- Útilega númer tvö -

Davíð sótti strákana á föstudagskvöldið. Þeir komu ekki í bæinn fyrr en um miðnættið. Á laugardagsmorguninn fórum við hjónin á fætur um tíu. Davíð fór beint í tölvuna að sinna verkefni. Strákarnir sváfu og sváfu. Klukkan var næstum orðin eitt þegar þeir vöknuðu. Það tók svo sinn tíma í að taka sig saman og undirbúa útilega þrátt fyrir að tjald og svefnpokar væru búnir að vera í bílnum síðan um síðustu helgi. Klukkan var því farin að halla í fjögur er við keyrðum út úr bænum. Keyrðum fyrir Hvalfjörðinn og fyrsta stopp var í Borgarfirðinum ca. 10 km. frá Borgarnesi þar sem tvíburahálfsystir mín á bústað. Við vorum búin að gera boð á undan okkur og fengum kaffi og með því er við mættum. Við grilluðum svo saman seinna um kvöldið og þáðum einn bolla til áður en ferðinni var haldið áfram. Um hálftólf komum við í Stykkishólm, tjölduðum og fórum beint í háttinn. Meiningin var að freista þess að fara í Suðureyjasiglingu morguninn eftir.

Á sunnudagsmorguninn voru allir vaknaðir um níu. Fengum okkur eitthvað að borða áður en við tókum dótið og tjaldið saman. Síðan voru tjaldsvæðaverðir leitaðir upp til að gera upp. Einhvern veginn voru þessir tveir tímar ekki nóg fyrir okkur og við sáum á eftir bátnum, hann var kominn nokkra metra frá bryggju, er við renndum að enda klukkan fimm mínútur yfir ellefu. Davíð Steinn fór í þessa siglingu með drengjakórnum í vor og hefði alveg verið til í að fara aftur. Að vísu var önnur ferð um hálfþrjú en við ákváðum að keyra frekar áfram. Við erum samt alveg ákveðin í að reyna að komast þessa ferð seinna í sumar. Strákarnir voru spenntir fyrir að komast í hvalaskoðunarferð en við keyrðum í gegnum alla staðina og fyrir nesið með tilheyrandi stoppum hér og þar. Síðasta stopp á Snæfellsnesinu var við Ölkeldu þar sem allir fengu sér vatn að smakka og Davíð Steinn fyllti á hálfs lítra flösku. Okkur fannst þetta öllum gott nema Oddi Smára.

Vorum í Borgarnesi um fjögur og fórum í sund í sól og 21 gráðu hita. Komum heim um sjö og tveim tímum seinna skutluðum við tvíburunum á Bakkann til föðurafa síns og ömmu. Þar verða þeir fram að næstu helgi en þá er líklega að við sækjum þá og leggjumst út aftur.

- Föstudagur -

Þótt ég sé lítið hrifin af því hversu hratt tíminn líður er ég ánægð með að það sé kominn föstudagur. Davíð hefur verið að vinna sólarhringum saman með svefntímann frá 1-5 tímum en í gærkvöld var hann þó kominn upp í rúm fyrir miðnætti og svaf heila átta tíma. Tvíburarnir

fóru með föðurbróður sínum á Bakkann seinni partinn á þriðjudaginn. Þar mega þeir vera í tvær vikur en við gerum ráð fyrir að sækja þá heim yfir helgina. Hver veit nema við leggjumst svo aðeins aftur út. Það er voðalega gott að hlaða batteríin úti á landi. En þetta kemur allt í ljós.

Við hjónin skruppum í þriggja ára afmæli seinni partinn í gær og kíktum við hjá tvíburahálfsystur minni á eftir. Stoppuðum ekki lengi því Davíð var svefnþurfi og úrvinda eftir vinnutörnina (sem vonandi er búin í bili).

Annars gengur lífið sinn vanagang. Les reyndar heldur minna, en alltaf eitthvað og tek í saumana mína nær daglega.

- Lagst út -

Við tókum til útilegudótið okkar um hádegið á laugardag. Tjald, svefnpokar, sængur og fleira. Fengum okkar að borða á leiðinni út úr bænum og svo fór Davíð í óvissuferð með okkur. Hann keyrði gegnum Mosfellsbæ, fór Þingvallaleið austur og keyrði svo Uxahryggjaleið að Húsafelli. Stutt frá Barnafossum voru tengdó og mágur minn og hans sonur búin að koma sér vel fyrir og voru þegar búin að gista eina nótt. Við settum upp tjaldið okkar nálægt og blönduðum svo geði við hina. Sameiginlegt grill var um kvöldið. Veðrið var yndislegt og voru allir á fótum framyfir miðnætti. Oddur Smári var kominn lang fyrstu á fætur í gærmorgun, fyrir hálfátta. Hann vildi sanna það að hann væri mesti morgun haninn. Veðrið hélt áfram að vera gott. Það komu reyndar örfáir dropar upp úr hádeginu en við tókum niður tjaldið skömmu síðar, alveg þurrt. Fórum í sund á Kleppjárnsreykjum með Tomma og Tedda og keyrðum svo Hvalfjörðinn heim.

- Laugardagsmorgun -

Ég er ein vöknuð af okkur öllum. Já, strákarnir eru komnir heim í bili. Skipti um bíl við manninn minn um sjö í gær. Skildi Fíatinn og manninn eftir í vinnunni hans og skutlaðist austur eftir strákunum. Stoppaði hjá pabba og mömmu til klukkan að ganga ellefu. Tvíburarnir eru búnir að vera duglegir að hjálpa afa sínum og ömmu þessar tæpu tvær vikur sem þeir voru hjá þeim. M.a. gróðursettu þeir yfir 500 trjáplöntur á landareign pabba á Heiði. Pabbi lenti reyndar inn á sjúkrahúsi eina nótt í vikunni. Hann fór í þrekpróf vegna hjartans og var lagður inn og blásinn með það sama. Það stoppaði hann samt ekki í að klára að planta í gær því hann hafði svo góða vinnumenn með sér.

Helga, Ingvi og stelpurnar komu austur í gærkvöld. Hulda verður eftir hjá afa sínum og ömmu og verður þar næstu tvær vikurnar ásamt jafnöldru sinni sem ég passaði á morgnana (ásamt Huldu) veturinn 2001-2002.

Þegar við mæðgin komum í bæinn um hálftólf komum við við á skrifstofu Davíðs svo þeir feðgar gætu hist aðeins. Maðurinn minn skilaði sér svo heim einhvern tímann í nótt en hann var ekki kominn þegar ég fór að sofa um hálftvö.

- Furðulegur gestur -

Þegar ég kom heim eftir vinnu og tveggja tíma frænkuvakt í gær spurði nágranninn minn af neðri hæðinni hvort ég ætti hænuna í garðinu. Ég kannaðist ekki við það og fannst þetta hálf ótrúlegt. En ég sá hænuna með mínum eigin augum.

- Markaregn í Laugardalnum -

Já, ég fór á völlinn í gærkvöldi og skemmti mér vel. Valsstrákarnir voru einfaldlega ákveðnari heldur en gestirnir og ég var ánægð með að Gummi Ben. skuli hafa opnað markareikninginn sinn en hann skoraði fyrsta og síðasta markið í 4:1 sigri á FH. Það var ekki að sjá á leik gestanna að þeir væru ósigraðir og efstir í deildinni eftir 7 umferðir en allir eiga sína slæmu daga. Ég veit ekki hvort að hluti af þessu megi skrifa á fjarveru Arnars Gunnlaugssonar en hann var ekki með í gærkvöldi. Ég er bara ánægð með sigurinn og hananú.

- Bríet 3 ára -

Yngri systurdóttir mín á afmæli í dag. Mikið hvað tíminn líður eitthvað fljótt. Ég var að tala við hana í síma um daginn. Fyrst spurði hún: -"Hver ert sú?" Þegar hún vissi hver ég var þá fór hún að "sýna" mér meiddi sem hún var með. Ég spurði hvort ég ætti að kyssa á meiddið og fékk að gera það. Ég man eftir strákunum á þessum aldri. Þeir gerðu það sama, "sýndu" þeim sem var í símtólinu eitt og annað í kringum þá eða á þeim sjálfum.

- Fimmtudagur -

Vá, hvert fóru dagarnir, vikan er bara alveg að verða búin??? Í gærkvöldi var síðasta kóræfing fyrir sumarfrí. Hin fræga gúllasmessa verður svo klukkan ellefu á sunnudaginn kemur. Það er greinilega hlaupinn einhver sumarfílingur í mannskapinn því þetta var fámennasta kóræfingin sem Adda kórstjóri hefur stjórnað í vetur. Sennilega mæta þó fleiri á sunnudaginn, en við vorum ekki nema sjö (3 í sópran, 1 í alt, 1 í tenór og 2 í bassa). Við munum samt klóra okkur vel fram úr messunni. Verst er að ekki verður hægt að syngja neitt í röddum en við ætlum að syngja keðjusöng undir altarisgöngunni.

Við Davíð skruppum á Skagann í fyrrakvöld til að fylgjast með ÍA - Val í blíðskaparveðri. Ég man bara ekki eftir að hafa verið á Akranesi í svona mildu og góðu veðri. En kannski er það bara af því að ég er nú ekki þar á hverjum degi, heldur ca. svona einu sinni á ári. Mér fannst Valsmenn vera miklu betri framan af en í heildina fengu þeir 18 hornspyrnur og það kom nákvæmlega ekkert út úr þeim (kannski smá hætta á ferðum einu sinni) en Skagamenn nýttu aðra af tveimur hornspyrnum sínum. Svo fengu þeir gefins vítaspyrnu en það var ekki dæmd hendi á þá (og ég sá Skagamenn setja hönd í bolta amk þrisvar sinnum og ekkert dæmt). En annars er gott að vera búin að taka út tapið eða þannig, fyrsta tap strákanna í rúmt ár.

Svo er hugsanlegt að ég bregði mér á landsleik í kvöld. Gæti samt verið áhætta ef ég yrði nú hás...

- Mánudagur -

Ég er að myndast við að koma heimilinu í betra horf og er allavega byrjuð og búin að gera eitthvað. Málið er að setja sér raunhæf markmið miðað við tíma og önnur störf og svo líka að byrja, "Hálfnað verk þá hafið er!"

Skruppum aðeins í bæinn í gær áður en við renndum austur með strákana en tvíburarnir verða á Hellu næstu tvær vikurnar. Þeir koma reyndar aðeins í bæinn um næstu helgi því Bríet er að verða þriggja ára á laugardaginn. Veðrið lék við landann í gær. Samt fannst mér ekki vera mjög margt um manninn í miðbænum. Það voru samt svona mannhrúgur hér og þar. Þegar við keyrðum austur mættum við alveg helling af bílum. Rétt austan við Selfoss var lögreglan að fylgjast með umferðinni, því miður fyrir Davíð því hann ók heldur greitt og á nú von á allt að 30 þúsund kr. sekt fljótlega. Pabbi sá svo um að ég þyrfti að keyra til baka því hann bað manninn minn um að grilla og bauð honum upp á bjór í leiðinni.

En svei mér þá ef ég er ekki strax farin að telja dagana niður í aðalfríið mitt þótt ég hafi komið vel endurnærð eftir sl. viku. Fimm vikur ( 24 virkir dagar)...

- Megagóð sumarfrísvika -

Það var slakað á, slappað af og hvílt sig vel á eftir. Föstudaginn 8. júní fórum við fjölskyldan út úr bænum á sjöunda tímanum. Ferðinni var heitið austur í Árnessýslu, í land Efri-Reykja, stutt frá Laugarvatni. Þar hreiðruðum við okkur niður í sumarbústað. Við hreyfðum okkur ekki fyrsta sólarhringinn, höfðum verslað smávegis á leiðinni úr bænum og það dugði fram á sunnudag. Þá var skroppið í verslunarferð á Laugarvatn. Þegar búið var að ganga frá vörunum ákváðum við að skella okkur að Gullfossi. Þangað er alltaf jafn gaman að koma.

Mánudagurinn var heitasti dagurinn og fór hitinn yfir 25 gráður þegar mest var, mig minnir að mælirinn hafi meira að segja sýn rúmlega 27. Það var of heitt að dvelja of mikið í pottinum og í raun var eiginlega ekki hægt að vera of lengi úti. Ég náði nú samt að brenna.

Annars fór vikan í lestur, útsaum, krossgátuþrautir, spil, sjónvarpsgláp og svefn. Við grilluðum upp á hvern einasta dag og stundum tvisvar. Við vorum alveg tilbúin að taka á móti gestum og vorum með utan á sængur fyrir sex auka. En það komu engir gestir fyrr en seinni partinn á fimmtudag að pabbi og mamma kíktu inn og grilluðu með okkur. Þau fóru svo aftur um kvöldið þegar amman var búin að spila alveg helling við dóttursynina. Fyrr um daginn fór rafmagnið af bústaðnum í nokkurn tíma. Við vissum ekki að því fyrr en bræðurnir ætluðu að rista sér brauð og ekkert gerðist, ekki heldur eftir að brauðristinni hafði verið stungið í samband. Við þetta rafmagnsleysi tæmdist heiti potturinn.

Í gærmorgun var ræs um og upp úr níu. Allir hjálpuðust að við að taka saman, og ganga frá bústaðnum eins og við vildum koma að honum. Við höfðum tekið við bústaðnum alveg þokkalegum, lítið hægt að kvarta, nema helst að heiti potturinn hafði ekki verið þrifinn. Amk ekki nógu vel. Lokuðum á eftir okkur á slaginu tólf. Fengum okkur að borða á grillstaðnum á Laugarvatni. Svo kíktum við í heimsókn til mömmu tvíburahálfsystur minnar.

Um fimm í gær fórum við svo með strákana á Köngurlóarmanninn 3 og skemmtum okkur öll jafn vel.

- Veðurblíða -

Bekkurinn hans Davíðs Steins og foreldrar hittust á Miklatúni seinni partinn í gær og grilluðu saman. Oddur Smári fékk að vera með og fóru bræðurnir á hjólum og hittu pabba sinn á svæðinu. Ég var að sinna heimaverkefnum og undirbúningi. Það voru kjöraðstæður og veðrið lék við hópinn.

Fyrr um daginn fóru bræðurnir og létu klippa sig. Ég hafði skilið eftir 1900 kr. handa hvorum. Oddur Smári fékk sér sumarklippingu, brodda og skildi bara skottið eftir. Fyrir það borgaði hann 1250 kr. Davíð Steinn fékk sér bara venjulega klippingu og það var aðeins dýrara eða 1600 kr. Það er nú annars meiri munurinn að geta bara látið þá fá pening fyrir klippingu og sent þá eina.

Davíð kom og sótti mig um hálfátta. Við komum við í Hlíðablóm sem er nýflutt í Skipholt 70 og sóttum tvær gjafir úr skreytingu. Gjafirnar voru handa tveimur kórfélögum, annar varð sextugur í febrúar og hinn verður sjötugur eftir 16 daga. Inn í kortin þeirra setti ég ferskeytlur sem mér tókst að smíða en þær má líka sjá á ljóðavefnum mínum. Leiðin lá svo í heimahús við Háaleitisbraut þar sem haldið var kór-grillpartý með mökum. Kristinn las upp pistilinn að venju, húsráðandi var líka með pistil, strákarnir voru með frábær söng-skemmtiatriði og svo afhentum við formaður og gjaldkeri kórsins gjafirnar og mæltumst til þess að kortin yrðu opnuð og lesin. Á eftir var fjöldasöngur. Eitthvað átti að reyna að hafa "ædol-keppni" en hún var amk ekki byrjuð þegar við Davíð kvöddum um ellefu. Hann skutlaði mér heim en fór svo á skrifstofuna og vann til fjögur. Ég átti eiginlega að drífa mig í bælið því ég var á sexvaktinni í morgun. Klukkan var samt næstum miðnætti þegar ég fór loksins inn í rúm og þá las ég amk í hálftíma. Mér tókst nú samt að vakna þokkalega hress korter yfir fimm í morgun. Þá er bara spurningin hvernig maður verður þegar fer að líða á daginn.

Framundan er smá frí og það er mjög líklegt að ég gefi mér ekki neinn tíma í bloggskrif alveg á næstunni, verð örugglega ekki í netsambandi megnið af vikunni.

Farið vel með ykkur og njótið veðurblíðunnar.

- Lestur er bestur -

Ég verð endilega að benda á bókina Pósthólf dauðans eftir Kristinn R Ólafsson. Hún hélt mér við efnið. Ég gat reyndar ekki lesið hana alveg í einum grænum en ég gat varla lagt hana frá mér þegar tíminn var hlaupinn og ég þurfti að sinna öðrum verkefnum eða fara að sofa í hausinn á mér. Í gærkvöldi fór ég heldur seint upp í en ákvað samt aðeins að kíkja í bókina Lífskraftur á landi og sjó eftir Braga Þórðarson. Þar er hann að segja frá athafnafólki. Ég gleymdi mér alveg við lesturinn las um Þórð Guðjónsson og svo litlu systur Steins Steinars en hún var fyrsta konan til að lesa Passíusálma Hallgríms Péturssonar í útvarpið. Allt í einu sá ég að klukkan var alveg að verða eitt svo ég lagði bókina treglega frá mér, slökkti ljósið og fór að sofa. Davíð var að vinna og hafði lofað að vinna ekki alla nóttina. Hann kom ekki heim fyrr en um sex í morgun.

Annars var kóræfing í gærkvöldi og fyrsta hálftímann voru mættir fleiri menn en konur, en það jafnaði sig svo út þegar 4. sópranröddin mætti á svæðið. Við vorum 3 í altinum og strákarnir skiptust í 3 bassa og 4 tenóra. Æft var fyrir síðustu tvær messurnar, göngumessu n.k. laugardagsmorgun og gúllasmessu sem verður klukkan 11 f.h. þann 24. júní n.k. Ég verð, aldrei þessu vant, ekki með í næstu messu en ég ætla ekki að missa af gúllasmessunni.

- Næsta helgi nálgast eins og óðfluga -

Það er kóræfing í kvöld, næstsíðasta æfing fyrir sumarfrí en það eru engar messur í júlí. Næsta æfing verður svo eftir hálfan mánuð en þá æfum við fyrir gúllasmessuna 24. júní.

Vinur tvíburanna "þríburinn" Dagur fékk að gista hjá þeim í nótt. Strákarnir sofnuðu frekar seint en þeir sváfu líka út í morgun og þegar ég hringdi og tékkaði á þeim um hálftólf voru þeir að fara að fá sér morgunmat. Þeir eru annars ekki heima í augnablikinu. Ég er að fara á stjórnarfund um fimm, síðasti fundur vorsins, uppgjör og aðeins horft framávið með kórstjóra.

- Rétt eða rangt mynsturtákn -

Ég hamast við að sauma bláa engilinn, þegar ég kem því við. Það eru margir bláir litir í kjólnum en í síðustu viku ákvað ég að sauma fæturnar á englinum. Yst á fótunum sýndist mér munstrið vera v. Mér fannst það hálfskrítið því v er fyrir ljósgrænan. Engu að síður saumaði ég þetta með græna litnum. Á sunnudaginn skruppum við Oddur Smári til Lilju vinkonu. Ég var með saumið með mér og saman grúfðum við okkur yfir munstrið. Þá kom í ljós að það sem ég hélt að væri v var þríhyrningur. Ég mátti því rekja upp græna litinn og breyta yfir í dökk-ferskju litaðan. Það gekk nú bara vel fyrir sig.

Í gærkvöldi skrapp ég til tvíburahálfsystur minnar. Til stóð að fara í smá göngutúr áður en við tækjum upp handavinnuna. Endirinn varð sá að við fórum beint að sauma. Látum bleytuna vera en rokið var ekkert upplífgandi. Ég gat því saumað alveg helling í gærkvöldið yfir kaffi og notalegu spjalli.

Það voru skólaslit í Hlíðaskóla í dag og ég fékk að skreppa og vera viðstödd þegar 5. og 6. bekkir voru inni á sal að taka á móti vitnisburði sínum. Bræðurnir fengu virkilega flottar einkunnir og góðan vitnisburð. Báðir höfðu þeir bætt sig síðan í janúar. Davíð Steinn er með meðaleinkunnina 8,83 þrátt fyrir að vera með eina einkunn upp á 6,5 og Oddur Smári er með meðaleinkunnina 8,735 (8,74) þrátt fyrir 10 í bæði málfræði og ensku. Svo eru þeir báðir með slatta af níum og 9,5. Ég er semsagt að springa úr stolti núna. Þeir bræður eru nú komnir í sumarfrí og höfðu það notalegt heima í dag. Að vísu var "tölvulaus" dagur í dag en þeir fengu að horfa á dvd-myndir. Svo er spurning hvernig maður umbunar piltunum fyrir góða ástundun og frábærar einkunnir?

- Allir út og suður um nýliðna helgi -

Ég tók þátt í sjálfboðavinnu á laugardaginn. Davíð skutlaði mér að brottfarastað rúmlega átta um morguninn. 17 höfðu skráð sig í ferðina en einn komst svo ekki með. Við vorum komin á "vinnustaðinn" rétt upp úr klukkan tíu. Byrjað var á að fá sér kaffi áður en skipt var liði. Það voru tvö innilið og tvö útilið. Inniliðin tóku til, viðruðu og þrifu, annað útiliðið skipti um nokkrar rúður en hitt útiliðið fór í skógarhögg og gróðursettu líka nokkrar trjáplöntur í sár eftir e-r framkvæmdir. Við vorum það mörg að við þurftum ekki að vinna alveg á hundarðinu. Ég hætti reyndar vinnu fyrir fjögur (var búin með mitt verk) og horfði á landsleikinn. Um hálfsex var svo sest að borðum og snætt grilluð lambalæri með meðlæti og drukkið hvítt, rautt, bjór eða gos með.

Klukkan tíu á laugardagsmorguninn skutlaði Davíð nafna sínum upp að Hallgrímskirkju þaðan sem drengjakórinn lagði upp í ferð á Snæfellsnes. Strákarnir og fylgifiskar fóru í Stykkishólm og fengu aðgang og aðstöðu við grunnskólann. Klukkan fjögur voru þeir svo með sameiginlega tónleika með tónlistaskólanum þarna. Davíð Steinn hitti fyrrum bekkjarfélaga sinn úr Ísaksskóla á tónleikunum. Um kvöldið borðaði hópurinn í Narfeyrarstofu. Morguninn eftir fóru þeir í tveggja tíma siglingu um Breiðafjörð, sáu margt og mikið og höfðu virkilega gaman af. Eftir siglinguna kvöddu þeir Hólminn og fóru til Ólafsvíkur þar sem þeir sungu fyrir eldri borgara á elliheimilinu. Davíð sótti strákinn um sjö í gærkvöld á sama stað og hann fór með hann morguninn áður.

Bekkurinn hans Odds Smára og foreldrar höfðu mælt sér mót við Hlíðaskóla um ellefu og ætluðu að hjóla upp í Árbær og fara í sund þar. Oddur hjólaði af stað og var með í uþb klukkutíma en þá gafst minn upp og hringdi í pabba sinn. Tel strákinn reyndar góðan að hafa þó farið af stað en hann hefur ekki hjólað mjög mikið í vor og er því ekki í neinu sérstöku formi. Davíð sótti strákinn, stakk hjólinu í skottið og svo héldu þeir feðgar förinni áfram upp í Árbæ.

- Nýr mánuður -

Nú fer að styttast í sumarfrí. Að vísu ætla ég bara að taka eina viku til að byrja með en hinar fjórar ekki fyrr en seinni partinn í júlí og fram í ágúst. Skólaslitin hjá strákunum eru n.k. þriðjudag og þá verða þeir hálfnaðir með grunnskólann, búnir með fimm bekki og eiga eftir aðra fimm bekki.

Í gær var aukaæfing hjá drengjakórnum og til stóð að taka upp þrjú síðustu lögin sem fara á diskinn. Tæpum tíu mínútum eftir að ég skutlaði Davíð Steini sendi hann mér sms; Komdu að sækja mig get ekki verið með:-(:-(. Strákurinn var með þrálátan hósta sem hann réði ekkert við svo því fór sem fór.

Ég mældi drenginn í morgun og var hann með örfáar kommur. Vondandi verður hann ekki veikur því drengjakórinn er að fara í ferðalag um helgina. Hann fór amk í skólann í morgunn en skólinn er bara til hádegis þessa dagana. Ég hringdi svo í kappann um hádegisbil og hvatti hann til að leggja sig. Eftir vinnu í dag fór ég fyrst að láta snoða mig og þegar ég kom heim tók ég eftir því að söngfuglinn minn var í náttfötunum. Hann sagði að sér þætti betra að sofa í náttfötunum og svo hefur hann líklega ekki nennt að klæða sig aftur.

Framundan er enn ein helgin en það er svo stutt síðan síðasta helgi var og hét. Farið vel með ykkur og njótið lífsins.

- Flottir drengir með góða tónleika -

Það mættu amk 220 manns til að hlusta á drengina í gærkvöldi og þeir sungu sig inn í hug og hjörtu allra held ég að mér sé óhætt að segja. Þeir sungu m.a. nokkra kafla úr verkinu Lífið og ljósið eftir Hjálmar H. Ragnarsson, það sem þeir sungu með karlakórnum á mánudaginn var. Tíminn var fjótur að líða og allt í einu voru tónleikarnir búnir, samt var örstutt hlé. Í lokin var strákunum fagnað svo vel að þeir sungu fyrir okkur aftur eitt lagið á efnisskránni: Amigos para sempre.

Davíð fór aftur í vinnuna eftir tónleikana og tvíburarnir strax í háttinn. Ég fór ekki inn í rúm fyrr en um ellefu leytið og þá til að lesa: Síðustu fréttir eftir Arthur Hailay. Ég hef lesið þessa bók einhvern tímann áður (og allar hinar;Bankahneykslið, Bílaborgin, Gullna farið, Hótel, Skammhlaup, Sterk lyf). Ég var svo spennt í lestrinum að ég var enn að lesa upp úr klukkan hálfeitt þegar ég heyrði hálföskrað "mamma", það var Davíð Steinn sem vaknaði upp af einhverri martröð. Endirinn varð sá að ég leyfði honum að koma upp í til mín og hann þurfti ekki að færa sig í sitt rúm aftur fyrr en pabbi hans kom heim um sex í morgun. Sennilega hefur þetta bara verið spennufall og ofþreyta hjá drengum því hann var eldhress í morgun.

- TÓNLEIKAR DRENGJAKÓRS REYKJAVÍKUR -

VERÐA haldnir í Hallgrímskirkju í kvöld klukkan átta. Aðgangseyrir kr. 1.000.

Hvet alla til að mæta og njóta þessara björtu og fallegu radda í ca klst. Sjáumst!

- Ljóðavefur -

Ég lét verða af því í gær að afrita öll ljóð og vísur sem ég hef birt á þessu bloggi mínu og setja saman í sér safn. Athugið að ég afritaði þau yfir en uppsetningin hélst samt ekki eins. Njótið vel þið sem viljið. Ég veit ekki alveg hvort ég mun setja ný ljóð beint á ljóðavefinn. Það verður samt að teljast mjög líklegt. Um að gera að nota "rétta" umhverfið.

- Ni parolis nur esperanto -

Jes, ég var var mætt til norsku esperanto vinkonu minnar um ellefu á laugardaginn. Til stóð að æfa sig fyrir kaffihúsaferð þar sem við myndum eingöngu tala saman á esperanto. Og á laugardaginn töluðum við því bara esperanto þann rúma klukkutíma sem ég var hjá henni. Tvisvar eða þrisvar brá ég reyndar ensku fyrir mig en ég sagði aðeins tvö orð á íslensku allan tímann; -"Æ, æ"! Inger bauð mér upp á koníaksstaup með kaffinu og ég er ekki frá því að það hafi liðkað málbeinið aðeins. Við vorum með orðabækur við hendina og komumst að því að líklega verðum við að hafa þær með á kaffihúsið. Annars fannst okkur þetta ganga bara vel!

Seinni partinn á laugardaginn skrapp ég í Krónuna að versla. Þar rakst ég bókstaflega á eina frænku mína og við þekktum hvor aðra á sama sekúndubrotinu. Þetta var skemmtilegur árekstur. Á leiðinni úr versluninni hitti ég svo einn frænda minn.

Í gærmorgun var ég mætt upp í kirkju um tíu. Það vantaði fimm í kórinn (1 alt, 1, tenór, 1 bassa og 2 í sópran) en við vorum 12 sem sungum messuna klukkan ellefu. Það gekk allt ljómandi vel fyrir sig. Nú eru bara tvær kóræfingar og tvær messur eftir fram að kórsumarfríi. Ég mun reyndar ekki mæta í göngumessuna sem verður 9. júní n.k. en æfingunum og gúllasmessunni sleppi ég ekki.

Um tvö í gær lögðum við fjölskyldan af stað í bíltúr upp í Borgarfjörð. Keyrðum Hvalfjörðinn og komum við í bensínsjoppu í Borgarnesi til að fylla á bílinn og kaupa eitthvað til að setja á grill um kvöldið. Svo héldum við ferðinni áfram en ca 10 kílómetrum frá Borgarnesi eiga tvíburahálfsystir mín og hennar maður mjög svo kósí sumarbústað. Foreldrar hennar voru í heimsókn. Strákarnir fóru fljótlega að leika við tveggja og hálfsárs dóttur tvíburahálfsystur minnar og löbbuðum með henni um nágrenni bústaðarins. Dagurinn leið hratt. Hitinn var nægur á tímabili til að setjast út á pall. Um kvöldið var grillað og borðað saman. Frábær dagur, afslappandi og mjög skemmtilegur. Okkur var ítrekað boðið að gista en við töldum okkur ekki hafa tíma í það þar sem Davíð ætlaði að vinna í dag og svo er söngfuglinn að fara að syngja með DKR og KR (drengja- og karlakór Reykjavíkur) í Hallgrímskirkju núna klukkan fimm seinni partinn.

- Lokaheimsóknin -

Ég hugsaði ekki út í að segja frá því að ég fór með Davíð Stein til tannfræðinsins í eftirskoðun í gærmorgun. Við fengum gefins myndir af munni hans og tönnum fyrir og eftir góminn, og þvílíkur munur. Vinstra meginn, framan frá séð, var allt í lagi en hægra meginn var tvöfalt krossbit. Núna er þetta allt orðið jafnt og flott.

Oddur Smári hringdi í mig í gemsann um tvö í gær. Það var tilviljun að ég heyrði í símanum því ég hafði gleymt að taka hann upp úr töskunni. En á svipuðum tíma og strákurinn hringdi þurfti ég að ná í svolítið í töskuna. Stráksi byrjaði á því að spyrja hversvegna ég hefði verið svona lengi að svara. En svo spurði hann hvort hann mætti gista heima hjá vini um nóttina. Ég sagði að það væri í lagi ef mamma hans segði já. "-Hennar!" sagði þá Oddur Smári, "-Ég kem heim um sjö í síðustu máltíðina og sæki tannburstann minn ef ég má gista..." Þessi tvö og reyndar þrjú önnur (Davíð Steinn er þar á meðal annað hvort sem söngvari eða bakrödd) eru að hugsa um að stofna hljómsveit saman. Þau vinirnir komu bæði fyrir sex og fékk hún að borða hjá okkur. Ég var með bygggrjón og ommilettu (eggjaköku) með grænmeti og afgang af soðinni ýsu. Bekkjarsystir og vinkona Odds byrjaði á að tilkynna að hún borðaði yfirleitt ekki mikið á kvöldið. Sennilega vildi hún hafa vaðið fyrir neðan sig ef henni fyndist maturinn ekki góður. Hún borðaði mest af því sem henni var skammtað á diskinn af ommilettunni en svo var hún svo hrifin af bygggrjónunum (sem hún kallaði reyndar baunir) að hún fékk sér aftur og aftur á diskinn uns ekkert var eftir í skálinni. Strax eftir matinn kvöddu vinirnir og fóru heim til hennar með einn tannbursta með í för.

- Enn ein vikan næstum liðin -

Á meðan Davíð Steinn var á aukaæfingu og að syngja beint í Kastljósinu fórum við hin í Laugardalinn til að fylgjast með leik Vals og KR 2:1. Ég ætlaði mér að spara röddina þar sem það er stutt í næstu messu en stemmingin var góð og ég gleymdi mér alveg. Þannig að ég er svolítið rám í dag. Ég hef morgundaginn til að jafna mig.


Í fyrradag skilaði ég af mér þremur bókum. Safnið í Grófinni var lokað vegna breytinga en það var móttökuhilla í anddyrinu sem á stóð: Ykkur er velkomið að skila hér. Ég nýtti mér það því ævisaga Kristjáns Eldjárns heitins var á síðasta auka-skila-degi. Mér leist ekkert á blikuna þegar ég skráði mig inn í Gegni í gærmorgun og sá að það var óbreytt staðan á útlánunum (20 í láni en átti að vera 17). Ég tók ekki sjensinn á því að þetta mundi ekki breytast í einhverja daga og að þá fengi ég sekt vegna ævisögunnar svo ég sendi fyrirspurn á safnið. Fyrirspurninni var ekki svarað en seinni partinn var búið að laga útlánsstöðuna mína. Hluti af þessum 17 bókum eru bækur sem ég tók fyrir strákana, 5 stykki. Annars er ég að spá í að bjóða þeim upp á að eignast sitt eigið bókasafnsskírteini. Þeir gætu farið í Kringlusafnið því þeir eru hvort sem er að skreppa í Kringluna öðru hvoru.

Ég er langt komin með tvær ólíkar en spennandi bækur. Fylgsnið eftir Dean R. Koontz og Ellefu mínútur eftir Paulo Coelho. Ætla ekkert að skrifa nánar um þær en mæli eindregið með þeim.

Hafið það gott nú um komandi hvítasunnuhelgi.

Heilræði í bland við bull

Glaðlega geislarnir dönsuðu saman
gullinbrúnir og heitir.
Að horfa á var virkilega gaman
vorið yl í kroppinn veitir.

Nú birtir meira dag frá degi
dimman er varla til.
Takið eftir því sem ég segi
svo allt fari eins og ég vil.

Alltaf er gott að meta lífið
og brosa oft og mikið.
Munnvikin allir upp hífið
ekki frá neinu vikið.

Verum jákvæð verum kát
verum mikið saman.
Setjum lífið í mót og mát
meira þó að framan.

Þetta er orðið hið mesta bull
og best er því að hætta núna.
Ekki er ég neitt að ráði full
ætla að leika fullkomnu frúna.

- Ný ríkisstjórn -

Ó, nei ég ætla ekki að tjá mig um kosningar, stjórnmál eða neitt í þeim moll. Kannski á ég það samt einhvern tímann eftir en sem stendur sé ég það nú ekki fyrir mér. Ó, nei, ó nei mér ég fann bara ekki skárri titil í þetta sinn...

Þegar ég var hjá norsku esperantovinkonu minni hringdi ein frænka mín í mig. Hún sagðist hafa verið að reyna að ná í mig í nokkurn tíma en þó ekki hringt í gemsann fyrr. Málið var að hún var með fatasendingu af yngri stráknum sínum (sem er á sextánda ári) til strákanna minn. Hún hringdi aftur til mín um kvöldið og spurði hvort hún mætti skjótast með þetta. Það var velkomið. Hluti af þessari fatasendingu voru náttföt, en annar tvíburinn er einmitt nýbyrjaður að sofa aftur í svoleiðis og hefur undanfarin kvöld farið í rúmið í heldur litlum náttfötum. Minn varð því mjög glaður með á fá öll þessi náttföt. Frænka mín stoppaði í góðan klukkutíma og áttum við skemmtilegt spjall saman.

Kvöldið var fljótt að líða. Ætlaði mér að reyna að fara frekar snemma í háttinn því ég átti morgunvaktina í morgun. En klukkan náði á slá hálftólf áður en ég fór upp í og þá las ég nokkrar blaðsíður áður en ég slökkti ljósið, bað bænirnar mínar og lagði af stað í draumalandið...

- Smá hér og smá þar -

Hef ég skrifað um það áður, hversu fljótur tíminn er að líða? Ó, já alveg örugglega. Samt verð ég alltaf jafn hissa þegar dagarnir vikan er komin á skrið og dagarnir þjóta áfram. Mér er fullkunnugt um að það borgar sig ekki að reyna að halda í við tímann. Stundum verð ég þó að reyna bara til að komast að því að það er einfaldlega ekki hægt og maður missir þá bara af einhverju í staðinn.

Á föstudaginn bað ég Davíð um að vinna nú ekki alla helgina. Hann fór um ellefu á laugadaginn og vann til sjö. Það kvöld talaði hann um að efna loforð sem við nafna sinn á sunnudeginum. Öll sváfum við til klukkan hálftíu á sunnudagsmorguninn. Ég bjó svo til kaffi sem við hjónin smökkuðum til áður en ég fyllti á sérstaka ferða-hita-kaffibolla sem við tókum með okkur. Klukkan var komin fram yfir hádegi þegar við lögðum í hann. Við vorum ekki fyrr komin út í bíl en hringt var í Davíð vegna vinnunnar. Hann lofaði að kíkja á smá mál seinna um daginn (og við sem ætluðum á leik...). Eftir að hafa tekið bensín lá leiðin út úr bænum. Beyðum af leið við Bláfjallaafleggjara og svo inn á leiðina inn að Kleifarvatni. Þar stoppuðum við góða stund. Fórum reyndar lítið sem ekkert út úr bílnum (nema strákarnir því þeir fóru amk þrjár ferðir út og suður...) því það hellirigndi. Næsta stopp var við Fúlapoll en Davíð hafði einmitt lofað nafna sínum að fara þangað einhvern tímann aftur er við stoppuðum við þann poll í ágúst sl. Svo var ekið áfram áleiðis til Grindavíkur og þar í gegn og ekki stoppað aftur fyrr en hér fyrir utan heima. Þá var klukkan þrjú. Davíð sagðist myndu koma aftur upp úr hálffjögur og fara með mér á leikinn í Árbænum (Fylkir - Valur 1:2). Það teygðist nú eitthvað á þessum smáfundi og endirinn varð sá að við fórum ekkert á leikinn. Davíð fór svo aftur í vinnuna upp úr tíu um kvöldið og kom ekki heim fyrr en um sjö í gærmorgun.

Mætti á stjórnarfund um leið og ég skutlaði söngfuglinum mínum á kóræfingu í gær. Nú er lokatörnin hjá drengjunum, æfing á morgun aftur og aukaæfing á fimmtudag með Karlakór Reykjavíkur. Kórarnir syngja svo saman um fimm á annan í hvítasunnu en klukkan átta miðvikudagskvöldið 30. maí verða drengirnir með vortónleikana. Báðir þessir atburðir verða í Hallgrímskirkju og það kostar 1.000 kr. inn á vortónleikana. Helgina eftir hvítasunnu verða þeir svo eina nótt í Stykkishólmi og eftir það er loksins komið sumarfrí hjá drengjunum. Við í stjórninni fundum svo í vikunni eftir vorferðina til að undirbúa næsta vetur.

Rétt fyrir hálffimm í dag sktulaði ég þríburunum á næstsíðustu vetrar-frjálsíþróttaæfinguna. Fylgdist með Davíð Steini koma út á peysunni (semsagt ekki í yfirhöfn) en hafði ekki rænu á að senda strákinn inn eftir flíspeysu. Auðvitað var svo útiæfing. Hann var bara svo ljónheppinn (enda í ljóninu) að fá lánaða slíka peysu á æfingunni. Ég skrapp í fiskbúð áður en ég fór til norsku esperanto vinkonum minnar. Nú fer að styttast í esperanto kaffihúsaferðina okkar.

Á morgun mun ég skreppa á safnið og skila af mér amk þremur bókum. Skilafresturinn á ævisögu Kristjáns heitins Eldjárns rennur einmitt út á morgun.

- Ævisögulestri lokið -

Ég átti bara rúmlega hundrað blaðsíður eftir og ákvað að ljúka við að lesa bókina sem fyrst. Var að enda við að lesa síðustu 40 blaðsíðurnar. Bókin er vel skrifuð og samansett. Stundum skellti ég upp úr en undir lokin táraðist ég. Ég hefði ekki viljað missa af því að lesa þessa bók upp til agna.

- Föstudagur enn á ný -

Helgin er framundan, vikan að baki. Gærdagurinn heppnaðist vel. Við mæðgin vorum mætt í Hallgrímskirkju um hálffimm. Hálftíma síðar opnaði drengjakórinn tónleika kórsins frá Þrándheimum og söng þrjá kafla úr ákveðnu verki (alveg stolið úr mér í augnablikinu). Kór Þrándheimar var stofnaður fyrir 900 árum og syngja þeir í 4 röddum, "drengir" á öllum aldri, sennilega frá níu ára og vel upp úr. Eftir eins og hálftíma tónleika var boðið upp á hressingu í öðrum hliðarsalnum og þar söng norski kórinn þrjú mun léttari lög en voru á efnisskránni.

Annars var ég að koma heim af safninu. Varð að framlengja örfáum bókum, þar á meðal einni sem ég er búin að framlengja áður. Fékk fimm daga framlenginu á Ævisögu Kristáns Eldjárns sem Gylfi Gröndal skrifaði. Ég ætti alveg að hafa það. Auðvitað nældi ég mér í fleiri bækur og segi ég kannski frá þeim á þessum vettvangi síðar.

Góða helgi!

- Uppstigningardagur -

Það er ekki frí hjá öllum í dag. Davíð fór í vinnuna um ellefu í morgun. Hann ætlar samt að mæta á tónleika drengjakórs Þrándheims í Hallgrímskirkju klukkan fimm í dag. Drengjakór Reykjavíkur syngur nokkur lög með þeim og á eftir eru kaffiveitingar í boði foreldrafélagsins (þ.e. allir leggja í púkk og koma með eitthvað með sér).

Annars eru strákarnir ekki heima þessa stundina og ég er ekki búin að sjá þá síðan rúmlega sjö í gærkvöldi. Eftir kóræfingu sá ég að Oddur Smári hafði reynt að ná í mig. Hann náði í pabba sinn. Til stóð að gista hjá Degi vini þeirra og hafði verið ákveðið að gista n.k. föstudag. Eitthvað annað kom upp á og þeim var boðið að gista í nótt í staðinn. Þeir komu ekki einu sinni heim að sækja tannburstana sína. Oddur Smári hringdi í mig um hádegið og spurði hvenær þeir ættu að koma heim. Ég var hjá norsku esperanto vinkonu minni og sagði að þeir yrðu að koma heim í síðasta lagi um tvö. Davíð Steinn á eftir að læra og hann þarf að fara í sturtu og vera mættur upp í kirkjukjallara um hálffimm.

Ég er ein heima sem stendur en ég á von að tvíburunum fljótlega, amk í kringum tvöleytið. Hmm, hvernig væri að grípa aðeins í saumana....??? Það er góð hugmynd.

Verð samt fyrst að segja aðeins frá tveimur bókum sem ég hef nýlokið við að lesa. Útisetan eftir Guðrúnu Bergmann. Dulræn, seiðandi og mjög grípandi. Fjallar um stúlku sem er dóttur-dóttir seiðkarls. Hann fær boð um að hún eigi að þjálfast sem eftirmaður hans. Ég varð algerlega heilluð af þessari skáldsögu. Hin bókin er Felustaðurinn eftir Terezza Azzopardi. Yngsta systirin af sex segir söguna. Pabbinn er forfallinn spilafíkill og veðjar um allt milli himins og jarðar. Þegar von er á þeirri yngstu heldur hann að honum sé að fæðast sonur og er svo glaður að hann tapar aleigunni. Þegar Dolores er örfárra vikna er hún skilin ein eftir í eldhúsinu í augnablik. Það kviknar í, henni er bjargað en vinstri höndin er ónýt eftir og einnig brenndist stór hluti af höfðinu svo það vex ekki hár á hana. Þetta var svolítið sorgleg skáldsaga en það var eitthvað við hana sem hélt mér við efnið.

- Þeytingur út og suður -

Var komin heim upp úr tvö í gær. Ég átti hálft í hvoru von á einni frænku minni í heimsókn svo ég náði ekki að sofna neitt þótt ég fleygði mér um stund. Upp úr fjögur var kominn tími til að skutla strákunum í frjálsar. Dagur var ekki kominn tuttugu mínútur yfir svo við renndum við heima hjá honum. Þar var enginn heima. Ég ákvað að byrja á því að skutla tvíburunum. Fékk gemsanúmer mömmu Dags hjá Davíð en hún svaraði ekki heldur. En Dagur svaraði á endanum og ég skutlaðist eftir honum, hann var bara um tuttugu mínútum of seinn á æfingu.

Þegar ég hafði komið strákunum af mér rak ég eitt erindi fyrir foreldrafélag drengjakórsins. Síðan lá leið mín í fiskbúð. Ég var eiginlega ákveðin í að kaupa saltfisk en það breyttist í ýsulasanja. Úr fiskbúðinni fór ég í tvö bakarí (það var ekki til heilt heilhveitibrauð í því sem ég fór fyrst í) og endaði í Sunnubúðinni áður en ég kom heim. Þá var klukkan langt gengin í sex.

Ég hefði þurft að harðsjóða eins og átta stykki egg til að skipta niður í tvær brauðtertur en einhvernveginn hafði ég mig ekki í það. Strákarnir komu heim í mat upp úr sjö og voru svo úti til hálftíu. Davíð skrapp heim á milli átta og níu en fór svo aftur í vinnuna og var að vinna langt fram á nóttina, það er að verða mjög gömul saga. Sat með saumana mína fyrir framan skjáinn langt fram á kvöld.

Eftir kóræfingu í kvöld verð ég að útbúa þessar brauðtertur því drengjakórinn er að syngja nokkurlög með drengjakór Þrándheims á smá tónleikum um fimm á morgun og eftir sönginn verður boðið upp á ýmislegt góðgæti. Mín mun bretta upp ermarnar í kvöld.

þankagangur

hugsanir á fleygiferð

eins og heimurinn

í kring

hvernig er hægt

að hægja

á þessu öllu?

hugsanir í óreiðu

eins og umhverfið

í kringum mig

hvernig er best

að taka til

í þessu?

hugsanir og minningar

hönd í hönd

til að ylja sér við

í góðu tómi

það kann ég

- Úr einu í annað -

Jæja, þá eru kosningarnar afstaðnar, söngvakeppninni lokið, enski boltinn kominn í sumarfrí og íslenski fótboltinn farinn að rúlla. Minn maður var frekar fúll að það skyldi vera klippt á síðustu tölur í söngvakeppninni bara af því að það voru að koma fyrstu tölur í þingkosningunum. Hann vildi meina að sjónvarpið hefði tekið að sér að sýna frá söngvakepnninni og þar með talið atkvæðagreiðslunni og þá áttu þeir að klára útsendinguna þaðan áður en þeir skiptu yfir í kosningasjónvarpið. Hann var það fúll að hann skipti yfir á Stöð tvö og horfði á útsendinguna þeirra á meðan hann jafnaði sig. En okkur fannst RÚV með betri dagskrá og horfðum við á þá útsendingu á meðan við nenntum. Ég gafst upp um tvö en Davíð hélt áhorfi áfram til klukkan fjögur.

Þrátt fyrir að hafa farið í háttinn á undan svaf ég lengur út í gærmorgun. Mætti svo í messuundirbúning um hálfeitt. Það var létt messa því annar kór, Sönghópurinn Norðurljós (en Adda stjórnar honum líka og verður kórinn með tónleika í Óháðu kirkjunni n.k. sunnudag) var á staðnum sem söng eitt lag fyrir predikun, annað eftir predikun og svo eitt lag í staðinn fyrir eftirspilið. Í okkar kór vantaði bara þrjá en þeir voru allir út tenór og þar sem það var bara einn mættur var ákveðið að syngja skírnarsálminn einraddað. Þetta fannst bassanum frekar slappt og tóku upp á því að syngja sína laglínu í rödduðu útsetningunni. Það fór svo að hluti af altinum elti bassann. Ég held að þetta hafi ekki komið neitt að sök. Rétt áður en skíra átti barnið hurfu afinn og foreldrarnir með það inn á skrifstofu prestsins. Þau voru ekki komin fram aftur þegar við vorum búin að syngja fyrstu tvö erindin í skírnarsálminum og sr. Pétur var tilbúinn að skíra. Hann spurði alla viðstadda hvort nokkur væri óskírður.

Er heim kom kveikti ég á enska boltanum og horfði á seinni hálfleikinn í leik Man. Utd og West Ham. Við Davíð drifum okkur í Laugardalinn eftir þann leik og horfðum á Val og Fram. Rétt misstum af Valsmarkinu og komum súr heim með jaftefli "í vasanum". En svona er þetta bara og vonandi verður þetta til þess að okkar strákar í Landsbankadeildinni verði meira á tánum og nýti betur sín fær því þeir áttu amk að skora 2 önnur mörk í leiknum.

En hvernig líst ykkur á útkomu kosninganna? Ég verð að segja það að mér finnst þetta skrýtin skilaboð sem kjósendur eru að senda þingheimi. Fólk vill breytingar en samt ekki of miklar. Það verður spennandi að fylgjast með næstu daga.

- Aumur háls -

Um miðjan dag í gær ákvað ég að boða forföll á kóræfingu. Hálsinn var sár og aumur og ég vissi að ef ég myndi mæta þá myndi ég taka þátt í æfingunni og hugsanlega tefja fyrir batanum. Nokkru eftir að ég afboðaði mig kom sms frá formanni kórsins um að kóræfing félli niður og að mæting í kirkju næsta sunnudag væri klukkan hálfeitt. Þannig að ég missti ekki af kóræfingunni.

Skutlaði Davíð Steini á kóræfingu rétt fyrir fimm og hafði svo samband við Davíð. Hann var alveg til í að sækja drenginn rétt fyrir sjö svo ég var tilbúin með matinn þegar feðgarnir komu heim. Oddur Smári hringdi og bað um leyfi til að borða hjá bekkjarsystur sinni svo hann kom ekki heim fyrr en rúmlega átta. Þá átti minn drengur eftir að læra.

- Mega góður plokkari -

Áður en ég fór heim í gær kom ég við í verslun og fiskbúð. Var komin heim á slaginu klukkan þrjú. Sat um stund úti í bíl og hlustaði á Brodda Broddason segja fréttir klukkan fimm, eða það sagði hann sjálfur. Ég leit aftur og aftur á klukkuna til að fullvissa mig um að hún væri nú bara þrjú.

Oddur Smári kom heim rétt á eftir mér. Hann kvartaði um í maganum og það lagaðist ekkert þótt hann fengi sér eitthvað að borða. Hann var því eftir heima þegar ég skutlaði Davíð Steini og Degi í frjálsar. Eftir það skutl fór ég beint til norsku esperanto vinkonu minnar. Í síðustu viku gaf hún mér biblíuna á esperanto og hafði ég gleymt henni hjá henni. Ég setti hana strax niður í esperantopokann til að gleyma henni ekki aftur. Við lásum m.a. Faðir vorið á esperanto, en það er að finna í einni af kennslubókunum sem við eigum.

Úr ýsunni, sem ég keypti í fiskbúðinni, útbjó ég plokkfisk. Mér finnst samt svolítið skrýtið að búa til plokkfisk úr nýjum fiski en ekki afgöngum. Sauð upp á fiskinum, skar niður stóran lauk og mýkti í olíu á pönnu. Setti fiskinn út í og bætti við þremur dósum af osti með svörtum pipar. Með þessu bauð ég upp á kartöflur og rúgbrauð með smjöri eða kæfu. Plokkarinn var þrælgóður og ég er viss um að það er lauknum og piparostinum að þakka!

- Kórsöngur á Grand Hótel -

Ég slakaði á í svona hálftíma eftir að ég kom heim í gær. Svo sá ég til þess að Davíð Steinn klæddist kórbúningnum sínum og skutlaðist með hann á Grand Hótel. Þar var verið að halda upp á dag hjúkrunar og hafði verið óskað eftir að drengjakórinn mætti á svæðið og syngi 2-3 lög. Þrjátíu drengir mættu. Friðrik hitaði þá upp en svo þurftu þeir að bíða smávegis eftir að komast að. Þeir sungu þrjú lög og fengu mjög góðar móttökur. Eftir sönginn máttu þeir svo fara heim.

Davíð fór í vinnu seinni partinn á sunnudaginn og hann var enn að um sex í gær. Hann var ekki laus fyrr en um sjö leytið. Eftir Heros-þáttinn slökkti ég á sjónvarpinu og sagði Davíð að nú væri mál að fara að sofa. Ég þurfti að fara á fætur upp úr fimm í morgun þannig að þetta (klukkan tíu í gærkvöld) var mjög góður tími til að fara í háttinn. Ég vaknaði, útsofin, á undan klukkunni um fimm í morgun og er enn sprellhress.

- Ein af níu vöskum sjálfboðaliðum -

Ég var sótt næstum heim að dyrum um hálfníu í gærmorgun og var fjórða inn í bílinn. Sótt voru fimm í viðbót sem höfðu gefið kost á sér í þessa ferð. Leiðin lá austur fyrir fjall í annað sumarbústaðaland fyrirtækisins. Þar biðu okkar þrír bústaðir til að taka í gegn. Komum austur um hálfellefu og byrjuðum á að fá okkur kaffi. Svo skiptum við okkur niður í þrjá hópa. Í einum hópnum voru tveir sem sáu m.a. um að skipta um þrjár rúður í einum bústaðnum. Í öðrum hópnum voru þrír sem sáu um að þrífa stærsta bústaðinn og var ég í síðasta hópnum, sem taldi fjóra, og þrifum við hina tvo bústaðina. Gerðum matarhlé um eitt en þrifunum lauk um fimm. Þá dembdu flestir sér í heita pottinn og létu líða úr sér. Að lokum var grillað og borðað áður en haldið var heim á leið aftur. Þetta var sem sagt mjög öflugur hópur að verki. En það hefði verið betra að vera fleiri þá hefði t.d. verið hægt að dytta að fleiru utanhús eins og að bera á.

Þurfti að ræsa Davíð Stein um níu í morgun því hann var enn steinsofandi og átti að vera mættur í upphitun fyrir messu klukkutíma síðar. Það tókst alveg. Við hjónin og Oddur Smári mættum svo í kirkju rétt fyrir ellefu. Drengjakórinn, unglingakórinn og barnakór Austurbæjarskóla og Hallgrímskirkju sáu um messusönginn og tókst krökkunum virkilega vel upp. Á eftir fengu þau pizzu, gos, ís og helíum fylltar blöðrur. Nokkrir strákar náðu að gera gat á blöðrurnar án þess að sprengja þær, gleyptu loftið í sig og töluðu svo nokkur orð með furðulegri rödd, mjög fyndið. Þetta var annars síðasta messa drengjakórsins í vetur en það er nóg af verkefnum framundan hjá þeim áður en þeir fara sjálfir í sumarfrí. Meira um það smátt og smátt seinna.

orðapokinn

ég
fór á
orðaveiðar
en þau svifu í burtu
var með tóman poka
til að tína þau ofan í
eftir margar tilraunir
var pokinn galtómur

- Helgin nærri -

Davíð Steinn hringdi í mig um þrjú og var hann með grátstafinn í kverkunum. Hann hafði fengið slæman hnikk á bakið í leikfimi og fann mikið til. Pabbi hans skrapp heim, gaf honum verkjastillandi og setti heita og kalda bakstra á bakið til skiptis. Svo skutlaði hann og Oddi Smára og Degi í frjálsar. Davíð Steinn náði að sofna.

Annars ætlaði ég að segja frá svolitlu krúttlegu sem Davíð Steinn spurði mig um daginn. Ég var að minnast á eitthvað fólk sem minnti hann á tvíburavinina sem þeir eignuðust um tveggja ára aldurinn. Hann hafði orð á því að það væri orðið mjög langt síðan hann hafði hitt þau og spurði hvort ég og mamma þeirra værum ekki vinkonur ennþá? Þetta fékk mig til að slá á þráðinn. Náði sambandi í þriðju tilraun. Hin tvíburamamman var glöð að heyra í mér. Hún var reyndar svolítið upptekin en tók niður númerið mitt og ætlar að vera í sambandi mjög fljótlega. Við náðum ekkert að spjalla að ráði en það var samt eins og við hefðum verið að tala saman síðast í gær.

- Allt að komast á venjulegt skrið -

Þar sem Davíð var að vinna næstum út í eitt síðustu daga og strákarnir í bústað með afa sínum og ömmu þá lék ég lausum hala og notaði tímann eins og mér hentaði best hverju sinni. Ég las, saumaði út, horfði svolítið á imbann, skrapp til norsku esperanto vinkonu minnar tvisvar á þessu tímabili og sitthvað fleira.

Strákarnir komu ekki fyrr en um sex í gær og voru þeir mjög ánægðir með ferðina. Þeir höfðu gert margt og mikið með frænda sínum og föðurforeldrum þessa daga og upp úr átta í gær voru mínir farnir að geyspa hástöfum. Þeir fóru í háttinn um hálftíu og voru sofnaðir rétt seinna.

Valsstrákarnir í meistaraflokknum töpuðu úrslitaleiknum í Lengjubikarnum í framlengdum leik við FH í gær. En Liverpool sló Chelsea út í meistaradeildinni í framlengdum leik og vítaspyrnukeppni. Ég sá hvorugan leikinn en fylgdist með á textavarpinu.

- Hitt og þetta -

Á föstudagskvöldið var sóttu tengdó tvíburana og einn sonarson til og tóku þá með sér í sumarbústað upp í Húsafell. Þar verða þau alveg þar til á morgun. Ekkert mál var að fá frí í skólanum og eini gallinn við þetta var að í dag er síðasti upptökudagur Drengjakórsins fyrir geisladiskinn. En plúsarnir eru miklu fleiri. Strákarnir hringdu báðir í mig í morgun og sögðu mér að það væri bongóblíða. Þeir eru líka búnir að senda pabba sínum nokkur myndskilaboð, m.a. eina af afa þeirra að grilla.

Davíð vann meira og minna alla helgina en fór þó ekki í vinnu fyrr en um fimm leytið í gær, eftir leikinn Arsenal - Fulham. En í staðinn var hann að vinna langt fram á nóttina.

Ég er byrjuð að sauma engilinn. Það var erfitt að byrja en þegar ég var komin af stað var þetta bara gaman. Líklega þyrfti ég að nota fingurbjörg því ég er orðin sár á góm hægri löngutangar, nálin gefur engin grið þótt ég sé bara að ýta á eftir henni. Las Valkyrjur eftir Þráinn Bertelsson um helgina. Bókin er spennandi og meinfyndin á köflum, enda var ég alls ekki lengi að lesa hana.

- Gráðun -

Oddur Smári tók gráðun í karate í gær og er nú komin með heilt rautt belti. Ég fékk að fara fyrr af foreldrafundi DKR til að fylgjast með gráðuninni. Tíminn átti að byrja 18:10 en hópurinn á undan var ekki búinn í gráðun fyrr en tuttugu mínútum fyrir sjö. Oddur var í fyrsta hópnum og honum gekk bara þokkalega, gleymdi sér samt aðeins með upphafsstöðuna en að öðru leyti fékk hann bara fínar athugasemdir. Hann kom svo og settist hjá mér þegar hann hafði lokið sér af. Þegar ég hvíslaði því að honum að hann gæti þurft að fara í sturtu heima sagði hann mér að hann gæti alveg labbað heim og hvatti mig til að mæta á réttum tíma á kóræfingu.

Adda kenndi okkur nýjar æfingar og lög á æfingunni, sem var mjög skemmtileg. Hún sagði að hún væri ekki búin að kenna okkur helminginn af öllu því sem hún kann fyrir sér. M.a. á hún eftir að kenna okkur að hengja upp naflann. En við sungum mikið út um eyrun í gærkvöldi.

Ég er með tvær bækur í takinu. Flóttinn eftir Sindra Freysson er á náttborðinu. Þetta var eina bókin sem ég átti eftir að lesa og gat ekki framlengt sjálf. Ætlaði að sjá til hvort ég myndi bara ekki skila henni á safnið (í síðustu ferð minni þangað) en þegar ég byrjaði að lesa hana sá ég að þessa bók yrði ég að lesa til agna. Svo ég fékk bókasafnsvörðinn, sem tók á móti bókunum sem ég skilaði af mér 20. apríl sl., til að framlengja Flóttann fyrir mig. Hin bókin er Hveitibrauðsdagar eftir James Patterson. Mögnuð spennusaga sem ég verð líklega ekki lengi að lesa. Ég hef nýlokið við að lesa bókina Gylting eftir Marie Darrieussecq. Það er bók sem ég mæli með. Hún er svolítið öðruvísi og kemur manni sífellt á óvart.

- Þvílíkt úthald -

Davíð Steinn hjólaði sjálfur á kóræfingu upp úr hálffimm í gær. Ég skutlaði Oddi Smára á karateæfingu, þá síðustu fyrir gráðunina, rétt fyrir sex. Sagði honum að líklega yrði hann að ganga heim því ég ætlaði að vera tilbúin með matinn þegar allir skiluðu sér heim. Strákurinn var svo heppinn að pabbi hans gat komið við og sótt hann er hann var að koma úr vinnu. Davíð var semsagt að vinna til klukkan sjö í gærkvöld. Eftir matinn hellti ég upp á smá kaffi fyrir manninn en stakk svo af. Var komin í Hafnarfjörðinn rétt fyrir hálfníu og við tvíburahálfsysturnar byrjuðum kvöldið á klukkutíma göngutúr og á eftir var saumað til klukkan hálftólf. Ég var með allt ósaumað efni með mér, bæði myndir, jólakort og jólalöber og þóttist ætla að dvelja á meðan ég lyki öllum þessum verkefnum. Það hefði nú þýtt það að ég hefði sest upp hjá vinkonu minni í nokkra mánuði. Ég náði að klára jólakortið með jólasveininum sem situr við opinn eld og þegar ég verð búin með bjöllurnar (byrjaði ekki á þeim í gærkvöldi) mun ég taka mynd af kortunum og setja á bloggið. Maðurinn minn var vakandi og að horfa á sjónvarpið þegar ég kom heim um miðnætti. Þá var hann ekki búinn að sofa síðan aðfaranótt sunnudags...

- Helgin flogin -

Davíð var að vinna alla helgina. Hann var heima á laugardagskvöldið, rétt skrapp heim í mat í gærkvöld og var ekki einu sinni kominn þegar ég fór í vinnuna í morgun. Hann kom víst rétt seinna bara til að skreppa sturtu áður en hann fór aftur. Er þetta nú hægt?

Lauk við að sauma Kossinn á föstudagskvöldið. Merkti hana með hvítum, skammstöfum og ártali, neðst í vinstra hornið, eða það hélt ég. Mátti rekja það upp því sú merking lenti fyrst á hvolfi efst í hægra hornið. Nokkuð skondið. Saumaði svo næstum eitt jólakort um helgina. Myndin er af jólasveini sem situr með bolla af heitu kakói við opinn eld. Mjög flott.

Á laugardagsmorguninn mætti ég í síðasta jógatímann í bili. Við vorum bara 31/2 í þessum tíma + kennarinn og tveir kennaranemar. 1/2 segi ég vegna þess að það kom 6 ára strákur í fyrsta skipti með pabba sínum. Stráksi stóð sig vel í reipunum og fékk góða hjálp frá kennaranum.

Söng við þjóðlagamessu í gær og gekk það allt saman ágætlega. Tvíburarnir voru boðnir í bíó með bekkjarfélaga annars þeirra. Þar sem Davíð var að vinna ákvað ég að horfa á handboltaleikinn heima til að geta líka fylgst með gangi mála fyrir norðan. Strákarnir komu heim úr bíó um hálffjögur en stoppuðu ekki lengi heima. Þeir vor svolítið seinir í mat því klukkan var orðin hálfátta þegar þeir skiluðu sér. Ég leyfði þeim svo að vera úti í fótbolta til níu en þeir fóru líka beint í háttinn þegar þeir komu inn.

- Mánuföstudagur -

Ég er alveg á því að mér finnist ekki vera föstudagur fyrr en einhvern tímann eftir hádegi í dag. Það er svo sem allt í lagi, amk á meðan ég mæti ekki óvart til vinnu á morgun haldandi það að það sé þriðjudagur.

Gærdagurinn var bara rólegur hjá mér. Hellti upp á könnuna um níu og klukkutíma síðar fór Davíð í vinnuna og ég sá hann ekki aftur fyrr en um hálfníu um kvöldið. Ég skrapp til norsku vinkonu minnar og lásum við saman esperanto í einn og hálfan tíma. Þegar ég kom heim var Dagur, vinur strákanna kominn en Oddur Smári var farinn til einnar bekkjarsystur sinnar. Hann fór svo með henni í Fjölskyldu og húsdýragarðinn og var þar fram eftir degi. Ég spurði Davíð Stein hvort þeir félagarnir vildu ekki kíkja líka og þegar Dagur hafði fengið leyfi skutlaði ég þeim. Okkur kom saman um að ég myndi sækja þá um þrjú nema þeir myndu hringja áður. Það var einmitt það sem gerðist, Davíð Steinn hringdi um hálfþrjú og bað um að þeir yrðu sóttir. Tveim tímum seinna skutlaði ég þeim á frjálsíþróttaæfingu. Oddur Smári hafði ákveðið að sleppa æfingunni. Hann hitti frændur sína í húsdýragarðinum og slóst í för með þeim.

Ég var heima að mestu og saumaði næstum út í eitt enda er ég næstum búin með Kossinn. Ég á bara eftir að sauma það hvíta í hvora höku og svo merkja mér myndina. Hvort er það þá Blái Engillinn eða þessi næst og svo á ég fullt af ósaumuðum jólakortum líka og þar eru flest munstrin það flott að ég mun sauma þau aftur og aftur og aftur...

Gleðilegt sumar!

- Síðasti vetrardagur -

Seinni partinn verður örugglega föstudagsfílingur í manni þar sem það er frí á morgun. Þegar ég kom heim rúmlega fjögur í gær sá ég að Davíð hafði ekki farið í vinnuna, jeppinn var heima, en maðurinn minn veiktist í fyrrakvöld. Ég vil meina að hann hafi veikst því það er búið að vera mikið álag á honum í langan tíma. Ég notaði tækifærið, hringdi í hann og bað hann um að senda strákana út með lyklana af jeppanum. Skutlaði "þríburunum" á frjálsíþróttaæfingu og kom við í fiskbúð á heimleiðinni.

- 17. gjöfin -

Ég fékk bæði tölvupóst og sms frá Blóðbankanum í gær. Það furðulega var samt það að ég hafði einmitt ætlað mér að fara í bankann þennan dag og gefa. Svo ég fór um leið og ég var búin að skutla Davíð Steini á kóræfingu. Allt gekk svo fljótt og vel fyrir sig að ég var komin á réttum tíma til baka til að skutla Oddi Smára á karateæfingu.

Þegar ég kom úr hádegismat í dag hafði ég misst af hringingu en skilaboðin voru þau að Davíð Steinn á að losna við góminn á morgun en ekki n.k. föstudag. Sá held ég að verði kátur þegar hann fréttir þetta.

- Helgin -

Þegar ég kom heim úr jógatíma á laugardagsmorguninn var Bríet frænka komin. Hún kom hlaupandi til mín og fagnaði mér vel. Helga og Ingvi voru í smáferð með vinnufélögum hans og þeirra mökum. Hulda hafði gist hjá vinkonu og var hjá henni. Bríet var voða hress og skemmtileg. Um eittleytið hafði Davíð orð á því að hann þyrfti að drífa sig í vinnuna. Þá tók sú stutta utan um annan handlegginn á honum og sagði: -"Nei, ekki þú fara að vinna. Bara mamma". Hann fór því ekki fyrr en hún hafði verið sótt. Ég hafði orð á því hvort við ættum að spá í að fá okkur sjálf svona vinnustoppara. Davíð Steinn smellti fingrum og spurði hvort Bríet gæti gert svona. Hún reyndi eitthvað smá en sagði svo: -"Nei, ég er bara þriggja ára". (Hún verður 3 í júní)

Í gær skruppum við mæðgin til einnar vinkonu minnar sem stytti fyrir mig þrennar buxur á þá, tvennar fyrir Davíð Stein og einar fyrir Odd. Eftir heimsóknina skutlaði ég bræðrunum aftur heim en skrapp sjálf að versla. Davíð gekk frá vörunum er ég kom með þær en ég kvaddi hann fljótlega aftur og fór vestur á Nes á leikinn Valur - ÍR 35:24. Nú er bara ein umferð eftir af handboltanum. Valur og HK eru með jafnmörg stig en Valsmenn sigruðu HK menn í tveimur leikjum af þremur og vinna á því, þ.e. ef bæði lið enda með jafnmörg stig eftir lokaumferðina.

Nokkrar sumarvorsstökur

Þó að rigni stríðum straumi
stingur birtan sér í gegn.
Þetta er eins og í dúndur draumi
dæmalaust góð fregn.

Dagur lengist meir og meir
mikið er það flott.
Bleytan breytir mold í leir
bráðum verður gott.

Sumarið er handan við hornið
hækkar sólin daglega.
Ekki svo slæmt fyrir íslenska kornið
sem ég nota "glaðlega".

- Loksins, loksins - FLÆÐIÆFINGAR í jóganu -

Mætti í jógatíma rétt rúmlega sex í morgun. Við vorum heldur fleiri heldur en í síðasta tíma. Eftir að hafa gert allar tíu kviðæfingarnar á bakinu 15 sinnum og teygt vel á eftir bað kennarinn okkur að losa af okkur böndin, setjast upp og fylgjast með sér. Hann sýndi okkur allar flæðiæfingarnar og svo hjálpaði hann okkur að æfa þær á eftir. Ég kunni fyrstu fimm og fékk svo smá leiðbeiningu með eina af hinum. Þetta var frábær jógatími.

Það var engin kóræfing í gærkvöldi þar sem við erum búin að vera í miklum kórönnum undanfarið og það er heldur engin messa næsta sunnudag. Við tvíburahálfsysturnar ákváðum samt að nota kvöldið til að hittast og taka nokkur saumspor. Um hálfátta fékk ég SMS. Hmm, hugsaði ég með mér, það var bæði verið að draga í SIBS og HHÍ". Skilaboðin voru reyndar frá tvíburahálfsystur minni sem stakk upp á því að byrja á því að fara í smá göngutúr. Ég tók vel í það, var mætt til hennar um hálfníu og við tókum uþb 45 mín göngu. Á eftir fengum við okkur kaffi, rúsínur (óhúðaðar), hnetur og döðlur. Svo var saumað, þ.e. ég saumaði en hún var í einhverju basli með saumaverkefnið og þurfti að rekja upp til að laga. Kvöldið leið fljótt eins og alltaf þegar við hittumst. Ég passaði mig á að stoppa ekki of lengi þar sem það var jógatími í morgun. Var komin heim um ellefu.

Davíð ákvað að fara að sofa um leið og ég en það gerist ekki oft þessa dagana og mér skilst á honum að það verði eitthvað lítið um svefn næstu vikuna þar sem hann (og fleiri) eru að setja upp nýtt kerfi fyrir einn kúnnan, kerfi sem á að fara í notkun um miðja næstu viku.

- Esperanto-krossgáta kláruð -

Strax eftir vinnu lagði ég leið mína til norsku esperantovinkonu minnar og var ég með allt efnið með mér. Fyrr en varði vorum við farnar að glíma við krossgátu í smáblaði sem við fengum þegar við mættum á fyrsta fundinn. Okkur vantaði aðeins fjögur orð, ögn (örlítið), róa, safi og ísskápur og þar sem við höfum eignast góðar og stórar esperanto-orðabækur, sem virka í báðar áttir þá töldum við að þetta yrði lítið mál. En sú var nú ekki raunin. Við fundum að vísu eitt orðanna en svo gáfumst við upp og fórum að lesa lítið ljóð sem var annars staðar í blaðinu. Og viti menn, þar sem við erum að leita að orðinu rem-boato, small allt saman á augabragði. Iome, remi, sako kaj kudejo (í sömu röð og þau voru skrifuð á íslensku hér á undan). Við vorum heldur betur ánægðar með okkur vinkonurnar.

Mætti eldhress í jóga í morgun, ein af fimm. Nú er að hefjast sjöunda vikan af átta og aðeins fjórir tímar eftir þar sem það er rauður dagur í almanakinu þann 19. n.k.

Tvíburarnir björguðu sér einir heima frá klukkan ellefu í morgun. Davíð var að vinna, hér heima, til klukkan að verða fimm í morgun og svaf til tíu. Það ætlar bara ekki að linna þessari törn. Hann hefði getað verið að vinna alla páskana og gerði það næstum því. Hann vann ekkert á laugardaginn var og bara til hádegis á páskadag. Hvar endar þetta eiginlega? Það fer að verða kominn tími á sumarbústaðaferð til að "vinda" ofan af sumum.

- Hallelúja -

Flest vorum við mætt, kórfélagar mínir og kórstjóri, í kirkjuna um sjö í gærmorgun. Gáfum kórstjóranum páskaegg númer 5. Það var byrjað að hita upp á slaginu og svo æfðum við okkur að ganga inn kirkjugólfið syngjandi sálm númer 577, fórum yfir hátíðarsöngvana og hina sálmana. Svo gafst góður tími fyrir kaffi. Rétt fyrir átta fórum við út að baka til, gengum fyrir hornið, komum inn um kirkjudyrnar og stilltum okkur upp í anddyrinu. Þeir kirkjugestir sem voru seinir fyrir horfðu undrandi á okkur. Með okkur var presturinn og safnaðarstjórnin en þau gengu svo inn á eftir okkur með altarismunina. Messan fór vel fram og létu raddirnar merkilega vel að stjórn miðað við tíma dagsins.

Þegar ég kom heim voru tvíburarnir búnir að finna eggin sín. Davíð var að vinna og ég ákvað að leggja mig um stund. Um hádegisbil dró ég manninn frá tölvunni og við brunuðum öll austur. Hittum Helgu, Ingva og stelpurnar rétt í svip áður en þau fóru í heimsókn til frændfólks. Þau komu við í bakaleiðinni og fékk Hulda að verða eftir til að geta leikið sér við frændur sína. Hún kom svo með okkur þegar við fórum aftur í bæinn um kvöldið.

- Skróp -

Ég rumskaði löngu áður en vekjarinn fór af stað í morgun. Fann fyrir eymslum í hægri öxl og niður í herðablaðið (ég hef samt ekkert verið að sauma í nokkra daga og aldrei fundið fyrir svona verk eða þreytu vegna saumaskapar). Líklega hafði ég legið eitthvað asnalega á hliðinni og klemmt taug, eða eitthvað. Ég ákvað semsagt að slökkva á vekjaranum og sleppa jóganu í morgun.

Gærdagurinn gekk annars bara mjög vel fyrir sig. Stór hluti af honum fór fram í tveimur kirkjum, í Kópavogskirkju milli hálftíu og rúmlega tólf og í Kirkju Óháða safnaðarins frá hálfsjö til rúmlega hálftíu. Fyrri flutningurinn tókst alveg með ágætum. Kórstjórarnir sögðu eftir á að það hefðu verið ein tvö eða þrjú slys hjá okkur en enginn af kirkjugestum hafði tekið eftir þeim og var samt einhver þar á meðal sem er tónlistamenntaður. Okkar kór mætti á undan um kvöldið og æfði aðeins fyrir páskamessuna. Kópavogskórinn kom klukkutíma seinna og við renndum saman yfir kvöldið. Þau ákváðu að syngja með okkur sálmana á milli píslasögukaflanna. Við sungum m.a. "Ég kveiki´ á kertum mínum" í röddum og það þótti svo flott að það hríslaðist léttur hrollur um amk suma kirkjugesti. Eftir lesturinn var altarisganga og svo hreinsuðum við allt af altarinu. Flest ljós voru slökkt og Pétur, kórstjórinn sem er að hætta og Ragnar, einn af meðhjálpurunum komu inn með logandi á sjö kertum og var slökkt á einu í senn eftir hverja setningu sem Jesús sagði á krossinum. Svo var stillt upp fyrir "Litlu orgelmessuna" og "Ave verum corpus". Ljós var kveikt við orgelið og einnig þannig að við kórarnir gætum séð á nótur en það gleymdist að sjá til þess að stjórnendur hefðu ljós svo þær urðu að stjórna okkur í blindni. En það tókst samt furðanlega og mér skilst á þeim sem höfðu líka mætt í Kópavogskirkjuna að flutningurinn hefði síst verið verri. Eftir þennan seinni flutning og margra vikna æfingar komst ég að því að ég kann þetta orðið utan að að mestu, amk tvo af köflunum og mest allt úr hinum tveimur.

Það skein eitt ljós mjög skært í gær
svo magnað að ég vildi nær.
Ég augum lokaði og hugsaði hljótt,
hlutirnir þeir breyttust fljótt.

- Letikast -

Svaf út í morgun, til klukkan hálfellefu. Mun ekki geta sofið út næst fyrr en á mánudaginn. Davíð er nýfarinn á skrifstofuna og strákarnir eru úti. Ég er búinn að lesa, ráða í krossgátuþrautir (m.a. sudoku) og vafra aðeins um á netinu. Ég er bara löt og skammast mín ekki mikið fyrir það.

Fór á aukaæfingu í Kópavogskirkju í gærkvöldi. Kvöldinu áður hafði verið ákveðið að æfa í Óháðu kirkjunni en kirkjukór Kópavogs ætlaði að æfa páskamessuna eftir þessa æfingu og þar sem það gekk svona brösuglega sl. þriðjudagskvöld vildi organistinn þeirra vera aftur þar. Það var í góðu lagi. Það átti greinilega ekki að fara framhjá mér að æfingin ætti að vera í Kópavogi því seinni partinn í gær var ég búin að fá þrjá tölvupósta (tvöfalt hjá einum) og þrjú símtöl. Eftir upphitun sagði Adda svolítið við okkur sem Kristni þótti ástæða til að punkta hjá sér. Hann mun líklega segja frá í næsta annál hvernig við lærðum að hugsa tónana út um eyrun.

Ef ykkur vantar eitthvað að gera á morgun þá flytja kórarnir litlu orgelmessu Haydens að hluta (4 kafla af sex) eftir messu í Kópavogskirkju í fyrramálið og aftur í Óháðu um kvöldið. Morgunmessan byrjar klukkan ellefu svo ég geri ráð fyrir að verkið verði flutt um tólf. Kvöldmessan hefst hálfníu og verður verkið flutt í athöfninni.

- Í söngönnum og fleira -

Strákarnir stækkuðu heldur betur í gær. Ég skildi eftir 4000 kr. áður en ég fór í vinnuna. Davíð hringdi í mig um tíu og spurði hvað ég ætlaði mér með þessa peninga. Ég hafði ætlað að hringja í strákana og láta þá vita að þetta væri fyrir klippingu. Um hádegi í gær hjóluðu kapparnir alla leið á Hárhornið við Hlemm til Torfa. Þar var biðin hins vegar svo löng að þeir ákváðu að prófa að spyrja á stofunni sem er á horni Lönguhlíðar og Miklubrautar. Og viti menn þeir þurftu aðeins að bíða í korter og rétt rúmlega það. Fengu hvorn sinn stólinn og hvorn sinn klipparann. Klippingin kostaði 1600 en annar þeirra fékk 100kr. afslátt, heilan 500 kr til baka (líklega vegna þess að skiptimyntin var á þrotum). Oddur Smári er aftur kominn með skott, búinn að sakna þess alveg síðan hann lét klippa það.

Dagur vinur þeirra var lasinn í gær. Ég skutlaði bræðrunum á frjálsíþróttaæfingu og skrapp svo til norsku esperantovinkonu minnar þar til kominn var tími til að sækja þá. Við mæðginin komum heim um hálfsjö og þá hafði ég tæpan klukkutíma þar til ég þurfti að rjúka að heiman aftur.

Það var lokaæfing í Kópavogskirkju. En þessi æfing gekk hálf brösuglega. Það vantaði marga úr karlaröddunum, sérstaklega í bassann en þeir voru bara tveir, báðir úr Óháða. Eftir tveggjaoghálfstíma æfingu var ákveðið að setja á klukkutíma aukaæfingu í kvöld. Undirleikarinn spilaði á pípuorgelið uppi og við stóðum fyrir framan altarið niðri til að byrja með. Stjórnandinn og undirleikarinn sáu ekki hvort annað svo hún brá á það ráð að fara upp til hans og stjórna okkur þaðan. Það gekk ekki vel og við fengum hálsríg. Þá vorum við beðin um að flykkjast upp og ég komst ekki hjá því að hugsa að sem betur fer væru ekki allir mættir því það fór ekki vel um okkur þarna, hálfklemmd. Enda gekk æfingin illa eins og áður er sagt. Ég get þó ekki annað en dáðst að bössunum tveimur, þeir stóðu sig eins og hetjur þótt það gengi líka illa á köflum hjá þeim eins og okkur hinum. Sungum svo Ave verum Corpus niðri í restina og mér skilst á okkar stjórnanda að við höfum sungið það eins og englar.

Eftir æfinguna var fyrirbænastund því formaður Kópavogskórsins er að berjast við erfið veikindi og var skorin við krabbameini í morgun (eða í dag). Við vorum nokkur úr óháða sem sátum eftir og tókum þátt í athöfninni.

- Örstutt -

Við vorum að koma heim af Bakkanum, með strákana með okkur en þeir eru búnir að vera þar síðan seinni partinn á föstudaginn. Afi þeirra sótti þá og einn afastrákinn til um fjögurleytið þann dag. Tengdapabbi stoppaði reyndar hér til fimm en þá fóru þeir þrír saman og sóttu þann fjórða.

Mætti í rópið á laugardagsmorguninn. Eftir tímann og sturtu heima skrapp ég til norsku esperanto-vinkonu minnar og lásum við saman hálfa kínverska sögu á esperanto. Náði að sjá síðustu mínúturnar í leik Liverpool og Arsenal og svo allan seinni hálfleikinn. "Mínir menn" voru langtum betri og unnu 4-1. Munaði þar mest um Crouch sem skoraði þrennu, hvert markið öðru fallegra. Um kvöldið fórum við hjónin í fertugsafmæli og vorum þar í svo góðu yfirlæti fram eftir kvöldi og fram á nótt að við vorum síðustu gestirnir til að fara.

Í gær var ég mætt í á kóræfingu klukkan tólf og um tvo var fermingamessa þar sem fermd voru 9 börn. Allt gekk vel fyrir sig. Fljótlega eftir að ég skilaði mér heim fórum við hjónin í heimsókn til einnar vinkonu minnar. Davíð var búinn að samþykkja að hreinsa eina lapptölvu og uppfæra vírusvörnina á henni. Hann hófst handa um fimmleytið og ég varð að draga hann í burtu upp úr tíu en hann náði ekki að klára alveg og hefði líklega helst viljað vera þangað til hann var búinn.