Tvær ferskeytlur og fleira

Sjá dagar styttast, nálgast jól
sumarið er liðið.
Blómin blunda öll í skjól
best að finna miðið.

Lífið eins og áin mögnuð
ég sætti mig við það.
Innri röddin rám ei þögnuð
reynslan skráð á blað.

Þessar tvær komu til mín í gær.  Önnur stuttu fyrir hádegi og hin rétt fyrir miðnætti.  Er búin að "útvarpa" þeim á fésbókinni og þegar fá nokkur "læk".  :-)  Annars var það bara heppni að ég náði að senda nokkrar línur á þessum vettvangi í gær.  Notaði þessar mínútur sem klukkuna vantaði í átta til að skrifa niður það helsta.  En svo var ég á vélinni milli átta og rúmlega tólf, reyndar með smá kaffipásu upp úr klukkan tíu.  Ein af okkur var í fríi og um ellefu voru tvær sendar í Katrínartúnið til að sitja sviðsfund.  Við hinar þrjár kláruðum allt daglegt og vorum búnar rétt fyrir hálfeitt.  Þá "lokuðum" við deildinni og fórum á eftir hinum tveim því það var hafinn starfsdagur.  Við fengum að borða í mötuneytinu uppfrá og náðum að hlusta á hluta af fyrirlestri um markmiðssetningu.  Ein af okkur fór á kynningu um víngerð og þrjár létu spá fyrir sér.  Mest fannst okkur gaman að hitta og vera innan um fólkið.  Um fimmleytið var farið niður í skála þar sem við fengum smá tilsögn í salsa og svo fengum við gott í gogginn.

Tap á heimavelli

Fór á heimaleik hjá Valsstrákunum í gærkvöldi.  Þeir tóku á móti strákunum úr Safamýrinni.  Valsmenn voru komnir í þægilega stöðu um miðjan síðari hálfleik, 4-5 mörkum yfir, en þá fór markvörður andstæðinganna að verja og verja og þótt Valsmarkvörðurinn væri líka að verja eitthvað þá saxaðist jafnt og þétt á forskotið og leikurinn endaði 25:26 fyrir Fram.  :-(

 

Annars ætlaði ég að hafa kjötsúpu í matinn í gærkvöldi.  Taldi mig eiga nokkra súpukjötsbita.  Á meðan ég leitaði að kjötinu notaði ég tækifærið og tók til og afísaði frystihólfið.  Ekkert fann ég kjötið en hins vegar fann ég fiskibollur sem ég vissi ekki að ég ætti og auðvitað voru þær hafðar í kvöldmatinn í staðinn.

 

Nei, engin ferskeytla í dag.  Eigið góða helgi og farið vel með ykkur!

Vel mætt á kóræfingu

Við vorum 16 með kórstjóranum sem mættum á æfingu í gærkvöldi og ég get svarið það að tíminn leið extra hratt.  Af þessum 15 er bara ein ný en Árni Heiðar hafði á orði að nú væri sko tækifæri til að byrja nýr því við ætlum að vera að æfa mest allt nýtt í vetur fyrir utan kannski hátíðarmessurnar.  Næsta messa verður annan sunnudag og þá mun kórinn sjá um veglegt kaffihlaðborð á báðum hæðum gegn vægu gjaldi.  Innkoman fer beint í kórsjóð og verður nýtt í eitthvað skemmtilegt og fleira fyrir kórfélaga.

 

Annars saumaði ég ekkert í gær heldur og verð að fara að taka í hnakkadrambið á mér held ég, svei mér þá.  Þó er ég ekki frá því að eins gott og róandi það er að sitja með saumana og sjá myndirnar birtast smám saman á jafanum þá er örugglega fínt að taka sér smá pásur öðru hvoru frá saumaskapnum.

Ekkert saumað í gær :-/

Var á bíl í gær og eftir vinnu skrapp ég í Lyfju og keypti m.a. tvær litlar flöskur af propanol.  Eina fyrir rafvirkjunarnemann og hina fyrir heimilið.  Sú sem afgreiddi mig ákvað að kíkja í reglur til að athuga hvort mætti afhenda tvær litlar flöskur í einu og það var alveg í lagi.  Tvíburinn þarf að fara með þetta og tannbursta með sér í skólann til að hreinsa e-ð sem hann er að nota í náminu sínu.  Það væri fróðlegt að vera fluga á vegg til að fá að fylgjast með því.  Svo kom ég við í fiskbúð og keypti saltfisk áður en ég fór heim.  Var alltaf á leiðinni að taka fram saumana mína og var meira að segja búin að kveikja á lampanum góða en imbinn krafðist alls tímans og var ég t.d. að horfa á annan þáttinn af "Broen" sem var á dagskrá kvöldið áður þegar ég var í saumaklúbbnum.

 

Nú er ég alveg að fara að fara að skrifa undir skilnað að borði og sæng og samning um skiptingu eigna og skulda og er ég mikið feginn að þessu máli er að ljúka.  Ég mun halda íbúðinni og svo þarf ég bara að setja manninum tímamörk á hvenær hann á að vera búinn að hirða allt sitt og skila mér öllum lyklum.

"Saumó" hjá Lilju :-)

Fyrsti skipulagði saumaklúbbur haustsins var á dagskrá í gærkvöldi í byggðinni við Úlfarsfell.  Ég var mætt á slaginu klukkan átta og ákvað að nota kvöldið í að sauma útlínur í mynd sem fer í jólakort.  Hálftíma seinna mætti tvíburahálfsystir mín.  Hún vann að Toskana-myndinni en spurði jafnframt hvenær við myndum byrja á pappírsjólakortunum.  Ég held að gestgjafi kvöldsins muni nota alla lausa tíma í að skera út skemmtilegar klippimyndir sem eru að rokseljast á tveimur stöðum í bænum, m.a. jólabúðinni.  Tíminn leið afar hratt eins og venja er þegar maður er að gera skemmtilega hluti með skemmtilegu fólki og var klukkan alveg að verða ellefu þegar ég kvaddi og hélt heim á leið, afar ánægð með allt í sambandi við kvöldið.

Skemmtileg helgi að baki

Sat með saumana mína fyrir framan skjáinn aðeins fram yfir miðnætti á föstudagskvöldið.  Morguninn eftir fór ég á fætur fyrir átta og var komin í Skautahöll Reykjavíkur um hálfníu.  Þar var hópur yngri systurdóttur minnar að hita upp og svo var Bríet fyrst á svellið.  Horfði á allar hinar í aldursflokknum en var samt komin heim fyrir hálftíu.  Um klst. síðar ákvað ég að drífa mig yfir til norsku esperanto vinkonu minnar.  Hún átti ekki von á mér en var ekki upptekin svo ég þáði hjá henni kaffisopa og svo dembdum við okkur í les- og þýðingaæfingar.  Þetta gekk mjög vel hjá okkur og ég benti henni einnig á að við hefðum verið óvenju duglegar og fljótar að koma okkur að verki.  Frá Inger dreif ég mig í Krónuna og verslaði inn fyrir vikuna.  Gat ekki séð að til væri nein lactosa-frí mjólk svo ég kom við í Hagkaup í Skeifunni til að kaupa nokkra lítra fyrir Davíð Stein.  Ég stoppaði ekki lengi við heima því ég var mætt á heimaleik hjá stelpunum mínum, klukkan hálftvö, sem tóku á móti Selfossstúlkum í Olísdeild kvenna á laugardaginn.  Leikurinn var bara spennandi fyrstu tuttugu mínúturnar en eftir það var alveg ljóst hvorum meginn sigurinn myndi lenda.  Það var bara spurning um hversu stór sigurinn yrði.  Hálfleikstölur voru 12:7.  Selfossstelpur skoruðu fyrsta markið í seinni hálfleik en svo skoruðu þær ekkert í rúmar fimmtán mínútur á meðan "mínar stelpur" röðuðu inn mörkum.  Lokatölur urðu 28:14.

 

Í gærmorgun var ég komin á stjá mun fyrr en á laugardagsmorguninn og var ég komin í Skautahöllina á slaginu átta.  Rétt seinna byrjaði fyrri hópurinn í flokki 12-14 ára að hita upp.  Hulda var í seinni hópnum og fyrst að þeim á svellið.  Sá allar átta stelpurnar keppa.  Þær voru margar sem duttu og sumar oftar en einu sinni.  Hulda datt ekki en það voru tvö stökk sem hún lenti ekki alveg óaðfinnanlega.  Eitthvað vantar hana enn upp á tæknina en tjáningin og túlkunin er í góðu lagi og þar skarar hún framúr.  Hún endaði í öðru sæti með 28,33 stig en sú sem vann fékk 28,76 og þar af rúmum fjórum heilum hærri fyrir tækni.  Var komin heim aftur um níu.  Skutlaði Oddi Smára í Árbæjarkirkju fyrir hálfellefu og ákvað að drífa mig í messu þar.  Skólalúðrasveit Árbæjar og Breiðholts spilaði tvö lög í messunni og önnur tvö fyrir utan kirkjuna eftir messu.  Þegar þessu var lokið pikkuðum við Davíð Stein upp í Mjóddinni og brunuðum austur á Hellu í heimsókn til pabba og mömmu.  Stoppuðum þar bæði í kaffi og kvöldmat og vorum svo komin heim rétt fyrir tíu.

Tap á heimavelli

Sat með sauma höndum í
svo róin yfir færðist.
Söngur hljómar dirrin dí
dálítið mér lærðist.

Nei, leið mín lá nú ekki á völlinn í gær.  Sat með saumana mína fyrir framan imbann og fylgdist með stelpunum okkar lenda í miklum vandræðum með þær svissnesku og úrslitin 0:2  :-( .  Gestirnir voru mun líklegri allan tíman til að bæta við mörkum heldur en okkar stelpur að skora.  Þær áttu reyndar nokkuð góða möguleika í flestum föstum leikatriðum en allt kom fyrir ekki.

 

Merkilegt annars hversu tíminn þýtur áfram.  Ég hamast við að njóta hans í botn og pæli lítið í því að ég eldist með hverri mínútunni enda ekkert svo gömul enn.  Vona bara að línur í ákveðnu máli fari að skýrast og skerast.  Lífið verður sífellt betra og ég hlakka til allra verkefnanna og áhugamálanna framundan.

 

Góða helgi!

Lestur er bestur

Það gengur bara nokkuð vel að lesa bækurnar af safninu.  Hef þegar lokið við fjórar og það er ekki komin vika síðan ég sótti þær á safnið.  Feluleikur var svo spennandi á köflum að ég varð stundum að leggja hana frá mér en það leið ekki langur tími áður en bókin/sagan togaði það mikið í mig að ég bara varð að lesa meira og komast að hvernig hlutirnir myndu fara.  Í gærkvöldi kláraði ég líka bókina Snákar og eyrnalokkar eftir Hitomi Kanehara.  Þessi saga fékk japönsk bókmennta verðlaun árið 2004.  Letrið er stórt en þrátt fyrir hispurslausa og á tíðum svolítið grófa frásögn þá lét sagan mann ekki í friði.  Ólgan mikil undir niðri og þegar bókin var búin langaði mig svo að vita meira.  En mikið er ég fegin að þessi saga var ekki hendi næst þegar ég tók þátt í alþjóða lestrarviku á Facebook og skrifaði 5. setninguna á bls. 52 í statusinn minn.  Ég er ekki með bókina við höndina en ég setningin byrjaði eitthvað á þessa leið:  "Ég saug á honum tærnar..."

 

Notaði strætó á milli heimilis og vinnu í gær en fór svo á bílnum á kóræfingu í gærkvöldi.  Mættum átta fyrir utan kórstjórann.  Það vantaði amk sex.  En við vorum að æfa rödduð lög úr brúnu bókinni og söng kórstjórinn með eina tenórnum sem var mættur.  Æfingin var skemmtileg og notaleg og tíminn fljótur að líða.  Reyndar fengum við að fara aðeins fyrr heim.  Horfði á Kiljuna á plúsnum og saumaði nokkur spor í stóru myndinni í leiðinni.

"Hafgolufólk"

Á mánudaginn var byrjaði ég á bók eftir Önnu Dóru Antonsdóttur sem heitir Hafgolufólk.  Sagan er um fjölskyldu eina og er eitt barnabarnið að tína upp ýmsan fróðleik um móðurforeldra sína og börnin þeirra og e-r barnabörn.  Það er skemmst frá því að segja að ég hætti ekki að lesa fyrr en ég var búin með bókina.  Núna er ég langt komin með Feluleikur eftir James Patterson og Michael Ledwidge.  Heilmikil spennusaga og ég er mest hissa á að vera ekki búin að klára bókina.  Það er reyndar ekki mikið eftir af henni en ég notaði tímann líka í útsaum, tölvuleiki og sjónvarpsgláp.  Er að vinna í því að fylla í "göt" og sauma þá staði sem eru fyrir utan síðasta og "stærsta" ósaumaða munstursvæðið.  Það er alveg að hafast og þá þarf ég ekki að fletta munsturblaðinu í sundur nema til að athuga með hvaða litum ég á að sauma með.  Er farin að þekkja sum táknin það vel að ég þarf ekki alltaf að fletta þeim upp.  Geri það þó nokkuð oft að fullvissa mig um að ég hafi rétt fyrir mér.

 

Fékk að fara aðeins fyrr úr vinnu í gær til að sinna ýmsum málum.  Það er sennilega að nást lending í skilnaðarmálinu og ég fór m.a. að athuga um leiðir til að borga mismuninn til að fá að halda íbúðinni og búa áfram í Drápuhlíðinni.  En ég ætlaði líka að nota tækifærið og gefa blóð en að þessu sinni verða víst að líða fimm mánuðir frá síðustu gjöf svo ég má ekki gefa fyrr en eftir 24. næsta mánaðar.  Kom líka við í hannyrðaversluninni Erlunni til að athuga hvort þar væru til fleiri stjörnumerki til að sauma út.  Mig vantar Bogmanninn til að sauma handa frænda mínum.  Því miður var bara til einn Hrútur svo ég þarf að athuga hvort ég geti fundið þetta ákveðna merki eftir öðrum leiðum.  Steingleymdi því að ég ætlaði líka að leysa út tvo lyfseðla en það kemur ekki að sök og er ég búin að sjá til þess að ég þarf ekki að leysa þá út alveg strax.  Er farin að velta því fyrir mér hvort það fari ekki að styttast í þessu hormónadæmi hjá mér, þau svör fást líklega ekki nema hjá kvensjúkdómalækninum mínum.  En þetta mál verður ekki skrifað mikið um á þessum vettvangi þótt það sé í raun og veru ekkert feimnismál.  Það er örugglega takmarkað hversu margir hafa áhuga á akkúrat svona málum þó ég sé alveg einstakt tilfelli.  :-)

Hjaltadætur

Notaði hjólið á milli heimilis og vinnu í gær.  Ég var rétt lögð af stað heim þegar fóru að koma dropar út lofti.  Ætlaði að hjóla leiðina sem ég fer oftast en á gangstéttinni, mín meginn, á miðri Sóleyjargötunni var kyrrstæð bifreið og engin leið framhjá henni án þess að fara út á götu.  Umferðin þarna er nokkur en ég komst yfir á hina gangstéttina eftir smá stund og ákvað svo að hjóla yfir brúna fyrir neðan BSÍ.  Ég var ekki lengi alla leið heim og slapp að mestu við að blotna því það varð aldrei ausandi rigning.  Stuttu eftir að ég kom heim bauð ég öðrum tvíbbanum að skutla honum eftir sendingu á pósthúsið.  Eftir kvöldmat og frágang í eldhúsinu kvaddi ég tvíburana og skrapp svo í heimsókn til vinkonu sem á líka pabba sem heitir Hjalti.  Stoppaði hjá henni í uþb tvo tíma og horfði m.a. á fyrsta þáttinn af nýrri þáttaröð,  "Broen".

"Harmsaga"

Seinni partinn á föstudaginn hringdi mágur minn í mig og spurði hvort ég væri upptekin kvöldið eftir.  Ég sagðist ekki vera búin að ráðstafa laugardagskvöldinu svo hann bauð mér tvo miða í leikhúsið sem ég þáði með þökkum.  Annars var ég ekki komin heim fyrr en á níunda tímanum á föstudagskvöldið og eyddi ég restinni af kvöldinu með saumana mína fyrir framan skjáinn.

 

Á laugardagsmorguninn, upp úr hálfellefu, kom norska esperanto vinkona mín til mín.  Ég bauð henni að koma með mér í leikhúsið um kvöldið og hún þáði boðið.  Fengum okkur krækiberjabúst í hrísmjólk með smá banana í líka og svo lögðumst við aðeins yfir esperantobækurnar.  Vinkonan kvaddi í bili rétt upp úr tólf.  Rúmum klukkutíma seinna labbaði ég yfir á Valsvöllin og sá "stelpurnar mínar" sigra ÍBV 27:20 í Olísdeild kvenna (handbolta).  Eftir leikinn lá leiðin í Kringlusafnið.  Skilaði öllum 6 bókunum sem ég var með í láni en það fóru 12 bækur með mér heim.  Inger kom aftur til mín nokkru áður en kominn var tími til að fara í leikhúsið svo við urðum samferða upp úr sjö heiman að frá mér.  Leikritið, Harmsaga, eftir Mikalel Torfason var sýnt í Kassanum á bak við Þjóðleikhúsið.  Tveir leikendur voru á sviðinu allan tímann í einnoghálfan tíma og fóru fram og aftur í tíma í sögu hjóna í tilvistarkreppu.  Hann fluttur út en vonar að þau eigi eftir að finna út úr þessu og ná saman aftur.  Það var mikill kraftur í leikurunum og flott hvernig þau gátu skipt yfir í annað tímabil nánast á stundinni.  Á einum stað í verkinu dönsuðu þau mjög flottan dans svo unun var á að horfa.  Ég var afar lukkuleg með að hafa boðist þetta óvænta leikhúsheimsóknardæmi.

 

Í gær var ég mætt í kirkjuna um hálfeitt.  Við hituðum upp fyrir tónlistarmessu á þremur korterum og Árni Heiðar var búin að fá til liðs við sig trommu- og bassaleikara.  Búið var að auglýsa að sverðgleypir myndi vera á svæðinu og sýna listir sínar en hann boðaði forföll.  Messan tókst bara vel en það hefðu mátt vera fleiri kirkjugestir.  Þeir voru samt e-ð um tuttugu.  Fékk mér kaffi og kleinu niðri í sal eftir messuna.  Var heima í rúman hálftíma áður en ég trítlaði yfir á Valsvöllinn á síðasta heimaleik í Pepsídeild karla.  Því miður urðu úrslitin KR í hag 1:2 og tryggðu þeir sér titilinn í leiðinn þrátt fyrir að eiga eftir að spila tvo leiki.

Handboltatímabilið hafið

Maður orðlaus alveg verður
að fylgjast sumu með.
Margur hann er illa gerður
aðrir minna´ á peð.
_____  _____  _____  _____

Vetrarsportið hafið er
handboltinn lifi.
Vildi vita hvernig fer
Valsklukkan hún tifi.

Jamm, ég skellti mér á völlinn í gær og tók þá ákvörðun að splæsa á mig árskorti á alla heimaleiki í vetur.  Kortið er rautt, semsagt í aðallitunum og ég fékk kort númer 68.  Tær snilld alveg hreint og "mínir menn" unnu fyrsta leikinn með fimm marka mun.  Hlynur Morthens fór hamförum í markinu, varði vel í fyrri hálfleik, tók pásu framan af síðarhálfleik (hleypti hinum markverðinum að) og varði svo sjö af átta síðustu skotum Haukanna.  Á síðustu mínútunum fengu Valsmenn á sig tvær brottvísanir með stuttu millibili en það kom ekki að sök og átti Hlynur stóran þátt í því.  27:22 var lokaniðurstaðan.  Nú þarf ég endilega að setja áminningu á næstu heimaleiki í Olísdeild karla og kvenna.  Ég var líka búin að sjá að heimaleikirnir skarast ekki á við kóræfingar svo ég er staðráðin í að vera dugleg að mæta á völlinn í vetur.

Hjólið skilið eftir í skúrnum

Nei, ég nennti ekki að fara á hjóli til vinnu í morgun.  Fór með gula stóra bílnum númer 13.  Ég hef þá alltaf þann möguleika að labba heim aftur...   ...eða taka vagninn bara til baka.

 

Saumaði aðeins í stóru myndinni fyrir kvöldmat í gær.  Lokaði einu "gati" á jafanum.  Það er magnað hversu lítið er í raun eftir af myndinni, eiginlega bara tvö tré, smá himinn og svo útlínurnar.  Samt er óvíst hvort ég leggi áherslu á klára myndina á þessu ári.  Reyndar er það svo að hún kallar alltaf á mig að vinna í sér en það er mjög misjafnt hversu mikið ég sauma í hvert sinn.

 

Var mætt við óháðu kirkjuna rétt fyrir hálfátta.  Nokkrir voru komnir en þar sem allt var slökkt í kirkjunni og bíll kórstjórans var ekki fyrir utan biðu menn í bílunum alveg vissir um að kirkjan væri lokuð og læst.  En rétt eftir að ég lagði bílnum sást hreyfing inni og svo stóð kórstjórinn í útidyragættinni eitt spurningamerki í framan.  Hann var víst löngu kominn, hafði labbað en það var enn svo bjart að hann hafði ekki kveikt nein ljós.

 

Kom heim aftur upp úr hálftíu.  Annar strákurinn var í playstation-leik í stofunni og ég leyfði honum að vera þar alveg til tíu.  Þá fékk ég að taka yfir sjónvarpstækið.  Stillti á plúsinn og horfði á Kiljuna á meðan ég kláraði afmælisgjöfina að öllu öðru leyti en því að ég á eftir að sauma skammstöfun mína og ártal.  Þetta var ekki lengi gert og alveg sex vikur í þetta afmæli.

Hjólandi

Strákarnir þáðu farið í skólann í gærmorgun þrátt fyrir að vera komnir í skólann rúmum tuttugu mínútum áður en tímarnir byrjuðu enda stíla ég inn á að vera á bíl þá tvo daga í viku sem strákarnir eru báðir að mæta klukkan 08:10.  Vinnudagurinn leið afar hratt enda nóg að gera alveg fram á síðasta klukkutímann.  Kom við á Hlemmi á heimleiðinni og keypti mér miða í strætó 2x9stk.  Bræðurnir voru báðir heima þegar ég kom heim og báðir í stofunni og líkt og á mánudaginn var annar að spila og hinn að fylgjast með.  Ég kveikti á tölvunni og gleymdi mér aðeins á vafrinu og í leikjunum því allt í einu var klukkan orðin sex.  Kvöldmaturinn var tilbúinn hjá mér rétt fyrir sjö og þegar ég var búin að borða settist ég með saumana mína fyrir framan skjáinn.  Saumaði smávegis myndinni sem ég hef verið að vinna að í ár áður en ég tók til við afmælisgjöfina.  Lagði samt handavinnuna frá mér þegar Castle byrjaði.  Lilja vinkona kom um hálftíu og horfði á restina af Castle með okkur.  Horfðum á sjónvarpið og spjölluðum inn á milli alveg til klukkan var að verða hálftólf þá eftir lét ég henni stofuna.  Hún labbaði svo af stað í HÍ á sama tíma og ég hjólaði í vinnuna.

Hraðferð á logninu

Við mæðgin komum öll heim á svipuðum tíma upp úr fjögur í gær.  Bræðurnir lögðu undir sig stofuna fram að kvöldmat og spiluðu e-n "playstation"-leik, eða hvort annað spilaði og hinn fylgdist með.  Ég kveikti á tölvunni sem Lilja lánaði mér og fór vítt og breytt um netheima þar til tími var kominn til að finna til matinn.  Eftir matinn settist ég fyrir framan skjáinn, tilbúin með bók á stofuborðinu en fór að vinna að nýjasta saumaverkefninu (afmælisgjöf).  Ég snerti ekki á bókinni fyrr en þegar ég skreið upp í rúm á tólfta tímanum en ég get verið stolt af saumaafrakstrinum því ef ég held svona áfram klára ég verkefnið á innan við viku.  En ég tók heldur ekki fram það saumaverkefni sem ég hef mest unnið við á árinu "Lost nomore".  Það er örugglega líka bara gott að taka sér smá pásur frá því inn á milli.

Hvert fór helgin?

Skrapp á völlinn bæði á föstudag og laugardag.  Valsstrákarnir tóku á móti Blikum um hálfsex á föstudaginn og niðurstaðan var 1:1.  Þeir eiga nú eftir að spila fjóra leiki, fara í Kaplakrikann og sækja FH heim í kvöld og til Eyja n.k. fimmtudag, fá KR í heimsókn á sunnudaginn og í lokaumferðinni fara þeir í Ólafsvík.  Ég er svolítið hugsi yfir að alltaf þegar ég mæti á heimaleikina endar leikirnir oftast jafnt og stundum tapast þeir.  Þá tvo heimaleiki sem ég komst ekki á sigruðu þeir :-/.  Fljótlega eftir að ég kom heim af leiknum hringdi norska esperanto-vinkona mín í mig.  Það var búið að vera nokkurra vikna hlé hjá okkur en við vorum sammála um að fara að taka upp þráðinn.  Mætti til hennar upp úr hálfellefu á laugardagsmorguninn.  Hún byrjaði á því að bjóða mér upp á kaffi á meðan hún setti upp hafragraut.  Gáfum okkur smá tíma til að kíkja á tungumálið og glugga í orðabækur eftir að við höfðum nært okkur á grautnum.  Ég drakk meira kaffi og hluti af þessum tíma fór í almennt spjall.  Það gerir ekkert til við verðum bara duglegri næst.

 

Frá Inger lá leiðin í Krónuna út á Granda.  Tvíbbinn sem yfirleitt gengur frá vörunum var í kattarpössunarleiðangri og sinnti köttunum langt fram eftir degi.  Hann var farinn áður en ég hafði varið í esperantoið og var ekki kominn er ég fór á völlinn um fjögur.  Síðasta umferðin í Pepsídeild kvenna var spiluð um helgina.  Valsstelpurnar tóku á móti Selfossi, unnu 4:0 og náðu að halda öðru sætinu.  Ein í gestaliðinu er uppalinn Valsari, var í árgangi með tvíburunum.  Hún hefur örugglega verið lánuð til Selfoss svo hún fengi að spila og var hún inná allan leiktímann.  Oddur Smári var kominn heim af leiknum þegar ég kom heim.  Setti upp kartöflur og steikti slátur handa okkur mæðginum og kvöldið fór svo í imbagláp.

 

Gærdagurinn fór í lestur, tauþvott, útsaum, tölvuna og sjónvarpsáhorf.  Strákarnir fór saman að gefa köttunum um hádegi og fóru svo þaðan yfir í spilakvöld í Kópavogi.  Létu vita um hálfsjö að þeir yrðu frameftir svo ég var ekkert að hafa fyrir að útbúa kvöldmat.  Bjó svo vel að eiga til afgang frá því seinni partinn í vikunni.  Myndin af  "Týnda sauðnum" gengur mjög vel og með sama áframhaldi klára ég öll hálf og heil spor á næstu vikum.  Annars byrjaði ég á nýju verkefni í gær sem ég ætla að vera fljót að klára og gefa í afmælisgjöf eftir einnoghálfan mánuð eða svo.  Meira um það síðar.  Það varð svo úr að ég sótti strákana í Kópavoginn um tíu í gærkvöld og það var það eina sem ég hreyfði bílinn í gær.

Helgin framundan

Hið innra logar ljósið bjart,
leiðbeinir og passar.
Dökkblátt myrkrið sýnist svart
í stofu nokkrir kassar.

Mér tókst það enn og aftur, nema hvað, að hnoða saman sæmilegri ferskeytlu.  Þessi hér að ofan er alveg glæný.

 

Annar tvíbbinn fór beint að læra þegar hann kom heim upp úr hálfsex og var að læra alveg þar til hann fór í háttinn um ellefuleytið.  Hann sagði mér svo í morgun að hann hefði hrokkið upp um klukkan eitt í nótt því hann vissi að eitt dæmið væri rangt reiknað og gat hann lagað það og sent lausnirnar frá sér aftur.

 

Samkvæmt plani hefðu Vals"strákarnir" átt að taka á móti "strákunum" úr Breiðabliki í gær en þessi leikur var færður aftur um einn dag svo ég er á leiðinni á völlinn í kvöld eða um hálfsex.  Í ísskápnum eru nokkur box af afgöngum sem við mæðginin getum valið úr svo ég slepp örugglega við að elda í kvöld.  En leikurinn í kvöld er næstsíðasti heimaleikurinn og það er aðeins einn heimaleikur eftir hjá stelpunum.  Já, það er stutt eftir af fótboltatímabilinu hér á landi.

Bókasafnsferð og raddþjálfun

Strákarnir voru á leið í matarboð til pabba síns eftir skóla í gær og fóru svo í ellefubíó þannig að ég hitti þá ekkert í gær.  Þeir voru nefnilega ekki komnir á fætur þegar ég lagði af stað í vinnuna.  Ákvað að skreppa á bókasafnið og skila nokkrum bókum.  Hefði getað skilað 10 en ein varð eftir heima.  Aldrei þessu vant kom ég með færri bækur heim eða fjórar þannig að það eru einungis 6 bókasafnsbækur hjá mér núna.  Eina þeirra er langt komin með en skilafresturinn ekki fyrr en seinast í mánuðinum.  Framlengdi skiladegi á bókinni sem varð eftir heima en ég er viss um að næsta ferð á safnið verði innan tveggja vikna og þá fari sú bók til síns heima.

 

Fékk mér afgang af fiskinum frá því í gær áður en ég fór á kóræfingu.  Guðbjörg Tryggvadóttir, raddþjálfari, söngkennari, stjórnandi sönghópsins Veiranna (Veirurnar) og fl. tók á móti okkur og kenndi okkur ýmislegt um raddbeitingu auk þess sem hún rifjaði upp með okkur það sem hún var búin að fara í áður.  Tveir tímar liðu afar hratt en ég var þreytt í baki og maga eftir þessi átök.  Raddböndunum hafði ég hins vegar náð að beita nokkuð rétt allan tímann svo þau voru í lagi.  Annars hélt ég á tímabili að ég væri hreinlega komin upp í sópranröddina svo hátt náði ég á skalanum án þess að hafa fyrir því.

2:1

Samgöngusamningurinn við vinnuna mína gerir ráð fyrir að nota megi einkabílinn allt að tvisvar sinnum í vinnuvikunni.  Ég er búin að velja þriðjudaga og föstudaga því þá eiga tvíburarnir báðir að byrja í skólanum um tíu mínútur yfir átta og þeim er alveg sama þótt þeir séu mættir rúmum tuttugu mínútum fyrr og nota sér farið.  Annar er svo búinn í skólanum upp úr tíu á þriðjudögum en hinn er í nokkuð stóru gati eftir morguntímana.  Sá síðar nefndi stefndi að því að skreppa heim í gatinu og ég bað hann um að nota tækifærið og taka úr uppþvottavélinni.  Hann hringdi svo í mig rétt fyrir hádegi og sagði að þar sem það hellirigndi og hann var bara á peysunni yrði hann í skólnum fram að og framyfir eftirhádegistímana sem voru búnir um fjögur.  Það varð úr að ég kippti stráknum með heim eftir vinnu.

 

Var tilbúin með kvöldmatinn fyrir hálfsjö.  Steikti þorskhnakka upp úr eggi, byggflögum og sesamfræjum krydduðu með "Best á lambið".  Með þessu var ég með soðnar kartöflur og gular baunir í bræddu smjöri.  Rétt fyrir sjö kom ég mér svo fyrir með saumana mína fyrir framan imbann og fylgdist með leik Íslands og Albaníu.  Á eftir horfðum við strákarnir svo á Castle.  Lilja vinkona kom upp úr hálftíu en hún ætlar að fá að gista hjá mér einu sinni í viku næstu vikurnar.  Strákarnir fóru inn til sín upp úr tíu en við Lilja horfðum á fréttir og spjölluðum svo til klukkan að ganga tólf.

Óvæntur saumaklúbbur

Á áttunda tímanum í gærkvöldi hringdi ég í tvíburahálfsystur mína til að kanna hvort það væri í lagi að kíkja í heimsókn.  Það var tekið vel í þá hugmynd. Spjölluðum aðeins í símann og minntumst á Lilju sem er með okkur í saumklúbb.  Það leit nefnilega út fyrir að erfitt yrði að finna tíma sem við gætum allar hist í vetur, Lilja upptekin á mánudags- og þriðjudagskvöldum, ég á kóræfingu á miðvikudagskvöldum og Sonja upptekin annað hvert fimmtudagskvöld.  Í því hringdi gemsinn minn svo ég kvaddi og sagðist koma fyrir níu.  Á línunni í gemsanum var Lilja og í ljós kom að hún var hætt við að festa öll mánudagskvöld.  Ég spurði hana hvort ég ætti bara ekki að taka hana með í fyrirhugaða heimsókn og það varð úr.  Allar vorum við með útsaumsverkefni, ekki byrjaðar að huga að neinni jólakortager (fyrir utan eina og hálfa jólakortið sem ég er búin að sauma) en við vorum mismunandi stemmdar í handavinnuna.  Það gerði reyndar ekkert til, þurftum mikið að spjalla upp og vinna upp liðnar vikur enda leið kvöldið alltof hratt.

4:4

Það var góð byrjun á helginni úrslitin í leiknum við Sviss.  Ég verð að viðurkenna að ég átti oft í vandræðum með að horfa á leikinn framan af og grúfði mig oftar en ekki yfir saumana mína en seinni helmingurinn af seinni hálfleik var magnaður og þvílík mörk frá Jóhanni Berg.  Hann byrjaði auðvitað vel strax á annarri mínútu en svo var það Kolbeinn sem gaf tóninn skömmu eftir að Sviss skoraði sitt fjórða mark úr vítaspyrnu.

 

Strákarnir voru annars hjá pabba sínum um helgina svo ég gat gert það sem mér sýndist þegar og ef ég vildi ;-).  Mætti til Nonna í Kristu klukkan tíu á laugardagsmorguninn og hann var búinn að klippa mig rúmum tuttugu mínútum seinna.  Restin af deginum fór í alls konar dúllerí.

 

Í gær var messað í óháðu kirkjunni og þar eð þetta var fyrsta messan sem byrjar klukkan tvö mætti Stopp-leikhópurinn á svæðið og sýndi leikritið um sálina hennar ömmu Rósu.  Leikritið var sýnt í stað predikunar en presturinn sagði samt nokkur orð á eftir.  Eftir messuna var vöfflukaffi á neðri hæðinni.  Ég skrapp svo í smá verslunarleiðangur áður en ég fór heim.

 

Helgin leið alltof hratt en ég held að ég hafi náð að njóta hvers augnabliks af henni og það er vel.

Vinnuvikulok

Orðin á sér láta standa
en það er allt í lagi.
Leysi vel úr öllum vanda
viss um mína hagi.

Kom hjólandi heim úr vinnu milli fjögur og hálffimm seinni partinn í gær.  Til stóð að minnka aðeins þvottinn sem hefur safnast upp og ég fór fljótlega að sinna þeim verkefnum.  Var með kvöldmatinn tilbúinn um sex og það fannst öðrum tvíbbanum sérlega gott því hann var svo að fara í fyrirpartý og þaðan á MR-ball.  Kvöldið hjá mér fór í sjónvarpsgláp, útsaum  og smá tölvumál.  Rétt rumskaði um eitt er ballfarinn kom heim og svo aftur um þrjú er ég varð heyrði e-n fá sér vatn.  Mig grunaði að það væri títtnefndur ballfari og reyndist það rétt hjá mér.  Báðir strákarnir áttu að mæta í skólann rétt upp úr átta í morgun og ég ákvað að vera á bíl og skutla þeim.  Það þurfti ekki að vekja neinn en er hrædd um að sá sem var á útstáelsinu og svaf stopult í nótt verði þreyttur þegar líða fer á daginn en hann er í skólanum alveg til fjögur í dag.

Fyrsta kóræfing vetrarins

Hjólaði milli heimilis og vinnu í gær.  Skrapp svo í smá leiðangur með annan tvíbbann en það kom reyndar ekkert út úr þeim leiðangri.  Stráksi ætlaði í klippingu en það var ekkert laust seinni partinn í gær.  Kom við í fiskbúð á heimleiðinni og keypti laxastykki og þorskhnakkastykki.  Setti þorskinn í frost og var með lax í kvöldmatinn.

 

Tæmdi vatnið úr þvottavélinni og stillti á suðuprógramm.  Er nú búin að komast upp með að þvo ekki þvott í næstum viku enda sést það á þvottakörfunni.  Verð eitthvað að reyna að vinna á þessu á næstunni og fá líka þefnæma tvíburann til að athuga hvort einhver lykt sé úr þvottavélinni okkar.

 

Mætti í kirkjuna rétt fyrir hálfátta á fyrstu kóræfingu vetrarins ásamt  10 öðrum kórfélögum og kórstjóranum.  Æfingin stóð yfir í tvo tíma með smá kaffihlé um miðbik hennar.  Æfðum m.a. fullt af täze (tese) sálmum úr sálmabókinni (740-750) og nokkur rödduð lög úr brúnu bókinni okkar.

Vinnuvikan hálfnuð

Ástæða nágrannaspjallsins í fyrradag var óþægileg lykt í þvottahúsinu (eitthvað sem ég slepp alveg við að finna þar sem ég er ekki með neitt lyktarskyn).  Til að prófa eitthvað urðum við ásáttar um að byrja á því að hreinsa þvottavélarnar með sveppaeyðandi efni.  Ég var á bílnum í gær og fór í svona efnaleiðangur eftir vinnu.  Efnið fékkst ekki í Lyfju eða Lyfjaveri en þeir áttu von á því seinni partinn í vikunni.  Ég var hins vegar svo heppin að fá efnið afgreitt í Lyfjavali í Álftamýrinni.  Þannig að eftir kvöldmat dreif ég mig niður í þvottahús með brúsann.  Byrjaði á því að hreinsa sigtið og strjúka innan úr gúmmíhringnum við trommluna.  Sprautaði efninu í sápuhólfið, trommluna og inn í gúmmíhringinn.  Stillti þvottavélina á 40 og lét hana taka inn á sig vatn og "þvo" í  nokkrar mínútur áður en ég slökkti á prógramminu.  Skv. leiðbeiningum á að láta þetta liggja svona yfir nótt en ég hafði ekki tíma til að sinna þessu í morgun þannig að frekari meðhöndlun verður að bíða þar til vinnudegi er lokið.

Í frænkuheimsókn

Því miður komst ég ekki á heimaleik Valsstelpna í gær en þær tóku á móti HK/Víkingi og unnu með 6 mörkum gegn engu.  Hafði nefnilega lofað íbúanum í kjallaranum að vera heima seinni partinn fyrir smá spjall.  Nágranninn kom rétt upp úr sex þegar leikurinn var nýlega hafinn og þótt spjallið væri ekki langt þá hafði ég mig ekki í að drífa mig út á völl, hefði líklega náð flestum jafnvel öllum mörkunum.  Í staðinn settist ég niður með saumana mína í smá stund.  Hitaði kjötsúpu frá því á föstudaginn og voru tvíburarnir afar glaðir með það.  Stuttu eftir mat hringdi ég í frænku mína sem hafði samband óvænt um daginn og kíkti á mig.  Hún sagðist ekki vera upptekin svo ég dreif í að ganga frá í eldhúsinu og skrapp svo í heimsókn til hennar.  Kvöldið leið hratt og ég kvaddi á ellefta tímanum.  Kom við í Hagkaup í Skeifunni eftir örfáum nauðsynjum og var svo heppin að annar tvíbbinn gekk frá vörunum áður en hann fór í háttinn.  Sjálf fór ég aðeins í tölvuna áður en ég fór í háttinn og las svo aðeins fram yfir miðnætti.

Í krækiberjamó

Í berjamó með pabba mætti,
mikið tíndum við.
Á morgunmatinn ekki hætti
ég held mínum sið.

Við mæðginin tókum okkur saman seinni partinn á föstudaginn, eftir að ég var búin að sinna þvottahúsmálum, og brunuðum austur á Hellu.  Vorum þar um kvöldmatarleytið.  Tvíburarnir voru með tölvurnar sínar og ég með saumana og nokkrar bækur.  Var komin á fætur upp úr níu á laugardagsmorguninn og eftir morgunútvarpsfréttir klukkan tíu fórum við pabbi saman í berjaleiðangur.  Við fórum rétt austur fyrir þorpið og tíndum alveg til klukkan að verða tólf.  Þá fórum við heim, fengum okkur eitthvað að borða, hlustuðum á hádegisfréttir og drifum okkur svo af stað aftur.  Í þetta sinn skoðuðum við á einum stað aðeins lengra áður en við fórum upp í hraunið ofan við Gunnarsholt.  Í hrauninu tíndum við helling og vorum að til klukkan að verða hálffjögur.  Þegar búið var að hreinsa og vigta reyndust þetta vera alveg um 20 kíló en ekki milli 20 og 30 eins og ég hélt fram á fésbókinni.

 

Til stóð að systir mín og hennar fjölskylda og ein vinkona myndu koma á laugardeginum en Helgufólk lagðist flest í hálsbólgu svo ekkert varð úr komu þeirra.

 

Gærdagurinn var verulega blautur svo við pabbi fórum ekki í neinn berjaleiðangur.  Kannski eins gott því ég var komin með og er henn með e-s konar berjastrengi, samt ekki eins slæma og þá sem ég fékk þegar ég fór með pabba fyrir tveimur árum en strengi samt.  Tók því rólega í gær.  Las, lék mér í tölvunni og saumaði út.  Er núna að keppast við að fylla í hin og þessi "götin" á jafanum og er alltaf jafn spennt að vinna í þessu verkefni.  Fljótlega eftir kvöldmat kvöddum við mæðginin pabba og mömmu (afa/ömmu) og vorum komin í bæinn upp úr hálftíu.  Við vörutalningu kom í ljós að ég þyrfti ekki að skreppa eftir vistum í búðina svo ég settist með saumana mína fyrir framan skjáinn og gleymdi mér næstum því.  Fór ekki í háttinn fyrr en upp úr miðnætti.

Blautur dagur

Allt er blautt og allt er grátt,
en ekki´ í mínu sinni.
Alltaf vakna alveg sátt
og hangi ekki inni.

Þessi "kom" til mín í morgun þegar ég hugsaði út í að það væri kominn föstudagur.  Var ekki alveg viss um hvort ég ætti að byrja fjórðu línu á en eða og en síðara orðið varð fyrir valinu á endanum.

 

Notaði annars leið 13 milli heimilis og vinnu í gær.  Vetrartímataflan er komin í gagnið og í nokkra tíma á morgnana og svo aftur seinni partinn eru vagnarnir á ca. 15 mínútna fresti.  Fór með vagninum sem var við Sunnubúð rétt upp úr hálfátta.  Vagninn sem ég tók svo seinni partinn átti að vera 18 mínútur yfir fjögur en hann var þar 25 mín. yfir.  Annar tvíbbinn lét mig vita að hann ætlaði til pabba síns eftir skóla.  Hinn var á leið á fyrstu trommuæfingu haustsins.  Ég bjó til kjötsúpu og bætti í hana vænum bita af sætri kartöflu.  Súpan var gómsæt.  Kvöldið notaði ég í lestur, útsaum og sjónvarpsgláp.

Lítið eftir af ágústmánuði

Hjólaði milli heimilis og vinnu í gær og fannst mér ég vera furðu fljót í förum.  Kom heim nokkru fyrir hálffimm og frétti þá að strákarnir væru að fara að hjálpa til við flutninga og færu í það eftir klukkan fimm.  Þar með slapp ég við að elda í annað skiptið í vikunni.  Fór með nokkur vikublöð á stofuna til Torfa, tengdapabba systur minnar, en hann klippir strákana alltaf fyrir lítið þegar þeir mæta til hans.  Annar tvíbbinn er reyndar mun duglegri við að fara í klippingu.  Hinn er sennilega ekki búinn að fara í svoleiðis í hátt í ár.  Hann nær krúnurakaði sig sjálfur rétt fyrir síðustu jól og aftur einhvern tímann í febrúar en núna er hann kominn með mikinn lubba.

 

Bókasafnið sendi mér tölvupóst um að skiladagur á skammtímalánsbók nálgaðist og þar sem ég var búin að lesa þessa bók ákvað ég að drífa í að skila henni og þremur öðrum lesnum bókum.  Skammtímalánsbókin var sú sem ég byrjaði á eitt kvöldið og gat ekki lagt frá mér fyrr en ég var búin að lesa hana upp til agna.  Fimm bækur voru ólesnar heima og ein bókaklúbbsbóka að auki.  Engu að síður slæddust nokkrar bækur í pokann af safninu.  Hafði hugsað mér kannski 1-3 en við nánari talningu voru þær sex.  Samt fór ég ekki beint að lesa þegar ég kom heim aftur heldur settist niður með saumana mína.  Upp úr sjö rambaði ég inn á óruglaða íþróttarás þar sem leikur Stjörnunnar og Vals í pepsídeild kvenna var að hefjast.  Horfði reyndar bara á fyrri hálfleikinn en leikurinn endaði 4:0 fyrir Stjörnustelpum og þar sem Breiðablik tapaði sínum leik eru þær bláklæddu búnar að tryggja sér Íslandsmeistaratitilinn í ár, hafa ekki tapað neinum leik í deildinni í sumar.

 

Síðustu dagar móður minnar heitir bókin sem ég byrjaði á rétt fyrir háttinn í gær er hún eftir Sölva Björn Sigurðsson.  Las ekki nógu mikið til að mynda mér neina skoðun en hún virkar ágætlega á mig það sem af er.

Á hjóli í dag

Í gær fór ég með strætó milli heimilis og vinnu.  Var mætt klukkan ellefu til að virða lögbundna hvíld eftir maraþon-vinnudag á mánudaginn.  Allt gekk miklu eðlilegra fyrir sig í vinnunni amk frá mínum bæjardyrum séð.  Var komin heim upp úr hálffimm.  Þá kíkti ég aðeins í tölvuna áður en ég bjó mér til kaffi.  Settist með kaffibollann inn í stofu og tók fram saumana mína í smá stund eða þangað til tími var kominn til að útbúa kvöldmatinn.  Saumaði svo aðeins meira eftir mat.  Við Oddur horfðum svo á "Castle" í sjónvarpinu.  Hinn tvíbbinn afrekaði það annars að fara aleinn og sjálfur og kaupa á sig skó eftir skóla í gær.

Langur dagur í gær

Beygjur og bogar lífinu í
ber oft mikið á.
Tíminn tifar og breytir því
takk er svarið þá.

Þar sem ég þurfti að reka erindi upp úr hádeginu í gær fór ég á bíl í vinnunna fyrsta daginn eftir langt og gott sumarfrí.  Vorum fjórar á deildinni en ein er í fríi og önnur var á leið í aðgerð og má ekki koma aftur fyrr en eftir tvær vikur.  Um hálfeitt fékk ég að skreppa frá.  Hitti annan lögfræðinginn minn á sýsluskrifstofunni.  Þar lögðum við fram móttillögur að samning og svo þarf ég að halda áfram að bíða enn um sinn.  Það er ekkert víst að þessum tillögum verði tekið án e-a breytinga en ég get vel haldið áfram að vera þolinmóð.  Skilnaðurinn mun ganga í gegn að lokum.  Var mætt aftur í vinnuna um tvö þá var orðið ljóst að þessi fyrsti vinnudagur yrði langur og furðulegur.  Án þess að fara of mikið út í þessa sálma þá var ég ekki búin fyrr en um miðnætti en þá var líka sagt við mig að muna ellefu tíma regluna.  Þannig að það er enn um klst. þar til ég þarf að vera mætt til vinnu.

Sumarfríið búið í bili

Í

smáa

letrinu las

ég um rauðan tígul

breytti svo

spaða

í

 

Strákarnir ákváðu að fara til pabba síns um helgina og þar með slapp ég við alla eldamennsku.  Nýr bæklingur frá Margaretha kom með póstinum.  Það er alltaf gaman að skoða hann.  Haustbæklingurinn er frekar mikið jóla-jóla.  Byrjar á jólaverkefnum og endar á þeim líka.  Sá auðvitað eitthvað sem gaman væri að gera en lét ekki freistast samt að þessu sinni.

 

Á laugardaginn sá ég á status einnar frænku minnar (amma hennar og nafna var systir hans pabba) að hún ætlaði að vera með opið hús.  Ég ákvað fá mér bíltúr og athuga hvort ég rataði ekki til hennar.  Vel var tekið á móti mér og stoppaði ég við í rúma tvo tíma.  Hitti m.a. systur hennar og mömmu.

 

Skrapp í verslunarleiðangur upp úr hádegi í gær og svo gerði ég nokkuð sem ég hef ekki fyrr gert í sumar.  Fór á bílnum út að Hlíðarenda til að fylgjast með heimaleik í Pepsí-deild karla, Valur - Þór/KA 2:2.  Um leið og leiknum var lokið brunaði ég upp í kirkjuna mína til að taka þátt í fyrstu messu haustsins.  Alls voru 17 í kirkjunni og af þeim 3 sem ekki voru með nein hlutverk.  En gott og gaman að hitta söngfélagana.

Síðasti virki frídagur í bili

Föstudagur enn á ný
að líða þessi vika.
Næstu skref ég undirbý
ætla ekki´ að hika.

Mér tókst það enn og aftur.  Þessi staka kom til mín eldsnemma í morgun.

Sá aumur á tvíbbunum í gær.  Annar var óvart seinn fyrir þrátt fyrir að eiga ekki að mæta í skólann fyrr en hálfellefu. Skutlaði honum því yfir á Skólavörðuholtið en með þeim orðum að skutl verða fá sem engin eftir að ég byrja að vinna aftur og á meðan ég er á samgöngusamning þar.  Hinn tvíbbinn átti ekki að mæta fyrr en upp úr eitt en ég var hvort eð er að skreppa í innlit til Hlíbbu minnar svo hann fékk far í skólann líka.

Var komin til Hlíbbu fyrir hálftvö, með saumana mína að sjálfsögðu.  Var ekki búin að stoppa lengi þegar systurdóttir hennar leit inn.  Sú hjálpaði frænku sinni að setja kaffi á borð og sem við vorum að setjast við borðið kom dóttir Hlíbbu, Jóna Mæja, aðeins við.  Hún hafði rétt tíma til að fá sér tíu og knúsa mömmu sína áður en hún þurfti að rjúka aftur.  Hún var að leggja af stað í fimm tíma ferðalag með tveimur vinum vestur á firði til að tína aðalbláber.  Frænkan fór líka á undan mér svo ég kom fyrst og fór síðust.

Tvíbbinn sem ég skutlaði seinna í skólann var kominn heim á undan mér.  Dagurinn fór að öðru leyti í lestur, tölvu, sjónvarpsgláp og að sjálsögðu meiri útsaum.

Rólegheit og lestur

Ég fór ekki út fyrir hússins dyr í gær þar sem ég átti ekkert erindi eitt eða neitt.  Var eitthvað að "dunda" í tölvunni og að sjálfsögðu tók ég aðeins í nálina.  Ákvað svo að fara að undirbúa mig fyrir háttinn frekar snemma eða rétt fyrir tíu.  Slökkti á tölvunni og dró fram eina af bókunum sem ég náði í af safninu sl. föstudag; Stöðvið brúðkaupið eftir Stephanie Bond.  Gat ekki lagt bókina aftur frá mér fyrr en hún var búin og þá var klukkan að slá tólf á miðnætti.

Andagift

Andinn kom yfir mig flínkur og fær.
Fagnandi tók honum mót.
Hugsanir villtust af vegi í gær,
varlega íhuga rót.

Orðin á sveimi í huganum hátt.
Held að ég þurfi að skrifa.
Hvernig allt hagast er ég sátt
hugsa að af muni lifa.

Lestur og ísaumur róa mig mikið
magnað hvað tíminn fer hratt.
Æskilegt nú væri fyrir vikið
að vita að stundum er bratt.

Efsta vísan "þvældist" fyrir mér þegar ég ætlaði að fara að sofa e-n tímann eftir miðnætti.  Það endaði með því að ég sendi mér hana í sms.  Hinar tvær bættust við bara núna áðan.  Gærdagurinn var annars þannig séð nokkuð venjulegur og gerðist fátt markvert.  Er alveg að vera búin að ná að klára að "nota" neðri helminginn af útsaumsmunstrinu og ég tel mig vera búin að "bjarga" málunum varðandi uppábrotsstaðina þar sem táknin eru að verða illlæsanleg.  Strákarnir byrja í skólanum á morgun og eru þeir bara nokkuð spenntir.  Þeir eiga þó eitthvað eftir að verða þreyttir fyrstu dagana þar sem illa gengur að snúa sólarhingnum við.  Oddur þarf reyndar ekki að byrja fyrr en upp úr hádeginu á morgun.

Frænkunöfnuhittingur

Seinni partinn á sunnudaginn var hringdi systurdóttir mömmu og nafna mín í mig.  Hún er þessa dagana stödd á Íslandi og var að athuga hvort við gætum ekki hist áður en hún færi aftur um miðja vikuna áleiðis til Kína þar sem hún verður að kenna ensku næsta vetur. Ég var enn á Hellu er hún hringdi en við ákváðum að vera í sambandi upp úr hádegi daginn eftir (í gær).  Eftir nokkur sms fyrst um tólf og svo um þrjú slógum við því föstu að hún kæmi til mín upp úr fjögur.  Upphaflega hugmyndin hafði verið að fara í smá göngu en það varð lítið úr henni í þetta sinn.  Var búin að hita kaffi er nafna mín kom færandi hendi með flott sjal/trefil frá Kína og við settumst niður inni í stofa með bollana.  Áður en við vissum af var komin tími til að finna til kvöldmatinn.  Við hjálpuðumst að við það og útbjuggum hinn fínasta kjúklingapottrétt með kjúklingafillet í bitum, lauk, papriku, sveppum og sætri kartöflu.  Út í þetta settum við svo krukku af karrýmauki.  Einnig suðum við bygggrjón meðfram þessu.  Í eftirrétt bauð ég upp á ostaköku og hellti upp á kaffi úr nýmöluðum kaffibaunum.  Þegar við vorum búnar að ganga frá eftir matinn settumst við aftur inn í stofu og allt í einu var klukkan orðin tólf á miðnætti.  Frænka mín kvaddi mig fljótlega og sagðist koma aftur heim í febrúar.  Yndislegur hittingur og það var margt spjallað og spekúlerað, við frænkur náum einstaklega vel saman og höfum alltaf gert þótt árin á milli okkar séu 14.

Annars gleymdi ég alveg að tala/skrifa um upplifunina á tónleikunum í Selinu við Stokkalæk sem ég sagði frá í gær.  "Sögutónleikarnir" byrjuðu klukkan fjögur og um hálfsex var gert smá kaffihlé áður en sögunni var framhaldið til klukkan sjö.  Ég skemmti mér mjög vel á þessum viðburði og þóttist mikið heppin að mamma bauð mér með sér.  Söngvararnir voru flottir og upplesturinn, leikurinn og látbragðsleikurinn afar skemmtilegt og þótt ég þykist vita að ýmislegt var fært í stílinn af því að "sagan er betri" svoleiðis þá fannst mér þetta fróðleg og afar merkileg saga.

Ein saga sögð

Þrátt fyrir að í þorpinu væri hátíð, hin árlegu töðugjöld, þá hélt ég mig "heimavið" í foreldrahúsum á laugardaginn.  Pabbi fór í örnefnaleiðangur nokkru fyrir hádegi en ég sat með saumana mína sunnan við hús og var Bríet að dunda sér við eitt og annað í kringum mig.  Mamma settust líka stund hjá mér.  Bríet fór svo í bæinn með foreldrum sínum er þau komu við um kvöldið eftir velheppnaðar hreindýraveiðar.

Sat ekki úti við í gær en kepptist við að sauma og er ég að hamast við að klára þá parta sem lenda í brotunum á munstrinu því þeir eru að hverfa og brotin jafnvel að rifna.  Ætla nú aðeins að reyna að tjasla þessu saman en geri líka ráð fyrir að þurfa kannski að grandskoða fyrirmyndina til að finn út úr nokkrum sporum.

Annars bauð mamma mér á tóknleika með sögulegu ívafi í Selinu við Stokkalæk seinni partinn í gær.  Mamma var einu sinni kaupakona í þessari sveit og kynntist hinn stórmerkilegur Kristínu Oberman sem átti íslenska móður og hollenskan föður sem var háttsettur í sínu heimalandi og var á tímabili landsstjóri á Súmötru.  Þar fæddist Kristín og ólst upp en hún kom til Íslands 16 ára rétt eftir stríð var í heimavist í tvö ár í Reykholti og fór svo í húsmæðraskóla.  Á sveitaballi kynntist hún fyrri eiginmanni sínum og eignaðist með honum tvö börn.  En hann var ofbeldisfullur og þegar hún var næstum búin að missa seinna barnið (það var fætt fyrir tímann vegna ofbeldis) fór Kristín frá manninum og réði sig sem ráðskona á Stokkalæk eftir að hafa séð auglýsingu um stöðuna þar sem tekið var fram að það mætti hafa með sér barn.  Það var ekki fyrr en ráðningatími hennar var liðinn og hún farin að taka sig saman aftur að bóndinn hafði sig í að biðja hennar.  Saman áttu þau svo 5 börn.  Fyrir rúmum tíu árum kom Guðrún Ásmundsdóttir leikkona með hóp af fólki að Stokkalæk.  Þá bjuggu þar annað fólk sem var búið að breyta staðnum í áttina að því sem hann er nú í dag.  Guðrún rak augun í innrammaðan pappírsmiða upp á veg sem unga fólkið hafði fundið í húsinu.  Á miðann hafði Kristín m.a. skrifað að á þessum stað hefði hún lifa 23 hamingjuríkustu ár ævi sinnar.  Guðrún varð forvitin um þessa konu og þegar hún fór að kynna sér sögu hennar vildi hún endilega gera eitthvað úr henni.  Hún notast við minningar frænku Kristínar sem og Mömmu og svo fékk hún sópran, tenór og baríntón, píanóleikara,  leikkonu, látbragðsleikkonu, eina vinkonu sína, tvö börn og tvær fiðluspilandi konur til að setja þetta upp með sér.  Afraksturinn var settur upp um helgina og bauð mamma mér á seinni tónleikana.  Það kom reyndar á daginn að mamma þurfti ekki að borga okkur inn, henni var boðið fyrir sinn þátt í þessari sögu.  Það mætti fullt af fólki og settist Kristbjörg Kjeld við hliðina á mér.

Pabbi vildi helst að ég gisti eina nótt enn en ég ákvað að drífa mig í bæinn í gærkvöldi.  Var komin heim um ellefu og strákarnir komu heim skömmu síðar.

Laugardagur

Ja hérna, ég fékk allt i einu smá fiðring í fingurna og löngun til að skrásetja gærdaginn áður en helgin er liðin.  Gærdagurinn var semsagt mjög skemmtilegur.  Um morguninn kom andinn yfir mig og ég póstaði föstudagsferskeytlu bæði á bloggið og fésbókina án þess að liggja mikið yfir vísunni sjálfri.  Um eitt skutlaðist ég með Odd upp í Tækniskóla og skildi hann eftir þar.  Hann mætti á skólasetninguna og ætlaði svo að fara í klippingu.  Næst setti ég bensín á "mömmubíl" hjá Atlantsolíu við Flugvallarveg.  Þá lá leiðin í Kringlusafnið þar sem ég skilaði átta bókum og tók með mér sjö í staðinn.  Á leiðinni út í bíl mundi ég skyndilega eftir rafkrúna naglasettinu sem ég keypti fyrir mömmu um daginn og gleymdi að taka með mér austur um síðustu helgi.  Ég kom því aftur við heima og sótti þetta.  Var tilbúin að öllu öðru leyti og allt annað komið út í bíl svo ég kvaddi Davíð Stein aftur og lagði af stað út úr bænum.  Var búin að hringja á einn stað á Selfossi um hádegi til að athuga hvort tekið yrði á móti mér og var mætt þangað áður en klukkan sló hálfþrjú.  Þáði kaffi, pönnsur og fleira og átti gott spjall við gestgjafann enda flaug tíminn út í buskann.  Hélt ferðinni áfram austur á Hellu á sjötta tímanum og var pabbi frekar hissa að sjá mig því ég hafði ekkert látið vita þegar ég lagði í hann.  Hann átti þó alveg eins von á mér.  Settist niður með saumana í smá stund en annars var ég nú bara að leika mér í tölvunni, leggja spila kapla eða spila "ólsen-ólsen upp og niður" við yngri systurdóttur mína.

Þannig er nú það

Þó að skýin fyrir sólu fara
förum ekki´ að skæla.
Hlæjum hærra, syngjum bara!
Hættum líka´ að pæla.

Ég neita að láta verðrið reyna að ráðskast með skapið í mér.  Það er best að brosa  amk út í annað sama á hverju gengur.

Annars notaði ég gærdaginn svipað og undanfarna daga, mest í útsaum þó.  "Lost no more"-verkefnið kallar stöðugt á mig og það er einfaldlega svo gaman að vinna í myndinni að tíminn hverfur mér alveg.  Fylgdist aðeins með heimsmeistaramótinu í frjálsum en upp úr fjögur fór ég og sótti eldri systurdóttur mína.  Hulda átti tíma í fótaaðgerð um fimm og þar sem foreldrar hennar voru að leggja í hreindýraveiðferð tók ég að mér að skutla frænku minni.  Var svo tilbúin að skutla henni heim til einnar vinkonu hennar er hún vildi bara fá far að Egilshöll.  Þær vinkonur ætluðu að taka strætó.

Framundan er enn ein helgin og svo síðasta vikan mín í sumarfríi.  Mun samt eiga eftir um átta daga frí þegar ég mæti í vinnu annan mánudag.

"Friður sé með yður!"

Tók daginn nokkuð snemma í gær svona miðað við að vera í sumarfríi.  Sinnti ýmsum skyldum fyrir hádegi en greip líka í bók og saumana mína.  Annar tvíburinn kom fram um hádegisbil og ég tilkynnti honum um áætlanir mínar.  Hinn tvíburinn var ekki enn vaknaður er ég brá mér af bæ.  Tók saumana mína með upp í byggðina við Úlfarsfell og var komin til Lilju vinkonu á slaginu klukkan eitt.  Mundaði nálina nær strax og svo föndruðum við (hún var í perluvinnu), drukkum kaffi og spjölluðum vítt og breitt.  Tíminn æddi áfram og þegar ég kvaddi tæpum fjórum tímum seinna fannst mér sem aðeins klukkutími væri liðinn.

Hafði pastarétt með sætum kartöflum, kúrbít, papriku, lauk, sveppum, kasew-hnetum og graskersfræjum í matinn.  Setti engan ost út í og í raun blandaði ég pastanu ekki saman við fyrr en við mæðgin vorum búin að borða.  Kvöldið fór svo í sjónvarpsgláp og útsaum.  Horfði m.a. á vináttulandsleikinn milli Íslands og Færeyja og var hálf svekkt yfir að fleiri færi væru ekki nýtt.  Þetta eina mark var svo þar að auki á grensunni ef svo má segja/skrifa.

Rólegheit

Í gær var sannkallaður letidagur.  Fór óvenjulega seint á fætur en klukkan var samt ekki orðin hálfellefu þegar ég var komin á stjá.  Ekkert fréttnæmt gerðist.  Saumaði út, las, hringdi í pabba og mömmu, eyddi drjúgum tíma í tölvunni (en var svo búin að slökkva á henni fyrir tíu í gærkvöldi) og horfði á sjónvarpið.  Það var rétt svo að ég hafði mig í að útbúa kvöldmatinn sem ég hafði þó frekar lítið fyrir; ofnsteikt bleikja með kartöflum og maísbaunum í bráðnu smjöri.

Hittingur

Gærdagurinn var góður.  Morguninn notaði ég í ýmsar skyldur og fleira.  Skrapp í búðina upp úr hádegi og svo settist ég út á svalir í tæpa tvo tíma og las alls kyns tröllasögur.  Á meðan ég sat þarna úti og í einni pásunni á milli tröllasaga datt mér í hug að senda sms á "tvíburahálfsystur" mína og spyrja hvort hún yrði heima um kvöldið.  Það varð úr að ég var mætt til hennar um átta og við byrjuðum á því að fá okkur klukkustundar göngutúr um hverfið.  Dóttlan hennar hjólaði með okkur.  Á eftir fengum við okkur kaffi, tókum fram saumana okkar og áttum áfram gott spjall (höfðum að sjálfögðu spjallað margt og mikið á göngunni).  Við fundum báðara fyrir því að hafa ekki hist nokkuð lengi enda liggur skipulagður saumaklúbbur niðri yfir hásumarið.  Klukkan var líka langt gengin í tólf þegar ég dreif mig loksins heim.

Veðurblíða

Við mæðginin tókum okkur upp rúmlega átta á föstudagskvöldið og drifum okkur út úr bænum.  Vorum komin á Hellu rétt fyrir tíu.  Annar tvíburinn setti strax upp tölvuna sína sem var með í för.  Ég horfði á sakamálamynd á RUV áður en ég fór í háttinn.

Upp úr hádegi á laugardeginum skrapp ég á sveitamarkaðinn á Hvolsvelli.  Tilgangurinn var aðallega að heilsa upp á Lilju vinkonu og systur hennar sem voru með bás þarna.  Á meðan ég stoppaði hjá þeim gaf bandarísk fjölskylda sig á tal við okkur, hjón og sonur (sennilega rúmlega tvítugur).  Þau voru ekki búin að vera nema nokkra daga á landinu en ungi maðurinn var þegar byrjaður að tala smá íslensku og vildi fá að vita hvernig við segðum frasa eða orð á íslensku.  Svo skrapp ég til mömmu þeirra systra og fékk mér kaffi og gott spjall.

Þegar ég kom til baka var móðurbróðir minn og fjölskylda kominn í heimsókn og nokkru seinna bættust bróðursonur pabba og hans kona í hópinn.  Mamma var búin að búa til kartöflusallat og marinera slatta af kjötmeti.  Við hjálpuðumst að við að skera niður í sallat og svo var grillað.  Dagurinn var semsagt frábær í alla staði.

Sat sunnan meginn við húsið með saumana mína í gærdag.  Borðuðum svo kvöldmatinn frekar snemma og við mæðgin drifum okkur í bæinn áður en sólin lækkaði of mikið á lofti til að pirra eða valda vandræðum.  Var samt ekki komin nógu snemma til að ná öllum leið Vals og Stjörnunnar en ég sá allan seinni hálfleikinn og sá mína menn ná stigi eftir að hafa lent manni og marki undir mjög snemma leiks.  Eftir leikinn horfðum við Oddur á "Sönnunargögn", þáttinn frá sl. fimmtudegi.

Engin "föstudagsferskeytla" heldur núna

Lífið er svo ljúft og veðrið hefur engin áhrif á það.  Í gær skrapp ég á sýsluskrifstofuna til að nálgast plögg.  Annars fór dagurinn í lestur og útsaum.  Hafði kvöldmatinn óvenjusnemma, lifrarrétturinn var tilbúinn vel fyrir hálfsex.  Hafði nefnilega rekið augun í það að heimaleikur kvenna hafði færst fram um einn og hálfan tíma, til 17:45 í stað 19:15.  Ég var semsagt búin að borða um hálfsex og mætt á völlinn þegar leikurinn var nýhafinn.  Leikar enduðu 2:1 fyrir mínum stelpum og eru þær nú í öðru sæti á eftir Stjörnunni.

Er heim kom gekk ég frá í eldhúsinu, hafði ekki haft vit á að úthluta strákunum því verkefni.  Stuttu seinna hringdi síminn, frænka mín og jafnaldra (afi hennar var föðurbróðir minn).  Hún sagðist hafa verið að hugsa svo mikið til mín að hún lét loksins verða af því að hringja til að athuga hvort ég myndi vera heima og eiga kaffi á könnunni ef hún kæmi.  Magnað hreint, því mér hefur oft orðið hugsað til þessarar frænku minnar og nú er ísinn semsagt brotinn.  Kaffið var að klárast að renna niður trektina þegar hún kom.  Margt var spjallað og ég minntist örugglega tvisvar eða þrisvar á það hversu vænt mér þótti að hún hafði samband.  Nú er boltinn hjá mér og ég mun pottþétt halda honum á lofti.

Hressandi veður úti núna

Það er líkt og það ætli að hausta snemma í ár en ég hef samt enga trú á því.  Það á örugglega eftir að rætast úr veðrinu aftur.  Svona veður gefur manni líka ástæðu til að "liggja" í bókum og/eða sauma út.

Skrapp í Elkó fyrir mömmu í gær að kaupa rafknúið naglasnyrtisett á útsölu.  Kom við í fiskbúð á leiðinni heim og keypti ýsu sem ég hafði í soðið um kvöldið og bleikju sem ég frysti í bili.  Annars fór dagurinn í lestur, útsaum og tölvuna.

Var eitthvað að spá í að skreppa á Fram - Valur í gær og get alveg séð eftir því að hafa ekki drifið mig því mínir menn unnu á útivelli 0:4.

Veðurblíða

Notaði gærmorguninn í að ljúka við að lesa eina af bókasafnsbókunum.  Upp úr hádegi fór ég svo á safnið og skilaði sex bókum.  Svo "rötuðu" átta bækur ofan í pokann í staðinn.  Skrapp í verslunarleiðangur og gekk Oddur frá vörunum þegar ég kom með þær heim.

Bjó til kaffi og fékk Odd til að setja fyrir mig stól út á svalir.  Settist svo út með bók (Rof eftir Ragnar Jónasson) og kaffi og sat alveg örugglega í uþb tvær klst. var nokkuð rauð á hálsi og upphandleggjum er ég kom svo inn.  Hafði lasagnia í kvöldmatinn, bjó til meira kaffi og eftir Castle stóðst ég ekki mátið og horfði á frímynd vikunnar af SkjáFrelsi, "Life of Pi".  Ég er nefnilega nýbúin að lesa bókina, hún var ein af þessum sex bókum sem ég skilaði á safnið  í gær.  Mögnuð bók og myndin var mjög góð.

Var á Hellu um helgina

Ég kom heim um ellefu í gærkvöldi og voru strákarnir sofnaðir.  Þeir fóru með þremur vinum sínum í bústaðaferð í Grímsnesið upp úr hádegi á laugardaginn og komu heim um hádegisbil í gær.  Ég fór með mági mínum og eldri systurdóttur minni austur til pabba og mömmu rétt fyrir hádegi á laugardaginn.  Helgin fór í lestur og útsaum.  Við mamma sátum sunnan meginn við hús í nokkra tíma á sunnudaginn og var ég að sjálfsögðu með saumana mína í höndunum.  Ég fór svo á bílnum hennar mömmu (hún er úlnliðsbrotin á hægri og keyrir sennilega ekki alveg í bráð) og lagði í hann langt gengin í tíu í gærkvöldi, kannski heldur of fljótt því sólin blinaði mig á kaflanum frá Rauðalæk og alveg nokkuð framhjá Vegamótum.  En ég komst heil heim og það er fyrir öllu.

Nýt þess að vera í sumarfríi

Þrátt fyrir að hafa  ekki farið að sofa fyrr en langt gengin  í tvö í nótt (var að lesa nema hvað) var ég vöknuð upp úr átta og komin á fætur um níu.  Þetta heitir að nýta tímann þótt sumt af honum fari auðvitað í einhverja vitleysu.  Er ekki enn farin að grípa í saumana og hef reyndar ekki snert þá síðan í fyrradag en það sem slær mig mest er að ég er búin að vera á fótum í þrjá tíma og ég var loksins að renna á fyrstu könnuna.

Strákarnir komu hingað heim eftir vinnu seinni partinn í gær eftir að hafa verið hjá pabba sínum síðan um helgina.  Þeir ákváðu að taka sér frí í dag og er annar þeirra ennþá sofandi.  Mér skilst að þeir fari í útilegu með nokkrum vinum á morgun og fram á mánudag.  Spurði þá hvort þeir þyrftu ekki að undirbúa sig og útbúa nesti og þh.  Eitthvað voru svörin dræm svo ég fylgist bara spennt með hvað gerist.

Hafið það sem allra best um helgina!

Komin heim í bili

Síðast liðinn mánudag átti ég bókað flug frá Reykjavík til Egilsstaða klukkan hálfellefu fh.  Ella, æskuvinkona mín, tók á móti mér og við byrjuðum á að skreppa heim til hennar  og fá okkur kaffi.  Síðan skruppum við í Bónus og vínbúðina þar sem ég keypti argentíska hvítvínsbelju.  Um kvöldið var vinkona mín með rosagóðan fiskrétt og hvítvínið var afar ljúffengt með.

Á þriðjudeginum vorum við komnar á fætur um níu.  Fengum okkur morgunmat og kaffi á eftir.  Ég var með saumana mína með, hafði reyndar gripið í þá strax daginn áður.  En á ellefta tímanum ókum við að Selskóg og tókum stóra hringinn þar.  Það voru nokkrir dropar en alveg logn og þetta var góður göngutúr.  Skórnir voru "þægir" mest alla leiðina en voru aðeins farnir að bíta mig í hægri hælinn í restina.  Er við komum til baka bjó Ella til handa okkur grænan búst úr appelsínusafa, spínati, engifer og lime.  Síðan horfðum við saman á frímynd Skjás Eins, "The man with the ironfists".  Eftir myndina og nokkurt kaffiþamb renndum við aðeins yfir á Seyðisfjörð og rúntuðum aðeins þar um.  Það var magnað að sjá spegilsléttan Löginn þegar við komum aftur til baka.  Um kvöldið kom uppeldisstjúpsystir Aðalsteins og maðurinn hennar.  Slegið var upp í grillveislu og drukkið hvítt, rautt og bjór frameftir kvöldi sem leið alltof hratt.

Í gær vorum við vinkonur aftur á fótum um níu.  Aðalsteinn var ekki farinn í vinnuna og drakk með okkur kaffi áður en hann fór.  Rétt fyrir hádegi löbbuðum við tvær upp á klett að hringskífu.  Þetta var ekki langur göngutúr en góður.  Það var búið að vera rok um morguninn en það lyngdi akkúrat á meðan við vorum á labbinu.  Fengum okkur aftur grænan drykk í hádeginu og svo greip ég í saumana mína.  Seinni partinn skruppum við yfir í Hússmiðjuna á Reyðarfirði og heimsóttum Aðalstein í vinnuna.  Valdís, dóttir Ellu, hitti okkur líka þar.  Í gærkvöldið kláraði ég úr beljunni og við vinkonurnar spiluðum nokkrar umferðar af 10.000  (farkle).  Fórum ekki eins seint að sofa og kvöldin á undan en náðum samt ekki að skríða upp í fyrir miðnætti.

Ég skrapp í sturtu upp úr átta í morgun og skreið svo upp í aftur í smá stund.  Fékk mér morgunmat um níu og hellti upp á.  Var búin að drekka einn kaffibolla áður en Ella kom fram.  Við spjölluðum svo yfir kaffibollum þar til kominn var tími til að skila mér á flugvöllinn.  Vélin fór í loftið rétt fyrir tólf og það er uþb klst. síðan ég lenti í Reykjavík.  Hitti Guðbjörgu frænku mína á flugvellinum en Oddur Vilberg sonur hennar var að koma frá Egilsstöðum með sömu flugvél og ég.

Fríið mitt er ekki hálfnað og ég veit ekki hvort það verða reglulegar færslur á blogginu næstu þrjár vikurnar, það verður bara að koma í ljós.

Lítið um skrif næstu daga

Helgin liðin en ný ævintýri framundan

ÉG tek flesta daga frekar snemma til að nýta þá sem allra best í alls konar, hitt og þetta/eitt og annað.  Á laugardagsmorguninn var ég mætt til Nonna í Kristu Quest alveg hissa á því að það voru liðna sex vikur síðan ég var klippt síðast.  Reyndar var ég alveg farin að finna fyrir því að hárið hafði þykknað og vaxið alveg helling.  Þetta var síðasti tímasetti tíminn í dagskránni svo Nonni festi fyrir mig allmarga næstu tíma á sex vikna fresti hátt í tvö ár fram í tímann.

Um hádegið skutlaði ég öðrum tvíbbanum í "passvinnu".  Hann er að passa tvær systur tveggja og fjögra alla virka daga og tók svo að sér að passa þær hluta úr helginni líka.  Ég fór beint heim aftur því ég átti eftir að græja smá þvottahúsmál.

Tveim tímum seinna hringdi ég í frænku mína og nöfnu í Garðabænum og fékk það staðfest að hún væri heima að sóla sig og að ég var velkomin í heimsókn að sóla mig með henni.  Dreif mig því þangað í einum grænum.  Byrjaði á því að skilja það sem ég hafði tekið með mér eftir út í bíl en frænka mín var ekki fyrr búin að heilsa mér er hún spurði hvort ég væri ekki með saumana með mér.  Ó, jú, ég var að sjálfsögðu með handavinnuna og sótti hana strax út í bíl.  Við sátum svo í sólinni til klukkan að ganga sex.  Frá frænku minni fór ég í Nettó fyrir hana til að kaupa smávegis fyrir mömmu hennar og færa henni.  Gamla konan, nýlega orðin 91 árs, var að jafna sig eftir veikindi og vantaði m.a. fisk í soðið og dóttirin var á leið í matarboð.  Ég tók þetta verkefni að mér með glöðu geði og var boðið í mat fyrir vikið.

Gærdagurinn fór allur í lestur, útsaum og sjónvarpsgláp, fylgdist með formúlunni, úrslitaleik EM kvenna og horfði svo á spennuþætti um kvöldið.  Skrif um ævintýrin framundan bíða aðeins, jafnvel í nokkra daga...

Föstudagur

Dagarnir þjóta áfram og ég keppist við að njóta þeirra.  Gærdagurinn leið t.d. ógnar hratt þrátt fyrir að ég færi snemma á fætur og fyndist ég þar með hafa ótal klukkustundir til stefnu þá hurfu þær fljótt.  Ég er samt ekkert að segja að ég sé að fara neitt illa með tímann.  Er að sinna einu og öðru og áhugamálin eru í fyrirrúmi svo það er kannski einmitt þess vegna sem tíminn æðir svona áfram?

Þegar  tvíburarnir voru komnir heim og búnir að fara í sturtu eftir vinnu dagsins fórum við yfir til annars bróður hennar mömmu og fjölskyldu hans.  Okkur var boðið í grill og nutum þess og félagsskaparins fram eftir kvöldi.  Það var einnig fylgst með gangi mála á EM kvenna, aðallega frá loka mínútum venjulegs leiks og þar til úrslitin eftir framlengingu og vítaspyrnukeppni var ljós.

Ég vona að hugsanlegir blogglesendur mínir sakni ekki ferskeytlunnar.  Andinn kom ekki nægilega vel yfir mig og í fríinu mínu mun ég sjálfsagt blogga eitthvað öðruvísi en vanalega.  Nú ef andinn kemur einhvern anna dag en föstudag mun ég líklega pósta innblæstrinum á bloggið, sama hvað dagurinn heitir.

Hafið það sem allra best um helgina og ekki gleyma að hlúa að ykkur sjálfum!

Morgunstund gefur gull í mund

Mér fannst samt einum of snemmt að fara á fætur klukkan sex í morgun.  Skrapp á snyrtinguna og fór svo beint í rúmið aftur.  Fór fram úr rúmlega hálfátta og þurfti að ýta við öðrum tvíbbanum.  Í stað þess að klæða mig alveg strax las ég í bók sem ég byrjaði á í gærkvöldi, Sagan af Pí.  Lauk við fyrsta hlutann áður en ég fór á fætur.  Ákvað að setja í þvottavél og var búin að því fyrir hálfníu þannig að líklega er að verða kominn tími til að hengja upp.

Um miðjan dag  í gær skrapp ég til hennar Hlíbbu minnar.  Hún er komin heim frá Landakoti en er ekki alveg nógu hress.  Hún hresstist samt eitthvað við komu mína.  Ég var með saumana mína með mér og stoppaði hátt á annan tíma.  Kom svo við í fiskbúðinni á leiðinni heim og keypti ýsu í soðið.

Fylgdist með leik Svía og Þjóðverja í fyrri undanúrslitaleik EM kvenna.  Það fór fyrir Svíum eins og Frökkum, þ.e. tölfræðin var öll Svía megin nema að einu leiti, þeim tókst ekki að skora löglegt mark og fengu þvílíkt klaufalegt mark á sig sem var markið sem skildi liðin að í lok leiks.  Þær þýsku verða svo að teljast sigurstranglegri hvort sem þær fá Dani eða Norðmenn í úrslitaleikinn.  Gleymum samt ekki að Norðmenn unnu Þjóðverja í riðlakeppninni og Danir slóu Frakka út, þannig að allt getur gerst.

Bongóblíða

Ég var komin á bókasafnið í Kringlunni rétt upp úr klukkan tíu í gærmorgun.  Skilaði sex bókum af þeim níu sem ég var búin að vera með sl hálfa mánuð eða svo og tók fimm "nýjar".  Ein af þessum bókum er með hálfsmánaðar skilafrest. Næst lá leiðin í Hagkaup á efri hæðinni þar sem ég keypti nokkur sokkapör til að gefa afmælisbörnum dagsins.  Var áður búin að gefa þeim smá pening.  Svo fór ég í Steinar og Waage og fann mér nýja skó.  Bað afgreiðslukonuna um að henda gömlu, lúnu/ónýtu skónum og labbaði á þeim nýju í Hagkaup á neðri hæðinni þar sem ég verlsaði m.a. rjóma.  Á leiðinni heim fyllti ég lánsbílinn af bensíni.

Strákarnir voru báðir vaknaðir er ég kom heim um hálftólf.  Dagurinn fór í ýmiss konar dundur.  Var kannski ekki alveg nógu dugleg að nýta mér veðurblíðuna en það verður bara bætt úr því í dag.  Upp úr tvö hófst ég handa við að búa til stafla af vöfflum og um svipað leyti kom einn vinur tvíburanna í heimsókn.

Rétt fyrir sex komu systir mín, mágur og eldri dóttir þeirra.  Sú yngri er í nokkurs konar skautaæfingabúðum á Akureyri.  Við hjálpuðumst að við eldamennskuna, steiktum hrefnukjöt, útbjuggum kartöflugratín, sósu, suðum rósakál, tókum af borðstofuborðinu og lögðum á það. Mágur minn losaði fyrir mig stíflu úr eldhúsvaskinum.  Þ.e. minni vaskurinn var stíflaður en ég var eiginlega búin að gleyma því þar sem ég læt svo sjaldan renna í hann. Maturinn heppnaðist annars vel og ég held að strákarnir hafi verið mjög ánægðir með bæði mat og gesti.  En strax eftir mat skutlaði ég Oddi í Smárabíó en tveir vinir hans voru búnir að bjóða honum í bíó.  Gestirnir biðu bara eftir mér og drukku kaffi í rólegheitunum.

Sumarfrísdagurinn fyrsti

Ég vissi það að blíðan myndi brjótast fram um leið og ég væri byrjuð í sumarfríi. Þrátt fyrir að í gær væri síðasti vinnudagur fyrir frí var dagurinn alls ekki lengi að líða.  Hjólaði heim upp úr fjögur og settist beint fyrir framan imbann til að fylgjast með leik í 8 liða úrslitum EM-kvenna.  Tók einnig fram saumana mína.  Rétt seinna hringdi ein vinkona mín og "föðursystir" (feður okkar eru nafnar sko) í mig og sagðist ætla að lána mér bíl næsta hálfa mánuðinn eða svo.  Ég varð alveg orðlaus en náði þó að þakka fyrir og þyggja gott boð.  

Um það bil sem leikurinn kláraðist kom þessi vinkona mín.  Hún stoppaði nokkra stund en fékk mig svo til að skutla sér heim til sín.  Þannig gat hún einnig kannað aksturslagið mitt og meðferð á bílum.  Þótt það sé nokkuð síðan ég keyrði beinskiptan bíl gekk þetta bara vel og ég held að Svala hafi fengið vissu sína um að bíllinn væri í góðum höndum.  

Fór svo beint heim og horfði á seinni leik dagsins og þann síðasta í 8-liða úrslitunum.  Þar var heldur betur spenna.  Danir komust yfir og það var sama hvað Frakkar reyndu þeim tókst ekki að jafna fyrr en út vítaspyrnu í seinni hálfleik.  Sköpuðu sér miklu fleiri færi heldur en þær dönsku en nýttu þau bara ekki.  Sú danska í markinu var líka að standa sig og dönsku varnar"mennirinir" voru duglegir að flækjast fyrir frönsku sóknar"mönnunum".  Leikurinn fór í framlengingu og vítaspyrnukeppni og það endaði með dönsku sigri, eitthvað sem fæstir höfðu búist við fyrir leikinn. Þar með eru þrjú af fjórum bestu liðunum lið frá norðurlöndunum, Norðmenn, Svíar og Danir.  Fjórða liðið eru svo Þjóðverjar.

Tvíburarnir eru annars 17 ára í dag og þeir tóku sér frí í tilefni dagsins og munu líklega leyfa sér að sofa út til að byrja með.  Ég er búin að lofa þeim vöfflum og ostaköku með kaffinu og hef svo hrefnukjöt í kvöldmatinn.  Svo spilum við annars daginn alveg eftir eyranu/eyrunum  ;-).

Vá hvað helgin leið eitthvað hratt

Helgin liðin og var ekki lengi að láta sig hverfa og nú er ný vika gengin í garð.  Oddur Smári labbaði með mér í Bónus í Kringlunni upp úr hádegi á laugardag og þar sem vörurnar komust í þrjá poka fórum við létt með að trítla með þær heim.  Annars hefði verið hægt að taka 13 sem stoppar fyrir utan Sunnubúðina.

 

Gærdagurinn fór allur í knattspyrnuáhorf og útsaum.  Horfði á tvo leiki í imbanum, fyrri tveir leikirnir á 8 liða úrslitum kvenna á EM.  Svíar völtuðu yfir stelpurnar okkar en Ítalir létu Þjóðverja hafa fyrir sigrinum.  Samdi við strákana um að þeir fengju sér bara afganga í kvöldmatinn.  Sjálf fékk ég mér haframjöl áður en ég trítlaði á völlinn.  Leikurinn endaði ekki vel fyrir mína rauðu menn, töpuðu 1:3 fyrir Fylki og þeir þurfa nú sárlega að fara að finna leiðir til að pota boltanum oftar í mark andstæðinganna, oftar heldur en þeir hirða hann úr eigin neti.

Upp er runninn föstudagur

Tugi telur hún í sex
tíguleg er frúin.
Með aldri nokkur virðing vex,
vinsæl barnatrúin.

Ég ákvað að deila ferskeytlunni sem ég skeytaði að mágkonu mömmu sl. þriðjudag.  :-)

 

En þvílík rigning seinni partinn í gær.  Ég var að sjálfsögðu á hjólinu og hefði annað hvort getað geymt það niðri í bílageymslu þar til í dag eða fengið að taka það með í strætó.  En ég gerði hvorugt, var með e-s konar "regnslá" sem ég fékk áður en ég fór í vatnsrennibrautirnar í skemmtigarðinum á Sevilla sl. haust.  Sláin er með hettu og það víð að ég gat verið með bakpokann minn undir henni en hún hlífði ekki buxunum eða fremst á úlpuermunum.  Var nokkuð fljót á milli vinnu og heimilis en það bætti sífellt í rigninguna svo það var ekki um annað að ræða en skipta um buxur og setja hinar á ofn þegar ég kom heim.

 

Hafði bleikju með nýjum kartöflum og gulum baunum í bræddu smjöri í matinn í gær.  Mmm, þvílíkt lostæti, ætti að hafa svona oftar í matinn og ég var svo heppin að það var smá afgangur sem ég gat tekið með mér í vinnuna fyrir hádegishressinguna í dag.

 

Auðvitað horfði ég á leikinn sem var sýndur úr riðli c á EM kvenna, Frakkland - England 3:0.  Grey ensku stelpurnar komust ekki í nein færi í fyrri hálfleik og voru lélegri á flestum sviðum heldur en andstæðingarnir.  Ég er eiginlega fegin því að okkar stelpur eiga að keppa við þær sænsku á sunnudaginn en ekki þær frönsku, en það var ekki ljóst fyrr en á tíunda tímanum í gærkvöldi.

 

Hafði það sem allra best um helgina, farið vel með ykkur og njótið þess að vera til!

Lítið eftir af vinnuvikunni

- Glæsilegt mark -

Vá, hvað þetta var vel útfærð sókn sem endaði með þessu líka flotta skallamarki frá stelpunni sem er alin upp á Hellu.  Ég hjólaði beint heim seinni partinn í gær og var búin að kveikja á sjónvarpinu og koma mér ágætlega fyrir stuttu áður en markið kom.  Ég verð samt að viðurkenna það að það var farið að fara svolítið um mig þegar leið á seinni hálfleikinn og hvað mér fannst síðustu mínúturnar og uppbótartíminn vera skelfilega lengi að líða.  Það sást samt á þeim hollensku að þær voru orðnar þreyttar því þrátt fyrir mörg skot að íslenska markinu voru fá af skotunum neitt hættuleg og ef þau hittu á rammann þá sá Guðbjörg um að "vera fyrir" og stóð sig alveg frábærlega, líkt og allt liðið reyndar.

 

Strákarnir voru í afmælisveislu frá því um miðjan dag í gær og langt fram á kvöld þannig að ég komst upp með að sleppa allri eldamennsku.  Notaði bara kvöldið í útsaum, sjónvarpsgláp, tölvumál og lestur og auðvitað var kvöldið ekki fyrr byrjað en það var búið.

Vikan hálfnuð

- Vikan hálfnuð -

 

Já, vikan er hálfnuð og mánuðurinn rétt rúmlega hálfnaður og nú á ég bara eftir að vinna í þrjá daga, fimm klst. og fimmtán mínútur áður en ég fer í sumarfrí.  Það verður komið að þessu áður en ég veit af.  :-)

 

Hjólaði milli heimilis og vinnu í gær.  Tók myndirnar af þreyttu skónum mínum og "Lost no more" og gleymdi mér svo nokkra stund í tölvunni.  Hélt að ég væri búin að missa af útsendingu af leik í A-riðli á EM kvenna.  En leikirnir voru ekki spilaðir fyrr en klukkan hálfsjö svo ég kveikti mátulega á sjónvarpinu þegar útsendingin í leik Svía og Ítala var að byrja.  Horfði á nær allan fyrri hálfleikinn, 0:0, en tók mér svo tæpan hálftíma í matarundirbúning (var með lambalifur og mesti tíminn fór eiginlega í að sjóða kartöflurnar) og kaffiuppáhelling.  Þegar ég mætti til leiks aftur var staðan 3:0 fyrir Svía og þær ítölsku voru bara búnar að skjóta einu sinni á mark mótherjans.  Þá gerði þjálfari þeirra bláklæddu tvöfalda breytingu og leikur liðsins breyttist svo mikið að maður fór að spá í hvort þetta væri örugglega sama liðið...

Týndi sauðurinn óðum að finnast

Þreyttir skór

Sigga sextug

- Mágkona mömmu sextug -

Önnur mágkona hennar mömmu er sextug í dag og í gærkvöldi byrjaði e-ð að gerjast í kollinum á mér.  Hrökk svo upp um fimm í morgun með tilbúna ferskeytlu sem ég sendi mér á sms-i svo ég gæti sent nöfnu minni (Sigríði Björgu Jónsd. Ström)  vískukornið í skeyti með morgninum.  Ferskeytlan verður ekki "sett á blað" hér en hugsanlega með föstudagsblogginu.

Labbaði annars heim úr vinnunni seinni partinn í gær og fann enn og aftur fyrir því að ég þarf að fara að kaupa mér nýja skó.  Ég veit ekki hvað ég er að pæla að drífa mig ekki í slíkan verslunarleiðangur því ég verð að fara fyrr eða síðar, helst í gær (eða jafnvel í síðasta mánuði).  Var búin að sjá til þess að strákarnir gætu sjálfir séð um að fá sér kvöldmat svo ég dundaði mér aðeins í tölvunni og las í einni bók þangað til kominn tími til að trítla á völlinn.

Valur - Víkingur Ólafsvík 0:0.  Bæði lið áttu sín færi og ef eitthvað er voru gestirnir heldur beittari.  En það var semsagt ekkert skorað í gær og þetta var 5. jafnteflisleikur Valsaranna á leiktíðinni og eru þeir í 6. sæti sem stendur.  Þeir eiga reyndar einn leik inni en það er í Frostaskjólinu á móti KR, frestaður leikur frá því KR-ingar voru að spila í evrópukeppninni.  Það verður ekki á vísann að róa hvað þann leik varðar en þó veit ég að mínir menn verða pottþétt ákveðnir í að ná sem hagstæðustu úrslitum þegar leikurinn verður flautaður á þann 25. n.k.

Mamma á afmæli í dag

- Afmælisdagur mömmu -

 

Já, mamma mín er sextíuogníu ára í dag og ein frænka okkar sextíuogþriggja.  Annars leið helgin hratt og örugglega við lestur, útsaum og sjónvarpsgláp.  Skrapp aðeins í Sunnubúðina í gær en þá var ég hvorki búin að versla neitt né elda í heila viku.  Morgunmaturinn var grísk jógúrt með krækiberjum og stundum lifrarpylsusneið með, borðaði í mötuneytinu í vinnunni í hádeginu og fékk mér svo haframjöl og rúsínur í nýsoðnu vatni á kvöldin.

 

Strákarnir komu heim í gærkvöldi eftir heila viku hjá pabba sínum.  Tveir vinir komu með þeim og þeir og annar strákurinn fór fljótlega út á rúntinn.  Stráksi kom ekki heim fyrr en á tólfta tímanum en ég var ekkert að stressa mig yfir því, var háttuð ofan í rúm og að lesa afar spennandi bók eftir Noru Roberts, Undir yfirborðinu.

Föstudagur

Lýsi eftir logni´ og sól
leitt að vantar sumar.
Ef það kemur kátt um jól
kannski fæ mér humar.

Jæja, nú er afleysingu minni í vinnunni brátt lokið.  Hópstjórinn minn kemur úr fríi á mánudaginn.  Við sem stöndum vaktina á deildinni náðum að vinna upp allt það sem lá fyrir og ég að ganga frá hinum ýmsu málum.  Ég er þó ekki frá því að ég mæti nokkuð fyrir átta á mánudagsmorguninn til að "taka stöðuna" á deginum og framleiðsluvélinni.

Eftir vinnu rölti ég upp á Sólvallagötu til norsku esperanto vinkonu minnar.  Hún bauð mér fyrst upp á kaffi og speltlummur áður en við fórum að spá í hið tilbúna tungumál.  Sagði henni frá að ég væri búin að sjá að það er alveg að koma að esperanto-þinginu sem að þessu sinni verður haldið hér á Íslandi, að mestu í Hörpu, dagana 20.-27. júlí n.k.  Gúggluðum þingið og spáðum aðeins í dagskrána áður en við lásum einn kafla í Jen via mondo og skrifuðum niður nokkur orð.  Tók svo strætó heim en það vill svo til að leið 13 stoppar við JL-húsið og svo hér á horninu, Langahlíð-Drápuhlíð.

Farið vel með ykkur um helgina og eigið hana sem allra besta!

Fimmtudagur

- Fimmtudagur -

Ég viðurkenni hér með að ég nennti hvorki að hjóla né labba í vinnuna í morgun.  Heldur tók ég strætó og vagninn stoppar við Hörpuna og vinnan mín er hinum meginn við götuna.

 

Hugurinn er annars  hjá EM-stelpunum okkar en hvort sem ég labba heim eða tek strætó á eftir þá verður búinn uþb hálftími af leiknum þegar ég kveiki á sjónvarpinu.  Annað hvort stilli ég þá á plúsinn og bíð til fimm eða horfi á afganginn á fyrri hálfleik og allan síðari hálfleik í beinni.

 

Aldrei þessu vant greið ég ekki í saumana mína í gærkvöldi.  Ég var búin að "stilla" mér upp í stofunni og kveikja á lampanum góða en svo gerðist ekkert meir.

Miðvikudagur

- Miðvikudagur -

Nýkomin heim úr vinnu, eldrauð, heit og sveitt eftir smá mótvind á hjólinu.  Ég var eiginlega stöðugt að í allan dag frá því fyrir átta og þar til klukkan var orðin fjögur, gleymdi meira að segja að taka mér síðdegiskaffipásu.  Stelpurnar þrjár (þar af ein sumarstúlka) slógu heldur ekki af og kvörtuðu ekki þótt þær kæmust ekki heim fyrr en fimm mínútur yfir fjögur. Ein af þeim var reyndar að vinna til tvö.

En svei mér þá ef ég þarf ekki að drífa mig í að fjárfesta í nýjum skóm og svo helst setja áminningu í simann um að láta ekki árið klárast áður en ég kaupi mér aðra.  Það er engan veginn sniðugt að eiga bara eitt og hálft par.  Þetta hálfa par eru skórnir sem ég nota í messum, tónleikum og árshátíðum en það er eiginlega ekki hægt að ganga mikið á þeim.

Ég þarf annars endilega að fara að setja inn aðra mynd af  "Lost no more" saumaverkefninu mínu, til samanburðar við þá mynd sem ég setti inn í síðasta mánuði.  Ég sat amk tvo og hálfan tíma við saumana í gærkvöldi enda leið kvöldið afar hratt.  Náði svo að lesa nokkra kafla í einni af bókasafnsbókunum áður en ég fór að sofa.