- Grillað í Heiðmörkinni -

Mér tókst að nýta gærdaginn nokkuð vel en var svolítið á skjön við veðrið samt. Því sumarveðrið og 18 stiga hitinn fór næstum því alveg framhjá mér. Ég náði þó að nýta smá hluta af sólinni og hitanum og um kvöldið vorum við nokkur búin að ákveða að hittast og grilla saman í Heiðmörkinni á sama stað og við enduðum gæsaveislu fyrir rétt rúmlega fjórum árum.

Vorum flestöll mætt við staðinn upp úr sex. Staðurinn var reyndar upptekinn en í stað þess að bíða ákváðum við að reyna að finna annan stað. Davíð vidi athuga með annan grillstað sem hann vissi um, tók fram úr hinum og hélt að hann yrði eltur. En það fannst staður, á milli þessara tveggja staða, sem passaði okkur mjög vel, e-s konar lundur. Krakkarnir smullu saman í leik og innan skamms var hægt að fá sér að borða. Enginn kom með eins mat mat með sér. Við vorum t.d. með fiska sem strákarnir veiddu í forrétt og lamb í aðalrétt. Tvíburahálfsystir mín var með lax og bauð m.a. upp á kartöflusallat og "föðursystir" mín var með svínakjöt og bauð upp á grillaðar ostapönnsur á undan, grillaðan ananas í eftirrétt og kaffi á eftir. Þarna vorum við í góða þrjá tíma og ákváðum að láta nú ekki líða önnur fjögur ár þar til næst heldur gera þetta að árvissum atburði.

- Hringinn í kringum Heklu -

Upp úr hálftíu, í gærmorgun, var ég búin að skutla Davíð á skrifstofuna og ná í strákana, Dag og eina vinkonu mína. Við áttum heimboð á Hellu. Ég ók Nesjavallaleiðina austur fyrir fjall og við renndum í hlað hjá pabba og mömmu rúmlega ellefu. Við fengum okkur kaffi og tókum til nesti fyrir þrjá. Strákarnir þrír og amman urðu eftir á Hellu.

Pabbi gerðist sérlegur fararstjóri og ekill fyrir okkur Höllu. Áætlað var að ferðalagið myndi taka 4-5 tíma og lögðum við í hann um tólfleytið. Fórum Fjallabak-syðri og völdum svo vinstri slóðann þegar leiðin skiptist fyrst í tvennt. Sá slóði lá alveg upp að nýjasta Hekluhrauninu og ég hef aldrei farið hann áður. Við gerðum örstutt kaffistopp á einum stað alveg við hraunið. Við ákváðum líka að renna við inn í Landmannalaugar þar sem við borðuðum nestið okkar, gengum aðeins inn í Grænagil og ég heilsaði upp á Smára og Nínu. Við fórum framhjá Sigölduvirkjun og niður Landveg til baka og lentum kl. 18:40 að staðartíma, þannig að ferðin tók rúmlega sex tíma en við nutum hverrar mínútu. Það var margt að sjá og við vorum mjög heppin með veður. Eða eins og Davíð segir alltaf: -"Ef það hefði verið betra, hefði það verið verra!".

Mamma tók á móti okkur með grillveislu og nýja útfærslu af sósu sem var síður en svo svo galin. Á eftir var kaffi og eplakaka. Strákarnir voru ekki í vandræðum með að eyða tímanum með vininum, sýna honum eitt og annað og þeir líka skruppu í sund. Ég náði svo að skila af mér ferðafélögunum, sækja Davíð og vera komin heim fyrir miðnætti.

- Ættarmótið -

Forsaga unnin upp úr Íslendingabók: Langafi minn einn hét Friðrik Guðmundsson (1875-1960) var frá Innri-Veðraá. Kona hans (langamma) var, Guðbjörg Guðmundsdóttir fædd í Fremri-Vatnadal (1880-1960). Þau eignuðust 13 börn og var móðurafi minn Friðgeir Marías Magnús, (1919-1974) næstyngstur. Hin voru: Stefán (1904-1922), Ólöf (1905-1905), Torfi (1906-1930), Guðmundur Einar (1908-1927), Mikaelína Sigrún Gröndal (1909-1969), Salome Una (1910-2005) Guðfinna María (1912-1937), Benedikt Össur (1913-1968), Ólöf Aðalheiður (1914-1996), Jón (1916-1981), Oddur (1917-1990) og Friðrik Björgvin (1920-1978).

Seint í október 2005 var haldið 1. ættarmótið (amk. sem ég veit um) á Loftleiðahótelinu. Fyrr í sumar fékk ég svo póst um næsta ættarmót og ég tilkynnti mjög fljótt um þátttöku. Sl. föstudag lögðum við Davíð, ég og strákarnir í hann vestur. Minnstu munaði að ég hætti við því maginn var eitthvað að stríða mér nóttina áður og á föstudagsmorguninn var ég með 39 gráðu hita sem hitastillandi töflur voru lengi að vinna á. En ég ákvað engu síður að drífa mig, sem betur fer, og mun aldrei sjá eftir því. Við keyrðum suðurfirðina vestur og vorum komin á Friðarsetrið við Önundarfjörð um átta leytið. Þar beið okkar matur og flestir af þeim sem ætluðu að vera með. Það fækkaði um örfáa í hópnum vegna óviðráðanlegra aðstæðna en hópurinn taldi alls 24 sem er miklu færra en fyrir tveimur árum. Krakkarnir voru fimm frá 5-14 og voru strax komin í leik. Flestir holuðu sér niður inni en við vorum þó örfá í tjöldum og tjaldvagni.

Rétt fyrir hádegi á laugardag var farið í rútuferð. Fyrst lá leiðin að kirkjugarðinum á Flateyri þar sem voru lögð blóm að nokkrum leiðum. Síðan var ekið um plássið og bæinn og stoppað við Unuhús og ostahúsið til að taka myndir. Í því fyrrnefnda bjó ein afasystir mín og er það kennt við hana og í því síðara bjuggu Friðrik og Guðbjörg. Því næst var farið til Súgandafjarðar ekið út með firðinum inn að bænum Bæ þar sem Karl bóndi var tekinn með í leiðangur upp að Vatnadal. Þar var borðað nesti og þeir sem treystu sér til fengu sér göngu alla leið inn að vötnunum sem dalurinn er kenndur við. Í bakaleiðinni var stoppað örstutt (pissustopp) á Suðureyri og að lokum var keyrt alveg fyrir Önundarfjörðinn. Allt í allt tók þessi ferð rúmlega sex tíma. Veðrið lék við okkur allan tímann og tíminn flaug hratt. Eftir kvöldmat var vegleg myndasýning bæði eldgamlar og dagsgamlar myndir.

Um hálfellefu í gær fór stór hópur niður í fjöru. Þrír dómarar, 14 í fimm liðum og 1 ljósmyndari. Þarna fór fram frækileg sandkastalakeppni og fengum við klukkutíma til að athafna okkur. Aðeins mátti nota skóflur (ekki þó fullorðins), fötur, sigti og muni úr náttúrunni (s.s. skeljar, strá og þ.h.). Við Davíð lentum saman í liði ásamt 14 ára frænda mínum og Helga systir var með Huldu og Davíð Stein í sínu liði. Eitt liðið samastóð af einni frænku minni, syni hennar og 17 ára bróðurdóttur, önnur frænka mín, maður hennar og yngri sonur voru í einu liðinu og í tveggja manna liðinu voru hjón. Þetta skiptist svona alveg óvart. Í dómnefndinni var; móðursystir mín, dóttir hennar (nafna mín) og pabbi þessarar 17 ára. Oddur Smári var svo skipaður sérlegur ljósmyndari amk á meðan unnið var við kastalagerðina. Ég skemmti mér konunglega og í mínu liði var mikill hlátur, miklar pælingar, algert lýðræði og unnið allan tímann. Við nýttum tímamörkin alveg upp á sekúndu. Líkt og keppendurnir unnu dómarar allan tímann út frá skýrum reglum sem þau settu sér. Og þegar komið var að verðlaunaafhendingunni var formaður dómnefndar með smá tölu og athugasemdir um hvert lið. Það lið sem vann fékk 14 stig af 15 mögulegum, lið okkar systra deildu með sér 2-3 sætinu með 10 stig.

Eftir velheppnaða og skemmtilega keppni drifum við Davíð í að taka niður tjaldið. Búið var að ganga frá öllu og fá sér að borða rétt fyrir eitt og þá lá leiðin að kirkjunni í Holti. Presturinn tók á móti okkur, sagði okkur aðeins frá sögu staðarins, var með örstutta helgistund og svo söng Davíð Steinn tvö lög í lokin. Í miðri helgistund komu nokkrir ferðamenn inn og strákurinn var svolítið stressaður í söngnum en skilaði samt vel frá sér. Svo var kvaðst fyrir utan kirkjuna og samkoman leystist upp.

Við Davíð ákváðum að keyra aðra leið heim og byrjðum á því að renna á Ísafjörð og rúnta smá hring um bæinn. Síðan ókum við sem leið lá í gegnum Súðavík og alveg alla leið á Hólmavík þar sem við stoppuðum til að rétta úr okkur og fá okkur eitthvað í svanginn. Næsta stopp var við Brú í Hrútafirði. Þá var klukkan um sjö. Í bæinn vorum við komin um hálfníu þannig að þetta var nokkuð stíf keyrsla á okkur. Við erum alveg ákveðin í að fara á vestfirðina aftur og gefa okkur þá miklu betri tíma. Svo er stefnt á annað ættarmót 2010 en þá verða liðin 50 ár frá því langforeldrar mínir féllu frá, 135 ár frá því Friðrik fæddist og 130 ár frá því Guðbjörg fæddist.

- Nóg að gerast -

Í gær urðu tvíburarnir ellefu ára, ótrúlegt en satt. Tíminn lætur ekki hæðast að sér. Í tilefni dagsins tók Davíð sér frí. Við vorum komin á fætur um átta og rétt fyrir níu lögðum við af stað áleiðis í Hólminn. Er við höfðum beygt af hringtorginu við Borgarnes, tókum við fljótlega fram úr rútu. Vorum komin í Stykkishólm tólf mínútum fyrir ellefu en svo kölluð Suðureyjasigling fer daglega klukkan ellefu og aftur kl. hálfþrjú, amk á sumartímanum. Þegar Davíð keypti miðana var honum sagt að seinkun yrði á ferðinni því beðið væri eftir hóp sem væri á leiðinni. Hálftíma síðar, tæpum þó, ók rútan, sem við tókum fram úr á leiðinni, að bryggju. Siglingin var frábær. Davíð Steinn var að fara í annað skipti á árinu en hann fór með drengjakórnum í júníbyrjun. Honum fannst samt mjög gaman. Siglt var að nokkrum eyjum og á einni þeirra býr hafarnarfjölskylda og sáum við annan fullorðna fuglinn og aðeins af ungunum sem eru tveir. Svo var botninn skrapaður og boðið upp á hörpudisks og ígulkerjasmakk. Strákarnir fengu að hjálpa til við að finna og opna skeljar og það var víst ekki leiðinlegt. Er við komum til baka fengum við okkur að borða í Narfeyrarstofu áður en við brunuðum aftur í bæinn. Ég skipti fljótlega við Davíð og tók við bílstjórastöðunni. Ákvað að keyra fyrir Hvalfjörðinn og stoppaði við Ferstiklu. Þar fengum við okkur ís og kaffi, en ég var komin í mikla koffínþörf og var þar að auki í spreng. Davíð tók svo aftur við bílstjórninni.

Er við komum í bæinn ákváðum við að fara í bíó. Strákarnir voru ekki sammála um hvaða mynd þeir vildu fara á. Annar vildi fara á Fantastic four... en hinn á Pirots of the Carabian... fórum á þá fyrrnefndu og vorum alveg tilbúin að fara á hina á eftir. Hún var ekki sýnd fyrr en tíu svo við fórum heim í millitíðinni. Dagur vinur þeirra hringdi fljótlega eftir að við komum heim og tvíburarnir ákváðu að leika frekar við hann heldur en að fara aftur í bíó. Vinurinn kom yfir og þeir fengu að vera í Playstation tölvunni. Svo fékk Dagur leyfi hjá okkur og mömmu sinni til að gista hjá strákunum. Það heyrðist enn í strákunum þegar við hjónin fórum að sofa um miðnætti og stuttu fyrir þrjú hrökk ég upp við hurðaskelli og spjall milli tveggja, sá þriðji, Oddur var sofnaður en hinir höfðu verið að hræða sig og gátu ekki sofnað...

Á sunnudaginn var skruppum við austur í sveit að heimsækja frænku mína eina sem stödd er á landinu um þessar mundir. Hún og foreldrar hennar voru með opið hús til að hún gæti hitt sem flesta í einu. Þetta var skemmtilega veisla. Bríet hélt því fram að hún ætti afmæli. Krakkarnir, sem voru þónokkur (amk 11 eða 12) voru duglega að leika sér úti. Tíminn leið bara alltof fljótt en hver veit nema að það verði ekki svo langt þangað til við heimsækjum þessa frænku mína út til Danmerkur þar sem hún býr?

- Harrý Potter og Fönixreglan -

Tengdapabbi skutlaði tvíburunum til móts við okkur hjónin á sjötta tímanum í gær. Við tókum við strákunum einhvers staðar í Þrengslunum. Höfðum góðan tíma því bíósýningin

átti ekki að hefjast fyrr en klukkan sjö. Vorum komin í Sambíóin við Álfabakka fyrir hálfsjö. Þar fréttum við að sýningin ætti eiginlega að byrja klukkan hálfsjö. Sem betur fer fyrir, alla hina sem héldu að hún ætti að hefjast klukkan sjö, þá var sýningunni frestað um hálftíma. Aðeins ein mynd var auglýst áður en sýningin byrjaði. Ekkert hlé var og við sátum og gleymdum tímanum í rúma tvo tíma. Ég er bara mjög sátt við þessa mynd. Hún var kannski heldur lengi að byrja en mér fannst það ekki koma neitt niður á myndinni í heild. Strákarnir voru líka mjög ánægðir en eftir á var Oddur Smári að segja okkur frá hinum og þessum mismuni milli bókar og myndar en strákurinn er búinn að lesa allar útkomnar Harrý Potter bækur fram og til baka. Eftir bíó gáfum við strákunum hressingu áður en við skutluðum þeim til baka á Bakkann.

- Miðvikudagur -

Ég var komin heim upp úr tvö í gær. Ætlaði mér að koma einhverju í verk en ekkert gerðist fyrstu klukkutímana. Kíkti í tölvuna í smástund og lagði mig svo. Ég ég hafði hvílt mig kom ég mér vel fyrir með bók sem ég las upp til agna. Davíð kom heim fyrir sjö og þá loksins hafði ég mig í smá "geru" amk þvottahús og uppþvottamál. Ætlaði að koma mér í rúmið eftir að Angelas Eyes var búið, en ég fór ekki beint að sofa heldur gleymdi tímanum gjörsamlega við að leysa Sudoku gátur úr Frístund - Sudoku. Klukkan var orðin eitthvað meira en miðnætti þegar ég loksins lagði frá mér blaðið eftir mikil heilabrot. Davíð kom uppí löngu seinna. Hann var að vinna og náði ekki að klára svo hann var farið áður en ég fór á fætur rétt fyrir sjö.

- Á vellinum -

Davíð náði að klára vinnu og ná í mig áður en klukkan sló átta og leikurinn, Fram - Valur, byrjaði. Leikurinn hófst klukkan átta og það voru tæplega 1300 (1267) áhorfendur, flestir í rauðu þótt um heimaleik Fram væri að ræða. Gummi Ben. kom okkar mönnum yfir mjög snemma leiks. Fleiri færi litu dagsins ljós en heimaliðið varðist vel og reyndi að skapa sér færi. Staðan í hálfleik var 0:1 fyrir Val. Um miðjan seinni hálfleik misstu Frammarar mann útaf með tvö gul spjöld en það var samt ekki að sjá að þeir væru einum færri. Engu að síður náðu Valsarar loks að skora annað mark og innsigla sigurinn stuttu fyrir leikslok. Það var mjög ljúft og nú munar bara tveimur stigum á FH og Val.

- Á hálendinu -

Við Davíð sóttum tvíburana á Bakkann um hádegisbil á laugardag. Gáfum okkur tíma í einn bolla af kaffi áður en við héldum af stað. Leiðin lá í gegnum Árnes og upp á fjöll með smá stoppum. Vorum komin inn í Landmannalaugar um fjögur og hittum þar Smára og Nínu sem buðu okkur hjónunum upp á kaffi með tvöfaldri ábót og strákunum kakó. Fram að því að við komum hafði verið nokkuð rólegt hjá þeim en þennan tíma sem við stoppuðum urðum við að sæta lagi við að spjalla smá. Tjaldstæðin voru full af fólki svo við ákváðum að setja ekki niður tjaldið þarna. Þegar við höfðum kvatt ókum við alla leið inn að Langasjó. Davíð var alveg í essinu sínu, akandi um á hálendinu og á leiðinni inn að Langasjó þurfti hann að fara yfir amk 17 smásprænur og svo aftur á leiðinni til baka.

Um tíu vorum við komin inn í Hólaskjól þar sem við tölduðum. Okkur fannst of seint að grilla okkur eitthvað og fengum okkur bara eitthvað létt fyrir svefninn. Morguninn eftir flúði Davíð úr tjaldinu á um níu að mestu vegna hitamollu. Aftur á móti var Davíð Steinn að drepast úr kulda þegar hann vaknaði. Við tókum okkur fljótlega saman, gerðum upp nóttina og fórum svo inn í Eldgjá. Gengum inn að fossi, ég fór að vísu ekki alveg alla leið en nógu langt til að sjá Ófærufoss. Davíð Steinn var eins og fjallageit og var langt á undan okkur klæddur flíspeysu með rennt upp í háls. Pabbi hans fékk hann til að fara úr peysunni inn við foss. Það var sól og mjög hlýtt og við skildum ekkert í því hvernig stráknum gat verið kalt. Honum hafði reyndar hlýnað við gönguna inn gjána.

Eftir göngutúrinn fórum við að síga af stað niður í byggð. Keyrðum reyndar aðeins áleiðis að Gjátindi og sáum ofan í Eldgjána hinum megin frá. Úúúú, ég er alltof lofthrædd í svoleiðis. Komum á Hellu um fimm og gáfum mömmu spes afmælisknús. Sandra Ósk, stúlka sem ég passaði í heilan vetur með Huldu þegar þær voru á öðru árinu, er búin að vera í "sveitinni" sl. tvær vikur ásamt systurdóttur minni. Þegar okkur bar að garði virtist hún alveg þekkja mig og fleygði sér í fangið á mér og gaf mér STÓRT KNÚS. O, hvað það var gott. En það er allavega staðreynd að við fjölskyldan fórum í útilegu þriðju helgina í röð.

- Ég kann líklega ekki að telja -

Davíð hringdi í mig um sex í gær. Hann var á leiðinni heim eftir vinnutörn en ég var á bókasafninu. Ég sagðist vera að skila bókum og taka nýjar fyrir strákana og þrjár til fjórar fyrir mig. Í bókapokann og heim komu alls 20 bækur, 9 teiknimyndasögur, 4 Frank og Jóa bækur og helmingi fleiri en fjórar handa mér. Átta er víst ekki sama og þrjár til fjórar er það nokkuð. Þrír plús fjórir nær ekki einu sinni átta. En ég verð örugglega ekki í vandræðum með að lesa þessar og hinar fjórar sem biðu heima og ég hef lengt skilafrestinn á. Ó, nei, ó, nei.

Við hjónin skruppum út að borða í gærkvöldi og litum svo inn til einnar vinkonu minnar. Davíð var búinn að vera með ferðatölvu eins barna hennar í nokkrar vikur að reyna að gera við en gat ekki einu sinni kveikt á tölvunni. Stoppuðum ekki lengi því Davíð var alveg ósofinn (kom ekkert heim í fyrrinótt) og þreyttur eftir því. Vorum komin heim rúmlega tíu og minn maður var á leið í rúmið stuttu síðar þegar honum datt í hug að það gæti verið ágætt að skella eins og einum bjór í sig. Þannig að klukkan var orðin hálftólf er hann fór upp í.

Helgin er framundan og spennandi að sjá hvaða ævintýri hún færir okkur.

Farið vel með ykkur!

- Göngusaumaklúbbur tvíburahálfsystra -

Var mætt til tvíburahálfsystur minnar upp úr klukkan átta í gærkvöldi. Við drifum okkur beint út í langan göngutúr enda ekta gönguveður, komum ekki til baka aftur fyrr en um hálftíu. Settumst reyndar smá stund niður í notalegum garði. Er við komum til baka fengum við okkur kaffi og hún greip í prjónana sína og í nál og það var prjónað og talið út til klukkan að verða ellefu.

- VISABIKAR karla -

Ég er hálf svekkt yfir að hafa ekki farið á leikinn í gær. Hefði farið ef Davíð hefði komist með, en hann var að vinna til rúmlega átta. Í staðinn hlustaði ég á fótboltarásina og hafði það framyfir, með því að vera ekki á einum stað, að vita stöðuna í hinum leikjum kvöldsins. Á lýsingunni að dæma voru Valsmenn sterkari aðilinn í leiknum í gær og hefðu í raun átt að gera út um leikinn á venjulegum tíma. Það hlýtur að hafa verð eins og blaut tuska í fésið að fá á sig jöfnunarmarki þegar næstum voru komnar 4 mín. fram yfir venjulegan leiktíma. En strákarnir jöfnuðu sig fjótlega á því. Ekkert mark var skorað í framlengingu og þegar um vítaspyrnukeppni er að ræða getur farið á hvorn veginn sem var, hvort sem liðið var betra í heildina eða átti í vök að verjast í leiktímanum. Kjartan Sturluson var sterkur á milli stanganna og fékk bara þetta eina mark, jöfnunarmark á sig, varði tvö vítaskotanna frá KR og eitt skotið fór yfir og meira þurfti ekki, Valsmenn eru því komnir í 8-liða úrslit, óle, óle, óle, óle...

- Bíóferð -

Við hjónin skruppum í Smárabíó klukkan átta í gærkvöldi og sáum Die Hard 4.0. Myndin féll alveg í kramið og gaman að sjá mörg atriðin á stóru tjaldi. Þetta er fjórða myndin sem Bruce Willis leikur John Mcclane en það kemur ekkert niður á gæðunum. Myndin er hröð, spennandi og með góðan húmor. Ég var hins vegar mjög ósátt við fjölda auglýsinga fyrir myndina. Fannst alveg nóg um. Við vorum komin stuttu fyrir átta. Á tjaldinu voru skjáauglýsingar en klukkan átta byrjuðu "lifandi/leiknar" auglýsingar og fóru amk 15 mín í þær áður en sýnd voru tvö eða þrjú bíóbrot úr væntanlegum myndum. Myndin sjálf byrjaði ekki fyrr en undir hálfníu þótt auglýstur tími hafi verið átta.

- Útilega númer tvö -

Davíð sótti strákana á föstudagskvöldið. Þeir komu ekki í bæinn fyrr en um miðnættið. Á laugardagsmorguninn fórum við hjónin á fætur um tíu. Davíð fór beint í tölvuna að sinna verkefni. Strákarnir sváfu og sváfu. Klukkan var næstum orðin eitt þegar þeir vöknuðu. Það tók svo sinn tíma í að taka sig saman og undirbúa útilega þrátt fyrir að tjald og svefnpokar væru búnir að vera í bílnum síðan um síðustu helgi. Klukkan var því farin að halla í fjögur er við keyrðum út úr bænum. Keyrðum fyrir Hvalfjörðinn og fyrsta stopp var í Borgarfirðinum ca. 10 km. frá Borgarnesi þar sem tvíburahálfsystir mín á bústað. Við vorum búin að gera boð á undan okkur og fengum kaffi og með því er við mættum. Við grilluðum svo saman seinna um kvöldið og þáðum einn bolla til áður en ferðinni var haldið áfram. Um hálftólf komum við í Stykkishólm, tjölduðum og fórum beint í háttinn. Meiningin var að freista þess að fara í Suðureyjasiglingu morguninn eftir.

Á sunnudagsmorguninn voru allir vaknaðir um níu. Fengum okkur eitthvað að borða áður en við tókum dótið og tjaldið saman. Síðan voru tjaldsvæðaverðir leitaðir upp til að gera upp. Einhvern veginn voru þessir tveir tímar ekki nóg fyrir okkur og við sáum á eftir bátnum, hann var kominn nokkra metra frá bryggju, er við renndum að enda klukkan fimm mínútur yfir ellefu. Davíð Steinn fór í þessa siglingu með drengjakórnum í vor og hefði alveg verið til í að fara aftur. Að vísu var önnur ferð um hálfþrjú en við ákváðum að keyra frekar áfram. Við erum samt alveg ákveðin í að reyna að komast þessa ferð seinna í sumar. Strákarnir voru spenntir fyrir að komast í hvalaskoðunarferð en við keyrðum í gegnum alla staðina og fyrir nesið með tilheyrandi stoppum hér og þar. Síðasta stopp á Snæfellsnesinu var við Ölkeldu þar sem allir fengu sér vatn að smakka og Davíð Steinn fyllti á hálfs lítra flösku. Okkur fannst þetta öllum gott nema Oddi Smára.

Vorum í Borgarnesi um fjögur og fórum í sund í sól og 21 gráðu hita. Komum heim um sjö og tveim tímum seinna skutluðum við tvíburunum á Bakkann til föðurafa síns og ömmu. Þar verða þeir fram að næstu helgi en þá er líklega að við sækjum þá og leggjumst út aftur.

- Föstudagur -

Þótt ég sé lítið hrifin af því hversu hratt tíminn líður er ég ánægð með að það sé kominn föstudagur. Davíð hefur verið að vinna sólarhringum saman með svefntímann frá 1-5 tímum en í gærkvöld var hann þó kominn upp í rúm fyrir miðnætti og svaf heila átta tíma. Tvíburarnir

fóru með föðurbróður sínum á Bakkann seinni partinn á þriðjudaginn. Þar mega þeir vera í tvær vikur en við gerum ráð fyrir að sækja þá heim yfir helgina. Hver veit nema við leggjumst svo aðeins aftur út. Það er voðalega gott að hlaða batteríin úti á landi. En þetta kemur allt í ljós.

Við hjónin skruppum í þriggja ára afmæli seinni partinn í gær og kíktum við hjá tvíburahálfsystur minni á eftir. Stoppuðum ekki lengi því Davíð var svefnþurfi og úrvinda eftir vinnutörnina (sem vonandi er búin í bili).

Annars gengur lífið sinn vanagang. Les reyndar heldur minna, en alltaf eitthvað og tek í saumana mína nær daglega.

- Lagst út -

Við tókum til útilegudótið okkar um hádegið á laugardag. Tjald, svefnpokar, sængur og fleira. Fengum okkar að borða á leiðinni út úr bænum og svo fór Davíð í óvissuferð með okkur. Hann keyrði gegnum Mosfellsbæ, fór Þingvallaleið austur og keyrði svo Uxahryggjaleið að Húsafelli. Stutt frá Barnafossum voru tengdó og mágur minn og hans sonur búin að koma sér vel fyrir og voru þegar búin að gista eina nótt. Við settum upp tjaldið okkar nálægt og blönduðum svo geði við hina. Sameiginlegt grill var um kvöldið. Veðrið var yndislegt og voru allir á fótum framyfir miðnætti. Oddur Smári var kominn lang fyrstu á fætur í gærmorgun, fyrir hálfátta. Hann vildi sanna það að hann væri mesti morgun haninn. Veðrið hélt áfram að vera gott. Það komu reyndar örfáir dropar upp úr hádeginu en við tókum niður tjaldið skömmu síðar, alveg þurrt. Fórum í sund á Kleppjárnsreykjum með Tomma og Tedda og keyrðum svo Hvalfjörðinn heim.

- Laugardagsmorgun -

Ég er ein vöknuð af okkur öllum. Já, strákarnir eru komnir heim í bili. Skipti um bíl við manninn minn um sjö í gær. Skildi Fíatinn og manninn eftir í vinnunni hans og skutlaðist austur eftir strákunum. Stoppaði hjá pabba og mömmu til klukkan að ganga ellefu. Tvíburarnir eru búnir að vera duglegir að hjálpa afa sínum og ömmu þessar tæpu tvær vikur sem þeir voru hjá þeim. M.a. gróðursettu þeir yfir 500 trjáplöntur á landareign pabba á Heiði. Pabbi lenti reyndar inn á sjúkrahúsi eina nótt í vikunni. Hann fór í þrekpróf vegna hjartans og var lagður inn og blásinn með það sama. Það stoppaði hann samt ekki í að klára að planta í gær því hann hafði svo góða vinnumenn með sér.

Helga, Ingvi og stelpurnar komu austur í gærkvöld. Hulda verður eftir hjá afa sínum og ömmu og verður þar næstu tvær vikurnar ásamt jafnöldru sinni sem ég passaði á morgnana (ásamt Huldu) veturinn 2001-2002.

Þegar við mæðgin komum í bæinn um hálftólf komum við við á skrifstofu Davíðs svo þeir feðgar gætu hist aðeins. Maðurinn minn skilaði sér svo heim einhvern tímann í nótt en hann var ekki kominn þegar ég fór að sofa um hálftvö.

- Furðulegur gestur -

Þegar ég kom heim eftir vinnu og tveggja tíma frænkuvakt í gær spurði nágranninn minn af neðri hæðinni hvort ég ætti hænuna í garðinu. Ég kannaðist ekki við það og fannst þetta hálf ótrúlegt. En ég sá hænuna með mínum eigin augum.

- Markaregn í Laugardalnum -

Já, ég fór á völlinn í gærkvöldi og skemmti mér vel. Valsstrákarnir voru einfaldlega ákveðnari heldur en gestirnir og ég var ánægð með að Gummi Ben. skuli hafa opnað markareikninginn sinn en hann skoraði fyrsta og síðasta markið í 4:1 sigri á FH. Það var ekki að sjá á leik gestanna að þeir væru ósigraðir og efstir í deildinni eftir 7 umferðir en allir eiga sína slæmu daga. Ég veit ekki hvort að hluti af þessu megi skrifa á fjarveru Arnars Gunnlaugssonar en hann var ekki með í gærkvöldi. Ég er bara ánægð með sigurinn og hananú.

- Bríet 3 ára -

Yngri systurdóttir mín á afmæli í dag. Mikið hvað tíminn líður eitthvað fljótt. Ég var að tala við hana í síma um daginn. Fyrst spurði hún: -"Hver ert sú?" Þegar hún vissi hver ég var þá fór hún að "sýna" mér meiddi sem hún var með. Ég spurði hvort ég ætti að kyssa á meiddið og fékk að gera það. Ég man eftir strákunum á þessum aldri. Þeir gerðu það sama, "sýndu" þeim sem var í símtólinu eitt og annað í kringum þá eða á þeim sjálfum.

- Fimmtudagur -

Vá, hvert fóru dagarnir, vikan er bara alveg að verða búin??? Í gærkvöldi var síðasta kóræfing fyrir sumarfrí. Hin fræga gúllasmessa verður svo klukkan ellefu á sunnudaginn kemur. Það er greinilega hlaupinn einhver sumarfílingur í mannskapinn því þetta var fámennasta kóræfingin sem Adda kórstjóri hefur stjórnað í vetur. Sennilega mæta þó fleiri á sunnudaginn, en við vorum ekki nema sjö (3 í sópran, 1 í alt, 1 í tenór og 2 í bassa). Við munum samt klóra okkur vel fram úr messunni. Verst er að ekki verður hægt að syngja neitt í röddum en við ætlum að syngja keðjusöng undir altarisgöngunni.

Við Davíð skruppum á Skagann í fyrrakvöld til að fylgjast með ÍA - Val í blíðskaparveðri. Ég man bara ekki eftir að hafa verið á Akranesi í svona mildu og góðu veðri. En kannski er það bara af því að ég er nú ekki þar á hverjum degi, heldur ca. svona einu sinni á ári. Mér fannst Valsmenn vera miklu betri framan af en í heildina fengu þeir 18 hornspyrnur og það kom nákvæmlega ekkert út úr þeim (kannski smá hætta á ferðum einu sinni) en Skagamenn nýttu aðra af tveimur hornspyrnum sínum. Svo fengu þeir gefins vítaspyrnu en það var ekki dæmd hendi á þá (og ég sá Skagamenn setja hönd í bolta amk þrisvar sinnum og ekkert dæmt). En annars er gott að vera búin að taka út tapið eða þannig, fyrsta tap strákanna í rúmt ár.

Svo er hugsanlegt að ég bregði mér á landsleik í kvöld. Gæti samt verið áhætta ef ég yrði nú hás...

- Mánudagur -

Ég er að myndast við að koma heimilinu í betra horf og er allavega byrjuð og búin að gera eitthvað. Málið er að setja sér raunhæf markmið miðað við tíma og önnur störf og svo líka að byrja, "Hálfnað verk þá hafið er!"

Skruppum aðeins í bæinn í gær áður en við renndum austur með strákana en tvíburarnir verða á Hellu næstu tvær vikurnar. Þeir koma reyndar aðeins í bæinn um næstu helgi því Bríet er að verða þriggja ára á laugardaginn. Veðrið lék við landann í gær. Samt fannst mér ekki vera mjög margt um manninn í miðbænum. Það voru samt svona mannhrúgur hér og þar. Þegar við keyrðum austur mættum við alveg helling af bílum. Rétt austan við Selfoss var lögreglan að fylgjast með umferðinni, því miður fyrir Davíð því hann ók heldur greitt og á nú von á allt að 30 þúsund kr. sekt fljótlega. Pabbi sá svo um að ég þyrfti að keyra til baka því hann bað manninn minn um að grilla og bauð honum upp á bjór í leiðinni.

En svei mér þá ef ég er ekki strax farin að telja dagana niður í aðalfríið mitt þótt ég hafi komið vel endurnærð eftir sl. viku. Fimm vikur ( 24 virkir dagar)...

- Megagóð sumarfrísvika -

Það var slakað á, slappað af og hvílt sig vel á eftir. Föstudaginn 8. júní fórum við fjölskyldan út úr bænum á sjöunda tímanum. Ferðinni var heitið austur í Árnessýslu, í land Efri-Reykja, stutt frá Laugarvatni. Þar hreiðruðum við okkur niður í sumarbústað. Við hreyfðum okkur ekki fyrsta sólarhringinn, höfðum verslað smávegis á leiðinni úr bænum og það dugði fram á sunnudag. Þá var skroppið í verslunarferð á Laugarvatn. Þegar búið var að ganga frá vörunum ákváðum við að skella okkur að Gullfossi. Þangað er alltaf jafn gaman að koma.

Mánudagurinn var heitasti dagurinn og fór hitinn yfir 25 gráður þegar mest var, mig minnir að mælirinn hafi meira að segja sýn rúmlega 27. Það var of heitt að dvelja of mikið í pottinum og í raun var eiginlega ekki hægt að vera of lengi úti. Ég náði nú samt að brenna.

Annars fór vikan í lestur, útsaum, krossgátuþrautir, spil, sjónvarpsgláp og svefn. Við grilluðum upp á hvern einasta dag og stundum tvisvar. Við vorum alveg tilbúin að taka á móti gestum og vorum með utan á sængur fyrir sex auka. En það komu engir gestir fyrr en seinni partinn á fimmtudag að pabbi og mamma kíktu inn og grilluðu með okkur. Þau fóru svo aftur um kvöldið þegar amman var búin að spila alveg helling við dóttursynina. Fyrr um daginn fór rafmagnið af bústaðnum í nokkurn tíma. Við vissum ekki að því fyrr en bræðurnir ætluðu að rista sér brauð og ekkert gerðist, ekki heldur eftir að brauðristinni hafði verið stungið í samband. Við þetta rafmagnsleysi tæmdist heiti potturinn.

Í gærmorgun var ræs um og upp úr níu. Allir hjálpuðust að við að taka saman, og ganga frá bústaðnum eins og við vildum koma að honum. Við höfðum tekið við bústaðnum alveg þokkalegum, lítið hægt að kvarta, nema helst að heiti potturinn hafði ekki verið þrifinn. Amk ekki nógu vel. Lokuðum á eftir okkur á slaginu tólf. Fengum okkur að borða á grillstaðnum á Laugarvatni. Svo kíktum við í heimsókn til mömmu tvíburahálfsystur minnar.

Um fimm í gær fórum við svo með strákana á Köngurlóarmanninn 3 og skemmtum okkur öll jafn vel.

- Veðurblíða -

Bekkurinn hans Davíðs Steins og foreldrar hittust á Miklatúni seinni partinn í gær og grilluðu saman. Oddur Smári fékk að vera með og fóru bræðurnir á hjólum og hittu pabba sinn á svæðinu. Ég var að sinna heimaverkefnum og undirbúningi. Það voru kjöraðstæður og veðrið lék við hópinn.

Fyrr um daginn fóru bræðurnir og létu klippa sig. Ég hafði skilið eftir 1900 kr. handa hvorum. Oddur Smári fékk sér sumarklippingu, brodda og skildi bara skottið eftir. Fyrir það borgaði hann 1250 kr. Davíð Steinn fékk sér bara venjulega klippingu og það var aðeins dýrara eða 1600 kr. Það er nú annars meiri munurinn að geta bara látið þá fá pening fyrir klippingu og sent þá eina.

Davíð kom og sótti mig um hálfátta. Við komum við í Hlíðablóm sem er nýflutt í Skipholt 70 og sóttum tvær gjafir úr skreytingu. Gjafirnar voru handa tveimur kórfélögum, annar varð sextugur í febrúar og hinn verður sjötugur eftir 16 daga. Inn í kortin þeirra setti ég ferskeytlur sem mér tókst að smíða en þær má líka sjá á ljóðavefnum mínum. Leiðin lá svo í heimahús við Háaleitisbraut þar sem haldið var kór-grillpartý með mökum. Kristinn las upp pistilinn að venju, húsráðandi var líka með pistil, strákarnir voru með frábær söng-skemmtiatriði og svo afhentum við formaður og gjaldkeri kórsins gjafirnar og mæltumst til þess að kortin yrðu opnuð og lesin. Á eftir var fjöldasöngur. Eitthvað átti að reyna að hafa "ædol-keppni" en hún var amk ekki byrjuð þegar við Davíð kvöddum um ellefu. Hann skutlaði mér heim en fór svo á skrifstofuna og vann til fjögur. Ég átti eiginlega að drífa mig í bælið því ég var á sexvaktinni í morgun. Klukkan var samt næstum miðnætti þegar ég fór loksins inn í rúm og þá las ég amk í hálftíma. Mér tókst nú samt að vakna þokkalega hress korter yfir fimm í morgun. Þá er bara spurningin hvernig maður verður þegar fer að líða á daginn.

Framundan er smá frí og það er mjög líklegt að ég gefi mér ekki neinn tíma í bloggskrif alveg á næstunni, verð örugglega ekki í netsambandi megnið af vikunni.

Farið vel með ykkur og njótið veðurblíðunnar.

- Lestur er bestur -

Ég verð endilega að benda á bókina Pósthólf dauðans eftir Kristinn R Ólafsson. Hún hélt mér við efnið. Ég gat reyndar ekki lesið hana alveg í einum grænum en ég gat varla lagt hana frá mér þegar tíminn var hlaupinn og ég þurfti að sinna öðrum verkefnum eða fara að sofa í hausinn á mér. Í gærkvöldi fór ég heldur seint upp í en ákvað samt aðeins að kíkja í bókina Lífskraftur á landi og sjó eftir Braga Þórðarson. Þar er hann að segja frá athafnafólki. Ég gleymdi mér alveg við lesturinn las um Þórð Guðjónsson og svo litlu systur Steins Steinars en hún var fyrsta konan til að lesa Passíusálma Hallgríms Péturssonar í útvarpið. Allt í einu sá ég að klukkan var alveg að verða eitt svo ég lagði bókina treglega frá mér, slökkti ljósið og fór að sofa. Davíð var að vinna og hafði lofað að vinna ekki alla nóttina. Hann kom ekki heim fyrr en um sex í morgun.

Annars var kóræfing í gærkvöldi og fyrsta hálftímann voru mættir fleiri menn en konur, en það jafnaði sig svo út þegar 4. sópranröddin mætti á svæðið. Við vorum 3 í altinum og strákarnir skiptust í 3 bassa og 4 tenóra. Æft var fyrir síðustu tvær messurnar, göngumessu n.k. laugardagsmorgun og gúllasmessu sem verður klukkan 11 f.h. þann 24. júní n.k. Ég verð, aldrei þessu vant, ekki með í næstu messu en ég ætla ekki að missa af gúllasmessunni.

- Næsta helgi nálgast eins og óðfluga -

Það er kóræfing í kvöld, næstsíðasta æfing fyrir sumarfrí en það eru engar messur í júlí. Næsta æfing verður svo eftir hálfan mánuð en þá æfum við fyrir gúllasmessuna 24. júní.

Vinur tvíburanna "þríburinn" Dagur fékk að gista hjá þeim í nótt. Strákarnir sofnuðu frekar seint en þeir sváfu líka út í morgun og þegar ég hringdi og tékkaði á þeim um hálftólf voru þeir að fara að fá sér morgunmat. Þeir eru annars ekki heima í augnablikinu. Ég er að fara á stjórnarfund um fimm, síðasti fundur vorsins, uppgjör og aðeins horft framávið með kórstjóra.

- Rétt eða rangt mynsturtákn -

Ég hamast við að sauma bláa engilinn, þegar ég kem því við. Það eru margir bláir litir í kjólnum en í síðustu viku ákvað ég að sauma fæturnar á englinum. Yst á fótunum sýndist mér munstrið vera v. Mér fannst það hálfskrítið því v er fyrir ljósgrænan. Engu að síður saumaði ég þetta með græna litnum. Á sunnudaginn skruppum við Oddur Smári til Lilju vinkonu. Ég var með saumið með mér og saman grúfðum við okkur yfir munstrið. Þá kom í ljós að það sem ég hélt að væri v var þríhyrningur. Ég mátti því rekja upp græna litinn og breyta yfir í dökk-ferskju litaðan. Það gekk nú bara vel fyrir sig.

Í gærkvöldi skrapp ég til tvíburahálfsystur minnar. Til stóð að fara í smá göngutúr áður en við tækjum upp handavinnuna. Endirinn varð sá að við fórum beint að sauma. Látum bleytuna vera en rokið var ekkert upplífgandi. Ég gat því saumað alveg helling í gærkvöldið yfir kaffi og notalegu spjalli.

Það voru skólaslit í Hlíðaskóla í dag og ég fékk að skreppa og vera viðstödd þegar 5. og 6. bekkir voru inni á sal að taka á móti vitnisburði sínum. Bræðurnir fengu virkilega flottar einkunnir og góðan vitnisburð. Báðir höfðu þeir bætt sig síðan í janúar. Davíð Steinn er með meðaleinkunnina 8,83 þrátt fyrir að vera með eina einkunn upp á 6,5 og Oddur Smári er með meðaleinkunnina 8,735 (8,74) þrátt fyrir 10 í bæði málfræði og ensku. Svo eru þeir báðir með slatta af níum og 9,5. Ég er semsagt að springa úr stolti núna. Þeir bræður eru nú komnir í sumarfrí og höfðu það notalegt heima í dag. Að vísu var "tölvulaus" dagur í dag en þeir fengu að horfa á dvd-myndir. Svo er spurning hvernig maður umbunar piltunum fyrir góða ástundun og frábærar einkunnir?

- Allir út og suður um nýliðna helgi -

Ég tók þátt í sjálfboðavinnu á laugardaginn. Davíð skutlaði mér að brottfarastað rúmlega átta um morguninn. 17 höfðu skráð sig í ferðina en einn komst svo ekki með. Við vorum komin á "vinnustaðinn" rétt upp úr klukkan tíu. Byrjað var á að fá sér kaffi áður en skipt var liði. Það voru tvö innilið og tvö útilið. Inniliðin tóku til, viðruðu og þrifu, annað útiliðið skipti um nokkrar rúður en hitt útiliðið fór í skógarhögg og gróðursettu líka nokkrar trjáplöntur í sár eftir e-r framkvæmdir. Við vorum það mörg að við þurftum ekki að vinna alveg á hundarðinu. Ég hætti reyndar vinnu fyrir fjögur (var búin með mitt verk) og horfði á landsleikinn. Um hálfsex var svo sest að borðum og snætt grilluð lambalæri með meðlæti og drukkið hvítt, rautt, bjór eða gos með.

Klukkan tíu á laugardagsmorguninn skutlaði Davíð nafna sínum upp að Hallgrímskirkju þaðan sem drengjakórinn lagði upp í ferð á Snæfellsnes. Strákarnir og fylgifiskar fóru í Stykkishólm og fengu aðgang og aðstöðu við grunnskólann. Klukkan fjögur voru þeir svo með sameiginlega tónleika með tónlistaskólanum þarna. Davíð Steinn hitti fyrrum bekkjarfélaga sinn úr Ísaksskóla á tónleikunum. Um kvöldið borðaði hópurinn í Narfeyrarstofu. Morguninn eftir fóru þeir í tveggja tíma siglingu um Breiðafjörð, sáu margt og mikið og höfðu virkilega gaman af. Eftir siglinguna kvöddu þeir Hólminn og fóru til Ólafsvíkur þar sem þeir sungu fyrir eldri borgara á elliheimilinu. Davíð sótti strákinn um sjö í gærkvöld á sama stað og hann fór með hann morguninn áður.

Bekkurinn hans Odds Smára og foreldrar höfðu mælt sér mót við Hlíðaskóla um ellefu og ætluðu að hjóla upp í Árbær og fara í sund þar. Oddur hjólaði af stað og var með í uþb klukkutíma en þá gafst minn upp og hringdi í pabba sinn. Tel strákinn reyndar góðan að hafa þó farið af stað en hann hefur ekki hjólað mjög mikið í vor og er því ekki í neinu sérstöku formi. Davíð sótti strákinn, stakk hjólinu í skottið og svo héldu þeir feðgar förinni áfram upp í Árbæ.

- Nýr mánuður -

Nú fer að styttast í sumarfrí. Að vísu ætla ég bara að taka eina viku til að byrja með en hinar fjórar ekki fyrr en seinni partinn í júlí og fram í ágúst. Skólaslitin hjá strákunum eru n.k. þriðjudag og þá verða þeir hálfnaðir með grunnskólann, búnir með fimm bekki og eiga eftir aðra fimm bekki.

Í gær var aukaæfing hjá drengjakórnum og til stóð að taka upp þrjú síðustu lögin sem fara á diskinn. Tæpum tíu mínútum eftir að ég skutlaði Davíð Steini sendi hann mér sms; Komdu að sækja mig get ekki verið með:-(:-(. Strákurinn var með þrálátan hósta sem hann réði ekkert við svo því fór sem fór.

Ég mældi drenginn í morgun og var hann með örfáar kommur. Vondandi verður hann ekki veikur því drengjakórinn er að fara í ferðalag um helgina. Hann fór amk í skólann í morgunn en skólinn er bara til hádegis þessa dagana. Ég hringdi svo í kappann um hádegisbil og hvatti hann til að leggja sig. Eftir vinnu í dag fór ég fyrst að láta snoða mig og þegar ég kom heim tók ég eftir því að söngfuglinn minn var í náttfötunum. Hann sagði að sér þætti betra að sofa í náttfötunum og svo hefur hann líklega ekki nennt að klæða sig aftur.

Framundan er enn ein helgin en það er svo stutt síðan síðasta helgi var og hét. Farið vel með ykkur og njótið lífsins.

- Flottir drengir með góða tónleika -

Það mættu amk 220 manns til að hlusta á drengina í gærkvöldi og þeir sungu sig inn í hug og hjörtu allra held ég að mér sé óhætt að segja. Þeir sungu m.a. nokkra kafla úr verkinu Lífið og ljósið eftir Hjálmar H. Ragnarsson, það sem þeir sungu með karlakórnum á mánudaginn var. Tíminn var fjótur að líða og allt í einu voru tónleikarnir búnir, samt var örstutt hlé. Í lokin var strákunum fagnað svo vel að þeir sungu fyrir okkur aftur eitt lagið á efnisskránni: Amigos para sempre.

Davíð fór aftur í vinnuna eftir tónleikana og tvíburarnir strax í háttinn. Ég fór ekki inn í rúm fyrr en um ellefu leytið og þá til að lesa: Síðustu fréttir eftir Arthur Hailay. Ég hef lesið þessa bók einhvern tímann áður (og allar hinar;Bankahneykslið, Bílaborgin, Gullna farið, Hótel, Skammhlaup, Sterk lyf). Ég var svo spennt í lestrinum að ég var enn að lesa upp úr klukkan hálfeitt þegar ég heyrði hálföskrað "mamma", það var Davíð Steinn sem vaknaði upp af einhverri martröð. Endirinn varð sá að ég leyfði honum að koma upp í til mín og hann þurfti ekki að færa sig í sitt rúm aftur fyrr en pabbi hans kom heim um sex í morgun. Sennilega hefur þetta bara verið spennufall og ofþreyta hjá drengum því hann var eldhress í morgun.

- TÓNLEIKAR DRENGJAKÓRS REYKJAVÍKUR -

VERÐA haldnir í Hallgrímskirkju í kvöld klukkan átta. Aðgangseyrir kr. 1.000.

Hvet alla til að mæta og njóta þessara björtu og fallegu radda í ca klst. Sjáumst!

- Ljóðavefur -

Ég lét verða af því í gær að afrita öll ljóð og vísur sem ég hef birt á þessu bloggi mínu og setja saman í sér safn. Athugið að ég afritaði þau yfir en uppsetningin hélst samt ekki eins. Njótið vel þið sem viljið. Ég veit ekki alveg hvort ég mun setja ný ljóð beint á ljóðavefinn. Það verður samt að teljast mjög líklegt. Um að gera að nota "rétta" umhverfið.

- Ni parolis nur esperanto -

Jes, ég var var mætt til norsku esperanto vinkonu minnar um ellefu á laugardaginn. Til stóð að æfa sig fyrir kaffihúsaferð þar sem við myndum eingöngu tala saman á esperanto. Og á laugardaginn töluðum við því bara esperanto þann rúma klukkutíma sem ég var hjá henni. Tvisvar eða þrisvar brá ég reyndar ensku fyrir mig en ég sagði aðeins tvö orð á íslensku allan tímann; -"Æ, æ"! Inger bauð mér upp á koníaksstaup með kaffinu og ég er ekki frá því að það hafi liðkað málbeinið aðeins. Við vorum með orðabækur við hendina og komumst að því að líklega verðum við að hafa þær með á kaffihúsið. Annars fannst okkur þetta ganga bara vel!

Seinni partinn á laugardaginn skrapp ég í Krónuna að versla. Þar rakst ég bókstaflega á eina frænku mína og við þekktum hvor aðra á sama sekúndubrotinu. Þetta var skemmtilegur árekstur. Á leiðinni úr versluninni hitti ég svo einn frænda minn.

Í gærmorgun var ég mætt upp í kirkju um tíu. Það vantaði fimm í kórinn (1 alt, 1, tenór, 1 bassa og 2 í sópran) en við vorum 12 sem sungum messuna klukkan ellefu. Það gekk allt ljómandi vel fyrir sig. Nú eru bara tvær kóræfingar og tvær messur eftir fram að kórsumarfríi. Ég mun reyndar ekki mæta í göngumessuna sem verður 9. júní n.k. en æfingunum og gúllasmessunni sleppi ég ekki.

Um tvö í gær lögðum við fjölskyldan af stað í bíltúr upp í Borgarfjörð. Keyrðum Hvalfjörðinn og komum við í bensínsjoppu í Borgarnesi til að fylla á bílinn og kaupa eitthvað til að setja á grill um kvöldið. Svo héldum við ferðinni áfram en ca 10 kílómetrum frá Borgarnesi eiga tvíburahálfsystir mín og hennar maður mjög svo kósí sumarbústað. Foreldrar hennar voru í heimsókn. Strákarnir fóru fljótlega að leika við tveggja og hálfsárs dóttur tvíburahálfsystur minnar og löbbuðum með henni um nágrenni bústaðarins. Dagurinn leið hratt. Hitinn var nægur á tímabili til að setjast út á pall. Um kvöldið var grillað og borðað saman. Frábær dagur, afslappandi og mjög skemmtilegur. Okkur var ítrekað boðið að gista en við töldum okkur ekki hafa tíma í það þar sem Davíð ætlaði að vinna í dag og svo er söngfuglinn að fara að syngja með DKR og KR (drengja- og karlakór Reykjavíkur) í Hallgrímskirkju núna klukkan fimm seinni partinn.

- Lokaheimsóknin -

Ég hugsaði ekki út í að segja frá því að ég fór með Davíð Stein til tannfræðinsins í eftirskoðun í gærmorgun. Við fengum gefins myndir af munni hans og tönnum fyrir og eftir góminn, og þvílíkur munur. Vinstra meginn, framan frá séð, var allt í lagi en hægra meginn var tvöfalt krossbit. Núna er þetta allt orðið jafnt og flott.

Oddur Smári hringdi í mig í gemsann um tvö í gær. Það var tilviljun að ég heyrði í símanum því ég hafði gleymt að taka hann upp úr töskunni. En á svipuðum tíma og strákurinn hringdi þurfti ég að ná í svolítið í töskuna. Stráksi byrjaði á því að spyrja hversvegna ég hefði verið svona lengi að svara. En svo spurði hann hvort hann mætti gista heima hjá vini um nóttina. Ég sagði að það væri í lagi ef mamma hans segði já. "-Hennar!" sagði þá Oddur Smári, "-Ég kem heim um sjö í síðustu máltíðina og sæki tannburstann minn ef ég má gista..." Þessi tvö og reyndar þrjú önnur (Davíð Steinn er þar á meðal annað hvort sem söngvari eða bakrödd) eru að hugsa um að stofna hljómsveit saman. Þau vinirnir komu bæði fyrir sex og fékk hún að borða hjá okkur. Ég var með bygggrjón og ommilettu (eggjaköku) með grænmeti og afgang af soðinni ýsu. Bekkjarsystir og vinkona Odds byrjaði á að tilkynna að hún borðaði yfirleitt ekki mikið á kvöldið. Sennilega vildi hún hafa vaðið fyrir neðan sig ef henni fyndist maturinn ekki góður. Hún borðaði mest af því sem henni var skammtað á diskinn af ommilettunni en svo var hún svo hrifin af bygggrjónunum (sem hún kallaði reyndar baunir) að hún fékk sér aftur og aftur á diskinn uns ekkert var eftir í skálinni. Strax eftir matinn kvöddu vinirnir og fóru heim til hennar með einn tannbursta með í för.

- Enn ein vikan næstum liðin -

Á meðan Davíð Steinn var á aukaæfingu og að syngja beint í Kastljósinu fórum við hin í Laugardalinn til að fylgjast með leik Vals og KR 2:1. Ég ætlaði mér að spara röddina þar sem það er stutt í næstu messu en stemmingin var góð og ég gleymdi mér alveg. Þannig að ég er svolítið rám í dag. Ég hef morgundaginn til að jafna mig.


Í fyrradag skilaði ég af mér þremur bókum. Safnið í Grófinni var lokað vegna breytinga en það var móttökuhilla í anddyrinu sem á stóð: Ykkur er velkomið að skila hér. Ég nýtti mér það því ævisaga Kristjáns Eldjárns heitins var á síðasta auka-skila-degi. Mér leist ekkert á blikuna þegar ég skráði mig inn í Gegni í gærmorgun og sá að það var óbreytt staðan á útlánunum (20 í láni en átti að vera 17). Ég tók ekki sjensinn á því að þetta mundi ekki breytast í einhverja daga og að þá fengi ég sekt vegna ævisögunnar svo ég sendi fyrirspurn á safnið. Fyrirspurninni var ekki svarað en seinni partinn var búið að laga útlánsstöðuna mína. Hluti af þessum 17 bókum eru bækur sem ég tók fyrir strákana, 5 stykki. Annars er ég að spá í að bjóða þeim upp á að eignast sitt eigið bókasafnsskírteini. Þeir gætu farið í Kringlusafnið því þeir eru hvort sem er að skreppa í Kringluna öðru hvoru.

Ég er langt komin með tvær ólíkar en spennandi bækur. Fylgsnið eftir Dean R. Koontz og Ellefu mínútur eftir Paulo Coelho. Ætla ekkert að skrifa nánar um þær en mæli eindregið með þeim.

Hafið það gott nú um komandi hvítasunnuhelgi.

Heilræði í bland við bull

Glaðlega geislarnir dönsuðu saman
gullinbrúnir og heitir.
Að horfa á var virkilega gaman
vorið yl í kroppinn veitir.

Nú birtir meira dag frá degi
dimman er varla til.
Takið eftir því sem ég segi
svo allt fari eins og ég vil.

Alltaf er gott að meta lífið
og brosa oft og mikið.
Munnvikin allir upp hífið
ekki frá neinu vikið.

Verum jákvæð verum kát
verum mikið saman.
Setjum lífið í mót og mát
meira þó að framan.

Þetta er orðið hið mesta bull
og best er því að hætta núna.
Ekki er ég neitt að ráði full
ætla að leika fullkomnu frúna.

- Ný ríkisstjórn -

Ó, nei ég ætla ekki að tjá mig um kosningar, stjórnmál eða neitt í þeim moll. Kannski á ég það samt einhvern tímann eftir en sem stendur sé ég það nú ekki fyrir mér. Ó, nei, ó nei mér ég fann bara ekki skárri titil í þetta sinn...

Þegar ég var hjá norsku esperantovinkonu minni hringdi ein frænka mín í mig. Hún sagðist hafa verið að reyna að ná í mig í nokkurn tíma en þó ekki hringt í gemsann fyrr. Málið var að hún var með fatasendingu af yngri stráknum sínum (sem er á sextánda ári) til strákanna minn. Hún hringdi aftur til mín um kvöldið og spurði hvort hún mætti skjótast með þetta. Það var velkomið. Hluti af þessari fatasendingu voru náttföt, en annar tvíburinn er einmitt nýbyrjaður að sofa aftur í svoleiðis og hefur undanfarin kvöld farið í rúmið í heldur litlum náttfötum. Minn varð því mjög glaður með á fá öll þessi náttföt. Frænka mín stoppaði í góðan klukkutíma og áttum við skemmtilegt spjall saman.

Kvöldið var fljótt að líða. Ætlaði mér að reyna að fara frekar snemma í háttinn því ég átti morgunvaktina í morgun. En klukkan náði á slá hálftólf áður en ég fór upp í og þá las ég nokkrar blaðsíður áður en ég slökkti ljósið, bað bænirnar mínar og lagði af stað í draumalandið...

- Smá hér og smá þar -

Hef ég skrifað um það áður, hversu fljótur tíminn er að líða? Ó, já alveg örugglega. Samt verð ég alltaf jafn hissa þegar dagarnir vikan er komin á skrið og dagarnir þjóta áfram. Mér er fullkunnugt um að það borgar sig ekki að reyna að halda í við tímann. Stundum verð ég þó að reyna bara til að komast að því að það er einfaldlega ekki hægt og maður missir þá bara af einhverju í staðinn.

Á föstudaginn bað ég Davíð um að vinna nú ekki alla helgina. Hann fór um ellefu á laugadaginn og vann til sjö. Það kvöld talaði hann um að efna loforð sem við nafna sinn á sunnudeginum. Öll sváfum við til klukkan hálftíu á sunnudagsmorguninn. Ég bjó svo til kaffi sem við hjónin smökkuðum til áður en ég fyllti á sérstaka ferða-hita-kaffibolla sem við tókum með okkur. Klukkan var komin fram yfir hádegi þegar við lögðum í hann. Við vorum ekki fyrr komin út í bíl en hringt var í Davíð vegna vinnunnar. Hann lofaði að kíkja á smá mál seinna um daginn (og við sem ætluðum á leik...). Eftir að hafa tekið bensín lá leiðin út úr bænum. Beyðum af leið við Bláfjallaafleggjara og svo inn á leiðina inn að Kleifarvatni. Þar stoppuðum við góða stund. Fórum reyndar lítið sem ekkert út úr bílnum (nema strákarnir því þeir fóru amk þrjár ferðir út og suður...) því það hellirigndi. Næsta stopp var við Fúlapoll en Davíð hafði einmitt lofað nafna sínum að fara þangað einhvern tímann aftur er við stoppuðum við þann poll í ágúst sl. Svo var ekið áfram áleiðis til Grindavíkur og þar í gegn og ekki stoppað aftur fyrr en hér fyrir utan heima. Þá var klukkan þrjú. Davíð sagðist myndu koma aftur upp úr hálffjögur og fara með mér á leikinn í Árbænum (Fylkir - Valur 1:2). Það teygðist nú eitthvað á þessum smáfundi og endirinn varð sá að við fórum ekkert á leikinn. Davíð fór svo aftur í vinnuna upp úr tíu um kvöldið og kom ekki heim fyrr en um sjö í gærmorgun.

Mætti á stjórnarfund um leið og ég skutlaði söngfuglinum mínum á kóræfingu í gær. Nú er lokatörnin hjá drengjunum, æfing á morgun aftur og aukaæfing á fimmtudag með Karlakór Reykjavíkur. Kórarnir syngja svo saman um fimm á annan í hvítasunnu en klukkan átta miðvikudagskvöldið 30. maí verða drengirnir með vortónleikana. Báðir þessir atburðir verða í Hallgrímskirkju og það kostar 1.000 kr. inn á vortónleikana. Helgina eftir hvítasunnu verða þeir svo eina nótt í Stykkishólmi og eftir það er loksins komið sumarfrí hjá drengjunum. Við í stjórninni fundum svo í vikunni eftir vorferðina til að undirbúa næsta vetur.

Rétt fyrir hálffimm í dag sktulaði ég þríburunum á næstsíðustu vetrar-frjálsíþróttaæfinguna. Fylgdist með Davíð Steini koma út á peysunni (semsagt ekki í yfirhöfn) en hafði ekki rænu á að senda strákinn inn eftir flíspeysu. Auðvitað var svo útiæfing. Hann var bara svo ljónheppinn (enda í ljóninu) að fá lánaða slíka peysu á æfingunni. Ég skrapp í fiskbúð áður en ég fór til norsku esperanto vinkonum minnar. Nú fer að styttast í esperanto kaffihúsaferðina okkar.

Á morgun mun ég skreppa á safnið og skila af mér amk þremur bókum. Skilafresturinn á ævisögu Kristjáns heitins Eldjárns rennur einmitt út á morgun.

- Ævisögulestri lokið -

Ég átti bara rúmlega hundrað blaðsíður eftir og ákvað að ljúka við að lesa bókina sem fyrst. Var að enda við að lesa síðustu 40 blaðsíðurnar. Bókin er vel skrifuð og samansett. Stundum skellti ég upp úr en undir lokin táraðist ég. Ég hefði ekki viljað missa af því að lesa þessa bók upp til agna.

- Föstudagur enn á ný -

Helgin er framundan, vikan að baki. Gærdagurinn heppnaðist vel. Við mæðgin vorum mætt í Hallgrímskirkju um hálffimm. Hálftíma síðar opnaði drengjakórinn tónleika kórsins frá Þrándheimum og söng þrjá kafla úr ákveðnu verki (alveg stolið úr mér í augnablikinu). Kór Þrándheimar var stofnaður fyrir 900 árum og syngja þeir í 4 röddum, "drengir" á öllum aldri, sennilega frá níu ára og vel upp úr. Eftir eins og hálftíma tónleika var boðið upp á hressingu í öðrum hliðarsalnum og þar söng norski kórinn þrjú mun léttari lög en voru á efnisskránni.

Annars var ég að koma heim af safninu. Varð að framlengja örfáum bókum, þar á meðal einni sem ég er búin að framlengja áður. Fékk fimm daga framlenginu á Ævisögu Kristáns Eldjárns sem Gylfi Gröndal skrifaði. Ég ætti alveg að hafa það. Auðvitað nældi ég mér í fleiri bækur og segi ég kannski frá þeim á þessum vettvangi síðar.

Góða helgi!

- Uppstigningardagur -

Það er ekki frí hjá öllum í dag. Davíð fór í vinnuna um ellefu í morgun. Hann ætlar samt að mæta á tónleika drengjakórs Þrándheims í Hallgrímskirkju klukkan fimm í dag. Drengjakór Reykjavíkur syngur nokkur lög með þeim og á eftir eru kaffiveitingar í boði foreldrafélagsins (þ.e. allir leggja í púkk og koma með eitthvað með sér).

Annars eru strákarnir ekki heima þessa stundina og ég er ekki búin að sjá þá síðan rúmlega sjö í gærkvöldi. Eftir kóræfingu sá ég að Oddur Smári hafði reynt að ná í mig. Hann náði í pabba sinn. Til stóð að gista hjá Degi vini þeirra og hafði verið ákveðið að gista n.k. föstudag. Eitthvað annað kom upp á og þeim var boðið að gista í nótt í staðinn. Þeir komu ekki einu sinni heim að sækja tannburstana sína. Oddur Smári hringdi í mig um hádegið og spurði hvenær þeir ættu að koma heim. Ég var hjá norsku esperanto vinkonu minni og sagði að þeir yrðu að koma heim í síðasta lagi um tvö. Davíð Steinn á eftir að læra og hann þarf að fara í sturtu og vera mættur upp í kirkjukjallara um hálffimm.

Ég er ein heima sem stendur en ég á von að tvíburunum fljótlega, amk í kringum tvöleytið. Hmm, hvernig væri að grípa aðeins í saumana....??? Það er góð hugmynd.

Verð samt fyrst að segja aðeins frá tveimur bókum sem ég hef nýlokið við að lesa. Útisetan eftir Guðrúnu Bergmann. Dulræn, seiðandi og mjög grípandi. Fjallar um stúlku sem er dóttur-dóttir seiðkarls. Hann fær boð um að hún eigi að þjálfast sem eftirmaður hans. Ég varð algerlega heilluð af þessari skáldsögu. Hin bókin er Felustaðurinn eftir Terezza Azzopardi. Yngsta systirin af sex segir söguna. Pabbinn er forfallinn spilafíkill og veðjar um allt milli himins og jarðar. Þegar von er á þeirri yngstu heldur hann að honum sé að fæðast sonur og er svo glaður að hann tapar aleigunni. Þegar Dolores er örfárra vikna er hún skilin ein eftir í eldhúsinu í augnablik. Það kviknar í, henni er bjargað en vinstri höndin er ónýt eftir og einnig brenndist stór hluti af höfðinu svo það vex ekki hár á hana. Þetta var svolítið sorgleg skáldsaga en það var eitthvað við hana sem hélt mér við efnið.

- Þeytingur út og suður -

Var komin heim upp úr tvö í gær. Ég átti hálft í hvoru von á einni frænku minni í heimsókn svo ég náði ekki að sofna neitt þótt ég fleygði mér um stund. Upp úr fjögur var kominn tími til að skutla strákunum í frjálsar. Dagur var ekki kominn tuttugu mínútur yfir svo við renndum við heima hjá honum. Þar var enginn heima. Ég ákvað að byrja á því að skutla tvíburunum. Fékk gemsanúmer mömmu Dags hjá Davíð en hún svaraði ekki heldur. En Dagur svaraði á endanum og ég skutlaðist eftir honum, hann var bara um tuttugu mínútum of seinn á æfingu.

Þegar ég hafði komið strákunum af mér rak ég eitt erindi fyrir foreldrafélag drengjakórsins. Síðan lá leið mín í fiskbúð. Ég var eiginlega ákveðin í að kaupa saltfisk en það breyttist í ýsulasanja. Úr fiskbúðinni fór ég í tvö bakarí (það var ekki til heilt heilhveitibrauð í því sem ég fór fyrst í) og endaði í Sunnubúðinni áður en ég kom heim. Þá var klukkan langt gengin í sex.

Ég hefði þurft að harðsjóða eins og átta stykki egg til að skipta niður í tvær brauðtertur en einhvernveginn hafði ég mig ekki í það. Strákarnir komu heim í mat upp úr sjö og voru svo úti til hálftíu. Davíð skrapp heim á milli átta og níu en fór svo aftur í vinnuna og var að vinna langt fram á nóttina, það er að verða mjög gömul saga. Sat með saumana mína fyrir framan skjáinn langt fram á kvöld.

Eftir kóræfingu í kvöld verð ég að útbúa þessar brauðtertur því drengjakórinn er að syngja nokkurlög með drengjakór Þrándheims á smá tónleikum um fimm á morgun og eftir sönginn verður boðið upp á ýmislegt góðgæti. Mín mun bretta upp ermarnar í kvöld.

þankagangur

hugsanir á fleygiferð

eins og heimurinn

í kring

hvernig er hægt

að hægja

á þessu öllu?

hugsanir í óreiðu

eins og umhverfið

í kringum mig

hvernig er best

að taka til

í þessu?

hugsanir og minningar

hönd í hönd

til að ylja sér við

í góðu tómi

það kann ég

- Úr einu í annað -

Jæja, þá eru kosningarnar afstaðnar, söngvakeppninni lokið, enski boltinn kominn í sumarfrí og íslenski fótboltinn farinn að rúlla. Minn maður var frekar fúll að það skyldi vera klippt á síðustu tölur í söngvakeppninni bara af því að það voru að koma fyrstu tölur í þingkosningunum. Hann vildi meina að sjónvarpið hefði tekið að sér að sýna frá söngvakepnninni og þar með talið atkvæðagreiðslunni og þá áttu þeir að klára útsendinguna þaðan áður en þeir skiptu yfir í kosningasjónvarpið. Hann var það fúll að hann skipti yfir á Stöð tvö og horfði á útsendinguna þeirra á meðan hann jafnaði sig. En okkur fannst RÚV með betri dagskrá og horfðum við á þá útsendingu á meðan við nenntum. Ég gafst upp um tvö en Davíð hélt áhorfi áfram til klukkan fjögur.

Þrátt fyrir að hafa farið í háttinn á undan svaf ég lengur út í gærmorgun. Mætti svo í messuundirbúning um hálfeitt. Það var létt messa því annar kór, Sönghópurinn Norðurljós (en Adda stjórnar honum líka og verður kórinn með tónleika í Óháðu kirkjunni n.k. sunnudag) var á staðnum sem söng eitt lag fyrir predikun, annað eftir predikun og svo eitt lag í staðinn fyrir eftirspilið. Í okkar kór vantaði bara þrjá en þeir voru allir út tenór og þar sem það var bara einn mættur var ákveðið að syngja skírnarsálminn einraddað. Þetta fannst bassanum frekar slappt og tóku upp á því að syngja sína laglínu í rödduðu útsetningunni. Það fór svo að hluti af altinum elti bassann. Ég held að þetta hafi ekki komið neitt að sök. Rétt áður en skíra átti barnið hurfu afinn og foreldrarnir með það inn á skrifstofu prestsins. Þau voru ekki komin fram aftur þegar við vorum búin að syngja fyrstu tvö erindin í skírnarsálminum og sr. Pétur var tilbúinn að skíra. Hann spurði alla viðstadda hvort nokkur væri óskírður.

Er heim kom kveikti ég á enska boltanum og horfði á seinni hálfleikinn í leik Man. Utd og West Ham. Við Davíð drifum okkur í Laugardalinn eftir þann leik og horfðum á Val og Fram. Rétt misstum af Valsmarkinu og komum súr heim með jaftefli "í vasanum". En svona er þetta bara og vonandi verður þetta til þess að okkar strákar í Landsbankadeildinni verði meira á tánum og nýti betur sín fær því þeir áttu amk að skora 2 önnur mörk í leiknum.

En hvernig líst ykkur á útkomu kosninganna? Ég verð að segja það að mér finnst þetta skrýtin skilaboð sem kjósendur eru að senda þingheimi. Fólk vill breytingar en samt ekki of miklar. Það verður spennandi að fylgjast með næstu daga.

- Aumur háls -

Um miðjan dag í gær ákvað ég að boða forföll á kóræfingu. Hálsinn var sár og aumur og ég vissi að ef ég myndi mæta þá myndi ég taka þátt í æfingunni og hugsanlega tefja fyrir batanum. Nokkru eftir að ég afboðaði mig kom sms frá formanni kórsins um að kóræfing félli niður og að mæting í kirkju næsta sunnudag væri klukkan hálfeitt. Þannig að ég missti ekki af kóræfingunni.

Skutlaði Davíð Steini á kóræfingu rétt fyrir fimm og hafði svo samband við Davíð. Hann var alveg til í að sækja drenginn rétt fyrir sjö svo ég var tilbúin með matinn þegar feðgarnir komu heim. Oddur Smári hringdi og bað um leyfi til að borða hjá bekkjarsystur sinni svo hann kom ekki heim fyrr en rúmlega átta. Þá átti minn drengur eftir að læra.

- Mega góður plokkari -

Áður en ég fór heim í gær kom ég við í verslun og fiskbúð. Var komin heim á slaginu klukkan þrjú. Sat um stund úti í bíl og hlustaði á Brodda Broddason segja fréttir klukkan fimm, eða það sagði hann sjálfur. Ég leit aftur og aftur á klukkuna til að fullvissa mig um að hún væri nú bara þrjú.

Oddur Smári kom heim rétt á eftir mér. Hann kvartaði um í maganum og það lagaðist ekkert þótt hann fengi sér eitthvað að borða. Hann var því eftir heima þegar ég skutlaði Davíð Steini og Degi í frjálsar. Eftir það skutl fór ég beint til norsku esperanto vinkonu minnar. Í síðustu viku gaf hún mér biblíuna á esperanto og hafði ég gleymt henni hjá henni. Ég setti hana strax niður í esperantopokann til að gleyma henni ekki aftur. Við lásum m.a. Faðir vorið á esperanto, en það er að finna í einni af kennslubókunum sem við eigum.

Úr ýsunni, sem ég keypti í fiskbúðinni, útbjó ég plokkfisk. Mér finnst samt svolítið skrýtið að búa til plokkfisk úr nýjum fiski en ekki afgöngum. Sauð upp á fiskinum, skar niður stóran lauk og mýkti í olíu á pönnu. Setti fiskinn út í og bætti við þremur dósum af osti með svörtum pipar. Með þessu bauð ég upp á kartöflur og rúgbrauð með smjöri eða kæfu. Plokkarinn var þrælgóður og ég er viss um að það er lauknum og piparostinum að þakka!

- Kórsöngur á Grand Hótel -

Ég slakaði á í svona hálftíma eftir að ég kom heim í gær. Svo sá ég til þess að Davíð Steinn klæddist kórbúningnum sínum og skutlaðist með hann á Grand Hótel. Þar var verið að halda upp á dag hjúkrunar og hafði verið óskað eftir að drengjakórinn mætti á svæðið og syngi 2-3 lög. Þrjátíu drengir mættu. Friðrik hitaði þá upp en svo þurftu þeir að bíða smávegis eftir að komast að. Þeir sungu þrjú lög og fengu mjög góðar móttökur. Eftir sönginn máttu þeir svo fara heim.

Davíð fór í vinnu seinni partinn á sunnudaginn og hann var enn að um sex í gær. Hann var ekki laus fyrr en um sjö leytið. Eftir Heros-þáttinn slökkti ég á sjónvarpinu og sagði Davíð að nú væri mál að fara að sofa. Ég þurfti að fara á fætur upp úr fimm í morgun þannig að þetta (klukkan tíu í gærkvöld) var mjög góður tími til að fara í háttinn. Ég vaknaði, útsofin, á undan klukkunni um fimm í morgun og er enn sprellhress.

- Ein af níu vöskum sjálfboðaliðum -

Ég var sótt næstum heim að dyrum um hálfníu í gærmorgun og var fjórða inn í bílinn. Sótt voru fimm í viðbót sem höfðu gefið kost á sér í þessa ferð. Leiðin lá austur fyrir fjall í annað sumarbústaðaland fyrirtækisins. Þar biðu okkar þrír bústaðir til að taka í gegn. Komum austur um hálfellefu og byrjuðum á að fá okkur kaffi. Svo skiptum við okkur niður í þrjá hópa. Í einum hópnum voru tveir sem sáu m.a. um að skipta um þrjár rúður í einum bústaðnum. Í öðrum hópnum voru þrír sem sáu um að þrífa stærsta bústaðinn og var ég í síðasta hópnum, sem taldi fjóra, og þrifum við hina tvo bústaðina. Gerðum matarhlé um eitt en þrifunum lauk um fimm. Þá dembdu flestir sér í heita pottinn og létu líða úr sér. Að lokum var grillað og borðað áður en haldið var heim á leið aftur. Þetta var sem sagt mjög öflugur hópur að verki. En það hefði verið betra að vera fleiri þá hefði t.d. verið hægt að dytta að fleiru utanhús eins og að bera á.

Þurfti að ræsa Davíð Stein um níu í morgun því hann var enn steinsofandi og átti að vera mættur í upphitun fyrir messu klukkutíma síðar. Það tókst alveg. Við hjónin og Oddur Smári mættum svo í kirkju rétt fyrir ellefu. Drengjakórinn, unglingakórinn og barnakór Austurbæjarskóla og Hallgrímskirkju sáu um messusönginn og tókst krökkunum virkilega vel upp. Á eftir fengu þau pizzu, gos, ís og helíum fylltar blöðrur. Nokkrir strákar náðu að gera gat á blöðrurnar án þess að sprengja þær, gleyptu loftið í sig og töluðu svo nokkur orð með furðulegri rödd, mjög fyndið. Þetta var annars síðasta messa drengjakórsins í vetur en það er nóg af verkefnum framundan hjá þeim áður en þeir fara sjálfir í sumarfrí. Meira um það smátt og smátt seinna.

orðapokinn

ég
fór á
orðaveiðar
en þau svifu í burtu
var með tóman poka
til að tína þau ofan í
eftir margar tilraunir
var pokinn galtómur

- Helgin nærri -

Davíð Steinn hringdi í mig um þrjú og var hann með grátstafinn í kverkunum. Hann hafði fengið slæman hnikk á bakið í leikfimi og fann mikið til. Pabbi hans skrapp heim, gaf honum verkjastillandi og setti heita og kalda bakstra á bakið til skiptis. Svo skutlaði hann og Oddi Smára og Degi í frjálsar. Davíð Steinn náði að sofna.

Annars ætlaði ég að segja frá svolitlu krúttlegu sem Davíð Steinn spurði mig um daginn. Ég var að minnast á eitthvað fólk sem minnti hann á tvíburavinina sem þeir eignuðust um tveggja ára aldurinn. Hann hafði orð á því að það væri orðið mjög langt síðan hann hafði hitt þau og spurði hvort ég og mamma þeirra værum ekki vinkonur ennþá? Þetta fékk mig til að slá á þráðinn. Náði sambandi í þriðju tilraun. Hin tvíburamamman var glöð að heyra í mér. Hún var reyndar svolítið upptekin en tók niður númerið mitt og ætlar að vera í sambandi mjög fljótlega. Við náðum ekkert að spjalla að ráði en það var samt eins og við hefðum verið að tala saman síðast í gær.

- Allt að komast á venjulegt skrið -

Þar sem Davíð var að vinna næstum út í eitt síðustu daga og strákarnir í bústað með afa sínum og ömmu þá lék ég lausum hala og notaði tímann eins og mér hentaði best hverju sinni. Ég las, saumaði út, horfði svolítið á imbann, skrapp til norsku esperanto vinkonu minnar tvisvar á þessu tímabili og sitthvað fleira.

Strákarnir komu ekki fyrr en um sex í gær og voru þeir mjög ánægðir með ferðina. Þeir höfðu gert margt og mikið með frænda sínum og föðurforeldrum þessa daga og upp úr átta í gær voru mínir farnir að geyspa hástöfum. Þeir fóru í háttinn um hálftíu og voru sofnaðir rétt seinna.

Valsstrákarnir í meistaraflokknum töpuðu úrslitaleiknum í Lengjubikarnum í framlengdum leik við FH í gær. En Liverpool sló Chelsea út í meistaradeildinni í framlengdum leik og vítaspyrnukeppni. Ég sá hvorugan leikinn en fylgdist með á textavarpinu.