Bleikjuflök og grænmeti í ofninum

Hugurinn er í París, alls konar tilfinningar á kreiki en mér finnst einhvern veginn erfitt að orða hugsanir mínar um þessar hræðilegu árásir. Veröldin verður sífellt firrtari að mínu mati en þó held ég að það sé aðeins lítið brot af mannkyninu sem er að valda þessum usla og ala á hræðlsu þannig að það fyrsta sem ráðamönnum dettur í hug er að auka viðvörunarstigið, vígbúast og vera við öllu búnir. Jafnvel fara að elta uppi þá sem lýsa sig ábyrga. Ég veit að það væri farsælast að launa illt með góðu og reyna að taka á hlutunum eins og Norðmenn gerðu eftir Úteyjar-hryllinginn. Æ, hvað veit maður svo sem? Ég er amk ekki tilbúin í stríð af neins konar tagi og ætla frekar að kveikja á kertum, biðja fyrir betri heimi og senda frá mér hlýjar, jákvæðar og góðar hugsanir.

Vinnuvikan leið hratt og helgin er að verða hálfnuð, sem og mánuðurinn. Er búin að fara daglega í sund átta daga í röð og hitti ég Lenu þrjá fjóra virka morgna af fimm svo við gátum pottormast saman. Það var mikið spjallað og ég gat leyft mér að vera amk fimm korter í sundi þar sem vinnudagurinn alla vikuna var frá klukkan níu til fimm. Fór heim með bílinn fjóra af þessum dögum og náði strætó sem skilaði mér fyrir utan vinnustaðinn rétt fyrir klukkan níu.

Nýji síminn er farinn að virka, líka sem sími, en ég kann ósköp lítið á þetta tæki ennþá. En ég kann þó að færa inn í keppnis-appið sem meiri hlutinn af vinnufélögunum er að taka þátt í. Fyrirtækinu var skipt upp í amk 13 lið og þetta app varð semsagt til þess að ég uppfærði símann loksins. Er samt ekki búin að skila samlokusímanum á "Þjóðmynjasafnið" en hann virkar ekki lengur sem sími því ég lét færa númerið á nýja símann.

Lífið er skemmtilegt

Ég fór á lánsbílnum beint í sund rétt fyrir klukkan hálfsjö í gærmorgun þannig að ég var að mæta rétt eftir að opnaði. Synti í uþb tuttugu mínútur og byrjaði svo á því að fara með Lenu í heitan pott þar sem hún var að ljúka fyrstu ferðinni í kalda pottinn. Fór svo tvær ferðir með henni í kalda, eina ferð í sjópottinn og eina ferð í þann heitasta. Svo kvaddi hún en ég fór í gufubað og svo smá sólbað. Annar sonurinn var með strætókortið og mér fannst ekki taka því að fara heim með sunddótið. Hafði verið það útsjónarsöm að taka til fyrir vinnuna sem og nótur fyrir kóræfingu. Fékk mér kaffibolla og banana áður en ég fór í vinnuna. Var mjög tímanlega og hugsaði alla leiðina hvort ég fengi stæði á neðra planinu. Og viti menn ég fékk enda stæðið.

Nýji síminn var notaður eins og spjaldtölva en ég ákvað að ég hefði tíma til að koma við í vodafone í Kringlunni til að virkja nýja símann og afvirkja hinn. Þurfti að bíða um stund eftir afgreiðslu en þetta hafðist allt saman og ég varð heldur ekkert svo sein á kóræfingu, það munaði sennilega bara eitthvað um þremur mínútum. Æfði aðeins með sópran en færði mig svo yfir í altinn því þær voru bara tvær en hinar voru þrjár (án mín). Það var miklu jafnara dæmi eftir að ég ákvað að syngja með altinum.

Samsung galaxy S5 neo

Það þurfti heila vinnustaðakeppni á nýju appformi til, til að ég uppfærði gsm-inn minn, nokia samloku-síma yfir í flatan síma með snertiskjá. Um fimm leytið í gær fór ég heim með útprentaða síðu af síma sem ég lét einn vinnufélaga minn sannfæra mig um að væri eitthvað sem gæti gengið upp fyrir mig. Báðum sonum mínum leist vel á að ég væri að spá í þetta og samþykktu þessa tegund en vildu samt ekki koma með mér. Ég dreif mig þá ein í ELKO í Skeifunni og keypti eitt stk. síma. Davíð Steinn var svo að "fikta" í honum á annan klukkutíma og gat sett flest upp nema símkortið úr gamlanum var of stórt. Hann ráðlagði mér að fara til VODAFONE við tækifæri og fá þá til að klippa gamla kortið í þá stærð sem hentaði nýja símanum. Það var ekki tími til þess í gær.

Annars fór ég í morgunsund fjórða daginn í röð í gærmorgun. Var byrjuð að synda aðeins fyrr heldur en morguninn áður. Þótt ég slakaði afar vel á og tæki lífinu í laugunum með nokkurri ró passaði ég vel upp á tímann. Fór beint heim með sunddótið mitt upp úr klukkan átta og hafði smá stund aflögu áður en ég náði strætó í vinnunna, leið 13 ca fimmtán mínútum fyrir níu fyrir utan Sunnubúðina.

Nokkrir dagar

Það hefur annað hvort ekki gefist tími í skrif eða þá að ég var ekki alveg upplögð þegar stundirnar gáfust þessa rúmu hálfu viku síðan ég skrifaði nokkuð síðast.  Það er svo sem alveg búið að vera í nógu að snúast, sérstaklega í félagslífinu. Endurnýjaði árskortið mitt í sund í gærmorgun. Hitti tvær vinkonur á Gló um sex í gær og höfðum við um margt að spjalla þannig að við sátum þó nokkra stund eftir að við vorum búnar að borða.

Fór í sund upp úr klukkan átta á sunnudagsmorguninn. Átti svo tæpa tvo tíma heima áður en ég fór aftur af stað. Kom við í blómaversluninni Hlíðarblóm, valdi og keypti tvo fallega smávendi áður en ég mætti í kirkjuna nokkuð í fyrra fallinu þar sem ég var bæði að aðstoða við kaffiundirbúninginn og hita upp með kórnum. Met var slegið í mætingu og við sem sáum um kaffið á eftir vorum að ljúka fráganginum um hálffimm. Þetta voru góðir fjórir klukkutímar sem ég var í krikjunni.

Laugardagurinn leið líka svona hratt og byrjaði einnig á sundferð. Á föstudaginn mætti ég í vinnu klukkan átta, hitti vinkonu á kaffihúsinu Babalú fljótlega eftir vinnu og bauð henni svo með mér á Edduna í Austubæ upp úr klukkan átta um kvöldið. Semsagt alltaf nóg að gera hjá mér. Hef þó alveg fundið mér tíma til að lesa en nálin hefur verið í óvanalega langri pásu.

Jóla-nótulaus á kóræfingu

Ég var mætt í Laugardalinn um það bil sem opnaði í sundlaugarafgreiðslunni í gærmorgun. Synti í rúmt korter, fór aðeins tvisvar sinnum í kalda pottinn en það var til að geta bleytt betur og aðeins lengur í mér í sjópottinum. Var mætt í vinnuna rétt fyrir átta. Vinnudagurinn leið hratt og örugglega en það teygðist aðeins úr honum í hinn endann.

Kom heim rétt fyrir fimm, hringdi og talaði stuttlega við pabba sem verður grasekkjumaður næstu vikuna eða svo. Svo taldi ég mig sortera rétt í kórnótupokann minn og var mætt í kirkjuna rétt fyrir hálfsex. Það kom í ljós fljótlega eftir að æfingin byrjaði að mig vantaði allar nótur sem við höfum verið að æfa í haust sem og jólanóturnar. Var með páskanóturnar og eiginlega allar aðrar nótur, brúnu bókina og sálma bókina. Þetta bjargaðist fyrir horn í þetta sinnið en um leið og ég kom heim fór ég yfir það sem ég hafði tekið úr pokanum og skilið eftir heima. "Týndu" nóturnar reyndust ekki vera í þeim bunka ..."svo hvað skyldi ég nú hafa gert af þeim?", hugsaði ég með mér.

Annar sonurinn var tilbúinn með kvöldmatinn og hinn sá um uppvaskið á eftir. Það var ekki fyrr en ég var sest inn í stofu eftir mat að ég mundi skyndilega að ég hafði tekið þessar umræddu nótur með mér austur í rauða bakpokanum mínum og þar voru þær enn ásamt hluta af esperanto dótinum mínu, þ.e. í bakpokanum (ekki fyrir austan).  :-)

Skemmtilega langur dagur

Tók leið 13, vagninn klukkan korter fyrir átta í gærmorgun. Þekkti vagnstjórann en hún er frá Selfossi. Vinnudagurinn til fjögur leið ótrúlega hratt en ég fékk að "hlaupa" út rétt fyrir fjögur til að hafa smá stund heima sem ég notaði til að hringja í pabba og skipta um föt. Var mætt á mánaðarlegan safnaðarstjórnarfund klukkan hálfsex. Eftir fundinn voru teknar af okkur einstaklingsmyndir og svo var hópnum stillt upp við altarið og teknar myndir af stjórninni með og án prests og organista. Það verður fróðlegt að vita hvernig til tókst en eitthvað af þessum myndum eiga að fara inn á heimahöfn safnaðarins.

Þegar ég kom heim aftur fékk ég að vita að bræðurnir væru á leið á spilakvöld til spilafélagans sem býr í Kópavogi. Ég lánaði þeim bílinn og hafði það kósí fyrir framan imbann alveg til klukkan tíu. Var farin að sofa áður en ungu mennirnir komu heim aftur en ég veit þó að þeir komu heim fyrir miðnætti.

Eitt og annað

Í gær leysti ég einn vinnufélaga minn af þannig að hún mætti á mínum tíma milli átta og fjögur en ég á hennar tíma milli 13 og 19. Þar af leiðandi gat ég notað morguninn til að skottast í sund, reka smá erindi og lesa svolítið. Var mætt í sundið rétt upp úr opnun eða rúmlega hálfsjö. Hitti Lenu í heita pottinum eftir að ég var búin að synda og fór með henni þrjár ferðir í kalda pottinn, eina í sjópottinn og eina ferð í heitasta pottinn. Gaf mér góðan tíma og kom ekki heim aftur fyrr en tveimur tímum eftir að ég fór. Skrapp svo fljótlega aftur til að sækja jólagjöfina til hennar systur minnar úr innrömmun.

Eina af níu bókunum sem ég náði í af safninu um daginn hef ég lesið áður, 90 sýni úr minni mínu eftir Halldóru Kristínu Thoroddsen. Þessi bók er alveg þess virði að vera lesin oft. Ég las hana upp til agna í gær. Hún er að vísu ekki nema rúmlega 100 blaðsíður en minningarbrotin eru mörg og sum hver alveg óborganleg. Mæli hiklaust með þessari bók.

Rétt missti af leið 13 upp úr hádeginu svo ég trítlaði á stoppistöðina við Klambratún og tók Ásinn þaðan. Hafði þó það góðan tíma að ég fór úr við MR einni stoppistöð fyrr en vagninn stoppar líka við Hörpuna. Vinnudagurinn leið þokkalega hratt. Við sem vorum á kvöldvaktinni gátum leyft okkur að fara heim nokkrum mínútum fyrir sjö þannig að ég var komin heim fyrir hálfátta.

Nýkomin úr morgunsundi

Enn ein helgin liðin og skiptu helgidagarnir sér niður á hvorn sinn mánuðinn. Það voru semsagt mánaðmót um helgina og næstsíðasti mánuður ársins er hafinn. Afmælisbarn dagsins í dag er systir mín sem er rétt rúmlega einu og hálfu ári yngri en ég. En ég ætlaði aðeins að gera upp helgina á þessum vettvangi.

Mikið sem veðrið var fallegt og gott á laugardaginn. En ég varð að skafa smá af lánsbílnum og vanda mig og keyra varlega í morgunsundið. Klukkan var að nálgast hálfníu þegar ég lagði af stað í sundið. Gaf mér góðan tíma í Laugardalnum og endaði á því að bera rakakrem á kroppinn þegar ég kom upp úr en það geri ég bara sirka vikulega. Þar sem norska esperanto vinkona mín var ekki búin að hringja um hálftíu reiknaði ég með að hún hefði farið í sína rækt og ég ætti að koma til hennar um tólf. Ég fór því heim, gekk frá sunddótinu, náði í þvottinn á snúruna og settist svo í stofusófann með mjög áhugaverða bók úr svo kallaðri tunglseríu: "Líf mitt til dæmis", (dagbækur 1998-2002) eftir Margréti Bjarnadóttur f.1981. Bókin er ekki nema 72 bls. en hún er mjög góð að mínu mati. Ég var búin að lesa uþb einn þriðja af bókinni þegar Inger hringdi. Hún hafði ekki farið eitt né neitt og var tilbúin að taka esperantostund með mér. Ég dreif mig því yfir til hennar. Stoppaði í rúma klukkustund, verslaði í bakaleiðinni og um hálftvö athugaði ég hvort tilvonandi rafeindavirki væri nokkuð búinn að hætta við að skreppa austur með mér. Svo reyndist ekki vera og hálftíma síðar vorum við lögð af stað. Hinn sonurinn var búinn að ákveða að vinna að erfiðu skólaverkefni og halda sig heima við.

Við Davíð Steinn komu austur um kaffi leytið. Eftir kaffið fékk pabbi dóttursoninn til að fara í vinnugalla og fara með sér út í skúr og skipta um dekk á báðum bílunum. Það tók drjúga stund en þeir voru þó búnir fyrir kvöldfréttir í sjónvarpinu. Ég sá um að elda kvöldmatinn fyrir okkur fjögur en við vorum ekki að borða fyrr en upp úr klukkan átta. Bauð upp á hvítvín með matnum úr "belju" sem ég hafði keypt helgina áður og var ekki búin að opna. Sonurinn fékk hálft vínglas en rétt smakkaði á því og gaf mér svo restina. Hann fór fyrstur í háttinn milli tíu og ellefu. Mamma fór inn í rúm að hlusta á sögu en við pabbi biðum eftir að uppþvottavélin kláraði til að geta gengið frá. Ég var svo síðust í bælið því ég settist aðeins við tölvuna.

Fór á fætur rétt um níu í gærmorgun. Náði því að borða morgunmat með pabba mínum. Á ellefta tímanum fékk ég lánaða regnkápuna hennar mömmu og arkaði upp að Helluvaði í heimsókn til föðursystur minnar. Stoppaði hjá henni í dágóða stund enda höfðum við um margt að spjalla. Ég var samt komin til baka um tólf. Dagurinn leið nokkuð hratt. Við mæðginin vorum ákveðin í að drífa okkur í bæinn strax eftir kaffi. Það gekk ekki alveg eftir en við vorum þó að skila okkur í bæinn upp úr klukkan sex.

Helgi og mánaðamót

Ég náði leið 13 fyrir utan vinnustaðinn minn klukkan rétt rúmlega fjögur í gær og fór beinustu leið heim. Annar sonurinn hafði aðeins þurft að skreppa í einn tíma í skólann um morguninn líkt og aðra föstudaga þetta misserið en hinn var ekki kominn heim og ekki von á honum nærri strax. Sá þeirra sem var heima hafði framkvæmt beiðni mína um að ryksuga sameignina alveg frá þvottahúsinu og upp á okkar pall. Þegar ég skrapp niður til að setja í eina vél sá ég að mér var óhætt að ákveða að við værum búin að skila af okkur þvottahúsumsjón þennan mánuðinn, en við eigum að taka sameignina fjórða hvern mánuð. Slapp semsagt alveg við að skúra yfir þvottahúsið og gat einbeitt mér að skylduverkunum í eigin íbúð.

Rétt fyrir hálfsex ákvað ég að drífa mig með nokkra poka af flöskum í endurvinnsluna við Knarrarvog. Fékk góða aðstoð við að tæma pokana í teljarann og skanna kvittunina sem ég fékk á eftir. Rúmlega 70 flöskur og dósir gáfu rúmar ellefuhundruð krónur beint inn á debetreikninginn minn svo mér fannst þessi ferð borga sig. Að vísu finnst mér líka gott að geta styrkt skátana, yngri flokkana í íþróttafélaginu og aðra sem stundum koma og spyrja um flöskur.

Úr endurvinnslunni fór ég í bókasafnið í Kringlunni og skilaði tveimur af fjórum bókum sem ég var enn með. Skilafresturinn nálgaðist á þessum sem ég fór með en ég var búin að framlengja um mánuð á hinum tveimur bókunum sem telja samtals 932 bls. Er byrjuð á þeim báðum og vildi fá lengri tíma til að ljúka við þær. Þrátt fyrir að eiga eftir þessar bækur, eina úr bókaklúbbnum sem ég er líka byrjuð á og enn eina ólesna tók ég mér níu bækur með heim af safninu. Heildar blaðsíðufjöldi þeirra bóka er þó ekki nema 1.482. Er ég bókaormur eða hvað? Ég held að það sé engin spurning og löngu sannað.

Hafið það sem allra best um helgina og njótið þess að vera til alltaf!

Bókasafnsferð

Eftir vinnu í gær fór ég beint heim. Hringdi í pabba og einnig tvær vinkonur mínar. Eftir að hafa matreitt lifur í kvöldmatinn og borðað dreif ég mig í sund. Kom heim rétt fyrir níu og þá voru ævintýraspilafélagar bræðranna mættir og þeir voru búnir að leggja holið undir sig þessir hressu fimm kappar. Ég gaf mér tíma til að skrásetja miðvikudaginn í örfáum línum áður en ég fór inn í stofu með bók. Reyndar notaði ég svo megnið að næstu tveimur tímum til að glápa á imbann. Fór í háttinn áður en strákarnir voru búnir að spila og vissi ekkert hvenær spilinu lauk því ég var steinsofnuð.

Hví er svona mikil hraðferð á tímanum?

Annar sonurinn notar rauða strætókortið á miðvikudögum. Þá nota ég tækifærið og fer á bílnum, fyrst í sund upp úr klukkan sjö og eftir reglubundna rútínu fer ég beint úr Laugardalnum í vinnuna. Í gærmorgun hitti ég Lenu og til að geta farið oftar með henni í pottadýfingar kleip ég aðeins af gufustundinni áður en ég fór upp úr.

Eftir annasaman vinnudag dreif ég mig beint heim strax um fjögur. Póstaði tilkynningu um samveru aldraðra í kirkjunni n.k. sunnudag á vegg og heimahöfn safnaðarins. Hringdi í pabba og svo hringdi mamma. Átti gott spjall við þau bæði en varð svo að drífa mig á kóræfingu. Ég fékk að æfa með bæði alt og sópran og nú erum við byrjuð að fara yfir aðventu og jólalögin.

Þegar æfingu var lokið, fyllti ég á tankinn á lánsbílnum og fór svo beinustu leið til tvíburahálfsystur minnar. Hún fékk leyfi til að æfa verkefni á mér. Ég hafði tekið föndrið með mér en það endaði með því að kvöldið leið án þess að ég gerði nokkuð nema aðeins að sýna jólakortin sem ég er búin að búa til. Það var mikið spjallað og ég gat ekki slitið mig í burtu fyrr en klukkan var langt gengin í ellefu. Gærdagurinn var því afar langur en viðburðarríkur hjá mér.

Morgunsund

Um gærdaginn er alveg hægt að skrifa í örfáum línum. Mætti í vinnu rétt fyrir átta í gærmorgun. Fór beint heim seinni partinn og hélt mig heima eftir það. Hringdi í tvíburahálfsystur mína. Hafði kjöt í karrý í matinn. Strákarnir voru með spilakvöld í holinu en ég föndraði og horfði á sjónvarpið til klukkan að ganga ellefu. Og nú er kominn tími til að rjúka á vikulega kóræfingu. Hvort skyldi ég nú æfa sem alt eða sópran í þetta skiptið? Segi kannski frá því á morgun.

Kjöt í karrý í kvöldmatinn

Ég hafði hugsað mér að kíkja í sund í Sundhöllina eftir vinnu í gær. Fór með sunddótið með mér í strætó í vinnuna í gærmorgun (hvað eru mörg í í því?). Það fór nú samt svoleiðis að ég fór beint aftur heim eftir vinnu, horfði á landsleikinn, hafði til kvöldmatinn, borðaði og fór svo á lánsbílnum í sund í Laugardalslaugina. Var byrjuð að synda upp úr hálfátta, fór tvisvar sinnum rúmlega tvær mínútur í kalda pottinn, nokkrar mínútur í sjópottinn, smá stund í gufuna og var komin heim aftur fyrir klukkan níu, áður en Broen byrjaði.

Samanburður

Myndin að ofan er tekin á Saffran á afmæli tvíburanna í fyrra. Mynd númer tvö er tekin heima hjá einni vinkonu minni fyrir rétt rúmum mánuði. Og myndin hér að neðan var tekin 8. okt. sl. Myndin sem ég setti á FB-vegginn af nýju úlpunni um daginn er þó enn betri.  "Ég, um mig frá mér til mín"

Nýkomin úr sundi

Það tókst ekki að mæta í sund strax eftir opnun í gærmorgun. Í staðinn hitti ég synina þegar þeir komu heim á níunda tímanum eftir að hafa spilað "ævintýraspilið" heima hjá einum spilafélaganum frá því um átta kvöldið áður. Náði líka að hella upp á kaffi handa Lilju vinkonu áður en ég dreif mig loks í Laugardalinn. Var á svipuðum tíma og á laugardagsmorguninn  en ég gaf mér ekki eins góðan tíma þótt ég næði alveg að sinna sundpottagufurútínunni svona nokkurn veginn. Ég vildi heldur eiga góða stund aftur heima áður en ég mætti í upphitun fyrir jazzmessu í kirkjuna. Náði þarna góðum tveimur tímum á milli, fékk mér kaffi með Lilju og kvaddi hana svo með góðu faðmlagi þar sem ég þóttist viss um að hún yrði farin þegar ég kæmi heim seinni partinn. Það reyndist vera rétt hjá mér.

Jazzmessan tókst alveg ágætlega. Það mætti ein úr sópran sem hefur ekki getað verið með í haust þar sem hún hefur verið að vinna á æfingatímum og á ferð og flugi messuhelgarnar. Þessi stúlka er líka að komast á níunda meðgöngumánuð svo það er viðbúið að hún verði stopult með í vetur. En mikið var gott og gaman að fá hana í hópinn í gær, hitta hana og sjá hvað hún blómstrar.  Aðeins tveir af tíu sálmum voru sungnir einradda. Kórstjórinn spilaði undir á Hammondorgelið og hafði fengið Scott Mclemore á trommur og Ásgeir Ásgeirsson á gítar með sér. Það var fín blanda. Rödduðu sálmana söng ég með altinum og gerði engar stórar gloríur þar. Villtist að vísu einu sinni yfir í sópran en það kom ekki að sök.

Púff hvað helgin leið fljótt.

Í gærmorgun var ég ákveðin í að vera ekkert að rjúka af stað í sund um leið og opnaði. Fór á fætur rétt upp úr átta og bjó til kaffi handa okkur Lilju. Klukkutíma síðar skutlaði ég vinkonu minni í Kolaportið þar sem hún var með sölubás ásamt annarri konu. Eftir skutlið fór ég í Laugardalinn og var byrjuð að synda um 9:40. Synti í tuttugu mínútur án þess að stoppa neitt á milli. Er ekki viss um hversu margir metrar það voru en ég ætla að giska á 600. Fór fjórar ferðir í kalda pottinn, þrjár ferðir í þann sem er 42 gráður en eftir fjórðu ferðina í þann kalda fór ég í sjópottinn. Þar var ég í dágóða stund því ég hitti svo skemmtilegt fólk, m.a. hjón um áttrætt sem voru svo lífleg og skemmtileg. Það kom í ljós að konan hafði verið í sveit á Móeiðahvoli í kringum fermingu hjá barnlausum hjónum og var húsmóðirin ættuð frá Keldum. Úr sjó pottinum skrapp ég aðeins í gufuna áður en ég fór upp úr.

Á heimleiðinni kom ég við á tveimur stöðum, Krónunni við Nóatún og i vínbúðina í Faxafeni. Heima dundaði ég mér við ýmislegt annað en "skyldustörfin" og flaug tíminn hratt við það dundur. Sótti Lilju í Kolaportið um fimm og var svo tilbúin um sex þegar ein úr minni deild í vinnunni kippti mér með mér í heimboð til annarrar úr sömu deild. Mættum öll nema ein af átta en fengum samt áttunda gestinn með en það er sá sem vann með okkur sl. vetur. Að auki fékk kjölturakkinn Birta að vera með. Við vorum semsagt í matarboði. Ég hafði tekið með mér litlar hvítvínsflöskur úr hvítvínsbúðinni en þær fór ég allar með óáteknar heim aftur því það var boðið upp á vín. Gerði mitt besta til að passa að fara ekki yfir víndrykkjustrikið til að vera messufær í dag. Held að það hafi alveg sloppið til.

Snemma á fótum - snemma í rúmið

Ég fór á fætur upp úr klukkan fimm í gærmorgun og var mætt í vinnuna klukkan sex eins og tvo dagana þar á undan. Um hálftíu fékk ég að skjótast frá. Sótti tilvonandi rafvirkja í Tækniskólann til að koma honum í fyrirfram pantaðan tíma til augnlæknis. Þar kom í ljós að sjónin hafði eitthvað versnað síðan í fyrravor. Engu að síður spurði augnlæknirinn son minn að því hvort hann vildi fá gleraugu. Hann er enn á mörkunum og myndi alveg fá bílpróf þótt hann væri ekki með gleraugu. Hins vegar er hann með smá sjónskekkju og finnur þar að auki fyrir þreytu í tímum og verður að passa sig að lenda ekki aftarlega í stofunni ef hann á að sjá á töfluna. Svo það var ákveðið að fjárfesta í gleraugum. Fórum með miðann frá lækninum í optikbúðina á fyrstu hæðinni í Hamrahlíðinni. Það tók smá tíma að velja sér réttar umgjarðir. Ég var fegin að það var ekki ég sem þurfti að velja en strákurinn fann þetta út alveg sjálfur og þegar búið var að velja, stilla og borga fengum við að vita að hægt yrði að sækja gleraugun seinna um daginn.

Einkabílstjórinn var kominn heim úr skólanum þarna langt gengin í ellefu og þar sem ég var alls ekki viss um að fá stæði aftur fyrir utan vinnustaðinn minn kipptum við honum með, skutluðum hinum bróðurnum aftur í skólann og mér í vinnuna. Ég bað strákinn um að fara með uppsöfnuð blöð og fleira í gámana og sækja mig aftur um eitt leytið.

Eftir vinnu fór ég beint heim. Við einkabílstjórinn sátum nokkra stund í bílnum fyrir utan því við vorum að rabba saman um eitt og annað. Að vísu var svo sem enginn heima hjá okkur þá stundina en það er bara eitthvað við það að spjalla saman í bílnum.

Seinna um daginn skrapp ég með vinkonu minni á tvo staði með hjólið hennar og fleira í geymslu og annað í notkun. Stoppuðum aðeins á báðum stöðum, ívið lengur á fyrri staðnum þar sem við skildum hjólið eftir. Þegar við komum til baka úr þessu leiðangri hjálpuðumst við að við að útbúa kvöldmatinn.

"Kaffi og rán" eftir Catharina Ingelman-Sundberg er bráðskemmtilegur sænskur kósí-krimmi. Hef verið að lesa þessa bók undanfarna daga og mæli hiklaust með henni. Vona að ég verði svona hresst og uppátækjasamt gamalmenni þegar þar að kemur.  :-)

Ég og pabbi minn

Myndin af okkur er tekina á Hellu þann 3. ágúst sl.

Jazzmessuhelgi framundan

Ég mætti aftur klukkan sex í vinnu í gærmorgun ásamt sama vinnufélaganum. Klukkan eitt fór ég beint í sund þar sem ég gaf mér góðan tíma í rútínuna. Hitti fyrrum vinnufélaga í sjópottinum og staldraði fyrir vikið aðeins lengur þar en oft áður. Að sundinu loknu fór ég með jólagjöfina hennar systur minnar í innrömmun í Rammagerð Kópavogs. Má sækja þetta strax upp úr mánaðamótum. Var komin heim á fjórða tímanum. Annar tvíburinn var farinn til pabba síns en hinn var að vinna að verkefni til sex og fékk svo strætóklink hjá mér því bróðirinn hafði verið með rauð kortið til að komast m.a. til Garðabæjar fyrr um daginn,eitthvað sem var skyldumæting á vegum skólans. Við vinkona mín skruppum í Sunnubúð eftir nauðsynjum og nammi, fengum okkur afganginn af laxaréttinum frá því kvöldið áður og horfðum svo á imbann fram eftir kvöldi. Ég var reyndar frekar skynsöm og fór í háttinn á ellefta tímanum vitandi það að ég þyrfti að vakna upp úr fimm aftur.

Morgunhani

Í stað þess að byrja gærdaginn á því að mæta í sund um hálfsjö var ég mætt í vinnuna klukkan sex ásamt einni annarri úr deildinni. Vinnuskyldu okkar lauk svo klukkan eitt og þá fór ég beint í Laugardalslaugina. Gaf mér góðan tíma í rútínuna mína og var þarna á annan tíma. Kom við í Fiskbúð Hafliða í Skipholti og ætlaði að kaupa bleikju að vestan til að hafa í kvöldmatinn. Samkvæmt manninum sem afgreiddi mig var bleikjan týnd, hafði ekki skilað sér í fiskbúðina, svo ég ákvað að kaupa laxaflak í staðinn

Var komin heim upp úr þrjú og hafði því góða tvo tíma í smá hvíld áður en ég mætti á kóræfingu. Kórstjórinn bað mig um að æfa altröddina því í byrjun leit út fyrir að annars væri engin alt. Það rættist þó úr því. Nafna mín altinum mætti nefnilega rétt eftir að æfingin hófst. Við konurnar voru einni færri en karlarnir eða fimm en þrjár af okkur heitum Anna svo það má segja að kórstjórinn hafi verið Önnum kafinn. Tveir af þremur bössum heita reyndar Kristinn. Æft var fyrir Jazzmessuna sem verður n.k. sunnudag og einnig farið yfir lögin sem við höfum verið að æfa sl. mánuð. Þess má geta að í einu laginu var ég að syngja alt-röddina í fyrsta skipti.

Þegar ég kom heim eftir kóræfingu var vinkona mín búin að gera mat úr laxinum og þau strákarnir að fá sér að borða. Ég byrjaði á því að smíða messutilkynningu í moggann og uppfæra vegginn og heimahöfnina með svipuðum upplýsingum áður en ég fékk mér smakk af laxi sem var bakaður í ofni ásamt rauðkáli, gulrótum og hvítkáli. Horfði á imbann til klukkan að verða tíu en þá fór ég að undirbúa mig undir háttinn til að vera tilbúin í næstu morgunvakt.

Þriðjudagskvöld

En ég ætla aðeins að skrá niður smávegis um gærdaginn. Fór með strætó í vinnuna og hafði sunddótið með því ég var að spá í að fara í sund beint eftir vinnu. Sú ákvörðun breyttist þó margra hluta vegna. Vinnudagurinn var annasamur og mjög öðruvísi, á margan hátt mjög athyglisverður en ég ætla samt ekki að að skrifa neitt meira um það. Ég sinnti vinnuskyldum mínum og fór beint heim á eftir. Heima stoppaði ég ca. einn og hálfan tíma áður en ég dreif mig loks í sund. Viðhélt rútínunni þrátt fyrir að vera á "óvenjulegri" tíma.

Eftir sundið ákvað ég að fara beint í heimboð í heimahús á stórreykjavíkursvæðinu til að fá tækifæri til að kveðja einn vinnufélaga minn. Ég hitti á réttu götuna í rétta bæjarfélagi en eitthvað hafði húsnúmerið skolast til í minninu hjá mér og ég bankaði upp á hjá bláókunnugu fólki. Sem betur fer átta annar vinnufélagi minn leið framhjá, gangandi og í sömu erindagjörðum og ég. Sú var með húsnúmerið á hreinu. Ég geymdi lánsbílinn þar sem ég hafði lagt honum og varð samferða töluvert austar í götuna. Nokkrir aðrir vinnufélagar höfðu svarað kallinu og voru þegar mætt í kveðjuhófið. Frábært að fá tækifæri til að kveðja góða manneskju en við vorum vissar um að leiðir okkar myndu eitthvað liggja saman síðar.

Annasöm og skemmtileg helgi!

Ég fór í sund strax upp úr klukkan átta á laugardagsmorguninn. Gaf mér góðan tíma, synti 500 metra fór fjórum sinnum 2,5 mínútur í kalda pottinn þrisvar í einn heita pottinn, tíu mínútur í sjópottinn og annað eins í gufuna. Upp úr hálftíu var ég á leiðinni heim þegar norska esperanto-vinkona mín hringdi og mér heyrðist á henni að hún vildi fá mig yfir til sín. Ég ákvað að hlýða kallinu. Fór heim með sunddótið, tók mig til fyrir austurferð og hafði esperantodótið með mér. Á leiðinni heyrði ég um að eitthvað væri um að vera á Eiðistorgi um hálfellefu í þættinum Bergson og Blöndal. Spáði svo sem ekkert meir í það en ég var rétt sest inn hjá vinkonum minni þegar hún sagðist hafa fengið "geggjaða" hugmynd og það leiddi til þess að við skruppum út á Eiðistorg og fengum okkur smá morgunverð og kaffi. Stoppuðum kannski í svona tuttugu mínútur eða hálftíma og nutum kaffis, hljómlistar og fl. áður en við snérum heim og lásum smá esperanto.

Frá Inger fór ég um tólf og fór þá beint austur á Hellu. Aðstoðaði mömmu við að gera eplajukk uppskrift úr helgarmogganum og hræra í pönnukökudeig og bjó einnig til þrjú jólakort. Ég var líka með bækur og saumadótið en það vannst ekki tími til að sinna því vegna þess að það var búið að bjóða okkur í smá veislu í Brekkugerði. Tókum pönnsurnar, sem mamma steikti á tveimur pönnum, eplajukkið og rjómasprautu með okkur þangað. Kvöldið leið alltof hratt. Pabbi og mamma fengu í glas og ég rétt dreypti á hálfu hvítvínsglasi með matnum. Keyrði þau heim stuttu fyrir tíu, tók saman dótið mitt, fékk krækiber og tók dót sem ég átti að afhenda Helgu systur og brunaði svo í bæinn. Kom heim fyrir miðnætti.

Í gærmorgun var ég mætt í Egilshöllina upp úr átta og sá yngri systurdóttur mína keppa á skautum. Henni gekk alveg ágætlega. Ég sá amk miklar framfarir en hún lenti í fjórða sæti af sextán keppendum og það þótt henni fipaðist einu sinni. Hún gerði svo afar vel í því að klára sinn dans þótt mússíkin stoppaði amk hálfri mínútu of snemma. Þegar keppni í þessum flokki var lokið lét ég Helgu fá dótið úr bílnum, kvaddi mæðgurnar og fór svo beint í sund. Synti svipað og daginn áður og gaf mér góðan tíma til að pottormast á eftir. Verslaði á heimleiðinni og var að koma heim um hálfeitt.

Bleikur dagur

Já, það var bleikur dagur í dag. En ég ætla reyndar að segja örstutt frá gærdeginum. Hann var kannski ekki alveg eins viðburðarríkur og margir undanfarnir dagar, nánast hægt að lýsa honum í þremur orðum: Vinna, borða, sofa! Og þó, ég náði að lesa smá inn á milli, skila fjórum bókum á safnið án þess að taka neinar í staðinn, elda kjúklingabringur í ofni með sætri kartöflu, hnúðkáli og rauðkáli (sauð bygggrjón með þessu) og horfði svo á imbann til klukkan tíu. Þá varð ég að fara að huga að því að koma mér í háttinn, einhvern veginn alveg búin á því þótt ég viti ekki alveg eftir hvað. Kannski eitthvað uppsafnað?

Njótið allra daga alltaf!

Allt ágætt bara

Gærdagurinn kláraðist alveg án þess að ég gæfi mér tíma til að setja inn pistil fyrir þriðjudaginn. Ég fór á fætur um sex í gærmorgun og þótt ég héldi vel á morgunrútínsspöðunum þá vantaði klukkuna ca 13 mínútur í sjö þegar ég synti loks af stað í Laugardalslauginni. Varð vör við að Lena var á svæðinu svo ég synti aðeins 200 metra til að hitta hana sem fyrst í pottinum. Hún fór reyndar fyrst í 42°C pottinn en þótt ég væri á undan ofan í þann kalda sat ég hennar tvær mínútur í viðbót þegar hún kom. Við náðum svo þremur öðrum kaldapottsferðum en ég sleppti gufu- og "sól"-baðinu því ég var ákveðin í að mæta aðeins fyrir átta í vinnuna.

Strax eftir vinnu skrapp ég upp í Brimborg til að sækja pakka fyrir pabba. Hann hafði verið að versla sér varahlut í bílinn sinn og þar sem hann vissi að ég yrði á ferðinni fljótlega bað hann mig um að sækja hann fyrir sig. Hafði örfáar mínútur heima til að ganga frá sunddótinu og fá mér smá snarl áður en tími var kominn til að mæta á kóræfingu. Bassinn var sá eini sem var fullskipaður en engu að síður var æfingafært.  Við sóprÖnnur og Helga sungum með Ingu Dóru í altinum þegar sópran átti ekki að syngja. Litum aðeins á "Bjarnatónið"- til að rifja upp fyrir jólin eftir kaffihlé. Einn úr bassanum átti sjötugs afmæli fyrr í vikunni og nafna mín í sópran átti afmæli í gær. Það var sungið fyrir þau bæði í restina af kóræfingunni.

Að lokum verð ég að segja örstutt frá þriðjudagskvöldinu því það var blásið í sauma-jólakortagerðar-prjónaklúbb hjá tvíburahálfsystur minni og ég náði að framleiða 10 stk jólakort. Kvöldið leið alltof hratt og klukkan var allt í einu farin að ganga tólf áður en við gátum slitið okkur frá föndrinu. Líklega er alltof langt síðan síðasti klúbbur var haldinn því við höfðum um margt að spjalla og að sjálfsögðu fengum við nokkur hlátursköstin.

Endalaust hraðferð á tímanum

Þar sem ég þurfti að skila posanum og leggja inn seðlana eftir kaffihlaðborðið í kirkjunni á sunnudaginn fór ég á lánsbílnum í vinnuna í gærmorgun. Ég byrjaði að sjálfsögðu á því að mæta í sund í Laugardalinn rétt eftir opnun. Veðrið var dásamlegt og frábært að byrja morguninn svona. Eftir 300 metra á bringunni fór ég beint í kalda pottinn. Hafði þóst sjá Lenu í lauginni að synda baksund og það kom á daginn að hún var þarna, hafði fyrst brugðið sér í einn heita pottinn áður en hún kom til mín í kalda pottinn. Það endaði með því að ég fór fjórar ferðir í þann kalda með henni. Í síðustu ferðinni hitti ég einn frænda minn, afi hans var föðubróðir minn. Hann var að prófa þessar dýfingar í þann kalda. Náði að vera um mínútu og svo fór hann smá stund upp úr áður en hann dýfði sér aftur. Við Lena bentum honum á að það þætti ekki verra að fara í heitan pott á milli. Endaði í sjópott og gufu og náði samt alveg á réttum tíma í vinnuna.

Fékk að stinga af úr vinnu rétt fyrir hálftvö. Fór fyrst í bankann áður en ég renndi Hafnarfjörðinn til að skila posanum til VALITOR. Kvöldið var notalegt. Las, horfði á fréttir, dansk-sænska sakamálaþáttinn Brúna og CSI-Cyber.

Eftir helgina

Nýliðin helgi var að mestu helguð kirkju óháða safnaðarins.  Ég fór þó í sund báða morgnana strax upp úr klukkan átta, þ.e. rétt eftir opnun. Eftir laugardagssundið og pottadýfingar skutlaði ég vinkonu minni í Kolaportið þar sem hún var með sölubás allan þann daginn. Síðan lá leiðin í Bónus í Kringlunni þar sem ég verslaði inn nauðsynjar fyrir kaffihlaðborð KÓSÍ-kórsins. Mætti með þetta kirkjuna og minn skerf á hlaðborðið, flatkökurnar sem ég smurði kvöldið áður, um hádegisbilið. Ég renndi blint í sjóinn hvað varðaði hjálparhendur fyrir undirbúning, vissi aðeins fyrir víst um fjórar hendur. En allt í allt mættum við átta (16 hendur) og komumst nokkuð langt með það sem hægt var að undirbúa daginn fyrir hlaðborð á tæpum þremur tímum. Ég var amk komin heim góðum klukkutíma áður en fótboltalandsleikurinn hófst. Þá voru mættir þrír félagar bræðranna og þeir vinirnir byrjaðir að spila. Sótti vinkonu mína í hálfleik. Nokkru eftir leikinn ákváðum við tvær að skreppa á Gló við Laugaveg og fá okkur að borða þar. Fórum á lánsbílnum en lögðum honum við Hallgrímskirkju og löbbuðum þaðan. Þetta var mjög góð hugmynd hjá okkur og komum við pakksaddar til baka.

Eftir sundið í gærmorgun hafði ég ágætistíma heima en ég hafði ákveðið að mæta í krikjuna um tólf og stóð við það. Var ekki búin að vera lengi á staðnum en byrjuð að undirbúa þegar fleiri mættu. Rétt upp úr eitt hituðum við upp fyrir messuna og að þessu sinni voru helmingi fleiri kórfélagar mættir heldur en í sl. tveimur messum, eða 10. Reyndar var aðeins ein mætt í altinum svo ég svissaði yfir í altinn í eina sálminum sem sunginn var í röddum. Einkabílstjórinn kom gangandi í kirkjuna um hálftvö og ég bað hann um að passa posann og "peningakassann" með skiptimynntinni í. Hann sá svo að mestu um að taka við greiðslu v/kaffihlaðborðsins eftir afar skemmtilega galdramessuna. Vel var mætt í kirkjuna og í nógu að snúast að fylgjast með að ekki vantaði neitt. Það tók líka drjúgan tíma að ganga frá. Oddur fékk að skila posanum af sér um fjögur og ég lánaði honum rauða kortið til að hann gæti skroppið í heimsókn til pabba síns.

Undirbúningur í fullum gangi

Þar sem ég var búin að fá leyfi til að fara fyrr úr vinnu til að reka ýmis erindi fór ég á lánsbílnum í gærmorgun. Byrjaði að sjálfsögðu á því að mæta í Laugardalinn klukkan hálfsjö. Synti 400 og náði tveimur góðum ferðum í kalda pottinn, einni í heitan pott, einni ferð í sjópottinn og smástund í gufuna og "sólbað" á eftir.

Klukkan hálfþrjú kvaddi ég vinnufélagana og dreif mig í að reka fyrrnefnd erindi. M.a. skrapp ég í banka eftir skiptimynnt (seðlum), sótti einn posa til Valitor og keypti nokkra pakka af flatkökum, smjör og hangikjöt. Eftir kvöldmat sat ég svo í stofunni með vinkonu minni, hún að prjóna og ég að smyrja flatkökur. Höfðum kveikt á sjónvarpinu á meðan og fylgdumst aðeins með útsvari.

Vinnuvikan liðin í bili

Ég fór með vagninum sem fer frá Sunnubúð korteri fyrir heila tímann í vinnuna í gærmorgun og var mætt á vinnustaðinn rétt fimm mínútum fyrir átta og svo beint heim aftur átta tímum seinna. Fékk annan soninn í lið með mér í skylduverkin svo þau gengu nokkuð hratt og vel fyrir sig. Hafði steiktan fisk með hvítkáli, rauðkáli og hýðisgrjónum í kvöldmatinn og tók svo fram jólakortaföndrið. Bjó til níu kort í viðbót og er þá nánast komin með tvo þriðju af kortunum sem mig vantar í ár. Vel gert!

Morgunstund

Var vöknuð nokkuð á undan vekjaraklukkunni og þó var hún stillt á tíma sem ekki náði 06:00. Hafði því ágætis tíma til að sinna morgunverkunum og taka mig til fyrir daginn. Var mætt við Laugardalslaugina um það leiti sem opnaði og að sjálfsögðu vígði ég nýja sundbolinn með því að synda 300m, dýfa mér 3x í kalda pottinn, 2x í einn heitan, einu sinni í sjópottinn og sitja svo nokkrar mínútur í gufunni.  Sundbolurinn virkaði vel.

Var mætt í vinnuna stuttu fyrir átta. Hafði alveg nóg að sýsla frameftir degi en fékk svo að fara klukkutíma fyrr. Hafði þá tæpa tvo tíma heima áður en ég mætti í fyrra fallinu á kóræfingu í krikjuna til að taka til kaffið fyrir pásuna. Þrátt fyrir að við mættum aðeins fimm fyrir utan kórstjórann blésum við í æfingu og æfðum nokkur lög, gömul og nýtti í röddum. Æfingin var góð en höfð í styttra lagi og við enduðum á því að taka smá kaffi áður en við gengum frá og fórum heim. Kórstjórinn varð reyndar eftir því hann er líka að stjórna karlakórnum Stefni og þeirra æfing er á eftir æfingu KÓSÍ-kórsins.

Mið vika

Þar sem ég var vöknuð nokkuð löngu á undan vekjaraklukkunni í gærmorgun freistaðist ég til að kveikja á tölvunni og náði ég að setja inn bloggfærslu áður en tími var kominn til að skottast út í strætó. Annars lá mér svo á að nota nýju úlpuna í fyrsta sinn að ég gleymdi að taka með mér húslykla. Þegar mér gafst kostur á að hætta aðeins fyrr í vinnunni var ég ekki viss um að ég myndi finna einhvern heima svo ég samdi um að ég mætti frekar hætta fyrr seinna í vikunni. Fékk mér svo göngutúr hálfa leið heim áður en ég náði vagninum sem stoppaði fyrir utan um hálffimm. Það voru allir heima svo ég komst inn. Ég stoppaði þó ekki lengi við því fyrsta þriðjudag í mánuði eru haldnir stjórnarfundir í óháða söfnuðinum og ég átti að vera mætt upp í kirkju klukkan fimm. Það hafðist. Fundurinn var nokkuð góður og setti ég m.a. beiðni fyrir hönd KÓSÍ-kórsins (með smá aðstoð) um að hækka framlagið í sjóðinn. Formaðurinn lagði til að tillagan yrði samþykkt á þá vegu að kórinn fengi helminginn af hækkuninni núna en frá og með áramótum myndi framlagið tvöfaldast miðað við núverandi framlag.

Kom heim upp úr hálfsjö. Hitaði smá hluta af kjötsúpunni, frá því á mánudagskvöldið án þess að hafa kjötið með, handa okkur Lilju en strákarnir höfðu sagt pass því það var spilakvöld hér hjá þeim frá klukkan hálfníu til hálftólf. Ég gerði lítið annað en að lesa, spjalla við Lilju og glápa á imbann. Ætlaði að horfa á þáttinn eftir tíu fréttir á RÚV en þá var ég hins vegar farin að geyspa svo mikið að ég taldi ráðlegast að koma mér í háttinn.

Brun á tímanum

Það mætti segja mér að það nýtt ár verði gengið í garð áður en langt um líður og þessir þrír mánuðið sem eftir lifa af þessu ári líði svo hratt, svo hratt að þegar ég lít til baka um áramótin muni mér finnast eins og þetta hafi í raun verið mun styttri tími. Það er eins gott að nýta og njóta augnablikanna.

Fljótlega eftir vinnu í gær fékk ég vinkonu mína sem er hjá mér í nokkra næstu daga til að koma með mér í Sport Direct og hjálpa mér að finna á mig úlpu og sundfatnað. Við gerðum góða ferð. Ég fékk á mig samskonar úlpu og ég keypti handa einkabílstjóranum um daginn, þrjár í einni fjólubláa að lit, og tvennskonar sundföt, tegundir sem ég hef ekki prófað áður, á innan við tuttuguogeittþúsund krónur. Sundbolurinn er opinn í bakið en ekki aðskorinn og hin sundfötin eru í tvennu lagi, brók og bolur (ekki bikiní). Ég hlakka til að prófa þá.

Eftir að við komum heim aftur hjálpuðumst við að við að útbúa dýrindis kjötsúpu í stærsta pottinum mínum. Um það leyti sem súpan varð til hringdi ég til að athuga með soninn sem enn var í skólanum. Þá var hann einmitt að hætta í verkefninu sem hann hafði verið að vinna að, úti var hellidemba og ég ákvað að senda einkabílstjórann, hinn soninn, eftir honum.

Eftir helgina

Tók þátt í haustfagnaði með vinnufélögum seinni partinn á föstudaginn og aðeins fram á kvöldið. Hafði ekki úthald lengur en til hálfníu en það var að hluta til vegna þess að ég var ákveðin í að nýta báða helgidagana mjög vel.

Var komin ofan í Laugardalslaug og byrjuð að synda fyrir klukkan hálfníu á laugardagsmorguninn. Úr sundinu mætti ég beint í klippingu. Þótt ég væri mætt  áður en klukkan varð alveg  tíu opnaði Nonni fyrir mér og bauð mér að byrja á því að fá mér smá kaffi sem ég þáði. Kom heim um hálfellefu. Tíminn til tvö leið frekar hratt við ýmis konar dundur og skylduverk. Var mætt á Vodafone-völlinn um tvö. Komið gervigras á völlinn en leiktíðið endaði eins og hún hófst með heimaleik sem tapaðist. Patrick Pedersen náði ekki að skora í leiknum en fékk engu að síður gullskóinn fyrir flest skoruð mörk í sumar.

Eftir leikinn trítlaði ég aftur heim til þess að ná í lánsbílinn og sækja eina vinkonu mína, og dótið hennar, en hún var með bás í Kolaportinu. Hitti aðeins á þrjár vinkonur sem eru Rangæingar að upplagi og líka í vinahóp Þallar (Fridu Fridriks).

Það var spilakvöld hér hjá bræðrunum en við vinkona mín lögðum stofuna undir okkur og ég bjó til níu jólakort þrátt fyrir að vera líka að fylgjast með sjónvarpinu. Hætti ekki kortaframleiðslunni fyrr en klukkan var langt gengin í tólf.

Var mætt í laugina í gærmorgun á svipuðum tíma og morguninn áður. Skrapp heim með sunddótið og náði í esperantodótið. Mundi loksins eftir að taka með mér tvær síðustu vikukrossgáturnar, þ.e. úr þeim vikublöðum sem ég fékk síðast í ágúst áður en ég sagði upp áskriftinni. Við einbeittum okkur að esperantoinu í þetta sinn. Stoppaði aðeins rúma klukkustund, skaust heim með esperantodótið og dreif mig svo í heimsókn til foreldra minna. Þar stoppaði ég aðeins fram á kvöld en var þó komin heim aftur um tíu.

Bókasafn, bleikja og föndur

Aðeins örfáar línur í dag. Ég skrapp í fiskbúð Hafrúnar fljótlega eftir vinnu í gær og keypti bleikjuflök frá Vestfjörðum. Mjög góður matur. Síðan lá leiðin á bókasafnið í Kringlunni. Skilaði tveimur af þremur bókum, var búin að framlengja skilafrestinum á þeirri síðustu. Kom heim með bleikjuna (og reyndar aðra fisktegund líka til að eiga í frysti) og sjö bækur, þar af eina sem þarf að skila eftir tvær vikur.

Kvöldið fór svo í jólakortaundirbúning, spjall við eina vinkonu sem prjónaði og bjó til skartgripi á meðan og sjónvarpsgláp. Klippti út fullt af jólalegum myndum úr þrívíddarbók sem ég átti í fórum mínum, hreinlega kláraði þá bók. Nú þarf ég bara að klippa niður fleiri karton og brjóta saman í hentuga kortastærð, á aðeins 13 slík kartona kort tilbúin til að jólaskreyta en þarf líklega amk annað eins.

Á meðan á þessu fór fram voru bræðurnir með spilakvöld frammi í holi.

Glænýr mánuður

Þá eru liðnir 3/4 hlutar af þessu herrans ári 2015 og ég hamast við að njóta dýrmætu augnablikanna og samskiptanna við samferðafólksins. Á þriðjudagskvöldið skrapp ég aðeins til "föðursystur" minnar (kannski rétt að kalla hana föðurnöfnu því feður okkar eru nafnar!?!?) en það var liðinn nokkur tími síðan við hittumst síðast, oft eitthvað annað í veginum eða tíminn að skarast á. En það er nú svo sem ekki fjöldi hittinga sem skipti mestu máli, amk ekki alltaf, heldur gæðin og hvernig maður nýtir þessar stundir sem gefast.

Í gærmorgun vaknaði ég í fyrsta skipti í þó nokkurn tíma við það að vekjarinn var kominn í gang. Enda hafði ég stillt klukkuna á 05:50 til að vera örugglega komin í sund strax um opnunar leytið. Það tókst, þ.e. ég var mætt í Laugardalinn rétt rúmlega hálfsjö og byrjuð að synda tæpum tíu mínútum síðar. Synti aðeins 300 metra til að geta farið oftar í pottana. Eftir fyrstu ferðina í kalda pottinn urðu fagnaðarfundir í einum af heitari pottunum þegar Lena, danska konan, fann mig þar en við höfum ekki hist síðan 11. ágúst sl. Ég náði tveimur kalda pottsferðum með henni og afar góðu spjalli í leiðinni.

Var mætt á vinnustaðinn ca tíu mínútum fyrir átta enda á lánsbílnum. Allt daglegt var búið fyrir hálfþrjú og ég fékk að fara heim upp úr klukkan þrjú. Það var alveg ágætt að fá klukkutíma lengri tíma til að slaka á og undirbúa sig undir annars afar góða og notadrjúga kóræfingu. Sú æfing byrjaði reyndar á kaffipásu þar sem það var ekki útséð um mætingu í allar raddir, en það rættist heldur betur úr mætingunni, nema kannski í altinum þær voru aðeins tvær, þrír í hvorri karlarödd og við vorum fjórar í sópran. Ég stalst því stundum til að æfa aðeins með altinum þegar sópranröddin átti að hvíla.

Frétti í gær af andláti fyrrum vinnufélaga sem ég vann með fyrstu fimm árin á RB. Það var smá högg því konan sú náði því þá ekki einu sinni að verða 75 ára og það þykir ekki hár aldur í dag. Hugurinn er hjá aðstandendum hennar.

Septembermánuður alveg að verða búinn

Eins og flesta virka daga aðra en miðvikudaga notaði ég rauða strætókortið til að ferðast milli heimilis og vinnu báðar leiðir í gær. Var komin heim fyrir klukkan hálffimm, hafði matinn tilbúinn upp úr sex og dreif mig svo í sund sem var bæði hressandi og endurnærandi. Ég var líka skynsöm og komin í háttinn fyrir ellefu en að sjálfsögðu las ég um stund áður en ég fór yfir í draumalandið.

Mega-hraði á tímanum

Það var líkt og sundkortið mitt hafi vitað að pásunni væri lokið í gærmorgun því það var komið upp úr veskisvasanum sem ég geymi það í þegar ég er ekki að nota það. Hugurinn var örugglega líka alveg tilbúinn í daginn því ég var vöknuð amk hálftíma fyrr heldur en ég hafði hugsað mér, þ.e. vel á undan vekjaraklukkunni. Ég var byrjuð að synda í Laugardalslauginni innan við hálftíma eftir að opnaði. Synti ekki nema 300 en fór þrjár ferðir í kalda pottinn, tvær ferðir á milli í 42°C pottinn, eina í sjópottinn og smá stund í gufuna. Var komin heim aftur rétt fyrir tíu.

Tæpum þremur tímum síðar var ég mætt í kirkjuna. Mættum sjö kórfélagar og það var alveg nóg til að sinna því verkefni sem við áttum að sinna, leiða messusvörin og sálmasönginn. Þurftum reyndar ekki að syngja nema tvo sálma þegar til kom en það höfðu verið settir þrír á töflunua og við höfðum rennt yfir þá alla um klukkustund fyrir messu. Messan sjálf var mjög hátíðleg og fjölbreytt en verið var að halda upp á að þann 21. sept. sl. voru liðin hundrað ár frá fæðingu séra Emils Björnssonar, fyrsta sóknarprest safnaðarins. Gítarspil var á undan sjálfri messunni, tvö af börnum séra Emils lásu fyrri og síðari ritningalestra, spiluð var upptaka af einni predikun sr. Emils, Ómar Ragnarsson var með smá ræðustúf um kynni sín af klerkinum og svo söng Geir Ólafs tvö Frank Sinatralög því 15. des n.k. verða liðin 100 ár frá fæðingu Sinatra. Á eftir var boðið upp á snittur og fleira góðgæti í efri safnaðarsalnum. Ég hjálpaði til við að ganga frá eftir veisluna.

Næst lá leiðin beint til norsku esperanto vinkonu minnar og stoppaði ég hjá henni í á aðra klukkustund. Kom við í Krónunni við Granda á heimleiðinni en klukkan var að verða sjö þegar ég skilaði mér heim.

Sundpásan búin sem betur fer

Ég rumskaði fyrst á níunda tímanum í gærmorgun en var ekkert að flýta mér framúr. Um níu var ég samt búin að taka utan af sænginni, koddunum og rúmdýnunni. Fékk mér morgunhressingu, kveikti á pabbatölvu en settist samt fyrst inn í stofu með síðustu ólesnu bókina af safninu; Dóttir mæðra minna eftir Sindra Freysson. Ég var einnig með saumatöskuna með mér en reyndar opnaði ég hana aldrei í allan gærdag. Ýmist las ég, spjallaði við foreldra mína eða vafraði um og lék mér á netinu.

Seinni part dags skrapp ég reyndar aðeins á elliheimilið til að heimsækja gömlu hjónin sem voru fyrst nágrannar okkar á Hellu og bjuggu á nr. 22. Árið 1976 var það hús enda húsið í götunni þegar pabbi og mamma tóku fyrstu skóflustunguna við hliðina. Gömlu hjónin voru nágrannar okkar til ársins 2000 en eftir skjálftann þá um sumarið var húsið þeirra dæmt óíbúðarhæft og einhverjum vikum síðar fengu þau íbúð við alveg nýja götu, Bogaslóð, rétt við Lund. Fyrr á þessu ári fékk gamli maðurinn að fara í hvíldarinnlögn á Lund. Hann er fæddur árið 1920 og bara nokkuð sprækur miðað við árin sem hann hefur lifað. Konan hans er sjö árum yngri og fljótlega fékk hún að koma og vera hjá honum og ég held að þau séu komin með fast pláss á elliheimilinu. Hún er síprjónandi og eftir hana liggja margir flottir hlutir. Hún prjónaði m.a. peysuna sem ég mátaði fyrir mömmu fyrr í sumar og er nú komin norður til Helgu systur enda var peysan alltaf ætluð henni.

Aðstoðaði mömmu smávegis í eldhúsinu en hún sá samt að mestu um að hugsa um kvöldmatinn. Eftir kvöldmat fengum við okkur kaffibolla og sátum að spjall til klukkan að ganga tíu en þá kvaddi ég og lagði í hann heim á leið.

Á æskuslóðum

Síðustu tveir vinnudagar vikunnar liðu nokkuð hratt og örugglega og að sjálfsögðu notaði ég rauða kortið í ferðirnar milli heimilis og vinnu. Þegar ég var á leiðinni heim upp úr fjögur í gær var ég orðin ákveðin í að drífa mig austur til foreldra minna strax um kvöldið. Mamma hafði haft af þessu veður, líklega af því ég minntist á það við pabba kvöldið áður að þetta væri að brjótast um í mér. Hún hringdi í mig á meðan ég var enn í strætó á leið heim. Ég sagðist myndu leggja í hann eftir kvöldmat þegar ég væri búin að sinna smá verkefnum heima fyrir. Ég var því mætt á Hellu í kringum hálfníu í gærkvöldi, klyfjuð eins og ég ætlaði mér að vera lengur en aðeins þessa einu nótt.  :-)

Skemmtilegur hittingur

Það var afar hressandi að fara fótgangandi til vinnu í gærmorgun. Vinnudagurinn leið nokkuð hratt og þegar fór að líða að hættutíma hafði ég samband við einkabílsstjórann og bað hann um að sækja mig. Við notuðum ferðina til að kíkja í sport direct og athuga hvort hann fengi á sig úlpu þar. Það kom á daginn að það var til svona þrjár í einni í hans stærð og alls ekki svo dýr, eða innan við fjórtán þúsund. Keypti úlpuna á strákinn sem notaði hana strax seinna um kvöldið. Hann fór út að hitta vini sína og ákvað að borða með þeim. Ég útbjó kjöt í karrýrétt handa mér og hinum syninum.

Það var frí á kóræfingu í gærkvöldi. Rétt um sjö sá ég mynd og skemmtilegan status hjá stúlku sem ég er búin að þekkja síðan innan við fermingu en við kynntums fyrst sem pennavinir. Við myndina hennar setti ég athugasemd sem hún tók vel í og það varð úr að ég ákvað að drífa mig í heimsókn til hennar. Það var eins og við hefðum verið að hittast síðast í síðustu viku en við þurftum mikið að spjalla og kisurnar hennar tvær vildu líka fá pínu athygli. Kvöldið leið mega hratt og klukkan var farin að ganga ellefu þegar ég kvaddi með þeim orðum að við yrðum endilega að endurtaka þetta við tækifæri.

Fótgangandi í vinnuna í morgun

Vinnudagarnir líða hratt og örugglega og stundum þarf maður að passa upp á að drífa sig heim eftir að hafa skilað átta tímunum. Í gær notaði ég strætó báðar leiðir milli heimilis og vinnu og reyndi meira að segja að veifa rauða kortinu í gærmorgun. Vagnsstjórinn leit í allt aðra átt en sagði ekkert. Seinni partinn náði ég leið 13 beint heim rétt rúmlega fjögur og þá voru enn einhverjir að frétta af því að það var ókeypis með öllum vögnum amk í Reykjavík og nágrenni.

Heima byrjaði ég á því að búa til kaffi og hringdi svo austur í foreldra mína. Pabbi svaraði en það heyrðist alveg í mömmu inn á milli líka þótt hún sæti inni í stofu með prjónanana sína. Líklega hafði pabbi einnig setið inni í stofum með krossgáturnar sínar og svarað í þann síma sem var næstur.

Hélt mig annars heima við allt kvöldið og horfði m.a. á beina útsendingu frá landsleik Íslands og Hvíta Rússlands í fyrsta leik A-landsliðs kvenna í riðli til að keppa um sæti á EM-17. Auðvitað hefði ég átt að drífa mig á völlinn og styðja stelpurnar okkar þaðan en ég ákvað að vera nísk við sjálfa mig og þar að auki eiga kost á að sjá endursýningarnar.

Frítt í strætó í dag

Enn ein vinnuvikan er komin á skrið og virðist ætla að líða fljótt og vel. Að vísu var gærdagurinn heldur lengri í seinni endann en ég ætlaði mér en það var eitthvað sem ég hafði lítið val um. Var bara ánægð með að þegar ég tók strætó heim upp úr klukkan sex að vita það að vesenið var yfirstaðið, málin leyst og nokkuð víst að hægt væri að ganga til hefðbuninna skylduverka næsta vinnudag.

Heima hafði ég verið búin að taka út fiskiflök úr frysti til að steikja en ég ákvað að geyma þau áfram inni í ísskáp og setti upp kartöflur og sauð bjúgu, nokkuð sem ég hef afar sjaldan í matinn þar sem mottóið mitt er að reyna að hafa sem minnst unnin mat sem oftast á boðstólum. Annar sonurinn varð samt glaður við. Hinn var reyndar ekki komin heim úr skólanum og þegar hann kom klukkutíma síðar fékk hann sér afganginn af matnum frá því á sunnudagskvöldið, matinn sem hann hafði eldað sjálfur.

Kvöldið leið mega hratt en ég var komin í ró vel fyrir miðnætti eftir að hafa glápt smá á imbann og lesið um stund í síðustu ólesnu bókinni sem ég er með af safninu. Reyndar kom ný bókaklúbbsbók inn um lúguna í gær en hún bíður betri tíma.

Hluti afrakstur berjaferðar 6. sept. sl.

Eftir helgina

Enn einn mánudagurinn runninn upp og reyndar langt liðið á hann. En að venju ætla ég aðeins að punkta niður gærdaginn. Stillti ekki á mig neina klukku í fyrrakvöld og að þessu sinni svaf ég alveg til klukkan að verða níu. Þrátt fyrir að hafa ekkert ákveðið fyrir stafni framan af degi leið tíminn hratt. Um hálfþrjú hringdi norska esperanto vinkona mín til að láta mig vita að hún væri komin heim og tilbúin að fá mig yfir. Ég lét ekki segja mér þetta tvisvar heldur tók saman esperantodótið og dreif mig af stað. Eftir smá krossgátur og smá esperantolestur ákváðum við að skreppa á bókamarkaðinn út á Granda. Þar voru margar freistingarnar en ég lét ekki freistast að þessu sinni en gaf mér engu að síður góðan tíma til að skoða og spá í úrvalið. Inger fann nokkrar bækur og þegar hún var búin að kaupa þær færðum við okkur yfir í Krónuna. Ég skilaði svo vinkonu minni heim um fimm leytið. Oddur Smári gekk frá vörunum og Davíð Steinn sá um kvöldmatinn.

Sunnudagur

Á fimmtudag og föstudag notaði ég strætókortið milli heimilis og vinnu, báðar leiðir. Hafði til kvöldmatinn upp úr klukkan sex og dreif mig svo fljótlega í sund. Fór tiltölulega snemma að sofa á fimmtudagskvöldinu en kvöldið eftir teygðist alveg til klukkan langt gengin í tvö aðfaranótt gærdagsins. Við Oddur Smári horfðum á síðasta þáttinn af "Criminal Minds" í þessari seríu og svo datt ég inn í verðlaunamyndina, Illskan. Síðan vafraði ég um á netinu í næstum klukkustund og las um stund eftir að ég var háttuð upp í rúm.

Fór ekkert í sund í gærmorgun en um ellefu leytið lögðum við mæðginin öll þrjú af stað austur á leið. Einkabílstjórinn stjórnaði bifreiðinni afar vel, ég sat við hliðina á honum og hinn bróðirinn aftur í. Foreldrar mínir tók afar vel á móti okkur og mamma fékk annan strákinn strax til að hjálpa sér við að setja hljóð á beina útsendingu úr Skautahöll Akureyrar þar sem fór fram keppni í listhlaupi á skautum og átti yngri systurdóttir mína að keppa um eitt leytið.

Ég stoppaði hins vegar stutt við í bili og var mætt í Odda stuttu fyrir hálftvö til að fylgja stúlku frá Hellu sem var örfáum árum yngri en ég. Hún var yngst af fimm systkynum sem ég þekki einnig ágætlega til. Athöfninni var útvarpað og ég ákvað að eiga stundina ein í bílnum. Hálftíma fyrir sjálfa athöfnina byrjaði organistinn og spilaði hugljúf lög. Sönghópurinn öðlingarnir sáu að mestu um sönginn og gerðu það svo vel. Maríanna Másdóttir frá Kirkjulækjarkoti söng einsöng í einu laginu og það var magnað á að hlýða. Presturinn sem sá um athöfnina, Guðbjörg Arnardóttir, er nýhætt að þjóna þessu prestakalli en hún bjó um árabil í Odda en var sett inn í embætti í Selfosskirkju fyrir örfáum vikum. Hún er frábær prestur og gerir allt svo látlaus og vel. Um það bil sem sem athöfnin var að klárast flyktist fólk úr bílum og safnaðarsalnum sem ekki hafði komist inn í kirkjuna og stillti sér upp í hálfboga skammt frá kirkjudyrunum. Eftir að hafa gert krossmark yfir kistunni, sem var stillt upp framan við safnaðarsalinn, og faðmað séra Guðbjörgu og tvíburabræður hinnar látnu keyrði ég til baka á Hellu og ákvað að þiggja veitingar í Íþróttahúsinu á Hellu í boði kvenfélagsins Unnar. Þá fékk ég tækifæri til að faðma börn, systur, foreldra og eitthvað af nánum aðstandendum hinnar látnu. Settist fyrst við borð hjá einni ungri stúlku, nýlega orðin 15 ára, og átti mjög gott og skemmtilegt spjall við hana um ýmislegt.

Skilaði mér í Hólavanginn upp úr klukkan hálffimm. Tveimur tímum seinna aðstoðaði ég mömmu við að undirbúa kvöldmatinn. Oddur Smári tók þátt í þeim undirbúningi. Kvöldmatur var borðaður eftir fréttatímann á RÚV. Nokkru eftir að búið var að ganga frá og vaska upp bauð pabbi upp á íspinna. Klukkan var orðin hálftíu áður en við mæðginin kvöddum. Einkabílstjórinn fékk að keyra, hinn sonurinn sat í framsætinu og ég "elti" bílstjórann.

Greinilega enn í frígírnum

Já, sæll, fimmtudagur er langt kominn og afar stutt í næstu helgi. Vikan hingað til hefur verið nokkuð góð bara. Á mánudagsmorguninn notaði ég strætókortið í fyrsta sinn þegar ég tók vagninn við Sunnubúð um hálfátta. Var mætt í vinnu tæpu korteri síðar, eiginlega of snemma því klukkuna vantaði enn meira en fimmtán mínútur í átta. Skilaði mér heim úr vinnu aftur um hálffimm. Hafði matinn rúmum klukkutíma seinna, bað strákana að ganga frá á eftir og dreif mig sjálf í kvöldsundferð. Það var nokkuð notalegt en mér fannst samt ég vera heldur þyngri á sundtökunum heldur en ég er snemma á morgnana.

Ég notaði strætókortið aftur milli heimilis og vinnu, báðar leiðir, á þriðjudaginn. Ég slapp við að hugsa fyrir eða taka til mat nema fyrir sjálfa mig því hér var haldið spilakvöld milli klukkan sex og hálfellefu og bræðurnir og vinirnir þrír sáu alveg um sig sjálfir.

Tilvonandi rafeindavirkinn minn þarf að mæta í tíma upp á Stórhöfða á miðvikudögum svo hann fær að nota strætókortið þá daga. Ég fór hins vegar af stað á lánsbílnum stuttu fyrir klukkan hálfsjö í gærmorgun og byrjaði á því að skreppa í Laugardalslaugina. Synti, fór í kaldan-, heitan- og sjó-pott og gufu og var síðan mætt í vinnu rétt fyrir átta. Náði að skreppa heim í um klukkustund áður en ég dreif mig á kóræfingu. Það leit í byrjun út fyrir að það yrði "messufall" en þegar við vorum mætt sjö þá var blásið í æfingu og það mjög góða æfingu. Æfðum eina Ave Maríu, tvö ný lög (þ.e. lög sem við höfum ekki sungið áður) og alla tese-sálmana í sálmabókinni. Fengum kaffipásu eftir um klukkustundaræfingu. Þegar ég skilaði mér heim aftur var spilahópurinn aftur á ferð. Þeir buðu mér að fá mér pizzu með sér og ég freistaðist í eina sneið.

Helgin leið hratt

Ég var vöknuð rétt upp úr klukkan sjö á laugardagsmorguninn. Kveikti á tölvunni áður en ég útbjó mér búst-drykk úr möndlumjólk og frosnum banönum, krækiberjum og spínati.  Út í þetta bætti ég nokkrum dropum af ólífuolíu. Laugarnar opna klukkan átta um helgar og um hálfníu dreif ég mig í Laugardalinn. Þar sinnti ég ákaflega hefðbundinni rútínu sem ég er búin að koma mér upp og var allt í allt um einn og hálfan tíma frá því ég mætti á svæðið og þar til ég settist aftur upp í lánsbílinn.

Síðan rúntaði ég upp í Mjódd (hefði getað farið á Hlemm) þar sem ég fjárfesti í RAUÐA-kortinu sem gildir 3 mánuði í strætó á höfuðborgarsvæðinu. Ætlaði að skila inn fimm lesnum bókum af átta, var semsagt búin að gleyma því að Kringlusafnið opnar klukkan eitt um helgar. Að endingu kom ég við í Krónunni í Nóatúni og verslaði inn áður en ég skrapp heim til að ganga frá sunddótinu og vörunum og til að fá mér e-a hressingu.

Bræðurnir ætluðu að hafa "spilakvöld" heima og ég ákvað að taka saumadótið og smávegis fleira með í skreppu austur til foreldra minna. Þangað var ég komin um hálftvö og stoppaði ég til klukkan að ganga tíu um kvöldið. Mamma hjálpaði mér með að "hanna" stórt og lítið k til að sauma orðin; Kaffi og Kakó undir tvær af þremur saumamyndum á klukkustreng sem nú á bara eftir að skola úr, pressa og láta ramma inn áður en honum verður pakkað inn í jólapakka til systur minnar. Undir efstu myndinni var ég búin að sauma Espresso. Að sjálfsögðu setti ég einkennisstafina mína og ártalið undir.

Í gærmorgun vaknaði ég á svipuðum tíma og morguninn áður en var komin aðeins fyrr í Laugardalinn til að eiga nokkra tíma heima áður en ég mætti svo í upphitun fyrir tónlistarmessu í kirkju óhaða safnaðarins klukkan eitt. Við mættum aðeins sjö úr KÓSÍ og í fyrsta sinn voru karlaraddirnar í meiri hluta. Þetta kom nú ekki að sök því allt var einraddað og við kunnum þessa messu ágætlega. Í stað predikunar var leikrit sem stoppleikhópurinn var með og allt í allt tók messan um fimm korter. Ég skemmti mér ágætlega og fékk mér kaffi í "neðra" á eftir áður en ég fór heim til að undirbúa mig undir að mæta loksins aftur á "heimaleik" í knattspyrnu karla.

Strákarnir voru farnir til pabba síns þegar ég kom úr kirkjunni. Ég byrjaði á því að hringja aðeins og spjalla við pabba áður en ég skipti um föt og ég hafði alveg tíma til að koma við og skila bókunum fimm á Kringlusafnið áður en ég mætti á leikinn, Valur - Keflavík, 3:2, sem spilaður var á Laugardalsvelli.

Fyrsti dagur í vinnu eftir næstum fimm vikna sumarfrí

Í gærmorgun skutlaði ég öðrum unga manninum í skólann þar sem ég var hvort sem er á leiðinni í sund. Tíminn hjá hinum unga manninum féll niður og hann ákvað því að leggja sig aðeins lengur en vinna svo að ákveðnum verkefnum heima.

Synti 400m og fór 3x2 mínútur í kalda pottinn, heitan pott á milli dýfinga og endaði í sjópottinum áður en ég fór í gufu og "sólbað" í lokin. Afar hressandi. Svo fór ég beint heim og sinnti hinum ýmsum málum og hugðarefnum, bæði áhugamálum og skylduverkum.

Sumarfríið er búið að vera ljúft, notadrjúgt og mjög skemmtilegt. Náði nú ekki að gera allt sem ég ætlaði mér en ég er amk úthvíld og hæstánægð með hvernig spilaðist úr þessum dögum.

Örfáar myndir frá Egilsstöðum og nágrenni (18.-24. ágúst)

 Þessa tók ég í spássitúr um svæðið morguninn eftir að ég kom til Egilsstaða

 Þessi er tekin sama kvöld.

 Tveim kvöldum síðar settumst við aðeins út með kertaljós og rautt og hvítt í glasi.

 Laugardaginn 22. ágúst skruppum við í sumarbústað til tengdaforeldra Ellu. Sá svo margt fallegt.

 Laga þurfti skiltið fyrir utan heima hjá Ellu og Aðalsteini. Hverfið þeirra var gult á Ormsteiti.

 Þessi er tekin sama kvöld af okkur vinkonunum á hreindýraveislunni í Kornhlöðunni.

Á sunnudeginum skruppum við inn í Hallormsstað. þar var margt að sjá.

Fyrirsögn

Eiginlega er ég ekki í neinu skrifstuði en langar samt að tæpa á því helsta sem á dagana hefur drifið. Mánudagsmorguninn 31. ágúst sl. kvaddi ég vinkonu mína, hennar mann og Egilsstaði og lagði af stað um hálfníu suðurleiðina til Hellu. Fór yfir Öxi og stoppaði þar stuttlega á tveimur stöðum. Næsta stopp var á Höfn um hádegisbil og þar splæsti ég kjúklingasallati á mig. Næsta stopp var á Hala í Suðursveit þar sem ég fékk að nota salerni og keypti mér kaffibolla og þjóðsögur á esperanto. Á leiðinni milli Hala og Víkur stoppaði ég stöku sinnum, m.a. við Jökulsárlónið. Þar var margt um manninn. Fékk mér aftur kaffi á Vík og eitthvað nasl með en stoppaði svo ekkert fyrr en ég kom á Hellu í kringum sjö leytið. Stoppaði hjá foreldrum mínum næstu tvær nætur en lauk svo hringferðalaginu seinni partinn á miðvikudeginum. Stoppaði heima fram á föstudag, heimsótti blóðbankann, endurnýjaði bókasafnsskírteinið, fékk lánaðar nokkrar bækur í leiðinni og gerði ýmislegt fleira af mér. En á föstudagskvöldinu fór ég aftur til foreldra minna og dvaldi þar fram á þriðjudaginn var. Ég skrapp m.a. í heimsóknir, saumaði út, las og við pabbi skruppum einnig í einn heljarinna berjaskoðunarleiðangur sem skilaði okkur bara smá sýnishornum af berjum.

Rótarfyllt

Í gær var liðinn rúmur mánuður síðan ég varð að heimsækja tannlækni vegna tannverkja sem reyndist vera tannrótarbólga. Komst sem betur fer að daginn eftir að ég hringdi því það var víst komin sýking í tvo ganga af þremur og náði sýkingin inn að beini í öðru tilvikinu. Ég var rúman klukkutíma í stólnum og svo sagðist tannlæknirinn þurfa að skoða þetta amk einu sinni aftur, ef ekki tvisvar og sendi mig út með lyfseðil upp á vikuskammt af sýklalyfjum. Í gær þurfti ekki að deyfa en ég var engu að síður um hálftíma í stólnum. Eftir smá snurfus var jaxlinn rótarfylltur og mér tjáð að ég þyrfti ekki að koma aftur nema þá í hefðbundið tanneftirlit. Þar sem ég veit að tannlæknirinn minn síðustu fimmtán-tuttugu árin er alveg að fara að hætta ákvað ég að fara í eftirlitið til þessa sama læknis og bjargaði jaxlinum mínum og fékk tíma seinni partinn í nóvember. Vonandi held ég tannheilsunni góðri á næstunni því það er miklu hagstæðarar fyrir budduna.

Dásamlega sumarfrí

Enn er vika eftir af sumarfríinu mínu þótt kirkju- safnaðarstjórnar- og kórstarfið sé formlega hafið. Reyndar mætti ég ekki í fyrstu messu haustsins þar sem ég var þá stödd á Egilsstöðum. Annars ætla ég aðeins að segja frá því helsta sem á daga mína hefur drifið svona rétt til að halda utan um þá fyrir sjálfa mig.

Tvíburarnir skelltu sér með mér í sundlaug Akureyrar að morgni 14. ágúst, einkabílstórinn fékk að keyra báðar leiðir. Þeir nýttu sér svo ferð móðurforeldra sinna suður seinna um daginn en ég var áfram alveg pollróleg. Við systur og yngri systurdóttir mín skruppum til Hríseyjar upp úr hádeginu á laugardag og fengum afar fallegt og gott veður. Á sunnudeginum fékkst Bríet til að koma með mér í sund á Akureyri þar sem við hittum "tvíburahálfsystur" mína og dóttur hennar sem er jafngömul frænku minni. Eftir sundið og smá næringu á eftir fékk Elísa að fara heim með Bríeti en við Sonja skruppum í jólahúsið.  Á mánudagsmorgninum skutlaði ég Bríeti á skautaæfingu um níu og sótti hana tveim tímum seinna. Helga systir kom heim úr vinnu upp úr tólf og um eitt skutluðum við Bríeti aftur á æfingu, fórum með flöskupoka í endurvinnslu og svo með Cöru, labradortíkina þeirra, á hundasvæðið við Háskóla Akureyrar. Á þriðjudagsmorgninum skutlaði ég Bríeti í skautahöllina um níu og skrapp í sund á meðan hún var í upphitun og á æfingu. Að þessu sinni "fann" ég loksins kalda karið við Sundlaug Akureyrar eftir að hafa verið bent á það í óspurðum fréttum í klefanum á leið út. Ég nýtti mér að sjálfsögðu karið nokkrum sinnum eftir að hafa synt svolítið fyrst.

Seinna þennan dag tók ég mig saman, kvaddi og hélt för minni áfram til Egilsstaða. Þangað var ég komin um sjö og tóku æskuvinkona mín og hennar maður vel á móti mér. Ella var byrjuð að vinna, undirbúa kennslu eftir sumarfrí og Aðalsteinn var að leiðsegja hreindýraveiði mönnum suma virku daga. Þau voru bæði farin þegar ég fór á fætur um hálfníu á miðvikudeginum. Veðrið var mjög gott og skrapp ég göngutúr fljótlega með viðkomu í vínbúðinni í bakaleiðinni. Dagarnir flugu hjá. Ég skrapp einu sinni í sundlaug Egilsstaða og þar var ég ekki í vandræðum með að finna kalda stampinn og nýtti ég mér hann að sjálfsögðu. Ég kíktí einnig á vinnustað einnar frænku minnar sem vinnur á minjasafni Austurlands. Við Ella brölluðum líka ýmislegt saman. Þessa sex daga sem ég dvaldi hjá þeim var hátíðin Ormsteiti í algleymingi og við drifum okkur á hreindýraveisluna á laugardagskvöldinu og þau svo áfram á ball með "Á móti sól" í Valaskjálf. Á sunnudeginum skruppum við aðeins inn í Hallormsstað fengum okkur smá göngu þar. Á mánudagsmorgninum reif ég mig það snemma upp að ég gat kvatt þau því ég lagði svo land undir hjól um hálfníu og keyrði alla leið á Hellu með smá stoppum hér og þar á leiðinni. Segi kannski stuttlega frá því ferðalagi seinna.

Í heimsókn hjá systur minni

Örstutt lífsmark af mér. Skrapp í morgunsund og "pottadýfingar" á þriðjudagsmorguninn. Fór heim og gekk frá sunddótinu og beið þar til klukkan var að slá níu. Þá fór ég yfir til einnar vinkonu minnar í morgunkaffi og til að færa henni smá afmælisgjöf.

Um hálfeitt í gær vorum við Oddur búin að pakka niður, ferma lánsbílinn og lögð af stað út úr bænum. Sóttum Davíð Stein í Mosfellsbænum. Bættum á tankinn í Borgarnesi og á Holtavörðuheiði eftirlét ég einkabílstjóranum ökusætið, leyfði hinum syninum að setjast fram í og kom mér sjálf fyrir aftur í. Næsta stopp var í Ömmukaffi á Blönduósi rétt fyrir fjögur þar sem við fengum okkur kaffi og með því. Oddur fékk að keyra áfram alla leið til Akureyrar og vorum við komin þangað rétt upp úr sex.

Pakk :D

Að sjálfsögðu var ég mætt í sundið rétt eftir að laugin opnaði í gærmorgun. Nú hafði ég hins vegar mun betri tíma svo ég gat "elt" Lenu þegar ég hitti hana í kalda pottinum. Þá var hún þegar búin að fara tvær ferðir í hann. Hún fór fimm ferðir í viðbót og ég elti hana allar þær ferðir og í heita pottinn á milli. Eftir síðustu ferðina fórum við í sjópottinn og svo þann heitasta. Þá kvaddi hún en ég skrapp í gufu og sat svo úti um stund.

Þegar ég kom aftur heim tók ég því rólega til að byrja með en um það leyti sem hreyfing komst á "einkabílsstjórann" var ég búin að hella mér upp á kaffi og útbúa mér haframjöl með kanil, rúsínum, kókosolíu og láta það trekkja sig með sjóðandi vatni. Ungi maðurinn sópaði upp af svölunum og fór svo tvær ferðir með ýmislegt bæði í söfnunar og ruslsagáma.

Hafði kvöldmatinn um sex, horfði á fréttir á Stöð 2 og sótti svo aðra úr saumaklúbbnum og tók hana með mér til hinnar. Vorum örlítið snemma í því en það kom ekki að sök og tíminn leið alveg jafn hratt og alltaf áður í svona hitting.

Átta ferðir í kalda pottinn í gærmorgun

Var komin í Laugardalslaugina á svipuðum tíma í gærmorgun og á laugardagsmorguninn. Synti líka eitthvað svipað en það var ekki fyrr en ég var búin að sitja í kalda pottinum í um það bil þrjár og hálfa mínútu að ég sá að Lena var að fara upp úr lauginni og í 42°C pottinn. Ég dreif mig upp úr og til hennar og fór svo næstu sjö x 2 mínútur (stundum 2,5 þegar við gleymdum okkur í spjallinu) og þar með var náði ég átta ferðum í þann kalda. Eftir síðustu köldu dýfuna fórum við í sjópottinn og þaðan í þann heitasta áður en við sögðum þetta gott. Klukkan var því byrjuð að ganga tólf þegar ég kom heim. Stuttu seinna hringdi Inger í mig og spurði hvort ég væri til í að koma með þeim hjónum á stofutónleika í hús skáldssins seinni partinn um daginn. Ég var meir en til í það og við ákváðum að hún myndi hringja aftur í mig rétt áður en þau legðu í hann.

Stuttu fyrir eitt skutlaði ég Davíð Steini í Mosfellsbæinn til kattapassarans, bróður síns en föðurbróðir þeirra ætlaði að kippa þeim með þaðan í matarboð til föðurforeldranna. Ég notaði tækifærið og kíkti í heimsókn á Reykjaveginn því ég hafði verið búin að fá fullvissu fyrir því að þar væri e-r heima til að taka á móti mér. Náði góðu klukkutíma stoppi áður en ég dreif mig heim aftur.

Heima stoppaði ég frekar stutt við því um þrjú hringdi Inger aftur og ég ákvað að bíða úti á Lönguhlíð rétt við strætóskýlið eftir að þau Hinni hirtu mig upp. Stofurtónleikarnir reyndust allt aðrir heldur en þeir sem Inger hélt hún væri að fara á. Hún ætlaði að heyra í strákunum í Vio en þeirra stofutónleikar voru 19. júlí sl. Í gær söng Guðrún Ingimarsdóttir sópran nokkur ljóð nóbesskálda við undirleik Önnu Guðnýjar Guðmundsdóttur. Ég skemmti mér vel og ég held að Inger hafi verið nokkuð sátt þótt hún hefði líklega aldrei farið af stað ef hún hefði vitað hvaða viðburður var í gangi. Svona er sumum hlutum bara ætlað að verða.

Oddur Smári kom heim rétt fyrir tíu og fékk að skreppa á lánsbílnum með smá dót til bróður síns og sækja sitt því Davíð Steinn ætla að vera síðustu hjá kisunum til miðvikudagsmorguns.

Á stofutónleikum í húsi skáldsins í dag

Vaknaði nokkru fyrir átta í gærmorgun án þess að hafa stillt nokkurn vekjara á mig. Gaf mér góðan tíma í morgunverkin áður en ég fór í laugardagsmorgunsundið í Laugardalinn. Synti í rétt um tuttugu mínútur og fór meira að segja eina ferð, 50m, á bakinu. Fór 3x3-4 mínútur í kalda pottinn, heitu pottana á milli dýfinga og í sjópottinn og gufuna að lokum. Hitti Lenu þegar ég var um það bil að fara upp úr en þá var hún að byrja.

Mætti í esperanto-hitting til norsku vinkonu minnar rétt fyrir ellefu og hún spurði mig hvort við ættum ekki að hittast aftur niðri í bæ seinni partinn. Ég var alveg til. Stoppaði hjá henni í rúma klukkustund og kom við í Krónunni við Granda strax á eftir áður en ég fór heim. Korter fyrir tvö skundaði ég hratt yfir á BSÍ og var mætt þangað áður en "Gleðigangan 2015" fór af stað. Fylgdist með öllum atriðunum og arkaði svo á eftir því síðasta, bleika víkingaskipinu hans Páls Óskars og föruneytis. Þetta var í allra fyrsta skipti sem ég fór á þennan viðburð og vá, hvað þetta var magnað. Hitti Inger og eina aðra vinkonu hennar rétt við Ráðhúsið. Þá var mannhafið farið að verða heldur mikið fyrir minn smekk og við drógum okkur út úr, löbbuðum smá hring og settumst svo inn í Iðnó og fengum okkur fiskisúpu og hvítvínsglas.

Labbaði aftur heim beint yfir Skólavörðuholtið sennilega um fimm eða þar um bil. Kvöldið fór í netvafr og imbagláp en ég var með saumatöskuna hjá mér, opnaði hana þó ekkert í þetta sinn.

Áttundi áttundi fimmtán

Eitthvað var mig að dreyma og ég ekki alveg tilbúin að vaknar þegar vekjarinn í gemsanum hringdi klukkan 05:55 í gærmorgun. Ýtti á "blunda/snoose" takkann og snéri mér smá stund á hina hliðina. Áður en tíu mínúturnar voru liðnar var ég búin að slökkva alveg á vekjaranum og byrjuð að sinna hefðbundnum morgunverkum. Rétt rúmlega hálftíma síðar var ég komin í Laugardalinn. Synti eitthvað smá en fór svo í pottadýfingarnar með Lenu sem var þegar byrjuð að dýfa sér. Ég náði fjórum ferðum með henni en sú fyrsta varaði reyndar aðeins í hálfa mínútu áður en hún var búin með sínar tvær. Ég sat eitthvað lengur áður en ég elti hana í heita pottinn og þegar hún var búin þar elti ég hana beint í kalda pottinn. Eftir fjórðu ferðina fór ég örstutt í heitasta pottinn og svo smástund í sjópottinn áður en ég dreif mig upp úr og í vinnuna.

Átta síðustu vinnuklukkustundirnar fyrir sumarfrí liðu alveg ótrúlega hratt. Reyndar var klukkan orðin hálffimm áður en ég fór út af vinnustaðnum en það var vegna þess að ég fór að spjalla smávegis við eina sem kemur í vinnu seinni partinn.  Fljótlega eftir að ég kom heim kom kattapössunarungimaðurinn heim því hér var spilakvöld í gærkvöldi milli klukkan sjö og ca ellefu. Ég fékk að hafa stofuna útaf fyrir mig og greip aðeins í saumana mína og glápti á imbann næstum því allan þennan tíma. Afar notaleg kvöldstund það.

Sjöundi ágúst

Fór gangandi milli heimilis og vinnu bæði í vinnuna og heim aftur. Tók smá krók á heimleiðinni, þ.e. ég stoppaði við á Lækjartorgi hjá einni vinkonu minni sem er búin að vera með sölubás þar. Hún var að taka saman básinn og svo urðum við samferða áleiðis heim til hennar en við kvöddumst  á Hverfisgötunni rétt við Vatnsstíginn.

Steikti þorsk í matinn en leyfði unga manninum að velja hvort hann vildi borða það eða afganginn af því sem hann eldaði kvöldið áður og hann valdi seinni kostinn.

Var eitthvað að spá í að heimsækja einn frænda minn og konuna hans í gærkvöldi. Var með gemsanúmerið hans í gemsanum mínum og það sem ég hélt að væri heimanúmerið. Hringdi úr heimasímanum mínum í þetta tiltekna númer og fékk samband við nafna frænda míns en sá maður býr á Höfn en ekki á höfuðborgarsvæðinu. Þegar ég uppgötvaði mistökin varð mér á orði við manninn að mér hefði verið bent á að koma mér upp kunningjum á þessu svæði en ég ætlaði nú kannski ekki að fara alveg svona að því, baðst afsökunar, kvaddi og leitaði uppi heimanúmerið hjá frænda mínum. Í ljós kom að hann er einungis skráður með gemsanúmerið í símaskráinni (ja.is) en það er konan hans sem er skráð á heimasímann. Ekkert varð reyndar úr heimsókninni að þessu sinni en ég spjallaði stuttlega við konuna hans í símann.

Annars er fátt að frétta nema ég veit að skrifin hérna verða eitthvað stopulli á næstunni þar sem ég mun ekki leggja neina áherslu á að komast í tölvu hluta af sumarfríinu mínu. Ætla jafnvel að sjá til með hvort ég "leggi niður" skrifin næsta mánuðinn eða svo. Hef nú reyndar ekki trú á því en það kemur í ljós.

Tuttugu og tveir tímar

Ég var mætt í Laugardalinn rétt áður en laugin var opnuð í gærmorgun eða líklega um tvær mínútur í hálfsjö. Synti 300 metra og hitti Lenu í kalda pottinum í hennar annarri ferð. Dýfði mér þrisvar sinnum tvær mínútur í viðbót með henni (alls 4x) og fór í 42°C heita pottinn á milli. En eftir síðustu kaldapotts ferðina mína fór ég í heitasta pottinn, einnig örstutt í sjópottinn og sat svo úti í uþb fimm mínútur áður en ég fór upp úr og í vinnuna. Bað um leyfi til að hætta vinnu fyrr eða um tvö. Fór þá fyrst með lánsbílinn í snertilausu þvottastöðina við Skúlagötu og beint þaðan í Smurstöð Olís við Klöpp. Þar var smá bið eða amk þrír bílar á undan en ég afhenti bíllyklana og fékk fríkeypis kaffi í bensínversluninni á meðan ég beið. Það var það mikið að gera á smurstöðinni að ég var ekki látin vita um leið og bíllinn var tilbúin heldur sá ég það sjálf þegar ég athugaði málið ca klukkutíma síðar. Á nýþvegnum og nýsmurðum lánsbílnum skrapp ég fyrst í Krónuna í Nóatúni áður en ég fór heim. Heima voru foreldrar mínír nýlega mætt á svæðið og pabbi var að setja upp fyrir mig handsmíðaðan grip fyrir aukarúllurnar á salerninu. Virkilega flott. Ég hellti upp á og fann eitthvað til með kaffinu en þau áttu eftir að útrétta aðeins meira áður en þau fóru aftur austur og stoppuðu aðeins til klukkan að verða fimm. Eftir að hafa kvatt þau skrapp ég með Davíð Stein í Kringluna svo hann gæti kíkt á útsölu í Dressmann og keypt sér nýjar buxur og peysu. Ungi maðurinn sá svo um að elda kvöldmatinn og fékk að bjóða vini í mat en ég ryksugaði upp verksummerkin um uppsetningu "nýju græjunnar" inn á baði.

Byrjuð að telja niður

Þar sem ég skrapp í sund um kvöldmatarleytið á mánudagskvöldið ákvað ég að labba í vinnuna í gærmorgun. Lagði kannski heldur tímanlega af stað eða rétt um sjö því þrátt fyrir að fara ekki alveg stystu og beinustu leið var ég mætt í vinnu rétt upp úr klukkan hálfátta. Níu tímum og ýmsum verkefnum seinna trítlaði ég aftur heim, beinustu leið yfir Skólavörðuholtið. Neðst á Skólavörðustígnum var búið að mála regnbogalitina á smá parti til að undirbúa "Hinsegin daga". Gerði fátt af mér í gærkvöldi en náði þó að fara yfir tvo stærstu pokana af notuðum fötum sem mér áskotnuðust í síðustu viku. Á þá bara eftir að fara yfir tvo minni pokana og kíkja svo aðeins aftur yfir það sem ég taldi mig geta notað. Verð líklega að máta eitthvað af þeim flíkum til að vera viss hvort ég passi í þær eða fíli að vera í þeim. Horfði á imbann milli átta og klukkan að ganga tíu en slökkti þá á sjónvarpinu, vafraði aðeins um á netinu og fór svo upp í rúm með góða bók áður en klukkan sló ellefu.

Langa helgin liðin

Við pabbi borðuðum morgunmatinn saman í gærmorgun á svipuðum tíma og á sunnudagsmorguninn. Ég náði að vera aðeins á undan inn í eldhús en hann var nú örugglega vaknaður löngu á undan mér. Pabbi fór fljótlega út í skúr og á bak við hús til að halda áfram kofasmíði, kofa undir garðáhöld sem á að leysa þann sem var rifinn niður í síðustu viku af. Ég dundaði mér við ýmislegt og var dagurinn frekar fljótur að líða. Eftir hádegi skrapp ég í örstuttan göngutúr og rak aðeins inn nefið hjá vinkonu í Nestúninu. Davíð Steinn var búinn að ákveða að vera fram yfir kaffitíma þannig að klukkan var að byrja að ganga fimm þegar við tókum saman dótið okkur, kvöddum og lögðum af stað heim. Þegar heim kom, um hálfsex, fór ég inn með dótið mitt, heilsaði upp á Odd og tvo spilafélaga, tók til sunddótið og skrapp strax yfir í Laugardalslaugina. Davíð Steinn fór að spila við bróður sinn og vinina. Ég kom heim úr sundi á áttunda tímanum og sat svo yfir imbanum til klukkan ellefu og horfði á efnið í þeirri röð sem ég valdi sjálf.

Komin aftur heim

Hún var um tuttugu mínútur gengin í níu þegar ég glaðvaknaði í gærmorgun. Var aðeins á eftir pabba mínum fram en hann var þó bara rétt byrjaður á morgunmatnum sínum svo við náðum eiginlega að borða saman. Hann fór fljótlega út í garð að vinna að nýjum koma fyrir garðáhöldin. Ég  kveikti á tölvunni og vafraði aðeins um en settist líka aðeins við saumana mína inn í stofu. Um tíu ákvað ég að fá mér labbitúr upp á Helluvaði og byrjaði á því að heimsækja föðursystur mína. Átti gott spjall og góða stund með henni. Síðan ákvað ég að reka aðeins inn nefið inn hjá syni hennar og hitti þar fyrir tengdadótturina sem var að gefa næstyngsta barnabarninu sínu pela og ungu foreldrana. Talaði reyndar mest við nöfnu mína og kjáði í litla frænda. Stoppaði sama og ekkert enda var það ekki ætlunin, heldur bara hitta aðeins á "fólkið mítt".

Eftir hádegi saumaði ég aðeins meir en spurði svo unga manninn hvort hann vildi koma í bíltúr. Lögðum í hann rétt fyrir tvö, keyrðum upp Rangárvelli, framhjá Heklubæjunum og yfir í Holta- og Landsveit og komum niður alveg við Landvegamót. Komum mátulega til baka í kaffið um hálffjögur þrátt fyrir að hafa á köflum aðeins ekið á 20km hraða. En mikið rosalega er "sveitin mín" falleg!  :-)

Mamma bað mig um að setja upp folaldakjöt um fimm og það varð úr að ég sá um kvöldmatinn sem var eiginlega frekar létt því potturinn sá um kjötið og svo setti ég upp kartöflur og bjó til kartöflumús úr þeim þegar þær voru soðnar. Allir borðuðu með bestu lyst og eftir að Davíð Steinn hafði jafnað sig aðeins varð hann við ósk ömmu sinnar og reitti aðeins úr brekkunni.

Aðeins út úr bænum

Þótt ég hafi ekki stillt á mig neina klukku áður en ég fór að sofa í fyrrakvöld var ég vöknuð fyrir átta í gærmorgun. Fór reyndar ekki alveg strax á fætur. Heyrði að "kattagæslupilturinn" var kominn á stjá en þegar ég fór fram var hann greinilega farinn að huga að köttunum. Var á rólegu nótunum og sinnti ýmsu áður en ég lagði af stað í sund. Eftir "sundsprettinn" hitti í svo vel á að Lena var nýkomin ofan í kalda pottinn. Sat aðeins lengur eftir að hún fór yfir í heitari pott en lagaði mig svo að hennar ferðum næstu þrjár ferðir milli kalda og heita pottsins. En þegar hún fór sjöttu ferðina í þann kalda fór ég yfir í sjópottinn enda búin með 4x2 mínútur í kalda pottinum.

Á slaginu ellefu var ég mætt til norsku esperanto vinkonu minnar og þar var ég næstu tvo tímana og lásum við m.a. nokkrar blaðsíður í sögubók sem gefin var út árið 1930 og er skrifuð á esperanto. Fljótlega eftir að ég kom heim setti ég niður í töskur og svo drifum við Davíð Steinn okkur austur á Hellu. Vorum komin þangað um fjögur, beint í kaffið. Seinna hjálpaði ungi maðurinn ömmu sinni að búa til fiskisúpu og tókst þeim afar vel upp. Ég bauð upp á hvítvín með súpunni og þótti ekki verra að setja smá lögg út í sjálfa súpuna.

Ágústmánuður að taka fyrstu skrefin

Þriðja morguninn í vikunni var ég mætt í Laugardalinn fyrir sjö. Í gærmorgun var ég mætt rétt upp úr hálfsjö. Hafði alveg tíma til að synda 3-400 metra en þegar ég var búin að synda 200 sá ég að Lena var að dýfa sér í kalda pottinn og ég ákvað strax að dýfa mér með henni. Ferðirnar í kalda pottinn urðu fjórar, allar í um tvær mínútur. Í einni ferðinni kom stúlka sem vinnur þarna og hugðist mæla hitann á pottinum. Við Lena vorum frekar forvitnar og báðum um nýjustu tölur en annað hvort var mælirinn bilaður eða potturinn það kaldur að það mældist enginn hiti.

Vinnudagurinn leið hratt og lengdist aðeins í annan endann hjá mér en þó aðeins um klukkustund. Var m.a. að sinna rútínuvinnu í sambandi við mánaðamótin og vildi ljúka við að yfirfæra yfir í ágúst svo það verði sem minnstar tafir á framleiðsluuppgjöri eftir helgi.

Þegar ég kom heim var kattagæsluungimaðurinn kominn enda voru bræðurnir og tveir félagar þeirra búnir að ákveða að hafa spilakvöld. Ég hafði hug á því að skreppa í heimsókn til eins frænda míns í gærkvöldi en áður en ég vissi af var ég farin að horfa með athygli á fyrstu bíómynd RÚV eftir fréttir og þótt ég hafi séð hana áður þá gat ég ekki slitið mig frá imbanum svo þetta endaði allt saman með því að ég hafði það notalegt fyrir framan skjáinn fram eftir kvöldi með handavinnutöskuna óopnaða við hliðina á mér.