- Kórsöngur á Grand Hótel -

Ég slakaði á í svona hálftíma eftir að ég kom heim í gær. Svo sá ég til þess að Davíð Steinn klæddist kórbúningnum sínum og skutlaðist með hann á Grand Hótel. Þar var verið að halda upp á dag hjúkrunar og hafði verið óskað eftir að drengjakórinn mætti á svæðið og syngi 2-3 lög. Þrjátíu drengir mættu. Friðrik hitaði þá upp en svo þurftu þeir að bíða smávegis eftir að komast að. Þeir sungu þrjú lög og fengu mjög góðar móttökur. Eftir sönginn máttu þeir svo fara heim.

Davíð fór í vinnu seinni partinn á sunnudaginn og hann var enn að um sex í gær. Hann var ekki laus fyrr en um sjö leytið. Eftir Heros-þáttinn slökkti ég á sjónvarpinu og sagði Davíð að nú væri mál að fara að sofa. Ég þurfti að fara á fætur upp úr fimm í morgun þannig að þetta (klukkan tíu í gærkvöld) var mjög góður tími til að fara í háttinn. Ég vaknaði, útsofin, á undan klukkunni um fimm í morgun og er enn sprellhress.

- Ein af níu vöskum sjálfboðaliðum -

Ég var sótt næstum heim að dyrum um hálfníu í gærmorgun og var fjórða inn í bílinn. Sótt voru fimm í viðbót sem höfðu gefið kost á sér í þessa ferð. Leiðin lá austur fyrir fjall í annað sumarbústaðaland fyrirtækisins. Þar biðu okkar þrír bústaðir til að taka í gegn. Komum austur um hálfellefu og byrjuðum á að fá okkur kaffi. Svo skiptum við okkur niður í þrjá hópa. Í einum hópnum voru tveir sem sáu m.a. um að skipta um þrjár rúður í einum bústaðnum. Í öðrum hópnum voru þrír sem sáu um að þrífa stærsta bústaðinn og var ég í síðasta hópnum, sem taldi fjóra, og þrifum við hina tvo bústaðina. Gerðum matarhlé um eitt en þrifunum lauk um fimm. Þá dembdu flestir sér í heita pottinn og létu líða úr sér. Að lokum var grillað og borðað áður en haldið var heim á leið aftur. Þetta var sem sagt mjög öflugur hópur að verki. En það hefði verið betra að vera fleiri þá hefði t.d. verið hægt að dytta að fleiru utanhús eins og að bera á.

Þurfti að ræsa Davíð Stein um níu í morgun því hann var enn steinsofandi og átti að vera mættur í upphitun fyrir messu klukkutíma síðar. Það tókst alveg. Við hjónin og Oddur Smári mættum svo í kirkju rétt fyrir ellefu. Drengjakórinn, unglingakórinn og barnakór Austurbæjarskóla og Hallgrímskirkju sáu um messusönginn og tókst krökkunum virkilega vel upp. Á eftir fengu þau pizzu, gos, ís og helíum fylltar blöðrur. Nokkrir strákar náðu að gera gat á blöðrurnar án þess að sprengja þær, gleyptu loftið í sig og töluðu svo nokkur orð með furðulegri rödd, mjög fyndið. Þetta var annars síðasta messa drengjakórsins í vetur en það er nóg af verkefnum framundan hjá þeim áður en þeir fara sjálfir í sumarfrí. Meira um það smátt og smátt seinna.

orðapokinn

ég
fór á
orðaveiðar
en þau svifu í burtu
var með tóman poka
til að tína þau ofan í
eftir margar tilraunir
var pokinn galtómur

- Helgin nærri -

Davíð Steinn hringdi í mig um þrjú og var hann með grátstafinn í kverkunum. Hann hafði fengið slæman hnikk á bakið í leikfimi og fann mikið til. Pabbi hans skrapp heim, gaf honum verkjastillandi og setti heita og kalda bakstra á bakið til skiptis. Svo skutlaði hann og Oddi Smára og Degi í frjálsar. Davíð Steinn náði að sofna.

Annars ætlaði ég að segja frá svolitlu krúttlegu sem Davíð Steinn spurði mig um daginn. Ég var að minnast á eitthvað fólk sem minnti hann á tvíburavinina sem þeir eignuðust um tveggja ára aldurinn. Hann hafði orð á því að það væri orðið mjög langt síðan hann hafði hitt þau og spurði hvort ég og mamma þeirra værum ekki vinkonur ennþá? Þetta fékk mig til að slá á þráðinn. Náði sambandi í þriðju tilraun. Hin tvíburamamman var glöð að heyra í mér. Hún var reyndar svolítið upptekin en tók niður númerið mitt og ætlar að vera í sambandi mjög fljótlega. Við náðum ekkert að spjalla að ráði en það var samt eins og við hefðum verið að tala saman síðast í gær.

- Allt að komast á venjulegt skrið -

Þar sem Davíð var að vinna næstum út í eitt síðustu daga og strákarnir í bústað með afa sínum og ömmu þá lék ég lausum hala og notaði tímann eins og mér hentaði best hverju sinni. Ég las, saumaði út, horfði svolítið á imbann, skrapp til norsku esperanto vinkonu minnar tvisvar á þessu tímabili og sitthvað fleira.

Strákarnir komu ekki fyrr en um sex í gær og voru þeir mjög ánægðir með ferðina. Þeir höfðu gert margt og mikið með frænda sínum og föðurforeldrum þessa daga og upp úr átta í gær voru mínir farnir að geyspa hástöfum. Þeir fóru í háttinn um hálftíu og voru sofnaðir rétt seinna.

Valsstrákarnir í meistaraflokknum töpuðu úrslitaleiknum í Lengjubikarnum í framlengdum leik við FH í gær. En Liverpool sló Chelsea út í meistaradeildinni í framlengdum leik og vítaspyrnukeppni. Ég sá hvorugan leikinn en fylgdist með á textavarpinu.

- Hitt og þetta -

Á föstudagskvöldið var sóttu tengdó tvíburana og einn sonarson til og tóku þá með sér í sumarbústað upp í Húsafell. Þar verða þau alveg þar til á morgun. Ekkert mál var að fá frí í skólanum og eini gallinn við þetta var að í dag er síðasti upptökudagur Drengjakórsins fyrir geisladiskinn. En plúsarnir eru miklu fleiri. Strákarnir hringdu báðir í mig í morgun og sögðu mér að það væri bongóblíða. Þeir eru líka búnir að senda pabba sínum nokkur myndskilaboð, m.a. eina af afa þeirra að grilla.

Davíð vann meira og minna alla helgina en fór þó ekki í vinnu fyrr en um fimm leytið í gær, eftir leikinn Arsenal - Fulham. En í staðinn var hann að vinna langt fram á nóttina.

Ég er byrjuð að sauma engilinn. Það var erfitt að byrja en þegar ég var komin af stað var þetta bara gaman. Líklega þyrfti ég að nota fingurbjörg því ég er orðin sár á góm hægri löngutangar, nálin gefur engin grið þótt ég sé bara að ýta á eftir henni. Las Valkyrjur eftir Þráinn Bertelsson um helgina. Bókin er spennandi og meinfyndin á köflum, enda var ég alls ekki lengi að lesa hana.

- Gráðun -

Oddur Smári tók gráðun í karate í gær og er nú komin með heilt rautt belti. Ég fékk að fara fyrr af foreldrafundi DKR til að fylgjast með gráðuninni. Tíminn átti að byrja 18:10 en hópurinn á undan var ekki búinn í gráðun fyrr en tuttugu mínútum fyrir sjö. Oddur var í fyrsta hópnum og honum gekk bara þokkalega, gleymdi sér samt aðeins með upphafsstöðuna en að öðru leyti fékk hann bara fínar athugasemdir. Hann kom svo og settist hjá mér þegar hann hafði lokið sér af. Þegar ég hvíslaði því að honum að hann gæti þurft að fara í sturtu heima sagði hann mér að hann gæti alveg labbað heim og hvatti mig til að mæta á réttum tíma á kóræfingu.

Adda kenndi okkur nýjar æfingar og lög á æfingunni, sem var mjög skemmtileg. Hún sagði að hún væri ekki búin að kenna okkur helminginn af öllu því sem hún kann fyrir sér. M.a. á hún eftir að kenna okkur að hengja upp naflann. En við sungum mikið út um eyrun í gærkvöldi.

Ég er með tvær bækur í takinu. Flóttinn eftir Sindra Freysson er á náttborðinu. Þetta var eina bókin sem ég átti eftir að lesa og gat ekki framlengt sjálf. Ætlaði að sjá til hvort ég myndi bara ekki skila henni á safnið (í síðustu ferð minni þangað) en þegar ég byrjaði að lesa hana sá ég að þessa bók yrði ég að lesa til agna. Svo ég fékk bókasafnsvörðinn, sem tók á móti bókunum sem ég skilaði af mér 20. apríl sl., til að framlengja Flóttann fyrir mig. Hin bókin er Hveitibrauðsdagar eftir James Patterson. Mögnuð spennusaga sem ég verð líklega ekki lengi að lesa. Ég hef nýlokið við að lesa bókina Gylting eftir Marie Darrieussecq. Það er bók sem ég mæli með. Hún er svolítið öðruvísi og kemur manni sífellt á óvart.

- Þvílíkt úthald -

Davíð Steinn hjólaði sjálfur á kóræfingu upp úr hálffimm í gær. Ég skutlaði Oddi Smára á karateæfingu, þá síðustu fyrir gráðunina, rétt fyrir sex. Sagði honum að líklega yrði hann að ganga heim því ég ætlaði að vera tilbúin með matinn þegar allir skiluðu sér heim. Strákurinn var svo heppinn að pabbi hans gat komið við og sótt hann er hann var að koma úr vinnu. Davíð var semsagt að vinna til klukkan sjö í gærkvöld. Eftir matinn hellti ég upp á smá kaffi fyrir manninn en stakk svo af. Var komin í Hafnarfjörðinn rétt fyrir hálfníu og við tvíburahálfsysturnar byrjuðum kvöldið á klukkutíma göngutúr og á eftir var saumað til klukkan hálftólf. Ég var með allt ósaumað efni með mér, bæði myndir, jólakort og jólalöber og þóttist ætla að dvelja á meðan ég lyki öllum þessum verkefnum. Það hefði nú þýtt það að ég hefði sest upp hjá vinkonu minni í nokkra mánuði. Ég náði að klára jólakortið með jólasveininum sem situr við opinn eld og þegar ég verð búin með bjöllurnar (byrjaði ekki á þeim í gærkvöldi) mun ég taka mynd af kortunum og setja á bloggið. Maðurinn minn var vakandi og að horfa á sjónvarpið þegar ég kom heim um miðnætti. Þá var hann ekki búinn að sofa síðan aðfaranótt sunnudags...

- Helgin flogin -

Davíð var að vinna alla helgina. Hann var heima á laugardagskvöldið, rétt skrapp heim í mat í gærkvöld og var ekki einu sinni kominn þegar ég fór í vinnuna í morgun. Hann kom víst rétt seinna bara til að skreppa sturtu áður en hann fór aftur. Er þetta nú hægt?

Lauk við að sauma Kossinn á föstudagskvöldið. Merkti hana með hvítum, skammstöfum og ártali, neðst í vinstra hornið, eða það hélt ég. Mátti rekja það upp því sú merking lenti fyrst á hvolfi efst í hægra hornið. Nokkuð skondið. Saumaði svo næstum eitt jólakort um helgina. Myndin er af jólasveini sem situr með bolla af heitu kakói við opinn eld. Mjög flott.

Á laugardagsmorguninn mætti ég í síðasta jógatímann í bili. Við vorum bara 31/2 í þessum tíma + kennarinn og tveir kennaranemar. 1/2 segi ég vegna þess að það kom 6 ára strákur í fyrsta skipti með pabba sínum. Stráksi stóð sig vel í reipunum og fékk góða hjálp frá kennaranum.

Söng við þjóðlagamessu í gær og gekk það allt saman ágætlega. Tvíburarnir voru boðnir í bíó með bekkjarfélaga annars þeirra. Þar sem Davíð var að vinna ákvað ég að horfa á handboltaleikinn heima til að geta líka fylgst með gangi mála fyrir norðan. Strákarnir komu heim úr bíó um hálffjögur en stoppuðu ekki lengi heima. Þeir vor svolítið seinir í mat því klukkan var orðin hálfátta þegar þeir skiluðu sér. Ég leyfði þeim svo að vera úti í fótbolta til níu en þeir fóru líka beint í háttinn þegar þeir komu inn.

- Mánuföstudagur -

Ég er alveg á því að mér finnist ekki vera föstudagur fyrr en einhvern tímann eftir hádegi í dag. Það er svo sem allt í lagi, amk á meðan ég mæti ekki óvart til vinnu á morgun haldandi það að það sé þriðjudagur.

Gærdagurinn var bara rólegur hjá mér. Hellti upp á könnuna um níu og klukkutíma síðar fór Davíð í vinnuna og ég sá hann ekki aftur fyrr en um hálfníu um kvöldið. Ég skrapp til norsku vinkonu minnar og lásum við saman esperanto í einn og hálfan tíma. Þegar ég kom heim var Dagur, vinur strákanna kominn en Oddur Smári var farinn til einnar bekkjarsystur sinnar. Hann fór svo með henni í Fjölskyldu og húsdýragarðinn og var þar fram eftir degi. Ég spurði Davíð Stein hvort þeir félagarnir vildu ekki kíkja líka og þegar Dagur hafði fengið leyfi skutlaði ég þeim. Okkur kom saman um að ég myndi sækja þá um þrjú nema þeir myndu hringja áður. Það var einmitt það sem gerðist, Davíð Steinn hringdi um hálfþrjú og bað um að þeir yrðu sóttir. Tveim tímum seinna skutlaði ég þeim á frjálsíþróttaæfingu. Oddur Smári hafði ákveðið að sleppa æfingunni. Hann hitti frændur sína í húsdýragarðinum og slóst í för með þeim.

Ég var heima að mestu og saumaði næstum út í eitt enda er ég næstum búin með Kossinn. Ég á bara eftir að sauma það hvíta í hvora höku og svo merkja mér myndina. Hvort er það þá Blái Engillinn eða þessi næst og svo á ég fullt af ósaumuðum jólakortum líka og þar eru flest munstrin það flott að ég mun sauma þau aftur og aftur og aftur...

Gleðilegt sumar!

- Síðasti vetrardagur -

Seinni partinn verður örugglega föstudagsfílingur í manni þar sem það er frí á morgun. Þegar ég kom heim rúmlega fjögur í gær sá ég að Davíð hafði ekki farið í vinnuna, jeppinn var heima, en maðurinn minn veiktist í fyrrakvöld. Ég vil meina að hann hafi veikst því það er búið að vera mikið álag á honum í langan tíma. Ég notaði tækifærið, hringdi í hann og bað hann um að senda strákana út með lyklana af jeppanum. Skutlaði "þríburunum" á frjálsíþróttaæfingu og kom við í fiskbúð á heimleiðinni.

- 17. gjöfin -

Ég fékk bæði tölvupóst og sms frá Blóðbankanum í gær. Það furðulega var samt það að ég hafði einmitt ætlað mér að fara í bankann þennan dag og gefa. Svo ég fór um leið og ég var búin að skutla Davíð Steini á kóræfingu. Allt gekk svo fljótt og vel fyrir sig að ég var komin á réttum tíma til baka til að skutla Oddi Smára á karateæfingu.

Þegar ég kom úr hádegismat í dag hafði ég misst af hringingu en skilaboðin voru þau að Davíð Steinn á að losna við góminn á morgun en ekki n.k. föstudag. Sá held ég að verði kátur þegar hann fréttir þetta.

- Helgin -

Þegar ég kom heim úr jógatíma á laugardagsmorguninn var Bríet frænka komin. Hún kom hlaupandi til mín og fagnaði mér vel. Helga og Ingvi voru í smáferð með vinnufélögum hans og þeirra mökum. Hulda hafði gist hjá vinkonu og var hjá henni. Bríet var voða hress og skemmtileg. Um eittleytið hafði Davíð orð á því að hann þyrfti að drífa sig í vinnuna. Þá tók sú stutta utan um annan handlegginn á honum og sagði: -"Nei, ekki þú fara að vinna. Bara mamma". Hann fór því ekki fyrr en hún hafði verið sótt. Ég hafði orð á því hvort við ættum að spá í að fá okkur sjálf svona vinnustoppara. Davíð Steinn smellti fingrum og spurði hvort Bríet gæti gert svona. Hún reyndi eitthvað smá en sagði svo: -"Nei, ég er bara þriggja ára". (Hún verður 3 í júní)

Í gær skruppum við mæðgin til einnar vinkonu minnar sem stytti fyrir mig þrennar buxur á þá, tvennar fyrir Davíð Stein og einar fyrir Odd. Eftir heimsóknina skutlaði ég bræðrunum aftur heim en skrapp sjálf að versla. Davíð gekk frá vörunum er ég kom með þær en ég kvaddi hann fljótlega aftur og fór vestur á Nes á leikinn Valur - ÍR 35:24. Nú er bara ein umferð eftir af handboltanum. Valur og HK eru með jafnmörg stig en Valsmenn sigruðu HK menn í tveimur leikjum af þremur og vinna á því, þ.e. ef bæði lið enda með jafnmörg stig eftir lokaumferðina.

Nokkrar sumarvorsstökur

Þó að rigni stríðum straumi
stingur birtan sér í gegn.
Þetta er eins og í dúndur draumi
dæmalaust góð fregn.

Dagur lengist meir og meir
mikið er það flott.
Bleytan breytir mold í leir
bráðum verður gott.

Sumarið er handan við hornið
hækkar sólin daglega.
Ekki svo slæmt fyrir íslenska kornið
sem ég nota "glaðlega".

- Loksins, loksins - FLÆÐIÆFINGAR í jóganu -

Mætti í jógatíma rétt rúmlega sex í morgun. Við vorum heldur fleiri heldur en í síðasta tíma. Eftir að hafa gert allar tíu kviðæfingarnar á bakinu 15 sinnum og teygt vel á eftir bað kennarinn okkur að losa af okkur böndin, setjast upp og fylgjast með sér. Hann sýndi okkur allar flæðiæfingarnar og svo hjálpaði hann okkur að æfa þær á eftir. Ég kunni fyrstu fimm og fékk svo smá leiðbeiningu með eina af hinum. Þetta var frábær jógatími.

Það var engin kóræfing í gærkvöldi þar sem við erum búin að vera í miklum kórönnum undanfarið og það er heldur engin messa næsta sunnudag. Við tvíburahálfsysturnar ákváðum samt að nota kvöldið til að hittast og taka nokkur saumspor. Um hálfátta fékk ég SMS. Hmm, hugsaði ég með mér, það var bæði verið að draga í SIBS og HHÍ". Skilaboðin voru reyndar frá tvíburahálfsystur minni sem stakk upp á því að byrja á því að fara í smá göngutúr. Ég tók vel í það, var mætt til hennar um hálfníu og við tókum uþb 45 mín göngu. Á eftir fengum við okkur kaffi, rúsínur (óhúðaðar), hnetur og döðlur. Svo var saumað, þ.e. ég saumaði en hún var í einhverju basli með saumaverkefnið og þurfti að rekja upp til að laga. Kvöldið leið fljótt eins og alltaf þegar við hittumst. Ég passaði mig á að stoppa ekki of lengi þar sem það var jógatími í morgun. Var komin heim um ellefu.

Davíð ákvað að fara að sofa um leið og ég en það gerist ekki oft þessa dagana og mér skilst á honum að það verði eitthvað lítið um svefn næstu vikuna þar sem hann (og fleiri) eru að setja upp nýtt kerfi fyrir einn kúnnan, kerfi sem á að fara í notkun um miðja næstu viku.

- Esperanto-krossgáta kláruð -

Strax eftir vinnu lagði ég leið mína til norsku esperantovinkonu minnar og var ég með allt efnið með mér. Fyrr en varði vorum við farnar að glíma við krossgátu í smáblaði sem við fengum þegar við mættum á fyrsta fundinn. Okkur vantaði aðeins fjögur orð, ögn (örlítið), róa, safi og ísskápur og þar sem við höfum eignast góðar og stórar esperanto-orðabækur, sem virka í báðar áttir þá töldum við að þetta yrði lítið mál. En sú var nú ekki raunin. Við fundum að vísu eitt orðanna en svo gáfumst við upp og fórum að lesa lítið ljóð sem var annars staðar í blaðinu. Og viti menn, þar sem við erum að leita að orðinu rem-boato, small allt saman á augabragði. Iome, remi, sako kaj kudejo (í sömu röð og þau voru skrifuð á íslensku hér á undan). Við vorum heldur betur ánægðar með okkur vinkonurnar.

Mætti eldhress í jóga í morgun, ein af fimm. Nú er að hefjast sjöunda vikan af átta og aðeins fjórir tímar eftir þar sem það er rauður dagur í almanakinu þann 19. n.k.

Tvíburarnir björguðu sér einir heima frá klukkan ellefu í morgun. Davíð var að vinna, hér heima, til klukkan að verða fimm í morgun og svaf til tíu. Það ætlar bara ekki að linna þessari törn. Hann hefði getað verið að vinna alla páskana og gerði það næstum því. Hann vann ekkert á laugardaginn var og bara til hádegis á páskadag. Hvar endar þetta eiginlega? Það fer að verða kominn tími á sumarbústaðaferð til að "vinda" ofan af sumum.

- Hallelúja -

Flest vorum við mætt, kórfélagar mínir og kórstjóri, í kirkjuna um sjö í gærmorgun. Gáfum kórstjóranum páskaegg númer 5. Það var byrjað að hita upp á slaginu og svo æfðum við okkur að ganga inn kirkjugólfið syngjandi sálm númer 577, fórum yfir hátíðarsöngvana og hina sálmana. Svo gafst góður tími fyrir kaffi. Rétt fyrir átta fórum við út að baka til, gengum fyrir hornið, komum inn um kirkjudyrnar og stilltum okkur upp í anddyrinu. Þeir kirkjugestir sem voru seinir fyrir horfðu undrandi á okkur. Með okkur var presturinn og safnaðarstjórnin en þau gengu svo inn á eftir okkur með altarismunina. Messan fór vel fram og létu raddirnar merkilega vel að stjórn miðað við tíma dagsins.

Þegar ég kom heim voru tvíburarnir búnir að finna eggin sín. Davíð var að vinna og ég ákvað að leggja mig um stund. Um hádegisbil dró ég manninn frá tölvunni og við brunuðum öll austur. Hittum Helgu, Ingva og stelpurnar rétt í svip áður en þau fóru í heimsókn til frændfólks. Þau komu við í bakaleiðinni og fékk Hulda að verða eftir til að geta leikið sér við frændur sína. Hún kom svo með okkur þegar við fórum aftur í bæinn um kvöldið.

- Skróp -

Ég rumskaði löngu áður en vekjarinn fór af stað í morgun. Fann fyrir eymslum í hægri öxl og niður í herðablaðið (ég hef samt ekkert verið að sauma í nokkra daga og aldrei fundið fyrir svona verk eða þreytu vegna saumaskapar). Líklega hafði ég legið eitthvað asnalega á hliðinni og klemmt taug, eða eitthvað. Ég ákvað semsagt að slökkva á vekjaranum og sleppa jóganu í morgun.

Gærdagurinn gekk annars bara mjög vel fyrir sig. Stór hluti af honum fór fram í tveimur kirkjum, í Kópavogskirkju milli hálftíu og rúmlega tólf og í Kirkju Óháða safnaðarins frá hálfsjö til rúmlega hálftíu. Fyrri flutningurinn tókst alveg með ágætum. Kórstjórarnir sögðu eftir á að það hefðu verið ein tvö eða þrjú slys hjá okkur en enginn af kirkjugestum hafði tekið eftir þeim og var samt einhver þar á meðal sem er tónlistamenntaður. Okkar kór mætti á undan um kvöldið og æfði aðeins fyrir páskamessuna. Kópavogskórinn kom klukkutíma seinna og við renndum saman yfir kvöldið. Þau ákváðu að syngja með okkur sálmana á milli píslasögukaflanna. Við sungum m.a. "Ég kveiki´ á kertum mínum" í röddum og það þótti svo flott að það hríslaðist léttur hrollur um amk suma kirkjugesti. Eftir lesturinn var altarisganga og svo hreinsuðum við allt af altarinu. Flest ljós voru slökkt og Pétur, kórstjórinn sem er að hætta og Ragnar, einn af meðhjálpurunum komu inn með logandi á sjö kertum og var slökkt á einu í senn eftir hverja setningu sem Jesús sagði á krossinum. Svo var stillt upp fyrir "Litlu orgelmessuna" og "Ave verum corpus". Ljós var kveikt við orgelið og einnig þannig að við kórarnir gætum séð á nótur en það gleymdist að sjá til þess að stjórnendur hefðu ljós svo þær urðu að stjórna okkur í blindni. En það tókst samt furðanlega og mér skilst á þeim sem höfðu líka mætt í Kópavogskirkjuna að flutningurinn hefði síst verið verri. Eftir þennan seinni flutning og margra vikna æfingar komst ég að því að ég kann þetta orðið utan að að mestu, amk tvo af köflunum og mest allt úr hinum tveimur.

Það skein eitt ljós mjög skært í gær
svo magnað að ég vildi nær.
Ég augum lokaði og hugsaði hljótt,
hlutirnir þeir breyttust fljótt.

- Letikast -

Svaf út í morgun, til klukkan hálfellefu. Mun ekki geta sofið út næst fyrr en á mánudaginn. Davíð er nýfarinn á skrifstofuna og strákarnir eru úti. Ég er búinn að lesa, ráða í krossgátuþrautir (m.a. sudoku) og vafra aðeins um á netinu. Ég er bara löt og skammast mín ekki mikið fyrir það.

Fór á aukaæfingu í Kópavogskirkju í gærkvöldi. Kvöldinu áður hafði verið ákveðið að æfa í Óháðu kirkjunni en kirkjukór Kópavogs ætlaði að æfa páskamessuna eftir þessa æfingu og þar sem það gekk svona brösuglega sl. þriðjudagskvöld vildi organistinn þeirra vera aftur þar. Það var í góðu lagi. Það átti greinilega ekki að fara framhjá mér að æfingin ætti að vera í Kópavogi því seinni partinn í gær var ég búin að fá þrjá tölvupósta (tvöfalt hjá einum) og þrjú símtöl. Eftir upphitun sagði Adda svolítið við okkur sem Kristni þótti ástæða til að punkta hjá sér. Hann mun líklega segja frá í næsta annál hvernig við lærðum að hugsa tónana út um eyrun.

Ef ykkur vantar eitthvað að gera á morgun þá flytja kórarnir litlu orgelmessu Haydens að hluta (4 kafla af sex) eftir messu í Kópavogskirkju í fyrramálið og aftur í Óháðu um kvöldið. Morgunmessan byrjar klukkan ellefu svo ég geri ráð fyrir að verkið verði flutt um tólf. Kvöldmessan hefst hálfníu og verður verkið flutt í athöfninni.

- Í söngönnum og fleira -

Strákarnir stækkuðu heldur betur í gær. Ég skildi eftir 4000 kr. áður en ég fór í vinnuna. Davíð hringdi í mig um tíu og spurði hvað ég ætlaði mér með þessa peninga. Ég hafði ætlað að hringja í strákana og láta þá vita að þetta væri fyrir klippingu. Um hádegi í gær hjóluðu kapparnir alla leið á Hárhornið við Hlemm til Torfa. Þar var biðin hins vegar svo löng að þeir ákváðu að prófa að spyrja á stofunni sem er á horni Lönguhlíðar og Miklubrautar. Og viti menn þeir þurftu aðeins að bíða í korter og rétt rúmlega það. Fengu hvorn sinn stólinn og hvorn sinn klipparann. Klippingin kostaði 1600 en annar þeirra fékk 100kr. afslátt, heilan 500 kr til baka (líklega vegna þess að skiptimyntin var á þrotum). Oddur Smári er aftur kominn með skott, búinn að sakna þess alveg síðan hann lét klippa það.

Dagur vinur þeirra var lasinn í gær. Ég skutlaði bræðrunum á frjálsíþróttaæfingu og skrapp svo til norsku esperantovinkonu minnar þar til kominn var tími til að sækja þá. Við mæðginin komum heim um hálfsjö og þá hafði ég tæpan klukkutíma þar til ég þurfti að rjúka að heiman aftur.

Það var lokaæfing í Kópavogskirkju. En þessi æfing gekk hálf brösuglega. Það vantaði marga úr karlaröddunum, sérstaklega í bassann en þeir voru bara tveir, báðir úr Óháða. Eftir tveggjaoghálfstíma æfingu var ákveðið að setja á klukkutíma aukaæfingu í kvöld. Undirleikarinn spilaði á pípuorgelið uppi og við stóðum fyrir framan altarið niðri til að byrja með. Stjórnandinn og undirleikarinn sáu ekki hvort annað svo hún brá á það ráð að fara upp til hans og stjórna okkur þaðan. Það gekk ekki vel og við fengum hálsríg. Þá vorum við beðin um að flykkjast upp og ég komst ekki hjá því að hugsa að sem betur fer væru ekki allir mættir því það fór ekki vel um okkur þarna, hálfklemmd. Enda gekk æfingin illa eins og áður er sagt. Ég get þó ekki annað en dáðst að bössunum tveimur, þeir stóðu sig eins og hetjur þótt það gengi líka illa á köflum hjá þeim eins og okkur hinum. Sungum svo Ave verum Corpus niðri í restina og mér skilst á okkar stjórnanda að við höfum sungið það eins og englar.

Eftir æfinguna var fyrirbænastund því formaður Kópavogskórsins er að berjast við erfið veikindi og var skorin við krabbameini í morgun (eða í dag). Við vorum nokkur úr óháða sem sátum eftir og tókum þátt í athöfninni.

- Örstutt -

Við vorum að koma heim af Bakkanum, með strákana með okkur en þeir eru búnir að vera þar síðan seinni partinn á föstudaginn. Afi þeirra sótti þá og einn afastrákinn til um fjögurleytið þann dag. Tengdapabbi stoppaði reyndar hér til fimm en þá fóru þeir þrír saman og sóttu þann fjórða.

Mætti í rópið á laugardagsmorguninn. Eftir tímann og sturtu heima skrapp ég til norsku esperanto-vinkonu minnar og lásum við saman hálfa kínverska sögu á esperanto. Náði að sjá síðustu mínúturnar í leik Liverpool og Arsenal og svo allan seinni hálfleikinn. "Mínir menn" voru langtum betri og unnu 4-1. Munaði þar mest um Crouch sem skoraði þrennu, hvert markið öðru fallegra. Um kvöldið fórum við hjónin í fertugsafmæli og vorum þar í svo góðu yfirlæti fram eftir kvöldi og fram á nótt að við vorum síðustu gestirnir til að fara.

Í gær var ég mætt í á kóræfingu klukkan tólf og um tvo var fermingamessa þar sem fermd voru 9 börn. Allt gekk vel fyrir sig. Fljótlega eftir að ég skilaði mér heim fórum við hjónin í heimsókn til einnar vinkonu minnar. Davíð var búinn að samþykkja að hreinsa eina lapptölvu og uppfæra vírusvörnina á henni. Hann hófst handa um fimmleytið og ég varð að draga hann í burtu upp úr tíu en hann náði ekki að klára alveg og hefði líklega helst viljað vera þangað til hann var búinn.

- Ballettsýningin -

Ég var svo heppin að vera boðið á ballettsýningu sem Hulda systurdóttir mín tók þátt í í fyrrakvöld. Þetta var frábær sýning og kenndi ýmissa grasa. Þarna voru fiðrildi, dúkkur, bansar, kanínur blóm, póníhestar (Hulda dansaði sem einn af hestunum og gerði það virkilega vel) og margt fleira. Helga bauð okkur mömmu þar sem Ingvi mágur er ekki á landinu og hún tók Bríeti með líka. Sú stutta sat í fanginu á mér fram að hléi, alveg grafkyrr og horfði hugfangin á. Eftir hlé átti hún bágt með að sitja lengur kyrr og vildi helst fara upp á svið og taka þátt. Í nokkra stund valsaði hún upp og niður við hliðina á sætaröðunum og lyfti höndum upp yfir höfuð eins og ballerínurnar á sviðinu. Ætli hún byrji ekki í ballett næsta haust, það mætti alveg segja mér það.

Í gærkvöldi var sameiginleg kóræfing í Óháðu kirkjunni. Þar var mikill raki og loftslagið eins og á Kanaríeyjum en aðfaranótt mánudags sl. sprakk heitavatnsrör og skemmdist töluvert. Gólfin í kjallaranum og eldhúsinnréttingin eru líklega alveg ónýt. Æfingin gekk hins vegar mjög vel. Um hálftíu kvaddi Kópavogskirkjukórinn en við hin sátum eftir og héldum æfingum áfram þar til klukkan var farin að ganga ellefu. Adda, afleysingaorganisti, sagði okkur frá því að Pétur Máté, væri búinn að segja upp. Það er búið að biðja hana um að vera áfram en málin skýrast ekki fyrr en einhvern tímann í sumar.

- Heimsókn til "afa" -

"Afi" hafði sett sig samband við mig vegna esperantobóka og möppu og bauð mér í leiðinni að koma með hinn tvíburann til að skoða vinnustaðinn hans. Nú fer hver að verða síðastur til að heimsækja afa í vinnuna, þar sem hann á aðeins eftir að vinna þarna í örfáa daga. Ég var búin snemma og dreif mig með karatestrákinn á fórða tímanum í gær (söngfuglinn var búinn að fara í svona heimsókn). Strákurinn var mjög ánægður með sýningatúrinn og var m.a. svo heppinn að hitta eitt átrúnaðargoð sitt og kasta á það kveðju (nokkuð sem ég hélt að myndi ekki gerast því ég hitti þennan mann í fermingamessunni sl. sunnudag og hafði spurt hann hvort hann yrði á staðnum og fengið neikvætt svar). Við kvöddum afa klukkutíma síðar og var ég þá komin með esperanto-orðabók í möppu, kennslubók í esperanto og fleira í hendurnar. Við mæðgin vorum bæði í sjöunda himni eftir þessa heimsókn!

Var mætt í rope-yoga korter yfir sex í morgun. Svei mér þá ef ég þarf ekki að taka með mér handklæði næst. Því hægar sem ég geri kviðæfingarnar á bakinu því meir bogar svitinn af mér. Ég verð alveg rennandi blaut og ég fann að einu sinni var farið að leka upp í aðra nösina á mér. En það er gott að byrja daginn svona og mér líður mjög vel í líkamanum eftir æfingarnar og langt fram eftir degi. Þetta er fimmta vikan af átta sem er að byrja en líklega verða amk tveimur færri tímar seinni helminginn af námskeiðinu vegna rauðra daga í almanakinu.

- Helgin flogin -

Já, hún staldraði ekki lengi við blessuð helgin. Ég mætti í rope yoga tíma rétt fyrir klukkan níu á laugardagsmorguninn. Kennarinn, Þórdís, lét okkur gera 15 æfingar af hverri æfingu á bakinu og næstum öllum hliðaræfingum líka. Gerðum 10 æfingar af tveimur síðustu hliðaræfingum, blævængnum og sparkinu. Þetta gekk bara vel og nokkuð áreynslulaust fyrir sig. Fór beint heim í sturtu en skrapp svo yfir til norsku esperantovinkonu minnar.

Bekkjarfélagi tvíburanna úr Ískaksskóla, sem fluttur er í Stykkishólm, var í bænum um helgina og bauð bræðrunum með sér í keilu seinni partinn á laugardaginn. Þeir vissu að von var á vininum og þegar þeir vissu að þeim yrði boðið í keilu fóru þeir út og biðu eftir að verða sóttir. Þeir hurfu út um þrjú og ég sá þá ekki aftur fyrr en rétt fyrir sjö.

Í gær var ég mætt á kóræfingu í óháðu kirkjunnu rétt fyrir tólf. Við æfðum fyrir páskana og messu dagsins sem var fermingamessa. Meira hvað fólk mætir últra tímanlega í kirkju ef eitthvað er um að vera. Fyrstu kirkjugestir mættu einumoghálfum tíma fyrir messuna. Fermd voru 13 börn og gekk allt vel fyrir sig, fyrir utan það að rétt fyrir messubyrjun, alveg um tvö, fór brunabjallan í gang með miklum látum. Þetta reyndist ekkert alvarlegt. Presturinn, séra Pétur Þorsteinsson , gerði gott úr þessu og sagði að nauðsynlegt hefði verið að hringja inn eins og í skólunum.

Um fjögur ætlaði ég á handboltaleik, Valur - Stjarnan og var þetta síðasti heimaleikur Vals sem leikinn verður í höllinni. Það var allt lokað þegar ég mætti á svæðið og samt vorum við nokkur sem vorum að tínast að. Starfsmaður opnaði fyrir okkur og sagði að leikurinn væri ekki fyrr en klukkan sex en okkur væri velkomið að bíða. Ég notaði tækifærið og verslaði inn. Þegar ég gerði svo aðra tilraun tókst mér að fá alla feðgana með mér. Þetta var hörku leikur og höllin þétt setin. Stjörnustrákarnir skoruðu fyrsta markið en það var samt aldrei spurning hvernig leikurinn færi. Pálmar var í miklu stuði í markinu og varð m.a. víti, hinn markvörðurinn kom einu sinni inn á til að freista þess að verja víti sem hann og gerði og einnig seinna skotið (því stjörnustrákarnir höfðu náð frákastinu). Heimaliðið vann með sex marka mun.

Davíð skutlaði okkur mæðginum heim og dreif sig svo á skrifstofuna. Hann ætlaði ekki að vera svo lengi en við mættumst á tröppunum rétt fyrir klukkan sex í morgun.

- Aftur komin helgi -

Noh enn ein helgin er að skella á. Nú er að byrja messutörn í Óháðu kirkjunnu. Næstu tvo sunnudaga eru fermingamessur og svo verður messað að kvöldi föstudagsins langa (og þá munum við flytja hluta af "Eine kleini orgelmesse" ásamt kirkjukór Kópavogskirkju) og svo er messa klukkan átta á páskadagsmorgun. Við munum reyndar flumflytja Hayden verkið í Kópavogskirkju strax eftir messu í Kópavogskirkju um hádegisbil á föstudaginn langa. Mjög spennandi allt saman.

Já, vá hvað er stutt í páska. Þetta er bara alveg að skella á.

Sat við saumana mína í gærkvöldi. Var að sauma jólakort með mynd af kirkju á. Rosalega flott en líka mjög smátt. Hluti af saumaskapnum er saumaður með hálfu spori og þakið á kirkjunni er bara saumað sem útlínur. Ég byrjaði á þessu korti á þriðjudagskvöldið og klára það líklega næst þegar ég ákveð að sauma það. Ég er nefnilega að sauma "Kossinn" á fullu líka, alveg búin að sauma þrjá dekkstu litina og er með fjórða litinn (af sjö alls). Dekksti liturinn myndar skugga á milli andlitanna og næst dekkstu litirnir mynda skuggana og varirnar í andlitunum svo það er mjög flott að sjá myndina verða til á jafanum þegar hún er saumuð svona.

Farið vel með ykkur og eigið góða helgi!

- Gamall "vinur" á næstu grösum -

Þegar ég kom heim í gær tók ég eftir mjög kunnuglegum bíl í næsta stæði, Daihatsu Grand Move, meira að segja bílnúmerið var kunnuglegt, ON367. Þetta var "gamli bíllinn" sem við áttum á undan Fíatinum. Mér fannst mjög vinalegt en svolítið skrýtið að sjá hann fyrir utan núverandi heimilið okkar.

Í fyrradag fór ég á bókasafnið í Kringlunni og skilaði þeim bókum sem ég var búin að lesa. Bað um að framlent yrði á allar hinar bækurnar. Ein af þeim man ég samt ekki eftir að hafa séð í fórum mínum og ekki hefur ratast stafur um hana í lestrardagbókina mína. Í gær kíkti ég svo á Gegnir.is og sá þá að það hafði ekki framlengst tíminn á þessa tilteknu bók. Ég sendi fyrirspurn á aðalsafnið í Grófinni og sagði mínar farir ekki sléttar, heldur verulega brugðnar, var alveg eyðilögð yfir að finna ekki þessa bók. Ég fékk svar við fyrirspurninni í morgun og þar var mér tjáð að bókin hefði fundist upp í hillu á safninu og búið væri að taka hana af listanum hjá mér. Mér létti stórum.

- Danssýning 5. BH -

Í gær sýndu, Oddur Smári og krakkarnir í hans bekk foreldrum sínum, systkynum og þeim ættingjum sem einnig var boðið og mættu, nokkra dansa. Við fengum að sjá tvo línudansa, rúmbu, cha,cha,cha, dans ársins 2006 og körfuboltadansinn. Það sem þau voru flott og frábær. Sýningin byrjaði um sex og ég var örlítið stressuð með tímann því Davíð Steinn var með drengjakórnum á upptökuæfingu í Fella- og Hólakirkju og var búinn korter fyrir sjö. Ég var reyndar búin að búa hann undir að þurfa að bíða smá.

UM kvöldið skrapp ég á Friendtex fatakynningu til vinkonu minnar. Auðvitað freistaðist ég smá þótt ég sé ekki alveg í því fatanúmeri sem mér líður best í. En ég stoppaði ekki lengi því ég var á leið í saumaklúbb til tvíburahálfsystur minnar. Passaði mig reyndar á að stoppa ekki of lengi svo ég yrði komin í rúmið vel fyrir miðnættið.

EN aðeins um síðastliðna helgi, afmælishelgina mína. Á laugardagskvöldið fórum við Davíð á árshátíð SRB sem haldin var á Grand Hótel. Veislustjórar voru Davíð Ólafsson og Stefán Stefánsson og voru þeir með undirleikara með sér. Tvær úr kortadeildinni tóku sig til og laumuðu þeim upplýsingum að þeim að það væri afmælisbarn í salnum. Milli forréttar og aðalréttar báðu þeir svo Önnu Sigríði (mig) um að rísa á fætur. Þeir sungu svo afmælislag í óperustíl við frumsamin texta áður en þeir báðu alla viðstadda um að standa á fætur syngja afmælislagið og hrópa svo þrefalt húrra á eftir. Þegar þjónnin sem þjónaði okkar borði vissi að ég ætti afmæli sagði hann að hvítvínsglasið sem ég hafði pantað með matnum væri í sínu boði. Glasið var reyndar nær tveimur glösum að magni hafði fengið vínið inn í karöflu og hafði þjónninn upphaflega sagt að ég fengi bónus þar sem vínið sem ég hafði pantað var volgt. Veislustjórarnir voru frábærir og klappaðir upp nokkrum sinnum þegar þeir voru að klára. Á eftir lék hljómsveitin BUFF fyrir dansi fram á rauða nótt. Við Davíð fórum reyndar heim um eittleytið.

ALLUR sunnudagurinn fór meira og minna í fótboltagláp og útsaum hjá mér. Við skruppum reyndar í Krónuna í Skeifunni og versluðum inn. Vorum heppin að fá allt sem var á listanum því verslunin er að hætta og þar af leiðandi eru þeir hættir að taka inn nýjar vörur. Það er sorglegt að þeir skuli vera að leggja þessa búð niður, ég var farin að versla þarna mjög reglulega og sá að það munaði mig heilmiklu.

Rifa augun reif og kát
raula lítinn brag.
Á mig kemur ekkert fát
ég er þrjátíuogníu í dag.

- Helgin í nánd -

Ósköp líða dagarnir eitthvað hratt. Lífið gengur samt sinn vanagang. Oddur Smári var mjög duglegur í ritgerðavinnu í vikunni. Hann hafði lært af fyrri vinnubrögðum og bætt þau verulega. Hann valdi að skrifa um Akureyri og átti að skila amk einni blaðsíðu, handskrifaðri, í gær. Strákurinn var búinn að skrifa ritgerðina á þriðjudaginn. Aftur á móti var ég mjög hissa á Davíð Steini, hann gerði þetta svo rétt og vel síðast en tveim dögum fyrir skil (skilin voru í dag) var hann ekki einu sinni búinn að velja sér efni. En minn tók sig á og skrifaði ágætis ritgerð um Mývatn í gærkvöldi. Ég benti honum samt á að betra væri að gera þetta eins og hann gerði það síðast, velja sér efni sem fyrst, leita upplýsinga, leyfa málunum að gerjast og eiga þá bara eftir að fínpússa daginn fyrir skil. Svo verður bara að koma í ljós hvort þeir bræður tileinki sér þessa aðferð eða ekki.

Á kóræfingu í fyrrakvöld mætti kirkjukór Kópavogskirkju til okkar og stjórnandi þeirra sem reyndar er að hætta mjög fljótlega. Vel gekk á æfingunni og var mjög gaman. Í kaffinu var boðið upp á afganga frá Bjargarkaffinu um síðustu helgi. Ég lét samt ekki freistast.

Saumaskapurinn gengur bara þokkalega. Ég er jafnvel að spá í að hvíla "kossinn" og sauma eins og eitt stykki jólakort fljótlega.

Farið vel með ykkur og hafið það gott um helgina!

- Örstutt -
1000

Jibbí, ég er komin með uppþvottavél aftur, og hún virkar fínt. Þetta er uppþvottavélin sem var á Grettisgötunni þar sem systir mín og hennar fjölskylda bjuggu síðast.

Það var nokkur þeytingur á mér í gær. Sótti kórkexið upp í Hallgrímskirkju. Stoppaði stutt heima og kom Oddur Smári með þegar ég skutlaði bróður hans á upptökuæfingu í Fella- og Hólakirkju. Síðan lá leiðin yfir í Veghúsin þar sem mamma var að passa Bríeti. Afhenti henni fermingamyndina og nú hefur hún tæpar þrjár vikur til að ramma hana inn. Við stoppuðum ekki lengi því Oddur Smári gleymdi sundskýlunni sinni í æfingabúðunum og hann er að fara í sundtíma á morgun svo við komum við í Hagkaup áður en ég skutlaði honum á karateæfingu.

Í gærkvöldi lauk ég við Lukkukettina og merkti mér þá. Skammstöfunin og ártalið kemur samt ekki til með að sjást eftir að ég verð búin að ramma myndirnar inn. Svo byrjaði ég á kossinum, saumaði í kringum jafann og tók miðjuna.

- Annasöm helgi -

Ég hitti mömmu og aðra konu í Bónus við Holtagarða á þriðja tímanum á föstudaginn. Saman fylltum við þrjár körfur að ýmsu matarkyns sem nota átti í kóræfingabúðunum um helgina. Ég kom heim um hálffjögur. Davíð Steinn var búinn að finna sig til alveg sjálfur. Ég fór yfir listann með honum en hann hafði engu gleymt. Rétt fyrir fimm skutlaði ég stráknum upp að Hallgrímskirkju. 33 kórdrengir (þrír voru veikir), tvær eldhúsdömur, átta eða níu hópstjórar, kórstjóri og undirleikari lögðu af stað með rútu til Hlíðardalsskóla nokkru seinna.

Rétt fyrir níu á laugardagsmorguninn var ég mætt í rope yoga tíma númer 6. Náðum að gera allar tíu kviðæfingarnar og svo sjö æfingar á hvorri hlið. Svo voru góðar teygjur og slökun í restina. Ég kom heim rétt á undan Davíð en hann var að koma frá því að skutla Oddi Smára á rútuna sem fór frá Laugardalshöll með 9-11 ára frjálsíþróttakrökka á leið í æfingabúðir á Laugarvatn. Ég dreif mig í sturtu og skrapp svo til Inger í esperanto tíma. Við notuðum tímann til að skrifa niður (á esperanto auðvitað) hvað við ætlum að borða, drekka og spjalla um á esperanto á kaffihúsi saman fljótlega.

Skrapp í Hagkaup eftir að ég fór frá Inger og keypti m.a. efni í brauðtertuhring. Þegar ég kom heim fann ég manninn steinsofandi ennþá. Hann var að hugsa um að drífa sig á skrifstofuna en mér tókst að fá hann fyrst með mér í heimsókn til Helgu systur og Ingva mágs. Hittum frænku okkar systra og hennar mann þar. Eftir heimsóknina skutlaði Davíð mér heim og fór sjálfur á skrifstofuna. Ég skipti um á hjónarúminu, setti í þvottavél og kláraði að sauma fermingamyndina. Um hálfsex skipti ég um föt og var mætt á veitingahúsið Ítalíu þar sem ég hitti þrjár af fjórum samstarfsstúlkum mínum og yfirmanneskjuna. Fjórða samstarfskonan var veik. Þarna áttum við saman tvær skemmtilega stundir yfir mat. Misjafnt var hvað hver pantaði, ein t.d. pantaði bara aðallrétt og gos og kaffi á eftir. Þrjár af okkur (þar á meðal ég) pöntuðum eina hvítvín saman. Ég var líka ein af þremur sem fékk mér forrétt, aðalrétt og eftirrétt og kaffi á eftir. Það eina sem skyggði á þessa góðu stund (fyrir utan að það vantaði eina í hópinn) var að þegar við vorum að borða eftirréttin var klukkan alveg að verða átta og það kom þjónn til okkar og sagði að borðið væri pantað klukkan átta. Sú yngsta í hópnum safnaði okkur saman í bílinn sinn og gerðist leigubílstjóri.

Eftir að ég kom heim bjó ég til brauðtertuhringinn og horfði svo á sjónvarpið fram eftir kvöldi.

Davíð var búinn að lofa að hjálpa til á karatemóti í morgun og átti að vera mættur í Kópavoginn um ellefu. Fyrst skutlaði hann mér samt að ná í Fíatinn sem var enn á Laugaveginum frá því í gærkvöldi. Ég var mætt á kóræfingu um tólf með brauðtertuna með mér því í dag var svokölluð Bjargar-messa og þá selur kvenfélag óháða safnaðarins meðlæti með kaffinu (flestir kórfélagar og kvenfélagskonur leggja eitthvað til veislunnar). Mamma og Davíð Steinn komu við að sækja húslyklana hans um eittleytið. Stráksi vildi frekar fara heim og vera einn þar heldur en að vera í messunni. Ég kom heim um þrjú (sleppti alveg kirkjukaffinu) og Davíð og Oddur Smári rúmum hálftíma síðar.

Núna eru nafnarnir að hjálpast að við að gera enskuverkefni. Mig langar að drífa í að ljúka við að sauma lukkukettina svo ég geti byrjað á nýju saumaverkefni fljótlega. Á nóg af ósaumuðum myndum eins og fram hefur komið áður.

Að lokum langar mig að geta þess að næsta færsla verður tímamótafærsla því hún verður númer 1000. Þessi færsla er semsagt númer 999!

- Danssýning 5HLE -

Við vorum öll mætt í hátíðarsal Hlíðaskóla um fimm í gær. Davíð Steinn og allir hinir í bekknum hans vorum um það bil að fara að sýna okkur nokkra dansa sem þau voru búin að læra. Oddur Smári ákvað að sleppa karateæfingu og koma með. Dansararnir byrjuðu á að sýna okkur tvo línudansa. Næst voru strákarnir beðnir um að bjóða dömunum upp í rúmbu. Þegar allir strákarnir voru komnir með dansfélaga voru þrjár stakar stúlkur eftir. Danskennarinn vissi af Oddi í salnum og spurði hvort hann væri tilbúinn að hjálpa þeim. Og hvort hann var. Hann hjálpaði til í rúmbunni og einnig í næsta dansi sem var cha, cha, cha. Að lokum dönsuðu krakkarnir dans ársins og körfuboltadansinn (sá dans var bónus fyrir hvað þau höfðu staðið sig vel á haustönninni). Á eftir sýningunni fengu allir sér af hlaðborðinu en allir höfðu lagt eitthvað í púkk.

Annars var ég í fimmta rope yoga tímanum í morgun. Það er mjög gott að byrja daginn á þessum æfingum. Vellíðanin er gífurleg og ég get svo svarið það að maður er brosandi allan daginn.

- Keppni og kappleikir -

Strákarnir áttu ekki að mæta fyrr en hálfsex (í stað hálffimm) í Laugardalshöll. Þá var upphitun og svo var keppni í 60m, langstökki, kúluvarpi og 800 m hlaupi milli krakka í yngri aldursflokkunum. Keppendur komu frá öðrum félögum líka. Mínir kepptu í elsta flokknum (11 ára) og gekk svona misvel en voru þó eitthvað að bæta sig miðað við þeirra fyrri árangur. Það voru þrjár greinar á dagskrá hjá þeim í gær, ein greinin, 800 m hlaup, verður háð seinni partinn í dag en þá verða tvíburarnir fjarri góðu gamni (ég held samt að Oddur Smári sé bara fegin því). Um sjö leytið skrapp ég frá til að kaupa fjölskyldutilboð á KFC. Ég kom til baka um hálfátta og þá áttu þeir enn eftir að vera í rúman klukkutíma á svæðinu. Það kom sér einkar vel fyrir mig því ég gat þá horft á fyrri hálfleikinn í leik Liverpool og Barcelona. Þvílíkur hálfleikur, "mínir menn" áttu að skora amk 3 mörk. Markskot hálfleiksins voru tíu á móti einu og voru sumir boltar að sleikja stangir eða slá. Ég hélt að sjálfsögðu með (og held enn, hef gert það lengi) með Liverpool. En ég held líka með Eiði Smára og var bara nokkuð sátt við að hann skyldi skora eina mark leiksins. Og þar sem Liverpoolmenn unnu fyrri leikinn í Barcelona 2:1 þá fóru þeir áfram á fleiri mörkum skoruðum á útivelli.

- Orðabullumbull -

Vindurinn strauk mér svo blítt um kinn

sveifluðust lokkar í allar áttir.

Ég verð þó að bíða enn um sinn

að opnaðar verði allar gáttir.

Glaðlegar hugsanir huga minn fylla

hætt get ég ekki að brosa.

Rétt er sér stundarkorn aðeins að tylla

samt ekki´ á blautan mosa.

Hvað er í gangi, ég bara spyr?

Tíminn hann þýtur hratt.

Niður ég sest og borða mitt skyr

samt var ekkert svo bratt.

Tímabært er þessu rugli að rjúfa

rangla tímanum mót.

Hlusta kannski á lagið ljúfa

láta sig dreyma um bót.

- Sunnudagskvöld -

Strákarnir eru sofnaðir og Davíð er að vinna. Hann fór á skrifstofuna um miðjan dag. Rétt fyrir átta sótti hann okkur Odd Smára og fór með okkur á kvöldvöku í Hallgrímskirkju þar sem Davíð Steinn var að syngja með drengjakórnum, fermingarbörn fluttu helgileik um sköpun ljóssins, ung stúlka spilaði á hörpu, strengjakvartett og tvö klarinett fluttu tvo kafla úr þekktu verki, Pétur Benediktsson flutti tvö lög eftir sjálfan sig og svo var einnig samsöngur, hugvekja og bænastund. Davíð skutlaði okkur mæðginunum heim og fór svo aftur að vinna.

Ungt par er búið að kaupa risíbúðina og er að koma sér fyrir. Í dag bankaði smiður upp á og vildi fá að skoða smá verksummerki eftir sig. Um var að ræða smá gat niður úr loftinu í herbergi tvíburanna. Hann lofaði að spasla í þetta og mála yfir svæðið við tækifæri.

Ég fór í Laugardalshöll og sá Valsara vinna Akureyri í handbolta karla í dag. Hitti tvær frænkur mínar á leiknum sem fór 32:28 fyrir mína menn. Fyrsta markið kom ekki fyrr en á fimmtu mínútu og það voru norðanmenn sem skorðuðu það. Þeir komust í 2:0 en svo skoruðu Valsmenn 7 mörk í röð og eftir það var eiginlega aldrei spurning um hvernig leikurinn myndi fara.

- Ýmislegt -

Enn ein helgin er runnin upp. Á fimmtudaginn beið mín miði frá Margaretha um að varan (jóladúkurinn sem ég sé fyrir mér á stofuborðinu einhver næstu jólin), væri kominn. Ég fór strax eftir vinnu í gær og sótti þetta.

Fermingamyndin er langt komin. Nú á ég aðeins eftir að ljúka við að sauma blómin, kyrtilinn, nafn fermingarbarnsins og fermingardaginn. Og þá verður það líklega bara "Ugla sat á kvisti... Að vísu á ég eftir að klára annan lukkuköttinn (þennan sem er að fylgjast með fiðrildunum) og ramma myndirnar inn. Einnig á ég hálfsaumað jólakort.

Rétt fyrir sex skutlaði ég Oddi Smára á aukaæfingu með sensei Poh Lim (í svokallaðar æfingabúðir). Ég skrapp og setti bensín á Fíatinn en fór svo og fylgdist aðeins með æfingunni. Ég var líka með saumana mína og bók (nema hvað) og saumaði og las á meðan ég beið.

Í morgun dreif ég mig á fætur rétt upp úr átta til að vera vel vöknuð á laugardags rope yoga æfingunni sem hófst rétt fyrir níu. Æfingin var mjög góð. Sumir voru að koma í fyrsta skipti og að þessu sinni var kennarinn með konu til aðstoðar sem kemur til með að vera með laugardagsæfingarnar. Ég finn enn fyrir töluverðum harðsperrum í kviðnum en það er víst bara gott. Guðni sagði að "ég væri með fullan kvið af ánægju".

Davíð ætlar að fara með Oddi Smára í karateæfingabúðir dagsins sem eru á sama tíma og laugardagsæfingarnar hjá stráknum. Þetta er síðasti tíminn sem sensei Poh Lim kennir. Og seinni partinn í dag verður Davíð Steinn sóttur ásamt fjórum öðrum drengjum úr drengjakórnum og farið verður af stað út í óvissuna.

Farið vel með ykkur.

- Nýr mánuður -

og bráðum aftur komin helgi

Ég fór í rope yoga tíma tvö í morgun og að þessu sinni sá ég að það voru tvær sturtur í klefanum. Ákvað samt að halda mig við áætlun mína. Mér tókst að sleppa við harðsperrur í handleggjum en er frekar aum frá bringu og niður á læri. Það á eftir að jafna sig fljótlega. Við gerðum allar tíu kviðæfingarnar (á bakinu) og tvær æfingar að auki á hvorri hlið. Þetta er bara gott og frábært að framundan séu sjö vikur í viðbót plús tíminn á laugardaginn.

Kóræfingin var í Kópavogskirkju í gærkvöldi. Aftur var okkur skipt upp í karla og kvennaraddir og farið vel yfir alla þrjá kaflana (af sex) sem við erum búin að fá í hendurnar. Í lokin sungum við saman yfir tvo af köflunum. Það gekk svona þokkalega. Allt í einu var klukkan orðin hálftíu. Mikið sem tíminn getur hert á sér ef verið er að gera eitthvað skemmtilegt, og nógu hratt fer hann fyrir...

- Lestrarprestur -

Tommi og Teddi næstum sjö ára sonur hans kíktu aðeins við í gærkvöldi. Við vorum búin að frétta að strákurinn væri duglegur að lesa og spurðum hvort hann væri alger lestrarhestur. -"Ekki hestur, prestur", sagði strákurinn þá.

Mér tókst að koma mér í rúmið rétt rúmlega tíu í gærkvöldi og leggja frá mér bókina Heppin eftir Alice Sebold um hálftíma síðar. Ég vaknaði svo um hálfsex í morgun, spennt fyrir fyrsta rope yoga tímanum í tæpt ár. Var mætt í Rope Yoga setrið fyrir sex en tíminn byrjar ekki fyrr en 6:15. Guðni Gunnarsson sér sjálfur um námskeiðið og á rúmum sjötíu mínútum náði hann að fara yfir allar tíu æfingarnar á bakinu, góðum teygjum og slökun í restina (reyndar var líka slökun í upphafi tímans). Reyndi að passa mig að nota ekki handleggina of mikið, nema til stuðnings, minnug allra aumu vöðvanna fyrir ári síðan. Það kemur svo í ljós á morgun hvort ég verð styrð um allan líkamann eða bara frá mitti og niður úr. Eini gallinn við þetta námskeið er að það virðist ekki gert ráð fyrir að maður fari í sturtu eftir tímana. Námskeiðið er frá 6:15-7:25 þriðjudaga og fimmtudaga og á laugardögum klukkan 8:50-10:00 næstu átta vikurnar. Það er semsagt of knappur tími til að fara heim í sturtu áður en maður mætir til vinnu virku dagana. Hvað er þá til ráða? Líklega verður endirinn sá að ég dríf mig úr námskeiðinu í vinnu og fer í snögga sturtu þar áður en ég hef vinnudaginn.

- Annasöm helgi að baki -

Á föstudagskvöldið var, var árshátíð hjá starfsfólki Óháðu kirkjunnar. Tvíburahálfsystir mín sótti okkur Davíð stuttu fyrir átta. Kokkar frá Sómasamlokum buðu upp á flott hlaðborð með ýmisskonar forréttum, kalkún og lamb í aðalrétt og svo var einhver eftirréttur í boði sem ég smakkaði ekki á. Aldrei þessu vant (amk þau skipti sem við höfum mætt) mætti Ómar Ragnarsson ekki á svæðið. En skarðið hans var vel fyllt. Kristinn var með nokkra góða brandara og smá annál, Víglundur kom með gítarinn og dreifði nýjasta textanum við lagið "Gvendur á Eyrinni" og Adda settist við píanóið og spilaði undir fjöldasöng í nokkrum öðrum lögum. Kvöldið var hið allra skemmtilegasta.

Helga systir hringdi um hálftíu á laugardagsmorguninn og sagðist mundu skila tvíburunum (sem höfðu gist hjá henni) fljótlega. Hún kom með báðar stelpurnar með sér og gaf sér sér tíma til að fá sér kaffi sopa. Rétt fyrir tólf skutlaðist ég með karatestrákinn á æfingu. Seinsei Poh Lim var með æfinguna en hann verður með æfingabúðir um næstu helgi svo líklega verður hann með einhverjar fleiri æfingar í vikunni. Það er verið að auglýsa eftir starfskrafti í ræstingar í Þórshamri og sá sem sá um þessi mál er hættur. Poh fékk stórukrakkana til að þrífa gólf, glugga og fleira og sagði að það væri góð karateæfing.

Davíð og Oddur Smári fóru á boltamót sem sá fyrrnefndi tók þátt í. Minn maður slasaðist á ökkla í upphituninni en var samt með. Það fór ekkert sérlega vel með fótinn á honum og er hann draghaltur maðurinn. Samt vill hann ekki láta kíkja á hann. Ég skildi Davíð Stein eftir einan heima um fimm og var mætt skömmu síðar að fagna vinnufélaga mínum sem var að halda upp á útskrift úr viðskiptafræði í Hálskólanum. Haldið var upp á þetta í Kaffi Reykjavík milli fimm og sjö þennan dag. Þetta var hið skemmtilegasta mannamót.

Í gær var svo messa í Óháðu kirkjunni. Það var alveg full kirkjan. Bjöllukórinn spilaði í upphafi og aftur í lok messu, fermingarfeðginin Örn Árnason og Sólrún Arnardóttir lásu fyrri og síðari ritningalestur, Bjartur Logi tók lagið rétt fyrir predikun og kristniboðinn Ragnar sá um predikunina. Venjulega eru messur ekki lengri en 40-50 mín en þessi stóð yfir í um 70 mínútur og var verulega skemmtleg.

Eftir messu verslaði ég í Krónunni og ákvað að hafa læri í sunnudagsmatinn. Keypt líka fullt af mjólk, álegg, brauð, ávexti og smotterí fleira. Karfan var samt innan við tíu þús. kr.

- Föstudagur -

Helgin er nýliðin og nú er önnur að skella á. Með sama áframhaldi verða aftur komin jól áður en maður nær að snúa sér marga hringi.

Seinni partinn í gær skutlaði ég Oddi Smára og Degi á frjálsíþróttaæfingu. Davíð Steinn kvartaði undan verk í ökkla og sagðist ekki treysta sér á æfingu. En hann notaði þennan tíma mjög vel og fór langt með að skrifa ritgerð um Tröllaskaga. Hann var reyndar svo séður að vera búinn að kíkja yfir efnið og afla sér heimilda svo þetta gekk ágætlega hjá honum. Þetta var erfiðara hjá Oddi Smára. Hann hafði bara ákveðið hvað hann ætlaði að skrifa um, Ísafjörð, en var sama og ekkert búinn að lesa sér til um staðinn. Hann byrjaði fljótlega eftir að hann kom heim úr æfingum og hélt áfram eftir kvöldmat. Klukkan var að verða tíu þegar hann hætti, óánægður með að hafa ekki náð að skrifa tvær blaðsíður.

Ég vissi ekki að ef maður gúgglar "Lafði Rós" kemur bloggsíðan mín fyrst í upptalningunni. Í síðustu viku hafði samband við mig maður sem var búinn að taka að sér veislustjórastöðu á árshátíð og var að leita að þessu efni. Því miður var ég ekki með söguna því ég fékk hana lánaða frá einum kórfélaga mínum á sínum tíma og athugaði ekki að taka afrit af henni til eignar.

Hulda frænka varð 7 ára í gær. Vá, mér finnst svo stutt síðan ég var að passa hana á morgnana. Í dag á Sandra Ósk sjö ára afmæli en ég var að passa hana seinni veturinn sem ég var með Huldu, þ.e. þegar þær voru á öðru árinu og að bíða eftir leikskólaplássi.

- Meiri þeytingur og kóræfing -

Strax um fjögur fór ég á bókasafnið. Bækurnar voru komnar á síðasta skiladag. Ég skilaði þeim flestum en framlengdi þrjár. Sótti mér svo slatta af bókum í viðbót. Reyndar segir "Gegnir" að ég sé ekki með neina bók í útláni sem stendur en það stenst ekki. Líklega er bara bilun í kerfinu. Ég var komin heim upp úr hálffimm en gat ekki stoppað mjög lengi þar sem búið var að boða til stjórnarfundar með útgáfunefnd í foreldrafélagi DKR á sjötta tímanum. Fundurinn var ekki mjög langur og náði ég að skreppa heim í tæpan klukkutíma áður en kominn var tími til að sækja karatestrákinn (eða "red ninja" á æfingu). Hann var sá eini sem mætti á æfingu í öskudagsbúning. Þegar ég var búin að skila stráknum heim sá ég að það tók því ekki að fara inn, það var stutt í að kóræfingin byrjaði. Að þessu sinni kom Kópavogskirkjukórinn í heimsókn til okkar. Tveir tímar voru mjög fljótir að líða enda mjög gaman á æfingunni. Þar sem stjórnendur voru tveir var okkur skipt upp í karla og kvennaraddir eftir upphitunina. Hálftíma seinna sungum við einn kafla yfir saman áður en við fórum í kaffi. Við sungum hinn kaflann yfir eftir kaffi áður en við skiptum aftur liði og fengum nýjan kafla í hendurnar.

- Þeytingur -

Hálftíma eftir að ég kom heim í gær skutlaðist ég með söngfuglinn á kóræfingu. Á heimleiðinni kom ég við í Suðurveri og keypti örfáar vatnsdeigsrjómabollur. Ég var ekki búin að vera lengi heima þegar kominn var tími til að skutla karatestráknum á æfingu en ég hafði boðist til þess. Ég fór aftur heim og undirbjó kvöldmatinn á hálftíma. Þá var kominn tími til að sækja söngfuglinn. Skutlaði honum heim og fór svo upp í Þórshamar og beið eftir karatestráknum. Eftir kvöldmat vöskuðum við Davíð upp og ég bjó til kaffi. En ég stoppaði ekki lengi heima, eftir uppvask og einn kaffibolla skrapp ég til tvíburahálfsystur minnar. Tveir og hálfur tími þar voru ekki lengi að líða, með sauma við hönd og á spjalli við vinkonu sína.

- Helgin komin og farin -

Já, tíminn lætur ekki bíða eftir sér frekar en fyrri daginn. Strákarnir biðu tilbúnir úti, með töskur (föt til skiptanna) þegar ég kom heim rúmlega fjögur sl. föstudag. Ég rétt skrapp inn með smá dót (sem betur fer því strákarnir höfðu skilið eftir opið inn í íbúð og ljós alls staðar). Ég varð ekkert smá glöð þegar ég sá að það var kominn miði frá Margaretha um að vörurnar væru komnar. Ég hafði reyndar ákveðið að koma við þar fyrst ég yrði í nágrenninu. En fyrst fórum við mæðginin og keyptum öskudagsbúninga á bræðurnar. Eftir þau viðskipti sótti ég vörurnar. Því næst lá leiðin upp í Grafarvog þar sem ég skildi strákana eftir en þeir fóru austur með afa sínum og ömmu skömmu síðar.

Ég skrapp heim að skipta um föt og gat ekki stillt mig um að kíkja á handavinnudótið. fermingamyndin og flestar hinna sem ég pantaði voru í pokanum (ein var reyndar ekki með þar sem ég pantaði hana nokkrum dögum seinna)en svo fann ég þessa líka, mundi ekki eftir að hafa pantað hana en ekki kvarta ég yfir að fá nóg af sauma verkefnum. Eftir að hafa skoðað dótið dreif ég mig í púlstofuna í Lágmúlanum þar sem ég eyddi næstu þremur tímum með skemmtilegu fólki. Vann alla fjóra púl-leikina sem ég spilaði en þann síðasta bara vegna þess að mótherjinn setti svörtu kúluna ofan í aðeins of snemma.

Þegar ég kom heim byrjaði ég strax að undirbúa saumun á fermingarmyndinni. Saumaði hringinn í kringum jafann og tók miðjuna. Ég féll aftur í þá gryfju að taka miðjuna eins og hún var merkt á munstrinu og var búin að sauma of mikið til að breyta því. En miðjan á munstrinu gerir ekki ráð fyrir nafninu sem er saumað undir eftir á. Þetta hlýtur samt að bjargast eins og í fyrra. Ég greip í saumana öðru hvoru alla helgina, mislengi í einu. Er búin með stjakann og gulu geislana (en ekki það hvíta í miðjunni og blómabreiðuna hægra meginn við stjakann og alla skugga á kirtlinum sem stúlkan klæðist. Haldið þið ekki að ég nái að ljúka við þessa mynd fyrir 1. apríl n.k? (Þ.e. ef ég verð þá ekki handlama).

Á laugardagskvöldið fórum við hjónin í fertugsafmæli. Mikið fjör og mikið gaman. Kvöddum um eitt-leytið því ég þurfti snemma á fætur morguninn eftir.

Í gærmorgun var ég komin austur á Hellu rúmlega átta. Var með kórbúninginn hans Davíðs Steins með mér. Gat stoppað í rúman hálftíma. Strákurinn var mættur í kirkjuna rétt fyrir tíu og pabbi hans sótti hann svo um tvö í klifurhúsið en þangað fóru kórdrengirnir eftir messu. Honum var svo boðið í afmæli til bekkjarsystur sinnar seinni partinn. Hann hélt endilega að afmælið byrjaði klukkan sex og fór ekki fyrr en þá og mætti því klukkutíma seinna í afmælið en allir hinir. En það gerði lítið til.

Ég dreif mig á handboltaleik ÍR - Valur (23:35) góð úrslit miðað við að staðan var 5:0 fyrir ÍR þegar sjö mínútur voru búnar af leiknum.

Davíð fór í vinnuna eftir að hafa sótt strákinn og hann kom ekki heim fyrr en um sex í morgun. ÉG er farin að halda að þessari törn ætli aldrei að ljúka.

Bolla, bolla.

- Kóræfing í Kópavogskirkju -

Oddur Smári valdi það að sleppa því að fara í sturtu eftir karateæfinguna í gær til að þurfa ekki að ganga heim líka. Ég var á stjórnarfundi v/Drengjakórsins milli fimm og rúmlega sex. Svo beið ég eftir að kóræfingin væri búin hjá Davíð Steini. Hann skaust svo fyrir mig inn í karateheimilið til að segja bróður sínum hvar bíllinn væri. Reyndar byrjaði hann á því að tilkynna Oddi Smára að þeir þyrftu að ganga heim. Sé alveg fyrir mér undrunarsvipinn sem hefur komið á karatestrákinn. Ég skutlaði tvíburunum heim og dreif mig svo í Kópavoginn. Þar tók kirkjukór Kópavogskirkju og stjórnandinn þeirra á móti okkur. Mæting var mjög góð og við byrjuðum á því að prófa að syngja þessa tvo kafla sem við erum búin að vera að æfa; Kyrie eleison og Agnus dei. Síðan skiptu kórstjórarnir okkur niður. Adda fór fram með alla strákana og við stelpurnar urðum eftir hjá Sigrúnu. Við æfðum raddirnar í köflunum sundur og saman og vorum svo áhugasamar að fylgdumst ekkert með tímanum. Allt í einu stóð Adda hjá okkur og spurði hvort við ætluðum ekki að taka okkur kaffipásu. Eftir pásuna æfðum við áfram aðskilin, sópran og alt saman og tenór og bassi saman, í c.a. 15 mín. Síðan sungum við kaflana saman aftur og þvílíkur munur. Við komum víst alveg ótrúlega miklu í verk í gærkvöldi. Næsta miðvikudag ætlar Kópavogskirkjukórinn að heimsækja okkur í óháðu kirkjuna.

- Góð hugmynd eða hvað? -

Það er nokkuð víst að þann 17. mars n.k. (á sjálfan afmælisdaginn minn) fer ég á árshátíð. Mér datt sí svona í hug að það væri alveg frábær hugmynd að halda upp á fertugs-afmælið mitt við það tækifæri. Það eru aðeins tveir gallar. Í fyrsta lagi þá verð ég bara þrjátíuogníu ára (en ég get haldið upp á það afmæli að ári í staðinn). Og í annan stað þá má ekki bjóða vinum og vandamönnum á árshátíðir (en það má bjóða maka og við Davíð getum alveg haldið upp á þetta tvö innan um slatta af vinnufélögum og þeirra mökum). Eða hvað? Kannski er þetta ekki svo góð hugmynd eftir allt saman.

Þegar ég hafði skutlað drengjunum í frjálsar í gær hitti ég norsku esperanto vinkonu mína. Við notðuðum klukkutímann mjög vel. Lásum þrjá kafla í Jen via mondo og gerðum öll verkefni sem tilheyrðu þeim köflum. Ég hugsa að það líði ekki á löngu áður en við getum farið saman á kaffihús og spjallað saman á esperanto. Það verður líklega bæði fróðlegt og skemmtilegt.

- Ég er bókaormur -

Þegar ég skilaði af mér bókum á safnið um mánaðamótin nóvember/desember sl. sá ég smá kompu auglýsta á 300 kr sem nota skyldi sem lestrardagbók. Ég var með klink á mér og keypti mér eitt stykki. Fyrsta færslan inn í bókina er skráð 8 desember. Það var bókin Týnd eftir Karin Alvtegen. Núna eru alls komnar 47 færslur. Ein af þeim bókum sem ég hef nýlokið er bókin Slepptu mér aldrei eftir Kazuo Ishiguro. Þetta er mjög grípandi og um leið sláandi bók. Skáldsagan er sögð í fyrstu persónu af liðlega þrítugri konu sem starfar sem hlynnir. Hlynnir að gjöfurum. Hún rekur sögu sína frá því hún man eftir sér. Hún ólst upp, ásamt fullt af öðrum börnum, á heimavistarskóla. Aldrei er talað um foreldra enda kemur í ljós að þessi börn eru klónuð með það í huga að nota líffærin úr þeim til ígærðslu. Ég mæli með þessari bók, hún er að mínu mati mjög góð.

- Saumaverkefni framundan -

Ég er að bíða eftir miða frá Margaretha. Mamma bað mig um að sauma fermingarmynd handa stúlkunni sem hún "passaði" nokkra vetur í röð. Ég átti reyndar munstrið til en datt í hug að það væri gaman að gefa munstrið með myndinni. En þetta var ekki það eina sem ég pantaði, ó, nei. Ég kolféll fyrir þessari, þessari og þessari. Þrátt fyrir að eiga líka fullt af myndum í jólakort ósaumuð þá freistaðist ég í tvær litlar páskamyndir líka. En fyrst á dagskránni er fermingamyndin og verð ég sennilega að sitja nokkuð mikið við þegar þetta kemur því stúlkan fermist á pálmasunnudag, 1. apríl næst komandi. Hugsanlega verð ég að finna mér jafa og nota afganginn af garninu frá myndinni sem ég saumaði í fyrra. Þetta kemur í allt í ljós mjög fljótlega.

- Helgarmál -

Davíð og Oddur Smári eru á karatemóti í Breiðablikshúsinu í Smáranum. Strákurinn er að keppa í kata og pabbinn að fylgjast með, styðja og hvetja. Við Davíð Steinn erum að sinna heimilisverkunum því þau urðu útundan í gær.

Hitti norsku esperanto-vinkonu mína um ellefu í gær. Þáði kaffi hjá henni og svo glugguðum við í nokkur blöð sem eru á esperanto og hún fær gefins. Tókum okkur góðan tíma og klukkan var að verða hálfeitt þegar ég kvaddi. Þá fór ég beint upp í Þórshamar og fylgdist með seinni helminginn af karatetímanum hjá Oddi Smára. Þegar við komum heim var félagi strákanna mættur á svæðið. Þeir fóru fljótlega, allir þrír, í Kringluleiðangur. Bræðurnir voru búnir að spara vasapeningana sína og lögðu í púkk til að kaupa sér nýjan tölvuleik.

Davíð fór á skrifstofuna og ég dreif mig í heimsókn til einnar vinkonu minnar. Við vorum ekki búnar að hittast síðan í október svo það var mál til komið. Ég hafði saumana mína með mér og stoppaði hjá henni í hátt í þrjá tíma. Það var mjög notaleg stund.

Framundan er messa. Mæting upp í kirkju um eitt, messað klukkan tvö, smá kaffisopi á eftir og komin heim upp úr þrjú. Svo er aldrei að vita nema ég skreppi á handboltaleik. Valsstrákarnir eru að fara í Framheimilið. Sjáum til, sjáum til.

- Vapaskapað upupp ápá ppmápálipi -

Eftir kvöldmat í gær fékk ég Odd Smára til að hjálpa mér við uppvaskið og þurrka. Ég veit ekki hvernig það byrjaði en allt í einu vorum við farin að tala saman og syngja á p-máli og við héldum það út allan þann hálftíma sem við vorum að verki. Strákurinn talar reiprennandi p-mál og var ekki í vandræðum með að syngja á því líka. Hann var mjög fljótur að læra þetta mál á sýnum tíma. Við Davíð ætluðum að nota þetta okkar á milli þegar við urðum vör við að strákarnir voru farnir að skilja enskuna en það virkaði ekki lengi, eiginlega bara mjög stutt.

- Skómál -

Ég er ekki að fara að skrifa um að skór tali sérstakt mál, he, he, hemm. Heldur hefur Davíð Steinn verið að kvarta undan þreytu í fótum og hælsæri og ekki treyst sér í frjálsar íþróttir síðustu tvö skipti. Ég er nýbúin að kaupa nýja inni-íþrótta-æfingaskó á strákana en ég hafði grun um að útiskór stráksa væru farnir að kreppa að. Þannig að þegar ég var búin að skutlast með Odd Smára og vininn á æfingu sótti ég hinn tvíburann. Við enduðum hjá Steinari Waage og fundum á hann mjög góða skó með innbyggðu innleggi (eða er það illegg?). Strákurinn er kominn í stærð 36. Á eftir skutlaði ég honum heim og dreif mig svo að sækja Odd Smára. Var komin um leyti sem æfingin var að klárast en þurti að bíða í tuttugu mínútur eftir stráknum. Samt fór hann ekki í sturtu. Hann hefur greinilega verið að spjalla mikið við vininn.

Það er alveg að koma helgi, aftur og nýliðin. Það verður nóg að gera og gerast m.a. er messa og svo er keppni í kata hjá Oddi Smára. Sú keppni er á sunnudagsmorguninn svo ég er hrædd um að ég komist ekki á hana. Veit ekkert hvað þetta tekur langan tíma en hann á að mæta klukkan tíu og ég á að mæta upp í kirkju um eitt. Kannski sleppur þetta en ég veit að Davíð getur alveg farið með strákinn. Það er samt skemmtilegra að fara bæði, eða öll.

- Dagarnir þjóta -

Tíminn líður alltof hratt. Í gær hitti ég kennara drengjanna í foreldraviðtali í skólanum. Strákarnir voru viðstaddir viðtalið við sinn kennara. Annar kennarinn hafði aðeins eitt að segja, fylgjast betur með þegar skipt væri um efni eftir frjálsan lestrartíma (strákurinn hverfur alveg inn í sögurnar sem hann les og heyrir þar af leiðandi oft ekki þegar kennarinn segir bekknum að taka upp aðrar bækur). Ég lýsti yfir ánægju minni að kennd væru vinnubrögð í skólanum.

Davíð Steinn treysti sér ekki á frjálsíþróttaæfingu en hann tók vel í að vaska upp fyrir mig í staðinn. Ég skrapp og las smá esperanto með norsku vinkonu minni. Kom heim um sex rétt á undan Oddi og Davíð kom ekkert löngu seinna. Það var amk borðaður matur á slaginu sjö og þá voru allir heima. Eitthvað hafði Davíð Steinn verið utan við sig í uppvaskinu því hann vaskaði bara upp það sem var í stóra vaskinum. En ég lét það óátalið, gerði bara smá grín að stráknum.

Davíð fór aftur í vinnu um níu leytið og ætlaði að koma heim upp úr miðnætti. Klukkan var víst orðin fjögur þegar hann skilaði sér. Törnin virðist ætla að halda áfram og það er spurning hvort ég ætti ekki að panta helgarpláss í bústað mjög fljótlega...

- Bústaðarferð -

Um helgina skruppum við í sumarbústað í landi Efri Reykja, ekki langt frá Laugavatni. Við ætluðum að vera komin þangað milli fjögur og fimm en vorum að leggja af stað úr bænum um það leyti. Byrjuðum á því að kíkja við á Bakkanum hjá tengdó. Síðan lá leiðin í KFC og Krónuna á Selfossi. Klukkan var rétt nýorðin átta er við komum í bústaðinn. Eitt af því fyrsta sem gert var var að láta renna í heita pottinn. Ég komst í hann um miðnætti og slakaði vel á.

Helga systir og Bríet komu eftir hádegi á laugardag. Hulda var í "sveitinni" hjá afa og ömmu og "Ingvadóttir" (eins og Bríet segir að pabbi sinn heiti) var að vinna. Helga fékk Davíð til að hjálpa sér með smá skólaverkefni. Við hin fórum m.a. í pottinn. Helgin var eiginlega alltof fljót að líða en mikið sem þetta var afsalppandi og gott að kúpla sig svona út. Ég las amk þrjár bækur og tók aðeins í saumana mína. Var líka með nótur og esperanto bækurnar með mér en gaf mér ekki tíma fyrir þær.

Á föstudaginn var komu bræðurnir með vitnisburð úr prófunum. Þeim gekk vel í öllu og lítur þetta mjög vel út. Lægsta einkunn hjá báðum er 7,5 (í leikfimi hjá Oddi Smára og í stafsetningu hjá Davíð Steini en hann hefur bætt sig alveg ótrúlega í því fagi). Annars voru þetta áttur, áttakomma fimm, níur, níukomma fimm og Davíð Steinn fékk tíu fyrir verkefnabókina í náttúrufræði. Meðaleinkunnin er 8 (7,9667 hjá Oddi Smára og 8,1 hjá Davíð Steini) og ég er að springa úr stolti.

Eftir einn og hálfan tíma verða afhent verðlaun fyrir kertasölu í drengjakórnum. Söluhæsti drengurinn fær bikar, fimm efstu fara í óvissuverð fljótlega og þeir sem seldu meira en 80 pakka fá 2000 kr. Davíð Steinn er í þriðja sæti og kemst í óvissuferð þriðja árið í röð. Hann seldi samtals 125 kaffi- og kertapakka. Sá sem seldi mest seldi 74 en það munaði bara tveimur pökkum á fyrsta og öðru sætinu.