Búin að kjósa

Ég fór ekkert aftur út í gær og eyddi restinni af deginum í lestur og þáttagláp alveg til klukkan að ganga miðnætti. Fór á fætur á níunda tímanum í morgun og strax eftir morgunverkin á salerninu settist ég inn í stofu með bók í hönd til að athuga betur hvort ég ætlaði að eyða meiri tíma í; Aðþrengdi í Odessu eftir Janet Skeslien Charles, bók sem ég byrjaði að glugga í í gær eða fyrradag og á að skilast 23. n.k. Það fór svo að ég steingleymdi tímanum og skemmti mér vel við lesturinn og áður er búin að lesa yfir 120 blaðsíður af uþb 450. Í gær byrjaði ég líka á Botnfall eftir Jörn Lier Horst um yfirlögregluþjóninn í litlum bæ í Vestfold í Noregi; William Wisting. Höfundur er eða var amk sjálfur yfirmaður í rannsóknarlögreglu og hefur skrifað nokkrar bækur og það hafa verið gerðir þætti eftir bókunum um þessa sögupersónu.

Sendi kaldapotts vinkonu minni skilaboð og það kom í ljós að hún ætlaði í sund um eitt. Ég ætlaði að mæta eitthvað fyrr og vera búin að synda en það fór svo að ég komst í tölvuna hans Davíðs Steins sem skrapp frá svo ég lagði ekki af stað úr húsi fyrr en um hálfeitt. Kom fyrst við í bókasafninu og skilaði þremur bókum, m.a. nýjustu skammtíma lánsbókinni. Skoðaði eina eða tvær bækur en ákvað að gera ekkert frekar í málinu enda enn með fimm bækur af safninu heima. Dreif mig í laugardalinn og fór beint í kalda pottinn. Var að ljúka þeirri ferð þegar Hrafnhildur kom og varð samferða henni og annarri til í heitasta pottinn. Fórum nokkrar ferðir á milli þessarra potta en svo sá ég yngstu mágkonu hennar mömmu heitinnar í sjópottinum og ég fór of spjallaði góða stund við hana. Náði svo að hafa mig í að synda 300 metra á braut 1 áður en ég fór upp úr.

Úr sundi fór ég beint í Smáralind til að kjósa utan kjörfundar í forsetakosningunum. Það var rennerí og raðir á staðnum en þetta gekk samt alveg ágætlega fyrir sig. Í bakaleiðinni leit ég við í Pennanum/Eymundsson og keypti eina kilju, sudokublað og barnabókina um kardemömmubæinn. Næst ákvað ég að skreppa og versla í Krónunni upp á Höfða. Það tók smá tíma að komast frá Kópavogi og þangað yfir en allt hafðist þetta. Var komin heim rétt fyrir klukkan fimm. Fékk Odd til að koma út og sækja vörurnar. Ég hringdi og spjallaði stuttlega við pabba áður en ég fór inn með dótið mitt.

Nú er  einn og hálfur tími þar til Valur - KR, fyrsti leikur í Pepsídeild kvenna hefst. Ég á árskort á völlinn og það lítur út fyrir að ég þurfi að mæta í bleiku regnkápunni góðu.

Góður tími í hvað sem er

Horfði á fyrstu tvo þættina af seríunni sem byrjaði á RÚV eftir tíu fréttir á mánudagskvöldið í gærkvöldi. Klukkan var næstum því hálfellefu þegar ég fór í rúmið. Las í tæpan hálftíma áður en ég sveif mjúklega í draumalandið. Rumskaði upp úr sex í morgun en ekki nóg til að nenna strax á fætur. Fór þó ekki eins seint á stjá og í gærmorgun. Rétt fyrir níu ýtti ég aðeins við N1 syninum til að fá lánað hjá honum N1-kortið. Fór þó fyrst í sund. Synti þó ekki nema 300m en flatmagaði í hinum ýmsu pottum. Fór fjórum sinnum í þann kalda, þrisvar í heitasta pottinn og einu sinni í sjópottinn. Rétt fyrir ellefu lagði ég fyrir framan N1 hjólbarðaverkstæðið í Fellsmúla og bað um að dekkin yrðu yfirfarin, var nokkuð viss um að skipta þyrfti um ventla í tveimur tilvikum. Skildi bílinn, lykilinn og gemsanúmerið eftir og labbaði á Café Mílanó og fékk mér könnukaffi og kjúklingaböku. Var með skammtímalánsbókina með mér og tók til við smá lestur eftir að hafa gætt mér á bökunni. Rúmlega tólf lagði ég af stað til baka og fékk sms um að bíllinn væri tilbúinn til afhendingar rétt áður en ég kom aðvífandi.

Fyrsti í sumarfríi

Gleymdi alveg að minnast á hitting okkar tvíburahálfsystur minnar sl. mánudagskvöld í gær og bæti úr því hér með. Lilja vinkona hafði ætlað að vera með en hún fór út úr bænum á sunnudagskvöldið þannig að það er lengra þangað til verður 100% saumaklúbbshittingur. Annars vorum við Sonja báðar að munda prjónana, hún að prjóna tusku og ég að vinna í enn einu sjalinu. Tveir og hálfur tími liðu sem um mesta lagi tíu mínútur væru að líða, svo fljótt hljóp frá okkur tíminn.

Þrátt fyrir að sumarfríið væri byrjað fór ég í rúmið upp úr klukkan tíu í gærkvöldi. Las að vísu til klukkan að verða ellefu og sofnaði svo fljótlega eftir það. Hins vegar rumskaði ég  aftur um fjögur leytið og 4:34 gafst ég upp á að reyna að sofna aftur, kveikti á náttborðslampanum og tók fram lesgleraugun og bókina eftir Hallgrím Helgason. Það voru innan við 90 blaðsíður eftir og ég lagði ekki frá mér bókina fyrr en hún var búin. Þá var klukkan að verða sex. Í stað þess að fara að huga að því að fara á fætur og mæta í sund um það leyti sem myndi opna um hálfsjö, slökkti ég ljósið lagði frá mér bók og gleraugu og reyndi að sofna. Vissi næst af mér klukkan að ganga tíu, takk fyrir túkall, og það endaði með því að ég fór ekki á fætur fyrr en klukkan var að verða ellefu.

Fékk mér hressingu, hellti fljótlega upp á kaffi og settist svo með skammtímalánsbókina (sem ég byrjaði að lesa í gærdag) inn í stofu. Um hálftvö hringdi ég í frænda minn á Patró til að kanna hvenær hann vildi og þau gætu tekið á móti mér í heimsókn. Það gæti farið svo að ég leggi af stað í þann leiðangur um miðja næstu viku. Stuttu seinna hringdi ég í æskuvinkonu mína sem hefur verið búsett á Egilsstöðum síðasta einn og hálfa tuginn eða svo. Það gæti farið svo að þau hjónin verði búin að minnka við sig fyrir haustið.

Eftir gott spjall við Ellu dreif ég mig í Vesturbæinn til norsku esperantó vinkonu minnar. Hún átti von á mér upp úr tvö og við byrjuðum á því að labba að heitu vaðlauginni nálægt Gróttu og til baka, alls um 6,4km. Á bakaleiðinni mættum við manni hennar og frænda hans. Þeir fóru aðeins lengra en við og þegar þeir komu til baka var ég í sólbaði á svölunum og Inger að undirbúa kaffitímann. Eftir kaffið fóru þeir frændur á Miklatún í smá Folf en við vinkonurnar aftur út á svalir að spjalla og baka okkur í sólinni.

Dagurinn afturábak

Var að enda við að laga upplýsingar um þynnstu bókina sem ég bloggaði um í gær. Annars var ég að koma úr sundi. Synti reyndar aðeins 300m en ég fór 7 x 4-8 mínútur í kalda pottinn þar af fimm ferðir með kalda potts vinkonu minni. Á leiðinni í sundið kom ég fyrst við í Fiskbúð Fúsa og keypti mér ma ýsu í soðið. Kom labbandi heim úr vinnu rétt rúmlega þrjú, 2,8km á 36 mínútum sem síminn skipti reyndar niður í tvær göngur. Í vinnunni vorum við með vöfflukaffi um tvö leytið. Ég og Petra græjuðum það á rúmum hálftíma. Var skráð í pökkunarverkefni í dag en kom þeim verkum af mér og sinnti öðrum málum í staðinn. M.a. hjálpaði ég þeirri sem sá um bókhaldið í dag við talningar og afstemmingar á framleiðslunni. Ég var mætt fyrst í vinnu um hálfátta í morgun eftir 3,4km göngu í 40 mínútur. Vaknaði amk tíu mínútum á undan vekjaraklukkunni í morgun og dreif mig fljótlega á fætur.

Kvöldmatur í boði Steins

Ég var svolítið hissa þegar ég vaknaði við vekjaraklukkuna mína rétt fyrir hálfsjö í morgun. Var smá stund að átta mig en morgunrútínan tók ekki svo langan tíma. Var lögð af stað um sjö í bleiku regnkápunni og skráði síminn á mig tvo göngutúra þannig að einhvers staðar hlýt ég að hafa hikað á arkinu á leiðinni. Fyrst skráði forritið 1,34km í 16 mínútur og svo 1,49km í uþb sautjánoghálfamínútu. Ég kom rétt á undan mæðgunum sem eru nýfluttar í Mosfellsbæinn, var að prenta út fyrstu framleiðsluskammtana og þær tóku að sér að ræsa vélina og taka út skápa og töskur. Ég var annars í sama verkefni og á föstudaginn, bókhaldinu. Klukkan þrjú labbaði ég af stað heim og var í 36 mínútur að ganga 2,9km. Fékk mér hressingu en hellti ekki upp á könnuna. Las tvo kafla í Sextíu kíló af sólskini á meðan ég var að ná mér aðeins niður eftir gönguna. Rétt upp úr klukkan fjögur tók ég til lesnar bækur og sjósundsdótið mitt. Fór fyrst á safnið að skila bókunum, alls 5 af átta og ég tók jafnmargar bækur að láni. Ein af þeim er nú frekar þunn; 23 sannar sögur eftir Sophie Calle og Nínu Óskarsdóttir þýddar af Óskari Árna Óskarssyni. Svo eru tvær bækur nýjar eða nýlegar en aðeins önnur þeirra á 14 daga skilafresti. Þær þrjár bækur sem ég skilaði ekki á safnið erum með skilafresti til 14. júní, bókin sem ég er að lesa og hinar tvær til 23. júní en það er hægt að framlengja um 30 daga ef þörf krefur. Snerting hins illa eftir Max Seeck,  er bókin með stysta skilafrestinn af safninu í dag og sá nær til 22. júní. Fór beint í Nauthólsvík af safninu. Þar kom í ljós að ég hafði gleymt að taka með mér sundhettuna. Ég ákvað samt að hætta ekki við heldur festi upp hárið með teygju og prófaði svo að dýfa mér í sjóinn í sundbol og strandskóm, sleppti sjósundsvettlingum og sokkum. Sjórinn er 9°C og þetta var allt í góðu lagi. Fann aðeins fyrir smá kulda rétt fyrst en ég var að svamla í sjónum í amk 7 mínútur og heilsaði heil æðarfuglsfjölskylda upp á mig. Steggur, kolla og 3 ungar komu amk svo nálægt mér að mér fannst eins og ég gæti snert þau með því að rétta út hendi í áttina til þeirra. Prófaði það samt ekki en fylgdist heilluð með ungunum leika sér að kafa og skjótast svo "blúbb" upp úr sjónum. Á leiðinni heim kom ég aðeins við í Kvikk hjá Oddi, ekki samt til að sníkja hjá honum kaffi. Heim kom ég um sex og þá var Davíð Steinn eiginlega tilbúinn að bera fram kvöldmatinn. Heppin ég.

Sumaropnun á bókasöfnum

Hafði lasanja í matinn á sjöunda tímanum í gærkvöldi. Oddur Smári skutlaði bróður sínum í afmælisboð í Grafarvoginn rúmum klukkutíma síðar. Ég horfði á nokkra þætti úr premium-sarpinum en var komin inn í rúm um ellefu. Kláraði bókina sem ég hef verið að lesa undanfarna daga og get nú farið að einbeita mér að bókinni eftir Hallgrím Helgason. Á þar að auki tvær aðrar ólesnar af safninu og þrjár bækur sem ég fékk hjá nöfnu minni um síðustu helgi.

Fór á fætur um hálfníu í morgun. Stuttu seinna kom Davíð Steinn fram, svolítið myglaður, hann hafði komið heim um hálftvö og átti að mæta á 10-19:30 vakt hjá N1 við Gagnveg. Hann brá sér í sturtu á meðan ég bjó til hafragraut handa okkur. Skutlaði syninum á vaktina og á leiðinni í sund kom ég við hjá Atlantsolíu við Sprengisand og fyllti tankinn. Í sundi fór ég 5 ferðir í kalda pottinn, synti 500m, fór tvisvar í 42°C heitan pott, einu sinni í sjópottinn og svo sat ég á stól og "sólaði" mig um stund áður en ég fór inn og þvoði mér um hárið. Stoppaði smá stund í Kvikk í Öskjuhlíð og fékk kaffi hjá Oddi Smára sem var á vakt milli 7:30-14. Svo ætlaði ég að skreppa á bókasafnið í Kringlunni til að skila nokkrum bókum en bókasöfnin eru víst lokuð á sunnudögum yfir sumartímann.

Styttist í sumarfrí

Á miðvikudaginn kemur rennur upp fyrsti dagurinn af 29 virkum dögum í röð sem ég tek af þeim 36,4 dögurm sem ég á í sumarfrí. Það verður eitthvað. Þá þykir mér líka líklegt að það hægist aðeins á bloggfærslum að einhverju leyti, sérstaklega á þeim tíma sem ég mun bregða mér í lengri og/eða styttri ferðalög. Látum það bara hafa sinn gang og koma í ljós.

Eitthvað gekk mér illa að sofna í gærkvöldi þrátt fyrir að vera komin í rúmið um ellefu og hætt að lesa áður en klukkan sló tólf. Ég var samt vöknuð fyrir klukkan átta og hefði getað hangið á hurðarhúninum í Laugardalnum. Hins vegar klæddi ég mig ekki fyrr en klukkan var að verða hálfníu og notaði svo rúman hálftíma í að lesa í bókinni eftir Koomson. Oddur Smári hafði lagt bílnum fyrir aftan heilsugæsluna. Þegar ég ræsti bílinn lét hann strax vita að það þyrfti að athuga þrýstinginn á dekkjunum. Líklega þarf ég að fara fljótlega og fá amk tvo nýja ventla. Ég byrjaði á því að fara að loftdælunni hjá Kvikk og bjargaði þessu. Rétt leit inn til að heilsa upp á Odd sem er á helgarvakt þessa helgina þannig að ég var ekki komin í Laugardalinn fyrr en rétt fyrir tíu. Synti aðeins 200m. Fór tvær ferðir í kalda pottinn sem var 10°C, eina ferð í þann heitasta og endaði á því að sitja stund í sólbaði og spjalla við eldri konu sem kom og settist hjá mér.

Var komin til esperanto-vinkonu minnar þegar klukkan var byrjuð að ganga tólf. Fyrsti hittingur síðan í byrjun mars og við byrjuðum að rólegu nótunum. Hún bauð mér upp á hafragraut og kaffi og svo settumst við í græna sófann á eftir og spjölluðum um flest en bara lauslega um esperanto. Kvaddi einum og hálfumtímum síðar með loforði um að vera í sambandi vegna n.k. miðvikudags. Prófaði að versla í Nettó við Granda og skrapp einnig í Elkó að kaupa mér símahleðslusnúrur, aðra 1m og hina 3m. Ætla hafa þá styttri til að grípa til í bílnum. Davíð Steinn var nývaknaður þegar ég kom heim. Hann tók að sér að ganga frá vörunum og svo fékk ég hann til að skúra yfir tvo baðherbergis og eldhúsgólffletina.

Helgarfrí framundan

Vinnudagurinn í dag var í styttra lagi, þó ekki eins stuttur og í gær. Labbaði af stað rétt fyrir sjö í morgun og tæpum 3km og rúmlega 37mínútum seinna var ég mætt í vinnu, fyrst á minni deild. Ég var skráð í bókhaldið í dag sem þýðir að ég kom ekki nálægt vélinni fyrr en eftir framleiðslu og uppgjör að ég hreinsaði út allar skrár. Við vorum svo tvær sem tókum líka að okkur að ryksuga og blása "kortabrautir", skynjara, umslagavél og færiband. Vorum búnar að öllu um hálftvö. Ég hafði hugsað mér að hinkra til tvö ef kæmi beiðni sem þyrfti að afgreiða. Hinar þrjár trítluðu af stað út í helgina og þegar pósturinn var sóttur korteri fyrir tvö lá ekkert á að bíða eftir beiðni sem var hvort sem er ekki hægt að afgreiða í póst fyrr en eftir helgi. Sá skilaboð frá Lilju vinkonu um að hún væri á torginu og beiðni frá henni um hvort ég gæti komið við og knúsað hana. Hún var að missa mömmu sína í vikunni og ég veit alveg upp á hár að það tekur á. Var komin til hennar rétt rúmlega tvö, knúsaði hana vel og lengi, staldraði við og spjallaði í góðan hálftíma og knúsaði hana aftur áður en ég labbaði heim 3km á 38 mínútum. Var komin heim fyrir klukkan hálffjögur og byrjaði á því að renna í könnuna þrátt fyrir að hafa fengið mér kaffi í vinnunni í morgun og aftur í hádeginu. Bræðurnir komu heim úr Sorpu, Elkó og Krónunni rétt á eftir mér. Ég var eitthvað að spá í að drífa mig í sjóinn milli klukkan fimm og sjö en ákvað svo að lána Oddi bílinn til að komast í vinnugrillpartý í Breiðholti upp úr klukkan fimm. Las um stund í bókinni eftir Koomson og var klukkan langt gengin í fimm þegar ég hringdi í pabba. Hann sagði mér frá því að önnur þvottavélin hefði bilað í gær og vatnið sem rann frá henni komst úr þvottahúsinu og alla leið inn í gang og herbergið sem ég sef í þegar ég gisti. Pabbi hafði orðið að fá viðgerðarmann á svæðið sem lagaði þvottavélina. Sjálfur skóf hann og þurrkaði upp vatnið og varð eftir sig eftir allan þann atgang.

Vinnu hætt snemma í dag

Veðrið í morgun var mjög milt og nánast engin hreyfing á logninu. Ég lagði af stað til vinnu fyrir klukkan sjö og labbaði 3,5km á 43 mínútum. Þegar átti að fara að byrja að hlaða inn fyrstu framleiðsluverkefnum dagsins kom í ljós að aðgangur allra var læstur og það endaði með því að við urðum að hringja í "vin" til að opna alla aðganga. Sú sem var nr 1 á vélinni gat samt hlaðið inn skránum í gegnum administrator á meðan við biðum eftir aðstoðinni. Daglegri framleiðslu, frágangi og allri talningu var lokið um tólf og rétt seinna komu tveir viðgerðarmenn á svæðið í sína mánaðarlegu úttekt á  vélinni. Ég sat yfir þeim á meðan sú sem hafði tekið að sér að sitja yfir í dag fór í mat. Var lögð af stað heim rétt upp úr klukkan eitt, labbaði 3,2km á 39 mínútum. Hellti mér upp á kaffi, fékk mér hressingu, las og slakaði aðeins á áður en ég dreif mig í Laugardalinn. Þar var ég í tæpa tvo tíma sem fóru aðallega í pottadýfingar og sólbað. Sleppti því að synda í þetta sinn en fór eina ferð í gufuna áður en ég fór upp úr og heim. N1 strákurinn var á leiðinni á aukavakt og Kvikk sonurinn var á átta tíma aukavakt til klukkan fimm.

Fjárfest í Valskortinu

Þrátt fyrir gráan dumbung og úðarigningu rétt fyrir sjö í morgun labbaði ég í vinnuna í flíspeysu, nýju strigaskónum og með rauða bakpokann á bakinu. Var 38 mínútur að ganga 3km. Ég var skráð númer 1 á vélina eftir kaffi. Sú sem átti fyrstu vakt á þeim enda sló aðganginn sinn rangt inn of mörgum sinnum. Við gátum hjálpast að við að skipta um aðgangsorð með því að hringja í "vin" og fá leiðbeiningar í gegnum símann en það var ekki nóg því það var búið að læsa aðganginum. Hleypti henni því inn á mínum aðgangi því fyrir lá að framleiða yfir 230 kreditkort fyrir klukkan tíu. Heildarfjöldi allra daglegra korta fór vel yfir 700 kort en þeirri framleiðslu lauk samt rétt rúmlega 12.

Lagði af stað heim áður en klukkan varð hálfþrjú og kom við í Valsheimilinu og keypti mér kort á alla heimaleiki í knattspyrnu- handbolta og körfubolta íslandsmótadeildum. Síminn skráði á mig tvær göngur; fyrst 2,9km í 36 mínútur og svo 0,82km í 12 mínútur. Fékk mér létta hressingu og las tvo kafla í bókinni eftir Dorothty Koomson áður en ég dreif mig í sund. Eins og í gær synti ég aðeins 300m en ég fór fjórum sinnum í kalda pottinn (sem enn er of heitur eða 12°) því ég hitti kalda pottsvinkonum mína. Kom við í Kvikk við Öskjuhlíð á leiðinni heim því Oddur er á vakt í dag til klukkan átta. Þegar heim kom var Davíð Steinn búinn að útbúa kjúklingasallat í kvöldmatinn.

Soðin ýsa

Vissi varla hvað var að gerast þegar vekjaraklukkan hringdi rétt fyrir hálfsjö í morgun. Var þó tiltölulega fljót að átta mig og slökkva á apparatinu í símanum. Rúmum hálftíma síðar labbaði ég af stað í vinnuna og var 34 mínútur að labba 2,8km. Ég var númer 1 á vélinni fram að morgunkaffi, að hlaða inn skrám og "troða" mismunandi kortum, úr einum eða fleiri skrám, og senda af stað. Sú sem var númer 2 á vélinni tók til kortategundirnar sem voru í framleiðslu úr 3 vögnum af fjórum og tók á móti hluta af þeim kortum.  Eftir kaffi fór ég yfir varahlutalagerinn, skráði inn nýlegar sendingar og skráði út hluti sem voru teknir af lager skv. pósti frá yfirferðar/viðgerðarmanni. Allri framleiðslu lauk um tólf en eftir hádegishlé vorum við með verkefni sem entist aðeins til klukkan tvö. Ég var því lögð af stað heim úr vinnu áður en klukkan varð hálfþrjú. Labbaði 3,45km á 44 mínútum. Fékk mér smá hressingu, hringdi í pabba og las smá stund í bók sem heitir, Sykurpúðar í morgunmat eftir Dorothy Koomson. Rétt fyrir fjögur lagði ég af stað með sunddótið mitt og box undir fisk. Kom fyrst við hjá Fiskbúð Fúsa og keypti, ýsu, 2 bleikjuflök og harðfisk. Skömmu síðar var ég komin í Laugardalinn. Hafði plásturinn á hnénu fór 2x6mínútur í kalda pottinn sem var ónvenu heitur eða 12°C, synti 300m og dýfði mér um stund í heitasta pottinn áður en ég fór upp úr aftur. Tók af mér plásturinn áður en ég fór í sturtu og setti á mig nýjan áður en ég klæddi mig, annars hefðu buxurnar blotnað vegna smá vilsu.

Annar í Hvítasunnu

Á laugardagsmorguninn skutlaði ég Davíð Steini á vakt hjá N1 í skógarhjalla (neðra Breiðholti) rétt fyrir tíu. Skrapp í laugardalslaugina en fór reyndar ekki lengra en í sturtuklefann til að þvo á mér hárið. Taldi mig hvorki geta synt né dýpt mér í pottana vegna hruflsins á hnénu. Þannig að ég var komin heim aftur um hálfellefu. Pakkaði niður fyrir 1-2 daga. Rétt fyrir tólf skrapp ég með útfyllt skjal til kjallarabúanna vegna sölu á íbúðinni. Aðeins vantaði undirskrift formanns húsfélags en þar sem hann var ekki heimavið bað ég krakkana um að sækja þá undirskrift og láta mig vita ef eitthvað vantaði á skjalið frá mér, gjaldkera húsfélagsins. Síðan ýtti ég aðeins við Oddi Smára til að geta kvatt hann áður en ég hlóð farangrinum í bílinn. Hringdi í tvíburahálfforeldra mína til að kanna hvort þau væru heima og tækju á mót gestum. Var komin í Fossheiðina rétt fyrir klukkan eitt og var þetta einungis önnur heimsóknin á þessu ári. Aftur á móti var ég að fara í fimmta sinn á Hellu til pabba en aðeins að gista þar í annað skiptið. Það fór svo að ég ákvað að vera tvær nætur. Búin að hafa það mjög gott. Við pabbi skiptumst á að sinna helstu nauðsynjaverkum í eldhúsinu en annars hef ég verið að prjóna lesa og tölvast. Og já ég "mjólkaði" hvítvínsbeljuna í aukaísskápnum tvö kvöld í röð en það er nóg eftir enn.

Sjórinn 9°C

Labbaði 3km á 36 mínútum til vinnu í morgun. Ég var nr.1 á vélinni, í hleðslu og ítroðslu fram að morgunkaffi. Framleiðslan gekk frekar brösuglega og vorum við næstum hálftíma lengur fyrir vikið. Eftir kaffi leysti ég aðra af þeim sem áttu vélarvaktina og var þá í móttöku. Þegar hún kom aftur úr skreppu samdi ég við hana um að fá að halda áfram. Hættum vinnu um tvö leytið og fékk ég far með einni upp í K2 þar sem kveðja átti eina samstarfskonu okkar sem unnið hefur hjá RB sl 23 ár. Ég mætti ein úr K1 í þetta kveðjuhóf. Staldraði við í rúman klukkutíma áður en ég labbaði heim. Heim kom ég fyrir fjögur og byrjaði á því að hella upp á kaffi, fá mér hressingu og hringja í pabba. Spjallaði líka við annan soninn sem var að koma úr Sorpuferð um svipað leyti.

Klukkan hálffimm tók ég til sjósundsdótið til og skrapp í Nauthólsvík. Það var fjara, hraðferð á logninu og öldugangur. Svamlaði um í þessu í uþb 5 mínútur áður en ég skrapp smástund í heita pottinn. Aðeins mega vera 55 en það voru alls ekki svo margir á þeim tíma sem ég var og nóg pláss í búningsklefanum. Margnota innkaupapokar, sem ég geymi í bílskottinu, fuku út og af stað út í buskann að ég hélt. Gerði heiðarlega tilraun til að grípa þá og hlaupa á eftir þeim en datt, reif buxurnar og hruflaði mig á hné og þremur fingrum á hægri fæti og hönd. Pokarnir voru stöðvaðir af runna hinum meginn við götuna og náði ég þeim öllum sem betur fer. En nú er stærsta spurningin hvort ég komist í sund í fyrramálið, hinn eða hinn.

Aðstaðan í Nauthólsvík opnuð aftur í dag

Það var víst opnuð öll aðstaðan í Nauthólsvík klukkan tíu í morgun, klefar, heiti pottur, gufan, útisturtur og að sjálfsögðu sjórinn (sem auðvitað var "opinn" allan tímann), og verður opið alla daga frá 10-19. Ég ákvað hins vegar að bíða amk til morguns með að skreppa í sjóinn og var mætt í Laugardalslaug um fjögur í dag. Skolaði vel af mér göngurykið en ég labbaði 2,96km til vinnu í morgun og 3,5km heim eftir vinnu. Skref dagsins eru komin upp í rúmlega tólfþúsundogfjögurhundruð og þá eru alveg ótalin skrefin milli potta, laugar og gufu. Synti ekki nema 300m en ég fór fimm sinnum í kalda pottinn og endaði í gufunni í rúmar 15 mínútur.

Tíundi sunddagurinn í röð

Vaknaði rétt fyrir klukkan sex í morgun, amk hálftíma áður en vekjaraklukkan átti að hringja. Var óviss með gönguveðrið en það endaði með því að ég labbaði af stað í regnkápu, ecco-götuskóm og með rauðabakpokann, sem ég keypti á Kanarí í fyrra, fullan af "ómissandi" dóti. M.a. aukabolur til að fara í eftir gönguna, hádegisnesti, ein bók, prjónadót og ýmislegt fleira. S-helath í simanum skráði á mig 2,81km (36 mín) göngu sjálfvirkt. Vann í móttöku á vélinni milli 8 og 9:30 en eftir kaffi svaraði ég m.a. fyrirspurnum í síma. Framkvæmdastjórinn mætti á fyrsta fund kortadeildar síðan í byrjun mars. Þessir fundir eru yfirleitt hálfsmánaðarlega nema rétt yfir blá sumarið. Og eftir fundinn fórum við kortadeildin á kaffihúsið Bergmál í Hörpu og gerðum okkur smá glaðan dag áður en við fórum heim. Mér bauðst far heim úr vinnunni sem ég þáði. Stoppaði þó ekki lengi heimavið, nema rétt til að hringja í pabba, taka mig til fyrir sundið og athuga hvað ég ætti helst að koma með heim úr búðinni. Verslaði í Krónunni við Nóatún áður en ég fór í sund. Kom heim aftur um hálfsjö. Davíð Steinn gekk frá vörunum og er að elda kvöldmatinn í þessum skrifuðum orðum.

Ein öld...

...er síðan móðuramma mín, Anna Jónsdóttir heitin, fæddist. Í næsta mánuði verða liðin 20 ár síðan hún dó.

Systir mín hringdi í mig í gærkvöldi og spurði hvort hún mætti biðja mig um að sækja fyrir sig vörur í Vöruhús Górilla við Vatnagarða 22 á næstu dögum. Ég ákvað því að fara á bílnum í vinnuna í morgun og hafði með mér sunddótið. Framleiðslu og endurnýjun lauk fyrir klukkan hálfeitt og öllum öðrum verkefnum löngu lokið þegar við yfirgáfum vinnustaðinn um tvö. Byrjaði á því að sækja pakkann fyrir Helgu áður en ég skellti mér í sund. Fór eina ferð í kalda pottinn áður en ég synti 500m, aðallega á bringunni en ca 30m skriðsund í loka ferðinni. Ég var svo búin að fara þrjár ferðir í kalda þegar kaldapotts vinkona mín mætti á svæðið og ég fór tvær ferðir í viðbót með henni áður en ég fór í gufu og svo uppúr og heim. Davíð Steinn var að leggja af stað í vinnu þegar ég kom heim á sjötta tímanum. Sá hann aðeins tilsýndar. Og Oddur Smári var í sinni vinnu milli 15 og 20. Ég ákvað því að sleppa létt frá eldamennsku og setti aðeins upp nokkur egg sem ég harðsauð. Fékk mér eitt af þeim eggjum en geymi mér hin til næstu daga.

Um daginn fór ég að horfa á seríu sem ber titilinn Normal people sem ég fann í sarpinum hjá sjónvarpi símans premium. Ein bókin sem ég kom með heim af safninu nýliðna helgi er bókin Eins og fólk er flest eftir Sally Rooney. Og eru þættirnir byggðir á þeirri sögu. Hef áður lesið sögu eftir sama höfund; Dragið andann djúpt og ég man að ég las þá bók með mikilli athygli og ánægju.

Sameining

Ég mætti í laugina um hálfeitt í gær. Fór eina ferð í kalda pottinn áður en ég synti 500m (200m á bakinu og 300m bringusund). Síðan fór ég beint í kalda pottinn aftur og var búin að sitja þar í uþb 2mínútur þegar kalda potts vinkona mín birtist, þá að fara sína 3. ferð. Ég sat í 3 mínútur í viðbót með henni og elti hana svo á milli potta næstu 6 skipti áður en ég endaði í gufunni. Heitu pottarnir voru ekki alveg á sínum réttu stillingum, mismunandi mikið kaldari.

Eftir sundið kom ég við í bókasafninu í Kringlunni. Skilaði 7 bókum og fékk mér 6 í staðinn. Er því með átta bækur af safninu núna. Kláraði tvær af þessum 6 strax í gær og er einnig byrjuð á annarri af þeim tveimur sem ég átti ólesnar síðan síðast. Önnur af þeim bókum sem ég kláraði í gær er á tveggja vikna láni; 43 smámunir: Örsögur eftir Katrínu Óttarsdóttur. Hver einasta saga er nákvæmlega 301 orð að lengd. Hin bókin er líka smásögur og heitir Það sem þú vilt eftir Pál Kristinn Pálsson.

Labbaði í vinnuna í morgun á nýju skónum og svo aftur heim um þrjú. Stoppaði stutt heima því ég var búin að mæla mér mót við kalda potts vinkonu mína milli fjögur og fimm. Kom við í Fiskbúð Fúsa á leiðinni í sundið og er búin að steikja þorskhnakka handa okkur Davíð Steini. Oddur Smári er að vinna til klukkan átta og verður að öllum líkindum búinn að borða þegar hann kemur heim af vaktinni.

Þrír réttir í lottó

Það fór nú svo að nýju skórnir voru ekkert gengnir meira til í gær heldur en milli bíls og áfangastaða og aftur heim um hádegisbil. Þrátt fyrir bongóblíðu fór ég nefnilega ekki aftur út. Hluti af ástæðunni er bókin Englar Hammúrabís. Lagði samt bókina frá mér um tíma. Las svo í smá stund eftir að ég fór upp í frekar snemma á laugardagskvöldi eða rúmlega tíu. Var sennilega sofnuð áður en klukkan varð ellefu. Enda vaknaði ég um sex í morgun. Og þá gerðist það sama og í gærmorgun, eftir að hafa reynt að kúra mig niður í uþb klukkustund, gafst ég upp og fór að lesa. Hafði eitthvað verið að spá í að mæta í sund strax um átta en það fór svo að ég gat ekki hætt að lesa fyrr en bókin var alveg búin og þá var klukkan að nálgast hálftíu. Úr þessu þá liggur mér ekkert svo á í sund, en í sund mun ég fara í dag hvort sem það verður eftir hálftíma, upp úr hádeginu eða seinni partinn í dag.

Sund daglega

Í gærmorgun mætti ég í sund rúmlega hálfellefu. Hitti þrjár sem voru að koma upp úr. Þær eru kennarara komnar á eftirlaun og tvær af þeim voru í KÓSÍ. Ég byrjaði á að dýfa mér í tvær mínútur í þann kalda áður en ég synti í tæpar tuttugu mínútur. Fór fimm ferðir í viðbót í kalda pottinn. Heitasti potturinn var lokaður en ég fór ma í sjópottinn og endaði í gufunni. Eftir sundferðina fór ég með bílinn í smurningu og áður en ég fór heim kom ég við í Eins og fætur toga keypti mér nýja strigaskó og fékk sokkapar í kaupbæti. Var með "gömlu skóna" með mér og bað um að þeim yrði fargað. Þá skó keypti ég seinni partinn í janúar í fyrra og hætti að nota þá sjö mánuðum síðar, þá búin að ganga þá upp til agna (sérstaklega vinstri skóinn).

Í morgun var ég vöknuð fyrir klukkan sjö. Fljótlega ákvað ég að lesa um stund. Það endaði með því að ég kláraði bókina BROT. Mætti í laugina um hálftíu, sinnti rútínunni og endaði svo á hálftíma "sólbaði" því ég hitti frændfólk mitt og við tókum tal saman. Áður en ég kom heim stoppaði ég í KVIKK í Öskjuhlíð og fékk Odd til að gefa mér kaffi sem ég drakk á staðnum.

Kaffi Álftanes

Davíð Steinn kom fram úr herberginu sínu rétt á eftir mér upp úr átta í gærmorgun. Hann hafði verið beðinn um að taka aukavakt á N1 í Skógarseli frá 10-19:30 og sagðist vanta far. Ég var hvort sem er búin að mæla mér mót við kaldapotts vinkonu mína um ellefu og sá þarna tækifæri til þess að vera búin að synda áður en við færum að trítla á milli potta. Það var nokkuð margt um manninn í Laugardalnum. Fann þó stóran skáp hinum meginn í skiptiklefanum og þegar ég kom út að laug sundleikfimi í gangi á brautum 7 og 8. Ég byrjaði á því að fara eina ferð í þann kalda áður en ég ákvað að nota braut 1 til að synda smávegis. Klukkan var akkúrat 10:30 þegar byrjaði. Varð að synda rólega á köflum og sveigja stundum fram hjá öðrum þannig að ég var nokkuð viss um að fjórar ferðir fram og til baka voru meira en 400m. Fór aftur í þann kalda og var stödd í heitasta pottinum þegar Hrafnhildur kom. Fór fjórar ferðir í kalda pottinn með henni. Hittum systur hennar eftir eina ferðina og fórum í 42°C pottinn og sjópottinn með henni. Ég endaði smá stund í gufu áður en ég fór heim upp úr klukkan tólf.

Um tvöleytið sótti fyrrum samstarfskona mín og við urðum samferða á Kaffi Álftanes þar sem við hittum tvær aðrar úr kortadeildinni. Aðra af þeim hef ég ekki hitt síðan rétt fyrir miðjan mars en við erum búnar að hringjast á öðru hvoru. Hina hitti ég aðra hvora viku í viku frá 30. mars þegar hún kom inn í A-hópinn eftir að hafa jafnað sig á aðgerð á vinstri úlnlið eftir slæmt brot sem ekki gréri. Við stöllurnar höfðum um margt að spjalla. Vorum allar að koma í fyrsta skipti á þennan stað sem var stofnaður fyrir 4,5 árum. Ég byrjaði á því að fá mér uppáhellt með ábót, fyrstu kaffibollar dagsins, hrákökusneið með rjóma og eplasíder 0%. Fljótlega fengum við vatnsflösku á borðið og þegar ég var búin með kökuna og tvo bolla af kaffi ákvað ég að fá mér eitt hvítvínsglas fyrst ég var nú einu sinni með bílstjóra. Lét eitt glas duga. Við stoppuðum þarna í góða tvo tíma og ákváðum að næsti sameiginlegi hittingur yrði ferð á Flúðir seinni partinn í júlí.

Uppstigningadagur

Er að lesa tvær bækur í einu; Englar hammúrabís eftir Max Seeck og BROT eftir Dóru S. Bjarnason þar sem hún skrifar um "lífshlaup þriggja kynslóða kvenna, lífshlaup mæðgna sem spannar 137 ár". Þá á ég aðeins eftir að opna tvær af átta bókum sem komu með mér af safninu á föstudaginn var. Það eru bækurnar Næstum eins og ástin eftir Ellen Feldman og Sextíu kíló af sólskini eftir Hallgrím Helgason. Skilafrestur þessara bóka er til 14. júní n.k. og það er hægt að framlengja um 30 daga. Hins vegar þarf ég að skila tveimur bókum rétt fyrir næstu mánaðamót og þá gæti ég fallið í freistingu. Mun skila amk 5 bókum af mér, kannski tveimur í viðbót. Því færri bækur sem verða eftir heima þeim mun meiri verður freistingin að líta í kringum sig á safninu. Og það er líklega alveg í góðu lagi ef ég passa uppá fjöldann.

Um eittleytið í gær fór ég gangandi yfir í Blóðbankann til að athuga hvor ég mætti ekki gefa. Fékk engin skilaboð eftir síðustu gjöf, í endaðan janúar, þannig að ég var viss um að ég myndi fá sms og email fljótlega eftir helgi. Ég fékk að gefa, það var stungið í þá hægri. Fann ekki fyrir stungunni og allt virtist ætla að ganga mjög vel. Eftir smá stund fór tækið að kvarta yfir að það væri ekki nógu gott flæði. Því var bjargað snarlega með því að hjúkrunarfræðingurinn studdi við nálina afganginn af tímanum sem það tók að fylla pokann. Þetta hefur aldrei þurft að gera áður. Mér fannst þetta allt í lagi svo fremi sem það tækist að ná skammtinum innan tímamarka sem tókst. Þetta var fimmtugastaogfimmta heimsókninn í þennan góða banka og ef ekki koma nein skilaboð á næstu dögum get ég farið aftur eftir fjóra mánuði.

Harðfiskur

Tíminn milli 8:30 og 13 í gærmorguninn fór í ósköp svipuð "verkefni" og á mánudagsmorguninn. Upp úr klukkan eitt dreif ég mig loksins í sund. Byrjaði á einni ferð í þann kalda og synti svo í rúmar 20 mínútur áður en ég fór aftur í þann kalda. Hitti Hrafnhildi í þeirri ferð og hún var búin að ná einni ferð áður á meðan ég var að klára að synda. Saman fórum við svo 7 ferðir í þann kalda og 6 í heitastas pottinn. Eftir loka ferðina í kalda pottinn fór ég í gufu. Áður höfðum við sammælst um að hittast næst rétt fyrir hádegi á uppstigningadag.

Ég var komin heim um hálffjögur og hellti mér strax upp á tvo bolla af kaffi. Síðan greip ég bók í hönd og las og las og las. Lauk við skammtímalánsbókina, hún var spennandi frá upphafi til enda. Ég las einnig; Manneskjusaga eftir Steinunni Ásmundsdóttur. Sú bók kom út 2018 og ég vissi um leið og ég byrjaði á henni að þá bók hefði ég lesið áður. Ég gat samt ekki lagt hana frá mér.

Hafði plokkfisk í kvöldmatinn handa okkur Davíð Steini. Oddur Smári var að vinna til klukkan átta og kemur sjaldan svangur heim.

Í morgun var ég vöknuð upp úr klukkan sex aðeins fyrr en ég áætlaði svo ég gerði heiðarlega tilraun til að reyna að sofna aftur um stund. Það fór nú þannig að ég var mætt í Laugardalinn klukkutíma síðar. Synti 500m, fór 4x í þann kalda, einu sinni í saltpottinn, einu sinni í heitasta pottinn og endaði í gufunni.

Ýmislegt

Eftir að hafa bloggað og "skroppið" stund í facebook-leikjaheima í gær notaði ég afganginn af morgninum í lestur. Fyrir blogg stakk ég í eina þvottavél og á tólfta tímanum skrapp ég aftur niður í þvottahús til að hengja upp. Þegar ég kom upp aftur hellti ég upp á könnuna og fékk mér einhverja hressingu. Hafði samband við kalda-potts vinkonu mína í gegnum facebook-spjallið. Hún sagðist myndu mæta í sund um eitt og ég ákvað að stíla mína sundferð inn á það. Ég hlustaði á hádegisfréttir og greip í prjónana mína en um leið og fréttirnar voru búnar dreif ég mig af stað. Tók einnig með mér tómt box í aukapoka sem ég geymdi í innkaupapokunum í skottinu á bílnum. Á leiðinni í sturtu hitti ég aðeins á Anítu Hinriksdóttur en pabbi hennar vann hjá RB í mörg ár svo ég hef fylgst extra vel með þessari hlaupadrottningu.  Hrafnhildur var þegar búin að fara eina ferð í þann kalda og á leiðinni í sína aðra ferð þegar ég kom út. Hún sagði að sér fyndist potturinn of kaldur og gæti ekki verið mjög lengi í einu. Potturinn var við neðri mörkin, 6°C, jú í kaldara lagi en líklega þurfti hún bara að æfa sig upp aftur eftir tveggja mánaða hlé. Við töpuðum tölunni á ferðunum í þann kalda, hún hafði samt alltaf eina umfram mig. Vorum alltaf lengur og lengur í hverri ferð og komnar yfir tvær mínútur þegar hún þurfti að fara aftur. Þá synti ég í smá stund eða 300m áður en ég fór upp úr og notaði tækifærið og þvoði mér um hárið. Næst lá leiðin í fiskbúð Fúsa þar sem ég keypti ýsu í soðið, harðfisk og 10 fiskibollur í frystinn. Úr fiskbúðinni fór ég í bílaþvottastöðina við Granda áður en ég endaði í Krónunni. Oddur Smári var farinn í vinnuna þegar ég kom heim. Davíð Steinn svaraði ekki símanum en var að fara að hringja til baka þegar ég kom inn með alla pinklana. Hann gekk frá vörunum á meðan ég gekk frá sunddótinu og svo hellti ég mér aftur upp á kaffi. Allt í allt drakk ég samt aðeins 4 bolla af kaffi í gær.

Spenningur

Það fór nú þannig að ég fór ekki út úr húsi í gær. Framan af var ég að stefna að því að skreppa í smá gönguferð upp úr hádeginu en einhvern veginn leið dagurinn án þess að ég drifi mig af stað. Ég var komin á fætur á níunda tímanum í gærmorgun. Fékk mér lýsi, egg, vatnsglas og kalk áður en ég settist inn í stofu. Þar plantaði ég prjónadótinu og nokkrum bókum á borð en byrjaði á því að setja upp fartölvuna. Slökkti ekki á henni aftur fyrr en á ellefta tímanum. Þá færði ég mig úr sófanum yfir í stofustól og greip bók í hönd. Er ca hálfnuð með skammtímalánsbókina en lauk við að lesa 2 bækur með 100 skemmtisögum af vestfjörðum. Á tólfta tímanum kláraði ég hinn helminginn af hafragrautnum, kaldan með rúsínum. Hellti upp á kaffi og var búin að drekka þrjá bolla fyrir hádegisfréttir. Hellti ekki aftur uppá könnuna. Hringdi í pabba upp úr klukkan tvö. Svo var ég ýmist að lesa, prjóna eða glápa á eitthvað í sjónvarpinu. Um kvöldmatarleytið hitaði upp afgang af hakkrétt og bætti m.a. osti út í. Annar sonurinn hafði þá þegar pantað sér pizzu og laumast með hana inn í herbergið sitt en hinn sonurinn kom fram og hafði fengið sömu hugmynd og ég, ég varð bara á undan.

Mæðginaskreppuferð

Gærmorguninn notaði ég í ýmislegt dundur. Lauk við lestur á síðustu bókinni sem ég tók á safninu þegar það opnaði aftur 4. maí sl. Byrjaði á skammtímalánsbókinni eftir Jussi Adler Olsen sem er rétt yfir 500 bls. en mjög spennandi. Eiginlega hálf hissa á mér að geta lagt hana frá mér eftir að ég var byrjuð að lesa. Rétt fyrir ellefu bjó ég mér til hafragraut, harðsauð egg og hellti upp á nákvæmlega 2 bolla af kaffi. Um svipað leyti kom Davíð Steinn fram. Ég bauð honum að deila með mér en hann afþakkaði í bili. Sagði honum að við Oddur Smári ætluðum að skreppa á Hellu upp úr hádeginu og bauð honum með. Hann þáði það.

Klukkan var byrjuð að ganga tvö þegar við lögðum í hann. Ég tók prjónadótið og tvær bækur með mér í ferðina. Einkabílstjórinn sá um aksturinn. Reynir og Jóna Mæja voru í innliti hjá pabba og nýlega mætt þangað þegar við komum. Ákveðið var að skella í vöfflur. Pabbi var þegar búinn að setja upp kaffið og ég skrapp í búðina eftir þeytirjóma og tók svo að mér að standa vöffluvaktina þegar ég kom til baka. Það var góð stemming í eldhúsinu og bræðurnir skiptust á um að segja sögur. Oddur var að heimsækja afa sinn í fyrsta sinn á þessu ári, Davíð Steinn í annað sinn og þetta var fjórða heimsóknin mín. Jóna og Reynir kvöddu um hálffimm. Davíð Steinn hjálpaði afa sínum að sækja allar myndir úr tölvunum þannig að hægt væri að sýna þær á tjaldi í gegnum myndvarpa og usb eða snúrutengi. Ég greip í prjónana mína um stund.

Kvöddum pabba á sjöunda tímanum. Ég las alla leið í bæinn. Komum við á KFC því Davíð Steinn bað um að fá að splæsa á okkur fjölskyldutilboði. Hann var svo búinn að mæla sér mót inn í tölvuheima um átta leytið. Oddur Smári fékk sína tölvu úr viðgerð á föstudaginn var. Eftir að hafa farið með hana tvisvar fannst loksins ástæða bilunarinnar. Takkinn til að endurræsa vélina stóð á sér og var alltaf að trufla. Taka þurfti þann hnapp úr sambandi.

Sumardekkin loksins komin undir

Í ljósi aðstæðna ákvað ég að vera ekki að "troða" mér á milli heldur panta tíma til að fá sumardekkin undir og setja nagladekkinn á dekkjahótel í staðinn. Þegar sú pöntun fór fram var nokkuð langt liðið á apríl og engir tímar lausir fyrr en í viku 20. Ég vissi að ég væri að standa vaktina á K1 með A-hópnum en mér fannst endilega eins og dagurinn sem ég valdi á netinu væri laugardagur, en ekki föstudagur. Það er ekki í boði að panta tíma nema á virkum dögum. Ég ákvað samt að halda tímanum og semja við Odd sem þurfti að vakna um átta í gærmorgun til að mæta með bílinn í bókaðan tíma kl 8:30 hjá N1 í Fellsmúla hvar sumardekkin hafa verið á hóteli síðan í nóvemberbyrjun.

Ég labbaði milli heimilis og vinnu fimmta daginn í röð. Skrefafjöldi virku daganna var aldrei undir 12800 skrefum og fór mest upp í tæp 15000. Við A-teymið í kortadeild rúlluðum upp föstudagsvaktinni, skrifuðum skýrslu til B-hópsins, sótthreinsuðum helstu snertifleti á starfsstöðvum og gátum samt farið snemma heim. Ég lagði af stað um hálfþrjú og kom við á Lækjartorginu hjá Lilju vinkonu sem var með opinn sölubásinn sinn í 5. sinn á þessu tímabili. Hún var ein af þremur. Gott að hitta aðeins á hana en við slepptum því að faðmast.

Kom heim áður en klukkan varð hálffjögur. Hringdi í pabba og spjallaði um stund við hann. Hann er að undirbúa rúðuskipti á þremur stöðum. Hann er loksins búin að fara í ómskoðunina á blöðruhálskirtlinum, fékk lyf við sýkingunni og á að mæta aftur í næsta mánuði. Hann fékk amk tvenns konar lyf en hætti eiginlega strax á einu lyfinu því það virkaði þveröfugt við það sem hann þarf og vill því það var eins og skrúfað væri frá en ekki fyrir.

Um fjögur skrapp ég á bílnum á bókasafnið upp í Kringlu. Skilaði tveimur af þremur bókum. Önnur af þeim bókum var á skammtímaláni og ég fékk póst frá safninu í gær um að skiladagur væri að nálgast. Hefði samt alveg haft alla helgina og fram á mánudag. En líklega hefði ég annað hvort átt að bíða með að skreppa á safnið í gær eða amk fara gangandi því sennilega hefðu komið færri bækur með mér heim fyrir vikið. Tók semsagt 8 misþykkar bækur og ein af þeim er á skammtímaláni; Frá deild Q: Fórnarlamb 2117 eftir Jussi Adler Olsen.

Áður en ég kom inn úr bílnum eftir bókasafnsferðina hringdi ég í systir mína. Hún mun byrja í sumarfríi aðeins á undan mér en þau Ingvi, Bríet og hundarnir verða á Hellu frá því 6. eða 7. júní n.k. og fram eftir júní mánuði. Bríet verður amk mánuði lengur en hún er búin að fá sumarvinnu hjá SS á Hvolsvelli.

Maí að verða hálfnaður

Þegar ég rumskaði fyrst upp úr klukkan fimm í morgun heyrði ég að úti var hellirigning. Hugsunin um að velja það að fara á bíl í vinnuna skaust upp í kollinn. Þegar ég fór á fætur einum og hálfum tíma seinna var himininn vissulega þungbúinn en það leit ekki út fyrir að vera mikil rigning svo ég ákvað að fara gangandi í vinnuna. Valdi meira að segja að fara leiðina sem er 3,5km. Það var smá úði á leiðinni en ég varð ekkert holdvot þótt ég væri aðeins í úlpu en ekki regnkápunni.

Daglegri framleiðslu lauk rétt fyrir tólf og við sem vorum á framleiðsluvaktinni náðum meira að segja að framleiða 300 stk af rúmlega sextánhundruð kortum sem eftir var að endurnýja. Afganginn framleiddum við strax eftir hádegishlé og kláruðum fyrir hálfþrjú. Var komin heim fyrir klukkan fjögur.

Í vinnunni milli 7:35 og 18:15

Þegar ég labbaði í vinnunna í morgun átti ég alls ekki von á að vera lengur en til klukkan þrjú. Ég var í bókhaldinu í dag og það fór stór hluti af morgninum að leyfa tæknimanni að yfirtaka tölvuna mína til að hann gæti hjálpað mér að tengjast teams. Það tókst rétt fyrir tólf. Um svipað leyti mætti viðgerðarmaður frá OBA mjög svo óvænt á svæðið til að taka yfirferð á vélinni. Það var akkúrat verið að ljúka við daglegu framleiðsluna og það var ákveðið að geyma afganginn af endurnýjuninni til morguns og "afhenda vélina til yfirferðar". Hinar tvær í vinnuhópnum mínum voru báðar með ákveðnar áætlanir utan vinnu seinni partinn svo ég tók að mér að sitja yfir. Hinar voru farnar fyrir þrjú en klukkan var farin að ganga fimm þegar ég labbaði heim úr vinnunni.

2x3,5km til og frá vinnu í dag

Rumskaði einhvern tímann milli fimm og sex í morgun við mikinn fuglasöng. Hefði helst þurft að fara á salernið en ég náði kúra í tæpa klukkustund. Var komin á fætur fyrir hálfsjö og lögð af stað gangandi í vinnuna sjö mínútum fyrir sjö. Gat ekki prentað út út tölvunni minni svo ég ákvað, líkt og í gær, að vera í framleiðsluteyminu í dag. Allt daglegt plús rúmlega 50 í dk-end var framleitt fyrir hádegi og milli eitt og hálfþrjú framleiddum við tæplega 1200 í viðbót í endurnýjuninni. enn eru óframleidd ríflega sextánhundruð kort. Prentaramálin voru lagfærð um hádegisbil þannig að á morgun get ég verið í bókhaldinu.

Hulda frænka var farin þegar ég kom heim úr vinnunni upp úr klukkan hálffjögur. Davíð Steinn sagði að hún hefði farið "áðan". Rétt fyrir fjögur fékk ég sms frá frænku minni þar sem hún þakkaði fyrir sig. Hringdi í pabba um fjögur leytið og hann er búinn að fá staðfestingu á því að mæta í ómskoðun á blöðruhálskirtli hér í Reykjavík rétt fyrir hádegi á morgun.

Vinnuhópur A að vinna í K1 þessa vikuna

Ég vaknaði við vekjaraklukkuna um 6:20 í morgun. Labbaði af stað í vinnuna rétt fyrir sjö og fékk skráðan á mig 38 mínútna göngutúr uþb 3km. Vinnutölvan mín er ekki mjög samvinnuþýð og neitar t.d. að prenta út svo ég ákvað að ég væri önnur af þeim sem sæi um framleiðslu í dag. Lukum við allt daglegt og eina litla skrá úr dk-endurnýjun fyrir klukkan tólf. Framleiddum vel yfir 900 kort í viðbót af endurnýjuninni eftir hádegi. Hættum framleiðslu upp úr klukkan hálfþrjú. Frá kl 15:07-15-49 var ég á leiðinni heim, 3,3 km. Heildarskref dagsins eru komin yfir 13500.

Í gærmorgun skrapp ég með systurdóttur mína upp í Grafarvog að sækja afganginn af dótinu sínu heim til mömmu fyrrverandi kærasta síns. Eftir hádegi bjó ég til vöfflur en sagði svo við Davíð Stein að hann yrði að taka að sér að elda kvöldmatinn. Hann gerði það þrátt fyrir að vera í e-s konar liða-spil-keppni á netinu frá klukkan fimm síðdegis. Maturinn var tilbúinn upp úr klukkan níu en sjálfur komst hann ekki til að borða fyrr en á ellefta tímanum.

Hulda

Rétt upp úr hádegi á föstudaginn dreif ég mig loksins af stað í leiðangur á bílnum. Fór fyrst að versla og því næst keypti ég þrif fyrir bílinn og keyrði í gegnum þvottastöð þar sem m.a. felgurnar voru þrifnar sérstaklega. Næst lá leiðin að Atlantsolíu við Sprengisand. Bensínnálin sýndi að það var enn fjórðungur úr tanki eftir á bílnum og í mælaborðinu gat ég nálgast þær upplýsingar að það gæti dugað mér í amk 180km. Helga systir hringdi þegar ég var á Miklubrautinni við Hlíðar til að tilkynna mér að Hulda væri að koma í bæinn. Það var ég þegar búin að frétta í gegnum annan soninn. Eftir að hafa fyllt á bílinn dreif ég mig heim. Fékk stæði fyrir framan heima og byrjaði á því að reyna að hringja í Odd svo ég gæti beðið þá bræður um að koma til móts við mig og taka við eitthvað af vörunum. Oddur heyrði ekki í símanum sínum svo ég sló á þráðinn til Davíðs Steins og það var Hulda sem svaraði. Hún kom skilaboðunum til bræðranna en það var aðeins Oddur sem kom á móti mér. Það var reyndar alveg nóg þegar til kom. Hann gekk frá vörunum. Hulda þurfti að skreppa fljótlega því hún hafði alveg gleymt að pakka niður nærflíkum þrátt fyrir að ætla að gista í þrjár nætur. Hún fékk far með vini í Smáralindina en klukkutíma síðar hringdi hún í Odd og bað hann um að sækja sig í Kringluna. Þeir bræður fóru báðir að sækja frænku sína, gangandi.

Upp úr klukkan sex sótti sjósundsvinkona mín mig og við skelltum okkur í sjóinn í Nauthólsvík í ca. 17 mínútur. Það var flóð og að flæða meira að svo ekki þurfti að fara mjög langt útí til að hætta að botna. Það var eitthvað af fólki í sjónum, ekki margir þó, og um sama leyti og við vorum að koma að kom kona sem greinilega var vön. Hún fór berfætt og vettlingalaus útí og var engu að síður amk 5 mínútum lengur ofaní sjónum heldur en við Helga Rún. Þegar ég kom heim aftur var Davíð Steinn að sinna kvöldmatargerð og tvær vinkonur Huldu voru í heimsókn. Vinkonurnar voru farnar áður en við borðuðum en Hulda fór og hitti þær einhvers staðar annars staðar á spilakvöldi. Frænka mín sagðist ætla að koma heim um tíu þegar hún fór en var ekki kominn heim þegar ég fór að sofa á tólfta tímanum.

Vaknaði rétt fyrir átta í gærmorgun. Fór á fætur fljótlega og sá þá traustar vísbendingar um að Hulda hafi skilað sér í hús. Ég ákvað að fá mér göngutúr upp í Kvikk þar sem Oddur er á vakt  milli 7:30 og 16 þessa helgina. Hann bauð mér upp á kaffi og ég sat og spjallaði við hann í hátt í tvo tíma á milli þess sem hann afgreiddi kúnnana. Þegar ég kom heim var Hulda vöknuð. Um eitt lögðum við frænkur af stað út úr bænum og vorum við komnar austur á Hellu rúmum klukkutíma síðar. Ég var að heimsækja pabba minn í þriðja sinn á þessu ári en Hulda var ekki búin að hitta afa sinn síðan 22. ágúst 2018. Það voru fagnaðar fundir. Pabbi var að sinna garðverkum en við frænkur fórum fljótlega inn og hjálpuðumst að við að útbúa upprúllaðar pönnsur. Eftir kaffitímann hjálpaði Hulda afa sínum að tengja myndasýningavél þannig að hún gat varpað myndum úr tölvu yfir á tjald. Hulda þurfti reyndar að fá smá aðstoð við þetta frá pabba sínum sem gat hjálpað í gegnum Facetime.

Við frænkur vorum komnar í bæinn aftur á sjöunda tímanum. Ég ætlaði að bjóða öllum krökkunum út að borða á uppáhaldsstað Huldu. Oddur vissi af því en var engu að síður búinn að gera aðrar ráðstafanir, var ekki í stuði til að koma með okkur hinum á Alibaba.

Sól og blár himinn

Báðir synir mínir voru komnir á fætur 2-3 tímum fyrir hádegi í gær. Annar þeirra átti endurkomutíma á heilsugæslunni vegna sveppasýkingarinnar sem hann var með um daginn. Hinn var ekki með nein plön nema "hamast" í tölvunni og hann var byrjaður að spila við einhvern upp úr klukkan níu. Tölvan hans Odds er í viðgerð en hann "leikur" sér þá bara í símanum í staðinn. Annars fór hann eina ferð í Sorpu í gær á meðan hinn samþykkti að skúra inni á baði. Ekki alveg jöfn skipti það þannig séð. Rétt fyrir fimm lánaði ég bræðrum bílinn og þeir fóru í 6 ára afmæli systur sinnar.

Ég kom ýmsu í verk í gær en ég hafði líka góðan tíma í alls konar. Vel gengur að lesa bækurnar af safninu. Sé fyrir mér að það hafi verið magnað að umgangast Indriða miðil þessi fáu ár áður en hann veiktist alvarlega og féll frá. Í raun og veru var hann "rannsakaður" af félagsskap sem kallaði sig Tilraunafélagið. Félag sem síðar varð að Sálarrannsóknarfélagi. Annar af þeim sem tók efnið saman er meðlimur í Lífsspekifélaginu og er stundum með erindi þar. Fleiri hafa skrifað um Indriða í gegnum tíðina m.a. Þórbergur Þórðarson í bók um Endurminningar Brynjólfs Þorlákssonar söngkennara.

Fimmtudagsmorgun

Ég fór fyrr uppí rúm í gærkvöldi heldur en í fyrrakvöld. Las að sjálfsögðu í einhverja stund en var örugglega sofnuð um ellefu. Vissi næst af mér klukkan korter yfir sjö í morgun. Að vísu rámar mig í einhverjar draumfarir, frekar miklar, en ekki nógu skýrar til að segja betur frá þeim.

Annars er ég að lesa allar þrjár bækurnar af safninu í einu. Eina af bókunum hef ég lesið áður, ég vissi alveg af því;  Fimmti riddarinn eftir James Patterson. Þriðja bókin er 1983 eftir Eirík Guðmundsson. Ágætt að dreifa athyglinni á milli bóka.

Lítið af frétta að öðru leyti. Hélt mig heimavið í gær, bara afþví bara. Hefði auðvitað átt að skreppa í smá gönguferð en einhvern veginn leið dagurinn, og hann leið ágætlega hratt þrátt fyrir að hafa byrjað mjög snemma, án þess að ég færi út úr húsi. Stundum er þetta bara svona. Báðir strákarnir fóru út á tímabili. Oddur fór í vinnu en Davíð Steinn að hitta vini.

Morgunstund

Fór heldur seinna að sofa í gærkvöldi en undanfarið, samt ekki eftir miðnætti. Klukkan var þó líklega orðin hálftólf. Og svo vakna ég fyrir klukkan sex í morgun, ekki við fuglasöng, heldur bara afþvíbara. Hugsanlega hefði ég getað kúrt mig niður aftur, sérstaklega eftir ferð á salernið, en í staðinn klæddi ég mig fyrir klukkan sjö og skipti um á rúminu mínu. Finnst samt aðeins of snemmt að trítla niður í þvottahús og setja í þvottavél. Hér sit ég því inni í stofu með kjöltutölvu sem pabbi á, búin að bursta tennurnar en ekki búin að fá mér neitt hvorki lýsi né neitt annað. Skrýtin skrúfa hún ég. En það er líka í góðu lagi.

Í gærmorgun fór ég ekki á fætur fyrr en um hálfníu. Eftir að hafa pissað og tannað settist ég beint inn í stofu, kveikti á þessari sömu tölvu og byrjaði á því að blogga. Klukkan var farin að ganga ellefu áður en ég slökkti og gekk frá tölvunni, skipti um sæti úr sófanum yfir í stól og tók mér bók í hönd. Það var ekki fyrr en klukkan var farin að halla í tólf að ég hellti mér upp á kaffi og fékk mér hressingu. Hafði samt einhvern tímann í millitíðinni tekið inn matskeið af lýsi. Á meðan hádegisfréttir voru sagðar felldi ég síðustu lykkjurnar af græn-svörtu afgangasjali sem ég hef verið að prjóna og gekk frá öllum 16 endunum. Stuttu síðar dembdi ég mér í vöfflubakstur, átti helming af soppu síðan í fyrradag sem urðu 7 vöfflur. Strákarnir "hjálpuðu" mér við að sporðrenna þessu.

Oddur Smári fór í vinnuna sína rétt fyrir þrjú. Davíð Steinn var heima í allan gærdag. Um hálffjögur sótti sjósundsvinkona mín mig. Það var flóð og sjávarhiti líklega um 6°C. Við svömluðum um í tæpar tuttugu mínútur og lentum svo í smá umferðarsultu á Flugvallarvegi og Bústaðavegi. Langt síðan hefur myndast svona sulta. Þegar ég kom heim fór ég beint í sturtu og notaði tækifærið og þvoði á mér hárið.

Tilhlökkun og von

Ef allt gengur upp og fer á besta veg þá er góður möguleiki á því að ég komist loksins í sund aftur annan mánudag. Ég krosslegg bæði fingur og tær en held ró minni að öðru leyti. Það hefur gert mikið fyrir mig að hafa fundið leið til þess að stunda sjóböð öðru hvoru síðustu vikur. Það á ég sjósundsvinkonu minni, Helgu Rún, að þakka. Hún á fimm "stakka" sem hún hannaði og saumaði sjálf og kallar yfirtökuflíkur því þetta var notað til að bregða yfir leikara sem voru í pásum frá útikvikmyndatökum eða eitthvað svoleiðis. Helga Rún byrjaði að stunda kælingar í sjónum í fyrra sumar og þegar ég kynntist henni í nóvember sl. mætti hún þrisvar í viku. Ég hitti hana oftast á mánudögum. Framan af hausti fór ég tvisvar í viku í sjóinn en ég hafði sundið og í október fækkaði ég ferðum um helming í sjóinn og valdi að mæta á mánudögum. Fór þó stöku sinnum á miðvikudögum ef ég hafði ekki komist á mánudeginum.

Ég labbaði með fjórar bókasafnsbækur í bakpoka á Kringlusafnið um þrjú í gærdag. Þær bækur var ég beðin um að setja ofan í kassa. Valdi mér þrjár bækur í staðinn. Ein af þeim bókum er ný með 14 daga útláni og er um Indriða Indriðason miðil (1883-1912). Ég var einnig með tómt plastbox með mér í bakpokanum. Úr Kringlunni labbaði ég því næst yfir í Fiskbúð Fúsa og keypti mér ýsu í soðið og tvo pakka af harðfisk, óbarinni ýsu áður en ég labbaði aftur heim.

Vöndum okkur

Í dag hefur aðeins verið slakað á þeim fjöldatakmörkunum og sumum reglum sem gilt hafa í nokkrar vikur vegna Covid-19. Veit til þess að ein samstarfskona mín var búin að panta tíma í klippingu, sjúkraþjálfun og fótaaðgerð allt í þessari viku. Þrátt fyrir að 2 metra regla gildi almennt ennþá, þá má þessi starfssemi fara í gang aftur en allir þurfa að fara extra varlega og muna þvott og sótthreinsun. Þá mega dagforeldrar, leikskólar og grunnskólar starfa eðlilega með þeim formerkjum að starfsfólkið haldi áfram að passa sig eins og kostur er. Það eru ekki mörg virk smit í okkar samfélagi en á meðan einhver smit eru enn í gangi verður að fara gætilega. Þetta vitum við örugglega velflest þar sem lögð hefur verið áhersla að hafa allt upp á borðum og greina frá og svara spurningum á daglegum upplýsingafundum almanna varna, sóttvarnar- og landlæknis embætta. Þessir undanfarnir mánuðir hafa verið mjög einkennilegir en ég er sannfærð um að það var brugðist rétt við svo afstýra mætti veldisvexti og ofurálagi. Álagið á heilbrigðiststéttina var mjög mikið á tímabili en þar sem allir unnu saman voru fundnar nýjar leiðir sem sumarhverjar munu vafalaust vera komnar til að vera. Ég vona að þetta skref í afléttingu gangi það vel að hægt verði að komast í sund aftur eftir þrjár vikur. Reyndar er ég það heppin að hafa fundið leið til að komast í sjóinn stöku sinnum og það gerir heilmikið. Ég veit að það er stór hópur af fólki sem vant var að fara daglega í sund eða mjög þétt og reglulega sem saknar þess að geta ekki stundað sína rútínu. Margt af eldra fólkinu stirðnar upp, sérstaklega þeir sem eiga erfiðara með að hreyfa sig um þegar þeir eru ekki í vatni. En ég get þó skroppið í bókasafnið upp í Kringlu á eftir, það opnar klukkan tíu. Förum varlega en gleymum samt ekki að lifa lífinu lifandi. Og eitt að lokum, verð að monta mig yfir því að ég náði skrefum gærdagsins yfir 12000, enda fór ég í langan göngutúr réttsælis um Öskuhlíðina milli klukkan þrjú og hálffimm í gær.

Sjósundsmorgunn

Í gær skráði síminn á mig rétt tæplega 12000 skref alls. megnið af þeim skrefum safnaðist í einum löngum göngutúr seinni partinn milli klukkan 15:15 og 16:44, 6,79 km rangsælis í kringum Öskjuhlíð. Ekkert stopp á leiðinni og meðalhraði skráður 4,5km á klst.

Davíð Steinn tók að sér að elda úr tveimur þorskhnakkaflökum í gærkvöldi, mjög gott hjá honum. Ég ákvað að fá mér hvítvínsglas eftir mat. Settist með það inn í stofu og hlustaði og horfði á "Heima með Helga" á Sjónvarpi Símans. Þetta var víst síðasti þátturinn og ég sat límd við skjáinn. Hef ekki horft á áður en mér skilst að hægt sé að ná í hina þættina og horfa á þá alla ennþá. Hver veit nema ég geri það.

Sjósundsvinkona mín sótti mig rétt upp úr klukkan níu í morgun og við skelltum okkur í sjóinn við Nauthólsvík í 17 mínútur. Það var svo mikil fjara að við vorum "nánast hálfnaðar" til Kópavogs (eða þannig) þegar við hættum að botna. Hressandi busl eins og alltaf.

Annars er ég spennt fyrir því að líklega eru sum bókasöfnin að opna aftur núna eftir helgi.

Laugardagsmorgunn

Skref gærdagsins voru innan við 7000 og náðu því ekki einu sinni helming fjöldans sem síminn skráði á mig á fimmtudaginn. Skrefin hefðu reyndar vel geta verið miklu færri eða eitthvað fleiri. Ég skrapp í rúmlega hálftíma göngutúr um miðjan dag í gær, labbaði hring um hverfið og fór m.a. um Klambratún. Ég fór líka nokkrar ferðir í þvottahúsið, heilmikill tröppugangur það. Gærdagurinn leið ótrúlega hratt miðað við að ég var svo sem ekki að gera neitt sérstakt. Greip þó í prjónana um stund, las, vafraði um á netinu og ýmislegt fleira. Horfði t.d. á 2 Criminal Mind þætti með Oddi. Davíð Steinn skrapp í afleysingar á N1 við Stórahjalla frá fjögur til átta.

Uþb 17 mínútur í sjónum

Hlustaði á fréttir klukkan sex í morgun. Slökkti á útvarpinu strax að loknum fréttum og snéri mér á hina hliðina. Mér tókst að slaka á, held þó að ég hafi ekki beint sofnað aftur, og kúrði mig niður í næstum einn og hálfan tíma. Þá reis ég úr rekkju, bjó um rúmið, fór í slopp og eftir að hafa sinnt morgunverkunum inni á baði eldaði ég einn góðan skammt af hafragraut handa mér. Rétt fyrir níu setti ég hárið í hnút og teygju og sundhettuna á mig, fór í sundbol, sjósundssokka og strandskó. Sundvettlingana og handklæði setti ég í poka. Síminn, fjölmiðlamælirinn, húslyklar og sokkapar fóru í stóru vasana á yfirtökuflíkinni og þegar ég var komin í hana og ullarhúfu yfir sundhettuna taldi ég mig tilbúnar og fór út með handklæðið og sundvettlingana í poka og þurfti aðeins að bíða í eina mínútu eftir sjósundsvinkonu minni. Það var fjara í Nauthólsvík en hún var ekki nærri því eins mikil og seinni partinn á þriðjudaginn var, síðast þegar við fórum. Við áætluðum að sjórinn væri eitthvað um 5°C, svalur en mjög svo notalegur. Svömluðum um í sjónum í rétt tæpar 17 mínútur. Það var ekki fyrr en ég var komin úr öðrum sjósundssokknum og strandskó og var að þurrka á mér tærnar að ég fattaði að ég hafði ekki tekið með mér skó. Ég fór úr hinum sjósundssokknum og strandskónum og klæddi mig svo aftur í strandskóna. Það var betra heldur en að labba berfættur eða á sokkaleistunum. Þetta var, held ég, sjötta sjósundsferðin frá því að morgni annars dags páska, 13. apríl sl. og er þetta í fyrsta skipti sem ég gleymdi að taka með mér skó.

Gönguforritið í símanum mínum taldi yfir 14.000 skref í gærdag, enda labbaði ég bæði til og frá vinnu, mörg skref í vinnunni og svo fór ég tvisvar sinnum í þvottahúsið eftir að ég kom heim seinni partinn í gær. Það skráðust tveir "göngusprettir" á mig í gærmorgun; fyrst 0,98km í 13 mínútur frá kl. 6:58 og svo 1,9km í 27 mínútur frá kl 7:12.  Labbaði í gegnum Klambratún, eftir Gunnarsbraut, smá spöl á Snorrabraut, Laugaveg, Hverfisgötu. Man ekki hvaða götu ég beygði til að fara alla leið á Skúlagötuna en ég var komin á þá götu aðeins áður en ég labbaði framhjá bakaríinu sem þar er. Það var nóg að gera í vinnunni, enda mánaðamót framundan og klukkan var orðin meira en hálffimm áður en ég rölti heim upp Ingólfsstræti, Skólavörðustíg, niður Eiríksgötu að Snorrabraut yfir á Bústaðaveg, undir brú og labbaði svo eftir Eskihlíð að Reykjahlíð þar sem ég beygði strax inn þar sem Drápuhlíð byrjar og alla leið heim.  Alls 2,8km á 41 mínútu.

Labbað í vinnu, lengri leiðina

Síminn skráði á mig tvo göngutúra á leiðinni í vinnuna í morgun. Fyrst í 17 mínútur 1,3km frá kl. 6:52 og svo í 29 mínútur 2,2km frá klukkan 7:10. Samt man ég ekki eftir að hafa stoppað neitt á leiðinni. Sinnti bókhaldinu í vinnunni, amk til hádegis. Fljótlega eftir hádegi varð ég að biðja aðra samstarfskonu mína að ganga frá sumu sem er í verkahring þess sem sinnir bókhaldinu. Það var verið að reyna að setja upp ákveðið forrit í tölvunni minni, netmaður sem vann heiman að frá sér, "yfirtók" vélina að hluta. Eftir tuttugu mínútna "fikt" bað hann mig um að endurræsa tölvuna og það tók mjög langan tíma. Þannig að allur tíminn frá klukkan eitt til klukkan þrjú fór í þetta.

Einkabílstjórinn sótti mig í vinnuna um hálffjögur og hann skutlaði mér í Krónuna við Granda. Þegar ég var búin að versla kom hann við í vinnunni sinni til að undirrita vinnusamning frá 1. júní n.k. áður en við fórum heim. Hann sá um að ganga frá vörunum. Ég hringdi í pabba sem svaraði ekki en hringdi fljótlega til baka. Hann hafði verið úti á palli.

Vinnuvikan hálfnuð

Í gærmorgun vaknaði ég nokkuð á undan vekjaraklukkunni. Labbaði af stað í vinnuna rétt fyrir klukkan sjö og var 36 mínútur að ganga 2,7km. Daglegri framleiðslu lauk um tólf en eftir hádegi var send til okkur endurnýjun upp á 999 kreditkort. Ein skrá með einu korti kom ekki yfir á framleiðsluvélina því um var að ræða löngu útrunna tegund. Framleiddum ca 2/3 af þessu skammti, hættum upp úr þrjú. Ein af okkur þremur gat farið heim um hálffjögur en við hinar tvær vorum að bíða eftir að hægt væri að ljúka ákveðnu verkefni. Klukkan var farin að ganga fimm þegar hægt var að vinda sér í það mál. Hin samstarfskona mín í A-hópnum skutlaði mér heim upp úr klukkan fimm.

Ég var líka vöknuð á undan vekjaraklukkunni í morgun. Gaf mér mjög góðan tíma í morgunverkin og fór svo á bílnum í vinnuna þrátt fyrir ágætis gönguveður. Ýmislegt skondið kom upp í framleiðslumálunum í dag, vélin var í lagi en mistök voru gerð bæði í plast- og formanotkun fyrir ákveðna tegund. Mistökin voru leyst farsællega þannig að ekkert fer frá okkur rangt afgreitt.

Kom heim rétt fyrir hálffjögur. Oddur Smári var með smá óþægindi v/sveppasýkingarinnar en hann fór engu að síður á vaktina sína rétt fyrir fjögur. Davíð Steinn var ekki heima og er ekki kominn heim enn. Í gær fór hann í mjög langan göngutúr en ég held að hann hafi verið kallaður á aukavakt í dag. Sjálf var ég sótt upp úr klukkan fjögur og þá var ég tilbúin í sjósundsferð. Vorum næstum korter útí. Fleiri voru í sömu erindagjörðum en ekkert svo margir.

Annars er ég að lesa aftur bókina Ég heiti Ísbjörg ég er ljón eftir Vigdísi Grímsdóttur.

Algert logn

Aðfaranótt laugardagsins, um þrjúleytið, rumskaði ég við það að annar sonurinn virtist vera kominn með í magann. Ég sofnaði aftur um stund en þegar nær dró morgni fór ég fram til að athuga málið betur. Oddur var inni á salerninu með kviðverki og flökurtilfinningu en þetta var samt eitthvað annað en gubbupest og þetta bráði ekki af honum. Upp úr átta hafði hann samband við heilsuveru og fékk símanúmer til að hringja í til að lýsa einkennum og fá leiðbeiningar. Úr varð að ég skutlaði honum upp að bráðamóttöku í Fossvogi og skildi hann þar eftir. Hann var þar í uþb 3 tíma. Fékk verkjastillandi, það var tekið blóð og þegar verkirnir dvínuðu og hann gat slakað á og pissað var tekið þvagsýni. Það tekur tíma að fá úr blóðprufum en við skoðun á þvagsýninu kom í ljós að hann er með sveppasýkingu. Þegar ég sótti hann upp úr klukkan tólf fórum við beint í Lyfjaver þar sem hann leysti út sveppalyf og verkjalyf. Hann var aumur frameftir gærdeginum en hann náði að sofa vel í nótt og gat mætt í vinnu í morgun.

Rétt upp úr níu í morgun sótti sjósundsvinkona mín mig og við skelltum okkur í Nauthólsvík. Það komu ein hjón að á sama tíma svo við vorum fjögur að svamla í spegilsléttum sjónum á flóði. Við vinkonurnar vorum út í í tæpt korter. Hún skilaði mér heim rétt fyrir tíu og við ætlum að hafa það á bak við eyrað að athuga með seinniparts sjóferð einhvern tímann í vikunni. Hún upplýsti mig annars um það að ég væri búin að þekkja foreldra hennar lengur en hana. Mamma hennar sá myndina sem póstuð var á sumardaginn fyrsta og sagðist þekkja mig. Ekki skrýtið því foreldrar hennar eru hluti af "morgunfólkinu" mínu í laugardalslauginni. Mikið sem heimurinn er lítill og vá hvað ég er heppin með samferðafólkið í kringum mig.

Fuglasöngur á fimmta tímanum

Já, ég rumskaði fyrst eitthvað um hálffimm í morgun við mikinn fuglasöng. Náði að snúa mér á hina hliðina, útiloka umhverfishljóðin og sofna aftur. Vissi næst af mér um sex og upp úr klukkan sjö var ég eiginlega glaðvöknuð svo tilhvers að hanga upp í rúminu. Um miðjan dag í gær skellti ég mér í vöfflubakstur. Bjó til uppskrift úr 6dl af heilhveiti, með 3 eggjum, smá kaffislettu, 1dl af olíu, ab-mjólk, smá af grískri jógúrt, 2tsk lyftiduft, 1tsk matarsóti og 2tsk vanilludropar. Gerði 6 vöfflur og geymi hinn helminginn af soppunni þar til í dag eða á morgun. Davíð Steinn tók að sér að að útbúa kvöldmatinn, alveg óumbeðið, og bjó til kjúklingasallat. Hann verður sífellt flinkari við matargerðina. Nú þarf ég endilega að fara að hvetja Odd Smára í að æfa sig svolítið í svona eldhúsverkum.

Lauk við að lesa YOSOY í gærkvöldi. Nú er spurning hvort ég finni ólesna bók í fórum mínum eða hvaða bók/bækur ég ætti að lesa aftur.

Sumardagurinn fyrsti

Klukkan var örugglega ekki nema hálfellefu þegar ég sofnaði í gær enda rumskaði ég rétt fyrir klukkan sex í morgun. Náði að kúra mig niður til klukkan að ganga átta áður en ég fór framúr til þess að létta á blöðrunni. Skreið upp í aftur og las í næstum klukkustund. Þá fór ég í morgunslopp og fram í eldhús til að búa mér til hafragraut. Upp úr níu var ég nánast búin að græja mig upp í sjósundsferð. Sjósundsvinkona mín sótti mig rétt fyrir hálftíu og við vorum tæpar tólf mínútur á svamli í Nauthólsvíkinni. Ætluðum eiginlega ekki að vera alveg svona lengi en við gleymdum okkur á spjallinu. Á meðan við vorum útí kom einn maður, kastaði á okkur kveðju og synti svo í burtu. Hittum hann svo aðeins aftur þegar við vorum að labba í bílinn en hann hafði farið upp úr sjónum á öðrum stað. Næsta sjóferð er áætluð á laugardagsmorguninn kemur.

Síðasti vetrardagur

Það eru líklega í kringum 40 dagar þar til ég kemst í laugarnar aftur. Þ.e. þær opna ekki fyrir almenning fyrr en í byrjun júní ef faraldurinn heldur áfram að dala, veiran hverfur og hægt verður að slaka á núverandi höftum. Eftir hálfan mánuð verður aðeins slakað á og þremur vikum eftir það verður komið í ljós hvort við höfum náð að haga okkur það vel að við höfum snúið á veiruna. Eftir það er nokkuð ljóst að við verðum engu að síður að halda vöku okkar og fylgjast með því hvernig gengur alls staðar annars staðar í heiminum. Það er ólíklegt að það verði nokkuð vit í því að ferðast út fyrir landsteinana og eða hleypa túristum inn í landið alveg á næstunni, því miður fyrir ferðamannaiðnaðinn. Og þegar loksins verður hægt að aflétta óvissustigi þá held ég að væri vit í að skoða það hvernig við getum umgengist jörðina okkar og hvert annað af  gagnhvæmri virðingu. 

Næst síðasti vetrardagur

Þegar sjósundsvinkona mín skilaði mér heim eftir svamlið í Nauthólsvík á laugardagsmorguninn var, vorum við ákveðnar í að skreppa aftur í sjóinn seinni partinn í gær. Hún var að vinna til fjögur og ætlaði að græja sig upp og kippa mér með um hálffimm leytið. Ég var eiginlega búin að græja mig upp, aðeins of snemma, um fjögur í gær þegar hún sendi mér skilaboð um að því miður yrði hún að hætta við sjóferð vegna krankleika. Í staðinn ákváðum við að taka stöðuna aftur á fimmtudagsmorguninn kemur, sumardaginn fyrsta. Það fór því svo að ég fór ekkert út úr húsi í gær. Dagurinn leið engu að síður frekar hratt. Var svo heppin að synirnir tóku að sér stóran part af "rútínu"-heimilisverkum. Það lengdi minn tíma til að sinna alls konar hugðarefnum. Ég lagði auðvitað mitt af mörkum og sá svo þar að auki um að það var kvöldmatur á borðum um klukkan sjö; "Best á fiskinn" kryddað þorskhnakkaflak, niðursneiddar kartöflur, gulrætur, rauðlaukur og rauðkál bakað allt saman í ofni.

Í morgun dreif ég mig á fætur stuttu áður en klukkan sló átta. Gaf mér góðan tíma í að glugga í blað dagsins og las einnig í Yosoy. Um tíu þreif ég ísskápinn að utan og innan en geymi mér frystihólfið þar til síðar. Um hálftólf skrapp ég í Krónuna við Granda og verslaði. Hitti fyrrum djákna við Hallgrímskirkju sem tók á móti okkur mæðginum í mömmumorgnum á árunum 1998-2002. Kom heim upp úr klukkan tólf og var svo heppin að annar sonurinn var kominn fram og hann tók við pokunum og gekk frá vörunum.

Ekki vinnudagur

A-hópurinn í K1 á að halda sig fjarri vinnustað þessa vikuna. Sjötta vikan að hefjast síðan okkur var skipt upp. Það sér ekki alveg fyrir endann á þessu ástandi og skilaboðin eru þau að þetta muni vara langt fram í mai, jafnvel lengur. Ég ætla að halda minni rútínu og reyna að sinna eitthvað að því sem ég hef skilið eftir útundan alltof lengi. Ég rumskaði fyrst um sex í morgun en þótt ég steinsofnaði ekki aftur náði ég að kúra mig niður alveg þar til klukkan var að verða átta. Klæddi mig, bjó um, burstaði tennur, náði í blaðið niður og settist með það inn í stofu. Gluggaði í blaðið í smá stund en snéri mér svo að bókinni sem ég gat um í gær. Um níu fékk ég mér mína daglegu matskeið af lýsi og lét það nægja í bili. Þarf að huga að því að láta skipta yfir í sumardekkin á bílnum í vikunni og leggja vetrardekkinn inn á dekkjahótel N1 í staðinn.

Sofið út á sunnudegi

Fann aðra bók eftir Guðrúnu Evu Mínervudóttur, YOSOY í fórum mínum í gær og er að sjálfsögðu byrjuð að glugga í hana. Markmiðið er að geta skráð lágmark 30 mínútur lestur á dag á svæðið mitt hjá allirlesa.is. Reyndar les ég sjaldnast styttra en þrjú korter eða klukkutíma í einu þegar ég tek mig til og gríp bók í hönd en svo skrái ég líka tíma sem ég er að glugga í blöðin og ég er fljótari að afgreiða þau.

Hringdi í Ellu vinkonu upp úr hádegi í gær. Hún heyrði ekki í símanum akkúrat þá en hringdi til baka seinni partinn og við spjölluðum í dágóða stund. Spurði hana m.a. út í soninn sem er í verkfræðinámi úti í Hollandi. Sonur sjósundsvinkonu minnar er í sama námi, ári á undan Einari Bjarna. Sá ungi maður og kærasta hans komu heim rétt fyrir miðjan mars og stunda fjarnám héðan. Unga manninum úti líður ágætlega. Þau eru örfá á vistinni, skólinn sjálfur er lokaður. Hann hafði hugsað sér að vera úti í sumar, skrapp heim um jólin, á eftir allan næsta vetur til að ljúka þessu námi. Nú er verkfræðistofan, sem hann hefur unnið hjá sl. sumur og allt árið þar til hann hóf þetta nám, búin að hafa samband við hann nokkrum sinnum og athugað hvort hann vilji ekki koma í vinnu hjá þeim í sumar.

Morgunbusl í sjónum

Í gærmorgun notaði ég bílinn til að koma mér í vinnuna og hafði í leiðinni með mér tómt box svo ég gæti komið við í Fiskbúð Fúsa á leiðinni heim. Hætti vinnu upp úr tvö og kom með rúmt kíló af ýsu og einn poka af harðfisk, óbarinni ýsu með mér heim. Vatt mér beint í að hella upp á könnuna og hrærði í vöffludeig í leiðinni. N1 sonurinn var að vinna svo ég bjó aðeins til 5 vöfflur og geymi svo afganginn af vöfflusoppunni til helgarinnar.

Var vöknuð klukkan sex í morgun. Gerði heiðarlega tilraun til að sofna aftur en það endaði með því að ég dreif mig á fætur, þó tveimur tímum seinna. Útbjó mér hafragraut um níu og þremur korterum síðar gerði ég mig klára fyrir sjósund. Var sótt á slaginu 10. Það var fjara og smá öldugangur í Nauthólsvík og við ætluðum aðeins að vera útí í 3-5 mínútur. Það var hins vegar svo gott og skemmtilegt buslið í sjónum að við gleymdum næstum því að fylgjast með tímanum. Vorum aðeins lengur en til stóð en ekkert svo mörgum mínútum lengur. Rétt áður en við fórum upp úr komu tveir hlauparar á svæðið, vippuðu sér úr hlaupafötunum, gerður nokkrar armbeygjur í fjörunni og skelltu sér smá stund út í sjó.

Er búin að lesa Síðasti hlekkurinn en er ekki búin að velja mér næstu bók. Hlýt að finna mér einhverja í dag. Sjáum til með það. Næsta mál á dagskrá er að hella mér upp á kaffi og fá mér fyrsta bolla dagsins.

Einn vinnudagur eftir í þessari viku

Labbaði af stað í vinnu kl. 6:57 í morgun og fór aðra leið heldur en í gær eða fyrradag. Eitthvað virðist ég hafa hikað á leiðinni því síminn skráði sjálfvirkt á mig tvo göngutúra. Þann fyrri frá kl. 18 mínútur og 1,36km en þann seinni frá klukkan 7:16 í 20 mínútur og 1,6km. Man ekki til að hafa stoppað neitt en ég labbaði Lönguhlíð að Miklubraut, undir göngin við ljósin, í gegnum Klambratúnið, Flókagötu að Gunnarsbraut þar sem ég beygði til hægri og labbaði að Njálsgötu. Labbaði stuttan spöl af Snorrabraut, hluta af Laugaveginum, smá hluta af Hverfisgötu og síðasta spölinn að Kalkofnsvegi labbaði ég Skúlagötu. Sá sjávarútvegsráðherra mæta í vinnu rétt upp úr klukkan hálfátta. Annars var ég í bókhaldinu í dag og fyrir utan að skrá niður framleiðslutölur og ónýt kort kom m.a. beiðni um að útbúa A-Hraðbankalykil og 2 PUK-bréf. Lagði af stað heim kl. 14:30 og var 37 mínútur að labba 2,87 km, beint yfir Skólavörðuholtið, undir tvær brýr og kom upp við byrjun Eskihlíðar. Skipti um bol, þvoði mér um hendur og hellti upp á kaffi og drakk einn bolla áður en ég bjallaði í pabba.

Frú Vigdís Finnbogadóttir níræð í dag

Fékk hláturskast þegar ég renndi yfir texta gærdagsins og sá meinlega villu sem ég er búin að laga núna. Í gærkvöldi var ég komin upp í rúm upp úr klukkan hálftíu og ca þremur korterum seinna lagði ég frá mér bókina sem ég er að lesa, slökkti ljósið, bað bænirnar mínar og svo steinsofnaði ég.

Vaknaði í morgun örstuttu áður en vekjarinn átti að fara af stað eða fyrir klukkan hálfsjö. Lagði gangandi af stað í vinnuna kl. 6:54 og 43 mínútum og 3,4 km síðar var ég komin á leiðarenda. Já, ég fór aðeins lengri leið heldur en í gær. Ætlaði eiginlega að rekja mig eftir leiðinni sem ég kom seinni partinn í gær en endaði á því að labba meðfram "nýju Hringbraut" alveg að brúnni neðan við Háskólann. Fór yfir þá brú og labbaði í gegnum Hljómskálagarðinn, meðfram tjörninni, Lækjargötu og að Kalkofnsvegi. Daglegri framleiðslu lauk fyrir klukkan tólf. Eftir hádegi ryksuguðum við framleiðsluvélina, sinntum bókhaldi og talningu, tókum á móti smá plastbirgðum og merktum 2 tegundir. Nýja vélin kom í mörgum pörtum og misstórum kössum upp úr klukkan eitt. Sumir kassarnir voru það stórir að kalla þurfti manninn sem sinnir viðhaldi á vegum OBA til að hjálpa til við að taka utan af stærstu kössunum til að koma öllum hlutum inn. Vélin verður ekki sett saman alveg í bráð því það þarf líka að vera með sérfræðingur utan úr heimi þaðan sem vélin er framleidd.

Klukkan korter yfir tvö ákvað ég að ég væri búin að skila mínu vinnuframlagi í dag. Hafði hugsað mér að labba aðra leið heim, búa til nokkurs konar hring, en áður en ég vissi af var ég farin að þræða svipaða leið til baka og ég kom úr í morgun. Á leiðinni mætti ég konu sem ég hitti stundum í sundi. Síminn skráði 3,52 km á 45 mínútum. Það fyrsta sem ég gerði eftir að ég var komin heim og búin að fara í þurran bol var að hella mér upp á kaffi. Svo hringdi ég í pabba sem er að byrja að vinna í því að ganga betur frá stóru skúrhurðinni sem hann setti í sl. haust.

Gengið í vinnuna

3 mánaða strætókortið, sem ég fjárfesti í í upphafi árs, rann úr gildi 5. apríl sl. og það stóð alltaf til að eftir þann tíma færi ég að labba í vinnuna. Eins og vinnutilhögun í minni deild er háttað væri heldur ekkert skynsamlegt að fjárfesta í nýju korti sem eiginlega nýtist aðeins aðra hverja viku. Klukkan 07:07 labbaði ég af stað í vinnuna í morgun. 37mínútum og 2,77km síðar var ég mætt og hafði sem betur fer hugsað fyrir því að hafa með mér þurran bol. B-hópurinn sem vann í dymbilvikunni kláraði það sem stóð útaf kreditendurnýjuninni og sendi af stað í póst og þær framleiddu líka mánaðarlega debetendurnýjun uþb 4000 kort á tveimur dögum. Sú af okkur í A-hópnum sem var í bókhaldinu keyrði lokakeyrsluna og sá til þess að senda megnið af þessum kort af stað í póst. Við hinar tvær sinntum því eingöngu daglegri framleiðslu og henni lauk rétt upp úr klukkan tólf. Eftir hádegi var lokið við að gera upp framleiðslu dagsins og telja þær tegundir á vagni sem voru notaðar í dag. Ég sá til þess að tæta niður uppsafnaða borða, svarta, gráa, rauða, hvíta og einn innfylliborða. Vinnudegi lauk í fyrrafallinu. Labbaði af stað heim kl. 14:34 og 41 mínútum og 2,93km síðar var ég komin heim. Þvoði mér um hendurnar, skipti um bol og hellti mér upp á 3 bolla af kaffi.

"Ekki leikur veröldin eins við alla"

Um það leiti sem Davíð Steinn var að byrja að undirbúa kvöldmatinn í gær, upp úr klukkan þrjú, dreif ég mig út í gönguferð. Skv. forriti í símanum mínum hóf ég gönguna kl. 15:24 og 68 mín og 5,38km síðar var ég búin að ganga réttsælis í kringum Öskjuhlíðina og komin heim aftur kl. 16:32. Þetta var 0.04km lengra en fimm mínútum hraðar heldur en þegar ég labbaði rangsælis í kringum Öskjuhlíðina sl miðvikudag. Vel gert og klapp á bakið mitt. Kvöldmaturinn var tilbúinn um hálfsex, ofnsteikt purusteik, með steiktum kartöflum, piparsósu, sallati og grænum baunum. Virkilega gott. Ég tók að mér að ganga frá á eftir og var búin að því áður en kvöldfréttir á Stöð2 hófust.

Í morgun var ég vöknuð fyrir klukkan átta og mín biðu skilaboð frá sjósundsvinkonu minni sem ég svaraði. Bjó mér til hafragraut á tíunda tímanum og stuttu fyrir ellefu var ég tilbúin, íklædd sundbol innanundir joggingfötum af mömmu, fjólubláu úlpunni, hárið í teygju undir sundhettu og ullarhúfu og í sjósundssokkum og strandskónum sem ég keypti á Spáni 2016. Var með sokka, gönguskó, sjósundsvettlinga og handklæði með mér í poka. Vinkona mín pikkaði mig upp um ellefu og við fórum beint í Nauthólsvík. Hún lánaði mér stærðar "yfirtökuflík", var sjálf í einni utan yfir sinn sjósundsklæðnað. Ég klæddi mig úr úlpu og joggingfötunum og í yfirtökuflíkina áður en við yfirgáfum bílinn og röltum með handklæðin og vettlingana í poka niður að staðnum þar sem við förum yfirleitt út í sjó við Nauthólsvík. Þar fyrir hittum við eina konu sem var að koma upp úr. Sú skrapp út í aftur í eina mínútu. Við hinar tvær svömluðum um og spjölluðum í um 9 mínútur. Vá, hvað þetta var gott. Ég verð að viðurkenna að ég var pínu smeik um að vera dottin úr einhverri æfingu þar sem það er mánuður síðan ég fór síðast í sjóinn. En heldur betur ekki. Vinkona mín skutlaði mér svo beint heim aftur og við sammæltumst um að vera í bandi n.k. laugardagsmorgun og fæ ég að hafa yfirtökuflíkina lánaða amk þar til opnað verður aftur fyrir aðstöðuna eftir samkomubann, hvenær sem það verður. Þegar heim kom dreif ég mig í sturtu og skolaði svo vel úr sjósundsbúnaðinum.

Bókin sem ég er að lesa núna er Síðasti hlekkurinn eftir Fredrik T Olsson. Var byrjuð á þessari bók fyrir einhverju síðan og ákvað að byrjað aftur frá byrjun. Er búin með fyrsta hlutann af fjórum og er mest hissa á að ég hafi ekki verið búin að ljúka við að lesa þessa bók fyrir löngu síðan, hún er það spennandi.

Páskadagur

Það eru dæmalaust skrýtnir tímar í gangi og hafa verið í nokkrar vikur. Allur heimurinn er undir og enginn veit nákvæmlega hvernig málin þróast. Ástandið bitnar á öllum en eitt af því sem getur og mun hjálpa er að skilja að við erum öll í þessu saman og það borgar sig að róa í sömu áttina amk í því landi sem við búum. Faraldurinn sem geisar mun kannski ekki ná okkur öllum og þá geta þeir sem ekki veikjast eða þekkja engan í þeim hópi eða framlínunni átt bágt með að taka þátt í þessum hamlandi verkefnum lon og don. Vonandi skilja þó flestir, helst allir, alvarleika þess að hlýða ekki Víði. Mikið sem ég er ánægð með þrenninguna, hversu samstíga þau eru, þolinmóð og óþreytandi við að upplýsa okkur hin. Það er mikið öryggi í því. Ég hef alveg sloppið við að rekast á veiruna. Það munaði líklega ekki miklu að þessi vágestur næði á vinnustöðvar strákanna minna en þeir hafa amk ekki veikst og eru duglegir að virða fjarlægðarmörk og benda kúnnum á að gera slíkt hið sama. Helgina fyrir afmælið mitt, um miðjan mars, var vinnuhópnum mínum skipt upp í A og B og síðan höfum við ekki hist nema þá í netheimum. A hópurinn, minn hópur, tók fyrstu törnina vikuna 16.-20. mars. Þá viku vorum við aðeins tvær. Vikuna 30/3-3/4 vorum við orðnar þrjár eins og B hópurinn og við verðum á vaktinni 3 í næstu viku. Ekki er vitað hversu lengi þetta fyrirkomulag verður en þó reiknum við með að þetta breytist ekki fyrr en í fyrsta lagi eftir 4. maí. Þannig að ég er búin að reikna það út að A hópur vinnur 11 virka daga í apríl en B hópur 9. Eitt af því sem er mjög erfitt í þessu ástandi er að geta ekki hitt fólkið sitt. Veðurtíðin fram að samkomu- og fjarlægðartakmörkunum hjálpaði samt líklega til við að venja mig við þetta ástand. Apríl er alveg að verða hálfnaður og ég er aðeins búin að hitta pabba minn tvisvar sinnum á árinu. Heyri í honum daglega. Hann er rólegur, æðrulaus og mikill dundari, finnur sér alltaf eitthvað til að gera. En ég veit að blöðruhálskirtillinn er að plaga hann og tíminn sem hann átti í ómskoðun 18. mars sl. var frestað til 13. maí.

Oddur Smári er að vinna frá 7:30-14 þessa helgina. Hann kom heim rétt fyrir þrjú í gær. Það er ekki nema fimm mínútna gangur í vinnuna hans og hann stimplaði sig út klukkan 14 en dvaldist eitthvað á staðnum og tók nokkrar afgreiðslur aukalega. Ég var búin að skrifa innkaupamiða og fékk hann til að keyra mig í Krónuna við Granda. Hann beið úti í bíl á meðan. Margt var um manninn á staðnum en þó ekki svo að það þyrfti að bíða í röð úti. Verslunarferðin tók ekki svo langan tíma.  Davíð Steinn ætlar svo að sjá um að elda hátíðarmatinn í dag/kvöld.

Fuglasöngur eldsnemma

Ég skrapp í örlítið lengri gönguferð um miðjan dag í gær heldur en seinni partinn í fyrradag. Það var smá rigning og ég fór í bleiku regnkápuna. Labbaði Lönguhlíð að Stakkahlíð, þar beygði ég til hægri og  labbaði að Hamrahlíð. Beygði til vinstri og labbaði næstum því út að Kringlumýrarbraut áður en ég beygði til hægri og labbaði upp að göngustíg sem liggur rétt við Bústaðaveg. Þetta endaði amk með því að ég labbaði einhvers konar hring og ég kom inn í Drápuhlíð þar sem hún byrjar. Labbaði rúmlega 2km á ca hálftíma. Annað varðandi gærdaginn er eiginlega ekki í frásögur færandi nema ég bjó til kjötbollur úr 2x500gr hakkrúllum í kvöldmatinn. Fór ekki eftir neinni sérstakri uppskrift frekar en venjulega en var mjög ánægð með útkomuna. Synir mínir voru sammála um gæðin. Fór eiginlega alltof seint að sofa en var þó búin að slökkva á náttborðslampanum fyrir miðnætti. Vaknaði við fuglasöng um klukkan fimm og náði ekki að sofna aftur.

Sturta og hárþvottur

Rumskaði fyrst eitthvað um sex í morgun og fannst það heldur snemmt. Náði að sofna aftur og sofa í næstum því tvo tíma. Gaf mér góðan tíma til að átta mig á að það væri að hefjast nýr dagur. Hugsaði um allt og ekkert. Það er alveg ágætt að gera einhverjar áætlanir en það er líka allt í lagi að láta þetta bara ráðast. Rétt fyrir níu steig ég inn í sturtuklefann og var með sjampó og sápu með í för. Það er rétt rúm vika síðan ég þvoði hárið á mér síðast. Ég hefði reyndar alveg geta slegið þessum hárþvotti á frest í 2-3 daga í viðbót án þess að nokkru skaði hefði hlotist af en ég var í stuði til að sinna þessu svo ég vatt mér í málið.

Gönguferðin í fyrradag var þess valdandi að ég var örlítið stirð í gær en líklega hefði ég átt að hundskast til að teygja mig vel eftir að ég kom heim, sem ég gerði ekki. Ég fór samt aftur út í gær en mun styttri hring, innan við 1,5 km. Í gær hrærði ég líka í vöfflur sem Oddur Smári tók að sér að verka og Davíð Steinn sá um kvöldmatinn og útjó dýrindis máltíð úr þorskhnökkum sem ég tók út úr frysti í gærmorgun. Las annars alveg helling í gær enda er ég búin að skrá mig á "Tími til að lesa" til að hjálpa til við heimsmet í lestri.

Sjósundsvinkona mín hafði samband við mig á FB-spjallinu í gær. Hún hafði drifið sig í sjóinn við Nauthólsvík um ellefu í gærmorgun. Fór tvisvar ofan í því þegar hún kom upp úr eftir um 8 mínútur kom myndatökumaður frá Stöð2 og bað hana um leyfi til að taka mynd af henni að svamla í sjónum. Hún var útí í ca 3 mínútur og svo kom smá myndbrot á fréttunum á Stöð2 í gærkvöldi. Hún setti sjálf myndir á vegginn sinn sem maðurinn hennar tók en hann ók henni á milli. Hún sagðist búa svo vel að ég síðar útitökuúlpu sem hún klæddi sig í yfir sjósundsgallann bæði fyrir og eftir sund. Hún fór úr sjósundsskónum eftir svamlið, þurrkaði sér og klæddi sig í ullarsokka og gönguskó og svo fór hún í sturtu þegar hún kom heim til sín. Naglinn sem hún er. Hún byrjaði að stunda sjóinn í fyrrasumar og fann að þetta var að hjálpa henni með hnjá og liðerfiðleika í fótum, þ.e. hún fann mikinn mun til batnaðar. Nú er hún búin að finna leið til þess að skreppa í sjóinn þótt aðstaðan við Nauthólsvík sé lokuð vegna Covid-19.

Gönguferð

Einhvern veginn æxlaðist það þannig að ég fór ekkert út úr húsi frá því að ég kom heim úr vinnu og skreppitúr í tvær búðir á föstudagskvöldið og alveg þar til ég skrapp í rúmlega klukkutíma gönguferð rangsælis í kringum Öskjuhlíðina seinni partinn í dag, 5,3km. Ég er hins vegar búin að ljúka við að lesa allar bókasafns- og jólabækur. Þögn eftir Yrsu Sigurðardóttir, sem ég fékk frá systir minni og fjölskyldu, las ég næstum alla á mánudaginn nema síðustu 60 bls. kláraði ég í gærmorgun. Sem betur fer er ég með nokkrar aðrar ólesnar bækur í fórum mínum m.a; Skaparinn eftir Guðrúnu Evu Minervudóttur. En ég hef líka verið frekar dugleg að munda prjónana síðustu daga og þar að auki leyft mér að gleyma mér alveg við hámhorf á hinum ýmsu þáttum í boði Sjónvarps Símans Premium. Synir mínir skruppu í Sorpuferð í dag, fóru báðir, því þeir voru báðir eitthvað að uppfæratölvurnar sínar rétt fyrir helgi og því fylgdi slatti af umbúðum sem var ágætt að losna við.