Ekkert að frétta

Var komin á fætur um hálfátta í gærmorgun. Ákvað mjög fljótlega að halda mig heima við og taka smá pásu frá öllum æfingum, sundi og göngum. Vafraði um á netinu til klukkan tíu og fór ekkert í  tölvuna eftir það. Horfði á hina og þessa þættina og kláraði að lesa skammtímalánsbókina. Sú bók er nokkuð svakaleg á köflum. Í hádeginu steikti ég tvo laxabita sem ég hafði átt í frysti og sauð saman rósakál, spergilkál og blómkál til að hafa með. Skipti þessu upp í tvo skammta. Á sjötta tímanum hafði ég samband við tvíburahálfsystur mína og við töluðum okkur m.a. annars saman um að gera saumaklúbbshitting hjá Lilju eftir vinnu einn daginn fljótlega í vikunni. 

Labbiganga í Öskjuhlíðinni í gær

Vaknaði um hálfsjö í gærmorgun. Klæddi mig, tók af rúminu og gerði æfingar með 2kg lóðum. Eftir morgun verkin á baðherberginu settist ég inn í stofu með fartölvu í fanginu. N1 sonurinn lagði af stað á sína vakt stuttu fyrir hálfátta og ég var komin í sund milli átta og níu. Synti 600m, flesta á bakinu, fór 2x5mínútur í kalda, 15 mínútur í gufu og 10 mínútur í sjópottinn. Hékk líka aðeins í rimlunum. Þvoði mér um hárið og var mætt í esperanto hitting um hálfellefu. Lásum 3 bls. Áður en ég fór heim eftir hittinginn keypti ég bílaþvott hjá Löðri við Fiskislóð og fyllti á tankinn hjá AO í Öskjuhlíð. Var komin heim rétt upp úr klukkan tólf. Restin af deginum fór í alls konar, m.a. prjón, lestur og uþb klukkkutíma göngu um Öskjuhlíðina þar sem ég mætti m.a. vörubíl með fullt af timbri. Hringdi líka í Lilju vinkonu. Lánaði Oddi bílinn og bað hann um að athuga með þrýstinginn á dekkjunum í leiðinni í heimsókn til pabba síns. 

Stilla

Vaknaði uþb sex mínútur yfir sex í gærmorgun. Rétt seinna hringdi vekjarinn næstum tíu mínútum of snemma. Hafði ekki valið rétta stillingu áður en ég fór að sofa á fimmtudagskvöldið. En þetta var svo sem í góðu lagi. Slökkti strax á hljóðinu og vekjaranum, klæddi mig og gerði æfingar með 2kg lóðum áður en ég fór fram og fékk mér lýsi. Eftir morgunverkin á baðherberginu settist ég inn í stofusófa með fartölvu í fanginu. Skömmu síðar kom N1 sonurinn fram, er á helgarvakt og mætir klukkan sjö á virkum dögum til að baka og undirbúa opnun klukkan hálfátta. Ég var mætt í mína vinnu rétt fyrir klukkan hálfátta. Það var mjög rólegt í klinkinu til að byrja með svo við notuðum tímann til að blása og sópa yfir salinn og þurrka af þegar við vorum búin að renna vögnum fram í skúr 2. Fórum í kaffipásu í fyrra fallinu. Eftir kaffi voru komin verkefni sem entust okkur í rúman klukkutíma svo við vorum komin upp í mat einnig í fyrra fallinu eða áður en klukkan var orðin hálftólf. Fljótlega komu síðustu verkefnin og vorum við að vinna þau til klukkan að verða hálftvö. Þá var líka allt búið uppi. Markmiðið var að klára fyrir tvö því það átti að fara að vinna í kerfinu sem við notum mest og þá mátti að sjálfsögðu ekki vera að nota það á meðan. Hringdi í pabba og spjallaði við hann á meðan ég var á leiðinni yfir í Laugardalslaug. Fór í fyrstu ferðina af þremur í þann kalda um klukkan tvö, synti 500m á braut 6, var í gufu í 15mínútur, gerði teygjuæfingar bæði í gufunni og við rimlana fyrir framan og slakaði svo vel á í sjópottinum. Ákvað að kíkja í Sports Direct og kaupa mér nýja sundboli. Fann reyndar bara einn í minni stærð sem var með smá skálmum eins og mér finnst best. Keypti hann og skrapp svo aðeins í Krónuna við hliðina. Klukkan var farin að ganga sex þegar ég kom heim. 

Næstum komin helgi enn á ný

Ég fóta mig alltaf betur og betur í nýju verkefnunum í neðra. Geri þó mistök af og til en læri mikið af þeim líka. Gærdagurinn var rólegur fram að kaffi. Fór meira að segja upp í fyrra fallinu. Nóg var að gera milli tíu og tólf. Áttu ekki mikið eftir þegar við fórum í mat. Öllum verkefnum, uppi og niðri var lokið fyrir klukkan tvö svo ég var komin snemma í sund. Átti ekki strax von á kalda potts vinkonu minni svo ég skrapp eina ferð í þann kalda. Og viti menn hún kom stuttu síðar beint frá tannlækni og mjög dofin í andlitinu. Við fórum á brautir 2 og 3 og syntum 600m á hálftíma og hún sagðist eftir á hafa synt úr sér deyfinguna. Ég var komin heim upp úr klukkan fjögur. Einum og hálfum tíma síðar datt mér í hug að skreppa í göngu upp í Öskjuhlíð. Ætlaði mér að skoða aðeins trjáfellingarsvæðið. Það svæði var enn merkt lokað og ég vogaði mér ekki inn fyrir lokunarpósta þótt líklega væri vinnu lokið þann daginn. Síminn skráði sjálfvirkt á mig tvær stuttar göngur, 1,91km á 24 mínútum og 0,87km á 11 mínútum. Skrefafjöldi gærdagsins fór rétt yfir 10.000 skref en rúmlega 4000 af þeim skrefum safnaði ég í vinnunni. 

Inn í daginn

Var glaðvöknuð upp úr klukkan fimm í gærmorgun og greip í bók fyrsta hálftímann áður en ég fór fram úr klæddi mig og gerði æfingar með tveimur 2,5kg lóðum.  Það var mjög rúmur tími í alla morgunrútínu og svo var ég mætt í vinnu á sama tíma og oftast, um hálfátta. Fór niður í klinkið korter fyrir átta. Byrjaði á því að renna vögnum með pöntunum á fram í skúr 2, kveikja á vélum og taka út úr kerfinu þær pantanir sem voru farnar eða að fara úr húsi. Það var aðeins komin ein pöntun, við Jói tókum hana til en svo var allt rólegt í smá stund. Hann þurfti að skreppa frá í rúman klukkutíma og ég var niðri að tékka á pöntunum reglulega. Hannes í afgreiðslunni hringdi skömmu eftir að Jói skrapp og bað mig um að fara með 3 tóm blá box í skúr 1 og afhenda manni sem var að koma með nokkra poka af klinki frá einum félagasamtökum. Eftir að hann var farinn renndi ég vagninum með klinkpokunum inn en ákvað að bíða með að sortera klinkið því það var úr öðrum banka heldur en það verkefni sem ég ætlaði að byrja á og var rétt ókomið. Forstjórinn kom niður með framkvæmdastjóranum um níu, aðallega til að sjá að kortavélin er loksins farin úr húsi og lögð af stað til Dúbæ en þau heimsóttu mig líka í klinkið. Líklega vildi hún líka sjá nýju vélarnar sem stauka upp klinkið. Fór upp fyrir klukkan hálftíu. Það var smá fundur í kaffitímanum. Eftir kaffi og fund var nóg að gera niðri fram að hádegi því það komu inn 5 klinkkassar. Unnum úr fjórum þeirra en ég var þó meira í að bóka og taka til pantanir sem bárust fyrir ellefu. Eftir hádegi lenti ég í smá veseni því ég blandaði saman klinki í eina staukvél og það tók meira en hálftíma að hreinsa og sortera frá. Hefði tekið lengri tíma ef Jói hefði ekki hjálpað mér. Samt vorum við búin um tvö leytið og ég stakk mér í sjóinn rétt fyrir þrjú og var komin heim upp úr klukkan fjögur.

Sjósund eftir vinnu í dag

Rumskaði aðeins stuttu fyrir fimm í gærmorgun og náði rétt að hugsa "Nei, ekki aftur!" áður en ég sofnaði aftur. Vaknaði svo tveimur mínútum áður en vekjarinn átti að ýta við mér. Samt hafði ég alveg nægan tíma fyrir alla morgunrútínu. Mætti í vinnu um hálfátta og korteri síðar fór ég niður, aðeins á undan læriföður mínum. Kveikti á vélum og fór að athuga með pantanir og henda út úr kerfinu því sem var farið. Gleymdi alveg að renna tveimur vögnum, með klinkpöntunum, fram í skúr tvö. Jói sá um þau mál þegar hann kom niður um átta. Tókum til þær pantanir sem lágu fyrir svo var smá pása á meðan við biðum eftir að plastvélin væri orðin nógu heit. Þá fékk ég að æfa mig í að stauka upp þrjár tegundir af klinki. Gekk vel fyrir utan að ég er hálfgerður klaufi, ennþá, við að skipta um pappíra. Eftir kaffi var nóg að gera til klukkan að verða tólf. Eftir hádegispásu var smá róleg stund en milli hálftvö og hálfþrjú komu slatti af klinkpöntunum sem þurfti að taka til. Sumar fóru strax út en hinar fara í dag. Vorum búin að öllu skömmu síðar. Það var líka allt að verða búið uppi. Stimplaði mig út stuttu fyrir þrjú og var mætt á braut 8 korter yfir þrjú. Var búin að synda 100m þegar kalda potts vinkona mín mætti. Synti 500m í viðbót, allt í allt í hálftíma. Kom heim um hálfsex eftir að hafa verið tvo tíma í sundi.

Ég er búin að klára að lesa framlengdu bókina og byrjuð á tveimur af þessum fimm sem ég sótti á safnið sl. mánudag; Ævintýrið eftir Vigdísi Grímsdóttur og Dauðinn einn var vitni eftir Stefán Mána. Síðarnefnda bókin er ný og því með 14 daga skilafresti. Er búin að lesa tæplega 70 bls. af henni og er frekar hissa á mér að geta lagt hana frá mér, hún er það spennandi og vel skrifuð. En ég sá líka að ég á eftir að ná í og lesa  Hungur eftir sama höfund og um sömu persónu. 

Fyrirmyndir

Var vöknuð eldsnemma í gærmorgun þrátt fyrir svolítið "bútóttan" svefn. Svo snemma að ég byrjaði morguninn á því að grípa í bók um klukkan fimm, síðasta ókláraða bókin af safninu. Átti bara um 50 bls. eftir af bókinni þegar ég fór á fætur korter fyrir sex. Gerði æfingar með 2kg lóðum áður en ég fór fram í eldhús og fékk mér sítrónuvatn. Sinnti svo morgunverkunum á baðherberginu og var sest inn í stofu með fartölvuna í fanginu klukkan að byrja að ganga sjö. Þurfti að sópa af bílnum áður en ég lagði af stað í vinnuna rúmum klukkutíma síðar. Stimplaði mig inn um hálfátta. Uþb tuttugu mínútum síðar fórum við niður. Það var rólegt til að byrja með, þó komnar einhverjar pantanir sem við tókum til. Staukuðum upp einni og hálfri millijón í 100kr fyrir Landsbankann. Rétt fyrir níu komu tveir baukar frá bílastæðasjóð og við afgreiddum þá áður en við fórum í kaffi. Eftir kaffi komu inn bæði pantanir og myntkassar svo það var nóg að gera fyrir okkur bæði. Skiptum með okkur verkum án þess að hafa orð á hver gerði hvað og hjálpuðumst einnig að. Nóg var að gera alveg til klukkan rúmlega hálftvö en þá var allt búið bæði uppi og niðri. Ég stimplaði mig út um tvö. Skrapp heim og náði í bókasafnspokann með fimm af sex bókum. Skilaði þeim á safnið, endurnýjaði skírteinið, tók fimm bækur í staðinn og framlengdi lánið á bókinni sem varð eftir heima. Mætti í osteostrong um hálffjögur, tæpum klukkutíma fyrir "fasta" tímann. Var svo komin í sund rúmlega fjögur. Synti ekki nema 300m, fór tvær ferðir í kalda, 15mín. í gufu, gerði teygjuæfingar í rimlunum, sat smá stund í sjópottinum og var komin upp úr rúmlega fimm þar sem ég vissi að kalda potts vinkona mín myndi ekki mæta á svæðið.

Í smá pælingum

Fannst sem það væri mjög langt liðið á morguninn þegar ég vaknaði í gærmorgun. Klukkan var samt ekki orðin átta. Fór á fætur og eftir morgunverkin á baðherberginu eyddi ég drjúgum tíma í tölvunni hans pabba. Um hálftíu fór ég inn í eldhús og fékk mér eitt harðasoðið egg og lagði svo nokkra kapla. Um tíu leytið hitaði ég mér vatn í te og fékk mér einnig bita af harðfiski, óbarinni ýsu. Pabba kom á fætur einhvern tímann á ellefta tímanum. Hann var örugglega búinn að koma fram mun fyrr um morguninn til að fá sér eitthvað og taka niður helstu tölur. Ég settist inn í stofu og tók fram saumana mína. Er nýlega farin að sætta mig við að þura að setja upp lesgleraugu og nota við útsauminn. Tók mér smá pásu á hádeginu til að fá mér skyr og leggja nokkra kapla. Greip svo aftur í saumana í góðan klukkutíma en skipti þá yfir í prjónana og kláraði enn eitt eldhúshandklæðið. Á bara eftir að ganga frá einum enda. Horfði á fyrri hálfleikinn í landsleik karla í fótbolta. Bríet frænka kom um hálfsexleytið. Ég ákvað svo að taka mig saman, kveðja og bruna í bæinn um sex. Lánaði Oddi bílinn svo hann gæti skroppið eftir nauðsynjum í Krónunni. Davíð Steinn var að fara annað og hafði verið búinn að versla. Oftast fara þeir bræður saman í verlunarleiðangur en ekki alltaf. 

Lífið er núna

Vaknaði frekar snemma miðað við að það var og er helgi. Var komin í sund korter yfir átta. Synti 600 metra á braut sex, nær allar ferðir bringusund en þó rúmlega hálfa ferð skriðsund. Fór tvisvar í þann kalda, góða gufu og sjópottinn. Gerði teygjur í rimlunum í rýminu framan við gufu klefann og sat smá stund í sólbaði áður en ég fór upp úr og í esperanto hitting. Var komin vestur í bæ um hálfellefu. Við lásum þrjár bls. í Kon-Tiki. Enduðum þar sem flekinn var tilbúinn og sagt frá heljarinnar skírnar athöfn deginum áður en sexmenningarnir lögðu upp í ævintýraferðina. Var komin heim rétt fyrir tólf. Kláraði að pakka niður, kvaddi Odd (Davíð Steinn var farinn úr húsi) og brunaði austur á bóginn. Fór Þrengslin og  kom við í Fossheiðinni á Selfossi. Var komin til pabba um þrjú. Dagurinn leið alltof hratt. Lagði kapla, prjónaði og fylgdist aðeins með seinni úrslitaleiknum í bikarkeppninni í körfunni. Við pabbi höfðum siginn fisk með kartöflum, rófum og smjöri í kvöldmatinn. Alltaf jafn gott. 

Í góðu yfirlæti

Morgunrútína gærdagsins var svipuð og í fyrradag. Var mætt í vinnu um hálfátta. Við fórum þó ekki niður í klinkið fyrr en tuttugu mínútum síðar. Föstudagar eru yfirleitt rólegir og gærdagurinn var engin undantekning. Lærifaðir minn þorði alveg að skilja mig eftir eina milli tíu og tólf þegar hann þurfti að skreppa aðeins frá. Ég tók til eina pöntun. Vaktaði svo kerfið til ellefu. Það komu ekki fleiri pantanir svo ég rúllaði tveimur vögnum fram í rýmið framan við skúrana og skrapp upp að kíkja í klink-körfuna í horninu við sjóðina. Þar var einn poki af skiptimynt í seðlum sem fara átti með í einn klinkkassann niðri. Eftir að hafa bætt pokanum í kassann rúllaði ég vögnunum í skúr 1. Fór upp í mat um hálftólf. Eftir mat var enn rólegra en við notuðum tímann í smá snatt og tiltekt. Svo sýndi Jói mér hvernig er keypt á milli sjóða innanhús. Vorum búin upp úr klukkan hálftvö og það var einnig allt að klárast uppi. Ég var byrjuð að synda á braut 6 á slaginu tvö. Synti flestar ferðirnar á bakinu. Hitti svo kalda potts vinkonu mína í kalda pottinum en hún hafði komið mun fyrr, var búin að synda og beið eftir mér í sjópottinum. Var búin með sundrútínuna stuttu fyrir hálffjögur. Þvoði mér um hárið og var mætt í hálfsárs klippitímann til Nonna í Kristu Quest rétt fyrir fjögur og komin heim upp úr klukkan hálffimm.

Iðnaður

Slökkti á vekjaranum rúmum tuttugu mínútum áður en hann átti að vekja mig í gærmorgun. Klæddi mig, bjó um og gerði æfingar áður en ég fór fram í eldhús og fékk mér sopa af lýsi og glas af sítrónuvatni. Þá fyrst sinnti ég morgunverkunum á baðherberginu. Hafði svo nægan tíma í netvafr og blogg áður en ég lagði af stað til vinnu. Þangað var ég mætt um hálfátta. Við vorum byrjuð niðri tíu mínútum fyrir átta. Það var nóg að sýsla alveg til klukkan að verða hálftvö en þá vorum við búin að öllu og það á sama tíma og þau sem voru að vinna uppi. Auðvitað vorum við ekki niðri allan tímann milli átta og hálftvö. Ég fór þrisvar upp í milli tíðinni; í kaffi, mat og einu sinni til að kíkja hvort eitthvað væri í "klinkkörfunni". Hringdi í heima símann hans pabba og hann svaraði að þessu sinni. Lét bara vel af sér. Ég var byrjuð að synda á braut 2 korter yfir tvö. Synti 500m og sat svo í kalda pottinum í 5 mínútur á eftir. Var ný sest inn í gufu þegar kalda potts vinkona mín mætti í slopp úr Laugum Spa. Við fórum tvær ferðir saman í þann kalda og sátu svo góða stund í sjópottinum á eftir. Hún fór svo aftur yfir í Laugar um hálffjögur þegar ég var að fara upp úr. Umferðin á leiðinni heim var nokkuð þung. Kom við í Fiskbúð Fúsa til að versla mér harðfisk og var komin heim um hálffimm leytið. 

Sjóbusl eftir vinnu í gær

Þegar til kom var ég vöknuð amk korteri áður en vekjarinn átti að ýta við mér í gærmorgun. Hafði góðan tíma í alla rútínu og lóðaæfingar en var samt mætt í vinnu um hálfátta. Lærifaðir minn í klinkinu hélt að ég væri enn í fríi og var farinn niður. Ég skottaðist niður tíu mínútum fyrir átta og þá var allt komið á fullt. Ég dembdi mér í verkin og komst að því að ég hafði engu gleymt. Ég varð samt eitt stórt spurningamerki um ellefu leytið þegar einn sjóðurinn stemmdi ekki, var nokkuð viss um að ég hafði verið að gera allt rétt. Það kom líka á daginn að um miðjan morgun hafði gleymst að taka til eina pöntunina. Um leið og var búið að taka hana til þá stemmdi allt. Það var mun rólegra eftir hádegi og við vorum búin að slökkva á vélunum um hálftvö þegar við vissum fyrir víst að það var ekkert meira að koma inn. Ég var komin í Nauthólsvík fyrir klukkan þrjú og heim um hálffimm.

Er að lesa tvær síðustu bækurnar af sex af safninu; Lungu eftir Pedro Gunnlaug Garcia og Delluferðin eftir Sigrúnu Pálsdóttur. Langt komin með þá síðarnefndu sem í fyrstu ætlaði ekki að grípa mig en í annarri lestrartilraun varð ég spenntari fyrir sögunni um Sigurlínu Brandsdóttur sem tók til sinna ráða þegar faðir hennar vildi heldur að hún sæi um heimilið og aðstoð á safninu sem hann vann á heldur en að leyfa henni og aðstoða hana við að mennta sig meira. 

Lífsleikni

Vaknaði um hálfátta. Gerði æfingar með 1,5kg lóðum og sinnti hefðbundinni rútínu. Mætti svo í sund um níu leytið. Þá var að byrja sundleikfimi svo ég snéri rútínunni minni við. Fór í sjópottinn eftir fyrstu ferðina í þann kalda og gufu eftir næstu ferð. Gerði örstuttar æfingar í rimlum og eftir þriðju ferðina í þann kalda var leikfiminni lokið og ég komst á braut 8 og synti 400m. Kom heim um ellefu leitið. Um tvö skrapp ég út í smá göngu sem varð heldur lengri en til stóð í upphafi. Síminn skráði á mig fjórar mislangar göngur því ég stoppaði greinilega þrisvar sinnum á leiðinni. Veit af tveimur stoppum. Annars vegar þegar ég reif upp símann til að snappa af svæði sem ég þurfti að krækja framhjá vegna tráfellinga og hins vegar þegar ég flúði smá stund undan skúr, hallaði mér upp að tré og hringdi í pabba. Um átta leytið um kvöldið skrapp ég svo yfir til tvíburahálfsystur minnar. Við vorum að halda upp á "annan í afmæli" og vorum að sjálfsögðu með handavinnu í höndunum. Ég bæði prjónaði og taldi út. Kom heim um hálfellefu og varð, annað kvöldið í röð, að leggja fyrir aftan gömlu heilsugæsluna.

Einn frídagur enn eða annar í afmæli

Klukkan var um hálfátta þegar ég fór á fætur í gærmorgun. Sinnti morgunrútínunni að mestu og var svo komin í sund upp úr klukkan níu. Byrjaði á kalda pottinum þar sem sundleikfimin var nýbúin og fólk enn að spjalla á brautum 7 og 8. Eftir fjórar mínútur í kalda pottinum sá ég að það væri alveg pláss til að synda. Fjórar konur úr leikfimihópnum voru enn ofan í og ein af þeim brast í afmælissöng þegar hún sá mig, hinar þrjár tóku undir þótt þær þekktu mig ekkert. Sú sem byrjaði er ein af fimm Sigrúnum sem ég hef kynnst einmitt á Laugardalslaugar svæðinu. Eftir sönginn þakkaði ég fyrir mig og synti svo 500 metrana skælbrosandi. Fór tvær aðrar ferðir í þann kalda, 15 mínútur í gufu og næstum hálftíma í sjópottinn en það var vegna þess að ég hitti aðra konu sem ég þekki. Að sundi loknu kom ég við í Krónunni í Skeifunni og AO í Öskjuhlíð á leiðinni heim. Um tvö leytið skrapp ég aftur út í stutta göngu, 1,5km. Upp úr klukkan fjögur fór ég í minn vikulega osteostrongtíma. Stuttu fyrir sjö sótti ég eina fyrrum samstarfskonu mína vestur í bæ og saman brunuðum við upp í Ártúnsholt þar sem yfir maður kortadeildar á árunum 2000-2014 (var örugglega byrjuð fyrr) tók á móti okkur og þremur öðrum sem unnum lengst saman. Þrjár af okkur erum enn að vinna saman. Tvær hættar vinnu vegna aldurs og sú yngsta í hópnum vinnur nú á velferðarsviði Reykjavíkurborgar í Mjóddinni. Það var glatt á hjalla og þrír tímar liðu svakalega hratt. Var búin að skila ferðafélaganum og komin heim klukkan að ganga tólf.

Allan daginn hrúguðust yfir mig afmæliskveðjur og símtöl. Missti reyndar af einu símtali þar sem ég setti símann á "uss" á meðan ég var í hittingnum í gærkvöldi. Tvær af fyrrum samstarfskonunum gáfu mér afmælisgjafir. Mágur minn hringdi rétt fyrir hádegi, yngri systurdóttir mín hringdi klukkan að ganga fjögur, söng fyrir mig og var óvenju ræðin en hún er alltaf jafn skemmtileg og systir mín hringdi upp úr klukkan sex og fékk m.a. eldri dóttur sína til að syngja fyrir mig líka.

Rífandi stuð

Þrátt fyrir að vera komin á fætur um hálfátta fór ég ekki í sund fyrr en um 10 í gærmorgun. Synti 500m og þegar ég fór mína fyrstu ferð af fjórum í þann kalda hitti ég kalda potts vinkonu mína. Fórum 3 ferðir saman og tvær í þann heitasta. Var komin heim um tólf og það stóð alltaf til að skreppa aðeins út aftur en einhvern veginn leið dagurinn án þess að það gerðist. Stundum er bara einum of gott að slaka vel á og hvíla sig extra vel á eftir. En í dag eru 20.819 dagar síðan ég fæddist. Það er sko alveg eitthvað. Mér finnst samt svo stutt síðan ég átti afmæli síðast, finnst varla geta verið að það séu liðnir 365 dagar svona næstum því einn, tveir og bingó! 

Frábær árshátíð RB

Rumskaði stuttu áður en N1 sonurinn fór af stað á vinnuvakt rúmlega sjö. Ég náði amk að bjóða honum góða daginn og óska honum góðrar vaktar. Fór á fætur stuttu síðar. Um hálfníu lagði ég af stað í sund. Byraði á einni ferð í þann kalda en fór svo á braut 6 og synti 500m. Fór tvær aðrar ferðir í þann kalda, góða gufuferð og smástund í sjópottinn. Settist líka smá stund á bekk í þessu milda sólarlausa veðri. Var komin heim upp úr ellefu. Stuttu eftir hádegi skrapp ég í mátulegan göngutúr, 1,5 km á tæpum tuttugu mínútum. Rétt fyrir hálffjögur skipti ég um föt og fékk Odd til að skutla mér á Dalveginn. Þaðan fóru tvær rútur austur fyrir fjall um fjögur leytið. Fyrra stoppið var á Ásnesi í Ölfusi þar sem einn vinnufélgainn býr. Hann bauð í fyrir partý í hlöðunni hjá sér. Margir komu á einkabílum en við vorum líklega hátt í  áttatíu manns sem komu á rútunum. Einhverjir komust ekki í þetta partý en mættu beint í Ingólfsskála sem var seinna stoppið og þar sem árhátíðin fór fram. KK fékk sviðið til að byrja með en það voru "Hundur í óskilum" sem sáu svo um veislustjórn. Ég skemmti mér alveg ágætlega. Maturinn var góður en ég sleppti þó eftirréttinum sem mér sýndist vera einum of sætur fyrir mig. Um það leyti sem verið var að klára eftirréttinn þökkuðu veislustjórar fyrir sig og við tók plötusnúður sem kunni sko alveg sitt fag. Ég var samt ekkert í of miklu dansstuði þannig séð og þáði far heim með einkabíl um hálfellefu, klukkustund áður en rútur áttu að vera klárar í heimferð. Ég var komin heim upp úr klukkan ellefu og las til miðnættis.

Til í þetta

Var vöknuð og komin á fætur upp úr klukkan hálfsjö. Gerði æfingar með 1,5kg lóðum, vafraði á netinu og setti inn færslu. Kveikti á sjónvarpinu um átta leytið og fylgdist með "Bítinu á Bylgjunni" í beinni. Einhvern veginn æxlaðist það þannig að ég ákvað að sleppa alveg sundferð en skrapp í smá göngutúr um ellefu leytið. Hreyfði bílinn ekki neitt en dundaði við ýmislegt mis gáfulegt heimavið. Gerði nokkrar tilraunir til að hringja í pabba eftir hádegið. Hann svaraði ekki fyrr en stutt fyrir klukkan sex. Hafði samt ekki farið neitt en bara ekki heyrt í símunum, hvorki heimasíma né gemsa. 

Get þakkað fyrir svo margt

Líklega var ég of spennt fyrir nokkrum frídögum framundan því í fyrrinótt var svefninn stundum víðs fjarri. Þetta varð til þess að ég var mun latari á fætur í gærmorgun. Þó var ég komin á stjá rétt upp úr átta. Hugmyndin var að fara fljótlega í sund en klukkan var byrjuð að ganga tólf þegar ég kom mér loksins af stað. Var í sundi til hálftvö. Synti 600m, flesta á bakinu því ég ákvað að þvo mér um hárið eftir sundið. Hitti annars yngstu mágkonu mömmu í sjópottinum og við spjölluðum saman í tæpan hálftíma. Fór aðeins tvær ferðir í þann kalda og ekkert í gufu. Kom við í Fiskbúð Fúsa og að þessu sinni keypti ég aðeins ýsu í soðið og hálft flak af bleikju. Þegar ég kom heim lánaði ég bræðrunum bílinn til að fara í sorpuferð. Um fjögur skrapp ég út í góða göngu. Stoppaði það oft fyrri partinn af leiðinni (upp að Perlu, niður í gegnum kirkjugarðinn og stíginn að og framhjá HR) að það var ekki fyrr en síðustu tuttugu mínúturnar að síminn skráði á mig sjálfvirka göngu, 1,5km. En skrefafjöldi gærdagsins fór vel yfir 9000 skref. Sennilega voru  amk 2/3 af þeim gengin eftir klukkan fjögur. 

Ekkert stress

Ég er smá saman að ná tökum á mörgum af verkefnunum í klinkinu. Er kannski lengi að brasa við sumt, þarf að vanda mig og vera viss. Það var þokkalega rólegur dagur í gær, ekkert svo margar pantanir. Lærifaðir minn sá að mestu um vélarnar, ein sorterar og safnar ákveðnum mörgum  peningum af sömu sort í poka. Tvær vélar geta staukað upp klinkið og önnur af þeim plastað. Ég sá um flestar pantanir, bókanir og talningar í gær. Telja þarf oft á dag, bæði þegar búið er að taka af og fylla á. Annars voru settir af sérsniðnir RB-leikar fyrir okkur í Seðlaverinu eftir fundinn í kaffitímanum í gær. Okkur var skipt í fjögur lið og er ég í Kryddpíu-liðinu. Fyrst fengum við 5 mínútur til að púsla frekar lítið púsl. Mitt lið náði að setja saman 34 bita. Svo var pútt keppni, 10 pútt á lið og 1 stig fyrir hverja holu. Ég klúðraði mínu pútti en gat sannfært "dómarann" um að þegar boltinn frá einum liðsfélaga mínum fór í holuna en strax aftur upp úr að það væri amk hálft stig. Mitt lið var í efsta sæti eftir þessar tvær keppnir en það er keppt bæði í dag og á morgun líka. Ég er fjarri góðu gamni því ég var búin að festa mér frí næstu fjóra virku dagana. Er að taka út meiri helminginn af þessum tæpu sjö frídögum frá í fyrra. Vinnudegi lauk í fyrra fallinu og ég var komin í Nauthólsvík upp úr klukkan þrjú og heim um hálffimm leytið.

Ein af bókunum af safninu; Sálarhlekkir eftir Steindór Ívarsson lætur ekki mikið yfir sér en geymir mikla skáldsögu. Bókin kom út 2023 og er rétt tæpar 200bls. Fjallar um gamla konu sem er nýkomin á elliheimili og rifjar upp erfiða reynslu á unglingsárum. Bókin skiptist upp í annars vegar rómversk tölusetta kafla sem fjalla um erfiða tímabilið og tölusetta kafla sem gerast á elliheimilinu. Er að verða hálfnuð með lesturinn og spennan magnast því í upphafi "sagði" gamla konan frá umslagi með bréfum til dætranna sem eiga ekki að lesast fyrr en eftir hennar dag. Þar skrifar hún um eitthvað sem hún hefur á samviskunni sem líklega mun ekki upplýsast fyrr en í loka köflunum. 

Lífið er núna

Það sem þessi tími hleypur sífellt hraðar og hraðar, jafnvel þótt maður sé ekki að gera neitt sérstakt. Það var annars nóg að gera í vinnunni í gær, bæði uppi og niðri. Ég var niðri allan tímann og er smá saman að fóta mig betur og betur í mörgum af verkefnunum. Það er svo sannarlega í mörg horn að líta en það getur líka alveg komið rólegur tími inn á milli. Vorum búin um þrjú svo ég fékk hálftíma í bónus. Hringdi í pabba og spjallaði við hann á meðan ég var á leiðinni í sundið. Gleymdi nefnilega að segja honum að ein frænka mín og nafna í móðurættina, sem var mikið í sveitinni hjá pabba og mömmu fyrstu árin hennar, fimm árum eldri en ég, hafði samband. Það voru skipulagsbreytingar í vinnunni hennar og hún sagði mér að hún hefði hætt strax og væri núna á Spáni að læra spönsku. Kemur ekki heim fyrr en fyrri partinn í apríl. Pabbi þessarar frænku minnar og móðuramma mín voru systkyni. Var komin á braut 7 og 8 um hálffjögur rétt á eftir kalda potts vinkonu minni. Synti 500m á 25 mínútum og var á undan henni í þann kalda. Saman náðum við þó 3 ferðum í þann pott. Var komin heim um hálfsex. Skömmu síðar kom "farfuglinn" minn heim eftir nokkurra daga ferð í Þýskalandi. Hann komst út án þess að þurfa að veifa vegabréfi og fattaði því ekki fyrr en hann var komin til Frankfurt að vegabréfið varð eftir heima. Hann lenti því í smá veseni með að komast heim en það bjargaðist þó fyrir horn. Okkur mæðginum fannst báðum skrýtið að hann hafi gleymt vegabréfinu á borðinu við hliðina á veski og bíllyklum en hvernig sem hann fór að því þá varð amk úr þess góð saga. Hann var annars úti í tæpa viku og hitti tvo af þremum kunningjum. Svo er hann svo heppinn að vera í vaktafríi bæði í dag og á morgun. 

Afskaplega þægilegt

Vaknaði stuttu fyrir sex. Sinnti hefðbundinni morgunrútínu nema ég tók smá hvíld frá æfingum með lóð. Vinnudagurinn var í styttra lagi og fór allur fram í klinkinu í "neðra".  Það var rólegt framan af morgni, smá hasar um og upp úr hádegi en allt búið fyrir tvö. Líka verkefnin uppi. Það gaf auga leið að það var alltof snemmt að fara strax í osteostrong. Hringdi í pabba og spjallaði við hann á meðan ég keyrði að fyrirtækinu Hreysti í Skeifunni. Þar fjárfesti ég í tveimur 2,5kg lóðum. Tók smá rúnt um Öskjuhlíð og Nauthólsvík. Lagði svo bílnum í smástund við Hátún 10 og ákvað að athuga með endurkomutíma vegna úlnliðsins. Þá var klukkan orðin þrjú og búið að loka í móttöku bæklunardeildar. Ég hringi þá bara fyrir þrjú í dag eða á morgun. Mætti í osteostrong uþb klukkutíma fyrir fasta tímann. Var mjög nálægt mínu besta í öllum æfingum. Klukkan var svo aðeins byrjuð að ganga fimm þegar ég fór á braut 8 í Laugardalslauginni og synti 400m. Hitti kalda potts vinkonu mína í okkar fyrstu ferð í kalda eftir sundið.

Kláraði að lesa aðra framlengdu bókina af safninu í gærkvöldi; Dauðaþögn eftir Önnu Rún Frímanndsdóttur. Hún er um mál ungrar konu sem finnst myrt á heimili sínu. Lögfræðingurinn Hrefna fær það hlutverk að aðstoða einn eiganda lögfræðistofunnar sem hún vinnur hjá við þetta mál. Sá eigandi þekkir fjölskyldu fórnarlambsins. Nokkuð spennandi bók og sumt sér maður alls ekki í gegnum og heldur manni á tánum allt til enda. 

Rusl

Vaknaði um sjö leytið í gærmorgun. Var komin á fætur fyrir átta og settist fljótlega við tölvuna hans pabba. Það birtir fyrr og fyrr þessa dagana og í gær var stillt og gott veður eins og undanfarið. Frostið var um 6-7°C en þegar leið á daginn og sólin náði að skína m.a. á mælinn fór hitinn eitthvað yfir núllið. Hafði bleikju í hádeginu, las, prjónaði, lagði kapla og vafraði á netinu. Kvaddi pabba á fimmta tímanum og var komin heim um hálfsex leytið. Hjálpaði Oddi að þrífa svalirnar en hann var loksins að fjarlægja "Fat-boy" sessu/púða sem var búinn að vera það lengi á svölunum að það var komið gat á hann og hluti af innihaldinu farið að flækjast fyrir og fjúka um í roki. Horfði á restina af seinni leik dagsins í enska boltanum Man. Utd - Arsenal 1:1. Horfði líka á línulega dagskrá RÚV, Landann og Matarsögu Íslands. Framundan er vinnuvika í styttri kantinum hjá mér, verð mjög sennilega eingöngu í klinkinu að læra öll handtökin og skráningarnar þar.

Ýmislegt

Ég vaknaði um hálfsjö í gærmorgun. Fór strax á fætur en var þó ekki komin í sundið fyrr en rétt fyrir níu. Synti 600m og fór aðeins eina 5mínútna ferð í þann kalda. Var mætt til esperanto vinkonu minnar um hálfellefu. Við lásum 3 bls. í Kon-Tiki. Höfundur og félagar eru byrjaðir að setja saman flekann með góðri aðstoð og  á besta stað; aðstöðu sjóhersins í Lima í Perú. Kom heim um hálftólf. Gekk frá sund- og esperantodótinu og setti niður í tösku. Um tólf leytið kvaddi ég Odd og brunaði af stað austur. Kom við í Fossheiðinni á Selfossi án þess að hafa látið vita af mér. Þar var vel tekið á móti mér og stoppaði ég í rúman klukkutíma og átti gott spjall yfir ávöxtum og bolla af tei. Kom til pabba um þrjú. Stuttu síðar kveikti hann á sjónvarpinu og ég dobblaði hann þá til að skipta yfir á rás 12 til að horfa á Liverpool - Southamton 3:1. Höfðum siginn fisk í kvöldmatinn. Pabbi var eitthvað að brasa í tölvunni til klukkan að ganga ellefu en var á undan að ganga til náða. Ég horfði á miðju myndina á RÚV áður en ég fór upp í rúm að lesa. Var sofnuð fyrir miðnætti.

Tuskuprjón

Vaknaði stuttu fyrir klukkan sex í gærmorgun og komst að því að ég hafði ekki stillt vekjarann aldrei þessu vant. Hann hefði svo sem ekki átt að ýta við mér fyrr en korter yfir sex. Var eingöngu í klinkinu í gær en það var þokkalega rólegt og allt búið um eitt leytið. Klóra mér enn í höfðinu yfir sumum verkefnunum en er komin með önnur nokkurn veginn á hreint. Var komin í sund um tvö. Mætti kalda potts vinkonunni þegar ég var að koma inn en hún hafði verið búin í vinnu mun fyrr. Eftir sundið kom ég við í Fiskbúð Fúsa og keypti mér harðfisk og einnig í heilsuhúsinu í Kringlunni þar sem ég keypti m.a. beltisþara og frækex. Annars var dagurinn tíðindalítill. 

Nokkuð gott

N1 sonurinn flaug á vit ævintýranna til Frankfurt í gærmorgun og verður þar í nokkra daga. Ég hlakka til að heyra ferðasöguna þegar þar að kemur. Annars fór ég ekkert niður í klinkið í gær, var bara í verkefnum uppi. Öllum verkefnum var lokið um tvö leytið og ég var komin í sund upp úr klukkan hálfþrjú. Synti 400m og hitti svo kalda potts vinkonu mína í fyrstu ferðinni í kalda. Hún fékk eyrnabólgu um daginn og má ekki synda í nokkra daga. Ætlar svo að fjárfesta í eyrnatöppum sem eru góðir fyrir sundið áður en hún skellir sér aftur í laugina. Ég var komin heim um fimm leytið og þrátt fyrir fínasta veður fór ég ekkert út aftur. Það hefði nú alveg verið kjörið að skreppa aðeins í smá göngutúr. En annars á maður ekki að velta sér of mikið upp úr "ef" og "hefði"! Best að horfa fram á veginn en vera sem mest í núinu.

Inniskór

Í gær var ég svolítið eins og jójó í vinnunni. Var að læra hvernig maður meðhöndlar kassa frá bílastæðasjóði þegar ég fékk þau skilaboð að ég þyrfti koma upp í innleggin. Vorum bara 13 í húsi í heildina og aðeins of fáir að bóka. Fljótlega eftir kaffi fékk ég þó að fara niður aftur og hafa tækninmanninn sem kemur til okkar vikulega meðferðis. Hann stillti tvo nauðsynlega hluti inn á mitt svæði í tölvunni. Var niðri fram að hádegi en fór aftur í innleggin eftir hádegi. Verkefnum lauk um þrjú leytið og ég fór beinustu leið í Nauthólsvík. Sjórinn var 2°C, mikil fjara og lítil sem engin ferð á logninu. Svamlaði um í uþb 10 mínútur. Fór beint í gufuna í korter, 3 mínútur í lónið og síðustu tuttugu mínúturnar áður en ég fór upp úr og heim var ég sð slaka á í pottinum. 

Virðing

Lærifaðir minn í klinkdeildinni byrjaði gærdaginn á því að fara til tannlæknis. Ég var með nokkur verkefni sem ég átti að sinna á meðan og það tókst alveg skammlaust. Að þeim verkefnum loknum gerði ég atlögu að því að skrá mig inn á mín svæði í tölvunni og komst ég alla leið inn í kerfið sem við þurfum að nota mest. Það virðist sem þriðjudagarnir séu líka annasamir niðri en við fengum þó smá "dauðar" stundir inn á milli og þar að auki tókum við til pantanir sem komu eftir klukkan ellefu sem strangt til tekið á þá ekki að vinna að fyrr en næsta virka dag. Dagleg verkefni voru annars búin um þrjú leytið. Ég stimplaði mig út hálftíma áður en átta tímarnir voru liðnir og skráði þann hálftíma sem bónustíma eins og við eigum að gera. Hringdi í pabba og spjallaði við hann á leiðinni yfir í sund. Hann var bara mjög hress og kátur með að geta sinnt sund rútínunni sinni. Ég synti 500m og hitti svo kalda potts vinonu mína í kalda pottinum. Fórum 3 ferðir í hann og komumst að því að næsti pottur var heitari en sá sem átti að vera heitastur. Eftir gufuferð í lok rútínu, sleppti ég sjópottinum og fór ég upp úr og beint heim. 

Æðruleysi

Gleymdi að geta þess í gær að ég skilaði skattframtalinu strax á sunnudaginn var. Allt villulaust og það eina sem ég þurfti að gera var að haka í að uppgjörið verði gert strax í byrjun júni svo það dreifist ekki á nokkra mánuði, staðfesta og senda. Gærdagurinn gekk annars alveg ágætlega fyrir sig. Safnaði yfir 6000 skrefum í heildina og voru líklega hátt í 90% af þeim vegna vinnunnar í klinkinu. Stimplaði mig út eftir akkúrat átta tíma og fór beint í vikulegan osteostrong tíma. Hringdi í pabba og spjallaði við hann á meðan ég var á leiðinni í sundið eftir styrktartímann. Hann fór í sund í gær og fannst mjög gott að komast aftur í kalda pottinn. Ég var byrjuð að synda korter í fimm. Synit 400m á tuttugu mínútum og var búin með eina ferð í þann kalda þegar kalda potts vinkona mín mætti á svæðið. Fórum tvær ferðir í þann kalda og svo í góða gufu áður en ég kvaddi. Var komin heim upp úr klukkan sex. 

Ný vinnuvika í nýjum mánuði

Fór á fætur um hálfátta, skömmu eftir að ég vaknaði. Rúmlega klukkutíma síðar var ég komin í sund. Byrjaði á 5 mínútum í kalda pottinum áður en ég fór á brautir 7 og 8 og synti 500m. Eftir næstu ferð í þann kalda fór ég í gufu svo kalda sturtu og sjópottinn. Var búin að vera þar í tíu mínútur þegar mágkona mömmu kom og stuttu síðar kalda potts vinkona mín. Eftir ca 25 mínútur í sjópottinum ætlaði ég að taka loka ferðina í þann kalda með vinkonu minni en þá var búið að loka honum í bili vegna of mikils klórs. Ég fór því bara í kalda sturtu, upp úr og heim. Bjó mér til hafragraut. Restin af deginum fór í alls konar dútl. M.a. fitjaði ég upp á enn einu eldhúshandklæðinu. 

Rigningatíð

Vaknaði um sjö leytið í gærmorgun. Gaf mér tíma í alla morgunrútínu hér heima áður en ég fór í sundið. Klukkan var því langt gengin í níu þegar ég skellti mér á braut 2 í Laugardalslauginni og synti 500m, flesta á bakinu. Fór tvær ferðir í þann kalda, góða gufu ferð og slakaði vel á í sjópottinum. Var á leiðinni upp úr úr kalda pottinum þegar yngsta mágkona mömmu mætti á svæðið svo ég skellti mér smá stund með henni í nuddpottinn. Annars var ég komin til esperanto vinkonu minna rétt rúmlega hálfellefu. Við lásum fjórar bls. í Kon-Tiki. Kvaddi hana um tólf og kom aðeins við í Krónunni við Fiskislóð áður en ég fór heim. Restin af deginum fór í alls konar heima-dútl. 

Inni í bókaheimi

Prófaði nýja starfsstöð í seðlaveri RB í gær. Mörg handtökin, skrefin og misþungar lyfturnar í klinksalnum í kjallaranum. Hendurnar urðu skítugar og notuð er sérstök sápa til að skrúbba sig þegar farið er í kaffi eða matarpásur eða í lok vinnudags. En vinnudagurinn leið mjög hratt og það var aldrei "dauð" stund. Gáfum okkur samt extra langan kaffitíma því sú sem var að hætta og við fórum með í göngu og út að borða á fimmtudaginn var mætt í vinnu í síðasta sinn og það var tertuveisla, ræður, blómaafhending, húrrahróp og klapp í samverunni í kaffitímanum. Vinnudegi lauk um tvö leytið og ég er ákveðin í að hafa með mér glósubók og skriffæri niður í klinkið eftir helgi. Hringdi í pabba og spjallaði við hann á meðan ég var á leiðinni yfir í sund. Synti aðeins 400m, fór eina 4 mínútna ferð í þann kalda, góða gufu og slakaði svo á í sjópottinum í rúmt korter áður en ég fór upp úr og heim.