar að bókinni um Þöglu stúlkuna, Michael Hjorth & Hans Rosenfeldt og ég kannast eitthvað við persónurnar í sögunni svo ég hef alla vega lesið eina bók af þeim þremur sem eru komnar út á undan þessari.

Upp úr klukkan eitt lögðum við mæðgin af stað í verslunarleiðangur. Rúntuðum aðeins út að Gróttu á heimleiðinni. Um þrjú fékk ég svo einkabílstjórann til að skutla mér niður í bæ þar sem ég hitti 2 núverandi vinnuvinkonur og eina sem vann með okkur til 2016 á Cafe Aleppo. Ég pantaði mér kaffi með nafni staðarins, eplapæ og litla hvítvínsflösku. Eftir eins og hálfs tíma hitting kvöddumst við. Ég varð samferða einni að Hörpunni og þar sem bíllinn hennar var búinn að vera frá því klukkan korter í átti um morguninn. Hún skutlaði mér svo heim.

Heima

Varð svolítið hissa þegar vekjaraklukkan vakti mig rétt fyrir hálfsjö í gærmorgun. Stillti á fimm mínútna blund á meðan ég var að átta mig á þessu. Það tók mig samt aðeins tæpar þrjár mínútur svo ég var búin að slökkva á vekjaranum áður en hann náði að hringja aftur. N1 sonurinn var að undirbúa sig undir vinnuvakt og hann fór út amk tuttugu mínútum á undan mér. Ég labbaði af stað í vinnuna um sjö. Við þrjár sem máttum mæta í gær voru sömu þrjár og unnu saman aðrahverja viku frá því viku eftir verslunarmannahelgi sl haust. Ég sinnti bókhaldinu en hinar tvær sáu um framleiðslu. Upp úr hádegi var send á okkur síðasta endurnýjun mánaðarins svo það var framleitt alveg til klukkan að verða þrjú. Ég sorteraði gömul kennispjöld á meðan og náði næstum því að klára að sortera úr þremum kössum, nokkur hundruð kennispjöld.

Fékk far heim úr vinnunni. Rétt fyrir fimm sótti sjósundsvinkona mín mig og við pikkuðum einnig upp nöfnu hennar áður en við skelltum okkur í sjóinn í Nauthólsvík, 7 mínútur í 3°C sjónum sem var að flæða að. Var komin heim aftur um hálfsex og fór beint í sturtu. Frestaði hárþvotti þótt það séu komnir tíu dagar síðan ég þvoði hárið síðast. Það sleppur alveg í tvo daga enn.

Er byrjuð á bók sem heitir Þögla stúlkan eftir Hjorth Rosenfeldt. Þetta ku vera fjórða bók höfundar um sálfræðikarakter að nafni Sebastian Bergman. Hef ekki lesið hinar en ef þessi nær til mín mun ég líklega leita hinar bækurnar uppi.

Extra stutt vinnuvika

Ég var komin á fætur rétt upp úr klukkan sjö í gærmorgun. Dagurinn fór allur í eitthvað dútl hér heima við og yfir 90% af því dútli tengdist áhugamálum og svoleiðis dægradvöl. Hellti mér tvisvar upp á kaffi. Horfði á báða landsleikina. Prjónaði, las og horfði á imbann. Eitt af því fáa sem ég gerði sem ekki tengdist dútlinu var að útbúa kjúklingalæri í ofni í kvöldmatinn. Var á einhverjum tímapunkti að spá í að skreppa aðeins út í göngutúr en það náði ekki lengra en að hugsa það. Bíllinn er búinn að vera kjurr í sama stæðinu síðan ég kom heim úr síðustu sundferð sl. miðvikudag. 

Síðasti sunnudagur marsmánaðar

Ég var glaðvöknuð og komin á fætur rétt fyrir átta í gærmorgun. Eftir morgunverkin á baðinu settist ég beint inn í stofu og kveikti á fartölvunni. Rétt rúmum klukkutíma síðar slökkti ég á tölvunni og snéri mér að því að búa mér til hafragraut. Þegar ég var búin að taka lýsi og borða helminginn af grautnum hafði ég smá tíma til að lesa og byrjaði ég á einni af bókunum sem ég sótti á safnið sl. miðvikudag; Stelpur sem ljúga eftir Evu Björg Ægisdóttur. Las þó ekki lengi og upp úr hálftíu græjaði ég mig upp fyrir sjósundsferð. Fór í sundbolinn, setti teygju í hárið og sundhettuna á mig. Klæddi mig í sjósundsskóna, í lopapeysu af mömmu, ullarhúfu og yfirtökuflíkina sem ég var enn með í láni frá sjósundsvinkonu minni. Setti skó, handklæði og sjósundsvettlinga í bláan ikeapoka og húslykla, vettlinga, sokka og síma í stóru vasana á yfirtökuflíkinni. Helga Rún sótti mig stuttu fyrir tíu og svo nöfnu sína áður en við fórum og hittum systurnar á stæðinu við Nauthólsvík. Þær þrjár síðastnefndu klæddu sig upp við húsið en ég og Helga Rún fórum á "okkar staði" í fjörunni sem var hægt því það var að fjara út. Hún byrjaði á því að mæla sjóinn sem reyndist 1,8°C. Vorum allar fimm samferða út í og svömluðum um á svæðinu í uþb fjórar mínútur. Fjórir aðrir höfðu fengið sömu hugmynd, að skella sér í smá sjóbað. Ég var komin heim aftur upp úr klukkan hálfellefu og fór ekkert út aftur í gær, aðeins eina ferð í þvottahúsið að skola sjósundsskó og vettlinga, vinda og hengja til þerris. Hringdi í pabba upp úr ellefu og eftir spjallið við hann hellti ég upp á fyrstu tvo kaffibolla dagsins. Hellti aftur upp á einn bolla á þriðja tímanum. Hafði samband við Ellu vinkonu og Önnu Önfjörð frænku mína. Las, prjónaði og dundaði mér við ýmislegt.

Laugardagsmorgun

Það var nokkuð svalt að labba í vinnuna í gærmorgun. Var ekki í nýju úlpunni en það slapp alveg til, hefði sennilega svitnað miklu meira í henni. Í vinnunni vorum við sömu þrjár og á fimmtudaginn. Skiptum um hlutverk og mitt hlutverk í gær var að taka á móti framleiðslu dagsins og skoða. Eftir hádegi vorum við að flokka kennispjöld til klukkan rúmlega hálfþrjú. Fékk far heim úr vinnunni og fór ekkert út aftur. Strákarnir voru báðir heima og ég hafði lasanja í kvöldmatinn. Annars var ég að vafra á netinu, prjóna, lesa og glápa á imbann. Ekki allt í einu samt. Áður en ég fór að sofa lauk ég við að lesa bókina sem ég hef verið að lesa undan farna daga. Það kom tilkynning frá bókasafninu um að skiladagur væri í gær en ég gat framlengt um 30 daga og gerði það. 

Helgarfrí

Seinni partinn í fyrradag var ákveðið að aðeins þrjár mættu mæta á vinnustað í einu. Yfirmaður setti upp nokkura daga plan og ég var skráð í vinnu í gær, dag og nk. mánudag og síðan ekki fyrr en fyrsta virka dag í apríl. Þegar við erum þetta fáar í vinnu röðum við okkur niður í framleiðslu og bókhaldsverkefni, ein í bókhaldi, önnur að hlaða inn og troða í vél og sú þriðja að taka á móti og skoða. Daglegri framleiðslu lauk um hádegið í gær. Ein af okkur fékk að fara fljótlega eftir hádegi en við hinar sátum og flokkuðum kennispjöld til klukkan að verða hálfþrjú. Þá ákváðum við að segja þetta gott þann daginn. Ég labbaði heim og byrjaði á því að hella mér upp á sterkan kaffibolla. Fór ekkert út úr húsi aftur en fór tvær ferðir í þvottahúsið, eina til að setja í vél og aðra ferð til að hengja upp. Horfði á báða landsleikina, vafraði um á netinu í fartölvunni og las smávegis í seinna bindinu um Hellu. Fór tiltölulega snemma í háttinn eða rétt fyrir tíu og las þá í bókinni; Vatn handa fílum sem er sú bók af safninu sem ég skilaði ekki í fyrradag.

Hertar reglur

Í gærmorgun var ég vöknuð um fimm við fuglasöng. Gerði tilraun til að kúra mig niður en um hálfsex gafst ég upp og fór bara á fætur, tannaði, tók lýsi og settist svo með fartölvuna inn í stofu þar til kominn var tími til að labba af stað í vinnuna. Vorum fjórar mættar í vinnu og mitt hlutverk var að sinna bókhaldinu. Daglegri framleiðslu lauk um hádegið. Eftir hádegið vorum við allar fjórar að flokka niður gömul kennispjöld eftir bönkum. Hættum í fyrra fallinu. Ég fékk far heim úr vinnunni og var komin í þann mund sem bein útsending frá blaðamannafundi ríkisstjórnarinnar um hertar samgöngur hófst. Ég hafði fengið áminningu frá bókasafninu um að skiladagur væri að nálgast. Ég tók til sunddótið og ákvað að byrja á því að skreppa á safnið og skila öllum bókum nema þeirri síðustu, sem ég er enn að lesa. Þá bók ætla ég að framlengja, ef það þá gerist ekki bara "sjálfkrafa" vegna lokunnar. Fékk fimm bækur að láni í amk mánuð. Af safninu fór ég beint í sund. Fór fjórum sinnum 4-5 mínútur í kalda pottinn, synti 500 metra, fór tvisvar í heitasta pottinn og endaði í gufunni áður en ég fór upp úr og heim að útbúa ommilettu úr 4 eggjum, rjóma, rifnum osti og afgangi af soðinni ýsu.

Á leið í sund og bókasafn áður en lokar

Vaknaði örfáum mínútum áður en vekjarinn átti að fara af stað í gærmorgun. Slökkti á honum og dreif mig á fætur. Það var ekki lengur strigaskóafæri svo ég reimaði á mig gönguskóna og labbaði í vinnuna á svipuðum tíma og venjulega. Vorum allar fimm og nú er nóg af aukaverkefnum ef maður er búinn með þau verkefni sem skráð er á mann. Rétt fyrir þrjú kom yfirmaður okkar á staðinn og fundaði með okkur í tæpa klukkustund. Góður fundur og farið yfir eitt og annað. Fékk far heim úr vinnunni. Vorum aðeins lengur á leiðinni því umferðin er þyngri upp úr klukkan fjögur. Stoppaði heima í hátt í klukkustund og hringdi m.a. í pabba. Dreif mig loksins í sund upp úr hálfsex. Fór tvisvar sinnum 5 mínútur í kalda pottinn, einu sinni í þann heitasta og synti svo aðeins 100 metra áður en ég fór upp úr og heim aftur. 

Alveg að fara í sund

Vekjaraklukkan vakti mig í gærmorgun. Valdi að "blunda" áfram í fimm mínútur en slökkti svo og fór á fætur þegar hún hringdi aftur. Það var strigaskóagöngufæri í vinnuna. Þurfti reyndar að sneiða framhjá einstaka pollum. Ég átti móttökuvakt á framleiðsluvélinni fram að kaffi. Var í öðrum verkefnum fram að hádegi en eftir hádegi og til rúmlega þrjú var ég á fremri (stjórnar) enda vélarinnar að framleiða endurnýjun. Fékk far heim úr vinnunni. Stoppaði heima til hálffimm en þá skrapp ég í sjóinn við Nauthólsvík. Var komin heim aftur um klukkustund síðar.

Er byrjuð að lesa síðustu bókina af safninu: Vatn handa fílum eftir Sara Gruen. 

Sund- eða sjóferð, erfitt að velja

Mágur minn og hundarnir voru fyrstir á fætur í gærmorgun. Ég kom fram rétt fyrir klukkan átta og þá var að hellast upp á kaffikönnuna. Upp úr klukkan tíu kvöddu systir mín og mágur og fóru með hundana í bæinn. Þau voru á tveimur bílum, mágur minn á vinnubíl því hann verður í verkefnum hér fyrir sunnan til miðvikudags. Leið þeirra hjóna lá í Kostkó áður en þau sóttu yngri dóttlu sína og mættu í fermingaveislu til systursonar Ingva.

Ég stoppaði fyrir austan aðeins fram yfir kaffi og var komin í bæinn rétt fyrir klukkan sex. Kvöldið fór í sjónvarpsgláp.

Hittingur á Hellu

Ég vaknaði við vekjaraklukkuna korter yfir sjö í gærmorgun. Dreif mig fram úr og á fætur. Lokað var inn í stofu sem benti til þess að frænka mín hefði skilað sér í hús einhvern tímann eftir að ég fór að sofa. Um hálfátta bankaði ég upp á hjá N1 syninum og spurði hvort hann þyrfti ekki að mæta í vinnuna klukkan átta. Hann dreif sig á fætur og ég tók til sunddótið mitt. Skutlaði syninum upp á Gagnveg og var hann mættur tvær mínútur fyrir átta. Kom við á Altanstsolíustöðinni við Sprengisand og fyllti á tankinn áður en ég fór í sund. Fámennt en góðmennt var í sundi en það voru samt all nokkrir sem heilsuðu mér með spurningunni; "Hvar hefur þú verið?" Það er svolítið langt síðan ég var í sundi á þessum tíma og undanfarna laugardaga hef ég þar að aukið valið að fara í sjóinn. Byrjaði á því að fara í kalda pottinn í 4-5 mínútur áður en ég synti 500 metra. Fór þrjár ferðir í viðbót í kalda pottinn, tvær ferðir í heitasta pottinn og endaði á gufubaði áður en ég fór upp úr og þvoði mér um hárið. Var mætt til klipparans rétt fyrir tíu. Hálft ár síðan ég var þar síðast. Hann klippti um 2cm af hárinu til að laga endana en lengsta tímann tók að þurrka og greiða á mér hárið. Það heldur áfram að þykkna og nú er ekkert verið að þynna það.

Hvorki Oddur né Bríet voru komin á fætur þegar ég kom heim um hálfellefu. Ég bjó mér til hafragraut og kaffi og gluggaði aðeins í helgarblaðið á meðan ég gæddi mér á þessu. Á tólfta tímanum raðaði ég klæðnaði, snyrtisetti og bókum í ferðatösku og tók til handavinnutöskuna og prjónadótið mitt. Bankaði á herbergisdyrnar hjá Oddi til að kveðja hann og brunaði svo beinustu leið á Hellu. Þar voru fyrir systir mín og mágur og báðir hundarnir þeirra og seinni partinn bættust Jóna Mæja og Reynir í hópinn. Grillið var tekið út. Mágur minn gerði bernessósu og hann og Reynir grilluðu lambasneiðar eftir að Helga systir og Jóna voru búnar að útbúa tvenns konar sallat og ofnbakað grænmeti. Þetta var mjög gott. Ég gekk frá eftir matinn og pabbi hellti upp á kaffi og boðið var upp á kleinur, kex og súkkulaði í eftirrétt. Jóna og Reynir kvöddu á ellefta tímanum og fljótlega fóru systir mín, mágur og hundarnir að sofa. Pabbi bauð góða nótt stuttu á eftir þeim. Ég sat við tölvuna til klukkan hálftólf áður en ég slökkti á henni og fór inn í rúm að lesa.

Gos

Þrátt fyrir smá úða og einhverja polla fór ég á strigaskóm og úlpu labbandi í vinnuna í gærmorgun. Á föstudögum erum við fjórar í vinnu því sú fimmta er í 70% stöðu og búin með sína vinnuviku á hádegi á fimmtudögum. Ég byrjaði frammi í skrifstofurými að undirbúa pökkun. Flokkaði svo gömul kennispjöld í um hálftíma þar til hægt var að telja fyrstu tölur. Eftir kaffi fór ég inn á framleiðsluvél að troða í og eftir hádegi fór ég á móttökuendann. Hættum framleiðslu um þrjú og gengum frá. Ég fékk far heim úr vinnunni. Stoppaði stutt við heima, fann til sunddótið mitt og dreif mig í Laugardalinn. Á heimleiðinni kom ég aðeins við í Krónunni við Nóatún. Ég var nýkomin heim og að setja upp grjónagraut þegar yngri systurdóttir mín kom. Hún þurfti að fara þrjár ferðir til að sækja dótið sem hún var með svo ég spurði auðvitað hvort hún væri flutt til mín. Dótið setti hún inn í stofu enda búin að fá leyfi til að gista þar. Ég fékk samt að sitja yfir imbanum langt fram á kvöld og aðeins inn í nóttina.

Æskuvinkona mín hringdi í mig upp úr tíu og það var hún sem færði mér þau tíðindi að gos væri hafið við Fagradalsfjall á Reykjanesi. Ég var að horfa á nýjasta þátt FBI most wanted, hafði ekki nennt að horfa á allan vikulega þáttinn hans Gísla Marteins en vinkona mín sagði að hann hefði fengið fréttirnar í eyrað undir lok þáttarins. Eftir spjallið við Ellu beið ég eftir því að aukafréttatíminn í sjónvarpinu hæfist og horfði aðeins fram yfir miðnætti. Útsendingu var ekki lokið þegar ég slökkti og dreif mig í háttinn. Rétt hafði úthald til að lesa einn kafla í næstsíðustu bókasafnsbókinni áður en ég fór að sofa í hausinn á mér.

Aftur komin helgi

Labbaði í vinnuna í gærmorgun á strigaskóm í mildu og góðu veðri. Vinnudagurinn leið hratt en hann var ekki búinn fyrr en um hálffjögur. Fékk far heim úr vinnunni. Aldrei þessu vant hafði ég gleymt að færa húslyklana yfir í bakpokann. Hvorugur sonanna svaraði í síma en annar þeirra hringdi fljótlega til baka og hleypti mér þá inn. Ég stoppaði stutt við heima, rétt til þess að taka til sunddótið. Var mætt í Laugardalinn rétt upp úr klukkan fjögur og var að klára mína fyrstu ferð í kalda pottinn þegar kalda potts vinkonan mætti á svæðið. Hún byrjar venjulega á því að fara í heitasta pottinn. Fór fimm ferðir í þann kalda með henni en endaði svo í gufubaði. Kom við í Fiskbúð Fúsa á leiðinni heim og keypti m.a. ýsu í soðið. 

Bráðum verður dagurinn lengri en nóttin

Vekjaraklukkan vakti mig rétt fyrir hálfsjö í gærmorgun. Var mikið að spá í að fara labbandi í vinnuna en í tilefni dagsins ætlaði ég að bjóða samstarsfólki mínu upp á smá veitingar sem voru aðeins meiri en ég treysti mér til að labba með. Það varð úr að ég fór á bílnum í vinnuna í fyrsta skipti á þessu ári. Framleiðsludagurinn fór ekki nógu vel af stað því það höfðu engar skrár skilað sér yfir á vél og við þurftum að hringja á vin til að hjálpa okkur að koma þeim yfir. Og fyrir utan fyrstu tvo daglegu verkin var ein stór endurnýjun með. Sem betur fer gat sá sem kom og hjálpaði okkur sent yfir nokkrar skrár í einu svo það tókst að ná að ljúka við að framleiða fyrsta skammtinn fyrir tímamörkin. Eftir þá framleiðslu fórum við í kaffipásu. Ég bauð m.a. upp á pralín ostatertu, litla gerð af súkkulaðitertu, þrjár tegundir af ostum, vínber og ritzkex. Þetta féll alveg í kramið.

Vinnudegi lauk rétt fyrir hálffjögur. Ég fór heim til að sækja sjósundsdótið mitt og var komin í 3,7°C sjóinn rétt upp úr fjögur. Það var mikil fjara og áður en ég vissi af var ég búin að svamla alla leið út að kaðli. Kom heim aftur um fimm og næsta klukkutímann var í að skoða og svara afmæliskveðjum á veggnum mínum. Helga systir hringdi í mig um þetta leyti.

 Klukkan sex fór ég aftur út og brunaði upp í Hraunbæ, mætti síðust af vinnufélögunum en íbúðareigandinn var akkúrat að byrja að sýna alla króka og kima íbúðarinnar. Svo bauð hún okkur upp á tvær tegundir af súpu, kjúklinga- og sveppasúpu, brauð og fl. Það var svo mikið af súpu að við spurðum tveggja spurninga, hvað hún hefði átt von á mörgum eða hverslu lengi hún vildi að við værum. Ég smakkaði báðar súpurnar og þáði svo kaffi og lítið páskaegg á eftir. Var vel södd eftir þessar veitingar. Um átta leytið kvöddum við gestgjafann. Á leiðinni heim hringdi besti vinur minn í tilefni dagsins. Sá býr í Grindavík og ég spurði strax hvernig þau hefðu það. Hann sagði að þetta væri búið að taka á og nóttin á undan hefði verið sú fyrsta í þrjár vikur sem hann svaf vel og vaknaði úthvíldur.

Þegar heim kom hélt ég áfram að svara öllum kveðjum og fékk einnig þriðja afmælissímtalið og það var frá esperanto vinkonum minni.

Afmælisdagur í dag

Var vöknuð aðeins á undan vekjaraklukkunni í gærmorgun og kom mér fljótlega á fætur. Sinnti morgunverkunum á baðinu og fékk mér matskeið af lýsi og glas af vatni. Svo settist ég smá stund inn í stofu með fartölvuna í fanginu. Labbaði af stað í vinnu um sjö og var mætt um hálfátta. Vorum fjórar af fimm, ein var í orlofi. Vinnudagurinn leið frekar hratt við alls konar hefðbundin sem og nokkur óalgeng störf. Fékk far heim úr vinnunni. Stoppaði heimavið í uþb klukkustund áður en ég dreif mig í sund. Synti reyndar ekkert en fór 3x4-5 mínútur í kalda pottinn, 2x í heitasta pottinn, 1x í sjópottinn og endaði í gufunni. Kom við í Hagkaup í Skeifunni á leiðinni heim.

Marsmánuður hálfnaður

Ég vaknaði á undan vekjaraklukkunni í gærmorgun og fór fljótlega á fætur. N1 sonurinn var kominn fram aðeins á undan mér og fór út úr húsi amk tuttugu mínútum á undan mér. Ég labbaði á strigaskóm í vinnuna sem var alveg í góðu lagi, göngufærið fínt. Sennilega voru það sokkarnir sem urðu til þess að tvær litlar tær á vinstra fæti fóru að nuddast saman á göngunni. Lét það samt ekki stoppa mig. Var á framleiðsluvélinni í móttöku fram að kaffi og í frágangi frammi í skrifstofurými eftir kaffi. Eftir hádegi sat ég sveitt í á þriðja klukkutíma að taka hið árlega öryggispróf, svara 30 spurningum, langflestar með fjórum svarmöguleikum og fyrirmælin voru þau að standast þyrfti með amk 70% rétt til að þurfta ekki að taka prófið strax aftur. Það hafðist og rétt rúmlega það.

Fékk far heim úr vinnunni og var að undirbúa mig að verða sótt af sjósundsvinkonu minni þegar ég sá tilkynningu frá Ylströndinni í Nauthólsvík að loka þyrfti aðstöðunni frá klukkan hálffjögur í gær vegna veikinda starfsmanns. Ég lét því vinkonunan vita að ég ætlaði að skreppa í sund í staðinn. Var mætt þangað rétt fyrir fimm og var búin að fara eina ferð í kalda pottinn þegar kalda potts vinkonana mætti. Við fórum fimm ferðir saman í þann kalda og svo endaði ég á að sitja góða stund í gufunni. Sleppti því alveg að synda í þetta sinn.

Ég var nýkomin upp í rúm um hálfellefu í gærkvöldi þegar stærsti skjálfti gærdagsins reið yfir, rúmlega 4 að stærð. Það kom annar innan við 4 skömmu síðar og fann ég líka fyrir honum. Las í smá stund en var svo örugglega sofnuð einhvern tímann upp úr klukkan ellefu. 

Ný vinnuvika framundan

Í gærmorgun var ég komin á fætur rétt fyrir átta. Til að byrja með fór ég aðeins að vafra um á netinu í fartölvunni sem Davíð Steinn lánaði mér. Áður en klukkan varð níu var ég búin að slökkva. Fékk mér afganginn af hafragrautnum frá því á laugardagsmorguninn. Borðaði hann kaldan með rúsínum og rjóma. Var mætt í laugardalslaugina um hálftíu. Byrjaði á því að synda og var búin með fyrstu ferðina í kalda pottinn þegar kalda potts vinkona mín fann mig í heitasta pottinum. Ein systir hennar og nafna mín mætti á svæðið þegar við vorum að koma úr þriðju og fjórðu ferðinni í kalda. Stuttu síðar hittum við sjósunds vinkonu mína og það kom í ljós að þær könnuðust hver við aðra, höfðu alist upp í sama hverfi. Þvoði á mér hárið þegar ég fór upp úr. Var komin heim um tólf og byrjaði á því að hella mér upp á kaffi. Var að hlusta á hádegisfréttirnar og prjóna þegar einn stór skjálfti reið yfir rúmlega hálfeitt.

Rétt fyrir tvö hringdi ég í nöfnu mína og frænku, Önnu Önfjörð, og okkur samdist um að ég kæmi yfir til hennar en við færum saman í kaffihús. Oddur Smári skutlaði mér vestur í bæ og hann notaði ferðina til að fara með flöskur og dósir í endurvinnslu. Rétt eftir að ég hringdi á dyrasímann hjá frænku minni ku næst stærsti skjálftinn í þessari þriggja vikna hrinu hafa riðið yfir, 5,4 og annar um 4 rétt síðar. Ég fann ekki fyrir þeim þarna fyrir utan, hef líklega verið á einhverri hreyfingu á meðan ég beið eftir að nafna mín kæmi niður og út. Það fyrsta sem hún spurði mig að þegar hún svo kom var hvort ég hefði fundið skjálftann. Hún sagði að kisan þeirra hefði í fyrsta skipti farið í spá í hvað væri að gerast, lætin og glamrið í húsgögnum og dóti í skápum var það mikið.

Við frænkur fórum saman á Cafe Aleppo og ég bauð okkur upp á kaffi og kruðerí. Eftir gott spjall og einnig könnun á hversu stórir skjálftarnir voru löbbuðum við aðra leið til baka. Nafna mín bauðst til þess að skutla mér heim og þáði ég það svo hittingur okkar var, smá gönguferð, kaffihúsahittingur og bíltúr að auki.

Er byrjuð að lesa næstsíðustu bókina af safninu: Marrið í stiganum eftir Evu Björg Ægisdóttur.

Fjárfest í sundbolum

Ég var frekar löt að fara framúr í gærmorgun og var klukkan langt gengin í níu áður þegar ég hafði mig loksins framúr. Klukkutíma síðar bjó ég mér til hafragraut og átti ég rjómalögg til að bæta út á hann svo hann var virkilega saðsamur og góður. Rétt rúmlega hálfellefu sótti sjósundsvinkona mín mig. Mættum í röðina við aðstöðuna korter fyrir ellefu. Systurnar komu um svipað leyti. Við vorum allar frekar aftarlega en samt nógu framalega til að fá að fara inn í fyrsta hollinu. Sjávarhitinn var kominn niður í 2,1°C og vindkælingin nokkur. Ég var fyrst út í af fjögurra manna hópnum mínum. Það var fjara svo vaða þurfti hálfa leið til Kópavogs ef maður vildi komast á eitthver dýpi.

Var skilað heim aftur fyrir klukkan hálfeitt. Fékk mér afgang af steiktum fiski frá því í vikunni og hellti mér upp á tvo kaffibolla. Tveimur tímum síðar dreif ég mig í sundbolaleiðangur í Sports Direct. Fann uppáhalds sniðið mitt í minni stærð og keypti mér þrjá. Tveir af þeim þremur sundbolum sem ég hef verið að nota eru orðnir hættulega þunnir á viðkvæmum stöðum svo þeir verða lagði til hliðar og svo í Rauða kross gám fljótlega. 

Í sjóinn á eftir

Labbaði af stað í vinnuna um sjö í gærmorgun, Um það bil sem ég var að komast efst upp á Skólavörðuhæðina ákvað ég að taka niður og slökkva á höfuðljósinu. Það er sennilegt að ég þurfi ekki að setja það upp aftur næstu mánuðina því það er alls ekki eins dimmt á morgnana enda verður jafndægur á vori um næstu helgi. Ég sinnti bókhaldsstörfum í vinnunni og um ellefu tók ég þátt í förgun ónýtra plasta frá því í febrúar. Höfðum þann háttinn á að ég þuldi upp tegundirnar og fjölda og yfirmaður minn var með pappíra til að staðfesta. Fyrirliðinn og ein úr öryggisdeildinni biðu með að farga plastinu þar til búið var að staðfesta öll tæplega hundrað kortin. Síðan var skeiðklukkan sett í gang til að athuga hvað tæki langan tíma fyrir tvo að tæta þessi kort. Niðurstaðan var ein og hálf mínúta. Eftir förgun var stuttur stöðu og upplýsingafundur. Öllum daglegu verkefnum og frágangi var lokið fyrir klukkan hálftvö. Enginn póstur kom klukkan tvö svo við drifum okkur heim í helgina. Ég fékk far heim. Byrjaði á því að hella mér upp á kaffi og fá mér smá hressingu. Tveim tímum seinna dreif ég mig loksins í sund og náði tveimur ferðum í kalda pottinn með kalda potts vinkonu minni. Ég tók svo smá sundsprett áður en ég fór aftur heim og bjó til plokkfisk úr afganginum að ýsunni frá því kvöldið áður.

Föstudagur

Þar sem ég tók að mér að sitja yfir þeim sem sinna yfirferð á framleiðsluvélinni var mér boðið að mæta aðeins seinna til vinnu í gærmorgun. En þótt ég ætti von á því að vera til klukkan fjögur þá var ég vöknuð og komin á fætur fyrir klukkan sjö og ákvað að labba af stað á venjulegum tíma, um sjö. Var í móttökustörfum á vélinni fram að morgunkaffi en pökkun, frágangi og talningu fram að hádegi. Yfirferðarmennirnir voru mættir klukkan tólf. Þá vorum við búnar að læsa alla skápa og bankatöskur inn á lager. 70% manneskjan kvaddi um þetta leyti og óskaði okkur góðrar helgar. Hinar tvær voru farnar um og upp úr klukkan eitt. Ég var með prjónana mína og bækur. Um tvö athugaði ég hvort borist hefði póstur. Pósthólfið var tómt. Yfirferðarmennirnir voru aftur á móti að taka sig saman og hættir. Þeir áttu semsagt aðeins að skila fjórum tímum og þar sem þeir voru tveir deildust tímarnir á þá báða svo þeir voru bara tvo tíma. Ég gat því hætt um leið og þeir voru farnir.

Labbaði heim og var komin nokkru fyrir þrjú. Kalda potts vinkona mín hafði haft samband fyrir klukkan átta og spurt hvort ég kæmi í sund um fjögur. Þá átti ég ekki von á því að komast fyrr en um fimm. Ég var ekkert að breyta tímasetningunni aftur. Mætti þó í sund rétt fyrir fimm, kom við í fiskbúðinni áður. Þá var hún búin að fara eina ferð. Saman fórum við fimm ferðir og fórum svo ýmist í heitasta pottinn, sjó-pottinn (sem loksins er kominn sjór í aftur) og pott no 2 sem er 42°C. Ég tók svo eina loka ferð í þann kalda, mína sjöttu áður en ég fór upp úr og heim. Klukkan var orðin meira en hálfsjö en ég var búin að græja soðna ýsu, með kartöflum og lauksmjöri um sjö leytið.

Labbað báðar leiðir

Fór labbandi á strigaskóm í vinnuna í gærmorgun. Færið var fínt. Við vorum aðeins fjórar í vinnu, sú fimmta hafði tekið sér orlofsdag. Ein af hinum tók svo út styttingu og kvaddi okkur um hádegið. Þá var framleiðslu lokið og átti aðeins eftir að telja síðustu tölur. Fljótlega eftir hádegishlé voru þær afgreiddar og sú sem var í bókhaldinu fór með slatta af dósum og flöskum með sér út stuttu fyrir tvö. Við tvær sem vorum eftir hinkruðum til tvö ef það myndi koma póstbeiðni um að vinna ákveðið verk. Sá póstur kemur aðeins stöku sinnum en hafði komið á slaginu tvö síðustu fjóra virka daga á undan. Í gær kom enginn póstur svo við ákváðum að drífa okkur heim. Ég fékk fínasta meðbyr á göngunni heim en mér fannst pínu fyndið að vera í strigaskóm þar sem það var kominn smá snjór hér og þar. Snjórinn var samt meira að fjúka um.

Þegar heim var komið hellti ég mér upp á tvo bolla af kaffi þrátt fyrir að vera búin að drekka amk fjóra espressó í vinnunni yfir daginn. Var lengi vel að spá í að drífa mig í sund en um fimm tók ég þá ákvörðun að fara ekkert út úr húsi aftur, heldur lesa, prjóna og taka því rólega. 

Smá hret

Ég reimaði á mig gönguskóna rétt fyrir sjö í gærmorgun. Setti ekki broddana undir og það slapp alveg til á göngunni í vinnuna. Þurfti þó að fara extra varlega þegar ég þveraði Klamratúnið, labbaði stundum til hliðar við steypta stíginn. Vann til klukkan tólf því ég var búin að ákveða að taka hálfan dag og skrá sem uppsöfnuð stytting vinnuvikunnar fyrir marsmánuð.

Hafði nefnt það við einkabílstjórann hvort hann myndi fara í Sorpu í fyrra fallinu, sækja mig í vinnunna á leiðinni þangað og hleypa mér út við Krónuna við Granda. Sonurinn var ekki einu sinni lagður af stað þegar ég labbaði út af vinnustaðnum en þegar ég náði loksins í hann samdist okkur um að hann myndi pikka mig upp við Sólfarið. Ég rölti því þangað og þurfti aðeins að bíða í uþb 7 mínútur.

Var búin að skrifa niður innkaupalista svo ég myndi ekki gleyma neinu nauðsynlegu. Komum heim um hálftvö. Þá var hinn sonurinn búinn að taka aðeins til í eldhúsinu. Einkabílstjórinn hjálpaði mér að ganga frá vörunum og svo tókum við okkur saman um að fara aðeins yfir gólfin, með rykmoppu yfir parketi, hrúgurnar svo ryksugaðar upp sem og teppið fram á palli og flísarnar á baðherbergisgólfinu.

Klukkan var langt gengin í fjögur þegar ég tók til sjósundsdótið og brunaði í Nauthólsvík. Það var næstum háflóð, sjórinn 3,2°C og ég svamlaði um í rúmar tíu mínútur. Engin biðröð var við aðstöðuna en þegar ég var á leiðinni heim upp úr klukkan fjögur þá tók það mig aðeins lengri tíma að komast heim en venjulega því það var smá umferðarsulta á Flugvallarvegi upp á Bústaðaveg.

Í gærkvöldi var ég svo með saumaklúbb hjá mér. Það var 100% mæting og sem fyrr fannst okkur við bara búnar að sitja, föndra og spjalla í uþb tíu mínútur þegar klukkan var allt í einu orðin ellefu. 

Stytting

Var í fyrstu ekki alveg viss hvað var að gerast þegar vekjarinn fór í gang í gærmorgun. En ég var tiltölulega fljót að átta mig og dreif mig á fætur. Átti til kaldan hafragraut í ísskápnum síðan á laugardagsmorguninn og ég gæddi mér á honum. Labbaði á strigaskóm í vinnuna. Nú þegar við erum allar fimm þá verðum við að skipta verkunum á milli okkar. Tvær sjá um framleiðsluvélina fram að morgunkaffi, ein sinnir bókhaldinu og önnur af þeim sem tekur við vélinni eftir kaffi undirbýr pökkun. Hin fær þá yfirleitt að aðstoða bókarann við að telja þegar fyrstu tölur eru tilbúnar eftir fyrsta framleiðsluskammtinn. Daglegri framleiðslu lauk fyrir klukkan tólf. Eftir hádegi ákváðum við að setjast aðeins niður saman í sófanum, tvær af okkur vorum með prjónana. Spjölluðum á léttu nótunum í kannski hálftíma áður en bókarinn fór að undirbúa síðustu talningalotu dagsins. Á slaginu tvö kom póstur sem þurfti að meðhöndla á ákveðinn hátt. Svona póstur kemur stöku sinnum en svo geta liðið dagar á milli. Í gær var þetta þriðji pósturinn í röð frá og með sl. fimmtudegi. Stungum af úr vinnunni rétt fyrir hálfþrjú. Ég fékk far heim.

 Þar sem ég fór ekkert í sund á sunnudaginn og þvoði þar af leiðandi ekki á mér hárið þá þá ákvað ég að drífa mig í sund seinni partinn. Synti að vísu ekki nema 200 metra en fór 4x4-5 mínútur í kalda pottinn, 2x í heitasta pottinn og var svo góða stund í gufunni. Þvoði á mér hárið og var komin heim um sex. Hafði tekið út þorshnakkaflak út í gærmorgun. Setti upp kartöflur, skar flakið í fjóra bita og steikti upp úr eggi og krydduðum byggflögum. Átti svo smá rjómaslettu til að setja út á pönnuna í restina. Mjög gott.

Er byrjuð á enn einni bókasafnsbókinni; Blóðengill: Hilma eftir Óskar Guðmundsson. Er samt enn að lesa Vatnið, gríman og geltið. Þar að auki er ég enn að lesa tvær síðustu jólabækurnar og svo styttist örugglega í að ég opni seinna bindið um Hellu.

Slyddukenndur göngutúr í vinnuna í morgun

Ég vaknaði ekki fyrr en klukkan var að verða hálftíu í gærmorgun, við glampandi sól og afar gott veður. Bíllinn minn var samt hrímaður að utan. Veit ekki hvenær ég sofnaði eftir skjálftann um nóttina en það var amk ekki alveg strax. Pabbi spurði um hvað við ættum að hafa í hádegismat. Sagðist reyndar eiga skyr fyrir sig. Ég tók út eina þorskblokk, sem ég steikti upp úr hrærðu eggi og krydduðu byggmjöli. Sauð kartöflur með og var maturinn tilbúinn rétt fyrir tólf.

Um eitt leytið fékk ég mér göngutúr upp að Helluvaði til að heimsækja föðursystur mína. Þetta er fyrsta heimsóknin mín til hennar á þessu ári en hún er búin að fá báðar sprauturnar. Stoppaði hjá henni í hátt í tvo tíma.

Annað sem ég gerði á meðan ég var fyrir austan um helgina, fyrir utan að prjóna, lesa og leggja kapla var að fá síðustu upplýsingar í skattframtalið mitt og skila því. Í fyrra var lokagreiðslan á lífeyrissjóðsláni sem pabbi tók og lánaði mér til að fjármagna fyrstu íbúðarkaupin 1995.

Um hálffimm kvaddi ég pabba og brunaði heim í bæinn. Var komin heim um sex, en södd eftir hádegismatinn og tvo kaffitíma. N1 sonurinn var að vinna til hálfátta og hinn fékk sér núðlur um það leyti sem ég var að koma heim. 

Hrökk upp við skjálfta um tvö í nótt

Var komin á fætur um sjö í gærmorgun. Hálftíma síðar vakti ég N1 soninn og spurði hvort hann ætti ekki að mæta til vinnu um átta. Það var reyndin og bauðst ég til að skutla honum. Hann þáði það, pissaði, tannaði og klæddi sig og með minni aðstoð komst hann í vinnuna rétt áður en klukkan sló átta. Ég fór beint heim aftur. Gekk frá endum á fyrsta barnateppinu sem datt af prjónunum í fyrrakvöld. Fitjaði upp á nýju barnateppi með öðru mynstri. Byrjaði að lesa Vatnið, gríman og geltið eftir Silju Björk Björnsdóttur sem er mágkona mágs míns og er um veikindi hennar sem hún glímdi við um tvítugt. Um hálftíu bjó ég mér til hafragraut og hellti upp á könnuna. Klukkutíma síðar var ég sótt af nöfnunum. Við vorum mættar í röðina við aðstöðuna í Nauthólsvík korter fyrir ellefu, nógu framalega til að ná inn með fyrsta hollinu. Sjórinn var kominn yfir þrjár gráður og tvær af okkur nutum þess að svamla um. Sú þriðja naut þess líka til að byrja með en við vorum kannski of lengi út í fyrir hana, næstum því korter og svo smá stund í lóninu áður en við fórum í heita pottinn. Vorum í pottinum í amk tuttugu mínútur en hún náði ekki í sig hita, ekki fyrr en hún fékk sér te eftir að hún mætti til vinnu upp úr tólf.

Um eitt leytið var ég búin að taka saman farangur amk til einnar nætur, vakti Odd til að kveðja hann og brunaði beint austur á Hellu. Við pabbi fórum í smá kaplakeppni en spilin voru ekki með okkur í liði svo ég settist fljótlega inn í stofu með prjónana mína. Pabbi bauð upp á pönnsur með kaffinu og í kvöldmat fékk ég kjötsúpu. Hann sjálfur er hættur að borða heitan mat á kvöldin, fékk sér kornfleks og lifrapylsusneið. Eftir að kvöldfréttirnar voru byrjaðara fékk ég leyfi til að renna í hvítvínsbeljuna. Horfði á seinni hlutann um Daða og Gagnamagnið og skipti svo yfir á Sjónvarp símans. Ég var komin upp í rúm um ellefu og las bara í stutta stund. Var örugglega sofnuð fyrir miðnættið. Um tvö leytið í nótt var ég nýbúin að snúa mér í rúminu þegar skjálftinn upp á fimm reið yfir og fannst greinilega. Ég ætlaði að halda áfram að sofa en ég varð að byrja á því að skreppa fram á salerni og tæma hlandblöðruna fyrst og það varð líklega til þess að ég glaðvaknaði og gekk illa að sofna aftur í einhvern tíma.

Sjórinn 3,2°C

Að sjálfsögðu labbaði ég í vinnuna fimmta daginn í röð í gærmorgun. Var mætt um hálfátta. Á föstudögum mætum við fjórar af fimm, þ.e. ef engin er í fríi eða lasin. Fram að morgunkaffi var ég inni á framleiðsluvélinni í móttökunni eftir að hafa tekið saman og talið til þær tegundir sem voru í daglegri framleiðslu í fyrstu tveimur daglegur verkefnunum. Eftir kaffið var ég frammi í pökkun, frágangi og einnig föstudagstalningu með bókaranum þegar framleiðsluverkefnum var lokið. Engin auka framleiðsla er í gangi svo það var engin framleiðsla eftir hádegi. Vorum samt í vinnu til klukkan að verða hálfþrjú.

Fékk far heim úr vinnunni. Hellti mér upp á smá kaffi og settist smá stund inn í stofu með fartölvuna í fanginu. Var komin í sund klukkan að verða hálffimm. 3x5 mínútur í kalda, 300m sund og endaði í löngu gufubaði. Kom heim aftur um sex. 

Fyrsta heila vinnuvikan mín á árinu liðin

Vaknaði upp við snarpan skjálfta stuttu fyrir sex í gærmorgun, rúmum hálftíma áður en vekjaraklukkan átti að vekja mig. Fór á fætur skömmu síðar. Labbaði af stað í vinnuna á svipuðum tíma og venjulega. Valdi aðra leið eftir að ég var komin þvert yfir Klambratún. Fór yfir Snorrabraut, framhjá Domus Medica, upp á milli Tækniskólans og Hallgrímskirkju, Skólavörðustíginn, hluta af Arnarhól og kom Kalkofnsveginn að vinnustaðnum. Ég var í bókhaldi og kom því ekkert nálægt framleiðslunni. Hinar fjórar skiptu með sér verkum, tvær í framleiðslu fram að kaffi og hinar tvær í alls konar undirbúning frammi. Þær síðarnefndu fóru svo í framleiðsluna eftir morgunkaffi. Allri endurnýjun er lokið í bili og daglegri framleiðslu lauk rétt fyrir klukkan tólf. Nú þegar við erum allar í vinnu saman er ein búin að færa sig aftur í 70%. Hún var því búin með vinnuvikuna sína um hádegið. Við hinar vorum til rúmlega tvö.

Fékk far heim úr vinnunni. Fór í sund um fjögur. Var búin að synda 400metra og sat í minni fyrstu ferð í þeim kalda þegar kalda potts vinkona mín mætti á svæðið. Kom heim aftur um sex. 

Skatturinn

Ég er ekki búin að opna skattframtalið mitt sem á að skila inn á næstu dögum. Er samt alveg róleg yfir þessu og stefni að því að skoða þetta og klára um komandi helgi.

Tuttugastaogþriðja vinnudaginn í röð á árinu labbaði ég í vinnuna upp úr klukkan sjö í gærmorgun. Framan af morgni höfðum við allar fimm nóg að sýsla. Við þrjár sem vorum frammi til að byrja með, ein í bókhaldi, önnur í að undirbúa pökkun og sú þriðja að sortera og raða saman ónýtu plasti frá því í febrúar, vorum sömu þrjár og unnu saman aðra hverja viku frá verslunarmannahelgi. Tvær af okkur tókum við framleiðslunni inni á vél eftir morgunkaffi. Ég var í að taka á móti. Þegar daglegu framleiðsluverkefni tvö af þremur lauk og það var amk hálftími í það þriðja höfðum við síðustu endurnýjun febrúar úr að moða. Sú endurnýjun var keyrð til okkar og yfir á vél sl. mánudag og það var búið að framleiða eitthvað af henni. Nokkrar misstórar skrár voru þó eftir og framleiddum við allar nema þá stærstu, hún var framleidd eftir hádegið.

Skipt var um vinnutölvur hjá mér og einni annarri eftir hádegi í gær og það var ekki búið fyrr en um fimm. Fékk svo far heim og ákvað að fara ekkert út úr húsi aftur, skrópaði semsagt í sjóinn og fór heldur ekkert í sund. 

Jarðhræringar og gosórói

Jæja, ætli það sé komið að því? Gos kannski að hefjast á stað sem er virkt en hefur ekki gosið öldum saman? Það er mikið lagt á almannavarnir þessi misserin og verkefnin velflest krefjandi. Og margt sem hefur verið að gerast og er í gangi eitthvað sem þarf að fylgjast með, læra af og búa sig undir allt mögulegt. Það væri nú samt alveg ágætt ef maður hætti að hrökkva upp við skjálfta á nóttunni.

En hvað um það, það gerist sem gerist. ÉG er að spá í að reyna bara að halda áfram daglegri rútínu. Ég labbaði í vinnuna á svipuðum tíma og oftast áður í gærmorgun og var mætt á vinnustaðinn rétt upp úr hálfátta. Ég átti fyrstu vakt á vélinni ásamt einni annarri, ég að hlaða inn og setja af stað. Hún að telja til tegundirnar og taka á móti. Sú sem átti að vera í móttökunni eftir kaffi var í krefjandi yfirlestri á verkferlum og handbók og þáði það að ég leysti hana af. Svo það fór þannig að ég kom mér inn á vél allan tímann sem hún var í gangi því eftir hádegi vorum við aftur saman á vélinni sem tókum fyrstu vaktina. Ég að taka á móti og hún að troða í. Hættum framleiðslu rétt fyrir hálffjögur, gengum frá og fórum heim. Fékk far með þeirri sem var tvisvar með mér á vélinni.

Kalda potts vinkona mín lét mig vita að hún kæmist ekki í sund. Ég var mætt í Laugardalslaugina upp úr klukkan fjögur. Fór 3x5 mínútur í kalda, synti 400 metra, fór einu sinni í heitasta pottinn og endaði í gufunni. Kom heim um sex leytið.

Er enn að lesa bókina Pabbastrákur en er rúmlega hálfnuð með hana enda hef ég aðeins verið að lesa í þeirri bók síðustu tvö kvöld.

Annar dagurinn í mars

Labbaði af stað í vinnu í gærmorgun rétt upp úr klukkan sjö og var þriðja af fimm til að mæta til vinnu. Eftir að hafa fyllt á vatnsflöskurnar okkar og setið smá stund frammi á kaffistofu fór tvær að vinna á vélina, ein í bókhaldið og við tvær sem áttum vélarvakt eftir morgunkaffið til hádegis fórum í lagertalningu. Í morgunkaffinu fengum við sendar sérstakar veitingar frá næsta yfirmanni í tilefni þess að þetta var fyrsti vinnudagur okkar allra saman síðan síðast í júlí á síðastliðnu ári. Fyrir utan daglega framleiðslu var enn nokkur endurnýjun eftir. Vélin var gangandi alveg til klukkan að ganga fjögur fyrir utan kaffi og hádegispásur.

Fékk far heim úr vinnunni upp úr hálffjögur. Rúmum klukkutíma síðar sótti sjósundsvinkona mín mig. Við voru aðeins tvær af fimm úr hópnum okkar sem drifum okkur í sjóinn. Vorum rúmar fimm mínútur í 2,2°C sjónum og svo nokkrar mínútur í lóninu sem virkaði næstum eins og heitur pottur. Vorum svo næstum hálftíma í heita pottinum. Mér var skilað aftur heim um sexleytið.

Grímulausar allar fimm saman í vinnu

Fór á fætur um klukkan níu í gærmorgun. Fljótlega hafði kalda potts vinkona mín samband og hún spurði hvort ég myndi mæta í Laugardalslaugina um tíu. Ég kvað svo vera og var akkúrat á planinu fyrir utan laugina þegar klukkan sló tíu. Hrafnhildur var þegar búin að fara eina ferð í kalda pottinn þegar hún hitti mig þar í minni fyrstu ferð. Fyrsta ferðin hjá mér varð þá aðeins lengri en hinar fjórar sem ég fór í viðbót. Eftir fimmtu ferðina mína synti ég 400m áður en ég fór upp úr. Þvoði á mér hárið og á heimleiðinni kom ég við í Krónunni við Nóatún. Restin af deginum var svona svipuð og undanfarna daga. Horfði á Landann og fyrri partinn af heimildamyndinni um flugslysið í Mykinesi 1970. Er ekki búin að klára að lesa bókina. Fór í háttinn um tíu, bæði til að lesa smá og undirbúa mig undir fyrstu heilu vinnuvikuna síðan í fyrra sem og að hitta allar samstarfskonur mínar á deildinni en síðast vorum við allar saman seinni partinn í júlí sl. Varð vör við skjálftana sem voru um hálfeitt í nótt og hrökk svo upp með andfælum klukkutíma síðar þegar sá sem var 4,9 reið yfir. 

Síðasti febrúardagurinn

Gærdagurinn var bara alveg ágætur. Var vöknuð en ekki komin framúr rúmi þegar næst stærsti skjálftinn, af öllum skjálftum síðan þetta hófst á miðvikudaginn var, reið yfir. Ákvað í kjölfarið að koma mér á fætur. Eftir morgunverkin á baðinu settist ég fyrst um sinn inn í stofu. Um hálftíu bjó ég mér til hafragraut og rétt rúmum klukkutíma síðar var ég mætt, langfyrst, í röðina við aðstöðuna í Nauthólsvík. Þetta var ca tuttuguogfimm mínútum fyrir opnun. Reyndar kannski ekki nema tuttugu mínútum því það var byrjað að hleypa inn nokkrum mínútum áður en klukkan varð ellefu. Hinar fjórar í hópnum mínum voru aftar í röðinni og komust samt inn með fyrsta hollinu. Sjórinn var 2°C, nokkur ferð á logninu og mikill og skemmtilegur öldugangur. Við vorum út í sjó í uþb fimm mínútur áður en við fórum í heita pottinn. Ég kom heim aftur um tólf og byrjaði á því að hella upp á könnuna. Fór aðeins einu sinni út úr íbúðinni eftir þetta. Þá lá leiðin í þvottahúsið að sækja þvott af snúrunum. Annars var ég að prjóna, vafra á netinu og lesa. Kláraði að lesa þriðju bókina af safninu og fyrra bindið um Hellu. Í gærkvöldi byrjaði ég svo á fjórðu bókinni af safninu, Illvirki. Lánaði bræðrunum bílinn seinni partinn en þeir voru boðnir í heimsókn til pabba síns og fjölskyldu hans.

Þetta er nú meiri hristingurinn

Það var með seinni skipunum sem ég fór á fætur í gærmorgun. Hafði að vísu rumskað um fimm sem kannski er ekkert óeðlilegt því ég var sofnuð fyrir klukkan hálfellefu. En mér tókst semsagt að bæla mig niður aftur án þess að fara framúr og var klukkan rétt að byrja að ganga tíu þegar ég fór á fætur. Framan af morgni stóð til að skreppa aðeins í sund en bókin illvirki ríghélt mér og um hádegisbil þegar skjálftahrinan var komin á skrið aftur var ég búin að ákveða að skrópa í sundið. Aftur á móti skrapp ég í þriggja kortera göngutúr milli þrjú og fjögur og áður en ég fór í háttinn í gærkvöldi var ég búin að ná skrefa markmiðum dagsins sem eru 6000 skref. Strákarnir voru báðir heima í gær og dobblaði ég þá til að skila af okkur sameigninni, þ.e. ryksuga og skúra frá þvottahúsið, ganginn og stigann upp að íbúðinni fyrir neðan okkur. 

Rigning og logn

Gærdagurinn var ósköp rólegur en leið samt frekar hratt. Lauk við að lesa smásögurnar sem voru fimm talsins og las einnig áfram í fyrra bindi um Hellu. Maður getur alveg gleymt sér við að skoða myndirnar í þeirri bók. Er búin að rekast nokkrum sinnum á nafnið hans afa míns. Ég tók líka fram prjónana mína. Kalda potts vinkona mín hafði samband og sagðist myndu mæta í sund um fjögur. Ég fór því ekkert út fyrr en um þrjú. Byrjaði á því að fara á atlantsolíustöðina við Sprengisand og fylla á tankinn. Það gekk eins og í sögu. Var byrjuð að synda um hálffjögur og synti 500 metra á rétt rúmum tuttugu mínútum. Klukkan var ekki alveg orðin fjögur þegar ég fór fyrstu ferðina í kalda pottinn. Sat þar í fjórar mínútur áður en ég fór nokkrar mínútur í heitasta pottinn. Enn bólaði ekkert á vinkonu minni svo ég settist smá stund á bekk. Ákvað svo að taka aðrar fjórar mínútur í kalda pottinum. Ég var búin að sitja nokkrar mínútur í heitasta pottinum þegar vinkonan mætti. Fór fimm ferðir með henni í kalda pottinn. Vorum yfirleitt um þrjár mínútur í hvert skipti. Kom heim rétt fyrir sex.

Í gærkvöldi byrjaði ég svo á þriðju bókinni af safninu: Illvirki eftir Emelie Schepp. Þetta er þriðja bók höfundar og eru sömu aðalpersónur og í hinum tveimur. Var að skila bók númer tvö í síðustu ferð og í þeirri ferð tók ég einni fjórðu bókina eftir sama höfund, Pabbastrákur. 

Bókasafnsferð

Þrátt fyrir að ég ætti ekki að mæta til vinnu í gær var ég komin á fætur hálfri stundu fyrir átta. Eftir að hafa sinnt morgunverkunum á baðherberginu settist ég inn í stofu. Hafði fimm bækur með mér, þrjár úr eigin safni og eina frá pabba. Ég byrjaði þó á að setjast með fartölvuna í fangið og gleymdi mér alveg næsta einn og hálfa tímann eða svo. Þegar ég loksins slökkti aftur á tölvunni fór ég fram í eldhús bjó mér til hafragraut og hellti upp á kaffi. Ég var að skola skálina og ná mér í fyrsta kaffi bollann þegar ísskápurinn byrjar að vera með óskiljanleg læti í smá stund. Fattaði það ekki fyrr en lætin byrjuðu aftur örskömmu síðar að þetta hefðu líklega verið jarðskjálftar. Fann svo fyrir öllum stærri skjálftum en 3,5 á rikter þegar ég sat í stofustólnum að lesa eða prjóna. Frestaði sjósundsferð þar til eftir hádegið til að geta fylgst með aukafréttatímanum klukkan tólf.

Ég fékk áminningu frá bókasafninu um að skiladagur væri að nálgast. Það varð til þess að ég greip líka með mér bókasafnspokann ásamt sjósundsdótinu. Byrjaði á því að skreppa á safnið og skilaði öllum sex bókunum. Á skammri stundu var ég komin með átta aðrar bækur í fangið. Ein af þeim er ljóðabókin Rof eftir Bubba Morthens og önnur er smásögusafnið Fílahirðirinn eftir Stefán Sigurðsson.

Áður en ég dreif mig í smá sjósundsferð ætlaði ég að fylla á tankinn hjá Atlantsolíu við Sprengisand. Þegar ég komst að dælu þá virkaði ekki lesarinn eða lykillinn svo ég ákvað að fresta þessu aðeins. Var komin ofan í sjóinn rétt upp úr klukkan tvö og ég gaf mér klukkutíma í allt í þessa dásemd. Kom við í Fiskbúð Fúsa áður en ég fór aftur heim.

Síðustu heimadagarnir framundan

Í gær var ég komin á fætur og búin að slökkva á vekjaraklukkunni fimm mínútum áður en hún hringdi. Hafði auka fimmtán mínútur til að kveikja á tölvunni og vafra aðeins um áður en kominn var tími til að labba af stað í vinnuna. Tuttugasti "mæta á vinnustað" dagurinn á árinu og tuttuguasti göngutúrinn til vinnu á árinu. Hlóð höfuðljósið í fyrrakvöld og birtan frá því mikil og skær á göngunni í gærmorgun. Ég sá um bókhaldið í gær en leysti líka aðeins af á vélinni því við vorum allar í starfssamtali við yfirmann í gærmorgun. Hún mætti til okkar rétt fyrir hálftíu og ég var fyrst í samtalsröðinni. Hinar tvær fóru fram í kaffi á meðan og önnur þeirra tók smá auka kaffi með mér en við vorum þó byrjaðar að framleiða aftur áður en kom að henni. Samtalið við yfirmanninn gekk að ég held ágætlega. Þetta var okkar fyrsta samtal maður á mann við þennan yfirmann og mér fannst amk mjög auðvelt að vera ég sjálf í samtalinu. Fyrsta formlega spurning var um líðan mína á vinnustað. Ég var ágætlega undirbúin því sú spurning og þrjár aðrar voru í fundarbeiðninni þegar boðað var til þessa samtals fyrir viku síðan. Annars lauk vinnudegi ekki fyrr en upp úr hálffjögur, þrátt fyrir að engin síðdegispása væri tekin en stundum standa sum vinnumál þannig að ekki er hægt að fara fyrr en búið er að leysa þau.

Fékk far heim úr vinnunni en stoppaði ekkert heima. Tók bara saman sunddótið mitt og var mætt í Laugardalslaugina rétt upp úr klukkan fjögur. Kalda potts vinkona mín var mætt og búin að fara eina ferð í kalda. Saman fórum við sex ferðir í viðbót. Ég sleppti því að synda en gaf mér góðan tíma í gufunni eftir síðustu ferðina í kalda pottinn. Kom heim um sex og setti upp grjónagraut. Næst má ég mæta í vinnuna á mánudaginn kemur, 1. mars og þá megum við mæta allar fimm í fyrsta skipti síðan síðast í júlí á síðasta ári. Einhverjar af hinum eiga enn inni meira en 10 orlofsdaga frá síðasta orlofsári og þær eru hvattar til að taka alla daga framyfir 10 út fyrir 1. maí. Ég á 7 daga svo ég slepp en á næsta ári mega þeir ekki vera meira en fimm eftir. Ég er búin að setja fram orlofsósk upp á 28 virka daga frá því seinni partinn í júlí og út ágúst.

Breytingar framundan

Þrátt fyrir að sofa alveg þar til vekjaraklukkan vakti mig rétt fyrir hálfsjö í gærmorgun hafði ég tíu auka mínútur til að kveikja aðeins á tölvunni áður en ég labbaði af stað í vinnuna. Höfuðljósið var með daufara móti enda hef ég aldrei hlaðið það. Engu að síður slokknaði ekki alveg á ljósinu fyrr en rétt áður en ég mætti til vinnu. Þessa dagana erum við með fullt af endurnýjun í gangi svo vélin var látin ganga frá rúmlega átta til rétt rúmlega þrjú. Aðeins voru gerðar pásur vegna talninga, morgunkaffis og hádegishlés. Fékk far heim úr vinnunni og hafði þá einn og hálfan tíma þar til sjósundsvinkona mín sótti mig. Mættum allar fimm úr hópnum í Nauthólsvík rétt fyrir hálfsex og þurftum að bíða í röð í ca tíu mínútur áður en okkur var hleypt í búningaaðstöðuna. Systurnar voru á leið í matarboð um sex en þær náðu öllum fjórum mínútum með okkur í 1,7°C sjónum og smá stund í heita pottinum áður en þær drifu sig upp úr. Ég kom heim um hálfsjö.

Styttri vinnuvikan hálfnuð

Ég var komin á fætur rétt fyrir klukkan átta í gærmorgun og hafði einn og hálfan tíma til að vafra um á netinu. Skutlaði N1 syninum á vinnuvakt upp á Gagnveg og mætti hann á slaginu klukkan tíu. Svo fór ég beint í laugardalinn. Kalda potts vinkona mín var mætt og búin að fara eina ferð í þann kalda. Saman fórum við sex ferðir og oftast í þann heitasta á milli en einu sinni í pott tvö og í annað skiptið í "sjópottinn". Það var eftir að systir hennar mætti á svæðið en sú fer ekkert í kalda pottinn. Eftir sjöttu kaldapotts ferðina synti ég 300 metra áður en ég fór upp úr og þvoði á mér  hárið. Var komin heim rétt upp úr tólf. Hlustaði á hádegisfréttir og prjónaði á meðan. Fljótlega eftir fréttir hellti ég mér upp á fyrstu tvo kaffibolla dagsins. Til stóð að nafna mín og frænka kæmi til mín um miðjan dag en þegar klukkan var að verða hálffjögur og ekkert bólaði á henni, hringdi ég. Í ljós kom að hún var lasin og bað hún mig margsinnis fyrirgefningar á að hafa ekki látið mig vita. Við spjölluðum saman í þrjú korter og ákváðum m.a. næsta hitting. Ég fór ekkert út aftur og bjó mér heldur ekki til meira kaffi. Átti samt ekki í neinum vandræðum með að eyða tímanum fram að háttatíma. 

Á leið í sund eftir skutl

Var glaðvöknuð fyrir klukkan sjö í gærmorgun og fór því fljótlega á fætur. Bauðst því til að skutla N1-syninum í vinnuna svo hann var mættur rétt fyrir átta, á réttum tíma. Þegar hann þarf að taka strætó á laugardagsvaktirnar er hann alltaf að mæta milli átta og hálfníu þótt hann taki fyrstu ferð. Fór beint heim aftur og lauk við að lesa síðustu bókina sem af safninu. Las líka í fyrra bindinu um Hellu sem pabbi lánaði mér um daginn og er ég rúmlega hálfnuð með það. Bjó mér til hafragraut og hellti upp á kaffi um níu leytið. Greip svo eitthvað í prjónana mína.

Upp úr klukkan hálfellefu var ég mætt no 3 í röðina við aðstöðuna í Nauthólsvík. Þrjár aðrar úr sjósundshópnum mínum mættu tíu mínútum seinna og lentu mun aftar í röðinni en komust sem betur fer inn í fyrsta hollinu. Þeir hleypa inn rúmlega 50 manns í einu svo það myndast líka smá raðir fyrir framan klefana. En þetta gengur þokkalega fljótt fyrir sig. Það var að flæða að svo við þurftum ekki að fara langt út í 1,3°C heitan sjóinn. Vorum hátt í fjórar mínútur í sjónum.

Þegar  ég var komin alveg upp úr eftir 15 mínútur í heita pottinum ákvað ég að renna við í Sports Direct til að kaupa mér nýja sundboli. Verslunin var opin en ég fann ekki þá tegund sem ég nota, amk ekki í minni stærð svo ég ákvað að snúa frá í bili. Á sem betur fer tvo vel nothæfa sundboli en annar þeirra er að farin að láta aðeins á sjá. 

Helgarfrí

Var mætt á vinnustað um hálfátta í gærmorgun eftir hálftíma labbitúr. Fimm mínútum síðar mætti sú næsta sem var á vinnuvakt í gær og það var eins gott því það þarf tvo til að opna inn á lager og sækja m.a. bankatöskurnar með útibúakortunum sem framleidd voru daginn áður. Fyrsta taska dagsins var sótt óvenju snemma eða þegar klukkuna vantaði tuttuguogþrjár mínútur í átta. Vinnudagurinn var annars fljótur að líða enda nóg að gera. Framleiddum til klukkan að ganga þrjú, með viðeigandi hádegis og kaffipásum. Á föstudögum leyfum við okkur að hætta í fyrra fallinu sama hvernig verkefnastaðan er, þ.e. svo framalega sem búið sé að framleiða daglega skammtinn. Klukkan var samt að verða hálffjögur þegar við yfirgáfum vinnustaðinn allar þrjár.

Ég fékk far heim og stoppaði þar í um klukkustund áður en ég skrapp í Laugardalinn. Annan daginn í röð fór ég í sund án þess að synda. Hefði kannski synt 200 metra ef uppáhalds brautirnar mínar hefðu ekki verið svona ásetnar eins og þær voru milli fimm og sex í gær. En það gerði helling fyrir mig að komast nokkrum sinnum í kalda pottinn og þann heitasta á milli og svo endaði ég á góðri gufuferð. 

Átjánda vinnudegi ársins lokið

Slökkti á vekjaraklukkunni fimmtán mínútum áður en hún átti að hringja í gærmorgun. Dreif mig fljótlega á fætur og hafði korter til að gera það sem ég geri mjög sjaldan en gerði í gær, kveikti á tölvunni og vafraði á netinu þar til kominn var tími til að labba af stað í vinnuna. Ég var í bókhaldi í gær og hinar tvær sáu um daglega framleiðslu til hádegis og endurnýjun til klukkan þrjú eftir hádegi. Þegar hefðbundnum daglegur bókarastörfum var lokið dundaði ég mér við að halda áfram að vinna að tengingum sem tengjast mánaðamótauppgjöri með góðfúslegu leyfi þeirrar sem heldur utan um reikningagerðina. Vinnudagurinn leið afar hratt.

Fékk far heim úr vinnunni og var komin heim upp úr klukkan hálffjögur. Mætti í laugardals laugina rétt rúmlega fjögur. Kalda potts vinkona mín var að ljúka sinni fyrstu ferð í þann kalda þegar ég mætti. Hún beið eftir mér í heitasta pottinum og við náðum svo að mana hvor aðra í 6x3mínútna kalda potts ferðir. Ég endaði svo á því að fara í gufu.

Kom við í Fiskbúð Fúsa á leiðinni heim og hann hafði á orði að ég væri seint á ferð. Það var samt alveg rúmur hálftími eftir af opnunartímanum hjá honum. Heima ákvað ég að setja ýsuflakið inn í ísskáp í dallinum sem ég hafði haft meðferðis í fiskbúðina. Setti upp nokkrar litlar kartöflur og skar niður lifrarpylsu- og blóðmörssneiðar og steikti á pönnu. Hafði keypt sinn hvort soðna keppinn í verslunarferðinni eftir vinnu á miðvikudaginn. 

Á leið í sund eftir smá

Var sem oftast fyrr vöknuð á undan vekjaraklukkunni í gærmorgun. Spáin hafði gert ráð fyrir rigningadembu og ég hafði verið að velta því fyrir mér að fara á bílnum í vinnuna svona einu sinni og þá fyrsta skiptið á þessu ári. En þegar til kom þá labbaði ég af stað um sjö. Það var einhver smá úrkoma en frekar lítil því ég varð sama og ekkert blaut á þessari hálftíma göngu í vinnuna. Nóg var að gera í vinnunni en önnur af samstarfskonum mínum hafði ákveðið að að taka orlof eftir hádegi. Ég fékk að hætta upp úr klukkan hálfþrjú. Fékk einkabílstjórann til að sækja mig og notaði tækifærið og skrapp í smá verslunarleiðangur á heimleiðinni. Rétt fyrir fimm hitti ég svo nöfnuna (ekki mína) úr sjósundshópnum og við skelltum okkur í 0,8°C sjóinn í amk fimm mínútur. Pössuðum okkur á því að verða ekki að "rúsínum" í heita pottinum á eftir og það hjálpaði að reka á eftir manni upp úr þegar við tókum eftir því að það var að myndast biðröð í að komast í aðstöðuna. 

Næstum 12000 skref í gær

Var búin að slökkva á vekjaraklukkunni og komin á fætur um það leyti sem hún átti að hringja. Labbaði af stað í vinnuna um sjö, á strigaskóm. Það slapp til og tafði mig ekki að ráði. Framleiðslu lauk um hálftólf og fljótlega eftir mat var ein af okkur þremur farin í orlof. Við hinar gengum frá í deildinni og ákváðum að yfirgefa svæðið áður en klukkan varð tvö. Ég labbaði heim á leið, upp Skólavörðustíginn. Þegar ég var að koma að Hallgrímskirkju heyri ég sagt "Ég sé að Anna Sigga er að koma, ætla að kasta á hana kveðju, heyri í þér síðar!" Þarna sat fyrrum vinnufélagi með hundinn sinn að tala við einhvern í gemsa. Ég staldraði við og spjallaði við hann í nokkra stund áður en ég hélt för minni áfram. Þetta varð til þess að það voru skráðir alls 3 göngutúrar í gær. Fékk mér smá hressingu eftir að ég kom heim. Var mætt í sund upp úr klukkan hálffjögur og hitti á eina sem hefur ekki komist í sund lengi. Hún var að koma úr sturtu, segist mega fara að mæta bráðum aftur en hún var í hnjáskiptiaðgerð í síðasta mánuði. Var komin heim aftur um hálfsex. Oddur Smári fékk bílinn lánaðann tæpum tveimur tímum síðar að sækja bróður sinn í vinnuna. Það var verið að sækja mig í saumaklúbb akkúrat þegar þeir bræður voru að koma heim. Klúbburinn var á Grettisgötunni og við tvíburahálfsysturnar vorum mættar þar rétt upp úr átta. Að venju voru þrír tímar uþb tíu mínútur að líða. Kvöldið gersamlega þaut hjá. 

Sprengidagur

Það var hálfgerður sunnudagur hjá mér í gær. Rétt náði að koma mér á fætur áður en klukkan varð níu. Var eitthvað að spá í hvort ég ætti að skreppa í sjóinn í hádeginu en ég kom mér ekki út úr húsi fyrr en seinni part dags. Meiri parturinn af tímanum fór í þáttaáhorf, kláraði 3 síðustu þættina úr danskri seríu af RÚV sem heitir Ulven kommer. Fyrsta kaffibolla gærdagsins drakk ég ekki fyrr en upp úr hádeginu. Hafði notað stóran part af morgninum í netvafr, leiki og blogg og einhverra hluta vegna var ekkert sem kallaði á að ég ætti endilega að fara að fá mér eitthvað annan en lýsi, hvorki maginn né hausinn. Ekki fyrr en upp úr klukkan tólf.

Um hálffjögur tók ég sjósundsdótið með mér út í bíl en byrjaði á því að skreppa í garnbúð við Reykjavíkurveg í Hafnarfirði. Fyrsta skipti sem ég heimsæki þessa búð og ég keypti garn í amk tvö ungbarnateppi. Var komin í Nauthólsvíkina um hálffimm og aftur heim rúmlega fimm. Fitjaði upp á nýju teppi í gærkvöldi og er því bæði með tusku og teppi á prjónum. 

Bolludagur

Var ekki komin á fætur fyrr en um níu í gærmorgun. Eins og oft áður settist ég inn í stofu með fartölvuna á lærunum stax eftir morgunverkin. Missti því að kaldapottsferðum með kaldapotts vinkonu minni því hún var búin að fara þegar ég mætti í sund upp úr klukkan hálftólf. Heitasti potturinn er ennþá lokaður. Ég fór fimm mínútur í þann kalda áður en ég synti 500m og svo aftur fimm mínútur í þann kalda áður en ég endaði í gufubaðinu. Þvoði á mér hárið og stóð svo í smá stund undir ískaldri sturtubunu áður en ég þurrkaði mér og fór upp úr. Kom við í bakaríi og keypti 6 tilbúnar vatnsdeigsbollur. Bjó mér til kaffi um leið og ég kom heim, hrærði einnig í vöfflusoppu og bjó til vöfflufjall. Annars fór dagurinn í tölvuleiki og sjónvarpsgláp. Greip ekki í bók fyrr en ég fór upp í rúm um hálftíu. Þá las ég smá í fjórum bókum. Er byrjuð á síðustu bókasafnsbókinni sem ég er með í láni; Stigið á strik eftir Ingva Þór Kormáksson. 

Skrapp á Hellu yfir nótt

Ég sótti þinglýst afrit af lóðaleigusamningnum til sýslumann um tíu á föstudagsmorguninn. Þaðan fór ég beint í sund. Heitasti potturinn var enn lokaður en ég fór 3x4 mínútur í þann kalda, synti 500 metra, fór í 43°C pottinn og endaði í gufunni. Kom heim um tólf. Ákvað að hlusta á hádegisfréttir áður en ég tæki mig saman og legði af stað austur. Klukkan var því byrjuð að ganga tvö áður en ég ýtti aðeins við þeim syninum sem var heima, bara til að kveðja. Hinn sonurinn hafði farið í heimsókn til tannlæknisins stuttu áður en ég kom heim úr sundi og var ekki kominn aftur. Hringdi í pabba þegar ég var að leggja í hann, sagðist vera á leiðinni en ég myndi koma við á einum stað á leiðinni. Gerði gott stopp í Fossheiðinni. Var komin til pabba um fjögur. Að venju fórum við í smá kaplakeppni en ég var líka að prjóna, lesa og vafra um á netinu. Pabbi var líka að vafra um á netinu og lesa en hann er með bókina Vonaskarð í láni frá einum sundfélaganum. Horfði á Gettu betur og Vikuna á föstudagskvöldið. Stoppaði hjá pabba yfir nótt og alveg framyfir kvöldmat og sjónvarpsfréttir. Var komin í bæinn um níu í gærkvöldi. 

Lengi í gang í gær

Klukkan var byrjuð að ganga tíu þegar ég loksins hafði mig framúr rúmi og á fætur í gærmogun. Morguninn fór í alls konar og ekkert sérstakt. Það sem var að þvælast fyrir mér var að þurfa að hringja í þann sem verður milliliður á milli verktakans sem gerði tilboð í verkefnið fyrir Drápuhlíð 19-21 til að athuga hvort pósturinn sem ég sendi í síðustu viku hafi skilað sér og staðfesta beiðni um að gera og senda okkur samning til yfirlestrar og undirritunnar. Rúmlega tvö lét ég svo loks verða að því að slá á þráðinn. Hringingunni var ekki svarað og ég var í óða önn að senda smá essemmess skeyti þegar hringt var til baka. Samtalið var mun léttara heldur en ég hafði ímyndað mér og nú líður ekki á löngu áður en eitthvað fer að gerast fyrir alvöru. Hef smá neikvæða tilfinningu um að einhver í húsinu muni halda áfram að "draga" lappirnar en þetta má ekki bíða mikið lengur því þá verður þetta bara verra.

Hringdi í tvær kunningjakonur og á meðan ég var að tala við aðra þeirra kom fyrirspurn frá kaldapotts vinkonu minni um hvort ég væri í bænum eða farin austur. Þegar ég sá skilaboðin spurði ég á móti hvenær hún ætlaði í sund. Ég frestaði því að sækja lóðaleigusamninginn úr þinglýsingu og var komin á stæðið við Laugardalslaugina þegar vinkonan svaraði og sagðist mæta um fimm, var að fara í göngutúr fyrst. Þar sem ég var ekki komin inn ákvað ég að fresta sundferð um rúma klukkustund til að hitta aðeins á vinkonuna og vera búin að synda áður en hún kæmi. Fór með bílinn í smurningu. Það tók alls ekki langan tíma. Skrapp svo á N1 við Gagnveg þar sem Davíð Steinn var á vakt og fékk hann til að skipta um eina rúðuþurrku. Að lokum kom ég við hjá Atlantsolíu við Sprengisand og fyllti á bílinn áður en ég dreif mig í sund. Var búin að synda 200 metra um hálffimm þegar kaldapotts vinkona mín mætti á svæðið svo það varð ekkert meira um sund en við fórum sjö ferðir í þann kalda. Heitasti potturinn er enn lokaður og það er pínu bagalegt því þá er erfiðara að komast í þann næstheitasta á milli vegna fjöldatakmaranna. En það er skárra að einn heitur pottur sé lokaður heldur en að sá kaldi sé það.

Er annars byrjuð að lesa næstsíðustu jólabókina, hina bókina sem Oddur gaf mér: Martröð í Mykinesi. 

Aðeins um gærdaginn

Ég var komin á fætur fyrir klukkan hálfátta í gærmorgun. Eftir morgunverkin á baðherberginu fékk ég mér matskeið af lýsi og vatnsglas áður en ég settist inn í stofu og kveikti á fartövlunni. Um níu leytið bjó ég mér til hafragraut og kaffi. Passaði einnig upp á það að fá mér vatn reglulega. Ég fékk staðfestingu með essemmessi og rafrænum pósti um að ég ætti tíma í blóðbankanum klukkan 14:20 snemma í gærmorgun.

Korter yfir ellefu sótti sjósundsvinkona mín mig og þegar við vorum að fara út í -1°C sjóinn rúmu korteri síðar mættum við forsetanum og var hann greinilega að koma til að bregða sér í sjóinn. Það var  háfjara og við stöllur óðum mjög langt út í en botnuðum alltaf. Vorum rúmar fimm mínútur í sjónum og við mættum forsetanum á leið ofan í þegar við vorum á leiðinni upp úr og í heita pottinn. Sjósundsvinkona mín var reyndar ekkert að spá í mannaferðir og vissi ekkert að Guðni var á staðnum fyrr en við vorum að fara til baka og hún sá forsetabílinn í stæðinu við hliðina á hennar bíl.

Borðaði afgang af kjúklingarétti í hádeginu og var dugleg að drekka vatn. Korter fyrir tvö, sjálfsagt amk tíu mínútum of snemma, labbaði ég af stað í Blóðbankann. Var ekki nema 15 mínútur á leiðinni. En ég þurfti bara að bíða aðeins eftir að það losnaði bekkur. Blóðþrýstingurinn var í mjög góðu lagi. Gerði þau mistök að nefna það að ég hefði skroppið í sjóinn í hádeginu því hjúkrunarfræðingurinn sem sinnti mér átti í vandræðum með að finna æð, skoðaði báða handleggi og vildi helst senda mig heim og fá mig aftur þegar ég væri ekki búin að fara í heitan pott skömmu áður. En hún féllst á að gera tilraun og valdi handlegginn sem sjaldnar hefur verið stungið í og viti menn hún hitti á æðina og rennslið var með besta móti, tók innan við þrjár mínútur að fylla á pokann. Þetta var fimmtugastaogsjöunda heimsóknin í besta bankann og ef ég má halda áfram að gefa á fjögurra mánaða fresti verð ég líklega í minni sextugustu heimsókn eftir uþb ár.

Allt orðið hvítt úti

Labbaði af stað í vinnuna á svipuðum tíma og oftast íklædd sömu yfirflíkum með höfuðljósið og í strigaskóm eins og í fyrradag. Veðrið og færðin voru einstaklega góð. Eftir labbið, þegar ég var mætt í vinnu, tilkynnti gönguforritið jafnlanga gönguferð og á mánudagsmorguninn en ég var alveg mínútu lengur á leiðinni í gær. Var frekar hissa á því vegna þess að mér fannst ég labba hraðar í gærmorgun. Ég var í bókhaldinu. Framleiðslutölur voru ívið hærri en á mánudaginn en engin aukaframleiðsla og þrátt fyrir að taka okkur extra góðan kaffitíma um miðjan morgun var framleiðslu lokið fyrir klukkan tólf. Aftur á móti beið kortasending opnunar, skoðunar, talningar og skráningar og þar að auki komu tvö annars konar aukaverkefni en plastframleiðsla svo klukkan var að verða þrjú þegar við vorum búnar að afgreiða þessi verk. Ég stillti vinnupóstinn minn á "out of office" því ég á ekki að mæta aftur fyrr en nk þriðjudag.

Fékk far heim úr vinnunni. Kalda potts vinkona mín hafði sagst ekki komast í "sund" í gær svo það var undir mér sjálfri komið hvenær ég mætti í sund seinni partinn. Lagði af stað rétt upp úr fjögur. Bíllinn var í Drápuhlíð hinum megin við Lönguhlíð síðan á sunnudaginn. Byrjaði á því að koma við í Fiskbúð Fúsa að versla mér ýsu í soðið og harðfisk, óbarða ýsu. Fór aðeins tvær ferðir í kalda pottinn, 4 mínútur hvor ferð og synti 300metra á milli. Eftir seinni ferðina í þann kalda fór ég beint í gufu því heitasti potturinn var tómur. Kom heim rétt fyrir sex og var tilbúin með kvöldmat um hálfsjö, soðna ýsu með gufusoðnu blómkáli. Bauð aðeins upp á smjör útá með.

Besti bankinn, blóðbankinn sendi mér mail og sms í gær um hvort ég gæti komið og gefið blóð í dag, 10. febrúar. Hvatti mig til að bóka mér tíma ef svarið mitt um að mæta væri jákvætt. Sendi inn beiðni eftir fjögur í gær og fékk svar um átta í morgun að ég má mæta innan þess tímaramma sem ég óskaði mér eftir klukkan tvö í dag. Held að það sé 57. heimsóknin mín. Best að vera dugleg að drekka vatn næstu tímana svo það verði léttara að finna og hitta á æð.

Þessi vinnuvika búin

Ég fór labbandi í vinnuna í gærmorgun um sjö íklædd fjólubláu úlpunni, strigaskóm, rauðri húfu og með höfuðljósið. Sú sem vinnur alla mánudaga í mánuðinum mætti í gær fyrsta daginn sinn af sex. Við þrjár sem vorum á vaktinni unnum saman aðra hverja viku frá því viku eftir verslunarmannahelgi og fram að áramótum. Núna hittumst við tvo daga hálfsmánaðalega. Gerðum með okkur samning um að þegar við erum að vinna saman þá megum við vera "allsberar" í framan, þ.e. þurfum ekki að setja upp grímu. Vinnudagurinn gekk fljótt og vel fyrir sig. Frekar fá dagleg kort og eina aukaframleiðslan var 200 gjafakort í hádeginu.

Fékk far heim úr vinnunni og ákvað að hella mér upp á smá kaffi fyrst ég var komin heim fyrir klukkan þrjú. Korter yfir fimm sótti sjósundsvinkona mín mig og fyrir utan hana sjálfa var nafna hennar og einnig yngri sonur. Systurnar mættu líka þannig að við vorum sex. Systurnar og sonurinn voru út í sjónum í tvær mínútur enda frekar langt síðan þau voru á svamlinu síðast. Við hinar entumst í rúmar fimm mínútur í -1,3°C sjónum og slökuðum svo vel á í heita pottinum á eftir þar sem við hittum hin fyrir sem voru styttra í sjónum. Sólin var að setjast og himininn logaði. Þegar ég kom heim var Davíð Steinn akkúrat að leggja matinn á borðið og aldrei þessu vant settumst við mæðginin þrjú saman að snæðingi. 

Stutta vinnuvikan hálfnuð

Ég var vöknuð og komin á fætur löngu fyrir klukkan átta í gærmorgun. Vissi að N1-sonurinn ætti að mæta í vinnu um tíu en hann hafði þó ekki spurt mig hvort hann fengi skutl í vinnu. Ég tók því samt rólega til að byrja með hérna heima. Vinnandi sonurinn kom fram um níu en sagðist vera búinn að redda sér fari, yrði sóttur vonbráðar. Ég hélt því áfram að taka því rólega þar til klukkan var langt gengin í tíu. Þá dreif ég mig loksins í sund. Kláraði sund og pottarútínu á uþb klukkutíma og var stödd í gufunni þegar inn kemur manneskja sem hrópar upp yfir sig: "Þarna ertu, Anna Sigríður, maðurinn minn sagðist hafa séð þig tilsýndar og ég fór að leita!" Þetta var sjósundsvinkona mín. Hennar vegna lengdi ég sundferðina um hálftíma og tók m.a. aukaferð í þann kalda.

Rétt fyrir þrjú í gær ók ég vestur í bæ að hitta nöfnu mína og frænku. Afhenti henni "kisuteppi" handa Pixí en svo drifum við okkur út í stuttan göngutúr, 1,5 km á 18 mínútum. Þegar við komum til baka fengum við okkur sódavatnsglas áður en hún hellti upp á kaffi. Stoppaði til klukkan að verða fimm. Áður en ég kvaddi ákváðum við frænkur næsta gönguhitting eftir hálfan mánuð í mínu hverfi.

Eina af bókasafnsbókunum hef ég lesið áður; Aðferðir til að lifa af eftir Guðrúnu Evu Mínervudóttur. Það var alls ekki leiðinlegt að lesa hana aftur. Hef nú lokið við að lesa fjórar af sex safnbókum. Er byrjuð á fimmtu bókinni; Ég veit hvar þú átt heima eftir Unni Lindell. En ég er líka komin vel af stað að lesa fyrra bindið af; Hella þorp í þjóðbraut. En ég á enn eftir að byrja á síðustu tveimur jólabókunum. Allt hefur sinn tíma. En ég var líka að byrja að horfa á danska þætti af RÚV sem heita Ulven kommer.

Frænkunöfnuhittingur í dag

Ég var komin á fætur fyrir klukkan átta í gærmorgun. Skipti um á rúminu mínu, sinnti morgunverkunum á baðherberginu, fékk mér lýsi og settist svo inn í stofu með fartölvuna í fanginu. Um hálftíu bjó ég mér til hafragraut og hellti líka upp á kaffi. Korter fyrir ellefu sótti sjósundsvinkona mín mig. Þrátt fyrir að vera mætta í Nauthólsvík tíu mínútum fyrir opnun var komin löng röð fyrir utan. En við vorum meðal fyrstu 30 og komumst inn í fyrsta hollinu. Sjórinn var -1,5°C en einhvern veginn náðum við samt að svamla um í fjórar mínútur. Vorum svo annað eins í lóninu áður en við fórum í heita pottinn. Ég var komin heim aftur um tólf.

Upp úr hádeginu eða um hálftvö fór ég með pappír og plast í gáma við Kjarvalsstaði. Ákvað svo að renna bílnum í gegnum þvottastöðina rétt hjá Krónunni við Granda. Þar var löng röð og það leið rúmur hálftími áður en ég komst að. Þegar ég var að keyra frá þvottastöðinni eftir bílþvottinn taldi ég bílana sem voru í röðinni áður en beygt er að húsinu. Þeir voru tuttugu en ég veit ekki hvað vorum margir bílar í röðinni sem lá meðfram húsinu, að lúgunni þar sem greitt er fyrir þvottinn og áfram þangað sem maður keyrir inn í þvottastöðina.

Kom við í Krónunni til að versla helstu nauðsynjar og þar hitti ég á fyrrum sveitunga minn og þekkti hann þrátt fyrir grímu. 

Skrepp aðeins í sjóinn á eftir

Tólfta vinnu daginn á árinu labbaði ég í vinnuna upp úr sjö í gærmorgun. Fyrirliðinn var mættur í afleysingar. Við tókum að okkur vélina og framleiðsluna meðan sú þriðja sá um bókhaldið. Þar sem allri framleiðslu var lokið um hádegi gat fyrirliðinn farið heim. Við hinar tvær sáum um frágang á deildinni eftir hádegi og við ryksuguðum framleiðsluvélina og teljarana m.a. Fékk far heim úr vinnunni og var komin heim upp úr klukkan hálfþrjú. Var að bræða það með mér hvort ég ætti að skrópa í sundferð en á endanum skrapp ég í Laugardalslaugina milli klukkan hálffimm og sex. Það var sundmót í gangi og hluti af klefum, sturtum og sundbrautum stúkað af fyrir keppendur. Ég ákvað því að láta 200 metra sund nægja en fór 3x fjórar mínútur í þann kalda og endaði á að vera 15 mínútur í gufunni áður en ég fór upp úr. Hitti aðeins á eina frænku mína (móðurömmur okkar voru systur) úti á bílaplani en hún var að sækja annan tvíburann sinn sem var að keppa í sundi.

Föstudagur

Labbaði af stað í vinnu rétt rúmlega sjö í gærmorgun. Rak í rogastans þegar ég mætti og hitti fyrir fyrirliðann í deildinni. Hennar vinnuplan er frá miðvikudegi til miðvikudags svo hún var að mæta sjöunda virka vinnudaginn í röð. Hún sagðist vera að hlaupa í skarðið fyrir aðra af hinum sem áttu skráða vinnuvakt ásamt mér. Vissum ekki þá hvort þetta væru bara nokkrir klukkutímar í afleysingu, heill vinnudagur eða jafnvel tveir. Fyrirliðinn var byrjuð að vinna sem bókari en ég benti henni á að það væri komið að mér að sinna þeim verkefnum. Við sóttum vagna og töskur inn á lager og skruppum svo fram á kaffistofu að fylla á vatnsbrúsa og taka því rólega þar til við værum orðnar þrjár. Vinnudagurinn leið hratt, ekkert óvænt kom upp á.

Fékk far heim úr vinnunni. Rétt fyrir fjögur var ég mætt í Laugardalinn. Var að spá í hvort ég næði að synda nokkrar ferðir áður en kalda potts vinkona mín mætti en hún mætti áður en ég var búin að klæða mig í sundbolinn. Ég "skrópaði" því í sundinu en við vinkonurnar fórum sjö ferðir sinnum þrjár mínútur í kalda pottinn og heitt á milli. Ég kom heim um sex en var þá svo dösuð að ég tilkynnti Davíð Steini að hann mætti elda ef hann vildi ég var ekkert svo svöng og í engu matarstússstuði. Það var ekkert brasað í eldhúsinu í gærkvöldi en það var svo sem til nóg af afgöngum í ísskápnum. 

Labbað í vinnu

Ég var að ganga eftir Skúlagötunni á áttunda tímanum í gærmorgun þegar ég þurfti að staldra aðeins við og reima aftur  vinstri skóinn. Átti svo enn eftir smá spöl í vinnuna þegar ég þurfti að reima aftur. Var samt komin í vinnu rétt upp úr hálfátta. Aðeins færri kort voru í framleiðslu í gær heldur en í fyrradag. Ég var að taka á móti og skoða og ferlið gekk svo hratt og vel fyrir sig að við vorum búnar með fyrri tvo skammtana hálftíma áður en við fengum hádegis skammtinn og það þrátt fyrir að við tækjum okkur extra langan kaffitíma. Framleiðslu lauk nokkru fyrir tólf. Eftir hádegi var verið að sinna ýmsum frágangi og mánaðamótauppgjöri. Fékk far heim úr vinnunni um þrjú. Fékk mér smá hressingu og kveikti um stund á fartölvunni en um hálffimm var ég mætt í Nauthólsvík. Það var fjara, 2°C lofthiti en sjórinn -1,8°C. Óð þónokkuð langt út í, botnaði alltaf, og svamlaði um í ca tvær mínútur. Fór svo í lónið sem var alveg stúkað af og því nokkrum gráðum yfir núllið útaf uppsprettunni. Endaði á því að sitja í heita pottinum í korter áður en ég fór upp úr og beint heim aftur. Bjó til grjónagraut í kvöldmatinn og bauð upp á kalda lifrapylsu með.

Horfði á Kiljuna um kvöldið og aðeins á Púllaraleikinn en ég var komin upp í fyrir tíu og las til klukkan hálfellefu. 

Mið vika

Ég vaknaði amk korter áður en vekjaraklukkan átti að hringja í gærmorgun. Dreif mig strax á fætur. Hitti aðeins á N1 soninn en hann var farinn út á undan mér. Ég labbaði af stað í vinnuna um sjö í vetrarúlpunni, gönguskóm og með höfuðljósið. Var mætt í vinnu um hálfátta og hitti fyrir fyriliða hópsins sem ég hef ekki hitt í hálft ár. Hún var í hinum hópnum og að saxa niður orlofsdaga frá í fyrra í sl. mánuði. Nú vinnur hún frá miðvikudegi til og með miðvikudags og hún mætti sl. miðvikudag, fyrsta virka daginn minn í ekki mæta á vinnustað, eftir 6 daga vinnutörn. Sú sem kom síðust af okkur þremur sem vorum skráðar á vinnuvakt var einnig í hinum hópnum en ég var búin að hitta hana nokkra daga í janúar. Hún vinnur frá föstudegi til og með föstudags. Sú síðarnefnda og ég tókum að okkur framleiðsluna og hún leyfði mér að velja á hvorum endanum ég væri. Ég valdi að hlaða inn og troða í. Dagleg framleiðsla gærdagsins var með meira móti og við vorum til hálftvö að ljúka framleiðslu með kaffi- og hádegispásum og smá aukatöfum.

Fékk far heim úr vinnunni og var komin heim um þrjú. Klukkutíma síðar var ég mætt í sund. Kalda potts vinkona mín gat ekki mætt á sama tíma svo ég fækkaði ferðum í þann kalda niður um helming en var 3-5 mínútur ofan í í hvert sinn. Var komin heim aftur rétt fyrir sex.

Fyrsti vinnudagur af tólf í febrúar

Fór á fætur um átta í gærmorgun. Eftir morgunverkin á baðinu fékk ég mér matskeið af lýsi áður en ég settist inn í stofu með fartölvuna í fanginu. Um hálfellefu bjó ég mér til hafragraut og meiningin var að drífa sig svo í sjóinn. Frestaði sjóferð um hálfa klukkustund því ég ákvað að horfa á upplýsingafundinn fyrst. Var komin út í -1,7°C kaldan sjóinn um tólf. Veit ekki hversu lengi ég svamlaði um en það var frekar stutt. Held þó að ég hafi verið uþb tvær mínútur áður en ég fór aðeins yfir í lónið. Endaði svo í heita pottinum í korter. Kom við í Fiskbúð Fúsa á leiðinni heim og keypti nætursaltað ýsuflak, hrogn og harðfisk. Setti handklæði í þvottavél þegar ég kom heim. Að öðru leyti fór dagurinn í svipaða hluti og aðrir virki "ekki-vinnudagar", lestur, prjón, netvafr og þáttagláp. Var komin upp í rúm fyrir klukkan tíu. Er byrjuð að lesa fyrra bindið af bókunum um Hellu en ég er líka byrjuð á einni af safninu; Köld slóð eftir Emelie Schepp. Þetta er önnur bók höfundar en ég er nýlega búin að lesa fyrstu bókina. 

Nýr mánuður

Það er mánudagur, en eiginlega ekki hjá mér þannig séð því ég er ekki að vinna í dag. Næstu sex virku daga, frá og með morgundeginum, má ég mæta á vinnustað.

Í gærmorgun var klukkan langt gengin í níu áður en ég fór á fætur. Um hálftíu fór ég út með sunddótið mitt og þurfti að byrja á því að skafa af bílnum sem enn var fyrir aftan heilsugæsluna síðan við Oddur komum heim á föstudagskvöldið. Var komin fyrstu ferðina ofan í kalda pottinn í Laugardalnum um tíu. Ætlaði að vera 2-3 mínútur en þegar þau tímamörk voru að nálgast kom náungi ofan í pottinn sem fór að spjalla sem varð til þess að ég kældi mig í rúmlega sex mínútur áður en ég fór að synda. Eftir tuttugu mínútur og 500m fór ég aftur í kalda pottinn. Þremur mínútum seinna fór ég í heitasta pottinn og stuttu síðar hitti ég konu sem stjórnaði barnakór Hallgrímskirkju þegar strákarnir mínir voru báðir í kór. Við spjölluðum í dágóða stund og urðum svo samferða í gufuna þar sem við héldum áfram að spjalla.

Kom heim aftur um hálftólf. Lagði bílnum í Blönduhlíð. Borðaði afganginn af hafragrautnum frá í fyrradag kaldan og bjó mér til tvo bolla af kaffi. Mikið af deginum fór svo í lestur, prjónaskap, íþróttaáhorf sem og þáttagláp. Lánaði strákunum bílinn um miðjan dag og fram á kvöld til að skreppa í heimsókn til pabba síns og fjölskyldu hans.

Pabbi lánaði mér bækurnar; Hella þorp í þjóðbraut eftir Ingibjörgu Ólafsdóttur. Þær komu út í fyrra og er almenn ánægja með þær. Pabbi er búinn að lesa þær tvisvar. Ég er að fara að byrja að lesa þær núna á eftir en er líka með bókasafns og jólabækur á kantinum. Alltaf hægt að finna sér eitthvað til að lesa og gera.