Smá hret

Ég reimaði á mig gönguskóna rétt fyrir sjö í gærmorgun. Setti ekki broddana undir og það slapp alveg til á göngunni í vinnuna. Þurfti þó að fara extra varlega þegar ég þveraði Klamratúnið, labbaði stundum til hliðar við steypta stíginn. Vann til klukkan tólf því ég var búin að ákveða að taka hálfan dag og skrá sem uppsöfnuð stytting vinnuvikunnar fyrir marsmánuð.

Hafði nefnt það við einkabílstjórann hvort hann myndi fara í Sorpu í fyrra fallinu, sækja mig í vinnunna á leiðinni þangað og hleypa mér út við Krónuna við Granda. Sonurinn var ekki einu sinni lagður af stað þegar ég labbaði út af vinnustaðnum en þegar ég náði loksins í hann samdist okkur um að hann myndi pikka mig upp við Sólfarið. Ég rölti því þangað og þurfti aðeins að bíða í uþb 7 mínútur.

Var búin að skrifa niður innkaupalista svo ég myndi ekki gleyma neinu nauðsynlegu. Komum heim um hálftvö. Þá var hinn sonurinn búinn að taka aðeins til í eldhúsinu. Einkabílstjórinn hjálpaði mér að ganga frá vörunum og svo tókum við okkur saman um að fara aðeins yfir gólfin, með rykmoppu yfir parketi, hrúgurnar svo ryksugaðar upp sem og teppið fram á palli og flísarnar á baðherbergisgólfinu.

Klukkan var langt gengin í fjögur þegar ég tók til sjósundsdótið og brunaði í Nauthólsvík. Það var næstum háflóð, sjórinn 3,2°C og ég svamlaði um í rúmar tíu mínútur. Engin biðröð var við aðstöðuna en þegar ég var á leiðinni heim upp úr klukkan fjögur þá tók það mig aðeins lengri tíma að komast heim en venjulega því það var smá umferðarsulta á Flugvallarvegi upp á Bústaðaveg.

Í gærkvöldi var ég svo með saumaklúbb hjá mér. Það var 100% mæting og sem fyrr fannst okkur við bara búnar að sitja, föndra og spjalla í uþb tíu mínútur þegar klukkan var allt í einu orðin ellefu. 

Stytting

Var í fyrstu ekki alveg viss hvað var að gerast þegar vekjarinn fór í gang í gærmorgun. En ég var tiltölulega fljót að átta mig og dreif mig á fætur. Átti til kaldan hafragraut í ísskápnum síðan á laugardagsmorguninn og ég gæddi mér á honum. Labbaði á strigaskóm í vinnuna. Nú þegar við erum allar fimm þá verðum við að skipta verkunum á milli okkar. Tvær sjá um framleiðsluvélina fram að morgunkaffi, ein sinnir bókhaldinu og önnur af þeim sem tekur við vélinni eftir kaffi undirbýr pökkun. Hin fær þá yfirleitt að aðstoða bókarann við að telja þegar fyrstu tölur eru tilbúnar eftir fyrsta framleiðsluskammtinn. Daglegri framleiðslu lauk fyrir klukkan tólf. Eftir hádegi ákváðum við að setjast aðeins niður saman í sófanum, tvær af okkur vorum með prjónana. Spjölluðum á léttu nótunum í kannski hálftíma áður en bókarinn fór að undirbúa síðustu talningalotu dagsins. Á slaginu tvö kom póstur sem þurfti að meðhöndla á ákveðinn hátt. Svona póstur kemur stöku sinnum en svo geta liðið dagar á milli. Í gær var þetta þriðji pósturinn í röð frá og með sl. fimmtudegi. Stungum af úr vinnunni rétt fyrir hálfþrjú. Ég fékk far heim.

 Þar sem ég fór ekkert í sund á sunnudaginn og þvoði þar af leiðandi ekki á mér hárið þá þá ákvað ég að drífa mig í sund seinni partinn. Synti að vísu ekki nema 200 metra en fór 4x4-5 mínútur í kalda pottinn, 2x í heitasta pottinn og var svo góða stund í gufunni. Þvoði á mér hárið og var komin heim um sex. Hafði tekið út þorshnakkaflak út í gærmorgun. Setti upp kartöflur, skar flakið í fjóra bita og steikti upp úr eggi og krydduðum byggflögum. Átti svo smá rjómaslettu til að setja út á pönnuna í restina. Mjög gott.

Er byrjuð á enn einni bókasafnsbókinni; Blóðengill: Hilma eftir Óskar Guðmundsson. Er samt enn að lesa Vatnið, gríman og geltið. Þar að auki er ég enn að lesa tvær síðustu jólabækurnar og svo styttist örugglega í að ég opni seinna bindið um Hellu.

Slyddukenndur göngutúr í vinnuna í morgun

Ég vaknaði ekki fyrr en klukkan var að verða hálftíu í gærmorgun, við glampandi sól og afar gott veður. Bíllinn minn var samt hrímaður að utan. Veit ekki hvenær ég sofnaði eftir skjálftann um nóttina en það var amk ekki alveg strax. Pabbi spurði um hvað við ættum að hafa í hádegismat. Sagðist reyndar eiga skyr fyrir sig. Ég tók út eina þorskblokk, sem ég steikti upp úr hrærðu eggi og krydduðu byggmjöli. Sauð kartöflur með og var maturinn tilbúinn rétt fyrir tólf.

Um eitt leytið fékk ég mér göngutúr upp að Helluvaði til að heimsækja föðursystur mína. Þetta er fyrsta heimsóknin mín til hennar á þessu ári en hún er búin að fá báðar sprauturnar. Stoppaði hjá henni í hátt í tvo tíma.

Annað sem ég gerði á meðan ég var fyrir austan um helgina, fyrir utan að prjóna, lesa og leggja kapla var að fá síðustu upplýsingar í skattframtalið mitt og skila því. Í fyrra var lokagreiðslan á lífeyrissjóðsláni sem pabbi tók og lánaði mér til að fjármagna fyrstu íbúðarkaupin 1995.

Um hálffimm kvaddi ég pabba og brunaði heim í bæinn. Var komin heim um sex, en södd eftir hádegismatinn og tvo kaffitíma. N1 sonurinn var að vinna til hálfátta og hinn fékk sér núðlur um það leyti sem ég var að koma heim. 

Hrökk upp við skjálfta um tvö í nótt

Var komin á fætur um sjö í gærmorgun. Hálftíma síðar vakti ég N1 soninn og spurði hvort hann ætti ekki að mæta til vinnu um átta. Það var reyndin og bauðst ég til að skutla honum. Hann þáði það, pissaði, tannaði og klæddi sig og með minni aðstoð komst hann í vinnuna rétt áður en klukkan sló átta. Ég fór beint heim aftur. Gekk frá endum á fyrsta barnateppinu sem datt af prjónunum í fyrrakvöld. Fitjaði upp á nýju barnateppi með öðru mynstri. Byrjaði að lesa Vatnið, gríman og geltið eftir Silju Björk Björnsdóttur sem er mágkona mágs míns og er um veikindi hennar sem hún glímdi við um tvítugt. Um hálftíu bjó ég mér til hafragraut og hellti upp á könnuna. Klukkutíma síðar var ég sótt af nöfnunum. Við vorum mættar í röðina við aðstöðuna í Nauthólsvík korter fyrir ellefu, nógu framalega til að ná inn með fyrsta hollinu. Sjórinn var kominn yfir þrjár gráður og tvær af okkur nutum þess að svamla um. Sú þriðja naut þess líka til að byrja með en við vorum kannski of lengi út í fyrir hana, næstum því korter og svo smá stund í lóninu áður en við fórum í heita pottinn. Vorum í pottinum í amk tuttugu mínútur en hún náði ekki í sig hita, ekki fyrr en hún fékk sér te eftir að hún mætti til vinnu upp úr tólf.

Um eitt leytið var ég búin að taka saman farangur amk til einnar nætur, vakti Odd til að kveðja hann og brunaði beint austur á Hellu. Við pabbi fórum í smá kaplakeppni en spilin voru ekki með okkur í liði svo ég settist fljótlega inn í stofu með prjónana mína. Pabbi bauð upp á pönnsur með kaffinu og í kvöldmat fékk ég kjötsúpu. Hann sjálfur er hættur að borða heitan mat á kvöldin, fékk sér kornfleks og lifrapylsusneið. Eftir að kvöldfréttirnar voru byrjaðara fékk ég leyfi til að renna í hvítvínsbeljuna. Horfði á seinni hlutann um Daða og Gagnamagnið og skipti svo yfir á Sjónvarp símans. Ég var komin upp í rúm um ellefu og las bara í stutta stund. Var örugglega sofnuð fyrir miðnættið. Um tvö leytið í nótt var ég nýbúin að snúa mér í rúminu þegar skjálftinn upp á fimm reið yfir og fannst greinilega. Ég ætlaði að halda áfram að sofa en ég varð að byrja á því að skreppa fram á salerni og tæma hlandblöðruna fyrst og það varð líklega til þess að ég glaðvaknaði og gekk illa að sofna aftur í einhvern tíma.

Sjórinn 3,2°C

Að sjálfsögðu labbaði ég í vinnuna fimmta daginn í röð í gærmorgun. Var mætt um hálfátta. Á föstudögum mætum við fjórar af fimm, þ.e. ef engin er í fríi eða lasin. Fram að morgunkaffi var ég inni á framleiðsluvélinni í móttökunni eftir að hafa tekið saman og talið til þær tegundir sem voru í daglegri framleiðslu í fyrstu tveimur daglegur verkefnunum. Eftir kaffið var ég frammi í pökkun, frágangi og einnig föstudagstalningu með bókaranum þegar framleiðsluverkefnum var lokið. Engin auka framleiðsla er í gangi svo það var engin framleiðsla eftir hádegi. Vorum samt í vinnu til klukkan að verða hálfþrjú.

Fékk far heim úr vinnunni. Hellti mér upp á smá kaffi og settist smá stund inn í stofu með fartölvuna í fanginu. Var komin í sund klukkan að verða hálffimm. 3x5 mínútur í kalda, 300m sund og endaði í löngu gufubaði. Kom heim aftur um sex. 

Fyrsta heila vinnuvikan mín á árinu liðin

Vaknaði upp við snarpan skjálfta stuttu fyrir sex í gærmorgun, rúmum hálftíma áður en vekjaraklukkan átti að vekja mig. Fór á fætur skömmu síðar. Labbaði af stað í vinnuna á svipuðum tíma og venjulega. Valdi aðra leið eftir að ég var komin þvert yfir Klambratún. Fór yfir Snorrabraut, framhjá Domus Medica, upp á milli Tækniskólans og Hallgrímskirkju, Skólavörðustíginn, hluta af Arnarhól og kom Kalkofnsveginn að vinnustaðnum. Ég var í bókhaldi og kom því ekkert nálægt framleiðslunni. Hinar fjórar skiptu með sér verkum, tvær í framleiðslu fram að kaffi og hinar tvær í alls konar undirbúning frammi. Þær síðarnefndu fóru svo í framleiðsluna eftir morgunkaffi. Allri endurnýjun er lokið í bili og daglegri framleiðslu lauk rétt fyrir klukkan tólf. Nú þegar við erum allar í vinnu saman er ein búin að færa sig aftur í 70%. Hún var því búin með vinnuvikuna sína um hádegið. Við hinar vorum til rúmlega tvö.

Fékk far heim úr vinnunni. Fór í sund um fjögur. Var búin að synda 400metra og sat í minni fyrstu ferð í þeim kalda þegar kalda potts vinkona mín mætti á svæðið. Kom heim aftur um sex. 

Skatturinn

Ég er ekki búin að opna skattframtalið mitt sem á að skila inn á næstu dögum. Er samt alveg róleg yfir þessu og stefni að því að skoða þetta og klára um komandi helgi.

Tuttugastaogþriðja vinnudaginn í röð á árinu labbaði ég í vinnuna upp úr klukkan sjö í gærmorgun. Framan af morgni höfðum við allar fimm nóg að sýsla. Við þrjár sem vorum frammi til að byrja með, ein í bókhaldi, önnur í að undirbúa pökkun og sú þriðja að sortera og raða saman ónýtu plasti frá því í febrúar, vorum sömu þrjár og unnu saman aðra hverja viku frá verslunarmannahelgi. Tvær af okkur tókum við framleiðslunni inni á vél eftir morgunkaffi. Ég var í að taka á móti. Þegar daglegu framleiðsluverkefni tvö af þremur lauk og það var amk hálftími í það þriðja höfðum við síðustu endurnýjun febrúar úr að moða. Sú endurnýjun var keyrð til okkar og yfir á vél sl. mánudag og það var búið að framleiða eitthvað af henni. Nokkrar misstórar skrár voru þó eftir og framleiddum við allar nema þá stærstu, hún var framleidd eftir hádegið.

Skipt var um vinnutölvur hjá mér og einni annarri eftir hádegi í gær og það var ekki búið fyrr en um fimm. Fékk svo far heim og ákvað að fara ekkert út úr húsi aftur, skrópaði semsagt í sjóinn og fór heldur ekkert í sund. 

Jarðhræringar og gosórói

Jæja, ætli það sé komið að því? Gos kannski að hefjast á stað sem er virkt en hefur ekki gosið öldum saman? Það er mikið lagt á almannavarnir þessi misserin og verkefnin velflest krefjandi. Og margt sem hefur verið að gerast og er í gangi eitthvað sem þarf að fylgjast með, læra af og búa sig undir allt mögulegt. Það væri nú samt alveg ágætt ef maður hætti að hrökkva upp við skjálfta á nóttunni.

En hvað um það, það gerist sem gerist. ÉG er að spá í að reyna bara að halda áfram daglegri rútínu. Ég labbaði í vinnuna á svipuðum tíma og oftast áður í gærmorgun og var mætt á vinnustaðinn rétt upp úr hálfátta. Ég átti fyrstu vakt á vélinni ásamt einni annarri, ég að hlaða inn og setja af stað. Hún að telja til tegundirnar og taka á móti. Sú sem átti að vera í móttökunni eftir kaffi var í krefjandi yfirlestri á verkferlum og handbók og þáði það að ég leysti hana af. Svo það fór þannig að ég kom mér inn á vél allan tímann sem hún var í gangi því eftir hádegi vorum við aftur saman á vélinni sem tókum fyrstu vaktina. Ég að taka á móti og hún að troða í. Hættum framleiðslu rétt fyrir hálffjögur, gengum frá og fórum heim. Fékk far með þeirri sem var tvisvar með mér á vélinni.

Kalda potts vinkona mín lét mig vita að hún kæmist ekki í sund. Ég var mætt í Laugardalslaugina upp úr klukkan fjögur. Fór 3x5 mínútur í kalda, synti 400 metra, fór einu sinni í heitasta pottinn og endaði í gufunni. Kom heim um sex leytið.

Er enn að lesa bókina Pabbastrákur en er rúmlega hálfnuð með hana enda hef ég aðeins verið að lesa í þeirri bók síðustu tvö kvöld.

Annar dagurinn í mars

Labbaði af stað í vinnu í gærmorgun rétt upp úr klukkan sjö og var þriðja af fimm til að mæta til vinnu. Eftir að hafa fyllt á vatnsflöskurnar okkar og setið smá stund frammi á kaffistofu fór tvær að vinna á vélina, ein í bókhaldið og við tvær sem áttum vélarvakt eftir morgunkaffið til hádegis fórum í lagertalningu. Í morgunkaffinu fengum við sendar sérstakar veitingar frá næsta yfirmanni í tilefni þess að þetta var fyrsti vinnudagur okkar allra saman síðan síðast í júlí á síðastliðnu ári. Fyrir utan daglega framleiðslu var enn nokkur endurnýjun eftir. Vélin var gangandi alveg til klukkan að ganga fjögur fyrir utan kaffi og hádegispásur.

Fékk far heim úr vinnunni upp úr hálffjögur. Rúmum klukkutíma síðar sótti sjósundsvinkona mín mig. Við voru aðeins tvær af fimm úr hópnum okkar sem drifum okkur í sjóinn. Vorum rúmar fimm mínútur í 2,2°C sjónum og svo nokkrar mínútur í lóninu sem virkaði næstum eins og heitur pottur. Vorum svo næstum hálftíma í heita pottinum. Mér var skilað aftur heim um sexleytið.

Grímulausar allar fimm saman í vinnu

Fór á fætur um klukkan níu í gærmorgun. Fljótlega hafði kalda potts vinkona mín samband og hún spurði hvort ég myndi mæta í Laugardalslaugina um tíu. Ég kvað svo vera og var akkúrat á planinu fyrir utan laugina þegar klukkan sló tíu. Hrafnhildur var þegar búin að fara eina ferð í kalda pottinn þegar hún hitti mig þar í minni fyrstu ferð. Fyrsta ferðin hjá mér varð þá aðeins lengri en hinar fjórar sem ég fór í viðbót. Eftir fimmtu ferðina mína synti ég 400m áður en ég fór upp úr. Þvoði á mér hárið og á heimleiðinni kom ég við í Krónunni við Nóatún. Restin af deginum var svona svipuð og undanfarna daga. Horfði á Landann og fyrri partinn af heimildamyndinni um flugslysið í Mykinesi 1970. Er ekki búin að klára að lesa bókina. Fór í háttinn um tíu, bæði til að lesa smá og undirbúa mig undir fyrstu heilu vinnuvikuna síðan í fyrra sem og að hitta allar samstarfskonur mínar á deildinni en síðast vorum við allar saman seinni partinn í júlí sl. Varð vör við skjálftana sem voru um hálfeitt í nótt og hrökk svo upp með andfælum klukkutíma síðar þegar sá sem var 4,9 reið yfir. 

Síðasti febrúardagurinn

Gærdagurinn var bara alveg ágætur. Var vöknuð en ekki komin framúr rúmi þegar næst stærsti skjálftinn, af öllum skjálftum síðan þetta hófst á miðvikudaginn var, reið yfir. Ákvað í kjölfarið að koma mér á fætur. Eftir morgunverkin á baðinu settist ég fyrst um sinn inn í stofu. Um hálftíu bjó ég mér til hafragraut og rétt rúmum klukkutíma síðar var ég mætt, langfyrst, í röðina við aðstöðuna í Nauthólsvík. Þetta var ca tuttuguogfimm mínútum fyrir opnun. Reyndar kannski ekki nema tuttugu mínútum því það var byrjað að hleypa inn nokkrum mínútum áður en klukkan varð ellefu. Hinar fjórar í hópnum mínum voru aftar í röðinni og komust samt inn með fyrsta hollinu. Sjórinn var 2°C, nokkur ferð á logninu og mikill og skemmtilegur öldugangur. Við vorum út í sjó í uþb fimm mínútur áður en við fórum í heita pottinn. Ég kom heim aftur um tólf og byrjaði á því að hella upp á könnuna. Fór aðeins einu sinni út úr íbúðinni eftir þetta. Þá lá leiðin í þvottahúsið að sækja þvott af snúrunum. Annars var ég að prjóna, vafra á netinu og lesa. Kláraði að lesa þriðju bókina af safninu og fyrra bindið um Hellu. Í gærkvöldi byrjaði ég svo á fjórðu bókinni af safninu, Illvirki. Lánaði bræðrunum bílinn seinni partinn en þeir voru boðnir í heimsókn til pabba síns og fjölskyldu hans.

Þetta er nú meiri hristingurinn

Það var með seinni skipunum sem ég fór á fætur í gærmorgun. Hafði að vísu rumskað um fimm sem kannski er ekkert óeðlilegt því ég var sofnuð fyrir klukkan hálfellefu. En mér tókst semsagt að bæla mig niður aftur án þess að fara framúr og var klukkan rétt að byrja að ganga tíu þegar ég fór á fætur. Framan af morgni stóð til að skreppa aðeins í sund en bókin illvirki ríghélt mér og um hádegisbil þegar skjálftahrinan var komin á skrið aftur var ég búin að ákveða að skrópa í sundið. Aftur á móti skrapp ég í þriggja kortera göngutúr milli þrjú og fjögur og áður en ég fór í háttinn í gærkvöldi var ég búin að ná skrefa markmiðum dagsins sem eru 6000 skref. Strákarnir voru báðir heima í gær og dobblaði ég þá til að skila af okkur sameigninni, þ.e. ryksuga og skúra frá þvottahúsið, ganginn og stigann upp að íbúðinni fyrir neðan okkur. 

Rigning og logn

Gærdagurinn var ósköp rólegur en leið samt frekar hratt. Lauk við að lesa smásögurnar sem voru fimm talsins og las einnig áfram í fyrra bindi um Hellu. Maður getur alveg gleymt sér við að skoða myndirnar í þeirri bók. Er búin að rekast nokkrum sinnum á nafnið hans afa míns. Ég tók líka fram prjónana mína. Kalda potts vinkona mín hafði samband og sagðist myndu mæta í sund um fjögur. Ég fór því ekkert út fyrr en um þrjú. Byrjaði á því að fara á atlantsolíustöðina við Sprengisand og fylla á tankinn. Það gekk eins og í sögu. Var byrjuð að synda um hálffjögur og synti 500 metra á rétt rúmum tuttugu mínútum. Klukkan var ekki alveg orðin fjögur þegar ég fór fyrstu ferðina í kalda pottinn. Sat þar í fjórar mínútur áður en ég fór nokkrar mínútur í heitasta pottinn. Enn bólaði ekkert á vinkonu minni svo ég settist smá stund á bekk. Ákvað svo að taka aðrar fjórar mínútur í kalda pottinum. Ég var búin að sitja nokkrar mínútur í heitasta pottinum þegar vinkonan mætti. Fór fimm ferðir með henni í kalda pottinn. Vorum yfirleitt um þrjár mínútur í hvert skipti. Kom heim rétt fyrir sex.

Í gærkvöldi byrjaði ég svo á þriðju bókinni af safninu: Illvirki eftir Emelie Schepp. Þetta er þriðja bók höfundar og eru sömu aðalpersónur og í hinum tveimur. Var að skila bók númer tvö í síðustu ferð og í þeirri ferð tók ég einni fjórðu bókina eftir sama höfund, Pabbastrákur. 

Bókasafnsferð

Þrátt fyrir að ég ætti ekki að mæta til vinnu í gær var ég komin á fætur hálfri stundu fyrir átta. Eftir að hafa sinnt morgunverkunum á baðherberginu settist ég inn í stofu. Hafði fimm bækur með mér, þrjár úr eigin safni og eina frá pabba. Ég byrjaði þó á að setjast með fartölvuna í fangið og gleymdi mér alveg næsta einn og hálfa tímann eða svo. Þegar ég loksins slökkti aftur á tölvunni fór ég fram í eldhús bjó mér til hafragraut og hellti upp á kaffi. Ég var að skola skálina og ná mér í fyrsta kaffi bollann þegar ísskápurinn byrjar að vera með óskiljanleg læti í smá stund. Fattaði það ekki fyrr en lætin byrjuðu aftur örskömmu síðar að þetta hefðu líklega verið jarðskjálftar. Fann svo fyrir öllum stærri skjálftum en 3,5 á rikter þegar ég sat í stofustólnum að lesa eða prjóna. Frestaði sjósundsferð þar til eftir hádegið til að geta fylgst með aukafréttatímanum klukkan tólf.

Ég fékk áminningu frá bókasafninu um að skiladagur væri að nálgast. Það varð til þess að ég greip líka með mér bókasafnspokann ásamt sjósundsdótinu. Byrjaði á því að skreppa á safnið og skilaði öllum sex bókunum. Á skammri stundu var ég komin með átta aðrar bækur í fangið. Ein af þeim er ljóðabókin Rof eftir Bubba Morthens og önnur er smásögusafnið Fílahirðirinn eftir Stefán Sigurðsson.

Áður en ég dreif mig í smá sjósundsferð ætlaði ég að fylla á tankinn hjá Atlantsolíu við Sprengisand. Þegar ég komst að dælu þá virkaði ekki lesarinn eða lykillinn svo ég ákvað að fresta þessu aðeins. Var komin ofan í sjóinn rétt upp úr klukkan tvö og ég gaf mér klukkutíma í allt í þessa dásemd. Kom við í Fiskbúð Fúsa áður en ég fór aftur heim.

Síðustu heimadagarnir framundan

Í gær var ég komin á fætur og búin að slökkva á vekjaraklukkunni fimm mínútum áður en hún hringdi. Hafði auka fimmtán mínútur til að kveikja á tölvunni og vafra aðeins um áður en kominn var tími til að labba af stað í vinnuna. Tuttugasti "mæta á vinnustað" dagurinn á árinu og tuttuguasti göngutúrinn til vinnu á árinu. Hlóð höfuðljósið í fyrrakvöld og birtan frá því mikil og skær á göngunni í gærmorgun. Ég sá um bókhaldið í gær en leysti líka aðeins af á vélinni því við vorum allar í starfssamtali við yfirmann í gærmorgun. Hún mætti til okkar rétt fyrir hálftíu og ég var fyrst í samtalsröðinni. Hinar tvær fóru fram í kaffi á meðan og önnur þeirra tók smá auka kaffi með mér en við vorum þó byrjaðar að framleiða aftur áður en kom að henni. Samtalið við yfirmanninn gekk að ég held ágætlega. Þetta var okkar fyrsta samtal maður á mann við þennan yfirmann og mér fannst amk mjög auðvelt að vera ég sjálf í samtalinu. Fyrsta formlega spurning var um líðan mína á vinnustað. Ég var ágætlega undirbúin því sú spurning og þrjár aðrar voru í fundarbeiðninni þegar boðað var til þessa samtals fyrir viku síðan. Annars lauk vinnudegi ekki fyrr en upp úr hálffjögur, þrátt fyrir að engin síðdegispása væri tekin en stundum standa sum vinnumál þannig að ekki er hægt að fara fyrr en búið er að leysa þau.

Fékk far heim úr vinnunni en stoppaði ekkert heima. Tók bara saman sunddótið mitt og var mætt í Laugardalslaugina rétt upp úr klukkan fjögur. Kalda potts vinkona mín var mætt og búin að fara eina ferð í kalda. Saman fórum við sex ferðir í viðbót. Ég sleppti því að synda en gaf mér góðan tíma í gufunni eftir síðustu ferðina í kalda pottinn. Kom heim um sex og setti upp grjónagraut. Næst má ég mæta í vinnuna á mánudaginn kemur, 1. mars og þá megum við mæta allar fimm í fyrsta skipti síðan síðast í júlí á síðasta ári. Einhverjar af hinum eiga enn inni meira en 10 orlofsdaga frá síðasta orlofsári og þær eru hvattar til að taka alla daga framyfir 10 út fyrir 1. maí. Ég á 7 daga svo ég slepp en á næsta ári mega þeir ekki vera meira en fimm eftir. Ég er búin að setja fram orlofsósk upp á 28 virka daga frá því seinni partinn í júlí og út ágúst.

Breytingar framundan

Þrátt fyrir að sofa alveg þar til vekjaraklukkan vakti mig rétt fyrir hálfsjö í gærmorgun hafði ég tíu auka mínútur til að kveikja aðeins á tölvunni áður en ég labbaði af stað í vinnuna. Höfuðljósið var með daufara móti enda hef ég aldrei hlaðið það. Engu að síður slokknaði ekki alveg á ljósinu fyrr en rétt áður en ég mætti til vinnu. Þessa dagana erum við með fullt af endurnýjun í gangi svo vélin var látin ganga frá rúmlega átta til rétt rúmlega þrjú. Aðeins voru gerðar pásur vegna talninga, morgunkaffis og hádegishlés. Fékk far heim úr vinnunni og hafði þá einn og hálfan tíma þar til sjósundsvinkona mín sótti mig. Mættum allar fimm úr hópnum í Nauthólsvík rétt fyrir hálfsex og þurftum að bíða í röð í ca tíu mínútur áður en okkur var hleypt í búningaaðstöðuna. Systurnar voru á leið í matarboð um sex en þær náðu öllum fjórum mínútum með okkur í 1,7°C sjónum og smá stund í heita pottinum áður en þær drifu sig upp úr. Ég kom heim um hálfsjö.

Styttri vinnuvikan hálfnuð

Ég var komin á fætur rétt fyrir klukkan átta í gærmorgun og hafði einn og hálfan tíma til að vafra um á netinu. Skutlaði N1 syninum á vinnuvakt upp á Gagnveg og mætti hann á slaginu klukkan tíu. Svo fór ég beint í laugardalinn. Kalda potts vinkona mín var mætt og búin að fara eina ferð í þann kalda. Saman fórum við sex ferðir og oftast í þann heitasta á milli en einu sinni í pott tvö og í annað skiptið í "sjópottinn". Það var eftir að systir hennar mætti á svæðið en sú fer ekkert í kalda pottinn. Eftir sjöttu kaldapotts ferðina synti ég 300 metra áður en ég fór upp úr og þvoði á mér  hárið. Var komin heim rétt upp úr tólf. Hlustaði á hádegisfréttir og prjónaði á meðan. Fljótlega eftir fréttir hellti ég mér upp á fyrstu tvo kaffibolla dagsins. Til stóð að nafna mín og frænka kæmi til mín um miðjan dag en þegar klukkan var að verða hálffjögur og ekkert bólaði á henni, hringdi ég. Í ljós kom að hún var lasin og bað hún mig margsinnis fyrirgefningar á að hafa ekki látið mig vita. Við spjölluðum saman í þrjú korter og ákváðum m.a. næsta hitting. Ég fór ekkert út aftur og bjó mér heldur ekki til meira kaffi. Átti samt ekki í neinum vandræðum með að eyða tímanum fram að háttatíma. 

Á leið í sund eftir skutl

Var glaðvöknuð fyrir klukkan sjö í gærmorgun og fór því fljótlega á fætur. Bauðst því til að skutla N1-syninum í vinnuna svo hann var mættur rétt fyrir átta, á réttum tíma. Þegar hann þarf að taka strætó á laugardagsvaktirnar er hann alltaf að mæta milli átta og hálfníu þótt hann taki fyrstu ferð. Fór beint heim aftur og lauk við að lesa síðustu bókina sem af safninu. Las líka í fyrra bindinu um Hellu sem pabbi lánaði mér um daginn og er ég rúmlega hálfnuð með það. Bjó mér til hafragraut og hellti upp á kaffi um níu leytið. Greip svo eitthvað í prjónana mína.

Upp úr klukkan hálfellefu var ég mætt no 3 í röðina við aðstöðuna í Nauthólsvík. Þrjár aðrar úr sjósundshópnum mínum mættu tíu mínútum seinna og lentu mun aftar í röðinni en komust sem betur fer inn í fyrsta hollinu. Þeir hleypa inn rúmlega 50 manns í einu svo það myndast líka smá raðir fyrir framan klefana. En þetta gengur þokkalega fljótt fyrir sig. Það var að flæða að svo við þurftum ekki að fara langt út í 1,3°C heitan sjóinn. Vorum hátt í fjórar mínútur í sjónum.

Þegar  ég var komin alveg upp úr eftir 15 mínútur í heita pottinum ákvað ég að renna við í Sports Direct til að kaupa mér nýja sundboli. Verslunin var opin en ég fann ekki þá tegund sem ég nota, amk ekki í minni stærð svo ég ákvað að snúa frá í bili. Á sem betur fer tvo vel nothæfa sundboli en annar þeirra er að farin að láta aðeins á sjá. 

Helgarfrí

Var mætt á vinnustað um hálfátta í gærmorgun eftir hálftíma labbitúr. Fimm mínútum síðar mætti sú næsta sem var á vinnuvakt í gær og það var eins gott því það þarf tvo til að opna inn á lager og sækja m.a. bankatöskurnar með útibúakortunum sem framleidd voru daginn áður. Fyrsta taska dagsins var sótt óvenju snemma eða þegar klukkuna vantaði tuttuguogþrjár mínútur í átta. Vinnudagurinn var annars fljótur að líða enda nóg að gera. Framleiddum til klukkan að ganga þrjú, með viðeigandi hádegis og kaffipásum. Á föstudögum leyfum við okkur að hætta í fyrra fallinu sama hvernig verkefnastaðan er, þ.e. svo framalega sem búið sé að framleiða daglega skammtinn. Klukkan var samt að verða hálffjögur þegar við yfirgáfum vinnustaðinn allar þrjár.

Ég fékk far heim og stoppaði þar í um klukkustund áður en ég skrapp í Laugardalinn. Annan daginn í röð fór ég í sund án þess að synda. Hefði kannski synt 200 metra ef uppáhalds brautirnar mínar hefðu ekki verið svona ásetnar eins og þær voru milli fimm og sex í gær. En það gerði helling fyrir mig að komast nokkrum sinnum í kalda pottinn og þann heitasta á milli og svo endaði ég á góðri gufuferð. 

Átjánda vinnudegi ársins lokið

Slökkti á vekjaraklukkunni fimmtán mínútum áður en hún átti að hringja í gærmorgun. Dreif mig fljótlega á fætur og hafði korter til að gera það sem ég geri mjög sjaldan en gerði í gær, kveikti á tölvunni og vafraði á netinu þar til kominn var tími til að labba af stað í vinnuna. Ég var í bókhaldi í gær og hinar tvær sáu um daglega framleiðslu til hádegis og endurnýjun til klukkan þrjú eftir hádegi. Þegar hefðbundnum daglegur bókarastörfum var lokið dundaði ég mér við að halda áfram að vinna að tengingum sem tengjast mánaðamótauppgjöri með góðfúslegu leyfi þeirrar sem heldur utan um reikningagerðina. Vinnudagurinn leið afar hratt.

Fékk far heim úr vinnunni og var komin heim upp úr klukkan hálffjögur. Mætti í laugardals laugina rétt rúmlega fjögur. Kalda potts vinkona mín var að ljúka sinni fyrstu ferð í þann kalda þegar ég mætti. Hún beið eftir mér í heitasta pottinum og við náðum svo að mana hvor aðra í 6x3mínútna kalda potts ferðir. Ég endaði svo á því að fara í gufu.

Kom við í Fiskbúð Fúsa á leiðinni heim og hann hafði á orði að ég væri seint á ferð. Það var samt alveg rúmur hálftími eftir af opnunartímanum hjá honum. Heima ákvað ég að setja ýsuflakið inn í ísskáp í dallinum sem ég hafði haft meðferðis í fiskbúðina. Setti upp nokkrar litlar kartöflur og skar niður lifrarpylsu- og blóðmörssneiðar og steikti á pönnu. Hafði keypt sinn hvort soðna keppinn í verslunarferðinni eftir vinnu á miðvikudaginn. 

Á leið í sund eftir smá

Var sem oftast fyrr vöknuð á undan vekjaraklukkunni í gærmorgun. Spáin hafði gert ráð fyrir rigningadembu og ég hafði verið að velta því fyrir mér að fara á bílnum í vinnuna svona einu sinni og þá fyrsta skiptið á þessu ári. En þegar til kom þá labbaði ég af stað um sjö. Það var einhver smá úrkoma en frekar lítil því ég varð sama og ekkert blaut á þessari hálftíma göngu í vinnuna. Nóg var að gera í vinnunni en önnur af samstarfskonum mínum hafði ákveðið að að taka orlof eftir hádegi. Ég fékk að hætta upp úr klukkan hálfþrjú. Fékk einkabílstjórann til að sækja mig og notaði tækifærið og skrapp í smá verslunarleiðangur á heimleiðinni. Rétt fyrir fimm hitti ég svo nöfnuna (ekki mína) úr sjósundshópnum og við skelltum okkur í 0,8°C sjóinn í amk fimm mínútur. Pössuðum okkur á því að verða ekki að "rúsínum" í heita pottinum á eftir og það hjálpaði að reka á eftir manni upp úr þegar við tókum eftir því að það var að myndast biðröð í að komast í aðstöðuna. 

Næstum 12000 skref í gær

Var búin að slökkva á vekjaraklukkunni og komin á fætur um það leyti sem hún átti að hringja. Labbaði af stað í vinnuna um sjö, á strigaskóm. Það slapp til og tafði mig ekki að ráði. Framleiðslu lauk um hálftólf og fljótlega eftir mat var ein af okkur þremur farin í orlof. Við hinar gengum frá í deildinni og ákváðum að yfirgefa svæðið áður en klukkan varð tvö. Ég labbaði heim á leið, upp Skólavörðustíginn. Þegar ég var að koma að Hallgrímskirkju heyri ég sagt "Ég sé að Anna Sigga er að koma, ætla að kasta á hana kveðju, heyri í þér síðar!" Þarna sat fyrrum vinnufélagi með hundinn sinn að tala við einhvern í gemsa. Ég staldraði við og spjallaði við hann í nokkra stund áður en ég hélt för minni áfram. Þetta varð til þess að það voru skráðir alls 3 göngutúrar í gær. Fékk mér smá hressingu eftir að ég kom heim. Var mætt í sund upp úr klukkan hálffjögur og hitti á eina sem hefur ekki komist í sund lengi. Hún var að koma úr sturtu, segist mega fara að mæta bráðum aftur en hún var í hnjáskiptiaðgerð í síðasta mánuði. Var komin heim aftur um hálfsex. Oddur Smári fékk bílinn lánaðann tæpum tveimur tímum síðar að sækja bróður sinn í vinnuna. Það var verið að sækja mig í saumaklúbb akkúrat þegar þeir bræður voru að koma heim. Klúbburinn var á Grettisgötunni og við tvíburahálfsysturnar vorum mættar þar rétt upp úr átta. Að venju voru þrír tímar uþb tíu mínútur að líða. Kvöldið gersamlega þaut hjá. 

Sprengidagur

Það var hálfgerður sunnudagur hjá mér í gær. Rétt náði að koma mér á fætur áður en klukkan varð níu. Var eitthvað að spá í hvort ég ætti að skreppa í sjóinn í hádeginu en ég kom mér ekki út úr húsi fyrr en seinni part dags. Meiri parturinn af tímanum fór í þáttaáhorf, kláraði 3 síðustu þættina úr danskri seríu af RÚV sem heitir Ulven kommer. Fyrsta kaffibolla gærdagsins drakk ég ekki fyrr en upp úr hádeginu. Hafði notað stóran part af morgninum í netvafr, leiki og blogg og einhverra hluta vegna var ekkert sem kallaði á að ég ætti endilega að fara að fá mér eitthvað annan en lýsi, hvorki maginn né hausinn. Ekki fyrr en upp úr klukkan tólf.

Um hálffjögur tók ég sjósundsdótið með mér út í bíl en byrjaði á því að skreppa í garnbúð við Reykjavíkurveg í Hafnarfirði. Fyrsta skipti sem ég heimsæki þessa búð og ég keypti garn í amk tvö ungbarnateppi. Var komin í Nauthólsvíkina um hálffimm og aftur heim rúmlega fimm. Fitjaði upp á nýju teppi í gærkvöldi og er því bæði með tusku og teppi á prjónum. 

Bolludagur

Var ekki komin á fætur fyrr en um níu í gærmorgun. Eins og oft áður settist ég inn í stofu með fartölvuna á lærunum stax eftir morgunverkin. Missti því að kaldapottsferðum með kaldapotts vinkonu minni því hún var búin að fara þegar ég mætti í sund upp úr klukkan hálftólf. Heitasti potturinn er ennþá lokaður. Ég fór fimm mínútur í þann kalda áður en ég synti 500m og svo aftur fimm mínútur í þann kalda áður en ég endaði í gufubaðinu. Þvoði á mér hárið og stóð svo í smá stund undir ískaldri sturtubunu áður en ég þurrkaði mér og fór upp úr. Kom við í bakaríi og keypti 6 tilbúnar vatnsdeigsbollur. Bjó mér til kaffi um leið og ég kom heim, hrærði einnig í vöfflusoppu og bjó til vöfflufjall. Annars fór dagurinn í tölvuleiki og sjónvarpsgláp. Greip ekki í bók fyrr en ég fór upp í rúm um hálftíu. Þá las ég smá í fjórum bókum. Er byrjuð á síðustu bókasafnsbókinni sem ég er með í láni; Stigið á strik eftir Ingva Þór Kormáksson. 

Skrapp á Hellu yfir nótt

Ég sótti þinglýst afrit af lóðaleigusamningnum til sýslumann um tíu á föstudagsmorguninn. Þaðan fór ég beint í sund. Heitasti potturinn var enn lokaður en ég fór 3x4 mínútur í þann kalda, synti 500 metra, fór í 43°C pottinn og endaði í gufunni. Kom heim um tólf. Ákvað að hlusta á hádegisfréttir áður en ég tæki mig saman og legði af stað austur. Klukkan var því byrjuð að ganga tvö áður en ég ýtti aðeins við þeim syninum sem var heima, bara til að kveðja. Hinn sonurinn hafði farið í heimsókn til tannlæknisins stuttu áður en ég kom heim úr sundi og var ekki kominn aftur. Hringdi í pabba þegar ég var að leggja í hann, sagðist vera á leiðinni en ég myndi koma við á einum stað á leiðinni. Gerði gott stopp í Fossheiðinni. Var komin til pabba um fjögur. Að venju fórum við í smá kaplakeppni en ég var líka að prjóna, lesa og vafra um á netinu. Pabbi var líka að vafra um á netinu og lesa en hann er með bókina Vonaskarð í láni frá einum sundfélaganum. Horfði á Gettu betur og Vikuna á föstudagskvöldið. Stoppaði hjá pabba yfir nótt og alveg framyfir kvöldmat og sjónvarpsfréttir. Var komin í bæinn um níu í gærkvöldi. 

Lengi í gang í gær

Klukkan var byrjuð að ganga tíu þegar ég loksins hafði mig framúr rúmi og á fætur í gærmogun. Morguninn fór í alls konar og ekkert sérstakt. Það sem var að þvælast fyrir mér var að þurfa að hringja í þann sem verður milliliður á milli verktakans sem gerði tilboð í verkefnið fyrir Drápuhlíð 19-21 til að athuga hvort pósturinn sem ég sendi í síðustu viku hafi skilað sér og staðfesta beiðni um að gera og senda okkur samning til yfirlestrar og undirritunnar. Rúmlega tvö lét ég svo loks verða að því að slá á þráðinn. Hringingunni var ekki svarað og ég var í óða önn að senda smá essemmess skeyti þegar hringt var til baka. Samtalið var mun léttara heldur en ég hafði ímyndað mér og nú líður ekki á löngu áður en eitthvað fer að gerast fyrir alvöru. Hef smá neikvæða tilfinningu um að einhver í húsinu muni halda áfram að "draga" lappirnar en þetta má ekki bíða mikið lengur því þá verður þetta bara verra.

Hringdi í tvær kunningjakonur og á meðan ég var að tala við aðra þeirra kom fyrirspurn frá kaldapotts vinkonu minni um hvort ég væri í bænum eða farin austur. Þegar ég sá skilaboðin spurði ég á móti hvenær hún ætlaði í sund. Ég frestaði því að sækja lóðaleigusamninginn úr þinglýsingu og var komin á stæðið við Laugardalslaugina þegar vinkonan svaraði og sagðist mæta um fimm, var að fara í göngutúr fyrst. Þar sem ég var ekki komin inn ákvað ég að fresta sundferð um rúma klukkustund til að hitta aðeins á vinkonuna og vera búin að synda áður en hún kæmi. Fór með bílinn í smurningu. Það tók alls ekki langan tíma. Skrapp svo á N1 við Gagnveg þar sem Davíð Steinn var á vakt og fékk hann til að skipta um eina rúðuþurrku. Að lokum kom ég við hjá Atlantsolíu við Sprengisand og fyllti á bílinn áður en ég dreif mig í sund. Var búin að synda 200 metra um hálffimm þegar kaldapotts vinkona mín mætti á svæðið svo það varð ekkert meira um sund en við fórum sjö ferðir í þann kalda. Heitasti potturinn er enn lokaður og það er pínu bagalegt því þá er erfiðara að komast í þann næstheitasta á milli vegna fjöldatakmaranna. En það er skárra að einn heitur pottur sé lokaður heldur en að sá kaldi sé það.

Er annars byrjuð að lesa næstsíðustu jólabókina, hina bókina sem Oddur gaf mér: Martröð í Mykinesi. 

Aðeins um gærdaginn

Ég var komin á fætur fyrir klukkan hálfátta í gærmorgun. Eftir morgunverkin á baðherberginu fékk ég mér matskeið af lýsi og vatnsglas áður en ég settist inn í stofu og kveikti á fartövlunni. Um níu leytið bjó ég mér til hafragraut og kaffi. Passaði einnig upp á það að fá mér vatn reglulega. Ég fékk staðfestingu með essemmessi og rafrænum pósti um að ég ætti tíma í blóðbankanum klukkan 14:20 snemma í gærmorgun.

Korter yfir ellefu sótti sjósundsvinkona mín mig og þegar við vorum að fara út í -1°C sjóinn rúmu korteri síðar mættum við forsetanum og var hann greinilega að koma til að bregða sér í sjóinn. Það var  háfjara og við stöllur óðum mjög langt út í en botnuðum alltaf. Vorum rúmar fimm mínútur í sjónum og við mættum forsetanum á leið ofan í þegar við vorum á leiðinni upp úr og í heita pottinn. Sjósundsvinkona mín var reyndar ekkert að spá í mannaferðir og vissi ekkert að Guðni var á staðnum fyrr en við vorum að fara til baka og hún sá forsetabílinn í stæðinu við hliðina á hennar bíl.

Borðaði afgang af kjúklingarétti í hádeginu og var dugleg að drekka vatn. Korter fyrir tvö, sjálfsagt amk tíu mínútum of snemma, labbaði ég af stað í Blóðbankann. Var ekki nema 15 mínútur á leiðinni. En ég þurfti bara að bíða aðeins eftir að það losnaði bekkur. Blóðþrýstingurinn var í mjög góðu lagi. Gerði þau mistök að nefna það að ég hefði skroppið í sjóinn í hádeginu því hjúkrunarfræðingurinn sem sinnti mér átti í vandræðum með að finna æð, skoðaði báða handleggi og vildi helst senda mig heim og fá mig aftur þegar ég væri ekki búin að fara í heitan pott skömmu áður. En hún féllst á að gera tilraun og valdi handlegginn sem sjaldnar hefur verið stungið í og viti menn hún hitti á æðina og rennslið var með besta móti, tók innan við þrjár mínútur að fylla á pokann. Þetta var fimmtugastaogsjöunda heimsóknin í besta bankann og ef ég má halda áfram að gefa á fjögurra mánaða fresti verð ég líklega í minni sextugustu heimsókn eftir uþb ár.

Allt orðið hvítt úti

Labbaði af stað í vinnuna á svipuðum tíma og oftast íklædd sömu yfirflíkum með höfuðljósið og í strigaskóm eins og í fyrradag. Veðrið og færðin voru einstaklega góð. Eftir labbið, þegar ég var mætt í vinnu, tilkynnti gönguforritið jafnlanga gönguferð og á mánudagsmorguninn en ég var alveg mínútu lengur á leiðinni í gær. Var frekar hissa á því vegna þess að mér fannst ég labba hraðar í gærmorgun. Ég var í bókhaldinu. Framleiðslutölur voru ívið hærri en á mánudaginn en engin aukaframleiðsla og þrátt fyrir að taka okkur extra góðan kaffitíma um miðjan morgun var framleiðslu lokið fyrir klukkan tólf. Aftur á móti beið kortasending opnunar, skoðunar, talningar og skráningar og þar að auki komu tvö annars konar aukaverkefni en plastframleiðsla svo klukkan var að verða þrjú þegar við vorum búnar að afgreiða þessi verk. Ég stillti vinnupóstinn minn á "out of office" því ég á ekki að mæta aftur fyrr en nk þriðjudag.

Fékk far heim úr vinnunni. Kalda potts vinkona mín hafði sagst ekki komast í "sund" í gær svo það var undir mér sjálfri komið hvenær ég mætti í sund seinni partinn. Lagði af stað rétt upp úr fjögur. Bíllinn var í Drápuhlíð hinum megin við Lönguhlíð síðan á sunnudaginn. Byrjaði á því að koma við í Fiskbúð Fúsa að versla mér ýsu í soðið og harðfisk, óbarða ýsu. Fór aðeins tvær ferðir í kalda pottinn, 4 mínútur hvor ferð og synti 300metra á milli. Eftir seinni ferðina í þann kalda fór ég beint í gufu því heitasti potturinn var tómur. Kom heim rétt fyrir sex og var tilbúin með kvöldmat um hálfsjö, soðna ýsu með gufusoðnu blómkáli. Bauð aðeins upp á smjör útá með.

Besti bankinn, blóðbankinn sendi mér mail og sms í gær um hvort ég gæti komið og gefið blóð í dag, 10. febrúar. Hvatti mig til að bóka mér tíma ef svarið mitt um að mæta væri jákvætt. Sendi inn beiðni eftir fjögur í gær og fékk svar um átta í morgun að ég má mæta innan þess tímaramma sem ég óskaði mér eftir klukkan tvö í dag. Held að það sé 57. heimsóknin mín. Best að vera dugleg að drekka vatn næstu tímana svo það verði léttara að finna og hitta á æð.

Þessi vinnuvika búin

Ég fór labbandi í vinnuna í gærmorgun um sjö íklædd fjólubláu úlpunni, strigaskóm, rauðri húfu og með höfuðljósið. Sú sem vinnur alla mánudaga í mánuðinum mætti í gær fyrsta daginn sinn af sex. Við þrjár sem vorum á vaktinni unnum saman aðra hverja viku frá því viku eftir verslunarmannahelgi og fram að áramótum. Núna hittumst við tvo daga hálfsmánaðalega. Gerðum með okkur samning um að þegar við erum að vinna saman þá megum við vera "allsberar" í framan, þ.e. þurfum ekki að setja upp grímu. Vinnudagurinn gekk fljótt og vel fyrir sig. Frekar fá dagleg kort og eina aukaframleiðslan var 200 gjafakort í hádeginu.

Fékk far heim úr vinnunni og ákvað að hella mér upp á smá kaffi fyrst ég var komin heim fyrir klukkan þrjú. Korter yfir fimm sótti sjósundsvinkona mín mig og fyrir utan hana sjálfa var nafna hennar og einnig yngri sonur. Systurnar mættu líka þannig að við vorum sex. Systurnar og sonurinn voru út í sjónum í tvær mínútur enda frekar langt síðan þau voru á svamlinu síðast. Við hinar entumst í rúmar fimm mínútur í -1,3°C sjónum og slökuðum svo vel á í heita pottinum á eftir þar sem við hittum hin fyrir sem voru styttra í sjónum. Sólin var að setjast og himininn logaði. Þegar ég kom heim var Davíð Steinn akkúrat að leggja matinn á borðið og aldrei þessu vant settumst við mæðginin þrjú saman að snæðingi. 

Stutta vinnuvikan hálfnuð

Ég var vöknuð og komin á fætur löngu fyrir klukkan átta í gærmorgun. Vissi að N1-sonurinn ætti að mæta í vinnu um tíu en hann hafði þó ekki spurt mig hvort hann fengi skutl í vinnu. Ég tók því samt rólega til að byrja með hérna heima. Vinnandi sonurinn kom fram um níu en sagðist vera búinn að redda sér fari, yrði sóttur vonbráðar. Ég hélt því áfram að taka því rólega þar til klukkan var langt gengin í tíu. Þá dreif ég mig loksins í sund. Kláraði sund og pottarútínu á uþb klukkutíma og var stödd í gufunni þegar inn kemur manneskja sem hrópar upp yfir sig: "Þarna ertu, Anna Sigríður, maðurinn minn sagðist hafa séð þig tilsýndar og ég fór að leita!" Þetta var sjósundsvinkona mín. Hennar vegna lengdi ég sundferðina um hálftíma og tók m.a. aukaferð í þann kalda.

Rétt fyrir þrjú í gær ók ég vestur í bæ að hitta nöfnu mína og frænku. Afhenti henni "kisuteppi" handa Pixí en svo drifum við okkur út í stuttan göngutúr, 1,5 km á 18 mínútum. Þegar við komum til baka fengum við okkur sódavatnsglas áður en hún hellti upp á kaffi. Stoppaði til klukkan að verða fimm. Áður en ég kvaddi ákváðum við frænkur næsta gönguhitting eftir hálfan mánuð í mínu hverfi.

Eina af bókasafnsbókunum hef ég lesið áður; Aðferðir til að lifa af eftir Guðrúnu Evu Mínervudóttur. Það var alls ekki leiðinlegt að lesa hana aftur. Hef nú lokið við að lesa fjórar af sex safnbókum. Er byrjuð á fimmtu bókinni; Ég veit hvar þú átt heima eftir Unni Lindell. En ég er líka komin vel af stað að lesa fyrra bindið af; Hella þorp í þjóðbraut. En ég á enn eftir að byrja á síðustu tveimur jólabókunum. Allt hefur sinn tíma. En ég var líka að byrja að horfa á danska þætti af RÚV sem heita Ulven kommer.

Frænkunöfnuhittingur í dag

Ég var komin á fætur fyrir klukkan átta í gærmorgun. Skipti um á rúminu mínu, sinnti morgunverkunum á baðherberginu, fékk mér lýsi og settist svo inn í stofu með fartölvuna í fanginu. Um hálftíu bjó ég mér til hafragraut og hellti líka upp á kaffi. Korter fyrir ellefu sótti sjósundsvinkona mín mig. Þrátt fyrir að vera mætta í Nauthólsvík tíu mínútum fyrir opnun var komin löng röð fyrir utan. En við vorum meðal fyrstu 30 og komumst inn í fyrsta hollinu. Sjórinn var -1,5°C en einhvern veginn náðum við samt að svamla um í fjórar mínútur. Vorum svo annað eins í lóninu áður en við fórum í heita pottinn. Ég var komin heim aftur um tólf.

Upp úr hádeginu eða um hálftvö fór ég með pappír og plast í gáma við Kjarvalsstaði. Ákvað svo að renna bílnum í gegnum þvottastöðina rétt hjá Krónunni við Granda. Þar var löng röð og það leið rúmur hálftími áður en ég komst að. Þegar ég var að keyra frá þvottastöðinni eftir bílþvottinn taldi ég bílana sem voru í röðinni áður en beygt er að húsinu. Þeir voru tuttugu en ég veit ekki hvað vorum margir bílar í röðinni sem lá meðfram húsinu, að lúgunni þar sem greitt er fyrir þvottinn og áfram þangað sem maður keyrir inn í þvottastöðina.

Kom við í Krónunni til að versla helstu nauðsynjar og þar hitti ég á fyrrum sveitunga minn og þekkti hann þrátt fyrir grímu. 

Skrepp aðeins í sjóinn á eftir

Tólfta vinnu daginn á árinu labbaði ég í vinnuna upp úr sjö í gærmorgun. Fyrirliðinn var mættur í afleysingar. Við tókum að okkur vélina og framleiðsluna meðan sú þriðja sá um bókhaldið. Þar sem allri framleiðslu var lokið um hádegi gat fyrirliðinn farið heim. Við hinar tvær sáum um frágang á deildinni eftir hádegi og við ryksuguðum framleiðsluvélina og teljarana m.a. Fékk far heim úr vinnunni og var komin heim upp úr klukkan hálfþrjú. Var að bræða það með mér hvort ég ætti að skrópa í sundferð en á endanum skrapp ég í Laugardalslaugina milli klukkan hálffimm og sex. Það var sundmót í gangi og hluti af klefum, sturtum og sundbrautum stúkað af fyrir keppendur. Ég ákvað því að láta 200 metra sund nægja en fór 3x fjórar mínútur í þann kalda og endaði á að vera 15 mínútur í gufunni áður en ég fór upp úr. Hitti aðeins á eina frænku mína (móðurömmur okkar voru systur) úti á bílaplani en hún var að sækja annan tvíburann sinn sem var að keppa í sundi.

Föstudagur

Labbaði af stað í vinnu rétt rúmlega sjö í gærmorgun. Rak í rogastans þegar ég mætti og hitti fyrir fyrirliðann í deildinni. Hennar vinnuplan er frá miðvikudegi til miðvikudags svo hún var að mæta sjöunda virka vinnudaginn í röð. Hún sagðist vera að hlaupa í skarðið fyrir aðra af hinum sem áttu skráða vinnuvakt ásamt mér. Vissum ekki þá hvort þetta væru bara nokkrir klukkutímar í afleysingu, heill vinnudagur eða jafnvel tveir. Fyrirliðinn var byrjuð að vinna sem bókari en ég benti henni á að það væri komið að mér að sinna þeim verkefnum. Við sóttum vagna og töskur inn á lager og skruppum svo fram á kaffistofu að fylla á vatnsbrúsa og taka því rólega þar til við værum orðnar þrjár. Vinnudagurinn leið hratt, ekkert óvænt kom upp á.

Fékk far heim úr vinnunni. Rétt fyrir fjögur var ég mætt í Laugardalinn. Var að spá í hvort ég næði að synda nokkrar ferðir áður en kalda potts vinkona mín mætti en hún mætti áður en ég var búin að klæða mig í sundbolinn. Ég "skrópaði" því í sundinu en við vinkonurnar fórum sjö ferðir sinnum þrjár mínútur í kalda pottinn og heitt á milli. Ég kom heim um sex en var þá svo dösuð að ég tilkynnti Davíð Steini að hann mætti elda ef hann vildi ég var ekkert svo svöng og í engu matarstússstuði. Það var ekkert brasað í eldhúsinu í gærkvöldi en það var svo sem til nóg af afgöngum í ísskápnum. 

Labbað í vinnu

Ég var að ganga eftir Skúlagötunni á áttunda tímanum í gærmorgun þegar ég þurfti að staldra aðeins við og reima aftur  vinstri skóinn. Átti svo enn eftir smá spöl í vinnuna þegar ég þurfti að reima aftur. Var samt komin í vinnu rétt upp úr hálfátta. Aðeins færri kort voru í framleiðslu í gær heldur en í fyrradag. Ég var að taka á móti og skoða og ferlið gekk svo hratt og vel fyrir sig að við vorum búnar með fyrri tvo skammtana hálftíma áður en við fengum hádegis skammtinn og það þrátt fyrir að við tækjum okkur extra langan kaffitíma. Framleiðslu lauk nokkru fyrir tólf. Eftir hádegi var verið að sinna ýmsum frágangi og mánaðamótauppgjöri. Fékk far heim úr vinnunni um þrjú. Fékk mér smá hressingu og kveikti um stund á fartölvunni en um hálffimm var ég mætt í Nauthólsvík. Það var fjara, 2°C lofthiti en sjórinn -1,8°C. Óð þónokkuð langt út í, botnaði alltaf, og svamlaði um í ca tvær mínútur. Fór svo í lónið sem var alveg stúkað af og því nokkrum gráðum yfir núllið útaf uppsprettunni. Endaði á því að sitja í heita pottinum í korter áður en ég fór upp úr og beint heim aftur. Bjó til grjónagraut í kvöldmatinn og bauð upp á kalda lifrapylsu með.

Horfði á Kiljuna um kvöldið og aðeins á Púllaraleikinn en ég var komin upp í fyrir tíu og las til klukkan hálfellefu. 

Mið vika

Ég vaknaði amk korter áður en vekjaraklukkan átti að hringja í gærmorgun. Dreif mig strax á fætur. Hitti aðeins á N1 soninn en hann var farinn út á undan mér. Ég labbaði af stað í vinnuna um sjö í vetrarúlpunni, gönguskóm og með höfuðljósið. Var mætt í vinnu um hálfátta og hitti fyrir fyriliða hópsins sem ég hef ekki hitt í hálft ár. Hún var í hinum hópnum og að saxa niður orlofsdaga frá í fyrra í sl. mánuði. Nú vinnur hún frá miðvikudegi til og með miðvikudags og hún mætti sl. miðvikudag, fyrsta virka daginn minn í ekki mæta á vinnustað, eftir 6 daga vinnutörn. Sú sem kom síðust af okkur þremur sem vorum skráðar á vinnuvakt var einnig í hinum hópnum en ég var búin að hitta hana nokkra daga í janúar. Hún vinnur frá föstudegi til og með föstudags. Sú síðarnefnda og ég tókum að okkur framleiðsluna og hún leyfði mér að velja á hvorum endanum ég væri. Ég valdi að hlaða inn og troða í. Dagleg framleiðsla gærdagsins var með meira móti og við vorum til hálftvö að ljúka framleiðslu með kaffi- og hádegispásum og smá aukatöfum.

Fékk far heim úr vinnunni og var komin heim um þrjú. Klukkutíma síðar var ég mætt í sund. Kalda potts vinkona mín gat ekki mætt á sama tíma svo ég fækkaði ferðum í þann kalda niður um helming en var 3-5 mínútur ofan í í hvert sinn. Var komin heim aftur rétt fyrir sex.

Fyrsti vinnudagur af tólf í febrúar

Fór á fætur um átta í gærmorgun. Eftir morgunverkin á baðinu fékk ég mér matskeið af lýsi áður en ég settist inn í stofu með fartölvuna í fanginu. Um hálfellefu bjó ég mér til hafragraut og meiningin var að drífa sig svo í sjóinn. Frestaði sjóferð um hálfa klukkustund því ég ákvað að horfa á upplýsingafundinn fyrst. Var komin út í -1,7°C kaldan sjóinn um tólf. Veit ekki hversu lengi ég svamlaði um en það var frekar stutt. Held þó að ég hafi verið uþb tvær mínútur áður en ég fór aðeins yfir í lónið. Endaði svo í heita pottinum í korter. Kom við í Fiskbúð Fúsa á leiðinni heim og keypti nætursaltað ýsuflak, hrogn og harðfisk. Setti handklæði í þvottavél þegar ég kom heim. Að öðru leyti fór dagurinn í svipaða hluti og aðrir virki "ekki-vinnudagar", lestur, prjón, netvafr og þáttagláp. Var komin upp í rúm fyrir klukkan tíu. Er byrjuð að lesa fyrra bindið af bókunum um Hellu en ég er líka byrjuð á einni af safninu; Köld slóð eftir Emelie Schepp. Þetta er önnur bók höfundar en ég er nýlega búin að lesa fyrstu bókina. 

Nýr mánuður

Það er mánudagur, en eiginlega ekki hjá mér þannig séð því ég er ekki að vinna í dag. Næstu sex virku daga, frá og með morgundeginum, má ég mæta á vinnustað.

Í gærmorgun var klukkan langt gengin í níu áður en ég fór á fætur. Um hálftíu fór ég út með sunddótið mitt og þurfti að byrja á því að skafa af bílnum sem enn var fyrir aftan heilsugæsluna síðan við Oddur komum heim á föstudagskvöldið. Var komin fyrstu ferðina ofan í kalda pottinn í Laugardalnum um tíu. Ætlaði að vera 2-3 mínútur en þegar þau tímamörk voru að nálgast kom náungi ofan í pottinn sem fór að spjalla sem varð til þess að ég kældi mig í rúmlega sex mínútur áður en ég fór að synda. Eftir tuttugu mínútur og 500m fór ég aftur í kalda pottinn. Þremur mínútum seinna fór ég í heitasta pottinn og stuttu síðar hitti ég konu sem stjórnaði barnakór Hallgrímskirkju þegar strákarnir mínir voru báðir í kór. Við spjölluðum í dágóða stund og urðum svo samferða í gufuna þar sem við héldum áfram að spjalla.

Kom heim aftur um hálftólf. Lagði bílnum í Blönduhlíð. Borðaði afganginn af hafragrautnum frá í fyrradag kaldan og bjó mér til tvo bolla af kaffi. Mikið af deginum fór svo í lestur, prjónaskap, íþróttaáhorf sem og þáttagláp. Lánaði strákunum bílinn um miðjan dag og fram á kvöld til að skreppa í heimsókn til pabba síns og fjölskyldu hans.

Pabbi lánaði mér bækurnar; Hella þorp í þjóðbraut eftir Ingibjörgu Ólafsdóttur. Þær komu út í fyrra og er almenn ánægja með þær. Pabbi er búinn að lesa þær tvisvar. Ég er að fara að byrja að lesa þær núna á eftir en er líka með bókasafns og jólabækur á kantinum. Alltaf hægt að finna sér eitthvað til að lesa og gera.

Síðasti janúardagur nýja ársins

Ég var komin á fætur um átt í gærmorgun. Eftir morgunverkin á baðinu fékk ég mér matskeið af þorskalýsi og vatnsglas. Lét það nægja fyrst um sinn og settist inn í stofu og tók fartölvuna í fangið. Var búin að slökkva aftur á tölvunni áður en klukkan varð tíu. Þá bjó ég mér til hafragraut. Korter fyrir ellefu sótti sjósundsvinkona mín mig en þrátt fyrir að vera mætta í Nauthólsvík á slaginu ellefu þurftum við að bíða í smástund áður en okkur var hleypt inn í klefa. Ástæðan er sú að þannig er auðveldara fyrir starfsfólkið að passa upp á að ekki fleiri en 30 séu í heita pottinum í einu. Eftir ca sjö mínútna bið var þremur hleypt inn svo við komumst inn í því holli verandi númer eitt og tvö í röðinni. Sjórinn var -1,7°C og mér skilst á vinkonunni að við hefðum verið þrjár mínútur út í áður en við röltum yfir í víkina. Þar vorum við örugglega hátt í tíu mínútur áður en við fórum í heita pottinn.

Var komin heim rétt fyrir hálfeitt og fór ekkert út aftur. Kláraði bókina um Betu Reynis, kveikti aftur á tölvunni og var alltaf á leiðinni að grípa í prjónana. Ekkert varð úr prjónaskap en ég las meira, kveikti á sjónvarpinu, horfði á part úr leik í enska boltanum og eitt og annað. 

Skrepp á Hellu í gær

Ég rumskaði upp úr klukkan sex í gærmorgun, slökkti á vekjaraklukkunni sem ég hafði stillt á að vekja mig 6:25 og kúrði áfram til klukkan sjö. Var komin í Laugardalinn rétt rúmlega hálfátta. Byrjaði á einni ferð í kalda pottinum áður en ég synti 400 metra. Fór tvær aðrar ferðir í kalda pottinn, eina í 42°, eina í 44° og eina í "sjópottinn". Endaði á smá gufubaði og útibekkjarsetu áður en ég fór upp úr og heim. Í þessari sundferð hitti ég nokkra af morgunfólkinu mínu. Ein að þeim sem ég hitti talaði samt um að það vantaði marga. Ég veit til þess að einhverjir hafa ekki mætt í sund síðan rétt fyrir fyrir fyrstu lokun þegar staðreynd var að veiran væri búin að banka upp á. Það er mjög skiljanlegt að fólk vilji passa sig og svo eiga sumir örugglega erfitt með að byrja rútínuna á ný, kannski komnir í allt aðra rútínu.

Þegar heim kom settist ég smá stund inn í stofu, fyrst að lesa og svo að vafra aðeins um á netinu áður en ég setti inn smá færslu á þessum vettvangi. Að skrifum loknum slökkti ég á tölvunni, hellti mér upp á kaffi og fékk mér eitthvað í svanginn. Stuttu seinna kom N1 sonurinn fram. Hann átti að vera á frívakt en það var hringt í hann og hann spurður hvort hann gæti hlaupið í skarðið hjá N1 í Mosfellsbæ. Hann samþykkti það, skellti sér í sturtu og var svo rokinn.

Oddur Smári kom fram um hálfeitt. Klukkutíma síðar lögðum við mæðgin af stað og ókum sem leið lá austur yfir fjall og alla leið á Hellu til að gera óvænt innlit. Pabbi átti alls ekki von á okkur en tók okkur opnum örmum. Settumst fyrst inn í stofu fyrsta klukkutímann. Svo hafði hann til handa okkur kaffi og bauð okkur upp á vöfflur með. Hann er farinn að skella í vöfflur og pönnsur annan hvern mánudag þegar rúmensku hjónin sem þrífa hjá honum koma. Eftir kaffi spurði pabbi hvort við ætluðum að vera í kvöldmat, sagðist eiga stórt flak af laxi í frysti. Við vorum ekkert að flýta okkur svo ég tók laxinn út. Matreiddi úr honum á sjöunda tímanum og við pabbi fengum okkur hvítvínsglas með matnum þar sem ég var með einkabílstjóra með í för. Horfðum á kvöldfréttir eftir matinn og var klukkan að byrja að ganga níu þegar við kvöddum, þökkuðum fyrir okkur og héldum heim á leið. Urðum að leggja bílnum fyrir aftan heilsugæsluna. Davíð Steinn var komin heim af aukavaktinni en ég hitti ekkert á hann þrátt fyrir að fara ekki í háttinn fyrr en upp úr ellefu því hann var á kafi í tölvuleik.

Morgunsund

Það tók mig ákveðinn tíma að koma mér í gang í gær. Var þó komin á fætur um átta og morguninn fór að mestu í lestur og netvafr. Um hálftvö dreif ég mig loks af stað, fyrst með bílinn í gegnum þvottastöð og svo að versla. Kom heim með vörurnar  um þrjú. Oddur Smári tók að sér að ganga frá en ég fór beint út aftur og nú í sund. Var búin að synda 500 metra og var á minni þriðju ferð í kalda pottinum þegar kalda potts vinkona mín mætti. Fór fjórar ferðir með henni í kalda en endaði svo á góðu gufubaði. Kom heim um sex. Las í smá stund áður en ég hafði mig í að útbúa plokkfisk úr fiskafgangi síðan fyrr í vikunni. 

Fullt tungl

Eftir að hafa setið við tölvuna í hátt í tvo tíma í gærmorgun slökkti ég aftur á henni og bjó til hafragraut og kaffi. Ljóst var að engin úr sjósundshópnum mínum kæmist í sjóinn en ég var ákveðin í að drífa mig um hádegið. Byrjaði þó á því að fara með lóðaleigusamninginn í þinglýsingu til sýslumanns. Það gekk ágætlega. Greiddi 2500kr. fyrir og fékk að vita að ég gæti sótt skjalið eftir hálfan mánuð gegn greiðslukvittuninni sem ég fékk í hendurnar. Man að ég skrifaði undir þrjú plögg á sínum tíma en Reykjavíkurborg hélt einu eftir hjá sér en ég fór með frumrit og afrit í þinglýsingu og annað þeirra skjala verða eftir hjá sýslumanni en hitt má ég semsagt sækja eftir tvær vikur og geyma.

Var komin í Nauthólsvík rétt rúmlega tólf. Það var háfjara, einhver ferð á logninu, lofthiti 0 en hiti sjávar var mældur -1,6°C. Fannst sem fyrr á fjörutímum ég þurfa að vaða hálfa leið til Kópavogs áður en ég gat dýft mér smástund í sjóinn. Var ekki með tímavörð með mér en held að ég hafi náð að vera í kringum mínútu. Sjórinn beit í læri og upphandleggi en ekkert svo að mér liði illa eða væri kalt. Rölti næst yfir í lónið sem var nokkrum gráðum hlýrra enda svamlaði ég þar um í nokkrar mínútur. Var svo uþb korter í heita pottinum.

Eftir sjósundsferðin skrapp ég á bókasafnið í Kringlunni og skilaði bókunum fjórum. Fann sex aðrar í staðinn en varð að byrja á því að endurnýja safnskírteinið áður en ég gat fengið þær að láni. Árgjaldið, kr. 2500 greiddi ég með glöðu geði. Síðan fór ég beint heim, ákvað að geyma frekari útréttingar í bili. Las einn kafla í þroskasögu Betu Reynis en svo fór mikill hluti af afganginum af deginum í að ljúka við að hámhorfa á söguna um Mörtu krónprinsessu. Það var ekki fyrr en ég fór í háttinn um hálfellefu að ég tók bókasafnsbækurnar upp úr pokanum. Ein af bókunum var þunn ljóðabók: Óstöðvandi skilaboð eftir Ásdísi Óladóttur. Las hana upp til agna og á örugglega eftir að lesa sumt aftur og aftur á meðan hún verður á náttborðinu næsta mánuðinn. Byrjaði einnig á bók eftir Lizu Marklund frá því 2007, ARFUR NÓBELS. 

Er að "teikna" upp daginn

Sjötta virka daginn í röð labbaði ég í vinnuna í gærmorgun, vel klædd og með höfuðljósið. Ég var í bókhaldi og hin tvö sáu um framleiðsluna. Framleiðslu lauk um hádegisbil því við vorum búin með öll aukaverkefni í bili. Aukamaðurinn yfirgaf því svæðið og eftirlét okkur hinum tveimur af fimm fastráðnum starfsmönnum frágangsmál. Tókum okkur langan hádegistíma. Samstarfskona mín skrapp út að borða með manninum sínum. Ég var svo heppin að aðeins þrír voru mættir í mat af fjórum svo ég fékk að borða fjórða skammtinn sem sendur var frá eldhúsi seðlabankans.

Klukkan að verða hálfþrjú ákváðum við að segja vinnudegi lokið og ég fékk far heim. Klukkutíma síðar var ég mætt í Laugardalinn og var búin að synda og fara eina ferð í kalda pottinn þegar kalda potts vinkona mín mætti á svæðið. Ég fór fimm aðrar ferðir í þann kalda en endaði svo á góðu gufubaði áður en ég fór upp úr og heim.

Er búin að lesa allar bækurnar af safninu. Þarf ekki að skila þeim fyrr en í febrúarbyrjun en mér þykir líklegt að ég geri mér ferð á safnið mjög fljótlega. Er annars hálfnuð með bókina um Betu Reynis, Svo týnist hjartaslóð, sem Valgeir Skagfjörð skrifar. Svo á ég eftir að lesa tvær jólabækur enn, en það er alltaf pláss fyrir bók/bækur í kringum mig.

Seinni vinnudagurinn

Í gærmorgun var ég vöknuð hálftíma áður en vekjarinn átti að hringja. Slökkti á klukkunni ca tuttugu mínútum áður en hún átti að hringja. Rétt fyrir sjö labbaði ég af stað í vinnuna í nýju úlpunni, gönguskóm og með höfuðljósið. Ég var mætt til vinnu rétt rúmlega hálfátta smástund á undan hinum tveimur. Samtarfskona mín sá um bókhald í gær, aukamaðurinn var númer 1 á framleiðsluvélinni og ég númer 2 að taka á móti og skoða. Kláruðum allt daglegt fyrir tólf og þrjár endurnýjanir frá hádegi til þrjú. Tvær af þessum endurnýjunum voru langt komnar. Fékk far heim úr vinnunni. Sjósundshópurinn minn komst ekki í sjóinn í gær en ég lét það ekki stöðva mig. Byrjaði reyndar á því að skreppa í Fiskbúð Fúsa upp úr hálffimm að kaupa roðlausa og beinlausa ýsu, óbarinn harðfisk (líka ýsu) og 1 kg af rauðum kartöflum. Úr fiskbúðinni fór ég beint í Nauthólsvík. Geymdi vörurnar í skottinu á meðan ég skrapp í -0,7°C kaldan sjóinn ca tvær mínútur. Það var flóð en samt var hitastigið á lóninu örugglega nokkrum gráðum yfir núllinu. Eftir 5 mínútna svaml í lóninu slakaði ég á í heita pottinum í uþb 15 mínútur. Var komin heim áður en klukkan varð sex. 

Stutt vinnuvika framundan

Ég var komin á fætur um átta í gærmorgun. N1-sonurinn fór í sturtu klukkutíma síðar og upp úr klukkan hálftíu var planið að skutla honum í vinnuna og fara svo beint í sund. Þegar við komum út í bíl gat ég ómögulega fengið öryggisbeltið til að festast í slíðrinu. Við nánari skoðun hafði farið bútur af eldhúsrúllupappír vel ofan í raufina. Við vorum ekki með neitt handbært til að reyna að ná snifsinu svo ég stalst til að keyra með soninn í vinnuna upp á Gagnveg. Bað hann um að halda við beltið þannig að það liti út fyrir að ég væri spennt. Hann fann svo verkfæri í vinnunni sem komst ofan í raufina og náði pappírnum upp úr.

Var mætt í Laugardalslaugina rúmlega tíu. Synti í tuttugu mínútur. Kaldi potturinn var lokaður svo ég fór á milli sumra hinna heitari potta og kældi mig inn á milli með því að setjast á bekk í nokkrar mínútur. Þvoði á mér hárið þegar ég fór upp úr og var komin heim um tólf leytið. 

Á leiðinni í sund eftir N1-vinnuskutl

Dreif mig á fætur á níunda tímanum í gærmorgun. N1-sonurinn var nýlega farinn í vinnuna. Eftir morgunverkin á baðinu fékk ég mér matskeið af þorskalýsi en settist svo inn í stofu og kveikti á fartölvunni. Sjósundsvinkonan var búin að hafa samband og það var fastákveðið að hún myndi taka mig með. Nafna hennar staðfesti mætingu líka. Um tíu leytið slökkti ég á tölvunni. Fékk mér hafragraut. Var svo akkúrat tilbúin þegar ég var sótt. Vorum mættar í Nauthólsvík fyrir klukkan ellefu og það var komin smá röð fyrir framan. Einhverjir voru búnir að skella sér í sjóinn, höfðu bara verið í sundfatnaði innan klæða. Við þrjár sem mættum úr okkar hóp komust inn í fyrsta hollinu. Það er ennþá 10 manna hámark í skiptiklefunum. Sjórinn var sagður -0,5°C en það var ekki svona ískrap í honum eins og um daginn. Það var fjara en byrjað að flæða aðeins að aftur. Vorum uþb 6 mínútur í sjónum og það var ekkert mál. Fórum svo aðeins í lónið og það var nokkrum gráðum hlýrra því fjaran var enn það mikil að lónið var stúkað af frá sjónum.

Kom heim upp úr klukkan tólf og byrjaði á því að hella upp á könnuna. Hinn sonurinn var kominn á fætur og byrjaði fljótlega að undirbúa heimilisverk. Hann sá um að rykskuga svo ég tók að mér að skúra.

Fór ekkert út aftur en fjórum sinnum niður í þvottahús. Hellti mér aftur upp á kaffi um hálffjögur. Hringdi í systur mína, fann fyrir því að hún hafði verið að hugsa til mín. Ég hafði reyndar líka verið að hugsa til hennar. Það á að setja Vallartúnið á sölu fljótlega en þau þurfa ekki að afhenda það fyrr en 1. júní. En þau eru að undirbúa sölusýningu og myndatöku. Þetta þýðir líklega að þau verði flutt í póstnúmer 641 einhvern tímann í maí. Á sínum tíma þegar þau mágur minn keyptu sínar fyrstu fasteignir með nokkura ára millibili var systir mín oft að reyna að fá mig til að flytja í hverfið nær þeim, 101 Reykjavík. Hlíðarnar og Norðurmýrin, 105 Reykjavík, eru nú alls ekki svo langt frá 101. Ég er enn í 105 á meðan systir mín og fjölskylda eru búin að prófa 112 og 600. Reyndar bjó ég í 112 1991-95.

Á leiðinni í sjóinn

Fjórða daginn í röð labbaði ég í vinnuna með höfuðljósið. Annan daginn í vinnuvikunni sinnti ég bókhaldinu. Fannst í smá stund sem það væri ekki kominn föstudagur enda var ég ekki í vinnunni á mánudaginn. Vinnudagurinn gekk vel og við stöllur ákváðum að þar sem það væri búið að ganga fremur vel í vikunni að við ættum skilið að hætta í fyrra fallinu. Það var framleitt til klukkan tvö en svo gengið frá og sameiginlegir snertifletir sótthreinsaðir. Ég fékk far heim úr vinnunni og var komin heim fyrir þrjú. Var ekki nógu ákveðin að drífa mig í sund, fór ekkert aftur út og greip ekki heldur neitt í prjónana mína. Reyndar var ég með tuskuprjón með mér í vinnunni og prjónaði aðeins í morgunkaffinu. 

Bóndadagur

Notaði ekki mannbroddana á göngunni í vinnuna í gærmorgun. Þeir voru þó með í för en leiðin sem ég labba er að mestu laus við hálku. Sjósundsvinkona mín gaf mér höfuðljós í jólagjöf sem þolir að fara á eitthvað dýpi. Hef notað það tvisvar sinnum í Nauthólsvík en fann svo enn frekari not fyrir ljósið á göngunni í vinnuna upp úr sjö á morgnana. Datt þetta í hug á göngunni í vinnuna seinni vinnudaginn í síðustu viku. Mundi svo eftir þessari hugdettu áður en ég labbaði af stað á þriðjudagsmorguninn var og hef notað það á göngunni í vinnuna alla fjóra vinnudagana.

Vinnudagur gærdagsins leið mjög hratt. Þar sem við tókum ekki kaffipásu eftir hádegi og erum mættar í hús korter fyrir átta hættum við fyrir klukkan hálffjögur. Ég fékk far heim með samstarfskonunni sem mætti til vinnu í gær (og var áður í vinnuhóp með mér). Settist aðeins niður í stofunni, kveikti á fartölvu og vafraði um í netheimum. Um fjögur hringdi ég í pabba. Hann hafði komið í bæjarferð í gærmorgun, var í rannsókn á spítalanum. Hann á að mæta aftur í byrjun febrúar og hitta þá á lækninn en það lítur út fyrir að ekki verði hægt að laga það sem hrjáir hann en það er alltaf smá von á að þetta lagist eitthvað með lyfjainntöku.

Mætti í Laugardalslaugina rétt upp úr hálffimm og fór beint í kalda pottinn. Þar hafði ég setið í rúmar þrjár mínútur þegar kalda potts vinkona mín kom úr heitasta pottinum í sína þriðju kalda potts ferð. Ég sat með henni í þrjár mínútur. Við fórum fjórar aðrar ferðir í þann kalda og alltaf þann heitasta á milli en eftir síðustu ferðina fór ég í gufubað í uþb 10 mínútur. Kokkaði einslags útgáfu af kjöt í karrý þegar ég kom heim.

Líður á mánuðinn

Setti mannbroddana aftur undir gönguskóna áður en ég labbaði af stað í vinnuna í gærmorgun. Gönguferðin gekk mjög vel en Samsung-health forritið í símanum var greinilega í verkfalli því þegar ég ætlaði að athuga hversu lengi ég var að labba, en forritið á að gera það sjálfkrafa, þá var ekki einu seinni búið að skrá á mig eitt einasta skref. Veit þó að skrefin í vinnuna, þá leiðina sem ég geng vanalega, eru rúmlega þrjú þúsund.

Í gær var ég á vélinni að hlaða inn verkefnum og senda þau af stað. Aukamaðurinn var í móttökunni og Silla í bókhaldi. Þurftum að senda aftur aðra endurnýjunina og hlaða inn en sem betur fer vorum við ekkert byrjuð á þeirri endurnýjun. Hefðum klárað þá endurnýjun sem við vorum að vinna í frá því á þriðjudag í gær en það stóðu aðeins um 67 kort útaf sem við gátum ekki framleitt.

Fékk aftur far heim úr vinnunni og svo var ég sótt rétt fyrir fimm til að skreppa í sjóinn. Mættum fjórar og fórum nokkrar mínútur í 0,2°C sjóinn. Davíð Steinn var að byrja að sinna kvöldmatargerð þegar ég kom heim aftur, mjög kryddaðan hakkrétt (hann missti sig aðeins í chillíinu).

Mannbroddar

Setti "naglana" undir gönguskóna áður en ég labbaði í vinnuna í gærmorgun. Var mætt fyrst en hin tvö sem hafa verið í hinum hópnum komu fljótlega. Ég fékk að vinna í bókhaldinu í fyrsta skipti á nýju árin en þetta var nú líka bara þriðji vinnudagurinn minn á árinu. Tvær endurnýjanir voru komnar og þeim hlaðið inn á vél. Þau sem voru á vélarvaktinni voru mjög iðin. Ég kom inn rétt fyrir þrjú og spurði hvort þetta væri ekki komið gott í dag, við þyrftum líka smá tíma til að ganga frá og svo er nægur tími. Þau samþykktu þessa tillögu mína. Samstarfskona mín var að fá gefins stóran bolta sem hægt er að nota til að gera æfingar á eða jafnvel sem stól. Ég bauðst til að halda á boltanum yfir í bílastæðahús Hörpu ef ég fengi far heim. Það var samþykkt. Við vorum alveg að vera komnar að tröppunum að kjallaranum þegar mér fannst húfan vera að fjúka af mér við það missti ég takið á boltanum og hann fauk af stað, þurftum að elta hann smá spöl en sem betur fer fór hann ekki út á götu en hann var vel blautur þegar ég náði honum aftur.

Var komin heim rétt upp úr hálffjögur. Hringdi í pabba, skrapp svo aðeins í netheima en var mætt í Laugardalslaugina rétt fyrir fimm. Eftir sundið kom ég við í Krónunni við Nóatún, eitt og annað sem vantaði sem passaði í tvo margnota poka. Oddur Smári gekk frá vörunum þegar ég kom heim aftur.

Þriðji vinnudagurinn á árinu í dag

Við Lilja kvöddum gestgjafa okkar rétt rúmlega eitt í gær eftir að hafa þegið smá hádegishressingu áður. Þurfti að skafa af bílnum áður en við lögðum í hann. Heimferðin gekk alveg ágætlega fyrir utan að stuttu áður en við komum að Hvalfjarðargöngunum var tekið fram úr okkur. Hefði verið allt í lagi nema bílstjórinn var ekkert að keyra mikið hraðar heldur en við, mjög ójafn hraði og þar að auki stundum að keyra á miðjum veginum. Óþægilegt að hafa svona bílstjóra fyrir framan sig og fúlt að geta ekki notað krús-kontrólinn. Aðstæður voru þannig að ekki var hægt að taka framúr aftur enda leyfði aksturslag bílstjórans það ekki, hann hægði á þegar umferð var á móti en gaf annars í og fór þá upp í næstum því 90.

Skilaði Lilju heim til sín stuttu fyrir klukkan þrjú og fór beint heim. Fékk stæði fyrir framan svo ég þurfti ekki að bera farangurinn langa leið. N1 sonurinn var í vinnu en hinn var heima en hann hélt sig í herberginu sínu að mestu. Ég byrjaði á því að kveikja á tölvunni þegar ég var búin að ganga frá ferðadótinu og sat við hana í rúmlega klukkustund. Rétt fyrir fimm skrapp ég í sjóinn í Nauthólsvík. Var komin heim aftur um sex. Oddur Smári var búinn að fá sér núðlur þannig að ég harðsauð egg og fékk mér eitthvað snarl. Horfði í landsleikinn og var, líkt og landsliðsþjálfarinn, ánægð með að strákarnir okkur slösuðust ekki og létu fantana í hinu liðinu ekki slá sig út af laginu. Góður sigur, meira svona!

Komin heim eftir frábæra daga í góðum félagsskap

Rétt upp úr eitt á föstudaginn var ég búin að pakka niður og komin af stað til að sækja Lilju vinkonu. Saman brunuðum við út úr bænum, undir Hvalfjörðinn, framhjá Borgarnesi og vorum í áttina að Stykkishólmi. Þegar við komum að hliðinu við Selborgir í Borgarfirði hringdum við í Sonju sem opnaði fyrir okkur. Þá áttum við eftir að keyra smá spöl, og við vorum ekkert að keyra of hratt því það voru margir pollar á vegslóðanum. Það var samt ekki rigning þegar við fluttum dótið okkar úr bílnum í bústaðinn til Sonju rétt fyrir hálffjögur. Sonja var að vinna en hún stimplaði sig út og bauð okkur kaffi. Það fór að rigna fljótlega og það hellirigndi langt fram á nótt. Við settumst í sófann með handavinnuna okkar eftir kaffið og tíminn fram að kvöldmatartíma leið ógnarhratt. Sonja sá um að hafa til kvöldmatinn og það var ekki fyrr en eftir mat sem hún þáði aðstoð og þá aðeins við uppvaskið. Við sátum svo frameftir kvöldi að spjalla og sýsla við handavinnuna okkar.

Þegar ég kom fram klukkan hálfátta morguninn eftir var Lilja vöknuð og komin fram fyrir löngu. Skellt var í morgunverðarhlaðborð þegar Sonja kom fram. Um hádegi skruppum við út í göngutúr og gengum flestar götur í kring nema ekki þá götu sem við komum akandi daginn áður. Eftir rigninguna daginn áður var betra að halda sig á veginum og helst í hjólförunum því undirlagið var mýkra í miðjunni. Þetta voru langt innan við 4000 skref. Þetta var sannkölluð saumaklúbbs ferð því við vorum oftast vinna við hannyrðirnar inni við þegar ekki voru matar, kaffi og svefntímar.

Lilja var aftur fyrst á fætur í gærmorgun. Ég kom fram á svipuðum tíma og morguninn áður og hafði með mér bók. Lilju fannst það góð hugmynd og sótti lestölvuna sína. Lásum til klukkan átta en þá höfðum við til kaffið og það var akkúrat tilbúið þegar Sonja kom fram. Eftir kaffið var gripið í handavinnuna en um hádegisbilið fórum við út í heldur svalara veður en daginn áður og löbbuðum þá leið sem við Lilja höfðum ekið á föstudaginn, næstum alla leið upp á veg og svo til baka. Það vantaði tæp þúsund skref upp á 6000. Þessi dagur leið jafn hratt og hinir og við stöllur fengum iðulega hlátursköst, vorum komnar með harðsperrur í magann en sammála um að þetta væri bara af hinu góða. Sonja bauð okkur að vera til mánudags og við Lilja þáðum það með þökkum.

Í morgun brá svo við að ég var fyrst á fætur. Vaknaði á svipuðum tíma og dagana á undan. Ég var búin að prjóna smávegis og lesa einn stuttan kafla þegar Lilja kom fram korter fyrir átta. Um átta leytið hjálpuðumst við að við að útbúa morgunverðarhlaðborð og það stóð heima, Sonja kom fram akkúrat þegar allt var klárt. Eftir kaffið stimplaði hún sig inn í vinnuna. Við Lilja sinntum handavinnunni okkar en skruppum svo út á pall þegar fór að birta til að fanga augnablikin og fegurðina.

Föstudagur, laugardagur eða sunnudagur

Ég heyrði þegar pabbi fór í sund rétt fyrir hálfsjö í gærmorgun. Ég var ekki með sunddótið með mér og ætlaði mér að kúra aðeins lengur. Það gekk samt ekki upp því ég var glaðvöknuð. Gafst upp á að reyna að sofna aftur rétt fyrir sjö og fór á fætur. Kveikti á einni tölvunni hans pabba og vafraði um á netinu í ca. klukkustund. En þegar pabbi kom heim úr upp úr hálfníu var ég búin að færa mig inn í eldhús og að leggja kapla. Fljótlega settist ég inn í stofu með bók. Er búin með bókina sem Davíð Steinn gaf mér í jólagjöf og næst síðustu bókina sem ég er með af safninu: Grafin undir gistihúsi, sláandi sönn saga af svikráðum, misnotkun og morðum eftir Ryan Green þýdd af Gísla Rúnari Jónssyni. Í gær byrjaði ég á annarri bókinni sem Oddur Smári gaf mér og er líka að lesa síðustu bókina sem ég er með af bókasafninu: Leyndarmál systranna eftir Diane Chamberlain.

Pabbi bauð mér með sér á Kanslarann í hádeginu þar sem við fengum aspassúpu og dýrindis kjúklingarétt. Ég tók aðeins til við prjónana eftir að við komum til baka aftur en ég var líka að leggja kapla, lesa og vafra á netinu fram að kaffi. Um fjögur, strax eftir kaffi, kvaddi ég pabba tók mig saman og lagði af stað í bæinn. Tók með barnastígvél sem Magga hans Sævars hafði komið með kvöldið áður. Hitti á Kristínu dóttir hennar við Rauðavatn og afhenti henni þessi stígvél.

Upp úr hádegi í dag er ég aftur á leið út úr bænum í tvær til þrjár nætur. Verð ekki með tölvuna meðferðis svo skrifin liggja niðri á meðan. Er nýlega komin heim úr sundi og á enn eftir að hella mér upp á kaffi. Best að fara að vinna í því.

Morgunstund

Þrátt fyrir að ekki væri vinnudagur í gær hafði ég stillt vekjaraklukkuna á mig. Stillti hana á 7:40 en á vinnudögum er ég mætt í vinnu á þeim tíma. Vaknaði amk klukkutíma áður en vekjaraklukkan átti að vekja mig og var búin að slökkva á henni og  koma mér fram úr fletinu áður en klukkan varð hálfátta. Skipti um á rúminu en beið til klukkan átta með að fara með rúmfötin niður í þvottahús í þvottvélina. Klukkan var langt gengin í níu þegar ég mætti í laugardagslaugina, á sundleikfimitíma sem fer fram á þeim brautum sem ég nota oftast til að synda. Byrjaði á því að fara tvær ferðir í kalda og þann heitasta á milli og eftir. Eftir seinni heita potts ferðina fór ég í pottinn sem alltaf er kallaður sjópotturinn. Það hefur reyndar ekki verið sjór í honum í marga mánuði og stundum er hann lokaður. Í gær var að minnka í honum og einn sem alltaf er í sundi á þessum tíma á morgnana og var komin ofan í pottinn sagði að það væri fjara. Kannast við þennan mann og alltaf hefur konan hans mætt með honum og ég hef stundum spjallað við hana. Hún var þó ekki með í gær og óvíst hvort hún komi aftur því hún er komin með alzeimer á það stig að hún þekkir oft ekki manninn sinn og rekur hann út. Hann sagði mér að hún væri komin með pláss á Eir og komin í aðlögun þar. Synti 100 metra á braut eitt en þá var leikfimin einmitt að klárast svo ég fór þriðju ferðina í kalda pottinn áður en ég synti 400 metra á braut 6 sem er alveg við hliðina á brautunum sem ég syndi oftast á.

Kom heim um hálfellefu, hengdi upp úr þvottavélinni og hellti mér svo upp á smá kaffi. Hringdi í Lilju vinkonu áður en ég tók mig saman og lagði af stað austur upp úr klukkan tólf. Kom við í Fossheiðinni hjá tvíburahálfforeldrum mínum. Kom svo pabba á óvart með því að hringja á dyrabjöllunni hjá honum um hálfþrjú. Útidyrnar voru læsta og ég nennti ekki að grafa eftir húslyklunum verandi með farangur með mér. Við pabbi fórum strax í smá kaplakeppni. Eftir kaffi settist ég með prjónana mína inn í stofu. Fann meira af samskonar garni þannig að ég ætti að ná í eins og eitt ungbarnateppi. Í kvöldmatinn fékk ég mér kalt hangiket með rófustöppu. Þar sem pabbi borðar heitan mat í hádeginu á Kanslaranum virka daga fær hann sér aðeins snarl á kvöldin. Hann bauð mér svo að fá mér hvítvínsglas eða tvö sem ég þáði og við fórum aftur í smá kaplakeppni.

Heimsókn á Hellu

Var búin að slökkva á vekjaraklukkunni og komin á fætur áður en hún hringdi í gærmorgun. Labbaði af stað í vinnuna nánast á sömu mínútunni og á mánudagsmorguninn. Engin auka framleiðsla var í gær en daglegu skammtarnir ívíð stærri. Engu að síður var allri framleiðslu lokið fyrir klukkan tólf. Tókum okkur góðan tíma í hádegismat en vorum eiginlega búin með öll verkefni fljótlega eftir að klukkan varð eitt. Ég stillti póstinn minn á sjálfvirkt svar um að ég væri ekki á vinnusvæðinu næstu fjóra virka daga. Svo var ég einnig búin að útbúa póst til að senda á fyrirtækið sem tekur á móti símtölum en ég gleymdi að senda hann. Fékk far heim úr vinnunni og var komin heim áður en klukkan varð þrjú.

Um hálffimm leytið fór ég í sund. Fór þrisvar í kalda, synti 500 og endaði í gufunni í amk tíu mínútur áður en ég fór upp úr og heim aftur. Bjó til grjónagraut í kvöldmatinn. Var búin að slökkva á sjónvarpinu áður en klukkan varð hálftíu og komin upp í rúm að lesa fljótlega eftir það. Sofnaði líklega áður en klukkan varð hálfellefu.

Seinni vinnudagurinn í þessari viku

Ég var vöknuð nokkru áður en vekjaraklukkan átti að hringja í gærmorgun. Var komin á fætur og búin að búa um á þeim tíma sem ég ráðgerði að vakna. Eftir morgunverkin á baðinu fékk ég mér matskeið af lýsi, harðsoðið egg og tvö glös af vatni. Labbaði af stað í vinnu rétt áður en klukkan varð sjö. Hafði með mér m.a. vöfflusoppuna frá í fyrradag og þeyttan rjóma. Allri framleiðslu var lokið rétt fyrir tólf.  Tókum okkur rúman matartíma en vorum þó komnar inn á deild aftur fyrir eitt. Ég stoppaði þar aðeins í um tíu mínútur áður en ég fór fram aftur og hellti mér út í vöfflugerð. Vöfflujárnið í vinnunni er tvöfalt og ég gerði 10 og það var samt afgangur í fötunni sem ég tók með mér heim aftur. Rjóminn kláraðist. Við vorum fimm sem gæddum okkur á þessum veitingum. Upp úr klukkan tvö vorum við búnar að ganga frá öllu og þar sem ekkert lá fyrir ákváðum við að segja þetta gott og fara heim. Önnur af samstarfskonum mínum bauð okkur hinum tveimur far heim sem við þáðum.

Stoppaði heima í rúma tvo tíma áður en ég fór í Nauthólsvík og -0,3°C sjóinn. Það var háflóð og ískrapi þeim megin sem ég er vön að fara út í. Ég lét ekki krapið stoppa mig en fór samt varlega. Var ekki með tímavörð með mér en er nokkuð viss um að hafa verið útí þarna megin í uþb eina og hálfa mínútu. Þar sem það var flóð þurfti ég ekki að fara mjög langt en engu að síður varð ég einnig að passa mig þessa stuttu leið til baka. Fór svo aðeins í lónið áður en ég kom mér fyrir í heita pottinum um stund. Var komin heim aftur um sex. Þá setti ég upp kartöflur og steikti eitt flak af þorskhnökkum í fjórum bitum.

Vöfflukaffi í vinnunni

Í gærmorgun skutlaði ég N1 syninum á vakt rétt fyrir tíu og fór svo beint í sund. Fór fjórar ferðir í kalda pottinn, synti 500 metra þar af 150 á bakinu og sápuþvoði á mér hárið áður en ég fór heim. Oddur Smári kom fram um eitt leytið og ég spurði hvot það væri ekki upplagt að búa til nokkrar vöfflur. Hann tók vel í þá hugmynd og ákvað að hjálpa mér. Ég hrærði í heila uppskrift og hann bjó til 5 vöfflur á meðan ég  þeytti rjóma og hellti á könnuna. Setti afganginn, sem var efni í amk 8-10 vöfflur í viðbót í litla fötu undan súrmat. Oddi fannst það frekar spes.

Leist ekki meir en svo á landsleikinn í handbolta að ég hætti að horfa þegar strákarnir okkar voru komnir fimm mörkum undir. Var svo gapandi hissa þegar ég ákvað að horfa á síðasta korterið af leiknum og sá að það hafði orðið alger viðsnúningur og leikurinn vannst með níu marka mun.

Hafði ofnbökuð kjúklingalæri með blómkáli, rauðkáli og sveppum í matinn og bauð ég einnig upp á soðin bygggrjón. Mjög gott að sjálfsögðu. 

Tuttuguogeinsárs starfsafmæli

Með þessari færslu jafna ég bloggskrif í janúar í fyrra, þe þetta er tíunda færsla ársins. En það eru ennþá 21 dagur eftir af þessum mánuði svo þótt það sé ekki öruggt að ég muni setja inn færslu daglega þá er næsta víst að þetta er ekki síðasta færslan í þessum mánuði. Staðan á sund- og sjóferðum á þessu nýja ári er líka jöfn, 5:5.

Í gærmorgun drattaðist ég á fætur rétt áður en klukkan varð níu. Um klukkustund síðar bjó ég mér til hafragraut og rétt fyrir ellefu var ég sótt af sjósundsvinkonu minni. Hittum hinar þrjár af kjarnanum í hópnum í Nauthólsvík. Sjórinn var sagður 0,5°C og lofthiti -3. Vorum út í sjó í uþb fimm mínútur og svo rúmar tíu mínútur í heita pottinum á eftir.

Var komin heim aftur áður en klukkan varð tólf. Hellti mér upp á tvo bolla af kaffi. Og dagurinn leið við alls konar dundur. Upp úr klukkan hálfsjö fór ég á bílnum niður í bæ og lagði honum á stæði á Skúlagötu rétt við Ingólfsstræti og Kalkofnsveg. Móðursystir mín og guðmóðir á afmæli í dag og hún bauð mér, dóttur sinni, kærasta hennar og tvíburabróðursyni sýnum út að borða á Grillmarkaðnum. Ég átti að mæta klukkan sjö og taldi mig hafa nægan tíma en það fór nú svo að ég mætti síðust korter yfir sjö. Mig misminnti nafnið og staðsetning á staðnum og fór langt yfir skammt og fór fyrst í Matarkjallarann. Mér voru fyrirgefin þessi mistök. Borðhaldið tók þrjá tíma enda var ætlunin að njóta matarins og félagsskaparins. 

Komin á fætur en ekki í gírinn

Í gærmorgun dreif ég mig á fætur rétt upp úr sjö. Fékk mér lýsi, harðsoðið egg og vatnsglas áður en ég fór í sund. Byrjaði á ferð í kalda pottinn áður en ég synti 500 metra fór svo beint í kalda aftur. Fór eina ferð í heitasta pottinn og svo aftur í þann kalda áður en ég fór í gufu. Endaði svo á kaldri sturtu áður en ég fór upp úr og heim.

Heima setti ég handklæði og brækur í þvottavélina og bjó ég mér til hafragraut og kaffi. Fór ekkert út úr húsi aftur en sinnti bæði áhugamálum og nokkrum skylduverkum. Oddur Smári tók hluta af skyldunum að sér.

Uppgötvaði að ég hef ekki alveg farið rétt eftir teppaprjónamynstrinu en þar sem ég er handviss um að ef þetta verður í þeirri lengd sem mælt er með þá dugar garnið ekki. Hef því ákveðið að rekja ekki upp heldur breyta eftir eigin höfði. Get alltaf útvegað það garn sem bent er á í uppskriftabókinni og prjónað eftir uppskriftinni aftur og þá fylgt henni betur.

Jafnoft í sjóinn og sund

Kom mér á fætur rétt áður en klukkan varð níu í gærmorgun. Sá morgun var að mörgu leyti keimlíkur morgninum á undan en ekki alveg að öllu leyti. Ég hafði með mér nokkrar bækur fram í stofu og byrjaði aðeins á einni af jólabókunum, Dauði skógar eftir Jónas Reyni Gunnarsson. Sú bók er góð. Kaflarnir stuttir en ég ætla samt ekki að hámlesa hana, þ.e. ég ætla að gefa mér nokkra daga, lesa aðeins örfáa kafla í einu. Í staðinn er ég með fleiri bækur á kantinum. Hef lokið lestrinum á þeirri bók sem varð eftir heima af safninu, Gilead og ég mæli mjög með henni. Þá bók er heldur ekki hægt að hraðlesa yfir nema þá að maður ætli að lesa hana aftur.

Hélt áfram að prjóna teppið og það gengur mjög vel, eiginlega of vel þannig séð, er búin að klára tvær dokkur, byrjuð á þeirri þriðju og er stödd í mundsturkafla 2 af fimm. Nýjasti yfirmaður minn hafði samband í gær til að láta mig vita að það væri verið að breyta vinnuvaktaplaninu frá og með næstu viku og amk út mánuðinn með fyrirvara um hvaða reglugerðabreytingar taka í gildi eftir 12. janúar. Tvær af okkur fimm eiga eftir að taka megnið af sumarfríinu sínu síðan í fyrra og þær ætla að taka eitthvað af því í þessum mánuði. Verktakinn verður í vinnu fram að mánaðamótum og við eigum aðeins að mæta 3 til vinnu hverju sinni. Samkvæmt plani á ég að mæta í vinnu tvo fyrstu dagana í næstu viku og svo ekki fyrr en 19. og þá vinn ég 6 virka daga í röð. Ef þetta gengur eftir þá er ég að vinna átta daga í þessum mánuði og næ að vinna eitthvað með öllum nema fyrirliðanum, sem er önnur þeirra sem er að fara í orlof.

Mætti í Laugardalslaugina um hálffjögur í gær og byrjaði á því að synda 500 metra. Hitti svo kalda potts vinkonu mína í hennar fyrstu ferð í kalda pottinn. Fór með henni fimm sinnum í viðbót og oftast þann heitasta á milli. Eftir sjöttu ferðina skildu leiðir og ég fór í gufu.

Áður en ég fór að sofa í gærkvöldi byrjaði ég að lesa; Kópavogskrónika: til dóttur minnar með ást og steiktum eftir Kamillu Einarsdóttur. Bókin lætur ekki mikið yfir sér, er þunn og stuttir kaflar en lesturinn vekur upp ýmsar hugsanir um lífið og tilveruna, uppvöxt og mannlega hegðun, hugsanir, gerðir og líkt og ólíkt fólk.

Dagurinn lengist smátt og smátt

Í gær fór ég í fjórða skiptið í sjóinn á árinu og hef því farið oftar þangað heldur en í sund. Fór í Laugardalslaugina um miðjan dag í fyrradag. Hitti ekki á kaldapotts vinkonu mína en ég fór fjórar ferðir í kalda pottinn og í synti einnig 400 metra.

Klukkan var annars um níu í gærmorgun þegar ég reif mig loksins á fætur. Eftir morgunverkin á baðinu settist ég beint inn í stofu og kveikti á fartölvunni. Ætli ég hafi ekki setið við hana í hátt í tvo tíma eða svo að leika mér, vafra og endaði á því að blogga. Um ellefu hringdi ég í föðursystur mína til að óska henni til hamingju með daginn. Talaði stutt því dóttur-dóttir hennar og dóttur-dóttur-sonur voru í heimsókn. Hún sagði mér að hún hefði svarað langömmubarni sínu því að hún væri þriggja ára þegar hann spurði. Þannig að hún klippti fremri töluna alveg af.

Þegar ég var að koma að austan síðast tók ég með mér 6 hnotur af rauðu Artic hreinu ullargarni sem er hluti af því garni úr fórum mömmu heitinnar sem eftir á að koma út eða gera eitthvað við. Þetta er öðruvísi garn heldur en mælt er með í barnateppauppskriftarprjónabókinni en ég ákvað samt að prófa að nota þetta. Hugsanlega dugar þetta garn ekki í uppskriftina en ég fitjaði upp á hringprjón í gær, er langt komin með fyrstu hnotuna og rétt að byrja á neðsta munsturkaflanum af þremur. Þetta verður eitthvað.

Um tvö leytið í gær skutluðum við Oddur Davíð Steini á aukavakt á N1 í Borgartúni. Oddur fór í Sorpu á meðan ég verslaði í Krónunni við Granda. Ég fór líka í Elko að kaupa hleðslubatterí í heimasímann og í Byko að kaupa stíflueyði.

Klukkan fimm sóttu nöfnurnar mig í sjósundsferð. Við hittum systurnar á bílaplaninu við Nauthólsvík. Vorum uþb fimm mínútur í 1,3°C sjónum og svo tuttugu mínútur í heita pottinum áður en við fórum upp úr og vorum í samfloti heim til annarrar systurinnar. Þar var okkur boðið upp á heimabakaðar kanelbollur og ýmislegt fleira. Það var mikið spjallað og tíminn leið alltof hratt. Sjósundsvinkona mín skutlaði mér og nöfnu sinni aftur heim um níu. 

Þrettándinn

Föðursystir mín, Árný Oddbjörg Oddsdóttir er 93 ára í dag. Hún býr í eigin húsnæði og sér um sig og heimili sitt sjálf. Fyrir nokkrum misserum fékk hún sér neyðarhnapp til að bera til öryggis en ég veit ekki til þess að hún hafi þurft að nota hann. Fólkið hennar er duglegt að líta til með henni og bjóða aðstoð, t.d. við búðarferðir. Einn sonur hennar og tengdadóttir búa í hinum enda hússins. Samt held ég að hún líti alveg jafn til með þeim og þau henni. Mér þykir afskaplega vænt um þetta frændfólk mitt allt, bæði föðusystur mína og alla hennar afleggjara og fylgifiska.

En aðeins að gærdeginum. Ég komst á fætur um hálfníu en maður minn hvað mér fannst mikið dimmt úti og langt fram á morguninn. Klukkan var ellefu þegar ég hafði mig loksins af stað að reka nokkur nauðsynleg erindi. Byrjaði á því að fara í bókasafnið og skila öllum bókum nema einni, þá bók framlengdi ég skilafrestinn á um einn mánuð. Þrátt fyrir að eiga jólabækurnar enn ólesnar, aðeins búin að glukka í teppaprjónabókina, þá tók ég þrjár bækur af safninu.

Frá bókasafninu lá leiðin að N1 við Fellsmúla. Skynjarinn fyrir þrýstinginn á dekkjunum hefur ekki verið í lagi síðan ég lét setja naglana undir. Bíllinn komst strax að og við nánari skoðun þurfti að skipta um einn skynjara. Fékk að gefa upp kennitölu N1-sonarins og borgaði innan við fimmþúsund fyrir skynjarann.

Næst lagði ég bílnum við Krónuna við Nóatún, aftarlega á planinu. Þaðan labbaði ég niður í Borgartún 12-14 þar sem Reykjavíkurborg er með margvíslega starfsemi. Í þjónustuverinu fékk ég að skrifa á þrjú plögg undir nýjan lóðaleigusamning við borgina. Fleiri íbúðareigendur við Drápuhlíð 21 eiga eftir að skrifa undir áður en hægt verður að þinglýsa þessum nýja samning.

Fór ekkert í Krónuna en kom við í Fiskbúð Fúsa áður en ég fór heim.

Frænkuheimsókn

Stuttu fyrir hádegi í gær hafði nafna mín og frænka samband við mig til að athuga hvenær hún gæti nálgast húslyklana sína. Við sammæltumst um að hún kæmi um eitt. Korter fyrir eitt hringdi hún aftur og sagðist sennilega verða eitthvað seinni þar sem mamma hennar er á landinu og þurfti að nota bílinn. Hálftíma síðar voru mæðgurnar mættar. Sú eldri er móðursystir mín og guðmóðir. Hún er með lögheimili í Noregi en á íbúð hér í Reykjavík (og reyndar eina í Kaupmannahöfn og aðra í Berlín) og er búin að vera hér síðan rétt fyrir áramót í jólafríi. Þær mæðgur gerðu gott stopp áður en þær fóru í frekari snúninga. Nafna mín færði mér jólakort og böggul frá þeim Mikael og kisu, mjög flotta vínrauða húfu og keramikkrús sem ég hallast að því að sé hugsað sem drykkjarílát frekar en ílát undir sprittkerti því það eru för í krúsinni sem passa við fjögurra fingra grip, þumal og þrjá fingur.

Rétt fyrir fimm, rúmri klukkustund eftir að frænkur mínar kvöddu, sóttu nöfnurnar mig í sjósundsferð. Hittum systurnar á planinu við Nauthólsvík og ellefu mínútum yfir fimm vorum við að vaða í átt til Kópavogs í 1,3°C heitan sjóinn. Vorum þrjár mínútur í sjónum en meira en hálftíma í heita pottinum á eftir. Þannig að ég er búin að fara oftar í sjóinn á þessu ári heldur en í sund.