- Saumað af kappi -

Rétt áður en ég kom heim í gær kom æskuvinkona mín, sem nú býr á Egilsstöðum. Hún var byrjuð að undirbúa uppáhellingu þegar ég kom. Karatestrákurinn var eitthvað þreyttur í gær og ákvað að sleppa því að mæta á æfingu. Maturinn var því til hjá mér um sjö (í stað hálfátta-átta). Hefði örugglega samt haft matinn á þessum tíma því Davíð átti að vera mættur í pílu um hálfátta. Var með lasanja sem mæltist vel fyrir af öllum. Söngfuglinn minn ákvað að fyrst hann var að syngja á tónleikum seinni partinn á sunnudaginn væri örugglega frí á æfingu. Hann fór því heim með vini og þegar ég ætlaði að athuga með hann náði ég ekki í hann í síma. Fyrst hann var ekki heima hélt ég að hann hefði farið í fyrra fallinu á æfinguna. Þegar hann var ekki kominn heim klukkan sjö fór mig að gruna að ekki væri allt alveg með felldu. Loksins náði ég símasambandi við hann og frétti þá að hann hefði farið heim með vini. Eftir að ég var búin að ganga frá í eldhúsinu með matinn settist ég inn í stofu með saumana mína og sat við í drjúga stund með smá hléum. Er alls ekki búin og þarf að sitja við í kvöld og næstu kvöld þar til þetta klárast.

- Brúðkaupsafmæli -

Í dag eru 14 ár síðan við Davíð skruppum til sýslumanns og létum pússa okkur saman. Áttum tíma klukkan þrjú og fulltrúi sýslumanns og önnur til tóku á móti okkur tveimur. Allt gekk vel fyrir sig en reyndar var fundið að því við manninn minn að hann ætlaði að setja giftingarhringinn á baugfingur vinstri handar eftir að hafa rennt mínum upp á baugfingur hægri handar minnar. Hann breytti þessu og var með hringinn á hægri hendi fyrstu árin. Núna er hann búinn að færa hringinn yfir á vinstri hendina. Fljótlega eftir athöfnina ókum við austur yfir fjall og áttum nóttina á Hótel Örk í Hveragerði. Skruppum á Bakkann daginn eftir og svo áfram á Hellu til pabba, þar sem við gistum eina nótt.

Skrópaði ekki í hannyrðunum mínum á föstudaginn. En laugardagurinn fór allur í annað heldur en saumaskap. T.d. fékk ég sms frá bókasafninu um að ég gæti sótt bókina sem ég hafði pantað innan þriggja daga. þetta er hátt í 700 bls. bók og mér leist ekkert á að bíða neitt með að sækja hana svo ég vatt mér strax í málið. Kom við í verslun á heimleiðinni og keypti nammi fyrir bræðurnar og pylsur sem þeir hituðu upp sjálfir þegar við foreldrarnir vorum farin á árshátíð um kvöldið.

Í gær vorum við boðin í 1 árs afmæli. Skruppum öll fjögur í smá stund en stoppuðum örugglega ekki lengur en í klukkutíma því söngfuglinn minn átti að vera mættur í fullum skrúða í Langholtskirkju rétt fyrir fimm. Drengjakórinn söng nokkur lög á tónleikum eldri félaga karlakórs Reykjavíkur. Davíð fór með honum og þeir feðgar björguðu svo kvöldmatnum. Settist svo niður með saumana mína í gærkvöldi og komst þónokkuð áfram þótt ég vildi reyndar helst vera búinn að þessu. Á eftir u.þ.b. helminginn af blómaskrautinu á öðrum fermingardrengnum og svo að merkja nafn og fermingardaga á báðar myndirnar. Þetta er samt allt að koma.

- Lagði inn pöntun -

Eftir vinnu í gær lagði ég leið mína í Aðalsafnið í Grófinni og skilaði inn "Ástandsbarninu". Hafði séð það á gegni.is að það ættu að vera til tvö eintök af : "Loftkastalinn sem hrundi" en þegar til kom hafði þeim bókum verið skilað í öðrum söfnum svo ég brá á það ráð að leggja inn pöntun. Hugaði reyndar um að þetta væri bara ágætt því ég þarf að leggja aðaláherslu á saumana mína næstu daga. Var svo heppin að Davíð tók að sér að sjá um kvöldmatinn, annan daginn í röð. Ég fór því í fyrsta skipti og sótti júdókappann af æfingu. Karatestrákurinn sá um sig sjálfur, labbaði á æfingu og aftur heim eftir æfinguna. Það tók samt sinn tíma. Held að hann hafi farið í smá gufubað eftir karateæfingu. Klukkan var orðin níu þegar ég settist loksins niður með saumana mína en ég hafði það af að klára blómamunstrið á fermingadreng no II. Þar er því bara eftir að sauma nafn og fermingardag. Ætla að byrja á blómamunstrinu á fermingadreng no I í kvöld. Það er þokkalega mikið að gerast um helgina en ég hlýt að fá tíma inn á milli til að sauma. Stefni að því að fara með þrjár útsaumsmyndir í innrömmun í næstu viku.

- Tveggja daga sauma-"verkfall" -

Hef ekki tekið upp saumadótið mitt síðan á mánudagskvöldið. Vona samt að það komi ekki að sök. Davíð fór í tölvubjörgunarleiðangur til eins vinar síns eftir mat á þriðjudagskvöldið og kom ekki heim fyrr en eitthvað eftir miðnætti. Ég festist óvart fyrir framan sjónvarpið og horfði á "Læknamiðstöðina" áður en ég setti í eina brauðtertu. Yfirleitt get ég nú saumað um leið og ég fylgist með e-u í sjónvarpinu, nema um spennuþætti/myndir og gamanmyndir sé að ræða en í fyrrakvöld gleymdi ég bara að taka upp saumana. Þegar bræðurnir voru farnir í rúmið upp úr tíu settist ég við tölvuna. Í gær ákvað ég að prófa hvort ég gæti svarað fyrir allar afmælisóskirnar á FB-veggnum mínum, hverja og eina einustu (urðu uþb 200 allt í allt). Það tókst eiginlega, nema ég svaraði þeim kveðjum sem bárust síðustu tæpu tvær klukkustundirnar fyrir miðnætti í morgun. Við Davíð ákváðum nefnilega að horfa á aðra myndina sem hann gaf mér í afmælisgjöf: "Yes man!" með Jim Carrey. Davíð sá til þess að ég fengi tvíréttaða máltíð í gærkvöldi áður en ég fór á kóræfingu. Hann var með sjávarréttasúpu í forrétt og snitsel og kartöflukratín í aðalrétt. Nýja græjan kom sér mjög vel við að skera niður grænmetið. Þetta var mjög gott hjá honum. Ég þurfti ekki að koma nálægt eldhússtörfunum í gær. Stakk í eina þvottavél og braut saman og tók upp þvottinn sem var á snúrunum, en maðurinn fór svo niður og hengdi upp úr vélinni þegar hún var búin. En í kvöld verð ég að taka upp saumana og sauma í amk í klst. ef ég á að geta farið með fermingadrengina í innrömmun í næstu viku.

- Stelputryppið 42 ára í dag! -

Fór og hitti trúnaðarlækni vinnu minnar með þrjú erindi í gær. Sýndi honum fingurnar og sagði frá "slysinu" sem ég varð fyrir á jóladag. Hann sagði að þetta væri bara mjög slæm tognun og ekkert undarlegt þótt fingurnir væru ekki enn búnir að jafna sig. Ég er líka komin með mjög skrýtin útbrot á sköflunginn á hægra fæti og skrifaði læknirinn upp á krem sem ég á að bera á svæðið daglega og annan til þriðja hvern dag þegar útbrotin fara að mýkjast. Kom því við í apótekinu á leiðinni heim í gær. Einnig "heimsótti" ég fiskbúðina við Freyjugötu 1 og fékk mér ýsu í soðið. Strákarnir fóru báðir á æfingar svo við vorum ekki að borða fyrr en á níunda tímanum. Söngfuglinn og júdókappinn minn hann Davíð Steinn var ekki par hrifinn er hann kom heim sársvangur en hann fékkst þó til að fá sér eitthvað smá. Það varð afgangur sem ég tók til í skál handa mér, gleymdi bara að taka það með mér í vinnuna svo ég borða þetta bara í kvöld eða tek með mér á morgun. Setti í eina brauðtertu sem ég hafði með mér fyrir vinnufélagana í dag.

- Saumaklúbbur -

Eftir nokkuð margra daga gönguhlé til vinnu þá trítlaði ég í vinnunna á nýju skónum mínum í gærmorgun. Arkaði aftur heim, seinni partinn, með viðkomu í bakaríinu þar sem ég verslaði grunn í brauðtertu sem ég ætla að skella í í kvöld og hafa með mér á morgun. Á mánudögum er tölvulaus dagur hjá bræðrunum og þeir voru heima í stofu með tveimur vinum að horfa á sjónvarpið þegar ég kom upp úr hálffimm. Var ekkert að spá neitt meira í þessu en klukkan fimm sagði karatestrákurinn allt í einu við söngfuglinn: "Átt þú ekki að vera mættur á kóræfingu?" Sá síðarnefndi var ekkert að gera mál úr hlutunum en dreif sig samt af stað. Rétt fyrir hálfátta skutlaði ég manninum í pílu, sótti karatestrákinn af æfingu og bauð strákunum að vera í tölvunni um kvöldið þar sem hvorugt okkar foreldranna yrði heima. Ég var komin til "tvíburahálfsystur" minnar upp úr klukkan átta. Vorum bara tvær í saumaklúbbnum en ég nýtti tímann mjög vel og er alveg að verða búin með blómaskreytinguna á fermingardreng no II. Ég er nú orðin sannfærð um að myndirnar muni fara í innrömmun eftir næstu helgi.

- "Önnusöm" helgi liðin -

Var mætt í Kristu til Nonna rétt fyrir tíu á laugardaginn. Lét þvo á mér hárið áður en Nonni tók við og klippti það og þynnti eftir öllum kúnstarinnar reglum. Hann var ekki ánægður þegar ég sagði honum að ég laumaðist stundum til að taka hvít hár úr e-m skallablett bara til að skoða þessi fíngerðu hár. "Þú mátt ekki taka hárin sem eru að koma." Eftir smá umhugsun bætti hann við "Veldu þá amk bara einn blett til að fikta í." Eftir klippinguna fór ég í skóbúðina Steinar Waage og keypti mér nýja skó, alveg eins og þá sem ég hef gengið í sl. 10 mánuði. Gömlu skóna skildi ég eftir því þeir voru eiginlega alveg búnir. Skutluðum tvíburunum í síðasta fermingafræðslutímann í Salahverfi í Kópavogi. Um kvöldið útbjó ég eina brauðtertu og Davíð keypti fyrir mig tvær skyrtertur. Þetta fór ég með alltsaman í kirkjuna um eitt í gær (þ.e. maðurinn skutlaðist með mig). Feðgarnir mættu svo í messubyrjun. Það var galdramessa og Bjargarkaffi eftir messu. Það var full kirkja. Allir sálmar voru sungnir einradda en við stóðum samt saman í röddunum okkar við kórfélagarnir. Við vorum aðeins 3 í altinum tvær Önnur og svo "tvíburahálfsystir" mín og hún stóð á milli okkar nafnanna svo hún var mjög önnum kafin. Skyldumæting hjá fermingabörnunum en fyrri fermingarmessan verður eftir hálfan mánuð. Strax eftir messu var smá fundur með prestinum, fermingarbörnunum og foreldrum. Lagt var á borð í "efra" og "neðra" og einnig á fimm borð í kirkjunni og það var hlaðborð af alls kyns góðgæti á báðum hæðum. Það fór svo þannig að ég tók ekkert upp saumana mína í gærkvöldi en ég saumaði bæði á föstudags- og laugardagskvöldið og ég er komin það langt að ég veit að myndirnar fara í innrömmun í næstu viku. Það er líka saumaklúbbur í kvöld...

- Pottakynning -

Tók mér orlof um klukkan eitt í gær. Á enn eftir nokkra daga af sumarfríinu síðan í fyrra. Byrjaði á því að rölta með skjal yfir á Vesturgötu 1. Þegar ég kom heim setti ég í þvottavél. Tók upp úr uppþvottavélinni. Hóf tiltekt í elhúsinu, ryksugaði og skúraði. Davíð kom heim um fjögur og fór strax að hjálpa mér. Pabbi kom um svipað leyti (og ein vinkona mín sem fékk gistingu hjá mér í tvo daga) en hann fór svo seinna að sækja mömmu. Konan með kynninguna (var að kynna potta frá Salatmaster) kom upp úr klukka sex og upp úr hálfsjö komu síðustu kynningargestirnir. Þá var búið að dúka borð í holinu og setja ný kerti í tvo stjaka á borðið. Kynningin fór samt fram í eldhúsinu og þar varð fólk að standa upp á endann í næstum einn og hálfan tíma. Allt fór vel fram og ég held að allir hafi skemmt sér stór vel. Allir fengu rófu- og gulrótasnakk á meðan kynningunni stóð en þegar maturinn var tilbúinn settust menn við borðið í holinu. Fengum kjúkling, fjórar tegundir af grænmeti og kartöflugratín og í eftir rétt var súkkulaði-grænmetiskaka með rjóma. Allt var yfirstaðið um tíuleytið og klukkutíma síðar fengu maðurinn minn og vinkona þá flugu í höfuðið að leigja mynd "The Hart locker". Ég held að klukkan hafi verið orðin hálftvö áður en ég skreið upp í rúm í nótt. Og framundan er annasöm helgi...

- Kóræfing, útsaumur og lestur -

Já, ég náði að sinna öllum áhugamálunum mínum í gær þrátt fyrir að þurfa á fund strax eftir vinnu og hafa aðeins hálftíma frá fundinum fram að kóræfingu og æfingin stóð yfir frá hálfátta til tíu. Að vísu var smá kaffihlé í millitíðinni en ég var ekki komin heim fyrr en upp úr klukkan tíu. Mamma hafði skutlað mér á æfinguna (en hún stoppaði stund heima áður en hún og söngfuglinn fóru á tónleika í Salnum) og ég fékk far heim með "tvíburahálfsystur" minni. Bað Davíð nefnilega um að sækja eina elstu vinkonu mína út á flugvöll upp úr hálfníu. Þau voru á rökræðum þegar ég kom heim af æfingu. Fljótlega settist ég niður með saumana mína og horfði í leiðinni á hluta af heimildamynd um fjölskyldu sem tók sig alveg upp og ferðaðist um heiminn mánuðum saman. Þegar ég skreið svo upp í rúm skuggalega nálægt miðnætti freistaðist ég til að byrja aðeins á bókinni sem ég fékk af safninu í fyrradag.

- Góð ferð á safnið -

Strax eftir vinnu í gær rölti ég yfir í aðal-borgarbókasafnið í Grófinni. Samkvæmt Gegni.is áttu að vera 2 eintök inni í hillu af bókinni "Ástandsbarnið" eftir Camillu Läckberg. Fann hana ekki í hillunni hjá nýjum og nýlegum bókum svo ég ákvað að spyrja um hana við afgreiðsluborðið. Þegar ég nefndi bókina við þá sem ég spurði snéri hún sér í hálfhring að hillu fyrir innan afgreiðsluborðið, tók bók og rétti mér. Mikið varð ég glöð. Hef 14 daga til að lesa hana og tímdi ekki að byrja strax í gær. Eftir þessa góðu ferð skrapp ég yfir í Eymundsson og keypti tvær svartar sálmabækur. Þá var ég að byrja að blotna á tánum svo ég ákvað að labba ekki mikið meira og settist á næstu biðstöð og beið eftir leið 13. Var eiginlega nýbúin að missa af vagninum og þurfti að bíða í uþb hálftíma eftir næsta en það var í góðu lagi.

Strákarnir fóru báðir á æfingar seinni partinn í gær, annar í karate og labbaði báðar leiðir, og hinn á Júdóæfingu en Davíð skutlaði honum og sótti aftur. Eftir að hafa aðeins setið við tölvuna bjó ég til kjötvars úr hakki, lauk, eggjum, haframjöli, heilhveiti, byggmjöli og kryddað með salti, cayanne og kjötkrafti leystum upp í vatni. Kúlaði þetta upp í ríflega 30 bollur, setti í ofnskúffuna og inn í ofn. Mmmmm, góðar voru þær. Frysti hluta af bollunum en gat líka smá til að hafa með mér í vinnuna í dag.

- Saumað og saumað -

Að vísu settist ég ekki niður með saumana mína fyrr en um tíu í gærkvöldi og sat þá við í rúman klukkutíma. Nú er ég komin af stað með blómaskreytinguna á seinni myndinni og líklega klára ég hana áður en ég held áfram með blómaskreytinguna á fyrri myndinni. Svo eru það bara nöfnin, fermingardagurinn, skammstöfunin mín og ártalið áður en ég mun pressa þetta og fara með í innrömmun. Í leiðinni ætla ég að láta ramma inn myndina "Kossinn" sem ég saumaði 2007. Ég var svo óforsjál að panta ekki rammann með um leið og ég pantaði útsauminn og svo hefur myndin bara legið samanbrotin í saumatöskunni minni. Á svo reyndar nokkar aðra myndir sem ég þarf að fara að vinna í að ramma inn (eða láta ramma inn) fyrir utan nokkur saumaverkefni sem ég á eftir að byrja á. Eftir að ég hef lokið við að sauma fermingadrenginga mun ég ráðast í að klára bláa engilinn og kannski sauma nokkur stjörnumerki. Saumi, saumi, saumi, saumi...... - það er svo gaman! :-)

- N E I ! -

Tvíburarnir skruppu í heimsókn til föðurforeldranna um helgina. Davíð skutlaðist með þá eftir kvöldmat á föstudaginn. Ég var enn hálftuskuleg eftir magapínuna á fimmtudaginn og settist frekar niður með saumana mína og horfði á útsvar í leiðinni. Settist líka niður með saumana mína bæði á laugardag og sunnudag, enda er ég búinn með fermingastrák no II og er þá komin á svipaðar slóðir og með fermingardreng I þ.e. á bara eftir að sauma blómaskreytinguna, nafnið(nöfnin) og fermingardaginn. Ef ég sest niður með saumana í einhverja stund á hverjum degi ætti ég að geta sett báða drengina í innrömmun eftir ca hálfan mánuð.

Útvarpsklukkan fór í gang klukkan sjö á laugardagsmorguninn eins og það væri virkur dagur. Ég rumskaði upp úr því en í stað þess að slökkva á útvarpinu settist ég við tölvuna í ca eina og hálfa klukkustund áður en ég skreið upp í aftur. Það var samt ekki að virka að skríða upp í aftur þótt slökknað hefði á útvarpinu svo ég fór fljótlega á fætur. Það var samt Davíð sem hellti upp á könnuna og útbjó "brunch" handa okkur um tólf. Röltum út í skóla og kusum um tvö leytið og um fimm fórum við að versla.

Gærdagurinn var jafn rólegur og laugardagurinn, ef ekki rólegri. Davíð sá um kvöldmatarmál og tengdapabbi átti leið í bæinn svo hann skutlaði strákunum heim í leiðinni.

- Raddþjálfun og magapest -

Við kórfélagarnir í "óþæga" kórnum rákum upp stór augu er við mættum á æfingu sl. miðvikudagskvöld. Árni var búinn að breytast í konu. Hann fékk kórstjóra Veiranna til að hlaupa í skarðið fyrir sig og taka okkur í raddþjálfun. Og það var sko þjálfun í lagi. Hún lét okkur m.a. galopna munninn áður en við byrjuðum að gefa frá okkur hljóð, leggjast á bakið og anda þannig að mjóhryggurinn snerti gólfið og taka um höfuðið áður en við hófum raddæfingar. Einnig áttum við að stinga tánum undir ofn og gera magaæfingar um leið og raddæfingar, þ.e. við áttum að reisa okkur upp til hálfs og sitja í þeirri stellingu eins lengi og við treystum okkur til á meðan við gerðum raddæfingar. Held að við höfum fengið amk tíu tíma námskeið á tveimur tímum. Hún á svo eftir að koma og tuska okkur til einu sinni enn.

Þegar ég fór á fætur í gærmorgun var ég eitthvað undarleg í maganum. Hélt fyrst að ég væri bara svona svöng og þetta mánaðarlega væri einnig að plaga mig. Ekki lagaðist verkurinn þótt ég fengi mér að borða, hann varð bara verri ef eitthvað var. Settist á klóið og skilaði af mér en samt lagaðist verkurinn ekki heldur varð ennþá verri og ég var að verða smeik um að það væri gos í uppsiglingu. Tilkynnti mig veika, háttaði mig skjálfandi upp í rúm og tókst sem betur fer að sofna fljótlega. Vissi ekki af mér fyrr en um hádegisbil. Þá var verkurinn farinn og mér leið miklu skár. Náði svo að vera sofnuð vel fyrir miðnætti í gærkvöld og vona að ég hafi sofið þessa pest úr mér.

Ákvað að mæta til vinnu í morgun þrátt fyrir að horfa framan í grá-hvíta konu í speglinum í morgun. Það hefur bara gengið vel.

- Tíminn æðir áfram -

Hef ekki enn mætt á keiluæfingar á árinu (sem eru á þriðjudagskvöldum). Eftir "vinnuslysið" í kirkjunni á jóladag eru vísifingur og langatöng hægri handar enn bólgnir og stundum aumir eða dofnir. Get samt saumað út án þess að finna fyrir aukaverkunum en veit að líklega verð ég að passa mig á að sitja ekki of lengi við. Settist niður í gærkvöldi í tæpan klukkutíma. Nú fer ég bráðum að verða búin að ná jafnlangt með fermingardreng no II og ég var komin með fermingardreng no I (bráðum bara eftir blómin, nafn og fermingardagur). Annars erum við búin að senda út næstum því öll boðskortin og undirbúningurinn fer nú að fara á fullt. Sumum finnst ég kannski heldur róleg í tíðinni en það er örugglega svipað með þetta og jólin... þessi stund mun renna upp...

- Mars er lagður af stað -

Helgin leið ótrúlega fljótt við skyldur og leiki í bland. Var mætt á aukakóræfingu í kirkjuna klukkan tíu á laugardagsmorguninn. Hafði passað að fara á fætur amk tveimur tímum fyrir æfingu til að vekja röddina. Svo var bara enginn annar vaknaður svo ég hafði enga ástæðu til að nota röddina fyrr en karatestrákurinn kom á fætur upp úr klukkan níu. Tveir og hálfur tími (meira að segja aðeins lengur en það) liðu undrafljótt enda var mjög gaman á æfingunni. Beið eftir að karatestrákurinn var búinn á sinni æfingu og hafði hann með mér heim. Vorum ekki mjög lengi heima því strákarnir áttu að mæta í fermingafræðslu á Kjalarnesi. Fórum öll saman og við Davíð versluðum inn á heimleiðinni. Sendi hann svo einann að sækja strákana því ég var komin með saumana mína í fangið og dottin í að fylgjast með bikarúrslitaleik karla í handbolta.

Á sunnudaginn skutlaði Davíð mér í kirkjuna rétt fyrir hálfeitt. Kórinn æfði með undirleikurunum (trommuleikara, saxafónleikara, kontrabassaleikara og kórstjórinn spilaði á píanóið). Feðgarnir mættu svo í kirkjuna um tvö. Það var heljarsveifla í messunni og hrikalega gaman.

Strax eftir vinnu í gær fór ég á pósthúsið og keypti mér slatta af frímerkjum. Frímerkti 17 umslög og setti strax í póst en restin af boðskortunum fer í póst í dag. Síðan rölti ég yfir á bókasafnið og skilaði einni bók. Aðra bókasafnsheimsóknina í röð labbaði ég tómhent út (þriðja heimsóknin á stuttum tíma) og nú er ég aðeins með 3 esperantobækur í láni af safninu. En ég er líka byrjuð að lesa jólabækurnar.

Strákarnir björguðu sér báðir á æfingar og heim aftur svo ég ákvað að mæta í saumaklúbbinn eftir að hafa skutlað manninum í pílu. Var því mætt í fyrrafallinu eða rétt fyrir átta og var tæpum klukkutíma á undan "tvíburahálfsystur" minni. Það var mikið saumað, hlegið og þambað kaffi. Stundum vorum við stöllurnar í hláturskasti og stundum svo niðursokknar í verkefnin okkar að það hljóðnaði allt í kringum okkur. Kom heim um hálftólf, á undan manninum, og hafði þá saumað heilt kerti og einnig bætt við fermingarjakkann á fermingardreng II. Hef uþb þrjár vikur enn til að klára og ætla mér helst að setjast eitthvað niður með saumana mína á hverju kvöldi/ hverjum degi.

- Vinnuvikan alveg að klárast -

Það er kominn föstudagur enn á ný og bara nokkrir klukkutímar og helgin eftir af febrúarmánuði. Hef ekki sest með saumana mína síðan á þriðjudagskvöldið. Hafði ætlað mér að sauma amk í klukkustund í gærkvöldi en mest kvöldið fór svo í lestur. Kláraði bókina "Óheillakráka" eftir Camillu Läckberg og nú bíð ég spennt eftir að komast yfir "Ástandsbarnið" eftir sama höfund sem og "Lofkastalann sem hrundi" eftir Stieg Larsson. En ég á líka alveg eftir að lesa allar jólabækurnar enn svo ég er ekkert að flýta mér að reyna að nálgast þessar bækur. Þær eru mjög vinsælar og enn á skammtímalánum, nema í bókasafninu á Hellu. Þar eru þær til í kilju uppi í hillu og á 30 daga skilafresti (sem örugglega mætti framlengja um mánuð).

- Syngjandi fjör -

Æfðum fyrir jazzmessuna n.k. sunnudag á kóræfingu í gærkvöldi. Það var mikið fjör og mikið gaman. Við munum líklega syngja flest lögin/sálmana í röddum. Þótt vel hafi gengið í gær var ákveðin aukaæfing á laugardagsmorguninn kemur. "Drottinn er minn hirðir", "Ég er hjá þér, ó, Guð", Ó, leið mig þá leið", "Þú ert mitt athvarf, Guð" og "Leitið hans ríkis" er m.a. það sem kórinn mun syngja. Það verða líka trommuleikari og saxafónleikari sem munu spila undir með Árna. Ég hlakka til messunnar og á alveg von á því að það verði mikil sveifla.

- Vikan hálfnuð -

Marsmánuður er handan við næstu helgi. Ekki var skrifað á umslög í gærkvöldi. Davíð sagðist vilja taka saman heimilsföng og póstlista á alla fyrst og strákarnir fengu að verða í pc-tölvunum til tíu og þá vorum við dottin í að horfa á skíðakrosskeppni alveg til hálfellefu að við skiptum yfir á "The las enemy". Strákarnir hafa beðið um að fá að bjóða tveimur af vinum sínum í veisluna. Annar af þessum tveimur ætlar ekki að láta ferma sig en hinn ætlar að bjóða tvíburunum í sína veislu sem verður hálfum mánuði fyrir þeirra veislu. Náði þó að sauma í eins og hálftíma í gærkvöldi. Fermingadrengur no II er alltaf að koma meira og meira í ljós.

- Þriðjudagur -

Kom við í Sunnubúð á leið heim í gær og keypti bjúgu, kartöflur og grænar baunir en Davíð hafði lagt það til um morguninn er ég spurði hann hvað ég ætti að hafa í matinn um kvöldið. Hitti söngfuglinn þegar ég var að ljúka við innkaupin en hann var að leggja í hann á kóræfingu. Ég vissi ekki betur en við hjónin yrðum bæði að heiman um kvöldið svo ég ákvað að koma strákunum á óvart. Mánudagar eru að öllu jöfnu tölvulausir dagar en ég sagði strákunum að þeir mættu vera í tölvunni í tvo tíma um kvöldið ef þeir tækju nú til á gólfinu inni hjá sér. Söngfuglinn var kominn heim á undan karatestráknum af æfingu og frétti þetta þá. Hann var svo glaður að hann fór strax í tiltektarmálin eftir að hafa borðað og skildi ekkert mjög mikið eftir handa bróður sínum. Davíð lenti í smá linsuvandamálum þannig að það endað með að hann var heima um kvöldið. Strákarnir fengu samt sína tölvustund. Ég fór í heimsókn til vinkonu minnar sem býr í Árbænum og tók saumana mína með. Höfðum svona míní-saumaklúbb en ein af okkur komst ekki vegna veikinda svo við ákváðum eiginlega að fresta saumaklúbbnum um viku en hittast samt tvær. Ég náði að ljúka við að sauma hendurnar og halda aðeins áfram með jakkann og skyrtuna á fermingadreng no II. Vona að ég geti sest niður smá stund með saumana í kvöld en megnið af kvöldinu fer örugglega í að skrifa utan á umslög og loka boðskort í tvíburafermingu inni í þeim.

- Hulda 10 ára -

Systurdóttir mín er tíu ára í dag. Mikið sem tíminn flýgur. Hittumst öll hjá pabba og mömmu seinni partinn á laugardaginn og vorum með smá þorrablót í bláendann á þorranum. Bríet er búin að missa fyrstu tönnina sína. Davíð fór eitthvað að gantast í henni og spurði hvað hefði eiginlega komið fyrir, afhverju hún væri búin að missa tönn. Það stóð ekki á svarinu hjá þeirri stuttu: "Pabbi minn reif úr mér tönnina!" Hið rétta er að tönnin var orðin svo laus að foreldrarnir voru hrædd um að barnið myndi gleypa hana einn daginn. Ingvi fékk að skoða tönnina, rétt kom við hana og tönnin datt úr.

Um morguninn höfðum við Davíð fylgt karatestráknum á hóp- og einstaklingskeppni í kata sem var haldið í íþróttahúsinum Fjörgyn í Grafarvogi. Maður sér alveg framfarir hjá stráknum en í báðum keppnunum lentu þeir/hann á móti besta liðinu/einstaklingnum og töpuðu. En það gengur bara betur næst.

Annars fór ég á bókasafnið strax eftir vinnu á föstudaginn var og skilaði tveimur bókum. Önnur bókanna var með tveggja vikna skilafrest sem var að renna út svo það var ekki seinna að vænna. Labbaði einn hring en fann ekkert sem vakti áhuga minn og í annað skiptið á stuttum tíma fór ég tómhent út úr safninu. En ég er með eina eftir sem ég er að lesa og einnig nokkrar esperantobækur. Svo á ég líka alveg eftir að lesa jólabækurnar. Nú ég þarf líka að vera dugleg að setjast niður með saumana mína....

- Vikan að klárast -

Enn einn föstudagurinn runninn upp, sá næstsíðasti í þessum mánuði. Í tvo daga í röð hef ég ekki tekið upp saumana mína. Ég vona að það þýði ekki að ég lendi í tímahraki um miðjan næsta mánuð. Tvíburarnir voru báðir heldur betur eftir sig eftir öskudaginn og fóru hvorugir á æfingu í gær. Ég var samt eitthvað svo innstill á það að það þyrfti ekki að vera tilbúinn matur fyrr en upp úr hálfátta svo ég var ekkert farin að hugsa út í matarmálin þegar Davíð kom heim um hálfsjö. Ég græddi nú heldur betur á því, því hann tók að sér að sjá um matarmálin. Karatestrákurinn fór snemma í rúmið en júdókappinn og söngfuglinn minn var á fótum þar til klukkan var byrjuð að ganga ellefu. En um það leyti sem hann fór að sofa leygðum við Davíð okkur myndina: "Stúlkan sem lék sér að eldinum"

Framundan er karatekeppni hjá Oddi og svo ætlum við að halda smá þorrablót með pabba, mömmu, systir minni og hennar fjölskyldu. Ekki seinna að vænna þar sem góan byrjar um helgina.

- Fjör á kóræfingu -

Tvisvar lagði ég af stað heim eftir vinnu í gær. Var hálfnuð upp götuna þegar ég uppgötvaði að ég var með vinnusímann í vasanum en ekki gemsann. Snéri við á punktinum. Leið mín lá fyrst í Eymundsson að kaupa línustrikuð blöð og 0.5 mm blý fyrir strákana. Þegar ég kom heim byrjaði ég á því að hengja upp úr þvottavélinni. Fjórir strákar voru í heimsókn hjá bræðrunum og allir voru þeir að leika sér í tölvunum. Ég kastaði kveðju á strákana og ákvað að leggja mig í uþb hálftíma. Var tilbúin með matinn (ofnbakaða bleikju með grjónum og lauksmjöri) upp úr klukkan hálfsjö og kom Davíð heim einmitt um það leyti. Klukkutíma síðar var ég mætt á kóræfingu. Við byrjuðum m.a. að æfa fyrir jazzmessuna sem verður þann 28. n.k; "Ó, leið mig þá leið" Og nú er ég með það lag á heilanum. Æfðum einnig "Maríukvæði" "Heyr himnasmiður" og fleiri. Við sungum líka yfir "Ísland ögrum skorið" og "Hærra minn Guð til þín". Inn á milli æfðum við alltaf frasa úr fyrst nefnda laginu svo það er kannski ekkert skrýtið þótt það haldi áfram að hljóma og laumist fram á varirnar inn á milli.

- Saumað í -

Settist niður með saumana mína um níu í gærkvöld og sat með þá í góðan klukkutíma. Lauk við andlitið á fermingarstráknum sem ég er að sauma núna og byrjaði á jakkanum. Vonandi næ ég svo að setjast niður við saumana eftir kóræfingu í kvöld.

Karatestrákurinn sagði frá því um það leiti sem hann var að leggja af stað á æfingu að hann ætti að mæta á aukaæfingu klukkan korter yfir átta. Við Davíð settum upp plan. Hann skutlaði júdókappanum á æfingu upp úr sex. Kom heim með hinn í mat rúmlega sjö og skutlaði honum aftur í Þórshamar stuttu áður en hann þurfti að sækja hinn. Karatestrákurinn kom svo labbandi heim rétt fyrir tíu.

Þeir bræður rifu sig á fætur upp úr klukkan sjö í morgun. Von var á hluta af vinum þeirra rétt fyrir hálfníu og þeir ætluð í strætó saman til eins vinarins og vera saman sem hópur í dag. Davíð Steinn gat notað búninginn sinn frá því í fyrra og Oddur Smári ætlaði að vera í karategallanum sem þýðir að ég verð að setja hann í þvottavélina í kvöld því það er æfing hjá kappanum á morgun.

- Fundir og útsaumur -

Strax eftir vinnu í gær lá leið mín í Pfaffhúsið á Grensásveginum. Á meðan söngfuglarnir æfðu hittumst við flestar í stjórninni og fórum í gegnum umsækjendur í hópstjórastöður í fyrirhugaða utanferð næsta sumar og skiptum strákunum upp í átta hópa. Eins og sumir voru búnir að kvíða fyrir þessu þá gekk þetta bara mjög vel og ég held að allir verði nokkurn veginn sáttir. Auðvitað gátu ekki allir umsækjendur fengið stöður en það fara átta út og voru valdi tveir til vara ef það verða forföll.

Ég ætlaði mér að vera dugleg að sauma seinni fermingadrenginn í gærkvöldi en klukkan var að verða tíu þegar ég settist loksins niður. Náði samt að sauma slatta á meðan ég fylgdist með seinni fréttum sjónvarpsins og ólympíuleikunum á eftir. Andlitið er því sem næst búið (hárið kláraðist um helgina) og næst er það jakkinn. Ég stefni að því að vera búin með báða drengina eftir 4-5 vikur (í kringum 20. mars).

Annars vorum við Davíð að koma úr foreldraviðtölum við kennara drengjanna. Þeir voru einnig viðstaddir, söngfuglinn í fyrri tímanum og karatedrengurinn í þeim seinni. Sá fyrrnefndi er að standa sig aðdáunarlega vel á meðan hinn hefur dalað og virðist ekki nenna að hafa fyrir hlutunum. Hann lofaði samt að taka sig á og breyta þessu.

- Helgin liðin -

Febrúar er hálfnaður og verður sjálfsagt liðinn áður en maður veit af. Sótti Helgu systur um hálfníu á laugardaginn. Við brunuðum á Hellu til pabba og mömmu og voru svo samferða þeim á Keldur eftir að hafa þegið smá kaffi. Útför föðursystur minnar hófst klukkan hálftólf hálftíma fyrir voru spiluð allskyns lög á orgelið. 10 félagar úr fóstbræðrum sungu og prestur var séra Guðbjörg Arnardóttir. Athöfnin var látlaus og falleg. Á eftir bauð fjölskyldan til erfidrykkju á Laugandi þar sem íþróttahús Hellu var upptekið vegna þorrablóts seinna um daginn. Boðið var upp á hangiket, flatkökur, baunir, rauðkál og kartöflur í jafningi og svo kaffi og pönnsur á eftir. Stoppuðum á eftir smá stund hjá pabba og mömmu þar sem ég fékk að smakka bollu. Tvíburarnir þurftu að labba í fermingafræðslu því ég var ekki komin aftur í bæinn fyrr en rúmlega fjögur. Fræðslan var e-s staðar í Suður-Hlíðunum svo þetta var ekkert svo langt labb. Engu að síður sótti Davíð strákana um fimm.

Í gær hélt óháði söfnuðurinn upp á 60 ára afmælið sitt með flottri afmælismessu. Forsetanum, tveimur fyrrverandi prestum og fleirum var m.a. boðið. Árni Heiðar fékk mann sem lék á kontrabassa til að spila með í messunni og Kristjana Stefánsdóttir söng. Hún söng forspilið og svo eitt lag fyrir predikun. Ómar Ragnarsson var með stólræðuna og fór á kostum eins og honum er einum lagið. Ég fann ekkert fyrir því þótt predikunin varði í meira ein tuttugu mínútur. Eftir ræðuna, söng og bundið mál söng kórinn "Ísland ögrum skorið" án undirleiks og strax á eftir sungum við fyrsta erindið í sálminum "Hærra minn Guð til þín". Kristjana söng næts erindi og ú-uðum við raddirnar (allar nema sópran undir) kórinn tók svo aftur undir í síðasta erindinu sem var sungið. Eftir messu kom Ómar til okkar og þakkaði okkur fyrir sönginn og sagði að Hærra minn... hefði verið einstaklega vel fluttur hjá okkur. Kona eins tenórsins sagði að hún hefði orðið svo hrærð yfir vel fluttum söng að hún táraðist og sagðist ekki hafa verið ein um það. Eftir messu var lagt á borð í kirkjunni en það voru líka dúkuð og dekkuð borð í "efra" og "neðra". Ég ákvað samt að drífa mig heim.

Davíð var að leggja síðustu hönd á boðskortið í ferminguna og svo skrifuðum við upp alla þá sem verður boðið. Fórum að versla á sjötta tímanum. Maturinn var ekki fyrr en um átta en það kom ekki að sök.

Í gær lauk ég við lestur bókarinnar sem ég er með í skammtímaláni. Settist líka aðeins við saumana mína í gærkvöldi.

- Föstudagur enn á ný -

Davíð skutlaði mér í vinnuna í morgun. Seinni partinn í gær var ég líka svo heppin að þegar ég var ca. hálfnuð heim var kallað í mig og mér boðið skutl heim. Þáði það með þökkum.

Tvíburarnir fóru báðir á æfingu (eða segir maður æfingar þar sem þeir voru að æfa hvor sína greinina), annar í karate og hinn í júdó. Feðgarnir fengu steikt slátur og soðnar kartöflur er þeir komu heim.

Að þessu sinni sinnti ég bæði saumaskap, lestri og FB en horfði ekkert á sjónvarp í gærkvöldi. Davíð var fyrir framan skjáinn að "leika" sér í ýmsum íþróttahreyfileikjum í ví-tölvunni og var rennsveittur eftir.

Framundan er jarðaför á morgun og söngur í 60 ára safnaðarafmælismessu á sunnudaginn.

- Fékk far í vinnuna í morgun -

Jæja, sólinn undir skónum á hægra fæti er orðinn lélegur svo ég þarf að drífa í því að kaupa mér nýja skó. Fann það er ég kom heim af kóræfingu í gærkvöldi að sokkurinn á hægra fæti var rakur svo ég ákvað að vekja Davíð tímanlega í morgun og biðja hann um að skutla mér. Það var ekkert mál. Ég labba svo örugglega heim eftir vinnu í dag, hvort sem jörð er blaut eða þurr.

Annars var mjög gaman á kóræfingu í gærkvöldi. Æfðum "Hærra minn Guð til þín" í röddum, tvö lög upp úr söngvasveig, og tvö önnur. Kórstjórinn ætlar svo að senda okkur númerin á sálmunum sem sungnir verða í messunni n.k. sunnudag.

Ekki settist ég við saumana mína í gær, en ég var bæði á FB og las einnig nokkra kafla í bókinni: "Stúlkan sem lék sér að eldinum" Þarf að klára þá bók og skila í síðasta lagi þann 19. Það á alveg að ganga upp en ég þarf líka að vera iðin við saumana mína.

- Rólegheit -

Í morgun labbaði ég til vinnu í fyrsta sinn í vikunni. Davíð skutlaði mér bæði í gærmorgun og á mánudagsmorguninn. Seinni partinn á mánudaginn tók ég strætó upp á Grensásveg og þangað kom Davíð og sótti mig upp úr klukkan hálfsjö. Labbaði heim í gær og kom við í kirkjuhúsinu. Var að spyrjast fyrir um minningarkort en söngkonan Rut L. Magnússon er fallin frá og fjölskyldan vill að drengjakórinn fái að njóta þess. Reikningsnúmer kórsins var birt með tilkynningunni í blöðunum í morgun og svei mér þá ef það er ekki farið að koma eitthvað inn vegna þess.

Söngfuglinn átti að mæta á sína aðra júdóæfingu í gær en það var að hellast í hann heiftarlegt kvef svo hann sleppti æfingunni. Davíð kom fyrir vikið fyrr heim og tók að sér að sjá um kvöldmatinn. Ég lék lausum hala á FB (fésbókinni) á meðan. Maðurinn hellti einnig upp á könnuna, fann það alveg upp hjá sjálfum sér þessi elska. Hann var svo að vinna frameftir og eitthvað að leika sér í nótt svo ég var ekkert að raska ró hans í morgun.

Hefði geta mætt á tónleika í Óháðu kirkjunni í gærkvöldi en ég var frekar löt og hummaði það fram af mér. Ætlaði líka að sauma smá en nú þarf ég helst að setjast með saumana á hverju kvöldi til að klára fermingadrengina fyrir ca. 20. mars n.k. svo þeir verði komnir úr innrömmun fyrir 11. apríl.

- "Ekki fundur" og saumaklúbbur -

Mér fannst endilega sem búið væri að boða til stjórnarfundar á kóræfingatíma í gær og ég var ekki ein um það. Við mættum þrjár af sex úr stjórninni en fundurinn er víst ekki fyrr en n.k. mánudag. Við gerðum bara gott úr þessum misskilningi en fundurinn varð samt ekki svo langur.

Eftir að hafa skutlað Davíð í pílu og sótt karatestrákinn af æfingu dreif ég mig í saumaklúbb til tvíburahálfsystur minnar. Þriðjið fiskurinn í saumaklúbbnum var mætt rétt á undan mér stuttu fyrir hálfníu. Það var spjallað og hlegið mikið en inn á milli fengum við okkur kaffi og sukkum niður í saumana. Klukkutíma seinna, að mér fannst, leit ég á klukkuna og þá var hún byrjuð að ganga tólf. Hvernig getur tíminn flogið svona hratt?

Kíkti aðeins inn á fésbókina þegar ég kom heim en las svo tvo kafla í; "Stúlkan sem lék sér að eldinum" áður en ég fór að sofa.

- Ferð á bókasafnið og fleira -

Rétt upp úr klukkan hálffimm á föstudaginn var, skutlaði ég einni vinkonu minni á flugvöllinn. Ég notaði tækifærið í og skrapp á bókasafnið. Var með þrjár bækur til að skila og ætlaði mér svo aðeins að taka esperantobækur með mér heim því ég á enn eftir að lesa jólabækurnar. Ég tók þrjár esperantobækur og svo sá ég tvær af bókunum sem ég hef verið að athuga með undanfarið. Stóðst auðvitað ekki mátið og tók þær báðar þótt önnur væri 600 bls. og aðeins með 14 daga skilafrest. Þrátt fyrir þetta lagðist ég nú ekki í neinn maraþon lestur um helgina.

Skrapp til norsku esperanto vinkonu minnar á laugardagsmorguninn og við fórum og lærðum saman á Kjarvalsstöðum. Um tvö var ég kominn upp í Þórshamar því karatestrákurinn minn var að taka sjúkragráðun. Sé mest eftir því að hafa ekki labbað á staðinn. Því Oddur byrjaði ekki fyrr en rétt um þrjú og söngfuglinn átti að vera mættur í Ráðhúsið klukkan hálffjögur. Ég missti því af seinni hluta prófsins hans Odds en hann náði og er kominn með hálft fjólublátt belti.

Upp úr klukkan sex kom tvíburahálfsystir mín og hennar maður með dóttur þeirra og pizzu til okkar. Strákarnir ætluðu að hafa ofan af fyrir stelpunni á meðan við hin fórum á árshátíð. Maður vinkonum minnar fór af hátíðinni í fyrra fallinu og sótti stelpuna til okkar. Passið gekk vel og árshátíðin sem við fórum á var mega-skemmtileg. Maturinn var góður og skemmtiatriðin heppnuðust öll vel. Óháði kórinn minn söng "Vísur Vatnsenda-Rósu" og "Alparós". Við komum ekkert svo seint heim. Klukkan var aðeins byrjuð að ganga eitt.

- Blóðbankinn heimsóttur -

Ég fékk bæði SMS og e-mail, frá blóðbankanum í gær, um hvort ég gæti komið við hjá þeim og gefið. Hef bara mátt gefa á fimm mánaða fresti og ég var síðast í bankanum 10. september. Hafði því sett í áminningu í gsm-inn minn að heimsækja blóðbankann 11. febrúar n.k. En ég fékk beiðni um að mæta í gær og varð við henni. Sú sem meðhöndlaði mig sagðist ætla að láta mæla járnið í blóðinu og ég get svo hringt eftir tvær vikur til að athuga hvort ég má gefa aftur eftir fjóra eða fimm mánuði. Gjöfin gekk annars mjög vel. Þetta var sú tuttugastaogfjórða en á spjaldinu stendur reyndar 25 en fyrir tveimur árum mistókst að stinga í æð svo ég varð að fara án þess að gefa í það skiptið. Engu að síður var það skráð sem heimsókn því blóðþrýstingurinn og púlsinn var mældur og tölurnar skráðar inn.

- Skór -

Það fer að líða að því að ég þurfi að skóa mig upp aftur. Á bara eitt par af götu-gönguskóm (sem ég keypti í fyrravor) og hef haft það á bak við eyrað um tíma að kaupa mér annað par til skiptanna. Það lítur samt út fyrir að ég þurfi fyrst að endurnýja parið sem ég á því sólarnir eru að verða lélegir. Kannski engin furða þar sem ég geng allt upp í 30km á viku, amk 100km á mánuði.

Þorði ekki að skreppa á keiluæfingu í gærkvöldi. Fingurnir tveir eru langt því frá að verða góðir, bólgnir og dofna oft upp hvort sem ég er að gera eitthvað eða ekki. Gat þó setið og saumað í rúman klukkutíma í gærkvöldi án þess að finna fyrir dofa. Eins gott því ég þarf að klára að sauma tvo fermingardrengi fyrir miðjan mars svo þeir verði komnir úr innrömmun áður en tvíburarnir fermast.

- Minning -

Ingigerður Oddsdóttir 28.03.1923-31.01.2010

Inga, föðursystir mín, fædd á Heiði á Rangárvöllum en kennd við Hróarslæk frá því hún byrjaði að búa, féll frá núna um helgina. Þá eru þau aðeins tvö systkynin eftir. Ég er sannfærð um að frænka mín var tilbúin að fá hvíldina, hefði orðið 87 ára í mars en talaði um það þegar elsti bróðirinn dó í desember 2008 að hún væri næst. Ég man eftir að það var fastur punktur í tilverunni eftir (Reyðarvatns-) réttir á haustin að enda daginn í smá kaffi á Hróarslæk. Pabbi var ekkert mikið fyrir að flækjast í heimsóknir en hann ákvað þó aleinn og sjálfur að skreppa með mig og tvíburana til systur sinnar þegar þeir voru bara á öðru árinu. Frænka mín var mjög hógvær og látlaus kona og með létta lund. Síðustu árin sín var hún á elliheimilinu Lundi á Hellu. Ég kíkti oft á hana þá sjaldan að ég var stödd á Hellu en alls ekki alltaf og sl. ár fór ég ekki mjög oft þannig að ég var ekki búin að heimsækja Ingu sennilega síðan sl. haust. Blessuð sé minning hennar!

- Janúar alveg að verða búinn -

Jæja, maður er svo mikið inn á FB og hinn helmingurinn af frítímanum fer í lestur, saumaskap og ýmislegt annað heldur en bloggarskrif. Tíminn æðir áfram og mér finnst hálffáranlegt að það verði kominn febrúar n.k. mánudag.

Í gærkvöldi fórum við öll á spilakvöld með 8. bekkjunum í Hlíðaskóla. Spilaðar voru 7 umferðir á ellefu borðum og verðlaun veitt fyrir fjögur efstu sætin í karla og kvennaflokkum og tvö neðstu sætin í sömu flokkum. Komið var með góðgæti á hlaðborð og voru bekkjarfulltrúar búnir að hella upp á kaffi, blanda djús og kæla vatn. Almenn ánægja var með kvöldið. Það togaði smá að sýna átti seinni hálfleikinn í leik Dana og Norðmanna en það var samt aldrei spurning um að mæta ekki á svona uppákomu enda sé ég alls ekki eftir þessum tíma.

Á jóladag meiddist ég á tveimur fingrum á hægri hendi, vísifingri og löngutöng. Sló þeim í tröppur, hafði rekið tærnar í en rétt náði að grípa í handriðið og gat afstýrt því að lenda á andlitinu. Fingurnir eru enn bólgnir og þeir eiga það til að dofna upp. Það gerist stundum ef ég sest við saumana og sauma lengur en í eina klukkustund eða svo.

N.k. laugardag verður söngfuglinn minn sóttur fyrir klukkan ellefu. Farið verður með hann og sjö aðra stráka í óvissuferð fyrir góða kertasölu. Sá strákur sem seldi mest seldi meira en 200 pakka af kertum. Einn strákurinn í undirbúningsdeildinni seldi yfir 50 pakka og fer með í óvissuferðina fyrir vikið því strákarnir sem ekki eru komnir í aðalkórinn eru ekki skyldugir til að selja neitt. Þessi strákur er reyndar kominn í kórinn núna en hann var í undirbúningsdeildinni fram að áramótum.

- Árleg kertapökkun framundan -

Í fyrramálið munu félagar úr DKR og aðstandendur þeirra hittast og pakka Heimaeyjar-kertum. Þetta er árviss viðburður og í kjölfarið fara drengirnir út af örkinni, ganga í hús og bjóða kerti til sölu. Þeir munu einnig bjóða kaffi (baunir og malað). Það er alltaf líf og fjör í kringum þessa kertapökkun og þeir sem mæta of seint missa jafnvel af mesta gamninu. Strákarnir þurfa að selja 50 kertapakka (eða 25 kaffipakka) að lágmarki en fimm söluhæstu strákarnir fara í óvissuferð í janúar eða febrúar og sá sem selur mest fær bikar. Það er vonandi að vel verði tekið á móti drengjunum okkar.

Um síðustu helgi mættu mörg tilvonandi fermingarbörn og séra Pétur til okkar í Drápuhlíðina. Í fræðsluhléinu bauð ég upp á vöfflur, brauðtertu, snakk og súkkulaði og gos mjólk eða kaffi til að dreypa á með. Davíð Steinn var orðinn lasinn svo hann svaf af sér þennan tíma. Um eittleytið um nóttina bankaði Oddur Smári hjá okkur og bar sig ekki vel. Hann hafði þá vaknað við það að hann þurfti að æla og náði ekki einu sinni framúr. Sænginn og koddinn sluppu en það þurfti heljar aðgerð til að hreinsa upp af gólfinu. Við hjónin mættum því í messu án drengjanna. Ég klukkustund fyrr til að hita upp með kórnum en Davíð kom svo rétt eftir að messan var byrjuð. Mamma kom alla leið frá Hellu til að vera viðstödd. Annars eru feðgarnir búnir að vera heima alla vikuna. Oddur Smári fór reyndar í skólann á mánudeginum en flensan var byrjuð að herja á hann um kvöldið og þeir feðgar hafa hóstað og hóstað síðustu dægrin.

Í gær mætti ég í mína árlegu heimsókn til tannlæknis. Venjulega sest ég í stólinn, opna munninn og eftir um fimm mínútur segir tannlæknirinn: "Þetta er fínt, sjáumst eftir ár!" En í gær brá svo við að bæði þurfti ég að bíða eftir að komast að og svo fann hann eina skemmd í tönn sem gert var við þegar ég var unglingur. Fyllingin var að mestu farin og skemmdin orðin nokkuð djúp.

- Það líður á vikuna -

Var á skemmtilegri kóræfingu í gærkvöldi og var tíminn frekar fljótur að líða. Erum að æfa upp úr "Söngvasveig" og æfðum amk fjögur lög í gær. Þrjú af lögunum höfum við reyndar æft áður. Áður en maður vissi af var klukkan orðin hálftíu. Kom við í búð og verslaði mjólk og brauð á heimleiðinni. Feðgarnir höfðu verið að spila en þegar ég kom heim voru strákarnir að undirbúa sig undir háttinn. Davíð var búinn að hella upp á og áttum við hjónin saman kósí-kvöld.

- Ársreikningur og skallablettir -

Skondin fyrirsögn hjá mér. Um þessar mundir er ég á kafi í að taka saman ársreikninga DKR. Sem betur fer á ég góða að. Davíð mun hjálpa mér að setja þetta saman og tvíburahálfsystir mín mun fara yfir og vonandi leggja blessun sína yfir. Ekki hefur verið boðað til aðalfundar enn og verði það ekki gert í næstu viku verður sennilega ekki fundur fyrr en eftir fyrstu messu drengjakórsins sem verður 4. okt. n.k. Eftir þá messu geri ég fastlega ráð fyrir því að þeim drengjum sem eru að hefja sitt 3.-6. starfsár verði veittar viðurkenningar. Segi kannski meira frá því eftir að sá atburður er liðinn.

Þeir stækka og þeim fjölgar, skallablettunum, í höfðinu á mér. Samt er ég nú farin að finna fyrir smá hársprettu. Ég er svo heppin að hárið á mér felur þessa bletti oftast nær. Stend mig að því að þreyfa kollinn á mér reglulega og kanna aðstæður og stundum falla þá nokkur hár. Ætla samt ekki að hafa áhyggjur af þessu. Hef það sterklega á tilfinningunni að þetta muni lagast þegar fram líða stundir. Verið getur að þá verði ég með hvíta lokka hér og þar í dökku hárinu og þeir verða lílega mun meira áberandi heldur en skallablettirnir.

- Fjölmiðlapunktar -

Undanfarin tvö ár höfum við hjónin gengið með sérstakan fjölmiðlamæli á okkur og strákarnir fengu svona mæla þegar þeir voru orðnir tólf ára. Mælarnir nema útvarps og sjónvarpsbylgjur sem Capacent-gallúp vinnur úr. Á meðan við berum þessa mæla söfnum við punktum sem við getum leyst út í alls konar varningi. Ég safnaði mér t.d. fyrir nýrri ryksugu, strákarnir hafa fengið sér útilegusett, hjólaviðgerðasett og fleira. Davíð er sá eini sem ekki er enn búinn að leysa út einhverja punkta. Ég var að enda við að panta mér kvörn til að mala kaffibaunir, pönnu og svo svolítið sem Davíð á að fá í afmælisgjöf...

- Fyrsta messa nýs organista í kirkju óháða safnaðarins -

Í gær skilaði Kári, nýráðinn organisti Grindavíkurkirkju af sér síðasta verkefninu fyrir Óháða söfnuðinn með því að spila forspilið. Pétur þakkaði honum síðan fyrir vel unnin störf undan farin tvö ár og kynnti nýráðinn organista (og kórstjóra), Árna Heiðar Karlsson og bauð velkominn til starfa. Messan fór vel fram og í stað predikunar var Stoppleikhópurinn með leikrit. Kórinn ruglaðist að vísu aðeins í einu svari en af því að allir rugluðust eins og við stoppuðum ekki þá tók enginn eftir þessu nema kórstjórarnir.

- Kann ég á þetta ennþá? -

Fjórir mánuðir liðnir frá síðustu færslu. Er samt alls ekki viss um að ég sé hætt, bara í langri pásu í bili ;-)! Sumarið hefur liðið undrafljótt og m.a. brugðum við fjölskyldan undir okkur betri fætinum og flugum út til Danmerkur seinni partinn í júlí og vorum í tvær vikur í sumarhúsi á Fjóni. Veðrið lék við okkur mest allan tímann. Ég fór í mjög skemmtilegt brúðkaup. Við fórum m.a. í Lególand, Djurs sommerland, Egeskov og fleira og fleira. Kom sólbrennd heim og brann svo enn meir er ég sat úti í sólinni með einni frænku minni í næstum fimm tíma einn sólardag fyrri partinn í ágúst (eða um miðjan).

Í gær fór ég 24. heimsóknina í blóðbankann og gaf blóð í 23. sinn. Ætla að fara aftur eftir fimm mánuði og er búin að setja það inn í skipulagsdagbókina í gsm.

Góða helgi!

- Gengið til og frá vinnu -

Þann 6. maí sl. hófst hið árlega átak; hjólað í vinnuna. Sem fyrr þá er í góðu lagi að ganga á milli. Í minni vinnu eru þrír 10 manna hópar og einn 3 manna. Ég er ekki sú eina sem geng á milli og það kom í ljós sl. föstudag að ég er í bullandi samkeppni við einn sem kemur frá Seltjarnarnesi. Þótt ég væri búin að ganga báðar leiðir alla dagana, alls um 42 km. þá var hann búinn að ganga 48 km. Leiðin sem ég fer oftast þessa dagana mælist 3 km. Styst get ég farið 2,5. Lengst hef ég farið 5 km.

- Heimsókn til Sólheima -

Um ellefu í gærmorgun söfunuðust við saman mörg úr kórnum mínum, organistinn og presturinn við kirkju óháða safnaðarins. Mannskapurinn deildi sér niður á nokkra bíla. Ég tók alla feðgana með og vorum við áfram bara fjögur. Lagt var af stað stuttu fyrir hálftólf og vorum við fyrst á staðinn, Sólheima í Grímsnesi, af þeim sem komu úr Reykjavík. Kórsystir mín, maki hennar og sú sem er formaður safnaðarstjórnar kirkjunnar voru mætt og sóluðu sig fyrir utan Sesselíuhús. Við byrjuðum á því að borða nestið okkar áður en við skunduðum í kirkjuna og hittum prestinn, séra Birgi Thomsen og organistann. Hún fór yfir sálmana með okkur og það var einnig ákveðið að strax eftir predikun myndi kórinn flytja "Dona Nobis". Messan hófst klukkan tvö og fór vel fram. Andrúmsloftið var mjög vinalegt og afslappað. Á eftir fylgdu presthjónin okkur um svæðið, sýndu okkur það helsta og tæptu á sögu staðarins. Áður en við fórum frá Sólheimum drukkum við kaffi á Grænu könnunni. En við vorum ekki á leiðinni heim heldur var næsti viðkomustaður Selfoss heima hjá kórsystur minni og hennar maka. Feðgarnir skyldu mig eftir þar og héldu heimleiðis. Þar var sungið, grillað og slegið á létta strengi langt fram á kvöld. Ég fékk far í bæinn með tvíburahálfsystur minni og var komin heim um hálftólf. Mjög skemmtilegur og eftirminnilegur dagur.

- Skráning liðinna atburða og tæpt á öðru -

Á laugardaginn var hitti ég samstarfskonur mínar úr deildinni á 19. hæð í Turninum við Smáratorg þar sem við fengum okkur "brunch" saman fyrir aðeins 3150 á manninn. Kræsingarnar voru hver annarri betri og þótt maður passaði sig á að fá sér ekki of mikið af neinu til að geta smakkað á sem flestu þá var maður orðin frekar saddur eftir fimmtu ferðina. Fór beint úr Turninum og sótti karatestrákinn af æfingu. Um tvöleytið söfnuðumst við öll saman út í bíl og brunuðum austur á Hellu í heimsókn til pabba. Ég tók með mér saumana mína og saumaði slatta í nýju verkefni sem ég byrjaði á á fimmtudeginum.

Á sunnudaginn sat ég við saumana mína í amk fimm klukkutíma enda er búinn alveg hellingur af klukkustrengnum. Tíminn flaug hratt frá mér. Það var svo sem ekkert sérstakt á döfinni og mér leið bara vel með að eyða tímanum svona.

Á mánudagskvöldið tók ég þátt í árlegu bankamóti í keilu ásamt fjórum öðrum konum sem vinna með mér. Sex kvennalið voru skráð til keppni og spilaðar voru þrjár umferðir af fimm þetta kvöld. Töpuðum fyrsta leiknum, en ekki með svo miklum mun og unnum hina tvo. Seinni umferðirnar voru spilaðar í gærkvöldi en ég gat ekki verið með því ég var á kóræfingu að æfa fyrir messuna og kirkjuvíxluhátíðina n.k. sunnudag. Þrátt fyrir tvö töp í gærkvöldi náðum við þriðja sætinu og hengdu vinnufélagar mínir bronsmetalíu um hálsin á mér er ég mætti til vinnu í morgun.

- Kóræfing og fleira -

Þegar komið var inn í kirkju óháða safnaðarins í gærkvöldi mátti vera ljóst að það þar hefði verið málningaframkvæmdir undan farna daga. Svo virðist sem aðilarnir sem eru að mála fari flestir eða allir úr hlífðargallanum og skilja hann eftir á gólfinu á þeim stað sem þeir fara úr. Nokkuð skondið að geta rakið það hvar hver og einn fór úr vinnugallanum. En málningalyktin ku hafa verið of sterk í kirkjunni í gær svo ákveðið var að hafa kóræfinguna í neðri safnaðarsalnum. Æfðum fyrir kirkjuvíxluhátíðina sem verður þann 10. maí n.k. en um þessar mundir eru 50 ár síðan kirkjan var vígð.

Bekkir tvíburanna hafa verið að vinna að verkefninu: "Reyklaus bekkur". Annar tvíburinn laumaði því út úr sér í gærkvöldi að það ætti að skila af sér í dag. Þeir feðgar sátu báðir við til miðnættis og Davíð áfram til þrjú. Nú á bara eftir að möndla myndbandið inn á síðuna en það verður ráðin bót á því í kvöld.

- Meðbyr á arkinu -

Ég fékk góðan meðbyr á arkinu í morgun. Veðrið var alveg ágætt en þar sem var svona hvasst þorði ég ekki annað en að hafa húfu því eyrun mín eru frekar viðkvæm fyrir roki. Ég er búin að skrá hreyfingu á Lífshlaupssíðunni í 367 daga síðan ég byrjaði að skrá í byrjun febrúar á síðasta ári. Ég skrái aðeins þá daga sem ég næ amk 30 mínútna hreyfingu en flesta virka daga er ég að labba til og frá vinnu og er ég einmitt hálftíma hvora leið.

Fór á keiluæfingu í gærkvöldi. Klukkutímann áður en mætti notaði ég í útsaum fyrir framan imbann en ég var að horfa á "Biggest looser". Keiluæfingin fór vel af stað, náði fellu í fyrsta kasti. Var með þokkalegt skor eftir fyrstu umferð, rétt komst yfir 100 í annarri umferð en náði ekki einu sinni 90 stigum í þriðju umferðinni. En þetta var gaman og það er fyrir mestu.

Gallinn við keiluæfingar er sá að ég er alltaf þónokkra stund að ná mér niður og í gærkvöldi horfðum við Davíð á einn þátt úr annarri seríu 24 með Kiefer Sutherland. Þátturinn var akkúrat búinn rétt upp úr miðnættinu og þá meldaði ég mig inn á Pet Society á fésbókinni og kláraði heimsóknarhringinn og íþróttakeppnirnar. Það tók mig þrjú korter enda telur gæludýrasamfélagið 93 gæludýr með honum Pjakki mínum.

Mamma kíkti í heimsókn seinni partinn í gær og stoppaði góða stund hjá mér. Hún hefur ekki verið í bænum í fleiri en einn dag í eitt og hálft ár.

- Tveir blogg-dagar í röð -

Eftir vinnu í gær náði ég í bílinn til Davíðs, sótti söngfuglinn og við fórum niður á Grensásveg. Hann á kóræfingu, ég á stjórnarfund. Fundahaldið gekk bara vel. Á eftir komum við söngfuglinn við á skrifstofu Davíðs og kipptum honum með heim. Ég fór beint og lagði fyrir utan Þórshamar og gluggaði í bók á meðan ég beið eftir karatestráknum. Davíð sá alveg um kvöldmatinn og gaf svo strákunum leyfi til að geyma uppvaskið til morguns svo þeir gætu farið út. Ég skrapp í heimsókn til einnar vinkonu. Tók með mér handavinnu en opnaði ekki einu sinni töskuna. Sat bara og spjallaði, drakk kaffi og gæddi mér á vatnsmelónu.

- Síðasta vikan í þessum mánuði byrjuð -

Í gær söng ég við fimmtu messuna í þessum mánuði og þá eru aðeins eftir fimm messur fram að sumarfríi og ein til. Kórinn ætlar nefnilega að heimsækja Sólheima í næsta mánuði og m .a. syngja við messu þar þann 17. maí.

Á föstudaginn fór Davíð Steinn í æfingabúðir með glímufélaginu Ármanni (frjálsar). Farið var til Þorlákshafnar og stoppað yfir nótt. Hópurinn kom til baka um sexleytið á laugardeginum. Í rétt rúman sólarhring vorum við semsagt bara þrjú í kotinu.

Eftir arkið í vinnuna í morgun skráði ég hreyfingu á 365. daginn síðan í febrúar í fyrra. Í næstu viku byrjar "hjólað/gengið" í vinnuna og líklega mun ég þá hætta að skrá inn alla hreyfingu inn á Lífshlaupið.

Á laugardaginn trítlaði ég í Kringluna og fékk klippingu um tíu. Hárgreiðslumeistarinn minn fékk áfall því hann fann þrjá skallabletti í höfðinu. Svoleiðisnokkuð er álagstengt en mér er fyrirmunað að skilja undir hvaða álagi ég á að hafa verið. Lét þessar fréttir ekki slá mig út af laginu en lofaði að fylgjast með höfðinu á mér, hvort kæmu fleiri blettir eða þessir stækkuðu. Eftir klippinguna labbaði ég í norðurmýrina til norsku esperantovinkonu minnar. Karatestrákurinn hringdi þangað í mig og bað mig um að koma í Þórshamar eftir esperantotímann og verða samferða honum heim. Ég varð við þeirri beiðni. Um þrjúleytið labbaði ég út í Hlíðaskóla og nýtti mér atkvæðisrétt minn í alþingiskosningunum.

- Gleðilegt sumar! -

Jey, það er komið sumar. Hann var nú ósköp blautur í gær, sumardagurinn fyrsti. Við höfðum hægt um okkur að mestu en við hjónin skruppum þó að versla og ég kom við í bókasafninu í Grófinni í leiðinni og skilaði inn 7 stykki bókum. Þótt ég væri með bækur heima kom ég ekki tómhent út af safninu því það voru 7 bækur sem báðu mig um að taka sig með sér og ég stóðst það auðvitað ekki. Það stytti upp mátulega snemma til þess að hægt væri að grilla í kvöldmatinn.

Söngfuglinn og frjálsíþróttakappinn minn er að fara í æfingabúðir, með Glímufélaginu Ármanni, til Þorlákshafnar seinna í dag og kemur aftur síðdegis á morgun. Það verður pottþétt skemmtileg ferð.

Á sunnudaginn verður síðasta messan í þessum mánuði í óháðu kirkjunni. Sú messa verður með léttara móti en við munum engu að síður koma með smá sýnishorn af því sem við munum syngja við 50 ára kirkjuvíxluafmælið þann 10. maí n.k.

- Ég er ekki hætt að skrifa -

Þótt skrifin mín liggi niðri inn á milli þá er ég alls ekki hætt. Ég hef það sterklega á tilfinningunni að þótt skrifin séu stopul í augnablikinu eigi eftir að verða breyting á einhvern tímann í nálægri eða fjarlægri framtíð. Oft hef ég ekki tök á því að komast í tölvu þegar andinn kemur yfir mig og svo þegar ég sit við tölvuna er andinn hvergi nálægt og mig langar að vera að gera eitthvað allt annað heldur en að blogga.

Messurnar á skírdag, föstudaginn langa og páskadagsmorgun gengu mjög vel fyrir sig. Ég hef hlustað á nokkra kafla úr messunni á skírdag, aðallega kórsönginn, en henni var útvarpað og er því aðgengilega á netinu í augnablikinu. Hljómurinn í kórnum fannst mér góður og skila sér vel á öldum ljósvakans svo ég er sátt. Andrúmsloftið að kvöldi föstudagsins langa var mjög notalegt í kirkjunni. Sú sem las píslarsöguna gerði það mjög vel. Kórinn söng inn á milli kafla og eftir altarisgöngu og eftir að búið var að taka allt af altarinu og slökkva á kertunum sjö kom kórinn sér fyrir uppi á svölum og söng þrjú lög í röddum: Heyr himnasmiður, Stóð við krossinn og Ave verum corpus. Fjórir úr söngskóla Sigurðar Demenz lögðu kórnum lið þetta kvöld og allt small mjög vel saman. Eftir að búið var að setja altarishlutina á sinn stað klukkan átta á páskadagsmorgunn söng kórinn Dona nobis sem forspil. Það var margt fólk í kirkjunni en þó hægt að fá sæti á meðan presturinn predikaði. Það hafði verið auglýst að það yrði ballettjáning en því miður forfallaðist stjórnandinn svo ekkert varð úr sýningunni. Að öðru leyti gekk allt upp og eftir messu var boðið upp á heitt kakó og brauðbollur.

Í gærkvöldi var saumaklúbbur. Við erum orðnar þrjár í klúbbnum. Í gær var næstum farið illa en það var einhver misskilningur um staðsetningu. Ég hafði ekki komið skilaboðunum rétt frá mér. Um hálfníu sendi ég sms til einnar sem ekki var mætt og spurði hvort hún væri nokkuð að villast. Ég fékk svar strax til baka þar sem hún spurði hvort við værum ekki að koma til hennar. Sem betur fer leystist farsællega úr þessu og við náðum tveggja tíma góðum handavinnutíma, spjalli, kaffi og fleiru.

- Páskar á næsta leyti -

Það verður samt ekki 100% frí hjá mér. Það verður messað í óháðu kirkjunni klukkan ellefu í fyrramálið. Messunni verður víst útvarpað. Svo er messa að kvöldi föstudagsins langa og aftur klukkan átta á páskadagsmorgun. Við erum líka boðin í eina fermingaveislu á morgun.

Við norska esperantovinkona mín færðum esperantotímann frá laugardeginum og þar til um hálffimm sl. mánudag. Ég komst ekki til hennar á laugardagsmorguninn vegna bazar DKR í Mjóddinni. Var að koma tertum á staðinn og upp úr hádeginu mættu flestir strákarnir til að syngja nokkur lög. Það tókst vel og bazarinn tókst líka mjög vel, seldum fyrir rúmlega 130. þús.

Á mánudagskvöldið heimsótti ég Lilju vinkonu mína. Hún var búin að bjóðast til að setja upp fyrir mig jóladúkinn. Við gerðum þessa heimsókn að saumaklúbbi í leiðinni og í fyrsta skipti í marga mánuði tók ég fram engilinn og saumaði.

Í gærkvöldi fór ég á keiluæfingu. Ein af okkur úr kortadeildinni kom með "keiluköku" handa einum keilufélaganum sem varð fimmtugur um daginn. Ég náði ágætis árangri í annarri æfingaumferðinni í gær. Byrjaði á fellu og náði svo þremur fellum í röð seinna í leiknum, enda varð enginn hærri en ég að stigum í lok þeirrar umferðar en það var einn með jafnmörg stig (147)

- Bazar og eitt og annað -

Jæja, enn ein vinnuvikan liðin og framundan eru amk fjórar 3-4 daga vinnuvikur svo ég á alveg von á því að það verði kominn maí áður en maður nær að blikka augunum.

Í gærkvöldi var árshátíð í Hlíðaskóla og af því tilefni drifu nokkrar hressar mæður og Davíð sig út á röltið milli hálftíu og miðnættis. Ég var með fyrsta klukkutímann en svo varð ég að fara heim og tæma blöðruna og ákvað að segja þetta gott að sinni. Davíð kom hins vegar ekki heim fyrr en klukkan að verða hálfeitt.

Á morgun stendur foreldrafélag Drengjakórs Reykjavíkur fyrir bazar í mjóddinni og um hálfeitt mæta söngfuglarnir á staðinn og taka nokkur lög. Á bazarnum verður hægt að kaupa kökur og ýmislegt fleira. Ég var að útbúa tvær brauðtertur og svo er kókoskaka með eplum að bakast í ofninum. Í hana hræði ég m.a. hrásykur og gróft spelt. Endilega lítið við í Mjóddina milli ellefu og tvö til þrjú á morgun!

Á sunnudaginn syng ég með kórnum mínum við fermingamessu númer tvö í Óháðu kirkjunni. Þriðja og síðasta fermingamessan þetta árið verður svo um hvítasunnuna.

Annars segi ég bara: Góða helgi!

- Föstudagur enn á ný -

Enn ein vikan er að klárast. Í dag eru nóttin og dagurinn jafnlöng, vorjafndægur. Ég tek eftir því á morgunarkinu að það slökknar sífellt fyrr á ljósastaurunum. Áður en langt um líður verður búið að slökkva á þeim áður en ég arka af stað til vinnu.

Annars náði ég ekki að þvo saumamyndirnar af fermingardrengjunum í gærkvöldi. Fór að gera allt annað en það. Skruppum með "velkomin í heiminn" -gjöf handa einni sem fæddist fyrr í þessum mánuði. Sú stutta var nýsofnuð svo við gátum ekki fengið að sjá hana sjálfa en við hittum hana bara í næstu ferð.

- Ljúfir dagar -

Mars verður liðinn áður en maður veit af og þá verður liðin einn fjórði hluti af árinu. Það er því um að gera að hamast við að njóta augnablikanna. Á kóræfingu í gærkvöldi æfðum við fyrir ferminngamessuna sem er n.k. sunnudag. Feðgarnir skutluðu mér á æfingu en fóru allir þrír í keilu en hálftíminn sem Oddur Smári vann í félagsvistinni var alveg að renna út. Strákarnir sluppu fyrir vikið við uppvaskið en við hjónin sáum um það eftir að ég kom heim af æfingu.

Afmælisdagurinn á þriðjudaginn var var einkar ljúfur og ánægjulegur. Aldrei fengið eins mikið af afmæliskveðjum, svei mér þá, en það voru vel yfir hundrað sem skrifuðu kveðjurnar á fésbókarvegginn minn. Davíð Steinn gaf mér diskinn með íslensku eurovision-lögunum 2009 og Davíð gaf mér m.a. 2 fyrstu seríurnar af 24. Svo bauð hann mér út að borða. Fórum á Ask og buðum strákunum með okkur. Nýtti daginn út í æsar, fór ekki í rúmið fyrr en um miðnætti.

Í kvöld ætla ég að þvo "fermingadrengina" svo ég geti farið að fara með þá í innrömmun.

Ég er ekki alveg að meðtaka það að nú sé liðið heilt ár síðan ég varð fertug

- Ég keypti mér kjól -

Ég dreif mig á Friendtex fatakynningu í gærkvöldi og var svo heppin að finna mjög klæðilegan og þægilegan kjól sem ég get notað á árshátíðinni annað kvöld og sem ég veit að ég mun nota oftar en það. Ég var líka svo heppin að ég gat fengið kjólinn strax. En ég keypti ekki bara kjólinn heldur þrjár aðrar flíkur líka sem ég fékk líka að taka með mér heim. Það var annars fullt af flottum og góðum fötum og ég hefði vel geta hugsað mér að kaupa flest allt það sem ég mátaði.

Enn á ný er kominn föstudagur og eins og kom fram hér að ofan er ég að fara á árshátíð um helgina. Sú verður haldin á Hótel Selfossi og á ég von á því að það verði mikil stemming og mikið gaman. Strákarnir fá að vera hjá afa sínum og ömmu á Bakkanum og leiðist þeim það alls ekki. Á sunnudaginn þurfum við svo að vera komin aftur í bæinn um miðjan dag. Söngfuglinn á að vera mættur í Langholtskirkju um hálffjögur en eldri félagar KKR buðu drengjakórnum að syngja nokkur lög með sér á tónleikum sem hefjast í fyrrnefndri kirkju klukkan fjögur. Það kostar aðeins 1500 kr inn og hvet ég alla sem hafa áhuga til að mæta.

- Fjör framundan -

Á kóræfingu í gærkvöldi æfðum við m.a. fyrir fermingamessuna. Næstu tvær messur, 22. mars og 5. apríl verða fermingamessur. En fyrri messuna í maí verður haldin 50 ára víxluhátíð kirkjunnar og við erum líka byrjuð að æfa lög fyrir þann atburð.

Í kvöld er ég boðin á fatakynningu og ég er að hugsa um að kíkja. Það er aldrei að vita nema ég finni á mig árshátíðardressið...

- Hitt og þetta -

Á mánudagskvöldið var hittumst við þrjár vinkonur heima hjá "tvíburahálfsystur" minni í saumaklúbb. Þar náði ég að klára að sauma og merkja tvo fermingadrengi. En það var eins gott að vinkonur mínar lásu yfir merkingarnar. Fermingadagurinn er 5. apríl n.k. en ég hafði saumað 02.04.09 undir nafnið á öðrum piltinum. Svo þegar ég ætlaði að laga það var ég byrjuð að sauma 50.02.09. En þetta tókst að lokum og ég hafði einnig tíma til að sauma jóladúkinn áður en kvöldið var úti og leið þó tíminn afar hratt í góðum félagsskap. En nú á ég semsagt bara eftir að þvo og pressa fermingadrengina og fara með þá í innrömmun.

Fór tvisvar í óháðu kirkjuna um síðustu helgi. Fyrst á föstudagskvöldið en það kvöld voru konur í aðalhlutverki. Þótt karlmenn væru velkomnir í þessa bænastund mætti aðeins einn fyrir utan organistann. Við mættum allar úr altinum og þrjár af fimm úr sópran. Svo var Bjargarkaffi eftir messu á sunnudaginn. Ég kom með brauðtertu með mér á hlaðborðið. Kirkjan var nokkuð þéttsetin enda mæta öll tilvonandi fermingabörn og forráðamenn í þessa messu. Fyrsta fermingarmessan verður þann 22. mars.

Vel gengur að lesa allar bækurnar 17 af safninu. Er búin með allar sem eru með skiladaginn 18. mars en hef ekki skilað þeim í safnið enn þar sem ég veit að á vegi mínum mundu verða bækur sem "bæðu" mig um að taka sig heim.

- Kóræfing í kvöld -

Þessa vikuna eru allir dagar ásetnir. Í gærkvöldi var keiluæfing hjá mér. Ekki gekk mér alveg eins vel og í síðustu viku en mér hefur líka gengið verr, svo þetta slapp. Nafnarnir fóru saman í Katlagil þar sem bekkur söngfuglsins var með kvöldvöku og skemmtu sér fram eftir kvöldi. Kvöldið endaði á krassandi draugasögu með hryllingsívafi sem maðurinn minn samdi sjálfur og las á staðnum. Í kvöld fer ég að kóræfingu og annað kvöld erum við búin að stefna forráðamönnum bekkjarfélaga karatestráksins á kaffifund í Perlunni. Á föstudaginn fara nafnarnir með drengjakórnum, kórstjóra, undirleikara og nokkrum foreldrum í æfingabúðir en ég fer á árlega árshátíð hjá safnaðarstjórn óháðu kirkjunnar.

- Alltaf nóg að gerast -

Enn á ný eru liðnir nokkrir dagar síðan ég bloggaði síðast. Ekki er alltaf um skort á tíma að ræða enda finnur maður sér yfirleitt alltaf tíma til að gera það sem manni finnst skemmtilegt að gera. Nei, heldur hefur andleysi og skriftarleti hrjáð mig. Það er alltaf eitthvað um að vera í kringum mig en hvenær sem færi gefst sest ég niður með góða bók eða tek upp saumana mína. Ég skilaði nokkrum bókum á safnið í síðustu viku og kom með fleiri til baka (þrátt fyrir að eiga ennþá ólesnar bækur af safninu heima). Eftir vinnu í gær arkaði ég á skrifstofuna til Davíðs til að fá hjá honum bílinn og gefa honum færi á því að vinna aðeins lengur. Í þetta skipti varð hann reyndar samferða heim. Ég skutlaði söngfuglinum á æfingu, sótti sendingu á pósthúsið og skilaði tveimur bókum á safnið. Skilafresturinn var að bresta á. Þarf varla að taka það fram að, auðvitað sá ég nokkrar bækur sem ég bara varð að taka með mér heim. Einnig náði ég mér í nokkrar bækur á esperanto. Og nú er ég með 17 bækur af safninu heima. Þegar ég kom heim var karatestrákurinn að labba af stað á æfingu. Ákvað að skutla honum. Verið var að skipta um læsingu á útidyrunum heima og fengum við einn lykil. Ég stoppaði því ekki lengi heima við heldur skrapp í Kringluna með það að markmiði að fjölfalda þennan lykil. Því miður var ekki til efni í svona lykil. Sótti strákana af æfingum og hafði svo smá tíma til að slaka á áður en Davíð bauð okkur að gera svo vel. Í gærkvöldi hittumst við svo þrjár vinkonur í saumaklúbb, heima hjá einni okkar. Tíminn flaug alltof hratt frá okkur og klukkan var allt í einu orðin ellefu. En það var mikið saumað, prjónað og spjallað...

- Helgin var ekki lengi að líða -

Laugardagurinn fór í esperantofund, innkaup og slökun.

Í gær mættum við öll með karatestráknum í Smárann þar sem keppt var í einstaklings- og hópkata barna og unglinga. Oddur Smári var skráður til leiks, bæði í einstaklings og hópkeppninni. Reyndar mætti einn liðsfélaginn ekki á mótið en það gat annar drengur stokkið inn í hópinn svo þeir gátu keppt. Við mættum á staðinn um hálftólf en Það liðu rúmir tveir tímar áður en komið var að Oddi. Fljótletga eftir að við mættum á svæðið fór söngfuglinn að sjá eftir að hafa komið með en við hjónin skemmtum okkur ágætlega.

- Það er að skella á helgi -

Það var ekki alveg eins gott að arka til vinnu í morgun eins og dagana sem stillan var. Það liggur við að ég panti frekar að hafa kalt og stillt veður heldur en blautt og hált. Seinni partinn í gær var hagl að dynja á mér hluta af leiðinni og það virtist alltaf vera beint á móti, beint í andlitið. En ég komst heim (og reyndar líka til vinnu í morgun) og gat skráð 2x30 mínútur í göngu á lífshlaupssíðuna í gær. Hef skráð hreyfingu á 305 daga á sl. 12 mánuðum og held ég megi bara vera stolt af sjálfri mér. Ég skrái mest göngur en það hefur komið fyrir að ég hef farið í sund og svo leyfi ég mér að skrá heimilisþrifin og hlaupin niður í þvottahús og upp aftur, í flokkinn: Annað, inn á milli.

- Fyrsta færslan í febrúar -

Mánuðurinn er rétt að verða hálfnaður og mikið vatn hefur runnið til sjávar síðan síðasta færsla var sett inn. Dagarnir hafa einhvern veginn þotið frá mér og/eða farið í allt annað en skriftir. Það eina sem liggur niðri líkt og skrifin er útsaumurinn minn. Ég hef ekki snert á nál í hálfan mánuð eða síðan ég fór í saumaklúbb til "tvíburahálfsystur minnar".

Þann 6. febrúar var skipulagsdagur í skólanum og á mánudaginn var, var foreldradagur. Ég átti inni tvo daga af sumarfríinu mínu síðan í fyrra og ákvað að leysa út amk einn og hálfan dag. Var svo heppin að fá bústað, sem ég sótti um, úthlutaðan þessa síðustu helgi og kennarar strákanna buðu okkur að mæta í viðtal sl. þriðjudag. Vorum komin í bústaðinn rúmlega fimm á föstudaginn. Í farteskinu voru m.a. bækur, spil, sundföt og saumadótið mitt. Las tvær og hálfa bók, spilaði póker við feðgana, fór í bæði stuttar og lengri göngur (tvær stuttar og eina lengri, laugardag, sunnudag og mánudag) en fór hvorki í heita pottinn né snerti á sauminu mínu. Potturinn var ekki notaður því það rann ekkert heitt vatn í hann (hverju svo sem um var að kenna (frosti eða bilun)) en ég skil ekkert í því afhverju ég tók ekki aðeins upp nálina. Kannski vegna þess að ég þarf einmitt að fara að drífa mig í að klára tvö af verkefnunum sem ég er með í gangi???

Annars verð ég að koma því á framfæri hvað tvíburarnir eru að standa sig með ágætum í lærdómnum þeir eru með meðaleinkunn upp á tæp 9 (8,89 og 8,96) og ég er mjög stolt af þeim.

- Í mútum eða ekki í mútum -

Karatestrákurinn minn heldur þessa dagana að hann sé í mútum. Hann er óvanalega hás og röddin einhvern veginn dýpri en venulega en ég hef ekki heyrt röddina hans verða neitt skræka svo ég hef sagt honum að líklega sé hann bara með vott af hæsi og kvefi. Þar fyrir utan styttist líklega í múturnar hjá tvíburunum. Ég er samt að vona að söngfuglinn fari ekki í mútur fyrr en eftir eitt og hálft ár svo hann geti verið einn vetur enn í drengjakórnum. Sjáum bara hvað setur.

Er á leið í saumaklúbb til "tvíburahálfsystur minnar" og á von á því að þar verði nálarnar mundaðar vel fram eftir kvöldi. Hef hug á því að leggja kapp á að klára fermingamyndirnar, af drengjunum tveimur, sem fyrst. Er langt komin með þær en á örugglega nokkra klukkutíma vinnu eftir enn.

Að venju arkaði ég í vinnuna í morgun en seinni partinn fékk ég far heim. Davíð Steinn var á frjálsíþróttaæfingu og Oddur Smári hafði drifið sig í klippingu og kom ekki heim fyrr en um sex. Ég notaði tækifærið og moppaði og skúraði yfir gólfin í eldhúsinu og stofunni og skúraði einnig dúkinn inni á baði. Þegar Oddur Smári kom heim fékk ég hann til að ryksuga yfir holið.

Var með lifur í kvöldmatinn og var hún borðuð með bestu lyst af öllum fjölskyldumeðlimum.

- Ágætis gönguveður -

Veðrið á arkinu í morgun var mjög milt og einstaklega hentugt til að hugsa um lífið og tilveruna. Fannst ég vera eitthvað fljótari í förum fyrir vikið en þegar ég athugaði með tímann þá hafði ég bara verið mínar 30 mínútur á leiðinni. Seinni partinn kom ég við í vínbúðinni við Austurstræti og var komin langleiðina upp í Skipholt þegar Davíð pikkaði mig upp. Eins gott kannski, því Hlíðablóm er ekki lengur við hliðina á American Style og hefur ekki verið þar síðan á aðfangadag. Maðurinn minn skutlaði mér í Hlíðablóm við Háaleytisbraut og beið eftir mér á meðan ég lét skreyta smá afmælisgjöf. Ég náði því samt að ganga 2x30 mínútur í dag.

- Færsla númer 1200 -

Ég er nýkomin heim eftir viðkomu í 12 Tónum (með reikning v/seldra hljómdiska) og Sundhöllinni, þar sem ég synti fyrst ca 300 metra áður en ég lét líða úr mér í heita pottinum. Söngfuglinn er í frjálsum, karatestrákurinn á kúmíte-æfingu og Davíð að vinna þar til kominn er tími til að sækja "þríburana". Það er heldur of fljótt að fara að huga að kvöldmatnum og réttast væri að setjast stund í "húsbóndastólinn" með góða bók...

- Helgin liðin -

Davíð er í pílu og strákarnir sofnaðir. Ég arkaði neðan úr bæ og á skrifstofuna í Ármúlanum eftir vinnu í dag og sótti bílinn eins og þrjá undanfarna mánudaga. Skutlaði strákunum á æfingar og sótti þá aftur. Oddur Smári er nú vanur að labba á sína æfingu en það var svo mikið vatnsveður um það leyti sem hann átti að fara að leggja í hann að ég ákvað að skutlast með hann.

Í gær leysti Adda af á orgelið í messu í Óháða söfnuðinum. Kári var búinn að undirbúa okkur vel. Til stóð að við syngjum Bæn ("Ég krýp og faðma fótskör þína, frelsari...") í röddum sem stólvers en sérann bað um óskalag, "Í bljúgri bæn" með sveiflu á flygilinn eins og Öddu er einni lagið. Við eigum þá hinn sálminn bara til góða. Stúlka um einsárs var skírð og það kom maður frá krisniboðinu og sagði frá sinni reynslu. Predikunarstóllinn var ekki notaður því hann var fullur af dóti úr skrifstofu prestsins en verið er að laga, breyta og snurfusa kirkjuna þessa dagana. Eftir messu og gott spjall við "tvíburahálfsystur mín" skrapp ég á bókasafnið og skilaði tveimur bókum. Kom heim með fjórar af safninu og er því með níu í láni allt í allt.

Helgin var annars frekar fljót að líða. Hitti norsku esperanto vinkonu mína milli ellefu og tólf á laugardaginn. Frá henni labbaði ég svo upp í Þórshamar og horfði á restina af karateæfinguna hjá Oddi. Við löbbuðum svo samferða heim. Davíð var búinn að taka til handa okkur snarl. Á eftir skruppum við í verslunarleiðangur en um kvöldið fórum við til tengdó í þorraveislu.

- Stutt í helgina -

Það er meira hvað tíminn flýgur áfram. Ég væri alveg til í að hægt væri að hægja aðeins á eða þá fá fleiri tíma í sólarhringinn (fleiri mínútur í klukkutímann) svo ég gæti sinnt öllu sem ég bæði þarf að gera og einnig öllum vinum og ættingjum sem og áhugamálunum. Væri það ekki afar ljúft? Ég sé þetta alveg fyrir mér; átta tímarnir búnir um hádegið, þá færu fjórir til sex tímar í heimilið og það væru samt eftir nokkrir tímar í áhugamálin og fjölskylduna og maður fengi samt nógan tíma til að sofa og hvíla sig vel fyrir næsta dag...

Farið alltaf vel með ykkur!